Filipos

Filipos

¹ Mahal ko hide a kákkapatkákka, iye a sulat ay gábwat nikán a ti Pablo sakay ti Timoteo a alipin hide ni Cristo Jesus. Iye ay para tu atanan a pinile nu Diyos a taga-Filipos a summampalataya hide ni Cristo Jesus, pate u puno hide sakay tu tumulung nide a mangasiwa tu mánnampalataya hide. ² Nakwa ay atádden kam nu Diyos Ama sakay tu Panginoon tam ati Jesu-Cristo ti kapayapaan, sakay pagpapala. ³ Pirmiyák a magpasalamat tu Diyos ko kada maisip takam. ⁴ Kada ipagdasal takam a atanan ay grabi u saya ko ⁵ dipo tu tulung moy tu pángpakapospos tu Maganda a Baheta tungkul ni Cristo, sapul nikuna a tanggapán moy iye hanggan nadid. ⁶ Siguraduwán ko nikam a u maganda a gimet a sinapulan nu Diyos nikam, ay tapusán na hanggan tu aldew nu kássole ni Cristo Jesus. ⁷ Dapat la a konna he u kagiyán ko dipo mahal takam a tahod sakay dipo magkaguman kitam a timmanggap tu pagpapala nu Diyos, maski tu itod a malayaák a magpahayag sakay mángtaknág tu Maganda a Baheta hanggan nadid a nakapiresuwák. ⁸ Tukoy nu Diyos a grabi dán i ammaw kuwáy dipo dakál u págmahal ko nikam a konna tu págmahal ni Cristo Jesus nikam. ⁹ Idáddasal ko a nakwa ay lalo pa a lumagu u págmahal moy tu balang essa, sakay maaguman ti karunungan sakay madisalad a pákkatukoy. ¹⁰ Tánni matukuyan moy ni ánya u pinakamaganda a dapat moy a gimitán. Para tu káddemát nu Aldew nu kássole ni Cristo ay demáttan nakam a malinis sakay awan ti kapintasan. ¹¹ Nakwa ay maputat u biyag moy tu mágkaganda a ugale a kaluub ni Jesu-Cristo, tán maparangalan sakay mapapuriyan u Diyos. ¹² Gusto ko a matukuyan moy, kákkapatkákka ko hide, u nangyare hide nikán ay nakatulung ti dakál tu kállawak nu Maganda a Baheta. ¹³ Dipo natukuyan nu atanan a guwardiya tu palasyo sakay tu agum pa hide a katoy he, a nepiresuwák dipo tu kássunud ko ni Cristo. ¹⁴ Sakay kákpalan tu mánnampalataya hide ay lalo pa a timmatag u pánniwala de tu Panginoon dipo tu kákkepireso ko, sakay bimmegsák u isip de sakay awan ti ánteng a nagbaheta tu Upos nu Diyos. ¹⁵ Tahod ngane a mangaral u agum tungkul ni Cristo dipo tu sene sakay gustu dila a ipeta a masmalalake hide nikán, pero te mangaral labe a tehhod a katapatan. ¹⁶ Ipáppangaral de ti Cristo dipo tu págmahal, dipo tukoy de a nepiresuwák tu pánglaban ko tu Maganda a Baheta. ¹⁷ U agum ay mangaral a awan tapat tu kaluuban de nan tehhod a madukás a layunin, dipo gustuwák dila a pasakitan mentaras a hedák ti piresuwanáy. ¹⁸ Pero awan ti ányapaman itod hide a atanan nikán. Mahalagaay ay mepangaral ti Cristo maski ánya a kaparaan, tapat man oni awan u layunin de tu pángngaral de. U essa ku pa a kasayaan ¹⁹ ay u pag-asa ko a dumemát u aldew a makalayaák a huway tu tulung nu dasal moy sakay tu Banal a Ispirito ni Jesu-Cristo. ²⁰ U gugusto ko sakay áasaan ko ay awanák nakwa magkulang tu tungkulin ko, nan magkahodák ti begsák ni isip ánya man a odas. Tánni mabiyagák man oni matay dán ay mapapuriyan ti Cristo tu pamamag-itan ko. ²¹ Dipo para nikán, u biyag ko ay nakalaan dán ni Cristo. Ni matayák dipo nikuna ay mas higit pa u pakinabang ko. ²² Pero ni magtulos-tulusák padi a mabiyag, ay maganda bi iye dipo makagimiták palla ti mágkaganda a bagay. Awan ko tukoy ni hádya i piliyán kuwáy. ²³ Ti duwwaan iye a pagpiliyan ay he dák ti ballog: ni mabiyag palla oni matay dán. Gusto ku dán nakwa a matay tánni makaguman ko dán ti Cristo, dipo iye u mas maganda para nikán. ²⁴ Pero para tu kapiyyaan moy ay mas maganda ni magtulos-tulusák palla a biyag. ²⁵ Dipo ti iye ay nakasiguduwák a mabiyagák palla sakay makaguman moy palla a atanan, tánni matulungan kam a magtulos-tulos a te kasayaan tu pánnampalataya tu Panginoon. ²⁶ Sakay ni makasoliyák dán hina nikam ay lalu moy a papuriyan ti Cristo dipo nikán. ²⁷ Kaya ngane kákkapatkákka ko hide, pagsikapan moy a mabiyag a ayun tu Maganda a Baheta tungkul ni Cristo. Dipo maski makasoliyák man hina nikam oni awan ay nakasiguduwák a tulos-tulos kam a matatag tu essa a layunin sakay mamágkaguman tu pánglaban tu Maganda a Baheta. ²⁸ Diyan kam manteng tu kumalaban hide nikam dipo ni awan kam manteng ay saiye u pakatukuyan de a mepahamak hide pero hikam be ay iligtas nu Diyos. ²⁹ Dipo ingkaluub nu Diyos nikam a sumampalataya ni Cristo pero bakán la a ina nan magtiis be ti hirap para nikuna. ³⁰ Nadid, danasán moy ngane u pághirap a netan moy a dinanas ko tu itod sakay nabaheta moy a dáddanasán kupa de hanggan nadid.

¹ Nadid, dipo makapangatád ti begsák isip u biyag moy a nakaugnay ni Cristo, sakay tehhod kam a kasayaan tu págmahal na, sakay nákpagkaessa kam tu Banal a Ispirito, sakay te soh kam a tumulung tu agum, ² dapat ay magkahod kam ti essa a pággisipan, sakay magmahalan kam tu balang essa sakay magkaessa kam ti essa a layunin. Ni konna hod ay magin ganap i kasayaan kuwáy dipo nikam. ³ Dyan kam maggimet ti ánya man a bagay dipo la tu kagustuwan moy a metanyag, nan magpakababa kam sakay ituring moy a mas higit u agum kasera nikam. ⁴ Bakán la u sadile moy a kapiyyaan u isipán moy nan pate be u kapiyyaan nu agum. ⁵ Nakwa magkahod kam ti pággisipan a konna ni Cristo. ⁶ Maskin tunay siya a Diyos ay awan na impilit a manatile a kapantay nu Diyos. ⁷ Nan nagpakababa siya sakay nabiyag a konna tu essa a alipin nikuna siya ay nagin tolay a kapareho tam. ⁸ Sakay nikuna a nagin tolay siya ay nagpakababa siya sakay nagin masássunudán siya tu Diyos hanggan kamatayan, maski pa u kákkatay na tu kudus. ⁹ Kanya inlangkaw siya nu Diyos tu kataasan sakay inyatád na nikuna u ngahan a higit tu atanan a ngahan. ¹⁰ Tánni atanan nu katoy ti langet sakay katoy ti lutaáy, u katoy tu disalad ni lutaáy ay lumuhud tán sumamba nikuna. ¹¹ Sakay ipakapospos nu atanan a tolay a ti Jesu-Cristo u Panginoon, para tu kapuriyan nu Diyos Ama. ¹² Kanya ngane, mahal ko hide a kákkapatkákka, ni kodyaák moy a lagi a sássunudán nikuna mamágkaguman kitam palla ay nakwa lalo kam pa a masássunudán nadid maski ni adeyuwák nikam. Pagsikapan moy a mabiyag a neayun tu kaligtasan a tinanggap moy, sakay gimitán moy iye ate hod a ánteng sakay pággalang tu Diyos. ¹³ Dipo u Diyos u mangatád nikam ti soh sakay kakayanan a magimet u kaluuban na. ¹⁴ Gimitán moy u atanan a bagay a awan ti reklamo sakay pamágtabbegan. ¹⁵ Tánni magin malinis kam sakay awan ti kapintasan bilang anak nu Diyos, nadid a kaguman moy palla u tolay hide a liwat sakay mágkadukás ti kákkabiyag. Tánni tu konna hod ay magin demlag kam nide a konna tu biton a maggehab ti langitáy, ¹⁶ mentras a ipakapospos moy nide u Maganda a Baheta a makapangatád ti biyag a awan ti kahád. Tánni tu káddemát ni Cristo ay mepagmadakál takam dipo awan nawanan ti kabuluhan u págpagud ko. ¹⁷ U págserbi moy a bunga nu pánnampalataya moy ay kumán a alay moy tu Diyos. Ni kailangan a mebuhus u digi ko, masayaák pade; dipo tu kamatayan ko ay kumán a mebuhus u digi ko kaguman nu alay moy. Sakay dipo ti ina ay mákpagsayaák nikam. ¹⁸ Kanya dapat magsaya kambe sakay mákpagsaya kam be nikán. ¹⁹ Maniwalaák a kaluuban nu Panginoon Jesus a mapaangay ko hina a pagdaka ti Timoteo tánni masayaák be ni ibaheta na u kalagayan moy hina. ²⁰ Awan dán ti iba a kapareho na tu pákpagkaessa na nikán tu págmalasakit tu kapiyyaan moy. ²¹ Dipo u agum ay awan ti iba a áisipan ni awan u sadile di la a kapiyyaan bakán a u para ni Jesu-Cristo. ²² Hikamon be u nakatukoy tu katapatan ni Timoteo. Kaguman ko siya tu pángngaral tu Maganda a Baheta. Tinulunganák na, a konna tu káttulung nu essa a anak tu ama na. ²³ Kanya balak ko siya a paangayán hina, ni matukuyan ku dán u hatul he nikán. ²⁴ Umasaák tu tulung nu Panginoon a awan magmalay ay makaangayák be hina. ²⁵ Naisip ko a kailangan dán hina a pasoliyán ti Epafrodito, u kapatkákka tam tu Panginoon a konna labe nikán a manggagawa sakay sundalo nu Diyos a pinaangay moy he para makatulung ko. ²⁶ Dipo tunay dán u soh na a ketan nakam hina a atanan, mabalisa siya a tahod dipo natukuyan na a nabaheta moy a nagkasakit siya. ²⁷ Nagkasakit ngane siya ti grabi a ngahe-ngahe na dán a ikatay pero kinagbiyan siya nu Diyos sakay pati be hikán. Kinagi ko a pati hikán, dipo tu págpiyya na ay neligtasák be tu matindi a kalungkutan. ²⁸ Kanya ngani gusto ku dán be a makasole siya hina dipo tukoy ko a masaya kam a ketan siya a huway. Tánni mabawasan dán be i balisa kuwáy. ²⁹ Kanya tanggapán moy siya a tehhod a kasayaan bilang tunay a tagapagserbi tu Panginoon. Igalang moy u tolay hide a konna nikuna. ³⁰ Dipo ngahe-ngahe dán siya a matay para tu págserbi ni Cristo. Intaya na u biyag na para matulunganák na bilang kapalit moy a magserbi nikán.

¹ Nadid, kákkapatkákka ko hide, magsaya kam para tu Panginoon. Awanák magsasawa a mánghuway-huway a mangkagi nikam ti bagayan hidenye dipo para la be iye tu kapiyyaan moy. ² Magingat kam tu tolay hide a masássohán a maggimet ti madukás. Kumán hide a aso a magbángngal. Male u itáttoldu de dipo ipilit de a kailangan a magpature bagu hide a maligtas. ³ Alalahanán moy a bakán a hide u tatahoden a ture nan hikitam, dipo u Banal a Ispirito u mánggiya nikitam tu págsamba tam tu Diyos sakay ipagmadakál tam u ginimet ni Cristo Jesus a siya u kasayaan tam. Awan kitam manalig tu pangluwas a seremonya a ipáppasunud de. ⁴ U tatahoden, te sapaták a dahilan para magmadakál ni tu págsunud tu utus ni Moises u págguhunan. Ni isipán ni deya man a te katuwiran siya a magtiwala tu konna he a gimet ay mas laluwák dán. ⁵ Tinuriyák tu kawalo a aldew sapul tu kákkeenak ko. Hebreowák; tunay a Israelita, gábwat tu lahe ni Benjamin. Ni kássunud tu Kautusan u págguhunan ay talaga sinunud ko dipo Pariseowák. ⁶ Dipo ngane tu kássunud ko tu Kautusan ay pináppahirapan ko u mánnampalataya hide tu itod. Kaya ni tungkul tu pagkamatuwid ayun tu Kautusan ay awan kam ti makagi nikán. ⁷ Pero dipo ni Cristo, u bagay hide a páppahalagaan ko tu itod ay imbilang ko nadid a awan ti kabuluhan. ⁸ On, imbilang ko a awan ti kabuluhan u atanan a bagay bilang kapalit nu mas lalo a mahalaga, u pákkatengge ko ni Cristo Jesus a Panginoon ko. U atanan a bagay ay impalagay ku dán a awan ti kabuluhan, magpasakupák la ni Cristo, ⁹ sakay mákpagkaessaák nikuna. Awan nák dán manalig a magin matuwid tu pamamag-itan nu kássunud tu Kautusan nan tu pánnalig ni Cristo. U pagin matuwid ko nadid ay kaluub nu Diyos nikán nikuna a simmampalatayaák ni Cristo. ¹⁰ U gusto ko nadid ay matengge ku pa ti husto ti Cristo, maranasan u kapangyariyan nu kákkabiyag na a huway sakay mákhate tu tinággád na a hirap sakay pumareho nikuna pati tu kákkatay na. ¹¹ Para ti konna hod ay maranasan ku be u mabiyag a huway. ¹² Awan ko kagiyán a nagimet ku dán u atanan a bagay a iye hide oni awanák dán makagimet ti kasalanan, nan magsumikapák a tupadán u kaluuban ni Cristo Jesus dipo iye u dahilan ni bakin a dinulawák na. ¹³ Kákkapatkákka ko hide, awan ko áisipán a natupad ku dán i bagayan iye hide. Pero u gággimitán ko nadid ay limunán u nakalipas sakay magsikapák para maalap ko u atanan nu gusto nu Diyos a matanggap ko tu tamuwán. ¹⁴ Kaya magtulos-tulusák ngane a patamo tu hangganan tánni matanggap ko u gantimpala a awan ti iba nan u pángdulaw nikán nu Diyos a mabiyag ti langet tu pamamag-itan ni Cristo Jesus. ¹⁵ Dapat konna hina u magin isipan tam bilang mágkatatag dán ti pánnampalataya. Ni bakán be a konna hina u isip moy ay ipakapospos iye nikam nu Diyos. ¹⁶ U mahalaga ay magtulos-tulos kitam a sumunud tu tatahoden a natukuyan tam. ¹⁷ Kákkapatkákka ko hide, ahigán moy u halimbawa ko. Sakay ahigán moy be u agum a mabiyag a konna nikame. ¹⁸ Dipo makpal u mabiyag kontara tu adal tungkul tu kákkatay ni Cristo tu kudus. Sangan ku dán a beses a kagiyán nikam sakay nadid ay magtákták i luwa kuwáy a ipaala-ala nikam a huway i iye. ¹⁹ Kapahamakan i sangpáttán diyay dipo u diyosán de ay u kagustuwan nu pilas de. Ipagmadakál dipa u bagay hide a dapat dipa nakwa a ikasanike sakay awan dán hide ti áisipán nan u bagay hide ti munduwáy. ²⁰ Pero para nikitam, u tunay tam a banuwan ay ti langet. Kaya tunay u pagkasoh tam tu págguhay tu kássole nu Panginoon a ti Jesu-Cristo, u tagapagligtas tam. ²¹ Káddemát ni itod a aldew ay baguwán na u mágkahina sakay matay a bággi tam sakay gimitán na a makalanget a konna tu bággi na. Gimitán na iye tu pamamag-itan nu kapangyariyan na a nangsakup na tu atanan a bagay.

¹ Kaya ngane mahal ko hide a kákkapatkákka, magpakatatag kam tu pánnampalataya moy tu Panginoon. Mahal takam sakay maammawák nikam hikam u kasayaan sakay gantimpala tu págserbi ko. ² Mákkekakagbiyák nikam Euodia sakay Sintique, a magkasundu kamon a duwwa bilang matkaka tu Panginoon. ³ Sakay ipákkekakagbi ko be niko, tapat ko a kaguman tulungan mo i duwwaán iye a bábbey. Dipo timmulung be hide nikán tu pángpakapospos tu Maganda a Baheta, a kaguman di Clemente sakay tu agum pa a tagapagserbi a konna nikán. U ngaha-ngahan de ay nakasulat tu libro nu biyag. ⁴ Magsaya kam a pirme tu Panginoon. Huwayán ko dámman a kagiyán: magsaya kam! ⁵ Ipeta moy tu atanan a tolay u kabaitan sakay pasensiya moy. Adene dán a dumemát u Panginoon. ⁶ Dyan kam mabalisa tu ánya man a bagay. Nan agidán moy tu Diyos u atanan nu kailangan moy tu pamamag-itan nu págdasal a tehhod a págpasalamat. ⁷ Ni ginimet moy iye, atádden kam nu Diyos ti kapayapaan a siya u mangbantay tu puso sakay tu isip moy dipo tu pákpagkaessa moy ni Cristo Jesus. I kapayapaanan iye ay awan kaya a maabut nu isip nu tolay. ⁸ Nadid kákkapatkákka, iye u kadimodyanan a kagiyán ko nikam: u lagi moy a isipán ay u bagay hide a karapat-dapat sakay kapure-pure: u bagay hide a tatahoden, marangal, matuwid, mágkaganda a gimet, sakay kagalang-galang. ⁹ Igimet moy u atanan a natukuyan moy, natanggap, nasaneg sakay netan moy nikán. Sakay u Diyos nu kapayapaan hod nikam. ¹⁰ Tunay i saya kuwáy tu Panginoon dipo huway moy dámman a inpeta u págmalasakit moy nikán, kállipas nu sangan a taon. Tukoy ko a awanák moy nalimu-limunan. Kaya la ay awan kam ti pagkakataun a tumulung nikán. ¹¹ Awan ko iye kagiyán para mák-agidák nikam ti tulung. Dipo natukuyan ku dán a magin kontento ánya man u kalagayan ko. ¹² Naranasan ku dán a maghirap. Naranasan ku dán be a magin sagana. Natukuyan ku dán a magin kontento tu ánya man a kalagayan: u mabássog oni magaláp, u kasaganaan oni lubu-lubus. ¹³ Magimet ku iye a atanan dipo tu begsák a inyatád nikán ni Cristo. ¹⁴ Konna pa man hod ay magpasalamaták a tahod dipo tu pángtulung moy nikán tu pághirap ko. ¹⁵ Sakay tukoy moy labe a taga-Filipos hide, nikuna lummakadák ti Macedonia sakay magsapul palla tu pángpakapospos tu Maganda a Baheta, awan dán ti iba a gurupo ni mánnampalataya a timmulung tu kailangan ko hide nan hikam la. ¹⁶ Dipo maski nikuna katoyák dán ti Tesalonica ay bakán kam la a pepensangan a nagpatawed ti tulung para nikán. ¹⁷ Kinagi ko iye, bakán a dipo gusto ko a tumanggap a pirme tu tulung moy hide, nan u gusto ko ay tumanggap kam ti makpal a gantimpala dipo matáttulungán kam. ¹⁸ Nadid, dipo tu tulung a impatawed moy ni Epafrodito a para nikán ay tehhod dán u atanan a kailangan ko hide sakay subra-subra ngane. Iye hide ay masáppot a alay tu Diyos, alay a katanggap-tanggap sakay makasaya nikuna. ¹⁹ Sakay u Diyos a pagserbiyan ko, siya u mangatád nikam tu atanan a kailangan moy a gábwat tu kayamanan na a awan maubus, dipo tu pákpagkaessa moy ni Cristo Jesus. ²⁰ Puriyán tam u Diyos sakay Ama hanggan-hanggan! Amen! ²¹ Ikumustaák moy tu atanan a pinile hide nu Diyos sakay nanalig hide ni Cristo Jesus, mákkumusta be u kákkapatkákka tam hide a kaguman ko he. ²² Kumusta kam kalla kagi nu kákkapatkákka tam hide he, lalo dán u tagapagserbi hide tu palasyo nu hare. ²³ Pagpalaán kam nakwa nu Panginoon a ti Jesu-Cristo.