Juan

Juan

¹ Bago u sapul átna dán u Upos. Kaguman nu Upos u Diyos sakay u Upos ay mismo a Diyos. ² Kaguman dán siya nu Diyos sapul pa tu sapul. ³ Tu pamamag-itan na ay nalalang u atanan a bagay, sakay awan ti ányaman a nalalang ni awan tu pamamag-itan na. ⁴ Hod nikuna u biyag, sakay u biyag a iye u mangatád ti demlag tu isip nu tolay. ⁵ U demlag ay siya u mangdemlag tu kadiklamman, sakay awan siya matatalo nu kadiklamman. ⁶ Nadid, pinaangay nu Diyos u essa a tolay a u ngahan na ay ti Juan. ⁷ Pinaangay na ti Juan tu tolay hide, para ikagi na nide u ngángngahanan tam a demlag, para maniwala hide nikuna a atanan. ⁸ Bakán a ti Juan u demlag nan immangay la he siya para mángpatunay tungkol tu demlag. ⁹ U tunay a demlag ay ti Jesu-Cristo. Immangay he siya ti munduway para demlagan u isip nu tolay hide. ¹⁰ Ti Jesus unanggimet ti munduway, pero nikuna immmangay he siya ti munduway, ay awan siya natenggi nu tolay hide. ¹¹ Immangay siya tu sadile na a banuwan, pero awan siya tinanggap nu kalugaran na hide. ¹² Pero u atanan a timmanggap sakay naniwala nikuna ay inatádden na hide ti karapatan a magin anak nu Diyos. ¹³ Nagin anak ngane hide nu Diyos, bakán a tu pamamagitan nu pangpilas a kákkeenak oni tu kagustuwan nu tolay, nan dipo tu kaluuben nu Diyos. ¹⁴ Nagin tolay u Upos sakay nákpágyan siya nikitam. Netan me u kapangyarihan na sakay kadakilaan na, bilang kaessa-essa a anak nu Ama. Hod nikuna u págmahal sakay u katapatan, sakay atanan nu kinákkagi na ay tatahoden. ¹⁵ Nagpatunay ti Juan tungkul nikuna, sakay iye u kinagi na: “Siya u gusto ko a kagiyán, nikuna a kinagi ko, ‘Tehhod a essa a dumemát a sumunud nikán a mas higit nan nikán, dipo baguwák a neenak ay katoy dán siya.”’ ¹⁶ Nadid, dipo mahal na kitam a tahod, kanya nakatanggap kitam a atanan ti sunud-sunud a págpapala. ¹⁷ Pero inyatád nikitam nu Diyos u Kautusan tu pamamag-itan ni Moises, pero u kagbi sakay u tatahoden ay neatád nikitam tu pamamag-itan ni Jesu-Cristo. ¹⁸ Maski nikan ay awan palla ti naketa tu Diyos Ama, pero impakilala siya nikitam nu Diyos Anak, u kaessa-essa a Anak a minahal nu Ama. ¹⁹ Nadid ti Juan ay nagbawtismo tu tolay hide ti Bitania. Nagutus u puno nu Judio hide ti Jerusalen tu agum hide a Saserdote sakay Levita, kinagi de a,“Tanungán moy ni siya dán i tagapagligtasay.” ²⁰ Awan na inpamen ni ti deya siya. Kinagi na, “Bakán a hikán u Cristo.” ²¹ “Ni konna hod ti deya ka?”Kagi de. ‘Hiko beman ti Elias?” “Bakán a hikán ti Elias,”kagi na. “Hiko beman u Propeta a áuhayán me?” Timmábbeg siya, “Bakán.” ²² Kinagi de, “Ni konna hod, ti deya ka? Kagiyán mo nikame para makagi me tu nagpaangay he hide nikame. Ánya u makagi mo tungkul tu sadile mo?” ²³ Timmábbeg ti Juan, “Hikán u tolay a kinagi ni Propeta Isaias tu itod. Nikuna a kinagi na,‘Masaneg u pákhaw nu essa a tolay tu parang,’ Kagiyán na, ‘Ayusán moy u lakadán nu Panginoon.”’ ²⁴ U nángpaangay tu tolay hide a immangay tu kán Juan ay u Pariseo hide. ²⁵ Tinanung de a huway ti Juan, “Bakin a magbawtismo ka ni bakán bál a hiko u Cristo oni ti Elias oni u Propeta?” ²⁶ Timmábbeg ti Juan, “Hikán ay magbawtismo la ti dinom, pero te essa a hod ti bállog moye a awan moy matengge. ²⁷ Siya u kinagi ko a, ‘Dumemát a sumunud nikán, pero awanák karapat dapat maski mangibut tu igut nu sapatus na.”’ ²⁸ Atananan iye ay nangyare ti Betania, tu dibilew nu dinom ni Jordan a nagbawtismuwan ni Juan. ²⁹ Nadid, tu essa a aldew ay netan ni Juan ti Jesus a paadene nikuna, kanya kinagi na tu tolay hide, “Atoy dán u Tupa nu Diyos a iyalay para mangibut tu kasalanan nu tolay ti munduway! ³⁰ Siya u gusto ko a kagiyán nikuna a kinagi ko a, ‘Tehhod a essa a dumemát a sumunud nikán a mas higit nikán, dipo atoy dán siya baguwák a neenak. ³¹ Tu dipalongo ay awan ku be siya talaga kilala ni ti deya siya. Pero nadid ay hodák he a magbawtismo tu dinom para ipakilala siya ti Israel.” ³² Káttapos ay kinagi ni Juan, “Netan ko u Banal a Ispirito a ummogsad a gábwat ti langet a konna tu essa a kalapate sakay nágyan nikuna. ³³ Tu itod ay awan ku be siya talaga kilala ni ti deya siya, pero u Diyos a nagutus nikán a magbawtismo ti dinom u nagkagi nikán, ‘Ni ketan mo a umogsad u Banal a Ispirito sakay mágyan tu essa a tolay, i tolayan ina ay magbawtismo ti Banal a Ispirito. ³⁴ Netan kudán ngane siya a mismo, sakay páppatunayan ko a siya u anak nu Diyos.” ³⁵ Nadid, tu sumunud a aldew ay hod a huway di Juan kaguman u duwwa tu tagasunud na hide. ³⁶ Nikuna a ketan na ti Jesus a magtaleb ay kinagi na, “Atoy dán u Tupa nu Diyos!” ³⁷ Tu pákkasaneg nu duwwa a disepulus tu kinagi ni Juan ay tinagubet de ti Jesus. ³⁸ Simmuleg ti Jesus sakay nikuna a ketan na hide a umunonod ay tinanung na hide, “Ánya i kailangan moyay?” Timmábbeg hide, “Maisto hádya páppágyanan muway?” ³⁹ Kinagi nide ni Jesus, “Mákkuyog kam tán ketan moy.” Kanya nákkuyog u duwwa kaya netan de u páppágyanan na. Magalas kuwatro dán ti itod a apon, kanya hod dán hod hide a nagpalipas ti gibi. ⁴⁰ U essa tu duwwa a nakasaneg tu kinagi ni Juan sakay simmunud ni Jesus ay ti Andres a kapatkákka ni Simon Pedro. ⁴¹ Kanya tu kadimadimangan ay inehyok a agad ni Andres u kapatkákka na a ti Simon sakay kinagi na nikuna, “Netan me u Mesias.”(U gusto a kagiyán ni iye a upos ay Cristo.) ⁴² Ingkuyog na ti Simon tu kán Jesus. Sakay nikuna a makademát hide tu kán Jesus ay inileng ni Jesus ti Simon sakay kinagi na, “Hiko ti Simon a anak ni Juan, pero sapul nadid ay dulawán ka dán a Cefas.”(U Cefas ay kapareho labe nu ngahan a Pedro, a ugusto na akagiyan ay bito.) ⁴³ Nadid, tu sumunud a aldew ay naisip ni Jesus a umangay ti Galilea. Káddemát na hod ay netan na ti Felipe kanya kinagi na nikuna, “Mákkuyog ka nikán.” ⁴⁴ (Ti Felipe ay taga-Betsaida, a konna di Andres sakay ti Pedro.) ⁴⁵ Nadid ay inehyok ni Felipe ti Nataniel sakay kinagi na nikuna, “Netan mi dán u tolay a kinagi ni Moises a insulat na tu Kautusan, sakay konna be tu insulat nu prupeta hide. Siya ay ti Jesus a taga-Nazaret a anak ni Jose.” ⁴⁶ Kinagi nikuna ni Nataniel, “Tehhod beman a maganda a maggábwat ti Nazaret?” Timmábbeg ti Felipe, “Kadon he ta ilingán mo.” ⁴⁷ Pákketa ni Jesus ni Nataniel a paadene nikuna ay kinagi na, “Saáy u tunay a Israelita, a matapat.” ⁴⁸ Tinanung siya ni Nataniel, “Kodyaák mo a natukuyan?” Timmábbeg ti Jesus, “Bagu ka a inangay ni Felipe ay netan taka dán a te sidum tu ponan nu kayo a igus.” ⁴⁹ Timmábbeg ti Nataniel, “Maisto, hiko u Anak nu Diyos! Hiko be u hare ti Israel!” ⁵⁰ Kinagi nikuna ni Jesus, “Maniwala ka beman nikán dipo tu kinagi ko a netan taka tu ponan nu kayo a igus? Higit pa he u mapatunayan mo.” ⁵¹ Sakay kinagi pa ni Jesus nikuna, “Pakatandaan moy: ketan moy u langet a bumukas sakay tulos-tulos u anghel hide a umogsad sakay sumangkay tu páppágyanan nu anak nu tolay.”

¹ Nadid, kállipas nu tállo a aldew ay tehhod a kasalan tu banuwan nu Cana a sakup ni Galilea. Sakay u ina ni Jesus ay hod bi hod. ² Imbitadu be di Jesus sakay u disepulus na hide. ³ Netaun be a naubusan u alak a handa de. Kanya kinagi nu ina ni Jesus nikuna, “Naubusan hide ti alak.” ⁴ Sakay kinagi ni Jesus nikuna,“Ináng-Ináng dyanák mo dipalonguwan, awan palla odas para ipeta ko u kapangyariyan ko.” ⁵ Kinagi nu ina ni Jesus tu utusan hide, “Gimitán moy u ánya man a utus na nikam.” ⁶ Tehhod a ánnám a tapayan a gággamitán nu Judio hide a pággugisan a ayun tu kaugaliyan de. U essa a tapayan ay maglasán ti duwa pulo hanggan ti tállo a pulo a galon a dinom. ⁷ Kinagi ni Jesus tu utusan hide, “Putatán moy ti dinom i tapayane hide.” Sakay pinutat de ngane iye hide. ⁸ Káttapos ay kinagi ni Jesus nide, “Mangsalduk kam sakay iyangay moy he tu mamahala ti handaanáy.”Nangsalduk ngane hide sakay inyangay de tu mamahala. ⁹ Nikuna ennaman nu mamahala u dinom a nagin alak ay awan na tukoy ni hádya a naggábwat itod, pero tukoy iye nu utusan hide a simmalduk tu dinom. Kanya impadulaw na u lállake a ingkasal, ¹⁰ kinagi na,“Karanyuwan, u masarap a alak u idipalongo de a ipainom tu naimbitaan hide. Ni nakainom dán hide ay hod di la a iluwas u mababa a kalase ni alak. Pero iba ka, dipo nadid mu la a inluwas u pinakamasarap a alak.” ¹¹ I nangyariyan iye ti Cana tu prubinsiya ni Galilea u kadipalonguwan a makataka-taka a ginimet ni Jesus. Sakay ti iye a ginimet na ay impeta na u kapangyariyan na, sakay naniwala nikuna u disepulus na hide. ¹² Káttapos nu kasal ay immangay ti Jesus ti Capernaum, kaguman u ina na, u kákkapatkákka na hide, sakay tu disepulus na hide. Nágyan hod hide ti sangan a aldew. ¹³ Nadid, káddemát nu Kasayaan nu Káttaleb nu Judio hide ay immangay di Jesus ti Jerusalem. ¹⁴ Tu káddemát na ti Jerusalem ay immangay siya tu templo sakay netan na hod u máglako hide ti baka, tupa hide sakay kalapate. Netan na be u mágpalit hide ti pilak. ¹⁵ Naggimet siya ti pangyabat na a lubid, sakay pinaluwas na tu Templo u maglako hide. Imbatikal na u pilak hide nu mágpalit hide ti pilak sakay impasakáb na u lamisaan de hide. ¹⁶ Kinagi be ni Jesus tu máglako hide ti kalapate, “Ibutan moy he i ina hide! Diyan moy gimitán a palengke u bilayáy nama ko!” ¹⁷ Naala-ala nu disepulus na hide u nesulat tu Kautusan: “U pángmalasakit ko tu bilay mo ay kumán a apoy a maggehab ti puso kuwáy.” ¹⁸ Nadid, dipo tu ginimet naan itod ay tinanung siya nu puno nu Judio hide, “Ánya a ka himala u ipeta mo nikame para mapatunayan a te karapatan ka a gimitán iye?” ¹⁹ Tinábbeg hide ni Jesus, “Hábbaán moy i templowáy a iye, sakay tu alay nu tállo a aldew ay pataknággán ko a huway.” ²⁰ Kinagi di be, “Ginimet i templowáy a iye tu luub nu áppat a pulo ay ti ánnám a taon, sakay pataknággán mo la tu luub nu tállo a aldew?” ²¹ Pero awan naintendiyan nu Judio hide a u templo a gusto a kagiyán ni Jesus ay u bággi na. ²² Kanya nikuna a mabiyag siya a huway, naala-ala nu disepulus na hide i kinagi na an iye, sakay naniwala hide tu kinagi nu Kasulatan sakay tu kinagi hide ni Jesus. ²³ Nadid, tu Aldew nu Kasayaan nu Pagtaleb ti Jerusalem, makpal a simmampalataya ni Jesus nikuna ketan de u makataka-taka a ginimet na. ²⁴ Pero awan nagtiwala ti Jesus nide, dipo tukoy na u atanan a áisipán de. ²⁵ Sakay awan dán siya kailangan a kagiyan tungkul tu tolay hide, dipo tukoy na ni ánya u katoy tu puso de.

¹ Nadid, tehhod a lállake a u ngahan na ay ti Necodemo. Essa siya tu puno nu Judio hide sakay kaguman siya tu gurupo nu Pariseo hide. ² Essa a gibi ay immangay siya tu kán Jesus sakay kinagi na, “Maisto, tukoy me a hiko ay essa a tagapagtoldu a gábwat tu Diyos, ta awan ti makagimet tu makataka-taka hide a ginimet mo, liban la ni hod nikuna u Diyos.” ³ Timmábbeg ti Jesus, “Kagiyan ko niko u tatahoden: Awan ti maketa tu paghare nu Diyos maski ti deya man maliban a meenak a huway.” ⁴ Kinagi nikuna ni Nicodemo, “Kodya a meenak u essa a tolay ni matanda dán siya? Awan dambe siya makasole tu tiyan nu ina na para iyenak siya a huway.” ⁵ Kinagi ni Jesus, “Kagiyan ko niko u tatahoden: Awan ti maski ni deya man u makasáddáp tu kaharian nu Diyos ni awan siya meenak tu pamamag-itan nu dinom sakay tu Banal a Ispirito. ⁶ U meenak a ayun tu pagkatolay ay konna labe tu essa a tolay, sakay u meenak a ayun tu Banal a Ispirito nu Diyos ay magkahod ti biyag a gábwat ti langet. ⁷ Kanya dyan ka magtaka tu kinagi ko niko dipo atanan ay kailangan a meenak a huway. ⁸ Mara ni te pahás ay masaneg mo u ugung na pero awan mo tukoy nággábwatan naay sakay tamuwán naay. Konna labi hod u tolay a neenak tu Ispirito nu Diyos.” ⁹ Kinagi ni Nicodemo nikuna, “Kodya a mangyare iye?” ¹⁰ Timmábbeg ti Jesus, “Essa ka a tanyag a tagapagtoldu ti Israel, pero awan mo maintendiyan iye? ¹¹ Kagiyan ko niko u tatahoden: Ikákkagi me u natukuyan me a mapatunayan me, pero awan moy iye tinanggap. ¹² Ni awan kam maniwala tu ikagi ko tungkul tu bagay he hide ti munduwáy, kodya kam pawád a maniwala tu kinákkagi ko tungkul tu bagay hide ti langet? ¹³ Awan ti maski ni ti deya man u nakaangay ti langet liban nikán a Anak nu tolay a gábwat ti langet.” ¹⁴ Sakay ni kodya a inlangkaw ni Moises tu itod u ulag tu kaparangan, konna bi hod, nikán a Anak nu tolay ay dapat be a ilangkaw, ¹⁵ para ni ti deya man u sumampalataya nikán ay magkahod ti biyag a awan ti kahád. ¹⁶ Dipo mahal a tahod nu Diyos u tolay hide ti munduway, kanya inyatád na u kaessa-essa na a Anak, para ni ti deya man u sumampalataya nikuna ay awan matay nan magkahod ti biyag a awan ti kahád. ¹⁷ Dipo awan pinaangay nu Diyos u anak na ti munduway para hatulan ti parusa u tolay hide, nan para iligtas tu pamamag-itan na. ¹⁸ U maniwala nikuna ay awan mahatulan a maparusaan, pero u awan maniwala nikuna ay nahatulan dán, dipo siya ay awan maniwala tu kaessa-essa a Anak nu Diyos. ¹⁹ Nahatulan hide dipo ummangay dán ti munduway u Anak nu Diyos bilang demlag tu mundu, pero mas ginusto pa nu tolay hide a manatile tu kadiklámman nan tu demlag, dipo madukás u gággimitán de hide. ²⁰ U tolay a maggimet ti madukás ay umád tu demlag. Adeyuwan de u demlag tánni awan ketan u madukas de a gimet. ²¹ Pero u mabiyag tu tama ay umadene tu demlag, tán matukuyan nu atanan a u gimet na a mágkaganda ay nagimet na tu págsunud tu Diyos.” ²² Nadid, káttapos ay immangay ti Jesus sakay u disepulus na hide tu lugar a Judea. Nákpágyan hod hide ti sabadit a panahun, sakay binawtismuwan u tolay hide. ²³ Ti Juan ay nagbawtismo tu lugar a Enon, a adene ti Salim, dipo makpal hod a dinom. Sakay immangay nikuna u makpal a tolay para magpabawtismo. ²⁴ (Awan palla ti itod nakapireso ti Juan.) ²⁵ Nadid ay nagkatábbegan u disepulus hide ni Juan ay tu essa a Judio tungkul tu páglinis ayun tu relihiyon de. ²⁶ Kanya immangay hide tu kán Juan sakay kinagi de, “Maisto, maala-ala mo beman u lállake a kaguman mo tu dibilew nu Dinom a Jordan, u impakilala mu ben tu tolay hide? Magbawtismo dám be siya, sakay umangay nikuna u lahus a atanan a tolay.” ²⁷ Timmábbeg ti Juan, “Awan ti magimet u tolay ni awan ipakultad nu Diyos. ²⁸ Hikam dám be u makapatunay tu kinagi ko nikam a bakán a hikán u Cristo. Pinaangayák la he a mágdipalongo nikuna para ikagi ko u káddemát na. ²⁹ Konna tu essa a bábbey a ikasal, u bábbey a ikasal ay para tu lállake a ikasal, u kaibigan nu ikasal ay masaya a maguhay tu káddemát nu lállake a ikasal. Konnaák bi hod, tunay i kasayaan kuwáy nadid ta angay dán u tolay hide tu kán Jesus. ³⁰ Kailangan a lalo pa siya a metanyag, sakay hikán ay mebaba pa.” ³¹ Nadid ay kinagi pa ni Juan, “U gábwat ti langet ay kataasan ti atanan sakay u gábwat ti munduway ay magupos tungkul tu bagay hide ti munduway. Ti Jesus a gábwat ti langet ay siya u kataasan ti atanan. ³² Kakkagiyan na u netan na sakay u nasaneg na ti langet, pero sasangan la u maniwala tu kinákkagi na. ³³ Pero u maniwala hide tu kinagi ni Jesus ay hide u mángpatunay a tatahoden u kinagi nu Diyos. ³⁴ Dipo pinaangay he nu Diyos ti Cristo para magkagi nikitam tu upos nu Diyos, dipo siya u pinagkaluuben nu Diyos tu Ispirito na a awan ti kahád ti kapangyariyan. ³⁵ Mahal a tahod nu Diyos u Anak na, sakay impabahala na nikuna u atanan a bagay tu kapangyariyan na. ³⁶ U maniwala tu Anak nu Diyos ay tehhod a biyag a awan ti kahád. Pero u awan sumunud nikuna ay awan magkahod ti biyag a awan ti kahád. Mágyan palla nikuna u iyamut nu Diyos.”

¹ Nadid, nabaheta nu Pariseo hide a mas makpal dán a naakit ti Jesus sakay makpal dán u nabawtismuwan na nan ti Juan. ² (U tatahoden, bakán a mismo a ti Jesus u magbawtismo nan u disepulus na hide). Nikuna a matukuyan ni Jesus a nabaheta iye nu Pariseo hide, ³ ay limmakad siya ti Judea sakay simmole ti Galilea. ⁴ Tu kássole na ti Galilea ay kailangan pa siya a magtaleb ti Samaria. ⁵ Kanya, nademát de u essa a banuwan a u ngahan na ay Sikar a sakup ni Samaria, adene tu luta a inyatád ni Jacob tu anak na a ti Jose. ⁶ Ketan hod u bal-ung a kinaliyan ni Jacob. Káddemát di hod ay nággetnod ti Jesus tu gibis nu bal-ung, ta napagud siya a naglakad. Halus magtatanghale dán u aldew. ⁷ Nadid ay tehhod a dimmemát a bábbey a Samaritana a angay sumagáb. Kinagi ni Jesus nikuna, “Mák-enomák pay.” ⁸ Ti itod a odas ay awan hod u disepulus hide ni Jesus dipo immangay hide tu banuwan para mamale ti makan de. ⁹ Kinagi nu Samaritana nikuna, “Judio ka sakay Samaritanaák, bakin a mák-enom ka nikán?”Kinagi na iye dipo umad mákpággagum u Judio hide tu Samaritano hide. ¹⁰ Kinagi ni Jesus nikuna,“Ni tukoy mo la ni ánya u inyatád nu Diyos, sakay ni deya i mák-enomáy niko ay hiko pa u mák-enom nikuna tán painumán na ka tu dinom a makapangatád ti biyag.” ¹¹ Kinagi nu bábbey nikuna, “Panginoon, madisalad i bal-ungáy sakay awan ka ti pangsalduk. Hádya ka a mangalap ti dinom a makapangatád ti biyag? ¹² Mas higit ka beman nan tu ninuno me a ti Jacob a nangkale ti iye a bal-ung? Siya sakay tu anak na hide, pate u hayup na hide ay he a umáinom tu itod. ¹³ Timmábbeg ti Jesus,“U uminom ti iye a dinom ay mauwaw padi a huway, ¹⁴ pero u uminom tu dinom a iyatád ko ay awan dán mauwa-uwaw. Dipo u dinom a iyatád ko ay konna tu essa a hábwayan a awan makakatiyan. Sakay u tolay a tumanggap ti iye ay magkahod ti biyag a awan ti kahád.” ¹⁵ Timmábbeg u bábbey,“Atáddinák mu pay, Panginoon tu dinom a kinagi mo para awanák dán mauwa-uwaw tán awanák dán he angay sumagáb.” ¹⁶ Nadid, kinagi ni Jesus nikuna, “Sole ka dán sakay kuyugán mo he u kabanga mo.” ¹⁷ Timmábbeg u bábbey a Samaritana,“Awanák ti kabanga.”Kinagi nikuna ni Jesus, “Tama ka ti kinagi muwe a awan ka ti kabanga, ¹⁸ dipo limma dán u nagin kabanga mo, sakay u kaguman mo nadid ay awan mo tunay a kabanga. Kanya tatahoden u kinagi mo.” ¹⁹ Timmábbeg u bábbey, “Panginoon, naintendiyan kudan a essa ka a prupeta. ²⁰ U nuno me hide ay simmamba tu Diyos ti bukidan iye, pero kinagi moy a Judio hide a ti Jerusalem la maare a sambaán u Diyos.” ²¹ Kinagi ni Jesus nikuna, “Maniwala ka nikán, dumemát dán u panahun a awan kamon sumamba tu Ama ti bukidáy a iye oni ti Jerusalem. ²² Hikam a Samaritano hide ay awan moy tukoy u sambaan moy. Pero tukoy me a Judio hide u sambaán me, dipo gábwat tu lahe a Judio u kaligtasan. ²³ Pero, dumemát dán u panahun sakay nadid dán ngane, autunay a pagsamba nu tolay tu Diyos a Ama ay pagsamba agabwat tu malinis a kaisipan sakay ayun tu tatahoden. Dipo konna he a kássamba u ehyukán nu Ama. ²⁴ U Diyos ay Ispirito, kanya u tolay hide ay maare a sumamba nikuna tu pamamagitan la nu pangdipalongo nu Banal a Ispirito sakay tu katutuhanan. ²⁵ Nadid, kinagi nu bábbey, “Tukoy ko a pademát u Mesias a dáddulawán a Cristo. Káddemát na ay siya u mángpaliwanag nikame tu atanan a bagay.” ²⁶ Kinagi ni Jesus nikuna, “Hikán dán iye a mismo i kagiyán muwe.” ²⁷ Nadid, ti odasan itod ay dimmemát u disepulus hide ni Jesus. Nagtaka hide nikuna a mademáttan de a mákpágguhon siya tu essa a bábbey. Pero awan hide nagtanung tu bábbey ni ánya i kailangan naay, sakay awan be hide nagtanung ni Jesus ni bakin a mákpágguhon siya tu bábbey. ²⁸ Kanya inwahak nu bábbey u banga na sakay nagsole tu banuwan sakay kinagi na tu taga-hod hide, ²⁹ “Kamon he! Ilingán moy u tolay a nakatukoy tu atanan a ginimet ko. Makay siya dán u Cristo a tagapagligtas!” ³⁰ Kanya limmuwas hide tu banuwan, sakay immangay hide tu kán Jesus. ³¹ Nadid, inakit nu disepulus hide ti Jesus a kuman dán. ³² Pero timmábbeg ti Jesus, “Tehhodák a makan a awan moy tukoy.” ³³ Kanya namágtanungan u disepulus na hide, “Tehhod beman nikuna a nangatád ti makan?” ³⁴ Kinagi ni Jesus nide, “U kanán ko ay u kássunud tu kaluuban nu nángpaangay he nikán, sakay u pángtupad tu pagimet na. ³⁵ Awan moy beman kakagiyan, ‘Áppat dalla a bulan ay sákgapas dán? Kagiyán ko nikam, makáttáng dán u mula hide maare dán a aniyán. ³⁶ U tolay a mággane ay makatanggap ti bayad. Konna bihod u tolay a magtoldu tu upos ko tu kapareho na a tolay ay makatanggap ti gantimpala a gábwat tu Diyos. Sakay u magtiwala hide nikan ay atádden na ti biyag a awan ti kahád. Hide ay kuman a áaniyan a aniyan nu mággane. Kanya magkaguman a masaya u nagmula tu upos nu Diyos sakay u nag-ane tu bunga na. ³⁷ Kanya tama la u kakagiyan a, ‘Iba u magmula sakay iba be u mag-ane.’ ³⁸ Paangayán takam para aniyán u bakán moy a immula. Iba u nagmula sakay hikam u mag-ane tu naghirapan de.” ³⁹ Nadid, makpal a Samaritano u naniwala ni Jesus ti banuwanan itod, dipo tu patunay nu bábbey, “Natukuyan ni Jesus u atanan a ginimet ko.” ⁴⁰ Kanya inpakpagguhon nu Samaritano hide ni Jesus a mákpágyan pala siya tu banuwan de. Kanya nákpágyan bi hod siya ti duwwa a aldew. ⁴¹ Sakay mentras a katoy hod ti Jesus ay makpal pa u naniwala nikuna tu pakkasaneg de tu pagtolduna. ⁴² Kinagi nu tolay hide tu bábbey, “Maniwala kame dán nadid, bakán la tu pángpatunay mo, nan dipo hikame dán a mismo u nakasaneg nikuna. Natukuyan mi nadid a siya u Tagapagligtas nu tolay ti munduway.” ⁴³ Nadid, kállipas nu duwwa a aldew a págyan hod ni Jesus ay naghektat siya a patamo ti Galilea. ⁴⁴ Ti Jesus dám be u nagkagi a u essa a prupeta ay awan igagalang tu sadile na a banuwan. ⁴⁵ xxxxNikuna a dimmemát siya ti Galilea ay masaya siya a tinanggap nu tolay hide, dipo hod hide a mismo ti Jerusalem tu Aldew nu Kasayaan nu Págtaleb nu Anghel. Sakay netan de u atanan a ginimet ni Jesus ti itod. ⁴⁶ Nadid, nagsole a huway di Jesus tu banuwan nu Cana a sakup ni Galilea. (U naggimitan na tu dinom a nagin alak.) Tu banuwan a Capernaum ay te essa a opisyal, u anak na a lállake ay te saket. ⁴⁷ Nikuna mabaheta na a nagsole dán ti Jesus ti Galilea a gábwat ti Judea ay immangay siya tu kán Jesus sakay nákkekagbi a umangay ti Jesus ti Capernaum sakay pagpiyyaán na u anak na a magipepatay dán. ⁴⁸ Kinagi ni Jesus nikuna, “Awan kam talaga maniwala, mentaras a awan kam maketa ti makataka-taka a gimet.” ⁴⁹ Timmábbeg u opisyal, “Panginoon, kádtamon bagu a matay u anak ko.” ⁵⁰ Kinagi ni Jesus nikuna, “Maare ka dán a sumole. Nagpiyya dán u anak mo.” Naniwala u opisyal tu kinagi ni Jesus kanya nagsole siya. ⁵¹ Hod palla siya tu dilan ay tinagbu dán siya nu utusan na hide, sakay kinagi de nikuna a nagpiyya dán u anak na. ⁵² Kanya tinanung na ni ánya a ka odas a nagpiyya u anak na. Timmábbeg u utusan hide, “Tu apon he tu magala una ti apon ay awan dán siya ti ladu.” ⁵³ Naalaala nu opisyal a ti odasan itod ay kinagi nikuna ni Jesus a nagpiyya dán u anak na. Kanya siya sakay tu buu na a pamilya ay naniwala ni Jesus. ⁵⁴ Iye u kaduwwa a makataka-taka a ginimet ni Jesus ti Galilea tu kággábwat na ti Judea.

¹ Nadid, káttapos ni itod ay immangay ti Jesus ti Jerusalem, para umangay tu kasayaan nu Judio hide. ² Ti Jerusalem ay te dakál hod a diposito ni dinom. U páppágyanan na ay adene tu pintuwan nu banuwan a sássáddáppan ni tupa. U pagngahan nu Judio hide ti dinumay a itod ay Betesda. Tu digdig nu dinom ay te limma a bilay. ³ Mágkatdug hod u tuna’t kakpal a te saket, u buhák hide, u pilay hide, sakay u lumpo hide. ⁴ Áuhayán de a magahikad u dinom, dipo ni minsan ay umogsad u essa a anghel nu Diyos sakay labugán na u dinom. U dipalongo a makatabsung tu dinom ay maghusay maski ni ánya u saket na. ⁵ Tehhod hod a essa a lállake a tállo a pulo ay ti walo dán a taon a te saket. ⁶ Nikuna ketan ni Jesus u lállake a mágkatdug hod, tukoy na a nalay dán u lállake a te saket. Tinanung siya ni Jesus, “Gusto mu beman a magpiyya?” ⁷ Timmábbeg u te saket a lállake, “Gusto ko nakwan, Maisto, pero awan ti mangtulung nikán a tumabsung ti dinume ni labugán dán. Patamuwák palla ay te nakadipalongo dán nikán.” ⁸ Kinagi ni Jesus nikuna, “Tumaknág ka, ágkatán mo i kákkatdugan muwe sakay maglakad ka dán!” ⁹ Ti itod bila ay pagdaka a nagpiyya u lállake sakay inágkat na u kákkatdugen na sakay naglakad. I itod a pangyayare ay netaun be a Aldew nu Káimang. ¹⁰ Kanya kinagi nu Judio hide tu lállake a nagpiyya, “Awan beman aldew nadid nu Káimang? Labag tu Kautusan u págtawed mo tu kákkatdugen mo!” ¹¹ Pero timmábbeg siya, “U tolay a nagpapiyya nikán u nagutus a tawidán ko u kákkatdugen ko sakay maglakadák.” ¹² Tinanung de siya, “Ti deya i nagutusay niko a tawidán mo i kákkatdugen muwe sakay maglakad ka?” ¹³ Pero awan nakilala nu lállake ni ti deya u nangpapiyya nikuna, dipo nawan dán ti Jesus tu káppalan nu tolay. ¹⁴ Káttapos ay netan ni Jesus u lállake tu disalad nu templo sakay kinagiyan na, “Nadid dipo nagpiyya ka dán, dyan ka dán nakwan magkasala, ta bakay te mangyare pa niko a mas lalo a madukás.” ¹⁵ Limmakad u lállake sakay kinagi na tu Judio hide a ti Jesus u nangpapiyya nikuna. ¹⁶ Kanya sapul hod ay dináddusta dán nu Judio hide ti Jesus dipo tu págpapiyya na tu Aldew nu Káimang. ¹⁷ Pero kinagi ni Jesus nide, “Tulos-tulos u trabaho nama ko hanggan nadid, konnaák la bi hod.” ¹⁸ Kanya ngahe-ngahe a bunuwán nu Judio hide ti Jesus tu iyamut de, pero bakán la a dipo tu páglabag tu batas tungkul tu Aldew nu Káimang nan dipo kákkagiyán na pa a u Diyos u Ama na, sakay iyaheg na u sadile na tu Diyos. ¹⁹ Kinagi nide ni Jesus, “Dapat moy a matukuyan a awan ti gimitán u Anak tu sadile na la nan u gimitán na la ay u ketan na a gimitán nu Ama. U gággimitán nu Ama ay siya la be u gággimitán nu Anak. ²⁰ Dipo mahal nu Ama u Anak, kaya ipeta na tu Anak u atanan a gimitán na. Mas pa ti iye u ipeta nikuna nu Ama a gimitan na, a pagtakaan moy ti husto. ²¹ Ni kodya a biyagán nu Ama u patay hide ay konna bi hod a biyagán nu Anak u deyaman a gusto na a biyagán. ²² Awan humatul u Ama tu maskin deyaman. Inyatád na tu Anak u atanan a kapangyariyan a maghatul ²³ para parangalan nu atanan u Anak a konna tu pángparangal de tu Ama. U awan mángparangal tu Anak ay awan mángparangal tu Ama a nángpaangay he nikuna. ²⁴ “Tatahoden u kagiyán ko nikam,” kinagi pa ni Jesus, “U mágsaneg tu upos ko sakay manalig tu nángpaangay he nikán ay tehhod a biyag a awan ti kahád. Awan dán siya mahatulan nan neagton dán siya gabwat tu kamatayan patamo tu biyag a awan ti kahád. ²⁵ Pakatandaan moy iye, dumemát u odas, nadid dán ngane, a masaneg nu patay hide u boses nu Anak nu Diyos, sakay u mágsaneg nikuna ay mabiyag. ²⁶ U Ama mismo u pinaggabwatan nu biyag. Sakay u Anak ay inatádden na be ti kapangyariyan a paggabwatan nu biyag. ²⁷ Inatádden be siya ti kapangyariyan a maghatul, dipo siya u Anak nu Tolay. ²⁸ Diyan moy iye pagtakaan, dipo dumemát u odas a masaneg nu patay hide u boses na. ²⁹ Mabiyag hide a huway sakay lumuwas hide tu nelábbángngan de. Atanan a naggimet ti maganda ay magkahod ti biyag a awan ti kahád. Pero atanan a naggimet ti madukás ay mahatulan sakay maparusaan. ³⁰ Kinagi pa ni Jesus, “Awanák ti gimitán a ayun la tu sadile ko a kagustuwan. Maghatulák a ayun tu kinagi nikán nu Ama, kanya tama u hatul ko, bakán a u sadile ko a kaluuben u sunudán ko nan u kaluuben nu nangpaangay he nikán. ³¹ Ni hikán la u mángpatunay tu sadile ko ay awan tatahoden u kinagi ko, ³² pero te agum a mángpatunay tungkul nikán, sakay tatahoden u kinagi na. ³³ Awan beman te inutusan kam a nagtanung ni Juan? Tu pángsiyasat moy nikuna ay ingkagi na nikam u tatahoden tungkul nikán. ³⁴ Pero awan ko kailangan u patunay a gabwat tu tolay. Kinagi ko la iye para maniwala sakay maligtas kam. ³⁵ Ti Juan ay kumán a demlag nu simbuwan a magdemlag tu itod, minasaya kam tu badit la a panahun tu demlag na. ³⁶ Pero tehhod a mángpatunay tungkul nikán a mas higit tu patunay ni Juan, u gimet hide a ipagimet nikán nu Ama, sakay siya be u gággimitán ko. Ina u mangpatunay a pinaangayák na he. ³⁷ Sakay u Ama a nangpaangay he nikán ay nagpatunay be tungkul nikán. Maski nikan ay awan moy palla nasaneg u boses na, sakay netan u hupa na, ³⁸ sakay awan moy tinanggap u upos na dipo awan kam maniwala nikán a pinaangay na he. ³⁹ Mággaadalán kam tu Kasulatan, ta akala moy a tu pamamag-itan ni iye ay magkahod kam ti biyag a awan ti kahád. U Kasulatan a mismo u mangpatunay tungkul nikán, ⁴⁰ pero umád moy a umadene nikán para maalap moy nakwa u biyag a awan ti kahád.” ⁴¹ Sakay kinagi pa ni Jesus, “Awan ko hangadán u papure nu tolay hide. ⁴² Tukoy takam sakay tukoy ko a awan ti puso-puso moye u págmahal tu Diyos. ⁴³ Immangayák he tu pamamag-itan nu Ama ko, pero umáddák moy a tanggapán. Pero ni te iba a angay he magtoldu nikam ayun tu sadile na la a kagustuwan ay tanggapán moy siya. ⁴⁴ Kodya kam a maniwala nikán, ni u papure la nu bawat essa u gusto moy, sakay bakán a u papure a gábwat tu eessa a Diyos? ⁴⁵ Dyan moy isipán a hikán u mángkaso nikam tu Ama. Ti Moises a áasaan moy u mismo a mángkaso nikam. ⁴⁶ Dipo ni tatahoden a naniwala kam ni Moises, nakwan ay maniwala kam be nikán, dipo mismo ti Moises ay nagsulat tungkul nikán. ⁴⁷ Pero ni awan kam maniwala tu insulat na, kodya kam a maniwala tu kinákkagi ko?”

¹ Nadid, káttapos ay immahabes ti Jesus tu Hanno nu Galilea, a dáddulawan labe a Hanno ni Tiberias. ² Timmagubet nikuna u makpal a tolay dipo netan de u makataka-taka hide a ginimet na, u págpapiyya na tu te saket hide. ³ Inumangay di Jesus tu buked, kaguman na u disepulus na hide sakay nággetnod hod hide. ⁴ Adene dán tu itod u aldew nu kasayaan nu Judio hide, a dáddulawán a aldew nu Págtaleb nu Anghel. ⁵ Nikuna a natannaw ni Jesus u makpal a tolay a paadene nikuna ay tinanung na ti Felipe, “Hádya kitam a makabale ti makan para makakan i tolayan iye hide?” ⁶ Intanung na iye dipo gusto na a purbaan ti Felipe, pero tukoy dán ni Jesus u gimitán na. ⁷ Timmábbeg ti Felipe,“Ti káppal diye, maski u walo a bulan a suweldu nu essa a tolay u ibale tam ti makan ay awan sapat para ipakan maski ni tagsabadit u bawat essa.” ⁸ Kinagi nu essa tu disepulus na hide a ti Andres a kapatkakka ni Pedro, ⁹ “Tehhod he a essa a anak a lállake a tehhod a limma a tinapay sakay duwwa a sinahab a ikan. Pero awan iye sapat ti káppal ni tolayáy.” ¹⁰ Kinagi ni Jesus tu disepulus na hide, “Paetnudán moy i tolaye hide.”Immetnod be u tolay hide dipo ti lugaran itod ay kalamonan. U bilang nu lállake hide ay limma a libu. ¹¹ Inalap ni Jesus u tinapay sakay nagpasalamat tu Diyos. Káttapos ay intagtag na iye tu tolay hide. Konna bi hod u ginimet na tu sinahab. Sakay u tolay hide ay kinuman hanggan a nabassog hide. ¹² Káttapos de a kimman ay kinagi ni Jesus tu disepulus na hide, “Ipunán moy u atanan a nabuhay a makan para awan ti masayang.” ¹³ Inipun di ngane u atanan a nabuhay a makan. U limma a tinapay a nepakan tu tolay hide ay nakaputat hide ti sapulo ay ti duwwa a lákba. ¹⁴ Nikuna a mapatunayan nu tolay hide u makataka-taka hide a ginimet ni Jesus ay kinagi de, “Siguradu a sadán iye u prupeta a pinaangay he ti munduwáy!” ¹⁵ Tukoy ni Jesus a plano nu tolay hide a pilitán siya a magin hare de. Kanya huway siya a limmakad hod sakay naggeessa a immangay tu buked. ¹⁶ Nikuna a gibi dán ay immangay u disepulus hide ni Jesus tu bihebi nu Hanno. ¹⁷ Gibi dán ay awan palla ti Jesus. Kanya simmakay dán hide tu essa a abang a paahabes a angay ti Capernaum. ¹⁸ Sakay mentaras a umahabes hide ay nagsapul a bimmegsák u pahás sakay dimmáddakkál u tagmák. ¹⁹ Nikuna a makaditaw hide ti mga ánnam oni limma a kilometro ay netan de ti Jesus a maglakad tu dibbew nu dinom a paadene tu abang de, kanya neántingan hide. ²⁰ Pero kinagi ni Jesus nide, “Hikán iye! Diyan kam manteng.” ²¹ Masaya hide a nangpasakay ni Jesus tu abang sakay pagdaka hide a nakademát tu angayan de. ²² Nadid, tu kadimadimangan netan nu tolay hide a nawahak tu bihebi nu minalno a eessa la u abang a atoy hod. Tukoy de ati Jesus ay awan kaguman nu disepulus na hide nikuna iye hide ay simmakay tu abang nan hide la u limmakad. ²³ Kanya ehyukán de ti Jesus. Nadid, te dimmemát a abang a gábwat ti Tiberias dimmung hide tu kinanan nu tolay hide tu tinapay a impasalamat nu Panginoon. ²⁴ Nikuna a ketan nu tolay hide a awan dán hod ti Jesus sakay u disepulus na hide ay simmakay hide tu abang. Hod hide a immangay ti Capernaum para ehyukán ti Jesus. ²⁵ Káddemát nu tolay hide tu dibilew nu Hanno ay netan de ti Jesus sakay tinanung de, “Maisto, nikasangan ka pahe?” ²⁶ Timmábbeg ti Jesus nide, “U tatahoden, ehyukánnák moy bakán a dipo tu netan moy a makataka-taka, nan dipo nakakan kam tu tinapay sakay nabássog. ²⁷ U makan ay masida, kanya diyan moy iye sikapan a ehyukan. U sikapan moy a ehyukan ay u makan a awan masisida sakay makapangatad ti biyag a awan ti kahad. Hikán a Anak nu Tolay u makapangatad ti biyag a hanggan–hanggan, dipo hikán u inatádden nu Ama ko ti kapangyariyan.” ²⁸ Kanya tinanung nu tolay hide ti Jesus, “Ánya i gimitán miyay para masunud me u kaluuban nu Diyos?” ²⁹ Timmábbeg ti Jesus, “Sa iye u ipagimet nu Diyos nikam, maniwala kam nikán a pinaangay na he.” ³⁰ Nagtanung be u tolay hide, “Ánya a kamakataka-taka u mepeta mo para maniwala kame niko? ³¹ U nuno tam hide ay kimman ti mana nikuna a hod hide tu parang. Dipo ayun tu Kasulatan ay inatádden hide ni Moises ti makan a gábwat ti langet. ³² Kinagi nide ni Jesus, “Kagiyan ko nikam u tatahoden: Bakán a ti Moises u nangatád ti makan a gábwat ti langet, nan u Ama ko. Sakay siya be u mangatád nikam ti tunay a makan a gábwat ti langet. ³³ Dipo u makan a gabwat ti langet a inyatad nu Diyos ay awan ti iba nan u immogsad la a gábwat ti langet, siya u makapangatád ti biyag tu tolay hide ti munduway.” ³⁴ Kinagi nu tolay hide, “Panginoon, sapul nadid ay lagi mo kame a atádden ti makanan itod.” ³⁵ Kinagi ni Jesus nide,“Hikán u tinapay a mangatád ti biyag. U deyaman a umadene sakay maniwala nikán ay awan magaláp oni mauwaw a hanggan-hanggan. ³⁶ Pero konna tu kinagi ko nikam, umád moy a maniwala nikán maskin netan moy dán u makataka-taka hide a ginimet ko. ³⁷ Pero maski ni ti deya u iyatád nu Ama ko sakay pasakup nikán ay awan ko siya palayasán. ³⁸ Dipo immogsadák a gábwat ti langet, bakán a para gimitán ko u sadile ko a kagustuwan nan u kagustuwan nu Ama ko a nangpaangay he nikán. ³⁹ Sakay iye u kagustuwan nu nangpaangay he nikán: diyan ko pabayan a mawan u maski essa tu inyatád na hide nikán, nan biyagán ko hide a huway tu katapusan a aldew. ⁴⁰ Dipo kagustuwan nu Ama ko a u atanan ay tumengge sakay maniwala tu Anak ay magkahod ti biyag a awan ti kahád, sakay biyagán ko hide a huway tu katapusan a aldew.” ⁴¹ Nadid ay namágganasasan u Judio hide dipo tu kinagi ni Jesus a siya u tinapay a gábwat ti langet. ⁴² Kanya kinagi de,“Awan beman ti Jesus ay u anak ni Jose? Bakin a kagiyán na a immogsad siya a gábwat ti langet, tukoy tam labe u dáddakál na hide?” ⁴³ Kinagi nide ni Jesus, “Diyan kam mamágganasasan ti tungkul nikán. ⁴⁴ Awan ti makaadene nikán maliban ni akitán siya nu Ama a nangpaangay he nikán. Sakay u umadene hide nikán ay biyagán ko a huway tu katapusan a aldew. ⁴⁵ Ayun tu insulat nu prupeta hide, ‘Tolduwan hide a atanan nu Diyos.’Kanya u atanan nu mágsaneg sakay nakatukoy tu Ama ay umadene nikán. ⁴⁶ Awan ko kinagi a te naketa dán tu Ama. Hikán la a gábwat tu Diyos Ama u naketa nikuna. ⁴⁷ Kagiyan ko nikam u tatahoden: U maniwala nikán ay tehhod a biyag a awan ti kahád. ⁴⁸ Dipo hikán u makan a mangatád ti biyag. ⁴⁹ U ninuno moy hide ay kimman ti mana nikuna katoy hide tu parang, pero natay labe hide a atanan. ⁵⁰ Pero awan matay u deyaman a kuman ti makan a gábwat ti langet. ⁵¹ Hikán u makan a mangatad ti biyag tu tolay, a immogsad he a gábwat ti langet. Mabiyag hanggan-hanggan u ti deyaman a kuman ti iye. Sakay u iyatád ko a makan a ikabiyag nu tolay ti munduway ay u bággi ko.” ⁵² Dipo he ay namágtalu-talo u Judio hide a nágsaneg ni Jesus. Kinagi de, “Kodya a meatád nikitam ni tolayan iye i bággi naáy para kanán tam?” ⁵³ Kinagi ni Jesus nide, “Kagiyan ko nikam u tatahoden: Mentaras awan moy kanán u bággi nu Anak nu Tolay sakay inumán u dige na ay awan kam magkahod ti biyag a awan ti kahád. ⁵⁴ Pero u kuman tu bággi ko sakay uminom tu dige ko ay magkahod ti biyag a awan ti kahád, sakay biyagán ko siya a huway tu katapusan a aldew. ⁵⁵ Dipo u bággi ko, u tunay a makan sakay u dige ko u tunay a áinumán. ⁵⁶ U kuman tu bággi ko sakay uminom tu dige ko ay manatile nikán, sakay manatiliyák be nikuna. ⁵⁷ U Ama ko a nangpaangay he nikan u pinaggabwatan ni biyag; kanya katoy be nikan u biyag a gabwat nikuna. Konna be tu kuman tu bággi ko ay atádden ku be siya ti biyag a gabwat nikan. ⁵⁸ Hikán u makan a gábwat ti langet. Iye ay bakán a kapareho nu mana a kinan nu ninuno moy hide, dipo natay labe hide maski ni kimman hide ti itod. Pero u ti deyaman a kuman ti makanan iye ay mabiyag a hanggan-hanggan.” ⁵⁹ I bagayan iye hide ay kinagi ni Jesus nikuna magtoldu siya tu bilay a págsambaan nu Judio hide ti Capernaum. ⁶⁰ Nikuna a masaneg iye nu disepulus hide ni Jesus ay makpal nide u nagkagi, “Madágge i itoldu nae. Ti deya u makaintendi ti iye?” ⁶¹ Maski ni awan ti nagkagi nikuna ay tukoy ni Jesus a naganasasan u disepulus na hide dipo tu intoldu na hide. Kanya kinagi na nide,“Dipo beman ti iye ay adágginák moy dán? ⁶² Kodya dán wád ni ketanák moy a Anak nu Tolay a paontok a pasole tu ginábwatan ko? ⁶³ U Ispirito nu Diyos u mangatád ti biyag; awan iye magimet nu tolay. U upos hide a kinagi ko ay gábwat tu Ispirito a makapangatád ti biyag. ⁶⁴ Pero te sangan nikam a awan maniwala.” Kinagi iye ni Jesus dipo tukoy na a sapul pa ti sapul ni ti deya u awan hide maniwala sakay ni ti deya u mángtokyon nikuna. ⁶⁵ Indagdag pa a kinagi ni Jesus, “Iye u dahilan ni bakin kinagi ko nikam a awan ti makaadene nikán liban ni kagustuwan nu Ama ko.” ⁶⁶ Sapul ti itod ay makpal dán tu disepulus na hide u immadág sakay awan dán nákkuyog nikuna. ⁶⁷ Tinanung nadid ni Jesus u sapulo ay ti duwwa na a disepulus, “Ánya gustuwák moy beman be a lakaden?” ⁶⁸ Timmábbeg ti Simon Pedro, “Panginoon ti deya pa beman angayan miyay? Katoy dán niko u upos a makapangatád ti biyag a awan ti kahád. ⁶⁹ Maniwala kame niko sakay tukoy me a hiko u Banal a pinaangay he nu Diyos.” ⁷⁰ Kinagi ni Jesus nide, “Awan beman pinile takam a sapulo ay ti duwwa? Pero u essa nikam ay dimonyo!” ⁷¹ U gusto he a kagiyán ni Jesus ay ti Judas a anak ni Simon Iscariote. Dipo maski ni kaguman ti Judas tu sapulo ay ti duwwa a disepulus ay itokyon na padi ti Jesus tu mangdakáp nikuna.

¹ Nadid, káttapos ay linebut ni Jesus i Galilea. Umád na a umangay ti Judea dipo gusto siya a bunuwán nu puno nu Judio hide. ² Nikuna a adene dán u essa tu eldew hide nu Kasayaan nu Judio hide ti Jerusalem a dáddulawan labe a Kasayaan ni Tolda, ³ kinagi nu wáwwadi hide ni Jesus nikuna, “Bakin a awan ka pa he lumakad sakay umangay ti Judea, tánni ketan nu disepulus mo hide u gággimitán mo hide? ⁴ Dipo awan ti tolay a mángtagu tu gimet na ni gusto na a metanyag. Ni maggimet ka ti makataka-taka, ipeta mo tu atanan.” ⁵ Kinagi iye nu wáwwadi ni Jesus dipo maski hide ay awan maniwala nikuna. ⁶ Kanya kinagi ni Jesus nide, “Para nikam ay maare moy a gimitán u gusto moy maski ni ánya a odas, pero para nikán ay awan ku palla odas. ⁷ Awan kam kaiyamutan nu tolay hide ti munduway, pero hikán ay kaiyamutan de, dipo inpeta ko nide a madukás u gimet de. ⁸ Hikam dálla u umangay tu Kasayaan nu Judio hide. Awanák umangay ta bakán palla iye u odas ko.” ⁹ Tu pákkakagi na ti iye ay nagwahak siya ti Galilea. ¹⁰ Tu kállakad nu wáwwadi hide ni Jesus a paangay tu kasayaan ay immangay labe ti Jesus pero patagu la. ¹¹ Ti kasayaanay a itod ay inehyok siya nu Puno nu Judio hide. “Hádya wád siya?”Kagi de. ¹² Sakay u tolay hod hide ay garabi u pángbábbaheta de ni Jesus. U agum ay magkagi, “Mabait siya a tolay.” Kagi be nu agum ay, “Awan, lállokuwán nala u tolay hide.” ¹³ Pero awan ti nagupos tungkul nikuna ti bulgaran, dipo tu ánteng de tu puno nu Judio hide. ¹⁴ Nikuna bállog dán nu kasayaan ay immangay ti Jesus tu templo sakay nangaral. ¹⁵ Nagtaka nikuna u pinuno nu Judio hide, sakay kinagi de, “Kodya na a matukuyan i bagayan iye hide, awan bi siya nakapagiskuwela?” ¹⁶ Kanya kinagi ni Jesus nide, “U itáttoldu ko ay bakán a gábwat nikán, nan gábwat tu nángpaangay he nikán. ¹⁷ Ni deyaman u masoh a sumunud tu kagustuwan nu Diyos ay matukuyan na u itáttoldu ko, ni gábwat tu Diyos oni gábwat la tu sadile ku a kagustuwan. ¹⁸ U magtoldu a ayun la tu sadile na a kagustuwan ay u gusto nala ay puriyán siya ni tolay. Pero u magtoldu a inutusan nu Diyos ay u gusto na ay mapure u Diyos. Sakay u págtoldu na ay tama, bakán a kakabuliyan. ¹⁹ Awan beman inyatád nikam ni Moises u Kautusan? Pero maski essa nikam ay awan ti nakasunud tu Kautusan. Dipo ni sinunud moy u Kautusan, bakin a gustuwák moy a bunuwan?” ²⁰ Timmábbeg u tolay hide, “Sináddáp ka dán ni madukás a ispirito! Ti deya beman u masoh a mangbuno niko?” ²¹ Kinagi nide ni Jesus, “Essa palla a makatakataka u ginimet ko ay nagtaka kamon dipo tehhodák a pinagpiyya a essa tu Aldew nu Káimang. ²² Awan beman inyatád nikam ni Moises u utus tungkul tu págture. (Bakán iye a gábwat ni Moises nan tu ninuno moy hide.) Sakay dipo ti iye ay turiyán moy u anak maski Aldew ni Káimang. ²³ Nadid, ni u essa a anak ay maare a turiyán tu Aldew nu Káimang para awan malabag u utus ni Moises, bakin a magingál kam nikán dipo pinagpiyya ko u essa a tolay tu Aldew nu Káimang? ²⁴ Diyan kam maghusga a ayun la tu ketan moy, nan adalán moy ti mapiyya bagu kam a maghusga, para matukuyan moy u tama.” ²⁵ Nadid ay kinagi nu sangan a taga-Jerusalem, “Awan beman sa iye u tolay a gusto a bunuwán nu puno tam hide? ²⁶ Pero ilingán moy lantad siya a mangaral sakay awan ti makagi u puno hide tungkul nikuna. Makay kilalaán di dán siya a Tagapagligtas. ²⁷ Pero tukoy tam ni hádya siya a gábwat, pero u Tagapagligtas a dumemát ay awan ti makatukoy ni hádya siya gábwat.” ²⁸ Mentaras a magtoldu ti Jesus tu templo ay kinagi na ti mabegsák, “Tatahoden beman a matenggiyák moy sakay tukoy moy ni hádyaák a gábwat? U tatahoden ay awanák he immangay tu sadile kula a kagustuwan. U tunay a Diyos u nangpaangay he nikán, pero awan moy siya matengge. ²⁹ Pero matengge ko siya dipo gábwaták nikuna, sakay siya u nangpaangay he nikán.” ³⁰ Dipo ti kinagiyan itod hide ni Jesus ay gustu dán siya a dakáppán nu pinuno nu Judio hide, pero awan ti nangahas dipo awan na palla odas. ³¹ Sakay makpal a tolay u naniwala nikuna. Kinagi de, “Siya dán u Tagapagligtas, dipo awan ti agum a makagimet tu makataka-taka hide a ginimet na.” ³² Nikuna a nasaneg nu Pariseo hide u pamágguhunan nu tolay hide tungkul ni Jesus, u pinuno nu Saserdote hide ay nagutus ti guwardiya tu templo para dakáppán ti Jesus. ³³ Kinagi ni Jesus, “Awanák moy dán makaguman ti malay, sakay káttapos ay soliyák dán tu nangpaangay he nikán. ³⁴ Ehyukánnák moy, pero awanák moy ketan, dipo awan kam makaangay tu angayan ko.” ³⁵ Namágtanungan u pinuno nu Judio hide, “Hádya wád plano naay a angayan ta awan tam kanon siya ketan? Angay wád siya tu lugar nu Griego hide, ni hádya a nekalat u kákkapatkákka tam a Judio, para magtoldu tu Griego hide? ³⁶ Bakin na a kinagi, ‘Ehyukánnák moy pero awanák moy dán ketan, dipo awan kam makaangay tu angayan ko.”’ ³⁷ Nadid, tu dimodyan a aldew a pinakamahalaga a kasayaan nu Judio hide, timmaknág ti Jesus sakay kinagi na ti mabegsák, “U deyaman a mauwaw ay umadene nikán sakay uminom. ³⁸ Sakay u atanan a sumampalataya nikán ay uminom. Dipo kinagi na tu Kasulatan, ‘Gábwat tu puso nu manalig hide nikán ay magtuhog u dinom a makapangatád ti biyag.”’ ³⁹ U dinom a gustu he a kagiyán ni Jesus ay u Banal a Ispirito, a adene dán a matanggap nu maniwala hide nikuna. Awan palla ingkaluub u Banal a Ispirito ti panahunay a itod, dipo awan palla immangay ti Jesus ti langet. ⁴⁰ Nikuna a masaneg di iye a kinagi ni Jesus ay makpal a tolay u nagkagi, “Siya dán u áohayán tam a prupeta!” ⁴¹ Kinagi be nu agum, “Ay siya dán u Tagapagligtas!” Pero tehhod be a nagkagi, “Bakán a siya u Tagapagligtas, dipo awan maare a gumábwat ti Galilea u Tagapagligtas. ⁴² Awan beman kinagi tu Kasulatan a u Cristo ay maggábwat tu lahe ni hare a David, sakay meenak ti Betlehem a banuwan ni David?” ⁴³ Kanya iba-iba u pánniwala nu tolay hide tungkul ni Jesus. ⁴⁴ U sangan nide ay gusto de siya a dakáppán, pero awan ti nagbegsák ti isip a gimitán iye. ⁴⁵ Nagsole u guwardiya hide tu templo, tu nagutus nide a pinuno a saserdote hide sakay tu Pariseo hide. Tinanung de u guwardiya hide, “Bakin a awan moy siya inyangay he?” ⁴⁶ Timmábbeg hide, “Nadid kami palla a nakasaneg ti konna nikuna a magupos.” ⁴⁷ Kinagi nu Pariseo hide,“Ni konna hod ay pati dán hikam ay naloko dán be ni tolayan itod? ⁴⁸ Tehhod kam dám beman a netan a pinuno nu Pariseo hide a maniwala nikuna? ⁴⁹ Awan! U tolay la hide a awan ti tukoy tu Kautusan ni Moises u maniwala nikuna. siguradu a parusaan hide nu Diyos!” ⁵⁰ Essa tu Pariseo hide a katoy hod ay ti Nicodemo a immangay tu kán Jesus a nákpágguhon tu essa a gibi tu itod. Kinagi na tu kaguman na hide, ⁵¹ “Awan beman labag tu Kautusan tam a hatulan u essa a tolay hanggan a awan tam masaneg sakay matukuyan ni ánya u ginimet na?” ⁵² Tinábbeg de ti Nicodemo, “Taga-Galilea ka beman be? Adalán mo u Kasulatan, para ketan mo a awan ti propeta a maggábwat ti Galilea.” ⁵³ Káttapos ni itod ay nagsoliyan dán u atanan a tolay tu bila-bilay de.

¹ Nadid, ti Jesus be ay immangay tu buked nu Olibo. ² Tu dimadimang, mentaras a maaga palla ay nagsole ti Jesus a huway tu templo. Makpal a tolay u immadene nikuna, kanya immetnod siya sakay nagtoldu siya hide. ³ Nadid ay dimmemát u Eskriba hide sakay u Pariseo hide. Tekaguman hide a bábbey a nadakáp de a nangilállake. Pinataknág de u bábbey tu atubang nu katolayan, ⁴ sakay kinagi de ni Jesus, “Maisto, i bábbiyan iye ay nadakáp a nangilállake. ⁵ Ayun tu Kautusan ni Moises ay dapat a batikalán hanggan a matay u konna he hide a bábbey. Ánya makagi muway tungkul ti iye?” ⁶ Intanung di iye para subukán dila ti Jesus, dipo magehyok hide ti mebintang de a kontara nikuna. Pero dimmukog la ti Jesus sakay nagsulat tu luta tu pamamag-itan nu toldu na. ⁷ Pero hinuway-huway de a tinanung ti Jesus, kanya timmaknág siya sakay kinagi na nide, “U awan nikam ti kasalanan ay siya u mágdipalongo a mangbatikal nikuna.” ⁸ Tu pákkakagi hod ni Jesus ay dimmukog dámman siya sakay nagsulat tu luta tu pamamag-itan nu toldu na. ⁹ Nadid, nikuna a minasaneg di iye ay essa-essa hide a limmakad, sapul tu pinakamatanda hanggan a ti Jesus dálla ay tu bábbey u nawahak. ¹⁰ Timmaknág ti Jesus sakay kinagi na tu bábbey, “Hádya dán hide? Awan dan beman ti magkagi a dapat ka a maparusaan? ¹¹ Timmábbeg u bábbey, “Awan Panginoon,”Kinagi ni Jesus nikuna, “Ni konna hod awan taka be parusaan. Maare ka dán a lumakad, pero diyan ka dán magkasala a huway.” ¹² Nadid ay huway a nagupos ti Jesus tu tolay hide, “Hikán u demlag ni munduway. U sumunud nikán ay awan mabiyag tu kadiklámman, nan magkahod ti demlag tu biyag na.” ¹³ Nikuna a masaneg iye nu Pariseo hide ay kinagi de, “Hiko la u magupos ti ina tungkul ti sadile muwe, kanya awan kame maniwala ta hiko labe u mangpatunay ti sadile muwe.” ¹⁴ Timmábbeg ti Jesus, “Maski ni hikán la i mángpatunayay ti sadile kuwáy ay tatahoden i kákkagiyán kuwáy, dipo tukoy ko ni hádyaák a naggábwat sakay ni hádyaák angayan. Pero hikam ay awan moy tukoy ni hádya naggábwatan kuway sakay ni hádyaák angayan. ¹⁵ Maghatul kam a ayun tu pághatul la nu tolay, pero awanák ti hatulan maskin ti deya. ¹⁶ Pero ni maghatulák tu tolay ay tatahoden u hatul ko, ta bakán la a hikán u manghatul, nan kaguman ko u Ama ko a nángpaangay he nikán. ¹⁷ Awan beman nakasulat tu Kasulatan moy, a ni te duwwa a magpatunay ti maski ánya a kagimet ay tanggapán moy a tatahoden. ¹⁸ Patunayan ko a mismo i sadile kuwáy, sakay magpatunay be u Ama ko a nangutus nikán.” ¹⁹ Nagtanung u Pariseo hide, “Hádya u Ama mo?”Timmábbeg ti Jesus, “Awanák moy matenggi maski u Ama ko. Ni matenggiyák moy ay matenggi moy be u Ama ko.” ²⁰ Iye u kinagi ni Jesus nikuna a nagtoldu siya tu templo, tu adene tu págdáttonan ti alay. Pero awan ti nangdakáp dipo awan palla dimmemát u odas na. ²¹ Huway a kinagi ni Jesus tu pinuno nu Judio hide, “Adeniyák dán a lumakad, pakaeehyukánnák moy, pero awan kam makaangay tu angayan ko. Matay kam a awan napatawad tu kasalanan moy hide.” ²² Dipo ti iye ay namágguhon u pinuno nu Judio hide, “Magpakamatay wád siya? Ánya u gusto na a kagiyán a awan kitam makaangay tu angayan na?” ²³ Kinagi ni Jesus nide, “Hikam ay taga he ti munduwan iye, hikán ay awan. Hikam ay taga sidung, hikan ay taga ontok. ²⁴ Kanya tatahoden u kinagi ko nikam a mágkatay kam a awan napatawad u kasalanan moy. Ni awan kam maniwala tu kinagi ko a, ‘Hikán ngane u pinaangay he nu Diyos,’ matay kam a talaga tu kasalanan moy hide.” ²⁵ Nagtanung hide, “Ti deya ka beman a talaga?” Timmábbeg ti Jesus, “Awan beman kinagi ko dán nikam tu itod pa ni ti deyaak? ²⁶ U tatahoden ay makpalák pa a makagi sakay mehatul kontara nikam. Awanák ti ikagi tu tolay hide ti munduway liban tu ipekagi nikán nu nangpaangay he nikán. Sakay mapagkatiwalaan u kinagi na hide.” ²⁷ Awan de naintendiyan a u kagiyán ni Jesus nide ay tungkul tu Ama. ²⁸ Kanya kinagi ni Jesus, “Ni ilangkawák moy dán a Anak nu Tolay ay hod moy palla a matukuyan a hikán ngane u Cristo. Sakay matukuyan moy be u atanan a bagay a ginimet ko sakay u kinagi ko ay ayun tu ipagimet sakay ipekagi nikan nu Ama. ²⁹ Pirme ko a kakaguman u nangpaangay he nikán, sakay awanák na páppabayan a mágge-essa, dipo pirme ko a gimitán u bagay hide a makasaya nikuna.” ³⁰ Nikuna a masaneg nu tolay hide u kinagi ni Jesus ay makpal u naniwala nikuna. ³¹ Nadid ay kinagi ni Jesus tu tolay hide a maniwala nikuna, “Ni tulos-tulos kam a sumunud tu itáttoldu ko ay tatahoden a tagasunud takam. ³² Matukuyan moy u tatahoden tungkol nikan, sakay u tatahoden a itod u mangpalaya nikam.” ³³ Timmábbeg hide ni Jesus, “Gábwat kame tu lahe ni Abraham, maski nikan ay awan kame nagin alipin ni deyaman. Kodya mo a makagi a palayaán kame?” ³⁴ Timmábbeg ti Jesus, “Kagiyán ko nikam u tatahoden, alipin nu kasalanan u atanan a nagkasala. ³⁵ U utusan ay awan kabilang tu essa a pamilya habang panahun, pero u anak ay lagi hod hanggan-hanggan. ³⁶ Kanya ni u Anak dán u magpalaya nikam ay talaga malaya kamon. ³⁷ Tukoy ko a gábwat kam tu lahe ni Abraham, pero binalakák moy a bunuwán dipo awan moy tanggapán tu puso moy u Upos ko. ³⁸ Kagiyán ko nikam u bagay hide a ketan ko Nama ko, sakay hikam be gimitán moy be u natukuyan moy nama moy.” ³⁹ Kinagi nu tolay hide, “Ti Abraham u ama me!” Timmábbeg ti Jesus, “Ni tatahoden a anak kam ni Abraham ay inaheg moy nakwa u mágkaganda na a gimet. ⁴⁰ Pero gustuwák moy a bunuwán, maski ni kagiyán ko la nikam u tatahoden a nasaneg ko a gábwat tu Diyos. Pero ti Abraham awan siya ti ginimet a konna tu madukas a gusto moy a gimitan nikan. ⁴¹ U gággimitán moy ay gággimitán nu ama moy a essa.” Timmábbeg hide ni Jesus, “Bakán kame a mungaw. U Diyos u Ama me!” ⁴² Kinagi ni Jesus nide, “Ni u Diyos u Ama moy, mahalánnák moy nakwa, dipo hikán ay gábwat tu Diyos. Awanák immangay he tu sadile ko la a kagustuwan, nan pinaangayák na he. ⁴³ Awan moy naintendiyan u kinagi ko, dipo awan moy matanggap u toldu ko. ⁴⁴ Ti Satanas u ama moy. Sakay ni ánya u gusto na ay itod u gusto moy be a gimitán. Mágbabono siya sapul pa tu sapul, sakay umád na u tatahoden dipo awan u tatahoden nikuna. Dipo ugale na dán a mágbabuli-buliyán dipo mabule siya, sakay siya u naggábwatan nu atanan kakabuliyan. ⁴⁵ Pero hikán, u kákkagiyán ko ay tatahoden, kanya umád kam a maniwala ti iye. ⁴⁶ Ti deya nikam makapángkagiyay a nakagimiták ti kasalanan? Tatahoden u kákkagiyán ko nikam. Bakin a umáddák moy a paniwalaan? ⁴⁷ Dipo u anak nu Diyos ay mágsaneg tu Upos nu Diyos. Bakán kam a anak nu Diyos dipo awan kam mágsaneg tu upos nu Diyos.” ⁴⁸ Kinagi nu puno nu Judio hide ni Jesus, “Tama u kinagi me a essa ka a Samaritano sakay sináddáp ka ni madukás a ispirito.” ⁴⁹ Timmábbeg ti Jesus, “Awanák sináddáp ni madukás a ispirito. Parangalan ko la u Ama ko, pero áinsultuwánnák moy. ⁵⁰ Awan ko gusto a ilangkaw i sadile kuwáy. U Ama u te gusto a ilangkawák nu tolay, sakay siya u makapángkagi a tama u kinagi ko. ⁵¹ Kagiyan ko nikam u tatahoden: U deyaman a mangtupad tu toldu ko ay awan mata-matay.” ⁵² Kinagi nu puno nu Judio hide, “Siguradu kame a sináddáp ka ni madukás a ispirito. Ti Abraham ay natay dán sakay nágkatay dán be u prupeta hide, pero kinagi mo a awan mata-matay u deyaman a mangtupad tu toldu mo. ⁵³ Ánya u gusto mo a kagiyán? Mas mataas ka beman tu nuno me a ti Abraham? Maski siya sakay u prupeta hide ay nágkatay dán! Ti deya ka beman tu akala mo?” ⁵⁴ Kinagi ni Jesus nide, “Ni hikán la u mánglangkaw tu sadile ko, awan iye ti kabuluhan. Pero u Ama, a kinagi moy a Diyos moy u mánglangkaw nikán. ⁵⁵ Pero awan moy siya tukoy, hikán ay tukoy ko siya. Ni kagiyán ko a awan ko siya kilala ay magin mabuliyák a konna nikam. Pero talaga kilala ko siya sakay sunudán ko u Upos na. ⁵⁶ U apo moy a ti Abraham ay masaya nikuna a matukuyan na u aldew nu káddemát ko. Netan na ngane iye, sakay nasaya siya.” ⁵⁷ Kinagi nu puno hide nikuna, “Awan ka palla ti 50 a taon, sakay kagiyán mo a netan mo ti Abraham?” ⁵⁸ Timmábbeg ti Jesus, “Kagiyan ko nikam u tatahoden: Bagu pa a neenak ti Abraham ay atnaák dán.” ⁵⁹ Dipo ti iye ay nangkáppot ti bito u tolay hide para batikalán de siya. Pero timmagu ti Jesus sakay limmakad tu templo.

¹ Nadid, tu páglakad di Jesus ay netan na u lállake a buhák, sapul pa tu kákkeenak na. ² Tinanung siya nu disepulus na hide, “Maisto, bakin wád a neenak i lállakiyan ina a buhák, deya u te kasalanan u dáddakál na hide o siya?” ³ Timmábbeg ti Jesus,“Neenak siya a buhák bakán a dipo tu kasalanan na oni kasalanan nu dáddakál na hide. Nangyari iye para mepeta u kapangyariyan nu Diyos nikuna. ⁴ Kailangan a tupadán tam u tarabaho nu nangpaangay he nikán, mentaras a magimet tam palla. Dipo dumemát dán u gibi a awan tamon magimet u ipagimet na. ⁵ Mentaras a hodák ti munduwáy ay hikán u demlag ti munduway.” ⁶ Nadid, tu pákkakagi na ti iye ay linoktaben na u luta sakay ginimet na a lusak, sakay inpahid na tu mata nu buhák. ⁷ Kinagi ni Jesus tu buhák, “Kadmudán magidemos tu dinom nu Siloam.”Kanya inumangay hod u buhák a nagidemos. Tu kássole na ay naketa dán siya. ⁸ Dipo ti iye ay namágtanungan u kadene na hide ti bilay sakay tu iba pa hide a nakatukoy nikuna, nikuna magpalimus palla siya. Kagi de, “Awan beman siya u date a magpalimus a tukoy tam?” ⁹ Kagi nu iba, “Siya dáng ngane.” Pero kinagi be nu iba, “Awan, kahupa na la.”Kanya u lállake dán a mismo u nagkagi, “Hikán itod.” ¹⁰ Kanya tinanung di siya, “Kodya ka a naketa?” ¹¹ Timmábbeg siya, “U lállake a ngángngahanan de a Jesus ay naggimet ti lusak. Impahid na iye ti mata kuwáy sakay kinagi na a umangayák tu dinom ni Siloam sakay magidemos. Kanya immangayák hod nagidemos, sakay káttapos ay naketaák dán.” ¹² Nagtanung u tolay hide, “Hádya dán siya? ”Timmábbeg u lállake, “Awan ko tukoy.” ¹³ Nadid, inyangay nu tolay hide tu Pariseo hide u lállake a date a buhák. ¹⁴ Ti itod ay Aldew nu Káimang, nikuna a naggimet ti Jesus ti lusak sakay pinagpiyya u buhák. ¹⁵ Kanya tinanung be siya nu Pariseo hide ni kodya siya a minaketa, sakay kinagi nu lállake, “Dináttonan na ti lusak u mata ko. Nagidemusák sakay káttapos ay naketaák dán.” ¹⁶ Kinagi nu sangan a Pariseo, “Bakán a gábwat tu Diyos i tolayan iye, dipo awan na sinunud u utus tungkul tu Aldew nu Káimang.”Pero kinagi be nu agum, “Ni makasalanan siya a tolay, kodya siya a makagimet tu konna he a makataka-taka a bagay?” Awan hide namágkasungdu tu áisipán de tungkul ni Jesus. ¹⁷ Kanya tinanung a huway nu Pariseo hide u lállake a buhák, “Ánya u makagi mo tungkul nikuna, dipo pinagpiyya naka?”Timmábbeg u lállake, “Essa siya a prupeta.” ¹⁸ Pero umád pade a maniwala nu puno nu Judio hide a siya u date a buhák. Kanya impadulaw de u dáddakál na hide, ¹⁹ sakay nagtanung hide, “Tahod beman a anak moy siya? Tahod beman a neenak siya a buhák? Bakin a naketa dán siya nadid?” ²⁰ Timmábbeg u dáddakál hide nu buhák, “Tukoy me a anak me siya, sakay neenak siya a buhák. ²¹ Pero awan me tukoy ni kodya siya nadid a naketa sakay ni ti deya u nagpapiyya nikuna. Siya dálla u tanungán moy. Te idad dám be siya kanya siya dalla u magupos para tu sadili na.” ²² Konna hod u kinagi nu dáddakál hide nu lállake dipo tu ánteng de tu pinuno nu Judio hide. Dipo nagkasunduwan nu pinuno hide a ni ti deya man u maniwala ni Jesus a siya u Cristo ay awan di dán tanggapán tu bilay a págsambaan de. ²³ Kanya konna he u intábbeg nu dáddakál hide nu lállake, “Dipo te idad dámbe siya, siya dálla u tanungán moy.” ²⁴ Kanya huway a impadulaw nu Judio hide u buhák sakay kinagi de nikuna, “Isumpa mo tu atubang nu Diyos a tatahoden u ikagi mo nikame. Awan maare a ti Jesus u nángpapiyya niko, ta makasalanan siya a tolay.” ²⁵ Timmábbeg u lállake, “Awan ko tukoy ni makasalanan siya oni awan. U tukoy ku la ay datiyák a buhák pero nadid ay naketaák dán.” ²⁶ Tinanung de u lállake, “Ánya i ginimet naay niko? Kodya na ka a pinagpiyya?” ²⁷ Timmábbeg siya, “Kinagi ko dán nikam, pero umád moy be a maniwala. Bakin gusto moy beman a huway a masaneg u tábbeg ko? Gusto moy a magin disepulus na?” ²⁸ Kanya nagingál hide, pinasanike de u lállake. Kinagi de, “Hiko u disepulus na, pero hikame ay disepulus ni Moises. ²⁹ Tukoy me a nagupos u Diyos ni Moises, pero u tungkul ti tolayan itona ay awan me tukoy ni hádya siya a gábwat.” ³⁰ Timmábbeg u lállake, “Magtakaák nikam! Ta awan moy tukoy ni hádya siya a gábwat, pero pinagpiyya na u mata ko. ³¹ Tukoy tam a awan sanigán nu Diyos u makasalanan hide, pero u ti deyaman a te ánteng tu Diyos sakay manggimet tu kaluuben na ay sanigán na. ³² Sapul ti sapul ay awan kitam palla ti nasaneg a nakapagpapiyya ti tolay a neenak a buhák. ³³ Ni awan gabwat tu Diyos i tolayan itona ay awan na magimet i makataka-taka an itod.” ³⁴ Timmábbeg u pinuno hide, “Neenak ka a makasalanan, sakay mabegsák pa i pággisipan muwe a mangaral nikame!” Sakay binawalan de siya a sumáddáp tu bilay a págsambaan de. ³⁵ Nikuna a nabaheta ni Jesus a binawalan de a sumáddáp tu bilay a págsambaan u lállake a date a buhák, inehyok na u lállake. Sakay nikuna a ketan na siya ay tinanung na, “Maniwala ka beman tu Anak nu Tolay?” ³⁶ Timmábbeg u lállake, “Ti deya beman siya Panginoon? Kagiyán mo ped nikán para maniwalaák nikuna.” ³⁷ Kinagi ni Jesus nikuna, “Netan mo dán siya, pasiyaan mo dán a kauhon nadid.” ³⁸ Pagdaka a kinagi nu lállake, “Maniwalaák dán, Panginoon.”Sakay limmuhud siya a simmamba ni Jesus. ³⁹ Nadid ay kinagi ni Jesus, “Kanyaák a immangay ti munduwáy ay para mahatulan u tolay hide. Sakay tu konna hod ay maketa u buhák hide tu tatahoden, sakay para mabuhák u magkagi hide a ketan de u tatahoden.” ⁴⁰ Nasaneg iye nu Pariseo hide a katoy hod, kanya nagtanung hide, “U gusto mu be man a kagiyán ay buhák kame be?” ⁴¹ Timmábbeg ti Jesus, “Ni buhák kam ay awan kam nakwa ti kasalanan. Pero kinagi moy a maketa kam, kanya manatile palla u kasalanan nikam.”

¹ Nadid ay nagupos ti Jesus tu pamamagitan nu talinhaga. Kinagi na, “Kagiyan ko nikam u tatahoden, u sumáddáp tu kulungan nu tupa hide a awan maglakad tu pintuwan nan umunek tu kudal ay mágtakaw sakay mágbabono. ² Pero u maglakad tu pintuwan ay u pastol nu tupa hide. ³ Pasáddáppán siya nu mágbantay tu pintuwan, sakay tukoy nu tupa hide u boses na. Dulawan na hide tu bawat ngahan de sakay iluwas na hide tu kulungan de. ⁴ Ni meluwas na dán u tupa na hide ay mágdipalongo siya nide sakay umusoseg be u tupa hide dipo tukoy de u boses na. ⁵ Pero u iba a tolay ay awan de sunudán nan adeyuwan dipa iye, dipo awan de tukoy u boses na.” ⁶ Kinagi ni Jesus i talinghagaan iye tu tolay hide, pero awan de naintendiyan u gusto na a kagiyán. ⁷ Kanya nagupos a huway ti Jesus nide, “Kagiyan ko nikam u tatahoden, hikán u pintuwan a lállakadán nu tupa hide. ⁸ U nedipalongo hide nikán a tagapagtoldu ay u kapareho de ay mágtakaw sakay mágbabono. Pero awan hide sinaneg nu tupa ko hide. ⁹ Hikán u pintuwan. U deyaman a sumáddáp tu pamamag-itan ko ay maligtas. Magin kapareho siya nu tupa a malaya a makasáddáp sakay makaluwas tu kulungan, sakay atádden ko siya ti makan na. ¹⁰ Dumemát u mágtakaw para magtakaw, mamuno sakay mangsida. Pero dimmemátták para magkahod u tolay hide ti biyag a masagana sakay malaya. ¹¹ Hikán u mabait sakay matapat a mággalaga a pastol“ U mabait sakay matapat a mággalaga ti tupa ay handa na a iyatád u biyag na para tu tupa hide. ¹² Pero u áupaan, ni ketan na u matapang a aso ay ginanan na hide. Kanya duklusán na u tupa hide sakay mamágkawatak-watak u tupa hide. ¹³ Lakaden na u tupa hide dipo áupaan la, kanya awan ti malasakit tu tupa hide. ¹⁴ Hikán u mabait sakay matapat a pastol. Tukoy-tukuyák nu tupa ko hide. Sakay tukoy-tukuyák di be. ¹⁵ A konna bihod u Ama ko tukoy-tukuyák na sakay tukoy-tukoy ko be siya. Handa ko a iyalay u biyag ko para tu tupa hide. ¹⁶ Tehhodák palla a agum a tupa a awan ti kudaláy. Kailangan ko be hide a pasaddapan sakay sanigan de u boses ko. Tu konna hod ay magin essa dan hide a gurupo sakay te essa hide a pastol. ¹⁷ “Mahalák nu Ama, dipo inyatád ko u biyag ko para nide, sakay káttapos ni iye ay mabiyagák a huway. ¹⁸ Awan ti makaalap tu biyag ko, ni awan inkusa ko iye a inyatád. Tehhodák a karapatan a iyatád iye, sakay alapán iye a huway. Iye u inyutus nikán nama ko.” ¹⁹ Dipo ti kinagiyan iye ni Jesus ay nagkahod dámman ti págtalo-talo u Judio hide. ²⁰ Makpal nide u nagkagi, “Magaheng siya sakay sináddáp ni madukás a ispirito. Bakin moy siya sássanigán?” ²¹ Pero kinagi be nu agum, “Awan makapagupos ti konna hina u sináddáp ni madukás a ispirito. Makapagpapiyya beman u sináddáp ni madukás a ispirito?” ²² Nadid ay odas dán nu kasayaan ti Jerusalem a paggala-ala de tu Templo. Ti panahunay a itod ay sákdágnen. ²³ Ummangay ti Jesus tu templo sakay naglakad tu parte a ni dulawán ay Balkon ni Solomon. ²⁴ U Judio hide ay naipun hide tu palebut na sakay kinagi de nikuna, “Hanggan nikasangan mo a itagu nikame ni ti deya ka a talaga? Ni hiko beman u Cristo, kagiyán mu dán nikame ti tapatan.” ²⁵ Timmábbeg ti Jesus nide, “Kinagi ku dán nikam, pero umád moy be a maniwala. U ginággimet ko a makataka-taka tu ngahan nu Ama ko u mangpatunay tungkul nikán. ²⁶ Pero umád moy a maniwala nikán, dipo awan kam kasale tu tupa ko hide. ²⁷ Mágsaneg nikán u tupa ko hide. Tukoy ko hide sakay sumunud hide nikán. ²⁸ Atádden ko hide ti biyag a awan ti kahád, sakay awan hide mepahamak. Awan ti makaagew nide tu kamát ko. ²⁹ Inyatád hide nikán nu Ama a makapangyariyan tu atanan. Awan ti makaagew nide tu kamát nu Ama ko. ³⁰ Hikán sakay u Ama ay eessa kame.” ³¹ Nikuna a masaneg iye nu Judio hide ay huway hide a nangkáppot ti bito para batikalán de siya. ³² Pero kinagi nide ni Jesus, “Impeta ko nikam u makpal a mágkaganda a gimet a impagimet nikán nu Ama. Hádya ti iye hide u dahilan para batikalánnák moy?” ³³ Timmábbeg hide, “Bakán a dipo tu mágkaganda mo a gimet kanya mi ka a batikalán, nan dipo tu páglapastangan mo tu Diyos. Dipo kinagi mo a hiko ay Diyos a tolay ka labe.” ³⁴ Timmábbeg ti Jesus, “Awan beman nakasulat tu Kautusan a kinagi nu Diyos a, ‘ Kinagi ko, hikam ay Diyos’? ³⁵ Sakay awan tam dapat a bali awanán u Kautusan. Kanya ni dinulaw na a ‘diyos’ U inatádden na hide ti mensahe, ³⁶ bakin moy a kagiyán a lapastanganán ko u Diyos dipo tu kinagi ko a hikán ay Anak nu Diyos? Piniliyák nu Ama sakay pinaangayák na he ti munduwáy. ³⁷ Ni awan ko gimitán u ipagimet nu Ama, diyan kam maniwala nikán. ³⁸ Pero ni ginimet ko u ipagimet hide nu Ama ko, maski ni umád moy a maniwala nikán, maniwala kam tu ginimet ko hide para maintendiyan moy a u Ama ay katoy nikán sakay hikán be ay katoy tu Ama.” ³⁹ Nadid, u te tungkulin hide a Judio, pákkasaneg de ti itod ay laan di dámman siya a dakáppán, pero awan ta nakalakad siya. ⁴⁰ Nagsole ti Jesus tu dibilew nu dinom ti Jordan, tu lugar a pinagbawtismuwan tu itod ni Juan. Nágyan hod siya, ⁴¹ sakay makpal a tolay u immangay hod nikuna. Kinagi de, “Maski ni pumensan ay awan naggimet ti makataka-taka ti Juan, pero atanan nu kinagi na tungkul ti tolayan iye ay tatahoden.” ⁴² Kaya makpal u naniwala ni Jesus.

¹ Nadid, tehhod a essa a lállake a nagkasakit u ngahan na ay ti Lazaro. Mágyan siya ti Betania, kaguman nu wáwwadi na hide a di Maria sakay Marta. ² Ti Maria u nángbulak tu pasáppot tu tikád ni Jesus sakay káttapos ay pinahiden na tu buuk na. Sakay dipo nagkasakit ti Lazaro, ³ ay impauwet nu matkaka ti Jesus kinagi de a, “Panginoon te saket u mahal mo a amigu.” ⁴ Nikuna a masaneg iye ni Jesus ay kinagi na, “Awan siya matay tu saket na. Nagkasakit siya para maparangalan u Diyos, sakay tu pamamag-itan ni iye ay puriyán nu tolay u Anak nu Diyos.” ⁵ Mahal ni Jesus u mátkaka a di Marta, Maria sakay ti Lazaro. ⁶ Pero maski ni mahal na hide ay pinalipas na pa u duwwa a aldew bagu a ummangay hod. ⁷ Káttapos nu duwwa a aldew ay kinagi na tu disepulus na hide, “Magsole kitam ti Judea.” ⁸ Timmábbeg hide, “Maisto, tu sangan he a aldew ay laan kitamon a batikalán nu Judio hide. Bakin magsole kitam pa hod?” ⁹ Timmábbeg ti Jesus, “Awan beman te sapulo ay ti duwwa a odas tu maghapun? Kanya u maglakad ti aldew ay awan siya medamba, dipo metan de u demlag ti munduway. ¹⁰ Pero u maglakad ti gibi ay mehakpa, dipo awan nikuna u demlag.” ¹¹ Káttapos ay kinagi pa ni Jesus, “U amigu tam a ti Lazaro ay netidug. Angen ko siya lukagán.” ¹² Kinagi nu disepulus na hide, “Panginoon, ni netidug siya ay magpiyya palla siya.” ¹³ U akala de ay tidug la ti Lazaro, pero u gusto a kagiyán ni Jesus ay patay dán ti Lazaro. ¹⁴ Kanya inliwanag iye ni Jesus nide, “Patay dán ti Lazaro. ¹⁵ Pero magpasalamaták ta awanák hod dipo u gimitán ko a makataka-taka ay para nikam, para maniwala kam nikán. Kadtamon hod.” ¹⁶ Ti Tomas a dáddulawán a kambal ay kinagi na tu kaguman na hide a disepulus, “Mákkuyog kitam nikuna, maski ni matay kitam a kaguman na.” ¹⁷ Káddemát di Jesus ti Betania ay áppat dán a aldew a nelábbáng ti Lazaro. ¹⁸ Te tállo a kilometro la u kadeyo ni Betania ti Jerusalem, ¹⁹ kanya makpal tu Judio hide u nangbisita di Marta sakay ti Maria, para paha-pahaán de hide tu kákkatay nu kapatkákka de. ²⁰ Nikuna a mabaheta ni Marta a pademát ti Jesus ay tinagbu na siya pero nagwahak tu bilay ti Maria. ²¹ Kinagi ni Marta ni Jesus, “Panginoon, ni hod ka la he ay awan nakwa natay u wadi ko. ²² Pero maski nadid, ay tukoy ko a iyatád niko nu Diyos u maski ánya a agidán mo nikuna .” ²³ Kinagi ni Jesus nikuna, “Mabiyag a huway u wadi mo.” ²⁴ Timmábbeg ti Marta, “Tukoy ko a mabiyag siya a huway tu dimodyan a aldew.” ²⁵ Kinagi ni Jesus nikuna, “Hikán u mangbiyag tu patay hide, sakay hikán be u mangatád ti biyag. U maniwala nikán, maski ni matay ay huway a mabiyag. ²⁶ U deyaman a biyag sakay maniwala nikán ay awan matay hanggan-hanggan. Maniwala ka beman ti iye, Marta?” ²⁷ Timmábbeg ti Marta, “On Panginoon, maniwalaák a hiko u Cristo, u Anak nu Diyos, a inuhay me a pademát he ti munduwáy.” ²⁸ Tu pákkakagi na ti iye ay nagsole ti Marta tu bilay de. Dinulaw na u wadi na a ti Maria sakay kinagi na ti lihim, “Atoy dán u Maisto, sakay impadulaw na ka.” ²⁹ Nikuna a masaneg iye ni Maria ay timmaknág siya sakay nagalalisto a immangay tu kán Jesus. ³⁰ (Awan palla nakademát ti Jesus tu Baryo, nan katoy palla siya tu nagtagbuwan de ay ti Marta.) ³¹ Nikuna a ketan nu Judio hide a nagalalisto a linumuwas ti Maria tu bilay ay tinumagubet hide nikuna, ta u akala de ay angay siya tu páglábbángngan a magsanget. ³² Káddemát ni Maria tu páppágyanan ni Jesus ay dimmapa siya tu atubang na sakay kinagi na, “Panginoon, ni katoy ka la he ay awan nakwa natay u wadi ko.” ³³ Nahabag ti Jesus tu pákketa na a magsanget ti Maria sakay u Judio hide a kaguman na. Kanya nalungkut siya a tahod. ³⁴ Tinanung na hide, “Hádya moy siya a inlábbáng?” Timmábbeg hide, “Panginoon, karon he, agen mo ilingán.” ³⁵ Sakay nagsanget ti Jesus. ³⁶ Kanya kinagi nu Judio hide, “Ilingán moy talaga mahal na ti Lazaro.” ³⁷ Pero u agum ay kinagi de, “Awan beman pinagpiyya na u lállake a buhák? Bakin a awan na neligtas tu kákkatay ti Lazaro?” ³⁸ Káddemát di Jesus tu páglábbángngan ay nalungkut dámman siya a tahod. U pinánglábbángngan de ni Lazaro ay kuweba a te takláb a dakál a bito. ³⁹ Kinagi ni Jesus, “Bukasan moy i lábbáng nge.”Timmábbeg ti Marta a wadi nu natay, “Panginoon, áppat dán siya a aldew a nelábbáng, mabuyok dán ina.”kagi na. ⁴⁰ Kinagi ni Jesus nikuna, “Awan beman kinagi ko dán niko a ni maniwala ka ay ketan mo u kapuriyan nu Diyos?” ⁴¹ Kanya inibutan de u bito. Timmangad ti Jesus ti langet sakay kinagi na, “Amáng, magpasalamaták niko dipo sinanigák mo. ⁴² Tukoy ko a pirmiyák mo a sanigán. Kaya ko iye a kinagi ay dipo ti tolayáy hide, para maniwala hide a hiko u nángpaangay he nikán.” ⁴³ Tu pákkakagi na ti iye ay pimmákhaw siya sakay kinagi na, “Lazaro, lumuwas ka!” ⁴⁴ Limmuwas ngane ti Lazaro a te balut palla u kama-kamát na sakay tu tika-tikád na ti panglábbáng a damit, sakay nabalutan ti tela u hupa na. Kinagi ni Jesus nide, “Ibutan moy dán u balut na a damit, tán makalakad siya.” ⁴⁵ Kanya makpal tu Judio hide a kaguman ni Maria u naniwala nikuna dipo tu netan de a ginimet ni Jesus. ⁴⁶ Pero u sangan nide ay immangay tu pinuno hide nu Pariseo sakay imbaheta de u ginimet ni Jesus. ⁴⁷ Kanya impadulaw nu pinuno nu Saserdote hide, sakay nu Pariseo hide u atanan a mágkataas a miyemro nu Judio hide. Sakay nikuna a naipun dán hide ay kinagi de, “Ánya u gimitán tam? Makpal a makataka-taka u ginimet ni tolayan iye. ⁴⁸ Ni páppabayan tam siya, u atanan a tolay ay maniwala nikuna. Ni mangyare ina ay lusubán kitam nu sundalo hide ni Roma sakay sidaán de u templo sakay u bansa tam.” ⁴⁹ Pero essa nide, ti Caifas a pinakapuno nu Saserdote hide ti taunay a itod, u nagupos a, “Talaga a awan kam ti tukoy. ⁵⁰ Awan moy beman naisip a mas maganda a matay u essa a tolay para tu banuwan na kasera ni mepahamak u buo a bansa?” ⁵¹ Awan gábwat tu sadile na u kinagi na. Bilang essa a pinakapuno a Saserdote, ingkagi ina nu Diyos tu pamamag-itan na ay matay ti Jesus para tu buo a bansa. ⁵² Sakay bakán la a tu bansa de, nan para tu atanan a anak nu Diyos a nekalat tu buu a mundu, para hide ay ipunán sakay pagessaán. ⁵³ Sapul hod ay binalak de a ipabuno ti Jesus. ⁵⁴ Kanya awan dán lantad a pumeta ti Jesus tu Judio hide nan immangay siya tu lugar a adene tu kaparangan, tu essa a banuwan a ni dulawán ay Efraim. Sakay hod pahod siya a nákpágyan kaguman nu disepulus na hide. ⁵⁵ Nadid ay adene dán u kasayaan nu Judio hide tu pággala-ala de tu Págtaleb nu Anghel. Makpal a tolay a gábwat tu iba-iba a lugar nu Israel u immangay ti Jerusalem para tupadán de u utus ni Moises tungkul tu páglinis ti bággi, bagu u kasayaan. ⁵⁶ Ináileng di hod ti Jesus sakay nagtanungan hod hide tu templo, “Ánya ti palagay moyay? Angay wád he siya ti kasayaanáy?” ⁵⁷ Ti itod a panahun ay inyutus nu pinuno nu Saserdote hide sakay nu Pariseo hide a ikagi ni ti deya man u makatukoy ni hádya ti Jesus para madakáp de siya.

¹ Nadid, ánnam pa a aldew bagu u pággala-ala tu Págtaleb nu Anghel ay dinumemát dán ti Jesus ti Betania, tu banuwan ni Lazaro a huway na a biniyag. ² Kanya naghanda di hod siya ti pangapon, sakay kimman siya a kaguman ti Lazaro. Ti Marta u naghanda tu kinanan de. ³ Ti Maria be ay nangalap ti kalahating letro a mamahalin a pasáppot, iye a pasáppot ay gábwat tu mula a nardo. Imbulak na iye tu tikád ni Jesus sakay pinahiden na tu buuk na. Kanya u buo a bilay ay simmáppot. ⁴ Kinagi ni Judas Iscariote a disepulus ni Jesus, a mángtokyon nikuna, ⁵ “U halaga ni pasáppotan ina ay katumbas nu sa-taon a suweldu. Bakin awan tam dálla inlako sakay u pilak ay inyatád tu mágkahirap hide?” ⁶ Kinagi na iye, bakán a dipo tu págmalasakit na tu mágkahirap hide nan dipo gusto na la a mangkupit tu pilak de. Siya u mághempás tu pilak de. Sakay kákkupitán na la itod. ⁷ Pero kinagi ni Jesus,“Pabayan mo siya. Ta inbulak na iye tu bággi ko, ta pánghanda na tu aldew nu páglábbáng nikán. ⁸ U mágkahirap hide ay pirme moy a kakaguman, pero hikán ay awan dan magmalay a kakaguman moy.” ⁹ Nikuna mabaheta nu makpal a tolay a katoy ti Jesus ti Betania ay ummangay hide hod. Bakán la a dipo ni Jesus nan gusto di be a ketan ti Lazaro a biniyag na a huway. ¹⁰ Kanya pinalano be nu pinuno nu Saserdote hide a ipabuno ti Lazaro, ¹¹ dipo siya u dahilan kanya makpal a Judio u himmiwalay nide sakay naniwala ni Jesus. ¹² Tu kadima-dimangan ay nabaheta nu makpal a tolay a immangay tu kasayaan a patamo ti Jesus ti Jerusalem. ¹³ Kanya nangalap hide ti palmera sakay limmuwas hide tu banuwan sakay tinagbu de siya. Pimmákhaw hide, “Puriyán u Diyos! Pagpalaan u pademát tu ngahan nu Panginoon. Puriyán u Hare nu Israel.” ¹⁴ Netan ni Jesus u essa a bul-o a asno sakay itod u sinakayan na, a konna tu nesulat, ¹⁵ “Diyan kam manteng taga-Jerusalem hide. Ilingán moy, u káddemát nu hare moy a mágkabayo tu bul-o a asno.” ¹⁶ Tu dipalongo ay awan iye naintendiyan nu disepulus hide ni Jesus. Pero nikuna a makasole dán ti Jesus ti langet ay hod de a naintendiyan a u nakasulat tu Kasulatan ay tungkul ni Jesus sakay itod u nangyare. ¹⁷ Makpal u naketa nikuna a biyagán a huway ni Jesus ti Lazaro. Imbábbaheta de i pangyayariyan iye tu agum. ¹⁸ Kanya makpal u timmagbu ni Jesus dipo nabaheta de u ginimet na a makataka-taka a bagay. ¹⁹ Nadid ay namágguhon u Pariseo hide, “Ilingán moy, umunonod dán nikuna u atanan a tolay, awan kitamon ti magimet!” ²⁰ Tehhod be a sangan a Griego a immangay tu kasayaan nu Aldew nu Pagtaleb para sumamba. ²¹ Immadene hide ni Felipe a taga-Betsaida, iye ay prubinsiya ni Galilea. Kinagi de nikuna, “Maisto, maare mi wád a mauhon ti Jesus?” ²² Immangay ti Felipe tu kán Andres sakay kinagi na nikuna u kinagi nu Griego hide. Káttapos ay immangay hide a duwwa tu kán Jesus sakay kinagi de u ipekagi de. ²³ Timmábbeg ti Jesus nide, “Dummemát dán u odas para parangalan u Anak nu Tolay. ²⁴ Tandaan moy: maliban a matákneg tu luta u essa a butil nu pahay sakay matay ay manatile itod a mággeessa. Pero ni memula ay magbunga itod ti makpal. ²⁵ U deyaman a mangpahalaga tu sadili nala ay siya u mawanan. Pero u awan mángpahalaga tu biyag na ti munduwan iye alang-alang nikán ay magkahod ti biyag a awan ti kahád. ²⁶ U atanan a masoh a magin disepulus ko ay dapat umunonod nikán, para ni hádyaák ay katoy bi hod siya. U deyaman a magserbi nikán ay ilangkaw nu Ama.” ²⁷ Kinagi ni Jesus,“Mabalisaák nadid. Kagiyán ku beman tu Ama a iligtasák na tu mággade-adene a pághirap? Awan, dipo iye u dahilan ni bakin katoyák he.” ²⁸ Káttapos ay kinagi ni Jesus tu Ama, “Amáng ipeta mo u kapuriyan mo tu tolay.”Nikuna a nakagi na itod ay essa a boses u timmábbeg,“Impeta ku dán tu pamamag-itan mo, sakay huway ko iye a ipeta.” ²⁹ Nikuna a masaneg nu tolay hide a katoy hod u boses ay kinagi de a, “Nagmahadat!” Pero kagi be nu agum ay, “Kinauhon na u essa a anghel.” ³⁰ Kinagi ni Jesus nide, “Iye a boses ay impasaneg na nikam bakán a para nikán. ³¹ Dummemát dán u odas a hatulan u mundu. Sakay palayasán ti Satanas a maghare tu mundu. ³² Sakay ni melangkawak dán ay iyadene ko u atanan a tolay tu sadile ko.” ³³ Kinagi iye ni Jesus para ipaliwanag na nide ni kodya siya a matay. ³⁴ Timmábbeg u tolay hide nikuna, “Nakasulat tu Kasulatan, u Cristo ay mabiyag hanggan-hanggan. Kodya mo a makagi a kailangan a matay u Anak nu Tolay? Ti deya beman u Anak nu tolay a gusto mo a kagiyán?” ³⁵ Timmábbeg ti Jesus nide, “Sabadit dálla a panahun a makaguman moy u demlag. Kanya mabiyag kam tu demlag mentaras a hod palla he u demlag, para awan kam abután nu diham. Dipo awan tukoy nu maglakad tu kadiklámman ni hádya siya angayan. ³⁶ Kanya sumampalataya kam tu demlag mentaras a hed palla he, tán magin tolay kam nu demlag.”Kattapos na iye a kagiyán ay limmakad siya a timmagu nide. ³⁷ Maski ni netan nu Judio hide u makpal a makataka-taka a ginimet ni Jesus ay awan pade hide maniwala nikuna. ³⁸ Para ti konna hod ay matupad u kinagi ni Prupeta Isaias, “Panginoon, tideya u maniwala tu kinagi me? Kandeya mo a impeta u kapangyariyan mo?” ³⁹ Konna tu kinagi pa ni Isaias, awan hide maniwala dipo: ⁴⁰ “Hikán a Diyos binuhák ko u mata-mata de sakay pinaigát ko u puso de, tán awan maketa u mata-mata de sakay awan makaintende u isip de, dipo makay magsole hide nikán, sakay pagpiyyaán ko hide.” ⁴¹ Kanya kinagi iye ni Isaias dipo netan na tu itod u pagka Diyos ni Cristo, sakay nagbaheta siya tungkol ni Jesus. ⁴² Konna man hod ay makpal labe tu puno nu Judio hide u naniwala ni Jesus. Pero inlihim di la iye dipo tu ánteng de tu Pariseo hide, sakay umád de a mapalakad hide tu bilay a págsambaan. ⁴³ Dipo ginusto dipa a puriyán hide nu tolay kasera tu Diyos. ⁴⁴ Kinagi ni Jesus ti mabegsák, “U maniwala nikán ay bakán la a hikán u pinaniwalaan na nan pate be tu nangpaangay he nikán. ⁴⁵ Sakay u naketa nikán ay naketa dám be tu nangpaangay he nikán. ⁴⁶ Immangayák he para demlag ni munduway, tan u deya man maniwala nikán ay awan manatili tu kadiklámman. ⁴⁷ U deya man a nakasaneg tu toldu ko hide pero umád a sumunud ay awan ko siya hatulan. Dipo awanák he immangay para hatulan i munduway nan iligtas u tolay hide. ⁴⁸ Tehhod a manghatul tu umád a mangtanggap tu toldu ko. U upos a ipáppangaral ko u manghatul nide tu dimodyan a aldew. ⁴⁹ Dipo u itáttoldu ko ay bakán a gábwat tu sadile ku la nan gábwat tu Ama a nangpaangay he nikán. Siya u nagutus tu kagiyán ko. ⁵⁰ Sakay tukoy ko u utus na hide ay mangatád ti biyag a awan ti kahád. Kanya ni ánya u ipekagi nu Ama, ay itod la u ká kkagiyán ko nikam.”

¹ Nadid ay dispiras dán nu kasayaan nu pággala-ala tu Págtaleb nu Anghel, tukoy dán ni Jesus a odas na dán a lumakad ti munduway dipo soli dán ti langet tu Ama na. Mahal na a tahod u disepulus na hide ti munduwáy, kanya hanggan tu katapusan ay impeta na nide ni sakodya na hide a kamahal. ² Ti gibiyan itod ay nangapon di Jesus sakay tu disepulus na hide. Nemula dán ni Satanas tu isip ni Judas Iscariote a anak ni Simon a itokyon na ti Jesus. ³ Tukoy ni Jesus a inyatád dán nikuna nu Ama u atanan a kapangyariyan. Sakay tukoy na be a gábwat siya tu Diyos sakay sole siya tu Diyos. ⁴ Timmaknág ti Jesus mentaras a kuman hide sakay ineklas na u pangluwas na a badu sakay nagkaen ti tuwalya. ⁵ Káttapos ay nángbulak siya ti dinom tu essa a palanggana, sakay nagsapul siya a naguges tu tikád nu disepulus na hide, sakay pinahiden na tu tuwalya a nagkaen na. ⁶ Tu káadene ni Jesus tu kán Simon Pedro ay kinagi nikuna ni Simon, “Panginoon, bakin hiko pa i mangugisay ti tika-tikád kuwáy?” ⁷ Timmábbeg ti Jesus nikuna, “Awan mo naintendiyan i gimitán kuwáy nadid, pero maintendiyan mu labe ina tu dimodyan.” ⁸ Kinagi ni Pedro nikuna, “Umád ko! Awan maare a hiko u manguges ti tikád kuwáy hide.” Timmábbeg ti Jesus, “Ni umád mo a ugisan taka ay awan ka dán mebilang a disepulus ko.” ⁹ Kanya kinagi ni Pedro, “Ni konna hod, Panginoon ay bakán la i tikád kuwáy i ugisan muway nan pate dán i kamát kuwáy hide sakay ulo kuwáy!” ¹⁰ Kinagi ni Jesus nikuna, “U nágdigus dán ay malinis dán u buo na a bágge, maliban dálla tu tikád na hide. Dipo malinis dán u buo na a bággi. Malinis kamon, pero bakán a atanan.” ¹¹ Kinagi ni Jesus a awan hide atanan ay malinis dipo tukoy na ni ti deya u mángtokyon nikuna. ¹² Nikuna a maugisan dán ni Jesus u tika-tikád de ay huway na a insulot u damit na sakay nagsole tu puwesto na. Káttapos ay tinanung na hide, “Naintendiyan moy beman u ginimet ko nikam? ¹³ Dáddulawánák moy a Maisto, sakay Panginoon, tama kam dipo ina u tatahoden. ¹⁴ Ni hikán a Maisto moy sakay Panginoon moy, ay naguges tu tika-tikád moy, dapat ay konna bi hod u gimitán moy tu bawat essa. ¹⁵ Impeta ko nikam u halimbawa a dapat moy a ahigán kanya gimitán moy iye tu kaguman moy hide. ¹⁶ Kagiyan ko nikam u tatahoden: Awan ti alipin a mas higit tu amo na sakay awan be ti alipin a mas higit tu nagutus nikuna. ¹⁷ Ta tukoy moy dán iye hide a bagay ay pagpalaan kam nu Diyos ni iye u gimitán moy. ¹⁸ Awan ko makagi iye para nikam a atanan, dipo tukoy ko u pinile ko hide pero kailangan a matupad u kinagi tu Kasulatan a, ‘Intokyunák nu tolay a páppakanán ko.’ ¹⁹ Kagiyán ku dán iye nikam nadid bagu a mangyare, para ni mangyare dán iye ay maniwala kam a hikán ngane u Cristo. ²⁰ Kagiyan ko nikam u tatahoden: U mangtanggap tu tolay hide a inutusan ko ay timmanggap nikán, sakay u mangtanggap nikán ay mangtanggap tu nángpaangay he nikán.” ²¹ Tu pákkakagi he ni Jesus ay nabalisa siya, “Kagiyan ko nikam u tatahoden: U essa nikam u mángtokyon nikán.” ²² Nagilingan u disepulus na hide, sakay naguluwan hide ni ti deya u gusto na a kagiyán. ²³ Ti itod be ay kadatig ni Jesus u pinakamamahal na disepulus. ²⁴ Kanya sininyasan siya ni Simon Pedro a tanungán ti Jesus ni ti deya u gusto na he a kagiyán. ²⁵ Kanya mentaras a kasadát na ti Jesus ay tinanung na siya, “Panginoon, ti deya u kákkagiyán mo?” ²⁶ Timmábbeg ti Jesus, “U atádden ko ti tinapay, káttapos ko a ilábláb ay siya itod.” Kanya nangalap ti Jesus ti tinapay sakay pángllábláb na ay inyatád na ni Judas a anak ni Simon Iscariote. ²⁷ Nikuna naalap dán ni Judas u tinapay ay simmáddáp nikuna ti Satanas. Kinagi ni Jesus nikuna, “Gimitán mu dán a agad u gimitán mo.” ²⁸ Awan naitendiyan nu agum a disepulus ni Jesus ni bakin kinagi na itod ni Judas. ²⁹ U akala nu agum ay inutusan la siya ni Jesus a mamale tu kailangan de tu kasayaan oni mangatád ti limus tu mágkahirap hide, dipo siya u mágsaddi tu pilak de. ³⁰ Tu kákkan ni Judas tu tinapay ay pagdaka siya a limmakad ti gibiyan itod. ³¹ Nadid, nikuna a makalakad ti Judas, kinagi ni Jesus, “Hikán a Anak nu tolay ay odas dán a iyatád nikán nu Diyos u karangalan ko. Sakay mehayag dám be u karangalan nu Diyos dipo tu ginimet ko. ³² Ni mehayag u karangalan nu Diyos dipo nikán ay ihayag be a pagdaka nu Diyos u karangalan tu Anak sakay gimitán na itod a pagdaka.” ³³ Kinagi pa ni Jesus, “Anak ko hide, sabaditák moy dálla a odas a makaguman. Ehyukánnák moy, pero konna tu kinagi ko tu pinuno nu Judio hide, awan kam makaangay tu angayan ko. ³⁴ Kanya essa a bigu a utus u iyatád ko nikam. Magmahalan kam, ni kodya takam a minahal ay konna bi hod u dapat moy a gimitán a págmahal tu bawat essa. ³⁵ Ni magmahalan kam ay matukuyan nu atanan a tolay a disepulus takam.” ³⁶ Nagtanung ti Simon Pedro ni Jesus, “Panginoon, hádya ka a angay?” Timmábbeg ti Jesus, “Nadid ay awan ka palla makaangay tu angayan ko, pero tumagubet ka be tu dimodyan a aldew.” ³⁷ Nagtanung pa ti Pedro, “Panginoon, bakin a awanák maare a mákkuyog niko nadid? Handaák la be a matay para niko.” ³⁸ Timmábbeg ti Jesus, “Talaga beman a handa ka a matay para nikán? U tatahoden, bagu a magtarakket u tandang a manok ay tállowák mo a beses a ipamen a awanák mo tukoy.”

¹ Nadid ay kinagi ni Jesus nide, “Diyan kam mabalisa. Magtiwala kam tu Diyos sakay magtiwala kam be nikán. ² Tu bilay Nama ko ay makpal a kuwarto. Angayák hod para paghanda takam ti páppágyanan moy. Awan ku iye kagiyán ni awan tatahoden. ³ Kapag nakaangayák dán hod sakay nepaghanda takamon ti páppágyanan moy ay soliyák sakay kuyugán takamon tu páppágyanan ko para maski ni hádyaák ay hod kam be. ⁴ Sakay tukoy moy dán u dilan a patamo tu angayan ko.” ⁵ Kinagi ni Tomas nikuna, “Panginoon, awan me tukoy ni hádya ka angayan, kodya me a matukuyan u dilan?” ⁶ Timmábbeg ti Jesus nikuna, “Hikán u dilan, u tatahoden, sakay u biyag. Awan ti makaangay tu Ama ni awan tu pamamag-itan ko. ⁷ Ni tukuyák moy ay tukoy moy dám be u Ama. Sapul nadid ay tukoy moy dán siya sakay netan.” ⁸ Kinagi ni Felipe nikuna, “Panginoon, ipeta mu ped nikame u Ama, tán tama dán nikame.” ⁹ Timmábbeg ti Jesus nikuna, “Awanák mu pad beman tukoy, Felipe, nalayák moy dán a kakaguman? U naketa nikán ay netan na dám be u Ama. Bakin a kagiyán mo a ipeta ko nikam u Ama? ¹⁰ Awan ka beman maniwala a hikán ay hod tu Ama sakay u Ama ay hod nikán? U kákkagiyán ko nikam ay awan gábwat nikán nan tu Ama a hod nikán. U bagay hide a gággimitán ko ay siya be u maggimet dipo siya ay hod nikán. ¹¹ Maniwala kam tu kinagi ko, a hikán ay hod tu Ama sakay u Ama ay hod nikán. Ni umád moy a maniwala ti kinagi kuwan iye ay maniwala kam dipo tu ginággimet ko hide. ¹² Kagiyán ko nikam u tatahoden: U deyaman a maniwala nikán ay makagimet be tu gággimitán ko, sakay mas pa ti iye u magimet na dipo angayák dán tu Ama. ¹³ Sakay maski ni ánya u agidán moy tu Diyos, tu pamamag-itan nu ngahan ko ay iyatád na, para maparangalan u Ama ko dipo nikán a Anak na. ¹⁴ Kanya maski ni ánya u agidán moy tu pamamaggitan nu ngahan ko ay iyatád ko.” ¹⁵ Kinagi na tu disepulus na hide, “Ni mahalák moy ay sunudán moy u utus ko. ¹⁶ Sakay magdasalák tu Ama a atádden nakam ti Banal a Ispirito, siya u Tagagiyya nikam, kaguman moy siya a hanggan-hanggan. ¹⁷ Sa itod u Banal a Ispirito a magtoldu nikam ti tatahoden. Awan siya matanggap nu taga-mundu hide dipo awan siya ketan oni makilala nu tolay hide. Pero tukoy moy siya, dipo siya ay kakaguman moy a hod nikam a hanggan-hanggan. ¹⁸ Awan takam iwahak a awan ti kaguman, soliyák nikam. ¹⁹ Sabadit dálla a panahun ay awanák dán ketan nu taga-mundo hide, pero ketanák moy. Sakay dipo biyagák, hikam be ay mabiyag. ²⁰ Tu káddemát ni itona a odas ay matukuyan moy a hodák tu Ama. Sakay hikam ay hod kam be nikán, sakay hikán ay hodák be nikam. ²¹ U ti deya man a mangtanggap sakay mangsunud tu utus ko hide ay siya u mangmahal nikán. U mangmahal nikán ay mahalán be nu Ama sakay mahalán ku be siya, sakay magpakilalaák nikuna ti husto.” ²² Tinanung siya ni Judas (Bakán a ti Judas Iscariote), “Panginoon, bakin a hikame la u pángpakilalaan mo tu sadile mo, awan mo ipakilala tu agum a tolay ti munduway?” ²³ Timmábbeg ti Jesus nikuna, “U mangmahal nikán ay sumunud tu upos ko. Mahalán siya nu Ama, sakay mágyan kame nikuna. ²⁴ U awan mangmahal nikán ay awan sumunud tu upos ko. Sakay u upos a nasaneg moy ay awan gábwat nikán nan gábwat tu Ama a nángpaangay he nikán. ²⁵ Kagiyán ko iye hide a bagay nikam, mentaras a kagumanák moy palla. ²⁶ Pero ni nakalakadák dán, u tagagiyya nikam ay u Banal a Ispirito a paangayán he nu Ama. Siya u mangtoldu nikam tu atanan a bagay sakay mángpaala-ala nikam tu atanan a kinagi ko nikam. ²⁷ Nadid, u iwahak ko nikam ay kapayapaan. Mismo a u kapayapaan ko u iyatád ko nikam ikapayapaanan iye ay awan meatád nu mundo. Kanya diyan kamon mabalisa sakay diyan kamon manteng. ²⁸ Nasaneg moy dán u kinagi ko tu itod a lumakadák pero soliyák labe nikam. Ni mahalák moy ay masaya kam tu káangay ko tu Ama, dipo mas dakila u Ama nan hikán. ²⁹ Kagiyán ko iye nikam nadid, bagu a mangyare para maniwala kam ni mangyare dán iye. ³⁰ Awan ku dán pakaatakdugán i kákkagiyán kuwáy nikam, dipo pademát dán ti Satanas a siya u maghare ti munduwáy, pero awan siya ti kapangyariyan nikán. ³¹ Pero dapat a matukuyan nu tolay hide a mahal ko u Ama, kanya gimitán ko u inyutus na nikán. Kadtamon, lumakad kitamon he.”

¹ Nadid ay kinagi pa ni Jesus, “Hikán u tunay a ponan nu ubas sakay u Ama ko u mággalaga. ² Káttulán na u balang pinget a awan magbunga sakay linisan na u balang pinget a magbunga para mas lalu pa iye a magbunga. ³ Táttupadán moy u itáttoldu ko nikam kanya kumán kam a u pinget hide a malinis dán. ⁴ Manatile kam nikán tán manatiliyák be nikam. Awan makapagbunga u essa a pinget ni awan nakakapit tu ponan. Konna bi hod u mangyare, awan kam magbunga ni awan kam manatile nikán. ⁵ “Hikán u ponan nu ubas sakay hikam u pinget hide. U tolay a manatile nikán sakay manatiliyák be nikuna ay siya u magbunga ti makpal. Dipo awan kam ti magimet ni hiwalay kam nikán. ⁶ U awan manatile nikán ay konna tu pinget a malanás sakay ibábbut, káttapos ay ipunán a ibut tu apoy para tutudán. ⁷ Ni manatile kam nikán, sakay u upos ko ay manatile be nikam, ay iyatád ko u ánya man a agidán moy. ⁸ Maparangalan u Ama ko ni magbunga kam ti makpal, sakay tu konna he a paraan ay mepeta moy a disepulus takam. ⁹ Mahal takam a konna tu pángmahal nikán nu Ama. Manatile kam tu págmahal ko. ¹⁰ Ni sássunudán moy u utus ko ay manatile kam tu págmahal ko. Konna nikán, sássunudán ko u utus nu Ama, kanya manatiliyák tu págmahal na. ¹¹ “ Kinagi ko nikam i bagayan iye hide, para makahate kam tu kasayaan ko sakay magin tunay u kasayaan moy. ¹² Sa iye u utus ko, magmahalan kam: konna tu págmahal ko nikam. ¹³ Awan dán ti págmahal a higit tu págmahal nu essa a tolay a náng-alay tu biyag na para tu amigu na hide. ¹⁴ Amigu takam ni sunudán moy u utus ko hide. ¹⁵ Awan takamon ibilang a alipin, dipo awan tukoy nu alipin ni ánya u gággimitán nu amo na. Nan, inturing takamon a amigu ko, dipo kagiyán ko nikam u atanan a nasaneg ko tu Ama. ¹⁶ Bakán a hikam u nangpile nikán, nan hikán u nangpile nikam, tán maglakad kam sakay magbunga tu bunga hide a manatile a hanggan-hanggan. Ni konna hod, ánya man u agidán moy tu Ama tu ngahan ko ay iyatád na nikam. ¹⁷ Kanya sa iye u utus ko nikam: magmahalan kam.” ¹⁸ Kinagi pa ni Jesus, “Ni maiyamut nikam u tolay hide ti munduway ay isipán moy a hikán pa u naiyamutan de bagu a hikam. ¹⁹ Ni kaguman kam tu taga-mundu hide ay mahalán dikam. Pero awan di kam kaguman, dipo pinile takam he ti munduway para awan kamon magin konna nide. Kanya u mundu ay maiyamut nikam. ²⁰ Diyan moy kalimunan u kinagi ko nikam a awan ti alipin a mas higit tu amo na. Ni dinustaák de ay dustaán dikam be. Sakay ni sinunud de u upos ko ay sunudán di be u kagiyán moy. ²¹ Dustaán dikam dipo maniwala kam nikán sakay dipo awan de tukoy u nangpaangay he nikán. ²² Ni awanák he immangay a nagupos nide ay awan nakwa napatunayan a nagkasala hide. Pero nadid ay awan dán hide ti merason tu kasalanan de. ²³ U maiyamut nikán ay maiyamut be tu Ama ko. ²⁴ Ni awanák naggimet tu atubang de ti makataka-taka a awan magimet nu ti deyaman, maare de a kagiyan a awan hide ti kasalanan. Pero nadid te kasalanan hide, ta maski ni netan de u ginimet ko a makataka-taka, ay naiyamut hide nikame ay tu Ama ko. ²⁵ Ti ginimet diyan iye ay natupad u nesulat tu Kasulatan a, “Maiyamut hide nikán a awan ti rason.” ²⁶ Káttapos ay kinagi ni Jesus, “Paangayán ko nikam u Banal a Ispirito a gábwat tu Ama. Siya u mánggiya nikam, sakay itoldu na nikam u tatahoden. Káddemát na ay siya u mángpatunay ni ti deyaák a talaga. ²⁷ Hikam be ay dapat magpatunay tungkul nikán, dipo kaguman takamon sapul pa ti sapul.”

¹ Nadid, kinagi pa ni Jesus, “Kagiyán ku iye a atanan nikam tánni awan kam mawanan ti pánnalig nikán. ² Dumemát u odas a awan kamon tanggapán nu kasa-Judio moy hide tu sinagoga. Sakay dumemát u odas a ni deyaman u mangbuno nikam ay magakala a págserbi dán itod tu Diyos. ³ Gimitán de i iye hide a bagay dipo awanák de kilala sakay awan di be kilala u Ama. ⁴ Pero kagiyán ko nikam i iye hide, para káddemát nu pagdusta a gimitan de nikam ay maalaala moy a kinagi ku dán iye hide nikam. “Awan ku palla kinagi nikam i bagayan iye hide tu sapul dipo kagumanák moy palla. ⁵ Pero nadid ay soliyák dán tu nangpaangay he nikán, pero maski ni essa nikam ay awan ti nagtanung ni hádyaák angayan. ⁶ Malungkut kam nadid, dipo tu kinagi ko nikam. ⁷ Pero kagiyan ko nikam u tatahoden a para tu kapiyyaan moy u kállakad ko, dipo awan he umangay u Banal a Ispiritu a tagagiyya nikam, ni awanák lumakad. Pero ni lumakadák ay paangayán ku he siya nikam. ⁸ Káddemát na ay patunayan na tu tolay hide ti munduway a male u pákkaintendi de tungkul tu kasalanan, sakay tungkul tu pagkamatuwid, sakay tungkul tu paghatul nu Diyos. ⁹ Male hide tungkul tu kasalanan, dipo awan hide naniwala nikán. ¹⁰ Male hide tungkul tu pagkamatuwid dipo angayák dán tu Ama sakay awanák moy dán keketan. ¹¹ Sakay male be hide tungkul tu paghatul nu Diyos dipo ti Satanas a mangdipalongo he ti munduwáy ay nahatulan dán a awan dán ti karapatan maghare. ¹² “Makpalák pa nakwa a kagiyán nikam, pero awan moy palla kaya a intendiyán nadid. ¹³ Pero káddemát nu Banal a Ispirito a tagapagtoldu tu tatahoden ay tulungan nakam para maintendiyan moy u atanan a tatahoden. U itoldu na ay bakán a gábwat nikuna, nan u nasaneg nala tu Diyos u kagiyán na. Sakay kagiyán na be nikam u tungkul tu bagay hide a dumemát. ¹⁴ Parangalanák na, dipo gábwat nikán u atanan a kagiyán na nikam. ¹⁵ U atanan a kao nu Ama ko ay kao ku be, kanya kinagi ko a gábwat nikán u atanan a ikagi nu Banal a Ispirito nikam. ¹⁶ Sabadit dálla a odas ay awanák moy dán ketan a huway, sakay káttapos nu sabadit a panahun ay ketanák moy a huway.” ¹⁷ Namágtanungan u disepulus na hide, “Ánya wád u gusto na a kagiyán? Bakin a nakagi na a sabadit dálla a panahun ay awan tamon siya ketan, sakay káttapos nu sabadit a panahun ay ketan tam siya a huway? Kinagi na pa a dipo soli dán siya tu Ama na.” ¹⁸ Kinagi de, “Ánya wád u gusto na a kagiyán tu ‘sabadit a panahun?’Awan tam tukoy ni ánya u gusto na a kagiyán.” ¹⁹ Tukoy ni Jesus a gusto de a magtanung, kanya kinagi na nide, “Namágtanungan kam beman tungkul tu kinagi ko a ‘Sabadit dálla a panahun ay awanák moy dán ketan, sakay káttapos nu sabadit a panahun ay ketanák moy a huway?’ ²⁰ Tatahoden, magsanget kam sakay maglungkut tu mangyare nikán, pero masaya u taga-mundu hide. Mágkalungkut kam, pero u kalungkutan moy ay mapalitan ti kasayaan. ²¹ Konna iye tu essa a bábbey a maghirap dipo tu pággenak na. Pero tu kákkeenak nu anak ay nalimunan na dán u atanan a hirap dipo tu kasayaan na a neenak na dán u anak na ti munduway. ²² Konna kam bi hod. Malungkut kam nadid, pero masaya kam tu aldew a mamágketa kitam a huway. Sakay awan ti maskin ti deya a makaagew tu kasayaan moy. ²³ Ti aldiwan itod ay awan moy dán kailangan a magtanung nikán. Kagiyán ko nikam u tatahoden: Anya man u agidan moy tu Ama tu pamamag-itan nu ngahan ko ay iyatád na. ²⁴ Hanggan nadid ay awan kam palla ti inaged nikuna tu pamamag-itan nu ngahan ko. Mangaged kam tán makatanggap kam, tán magin tunay u kasayaan moy.” ²⁵ “Kinagi ko iye hide nikam tu pamamag-itan nu talinghaga, pero dumemát u odas a awanák dán nikam magupos ti talinghaga, nan ikagi ko nikam u tungkul tu Ama ko ti diretsuwan a kákkaupos. ²⁶ Ti itod be a aldew ay mismo hikam u mangaged tu Ama tu pamamag-itan nu ngahan ko. Awan dán kailangan a hikán pa u mangaged tu Ama a para nikam. ²⁷ Dipo mahal kam nu Ama, dipo minahalák moy sakay naniwala kam a gábwaták tu Diyos. ²⁸ Naggábwaták ngane tu Ama sakay immangayák he ti munduwáy. Pero nadid ay lumakadák dán he ti munduwáy ta soliyák dán tu Ama.” ²⁹ Kinagi nu disepulus na hide, “Nadid palla ngane ay magupos ka dán ti diretsuwan nikame, bakán dán a tu pamamag-itan nu talinghaga. ³⁰ Tukoy me a tukoy mo u atanan a bagay, sakay awan ka dán kailangan a tanungán nu deyaman. Kanya maniwala kame a gábwat ka tu Diyos.” ³¹ Timmábbeg ti Jesus nide, “Maniwala kam beman nadid nikán? ³² Pero dumemát u odas a mamághiwewalay kam sakay magsoliyan tu bila-bilay moy, sakay iwahakák moy a mággeessa. Pero maski konna hod ay te kagumanák pade dipo kaguman ko u Ama. ³³ Kinagi ko dán iye hide a bagay nikam, tán magkahod kam ti kapayapaan tu pákpagkaessa moy nikán. He ti munduway pahirapan dikam, pero pabegsákkán moy u isip moy dipo nagtagumpayák dán kontara tu kapangyariyan ni munduway.”

¹ Nadid, tu pákkakagi ni Jesus ti iye hide a bagay ay timmangad siya ti langet sakay kinagi na, “Ama, dimmemát dán u odas. Parangalan mu dán u Anak mo, para parangalan nakabe. ² Dipo inatáddinák mo ti kapangyariyan tu atanan a tolay para maatádden ko ti biyag a awan ti kahád u atanan a tolay a inyatád mo nikán. ³ Sakay sa iye u gusto a kagiyán nu biyag a awan ti kahád: u matukuyan ka nu tolay hide a hiko la u tunay a Diyos, sakay matukuyan di be u pinaangay mu he. ⁴ Impakapospos ku dán u karangalan mo he ti munduwáy, dipo natupad ku dán u impatarabaho mo nikán. ⁵ Kanya nadid, Ama ay atáddinák mo ti karangalan a konna tu karangalan ko nikuna a hodák palla niko tu itod bagu a lalangán i munduway. ⁶ Inpakilala taka tu tolay hide a inyatád mo nikán ti munduwáy. Kao mo hide sakay inyatád mo hide nikán, sakay sinunud de u upos mo. ⁷ Tukoy di dán a u atanan a inyatád mo nikán ay gábwat niko. ⁸ Dipo intoldu ko nide u atanan a intoldu mo nikán sakay tinanggap di iye. Siguradu hide a talaga gábwaták niko sakay maniwala hide a pinaangayák mu he. ⁹ “Ipagdasal ko hide. Awanák magdasal para tu taga-mundu hide nan para tu inyatád mo hide nikán, dipo kao mo hide. ¹⁰ U atanan a tolay a kao ko ay kao mo, sakay u atanan a kao mo ay kao ko, sakay maparangalanák tu pamamag-itan de. ¹¹ Sakay nadid ay soliyák dán niko, iwahak ku dán i munduwáy, pero hide ay manatile hide he ti munduwáy. Ama a Banal, bantayan mu ped hide tu pamamag-itan nu kapangyariyan nu ngahan mo, a inyatád mo nikán, tán magin essa hide a konna nikita. ¹² Mentaras a kagumanák de ay iningatan ko hide tu kapangyariyan a inyatád mo nikán. Iningatan ko hide sakay awan ti nepahamak nide, puwera la tu tolay a nagehyok tu kákkepahamak na para matupad u kinagi tu Kasulatan tungkul nikuna. ¹³ Pero nadid ay soliyák dán niko. Kákkagiyán ko i bagayan iye hide mentaras a hodák palla he ti munduwáy tán magkahod hide ti kasayaan a konna nikán. ¹⁴ Intoldu ku dán nide u upos mo. Tunay u ingál nu taga-mundu hide nide, dipo awan dán hide makamundu a konna nikán a bakán a makamundu. ¹⁵ Awan ko idasal a alapán mu dán he hide ti munduwáy, nan ingatan mo hide para awan hide matalo ni Satanas. ¹⁶ Awan hide makamundo, konna nikán a awan tagamundu. ¹⁷ Ilaan mu hide tu pamamag-itan nu tatahoden; u upos mo ay tatahoden. ¹⁸ Pinaangayák mu he ti munduwáy, konna bi hod ay pinaangay ku be hide ti munduwáy, para magtoldu. ¹⁹ Sakay alang-alang nide ay inlaan ko i sadile kuwáy niko, tán melaan be hide niko tu pamamag-itan nu tatahoden. ²⁰ U dasal ko ay bakán la a para nide, nan pate be tu maniwala hide nikán tu pamamag-itan nu pagtoldu de. ²¹ Ama ipagdasal ko niko, a nakwa magin essa hide a atanan a konna nikita. Ni kodya ka a hod nikán sakay hodák be niko, nakwa hide ay hod nikita, para maniwala u taga-mundu hide a hiko u nangpaangay he nikán. ²² Inatádden ko hide ti karangalan a konna tu inyatád mo nikán, para magin essa hide a konna nikita. ²³ Hikán ay hod nide sakay hiko ay hod nikán, tánni tatahoden a magin essa hide. Tán matukuyan nu taga-mundu hide a pinaangayák mu he, sakay matukuyan di be a mahal mo u maniwala hide a konna tu págmahal mo nikán. ²⁴ Ama, gusto ko a makaguman tu angayan ko u tolay hide a inyatád mo nikán, tán ketan di be u karangalan a inyatád mo nikán, dipo mahalák mo bagu pa a nilalang i munduway. ²⁵ Ama, a Banal maski ni awan ka tukoy nu taga-mundu hide ay tukoy taka, sakay tukoy nu maniwala hide a hiko u nangpaangay he nikán. ²⁶ Inpatengge taka nide, sakay tulos-tulos ko iye a gimitán para u págmahal mo nikán ay hod be nide sakay hikán be ay hod nide.”

¹ Nadid, tu káttapos ni Jesus a magdasal ay immangay hide ay tu disepulus na hide ti Kidron. Sakay immangay hide tu lugar a makpal a kayo a olibu. ² Ti Judas a mángtokyon ni Jesus ay tukoy na i lugaran itod, dipo pirme hod a maipun di Jesus sakay u disepulus na hide. ³ Kanya immangay hod ti Judas, kaguman na u makpal a sundalo a Romano sakay u guwardiya hide tu templo a pinaangay hod nu puno nu Saserdote hide sakay Pariseo. Tehhod hide a tawed a simbuwan sakay te mga armas hide. ⁴ Tukoy ni Jesus u atanan a mangyare nikuna, kanya tinagbu na hide sakay tinanung, “Ti deya ehyukán moyay?” ⁵ Timmábbeg hide, “Ti Jesus a taga-Nazaret” Kinagi ni Jesus nide, “Hikán itod.” U mángtokyon ni Jesus a ti Judas ay kaguman hod. ⁶ Nikuna a kagiyán ni Jesus a siya u ehyukán de ay neatras hide sakay natumba tu luta. ⁷ Kanya nagtanung a huway ti Jesus, “Ti deya u ehyukán moy?” Timmábbeg hide a huway, “Ti Jesus a taga-Nazaret.” ⁸ Kinagi nide ni Jesus, “Awan beman kinagi ku dán nikam a hikán itod? Ni hikán ngane u ehyukán moy ay pakultaden moy dán a lumakad i kakagumanan kuwe hide.” ⁹ Kinagi itod ni Jesus, tán matupad u dasal na, “Ama awan ti maski essa a nepahamak tu inyatád mo nikán,” ¹⁰ Binagut ni Simon Pedro u áttak na, sakay tinegpas na u alipin nu pinakapuno nu Saserdote hide. Nahipang u kawanan a talinga nu utusan a u ngahan na ay Malco. ¹¹ Kinagi ni Jesus ni Pedro, “Isahungan mo i áttak muwe. Tu ileng mu beman ay awan ko tiisán u pághirap a iyatad nikán nu Ama?” ¹² Kanya dinakáp nu sundalo hide a Romano ti Jesus, pinagdipalonguwan hide nu kapitan de, kaguman u guwardiya hide a Judio sakay pinungo de siya. ¹³ Inyangay de siya tu kán Anas a katugngan ni Caifas. Ti Caifas u pinakapuno nu Saserdote hide ti itod a taon. ¹⁴ Siya u nagpayo tu puno nu Judio hide a mas maganda a essa la u matay a tolay kasera mepahamak u buo a bansa. ¹⁵ Ti Pedro ay immunonod ni Jesus, kaguman na u essa a disepulus. Sakay tukoy nu disepulus u pinakapuno a Saserdote kaya nakasáddáp siya tu kudal a kaguman ni Jesus. ¹⁶ Pero ti Pedro ay nagwahak a te taknág tu pintuwan nu kudal. U disepulus a kilala nu pinakapuno a Saserdote ay simmole tu luwas sakay nákpágguhon tu bábbey a mágbantay tu pintuwan sakay pinasáddáp na ti Pedro. ¹⁷ Kinagi nu bábbey ni Pedro, “Awan beman essa ka tu disepulus ni tolayan ina?” Timmábbeg ti Pedro, “Awan!” ¹⁸ Nadid, ti itod a gibi ay madágnen, kanya mágtaknág tu lebut nu apoy u utusan hide sakay u guwardiya hide para magendu, maski ti Pedro ay nákhalo bi hod nide para mákpagendu. ¹⁹ Tu disalad ay tinanung nu pinakapuno nu Saserdote hide ti Jesus, tungkul tu disepulus na hide sakay tu itáttoldu na hide. ²⁰ Timmábbeg ti Jesus, “Bulgaranák a magupos tu tolay hide. Pirmiyák a magtoldu tu Sinagoga hide, oni tu templo, ni hádya a magipun ipun u atanan a Judio hide. Awanák nagtoldu ti lihim. ²¹ Bakinák moy a tanungán nadid? U dapat moy a tanungán ay u nakasaneg hide nikán, tukoy de ni ánya u kinákkagi ko.” ²² Nikuna a makagi iye ni Jesus ay dinapang siya nu essa a guwardiya a adene nikuna. Kinagi nu guwardiya, “Bakin a konna ka hina a tumábbeg ti pinakapunuwe ni Saserdote?” ²³ Tinábbeg siya ni Jesus, “Ni te madukássák a kinagi, patunayan mo iye. Pero ni tatahoden u kinagi ko, bakinák mo a dinapang?” ²⁴ Ti Jesus mentaras a nakapungo ay impeangay ni Anas tu kán Caifas, u pinakapuno a Saserdote. ²⁵ Nadid, nikuna a mágtaknág ti Simon Pedro a adene tu apoy a magendu. Tinanung siya nadid nu katoy hod hide, “Awan beman essa ka be tu disepulus na hide?” Impamen iye ni Pedro, “Awan.” ²⁶ Tinanung be siya nu essa tu utusan nu pinakapuno a Saserdote, a panganakán nu hinipangan na ti talinga, “Awan beman netan taka a kaguman na hod tu lugar a makpal a ponan nu Olibu?” ²⁷ Pero impamen dámman itod ni Pedro, sakay ti itod bi la ay nagtarakket u tandang a manok. ²⁸ Gábwat tu kán Caifas ay inyangay de ti Jesus tu páppágyanan nu gubernador. Magamulaldew dán ti itod. Awan simmáddáp u Judio hide tu páppágyanan nu gubernador dipo ayun tu Kautusan de, u sumáddáp tu bilay nu essa a bakán a Judio ay mebilang a madangat kanya awan maare a kuman. Tu pangapon tu pággala-ala tu kasayaan tu Págtaleb nu Anghel. ²⁹ Kanya ti Pilato a gubernador ay limmuwas sakay kinagi na, “Ánya i mebintang moyay ti tolayan iye?” ³⁰ Timmábbeg hide, “Ni awan siya naggimet ti madukás ay awan mi he siya inyangay.” ³¹ Kinagi ni Pilato nide, “Hatulan moy dán siya tu sadile moy a Kautusan.”Timmábbeg u puno nu Judio hide, “Pero awan kame ti kapangyariyan a humatul ti kamatayan maskin ti deya.” ³² Nangyari iye para matupad u kinagi ni Jesus, tungkul tu kákkatay na a danasán na. ³³ Huway a simmáddáp ti Pilato tu palasyo na sakay impadulaw na ti Jesus, sakay tinanung na, “Hiko beman u hare nu Judio hide?” ³⁴ Timmábbeg ti Jesus, “Hiko beman ginábwatanay ni ina a tanung oni tehhod la a nagkagi niko tungkul nikán?” ³⁵ Timmábbeg ti Pilato, “Judiowák beman? Inyangay ka he nikán nu kabanuwan mo hide sakay tu puno nu Saserdote hide. Ánya beman ginimet muway?” ³⁶ Kinagi ni Jesus nikuna, “U kahariyan ko ay bakán a he ti munduway. Ni katoy he u kahariyan ko ay u alagad ko hide ay mákpaglaban para awanák madakáp nu Judio hide. Pero bakán a he u kahariyan ko.” ³⁷ Kinagi ni Pilato, “Ni konna hod ay essa ka a hare?” Timmábbeg ti Jesus, “Tama u kinagi mo a hariyák. Sakay ina u dahilan ni bakin a neenakák sakay immangay he ti munduwáy ay para ibaheta u tatahoden. U atanan a makatukoy tu tatahoden ay mágsaneg nikán.” ³⁸ Tinanung siya ni Pilato, “Ánya beman u tatahoden?” Tu pákkakagi he ni Pilato ay limmuwas siya sakay kinagi na tu Judio hide, “Awanak ti ketan a kasalanan ni tolayan iye. ³⁹ Pero ayun tu kaugaliyan moy ay dapaták a magpalaya ti essa a pireso kada Kasayaan nu Pággala-ala nu Págtaleb nu Anghel. Kanya gusto moy beman a palayaan ko u Hare nu Judio hide?” ⁴⁰ Pimmákhaw u tolay hide, “Bakán a siya nan ti Barabas!”(Ti Barabas ay essa a tulisan.)

¹ Nadid, pinaalap ni Pilato ti Jesus sakay pinabálbág na. ² Sakay u sundalo hide ay naggimet hide ti kurona a saet sakay inkurona de tu ulo ni Jesus. Sakay sinulutan de siya ti badu a kulay ni ubi dipo sa itod u kurol nu badu nu hare. ³ Essa-essa hide a immadene nikuna sakay ininsulto de siya sakay kinagi de, “Mabiyag u Hare nu Judio hide hanggan-hanggan!” sakay dinapang de siya. ⁴ Kanya limmuwas a huway ti Pilato sakay kinagi na tu tolay hide, “Mágsaneg kam! Ta iyatubang ko siya nikam. Gusto ko a matukuyan moy a awanák ti netan a kasalanan na!” ⁵ Nikuna a limmuwas ti Jesus a naka kurona ti saet sakay nakasulot ti kurol ubi a damit ay kinagi ni Pilato, “Ilingán moy siya!” ⁶ Nikuna a ketan siya nu pupuno hide a Saserdote sakay tu guwardiya hide ay pimmákhaw hide, “Ipako siya tu kudus! Ipako siya tu kudus!” Pero timmábbeg ti Pilato, “Hikam dálla u mangalap nikuna a mángpako tu kudus, dipo ni hikán la ay awanák ti ketan a kasalanan na.” ⁷ Pero impilit nu Judio hide, “Tehhod kame a Kautusan. Sakay ayun ti iye ay dapat siya a matay dipo magkukunware siya a Anak nu Diyos.” ⁸ Nikuna a masaneg iye ni Pilato ay lalu siya a nanteng. ⁹ Kanya huway na a inyangay ti Jesus tu disalad nu palasyo na sakay tinanung na, “Taga-hádya ka?” Pero awan timmábbeg ti Jesus. ¹⁰ Kanya kinagi ni Pilato, “Bakin a umáddák mo a tábbegán? Awan mu beman tukoy a te kapangyariyanák a mangpalaya niko oni ipako ka tu kudus?” ¹¹ Timmábbeg ti Jesus, “Awan ka ti kapangyariyan nikan ni awan inyatád niko nu Diyos. Kanya mas dakál u kasalanan nu tolay a náng-angay he nikán.” ¹² Nikuna a masaneg iye ni Pilato ay lalo siya a nasoh a palayaán ti Jesus. Pero nagpákhawan u Judio hide, “Ni palayaán mo i tolayan ina ay kontara ka tu hare tam ti Roma! Dipo u deyaman a mángkagi a hare siya ay kadima nu Hare.” ¹³ Nikuna a masaneg iye ni Pilato ay inluwas na ti Jesus tu palasyo na. Káttapos, immetnod siya tu áetnuden nu tagahatul, tu lugar a ni dulawán ay plasa a samento (tu upos a Hebreo ay “Gabata.”) ¹⁴ Nadid ay dispiras dán nu kasayaan a Pággala-ala nu Pagtaleb nu Anghel, tamo dán a tanghale. Kinagi ni Pilato tu Judio hide, “Sa iye u hare moy!” ¹⁵ Pero nagpákhawan u Judio hide, “Bunuwán siya! Ipako siya tu kudus!” Kinagi ni Pilato nide, “Ipako ko beman tu kudus u hare moy?” Timmábbeg u puno nu Saserdote hide, “Awan kame ti iba a hare nan u hare tam ti Roma!” ¹⁶ Kanya inyatád ni Pilato ti Jesus nide para ipako tu kudus. ¹⁷ Sakay limmuwas hide tu banuwan. Impabáklay de ni Jesus u kudus na a paangay tu lugar a dáddulawán a “Bungo” (a tu upos ni Hebreo ay Golgota). ¹⁸ Impako di hod ti Jesus tu kudus kaguman na u duwwa a lállake, essa tu kawanan sakay essa tu kawihe, hod ti bállog ti Jesus. ¹⁹ Nagsulat be ti Pilato sakay impekáppát na tu kudus. U nedátton tu nepákkát ay, “Ti Jesus a taga-Nazaret u Hare nu Judio hide.” ²⁰ Nakasulat iye tu upos ni Hebreo, Romano, sakay Griego. Makpal a Judio u nakabasa ti iye, dipo adene tu banuwan u lugar ni hádya de a impako ti Jesus tu kudus. ²¹ Kinagi nu pupuno hide nu Saserdote ni Pilato a, “Dyan mo dapat insulat a Hare nu Judio hide nan, ‘Kinagi ni tolayan iye a siya kan u hare nu Judio hide.”’ ²² Pero tinábbeg hide ni Pilato, “Ni ánya nesulat kuwáy ay awan dán ti makapangbagu.” ²³ Nikuna a mepako dán nu sundalo hide ti Jesus, ay inalap de u damit na sakay hinati-hate de ti áppat, tággessa a parte u balang sundalo. Inalap di be u damit na a pangdisalad, a nadihop a buo awan iye nahate oni te nagtongkuwan sapul ti ontok hanggan ti sidung. ²⁴ Kinagi nu essa a sundalo, “Diyan tamon iye pamághatiyán. Mamágbunutan kitam dálla ni ti deya keangayanay ni iye.” Nangyare iye para matupad u kinagi tu Kasulatan a, “Pinamághate-hati de u damit ko, sakay namágbunutan hide tu damit ko a pangdisalad.”Sakay iye ngane u ginimet nu sundalo hide. ²⁵ Nadid, mágtaknág u ina ni Jesus tu sadát nu kudus na sakay u wadi na a bábbey a ti Maria a kabanga ni Cleofas, sakay katoy bi hod ti Maria a Magdalena. ²⁶ Nikuna a ketan ni Jesus a mágtaknág hod tena na sakay kasadát na u pinakamamahal na a disepulus ay kinagi na nena na, “Ináng, ináng ibilang mo siya a kumán a sadile mo anak!” ²⁷ Sakay kinagi na be tu disepulus na, “Ibilang mo siya a kumán a sadile mo a ina.” Sapul ti itod ay nágyan dán u ina ni Jesus tu páppágyanan ni disepulusan itod. ²⁸ Tukoy ni Jesus a natapos na dán u atanan a tarabaho na, sakay tán matupad u katoy tu Kasulatan ay kinagi na, “Mauwawák.” ²⁹ Tehhod hod a essa a malukung a putat ti alak. Imbisa hod nu sundalo hide u damit, sakay insálpet de tu pinget nu kayo a isopo sakay inyadene de tu labi ni Jesus. ³⁰ Nikuna a masápsáp dán ni Jesus u alak ay kinagi na, “Natapos dán.” Indukog na u ulo na sakay nabágsutan siya ti angás. ³¹ Ti itod ay Aldew nu Paghanda, sakay tu kadimadimangan ay mahalaga dán a Aldew nu Káimang. Dipo umád nu Judio hide a mewahak tu kudus u bangkay hide tu Aldew nu Káimang, ay inaged de ni Pilato a pusingán u tikád nu nepako hide para alisto hide a matay, sakay ibutan a agad u bangkay hide. ³² Kanya iye ngane u ginimet nu sundalo hide. Pinuseng de u tikád nu duwwa a kaguman ni Jesus a nepako. ³³ Pero tu káadene de ni Jesus ay netan de a patay dán siya, kanya awan di dán pinuseng u tulang na hide. ³⁴ Pero u essa a sundalo ay pinika na u hawes ni Jesus tu gayang, sakay bigla a nagbulos u dige ay tu dinom. ³⁵ Hikán a nagsulat ti iye ay netan ko u nangyare. Kanya tukoy moy a tatahoden u patunay ko a iye nikam. Tukoy ko atatahoden u kagiyan ko sakay ikagi ko iye nikam para maniwala kam. ³⁶ Nangyare i bagayan iye hide para matupad u kinagi na tu Kasulatan,“Awan ti mapuseng maski ni essa tu tulang na hide.” ³⁷ Kinagi be tu essa pa a bahagi nu Kasulatan, “Áelingán de u tolay a ginayang de.” ³⁸ Káttapos ni iye, ti Jose a taga-Arimatea ay immangay tu kán Pilato para mák-aged ti permiso a mangalap tu bangkay ni Jesus. (Ti Jose ay essa a disepulus ni Jesus, pero lihim la dipo manteng siya tu pinuno nu Judio hide.) Sakay pinakultaden siya ni Pilato; kanya inalap na u bangkay ni Jesus. ³⁹ Inaguman siya ni Nicodemo, u lállake a bimmisita tu itod ni Jesus tu essa a gibi. Tettawed ti Necodemo a mga tallo pulo a kilo a pasáppot a halo-halo a gábwat ti kayo. ⁴⁰ Inalap de u bangkay ni Jesus, pinasáppotan de u damit, a inyagum di bi hod u masáppot, ta sa itod u ugale nu Judio hide ni maglábbáng. ⁴¹ Tu adene nu nángpakuwan de ni Jesus ay te mammulaan hod, te essa hod a bigu a páglábbángngan a kuweba a awan palla nagamit. ⁴² Inlábbáng di hod ti Jesus dipo adene, sakay aldiwan itod ay aldew nu paghanda para tu Aldew nu Kaimang.

¹ Nadid, tu dimadimang nu Simba, madidiklám palla ay immangay dán ti Maria Magdalena tu páglábbángngan. Káddemát na hod ay netan na a nabukasan dán u takáp nu páglábbángngan a bito. ² Kanya nagginan a sole ti Maria a immangay tu kán Simon Pedro sakay tu disepulus a mahal ni Jesus. Káddemát na ay kinagi na nide, “Inalap de u Panginoon tu páglábbángngan sakay awan mi dán tukoy ni hádya de a inyangay.” ³ Kanya nagginan ti Pedro a patamo tu páglábbángngan a kaguman u essa a disepulus. ⁴ Parehas hide a nagginan, pero mas mabilis u essa kasera ni Pedro, kanya nedipalongo a nakademát tu páglábbángngan. ⁵ Inleget na u disalad nu páglábbángngan. Netan na u lino a damit hide a nangbalut de ni Jesus, pero awan siya simmáddáp. ⁶ Simmunud nikuna a dimmemát ti Simon Pedro, sakay simmáddáp siya tu disalad nu páglábbángngan. Netan na u lino a damit hide a te dátton, ⁷ maski u tela a nangbalut de tu ulo ni Jesus ay nakáppel dán, sakay nebukod. ⁸ Sakay u disepulus a nedipalongo ay timmagubet be ni Pedro a simmáddáp tu páglábbángngan. Tu pákketa na a konna hod ay naniwala siya a nabiyag dán ti Jesus. ⁹ Dipo awan di palla naintendiyan u nakasulat tu Kasulatan a kailangan talaga mabiyag a huway ti Jesus. ¹⁰ Káttapos ni itod ay nagsole u duwwa a disepulus. ¹¹ Pero ti Maria ay mágtaknág tu luwas nu páglábbángngan a mágsasangitán. Mentaras a magsanget siya ay limmeget siya tu disalad nu páglábbángngan, ¹² sakay netan na u duwwa a anghel a nakadamit ti mapudew. Mággetnod hide tu nángdáttonan tu bangkay ni Jesus. U essa ay hod tu banda tu ulo, u essa be ay hod tu banda tu táttikádden na. ¹³ Tinanung de ti Maria, “Bakin a magsanget ka?” Timmábbeg siya, “Te nangalap tu Panginoon ko, awan ko tukoy ni hádya de a inyangay.” ¹⁴ Tu pákkakagi na ti iye ay simmuleg siya, netan na ti Jesus a mágtaknag pero awan na natengge a ti Jesus itod. ¹⁵ “Bakin magsanget ka?”Kagi nikuna ni Jesus. “Ti deya u ehyukán mo?” Tu buung akala na a siya u magmula hod ay timmabbeg ti Maria, “Maisto, ni inalap mo u bangkay nu Panginoon ko, itoldu mo nikán ni hadya mo a inyangay ta alapán ko siya.” ¹⁶ Kinagi nikuna ni Jesus, “Maria!” Tu kássuleg na ay pimmákhaw siya tu upos ni Hebreo, “Rabboni!” (u gusto na a kagiyán ay “Maisto.”) ¹⁷ Kinagi ni Jesus, “Diyanák mo tawiden, dipo awanák palla simmole tu Ama. Umangay ka tu kákkapatkákka ko sakay kagiyán mo a soliyák dán tu Ama ko a Ama mo be, sakay tu Diyos ko a Diyos mu be.” ¹⁸ Kanya immangay ti Maria Magdalena tu disepulus hide ni Jesus sakay imbaheta na nide, “Netan ko u Panginoon!” Sakay kinagi na nide u ipekagi ni Jesus. ¹⁹ Nadid, nikuna a gibi dán ti aldiwan itod nu Simba ay naipun u disepulus hide ni Jesus. Ingkandadu de u pintuwan hide dipo tu ánteng de tu pinuno nu Judio hide. Bigla a dimmemát ti Jesus sakay timmaknág tu bállog de, sakay kinagi na,“Magkahod kam nakwa ti kapayapaan.” ²⁰ Tu pákkakagi na ti iye ay impeta na u talingo na hide tu kamát na sakay tu hawes na. Tunay u saya nu disepulus hide nikuna a ketan de u Panginoon. ²¹ Kinagi a huway ni Jesus iye, “Magkahod kam nakwa ti kapayapaan. Ni kodyaák he a pinaangay nu Ama ay konna be hod a suguwan takam.” ²² Tu pákkakagi na ti iye ay inangássan na hide sakay kinagi na, “Tanggapán moy u Banal a Ispirito. ²³ U tolay a magsise tu kasalanan na sakay kagiyán moy a pinatawad dán siya nu Diyos ay talaga napatawad dán siya. Pero u tolay a umád a magsise tu kasalanan na ay kagiyán moy awan siya patawadán nu Diyos, talaga awan siya patawadán.” ²⁴ Nadid, ti Tomas a dáddulawán de a kambal a essa tu sapulo ay ti duwwa a disepulus ay awan de nakaguman nikuna a pimmeta nide ti Jesus. ²⁵ Kanya imbaheta de nikuna a netan de u Panginoon. Pero timmábbeg siya nide, “Awanák maniwala mentaras a awan ko ketan u talingo nu pako hide tu kamát na, sakay mesáddáp u kamát ko tu talingo na hide tu hawes na.” ²⁶ Kállipas nu walo a aldew ay huway a naipun u disepulus hide ni Jesus tu disalad nu bilay. Kaguman di dán hod ti Tomas. Pero maski ni nakakandadu u pintuwan hide ay dimmemát ti Jesus sakay timmaknág tu bállog de, sakay kinagi na, “Magkahod kam ti kapayapaan.” ²⁷ Kinagi ni Jesus ni Tomas, “Ilingán mo i kamát kuwáy hide sakay tawiden mo. Isáddáp mo be ikamát muwe ti hawes kuwáy. Diyan ka magalanganin; maniwala ka dán.” ²⁸ Kinagi ni Tomas nikuna, “Hiko ngane u Panginoon ko sakay Diyos ko!” ²⁹ Kinagi ni Jesus nikuna,“Maniwala ka beman dipo netanák mo? Mapalad u maniwala hide maski ni awanák de netan.” ³⁰ Nadid ay ginimet ni Jesus u makpal a makataka-taka tu atubang nu disepulus na hide. Pero awan hide nesulat ti libruwáy a iye. ³¹ Pero i libruwan iye ay nesulat para maniwala kam a ti Jesus u Cristo a Anak nu Diyos. Ni maniwala kam nikuna, ay magkahod kam ti biyag a awan ti kahád.

¹ Nadid, káttapos ni itoday hide a pangyayare ay pimmeta dámman ti Jesus tu disepulus na hide tu minalno nu Tiberias. Konna he u nangyare: ² Ti itod ay mamágkaguman di Simon Pedro, ti Tomas a Kambal, sakay ti Nataniel a taga-Cana tu prubinsiya ni Galilea, a anak hide ni Zebedeo, sakay tu duwwa pa a disepulus. ³ Kinagi nide ni Simon Pedro, “Mangikanák.” Timmábbeg hide, “Mákkuyog kame.” Kanya simmakay hide tu abang a dimmitaw. Pero awan hide ti nalap ti gibiyan itod. ⁴ Nikuna a magamulaldew dán ay tehhod hide a netan a mágtaknág tu digdig. Pero awan de tukoy a ti Jesus itod. ⁵ Kinagi nide ni Jesus, “Amigu ko hide, te nalap kam?” Timmábbeg hide, “Awan.” ⁶ Kinagi ni Jesus nide, “Iyagton moy i pante moye para makalap kam.” Ginimet di ngane iye. Kaya halus a awan de mahela u pante de tu káppal nu nalap de a ikan. ⁷ Kinagi nu disepulus a mahal ni Jesus ni Pedro, “U Panginoon itod!” Nikuna a masaneg iye ni Pedro ay insulot na u damit na a ineklas na, simmegbu siya tu dinom, sakay nagnangoy a patamo tu digdig. ⁸ U agum a disepulus a katoy tu abang ay nagsole be tu digdig a hela u pante de a putat ti ikan, dipo manga siyam la a pulo a metros u kadeyo de tu digdig. ⁹ Tu káawas de tu digdig ay netan di hod u maggangat a apoy a tehhod dán a neapoy a ikan, sakay ti sasangan a tinapay. ¹⁰ Kinagi ni Jesus nide, “Máng-angay kam pa he ti sasangan a ikan a nalap moy.” ¹¹ Kanya simmakay ti Pedro tu abang sakay hinela na tu digdig u pante a putat ti dáddakkál a ikan, a datos ay ti limma pulo ay ti tállo a atanan. Pero maski ni sa konna hod a kakpal u ikan ay awan nasida u pante. ¹² Kinagi ni Jesus nide, “Magaramusal kitam pa.” Pero maski ni essa tu disepulus hide ay awan ti nagtanung ni Jesus ni ti deya siya. Tukoy de a siya u Panginoon. ¹³ Nangalap ti Jesus tu tinapay sakay inyatád na nide. Konna bi hod u ginimet na tu ikan. ¹⁴ Iyedán u katállo a beses a káppeta ni Jesus tu disepulus na hide káttapos na a nabiyag a huway. ¹⁵ Nikuna a matapos dán hide a magaramusal ay kinagi ni Jesus ni Simon Pedro, “Simon a anak ni Juan, mahalák mu beman a higit tu págmahal de?” Timmábbeg ti Pedro, “On, Panginoon, tukoy mo a mahal taka.” Kinagi ni Jesus, “Pakanán mo u tupa ko hide.” ¹⁶ Tinanung siya a huway ni Jesus, “Simon a anak ni Juan, mahalák mu beman?” Timmábbeg ti Pedro, “On, Panginoon, tukoy mo a mahal taka.”Kinagi ni Jesus, “Alagaan mo u tupa ko hide.” ¹⁷ Tu katállo a beses ay kinagi ni Jesus, “Simon a anak ni Juan, mahalák mu beman a talaga?” Nalungkut ti Pedro dipo tállo na dán siya a beses a tanungán ni mahal na be man siya. Kanya timmábbeg siya, “Panginoon, tukoy mo u atanan a bagay. Tukoy mo a mahal taka.” Kinagi ni Jesus nikuna, “Pakanán mo u tupa ko hide.” ¹⁸ Kinagi ni Jesus, “Pakatandaan mo, nikuna anak ka palla ay hiko mismo u mangbadu tu sadile mo, sakay umangay ka la maski hádya gusto mo. Pero tu káttanda mo ay iyolnat mola i kamát muwe hide sakay iba dán u mangbadu niko, sakay iyangay na ka tu lugar a awan mo gusto.” ¹⁹ Kinagi iye ni Jesus para ipaliwanag na ni Pedro ni kodya siya a matay, sakay ni kodya na a maparangalan u Diyos. Kanya kinagi ni Jesus ni Pedro, “Ahiganák mo.” ²⁰ Nadid ay simmuleg ti Pedro sakay netan na a umusoseg nide u disepulus a mahal ni Jesus. Siya u disepulus a mágsandig ni Jesus nikuna mangapon hide, sakay siya u nagtanung ni Jesus ni ti deya u mángtokyon nikuna. ²¹ Nikuna a ketan siya ni Pedro ay tinanung na ti Jesus, “Panginoon, ánya be i mangyariyay nikuna?” ²² Timmábbeg ti Jesus, “Ni gustuwán ko a mabiyag siya hanggan tu kássole ko, ay maánya beman niko? Sumunud ka la nikán.” ²³ Dipo ti iye ay kimmalat u baheta a awan mata-matay iye a disepulus. Pero awan kinagi ni Jesus a awan siya matay. U kinagi nala ay, “Ni gusto ko siya a mabiyag hanggan tu kássole ko, ay maánya beman niko?” ²⁴ Hikán u disepulus a mangpatunay ti bagayan iye hide. Sakay u insulat ko hide ay u mismo a netan ko. Kanya tukoy ko a tatahoden u kagiyán ko. ²⁵ Makpal pa a bagay u ginimet ni Jesus. Pero ni nesulat i atananan iye, ay kulang u buo a mundu para pangdattonan tu libro hide a mesulat.