Pahayag

Pahayag

¹ Nadid, iye u libro a sássulatan nu pahayag ni Jesu-Cristo tungkul tu bagay hide a adene dán a mangyare. Iye ay kinagi nu Diyos ni Jesu-Cristo para ipatukoy na iye nikitam a tagapagserbi na. Iye ay impahayag na ni Juan tu pamamag-itan nu pinaangay na a anghel. ² Kinagi ni Juan u atanan a netan na tungkul tu impahayag nu Diyos sakay pinatunayan ni Jesu-Cristo. ³ U tolay a mangbasa oni mágsaneg sakay mangtupad tu atanan a nakasuslat ti iye ay pagpalaán nu Diyos! dipo i atananan iye ay adeni dán a mangyare. ⁴ Iye ay gábwat nikán a ti Juan: U sulat ko a iye ay para nikam a pitto a grupo nu mánnampalataya hide ni Cristo a mamaggipun-ipun tu pitto a banuwan ti Asia. Magkahod kam nakwa ti kapayapaan sakay págpapala a gábwat tu Diyos. Diyos tu kasalukuyan, Diyos tu nakalipas, sakay Diyos tu pademát. Sakay gábwat tu Ispirito a te pitto gawain, a katoy tu atubang nu trono na. ⁵ Sakay gábwat be iye ni Jesu-Cristo, u tapat a tistigu, ti bagayan iye hide, u kadipalonguwan a nabiyag a huway, sakay Hare nu atanan a hare ti munduway. Siya ay puriyán tam, dipo tunay a mahal na kitam. Sakay pinalaya na kitam gábwat tu kákkaalipin tam tu kasalanan tam hide tu pamamag-itan nu kákkebuhus nu dige na tu kudus. ⁶ Sinakup na kitam tu kahariyan na, para makaguman na kitam a maghare a kaguman na. Imbilang na kitam be a saserdote a magserbi tu Diyos a Ama. U kapuriyan sakay u kapangyariyan a awan ti kahád ay para la ni Cristo! Amen. ⁷ Tandaan moy! Dumemát siya a huway a napalebutan nu diklam, sakay ketan nu atanan a tolay maski u nangpika hide ni kuna tu wahes na tu itod. Sakay u atanan a tolay ti munduway a awan sumampalataya nikuna ay magsanget dipu tu ánteng de tu págparusa na nide. Talaga a konna he u mangyare! Amen. ⁸ Kinagi nu Panginoon a Diyos, “Hikán u Alpa sakay u Omega.” U Sapul sakay Katapusan nu atanan a bagay.” Siya u Diyos a hoddán hina tu sapul pa, sakay katoy hanggan nadid, sakay hanggan-hanggan. Siya u Diyos a makapangyariyan tu atanan. ⁹ Hikán u kapatkákka moy a ti Juan tu pánnampalataya sakay kaguman moy tu pághirap sakay págtiis a danasán nu kaguman hide tu kaharian nu Diyos dipo tu pákpagkaessa tam ni Cristo. Neangayák tu puduk a Patmos dipo inpakapospos ko u upos nu Diyos sakay u tatahoden a inpahayag ni Jesus. ¹⁰ Sakay mentras a heyák hod, netaun be a aldew tu itod nu pággipun-ipun para sumamba tu Pangioon Jesus, hikan ay inggiya nu Ispiritu nu Diyos sakay nasaneg ko tu áadággen ko u mabegsák a boses a kumán a tánnog ni trumpeta. ¹¹ Kinagi na a, “Isulat mo u atanan a ketan mo, sakay ipatawed mo tu pitto a grupo nu mánnampalataya hide: ti Efeso, Esmirna, Pergamo, Tiatira, Sardis, Filadelfia, sakay ti Laodicea.” ¹² Linumingaták tánni ketan ko ni deya u magupos, tu kállingat ko ay naketaák ti pitto a págdáttonan ti simbuwan a ginto. ¹³ Sakay tu bállog nu simbuwan hide ay te netanák a mágtaknág a kumán a Anak nu Tolay. Nakabadu siya ti malayon a hanggan tu bulong na. Sakay tehhod a baregkás a ginto a umáabadáy tu hakaw na. ¹⁴ U buuk na ay konna tu pudew nu dotdut nu tupa sakay niyebe, sakay u mata na ay kumán a apoy a maggehab. ¹⁵ Magkinang-kinang u tikád na a kumán a tangso a nagdaman ti apoy sakay pinakintab. Sakay u boses na ay kumán a tánnog nu sánnad. ¹⁶ Táttawed na u pitto a biton tu kawanan na a kamát sakay magluwas tu labi na u ispada a magdiliputan ti ngahab. Sakay makasile u hupa na a konna tu mainit a tanghale. ¹⁷ Pákketa ko nikuna ay kumánnák a patay a nalugmuk tu atubang na. Pero intupo na nikán u kawanan na a kamát sakay kinagi na, “Dyan ka manteng! Hikán u Sapul sakay u Katapusan, ¹⁸ sakay Hikán u Biyag. Natayák pero ilingán mo, biyagák nadid sakay awanák dán mata-matay maski nikan. U kamatayan sakay u páppágyanan nu patay ay katoy dán tu disalad nu kapangyariyan ko. ¹⁹ Kanya isulat mo u atanan a netan mo, u mangyare nadid sakay u mangyare palla tu tamuwán. ²⁰ Iye u gusto a kagiyán nu pitto a biton a netan mo a táttawed ko tu kawanan ko a kamát sakay u pitto a págtupuwan ti simbuwan a ginto: u pitto a biton ay u anghel hide nu pitto a gurupo nu mánnampalataya. Sakay u pitto be a págtupuwan ti simbuwan a ginto ay u pitto a gurupo nu mánnampalataya hide.

¹ “Nadid, isulat mo tu anghel nu mánnampalataya hide ti Efeso: Iye u pekagi nu te tatawed tu pitto a biton tu kawanan na a kamát a maglakad tu bállog nu pitto a págtupuwan ti simbuwan a ginto. ² Tukoy ko u gimet moy hide, u pagud sakay u tiyaga moy. Tukoy ko a awan moy kákkonsentiyán u mágkadukás a tolay. Pero pinurbaan moy u magware-ware hide a apostol, kaya napatunayan moy a mágkabule hide. ³ Tukoy ko be a matiyaga kam a nagtiis tu makpal a hirap alang-alang nikán sakay awan moy inadággen u pánnapalataya moy nikán sakay awan kam nanghina. ⁴ Pero tehhodák a essa a bagay a umád nikam: nanglamig dán u págmahal moy nikán a awan konna tu págmahal moy tu purumero. ⁵ Isipán moy u date moy a kalagayan; ni kodyan kam a nanglamig tu pánnampalataya moy. Magsise kamon sakay gimitán moy a huway u date moy a gággimitán tu purumero. Ni awan ka magsise ay angayák hina sakay ibutan ko tu páppágyanan na u simbuwan moy. ⁶ Pero sabi iye i panggustuwan kuwáy nikam: sasala moy be a konna nikán u gággimitán nu Nicolaita hide. ⁷ “Ni makaintendi kam, ay pakasanigán moy u kákkagiyán nu Banal a Ispirito tu gurupo nu mánnampalataya hide. “U magtagumpay ay atádden ko ti karapatan a kuman tu bunga nu kayo a makapangatád ti biyag a katoy tu kahariyan nu Diyos. ” ⁸ “Nadid, isulat mo iye tu anghel nu mánnampalataya hide ti Esmirna: Iye u pekagi nu Sapul ay tu Katapusan, u natay sakay nabiyag a huway. ⁹ Tukoy ko u pagsubuk a dáddanasán mo. Tukoy ko a mahirap kam, pero i tatahodinay ay mayaman kam. Sakay tukoy ko be u pangsássida nikam nu bakán hide a Judio, pero i tahoday ay sakup hide ni Satanas. ¹⁰ Dyan kam manteng tu hirap a adene moy dán a danasán. Tandaan moy: pepireso ni Satanas u sangan nikam bilang pagsubuk; magtiis kam tu alay nu sapulo a aldew. Magtulos-tulos kam la a matapat hanggan tu kamatayan, tánni premyuwan takam ti biyag a awan ti kahád.” ¹¹ “Ni makaintendi kam ay pakasanigán moy u kákkagiyán nu Banal a Ispirito tu gurupo nu mánnampalataya hide! “U magtagumpay ay awan dán makadanas tu kaduwwa a kamatayan. ¹² “Isulat mo tu anghel nu mánnampalataya hide ti Pergamo: Iye u pekagi nu te tatawed tu matalas a ispada a te magdiliputan ti ngahab: ¹³ Tukoy ko a mámmágyan kam tu lugar paghariyan ni Satanas, pero tulos-tulos kam padi a tapat nikán. Awan moy inadággen u pánnampalataya moy. Maski ni binuno ti Antipas, a matapat ko a tagapagserbi ti lugar moye a páppágyanan ni Satanas. ¹⁴ Pero tehhodák a sangan a pangsalaan nikam: tehhod nikam a mangunonod tu toldu ni Balaam. Iye u nangtoldu ni Balak para igiyya na u Israelita hide a magkasala. Kaya kinuman hide tu makan a nealay tu diyos-diyosan hide sakay naggimet ti mágkahalay a gimet. ¹⁵ Tehhod be a sangan nikam a umunonod tu toldu nu Nicolaita hide. ¹⁶ Kaya magsise kamon sakay adággen u kasalanan moy hide! Ta ni awan ay angayák hina a pagdaka sakay labanan ko i tolayan hiden na tu pamamag-itan nu ispada a lumuwas ti labi kuwáy. ¹⁷ “Ni makaintendi kam ay pakasanigán moy u kákkagiyán nu Banal a Ispirito tu gurupo nu mánnampalataya hide! U magtagumpay ay atádden ko tu netagu a manna. Sakay atádden ko siya ti mapudew a bito a sássulatan nu essa a bigu a ngahan a awan ti makatuko-tukoy maliban nikuna.” ¹⁸ “Isulat mo tu anghel nu gurupo nu mánnampalataya hide ti Tiatira: Iye u pekagi nu Anak nu Diyos a tehhod a mata a kumán a maggehab a apoy sakay u tikád na ay kumán a magkinang-kinang a pinakintab a tangso. ¹⁹ Tukoy ko u gimet moy, u págmahal, katapatan, págserbi sakay págtiyaga moy. Tukoy ko a lalo a maganda u gággimitán moy nadid nan tu itod. ²⁰ Pero sabi iye i pangsalaan kuwáy nikam: páppabayan moy la ti Jezebel, u bábbey a magkukunware a prupeta nu Diyos, a tolduwan sakay linlangán u tagapagserbi ko hide a mangibábbey oni mangilállake sakay kuman tu nealay hide tu diyos-diyosan. ²¹ Inatádden ko siya ti pagkakataun para magsise sakay adággen u madukás na a kákkabiyag, pero umád na. ²² Kanya nadid: magkasakit siya ti matindi sakay u nákduhog nikuna. Magdanas hide ti matindi a kahirapan ni awan de pagsisiyan u mágkadukás a gimet de kagunan i bábbiyán itod. ²³ Sakay pati be u immunonod hide tu toldu na ay parusaan ko ti kamatayan tu pamamag-itan nu peste, tánni matukuyan nu atanan a mánnampalataya a hikán u makatukoy tu puso sakay tu isip nu tolay. Premyuwan ko u balang essa nikam ayun tu ginimet moy. ²⁴ Pero u agum hina nikam ti Tiatira a awan nágsaneg tu toldu ni Jezebel, sakay awan summunud tu‘mágkadsalad kan a lihim ni Satanas,’ay awan kudán dagdagen ti dágge. ²⁵ Pero dapat kam a magtulos-tulos a tapat nikán hanggan tu káddemát ko. ²⁶ U magtagumpay sakay sumunud tu kagustuwan ko hanggan ti katapusan ay atádden ko siya ti kapangyariyan a mamahala tu bansa hide, ²⁷ konna tu kapangyariyan a inyatád nikán nu Ama. Sakay pamahalaan na hide tu pamamag-itan nu sahukod a bakal, sakay mogmugán na u bansa hide a konna tu pángmogmog tu banga. ²⁸ Sakay iyatád ko be nikuna u talang umaga a paketan tu tagumpay na. ²⁹ “Ni makaintendi kam ay pakasanigán moy u kákkagiyán nu Banal a Ispirito tu gurupo nu mánnampalataya hide!

¹ Nadid, “Isulat mo iye tu anghel nu mánnampalataya hide ti Sardis: “Iye u pekagi nu tehhod nikuna u pitto a gawain a Ispirito nu Diyos sakay tu pitto a biton. Tukoy ko u gimet moy; tu pangileng ay biyag kam, pero i tahoday ay patay kamon. ² Lumukag kamon, sakay pabegsákkán moy u nawahak nikam a pánnampalataya moy nikán, dipo ni awan ay matuluyan dán a matay. Dipo netan ko a awan palla karapat-dapat u gimet moy hide tu pangileng nu Diyos ko. ³ Kanya ngani, isipán moy u toldu hide a tinanggap moy sakay nasaneg, sunudán moy ina hide sakay pagsisiyan moy u kasalanan moy hide. Ni awan kam lumukag ay angayák hina a konna tu káddemát nu mágtakaw, awan moy matukuyan u odas nu káddemát ko. ⁴ Konna pa man hod ay tehhod a sasangan hina ti Sardis a awan immaheg tu mágkadukás a gimet nu agum kumán, de a iningatan u badu de a malinis, kaya makaguman ko hide a nakabadu ti mapudew dipo karapat-dapat hide. ⁵ U magtagumpay ay pabaduwan be ti mapudew, sakay awan ko ibu-ibutan u ngahan na tu libro nu biyag. Tenggiyán ko siya tu atubang nu Ama ko sakay tu anghel ko hide.” ⁶ “Ni makaintendi kam ay pakasanigán moy u kákkagiyán nu Banal a Ispirito tu gurupo nu mánnampalataya hide! ⁷ “Isulat mo be iye tu anghel nu gurupo nu mánnampalataya hide ti Filadelfia: “Iye u pekagi nu banal sakay u tatahoden, hod nikuna u susi oni kapangyariyan a nagsapul tu pághare ni David. Siya u maghatul ni ti deya u makasaddáp tu kahariyan na, nan awan ti makapángsiradu tu binukasan na, sakay awan ti makapangbukas tu siniraduwan na: ⁸ Tukoy ko u gággimitán moy hide. Tukoy ko a sabadit la u kakayanan moy, pero sinunud moy u toldu ko sakay nagin matapat kam nikán. Nan binukasan ko u pintuwan a sáddáppan moy a awan mesiradu nu maskin ti deya. ⁹ Tandaan moy! Utusan ko u gurupo ni Satanas a mágkabule sakay mapagkunware a Judio, a angay lumuhud tu atubang moy. Sakay hod de a matukuyan a hikam u mahal ko. ¹⁰ Dipo sinunud moy u utus ko a magtiyaga ay ingatan takam be káddemát nu pagsubuk a dumemát tu atanan a tolay ti munduway. ¹¹ Adeniyák dán a sole. Kaya itulos-tulos moy u mágkaganda moy a gimet, tánni awan ti makapang-agew tu piremyo moy a kurona. ¹² U magtagumpay ay ibilang ko a tolay ko magpakahanggan a konna tu adigi tu templo nu Diyos ko dipo mágyan dán siya hod hanggan-hanggan. Isulat ko nikuna u ngahan nu Diyos ko, sakay u ngahan nu banuwan nu Diyos ko. Iye ay u bigu a Jerusalem a sumidung a gábwat tu Diyos ko ti langet. Isulat ko be nikuna u bigu ko a ngahan. ¹³ “Ni makaintendi kam ay pakasanigán moy u kákkagiyán nu Banal a Ispirito tu gurupo nu mánnampalataya hide!” ¹⁴ “Isulat mo be iye tu anghel nu gurupo nu mánnampalataya hide ti Laodicea: “Iye u pekagi nu te ngahan a Amen, u matapat sakay tatahoden a tistigu, sakay siya u pinaggábwatan nu atanan a linalang nu Diyos. ¹⁵ Tukoy ko u gimet moy. Kagi moy a mannampalataya kam pero awan ti patunay. Kumán kam a dinom a awan malamig pero awan be mainit. Masmaganda pa ni malamig kam dálla a lalabba oni mainit! ¹⁶ Dipo maligamgam kam, awan kam mainit oni malamig ay iloktab takam! ¹⁷ Dipo kagi moy a,‘Mayaman kame sakay sagana tu atanan a bagay sakay awan kame dán ti iba a kailangan!’Pero u awan moy tukoy ay lubu-lubus kam sakay kakagbi, mahirap a tahod, eklas, sakay buhák. ¹⁸ Kaya ngani ipayo ko nikam a mamale kam nikán ti puro a ginto tánni yumaman kam. Mamale kam be nikán ti mapudew a badu tánni mabaduwan i eklas moye a bággi, sakay gamot ti mata tánni maketa kam. ¹⁹ Atanan nu mahal ko ay páppasunungán sakay dáddisiplinaan ko. Kaya ngani magsikap kam; magsise kamon sakay adággen u kasalanan moy hide. ²⁰ Tandaan moy, mágtaknággák tu luwas nu pintuwan a makán toktokán. Ni deya man u mangsaneg tu boses ko sakay bukasan na u pintuwan ay sumáddáppák tu bilay na sakay mággatubang kame a kuman. ²¹ U magtagumpay ay paetnudán ko a kasadát nu trono ko. Konna nikán a nagtagumpay, kaya nadid ay mággetnudák tu sadát nama ko tu trono na. ²² “Ni makaintendi kam ay pakasanigán moy u kákkagiyán nu Banal a Ispirito tu gurupo nu mánnampalataya hide!”

¹ Káttapos ni iye ay naketaák ti bumábbukas a pintuwan ti langet. Sakay nasaneg ko a huway u boses a kumán a trumpeta, kinagi na, “Sumangkay ka he ta ipeta ko niko u mangyare tu pademát a panahun.” ² Biglaák a inggiya nu Banal a Ispirito nu Diyos, sakay netan ku hod ti langet u essa a trono a tehhod a essa a mággetnod sakay u mággetnod hod. ³ Sakay u hupa nu mággetnod hod ay magsiláng-siláng a konna tu mágkahalaga a bito a haspe sakay kornalina. Sakay pumáppalebut u balangaw tu trono a kakurol nu bito a esmeralda. ⁴ Nakapalebut bi hod u duwwa a pulo ay ti áppat a trono. Sakay mággetnod hod u duwwa a pulo ay ti áppat a tagapangasiwa a nakasulot ti mágkapudew a badu sakay te manga kurona hide a ginto. ⁵ Te maggábwat a kilat tu trono, kasabay nu galungogung nu kádduh. Sakay tehhod be a pitto a maggehab a simbuwan tu atubang nu trono, iye u Ispirito nu Diyos ate pitto a gawain. ⁶ Tu atubang nu trono ay tehhod a kumán a diget a bubug a tunay ti lekmang a konna tu kristal. Sakay nakapalebut tu bawat kanto nu trono u áppat a linalang a biyag a putat ti mata tu atubang ay tu adág. ⁷ U purumero a linalang a biyag ay kumán a liyon, u kaduwwa ay kumán a baguntao a baka, sakay u katállo ay kumán a hupa ni tolay. Sakay u kaáppat ay kumán a magegbáh a agila. ⁸ Tággánnám u pakpak nu nilalang hide a biyag sakay putat ti mata u bawat essa tu atubang sakay tu adág de. Sakay awan hide ti imang a mágkakansiyonán aldew ay ti gibi ti konna he: “Banal, banal, banal, u Panginoon a Diyos a makapangyariyan tu atanan. U Diyos tu sapul, Diyos nadid sakay Diyos tu pademát.” ⁹ Sakay mentras a mágkansiyon hide ti papure, parangal, sakay pasasalamat tu mággetnod tu trono, a te biyag hanggan-hanggan, ¹⁰ ay limmuhud u duwwa a pulo ay ti áppat a tagapangasiwa tu atubang nu trono. Sakay sinamba de u mággetnod hod, u mabiyag a hanggan-hanggan. Inyalay de u kurona de tu atubang nu trono sakay kinagi de, ¹¹ “Karapat-dapat ka a tumanggap ti papure, pággalang, sakay kapangyariyan, Panginoon me a Diyos; Dipo hiko u nanglalang tu atanan a bagay. Sakay ayun tu kagustuwan mo ay nilalang mo hide sakay pinanatile ti iye.”

¹ Nadid, netan ko u essa a kasulatan a nalukot a táttawed nu mággetnod tu trono tu kawanan na a kamát. Te sulat iye a magdilu-diluputan sakay te pitto a selyo. ² Sakay naketaák ti makapangyariyan a anghel a nagupos ti mabegsák, “Ti deya u karapat-dapat a mangibut tu selyo sakay mangbukas ti nalukutáy a kasulatan?” ³ Pero awan ti maskin essa ti langet oni ti lutaáy oni ti disalad ni lutaáy u makapangbukas oni makapangileng tu lasán nu kasulatan. ⁴ Nágsasangitánnák dipo awan ti ketan a karapat-dapat a mangbukas sakay mangileng tu nakasulat hod. ⁵ Pero kinagi nikán nu essa tu tagapangasiwa hide, “Dyan ka dán magsanget! Ilingán mo, u dáddulawán a Liyon a Lahe ni Juda, sakay apo ni David. Siya u nagtagumpay sakay te karapatan a mangibut tu pitto a selyo sakay mangbukas tu kasulatan a nalukot.” ⁶ Sakay káttapos ay naketaák ti essa a Tupa a mágtaknág tu bállog nu tagapangasiwa hide. Sakay tu trono a napalebutan nu áppat a nilalang a biyag. Tehhod a tanda a nabuno dán iye a Tupa. Tehhod iye a pitto a saduk, sakay pitto a mata, iye u Ispirito nu Diyos a te pitto a gawain a pinaangay na ti buuwáy a mundu. ⁷ Ummadene u Tupa sakay inalap na u nalukot a kasulatan tu kawanan a kamát nu mággetnod tu trono. ⁸ Nikuna a alapán na iye ay limmuhud tu atubang nu Tupa u áppat a linalang a biyag sakay u duwwa a pulo ay ti áppat a tagapangasiwa. Bawat essa ay tehhod a táttawed a alpa sakay tehhod a ginto a malukung a putat ti insenso. Saiye u dasal nu tolay hide nu Diyos. ⁹ Sakay mágkansiyon hide ti bigu a kansiyon, “Hiko u karapat-dapat a mangalap tu kasulatan a nalukot. Sakay mangibut tu selyo na hide. Dipo nabuno ka sakay tu pamamag-itan nu digi mo, ay tinubus mo para tu Diyos u atanan a tolay, gábwat tu kada lahe, upos, nanuwan, sakay bansa. ¹⁰ Sakay pinagin hare mo hide sakay saserdote para magserbi tu Diyos. Sakay maghare hide ti lutaáy.” ¹¹ Immilingák a huway sakay nasaneg ko u boses nu linibu-libu sakay minilyon-milyon a anghel. Nakapalebut hide tu trono, tu áppat a nilalang a biyag sakay tu tagapangasiwa hide. ¹² Mágkansiyon hide ti mabegsák: “U Tupa a binuno ay karapat-dapat a tumanggap ti kapangyariyan, kayamanan, karunungan, sakay begsák, karangalan, papuri sakay pággalang.” ¹³ Sakay nasaneg ko a mamágkansiyonan u atanan a linalang a katoy ti langet, ti lutaáy, disalad ni lutaáy, sakay u katoy hide tu diget ti konna he: “Iyatád tu mággetnod tu trono sakay tu Tupa u kapuriyan, karangalan, kadakilaan sakay kapangyariyan a awan ti kahád!” ¹⁴ Tummábbeg u áppat a linalang a biyag ti, “Amen!” Sakay limmuhud u atanan nu tagapangasiwa hide sakay sinumamba tu Diyos sakay tu Tupa.

¹ Nadid, áelingán ko nikuna a ibutan nu Tupa u essa tu pitto a selyo. Sakay nasaneg ko a nagupos, a kasimbegsák nu kádduh, u essa tu áppat a linalang a biyag, kinagi na, “Karon he!” ² Sakay káileng ko ay naketaák ti kabayo a mapudew sakay u mágkabayo ay te tatawed a pana. Inatádden siya ti kurona sakay limmakad tán mákpaglaban sakay tulos-tulos a magtagumpay. ³ Nikuna ibutan nu Tupa u kaduwwa a selyo ay nasaneg ko a kinagi nu kaduwwa a linalang a, “Karon he!” ⁴ Sakay naketaák dámman ti essa a kabayo a madideg. U mágkabayo ay inatádden ti kapangyariyan a magpasapul ti gera ti lutaáy tánni mamágbunuwan u tolay hide. Sakay inatádden siya ti dakál a ispada. ⁵ Nikuna a ibutan nu Tupa u katállo a selyo ay nasaneg ko a kinagi nu katállo a linalang a biyag, “Karon he!”Sakay naketaák ti kabayo a mangitet, u mágkabayo hod ay te táttawed a timbangan. ⁶ Sakay te nasanigák a kumán a boses a gábwat tu páppágyanan nu áppat a linalang a biyag. Kinagi na, “Essa la a takal a trigo oni tállo a takal a sebada i mabaliyay nu saldew a hornal. Pero dyan sidaán u olibu sakay u ubas para te magimet a langis sakay alak!” ⁷ Nikuna ibutan nu Tupa u kaáppat a selyo ay nasaneg ko a kinagi nu kaáppat a linalang a biyag a, “Karon he!” ⁸ Sakay naketaák ti malabut a kabayo. U ngahan nu mágkabayo hod ay Kákkatay, a áunonudán nu Hades. Sakay naatádden hide ti kapangyariyan tu kaáppat a bahagi ti lutaáy a mamuno tu pamamag-itan nu ispada, alap, saket sakay mágkatapang a hayup. ⁹ Nikuna a ibutan nu Tupa u kalimma a selyo ay netan ko tu sahok nu altar u kaliduwa nu binábbuno hide dipo tu kássunud de tu upos nu Diyos sakay tu matapat de a págpatunay he. ¹⁰ Makán pákhawán hide ti mabegsak, “Panginoon a Makapangyariyan, banal sakay tatahoden! Hanggan nikan kame pa a maguhay bagu mo a hatulan sakay parusaan u tolay hide a nangbuno nikame?” ¹¹ Kaya inatádden ti mágkapudew a badu u balang essa nide. Sakay kinagiyan hide a umimang pa ti sabadit a panahun, hanggan makompleto u bilang nu kákkapatkákka de hide sakay kakagumanan tu págserbi ni Cristo, a bunuwán be a konna nide. ¹² Nikuna a ibutan nu Tupa u kaánnám a selyo ay naglinog ti tunay a begsák. Nagdiham u aldew a konna tu damit a pangluksa sakay dimmideg u bulan a konna tu dige. ¹³ Sakay minágkatákneg u biton hide ti lutaáy a konna tu kákkatákneg nu butáng hide nu kayo a igus ni sabáddán nu mabegsák a pahás. ¹⁴ Nawan u langet a konna tu kasulatan a bigla a nalukot. Sakay u buked ay tu puduk ay neagton gábwat tu date de a págyanan. ¹⁵ Nadid, u hare hide ti munduwáy sakay u gubernador hide, u heneral hide, u mágkayaman, u tehhod hide a kapangyariyan sakay u atanan a tolay, malaya oni alipin ay tumagu tu kuwe-kuweba sakay tu pag-itan nu bito-bito hide tu buked. ¹⁶ Sakay kinagi de tu buked hide sakay tu bito hide, “Tapuhan moy kame tánni awan kame ketan nu mággetnod tu trono, sakay tánni awan mi dán madanas u iyamut nu Tupa! ¹⁷ Dipo dummemát dán u aldew nu págparusa de tu tolay hide sakay awan ti makaligtas tu iyamut de!”

¹ Káttapos ni iye ay netan ko u áppat a anghel a mágtaknág tu áppat a suluk ni munduway. Pugáddán de u pahás, tánni awan ti bumugso ti lutaáy, tu diget, oni tu ánya man a kayo. ² Sakay naketaák ti essa pa a anghel a naggábwat ti sikatan, tawed na u págmarka nu Diyos a biyag. Pinákhawan na u áppat a anghel a inatádden nu Diyos ti kapangyariyan a mangsida tu luta ay tu diget. ³ Kinagi na, “Dyan moy palla sidaán u luta, u diget, sakay u kakayowan. Mentaras awan tam palla namarkaan u kidáp nu tagapagserbi hide nu Diyos.” ⁴ Sakay nasaneg ko u bilang nu namarkaan-144,000 a gábwat tu sapulo ay ti duwwa a lahe ni Israel: ⁵ tu lahe ni Juda ay 12,000, tu lahe ni Ruben ay 12,000, tu lahe ni Gad ay 12,000, ⁶ tu lahe ni Aser ay 12,000, tu lahe ni Neftali ay 12,000, tu lahe ni Manases ay 12,000, ⁷ tu lahe ni Simeon ay 12,000, tu lahe ni Levi ay 12,000, tu lahe ni Isacar ay 12,000, ⁸ tu lahe ni Zabulon ay 12,000, tu lahe ni Jose ay 12,000, tu lahe ni Benjamin ay 12,000. ⁹ Káttapos ni iye ay netan ko u tunay ti kakpal a tolay a maskin deya ay awan ti makabilang! Gábwat hide tu bawat bansa, lahe, banuwan, sakay bawat upos. Mágtaknág hide tu atubang nu trono sakay nu Tupa, a nakabadu ti mapudew sakay te táttawed a palaspas. ¹⁰ Sakay kinagi de ti mabegsák, “U kaligtasan ay gábwat tu Diyos tam a mággetnod ti trono we, sakay konna bi hod tu Tupa!” ¹¹ Timmaknág u atanan a anghel tu palebut nu trono sakay u tagapangasiwa hide pate u áppat a linalang a biyag. Dummapa hide tu atubang nu trono sakay summamba tu Diyos. ¹² Kinagi de, “Amen! U Diyos tam ay karapat-dapat a puriyán, sambaán, pasalamatan sakay parangalan. Hod nikuna u kadakilaan, karunungan, kapangyariyan, sakay begsák. Puriyán siya hanggan-hanggan! Amen!” ¹³ Tinanungák nu essa tu tagapangasiwa hide, “Deya i nakabaduwe hide ti mapudew, sakay hádya hide a naggábwat?” ¹⁴ Timmábbegák, “Awan ku ben tukoy. Hiko i makatukuyay.” Kaya kinagi na nikán, “Hide u nagtagumpay tu mahigpit a hirap. Mapudew dán nadid u badu de kumán a linabaan tu dige nu Tupa. ¹⁵ Kaya ina i dahilanay ni bakin katoy hide tu atubang nu trono nu Diyos, para magserbi nikuna aldew ay gibi tu templo. Sakay u mággetnod tu trono u magalaga nide. ¹⁶ Awan dán hide magala-aláp oni mauwa-uwaw; awan dán hide makagkag tu aldew oni mapase tu ánya man a matindi a init. ¹⁷ Dipo u Tupa a katoy tu bállog nu trono u magin tagapag-alaga de. Iyangay na hide tu bukal a makapangatád ti biyag; sakay pahidán nu Diyos u luwa tu mata de, dipo awan dán ti dahilan para malungkut hide.”

¹ Nadid, nikuna a ibutan nu Tupa u kapitto a selyo ay awan ti hehaw ti langet tu alay nu kahalate a odas. ² Káttapos ay netan ko u pitto a anghel a mágtaknág tu atubang nu Diyos. Sakay u balang essa nide ay inatádden ti trumpeta. ³ Sakay te essa pa a anghel u dummemát sakay angay timmaknág tu atubang nu altar. Te tatawed siya a ginto a malukung a págtutudan ti insenso. Inatádden siya ti makpal a insenso para iyalay tu ginto a altar tu atubang nu trono, kaguman nu dasal nu atanan a pinile nu Diyos. ⁴ U asok a gábwat tu págtutudan ti insenso a táttawidan nu anghel ay immontok a patamo tu atubang nu Diyos, kasabay nu dasal nu pinile hide nu Diyos. ⁵ Káttapos ay nangalap u anghel ti genggeng tu altar sakay indátton na tu págtutudan ti insenso, tulos na a imbudas tu luta. Pagdaka a nagkádduh, te galungogung, nagkilat, sakay naglinog. ⁶ Nadid, himmanda dán u pitto a anghel para patánnugán u trumpeta de hide. ⁷ Nikuna patánnugán nu purumero a anghel u trumpeta na ay naguden tu luta ti iyelo sakay apoy a te kahalo a dige. Kaya natutod u katállo a parte ni lutaáy, u katállo a parte nu kakayowan, sakay u atanan a lamon. ⁸ Nikuna a patánnugán nu kaduwwa a anghel u trumpeta na ay timmáppel tu diget u kumán a dakál a buked a magapoy-apoy, kaya u katállo a parte nu diget ay nagin dige. ⁹ Sakay minágkatay u katállo a parte nu tehhod hide a biyag a katoy hod, sakay minágkasida u katállo a parte nu atanan a kalase a barko a katoy tu diget. ¹⁰ Nikuna a patánnugán nu katállo a anghel u trumpeta na ay natákneg u tunay ti kadakál a biton ti langet a mágganga-gangat a kumán a simbuwan, sakay timmáppel tu katállo a parte nu konayan hide sakay tu bukal hide. ¹¹ U ngahan ni bitonan itod ay tuble. U katállo a parte nu dinom ay nadáttonan ti tuble kanya makpal a nágkatay a tolay nikuna mainom di itod. ¹² Nikuna patánnugán nu kaáppat a anghel u trumpeta na ay nasida u katállo a parte nu aldew, bulan, sakay u biton hide, kaya nawan u katállo a parte a demlag de. Dinumiham u katállo a parte nu aldew, sakay konna bi hod u katállo a parte nu gibi. ¹³ Káttapos ni itod ay naketaák ti agila a magegbáh tu kalawakan sakay nasaneg ko a makán pákhawán, “Makaánteng i mangyariyay tu katoy hide ti munduway, ni patánnugán dán nu tállo pa a anghel u trumpeta de hide!”

¹ Nadid, nikuna a patánnugán nu kalimma a anghel u trumpeta na ay áelingán ko a natápduk ti lutaáy u essa a biton a gábwat ti langet. Sakay neatád nikuna u suse nu ganáb nu ábbut a tunay ti kadsalad. ² Nikuna a bukasan nu biton u ábbut a tunay ti kadsalad ay limmuwas u asok a tunay a bagál a kumán a asok nu makpál a nagtutudan. Kaya nagdiham u aldew sakay u panganurin dipo natakáppan tu asok. ³ Minagluwasan u haksa hide tu asok sakay kimmalat ti lutaáy. Sakay naatádden hide ti kapangyariyan a magpasaket, a konna tu kamandág nu ánnepet. ⁴ Pero nakagiyan hide a dyan de sidaán u lamu-lamon oni u ánya man a mula sakay u kakayowan hide. Nan u tolay la hide a awan ti marka nu Diyos tu kidáp u pasakitan de. ⁵ Pero awan de maare a bunuwán u tolay hide, nan pahirapan di la hide tu limma a bulan. U kamandag nu kaget de ay kumán a kaget ni ánnepet. ⁶ Sakay ti itona a panahun ay ehyukán nu tolay u kamatayan, pero awan hide mata-matay. Gustuwán de a matay, pero adeyuwan hide nu kákkatay. ⁷ U haksa hide ay kumán a kabayo a nakahanda dán tu labanan. Kumán hide a te manga kurona a ginto sakay konna tu hupa nu tolay u hupa de. ⁸ Kumán a malayon a buuk ni bábbey u buuk de, sakay kumán a ngipán ni liyon u ngipán de. ⁹ U hakaw de ay te takáp a kumán a baluti a bakal, sakay u tánnog nu pakpak de ay kumán a damák-damák nu makpal a karwahe sakay kabayo a pasugud tu labanan. ¹⁰ U ipos de ay te tibu a konna tu ánnepet. Sakay katoy hod u kapangyariyan de a magpasaket tu tolay hide alay nu limma a bulan. ¹¹ U hare de ay u anghel a mágbantay tu ábbut a tunay ti kadsalad. U ngahan na tu upos a Hebreo ay Abadon, sakay ti Griego ay Apolion; u gusto na a kagiyán ay Tagapagsida. ¹² Limmipas dán u purumero a makaánteng a hirap; pero tehhod pa a pademát a duwwa! ¹³ Nadid, pinatánnog nu kaánnám a anghel u trumpeta na sakay nasaneg ko u boses a gábwat tu áppat a suluk nu altar a ginto a katoy tu atubang nu Diyos. ¹⁴ Kinagi na tu kaánnám a anghel a te trumpeta, “Okbisan mu dán u áppat a anghel a nakagapus tu gibis nu dinom a Eufrates.” ¹⁵ Kaya u áppat a anghel a nelaan para ti iye a odas, aldew, bulan sakay taon ay pinalaya tánni bunuwán de u katállo a parte nu atanan a tolay ti munduwáy. ¹⁶ U nasaneg ko a bilang nu sundalo hide a nakakabayo ay 200,000,000. ¹⁷ Sakay netan ko tu pamamag-itan nu pangitain u kabayo hide sakay u mágkabayo hide. U mágkabayo hide ay tehhod a baluti a madideg a kakulor nu apoy, asul a kumán a bito safiro, sakay madilaw a kumán a asupre. Kumán a ulo ni liyon u ulo nu kabayo hide, sakay tehhod a magluwas tu labi de a apoy, asok, sakay asupre. ¹⁸ U tállo a salut a nangbuno tu katállo a parte nu katolayan ti munduway ay u apoy, asok, sakay u asupre a gábwat tu labi de. ¹⁹ U kapangyariyan nu kabayo hide ay katoy tu labi de sakay tu ipos de. U ipos de hide ay tehhod a ulo a kumán a biklat, iye u gamitán de a pangpasaket tu tolay hide. ²⁰ Pero u tolay hide a awan natay ti iye hide a salut ay awan padi nagsise. Awan hide immadág sakay ummimang tu págsamba de tu dimonyo sakay tu diyos-diyosan a ginággimet di la be. Iye hide ay gimet tu ginto, pilak, tangso, bito, sakay kayo, a awan maketa, makasaneg, oni makalakad. ²¹ Awan di be ngane pinagsisiyan u pámmuno, págdipoh, u pángngibábbey oni pángngilállake oni págtakaw de.

¹ Nadid, kállipas ni iye ay naketaák dámman ti essa a makapangyariyan a anghel a gábwat ti langet. Nabalutan siya ti diklám sakay tehhod a balangaw tu ulo na. Magdemlag a kumán a aldew u hupa na, sakay kumán a adigi a apoy u tika-tikád na. ² Tehhod siya a táttawed a nakabukas a badit a kasulatan. Sakay u kawanan na a tikád ay inggemmák na tu diget, sakay u kawihe ay tu luta. ³ Sakay pimmákhaw siya, u boses na ay kumán a tagguwang ni liyon. Tinábbeg siya nu pitto a kádduh. ⁴ Isulat ku dán nakwa u nasaneg ko káttapos nu kádduh, pero te boses a gábwat ti langet a nagupos, “Ilihim mo u kinagi nu pitto a kádduh, dyan mo isulat!” ⁵ Sakay netan ko u anghel a gumággemmak tu diget sakay tu luta a inyontok na u kawanan na a kamát ti langet. ⁶ Sakay nanumpa tu ngahan nu Diyos a te biyag a awan ti kahád, a nanglalang tu langet, tu luta, tu diget, sakay tu atanan a katoy hod. Kinagi nu anghel, “Awan dán magmalay! ⁷ Ni patánnugán dán nu kapitto a anghel u trumpeta na ay igimet dán nu Diyos u lihim na a plano, konna tu impahayag na tu tagapagserbi na hide a prupeta.” ⁸ Káttapos ay kinauhunák a huway nu boses a nasaneg ko a gábwat ti langet. Kinagi na, “Umadene ka ti anghele a gumággemmak ti digete sakay ti lutae sakay alapán mo i táttawed nae a kasulatan a nakabukas.” ⁹ Kaya immadeniyák tu anghel sakay inaged ko u kasulatan. Kinagi na nikán, “Alapán mo sakay kanán mo; mapet ina ti gusok muwe, pero matam-is ina a konna tu pitukan ti labi muwe.” ¹⁰ Kaya inalap ko u kasulatan tu kamát na sakay kinan. Matam-is ngani a tahod tu labi ko a konna tu bisa nu pitukan, pero nikuna metállán ku dán ay pinumet u gusok ko. ¹¹ Sakay kinagi na nikán, “Kailangan a ipakapospos mo huway u pahayag nu Diyos tungkul tu iba-iba a tolay, bansa, upos, sakay tu hare hide.”

¹ Nadid, káttapos ay inatáddinák ti págsukat a kumán a sahukod sakay te nagkagi nikán a, “Tumaknág ka ta angay mo sukatán u templo nu Diyos sakay u altar. Sakay bilangán mo u magsamba hod hide. ² Pero dyan mu dán sukatán u laguwerta nu templo, dipo neatád dán itod tu tolay hide a awan tumenggi tu Diyos. Awan de igalang u Banal a Banuwan tu alay nu áppat a pulo ay ti duwwa a bulan. ³ Paangayán ko hod u duwwa ko a tistigu a nakabadu ti pangluksa sakay ipahayag de u upos nu Diyos tu alay nu 1,260 a aldew.” ⁴ I duwwaán iye a tistigu ay konna tu duwwa a ponan a olibo oni u duwwa a págdáttonan ti simbuwan a katoy tu atubang nu Diyos a Panginoon nu atanan a katoy ti lutaáy. ⁵ Ni tehhod a mangpasaket nide ay te magluwas a apoy tu labi de a mangtutod tu kadima de hide. Konna hina u kákkatay nu deya man a mangpasaket nide. ⁶ Te kapangyariyan hide a mangpugád tu uden mentaras a magpahayag hide tu upos nu Diyos. Te kapangyariyan be hide a pagin digiyán u dinom, sakay mangpademát ti salut tu tolay hide maski ánya man a odas a gustuwán de. ⁷ Sakay káttapos de a magbaheta tu upos nu Diyos ay umawas tu ábbut a tunay ti kadsalad u essa a makaánteng a hayup sakay mákpaglaban nide. Matalo hide sakay mabuno nu hayup. ⁸ U bangkay de hide ay kapayad-payad tu karsada nu tanyag a banuwan a nepakuwan nu Panginoon de tu itod. Ngángngahanan de iye a Sodoma sakay Egipto pero bakan iye u tatahoden a ngahan na. ⁹ Tu alay nu tállo a aldew ay ti kalahate, u bangkay di hide ay áilingán nu katolayan a gábwat tu iba-iba a lahe, tribu, upos, sakay awan ti maski deyaman a payagen a mánglábbáng ti bangkayan itod hide. ¹⁰ Magsaya a tahod u atanan a tolay ti munduwáy dipo tu kákkatay ni duwwaan iye. Mamággatádden hide ti rigalo dipo tu kasayaan de, dipo i duwwaan iye a prupeta u nangatád nide ti dakál a kahirapan. ¹¹ Pero kállipas nu tállo ay ti kalahate a aldew ay biniyag hide a huway nu Diyos, sakay timmaknág hide. Kaya konna dálla hod u ánteng nu naketa hide nide. ¹² Káttapos ay nasaneg de a nagupos u tunay a begsák a boses a gábwat ti langet, “Sumangkay kam he!”Summangkay ngane hide ti langet a nakasakay tu panganurin mentaras a umáeleng nide u kadima de hide. ¹³ Naglinog ti tunay a begsák ti itod be a odas. Nasida u kasapulo a parte nu banuwan, sakay pitto a libu a tolay u natay. Mineántingan u nabuhay hide a tolay, kaya tinengge de u kadakilaan sakay kapangyariyan nu Diyos ti langet. ¹⁴ Limmipas dán u kaduwwa a makaánteng a pangyayare, pero dumáddadedemát dán u katállo. ¹⁵ Nikuna patánnugán dán nu kapitto a anghel u trumpeta na ay tehhod a mágkabegsák a boses a gábwat ti langet a nagupos, “U pághare ti munduwáy ay neagton dán tu Panginoon tam sakay ni Cristo. Maghare siya hanggan-hanggan” ¹⁶ Sakay u duwapulo ay ti áppat a tagapangasiwa a mággetnod tu trono de hide tu atubang nu Diyos ay dimmapa sakay summamba nikuna. ¹⁷ Kinagi de: “Panginoon a Diyos a Makapangyariyan tu atanan, Diyos tu kasalukuyan, sakay Diyos tu nakalipas. Magpasalamat kami niko dipo ginamit mo dán u kapangyariyan mo a awan ti kahád. Sakay magsapul ka dán a maghare! ¹⁸ Maiyamut a tahod u tolay hide a awan tumenggi niko. Dipo dimmemát dán u odas para parusaan mo hide. Odas dán para hatulan mo u patay hide, sakay atádden ti piremyo u tagapagserbi mo hide, a prupeta, u mannampalataya hide, sakay tu atanan a te ánteng niko, mataas man ay ti mababa. Odas dán para puksaán mo u nagpahirap tu tolay hide ti munduway.” ¹⁹ Nabukasan u templo nu Diyos ti langet kaya áelingán u Kaban nu Kasunduwan tu disalad nu templo. Sakay káttapos ay nagkilat sakay nagkádduh. Masaneg be u mágkabegsák a hehaw, sakay maglinog be, sakay maguden ti iyelo.

¹ Nadid, káttapos ni iye ay tehhod a limmitaw ti langet a makataka-taka a senyal: essa a bábbey a nabaduwan ti aldew sakay gumággemmak tu bulan; sakay tehhod a kurona a sapulo ay ti duwwa a biton. ² Paghilaban dán siya kaya mamákhaw tu saket a bábbatiyán na. ³ Sakay tehhod pa a essa a senyal a limmitaw ti langet: essa a dragon a madideg. Tehhod siya a pitto a ulo sakay sapulo a saduk sakay tehhod a kurona u bawat ulo na. ⁴ Kinahed nu ipos na u katállo a parte nu biton hide ti langet sakay insapwag na itod ti lutaáy. Káttapos ay timmaknág siya tu áoyadan nu bábbey a adene dán a magenak tánni itálmok na u anak tu kálluwas na. ⁵ Nagenak u bábbey ti lállake a anak, pero tehhod a nangagew tu anak sakay inyangay na tu Diyos, tu trono na. Iye a anak u netakda a maghare tu atanan a bansa tu pamamag-itan nu sahukod a bakal. ⁶ Sakay u bábbey ay gimminan tu parang, tu lugar a inhanda nu Diyos para nikuna. Para maalagaan siya hod tu alay nu essa a libu sakay duwwadatos ay ti ánnam a pulo a aldew. ⁷ Káttapos ni itod ay nagkahod ti gera ti langet! Di Arkanghel Miguel sakay u anghel na hide ay nákpaglaban tu dragon sakay tu nasakupan na hide. ⁸ Pero natalo u dragon sakay u nasakupan na hide, kaya pinalayas hide ti langet. ⁹ U dragon, a dáddulawán be a biklat tu itod a panahun, u ngahan na ay Diyablo oni Satanas. Siya u nangdaya ti buuwáy a mundu. Imbut siya ti munduway, kaguman u nasakupan na hide. ¹⁰ Sakay nasaneg ko u mabegsák a boses a gábwat ti langet, kinagi na, “Dimmemát dán u págligtas nu Diyos tam! Impeta na dán u kapangyariyan na bilang hare! Sakay impeta dán ni Cristo u karapatan na a mamuno! Dipo napalayas dán ti langet u mángkákkaso ti aldew ay ti gibi tu kákkapatkákka tam. ¹¹ Tinalo de u Diyablo tu pamamag-itan nu dige nu Tupa, sakay tu upos nu Diyos a impahayag de sakay awan hide nanghinayang tu biyag de maski hanggan tu kákkatay. ¹² Kaya magsaya kam, hikam a mágyan ti langet! Pero makaánteng i danasán moyay, hikam a mágyan tu luta sakay tu diget! Dipo u matindi a iyamut nu Diyablo ay meangay nikam. Dipo tukoy na a awan dán siya magmalay.” ¹³ Nikuna ketan nu dragon a nebut dán siya ti lutaáy ay hinagad na u bábbey a náng-enak tu lállake a anak. ¹⁴ Pero naatádden u bábbey ti pakpak a konna tu dakál a agila tánni makaegbáh a patamo tu parang. Hod siya a alagaan tu alay nu tállo a taon ay ti kalahate tánni awan siya maaánya nu biklat. ¹⁵ Kanya náng-obla ti dinom u biklat a konna tu konayan tánni meanod u bábbey. ¹⁶ Pero ginumángngak u luta sakay sinánghop u dinom a inyobla nu dragon kaya naligtas u bábbey. ¹⁷ Dipo tu iyamut nu dragon ay binalingan na a geraán u nabuhay a lahe nu bábbey. Iye u tolay hide a sumássunud tu utus nu Diyos sakay nagtulos-tulos a nagin tapat tu tatahoden a inhayag ni Jesus. ¹⁸ Nadid, tummaknág tu bihebi nu diget u dragon.

¹ Nadid, naketaák ti makaánteng a hayup a immawas tu diget, tehhod siya a pitto a ulo sakay sapulo a saduk. Tehhod a kurona u bawat saduk, sakay tu bawat ulo ay te nakasulat a ngahan a mang-insulto tu Diyos. ² U hayup a netan ko ay kumán a idsura ni leopardo, u tika-tikád na ay kumán a tikád ni oso sakay u labi na ay kumán a labi ni liyon. Inyatád nu dragon nikuna u kapangyariyan na, u trono na, sakay u malawak na a karapatan a mamuno. ³ U essa tu ulo hide nu makaánteng a hayup ay tehhod a talingo a ngahe-ngahe na dán a katayan, pero nagpiyya itod. Kanya himmanga u atanan a tolay ti munduwáy tu nangyare kaya simmunud hide nikuna. ⁴ Sinamba nu atanan a tolay u dragon dipo inyatád na u kapangyariyan na tu makaánteng a hayup. Sakay sinamba di be u makaánteng a hayup kinagi de, “Deya makapangpantayay tu makaánteng a hayup? Deya makakayaay a lumaban nikuna?” ⁵ Pinayagan a maghambug u makaánteng a hayup sakay makapag-insulto tu Diyos, sakay maghare tu alay nu áppat a pulo ay ti duwwa a bulan. ⁶ Ininsulto na ngane u Diyos, u ngahan nu Diyos, u páppágyanan nu Diyos, sakay u atanan a katoy ti langet. ⁷ Pinayagan be siya a geraán sakay taluwán u pinile hide nu Diyos. Sakay inatádden siya ti kapangyariyan a mamuno tu atanan a tolay ti munduwáy, tu bawat lahe, banuwan, upos sakay bansa. ⁸ Sakay u atanan a tolay a katoy ti lutaáy ay sumamba nikuna, puwera la tu tolay hide a nakasulat u ngahan de tu libro nu biyag sapul pa nikuna a lalangán i munduway. I libruwan iye ay táttawed nu Tupa a binuno. ⁹ “Ni makaintndi kam ay mágsaneg kam! ¹⁰ Ni deyaman u netakda a madakáp ay sadya a madakáp; sakay ni deyaman u netakda a matay ti áttak ay sadya a matay ti áttak. Kaya kailangan a magpakatatag sakay manalig u pinile hide nu Diyos.” ¹¹ Sakay naketaák dámman ti essa pa a makaánteng a hayup a limmitaw tu luta. Tehhod iye a duwwa a saduk a konna tu saduk nu tupa, pero u boses na ay kumán a boses nu dragon. ¹² Ginamit na u atanan a kapangyariyan nu purumero a makaánteng a hayup tánni ipatupad u kagustuwan na hide. U atanan a tolay ti munduwáy ay pinilit na a sumamba tu purumero a makaánteng a hayup a natalinguwan pero nagpiyya. ¹³ Naggimet ti makataka-taka a bagay u kaduwwa a makaánteng a hayup, nagpasidung siya ti apoy a gábwat ti langet a áelingán nu katolayan. ¹⁴ Sakay dipo tu makataka-taka hide a impagimet nikuna nu purumero a makaánteng a hayup ay nalinlang na u katolayan. Inutusan na u katolayan a maggimet ti rebulto nu purumero a makaánteng a hayup, a natalinguwan ti áttak pero nabiyag pade. ¹⁵ Pinayagan u kaduwwa a makaánteng a hayup a atádden ti biyag u rebulto nu purumero a makaánteng a hayup. Kaya nakapagupos u rebulto, sakay pinabuno na u atanan nu awan hide sumamba nikuna. ¹⁶ Sapilitan a pinatatak nu kaduwwa a makaánteng a hayup u kawanan a kamát oni kidáp nu atanan a tolay. Mataas man oni mababa, mayaman man oni mahirap, alipin man oni malaya. ¹⁷ Dipo ti iye, awan ti makabale oni makapaglako maliban la ni tehhod a tatak nu ngahan nu makaánteng a hayup, oni nomiro a katumbas nu ngahan na. ¹⁸ Kailangan he u karunungan. Matukuyan nu makaintendi u kahulugan nu nomiro a katumbas nu ngahan nu makaánteng a hayup, dipo ngahan iye nu essa a lállake. U nomiro ay 666.

¹ Nadid, káileng ko ay netan ko u Tupa a mágtaknág tu Buked nu Sion, kaguman na u 144,000 a tolay. Sakay sumássulat tu kidáp de u ngahan nu Tupa sakay u ngahan nu Ama na. ² Sakay nasaneg ko u boses a gábwat ti langet a kumán a tánnog ni tapaw sakay tánnog ni kádduh. U boses a nasaneg ko ay kumán a tánnog nu mamágtogtugan hide ti alpa. ³ Mágkansiyon u 144,000 a tolay ti bigu a kansiyon tu atubang nu trono, sakay tu áppat a linalang a biyag, sakay tu duwapulo ay ti áppat a tagapangasiwa. Awan ti makaintendi ti kansiyonan itod maliban la tu 144,000 a naligtas tu tolay hide ti munduwáy. ⁴ Iye u lállake hide a awan nagkahod ti ánya man a kaugnayan tu bábbey; awan hide nákkabanga. Immunonod hide tu Tupa maskin hádya u angayan na. Iye u tolay hide a natubus ti munduway bilang purumero a alay tu Diyos sakay tu Tupa. ⁵ Maski nikan ay awan hide nagbule-bule kaya awan nide ti mepintas. ⁶ Nadid, naketaák damman ti essa a anghel a magegbáh tu panganurin. Tatawed na u awan ti katapusan a Maganda a Baheta tánni ibaheta tu tolay hide ti munduway: tu bawat bansa, tu bawat lahe, tu bawat upos, sakay tu bawat banuwan. ⁷ Sakay kinagi na ti mabegsák, “Magkahod kam ti ánteng tu Diyos, sakay parangalan moy siya! Dipo dimmemát dán u odas nu pághatul na. Sambaán moy u Diyos a nanglalang tu langet, tu luta, tu diget, sakay tu hábwayan hide!” ⁸ Kinagi be nu kaduwwa a simmunud a anghel, “Nasida dán! Nasida dán u tanyag a Babilonia! U banuwan a iye ay garabi ti kasalanan dipo inakit na u atanan a tolay a sumunod tu mágkadangát de a gimet.” ⁹ Sakay simmunud u katállo a anghel, kinagi na ti mabegsák, “Ni deya man u sumamba tu makaánteng a hayup sakay tu rebulto na, sakay ni deya man u magpatatak tu kidáp na oni tu kamát na, ¹⁰ ay danasán de u iyamut nu Diyos a awan ti halo a kagbi. Sadya a parusaan hide tu apoy ay tu asupre tu atubang nu banal hide a anghel sakay tu Tupa. ¹¹ U asok nu apoy a mangpáppahirap nide ay tulos-tulos a paontok hanggan-hanggan. Aldew ay ti gibi ay makánhirapán u simmamba hide tu makaánteng a hayup sakay tu rebulto na, sakay u natatakan hide tu ngahan na.” ¹² Kaya dapat a magpakatatag sakay magin matáttiisán u pinile hide nu Diyos, u sumássunud hide tu utus nu Diyos, sakay dapat a manatile u pánnampalataya de ni Jesus. ¹³ Sakay nasaneg ko u boses a gábwat ti langet a nagupos, “Isulat mo iye: Sapul nadid ay pinagpala u magserbi hide tu Panginoon ati Jesus hanggan tu kákkatay de!”“Tatahoden,”kagi nu Banal a Ispirito. “Makaimang dán hide tu pághirap de; dipo maalap di dán u gantimpala tu mágkaganda de a ginimet.” ¹⁴ Káileng ko ay naketaák ti mapudew a panganurin, sakay mággetnod hod u kumán a Anak nu Tolay. Tehhod siya a kurona a ginto sakay te tatawed a matadám a karit. ¹⁵ Sakay te essa pa a anghel a limmuwas tu templo. Sakay kinagi na ti mabegsák tu mággetnod tu panganurin, “Gamitán mu dán i karit muwe, maggapas ka dán dipo sákgapas dán, naluto dán u gapasán ti lutaáy!” ¹⁶ Kaya tu pángwasiwas nu mággetnod tu panganurin tu karit na ay nagapas u dapat a aniyán ti lutaáy. ¹⁷ Sakay te essa pa a anghel a limmuwas tu templo ti langet a te tatawed a matadám a karit. ¹⁸ Lummuwas tu altar u essa pa a anghel a nakabahala tu apoy. Kinagi na ti mabegsák tu anghel a te tatawed a matalas a karit, “Gamitán mu dán i karit muwe, aniyán mo dán u atanan a ubas ti lutaáy, ta nágkaluto dán!” ¹⁹ Kaya inwasiwas nu anghel u karit na ti lutaáy ay naane u atanan a ubas. Sakay intogbak na tu págpáspássan ti ubas. U gusto a kagiyán ni iye ay u tolay hide a magdanas tu matindi a parusa a iyamut nu Diyos. ²⁰ Pináspás u ubas hide tu luwas nu banuwan. Binumulos u dige a gábwat tu págpáspássan a linumangáp hanggan ti tállo a datos a kilometro sakay inumabut ti limma a talampakan u kabáttong na.

¹ Nadid, naketaák ti essa pa a makataka-taka a pangitain ti langet: te pitto a anghel a te manga táttawed a salut. Iye hide u dimodyan a salut, dipo he a matapos u matindi a iyamut nu Diyos. ² Naketaák ti kumán a diget a bubug a maggehab. Netan ko be u nangtalo hide tu makaánteng a hayup sakay tu awan hide simmamba tu rebulto na, sakay u awan hide natatakan tu ngahan na a katumbas nu nomiro a 666. Mágtaknág hide tu diget a kumán a bubug, táttawed de u alpa a inyatád nu Diyos. ³ Mágkansiyon hide tu kansiyon ni Moises, a tagapagserbi nu Diyos sakay kansiyon be nu Tupa: “Panginoon a Diyos a makapangyariyan tu atanan, Dakila sakay makataka-taka u gimet mo hide! Hiko u Diyos nu bansa hide, Banal sakay tama u atanan a pámmalakad mo! ⁴ Maskin deya ay manteng niko Panginoon! Atanan ay mángpahayag tu kadakilaan mo! Dipo hiko la u banal! U atanan a bansa ay umadene sakay sumamba niko, dipo netan nu atanan u gimet mo a banal.” ⁵ Káttapos ni iye ay netan ko a bimmukas u templo ti langet, sakay netan ko hod u Lugar a Kabanalan. ⁶ Limmuwas tu templo u pitto a anghel a te tatawed a pitto a salut. Nakabadu hide ti malinis a mapudew a lino, sakay tehhod hide a baregkás a ginto tu hakaw de. ⁷ U essa tu áppat a linalang a biyag ay nangatád tu pitto a anghel ti tatággessa de a malukung a ginto a putat ti parusa dipo tu matindi a iyamut nu Diyos a biyag hanggan-hanggan. ⁸ U templo ay naputat ti asok a gábwat tu Diyos. Iye u paketaan tu kadakilaan sakay kapangyariyan na. Sakay awan ti makasáddáp tu templo mentaras awan matapos u pitto a salut a tawed nu pitto a anghel.

¹ Nadid, nakasanigák ti mabegsák a boses a gábwat tu templo a magutus tu pitto a anghel, “Kad moy dán, ibulak moy dán u parusa nu Diyos tu tolay hide ti munduway, a gabwat ti pittuwan ina a malukung!” ² Kaya limmakad u essa a anghel sakay imbulak na ti munduwáy u lasán nu malukung na. Dipo hod ay nagkahod ti mágkaapdás sakay makadanga-dangát a talingo u tolay hide a tehhod a tatak nu makaánteng a hayup sakay u simmamba tu rebulto na. ³ Imbulak nu kaduwwa a anghel u lasán nu malukung na tu diget. Kaya u diget ay nagin kumán a dige nu patay a tolay sakay u atanan a te biyag tu diget ay nágkatay. ⁴ Imbulak nu katállo a anghel u lasán nu malukung na tu konayan sakay tu hábwayan hide, kaya nagin dige be itod hide. ⁵ Sakay nasaneg ko a kinagi nu anghel a nakabahala tu dinom hide: “Hiko u Diyos a makatarungan a maghatul. Hiko u banal; hiko u awan ti sapul sakay awan ti kahad! Matuwid i ginimet muwe a pághatul tu tolay hide. ⁶ U nangbuno tu pinile mo hide sakay tu propeta hide, ay inatádden mo ti dige tánni inumán de. Ina i dapatay nide!” ⁷ Sakay nasaneg ko u boses a gábwat tu altar: “Panginoon a Diyos a makapangyariyan tu atanan, talaga a tama sakay makatarungan u hatul mo!” ⁸ Imbulak nu kaáppat a anghel u lasán nu malukung na tu aldew. Kaya lalo pa a timmindi u init nu aldew sakay nágkatutod u tolay hide. ⁹ Nágkatutod ngane hide dipo tu tindi nu init. Pero sinumpa di pa u ngahan nu Diyos a te kapangyariyan a mángpatawed ti salutan iye hide, embes a magsise hide sakay magpure tu Diyos. ¹⁰ Imbulak nu kalimma a anghel u lasán nu malukung na tu trono nu makaánteng a hayup, kaya dinumiklám u kahariyan na. Dipo tu apdás a mabate nu tolay hide, pate u dila de ay kagitán de. ¹¹ Sakay sinumpa di pa u Diyos ti langet dipo tu dáddanasán de a hirap sakay tu talingo de hide. Awan di pade pinagsisiyan u gimet de hide a mágkadukás. ¹² Imbulak nu kaánnám a anghel u lasán nu malukung na tu dakál a konayan nu Eufrates. Nakatiyan u dinom, sakay nagkahod ti dilan para paglakadan nu hare hide a taga-sikatan. ¹³ Sakay netan ko a magluwas tu labi nu dragon, sakay tu makaánteng a hayup, sakay u mágkabule a prupeta u tállo a mágkadukás a ispirito a kumán a idsura ni tukak. ¹⁴ Iye hide u dimonyo a mággimet ti makataka-taka a bagay. Maglebut hide ti munduwáy para ipunán u atanan nu hare para mákgera tu Diyos káddemát nu dakila a Aldew a intakda nu Diyos a Makapangyariyan tu atanan. ¹⁵ - ¹⁶ Sakay pinisan nu ispirito hide u hare hide tu lugar a dáddulawán a Armagedon, tu upos a Hebreo. (Iye u babala nikam nu Panginoon Jesus, kinagi na a, “Pakasanigán moy! Dumemátták a konna tu káddemát nu mágtakaw! Pinagpala u pirme a lukag sakay awan nageklas tu badu na; tán awan siya mepasanike a maglakad a eklas tu atubang nu katolayan!”) ¹⁷ Imbulak nu kapitto a anghel u lasán nu malukung na tu pahás. Sakay tehhod a mabegsák a boses a gábwat tu trono tu templo, u nagupos a, “Natapos dán!” ¹⁸ Káttapos ay nagkilat, nagkádduh, sakay naglinog ti tunay a begsák. Sa iye u kabegsákkan a linog sapul a lalangán u tolay ti munduway. Talaga a tunay iye a begsak! ¹⁹ Minahate ti tállo a parte u Babilonia a tunay ti kadakál a banuwan. Sakay u atanan a banuwan ti munduway ay nágkasida. Tinupad nu Diyos u kinagi na tungkul tu tanyag a Babilonia, kanya imbuhus na hod u matindi na parusa a paketaan tu iyamut na. ²⁰ Nágkawan u atanan a puduk, sakay minágkaduhay u atanan a buked. ²¹ Sakay naguden ti dáddakkál a iyelo a kumilo ti manga limmapulo u balang essa, sakay nágkatáppelan u katolayan. Dipo ti iye ay sinumpa nu katolayan u Diyos dipo ti iye a makaánteng a salut a dinanas de.

¹ Nadid ay immadene nikán u essa tu pitto a anghel a te tatawed a pitto a malukung, kinagi na, “Karon he, ta ipeta ko niko ni kodya a parusaan u raina nu kahalayan. I bábbiyan iye ay u dakál a banuwan a netaknág tu adene nu pamágtagbuwan nu makpal a konayan. ² Natukuyan nikuna nu hare hide ti lutaáy u mágkahalay hide a gimet sakay u tolay hide ti lutaáy ay lininlang na kanya sinunud de u intáttoldu ni bábbiyan ina, ni mara ay nilasing na hide tu alak nu kahalayan.” ³ Kattapos, ay inggiyyaák nu Banal Ispirito, inyangayák nu essa a anghel tu parang. Netan ko hod u essa a bábbey a mágsakay tu madideg a makaánteng a hayup a te pitto a ulo sakay sapulo a saduk. Sumássulat tu bággi na u upos hide a pang-insulto tu Diyos. ⁴ Nakabadu ti madideg sakay kulay ubi u bábbey. Sakay makpal siya a sulot a alahas a ginto, mahalaga a bito, sakay perlas. Tatawed na u tasa a ginto a putat tu kadukássan na sakay tu mágkalaswa na a gimet. ⁵ Sakay nakasulat tu kidáp u ngahan ni iye a te lihim a kahulugan, “U tanyag a Babilonia, u ina nu bábbey a bábbayaden sakay atanan nu tolay ti munduway ay maggimet ti mágkalaswa.” ⁶ Netan ko i bábbiyan iye a lasing tu dige nu pinile hide nu Diyos, sakay tu dige nu binábbuno na hide dipo tu kássunud de ni Jesus. Nagtakaák tu pákketa ko nikuna. ⁷ Pero kinagi nikán nu anghel, “Bakin magtaka ka? Kagiyán ko niko u sekreto a kahulugan nu bábbey sakay u sássakayan na a makaánteng a hayup a te pitto a ulo sakay sapulo a saduk. ⁸ U makaánteng a hayup a netan mo ay biyag tu itod pero patay dán nadid; pero lumitaw siya a huway a gábwat tu ábbut a awan ti kahád ti kadsalad sakay agad na a tamuwán u kaparusaan. Ketan siya nu tolay hide ti lutaáy a awan nakasulat u ngahan de tu libro a listaan nu tolay hide a inatádden ti biyag a awan ti kahád. Bagu a lalangán i munduway, u ngahan de ay awan nelista ti libruwan itod pákketa de tu makaánteng a hayup, hide ay magtaka, Dipo tukoy de a nabuno dán siya, pero lumitaw siya a huway a biyag. ⁹ Kailangan he u karunungan para maintendiyan u tama, u kahulugan ni iye hide. U pitto a ulo ay u pitto a buked a pággetnudan nu bábbey. U pittuwan itod a buked ay u pitto a hare, ¹⁰ pero u limma nide ay awan dán. U essa be nide ay kasalukuyan palla a maghare sakay u kadimodyanan ay awan padla dummemát pero káddemát na ay sabadit labe a panahon siya a maghare. ¹¹ Pero u makaánteng a hayup a biyag tu itod pero nadid ay patay dán ay siya u kawalo a hare, kaguman be nu pitto. Sakay u keangayan na ay u kaparusaan. ¹² U sapulo a saduk a netan mo ay u sapulo a hare a awan palla naghare, pero atádden hide ti kapangyariyan a maghare ti essa-odas la kaguman nu makaánteng a hayup. ¹³ Eessa u layunin ni sapuluwan iye: Ipasakup de tu makaánteng a hayup u kapangyariyan de sakay u karapatan de a mamuno. ¹⁴ Geraán de u Tupa pero taluwán na hide, dipo siya u Panginoon nu atanan a panginoon sakay Hare nu atanan a hare. Kaguman na tu tagumpay u dinulaw sakay pinile na a nagin tolay na, a matapat a palagi a magserbi nikuna.” ¹⁵ Sakay kinagi pa nikán nu anghel, “U ketan mo a nagtagbuwan nu dinom hide a pággetnudan nu madukás a bábbey ay u tolay hide a gabwat tu iba-iba a lahe, bansa sakay upos hide ti munduway. ¹⁶ U sapulo a saduk a netan mo sakay u makaánteng a hayup ay maiyamut tu tanyag a bábbey ti kahalayan. Alapán de u atanan a ari-ariyan na sakay lakaden de siya a eklas. Kanán de u pilas na sakay u mabuhay ay tutudán di pa. ¹⁷ Ginusto nu Diyos a gimitan nu sapulo a hare u planu na. Kanya namagkasundu u sapulo a hare a ipasakup tu makaánteng a hayup u kapangyariyan de sakay u karapatan de a mamuno, hanggan a matupad u upos nu Diyos. ¹⁸ U bábbey a netan mo ay u tanyag a banuwan a sássunudán nu hare hide ti munduway.”

¹ Nadid, káttapos ni iye ay naketaák ti essa a anghel a pasidung a gábwat ti langet. Makapangyariyan a tahod i anghelan iye. Makasile siya dipo tu kaluwalhatiyan na kanya dummemlag u buo a mundu. ² Sakay pimmákhaw siya ti tunay a begsák, kinagi na, “Nasida dán! Nasida dán u tanyag a Babilonia! Bilay dálla siya nadid nu dimonyo hide, piresuwan nu mágkadukás a ispirito, sakay páppágyanan dálla nu mágkadangát a manok. ³ Nangyare iye tu banauwan nu Babilonia dipo inakit ni iye u tolay hide tu buo a mundu a sumunud tu magkalaswa na a gimet. Sakay u atanan a hare ti munduway ay kuman a nangibabbey nikuna dipo nikuna de a natukuyan u paggimet ti kahalayan. Sakay u nigosyante hide ay yimmaman dipo tu mahalay na a kákkabiyag. ⁴ Káttapos ay nakasanigák ti essa pa a boses a gábwat ti langet, kinagi na, “Pinile ko hide a tolay, umadeyo kam nikuna, tánni awan kam mákkekuyog tu paggimet na tu kasalanan, sakay tánni awan kam maparusaan a kaguman na! ⁵ Dipo tu kakpal dán nu kasalanan na ay kumán dán a inumabut ti langet, sakay awan mapalampas nu Diyos u kadukássan na. ⁶ Gimitán moy nikuna u ginimet na nikam, sakay dubliyán moy u pággante moy tu ginimet na nikam. U pagpahirap a gusto na a ipabate tu agum ay ipadanas moy be nikuna ti masgrabi; Kumán a putatán moy u tasa na tu áinumán a mas mapet nan tu inhanda na nikam. ⁷ Ni kodya siya a nagpakasaya sakay nagmataas tu itod, ay ipabate moy be nikuna u katapat ni iye hide a kahirapan sakay kalungkutan. Dipo u pirme na a kákkagiyán ay ‘Tanyagák a Raina! Awanák bilo, sakay awanák makadadanas ti kalungkutan maski nikan!’ ⁸ Kaya sabay-sabay a dumemát nikuna u salut hide tu saldew Saket, kalungkutan, sakay sák-aláp. Sakay tutudán siya tu apoy, dipo makapangyariyan u Panginoon a Diyos a manghatul nikuna.” ⁹ Mentaras a áelingán de u asok nu kákkatutod na, mamágsangitan sakay maglungkutan u hare hide a nákpaggimet nikuna ti kahalayan sakay nákpagkasayaan nikuna. ¹⁰ Mágtaknág la hide tu adeyo dipo tu ánteng de a medamay tu parusa na. Kagiyán de, “Kakagbi u Babilonia mabegsák sakay tanyag a bansa! Tu essa la a odas ay dumemát u parusa nikuna!” ¹¹ Sakay mamágsangitan, mamáglungkutan u nigosyante hide ti munduway dipo awan dán ti mamale tu laku de hide. ¹² Awan dán ti mamale tu ginto de, silber, alahas a bito, perlas, sakay tu mágkamahal a damit a mapudew, madideg, kulay ubi, sakay seda. Awan dán ti mamale tu sare-sare hide a kalase nu mágkasáppot a kayo; sakay u kagamitan hide a gábwat tu paseng ni elepante, mágkamahal hide a kayo, tangso, bakal, sakay marmol. ¹³ Awan dán ti mamale ti kanela, rikadu, kamanyang, mira, sakay insenso; alak sakay langis, arina sakay trigu. Sakay awan be ti mamale ti kabakaan sakay katupaan, kakabayuwan sakay kakarwahiyan, sakay u alipin de hide a tolay. ¹⁴ Kagiyán nu nigosyante hide tu bansa a Babilonia, “Awan dán u atanan a mágkaganda a bagay a ginusto mo. Naalap dán niko u kayamanan a ipagmadakál mo. Awan dán niko pate u ganda mo; maski nikan ay awan dán sumole niko iye hide!” ¹⁵ Awan umadene u nigosyante hide a yimmaman ti itod a banuwan dipo tu ánteng de a medamay tu pághirap na. Mamágsangitán hide sakay maglungkut. ¹⁶ Kagiyán de, “Kakagbi u tanyag a banuwan! Tu itod, u tolay hod hide ay nabaduwan ti mágkamahal a damit, sakay sare-sare a alahas a konna tu ginto, mamahalin a bito, sakay perlas! ¹⁷ Tu alay la nu essa a odas ay nawan u atanan a kayamanan na!” Mágtannaw tu adeyo u kapitan hide, u mágsakay hide, u tripulante hide tu pangdiget a págsakayan, konna bi hod tu atanan nu maghanapbuhay tu diget. ¹⁸ Sakay mentaras a áelingán de u asok nu natutod a banuwan ay kagiyán de, “Awan ti kapareho u katanyagan ni ina a banuwan!” ¹⁹ Sakay dáttonan de ti abu u ulo-ulo de sakay magsangitan. Kagiyán de, “Kakagbi u tanyag a banuwan! Yimmaman u atanan a dinumung nikuna. Pero tu alay la nu essa a odas ay minágkawan u atanan nikuna!” ²⁰ Magsaya ka langet, tu nangyare nikuna! Magsaya kam, atanan a pinile, apostol hide, sakay prupeta hide! Dipo hinatulan dán siya nu Diyos tu ginimet na nikam! ²¹ Káttapos ay tehhod a essa a makapangyariyan a anghel a nangágkat ti bito a konna tu dakál a gilingan. Imbatikal na itod tu diget sakay kinagi na, “Konna he u pángsida tu tanyag a banuwan nu Babilonia, sakay awan dán keketan a huway! ²² Sakay awan dán masasaneg hina u boses nu mágkansiyon hide, u togtog nu alpa, plauta, sakay trumpeta! Awan dán ketan hina u magkalalake hide a tarabahador, sakay awan dán be masasaneg u tánnog nu gilingan hide! ²³ Awan dán be maski essa a sulo magdemlag hina; sakay awan dán masasaneg hina u mágkasaya a boses nu ikasal hide. Dipo nagin tanyag ti munduway u nigosyante hina hide, sakay nadaya u atanan a tolay ti munduway tu pamamag-itan nu anting-anting nu tolay hide a magyan hina.” ²⁴ Pinarusaan nu Diyos u Babilonia dipo hod di hod a binuno u propeta hide a nángpahayag tu upos nu Diyos, sakay u atanan a tolay nu Diyos, sakay u agum pa a tolay ti lutaáy a binuno hod.

¹ Nadid, káttapos ni iye ay nasaneg ko u mabegsák a boses a kumán a pinagessa a makpal a tolay ti langet a mágkansiyon ti konna he, “Puriyán tam u Panginoon tam! Siya ay karapat-dapat a parangalan dipo siya u makapangyariyan a Diyos a nagligtas nikitam! ² Dipo makatarungan sakay tama u pághatul na! Hinatulan na u raina a tanyag ti kalaswaan a nángpadukás ti munduway. Pinarusaan siya nu Diyos dipo tu pángbuno na tu tagapagserbi hide nu Panginoon!” ³ Kinansiyon de a huway, “Puriyán u Panginoon! U asok nu natutod a tanyag a banuwan ay paontok hanggan-hanggan!” ⁴ U duwapulo ay ti áppat a tagapangasiwa sakay u áppat a linalang a biyag ay limmuhud sakay simmamba hide tu Diyos a mággetnod tu trono, kinagi de, “Amen! Puriyán u Panginoon!” ⁵ Sakay tehhod a nagupos a gábwat tu trono, kinagi na, “Puriyán moy u Diyos tam, hikam a atanan a tagapagserbi na, mágkababa oni mágkataas man, hikam ate ánteng nikuna!” ⁶ Káttapos ay nasaneg ko u kumán a pinagessa a boses nu makpal a tolay. Kumán a tánnog nu dakál a tapaw sakay tánnog ni kádduh, kinagi na, “Puriyán u Panginoon! Dipo mághare u Panginoon, u Diyos tam a makapangyariyan tu atanan! ⁷ Dapat kitam a magsaya sakay puriyán tam siya, dipo dummemát dán u kasal nu Tupa. Sakay nakahanda dán u kakasal na a bábbey. ⁸ Nasulutan dán siya ti tunay a pudew sakay makasile a damit a lino.” U tunay a pudew a damit a lino ay u mágkaganda a gimet nu tolay hide a pinabanal nu Diyos. ⁹ Sakay kinagi nikán nu anghel, “Isulat mo iye: Pinagpala u naimbitaan tu kasal nu Tupa.” Sakay kinagi na pa, “Iye a kinagi ko ay tatahoden a upos nu Diyos.” ¹⁰ Limmuhudák tu atubang na para sumamba nikuna, pero kinagi na nikán, “Dyan mo ina gimitán! Dipo kaparehuwák mu labe a tagapagserbi, konna tu kákkapatkákka hide a nagpahayag tungkul ni Jesus. U Diyos u dapat mo a sambaán! Dipo u tatahoden a intoldu ni Jesus ay impahayag nu prupeta hide tu pamamag-itan nu kapangriyan nu Banal a Ispirito. ¹¹ Káttapos ni iye ay nabukasan u langet, sakay naketaák ti kabayo a mapudew. U mágkabayo ay dáddulawán de a Matapat sakay Tatahoden dipo matuwid siya a maghatul sakay mákgera. ¹² Kumán a maggehab a apoy u mata na, sakay makpal siya a kurona. Sumássulat tu bággi na u ngahan na, pero siya la i makatukuya’y tu gustu na a kagiyán. ¹³ U imbadu na ay kumán a imbatad ti dige, sakay u págdulaw de nikuna ay “Upos nu Diyos.” ¹⁴ Umunonod nikuna u sundalo hide ti langet, a nakabadu ti malinis sakay mapudew a damit a lino, sakay mágkabayo be hide ti mapudew a kabayo. ¹⁵ Tehhod a magluwas tu labi na a matalas a áttak; gamitán na iye para pangdaig tu bansa hide. Paghariyan na hide ti sampilitan sakay awan ti sumuway nikuna. U tolay hide ti munduway a komontara tu Diyos ay iparanas na nide u págparusa nu Diyos a makapangyariyan tu atanan. Iye u gusto a kagiyan nu pagbulusán na tu págpáspássán ti ubas u alak nu iyamut nu Diyos. ¹⁶ Sumássulat tu badu na sakay tu pengkel na u ngahan a, “Hare nu atanan a hare sakay Panginoon nu atanan a panginoon.” ¹⁷ Káttapos ay naketaák ti anghel a mágtaknág tu aldew. Dinulawan na ti mabegsák u manok hide a magegbáh tu kalawakan, “Kamon he, magipun-ipun kam para tu dakál a handaan nu Diyos!” ¹⁸ Ta kanán moy u pilas nu hare hide, nu kapitan hide, nu sundalo hide, nu kabayo hide sakay u mágkabayo hide. Kanán moy u pilas nu atanan a tolay, alipin sakay malaya, mágkababa sakay mágkataas!” ¹⁹ Sakay netan ko a namággipun u makaánteng a hayup, u hare hide ti munduway, sakay u sundalo de hide tánni geraán de u mágkabayo sakay u sundalo na hide. ²⁰ Namáglaban-laban hide sakay nadakáp u makaánteng a hayup sakay tu mabule a prupeta a naggimet ti himala tu ngahan nu makaánteng a hayup. Iye hide u ginamit na a pangdaya tu tolay hide a tehhod a tanda nu makaánteng a hayup sakay summamba tu rebulto na. I duwwaan iye ay imbut de a biyag tu magapoy-apoy a asupre. ²¹ Sakay u sundalo de hide ay pinágbuno nu magkabayo tu mapudew tu pamamagitan nu áttak a magluwas tu labi na, sakay nagsawa u manok hide a mágkakanán tu bangkay de hide.

¹ Nadid, káttapos ni itod ay naketaák ti anghel a pasidung a gábwat ti langet, tatawed na u suse nu ábbut a awan ti kahád ti kadsalad sakay u dakál a kadena. ² Dinakáp na u dragon, iye u biklat tu itod a panahun, siya u Diyablo oni Satanas. Sakay inggapus na tu alay nu sanglibu a taon, ³ sakay imbut nu anghel tu ábbut a awan ti kahád ti kadsalad. Insiradu na u ábbut sakay tinatakan na u pintuwan tánni awan siya makaluwas sakay makapagdaya tu bansa hide mentaras awan matapos u sanglibu a taon. Pero káttapos ni itod ay mapalaya siya ti sabadit a panahun. ⁴ Káttapos ay naketaák ti makpal a trono, sakay u mággetnod hide hod ay naatádden ti karapatan a maghatul. Sakay netan ko be u kaliduwwa nu pinutulan hide dipo tu págpatunay de tungkul ni Jesus sakay tu págpahayag de tu Upos nu Diyos. Awan hide simmamba tu makaánteng a hayup sakay tu rebulto na, sakay awan hide nagpatatak tu tatak nu makaánteng a hayup tu kidáp de oni tu kamát de. Biniyag hide tán mákapaghare hide a kaguman ni Cristo tu alay nu sanglibu a taon. ⁵ Iye u kapurumeruwan a pángbiyag tu patay hide. U agum a nágkatay ay saka la a biyagán, kállipas nu sanglibu a taon. ⁶ Pinagpala sakay Banal u makaguman hide tu purumero a págbiyag. Awan ti kapangyariyan nide u kaduwwa a kákkatay; magin saserdote hide nu Diyos sakay ni Cristo, sakay maghare hide a kaguman na tu alay nu sanglibu a taon. ⁷ Sakay káttapos nu sanglibu a taon ay palayaán ti Satanas tu kákkepiresu na. ⁸ Lumuwas siya para dayaán u bansa hide ti munduway. Ipunan na u atanan a tolay para mákpaggera. U kakpal de ay konna tu baybay tu gibis nu diget iye u dáddulawán de a Gog sakay Magog. ⁹ Kumalat hide ti buuwáy a mundu sakay palebutan de u pinile hide nu Diyos sakay u banuwan a pinakamaha-mahal na. Pero paudinan hide nu Diyos ti apoy a gábwat ti langet kaya matay hide a atanan. ¹⁰ Sakay u Diyablo a nangdaya nide ay ibut tu kumán a diget a apoy sakay tu asupre, a nángbutan labe tu makaánteng a hayup sakay tu mágkabule a prupeta. Aldew ay ti gibi ay mamágkaguman hide a pahirapan hod hanggan-hanggan. ¹¹ Káttapos ay netan ko u dakál a trono a mapudew sakay tehod a mággetnod hod. Nawan u luta ay tu langet tu atubang na, sakay awan dán nenetan a huway. ¹² Sakay netan ko a mágtaknág u nágkatay hide tu atubang nu trono, mágkataas man oni mágkababa. Sakay binuklat u libro hide, pati be u libro a listaan nu tolay hide a inatádden ti biyag a awan ti kahád. Hinatulan u nágkatay hide ayun tu ginimet de mentras biyag hide, konna tu nágkesulat tu libro hide. ¹³ Sakay inyobla nu diget u nágkatay hide a katoy hod. Inyobla be nu luta sakay nu Hades u nágkatay hide a katoy nide. Hinatulan u atanan ayun tu ginimet de. ¹⁴ Káttapos ay imbut tu kumán a diget a apoy u Kákkatay sakay u Hades. I malawakan iye a apoy ay u kaduwwa a kamatayan. ¹⁵ Ni deya man u awan ti ngahan tu libro a listaan nu tolay hide a inatádden ti biyag a awan ti kahád ay ibut tu malawak a apoy.

¹ Nadid, káttapos ay netan ko u bigu a langet sakay u bigu a mundu. Dipo nawan dán u date a langet sakay u date a mundu; sakay awan dán be u diget. ² Sakay netan ko u Banal a Banuwan, u bigu a Jerusalem a pasidung a gábwat tu Diyos ti langet. Konna tu bábbey a ikasal a nakabadu ti maganda a handa para tagbuwán nu lállake a makabanga na. ³ Sakay nasaneg ko u mabegsák a boses a gábwat tu trono, kinagi na, “Ilingán moy kapisan dán nu Diyos u katolayan tu páppágyanan na! Mákpágyan dán siya nide sakay magin banuwan na dán hide. Sakay pirme di dán a kakaguman u Diyos sakay siya dán u eessa a Diyos de. ⁴ Pahidán na u luwa de hide. Awan dán ti matay, malungkut, magsanget, oni magkasakit dipo limmipas dán u date hide a bagay.” ⁵ Kinagi nu mággetnod tu trono, “Baguwán ko dán u atanan a bagay!” Sakay kinagi na nikán, “Isulat mo iye: Maasaan sakay tatahoden iye hide a upos.” ⁶ Sakay kinagi na pa, “Natupad dán! Hikán u Alpa sakay u Omega, u sapul ay tu katapusan nu atanan. Ni deya man u mauwaw ay atádden ko ti dinom a awan ti bayad a gábwat tu bukal a makapangatád ti biyag a awan ti kahád. ⁷ Iye u matanggap nu magtagumpay. Sakay hikán u magin Diyos na, sakay siya be ay magin anak ko. ⁸ Pero makaánteng u demáttán nu tolay hide a awan nagtiwala ni Jesus dipo tu ánteng de a matay, u awan hide summampalataya, u mágkadangát hide ti gággimitán, u mágbabono hide, u mángngibábbey oni mángngilállake hide, u mágdipoh hide, u mágsamba hide ti diyos-diyosan, sakay u atanan a mágkabule. Ibut hide tu kumán a diget a magapoy-apoy a asupre. Sa iye u kaduwwa a kákkatay.” ⁹ Immadene nikán u essa tu pitto hide a anghel a te tatawed a pitto a malukung a putat tu pitto a katapusan a salut. Kinagi na, “Karon he, ta ipeta ko niko u bábbey a magin kabanga nu Tupa.” ¹⁰ Inggiyyaák nu Ispirito, sakay inyangayák nu anghel tu tunay ti langkaw a buked. Impeta na nikán u Jerusalem u Banal a Banuwan a pasidung a gábwat tu Diyos ti langet. ¹¹ Magdemlag iye dipo tu kaluwalhatiyan nu Diyos; magkilápkiláp a konna tu alahas a haspe sakay malekmang a konna tu bubug. ¹² U pader ay tunay a bagál sakay malangkaw, sakay tehhod a sapulo ay ti duwwa a pintuwan, balang essa a pintuwan ay te magbantay a anghel. Nakasulat tu pintuwan hide u ngahan nu sapulo ay ti duwwa a lahe ni Israel. ¹³ Tehhod a tállo a pintuwan tu balang gilid: tállo tu danág ti sikatan, tállo tu danág ti ámiyanan, tállo tu danág ti abagatan, sakay tállo be tu danág ti sahámman. ¹⁴ Sakay tehhod pa a sapulo ay ti duwwa a pundasyon u kudal nu pader sakay nakasulat hod u ngahan nu sapulo ay ti duwwa a apostol nu Tupa. ¹⁵ U anghel a kauhon ko ay te tatawed a págsukat a ginto para sukatán u banuwan konna bi hod u pintuwan na hide sakay tu kudal na a pader. ¹⁶ Kuwadradu u sukat nu banuwan, ni sa kodya u katakdug na ay konna bi hod u lawa na. Nikuna sinukat nu anghel u banuwan ay 2,400 a kilumetro u katakdug na sakay tu kalawa na, konna bi hod u langkaw na. ¹⁷ Sinukat na be u kudal a pader, 216 a piye u kalangkaw na, sigun tu págsukat a tawed nu anghel. ¹⁸ U ginamit tu kudal a pader ay bito a haspe, pero u banuwan ay puro a ginto, tunay a lekmang a konna tu bubug. ¹⁹ U pundasyon hide nu kudal ay napagandaan ti atanan a mágkahalaga a bito. U purumero ay haspe, u kaduwwa ay sapiro, u katállo ay kalsedonia, u kaáppat ay esmeralda, ²⁰ u kalimma ay onise, u kaánnám ay kornalina, u kapitto ay krisolito, u kawalo ay berilo, u kasiyam ay topasyo, u kasapulo ay krisopraso, u kasapulo ay ti essa ay hasinto, u kasapulo ay ti duwwa ay amatista. ²¹ U sapulo ay ti duwwa a pintuwan ay perlas, u balang essa ay gábwat ti essa la a perlas. U kakarsada tu banuwan ay puro a ginto sakay tunay a lekmang a konna tu bubug. ²² Sakay napansin ko a awan ti templo tu banuwan dipo mismo a u Panginoon a Diyos a Makapangyariyan tu atanan sakay u Tupa u pinakatemplo hod. ²³ Awan dán kailangan u aldew oni u bulan para mangdemlag tu banuwan, dipo u kaluwalhatiyan nu Diyos u mangdemlag hod, sakay u Tupa u simbuwan. ²⁴ I demlagan itod u mangdemlag tu lakadán nu tolay hide tu iba-iba a bansa ti lutaáy; sakay iyangay hod nu hare hide ti munduway u kayamanan de hide. ²⁵ Pirme dán a bukas tu maghapun u pintuwan nu banuwan dipo awan dán hod gumibi-gibi. ²⁶ Anya man u kayamanan sakay karangalan nu tolay hide tu iba-iba a bansa ay iyangay de ti banuwanan itod. ²⁷ Pero awan hod ti makasáddáp a ánya man a bagay a madangát tu pangileng nu Diyos, u makán gimitán ti madukás, sakay u mágkabule hide. Nan u makasáddáp laay hod tu banuwan ay u nakasulat u ngahan na tu libro nu Tupa. Dipo i librowan iye u sássulatan nu ngahan nu naatádden ti biyag a awan ti kahád.

¹ Nadid, impeta be nikán nu anghel u konayan a makapangatád ti biyag. Tunay a lekmang u dinom a kumán a bubug. Gábwat iye a konayan tu trono nu Diyos sakay nu Tupa. ² Magbulos iye tu bállog nu karsada nu banuwan. Tu magdibiliwan nu konayan ay te kayo a makapangatád ti biyag. Magbunga iye ti kada bulan kanya sapulo ay ti duwwa iye a beses a magbunga ti sataon, sakay makagamot u duu-duun na tu sake-saket nu tolay hide tu kada bansa. ³ Awan ti ketan hod a ányaman a kaiyamutan nu Diyos. Nan u katoy hod ay u trono nu Diyos sakay u Tupa, sakay sambaán dán siya nu tagapagserbi na hide. ⁴ Ketan de u hupa na, sakay mesulat tu kidáp de u ngahan na. ⁵ Sakay awan dán hod ti gibi, kaya awan dán kailangan u simbuwan oni demlag nu aldew dipo u Panginoon a Diyos u magin demlag de. Sakay maghare hide hanggan-hanggan. ⁶ Sakay kinagi nikán nu anghel, “Maasaan sakay tatahoden iye hide a upos. U Panginoon a Diyos, a nángkaluub tu Ispirito na tu prupeta hide, u nangutus tu anghel na a ipakapospos tu tagapagserbi na hide u bagay hide a adene dán a mangyare.” ⁷ Sakay kinagi ni Jesus, “Mágsaneg kam! Pademátták dán! Pinagpala u mangsássunud tu pahayag hide a katoy ti libruwan iye!” ⁸ Hikán ti Juan u nakasaneg sakay naketa ti iye hide a bagay. Pákkasaneg ko sakay pákketa ti iye a atanan ay limmuhudák tu atubang nu anghel a nángpeta nikán para sumamba nikuna. ⁹ Pero kinagi na nikán, “Dyan mo ina gimitán! Tagapagserbiyák labe a kapareho mo, konna tu kákkapatkákka mo a prupeta, sakay u atanan a mangsunud tu upos hide ti libruwan iye. U Diyos i sambaán muway!” ¹⁰ Sakay kinagi na pa nikán, “Dyan mo ilihim u pahayag hide a katoy ti libruwan iye, dipo adene dán iye hide a mangyare. ¹¹ U makán gimitán ti madukás ay magtulos-tulos a magpakadukás sakay u madangát ti kákkabiyag ay magtulos-tulos a magpakadangát. Pero u maggimet hide ti maganda ay magtulos-tulos a maggimet ti maganda. Sakay u banal ti kákkabiyag ay magtulos-tulos a magpakabanal.” ¹² Kinagi ni Jesus, “Mágsaneg kam! Pademátták dán! Tawed ko dán u gantimpala hide a iyatád tu balang essa ayun tu ginimet na! ¹³ Hikán u Alpa sakay tu Omega, u purumero ay tu dimodyan, u Sapul ay tu Katapusan.” ¹⁴ Pinagpala u maglinis hide tu babadu de dipo tehhod hide a karapatan a sumáddáp tu banuwan sakay kuman tu bunga nu kayo a makapangatád ti biyag. ¹⁵ Pero mágwahak tu luwas u mágkadukás hide a tolay, u mágdipoh hide, u mángngibábbey oni mángngilállake, u mágbabono hide, u mágsamba hide ti diyos-diyosan, sakay u mágkabule hide ti upos sakay ti gimet. ¹⁶ “Hikán ti Jesus, u nangutus tu anghel ko para ipakapospos nikam a grupo nu mánnampalataya hide iye hide a bagay. Gábwaták tu lahe ni David sakay hikán u mademlag a biton ti dimadimang.” ¹⁷ Kinagi nu Banal a Ispirito sakay u Bábbey a ikasal, “Karon he!” Sakay atanan a makasaneg ti iye ay magkagi be a, “Karon he!” Umadene u atanan a mauwaw; mangalap u masoh tu dinom a makapangatád ti biyag, awan iye ti bayad. ¹⁸ Hikán ti Juan ay mangatád ti babala tu atanan a makasaneg tu hula hide a nakasulat ti libruwan iye: Ni deya man u mangdagdag tu atanan a lasán ni libruwan iye ay idagdag nu Diyos tu parusa na u atanan a salut a nakasulat he. ¹⁹ Sakay ni deya man u mangibut tu agum a upos tu pahayag hide a nesulat he ay awan payagen nu Diyos a mákbahagi a kuman tu bunga nu kayo a makapangatád ti biyag, sakay ibutan nu Diyos u karapatan na a sumáddáp tu Banal a Banuwan a nakagi he. ²⁰ Kinagi nu Panginoon Jesus a nagpahayag ti atananan iye, “Tatahoden! Pademátták dán!” Amen. Dumemát ka dán nakwa, Panginoon Jesus! ²¹ Nakwa u kagbi nu Panginoon Jesus ay hod nikam a atanan! Amen.