Mateo

Mateo

¹ Sa iye i listaanay nu kaapo-apuwan ni Jesu-Cristo a lahi ni (Hari a ) David sakay ni Abraham. ² Ti Abraham i amaay ni Isaac sakay ti Isaac be i amaay ni Jacob. Ti Jacob be u ama ni Juda sakay tu kákkapatkákka na hide a lállake. ³ Nagin anak ni Juda sakay ni Tamar di Fares sakay ti Zara. Ti Fares i amaay ni Esrom sakay ti Esrom be u ama ni Aram. ⁴ Sakay ti Aram i amaay ni Aminadab sakay ti Aminadab u ama be ni Naason sakay ti Naason u ama be ni Salmon. ⁵ Nagin anak ni Salmon sakay ni Rahab ti Booz tapos nagin anak be ni Booz sakay ni Ruth ti Obed. Sakay ti Obed i amaay ni Jesse, ⁶ a ama ni Hari a David. Nadid nagin anak ni Hari a David ti Solomon sakay u ina na ay u nabilowan ni Urias. ⁷ Sakay ti Solomon i amaay ni Roboam sakay ti Roboam u ama be ni Abias sakay ti Abias u ama be ni Asa. ⁸ Sakay ti Asa i amaay ni Josafat sakay ti Josafat u ama be ni Joram sakay ti Joram u ama be ni Ozias. ⁹ Sakay ti Ozias i amaay ni Jotam sakay ti Jotam u ama be ni Acaz sakay ti Acaz u ama be ni Ezequias. ¹⁰ Ti Ezequias i amaay ni Manases sakay ti Manases u ama be ni Amos sakay ti Amos u ama be ni Josias. ¹¹ Sakay ti Josias i amaay ni Jeconias sakay tu kákkapatkákka na hide. Neenak dán hide bagu tu panahun a pinuwersa a inyangay nu taga Babilonia u Israelita hide tu bansa de. ¹² Nadid káttapos nu panahun nu pángpuwersa a kákkeangay nu Israelita hide ti Babilonia ay nagin anak ni Jeconias ti Salatiel sakay ti Salatiel u ama be ni Zorobabel. ¹³ Sakay ti Zorobabel i amaay ni Abiud sakay ti Abiud be u ama ni Eliaquim sakay ti Eliaquim be u ama ni Azor. ¹⁴ Sakay ti Azor i amaay ni Sadoc sakay ti Sadoc u ama be ni Aquim sakay ti Aquim u ama be ni Eliud. ¹⁵ Sakay ti Eliud i amaay ni Eleazar sakay ti Eleazar u ama be ni Matan sakay ti Matan u ama be ni Jacob. ¹⁶ Sakay ti Jacob i amaay ni Jose a kabanga ni Maria. Ti Maria i inaay ni Jesus u nginahanan a Cristo. ¹⁷ Kanya te 14 a salin lahi sapul ni Abraham hanggan ni David. Sakay 14 be a salin lahi a sapul ni David hanggan tu panahon nu puwersa a kákkeangay nu Israelita hide ti Babilonia. Sakay te 14 be a salin lahi sapul tu puwersa a kákkeangay ti Babilonia hanggan ni Cristo. ¹⁸ Nadid konna he i istoryaay nu kákkaenak ni Jesu-Cristo: Ti Maria a ina ni Jesus sakay ti Jose ay nasakad dán. Pero bagu hide a nagagum ay nagbuktet ti Maria tu pamamagitan nu kapangyariyan nu Banal a Ispiritu. ¹⁹ Nikuna natukuyan iye nu magin kabanga ni Maria a ti Jose, ay nagplano siya a uhunán sakay hiwalayan ti Maria ti lihim dipo umád siya a mapasanike ti Maria tu kakpalan. Ginimet iye ni Jose dipo essa siya a malinis a tolay. ²⁰ Pero nikuna a nabuo dán tu isip na a gimitán iye ay pinumeta u essa a anghel nu Panginoon nikuna tu tagináp na. Kinagi nu anghel nikuna, “ Jose a lahi ni David, dyan ka magduwaduwa a mangkabanga ni Maria, dipo u anak akatoy tu tiyan na ay gimet nu kapangyariyan nu Banal a Ispiritu. ²¹ Magenak siya ti essa a lállake, u ingahan mo nikuna ay Jesus dipo siya u mángligtas tu tolay na hide tu kaparusaan nu kasalanan de.” ²² Atananan iye ay nangyari para matupad u kinagi nu Panginoon tu tolay tu itod tu pamamagitan nu propeta na. ²³ I kinagi naay ay “Ilengán moy! Magbuktet u essa a madiket sakay magenak ti essa a lállaki. Sakay u magin ngahan na ay Emmanuel.” (U kahulugan nu ngahan na ay ‘Kakaguman tam u Diyos’.) ²⁴ Nikuna a nalukag ti Jose ay sinunud na u utos nu anghel nu Panginoon. Kinabanga na ti Maria. ²⁵ Pero awan dinuhog ni Jose ti Maria hanggan awan siya naggenak. Nagenak ti Maria ti lállaki sakay nginahanan ni Jose u anak a Jesus.

¹ Nadid tu panahun ni Hari Herodes, káttapos a neenak ti Jesus tu banuwan a Betlehem a sakup nu Judea ay te dummemát a sasangan a mágkalalaki a tolay ti Jerusalem a gábwat ti Sikatan. ² Nágtatanungán hide tu tolay hide a mágyan hod “Hádya a neenak u anak a magin Hari nu Judeo hide? Netan mi hod ti Sikatan a linumitaw u biton a tanda nu kákkaenak na . Kanya inumangay kami he para ipeta mi u págsamba me nikuna.” ³ Nikuna a nabaheta iye ni Hari Herodes ay naligalig siya pati be u katolayan ti Jerusalem. ⁴ Kanya pinisan na u atanan a pupuno nu saserdote hide sakay u maistu hide nu Kautusan ni Moises. Sakay tinanung na hide “Hádya beman a meenak u Cristo a inpanatu nu Diyos a magin hari nu tolay na hide?” ⁵ Tinábbeg de siya “Tu lugar a Betlehem a sakup ni Judea. Dipo konna he u kinagi nu Diyos tu itod a insulat nu essa a propeta, ⁶ ‘U lugar a Betlehem a sakop ti Juda ay mas tanyag nan tu agum a banubanuwan ti Juda, dipo hod a meenak u puno a mamahala sakay magpospus tu tolay ko hide a Israelita.’ ” ⁷ Káttapos a natukuyan iye ni Hari Herodes ay lihim na a pinadulaw u mágkalalaki hide a tolay a gábwat ti Sikatan. Tinukoy na nide ni nikan a linumitaw u biton tánni matukuyan na ni nikan a neenak u anak. ⁸ Sakay pinaangay na hide ti Betlehem sakay imbilin na nide “Kad moy dán, ehyukán moy ti hustu u anak. Pákketa moy nikuna ay ipakapospos moy nikán a pagdaka tánni angay ku be siya bisitaán sakay ipeta ko u págsamba ko nikuna.” ⁹ Káttapos ay limmakad hide. U biton a netan de ti hod tu Sikatan ay netan de dámman. Dimmipalongo u biton nide hanggan immimang tu tapat nu págyanan nu anak. ¹⁰ Tunay ti saya u mágkalalaki hide a tolay a gábwat ti Sikatan nikuna netan de a immimang u biton. ¹¹ Kássáddáp de tu bilay ay netan de u anak a kaguman nu ina na a ti Maria. Limmuhud hide sakay dinumapa bilang pággalang de nikuna. Káttapos ay inluwas de u regaregaro de sakay inyatád de nikuna u regaregaro de a ginto, pasáppot a suub sakay mira. ¹² Nadid linakad de u iba a dilan a soli tu bansa de dipo binawalan hide nu Diyos tu pamamagitan nu tagináp a dyan dán hide soli ni Herodes. ¹³ Nadid nikuna nakahektat dán u Mágkalalaki hide a tolay ay pinumeta u essa a anghel nu Panginoon ni Jose tu tagináp na. Sakay kinagi na “Umikát ka dán Jose. Iyangay mo ti Egipto u matina mo sakay dyan kam lumakad hod hanggan awan ko kagiyán niko. Dipo ehyukán ni Herodes u anak para bunuwán.” ¹⁴ Kanya inumikat ti Jose sakay linumakad hide ti itona a gibi sakay inyangay na u matina na ti Egipto. ¹⁵ Sakay nágyan hide hod hanggan natay ti Herodes. Nangyari iye para matupad u impekagi nu Panginoon tu propeta na tu itod pa a “Dinulawan ko u anak ko a lumakad ti Egipto”. ¹⁶ Nadid nikuna biyag padla ti Herodes sakay nakalakad dán di Jose ti Betlehem, natukuyan ni Herodes a naessaan siya nu bisita hide a gábwat ti Sikatan. Naiyamut siya a tahod. Kanya inutusan na u sundalo na hide a bunuwán de u atanan a anak a lállaki a te idad a duwwa a taon sakay pababa a mágyan ti Betlehem sakay tu palebut na hide a lugar. U nagin giya na tu idad nu anak hide a bunuwán ay ayun tu natukuyan na a kinagi nu mágkalalaki hide a tolay tu panahun nu kállitaw nu biton. ¹⁷ Kanya natupad u kinagi ni propeta Jeremias tu itod a ¹⁸ “Masaneg tu banuwan a Rama u mabegsák a sangetan. Sangitan nu apo apo hide ni Raquel u aanak de. Sala de a pahapahaán hide dipo nágkatay dán u anak de hide.” ¹⁹ Nadid nikuna a natay ti Herodes, ay te essa a anghel nu Panginoon a pinumeta tu tagináp ni Jose hod ti Egipto. ²⁰ Kinagi na “Jose umikat ka dán. Angay mo dán isoli u pattena mo ti Israel dipo natay dán u gusto mangbuno tu anak.” ²¹ Kanya inumikat ti Jose sakay nagsoli hide a máttama ti Israel. ²² Pero nikuna nabaheta ni Jose a u pinumalit ni Herodes bilang hari ti Judea ay u anak na a ti Arqueloa ay nanteng siya a sumoli hod. Sakay binawalan siya nu Panginoon tu pamamagitan tu tagináp kanya immangay siya ti Galilea. ²³ Sakay nágyan hide ti Nazaret a sakop ni Galilea tánni matupad u kinagi nu propeta tu itod pa a “Mangahanan siya a taga Nazaret.”

¹ Nadid kállipas nu makpal a taon sakay nágyan padla ti Jesus ti Nazaret ay dummemát tu kaparangan ti Judea u essa a tolay a u ngahan na ay ti Juan a magbawtismo. Sakay nágyan siya hod sakay nagsapul a nagtoldu. ² Kinagi na “Adággen moy u kasalanan moy dipo adeni dán a maghari u Diyos nikitam.” ³ Ti Juan u kinagi ni propeta Isaias tu itod pa a “ Te magtoldu a mabeksak tu kaparangan. Itoldu na a dapat ihanda mo u sadili mo a tumagbu tu Panginoon.” ⁴ U badu ni Juan ay gimet tu naladi a buuk nu hayup a kamelyo. U sinturon na ay gimet be tu koblet nu hayup. Sakay u kákkanán na ay haksa sakay bisa ni pitukan. ⁵ Ummangay nikuna a mágsaneg u taga Jerusalem, taga Judea sakay u mágyan hide tu banuwan hide a namagdibilew tu dinom a Jordan. ⁶ Intapat de u kasalanan de sakay tulos hide a binawtismuwan ni Juan tu dinom a Jordan. ⁷ Pero pákketa ni Juan a makpal a miyembro nu Pariseo sakay Saduseo u umadeni nikuna para magpabawtismo ay pinagkagiyan na hide “Hikam a mágkadukás a tolay, deya u nagkagi nikam a ni magpabawtismo kam ay maiwasan moy u parusa nu Diyos? ⁸ Ipeta moy u págsisi moy tu pamamagitan nu págsunud moy tu Diyos. ⁹ Sakay dyan moy be isipán a makaligtas kam tu parusa nu Diyos dipo lahi kam ni Abraham. Dipo ikagi ko nikam a kaya nu Diyos a gimitán i bitowáy hide a magin lahi ni Abraham. ¹⁰ Maski nadid ay inhanda dán nu Diyos u wasay a págkáttol tu gimugimut nu kayokayo. Dipo u kayo a awan ti maganda a bunga ay káttulan sakay ibut tu apoy. ¹¹ Bawtismuwan ko ti dinum u tolay hide bilang tanda nu págsisi de pero u Tagapagligtas a dumemát ay mas makapangyariyan nan nikán. Awanák pa ngane karapatdapat a magin utusan na a tagatawed nu sapatus na. Siya u magbawtismo nikam tu Banal a Ispiritu sakay tu apoy. ¹² Siya u maghatul tu atanan a tolay. Ihiwalay na u mabait a tolay hide sakay tu madukás a tolay hide. Konna tu essa a tolay a ihiwalay na u bunga hide tu yaut. Puhunán na u bunga hide tu bilay na sakay tutudán na u yaut hide. Kanya magsisi kam tánni awan na kam parusaan tu apoy a awan maadaadáp a konna tu yaot a tinutod nu tolay.” ¹³ Nadid dummemát ti Jesus ti Jordan a gábwat ti Galilea para magpabawtismo ni Juan tu dinom. ¹⁴ Pero gusto ni Juan a hadlangan u plano ni Jesus kanya kinagi na nikuna “Hikán nakwa u kailangan a bawtismuwan mo pero nadid hiko pa u inumangay nikán.” ¹⁵ Pero tinábbeg siya ni Jesus, “Pabayan mo padla a mangyari iye nadid. Dipo tu gimitán ta nadid ay matupad ta u atanan a utus nu Diyos a gimitán ta.” Kanya pinumayag ti Juan a bawtismuwan na ti Jesus. ¹⁶ Káttapos a nabawtismuwan ti Jesus ay inumawas siya tu dinom. Pagdaka a binumukas u langet sakay netan na u Ispiritu nu Diyos a inumogsad a kumán a kalapati sakay inumapon nikuna. ¹⁷ Tapos te boses a nasaneg a gábwat ti langet a nagkagi a “Siya u Anak ko a mahal ko. Masayaák a tahod nikuna.”

¹ Káttapos ay inyangay nu Ispiritu nu Diyos ti Jesus hod tu kaparangan para purbaan a toksuwán ni Satanas. ² Hod ay nagkulasyon ti Jesus ti áppat a pulo a aldew ay ti gibi. Sakay nagaláp siya. ³ Sakay immangay nikuna ti Satanas sakay kinagi na “Ni tatahoden a hiko u Anak nu Diyos ay ipeta mo. Gimetán mo a makan i bitowe hide.” ⁴ Pero timmábbeg ti Jesus “Umádko, dipo nesulat tu Upos nu Diyos a ‘Bakán la a tu makan a mabiyag i tolayay pero kailangan na pa u atanan a upos nu Diyos.’ ” ⁵ Káttapos ay inyangay siya ni Satanas tu atáp nu Templo ti Jerusalem. ⁶ Sakay kinagi ni Satanas ni Jesus “Ni hiko u Anak nu Diyos ay tumakduk ka dipo nesulat tu Upos nu Diyos a ‘Utusan nu Diyos u anghel na hide a mangbantay niko. Kanya sangbutan di ka tánni awan ka maánya.’ ” ⁷ Pero timmábbeg ti Jesus “Nesulat be a ‘Dyan ka maggimet ti essa a bagay para la purbaan mo ni talaga a gimitán nu Panginoon a Diyos u panantu na hide.’ ” ⁸ Káttapos ay inyangay dámman siya ni Satanas tu toktok nu essa a malangkaw a buked sakay impeta na nikuna u atanan a babansa ti munduway sakay u kayamanan de. ⁹ Sakay kinagi ni Satanas ni Jesus “Iyatád ko niko iye a atanan ni lumuhud ka sakay sumamba nikán.” ¹⁰ Pero inutusan ni Jesus ti Satanas “Umadeyo ka nikán Satanas. Dipo nakasulat be a ‘Sambaán mo u Panginoon a Diyos sakay siya la u sunudán mo awan dán ti agum.” ’ ¹¹ Kanya nilakaden siya ni Satanas. Sakay dimmemát u anghel hide sakay sinerbiyan di siya. ¹² Nadid essa a aldew ay nabaheta ni Jesus a nepireso ti Juan kanya nagsoli ti Jesus ti Galilea. ¹³ Sakay awan dán siya nágyan ti Nazaret, inumagton siya ti Capernaum. Iye a banuwan ay adeni tu minalno a hod tu pag-itan nu págyanan nu lahi hide ni Zabulon sakay Neftali. ¹⁴ Nangyari iye para matupad u kinagi ni Propeta Isaias tu itod pa a ¹⁵ “Hikam a mágyan ti Zabulon sakay Neftali a sakop ni Galilea a kadibilew ni Jordan a pagyanan nu makpal a tolay a awan maniwala tu Diyos. ¹⁶ Hikam a mágyan tu kadiklámman nu kasalanan ay maketa ti dakál a demlag. U demlag u mángpeta tu dilan nu kaligtasan tu mágyan hide tu lugar nu kamatayan.” ¹⁷ Hod ti Capernaum ay nagsapul ti Jesus a magtoldu. Kinagi na “Adággen moy u kasalanan moy dipo adeni dán a maghari u Diyos nikitam.” ¹⁸ Nadid tu páglakad ni Jesus tu digdig nu minalno nu Galilea, ay netan na u duwwa a lállake a magsabud dipo mángngikan hide. Matkaka u duwwa, u ngahan nu essa ay ti Simon, u palayaw na ay Pedro sakay u essa ay ti Andres. ¹⁹ Sakay kinagi na nide “Kumuyog kam nikán dipo tolduwan takam ni kodya a magakit ti tolay para sumunud hide nikán.” ²⁰ Págdaka de a inwahak u gilagila de sakay kimmuyug dán hide ni Jesus. ²¹ Tulos hide a naglakad tu digdig nu minalno sakay netan di Jesus u matkaka a lállake a di Santiago sakay ti Juan a anak ni Zebedeo. Hod hide sakay tu ama de tu abang de a magayuma tu gila de. Inakit be hide ni Jesus a magin disipulus na. ²² Págdaka de be a linakaden u ama de sakay u abang de sakay kimmuyug hide ni Jesus. ²³ Nadid immangay ti Jesus tu atanan a banuwan nu Galilea sakay nagtoldu tu sinagoga de hide. Intáttoldu na u Maganda a Baheta tungkol tu pághari nu Diyos. Sakay pinagpiyya na be u atanan a sakisaket nu tolay hide. ²⁴ Kanya nasaneg nu totolay hide tu buo a lugar a Siria u ginimet ni Jesus a makataka-taka hide. Inyangay de nikuna atanan nu te saket hide, u hinayup hide, u mágpatay hide sakay u awan dán hide makaahikad. Pinagpiyya hide a atanan ni Jesus. ²⁵ Sakay immunonod nikuna u makpal a tahod a tolay a taga Galilea, taga Decapolis, taga Jerusalem, taga iba-iba a banuwan ni Judea sakay u mágyan hide tu banuwan a dibilew nu Jordan.

¹ Nadid tu pákketa ni Jesus tu makpal a tolay ay simmangkay siya tu badit a buked. Sakay inumetnod siya hod para magtoldu. Immunonod nikuna u disepulos na hide sakay inumetnod hide tu harapan na. ² Sakay sinapulan na hide a tinolduwan. Kinagi na, ³ “Pinagpala nu Diyos u tolay hide a umasa nikuna tu atanan a pangangailangan de dipo u Diyos u hari de. Siya u mangpospos nide. ⁴ Pinagpala nu Diyos u malungkut hide dipo hide u pahapahaán nu Diyos. ⁵ Pinagpala nu Diyos u awan hide mapagmataas dipo hide u makaalap tu atanan a inpanantu nu Diyos. ⁶ Pinagpala nu Diyos u tolay hide a masoh a tahod a manggimet tu kaluuben nu Diyos dipo hide u tulungan nu Diyos tánni magimet de u kaluuben na. ⁷ Pinagpala nu Diyos u makákkagbiyán tu agum dipo hide u kagbiyan nu Diyos. ⁸ Pinagpala nu Diyos u tolay hide a awan dán ti agum a pagserbiyán nan u Diyos la dipo hide u maketa nikuna. ⁹ Pinagpala nu Diyos u tagaayus tu magdima hide dipo hide u madulawan a anak nu Diyos. ¹⁰ Pinagpala nu Diyos u dáddustaán hide a tolay dipo gimitán de u kaluuben nu Diyos, hide u katolayan tu kahariyan na. ¹¹ Pinagpala kam nu Diyos ni insultuwán di kam sakay dustaán sakay bintangán di kam ti sare-sare dipo disepulos takam. ¹² Konna labe hod u ginággimet nu tolay hide tu propeta ko hide tu itod. Magkasayaan kam a tahod dipo dakál u gantimpala moy ti langet.” ¹³ Kinagi pa ni Jesus nide “Hikam ay kumán a asen ti munduway. Ni mawan u lasa nu asen, awan dán ti paraan a mesoli pa u lasa na. Awan dán ti serbi u asen kaya ibut dálla sakay gággemmakan dálla nu katolayan. ¹⁴ Hikam be ay kumán a demlag ti munduway. Awan ti makapángtagu tu essa a banuwan a hod tu toktok nu buked. ¹⁵ Sakay awan ti tolay a mangtab ti simbuwan sakay takáppan na ti baldi. Nan itupo na iye tu lamisaan tánni mademlagan u he tu disalad nu bilay. ¹⁶ Konna la be hod u gimetan moy, ipeta moy u demlag moy tu tolay hide tánni ketan de u mágkaganda moy a gimet. Tán para puriyán de u Ama moy ti langet.” ¹⁷ Kinagi pa ni Jesus nide “Dyan moy isipan a immangayák he para ibutan u Kautusan ni Moises oni u intáttoldu nu Propeta hide a upos nu Diyos. Awanák immangay he para ibutan hide nan ipaliwanag sakay tupadán iye hide. ¹⁸ Pakatandaan moy iye, hanggan a atoy pa u langet sakay u luta ay matupad u atanan a nesulat tu Kautusan. ¹⁹ Kanya ni ti deya man u awan sumunud tu maski essa tu kautusan dipo isipan na a awan iye pinakamahalaga sakay mangtoldu ti konna hina ay magin pinakababa tu kahariyan nu Diyos. Pero ni ti deya man u sumunud sakay mangtoldu tu katolayan tu kautusan ay magin mataas a tolay tu kahariyan nu Diyos. ²⁰ Kanya ikagi ko nikam a paghariyan kam la nu Diyos ni tatahoden moy a sunudán u kautusan nu Diyos. U kássunud moy tu kautusan ay dapat mas humigit pa tu págsunud nu Pariseo hide sakay tu maistu hide nu Kautusan ni Moises.” ²¹ Kinagi pa ni Jesus “Nasanig moy a intoldu de tu nunu moy hide a ‘Dyan ka mamuno sakay u makabunu ay parusaan nu Diyos’ ²² Pero nadid ay ikagi ko nikam a ni deya u mágngál tu kákkapatkákka na ay parusaan nu Diyos. Sakay ni ti deya u manginsulto ay hatulan nu Sanedrin. Sakay ni ti deya man u magkagi tu kákkapatkaka na a ‘Awan ka ti serbi a tolay’ ay parusaan nu Diyos ti impiyerno. ²³ Kanya ni magalay ka tu lugar nu pággalayan sakay naalaala mo a te kasalanan ka tu kapatkákka mo ay ²⁴ iwahak mo padla u alay mo tu atubang nu pággalayan sakay angay ka pa mákpagkasundo nikuna. Káttapos ay maari ka dán a soli a magalay. ²⁵ Ni te mángkaso niko ay ayusán mu dán u problema bagu kam a humarap tu huwes. Dipo ni hod ka dán hod sakay natalo ka tu kaso ay ipepireso ka nu huwes tu pulis. ²⁶ Talaga a awan ka makaluwas tu piresuwan hanggan awan mo mabayaden u atanan a utang mo.” ²⁷ Kinagi pa ni Jesus “Nasanig moy a intoldu de tu nunu moy hide a ‘Dyan ka mangalunya. ’ ²⁸ Pero nadid itoldu ko nikam a ni ti deya man u umileng la tu bábbey a te soh a dumuhog ay nagkasala dán ti pángngibábbey tu isip na. ²⁹ Kanya ni u kawanan mo a mata ay u dahilan tu págkasala mo ay lábwetán mo sakay ibut mo. Mas maganda pa a mawanan ka ti essa a parte nu bággi mo kasera ni meimpiyerno u atanan a bággi mo. ³⁰ Sakay ni u kawanan mo a kamát u dahilan nu págkasala mo ay káttolán mo sakay ibut mo. Mas maganda pa a mawanan ka ti essa a parte nu bággi mo kasera ni me impiyerno u atanan a bággi mo.” ³¹ Kinagi pa ni Jesus “Nasanig moy a intoldu de tu nunu moy hide a ‘Ni hiwalayan nu lállake u kabanga na ay kailangan a atádden u kabanga na ti katibayan nu pághiwalay de. ³² Pero nadid ay itoldu ko nikam a ni ti deya man u humiwalay tu kabanga na a bábbey maski awan nangilállake ay nagkasala siya dipo siya u te dahilan ni mákkabanga a huway u bábbey. U lállake a kumabanga be nikuna sakay u bábbey ay nagkasala ti pángngalunya.” ³³ Kinagi pa ni Jesus “Nasanig moy a intoldu de tu nunu moy hide a ‘Dyan mo sidaán u pinanumpaán mo a panantu nan tupadán mo u pinanumpaán mo tu Panginoon..’ ³⁴ Pero nadid ay itoldu ko nikam a dyan kam manumpa ni magpanantu kam. Dyan moy kagiyán a sistigo moy u langet dipo hod u trono nu Diyos. ³⁵ Sakay dyan moy kagiyán a sistigo moy u mundo dipo u Diyos be u tagapamahala he. Sakay dyan moy be kagiyán a sistigo moy u Jerusalem dipo itod u banuwan nu Diyos a pinakamataas a hari. ³⁶ Sakay dyan ka manumpa a ‘Maski ni matayák nadid.’ dipo awan mo kaya a baguwán u kurol nu maski essa tu buuk mo. ³⁷ Mas maganda a kagiyán mo dálla a ‘U’ ni kaya mo o ni ‘Awan’ ni awan mo kaya a gimitán. Dipo u págsumpa ay gábwat ni Satanas.” ³⁸ Kinagi pa ni Jesus “Nasanig moy a intoldu de tu nunu moy hide a ‘Ni ti deya u makasida ti mata ay bayaden na la be ti mata sakay u makasida ti ngipán ay bayaden na la be ti ngipán.’ ³⁹ Pero kagiyán ko nikam nadid a dyan kam gumante tu tolay a nanggimet nikam ti madukás. Nan ni te mangdapang niko ay ipadapang mo pa u dilupot. ⁴⁰ Ni ikaso de ka para la maalap de u badu mo ay iyatad mo dálla pati u dyaket mo. ⁴¹ Ni ipilit a ipasakbet nu essa a tolay u karga na niko ti essa a kilometro ay sakbitán mo u karga na ti duwwa a kilometro. ⁴² Atádden mo u mangaged niko sakay paáddiman mo u mangáddem niko.” ⁴³ Kinagi pa ni Jesus “Nasanig moy a intoldu de tu nunu moy hide a ‘Mahalán mo u kaibigan mo sakay kaiyamutan mo u kadima mo.’ ⁴⁴ Pero iye u ikagi ko nikam, mahalán moy u kadima moy sakay ipagdasal moy u mangdusta nikam. ⁴⁵ Tánni magin tunay kam a anak nu Ama moy a atoy ti langet. Dipo atádden na a parehas ti sinag sakay uden u mabait sakay u madukás a tolay. ⁴⁶ Ni u mahalán moy la ay u magmahal la nikam ay bakin gantimpalaán kam pa nu Diyos? Awan beman a gággimitán moy labe u gággimitán nu tagakolekta ti buwis hide a mágdaya? ⁴⁷ Sakay ni u áuhunán moy ay u kaibigan moy la, ánya u nagimet moy a mas maganda kasera tu awan ko hide disepulos. Konna hina la be u gággimitán nu tolay a awan maniwala tu Diyos. ⁴⁸ Kanya dapat a awan kam ti kapintasan konna tu Ama moy a hod ti langet a awan ti kapintasan.”

¹ Kinagi pa ni Jesus “Siguraduwan moy a dyan kam la maggimet ti maganda para la ipeta tu tolay tánni puriyán de kam. Dipo awan kam ti gantimpala a maalap tu Ama moy ti langet. ² Kanya ni mangatád kam tu magkahirap hide ay dyan moy ihambug tu agum. Ina u gággimitán nu mapagkunware hide a tolay tu sinagoga hide sakay tu kakarsada tánni puriyán hide nu katolayan. Ikagi ko nikam a talaga natanggap di dán u gantimpala de. Awan dán hide ti gantimpala a gábwat tu Diyos. ³ Kanya hikam ni mangatád kam dyan moy ikagi maski ni ti deya. ⁴ Gimetán moy la iye a sekreto sakay gantimpalaán kam nu Ama moy ti langet a naketa nikam.” ⁵ Sakay kinagi pa ni Jesus “Ni magdasal kam ay dyan moy ahigán u gimet nu mapagkunware hide. Gugusto de a magdasal a nakataknág tu sinagoga sakay tu kakarsada tánni ketan hide nu katolayan. Ikagi ko nikam a talaga naalap de dán u gantimpala de. ⁶ Pero hikam, ni magdasal kam ay angay kam tu awan ti tolay a lugar sakay magdasal kam tu Ama moy a awan tam ketan. Sakay siya a naketa nikam u mangatád nikam ti gantimpala. ⁷ Tu págdasal moy ay dyan kam magupos ti makpal a upos a awan ti kahulugan konna tu págdasal nu awan maniwala tu Diyos hide. Dipo isipan de a tábbegán hide nu Diyos dipo makpal dán hide a inyupos. ⁸ Dyan moy hide ahigán dipo tukoy dán nu Ama moy i kailangan moyay bagu kam a mangaged. ⁹ Kanya magdasal kam a te kahulugan a konna he ‘Amáng a Diyos ti langet, ilangkaw nakwa nu tolay hide u ngahan mo. ¹⁰ Masoh kami a hiko u maghari tu atanan a tolay ti munduwáy. Nakwa sunudán nu atanan a tolay u kagustuwán mo he ti munduwáy a konna tu págsunud de hina ti langet. ¹¹ Atádden mo kami ped tu pangangailangan mi aldew a aldew. ¹² Patawaden mo kami tu kasalanan mi a konna tu págpatawad mi tu nagkasala nikami. ¹³ Sakay dyan ka pumayag a matukso kami tu kasalanan nan iyadeyo mo kami ni Satanas. Dipo u kahariyan sakay u kapangyariyan ay kao mo hangganhanggan. Sakay hiko u mapuri tu atanan hangganhanggan. Amen.’ ¹⁴ Ni patawadán moy u nagkasala nikam ay patawadán kam be nu Ama moy ti langet. ¹⁵ Pero ni awan moy hide patawadán ay awan kam be patawadán nu Ama moy ti langet.” ¹⁶ Sakay kinagi pa ni Jesus “Ni magkulasyon kam ay dyan moy ipeta a malungkot kam konna tu gággimitán nu mapagkunware hide. Awan dán hide magayos tu sadidaili de tán matukoyan nu agum a nagkulasyon hide sakay puriyán de hide. Kagiyan ko nikam a talaga natanggap de dán u gantimpala de hide. ¹⁷ Kanya ni hikam u mágkulasyon ay magsuklay sakay magudemos kam ¹⁸ para awan maposposan nu tolay hide a nagkulasyon kam. Nan u nakatukoy la ay u Ama moy la ti langet a awan ketan. Sakay siya u mangatád nikam tu gantimpala moy. ¹⁹ Sakay kinagi pa ni Jesus “Dyan kam magpuhon ti kayaman hee ti munduwáy dipo u kayaman he ay anayán, simangán sakay matakaw nu mágtakaw hide. ²⁰ Nan magpuhon kam ti kayamanan hod ti langet. Awan hod anayán, simangán sakay matakaw. ²¹ Dipo ni hádya u kayamanan mo hod hod be u isip mo.” ²² Sakay intoldu pa ni Jesus “U mata u pinakasimbuwan nu bággi, kaya ni awan ti diperensiya u mata moy ay mademlagan be u atanan a bággi moy. ²³ Pero ni te diperensiya u mata moy ay madihaman u atanan a bággi moy. Kanya ni u simbuwan a atoy niko ay madukás, ay grabe a tahod u kadukássan mo. ²⁴ Sakay kinagi pa ni Jesus “Awan ti makapagserbi ti duwwa a amo dipo kayamután na u essa sakay mahalaán na u essa oni mas magin matapat siya tu essa nan tu essa. Awan moy maare a sabayán a pagserbiyan u Diyos sakay u kayamanan. ²⁵ Kaya itoldu ko nikam a dyan kam maligalig tu pangangailangan nu biyag moy a konna ti kanán, inumán, sakay badu. Awan beman mas mahalaga u biyag nan tu makan sakay mas mahalaga u bággi nan tu badu? ²⁶ Isipan moy la u manok hide, awan hide magsabug o maggapas sakay magdátton tu pagsalansanan pero pakanan hide nu Ama moy ti langet. Awan beman mas mahalaga kam nikuna nan tu manok hide? ²⁷ Sakay maare beman pakaatakdugán nu balisa u biyag moy? ²⁸ Umesa pa, bakin a mabalisa kam ni ánya u isulot moy? Isipan ped ni kodya dumakál u bulaklak hide tu araduwan. Awan hide makagimet ti badu ²⁹ pero mas maganda pa hide ilengán nan tu pinakamayaman a hari tu itod a ti Solomon. ³⁰ Ni konna hod u pagpospos nu Diyos tu bulaklak a alisto matay sakay tutudan la, hikam pa wád kaya u awan na atádden ti badu? Ánya rámben ti kabadit u paniwala moy. ³¹ Kanya dyan kam mabalisa tu kanán, inumán sakay tu isulot moy. ³² Dipo sa itod hide u ehyokán nu awan maniwala tu Diyos. Pero tukoy nu Ama moy ti langet u atanan a kailangan moy hide. ³³ Kanya hikam ay idipalongo moy u pághari nu Diyos tu biyag moy sakay sunudán u atanan a kautusan na. Dipo ni gimitán moy ina ay iyatád be nu Diyos u atanan a kailangan moy. ³⁴ Kanya dyan kam mabalisa tu pangangailangan moy para ni ilaw dipo bahala be u Diyos hod. Dyan moy dán dagdagen pa u problema moy kada aldew.

¹ Sakay kinagi pa ni Jesus “Dyan moy hatulan u kapareho moy tánni awan kam mahatulan nu Diyos. ² Dipo hatulan kam nu Diyos ayun tu hatul moy tu agum. U nangususegan moy tu pághatul moy ay siya la be u ihatul nu Diyos nikam. ³ Bakin a ketan moy u badit a kasalanan nu kapatkákka moy pero bale awanán moy la u kasalanan a dakál a ginimet moy? ⁴ Dyan kam pumurba a tumulung tu kapareho moy a te mas badit ti kasalanan nan nikam. ⁵ Mapagkunware kam. Ibutan moy pa u dakál moy a kasalanan para makatulung kam tu agum a magibut tu badit de a kasalanan. ⁶ Dyan moy iyatád tu aso hide u malinis hide a bagay, o ni iyatád u perlas moy tu baboy hide dipo yáyyudakán de la itod sakay duklusán di kam. ⁷ Ni mangaged kam tu Diyos ay atádden na kam. Ni magehyok kam ay metan moy. Ni tumoktok kam tu pintuwan ay bukasan na para nikam. ⁸ Dipo u atanan a maggaged ay maatádden sakay u atanan a magehyok ay maketa sakay u atanan a magtoktok ay mabukasan. ⁹ Atádden moy beman ti bito u anak moy ni maggaged ti kanán? ¹⁰ Atádden moy beman ti biklat u anak moy ni maggaged ti ikan? Siyempre awan. ¹¹ Ni hikam a makasalanan ay tukoy moy a mangatád ti maganda tu anak moy, mas lalo a mangatád ti maganda u Ama moy tu langet tu atanan a mangaged nikuna. ¹² Gimitán moy tu agum u gusto mo a gimitán be nu agum niko. Sa itod u kahulugan nu Kautusan ni Moises sakay tu toldu nu Propeta hide.” ¹³ Kinagi pa ni Jesus “Sumaddáp kam tu mapiit a pintuwan nu langet dipo malawa u pintuwan sakay alisto a lakadán u dilan a tamo ti impiyerno. Makpal u dumilan ti itod a dilan. ¹⁴ Pero mapiit u pintuwan sakay mahirap u dilan a tamo ti langet. Kanya sasangan la a tolay u maketa ti iye.” ¹⁵ Kinagi pa ni Jesus “Umiwas kam tu awan hide tatahoden a propeta. Umangay hide nikam a mapagkunware a mabait pero matapang bál hide. ¹⁶ Matenggi moy hide tu gimet de. Konna tu kayo o halaman a matenggi moy tu bunga na. Maari beman a magbunga ti masarap u masaet a halaman? Siyempre awan. ¹⁷ Magbunga ti maganda u maganda a kayo sakay magbunga be ti madukás u madukás a kayo. ¹⁸ Siyempre awan maare a magbunga ti madukás u maganda a kayo sakay u madukás a kayo awan magbunga ti maganda. ¹⁹ Sakay u kayo a awan magbunga ti maganda ay pukanán sakay ibut tu apoy. ²⁰ Kanya matenggi moy u awan tatahoden a propeta hide dipo tu gimet de.” ²¹ Sakay kinagi pa ni Jesus “Awan atanan a dumulaw nikán a Panginoon ay paghariyan nu Ama ko ti langet. U paghariyan na hide ay u sumunud la nikuna. ²² Káddemát nu Aldew nu Pághatul ay makpal u magkagi nikán a ‘Panginoon, pasáddáppán mo kami dipo tu ngahan mo ay kinagi mi u upos mo sakay pinalakad mi u demonyo hide. Sakay naggimet kami ti himala tu ngahan mo.’ ²³ Sakay tábbegán ko hide ‘Awan takam matenggi. Makasalanan kam, umadeyo kamon.’ ²⁴ Kaya ni ti deya man u mágsaneg sakay sumunud tu intáttoldu ko hide ay u kapareho naay ay u essa a malalake a tolay a nagtolnák tu bilay na tu bito para magin matibay. ²⁵ Dummemát u uden a mabegsák sakay dummakál u dinom. Sakay pinahás ti mabakság u bilay. Pero awan la natumba dipo nakatolnák tu bito. ²⁶ Pero ni ti deya man u mágsaneg sakay awan sumunud ay kapareho siya tu essa a tolay awan ti tukoy a nagtolnák tu bilay na tu baybay. ²⁷ Dummemát u uden a mabegsák sakay dummakál u dinum. Sakay pinahás ti mabakság u bilay. U nangyare ay natumba u bilay sakay nahábba a tahod.” ²⁸ Nikuna natapos ti Jesus a nagtoldu ay nagtaka u katolayan tu págtoldu na. ²⁹ Dipo nagtoldu siya nide a te kapangyariyan bakán a konna tu mágtoldu hide tu Kautusan ni Moises.

¹ Nadid nikuna natapos dán ti Jesus a nagtoldo ay dinumegson siya tu badit a buked. Sakay inunonod siya nu makpal a tolay. ² Tapos ay te bigla a ummadeni ni Jesus a essa a tolay a te sakit a ketong. Sakay dimmapa u tolay tu atubang ni Jesus a nákkekagbi “Panginoon, ni gustuwán mo ay mapagpiyyaák mo. Pagpiyyaának muped.” ³ Kanya kinahap siya ni Jesus sakay kinagi na, “Gusto ta ka a pagpiyyaán. Nadid ay magpiyya ka dán.” Sakay pagdaka a nawan u ketong nu tolay. ⁴ Káttapos kinagi ni Jesus nikuna, “Dyan mo ibaheta iye maski ni ti deya man. Pero angay mo pa ipaileng tu saserdote u nangyari niko. Káttapos, bilang pangpatunay tu tolay hide a nagpiyya ka dán ay mangatád ka nikuna ti iyalay na ayun tu inyutus ni Moises tu itod pa. ⁵ Nadid káddemmát ni Jesus tu banuwan a Capernaum ay immadeni u essa a kapitan nu sundalo hide a taga Roma sakay nákkekagbi nikuna. ⁶ Sakay kinagi na “Panginoon, u utusan ko a anak ay te katdug dalla tu bilay ko. Awan siya makaahikad. Grabe a tahod u pághirap na. Pagpiyyaán mo ped siya.” ⁷ Timmábbeg ti Jesus “Sige angay ko siya pagpiyyaán.” ⁸ Pero timmábbeg u kapitan, “Panginoon awanák karapatdapat para umangay ka tu bilay ko. Ikagi mo dálla he sakay magpiyya dán siya hod. ⁹ Tukoy ko a magimet mo ina dipo te mas mataas a nangsakup nikán sakay te nasakupanák be. Ni iyutus ko tu essa nu sundalo ko a ‘Angay ka hod.’ ay angay siya pagdaka. Ni utusan ko be u essa a ‘Angay ka he.’ ay angay be siya pagdaka. Sakay ni utusan ko be u utusan ko a ‘Gimitán mo iye.’ ay talaga a gimitán na itod. Kaya maski ikagi mo la he ay magpiyya dán siya hod.” ¹⁰ Nikuna nasanig iye ni Jesus ay nagtaka siya tu kapitan. Sakay kinagi na tu tolay hide a umunonod nikuna “Kagiyan ko nikam a awanák padla naketa ti Israelita a kapareho nikuna a dakál ti pánnampalataya. ¹¹ Sakay kagiyan ko pa nikam a tu Aldew nu Pághatul ay makpal a tolay a gábwat ti ibaiba a bansa u makaguman nu nunu tam hide a di Abraham, Isaac sakay Jacob tu dakál a handaan ni maghari dán u Diyos. ¹² Pero makpal tu Israelita hide a dapat a mesali ay awan mesali tu handaan. Hod hide a iyangay ti impiyerno. Hod hide a magsanget sakay maghirap a tahod.” ¹³ Sakay kinagi ni Jesus tu kapitan “Maari ka dán a soli tu bilay moy. Nangyari dán u inaged mo dipo naniwala ka.” Sakay nagpiyya ngane u utusan na ti itona be a odas. ¹⁴ Nadid nikuna immangay ti Jesus tu bilay ni Pedro ay netan na a te katdug u katugngan a bábbey ni Pedro dipo grabe u ladu na. ¹⁵ Kinahap ni Jesus u kamát na sakay naibut u ladu na. Tulos a inumikat u bábbey sakay sinerbiyan na ti Jesus ti makan. ¹⁶ Nikuna a gibi dán ay inyangay nu tolay hide ni Jesus u makpal hide a hinayup. Essa na la a utos ay pinalakad na u magkadukas hide a ispiritu sakay pinagpiyya na u te saket hide. ¹⁷ Nangyari iye para matupad u hula ni propeta Isaias tu itod a “Siya u nangibut tu sakisaket tam sakay pinagpiyya na kitam..” ¹⁸ Nadid tu essa aldew, nikuna napansin ni Jesus a makpal dán a tahod a tolay a umadene nikuna ay inutusan na u disepulus na hide a iyahabes di siya tu dibilew nu minalno. ¹⁹ Pero bagu hide a nakaahabes ay inadeniyan siya nu essa a maisto nu Kautusan. Kinagi na ni Jesus “Maisto, kumuyugák niko maski hadya u angayan mo. Gusto ko a magin disepulos mo.” ²⁰ Timmábbeg ti Jesus nikuna “U aso ay te págyanan sakay u manok hide ay te lobun pero hikán a Anak nu Tolay ay awan ti bilay a sadili a págkatdugan oni maimangan.” ²¹ Sakay nagtanung u essa pa a disepulos ni Jesus, “Panginoon, gusto ko kumuyug niko, pero maariyák pa beman a soli tu bilay mi tánni ilábbáng ko u ama ko?” ²² Pero tinábbeg siya ni Jesus “Kumuyug ka dán nikán nadid, ipabahala mo dálla u páglábbáng tu awan naniwala tu awan labe naniwala tu Diyos.” ²³ Káttapos ay sinumakay ti Jesus tu abang sakay u disepulus na hide. Inahabes de u minalno. ²⁴ Tu paggahabes de ay bigla a te dummemát a mabegsák a pahás kanya tinapuhan hide nu tagmák. Pero ti Jesus ay tidug la. ²⁵ Angay siya nilukag nu disepulus na hide sakay kinagi di nikuna “Panginoon tulungan mo kami. Malimás kami.” ²⁶ Timmábbeg siya “Bakin a manteng kam? Dapat a kabadit u paniwala moy.” Inumikat siya sakay inutusan na u pahás a umimang sakay u tagmák a lumantap. Pagdaka a nasunud u utus na. Nawan u pahás sakay u tagmák. ²⁷ Nagtaka u atanan a hod tu abang sakay namagtanungan hide “Anya a kalase a tolay iye a maski u pahás sakay tagmák ay sumunud nikuna?” ²⁸ Nadid nikuna dimmemát hide tu dibilew nu minalno, tu lugar nu taga Gadara hide ay tinagbu siya nu duwwa a hinayup a lallake. Mágyan hide tu kuwe-kuweba a páglábbángngan nu tolay hide. Matapang hide a tahod kaya awan ti maari a tumaleb hod. ²⁹ Pagdaka hide a pinumakhaw “Anak nu Diyos ánya u gimitán mo nikame? Inumangay ka beman he para parusaan kami maski awan padla odas nu pághirap me?” ³⁰ - ³¹ Nákkekagbi u demonyo hide “Dipo palakadan mo kami ay lalábba a utusan mo kami a somdáp ti babuye hide.” Dipo hod tu adeni de ay te makpal a babuy a manabsab. ³² Kanya inutusan hide ni Jesus a “Hala sige, umangay kam hod tu babuy hide.” Kanya linakaden de u duwwa a lallaki sakay inumangay hide tu babuy hide. Káttapos ay mabilis u babuy hide a ginuminan tu pengpeng sakay natápduk hide tu dinom. Nalimás u atanan a babuy. ³³ Nikuna netan iye nu tagaalaga hide tu babuy ay ginuminan be hide a tamo tu banuwan de. Imbaheta de u atanan a nangyare pati u nangyare tu hinayup hide. ³⁴ Nikuna nasaneg nu katolayan u nangyare ay linumuwas hide tu banuwan de para tagbuwán de ti Jesus. Inuhon de ti Jesus a lakaden na u lugar de.

¹ Kanya sinumakay ti Jesus tu abang de sakay inumahabes hide a tulos tu banuwan a Capernaum. ² Káddemát de hod ay intugán nu sasangan a tolay u essa a tolay a awan makaahikad ni Jesus. U tolay ay nagkátdug tu essa a ayod. Nikuna netan ni Jesus a te pánnámpalataya hide nikuna ay kinagi na tu tolay a awan makaahikad “Anak, magsaya ka dipo pinatawad ta ka dán tu kasalanan mo.” ³ Nikuna nasaneg iye nu Maisto hide nu Kautusan ni Moises ay inisip de a “Awan ti galang tu Diyos iye a tolay, kumán siya a Diyos.” ⁴ Pero natukuyan ni Jesus u inisip de kanya tinanung na hide “Bakin a magisip kam ti madukas tungkul nikán? ⁵ Anya beman u alisto a gimitán ti tolayáy, kagiyan ko nikuna a ‘Pinatawad taka dán tu kasalanan mo.’ oni ‘Tumaknág ka sakay lumakad ka dán.’? ⁶ Patunayan ko nikam a hikán a Anak nu Tolay ay te kapangyariyan a magpatawad ti kasalanan he ti munduwáy.” Kaya kinagi na tu tolay a awan makaahikad “Umágkat ka dán anak, báklayán mudán i ayude sakay soli ka tu bilay moy dipo nagpiyya ka dán.” ⁷ Pagdaka a inumágkat u tolay sakay nagsoli tu bilay de. ⁸ Nikuna netan iye nu tolay hide ay nagtaka hide sakay pinuri de u Diyos a nangatád ti konna hina a kapangyariyan tu tolay hide. ⁹ Nadid nikuna linumakad ti Jesus hod ay tinaleban na u essa a tolay a mággetnud tu lugar a págkulektaan ti buwes. Ti Mateo u ngahan nu tolay a tagakulekta ti buwes. Kinagi ni Jesus nikuna “Mákkuyog ka nikán para magin disepulos ko.” Kanya tinumaknág ti Mateo, linakaden na u tarabaho na. Sakay nákkuyog siya ni Jesus. ¹⁰ Nadid nikuna kimman di Jesus tu essa a handaan tu bilay ni Mateo ay hod be hod u makpal a tagakolekta ti buwis sakay u iba hide a makasalanan a tolay. Nákkan hide ni Jesus sakay tu disepulos na hide. ¹¹ Nikuna netan iye nu Pariseo hide ay tinanung de u disepulos ni Jesus, “Bakin a pumisan a kuman u tagapagtoldu moy tu tagakolekta tu buwis sakay tu makasalanan hide?” ¹² Pero nasanig ni Jesus u tanung de kanya tinábbeg na hide “U awan ti saket ay awan mangangailangan ti doktor, u te saket la. ¹³ Angay moy intendiyan u kinagi nu Panginoon tu kasulatan na ‘Gusto ko a kagbiyan moy u tolay hide, bakán a u alay moy.’ Dipo awanák ummangay ti munduwáy para kagiyan u malinis hide a tolay a magsisi nan u makasalanan hide.” ¹⁴ Nadid immangay u disepulos ni Juan a Magbautismo ni Jesus sakay nagtanung, “Bakin hikami sakay u Pariseo hide ay magkulasyon pero u disepulos mo hide ay awan?” ¹⁵ Timmábbeg ti Jesus “Maari beman a magdalamhati u nákpágkasal hide ni kaguman di palla u lállaki a ikasal? Siyempre awan. Pero dumemát u aldew a alapan de u lállaki a ikasal, hod dán hide a magkulasyon. ¹⁶ Sakay awan ti mangdihop ti bigu a tela para áppolan u ábbut tu dati a badu. Dipo ni labaan de u badu ay bumadit u bigu a tela a inyáppol de. Batakan nu bigu a tela u dati a badu sakay pisadan na. Mas dumakal dan nadid u sida nu badu. ¹⁷ Pareho labi tu pággasákkan ti alak a gimet tu koblet nu hayup. Awan ti tolay a mangasák ti bigu a alak tu dati a pággasákkan dipo mapisad u pággasákkan sakay mebulak u alak. U bigu a alak ay dapat iyasák tu bigu a pággasákkan para pareho hide a awan masayang. ¹⁸ Alay a nákpagguhon ti Jesus nide ay te dummemát a essa a puno nu Judeo hide. Limmuhud tu atubang na sakay kinagi na, “Kákkatay la nu anak ko a bábbey, pero kaya mo siya a biyagan a huway ni angay mo itupo u kamat mo nikuna.” ¹⁹ Kanya tinumaknag ti Jesus sakay u disepulos na hide sakay nákkuyog tu puno. ²⁰ Tu paglakad de ay te essa a bábbey a umunonod nide. Iye a bábbey ay duwwa pulo dán a taon a te saket a mágdadigiyan. Sakay kinahap nu bábbey u garayan nu badu ni Jesus. ²¹ Dipo naisipan na a “Ni makahap ko la u badu na ay magpiyyaak.” ²² Kanya linumingat ti Jesus sakay pákketa na tu babbey ay kinagi na “Magsaya ka, dipo tu pánnampalataya mo ay nagpiyya ka.” Ti itona be a odas ay nagpiyya u bábbey. ²³ Káttapos ay timmulos di Jesus a naglakad tu bilay nu puno nu Judeo. Kássáddap de tu bilay na ay netan ni Jesus u magtogtog hide ti pangpatay sakay u mahehaw a katolayan. ²⁴ Kinagiyan na hide, “Lumuwas kam a atanan, awan natay u anak, natdug la.” Pero awan naniwala u tolay nikuna, pinagtawaan di pa siya. ²⁵ Nikuna a napaluwas di dan u tolay hide ay sinumáddap ti Jesus tu kuwarto nu anak a babbey. Inalap na u kamat nu patay a anak sakay inumikat u anak. ²⁶ U baheta tungkol ti iye a pangyayari ay kinumalat tu buo a Galilea. ²⁷ Kállakad ni Jesus tu bilay nu puno ay inunonod siya nu duwwa a lallaki a buhák. Sakay dinulaw di siya “Anak ni David kagbiyan mo kami.” ²⁸ Nikuna sinumaddáp dan ti Jesus tu bilay ay inumadeni nikuna u buhák hide. Sakay tinanung na hide “Maniwala kam beman a mapagpiyya takam?” Tinumábbeg hide “Opo Panginoon, maniwala kami.” ²⁹ Sakay kinahap ni Jesus u mata de sakay kinagi na “Dipo tu paniwala moy ay magpiyya kam.” ³⁰ Tapos ay bigla hide a naketa. Sakay mahigpit hide a pinagbilinan ni Jesus a “Dyan moy ikákkagi iye maski ni ti deya man.” ³¹ Pero imbábbaheta de tu atanan a taga Galilea u tungkul ni Jesus. ³² Nadid tu kahhektat nu duwwa ay te inyangay hide ni Jesus a hinayup a bulol. ³³ Kanya pinalayas ni Jesus u demonyo sakay pagdaka a nakaupos u tolay. Minagtaka u tolay hide sakay kinagi de “Sapul tu itod ay awan padla iye nangyari ti Israel.” ³⁴ Pero kinagi nu Pariseo hide “Makapalayas siya ti demonyo dipo inatádden siya ti kapangyariyan ni Satanas u hari nu demonyo hide.” ³⁵ Inangay ni Jesus u atanan a banuwan sakay babaryo. Nagtoldu siya tu sinagoga di hide. Nagtoldu siya tungkul tu Maganda a Baheta tungkul tu pághari nu Diyos. Sakay maski hadya siya inumangay ay pinagpiyya na u tolay hide tu sakisaket de. ³⁶ Nikuna a netan na u tolay hide ay kinagbiyan na hide. Dipo mabalisa hide sakay awan de tukoy ni hadya hide magaged ti tulung. Kuman hide a tupa a awan ti pastol. ³⁷ Kanya kinagi na tu disepulus na hide, “Makpal u aniyán pero sasangan la u maggapas. ³⁸ Ipagdasal moy tu Panginoon a makákkao tu ani a magpatawed ti maggapas hide tu ani.”

¹ Pinauwet ni Jesus u sapulo ay ti duwwa a disepulos na sakay inatádden na hide ti kapangyariyan a magpalayas ti madukas a ispiritu. Inatádden na be hide ti kapangyariyan a magpapiyya ti atanan a sakisaket. ² Sa iye u ngahangahan nu sapulo ay ti duwwa a disepulos a nginahanan na be a apostol na hide: U purumero ay ti Simon, u palayaw na ay Pedro, ti Andres a kapatkaka ni Pedro, ti Santiago sakay ti Juan a anak ni Zebedeo, ³ ti Felipe sakay ti Bartolome, ti Tomas sakay ti Mateo a taga kolekta ti buwis, ti Santiago a anak ni Alfeo sakay ti Tadeo, ⁴ ti Simon a miyembro nu essa a grupo a gusto a mapalaya u Israelita hide tu taga Roma. Sakay ti Judas Iscariote a nangtokyon ni Jesus. ⁵ Inutusan sakay pinagbilinan hide ni Jesus a “Dyan kam umangay tu lugar nu awan hide Judio oni tu banubanuwan nu Samaritano hide. ⁶ Angay moy tolduwan u Israelita la hide, u netawtaw a tupa hide nu Diyos. ⁷ Ituldo moy nide a ‘Adeni dán a maghari u Diyos nikitam.’ ⁸ Pagpiyyaán moy u te saket hide sakay biyagán moy u patay hide. Pagpiyyaán moy be u te ketong hide sakay palayasán moy u demonyo hide tu hinayup. Nakaalap kam a awan ti bayad kanya iyatád moy be a awan ti bayad. ⁹ Tu lakad moy ay dyan kam magtawed ti pilak, ¹⁰ págasákkan ti badu, pagbihisan, reserba a sinelas sakay sahukud dipo u manggagawa ay dapat la pakanán nu pinagserbiyan na hide.” ¹¹ Sakay kinagi pa ni Jesus “Maski hadya man a banuwan o baryo u angayan moy ay magehyuk kam ti tolay a karapatdapat a tulusan sakay hod kam a tumulos nikuna hanggan awan kam lumakad. ¹² Tu kassáddap moy tu bilay na ay batiyan moy u makábbilay ti ‘Pagpalaan kam nu Diyos ti kapayapaan.’ ¹³ Ni awan karapatdapat u magyan hod ay bawiyán moy u bati moy pero ni karapatdapat hide ay dyan moy bawiyán. ¹⁴ Ni u tolay hide tu essa a bilay oni banuwan ay awan magsanig nikam ay ipagpag moy u alikabok tu tikatikad moy sakay lakadán moy hide. ¹⁵ Pakatandaan moy iye: Tu Aldew nu Paghukom ay mas maparusaan nu Diyos u tolay hide a napagpagan moy ti alikabok nan tu magkadukas a tolay hide a magyan tu itod a panahun tu banuwan a Sodoma sakay Gomorra.” ¹⁶ Kinagi pa ni Jesus tu sapulo ay ti duwwa a apostol na “Pakatandaan moy, paangayan takam tu tolay hide a umád nikán. Kumán kam a tupa a indátton tu bállog nu magkatapang a hayup hide. Kanya ilagen moy hide konna tu biklat a alisto umilag dipo tukoy na a mapadukás siya. Pero magin mabait kam nide konna tu kalapati. ¹⁷ Magingat kam dipo ikaso de kam sakay haplitán di kam tu sinagoga de hide. ¹⁸ Dipo a disepulos takam ay ikaso de kam be tu gubernador sakay hari hide. Siya dán itod u odas moy a magbahagi nide sakay tu awan hide Judio tungkol nikán. ¹⁹ Dyan kam mabalisa ni kodya kam magupos oni anya i ikagi moyay, dipo káddemát nu odas ay ipaisip nu Diyos u ikagi moy. ²⁰ Bakán a hikam u maggupos nan u Ispiritu nu Ama tu pamamagitan moy.” ²¹ Sakay kinagi pa ni Jesus nide “Ipabuno nu kapatkaka na u kapatkaka na a mannámpalataya, konna labe u gimetan nu ama hide tu anak de hide. Magrebelde u anak hide tu dáddakal de sakay ipabuno de be. ²² Kaiyamutan de kam dipo tu paniwala moy nikán. Pero u matapat nikán hanggan matay ay siya la u maligtas. ²³ Ni dustaán di kam tu essa banuwan ay guminan kam tu iba. Kagiyan ko nikam a awan moy pa maangayan u atanan a banubanuwan ti Israel ay makademáták dán a Anak nu Tolay.” ²⁴ Kinagi pa ni Jesus nide “Awan ti disepulos a humigit pa tu tagapagtuldo na. U utusan be ay awan mataas tu amo na ²⁵ U madanas nu tagapagtoldu ay madanas labe nu disepulos na. Madanas labe nu utusan u madanas nu amo. Ni hikán a tagapagtoldo moy ay nginahanan de a Satanas mas grabe u ingahan de nikam a disepulos ko hide.” ²⁶ Kinagi pa ni Jesus nide “Kanya dyan kam manteng ti tolay hide. Awan ti netago a awan meluwas sakay atanan a sekreto ay matukuyan. ²⁷ U atanan a kinagi ko nikam tu diham ay ikagi moy tu atanan tu demlag sakay u nasanig moy a inyanasas ko nikam ay ipakhaw moy para masanig nu atanan. ²⁸ Sakay dyan moy kantingan u makabuno tu bággi moy pero awan makabuno tu kaliduwa nan dapat kantingan moy u Diyos a makabuno tu bággi sakay kaliduwa moy ti impiyerno. ²⁹ Awan beman mura la ni ilako u dignás hide? Maski mura la hide ay awan hide matay ni awan kaluuban nu Ama moy. ³⁰ Mas lalo u pangalaga na nikam, tukoy na u bilang nu buuk moy. ³¹ Kanya dyan kam manteng mas mahalaga kam tu Diyos kasera tu dignás hide.” ³² Kinagi pa ni Jesus tu disepulos na hide “Ni ti deya man u magtapat tu tolay hide a disepulos ko siya ay itapat ko be nama ko ti langet a disepulos ko siya. ³³ Pero ni ti deya a tumanggi a disepulos ko siya tu agum ay itanggi ko be siya nama ko.” ³⁴ Kinagi pa ni Jesus tu disepulos na hide “Dyan moy isipan a immangayák para mangpayapa ti munduwáy. Nan immangayák para mamáglaban u tolay hide. ³⁵ Kalabanán nu awan maniwala nikán u naniwala. Mamáglaban u anak a lállake sakay u ama na, u ina sakay tu anak na a bábbey. Sakay mamáglaban be u magkatugngan a bábbey. ³⁶ U magin kalaban nu essa a tolay a naniwala ay u kasabilay na labe. ³⁷ Ni ti deya u mas magmahal tu ama na sakay tu ina na nan nikán ay awan karapatdapat a magin disepulos ko. Sakay ni ti deya be u mas magmahal tu anak na hide nan nikán ay awan karapatdapat a magin disepulos ko. ³⁸ Sakay ni ti deya be u awan makatággad tu kahirapan tu kássunud nikán ay awan karapatdapat a magin disepulos ko. ³⁹ Ni ti deya man u umád a maniwala nikán dipo kakengan na u biyag na ay mawanan, pero ni ti deya man u mawanan ti biyag dipo tu paniwala na nikán ay magkahod ti biyag a awan ti katapusan.” ⁴⁰ Kinagi pa ni Jesus nide “Ni ti deya u mangtanggap nikam ay tinanggapák de be. Sakay u mangtanggap nikán ay tinanggap de u Ama a nangutus nikán. ⁴¹ Ni ti deya u mangtanggap tu essa a propeta dipo siya ay propeta nu Diyos ay makatanggap be gábwat tu Diyos ti gantimpala a nelaan para tu essa propeta. Sakay ni ti deya u mangtanggap tu essa a malinis a tolay dipo tu kabaitan na ay makatanggap be ti gantimpala a nelaan para tu malinis a tolay. ⁴² Sakay ni ti deya u mangatád maski essa baso a dinum tu pinakababa a disepulos ko ay kagiyan ko nikam a talaga makatanggap siya ti gantimpala gábwat tu Diyos.”

¹ Nadid nikuna natapos dán a nagtoldo ti Jesus tu sapulo ay ti duwwa na a disepulos ay linakaden na itona a banuwan sakay immangay siya tu ibaiba pa a banuwan ni Galilea para magtoldo. ² Ti iye be a panahon ay nepireso ti Juan a magbautismo. Nabaheta na u ginággimet ni Cristo kanya pinalakad na u disepulos na para tanungan ti Jesus. ³ Tinanong de ti Jesus “ Hiko beman talaga u Cristo a áuhayan mi oni magguhay kami pa ti iba?” ⁴ Tinábbeg hide ni Jesus “Angay moy ikagi ni Juan u netan sakay nasanig moy he. ⁵ Ikagi moy a maketa dán u buhák. Makalakad u pilay. Nagpiyya u te ketong. Makasaneg dán u bangngag. Nabiyag u patay sakay natolduwan dán u pobre hide tu maganda a baheta. ⁶ Sakay ikagi moy pa nikuna a ‘Pagpalaan nu Diyos u tolay a awan manghina u paniwala di nikán.” ’ ⁷ Nikuna lumakad dán u disepulos ni Juan ay sinapulan a impaliwanag ni Jesus u patungkul ni Juan tu katolayan hide. Kinagi na nide “Anya beman u angay moy ineleng tu kaparangan? Essa beman a mahina a lállake a konna tu kugun a alisto la idappay-dappay nu pahás? ⁸ Oni essa a tolay a maganda ti badu? U magbadu ti konna hina ay hod la magyan ti palasyo bakan a ti kaparangan. ⁹ U angay moy beman ineleng ay essa a propeta? Tama, pero ti Juan ay mas higit pa tu propeta. ¹⁰ Ti Juan u nesulat tu Kasulatan a kinagi nu Diyos a ‘Pakatandaan moy, ipadipalongo ko a paangayan u tagabaheta ko para maghanda tu angayan mo.’ ¹¹ Kagiyan ko nikam a tu atanan a nagin tolay ti munduwáy ay awan ti humigit pa nan ti Juan a magbawtismo. Pero u pinakababa tu kahariyan nu Diyos ay higit pa nan ni Juan. ¹² Sapul tu pagtoldo ni Juan a Magbawtismo hanggan nadid u kahariyan nu Diyos ay nakadanas ti grabe a atake sakay gusto nu magkatapang a tolay a agiwan u kahariyan. ¹³ Dipo bagu ti Juan a dumemát ti munduwáy ay nagtoldu u Kasulatan tungkol tu kahariyan nu Diyos. ¹⁴ Sakay ni maniwala kam tu kagiyan ko, ti Juan ay ti Elias a dati dán a nehula tu kasulatan a magsoli a huway. ¹⁵ Ni ti deya masoh a magsanig ay dapat magsanig ti husto sakay intendiyan na u kinagi ko.” ¹⁶ Kinagi pa ni Jesus nide “Kodya ko a ipareho u tolay nadid? Kumán hide a anak hide a maggayam tu pággayaman sakay magreklamo tu kaayam de, ¹⁷ kagi de ‘Tinogtugan mi kam pero awan kam magsayaw, nagsanget kami pero awan kam nalungkot.’ ¹⁸ Dipo ti Juan a magbautismo ay awan uminom ti alak sakay pirmi magkulasyon tapos kagi de a te demonyo kan siya. ¹⁹ Nadid hikán a Anak nu Tolay ay kuman sakay uminom ti alak ay kagiyan de be a ‘Katoy u essa a tolay a maunas sakay lasingero. Barkada siya nu tagakolekta ti buwis hide sakay u makasalanan hide.’ Pero ketan labe u bunga nu karunungan nu Diyos tu biyag nu tolay a sumunud.” ²⁰ Sakay nagngál ti Jesus tu tolay hide tu banubanuwan hide a makpal siya a ginimet a himala dipo awan hide nagsisi. ²¹ “Kakagbi kam a taga Corazin sakay Betsaida. Dipo ni u ginimet ko a himala hide nikam ay nangyare ti Tiro sakay ti Sidon tu itod ay nagsisi nakwa hide. Nagbadu nakwa hide ti kostal sakay sássapwagan de u ulo de ti abu bilang pangpeta a nagsisi hide. ²² Ikagi ko nikam a mas higit u parusa moy nan tu parusa nu taga Tiro sakay Sidon tu Aldew nu Paghukom. ²³ Sakay hikam a taga Capernaum, dyan moy ipalalo a makaangay kam ti langit dipo iyangay kam nu Diyos ti impiyerno. Ni u himala hide a ginaggamet nikam ay nangyare ti Sodoma ay nagsisi nakwa u tolay hide hod tu itod sakay awan hide napuksa. ²⁴ Pakatandaan moy tu Aldew nu Paghukom ay mas higit u parusa moy nan tu parusa a nadanas nu taga Sodoma tu itod.” ²⁵ Sakay ti itona be a panahon ay nanalangin ti Jesus “Amáng, u Panginoon ti langit sakay ti munduway, magpasalamaták niko dipo awan mo impakapospos u kalooban mo tu magkalalake hide pero impakapospos mo tu mapagkumbaba hide. ²⁶ On Amáng dipo ina u kagustuwan moway.” ²⁷ Káttapos na a nanalangin ay kinagi ni Jesus tu disepulos na hide “Intád nu Ama nikán u atanan a kapangyariyan tu atanan a bagay. Awan talaga ti makatukoy tu Ama, u Anak la. Sakay awan talaga ti makatukoy tu Anak nan u Ama la sakay tu atanan a napili nu Anak a ipatenggi u Ama. ²⁸ Umadeni kam nikán u pagod sakay nadággiyan hide, dipo atádden ta kam ti imang. ²⁹ Magpasakop kam nikán konna tu essa a hayop a te paud sakay matuto kam nikán. Mabaiták sakay mapagkumbaba kanya makaimang kamon. ³⁰ Dipo u paggiya ko ay malagen sakay u iyatad ko nikam a utus ay awan mahirap.

¹ Essa Aldew nu Káimang nu Judeo hide ay nagtaleb de Jesus tu bállog nu essa a katriguhan. Nagaláp u disepulos ni Jesus kaya nangalap hide tu bunga nu trigu sakay kinan de. ² Nikuna netan hide nu Pariseo hide ay kinagi de ni Jesus “Ilengan mo u gággamitán nu disepulos mo hide. Bawal ina tu Aldew nu Kaimang.” ³ Tinábbeg hide ni Jesus “Awan moy beman nabasa u ginimet ni David sakay tu kaguman na hide nikuna a nagaláp hide? ⁴ Sinadáp na u Tabernakulo sakay kinan de u tinapay a inyalay tu Diyos. Bawal itod a kanan de ayun tu kautusun dipo u maari la a kuman hod ay u saserdote la hide. ⁵ O awan moy beman a nabasa be tu Kasulatan a u saserdote ay magtarabaho tu Aldew nu Kaimang pero awan hide nagkasala? ⁶ Ikagi ko nikam a mas mataasák nan tu Templo. ⁷ Awan moy nakwa hinatulan u awan ti kasalanan ni naintendiyan moy la u kinagi nu Diyos a ‘Gusto ko a kagbiyan moy u tolay hide, bakán a u alay moy nikán.’ ⁸ Dipo hikán a Anak nu Tolay ay u Panginoon nu Aldew nu Kaimang.” ⁹ Nadid linakaden ni Jesus u katriguhan sakay immangay siya tu sinagoga de hod. ¹⁰ Hod a naketa siya ti tolay a te essa a kamát a awan dán magahikad. Tinanong siya nu Pariseo hide tánni mabintang de siya “Maari wád tu Kautusan a magpapiyya tu te saket tu Aldew nu Kaimang?” ¹¹ Tinábbeg na hide “Ni mara hikam ay neabbut u essa a tupa moy tu Aldew nu Kaimang, awan beman a iyawas u tupa moy tu abbut? ¹² Mas mahalaga pa u tolay nan tu tupa. Kanya maari tu Kautusan a maggimet ti maganda tu Aldew nu Kaimang.” ¹³ Sakay kinagi na tu tolay “Iyolnat mo i kamát mowe.” Inyolnat ngane nu tolay u kamát na sakay nagpiyya, nagin kapareho nu essa kamát. ¹⁴ Linumakad u Pariseo hide sakay nagmagguhonan de ni kodya de ti Jesus a bunuwán. ¹⁵ Pero tukoy ni Jesus u pinalano de kanya linakaden na itod a lugar. Makpal a tolay u umunonod nikuna sakay pinagpiyya na u atanan a te saket nide. ¹⁶ Inutusan na hide a dyan de siya ibábbaheta. ¹⁷ Atanan an iye ay nangyari para matupad u kinagi nu Panginoon tu tolay tu itod tu pamamagitan nu propeta na a ti Isaias. ¹⁸ I kinagi na ay “Sa iye u Utusan ko a napili ko. Mahal ko siya sakay siya u kinasayaan ko a tahod. Iyatád ko nikuna u Ispiritu ko sakay ibaheta na tu atanan a katolayan u hatul ko. ¹⁹ Awan siya mákpagdima, awan be siya maghangtit. Awan siya magpalalo tu kakarsada. ²⁰ Awan na pahirapan u magkahina hide sakay tulungan na u pinakabadit ti pagasa, hanggan a magtagumpay u katarungan. ²¹ Siya i pagasa nu atanan a tolay. ²² Nadid te essa a tolay a hinayup a buhák sakay bulol pa be a inyangay de ni Jesus. Pinagpiyya ni Jesus u tolay kanya nakaupos sakay naketa dán. ²³ Nagtaka u atanan a tolay sakay kinagi de “Sa dawád iye u Anak ni David?” ²⁴ Pero nikuna nasanig iye nu Pariseo ay kinagi de “Kanya mapalayas na u demonyo hide dipo inatádden siya ti kapangyariyan ni Satanas.” ²⁵ Dipo tukoy ni Jesus u inisip de ay kinagi na nide “Ni u totolay ti essa a kahariyan ay maggurupogurupo sakay mamaglaban hide ay sigurado a masida u kahariyan. Sakay ni u totolay tu essa a banuwan oni bilay ay mamaglaban ay sigurado be a awan hide magkaessa. Awan hide ti abutan. ²⁶ Kanya ni palayasan ni Satanas ti Satanas ay kalabanan na u sadili na. Masida u kahariyan na. ²⁷ Kagi moy a nagpalayasák ti demonyo dipo inatáddenák ti kapangyariyan ni Satanas. Kodya nadid u disepulos moy hide? Nagpalayas be hide ti demonyo. Kaya hide u magpatunay ni tama u kinagi moy patungkul nikán. ²⁸ Pero ni nagpalayasák ti demonyo tu kapangyariyan nu Ispiritu nu Diyos ay nagpatunay ina a dumemát dán nikam u paghari nu Diyos. ²⁹ Awan mo masadáp sakay matakawan u bilay nu essa a makapangyariyan a tolay ni hanggan awan mo siya mapungo. Ni mapungo mo dán siya ay maari mo dán a matakawan u bilay na. ³⁰ Ni deya u awan tumulong nikán ay kontra nikán sakay ni deya u awan tumulong nikán a magpaipun ti tolay ay magpaadeyo nide. ³¹ Atanan a kasalanan oni pagupos ti madukás laban tu Diyos ay mapatawad pero u pagupos laban tu Banal a Ispiritu ay awan ti kapatawaden. ³² Sakay ni ti deya man u magupos laban nikán a Anak nu Tolay ay mapatawad nu Diyos pero u magupos laban tu Banal a Ispiritu ay awan mapatawad, magin nadid a panahon oni tu demodyan a aldew.” ³³ Kinagi pa ni Jesus “U kayu ay matukuyan tu bunga na. Ni alagaan mo u kayu ay magin maganda u bunga na hide pero ni awan mo siya alagaan ay magin madukás u bunga na hide. ³⁴ Hikam ay kumán a makamandag a biklat hide. Kodya u magkadukás a tolay a konna nikam maari a magupos ti maganda? Dipo ni anya u pirmi hod tu puso moy ay itod labe u lumuwas tu labi moy. ³⁵ U mabait a tolay ay magupos ti maganda dipo maganda u he tu isip na. Sakay u makasalanan a tolay ay magupos ti madukás dipo madukás u he tu isip na. ³⁶ Ikagi ko nikam a panagutan moy u bawat upos moy a madukás ti Aldew nu Paghukom. ³⁷ U iyupos moy nadid ay siya u gamitan a panghatul nikam ni maligtas kam oni awan. ³⁸ Tapos ay kinagi nu sasangan a Pariseo sakay Maisto nu Kautusan ni Jesus “Maistu, maari mo kami beman a petaan ti himala bilang puruweba?” ³⁹ Timábbeg ti Jesus “Hikam ay madukás sakay mapangalunya a katolayan ay magaged ti himala. U meatád ko la nikam ay u nangyari a himala ni Jonas tu itod. ⁴⁰ Konna ni Jonas a tállo a aldew sakay gibi a hod tu disalad nu tiyan nu dakál a tahod a ikan, ay hikán a Anak nu Tolay ay tállo be a aldew sakay gibi tu disalad nu luta. ⁴¹ Káddemát nu aldew nu paghatul nu Diyos ay tumaknág u taga Ninive sakay hatulan de kam. Dipo nagsisi hide nikuna tinulduwan hide ni Jonas. Sakay nadid mas mahigiták pa ni Jonas tapos awan kam pa magsisi. ⁴² Káddemát nu aldew nu paghatul nu Diyos ay tumaknág be u Reyna nu banuwan a Sheba sakay hatulan na kam. Dipo adeyo a lugar u ginábwatan na para la magsanig tu karunungan ni Solomon. Sakay nadid mas higiták pa ni Solomon tapos awanák moy sanigan.” ⁴³ Kinagi pa ni Jesus tu Pariseo hide “Ni lumukad u essa a madukás a ispiritu tu essa a tolay ay umangay siya tu kaparangan sakay magehyok ti imangan. Ni awan siya maketa ay ⁴⁴ isipan na a ‘Magsoliyák dálla tu tolay a nilakaden ko.’ Kademát hod ay ketan na u dati a papagyanan na a awan ti lasán, malinis sakay maayos dán. ⁴⁵ Kanya magehyok siya ti pitto a mas madukás pa nikuna sakay angay hide a atanan sumádáp tu dati a pagyanan na sakay magyan hide hod. Kanya mas lalo dumukás u kalagayan nu tolay nan tu date. Konna labe hina u magin karanasan moy dipo madukás kam a katolayan. ⁴⁶ Nadid alay nu paggupos ni Jesus tu katolayan ay dumemát u ina sakay kapatkakka na hide a lállake. Nagtaknág hide tu luwas ni bilay sakay gusto de siya a uhunán. ⁴⁷ Kanya te nangkagi ni Jesus a atoy hide tu luwas sakay gusto de siya a uhunán. ⁴⁸ Pero timmábbeg ti Jesus “Deya u ina ko sakay kapatkaka ko hide a lállaki?” ⁴⁹ Intoldu na u disepulos na hide sakay kinagi na “Hide iye u ina sakay kakapatkaka ko hide. ⁵⁰ Dipo ni ti deya u tumupad tu kaluuben nu Ama ko ti langit ay siya u ina sakay kapatkaka ko hide.”

¹ Nadid ti itona be a aldew ay limmuwas ti Jesus tu bilay sakay immangay tu Hánno nu Galilea. Káddemát na hod ay inumetnud siya tu digdig nu minalno para magtoldo. ² Makpal a tolay u dinumulug nikuna kanya sinumakay siya tu abang. Inumetnud siya sakay nagtoldo tu katolayan a nagtaknág tu baybay. ³ Nagtoldo siya ti makpal tu pamamaraan ni talinghaga. Kinagi na “Te essa a lállaki a mágsabug. ⁴ Tu págsabug na ay te bine neangay tu digdig nu dilan. Dumemát u manok hide sakay tinoktok de u bine hide. ⁵ U agum a bine ay neangay tu luta a makpal a bito tu disalad na. Ay alisto hide a tinumubu ⁶ Pero alisto hide a nalanás dipo tu matindi a init sakay awan hide ti masyado a nakagimot ti madisalad. ⁷ U agum a bine ay neangay tu luta a maduksan. Nikuna dumakal u saet hide ay naelongan iye hide. ⁸ U agum a bine ay neangay tu maganda a luta. Iye hide ay nagtubu ti maganda sakay nagbunga ti makpal. U bunga nu agum a ohay ay tágtállo a pulo, u agum tágannam a pulo sakay u agum ay tággidatos a butil kada ohay.. ⁹ Ni ti deya masoh a magsanig ay dapat magsanig ti husto sakay intendiyan na u kinagi ko.” ¹⁰ Sakay umadeni u disepulos na hide ni Jesus sakay tinanong de siya “Bakin a idilan mo ti talinghaga u pagtoldo mo tu tolayay hide?” ¹¹ Tinábbeg na hide “Impakapospos nu Diyos nikam u sekreto nu Kahariyan na pero awan na ipakapospos nide. ¹² Dipo ni ti deya u tehhod ay maatádden pa sakay sumagana siya. Pero u awan ay maalap pa u hod nikuna. ¹³ Kanya a magtalinghagaák nide dipo ketan de dán u ginimet ko pero awan de pa maintendiyan. Nasanig de u kinagi ko pero awan di padla maintendiyan. ¹⁴ Natupad ngane dán nide u kinagi nu Diyos ni propeta Isaias tu itod pa a ‘Masanig moy u kinagi ko pero awan moy maintendiyan. Ketan moy u gimetan ko pero awan moy maintendiyan. ¹⁵ Dipo inumigát dán u isip moy sakay awan dán magsanig u talinga moy. Sakay inkiháp moy dán u mata moy. Ni awan moy ina hide ginaggimet ay maketa kam nakwa tu mata moy sakay makasanig kam nakwa tu talinga moy. Sakay maintendiyan nakwa nu isip moy tánni angay kam nikán para pagpiyyaan takam.’ ¹⁶ Pero hikam a disepulos ko hide ay pinagpala kam dipo naketa sakay nakasanig kam. ¹⁷ Tatahoden a kagiyan ko nikam, makpal a propeta sakay malinis a tolay tu itod u nasoh a ketan u netan moy nadid. Pero awan iye nangyari nide.” ¹⁸ Kinagi pa ni Jesus nide “Sanigan moy nadid u kahulugen nu talinghaga nu mágsabug: ¹⁹ U panghalimbawaan nu bine hide a neangay tu digdig nu dilan ay u essa a tolay a nakasanig tu baheta tungkol tu paghari nu Diyos pero awan na iye naintendiyan. Dumemát ti Satanas, inagew na tu isip na u nasanig na. ²⁰ U neangay be a bine tu mabito a luta ay konna tu essa a tolay a nakasanig sakay masaya a tumanggap tu baheta tungkol tu paghari nu Diyos. ²¹ Pero dipo pareho siya tu essa a mula a awan ti gimot a madisalad ay awan siya makatággád tu hirap nu sesti dipo tu paniwala na ay alisto siya a umadág tu paniwala na. ²² U bine be a neangay nadid tu kasaetan ay kapareho na u essa a tolay a nakasanig sakay tumanggap tu upos nu Diyos pero dipo naelongan siya nu kákkabalisa nu biyag sakay tu linlang nu kayamanan ay awan nakabunga u paniwala na. ²³ U bine be a neangay nadid tu maganda a luta ay kapareho na u essa a tolay a nakasanig sakay tatahoden a naintidiyan na u upos nu Diyos. Kanya makpal a tahod a bunga u ketan tu paniwala na. ²⁴ Nagistorya pa ti Jesus ti essa pa a talinghaga, kinagi na “U paghari nu Diyos ay konna tu istorya nu essa a tolay a nagmula ti maganda hide a halaman tu pagmulaan na. ²⁵ Essa gibi nikuna tidug u atanan ay minulaan nu kadima na ti madukás a halaman sakay linakaden. ²⁶ Nikuna dumakál sakay bimmulaklak dán u maganda a halaman ay lumuwas be u madukás a halaman hide. ²⁷ Nagtanong u utusan hide tu amo de “Awan beman magkaganda la a kalase a halaman u inmula mo? Bakin a te madukás a halaman a limmuwas?” ²⁸ Timmábbeg u amo de “Gimet iye nu kadima tam.” Nagtanong dámman u utusan na hide “Bagutan mi beman u magkadukás hide a halaman?” ²⁹ Timmábbeg u amo de “Dyan moy, makay mabagut moy pati u magkaganda hide a halaman. ³⁰ Pabayan moy dán hide a sabay a dumakál hanggan tu pággani tam. Utusan ko la u magani hide a ‘Dipalongo moy a bagutan u madukás a halaman hide. Tapos ay bádbáddan moy hide para tutudán. Pero aniyán moy u bunga nu maganda a halaman sakay idátton moy tu bilay ko.” ’ ³¹ Nagtalinghaga pa ti Jesus “U pághari nu Diyos ay konna tu essa a bine nu atong a mustasa. Inmula iye nu essa a tolay. ³² U mustasa ay u pinakabadit a bukál pero ni tumubo dán ay magin pinakadakál a atong dipo magin kayo. Sakay magin apunan nu manok hide. ³³ Nagtalinghaga pa ti Jesus essa “U paghari nu Diyos ay konna tu lebadura a inhalo nu essa bábbey tu minasa a harina para maggimet ti tinapay. Simmanáp u lebadura tu harina kanya umalsa iye.” ³⁴ Nagtoldo ti Jesus tu tolay hide tu pamamaraan nu talinghaga. Awan siya ti intoldo a iba nan puro talinghaga la. ³⁵ Kanya natupad u hula nu essa a propeta tu itod, “Kinagi nu Diyos ‘Maguposák nide tu pamamaraan nu talinghaga. Ikagi ko nide u bagay hide a awan padla ti nakapospos sapul tu paggimet nu mundo.” ’ ³⁶ Sakay limmakad siya tu katolayan sakay simmadáp tu bilay. Hod ay kinagi nu disepulos na nikuna “Panginoon, ikagi mo nikami u kahulugan nu talinghaga nu madukás a kalase nu halaman.” ³⁷ Tinábbeg hide ni Jesus “Hikán a Anak nu Tolay u nagmula tu maganda a halaman. ³⁸ U luta ay u mundo, u maganda a kalase a halaman ay u tolay hide a naghariyan nu Diyos. U madukás a kalase a halaman ay u tolay hide a kao ni Satanas. ³⁹ U kadima a nagmula tu madukás a kalase nu halaman ay ti Satanas. U pággani ay u katapusan nu mundo sakay u magani hide ay u anghel hide. ⁴⁰ Tu panahon nu ani ay ibutan u magkadukás a kalase nu halaman hide sakay tutudán Konna labe u mangyare tu katapusan nu mundo. ⁴¹ Hikán a Anak nu Tolay ay paangayan ko u anghel hide para ibutan de u atanan a ginábwatan nu kasalanan sakay u atanan a maggimet ti madukás. ⁴² Ibut hide nu anghel tu impiyerno sakay hod hide a magsasangitan sakay mágáadoyán tu hirap. ⁴³ Sakay dumemlag nadid u malinis hide a tolay konna tu aldew hod tu kahariyan nu Ama de. Ni ti deya u makasanig ay pakaintendiyan na.” ⁴⁴ Kinagi pa ni Jesus “U paghari nu Diyos ay konna tu essa a kayamanan a nakaliyan nu essa a tolay tu araduwan a kao nu iba a tolay. Tinapuhan na u kayamanan sakay dipo tu grabe a saya na ay angay na inlako u atanan a kao na sakay binali na u luta a te kayamanan.” ⁴⁵ Kinagi pa ni Jesus “U paghari nu Diyos ay konna dámman tu essa a tolay a u negosyo na ay magehyok ti mamahalin a perlas. ⁴⁶ Nikuna netan na u essa perlas a mataas ti halaga ay inlako na atanan a kao na sakay binali na u perlas.” ⁴⁷ Kinagi pa ni Jesus “U paghari nu Diyos ay konna dámman tu essa a dakál a panti a indátton de tu diget sakay nakaalap ti sarisare a ikan. ⁴⁸ Nikuna naputat dán u panti ay hinela de tu baybay. Umetnud u tolay hide tu baybay sakay piniliyan de. Indátton de tu págdáttonan u magkanda a ikan hide pero imbut de u magkadukás hide. ⁴⁹ Konna labe hina u mangyare ti katapusan nu mundo. Dumemát u anghel hide sakay ihiwalay de u makasalanan tu malinis hide a tolay. ⁵⁰ Iyangay de u makasalanan ti impiyerno. Hod ay magsasangitán hide sakay mágáadoyán.” ⁵¹ Tinanong ni Jesus u disepulos na hide “Naintendiyan moy beman u kinagi ko?” Timmábbeg hide “On naintendiyan mi Panginoon.” ⁵² Kinagi pa ni Jesus nide “Kanya atanan a maisto nu kautusan nu Diyos a magin disepulos tu kahariyan nu Diyos ay konna tu essa a makákkao tu essa a bilay. Iluwas na u dati sakay bigu hide a kayaman tu bodega na. ⁵³ Nikuna natapos dán ti Jesus a nagtoldo ti iye hide a talinghaga ay hinumektat siya ti itod a lugar. ⁵⁴ Nagsoli ti Jesus tu banuwan na sakay nagtoldo siya tu sinagoga de. Nagtaka u nakasanig hide sakay kinagi de “Hadya wád siya nakaalap tu karunungan na sakay kapangyariyan na a maggimet ti himala? ⁵⁵ Awan beman siya u anak nu karpintero? Awan beman u ina na ay ti Maria sakay u kákkapatkákka na a lállake ay di Santiago, Jose, Simon, sakay Judas? ⁵⁶ Sakay awan beman mágyan u kákkapatkákka na a bábbey hide nikitam he ti baryo tamáy? Bakin a tanyag siya?” ⁵⁷ Inadiyan de ti Jesus, kanya kinagi ni Jesus “U essa propeta ay igalang maski hadya pero awan siya igalang nu tolay hide tu sadili na a banuwan sakay tu sadili na a bilay.” ⁵⁸ Dipo awan hide maniwala nikuna ay awan siya naggimet ti makpal a himala hod.

¹ Nadid tu panahon a itona ay nabaheta ni Hari Herodes Antipas a puno nu lugar a Galilea u ginimet ni Jesus. ² Kinagi na tu tagapayo na hide “Siya ti Juan a magbawtismo a nabiyag a huway kanya a makagimet siya ti ibaiba a himala.” ³ Dipo ti Herodes u nangpepireso sakay nagpabuno ni Juan bilang pabor na tu kabanga na a ti Herodias. Ti Herodias ay dati a kabanga nu kapatkaka ni Herodes a ti Felipe. ⁴ Bagu ti Juan a nepireso ay palagi na a pagkagiyan ti hari Herodes a “Awan ayun tu kautusan nu Diyos a kinabanga mo u kabanga nu kapatkaka mo.” ⁵ Maski gusto ni Herodes a ipabuno ti Juan ay awan na itod magimet dipo manteng siya tu katolayan. Dipo propeta u pangileng nu katolayan ni Juan. Kanya impepiriso dálla ni Herodes ti Juan. ⁶ Pero nikuna nagkasayaan hide tu kapanganakan ni Herodes ay nagpalabas ti sayaw u anak a madikit ni Herodias. Nasayaan a tahod ti Herodes tu palabas. ⁷ Kanya nagpananto ti Herodes tu madikit a iyatád ni Herodes maski anya man u agidan na. ⁸ Dipo tu utus nu ina na a kinagi nu madikit ni Herodes a “Mahal a hari, gusto ko a iyatád mo nikán u ulo ni Juan a magbawtismo a nakadátton tu dakál a penggan.” ⁹ Nikuna a nasanig iye ni Herodes ay nalungkot siya pero awan siya ti magimet dipo nakapananto siya tu atubang nu makpal a bisita. Kanya inyutos na tu sundalo na a iyatád u inagid nu madikit. ¹⁰ Kanya naputulan ti Juan ti perisuwan. ¹¹ Sakay indátton de tu dakál a penggan u ulo na sakay inyatád de tu madikit. Káttapos ay inyatád nu madikit tu ina na. ¹² Sakay dumemát u disepulos ni Juan, inalap de u bangkay ni Juan sakay inlábbang de. Káttapos ay angay de inbaheta ni Jesus u nangyari ni Juan. ¹³ Nadid nikuna nasanig iye ni Jesus ay sinumakay siya sakay u disepulos na hide tu essa a dakál a abang sakay inumangay tu essa a tahimik a lugar. Pero nikuna natukuyan iye nu tolay hide ay tinagubet de ti Jesus. Namaybay hide. ¹⁴ Nikuna inumawas ti Jesus ay hod dán hod u makpal a tolay a naguhay nikuna. Nikuna netan na u makpal a tolay ay kinagbiyan na hide. Sakay pinagpiyya na u te saket nide. ¹⁵ Nikuna pággapon dán ay immadeni ni Jesus u disepulos na hide. Kinagi de nikuna “Panginoon, madiham dán sakay atoy kitam tu matahimik a lugar a adeyo. Palakadan mo dán u tolayay hide para mamali hide ti kanan de tu adeni a babaryo.” ¹⁶ Timmábbeg ti Jesus “Awan hide kailangan a lumakad. Hikam u mangatád nide ti makan.” ¹⁷ Pero timmábbeg hide “Pakodya mi hide pakanan? Te limma kami la a tinapay sakay duwwa a ikan a sinahab.” ¹⁸ “Dah, iyatád moy hide nikán” tábbeg ni Jesus. ¹⁹ Káttapos ay pinaetnud ni Jesus u katolayan tu kalamonan hide. Inalap na u limma a tinapay sakay duwwa a ikan sakay tummangngad ti langit. Nagpasalamat siya tu Diyos sakay tináppeng-táppeng na u tinapay. Kimmakpal u makan. Sakay intád na tu disepulos na hide sakay intagtag be nu disepulos na hide tu katolayan. ²⁰ Kimman u atanan sakay nabássug. Sakay inipon nu disepulos ni Jesus u nabuhay a pagkain a duwwa pulo a balulang. ²¹ U atanan a kimman ay limma a libo a lállaki bukod pa tu bábbey hide sakay tu anak hide. ²² Káttapos ay pagdaka a pinasakay ni Jesus u disepulos na hide tu abang. Pinadipalongo na hide tu lugar a hod tu dibelew nu minalno alay a pasoliyan na u tolay hide tu bilabilay de. ²³ Káttapos na iye a ginimet ay inumangay siya tu essa a bukid para manalangin. Inabot hod siya ni gibi. ²⁴ Alay a hod tu bukid ti Jesus ay hod dán ti ditaw nu minalno u disepulos na hide. Nagkaproblema hide dipo dinemáttan hide ti mabegsák a dahughasi sakay dumakál u tagmák a tamo nide. ²⁵ Nikuna tamo dán a magamulaldew ay inumangay ti Jesus ti disepulos na hide. Linakad na u dibbew nu dinum nu minalno. ²⁶ Pero nikuna netan siya nu disepulos na a naglakad tu dibbew nu dinum ay nanteng hide a tahod. Pinumakhaw hide dipo tu anteng de a “Hayup wád ina tumo.” ²⁷ Pero kinagi ni Jesus nide a pagdaka “Dyan kam manteng, hikán iye ti Jesus.” ²⁸ Sakay tinumábbeg ti Pedro, “Ni hiko ina Panginoon ay pangayanák mo hina a maglakad tu dibbew nu dinum.” ²⁹ Timmábbeg ti Jesus “Sigi, angay ka he.” Kanya inumogsad ti Pedro sakay naglakad tu dibbew nu dinum a patamo ni Jesus. ³⁰ Pero nikuna a netan na u tagmák ay nanteng siya a tahod sakay utay-utay siya a umalád. Pinumakhaw ti Pedro “Iligtasák mo Panginoon.” ³¹ Pagdaka a ginewat ni Jesus u kamát na sakay kinagi na nikuna “Bakin a nagalangan ka Pedro? Badit a tahod u paniwala mo nikán.” ³² Nikuna sinumakay dán hide a duwwa tu abang ay immimang be u dahugase. ³³ Sinamba siya nu disepulos na hide, kinagi de “Talaga hiko ngane u Anak nu Diyos.” ³⁴ Nadid nikuna naahabes di dán u minalno ay dimmung hide tu lugar a Genesaret. ³⁵ Pákkatengge nu tolay hide ni Jesus ay imbaheta de tu atanan a banubanuwan hod a dumemát ti Jesus. Kanya iyangay nu tolay hide u atanan a te saket hide nikuna. ³⁶ Nakekagbi u te saket hide a ni maari de a kahapán maski u garayan na la nu damit na. U atanan a kumahap ay nagpiyya.

¹ Essa aldew te immangay ni Jesus a Pariseo hide sakay u Maisto nu Kautusan hide. Gábwat hide ti Jerusalem. ² Tinanong de ti Jesus “Bakin a labagán nu disepulos mo hide u kautusan nu nunu tam hide? Awan de ugesan u kamakamát de bago a kuman ayun tu paraan a intoldo nu nunu tam hide.” ³ Tinábbeg hide ni Jesus “Bakin hikam, nilabag moy u kautusan nu Diyos para la masunud u utus nu nunu hide? ⁴ Halimbawa la, inyutus nu Diyos a ‘Igalang mo tama mo sakay tena mo.’ sakay inyutus na be a ‘Ni ti deya u magupos ti madukás laban nama sakay tena na ay dapat ipabuno siya.’ ⁵ Pero intoldo moy a ‘Awan dán kailangan a tulungan ti pilak u dáddakal ni u pilak ay iyatád dálla tu Diyos.’ ⁶ Kanya dipo tu kautusan nu nunu ay awan nasunud u kautusan nu Diyos. ⁷ Mapagkumware kam. Tama u hula ni propeta Isaias tungkol nikam. Kinagi nu Diyos tu pamamagitan na tu itod pa a ⁸ ‘Hide iye a tolay ay gumalang nikán tu labi di la pero tu isip de ay awan. ⁹ U pagsamba de nikán ay awan ti kabuluhan dipo pinalitan de u kautusan ko tu kautusan de.” ’ ¹⁰ Sakay pinaadeni ni Jesus u tolay hide nikuna sakay kinagi na nide “Pakaintindiyan moy u kagiyan ko nikam. ¹¹ Bakán a tu isubu nu tolay u makapangpadangát nikuna tu Diyos nan u madukás a kagiyan na.” ¹² Mamayamaya ay immadeni u disepulos ni Jesus nikuna sakay kinagi de “Nasaketan u Pariseo hide tu kinagi mo.” ¹³ Tinábbeg hide ni Jesus “Bagután nama ko a atoy ti langet u halaman hide a awan na inmula. ¹⁴ Pabayan moy hide, buhák hide a tagagiyya. Ni u buhák u maggiyya tu buhák ay pareho hide a matápduk tu ábbut.” ¹⁵ Sakay nagtanong ti Pedro “Ipaliwang ped nikami u kinagi mo a awan makapangpadangát tu Diyos u kanan nu essa a tolay.” ¹⁶ Timmábeg ti Jesus “Pati bál hikam ay awan moy naintendiyan u kinagi ko? ¹⁷ Atanan a kanán nu essa tolay ay angay tu tiyan sakay iyattay na. ¹⁸ Pero u madukás a upos ay gábwat tu makasalanan a puso ay itod u makapangpadangát tu tolay tu Diyos. ¹⁹ Dipo gábwat tu puso ay u madukás a isip tu agum, pámmuno, pángngalunya, pagtakaw, pagsistigo ti kakabuliyan tu agum a tolay sakay pagmetmet. ²⁰ Sa itod hide u makapangpadangát ti tolay, bakán a u kuman a awan nagguges ti kamát. ²¹ Nadid hinumektat ti Jesus hod sakay immangay tu luta a adeni tu banuwan hide a Tiro sakay Sidon. ²² Hod ay te immadeni nikuna a bábbey a taga Canaan a mabegsák a magpakhaw a nákkekagbi nikuna “Panginoon a Anak ni David, kagbiyanák mo ped. U anak ko a bábbey ay hinayup. Pahirapan siya a tahod nu madukás a ispiritu. ²³ Pero awan la siya tinábbeg ni Jesus. Sakay inumadeni ni Jesus u disepulos na hide sakay kinagi de “Palakadán mo siya, mahehaw a umonod nikitam.” ²⁴ Kanya kinagiyan na u bábbey “Inutusanák nu ama ko para la tu netawtaw a tupa a Israelita hide, bakán tu awan Israelita.” ²⁵ Pero inumadeni u bábbey sakay limmuhod tu atubang na sakay kinagi na “Tulunganák mo ped Panginoon.” ²⁶ Timmábbeg ti Jesus “Awan karapatdapat a iyatád tu aso u dapat a kanán nu anak hide.” ²⁷ “Tahod ngane Panginoon, pero maski u aso hide ay maari a kuman tu mumo a netápduk tu lamesaan nu amo de.” tábbeg be nu bábbey. ²⁸ Kanya kinagi ni Jesus tu bábbey “Dakál u pannámpalataya mo. Tábbegan ko u inyuhon mo nikán” Sakay ti itod be a panahon ay nagpiyya u anak na a bábbey. ²⁹ Káttapos ay nagsoli ti Jesus tu minalno nu Galilea. Tinohbok na u essa a buked sakay inumetnud hod. ³⁰ Sakay inumangay nikuna u makpal a tahod a tolay a te tawed a pilay, buhak, bulol, sakay ibaiba pa a tolay a te sarisare a sakit. Iyadeni de hide ni Jesus sakay pinagpiyya hide ni Jesus a atanan. ³¹ Kanya nagtaka u tolay hide nikuna a netan de a makaupos dán u bulol, makalakad dán u pilay, sakay maketa dán u buhak. Sakay pinuri de u Diyos nu Israel dipo tu nangyare. ³² Nadid dinulawan ni Jesus u disepulos na hide sakay kinagi na nide “Kakagbi u tolay hide. Tállo dán hide a aldew a kakaguman tam, awan dán hide ti makan. Awan ko gusto a palakadan ko hide a magaláp makay pumatay hide tu dilan.” ³³ Nagtanong u disepulos na “Anya be ipakan tamay nide? Atoy kitam tu parang, makpal pa be hide.” ³⁴ Tinanong hide ni Jesus “Sangan a tinapay u tawed moy?” “Pitto a tinapay, sakay sasangan a bábbadit a ikan” tábbeg nu disepulos na. ³⁵ Kanya inutusan na u tolay hide a umetnud. ³⁶ Sakay inalap na u pitto a tinapay sakay u ikan hide. Káttapos na a nagpasalamat tu Diyos ay tináppeng-tapeng na u tinapay hide sakay intád na nide tu disepulos na hide. Intagtag be nu disepulos na hide tu katolayan. ³⁷ Kimman u atanan sakay nabássug hide. Káttapos ay inhempas nu disepulos na u pitto a balulang a sobra a tinapy. ³⁸ Atanan a kimman ay áppat a libo a lállake bukod pa tu bábbey sakay anak hide. ³⁹ Sakay káttapos ay pinasole ni Jesus u tolay hide tu bilabilay de. Sakay sinumakay siya tu abang a umangay tu lugar nu Magadan.

¹ Essa aldew immadeni ni Jesus u sasangan a Pariseo sakay Saduseo hide. Gusto de a purbaan ti Jesus kanya kinagi de a mangpeta siya ti essa a tanda gábwat ti langit. ² Pero timmábbeg ti Jesus, “Ni adeni dán sumahám u aldew ay kagiyan moy a ‘Magin maganda u panahon ni ilaw dipo dumideg u langet.’ ³ Sakay ni ti dimadimang a tahod ay kagiyan moy a ‘Maguden nadid dipo madiklám u langet’. Matukoyan moy u palatandaan ti langit pero awan moy natukoyan u palatandaan hide ti kasalukuyan a panahon. ⁴ Madukás kam a lahi sakay awan matapat tu Diyos! Nagehyok kam ti tanda pero awan ti ipeta nikam liban tu palatandaan a nangyari ni Jonas!” Sakay linakaden na hide. ⁵ Nadid nikuna a nakaahabes dán hide tu dilipot nu minalno ay nalimunan nu disepulus hide a magtawed ti tinapay. ⁶ Kinagi ni Jesus nide, “Mag-ingat kam tu págpaalsa nu Pariseo sakay Saduseo hide.” ⁷ Namagguhon u disepulus hide. Kinagi de, “Dipo wád awan kitam ti tawed a tinapay kanya nakagi na itod.” ⁸ Natukoyan iye ni Jesus kanya tinanong na hide, “Bakin pinagguhonan moy a awan kam ti bilon a tinapay? tunay ti kabadit nu paniwala moy! ⁹ Awan moy pa beman maintendiyan? Nalimunan moy dán beman nikuna hinati-hati ko u limma a tinapay para tu limma a libo a tolay? Sangan a balulang u tinapay a sobra? ¹⁰ Kona labe tu pitto a tinapay para tu appat a libo, sangan a dáddakkál a balulang a tinapay u sobra? ¹¹ Bakin awan moy padi maintindiyan a bakán a tungkol tu tinapay u kinagi ko? Mag-ingat kam tu págpaalsa nu Pariseo sakay Saduseo hide.” ¹² Sakay naintendiyan de dán a magingat bál hide tu adal nu Pariseo sakay Saduseo hide bakán a págpaalsa.. ¹³ Nadid nikuna a dimmemát ti Jesus tu lugar ni Cesarea ti Filipos ay tinanong na u disepulus na hide, “Deya kan u Anak nu Tolay ayon tu tolay hide?” ¹⁴ Sakay timmábbeg hide, “U kagi nu agum ay ti Juan a Magbawtismo ka kan. Kinagi be nu agum, ti Elias ka kan. Sakay te magkagi pa be a ti Jeremias ka kan oni essa tu propeta hide.” ¹⁵ “Ay hikam, ánya u makagi moy? Deya ák beman?” tanong na nide. ¹⁶ Timmábbeg ti Simon Pedro, “Hiko po u Cristo, u Anak nu Diyos a biyag.” ¹⁷ Kinagi nikuna ni Jesus, “Pinagpala ka Simon a anak ni Jonas! Dipo iye a karunungan ay awan intoldo niko ni ti deya man a tolay nan impakapospos iye niko nu Ama ko a atoy ti langit. ¹⁸ Sakay kagiyan ko be niko a hiko ti Pedro sakay ti iye a bito u magin pundasyon nu pinili ko hide a tolay. Sakay awan ti makapangtalo maski u kapangyarihan ni Satanas. ¹⁹ Iyatád ko niko u susi hide nu kaharian ti langit: u ipagbawal mo ti lutaáy ay ipagbawal ti langit sakay u payagen mo ti luta ay payagen bi ti langit” ²⁰ Sakay mahigpit na a binilinan u disepulus na hide a dyan kagiyan ni deya man a siya u Cristo. ²¹ Sapul hod ay impakapospos dán ni Jesus tu disepulus na hide a kailangan siya a umangay ti Jerusalem. Magdanas siya hod ti makpal a hirap tu kamát nu pinuno nu banuwan, pupuno nu saserdote hide sakay tu maisto hide nu Kautusan ni Moises. Sakay ipabuno de pa siya pero tu ikatállo a aldew ay huway siya a mabiyag. ²² Inakit siya ni Pedro tu essa a sulok sakay pinagkagiyan ti konna he: “Panginoon, dyan nakwa payagen nu Diyos a mangyari ina! Awan dapat a mangyare iye niko.” ²³ Pero kinagiyan siya ni Jesus, “Umadeyo ka Satanas! Essa ka a hadlang nikán. U isip mo ay bakán a tu Diyos nan kao nu tolay.” ²⁴ Kinagi ni Jesus tu disepulus na hide, “Ni deya u masoh a sumunod nikán ay limunan na u sadili na, baklayán u kudus na sakay sumunod nikán. ²⁵ U mangkemot tu biyag na ay siya u mawanan pero u mag-alay tu biyag na para nikán ay siya u magkahod ti tunay a biyag. ²⁶ Anya u maalap nu essa a tolay ni makao na u buo a mundo pero ni u kapalit be ni iye ay u biyag na? Anya u maari a mebayad nu essa tolay para mesoli nikuna u biyag na? ²⁷ Dipo pademát u Anak nu Tolay a te kapangyariyan a gábwat tu Ama na sakay kaguman na u anghel hide. Ti panahunan a itona ay hatulan na u kada tolay ayon tu ginimet na. ²⁸ Kagiyan ko nikam: te sangan nikam he ay awan matay hanggan a awan de ketan u Anak nu Tolay a dumemát bilang Hari.”

¹ Nadid kállipas nu annám a aldew, kinuyog ni Jesus ti Pedro sakay u matkaka a ti Santiago sakay ti Juan. Tinohbok de u essa a malangkaw a buked. ² Alay de a he hod ay netan de a nag-iba u hupa ni Jesus: dumemlag a kumán a aldew u hupa na sakay pimmudew a makasili u damit na. ³ Bigla a netan nu tállo a disepulus di Moises sakay Elias a nákpagguhon ni Jesus. ⁴ Kanya kinagi ni Pedro ni Jesus, “Panginoon, maganda a atoy kami. Ni gusto moy ay maggimet kami ti tállo a tolda: essa para niko, essa para ni Moises sakay essa para ni Elias.” ⁵ Nagupos padi siya nikuna a bigla a liniduman hide nu essa a makasili a diklam. Sakay gábwat hod ay te nagkagi, “Siya u pinakamahal ko a Anak a kinasayaan ko a tahod. Sanigan moy siya!” ⁶ Nikuna nasanig nu disepulus na hide u boses ay nanteng hide sakay dinumapa hide. ⁷ Pero inadeniyan hide ni Jesus sakay kinahap, “Tumaknag kam,” kagi na, “dyan kam manteng!” ⁸ Nikuna inumileng hide ay awan hide ti iba a netan ni awan ti Jesus. ⁹ Alay de a dumegson tu buked, inyutos ni Jesus nide, “Dyan moy kagiyan ni ti deya man u pangitain hanggan a awan huway a mabiyag u Anak nu Tolay.” ¹⁰ Tinanong siya nu disepulus na hide, “Bakin a kagiyan nu maisto hide nu Kautusan ni Moises a kailangan pa a sumoli ti Elias?” ¹¹ Timmábbeg ti Jesus, “Tahod ngane a sumoli pa ti Elias para ihanda u atanan a bagay. ¹² Kagiyan ko nikam a immangay dán ti Elias, pero awan siya natenggi nu tolay hide. Sakay pinahirapan de siya. Konna labe hina a pahirapan de u Anak nu Tolay.” ¹³ Sakay naintendiyan dán nu disepulus na hide a ti Juan a Magbawtismo bál u gusto na kagiyan. ¹⁴ Nadid kássoli di ay te dinemáttan hide a makpal a tolay. Ummadeni u essa a lállaki sakay limmuhod tu atubang na sakay kinagi na, ¹⁵ “Panginoon, mahabag ka tu anak ko a lállaki! Siya ay magpatay sakay mahirapan a tahod ni sumpongán. Dipo palagi siya a meangay tu apoy oni tu dinom. ¹⁶ Inyangay ko dán siya tu disepulus mo hide, pero awan de mapagpiyya.” ¹⁷ Timmábbeg ti Jesus, “Lahi kam a awan ti paniwala sakay maigát ti ulo! Hanggan nikanák moy dapat palagi a kakaguman? Hanggan nikan ta kam a pagtiisan? Iyangay moy he u anak!” ¹⁸ Pinagkagiyan ni Jesus u demonyo sakay lummuwas iye. Nagpiyya a pagdaka u anak. ¹⁹ Káttapos ay immadeni u disepulus na hide ni Jesus sakay nagtanong a awan ti agum a makasanig, “Bakin awan mi mapalakad u demonyo?” ²⁰ Timmábbeg siya,“Dipo awan sapat u paniwala moy. Kagiyan ko nikam: ni magin kapareho la tu kadakal nu bukál nu mustasa u paniwala moy tu Diyos ay makagi moy tu buked a iye, ‘Umagton ka hod!’ sakay umagton iye. Awan ti bagay a awan moy magimet. ²¹ Pero u konna hod a kalase a demonyo ay awan mapalakad ni awan tu pamamagitan nu pagdasal sakay pagkulasyon.” ²² Nadid nikuna a napisan ti Galilea u disepulus na hide, kinagi nide ni Jesus, “U Anak nu Tolay ay itokyon ²³ sakay bunuwán de pero huway a mabiyag tu katállo a aldew.” Nikuna nasanig di iye ay nalungkot hide a tahod. ²⁴ Nadid kádemmát de ti Capernaum, immadeni ni Pedro u tagasingeh hide ti buwis para tu templo. Tinanong de siya, “Magbayad beman ti buwis para tu templo u maistu moy?” ²⁵ “Opo” tábbeg ni Pedro. Sakay nikuna dimmemát siya tu bilay ay nadipalonguwan siya ni Jesus a tinanong: “Anya beman u palagay mo Simon, kan deya magsingeh ti buwis u hari hide ti munduway? Tu sakup na hide oni tu taga iba hide a bansa?” ²⁶ “Tu taga iba hide a bansa po,” tábbeg na. Kinagi ni Jesus, “Ni konna hod, awan dapat magbayad u nasakopan na hide. ²⁷ Pero, para awan la hide ti makagi nikitam, angay ka tu minalno sakay magbahuwan ka. Sakay alapan mo u dipalongo a ikan a maalap mo. Pangángngakán mo u labi na sakay te ketan ka a pilak. Alapán mo sakay angay mu ibuwes para nikita.”

¹ Ti itona panahon ay immadeni ni Jesus u disepulus na hide sakay nagtanong, “Panginoon, deya u pinakamataas tu kaharian ti langit?” ² Dinulaw ni Jesus u essa a anak sakay pinataknág tu atubang de. ³ Kinagi na, “Pakatandaan moy iye: hanggan awan kam nagbago sakay pumarehas tu anak hide a mapakumbaba, talaga a awan kam mebilang tu pinaghariyán dán hide nu Diyos. ⁴ Ni deya man u magpakababa a kumán a anak a iye ay siya u pinakamataas tu pinaghariyán dán nu Diyos hide. ⁵ Sakay ni deya man a tumanggap tu essa a anak a kona he dipo bakán hikán bale hikán u tinanggap na.” ⁶ Kinagi pa ni Jesus “Mas mapiyya pa tu essa a tolay a báttenan siya ti essa a dakal a bito tu alleg na sakay itápduk siya tu bállog nu diget nan magin ginábwatan siya nu pagkasala nu essa tu konna hee a anak a naniwala nikán. ⁷ Mahirap a tahod u kalagayan nu tolay ti munduwáy dipo tu ginabwatan hide nu kasalanan! Awan mawan u ginábwatan hide nu kasalanan, pero makaanteng u mangyari tu tolay a pinaggábwatan nu kasalanan! ⁸ Ni u kamát oni tikád mo u ginábwatan nu pagkasala mo ay káttolan mo iye sakay ibut! Mapiyya pa a angay ka ti langit a káttol u essa mo a kamát oni tikád nan te duwwa a kamát o tikád sakay ti impiyerno labe u angayan mo. ⁹ Sakay ni u mata mo u ginábwatan nu pagkasala mo ay lábwetan mo iye sakay ibut! Mapiyya pa a meangay ka ti langit a buhák u essa a mata nan te duwwa a mata ka sakay meangay tu apoy nu impiyerno.” ¹⁰ Kinagi pa ni Jesus “Magingat kam a dyan moy hamakán u essa nu badit a iye hide. Kagiyan ko nikam: ti langit, u anghel di hide ay pirmi a atoy tu atubang nu Ama ko. ¹¹ Dipo immangay u Anak nu Tolay para iligtas u netawtaw. ¹² Anya tu pangisip moy u gimitán nu essa a tolay a te 100 a tupa ni netawtaw u essa a tupa na? Awan beman a iwahak na u 99 a nagsabsab tu kalamonan para la ehyokan na u netawtaw? ¹³ Kagiyan ko nikam: ni ketan na u netawtaw ay higit u kasayaan na tu essa nan tu 99 a awan netawtaw. ¹⁴ Kona labe hina a awan gusto nu Ama moy a atoy ti langit a metawtaw u essa tu badit a iye.” ¹⁵ Kinagi pa ni Jesus “Ni magkasala niko u kapatkaka mo, angay mo siya uhunan ti maganda. Ni sinanig na ka sakay nagaged ti patawad, u pamaggagum moy bilang mátkaka ay nepasoli mo tu dati. ¹⁶ Pero ni umád siya sumanig, mángkuyog ka pa ti essa o duwwa a kapatkaka para u atanan nu pinaguhonan moy ay mapatunayan nu duwwa o tállo a sestigo. ¹⁷ Ni umád padi siya sumanig nide, ikagi mo iye tu kapisanan nu kapatkaka hide ti pannampalataya. Sakay ni umád padi siya sumanig nide ay ibilang mo dán siya a essa a awan maniwala tu Diyos oni essa a madukás a tagakolekta ti buwis.” ¹⁸ Kinagi pa ni Jesus “Kagiyan ko nikam: anya man a ipagbawal moy ti lutaáy ay ipagbawal ti langit sakay anya man a payagen moy ti lutaáy ay payagen bi ti langit. ¹⁹ Sakay kagiyan ko pa be nikam: ni u duwwa nikam he ti lutaay ay magkaessa tu pagaged ti anya man a bagay tu pagdasal moy ay iyatád iye nikam nu Ama ko a atoy ti langit. ²⁰ Dipo ni te duwwa o tállo a nagipon-ipon dipo nikán ay hoddák a kaguman de.” ²¹ Nadid immadeni ti Pedro ni Jesus sakay nagtanong nikuna, “Panginoon, sangan a beses ko a patawadan u kapatkaka a pahuway-huway a nagkasala nikán? Penpitto beman?” ²² Tinábbeg siya ni Jesus, “Bakán a penpitto la, ni awan kada magakasala siya niko ay patawadan mo. ²³ Dipo u pághari nu Diyos ay kapareho ni iye: nagdisisyon nu essa a hari a pagbayadan u utusan na hide a te utang nikuna. ²⁴ U dipalongo a inyangay nikuna ay u essa a te utang a sapulo a milyun a piso. ²⁵ Dipo awan siya makabayad ay inyutos nu hari a ilako siya, u kabanga na, u anak na hide, sakay u atanan nu ari-arian na para pangbayad. ²⁶ Limmuhod u tolay a iye tu atubang nu hari sakay nákkekagbi ‘Atáddennák mo pa ti panahon sakay bayaden ko niko u atanan.’ ²⁷ Kinagbiyan siya nu hari kanya binale awan na u utang na hide sakay pinalaya siya. ²⁸ Pero kállakad na hod ay nakatagbo na u essa tu kapareho na a utusan a te utang a 500 a piso nikuna. Tinawedán na iye tu bukhaw na sakay kinagi na ‘Magbayad ka tu utang mo nikán!’ ²⁹ Limmuhod u te utang sakay nákkekagbi nikuna ‘Atáddennák mo pa ti panahon sakay bayaden taka.’ ³⁰ Pero awan siya pinumayag; nan impepireso na u kapareho na a utusan hanggan makabayad. ³¹ Nikuna a netan u nangyari nu agum hide a utusan ay nasakitan hide ti husto. Ummangay hide tu hari sakay impilet di u nangyari. ³² Kanya pinudulaw siya nu hari. ‘Hiko, dapat ka a dukás’ kagi nu hari. ‘Pinatawad taka tu utang mo dipo nákkekagbi ka nikán. ³³ Nahabagák niko; awan beman dapat ka be a mahabag tu kapareho mo?’ ³⁴ Sakay tu iyamot nu hari, ay impepireso na u awan ti kagbi a utusan hanggan a mabayadan na u utang na. ³⁵ Kona labe hina u gimitán nikam nu Ama ko a atoy ti langit ni awan moy patawadan u kapatkakka moy.”

¹ Kállipas a kagiyan ni Jesus u bagay hide a iye ay lummakad siya ti Galilea. Sakay immangay siya tu lugar nu Judea a sikatan nu dinom a Jordan. ² Inunonod siya nu dapat a kakpal a tolay sakay pinagpiyya na hide hod. ³ Te sangan a Pariseo hide a immadeni nikuna sakay pinurbaan di siya tu pamamagitan nu tanong a iye “Neayon beman tu Kautusan a sumina u lállaki tu kabanga na ni maski anya a dahilan?” ⁴ Timmábbeg ti Jesus, “Awan moy beman nabasa tu Kasulatan a tu sapul ay nilalang hide nu Diyos, lállaki sakay bábbey? ⁵ Sakay kinagi pa tu Kasulatan a, ‘Dipo he, lakaden nu lállaki u ama na sakay tu ina na. Sakay magpisan hide nu kabanga na sakay magin essa hide.’ ⁶ Kaya awan dán hide a duwwa ni awan essa dán hide. Kanya u pinagessa nu Diyos ay dyan pagsinaan nu tolay.” ⁷ Tinanong siya nu Pariseo hide, “Bakin inyutos ni Moises tu itod a atádden nu lállaki u kabanga na ti katibayan nu págsina tu kabanga bago a sumina u bábbey?” ⁸ Timmábbeg ti Jesus, “Dipo tu igát nu ulo moy kanya pinayagen dálla ni Moises a maari kam a sumina tu kakabanga moy hide. Pero bakán a konna hod tu sapul. ⁹ Kaya kagiyan ko nikam: deya man a lállaki a sumina tu kabanga na ti anya man a dahilan liban tu pángalunya sakay makkabanga ti agum ay nangalunya. [Sakay u mákkabanga tu bábbey a sinina-an nu kabanga na ay nanglunya be.]” ¹⁰ Kinagi nu disepulus na hide, “Ni konna hod Panginoon u kalagayan nu lállaki tu kabanga na ay mas maganda pa a dyan dálla makkabanga.” ¹¹ Timmábbeg ti Jesus, “Awan atanan ay makatanggap ti iye a adal ni awan u pinagkalooban la hide nu Diyos. ¹² Dipo te iba iba a dahilan ni bakin te lállaki a awan makkabanga: u agum ay dipo neenak hide a awan maari mákduhog; u agum ay dipo naoperaan hide. U agum ay awan nakkabanga para mas makapagserbi hide tu Diyos ti maayos. Ni matanggap moy iye a adal ay gimetán moy.” ¹³ Nadid te nagtugan ti anak hide ni Jesus para tanongan de ni maari itupo na u kamát na sakay ipanalangin u anak hide. Pero pinagngallan hide nu disepulus na hide. ¹⁴ Pero kinagi ni Jesus, “Pabayan moy a umadeni nikán u anak hide. Dyan moy hide bawalan dipo tu kapareho de hide u pághariyan nu Diyos.” ¹⁵ Sakay intupo na tu anak hide u kamát na sakay limmakad ti Jesus. ¹⁶ Sakay te bigla be a essa a lállaki a immadeni ni Jesus sakay nagtanong, “Maistu, anya a maganda u gimetan ko para magkahoddák ti biyag a awan ti katapusan?” ¹⁷ Timmábbeg ti Jesus, “Bakin hikán u tanongan mo ni anya u maganda? Essa la u mabait. Ni gusto mo a magkahod ti biyag a awan ti katapusan, sunudán mo u Kautusan hide.” ¹⁸ “Anya hidentod a kautusan?” tanong na. Timmábbeg ti Jesus, “Dyan ka mamuno; dyan ka mangalunya; dyan ka magtakaw; dyan ka magbulibuli tu págsestigo mo; ¹⁹ igalang mo u ama sakay ina mo; sakay mahalán mo u kapareho mo konna tu pagmahal mo tu sadili mo.” ²⁰ Kinagi nu ulito, “Nagimet ko dán ina a atanan. Anya pa wád u dapat ko a gimetán?” ²¹ “Ni gusto mo a magin karapatdapat tu Diyos, angay mo ilako u ari-arian mo sakay iyatád mo tu pobre hide u nanglakuwan. Ni gimetán mo iye, magkahod ka ti kayamanan ti langit. Káttapos ay sumoli ka he sakay sumunod nikán.” tábbeg ni Jesus. ²² Pákkasanig na ni iye, malungkot a humektat u ulito, dipo siya ay tunay ti yaman. ²³ Kinagi ni Jesus tu disepulus na hide, “Kagiyan ko nikam: mahirap mebilang u magkayaman hide tu pinaghariyán dán hide nu Diyos! ²⁴ Sakay kagiyan ko be nikam: mas alisto pa a makasáddap u dakal a hayop a kamelyo tu ábbut nu digum nan magpasakop tu pághari nu Diyos u essa a mayaman.” ²⁵ Nagtaka u disepulus hide nikuna nasanig de iye, kanya nagtanong hide, “Ni konna hod, deya po u maligtas?” ²⁶ Inileng hide ni Jesus sakay kinagi, “Awan talaga iye magimet nu tolay, pero magimet nu Diyos u atanan a bagay.” ²⁷ Sakay nagupos ti Pedro, “Panginoon tukoy mo a nilakaden mi u atanan sakay hikami ay sumunod niko. Anya po u magin gantipala mi?” ²⁸ Kinagi nide ni Jesus, “Pakatandaan moy iye: ni maghari dán u Anak nu Tolay tu kapangyariyan na ti páddemát a mundo a itatag nu Diyos, hikam a sumunod nikán ay maatádden labe ti kapangyariyan para hatulan u sapulo ay ti duwwa a lahi ni Israel. ²⁹ Sakay ni deya man u manglakad tu bilay na, kapatkaka na hide, ama sakay ina na hide, anak na hide, oni u luta na hide para nikán ay makatanggap be ti pendatos a beses tu linakaden na. Sakay pagkalooban siya ti biyag a awan ti katapusan. ³⁰ Pero makpal a nagdipalongo a medimodyan, sakay makpal a dimodyan a medipalongo.”

¹ Intulos ni Jesus u págtoldo na, kinagi na “U pághari nu Diyos ay kapareho ni iye: Essa a dimadimang a tahod ay limmuwas u te kao tu ubasan tu bilay na para magehyok ti upaan na hide. ² Nikuna a nakaehyok dán siya ay nagkasundo hide tu upa nu essa a tolay ti maghapon. Pinaangay na hide tu ubasan na. ³ Lummuwas siya a huway nikuna magalas nuybe tu dimadimang sakay naketa siya ti agum pa a nagistambay la tu palengke. ⁴ Kinagi na nide, ‘Angay kam magtrabaho tu ubasan ko. Atádden takam ti tama a upa.’ Kanya immangay hide. ⁵ Lummuwas dámman u te kao tu alas dose ti tanghale sakay tu alas tres ti apon. Sakay pareho labe u ginimet na. ⁶ Nikuna a magalas singko ti apon ay lummuwas dámman siya sakay naketa pa ti iba a awan be nagtrabaho. Kinagi na nide, ‘Bakin kam a nagistambay la he tu buo a maghapon?’ ⁷ ‘Awan be ti mangatád nikami ti trabaho,’ tábbeg de. Sakay kinagi na, ‘Ni konna hod, angay kam magtrabaho tu ubasan ko. Upaan ta kam’ ⁸ Nikuna a sumaham dán u aldew, kinagi nu te kao nu ubasan tu tagapangasiwa na, ‘Dulawan mo dán u upaan hide sakay suwelduwan mo hide. Magsapul tu dimodyan hanggan tu dipalongo hide a nagtrabaho.’ ⁹ U nagsapul hide tu alas singko ti apon ay nakaalap ti upa a halaga nu nagtarabaho ti essa aldew. ¹⁰ Sakay nikuna immadeni u nagdipalongo hide ay akala de a makaalap hide ti higit pa; pero u kada essa nide ay nakaalap la be hide ti pareho a upa a pangsaldew. ¹¹ Pákkaalap de, nagreklamo hide tu te kao tu ubasan. ¹² Kinagi de, ‘Essa a odas la a nagtrabaho u demodyan hide a dimmemát, samantala maghapon kami a naghirap sakay nagtiis ti makapasi a init nu aldew. Bakin po pinagpare-pareho mo u upa mi?’ ¹³ Pero kinagi na tu essa nide, ‘Barkada, awan taka dinaya. Awan beman nagkasundo kita a u upa ay halaga nu essa a aldew a tarabaho? ¹⁴ Alapán mo u para niko sakay lumakad ka dán. Maanya ni gusto ko a suwelduwan u nannimodyan ti kapareho tu upa ko niko? ¹⁵ Awan beman karapatan ko a gimetan u gusto ko tu ari-arian ko? O makay sumeni ka la tu kabaitan ko?’ ¹⁶ Kaya kinagi ni Jesus “U nedemodyan ay magdipalongo sakay u nagdipalongo ay medimodyan.” ¹⁷ Nadid ummangay di Jesus ti Jerusalem. Alay nu paglakad de tu dilan a patamo ti Jerusalem ay binukod na u sapulo ay ti duwwa. Kinagi na nide, ¹⁸ “Magsanig kam, patamo kitam ti Jerusalem. Hod ay itukyon u Anak nu Tolay tu pupuno nu saserdote hide sakay tu maisto hide nu Kautusan. Hatulannák de ti kamatayan, ¹⁹ sakay ipaubaya tu awan hide maniwala tu Diyos. Sestiyánnák de, haplitán ti grabe sakay ipako tu kudus; pero huwayák a biyagán nu Diyos tu ikatállo a aldew.” ²⁰ Nadid essa aldew immadeni ni Jesus u kabanga ni Zebedeo, kaguman na u anak na hide. Te gusto siya a ipakpágguhon, kaya limmuhod siya tu atubang ni Jesus. ²¹ “Anya u maari a magimet ko para niko?” tanong ni Jesus. Timmábbeg siya, “Gusto ko a ipagkaloob mo tu duwwa ko a anak u karapatan a umetnod a kadatig mo tu kaharian mo---essa ti kawanan sakay essa ti kawihi. Maghari hide a kaguman mo” ²² “Awan moy tukoy u agidán moy.” kagi ni Jesus nide. “Makaya moy beman a tággadan u hirap a tiisán ko?” “On,” tábbeg de. ²³ Kinagi ni Jesus, “U hirap ko ay makayanan moy ngane. Pero bakán a hikam u mangpile ni deya u umetnud tu kawanan sakay tu kawihi ko. Itona hide a inagid moy ay para tu pinaghandaan hide nu Ama ko.” ²⁴ Nikuna a nasanig iye nu agum a sapulo, nagngal hide tu matkaka. ²⁵ Kaya pinaadeni hide ni Jesus a atanan sakay kinagi na nide, “Tukoy moy a u pupuno nu awan hide maniwala tu Diyos ay maghari tu tolay na hide. Sakay hide u dapatay a masunod ni anya man u gusto de. ²⁶ Pero bakán a konna hina u dapat a mangyari nikam. Nan, ni deya man nikam u masoh a magin mataas ay dapat siya u magserbi. ²⁷ Sakay deya man u masoh a magin puno ay dapat magin tagaserbi moy. ²⁸ Konna tu Anak nu Tolay a awan ummangay para pagserbiyan nan para magserbi sakay iyalay na u biyag na para matubos u kakpalan.” ²⁹ Nadid tu hektat de ti Jerico, ti Jesus ay inunonod nu dapat a kakpal a tolay. ³⁰ Sakay te duwwa a buhák a mággetnod tu degdeg nu dilan. Nikuna a nasanig de a magtaleb ti Jesus ay nagpapakhawan hide “Anak ni David, mahabag ka nikami!” ³¹ Pinagkagiyan hide nu katolayan a ummimang pero lalo hide a pimmakhaw, “Anak ni David, mahabag ka nikami!” ³² Pinumirmi ti Jesus sakay dinulaw na hide sakay tinanong, “Anya u maari a gimetan ko nikam?” ³³ Tinumábbeg hide, “Panginoon, pagpiyyaan mo kami tán maketa kami!” ³⁴ Kinagbiyan hide ni Jesus kanya kinahap na u matamata de. Pagdaka hide a naketa sakay tulos a sumunod nikuna.

¹ Nadid nikuna adeni dán ti Jesus sakay u disepulus na hide ti Jerusalem ay umimang hide ti Betfage, tu Buked nu Olibo hide. Pinadipalongo ni Jesus u duwwa a disepulus. ² Kinagi na nide, “Angay kam tu sumunud a banuwan. Metan moy hod u essa a inahin a asno a nakaigut, kaguman u bul-o na. Lukasán moy sakay iyangay moy he. ³ Ni te magtanong nikam, kagiyan moy la a kailangan nu Panginoon me. Sakay pagdaka na itod a ipatawed nikam.” ⁴ Nangyari iye tánni matupad u kinagi nu propeta tu itod: ⁵ “Kagiyán moy tu taga banuwan nu Sion, ‘Ilengan moy, páddemát dán u hari moy. Siya ay mapagpakumbaba; nakasakay la tu essa a bul-o nu asno.’ ’ ⁶ Immangay ngane u duwwa a disepulus sakay ginimet u inyutos ni Jesus. ⁷ Inyangay de u inahin a asno sakay u bul-o ni Jesus. Sakay insapin de tu adag nu asno hide u alikáb-káb de sakay simmakay ti Jesus. ⁸ Bilang paggalang ay makpal a naglatag tu alikáb-kab de tu dilan; u agum be ay nangkáttol hide ti babbadit a pinget nu kayo sakay inlatag di be tu dilan. ⁹ Nagpakhaw u tolay hide tu dipalongo sakay u umunonod nikuna: ”Puriyan u Anak ni David! Pagpalaán u dumemát bilang tagapágserbi nu Panginoon! Puriyan u Diyos!” ¹⁰ Kássáddap ni Jesus ti Jerusalem, nagulo u buo a banuwan. “Deya wád iye?” namagtanongan hide. ¹¹ “Ti Jesus, u propeta a taga Nazaret a Galilea,” tábbeg be nu kakpalan. ¹² Sakay simmáddap ti Jesus tu templo. Pinaluwas na u naglako hide sakay u namali hod. Impasakab na u lamesaan hide nu tagapalit ti pilak sakay u pagetnudan nu naglako hide ti kalapate. ¹³ Kinagi na, “Nesulat ti Kasulatan: U bilay nu Diyos ay madulaw a lugar nu págdasalan. Pero ginimet moy a lugar nu mágtakaw hide.” ¹⁴ Te buhák sakay pilay hide a inyangay de ni Jesus tu templo sakay pinagpiyya na hide. ¹⁵ Naiyamut u pupuno hide nu saserdote hide sakay u maisto hide nu Kautusan ni Moises nikuna netan de u kababalaghan a ginimet na, sakay u anak hide a magpakhaw tu disalad nu templo, “Pagpalaán nu Diyos u Anak ni David!” ¹⁶ Sakay tinanong de ni Jesus, “Nasanig mo beman u kagiyan de?” “Nasanig ko,” tábbeg ni Jesus. “awan moy beman nabasa a nesulat tu Kasulatan ‘ Tinolduwan mo u anak hide sakay u sumuso pa hide a magpuri niko.’ ” ¹⁷ Hinumektat ti Jesus tu banuwan sakay nanamo ti Betania. Hod siya a nagpalipas ti gibi. ¹⁸ Tu dimadimang, nikuna a pasoli ti Jesus tu banuwan ay nagaláp siya. ¹⁹ Netan na u essa a kayo nu igos tu degdig nu dilan sakay inadeniyan na iye. Pero awan siya ti netan a bunga ni awan u duuduun na la. Kaya kinagi na tu kayo nu igos, “Awan ka dán magbunga magpakahanggan!” Sakay pagdaka ay nalanás iye. ²⁰ Nikuna netan iye nu disepulus na hide ay naluktot hide. “Kodya nalanás a pagdaka u kayo nu igos?” tanong de. ²¹ Timmábbeg ti Jesus, “Pakatandaan moy iye: ni te pánnampalataya kam tu Diyos sakay awan kam magalinlangan ay magimet moy be u ginimet ko tu kayo nu igos a iye. Bakán la a iye u magimet moy! Ni kagiyan moy tu buked a iye, ‘Lumakad ka hina; lumukso ka tu diget,’ ay mangyari u kinagi moy. ²² Sakay anya man a agidan moy tu panalangin ay maalap moy, ni naniwala kam.” ²³ Nadid simmádap dámman ti Jesus tu templo. Alay na a nagtoldo, immadeni nikuna u pupuno nu saserdote hide sakay u pinuno nu banuwan sakay tinanong di siya, “Anya u karapatan mo a maggimet ti hide iye a bagay? Deya u nangatad niko ti kapangyariyan?” ²⁴ Timmábbeg ti Jesus, “Tanongán ko kam be. Ni tábbegánnák moy ay kagiyan ko be nikam ni deya u nangatád nikán ti kapangyariyan a maggimet ti iye hide a bagay. ²⁵ Deya u nangatád ti kapangyariyan ni Juan para magbawtismo, u Diyos beman oni u tolay?” Sakay namagguhon hide “Ni kagiyan tam a gábwat tu Diyos, ay kagiyan na bi nikitam, ‘Bakin awan moy siya pinaniwalaan?’ ²⁶ Pero ni kagiyan tam be a gábwat tu tolay, makay be ni anya u gimetan nikitam nu totolay ni banuwan. Dipo tenggiyan de a ti Juan ay essa a propeta.” ²⁷ Kaya tinábbeg de ti Jesus, “Awan mi tukoy!” Kinagi be ni Jesus, “Ni konna hod ay awan ko be tábbegan u tanong moy.” ²⁸ Nadid kinagi ni Jesus “Anya u palagay moy he? Te essa a tolay a te duwwa a anak a lállake. Ummadeni siya tu panganay sakay kinagi na, ‘Anak, angay ka magtrabaho tu ubasan nadid a aldew.’ ²⁹ ‘Umad ko,’ tábbeg na. Pero nagbago u isip na sakay umangay labe. ³⁰ Ummadeni labe u ama tu ikaduwwa sakay konna labe hod u kinagi na. ‘On,’ tábbeg na, pero awan be inumangay. ³¹ Deya tu duwwa u sumunod tu gusto nu ama na?” “U panganay po,” tábbeg de. Sakay kinagi nide ni Jesus, “Kagiyan ko nikam: u madukás hide a tagakolekta ti buwis sakay belyas hide ay magdipalongo pa nan nikam a magpasakop tu pághari nu Diyos. ³² Dipo immangay nikam ti Juan sakay intoldo na u matuwid a biyag sakay awan moy siya pinaniwalaan. Pero pinaniwalaan siya nu madukás hide a tagakolekta ti buwis sakay tu belyas hide. Netan moy iye, pero awan kam padi nagsisi sakay naniwala nikuna.” ³³ Nadid intulos ni Jesus u págtoldo na. “Sanigan moy u essa pa a talinghaga. Te essa a tolay a nagmula ti ubas tu luta na sakay kinudalan na. Naggimet siya hod ti pagpáspásan ti ubas. Sakay naggimet be siya ti essa a malangkaw a pagbantayan. Káttapos, inwahak na tu mágtarabaho u ubasan na sakay immangay siya tu iba a lugar. ³⁴ Nikuna a dimmemát u panahon nu sakbudas, pinaangay na u utusan na hide para alapán di u kabunong na. ³⁵ Pero ginábbu hide nu mágtarabaho hide; binálbág de u essa, binunu u kaduwwa, sakay binábbudas di be ti bito u katállo. ³⁶ Pinaangay dámman nu te kao u mas makpal a utusan, pero konna labe hod u ginimet nu mágtarabaho hide. ³⁷ Tu katapusan ay pinaangay na u anak a lállake. ‘Sigurado a igalang de u anak ko,’ inisip na. ³⁸ Pero nikuna netan nu magtrabaho hide u anak ay namagguhon hide, ‘Iye u tagapagmana. Kamon dán! Bunuwán tamon tán makao tam u mana na.’ ³⁹ Kaya ginábbu di siya, inyangay tu luwas nu ubasan sakay binunu.” ⁴⁰ Káttapos nu talinghaga ay tinanong hide ni Jesus, “Kássoli nu te kao tu ubasan, anya wád u gimitán na tu mágtarabaho hide?” ⁴¹ Timmábbeg u pupuno hide, “Pahirapan sakay bunuwán na u magkadukás a itod hide sakay ipatarabaho u ubasan tu iba a mangatád nikuna tu kabunong na tu panahon ni sakbudas.” ⁴² Tinanong hide ni Jesus, “Awan moy beman nabasa u nesulat tu Kasulatan? ‘U bito a inadeyan nu karpentero hide nu bilay, siya u nagin bito a pinakaposte nu bilay. Iye ay ginimet nu Panginoon sakay iye ay makataka-taka!’ ⁴³ Kaya ngane kagiyan ko nikam: Bakán dán a hikam u pághariyan nu Diyos ni awan u bansa a magserbi nikuna ti matapat. ⁴⁴ U mesangdul ti bitowan iye ay mamogmog sakay mapassit u mehagnakan ni iye.” ⁴⁵ Nasaneg nu pupuno nu saserdote hide sakay nu Pariseo hide a u talinghaga hide ni Jesus sakay nabati de a hide u patamaan na. ⁴⁶ Dakáppan de nakwa siya, pero nanteng hide tu tolay, dipo tiningge de a propeta ti Jesus.

¹ Nadid nagtoldo dámman ti Jesus tu pupuno nu Judeo hide tu pamamagitan nu talinghaga. Kinagi na, ² “U pághari nu Diyos ay kapareho ni iye: Naghanda ti essa a handaan u essa a hari para tu kasal nu anak na a lállake. ³ Inutusan na u utusan na hide para akitan u naimbitaan hide pero umád de a mákpágkasayaan. ⁴ Huway siya naggutos ti iba a utusan hide sakay pinagbilinan a, ‘Kagiyan moy tu inimbitaan hide ‘Nehanda ko dán u handaan. Nabuno ko dán u baka ko hide, u pinatabe hide a bul-o sakay handa dán be u atanan a bagay. Kamon dán tu handaan!’ ’ ⁵ Pero awan iye pinansin nu naimbitaan hide . Immangay hide tu sadi-sadili de a angayan, u essa ay tu luta na sakay u essa ay tu negosyo na. ⁶ U agum ay ginábbu de u utusan hide, pinahirapan sakay binunu. ⁷ Naiyamut a tahod u hari. Pinaangay na u sundalo na hide, impabuno na u nangbuno hide sakay impatutod na u banuwan de. ⁸ Kinagi na tu utusan na hide, ‘Nakahanda dán u handaan, pero awan karapat-dapat u inimbitaan hide. ⁹ Kaya umangay kam tu kakarsada a makpal a tolay sakay imbitaan moy tu kasalan u atanan a ketan moy.’ ¹⁰ Lumuwas ngane hide tu matolay a kakarsada u utusan hide sakay kinuyog u atanan a netan de, magkadukás sakay magkabait. Kanya naputat nu bisita hide u lugar a págkasalan. ¹¹ Nikuna ilengán nu hari u bisita hide ay netan na hod u essa a tolay a awan nakadamit para tu handaan. ¹² ‘Barkada, bakin nakasaddap ka he a awan nakadamit ti maganda?’ tanong na. Awan ti makagi u tolay. ¹³ Kaya kinagi nu hari tu utusan na hide ‘Gilotán moy u kamát na sakay tikád sakay itapduk siya tu pinakamadihám a lugar a hod tu luwas. Hod ay mághirap siya ti grabe sakay mággaadoyan’ ”. ¹⁴ Kaya kinagi ni Jesus “Dipo makpal u nadulawan pero sasangan u mapili.” ¹⁵ Nadid linumakad u Pariseo hide sakay pinaguhunan ni pakodya de madakáp ti Jesus tu tábbeg na hide. ¹⁶ Kaya pinaangay de nikuna u sangan tu disepulus de hide a kaguman u sangan a sakop ni hari Herodes. Kinagi de, “Maistu, tukoy mi a hiko ay matapat sakay itáttoldo mo u buo a tatahoden a gusto nu Diyos a gimetan nu tolay hide . Awan ka ti piliyán dipo pareho u pangileng mo tu atanan a tolay. ¹⁷ Anya wád tu palagay mo? Neayon beman tu Kautusan a magbuwis tu Hari a Cesar oni awan?” ¹⁸ Pero tukoy ni Jesus u plano de a madukás kanya kinagi na, “Mapagkunware kam! Bakin gustowák moy a linlangán? ¹⁹ Dah iyatád moy he nikán u pilak a pággibuwis.” Sakay inatádden de siya. ²⁰ “Kandeya a hupa sakay ngahan u ketan he?” tanong ni Jesus. ²¹ “Kan hari a Cesar po,” tábbeg de. Sakay kinagi na nide, “Ni konna hod, iyatád moy ni hari a Cesar u para ni hari a Cesar sakay tu Diyos u para tu Diyos.” ²² Nagtaka hide nikuna nasanig de iye sakay linumakad hide. ²³ Ti aldew labeyan itod ay immadeni ni Jesus u sangan a Saduseo hide. Hide u tolay a naniwala a awan biyagan a huway u natay hide. Kinagi de, ²⁴ “Maisto, intoldo po ni Moises a ni matay a awan ti anak u essa a lállake, u kapatkaka na u dapat mangkabanga tu bilo para magkaanak hide para tu natay. ²⁵ Tu itod ay te pitto a matkaka a lállake he ti nikami. Nakkabanga u panganay sakay natay a awan ti anak kanya kinabanga u kabanga na nu kasunod a kapatkakka na. ²⁶ Kona labe u nangyari tu kaduwwa, tu kátallo hanggan tu kápitto. Natay hide a atanan. ²⁷ Káttapos ay natay be u bábbey. ²⁸ Deya po tu pitto u magin kabanga na tu huway a kákkabiyag dipo siya ay nakabanga de a atanan?” ²⁹ Timmábbeg ti Jesus, “Liwat kam a tahod, dipo awan moy tukoy u Kasulatan hide oni u kapangyariyan nu Diyos. ³⁰ Dipo tu huway a kákkabiyag, u tolay hide ay awan magkabanga; hide ay magin kapareho nu anghel hide ti langit. ³¹ Tungkol be tu huway a kákkabiyag, awan moy padla beman nabasa ti Kasulatan u kinagi nikam nu Diyos? Kinagi na, ³² ‘Hikán u Diyos ni Abraham, Diyos ni Isaac sakay Diyos ni Jacob.’ U Diyos ay bakán Diyos nu patay, ni awan nu biyag hide.” ³³ Sakay nikuna nasanig iye nu tolay hide ay nagtaka hide tu toldo na. ³⁴ Nagipun-ipon u Pariseo hide nikuna nabaheta de a napatahimik ni Jesus u Saduseo hide. Sakay nagisip hide ti itanong be ni Jesus. ³⁵ Sakay essa nide a malalaki tu Kautusan, u nagtanong ni Jesus para purbaan siya. ³⁶ “Maisto, anya po u pinakamahalaga a utos tu Kautusan?” ³⁷ Timmábbeg ti Jesus, “Mahalán mo u Panginoon mo a Diyos ti buo a puso, ti buo a kaliduwa sakay ti buo a isip. ³⁸ Sa iye u pinakamahalaga a utos. ³⁹ Sa be iye u kaduwwa: Mahalán mo u kapareho mo konna tu pagmahal mo tu sadili mo. ⁴⁰ U duwwa a utos a iye u ginábwatan nu buo a Kautusan ni Moises sakay u toldo nu propeta hide.” ⁴¹ Tinanong ni Jesus u napisan hide a Pariseo: ⁴² “Anya u pákkatukoy moy tungkol ti Mesias? Kan deya siya a lahi?” “Ni Hari David po,” tábbeg de. ⁴³ “Ni konna hod,” kagi ni Jesus, “bakin dimmulaw nikuna a Panginoon ti David nikuna inggiyya siya nu Ispiritu? U kinagi na, ⁴⁴ ‘Kinagi nu Panginoon ko tu Panginoon, ‘Umetnud ka tu kawanan ko, hanggan a mapasuko ko niko u atanan a kadima mo hide.’ ⁴⁵ Ti David mismo u dimmulaw nikuna a Panginoon; kodya a makagi a lahi ni David u Mesias?” ⁴⁶ Ni essa man nide ay awan ti makatábbeg nikuna. Sakay sapul hod awan dán ti nangahas a magtanong nikuna.

¹ Nadid káttapos ay kinagi ni Jesus tu tolay hide sakay tu disepulus na hide, ² “U maisto hide nu Kautusan ni Moises sakay u Pariseo hide u tinenggi a tagapaliwanag nu Kautusan ³ Kaya gimetan moy u itáttoldo de sakay sunudán moy u inyutos de. Pero dyan moy ahigán u gimet de dipo awan de gimetán u itáttoldo de. ⁴ Naghanda hide ti madágge a karga sakay pinabaklay de tu tolay hide pero maski ni toldo man ay umád de iyahikad para tumulong. ⁵ Puro a pagpakunware u gimet de hide. Pinalabang de u págdattonan de ti bersikulo de sakay pinaatakdug de u garayan nu damit de hide para mapansin hide nu tolay a mágserbi hide tu Diyos. ⁶ U gugusto di ay hide u paetnudán tu págetnudan a para tu mataas a tolay tu handaan sakay u pinakanimportante a lugar tu sinagoga hide. ⁷ U gusto di pa ay igalang hide tu kakarsada sakay dulawan hide a maisto nu tolay hide. ⁸ Pero hikam ay dyan kam padulaw a maisto dipo essa la u Maisto moy sakay hikam a atanan ay matkaka. ⁹ Sakay dyan moy dulawan a ama u deya man a tolay tu luta dipo essa la u Ama moy, u Ama a atoy ti langit. ¹⁰ Dyan kam padulaw a amo dipo essa la u amo moy, u Mesias. ¹¹ U pinakamataas nikam ay dapat u magin utusan moy. ¹² U nagpakataas ay medibbe sakay u nagpakababa ay melangkaw.” ¹³ Nadid pinagkagiyan ni Jesus u maisto hide nu Kautusan ni Moises sakay u Pariseo hide, “Kakagbi kam! Mapagkunware kam! Hadlangán moy u tolay hide para awan hide mapaghariyán nu Diyos. Umád moy a magpasakop tu pághari nu Diyos ay hadlangan moy pa u masoh a magpasakop! ¹⁴ Kakagbi kam sakay mapagkunware kam! Inalap moy u ariarian nu bábbey a bilo sakay u págdasal moy ay pinaatakdug moy para awan de mahalata u págkunware moy! Dipo tu gimet moy a iye ay lalo pa a dumagge u parusa moy! ¹⁵ Kakagbi kam talaga, maisto hide nu Kautusan ni Moises sakay Pariseo hide! Mapagkunware kam! Ahabisan moy u diget sakay angayan u iba a bansa, makaakit kam la ti essa a awan maniwala tu relihiyon moy. Sakay ni maakit moy dán ay ginimet moy pa mas madukás nan nikam. Kanya nagin doble u dahilan para siya ay parusaan ti impiyerno. ¹⁶ Kakagbi kam, buhák a tagagiyya! Itáttoldo moy a ni manumpa ka tu ngahan nu Templo ay maari mo a awan tupadán u panantu mo. Pero ni manumpa ka tu ginto nu Templo ay dapat mo a tupadán u panantu mo. ¹⁷ Loko kam a buhák! Awan kam talaga ti tukoy! Anya u mas mahalaga, u ginto oni u Templo a nángpalinis tu ginto? ¹⁸ Kagiyan moy pa be a ni ti deya man u manumpa tu págalayan ay maari a awan tupadán u panantu na. Pero ni manumpa ka tu alay a atoy tu pággalayan, dapat mo a tupadán u panantu mo. ¹⁹ Awan moy talaga naintendiyán! Anya beman u mas mahalaga, u alay oni u pággalayan a nángpalinis tu alay? ²⁰ Kaya ni nanumpa ka tu págalayan ay bilang nanumpa ka dán be tu atanan nu alay a hod hod. ²¹ Ni nanumpa ka tu ngahan nu Templo ay bilang nanumpa ka dán be tu ngahan nu Diyos a mágyan hod. ²² Sakay ni ipinanumpa ni ti deya man u langit, ipinanumpa na u págyanan nu Diyos sakay u Diyos a mismo. ²³ Kakagbi kam, maisto hide nu Kautusan ni Moises sakay Pariseo hide! Mapagkunware kam! Inyatád moy u ikapo maski u págrekado a awan ti halaga pero kinalimunan moy a igimet u mas lalo a mahalaga a adal ti Kautusan: Hikam ay magin pantay tu atanan a bagay, u magin makakagbiyan sakay u katapatan. Tama ngane a mag-ikapo kam pero dyan moy be kalimunan a gimetan u mas mahalaga tu Kautusan. ²⁴ Buhák kam a tagagiyya! Ibut moy u langaw tu ainuman moy pero itallán moy u maski u dakal a hayop konna ti kamelyo! ²⁵ Kakagbi kam, maisto hide nu Kautusan ni Moises sakay Pariseo hide! Mapagkunware kam! Lalinisán moy u luwas nu tasa sakay nu penggan moy pero u disalad nu puso moy ay putat ti daya, dámmot sakay págsamantala. ²⁶ Buhák kam Pariseo hide! Linisán moy pa u atoy disalad nu tasa sakay nu penggan moy sakay magin malinis labe u luwas! ²⁷ Kakagbi kam, maisto hide nu Kautusan ni Moises sakay Pariseo hide! Mapagkunware kam! U kapareho moy hide ay u pantiyong a pinaganda, maganda ngane tu luwas pero ti disalad ay putat ti buyok sakay tulang. ²⁸ Talaga konna kam tu lábbángan! Tu pangeleng nu tolay ay magkabait kam pero u tatahoden, tunay kam a mapagkunware sakay madukás.” ²⁹ Kinagi pa ni Jesus nide, “Kakagbi kam, maisto hide nu Kautusan ni Moises sakay Pariseo hide! Mapagkunware kam! Nagpagimet kam ti lábbángan nu propeta hide a binuno nu nuno moy hide. Sakay dinikorasyonan moy u lábbáng de. ³⁰ Sakay kagiyan moy nadid, ‘Ni hikami nakwa u biyag tu kapanahonan nu nuno mi hide ay awan mi impabuno u propeta hide.’ ³¹ Dipo ti kinagi moyan iye ay inamin moy a hikam u aapo hide nu nangpabuno tu propeta hide tu itod! ³² Sige! Tapusán moy u sinapulan nu nuno moy hide! ³³ Malinlang kam konna tu biklat! Awan kam talaga makaiwas, maparusaan kam ti impiyerno! ³⁴ Magpaangayyák nikam ti propeta hide, mágkalalaki a tolay sakay u maisto hide nu Kautusan ni Moises! Bunuwán moy u sangan nide sakay u agum ay ipako moy ti kudus. U agum ay haplitán moy tu sinagoga sakay u agum ay ehyokán moy tu banubanuwan tán madakáp moy. ³⁵ Dipo tu gimitán moy, dumemát nikam u parusa tu págbuno ti atanan nu tolay a matuwid tu buo a mundo. Magsapul tu págbuno tu awan ti kasalanan a ti Abel hanggan tu págbuno ni Zacarias a anak ni Baraquias. Binuno moy siya tu bállog nu págalayan sakay tu templo. ³⁶ Kagiyan ko nikam: u parusa nu atanan an iye ay meangay ti tolay hide ti kasalukuyan.” ³⁷ Kinagi pa ni Jesus, “Jerusalem, Jerusalem! Pinabuno mo u propeta hide sakay bábbudasán moy u pinaangay nu Diyos nikam! Sangan a beses ko a sinikap a alagaan u mágyan niko, konna tu paglákáp nu essa a inahin tu sepsep na hide pero inadiyán mo. ³⁸ Kaya nadid ay pabayan nu Diyos u Templo moy sakay awan dán ti mágyan. ³⁹ Kagiyan ko nikam: Awannák moy ketan hanggan awan dumemát u odas a kagiyan moy, ‘Pagpalaán u dumemát tu ngahan nu Panginoon!’ ”

¹ Nadid nikuna nakaluwas dán ti Jesus tu templo ay immadeni u disepulus sakay intoldo de nikuna u bilay hide nu templo. ² Pero kinagi na nide, “Ketan moy i bilayan iye hide? Pakatandaan moy! Dumemát u aldew a awan hina ti mabuhay a bilay. Atanan ay masida!” ³ Káttapos immangay ti Jesus tu Buked nu Olibo. Alay na hod a keetnod, sekreto siya a tinanong nu disepulos na hide, “Nikan beman mangyari i bagayan ina hide? Anya po u magin palatandaan nu kássoli mo a huway sakay u katapusan nu mundo?” ⁴ Timmábbeg ti Jesus, “Mag-ingat kam a awan kam metawtaw ni ti deya man! ⁵ Dipo makpal a umangay tu ngahan ko sakay magkagi a, ‘Hikán u Mesias!’ Sakay makpal hide a metawtaw. ⁶ Makasanig kam ti te gera sakay bahebaheta a te gera. Dyan kam maligalig. Dapat a mangyare hide iye pero bakán padla iye u katapusan. ⁷ Dipo mákpággera u bansa hide laban tu iba-iba a bansa sakay u kahariyan hide tu iba-iba a kahariyan. Magkahod ti sákaláp sakay linog tu iba iba a lugar. ⁸ Pero u atanan ni iye ay sapul palla nu pághirap hide. ⁹ Ti panahon an itod, kaiyamután kam nu atanan a tolay dipo nikán sakay dakáppán para pahirapan sakay bunuwán. ¹⁰ Makpal a umadág tu pánniwala de sakay maiyamut tu balang essa. Itokyon de u kapareho de ti pánnampalataya. ¹¹ Makpal u magpanggap a propeta sakay itawtaw de u kakpalan. ¹² U kadukássan ay kumalat tu atanan a lugar kanya mawan u pagmahal nu kakpalan. ¹³ Pero u matapat hanggan ti katapusan ay siya u maligtas. ¹⁴ Sakay mepaliwanag ti buo a mundo u Maganda a Baheta a tungkol tu pághari nu Diyos para iye ay matukoyan nu atanan a bansa. Sakay káttapos ay dumemát u katapusan.” ¹⁵ Sakay kinagi pa ni Jesus “Metan moy a mangyari tu Banal a Lugar nu Templo. Magtaknág u Awan Ti Galang Tu Diyos a inhula ni Propeta Daniel tu itod. Pakaintendiyan iye nu magbasa! ¹⁶ Ni mangyari dán iye, u atoy tu banuwan nu Judea ay dapat guminan dán tu buked. ¹⁷ U atoy tu atáp ay dyan mag-isip a summádap tu bilay na para mangalap ti maski ánya. ¹⁸ Sakay u atoy tu araduwan di ay dyan dán soli tu bilay di para mangalap ti damit. ¹⁹ Kakagbi a tahod u mabuktet sakay u magpasuso ti aldew an itod! ²⁰ Ipagdasal moy a u págginan moy ay dyan metaon ti sakdagnen o tu Aldew nu Káimang. ²¹ Dipo ti itona a panahon, u tolay hide ay magdanas ti pinakagrabe a pághirap a awan padla nadanas sapul gimetán u mundo hanggan nadid. Sakay awan dán be madanas pa a huway. ²² Sakay ti katotohanan ni awan paapehetan nu Diyos u panahon an itod ay awan ti maligtas. Pero para tu tolay hide nu Diyos ay ipaapehet na u panahon”. ²³ Sakay kinagi pa ni Jesus “Ni te magkagi nikam, ‘Atoy dán u Mesias!’ o ‘Atoy hina siya!’ ay dyan kam maniwala. ²⁴ Dipo te magkunware hide a Mesias sakay te pumeta a awan tatahoden a propeta. Mangpeta hide ti makataka-taka a tanda sakay kababalaghan hide para itawtaw ni maaari, pate u tolay hide nu Diyos. ²⁵ Pakatandaan moy a indipalongo ko dán iye a kinagi nikam. ²⁶ Kaya ni kagiyan de nikam, ‘Atoy hod siya ti kaparangan.’ ay dyan kam umangay. Ni kagiyan de, ‘Atoy hod siya ti disalad.’ Ay dyan kam maniwala. ²⁷ Dipo ni kodya magdemlag u kilat ni magginan gábwat ti sikatan hanggan ti sahámman ay konna labe hod u págdemát nu Anak nu Tolay. Ketan nu atanan sakay bigla. ²⁸ Ni hadya te bangkay, hod be umipon u wakwak hide.” ²⁹ Kinagi pa ni Jesus “Káttapos ni pághirapan itod, pagdaka magdiham u aldew sakay awan magdemlag u bulan. Matápduk u biton hide a gábwat ti langit sakay maibutan u kapangyariyan hide a hod ti kalawakan. ³⁰ Káttapos ay pumeta ti langit u tanda nu Anak nu Tolay sakay magdalamhati ti grabe u atanan a bansa. Metan de u Anak nu Tolay a hod tu diklam, dumemát a makapangyariyan sakay grabe a demlag. ³¹ Tu mabegsák a tánnog nu tambuli, iyutus na tu anghel na hide a angay tu buo a mundo sakay pisanan de u tolay hide nu Diyos.” ³² Kinagi pa ni Jesus “Pakaintendiyan moy u adal a maalap tu kayo a igos: ni magduun ti bigo u pinget na, tukoy moy a adeni dán u kássinag. ³³ Konna labe hina, ni metan moy u atanan a kinagi ko ay matukoyan moy a adeni dán u panahon nu káddemát ko---adeni dán a talaga. ³⁴ Pakatandaan moy: mangyari i atananan iye buhol a matay u lahi nadid. ³⁵ Mawan u langit sakay u luta pero u upos ko hide ay awan mawan.” ³⁶ Kinagi pa ni Jesus “Pero awan ti nakatukoy tu aldew sakay panahon nu káddemát ko. Maski u anghel hide ti langit oni u Anak be ay awan na tukoy---u Ama la u nakatukoy ti iye. ³⁷ - ³⁸ U káddemát nu Anak nu Tolay ay pareho tu káddemát nu lonsu tu itod tu panahon ni Noe. Tu itod, u tolay ay naghandaan, naglasingan sakay nagkabanga, hanggan tu aldew a makasáddáp tu dakál a abang ti Noe. ³⁹ Dimmemát u lonsu a awan di namalayan sakay nalemas hide a atanan. Konna labe hod u mangyari tu págdemát nu Anak nu Tolay, awan di maandaman. ⁴⁰ Ti panahonan itod, te duwwa a lállaki a magtarabaho tu luta. Alapán u essa sakay mawahak u essa. ⁴¹ Te duwwa a bábbey a magkaguman a maggiling. Alapán u essa sakay mawahak u essa. ⁴² Kaya magbantay kam dipo awan moy tukoy ni nikan u aldew a umangay u Panginoon moy. ⁴³ Pakatandaan moy iye: ni tukoy la nu makábbilay ni anya a panahon ti gibi a dumemát u mágtakaw, nagbantay nakwa siya sakay awan na pabayan a sáddápán u bilay na. ⁴⁴ Kaya magin handa kam a pirmi dipo dumemát u Anak nu Tolay ti panahon a awan moy asaan.” ⁴⁵ Kinagi pa ni Jesus “U matapat sakay malalaki a utusan ay siya u atádden ti kapangyariyán nu amo na a mamahala tu agum a alipin na hide. Siya u mangatád nide ti makan de tu tama a panahon. ⁴⁶ Pinagpala i utusanan itod, ni demáttan siya a matapat tu tarabaho na tu kássoli nu amo na! ⁴⁷ Kagiyan ko nikam: ipebahala nikuna nu amo na u atanan nu ari-arian na. ⁴⁸ Pero ni madukás i utusanan itod ay isipan na ‘Malay pa bagu a sumoli u amo ko.’ ⁴⁹ Sakay sapulan na a bálbagán u kapareho na a utusan sakay mákpágkainan sakay mákpáginoman tu lasingero hide. ⁵⁰ Magsoli u amo ni utusanan itod tu aldew a awan na asaan sakay tu panahon a awan na tukoy. ⁵¹ Grabe a higpit u magin parusa nu amo ti alipin an itod. Iyangay siya tu lugar a kaguman u mapagkunware hide. Hod hide maghirap a tahod sakay mággaadoyán.”

¹ Kinagi pa ni Jesus “Kona he a talinghaga mepareho u kahariyan nu Diyos: Te sapulo a mámmadiket a amigo nu ikasal hide. Ayon tu kaugalian de, tu aldew nu kasal ay tagbuwan de u lállaki a ikasal a te tawed u bawat essa nide a simbuwan. ² U limma nide ay magkalalaki sakay u limma ay awan ti tukoy. ³ Dipo u awan hide ti tukoy ay nagtawed hide ti simbuwan de pero awan nagtawed ti reserba a gas. ⁴ Pero u magkalalaki ay nagtawed ti gaas bukod pa tu atoy tu simbuwan de. ⁵ Nalay a dimmemát u lállaki a ikasal, kanya nágtonka dán hide a atanan sakay netidug. ⁶ Pero nikuna hatinggabi dán ay te pimmakhaw ‘Atoy dán u lállaki a ikasal! Tumagbu kamon!’ ⁷ Pagdaka ummikat u sapulo a mámmadiket sakay inayos de u bawat simbuwan de. ⁸ Kinagi nu awan hide ti tukoy tu magkalalaki hide, ‘Atádden moy kami ped ti gaas. Mággadáp-adáp dán u simbuwan mi hide.’ ⁹ ‘Makay awan magkasiya i gaas miyáy nikitam a atanan,’ tábbeg nu magkalalaki hide. ‘Mapiyya pa ay umangay kam pa tu tindaan sakay mamali ti kao moy.‘ ¹⁰ Kaya lummakad u limma a awan ti tukoy a mammadiket. Alay de a namali, dimmemát u lállaki a ikasal. U limma a nakahanda ay kaguman nu lállaki a ikasal a nakasáddáp tu kasalan. Sakay insirado de u pintuwan nu bilay. ¹¹ Káttapos, dinumemát be u limma a awan ti tukoy a mámmadiket. ‘Panginoon, pasáddáppán moy kami ped!’ nagdulaw hide. ¹² Pero timmábbeg siya, ‘Talaga kagiyan ko nikam: awan ta kam matetenggi.‘ ” ¹³ Kinagi ni Jesus “Kaya magbantay kam, dipo awan moy tukoy u aldew oni u panahon.” ¹⁴ Kinagi pa ni Jesus “U pághari nu Diyos ay mepareho be ti iye a talinghaga: Te essa a tolay a te plano a magbiyahe kanya dinulaw na u utusan na hide sakay impagkatiwala na nide u ari-arian na. ¹⁵ Inatádden na ti pilak u kada essa ayon tu kanya-kanya na a kakayahan: inatádden na u essa ti limma a libo a piso, u essa be ay duwwa a libo sakay u essa be ay essa a libo. Káttapos ay hinumektat siya. ¹⁶ Lummakad a pagdaka u nakaalap ti limma a libo a piso sakay nagnegosyo siya. Sakay timmubo u pilak na ti limma a libo a piso be. ¹⁷ Kona labe tu nakaalap ti duwwa a libo ay tummubo be u pilak na ti duwwa a libo. ¹⁸ Pero u nakaalap ti essa a libo ay nagkali tu luta sakay intago na u pilak nu amo na. ¹⁹ Kállipas nu malay a panahon, sinumoli u amo nu utusan hide sakay nagkuwenta hide. ²⁰ Ummadeni u nakaalap ti limma a libo a piso sakay kinagi na, ‘Panginoon, sa iye u limma a libo a piso a intád mo nikán. Sakay sa iye be u limma a libo a piso a tinubo ko.’ ²¹ Kinagi nikuna nu amo na, ‘Malalaki! Tapat sakay mabait a utusan! Dipo nagin matapat ka tu badit a halaga, mamahala ka tu dakal a halaga. Sumáddáp ka sakay mákpagkasayaan ka nikán!’ ²² Ummadeni be u nakaalap ti duwwa a libo sakay kinagi na, ‘Panginoon, sa iye u intád mo nikán a duwwa a libo. Sakay sa be iye u duwwa a libo a tinubo ko.’ ²³ Kinagi nu amo na, ‘Malalaki! Tapat sakay mabait a utusan! Nagin matapat ka tu badit a halaga kanya mamahala ka tu dakal a halaga. Sumáddáp ka sakay mákpagkasayaan ka nikán!’ ²⁴ Sakay ummadeni be u nakaalap ti essa a libo. Kinagi na ‘Tukoy ko a hiko ay mahigpit. Maggapas ka tu awan mo immula sakay maggani ka tu awan mo intalok. ²⁵ Nantengák kanya inkali ko dálla tu luta u pilak mo. Atoy la u essa mo a libo.’ ²⁶ ‘Madukás sakay tamad a utusan!‘ tábbeg nu amo na. ‘Tukoy mo bál a maggapasák tu awan ko inmula sakay maggani tu awan ko intalok! ²⁷ Bakin awan mo ina indiposito tu bilay a págdipositowán ti pilak, nakwa te naalapák a tubo nadid? ²⁸ Alapan moy nikuna u essa a libo sakay iyatád tu te 10,000. ²⁹ Dipo u tehhod ay atádden pa sakay magsosobra pa. Pero u awan, maski u badit a atoy nikuna ay alapán pa. ³⁰ Iyangay moy ti kadihámman tu luwas u utusan a awan ti kabuluhan. Hod siya a magsanget sakay magaadoyan.”’ ³¹ Sakay kinagi pa ni Jesus “Dumemát u Anak nu Tolay bilang Hari, kaguman na u atanan a anghel. Sakay maghari siya tu atanan. ³² Ti panahon an itod, maipon tu atubang na u atanan a tolay. Hide ay paghiwahiwalayan na. Kapareho nu gággimitan nu pastol hide tu tupa sakay kambing hide. ³³ Idátton na tu kawanan na u tupa hide sakay tu kawihi na u kambing hide. ³⁴ Sakay kagiyan ko tu atoy hide tu kawanan ko, ‘Kamon he, hikam a pinagpala nu Ama ko! Mágyan kam tu kaharian a inhanda para nikam sapul pa nikuna ginimet u mundo. ³⁵ Dipo hikán ay nagaláp pero pinakan moy, nauwaw pero pinainom moy. Hikán ay nagin dayo tu banuwan moy tapos pinatulosák moy ti maganda. ³⁶ Hikán ay awan ti mesulot pero ináttadden moy ti damit. Nagkasakiták tapos inasikasoák moy. Hikán ay nepiriso tapos binisita moy.’ ³⁷ Tummábbeg u malinis hide, ‘Panginoon, nikan mi ka a netan a nagaláp sakay pinakan mi? Oni nauwaw sakay pinainom mi? ³⁸ Nikan ka nagin dayo sakay pinatulos mi? Oni kaya awan ti mesulot sakay ináttadden mi ti damit? ³⁹ Sakay nikan mi ka a netan a te sakit o atoy tu pirisuwan sakay inasikaso mi?’ ⁴⁰ Sakay tábbegan ko hide, ‘Talaga a kagiyan ko nikam: nikuna ginimet moy iye tu pinakamababa hide a kákkapatkákka ko ay bilang hikán u kinagbiyan moy.’ ⁴¹ Sakay kagiyan ko be tu atoy hide tu kawihi, ‘Umadeyo kam nikán a binusong nu Diyos! Hikam ay meangay tu apoy a awan maadápadáp a inhanda para ni Satanas sakay tu demonyo na hide . ⁴² Dipo hikán ay nagaláp pero awannák moy pinakan, nauwaw pero awannák moy pinainom. ⁴³ Hikán ay nagin dayo tu banuwan moy pero awannák moy pinatulos ti maganda. Hikán ay awan ti mesulot pero awannák moy ináttadden ti damit. Nagkasakiták pero awanák moy inasikaso. Hikán ay nepiriso pero awannák moy binisita.’ ⁴⁴ Sakay tummábbeg be hide, ‘Panginoon, nikan mi ka netan a nagaláp oni nauwaw oni nagin dayo oni nawanan ti mesulot oni te sakit oni atoy tu pirisuwan sakay awan mi ka pinagserbiyán?’ ⁴⁵ Sakay kagiyan ko nide, ‘Talaga a kagiyan ko nikam: nikuna awan moy kinagbiyan a tulungan u pinakamababa hide a kapatkákka ko ay bilang hikán u awan moy kinagbiyan.”’ ⁴⁶ Kinagi pa ni Jesus “Iyangay hide tu kaparusaan a awan ti katapusan pero u malinis hide ay makatanggap ti biyag a awan ti katapusan.”

¹ Nikuna a natapos dán a itoldo ni Jesus u atanan a iye ay kinagi na tu disipulos na hide, ² “Tukoy moy a duwwa a aldew dálla ay Kasayaan dán nu Aldew nu Pagtaleb. Sakay itokyon u Anak nu Tolay para ipako tu kudus.” ³ Nadid u pupuno hide nu saserdote sakay u pinuno hide nu banuwan ay nagpisanpisan hod tu dakal a bilay nu pinakapuno a saserdote a ti Caifas. ⁴ Nagplano hide a sekreto de a ipadakáp ti Jesus sakay ipabuno. ⁵ Sakay kinagi de pa, “Dyan tam gimitán ti aldew nu Kasayaan makay magkagulo u tolay hide.” ⁶ Nadid atoy ti Betania ti Jesus tu bilay ni Simon a dati a te ketong. ⁷ Alay na a kuman, immadeni nikuna u essa a bábbey a te tawed a pággasákkan a alabastro a putat ti mamahalin a passáppot. Dináttonan na u ulo ni Jesus tu passáppot. ⁸ Naiyamut u disipulos na hide nikuna netan de iye. “Bakin sinayang na u passáppot?” tanong de. ⁹ Kinagi di pa, “Nelako nakwa itod ti mahal sakay neatád tu pobre hide u nánglakuwan!” ¹⁰ Awan netago ni Jesus u kinagi de kanya kinagi na, “Bakin gágguluwan moy u bábbey? Maganda u ginimet na nikán. ¹¹ Tu atanan a panahon ay kakaguman moy u pobre hide pero hikán ay awan moy makaguman ti habang panahon. ¹² Awan beman dináttonanák na ti passáppot bilang paghanda tu paglábbang nikán. ¹³ Pakatandaan moy: hadya man itoldo u Maganda a Baheta ay kagiyan di be u ginimet na bilang págalaala nikuna.” ¹⁴ Ti Judas Iscariote, essa tu sapulo ay ti duwwa ay nákpágguhon tu pupuno nu saserdote hide. ¹⁵ “Anya u iyatád moy nikán ni tulungan ta kam a madakáp ti Jesus?” tanong na. Tu itod bela ay inattáden di siya ti tállo a pulo a silber a pilak. ¹⁶ Sapul hod, nagehyok dán ti Judas ti pagkakataon para metokyon na ti Jesus. ¹⁷ Dumemát u dipalongo a aldew nu Kasayaan nu Tinapay a Awan ti Págpaalsa. Ummadeni ni Jesus u disipulos hide sakay nagtanong, “Panginoon, hadya mo gusto a ipaghanda mi ka ti pangngapon nu Aldew nu Págtaleb?” ¹⁸ Timmábbeg siya, “Angay kam ti dibanuwan sakay ehyokan moy u essa a tolay. Kagiyán moy nikuna a kona he u ipekagi nu Maistu mi ‘Adeni dán u panahon ko. Hikán sakay u disipulos ko hide ay tu bilay mo a kuman tu pangngapon nu Aldew nu Págtaleb.’ ” ¹⁹ Sinunud nu disipulos na hide u utos ni Jesus sakay inhanda de u pangapon nu Aldew nu Págtaleb. ²⁰ Ti gibiyan itod, kuman tu lamesaan ti Jesus a kaguman na u sapulo ay ti duwwa a disipulos na. ²¹ Alay de a kuman, kinagi ni Jesus ”Kagiyan ko nikam: essa nikam u mángtokyon nikán.” ²² Minalungkot a tahod u disipulos na hide sakay balang essa ay nagtanong nikuna, “Hikán beman Panginoon?” ²³ Timmábbeg siya, “U kasabay ko a sumawsaw tu baso ay siya u mángtokyon nikán. ²⁴ Matay u Anak nu Tolay ayun tu Kasulatan pero kakagbi a tahod u mángtokyon nikuna! Mapiyya pa a awan inyenak i tolay an itod.” ²⁵ Ti Judas a mángtokyon nikuna ay nagtanong be, “Maistu, hikán beman?” Timmábbeg ti Jesus, “Hiko dán u nagkagi.” ²⁶ Alay de a kuman, nangalap ti tinapay ti Jesus. Sakay matapos magpasalamat tu Diyos ay hinatihati na u tinapay sakay intád tu disipulos na hide. “Alapan moy iye sakay kanán. Iye u bággi ko.” kinagi na. ²⁷ Káttapos ay inalap na u baso, nagpasalamat tu Diyos sakay intád nide. “Uminom kam a atanan ti iye,” kagi na ²⁸ “dipo iye u digi ko a mangpatibay tu uhunan nu Diyos, u digi ko a mebuhos para mapatawad u kasalanan nu tolay hide. ²⁹ Kagiyan ko nikam a awannák dán uminom ti alak a gábwat ti ubas hanggan ti aldew a u bigo dán a alak u inuman ko a kaguman kam tu kahariyan nu Ama ko.” ³⁰ Sakay káttapos di a magkansiyon ti essa a pasalamat, immangay hide tu Buked nu Olibo. ³¹ Kinagi ni Jesus nide, “Ti gibiyan iye, hikán ay ginanan moy a atanan konna tu kinagi tu Kasulatan, ‘Bunuwan ko u pastol sakay magkawatakwatak u tupa hide.’ ³² Pero káttapos ko a mabiyag a huway ay mágdipalongowák nikam ti Galilea.” ³³ Timmábbeg ti Pedro, “Maski ginanan ka nu atanan ay awan ta ka ginanan.” ³⁴ “Pakatandaan mo,” kagi ni Jesus, “ti gibi biyan iye, bagu a magtarakket u manok ay pentállowák mo a ipamen.” ³⁵ Pero kinagi ni Pedro, “Maski ni bunuwanák de ay awan ta ka ipamen.” Sakay kona labe hod u kinagi nu agum a disipulos na hide. ³⁶ Sakay kinuyog hide ni Jesus tu essa a lugar a nadulawan a Getsemani. Kinagi na tu disipulos na hide, “He kam pala he ta magdasallák ti danágge hod.” ³⁷ Pero kinuyog na ti Pedro sakay u duwwa a anak ni Zebedeo. Sakay nabalisa siya sakay nalungkot a tahod. ³⁸ Kinagi na nide, “U puso ko ay maglungkot a tahod halos a ikatay ko! He kam pala he sakay mákpagpuyat nikán!” ³⁹ Immadeyo ti Jesus ti sabadit, dinumapa siya sakay nagdasal a ”Ama ko, ni maaari ay ibutan mo nikán i pághirapan iye. Pero bakan a u gusto ko ni awan u gusto mo u mangyare.” ⁴⁰ Nagsoli siya sakay dinemáttan na a tidug u tállo a disipulos. Kinagi na ni Pedro, “Talaga beman a awan kam maari a mákpagpuyat nikán maski ni essa la a odas? ⁴¹ Magpuyat kam sakay manalangin tánni awan kam matalo nu tukso. U espiritu ay nakahanda pero mahina u bággi.” ⁴² Huway siya a ummadeyo sakay nagdasal “Ama ko, ni awan maari ibutan i pághirapan iye ni awan ko magimet ay sunudán ko u kagustuwan mo.” ⁴³ Huway siya a nagsoli sakay dinemáttan na dámman hide a tidug dipo grabe u tongka de. ⁴⁴ Nilakaden na dámman u tállo a disipulos sakay huway siya a nagdasal, itod labe u kinagi na. ⁴⁵ Nagsoli dámman siya tu disipulos na hide sakay kinagi na nide, “Tidug kam padla beman sakay umimang? Dumemát dán u odas a itokyon u Anak nu Tolay tu makasalanan hide. ⁴⁶ Kadta mon! Atoy dán u mángtokyon nikán.” ⁴⁷ Magupos padla ti Jesus nikuna dimmemát ti Judas, essa tu sapulo ay ti duwwa. Te kaguman siya a makpal a tolay a te tawed a attak sakay batuta. Gábwat hide tu pupuno nu saserdote hide sakay tu pinuno nu banuwan. ⁴⁸ Bago pa hide dimmemát hod ay kinagi dán nu mángtokyon u konna he a sinyal: “U ámmuwan ko ay siya u ehyokan moy. Dakáppán moy a pagdaka!” ⁴⁹ Kanya inadeniyan ni Judas ti Jesus sakay binati, “Mapiyya a gibi Maistu!” sakay inammuwan na. ⁵⁰ Kinagi nikuna ni Jesus, “Barkada, gimetan mo dán u sadya mo.” Sakay inadeniyan siya nu tolay hide sakay dinakáp. ⁵¹ Bugla a nagbagot ti attak u essa tu kaguman ni Jesus. Tinegpas na u utusan nu pinakapuno a saserdote sakay nahipang u talinga na. ⁵² Kinagi ni Jesus, “Isahungan mo i attak mowe! U mabiyag ti attak ay tu attak a matay. ⁵³ Awan mo beman tukoy a makaagedák tu Ama ko ti libo libo a anghel hide sakay paangayan na hide pagdaka? ⁵⁴ Pero kodya a matupad u nesulat tu Kasulatan a dapat iye a mangyare?” ⁵⁵ Sakay inatubang na u tolay hide sakay kinagi, “Hikán beman ay tulisan a immangay kam he a te tawed a attak sakay batuta hide para dakápannák moy? Aldew aldew, hikán ay nagtoldo tu templo pero awannák moy dinakáp. ⁵⁶ Pero nangyari iye a atanan tánni matupad u insulat nu propeta hide tu Kasulatan.” Káttapos ay ginuminan u disipulos na hide sakay inwahak di siya a maggeessa. ⁵⁷ Inyangay de ti Jesus tu bilay ni Caifas, u pinakapuno a saserdote hide. Hod hod a nagpisanpisan u maisto hide nu Kautusan ni Moises sakay u pinuno nu banuwan. ⁵⁸ Tummagubet nikuna ti Pedro pero adeyo u agwat de. Káddemát na tu bilay ni Caifas ay simmáddap siya tu sural sakay naggetnud a kaguman u guwardiya hide tánni metan na ni anya u mangyari. ⁵⁹ Nagehyok u pupuno nu saserdote hide sakay u buo a Sanedrin ti sestigo a magbulibuli laban ni Jesus para mepabuno de siya. ⁶⁰ Pero awan hide ti nasanig a istorya de a maari a gamitan para mepabuno de siya, maski makpal a ummatubang sakay nagkagi ti kakabuliyan tungkol nikuna. Tu katapusan, te duwwa a ummatubang ⁶¹ sakay nagkagi, “Kinagi ni tolayan ina a sidaán na u templo sakay ayusán na tu katállo a aldew.” ⁶² Tummaknag u pinakapuno a saserdote sakay kinagi na ni Jesus, “Awan ka beman ti metábbeg tu imbintang de niko?” ⁶³ Pero awan ti kákkagi ti Jesus. Sakay kinagi nikuna nu pinakapuno a saserdote, “Iyutos ko niko: kagiyan mo nikami, tu ngahan nu Diyos a biyag, ni hiko beman u Mesias, u Anak nu Diyos?” ⁶⁴ Timmábbeg ti Jesus, “Hiko dán u nagkagi. Pero kagiyan ko niko: Sapul nadid ay ketan mo u Anak nu Tolay a nakaetnud tu kawanan nu Makapangyariyan a Diyos sakay dumemát siya a gábwat ti langit!” ⁶⁵ Nikuna a nasanig iye nu pinakapuno a saserdote, pinisad na u damit na sakay kinagi na, ”U inupos na atode ay awan ti galang ti Diyos! Awan tamon kailangan u magsestigo pa. Nasanig moy u paglapastangan na tu Diyos! ⁶⁶ Anya ti palagay moye?” Timmábbeg hide, “Te kasalanan siya, dapat siya a matay!” ⁶⁷ Sakay niluktaben de siya tu hupa na sakay sinasuntok. Dinapang be siya nu agum ⁶⁸ sakay kinagi di, “Cristo, hulaan mo ni ti deya u nangdapang niko?” ⁶⁹ Alay ni Pedro a naggetnud tu sural, inadeniyan siya nu essa a utusan a bábbey sakay kinagi na, “Kaguman ka be ni Jesus a taga-Galilea, awan beman?” ⁷⁰ Pero impamen na iye tu atubang nu kakpalan. “Awannák ti tukoy ti kákkagikagiyan mowe.” tábbeg na. ⁷¹ Sakay limmuwas ti Pedro. Netan siya nu essa pa a utusan a bábbey sakay kinagi na tu atoy hod, “I lállakiyan iye ay kaguman ni Jesus a taga Nazaret.” ⁷² Nagpamen a huway ti Pedro “Magpanantowák a awan ko matenggi i tolayan ina.” ⁷³ Awan malay ay ummadeni ni Pedro u lállaki hide a atoy hod. Kinagi de, “Essa ka ngane nide. Matenggi tu paggupos mo nay tumo.” ⁷⁴ “Maski matayyák pa ay talaga a awan ko matenggi i tolayan ina.” tábbeg ni Pedro. Siya be u pagtarakket nu manok. ⁷⁵ Sakay naalala ni Pedro u kinagi ni Jesus, “Bago a magtarakket u manok, pentállowák mo a ipamen.” Sakay lumuwas ti Pedro sakay nagsanget ti husto.

¹ Tu dimadimang, namagguhon u pupuno hide nu saserdote sakay u pinuno hide nu banuwan ni kodya de a ipabuno ti Jesus. ² Káttapos ay pinungo de siya sakay inyangay de ni Gobernador Pilato. ³ Nikuna netan ni Judas a ti Jesus ay hinatulan ti kamatayan ay nagsisi siya sakay insoli na tu pupuno hide nu saserdote sakay tu pinuno hide nu banuwan u tállo a pulo a silber a pilak. ⁴ Kinagi na, “Nagkasalák! Intokyon ko u tolay a awan ti kasalanan.” “Anya u pákalam mi? Bahala ka hina!” tábbeg de. ⁵ Imbudas ni Judas u pilak a silber tu disalad nu templo sakay limmakad sakay káttapos ay nagbitte. ⁶ Inalap nu pupuno hide nu saserdote u pilak a silber sakay kinagi de, “Bawal tu Kautusan a iyatád u pilak a iye tu pagdáttonan nu handog nu templo. Dipo iye ay bayad tu biyag nu essa a tolay.” ⁷ Nagkaessa hide a u pilak ay ibali de ti luta nu maggimet ti páglutuwan ti banga para magin páglábbangan nu taga iba hide a bansa. ⁸ Kaya u lutan a itod ay nginahanan a “Luta nu Dige” maski hanggan nadid. ⁹ Ti konna he a paraan natupad u kinagi ni Propeta Jeremias tu itod: “Inalap de u tállo a pulo a silber a pilak u inhalaga nikuna nu Israelita hide ¹⁰ sakay imbayad ko tu luta nu maggimet ti páglutuwan a banga ayon tu inyutos nikán nu Panginoon.” ¹¹ Káttapos ay inyangay de ti Jesus tu gobernador. “Hiko beman u Hari nu Judeo hide?” tanong nikuna nu gobernador. Timmábbeg ti Jesus, “Hiko dán u nagkagi.” ¹² Pero nikuna bintangan siya nu pupuno hide nu saserdote sakay nu pinuno nu banuwan ay awan dán siya timmábbeg. ¹³ Kaya kinagi nikuna ni Pilato, “Awan mo beman nasanig u inbintang de niko?” ¹⁴ Pero awan timmábbeg ti Jesus kanya nagtaka a tahod u gobernador. ¹⁵ Nadid kada Kasayaan nu Aldew nu Págtaleb, gággimitán dán nu gobernador u magpalaya ti essa a pireso. Mapalaya ni ti deya man u kagiyan nu tolay hide. ¹⁶ Tu itod ay te essa a tanyag a pireso a nginahanan a [Jesus] Barrabas. ¹⁷ Kaya nikuna naipun dán u tolay hide ay tinanong hide ni Pilato, “Deya u gusto moy a palayaán ko, ti [Jesus] Barrabas o ti Jesus a nadulawan a Cristo?” ¹⁸ Dipo tukoy ni Pilato a seni u dahilan de ni bakin a inyangay de nikuna ti Jesus. ¹⁹ Bakán la a ina. Alay na a nakaetnud tu pághukoman, impekagi nikuna nu kabanga na, “Dyan ka mák-alam ti tolayan ina a awan ti kasalanan dipo tu gibi he ay pinahirapanák nu tagináp ko a patungkol nikuna.” ²⁰ Pero bago nangyare u pagpapili ni Pilato ay sinulsulan dán nu pupuno hide nu saserdote sakay nu pinuno nu banuwan u tolay hide a kagiyan de ni Pilato a ti Barrabas u palayaán sakay ti Jesus ay bunuwan. ²¹ Huway a tinanong nu gobernador u tolay hide, “Deya tu duwwa u gusto moy palayaán ko?” “Ti Barrabas po!” tábbeg de. ²² Tinanong hide ni Pilato, “Ni konna hod, anya u gimitán ko ni Jesus a nadulawan a Cristo?” Timmábbeg u atanan, “Ipako siya tu kudus!” ²³ “Bakin, anya beman a madukás u ginimet na?” tanong ni Pilato. Pero lalo pa hide pimmakhaw, “Ipako siya tu kudus!” ²⁴ Nikuna a netan iye ni Pilato a awan siya ti magimet sakay makay magkagulo pa u tolay hide ay nagpaalap siya ti dinom sakay nagguges tu kamát na tu atubang nu tolay hide. “Awanák ti pananagutan ti kákkatay ni tolayan iye. Bahala kamon!” kagi ni Pilato. ²⁵ Timmábbeg u tolay hide, “Pananagutan mi sakay tu anak mi hide u kákkatay na!” ²⁶ Sakay pinalaya na ti Barrabas pero pinalatigo na ti Jesus sakay intád nide para ipako tu kudus. ²⁷ Káttapos, ti Jesus ay inyangay nu sundalo hide tu kampo de. Sakay naipun u makpal a sundalo tu palebut na. ²⁸ Sakay inubaan de siya sakay sinulutan ti essa a damit a madideg. ²⁹ Nangkawekaw hide ti lanot a masaet sakay indátton de tu ulo na sakay pinagtawed de ti essa a sahukod tu kawanan a kamát. Sakay sinesti de siya a niluhud-luhudan sakay kinagi de “U Hari nu Judeo hide!” ³⁰ Káttapos de siya a linalluktabben ay inalap de u sahukod na sakay ingahote tu ulo na. ³¹ Sakay káttapos de siya a pinahirapan ay inubaan de siya. Sinulutan de siya tu sadili na a damit sakay inyangay tu luwas nu banuwan para ipako tu kudus. ³² Kálluwas de tu banuwan, netan de u essa a lállaki a nginahanan a Simon, essa a taga-Cirene. Pinilit de ipabaklay nikuna u kudus ni Jesus. ³³ Káddemmát de tu lugar a nadulawan a Golgota (u gusto a kagiyan ay Lugar nu Bungo) ay ³⁴ inatádden de ti Jesus ti alak a hinaluwan ti apdo. Pero nikuna naenámman na iye ay awan na ininom. ³⁵ Nikuna a nepako de dán siya tu kudus, hinati-hati de u damit na hide káttapos de a nagbunutan. ³⁶ Sakay immetnud hide para bantayan siya. ³⁷ Nesulat tu ontok nu kudus u nagin kasalanan na: “Ti Jesus, u Hari nu Judeo hide.” ³⁸ Duwwa be a tulisan u kasabay na a nepako tu kudus, essa a kudus tu kawanan na sakay essa be a kudus tu kawihe. ³⁹ Dinusta siya nu nagtaleb hide sakay nagwalingiwang pa a ⁴⁰ nagkagi, “Awan beman hiko u mángsida tu templo sakay kagi mo a huway mo gimetan itod tu loob nu tállo a aldew? Kaya iligtas mo nadid u sadili mo! Ni hiko talaga u Anak nu Diyos, umogsad ka hina tu kudus!” ⁴¹ Sinesti be siya nu pupuno hide nu saserdote, nu maisto hide nu Kautusan ni Moises sakay nu pinuno nu banuwan. Kinagi de, ⁴² “Inligtas na u agum pero u sadili na ay awan na meligtas! Awan beman siya u Hari ti Israel? Ni umogsad la siya nadid tu kudus ay maniwala kami nikuna! ⁴³ Nanalig siya tu Diyos sakay kinagi na a siya u Anak nu Diyos. Iligtas siya nu Diyos ni talaga a tatahoden u kinagi na!” ⁴⁴ Sakay sinesti be siya nu duwwa a tulisan a nepako a kasabay na. ⁴⁵ Sapul tu tanghali hanggan tu alas tres ti apon ay nagdiham u buo a lugar. ⁴⁶ Nikuna a magalas tres ti apon, pimmakhaw ti Jesus, “Eli, Eli, lama sabaktani?” U gusto na a kagiyan ay “Diyos ko, Diyos ko, bakinák mo a pinabayan?” ⁴⁷ Nasanig iye nu sangan a ketaknág hod sakay kinagi de, “Dádduluwan na ti Elias!” ⁴⁸ Pagdaka gimminan u essa nide sakay nangalap ti damit. Binisa na ti maapsot a alak sakay inyegut na tu ontok nu essa a kayo sakay impasápsáp na ni Jesus. ⁴⁹ Pero kinagi be nu agum, “Magguhay ka pa, ilengán tam ni dumemát ti Elias para iligtas siya!” ⁵⁰ Sakay huway a pimmakhaw ti Jesus sakay natay. ⁵¹ Bigla a napisad tu bállog u kortina nu templo, sapul ti ontok hanggan ti sidung. Naglinog tu luta sakay nabisag u dadangli hide. ⁵² Nabukasan u lábbang hide sakay nabiyag a huway u makpal a naniwala tu Diyos a nágkatay dán. ⁵³ Lumuwas hide tu lábbang sakay nikuna a huway a nabiyag ti Jesus, simmáddap hide ti Jerusalem sakay netan hide hod nu makpal a tolay. ⁵⁴ Nanteng a tahod u kapitan sakay u sundalo hide a nagbantay ni Jesus nikuna nabati de u linog sakay netan de u atanan a nangyari. ”Tahod ngane a siya ay Anak nu Diyos!” kinagi de. ⁵⁵ Atoy be hod u makpal a bábbey a mágtanaw hod tu adeyo. Hide itod u sapul pa ti Galilea ay ummunonod dán hide ni Jesus sakay nagserbi nikuna. ⁵⁶ Kaguman nide ti Maria Magdalena, ti Maria a ina ni Santiago sakay ni Jose, a kabanga ni Zebedeo. ⁵⁷ Bagu a nagdiham, dimmemát u essa a mayaman a taga Arimatea, u ngahan na ay ti Jose. Siya ay disipulos be ni Jesus. ⁵⁸ Ummadeni siya ni Pilato sakay inaged na u bangkay ni Jesus. Inyutos be ni Pilato a iyatád u bangkay nikuna. ⁵⁹ Kaya inalap ni Jose u bangkay sakay binalutan ti bigu a damit a lino. ⁶⁰ Inyangay na iye tu sadili na a páglábbangan a awan palla nalay a impagimet na tu pader a bito. Káttapos, ingulong na tu pintuan u essa a dakal a bito sakay limmakad. ⁶¹ Atoy be hod ti Maria Magdalena sakay u essa pa a Maria a nággetnud tu luwas nu lábbang. ⁶² Tu kadima-dimangan, káttapos nu aldew nu paghanda nu Aldew nu Págtaleb ay sabay a immangay ni Pilato u pupuno hide nu saserdote sakay u Pariseo hide. ⁶³ Kinagi de nikuna, “Mahal mi a gobernador, naalala mi a kinagi nu mapagkunware an itod nikuna a biyag padla siya a huway siya mabiyag kállipas nu tállo a aldew. ⁶⁴ Pabantayan mo ped ti husto u lábbang hanggan tu katállo a aldew. Makay umangay u disipulos na hide sakay takawan de u bangkay. Sakay kagiyan de tu tolay hide a siya ay huway a nabiyag. Mahirap dán makay u panlinlang an iye ay magin mas madukás pa nan tu dipalongo.” ⁶⁵ Kinagi nide ni Pilato “Magkuyog kam ti sundalo ko hide sakay pabantay moy ti husto u lábbang ni Jesus.” ⁶⁶ Kaya immangay hide sakay dináttonan de ti senyal u pintuwan a bito sakay pinabantay de u lábbang tánni masigudo de a awan iye maahikad ni ti deya man.

¹ Kállipas nu Aldew nu Káimang, nikuna dimadimang palla a tahod tu dipalongo a aldew nu simba ay ummangay tu naglábbangan de ni Jesus ti Maria Magdalena sakay u essa pa a Maria. ² Káddemát de hod ay bigla a naglinog ti mabegsák dipo ummogsad gábwat ti langit u essa a anghel nu Panginoon. Ingulong na u bito a nakatakáp tu lábbang sakay immetnud tu dibbew na. ³ U hupa na ay makasili a kumán a kilat, pareho be tu pudew nu damit na. ⁴ Nagpágpág ti ánteng u bantay hide sakay natumba a konna tu essa a patay nikuna netan de u anghel. ⁵ Pero kinagi nu anghel tu bábbey hide, “Dyan kam manteng. Tukoy ko a ehyokan moy ti Jesus a nepako tu kudus. ⁶ Awan dán siya he dipo huway dán siya a nabiyag a konna tu kinagi na. Kamon dán, ilengán moy u nángdáttonan nikuna. ⁷ Alistuwan moy a angay ibaheta tu disipulos na hide a siya ay huway a nabiyag sakay mágdipalongo ti Galilea. Metan moy siya hod! Pakatandaan moy u kinagi ko nikam.” ⁸ Kanya nagalisto hide a hinumektat tu lábbang. Naghalo u bábbatiyan de, anteng sakay grabe a saya. Nagginan hide a immangay tu disipulos hide para ibaheta u nangyare. ⁹ Pero bigla hide a tinagbu ni Jesus sakay binati. Immadeni hide ni Jesus, kinábkabban de u tikád na sakay sinamba de ti Jesus. ¹⁰ Kinagi nide ni Jesus, “Dyan kam manteng! Angay kam sakay kagiyan moy tu kákkapatkákka ko hide a umangay hide ti Galilea sakay ketanák de hod!” ¹¹ Nikuna nakalakad dán u bábbey hide, ummangay be tu banuwan u sangan tu bantay nu lábbang sakay inbaheta de tu pupuno hide nu saserdote u atanan nu nangyare. ¹² Nagipun-ipon hide sakay káttapos a makpágguhon tu pinuno nu banuwan, sinuhulan de ti makpal a pilak u sundalo hide. ¹³ Sakay inutusan hide a kona he u ibábbaheta de, “Alay me a natdug tu gibi he, immangay u disipulos na hide sakay tinakaw de u bangkay.” ¹⁴ Kinagi pa nu pupuno nu saserdote nide, “Dyan kam mabalisa, maski masanig man iye nu gobernador, hikami u bahala a mángpaliwanag!.” ¹⁵ Tinanggap nu bantay hide u pilak sakay ginimet de u inyutus nide. Kaya hanggan nadid iye pade u iyá-istorya tu Judeo hide. ¹⁶ U sapulo ay ti essa a disipulos ay immangay ti Galilea, tu buked a intoldo nide ni Jesus. ¹⁷ Nikuna a netan de ti Jesus ay sinamba de siya. Maski u agum ay nag-alinlangan padi. ¹⁸ Ummadeni ti Jesus sakay kinagi na nide, ”Inyatád dán nikán u atanan a kapangyariyan ti langit sakay ti lutaay. ¹⁹ Kanya angay kam sakay gimitan moy a disepulus ko u atanan a tolay tu atanan a bansa. Bawtismuwan moy hide tu ngahan nu Ama sakay nu Anak sakay tu Banal a Ispiritu. ²⁰ Sakay tolduwan moy hide a sumunud tu atanan a inyutus ko nikam. Pakatandaan moy: Hikán ay kakaguman moy hanggan tu katapusan nu mundo.