Lucas

Lucas

¹ Kagalang-galang a Teofilo, makpal dán u nagsikap a nagsulat tungkul tu ginimet ni Jesus nikuna a nákpágyan siya nikitam ti munduway. ² Insulat de u ayun tu intoldu nu tolay hide a naketa tu ginimet ni Jesus sapul tu sapul sakay nangaral tu upos nu Diyos. ³ Kanya inadal ko be ti husto u atanan a bagay tungkul ti nangyariyan iye hide, sinapul ko tu sapul na. Naisip ko a maganda be ni magsulaták ti essa a maayus a istorya para nikam ⁴ tánni lalu moy a matukuyan u tatahoden a intoldu nikam. ⁵ Nikuna ti Herodes u hare ti Judea, tehhod a essa a saserdote a gábwat tu lahe ni Abias. U ngahan na ay ti Zacarias. U kabanga na a ti Elizabet ay gábwat be tu lahe ni Aaron. ⁶ Iye a magkabanga ay kinasayaan nu Diyos, sumássunud hide tu atanan a utus na. ⁷ Pero awan hide ti anak dipo baug ti Elizabet sakay parehas dán hide a matanda. ⁸ Essa aldew nikuna u gurupo dán ni Zacarias u limmewas a manungkulan tu templo ay ti Zacarias u nagserbi a saserdote tu atubang nu Diyos. ⁹ Sigun tu kaugalian nu saserdote hide ay nagbunutan hide. Nadid ti Zacarias u nabunut a magalay kanya siya simmáddáppay tu Templo nu Panginoon a Diyos a magtutod tu kamanyang. ¹⁰ Mentaras magalay ti Zacarias ay mamággipun-ipun be u tolay hide tu luwas nu Templo sakay magdasal. ¹¹ Pimmeta hod nikuna u anghel nu Panginoon a mágtaknág tu danág tu kawanan nu pággalayan ti kamanyang. ¹² Neántingan siya sakay nahákned tu pákketa na tu anghel. ¹³ Pero kinagi nikuna nu anghel, “Dyan ka manteng Zacarias! Sinaneg nu Diyos u dasal mo. Magenak u kabanga mo ati Elizabet ti essa a lállake. Juan i pángngahanan muway tu anak! ¹⁴ Pasayaán nakam a tahod sakay makpal be a masaya tu kákkeenak na, ¹⁵ dipo magin dakila siya tu pangileng nu Panginoon. Awan siya dapat a uminom ti alak oni ányaman a áinumán a makalasing. Sakay he palla siya tu tiyan nu ina na ay atádden dán siya ti kapangyariyan nu Banal a Ispirito. ¹⁶ Makpal tu lahe ni Israel u maakit na a máktawad tu kasalanan de sakay magsole hide tu Panginoon de a Diyos. ¹⁷ Mágdipalongo ti Juan tu Panginoon, u begsák sakay u kapangyariyan na ay konna ni prupeta a Elias, para pamágkasunduwán na a huway u ama, sakay u anak de hide. Pasoliyán na u tolay hide a masássuwayán tu Panginoon tu págsunud tu paraan a makasaya tu Diyos tánni makapaghanda hide tu káddemat nu Panginoon.” ¹⁸ Kinagi ni Zacarias tu anghel, “Kodyaák a makasigudu a mangyare iye? Lakayák dán sakay bakás dán be u kabanga ko.” ¹⁹ Timmábbeg u anghel, “Hikán ti Gabriel a mágserbi tu atubang nu Diyos. Pinaangayák na he para ikagi ko nikam i magandaáy a baheta. ²⁰ Pero dipo awan ka naniwala tu kinagi ko hide a matupad iye tu takda a panahun, ay awan ka makapagupos hanggan tu aldew a mangyare iye hide.” ²¹ Nadid nalay dán a mággauhayán tu luwas u tolay hide ni Zacarias. Nágtaka dán hide ni bakin tunay siya ti alay tu disalad nu Templo. ²² Kálluwas na ay awan dán siya makapagupos nan makánsinyasán dálla. Kaya inisip nu tolay hide a tehhod a impeta u Diyos a pangitain nikuna tu disalad nu Templo. ²³ Nikuna matapos dán u odas nu págserbi ni Zacarias ay nágsole dán siya. ²⁴ Awan ngane nágnalay ay naglihe ti Elizabet, sakay tu luub nu limma a bulan ay awan siya limmuwa-luwas tu bilay de. ²⁵ Kinagi ni Elizabet, “Nadid ay kinagbiyanák nu Panginoon. Inatáddinák na ti anak para awanák dán mepasanike tu katolayan!” ²⁶ Nikuna kaannám dán a bulan nu páglihe ni Elizabet ay pinaangay nu Diyos u anghel a ti Gabriel tu banuwan a Galilea ti Nazaret, para kauhunán u ²⁷ essa a madiket a ti Maria. Nakatakda dán siya a ikasal ni Jose, iye a lállake ay gábwat tu lahe ni hare a David. ²⁸ Ummadene u anghel ni Maria sakay binate na, “Mágsaya ka dán! Kasayaan ka a tahod nu Diyos! Katoy niko u Panginoon!” ²⁹ Nabalisa a tahod ti Maria dipo tu kinagi nikuna nu anghel. Kanya pinakaisip na ti husto ni ánya u gusto na a kagiyán. ³⁰ Kinagi nikuna nu anghel, “Dyan ka la manteng Maria, ta kasayaan ka nu Diyos. ³¹ Mágsaneg ka! Magbuktet ka sakay magenak ti essa a lállake a anak sakay ngahanan mo siya a Jesus. ³² Magin dakila siya sakay dulawán de siya a Anak nu Kataasan a Diyos. Iyatád nikuna nu Panginoon a Diyos u pagkahare nu nuno na a ti hare David tán ³³ maghare siya tu lahe ni Jacob hanggan-hanggan. U pághare na ay awan ti kahád.” ³⁴ “Kodya iye a mangyare nikán, madikiták palla?”kagi ni Maria. ³⁵ Timmábbeg u anghel, “Angay niko u Banal a Ispirito sakay lenduman ka nu kapángyariyan nu Diyos. Dipo ti iye, u iyenak mo ay banal sakay dulawán siya a Anak nu Diyos. ³⁶ Awan beman baug u pensan mo a ti Elizabet? Pero nadid ay naglihe dán siya maski ni bakás dán, kaánnam na dán ngane nadid a bulan a mabuktet, ³⁷ dipo kaya a gimitán nu Diyos u atanan a bagay.” ³⁸ Timmábbeg ti Maria, “Alipinák nu Panginoon, mangyare nakwa nikán u atanan a kinagi mo.” Káttapos ay nilakaden dán siya nu anghel. ³⁹ Sumangan a aldew tu kállakad nu anghel ay nagalalisto ti Maria a immangay tu mabuke-buked a banuwan ti Juda. ⁴⁰ Káddemát na tu bilay di Zacarias ay kinumusta na ti Elizabet. ⁴¹ Nikuna masaneg ni Elizabet u pángngumusta ni Maria ay bigla a nagahikád u anak tu tiyan na sakay naputat siya ti Banal a Ispirito. ⁴² Nepákhaw siya tu saya na, “Pinagpala ka tu kabábbiyan sakay pinagpala be u kátna ti tiyan muwe a anak! ⁴³ Deyaák beman para bisitaán nu ina nu Panginoon ko? ⁴⁴ Tu pákkasaneg ko tu kumusta mo ay mággaahikadán u anak ti tiyan kuwáy dipo tu saya na. ⁴⁵ Pinagpala ka ta naniwala ka a mangyare niko u impekagi nu Panginoon.” ⁴⁶ Káttapos ay nagpuri ti Maria kinagi na, “ Tunay págpure kuwáy niko Panginoon a Diyos. ⁴⁷ Sakay tunay be i saya kuwáy dipo tu Diyos a Tagapagligtas ko. ⁴⁸ Dipo awanák pinabayan nu Panginoon maski ni mababaák la a utusan! Sapul nadid ay dulawanák nu atanan a tolay a pinágpala. ⁴⁹ Dipo dakila u Diyos, kanya makpal a mágkaganda a bagay u ginimet na tu biyag ko. Malinis siya! ⁵⁰ U kagbi na ay para tu atanan tolay sakay tu atanan a lahe a tehhod a ánteng nikuna. ⁵¹ Impeta na u kapangyariyan na, kaya pinagwatak-watak na u hambug hide. ⁵² Inibutan na u hare hide tu pághare de, sakay inlangkaw na u mágkababa hide. ⁵³ Binássog na ti mágkaganda a bagay u mágkahirap hide, sakay pinalakad na u mágkayaman hide a awan ti tawed maski ni ánya. ⁵⁴ Tinupad na u pananto na tu nuno tam hide. Tinulungan na u banuwan na a Israel dipo makákkagbiyán siya. ⁵⁵ Dipo inpananto na tu lahe ni Abraham a kagbiyan na hide hanggan-hanggan. ⁵⁶ Nágyan pa ti Maria tu kád Elizabet ti tállo a bulan bago siya nagsole. ⁵⁷ Nikuna a bulan dán ni Elizabet ay nagenak siya ti lállake a anak. ⁵⁸ Tunay u saya nu kadatig de hide a bilay sakay u kákkapatkákka de hide nikuna a mabaheta de a pinagpala siya nu Panginoon, sakay nákpagsaya hide nikuna. ⁵⁹ Tu kasasimba dán nu anak ay pinature de. Gusto nakwan nu kákkapatkákka de hide a ingahan u anak tu ama na a ti Zacarias. ⁶⁰ Pero kinagi ni Elizabet, “Bakán a Zacarias nan Juan i pángngahanan tamay nikuna.” ⁶¹ Kinagi de, “Maski essa man ti kákkapatkákka moye hide ay awan ti ngahan a konna hina.” ⁶² Kanya sininyasan de u ama na sakay tinanung di siya ni ánya i pángngahan naay tu anak. ⁶³ Kanya nák-aged ti Zacarias ti pagsulatan sakay insulat na a, “Juan i ngahan naay.” Kanya nahákned hide a atanan. ⁶⁴ Ti itod be a odas ay nakapagupos a huway ti Zacarias sakay napuri tu Panginoon. ⁶⁵ Neántingan u atanan a tagahod sakay nebaheta tu mabuke-buked a lugar ti Judea u tungkul tu nangyare di Zacarias sakay ti Elizabet. ⁶⁶ Atanan nu nakasaneg ti iye ay nággisip-isip tu nangyare sakay kinagi de, “Ánya wád i mangyariyay ti anakáy káddakál na?” Magin dakila siya dipo u Panginoon ay pirmi nikuna. ⁶⁷ Naputat ti Banal a Ispirito ni Zacarias a ama nu anak sakay naghula ti mensahe a gábwat tu Diyos, ⁶⁸ “Puriyán u Panginoon a Diyos nu Israel. Dipo immangay he siya ti lutaáy para palayaan sakay iligtas u anak na hide. ⁶⁹ Nangatád nikitam u Panginoon ti makapangyariyan a tagapagligtas, a gábwat tu lahe ni hare David a tagapagserbi na. ⁷⁰ Iye ay sigun tu inpananto na tu itod pa tu pamamag-itan nu prupeta na hide a malinis, ⁷¹ a iligtas na kitam tu atanan a kadima tam, sakay tu atanan a maiyamut nikitam. ⁷² Nagpananto bi siya a kagbiyan na u nuno tam hide, sakay awan na kalimunan u kasunduwan de a banal. ⁷³ Inpananto na iye a kasunduwan tu nuno tam a ti Abraham, ⁷⁴ a iligtas na kitam tu kadima tam hide, tánni makapagserbi kitam nikuna a awan ti ánteng. ⁷⁵ Makapagserbi kitamon a te malinis a biyag tu pangileng nu Diyos mentaras a katoy kitam palla ti lutaáy. ⁷⁶ Sakay hiko Anak ko ay dulawán de a prupeta nu Kataas-taasan a Diyos a makapangyariyan tu atanan; dipo hiko i mángdipalonguwáy a mánghanda tu paglakadan nu Panginoon, ⁷⁷ sakay itoldu mo u kaligtasan tu tolay na hide, tu pamamag-itan nu págkahod ti kapatawaden nu kasalanan de hide. ⁷⁸ Mapagmahal sakay makákkagbiyán u Diyos tam. Dipo tu kagbi nu Panginoon nikitam ay immangay he a konna tu kássikat nu aldew. ⁷⁹ Tán mademlagen u katoy hide tu kadiklámman sakay u nágkatay dán ti kasalanan, Igiyya na kitamon patamo tu kapayapaan.” ⁸⁰ Sakay dimmakál u anak a tehhod a mabegsak a ispirito a gábwat tu Diyos. Nágyan siya tu parang hanggan tu aldew a pimmeta siya tu taga-Israel hide.

¹ Nadid, ti panahunan itod ay nagutus ti Agusto a Emperador ti Roma a dapat a magparihistro u atanan a tolay a nasakupan na. ² Iye u kadipalonguwan a págparehistro nikuna a ti Cirenio palla u gubernador ti Siria. ³ Kanya u atanan a tolay ay nagsole tu sadile de a banuwan para magparihistro. ⁴ Kanya ti Jose a mágyan ti Nazaret a banuwan ni Galilea ay immangay ti Judea, ti Betlehem u banuwan a neenakan ni hare a David, dipo gábwat siya tu lahe ni David. ⁵ Kaguman ni Jose ti Maria a magin kabanga na a angay magparihistro. Nadid ti itod be a bulan ay taráeenakan dán. ⁶ Mentaras katoy hide ti Betlehem ay dinemát dán nu pággenak ti Maria. ⁷ Inyenak na u panganay na a anak a lállake. Binalutan na ti lampen u anak sakay pinakatdug na tu bahahungan, dipo awan dán hide ti tulusan dipo putat dán u págkaseruwan hide a bilay. ⁸ Nadid ti lugaran itod ay tehhod a mággalaga ti tupa a katoy tu parang a magdamag a magbantay tu tupa de hide. ⁹ Bigla a timmaknág u essa a anghel nu Panginoon tu atubang de, kanya nagdemlag u palebut de tu demlag nu Panginoon. Kanya grabi u ánteng de. ¹⁰ Pero kinagi nu anghel nide, “Dyan kam manteng! Dipo tehhodák a maganda a baheta para nikam. Mangatád iye ti dakál a kasayaan tu atanan a tolay. ¹¹ Dipo neenak nadid a aldew ti Betlehem tu banuwan ni David u Tagapagligtas, u Cristo a Panginoon. ¹² Iye u tanda para matengge moy siya: tehhod kam a ketan a anak a nabalutan ti lampen sakay kekatdug tu bahahungan.” ¹³ Káttapos nu anghel a magupos ay bigla dálla a lummitaw u grabi’t kakpal a anghel a gabwat ti langet a magkansiyon ti magpure tu Diyos. ¹⁴ “Puriyán u Diyos a katoy ti langet, Sakay tehhod dán a kapayapaan tu tolay hide a kinasayaan na a katoy ti lutaáy!” ¹⁵ Nikuna makalakad dán u kaanghelan a tamo ti langet ay namágguhon u mággalaga hide ti tupa, “Kadtamon ti Betlehem! Angay tam ilingan u inbaheta nikitam nu anghel nu Panginoon.” ¹⁶ Pagdaka hide a immangay ti Betlehem, káddemát di hod ay netan de di Maria ay ti Jose sakay u anak a kekatdug tu bahahungan. ¹⁷ Pákketa de nikuna ay inyistorya de di Jose u kinagi nu anghel tungkul tu anak; ¹⁸ kaya nagtaka u atanan nu nakasaneg tu inbaheta nu mággalaga hide ti tupa. ¹⁹ Pero tináttandaan ni Maria u atanan a nasaneg na sakay pinagisipan na ti mapiyya iye hide a bagay. ²⁰ Nagsole tu parang u mággalaga hide ti tupa a makán puriyán tu kadakilaan nu Diyos dipo tu atanan a nasaneg sakay netan de, dipo natupad u inbaheta nu anghel hide nide. ²¹ Nadid nikuna a walo dán a aldew u anak ay tinure di dán siya sakay nginahanan de a Jesus. Iye u ngahan a kinagi nu anghel bagu siya a inlihe ni Maria. ²² Nikuna dummemát dán u aldew a pangtupad di Jose ay ti Maria tu Kautusan ni Moises a páglinis ay immangay hide tu Templo ti Jerusalem. Kaguman de u anak tánni mealay tu Panginoon. ²³ Dipo sigun tu sumássulat tu Kautusan nu Diyos, “U atanan a panganay a lállake ay kailangan a mealay tu Panginoon.” ²⁴ Sakay náng-alay bi hide sigun tu kinagi nu Kautusan nu Panginoon. U maare a iyalay ay duwwa a kalapate oni duwwa tu iba a kalase ni manok. ²⁵ Nadid, tehhod a essa a lállake a magyan ti Jerusalem a Simeon u ngahan na. Malinis siya a tolay sakay te ánteng tu Diyos sakay u Banal a Ispirito ay katoy nikuna. Makán uhayán siya ni nikán a dumemát u Cristo a mángligtas tu lahe ni Israel. ²⁶ Inhayag dán nikuna nu Banal a Ispirito a awan siya matay mentaras a awan na ketan u Cristo a inpananto nu Panginoon. ²⁷ Ti itod be a aldew ay inggiya siya nu Banal a Ispirito a angay tu Templo. Nikuna iyangay dán hod ni Jose sakay ti Maria ti Jesus para iyalay tu Panginoon a sigun tu Kautusan ay netan ni Simeon u anak. ²⁸ Kinálkál na u anak sakay nagpure siya tu Diyos. Kinagi na, ²⁹ “Nadid Panginoon, alapán mu dán ti mapayapa i tagapagserbi muwáy, dipo natupad dán u inpananto mo nikán. ³⁰ Netan ko dán a mismo u inyatád mo a Tagapagligtas, ³¹ a inhanda mo para makilala nu atanan a tolay: ³² siya u mangdemlag tu Hentil hide, sakay siya be u mangatád ti karangalan tu pinile mo a lahe ni Israel.” ³³ Kanya nagtaka u ama sakay u ina ni Jesus dipo tu kinagi ni Simeon tungkul nikuna. ³⁴ Inaged ni Simeon a pagpalaán hide nu Diyos sakay kinagi na ni Maria, “Sanigán mo i kagiyán kuwáy, anakan iye ay pinile nu Diyos. Tu pamamag-itan na ay makpál u maligtas sakay makpal be u mahatulan tu lahe hide ni Israel. Siya u tanda a gábwat tu Diyos pero makpál be nikuna u mangkontara, ³⁵ para mehayag u áisipán de. Sakay hiko a mismo ay demáttan ni grabi a kalungkutan a kumán a sundang a indágkal ti puso muwe.” ³⁶ Katoy be tu Templo u essa a prupeta a bábbey, u ngahan na ay ti Ana a anak ni Fanuel a gábwat tu lahe ni Aser. Bakás dán siya a tahod. Pitto la hide a taon a nagagum ay tu kabanga na, ³⁷ sakay nadid ay walo a pulo ay ti áppat dán a taon a nabilo. Lagi siya tu Templo aldew ay ti gibi a mágpapuriyán tu Diyos tu pamamag-itan nu págkakulasyon sakay pakándasal. ³⁸ Ti odas biyan itod ay immadene be ti Ana tu kád Jose ay ti Maria, sakay nagpasalamat tu Diyos. Nagupos be siya tungkul ni Jesus tu maguhay hide tu págligtas nu Diyos tu lahe ni Israel. ³⁹ Nikuna natupad dán di Jose ay ti Maria u atanan a bagay tu Kautusan nu Panginoon ay nagsole dán hide tu banuwan a Nazaret a Galilea. ⁴⁰ Dimmakál u anak a mabegsak, malalake sakay kinasayaan nu Diyos. ⁴¹ Nadid, kada taon ay angay mákpamiyesta u dáddakál hide ni Jesus ti Jerusalem tu Pággalaala tu Págtaleb nu anghel. ⁴² Nikuna sapulo ay ti duwwa dán siya a taon ay ummangay dámman hide ti Jerusalem para mákpamiyesta, sigun tu kaugaliyan de. ⁴³ Káttapos nu piyesta ay naghektat dán hide a sole. Nagwahak ti Jesus ti Jerusalem a awan namalayan nu dáddakál na hide. ⁴⁴ Tu buong akala nu dáddakál na hide ay kaguman dila siya kanya dire-diretso la hide tu lakad de tu saldew. Nikuna matukuyan nu dáddakál na a awan siya kaguman ay inehyok de tu kákkapátkákka de sakay tu matengge de hide a tolay, pero ⁴⁵ awan de netan ti Jesus. Kanya nagsole hide ti Jerusalem para hed di hod a ehyukán ti Jesus. ⁴⁶ Káttapos nu tállo a aldew ay netan de ti Jesus tu Templo a mákpággetnod tu kamaistuwan nu Kautusan a mágsaneg sakay makán tanungan nide. ⁴⁷ Nagtaka u atanan a nakasaneg tu katalinuwan na a magtábbeg. ⁴⁸ Nikuna ketan siya nu dáddakál na ay nagtaka be hide. Kinagi nena na, “Anin, anak ko, bakin a kinonna mo kami he? Grabi u balisa me ay tama mo a makán ehyukán niko.” ⁴⁹ Timmábbeg ti Jesus, “Bakin ehyukánnák moy? Awan moy beman tukoy a dapat hedák tu bilay nama ko?” ⁵⁰ Pero awan de naintendiyan u tatahoden a kahulugan nu kinagi na. ⁵¹ Káttapos ay nákkuyog dán ti Jesus tu dáddakál na hide a pasole ti Nazaret, sakay nagin masássunudán siya nide. Pinakatandaan nu ina na u atanan a bagay a nangyare. ⁵² Mágdaka-dakál ti Jesus a malalake sakay lalo pa a kinasayaan nu Diyos sakay nu tolay hide.

¹ Ti panahunan itod ay sapulo dán ay ti limma a taon u pághare ni Tiberio ti Roma. Ti Poncio Pilato ay gubernador ti Judea sakay ti Herodes ay gubernador ti Galilea. U wadi na a ti Felipe ay gubernador tu lugar a Iturea sakay ti Traconite sakay gubernador be ti Lisanias ti Abilinia. ² Di Anas ay ti Caifas u pinakapuno a saserdote nu Judio hide. Ti itod be a panahun ay katoy tu parang ti Juan a anak ni Zacarias. Ingkagi nikuna nu Diyos u dapat na a kagiyán tu tolay hide. ³ Kanya linebut na u banuwan a magdibi-dibilew ti Jordan. Impangaral na tu tolay hide a dapat hide a magsise tu kasalanan de hide sakay magpabawtismo tánni patawadán hide nu Diyos. ⁴ Dipo hod ay natupad dán u nesulat tu libro ni prupeta Isaias a konna he: “Kinagi nu essa a magpákhaw tu parang, ‘Ihanda moy u dilan nu Panginoon, Maggimet kam tu masunong a dilan a paglakadan na! ⁵ Kailangan a tambakan u lalábbak hide a lugar, sakay patagán u mabuke-buked hide. Pasunungán u dilan a palekwát-lekwát, sakay pantayán u dilan a magkabuktonbukton. ⁶ Sakay ketan nu atanan a tolay u págligtas nu Diyos!’ ” ⁷ Makpal a tolay u ummadene ni Juan para magpabawtismo, “ Pero kinagi na nide hikam a lahe nu mágkadukás hide a tolay! Ti deya nagkagiyay a makaginan kam tu parusa a pademát? ⁸ Ni talaga a nagsisi kamon tu kasalanan moy hide ay ipeta moy iye tu gimet moy hide! Dyan kam umasa a dipo gábwat kam tu lahe ni Abraham ay awan kamon maparusaan. Kagiyán ko nikam, makagimet u Diyos ti tunay a lahe ni Abraham tu pamamag-itan ni iye hide a bito. ⁹ Maski nadid ay nakahanda dán u parusa nu Diyos a kumán a wasay a pangpukan tu kayo hide. U atanan a kayo a awan magbunga ti maganda ay pukanán sakay ibut tu apoy. ¹⁰ Tinanung siya nu tolay hide, “Ni konna hod ay ánya u dapat me a gimitán?” ¹¹ Timmábbeg ti Juan, “Ni tehhod kam a duwwa a badu ay iyatád moy u essa tu awan ti badu, sakay ni tehhod kam a makan ay pakanán moy u magaláp hide.” ¹² Dummemát be u mágsingeh hide ti buwes para magpabawtismo. Tinanung di be siya, “Maisto, ánya be u dapat me a gimitán?” ¹³ Timmábbeg siya, “Dyan kam magsingeh ti subra tu dapat moy a singihán.” ¹⁴ Tinanung be siya nu sundalo hide, “Ay hikame, ánya be u dapat me a gimitán? Dyan kam mamilit a magaged ti pilak maskin deya oni dyan kam magsihe ti kakabuliyan. Makontento kamon tu suweldu moy.” tábbeg ni Juan. ¹⁵ Atanan nu tolay ay maguhay dán tu káddemat nu Cristo. Inisip de a bakay ti Juan dán u Cristo a áohayan de. ¹⁶ Pero timmábbeg ti Juan, “Bawtismuwan takam tu dinom, pero tehhod a dumemát a mas makapangyariyan nan hikán. Siya u mangbawtismo nikam tu Banal a Ispirito sakay tu apoy. Awanák dámmanla karapat-dapat a mangokbis tu sinelas na. ¹⁷ Konna siya tu essa a tolay a te tawed a bilao para ihiwalay u lupás tu pahay. Idatton na u pahay tu kamalig sakay u lupás ay tutudán na tu apoy a awan dán mata-matay maski nikán. ¹⁸ Makpal padi a bagay u intoldu ni Juan tu pángngaral na tu Maganda a Baheta tu tolay hide. ¹⁹ Maski u puno a ti Herodes ay pinagkagiyan na dipo inagum na ti Herodias sakay tu agum pa hide a ginággimet ni Herodes a mágkadukás. Ti Herodias ay kabanga nu wadi ni Herodes. ²⁰ Kanya impepireso ni Herodes ti Juan sakay nagin dagdag pa iye tu kasalanan na hide. ²¹ Nikuna nabawtismuwan dán ni Juan u atanan a tolay a katoy hod ay binawtismuwan nabe ti Jesus. Mentaras a magdasal ti Jesus ay nabukasan u langet ²² sakay ummogsad nikuna u Banal a Ispirito a konna tu kalapate. Essa a boses u gábwat ti langet u nasaneg de a nagupos,“Hiko u pinakamamahal ko a anak; masayaák niko a tahod.” ²³ Tállo dán a pulo a taon ti Jesus nikuna magsapul a mangaral. Tu pangisip nu tolay hide a anak siya ni Jose a anak ni Eli, ²⁴ Ti Eli ay anak ni Matat, ti Matat ay anak ni Levi a anak ni Melqui, sakay ti Melqui be ay anak ni Janai a anak ni Jose. ²⁵ Ti Jose ay anak ni Matatias a anak ni Amos. Ti Amos ay anak ni Nahum a anak ni Esli. Ti Esli be ay anak ni Nage, ²⁶ a anak ni Maat a anak ni Matatias. Ti Matatias ay anak ni Semei a anak ni Jose. Ti Jose ay anak ni Juda, ²⁷ a anak ni Joana. Ti Joana ay anak be ni Resa a anak ni Zorobabel a anak ni Salatiel a anak be ni Neri. ²⁸ Ti Neri ay anak ni Melqui a anak ni Adi. Ti Adi ay anak ni Cosam a anak ni Elmodam a anak ni Er. ²⁹ Ti Er ay anak ni Josue a anak ni Elieser a anak be ni Jorim a anak ni Matat. Ti Matat ay anak ni Levi, ³⁰ a anak ni Simeon a anak ni Juda. Ti Juda ay anak be ni Jose. Ti Jose ay anak ni Jonan a anak ni Eliaquim, ³¹ a anak ni Melea. Ti Melea ay anak ni Mainan a anak ni Matata a anak be ni Natan a anak ni David. ³² Ti David ay anak ni Jesse, a anak ni Obed, sakay ti Obed ay anak be ni Booz. Ti Booz ay anak ni Salmon a anak ni Naason, ³³ a anak ni Aminadab a anak ni Admin. Ti Admin ay anak be ni Arni a anak ni Esrom, a anak be ni Farez. Ti Farez ay anak ni Juda, ³⁴ a anak ni Jacob. Ti Jacob ay anak ni Isaac a anak ni Abraham. Ti Abraham ay anak ni Tare a anak ni Nacor. ³⁵ Ti Nacor ay anak ni Serug a anak ni Ragau, a anak ni Peleg, sakay ti Peleg ay anak ni Heber a anak ni Sala. ³⁶ Ti Sala ay anak ni Cainan a anak ni Arfaxad a anak be ni Sem. Ti Sem ay anak ni Noe a anak ni Lamec, ³⁷ a anak ni Matusalem a anak ni Enoc. Ti Enoc ay anak ni Jared a anak ni Mahalaleel a anak be ni Cainan. ³⁸ Ti Cainan ay anak ni Enos a anak be ni Set. Sakay ti Set ay anak ni Adan a Anak nu Diyos.

¹ Nadid, lummakad dán ti Jesus ti Jordan, putat siya tu kapangyariyan nu Banal a Ispirito. Iye i nánggiyaay nikuna tu parang. ² Appat a pulo a aldew ay ti gibi siya hod a tináttokso ni Satanas tu parang. Mentaras a katoy siya hod ay awan siya kikimman, kanya nagipehás siya ti aláp. ³ Kinagi nikuna nu Diyablo, “Ni hiko ngane u Anak nu Diyos ay iyutus mo a magin tinapay i bituwan iye.” ⁴ Pero timmábbeg ti Jesus, “Nakasulat tu Banal a Kasulatan, ‘Bakán la tu tinapay a mabiyag u tolay nan tu kada upos a lumuwas tu labi nu Diyos.”’ ⁵ Káttapos ay inyangay siya nu diyablo tu essa a malangkaw a lugar sakay impeta na ti saglit u atanan a kahariyan ti munduwáy. ⁶ Sakay kinagi nu diyablo ni Jesus, “Iyatád ko niko u atanan a kapangyariyan sakay kayamanan ti kahariyanan iye hide. Hikán i makákkaoway ti iye hide a atanan kanya maare ko iye a iyatád tu deya man a gusto ko a páng-atáddan. ⁷ Kaya ni hikán i sambaán muway ay magin kao mo iye hide a atanan.” ⁸ Pero tummábbeg ti Jesus, “Nakasulat tu Banal a Kasulatan, ‘U Panginoon mu la a Diyos u dapat mo a sambaán, sakay siya la u dapat mo a pagserbiyan.’ ” ⁹ Sakay inyangay dámman siya nu diyablo tu toktok nu Templo ti Jerusalem sakay kinagi na nikuna, “Ni hiko ngane u Anak nu Diyos, tumákneg kaped ¹⁰ dipo nakasulat a, ‘Ibilin nu Diyos tu anghel na hide a ingatan di ka,’ ¹¹ sakay nakasulat be, ‘Alalayan dika, tánni awan ka mesángdul ti bituwe hide.”’ ¹² Pero timmábbeg ti Jesus, “Nakasulat tu Banal a kasulatan a, ‘Dyan mo subukán u Panginoon mo a Diyos!’ ” ¹³ Káttapos a toksuwán ti Jesus tu atanan a paraan ay lummakad dán u diyablo sakay naguhay ti iba a tiyempo. ¹⁴ Nadid, nagsole ti Jesus ti Galilea a tehhod a kapangyariyan nu Banal a Ispirito. Nebaheta tu banu-banuwan hod u tungkul nikuna. ¹⁵ Nagtoldu siya tu katolayan tu sinagoga de hide sakay pinure siya nu atanan a tolay a nakasaneg nikuna. ¹⁶ Nadid, immangay ti Jesus ti Nazaret. U banuwan a dimmakállan na. Konna tu date na a gággimitán, immangay siya tu sinagoga tu Aldew nu Káimang sakay tummaknág para basaán u Banal a Kasulatan. ¹⁷ Inyatád di nikuna u libro a insulat ni prupeta Isaias. Binuklat na itod tu piligu a te nakasulat a konna he, ¹⁸ “Katoy nikán u Ispirito nu Panginoon, dipo hikán u pinile na a mángpakapospos tu Maganda a Baheta tu mágkahirap hide a tolay. Inutusanák na para ikagi tu pireso hide a malaya dán hide. sakay konna bi hod, u buhák hide ay maketa dán. Inutusanák na para palayaán u áapi-apiyán hide, ¹⁹ sakay ipakapospos ko be a dumemát dán u panahun nu págligtas nu Panginoon.” ²⁰ Káttapos ni Jesus a nangbasa tu kasulatan ay linukot na itod sakay insole na tu mágserbi tu sinagoga. Nággetnod Siya para mangaral dán. Sakay ináeleng siya nu atanan a tolay a atoy hod, ²¹ sakay kinagi na nide, “I kasulatan iye a nasaneg moy ay natupad dán nadid.” ²² Pinure siya nu atanan a tolay sakay nagtaka hide dipo malalake siya a magupos. Kinagi de, “Awan beman ina u anak ni Jose?” ²³ Kaya kinagi ni Jesus, “Siguradu a kagiyán moy nikán i kakagiyanan iye: ‘Nay, ta doktor ka labe ay gamután mo i sadile muwe.’ Kagiyán moy be nikán, ‘Bakin awan mo gimitán tu sadile mo a banuwan u nabaheta me a ginimet mo ti Capernaum?’ ²⁴ Pero kagiyán ko nikam,” kagi ni Jesus, “Tatahoden a awan tanggapán u prupeta tu sadile na a banuwan. ²⁵ Pero kagiyán ko nikam, makpal a bábbey a bilo ti Israel tu kapanahunan ni prupeta Elias. Nikuna awan naguden ti tállo a taon ay ti kalahate ay nagkahod ti grabi a sák-aláp tu buo a Israel. ²⁶ Pero awan pinaangay nu Diyos ti Elias a tumulung tu maski essa nide nan pinaangay na siya tu essa a bilo a bábbey ti Sarepta a sakup ni Sidon. ²⁷ Sakay tu kapanahunan be ni prupeta Eliseo ay makpal u te ketong pero awan siya ti pinagpiya maskin essa nide. Nan ti Naaman la a taga-Siria.” kagi ni Jesus. ²⁸ Nikuna masaneg de u kinagi ni Jesus ay grabi u iyamut nu tolay hide a katoy tu sinagoga. ²⁹ Tummaknág hide a atanan sakay intoglad de siya a paluwas. Inyangay di siya tu toktok nu buked tu banuwan para itákneg. ³⁰ Pero naglakad ti Jesus tu bállog de sakay linakaden na hide. ³¹ Nadid, ummangay ti Jesus ti Capernaum, essa a banuwan ti Galilea. Nagtoldu siya hod tu Aldew nu Káimang. ³² Nagtaka u mágsaneg hide tu págtoldu na dipo tehhod a kapangyariyan u paggupos na. ³³ Nadid, te essa a lállake tu sinagoga sinaddap ni madukas a ispirito. Pimmakhaw siya ti mabegsák, ³⁴ “Jesus a taga-Nazaret,” kagi na, “Ánya i pák-alam muway nikame? Ummangay ka beman he para bunuwán mo kame? Tukoy ko ni deya ka, hiko u Banal a Anak nu Diyos.” ³⁵ Pero sinaway siya ni Jesus, kinagi na, “Dyan ka pakahehaw! Umibut ka ti tolaye!” Káttapos inlugmuk nu madukás a ispirito u lállake tu atubang nu katolayan, sakay tulos na a linakaden sakay awan na pinasakitan. ³⁶ Nagtaka hide a atanan kaya namágtanungan hide a kinagi de, “Ánya wád iye a kakalase a pággupos? Makapangyariyan sakay mabisa. Paibután na u madukás a ispirito sakay sumunud be hide tu kagiyán na!” ³⁷ Sakay kimmalat u baheta tungkul ni Jesus ti lugaran itod. ³⁸ Limmakad ti Jesus tu sinagoga sakay tulos siya a immangay tu bilay ni Simon. Ti itod be ay tunay ti kahigpit u ladu nu katugngan a bábbey ni Simon kaya impákpagguhon de ni Jesus a pagpiyaán siya. ³⁹ Angay timmáknág ti Jesus tu wahes nu kákkatdugan nu maladu a bábbey sakay inyutus na a maibut u ladu tu bábbey. Ummibut ngane u ladu na kaya pagdaka siya a timmáknag sakay nagpospos nide. ⁴⁰ Nikuna sumaham dán u aldew ay inyangay nu tolay hide tu kán Jesus u te saket hide. Intupo na u kamát na tu balang essa, sakay pinagpiyya na hide. ⁴¹ Nágpapákhawán a limmuwas u mágkadukás a ispirito tu kakpalan nu tolay hide kinagi de, “Hiko u Anak nu Diyos!” Pero sinaway hide ni Jesus sakay awan na hide pinakultadan a magupos, dipo tukoy de a siya u Cristo. ⁴² Tu kaldiwan ay limmakad ti Jesus, immangay siya tu tahimik a lugar a awan ti tolay. Pero inehyok padi siya nu tolay hide. Nikuna ketan di dán siya ay nákkekakagbi hide a dyan pa la siya lumakad. ⁴³ Pero kinagi ni Jesus, “Kailangan a ipangaral ko be tu agum a banuwan u Maganda a Baheta tungkul tu pághare nu Diyos dipo saiye u dahilan kayaák a pinaangay nu Diyos ti lutaáy.” ⁴⁴ Kaya nangaral siya tu sinagoga hide ti Judea.

¹ Nadid, essa a aldew mentaras mangaral ti Jesus tu baybay nu diget a Genesaret ay kinadahupodupan siya nu dapat a kakpal a tolay dipo gusto de a mágsaneg tu upos nu Diyos. ² Sakay netan na u duwwa a abeng a keddung. Nakaawas dán u mángngikan hide sakay maguges dálla hide tu pante de hide. ³ Summakay siya tu essa a abeng a kao ni Simon, sakay kinagiyan na siya a itágtaw na ti sabadit u abeng. Nággetnod siya tu abeng sakay nagtoldu tu tolay hide. ⁴ Káttapos na a nagtoldu ay kinagi na ni Simon, “Angay kam mamante ditaw tán makalap kam.” ⁵ Timmábbeg ti Simon, “Maisto, sagibi kami dán a nanilág pero awan kame ti nalap. Pero dipo kinagi mo ay isáklad ko a huway u pante hide.” ⁶ Konna ngane hod u ginimet de. Dapat a kakpal u nalap de a ikan kaya ngahe–ngahe a mapisad u pante de hide. ⁷ Kanya pinayadden de u kaguman de hide tu essa a abeng tán patulung. Kanya tinulungan di hide. Naputat ti ikan u duwwa a abeng kaya ngahe-ngahe dán a omállád. ⁸ Pákketa ni Simon Pedro tu nangyare ay limmuhud siya tu atubang ni Jesus sakay kinagi na, “Adeyuwanák mo Panginoon, dipo makasalananák a tolay.” ⁹ Grabi u taka na ay tu agum na hide dipo tu kakpal nu nalap de a ikan, ¹⁰ konna bi hod di Santiago ay ti Juan a anak ni Zebedeo a kasosyo ni Simon. Kinagi ni Jesus ni Simon, “Dyan ka manteng! Sapul nadid ay bakán dán a ikan alapán muway nan magakit ka dán ti tolay a maniwala nikán.” ¹¹ Nikuna nedek di dán u abeng de hide ay linakaden de itod a atanan sakay immunonod hide ni Jesus. ¹² Nikuna katoy ti Jesus tu essa a banuwan ay immadene nikuna u essa a kinetong a lállake. Limmuhud siya sakay nákkekakagbi ni Jesus, “Panginoon ni gustuwán mula ay mapagpiyyaák mo.” ¹³ Tinawiden siya ni Jesus sakay kinagi na, “Gusto ko a magpiyya ka!”Sakay pagdaka a nawan u ketong na. ¹⁴ Sakay kinagiyan siya ni Jesus, “Dyan mo iye kagi-kagiyán maskin deya. Nan angay mo ipeta tu saserdote hide sakay magalay ka sigun tu inyutus ni Moises. Sa iye mángpatunayay tu tolay hide a nagpiya ka dán.” ¹⁵ Pero mas lalo pa a nekalat u baheta tungkul ni Jesus, kaya nagdemáttan u grabi’t kakpal a tolay tán mágsaneg sakay mapagpiyya u saket de hide. ¹⁶ Pero pirmi a umangay ti Jesus tu parang sakay hod siya a magdasal. ¹⁷ Essa, aldew mentaras magtoldu ti Jesus ay te mággetnod a Pariseo sakay u maisto hide nu Kautusan. Gábwat hide tu iba-iba a banuwan ti Galilea, ti Judea sakay ti Jerusalem. Atoy ni Jesus u kapangyariyan nu Diyos a magpapiya tu te saket hide. ¹⁸ Nadid, tehhod a dummemát a sangan a tolay a te usung a paralitiko a kumákkatdug. Ipilit de a isaddáp tu bilay tánni meangay tu atubang ni Jesus. ¹⁹ Pero awan hide makasáddap dipo tu kakpal nu tolay. Kanya immunek hide tu atáp sakay linákwaban de sakay intonton de tu bállog nu katolayan u págkatdugan nu paralitiko tu atubang ni Jesus. ²⁰ Nikuna ketan ni Jesus u pánnampalataya de ay kinagi na tu paralitiko, “Anak, napatawad ka dán tu kasalanan mo hide.” ²¹ U maisto hide nu Kautusan sakay u Pariseo hide ay nággisip-isip sakay namágguhon-uhon hide, “Deya ben iye a tolay a magkukunware a Diyos? Awan beman Diyos la i maariyay a magpatawad ti kasalanan?” ²² Pero tukoy ni Jesus u katoy tu isip de kaya kinagi na nide, “Bakin magisip kam ti konna hina? ²³ Ánya mas alistuway a kagiyán ko, ‘Napatawad dán u kasalanan mo hide,’ oni kagiyán ko, ‘Tumaknág ka sakay maglakad?’ ²⁴ Nadid, patunayan ko nikam a u Anak nu Tolay ay te kapangyariyan ti lutaáy a magpatawad ti kasalanan.”kinagi na tu paralitiko, “Tumaknag ka, tawidán mo i págkatdugan muwe sakay sole ka dán!” ²⁵ Pagdaka a immikat u lállake sakay inagkat na u kakkatdugan na tu atubang nu katolayan sakay nagsole a nágpapuriyán tu Diyos. ²⁶ Nagtaka u atanan a kotay hod sakay grabi u ánteng de. Nagpure hide tu Diyos sakay kinagi nu balang essa nide, “Netan tamon nadid u makataka-taka a bagay!” ²⁷ Káttapos ni pangyayariyan itod ay limmuwas ti Jesus tu bilay. Netan na u essa a mágsingeh ti buwes, u ngahan na ay ti Levi. Mággetnod siya tu págsingihan ti buwes. Kinagi nikuna ni Jesus, “Umunonod ka nikán.” ²⁸ Tummáknág ti Levi sakay tulos na a linakadan u atanan sakay immunonod siya sakay nagserbi ni Jesus. ²⁹ Sakay káttapos ay hinandaan ni Levi ti Jesus ti dakál a handaan tu bilay na. Nák-atubang ni Jesus a kuman u agum hide a mágsingeh ti buwes sakay u agum pa hide a tolay. ³⁰ Nágganasasan u Pariseo hide sakay u maisto hide nu Kautusan. Kinagi de tu disepulus hide ni Jesus, “Bakin mákpággatubang kam a kuman sakay uminom ti mágsinge he hide ti buwes sakay tu agum pa hide a makasalanan?” ³¹ Tinábbeg hide ni Jesus, “Awan kailangan nu awan ti saket u mággamot nan u te saket la. ³² Awanák he immangay para tulungan u tolay hide a magkagi a malinis hide nan kayaák a immangay he ay para tulungan a magsise u makasalanan hide.” ³³ Te sangan a tolay a nagkagi: “Pirme a magkulásyon sakay magdasal u disepulus hide ni Juan; konna bi hod u disepulus nu Pariseo hide. Pero bakin i disepulus muwe hide ay mágkakanán la sakay mággainumán?” ³⁴ Timmábbeg ti Jesus, “Pagkulásyonán moy beman u bisita hide tu kasalan a kaguman de pálla u lállake a kinasal? ³⁵ Dumemát u aldew a mehiwalay dán u kinasal, saka palla hide a magkulasyon.” ³⁶ Kinagi be ni Jesus nide u essa a talinhaga,“Awan maare a mangtabas ti essa a risato tu bigu a damit para iyáppol tu date dán a damit. Mara ni konna he i gimitán moyay ay masida u bigu a damit sakay ni bigu iyappol moyay ay awan mebagay tu date dán a damit. ³⁷ Awan be ti magasák ti bigu a alak tu date dán a pággasákkan a koblet ni hayup. Ni konna he i gimitán moyay ay mapisad u date a pággasákkan sakay mágkebut u alak sakay tulos a masida u pággasákkan. ³⁸ Ni bigu a alak u iyasák moy ay dapat a bigu be u pággasákkan. ³⁹ Sakay awan be ti masoh a manginom tu bigu a alak mara ni nakainom dán hide tu date a alak. Nan kagiyán de a, ‘Masarap u date a alak.’ ”

¹ Tu Aldew nu Káimang ay nagtaleb di Jesus tu katriguwan. Nagkádtoh u disepulus na hide tu ohay nu trigu sakay kinásselan de itod. ² Pero kinagi nu agum a Pariseo, “Bakin maggimet kam ti bawal tu Kautusan tu Aldew nu Káimang?” ³ Tinábbeg hide ni Jesus, “Awan moy beman nabasa tu Kasulatan u ginimet ni David nikuna nagaláp siya sakay tu kaguman na hide? ⁴ Awan beman simmáddáp siya tu bilay nu Panginoon sakay kimman tu tinapay a alay tu Diyos, a u saserdote la hide u tehhod a karapatan a mangkan hod? Inatádden na pa u kaguman na hide.” ⁵ Sakay kinagi pa ni Jesus, “U Anak nu Tolay u makapángkagi ni ánya u dapat a gimitán tu Aldew nu Káimang.” ⁶ Tu Aldew nu Káimang ay summáddáp ti Jesus tu sinagoga sakay nagtoldu. Te essa a lállake a patay u kawanan na a kamát. ⁷ Binábbantayan nu maisto hide nu Kautusan sakay nu Pariseo hide ti Jesus, ni magpapiyya siya tu aldew nu Káimang tánni tehhod hide a mesihe nikuna. ⁸ Pero tukoy ni Jesus u katoy tu isip de, kaya kinagi na tu lállake a patay ti kawanan a kamát, “Karon he, angay ka tumáknag ti atubangay.” Immadene u lállake sakay timmáknág tu atubang de. ⁹ Káttapos ay kinagi ni Jesus tu maisto hide nu Kautusan sakay tu Pariseo hide, “Tanungán takam nadid ánya i tamaay a págsunud tu kautusan tu Aldew nu Káimang. U maggimet ti maganda oni maggimet ti madukás? Iligtas u tolay oni mamuno?” ¹⁰ Sakay inileng na hide a atanan sakay káttapos ay kinagi na tu lállake, “Iyolnat mo i kamát muwe!” Kaya tu páng-olnat na tu kamát na ay pagdaka a nagpiya. ¹¹ Pero grabi u iyamut nu maisto hide nu Kautusan sakay u Pariseo hide. Kanya namágguhon hide ni ánya u dapat de a gimitán ni Jesus. ¹² Ti panahunan itod ay immangay ti Jesus tu bumábbuked sakay sagibi siya hod a nágdasal. ¹³ Sakay tu kadimadimangan ay dinulawan na u disepulus na hide, sakay nangpile siya ti sapulo ay ti duwwa nide. Sakay nginahanan na hide a apostol na. ¹⁴ Iye hide u ngaha-ngahan de, ti Simon a nginahanan ni Jesus a Pedro, sakay ti Andres a wadi ni Pedro, di Santiago, Juan, Felipe, Bartolome, ¹⁵ Mateo, Tomas, sakay ti Santiago a anak ni Alfeo, ti Simon a makabayan, ¹⁶ ti Judas a anak ni Santiago, sakay ti Judas Iscariote a nángtokyon ni Jesus. ¹⁷ Káttapos na a piliyán u disepulus na hide ay nanegson siya sakay tummáttaknág hide tu patag a lugar. Katoy hod, u kakpalan nu disepulus na hide sakay u makpal a tolay a gábwat ti Judea sakay Jerusalem, sakay u banuwan hide tu baybay nu Tiro sakay Sidon. ¹⁸ Ummangay hod hide para mágsaneg, sakay mapagpiyya tu saket de hide. Pinagpiyya ngani hide ni Jesus, pate u páppahirapan hide nu mágkadukás a ispirito. ¹⁹ Pinilit nu atanan a te saket a umadene nikuna tánni matawiden de siya, dipo tehhod siya a kapangyariyan a magpapiya tu atanan a te saket. ²⁰ Immileng ti Jesus tu disepulus na hide sakay kinagi na, “Pinagpala u mágkahirap hide nadid, dipo paghariyan kam nu Diyos! ²¹ Pinagpala u magaláp hide nadid, dipo bássugán kam nu Diyos! Pinagpala u mágsanget hide nadid, Dipo magkahod kam ti kasayaan! ²² ‘Pinagpala kam ni kaiyamutan dikam, palayasán, insultuwán sakay kagiyan de a madukas kam dipo tu Anak nu Tolay. ²³ Magsaya kam ti itona a aldew, lumokso kam ti saya dipo grabi’t kadakál u gantimpala moy ti langet. Dipo konna labe hod u ginimet nu nuno de hide tu prupeta hide. ²⁴ “Pero kakagbi kam a mágkayaman hide nadid, Dipo natamasa moy dán u kaginhawaan. ²⁵ “Kakagbi kam a bássog hide nadid, dipo aláppán kam! Kakagbi u mágtatawaán hide nadid, Dipo maglungkut sakay magsasangitán kam! ²⁶ “Kakagbi kam ni puriyán kam nu atanan a tolay, dipo konna bi hod u ginimet nu nuno di hide tu magkukunware hide a prupeta.” ²⁷ “Pero kagiyán ko nikam a mágsaneg hide nadid. Mahalán moy u kadima moy hide sakay maggimet kam ti maganda tu maiyamut hide nikam. ²⁸ Pagpalaán moy u mángsumpa hide sakay idasal moy u mangape hide nikam. ²⁹ Ni dapangán dikam ay ipadapang moy pa u dilupot. Ni alapán de u alikábkáb mo ay iyatád mun pate u badu mo. ³⁰ Atádden mo u magaged niko sakay ni te nangalap tu kabiyagan mo ay dyan mu pesole. ³¹ Gimitán moy tu agum u gusto moy a gimitán di be nikam. ³² Ni u mahalán moy la ay u magmahal labe nikam, ánya wád matanggap moyay a piremyo a gábwat tu Diyos? Maskin u makasalanan hide a tolay ay makabeto be a magmahal tu mangmahal hide nide. ³³ “Ni u paggimitan moy ti maganda ay u maggimet labi hide nikam ti maganda ay ánya wád matanggap moyay a piremyo a gábwat tu Diyos? Maskin u makasalanan hide a tolay ay maggimet labe ti konna hina. ³⁴ Sakay ni paáddiman moy laay ay u áasaan moy hide a makabayad nikam, ánya wád matanggap moyay a piremyo a gábwat tu Diyos? Maskin u makasalanan hide a tolay ay magpaáddem be tu kapareho de a makasalanan dipo tukoy de a makabayad hide. ³⁵ Nan mahalán moy u kadima moy hide. Mággimet kam ti maganda nide sakay magpaáddem kam a awan dán umasa ti ánya pa man a bayad. Tánni dakál u piremyo a matanggap moy. Tán hikam u magin anak nu Dakila a Diyos. Dipo siya ay makákkagbiyan tu mágkadukás sakay tu awan hide tumáttenggi ti utang a luub nikuna. ³⁶ Dapat makákkagbiyán kam, konna tu Ama moy a Diyos.” ³⁷ “Dyan kam humatul tánni awan kam hatulan nu Diyos. Dyan kam be magparusa tánni awan kam parusaan nu Diyos. Mágpatawaden kam tánni patawadán kam nu Diyos. ³⁸ Mangatád kam, tánni atádden kam be nu Diyos; ti tama a takal, natádtád sakay magsápway. Dipo ni ánya u ginamit moy a págtakalan tu agum ay itod be u gamitán nu Diyos nikam.” ³⁹ Tinanung be hide ni Jesus ti patalinhaga, “Maare beman a igiya nu buhák u kapareho na a buhák? Ni konna hod u gimitán de ay pareho hide a metápduk tu ábbut. ⁴⁰ Awan ti disepulus a mas higit tu maisto na. Pero ni matolduwan dán ti husto ay magin konna siya tu maisto na.” ⁴¹ “Bakin bábbahángngán mo i puleng ni kapatkákka muwe? Pero awan mo mabaha-baháng i gaturoso muwe a puleng? ⁴² Kodya mo a kagiyán tu kapatkákka mo a, “Kapatkákka, tulungan taka a mangibut ti puleng muwe, pero awan mo ketan i gaturoso mo a puleng? Mapagpakunware! Ibutan mu pa i gaturoso muwe a puleng, tánni maketa ka ti maganda para maibutan mo u puleng nu kapatkákka mo.” ⁴³ “U maganda a kayo ay awan magbunga ti madukás. Konna labe hod tu madukás a kayo, awan iye magbunga ti maganda. ⁴⁴ Matengge u kayo tu pamamag-itan nu bunga na. Dipo awan ka makapusát ti bunga ni igus tu ponan a masaet. Sakay awan be makapusát ti bunga ni ubas tu ponan nu dawag. ⁴⁵ Konna labi iye tu tolay, u mabait a tolay ay makapangatád ti maganda dipo mabait siya. U madukás a tolay ay makapangatád ti madukás dipo putat ti kadukássan u puso na. Dipo ni ánya u lumuwas tu labi nu tolay ay siya labe u atoy tu puso na.” ⁴⁶ “Bakin dáddulawannák moy a, ‘Panginoon, Panginoon ko,’ pero awan moy labe gimitán u kákkagiyán ko? ⁴⁷ Kagiyán ko nikam, ni deyaman u umadene nikán sakay mágsaneg tu upos ko, sakay sumunud ay konna siya ti iye a talinhaga. ⁴⁸ Konna siya tu tolay a naggimet ti bilay. Uginimet na ay nagkotkot ti tuna’t kadsalad sakay impundasyon na u bilay tu dakal a bito. Nikuna a nagdakál u dinom ay dinapalis na u bilay pero awan la nagahikad dipo matibáng u kákkagimet na. ⁴⁹ Pero ni deya man i mágsanigay tu upos ko sakay awan na igimet ay konna siya tu tolay a naggimet ti bilay a awan ti pundásyon. Nikuna magdakál u dinom sakay dinapalis na u bilay ay pagdaka a natumba sakay tulos a nasida.

¹ Nadid, káttapos a nangaral ni Jesus tu tolay hide ay immangay siya tu banuwan a Capernaum. ² Tehhod hod a essa a kapitan nu Romano a te pinakamamahal a alipin. Nadid tehhod a saket iye a alipin sakay magipepatay dán. ³ Nikuna mabaheta nu kapitan u ginággimet hide ni Jesus ay inutusan na u sangan a puno nu Judio hide a pakpagguhunan de ti Jesus a umangay tu bilay na sakay pagpiyaán u alipin na. ⁴ Káddemát de tu kán Jesus ay nákkekakagbi hide nikuna, kinagi de, “Dapat la a tulungan mo ti kapitan, ⁵ dipo mahal na u bansa tam sakay nangpagimet na kitam pa ngane ti sinagoga.” ⁶ Kanya nákkuyog nide ti Jesus, pero nikuna adene dán siya tu bilay ay inpatagbu siya nu kapitan tu barkada na hide, sakay impekagi na iye ni Jesus, “Panginoon, pekagi ben ni kapitan a dyan ka kan dálla magabala a angay tu bilay na dipo awan kan siya karapat-dapat a angay mo bisitaán. ⁷ Sakay awan kan be siya karapat-dapat a umatubang niko. Pero ni kagiyán mo kalla a magpiyya u alipin na ay tahod a magpiyya siya. ⁸ Dipo essa kál labe siya a sakup nu mas mataas a puno sakay tehhod kál labe siya a sakup a kasundaluwan; ni kagiyán nakan tu essa a, “Angay ka hode,” ay sumunud siya. Ni kagiyán na kan be tu agum a, ‘Karon he,’ ay umadene kan be, sakay ni kagiyán na kan tu alipin na a, ‘gimitán mo iye,’ ay gimitán na kan be itod.” ⁹ Nikuna masaneg iye ni Jesus ay nagtaka siya sakay ummatubang tu katolayan a umunonod nikuna. Kinagi na a, “Maski ti Israel ay awanák palla naketa ti konna he ti kadakál a pánniwala.” ¹⁰ Kássole nu inutusan hide nu kapitan ay dinemáttan de tu bilay a nagpiya ngani dán u utusan. ¹¹ Káttapos hod ay ummangay ti Jesus tu banuwan a dáddulawán de a Nain. Nákkuyog nikuna u disepulus na hide sakay u grabi’t kakpal a tolay. ¹² Nikuna adene dán siya tu banuwan ay natagbu na u maglábbáng hide tu kaessa-essa a anak a lállake nu bilo a bábbey. Makpál u mákpaglábbáng. ¹³ Pákketa nu Panginoon tu ina nu natay ay minahabag siya nikuna, kaya kinagi na nikuna,“Dyan ka dán magsanget.” ¹⁴ Immadene siya sakay kinahap na u kabaong, kaya immimang u magusung hide. Kinagi ni Jesus, “Ulito kagiyan ko niko, umikat ka!” ¹⁵ Nabiyag sakay nagupos u ulito. Sakay inyatád siya ni Jesus nena na. ¹⁶ Neántingan hide a atanan sakay nagpure hide tu Diyos. Kinagi de, “Dummemát dán nikitam u dakila a prupeta. Immangay he u Diyos para tulungan na kitam a tolay na hide.” ¹⁷ Kimmalat u baheta tungkul ni Jesus tu buo a Judea sakay tu palebut na hide a banuwan. ¹⁸ Imbaheta nu disepulus hide ni Juan a Magbautismo nikuna u ginággimet ni Jesus, ¹⁹ sakay dinulaw ni Juan u duwwa tu disepulus na hide sakay pinaangay na hide tu Panginoon para magtanung ti konna he, “Hiko dán beman u impananto nu Diyos a dumemát, oni maguhay kame pa ti agum?” ²⁰ Káddemát de tu kán Jesus ay kinagi de, “Pinaangay kame he ni Juan a Magbautismo dipo petanung na, ni hiko kanon beman u impananato nu Diyos a dumemát oni maguhay kame pa ti agum?” ²¹ Ti odasan itod ay makpál u pinagpiyya ni Jesus: a te saket, u hinayup hide sakay u buhák hide ay maketa. ²² Sakay timmábbeg siya nide, “Sole kamon tu kán Juan sakay kagiyán moy nikuna u netan sakay nasaneg moy. Naketa dán u buhák hide, makalakad dán u pilay hide, nagpiyya dán u kinetong hide, makasaneg dán u bángngág hide, nabiyag dán a huway u patay hide sakay nepangaral dán u Maganda a Baheta tu mágkahirap hide. ²³ Pinagpala u tolay a awan magduwwa-duwwa nikán.’ ” ²⁴ Kállakad nu inutusan hide ni Juan ay te kinagi ti Jesus tungkul ni Juan tu tolay hide: “Bakin angay kam tu parang? Ánya u gusto moy a ketan? Essa a kugun a iháhhapay-hapay nu pahás? ²⁵ Ánya beman u gusto moy a ketan? Essa tolay a nakabihis ti mamahalin? U tolay hide a magsulot ti mamahalin ay mágkayaman sakay mámmágyan la tu palasyo nu hare. ²⁶ Ánya u gusto moy a ketan? Essa a prupeta? Tatahodan ina, sakay kagiyán ko nikam a mas higit pa siya tu essa a propeta. ²⁷ Dipo ti Juan u tumbukan nu Kasulatan: ‘Siya u inutusan ko a magdipalongo niko. Tán mánghanda tu paglakaden mo.’ ²⁸ Kagiyán ko nikam, awan palla ti neenak a mas dakila nikuna. Pero mas dakila ni Juan u pinakamababa hide a pinaghariyan nu Diyos.” ²⁹ U atanan a tolay a nakasaneg nikuna, maske u mágsingeh hide ti buwes ay nagpure tu Diyos. Binawtismuwan iye hide ni Juan. ³⁰ Pero u Pariseo hide sakay u maisto hide nu Kautusan ay timmanggi tu kagustuwan nu Diyos tu biya-biyag de, dipo umád de a nagpabawtismo ni Juan. ³¹ Kinagi pa ni Jesus, “Deya wád u maare ko a pángparehuwan tu tolay hide nadid? Sakay deya u kapareho de hide? ³² Kumán hide a anak a mággetnod tu páglakuwan sakay mamágdulawan tu kaayam de hide, ‘Tinogtugán mi kam ti plawta, pero awan kam nagsayaw! Nasaneg moy kame a nagsanget, pero awan kam nákpagsanget!’ ³³ Dipo nikuna immangay he ti Juan a Magbautismo ay nagkulasyon sakay awan umminom ti alak, pero kinagi moy a hinayup siya. ³⁴ Nikuna dimmemát be u Anak nu Tolay a kuman sakay uminom ay kinagi moy, ‘Ilingán moy tolaye a maunas, máglalasing sakay barkada nu mágsingeh hide ti buwes sakay u agum hide a makasalanan!’ ³⁵ Pero u karunungan nu Diyos ay napatunayan a tama tu pamamag-itan nu maganda a kakkabiyag nu tagasunod na hide.” ³⁶ Nadid, inimbitaan nu essa a Pariseo ti Jesus a angay kuman tu bilay na. Kanya ummangay ti Jesus sakay nákpággatubang a kimman. ³⁷ Ti itod be a banuwan ay te bábbey a makasalanan. Nikuna mabaheta na a pasiyaan a kuman ti Jesus tu bilay nu Pariseo ay immangay hod siya sakay nagtawed ti pasáppot a katoy tu págdattonan a alabastro. ³⁸ Káddemát na hod ay ummadene siya tu tattikadden ni Jesus. Sakay nagsanget, binisa na tu luwa na u tikád ni Jesus. Pinahidan na itod tu buuk na sakay inámmuwan na sakay dináttonan na ti pasáppot. ³⁹ Nikuna ketan itod nu Pariseo a nangakit nikuna ay nakagi na tu sadile na, ‘Ni talaga a prupeta i tolayan iye ay dapat tukoy na ni ti deya mangkákkahapáy nikuna sakay ni ánya i pagkatolayay ni iye a bábbey. Essa siya a makasalanan!’ ⁴⁰ Tukoy ni Jesus u katoy tu isip ni Simon, kaya kinagi na, “Simon, tehhodák a kagiyán niko.”“Ánya itod, maisto?” kagi ni Simon. ⁴¹ Kinagi ni Jesus, “Te duwwa a tolay a nangáddem ti pilak tu essa a mágpautang; Nangáddem u essa ti limma a datos a dinaryo, sakay u essa be ay limma a pulo a dinaryo. ⁴² Nikuna awan hide makabayad ay pareho hide a pinatawad nu nangutangan de. Nadid, deya nide u mas mangmahal tu nagpautang?” ⁴³ Timmábbeg ti Simon, “Tu palagay ko ay u dakál ti utang u pinatawad na.” “Tahod ka,” kagi ni Jesus. ⁴⁴ Káttapos ay sinuleg na u bábbey sakay kinagi na ni Simon, “Netan mo i bábbiyáy? Summáddáppák ti bilay muwáy, pero awanák mo inatádden ti dinom a panguges ko ti tikád kuwáy. Pero siya ay binisa na ti luwa i tikád kuwáy sakay pinahidan na pa tu buuk na. ⁴⁵ Awanák mo inámmuwan bilang pagtanggap mo nikan, pero siya ay awan ummimang a mággaámmuwán ti tikád kuwáy sapul tu kássáddáp ko. ⁴⁶ Awanák mo linangisan ti ulo, pero pinahidan na ti pasáppot i tikád kuwáy. ⁴⁷ Kaya kagiyán ko niko, napatawad dan u dakal a kasalanan ni babbiyay a pinatunayan nu dakal a pagmahal a impeta na nikan. Pero u tolay a mangisip a badit la u napatawad a kasalanan ay badit labe u impeta na a págmahal.” ⁴⁸ Sakay kinagi na tu bábbey, “Napatawad ka dán tu kasalanan mo hide.” ⁴⁹ Kanya u kaguman na hide a kuman ay namágtanungan tu sadi-sadile de, “Deya wád iye a tolay, pate u págpatawad ti kasalanan ay pangahasan na?” ⁵⁰ Sakay kinagi na tu bábbey, “Inligtas ka nu pánnampalataya mo, lumakad ka a mapayapa.”

¹ Nadid, káttapos ni itod ay linebut ni Jesus u banu-banuwan sakay u babaryo hide. Impangaral na u Maganda a Baheta tungkul tu pághare nu Diyos. Kaguman na u sapulo ay ti duwwa a disepulus na, ² sakay u sangan hide a bábbey a pinalaya na tu mágkadukás a ispirito sakay pinagpiyya na tu saket de. Essa ay ti Maria a kákkagiyan de a Magdalena, pitto a mágkadukás a ispirito u napalakad nikuna, ³ sakay ti Juana a kabanga ni Cusa a katiwala ni Herodes, ti Susana sakay makpal pa a agum. Sadile de a pilak i nángtáttustus diyay tu kailangan di Jesus sakay tu disepulus na hide. ⁴ Makpal u nagdemáttan a tolay a gábwat tu agum a banuwan tán umadene ni Jesus. Nikuna a naipun dán u tuna’t káppal a tolay ay ingkagi na i talinhagaan iye: ⁵ “Te essa a tolay a angay nagsabug tu bine na. Tu págsabug na ay te netákneg tu dilan, kaya negemmakan sakay kinákkutem nu kamanukan. ⁶ Tehhod be a netákneg tu kabitu-bituwan, nagtubu pero nalanás bila itod dipo malapes u luta. ⁷ Tehhod be a netákneg tu kasaetan. Kimmáppal u kasaetan kaya binuhebáddan na u nagtubu hide a bine. ⁸ Sakay u agum hide a bine ay netákneg tu maganda a luta. Kaya nagtubu sakay nagbunga ti tággi–datos a butil.”Sakay káttapos ay kinagi na ti mabegsák, “Mágsaneg u tehhod a talinga!” ⁹ Intanung nu disepulus na hide ni ánya u kahulugan nu talinhaga. ¹⁰ Timmábbeg ti Jesus nide, “Inatádden kam nu Diyos ti karunungan tán matukuyan moy u lihim hide tungkul tu pághare na. Pero u agum ay tu pamamag-itan nu talinhaga hide tánni: ‘Maski umileng hide ay awan hide ti ketan; sakay maski mágsaneg hide ay awan hide ti maintendiyan.’ ” ¹¹ “Iye u kahulugen nu talinhaga: u bine ay u upos nu Diyos. ¹² U bine a nesabug tu bihebi nu dilan ay u nágsaneg hide. Pero dimmemát ti Satanas sakay inibutan na tu puso de u upos nu Diyos tánni awan hide maniwala sakay maligtas. ¹³ U nesabug a bine tu bito-bito hide ay u tolay hide a nágsaneg sakay masaya de a tinanggap u upos nu Diyos. Pero awan tatahoden u págtanggap de tu puso de, kaya awan nagnalay u pánnampalataya de. Tu káddemát nu pagsubuk tu biyag de ay pagdaka hide a summina. ¹⁴ U nesabug tu kasaetan ay u tolay hide a nágsaneg tu upos na pero tu kalayan ay dinaig hide nu kákkabalisa de ti biyag, kákkasoh ti kayamanan sakay págsasaya tu magkadukás hide a bagay. Kanya awan hide lummagu tu pánnampalataya de. ¹⁵ Pero u nesabug tu maganda a luta ay u tolay hide a nagsaneg tu upos nu Diyos sakay u náng-asák tu puso de a te katapatan sakay kalinisan. Dipo tu págtiyaga de kaya nagbunga hide.” ¹⁶ Sakay tehhod pa a essa a talinhaga a kinagi ti Jesus, “Awan ti magtab ti simbuwan sakay taklábban na ti banga oni isahok. Nan itupo na itod tu págtupuwan tánni mademlagan u sumáddáp hide tu bilay. ¹⁷ Dipo awan ti netagu a awan lumitaw sakay awan ti sekreto a awan matukuyan. ¹⁸ Kaya pakasanigán moy i itáttoldu kuwáy, dipo ni maniwala kam tu upos ko ay dagdagan pa nu Diyos u tukoy moy dán. Pero ni awan kam mágsaneg sakay awan kam maniwala tu upos ko ay ibutan pa nu Diyos maski u kabadit-baditan a katoy nikam. ¹⁹ Nadid, dimmemát u ina sakay tu wáwwadi ni Jesus a lállake. Pero awan hide makaadene nikuna dipo tu kakpal nu tolay. ²⁰ Kaya te nángkagi nikuna, “Katoy ti luwase dena mo sakay u wáwwadi mo hide, gusto dika a uhunan.” ²¹ Pero kinagi ni Jesus, “U mágsaneg hide sakay sumunud tu upos nu Diyos ay hide u ina sakay wáwwadi ko.” ²² Essa aldew ay summakay di Jesus sakay u disepulus na hide tu abeng. Sakay kinagi na nide, “Umahabes kitam dibilew ni minalno wáy.” Kanya immahabes ngane hide. ²³ Nikuna pasiyaan dán hide a máglayag ay netidug ti Jesus. Nagabutan hide ni tribunada sakay naputát dán hide ti limas, kaya ngahi-ngahe dán hide a umállád. ²⁴ Kaya inadeniyan siya nu disepulus na hide sakay linukag, “Panginoon, matay kitamon!”kagi de. Immikat ti Jesus sakay sinaway na u pahás sakay u dalondun. Káttapos ay lummantap u tagmák. ²⁵ Tinanung na hide, “Hádyarán u pánnampalataya moy?” Tu ánteng de sakay tu taka de ay namágtanungan hide, “Deya wád iye a katolay? Maske u pahás sakay u dalondun ay utusan na sakay sumunud be hide nikuna!” ²⁶ Nagpundu hide tu lugar nu Geraseno hide a tapat ni Galilea a kadibilew nu minalno. ²⁷ Káawas ni Jesus tu abeng ay tinagbu siya nu lállake a taga hod a sináddáp ni madukás a ispirito. Nalay dán siya hod a obba sakay mámmágyan dán tu paglábbangngan dipo umád na be a mágyan tu bilay de. ²⁸ Pákketa na ni Jesus ay pimmákhaw siya sakay limmuhud tu atubang na. Sakay kinagi na ti mabegsák, “Jesus a Anak nu Diyos a dakila, ánya pák-alam muway nikán? Kagbiyanák mo ped, dyanák mo parusaan.” ²⁹ Kinagi na iye dipo inutusan ni Jesus u madukás a ispirito a lumakad nikuna. Nalay dán siya a sassaddappan nu madukás a ispirito. Kaya maski ni pakababantayan sakay punguwán ti kadena u tika-tikád na sakay u kama kamát na ay bágsután na la. Sakay iyáangay siya nu madukás a ispirito tu adeyo a lugar. ³⁰ Tinanung siya ni Jesus, “Deya ngahan muway?” “Batalyon,” kagi na, dipo makpál u mágkadukás a ispirito u simmáddáp nikuna. ³¹ Sakay nákkekagbi u mágkadukás hide a ispirito a dyan hide pasegbuwán ni Jesus tu abbut a awan ti kahad. ³² Tehhod a kababuyan a kuman tu bumábbuked a adene hod. Nákkekagbi ni Jesus u mágkadukás hide a ispirito a pasáddáppán na dálla hide tu kababuyan, kaya pinakultadan na hide. ³³ Kanya limmuwas tu tolay u mágkadukás hide a ispirito sakay simmáddáp tu kababuyan. U kababuyan ay bigla a nággaginanán sakay tulos-tulos a nágketákneg tu minalno sakay nágkalimás. ³⁴ Nikuna ketan nu mággalaga hide tu kababuyan u nangyare ay gummággenan hide a immangay tu banuwan ay tu babaryo sakay imbábbaheta de u nangyare hide. ³⁵ Kaya immangay hod u tolay hide para ilingán u nangyare. Tu káddemát de tu kán Jesus ay netan de u tolay a date a sináddáp ni madukás a ispirito. Mággetnod tu atubang ni Jesus a nakabadu sakay matino dán u isip na. Kanya neántingan hide a atanan. ³⁶ Ingkagi nu tolay hide a naketa tu nangyare tu tolay hide ni kodya a nagpiyya u lállake a sináddáp ni madukás a ispirito. ³⁷ - ³⁹ Nákkekagbi u taga Geraseno hide ni Jesus a lumakad dán siya tu banuwan de dipo grabi u ánteng de. Nákkekakagbi ni Jesus u lállake a pinalaya na tu mágkadukás hide a ispirito a ikuyog de siya. Pero kinagi nikuna ni Jesus, “Sole ka dán tu bilay moy sakay ibaheta mo u dakál a bagay a ginimet niko nu Diyos.” Di Jesus sakay tu disepulus na hide, ay simmakay tu abeng sakay limmakad dan hide. Nagsole ngane u lállake sakay imbábbaheta na tu buo banuwan u ginimet nikuna ni Jesus. ⁴⁰ Nikuna nagsole dán ti Jesus tu dibilew nu minalno ay masaya siya a tinanggap nu tolay hide dipo áuhayán di dán siya. ⁴¹ Nadid te dimmemát be a essa a lállake, a Jairo u ngahan na, a tagapangasiwa tu sinagoga. Limmuhud siya tu atubang ni Jesus sakay nákkekakagbi a umangay tu bilay na, ⁴² dipo u kaessa-essa na a anak a bábbey a magsasapulo ay ti duwwa a taon ay magipepatay dán. Mentaras maglakad ti Jesus a patamo tu bilay ni Jairo ay sássánsánnán siya nu katolayan. ⁴³ Katoy bi hod u bábbey a sapulo ay ti duwwa dán a taon a mágdadigiyán. Sakay awan ti makagamot nikuna maskin deya. Naubus dán u atanan a kabiyagan na ti págpapagamot pero awan la nagpipiya. ⁴⁴ Kaya immadene siya tu áadággan ni Jesus sakay kinahap na u garayan nu damit na. Pagdaka a ummimang u págdadigi na. ⁴⁵ Tinanung ni Jesus u disepulus na hide, “Deya u nangkahap tu damit ko?” Nikuna awan ti umamin ay kinagi ni Pedro, “Maisto, napalebutan ka ni tolaye hide sakay sássánsánnán di ka!” ⁴⁶ Pero kinagi ni Jesus, “Tehhod a nangkahap ti damit kuwáy! Nabate ko a tehhod a kapangyariyan a limmuwas nikán.” ⁴⁷ Nikuna matukuyan nu bábbey a awan melihim u ginimet na ay nágpapágpággán siya a immadene ni Jesus sakay limmuhud tu atubang na. Káttapos ay kinagi na tu atanan a katoy hod ni bakin kinahap na u damit ni Jesus sakay ni kodya siya nagpiya a pagdaka. ⁴⁸ Kinagi na nikuna, “Anak, pinagpiyya ka nu pánnanampalataya mo. Sole ka dán a tehhod a kapayapaan.” ⁴⁹ Mentaras a magupos ti Jesus ay dimmemát u essa lállake a gábwat tu bilay nu tagapangasiwa. Kinagi na, “ Patay dán u anak mo!” Dyan mu dán abalaán i maistuwe.” Kagi na ni Jairo. ⁵⁰ Pero tu pákkasaneg ni Jesus ay kinagi na ni Jairo, “Dyan ka mabalisa. Manalig kala a magpiya siya.” ⁵¹ Káddemát ni Jesus tu bilay ni Jairo ay awan na ingkuyog u agum tu sáddáp nan di Pedro, Juan, Santiago, tama na sakay tena na la nu madiket. ⁵² Sangitan dán u atanan a tolay a katoy hod. Pero kinagi ni Jesus, “Dyan kam magsanget dipo awan siya patay, nan tidug la.” ⁵³ Kinatawaan di siya dipo tukoy de a patay dán u madiket. ⁵⁴ Pero tinawiden ni Jesus u kamát na sakay kinagi na, “Umikat ka anak!” ⁵⁵ Ti itod be ay nabiyag u madiket sakay tulos a immikat. Sakay pinapakan ni Jesus. ⁵⁶ Grabi u taka nu dáddakál na hide pero kinagiyan na hide a dyan de kagi-kagiyán maskin deya u nangyare.

¹ Nadid, dinulaw ni Jesus u sapulo ay ti duwwa a disepulus sakay inatádden na hide ti kapangyariyan a magpalayas ti madukás a ispirito sakay magpapiyya tu tehhod hide a saket. ² Sakay inutusan na hide a angay mangaral tungkul tu pághare nu Diyos sakay magpapiyya tu tehhod hide a saket. ³ Kinagi na nide, “Dyan kam magbilon ti maske ánya man tu angayan moy maske sahukod, hembeg, makan, pilak oni paglewasan. ⁴ Sakay máktulos kam tu bilay a mangtanggap nikam, sakay mágyan kam hod mentaras a awan kam pálla lumakad ti banuwanan itod. ⁵ Ni mara awan dikam be tanggapán ti itona a banuwan ay lumakad kam hod. Bagu kam a humektat ay ipagpag moy pa u alikabuk nu tika-tikád moy, bilang paalaala kontara nide.” ⁶ Kanya naglakad u disepulus na hide sakay nangaral tu babaryo hide tungkul tu Maganda a Baheta sakay pinagpiya de u tehhod hide saket tu luga-lugar a immangayan de. ⁷ Nadid, nabaheta ni Herodes a gobernador ti Galilea u atanan a ginággimet ni Jesus. Naguluwan siya, dipo tehhod a sangan a tolay a nagkagi a nabiyag a huway ti Juan a Mágbawtismo. ⁸ Te nagkagi be a, “Pimmeta ti Elias.”Te nagkagi pa a, “Nabiyag kan a huway u essa tu prupeta hide tu itod pa a panahun.” ⁹ Pero kinagi ni Herodes, “Impaputol ku dán ti Juan. Deya wad iye a lállake? Makpalák dán a nabaheta tungkul nikuna.” Kanya pinilit ni Herodes a ketan ti Jesus. ¹⁰ Kássole nu disepulus hide ni Jesus ay imbaheta de nikuna u atanan a ginimet de. Káttapos ay limmakad ti Jesus kaguman na u disepulus na hide a immangay tu banuwan a Betsaida. ¹¹ Nikuna matukuyan iye nu tolay hide ay timmagubet hide. Sakay masaya be hide a tinanggap ni Jesus sakay nangaral siya nide tungkul tu pághare nu Diyos. Pinagpiya na be u te saket hide. ¹² Nikuna mágsasasahám dán u aldew ay ummadene ni Jesus u sapulo ay ti duwwa na a disepulus sakay kinagi de nikuna, “Palakadán mu dán i tolaye hide tánni makapagehyok hide ti makan sakay te mapátdugan hide tu babaryo tu palebut. Katoy kitam ti parangay a lugar.” ¹³ Pero kinagi na nide, “Hikam u mangatád nide ti makan.” Timmábbeg be u disepulus hide, “Awan kitam ti makan pero tehhod heeh a lilimma a tinapay sakay duduwwa a ikan. Mamale kami beman ti makan para ti tolayan hidenye?” ¹⁴ (Dipo tehhod a manga limma a libu a kalállakiyan u katoy hod). Kinagi na tu disepulus na hide, “Pággetnudán moy i tolaye hide ti tág-lalimmapulo.” ¹⁵ Pinaetnod di ngani hide a atanan. ¹⁶ Inalap ni Jesus u limma a tinapay sakay u duwwa a ikan. Tummangad siya ti langet sakay nagpasalamat tu Diyos. Hinate-hate na itod sakay inyatád na tu disepulus na hide para itagtag tu katolayan. ¹⁷ Nakakan hide a atanan sakay nabássog. Káttapos ay inipun nu disepulus na hide u buhay sakay nakaputat pa hide ti sapulo ay ti duwwa a lákba. ¹⁸ Nadid, essa aldew, mentaras magdasal ti Jesus a maggisessa ay ummadene nikuna u disepulus na hide. Tinanung na hide, “Ánya i kákkagiyánnay nu tolay hide tungkul nikán? Ti deyaák kan?” ¹⁹ Timmábbeg hide, “Te sangan a magkagi a ti Juan a Mágbawtismo ka kan. Pero kagi be nu agum ay ti Elias ka kan, sakay te nagkagi be a essa ka tu prupeta hide tu itod a panahun a nabiyag a huway.” ²⁰ Sakay tinanung na hide a huway, “Ay hikam, ánya be u makagi moy tungkul nikán?” “Hiko u Cristo a inpananto nu Diyos!” Kagi ni Pedro. ²¹ Inpakebibilin ni Jesus a dyan de iye kagi-kagiyán maskin deya. ²² Kinagi na pa nide, “Magtiis pa ti dakál a hirap u Anak nu Tolay. Itakwil siya nu puno nu Judio hide, u puno nu saserdote hide sakay u maisto hide nu Kautusan. Ipabuno di siya pero biyagán siya a huway nu Diyos tu katállo a aldew.” ²³ Sakay kinagi na nide a atanan, “Ni deya man u masoh a sumunud nikán ay kailangan a kalimunan na u para tu sadile na. Báklayán na aldew-aldew u kudus na sakay sumunud nikán. ²⁴ Dipo u tolay a masoh a mángligtas tu sadile na a biyag ay siya i mawananay ti biyag a awan ti kahád. Pero ni deya man u máng-alay tu biyag na alang-alang nikán ay magkahod ti biyag a awan ti kahád. ²⁵ Ánya u pakinabang nu tolay ni makao na u atanan a bagay ti munduwáy pero mepahamak labe u biyag na? ²⁶ Ni ikasanikiyák moy sakay u upos ko, hide ay ikasanike kam be nu Anak nu Tolay tu kássole na. A tehhod a kapangyariyan iye ay kapareho nu kapangyariyan nu Ama sakay tu banal hide a anghel. ²⁷ Kagiyán ko nikam u tatahoden: tehhod he nikam a awan matay mentaras a awan de ketan u pághare nu Diyos. ²⁸ Nadid, kállipas nu manga walo a aldew, káttapos a kagiyán ni Jesus iye hide a bagay ay ingkuyog na di Pedro, Juan sakay ti Santiago, tu bumábbuked para magdasal. ²⁹ Mentaras a magdasal ti Jesus ay nagbagu u idsura na. Sakay u damit na ay grabit pudew. ³⁰ Káttapos ay bigla dálla a lummitaw u duwwa a lállake a nákpágguhon nikuna, di Moises sakay ti Elias, ³¹ a u hupa de ay makasile be. Pinágguhunan de u tungkul tu adene a kákkatay ni Jesus a mangyare ti Jerusalem. ³² Nadid ay mahimbing a tidug di Pedro sakay tu agum na hide. Pero bigla hide a nalukag sakay netan de ti Jesus a makasile u idsura na sakay te mágtaknág a duwwa a lállake tu adeni na. ³³ Nikuna palakad dán u duwwa a lállake ay kinagi ni Pedro ni Jesus, “Panginoon, maganda bál ta katoy kame he. Maggimet kame ti tállo a sahong: essa para niko, essa para ni Moises, sakay essa be para ni Elias.” Pero u tatahoden ay awan na tukoy u áamet-amitán na. ³⁴ Mentaras a magupos ti Pedro ay tinaklábban hide nu panganurin. Kaya neántingan u disepulus na hide. ³⁵ Sakay te boses a nagupos tu panganurin, “Iye u Anak ko a pinile ko, sanigán moy siya!” ³⁶ Nikuna mawan dán u boses ay netan de a mággisessa dálla ti Jesus. Awan padla kinagi-kagi nu disepulus hide u netan de. ³⁷ Tu kadimadimangan na ay nanegson dán hide sakay tinagbu siya nu tunay ti kakpal a tolay. ³⁸ Tu kákpalan nu tolay hide ay tehhod a lállake a pummákhaw, “Maisto,” kagi na, “Kagbiyan mu pay a pagpiyyaán i kaessa-essa kuwáy a anak a lállake! ³⁹ Sináddáp siya ni madukás a ispirito, kaya bigla dálla siya a mágpapákhawán sakay mágpapágpággán hanggan a maghuho u labi na. Pirme na siya a páppasakitan sakay awan na dán gusto a lakadan. ⁴⁰ Nákkekagbiyák dán be tu disepulus mo hide a palayasán u madukás a ispirito, pero awan di kaya. ⁴¹ Timmábbeg ti Jesus, “ Lahe a tunay ti dukás sakay awan ti pánnampalataya! Hanggan nikan takam a pagtiisan?” Sakay kinagi na tu lállake, “Iyangay mo he u anak mo.” ⁴² Mentaras a paadene u anak ay inlugmuk sakay pinagpapágpág dámman siya nu madukás a ispirito, pero pinalayas ni Jesus u madukás a ispirito. Pinagpiyya na sakay tulos na a inyatád tu ama na. ⁴³ Sakay nagtaka u katolayan tu netan de a kapangyariyan nu Diyos. ⁴⁴ “Pakasanigán moy sakay pakatandaan i kagiyán kuwáy: u Anak nu Tolay ay itokyon nu tolay hide sakay masakup nu kapangyariyan nu tolay hide.” ⁴⁵ Pero awan di maintendiyan u kinagi na dipo awan pálla impakapospos nu Diyos nide u kahulugan ni itod. Sakay manteng be hide a magtanung ni ánya u gusto a kagiyán nu kinagi na. ⁴⁶ Sakay namágtábbegan u disepulus hide ni ti deya u pinakadakila nide. ⁴⁷ Pero tukoy ni Jesus ni ánya u katoy tu isip de, kaya dinulawan na u essa a badit a anak sakay pinataknág na tu háhhawisan na. ⁴⁸ Sakay kinagi na nide, “Ni deya man u mangtanggap ti anakan iye alang-alang nikán ay hikán u tinanggap na, sakay ni deya man u mangtanggap nikán ay mangtanggap be tu nangutus nikán a umangay he. U mapagpakumbaba nikam a atanan ay siya u pinakadakila.” ⁴⁹ Kinagi ni Juan, “Panginoon, naketa kame ti tolay a magpaibut ti dimonyo hide tu ngahan mo. Sinaway me siya dipo bakán tam siya a kaguman.” ⁵⁰ Pero kinagi ni Jesus, “Dyan moy siya sawayán, dipo u awan kontara nikam ay kaguman moy.” ⁵¹ Nikuna adene dán a sumole ti Jesus ti langet ay naisip na a angay ti Jerusalem. ⁵² Kanya pinágdipalongo na u sangan a tolay tán angay de ihanda u tulusan na tu essa a lugar ti Samaria. ⁵³ Pero awan siya tinanggap nu Samaritano hide dipo nakadisisyon dán siya a tamo ti Jerusalem. ⁵⁴ Nikuna matukuyan itod nu disepulus na a di Santiago sakay ti Juan ay kinagi de nikuna, “Panginoon, masoh ka beman a paudinan me ti apoy tánni matutod hide? ⁵⁵ Pero inatubang hide ni Jesus sakay pinágngállan na hide. ⁵⁶ Sakay immangay hide tu agum a baryo. ⁵⁷ Nadid, mentaras maglakad hide ay tehhod a lállake a nagkagi ni Jesus, “Mákkuyoyugák niko maskin hádya i angayan muway.” ⁵⁸ Timmábbeg ti Jesus nikuna, “Te ábbut a páppágyanan u mágkatapang hide a hayup sakay te lobun u manok hide. Pero u Anak nu Tolay ay awan ti sadile a bilay a matidugan sakay maimangan.” ⁵⁹ Káttapos ay kinagi ni Jesus tu essa, “Mákkuyog ka nikán, bilang disepulus ko.” Pero tummábbeg siya, “Panginoon, pakultadenak mupa a sole ta angay ku pa pelábbáng tama ko.” ⁶⁰ Pero kinagi na nikuna, “Ipebahala mu dán tu patay hide u páglábbáng tu kasapatay de hide. Pero hiko ay angay mo ibaheta u pághare nu Diyos.” ⁶¹ Te essa be a nagkagi nikuna,“Sumunudák niko Panginoon, pero pakultadenák mu pa a angay iye kagiyán tu pamilya ko.” ⁶² Sakay konna bi he u tábbeg ni Jesus, “U mágsasuleg-sulegán a magaradu ay awan karapat-dapat tu kahariyan nu Diyos.”

¹ Nadid, káttapos ni itod ay nángpile dámman u Panginoon ti pitto a pulo ay ti duwwa a disepulus. Sakay pinágdipalongo na hide ti tágdaduwwa a umangay tu balang banuwan sakay tu lugar a angayan na. ² Sakay kinagi na nide, “Makpal u gapasán, pero kulang u mággapas.” Kaya idasal moy tu makákkao a mángpaangay pa siya ti mággapas tu pággapasan na. ³ Sigi kammoy dán! Paangayán takam a kumán a tupa tu bállog nu hayup hide a mágkatapang. ⁴ Dyan kam magtawed ti pitaka, hembeg oni sinelas. Sakay dyan kamon magabala a mákpagkumustaan tu matagbu moy hide. ⁵ Kássáddáp moy tu balang bilay a angayan moy ay kagiyán moy nide a, ‘Maghare nakwa u kapayapaan ti iye a bilay!’ ⁶ Ni masássohán ti kapayapaan u mámmágyan hod ay mágkahod hide ti kapayapaan. Pero ni awan hide masassohan ti kapayapaan ay awan mangyare u kinagi moy nide. ⁷ Ni deya u bilay a nagpatulos nikam ay hod kam la hod. Dyan kamon paagton-agton ti bilay; kanán moy sakay inumán moy u ánya man a ihayin di nikam. Dipo u tarahabador ay te karapatan a mangtanggap tu hornal na. ⁸ Ni tanggapán di kam tu essa a banuwan, kanán moy ni ánya man u ihayin di nikam. ⁹ Pagpiyyaán moy u tehhod hide a saket hod sakay kagiyán moy nide, ‘Adene kamon a paghariyan nu Diyos.’ ¹⁰ Pero ni awan dikam tanggapan tu essa a banuwan ay lumuwas kam tu dilan sakay kagiyán moy, ¹¹ ‘Maske u alikabuk nu banuwan moy a pimmakkat tu tika-tikád me ay pagpagán me bilang babala nikam. Pero iye u pakaisipán moy, inatádden kamon ti pagkakataun a mapagharian nu Diyos!’ ¹² Kagiyán ko nikam: tu Aldew nu Pághatul ay mas madágge u parusa nu tolay hide ti banuwanan itona, nan tu dinanas nu taga-Sodoma hide!” ¹³ Kakagbi kam taga–Corazin hide! Kakagbi kam a taga-Betsaida hide! Dipo ni ti Tiro sakay ti Sidon nangyare u himala hide a inpeta ko nikam ay nalay dán nakwa hide a nagsulot ti kostal sakay nággetnod tu abu, para ipeta a nagsise hide. ¹⁴ Tu Aldew nu Pághatul ay mas madágge u parusa moy nan tu parusa nu taga-Tiro sakay u taga-Sidon hide. ¹⁵ Sakay hikam a taga-Capernaum hide, maare moy a ilangkaw u sadili moy hanggan ti langet pero itákneg kam hanggan ti impiyerno. ¹⁶ Ni deya man u mangsaneg nikam ay hikán i sinaneg diyay sakay u awan mangtanggap nikam ay hikán i awan diyay tinanggap. U awan mangtanggap nikán ay awan di be tinanggap u nangutus nikán a umangay he. ¹⁷ Káttapos ni pangyayariyan iye ay nagsole a tuna’t saya u pitto a pulo ay ti duwwa a disepulus. Kinagi de, “Panginoon, maski u demonyo hide ay summunud nikame ni utusan mi hide tu ngahan mo.” ¹⁸ Kinagi ni Jesus, “Netan ko ti Satanas a natákneg a gábwat ti langet a kumán a kilat. ¹⁹ Tandaan moy inatádden takam ti kapangyariyan a gemmakan u biklat sakay u ánnepet hide, sakay inatádden takam be ti kapangyariyan a mangtalo tu kapangyariyan ni Satanas. Sakay awan nikam ti makapangpasaket. ²⁰ Pero dyan kam magsaya ta napasunud moy u mágkadukás hide a ispirito nan magsaya kam dipo nelista dán u ngaha-ngahan moy ti langet.” ²¹ Ti odas biyan itod ay nagkahod ti Jesus ti kasayaan a gábwat tu Banal a Ispirito, kinagi na, “Magpasalamaták niko Ama a Panginoon ti langet sakay ti lutaáy dipo awan mo impakapospos tu mágkarunung i bagayan hidenye. Impakapospos mo la iye hide tu tolay hide a mapakumbaba a konna tu anak. On, Ama magpasalamaták dipo konna hod u gusto mo a mangyare.” ²² Sakay kinagi na nide, “Inyatád dán nikán nu Ama ko u atanan a bagay. Awan ti makatukoy ni deya u Anak ni awan la u Ama. Sakay awan ti makatukoy tu Ama ni awan u Anak la, sakay u pinile hide nu Anak a pángpakapospusan na tungkul nikuna.” ²³ Ummatubang ti Jesus tu disepulus na hide sakay kinagi na nide a awan ti agum a mangsássaneg, “Mapalad kam, dipo netan moy u bagay hide a ketan moy nadid! ²⁴ Pero kagiyán ko nikam, makpal a prupeta sakay hare u nasoh a maketa tu netan moy pero awan di netan. Masoh be hide a mangsaneg tu nasaneg moy pero awan di be nasaneg.” ²⁵ Nadid, immadene ni Jesus u essa a maisto nu Kautusan tánni purbaan siya, “Maisto,” kagi na, “Ánya u dapat ko a gimitán tánni magkahodák ti biyag a awan ti kahád?” ²⁶ Timmábbeg ti Jesus, “Ánya beman u nakasulat tu Kautusan? Ánya beman u mabasa mo hod?” ²⁷ Timmábbeg siya, “ Mahalán mo u Panginoon mo a Diyos ti buo a puso, ti buo a kaliduwwa, ti buo begsák sakay tu buo mo a isip; Sakay mahalán mo u kapareho mo a tolay konna tu pángmahal mo tu sadile mo.” ²⁸ “Tama u tábbeg mo,” kagi ni Jesus. “Gimitán mo ina, tánni magkahod ka ti biyag a awan ti kahád.” ²⁹ Dipo tu pagkasoh nu maisto nu Kautusan a ipeta a tama siya ay tinanung na a huway ti Jesus: “Deya beman kapareho kuway a tolay?” ³⁰ Timmábbeg ti Jesus tu pamamag-itan nu pággistorya, “Te essa a tolay a gábwat ti Jerusalem a patamo ti Jerico. Insanáb siya nu tulisan hide. Inalap de u susulot na a badu sakay binálbág de siya, kaya magipepatay dán nikuna a lakaden de. ³¹ Nadid, netaun be a magtaleb u essa a saserdote ti itod, pákketa na tu tolay a kumakkatdug tu dilan ay limmise siya sakay nagtulos-tulos tu lakad na. ³² Tehhod be a nagtaleb a essa a Levita, pero nikuna ketan na u tolay a nabálbág ay limmisi be siya sakay nagtulos-tulos la be tu lakad na. ³³ Pero tehhod be a nagtaleb a Samaritano a gábwat tu adeyo a lugar. Pákketa na tu kumakkatdug a tolay ay kinagbiyan na siya. ³⁴ Inadeniyan na siya, binulakan na ti langis sakay ti alak u talingo na hide sakay binádbáddán na. Sakay insakay na siya tu nagsakayan na a asno. Inyangay na siya tu essa a táttulusan tánni maalagaan hod siya. ³⁵ Tu kadimadimangan na ay inatádden nu Samaritano u makábbilay ti pilak sakay kinagi na nikuna, ‘Alagaan mo siya sakay ni kulang pa ina tu kailangan moy hide ay bayaden ko la tu kássole ko.’ ” ³⁶ Kinagi ni Jesus tu tagapagtoldu tu Kautusan,“Deya nadid tu palagay mo tu tállo a nagtaleb u nángpeta ti págmahal tu tolay a hinarang nu tulisan hide?” ³⁷ “U tolay a timmulung nikuna.” Kagi nu maisto nu Kautusan. Kinagi nikuna ni Jesus, “Kadmudán sakay konna bi hod u gimitán mo.” ³⁸ Nadid, nagtulos-tulos di Jesus sakay u disepulus na hide tu lakad de, dimmemát hide tu essa a baryo. Te mágyan hod a essa a bábbey a Marta u ngahan na. Masaya na a tinanggap di Jesus tu bilay na, ³⁹ sakay tehhod siya a wadi a Maria u ngahan na. Nággetnod siya tu atubang nu Panginoon sakay nágsaneg tu intáttoldu na. ⁴⁰ Pero grabi dán u balisa ni Marta dipo tu kákpal nu dapat na a gimitán, kaya immadene ni Jesus sakay kinagi na, “Panginoon, baliawan beman la niko a páppabayanák ni wadi kuwe a mággisessa a magpospos? Kagiyán mo ped nikuna a tulunganák na.” ⁴¹ Pero kinagi nikuna nu Panginoon, “Marta, Marta, grabi ka ti kábbali-balisa tu sari-sare a bagay, ⁴² pero eessa la i talagaay a kailangan. Pinile ni Maria u tama a bagay a awan mamawan nikuna.”

¹ Nadid, ay nagdasal ti Jesus tu essa a lugar. Káttapos na ay kinagi nu essa tu disepulus na hide, “Panginoon, tolduwan mo kame ped a magdasal, konna tu ginimet ni Juan tu disepulus na hide,” ² kinagi na nide, “Ni magdasal kam ay konna he u kagiyán moy, ‘Ama, puriyán nakwa u banal mo a ngahan. Maghare ka nakwa nikame.’ ³ Atádden mo kame nakwa ti makan me aldew-aldew. ⁴ Sakay patawadán mo kame tu kasalanan me hide, dipo pappatawadan mi be u nagkasala hide nikame. Sakay dyan mo kame pabayan a matokso.” ⁵ Sakay kinagi na nide, “ Mara ni tehhod a immangay nikam a essa tu barkada moy hide tu bállog nu gibi sakay kinagi na, ‘Barkada, atáddinák mo ped pala ti tállo a tinapay. ⁶ Dimmemát biyay be u essa ko a barkada a gábwat tu lakad na, awanák ti mepakan nikuna!’ ⁷ Sakay tumabbeg u barkada mo a katoy tu disalad nu bilay na ti konna he, ‘Dyanák pay istorbuwán! Nekalang dán i ganábbe sakay mágkatdug kame dán a samáttenaan. Awanák dán makaikat a mangatád niko ti kailangán muwe.’ ⁸ Kagiyán ku nikam, maskin magbarkada pa hide ay awan siya umikat tan mangatad tu agidan mo. Pero dipo mamilit ka ay umikat bila siya tán mangatád maskin ánya u kailangan mo. ⁹ Kanya kagiyán ko nikam; agidán moy tu Diyos u kailangan moy tánni atádden nakam: magehyok kam tánni maketa kam. Magtoktok kam tánni bukasan kam. ¹⁰ Dipo u magaged ay magkahod, u magehyok ay maketa, sakay ni deya man u tumoktok ay mabukasan. ¹¹ Hikam a ama hide, ni mangaged ti ikan u anak moy ay atádden moy beman ti biklat? ¹² Oni mara mák-aged ti bunay, átadden moy beman siya ti ánnepet? ¹³ Ni hikamon a mágkadukás hide a tolay ay makabeto a mangatád tu mágkaganda hide a bagay tu anak moy, itod pa beman u Ama moy ti langet! Iyatád na u Banal a Ispirito tu mangaged hide nikuna!” ¹⁴ Tehhod a essa a lállake a pinabangngag nu essa a dimonyo. Nadid pinaibut ni Jesus u demonyo a dahilan nu kákkabulol nu essa a lállake, kanya nakapagupos dán siya kanya nagtaka u katolayan. ¹⁵ Pero kinagi nu agum, “Ti Beelzebul a pinuno nu demonyo hide u nangatád nikuna ti kapangyariyan a mágpalayas tu demonyo hide.” ¹⁶ Te agum be a masoh a mangpurba ni Jesus, kaya kinagi de a, “Mángpeta kapay ti makataka a bagay a mangpatunay a katoy niko u Diyos.” ¹⁷ Pero tukoy na u áisipán de, kaya kinagi na nide, “U bawat kahariyan a awan ti pamágkaessa ay masida sakay konna bi hod u mangyare tu sabilay a mamágdadema. ¹⁸ Ni tehhod a gurupo a mamágdadema tu kaharian ni Satanas ay kodya iye a magtulos-tulos? Sakay kagiyán moy a nagpalayasák tu dimonyo hide tu pamamag-itan nu kapangyariyan ni Beelzebul. ¹⁹ Ni magpalayasák ti dimonyo tu pamamag-itan ni Beelzebul, deya be u mangatád ti kapangyariyan tu disepulus moy hide a makagimet ti konna hod? Hide dán be u mángpatunay a talaga mali kam. ²⁰ Pero ni magpalayasák tu demonyo hide ta dipo tu kapangyariyan nu Diyos, iye u mangpatunay a dimmemát dán nikam u pághare nu Diyos. ²¹ “Mara ni tehhod a essa a tolay a mabegsák a magbantay tu bilay na sakay kompleto ti armas ay talaga a awan ti makaalap tu kabiyagen na hide. ²² Pero ni kalabanan sakay taluwán siya nu mas mabegsák nikuna ay alapán na u armas a áasaan na hide a pangdipensa pate u kabiyagen na hide sakay ipagatád na iye hide. ²³ U awan mákkaguman nikán ay kontara nikán. U tolay a awan tumulung a pisanán u tolay hide ay siya u máng-adeyo tu tolay hide nikán. ²⁴ Sakay kinagi pa ni Jesus, “Ni lummuwas dán tu baggi nu essa a tolay u madukás a ispirito ay máglalebután dán itod tu lugar a awan ti dinom. Sakay magehyok ti imangan na. Ni awan siya ti ketan ay kagiyán na tu sadile na, ‘Soliyák tu ginábwatan ko a bilay.’ ²⁵ Sakay ni demáttan na a malinis sakay maayus u bilay ti kássole naan itod, ²⁶ ay lumuwas siya a huway sakay magakit pa ti pitto a ispirito a mas madukás pa nan siya. Sumáddáp hide ti tolayan itod sakay mágyan hod. Kaya mas lalo pa a dumukás u kalagayan ni tolayan itod.” ²⁷ Mentaras a magupos ti Jesus ay te bigla a pimmákhaw a bábbey tu kákpalan sakay kinagi na nikuna, “Pinagpala u bábbey a náng-enak sakay nangpadakál niko!” ²⁸ Pero timmábbeg ti Jesus, “Mas mapalad u mágsaneg sakay sumássunud tu upos nu Diyos!” ²⁹ Nikuna kummakpal dán u katolayan ay kinagi ni Jesus, “Grabi’t dukás i tolayay nadid a panahun! Magaged hide ti makataka-taka a bagay pero awanák mangpeta nide. Tama dán tu makataka-taka a bagay a nangyare ni Jonas. ³⁰ Ni kodya a nagin tanda ti Jonas tu taga-Ninive hide ay konna bi hod u magin tanda nu Anak nu Tolay ti lahiyan iye. ³¹ Tu Aldew nu Pághatul ay tumaknág u Reyna a taga-abagatan, sakay hatulan na ilahe yan iye a dapat a maparusaan. Dipo gábwat siya tu suluk ni munduwáy pero immangay siya tánni mágsaneg tu karunungan ni Solomon; pero mas pa ni Solomon u katoy he! ³² Tu Aldew nu Pághatul ay tumaknág be u taga-Ninive hide tán kumontara ti lahiyan iye, dipo nagsise hide nikuna mangaral nide ti Jonas. Sanigán moy katoy he u mas mataas nan ti Jonas.” ³³ Sakay kinagi pa ni Jesus, “Awan ti tolay a magtab ti simbuwan sakay itagu na oni taklábban na tu págtakalan. Nan idátton na itod tu talaga a págdattonan tánni mademlagan u tolay a sumáddáp tu bilay. ³⁴ U mata mo u pinakangsimbu tu bággi mo. Ni maganda u pangileng mo ay mademlagan u bággi mo. Pero ni mahabuhab u pangileng mo ay madiham labe u bággi mo. ³⁵ Kaya pakasiguraduwán mu la, bakay u áakalaán mo a demlag a katoy niko ay kadiklámman bál. ³⁶ Dipo ni maganda u katoy tu isip mo ay awan ka maggimet ti madukás. Magdemlag iye a kumán a dáddemlagan nu essa a mademlag a simbuwan.” ³⁷ Nikuna matapos ti Jesus a nagtoldu ay inakit siya nu essa a Pariseo a kuman tu bilay na. Kaya nákkuyog siya sakay nákpággatubang tu lamisaan. ³⁸ Nagtaka u Pariseo nikuna ketan na ti Jesus a kimman a awan naguges tu kamát na. ³⁹ Kinagi nikuna nu Panginoon, “Hikam a Pariseo hide, áugisan moy u luwas nu baso sakay u penggan pero u puso moy ay makasadile sakay putat ti kadukássan! ⁴⁰ Awan kam ti tukoy! Awan beman u Diyos a nanggimet tu katoy tu luwas ay siya labe u nanggimet tu katoy tu disalad? ⁴¹ Kaya tulungan moy u magkahirap hide tu kailangan de tán magin malinis kam tu atubang nu Diyos. ⁴² Hikam a Pariseo hide ay kakagbi dipo maparusaan kam! Sássunudán moy u Kautusan nu Diyos a mangatád tu kasapulo a parte nu kabiyagen moy a konna tu mula-mula moy, sakay pangrikadu. Pero sa iye i nalimunan moyay a gimitán, u awan págdaya tu tolay hide sakay u tama a págmahal tu Diyos. Tama la a iyatád tu Diyos u parte na tu nabuhas moy, pero dyan moy kalimunan u mas mahalaga nan tu Kautusan. ⁴³ Kakagbi kam Pariseo hide! Dipo masássohán kam a umetnod tu pangbisita hide a pággetnudan tu sinagoga! Gugusto moy be a igalang dikam sakay batiyán tu matolay a lugar. ⁴⁴ Kakagbi kam! Dipo kumán kam a páglábbángngan a awan ti tanda kaya mágkagemmakan kam nu tolay hide a awan de mamalayan.” ⁴⁵ Kinagi nu essa tu maisto hide nu Kautusan, “Maisto, ti kinagi muwe ay pati hikame ay ininsulto mo.” ⁴⁶ Tinábbeg siya ni Jesus, “Kakagbi kam be maisto hide nu Kautusan! Páppadággiyan moy u tolay hide tu mágkahirap moy hide a Kautusan, pero mismo hikam ay awan moy hide tattulungan para sunudan i kautusanan iye. ⁴⁷ Kakagbi kam dipo hikam ay maparusaan! Dipo hikam i mággagimitánnay tu mágkaganda a páglábbángngan nu prupeta hide a binuno nu ninunu moy hide. ⁴⁸ Dipo ti ginimet moyan itod ay hikam labe i nagpatunayay a immayun kam tu ginimet nu ninunu moy hide, dipo hide u nangbuno tu prupeta hide sakay hikam be u nággimet tu páglábbángngan de. ⁴⁹ Iye be u mangpatunay a tatahoden u kinagi nu Diyos sigun tu Karunungan na, ‘Paangayán ko nide u prupeta sakay u disepulus ko hide a magtoldu tu tolay hide. Pero bunuwán de u agum sakay pasakitan de u agum.’ ⁵⁰ Kaya u tolay hide nadid u maparusaan dipo tu pángbuno nu nuno de hide tu prupeta hide sapul lalangán i munduwáy, ⁵¹ sapul tu pángbuno ni Cain ni Abel hanggan ni Zacarias a binuno tu sállat nu Templo a págtutudan ti alay. Hikam a mabiyag nadid u maparusaan dipo tu ginimet de. ⁵² “Kakagbi kam maisto hide nu Kautusan! Inatádden kam ti tungkulin a ipangaral u upos nu Diyos, pero awan moy la impangaral dipo awan kam maniwala nikuna nan bawalan moy pabe u tolay hide a masoh a maniwala.” ⁵³ Sakay limmakad ti Jesus ti lugaran itod. Sapul hod ay naiyamut dán nikuna u maisto hide nu Kautusan sakay u Pariseo hide. Tináttanung di siya tungkul tu sari-sare a bagay, ⁵⁴ tán madakáp de siya nite makagi siya a maare de a ibintang nikuna.

¹ Nikuna magdemáttan u libu-libu a tolay ay mágkegegemmakan di dán u balang essa nide dipo tu káppal nu tolay. Kinagi ni Jesus tu disepulus na hide, “Magingat kam tu págpaalsa a gággamitán nu Pariseo hide; u gusto ko a kagiyán ay mapagpakunware hide. ² Awan ti netagu a awan lumitaw sakay awan ti sekreto a awan matukuyan. ³ Kanya maski ni ánya kinagi moyay tu kadihaman ay masaneg labe itod tu demlag. Sakay ni ánya man u iyanasas moy tu disalad nu bilay ay matukuyan labe itod nu atanan tolay.” ⁴ Kagiyán ko nikam, barkada ko hide, dyan kam manteng tu mágbabono hide. Dipo u maare dila a bunuwán ay u bággi nu tolay sakay awan dán hide ti iba a kaya a gimetan.” ⁵ Kagiyán ko nikam ni deya u dapat moy a kantingan: kantingan moy u Diyos dipo kattapos na a mamuno, siya la u tehhod a kapangyariyan a máng-but tu tolay ti impiyerno. Tandaan moy, u Diyos la u dapat moy a kantingan! ⁶ “Awan beman u limma a dignás ay melako la ti duwwa a sentabos? Pero maski essa tu kadignássan ay awan hide páppabayan nu Diyos. ⁷ Maske i buuk moye ay nabilang na dán a atanan. Kanya dyan kam manteng dipo mas mahalaga kam tu Diyos nan u dignás hide.” ⁸ “Sakay kagiyán ko be nikam, ni deya man u awan mángkasanike nikán tu atubang nu katolayan ay awan be siya ikasanike nu Anak nu Tolay tu atubang nu anghel hide. ⁹ Pero ni deya man u mángpamen nikán tu atubang nu katolayan ay ipamen ko be tu atubang nu anghel hide nu Diyos. ¹⁰ Sakay ni deya man u magupos ti kontara tu Anak nu Tolay ay mapatawad. Pero u magupos ti madukás tu Banal a Ispirito ay awan mapatawad. ¹¹ “Kapag ni inyangay dikam tu sinagoga oni tu atubang nu puno hide sakay tu tehhod hide a mataas a katungkulan para akusaan dikam, dyan kam mabalisa tu itábbeg moy oni u ánya man a kagiyán moy, ¹² dipo ti odasan itona, u Banal a Ispirito u mangtoldu nikam ni ánya u dapat moy a kagiyán. ¹³ Te essa a lállake a atoy tu kákpalan a nagkagi ni Jesus ti konna he, “Maisto, kagbiyan ped a iyutus tu wadi ko a paghatiyan midán u mana me.” ¹⁴ Pero timmábbeg siya, “Deya beman u nangatád nikán ti karapatan a magin huwes oni manghate tu mana moy?” ¹⁵ Sakay kinagi na nide a atanan, “Magingat kam tu atanan a kalase ni kakutidan; dipo u tunay a biyag nu essa a tolay ay awan masukat tu kakpal nu yaman na.” ¹⁶ Káttapos ay inyistorya ni Jesus u essa a talinhaga,“Tehhod a essa a mayaman a makpal a naane tu mula na. ¹⁷ Kaya nakagi na tu sadile na, ‘Ánya wád i gimitán kuway? Awanák dán ti pagdáttonan ti naane kuwáy hide! ¹⁸ Tukoy ku dán! Ipahábba ko u págsalansanan ko hide sakay manggimiták ti mas dakál. Sakay hed ku hod a idátton i naane kuwáy hide sakay tu agum ko hide a kabiyagen.’ ¹⁹ Sakay kagiyán ko ti sadile kuwáy, masuwertiyák dipo makpalák dán a kabiyagan! Awanák dán kula-kulangán mentaras biyagák! Kanya magpakasarapák dálla a makán kanán sakay makán inuman.’ ²⁰ Pero kinagi nu Diyos nikuna, ‘Awan ka ti tukoy! Ti iye be a gibi ay matay ka! Kándeya nadid a meangay i inhanda muwe hide para ti sadile muwe?”’ ²¹ Káttapos ay kinagi ni Jesus, “Konna hina u sapitán nu tolay a makán puhunan ti kayamanan para tu sadile na. Pero mahirap labe tu pangileng nu Diyos.” ²² Kinagi pa ni Jesus tu disepulus na hide, “Kaya kagiyán ko nikam: dyan kam mabalisa tu makan para mabiyag kam oni tungkul tu damit a mesulot moy, ²³ dipo mas mahalaga u biyag nan tu makan sakay u bággi nan tu damit. ²⁴ Ilingan moy i wákwake hide: awan hide mágmula oni mággapas sakay awan hide ti salansan pero páppakanán hide nu Diyos. Hikam pa beman wád u awan alagaan nu Diyos? Mas mahalaga kam nan u manok hide! ²⁵ Sakay deya nikam u makapang-paatakdug tu biyag na maskin essa la a odas dipo la tu kákkabalisa? ²⁶ Ni awan moy ngane dán magimet iye hide a kabadit a bagay, bakin mabalisa kam pa tu agum a bagay? ²⁷ Ilingán moy dálla u bulaklak hide tu parang sakay isipán moy ni kodya hide a lumagu. Awan hide mágtrabaho oni mággimet ti badu de. Pero iye i kagiyán kuwáy nikam, maski ti Solomon a pinakamayaman tu itod ay awan nangsulot ti kapareho ti kaganda nu bulaklak hide tu parang. ²⁸ Ni u lamon dán hide a biyag nadid sakay ni ilaw ay tutudán ay pospusán nu Diyos, hikam pa beman wád u awan na pospusán a baduwan? Tunay ti kabadit u pánniwala moy nikuna! ²⁹ Kanya dyan kam mabalisa tu pakán ahyok moy ti makan sakay mainom moy, ³⁰ dipo tukoy nu Ama moy ti langet a kailangan moy iye hide a atanan. Iye hide u bagay a páppospusán nu tolay hide a awan ti pánniwala tu Diyos. ³¹ Kanya pilitán moy a paghariyan kam nu Diyos, sakay iyatad na nikam u atanan a kailangan moy hide.” ³² “Hikam a disepulus ko hide, dyan kam manteng, maski sasangan kam la dipo gugusto nu Diyos a kaguman nakam tu kahariyan na. ³³ Ilako moy u kabiyagen moy hide sakay iyatád moy tu mágkahirap hide u naglakuwan moy! Tánni makaipun kam ti kayamanan ti langet. U maipun moy hod a kayamanan ay awan magdadate one maubu-ubus sakay awan ti makasasáddáp a mágtakaw sakay awan makuta-kutam. ³⁴ Dipo ni hadya u kayamanan moy ay katoy bi hod u pusu moy.” ³⁵ Sakay kinagi pa ni Jesus, “Pirme kam a humanda sakay pirme moy paggangatán u simbuwan moy hide. ³⁶ Humanda kam a konna tu alipin hide a maguhay tu kássole nu amo de a gábwat tu kasalan, tánni ni dumemát siya sakay tumoktok ay mabukasan de a agad u pintuwan. ³⁷ Pinagpala u alipin hide a demáttan na a awan tidug sakay nakahanda tu káddemát nu amo de. Kagiyán ko nikam, pággetnudan na hide tu lamisaan sakay serbiyan na hide mentaras a kuman hide. ³⁸ Pinagpala hide ni demáttan na hide a nakahanda, maskin dumemát man siya tu bállog nu gibi oni kaldiwan. ³⁹ Pero tandaan moy iye, ni tukoy la nu makábbilay ni ánya a odas a dumemát u mágtakaw ay awan dán siya mátdug tánni awan makasáddáp u mágtakaw tu bilay na. ⁴⁰ Dapat kam be a pirme a handa, dipo u Anak nu Tolay ay dumemát tu odas a awan moy asa-asaan.” ⁴¹ Káttapos ay nagtanung ti Pedro, “Panginoon, kinagi mo beman i talinhagaan iye para nikame oni para tu atanan?” ⁴² Timmábbeg u Panginoon, “Ni deya u tapat sakay malalake a alipin ay siya i páng-intregaanay nu amo na tu kasabilay na hide ni tehhod siya a angayan. Siya i nakabahalaay a mangatád ti makan tu agum hide a utusan tu tama a odas. ⁴³ Pinagpala iye a alipin ni demáttan siya nu amo na a gággimitán na u atanan a tarabaho na. ⁴⁴ Tandaan moy i kagiyán kuwáy, dipo tapat siya a alipin ay siya u pangintregaan nu amo na tu atanan a kabiyagan na. ⁴⁵ Pero ni awan tapat u alipin ay kagiyán na tu sadile na a, ‘Malay palla a sumole u amo ko.’ Sakay sapulan na a bálbággán u agum hide a alipin a lállake pate u bábbey hide sakay mágkakanán siya sakay máglalasingán. ⁴⁶ Dumemát u amo na tu odas a awan na asa-asaan sakay tu odas a awan na tukoy. Kaya ipisan siya nu amo na tu tolay hide a masassuwayan a parusaan.” ⁴⁷ “U alipin a makatukoy tu gusto a ipagimet nu amo na pero nagpabaya sakay awan na sinunud ay makatanggap ti madágge a parusa. ⁴⁸ Pero u alipin a awan palla makatukoy tu gusto nu amo na, sakay nakagimet ti madukás ay maparusaan pero magaan la. U pinagkatiwalaan ti makpal ay te panagutan tu mas makpal a bagay.” ⁴⁹ Nadid, kinagi ni Jesus tu disepulus na hide,“Kayaák a ummangay ti munduwáy ay para mangtawed ti parusa nu Diyos tolay hide. Sakay nakwa ay magsapul dan u parusa de konna tu essa a apoy a maggangat dan! ⁵⁰ Pero bagu iye mangyare ay magdanasák pa ti dakál a hirap. Mabalisaák dán mentaras awan palla iye matupad. ⁵¹ Ti isip moy bemane ay immangayák ti lutaáy para mangatád ti kapayapaan? Kagiyán ko nikam, bakán a kapayapaan i tawed kuwáy nan u pamágsasena nu tolay hide. ⁵² Sapul nadid ni tehhod a limma a tolay tu sabilay ay mamághiwewalay hide, u tállo ay kontara tu duwwa sakay u duwwa ay kontara be tu tállo. ⁵³ U ama kontara tu anak na a lállake, awan magkasundu u máttama sakay u máttena sakay konna bi hod u mamágkatugngan hide.” ⁵⁴ Káttapos ay kinagi ni Jesus tu tolay hide, “Kapag ketan moy a madiklam i sahámman ay kagiyán moy dán a maguden sakay konna ngane hod u mangyare. ⁵⁵ Sakay ni magabagat dán ay kagiyán moy a magsinag, kaya konna ngane hod u mangyare. ⁵⁶ Hikam a mapagkunware hide! Malalake kam a mangbasa tu tanda hide ti lutaáy sakay ti langet, bakin awan moy mabasa u tanda hide nu Diyos a mangyare dán nadid a panahun?” ⁵⁷ “Bakin awan moy matukuyan ni ánya tamaay? ⁵⁸ Mara ni te mángdimanda niko, mákpagkasundu ka tu nángdimanda niko mentaras te panahun pálla dipo makay pilitán naka a iyatubang tu huwes. Sakay iyatád nakam tu mágbantay tu págpiresuwan sakay ipepireso kam. ⁵⁹ Kagiyán ko niko, awan ka makaluwas ti hod mentaras awan mo mabayaden u atanan nu kasalanan mo.”

¹ Nadid, mentaras a magtoldu ti Jesus ay tehhod a sangan a dummemát a tolay. Imbaheta de ni Jesus a pinabuno ni Pilato u sangan a taga-Galilea mentaras a magalay hide tu Diyos. ² Kinagi na nide, “Dipo beman a konna hod u nangyare nide ay isipán moy dán a mas makasalanan hide nan tu agum hide a taga-Galilea? ³ Pero tandaan moy i kagiyán kuwáy nikam, ni awan kam magsise tu kasalanan moy hide ay matay kam labe a konna nide. ⁴ Tungkul be tu sapulo ay ti walo a natay nikuna natáppelan hide nu tore a malangkaw a bilay ti Siloe ay isipán moy dán beman be a makpal hide a nagimet a madukás nan tu agum a mágyan ti Jerusalem? ⁵ Pero tandaan moy i kagiyán kuwáy nikam, ni awan kam magsise tu kasalanan moy hide, ay mepahamak kam labe a konna nide.” ⁶ Káttapos ay inyistorya ni Jesus nide iye a talinhaga, “Tehhod a essa a tolay a te mula a kayo a igus tu ubasan na. Nikuna a sákbunga dán nu igus ay angay na inileng ni te bunga dán, pero awan siya ti nenetan. ⁷ Kaya kinagi na tu mágbantay tu ubasan, ‘Tálluwák dán he a taon a makánsoli-soliyán tán ilingan ni te bunga dán kayuwan iye, pero awanák padi ti keketan. Maganda ben wád ni pukanán mu dálla iye ta makasiwal la ti agumáy a mula.’ ⁸ Pero timmábbeg u mágbantay, ‘Dyan ta pala pukanán nadid a taon. Kotkotan ko i lebut naáy sakay dáttonan ko ti págpaoya, ⁹ bakay ni magbunga la ti sumunuday a taon. Pero ni awan ay pukanán ku dán.”’ ¹⁰ Nadid, essa Aldew nu Káimang ay nagtoldu ti Jesus tu sinagoga. ¹¹ Tehhod hod a bábbey a sapulo ay ti walo dán a taon a te bábbatiyán, dipo tu madukás a ispirito a summáddáp nikuna. Kábbung siya a tahod sakay awan na dán meoolnat u bággi na. ¹² Pákketa nikuna ni Jesus ay dinulawan na siya sakay kinagi na, “Nagpiyya ka dán ti bábbatiyán muwe.” ¹³ Sakay intupo ni Jesus u kamát na tu bábbey, kaya neolnat na u bággi na ti itod be sakay nagpure tu Diyos. ¹⁴ Pero nágngál u puno nu sinagoga dipo nagpapiyya ti Jesus tu Aldew nu Káimang, kaya kinagi na tu tolay hide, “Tehhod a ánnam a aldew a nelaan para tu págtarabaho. Umangay kam ti aldiwan ina para mapagpiya u bábbatiyan moy, bakán a tu Aldew nu Káimang.” ¹⁵ Kanya tinábbeg siya nu Panginoon, “Hikam a magkukunware hide! Awan beman magtarabaho kam be tu Aldew nu Káimang? Agen moy ben okbisan tu nagulaan moy u baka oni asno moy sakay angay moy painumán tu áinuman de maske tu Aldew nu Káimang, awan beman? ¹⁶ I bábbiyan iye a gábwat tu lahe ni Abraham ay sapulo ay ti walo dán a taon a pináppahirapan ni Satanas. Awan beman dapat siya a palayaán maskin tu Aldew nu Káimang?” ¹⁷ Dipo ti tábbegan itod ni Jesus ay nepasanike u atanan a kumontara nikuna sakay nagsaya be u tolay hide tu makataka-taka a bagay a ginimet na. ¹⁸ Káttapos ay kinagi ni Jesus, “Ánya kaparehuway nu pághare nu Diyos? Hádya ko iye a ipareho? ¹⁹ Konna iye tu bukál nu mustasa a immula nu essa a tolay tu págmulaan na. Dimmakál iye hanggan nagin kayo sakay naglobunan nu kamanukan u pingi-pinget na.” ²⁰ Sakay kinagi pa ni Jesus, “Hádya ko a ipareho u pághare nu Diyos? ²¹ I kaparehuwan iye ay konna tu págpaalsa a inhalo nu essa a bábbey tu tállo a takal a arina, kaya immalsa ti husto u arina.” ²² Nagtulos-tulos ti Jesus tu lakad na, nagtoldu siya tu kada banuwan sakay babaryo a tinaleban na a paangay ti Jerusalem. ²³ Tehhod a essa a nagtanung nikuna, “Panginoon, sabadit beman la u maligtas?” ²⁴ Kinagi na nide, “Pilitán moy a makasáddáp tu mapiit a pintuwan. Makpal u masoh a sumáddáp hod pero awan makasáddáp. ²⁵ Kapag insiradu dán nu makábbilay u pintuwan ay awan nakamon pasáddáppán maski ni mákkekakagbi kam pa a mágtatoktokán, maski pa ni kagiyán moy a, ‘Panginoon, kagbiyan mu kami pay a pasáddáppán.’Pero tábbegan nakam ti konna he, ‘Awan takam matengge!’ ²⁶ Kaya kagiyán moy be a, ‘Kaguman mo kame a kimman sakay imminom sakay nagtoldu ka pa tu banuwan me.’ ²⁷ Pero kagiyán be nu Panginoon a, ‘Awan takam matengge! Umadeyo kam nikán, atanan moy a mággagimitán ti mágkadukás!’ ²⁸ Mágsasangitán kam sakay magngahitáb u ngipa-ngipán moy kapag ketan moy a katoy tu kahariyan nu Diyos di Abraham, Isaac sakay ti Jacob sakay u atanan nu prupeta hide sakay hikam ay palayasán tu luwas. ²⁹ Sakay dumemát u tolay hide a magipun-ipun a gábwat ti sikatan sakay ti sahámman, ti amiyanan sakay ti abagatan sakay angay hide mákpággatubang tu lamisaan tu kahariyan nu Diyos. ³⁰ Talaga a tehhod a dimodyan a medipalongo sakay tehhod be a nágdipalongo a medimodyan.” ³¹ Ti odas biyan itod ay te sangan a Pariseo a ummadene ni Jesus sakay kinagi de, “Lumakad ka dán he, dipo gusto ka a ipabuno ni Herodes.” ³² Pero timmábbeg siya nide, “Kagiyán moy ti mauták kan ina a magpalayasák nadid tu demonyo hide sakay magpapiyyaák palla tu tehhod hide a saket. Sakay konna la bi he u gimitán ko ni ilaw sakay tu katállo a aldew ay tapusán ko u tarabaho ko. ³³ Pero dapat ko a itulos u lakad ko nadid, ni ilaw hanggan puwera ni ilaw. Dipo awan dapat a matay tu agum a banuwan u essa a prupeta nan ti Jerusalem la! ³⁴ “Hikam a taga-Jerusalem hide, binábbuno moy u prupeta hide sakay binábbatikal moy u pinaangay hide nu Diyos a magtoldu nikam! Pumensangan takamon a gusto a lákkáppan a konna tu páglákkáp nu manok tu sepsep na hide, pero umád kam. ³⁵ Kaya nadid ay pabayan kamon nu Diyos. Tandaan moy i kagiyán kuwáy, awanák moy dán memetan hanggan a awan dumemát u odas a kagiyán moy a, ‘Pagpalaán nakwan u mágdadedemát tu ngahan nu Panginoon!”’

¹ Nadid, essa Aldew nu Káimang, inakit nu essa a puno nu Pariseo hide ti Jesus a kuman tu bilay na. Sakay áelingan nu komontara hide nikuna u ahikad na hide. ² Nadid tehhod a essa a lállake a lummábbeg a immadene ni Jesus. ³ Kaya tinanung ni Jesus u Pariseo hide sakay u maisto hide nu Kautusan, “Kontara beman tu Kautusan u magpapiyya tu Aldew nu Káimang oni awan?” ⁴ Pero awan hide ti dikákkagiyan, kanya tinawidan ni Jesus u te saket sakay pinagpiyya na sakay pinagsole na. ⁵ Sakay kinagi na nide, “Ni te anak kam oni baka a natákneg tu bal-ung, awan moy beman alapán maski Aldew nu Káimang?” ⁶ Awan hide nakatábbeg ti tanungan itod ni Jesus. ⁷ Nahalata ni Jesus a páppiliyán nu naimbitaan hide u pággetnudan a nelaan tu marangal a tolay. Kaya kinagi na i talinhagaan iye, ⁸ “Ni inakit di ka tu kasalan ay dyan mo piliyán u pággetnudan nu mágkarangal hide a tolay, bakay ni te inakit pa hide a mas marangal nan hiko. ⁹ Dipo mepasanike kam la ni adeniyan kam nu nagakit nikam sakay kagiyán na nikam a, ‘Pággetnudán muped i tolayáy ti paggetnudan muwe!’ Kaya meangay ka pa tu pinakamababa a pággetnudan. ¹⁰ Pero ni tehhod niko a nangakit ay piliyán mo u pággetnudan a awan marangal tánni ni umadene u nangakit niko ay kagiyán na a, ‘Barkada, he kahe a mággetnod ti marangal lay a pággetnudan.’ Tánni ketan nu atanan a tolay a marangal ka. ¹¹ Dipo u palalo a tolay ay mebaba sakay u tolay a magpakababa ay melangkaw.” ¹² Kinagi nabe tu nangakit nikuna, “Ni mara maghanda ka ay dyan ka magakit tu barkada mo hide, u wáwwadi mo hide, u kákkapátkákka oni u magkayaman hide a kadatig mo a bilay, dipo akitán di kala be tánni magantiyan di ka. ¹³ Pero ni maghanda ka ti dakál a handaan, u akitán mo ay u magkahirap hide a tolay, u lumpo hide, u pilay hide, sakay u buhák hide. ¹⁴ Ni konna he u gimitán mo ay pagpalaan ka, dipo maski ni awan hide makagante niko, u Diyos u mangatád niko ti piremyo tu kákkabiyag a huway nu tolay hide a sumunud nikuna.” ¹⁵ Nikuna masaneg itod nu essa a katubang di Jesus ay kinagi na, “Mapalad u makatubang tu lamisaan tu kahariyan nu Diyos!” ¹⁶ Pero timmabbeg ti Jesus nikuna, “Essa a lállake u naghanda ti grabi’t kakpal a handa, sakay nagakit ti tuna’t kakpal a tolay. ¹⁷ Nikuna dumemát dán u odas nu handaan ay inutusan na u utusan na hide. Iye u impekagi na tu inakit na hide a, ‘Kamon dán, nakahanda dán u atanan!’ ¹⁸ Pero nagdahilan hide a atanan. Kinagi nu dipalongo, ‘Nakabaliyák ti araduwan, kailangan a angay ko itod ilingan. Pagpasensiyaanák moy dálla.’ ¹⁹ Sakay kinagi be nu kaduwwa, ‘Nakabaliyák ti limma a paris a dáppog, kailangan ko a purbaan tánni matukuyan ko ni maganda hide a pagaradu. Pagpasensiyaanák moy dalla.’ ²⁰ Sakay kinagi be nu essa, ‘Awanák makaangay dipo biguwák a kasal.’ ²¹ Nagsole u utusan sakay imbaheta na iye tu amo na. Nágngál u amo sakay kinagi na tu utusan na, ‘Sigi alistuwan mo angay ka tu kakarsada sakay tu mágkapiit hide a dilan tu banuwan sakay ikuyog muhe u mágkahirap hide a tolay, u lopog hide, u buhák hide, sakay u pilay hide.’ ²² Sakay kinagi nu alipin, ‘Ginimet kudán u kinagi mo, pero makpal palla a paggetnudan u awan ti maggetnod.’ ²³ Kaya kinagi nu amo tu alipin, ‘Angay ka tu kakarsada sakay tu dila-dilan hide sakay pilitán mo a umangay he u deya man a ketan mo tánni maputát i bilay kuwáy. ²⁴ Kagiyán ko nikam, maski essa tu dipalongo ko hide a inakit ay awan makaeennam tu inhanda ko hide!”’ ²⁵ Nadid, nákkuyog ni Jesus u tuna’t kakpal a tolay; immatubang siya nide sakay kinagi na, ²⁶ “Ni deya man u masoh a sumunud nikán. Pero mas mahal na tama na sakay tena na, kabanga, anak, wáwwadi sakay u sadile na a biyag ti mas higit nikán ay awan maare a magin disepulus ko. ²⁷ Ni deya man u umád a magkarga tu sadili na a kudus sakay summunud nikán ay awan maare a magin disepulus ko. ²⁸ Dipo ni te essa nikam a magbalak a magpabilay ti dakál, awan beman umetnod pa siya sakay kuwentaán na ni sa kodya u magastus na? Tánni matukuyan na ni tehhod siya a pilak a pangpatapos tu bilay na. ²⁹ Makay hanggan pundasyon la u medatton ay pagtawaan la siya nu atanan a maketa nikuna. ³⁰ Kagiyán de, ‘Sinapulan ni tolayan iye a magpabilay ti dakál pero awan labe netapos.’ ³¹ “Oni deya a hare u máklaban tu essa a hare u awan pa mággetnod para pagadalan ti husto ni u sapulo a libo na a sundalo ay melaban tu kalaban na a duwwa a pulo a libo a sundalo? ³² Sakay ni awan na kaya ay pagdaka a mangutus tu opisyal na hide a angay mákpagkasundu. ³³ Konna bi hod,“Awan maare a magin disepulus ko u maskin deya ni awan na adággen u atanan a katoy tu biyag na.” ³⁴ “Mahalaga u asen, pero ni tummablal dán ay awan dán iye mapaasen a huway. ³⁵ Awan dán iye mapakinabangan maskin ihalo pa tu págsapwagan para pataba. Kaya ibut dálla iye nu tolay hide. Magsaneg u tehhod a talinga!”

¹ Essa a aldew u mágsingeh hide ti buwes sakay u agum pa hide a inturing a makasalanan ay immadene ni Jesus para mágsaneg. ² Nágganasasan u Pariseo hide sakay u maisto hide nu Kautusan, kinagi de, “I tolayan iye ay mákpággagum tu makasalanan hide sakay mákpággatubang nide a kuman.” ³ Dipo hod ay kinagi ni Jesus nide i talinhagaan iye, ⁴ “Ni u essa nikam ay tehhod a datos a tupa sakay nawan u essa, ánya gimitán naay? Awan beman iwahák na u siyam a pulo ay ti siyam tu parang sakay ahyukán na u nawan hanggan metan na itod? ⁵ Ni ketan na dán ay masaya siya a mangbabákláy tu tupa para isole. ⁶ Káddemát na tu bilay ay akitán na u barkada na hide sakay u kadatig na hide a bilay sakay kagiyán na nide, ‘Mákpagsaya kam nikán, dipo netan ku dán u tupa ko a nawan!’ ⁷ Kagiyán ko nikam, magkahod ti dakál a kasayaan ti langet dipo tu essa a makasalanan a nagsise nan tu siyam a pulo ay ti siyam a malinis a awan kailangan a magsise!” ⁸ Kinagi pa ni Jesus, “Ni tehhod a sapulo a pilak u bábbey sakay nebut u essa, ánya wád i gimitán naay? Awan beman taban na u simbuwan sakay walisan na u bilay sakay pakaehyukán na hanggan ketan na itod? ⁹ Ni ketan na dán iye ay akitán na u barkada na hide sakay u kadatig na hide a bilay sakay kagiyán na nide, ‘Mákpagsaya kam nikán, dipo netan ku dán u nebut ko a silber a pilak!’ ¹⁰ Kagiyán ko nikam, konna bi hod u kasayaan nu anghel hide nu Diyos dipo tu essa a makasalanan a immadág tu kasalanan na.” ¹¹ Kinagi pa ni Jesus, “Te essa a tolay a tehhod a duwwa a anak a lállake. ¹² Kinagi nikuna nu dipos, ‘Amáng, iyatád mu dán nikán u manaán ko.’Kaya hinate nu ama u ari-arian na nide a duwwa. ¹³ Kállipas nu sangan a aldew ay inlako nu dipos u namana na sakay immangay tu adeyo a lugar. Ginasta na hod u pilak tu awan hide ti pinagseserbiyan a bagay. ¹⁴ Nikuna maubus na dán u pilak na ay nagkahod ti matindi a sák-aláp ti lugaran itod, kanya naghirap siya. ¹⁵ Kanya simmáddáp siya a utusan tu essa a lállake a taga-hod. Pinaangay na siya tu uma na tánni magalaga tu babuy na. ¹⁶ Dipo tu aláp na, sakay awan be nikuna ti mangatád ti makan, mgahi-mgahe nadan a kanán u kákkanán nu babuy hide. ¹⁷ Pero napag-isip-isip na u ginággimet na hide kaya nakagi na tu sadile na, ‘U alipin nama ko ay awan magala-aláp nan lalabis pa u kanan de, pero hikán ay matayák dán he ti aláp! ¹⁸ Soliyák tu kán amáng sakay kagiyán ko nikuna, ‘Amáng, nagkasalaák tu Diyos sakay niko. ¹⁹ Awanák mu dán dapat a dulawán a anak mo; nan ibilangák mo dálla a essa tu alipin mo hide.’ ²⁰ “Timmáknág siya sakay nagsole nama na. Adeyo pálla siya ay táttannawán dán siya nama na. Sakay kinagbiyan na siya ti husto kaya gumággenan siya a tummagbu, kinábkábban na sakay inammuwan na siya. ²¹ Sakay kinagi nu anak nikuna, ‘Amáng, nagkasalaák tu Diyos sakay niko. Awanák dán karapat-dapat a dulawán mo a anak mo.’ ²² Pero dinulaw nu ama u alipin na hide, ‘Magalisto kam! Iyangay moy he u pinakamaganda a damit sakay isulot moy nikuna. Sulutan moy siya ti sángkalan sakay sapatus. ²³ Sakay alapán moy u pinatabiyan a dumalaga a baka sakay bunuwan ta kuman kitam sakay magsaya! ²⁴ Dipo akala ko ay natay dán i anak kuwan iye, pero biyag pabballa, nawan, pero netan bila.’ Kanya nagsaya hide. ²⁵ “Nadid, u panganay ay katoy palla tu uma de, mentaras a pademát siya tu bilay ay nasaneg na u togtugan sakay sayawan. ²⁶ Dinulawan na u essa tu alipin de hide sakay tinanung, ‘Bakin a te kasayaan ti bilay?’ ²⁷ Kinagi nu alipin nikuna, ‘Dimmemát u wadi mo! Kaya pinabuno nama mo u pinatabiyan na a baka a dumalaga, dipo nagsole siya a biyag sakay awan ti saket!’ ²⁸ Pero nágngál u panganay sakay umád na dán a sumáddáp tu bilay de. Kanya limmuwas tama na sakay pinaha-paha na siya. ²⁹ Pero kinagi nu panganay, ‘Nagserbiyák niko ti makpal a taon sakay maski nikan ay awan taka sinuway. Pero maski ni pumensan ay awanák mo inatádden maskin essa a bul-o a kambing para pagkasayaan me ay tu barkada ko hide. ³⁰ Pero nikuna dimmemát u anak mo a nággagastaán tu kabiyagan mo hide tu pángngibábbey ay pinangbuno mo pa tu pinatabiyan mo a bul-o a baka!’ ³¹ Timmábbeg tama na, ‘Anak ko, pirmi taka a kakaguman kaya atanan a kabiyagan ko ay kao mo.’ ³² Pero dapat kitam a magsaya dipo u wadi mo a akala tam ay patay dan ay nagsole a huway, pero netan bila.”’

¹ Nadid, kinagi pa ni Jesus tu disepulus na hide, “Tehhod a essa a mayaman a te katiwala. Te nagpilet nikuna a ginággastus nu katiwala u kabiyagen na. ² Kanya impadulaw na sakay tinanung, ‘Ánya ben i masaneg-saneg kuwáy tungkul niko? Magkuwentaan kita dán tu pángngasiwa mo. Dipo sapul nadid ay awan taka dán katiwala.’ ³ Kinagi nu katiwala tu sadile na, ‘Ánya dán gimitán kuway nadid? Ibutanák dán nu amo ko a katiwala na. Awan ko kaya a magtarabaho ti luta sakay masanikiyák be a máklimus. ⁴ A, konna he i gimitán kuway tánni maski maibutanák tu tarabaho ko ay tehhodák palla a barkada a mangtanggap nikán tu bilay de!’ ⁵ Kaya inessa-essa na a dinulawan u tehhod hide a utang tu amo na. Tinanung na u dipalongo, ‘Sangan utang muway tu amo ko?’ ⁶ Timmábbeg siya, ‘Essa a datos a tapayan a langis.’Sakay kinagi nu katiwala nikuna, ‘Salaáy u listaan nu utang mo. Magalisto ka! Mággetnod ka sakay isulat mo dálla a limmapulo.’ ⁷ Sakay kinagi na tu kaduwwa, ‘Ay hiko, sangan utang muway?’Timmábbeg siya, ‘Essa a datos a kostal a trigu.’ Kinagi nu katiwala nikuna, ‘Salaáy u listaan nu utang mo hide, isulat mo dálla a walo a pulo.’ ⁸ Pinure nu amo na u katiwala a madaya dipo impeta na a mautak siya. Dipo mas malalake a maggimet ti paraan u makamundu hide a tolay tu biyag de nan u tolay hide a te ánteng tu Diyos.” ⁹ Sakay káttapos ay kinagi ni Jesus, “Kagiyán ko nikam, gamitán moy u kayamanan moy ti lutaáy tu paggimet ti maganda tu kapareho a tolay. Maskin maubus iye ay tehhod a mangtanggap nikam tu bilay na a awan ti kahad ti langet. ¹⁰ U mapagkatiwalaan ti badit a bagay ay mapagkatiwalaan be ti dakál a bagay sakay ni deya man u mangdaya tu badit a bagay ay magdaya be tu dakál a bagay. ¹¹ Kaya ni awan kam mapagkatiwalaan tu kayamanan ti munduwáy, deya u magtiwala nikam tu tunay a kayamanan? ¹² Ni awan kam mapagkatiwalaan tu kayamanan nu agum ay awan kam be mapagkatiwalaan tu tatahoden a kayamanan a para nikam. ¹³ Awan maare a pagsabayán a serbiyan nu essa a utusan u duwwa a amo dipo kaiyamutan na u essa sakay mahalán na u essa. Pagserbiyan na ti husto u essa sakay awan na pospusán u essa. Awan moy maare a pagsabayán a serbiyan u Diyos sakay u kayamanan.” ¹⁴ Nikuna masaneg iye nu Pariseo hide ay kinatawaan de ti Jesus dipo masássohan hide ti pilak. ¹⁵ Pero kinagi ni Jesus nide, “Mapagpakunwari kam tu atubang nu katolayan, pero tukoy nu Diyos u katoy tu puso moy. Dipo u mahalaga tu tolay ay sasala nu Diyos.” ¹⁶ “U kautusan ni Moises sakay u insulat nu prupeta hide u sassunudan nu tolay hide hanggan dummemat ti Juan a Mágbawtismo. Sapul hod ay nepangaral dán u Maganda a Baheta tungkul tu pághare nu Diyos. Kaya makpal u magpilit a magin kaparte hod. ¹⁷ Pero mas alisto pa a mawan u langet sakay tu luta, nan mawanan ti bisa u kabadit-baditan a parte nu kautusan. ¹⁸ U lállake a summina tu kabanga na sakay mákkabanga ti iba ay nangibábbey, sakay u mangkabanga tu bábbey a sininaan ay mángibabbey labe.” ¹⁹ Nadid, kinagi pa ni Jesus, “Te essa a mayaman a mágbabihisan ti mágkamahal a damit sakay makpal a sare-sare a makan ti aldew-aldew. ²⁰ Sakay tehhod be a essa a mahirap a putat ti talingo u bággi na, sakay mágkatdug tu pintuwan nu mayaman, u ngahan na ay ti Lazaro. ²¹ U áasaan na a kanán ay u nágketápduk hide a mumo tu lamisaan nu mayaman. Kaya adeniyan siya nu aso hide sakay dáddeldelan u talingo na. ²² Natay u mahirap kaya inyangay nu anghel hide u kaliduwwa na tu páppagyanan ni Abraham. Natay be u mayaman sakay nelábbáng. ²³ Sakay tu bállog nu págtatiis na tu lugar nu patay hide sakay timmangad u mayaman netánnawan na tu adeyo ti Abraham a kaguman na ti Lazaro. ²⁴ Kaya pimmákhaw siya, ‘Ama a Abraham, kagbiyanák pay, utusan mo pay ti Lazaro a ilogbut na u toldu na tu dinom sakay ipatuhog na ti dila kuwáy dipo maghirapák dán ti magdalob-dalubáy a apoy.’ ²⁵ Pero kinagi ni Abraham, ‘Anak isipán mo a nagpakasawa ka tu biyag mo ti luta atod. Sakay ti Lazaro ay nagtiis ti hirap. Pero nadid ay masaya dán u biyag na he sakay hiko damman ay mághahirapán ka hina. ²⁶ Bakán la ina, tehhod a malawa sakay madisalad a ábbut ti pag-itan tamáy, kaya u katoy he ay awan makaangay hina sakay u katoy hina ay awan be makaangay he.’ ²⁷ Kaya kinagi nu mayaman, ‘Ni konna hod, Ama a Abraham, mákkekagbiyák niko a paangayán mo ti Lazaro tu bilay nama ko, ²⁸ dipo tehhodák a limma a kákkapatkákka a lállake hod, utusan mo siya a angay na hide pagkagiyán tánni awan be hide meangay ti lugaráy a paghirapan ko.’ ²⁹ Pero kinagi nikuna ni Abraham, ‘Katoy dán nide u insulat hide ni Moises sakay u insulat nu propeta hide kaya dapat de itod a sunudán.’ ³⁰ Timmábbeg u mayaman, ‘Awan itod hide sapat, Ama a Abraham. Pero ni angay nide u essa a natay dán sakay nabiyag a huway ay adággan de u kasalanan de hide.’ ³¹ Pero kinagi nikuna ni Abraham, ‘Ni umád de a sunudán u insulat ni Moises sakay u insulat nu propeta hide ay awan dila be sanigán maski u essa a patay a nabiyag a huway.”’

¹ Kinagi ni Jesus tu disepulus na hide, “Pirme a tehhod a dahilan ni bakin a magkasala u tolay; pero makaánteng u sapitán nu tolay a pinaggábwatan ni iye a pagkakasala! ² Maganda pa ni báttenan siya ti essa a dakál a gilingan a bito tu álleg na sakay ibut ditaw a diget, nan magin dahilan nu pagkasalaan ni biguwan iye hide ti pánnampalataya. ³ Kaya mag-ingat kam! “Ni magkasala niko u kapátkákka mo ay págkagiyan mo; sakay ni magsise siya ay patawadán mo. ⁴ Ni pumenpitto dán siya a nagkasala niko tu maghapun, sakay pumenpitto be siya a umadene niko a magkagi a, ‘Nagsisiyák,’ Kailangan a patawadán mo siya.” ⁵ Kinagi nu disepulus hide ni Jesus, “Dagdagan mu ped pánnampalataya miyáy!” ⁶ Pero timmábbeg ti Jesus, “Ni te pánnampalataya kam nakwan dálla a konna tu kadakál nu bukál nu mustasa ay maare moy dán a makagi ti kayuwáy a sikomoro a, ‘Mabotbot ka sakay memula ka ti diget ta atod!’sakay sumunud iye. ⁷ Ipagpalagay tam a tehhod kam a utusan a mággaradu oni mággalaga ti tupa. Kággábwat na beman tu araduwan ay kagiyán moy beman nikuna a, ‘Karon he, angay ka dán kuman?’ ⁸ Awan beman konna he i kagiyán moyay, ‘Maglewas ka dán sakay paghandaák mo ti pangapon ko sakay serbiyanák mo mentaras kumanák. Káttapos ko a kuman ay saka ka dán a kuman.’ ⁹ Kailangan beman a pasalamatan nu amo u alipin na dipo sássunudán na siya? ¹⁰ Konna kam labi hod, ni nagimet moy dán u atanan a inyutus nikam nu Diyos ay iye u dapat moy a kagiyán, ‘Alipin kami la; kaya ginimet mila u tungkulin me hide.”’ ¹¹ Nikuna patamo dán ti Jesus ti Jerusalem ay nagtaleb siya tu pag-itan nu Samaria sakay Galilea. ¹² Nikuna pasáddáp dán siya tu essa a baryo ay tinagbu siya nu sapulo a kinetong pero awan hide immadene nan tumáttaknág la hide tu medyo adeyo, ¹³ sakay pimmákhaw hide, “Jesus a Panginoon! Kagbiyan mo kami pay!” ¹⁴ Pákketa ni Jesus nide ay kinagi na, “Kámmoy dán sakay pumeta kam tu saserdote hide.” Mentaras a maglakad hide ay nagpiyya hide. ¹⁵ Nikuna nabate nu essa a nagpiyya dán siya, ay nagsole siya a mágpapákhawán a nágpapuriyán tu Diyos. ¹⁶ Sakay limmuhud siya tu atubang ni Jesus sakay nagpasalamat. Taga-Samaria iye a tolay. ¹⁷ Kinagi ni Jesus, “Awan beman sapulo u pinagpiyya ko? Hádyarán u siyam? ¹⁸ Bakin awan nagsole u agum para magpure tu Diyos, nan i nagsole paáy ay i bakán náy a taga-he?” ¹⁹ Sakay kinagi ni Jesus nikuna, “Tumaknág ka dán sakay sole! Pinagpiyya ka dipo tu pánnampalataya mo.” ²⁰ Nadid, tinanung nu Pariseo hide ti Jesus ni nikan a magsapul u pághare nu Diyos. Timmábbeg siya, “Awan ti ketan a palatandaan tu págsapul nu pághare nu Diyos, ²¹ sakay awan be ti magkagi a nagsapul dán iye hode oni heeh. Dipo i tahoday ay nagsapul dán a maghare u Diyos nikam.” ²² Káttapos ay kinagi na tu disepulus hide, “Dumemát u panahun a gustuwán moy a ketan u Anak nu Tolay maskin essa aldew la, pero awan mangyare itod.” ²³ Te mángkagi nikam, ‘Kátoy hode!’ oni ‘Katoy siya heeh!’ Pero dyan kam hod umangay sakay dyan kam nide maniwala. ²⁴ Dipo u Anak nu Tolay ay dumemát a konna tu kilat a magdemlag tu buo a langet. ²⁵ Pero kailangan pa siya a magtággád ti makpal a hirap, sakay umadden di siya nu tolay hide nadid. ²⁶ U káangay he nu Anak nu Tolay ay konna tu panahun ni Noe. ²⁷ U tolay hide tu itod ay mágkakanán, makán inumán sakay mamágkabangaán, hanggan dummemát u aldew a summakay ti Noe tu dapat a kadakál a abeng. Káddemát nu lonso ay nágkatay hide a atanan. ²⁸ Konna labi hod u nangyare tu panahun ni Lot. U tolay hide ay makán kanán, makán inumán, sakay makán baliyán, makán lakuwan, makán mulaán sakay mágbabilayán. ²⁹ Pero nikuna a lumakad ti Lot ti Sodoma ay naguden ti apoy sakay asupre kaya natutod hide a atanan. ³⁰ Konna labi hod i mangyariyay tu káddemát nu Anak nu Tolay. ³¹ “Ti aldiwan itod, u katoy tu atáp nu bilay ay dyan dán magabala a umogsad para alapán u kabiyagen na hide tu disalad nu bilay. Sakay u katoy tu uma ay dyan dán magabala a sole.” ³² Isipán moy dálla u nangyare tu kabanga ni Lot. ³³ Ni deya man u mángligtas tu biyag na ay mawanan a talaga. Pero ni deya man u awan mángkemot tu biyag na dipo tu kássunud na nikán ay magkahod ti biyag a awan ti kahád. ³⁴ Kagiyán ko nikam, ni te duwwa a lállake a mágkatdug tu essa a abák ti gibiyan itod, alapán u essa sakay mawahak u essa. ³⁵ Tehhod be a duwwa a bábbey a maggiling; maalap u essa sakay mawahak be u essa. ³⁶ Tehhod be a duwwa a lállake a magtarabaho tu uma, maalap u essa sakay mawahak be u essa.” ³⁷ Tinanung nu disepulus na hide, “Hadya iye a mangyare Panginoon?”Timmábbeg siya, “Ni hádya u páppagyanan nu bangkay hide ay hod bi hod a naipun-ipun u wákwák hide.”

¹ Kinagi ni Jesus tu disepulus na hide u essa a talinhaga, para itoldu na nide a pirme hide a magdasal sakay dyan hide mawanan ti pag-asa. ² Kinagi na, “Tu essa a banuwan ay tehhod a huwes a awan ti ánteng tu Diyos sakay awan ti igággalang a tolay. ³ Sakay tehhod be a bábbey a bilo ti itod a banuwan a makánsole-soliyán tu huwes sakay kagiyán na a, “Kagbiyanák pay a isuhog tu kadima ko hide.” ⁴ Nanalay dán a awan popospusán nu huwes u bilo. Pero awan nagnalay ay kinagi nu huwes tu sadile na, ‘Maskin awanák ti ánteng tu Diyos sakay awanák ti igággalang a tolay, ⁵ ay mapiyya pa ni isuhog ku dálla i bábbiyan iye para awanák na dán istorbuwan bakay ni magiyamuták pa nikuna ti pakansolisole naay.”’ ⁶ Káttapos ay kinagi ni Jesus, “Nasaneg moy u kinagi ni madukásan itod a huwes! ⁷ U Diyos pa wád u awan mángsuhog tu pinile na hide a mákkekakagbi nikuna tu aldew ay ti gibi. Paguhayán na beman wád hide ti malay a panahun? ⁸ Kagiyán ko nikam, iyatád na a pagdaka u atanan a tulung a agidán tam. Pero káddemát a huway nu Anak nu Tolay ti munduwáy, te ketan pa wád siya a manalig nikuna?” ⁹ Kinagi ni Jesus iye a talinhaga tu tolay hide a u pangisip de tu sadile de ay mágkalinis, pero imemenos di la be u agum a tolay. ¹⁰ “Te duwwa a lállake a summáddáp tu Templo para magdasal. U essa ay Pariseo sakay u essa ay mágsingeh ti buwes. ¹¹ Timmaknág u Pariseo sakay nagdasal ti konna heeh,‘Magpasalamaták niko, Panginoon dipo awanák kapareho nu agum a mágtakaw, mágkadaya, mángngibábbey oni konna ti lállakiyáy a mágsingeh ti buwes. ¹² Pumenduwaák a magkulasyon ti sasimba; mángngatáddák ti ikapo tu atanan a mapaghanapbuhayan ko.’ ¹³ Pero u mágsingeh ti buwes ay magtáknág tu adeyo; a awan makaile-ileng ti langet, nan táttepdagán na u hakaw na, sakay kinagi na, ‘Diyos ko, kagbiyanák pay, essaák a makasalanan!’ ¹⁴ Kagiyán ko nikam, iye a lállake ay simmole a kinasayaan nu Diyos, pero awan na kinasayaan u essa. Dipo u mánglangkaw tu sadile na ay mebaba, pero ni ti deya man u magpakababa ay melangkaw.” ¹⁵ Inyangay nu tolay hide u anak de hide para itupo ni Jesus u kamát na tu anak. Nikuna ketan iye nu disepulus na hide ay pinagkagiyan de u tolay hide. ¹⁶ Pero dinulawan ni Jesus u anak hide sakay kinagi na tu disepulus na hide, “Pabayan moy a umadene nikán u anak hide. Dyan moy hide sawayán dipo u magin kaparte tu kahariyan nu Diyos ay u konna ti anakan hidenye. ¹⁷ Tandaan moy: ni deya man u awan mangtanggap tu pághare nu Diyos a konna tu bábbadit a anak ay awan paghariyan nu Diyos.” ¹⁸ Nadid, tehhod a nagtanung ni Jesus a puno nu Judio hide, “Mabait a maisto, ánya i dapat kuway a gimitán tánni mágkahodák ti biyag a awan ti kahád?” ¹⁹ Timmábbeg ti Jesus, “Bakin dinulawák mo a mabait? Awan ti mabait maliban tu Diyos. ²⁰ Tukoy mu dán u utus hide nu Diyos, ‘Dyan ka mangibábbey sakay mangilállake, dyan ka mamuno, dyan ka magtakaw, dyan ka magtistigu ti kakabuliyan sakay igalang mo tama mo sakay tena mo.”’ ²¹ Timmábbeg u lállake, “Sinássunud ku dán ina a atanan sapul pa nikuna anakák.” ²² Nikuna masaneg iye ni Jesus ay kinagi na, “Essa pa a bagay u kulang niko. Ilako mo u atanan nu kabiyagen mo sakay iyatád mo tu mágkahirap hide u naglakuwan mo tán magkahod ka ti kayamanan ti langet. Káttapos ay sole ka sakay sumunud ka nikán.” ²³ Pero nikuna masaneg na iye ay nalungkut siya, dipo mayaman siya a tahod. ²⁴ Netan ni Jesus a nalungkut siya kaya kinagi na, “Mahirap a makasáddáp u essa mayaman tu kahariyan nu Diyos! ²⁵ Mas alisto pa a makasáddáp u essa a kamelyo tu ábbut nu digum nan tu essa a mayaman a makásaddáp tu kahariyan nu Diyos.” ²⁶ Nagtanung u mágsaneg hod hide, “Ni konna hod, deya pa wád i maligtasay?” ²⁷ Pero timmábbeg ti Jesus, “U awan magimet nu tolay ay kaya a gimitán nu Diyos.” ²⁸ Sakay kinagi ni Pedro, “Ilingan moy, linakadan mi dán u bilay mi hide para sumunud niko.” ²⁹ Sakay kinagi ni Jesus nide, “Tandaan moy iye, ni deya man u mángwahak tu bilay na, tu kabanga na, tu kakkapatkakka na, tu dáddakál na hide oni u anak di hide dipo tu kahariyan nu Diyos, ³⁰ ay makatanggap ti mas makpal pa nan tu inwahak na hide. Sakay tu pademát a panahun ay magkahod pa siya ti biyag a awan ti kahád.” ³¹ Sakay dinulaw ni Jesus u sapulo ay ti duwwa na a disepulus sakay kinagi na nide, “Angay kitam ti Jerusalem sakay matupad hod u atanan nu insulat nu prupeta hide tungkul tu Anak nu Tolay. ³² Dipo iyangay di siya tu Hentil hide sakay sestiyan, insultuwán sakay loktaben. ³³ Bálbággán di siya sakay bunuwan, pero tu katállo a aldew ay mabiyag siya a huway.” ³⁴ Pero awan hide ti naintendiyan tu nasaneg de. Awan de naintendiyan ni ánya u gusto na a kagiyán sakay awan hide ti nangmalayan ni ánya u kinagi na. ³⁵ Nikuna adene dán di Jesus ti Jerico; ay tehhod a lállake a buhák a mággetnod tu gibis nu dilan sakay máklimus. ³⁶ Nikuna masaneg na a magtaleb u makpal a tolay ay tinanung na ni ánya i nangyariyay. ³⁷ Kinagi de nikuna,“Magtaleb ti Jesus a taga-Nazaret.” ³⁸ Sakay pimmákhaw siya, “Jesus, Anak ni David! Kagbiyanák mo pay!” ³⁹ Páppatahimikán siya nu tolay hide a katoy tu dipalongo, pero inyondug na pa a impákhaw,“Anak ni David, kagbiyanák mu pay!” ⁴⁰ Immimang ti Jesus sakay inyutus na a iyangay de nikuna u buhák. Nikuna makaadene dán u buhák ay tinanung na siya, ⁴¹ “Ánya u gusto mo a gimitán ko niko?”“Panginoon, gusto ko a maketaák!”Kagi na. ⁴² Kinagi ni Jesus nikuna, “Mangyare u gustu mo! Maketa ka dán dipo tu pánniwala mo nikán.” ⁴³ Kaya ti odas biyan itod ay naketa siya sakay tulos a immunonod ni Jesus a nágpapuriyán tu Diyos. Nikuna a ketan itod nu katolayan ay atanan de a nagpure tu Panginoon.

¹ Nadid, immangay ti Jesus ti Jerico sakay naglakad siya tu banuwan. ² Te essa hod a lállake a Zaqueo u ngahan na. Siya u puno nu mágsingeh hide ti buwes sakay tunay a yaman. ³ Gugusto na a ketan ti Jesus tán matengge na ni ti deya siya. Pero dipo tunay siya ti henggád sakay tunay a kákpal u tolay ay awan na ketan ti Jesus. ⁴ Kaya nágdipalongo siya a nagginan sakay ummunek tu kayo a sikomoro tánni ketan na ti Jesus a magtaleb hod. ⁵ Káttapat ni Jesus tu kayo ay timmangad siya sakay kinagi na nikuna, “Zaqueo, umogsad ka dipo tumulusák nadid tu bilay mo.” ⁶ Kaya nagalalisto siya a immogsad sakay grabi u saya na a nangtanggap ni Jesus tu bilay na. ⁷ Nikuna ketan itod nu tolay hide ay nágganasasan hide a atanan, kinagi de a, “Maktulos siya tu makasalanane a tolay!” ⁸ Timmaknág ti Zaqueo sakay kinagi na,“Panginoon, iyatád ko tu mágkahirap hide u kalahate nu kabiyagen ko. Sakay ni deya man u nadaya ko ay pumen-áppat ko a bayadan.” ⁹ Sakay kinagi ni Jesus nikuna, “Dimmemát nadid u kaligtasan ti sabilayan iye dipo te patunay a itolayan iye ay lahe labe ni Abraham. ¹⁰ Dipo u Anak nu Tolay ay immangay he tánni ehyukán sakay iligtas u nágketawtaw hide.” ¹¹ Mentaras a mágsaneg u tolay hide ay insaysay na u essa pa a talinhaga. Dipo adene dán hide ti Jerusalem sakay u akala nu tolay hide ay magsapul dán u pághare nu Diyos. ¹² Kaya kinagi na, “Te essa a lállake a mayaman a immangay tu adeyo a lugar para magin hare sakay nagsole labe tu banuwan na para maghare. ¹³ Pero bagu siya limmakad ay dinulawan na u sapulo na hide a utusan. Inatádden na hide ti tatággessa de a pilak a ginto. Sakay kinagi na nide, “Inigosyo moy pala hanggan tu kássole ko.” ¹⁴ Pero u kabanuwanan na hide ay inadiyan de siya, kaya nangutus hide ti angay mangkagi tu pinaka-mataas a puno nu banuwan a umád di siya a magin hare de. ¹⁵ Pero nagin hare padi siya, “Nikuna makasole dán siya ay pinadulaw na u utusan na hide a inatádden na ti pilak a ginto, tánni matukuyan na ni sangan u ganansiya de. ¹⁶ Immadene nikuna u dipalongo sakay kinagi na, ‘Panginoon, u pilak mo a ginto ay nakaganansiyaák ti sapulo a pilak a ginto.’ ¹⁷ Kinagi na nikuna, ‘Malalake ka a utusan, sakay mabait ka a utusan! Dipo matapat ka tu badit a bagay kaya pamunuwan taka tu sapulo a banuwan.’ ¹⁸ Immadene be u kaduwwa, kinagi na, ‘Panginoon, u pilak mo a ginto ay nakaganansiyaák be ti limma.’ ¹⁹ Kaya kinagi na nikuna, ‘Pamunuwan mo u limma a banuwan.’ ²⁰ Káttapos nu kaduwwa ay immadene be u essa pa a utusan, sakay kinagi na, ‘Panginoon, sadánnáy u pilak mo a ginto. Binalutan ko ti panyo sakay intagu ko. ²¹ Dipo mantingák biyaybe niko dipo tukoy ko a tunay ka ti kahigpit; alapán mo u bakán mo a kao, sakay áaniyán mo u bakán mo a inmula.’ ²² Kinagi nu hare nikuna, ‘Madukás ka a utusan! Hatulan taka tu kinagi mo. Tukoy mo bál a mahigpiták, áalapán ko u bakán ko a kao sakay áaniyán ko u bakán ko a inmula! ²³ Bakin awan mo indátton tu bangko i pilak kuwe? Tánni tehhodák a ganansiya tu kássole ko.’ ²⁴ Káttapos ay kinagi nu hare tu atanan a katoy hod, ‘Alapán moy nikuna u pilak a ginto sakay iyatád moy tu tehhod a sapulo.’ ²⁵ Pero kinagi di nikuna, ‘Panginoon, bakin iyatád tam nikuna, tehhod dán siya a sapulo a pilak a ginto?’ ²⁶ ‘Tandaan moy iye: ni deya u tapat tu neatád nikuna ay madagdagan pa itod ti makpal. Pero ni deya man, u awan tapat ay maski u badit a katoy nikuna ay mawan pa itod nikuna. ²⁷ Kinagi na pa, ‘Konna be tu kadima ko hide a umád nikán a maghare nide ay iyangay moy he hide sakay bunuwán ti atubang kuwáy!”’ ²⁸ Káttapos na a nággistorya ay nágdipalongo dán siya a patamo ti Jerusalem. ²⁹ Nikuna adene dán siya ti Betfage sakay ti Betania, tu buked a ngángngahanan de a Buked nu Olibo hide ay pinágdipalongo na u duwwa na a disepulus. ³⁰ Kinagi na nide, “Angay kam tu sumunud a baryo. Kássáddáp moy hod ay ketan moy u essa a bul-o a asno a umáegut, awan palla iye nasaka-sakayan. Okbisán moy sakay iyangay moy he. ³¹ Ni te magtanung nikam ni bakin okbisán moy ay kagiyán moy, ‘Kailangan iye nu Panginoon.”’ ³² Kaya naglakad dán u inutusan na hide sakay netan di ngane u asno a konna tu kinagi nide ni Jesus. ³³ Mentaras a okbisan de u asno ay tinanung hide nu makákkao, “Bakin okbisán moy bul-o miye a asno?” ³⁴ Kanya timmábbeg hide, “Kailangan iye nu Panginoon.” ³⁵ Inyangay de tu kán Jesus u asno sakay sinapinan de u adág nu asno tu alikab-kab sakay pinasakay de ti Jesus. ³⁶ Mentaras a mágsakay siya a patamo ti Jerusalem ay inlatag nu tolay hide u dami-damit de tu paglakadán na. ³⁷ Nikuna padegson dán siya tu Buked nu Olibo hide ay nagpákhawan u atanan nu disepulus na hide dipo tu saya de. Sakay nagsapul dán hide a magpasalamat tu Diyos dipo tu atanan a makataka-taka a bagay a netan de a ginimet ni Jesus. ³⁸ Kinagi de, “Puriyán u Hare a mágdadedemát tu ngahan nu Panginoon! Puriyan u Diyos dipo te kapayapaan ti langet!” ³⁹ Kinagi nikuna nu sangan a Pariseo hide a kaguman tu kákpalan, “Maisto, sawayán mupay i disepulus muwe hide.” ⁴⁰ Timmábbeg ti Jesus, “Kagiyán ko nikam, ni mara tumahimik hide ay u bito dán u lumewas a magpákhaw ti papure.” ⁴¹ Nikuna adene dán siya ti Jerusalem ay nagsanget siya nikuna matan-aw na u banuwan dipo kagbiyan na u tolay hide hod. ⁴² Kinagi na, “Ni ányaán ku pala ay matukuyan moy nakwa ni ánya makapangatádday nadid nikam ti kapayapaan! Pero awan kam la ti nangmala-malayan. ⁴³ Dipo dumemát u aldew a palebutan kam nu kadima moy hide ti banuwan moyáy sakay bantayan dikam ti husto tánni awan kam makaluwa-luwas sakay lusubán di kam. ⁴⁴ Puksaán di kam pate u anak moy hide, awan hide ti ibuha-buhay. Maski u bito hide tu banuwan moy ay awan manatili tu date na a pappagyanan, dipo awan moy pinospos u káddemát nu Diyos a mángligtas nikam.” ⁴⁵ Nadid, simmáddáp ti Jesus tu Templo sakay pinalakad na u atanan a maglako hod. ⁴⁶ Kinagi na nide, “Sumássulat, U bilay ko ay nginahanan de a bilay a págdasalan.’ Pero ginimet moy a bilay nu mágtakaw hide.” ⁴⁷ Sakay aldew-aldew ay nagtoldu siya tu Templo. Gusto siya a ipabuno nu puno nu saserdote hide, nu maisto hide nu Kautusan sakay u ama-amaan hide tu banuwan. ⁴⁸ Pero awan hide ti netan a paraan ni kodya di siya a mabuno, dipo atanan a tolay ay taimtim a mágsaneg nikuna.

¹ Nadid, essa aldew mentaras a magtoldu ti Jesus tu templo sakay mangaral tu Maganda a Baheta, inadeniyan siya nu puno nu saserdote hide sakay u maisto hide nu kautusan sakay u puno hide nu banuwan. ² Sakay kinagi de nikuna, “Kagiyán mo ped nikame ni ánya karapatan muway a maggimet ti bagayan hidenye? Oni deya niko u nangatád ti kapangyariyan?” ³ Timmábbeg ti Jesus, “Tanungán takam be nadid. Kagiyán moy ped be nikán, ⁴ ni hádya a naggábwat u karapatan ni Juan a magbawtismo, tu Diyos beman oni tu tolay?” ⁵ Kaya namágguhon-uhon hide,“Ni kagiyán tam a gábwat tu Diyos, kagiyán na be nikitam, ‘Bakin awan moy siya pinaniwalaan?’ ⁶ Pero ni kagiyán tam a gábwat tu tolay ay batikalán kitam nu tolay hide, dipo maniwala hide a prupeta ti Juan.” ⁷ Kaya tummábbeg hide, “Awan me tukoy!” ⁸ Kinagi ni Jesus nide, “Awan ko be kagiyán nikam ni hádya a gábwat u karapatan ko a maggimet ti bagayan hidenye.” ⁹ Nangaral siya a huway tu tolay hide sakay inyistorya na iye a talinhaga, “Te essa a tolay a nagmula ti ubas tu uma na. Impaupa na itod tu tarabahador na hide sakay immangay tu adeyo a lugar sakay nagnalay hod. ¹⁰ Nikuna sákbuhas dán ay pinaangay na u essa a alipin para alapán u kabunong na. Pero pákketa nu tarabahador hide tu utusan ay binálbág de sakay pinasole de a awan ti tawed. ¹¹ Kaya nagutus siya a huway tu essa na a alipin, pero binálbág de labe sakay pinasanike sakay pinasole a awan ti tawed. ¹² Pinaangay na u katállo na a alipin pero tinalinguwan dila siya sakay pinalakad. ¹³ Kinagi nu makákkao tu ubasan, ‘Ánya wád i dapat kuway a gimitán? Maganda wád ni u pinakamamahal ko a anak u paangayán ko hod. Siguradu a igalang di siya.’ ¹⁴ Pero nikuna ketan nu tarabahador hide u anak nu makákkao ay namagguhon hide sakay kinagi de, ‘Iye u magmana, bunuwán tam siya para makao tam u manaán na.’ ¹⁵ Kaya inyangay di siya tu luwas nu kaubasan hide sakay binuno. Sakay kinagi ni Jesus,“Ánya wád u gimitán nide nu makákkao tu kaubasan?” ¹⁶ “Angay siya hod sakay bunuwan na u katiwala hide tu kaubasan sakay iyatád na tu agum u uma na.” Pákkasaneg nu tolay hide tu kinagi na ay kinagi de, “Dyan nakwan iye ipakultad nu Diyos a mangyare!” ¹⁷ Pero inileng hide ni Jesus sakay kinagi na, “Ni konna hod, ánya u gusto a kagiyán nu sumássulat tu Banal a Kasulatan? ‘U bito a inadiyan nu mágbilay hide ay siya u bito a nagin pundasyon?’ ¹⁸ Ni deya man u matákneg ti bituwan ina ay mahito-hito sakay ni deya man u matáppelan na ay puma-páhtot.” ¹⁹ Gusto a dakáppán nu maisto hide nu Kautusan sakay u puno nu saserdote hide ti Jesus ti odasan itod. Dipo tukoy de a hide u páppatamakan ni Jesus tu talinhaga. Pero manteng hide tu tolay hide. ²⁰ Kaya naguhay dálla hide ti essa a tiyempo. Sinuhulan de u sangan a tolay para magkukunware a magehyok ti katutuhanan. Ginimet de iye para dakáppán de siya ni magkamale siya tu pággupos na, tánni konna hod ay mekaso de siya tu gubernador. ²¹ Essa aldew kinagi nu espiya hide ni Jesus, “Maisto, tukoy me a tama atanan ni kákkagiyán sakay itáttoldu muwe. Tukoy mi be a awan ka manuyo tu te mataas a tungkulin a tolay, nan itoldu mo u tatahoden a kagustuwan nu Diyos a gimitán nu tolay hide. ²² Ánya ti pangisip muwe, labag beman tu Kautusan a magbayad kitam ti buwes ni Cesar oni awan?” ²³ Pero tukoy ni Jesus u áisipán de a madukás, kaya kinagi na nide, ²⁴ “Igewat moy nikán u essa a pilak. Kandeya a hupa sakay ngahan u katoy ti pilakáy” “Kán Cesar.”Tábbeg de. ²⁵ Kinagi ni Jesus nide, “Ni konna hod ay iyatád moy ni Cesar u para ni Cesar, sakay iyatád moy tu Diyos u para tu Diyos.” ²⁶ Awan ti nangyare tu áisipán de a madukás a dakáppán de siya tu pággupos na tu atubang nu katolayan. Dipo awan hide ti netan a pangdakáppan de nikuna. Sakay nabigla hide tu intabbeg na nide, kanya nagtahimik dálla hide. ²⁷ Te sangan a Saduseo a ummadene ni Jesus. Iye hide ay mágtatolduwán a awan mabiyag a huway u patay hide. ²⁸ Sakay kinagi de, “Maisto, insulat ni Moises tu kautusan a para nikitam u konna he a batas, ‘Ni mara a matay u essa a lállake sakay awan hide ti anak ay tu kabanga na ay kailangan a pakasalan nu wadi nu lállake u bilo tánni mágkahod hide ti anak para tu natay.’ ²⁹ Nadid, tehhod a pitto a mátkaka a lállake. Nákkabanga u panganay sakay natay a awan ti anak. ³⁰ Káttapos ay pinakasalan nu kaduwwa u nabilo, pero natay be a awan ti anak. ³¹ Sakay konna bi hod u nangyare tu katállo hanggan tu kapitto; naessa-essa a nakabanga nu bilo a bábbey u pitto a mátkaka. Pero nágkatay hide a atanan a awan ti anak. ³² Tu katapusan ay natay labe u bábbey. ³³ Kaya kinagi de, tu kákkabiyag a huway, deya wád u tenggiyán na a kabanga tu pitto dipo nakabanga na hide a atanan?” ³⁴ Timmábbeg ti Jesus, “ Ti biyagan iye, u lállake hide sakay u bábbey hide ay mákkabanga. ³⁵ Pero u tolay a karapatdapat a mabiyag a huway sakay meangay ti langet ay awan dán hod mákkabanga. ³⁶ Dipo konna dán hide tu anghel hide a awan mata-matay sakay magin anak dán hide nu Diyos. Dipo biniyag na dán hide a huway. ³⁷ Pate ti Moises ay nágpatunay a mabiyag a huway u patay hide. Dipo nikuna a katoy siya tu maggehab a mahenggád a kayo ay dinulawan na u Panginoon a, ‘Diyos ni Abraham, Diyos ni Isaac, sakay Diyos ni Jacob.’ ³⁸ Pero u Diyos ay bakán a Diyos nu patay hide nan Diyos nu biyag hide, u atanan a dinulaw nu Diyos ay bakán a patay nan biyag.” ³⁹ Sakay kinagi nu agum a maisto nu Kautusan, “Maisto, maganda u intábbeg mo!” ⁴⁰ Sakay sapul hod ay awan dán ti nangahas a magtanung nikuna. ⁴¹ Káttapos ay kinagi ni Jesus nide, “Kodya tam a makagi a anak ni David u Mesias? ⁴² Dipo ti David dán a mismo u nagkagi tu libro nu Awit a, ‘Kinagi nu Panginoon tu Panginoon ko, “Mággetnod ka ti kawanan kuwáy, ⁴³ Mentaras awan ko niko mapasuko u kadima mo hide.”’ ⁴⁴ Nadid, ti David dán u nagdulaw nikuna a Panginoon; bakin wád a kákkagiyán nu tolay hide a anak siya ni David?” ⁴⁵ Mentaras a mágsaneg u tolay hide ni Jesus ay kinagi na tu disepulus na hide, ⁴⁶ “Magingat kam tu Maisto hide nu Kautusan dipo gugusto de a magsulot ti mágkalayon a damit tánni mapansin hide nu tolay. Sakay gugusto di be a igalang. Gugusto di be a mággetnod tu mágkaganda a pággetnudan para tu te mataas a tungkulin tu sinagoga hide sakay tu handaan hide. ⁴⁷ Alapán de u ari-arian nu bilo hide. Sakay gusto de a itagu u mágkadukás de a gimet kaya magdasal hide ti atakdug. Iye hide a tolay ay parusaan nu Diyos ti mas madágge a parusa!”

¹ Nadid, nikuna a netan ni Jesus u mágkayaman hide a nagtábbung ti pilak tu págdáttonan ti ikapo tu templo, ² netan na be u mahirap a bábbey a bilo a nángtábbung ti duwwa a sentabos. ³ Kanya kinagi ni Jesus tu disepulus na hide, “Tatahodan i kagiyán kuwáy nikam, i mahirape a bilo ay mas dakál u inyatád na nan ti inyatád diye a atanan. ⁴ Dipo i mágkayaman ne hide ay u subra la nu kayamanan de u inyatád de. Pero i bilo we a bábbey ay inyatád na u atanan a kabiyagan na.” ⁵ Nágguhunan nu sangan tu disepulus u tungkul tu templo, dipo tu mágkaganda hide a bito a ginamit sakay tu dikurasyon hide a inyáalay nu tolay. Kanya kinagi ni Jesus, ⁶ “Dumemát u aldew a atanan nu ketan moy ay maduhay, awan ti bito a mabuhay a te tupo tu kapareho na a bito.” ⁷ Tinanung de ti Jesus, “Maisto, nikan iye a mangyare? Sakay ánya u senyal ni adene dán iye a mangyare? ⁸ Timmábbeg ti Jesus, “Magingat kam tánni awan kam metawtaw nu agum a tolay! Makpal u dumemát a magkagi a hide u Mesias sakay magkagi, ‘Hikán u Cristo,’sakay‘Dummemát dán u panahun!’ Dyan kam maniwala nide. ⁹ Ni mara makabaheta kam ti gera sakay dimaan ay dyan kam mabalisa. Talaga a mangyare iye hide a atanan, pero bakán pálla iye u katapusan ni munduwáy.” ¹⁰ Sakay kinagi na pa, “Mamággera u bansa ti bansa sakay u kahariyan ti kahariyan. ¹¹ Magkahod ti tunay a begsák a linog, sák-aláp, sakay magkahod be tu iba-iba a lugar ti iba-iba a saket. Tehhod be a lumitaw a makaánteng a bagay, sakay makataka hide a senyal a gábwat ti langet. ¹² Pero bagu a mangyare iye hide a atanan ay padakáp dikam sakay pahirapan. Iyangay dikam tu sinagoga hide para imbistigaan sakay ipepireso. Sakay dipo tu págsunud moy nikán ay iyatubang dikam tu hare hide sakay tu gubernador hide. ¹³ Iye dán u pagkakataon moy a mángpakapospos tu Maganda a Baheta tungkul nikán. ¹⁴ Begsákkan moy i isip moye, dyan kam mabalisa ni kodya moy a dipensaan i sadile moye, ¹⁵ dipo hikán i mangtolduway nikam tu tama a itábbeg moy, tánni awan ti makagi u kadima moy hide. ¹⁶ Itokyon kam nu dáddakal moy hide, kakkapatkakka moy hide, kapartidu moy hide sakay barkada moy hide. Sakay ipabuno de u agum nikam. ¹⁷ Kaiyamután kam nu atanan a tolay dipo tu kássunud moy nikán, ¹⁸ pero awan ti mawan maskin essa a waget tu buuk moy. ¹⁹ Tu pagtiis moy ay magkahod kam ti biyag a awan ti kahád.” ²⁰ Pero ni ketan moy a napalebutan dán nu sundalo hide i Jerusalem ay tukoy moy dán a adene dán a masida i banuwanan ina. ²¹ Kaya u katoy hide ti Judea ay dapat guminan dán tu buki-buked, sakay u katoy hide ti Jerusalem ay kailangan a lumakad dán hod. Sakay u katoy hide tu buked ay dyan dán angay tu siyudad. ²² Dipo itod dán u págparusa a aldew, tánni matupad u sumássulat tu Kasulatan. ²³ Kakagbi u mabuktet hide sakay u magpasuso hide ti aldiwan itod! Dipo dumemát u mahigpit a hirap ti lugaran itod, bilang pagparusa nu Diyos ti bansaan ina.” ²⁴ U agum ay matay hide ti áttak, sakay u agum ay dakáppan sakay ipereso tu iba-iba a bansa. Sakay sakupán nu Hentil hide u banuwan a Jerusalem hanggan matapos u panahun a netakda.” ²⁵ Kinagi ni Jesus, “Magkahod ti senyal tu aldew, tu bulan, sakay tu biton hide. Ti lutaáy ay maligalig u atanan a tolay sakay awan de tukoy ni ánya u gággagamitán de dipo tu mabegsak a tánnog nu diget sakay daddakkal a dalondun. ²⁶ U tolay hide ay pumatay ti ánteng dipo ti pakán isip ni ánya u mangyare ti munduwáy. Dipo mayanág ti langet sakay u atanan a katoy hod ay meangay tu bakán de a date a páppágyanan. ²⁷ Ti Panahunan itod ay ketan de u Anak nu Tolay a pasidung tu panganurin a te kapangyariyan sakay grabi a demlag. ²⁸ Nadid, ni magsapul dán a mangyare i bagayan hidenye ay dyan kam manteng, magsaya kam dipo adene dán a dumemát u kaligtasan moy.” ²⁹ Sakay kinagi ni Jesus u essa a talinhaga,“Ilingán moy u kayo a igus sakay u agum hide a kayo. ³⁰ Ni magdaon dán iye ay tukoy moy dán a adene dán a kássinag. ³¹ Konna labi hod, ni ketan moy dán a mangyare dán iye hide a kinagi ko ay tukoy moy a adene dán a maghare u Diyos. ³² Tandaan moy, mangyare iye a atanan bagu matay u atanan a tolay a biyag nadid. ³³ Mawan u langet sakay u luta, pero u upos ko ay awan mamawan.” ³⁴ Kinagi ni Jesus,“Pero mag-ingat kam, dyan kam mággaabalaán a máglalasingán sakay mágsasayaán, sakay dyan kam mabalisa ti pakán áhyok moy tu kabiyagan moy hide tu aldew-aldew. Bakay abutan kam ni Aldiwan itod a awan handa. ³⁵ Dipo dumemát siya ti lutaáy tu odas a awan asa-asaan nu atanan a tolay. ³⁶ Kaya lagi kam a handa tu atanan odas. Pirme moy a idasal a magkahod kam ti begsák tánni matággád moy u atanan a hirap a dumemát sakay nakahanda kam la a umatubang tu Anak nu Tolay.” ³⁷ - ³⁸ Aldew-aldew ay magtoldu ti Jesus tu templo. Dipo kada dimadimang ay magagabi a angay u tolay hide tu templo para mágsaneg nikuna. Ti gibi ay lumakad siya sakay angay tu Buked nu Olibo hide.

¹ Nadid, adene dán a dumemát u Piyesta nu Tinapay a awan ti Págpaalsa a kákkagiyán di be a Kasayaan nu Aldew nu Págtaleb. ² U puno nu saserdote hide sakay u Maisto hide nu Kautusan ay magileng ti paraan tánni mepabuno de ti Jesus, pero maingat hide dipo manteng hide tu tolay hide. ³ Ti itod be ay simmáddáp ti Satanas ni Judas a Iscariote, a essa tu sapulo ay ti duwwa a disepulus na. ⁴ Kanya lummakad siya sakay immangay tu puno nu saserdote hide sakay tu puno nu mágbantay hide tu templo para págguhunan de ni kodya na a metokyon ti Jesus nide. ⁵ Nasaya u puno nu saserdote hide sakay pinanantuwan de ti pilak ti Judas. ⁶ Pimmayag ti Judas tu kasunduwan, kanya sapul hod ay nagehyok dán siya ti pagkakataun a metokyon na ti Jesus, tu paraan a awan matukuyan nu katolayan. ⁷ Dimmemát dán u Aldew nu Piyesta a kuman u Judio hide ti tinapay a awan ti págpaalsa, sakay págbuno di be tu tupa para tu Kasayaan nu Aldew nu Págtaleb. ⁸ Inutusan ni Jesus ti Pedro sakay ti Juan, kinagi na, “Kammoy dán, maghanda kam ti pangapon tam para tu Aldew nu Págtaleb.” ⁹ Tinanung de siya, “Hadya i gusto muway a paghandaan me?” ¹⁰ Timmábbeg siya, “Angay kam ti Jerusalem. Tehhod kam hod a matagbu a lállake a te sásson a tapayan a te lasán a dinom. Unonudán moy siya tu bilay a sáddáppan na. ¹¹ Sakay kagiyán moy tu makábbilay,‘Petanung ben nu Maisto ni tehhod kam a kuwarto a maare na a gamitán sakay tu disepulus na hide para tu Aldew nu Págtaleb.’ ¹² Kaya ipeta na nikam u tunay a kadakál a kuwarto tu ontok nu bilay a tehhod dán a nakahanda a gamit. He kam hod a maghanda tu pangapon tam.” ¹³ Lummakad u disepulus hide sakay netan de u atanan a ayun tu kinagi ni Jesus. Sakay inhanda de u Pangapon de para tu Aldew nu Págtaleb. ¹⁴ Nikuna dummemát dán u odas nu pángngapon de, ay nákpággatubang ti Jesus tu disepulus na hide. ¹⁵ Káttapos ay kinagi na nide, “Gugusto ko a makaguman takam ti iye a pangapon baguwák a maghirap. ¹⁶ Sanigán moy i kagiyán kuwáy nikam, awanák dán kuman a huway ti iye hanggan a mangyare u kahulugen ni iye tu aldew a maghare u Diyos. ¹⁷ Sakay inalap na u tasa a te lasán a alak, sakay káttapos na a nagpasalamat tu Diyos ay kinagi na, “Alapán moy iye sakay pamághatiyan moy. ¹⁸ Tandaan moy i kagiyán kuwáy nikam, awanák dán uminom a huway tu tábbug nu ubas mentaras awan palla dumemát u paghare nu Diyos.” ¹⁹ Sakay inalap na u tinapay sakay nagpasalamat tu Diyos, káttapos ay tináppeng-táppeng na itod sakay inyatád na nide. Kinagi na, “ Iye u bággi ko a nealay para nikam. Gimitán moy iye a pággalaalaan moy nikán.” ²⁰ Sakay konna bi hod u ginimet na tu tasa a te alak, sakay kinagi na, “I mainuman iye ay tanda nu bigu a kasunduwan nu Diyos a pinatibay nu dige ko a mebuhus dipo nikam. ²¹ Pero kaatubang ku nadid u mángtokyon nikán. ²² U Anak nu Tolay ay dapat a matay sigun tu intakda nu Diyos, pero makaaánteng u sapitán nu tolay a mángtokyon nikuna.” ²³ Kanya namágtanungan u disepulus hide ni ti deya nide u manggimet ti konna hod. ²⁴ Namágtábbegan u disepulus hide ni deya nide u tenggiyán a pinakadakila. ²⁵ Kanya kinagi nide ni Jesus, “U hare nu Hentil hide ay amo nu nasakupan na hide, sakay u te kapangyariyan hide ay gusto di a madulaw a, ‘matattulungan tu tolay hide.’ ²⁶ Pero bakán a konna hina u dapat moy a gimitan. Nan u pinakadakila u magin pinakamababa sakay u puno u dapat a magin tagapagserbi. ²⁷ Deya beman u dakila, u pagserbiyan oni u magserbi? Awan beman ay u pagserbiyan? Pero kakagumanák moy bilang essa a tagapagserbi. ²⁸ Matapat kam a kumuyoyog nikán maski tu odas nu makpal a pagsubuk a dinanas ko. ²⁹ Ni kodyaák a pinagkaluuben nu Ama ti karapatan a maghare, pagkaluuben takam be ti karapatan a maghare a konna nikán. ³⁰ Kapisan takam a kuman sakay uminom tu kahariyan ko, sakay mággetnod kam tu trono hide para mamahala tu sapulo ay ti duwwa a lahe ni Israel.” ³¹ Kinagi ni Jesus, “Simon, Simon! Magsaneg ka! Inaged ni Satanas a purbaan naka konna tu páng-ibut tu lupás tu trigu. ³² Pero indaddasal taka a awan manghina u pánnampalataya mo. Ipamenák mo pero pagsisiyan mo labe, kaya gusto ko a tulungan mo u kakagumanan mo hide tánni bumegsák u pánnamplataya de.” ³³ Timmábbeg ti Pedro, “Panginoon, nakahandaák a mepireso sakay matay a kaguman mo!” ³⁴ Pero kinagi ni Jesus, “Tandaan mo i kagiyán kuwáy Pedro, bagu magtarakket u tandang ti aldiwan iye ay pumentálluwák mo a ipamen.” ³⁵ Káttapos ay tinanung hide ni Jesus, “Nikuna a utusan takam a awan ti tawed a pitaka sakay hembeg, oni sapatus, kinulang kam beman?” Timmábbeg hide, “Awan.” ³⁶ Kinagi ni Jesus, “Pero nadid, ni tehhod kam a pitaka oni hembeg ay tawidán moy dán. Ni deyaman u awan ti áttak, ay ilako moy u alikab-kab moy hide sakay mamale kam ti áttak. ³⁷ Sanigán moy kagiyán kuwáy, kailangan a matupad dán nadid u sumássulat tu Kasulatan tungkul nikán, ‘Inbilang de siya a essa tu makasalanan hide.’ Dipo u nesulat tungkul nikán ay matupad dán nadid!” ³⁸ Káttapos ay kinagi nu disepulus na hide, “Panginoon, tehhod heeh a duwwa a áttak.”Tummábbeg ti Jesus, “Tama dán!” ³⁹ Konna tu date na a gággimitán, limmakad ti Jesus sakay immangay tu Buked nu Olibo hide kaguman u disepulus na hide. ⁴⁰ Káddemat di hod ay kinagi na nide, “Magdasal kam, tánni awan kam madaig nu tokso.” ⁴¹ Káttapos ay immadeyo siya nide ti sabadit sakay limmuhud sakay nagdasal. ⁴² Kinagi na,“Ama, ni maare ay iyadeyo ped nikán i pághirapan iye. Pero bakán a u kagustuwan ko u masunud nan u kagustuwan mo.” ⁴³ Pimmeta nikuna u essa a anghel a gábwat ti langet sakay pinabegsák na u isip na. ⁴⁴ Dipo tu hirap a áisipán na ay lalo siya a nagdasal ti husto. Timmákták tu luta u inet na a kumán a dáddakkál a tuhog ni dige. ⁴⁵ Káttapos na a nagdasal ay nagsole siya tu disepulus na hide. Dinemáttán na hide a tidug dipo tu grabi a lungkut de. ⁴⁶ Tinanung na hide, “Bakin a mágtatidugán kam? Umikat kam sakay magdasal tánni awan kam madaig nu tokso.” ⁴⁷ Pasiyaan palla a magupos ti Jesus nikuna a dumemát u makpal a tolay a págdidipalonguwan ni Judas. Siya u essa tu sapulo ay ti duwwa a disepulus. Inadeniyan na ti Jesus sakay inámmuwan, ⁴⁸ pero tinanung siya ni Jesus, “Judas, itokyon mo beman u Anak nu Tolay tu pamamag-itan nu ámmo?” ⁴⁹ Pákketa nu disepulus na hide ti itod ay kinagi de, “Panginoon, tegpasan mi dán beman hide” ⁵⁰ Tinegpas ngane nu essa a disepulus u kawanan a talinga nu alipin nu pinakapuno nu saserdote, kaya nahipang u talinga na. ⁵¹ Pero kinagi ni Jesus, “Tama dan!” Sakay kinahap na u talinga nu alipin kaya nagpiyya. ⁵² Káttapos ay kinagi ni Jesus tu puno nu saserdote hide sakay tu puno nu mágbantay hide tu templo sakay tu ama-amaan hide nu banuwan a immangay hod para dakáppán siya, “Madukássák beman a tolay, kanya kam he a immangay a te átták hide sakay gahote hide? ⁵³ Aldew-aldiwák a magtoldu tu Templo sakay katoy kam bi hod, pero awanák moy dinakáp. Pero nadid ay panahun moy dán sakay panahon dambe nu paghare nu kapangyariyan ni Satanas.” ⁵⁴ Dinakáp di ngane ti Jesus sakay inyangay de tu bilay nu pinakapuno a saserdote. Immunonod nide ti Pedro pero adeyo la. ⁵⁵ Nagnamo u tolay hide tu laguwerta nu bilay sakay nagendu, nákpággetnod be hod ti Pedro. ⁵⁶ Nikuna ketan siya nu utusan a bábbey a magendu ay minámmalas na siya. Sakay kinagi na, “Kaguman be ni Jesus i tolayan iye!” ⁵⁷ Pero impamen ni Pedro, kinagi na, “Aha! Awan ko siya matengge!” ⁵⁸ Maya-maya ay te nakaino nikuna a huway sakay tinanung na, “Awan beman essa ka be tu kakagumanan na hide?” Pero timmábbeg ti Pedro, “Aha! Awanáng.” ⁵⁹ Kállipas nu essa a odas ay inpagpumilit be nu essa a katoy hod, “Kaguman ngani ni Jesus i tolayan itona, dipo essa be siya a taga-Galilea.” ⁶⁰ Pero timmábbeg ti Pedro, “Awan ko tukoy tumo i kákkagiyán muwe!” Pasiyaan palla siya a magupos ay bigla a nagtarákket u tandang. ⁶¹ Simmuleg u Panginoon ni Pedro sakay lináttángngan na siya. Kaya naisip ni Pedro u kinagi nu Panginoon a, “Bagu a magtarákket u tandang ti aldiwan iye ay pumentálluwák mo a ipamen.” ⁶² Kanya limmuwas ti Pedro sakay nágsasangitán. ⁶³ Nadid, sinásseste sakay binábbálbág nu magbantay hide ti Jesus. ⁶⁴ Pinángngássan di siya sakay tinanung, “Nay, tukuyan pay ni ti deya u nangsuntuk niko?” ⁶⁵ Sakay makpal pa hide a kinákkagi a madukás nikuna. ⁶⁶ Tukadimadimangan na ay namággipun u ama-amaan hide nu banuwan, u puno nu saserdote hide sakay u maisto hide nu Kautusan. Inyatubang di nide ti Jesus sakay tinanung de, ⁶⁷ Kinagi de, “Kagiyán mo nikame ni hiko beman u Mesias.” Timmábbeg ti Jesus, “Maski kagiyán ko nikam ay awan kam labe maniwala. ⁶⁸ Sakay ni tanungán takam be ay awan kam labe tumábbeg. ⁶⁹ Pero sapul nadid ay mággetnod dán u Anak nu Tolay tu kawanan nu makapangyariyan a Diyos.” ⁷⁰ Sakay kinagi de a atanan, “Gusto muway a kagiyán ay hiko u Anak nu Diyos?”Timmábbeg siya, “Hikamon nagkagiyay a hikán ngane.” ⁷¹ Sakay kinagi de, “Ánya pa beman a patunay i kailangan tamay? Nasaneg tamon a mismo tu sadile na a labi.”

¹ Nadid, káttapos hod ay timmaknág hide a atanan sakay inyangay de ti Jesus tu kán Pilato. ² Sakay sinapulan de a sihiyán siya, kinagi de, “Napatunayan me a sássulsulan ni tolayan iye u kalugaran me hide a magribeldi. U tolay hide ay binábbawalan na a magbayad ti buwes para ni Cesar a hare ti Roma. Sakay páppaniwalaán na pa u tolay hide a siya u Cristo, a essa a hare.” ³ Tinanung siya ni Pilato, “Hiko beman u hare nu Judio hide?” “Hiko dán nagkagi ye.” tábbeg ni Jesus. ⁴ Sakay kinagi ni Pilato tu puno nu saserdote hide sakay tu tolay hide, “Awanák ti ketan a kasalanan ni tolayan iye.” ⁵ Pero impilit de a kinagi, “Tinolduwan na u atanan a taga-Judea a kontraán u gubiyerno tam. Nagsapul siya ti Galilea hanggan dán heeh.” ⁶ Nikuna masaneg iye ni Pilato, ay tinanung na ni taga-Galilea beman ti Jesus. ⁷ Nikuna matukuyan na a taga-Galilea siya ay impeangay na ni Herodes dipo sakup na u Galilea. Nagkataun be a katoy ti Herodes ti Jerusalem. ⁸ Masaya a tahod ti Herodes nikuna ketan na ti Jesus, dipo nalay na dán siya a gusto a ketan. Dipo tu nabaheta na hide tungkul nikuna, sakay umasa siya a maggimet ti Jesus ti milagro para ketan na. ⁹ Makpal siya a intáttanung ni Jesus, pero awan timmatábbeg. ¹⁰ U puno nu saserdote hide sakay u maisto hide nu Kautusan ay mágtaknág be hod a awan ti imang a makán sihiyán ni Jesus. ¹¹ Dipo ti iye ay sineste sakay ininsulto siya ni Herodes sakay u sundalo na hide. Binaduwan de siya ti pang hare a damit bilang pangseste di nikuna, kattapos ay pinasole di siya ni Pilato. ¹² Sakay ti aldiwan itod ay nagin barkada dan ni Herodes ti Pilato a date a magkadima. ¹³ Inpadulaw ni Pilato u puno nu saserdote hide, u ama-amaan hide nu banuwan sakay u tolay hide. ¹⁴ Sakay kinagi na nide, “Inyangay moy he nikán i tolayan iye dipo makánsulsulán tu tolay hide. Nadid tinanung ko siya tu atubang moy sakay napatunayan ko a awan tatahoden u isássihe moy hide nikuna. ¹⁵ Konna bi hod ti Herodes, awan siya ti netan a kasalanan ni Jesus kaya inpesole na siya nikán. Awan siya dapat a hatulan ti kamatayan dipo awan siya ti kasalanan. ¹⁶ Kaya ipalatigu ko dálla siya sakay palayaán.” ¹⁷ Kada Kasayaan nu Aldew nu Págtaleb ay kailangan a magpalaya ti Pilato ti essa a pireso a piliyán nu tolay hide. ¹⁸ Pero sabay-sabay a impákhaw nu tolay hide, “Bunuwan i tolayan ina! Sakay palayaán mo ti Barabas!” ¹⁹ (Nepireso ti Barabas dipo namuno siya sakay siya u nanggiya tu tolay hide ti Jerusalem a kumontara tu gubiyerno.) ²⁰ Tu pagkagusto ni Pilato a mapalaya ti Jesus ay kinagi na a huway tu katolayan, ²¹ pero pimmákhaw u katolayan, “Ipako siya tu kudus! Ipako siya tu kudus!” kagi de. ²² Pumentállo a kagiyán nide ni Pilato a, “Ánya beman i ginimet naay a madukás? Awanák ti ketan a dahilan para ipabuno ko siya. Ipalatigu ko dálla siya sakay palayaán.” ²³ Pero lalu de a inpilit sakay impákhaw a dapat a mepako siya tu kudus. Tu katapusan ay awan nakasuway ti Pilato nide, ²⁴ kanya pinagustuwan ni Pilato u kagustuwan nu tolay hide. ²⁵ Dipo tu kagustuwan de ay pinalaya na u tolay a nagribelde tu gubiyerno sakay namuno. Káttapos ay inyatád na nide ti Jesus tán gimitán de u gusto de a gimitán nikuna. ²⁶ Nikuna iyangay di dán ipako ti Jesus ay natagbuwan de ti Simon a taga-Cirene a kággábwat na tu uma. Binehbeh di siya sakay pilit a impabáklay u kudus nikuna sakay pinaunonod de ti Jesus. ²⁷ Makpal a tolay u umononod ni Jesus, kaguman be u sangan a bábbey a makánsangitán dipo tu habag di nikuna. ²⁸ Pero sinuleg hide ni Jesus sakay kinagi na nide, “Hikam a kabábbiyan ti Jerusalem, dyanák moy sangitan nan u sangitan moy ay u sadile moy sakay u anak moy hide. ²⁹ Dipo dumemát u aldew a kagiyán nu tolay hide, ‘Mapalad u baug hide sakay u awan hide ti pasusuwán a anak.’ ³⁰ Ti aldiwan itod ay kagiyán nu tolay hide tu buked hide a, ‘Maduhay kamon a buked hide tánni matapuhan kame!’ ³¹ Dipo ni konna he u gimitán tu kayo a maata, ánya wád be u gimitán de tu namadiyan dán?” ³² Te duwwa pa a mágbabono a inluwas nu sundalo hide para bunuwán a kaguman ni Jesus. ³³ Sakay káddemát de tu lugar a kákkagiyán de a Bungo ay impako de ti Jesus tu kudus sakay tu duwwa a tulisan, essa tu kawanan ni Jesus sakay essa be tu kawihe. ³⁴ Kinagi ni Jesus, “Ama, patawadán mo hide dipo awan de tukoy u gággagamitán de.” Sakay namágbunutan u sundalo hide tánni matukuyan de ni hadya tu damit ni Jesus u meangay tu bawat essa nide. ³⁵ Mágtáknág hod u tolay hide a mággeleng, mentaras a sássestiyan siya nu puno hide nu banuwan. Kinagi de, “Inligtas na u agum, nadid ni talaga a siya u Cristo a pinile nu Diyos ay iligtas na be i sadile nae!” ³⁶ Ininsulto be siya nu sundalo hide, immadene hide sakay inatádden de ti maapsot a alak, ³⁷ sakay kinagi de, “Ni hiko ngane u Hare nu Judio hide, iligtas mo i sadile muwe!” ³⁸ Tu ontok nu kudus ni Jesus ay te sumássulat: (ti upos a Griego, Latin sakay Hebreo,) “Iye u Hare nu Judio hide.” ³⁹ Ininsulto be siya nu essa a tulisan a kasadát na, kinagi na, “Awan beman hiko u Cristo? Iligtas mo i sadile muwe sakay pate hikame!” ⁴⁰ Pero nagkagiyan siya nu kaguman na, “Awan ka dán beman ti ánteng tu Diyos? Pareho kitam a tallo a pinarusaan, ⁴¹ pero hikita la a duwwa la u dapat maparusaan ti kamatayan dipo tu ginimet ta hide a kasalanan. Pero i tolayan iye ay awan ti ginimet a madukás.” ⁴² Sakay kinagi na pa, “Jesus, alalahanánnák mo ni maghare ka dán.” ⁴³ Timmábbeg ti Jesus, “Kagiyán ko niko, nadid be ay ikuyog taka ti Paraiso.” ⁴⁴ Nikuna magalas dose dán ti tanghale ay nagdiklam i buuwáy a mundu hanggan ti alas tres ti apon. ⁴⁵ Nawanan ti demlag u aldew, sakay bigla a nahate ti bállog u partisyon a kortina nu templo. ⁴⁶ Pimmákhaw ti mabegsák ti Jesus, “Ama, ipabahala ku dán niko i ispirito kuwáy!” Sakay tu pákkakagi na hod ay nahángsatán dán siya. ⁴⁷ Nikuna ketan nu kapitan nu sundalo hide u nangyare ay nagpure siya tu Diyos. “Talaga a malinis i tolayan iye!” kagi na. ⁴⁸ I nangyariyan itod ay netan nu atanan a tolay a mamággipun sakay mággeleng hod. Nagsole hide a tunay ti lungkut. ⁴⁹ Te taknag tu adeyo u barkada hide ni Jesus pate u kabábbiyan a immunonod nikuna sapul pa ti Galilea. Netan di be iye hide a pangyayare. ⁵⁰ - ⁵¹ Nadid, te essa a lállake a Jose u ngahan na. Taga-Arimatea siya a sakup nu banuwan nu Judea. Mabait sakay malinis iye a tolay sakay kaguman tu maguhay hide tu paghare nu Diyos. Maski ni kagawad siya nu Sanedrin ay awan siya sang-ayun tu ginimet de ni Jesus. ⁵² Immangay siya tu kán Pilato sakay inaged na u bangkay ni Jesus. ⁵³ Nikuna meogsad dán u bangkay ay binalutan na ti damit a lino sakay indátton na tu páglábbánggan a kumán a kuweba awan palla itod napaglalábbángngan. ⁵⁴ Aldew itod nu Pághanda, sakay magsapul dán u Aldew nu Káimang. ⁵⁵ Immunonod ni Jose u bábbey hide a nákkuyog ni Jesus sapul pa ti Galilea, kanya netan de u naglábbángngan, pate u kákkedátton hod nu bangkay ni Jesus. ⁵⁶ Káttapos ay nagsole hide sakay naghanda ti pabango sakay mira. Nikuna dumemát dán u aldew nu Kaimáng ay immimang hide a konna tu intakda nu Kautusan.

¹ Nadid, magamulaldew palla nu simba ay immangay dán u bábbey hide tu páglabbángngan, tawed de u pabango hide a inhanda de. ² Káddemát de ay nedemáttan de a negulung dan u bito a tumáttákláb tu pintuwan nu páglábbángngan. ³ Pero kássáddáp de ay awan de netan u bangkay ni Jesus. ⁴ Magulu-guluwan palla hide tu nangyare ay bigla dálla a pimmeta u duwwa a lállake a makasile ti damit. ⁵ Dipo tu ánteng de ay limmuhud hide a sayad u hupa de tu luta. Tinanung hide nu lállake a duwwa, “Bakin ehyukán moy u biyag tu lugar nu patay hide? ⁶ Nabiyag dán a huway ti Jesus, awan dán he siya! Isipan moy u kinagi na dán nikam nikuna he palla siya ti Galilea. ⁷ Awan beman kinagi na a, ‘U Anak nu Tolay ay kailangan a metokyon tu makasalanan hide sakay mepako tu kudus, sakay tu katállo a aldew ay mabiyag siya a huway.”’ ⁸ Kanya naalaala de u kinákkagi ni Jesus tu itod, ⁹ kanya nagsole hide sakay inbaheta de itod a atanan tu sapulo ay ti essa a apostol sakay tu agum de hide. ¹⁰ U bábbey hide ay di Maria Magdalena, Juana, sakay ti Maria a ina ni Santiago; iye hide sakay tu agum pa a bábbey a kaguman de u nagbaheta tu Apostol hide. ¹¹ Pero awan naniwala u Apostol hide dipo tu akala de ay gimi-gimet la nu bábbey hide. ¹² Pero timmaknág ti Pedro sakay gummággenan a immangay tu páglábbángngan. Simmáddáp siya, sakay nikuna ilingán na ay awan siya ti iba a netan nan u damit a lino a nangbalut de ni Jesus. Kaya nagsole siya a grabi u taka na. ¹³ Ti aldew biyan itod ay paangay tu baryo a Emaus u duwwa a disepulus ni Jesus. U kadeyo nu Emaus ti Jerusalem ay sapulo ay ti essa a kilometro. ¹⁴ Págguhunan de a duwwa u nangyare hide. ¹⁵ Mentaras a mágguhon hide sakay magtanungan ay immadene nide ti Jesus sakay náksabay. ¹⁶ Netan de siya pero awan de natengge a kumán a natakáppan u mata de. ¹⁷ Tinanung hide ni Jesus, “Ánya ben i págguhunan moye?” Kaya ummimang hide ti sa badit tu páglakad de a malungkut a tahod. ¹⁸ Timmabbeg u essa nide a u ngahan na ay ti Cleopas. Kinagi na, “Hiko wád la i dayuway ti Jerusalem a awan nakabaheta tu nangyare hide ti nakadaman na tode a aldew.” ¹⁹ Tinanung na hide,“Ánya beman itod hide a pangyayare?” Timmábbeg hide, “Tungkul tu nangyare ni Jesus a taga-Nazaret, essa a prupeta a makapangyariyan tu gimet sakay tu pagtoldu na, magin tu atubang nu Diyos sakay tu tolay hide. ²⁰ Dinakáp siya nu puno me hide a saserdote sakay nu puno hide tu banuwan para mahatulan ti kamatayan, sakay nepako tu kudus. ²¹ Áasaan mi pa be a siya u mángligtas tu lahe hide ni Israel. Sakay bakán la a ina, katállo na dán nadid a aldew sapul a mangyare itod. ²² Nahákned kame tu imbaheta nu agum a bábbey a kakagumanan me. Magamulaldew kan palla ay immangay dán hide tu páglábbángngan, ²³ pero awan de kanon netan u bangkay na hod. Nagsole hide sakay kinagi de a te netan kan hide a duwwa a anghel a nagkagi nide a biyag ti Jesus. ²⁴ Immangay be u agum me hide tu páglábbángngan sakay konna bi hod u netan de. Pero awan de netan ti Jesus.” ²⁵ Kinagi nide ni Jesus, “Awan kam beman makaintendi? Bakin awan moy paniwalaan u atanan a kinagi nu prupeta hide? ²⁶ Awan beman kailangan madanas nu Cristo u atanan a paghihirap a iye bagu na a matanggap u marangal na a páppágyanan ti langet?” ²⁷ Sakay impaliwanag nide ni Jesus u atanan a nesulat tu Kasulatan tungkul tu sadile na, sapul tu insulat ni Moises hanggan tu insulat nu prupeta hide. ²⁸ Nikuna adene dán hide ti Emaus a tamuwan de ay nagkunware a magtulos-tulos siya a tamo tu adeyo a lugar, ²⁹ pero pinugád de siya, “Máktulos ka palla nikame, dipo sumahám dán i aldiwe sakay mágdadidiklám dán.” Kaya nákkuyog ngane siya nide. ³⁰ Nikuna kaatubang di dán siya a kuman ay nangalap siya tu tinapay sakay nagpasalamat tu Diyos. Káttapos ay hinate-hate na sakay inyatád na nide. ³¹ Ti itod la a nabukasan u mata de sakay natengge de ti Jesus, pero bigla siya a nawan. ³² Nakagi de, “Kaya bál a konna dálla hod u sahat tam mentaras a mákpágguhon sakay makánpaliwanagán nikita tu Kasulatán.” ³³ Ti itod be ay nagsole hide ti Jerusalem. Dinemáttan de hod a mamág-ipun-ipun u sapulo ay ti essa sakay tu agum de hide. ³⁴ Kinagi de tu duwwa, “Tatahoden bál a nabiyag a huway u Panginoon! Pimmeta siya ni Simon!” ³⁵ Sakay inyistorya be nu duwwa u nangyare nide tu dilan, sakay ni kodya di siya a natengge nikuna a paghate-hatiyan na u tinapay. ³⁶ Mentaras a mamágguhon hide tungkul tu nangyare ay timmáknag ti Jesus tu bállog de, sakay kinagi na, “Magkahod kam nakwa ti kapayapaan!” ³⁷ Pero nahákned hide sakay nanteng dipo u akala de tu katoy tu atubang de ay multo. ³⁸ Kanya kinagi nide ni Jesus,“Bakin magalanganin kam? Sakay bakin manteng kam? ³⁹ Ilingán moy i kamát sakay i tikád kuwáy, hikán iye. Kahapánnák moy sakay malasán. U multo ay awan ti pilas sakay awan ti tulang, pero hikán ay tehhod a konna tu keitan moy.” ⁴⁰ Pákkakagi na hod ay impeta na u kamát na sakay u tikád na. ⁴¹ Nikuna awan padi hide makapaniwala dipo tu saya sakay tu hákned de ay tinanung hide ni Jesus, “Te makan kam beman hina?” ⁴² Inatádden di siya ti sagálgál a ikan a neapoy. ⁴³ Inalap na itod sakay kinan na tu atubang de. ⁴⁴ Káttapos ay kinagi na nide, “Iye u gusto ko a tumbukán nikuna kagiyán ko nikam tu itod pa nikuna a kakagumanák moy padla; a kailangan a matupad u atanan a nesulat tungkul nikán tu Kautusan ni Moises, sakay tu insulat nu prupeta hide, sakay tu libro nu Awit hide.” ⁴⁵ Binukasan na u iisip de para maintendiyan de u Kasulatan hide. ⁴⁶ Sakay kinagi na nide, “Konna he u nesulat,’Kailangan a maghirap sakay matay u Cristo sakay mabiyag a huway tu katállo a aldew.’ ⁴⁷ Tu pamamag-itan nu ngahan na, u págsise sakay kapatawadan nu kasalanan ay dapat a ipangaral tu atanan a bansa, sapul ti Jerusalem. ⁴⁸ Hikam u mangpatunay ti iye hide a bagay. ⁴⁹ Tandaan moy, paangayán kuhe u inpananto nu Ama ko, kaya dyan kam lumakad ti Jerusalem mentaras a awan kam pagkaluuben nu kapangyariyan a gábwat ti langet.” ⁵⁰ Káttapos ay inkuyog hide ni Jesus ti Betania. Káddemát di hod ay inyontok na u kamát na sakay pinagpala na hide. ⁵¹ Mentaras a pagpalaán na hide ay mággaoontok siya a patamo ti langet. ⁵² Sinamba de siya; káttapos ay nagsole dán hide ti Jerusalem, a grabi u kasayaan de. ⁵³ Palagi hide tu templo sakay he hod hide a magpapuriyán tu Diyos.