Santiagu

Santiagu

¹ Hikán ti Santiago a alipin nu Diyos sakay alipin nu Panginoon Jesu-Cristo. Magsulaták tu atanan a Judio a mánnampalataya tu Diyos a katoy tu iba-iba a lugar ti munduway. Kumusta kam la hina a atanan. ² Kákkapatkákka ko hide, magsaya kam ni makadanas kam ti iba-iba a pagsubuk, ³ dipo tukoy moy dán a u pagsubuk hide ay máng-atád ti katatagen tu pánnampalataya moy. ⁴ Kanya dapat kam a magtággád ti hirap sakay diyan manghina ti isip tánni magin ganap kam sakay u pánnampalataya moy ay awan ti kulang. ⁵ Ni ti deya man u kulang ti karunungan ay mangaged kam tu Diyos tánni atádden na kam dipo makákkagbiyán siya awan mágkemot sakay awan na ipasanike u magaged nikuna. ⁶ Pero u mangaged ay dapat a magtiwala tu Diyos sakay diyan magduwwa-duwwa, dipo u tolay a magduwwa-duwwa ay kumán a tagmák tu diget a iyáppah nu pahás maskin hadya. ⁷ U tolay a magduwwa-duwwa ay diyan dán umasa a makatanggap ti maskin ánya a gábwat tu Panginoon. ⁸ Dipo ni u essa a tolay ay magduwwa-duwwa, awan be siya mapagkatiwalaan tu gággimitán na. ⁹ Magsaya kam kákkapatkákka, maskin mahirap kam dipo inlangkaw kam nu Diyos. ¹⁰ U kákkapatkákka tam a mágkayaman ay dapat a magsaya maskin inbaba nu Diyos u karangalan de, dipo u kayamanan ay lumipas konna tu bulaklak nu lamon. ¹¹ Konna be tu lamon a ni makagkag tu masinggit a sinag ay malanás, mahaghag u bulaklak na sakay mawan u ganda na. Konna labe tu tolay a mayaman, mentras a magpayaman matay labe siya. ¹² Pinagpala u tolay a manatile a matatag tu pánnampalataya na tu pagsubuk hide sakay kahirapan, dipo ni malampasan de itod ay magkahod hide ti biyag a awan ti kahád a impananto nu Diyos tu atanan a magmahal nikuna. ¹³ Ni u essa a tolay ay matokso tu pagsubuk a dumemát nikuna ay diyan na kagiyán a gábwat itod tu Diyos dipo umád nu Diyos u mágkadukás hide a bagay. Awan siya matokso nu madukás sakay awan na be toksuwán maskin ti deya. ¹⁴ Matokso u tolay ni maakit siya tu madukás a kagustuwan nu pilas na. ¹⁵ Sakay ni sunudán na u madukás a kagustuwan na ay magkasala siya, sakay ni itulos-tulos na la u págkakasala na u risulta na ay kamatayan. ¹⁶ Kákkapatkákka ko hide, dyan kam palálloko. ¹⁷ Atanan a mágkaganda a bagay ay inyatád nu Diyos a nanggimet tu aldew, bulan, biton ay tu langet. Sakay maskin magbagu iye a atanan ay awan siya magbabagu nikitam maskin nikan. ¹⁸ Ayun tu kaluuban nu Diyos ay ginimet na kitam a anak na hide tu pamamag-itan nu impakapospos na a upos na a tatahoden, tánni magin pinakamahalaga kitam tu atanan a linalang na. ¹⁹ Pakatandaan moy iye kákkapatkákka ko hide, dapat kam a handa a mágsaneg, isipán tam pa ti maayus u kagiyán tam bagu a magupos sakay diyan agad a maiyamut. ²⁰ Dipo u iyamut ay awan makatulung tu tolay tánni magin matuwid tu pangileng nu Diyos. ²¹ Kanya adággen moy dán u atanan nu kadukássan sakay tu agum pa a mágkadangát a gimet, sakay tanggapán moy dán u upos nu Diyos a indátton na tu isip moy dipo siya u mángligtas nikam. ²² Dyan kitam tagapágsaneg la tu upos nu Diyos ni awan sunudán tam u kákkagiyán na, dipo ni awan ay lállokuwán tam la u sadi-sadile tam. ²³ Dipo ni mágsasanigán kitam la tu upos na sakay awan tam igimet ay kumán kitam la a nággaspeho, ²⁴ sakay tu káadág na ay nalimunan narán u idsura na. ²⁵ Pero pagpalaán nu Diyos u atanan a gimitán nu tolay a tulos-tulos a magadal sakay mangtupad tu upos nu Diyos a mangpalaya nikitam gábwat tu kasalanan, sakay bakán la tagapágsaneg a makalimon a agad. ²⁶ Ni tu pangisip nu tolay ay makidiyos siya pero awan na labe kaya a pugáddán u dila na, ay lállokuwán nala u sadile na, dipo awan ti pinagserserbiyan u pakidiyos na. ²⁷ U ibilang nu Diyos a Ama tam a makidiyos ay u tumulung tu ulila sakay tu bábbey hide a bilo tu kahirapan de, sakay awan mák-aheg tu mágkadukás hide a gimet ti munduway.

¹ Kákkapatkákka ko hide, dipo mánnampalataya kitamon ni Jesu-Cristo a Panginoon tam a dakila ay dapat awan kitam ti paboran a tolay. ² Mara ni te sumáddáp tu pággipun-ipunan moy a essa a mayaman a nakasangkalan ti ginto sakay nakabadu ti mágkamahal a badu, sakay dummemát be u essa a mahirap a nakabadu ti pisad-pisad, ³ ni u asikasuwán moy laay ay u nakabadu ti mágkamahal sakay atádden ti pággetnudan na, pero u mahirap ay pinabayan moy la a mággetnod tu dáttag oni mágtaknág la, ⁴ awan beman u asikasuwán moy la ti maayus ay u mágkayaman hide, sakay u mágkahirap hide ay api-apiyán moy la? Awan tama u pághatul moy dipo makasadile ina. ⁵ Mahal ko hide a kákkapatkákka, mágsaneg kam! Awan beman pinile nu Diyos u mágkahirap hide ti munduwan iye tánni magin mayaman ti pánnampalataya, sakay magin tagapagmana tu kahariyan a impananto na tu atanan a magmahal nikuna? ⁶ Pero bakin a imemenos moy la u mágkahirap hide? Awan beman u mágkayaman hide u mangape-ape nikam sakay mángkaso nikam? ⁷ Awan beman hide u mangsásseste tu dakila a ngahan ni Jesu-Cristo a nangsakup nikitam? ⁸ Ni sunudán moy u utus nu Diyos a katoy tu Kasulatan a, “Mahalán moy u kapareho moy a tolay a konna tu págmahal moy tu sadile moy a bággi,”ay nagimet moy dán u tama. ⁹ Pero ni u mágkayaman la hide u igalang moy sakay iba u pangileng moy tu mágkahirap hide ay nagkasala kamon ayun tu utus nu Diyos kanya parusaan nakam. ¹⁰ U tolay a simmuway tu essa la a utus, maskin nasunud na u agum ay sinuway na padi u atanan nu Kautusan. ¹¹ Dipo inyutus nu Diyos a, “Dyan kam mangilállake oni mangibábbey.”Tehhod pa a utus a,“Dyan kam mamuno.” Nadid maskin awan kam nangilállake oni nangibábbey pero namuno kam ay sinuway moy padi u Kautusan. ¹² Kanya magingat kam tu pággupos moy sakay tu gimet moy, dipo hatulan kam nu Diyos ayun tu Kautusan a nangpalaya tu tolay. ¹³ Awan kagbiyan nu Diyos u tolay a awan makákkagbiyán pero u tolay a makákkagbiyán ay awan dapat a manteng tu pághatul nu Diyos. ¹⁴ Kákkapatkákka ko hide, ánya wád serbiyay nu pánnampalataya nu essa a tolay a awan ketan tu gimet na? Meligtas beman wád siya nu konna hina a pánnampalataya? ¹⁵ Mara ni awan ti mesulot sakay awan ti makan ti aldew-aldew u kapátkákka mo, ¹⁶ sakay kagiyán moy nikuna, “Kagbiyan ka nakwa nu Diyos a maketa ti badu sakay makan moy,” makatulung beman itod ni awan moy atádden tu kailangan de? ¹⁷ Konna bihod u pánnampalataya; ni awan aguman tu maganda a gimet ay patay dipo awan iye ti serbi. ¹⁸ Tehhod a magkagi a, “Manampalatayaák la para maligtas; u agum ay maggimet la ti maganda ay tama dán.” Sa iye u tabbeg ko hina,“Kodya mapatunayan nu tolay u pánnampalataya na ni awan ketan tu gimet na a maganda. Pero para nikán u kássampalataya ko ay ketan tu pággimet ko ti maganda.” ¹⁹ Awan beman maniwala kam a eessa la u Diyos? Maganda ina! Pero isipán tam a maskin u dimonyo hide ay maniwala be tu Diyos, sakay magpágpág pa ngane hide ti ánteng. ²⁰ Hikam a awan makaintendi! Bakin? Kailangan kubeman a patunayan nikam a awan ti pinagseserbiyan u pánnampalataya a awan ti gimet? ²¹ Awan beman na saya u Diyos tu ninuno tam a ti Abraham dipo tu ginimet na nikuna a inyalay na u anak na a ti Isaac tu Diyos? ” ²² U pánnampalataya na sakay tu maganda na a gimet ay magkaguman. Dipo u pangtupad na tu kinagi nu Diyos u paketaan a tatahoden u pánnampalataya na. ²³ Kanya natupad dán u sumássulat a,“Summampalataya ti Abraham tu Diyos, sakay imbilang siya nu Diyos a matuwid dipo tu pánnampalataya na.”Kanya dinulaw siya a amigu nu Diyos. ²⁴ He tam a ketan a ituring nu Diyos a matuwid u essa a tolay dipo tu gimet na hide a maganda, bakán la tu pánnampalataya na. ²⁵ Konna labe ni Rahab, u bábbey a bábbayaden; imbilang siya nu Diyos a matuwid dipo tu ginimet na a maganda, dipo pinatulos na tu bilay na u duwwa a Judio a magtik-tik tu lugar de. Intoldu na pa nide u iba a dilan tánni awan hide madakáp. ²⁶ Patay u bággi a awan ti kaliduwwa; konna labi hod, u pánnampalataya a awan ti gimet ay patay.

¹ Kákkapatkákka ko hide, awan dapat a makpal nikam u magin tagapagtoldu tu Upos nu Diyos, dipo tukoy moy dán a mas mahigpit u pághatul nikitam a tagapagtoldu hide nan tu agum. ² Atanan tam ay pirme a magkamale. U tolay a awan magkamale tu pággupos na ay essa dán siya a ganap a tolay dipo tukoy na a pugáddan u sadile na. ³ Isipán tam u kabayo hide, ni pirinuwan tam u labi na ay mapasuko tam maskin hádya tam a paangayan. ⁴ Ilingán tam be u barko hide, maskin tunay ti kadakál ni pagabutan ni mabegsák a pahás ti ditaw ay mepaangay nu kapitan maskin hádya tu pamamag-itan nu badit a timon. ⁵ Konna labi hina u dila nu tolay; kabaditan a parte nu bággi, pero tunay ti kadakál u magimet na a kapalaluwan. Sakay isipán moy dálla a kayang-kaya a matutod nu badit a apoy u tunay a lawak a talon. ⁶ U dila ay kumán a apoy, dipo iye paggabwatan nu makpal a kadukássán a mangpadangát tu buo tam a pagkatolay. Iye ay konna tu apoy a gábwat ti impiyerno a mangatád ti kaguluwan tu biyag tam. ⁷ U atanan a kalase a hayup a maglakad oni magahakas sakay u ikan hide tu dinom ay kaya a paamuwán nu tolay. ⁸ Pero hanggan nadid ay awan palla ti tolay a makapangpaamo tu dila. Tunay iye ti dukás, awan ti makapuga-pugád sakay putat ti kamandag a makatay. ⁹ U dila tam u gággamitán tam tu págpure tu Panginoon a Ama tam. Pero ni agum iye labe u gággamitán tam tu págsumpa tam tu kapareho tam a tolay a linalang nu Diyos a kahupa na. ¹⁰ Kanya tu eessa a labi a maggábwat u págpure sakay págsumpa. Male ina, kákkapatkákka ko hide. ¹¹ Awan maggábwat tu eessa a hábwayán u matablal a dinom sakay u maamba a dinom. ¹² Kákkapatkákka ko hide, awan maare a magbunga ti olibo u igus o u ubas ti igus. Konna labe ti iye a mas awan maare a magpisan a lumuwas u matablal a dinom sakay u maamba a dinom tu eessa a hábwayan. ¹³ Deya nikam u marunung sakay makaintendi? Patunayan moy iye tu pamamag-itan nu matuwid a kákkabiyag sakay u maganda a gimet bunga nu págpakababa sakay karunungan. ¹⁴ Pero ni pagka masásseniyán sakay pagka makasadile u hod tu puso moy, ay dyan moy ipagmadakál a tehod kam a karunungan dipo kakabuliyan moy la ina sakay awan nikam u tatahoden. ¹⁵ U konna hina a karunungan ay bakán a gábwat tu Diyos nan makamundu; gábwat tu diyablo, bakán a tu Banal a Ispirito. ¹⁶ Dipo ni pagka masásseniyán sakay pagka makasadile u maghare ay pirme a te kaguluwan sakay atanan a kalase ni mágkadukás a gimet. ¹⁷ Pero u tolay a te karunungan a gábwat tu Diyos, dipalongo tu atanan, ay te maayus a kákkabiyag, masássohán ti kapayapaan sakay mapagpugád. Awan na ipilit u sadile na a kagustuwan, makákkagbiyán, masipag a maggimet ti maganda, pare-pareho u pangileng na tu atanan a tolay sakay awan mapagkunware. ¹⁸ U tolay a tehhod a kapayapaan ay makapangatád labe ti kapayapaan tu agum a tolay. Iye u mangatád ti maganda a pamággagum.

¹ Ánya u nagsapulan nu pamágdadema moy? Awan beman u mágkadukás a hilig u gusto a maghare tu puso moy? ² Tehhod kam a gusto a alapán pero awan moy maalap, kanya maskin mamuno kam basta maalap moy la u gusto moy. Dipo tu pagkasoh moy tu bakán moy a kao kanya pamágdademaan moy. Kanya awan moy maalap u gusto moy dipo awan kam magaged tu Diyos. ³ Sakay maskin magaged kam tu Diyos ay awan nakam atádden dipo madukás u katoy tu isip moy sakay gusto moy la a masunud u mágkadukás moy hide a kagustuwan. ⁴ Hikam a awan tapat tu Diyos! Awan moy beman tukoy a ni pahalagaan tam u bagay hide ti munduway ay kadima tam u Diyos? Kanya u ti deyaman a sumunud tu madukás a gimet nu tolay ti munduway ay kadima nu Diyos. ⁵ Dyan moy isipán a awan ti seserbi u kinagi tu Kasulatan a, “Umád nu Banal a Ispirito a pinágyan nikitam nu Diyos a te kaagew tu págmahal tam.” ⁶ U tatahoden ay tunay ti kadakál u kagbi nu Diyos nikitam kanya tulungan na kitam, konna tu nesulat tu Kasulatan,“Kadima nu Diyos u palalo hide pero kagbiyan na u mapagpakumbaba hide.” ⁷ Kanya magpasakup kam tu Diyos, labanan moy ti Satanas tánni adeyuwan nakam. ⁸ Umadene kam tu Diyos tánni umadene siya nikam. Kanya hikam a makasalanan hide, iyemang moy dán u pággagimet ti madukás, sakay u pabagu-bagu hide ti isip, diyan kamon magduwwa-duwwa ti isip a sumunud tu Diyos. ⁹ Maglungkut kam ti husto, isanget moy u nagimet moy hide a kasalanan. U págtawa moy ay palitan moy dán ti págsanget sakay u kasayaan moy hide ay palitan moy ti pagkamalungkut. ¹⁰ Magpakababa kam tu atubang nu Diyos tánni ilangkaw na kam. ¹¹ Kákkapatkákka ko hide, dyan kam magupos ti madukás kontara tu kapareho moy a mánnampalataya, u magupos ti madukás sakay maghatul tu kapareho na ay kumontara sakay maghatul tu Kautusan nu Diyos. Ni konna hod ay bakán kamon a tagasunud nu Kautusan nan tagahatul dán. ¹² Eessa la u tagahatul sakay náng-atád tu Kautusan: U Diyos a te kapangyariyan a magligtas sakay magparusa. Ti deya ka a manghatul tu kapareho mo? ¹³ Mágsaneg kam nikán, hikam a magkagi a,“Nadid oni ilaw ay angay kame ti konna he a banuwan. Magsataon kame hod sakay magnegosyo tánni kumita kame ti dakal a pilak.” ¹⁴ Dyan kitam magupos ti konna hina dipo awan tam tukoy ni ánya i mangyariyay ni ilaw tu biyag tam. U biyag tam ay kumán la a asok a bigla la a magbuo sakay awan la malay ay mawan dán. ¹⁵ Nan konna he u dapat moy a kagiyán,“Ni kagustuwan nu Diyos a mabiyag kame palla ay iye o ni itod u gimitan me.” ¹⁶ Pero nadid ay mágmadakál kamon sakay maghambug, madukás ina! ¹⁷ Kanya ni tukoy nu essa a tolay u maganda pero awan na ginimet ay nagkasala siya.

¹ Nadid, hikam a mágkayaman hide, pakatandaan moy i kagiyán kuwáy, magsanget kam ti husto dipo tu garabi a hirap a dumemát nikam. ² Nágkabuyok dán u kayamanan moy hide sakay kinákkan dán nu ipás hide u badu moy hide. ³ Kinalawang dán u pilak sakay u ginto moy hide, sakay u kalawang a ina u mangpatunay a intagu moy la u kayamanan moy sakay awan moy intulung tu te kailangan hide. Káddemát nu dimodyan a aldew a umatubang kitam tu Diyos, u kalawang nu kayamanan moy u kuman a magsida nikam konna tu pagsida nu apoy dipo ina u mangpatunay a dapat kam a maparusaan. Dipo tu dimodyan a aldew u kayamanan moy la u pinappospos moy. ⁴ U tolay hide a pinagtarabaho moy tu araduwan moy ay mágdadaingán tu Diyos dipo awan moy binayaden. Nadid nasaneg dán nu Diyos a makapangyariyan tu atanan u daing de hide. ⁵ Nabiyag kam ti sagana sakay nágpapasarapán kam la ti biyag moye ti munduwan iye. Pero tu dimodyán a aldew ay te pananagutan kam. Kumán kam a u hayup a tumabe dipo makpal a makan, pero awan na tukoy a bunuwán bál siya. ⁶ Pinarusaan moy sakay pinabuno u tolay hide a awan ti kasalanan, maskin awan hide linumaban nikam. ⁷ Kákkapatkákka ko hide, magtiyaga kam be a maguhay tu káddemát nu Panginoon. Konna tu mágmula a nagtiyaga a maguhay tu uden sakay tu págbunga nu mula na hide. ⁸ Konna labe nikitam, dapat kitam be a magtiyaga sakay begsákkan tam u isip tam dipo adene dán a dumemát u Panginoon. ⁹ Kákkapatkákka ko hide, dyan kamon mamágsidaan tánni awan kam hatulan nu Diyos. Dipo adene dán u pághatul nu Diyos tu atanan a tolay. ¹⁰ Kákkapatkákka ko hide, ahigán tam u prupeta hide a nangaral tu Upos nu Diyos, nagtiyaga hide a nagtiis tu kahirapan de hide. ¹¹ Awan beman kákkagiyán tam a mapalad u tolay hide a mágtatiisán ti hirap. Nasaneg moy dán u tungkul ni Job tu págtiis na ti madágge a hirap, sakay tukoy moy dán be a tu katapusan ay pinagpala siya nu Panginoon. Ketan tam he a makákkagbiyán sakay mabait u Panginoon. ¹² Higit tu atanan kákkapatkákka ko hide, dyan kamon sumumpa, ni magpangako kam. Dyan moy kagiyán a,“Tistigu ko u langet!” oni “Tistigu ko u luta,”oni ánya paman a kabagay. Kagiyán moy dálla a “on ni on,”oni “awan ni awan,” tánni awan kam hatulan nu Diyos. ¹³ Tehhod beman nikam a maghirap? Dapat magdasal siya tu Diyos. Tehhod beman nikam a masaya? Dapat magkansiyon siya ti papure tu Diyos. ¹⁴ Tehhod beman a te saket nikam? Dapat pauwet na u pupuno hide nu mánnampalataya hide tánni ipagdasal de siya sakay pahidan ti langis tu ngahan nu Panginoon. ¹⁵ U panalangin a te pánnampalataya ay makapagpapiyya tu te saket, sakay pabegsákkán siya nu Diyos sakay patawadán na ni te kasalanan siya. ¹⁶ Kanya itapat moy tu balang essa u kasalanan moy hide sakay ipagdasal moy u balang essa tánni magpiyya kam. Dakál u magimet nu panalangin nu tolay a pirme a sumunud tu kagustuwan nu Diyos. ¹⁷ Konna ni Elias, maskin prupeta siya ay tolay padi siya a konna nikitam. Pero nikuna a nagdasal siya a dyan nakwa maguden, ay awan ngane naguden ti tállo a taon ay ti kalahate. ¹⁸ Nikuna a nagdasal siya a huway para naguden ay naguden dan sakay nagtubu u mula nu tolay hide sakay nagbunga. ¹⁹ Kákkapatkákka ko hide, ni tehhod a essa nikam a nehiwalay tu tatahoden ay maganda ni maakit moy siya a huway. ²⁰ Dapat moy a matukuyan a u mánggiya tu tolay a makasalanan para iwahak na u makasalanan na a kákkabiyag ay nanglitas tu kaliduwa ni iye tu kamatayan. Sakay siya be u dahilan nu kapatawaden nu makpal a kasalanan ni tolayan itod.