Efeso

Efeso

¹ Mahal mi hide a kákkapatkákka, hikán ay ti Pablo a apostol ni Cristo Jesus a ayun tu kaluuban nu Diyos. Saiye u sulat ko para tu pinile hide nu Diyos a he ti Efeso sakay matapat be a sumunud ni Cristo Jesus: ² Magkahod kam nakwa ti pagpapala sakay kapayapaan a gábwat tu Diyos a Ama tam sakay tu Panginoon tam a ti Jesu-Cristo. ³ Magpasalamat kitam tu Diyos sakay Ama nu Panginoon tam a ti Jesu-Cristo! Impagkaluub na nikitam u atanan a págpapala a ikapiya tam a gábwat ti langet dipo tu pákpagkaessa tam ni Cristo. ⁴ Bagu pa a lalangán i munduwáy ay pinile kitamon nu Diyos tánni magin banal sakay awan ti kapintasan tu atubang na. Dipo tu págmahal nu Diyos, ⁵ ay naplanu na dán tu itod a gimitán kitam a anak na tu pamamag-itan ni Jesu-Cristo ayun tu layunin sakay tu kaluuban na. ⁶ Puriyán tam u Diyos dipo tu makataka-taka a kagbi na a inyatád na nikitam tu pamamag-itan nu pinakamamahal na a Anak. ⁷ Tinubus kitam ni Cristo tu pamamag-itan nu kákkatay na, sakay pinatawad na kitamon tu kasalanan tam hide. Konna hod ti kadakál u págmahal na, ⁸ a impabate na nikitam! Inatádden na kitam ti karunungan sakay pangintendi. ⁹ Dipo gusto na a maintendiyan tam u sekreto a plano nu Diyos, a mehayag tu pamamag-itan ni Cristo, ¹⁰ káddemát nu netakda a panahun. U plano nu Diyos ay pagessaan na u atanan a bagay a katoy ti langet sakay ti lutaáy sakay ipasakup na ni Cristo. ¹¹ Dipo ni Cristo, ay nagin sakup kame nu Diyos a nanggimet tu atanan a bagay ayun tu plano sakay kaluuban na. Nangyare iye nikuna piliyán na kame tu itod pa. ¹² Ginimet na iye para hikame a nedipalongo a simmampalataya ni Cristo ay magpure nikuna dipo tu kapangyariyan na. ¹³ Hikam be ay nagin sakup nu Diyos dipo nikuna masaneg moy u Maganda a Baheta nu kaligtasan ay simmanpalataya kam ni Cristo. Kanya impagkaluub nikam u Banal a Ispirito a inpananto nu Diyos bilang tanda a pinile na kam. ¹⁴ U Banal a Ispirito u katibayan a matanggap tam a gábwat tu Diyos u impanantu na hide hanggan makao tam u ganap a kaligtasan. Kaya puriyán tam u makapangyariyan a Diyos. ¹⁵ Kanya sapul nikuna mabaheta ko u pánnampalataya moy tu Panginoon tam a ti Jesus sakay tu págmahal moy tu atanan a sakup hide nu Diyos, ¹⁶ ay awanák ti imang a mágpapasalamatán tu Diyos dipo nikam. Sakay palagi takam la a idáddasal. ¹⁷ Sakay u lagi ko a dasal tu Diyos nu Panginoon tam a Jesu-Cristo, u dakila a Ama, ay atádden na kam ti karunungan sakay pángngintendi gabwat tu Banal a Ispirito tánni makilala moy siya ti husto. ¹⁸ Idáddasal kube tu Diyos a nakwa demlagan nu Diyos i isip moye tánni matukuyan moy u tungkul tu asaan tam a inlaan na nikitam bilang sakup na hide. Sakay para maitendiyan moy ni sakodya ti kakpal u págpapala a inlaan na para tu pinili na hide. ¹⁹ Sakay ipagdasal ku be a matukuyan moy u awan ti kahád a kapangyariyan na nikitam a manalig nikuna. Itod be a kapangyariyan, ²⁰ u nangbiyag a huway ni Cristo sakay nangpaetnod nikuna tu kawanan nu Diyos ti langet. ²¹ Kanya sakup nu kapangyariyan ni Cristo u atanan a pághare, pámmahala, kapangyariyan, sakay pámmuno. Siya u pinakamataas a ngahan, bakán la ti panahunan iye nan pate tu pademát pa. ²² Impasakup be nu Diyos tu kapangyariyan ni Cristo u atanan a bagay, sakay siya u indátton na a puno tu mánnampalataya hide. ²³ Hikitam a mánnampalataya hide u kumán a bággi ni Cristo, dipo atanan a hed ni Cristo ay hod nikitam. Siya u mangatád ti biyag tu atanan a bagay siya ay hod tu atanan a lugar.

¹ Nadid, tu itod ay inturing kam nu Diyos a patay dipo tu kássuway sakay kasalanan moy hide. ² Sinunud moy tu itod u madukás a ugale. Sakup kam tu itod nu kapangyariyan ni Satanas a maghare ti munduwáy. Siya u ispirito a maghare tu tolay hide a masuwayin. ³ Tu itod, ay kaguman kitam bi he, nabiyag kitam ayun tu kagustuwan nu pilas sakay sinunud u madukás a hilig nu bággi sakay isip tam. Kaya dipo hod ay kaguman kitam be tu nerarapat hide a parusaan nu Diyos. ⁴ Pero kinagbiyán kitam nu Diyos sakay minahal na kitam ti husto. ⁵ Maske ni inturing na kitam a patay dipo tu págsuway tam ay biniyag na kitam a huway nikuna a biniyag na ti Cristo. Naligtas kam dipo la tu habag nu Diyos. ⁶ Dipo tu pákpágkaessa tam ni Cristo Jesus, ay biniyag na kitam a huway a kaguman ni Cristo sakay pinággetnod na ti langet a kaguman na. ⁷ Ginimet na iye para tu dumemát a panahun ay mepeta na u awan masukat sakay awan mapantayan a habag sakay págmahal nu Diyos nikitam tu pamamag-itan ni Cristo Jesus. ⁸ Dipo tu habag nu Diyos ay naligtas kam tu pamamag-itan nu pánnampalataya moy ni Cristo. Iye a kaligtasan ay kaluub nu Diyos, bakán a gábwat nikam. ⁹ Bakán iye a dipo tu mágkaganda moy hide a gimet kanya awan ti mepagmadakál u deyaman. ¹⁰ Nilalang kitam nu Diyos, sakay tu pamamag-itan nu pákpagkaessa tam ni Cristo Jesus ay inatádden na kitam ti bigu a biyag tánni gamitán tam tu pággimet ti maganda. Dipo itod dán u date na a plano a gustu na a gimitán tam. ¹¹ Kanya isipán moy u date moy a kalagayan: neenak kam a Hentil sakay ngángngahanan a “Awan nature”nu Judio hide. (U Judio hide ay ngángngahanan a “nature”ayun tu gággimitán de tu bággi de.) ¹² Isipán moy a ti panahunan itod ay hiwalay kam be ni Cristo, awan kam kasale tu banuwan nu Israel sakay awan kasale tu kasunduwan nu Diyos a inpanantu na hide. Tu itod ay nabiyag kam ti munduwan iye a awan ti pag-asa sakay awan ti Diyos. ¹³ Pero nadid, dipo tu pákpágkaessa moy ni Cristo Jesus, hikam a date a adeyo ay neadeni dán tu pamamag-itan nu dige ni Cristo a nagbulos nikuna a matay siya tu kudus. ¹⁴ Tu pamamag-itan nu kákkatay na ay pinagkasundu na kitam, hikame a Judio hide sakay hikam a Hentil hide ay pinagessa na. Inibutan na u iyamut a kumán a pader a nánghiwalay nikitam. ¹⁵ Inibutan na u bisa nu Kautusan a puro utus sakay patakaran tánni pagessaán na u duwwa a lahe nu tolay para ti konna hod ay maghare u kapayapaan. ¹⁶ Nadid, eessa kitam dalla a baggi tu pamamag-itan nu kákkatay na tu kudus; inibutan na u iyamut nu duwwa a lahe tu balang essa sakay pinagkasundu na kitam tu Diyos. ¹⁷ Sakay immangay he ti Cristo sakay inpangaral na tu atanan u Maganda a Baheta a mangatád ti kapayapaan nikam a Hentil hide a adeyo tu Diyos sakay tu Judio hide a adene nikuna. ¹⁸ Dipo ni Cristo ay pari-pareho kitamon a makaadene tu Ama tu pamamag-itan nu mággeessa a Banal a Ispirito. ¹⁹ Kaya awan kamon taga-iba a bansa nan kabanuwan kamon nu pinile hide nu Diyos sakay kasale tu pamilya na. ²⁰ Kumán kitam a bilay, u pundásyon ay u intoldu nu apostol sakay u prupeta hide sakay u pinakamahalaga a bito ay ti Cristo Jesus. ²¹ Tu pamamag-itan ni Cristo, u atanan a bahagi nu bilay ay natongko-tongko sakay nakataknág bilang banal a templo nu Panginoon. ²² Dipo tu pákpagkaessa moy nikuna, ay kaguman kam be tu páppágyanan nu Diyos tu pamamag-itan nu Ispirito.

¹ Kaya dipo ti iye, hikán a ti Pablo ay nepireso dipo tu pángngaral ko tungkul ni Cristo Jesus nikam a Hentil hide. ² Tukoy ko a nabaheta moy dáwwad be a dipo tu habag nu Diyos ay inpagkatiwala na nikán u págpahayag tu kagbi na para nikam. ³ U plano hide nu Diyos a awan palla tu itod ti nakatukoy ay Inpahayag na nikán a mismo, sakay te nesulaták dán nikam tungkul ti iye. ⁴ Mentras a basaán moy iye, ay matukuyan moy a maintendiyan ko u sekreto tungkul ni Cristo. ⁵ Iye a plano ay awan inpahayag nu Diyos tu tolay hide tu itod, pero impahayag na dán nadid tu banal hide a apostol sakay tu prupeta hide tu pamamag-itan nu Banal a Ispirito. ⁶ Sa iye u sekreto nu Diyos: tu pamamag-itan nu Maganda a Baheta, u Hentil hide ay makatanggap tu pananto hide nu Diyos kaguman nu Judio hide, sakay parte be hide nu eessa a bággi dipo tu pákpagkaessa de ni Cristo Jesus. ⁷ Dipo tu kagbi nu Diyos, ay nagin tagapagserbiyák na para tu Maganda a Baheta tu pamamag-itan nu kapangyariyan na. ⁸ Hikán u pinakamababa tu pinile hide nu Diyos. Konna paman hod ay ginusto na padi a ipagkaluub nikán i tungkulin nan iye, a ipangaral tu Hentil hide u Maganda a Baheta tungkul tu awan masukat a págpapala a gábwat ni Cristo. ⁹ Sakay ipaliwanag tu atanan ni kodya a mangyare u plano nu Diyos. Iye a sekreto ay nalay a panahun a inlihim nu Diyos a nanglalang tu atanan a bagay, ¹⁰ tánni tu pamamag-itan nu mánnampalataya hide ay mepatengge nadid tu pinuno hide sakay tu te kapangyariyan hide ti langet u awan ti kahád a karunungan nu Diyos a nehayag ti iba-iba a paraan. ¹¹ Iye u plano nu Diyos sapul pa tu sapul sakay tinupad na iye tu pamamag-itan ni Cristo Jesus a Panginoon tam. ¹² Dipo tu pákpagkaessa sakay pánnampalataya tam ni Cristo Jesus, ay malaya kitamon a makaadene tu Diyos a awan ti ánteng oni págduwwa-duwwa. ¹³ Kanya dyan kam nakwa manghina dipo tu nabaheta moy a pághirap ko he para nikam. Iye a pághirap ay para tu kapiyaan moy. ¹⁴ Kanya kada maalaala ku iye a plano nu Diyos ay lumuhudák para magpasalamat tu Ama. ¹⁵ Siya u Ama nu kada pamilya nu tolay a hed ti langet sakay ti lutaáy a simampalataya nikuna. ¹⁶ Idáddasal ko, ayun tu kayamanan sakay tu kadakilaan na a pabegsákkán na u ispiritwal moy a biyag tu pamamag-itan nu Ispirito na, ¹⁷ Tánni mágyan ti Cristo tu puso moy tu pamamag-itan nu pánnampalataya moy nikuna. Idáddasal kube a magin matibay sakay matatag kam tu págmahal moy tu Diyos sakay tu balang essa. ¹⁸ Sakay ni mangyare ina, hikam sakay u agum a mánnampalataya hide ay magkahod ti kakayahan a maintendiyan ni sakodya ti kalawak, kadakál sakay kadisalad u págmahal ni Cristo para nikitam, ¹⁹ tánni u ugali moy ay magin konna tu ugale nu Diyos, kapag matukuyan moy u awan masukat a págmahal ni Cristo, maski ni awan kitam ti kakayahan para ganap a maintendiya iye. ²⁰ Nadid, puriyán tam u Diyos a makagimet tu higit pa tu agidán sakay isipán tam hide, tu pamamag-itan nu kapangyariyan na a magahikad nikitam. ²¹ Papuriyan tam siya magpakahanggan, atanan tam a mánnampalataya a konna tu págparangal nikuna ni Cristo Jesus! Amen.

¹ Kaya nadid, bilang essa a nakapireso dipo tu págserbi ko tu Panginoon ay mákkekakagbiyák nikam a mabiyag kam a konna tu nerarapat bilang dinulaw hide nu Diyos. ² Magin mapagpakumbaba kam, mabait, sakay matiyaga. Magmahalan kam sakay magpasensiyaan tu balang essa. ³ Pagsikapan moy a mapanatile u págkakaessa moy a gábwat tu Banal a Spirito tu pamamag-itan nu mapayapa moy a pákpággagum. ⁴ Eessa kitam a bággi sakay te essa be a Banal a Ispirito. Konna be hod, eessa la u pag-asa moy kaligtasan nikuna a dulawán kam nu Diyos. ⁵ Essa la u Panginoon, kanya essa u pánnampalataya sakay essa a bawtismo. ⁶ U Diyos ay eessa la sakay siya u Ama tam a atanan. Siya u kataasan tu atanan. Magahikad siya nikitam sakay mágyan nikitam a atanan. ⁷ Pero u bawat essa nikitam ay inátadden ni Cristo ti kaluub, ayun tu gustu na a inyatád. ⁸ Konna tu kinagi na tu Kasulatan, “Nikuna summole siya ti langet, ay ingkuyog na u pireso hide, Sakay inátadden na ti kaluub u tolay hide.” ⁹ Ánya u gusto kagiyán nu ‘Summole siya ti langet?’U gusto kagiyán ni ina ay summidung pa siya ti lutaáy. ¹⁰ U tolay a immangay ti lutaáy ay siya labe u tolay a immangay tu kataasan a lugar ti langet para siya dán u maghare tu atanan a linalang. ¹¹ Sakay te iba-iba a kaluub a inyatád siya nikitam: u agum ay pinagkaluuban na a magin apostol, u agum ay magin prupeta, u agum ay mángngaral tu Maganda a Baheta, u agum ay magin pastor sakay u agum ay tagapagtoldu. ¹² Ginimet na iye tánni ihanda tu págserbi u pinile na hide tánni lumagu sakay tumatag hide bilang bággi ni Cristo. ¹³ Tánni hikitam a atanan ay magkaessa tu pánnampalataya sakay tu pákkatukoy tu Anak nu Diyos, sakay tánni magin awan kitam ti kapintasan a konna ni Cristo. ¹⁴ Tánni awan kitamon konna tu anak hide a pabagu-bagu ti isip sakay alisto la a maniwala tu iba-iba a toldu nu tolay hide a mágdaya. Awan kitamon metaw-taw nu tolay hide a u gustu dila ay meangay u tolay tu baka-bakán tu pamamag-itan nu págdaya de. ¹⁵ Nan manatili kitam tu katutuhanan a tehhod a págmahal tánni tu atanan a bagay ay magin konna kitam ni Cristo a siya u ulo nu atanan nu mánnampalataya hide. ¹⁶ Sakay tu pámmunu na, u atanan nu bahagi nu bággi a awan ti agum nan u mánnampalataya, pinagtongko-tongko na sakay u balang essa ay mamágtulungan. Sakay tu pánggimet nu kada essa tu tungkulin de a tehhod a págmahal, u atanan a parte nu bággi ay lumagu sakay bumegsák. ¹⁷ Tu ngahan nu Panginoon, kagiyán ko iye nikam: dyan kamon mabiyag a konna tu tolay a awan nakatengge tu Diyos. Awan ti seserbi u áisipán de. ¹⁸ Sakay awan hide ti pang-intendi. Dipo awan hide ti tukoy sakay mágkaigát u ulo de, awan hide ti bahagi tu biyag a impagkaluub nu Diyos. ¹⁹ Nagin alipin hide ni kahalayan, sakay awan dán hide matagama maskin badit. Awan dán hide ti iba a gággimitán nan puro a kalaswaan. ²⁰ Pero bakán a konna he u natukuyan moy ni Cristo. ²¹ Ni talaga sinaneg moy u toldu na sakay natolduwan kam tu katutuhanan a katoy ni Jesus, ²² ay dapat adággan moy dán u date moy a kákkabiyag dipo iye ay gimet nu date moy a pagkatolay. I pagkatolayan iye u mángpahamak nikam dipo tu mágkadukás a kagustuwan nu bággi a mágdaya nikam. ²³ Nan pakultaden moy a baguwan nu Banal a Ispirito u isip moy sakay tu ugali moy. ²⁴ Sakay u dapat a ketan nikam ay u bigu moy a pagkatolay a nilalang a konna tu Diyos a awan ti kapintasan sakay banal. ²⁵ Kanya adággen moy dán u págbule-bule sakay u tatahoden u ikagi moy tu kákkapátkákka moy hide dipo kabilang kitam tu eessa a bággi. ²⁶ Ni mágngál kamman ay diyan kam magkasala. Sakay dyan moy dán paalayán u ingál moy, ²⁷ tánni awan moy maatádden ti pagkakataun ti Satanas. ²⁸ U mágtakaw ay dyan dán magtakaw; nan magtrabaho siya sakay gamitán na u kamát na tu tarabaho a marangal tánni makatulung siya tu mangailangan hide. ²⁹ Dyan kam magupos ti madukás; sikapán moy a palagi a u ikagi moy ay kapiyyaan nu agum sakay neayun tu pagkakataun tánni makinabang u makasaneg hide. ³⁰ Sakay dyan moy palungkután u Banal a Spirito, dipo siya u tanda nu Diyos nikam, sakay siya u katibayan nu kaligtasan moy káddemát nu netakda a aldew. ³¹ Ibutan moy dán u ányaman a saket ni isip, iyamut, pákpágdadima, pánggulo, metmet, págsida tu agum, sakay tu atanan a kalase nu madukás a ugale. ³² Nan magin mabait kam sakay makákkagbiyán tu balang essa sakay magpatawadan kam konna tu págpatawad nikam nu Diyos tu pamamag-itan ni Cristo.

¹ Kanya ahigán moy u Diyos dipo atanan moy ay pinakamamahal na a anak. ² Mabiyag kam a tehhod a págmahal tu kapareho moy a konna tu págmahal nikitam ni Cristo. Inyalay na u sadile na para nikitam bilang katanggap-tanggap a alay tu Diyos. ³ Dipo pinile kam nu Diyos bilang kao na, ay awan dán dapat a ketan nikam u tungkul tu ányaman a kalase ni pángngibábbey oni pángngilállake sakay kalaswaan. ⁴ Sakay awan be nerarapat a masaneg nikam u mágkalaswa hide oni awan ti pinagseserbiyan a uhunan sakay tu págbiro a awan nararapat. Nan, magin mapagpasalamat kam tu Diyos. ⁵ Tukoy moy a awan makaangay tu kahariyan ni Cristo sakay tu Diyos u tolay hide a mángngibábbey oni mangilállake, mágkalaswa, sakay sakim (dipo u kasakiman ay págsamba tu diyos-diyosan.) ⁶ Dyan kam padaya tu maskin ti deya tu pamamag-itan nu pángngatuwiran hide a awan ti kabuluhan tungkul tu mágkadukás de a gimet, dipo u Diyos ay maiyamut tu masásuwayán hide. ⁷ Kaya dyan kam mákpaggagum tu tolay hide a konna he u gággimitán na. ⁸ Tu itod ay nabiyag kam tu kadiklámman pero nadid ay nademlagan kamon dipo katoy kamon tu Panginoon. Kanya ipeta moy tu kákkabiyag moy a nademlagan kamon. ⁹ Dipo nu u essa a tolay ay nademlagan dán ay ketan tu gimet na u maganda, tama sakay tatahoden. ¹⁰ Sakay pagadalan moy ni ánya u makasaya tu Panginoon. ¹¹ Dyan kam mákbahagi tu gimet nu tolay hide a katoy tu kadiklámman. Nan ikagi moy nide a madukás u gággimitán de. ¹² Dipo makasanike a banggitán he u bagay hide a gággimitán de ti lihim. ¹³ Pero ni kagiyan moy hide tu mágkadukás de a gággimitán ay matukuyan de a madukás ngane itod. ¹⁴ Sakay melantad u atanan dipo tu demlag. Kaya kinagi nu Kasulatan, ‘Lumukag ka hiko a tidug, Umikat ka a gábwat tu patay hide Tánni demlagan ka ni Cristo.’ ¹⁵ Kanya ingatan moy ni kodya kam a mabiyag. Dyan kam mabiyag a konna tu mangmang hide nan konna tu mágkalalake hide a nakatukoy tu kaluuban nu Diyos. ¹⁶ Samantalaán moy u pagkakataun hide a makagimet kam ti maganda. Dipo makpal dán u mágkadukás a gimet ti muduwáy. ¹⁷ Dyan kam umaheg tu mangmang hide. Nan tukuyán moy ni ánya u kaluuban nu Panginoon a gimitan moy. ¹⁸ Sakay dyan kam máglalasingán, dipo makasida ina ti maganda a kákkabiyag. Nan pilitán moy a u kapangyariyan nu Banal a Spirito u maghare nikam. ¹⁹ Tu pággipun-ipun moy ay mágkansiyon kam ti kansiyon a papure para tu Diyos. Buo a puso kam a mágkansiyon sakay magpure tu Panginoon. ²⁰ Bilang mánnampalataya tu Panginoon tam ati Jesu-Cristo lagi kam a magpasalamat tu Diyos Ama maski ánya man u mangyare nikam. ²¹ Pasakup kam tu balang essa bilang tanda nu pággalang moy ni Cristo. ²² Hikam a bábbey hide, pasakup kam tu kákkabanga moy hide konna tu págpasakup moy tu Panginoon. ²³ Dipo u lállake u ulo nu kabanga na, konna ni Cristo a ulo sakay tagapagligtas nu mánnampalataya hide a bággi na. ²⁴ Kanya ni kodya a magpasakup ni Cristo u mánnampalataya hide, ay konna be hod u bábbey hide dapat a pasakup tu kákkabanga de hide tu atanan a bagay. ²⁵ Hikam a lállake hide, mahalán moy u kákkabanga moy hide, konna tu págmahal ni Cristo tu mánnampalataya hide. Dipo tu págmahal na ay inyalay na u biyag na para nide. ²⁶ Ginimet na iye para hikitam a mánnampalataya hide ay magin banal tu atubang nu Diyos dipo hikitam ay imbilang na a nalinisan dán tu pamamag-itan nu pánniwala tam tu upos na kanya hikitam ay nabawtismuwan dán tu dinom. ²⁷ Tánni meatubang na u mánnampalataya hide tu sadile na a maganda, banal, awan ti kapintasan sakay ányaman a dangát. ²⁸ Kaya dapat a mahalán nu lállake hide u kákkabanga de konna tu págmahal de tu sadile de. Ni deya man u magmahal tu kabanga na ay magmahal be tu sadile na. ²⁹ Awan ti tolay a maiyamut tu sadile na, nan pákanán sakay áalagaan na iye. Konna tu gággimitán ni Cristo tu mánnampalataya hide, ³⁰ dipo hikitam ay bahagi nu bággi ni Cristo. ³¹ Kinagi nu Kasulatan, “Dipo he, ay lakaden nu lállake u dáddikál na hide sakay magagum hide ay tu kabanga na; sakay magin essa dán hide.” ³² Iye u dakila a Tatahoden a impahayag nu Diyos: impeta ni iye u kaugnayan ni Cristo sakay tu mánnampalataya hide nikuna. ³³ Pero iye ay patungkul be tu balang essa nikam: hikam a lállake hide, mahalán moy u kákkabanga moy a konna tu sadili moy; hikam a bábbey hide, igalang moy u kákkabanga moy hide.

¹ Nadid, hikam a anak hide, sunudán moy u dáddakál moy hide, dipo iye u nerarapat a gimitán nu mánnampalataya hide tu Panginoon. ² “Igalang moy u dáddakál moy hide.”Iye u kadipalonguwan a utus a tehhod a pananto. Iye u pananto: ³ “Tánni gumanda u biyag mo sakay umatakdug u biyag mo ti lutaáy.” ⁴ Hikam a dáddakál hide, dyan moy masiyado a págngállan u anak moy hide ti ipagribeldi de. Padakállán moy hide a tehhod a disiplina sakay tolduwan moy tu adal nu Panginoon. ⁵ Hikam a alipin hide, sunudán moy u amo moy hide a tehhod a pággalang, ánteng sakay katapatan a kumán be ati Cristo u pinagserbiyan moy. ⁶ Gimitán moy iye, te maketa man oni awan bakán a para puriyán nu tolay hide nan dipo tagapagserbi kam ni Cristo sakay sumássunud ti buu a puso tu kaluuban nu Diyos. ⁷ Magserbi kam a tehhod a kasayaan a kumán a u Panginoon a mismo u pagserbiyan moy bakán a u tolay. ⁸ Dipo átádden nu Panginoon ti gantimpala u balang essa ayun tu ginimet na a maganda, alipin man oni bakán a alipin. ⁹ Sakay hikam a amo hide, mákpággagum kam ti maganda tu alipin hide. Dyan moy hide pakantingán, dipo tukoy moy a pareho kam la a alipin nu eessa a Panginoon a katoy ti langet sakay pantay u pangileng na tu balang essa. ¹⁰ Iye u dimodyan ko a kagiyán: Magpakatibay kam tu pánnampalataya moy tu Panginoon tu pamamag-itan nu dakila na a kapangyariyan. ¹¹ Gamitán moy u atanan a armas a inyatád nu Diyos nikam tánni malabanan moy u patibung hide nu diyablo. ¹² Dipo u kalaban tam ay bakán a katolayan, nan u magkadukás hide a ispirito tu panganurin; hide iye u pinuno, u te kapangyariyan hide, sakay u mamahala hide tu mágkadukás a mámmagyan ti munduwáy. ¹³ Kanya isulot moy u atanan a armas a inyatád nu Diyos nikam. Tánni tu aldew a dumemát u kadukássan ay magimet moy a mákpaglaban. sakay káttapos nu pákpaglaban moy ay matatag kam padi tu pánnampalataya moy. ¹⁴ Kaya konna tu essa a sundalo, dapat lagi kam a handa: U tatahoden la u dapat moy a isipán oni kagiyán a magesinturon moy. Sakay dapat u magada la u gimitán moy a kumán a iye u pangtakláb moy tu hakaw moy. ¹⁵ Kailangan a lagi kam a handa a ipangaral u Maganda a Baheta a mangatád ti kapayapaan; kumán iye a sapatus moy. ¹⁶ Pero bakán la a ina. Nan kailangan a lagi kam a matatag tu pánnampalataya moy, dipo iye u magekalasag moy a pangsalag moy tu atanan a tokso ni Satanas a kumán a magapoy-apoy a pana a ipana na nikam. ¹⁷ Lagi kambe a manalig a natanggap moy dán u kaligtasan moy a gábwat ni Cristo kanya hikam ay ligtas dán, konna tu essa a sundalo a manalig dipo tukoy na ate helmet siya a pangdipensa na tu ulu na. Sakay dapat lagi kam a handa a magpahayag tu upos nu Diyos a itoldu nikam nu Banal a Ispirito, dipo iye u kumán moy a áttak. ¹⁸ Sakay palagi kam a magdasal tu Diyos a tulungan nakam, sakay diyan kam magpabaya nan ipagdasal moy u atanan nu mánnampalataya hide ni Cristo, sakay palagi moy a sunudán u pággiya nu Banal a Ispirito nikam tu págdasal moy. ¹⁹ Ipagdasalák moy be a nakwa kada magtolduwák ay atáddinák nu Diyos ti tama hide a upos tánni mepahayag ko a tehhod a begsák isip u Maganda a Baheta a nesekreto tu itod. ²⁰ Dipo inutusanák nu Diyos para ipangaral u Maganda a Baheta sakay iye u dahilan ni bakin a nakapiresuwák nadid. Kaya ipagdasal moy a mepahayag ko iye a tehhod a begsák isip dipo iye u nerarapat. ²¹ Ti Tiquico, a mahal tam a kapátkákka sakay matapat a tagapagserbi nu Panginoon, u mángbaheta nikam tu atanan a bagay tungkul tu kalagayan sakay gággimitán ko. ²² Iye u dahilan ni bakin a paangayán ko siya hina, tánni matukuyan moy u kalagayan mi he sakay mapabegsák be u isip moy. ²³ Kákkapatkákka ko hide, nakwa ay atádden kam nu Diyos Ama sakay tu Panginoon tam ati Jesu-Cristo ti kapayapaan, págmahal tu balang essa sakay pánnampalataya moy nikuna. ²⁴ Pagpalaán nakwa nu Panginoon a ti Jesu-Cristo u atanan a magmahal nikuna ti tapat.