Colosas

Colosas

¹ Mahal ko hide a kákkapatkákka, iye a sulat ay gábwat nikán a ti Pablo a apostol ni Cristo Jesus ayun tu kaluuben nu Diyos sakay gábwat be tu kapatkákka tam a ti Timoteo. ² Iye a sulat ay para tu taga-Colosas hide a pinile nu Diyos sakay tapat a kákkapatkákka me ni Cristo. Nakwa ay atádden kam nu Diyos Ama ti kapayapaan, sakay pagpapala. ³ Pirme kame a magpasalamat tu Diyos a Ama nu Panginoon tam a ti Jesu-Cristo, kada ipagdasal mikam, ⁴ dipo nabaheta me u pánnampalataya moy ni Cristo-Jesus sakay u págmahal moy tu atanan a pinile nu Diyos, ⁵ dipo tu pag-asa a matanggap moy u nehanda para nikam ti langet. Natukuyan moy u tungkul ti pag-asaan iye nikuna a ibaheta nikam u upos nu tatahoden; iye u Maganda a Baheta a dimmemát nikam. ⁶ Kimmalat iye ti buuwáy a mundu tán mangatád ti págpapala, konna tu nangyare nikam sapul nikuna a nasaneg moy sakay naintendiyan u tatahoden tungkul tu kagbi nu Diyos. ⁷ Natukuyan moy iye ni Epafras, a tapat a alipin ni Cristo a mahal me a kaguman a tagapagserbi ni Cristo sakay siya u bilang bággi me nikuna nagtoldu siya nikam. ⁸ Sakay natukuyan me nikuna u tungkul tu págmahal moy a impagkaluub nikam nu Banal a Ispirito. ⁹ Kaya sapul a nasaneg me iye, ay tulos-tulos me a idáddasal tu Diyos a nákwa ay ipakapos-pos na nikam ti husto u kaluuban na. Tu pamamag-itan nu karunungan sakay pággintendi a kaluub nu Banal a Ispirito. ¹⁰ Para ti konna hod, mabiyag kam a karapat-dapat sakay makasaya tu Panginoon: sakay makagimet kam ti mágkaganda a gimet sakay lumawak u pákkatukoy moy tu Diyos. ¹¹ Idáddasal me be a pabegsákkán nakam nakwa tu tulung nu dakila na a kapangyariyan tánni makatággád kam sakay makapagtiis tu atanan a bagay ate kasayaan. ¹² Sakay pirme kam a magpasalamat tu Ama, dipo nebilang kam karapat-dapat a mákbahagi tu mana a para tu pinile na hide a katoy tu demlag. ¹³ Inligtas na kitam tu kapangyariyan nu kadiklámman sakay inyagton na kitam tu kahariyan nu pinakamamahal na a Anak. ¹⁴ Tu pamamag-itan nu Anak na, ay napalaya sakay napatawad kitamon tu kasalanan tam hide. ¹⁵ U Diyos ay awan ketan pero ketan u Diyos ni Cristo. Siya u tehhod a kapangyariyan tu atanan a nilalang. ¹⁶ Dipo atanan a nilalang ti langet sakay ti lutaáy, ketan man oni awan, pate u ispirito hide a maghare, sakay tu mamahala hide, u mamuno hide, sakay u tehhod hide a kapangyariyan a ispiritwal ay nilalang nu Diyos tu pamamagitan na sakay para nikuna. ¹⁷ Bagu pa a lalangán u atanan a bagay ay katoy dán ti Cristo, sakay tu pamamag-itan na u atanan a nilalang ay manatile tu kaayusan de. ¹⁸ Ti Cristo u ulo nu mánnampalataya hide sakay hide u bággi na. Siya u pinaggábwatan nu biyag a awan ti kahád, dipo siya u kadipalonguwan a nabiyag a huway tánni siya u pinakadakila tu atanan. ¹⁹ Dipo netakda dán nu Diyos a he dán tu anak na u atanan a pagka-Diyos na. ²⁰ Sakay tu pamamag-itan nu Anak na, ay ginusto nu Diyos a u atanan nu nilalang ti langet ay ti lutaáy ay mákpagkasundu nikuna. Iye ay tu pamamag-itan nu digi ni Cristo a nebuhus tu kákkatay na tu kudus. ²¹ Tu itod, ay adeyo kam tu Diyos sakay nagin kadima na, dipo tu kadukássan a hod tu isip moy sakay siya be u gággimitán. ²² Pero dipo tu kákkatay ni Cristo, ay inturing nakam a amigu na tánni makaatubang kam nikuna a banal, matuwid, sakay awan ti kapintasan. ²³ Pero kailangan a manatile kam a tapat sakay matatag tu pánnampalataya moy. Dyan moy pabayan a mawan u pag-asa a gábwat tu Maganda a Baheta a nasaneg moy. U Maganda a Baheta a iye ay nepangaral dán tu buo a mundu, sakay hikán ati Pablo ay naging tagapangaral ti iye. ²⁴ Masayaák tu pághirap ko nadid dipo tukoy ko a para iye tu ikapiya moy. I pághirap ni bággi kuwáy nadid ay pángtulos-tulos tu pághirap ni Cristo para tu mánnampalataya hide a magebággi na. ²⁵ Nagin tagapagserbiyák na para tu mánnampalataya hide nikuna a piniliyák nu Diyos para ganap a mepahayag nikam u upos na. ²⁶ Iye a itoldu ko ay katupaden nu plano nu Diyos a nelihim tu nakalipas hide a makpal a taon sakay lahe, pero nehayag dán nadid tu pinile hide nu Diyos. ²⁷ Ginusto nu Diyos a ihayag tu atanan a tolay u dakila sakay makataka-takaan iye a planu na, a awan ti agum nan ti Cristo a katna nikam. Dipo nikuna ay nakasigudu kitam tu pag-asa tam a makaguman kitam tu kahariyan nu Diyos. ²⁸ Itona u dahilan ni bakin a ipáppangaral me ti Cristo tu katolayan. Ipakapos-pos me sakay táttolduwan me hide tu atanan a tukoy me tungkul ni Cristo para meatubang me u balang essa tu Diyos, a awan ti kapintasan dipo tu pákpagkaessa de ni Cristo. ²⁹ Iye u gustu ko a matupad kaya magpakahirapák a magtoldu tu pamamag-itan nu kapangyariyan ni Cristo a magahikad nikán.

¹ Nadid, gusto ko a matukuyan moy ni sa kodya ti kadakál u pághirap ko para nikam, konna be tu taga-Laodicea hide, sakay tu atanan a awan palla hide naketa nikán. ² Gággimitán ku iye para pabegsákkán takam a atanan sakay pagkaessaán a magmahalan tu balang essa. Tánni matukuyan sakay maintendiyan moy ti husto u plano nu Diyos a inlihim na tu itod tungkul ni Cristo. ³ Katoy nikuna u atanan a karunungan nu Diyos. Siya u kumán a suse para maitendiyan u isip nu Diyos. ⁴ Kákkagiyán ko iye nikam tánni awan kam metawtaw nu deyaman tu pamamag-itan nu mágkaganda a pággupos. ⁵ Maski ni awanák hina, ay lagi kam tu isip ko. Masayaák dipo mapayapa u kákkabiyag moy sakay matibay u pánnampalataya moy ni Cristo. ⁶ Ta tinanggap moy dán ti Cristo Jesus bilang Panginoon, ay dapat mabiyag kam a karapat-dapat nikuna. ⁷ Manatile kam nikuna sakay tulos-tulos a lumagu tu pákkakilala moy nikuna. Magpakatibay kam tu pánnampalataya a netoldu nikam, sakay lagi kam a magpasalamat tu Diyos. ⁸ Magingat kam tánni awan kam madaya nu maskin deya tu pamamag-itan nu awan hide ti kabuluhan a makadaya a toldu a awan naggábwat ni Cristo, nan kagi-kagi la nu mágkatanda hide sakay nu mágkadukás a ispirito. ⁹ Kaya diyan kam padaya dipo u buo a pagka-Diyos ay katoy ni Cristo maskin nagin tolay siya. ¹⁰ Sakay dipo tu pákpagkaessa moy nikuna, ay hod dán nikam u atanan a kailangan moy tu pánnampalataya moy. Ti Cristo puno tu atanan a te kapangyariyan sakay kapamahalaan. ¹¹ Dipo tu pákpagkaessa moy ni Cristo, ay kumán kamon a nature. Pero bakán a tu págture a gimitán nu tolay nan u págture a gábwat ni Cristo, a awan ti agum nan tu páng-adág tu mágkadukás a kagustuwan nu bággi. ¹² Sakay nikuna mabawtismuwan kamon, ay kumán kamon a nelábbáng a kaguman ni Cristo sakay nabiyag kam a huway a kaguman na dipo tu pánniwala moy tu kapangyariyan nu Diyos a nangbiyag nikuna a huway. ¹³ Tu itod, ay nebilang kam a patay dipo tu kasalanan moy hide. Pero nadid ay biniyag kamon nu Diyos a kaguman ni Cristo. Sakay pinatawad na u kasalanan tam hide. ¹⁴ Tehhod kitam nakwa a panagutan tu Diyos dipo awan tam natupad u Kautusan. Pero imbut iye nu Diyos tu pamamagitan nu kákkepako ni Cristo tu kudus. Kaya awan na kitamon parusaan. ¹⁵ Tu pamamag-itan nu kákkatay na tu kudus, ay natalo na ti Satanas sakay u mágkadukas hide a ispirito a pamunuwan na. Sakay impeta na tu atanan a hide ay awan dán ti kaya a mamuno nikitam Iye u katunayan a nagtagumpay siya. ¹⁶ Kanya dyan kamon pasakup tu ánya man a patakaran tungkul tu makan oni mainom, tungkul tu piyesta, tu bigu a bulan oni tu Aldew nu Káimang. ¹⁷ Iye hide ay anino la nu bagay hide a pademát. Pero ti Cristo u katupaden ni iye hide a atanan. ¹⁸ Dyan kam maniwala tu mángpeta hide tu liwat de a págpakumbaba sakay magsamba tu anghel hide. Ipagmadakál de a mas higit hide nikam dipo tu pangitain de hide pero u tatahoden ay magmadakál la hide magmadakál la hide dipo tu makamundu de a isip. ¹⁹ Awan hide magpasakup ni Cristo bilang ulo sakay te kapangyariyan tu buo a bággi a namagtongko-tongko sakay mangalaga nikitam a kumán a bággi na.Tu konna hod ay lumagu kitam ayun tu páglagu a gusto nu Diyos. ²⁰ Nákkatay kamon a kaguman ni Cristo sakay awan dán tu kapangyariyan nu mágkadukás hide a ispirito a maghare ti munduwáy. Bakin a sumunud kam pa tu patakaran hide a konna tu, ²¹ “Diyan kumahap ti iye,”“Dyan umennam ti iye,”“Dyan kahapán iye”? ²² Iye hide ay utus sakay toldu la nu tolay tungkul tu bagay hide a mawan. ²³ Ti bigla ileng, kumán ngane a maganda u págsamba tu anghel hide, u male a gággimitán a págpakababa sakay págpasaket tu bággi de. Pero iye hide ay awan ti metulung para mapigilan u mágkadukás a kagustuwan nu pilas.

¹ Nadid, dipo nebilang kamon a nabiyag a huway a kaguman ni Cristo, ituun moy u isip moy tu bagay hide a katoy ti langet tu páppágyanan ni Cristo a mággetnod tu kawanan nu Diyos. ² Ituun moy isip moye tu bagay hide ti langet, bakán a tu bagay hide ti lutaáy ³ dipo kumán kamon a natay tu date moy a kákkabiyag, sakay u tatahoden moy a biyag ay katoy tu Diyos, kaguman ni Cristo. ⁴ Ti Cristo u tatahoden a biyag moy, ni mehayag dán siya, ay mehayag kambe a kaguman na sakay makbahagi kam tu karangalan na. ⁵ Kaya dapat moy dán a ibutan u kagustuwan nu pilas: u pángngibábbey oni pángngilállake, kahalayan, pággisip ti mágkalaswa a bagay, madukás a kagustuwan, sakay u págdámmot a essa a klase ni págsamba tu diyos-diyosan. ⁶ Parusaan nu Diyos u tolay hide a maggimet ti konna he a bagay. ⁷ Tu itod, nikuna paghariyan kam palla nu mágkadukás a kagustuwan nu pilas, ay nabiyag kam be a konna ti iye a kakaguman nu tolay hide a mággagimitán ti konna he. ⁸ Pero nadid, ibutan moy dán iye a atanan, pággiyamut, subra a kákkaiyamut sakay u saket ni isip. Iwasan moy dán u pángsida tu agum a tolay sakay u mágkalaswa a pággupos. ⁹ Diyan kam magbuli-bule tu balang essa, dipo inibutan moy dán be u date moy a pagkatolay pate u date hide a gimet, ¹⁰ sakay impalit moy dán u bigu moy a pagkatolay. Tulos-tulos iye a mabagu sakay magin kahupa nu Diyos a nanglalang nikam, tánni mas lalo moy siya a matenggi. ¹¹ Kanya awan dán ti pagkakaiba u Griego sakay u Judio, u ture sakay u awan ture, ute nagadalan sakay oni awan ti nagadalan, u alipin sakay tu tolay a malaya. Para ni Cristo, awan ti págkakaiba u atanan, dipo siya ay para tu atanan. ¹² Bilang pinile nu Diyos, banal sakay mahal na, dapat makákkágbiyán kam, maganda u ugale, mapagpakumbaba, mabait sakay handa a magtiis. ¹³ Mamágpasensiyaan kam sakay mamágpatawaden ni te saket kam ti isip tu balang essa. Magpatawaden kam konna tu págpatawad nikam nu Panginoon. ¹⁴ Sakay higit tu atanan, magmahalan kam dipo iye u mangatád ti tunay a págkakaessa. ¹⁵ Sakay paghariyán moy tu puso moy u kapayapaan a gábwat ni Cristo, dipo iye u dahilan kaya nadulaw kam nu Diyos para magin bahagi nu essa a bággi. Magpasalamat kam a pirme. ¹⁶ U upos hide ni Cristo ay iyasák moy tu isip moy. Mamágpaala-alaan kam sakay mamágtolduwan tu balang essa ayun tu karunungan a kaluub nu Diyos. Mágkansiyon kam ti pang-ispirituwal a kansiyon a gábwat tu Diyos a te págpasalamat. ¹⁷ Sakay ánya man u gimitán moy magin tu pággupos oni tu gimet, ay gimitán moy a atanan tu ngahan nu Panginoon Jesus, sakay magpasalamat kam tu Diyos Ama tu pamamag-itan na. ¹⁸ Bábbey hide, pasakup kam tu kákkabanga moy, dipo ina u nerarapat a gimitán bilang mannampalataya tu Panginoon. ¹⁹ Lállake hide, mahalán moy u kákkabanga moy, sakay diyan moy hide pasakitan. ²⁰ Anak hide, sunudán moy sakay igalang u dáddakál moy hide tu atanan a bagay, dipo ina u makasaya tu Panginoon. ²¹ Dáddakál hide, dyan moy págngállan ti subra u anak moy hide, bakay ni manghina hide ti isip. ²² Alipin hide, sunudán moy tu atanan a bagay u amo moy ti lutaáy. Te maketa man oni awan, magtrabaho kam, bakán a para kasayaan kam nu tolay nan dipo tapat kam sakay te ánteng tu Panginoon. ²³ Ánya man u gimitán moy, ay gimitán moy ti buu a puso a kumán a bakán a tolay i pagserbiyan moyay nan u Panginoon. ²⁴ Tukoy moy labe a te gantimpala kam tu Panginoon; tanggapán moy u inhanda na tu anak na hide. Dipo ti Cristo a Panginoon u págserbiyan moy. ²⁵ U makasalanan be hide ay parusaan na ayun tu kasalanan de hide dipo u Diyos ay awan ti kampiyan.

¹ Amo hide, magin mabait kam sakay pantay u pángtrato moy tu alipin hide. Alalahanán moy a tehhod kam be a Panginoon ti langet. ² Dyan kam magsasawa a magdasal. Ituun moy a pirme u isip moy tu págdasal sakay lagi kam a magpasalamat tu Diyos. ³ Ipagdasal moy kame be a atádden kame nu Diyos ti pagkakataun a mepahayag me u upos na tungkul ni Cristo a nelihim tu itod. Iye u dahilan nu kákkepireso ko nadid. ⁴ Ipagdasalák moy be a mepangaral ko iye ti maganda, sakay tu nerarapat. ⁵ Magingat kam tu pákpággagum moy tu awan hide mánnampalataya. Samantalaán moy u atanan a pagkakataun a mebahagi u pánnampalataya moy. ⁶ Pilitán moy a mawile hide tu pákpágguhon de nikam sakay adalán moy ti maganda ni kodya moy a tábbegán ti tama u balang essa. ⁷ Ti Tiquico a mahal me a kapatkákka ti pánnampalataya sakay kapareho ko be a alipin nu Panginoon, u mángbaheta nikam tu atanan a bagay tungkul tu kalagayan kuhe. ⁸ Pinaangay ko siya hina para matukuyan moy u kalagayan me, tánni bumegsák u isip moy. ⁹ Sakay kaguman na ti Onesimo, u tapat sakay mahal tam a kapatkákka ti pánnampalataya. Hide u mángbaheta nikam tu atanan a nangyare he. ¹⁰ Kumustaán kambe ni Aristarco a kaguman ko be a nakapireso, sakay ti Marcos a pensan ni Bernabe. (Konna tu imbilin ko nikam tu itod tungkul ni Marcos, tanggapán moy siya ti mahusay káddemát na hina.) ¹¹ Kumusta kam kálla be kagi ni Jesus a nginahanan de a Justo. Hide la a tállo u Kristiyano a Judio he a timmulung nikán tu pángngaral tungkul tu pághare nu Diyos. Hide u nangpabegsák tu isip ko. ¹² Mákkumusta be nikam u kabanuwan moy a ti Epafras a alipin ni Cristo Jesus. Pirme nakam a idáddasal ti mataimtim a manatile kam a matatag, lumagu, sakay pirmi a sumunud tu kaluuban nu Diyos. ¹³ Tistiguwák tu págsumikap na para nikam sakay tu katoy hide ti Laodicea sakay Hierapolis. ¹⁴ Mákkumusta be nikam ti Lucas, u mahal tam a doktor, sakay ti Demas. ¹⁵ Ikumustaák moy dálla tu kákkapatkákka tam hide ti Laodicea, ni Nimfa sakay tu mánnampalataya hide a mamággipun-ipun tu bilay na. ¹⁶ Pákkabasa moy ti sulatan iye, ay ipabasa moy be tu mánnampalataya hide ti Laodicea. Sakay basaán moy be u sulat ko a gábwat hod. ¹⁷ Sakay kagiyán moy pay ni Arquipo a itulos-tulos na u gawain a tinanggap na tu Panginoon. ¹⁸ Hikán a ti Pablo i nágsulatay ti iye a pángngumusta, tánni matukuyan moy a iye a sulat ay talaga gábwat nikán. Diyan moy kalimunan a nakapiresuwák ipagdasalák. Pagpalaán kam nu Diyos.