Roma
11 Iye a sulat ay gábwat ni apostol Pablo a tagapagserbi ni Jesu-Cristo a dinulaw sakay pinile na tánni mángbaheta tu Maganda a Baheta nu Diyos. 2 Iye a Maganda a Baheta a impananto nu Diyos tu itod pa a panahun tu pamamag-itan nu prupeta hide sakay nesulat tu Banal a Kasulatan, 3 ay tungkul tu Anak na, u Panginoon tam a ti Jesu-Cristo. Nikuna a nagin tolay siya ay neenak siya a gábwat tu lahe ni hare a David. 4 Sakay ti Jesu-Cristo ay napatunayan a siya u Anak nu Diyos nikuna a biniyag siya a huway ayun tu kapangyariyan nu Banal a Ispirito. 5 Tu pamamag-itan ni Jesu-Cristo ay tinanggap me u kaluub a magin apostol tánni maakit me u tolay hide tu atanan a bansa a sumampalataya sakay sumunud nikuna. 6 Pate hikam a taga-Roma hide ay pinile nu Diyos a pasakup ni Jesu-Cristo. 7 Iye a sulat ay para nikam a atanan a mahal nu Diyos a katoy hina ti Roma, a dinulaw tánni magin banal. Nakwa ay magkahod kam ti págpapala sakay kapayapaan a gábwat tu Diyos a Ama sakay tu Panginoon tam a ti Jesu-Cristo. 8 Dipalongo tu atanan ay magpasalamaták tu Diyos tu pamamagitan ni Jesu-Cristo dipo nikam a atanan, dipo mabábbaheta dán u pánnampalataya moy tu buo a mundu. 9 Dipo tukoy nu Diyos a pagserbiyan ko ti buo a puso, tu pángngaral ko tu Maganda a Baheta tungkul tu Anak, na a palagi takam a idáddasal. 10 Sakay ipagdasal ko be a makaangayák hina nikam ni kaluuban nu Diyos. 11 Gusto ko dán be a ketan takam, tánni mabahagiyan tu kaluub hide a ispiritwal para bumegsák kam. 12 U gusto ko a kagiyán ay tánni matulungan tam u balang essa para bumegsák u pánnalig tam tu Diyos. 13 Mahal ko hide a kákkapatkákka, gusto ko a matukuyan moy ni sanganák dán a beses a mággagayakán pero tehhod la a hadlang. Gusto ko a umangay hina tánni tehhodák be a maakit ti pánnampalataya ni Cristo, konna tu ginimet ko tu bakán hide a Judio tu lugar hide a inangayan ko. 14 Tehhodák a pananagutan a mángbaheta tu upos nu Diyos tu atanan a lahe nu tolay, tu mágkarunung hide sakay tu awan hide ti nagadalan. 15 Sa ina u dahilan ni bakin gugusto ko a ipangaral be hina ti Roma u Maganda a Baheta. 16 Awanák masanike a mángbaheta tu Maganda a Baheta tungkul ni Cristo, dipo sa iye u kapangyariyan nu Diyos tánni maligtas u atanan a mánnampalataya, dipalongo tu Judio hide sakay tu Griego hide. 17 Dipo impeta nu Maganda a Baheta ni kodya a magin matuwid u essa a tolay, sakay ibilang a awan ti kasalanan tu pamamag-itan nu pánnampalataya ayun tu nesulat tu Kasulatan, “U tolay ay imbilang nu Diyos a awan ti kasalanan dipo tu pánnampalataya ay mabiyag.” 18 Pero impeta nu Diyos u iyamut na a gábwat ti langet, tu atanan a tolay a awan maka Diyos sakay mággimet ti kadukássan. Dipo hadlangan de tu mágkadukás de a gimet u tatahoden a gusto nu Diyos a matukuyan de. 19 Dipo tukoy di dán u katutuhanan tungkul tu Diyos, dipo impeta dán nu Diyos nide. 20 Sapul pa nikuna a lalangán nu Diyos i munduway, u katangian na a awan ketan, u awan ti kahád a kapangyariyan na sakay u pagka-Diyos na ay maliwanag a ketan tu bagay hide a linalang na, kanya awan hide ti medahilan. 21 Maski tukoy dán nu tolay a tehhod a Diyos ay awan di pade siya pinarangalan bilang Diyos oni pinasalamatan. U ginimet de ay nagisip hide ti awan ti seserbi kanya nadiklámman u isip de a awan ti tukoy. 22 Kagi de a mágkalalake hide, pero u tatahoden ay awan hide ti katuko-tukoy. 23 Nikuna a inadággen de u kadakilaan nu Diyos a awan ti kamatayan, nagsamba hide tu ribulto nu tolay a te kamatayan, tu manok hide sakay tu hayup hide a tehhod a áppat a tikád, sakay tu hayup hide a magahakas. 24 Kanya pinabayan dán hide nu Diyos tu mágkadukás a kagustuwan nu puso de, hanggan nikuna a maggimet dán hide tu kagustuwan nu bággi de tu balang essa. 25 Dipo inadággen de u katutuhanan tungkul tu Diyos sakay pinalitan de ti kakabuliyan, sinamba de sakay pinagserbiyan u linalang, a nakwa u nanglalang u dapat a papuriyan hanggan-hanggan. Amen! 26 Dipo hod ay pinabayan dán hide nu Diyos a gimitán u mágkalaswa de a isip. Umád dán a mákduhog nu bábbey hide tu lállake hide nan tu kapareho de dálla a bábbey a mákduhog. 27 Konna labe hod tu lállake hide, umád di dán a mákduhog tu bábbey hide nan tu kapareho di dálla a lállake a naakit. I gággimitán diyan iye ay makadanga-dangát, kanya dipo ti iye ay pinarusaan hide nu Diyos a nararapat tu madukás de a gimet. 28 Dipo umád de a tenggiyan u Diyos, kanya pinabayan na dán hide tu mágkadukás de a isip sakay tu gággimitán de a makadanga-dangáta. 29 Kanya nagin alipin dán hide nu atanan a kadukássan, sakay kalokuwan, kasakiman, sakay madukás a isip. Naputat hide ti sene, pámmuno, págtalo-talo, págdaya, sakay págmetmet. 30 Mangsida hide tu kapareho de, maiyamut hide tu Diyos, awan hide ti galang sakay tunay hide ti kapalaluwan, palagi a magehyok ti madukás sakay awan sumunud tu dáddakál di hide. 31 Awan hide makaintendi, awan hide matapat tu pananto de, sakay awan hide ti kagbi. 32 Tukoy de u utus nu Diyos a dapat parusaan ti kamatayan u mggimet hide ti kasalananan iye pero diretso pade hide a maggimet ti iye. Sakay masaya pa hide ni ketan de u agum a maggimet tu gággimitán de.
21 Nadid, makay ni kagiyán mo a dapat la a mahatulan i iye a tolay dipo tu kadukássan na. Pero maski hiko a maghatul ay awan ti medahilan. Dipo tu pághatul mo tu iba ay hinatulan mo dán be u sadile mo. Dipo gággimitán mo labe u konna hod a bagay. 2 Tukoy tam a makatarungan u hatul nu Diyos tu tolay hide a maggimet ti madukás. 3 Pero ti deya ka a humatul tu iba ni mismo a hiko ay maggimet ti konna hod? Tu palagay mo, makaiwas ka beman tu hatul nu Diyos ni hatulan mo u agum a mággagimitán ti madukás a gággimitán mo labe? 4 Oni akala moy beman awan kam parusaan nu Diyo, dipo tunay siya ti bait, mapagpugád sakay mapasensiya? Awan moy beman tukoy a atádden naka ti pagkakataun a magsise sakay magbagu kanya talaga a mabait siya niko? 5 Dipo tu kaigáttan ni ulo moye sakay awan págsise ay padággiyán mula u parusa nu Diyos niko, tu aldew a pángpeta nu Diyos tu iyamut na sakay makatarungan a pághatul na. 6 Dipo iyatád nu Diyos tu bawat essa u parusa ayun tu ginimet na hide. 7 Atádden na ti biyag a awan ti kahád u tolay hide a magsumikap a maggimet ti maganda, a u gusto de ay maalap u karangalan, papure a gábwat tu Diyos sakay biyag a awan ti kamatayan. 8 Pero tu agum hide a awan ti áisipán nan u sadile di la sakay umád de a sumunud tu tatahoden nan tu kadukássan ay ipadanas nide nu Diyos u garabi a iyamut na. 9 Atanan a tolay a maggimet ti madukás ay parusaan nu Diyos, purumero u Judio hide sakay u bakán hide a Judio. 10 Pero atádden nu Diyos ti karangalan, papure sakay kapayapaan u atanan a maggimet ti maganda, purumero u Judio hide sakay u bakán a Judio. 11 Dipo pare-pareho u pangileng nu Diyos tu atanan a tolay. 12 U tolay hide a magkasala a awan makatukoy tu Kautusan ni Moises ay maparusaan, pero u pághatul nide ay bakán a ayun tu Kautusan. Sakay u atanan a magkasala a makatukoy tu Kautusan ay maparusaan labe sakay u pághatul nide ay ayun tu Kautusan. 13 Dipo bakán a u magsaneg hide tu Kautusan u ibilang nu Diyos a matuwid nan u sumássunud ti iye hide u ibilang na a awan ti kasalanan. 14 U Hentil hide ay awan ti tukoy tungkul tu Kautusan. Pero ni maggimet hide ti ayun tu Kautusan ay impeta de a maske awan hide ti tukoy hod ay tukoy de u dapat de a gimitán. 15 U mágkaganda de a gimet ay mángpeta tu inyutus nu Kautusan ay katoy tu puso de. U konsensiya de u mángpatunay, dipo ni maggimet hide ti madukás ay usigán hide nu konsensiya de sakay ni maggimet hide ti maganda ay tukoy labe nu isip. 16 Mangyare iye tu aldew a hatulan nu Diyos u atanan a sekreto nu tolay, tu pamamag-itan ni Jesu-Cristo, ayun tu Maganda a Baheta a itáttoldu ko. 17 Nadid, kákkagiyán moy a hikam ay Judio, sakay maniwala kam tu Kautusan sakay ipágmadakál moy u rilasyon moy tu Diyos. 18 Kákkagiyán moy pa a tukoy moy u kaluuben na sakay tukoy moy u mágkaganda hide a bagay dipo intoldu nikam nu Kautusan. 19 Sakay tu pangisip mo tu sadile mo ay tagagiya ka tu buhák hide tu katutuhanan sakay demlag ka tu nadiklámman hide ti isip. 20 Sakay dipo hikam u timmanggap tu Kautusan ni Moises ay kákkagiyán moy a tukoy moy dán u atanan, kanya kákkagiyán moy a hikam u tagapagtoldu tu awan hide ti tukoy sakay tagapagtoldu tu anak palla hide ti pákkatukoy tu bagay hide tungkul tu Diyos. 21 Táttolduwan moy u agum, pero bakin u sadile moy ay awan moy tolduwan? Mangaral kam kontara tu págtakaw pero bakin magtakaw kam labe? 22 Sakay ibawal moy u pángngalunya, pero mangalunya kam labe. Maiyamut kam tu diyos-diyosan hide, pero bakin a sumaddáp kam tu templo de para la makapagtakaw tu nágkealay hide tu diyos-diyosan? 23 Ipágmadakál moy a hod nikam u Kautusan nu Diyos, pero awan moy labe inggagalang u Diyos dipo awan moy sássunudán u kinagi nu Kautusan a dapat a gimitán. 24 Konna tu nesulat tu Kautusan a “U ngahan nu Diyos ay awan igagalang nu bakán hide a Judio dipo nikam.” 25 Hikitam a Judio ay ture dipo sa itod u utus nu Diyos a patunay a hikitam u pinili na a magin tolay na pero awan ti halaga u pagigin ture tam ni awan tam sássunudán u Kautusan na. 26 Ni u hentil a awan nature ay maggimet ti maganda a ayun tu kinagi nu Kautusan, awan beman siya ibilang nu Diyos a ture? 27 Kanya maski hikam ay Judio hide sakay nature, patunayan nu bakán hide a Judio a dapat kam a parusaan. Dipo maski awan hide ture sakay awan nide u Kautusan ay sássunudán di labe. Pero hikam a makatukoy tu Kautusan ay lumabag labe ti iye. 28 Dipo bakán a u pagigin Judio oni u pákkature u dahilan para mebilang u essa a tolay a siya ay tolay nu Diyos. 29 U tatahoden a Judio ay u tolay a nabagu u puso tu pamamag-itan nu Ispirito nu Diyos, sakay bakán a dipo nature siya. U papure nikuna ay bakán a gábwat tu tolay nan gábwat tu Diyos.
31 Nadid, kodya a mas higit u Judio hide tu bakán hide a Judio? Ánya u kahalagaan nu pagigin ture de? 2 Tahod a mas higit u Judio hide tu makpal a bagay: Dipalongo tu atanan, hide u nángkatiwalaan nu Diyos tu upos na. 3 Maski ni awan maniwala u sangan nide tu pananto nu Diyos, u gusto na beman a kagiyán ay awan dán tapat u Diyos tu págtupad na tu pananto na hide? 4 Awan, dipo tapat u Diyos tu upos na, maske mabule u atanan a tolay. Konna ngane tu kinagi na tu Kautusan, “Talaga a mapatunayan a tapat ka tu upos mo Panginoon Diyos. Sakay ni kagiyán nu tolay ate pagkakamale ka mapatunayan a awan ka ti págkakamale” 5 Nadid, te agum a tolay a magkagi a masmaganda kan a maggimet kitam ti madukás, para ketan kan nu tolay hide a tama u gimet nu Diyos. Kaya kákkagiyán de a awan na kitam kan dapat a parusaan tu kasalanan tam. 6 Bakán a konna hod! Male itod! Dipo ni awan makatarungan u Diyos kodya na a hatulan u tolay hide ti munduway. 7 Sakay te magkagi pa ti konna he, “Ni tu págbule-bule ko ay ketan u kadakilaan nu Diyos a awan siya magbule-bule, bakin a parusaanák na bilang essa a makasalanan?’ 8 Ni konna hod u katuwiran mo, ay kumán mo a kinagi a maggimet kitam ti madukás para lumuwas u maganda. Sakay ayun tu tolay hide a mangsássida nikame, konna kan hod u itáttoldu me. I tolayan ina hide ay dapat la a parusaan nu Diyos. 9 Ánya nadid u makagi tam? Hikitam beman a Judio ay mas higit tu bakán hide a Judio? Awan! impaliwanag ko dán, a atanan a tolay ay makasalanan, Judio man oni bakán a Judio. 10 A konna tu kinagi na tu Kautusan, “Awan ti malinis tu pangileng nu Diyos maskin essa. 11 Awan ti makaintendi tungkul tu Diyos, awan ti nagsikap para matenggi siya. 12 U atanan ay immadág tu Diyos sakay nagin awan ti pagseserbiyan. Awan ti naggimet ti maganda, awan maski ni essa.” 13 “U pággupos de ay kumán a u lábbáng a mabuyok, dipo palagi hide a mágga-upusán ti kakabuliyan. U upos a lumuwas tu labi de ay kumán a kaget nu makamandag a ulag dipo mangsida tu kapatkákka de. 14 Sakay u lumuwas tu labi de ay puro a pagseste sakay magkasaket a upos. 15 Tu badit la a dahilan ay agad dán hide a mamuno ti tolay. 16 Maske ni hádya u angayan de ay kapahamakan sakay kalungkutan u ipabate de. 17 Awan de tukoy a mabiyag ti mapayapa, 18 sakay awan hide ti ánteng tu Diyos. 19 Nadid, tukoy tamon a atanan a kinagi tu Kautusan ay para nikitam a Judio hide a sakup nu Kautusan, tánni awan ti me dahilan u ti deyaman a awan siya dapat maparusaan. U atanan a tolay ti munduway ay managut tu Diyos. 20 Dipo awan ni ti deyaman u ibilang nu Diyos a awan ti kasalanan tu pamamag-itan nu kássunud tu Kautusan. Nan u Kautusan u mángpeta tu kasalanan nu tolay. 21 Pero nadid ay inhayag dán nu Diyos ni kodya na a inbilang a awan ti kasalanan u tolay. Iye ay bakán a tu kássunud tu Kautusan. Mismo u Kautusan sakay u insulat nu prupeta hide u mangpatunay ti iye. 22 U tolay ay inturing nu Diyos a awan ti kasalanan tu pamamag-itan nu pánnampalataya de ni Jesu-Cristo, sakay awan ti kampiyan u Diyos. Kaya u tideyaman a sumampalataya ni Jesu-Cristo ay ibilang a matuwid. 23 Dipo u atanan ay nagkasala sakay awan hide nagin karapat- dapat tu pangileng nu Diyos. 24 Pero dipo tu kagbi na nikitam, imbilang na kitam a awan ti kasalanan tu pamamag-itan ni Cristo Jesus a nangtubus nikitam. Iye ay rigalo nu Diyos. 25 Ti Jesu-Cristo u pinaangay he nu Diyos ti munduwáy tánni iyalay na u biyag na, para maibut u iyamut nu Diyos nikitam, sakay tu pamamag-itan nu dige na ay napatawad dán u kasalanan tam ni sumampalataya kitam nikuna. Ginimet iye nu Diyos tánni ipeta na a siya ay matuwid, dipo tu purumero ay nagpasensiya siya sakay pinalipas na la u kasalanan a nagimet nu tolay hide a nakwa pinarusaan na dán hide. 26 Pero nadid pinaangay na he ti Cristo tánni ipeta na a matuwid siya. Dipo ti iye a ginimet na, pinatunayan na a tama siya tu pangturing na a matuwid u sumampalataya hide ni Jesus. 27 Kaya awan kitam ti ipagmadakál, dipo u pángturing nikitam a matuwid ay bakán a tu kássunud tam tu Kautusan, nan tu pánnampalataya tam ni Jesus. 28 Dipo maniwala kitam a ituring nu Diyos a matuwid u tolay tu pamamag-itan nu kássampalataya na ni Cristo, bakán a tu kássunud tu Kautusan. 29 U Diyos ay bakán la a Diyos nu Judio hide, nan Diyos labe siya nu bakán hide a Judio, dipo Diyos siya nu atanan. 30 Eessa la u Diyos para tu Judio hide sakay tu bakán a Judio, sakay pareho hide a ituring nu Diyos a awan ti kasalanan dipo tu pánnampalataya de ni Cristo. 31 U gusto na beman a kagiyán ay bali-awanán mi dán u Kautusan? Awan! Dipo u tatahoden ay mas lalo mi pa a tinupad u layunin nu Kautusan.
41 Nadid, bilang essa a halimbawa ni kodya a inturing nu Diyos a matuwid u tolay, isipan moy ti Abraham a Ama nu Judio hide ti pilas. 2 Ni inbilang siya nu Diyos a awan ti kasalanan dipo tu nagimet na hide, nakwa ay tehhod siya a mepagmadakál. Pero awan siya ti mepagmadakál tu Diyos, 3 dipo kinagi na tu Kautusan, “Nanampalataya ti Abraham tu Diyos, sakay dipo hod ay inbilang siya nu Diyos a matuwid.” 4 U meatád tu essa a tolay a nagtarabaho ay upa bakán a kaluub. 5 Pero inturing kitam nu Diyos a matuwid bakán a tu mágkaganda tam a gimet nan tu pánnampalataya tam tu Diyos a siya u nángturing tu makasalanan a matuwid hide. 6 Iye u gusto a kagiyán ni hare a David nikuna a banggitán na u tungkul tu pagigin mapalad, nu tolay hide a inturing nu Diyos a matuwid bakán a tu mágkaganda de a gimet. 7 “Kinagi na, Pinagpala u tolay a pinatawad na sakay linimon dán nu Diyos u kasalanan na hide. 8 Pinagpala u tolay a imbilang nu Panginoon a awan dán managut tu kasalanan na hide.” 9 I kinagiyan iye hide ni hare a David ay bakán la a para tu Judio hide, nan pate labe tu bakán hide a Judio. Tukoy moy iye dipo binanggit mi dán, “Imbilang nu Diyos a matuwid ti Abraham dipo tu pánnampalataya na.” 10 Nikan beman siya a nebilang a matuwid? Awan beman nikuna a awan palla siya nature? 11 Tinure siya bilang tanda a ibilang dán siya a matuwid dipo tu pánnampalataya na. Kanya ti Abraham ay imbilang a ama nu atanan a manampalataya a awan nature. Sakay dipo ngane tu pánnampalataya de, ay imbilang hide nu Diyos a matuwid. 12 Sakay siya be u ama nu Judio hide a nature, bakán la ta nature hide tu bággi, nan dipo manampalataya be hide a konna tu ninuno tam a ti Abraham nikuna a awan padla siya nature. 13 Impananto nu Diyos ni Abraham sakay tu lahe na hide a hide u mangmana ti munduway. U pananto a iye ay inyatád nu Diyos ni Abraham bakán a dipo tu kássunud na tu Kautusan, nan dipo inbilang siya nu Diyos a matuwid tu pamamag-itan nu pánnampalataya na. 14 Ni u sumássunud la hide tu Kautusan u magin tagapagmana, awan ti kabuluhan u pánnampalataya sakay u pananto nu Diyos. 15 U Kautusan u dahilan ni bakin tehhod a parusa a gábwat tu Diyos. Dipo ni awan ti Kautusan ay awan be ti págsuway. 16 Kanya u pananto nu Diyos ay nakabase tu pánnampalataya, tánni iye ay magin págpapala sakay talaga a matanggap nu atanan a lahe ni Abraham, bakán la tu Judio hide a timmanggap tu Kautusan, nan maske tu bakán hide a Judio a mánnampalataya a konna ni Abraham dipo siya u ama tam a atanan. 17 Konna he u kinagi na tu Kasulatan, “Ginimet taka a ama nu makpal a bansa.”Iye a pananto ay tehhod a bisa tu atubang nu Diyos a panaligan na, u Diyos a nangbiyag tu patay hide sakay manglalang tu atanan a bagay a awan palla. 18 Maske ni awan dán ti pag-asa ti Abraham a magkahod ti anak, nanampalataya pade siya a tupadán nu Diyos u pananto na a magin ama siya nu makpal a bansa. Ayun tu kinagi nikuna nu Diyos, “Konna ti kakpal tu biton ti langet u magin lahe mo.” 19 Awan siya nanghina tu pánnampalataya na maski ni magdatos dán u idad na, sakay mahina dán u babággi na, sakay tukoy na be a baug ti Sara awan dán maare a magenak. Konna man hod, ay awan nanghina u pánnampalataya na. 20 Awan siya nagduwwa-duwwa tu pananto nu Diyos, nan mas lalo pa siya a tinumibay tu pánnampalataya na sakay nagpure tu Diyos. 21 Dipo nanalig siya ti husto a tupadán nu Diyos u pananto na. 22 Kanya imbilang nu Diyos a matuwid ti Abraham dipo tu pánnampalataya na. 23 Pero u upos a, “Inturing a matuwid,”ay bakán la a para ni Abraham, 24 nan para be nikitam. Nebilang kitam a awan ti kasalanan dipo tu pánnampalataya tam tu Diyos a nangbiyag a huway tu Panginoon tam a ti Jesus. 25 Impabuno de ti Jesus, dipo tu kasalanan tam hide, sakay biniyag a huway tánni mebilang kitam a awan ti kasalanan.
51 Kanya nadid ay imbilang kitamon nu Diyos a awan ti kasalanan dipo tu pánnampalataya tam tu Panginoon tam a ti Jesu-Cristo, kanya tehhod kitamon a maganda a rilasyon tu atubang nu Diyos. 2 Tu pamamag-itan ni Jesus sakay dipo tu pánnampalataya tam ay mabati tamon u habag na sakay masaya kitamon dipo tu pag-asa tam a makahate kitam tu kadakilaan nu Diyos. 3 Sakay masaya kitam maske ni maranasan tam u hirap hide, dipo matuto kitam a magtiis. 4 Dipo u resulta nu págtiis ay maganda a ugale sakay u risulta nu maganda a ugale ay pag-asa a makahate kitam tu kadakilaan nu Diyos. 5 Sakay awan kitam mabigu-bigu tu pag-asa tam dipo impabate na nikitam u págmahal na tu pamamag-itan nu Ispirito Santo a inyatád nikitam nu Diyos. 6 Nikuna awan kitam ti magimet para makaligtas tu parusa, natay ti Cristo para tu kasalanan tam hide tu panahun a intakda nu Diyos. 7 Bihira a mangyare a iyalay nu essa a tolay u biyag na para tu essa a matuwid a tolay. Maare labe a tehhod a magbegsák- isip a máng-atád tu biyag na para tu mabait a tolay. 8 Pero impeta nikitam nu Diyos u págmahal na ti konna he a paraan: Maske tu itod nikuna a makasalanan kitam palla, natay ti Cristo para nikitam. 9 Sakay nadid ay nebilang kitamon a awan ti kasalanan tu pamamag-itan nu dige ni Cristo, kanya siguradu dán u kaligtasan tam tu parusa nu Diyos dipo ni Cristo. 10 Tu itod ay kadima kitam nu Diyos, pero nadid ay tinanggap na kitamon a kaibigan na tu pamamag-itan nu kákkatay nu Anak na. Kanya nadid a tehhod kitamon a maganda a relasyon tu Diyos siguradu dán a iligtas na kitam tu pamamag-itan nu biyag ni Cristo. 11 Sakay bakán la sa ina, masaya kitam tu rilasyon tam tu Diyos, dipo tu ginimet nu Panginoon tam a ti Jesu-Cristo. Dipo nikuna ay tinanggap kitam nu Diyos a kaibigan na. 12 Nadid, nagkahod ti kasalanan ti munduway dipo tu kassuway ni Adan tu utus nu Diyos. Sakay dipo tu kasalanan na ay nagkahod be ti kamatayan. Kanya matay u atanan a tolay, dipo nagkasala u atanan. 13 Bagu a inyatád nu Diyos u Kautusan, ay maggimet dán ti kasalanan u tolay hide pero awan meturing a kasalanan itod ni awan u Kautusan. 14 Konna pa man hod, ay naghare pade u kamatayan sapul ni Adan hanggan ni Moises, maski ni u kasalanan de ay awan kapareho nu kássuway ni Adan. Ti Adan ay kumán a letrato ni Cristo a inasaan tu itod a dumemát. Dipo pareho hide a te impamana tu katolayan. 15 Pero u impamana ni Jesu-Cristo sakay tu kasalanan a impamana ni Adan ay dakál u pagkakaiba. Tatahoden a nakapangatád ti kamatayan tu makpal a tolay u kasalanan ni Adan, pero mas higit u kagbi sakay kaluub nu Diyos a dummemát tu makpal a tolay tu pamamagitan nu essa a tolay a ti Jesu-Cristo. 16 Iba talaga u risulta nu kaluub nu Diyos tu risulta nu kássuway ni Adan. U kássuway ni Adan ay nagresulta ti hatul a kaparusaan, pero u kaluub nu Diyos a dimmemát maske ni makpal a págsuway ay nagrisulta ti págpatawad. 17 Ta dipo tu kasalanan nu essa a tolay ay naghare u kamatayan. Pero dipo tu ginimet nu essa a tolay a ti Jesu- Cristo, u tolay hide a timmanggap ti kagbi sakay kaluub nu Diyos, ay imbilang na a awan ti kasalanan, sakay maghare hide tu biyag a awan ti kahad. 18 Kanya dipo tu kasalanan nu essa a tolay, u atanan ay nahatulan tu kaparusaan. Konna man hod, dipo tu matuwid a ginimet nu essa a tolay, u atanan ay mebilang a awan ti kasalanan sakay maatádden ti biyag a awan ti kahád. 19 Dipo tu kássuway nu essa a tolay makpal a nagin makasalanan. Konna man hod, dipo tu kássunud nu essa a tolay ay makpal a imbilang u Diyos a matuwid. 20 U Kautusan ay inyatád nu Diyos tánni ketan nu tolay a makpal u kasalanan de, sakay nadag-dagen pa dipo tu Kautusan. Pero maski ni nadag-dagen u págsuway ay mas lalo a nadagdagen u habag nu Diyos. 21 Kanya ni kodya a naghare u kasalanan tu pamamag-itan nu kamatayan, konna labe hod, maghare u habag nu Diyos sakay tu pángbilang na nikitam a awan ti kasalanan tu pamamag-itan nu Panginoon tam a ti Jesu-Cristo, tánni maranasan tam u biyag a awan ti kahád.
61 Ánya nadid u makagi tam? Tulos- tulos kitam pade tu págkakasala tánni madagdagen u habag nu Diyos nikitam? 2 Awan! Awan kitamon dapat mabiyag, tu págkakasala dipo konna kitam tu essa a patay a awan dán magkasala. 3 Awan moy beman tukoy a atanan tam ay nabawtismuwan ni Cristo Jesus, u gusto na a kagiyán ay kaguman kitam tu kákkatay na? 4 Kanya nikuna a nabawtismuwan kitam, nelábbáng kitam a kaguman ni Cristo tánni makaguman na kitam be a mabiyag. Kanya ni kodya a nabiyag ti Cristo tu pamamag-itan nu dakila a kapangyariyan nu Ama, hikitam be ay mabiyag tu bigu a biyag. 5 Dipo ni nákpagkaessa kitam ni Cristo tu kamatayan na, talaga a makaguman na kitam tu kákkabiyag na a huway. 6 Tukoy tam a u date tam a pagkatolay ay nepako dán tu kudus a kaguman ni Cristo, tánni matay u makasalanan tam a bággi, tánni awan kitamon maalipin pa nu kasalanan. 7 Dipo u tolay a patay dán ay napalaya dán tu kapangyariyan nu kasalanan. 8 Sakay ni hikitam ay natay a kaguman ni Cristo, maniwala kitam a mabiyag kitam be a kaguman na. 9 Dipo tukoy tam a ti Cristo ay nabiyag a huway sakay awan dán matay a huway. Awan dán nikuna ti kapangyariyan u kamatayan. 10 Nikuna a natay siya, ay natay siya a pumensan para tu kasalanan nu tolay hide, sakay u biyag na nadid ay para tu ikasaya nu Diyos. 11 Kanya dapat moy a ibilang u sadile moy a patay dán tu kasalanan, pero biyag para tu Diyos dipo tu pákpagkaessa moy ni Cristo Jesus. 12 Dyan moy dán pabayan a maghare u kasalanan tu bággi moy a matay tánni awan kamon maalipin tu atanan a kagustuwan na. 13 Dyan moy dán gamitán u hádya man a parte nu bággi moy tu pággimet ti kasalanan. Nan iyalay moy tu Diyos u sadile moy bilang tolay a inatádden ti bigu a biyag. Ilaan moy tu Diyos u bággi moy tu pággimet ti maganda. 14 Dipo awan dán dapat a maghare pa nikam u kasalanan, dipo awan kamon sakup nu Kautusan ni awan sakup dán nu habag nu Diyos. 15 Nadid, maggimet kitam pa beman ti kasalanan dipo awan kitamon sakup nu kapangyariyan nu Kautusan, nan sakup dán nu kapangyariyan nu habag nu Diyos? Awan! 16 Awan moy beman tukoy a ni sakup kam ni ti deyaman bilang essa a alipin, alipin kam ngane nu sássunudán moy. Kanya ni sássunudán tam u kasalanan alipin kitam nu kasalanan sakay u risulta na ay kamatayan. Pero ni sássunudán tam u Diyos alipin kitam nu Diyos a u risulta na ay matuwid a kákkabiyag. 17 Pero salamat tu Diyos dipo hikam a date a alipin nu kasalanan ay buo a puso moy dán a sinunud u adal a intoldu nikam. 18 Nadid, ay napalaya kamon tu kasalanan sakay alipin kamon nu katuwiran. 19 Magupusák tu pangkaraniwan a paraan para alisto moy a maintendiyan. Nikuna a nagpaalipin kam tu kadukássan sakay nagin madukás kam ngane. Nadid ay paalipin kam tu katuwiran tánni magin tunay kam a banal. 20 Nikuna a alipin kam palla nu kasalanan, awan moy naisip a gimitán u bagay hide a neayun tu kagustuwan nu Diyos. 21 Pero ánya u inábbang moy tu date moy a kákkabiyag a ikasanike moy dán nadid? U hantunan na ay kamatayan. 22 Pero napalaya kamon tu kasalanan sakay alipin kamon nu Diyos. Sakay u natanggap moy ay kabanalan sakay biyag a awan ti kahád. 23 Dipo u bayad nu kasalanan ay kamatayan, pero u kaluub nu Diyos ay biyag a awan ti kahád tu pamamag-itan ni Cristo-Jesus a Panginoon tam.
71 Kákkapatkákka ko hide, tukoy ko a maintendiyan moy u batas a u essa a tolay ay sakup la nu batas mentaras biyag siya. 2 Halimbawa, ayun tu batas, u essa a bábbey a tehhod a kabanga ay sakup la nu kabanga na habang biyag siya. Pero ni matay dán u kabanga na a lállake, ay malaya dán siya tu batas tungkul tu magkabanga. 3 Kaya ni mák-agum siya tu iba a lállake mentaras a biyag palla u kabanga na, ay nagkasala siya ti pángngalunya. Pero ni patay dán u kabanga na a lállake, malaya dán siya tu batas tungkul tu magkabanga. Sakay ni mákkabanga siya a huway, awan siya nagkasala ti pángngalunya. 4 Konna labe hod kákkapatkákka ko hide. Natay kamon tu Kautusan tu pamamag-itan nu kákkatay ni Cristo. Nabiyag a huway. Sakay hikam ay kao na dán tánni magbunga kam ti mágkaganda a gimet para tu ikasaya nu Diyos. 5 Nikuna a mabiyag kitam palla tu date tam a pagkatolay, u mágkadukás a kagustuwan nu bággi tam u naghare, sakay lalo pa a pinadukás nu Kautusan kaya nakagimet kitam ti bagay hide a madukás a u resulta na ay u kamatayan tam. 6 Pero nadid u kapareho tam ay u patay a awan sakup nu Kautusan i Kautusanan iye ay siya u nangalipin nikitam dipo awan tam kaya a sunudán. Pero nadid ay nawan dán u pagkukulang tam tu awan tam págsunud tu Kautusan. Kaya nadid u págserbi tam tu Diyos ay bakán dán a tu date a biyag a sakup nu Kautusan ni awan tu bigu a biyag a inyatád nu Ispirito Santo. 7 U gusto na beman a kagiyán ay madukás u Kautusan? Awan! Dipo awan ko nakwa natukuyan u kasalanan ni awan u Kautusan. Awan ko nakwa natukuyan ni ánya u pagin sakim ni awan kinagi nu Kautusan,“Dyan ka magin sakim.” 8 Pero dipo tu Kautusan, ay linukag nu kasalanan u baggi ko para tu atanan a kalase ni kasakiman. Dipo awan ti kasalanan ni awan ti Kautusan. 9 Nikuna a mabiyagák a awan ti Kautusan. Pero nikuna a matukuyan ko u Kautusan, sakay natukuyan ko a makasalananák bál sakay nahatulan ti kamatayan. 10 Kanya u Kautusan a dapat nakwa a mangatád ti biyag ay siya pa u nangatád nikán ti kamatayan. 11 Dipo ginamit nu kasalanan u Kautusan tánni dayaánnák na, sakay dipo hod ay nahatulanák ti kamatayan dipo awan ko masunud u Kautusan. 12 U Kautusan ay gábwat tu Diyos, kanya iye ay banal matuwid sakay maganda. 13 U gusto na beman a kagiyán a u mágkaganda a bagay u nangatád nikán ti kamatayan? Awan! U kasalanan ay siya u nangatád nikán ti kamatayan. Ginamit nu kasalanan u Kautusan a essa a maganda a bagay, tánni mahatulanák ti kamatayan. Sakay dipo hod, ay natukuyan ko ni sakodya ti kadukás u kasalanan. 14 Tukoy tam a u Kautusan ay maganda dipo gábwat tu Banal a Ispirito nu Diyos. Pero hikán ay makamundu, sakay alipin nu kasalanan. 15 Awan ko maintendiyan u sadili ko. Dipo awan ko magimet u mágkaganda hide a bagay a gusto ko a gimitán, sakay u bagay hide a umád ko a gimitán u gággimitán ko. 16 Nadid, ni awan ko gimitán u mágkadukás hide a gággimitán ko, u gusto na a kagiyán ay sang-ayunák tu kinagi nu Kautusan ay maganda. 17 Kanya kumán a bakán a hikán u maggimet ti madukás, nan dipo tu pagin makasalanan ko kanya magkasalaák. 18 Tukoy ko a awan ti maganda tu makasalanan ko a pagkatolay, dipo ni gusto ko a maggimet ti maganda, ay awan ko labe iye magimet. 19 Awan ko magimet u mágkaganda hide a bagay a gusto ko a gimitán, pero u mágkadukás a bagay a umád ko a gimitán, ay itod be u gággimitán ko. 20 Ni gimitán ko u umád ko a gimitán, bakán dán a hikán u manggimet hod ni awan u makasalanan ko a pagkatolay. 21 Sa iye u natukuyan ko tu sadile ko. Ni gusto ko a maggimet ti maganda, ay hadlanganák nu madukás ko a pagkatolay. 22 Buo a pusowák a masaya tu Kautusan nu Diyos. 23 Pero tehhod a agum a kapangyariyan a magahikad tu sadili ko. Tu isip ko ay gustu ko a maggimet ti maganda pero iba be u gimitán nu bágge ko dipo u madukás a kagustuwan nu bágge ko u lagi a masunud kanyaák a magkasala. 24 Kakagbi u kalagayan ko! ti deya u mángligtas nikán tu makasalanan a bággi a makapangatád nikán ti kamatayan? 25 Salamat tu Diyos, dipo siya u mángligtas nikán tu pamamag-itan ni Jesu-Cristo a Panginoon tam. Ni konna hod, iye u kalagayan ko, u isip ko ay magpasakupák tu Kautusan nu Diyos, pero dipo tu makasalanan ko a pagkatolay ay magkasalaák pade.
81 Kanya nadid, ay awan dán mahatulan ti kaparusaan u katoy ni Cristo Jesus. 2 Dipo tu pákpagkaessa tam ni Cristo Jesus, ay napalaya kitamon tu kapangyariyan nu kasalanan sakay kamatayan tu pamamag-itan nu kapangyariyan nu Banal a Ispirito a makapangatád ti biyag. 3 U Kautusan ay awan makapangibut tu kapangyariyan nu kasalanan tu biyag tam dipo tu kahinaan nu makasalanan tam a pagkatolay. U Diyos u nangibut nikuna a pinaangay nahe u sadile na a anak a konna tu essa a tolay a makasalanan tánni magin alay para tu kasalanan tam. sakay nikuna a nagin tolay siya ay tinapos nu Diyos u kapangyariyan nu kasalanan. 4 Ginimet iye nu Diyos tánni u ipatupad nu Kautusan ay matupad tam be a mabiyag tu págiyya nu Banal a Ispirito sakay bakán a ayun tu makasalanan tam a pagkatolay. 5 Dipo u mabiyag hide ayun tu hilig nu pilas ay gugusto de u bagay hide a ayun tu pilas, pero u mabiyag ayun tu pággiya nu Ispirito ay magsumikap a maggimet tu bagay hide a ayun tu kagustuwan nu Banal a Ispirito. 6 U sapitán nu kássunud tu makasalanan a pagkatolay ay kamatayan, pero u sapitán nu kássunud tu kagustuwan hide nu Banal a Ispirito ay kapayapaan sakay biyag a awan ti kahád. 7 Dipo kalaban nu Diyos u deyaman a sumunud tu gusto nu makasalanan a pagkatolay, dipo umád na a sumunud tu Kautusan nu Diyos sakay talaga a awan na magimet a sumunud. 8 Kanya u tolay hide a mabiyag ayun tu makasalanan de a pagkatolay ay awan hide maare a kasayaan nu Diyos. 9 Pero awan kamon mabiyag a ayun tu makasalanan a pagkatolay nan ayun tu pággiya nu Banal a Ispirito, ni talaga a mágyan nikam u Ispirito nu Diyos. Ni u Ispirito ni Cristo ay awan tu essa a tolay ay bakán siya a kán Cristo. 10 Pero dipo mágyan dán nikam ti Cristo maski matay dán u bággi moy dipo tu kasalanan ay biyag u ispirito moy dipo imbilang kamon nu Diyos a matuwid. 11 Sakay dipo mágyan dán nikam u Ispirito nu Diyos a nangbiyag a huway ni Jesu-Cristo, itod be a Diyos u mangatád ti biyag tu bággi moy a te kamatayan tu pamamag-itan nu Ispirito nu Diyos a mágyan nikam. 12 Kanya kákkapatkákka ko hide, dyan kitamon mabiyag a ayun tu makasalanan tam a pagkatolay. 13 Dipo matay kam ni mabiyag kam ayun tu makasalanan moy a pagkatolay. Pero mabiyag kam ni adággen moy u makasalanan moy a pagkatolay tu pamamag-itan nu pággiya nu Banal a Ispirito. 14 U atanan a igiya nu Ispirito nu Diyos ay anak hide nu Diyos. 15 Dipo awan kam timmanggap ti ispirito nu kákkaalipin tánni huway a manteng. U tinanggap moy ay Ispirito a magin anak nu Diyos, sakay iye u mangatád nikitam ti karapatan a dumulaw nikuna a, “Ama! Ama ko!” 16 U Banal a Ispirito sakay u ispirito tam ay pareho a mangpatunay a anak kitam nu Diyos. 17 Sakay bilang anak hide nu Diyos, hikitam ay tagapagmana nu Diyos sakay kaguman ni Cristo a magmana tu págpapala hide a inhanda na. Dipo ni magtiis kitam a konna ni Cristo tu itod ay dumemát u aldew a parangalan na kitam a kaguman na. 18 Para nikán, u paghihirap tam nadid hide ay awan mekompara tu maganda a kalagayan a makao tam káddemát nu aldew. 19 Maski ni u buo a linalang hide nu Diyos ay gusto di dán a ipahayag nu Diyos u anak na hide. 20 Dipo atanan a ginimet nu Diyos ay awan nanatile tu date de a maganda a kákkagimet dipo nesale hide tu kaparusaan a gábwat tu Diyos. Nangyare iye dipo bakán a gusto de nan dipo iye u gusto nu Diyos. Pero inatádden na hide ti pag-asa. 21 Dipo dumemát u aldew a baguwán nu Diyos u atanan a bagay para awan ti mahunot sakay mesale hide tu maluwalhate a kalayaan nu anak hide nu Diyos. 22 Tukoy tam a hanggan nadid, u buo a linalang ay maghirap sakay mágdadaingán a konna tu essa a bábbey a magenak dán. 23 Sakay bakán la a hide! Maski hikitam a timmanggap tu Banl a Ispirito bilang dipalongo a kaluub nu Diyos ay mágdadaingán be mentaras a maguhay kitam a matubus u bággi tam sakay ihayag nu Diyos a anak na kitam. 24 Ligtas kitamon sakay maguhay kitam dálla a makompleto i kaligtasanan iye. Umasa kitam dipo awan palla u asaan tam. Deya beman u umasa tu katoy dán hina a asaan na? 25 Pero ni umasa kitam tu awan tam áelingan ay uhayán tam ina a tehhod a págtiyaga. 26 Sakay tulungan kitam nu Banal a Ispirito tu kahinaan tam. Awan tam tukoy ni kodya kitam a magdasal, kanya u Ispirito u mamagitan nikitam tu Diyos tu paraan a awan tam kaya a ikagi. 27 Sakay maintendiyan nu Diyos a makatukoy tu lasán nu puso nu tolay u ánya man a kagiyán nu Banal a Ispirito. Dipo u Banal a Ispirito u mamagitan para nikitam a anak nu Diyos, sakay iye ay palagi a ayun tu kaluuben nu Diyos. 28 Tukoy tam atu atanan a bagay, ay magahikad u Diyos para tu kapiyyaan nu atanan a mangmahal nikuna. Iye u gággimitán nu Diyos tu atanan a mangyare tu tolay hide a pinili na a makaguman tu plano na. 29 Dipo sapul pa tu itod ay tukoy dán nu Diyos ni tideya u para nikuna, pinile na dán hide a magin konna tu Anak na ati Jesus, tánni siya u magin panganay tu makpal a mátkaka. 30 Kanya u tolay hide a pinile nu Diyos tu itod pa ay dinulaw na tánni magin anak na hide, sakay u dinulaw na hide ay imbilang na hide a matuwid, sakay u imbilang na hide a matuwid ay inatádden na ti karangalan. 31 Nadid, ni isipán tam u atanan a mágkaganda a bagay a ginimet nu Diyos para nikitam dapat konna he u makagi tam: Ni u Diyos ay kakampe tam tideya u magtagumpay kontara nikitam? 32 Ni u sadile na a Anak ay awan na inkemot ni awan inyatád na nikitam, siguradu a iyatád nabe nikitam u atanan a bagay. 33 Awan ti makapángkaso kontara nikitam a pinile nu Diyos a hikitam ay makasalanan pade, dipo u Diyos dán a mismo u nángturing kitam a matuwid kitamon? 34 Awan be ti makahatul nikitam a dapat kitam a maparusaan dipo ti Cristo Jesus dán a mismo u hinatulan a matay para nikitam. Sakay bakán la a ina; nan biniyag siya a huway sakay nadid ay hod dán siya tu kawanan nu Diyos sakay siya u mamagitan para nikitam. 35 Awan ti makapánghiwalay nikitam tu págmahal ni Cristo. maski magdanas kitam pa ti pághirap, saket, seste, aláp, awan ti mesulot, panganib, oni maski u kamatayan, dakál pade u págmahal ni Cristo nikitam. 36 Ayun tu kinagi na tu Kasulatan ay, “Alang- alang niko ay palagi a dilikadu ti kamatayan u biyag me. Kumán kame a u tupa hide a bunuwán.” 37 Pero maski konna he u pághirap tam nadid, mapagtagumpayan tam pade u atananan iye, dipo ni Cristo a nangmahal nikitam. 38 - 39 Awanák magduwwa-duwwa a awan ti makapánghiwalay nikitam tu págmahal nu Diyos. Maski dumemát u kamatayan tam, oni biyag kitam palla, maski u anghel hide, u puno hide u bagay hide nadid a kasalukuyan, u bagay hide a pademát, u tehhod hide a kapangyariyan, u kalangkawan, u kadisaladen, oni ányaman a linalang ay awan makapánghiwalay nikitam tu págmahal nu Diyos, u págmahal a impabate na nikitam tu pamamagitan ni Cristo Jesus a Panginoon tam.
91 Nadid, hikán a mánnampalataya ni Cristo ay te kagiyánák nikam. Tatahoden u kagiyán ko awanák magbule-bule, sakay u Banal a Ispirito u mángpatunay a malinis u konsensiya ko a tatahoden u kagiyán ko. 2 Garabi a tahod i lungkut kuwáy sakay awan maibut i saket ni puso kuwáy, 3 para tu kabanuwan ko hide a Judio. Ni maare la nakwa ay hikán dálla u sumpaán nu Diyos sakay mehiwalay ni Cristo para la a maligtas hide. 4 Bilang Israelita ay inturing hide nu Diyos a anak na, impeta na nide u kadakilaan na, naggimet u Diyos ti kasunduwan nide, inyatád na nide u Kautusan, tinolduwan na hide tu tama a págsamba sakay makpal a pananto u Diyos nide. 5 U ninuno de hide ay pinile nu Diyos sakay u lahe de u ginábwatan ni Cristo nikuna a nagin tolay siya, u Diyos a makapangyariyan tu atanan sakay dapat a papuriyan a hanggan-hanggan! Amen. 6 Awan na gusto a kagiyán a awan natupad u pananto nu Diyos, dipo awan hide simmapalataya, dipo awan atanan a gábwat ti Israel ay kaguman tu banuwan a pinile na. 7 Sakay awan atanan a gábwat ni Abraham ay meturing a anak na. Dipo kinagi nu Diyos ni Abraham, “U gábwat la ni Isaac u ibilang a lahe mo a impananto ko niko. ” 8 U gusto na a kagiyán ay awan atanan a anak ni Abraham ay imbilang a anak nu Diyos, ni awan u anak la hide ayun tu nepananto u ibilang a lahe na. 9 Dipo konna he u pananto, “Soliyák ti taunay, ti konna labe nadid a panahun, sakay magkahod ka ti anak a lállake, Sara.” 10 Sakay bakán la sa itod. Tu pamamag-itan nu duwwa a anak ni Rebeca sakay tu ninuno tam a ti Isaac, impeta be nu Diyos a bakán a atanan a gábwat ni Abraham ay inturing a anak na hide. 11 Impakilala nu Diyos a u págpile na ay ayun tu sadile na a plano sakay bakán a tu gimet nu tolay. Dipo bagu pa a meenak u anak hide sakay bagu pa a makagimet ti maganda oni madukás, 12 kinagi nu Diyos ni Rebeca, “Magserbi u ákka tu wadi na.” 13 Konna tu kinagi na tu Kautusan, “Minahal ko ti Jacob pero ti Esau ay awan.” 14 Ni konna hod makagi tam beman a awan makatarungan u Diyos? Awan! 15 Dipo kinagi na ni Moises, “Mahabagák tu gusto ko a kahabagen sakay kagbiyan ko u gusto ko a kagbiyan.” 16 Ni konna hod, u págpile nu Diyos ay bakán a ayun tu kagustuwan nu tolay oni tu pággimet ti maganda, ni awan tu kagbi la nu Diyos. 17 Dipo ayun tu Kasulatan, kinagi nu Diyos ni Faraon a hare ti Egipto, “Indátton taka a hare tánni tu pamamag-itan nu gimitán ko a kontara niko ay mepeta u kapangyariyan ko sakay makilala u ngahan ko ti munduway.” 18 Kanya kahabagen nu Diyos u gusto na a kahabagen sakay paigáttán na ti ulo u gusto na a paigáttán. 19 Makay kagiyán de dammán nikán nadid a, “Bakin a kákkagiyán nu Diyos a dapat managut u tolay hide tu kasalanan de? Deya beman u makalaban tu kaluuben na?” 20 Pero hiko a tolay la deya ka beman para tumábbeg ti konna hina tu Diyos? Makagi beman nu ginimet tu nanggimet nikuna a, “Bakin a ginimiták mo a konna he?” 21 Konna tu essa a maggimet ti banga, te karapatan siya a gimitán u luta ayun tu gustu na. Te karapatan siya a maggimet ti essa a kasangkapan a mágkamahal sakay essa be a kalase a mágkamura la. 22 Konna pa man hod, gusto nu Diyos a ipeta u iyamut na sakay u kapangyariyan na, pero pinagtiyagaan na sakay pinagtiisan u tolay hide a dapat dán nakwa a parusaan sakay puksaán. 23 Ginimet na iye tánni ipeta na u awan ti kapareho a kadakilaan na tu tolay hide a kinahabagen na, a tu itod pa ay inhanda na dán para parangalan na. 24 Sakay awan dán ti iba nan hikitam a dinulaw na, bakán la a u gábwat tu Judio hide nan u gábwat be tu Hentil hide. 25 Konna he u kinagi na tu libro ni Oseas: “U date a bakán ko a banuwan ay dulawán a banuwan ko, sakay u date a awan ko mahal ay dulawán a mahal ko. 26 “Sakay u kinagiyan na a bakán na a banuwan! Ay madulawan a anak nu Diyos a biyag.” 27 Konna bi he u impahayag ni propeta Isaias tungkul ti Israel, “ Maske ni konna ti kakpal tu baybay tu diget u magin anak ni Israel ay sasangan la nide u maligtas. 28 Dipo mahigpit sakay alisto a gimitán nu Panginoon u pághatul na ti munduway. 29 Kinagi be ni Isaias a, “Ni u Panginoon a Makapangyariyan tu atanan ay awan nángwahak tu lahe tam, hikitam nakwa ay nagin konna ti Sodoma sakay Gomora.” 30 Ánya nadid u makagi tam tungkul ti iye? U bakán hide a Judio a awan nagsikap a magin makasaya tu Diyos ay kinasayaan na hide, imbilang na hide a awan ti kasalanan tu pamamag-itan nu pánnampalataya de nikuna. 31 Pero u Judio hide a nagsikap a meturing a awan ti kasalanan tu pamamag-itan nu kássunud de tu Kautusan ay awan nagtagumpay. 32 Bakin awan hide nagtagumpay? Dipo nagtiwala hide tu gimet de sakay awan hide simmampalataya Jesu-Cristo. Nehakpa hide tu bito a kákkehakpaan. 33 Ayun tu nesulat, “Nángdáttonák ti Sion ti essa a bito a kákkesángdulan, essa a bito a kákkehakpaan de. Pero awan mabigu- bigu u manampalataya hide nikuna.”
101 Kákkapatkákka ko hide, u gugusto ko a mangyare sakay u dasal ko tu Diyos ay u kaligtasan nu kalahe ko hide a Judio. 2 Hikán dán u makapangpatunay a magsumikap hide para kasayaan hide nu Diyos, pero male u pángngintendi de. 3 Dipo awan de tukoy ni kodya u pángbilang nu Diyos a awan ti kasalanan u essa a tolay. Nagsikap hide a maggimet ti sadile de a pamamaraan, nan sumunud tu pamamaraan nu Diyos. 4 Dipo awan de tukoy a ti Cristo u katupaden nu Kautusan. Dipo tu ginimet na, u atanan a manampalataya nikuna ay imbilang nu Diyos a awan ti kasalanan. 5 Konna he u insulat ni Moises tungkul tu pngturing nu Diyos a matuwid u essa a tolay ayun tu Kautusan: “U tolay a mangtupad tu atanan nu Kautusan sakay awan magkasala magpakahanggan ay siya u tumanggap ti biyag a gábwat tu Diyos.” 6 Pero bakán a konna hod u gusto a kagiyán nu pángturing nu Diyos tu tolay a matuwid tu pamamag-itan nu pánnampalataya na ni Cristo. Kaya te nesulat a konna he,“Diyan mo kagiyán ti sadile muwe,‘Ti deya u umangay ti langet?’ (u gusto a kagiyán ni iye ay awan kailangan a te umangay ti langet dipo immogsad dán ti Cristo.) 7 Diyan mo be kagiyán a, “Deya beman u umogsad tu lugar nu patay hide. Tánni pasangkayán ti Cristo gábwat tu patay hide.” 8 Pero kinagi nu Kasulatan, “U upos nu Diyos ay adene niko, sakay mágyan dán ti puso moye sakay impahayag dán nu labi- labi moy. (U gusto na a kagiyán ay u upos a impangaral me tungkul tu pánnampalataya.) 9 Ni ipahayag mo a ti Jesus ay Panginoon sakay sumampalataya ka ti buo a puso a biniyag siya a huway nu Diyos, ay maligtas ka. 10 Dipo imbilang nu Diyos a awan ti kasalanan u tolay a sumampalataya nikuna ti buo a puso. Sakay ni ipahayag na a siya ay sumampalataya, maligtas siya. 11 Dipo kinagi na tu Kasulatan, ni deyaman u sumampalataya nikuna ay awan mepasanike. 12 Awan ti pagkakaiba u Judio hide sakay u Hentil hide. Eessa la u Panginoon nu atanan sakay siya u mangatád tu makpal a pagpapala tu atanan a dumulaw nikuna. 13 Dipo kinagi na tu Kasulatan a, “U atanan a umaged tu Diyos ti habag ay hide u kahabagen sakay iligtas na.” 14 Pero kodya hide a dumulaw ni awan be hide sumampalataya nikuna? Sakay kodya hide a sumampalataya ni awan palla hide nakasaneg tungkul nikuna? Sakay kodya hide a makasaneg ni awan ti mangaral? 15 Sakay kodya a makapangaral u deyaman ni awan siya inutusan? Ayun tu Kasulatan, ‘Anya dámben ti ganda a áelingán u pademát hide a magtoldu tu Maganda a Baheta.” 16 Pero awan atanan ay tummanggap tu Maganda a Baheta. Kinagi ngane ni Isaias, “Panginoon, sasangan la u naniwala tu itáttoldu me hide.” 17 Kanya sumampalataya la u tolay ni masaneg na u mensahe tungkul ni Cristo. Sakay makasaneg la siya ni tehhod a mangaral tungkul ni Cristo. 18 Pero u tanung ko, awan palla beman nakasaneg u Israelita hide? Nakasaneg ngane hide! Dipo, te nesulat a konna he, “nasaneg tu atanan a suluk ni munduway u boses de sakay u atanan a kinagi de ay nasaneg tu buo a mundu.” 19 Iye pa u essa ko a tanung: awan beman nakaintendi u bansa a Israel? Tu itod pa ay tinábbeg dán iye ni Moises: “Paseniyán takam tu bakán hide a Israelita. Paiyamután takam dipo ipeta ko u kagbi ko tu tolay hide a awan makatengge nikán.” 20 Sakay buo a tapang a kinagi ni Isaias: “Netanák nu awan hide mangehyok nikán. Nagpakilalaák tu tolay hide a awan magtanung nikán.” 21 Pero tungkul dámman tu Israel, iye u kinagi nu Diyos: “Tu buo a maghapun ay palagiyák a mágdadulawán sakay maguhay tu essa a banuwan a maigát ti pággisipan sakay masássuwayán.”
111 U tanung ko nadid ay: Inadiyan beman nu Diyos u pinile na hide a tolay? Awan! hikán ay Israelita a mismo, gábwat tu lahe ni Abraham sakay kabilang tu lahe ni Benjamin. 2 Awan inadiyan nu Diyos u tolay hide a sapul pa tu sapul ay pinile na dán. Awan moy beman tukoy u kinagi na tu Kasulatan tungkul ni Propeta Elias? Dinumaing siya tu Diyos dipo tu gággimitán nu Israelita hide. 3 U kagi ni Elias ay,“Panginoon, binuno di dán u prupeta mo hide sakay hinábba de u págdasalan me niko. Hikán dálla u nabuhay sakay gustuwák di pa a bunuwán.” 4 Pero ánya u intábbeg nikuna nu Diyos? Awan dipo tehhod palla a nabuhay a pitto a libu a lállake a awan sinumamba tu diyos-diyosan a ti Baal. 5 Konna labe nadid a kasalukuyan, tehhod palla a nabuhay a matapat tu pinile hide nu Diyos, dipo tu habag na. 6 Pinile na hide dipo tu habag na, bakán a dipo tu mágkaganda a gimet de hide, dipo ni tu mágkaganda de a gimet ay awan iye mebilang a habag. 7 Ánya nadid? Awan natanggap nu Israelita hide u gusto de a mebilang hide nu Diyos a matuwid. U pinile na la hide u nakatanggap ti iye, pero u agum ay pinaigát na u puso-puso de. 8 Konna tu nesulat tu Kasulatan, “Ginimet hide nu Diyos a maigát ti pággisipan sakay hanggan nadid ay kumán hide a buhák oni bángngág tu katutuhanan.” 9 Kinagi be ni David tungkul nide: U kasayaan de hide nakwa ay siya u magin kumán a sákwat a mang-ekhot nide dipo iye u máng-angay nide tu kapahamakan, kákkasida nu biyag de sakay parusa nide. 10 Mabuhák nakwa u mata de hide para awan hide maketa sakay nakwa ay magdanas hide ti awan ti kahád a pághirap a konna tu essa a tolay a nagkábbung dán dipo tu dágge nu báklay na. 11 Nesángdul u Judio hide dipo awan hide simmampalataya ni Cristo. U gusto na beman a kagiyán ay tulos dán a mepahamak u Israel? Awan! Pero dipo tu kássuway de ay nagkahod ti pagkakataun u Hentil hide a maligtas. Sakay dipo hod ay sinumene u Judio hide sakay gustuwán di be i kaligtasanan iye. 12 Nadid, ni u kássuway nu Judio hide sakay u awan de págtagumpay a matanggap u kaligtasan ay nakapangatád ti págpapala tu Hentil hide a tu buo a mundu, sakodya pa wád a kadakál u págpapala a meatád ni makompleto dán u buo a bilang nu Judio hide a manampalataya ni Cristo? 13 Nadid, iye dámman u kagiyán ko nikam a bakán hide a Judio. Ginimiták a apostol nu Diyos para nikam, sakay ikarangal ko i tarabahuwan iye. 14 Tu pamamag-itan ni iye ay baka sakale la a mapasene ko u kapareho ko hide a Judio tánni sumampalataya u sangan nide sakay maligtas. 15 Ni u pángpabaya nu Diyos tu Judio hide u nagin dilan tánni sumole nikuna u atanan a tolay ti munduway, awan beman mas lalo a maganda u resulta ni u Judio hide ay huway a tanggapán nu Diyos? Awan beman kumán labe hide a biniyag a huway. 16 Maare tam a mekompara u Judio hide tu essa a tinapay a inyalay nu Judio hide. Ni nakahandug dán tu Diyos u bahagi nu tinapay, konna labe hod u buo a tinapay. Sakay ni nakahandug dán tu Diyos u gimot nu essa a ponan nu kayo, konna labe hod ay kaguman dán u pinge-pinget na hide. 17 U Judio hide ay konna tu essa a ponan nu kayo a olibu a kináttol u sangan tu pinget na hide. Sakay hikam a bakán a Judio ay konna tu pinget hide nu olibu a timmubu tu talon a inkabit bilang kapalit tu kináttol a pinget hide. Kanya nakinabang kam tu págpapala nu Diyos a para tu Judio hide. 18 Pero dyan kam magmadakál a magisip a masmabait kam kasera tu pinget hide a kináttol. Alalahanán moy a pinget kam la, bakán a hikam u mangbiyag tu gimot ni awan u gimot u mangbiyag nikam. 19 Maare a kagiyán moy a,“Kináttol hide para hikame u mekabit.” 20 Tatahoden ina. Kináttol hide dipo awan hide sumampalataya ni Cristo, sakay hikam ay inkabit dipo nanampalataya kam nikuna. Kanya dyan kam magmadakál, nan magkahod kam ti ánteng. 21 Dipo ni nagimet nu Diyos a káttolán u tatahoden a pinget hide, magimet na be a káttolán kam. 22 He tam a ketan u kabaitan nu Diyos sakay ni sakodya siya a kahigpit a maghatul. Mahigpit na a hatulan ti parusa u magkasala hide nikuna. Pero mabait siya nikam ni manatile kam tu kabaitan na, pero ni awan, ay káttulán na kam be. 23 Sakay ni awan magmaigát u Judio hide nan hide ay sumampalataya, ikabit hide a huway tu ponan, dipo kaya iye a gimitán nu Diyos. 24 Dipo ni hikam a pinget nu olibu a timmubu tu talon ay nekabit tu naalagaan a olibu maski ni awan iye karanyuwan a gággimitán, mas magaan a ikabit a huway nu Diyos u pinget hide a kináttol a gábwat tu date na a ponan. 25 Kákkapatkákka ko hide, gusto ko a matukuyan moy u essa a katutuhanan a nadid ko la a ikagi nikam, tánni awan magin mataas u pangisip moy tu sadile moy. U págmaigát nu Judio hide ay pansamantala la, awan habang panahun. Iye ay hanggan a makompleto u bilang nu Hentil hide a manampalataya ni Cristo. 26 Káttapos ni ina, ay maligtas u buo a Israel, konna tu kinagi na tu Kasulatan, “U Tagapagligtas ay gábwat tu banuwan nu Judio hide sakay ibutan na u madukás a gimet tu lahe ni Jacob.” 27 Tu aldew a ibutan ko u kasalanan de, itod dán u katupaden nu pananto ko nide. ” 28 Dipo inadiyan nu Judio hide u Maganda a Baheta, kanya nagin kadima hide nu Diyos tánni hikam a bakán a Judio ay maatádden ti pagkakataun a maligtas. Pero ni u págpile nu Diyos u págguhunan, mahal pade hide nu Diyos dipo tu ninuno de hide. 29 Dipo u Diyos ay awan magbabagu ti isip tu págpile na sakay págpapala. 30 Tu itod, hikam a bakán a Judio ay masássuwayán tu Diyos, pero nadid ay kinahabagan na kam dipo tu kássuway nu Judio hide. 31 Konna labe hod, kagbiyan na u Judio hide maski hide ay masássuwayán, konna tu ginimet na nikam. 32 Kaya atanan a tolay, Judio man oni Hentil, ay pinabayan nu Diyos a manatile hide tu pagkamasássuwayán de para ipeta na nide a atanan u kagbi na. 33 Tunay ti kadakál u kabaitan nu Diyos tu tolay! Awan masukat u karunungan na! Awan tam kaya a intendiyan u plano na sakay pamamaraan! 34 Konna ngane tu kinagi na tu Kasulatan: “ Ti deya wád u makaintendi tu isip nu Panginoon? Ti deya wád u makapangpayo nikuna? ” 35 Ti deya man a tolay ay awan siya ti mepautang tu Diyos para makagi na a te kailangan a bayaden u Diyos nikuna. 36 Dipo u atanan a bagay ay gábwat nikuna, sakay linalang na iye hide tu pamamag-itan na sakay para nikuna. Puriyán u Diyos a magpakahanggan! Amen.
121 Kanya ngane kákkapatkákka ko hide, kinagbiyan kam nu Diyos kaya mákpágguhunák nikam. Nadid a biyag kam palla, iparehu moy u biyag moy tu essa a alay a awan ti kapintasan a iyatád moy tu Diyos para págserbi nikuna mentaras biyag kam. Iye u makapangpasaya nikuna. Sakay iye u tatahoden a págsamba moy nikuna. 2 Dyan moy ahigán u gággimitán nu tolay hide ti munduwan iye. Pabayan moy a baguwán kam nu Diyos tu pamamag-itan nu págbagu na tu isip moy hide, tánni matukuyan moy u kaluuben nu Diyos ni ánya u maganda katanggap-tanggap sakay makasaya nikuna. 3 Dipo tu págpapala a impagkaluub nu Diyos nikán ay piniliyk na para magtoldu tu upos na, kagiyán ko nikam a dyan moy pahalagaan u sadile moy ti mas higit tu nerarapat. Ni awan tenggiyán moy u tunay moy a kakayanan ayun tu pánnampalataya a inyatád nikam nu Diyos. 4 Ni kodya a u bággi ay makpal a parte sakay bawat parte ay tehhod a kanya-kanya a tarabaho, 5 konna labe nikitam a manampalataya. Makpal kitam, pero nabuo kitam tu eessa a bággi ni Cristo, sakay balang essa ay parte nu kada essa. 6 Iba- iba u kakayanan a inyatád nikitam nu Diyos ayun tu habag na, kanya gamitán tam i kaluuban ina hide. Ni u kaluub nu essa a tolay ay págpahayag tu upos nu Diyos, kailangan ipahayag na iye ayun tu pánnampalataya na. 7 Ni u kaluub na ay tumulung tu kapareho, tumulung siya. Ni magtoldu, magtoldu siya, 8 ni págpayo, magpayo siya ti maayus, ni pángngatád, mangatád siya tu maluwag tu kaluuben na, ni pámmuno, mamuno siya ti buo a tiyaga. Sakay ni káttulung tu te kailangan, tumulung siya a tehhod a kasayaan. 9 Magmahalan kam a tehhod a katapatan. Kaiyamutan moy u madukás sakay palagi kam a maggimet ti maganda. 10 Magmahalan kam bilang mátkaka ni Cristo sakay pahalagaan moy u agum higit tu págpahalaga moy tu sadile moy. 11 Dyan kam magin tamad ni awan magpakasipag kam sakay buo a puso a magserbi tu Panginoon. 12 Sakay dipo te pag-asa kam tu biyag magsaya kam. Pagtiisan moy u hirap hide sakay palagi a manalangin. 13 Tulungan moy u kákkapatkákka moy hide a mánnampalataya a te kailangan, sakay patulusán moy u awan hide ti matulusan. 14 Ipagdasal moy tu Diyos a pagpalaán u tolay hide a mangsásseste nikam. Pagpalaán moy hide bakán a sumpaán. 15 Mákpagsaya kam tu masaya hide, sakay mákpaglungkut kam tu malungkut hide. 16 Mabiyag kam ti mapayapa tu balang essa. Dyan kam magmadakál, ni awan mákpággagum kam ti maayus tu mababa hide ti kalagayan a tolay. Dyan kam mágmaru-marunung. 17 Dyan moy gantiyan ti madukás u maggimet hide ti madukás nikam. Magsikap kam a mabiyag ti marangal. 18 Ni maare la nakwa, mákpággagum kam ti mapayapa tu atanan a tolay. 19 Mahal ko hide, dyan kam gumante. Ipaubaya moy ina tu Diyos. Dipo kinagi nu Panginoon tu Kasulatan, “Hikán u gumante, hikán be u magparusa.” 20 Kanya ni magaláp u kadima mo, pakanán mo siya. Ni mauwaw siya, painumán mo siya. Dipo ni gimitán mo iye hide ay mepasanike siya tu sadile na. 21 Dyan kam magpatalo tu madukás ni awan taluwán moy u madukás tu pamamag-itan nu pággimet ti maganda.
131 Magpasakup kam a atanan tu namuno hide tu gubiyerno. Dipo awan ni ti deyaman a tolay a maare a mamuno ni awan impakultad nu Diyos, sakay u karapatan nu essa a mamuno ay gábwat tu Diyos. 2 Kanya u kumalaban tu gubiyerno ay kumalaban tu intatag hide nu Diyos, sakay parusaan na hide. 3 U pinuno hide ay awan dapat a kantingan nu maggimet hide ti maganda. U dapat nide a manteng ay u maggimet hide ti madukás kanya ni gustu mo a awan ka ti kantingan tu namuno hide, gimitán mo u maganda sakay puriyán dika. 4 Dipo u pinuno hide tu banuwan ay tagapagserbi hide nu Diyos para tu kapiyyaan tam. Pero ni maggimet ka ti madukás, dapat ka a manteng dipo tehhod hide a kapangyariyan a mangparusa niko. Hide u tagapagserbi nu Diyos a magparusa tu maggimet hide ti madukás. 5 Kanya magpasakup kam tu gubiyerno, bakán la a tánni maiwasan u parusa ni awan dipo iye u dapat a gimitán. 6 Ina be u dahilan ni bakin magbayad kitam ti buwes. Dipo u pinuno hide ay tagapagserbi nu Diyos sakay inyatád de u buo a panahun tu pángtupad tu tungkulin de. 7 Kanya iyatád moy u dapat a iyatád. Magbayad kam tu buwes moy hide, igalang u dapat a igalang, sakay parangalan u dapat a parangalan. 8 Dyan kam manatile a te sagutin ni deyaman, liban tu sagutin moy a magmahalan. Dipo u magmahal tu kapatkákka na ay mangtupad tu Kautusan. 9 U utus hide a konna tu, “Dyan ka mangilállake oni mangibábbey, dyan ka mamuno, dyan ka magtakaw, dyan mo angkinán u kao nu iba,” sakay u iba pa hide a utus ay nabuo la ti eessa a utus, “Mahalán mo u kapareho mo a konna tu págmahal mo tu sadile mo.” 10 U tolay a magmahal ay awan maggimet ti madukás tu kapareho na. Kanya ni magmahalan kitam ay táttupadán tam u buo a Kautusan. 11 Dapat moy iye a gimitán dipo tukoy moy a odas dán para lumukag kam. Dipo mas adene dán u odas nu kaligtasan tam kasera nikuna a nagsapul kitam a sumampalataya tu Panginoon. 12 Adene dán a lumipas u gibi, sakay magamulaldew dán. Kanya adággen tamon u gimet hide tu kadiklámman sakay isulot tam u maganda a gimet bilang panglaban tam a katoy hide tu demlag. 13 Sakay dipo katoy kitam tu demlag, mabiyag kitam ti marangal. Diyan tamon gimitán u páglasing, u magulo hide a págsaya, dyan kitam mangibábbey oni mangilállake, dyan kitam mákdima, sakay diyan kitam be maiyamut tu agum. 14 Ni awan, ahigán moy u halimbawa nu Panginoon Jesu-Cristo, sakay dyan moy sunudán u makamundu a kagustuwan nu pilas.
141 Nadid, tanggapán moy u kapatkákka moy a mahina ti pánnampalataya sakay dyan kam mákpagtalo tu pánniwala na hide. 2 Halimbawa, tehhod a tolay a maniwala a atanan a pagkain ay maare a kanán. Tehhod be a mahina ti pánnampalataya sakay para nikuna, atong la u dapat a kanán. 3 Awan dapat a sestiyán nu tolay a kuman ti maskin ánya, u tolay a atong la u kanán na. Sakay dyan hatulan nu kuman la ti atong u kuman ti maskin ánya. Dipo hide a duwwa ay pareho la a tanggapán nu Diyos. 4 Ti deya ka a manghatul tu utusan nu iba? U amo na la u makapanghatul nikuna ni tama u gággimitán na oni awan. Sakay magimet na u tama, dipo u Panginoon u mangtulung nikuna. 5 Tehhod a tolay a mángisip a mas mahalaga u essa a aldew kasera tu iba. Te tolay be a pare-pareho la u atanan a aldew para nikuna. U balang essa ay magdisisiyon tu sadile tungkul ti bagayan ina. 6 U tolay a tehhod a pahalagaan a aldew ay pinahalagaan na iye para tu Panginoon. Sakay u tolay be a kuman ti maski ni ánya ay gimitán na iye para tu Panginoon, dipo pasalamatan na u Diyos para tu kanán na. U awan be kuman tu iba a kalase nu pagkain ay gimitán na iye para tu Panginoon sakay magpasalamat be siya tu Diyos. 7 Awan ti essa nikitam a mabiyag oni matay tu sadile na la. 8 Ni hikitam ay mabiyag ay mabiyag kitam para tu Panginoon, sakay ni matay kitam, matay kitam para tu Panginoon. Kanya mabiyag kitam man oni matay ay he kitam tu Panginoon. 9 Iye u dahilan ni bakin natay sakay nabiyag a huway ti Cristo, tánni magin Panginoon siya nu biyag hide sakay nu patay hide. 10 Kanya dyan mo hatulan oni sestiyán u kapatkákka mo ni Cristo. Dipo hikitam a atanan ay umatubang tu Diyos, sakay siya u manghatul ni u ginimet tam ay maganda oni madukás. 11 Dipo nesulat a, “Hikán u Diyos a biyag magpakahanggan, sakay iye u kagiyán ko: U atanan ay lumuhud tu atubang ko, sakay u atanan a tolay ay magpure nikán.” 12 Kanya atanan tam ay managut tu Diyos tu atanan a ginimet tam. 13 Kanya dyan kitamon humatul tu balang essa. Ni awan iwasan tam a maggimet ti ányaman a bagay a magin dahilan nu págkakasala nu kapatkákka tam. 14 Dipo tu pákpágkaessa ko tu Panginoon Jesus, siguraduwák a talaga a awan ti bawal a makan. Pero ni tu akala nu essa a tolay ay bawal u essa a makan, dapat dyan na kanán. 15 Ni masakitan u kapatkákka mo dipo tu kákkanán mo, awan dán ayun tu págmahal u gággimitán mo. Dyan mo ipahamak u kapatkákka mo ni Cristo dipo la tu pagkain, dipo natay ti Cristo para be nikuna. 16 Dyan mo gimitán u ányaman a bagay a imbilang nu iba a madukás maskin para niko ay maganda. 17 Dipo u kahariyan nu Diyos ay awan tungkul tu pagkain oni áinumán, ni awan tungkul tu matuwid a kákkabiyag, maganda a rilasyon tu balang essa, sakay kasayaan a gábwat tu Banal a Ispirito. 18 U magserbi ni Cristo tu konna he a paraan ay makasaya tu Diyos sakay igalang siya nu kapareho na. 19 Kanya pilitán tam a gimitán a palagi u bagay hide a makapangatád ti kapayapaan sakay makapángpatibay tu balang essa. 20 Dyan mo sidaán u pánnampalataya nu agum a inligtas nu Diyos dipo la tu pagkain. Atanan a pagkain ay maare a kanán, pero iye ay madukás ni magkasala u iba dipo tu kákkanán mo. 21 Mas maganda pa u dyan kuman ti karne oni uminom ti alak oni maggimet tu bagay hide a makapangatád ti págkakasala nu kapatkákka mo. 22 Kanya ányaman u pánniwala mo ti bagayan iye hide, hiko dálla sakay u Diyos u dapat a makatukoy. Mapalad u tolay a awan gágguluwán nu konsensiya na dipo tu pággimet na tu bagay hide a tukoy na a tama. 23 Pero u deyaman a kuman a te págduwwa-duwwa ay nagkasala dipo awan ayun tu pánnalig na u gággimitán na. Dipo kasalanan u ányaman a bagay a gimitán tam a awan ayun tu pánniwala tam.
151 Hikitam a mágkabegsák ti pánnampalataya ay dapat a tumulung tu kákkapatkákka hide a mágkahina ti pánnampalataya. Bakán la a u sadile tam a kapiyyaan u dapat tam a isipán, 2 nan u ikaganda be nu agum, tánni mapabegsák be u pánnampalataya de. 3 Maskin ti Cristo ay awan naghangad tu sadile na kapiyyaan, nan ayun tu Kasulatan,“Hikán u timmanggap tu atanan a seste de niko, Panginoon.” 4 U atanan a nesulat tu Kasulatan tu itod pa a panahun ay nesulat para tolduwan na kitam. Sakay tu pamamag-itan nu Kasulatan ay magin matatag kitam tu pánniwala sakay magkahod kitam ti pag-asa. 5 Nakwa u Diyos a mangpatatag sakay mangpabegsk tu pánnampalataya tam u tumulung nikam a mabiyag a te, págkaka-essa bilang tagasunud hide ni Cristo Jesus. 6 Tánni konna hod ay pisan-pisan kam a magpure tu Diyos sakay Ama nu Panginoon tam a ti Jesu-Cristo. 7 Tanggapán moy u balang essa konna tu pángtanggap ni Cristo nikam tánni mapure nu tolay u Diyos. 8 Dipo kagiyán ko nikam a pinaangay nu Diyos ti Cristo ti lutaáy para magserbi tu Judio hide sakay para mepeta na a tapat u Diyos tu pángtupad na tu pananto na hide tu ninuno de hide. 9 Inutusan be ti Cristo tánni mepeta na u kagbi nu Diyos tu bakán hide a Judio, tánni puriyán di be u Diyos. Ayun ngane tu Kasulatan, “Puriyán taka kaguman u awan hide Judio sakay puriyán taka tu kansiyon ko.” 10 Sakay kinagi na pa tu Kasulatan,“Hikam a bakán hide a Judio, mákpagsaya kam tu tolay hide a date a pinile nu Diyos.” 11 Sakay kinagi na pa,“Hikam a atanan a bakán hide a Judio, puriyán moy u Panginoon. Atanan a tolay ay magpure nikuna.” 12 Kinagi be ni Isaias, “Tem meenak tu lahe ni Jesse Para maghare tu bakán hide a Judio, siya u asaan de.” 13 Nakwa u Diyos a mangatád nikitam ti pag-asa ay siya u mangatád nikam ti kasayaan sakay kapayapaan dipo tu pánnampalataya moy nikuna, tánni tulos-tulos a lumagu u pag-asa moy tu pamamag-itan nu Banal a Ispirito. 14 Kákkapatkákka ko hide, maniwalaák a talaga a tunay kam ti kabaitan, te sapat a tukoy sakay marunung a magpaala-alaan tu balang essa. 15 Pero nagsulaták pade tungkul tu bagay hide a dapat a ipaalaala nikam, dipo impagkaluub nu Diyos nikán 16 a magin utusanák ni Jesu-Cristo para tu bakán hide a Judio. magserbiyák tu bakán hide a Judio a konna tu essa a saserdote sakay impangaral nide u Maganda a Baheta nu Diyos. Gimitán ko iye tánni magin alay hide a katanggap-tanggap tu Diyos, a nelaan nikuna tu pamamag-itan nu Banal a Ispirito. 17 Sakay bilang tagapagserbi ni Jesu-Cristo, mepagmadakál ko u nagimet ko hide para tu Diyos. 18 Sakay u ipagmadakál ko a iye ay awan ti iba ni awan u ginimet ni Cristo tu pamamag-itan ko, a naakit ko u bakán hide a Judio a sumunud tu Diyos tu pamamag-itan nu toldu ko hide sakay tu gimet ko hide. 19 Sakay tu pamamag-itan nu makataka-taka hide a bagay tu kapangyariyan nu Banal a Ispirito. Kanya nebaheta ko u Maganda a Baheta tungkul ni Cristo sapul ti Jerusalem hanggan ti Ilirico. 20 U pinakagugusto ko ay mepangaral u Maganda Baheta tu lugar hide a awan palla nepangaral ti Cristo tánni awanák makapangaral tu lugar a tehhod dán a tarabaho a sinapulan nu iba. 21 Kinagi na tu Kasulatan, “Matenggi siya nu awan palla hide nakagiyan tungkul nikuna, sakay makaintendi u awan palla hide nakasaneg tungkul nikuna.” 22 U pángngaral ko tu lugar hide heeh u dahilan ni bakin hanggan nadid ay awanák palla makademát hina nikam. 23 Pero nadid tapus dán u tarabaho ko hide heeh, sakay dipo nalay ku dán a gusto a umangay hina, 24 asaan ko a mamágketa-keta kitam nadid. Tamuwák hina káangay ko ti Ispanya. Sakay tukoy ko a magin masayaák tu pamagketa tam maskin sabadit la a panahun. Asaan ko be a matulunganák moy tu káangay ko ti Ispanya kággábwat ko hina. 25 Pero nadid, kailangan ko pa umangay ti Jerusalem tánni iyangay ko u tulung tu kákkapatkákka hod. 26 Dipo masoh u kákkapatkákka hide ti Macedonia sakay Acaya a magkulekta ti tulung para tu mágkahirap hide a kákkapatkákka ti Jerusalem. 27 Masaya hide a nangatád, sakay dapat la dipo kumán hide a te utang tu Judio hide. Dipo u Hentil hide ay nakabahagi tu págpapala a ispiritwal nu Judio hide, marapat be a tulungan u Judio hide tu pamamag- itan nu págpapala de a pangpilas. 28 Pákkeangay ko tu nakagi a tulung tu kákkapatkákka hide ti Jerusalem, maglakadák a tamo hina nikam baguwák a angay ti Ispanya. 29 Maniwalaák a káddemát ko hina nikam, ay tawed ko u makpal a págpapala para nikam a gábwat ni Cristo. 30 Kanya mákkekagbiyák nikam, kákkapatkákka ko hide, alang-alang tu Panginoon a Jesu-Cristo sakay tu págmahal a gábwat tu Banal a Ispirito, tulungannák moy tu panalangin moy. 31 Ipagdasalák moy a maligtasák tu awan hide mánampalataya ti Judea, sakay masaya a tanggapán nu kákkapatkákka ti Jerusalem u tawed ko a tulung para nide. 32 Tánni konna hod, masayaák a makademát hina nikam ni kaluuben nu Diyos, sakay makaimang hina nikam. 33 Tulungan kam nakwa nu Diyos a mangatád ti kapayapaan. Amen.
161 Nadid, gusto ko a ipatengge nikam u kapatkákka tam a ti Febe. Nagserbi siya tu grupo nu mánnampalataya hide ti Cencrea. 2 Tanggapán moy siya bilang kapatkákka tu Panginoon a konna tu dapat tam a gimitán bilang mátkaka tu Diyos. Tulungan moy siya tu ányaman a kailangan na dipo makpal siya a natulungan sakay essaák dán hod. 3 Ikumustaák moy di Priscila sakay ti Aquila, u katarabahuwan ko hide ni Jesu-Cristo. 4 Intaya de u biyag de dipo nikán. Dakál u utang ko nide, sakay bakán la hikán ni awan pate atanan nu mánnampalataya hide a Hentil. 5 Ikumustaák moy be tu mánnampalataya hide a nagipun-ipun tu bilay de. Ikumustaák moy be tu mahal ko a amigu a ti Epeneto. Siya u dipalongo a nanampalataya ni Jesu-Cristo tu prubinsiya a Asia. 6 Ikumustaák moy be ni Maria, a nagsumikap ti husto para nikam. 7 Ikumustaák moy be di Andronico sakay Junia, u kapareho ko hide a Judio sakay nakaguman ko tu piresuwan. Dipalongo pa hide a nagin kristiyano kasera nikán, sakay tukoy-tukoy hide nu apostol hide. 8 Ikumustaák moy be tu mahal ko a kaibigan tu Panginoon a ti Ampliato. 9 Ikumustaák moy be ni Urbano a kapareho ko a manggagawa ni Cristo, sakay konna be tu mahal ko a amigu a ti Estaquis. 10 Ikumustaák moy be ni Apeles a essa a matapat a magserbi ni Cristo. Ikumustaák moy be tu sabilay ni Aristobulo, 11 tu kapareho ko a Judio a ti Herodion, sakay tu kákkapatkákka tu Panginoon tu sabilay ni Narsiso. 12 Ikumustaák moy di Tripena sakay Triposa a mágkasipag hide a manggagawa nu Panginoon. Ikumustaák moy be tu mahal ko a kaibigan a ti Persida. Dakál u netulung na tu gawain nu Panginoon. 13 Ikumustaák moy be ni Rupo, a essa a mahusay a tagapaserbi nu Panginoon. Ikumustaák mu be tu ina na a kumán ko dán be a ina. 14 Ikumustaák moy be di Asincrito, Flegonte, Hermes, Patrobas, Hermas sakay tu kákkapatkákka hide a kaguman de. 15 Ikumustaák moy be di Filologo, Julia, Nereo sakay tu kapatkákka na a bábbey a ti Olimpas, sakay tu atanan nu kákkapatkákka tu Panginoon a kaguman de hide. 16 Magkumustaan kam bilang mátkaka ni Cristo, tu pamamag-itan nu malinis a ámmo, kákkumustaán kam nu atanan nu mánnampalataya ni Cristo heeh. 17 Kákkapatkákka ko hide, magingat kam tu tolay hide a maggimet ti pamágguru-gurupo nikam sakay manggággulo tu pánnampalataya moy. Magtoldu hide kontara tu adal hide a natanggap moy nikame. Kanya iwasan moy hide. 18 U tolay hide a konna hina ay awan magserbi tu Panginoon Jesu-Cristo, ni awan tu sadile de a hangad. Lállokuwán de la u kulang hide ti karunungan tu pamamag-itan nu mágkagaganda de a pággupos. 19 Nabaheta dán nu atanan u katapatan tu kássunud moy tu Panginoon, sakay masayaák dipo hina. Pero u gusto ko ay magin malalake kam tu bagay hide a maganda sakay awan ti tukoy tu bagay hide a madukás. 20 U Diyos a pinaggábwatan ni kapayapaan ay adene nadán a puksaán u kapangyariyan ni Satanas tu pamamag-itan moy. Pagpalaán kam nu Panginoon Jesus. 21 Ti Timoteo a kaguman ko a magserbi tu Panginoon ay mákkumusta be nikam, sakay di Lucio, Jason sakay ti Sosipatro a kapareho ko hide a Judio. 22 Hikán be ti Tercio a mánampalataya be ay mákkumusta be nikam. Hikán u nagsulat ti iye a sulat ni Pablo. 23 Kákkumustaán kam be ni Gayo. Hikán a ti Pablo ay náktulos tu bilay na, he be a magipun-ipun u mánampalataya he hide. Kákkumustaán kam be ni Erasto a tusurero nu banuwan sakay tu kapatkákka tam a ti Cuarto. 24 [Pagpalaán kam a atanan nu Panginoon tam a ti Jesu-Cristo. Amen.] 25 Sakay nadid, puriyán tam u Diyos a siya u makapangpatibay tu pánnampalataya moy ayun tu Maganda a Baheta a intoldu ko nikam. U Maganda a Baheta a iye ay tungkul ni Jesu-Cristo, a nelihim tu nalay dán a panahun, 26 pero nadid ay nehayag dán tu atanan a tolay tu pamamag-itan nu insulat nu prupeta hide. Iye ay ayun tu utus nu awan ti kamatayan a Diyos, tánni u atanan nu tolay ay manampalataya sakay sumunud nikuna. 27 Puriyán tam u eessa a Diyos u marunung tu atanan. Puriyán tam siya a hangga-hanggan tu pamamag-itan ni Jesu-Cristo! Amen.