Marcos

Marcos

¹ Nadid, iye u Maganda a Baheta tungkul ni Jesu-Cristo, u Anak nu Diyos. ² Nagsapul iye nikuna natupad u insulat ni prupeta Isaias, “Katoy he u inutusan ko a mágdipalongo niko; Ihanda na u lakadán mo. ³ Siya u magpákhaw tu kaparangan ti konna he: ‘Ihanda moy u lakadán nu Panginoon, sakay ayusán moy u paglakaden na. ⁴ Sakay dimmemát ngani ti Juan a Tagapagbautismo tu kaparangan. Nagtoldu siya tu tolay hide a dapat hide a magsise tu kasalanan de sakay magpabawtismo támpara patawadán nu Diyos u kasalanan de hide. ⁵ Makpal a tolay tu prubinsya a Judea sakay tu banuwan a Jerusalem, u immangay tu kán Juan sakay intapat de u atanan a kasalanan de, sakay binawtismuwan hide ni Juan tu dinom a Jordan. ⁶ Nadid, u badu ni Juan ay gimet tu linade a buuk nu dakál a hayup a kamelyo sakay u sinturon na ay koblet. U kákkanán na ay haksa sakay bisa ni pitukan. ⁷ Konna he u kákkagiyán na tu tolay hide, “U dumemát a kasunud ko ay mas makapangyariyan nan hikán. Awanák karapat-dapat a mangibut tu sinelas na. ⁸ Binawtismuwan takam tu dinom. Pero bawtismuwan nakam tu Banal a Ispirito.” ⁹ Ti panahunan itod ay dimmemát ti Jesus a gábwat ti Nazaret a sakup ni Galilea, sakay binawtismuwan siya ni Juan tu dinom a Jordan. ¹⁰ Tu káawas ni Jesus tu dinom ay netan na a bimmukas u langet sakay simmidung nikuna u Banal a Ispirito a kumán a kalapate. ¹¹ Sakay nasaneg na u boses a gábwat ti langet, “Hiko u pinakamamahal ko a anak, masayaák niko a tahod.” ¹² Káttapos ay inggiyya nu Banal a Ispirito ti Jesus tu kaparangan. ¹³ Áppat a pulo a aldew siya a katoy hod a táttoksuwán ni Satanas. U hayup hod ay mágkatapang pero pinagserbiyan nu anghel hide ti Jesus. ¹⁴ Nikuna a nepireso ti Juan ay immangay ti Jesus ti Galilea sakay nagtoldu hod siya tu Maganda a Baheta a gábwat tu Diyos. ¹⁵ Kinagi na,“Dimmemát dán u odas sakay adene dán a maghare u Diyos. Kaya magsise kamon tu kasalanan moy hide sakay maniwala kam ti iye a Maganda a Baheta.” ¹⁶ Mentaras a maglakad ti Jesus tu bihebi nu minalno ti Galilea ay netan na u matkaka a mángngikan, di Simon sakay ti Andres a magsabud. ¹⁷ Kinagi nide ni Jesus, “Mákkuyog kam nikán, sapul nadid ay bakán dán a ikan u alapán moy nan tolay dán a para tu Diyos.” ¹⁸ Pákkakagi na hod ay agad de a inwahak u gila de sakay nákkuyog hide nikuna. ¹⁹ Nagdiretso la siya tu páglakad na, awan palla siya nakaadeyo ay netan na u matkaka a di Santiago ay ti Juan, a anak ni Zebedeo. Katoy hide tu abeng de a magayuma tu pante de. ²⁰ Dinulaw be hide a agad ni Jesus kaya be hide a nákkuyog nikuna, linakaden de u ama de tu abeng a kaguman nu áupaan hide a tolay. ²¹ Nadid ay immangay hide ti Capernaum. Tu Aldew nu Káimang ay simmáddáp ti Jesus tu Sinagoga sakay nagtoldu. ²² Nagtaka u tolay hide dipo magtoldu siya nide a te kapangyariyan, bakán a konna tu maisto hide nu Kautusan ni Moises. ²³ Mentaras a magtoldu ti Jesus bigla a simmáddáp tu Sinagoga u essa a lállake a sináddáp ni madukás a ispirito sakay pimmákhaw, ²⁴ “Ánya pák-alam muway nikame, Jesus a taga-Nazaret? Immangay kabe man he para puksaán mu kame? Tukoy taka, hiko u Banal a gábwat tu Diyos.” ²⁵ Pero inyutus ni Jesus tu madukás a ispirito, “Manahimik ka, sakay umibut ka nikuna.” ²⁶ Pinagpágpág nu madukás a ispirito u tolay sakay limmuwas a makán pákhawán. ²⁷ Nagtaka u atanan, kanya namágtanungan hide, “Ánya iye? Bigu a toldu? Mautusan na pate u mágkadukás hide a ispirito sakay sumunud be nikuna.” ²⁸ Dipo hod ay mabilis a kimmalat tu buo a Galilea u baheta tungkul tu ginimet ni Jesus. ²⁹ Nadid, kálluwas di Jesus sakay tu disepulus na hide, kaguman di Santiago sakay ti Juan, tu Sinagoga ay nagdiretso hide tu bilay di Simon ay ti Andres. ³⁰ Nedemáttan de ate katdug dálla u katugngan ni Simon Pedro, dipo tu lánggáng na a ladu, kanya agad di iye a kinagi ni Jesus. ³¹ Nikuna natukuyan iye ni Jesus ay inadeniyan na u bábbey, tinawiden na u kamát na sakay pinaikat na. Ti itod bila ay nagpiyya u ladu na sakay nagserbi nide. ³² Tu kássahám nu aldew ay inyangay de tu kán Jesus u atanan a te saket sakay u sináddáp hide ni madukás a ispirito, ³³ Sakay halus atanan a tolay tu banuwan ay naipun tu atubang nu bilay. ³⁴ Pinagpiyya na u tunay ti kakpal a te saket maski ni ányaman u bábbatiyán de sakay pinaibut na u madukás hide a ispirito. Awan na iye hide pinakultaden a magupos dipo tukoy de ni ti deya siya. ³⁵ Magamulaldew palla ay immikat dán ti Jesus sakay immangay tu tahimik a lugar sakay nagdasal. ³⁶ Tu káikat di Simon sakay tu agum na hide ay inehyok di siya. ³⁷ Nikuna a ketan di ti Jesus ay kinagi de a, “Ehyukán ka nu tolay hide.” ³⁸ Pero kinagi ni Jesus nide, “Kailangan a umangay kitam be tu agum a banuwan para makapagtolduwák hod. Iye u dahilan ni bakin a immangayák he.” ³⁹ Sakay linebut na u buo a Galilea a nagtoldu tu Sinagoga hide sakay nagpaibut tu mágkadukás hide a ispirito a hod tu tolay hide. ⁴⁰ Nadid tehhod a essa a te ketong a immadene ni Jesus. Limmuhud siya sakay nákkekakagbi,“Ni kaluuben mo a magpiyyaák ay mapagpiyyaák mo.” ⁴¹ Kinagbiyan siya ni Jesus kaya kinahap na sakay kinagi na, “On gusto ko! magpiyya ka.” ⁴² Ti itod bila ay nagpiyya u kinetong. ⁴³ Sakay pinalakad siya a agad ni Jesus, ⁴⁴ pero kinagiyan na siya, “Diyan mu iye kagi-kagiyán maski ni ti deya. Nan angay ka paileng tu saserdote. Káttapos ay mangatád ka nide ti iyalay de a konna tu inyutus ni Moises, támpara patunay tu tolay hide a nagpiyya ka dán.” ⁴⁵ Pero limmakad siya sakay imbábbaheta na u nangyare, kanya awan dán makalantad ti Jesus a makasáddáp tu banuwan nan hod dálla siya tu adeyo hide a lugar. Pero maski konna hod ay umangay pade nikuna u tolay hide a gábwat tu iba-iba a lugar.

¹ Nadid, kállipas nu sangan a aldew ay nagsole ti Jesus ti Capernaum. Sakay kimmalat u baheta a hod siya tu bilay a páppágyanan de. ² Kanya naipun hod u makpal a tolay, ngahi-ngahe a awan ti mapuwestuwan maski tu luwas nu pintuwan. ³ Mentaras a magtoldu ti Jesus, ay te dimmemát a áppat a lállake, te usung hide a paralitiko ⁴ Dipo tu kakpal nu tolay ay awan di meadene u paralitiko ni Jesus, kanya inyonek de u te saket tu atáp nu bilay sakay linákwab de u atáp tu tapat ni Jesus, sakay intonton de u paralitiko a ketidug tu ayod a kekkatdugen na. ⁵ Nikuna ketan ni Jesus ni sakodya a kadakál u pánniwala de ay kinagi na tu paralitiko, “Anak, pinatawad dán u kasalanan mo hide.” ⁶ Nadid te sangan a eskriba a mággetnod hod a nagisip ti konna he: ⁷ “Bakin magupos siya ti konna hod? Lapastanganan ina tu Diyos! Awan beman u Diyos la u makapagpatawad ti kasalanan?” ⁸ Tukoy ni Jesus u katoy tu isip de kanya kinagi na a agad, “Bakin magisip kam ti konna hina? ⁹ Ánya beman u mas alisto, u kagiyán ti paralitikuwáy, “Napatawad dán u kasalanan mo hide,’ oni kagiyán a, ‘Tumaknág ka sakay tawidán mo dán i kekkatdugen muwe sakay maglakad ka’? ¹⁰ Pero patunayan ku nikam a tehhod a kapangyariyan u Anak nu Tolay a magpatawad ti kasalanan ti lutaáy.” kinagi na tu paralitiko, ¹¹ “Tumaknág ka, tawidán mo i kákkatdugan muwe sakay soli ka dán!” ¹² Tummaknág ngani u paralitiko samantala umaeleng u atanan a tolay. Agad na a tinawed u kákkatdugen na sakay lummakad, kanya atanan a katoy hod ay nagtaka. Nagpure hide tu Diyos sakay kinagi de, “Awan kami padla naketa ti konna he maskin nikasangan”! ¹³ Ummangay a huway ti Jesus tu bihebi nu Hanno tu prubinsiya a Galilea. Tinagubet siya hod nu tuna’t kakpal a tolay sakay tinolduwan na hide. ¹⁴ Mentaras a maglakad ti Jesus ay netan na a mággetnod tu págsingihan ti buwes ti Levi a anak ni Alfeo. Kinagi nikuna ni Jesus, “Mákkuyog ka nikán” Tummaknág be ti Levi sakay nákkuyog ngani nikuna. ¹⁵ Nikuna kuman ti Jesus sakay tu disepulus na hide tu bilay ni Levi, kaguman de a kuman u mágsingeh hide ti buwes sakay u agum pa hide a makasalanan, dipo makpal a konna he a tolay a nágkuyog ni Jesus. ¹⁶ Nikuna ketan iye nu sangan a tagapagtoldu nu Kautusan a kaguman tu gurupo nu Pariseo hide ay tinanung de u disepulus na hide, “Bakin mákkaguman siya a mákkan tu mágsingeh hide ti buwes sakay tu makasalanan hide?” ¹⁷ Nasaneg iye ni Jesus kanya siya u tummábbeg, “Awan kailangan nu tolay a awan ti saket u mággamot, nan u tessaket la. Ummangayák he támpara dulawán u makasalanan hide, bakán a u awan hide ti kasalanan.” ¹⁸ Nadid ay nagkulasyon u disepulus hide ni Juan a Tagabawtismo sakay u Pariseo hide. Tehhod a ummadene ni Jesus sakay nagtanung, “Bakin awan nagkulasyon i disepulus muwe hide, samantala u disepulus hide ni Juan a Tagabawtismo sakay u Pariseo hide ay nagkulasyon?” ¹⁹ Timmábbeg ti Jesus, “Dapat beman a magkulasyon u tolay hide tu kasalan mentaras kaguman di palla u lállake a inkasal? Awan! Mentaras kaguman di padla siya ay awan di itod gimitán. ²⁰ Pero dumemát u aldew a meadeyo nide u lállake a inkasal, kaya hod padla hide a magkulasyon. ²¹ “Awan ti magáppol ti bigu a risato tu date a damit dipo ni nabatak u bigu a risato, mabatak u ináppolan sakay lalo a dumakál u pisad. ²² Awan be ti magasák tu bigu a alak tu date dán a pággasákkan, dipo pisadán nu alak u date a pággasákkan sakay parehas a masayang u alak sakay u pággasákkan. Dapat u bigu a alak ay iyasák tu bigu be a pággasákkan!” ²³ Tu essa a Aldew nu Káimang, nagtaleb ti Jesus sakay u disepulus na hide tu bihebi nu ka triguwan. Mentaras maglakad hide ay nangalap u disepulus hide tu ohay nu trigu ta pagkásselan de, ²⁴ Sakay kinagi nu Pariseo hide ni Jesus, “Ilingán mo i gággimitán ni disepulus muwe hide. Mahigpit itona a ipagbawal nu Kautusan tu Aldew nu Káimang!” ²⁵ - ²⁶ Tinábbeg be hide ni Jesus, “Awan moy padla beman nabasa u ginimet ni David nikuna ti Abiatar u pinakapuno a saserdote? Nikuna nagaláp ti David sakay u kaguman na hide dipo awan ti makan, summáddáp siya tu bilay nu Diyos sakay kimman tu tinapay a alay tu Diyos. Inatádden na pa u kaguman na hide. Ayun tu Kautusan, u saserdote la u tehhod a karapatan a kuman ti itod.” ²⁷ Kinagi be ni Jesus, “Netakda u Aldew nu Kaimang para tu kapiyyaan nu tolay; bakán a nilalang u tolay para tu Aldew nu Kaimang. ²⁸ Kaya u Anak nu Tolay ay te kapangyariyan a mángkagi ni ánya u tama a gimitán tu Aldew nu Káimang.”

¹ Nadid, simmáddáp a huway ti Jesus tu sinagoga. Nedemáttan na hod u essa a lállake a patay u essa na a kamát. ² Kanya binantayan nu agum a tolay a hed-hod ni pagpiyyaán ni Jesus i lállakiyan itod tu Aldew nu Káimang, támpara tehhod hide a mebintang nikuna. ³ Dinulaw ni Jesus u lállake a patay ti kamat, “Karon he!” ⁴ Káttapos ay tinanung nabe u tolay hide,“Ánya beman u ayun tu Kautusan, u maggimet ti maganda oni maggimet ti madukás tu Aldew nu Káimang? U mángligtas ti biyag oni mamuno?” Pero awan hide timmábbeg. ⁵ Maiyamut sakay malungkut ti Jesus a immileng tu tolay hide a katoy tu palebut na, dipo tu kaigáttan nu ulo de. Káttapos ay kinagi na tu te saket, “Iyolnat mo i kamát muwe.” Inyolnat be nu lállake u kamát na sakay nagpiyya iye. ⁶ Kanya limmakad a agad u Pariseo hide sakay nákpágguhon tu tagasuporta hide ni Herodes para ipabuno de ti Jesus. ⁷ Nadid, lummakad di Jesus sakay tu disepulus na hide sakay immangay tu bihebi nu minalno. Tinagubet hod siya nu tunat kakpal a tolay a gábwat ti Galilea, ti Judea, ⁸ Jerusalem, Idumea, tu dibilew nu dinom a Jordan sakay tu palebut ni Tiro sakay Sidon. Tummagubet hide ni Jesus dipo nabaheta de u atanan a makataka-taka a ginimet na. ⁹ Dipo tu kakpal nu tolay ay nagpahanda ti Jesus tu disepulus na hide ti essa a abang, para te masakayan siya para awan maáldit nu tolay hide a magdemáttan. ¹⁰ Dipo makpal dán siya a pinagpiyya, dayuwán siya nu atanan a te saket tán para matawiden di la siya. ¹¹ Ni ketan siya nu tolay hide a sináddáp nu madukás a ispirito ay lumuhud hide tu atubang na sakay pumákhaw,‘Hiko u Anak nu Diyos!’ ¹² Pero mahigpit a inutusan ni Jesus u mágkadukás hide a ispirito a dyan de kagiyán ti maskin deya ni ti deya siya. ¹³ Káttapos ay immangay ti Jesus tu buked sakay dinulawan na u tolay hide a pinili na, sakay immadene hide nikuna. ¹⁴ Nagpile siya ti sapulo ay ti duwwa [a dinulaw na a disepulus] para kaguman na sakay utusan na a mangaral. ¹⁵ Sakay inatádden nabe hide ti kapangyariyan a magpalakad tu mágkadukás hide a ispirito. ¹⁶ Sa iye u disepulus na hide a pinili na: Ti Simon a ngángngahanan na a Pedro, ¹⁷ ti Santiago sakay ti Juan a anak ni Sebedeo (hide ay dáddulawán na a Boanerges a u gusto na a kagiyán ay “anak hide ni kádduh”); ¹⁸ ti Andres, ti Felipe, ti Bartolome, ti Mateo, ti Tomas, ti Santiago a anak ni Alfeo, ti Tadeo, ti Simon a makabayan, ¹⁹ sakay ti Judas Iscariote a nángtokyon ni Jesus. ²⁰ Tu kássole ni Jesus tu bilay a táttulusan na ay nagdemáttan a huway u tunay ti kakpal a tolay. Kanya awan dán hide ti odas a kinuman. ²¹ Nikuna a mabaheta nu pamilya ni Jesus i iye ay inangay di siya para pahintuwán, dipo kákkagiyán nu tolay hide a nasida dán u isip na. ²² Tehhod be a dimmemát a gábwat ti Jerusalem a tagapagtoldu hide tu Kautusan, kinagi de, “Sináddáp siya ni Satanas a pinakapuno nu mágkadukás a ispirito. Sakay iye u mángatád nikuna ti kapangyariyan a magpaibut tu mágkadukás hide a ispirito.” ²³ Kanya pinaadene ni Jesus u tolay hide sakay nagupos siya nide ti sangan a talinhaga, “Mapalakad beman ni Satanas u sadili na? ²⁴ Ni mamáglaban-laban u tolay hide tu essa a banuwan ay masida i kahariyanan itod. ²⁵ Konna bi hod u mangyare tu essa a pamilya ni namágdadema hide. ²⁶ Konna bihod ti Satanas, kapag kinalaban ni Satanas u sadile na sakay u sakup na hide ay mahate-hate sakay mamágdadema ay masida u kahariyan na sakay itod dán u katapusan na. ²⁷ “Awan maare a sáddáppán nu mágtakaw u bilay nu mabegsák a tolay ni awan pa siya megapus. Pero ni megapus dán ay maare dán a pagtakawan u bilay na. ²⁸ Tandaan moy iye: u atanan a kasalanan pate u upos a kontara tu Diyos ay maare a mapatawad, ²⁹ pero ni ti deyaman u magupos kontara tu Banal a Ispirito ay awan ti kapatawaden. U konna hina a kasalanan ay awan mapatawad hanggan-hanggan. ³⁰ Kinagi itod ni Jesus dipo kákkagiyán nu tagapagtoldu hide tu Kautusan a sináddáp siya nu madukás a ispirito. ³¹ Nadid, dimmemát u ina sakay u wáwwadi hide ni Jesus. Nágtaknág hide tu luwas nu bilay sakay impadulaw di siya. ³² Makpal a tolay u mággetnod tu palebut ni Jesus. Tehhod a nagkagi nikuna, “Katoy ti luwase tena mo sakay tu wáwwadi mo hide a bábbey sakay lállake uhayán dika.” ³³ Timmábbeg ti Jesus, “Deya beman i ina kuway sakay wáwwadi kuway?” ³⁴ Inileng na u tolay hide a katoy tu palebut na, sakay kinagi na, “hide ina kuway sakay wáwwadi kuway! ³⁵ Ta dipo ni deya man u sumunud tu kaluuben nu Diyos ay siya u ina ko sakay u wáwwadi ko.”

¹ Nadid, nagtoldu a huway ti Jesus tu bihebi nu Hanno ti Galilea. Sakay immangay hod nikuna u tunay ti kakpal a tolay, kanya simmakay siya tu abang sakay dummitaw siya a nággetnod. U tolay hide ay hod be tu bihebi nu minalno, ² sakay tinolduwan na hide ti makpal a bagay tu pamamag-itan nu talinghaga. Konna he u kinagi na: ³ “Mágsaneg kam! Tehhod a essa a tolay a limmuwas para magsabug ti bine. ⁴ Tu págsabug na ay tehhod a bine a netákneg tu dilan. Dimmemát u manok hide sakay kinákkutem de itod hide a bine. ⁵ Tehhod be a bine a netákneg tu mabito-bito. Maski awan ti taga-luta, alisto a timmubu u bine hide. ⁶ Pero nalanás labe hide nikuna a simminggit u sinag, dipo awan madisalad u gimot de, kanya natay. ⁷ Tehhod be a bine a netákneg tu masaet a kalamonan; immoya u lamon hide inilongan na u bine a timmubu, kanya awan nagbunga u bine hide. ⁸ Sakay te netákneg be a bine tu maganda a luta. Timmubu iye sakay immoya, sakay nagbunga ti makpal, te tággi tállo a pulo sakay ánnám a pulo, sakay tággi datos a butil u bawat essa.” ⁹ Kinagi pa ni Jesus, “Hikam a mágsaneg ay dapat moy iye a pakasanigán sakay intendiyán.” ¹⁰ Nikuna a mágge essa dálla ti Jesus ay ummadene nikuna u sangan tu mágsaneg hide kaguman u disepulus na hide. Inaged de a ipaliwanag na u talinghaga. ¹¹ Kinagi nide ni Jesus,“Nepagkaluub nikam u karapatan a matukuyan u lihim tungkul tu pághare nu Diyos, pero tu agum ay nekagi iye tu pamamag-itan nu talinghaga. ¹² Tánni, ‘Maski ketan de ay awan di pade maintendiyan, sakay makánsanigán man hide ay awan hide makaintendi. Dipo ni makaintendi nakwa hide ay nagsise hide tu kasalanan de hide sakay napatawad nakwa hide.”’ ¹³ Káttapos ay tinanung hide ni Jesus, “Awan moy pad beman la naintendiyan i talinghagaan iye? Kodya moy a maintendiyan u agum pa hide a talinghaga? ¹⁴ Iye u gusto a kagiyán nu talinghaga: u insabug nu mágsabug ay u Upos nu Diyos, ¹⁵ sakay u bine hide a netákneg tu dilan ay u tolay hide a nakasaneg tu Upos nu Diyos. Pero tu káddemát ni Satanas ay inagew na u Upos nu Diyos a nasaneg de. ¹⁶ “U kapareho nu bine a netákneg tu mabito-bito a luta ay u nágsaneg hide tu Upos nu Diyos sakay tinanggap de a te kasayaan u Upos nu Diyos. ¹⁷ Pero awan naggimot u upos nu Diyos tu puso de, kanya awan hide nanatile. Nikuna demattan hide nu sari-sare a kahirapan oni pagdusta dipo tu upos nu Diyos, ay pagdaka hide a immatras. ¹⁸ Sakay u agum a bine a netákneg tu kalamonan ay u tolay hide a nakasaneg tu upos nu Diyos, ¹⁹ pero dipo tu kabalisaan ti biyag, págmahal tu pilak, oni kákkasoh tu sari-sare a bagay, u Upos nu Diyos ay nawan tu puso de kanya awan iye nagbunga. ²⁰ “Iye be u kapareho nu bine a nesabug tu maganda a luta. Hide u tolay a nágsaneg sakay nangtanggap tu Upos nu Diyos sakay mágbunga-bunga ti makpal; tehhod a tágtatallo a pulo, te tágga-ánnám a pulo sakay tehhod a tággidatos.” ²¹ Sakay kinagi pa nide ni Jesus,“Taban beman u simbuwan sakay takáppán tu págtakalan o kaya itagu tu sahok nu táttidugen? Awan beman kapag nataban dán ay idátton itod tu talaga a págtupuwan? ²² Awan ti netagu a awan melantad, sakay awan ti sekreto a awan mehayag. ²³ Kinagi ni Jesus“Hikam a mágsaneg hide, dapat moy iye a isipán sakay intendiyán.” ²⁴ Indugtung na pa, “Intendiyán moy ti mapiyya u nasaneg moy. U panukat a ginamit moy tu agum ay siya be u panukat nikam, sakay mas pa hona. ²⁵ Dipo u tehhod dán ay atádden pa, pero u awan ay alapán pa maskin u badit a katoy nikuna. ²⁶ Kinagi pa ni Jesus, “U pághare nu Diyos ay konna tu essa a nagsabug tu bine tu buked na. ²⁷ Mátdug siya ti gibi sakay umikat ni aldew dán. Pero u bine ay magtubu sakay umoya, pero awan na tukoy ni kodya. ²⁸ U luta u magpatubu sakay magpabunga tu mula; lumuwas pa u duun na, bagu u ohay; sakay káttapos ay makpal a butil. ²⁹ Sakay ni naluto dán ay aniyán dán iye nu kekkao, dipo odas dán a aniyán.” ³⁰ “ Sakay kinagi pa ni Jesus, ”Hádya tam pa a meparehas u kahariyan nu Diyos? Ánya a katalinghaga u gamitán tam para mepaliwanag iye? ³¹ “U pághare nu Diyos ay kapareho nu bukál nu mustasa, iye u pinakabadit tu atanan a bukál. ³² Pero ni memula dán sakay tumubu dán ay magin pinakamalangkaw iye tu atanan a mula; sakay magpinget pa ti mágkabaál. Kaya maare a paglobunan nu manok hide u pinget na a malidum.” ³³ Konna hod u págtoldu ni Jesus tu tolay hide, maggamit siya ti makpal a talinghaga, ayun tu kaya de a pággintendi. ³⁴ Awan siya nagtoldu tu tolay hide a bakán a tu pamamag-itan nu talinghaga, pero ipaliwanag na labe tu disepulus na hide u atanan ni hidi-hidi dálla. ³⁵ Nadid, tu kagibiyan ni itod a aldew ay kinagi ni Jesus tu disepulus na hide,“Umahabes kitam ti dibilew.” ³⁶ Kanya linakaden de u katolayan sakay simmakay hide tu abang a sássakayan ni Jesus. Tehhod agum pa abang a náksabay nide. ³⁷ Mentaras a mággabang hide ay inabut hide nu mabegsák a bagyo, salpuk-salpukán nu dáddakkál a tagmák u abang de kaya halus maputat dán ti limas. ³⁸ Tidug ti Jesus a nakapunganan tu dipos nu abang. Linukag siya nu disepulus na hide, “Maisto, awan ka beman ti pák-alam maski malimás kitamon?” ³⁹ Immikat ti Jesus sakay pinaimang na u pahás ay tu tagmák. Kinagi na tu pahás, “Umimang ka dán!” sakay kinagi na tu tagmák, “Lumantap ka dán!” Ummimang ngane u pahás sakay limmantap u diget. ⁴⁰ Káttapos ay kinagi na tu disepulus na hide, “Bakin a manteng kam? Hanggan pad beman nadid ay awan kam pad la ti pánnampalataya nikán?” ⁴¹ Garabi u ánteng de sakay nagtaka hide. Kinagi de tu bawat essa, “Ti deya wád iye? Maski u pahás sakay u tagmák ay sumunud nikuna!”

¹ Nadid ay nakademát dán hide tu dibilew nu minalno, tu lugar nu Garaseno hide. ² Tu káawas ni Jesus tu abang ay tinagbu siya nu essa a lállake a sináddáp ni madukás a ispirito. ³ Mámmágyan siya tu páglábbángngan. Awan dán ti makabilod nikuna maskin kadena pa u gamitán de. ⁴ Sangan di dán siya a beses a igapus ti kadena tu kamát na ay tu tikád na, pero bágsot-bágsután nala. Awan dán ti makabilod nikuna. ⁵ Aldew ay ti gibi ay mágpapákhawán siya tu páglábbángngan sakay tu buki-buked, sakay táttalinguwan na be u sadile na tu mágkatadám a bito. ⁶ Adeyo palla ti Jesus ay netan dán siya nu lállake. Nagginan siya a paadene ni Jesus sakay limmuhud tu atubang na. ⁷ Sakay pinumákhaw siya ti mabegsák, kinagi na, “Jesus, Anak nu Kataas-taasan a Diyos, ánya i pákalam muway nikán? Ipananto mo tu ngahan nu Diyos a awanák mo pahirapan!” ⁸ Kinagi na iye dipo inyutus ni Jesus, “Madukás a ispirito, lumakad ka ti tolayan iye!” ⁹ Tinanung siya ni Jesus, “Ánya ngahan muwáy?” “Kakáppalan, u ngahan ko dipo makpal kame.” kagi na. ¹⁰ Sakay nákkekagbi u madukás a ispirito ni Jesus a diyan na hide paadeyuwán ti lugaran itod. ¹¹ Nadid, tu digdig nu buked ay te kababuyan a magsábbuk. ¹² Nákkekagbi ni Jesus u madukás a ispirito, kinagi na,“Ni maare ay pasáddáppán mu kame dálla tu kababuyan.” ¹³ Pimmayag ti Jesus immibut u mágkadukás a ispirito tu lállake sakay simmáddáp hide tu kababuyan. Káttapos ay nággaginanán a padegson u mahigit a duwwa a libu a babuy tu tunay ti langkaw a pang-pang a diri-diretso a sinumegbu tu dinom kanya nágkalimás hide. ¹⁴ U mággalaga hide tu babuy ay nággaginanán hide a patamo tu banuwan tu babaryo sakay imbaheta di hod u nangyare. Kanya immangay hod u tolay hide para ilingán de u nangyare. ¹⁵ Tu káddemát de tu kán Jesus ay netan de u lállake a sináddáp ni madukás a ispirito a mággetnod nakabadu dán sakay mahusay dán siya. Nikuna a ketan nu tolay hide ay nanteng hide. ¹⁶ Imbábbaheta nu tolay hide u netan de a nangyare tu lállake a date a sináddáp nu mágkadukás hide a ispirito sakay tu kababuyan. ¹⁷ Dipo ti iye ay nákkekagbi u tolay hide ni Jesus a lumakad siya tu banuwan de. ¹⁸ Nikuna a sumakay dán ti Jesus tu abang ay nákkekagbi nikuna u lállake a date a sináddáp ni magkadukás a ispirito a kuyugán na siya, ¹⁹ pero awan pimmayag ti Jesus, nan kinagi na tu lállake, “Sumole ka dán tu pamilya mo sakay ibaheta mo nide u atanan a ginimet niko nu Panginoon sakay ni kodya naka a kinagbiyan.” ²⁰ Kanya limmakad u lállake sakay immangay ti Decapolis sakay imbaheta na hod u ginimet nikuna ni Jesus. Sakay nagtaka u atanan a nakasaneg tungkul tu pangyayare. ²¹ Simmakay ti Jesus tu abang sakay nagsole ti dibilew. Katoy palla siya tu bihebi nu minalno ay kinadahupodupan dámman siya nu tunay ti kakpal a tolay. ²² Katoy bi hod u essa a puno tu sinagoga a ti Jairo u ngahan na. Pákketa na ni Jesus ay lummuhud siya tu táttikádden na ²³ sakay nákkekagbi, “Magipepatay dán u anak ko a dalagita. Mahabag ka, ni maare ay mákkuyog ka nikán sakay itupo mo i kamát muwe nikuna, tán magpiyya siya sakay mabiyag!” ²⁴ Nákkuyog nikuna ti Jesus. Pero immunonod be nikuna u tuna’t kakpal a tolay, kanya halus maáldit dán siya. ²⁵ Kaguman be hod tu mamággálditan u essa a bábbey a sapulo ay ti duwwa dán a taon a mágdadigiyán. ²⁶ Makpal a hirap u nadanas na tu págpagamot na tu sari-sare a mággamot. Naubus na dán u atanan a ari-ariyan na tu págpagamot, pero awan nagpiyya nan lalu pa a himmigpit u saket na. ²⁷ Nikuna a nabaheta na u makataka-taka a ginimet ni Jesus ay nákpágálditan siya tu tolay hide para matawiden nala u damit ni Jesus. ²⁸ Dipo naisip nu bábbey:“Ni makahap kula i damit nae ay magpiyyaák dán.” ²⁹ Pagdaka ngani a ummimang u págdigi na sakay naramdaman na a nagpiyya dán siya. ³⁰ Agad be a nabate ni Jesus a te nagpiyya dipo tu kapangyariyan na, kanya simmuleg siya tu tolay hide sakay tinanung na hide, “Ti deya i nangkahapay ti badu kuwáy?” ³¹ Kanya timmábbeg u disepulus na hide,“Bakin itanung mo ni ti deya i nangkahapay ti badu muwe? Tuna’t kakpal i katolayane a mamággálditan!” ³² Pero tulos-tulos la a summuleg ti Jesus para ilingán na ni ti deya i nangkahapay tu badu na. ³³ Palibhasa tukoy nu bábbey u nangyare, kanya immadene siya a magpágpág ti ánteng sakay limmuhud tu atubang ni Jesus. Sakay kinagi na u buo a tatahoden tungkul tu nangyare nikuna. ³⁴ Pero kinagi nikuna ni Jesus, “Anak, pinagpiyya ka nu pánnampalataya mo. Kadmudán sakay pamayapaan mo isip muwe. Nagpiyya ka dán.” ³⁵ Mentaras a kauhunán ni Jesus u bábbey ay dimmemát u sangan a tolay a gábwat tu bilay ni Jairo. Kinagi de ni Jairo,“Patay dán u anak mo. Dyan mo dán abalaán i maistuwe.” ³⁶ Pero awan pinansin ni Jesus u kinagi de. Nan kinagi na ni Jairo, “Dyan ka manteng, sumampalataya ka la.” ³⁷ Sakay awan pinayagen ni Jesus a mákkuyog u katolayan maliban di Pedro sakay u matkaka a di Santiago ay ti Juan. ³⁸ Káddemát de tu bilay ni Jairo ay netan ni Jesus a mabalisa u tolay hod hide, sakay makánsangitán hide. ³⁹ Tu kássáddáp na tu bilay ay kinagi na tu tolay hide, “Bakin a marebuk kam sakay makánsangitán? Awan patay i anake nan tidug la siya.” ⁴⁰ Dipo tu kinagi na ay kinatawaan siya nu tolay hide. Pero pinaluwas na hide a atanan maliban tu tállo a disepulus sakay tu dáddakál nu anak, sakay simmáddáp hide tu páppágyanan nu anak. ⁴¹ Tinawiden ni Jesus u kamát nu anak sakay kinagi na, “Talita koum,”u gusto na a kagiyán ay “anak, umikat ka!” ⁴² Kaya pagdaka a immikat u anak sakay naglakad, sakay nagtaka a tahod u atanan tolay hod. U anak ay sapulo ay ti duwwa dán a taon. ⁴³ Sakay mahigpit hide a kinagiyan ni Jesus a dyan de kagiyán maskin ti deya u nangyare. Káttapos ay inyutus na a atádden de ti makan u anak.

¹ Limmakad ti Jesus ti Capernaum sakay simmole siya tu sadile na a banuwan kaguman u disepulus na hide. ² Káddemát nu Aldew nu Káimang ay immangay ti Jesus tu sinagoga sakay nagtoldu hod. Kakpalan tu nágsaneg nikuna ay nagtaka hide sakay nagtanungan hide, “Hádya na wád a inalap i karunungan na e? Sakay ánya iye a karunungan a neatád nikuna? Kodya siya a makagimet ti makataka-taka a bagay? ³ Awan beman siya u karapintero a anak ni Maria, sakay wadi na di Santiago, Jose, Judas sakay ti Simon? Awan beman u wáwwadi na a bábbey ay hod he a mágyan?”Dipo ti itod ay umád de a maniwala nikuna sakay binadit-badit de siya. ⁴ Dipo ti iye ay kinagi nide ni Jesus, “U essa a prupeta ay igalang maskin hádya, liban la tu kabanuwan na hide, u kapartidu na hide, sakay u kabilay na hide.” ⁵ Itod u dahilan ni bakin awan siya nakagimet tu makataka-taka a bagay ti itod, liban la tu sasangan a te saket a pinatungan na tu kamát na sakay pinagpiyya. ⁶ Nagtaka siya dipo umád de a maniwala nikuna. Linebut ni Jesus u babaryo tu palebut sakay tinolduwan na u tagahod hide. ⁷ Dinulaw na u disepulus na hide a sapulo ay ti duwwa sakay inutusan na hide ti tágdaduwwa. Inatádden na hide ti kapangyariyan a magpalayas ti mágkadukás a ispirito, ⁸ sakay binilinan na hide a, “Dyan kam magtawed ti maskin ánya man, liban la tu sahukod. Diyan kam magbilon, maski ni pággasákkan oni pilak. ⁹ Maare kam a magsulot ti sinelas, pero diyan kam magtawed ti paglewasan moy.” ¹⁰ Kinagi na be nide, “Ni pinatulos dikam tu essa a bilay ay mágyan kam hod mentras awan kam lumakad ti itod a banuwan. ¹¹ Ni umád dikam a tanggapán oni awan kam sanigán nu tolay hide tu essa a lugar ay lumakad kam hod sakay ipagpag moy u alikabuk tu tikád moy, tanda itod a parusaan hide nu Diyos tu awan de pánniwala nikam.” ¹² Kanya naglakad ngani u sapulo ay ti duwwa a disepulus sakay nagtoldu hide tu tolay hide, a dapat de a pagsisiyan u kasalanan de. ¹³ Pinalakad de u mágkadukás hide a ispirito tu tolay hide a sináddáp ni mágkadukás a ispirito; pinahidan de be ti langis u makpal a te saket sakay nagpiyya hide. ¹⁴ Nadid ay nabaheta ni Hare a Herodes u tungkul ni Jesus, dipo kilala dán siya nu makpal a tolay. Tehhod be a magkagi a ti Juan a Mágbautismo ay nabiyag a huway kaya makagimet ti Jesus ti makataka-taka a bagay. ¹⁵ U akala nu agum ay ti Elias siya. Sakay kinagi be nu iba, “Prupeta siya, a konna tu prupeta hide tu itod.” ¹⁶ Nikuna masaneg iye ni Herodes ay kinagi na,“Siya ti Juan a pinaputol ko ti ulo. Nabiyag siya a huway.” ¹⁷ Mismo a ti Herodes u nangpadakáp sakay nángpekulung ni Juan dipo tu kagustuwan ni Herodias. (I bábbiyan iye ay inagew ni Herodes sakay pinakasalan na maski kabanga siya nu kapatkákka na a ti Felipe) ¹⁸ Dipo palagi a kákkagiyan tu itod ni Juan ti Herodes a, “Labag tu batas a kagumanán mo u kabanga nu kapatkákka mo!” ¹⁹ Sakay dipo ti iye, nagkim-kim ti iyamut ti Herodias ni Juan sakay gusto na siya a ipabuno. Pero awan na itod magimet ²⁰ dipo tukoy na a manteng ti Herodes ni Juan. Kilalanán nu hare a malinis a tolay ti Juan, sakay pilitán na a awan siya mepahamak. Gugustu na a mágsaneg ni Juan maski ni makabalisa nikuna u itáttoldu ni Juan. ²¹ Pero dimmemát labe u pagkakataun ni Herodias a pabuno ti Juan tu káddemát nu aldew nu kákkeenak ni Herodes. Naghanda ti Herodes ti makpal a makan sakay inimbitaan na u upisyales nu sundalo hide, sakay katoy bi hod u mágkayaman hide ti Galilea. ²² Nikuna simmáddáp u anak a bábbey ni Herodias sakay nagsayaw ay nasaya a tahod ti Herodes sakay u bisita hide, kanya kinagi nu hare tu madiket a, “Agidán mo nikán u maski ánya a gusto mo ta iyatád ko.” ²³ Impananto na pa tu madiket a iyatád na maski u kalahate pa nu kahariyan na ni sa itod u agidán na. ²⁴ Pákkasaneg hod nu madiket ay limmuwas siya sakay tinanung na u ina na ni ánya u agidán na. Kanya kinagiyan siya nu ina na a agidán na u ulo ni Juan a Mágbawtismo. ²⁵ Kanya nagalalisto a simmole u madiket tu kán Hare a Herodes sakay kinagi na, “U gustu ko ay iyatád mo nikán nadid be u ulo ni Juan a Mágbawtismo a keddátton tu essa a penggan.” ²⁶ Tu pákkasaneg hod nu hare ay tunay u lungkut na, pero dipo nagpananto siya tu atubang nu bisita na hide ay awan siya maka-adi tu madiket. ²⁷ Kanya pagdaka a inutusan ni Herodes u essa a sundalo a iyangay na nikuna u ulo ni Juan. Simmunud ngani u sundalo sakay pinutolan na ti Juan tu disalad nu piresuwan. ²⁸ Sakay indátton na tu penggan u ulo ni Juan sakay inyatád na tu madiket. Sakay inyatád bi iye nu madiket tu ina na. ²⁹ Nikuna a mabaheta nu alagad hide ni Juan u nangyare ay inalap de u bangkay na sakay inlábbáng de. ³⁰ Nadid, simmole u disepulus hide a inutusan ni Jesus a nagtoldu, sakay ingkagi de nikuna u atanan a ginimet de sakay u intoldu de. ³¹ Dipo tu kakpal nu tolay a magdemáttan sakay maglakaden ay awan dán hide ti panahun a kuman. Kanya kinagi ni Jesus tu disepulus na hide, “Umangay kitam tu tahimik a lugar para makaimang kam ti sabadit.” ³² Kanya simmakay hide tu abang, sakay immangay hide tu tahimik a lugar. ³³ Pero makpal a naketa tu kállakad de sakay makatukoy ni hádya hide angayan. Kanya u tolay hide a gábwat tu iba-iba a banuwan ay nagginanan a patamo ti lugaran itod sakay nadipalonguwan dipa di Jesus. ³⁴ Káawas ni Jesus tu abang ay netan na u tunay ti káppal a tolay. Nahabag siya nide dipo kumán hide a tupa a awan ti pastol, kanya tinolduwan na hide ti makpal a bagay. ³⁵ Nikuna a apon dán ay immadene ni Jesus u disepulus na hide sakay kinagi de,“Parang i lugaran iye sakay adene dán a sumahám i aldiwe. ³⁶ Palakadán mo dán i tolaye hide para makaangay hide tu babaryo sakay tu banuwan hide para makabale hide ti makan de.” ³⁷ Pero kinagi nide ni Jesus, “Hikam u mangpakan nide.” Timmábbeg u disepulus hide, “Kodya pangpakan miyay nide? Awan kami ti sapat a pilak a pamale, duwadatos a dinaryu i kailanganay para mapakan hide a atanan. ³⁸ Tinanung hide ni Jesus, “Sangan u tawed moy a tinapay? Sigi ilingán moy ped,” Inileng de, sakay kinagi de ni Jesus, “Tehhod kitam he a limma a tinapay, sakay ti duwwa a ikan.” ³⁹ Sakay inyutus ni Jesus tu disepulus na hide a pággetnudán tu kalamonan ti guru-gurupo u katolayan. ⁴⁰ Kanya nággetnod u tolay hide ti tággi datos sakay ti tággi limma pulo tu kada gurupo. ⁴¹ Inalap ni Jesus u limma a tinapay sakay tu duwwa a ikan; tummangad siya ti langet sakay nagpasalamat tu Diyos. Káttapos ay hinati-hate na u tinapay sakay inyatád na tu disepulus na hide para iyatád di be tu tolay hide. Konna bi hod u ginimet na tu ikan sakay intagtag dibe. ⁴² Nakakan hide a atanan sakay nabássog, ⁴³ sakay nikuna ipunán nu disepulus na hide u nabuhay a tinapay ay ti ikan ay nakaputat pa hide ti sapulo ay ti duwwa a lákba. ⁴⁴ U bilang nu lállake a kinuman ay limma a libu. ⁴⁵ Káttapos ay pinasakay a agad ni Jesus tu abang u disepulus na hide. Pinágdipalongo na hide tu banuwan ni Betsaida, tu dibilew nu minalno, mentaras a pasoliyán na be u tolay hide. ⁴⁶ Nikuna a makalakad dán u tolay hide ay simmangkay siya tu essa a bumábbuked para magdasal. ⁴⁷ Nikuna gibi dán ay hod dán ditaw u abang, sakay mággeessa be ti Jesus tu buked. ⁴⁸ Netan na a mahirapan dán u disepulus na hide tu págbusay, dipo tagbu nide u pahás. Nikuna a magamulaldew dán ay timmagubet nide ti Jesus a maglakad tu dibbew nu dinom. Nikuna a masalinan na u disepulus na hide, ⁴⁹ ay netan di siya a maglakad tu dibbew nu dinom. Tulos hide a pinumákhaw ta akala de ni multo siya, ⁵⁰ Atanan de ay neántingan a tahod, pero agad a kinagi ni Jesus nide, “Diyan kam manteng, Hikán iye! Pabegsákkán moy i isip moye!” ⁵¹ Simmakay siya tu abang sakay bigla a timmahan u mabegsák a pahás. Sakay nagtaka hide ti husto, ⁵² dipo awan di palla naintendiyan maskin netan di dán u makataka-taka a ginimet ni Jesus tu tinapay; Umád de a maniwala dipo maigát u pusu de. ⁵³ Ummahabes hide ti dibilew sakay káddemát de ti Genesaret ay dummung hide. ⁵⁴ Tu káawas de ay agad a natengge nu taga-hod hide ti Jesus. ⁵⁵ Tunay hide ti bilis a nángbaheta ti iye tu kadatig na hide a banuwan. Inyangay nu tolay hide tu kán Jesus u atanan a te saket a hod tu abák, maskin hadya u páppágyanan na a pakabahetaan de. ⁵⁶ Maskin hádya siya a umangay, tu babaryo, tu banu-banuwan, oni tu buki-buked ay iyangay di nikuna u te saket hide, tu lugar a pagipun-ipunan nu tolay hide. Nákkekagbi hide ni Jesus ani maare ay pakahapán na u kessaket hide maskin u garayan nu damit na. Sakay u atanan nu makakahap ay magpiyya.

¹ Nadid, immadene ni Jesus u Pariseo hide sakay u maisto hide nu Kautusan, a gábwat ti Jerusalem. ² Dipo netan de u disepulus hide ni Jesus a awan naguges ti kamát bagu a kinuman, a ayun tu kaugaliyan nu Pariseo hide. ³ Dipo u Judio hide lalu dán u Pariseo hide ay ugali de a maguges pa ti kamát bagu a kuman dipo iye, u intoldu nide nu ninuno de hide. ⁴ Kággábwat de ti palengke ay awan hide kuman mentaras a awan hide makadigus. Sakay makpal palla hide a sunudán a kaugaliyan ni kodya u págguges tu iba de a kasangkapan. ⁵ Kanya tinanung nu Pariseo hide ti Jesus sakay tu tagapagtoldu hide tu Kautusan, “Bakin a awan sumunud u disepulus mo hide tu kaugaliyan a intoldu nu nuno tam hide? Basta kinuman la hide a awan naguges tu kamát de a ayun tu paraan a netoldu.” ⁶ Tinábbeg hide ni Jesus, “Tama u kinagi ni prupeta Isaias tungkul nikam a magwari-ware. Ayun tu insulat na: kinagi nu Diyos. ‘ Igalangák ni tolayan iye hide tu labi di la, bakán atu puso de. ⁷ Awan ti pasa u págsamba di nikán, dipo u itáttoldu de ay u utus la nu tolay, pero itáttoldu debe a iye u utus nu Diyos.’ ⁸ Sássuwayán moy u utus nu Diyos, sakay u kaugaliyan nu tolay u sássunudán moy.” ⁹ Sakay kinagi pa ni Jesus,“Mahusay kam tu awan moy págsunud tu utus nu Diyos para masunud moy la u kaugaliyan nu nuno moy hide! ¹⁰ U halimbawa a kinagi ni Moises a gábwat tu Diyos ay, ‘Igalang moy u dáddakál moy sakay ni ti deya u magupos ti madukás tu dáddakál na ay dapat a bunuwán.’ ¹¹ Pero itáttoldu moy be, a kapag kinagi nu anak tu dáddakál na; u tulung a iyatád na nakwa nide ay korban (U gusto na a kagiyán ay nakalaan dán tu Diyos.) ¹² i tolayan itod ay awan moy dán siya payagen a tumulung tu dáddakál na. ¹³ Tu konna he a paraan ay awan nikam ti halaga u utus nu Diyos tu pamamag-itan nu itáttoldu moy. Sakay makpal kam pa a bagay a gággimitán a konna ti iye.” ¹⁴ Sakay pinaadene ni Jesus a huway u tolay hide nikuna sakay kinagi na nide, “Mágsaneg kam nikán a atanan, sakay intendiyán moy u kagiyán ko! ¹⁵ Bakán a u kanán nu tolay u mangpadukás nikuna tu atubang nu Diyos nan u lumuwas tu labi na u mangpadukás nikuna. ¹⁶ Kanya hikam a mágsaneg hide ay dapat moy iye a isipán.” ¹⁷ Káttapos ay linakaden na u tolay hide sakay simmáddáp siya tu bilay, nikuna a hod dán siya tu disalad ay tinanung siya nu disepulus na hide ni ánya u gusto a kagiyán ni talinghagaan itod. ¹⁸ Kinagi nide ni Jesus,“Awan moy pad beman la naintendiyan? Awan moy beman tukoy a maskin ánya u kanán nu tolay ay awan makapángpadukás nikuna? ¹⁹ Dipo maski ni ánya u kanán na ay awan be angay tu puso na, nan tu tiyan na la, káttapos ay iyáttay.” (Ti kinagiyan iye ni Jesus ay ingkagi na a atanan a kákkanán ay maare a kanán.) ²⁰ Kinagi na pa, “Pero u lumuwas a madukás a upos tu labi nu tolay ay siya u makapangpadukás nikuna tu pangileng nu Diyos. ²¹ Dipo tu puso nu tolay a maggábwat u madukás a isip a mangsulsul nikuna tu pággimet ti madukás para pángngibábbey, magtakaw, mamuno, ²² mangilállake, managhile, sakay pángloko, sakay mágkahalay, pághambug, sakay tu iba a gimet a madukás. ²³ Atanan ni iye a kadukássan ay gábwat tu puso nu tolay, sakay sa iye u makapangpadukás nikuna.” ²⁴ Nadid ay limmakad hod ti Jesus, immangay siya tu lugar a Tiro sakay ti Sidon. Káddemát na hod ay timmulos siya tu essa a bilay, umád na nakwa a matukuyan nu tolay hide a dimmemát siya; pero awan na netagu. ²⁵ Tehhod hod a essa a bábbey a sináddáp ni madukás a ispirito u anak na. Tu pákkasaneg na ni Jesus ay inumangay hod siya a agad, sakay limmuhud siya tu atubang na. ²⁶ I itod a bábbey ay bakán a Judio, nan taga-Sirofenicia siya. Nákkekagbi siya ni Jesus a palakadán na u mágkadukás a ispirito tu anak na. ²⁷ Pero kinagi ni Jesus tu pamamag-itan nu essa a talinghaga. “Dapat ku pa a pakanán u anak ko, dipo awan tama a alapán u kanán nu anak sakay ipakan tu aso.” ²⁸ Timmábbeg u bábbey, “Tama ka Panginoon, pero maskin u aso hide tu sahok nu lamisaan ay kanán de u nabuhay a mágketákneg nu anak hide.” ²⁹ Kanya kinagi ni Jesus nikuna, “Dipo ti tábbeg muwan ina ay maare ka dán a sumole. Limmakad dán u madukás hide a ispirito tu anak mo.” ³⁰ Simmole u bábbey, sakay nedemáttan na u anak tu págkatdugan na. Nilakaden ngani dán siya nu madukás a ispirito. ³¹ Káddemát ni Jesus a gábwat tu lugar a Tiro, nagtaleb siya ti Sidon, sakay naglebut tu lugar ni Decapolis, sakay káttapos ay nagdiretso siya tu dinom ni Galilea. ³² Inyangay hod nikuna nu tolay hide u essa a lállake a bulol sakay bángngág, nákkekagbi hide a itupo na u kamát na tu te saket. ³³ Inyadeyo pa ni Jesus u lállake tu tolay hide, sakay káttapos ay insulot na u magtembang na a toldu tu magtembang be a talinga nu lállake. Káttapos ay nagloktab ti Jesus sakay inpahid na u loktab na tu dila nu lállake. ³⁴ Timmangad ti Jesus ti langet sakay immangás ti dakál, sakay kinagi na tu lállake, “Effata,” a u gustu na a kagiyán ay “Mabukasan talingamuwe!” ³⁵ Tu pákkakagi ni Jesus ti itod ay nakasaneg dán u lállake sakay makaupos dán siya ti maayus. ³⁶ Ingkagi na tu tolay hide a dyan di iye ibábbaheta, pero maskin binawalan hide ay lalu de a imbábbaheta. ³⁷ U atanan a nakasaneg ay nagtaka hide a tahod, kinagi de, “Maganda u gimet ni itona a lállake! maski u buhák ay naketa, sakay u bulol hide ay pagupusán na hide ti maganda.”

¹ Makalipas u sangan a aldew ay namagipun-ipun a huway u tunay ti kakpal a tolay. Nikuna a awan dán hide ti makan ay dinulaw ni Jesus u disepulus na hide, sakay kinagi na, ² “Mahabagák ti tolayáy hide, tállu dán hide a aldew a kaguman ko sakay awan dán hide ti makan. ³ Ni pasoliyán ku bi hide a magaláp ay makay ni manghina hide tu dilan. Dipo te sangan nide a gábwat tu adeyo.” ⁴ Kanya kinagi nu disepulus na hide, “Hádya kitam a mangalap ti ipakan tam nide ti kaparanganáy a lugar?” ⁵ Sakay tinanung hide ni Jesus, “Sangan a mommon i bilon moyay a tinapay?” timmábbeg hide,“pitto.” ⁶ Pinaetnod ni Jesus u tolay hide tu kalamonan sakay inalap na u pitto a tinapay. Nagpasalamat siya tu Diyos, káttapos ay tináppeng-táppeng na iye sakay inyatád na tu disepulus na hide para iyatád de tu tolay hide. ⁷ Tehhod be hide a sasangan a bábbadit a ikan. Impasalamat be itod ni Jesus tu Diyos, sakay inyatád na tu disepulus na hide para iyatád de tu tolay hide. ⁸ Nakakan sakay nabássog hide a atanan. Nikuna ipunán de u nabuhay ay nakaputat pa hide ti pitto a lákba. ⁹ U kimman hod ay te áppat a libu. Káttapos ay pinasole dán hide ni Jesus, ¹⁰ sakay agad siya a simmakay tu abang a kaguman nu disepulus na hide. Sakay immangay hide tu lugar a Dalmanuta. ¹¹ Nikuna a nasaneg nu Pariseo hide ti Jesus a dimmemát ay immangay hod hide a nákpagpasuwayan nikuna. Dipo pilitán de siya a mángpeta ti makataka-taka a mangpatunay a pinaangay he siya nu Diyos, dipo gusto de siya a purbaan. ¹² Nikuna a masaneg na iye ay immangás siya ti madisalad sakay kinagi na, “Bakin wád a magaged ti makataka-taka a bagay i tolayan iye hide? U tatahoden ay awanák ti makataka-taka a bagay a ipeta nikam.” ¹³ Káttapos ay gininanan na hide. Simmakay siya a huway tu abang sakay immahabes ti dibilew. ¹⁴ Nadid ay nalimunan nu disepulus hide ni Jesus a magtawed ti tinapay; eessa la u tawed de a tinapay tu abang. ¹⁵ Kinagi nide ni Jesus, “Magingat kam tu págpaalsa nu Pariseo hide sakay ti Herodes.” ¹⁶ Namágguhon u disepulus hide ni Jesus, akala de, kanya na itod a kinagi ay dipo awan hide ti tawed a tinapay. ¹⁷ Dipo tukoy ni Jesus ni ánya u pamágguhunan de, kanya kinagi na nide, “Bakin pamágguhunan moy a awan kam ti tawed a tinapay? Awan kam pad beman la makaintendi? Maigát pad beman la u isip moy? ¹⁸ Awan kam beman ti mata? Bakin awan kam maketa? Bakin awan kam makasaneg? Nalimunan moy dán beman ¹⁹ nikuna a táppeng-táppengan ko u limma a tinapay, para tu limma a libu? Sangan a lakba u subra? Timmábbeg hide, “Sapulo ay ti duwwa!” ²⁰ “Sakay nikuna táppeng-táppengán ko u pitto a tinapay para tu áppat a libu a tolay, sangan a lákba u nabuhay? tanung na nide. “Pitto,” intábbeg de a huway. ²¹ Sakay kinagi na nide, “Awan moy pad beman la naintendiyan u kinagi ko?” ²² Nadid, tu káddemát de ti Betsaida ay te sangan a tolay a nang angay tu kan Jesus ti essa a lállake a buhák, nákkekagbi hide a ni maare ay pagpiyyaán na i lállakiyan itod. ²³ Kanya kinabitan ni Jesus u buhák a limmuwas tu baryo, káddemát de tu luwas. Linoktaben na u mata nu buhák káttapos ay intupo na u kamát na tu buhák sakay tinanung na, “Tehhod ka dám beman a ketan?” ²⁴ Timmangad u lállake sakay kinagi na, “Maketaák dán ti tolay, pero kumán hide a kayo a maglakad.” ²⁵ Kanya intupo a huway ni Jesus u kamát na tu mata nu buhák. Ti pagkakataunan iye ay immileng u lállake a huway. Sakay mademlag dán u pangileng na. ²⁶ Bagu siya a pinasole ni Jesus ay kinagi na nikuna, “Kad mudán sakay diyan ka dán sumole ti Betsaida.” ²⁷ Nadid ay immangay di Jesus tu babaryo ti Cesarea a sakup nu lugar a Filipos. Mentaras maglakad hide ay tinanung na u disepulus na hide, “ Ti deyaák kan ayun tu tolay hide?” ²⁸ Timmábbeg u disepulus na hide, “U kagi nu agum ay ti Juan a Mágbawtismo ka kan; u kagi be nu agum ay hiko kan ay ti Elias; u kinagi be nu agum ay essa ka kan tu prupeta hide nu Diyos.” ²⁹ Tinanung hide ni Jesus, “Ay hikam deyaák tu pangisip moy?” Timmábbeg ti Pedro, “Hiko ti Cristo.” ³⁰ Kinagiyan hide ni Jesus a, “Diyan moy kagiyán maskin ti deya ni ti deyaák.” ³¹ Nadid ay nagsapul a nangaral ti Jesus tu disepulus na hide a siya u, Anak nu Tolay a kailangan a magdanas ti makpal a hirap. Umádden siya nu puno hide nu Judio hide, sakay u puno nu Saserdote hide sakay tu tagapagtoldu hide tu Kautusan. Ipabuno di siya pero tu katállo a aldew ay mabiyag siya a huway. ³² Impaliwanag na iye hide a atanan nide. Nikuna a masaneg iye ni Pedro ay inyadeyo na ti Jesus sakay pinagkagiyan. ³³ Pero immatubang ti Jesus tu disepulus na hide sakay kinagi na ni Pedro, “Umadeyo ka nikán Satanas! U isip mo ay awan ayun tu kaluuben nu Diyos nan ayun tu kaluuban nu tolay.” ³⁴ Pinaadeni ni Jesus u tolay hide pati u disepulus na hide sakay kinagi na nide, “Ni ti deyaman u masoh a sumunud nikán ay awan na dapat idipalongo u sadile na, sakay nakahanda a maghirap maskin hanggan tu kamatayan sakay sumunud nikán. ³⁵ Dipo u maghangad a mángligtas tu biyag na ay mawanan ti biyag; pero u tolay a máng-alay tu biyag na alang-alang nikán sakay tu Maganda a Baheta ay magkahod ti biyag hanggan-hanggan. ³⁶ Ánya u pakinabang nu tolay, ni makao naman u atanan a bagay ti munduwáy, pero mepahamak labe u biyag na? ³⁷ Ánya beman u mebayad nu tolay para magkahod siya ti biyag a awan ti kahád? ³⁸ Ni ikasanikiyák moy sakay ni ikasanike moy be u upos ko tu tolay hide a makasalanan nadid a panahun, sakay ni awan kam tapat tu Diyos ay ikasanike kam be nu Anak nu Tolay káddemát na a tehhod a kapangyariyan a gábwat tu Ama na, kaguman na u anghel hide.”

¹ Kinagi pa ni Jesus nide, “Tandaan moy, tehhod a sangan he nikam a awan matay hanggan a awan de ketan u pághare nu Diyos a tehhod a kapangyariyan.” ² Kállipas nu ánnám a aldew ay simmangkay ti Jesus tu essa a malangkaw a buked. Awan siya ti agum a kinaguman nan di Pedro, Santiagu sakay ti Juan la. Nikuna hed hide hod ay netan de a nagbagu u idsura ni Jesus. ³ Tunay ti pudew u damit na sakay makasile a ilingán, maskin ti deya ti munduwáy ay awan ti makapagpapudew ti konna hod. ⁴ Sakay netan di be hod di Elias sakay ti Moises, a mákpágguhon ni Jesus. ⁵ Kinagi ni Pedro ni Jesus, “Panginoon, mapiyya la ta katoy kami he. Pagbilay mi kam a tállo: ti bábbadit a bilay; essa niko, essa ni Moises, sakay essa ni Elias.” ⁶ Iye u kinagi na dipo awan na tukoy ni ánya u kákkagi-kagiyán na dipo garabi u ánteng na sakay u agum na hide. ⁷ Nadid ay tinaklábben hide nu diklám sakay tehhod hide a nasaneg a boses a gábwat tu diklám, kinagi na “Sa iye u pinakamamahal ko a Anak. Sanigán moy siya!” ⁸ Tu kássuleg nu disepulus hide ay awan dán hide ti netan nan ti Jesus dálla. ⁹ Nadid, nikuna a padegson dán hide tu buked ay mahigpit hide a kinagiyan ni Jesus a, “Diyan moy kagiyán maskin ti deya u netan moy, mentaras awanák mabiyag a huway, hikán a Anak nu tolay.” ¹⁰ Kanya awan de kinagi maskin ti deya i nangyariyan itod, pero nagtanungan hide ni ánya i gustuway a kagiyán ni Jesus tu kinagi na a mabiyag siya a huway. ¹¹ Sakay tinanung de ti Jesus,“Bakin a kákkagiyán nu tagapagtoldu hide tu Kautusan a kailangan kan pa a dumemát ti Elias bagu a dumemát u tagapagligtas ti munduwáy?” ¹² Timmábbeg ti Jesus, “Tatahoden ina, umangay pa he ti Elias, para ihanda u atanan a bagay. Ay hikam, bakin wád a mabasa tu Kasulatan, a u Anak nu Tolay ay badit-baditán sakay maghirap ti garabi? ¹³ Pero kagiyán ko nikam a immangay dán he ti Elias, pero ginimet de nikuna u gusto de sakay natupad dán ngane u nakasulat tungkul nikuna.” ¹⁴ Nadid, tu kássole di Jesus tu agum na a disepulus ay netan de a makpal a tolay. Katoy bi hod u maisto hide nu Kautusan a mákpagpasuwayan tu disepulus hide ni Jesus. ¹⁵ Nagtaka u tolay hide nikuna a ketan de ti Jesus. Sakay nagginan hide a timmagbu, sakay bimmate nikuna. ¹⁶ Tinanung ni Jesus u disepulus na hide, “Ánya u pamágtalu-taluwan moy?” ¹⁷ Tehhod a essa a lállake tu katolayan a timmábbeg, “Maisto, inyangay ku he niko i anak kuwáy a lállake, dipo sináddáp siya ni madukás a ispirito, sakay awan dán makapagupos. ¹⁸ Ni pahirapan nu madukás a ispirito ay itumba na siya; magbugak u labi na sakay magngaritengát u ngipán na, sakay umigát u bággi na. Nákpagguhunák dán tu disepulus mu hide a palakadán u madukás a ispirito, pero awan di kaya!” ¹⁹ Kinagi ni Jesus nide, “Awan ti pánniwala i tolayay nadid a panahun! Hanggan nikasanganák moy a kakaguman? Hanggan nikasangan takam a pagtiisan? Iyangay mo he anake!” ²⁰ Kanya inyangay de u anak tu kán Jesus. Pero tu pákketa nu madukás a ispirito ni Jesus ay pinagpágpág na u anak, pinatumba sakay pinaggulung tu luta a magbugak u labi na. ²¹ Tinanung ni Jesus u ama nu anak, “Nikasangan pa siya a nagkakonna hina?” Timmábbeg u ama. “Sapul pa tu kaanak na. ²² Lagi siya a patumbaán nu madukás a ispirito tu apoy oni kaya tu dinom dipo laan na siya a bunuwán. Kanya ni maare ay kagbiyan mo kame, ni ke magimet ka, tulungan mu kame.” ²³ Tinábbeg siya ni Jesus, “Bakin a na kagi mo a tehhodák a magimet? Mangyare u atanan para tu tolay a maniwala tu Diyos.” ²⁴ Agad a timmábbeg ti mabegsák u ama nu anak, “Maniwalaák, patibayán mu ped i pánniwala kuwáy tán magin husto!” ²⁵ Tu pákketa ni Jesus tu tunay ti káppal a tolay a tamo nikuna ay kinagiyan na u madukás a ispirito, “Hiko, a ispirito a mágpabángngág sakay mágpabulol umibut ka dán ti anake: sakay diyan ka dán sumole nikuna a huway!” ²⁶ Tu pákkakagi hod ni Jesus ay pimmákhaw u madukás a ispirito, sakay pinagpágpág na u anak ti mahigpit, sakay immibut. U anak ay kumán dán a bangkay u idsura na, akala nu tolay hide ay natay dán! ²⁷ Pero tinawiden ni Jesus u kamát nu anak sakay pinaikat na. Sakay timmaknág be u anak. ²⁸ Tu kássáddáp di Jesus tu bilay ay tinanung siya nu disepulus na hide ti lihim, “Bakin a awan me napalayas u madukás a ispirito?” ²⁹ Tinábbeg hide ni Jesus, “I konna ay hod a kalase ni ispirito ay mapalakad la tu pamamag-itan nu págdasal.” ³⁰ Nadid, palihim a limmakad di Jesus ti lugaran itod sakay himmoyot hide ti Galilea. Umád ni Jesus a matukuyan nu tolay hide a atoy hod siya, ³¹ dipo tolduwan na u disepulus na hide. Kinagi na nide, “Hikán a Anak nu Tolay ay itokyunák de, ipabunuwák de, pero huwayák a mabiyag tu katállo a aldew.” ³² Pero awan de naintendiyan u kinagi ni Jesus, sakay magalangan be hide a magtanung nikuna. ³³ Nadid ay dimmemát hide ti Capernaum. Nikuna a hod dán hide tu bilay ay tinanung hide ni Jesus, “Ánya u pinamágtalu-taluwan moy tu mamaya he tu dilan?” ³⁴ Awan hide makatábbeg, dipo u pinamágtalu-taluwan de ay ni deya nide u pinakamataas. ³⁵ Kanya immetnod ti Jesus, sakay dinulaw na u sapulo ay ti duwwa a disepulus na, sakay kinagi na nide, “Ni deya man u masoh a magin pinakamataas tu atanan ay dapat a magpakababa sakay dapat a magserbi tu atanan.” ³⁶ Tu pákkakagi na ti itod ay dinulaw na u essa a anak sakay pinataknág na tu atubang de. Tu pángkálkál na tu anak ay kinagi na nide, ³⁷ “Ni deya man u mangtanggap ti anakáy a konna he dipo nikán ay tinanggapák na sakay u mangtanggap nikán ay tumanggap be tu ama a nángpaangay he nikán.” ³⁸ Kinagi ni Juan ni Jesus, “Maisto, naketa kame ti tolay a nagpalayas ti madukás a ispirito tu ngahan mo, binawalan me siya dipo awan tam siya kaguman.” ³⁹ Pero kinagi ni Jesus, “Diyan moy siya bawalan, dipo maski deya u maggimet ti maganda a gimet tu pamamag-itan nu ngahan ko ay awan magupos ti madukás kontara nikán káttapos na itod a gimitán. ⁴⁰ Dipo u awan kontara nikitam ay kakampi tam. ⁴¹ Tandaan moy: ni ti deyaman u mangatád nikam maski essa a baso a dinom dipo hod kam ni Cristo ay siguradu a makatanggap ti gantimpala.” ⁴² “Maganda pa tu essa a tolay a báttenan ti gilingan a bito u álleg na, sakay itábbung ti ditaw a diget kasera makapáng-atád siya ti pagkasalaan nu anak hide a maniwala nikán.” ⁴³ Kanya kinagi ni Jesus, “Ni u kamát mo u mangatád niko ti págkakasala ay putáddán mo dán! Maganda pa a umangay ka ti langet a putád, kasera ni duwwa u kamát mo a meangay tu apoy a awan maada-adáp. ⁴⁴ Awan hod matay u uhád hide a mangkan nide sakay u apoy. ⁴⁵ - ⁴⁶ Sakay ni u tikád mo u dahilan nu págkasalaan mo, putáddán mo! Mas maganda pa ni eessa la u tikád mo ni tehhod ka a biyag a awan ti kahád, kasera ni duwwa u tikád mo a meangay ti impiyerno. ⁴⁷ Sakay ni u mata mo u dahilan nu págkasalaan mo ay lábwetán mo! Mas maganda pa ni eessa la u mata mo pero tehhod ka a biyag a awan ti kahád, kasera ni duwwa u mata mo pero ibut ka la be ti impiyerno. ⁴⁸ Awan mata-matay u uhád hod hide sakay u apoy ay awan be maada-adáp.” ⁴⁹ Dipo kinagi ni Jesus, “U atanan a tolay ay puruwebaan tu apoy. ⁵⁰ Maganda u asen, pero ni mawanan ti lasa ay tumablal dán, pakodyaán pa a pasoliyán u asen na? Konna bi hod nikam, dapat magin konna kam tu asen a makatulung tu tolay, tulungan moy u bawat essa támpara magin maayus u pamággagum moy.”

¹ Nadid ay limmakad di Jesus ti Capernaum, immangay hide tu lugar a Judea, sakay immahabes ti Jordan. Makpal dámman a tolay u inumangay hod nikuna, sakay konna tu date na gággimitán, tinolduwan na hide. ² Ti itod u Pariseo hide ay immangay hod nikuna para purbaan de siya. Kanya nagtanung hide, “Ayun beman tu Kautusan a hiwalayan nu lállake u kabanga na?” ³ Tinanung be hide ni Jesus, “Ánya beman u inyutus nikam ni Moises?” ⁴ Timmábbeg be hide,“Impakultad ni Moises a hiwalayan nu lállake u kabanga na ni atádden na ti Kasulatan ni pághiwalay.” ⁵ Pero kinagi nide ni Jesus, “Ginimet ni Moises i Kautusanan itod dipo tu kaigáttan ni ulo moye. ⁶ Dipo sapul pa nikuna a lalangán nu Diyos i munduwáy ay, linalang na u tolay a lállake sakay bábbey. ⁷ ‘Iye u dahilan ni bakin lakaden nu lállake u dáddikál na hide sakay mák-agum tu kabanga na, ⁸ sakay magin essa hide.‘Kaya dipo nagagum dán hide ay bakán dán hide a duwwa nan essa dán hide. ⁹ Kanya dapat awan paghiwalayán nu tolay u pinagagum nu Diyos.” ¹⁰ Káddemát de tu bilay ay u disepulus na be hide u nagtanung tungkul ti itod. ¹¹ Kinagi nide ni Jesus, “Ni hiwalayan nu lállake u kabanga na sakay mákkabanga siya ti iba ay nangibábbey siya tu atubang nu Diyos. ¹² Konna bi hod u bábbey a humiwalay tu kabanga na a lállake ni mákkabanga siya ti iba a lállake ay nangilállake siya tu atubang nu Diyos.” ¹³ Nadid, makpal a náng-angay tu anak de tu kán Jesus para kahapán na hide sakay pagpalaán; pero pinagkagiyan hide nu disepulus hide ni Jesus. ¹⁴ Nikuna a ketan ni Jesus u nangyare ay nagingál siya, sakay kinagi na tu disepulus na hide, “Pabayan moy a umadene nikán u anak hide, diyan moy hide bawalan, dipo maghare u Diyos tu anak hide. ¹⁵ Tandaan moy: u umád a tumanggap tu pághare nu Diyos a konna tu págtanggap nu anak ay awan siya makasáddáp tu kahariyan nu Diyos.” ¹⁶ Tu pákkakagi ni Jesus ti itod ay kinálkál na u anak, sakay intupo na u kamát na nide, sakay pinagpala na hide. ¹⁷ Nadid, nikuna a palakad dán di Jesus ay tehhod a lállake a nagginan a immadene nikuna, limmuhud siya sakay nagtanung, “Mahusay a maisto, kagiyán mu ped ni ánya i gimitán kuway para magkahodák ti biyag a awan ti kahád?” ¹⁸ Timmábbeg ti Jesus, “Bakin kagiyán mo a mahusayák? U Diyos la u mahusay. ¹⁹ Tungkul tu tanung mo, tukoy mo u utus nu Diyos, ‘Diyan ka mamuno; diyan ka mangibábbey; diyan ka magtakaw; diyan ka magpatunay ti kakabuliyan; diyan ka magdaya; sakay igalang mo tama mo sakay tena mo.”’ ²⁰ Kinagi nu lállake,“Maisto, sinunud ku dán ina hide a atanan sapul pa nikuna anakák.” ²¹ Inileng siya ni Jesus, a tehhod a págmahal sakay kinagi na nikuna, “Essa pa a bagay u dapat mo a gimitán. Ilako mo u ari-ariyan mo sakay u pilak a naglakuwan mo ay iyatád mo tu mágkahirap hide tánni magkahod ka ti kayamanan ti langet. Káttapos ay soli ka sakay sumunud ka nikán.” ²² Pákkasaneg hod nu lállake ay nalungkut siya limmakad dipo tunay siya ti yaman. ²³ Immileng ti Jesus tu palebut na sakay kinagi na tu disepulus na hide, “Tunay ti hirap para tu mágkayaman u makasáddáp tu kahariyan nu Diyos!” ²⁴ Nagtaka hide tu kinagi ni Jesus, kanya kinagi na a huway, “Talaga a tunay ti hirap a makasáddáp tu kahariyan nu Diyos! ²⁵ Mas alisto pa a makasáddáp u hayup a kamelyo tu ábbut nu digum kasera magpasakup u essa a mayaman tu pághare nu Diyos.” ²⁶ Lalo a nagtaka u disepulus na hide, kanya nagtanung hide, “Ni konna hod ti deya u maligtas?” ²⁷ Inileng hide ni Jesus sakay kinagi na, “Awan iye kaya a gimitán nu tolay, pero tu Diyos ay awan ti impusible. Dipo magimet na a atanan a bagay.” ²⁸ Kinagi nikuna ni Pedro, “Kodya kami be? Linakaden me u atanan para sumunud niko.” ²⁹ Timmábbeg ti Jesus, “Pakatandaan moy: atanan a nángwahak tu bilay, kákkapatkákka, dáddakál, anak, oni luta dipo nikán sakay tu Maganda a Baheta, ³⁰ ay siguradu a magkahod siya nadid a panahun ti dinatos-datos a bilay, kákkapatkákka, dáddikál, anak sakay ari-ariyan hide, peru te kaguman be a kahirapan. Sakay káttapos nu biyag ti lutaáy ay magkahod siya ti biyag a awan ti katapusan. ³¹ Pero makpal a mágdipalongo a medimodyan, sakay makpal be u medimodyan a medipalongo.” ³² Mentaras a maglakad hide a patamo ti Jerusalem ay mágdidipalongo nide ti Jesus; u disepulus na hide ay págkábba-kábbaan sakay manteng u tolay hide a umusoseg nikuna. Inhiwalay ni Jesus u sapulo ay ti duwwa a disepulus na hide sakay kinagi na a huway ni ánya u mangyare nikuna. ³³ “Paangay kitamon ti Jerusalem, sakay hikán a Anak nu Tolay ay itokyon de tu mataas hide a Saserdote sakay tu tagapagtoldu hide ti Kautusan. Sakay hatulanák de ti kamatayan sakay iyatáddák de tu bakán hide a Judio. ³⁴ Insultuwánák de, loktaben, bálbággán, sakay bunuwán. Pero mabiyagák a huway kállipas nu tállo a aldew.” ³⁵ Nadid ay immadene ni Jesus di Santiagu sakay ti Juan a anak ni Zebedeo, sakay kinagi de, “Maisto, tehhod kami niko a agidán.” ³⁶ Tinanung hide ni Jesus, “Ánya agidán moyay?’ ’ ³⁷ Timmábbeg hide, “Ni maghare ka dán ay paetnudán mu kame nakwa tu adene mo; u essa ay tu kawanan sakay u essa ay tu kawihe.” ³⁸ Pero kinagi nide ni Jesus, “Awan moy tukoy ni ánya u agidán moy, kaya moy beman a tiisán u pághirap a tiisán ko? Maghirapák a hanggan matayák, kaya moy beman?’ ’ ³⁹ Timmábbeg hide “on, kaya me” kinagi ni Jesus. “Tahod ngane a madanas moy u kahirapan a madanas ko. ⁴⁰ Pero bakán a hikán u magpile ni ti deya u umetnod tu kawanan oni tu kawihe. Inlaan la itona hide para tu pinile nu Diyos.” ⁴¹ Nikuna a matukuyan nu sapulo a disepulus ni ánya u inaged di Santiagu ay ti Juan ay nagingál hide nide. ⁴² Kanya pinaadene hide a atanan ni Jesus sakay kinagi na nide, “Tukoy moy he ti lutaáy u inturing a puno ay tehhod a kapangyariyan tu tolay hide a nasakupan de, sakay maski ánya u gusto de ay masunud. ⁴³ Pero awan kam dapat konna hod. Nan, ni ti deya man nikam u masoh a magin mataas ay dapat magin tagapagserbi, ⁴⁴ sakay ni ti deya nikam u masoh a magin puno ay dapat magin tagapagserbi nu atanan. ⁴⁵ Dipo maski hikán a Anak nu Tolay ay immangay he ti munduwáy bakán a para pagserbiyan nan magserbi sakay máng-atád tu biyag na para maligtas u atanan nu tolay.” ⁴⁶ Nadid, immangay di Jesus ti Jerico, tu kállakad na ti itod ay kaguman na u disepulus na hide, sakay makpal pa a agum a tolay. Te essa hod a lállake a mággetnod tu bihebi nu dilan a máklimus. U ngahan na ay ti Bartimeo, a anak ni Timeo. ⁴⁷ Nikuna a masaneg na ti Jesus a taga-Nazaret a magtaleb ay pimmákhaw siya: “Jesus, a gábwat tu lahe ni David, kagbiyanák mo!” ⁴⁸ Pinagkagiyan siya nu tolay hod hide a diyan siya mahehaw, pero lalo na pa a imbegsák u págpákhaw na, “Apo ni David, kagbiyanák mo!” ⁴⁹ Tu pákkasaneg ni Jesus nikuna ay kinagi na, “Iyangay moy he siya.” Kanya dinulawan de u buhák sakay kinagi de nikuna, “Begsákkan mo i isip muwe. Tumaknág ka dán, dipo impadulaw ka ni Jesus.” ⁵⁰ Imbudas ni Bartimeo u alikábkáb na, lummukso a timmáknág sakay immadene ni Jesus. ⁵¹ Tinanung siya ni Jesus, “Ánya i gusto muway a gimitán ko niko?’ ’ Timmábbeg u buhák, “Maisto, gusto ko a maketa a huway.” ⁵² Kinagi ni Jesus nikuna, “Sumoli ka dán pinagpiyya ka nu pánnampalataya mo.” Agad siya a naketa, sakay immunonod siya ni Jesus tu dilan.

¹ Nadid, nikuna adeni dán di Jesus ti Jerusalem ay táttannawán di u banuwan a Betfage sakay Betania a katoy tu digdig nu buked a Olibo. Inutusan ni Jesus u duwwa na a disepulus. ² Kinagi na nide,“Umangay kam tu sumunud a baryo. Kássáddáp moy hod ay ketan moy u essa a bul-o a asno a te egut, awan palla iye nasaka-sakayan. Lukasan moy sakay tawidán moy he. ³ Ni te magtanung nikam ni bakin a lukasán moy u asno ay kagiyán moy a kailangan nu Panginoon sakay isole la be a agad.” ⁴ Kanya naglakad u duwwa, sakay tehhod ngane hide a netan a asno tu bihebi nu dilan a umáegut tu pintuwan nu essa a bilay. Nikuna a lukasán di dán u asno, ⁵ ay tinanung hide nu tolay hide a mágtaknág hod,“Ánya i gimitán moyay hina? Bakin a lukasán moy i asno we?” ⁶ Kinagi de u ipekagi ni Jesus, kanya pinabayan dán hide nu tolay hide. ⁷ Inyangay de u asno tu kán Jesus, sakay sinapinan de tu alikábkáb de hide u adág nu asno sakay simmakay ti Jesus. ⁸ Sakay makpal a tolay u naglatag tu alikábkáb de tu dilan, sakay u iba be ay nangkáttol ti maduun a pinget ni kayo sakay inlatag de tu dilan. ⁹ U mágdipalongo hide ni Jesus sakay u umunonod hide nikuna ay magpákhaw,“Puriyán u Diyos! Pagpalaán u pademát tu ngahan nu Panginoon! ¹⁰ Pagpalaán nakwa nu Diyos u mágdadedemát a kahariyan nu ninunu tam a ti David! Puriyán tam u Kataasan a Diyos!” ¹¹ Káddemát de ti Jerusalem ay immangay ti Jesus tu Templo. Inileng na ti maayus u atanan a bagay hod. Nikuna a gibi dán ay immangay siya ti Betania kaguman na u sapulo ay ti duwwa a disepulus na. ¹² Tu dimadimang, nikuna a lumakad hide ti Betania a pasole ti Jerusalem ay nagaláp ti Jesus. ¹³ Tu pákkatannaw na tu kayo a igus ay inadeniyan na a inileng ni te bunga. Pero awan siya ti netan nan puro a duun, dipo awan palla págbunga ni igus ti itod. ¹⁴ Kinagi ni Jesus tu igus, “Sapul nadid ay awan dán ti maennaman u tideya man dipo awan ka dán magbunga-bunga hanggan-hanggan.”Nasaneg itod nu disepulus na hide. ¹⁵ Káddemát de ti Jerusalem ay immangay ti Jesus tu Templo. Pinalayas na u maglako hod hide sakay tu mamale hod hide. Impágpasakáb na u lamisaan nu mágpalit hide ti pilak sakay tu áetnudan nu máglako hide ti kalapate. ¹⁶ Sakay binawalan na be a magtaleb tu luwas nu Templo u te tawed hide a paninda. ¹⁷ Káttapos ay tinolduwan na u tolay hod hide, kinagi na, “Awan beman kinagi nu Diyos tu Kasulatan, u bilay ko ay bilay a págdasalan nu atanan a tolay? Pero ginimet moy a bilay nu mágtakaw hide.” ¹⁸ U ginimet ni Jesus ay nabaheta nu puno hide nu Saserdote sakay tu tagapagtoldu hide tu Kautusan. Kanya nangileng hide ti paraan para bunuwán ti Jesus. Pero manteng hide nikuna dipo hanga u tolay hide tu págtoldu na. ¹⁹ Nikuna a gibi dán ay limmakad di Jesus ti Jerusalem, kaguman na u disepulus na hide. ²⁰ Nadid, tu dimadimang, nikuna a pasole dán hide ti Jerusalem ay netaleban de u kayo a igus sakay netan de a nalanás dán, hanggan tu gimot na. ²¹ Naalaala ni Pedro u kinagi ni Jesus tu igus. Kanya kinagi na, “Maisto, ilingán mo u kayo a igus a sinumpa mo. Nalanás dán!” ²² Kinagi ni Jesus nide, “Sumampalataya kam tu Diyos! ²³ Tatahoden u kagiyán ko nikam, maare moy a kagiyán ti bukidan iye, “Umagton ka tu diget!”Sakay ni awan kam magduwwa-duwwa ti isip, ay talaga a mangyare u kinagi moy. ²⁴ Kanya kagiyán ko nikam, ánya man u agidán moy tu Diyos tu pamamag-itan nu dasal moy ay maniwala kam a natanggap moy dán itod, sakay talaga a matanggap moy ngani itod. ²⁵ Sakay ni magdasal kam, patawadán moy pa u nagkasala hide nikam támpara u kasalanan moy be ay patawadán be nu Ama moy a katoy ti langet. ²⁶ Dipo ni umád moy a magpatawad ay awan kam be patawadán nu ama moy a katoy ti langet.” ²⁷ Nadid, simmáddáp hide a huway ti Jerusalem. Mentras a maglakad ti Jesus tu Templo ay inadeniyan siya nu puno nu Saserdote hide, u tagapagtoldu hide tu Kautusan sakay u puno nu banuwan. ²⁸ Tinanung de ti Jesus, “Ánya u karapatan mo a maggimet tu bawat gusto mo a gimitán ti Templuwáy? Ti deya u nangatád niko ti karapatan?” ²⁹ Timmábbeg ti Jesus, “Tanungán takam be. Sakay ni tábbegán moy ay kagiyán ko ni hádya a gábwat u kapangyariyan ko tu pággimet ti bagayan iye. ³⁰ Kagiyán moy nikán, hádya a gábwat u karapatan ni Juan a magbawtismo, tu Diyos beman oni tu tolay? ³¹ Namágtanungan hide,“Ni kagiyán tam a gábwat tu Diyos, kagiyán na be, ‘bakin a awan kam naniwala ni Juan.’ ³² Pero ni kagiyán tam be a gábwat tu tolay, magingál nikitam u tolay hide.”Manteng hide tu tolay hide dipo maniwala u tolay hide a ti Juan ay prupeta nu Diyos. ³³ Kanya timmábbeg hide, “Awan mi tukoy.” Kinagi ni Jesus nide, “Ni konna hod, awan kube kagiyán nikam ni hádya a gábwat u karapatan ko para gimitán iye hide a bagay.”

¹ Nadid, nagtoldu ti Jesus tu tolay hide tu pamamag-itan nu talinghaga. Kinagi na, “Tehhod a essa a tolay a nagmula ti ubas. Kinudal na itod sakay naggimet ti ábbut a págpáspássan ti ubas. Sakay nagtolnák siya ti bilay a págbantayan. Sakay inyintirega na u uma na tu magtarabaho hod hide, sakay inumangay siya ti iba a lugar. ² Nikuna panahun dán nu sákburas ti ubas ay pinaangay na hod u essa a utusan tu mágmula hide, para alapán u kahate na tu bunga nu ubas. ³ Pero tu pákketa nu págtarabahuwán na hide tu utusan nu amu de ay binálbág de siya, sakay pinasole di siya a awan ti tawed. ⁴ Kanya u makákkao ay nagpaangay hod a huway ti essa pa a utusan, pero u utusan a pinaangay na hod ay pinakol de sakay pinasanike de. ⁵ Nangutus damman a huway u makákkao ti essa pa a utusan pero binuno di siya. Makpal pa a pina-angay hod u makákkao, pero u iba ay binálbág de sakay u iba ay binuno de. ⁶ Hanggan a awan dán ti nabuhay nan u eessa na dálla a anak a pinakamahal na. Kanya pinaangay na u anak na tu uma na. Ta u akala na ay igalang de siya. ⁷ Pero nikuna a ketan nu mágmula hide u anak na ay kinagi de, ‘Sa itona u tagapagmana. Kamon he, bunuwán tam siya para me angay nikitam u atanan a manaán na.’ ⁸ Kanya sinunggaben de sakay binuno de, sakay káttapos ay imbut de tu luwas nu kaubasan u bangkay na. ⁹ Nadid, “Ánya wád i gimitán nay nu makákkao tu ubasan? Siguradu a umangay siya tu mágmula hide sakay bunuwán na hide. Káttapos ay iyintirega na ti iba a tolay u uma na. ¹⁰ Awan moy pad beman la nabasa u kinagi na tu Kasulatan? ‘U bito a inumádden nu mágbilay hide, ay siya bál u bito a pinakapundasyon. ¹¹ Iye u ginimet nu Panginoon, a makataka-taka sakay tunay ti ganda.”’ ¹² Nikuna a matukuyan nu pinuno nu Judio hide a hide u páppatamakan ni Jesus ti talinghagaan itod ay gusto de a dakáppán ti Jesus. Pero manteng hide tu tolay hide. Kanya pinabayan di dálla ti Jesus, sakay limmakad hide. ¹³ Nadid, pinaangay nu pinuno nu Judio hide tu kán Jesus u sangan a Pariseo, sakay u sangan a alagad ni Herodes para bantayan de u kákkagiyán na para tehhod hide a mesihe a kontara nikuna. ¹⁴ Immadene hide sakay kinagi de nikuna, “Maisto, tukoy me a tatahoden u kákkagiyán mo, sakay awan ka ti ayunan. Dipo awan ka umileng tu kalagayan nu tolay, nan ni ánya u tatahoden a tungkul tu kaluuben nu Diyos u itáttoldu mo. Nadid, tama beman a magbayad kitam a Judio ti buwes ni Cesar a hare ti Roma?” ¹⁵ Pero tukoy ni Jesus a magkukunware la hide, kanya kinagi na, “Bakin páppurbaanák moy? Atáddinák moy ti pilak.” ¹⁶ Inangayan di ngane ti Jesus ti pilak. Sakay nagtanung ti Jesus, “Kándeya a ngahan sakay letrato u neukit heeh?” Timmábbeg hide, “Kán Cesar a hare ti Roma.” ¹⁷ Kanya kinagi ni Jesus nide, “Iyatád moy tu hare u para tu hare, sakay iyatád moy tu Diyos u para tu Diyos.” Tu pákkasaneg de tu tábbeg na ay nagtaka hide. ¹⁸ Nadid, immangay tu kán Jesus u sangan a Saduseo para magtanung. U Saduseo hide ay itáttoldu de a awan mabiyag a huway u patay hide. Kinagi de, ¹⁹ “Maisto, ayun tu batas a insulat ni Moises: ‘Kapag ni natay u lállake a awan ti anak tu kabanga na ay dapat pakasalan nu wadi na a lállake u nabiluwan na, tám para magkahod hide ti anak para nikuna.’ ²⁰ Nadid, kinagi de, “Tehhod a pitto a mátkaka tu itod a lállake. Nákkabanga u ákka, pero natay a awan ti anak. ²¹ Kanya u bilo ay kinabanga nu sumunud tu ákka. Pero natay bi siya a awan ti anak. Konna bi hod u nangyare tu katállo. ²² Hanggan tu kapitto de a wadi. Natay hide a atanan a awan ti anak tu bábbey. Tu katapusan ay natay be u bábbey. ²³ Nadid, ti deya u magin kabanga ni bábbiyan itod tu kaduwwa a biyag dipo nakabanga siya nu pitto?” ²⁴ Timmábbeg ti Jesus, “Mali kam, dipo awan moy naintendiyan u nakasulat tu Kasulatan nu Diyos sakay u kapangyariyan na. ²⁵ Dipo tu kaduwwa a biyag ay awan dán hide mákkabanga. Dipo kapareho dán hide nu anghel hide ti langet. ²⁶ Tungkul be tu kákkabiyag a huway, awan moy pad beman la nabasa u insulat ni Moises? Nikuna a hod siya tu maggangat a kayo, kinagi nikuna nu Diyos,“Hikán u Diyos ni Abraham, U Diyos ni Isaac sakay u Diyos ni Jacob!” ²⁷ Bakán siya a Diyos nu patay hide, nan Diyos nu biyag hide. Kanya mali kam!” ²⁸ Tehhod be a essa a tagapagtoldu hod tu Kautusan a mágsaneg tu mákpagpasuwayan hide ni Jesus. Nasaneg na a mahusay u tábbeg ni Jesus, kanya nagtanung be siya,“Ánya beman u pinakamahalaga a utus?” ²⁹ Timmábbeg ti Jesus, “Iye u mahalaga a utus: pakasanigán moy a taga-Israel! U Panginoon tam a Diyos, u Tunay a Panginoon. ³⁰ Kanya mahalán mo u Panginoon mo a Diyos ti buo mo a isip, buo a kaliduwwa, sakay tu buo mo a begsák! ³¹ Sakay u kaduwwa ay iye, ‘Mahalán mo u kapatkákka mo a konna tu págmahal mo tu sadile mo.’Awan dán ti agum a utus a higit a mahalaga kasera ti iye a duwwa.” ³² Kinagi nu tagapagtoldu tu Kautusan, “Tama ka, Maisto! Tatahoden i kinagi muwe a eessa la u Diyos awan dán ti iba. ³³ Sakay napakahalaga u magmahal nikuna tu buo a puso, buo a pag iisip, sakay tu buo a begsák. Sakay kailangan be a mahalán u kapatkákka konna tu págmahal tam tu sadile tam. Iye u pinakamahalaga kasera tu ánya man a kalase ni alay a táttutudán sakay tu iba pa hide a handug.” ³⁴ Nikuna a masaneg ni Jesus a tama u tábbeg na hide ay kinagi na nikuna, “Adene ka dán a masakup nu pághare nu Diyos.”Sapul hod ay awan dán ti nangahas a nagtanung ni Jesus. ³⁵ Nadid, tu págtoldu ni Jesus tu Templo ay tinanung na u tolay hide, “Bakin a kákkagiyán nu tagapagtoldu hide tu Kautusan a u Cristo ay anak ni David? ³⁶ Awan beman ti David dán u nagkagi tu tulung nu Banal a Ispirito a: ‘Kinagi nu Panginoon tu Panginoon ko, ‘Mággetnod ka tu kawanan ko, hanggan a mapasuko ko niko u kadima mo hide.”’ ³⁷ Nadid, ni dinulaw siya ni David a Panginoon, kodya siya a nagin lahe ni David?” Kanya nágsaneg u tolay hide a nágsaneg ni Jesus. ³⁸ Kinagi pa ni Jesus tu págtoldu na, “Magingat kam tu tagapagtoldu hide tu Kautusan. Mahilig hide a máglakad-lakad a nakasulot ti mágkalayon a damit. Sakay gugusto de a batiyán hide sakay igalang nu tolay hide. ³⁹ Sakay gugusto di be a umetnod tu áetnuden nu mataas a tolay tu sinagoga sakay tu bilay a tehhod a handaan. ⁴⁰ Sakay ugale di be a magdasal ti atakdug, para isipán nu tolay hide a malinis hide. Sakay áubusán de a agiwán u ari-ariyan nu bilo hide. Kanya i tolayan iye hide ay makatanggap ti madágge a parusa.” ⁴¹ Nadid, nággetnod ti Jesus tu adene nu págdáttonan ti ikapo tu Templo. Áelingan na u tolay hide a magdátton ti pilak. Makpal a mágkayaman a nangatád ti dáddakkál a halaga. ⁴² Immadene bi hod u essa a mahirap a bilo sakay nangatád ti duwwa a sentabos. ⁴³ Dinulaw ni Jesus u alagad na hide sakay kinagi na, “U tatahoden ay mas dakál u inyatád ni biluwan itona kasera nide a atanan. ⁴⁴ Dipo hide ay nangatád la tu susubra de a pilak. Pero i biluwe ay nangatád maski ni mahirap siya. Inyatád na u atanan a kabiyagen na.”

¹ Nadid, nikuna a paluwas dán di Jesus tu Templo ay kinagi nu essa tu disepulus na hide, “Maisto, ilingán mo u kákkagimet nu Templo! Káddakkál nu bito hide a nagamit sakay tunay a ganda u kákkagimet na!” ² Tummábbeg ti Jesus, “I áelingán muwe a dáddákkál a bilay mahábba sakay awan ti bito a mawahak a tumáttopo tu kasabito nan mahábba.” ³ Nadid, mentaras a mággetnod ti Jesus tu buked nu Olibo, tu tapat nu Templo ay tinanung siya di Pedro, Santiagu, Juan sakay ti Andres ti lihim. ⁴ “Maari beman a kagiyán mo nikame ni nikasangan a mangyare u kinagi mo? Sakay ánya u tanda ni adene dán a mangyare iye hide a atananan?” ⁵ Kanya kinagi nide ni Jesus, “Magingat kam tán awan kam madaya nu maskin deya. ⁶ Dipo makpal a dumemát a magkukunware a hide u Cristo kaya makpal hide a metawtaw. ⁷ Ni makasaneg kam ti labanan a adene nikam sakay makabaheta kam a te labanan be tu adeyo ay diyan kam manteng. Kailangan a mangyare ina hide, pero bakán palla a ina u katapusan. ⁸ Dipo mamáglaban u bansa ti bansa sakay kahariyan ti kahariyan. Maglinog tu iba-iba a lugar, sakay magkahod ti sák-aláp. I iye hide ay sapul pádla nu paghirap a dumemát. Konna la iye tu dipalonga a saket a mabate nu bábbey a adeni dán a magenak. ⁹ “Humanda kam! Dipo dumemát u panahun a itokyon dikam, sakay bálbággán dikam tu sinagoga hide. Imbistigaan dikam tu atubang nu gubernador hide sakay tu hare hide dipo tu kássunud moy nikán. Iye u pagkakataun moy para mángkagi nide tungkul nikán. ¹⁰ Pero kailangan a mepangaral pa u Maganda a Baheta tu atanan a suluk ni munduwáy bagu a dumemát u katapusan. ¹¹ Ni dakáppán dikam sakay bistaán ay diyan kam manteng tu kagiyán moy. Dipo ti itod a odas ay tulungan kam nu Banal a Ispirito ni ánya i dapat moyay a kagiyán.’ ’ ¹² Kinagi pa ni Jesus,“Káddemát ni panahunan itod ay itokyon nu tolay u kapatkákka na a pabuno; konna bi hod u gimitán nu ama tu anak na. Labanan nu anak u dáddakál na, sakay pabuno na hide. ¹³ Kaiyamutan kam nu atanan dipo tu kássunud moy nikán, pero u manatile a tapat hanggan tu katapusan ay siya u maligtas.” ¹⁴ Nadid, kinagi pa ni Jesus, “Kailangan a intendiyán iye nu mágbasa: Ni ketan moy dán u tunay ti dukás a gimet a awan ti kapareho a katoy tu lugar a awan na dapat a págyanan ay u katoy hide ti Judea ay dapat guminan dán tu buki-buked. ¹⁵ Sakay ni ti deya u pagabutan tu bubungan nu bilay na ay diyan dán magabala a umogsad a mangalap ti ánya man hina a tawidán na; ¹⁶ sakay u hod tu uma na ay diyan dán sumole para mangalap ti badu. ¹⁷ Kakagbi u bábbey hide a mágkabuktet sakay u magpasuso hide ti aldiwan itod! ¹⁸ Idasal moy iye hide tu Diyos a diyan iye mangyare tu panahun nu amiyan, ¹⁹ dipo maghirap ti husto u tolay hide ti panahunan itod, itod a kahirapan ay awan ti kapareho sapul nikuna a lalangán nu Diyos i munduwáy, hanggan nadid, sakay awan dán iye mahuwa-huway. ²⁰ Ni awan paapehitán nu Diyos i aldiwan iye ay awan ti tolay a maligtas; pero paapehitán na i aldiwan itod, alang-alang tu pinile na hide. ²¹ Ni tehhod nikam a magkagi. ‘Atoy he u Cristo!’ oni kagiyán de. ‘Atoy kanon siya!’ diyan kam maniwala. ²² Dipo makpal a magwari-ware a hide u Cristo sakay te magwari-ware be a prupeta hide, sakay mángpeta bi hide ti tanda sakay makataka-taka hide a bagay tán itawtaw de ni maare pate u pinile hide nu Diyos. ²³ Kanya magingat kam. Dipo impáppadipalongo ku dán nikam a ingkagi u atanan a bagay bagu a mangyare iye hide.’ ’ ²⁴ Sakay kinagi pa ni Jesus, “Káttapos ni aldiwan itod a kahirapan ay magdiklám u aldew, awan dámbe dumemlag u bulan, ²⁵ sakay matákneg u biton hide a gábwat ti langet. Sakay mayanág u atanan a kapangyariyan nu kalawakan. ²⁶ Káttapos ay ketanák de a Anak nu tolay a dumemát a hod tu panganurin, a tehhod a dakila a kapangyariyan sakay karangalan. ²⁷ Paangayán ko u anghel ko hide tu áppat a suluk ni munduwáy tánni ipunán de u tolay hide a pinile nu Diyos.” ²⁸ “Intendiyán moy u adal a gábwat tu ponan nu kayo a igus; kapag ni magduun dán u pinget na hide ay tukoy moy dán a adene dán u kássinag. ²⁹ Konna bi hod, ni ketan moy dán a mangyare dán iye hide a kinagi ko nikam ay matukuyan moy a adeni dán siya a dumemát; halus atoy dán siya. ³⁰ Tatahoden u kagiyán ko nikam: iye hide a atanan ay mangyare bagu a matay u tolay hide a biyag palla nadid. ³¹ Mawan u langet sakay u luta, pate u atanan a bagay, pero u upos ko ay awan mamawan hanggan-hanggan. ³² “Awan ti makatukoy tu aldew oni odas, maski u anghel hide ti langet oni hikán a mismo a Anak nu Diyos. U Diyos Ama la u nakatukoy ti iye. ³³ Kanya magingat kam sakay lagi a handa dipo awan moy tukoy ni nikan iye a mangyare. ³⁴ Iye ay maare tam a ipareho tu essa a tolay a umangay tu adeyo a lugar: bagu siya a lumakad tu bilay na ay inatádden na u bawat essa tu utusan na hide ti tarabaho, sakay kinagiyan na u tagabantay tu pintuwan a dapat lagi a handa tu káddemát na. ³⁵ Kanya magin handa kam, dipo awan moy tukoy u káddemát nu kebbilay; maare a ti pággapon, oni hatinggabi, magamulaldew, oni dimadimang. ³⁶ Kanya humanda kam makay kedemáttan takam a tidug. ³⁷ Iye u bilin ko nikam sakay tu atanan a tolay: pirme kam a nakahanda!’ ’

¹ Duwwa dálla a aldew ay piyesta dán nu pággala-ala nu Judio hide tu kálluwas de ti Egipto, sakay Piyesta be nu tinapay a awan ti Págpaalsa. Nadid, u puno nu saserdote hide sakay u eskriba hide a maisto nu Kautusan ay pinamágguhunan de ni kodya de a ipadakáp ti Jesus a awan ti makatukoy sakay pabuno de. ² Kinagi de, “Diyan tam gimitán tu Piyesta, dipo makay magulo u tolay hide.’ ’ ³ Nadid, nikuna a katoy ti Jesus tu banuwan a Betania. Mentaras a kuman siya tu bilay ni Simon, a date a te ketong ay dimmemát u essa a bábbey. Tehhod siya a tawed a mamahalin a pabango a keasák tu bote, gábwat itod tu mula a nardo tunay itod ti kamahal. Binássag na u bote sakay imbulak na tu ulo ni Jesus. ⁴ Nagingál u sangan tu tolay hod hide, kinagi de, “Bakin a sássayangán na i pabango we? ⁵ Inlako na nakwa ina dipo u halaga na ay sataon a suweldu nu essa a tarahabador, “Sakay u naglakuwan na a pilak ay meatád tu mágkahirap hide!’ ’ Sakay nagingál hide tu bábbey. ⁶ Pero kinagi ni Jesus, “Pabayan moy la siya! Bakin a rebukán moy siya? Maganda u ginimet na nikán. ⁷ Dipo u mágkahirap ay pirme moy la a kaguman sakay maare kam a tumulung nide, maski ánya a odas. Pero awanák moy lagi a kakaguman. ⁸ Ginimet nala u makaya na para nikán. Iye ay pánghanda tu káddemát nu pánglábbáng nikán. ⁹ Tandaan moy, maski hádya a ipangaral u Maganda a Baheta ay mabanggit dila u ginimet na bilang pággala-ala nikuna.’ ’ ¹⁰ Nadid, ti Judas Iscariote, a essa tu sapulo ay ti duwwa a disepulus ni Jesus ay immangay tu puno nu saserdote hide para itokyon na ti Jesus. ¹¹ Masaya hide tu kinagi ni Judas sakay impananto de a atádden di siya ti pilak. Sapul hod ay naguhay dán ti Judas ti pagkakataun a metokyon na ti Jesus. ¹² Tu dipalongo a aldew nu Piyesta nu tinapay a awan ti Págpaalsa, aldew be nu págbuno de ti tupa para tu Piyesta nu aldew nu págtaleb. Tinanung nu disepulus na hide ti Jesus, “Hádya i gustu muway a pánghandaan me tu pangapon tam para tu Piyesta nu pággala-ala?’ ’ ¹³ Kanya inutusan ni Jesus u duwwa na a disepulus, kinagi na, “Angay kam tu banuwan a Jerusalem. Káddemát moy hod ay te matagbu kam a lállake a te báklay a banga a putat ti dinom. Unonudán moy siya ¹⁴ hanggan tu bilay a sáddáppan na, ‘Sakay kagiyán moy tu makákkao tu bilay, ‘Ipetanung ben nu Maisto ni tehhod kam a kuwarto a maare na a pangapunan sakay tu disepulus na hide, para tu Piyesta nu pággala-ala.’ ¹⁵ Ipeta na nikam u dakál a kuwarto tu ontok nu bilay. Nakahanda dán itod para nikitam kaya ihanda moy dán u pangapon tam.’ ’ ¹⁶ Naglakad ngani u duwwa na a disepulus, sakay nikuna a makademát hide tu banuwan ay netan de u atanan a kinagi ni Jesus nide. Sakay inhanda di hod u pangapon de a para tu Piyesta nu pággala-ala. ¹⁷ Nikuna a gibi dán ay dimmemát di Jesus, sakay u sapulo ay ti duwwa a disepulus na. ¹⁸ Mentaras a kuman hide ay kinagi ni Jesus: “Tandaan moy iye: te essa nikam he a katubang ko a kuman u mángtokyon nikán.’ ’ ¹⁹ Nalungkut u disepulus na hide nikuna a masaneg di iye, kanya u bawat essa nide ay nagtanung ni Jesus, “Hikán beman Panginoon?’ ’ ²⁰ Kinagi ni Jesus nide,“U essa nikam a sapulo ay ti duwwa a kasabay ko a mángsawsaw ti tinapayáy ti malukungáy ay siya u mángtokyon nikán. ²¹ Hikán a anak nu tolay ay bunuwán, ayun tu kinagi nu Kasulatan, pero kakagbi u tolay a mángtokyon nikán! Mas maganda pa ni awan dálla neenak i tolayan iye.’ ’ ²² Mentaras a kuman hide ay nangalap ti Jesus ti tinapay sakay nagpasalamat tu Diyos. Nikuna a matapos dán siya a magpasalamat ay tináppeng-táppeng na sakay inyatád na tu disepulus na hide. Kinagi na, “Alapán moy iye; iye u bággi ko.” ²³ Káttapos, ay nangalap siya ti tasa a te alak. Nagpasalamat siya tu Diyos sakay káttapos ay inyatád na tu disepulus na hide, sakay imminom hide a atanan. ²⁴ Kinagi ni Jesus nide, “Iye u dige ko a nebuhus para tu makpal a tolay. Iye u mangpatunay a tehhod dán a bigu a kasunduwan u Diyos sakay u tolay. ²⁵ Tandaan moy, awanák dán uminom ti áinumán a gábwat tu ubas hanggan tu aldew a inumán ko u bigu a alak a áinumán tu kahariyan nu Diyos.” ²⁶ Nágkansiyon hide ti papure tu Diyos sakay káttapos ay ummangay hide tu buked a Olibu. ²⁷ Nadid, kinagi ni Jesus tu disepulus na hide, “Lakadinák moy a atanan, dipo kinagi nu Diyos tu Kasulatan, ‘Bunuwán ko u pastol sakay u tupa hide a inalagaan na ay magkalat.’ ²⁸ Pero ni mabiyagák dán a huway ay mágdipalonguwák nikam a umangay ti Galilea.” ²⁹ Kinagi ni Pedro ni Jesus, “Maski ni lakaden ka nu atanan ay awan taka lakaden.’ ’ ³⁰ Tinábbeg siya ni Jesus, “Tandaan mo, bagu a magtarakket ti pumenduwwa u manok nadid a gibi ay pentálluwák mo a ipamen.” ³¹ Pero impilit la ni Pedro, “Maski ni bunuwánnák de a kaguman mo ay awan taka ipamen.” Konna bi hod u kinagi nu agum a disepulus na. ³² Nadid, immangay hide tu lugar a Getsemani u ngahan na. Káddemát di hod ay kinagi ni Jesus nide, “Mággetnod kam pa he mentaras magdasalák.’ ’ ³³ Ingkuyog na di Pedro, Santiago, sakay ti Juan. Nadid, nabalisa siya a tahod. ³⁴ Kinagi na nide, “Mabalisaák a tahod a ngahi-ngahiyák a matay! Maguhay kampa he diyan kam mátdug.” ³⁵ Immadeyo siya ti badit, tu disepulus na hide sakay dimmapa siya a nagdasal ani maare ay diyan na dán madanas u paghihirap a dumemát nikuna. ³⁶ Impagdasal na,“Ama, Ama ko!Tukoy ko a magimet mo u atanan a bagay. Ni maare ay diyanák mo ped pabayan a maghirap. Pero bakán a u kagustuwan ko u masunud nan u kagustuwan mo.’ ’ ³⁷ Nadid, tu kássole na tu tállo na a disepulus ay nedemáttan na u tállo a tidug kanya linukag na hide sakay kinagi na ni Pedro, “Simon bakin tidug ka? Awan ka beman makapagbantay maski ni essa la a odas mentaras a magdasalák?’ ’ ³⁸ Sakay kinagi na nide, “Dyan kam mátdug magdasal kam tán awan kam matokso. Nakahanda u ispirito, pero mahina u bággi moy.’ ’ ³⁹ Immadeyo a huway ti Jesus sakay nagdasal, indasal na a huway u purumero na a indasal. ⁴⁰ Káttapos ay simmole a huway ti Jesus tu disepulus na hide sakay dinemáttan na dámman hide a tidug, dipo garabi u tongka de. Nikuna a malukag hide ay awan de tukoy ni ánya u kagiyán de ni Jesus. ⁴¹ Tu katállo a sole ni Jesus ay kinagi na nide, “Tidug kam sakay umimang? Tama dán ina! Dummemát dán u odas a pángtokyon di nikán tu makasalanan hide a tolay. ⁴² Umikat kamon ta kadtamon atoy dán u tolay a mángtokyon nikán.’ ’ ⁴³ Magupos palla ti Jesus nikuna a dumemát ti Judas, a essa tu sapulo ay ti duwwa a disepulus na, makpal siya a kaguman a tolay a te mangaáttak sakay gahote. Inutusan hide nu puno hide nu Saserdote hide, sakay u tagapagtoldu hide tu Kautusan, sakay tu puno hide nu banuwan. ⁴⁴ Bagu hide a dinumemát ay kinagiyan dán ni Judas u tolay hide, “Ni ti deya u ámmuwan ko ay siya itod. Dakáppán moy siya sakay bantayan ti husto.” ⁴⁵ Kanya tu káddemát ni Judas ay pagdaka siya a immadene ni Jesus. Sakay kinagi na, “Maisto!’ ’ káttapos ay inámmuwan na siya. ⁴⁶ Tu pákketa nu tolay hide ay pagdaka de a tinawiden ti Jesus sakay dinakáp. ⁴⁷ Binagut nu essa a disepulus ni Jesus u áttak na, sakay tinegpas na u alipin nu puno nu Saserdote hide, kanya nahipang u talinga na. ⁴⁸ Kinagi ni Jesus tu nangdakáp hide nikuna, “Ányaák mágbabono? Kaya kam a immangay he a te tawed a áttak sakay gahote dakáppánnák moy? ⁴⁹ Aldew-Aldiwák a magtoldu tu Templo. Bakin awanák moy hod dinakáp? Pero kailangan a matupad u kinagi nu prupeta tu Kasulatan nu Diyos.” ⁵⁰ Ginuminan u atanan nu disepulus na hide sakay inwahak di siya. ⁵¹ Timmagubet ni Jesus u essa a ulito a nakabadu la ti lino. Hinagad siya nu katolayan ⁵² pero ginuminan siya, newahak na u alikábkáb na kaya uba siya a nággaginanán. ⁵³ Nadid, inyangay de ti Jesus tu bilay nu kapunuwan a Saserdote; naipun dán hod u atanan a puno nu Judio hide. ⁵⁴ Immunonod bi hod ti Pedro, pero adeyo la u distansiya na ni Jesus. Simmáddáp siya tu sássáddáppan nu bilay nu pinakapuno nu Saserdote hide, sakay nákpággetnod siya tu mágbantay hide a magendu tu apoy. ⁵⁵ Nadid, u puno hide nu mágkataas a Saserdote sakay u buo a gurupo ay magehyok hide ti ibintang de ni Jesus tán te dahilan hide a mangpabuno nikuna. Pero awan hide ti ketan. ⁵⁶ Makpal u nagtistigu ti kakabuliyan a kontara ni Jesus, pero awan pari-pareho u kinákkagi de. ⁵⁷ Tehhod a sangan a nagtistigo ti kakabuliyan a kontara ni Jesus kinagi de: ⁵⁸ “Nasaneg me a kinagi na, ‘Hábbaán ko u Templo a ginimet ni tolay, pero tu alay nu tállo a aldew ay maggimiták ti bigu a Templo a awan magimet ni tolay.” ⁵⁹ Pero awan labe mamágkapareho u kinákkagi de. ⁶⁰ Timmaknág u pinakapuno nu Saserdote hide tu atubang de, sakay tinanung na ti Jesus, “ Ánya u makagi mo tu kinákkagi de kontara niko?’ ’ ⁶¹ Pero awan ti kákkagi ti Jesus; kanya tinanung siya a huway nu pinakapuno nu Saserdote hide, “Hiko beman u Cristo a anak nu kataas-taasan a Diyos?” ⁶² Nadid ay nagupos dán ti Jesus, kinagi na, “Hikán ngane, sakay hikán a Anak nu Tolay ay ketan moy, a mággetnod tu kawanan nu makapangyariyan a Diyos. Sakay ketan moy u káddemát kuhe ti munduwáy a kaguman nu diklám ti langet.’ ’ ⁶³ Nikuna a masaneg iye nu puno nu Saserdote hide ay pinisad na u damit na dipo tu ingál na sakay kinagi na, “Awan tamon kailangan ti magtistigu! ⁶⁴ Nasaneg moy u kinagi na a kontara tu Diyos. Ánya u gusto moy a gimitán tam nikuna?” Nadid ay kinagi de a atanan a kailangan siya a bunuwán. ⁶⁵ Linoktaben siya nu agum a katoy hod. Pinángngássan de, sakay sinuntuk de. Pinatukoy dipa ni ti deya nangsuntukay nikuna, sakay binálbág siya nu mágbantay hide. ⁶⁶ Nikuna a hed palla ti Pedro tu luwas nu pintuwan ay dimmemát u essa a bábbey a alipin nu puno nu Saserdote hide. ⁶⁷ Nikuna a ketan na ti Pedro a magendu tu adene nu apoy ay minámmalas na siya sakay kinagi na, “Awan beman kaguman ka be ni Jesus a taga-Nazaret?” ⁶⁸ Pero impamen ni Pedro, kinagi na, “Awan ku tukoy i kákkagiyán muwe. “Káttapos ay limmakad hod siya sakay limmuwas siya tu kállakad na ay nagtarakket u tandang. ⁶⁹ Netan dámman hod siya nu bábbey a alipin, kanya kinagi nu bábbey tu tolay hide a katoy hod, “I tolayan ina ay essa be a kakagumanan ni Jesus.” ⁷⁰ Pero huway a impamen ni Pedro. Mamaya-maya ay kinagi nu tolay hide a katoy hod, “Diyan mudán ipamen a essa ka nide. Taga-Galilea ka awan beman?” ⁷¹ Kinagi ni Pedro, “Isumpa ko, maski ni parusaanák nu Diyos ni magbuli-buliyák, awan ko matengge i tolayan itona.” ⁷² Nagtarakket dámman u tandang. Kanya naala-ala ni Pedro u kinagi ni Jesus nikuna a, “Bagu a magtarakket u manok ti pumenduwwa ay pumentálluwák mo a ipamen.”Kanya nágsasangitán siya ti husto.

¹ Nadid, tunay palla ti kadimadimang ay namágguhon u Saserdote hide, sakay u pinuno hide nu banuwan sakay u tagapagtoldu hide tu Kautusan, sakay u agum hide a pinuno nu Judio hide, namágguhunan de ni ánya gimitán diyay ni Jesus. Pinapungo di ti Jesus sakay inyangay de tu kán Pilato. ² Nikuna a katoy dán hod hide ay tinanung siya ni Pilato, “Hiko beman u hare nu Judio hide?” Timmábbeg ti Jesus, “Kinagi mo dán.” ³ Makpal a bintang u puno hide nu saserdote hide a kontara ni Jesus ⁴ kanya tinanung siya a huway ni Pilato, “Bakin awan ka tumábbeg? Nasaneg mo u kakpal nu ibábbintang de niko.” ⁵ Pero awan pade timmábbeg ti Jesus, kanya nagtaka ti Pilato. ⁶ Kada kasayaan nu pággala-ala nu Judio hide tu kálluwas de ti Egipto ay ugale ni Pilato a magpalaya ti essa a pireso a gusto nu tolay hide a palayaán. ⁷ Tehhod hod a essa a pireso a u ngahan na ay Barabas. Nepireso siya dipo kaguman siya tu nagribeldi hide sakay nakabuno nikuna a tehhod a kaguluwan. ⁸ Makpal a immadene ni Pilato a inaged de a gimitán na a huway u ugale na a magpalaya ti pireso. ⁹ Kanya tinanung hide ni Pilato, “Gusto moy beman a palayaán ko u Hare nu Judio hide?’ ’ ¹⁰ Kinagi na iye dipo tukoy ni Pilato a u Saserdote hide ay managhile la hide ni Jesus kanya inyangay di hod siya nikuna. ¹¹ Pero sinássusutan nu puno hide, nu Saserdote hide u tolay hide a ti Barabas u agidán de a palayaán na bakán a ti Jesus. ¹² Kanya tinanung hide a huway ni Pilato, “Ánya nadid u gimitán ko ti tolayáy a dáddulawán moy a Hare nu Judio hide?’ ’ ¹³ Pimmákhaw u tolay hide, “Ipako siya tu kudus!’ ’ ¹⁴ Kinagi ni Pilato nide, “Bakin, ánya u kasalanan na?’ ’ Pero mas lalo pa a pimmákhaw u tolay hide, “Ipako siya tu kudus!’ ’ ¹⁵ Dipo gusto ni Pilato a pagbigyan u tolay hide ay pinalaya na ti Barabas. Sakay pinabálbág na ti Jesus sakay impeatád na tu sundalo hide para ipako de tu kudus. ¹⁶ Inyangay nu sundalo hide ti Jesus tu disalad nu kudal nu bilay nu gubernador, sakay pinaipun di hod u atanan a sundalo. ¹⁷ Sakay sinulutan de ti Jesus ti badu a kurol ni ubi. Sakay nangalap hide ti saet a ginimet de a kurona, sakay indátton de tu ulo ni Jesus, a kurona na. ¹⁸ Káttapos ay impákhaw de a sineste, “Mabuhay u Hare nu Judio hide!’ ’ ¹⁹ Sakay binakád-bakád de siya, sakay linoktaben de siya, sakay nagkukunware a limmuhud nikuna. ²⁰ Káttapos de a lokuwán ti Jesus ay ineklasan de tu badu na a kurol ubi sakay insulot de u date na a damit. Káttapos ay inyangay de siya tu luwas nu banuwan para ipako tu kudus. ²¹ Mentaras a maglakad hide ay natagbu de ti Simon a taga-Cirene a ama di Alejandro ay ti Rufo, gábwat siya tu uma na. Pilit de a impabáklay nikuna u kudus ni Jesus. ²² Inyangay de ti Jesus tu lugar a ngángngahanan de a Golgota, a u gusto na a kagiyán ay lugar ni bungo. ²³ Káddemát di hod ay inatádden de ti Jesus ti alak a te halo a mira. Pero awan na iye ininom. ²⁴ Sakay impako de ti Jesus tu kudus sakay pinaghati-hati de u damit na, tu pamamagitan nu bunutan. ²⁵ Alas nuwebe ti dimadimang nikuna a ipako de ti Jesus tu kudus. ²⁶ Sakay nakasulat tu ontok nu kudus u bintang de nikuna. “U hare nu Judio hide.’ ’ ²⁷ Te duwwa be a mágtakaw a impako tu kudus a kasabay ni Jesus, essa tu kawanan na sakay essa be tu kawihe na. ²⁸ Ti nangyariyan iye ay natupad u kinagi tu kasulatan a, “Nebilang siya a mágbabono.’ ’ ²⁹ Nadid, u magtaleb hod hide ay áinsultuwán de ti Jesus, kinagi de, “Hala! Hiko bál u manghábba tu Templo, sakay ipataknág mo a huway tu alay nu tállo a aldew? ³⁰ Umogsad ka ti kuduse sakay iligtas mo i sadile muwe!’ ’ ³¹ Konna bi hod u pángdusta nikuna nu puno hide nu Saserdote hide sakay tu tagapagtoldu hide tu Kautusan. Kinagi de tu balang essa, “Inligtas na u agum, pero awan na meligtas u sadile na! ³² Ni ketan tam a umogsad ti kuduse i Hari kane ti Israel ay maniwala kitamon nikuna a siya u Cristo!” Sakay sinesti be siya nu duwwa a nepako a kaguman na. ³³ Nikuna a tanghale dán ay nagdiham u buo a luta hanggan alas tres ti apon. ³⁴ Nikuna a mag-alas tres dán ti apon ay pimmákhaw ti Jesus ti mabegsák, “Eloi, Eloi, Lema Sabachthani?” a u gusto na a kagiyán ay “Diyos ko, Diyos ko, bakin a pinabayanák mo?” ³⁵ Nikuna a masaneg itod nu mágtaknág hod hide, ay kinagi de, “Sanigán moy, dáddulawan na ti Elias!” ³⁶ Agad be a nagginan u essa a tolay a nángngay ti damit, sakay binisa na ti suka, sakay indátton na tu ontok nu kayo, sakay impasápsáp na ni Jesus. Sakay kinagi na, “Ilingán tam ped ni dumemát ti Elias a máng-ogsad nikuna ti kuduse.” ³⁷ Pimmákhaw ti mabegsák ti Jesus sakay káttapos ay nahángsatan dán siya. ³⁸ Ti itod be ay bigla a nahate u kortina tu disalad nu Templo, sapul ti ontok hanggan ti sidung. ³⁹ Mágtaknág tu atubang nu kudus u kapitan nu sundalo hide. Kaya netan na ni kodya a nahángsatan ti Jesus. Kinagi na, “Tatahoden ngane a Anak nu Diyos i tolayan iye!” ⁴⁰ Katoy bi hod u sangan a bábbey a mágtannaw tu adeyo. Kaguman ti Maria Magdalena, ti Salome, sakay ti Maria a ina ni Jose sakay ti Santiago a dipos de. ⁴¹ Iye hide a bábbey ay lagi a mákkuyoyog ni Jesus sakay tumáttulung nikuna tu itod, nikuna a katoy palla siya ti Galilea. Katoy bi hod u agum a bábbey a kaguman ni Jesus a immangay ti Jerusalem. ⁴² - ⁴³ Nikuna a mágdiha-diham dán ay dummemát ti Jose a taga-Arimatea, essa siya a igággalang a miyembro nu Sanedrin. Maguhay be siya tu káddemát nu pághare nu Diyos. Dipo tu itod ay aldew nu pághanda, oni dispiras nu Aldew nu Káimang ay nagbegsák isip siya a ummadene siya ni Pilato para agidán na u bangkay ni Jesus. ⁴⁴ Nikuna a masaneg ni Pilato a patay dán ti Jesus ay nagtaka siya. Kanya impadulaw na u kapitan nu sundalo hide sakay tinanung na ni nalay dán a natay ti Jesus. ⁴⁵ Sakay nikuna a masaneg ni Pilato tu kapitan a patay dán ti Jesus ay pinayagan na ti Jose a alapán u bangkay ni Jesus. ⁴⁶ Namale ti Jose ti mapudew a damit a lino a pangbalut na tu bangkay. Nikuna a me-ogsad na u bangkay ni Jesus ay binalutan na tu damit sakay tulos na a inlábbáng tu kuweba a páglábbangngan de. Impagulung na u dakál a bito a nangtakáp de tu pintuwan nu páglábbángngan de. ⁴⁷ Netan di Maria Magdalena sakay ti Maria a ina ni Jose u nánglábbángngan de ni Jesus.

¹ Nadid, kállipas nu Aldew nu Káimang, di Maria Magdalena, ti Maria a ina ni Santiago, sakay ti Salome ay namale ti pangpasáppot para tu bangkay ni Jesus. ² Nikuna a dimadimang tu Aldew nu simba ay maagap hide a immangay hod tu lábbang ni Jesus. ³ Mentaras a maglakad hide ay namágtanungan hide tu bawat essa. “Deya wád maare tamay a kauhunán para mánggulung tu bito a dakál a takáp nu páglábbángngan?” ⁴ Nakagi de itod dipo tunay ti kadakál u bito. Pero tu káddemát di hod ay netan de a negulung dán u bito a takáp nu pintuwan. ⁵ Sakay simmáddáp hide tu páglábbángngan, tehhod hide a netan a essa a lállake a nakabadu ti malayon sakay mapudew a damit, sakay mággetnod siya tu danág ti kawanan. Kanya tunay u ánteng de. ⁶ Pero kinagi na nide, “Dyan kam manteng! Tukoy ko a ehyukán moy ti Jesus a taga-Nazaret a nepako tu kudus. Awan dán he siya. Biniyag dán siya a huway nu Diyos! Ilingán moy u pinángdáttonan tu bangkay na.” ⁷ Káttapos ay kinagi nu lállake nide, “Sumole kamon, sakay kagiyán moy tu disepulus na hide, lalo dán ni Pedro, a mágdipalongo siya nikam ti Galilea. Hod moy hod siya a ketan a konna tu kinagi na nikam.” ⁸ Lummuwas hide tu páglábbángngan sakay nággaginanán hide a lummakad, magpágpág hide sakay magulu u isip de. Awan hide ti ingkagi a ányaman maskin deya dipo tu ánteng de. ⁹ Dimadimang palla tu Aldew nu simba ay nabiyag a huway ti Jesus. Dipalongo na a pimmetaan ay ti Maria Magdalena. Siya u bábbey a inibutan na ti pitto a madukás a ispirito. ¹⁰ Immangay siya tu disepulus hide ni Jesus, para ibaheta na nide u netan na. Nedemáttan na hide a maglungkut sakay mágsasangitán. ¹¹ Pero awan hide maniwala tu baheta na a biyag ti Jesus sakay pimmeta nikuna. ¹² Káttapos ni itod, nikuna a pasiyaan a maglakad u duwwa na a disepulus a patamo tu baryo ay pimmeta nide ti Jesus, pero awan di siya natengge dipo nagbagu u hupa na. ¹³ Simmole hide tu kakagumanan de hide sakay imbaheta de nide u nangyare, pero umád de a maniwala. ¹⁴ Káttapos ay pummeta ti Jesus tu sapulo ay ti essa a disepulus na nikuna a pasiyaan hide a kuman. Pinágngállan na hide dipo tu awan de pánniwala nikuna sakay dipo tu kaigáttan nu ulo de, dipo umád de a maniwala tu nángbaheta nide a nabiyag siya a huway. ¹⁵ Sakay kinagi nide ni Jesus, “Umangay kam tu buo a mundu sakay ipangaral moy u Maganda a Baheta tu atanan a tolay. ¹⁶ U sumampalataya sakay magpabawtismo ay maligtas, pero u umád a sumampalataya ay maparusaan. ¹⁷ U sumampalataya hide ay atádden ti kapangyariyan a maggimet ti makataka-taka a bagay: tu ngahan ko ay magpalayas hide ti mágkadukás a ispirito sakay makapagupos hide ti iba-iba a upos. ¹⁸ Maski ni mangkáppot man hide ti ulag oni make-inom ti lason ay awan hide maaánya; sakay magpiyya u te saket hide a tupuwan de tu kamát de.” ¹⁹ Nadid káttapos ni Jesus a nagupos nide ay inyontok siya ti langet sakay nággetnod tu kawanan nu Diyos. ²⁰ U disepulus na hide ay immangay ngani tu iba-iba a lugar sakay nagtoldu. Tinulungan hide nu Panginoon ti itod a gawain. Pinatunayan nu Panginoon tu tolay hide a tahod u impáppangaral de tu pamamag-itan nu pággimet ti makataka-taka a bagay a inpagkaluub na nide. (v 9) [Ummangay u bábbey hide tu kán Pedro sakay tu kaguman na hide, sakay insaysay de u atanan a nakagi nide. (v 10) Káttapos ay inutusan ni Jesus u disepulus na hide a ipangaral tu atanan a suluk ni munduwáy u banal sakay a awan maglilipas a baheta nu kaligtasan a awan ti kahád.]