Hebreo

Hebreo

¹ Tu itod a panahun ay nákpágguhon u Diyos tu ninuno tam hide tu iba-iba a pagkakataun sakay iba-iba a paraan tu pamamag-itan nu prupeta hide. ² Pero nadid a dimodyan a aldew, ay nákpágguhon siya nikitam tu pamamag-itan nu Anak na a tagapagmana tu atanan a bagay. Sakay tu pamamag-itan na ay ginimet nu Diyos u buo a mundu sakay tu atanan a katoy he. ³ U Anak u mángpeta tu kaluwalhatian nu Diyos. Dipo ni ánya u Diyos ay konna bihod u Anak. Siya u mangalaga tu buu a mundu tu pamamag-itan nu upos na a makapangyariyan. Káttapos na a linisan u kasalanan tam hide, ay simmole siya ti langet sakay nággetnod tu kawanan nu makapangyariyan a Diyos. ⁴ U anak u mas higit a dakila nan tu anghel na hide, konna tu ngahan a inyatád nikuna nu Diyos a mas dakila. ⁵ Dipo maski nikan, ay awan ti maski ni essa a anghel u kinagiyan nu Diyos ti konna he, “Hiko u anak ko! Sapul nadid ay hikán dán u Ama mo.” Sakay awan na be kinagi tu maskin deya a anghel a, “Hikán u magin Ama na, sakay siya u magin Anak ko.” ⁶ Sakay nikuna paangayán dán nu Diyos u panganay na a anak ti munduway ay kinagi na, “Dapat siya a sambaán nu atanan a anghel nu Diyos.” ⁷ Tungkul be tu anghel hide ay kinagi na a, “Ginimet na a pahás u anghel na hide, sakay gehab ni apoy u magserbi hide nikuna.” ⁸ Pero iye u kinagi na tungkul tu Anak na, “U kahariyan mo, O Diyos, ay awan ti kahád, u pághare mo ay tehhod a katarungan. ⁹ Masaya ka tu maggimet ti maganda, pero u masássuwayán ay sasala mo. Kanya pinile ka nu Diyos a Diyos mo, sakay inatádden na ka ti kasayaan a higit tu kaguman mo hide.” ¹⁰ Sakay kinagi na pa, “Tu sapul ay hiko Panginoon u nanglalang tu mundu, sakay gimet nu kamát mo u langet. ¹¹ Iye hide ay mawan, Magin háppot hide a atanan a konna tu damit. pero hiko ay awan mamawan. ¹² Isaddi mo hide a konna tu alikábkáb, sakay konna hide tu damit a mapalitan. Pero awan ka magbabagu sakay hanggan-hanggan ka a mabiyag.” ¹³ Maski nikan ay awan kinagi nu Diyos tu maskin deya a anghel a, “Mággetnod ka ti kawanan kuwáy mentaras a awan ko niko mapasuko u kadima mo hide.” ¹⁴ Ni konna hod ay ánya u anghel hide? Ispirito hide a magserbi tu Diyos, sakay hide u utusan para tumulung tu maligtas hide.

¹ Kanya ngane, dapat tam a pakatáttawiden ti mahigpit u tatahoden a nasaneg tam, tánni awan kitam metawtaw. ² Ta u impakapospos nu anghel hide a upos ay napatunayan a tatahoden, sakay u balang sumuway oni awan sumunud ay makatanggap ti karapat-dapat a parusa. ³ Konna bi hod, awan kitam makaiwas tu parusa ni awan tam pahalagaan u dakila a kaligtasan. U Panginoon u dipalongo a nángkagi ti kaligtasanan iye, sakay u nakasaneg hide nikuna u magpatunay nikitam a tutuhanan iye. ⁴ Pinatunayan be iye nu Diyos tu pamamag-itan nu senyal hide sakay iba-iba a makataka-taka a bagay, sakay tu pamamag-itan nu kaluub nu Banal a Ispirito a inyatád na a ayun tu kaluuban na. ⁵ Sakay bakán a u anghel hide u pinile nu Diyos a mamahala tu bigu a mundo a lalangán na, iye u mundu a kákkagiyán me. ⁶ Nan konna he u kinagi tu kasulatan, “Ánya la u tolay para alalahanán mo oni u anak nu tolay para alagaan mo? ⁷ Ginimet mo u tolay a mas mababa tu anghel mo hide tu sabadit a panahun, pero pinagkaluuben mo siya ti kadakilaan sakay karangalan. ⁸ Sakay inpasakup mo u atanan a bagay tu kapangyariyan na .” Nikuna a impasakup nu Diyos u atanan a bagay tu kapangyariyan nu tolay, ay awan ti ánya man a awan na inpasakup. Pero nadid a panahun ay awan tam palla netan a nasakup nu kapangyariyan nu tolay u atanan a bagay. ⁹ Pero tukoy tam ti Jesus, maski ni nebaba ti sabadit a panahun tu anghel hide, ay naatádden ti karangalan sakay kaluwalhatian dipo tu kákkatay na. Dipo tu habag nu Diyos nikitam ay ingkaluub na a matay ti Jesus para nikitam a atanan. ¹⁰ U Diyos u nanglalang tu atanan a bagay para tu kaluwalhatian na. Kanya karapat-dapat u ginimet nu Diyos a pinakultaden na a maghirap ti Jesus para magin ganap ti Jesus sakay magimet na u dapat bilang paggábwatan nu kaligtasan. Ti konna hod ay makapagtawed siya ti makpal a tolay tu kaluwalhatian na. ¹¹ Ti Jesus u magpabanal tu tolay hide. U Ama na sakay u ama ni iye hide a tolay ay eessa. Kanya awan na ikasanike a dulawán na hide a kapatkákka na. ¹² Konna he u kinagi na: “Ipahayag ko tu kákkapatkákka ko hide u ginimet mo hide, sakay mágkansiyonák ti papure niko tu bállog nu katolayan.” ¹³ Kinagi na be a, “Manaligák tu Diyos.” Sakay indagdag na pa a, “Hikán laáy, kaguman ko u anak hide nu Diyos a inyatád na nikán.” ¹⁴ Dipo u anak hide nu Diyos ay tolay, kaya nagin tolay be ti Jesus a konna nide a tehhod a pilas sakay dige. Nagin tolay siya tánni tu pamamag-itan nu kákkatay na ay matalo na u kapangyariyan ni Satanas, a tehhod a kapangyariyan tu kamatayan. ¹⁵ Sakay pinalaya na u nagapus hide ti ánteng ti kamatayan tu buu de a biyag. ¹⁶ Kanya malinaw a bakán a u anghel hide u táttulungan ni Jesus nan u lahe hide ni Abraham. ¹⁷ Kaya kailangan a mepareho ti Jesus tu kákkapatkákka na hide tu atanan a paraan, tánni magin pinakapuno a saserdote a makákkagbiyán sakay matapat a magserbi tu Diyos sakay magalay para tu kapatawaden nu kasalanan nu tolay. ¹⁸ Dipo naranasan na a tinokso sakay naghirap, kanya matulungan na be nadid u toksuwán hide.

¹ Kanya ngane kákkapatkákka ko hide ti pánnampalataya sakay kaguman tu dulaw nu Diyos, alalahanán moy ti Jesus a pinaangay he nu Diyos a puno a saserdote nu pánnampalataya tam. ² Matapat siya tu Diyos a nangpaangay he nikuna, konna ni Moises a nagin tapat tu pángngasiwa na tu anak hide nu Diyos. ³ Ni mas marangal u naggimet tu bilay nan u bilay ay konna labi hod, mas marangal ti Jesus nan ti Moises. ⁴ Kada bilay ay tehhod a nanggimet, pero u Diyos la u nanglalang tu atanan a bagay. ⁵ Nagin matapat ti Moises tu pámmahala na tu pinile hide nu Diyos bilang essa a tagapagserbi. U atanan a bagay hide a ginimet na ay mage-anino la nu bagay hide a ipahayag nu Diyos tu dumemát a panahun. ⁶ Pero ti Cristo ay matapat bilang Anak a namahala tu pinili hide nu Diyos. Sakay hikitam u pamilya na hide ni tulos-tulos kitam a magin tapat tu pag-asa tam nikuna. ⁷ Kanya konna tu kinagi nu Banal a Ispirito, “Ni masaneg moy nadid u upos nu Diyos ay, ⁸ diyan moy dán paigáttán i isip moye, konna tu ginimet nu Israelita hide a kássuway sakay pángpurba tu Diyos tu parang. ⁹ Kinagi nu Diyos, “Pinurbaanák nu dáddikál moy hide tu parang, maski ni netan de u ginággimet ko hide a makataka tu alay nu áppat a pulo a taon. ¹⁰ Kanya nabate de u iyamut ko sakay kinagi ko, ‘Pirme hide a sumuway nikán, awan di dán sunudán u kagiyán ko.’ ¹¹ Kaya dipo tu iyamut ko ay insumpa ko a, ‘Awan di dán mademát u lugar a inpananto ko nide.’ ¹² Kanya magingat kam kákkapatkákka ko, a awan magkahod ti madukás a isip sakay mawanan ti pánniwala a magin dahilan nu káadág moy tu biyag a Diyos. ¹³ Nan magpaala-alaan kam aldew-aldew, mentaras a madulaw palla “nadid” u panahun, tánni awan ti madaya nikam sakay magin alipin nu kasalanan. ¹⁴ Dipo hikitam a atanan ay kaguman ni Cristo, ni manatile a matatag u pánniwala tam hanggan-hanggan, konna tu inpeta tam a pánnampalataya tu itod nikuna a bigu kitam palla a summampalataya nikuna. ¹⁵ Konna tu kinagi tu Kasulatan, “Ni masaneg moy nadid u boses nu Diyos, ay diyan moy dán paigáttán u puso moy, konna tu kássuway nu nuno moy hide tu Diyos.” ¹⁶ Deya u simmuway tu Diyos maski ni nasaneg di dán u boses na? Awan beman u inluwas hide ni Moises ti Egipto? ¹⁷ Sakay ti deya u naiyamutan nu Diyos tu alay nu áppat a pulo a taon? Awan beman, u nagkasala hide a nágkatay tu parang? ¹⁸ Sakay ti deya u kinagiyan a, “Awan hide makasáddáp tu páppágyanan na sakay makaimang” Awan beman u masássuwayán hide? ¹⁹ Kaya tukoy tam a awan hide makasáddap tu páppágyanan na sakay makaimang dipo tu awan de pánniwala.

¹ Sakay nadid, u pananto nu Diyos tungkol tu imangan a inhanda na ay para labe nikitam. Kanya ngani mangilag kam makay tehhod nikam a awan makaguman tu impananto na. ² Dipo konna nide ay nakasaneg kitam be ti Maganda a Baheta. Pero awan de napakinabangan u nasaneg de, dipo awan di iye tinanggap a tehhod a pánnampalataya. ³ Hikitam a maniwala u makasáddáp sakay makaimang tu páppágyanan nu Diyos. Tu awan hide maniwala ay kinagi na a, “Tu iyamut ko ay isumpa ko, ‘a awan hide makasáddáp sakay makaimang tu páppágyanan ko.”’ I maimanganan itod ay inhada nadán sapul a lalangán na i munduway. ⁴ Dipo kinagi na tu essa a bahagi nu Kasulatan a, “Tu kapitto a aldew ay ummimang u Diyos tu páglalang na.” ⁵ Sakay kinagi na pa a huway, “Awan hide makasáddáp sakay makaimang tu páppágyanan ko.” ⁶ Awan nakasáddáp sakay nakaimang tu páppágyanan nu Diyos u dipalongo hide a nakasaneg tu Maganda a Baheta dipo awan hide summampalataya. Pero nadid ay tehhod pade a makasáddáp sakay makaimang tu páppágyanan nu Diyos, ⁷ kanya nángtakda a huway u Diyos ti essa pa a aldew, itod a aldew ay “nadid.” Impakapospos iye nu Diyos tu pamamag-itan ni David kállipas nu nalay a panahun. Kinagi na, “Ni masaneg moy nadid u boses nu Diyos, ay diyan moy dán paigáttán u isip moy.” ⁸ Ta dipo ni nakaimang u tolay hide tu pamamag-itan ni Josue tu itod ay awan dán nakwa huway a nagpananto u Diyos ti essa pa a aldew a káimang. ⁹ Kanya ngane tehhod palla a nakahanda a imangan u pinile hide nu Diyos, a konna tu káimang nu Diyos káttapos nu pánglalang na tu kapitto a aldew. ¹⁰ Ta dipo ni deyaman u makasáddáp a umimang tu páppágyanan nu Diyos, ay umimang be tu tarabaho na a konna tu káimang nu Diyos tu páglalang na. ¹¹ Kanya pagsikapan tam a makasáddáp sakay umimang tu páppágyanan nu Diyos. Dipo u sumuway tu Diyos ay awan makasáddáp a konna tu Israelita hide. ¹² Dipo u upos nu Diyos ay biyag sakay makapangyariyan sakay mas matalas nan u áttak magdiluputan ti tadám, ladássán na hanggan tu paghiwalayan nu kaliduwwa sakay ispirito, kasukasuwan hanggan tu uták nu tulang. Sakay tukoy na u katoy tu isip sakay plano nu tolay. ¹³ Awan ti metagu tu Diyos, áelingán na a atanan. Sakay tábbegan tam nikuna u atanan a ginimet tam. ¹⁴ Kanya magpakatatag kitam tu pánnampalataya tam, dipo tehhod kitam a dakila a Pinakapuno a Saserdote, simmáddáp dán siya ti langet tu atubang nu Diyos. Siya ay ti Jesus a Anak nu Diyos. ¹⁵ Maintendiyan kitam nu pinuno tam a Saserdote tu kahinaan tam hide. Dipo napurbaan na be a tinokso tu atanan a paraan, konna nikitam, pero maski nikan ay awan siya nagkasala. ¹⁶ Kanya diyan kitam magduwwa-duwwa a umadene tu trono nu makákkagbiyán a Diyos, tán matanggap tam u kagbi na sakay habag na tu panahun a kailangan tam u tulung.

¹ U balang pinakapuno a saserdote a pinile tu katolayan ay pinile a magserbi tu Diyos para nide. Siya u magalay tu kaluub hide sakay alay para mapatawad u kasalanan de hide. ² Mapákpággaguman na ti maayus u tolay hide a awan ti tukoy sakay masuwayin, dipo tehhod be siya a kahinaan a konna nide. ³ Dipo magkasala labe siya, ay kailangan a magalay siya para tu sadile na be hide a kasalanan bakán la a para tu tolay hide. ⁴ U karangalan nu pagiging pinuno a saserdote ay awan maangkin nu deyaman tu sadile nala a kagustuwan. Dipo u Diyos u nangpile nikuna a konna tu pángpile na ni Aaron. ⁵ Konna bi hod, awan inlangkaw ni Cristo u sadile a magin pinuno a saserdote. Nan pinile siya nu Diyos a nangkagi nikuna, “Hiko u Anak ko. Sapul nadid ay hikán dán u Ama mo.” ⁶ Kinagi na be tu agum a parte nu Kasulatan, “Hiko ay saserdote hanggan-hanggan a konna tu pagkasaserdote ni Melquisedec.” ⁷ Nikuna a katoy palla ti Jesus ti lutaáy, ay insanget na a magdasal sakay nákkekagbi tu Diyos a makapángligtas nikuna tu kamatayan. Kanya tinábbeg siya nu Diyos dipo tatahoden u págpakababa na. ⁸ Maski Anak siya nu Diyos ay natukuyan na a sumunud tu pamamag-itan nu pághirap na. ⁹ Nikuna a nagin ganap dán siya, ay siya u naggábwatan nu awan ti katapusan a kaligtasan nu atanan a sumunud nikuna. ¹⁰ Indátton siya nu Diyos a pinuno a saserdote konna tu pagkasaserdote ni Melquisedec. ¹¹ Makpal kami pa a makagi tungkul ti bagayan iye hide, pero mahirap a ipaliwanag dipo awan kam makaintendi sakay sala moy a mágsaneg. ¹² Dapat nakwa ay tagapagtoldu kamon, pero hanggan nadid ay kailangan kampa a tolduwan tu pasapul hide a adal tungkul tu upos nu Diyos. Hanggan nadid ay gatas palla u kákkanán moy embes a u mágkakásseng dán a makan. ¹³ U mabiyag hide ti gatas ay anak palla a badit, awan palla ti tukoy tu maganda ay tu madukás. ¹⁴ Pero u maigát a kanán ay para tu mágkatanda dán hide sakay tukoy na dán u maganda ay tu madukás.

¹ Kanya dapat kitam a lumagu sakay sapulan tam a pagadalan u maspa nan tu pangpurumero hide a adal a tungkul ni Cristo. Sakay magtulos-tulos kitamon tu adal hide a mágkadisalad. Awan tam kailangan a huway-huwayán u adal hide a tungkul tu káadág tu gimet hide a awan maganda tu pangileng nu Diyos, sakay tungkul tu pánnampalataya tu Diyos, ² tu bawtismo, tu págtupo ti kamát ni te ipagdasal, u kákkabiyag a huway, sakay tungkul tu paghatul nu Diyos tu tolay hide a makasalana a hide ay maparusaan tu awan ti kahád. ³ Nan magtulos-tulos kitamon. Ina u gimitán me ni kagustuwan nu Diyos. ⁴ Dipo kodya mo a mapagsise sakay pasoliyán u immadág dán hide tu pánnampalataya de? Nademlagan dán hide tu itod, naranasan di dán be u kaluub a gábwat ti langet, sakay nakatanggap be hide tu Banal a Ispirito. ⁵ Nadanas di dán be u kagandaan nu upos nu Diyos, sakay u kapangyariyan nu Diyos a maghare tu dumemát a panahun. ⁶ Ni umadág pa hide, káttapos de a maranasan iye a atanan ay awan dán hide mapasole a huway. Dipo u gusto ni iye a kagiyán ay ipako de a huway tu kudus u Anak nu Diyos sakay pasanikiyán tu atubang nu makpal a tolay. ⁷ Hikitam a tolay ay konna tu luta a káttapos a maudinan ti mabegsák ay tubuwan ni mula a pakinabangan nu nagmula. Pagpalaan nu Diyos ina a luta. ⁸ Pero ni tumubuway ay lamon sakay saet ay busungán nu Diyos dipo awan pakinabangan, káttapos ay tutudán. ⁹ Mahal me hide a amigu, maski ni konna he u kákkagiyán me, ay tukoy me a katoy kam ti maganda a kalagayan tungkul tu kaligtasan moy. ¹⁰ Dipo matapat u Diyos. Awan na kalimunan u gimet moy sakay u págmahal moy nikuna tu pamamag-itan nu págserbi moy tu kákkapatkákka moy hide a Kristiyano, a hanggan nadid ay gággimitán moy pade. ¹¹ U gusto me ay magtulos-tulos kam a magsikap tu paggimet ti iye, hanggan a matanggap moy u áasaan moy. ¹² Kanya diyan kam magin tamad, nan ahigán moy u tolay hide a dipo tu pánnampalataya de sakay págtiis ay natanggap didan u impananto nu Diyos. ¹³ Nikuna a magpananto u Diyos ni Abraham, ay sinumpaan na itod a tupadán. Dipo awan dán ti makataas nikuna, nanumpa siya tu sadile na a ngahan. ¹⁴ Kinagi na a, “Talaga a pagpalaán taka, sakay pakakpalán ko u lahe mo.” ¹⁵ Nagtiyaga ti Abraham a naguhay, kanya natanggap na u nepananto nikuna. ¹⁶ Ni manumpa u tolay ay tu pamamag-itan nu ngahan a mas mataas nan hide u gamitán de. Itod u mangtapos sakay mangpatibay tu uhunan de. ¹⁷ Konna bi hod, pinatibay nu Diyos u pananto na tu pamamag-itan nu pánnumpa tánni ipeta na tu pinanantuwan na hide a awan magbabagu u kinagi na a gimitan na. ¹⁸ Awan magbabagu oni magbule-bule u Diyos ti duwwaan iye a bagay: U pananto na sakay u sinumpaan na. Kanya hikitam a nagpasakup tu Diyos ay matibay u isip tam a umasa tu inpananto na. ¹⁹ Iye a pag-asa tam ay matibay sakay matatag a angkla nu biyag tam. Dipo umabut iye hanggan tu dilupot nu kortina nu templo ti langet, a kabanal-banalan. ²⁰ Nágdipalongo dán hod a simmáddáp ti Jesus para nikitam. Siya u awan ti kahád a pinakapuno a saserdote tam a konna tu pagkasaserdote ni Melquizedec.

¹ Ti Melquisedek ay hare ti Salem sakay saserdote nu Kataasan a Diyos. Nikuna a pasole dán ti Abraham a gábwat tu págpuksa tu hare hide ay tinagbu siya ni Melquisedek sakay kinagi na, “Pagpalaán ka nu Panginoon.” ² Inyatád nikuna ni Abraham u ikapo nu atanan a naalap na tu gera. (U purumero a kahulugan nu ngahan ni Melquisedek ay, “Hare a Matuwid.” Sakay hare be siya ni Salem, a u gusto na a kagiyán ay“Hare ni kapayapaan.”) ³ I Hariyan iye ay awan ti ama sakay ina kanya awan bi siya neenak sakay awan ti kamatayan. Konna siya tu Anak nu Diyos a saserdote hanggan-hanggan. ⁴ Ina u paketaan ni sakodya ti kadakila ti Melquisedek! Inyatád nikuna ni Abraham a pinakaama nu lahe tam u ikapo nu naalap na tu gera. ⁵ Nadid, ayun tu Kautusan ni Moises, u saserdote hide a gábwat tu lahe ni Levi ay nangalap ti ikapo tu Israelita hide maski ni pare-pareho hide a gábwat tu lahe ni Abraham. ⁶ Ti Melquisedek ay awan gábwat tu lahe ni Levi, pero nakatanggap siya ti ikapo a gábwat ni Abraham. Pinagpala na pa ti Abraham a pinanantuwan nu Diyos. ⁷ Tukoy tam a atanan a mas mataas u mangatád ti págpapala nan tu pinagpala. ⁸ U Levita hide a tumanggap ti ikapo ay matay; pero pinatunayan nu Kasulatan a biyag ti Melquisedek. ⁹ Kaya maare a kagiyán a ti Levi a tumanggap ti ikapo, ay nagikapo be tu pamamag-itan ni Abraham. ¹⁰ Dipo awan palla neenak ti Levi, makagi a atoy palla siya tu baggi nu ninuno na a ti Abraham nikuna a tagbuwán siya ni Melquisedek. ¹¹ U Kautusan ay inyatád nu Diyos tu Israelita hide tán magin ganap hide. Ni u pagin ganap ay natanggap tamon, tu pamamag-itan nu saserdote a gábwat tu lahe ni Levi ay awan dán nakwa kailangan u iba a saserdote, ayun tu pagkasaserdote ni Melquisedek a iba tu pagkasaserdote ni Aaron. ¹² Ni baguwán u pagkasaserdote ay kailangan be a baguwán u Kautusan. ¹³ U kákkagiyán ku he a saserdote ay u Panginoon Jesus. Kabilang siya tu agum a lahe sakay maski essa tu lahe na ay awan ti nagin saserdote. ¹⁴ Dipo tukoy nu atanan a tolay a gábwat tu lahe ni Juda u Panginoon tam. Sakay awan nabanggit ni Moises u lahe a itod nikuna a kagiyán na u tungkul tu saserdote hide. ¹⁵ Mas lalo pa iye a nagin maliwanag nikuna a nagkahod ti iba a saserdote a kapareho ni Melquisedek. ¹⁶ Nagin saserdote siya dipo tu kapangyariyan na dipo u biyag na awan ti kahád, bakán a dipo tu lahe a konna tu patakaran nu Kautusan. ¹⁷ Dipo konna he u kinagi nu Kasulatan tungkul nikuna, “Saserdote ka hanggan-hanggan, a konna tu pagkasaserdote ni Melquisedek.” ¹⁸ Kanya ngane, inibutan dán nu Diyos u date a Kautusan dipo mahina sakay awan ti bisa. ¹⁹ Dipo awan ti magin ganap tu pamamag-itan nu Kautusan ni Moises. Pero mas maganda u bigu a pag-asa a tinanggap tam nadid, dipo makaadene kitamon tu Diyos. ²⁰ I biguwan iye a pag-asa ay mas maganda dipo iye u sinumpaan nu Diyos. Awan siya simmumpa nikuna a gimitán na a saserdote u lahe hide ni Levi. ²¹ Pero simmumpa siya nikuna a gimitán na a saserdote ti Jesus, konna tu kinagi na, “Simmumpa u Panginoon a hiko u Saserdote hanggan-hanggan! Sakay awan magbabagu u isip na.” ²² Dipo ni Jesus ay nakasiguradu kitamon tu mas maganda a kasunduwan. ²³ Tu itod ay makpal u saserdote hide dipo ni matay u essa ay mapalitan siya nu essa, para makatulos tu tungkulin de. ²⁴ Pero ti Jesus ay biyag hanggan-hanggan, kanya awan ti katapusan u pagkasaserdote na. ²⁵ Kanya ngane, a meligtas na u atanan a umadene tu Diyos tu pamamag-itan na. Dipo biyag siya hanggan-hanggan sakay siya u mángsuhog nide. ²⁶ Ti Jesus, u kailangan tam a pinakapuno a saserdote. Dipo banal siya sakay awan ti kapintasan, awan ti kasalanan sakay hiwalay tu makasalanan hide, sakay kataasan ti langet. ²⁷ Awan siya kapareho nu agum hide a pinakapuno a saserdote a kailangan pa a magalay kada aldew. U purumero de a iyalay ay para tu sadile de a kasalanan, sakay káttapos ay para tu kasalanan nu katolayan Pero ti Jesus ay pumensan la nagalay sakay awan dán kailangan a huwayán, itod ay nikuna a inyalay na u sadile na. ²⁸ U napile hide tu itod a saserdote a ayun tu Kautusan ay palagi a te kahinaan dipo tolay labe hide. Pero ayon tu pananto nu Diyos kinagi na a u mismu na a Anak u magin pinakapuno a saserdote hanggan-hanggan. Sakay awan siya ti kahinaan. I panantuwan iye nu Diyos ay dimodyan a dimmemát nan u Kautusan.

¹ Iye u gusto me a kagiyán: tehhod kitam a pinakapuno a saserdote a mággetnod tu kawanan nu trono nu Kataas-taasan a Diyos ti langet. ² Magserbi siya bilang pinakapuno a saserdote hod tu lugar a Banal, lugar a bakán a ginimet ni tolay nan u Panginoon. ³ Tungkulin nu essa a pinakapuno a saserdote a magalay ti kaluub sakay alay. Kanya dapat a tehhod be a iyalay u pinakapuno a saserdote tam. ⁴ Ni katoy palla siya ti lutaáy ay awan siya maare a magin saserdote, dipo makpal dán a saserdote a taga-alay tu kaluub hide a ayun tu Kautusan. ⁵ U tungkulin de ay inaheg dila sakay anino nu katoy ti langet. Dipo nikuna a itaknág ni Moises u tolda ay kinagiyan siya nu Diyos, “Gimitán mo u atanan a bagay a ayun tu impeta ko niko tu buked.” ⁶ Pero u tungkulin a neatád ni Jesus, ay mas dakila nan u neatád a tungkulin tu agum a saserdote. Dipo siya u mángtaknág tu bigu a kasunduwan a mas maganda, sakay pinatibay iye nu Diyos tu pananto na. ⁷ Ni awan ti kulang tu dipalongo a kasunduwan, ay awan dán nakwa mangailangan ti kaduwwa. ⁸ Pero netan nu Diyos u liwat nu tolay hide, kanya kinagi na, “Dumemát u aldew hide, a mákpagkasunduwanák ti bigu tu Israelita hide sakay tu lahe ni Juda. ⁹ Bakán a konna tu kasunduwan a ginimet ko tu ninuno de hide, nikuna a inluwas ko hide ti Egipto. Dipo awan hide nagin tapat tu pákpagkasundu de nikán, kanya pinabayan ko hide.”Kagi nu Panginoon. ¹⁰ “Iye u bigu ko a kasunduwan tu Israelita hide, káddemát ni aldiwan itod,”Kagi nu Panginoon: “Ay imula ko tu isip de u utus ko hide, sakay iyukit ko tu pusu de. Hikán u magin Diyos de, sakay hide u magin banuwan ko. ¹¹ Awan dán kailangan a tolduwan nu ti deyaman u kasa-banuwan na, oni kagiyán tu kapatkákka na a, ‘Tenggiyán mo u Panginoon.’ Dipo tenggiyánnák de a atanan, sapul tu kababaan hanggan tu kataasan. ¹² Dipo patawadán ko u kadukássan de hide, sakay limunán ku dán u kasalanan de hide.” ¹³ Nikuna a kagiyán nu Diyos u bigu a kasunduwan, ay pinawanan na ti bisa u date. Sakay u ánya man a mawanan ti bisa sakay dati dán ay adene dán a mawan.

¹ U dipalongo a kasunduwan ay tehhod a patakaran tu págsamba sakay tu págsambaan a katoy ti lutaáy. ² U tolda a netaknág ay te duwwa a parte; U purumero a parte ay u Lugar a Banal. Katoy hod u saláng, lamisaan, sakay u tinapay hide a alay tu Diyos. ³ U kaduwwa a parte ay atoy tu dilupot nu kortina a dáddulawán a Lugar a Kabanalan. ⁴ Atoy hod u altar a ginto a págtutudan ti insenso, sakay u kaban nu Kasunduwan a nabalutan ti ginto. Tu disalad nu Kaban ay tehhod a pággasákkan a ginto a u lasán na ay mana, u sahukod ni Aaron a nagduun, sakay u nágkatapyas a bito a sássulatan nu Kasunduwan. ⁵ Tu dibbew nu Kaban ay tehhod a kerubin a mángpeta a katoy hod u Diyos. Táttakáppan nu pakpak de hide u Lugar nu Kagbi. Pero ti nadidáy ay awan mi palla mepaliwanag a atanan. ⁶ Konna hod u ayus nu disalad nu tolda a págsambaan de. U saserdote hide ay sumáddáp aldew-aldew tu purumero a parte tán gimitán de u tungkulin de. ⁷ Pero u makasáddáp la tu kaduwwa a bahagi ay u pinakapuno a saserdote sakay pumensan na la iye a gimitán ti sataon. Te tawed siya a dige a iyalay na tu Diyos, para tu kasalanan na hide sakay tu katolayan, tu nagimet de hide a kasalanan a awan de namalayan. ⁸ Ti iye a ayus na ay malinaw a ipakapospos nu Banal a Ispirito a u dilan a patamo tu Lugar a Kabanalan ay awan palla bukas mentaras a mágtaknág palla u date a tolda a págsambaan. ⁹ Itod hide ay mage anino la, u gusto na a ipakapospos ay u panahun nadid a kasalukuyan. U kaluub hide sakay u alay hide hod ay awan makapangpabanal tu sumamba hide. ¹⁰ I gággimitán diyan itod hide ay tungkul la ti pagkain sakay inuman sakay tu sare-sare a kalase páglinis. Kautusan hide a pangluwas a gumana la a hanggan a dumemat u bigu a paraan nu Diyos. ¹¹ Pero dummemát dán ti Cristo a pinakapuno a saserdote nu bigu a kasunduwan. Nagserbi siya tu págsambaan a awan ti kapareho ti kadakila, awan ginimet ni tolay, sakay awan ti munduway. ¹² Pumensan la a simmáddáp ti Cristo tu Lugar a Kabanalan, sakay awan dán kailangan a huwayán. Bakán a digi ni kambing sakay digi ni bul-o a baka u inyalay na nan u sadile na a dige, tánni mapatawad kitam tu kasalanan tam hanggan-hanggan. ¹³ U dige nu kambing sakay nu toro sakay u abu nu dumalaga a baka ay iwasek-wasek tu tolay a madangát ti biyag. Káttapos ni itod ay mebilang dán hide a malinis ayun tu Kautusan. ¹⁴ Pero mas dakál u magimet nu dige ni Cristo! Tu pamamag-itan nu awan ti katapusan a Ispirito ay inyalay na tu Diyos u sadile bilang alay a awan ti kapintasan. U digi na u manglinis tu puso ay tu isip tam tán adággen tamon u gimet hide a awan ti kabuluhan sakay pagserbiyan tam u Diyos a biyag. ¹⁵ Kaya ngane ti Cristo u tagapamagitan tu bigu a kasunduwan. Dipo tu kákkatay na, ay napatawad u katolayan tu kássuway de nikuna a sakup palla hide nu purumero a kasunduwan. Kanya dipo hod, ay matanggap nu dinulaw hide nu Diyos u impananto na a awan ti katapusan a págpapala. ¹⁶ Mara ni kasunduwan ay kailangan a mapatunayan a patay dán u nanggimet. ¹⁷ Dipo awan ti bisa u kasunduwan mentaras a biyag palla u nanggimet. Magkabisa la iye ni matay dán siya. ¹⁸ Konna labe tu date a kasunduwan nu Diyos a nagkabisa la tu pamamag-itan nu dige nu hayup hide a inyalay de. ¹⁹ Dipo káttapos a inpakapospos ni Moises u Kautusan tu katolayan, ay inalap na u dige nu baka hide sakay kambing sakay hinaluwan na ti dinom. Nangalap siya ti madideg a langis sakay pinget ni hisopo, sakay insawsaw na itod tu dige a te halo a dinom. Sakay winasek-wasikan na u libro nu Kautusan sakay u tolay hide. ²⁰ Káttapos ay kinagi na, “Iye u dige a nangpatibay tu Kasunduwan a inyatád nu Diyos sakay ipatupad na nikam.” ²¹ Winasek-wasikan na be tu dige u tolda sakay u atanan a gamit tu págsamba. ²² Ayun tu Kautusan, halus atanan a kagamitan tu pagsamba tu tolda ay mebilang a malinis tu pamamag-itan nu dige. Sakay awan mapatawad u kasalanan ni awan ti mebuhos a dige bilang alay tu Diyos. ²³ Iye hide a kasangkapan tu págsambaan, ay mage-letrato la nu katoy ti langet. Kaya kailangan a linisan tu pamamag-itan nu pággalay. Pero kailangan a mas mágkaganda a alay u iyalay para tu kagamitan a págsamba ti langet. ²⁴ Dipo ti Cristo ay awan simmáddáp tu Lugar a Kabanalan a ginimet ni tolay, sakay mageletrato la nu tatahoden, nan tu lugar a kabanalan ti langet. Nadid ay katoy dán siya tu atubang nu Diyos a mamag-itan para nikitam. ²⁵ U pinakapuno a saserdote nu Judio hide ay sumáddáp tu Lugar a Kabanalan kada taon, a te tawed a dige ni hayup. Pero ti Cristo ay pumensan la a simmáddáp para iyalay na u sadile na, sakay awan nadán kailangan a huwayán. ²⁶ Dipo ni bakán a konna hod ay kailangan a pahuway-huway siya a matay sapul nikuna a lalangán i munduway. Pero pumensan la siya a immangay he, nadid a katapusan dán nu panahun tán buhaán na u kasalanan tu pamamag-itan nu pág-alay na tu sadile na. ²⁷ Netakda tu tolay a pumensan la a matay, káttapos ay u pághatul. ²⁸ Konna labi hod, ti Cristo ay pumensan la a natay tán buhaán na u kasalanan nu tolay hide. Dumemát siya a huway, bakán a para tubusán a huway u kasalanan nu tolay nan tán iligtas na u magáohay hide nikuna.

¹ U Kautusan ay mage-anino la, bakán a tatahoden a letrato nu mágkaganda a bagay a dumemát. Awan iye mangpabanal tu umadene hide tu Diyos a magalay kada taon. ² Dipo ni napatawad dán hide tu pamamag-itan nu alay de, ay awan dán nakwa hide ti alalahanán pa tu kasalanan de, sakay awan dán hide magalay a huway. ³ Pero u pág-alay a gággimitán de a taon-taon ay lalo a mángpaisip nide tu kasalanan de hide. ⁴ Dipo u dige nu lállake hide a baka sakay nu kambing hide ay awan makapang-ibut tu kasalanan hide nu tolay. ⁵ Kanya ngane, nikuna a dimmemát ti Jesus he ti munduwáy, ay kinagi na tu Ama na, “U alay hide a hayup ay awan mo gusto, kanya inhanda mo u bággi ko para magin alay. ⁶ Awan ka nasaya tu alay hide a tinutod sakay tu alay hide para tu kasalanan. ⁷ Kanya kinagi ko niko, “Katoyák he, Diyos ko para tupadán u kaluuban mo, a konna tu nakasulat tu Kasulatan tungkul nikán.” ⁸ Kinagi ni Cristo a,“Awan mo gusto oni kinasayaan u alay hide sakay u hayup hide, u alay hide a tutudán, sakay u alay hide a para tu kasalanan, maski ni ayun iye tu Kautusan.” ⁹ Káttapos ay kinagi na tu Ama, “Katoyák he para tupadán u kaluuban mo.”Kaya inibutan nu Diyos u dipalongo a pág-alay sakay inpalit na u alay ni Cristo. ¹⁰ Dipo tu págsunud ni Jesu-Cristo tu kaluuban nu Diyos, ay lininis na kitam tu kasalanan tam hide tu pamamag-itan nu pág-alay na tu sadile na a bággi. Pumensan nala iye a ginimet, sakay awan dán iye mahuwa-huway. ¹¹ Balang saserdote ay aldew-aldew a magserbi sakay magalay ti konna labe hod a alay, pero awan labe itod hide makaibut ti kasalanan. ¹² Pero ti Cristo ay pumensan la a nag-alay para tu kasalanan tam, káttapos ay nággetnod dán siya tu kawanan nu Diyos. ¹³ Sakay nadid ay naguhay dalla hod siya hanggan mapasuko nu Diyos nikuna u kadima na hide. ¹⁴ Kanya tu pamamag-itan la nu pumensan na a pággalay, ay pinaginbanal na hanggan-hanggan u lininis na hide. ¹⁵ Pinatunayan bi iye nu Banal a Ispirito nikitam. Purumero ay kinagi na, ¹⁶ “Iye u magin kasunduwan ko nide káddemát ni aldiwan itod hide, ”kagi nu Panginoon: “Idátton ko tu puso de u utus ko hide, sakay isulat ko tu isip de.” ¹⁷ Sakay kinagi na pa a, “Limunán ku dán u kasalanan de hide sakay u mágkadukás de hide a gimet.” ¹⁸ Kanya dipo napatawad dán u kasalanan tam hide, awan dán kailangan a magalay para tu kasalanan. ¹⁹ Kanya ngane kákkapatkákka ko hide, malaya kitamon a makasáddáp tu Lugar a Kabanalan dipo tu kákkatay ni Jesus. ²⁰ Tu pamamagitan nu pággalay na tu sadili na a bággi ay binukasan na para nikitam u bigu a dilan patamo tu lugar a kabanalan a hod tu dilupot nu kortina. I dilanan iye a u dilan para makaangay kitam tu biyag a awan ti kahád. ²¹ Sakay tehhod kitam a dakila a kataasan a saserdote a mamahala tu pinile hide nu Diyos, ²² kanya umadene kitam tu Diyos a tehhod a katapatan sakay matibay a pánnampalataya nikuna, dipo nalinis dán nu dige ni Cristo u isip tam a kumán a na ugisan dán u bággi tam tu malinis a dinom. ²³ Magpakatatag kitam tu pag-asa tam, sakay diyan kitamon magduwwa-duwwa, dipo matapat u nagpananto nikitam. ²⁴ Sakay pagsikapan tam a pabegsákkán u balang essa tu págmahal tu agum, sakay tu pággimet ti maganda. ²⁵ Sakay diyan tam kalimunan u pákpagipun-ipun a konna tu agum a nakalimon dán. Nan pabegsákkán tam u isip nu balang essa, lalu dán nadid a ketan tamon a adene dán u káddemát nu Panginoon. ²⁶ Dipo ni tulos-tulos kitam palla a maggimet ti kasalanan, maski ni natukuyan tamon sakay natanggap u tatahoden ay awan dán ti mealay para tu kapatawaden nu kasalanan tam. ²⁷ Nan u maguhay dálla nikitam ay u makaánteng a pademát a pághatul, sakay u maggehab a apoy a mangtutod tu kadima hide nu Diyos! ²⁸ Ayun tu patunay nu duwwa oni tállo a tistigu, u sumuway tu Kautusan ni Moises ay awan ti habag a bunuwán. ²⁹ Sakodya ti kadágge tu palagay moy u parusa nu tolay a awan mángpahalaga tu Anak nu Diyos, sakay u awan mángpahalaga tu digi na a nangpatibay tu kasunduwan sakay nángpabanal nikuna, sakay u awan mánggalang tu makákkagbiyán a Banal a Ispirito? ³⁰ Dipo matengge tam u nagkagi ti konna he, “Hikán u gumante sakay hikán u magparusa.” Sakay kinagi na pa, “Hatulan nu Panginoon u tolay na hide.” ³¹ Makaánteng u mahatulan nu Diyos a biyag! ³² Isipán moy u nangyare nikam tu itod, nikuna a pákkatanggap moy tu Maganda a Baheta. Nagdanas kam ti makpal a kahirapan pero awan kam natalo. ³³ Ni minsan ay áinsultuwán dikam sakay páppahirapan tu atubang nu kakpalan. Sakay ni minsan be ay makramay kam tu agum moy a magdanas ti konna labi hod. ³⁴ Nákpagtiis kam tu pághirap nu nágkepireso hide. Sakay tinanggap moy a te kasayaan nikuna a inagew de u ari-ariyan moy, dipo tukoy moy a tehhod kam a mas maganda sakay awan mawan a ari-ariyan u nelaan nikam. ³⁵ Kanya diyan kam mawanan ti pánnalig tu Diyos, dipo tehhod a dakál a piremyo a nakalaan para nikam. ³⁶ Kailangan kam a magtiis tánni masunud moy u kaluuban nu Diyos sakay matanggap moy u inpananto na. ³⁷ Dipo kinagi tu Kasulatan a, “sabadit dálla a panahun ay dumemát dán siya. Awan dán siya magmamalay. ³⁸ U matapat ko a tagapagserbi ay mabiyag a tehhod a pánnampalataya, pero ni adággen na u pánnampalataya na, ay awan ko siya kasayaan.” ³⁹ Pero awan kitam kasale tu immadág hide sakay nepahamak, nan tu sumampalataya hide tu Diyos sakay tu nágkaligtas hide.

¹ U pánnampalataya ay u págtiwala a mangyare u áasaan tam hide, sakay tehhod kitam a kasiguraduwan tu bagay hide a awan ketan. ² Dipo tu pánnampalataya de ay kinasayaan nu Diyos u tolay hide tu itod. ³ Dipo tu pánnampalataya ay naintendiyan tam a nilalang u mundu tu pamamag-itan nu upos nu Diyos sakay u bagay hide a ketan ay gábwat tu awan hide ketan. ⁴ Dipo tu pánnampalataya tu Diyos, ay nagalay ti Abel ti mas maganda a alay nan tu inhandog ni Cain. Kanya nebilang a matuwid ti Abel nikuna tanggapán nu Diyos u alay na. Maski ni nalay dán siya a natay ay magupos padi siya tu pamamag-itan nu pánnampalataya na tu Diyos. ⁵ Dipo tu pánnampalataya tu Diyos ay awan natay ti Enoc nan inyangay siya ti langet. Awan dán siya netan dipo inalap dán siya nu Diyos. Kinagi tu Kasulatan a bago a inyangay nu Diyos ti Enoc ay makasaya dán tu Diyos u biyag na. ⁶ Ni awan kitam sumampalataya tu Diyos, ay awan tam siya mapasaya, dipo ni deyaman u umadene nikuna ay dapat a maniwala a tehhod a Diyos a mángngatád ti piremyo tu tolay hide a magsikap a makilala u Diyos. ⁷ Dipo tu pánnampalataya ay sinaneg ni Noe u babala nu Diyos tungkul tu bagay hide a mangyare a awan na palla netan. Kanya naggimet siya ti essa a dakál a abang tán maligtas siya sakay u pamilya na. Dipo hod ay nahatulan u tolay hide ti munduway, pero ti Noe ay nebilang a matuwid dipo tu pánnampalataya na tu Diyos. ⁸ Dipo tu pánnampalataya tu Diyos ay sinunud ni Abraham u utus nu Diyos a umangay tu lugar a inpananto na nikuna. Simmunud ngane siya maski awan na tukoy ni hádya angayan naay. ⁹ Dipo tu pánnampalataya na be ay nágyan ti Abraham bilang dayuhan tu lugar a inpananto nikuna nu Diyos. Nágyan siya tu tolda, sakay konna bi hod di Isaac sakay ti Jacob, a tagapagmana be tu pananto nu Diyos. ¹⁰ Dipo áohayán ni Abraham u essa a banuwan a matibay u pundasiyon a mismo u Diyos u nagplano sakay nángtatag. ¹¹ Dipo tu pánnampalataya ay nagkahod ti kakayanan a magin ama ti Abraham, maski ni lakay dán siya sakay maske awan dán magenak ti Sara. Pero nanalig siya a tupadán nu Diyos u pananto na. ¹² Kanya ti Abraham a mebilang a ngahe-ngahe dán a patay ay naggábwatan nu essa a lahe a konna ti kakpal nu biton ti langet sakay tu baybay tu gibis nu diget. ¹³ Natay hide a atanan a tehhod a pánnampalataya tu Diyos. Awan de natanggap u inpananto nu Diyos pero natannaw de itod tu adeyo. Inturing de u sadile de a dayuhan la ti munduwan iye. ¹⁴ Hod tam he a matukuyan a u tolay hide a konna hod ti pággi sipan ay maguhay palla hide ti sadile de a banuwan. ¹⁵ Ni áisipán dilaay ay u banuwan a linakaden de, tehhod pa nakwa hide a pagkakataun a makasole. ¹⁶ Pero u gusto de ay u mas maganda a banuwan, u banuwan a katoy ti langet. Kanya awan ingkasanike nu Diyos a dulawán de siya a Diyos de, dipo naghanda na hide ti essa a banuwan. ¹⁷ Dipo tu pánnampalataya ni Abraham, ay inyalay na ti Isaac nikuna a subukán siya nu Diyos. Handa siya a máng-alay tu mággeessa na a anak, maski tukoy na a u pananto nikuna nu Diyos ¹⁸ a magin lahe na ay maggábwat ni Isaac. ¹⁹ Dipo maniwala ti Abraham a ni matay ti Isaac ay kaya siya a biyagán a huway nu Diyos a kumán a konna ngani hod u nangyare. Kumán a nesole nikuna ti Isaac a gábwat tu patay hide. ²⁰ Dipo tu pánnampalataya ay kinagi ni Isaac di Jacob ay ti Esau u págpalaán hide nu Diyos tu dumemát a panahun. ²¹ Dipo tu pánnampalataya ay kinagi ni Jacob a pagpalaán nu Diyos u duwwa a anak ni Jose bagu siya a natay. Sakay timmawed tu ontok nu sahukod na sakay sinumamba tu Diyos. ²² Dipo tu pánnampalataya, kinagi ni Jose nikuna a adene dán siya a matay, a makalakad u Israelita hide ti Egipto sakay imbilin na a tawidán de u tulang na hide. ²³ Dipo tu pánnampalataya ay awan nanteng a summuway u dáddakál ni Moises tu utus nu hare; nikuna ketan de a maganda u pámmamággi nu anak, nan intagu di siya tu alay nu tállo a bulan. ²⁴ Dipo tu pánnampalataya, inumád ti Moises a padulaw a anak nu prinsesa a anak nu hare ti Egipto, nikuna dakál dán siya. ²⁵ Ginusto na pa a mákpaghirap tu tolay hide nu Diyos, nan magtamasa ti kasayaan a awan la magmalay a maggábwat tu kasalanan. ²⁶ Imbilang na a mas mahalaga u magtiis para tu Mesias kasera tu kayamanan hide ti Egipto. Dipo nakatuun u isip na tu gantimpala hide a pademát. ²⁷ U pánnampalataya be u nánggiya ni Moises a lakaden na i Egipto maski ni magingál u hare. Mabegsák u isip na dipo kumán na a ketan u Diyos. ²⁸ Dipo be ti itod a pánnampalataya, kanya na a sinapulan u pánggimet tu Aldew nu Káttaleb. Sakay iyutus u págpahid ti dige tu pintuwan hide nu bilay para awan bunuwán nu Anghel a Magpuksa u panganay hide a lállake a Israelita. ²⁹ Dipo tu pánnampalataya tu Diyos, ay nakaahabes u Israelita hide tu Madideg a Diget a kumán a maglakad tu mamade a luta. Pero nikuna a umahabes u taga-Egipto hide ay nágkalimás hide. ³⁰ Dipo tu pánnampalataya nu Israelita hide tu Diyos ay naduhay u pader ti Jerico, káttapos de a lebután tu pitto a aldew. ³¹ Dipo tu pánnampalataya, u belyas a ti Rahab, ay awan nepahamak a kaguman nu umád hide a pasakup tu Diyos, dipo pinatulos na ti maganda u magsubuk hide. ³² Magtulos-tulusák pa beman? Kulangannák ti panahun ni essa-essaán ko a ikagi u ginimet hide di Gideon, Barak, Samson, Jefte, David, Samuel, sakay tu prupeta hide. ³³ Dipo tu pánnampalataya de tu Diyos, ay tinalo de u kahariyan hide, nabiyag hide ti matuwid sakay natanggap de u inpananto hide nu Diyos sakay napaamo de u liyon hide. ³⁴ Awan hide napase tu maggehab a apoy, sakay nakaligtas tu ispada nu mangbuno hide nide. U agum nide ay mágkahina pero inatádden hide nu Diyos ti begsák para magin mabegsák tu labanan, kanya natalo u sundalo hide a dayuhan. ³⁵ Dipo tu pánnampalataya, ay nesole tu sangan a bábbey u mahal di hide ti biyag a nagkatay káttapos a biyagán a huway. U agum be ay umád de a palayaán hide, nan tiniis de u págpahirap nide, dipo tukoy de a maske matay hide ay huway labe hide a biyagán; sakay ibiyagan itod ay adeyo a masmaganda. ³⁶ U agum be ay ininsulto sakay linatigu sakay tehhod be a nekulung a nakakadena. ³⁷ U agum be ay binábbatikal, tináppeng ti lagadi sakay binuno ti áttak. Nagsulot be u agum ti koblet ni tupa sakay koblet ni kambing. Sakay u agum be ay naklimu-limus, inape-ape, sakay pináppasakitan. ³⁸ Pakalat-kalat hide tu parang sakay tu buki-buked. Timmagu hide tu kuweba sakay tu ábbut nu luta. Awan karapat-dapat nide i munduway! ³⁹ Dipo tu pánnampalataya de tu Diyos, ay nángwahak hide ti essa a kasaysayan a awan mali-malimunan maski nikan. Pero u impananto nu Diyos ay awan de natanggap tu panahun de. ⁴⁰ Iye ay dipo tehhod a mas maganda a plano u Diyos para nikitam, dipo gusto na a makaguman de kitam ni tupadán na dán u impanananto na nide a hide ay magin ganap.

¹ Nadid ta napalebutan kitam ti makpal a tistigu, adággen tamon u kasalanan a alisto a mangtaw-taw nikitam sakay ibutan u ányaman a hadlang a mangpugád nikitam, sakay magtiyaga kitam a magtulos-tulos tu ginanan tam a intakda nu Diyos. ² Ituun tam u pangileng tam ni Jesus a naggábwatan nu pánnampalataya tam sakay nangpatupad ti iye. Dipo tu kasayaan a magáohay nikuna ay awan na ingkasanike a matay tu kudus, sakay siya nadid ay mággetnod tu kawanan nu trono nu Diyos. ³ Isipán moy u tiniis hide ni Jesus a hirap a gábwat tu makasalanan hide a tolay, tánni awan kam manghina ti isip. ⁴ Tu pághirap moy kontara tu kasalanan ay awan palla dimmemát tu punto a mabuno kam. ⁵ Makay nalimunan moy dán wád u pagtoldu nu Diyos nikam bilang anak na, “Anak ko, diyan mo baliawanan u pagdisiplina nu Panginoon, sakay diyan ka manghina ti isip ni sawayán na ka. ⁶ Dipo disiplinaan nu Panginoon u mahal na hide, sakay parusaan na u imbilang na a anak.” ⁷ Tiisán moy u atanan a hirap, bilang pángtuwid nu essa a ama, dipo iye u mángpatunay a ibilang kam nu Diyos a anak na hide. Ti deya a anak u awan disiplinaan nu ama na? ⁸ Ni u págdisiplina a gággimitán tu atanan a anak ay awan gimitán nikam, ay awan kam tunay a anak nan mungaw kam la. ⁹ Awan beman dáddisiplinaan kitam nu dáddakál tam hide, kaya igalang tam hide? Kanya lalo kitam a dapat a magpasakup tu disiplina nu Ama tam ti Ispirito, tánni mabiyag kitam. ¹⁰ Tu alay nu sabadit a panahun ay disiplinaan kitam nu dáddakál tam hide ayun tu tukoy de a maganda. Pero u pagdisiplina nikitam nu Diyos ay palagi a tu ikapiyya tam tán magin banal kitam a konna nikuna. ¹¹ Mentaras a disiplinaan kitam ay awan kitam masaya nan masakitan. Pero káttapos ni itod ay magkahod kitam ti kapayapaan a bunga nu matuwid a kákkabiyag. ¹² Kanya ilangkaw moy i kamát moye hide a mágkalupoy sakay begsákkan i guwaláb moye hide a magpágpág. ¹³ Sakay maglakad kam tu matuwid a dilan tánni u agum a magkahina ti pánnampalataya, ay awan mesangdul sakay mapilay nan bumegsak. ¹⁴ Sikapán moy a makasundu u kapareho moy a tolay sakay magpakabanal kam, dipo awan moy ketan u Panginoon ni awan kam mabiyag ti konna he. ¹⁵ Pakabantayan moy a awan adággen nu deya man nikam u pagmahal nu Diyos. Dyan kam magmula ti saket ni isip a makapangpadukás tu agum. ¹⁶ Bantayan moy be a awan ti mangibábbey oni mangilállake tu maskin deya nikam, oni awan pahalagaan u bagay hide a ispiritwal, konna ni Esau a impalit na ti essa a penggan a makan u karapatan na bilang panganay. ¹⁷ Sakay tukoy moy be a káttapos ay inaged na tu ama na u pagpapala a para tu panganay. Pero awan dán maare dipo awan dan mabagu u ginimet na, maski ánya man u gimitán na a pagsise sakay págsanget. ¹⁸ Awan kam ummadene a konna tu káadene nu Israelita hide tu buked a Sinai a tehhod a maggehab a apoy, tunay ti diklam sakay te mabegsak a pahás. ¹⁹ Tehhod hod a tánnog ni trumpeta sakay boses. Nikuna a masaneg de i bosesan itod ay nákkekagbi hide a diyan dán mákpágguhon nide, ²⁰ dipo awan de mataggád iye a utus, “Ni deyaman u gumemmak tu buked, maski ni hayup, ay batikalán hanggan a matay.” ²¹ Talaga a makaánteng u netannawan de, kanya pate ti Moises ay nagkagi a, “Magpágpággák ti ánteng!” ²² Pero hikam u inadeniyan moy ay u Buked nu Sion sakay tu banuwan nu Diyos a biyag, u makalanget a Jerusalem, a páppágyanan nu awan mabilang a anghel. ²³ Umadene kam tu masaya a paggipun-ipun nu imbilang nu Diyos a panganay a anak na hide a nakalista ti langet u ngaha-ngahan de. Umadene kam tu Diyos a hukum nu atanan, sakay tu ispirito nu tolay hide a inturing nu Diyos a banal sakay ginimet na dán a ganap. ²⁴ Sakay umadene kitam ni Jesus, u tagasuhog tu bigu a kasunduwan. Sakay nákkaguman kamon tu kapatawaden nu kasalanan dipo tu nebuhus a dige ni Cristo. Awan iye kapareho nu kákkebuhus nu dige ni Abel a mangaged ti katarungan. ²⁵ Kanya magingat kam, sakay diyan moy adiyan u Diyos a magupos nikitam. Dipo u awan hide nágsaneg tu nagupos hide tu itod ti lutaáy ay awan nakaligtas tu parusa! Nadid, kodya kitam makaligtas ni umád kitam a mágsaneg tu magupos a gábwat ti langet? ²⁶ Nikuna a magupos u Diyos tu itod ay nayanág u luta; pero impananto na nadid, “Pumensan ko pa a yanággán, bakán la a lutaáy nan pate be ti langet.” ²⁷ U upos a, “Pumensan pa,” ay maliwanag a mángpatukoy a ibutan nu Diyos u bagay hide a mayanág, tán manatile u bagay hide a awan mayanág. ²⁸ Kanya magpasalamat kitam tu Diyos, dipo makaguman nakitamon tu kahariyan na a awan mayanág. Sambaan tam u Diyos tu paraan a makasaya nikuna, a tehhod a paggalang sakay ánteng; ²⁹ dipo ni magparusa u Diyos tam ay kumán a apoy a makatutod.

¹ Nadid, tulos-tulos kam a magmahalan bilang mátkaka ni Cristo. ² Diyan moy kalimunan a magpatulos tu dayuhan hide. Tehhod a sangan a naggimet ti konna he, nakapagpatulos hide tu anghel hide a awan de namalayan. ³ Isipán moy u nágkepireso hide a kumán a kaguman dikam a nakapireso. Sakay tulungan moy u kákkapatkákka a apiyadu a kumán a hikam u magdanas be ti konna hod. ⁴ Dapat igalang nu atanan u pákkabanga, sakay magin tapat tu balang essa u magkabanga. Dipo hatulan nu Diyos u mangibábbey oni mangilállake. ⁵ Diyan kam kumán a hupa ni pilak; makontento kamon ni ánya u katoy nikam. Dipo kinagi nu Diyos, “Awan taka lakaden oni pabayan.” ⁶ Kanya awan ti pagduwwa-duwwa a makagi tam, “U Panginoon u tumulung nikán, awanák manteng. Ánya u magimet nikán nu tolay?” ⁷ Alalahanán moy u nangasiwa hide nikam, a nángpakapospos nikam tu upos nu Diyos. Isipán moy ni kodya hide a nabiyag hanggan a natay ate pánnampalataya. Ahigán moy u pánnampalataya de tu Diyos. ⁸ Maski nikan ay awan magbabagu ti Jesu-Cristo. Ni ánya siya tu itod ay konna labe siya nadid sakay hanggan-hanggan. ⁹ Diyan kam paakit tu sari-sare sakay tu iba hide a adal. Mas maganda para nikitam a mapabegsák u pánnampalataya tam tu pamamag-itan nu kagbi nu Diyos nan tu pamamag-itan nu kássunud tu utus hide tungkul tu makan. U simmunud ti iye hide ay awan ti naalap a pakinabang. ¹⁰ Tehhod kitam a altar, sakay u saserdote hod hide a magserbi tu págsambaan nu Judio hide ay awan maare a kuman tu alay tam hod. ¹¹ Tu itod u dige nu hayup hide ay iyangay nu pinakapuno a saserdote tu lugar a kabanal-banalan tánni iyalay para tu kasalanan, pero u bággi ay táttutudán tu luwas nu banuwan. ¹² Kaya konna labi hod, natay ti Cristo tu luwas nu banuwan tán malinis na u tolay tu kasalanan de hide tu pamamag-itan nu dige na. ¹³ Kanya umadene kitam nikuna tu luwas nu banuwan sakay magdanas be ti kadustaan a tiniis na. ¹⁴ Dipo bakán a ti lutaáy u talaga a lugar tam, nan tehod kitam a áohayán a lugar a págyanan tam tu dumemát a panahun. ¹⁵ Kanya pirmi kitam a magalay ti papure tu Diyos tu pamamag-itan ni Jesus, papure a mángkagi tu pákkatukoy tam tu ngahan na. ¹⁶ Sakay diyan tam kalimunan a maggimet ti maganda sakay tu káttulung tu agum dipo ina u alay a kasayaan nu Diyos. ¹⁷ Sumunud kam sakay magpasakup tu mangasiwa hide nikam dipo te pananagutan hide a magbantay nikam, sakay managut hide tu Diyos tungkul ti iye. Ni sunudán moy hide ay masaya hide a gimitán u tungkulin de, pero ni awan ay malungkut hide, sakay ni malungkut hide ay awan iye makatulung nikam. ¹⁸ Ipagdasal moy kame, makagi me nikam a malinis u konsensiya me, sakay gusto me a mabiyag ti matuwid tu atanan nu panahun. ¹⁹ Higit tu atanan ay agidán ko a ipagdasalák moy a makasoliyák hina a agad nikam. ²⁰ U Diyos a ginábwatan nu kapayapaan, sakay nangbiyag a huway tu Panginoon Jesus, a nagin Dakila a Pastol nu tupa hide dipo tu dige na a nangpatibay tu awan ti kahád a kasunduwan, ²¹ u mangkaluub nakwa nikam u atanan a kailangan moy para megimet moy u kaluuben na, sakay tu pamamag-itan ni Jesu-Cristo ay gimitán na nikitam u makasaya nikuna. Puriyán ti Cristo hanggan-hanggan Amen! ²² Ipákpágguhon ko nikam, kákkapatkákka hide, a sanigán moy ti maganda u pangaral ko hide nikam dipo apehet la i sulat kuwáy. ²³ Gusto ko be a matukuyan moy a nakalaya dán u kapatkákka tam a ti Timoteo. Ni dumemát siya a pagdaka ay ikoyog ko siya káangay ko hina. ²⁴ Ikumusta moy kame tu mangasiwa hide nikam sakay tu atanan a kákkapatkákka. Kumustaán kam be nu kákkapatkákka ti Italia. ²⁵ Pagpalaán kam a atanan nu Diyos. Amen!