Galacia

Galacia

¹ Iye a sulat ay gábwat nikán a ti Pablo, a pinile a apostol bakán a gábwat tu tolay oni tu pamamag-itan nu tolay, nan ti Jesu-Cristo sakay tu Diyos Ama a huway a nangbiyag ni Jesus. ² U atanan nu kákkapatkákka tam a katoy he ay kaguman ko a mákkumusta nikam a mánnampalataya hide a taga-prubinsiya ni Galacia. ³ Magkahod kam nakwa ti kapayapaan sakay pagpapala a gábwat tu Diyos a Ama sakay tu Panginoon tam a ti Jesu-Cristo. ⁴ Inyalay ni Cristo u sadile na dipo tu kasalanan tam, sigun tu kaluuben nu Diyos Ama tam. Ginimet na iye para meligtas kitam tu kadukássan a kasalukuyan a maghare ti munduwan iye. ⁵ Puriyán u Diyos hanggan-hanggan! Amen. ⁶ Nagtakaák ni bakin alisto kam a immadág tu Diyos a nangdulaw nikam tu pamamag-itan nu kagbi ni Cristo. Sakay inumagton kam tu baka-bakán a u kagi moy ay maganda a baheta. ⁷ U tatahoden ay awan talaga ti iba a Maganda a Baheta. Kaya la ay tehhod a makánguluwán nikam, sakay gusto de a ibaán u Maganda a Baheta tungkul ni Cristo. ⁸ Pero ni te tolay oni hikame oni essa a anghel a gábwat ti langet u magtoldu nikam ti iba tu Maganda a Baheta maliban tu intoldu mi dán nikam ay parusaan nakwa siya nu Diyos! ⁹ Kinagi mi dán iye nikam tu itod sakay kagiyán ku dámman a huway, ni tehhod man a magtoldu nikam a iba tu Maganda a Baheta maliban tu tinanggap moy, ay parusaan nakwa siya nu Diyos! ¹⁰ Diyan moy isipán a kaya ku iye a kákkagiyán ay para masaya nikán u tolay. U papure la a gábwat tu Diyos u gusto ko a matanggap. Ni ilingán ku laay ay u ikasaya nu tolay, ay awanák tunay a tagapagserbi ni Cristo. ¹¹ Gusto ko a matukuyan moy kákkapatkákka ko hide a u Maganda a Baheta a ipáppangaral ko nikam ay bakán a gime-gimet la ni tolay. ¹² Dipo awan ko iye tinanggap tu tolay sakay awan bi iye intoldu nikán nu maskin deya a tolay. Nan ti Jesu-Cristo a mismo u nánghayag he nikan. ¹³ Tukoy moy labe u date ko a kákkabiyag tu relihiyon nu Judio hide. Pinahirapan ko ti husto u mánnampalataya hide tu Diyos sakay sinikap ko hide a sidaan a atanan. ¹⁴ Sakay tungkul be tu págsunud tu relihiyon me a Judio ay mas lamangák, nan tu kaidad ko hide, dipo talaga a sinunud ko ti husto u kaugaliyan a naggábwat tu ninuno me hide. ¹⁵ Pero tu kagbi nu Diyos ay piniliyák na dán a magin tagapagserbi na, baguwák pa a neenák. ¹⁶ Nikuna ipakapospos nikán nu Diyos u Anak na para mebaheta ko tu Hentil hide ay awanák nák-aged ti payo tu maskin ti deyaman. ¹⁷ Oni immangay ti Jerusalem tánni mákkapospos tu apostol hide a nedipalongo nikán. Nan immangayák ti Arabia sakay káttapos ay nagsoliyák ti Damasco. ¹⁸ Kállipas nu tállo a taon ay immangayák ti Jerusalem tánni mákpágguhon ni Pedro. Sapulo wak ay ti limma a aldew a nágyan hod. ¹⁹ Awanák hod ti netan a agum a apostol, nan ti Pedro la sakay ti Santiagu a wadi nu Panginoon. ²⁰ Tatahoden a atanan i kinagi kuwáy ti sulatan iye, tukoy nu Diyos a awanák magbule-bule. ²¹ Káttapos hod ay immangayák ti Siria sakay Cilicia. ²² Ti itod a panahun ay awanák palla netan nu mánnampalataya hide a taga-Judea. ²³ Nabaheta di dálla a, “U date a mágpahirap nide ay nangaral dán nadid ti pánnampalataya a sinikap na a sidaán tu itod.” ²⁴ Kanya pinure de u Diyos dipo tu ginimet na nikán.

¹ Kállipas nu sapulo ay ti áppat a taon, ay immangayák a huway ti Jerusalem, kaguman ko di Bernabe ay ti Tito. ² Simmoliyák dipo kinagi nikán nu Diyos a dapaták a angay hod. Nákpágguhunák ti sadiliyan tu puno hide nu mánnampalataya hide, sakay inpakapospos ko nide u Maganda a Baheta a ibábbaheta ko tu Hentil hide. Ginimet ko iye tán masigudu ko a awan masayang u pinagpaguden ko tu nakalipas hanggan tu kasalukuyan. ³ Maski ni Griego u kaguman ko a ti Tito ay awan de pinilit a magpature. ⁴ Pero ti itod ay te nagware-ware a manampalataya hide a pimmurba a nangpilit tungkul tu pagture. Nákpággagum hide nikame tán sidaán de u kalayaan a natanggap tam ni Cristo Jesus, tánni alipinan kitam a huway nu Kautusan. ⁵ Pero maskin nikan ay awan kame immayun tu gusto de, tán maingatan me u tunay a kahulugan nu Maganda a Baheta para nikam. ⁶ U punu nu mánnampalataya hide ti Jerusalem ay awan be ti nakagi. Awan ti halaga nikán ni ti deyaman hide, dipo awan ti paboran u Diyos. ⁷ Nan tinenggiyák de a piniliyák nu Diyos para mangaral tu Maganda a Baheta tu Hentil hide, konna ni Pedro a pinile be tán mangaral tu Maganda a Baheta tu Judio hide. ⁸ U Diyos a nangatád ti kapangyariyan ni Pedro a mangaral tu Judio hide ay siya labe u nangatád nikán ti kapangyariyan a mangaral tu Hentil hide. ⁹ Kaya nikuna a matukuyan nu pinuno nu mánnampalataya hide, a di Santiago, Pedro sakay ti Juan, a ingkaluub nikán nu Diyos iye a gawain ay tinanggap dikame ay ti Bernabe bilang kapareho de a tagapagtoldu tu Maganda a Baheta. Sakay namágkasunduwan me a magtoldu kame tu Hentil hide sakay hide u magtoldu tu Judio hide. ¹⁰ Inpákpágguhon dila a diyan me páppabayan u mágkahirap hide. Sakay iye be u gugusto ko a gimitán. ¹¹ Pero nikuna a dimmemát ti Pedro ti Antioquia ay pinagkagiyan ko siya tu atubang nu mánnampalataya hide dipo awan tama u gággimitán na. ¹² Ta dipo nikuna a awan palla u sasangan a tolay a inutusan ni Santiago ay kaguman siya a mákkan tu Hentil hide. Pero nikuna a dimmemát hide ay bimmukod siya tu Hentil hide. Ginimet na itod dipo manteng siya a te makagi u kaparehas na hide a Judio, lalu dán u Judio hide a sumássunud palla tu ugale de a págpature. ¹³ Pati be u agum a mánnampalataya hod ay inumaheg ni Pedro, pate ti Bernabe ay nákke-aheg nikuna. ¹⁴ Nikuna ketan ko a awan dán ayun tu Maganda a Baheta u gággimitán de ay kinagi ko ni Pedro tu atubang de a atanan, “Hiko ay Judio pero kuman ka dan a Hentil dipo kuman ka a kaguman de. Pero nadid ay bakin páppilitán mo u Hentil hide a mabiyag a konna tu kákkabiyag nu Judio hide? Dipo nikuna a awan ka dán kuman a kaguman de, kumán mu labe a kinagi a u kapareho mula a Judio u nebabagay a kuman a kaguman mo.” ¹⁵ Hikame a neenak a Judio, ay iba tu Hentil hide a inturing a makasalanan nu kákkapatkákka me a Judio. ¹⁶ Pero tukoy me a imbilang dán nu Diyos u tolay a awan ti kasalanan tu pamamag-itan nu pánnampalataya na ni Jesu-Cristo bakán a tu kássunud tu kautusan. Kanya ngane, summampalataya kami be ni Jesu-Cristo tánni meturing kame a matuwid tu pamamag-itan nu pánnampalataya nikuna, bakán a tu kássunud tu kautusan. Dipo awan ni ti deyaman u meturing a matuwid tu pamamag-itan la nu kássunud tu kautusan. ¹⁷ “Pero ni ketan a hikame ay makasalanan pade maski tu págsikap me a meturing nu Diyos a matuwid kame tu pamamag-itan ni Cristo, u gusto beman a kagiyán ni iye ay ti Cristo u dahilan nu pagigin makasalanan me? Bakán! ¹⁸ Pero ni soliyán ko u págsunud tu kautusan a inadággen ku dán, ay hikán dán u mangpatunay a makasalananák dipo tu kállabag ko ti iye. ¹⁹ U tatahoden tu pamamag-itan a mismo nu Kautusan ay natukuyan ko a awan dán ti kapangayarihan u Kautusan nikán kaya malayaák dán a mabiyag para tu Diyos. ²⁰ Kumánnák a nepako sakay natay tu kudus a kaguman ni Cristo tu kudus. Bakán dán a hikán u mabiyag tu sadile ko nan ti Cristo dán. Mentaras biyagák ay mabiyagák ayun tu pánnampalataya tu Anak nu Diyos a nangmahal nikán sakay náng-alay tu biyag na para nikán. ²¹ Ni hikán ay awan ko ituring a awan ti halaga u kagbi nu Diyos. Dipo ni ituring nu Diyos a matuwid u tolay tu pamamag-itan nu kássunud tu Kautusan, ay awan ti kabuluhan u kákkatay ni Cristo!

¹ Hikam a taga Galacia hide, awan kam ti tukoy! Deya i nakaalumayaay nikam? Malinaw a nepakapospos ko nikam ni kodya a natay ti Jesu-Cristo tu kudus! ² Saiye u gusto ko a itanung nikam: Tinanggap moy beman u Banal a Ispirito dipo tu kássunud moy tu Kautusan? Awan! Nan dipo simmampalataya kam tu nasaneg moy tungkul ni Cristo. ³ Talaga a awan kam ti tukoy! Nagsapul kam a manampalataya tu pamamag-itan nu tulung nu Banal a Ispirito. Pero nadid ay akala moy wád day ni mapabegsák moy u pánnampalataya moy tu sadile moy la a begsák? ⁴ Awan dán beman ti halaga nikam u bagay hide a pinagtiisan moy? Tehhod palla wad. ⁵ Bakin inyatád nikam nu Diyos u Ispirito na? Bakin maggimet siya ti makataka-taka? Dipu beman tu kássunud moy tu Kautusan? Awan! Nan dipo tu pánnampalataya moy tu nasaneg moy tungkul tu Maganda a Baheta. ⁶ Konna tu nangyare ni Abraham, “Simmampalataya siya tu Diyos, kanya inbilang siya nu Diyos a matuwid.” ⁷ Ni konna hod ay maliwanag a u simmampalataya la hide tu Diyos u tunay a lahe ni Abraham. ⁸ Bagu pa iye a nangyare ay kinagi dán nu kasulatan a ituring nu Diyos a matuwid u Hentil hide tu pamamag-itan nu pánnampalataya de nikuna, sakay iye a Maganda a Baheta ay inpakapospos na ni Abraham,“Tu pamamag-itan mo ay pagpalaán nu Diyos u atanan a bansa.” ⁹ Simmampalataya ti Abraham tu Diyos kanya pinagpala siya, kanya u atanan a manalig tu Diyos ay pagpalaán be a konna nikuna. ¹⁰ Pero u tolay hide a umasa a maligtas tu kássunud tu Kautusan ay sinumpa. Dipo nakasulat,“Maparusaan u tolay hide a awan sumássunud tu atanan a nakasulat tu Lubro nu Kautusan.” ¹¹ Nadid, malinaw a awan ti tolay a meturing a matuwid tu atubang nu Diyos tu pamamag-itan nu kássunud tu Kautusan, dipo kinagi tu Kautusan, “U tolay a inturing nu Diyos a matuwid ay mabiyag dipo tu pánnampalataya na.” ¹² Pero u kássunud tu Kautusan ay awan neayun tu pánnampalataya tu Diyos. Dipo nakasulat a, “U tolay a gusto a mabiyag tu pamamag-itan nu Kautusan ay kailangan a sumunud tu atanan a inyutus niiye.” ¹³ Tinubus kitamon ni Cristo tu sumpa a gábwat tu Kautusan nikuna naghirap siya a konna tu essa a sinumpa dipo nikitam. Konna tu nakasulat tu Kasulatan a, “Sinumpa u bawat nebátten ti kayo.” ¹⁴ Tinubus kitam ni Cristo para u págpapala hide a inpananto nu Diyos ni Abraham ay matanggap be nu Hentil hide tu pamamag-itan ni Jesu-Cristo. Sakay tu pamamag-itan nu pánnampalataya tam nikuna ay matanggap tam u inpananto nu Diyos a Banal a Ispirito. ¹⁵ Kákkapatkákka ko hide, iye u karaniwan a halimbawa. Ni napirmaan dán u essa a kasunduwan ay awan dán iye maare a mabagu nu maskin deya. Sakay awan dán be iye maare a dagdagan. ¹⁶ U Diyos ay nagpananto ni Abraham, sakay tu apu na. Awan nesulat tu Kasulatan a,“Tu apo mo hide,”a u gusto na a kagiyan ay makpal a apo. Nan u nakasulat ay,“Essa tu apo mo hide,” a u gusto na a kagiyan ay eessa la a apo, awan ti agum nan ti Cristo. ¹⁷ Sa iye u gusto ko a kagiyán: pinatatag nu Diyos u kasunduwan na ni Abraham sakay inpananto na a tupadán itod. Kaya i kasunduwanan itod ay awan maare a pawanan ti bisa nu Kautusan a dimmemát la kállipas nu áppat a datos ay ti tállo a pulo a taon. Nadid, itod a Kautusan ay awan maare a mangbagu tu inpananto nu Diyos. ¹⁸ Dipo mara ni matanggap tam u págpapala tu pamamag-itan nu págsunud tam tu Kautusan ay bakán dán iye a u pananto na. Pero inpagkaluub nu Diyos u págpapala ni Abraham bilang pángtupad na tu pananto na. ¹⁹ Ni konna hod, bakin a neatád pa u Kautusan? Neatád iye para mepeta tu tolay a hide ay nagkasala tu atubang nu Diyos. Pero iye ay hanggan la a dumemát u impananto a apo ni Abraham. Neatád iye a Kautusan tu pamamag-itan nu anghel hide sakay tu tulung nu tagasuhog. ²⁰ Pero i pangakuwan iye nu Diyos ni Abraham ay awan dán kailangan u tagasuhog dipo u Diyos a mismo u nákpagkasundu ni Abraham. ²¹ Gusto bemanay ni iye a kagiyán ay kontara tu pananto hide nu Diyos u Kautusan? Awan, dipo u Kautusan sakay u pananto ay awan magkapareho ti layunin. Bakán a u págsunud tu Kautusan u dahilan para u tolay ay meturing a matuwid kaya bakán a u Kautusan u makapangatad ti biyag a awan ti kahad. ²² Pero kinagi nu Kasulatan, u atanan a tolay ay alipin nu kasalanan sakay awan hide maligtas tu pamamag-itan nu págsunud tu Kautusan dipo bakán a itod u paraan para makaguman u tolay tu pananto nu Diyos nan u pánnampalataya la ni Jesu-Cristo. Kanya nadid u mánnampalataya la hide ni Jesu-Cristo u pagkaluuben tu impananto nu Diyos. ²³ Nikuna a awan tam palla tukoy u tungkul tu pánnampalataya ay maparusaan kitam nakwa dipo tu awan tam kássunud tu Kautusan. Sakay awan kitam ti pag-asa a maligtas hanggan a mehayag nikitam u tungkul tu pánnampalataya. ²⁴ Kanya ngane u Kautusan u itáttoldu nikitam hanggan tu káddemát ni Cristo, para matukuyan tam ani dumemát dán siya ay dapat kitam a sumampalataya nikuna dipo meturing kitam la a matuwid tu pamamag-itan nu pánnampalataya tam nikuna. ²⁵ Nadid, dipo summampalataya kitamon ni Cristo kaya awan kitamon dapat manalig tu Kautusan para meturing kitam nu Diyos a matuwid. ²⁶ Dipo tu pánnampalataya moy ni Jesu-Cristo ay nagin anak kam a atanan nu Diyos. ²⁷ U ugale ni Cristo u nesulot nikam a kumán a damit nikuna a mabawtismuwan kam nikuna. ²⁸ Awan dán ti pagkaibaan u Judio hide sakay u Griego hide, u alipin sakay u malaya hide, u lállake sakay u bábbey hide. Eessa kamon a atanan dipo tu pákpagkaessa moy ni Jesu-Cristo. ²⁹ Ni sakup kamon ni Cristo ay lahe kamon ni Abraham sakay tagamana tu inpananto nu Diyos nikuna.

¹ Iye u gusto ko a kagiyán; mentaras anak palla u magmana ay kumán a awan siya humigit tu alipin maski siya u mangkao tu atanan. ² Dipo sakup palla siya nu mangalaga hide nikuna sakay tu taga pangasiwa tu ari-ariyan na hanggan tu panahun a intakda nu ama na. ³ Konna labe nikitam, nikuna a awan kitam palla mánnampalataya ni Cristo, alipin kitam palla nu toldu hide ti munduwáy. ⁴ Pero nikuna a dimmemát u takda odas ay pinaangay nu Diyos ti lutaáy u Anak na. Inyenak siya nu essa a bábbey sakay nagpasakup tu Kautusan ni Moises, ⁵ tánni palayaán na u nasakup hide nu Kautusan.Tán mebilang kitam a anak hide nu Diyos. ⁶ Sakay para mapatunayan a anak kam nu Diyos, ay pinaangay na u Ispirito nu Anak na tu puso tam hide, tánni makadulaw kitam tu Diyos a, “Ama, Ama ko!” ⁷ Kanya bakán kamon a alipin nan anak na dán. Dipo anak na kamon kanya ginimet kam nu Diyos a tagapagmana na. ⁸ Tu itod nikuna awan moy palla natengge u Diyos, ay alipin kam nu diyos-diyosan hide. ⁹ Pero nadid a matengge moy dán u Diyos, o mas maganda a kagiyán a, matengge kamon nu Diyos, bakin a soliyán moy dámman u baka-bakán hide a toldu ni munduwáy? Bakin a gusto moy dámman a paalipin a huway ti itod hide a bagay? ¹⁰ Tehhod kam a ipáppangilin a aldew, bulan, panahun sakay taon. ¹¹ Mabalisaák bakay ni masayang la i pagud kuwáy para nikam. ¹² Ipákkekagbi ko nikam kákkapatkákka ko hide, ahigánnák moy a awan dán nanalig tu Kautusan sapul nikuna a simmampalatayaák ni Cristo. Hikán ay nagin konna nikam a Hentil dipo bakán dán a u Kautusan a inyatád tu Judio hide u mahalaga nikán. Awan kam nikán ti nagimet a madukás. ¹³ Tukoy moy dámbe a tu dipalongo a pángngaral ko nikam ay te sakiták kayaák a nagnalay hina a nagtoldu nikam. ¹⁴ Pero maskin nahirapan kam ti husto tu págkasakit ko ay tiniisák moy, awanák moy inadiyan nan tinanggapák moy a kumán a anghel nu Diyos. Tinanggapák moy pa ngane a kumán a ti Jesu-Cristo. ¹⁵ Hádyarán nadid u kasayaan a inpeta moy nikán tu itod? Hikán dán u makapagpatunay a ni maare la nakwa ay pate u mata moy ay lábwetán moy para iyatád moy nikán. ¹⁶ Bakin nadid ay kumánnák moy dán a kadima dipu beman kinagi ko nikam u tatahoden tungkul tu pagkukulang moy hide? ¹⁷ Tatahoden a te tolay hina mángpeta tu págmalasakit nikam tán mebilang kam la nide pero bakán a u kapiyyaan moy u gusto de. Gusto dikam la a iyadeyo nikán tán hide dán u sunudán moy. ¹⁸ Awan madukás a mángpeta hide nikam ti págmalasakit nu tu kapiyyaan moy. sakay dapat a palagi, bakán nakwa la a ni katubangák moy la. ¹⁹ Anak ko hide, dipo nikam kaya magdanasák dámman ti hirap a konna tu magenak a bábbey. Gimitán ko iye hanggan pumareho ni Cristo u biyag moy. ²⁰ Nakwa kaguman takam nadid tán mekagi ko u katoy ti isip kuwáy, dipo tunay i balisa kuwáy nikam. ²¹ Sa iye u tanung ko nikam, hikam a te gusto a pasakup tu Kautusan: awan moy beman nasaneg u kinagi nu Kautusan? ²² Kinagi hod a magkahod ti duwwa a anak a lállake ti Abraham. U essa ay anak nu kabanga na a alipin, sakay u essa ay anak nu kabanga na a malaya. ²³ U anak na tu alipin ay neenak tu pangkaraniwan la a paraan. Pero u anak na tu malaya a bábbey ay u pángtupad nu Diyos tu inpananto na ni Abraham. ²⁴ Patalinghaga iye. U duwwa a bábbey ay talinghaga nu duwwa a kasunduwan. Ti Agar u halimbawa nu tipan tu buked a Sinai sakay tu anak na hide a puro a alipin. ²⁵ Ti Hagar u kumán a u Buked a Sinai ti Arabia, sakay u inyenak na hide ay alipin hide u pángparehuwan tu tolay hide nadid ti Jerusalem ay kumán labe a alipin dipo alipin palla hide nu Kautusan. ²⁶ Pero u kabanga na a ti Sara ay bakán a alipin sakay siya u pángparehuwan tu Jerusalem a katoy ti langet, sakay siya u ina tam dipo awan kitam alipin nu Kautusan. ²⁷ Ayun tu Kautusan, “Magsaya ka, hiko a bábbey a awan magenak! Pumákhaw ka ti saya, maski awan mo palla nabate u gássok ni anak! Dipo mas makpal u anak nu bábbey a baug a inwahak nu kabanga na nan tu bábbey a te kabanga.” ²⁸ Kákkapatkákka ko hide, konna ni Isaac ay anak kitam be sigun tu pananto. ²⁹ Tu itod a panahun, u anak a alipin ay pinahirapan na u anak a inyenak tu pamamag-itan nu kapangyariyan nu Banal a Ispirito. Konna bi hod nadid a panahun, páppahirapan kitam nu sakup hide nu Kautusan ni Moises. ³⁰ Pero konna he u kinagi nu Kautusan,“Palayasán mo u utusan a bábbey sakay u anak na; dipo u anak nu alipin ay awan dapat a mákhate tu mana nu anak nu malaya a bábbey.” ³¹ Kaya ngane kákkapatkákka, awan kitam anak nu alipin nan anak kitam nu malaya a bábbey.

¹ Nadid, ay malaya kitamon dipo pinalaya kitamon ni Cristo tu Kautusan a nangsakup nikitam. Kaya magpakatatag kam sakay dyan dán paalipin a huway! ² Pakatandaan moy i kagiyán kuwáy, hikán ti Pablo u magkagi nikam a ni magpature kam para magin katanggap-tanggap tu Diyos ay mawanan dán ti halaga u ginimet ni Cristo para nikam. ³ Huwayán ko a kagiyán, pakatandaan moy a ni magpature kam para magin katanggap-tanggap tu Diyos, obligadu kam a sumunud tu Kautusan. ⁴ Hikam a magpumilit a ituring nu Diyos a matuwid tu pamamag-itan nu kássunud moy tu Kautusan ay inadággen moy dán ti Cristo. Sakay inadiyan moy u kagbi nu Diyos. ⁵ Pero hikame ay umasa a ibilang nu Diyos a matuwid tu pamamag-itan nu tulung nu Banal a Ispirito sakay tu pánnampalataya me ni Cristo. U katupaden ni iye u pakauha-uhayán me. ⁶ Tu nákpagkaessa dán ni Jesu-Cristo ay awan dán mahalaga ni awan nature oni nature u essa a tolay. U mahalaga ay u pánnampalataya ni Cristo a ketan tu gimet dipo tu págmahal. ⁷ Maganda dán nakwa u kássunud moy tu tatahoden a pánnampalataya. Ti deya u nangpugád nikam a diyan itulos u kássunud moy tu tatahoden? ⁸ Awan iye gimitán nu Diyos a nangdulaw nikam. ⁹ Tehhod a talinghaga ti iye hide a mágtoldu ti baka-bakán. Kumán hide a págpaalsa ti tinapay a maski badit la u medátton ay mapaalsa na dán u lutuwán a tinapay. ¹⁰ Dipo tu pákpagkaessa tam tu Panginoon ay magtiwalaák a awan kam magbagu tu pánniwala moy. Sakay nakasiguduwák a parusaan nu Diyos u deyaman a tolay hide a mangrebuk nikam. ¹¹ Kákkapatkákka ko hide, tehhod kan a magkagi a ipáppangaral ko kan hanggan nadid a kailangan pade a magpature. Ni tatahoden ina ay awan dán nakwa ti magpahirap nikán. U tatahoden ay páppahirapanák di la dipo ipáppangaral ko u tungkul tu kákkepako ni Cristo tu kudus. ¹² I mangrárrebuk ke hide nikam tu págtoldu de ti male, ay bakán nakwa la a magpature nan lalabba di dán a ipakáttol. ¹³ Nadid kákkapatkákka ko hide, dinulaw kam nu Diyos para magin malaya. Pero diyan moy nakwa gamitán u kalayaan moy para mapagustuwan la u sadile moy hide nan magserbi kam tu balang essa a tehhod a págmahal. ¹⁴ Dipo u buo a Kautusan ay makagi la ti essa a upos, “Mahalán mo u kapareho mo a tolay, konna tu págmahal mo tu sadile mo.” ¹⁵ Pero ni tulos-tulos kam a mamágdadema a kumán a aso a magkagitan ay mangilag kam dipo makay masida moy u biyag nu balang essa. ¹⁶ Sa iye u kagiyán ko nikam, “U Banal a Ispirito u magin patnubay moy tu biyag moy sakay dyan kam paalipin tu kagustuwan nu pilas.” ¹⁷ Dipo u hilig nu pilas ay kontara tu kagustuwan nu Banal a Ispirito. Sakay u gusto be nu Banal a Ispirito ay kontara tu kagustuwan nu pilas. Magkalaban i duwwaan iye, kanya awan moy magimet u gusto moy a gimitán. ¹⁸ Pero ni igiyya kam nu Banal a Ispirito ay awan kamon sakup nu Kautusan. ¹⁹ Awan metagu u gimet nu tolay a makamundu. Pángngibábbey oni pángilállake sakay u mágkalaswa sakay mágkadangát hide a gimet, ²⁰ págsamba tu diyos-diyosan, págdipoh, pággingál, pamágdadema, pánnaghile, kákkaiyamut, pagkamadámmot, awan ti pagkakaessa sakay pamágkampe-kampe. ²¹ Kássene, páglasing, sakay magkasayaan hide ti madukás, sakay ti iba a madukás a gimet. Kagiyán ko iye a huway nikam a awan mebilang tu kahariyan nu Diyos u maggimet hide ti konna he. ²² Pero u tolay a mabiyag ayun tu pággiyya nu Banal a Ispirito ay mapagmahal, tehhod a kasayaan, tehhod a kapayapaan, magtággád ti hirap, mabait, maggimet ti maganda a bagay tu agum hide a tolay sakay tehhod a katapatan ²³ mahinahun, sakay mapugáddan na u sadili na. U atanan a ugale a iye ay awan kontara tu Kautusan. ²⁴ U nagpasakup hide ni Jesu-Cristo ay inadággen di dán u madukás de a gimet a kumán de a impepako a kaguman ni Cristo tu kudus u makasalanan de a pagkatolay kaguman u mágkahalay sakay tu agum pa a kagustuwan nu pilas. ²⁵ Nadid ta gábwat tu Banal a Ispirito u bigu a biyag tam, ay dapat ipahintulut tam u pággiyya na tu biyag tam. ²⁶ Diyan kitamon magin palalo, diyan tam pagiyamután u kapatkákka tam, sakay magsállapan.

¹ Kákkapatkákka ko hide, ni te nagkasala a kaguman moy, hikam a igággiyya nu Banal a Ispirito ay uhunán moy siya a pasoliyán tu Diyos. Pero magingat kam makay pate hikam ay matokso be. ² Magtulungan kam tu ánya man a problema moy hide, tu konna he a paraan ay matupad moy u utus ni Cristo. ³ Ni ti deyaman u magakala tu sadile na a mas higit siya tu agum pero awan labe ay nagbuli-bule tu sadile na. ⁴ Dapatay ay ilingán nu balang essa u sadile na a gimet. Dipo u nakapangatád tu kasayaan nu tolay ay u pággimet na ti maganda bakán au pángpareho na tu agum tu gimet na. ⁵ Dipo managut u bawat essa tu sadile de a ginimet. ⁶ U tináttolduwan hide tu upos nu Diyos ay dapat mangatád tu pagpapala de tu magtoldu nide tu upos nu Diyos. ⁷ Diyan moy lokuwán u sadile moy. U Diyos ay awan maloko nu maskin deya. Ni ánya u immula nu essa a tolay ay itod labe u aniyán na. ⁸ Ni u sásunudán nu essa a tolay ay u hilig nu pilas na ay mepalulung siya. Pero u tolay a u Banal a Ispirito u sássunudán na ay magkahod siya ti biyag a awan ti kahád. ⁹ Kanya diyan kitam magsawa a maggimet ti maganda tu agum a tolay. Dipo dumemát u aldew a makatanggap kitam ti gantimpala tu awan tam káimang tu pággimet ti maganda. ¹⁰ Kanya ngane samantalaán tam u pagkakataun a makagimet kitam ti maganda tu atanan a tolay, lalu dán tu kákkapatkákka tam hide ti pánnampalataya. ¹¹ Mapansin moy wád a dáddakkál a letra i págsulat kuwáy, hikán a mismo u nagsulat he. ¹² U tolay a mangpilit nikam a magpature ay gustu dila a puriyán hide nu agum a tolay. Konna hod gimet diyay dipo paraan de a awan hide mapahirapan a konna tu págpahirap tu tolay a magtoldu au kamatayan la ni Cristo tu kudus u makaligtas tu tolay. ¹³ Maski ngane u nagpature hide ay awan sumássunud tu Kautusan. Gusto dikam la a pature tán mepagmadakál de a hide u nakaakit nikam para sumunud ti kautusanan iye. ¹⁴ Nakwa awan iye mangyare nikán. U ipagmadakál kula ay u kákkatay nu Panginoon tam a ti Jesu-Cristo. Dipo tu kamatayan ni Cristo tu kudus ay awan dán ti halaga para nikán u bagay hide ti munduwáy, sakay hikán ay awan dámbe ti halaga para ti munduwáy. ¹⁵ Awan mahalaga ni nature oni awan u essa a tolay. U mahalaga ay u pángbagu nikitam nu Diyos. ¹⁶ Hikam a atanan a sumássunud tu kinákkagi ko hide, magkahod kam nakwa ti kapayapaan sakay kagbiyan kam nu Diyos, dipo hikam u tolay a pinile nu Diyos a kao na. ¹⁷ Kanya sapul nadid ay diyan moy dán nakwa dagdagen i hirap kuwáy. Dipo u peklat hide tu bággi ko ay magpatunay a tagapagserbiyák ni Jesus. ¹⁸ Kagbiyan kam nakwa nu Panginoon tam a ti Jesu-Cristo kákkapatkákka ko hide. Amen!