Gimet

Gimet

¹ Mahal ko a Teofilo: Tu purumero ko a libro ay insulat ko u atanan a ginimet sakay intoldu ni Jesus magsapul tu kadipalonguwan na a ginimet ² hanggan tu aldew a simmole siya ti langet. Bagu siya a simmole ti langet ay binilinan na u pinile na hide bilang apostol tu pamamag-itan nu Banal a Ispirito. Káttapos nu pághirap na ay pimmeta siya nide ti sangan a beses, tánni patunayan na a biyag siya. Pimmeta siya nide tu alay nu kuwarenta a aldew sakay nagtoldu tungkul tu pághare nu Diyos. ⁴ Essa aldew mentaras kuman hide a kaguman ni Jesus ay kinagi na, “Dyan kam pa lumakad ti Jerusalem. Uhayán moy u Banal a Ispirito a inpananto nu Diyos Ama. Kinagi ko dán iye nikam tu itod. ⁵ Nagbawtismo ngane ti Juan tu dinom, pero awan magmalay ay mabawtismuwan kam be tu Banal a Ispirito.” ⁶ Nikuna mamágkaguman a huway di Jesus sakay tu disepulus na hide ay tinanung de siya,“Panginoon, itatag mo dán beman a huway u pághare nu lahe hide ni Israel?” ⁷ Timmábbeg ti Jesus, “Awan moy kailangan a matukuyan u panahun oni odas a intakda nu Diyos Ama ni nikán a mangyare u bagay hide a itod. ⁸ Pero ni kátna dán nikam u Banal a Ispirito ay magkahod kam ti kapangyariyan a mangpatunay tungkul nikán ti Jerusalem, tu buo a Judea, ti Samaria, sakay hanggan tu kasuluk-sulukan ni munduway.” ⁹ Pákkakagi na ti iye, ay mágga-oontok dán siya a patamo ti langet. Mentaras umáeleng hide nikuna a paontok, ay tinakáppan siya nu diklám sakay agad siya a nawan tu pangileng de. ¹⁰ Mentaras a umáeleng hide ti langet ay tehhod a duwwa a lállake a nakamapudew ti badu u bigla dálla a timmaknág tu háhhawisan de. ¹¹ Kinagi de, “Hikam a taga-Galilea hide, bakin katoy kam pa he a umáeleng ti langet? Ti Jesus a netan moy a immangay ti langet ay sole siya a konna tu netan moy a káangay na ti langet.” ¹² Nagsole u disepulus hide ti Jerusalem a gábwat tu Buked nu Olibo, a halus essa a kilometro u kadeyo na ti Jerusalem. ¹³ Káddemát de ti Jerusalem, ay simmangkay hide ti ontok a kuwarto tu bilay a táttulusan de. Iye hide ay di Pedro, Juan, Santiagu, Andres, Felipe, Tomas, Bartolome, Mateo, Santiagu a anak ni Alfeo, Simon a makabayan, sakay ti Judas a anak ni Santiago. ¹⁴ Lagi hide a mamággipun-ipun para magdasal kaguman u bábbey hide sakay ti Maria a ina ni Jesus, konna bihod u kákkapatkákka ni Jesus a lállake. ¹⁵ Kállipas nu sangan a aldew, ay namággipun-ipun u essa a datos ay ti bayinte a mánnampalataya. Timmaknág ti Pedro tu atubang de sakay nagupos, ¹⁶ “Kákkapatkákka ko hide, u nakasulat tu Banal a Kautusan nikuna a pinagupos nu Banal a Ispirito ti David tungkul ni Judas a nánggiya tu nangdakáp hide ni Jesus ay natupad dán. ¹⁷ Ti Judas ay date me a kaguman bilang essa a apostol, sakay kaguman me siya tu págserbi.” ¹⁸ (U pilak a inbayad de ni Judas ay inbale na ti luta. Sakay hed he siya a natákneg a pausok, nabutyakan u tiyan na sakay limmuwas u bituka na. ¹⁹ Natukuyan iye nu atanan a mámmágyan ti Jerusalem, kanya nginahanan de itod a lugar a Akeldama, u gusto na a kagiyán ay “Uma nu Dige.”) ²⁰ Kinagi pa ni Pedro, “Nakasulat tu Libro nu Kansiyon hide, ‘U nágyanan na ay diyan moy dán adeniyan, sakay diyan dán págyanan nu maskin ti deya.’ Sumássulat be a, ‘Iyatád tu agum u tungkulin na.’ ²¹ - ²² “Kanya dapat kitam a mangpile ti essa a makaguman tam bilang kapalit ni Judas. Dapat essa siya tu nakaguman tam hide a nagserbi tu Panginoon Jesus nikuna katoy padla siya ti munduwáy, sapul nikuna binawtismuwan siya ni Juan hanggan tu káangay na ti langet.” ²³ Kanya nangpile hide ti duwwa a lállake a pagpiliyan de: ti Matias sakay ti Jose a ngángngahanan de a Barsabas sakay Justo. ²⁴ Sakay bagu hide a nangpile ay nagdasal hide, “Panginoon, hiko u nakatukoy tu puso nu atanan a tolay. Kanya ipeta mo ped nikame ni ti deya u dapat me a piliyán ti duwwaan iye, ²⁵ a magin apostol mo bilang kapalit ni Judas tu katungkulan na a awan na hinawe. Nadid ay he dán siya tu lugar a nelaan nikuna.” ²⁶ Káttapos de a nagdasal ay nagbunutan hide. Sakay u napile de ay ti Matias. Kanya ti Matias u indagdag de tu sapulo ay ti essa a apostol.

¹ Nikuna dumemát u aldew nu Penticostes ay nagipun-ipun tu essa a lugar u atanan nu mánnampalataya hide. ² Sakay te bigla dálla hide a nasaneg a galungogung a gábwat ti langet, a konna tu mabegsák a pahás. I galungogungan itod u masaneg tu hádya man a suluk nu bilay a pamággipun-ipunan de. ³ Káttapos ay tehhod hide a netan a nagbuu-buo a apoy a kumán a dila a kimmalat tu balang essa nide. ⁴ Sakay minágkaputat hide ti Banal a Ispirito. Kanya nakapagupos hide ti iba-iba a upos, sigun tu kaluub nu Banal a Ispirito tu balang essa. ⁵ Nadid, makpal a Judio a makidiyos, u mágyan ti Jerusalem a gábwat tu iba-iba a bansa ti munduway. ⁶ Pákkasaneg nu tolay hide tu galungogung a itod ay nagalalisto hide a immangay tu pamággipunan nu mánnampalataya hide. Nagtaka hide dipo nasaneg de a makapagupos dán u mánnampalataya hide tu upu-upos de. ⁷ Dipo tu págtaka de ay nakagi de, “Awan beman taga-Galilea hide a atanan? ⁸ Bakin tukoy di dán a magupos tu kada upos tam? ⁹ Tehhod nikitam a taga-Partia, te taga-Media, taga-Elam, te gábwat be ti Mesopotamia, ti Judea, Capadocia, ti Ponto sakay ti Asia. ¹⁰ Tehhod pa nikitam a taga-Frigia sakay Panfilla, Egipto sakay u lugar hide a sakup ni Libia a adene ti Cirene. Katoy bihod u taga-Roma hide u Judio sakay u naakit hide tu rilihiyon de. ¹¹ Sakay u agum ay gábwat ti Creta sakay ti Arabia. Pero masássaneg tam hide a magupos tu upos tam tungkul tu makataka-taka hide a ginimet nu Diyos!” ¹² Awan de maabut a maisip u nangyare kanya awan matapos-tapos u pamágtanungan de ni ánya u gusto a kagiyán ni itod. ¹³ Pero u agum hide ay sineste de hide, kinagi de, “Lasing la itona hide!” ¹⁴ Nadid, dipo tu kinagi de ay timmáknág ti Pedro kaguman u sapulo ay ti essa a apostol sakay nagupos siya ti mabegsák. Kinagi na, “Hikam a kasa Judio ko hide, sakay hikam a taga-Jerusalem, mágsaneg kam nikán, dipo kagiyán ko ni ánya i gustuway a kagiyán ni iye hide a bagay. ¹⁵ Awan lasing iye hide a tolay a konna tu pangisip moy. Dipo alas nuwebe palla nadid ti dimadimang. ¹⁶ Iye a pangyayare ay u katupaden dán nu hula ni prupeta Joel tu itod: ¹⁷ Kinagi nu Diyos, “Tu dimodyan a aldew, ay iyatád ko u Banal a Ispirito ko tu atanan a klase ni tolay. Ibaheta nu anak moy hide a lállake sakay bábbey u upos ko; sakay maketa ti pangitain u anak moy hide a ulito; sakay u mágkatanda hide a lállake ay magkahod hide ti tagináp. ¹⁸ Ti itod a aldew ay iyatád ko u Ispirito ko tu tagapagserbi ko hide a lállake sakay bábbey, sakay ipahayag de u Upos ko hide. ¹⁹ Mángpetaák ti himala ti langet sakay ti lutaáy; mangpetaák ti dige, apoy sakay ti mabagál a asok. ²⁰ Magdiklám u aldew sakay magdideg u bulan a kumán a dige. Mangyare iye bagu a dumemát u makataka-taka a aldew nu pághatul nu Panginoon. ²¹ Pero ni ti deyaman u dumulaw tu ngahan nu Panginoon ay maligtas.” ’ ²² “Hikam a taga-Israel hide ay mágsaneg kam nikán! Ti Jesus a taga-Nazaret ay pinaangay nu Diyos nikam, sakay pinatunayan iye nu Diyos tu pamamag-itan nu himala hide sakay tu makataka-taka hide a ginimet na tu pamamag-itan ni Jesus. Mismo hikam u nakatukoy ti pangyayariyan iye dipo nangyare iye he nikam. ²³ Sapul pa tu sapul ay tukoy dán nu Diyos a ti Jesus ay iyatád na nikam, kanya ayun tu karunungan na ay pinayagen na a impepako moy sakay pinabuno tu makasalanan hide a tolay. ²⁴ Pero nadid ay biniyag siya a huway nu Diyos sakay inibutan na u kapangyariyan nu kamatayan nikuna dipo awan maare a maghare nikuna u kamatayan. ²⁵ Konna tu kinagi ni David tu itod tungkul nikuna, ‘Tukoy ko a lagi ko a kaguman u Panginoon sakay awanák na pabayan, kanya awanák mabali-balisa. ²⁶ Kanya tunay kasayaan kuwáy, sakay awan mapugád u papuri ko tu Diyos. Sakay maskin matayák, ay tehhodák a pag-asa a mabiyag. ²⁷ Dipo tukoy ko a awan mo pabayan u kaliduwwa ko tu lugar nu kaliduwwa nu nágkatay dán hide. Awan mo be pabayan a mahunot u banal mo a tagapagserbi. ²⁸ Intoldu mo nikán u tama a dilan a patamo tu biyag, sakay dipo hiko u palagi ko a kaguman ay masayaák a tahod.’ ²⁹ “Kákkapatkákka ko hide, maliwanag a bakán a ti David u kákkagiyán ko he, dipo u nuno tam a ti David ay natay dán sakay nelábbáng dán, sakay hanggan nadid ay tukoy tam ni hádya siya a nelábbáng. ³⁰ Ti David ay essa a prupeta kanya natukuyan na u inpananto nu Diyos nikuna, a essa tu sumunud a lahe na ay magin hare la be a konna nikuna sakay siya u magmana tu kahariyan na. ³¹ Sakay netan na dán ni ánya mangyariyay tu lahe na. Kanya u kákkabiyag a huway ni Cristo u binanggit na nikuna kinagi na a, ‘Awan siya pinabayan tu páglábbángngan sakay awan nahunot u bággi de.’ ³² Iye ay ti Jesus a biniyag nu Diyos a huway, napatunayan me a nabiyag siya a huway dipo netan me. ³³ Pinággetnod siya tu kawanan nu Diyos sakay natanggap na u nepananto a Banal a Ispirito tu Ama. Iye u inyatád na nikame konna tu áelingán sakay masássaneg moy nadid. ³⁴ - ³⁵ Bakán a ti David u immangay ti langet, pero kinagi na, ‘Kinagi nu Panginoon tu Panginoon ko: Mággetnod ka he ti kawanan kuwáy hanggan mapasuko ko u kadima mo hide niko.’ ³⁶ Kanya dapat talaga a matukuyan nu atanan a Israelita a ti Jesus a impako moy tu kudus ay siya u pinile nu Diyos a magin Panginoon sakay Cristo.” ³⁷ Nabalisa hide tu nasaneg de kanya kinagi de ni Pedro sakay tu agum hide a apostol a, “Kákkapatkákka me hide, ánya i dapat miyay a gimitán?” ³⁸ Timmábbeg ti Pedro, “Kákkapatkákka ko hide, pagsisiyan moy dán sakay adeyuwan u kasalanan moy hide, sakay magpabawtismo kam tu ngahan ni Jesu-Cristo tánni mapatawad kam tu kasalanan moy hide, sakay pagkaluuben nakam tu Banal a Ispirito. ³⁹ Dipo iye a pananto nu Diyos ay para nikam sakay tu kaapu-apuwan moy hide, sakay para tu atanan a tolay a katoy ti adeyo, tu balang essa a dulawán nu Panginoon a Diyos.” ⁴⁰ Makpal pa a kinagi ti Pedro pero essa la u pákkekakagbi na tu tolay hide itod ay,“Pabayan moy a maligtas kam tánni awan kam mesale tu parusa a dumemát ti madukássan iye a lahe.” ⁴¹ Makpal u naniwala tu mensahe na sakay nagpabawtismo hide a agad. Ti itod a aldew ay mga tállo a libu a tolay u nedagdag tu mánnampalataya hide. ⁴² Nagin masipag hide tu págsaneg sakay pággadal tu itáttoldu nu apostol hide. Lagi hide a mamaggipun-ipun bilang mátkaka. Sakay hide ay pisan-pisan a kuman sakay magdasal. ⁴³ Makpal a himala sakay makataka-taka a bagay u ginimet nu Diyos tu pamamag-itan nu apostol hide. Kanya nabiyag hide a tehhod a pággalang sakay ánteng tu Diyos. ⁴⁴ Sakay pirmi a mapisan-pisan u atanan nu mánnampalataya hide sakay awan hide nagkemot tu ányaman a kabiyagen de ni awan imbahagi de tu balang essa nide. ⁴⁵ Inlako de u atanan nu kabiyagen de hide sakay u naglakuwan de ay impagatád de tu kakaguman de hide sigun tu pangangailangan nu balang essa. ⁴⁶ Mamágpisan hide tu templo kada aldew, sakay mamágkaguman hide tu bila-bilay de a magpira-piraso tu tinapay, masaya hide a mamággatubang a kuman a maluwag tu isip de, ⁴⁷ sakay pirme hide a magpure tu Diyos sakay igalang hide nu tolay hide. Kada aldew ay tehhod a iligtas u Diyos sakay idagdag na hide tu grupo nu manampalataya hide.

¹ Nadid, mga alas tres ti apon ay immangay di Pedro sakay ti Juan tu templo. Iye ay odas nu págdasal. ² Tu pintuwan nu Templo a dáddulawán de a, “Pintuwan a Maganda” ay tehhod a essa a lállake a lopog sapul pa tu kákkeenak na. Aldew-aldew ay iyangay de siya tu templo para máklimus tu tolay hide a sumáddáp hod. ³ Nikuna ketan na di Pedro sakay ti Juan a pasáddáp tu templo ay náklimus siya. ⁴ Lináttángngan siya di Pedro sakay ti Juan. Káttapos ay kinagi ni Pedro nikuna, “Umileng ka nikame.” ⁵ Inumileng ngane u lállake nide tu pangakala na a limusan de siya. ⁶ Pero kinagi nikuna ni Pedro, “Awanák ti pilak oni ginto. Pero tehhodák niko a iyatád: Tu ngahan ni Jesus a taga-Nazaret ay maglakad ka!” ⁷ Tinawiden ni Pedro u kawanan na a kamát sakay pinataknág na. Bigla a bimmegsák u tikád na sakay tu kasu-kasuwan na hide. ⁸ Limmukso siya sakay naglakad. Káttapos ay nákkuyog siya a simmáddáp tu templo. Diri-diretso u páglakad na sakay limmukso a nagpure tu Diyos. ⁹ Netan nu atanan a tolay a maglakad dán siya sakay mágpapuriyán tu Diyos. ¹⁰ Nikuna a matengge de a siya u tolay a date a máklimus a mággetnod tu Pintuwan a Maganda nu Templo ay nagtaka hide ti husto tu nangyare nikuna. ¹¹ Nadid, nikuna katoy hide tu essa a lugar tu templo a kákkagiyán de a sássiduman ni Solomon, ay pasiya a kumákkabit u date a lopog ni Pedro ay ti Juan, nagginanan a immadene nide u tolay hide a tunay u taka de tu nangyare. ¹² Pákketa ni Pedro tu tolay hide ay kinagi na, “Israelita hide, bakin magtaka kam ti iye a nangyare? Bakin ilingan moy kame ti konna hina? Akala moy beman ni napaglakad me siya tu pamamag-itan nu sadile mila a kapangyariyan oni dipo tu kabanalan me? ¹³ U Diyos di Abraham, Isaac sakay ti Jacob, u Diyos nu nunu tam hide, u nangatád tu pinakamataas a karangalan tu tagapagserbi na a ti Jesus. Pero inyangay moy siya tu te kapangyariyan sakay intakwil tu atubang ni Pilato maski ni gusto na siya a palayaan. ¹⁴ Inadiyan moy u Banal a awan ti kasalanan, mas ginusto moy pa a paluwasan tu págpiresuwan ti Barabas a essa a mágbabono. ¹⁵ Binuno moy u naggábwatan nu biyag, pero biniyag siya a huway nu Diyos. Hikame u makapagpatunay a nabiyag siya a huway, ¹⁶ U kapangyarihan nu ngahan ni Jesus u nangpapiyya ti tolayan iye a tukoy moy a lopog sapul pa tu kákkeenak na. U pánniwala na tu ngahan ni Jesus sakay u pánnampalataya na ni Jesus u tatahoden a nagpiyyaan na a konna ti ketan moye. ¹⁷ “Kanya nadid kákkapatkákka ko hide, tukoy ko a nagimet moy sakay tu pinuno moy hide i bagayan itod hide ni Jesus dipo awan moy tukoy ni tideya siya. ¹⁸ Dipo tu ginimet moy ay natupad dán u inpahayag nu Diyos tu pamamag-itan nu prupeta hide tu itod a kailangan a maghirap ti Cristo. ¹⁹ Kanya nadid ay magsisi kamon sakay umadene tu Diyos, tánni patawadán na u kasalanan moy hide, ²⁰ tánni matanggap moy u bigu a begsák a gábwat tu Panginoon. Káttapos ay paangayán na he a huway ti Jesus, u Cristo a intakda na a mángligtas nikam. ²¹ Pero kailangan a mágyan pa ti Jesus ti langet hanggan dumemát u panahun a baguwán nu Diyos u atanan a bagay. Itona be u kinagi nu Diyos tu itod tu pamamag-itan nu banal na hide a prupeta. ²² Konna tu kinagi ni Moises, ‘U Panginoon a Diyos tam ay mangpile ti essa a prupeta a kapareho ko, a gábwat labe nikam. Kailangan sunudán moy atanan a kagiyán na nikam. ²³ U awan hide sumunud ti iye a prupeta ay ibukod nu Diyos tu pinile na hide sakay puksaán.’ ²⁴ Maske u prupeta hide tu itod a panahun, magsapul ni Samuel hanggan tu umunonod hide nikuna ay nángpakapospos tungkul tu mangyare nadid a panahun. ²⁵ U impananto hide nu Diyos a kinagi nu prupeta na hide ay para nikam a Judio hide, sakay kaguman kam tu kasunduwan a ginimet nu Diyos tu ninuno tam hide, dipo kinagi na ni Abraham, ‘Pagpalaán ko u atanan a tolay ti munduwáy tu pamamag-itan nu essa a tolay a maggábwat tu lahe mo.’ ²⁶ Kanya pinaangay he nu Diyos u pinili na a Tagapagserbi, dipalongo nikitam a Judio para pagpalaán na kitam sakay tulungan na kitam a umadág tu madukás tam a kákkabiyag.

¹ Nadid, mentaras magupos palla di Pedro sakay ti Juan tu tolay hide ay inadeniyan hide nu saserdote hide, u kapitan nu guwardiya hide tu templo, sakay u Saduseo hide. ² Grabi u iyamut de tu duwwa a apostol dipo ibábbaheta de tu tolay hide a nabiyag a huway ti Jesus. Sakay iye u mángpatunay a mabiyag a huway u patay hide. ³ Kanya dinakáp de ti Pedro sakay ti Juan. Imbistigaan di pa nakwa hide a duwwa kanya la ay gibi dán, kaya ingkulung di hide hanggan tu dimadimang. ⁴ Pero maskin konna he u nangyare nide ay makpal u simmampalataya tu págtoldu de. Ummabut ti limma a libu u simmampalataya hide a lállake. ⁵ Tu kadimadimangan ay namágkatipun ti Jerusalem u puno nu saserdote hide, puno nu Judio hide sakay u tagapagtoldu hide tu Kautusan. ⁶ Kaguman bi hod ti Anas a pinakapuno a saserdote, sakay ti Caifas, ti Juan, ti Alejandro, sakay tu agum pa hide a miyembro nu pamilya ni Anas. ⁷ Inyangay di hod di Pedro sakay ti Juan sakay tinanung,“Kándeya a ngahan oni kapangyariyan u ginamit moy tu págpapiyya tu tolay a lopog?” ⁸ Kanya nagupos ti Pedro a tehhod a kapangyariyan nu Banal a Ispirito, kinagi na, “Hikam a puno nu saserdote hide sakay puno nu Judio hide, ⁹ ni itanung moyay nikame ay tungkul tu págpapiyya ti tolayáy a lopog, ¹⁰ gusto ko a matukuyan moy a atanan sakay konna be nikam a lahe ni Israel a itolayan iye a mágtaknág tu atubang moy ay nagpiyya dipo tu kapangyariyan ni Jesu-Cristo a taga-Nazaret. Siya u impaku moy tu kudus sakay binuno moy, pero biniyag siya a huway nu Diyos. ¹¹ Ti Jesus, u gusto a kagiyán nu sumássulat tu Banal a Kasulatan a, ‘U bito a inadiyan nu mágtolnák hide ti bilay, ay siya u nagin pinaka pundasyon a bito.’ ¹² Awan dan ti iba a makapangatád ti kaligtasan, dipo awan ti iba a pinaangay he u Diyos ti lutaáy para iligtas u tolay hide nan ti Jesus la.” ¹³ Nagtaka u buo a Sanedrin tu begsák isip a impeta di Pedro sakay ti Juan, lalu dán nikuna naihupaan de a awan bál hide nakapagadal. Naihupaan dila be a hide u kakaguman ni Jesus tu itod. ¹⁴ Magupos pa nákwa hide kontara tu makataka-taka a ginimet di Pedro sakay ti Juan, pero dipo mágtaknág tu adene de u tolay a pinapiyya de ay timmahimik dálla hide. ¹⁵ Kanya pinaluwas di pala u duwwa a apostol tu pamággipun-ipunan de sakay namágguhon-uhon hide. ¹⁶ Kinagi de, “Ánya gimitán tamay nadid nide? Tukoy dán nu atanan a taga-Jerusalem hide u ginimet de a makataka-taka a bagay kaya awan tamon iye mepamen. ¹⁷ Para awan dán kumalat u pángngaral de tu tolay hide ay kagiyan tam hide a diyan dán hide magtoldu tungkul ni Jesus.” ¹⁸ Kanya impadulaw de a huway di Pedro sakay ti Juan sakay kinagiyan di hide a diyan magupos oni magtoldu tungkul ni Jesus. ¹⁹ Pero timmábbeg ti Pedro sakay ti Juan, “Hikamon i manghatulay ni ánya u tama sakay ni ánya u maganda tu atubang nu Diyos; sunudán mikam beman oni sunudán me u Diyos? ²⁰ Awan me maare a awan ibaheta u netan me sakay u nasaneg me.” ²¹ Pero mahigpit di pa hide a binawalan a mangaral sakay káttapos ay pinalaya di dán hide. Maski ni gusto di nakwa a pahirapan u duwwa ay awan de iye nagimet dipo manteng hide tu tolay hide. Dipo u tolay hide ay magpure tu Diyos dipo tu nangyare a himala. ²² Dipo u tolay a pinagpiyya de tu pamamagitan nu himala ay mahigit dán a áppat a pulo a taon a lumpo. ²³ Nikuna makaluwas dán di Pedro sakay ti Juan, ay immangay hide tu kakagumanan de hide sakay imbaheta de ni ánya u kinagi nu puno nu saserdote hide sakay u puno nu Judio hide. ²⁴ Pákkasaneg hod nu mánnampalataya hide ay nagkaessa hide a nagdasal, “Panginoon, hiko u nanglalang tu langet, tu luta, tu diget sakay tu atanan a bagay a katoy hod. ²⁵ Ti David a Tagapagserbi mo tu itod ay indipalongo nu Banal a Ispirito kanya insulat na u konna he: ‘Bakin wád a tunay iyamutay nu Hentil hide? Sakay bakin nagbalak u Judio hide ti baka-bakán? ²⁶ Nagkaessa u hare hide ti lutaáy, Sakay u pupuno hide para lumaban tu Panginoon sakay tu pinile na hide.’ ²⁷ Natupad ngani iye nikuna a nagkaessa di Herodes ay ti Poncio a Pilato, kaguman u Hentil hide sakay u buo a Israel. Nagkaessa hide kontara ni Jesus a banal a pinile mo a tagapagserbi. ²⁸ Tu ginimet de ay natupad dán u balak mo tu itod. Sakay nangyare iye tu kapangyariyan mo sakay tu kagustuwan mo. ²⁹ Sakay nadid Panginoon, ay pagisipan de kame ti madukás. Tulungan mo u tagapagserbi mo hide a mepangaral me tu buung tapang u Upos mo. ³⁰ Payagen mu dán tu pamamag-itan nu kapangyariyan ni Jesus a banal mo a tagapagserbi a mapapiyya me u te saket hide sakay makagimet kame ti himala sakay makataka-taka a bagay.” ³¹ Káttapos de a magdasal ay nayanág u pamággipun-ipunan de a bilay. Atanan de ay naputat tu Banal a Ispirito sakay buung tapang a nangaral tu Upos nu Diyos. ³² Namágkaessa ti isip u mánnampalataya hide. Sakay awan sinadile nu bawat essa u ari-arian de nan para nide a atanan. ³³ Tu begsák nu kapangyariyan nu Diyos ay tulos-tulos la a magpatunay u apostol hide tungkul tu kákkabiyag a huway nu Panginoon Jesus. Kanya pinagpala nu Diyos u atanan a mánnampalataya. ³⁴ Awan ti kinulang tu kailangan de dipo inlako nu mánnampalataya hide u luta de hide sakay bilay, ³⁵ sakay u pilak a naglakuwan de ay inyatád de tu apostol hide. Sakay inyatád be iye nu apostol hide tu te kailangan hide. ³⁶ Konna bi he u ginimet ni Jose a Levita a taga-Cipre. Nginahanan siya nu apostol hide a Bernabe, u gusto na a kagiyán ay “Anak a Matáttulungán.” ³⁷ Inlako ni Jose u luta na sakay u pilak ay inyatád na tu apostol hide.

¹ Nadid tehhod a magkabanga a naglako be ti luta; u ngahan nu lállake ay ti Ananias sakay u kabanga na ay ti Safira. ² Pero bagu a inyatád ni Ananias u naglakuwan na tu apostol hide ay nagkupit siya tu naglakuwan na, tukoy itod nu kabanga na. ³ Kanya kinagi ni Pedro,“Ananias, bakin nagpadaig ka ni Satanas sakay nagbule-bule ka tu Banal a Ispirito? Bakin binawasan mo u naglakuwan mo tu luta? ⁴ Nikuna awan palla nelako u luta, awan beman kao mo itod? Sakay nikuna melaku dán, awan beman kao mo? Bakin naisipan mo pa a gimitán itod? Awan ka nagbule-bule tu tolay nan tu Diyos ka a nagbule-bule!” ⁵ Nikuna masaneg iye ni Ananias ay patay siya a natumba. Sakay atanan nu nakasaneg tu nangyare ay neántingan hide a tahod. ⁶ Timmaknág u áolito hide sakay binalutan de u bangkay sakay inlábbáng. ⁷ Kállipas nu manga tállo a odas ay dimmemát u kabanga na, a awan ti katuko-tukoy tu nangyare. ⁸ Pagdaka siya a tinanung ni Pedro, “Kagiyán mu ped nikán u tatahoden, sabemalla iye u pinaglakuwan moy tu luta?” “On, sala ngane itona.” kagi na. ⁹ Kanya kinagi nikuna ni Pedro, “Bakin pinagkaessaan moy a purbaan u Ispirito nu Panginoon? Ilingan mo! Katoy dán ti pintuwane u naglábbáng hide tu kabanga mo, hiko dámman nadid isunud diyay a ilábbáng!” ¹⁰ Pagdaka a natumba ti Safira tu atubang ni Pedro sakay natay. Kássáddáp nu áolito hide ay netan de a patay dán siya; kanya angay di siya inlábbáng tu sadát nu kabanga na. ¹¹ Tunay u ánteng nu mánnampalataya hide sakay atanan a nakasaneg ti itod a nangyare. ¹² Nadid, makpal a ginimet u apostol hide a makataka-taka a bagay a netan nu tolay hide. Atanan nu mánnampalataya hide ay napisan-pisan tu Sássiduman ni Solomon. ¹³ Pero manteng a mákkuyog u awan hide mánnampalataya maski ni tehhod hide a respeto nide. ¹⁴ Pero mágkakakáppal u lállake hide sakay u bábbey hide a summampalataya tu Panginoon. ¹⁵ Inyangay nu tolay hide tu karsada u te saket hide sakay pinágkatdug de hide tu katre sakay u agum ay ti abák, tánni tu káttaleb ni Pedro ay malenduman hide nu anino na. ¹⁶ Sakay dimmemát be u makpal a tolay a gábwat tu iba-iba a banuwan a adene ti Jerusalem, tawed de u te saket hide sakay tu hinayup hide; kaya nagpiyya hide a atanan. ¹⁷ Pero u pinakapuno nu saserdote hide sakay u sakup na hide a Saduseo ay tunay u pánnaghile de kanya namágkaessa hide a pahirapan de hide. ¹⁸ Dinakáp de u apostol hide sakay ingkulung de hide. ¹⁹ Pero nikuna gibi dán ay binukasan nu anghel nu Panginoon u kulungan sakay inluwas na u apostol hide. Kinagi na nide, ²⁰ “Angay kam tu templo sakay ipangaral moy tu tolay hide u tungkul tu bigu a kákkabiyag.” ²¹ Nikuna kaldiwan dán ay simmáddáp hide tu templo sakay nangaral tu tolay hide. Nagipun-ipun be u pinakapuno nu saserdote hide sakay tu kaguman na hide. Dinulaw de u ama-amaan hide nu lahe hide ni Israel a kákkagiyán a Sanedrin, sakay impaalap de tu kulungan u apostol hide. ²² Pero káddemát hod nu guwardiya hide ay awan dán u apostol hide. Kanya nagsole hide tu pággipun-ipunan de sakay konna he u imbaheta de, ²³ “Netan me a nakakandadu ti mapiyya u kulungan sakay katoy labi hod a mágtaknág u guwardiya hide. Pero nikuna bukasan me ay awan kame ti netan a tolay tu disalad!” ²⁴ Nadid tunay u balisa nu puno nu saserdote hide sakay u kapitan nu guwardiya hide tu templo nikuna mabaheta de iye, sakay awan de sukat a maisip ni ánya u nangyare tu apostol hide. ²⁵ Pero tehhod a dimmemát a nágbaheta nide, “U lállake hide a ingkulung moy ay katoy hide tu templo sakay mangaral tu tolay hide.” ²⁶ Kanya immangay u puno nu guwardiya hide tu templo, kaguman na u sundalo na hide. Ingkuyog de u apostol hide, pero awan de hide pinuwersa dipo manteng hide a budasán hide nu tolay hide. ²⁷ Sakay inyatubang de u apostol hide tu Sanedrin sakay tinanung hide nu pinakapuno nu saserdote hide. ²⁸ Kinagi na,“Awan beman binawalan mikam a mangaral tu ngahan ni Jesus? Pero ilingán moy ginimet moye! Kimmalat dán tu intero a Jerusalem i itáttoldu moye, sakay gusto moy kami pa a pakasalananán tu kákkatay ni tolayan itod!” ²⁹ Pero timmábbeg ti Pedro sakay u agum hide a apostol, “U Diyos u dapat me a sunudán, bakán a u tolay. ³⁰ U Diyos nu nuno tam hide u nangbiyag a huway ni Jesus a binuno moy nikuna impepako moy tu kudus. ³¹ Inyangay siya nu Diyos ti langet sakay inatádden ti kataasan a katungkulan a makaguman na a maghare ti langet. Siya u Mangsakup sakay Mángligtas nikitam. Ginimet itod nu Diyos tánni magkahod ti pagkakataun u lahe hide ni Israel a magsise sakay mangaged ti tawad tu kasalanan de hide tánni mapatawad hide. ³² Hikame i mángpatunayay ti bagayan iye pati u Banal a Ispirito a impagkaluub nu Diyos tu atanan a sumássunud nikuna. ³³ Nikuna nasaneg de u kinagi ni Pedro ay tunay u iyamut nu miyembro nu Sanedrin, sakay gusto de a ipabuno u apostol hide. ³⁴ Pero timmaknág u essa a Pariseo a ti Gamaliel u ngahan na, tagapagtoldu siya nu Kautusan sakay igággalang nu intero a banuwan. Inyutus na a iluwas di pala u apostol hide. ³⁵ Sakay kinagi na nide,“Kabanuwan ko hide, isipan moy pa ti mapiyya u gimitán moy ti iye hide a tolay. ³⁶ Sakay awan beman awan palla nalay a limmitaw ti Teudas a nagkunware a essa a dakila a puno, sakay naakit na u áppat a datos a tolay a nák-agum nikuna. Pero namághiwewalay u tauhan na hide nikuna nabuno siya kaya nabaliawan u gurupo de. ³⁷ Káttapos ay limmitaw be ti Judas a taga-Galilea tu panahun nu págsensus tu tolay sakay nakaakit be siya ti makpal a tolay. Nikuna mabuno siya ay namághiwewalay be u sakup na hide. ³⁸ Kanya kagiyán ko nikam: diyan moy pák alaman iye hide a tolay; pabayan moy la hide. Ni gággimitán diyan itona ay gábwat la tu tolay ay awan itona ti abután. ³⁹ Pero ni gábwat tu Diyos ay awan moy itona mapugáddan sakay lumitaw la a lumaban kam tu Diyos!” Nikuna masaneg de u payo ni Gamaliel ay simmunud hide nikuna. ⁴⁰ Pinadulaw de a huway u apostol hide sakay káttapos de hide a impabálbág sakay binawalan a mangaral tu ngahan ni Jesus ay pinalakad di dán hide. ⁴¹ Tunay ti saya a limmakad u apostol hide tu atubang nu Sanedrin dipo pinagustuwan nu Diyos a magdanas hide ti págseste alang-alang ni Jesus. ⁴² Kanya kada aldew ay angay hide tu templo sakay tu iba-iba a bilay sakay hed hod hide a mangaral tungkul ni Jesus, a siya u Cristo.

¹ Nadid tu itod a panahun ay makpal dán a mánnampalataya sakay nagreklamo dán u Helenista hide kontara tu Hebreo hide. Kinagi de a u bábbey hide a bilo tu gurupo de ay napabayan dán tu pángngatád tu kabiyagen de aldew-aldew. ² Kanya inipun de ti sapulo ay ti duwwa u atanan nu mánnampalataya hide sakay kinagi de nikuna, “Awan me dapat a pabayan u pángngaral me tu Upos nu Diyos para mangasiwa tu pángngatád tu pang aldew-aldew a kabiyagen. ³ Kanya kákkapatkákka ko hide, mangpile kam tu kaguman moy hide ti pitto a lállake a kilala tu pággimet ti maganda, mágkalalake sakay págdipalonguwan nu Banal a Ispirito, para idátton me hide ti iye a tungkulin. ⁴ Para ilaan me be u panahun me tu págdasal sakay tu pángngaral tu Upos nu Diyos.” ⁵ Nasaya u atanan nu katolayan tu plano nu apostol hide; kanya pinile de ti Esteban, essa a lállake a matatag ti pánnampalataya tu Diyos sakay pinágdipalonguwan nu Banal a Ispirito. Pinile dibe ti Felipe, Procoro, Nicanor, Timon, Parmenas, sakay ti Nicolas a taga-Antioquia, essa siya a Hentil a naakit tu pánnampalataya nu Judio hide. ⁶ Nikuna a inyatubang de hide tu apostol hide; ay impagdasal de sakay intupo de u kamát de nide. ⁷ Tulos-tulos a kimmalat u Upos nu Diyos sakay u mánnampalataya hide ay pakáppal a pakáppal ti Jerusalem. Sakay u saserdote hide ay makpal a simmampalataya. ⁸ Pinagpala nu Diyos ti Esteban sakay inatádden na ti kapangyarihan, kanya nakagimet siya ti makpal a himala sakay makataka-taka hide a bagay tu atubang nu katolayan. ⁹ Nákpagtábbegan ti Esteban tu sangan a kaguman tu sinagoga nu Pinalaya hide, hide ay u Judio hide a taga-Cirene, taga-Alejandria, taga-Cecilia, sakay taga-Asia. ¹⁰ Pero awan hide ti magimet tu karunungan ni Esteban a inyatád nu Banal a Ispirito. ¹¹ Kanya sinekreto de a sinulsulan u sangan a lállake a magkagi ti konna he, “Nasaneg me a sássumpaán na ti Moises sakay u Diyos.” ¹² Iye u ginimet de tánni masulsulan de a magiyamut u tolay hide ni Esteban, u ama-amaan hide nu lahe hide sakay tu lahe hide ni Israel. Sinunggaben de siya sakay inyatubang tu Sanedrin. ¹³ Sakay náng-atubang hide ti mágkabule a mangpatunay kontara ni Esteban. Kinagi de, “I tolayan iye ay awan ti imang ti pággaupos kontara tu banal a Templo sakay tu Kautusan ni Moises. ¹⁴ Nasaneg me a kinagi ni Jesus a taga-Nazaret a sidaán na u Templo, sakay palitan na u kaugalian a inpamana nikitam ni Moises. ” ¹⁵ Lináttángngan nu atanan a katoy tu pamággipun-ipunan ti Esteban sakay namalas de a kuman a hupa nu anghel nu Diyos u hupa na.

¹ Tinanung nu pinakapuno nu saserdote hide ti Esteban, “Tatahoden beman iye hide a atanan?” ² Timmábbeg ti Esteban, “Kákkapatkákka ko hide sakay dáddakal hide, sanigán moy i kagiyán kuwáy. U dakila sakay u makapangyarihan a Diyos ay pimmeta tu nunu tam a ti Abraham nikuna katoy palla siya ti Mesopotamia bago a nágyan ti Haran. ³ Sakay kinagi nikuna nu Diyos, ‘Lakaden mo u luta mo sakay u kákkapatkákka mo hide sakay angay ka tu lugar a itoldu ko niko.’ ⁴ Kanya limmakad siya tu lugar nu Caldeo hide sakay nágyan ti Haran. Kákkatay nu ama na, pinaagton siya nu Diyos ti lugaran iye a páppágyanan moy nadid. ⁵ Pero awan siya inatádden nu Diyos maskin sa ihek a luta, pero impananto na nikuna a magin kao na iye sakay tu magin lahe na maskin awan palla siya ti anak. ⁶ Sakay konna he u kinagi nikuna nu Diyos, ‘U lahe mo hide ay mákpágyan ti iba a bansa. Magin alipin hide hod sakay pahirapan tu alay nu áppat a datos a taon. ⁷ Pero parusaan ko u bansa a mangalipin nide. Lumakad hide hod sakay sumamba hide nikán ti lugaran iye.’ ⁸ Sakay inyutus nu Diyos ni Abraham u pagture bilang tanda nu kasunduwan na. Kanya nikuna meenak ti Isaac ay tinure na siya tu kawalo a aldew. Konna bi he ginimitay ni Isaac tu anak na a ti Jacob, sakay iye be u ginimet ni Jacob tu sapulo ay ti duwwa na a anak a lállake, a nagin ama nu sapulo ay ti duwwa a lahe. ⁹ “Pero, simmene ni Jose u agum na a kákkapatkákka a anak ni Jacob kanya inlako de siya a alipin ti Egipto. Pero konna pa man hod ay awan siya pinabayan nu Diyos. ¹⁰ Nan tinulungan na siya tu atanan a pághirap na. Pinagpala siya nu Diyos sakay pinagkaluuben ti karunungan nikuna umatubang siya tu Faraon, u hare ti Egipto. Sakay ginimet na siya a gobernador ti Egipto sakay namahala tu bilay na. ¹¹ Nagkahod ti sák-alap sakay ti matindi a hirap ti buo a Egipto sakay Canaan, sakay awan ti mapangalapan ti makan u ninuno tam hide. ¹² Kanya nikuna mabaheta ni Jacob a tehhod a lako a trigu ti Egipto ay pinaangay na hod u nuno tam hide sakay iye u kadipalonguwan de a immangay hod. ¹³ Tu kapenduwwa di hod a káangay ay nagpakilala dán ti Jose tu kákkapatkákka na hide, sakay natukuyan ni Faraon u tungkul tu pamilya na. ¹⁴ Sakay pinauwet ni Jose u ama de a ti Jacob sakay tu kákkapatkákka na hide, pitto a pulo ay ti limma hide a atanan. ¹⁵ Immangay ti Jacob ti Egipto sakay hod siya a natay konna bi hod tu nunu tam hide. ¹⁶ U bangkay de hide ay inyangay de ti Siquem sakay inlábbáng de tu páglábbángngan a binale ni Abraham tu anak ni Hamor. ¹⁷ “Nikuna adene dán u panahun nu págtupad nu Diyos tu pananto na ni Abraham, ay makpal dán a Israelita ti Egipto. ¹⁸ U hare tu itod ti Egipto ay awan na kilala ti Jose. ¹⁹ Linoko sakay pinahirapan na u ninuno tam hide sakay inyutus na tu nuno tam hide a ibut de u anak de hide tán para matay. ²⁰ Ti itod a panahun ay neenak ti Moises, u anak a kinasayaan nu Diyos. Tállo la siya a bulan a inalagaan tu bilay nu ama na. ²¹ Pero napilitan hide a inyangay de siya tu essa a lugar sakay inwahak di hod. Nadid, nikuna netan siya nu anak ni Faraon a bábbey ay inalap na siya sakay pinadakál a kumán a sadili na a anak. ²² Tinolduwan siya tu atanan a karunungan ti Egipto, sakay nagin malalake siya ti pággupos sakay tu gimet. ²³ “Nikuna áppat a pulo dán a taon u idad ni Moises ay naisipan na a angen ilingán u kasa Judio na hide tu páppágyanan de. ²⁴ Netan na a api-apiyán nu essa a taga-Egipto u essa a Judio. Kanya insuhog na siya, pero dipo tu pángsuhog na ay nabuno na u taga-Egipto. ²⁵ Akala ni Moises ay maintendiyan siya nu kasa Judio na hide a tu pamamag-itan na ay iligtas hide nu Diyos pero awan de itod naintendiyan. ²⁶ Tu sumunud a aldew ay tehhod siya a netan a duwwa a Israelita a magdima, nadid pilit na hide a sawayán. ‘kakagumanan ko hide,’ kagi na, ‘ Bakin magdima kam? Pareho kam pabe a Israelita.’ ²⁷ Pero intoglad siya nu essa a mangpahirap tu kadima na sakay kinagi na, ‘Deya i nángdáttonay niko a magin puno sakay tagahatul me? ²⁸ Gustuwák mo beman a bunuwan konna tu ginimet mo tu apon he tu taga-Egipto?’ ²⁹ Nikuna masaneg iye ni Moises ay gimminan siya sakay nágyan siya tu lugar a Midian. Nákkabanga hod sakay nagkahod ti duwwa a anak a lállake. ³⁰ “Kállipas nu áppat a pulo a taon ay pimmeta ni Moses u anghel tu pamamag-itan nu maggehab a badit a kayo tu parang a adene tu Buked a Sinai. ³¹ Nagtaka ti Moises tu netan na, nikuna adeniyan na tán ketan na ti mapiyya ay nasaneg na u boses nu Panginoon: ³² Kinagi na, ‘Hikán u Diyos nu ninuno mo hide, u Diyos di Abraham, Isaac sakay ti Jacob.’ Minagpágpág ti Moises ti ánteng sakay awan siya makaileng. ³³ Kinagi nikuna nu Panginoon, ‘Ibutan mo i sinelas muwe dipo banal i págtaknággan muwe. ³⁴ Netan ko u páng-ape nu taga-Egipto hide tu pinile ko hide sakay nasaneg ko u daing de, kayaák a katoy he tánni iligtas ko hide. Nadid maghanda ka ta paangayán taka ti Egipto.’ ³⁵ “Saiye ti Moises a awan tinanggap nu kasa Israelita na hide a nagkagi, ‘Ti deya u nángdátton niko para magin pinuno me sakay tagahatul me?’ Pero ti Moises u ginimet nu Diyos a puno sakay tagapagligtas tu tulung nu anghel a pimmeta nikuna tu badit a kayo. ³⁶ Siya u nangibut tu kahirapan de. Naggimet siya tu makataka-taka hide a bagay ti Egipto, tu Diget a madideg, sakay tu parang, tu alay nu áppat a pulo a taon. ³⁷ Siya labe u Moises a nagkagi tu Israelita hide, ‘U Diyos ay mangpaangay he nikam ti essa a prupeta a kapareho ko a naggábwat tu lahe moy.’ ³⁸ Ti Moises u kaguman nu nuno tam hide tu parang. Siya u nákpágguhon tu anghel a nákpágguhon nikuna sakay tu ninuno tam hide tu Buked a Sinai. Siya u tummanggap tu upos hide a makapangatád ti biyag a gábwat tu Diyos para iyatád nikitam. ³⁹ “Pero awan siya sinunud nu ninuno tam hide nan inadiyan di pa ngane, mas gusto di pa a magsole ti Egipto. ⁴⁰ Sakay kinagi de ni Aaron, ‘Panggimet mo kame ti diyos a mángdipalongo nikame, dipo awan me tukoy ni nangánya dán i Moises san itod a nángluwas nikame ti Egipto.’ ⁴¹ Kanya naggimet ngane hide ti diyos-diyosan a kumán a bul-o a baka. Piniyesta de itod sakay inalayan de bilang págsamba. ⁴² Dipo tu ginimet de ay inadággen hide nu Diyos sakay pinabayan na a sumamba hide tu awan mabilang a diyos-diyosan konna tu nakasulat tu libro nu prupeta hide: ‘Israel, dipo bakán a hikán u inalayan moy tu alay hide sakay tu hayup hide a binuno ay umalay kam ti áppat a pulo a taon tu parang.’ ⁴³ U tatawed moy ay u tolda ni Moloc: Sakay u biton nu diyos-diyosan moy a ti Renfan, Iye hide u letrato hide a ginággimet moy tán sambaán. Kanya ibut takam tu kadilipot pa nu Babilonia.’ ⁴⁴ Nadid, kinagi ni Esteban, “Nikuna katoy tu parang u nuno tam hide ay katoy nide u badit a templo a mángpakapospos nide a kaguman de u Diyos. Ginimet de u Tolda nu Kasunduwanan itod a konna tu sukat sakay idsura a intoldu nu Diyos ni Moises. ⁴⁵ Minana iye nu anak de hide sakay tinawed de nikuna sinakup de u bansa a impatalo nide nu Diyos, tu pangdipalongo nide ni Josue. Tatawed de itod hanggan tu panahun ni David. ⁴⁶ Kinasayaan nu Diyos ti David kaya inaged na a pakultadan na siya a maggimet ti bilay para tu Diyos ni Jacob. ⁴⁷ Pero ti Solomon dán naggimitay ti itod a bilay. ⁴⁸ “Konna pa man hod u Kataas-taasan a Diyos ay awan mámmágyan tu bilay a ginimet nu tolay, ayun tu kinagi nu prupeta: ⁴⁹ Kinagi nu Panginoon, ‘U trono ko ay u langet, Sakay u gággemmakan ni tikád kuwáy ay lutaáy, Ánya pa a kabilay i gimitán moyay para nikán, Oni lugar a imangan ko? ⁵⁰ Awan beman hikán u nanggimet ti atananan iye?’ ⁵¹ “Talaga makásseng ulo moye! Awan palla nabagu i isip moye! Umád moy a sanigán u tatahoden! Ni ánya u ginimet nu dáddakál moy hide, ay itod be i gággimitán moyay. Masássuwayán kam a pirme tu Banal a Ispirito. ⁵² Ti deya beman a prupeta i awanay pinahirapan nu nunu moy hide? Binunu de u nánghula tu káddemát nu Banal a intokyon moy be sakay impabuno. ⁵³ Tinanggap moy u Kautusan a inyatád nu Diyos tu pamamag-itan nu anghel hide, pero awan moy itod sássunudán!” ⁵⁴ Nikuna masaneg iye nu katolayan ay minagngahitáb hide dipo tu iyamut de ni Esteban. ⁵⁵ Pero naputat siya ti Banal a Ispirito, kanya immileng siya ti langet kaya netan na u demlag nu Diyos sakay kaguman na ti Jesus a maghare. ⁵⁶ Kinagi ni Esteban, “Netan ko a nakabukas ti langet, sakay netan ko ti Jesus a anak nu Tolay a katoy tu kawanan nu Diyos.” ⁵⁷ Pinálláddan de u talinga de sakay minagpákhawan; káttapos ay sabay-sabay hide a simmunggab nikuna. ⁵⁸ Binehbeh de ti Esteban hanggan tu luwas nu banuwan para batikalán. He di hod siya a binábbatikal hanggan a matay. U tolay hide a nangtistigu ay inuba de u damit de sakay inyatád de ni Saulo. ⁵⁹ Mentras bábbatikalán de ti Esteban ay nagdasal siya ti konna he, “Panginoon Jesus, tanggapán mo ispiritu kuwáy.” ⁶⁰ Sakay limmuhud ti Esteban sakay pimmákhaw, “Panginoon, patawadán mo hide ti kasalanan diyáy a ginimet de nikán!”Káttapos hod ay nahángsatan siya.

¹ Nadid, ti Saulo ay kaguman tu pángbuno de ni Esteban. Ti itod a aldew a nagsapul u mahigpit a págpahirap tu mánnampalataya ti Jerusalem. Kanya kimmalat u atanan nu mánnampalataya hide ti Judea sakay ti Samaria. U apostol la hide u nawahak ti Jerusalem. ² Inlábbáng nu mánnampalataya hide u bangkay ni Esteban sakay sinangitan de ti husto. ³ Pero tu pagkagusto ni Saulo a sidaán u mánnampalataya hide ay sináddáp na u bila-bilay sakay dinakap na u mánnampalataya hide sakay inkulung na, bábbey man oni ni lállake. ⁴ U namághiwewalay a mánnampalataya u nagtoldu tu Maganda a Baheta. Maskin hádya hide keangayan ay ibaheta di pade. ⁵ Immangay ti Felipe tu essa a banuwan ti Samaria sakay intoldu na hod u tungkul ni Cristo. ⁶ Nikuna masaneg nu tolay hod hide u toldu ni Felipe sakay netan de u makataka-taka hide a ginimet na ay pinakasaneg de ti mapiyya u atanan a kákkagiyán na. ⁷ Maski u mágkadukás hide a Ispirito ay lummakad tu tolay hide a hinayup, sakay makán pakhawán a paluwas. Sakay makpal a lopog sakay pilay u nagpiyya. ⁸ Kanya nagkahod ti dakál a kasayaan ti banuwanan itod. ⁹ Pero ti lugaran itod ay te essa a lállake, a u ngahan na ay ti Simon. Tu itod ay páppahangaán na u Samaritano hide tu pamamag-itan nu salamangka. Ipágmadakál na a tehhod siya a kapangyariyan. ¹⁰ Sanigán be siya nu tolay hide, sapul tu mágkataas hide a tolay hanggan tu mágkababa a tolay. U kagi di pa ay “Lállakiyan iye u tehhod a dakila a kapangyariyan, u kapangyariyan nu Diyos.” ¹¹ Nalay dán a panahun a pináppaniwala na hide tu pamamag-itan nu págsalamangka na, kaya tulos-tulos hide a mágsaneg nikuna. ¹² Pero nikuna impangaral ni Felipe u Maganda a Baheta tungkul tu pághare nu Diyos sakay tungkul ni Jesus-Cristo ay summampalataya sakay nagpabawtismo u lállake hide sakay u bábbey hide. ¹³ Simmampalataya be ti Simon sakay nikuna mabawtismuwan ay pirme dán siya a mákkuyoyog ni Felipe. Sakay nikuna netan na u makataka-taka hide ay himmanga siya. ¹⁴ Nikuna nabaheta nu apostol hide a mámmágyan ti Jerusalem a tinanggap nu Samaritano hide u Upos nu Diyos ay inutusan de a angay hod di Pedro sakay ti Juan. ¹⁵ Káddemát di hod ay impagdasal de u Samaritano hide para matanggap di be u Banal a Ispirito, ¹⁶ dipo awan palla ti timmanggap ti iye maskin deya nide, nabawtismuwan la hide tu ngahan nu Panginoon a Jesus. ¹⁷ Intupo di Pedro sakay ti Juan u kama-kamát de tu ulo nu mánnampalataya hide sakay tinanggap de u Banal a Ispirito. ¹⁸ Netan ni Simon a natanggap de u Banal a Ispirito tu pamamag-itan nu págtupo nu apostol hide tu kamát de. Kanya inupaan na ti pilak di Pedro sakay ti Juan. ¹⁹ Kinagi na,“Atáddinák moy ti konna he a kapangyariyan, para ni ti deya man u tupuwan ko ti kámat ay makatanggap be ti Banal a Ispirito.” ²⁰ Tinábbeg siya ni Pedro, “Mepahamak ka a kaguman ni pilak muwe, dipo u akala mo ay mabale mo ti pilak u kaluub nu Diyos. ²¹ Tukoy nu Diyos a madangát u puso mo, kanya awan ka ti karapatan oni bahagi ti gawainan iye. ²² Pagsisiyan mo u mágkadukás mo hide a gimet sakay magdasal ka tu Panginoon a patawadán naka nakwa tu balak mo a madukás. ²³ Dipo tu pangileng ko ay sumene ka a tahod sakay alipin kapade nu kasalanan.” ²⁴ Kinagi ni Simon, “Idasalák moy ped tu Panginoon, tánni awan ko sapitán u konna tu kinagi moy hide.” ²⁵ Matapos a nagpatunay di Pedro ay ti Juan, sakay nangaral tu Upos nu Panginoon tu banuwan ni Samaria ay nagsole hide ti Jerusalem. Intoldu di be u Maganda a Baheta tungkul tu Panginoon tu tinaleban de a babaryo ti Samaria. ²⁶ Káttapos ay inutusan be nu anghel nu Panginoon ti Felipe, “Angay ka a agad ti sahámman tu dilan a paangay ti Gaza, gábwat ti Jerusalem.” (Iye a dilan ay katoy tu Parang.) ²⁷ Immangay ngane hod ti Felipe. Pademát be u taga-Etiopia a pinuno. Siya u tagapamahala tu kayamanan nu Candace oni reyna ti Etiopia. Gábwat siya ti Jerusalem ta summamba tu Diyos. ²⁸ Pasole dán siya sakay nakasakay tu kalesa na sakay mágbasa tu libro ni Prupeta Isaias. ²⁹ Sakay kinagi nu Banal a Ispirito ni Felipe a, “Máksabay ka ran ti sasakyanan itona.” ³⁰ Kanya gummággenan a immadene ti Felipe, nasaneg na a basaán nu puno u libro ni Propeta Isaias. Tinanung ni Felipe u puno, “Maintendiyan mo beman i bábbasaán muwe?” ³¹ Timmábbeg siya, “Kodya ko iye a maintendiyan ni awan ti mángpaliwanag nikán.?” Pinasakay na ti Felipe tu kalesa na sakay nágsadát hide a nággetnod. ³² Iye u parte nu libro a bábbasaán na: “Kumán siya a essa a tupa a netakda a bunuwán Oni konna tu kordero a awan lumaban maski ni gapasan sakay awan ti kákkagi. ³³ Binadit-badit de siya, pinahirapan sakay inape. Awan ti makapángkagi tungkul tu sumunud a lahe na hide dipo binuno de siya.” ³⁴ Kinagi nu pinuno ni Felipe, “Kagiyán mo ped nikán ni ti deya u páppatungkulan na he, u sadile na beman oni agum? ³⁵ Nadid, impaliwanag ni Felipe u gusto a kagiyán nu binasa nu pinuno sakay intoldu na u Maganda a Baheta tungkul ni Jesus. ³⁶ Nagtulos-tulos hide tu páglakbay de hanggan nakademát tu lugar a tehhod a dinom. Kinagi nu pinuno, “Tehhod he a dinom, maariyák mu dán beman a mabawtismuwan?” ³⁷ Kinagi nikuna ni Felipe, “Maare taka a bawtismuwan ni tunay u pánnampalataya mo tu Panginoon Jesu-Cristo.”Timmábbeg siya, “Maniwalaák a ti Jesu-Cristo u anak nu Diyos.” ³⁸ Pinaimang nu pinuno u kalesa na sakay immogsad hide a duwwa tu dinom sakay binawtismuwan siya ni Felipe. ³⁹ Káawas de tu dinom ay inalap nu Ispirito nu Panginoon ti Felipe. Awan dán siya netan nu pinuno, nag tulos-tulos la siya tu páglakbay na a tehhod a kasayaan. ⁴⁰ Namalayan dálla ni Felipe a katoy dán siya ti Azoto. Intoldu na hod u Maganda a Baheta tungkul ni Jesus sakay tu atanan a lugar a tinaleban na hanggan makademát siya ti Cesarea.

¹ Nadid, tunay u pagkasoh ni Saulo a pakantingán sakay bunuwán u disepulus hide nu Panginoon. Kanya immadene siya tu pinakapuno nu saserdote hide, ² sakay nák-aged siya ti sulat para tu sinagoga hide ti Damasco tánni madakáp u deya man a ketan na hod a kaguman tu mánnampalataya hide, lállake man oni bábbey sakay iyangay na hide ti Jerusalem. ³ Nadid, immangay ti Saulo ti Damasco. Nikuna adene dán siya tu banuwan ay bigla a kimmislap tu palebut na u makasile a demlag a gábwat ti langet, ⁴ kanya nalugmuk siya. Sakay nasaneg na u boses a nagdulaw nikuna, “Saulo, Saulo! Bakin páppahirapanák mo?” ⁵ Kinagi na, “Deya ka beman, Panginoon?” Timmábbeg ti Jesus,“Hikán ti Jesus, u páppahirapan mo. ⁶ Tumaknág ka sakay umangay tu banuwan. Te mángkagi hod niko ni ánya u dapat mo a gimitán.” ⁷ Netiláng-lángngan u kaguman hide ni Saulo nikuna masaneg de u boses pero awan hide ti ketan a tolay. ⁸ Timmaknág ti Saulo sakay nikuna ibulag na u mata na ay awan dán siya maketa, kanya inalalayan siya nu kaguman na hide sakay inyangay de ti Damasco. ⁹ Awan siya nakeketa tu alay nu tállo a aldew, sakay awan be kikimman oni immino-inom. ¹⁰ Nadid, ti Damasco ay te essa a disepulus, a u ngahan na ay ti Ananias. Kinagi nu Panginoon nikuna tu pangitain, “Ananias!” Timmábbeg siya, “Ánya itod Panginoon?” ¹¹ Sakay kinagi nu Panginoon, “Angay ka tu karsada a ngángngahanan de a Masunong, angay ka tu bilay ni Judas sakay itanung mo u essa a lállake a taga-Tarso, Saulo, u ngahan na. Pasiyaan siya nadid a magdasal.” kagi nu Panginoon. ¹² Sakay netan naka tu pangitain a simmáddáp tu páppágyanan na sakay intupo mo u kamát mo para maketa siya a huway. ¹³ Pero timmábbeg ti Ananias, “Panginoon, makpalák dán a nabaheta ti tolayan iye, tungkul tu kadukássan a ginággimet na tu mánnampalataya hide ti Jerusalem. ¹⁴ Sakay immangay siya ti Damasco wáy, a te karapatan a gábwat tu pupuno nu saserdote hide, para dakáppán u atanan a summampalataya niko.” ¹⁵ Pero kinagi nikuna nu Panginoon, “Kammudán hod! Dipo pinile ko siya para ipangaral tu Hentil hide u tungkul nikán, tu hare hide, sakay tu lahe hide ni Israel, ¹⁶ sakay ipeta ko nikuna atanan hirap a kailangan na a danasán dipo nikán.” ¹⁷ Kanya immangay ngane hod ti Ananias. Summáddáp siya tu bilay sakay intupo na u kamát na ni Saulo. Kinagi na,“Kapátkákka ko a Saulo, pinaangayák he nu Panginoon tam a ti Jesus, a nákpágguhon niko tu dilan nikuna patamo ka he. Inutusanák na tanni maketa ka a huway sakay maputat ka tu Banal a Ispirito.” ¹⁸ Sakay agad a natákneg u kumán hide a keskes tu mata ni Saulo kanya naketa dán siya a huway. Kaya timmaknág siya sakay nagpabawtismo. ¹⁹ Kimman siya sakay bimmegsak a huway u bággi na. Nákpágyan ti Saulo tu mánnampalataya hide ti Damasco ti sangan a aldew. ²⁰ Sakay simmáddáp siya tu sinagoga hide sakay nagtoldu tungkul ni Jesus, kinagi na, “Siya u Anak nu Diyos.” ²¹ Nagtaka u atanan a nakasaneg nikuna, kanya kinagi de, “Awan beman sa iye u date mágpapahirapán tu mánnampalataya hide ti Jerusalem? Sakay awan beman immangay la he tánni dakáppán hide sakay tawidán tu pupuno nu saserdote hide?” ²² Pero lalo pa a nagin malalake ti Saulo tu pángngaral na, kanya awan dán tukoy nu Judio hide a mágyan ti Damasco ni ánya itábbeg diyay tu págpatunay na a ti Jesus ay u Mesias. ²³ Nikuna makalipas u sangan a aldew, ay namágkaessaan nu Judio hide a bunuwán ti Saulo. ²⁴ Aldew ay ti gibi ay isanáb de siya tu laguwerta nu banuwan para bunuwán. Pero natukuyan itod ni Saulo. ²⁵ Kanya essa gibi ay inyasák siya nu disepulus na hide tu balulang sakay intostos de tu dilupot nu pader. ²⁶ Káddemát na ti Jerusalem ay pinurbaan na a mákpisan tu disepulus hod hide. Pero manteng hide nikuna, dipo awan hide makapaniwala a essa dán siya a disepulus. ²⁷ Pero kinuyog siya ni Bernabe, sakay inyangay na tu apostol hide. Impaliwanag na nide ni kodya pimmeta u Panginoon ni Saulo sakay nákpágguhon nikuna tu dilan. Kinagi na be ni kodya siya a nagtoldu ti Damasco a awan ti ánteng tungkul ni Jesus. ²⁸ Kaya sapul hod ay imbilang di dán ti Saulo a kakagumanan de ti Jerusalem, sakay awan siya ti ánteng a nagtoldu ti lugaran itod tungkul tu Panginoon. ²⁹ Nákpágguhon be siya sakay nákpagtábbegan tu Judio hide a magupos ti Griego, kaya binalak de siya a bunuwán. ³⁰ Kanya nikuna matukuyan iye nu kákkapátkákka hide a mánnampalataya ay inyangay de ti Saulo ti Cesarea sakay pinasole de ti Tarso. ³¹ Kanya sapul hod ay nagin tahimik u kalagayan nu mánnampalataya hide tu buo a Judea, Galilea sakay Samaria. Hide ay bimmegsák ti pánnampalataya sakay kimmakpal tu tulung nu Banal a Ispirito sakay nabiyag a te ánteng tu Panginoon. ³² Nadid, nilebut ni Pedro u bawat banuwan tánni bisitaán u kákkapátkákka hide ti pánnampalataya. Nikuna bisitaán na u kákkapátkákka hide ti Lida, ³³ ay netan na hod u essa a lállake, Eneas u ngahan na. Lopog siya sakay walo dán a taon a kumákkatdug. ³⁴ Kinagi nikuna ni Pedro, “Eneas, pinagpiyya ka dán ni Jesu-Cristo. Tumaknág ka sakay isáddi mo i abák muwe! ” Pagdaka a immikat ti Eneas. ³⁵ Nikuna a ketan nu atanan a mámmágyan ti Lida sakay Saron a nagpiyya dán siya ay summampalataya hide tu Panginoon. ³⁶ Ti Joppa ay tehhod be a essa a bábbey a mánnampalataya, u ngahan na ay Tabita, (ti Griego, u ngahan na ay Dorcas, u gusto na a kagiyán ay ogsa.) Inyobus na u atanan a odas na tu pággimet ti maganda sakay tu págtulung tu mágkahirap hide. ³⁷ Ti aldiwan itod ay nagkasakit siya sakay natay. Nikuna mapunasan dán u bangkay na ay indátton de tu mángngontok a kuwarto. ³⁸ Dipo adene la u Lida ti Joppa, nabaheta nu mánnampalatay hide a katoy hod ti Pedro, kanya inutusan de u duwwa a lállake para ipákpágguhon de a angay siya agad ti Joppa. ³⁹ Kanya naghika-hika sakay nákkuyog nide ti Pedro. Káddemát na hod ay inyangay de siya tu kuwarto tu ontok. Agad a immadene nikuna u bábbey hide a bilo a makán sangitán sakay inpeta de nikuna u pággalikábkáb sakay u damit a ginággimet ni Dorcas nikuna biyag palla siya. ⁴⁰ Pinaluwas ni Pedro u atanan a katolayan sakay limmuhud a nagdasal. Káttapos ay ummatubang siya tu bangkay sakay kinagi na, “Tabita, umikat ka dán!” Bimmulag ti Tabita sakay pákketa na ni Pedro ay immetnod siya. ⁴¹ Tinawiden ni Pedro u kamát ni Tabita sakay tinulungan na a tumaknág. Dinulawan na u mánnampalataya hide, u bilo hide a bábbey sakay inyatubang na nide ti Dorcas a biyag. ⁴² Nabaheta iye nu tolay hide a mágyan tu banuwan nu Joppa, kanya makpal u naniwala tu Panginoon. ⁴³ Nanalay pa a nágyan ti Pedro tu siyudad a Joppa. Náktulos siya tu bilay ni Simon a u tarabaho na ay máglinis ti koblet ni hayup para gimitán a gagamit.

¹ Nadid, tehhod a essa lállake a taga-Cesarea, u ngahan na ay ti Cornelio. Kapitan siya nu sundalo hide a Romano, a dáddulawan de a “Batalyon nu Italyano.” ² Tehhod siya a ánteng tu Diyos, pati u buo na a pamilya. Palagi siya a mangatád ti tulung tu Judio hide, sakay pirme a magdasal tu Diyos. ³ Nikuna magala-alas tres dán ti apon ay netan na tu pangitain u essa a anghel nu Diyos a simmáddáp tu bilay na sakay kinagi na, “Cornelio!” ⁴ Ináeleng na siya sakay grabi u ánteng na a tummábbeg, “Ánya itod, Panginoon?” Tummábbeg u anghel, “Sinaneg nu Diyos u dasal mo hide sakay nasaya siya niko tu káttulung mo tu mágkahirap hide. ⁵ Sakay nadid ay mangutus ka ti sangan a lállake a angay tu banuwan nu Joppa. Sakay paangay mo ti Simon a ngángngahanan de a Pedro. ⁶ Náktulos siya tu bilay ni Simon a máglinis ti koblet ni hayup para gimitán a gagamit. U bilay na ay adene tu diget.” ⁷ Nikuna nakalakad dán u anghel ay dinulawan ni Cornelio u duwwa tu utusan na hide sakay u essa a sadile na sundalo a maki Diyos. ⁸ Sakay inyistorya na nide u atanan a nangyare, sakay pinaangay na hide tu siyudad a Joppa. ⁹ Tu sumunud a aldew ay adene dán tu siyudad a Joppa u inutusan hide ni Cornelio. Ti Pedro ay simmangkay tu bubungan nu bilay para magdasal. Magtatanghali dán hod. ¹⁰ kanya tunay dán u alap na sakay gusto na dán a kuman. Pero tu alay de a mangpospos tu pangaldew de ay naketa siya ti pangitain. ¹¹ Netan na u langet a nabukasan sakay tehhod a malabang a kumán a ulás a netostos sakay umáegut tu áppat a suluk. ¹² Ti ulássán itod ay katoy hod u atanan a klase ni hayup: u maglakad hide, u magahakas hide tu luta, sakay u magegbáh hide. ¹³ Sakay tehhod siya a nasaneg a boses a nagupos,“Tumaknág ka Pedro, magbuno ka dán sakay kuman.” ¹⁴ Pero timmábbeg ti Pedro, “Awan ko itona magimet, Panginoon! Dipo maskin nikan ay awanák kimman tu ánya man a bagay a inbilang a madangát sakay awan karapat-dapat.” ¹⁵ Nasaneg na huway u boses a nagupos nikuna,“Diyan mo ibilang a madangát u bagay hide a inbilang dán nu Diyos a malinis.” ¹⁶ Pumentállo iye a nangyare sakay káttapos ay nágpaontok dán u ulás a tamo ti langet. ¹⁷ Nadid mentaras a áisipán padla ni Pedro ni ánya u gusto a kagiyán ni pangitainan itod ay dimmemát be u inutusan hide ni Cornelio. Sakay hide ay naguhay tu sássáddáppan nu bilay, ¹⁸ Intanung de ni he hod a náktulos ti Simon a ngángngahanan de a Pedro. ¹⁹ Aisipán padla ni Pedro u gusto a kagiyán nu pangitain nikuna kagiyan siya nu Banal a Ispirito, “Te tállo a lállake a magehyok niko. ²⁰ Umogsad ka dán sakay dyan ka magalangan a mákkuyog nide dipo hikán u nangutus nide.’ ’ ²¹ Kanya immogsad ti Pedro sakay kinagi na tu tolay hide, “Hikán u áehyukán moy. Ánya u kailangan moy nikán?” ²² Kanya kinagi de, “Pinaangay kame he nu kapitan nu sundalo hide a ti Cornelio. Mabait siya a tolay sakay te ánteng tu Diyos, igággalang siya nu atanan a Judio. Kinagi nikuna nu anghel nu Diyos a paangay na ka sakay sanigán na u kagiyán mo.” ²³ Pinatulos hide ni Pedro sakay hod na dán hide a pinatidug ti gibiyan itod. Tu kadimadimangan ay nákkuyog siya nide, sakay kaguman u sangan a mánnampalataya a taga-Joppa. ²⁴ Maghapun hide a naglakad bagu hide a nakademát ti Cesarea. Maguhay dán nide ti Cornelio, pate u kákkapatkákka na hide a inakit na sakay tu matalik na hide a Amigu. ²⁵ Káddemát ni Pedro ay tinagbu siya ni Cornelio sakay limmuhud tu atubang na a simmamba. ²⁶ Pero kinagi ni Pedro, “Tumaknág ka. Tolayák labe a kapareho mo.” ²⁷ Mentaras a pasáddáp hide tu bilay ay mágguhon hide. Netan ni Pedro a makpal a tolay a napisan hod. ²⁸ Kinagi na, “ Tukoy moy a bawal tu relihiyon me a Judio u mákpisan oni bumisita tu bakán a Judio; pero inpeta nikán nu Diyos a maskin deya man ay dyan ko ituring a madangát oni awan karapat-dapat. ²⁹ Kanya nikuna pinauwiták moy ay awanák nagitamad a nákkuyog. Gusto ko matukuyan ni bakin impaangayák moy.” ³⁰ Kinagi ni Cornelio, “Áppat dán a aldew u nakalipas tu konna labe he a odas, nagdasalák ti bilay miyáy nikuna bigla timmaknág tu atubang ko u essa a lállake a magdemlag u damit na. ³¹ Kinagi na, ‘Cornelio, sinaneg nu Diyos u dasal mo hide sakay kinasayaan na u págtulung mo tu mágkahirap hide. ³² Ipaangay mo ti Simon tu banuwan a Joppa, u ngángngahanan di labe a Pedro. Náktulos siya tu bilay ni Simon a máglinis ti koblet ni hayup a gimitán a gagamit. adene tu diget u bilay na. ³³ Kanya pagdaka taka a impauwet; makpal a salamat ta nakaangay ka he. Nadid ay napisan kame para sanigán u ipekagi nu Panginoon.” ³⁴ Kanya kinagi ni Pedro, “Nadid ko a natukuyan a pare-pareho u pangileng nikitam nu Diyos. ³⁵ Nasaya siya tu tolay a te ánteng nikuna sakay u maggimet ti tama, maskin ánya a ka lahe. ³⁶ Nadid inpakapospos nu Diyos tu Israelita hide u Maganda a Baheta tungkul tu pákpágkasundu tu pamamag-itan ni Jesu-Cristo, u Panginoon nu atanan! ³⁷ U Maganda a Baheta ay nepangaral tu buo a Judea, sapul ti Galilea káttapos a mepangaral ni Juan u tungkul tu bawtismo. ³⁸ Tukoy moy ti Jesus a taga-Nazaret, siya u nángkaluuban nu Diyos tu Banal a Ispirito sakay kapangyariyan bilang patunay a siya u napile. Katoy nikuna u Diyos kanya maski hádya i angayan naay ay maggimet siya ti maganda sakay palayaán na u páppahirapan hide nu diyablo. ³⁹ Hikame u mangpatunay tu atanan a ginággimet na tu lugar nu Judio hide sakay ti Jerusalem. Binuno de siya, sakay nepako tu kudus. ⁴⁰ Pero biniyag siya nu Diyos tu katállo a aldew sakay pimmeta siya, ⁴¹ bakán a tu atanan a tolay nan nikame la a pinile nu Diyos bilang patunay. Hikame u kaguman na a kimman sakay umminom nikuna nabiyag siya a huway. ⁴² Sakay inutusan na kame a mangaral tu tolay hide, sakay mángpatunay a siya u inlaan nu Diyos a magin tagapaghatul tu biyag hide sakay tu nágkatay dán hide. ⁴³ Siya u kákkagiyán nu prupeta hide nikuna ipahayag de a, ‘Ni deya man u maniwala nikuna ay patawadán na u kasalanan de tu pamamagitan nu ngahan na.” ⁴⁴ Pasiyaan padla a magupos ti Pedro, nikuna dimmibbi u Banal a Ispirito tu tolay hide a mágsaneg tu Maganda a Baheta. ⁴⁵ Nagtaka u mánnampalataya hide a Judio a kaguman ni Pedro, dipo nepagkaluub be tu bakán hide a Judio u Banal a Ispirito. ⁴⁶ Natukuyan de iye dipo nasaneg de a nagupos tu iba-iba a upos sakay nagpure tu Diyos u Hentil hide. Kanya kinagi ni Pedro, ⁴⁷ “Tehhod pa beman a makahadlang para bawtismuwan hide tu dinom? Konna labe hide nikitam a napagkaluuben ti Banal a Ispirito. ⁴⁸ Sakay inyutus na a bawtismuwan hide tu ngahan ni Jesu-Cristo. Sakay impákpágguhon de ni Pedro a mákpágyan pala hod ti sangan a aldew.

¹ Nadid, nabaheta nu apostol hide sakay nu mánnampalataya hide ti buo Judea a naniwala be u Hentil hide tu upos nu Diyos. ² Kanya nikuna immangay ti Pedro ti Jerusalem, ay binaháng siya nu mánnampalataya hide a Judio a nature. ³ Kinagi de, “Bakin náktulos ka tu bakán hide a ture a Hentil, sakay nákkan ka pa nide? ⁴ Kanya inpaliwanag nide ni Pedro u atanan a nangyare. ⁵ Kinagi na, “Nikuna hedák ti Joppa a magdasal ay naketaák ti pangitain. Netan ko u kumán a ulás a tummonton tu atubang ko a gábwat ti langet; sakay bumábbátten tu áppat a suluk. ⁶ Pinakamalas ko itod sakay netan ko hod u atanan a kalase ni hayup: u maglakad hide, u magahakas hide, pate u mágkailam hide a hayup sakay tu magegbáh hide. ⁷ Sakay nasaneg ko u boses a nagkagi nikán, ‘Tumaknág ka Pedro, magbuno ka dán sakay kuman!’ ⁸ Pero kinagi ko, ‘Umád ko Panginoon! Dipo maski nikan ay awanák padla kikimman tu ánya man a bagay a nebilang a madangát oni awan karapat-dapat.’ ⁹ Pero nasaneg ko a huway u boses a gábwat ti langet kinagi na, ‘Diyan mo ituring a madangát u bagay hide a imbilang nu Diyos a malinis!’ ¹⁰ Pumentállo iye a nangyare sakay káttapos ay nabatak dán a huway a patamu’t langet u ulás. ¹¹ Ti itod be a odas ay dimmemát tu tinulusan ko u tállo a lállake a manguwet nikán a gábwat ti Cesarea. ¹² Sakay kinagi nikán nu Banal a Ispirito a diyanák magalangan a mákkuyog nide. Nákkuyog be nikán u ánnám a mánnampalataya nikuna immangay kame tu bilay ni Cornelio. ¹³ Káddemát mi hod ay inyistorya nikame ni Cornelio a naketa siya ti anghel a mágtaknág tu disalad nu bilay na, sakay kinagi na nikuna, ‘Ipauwet mo ti Simon a ngángngahanan de a Pedro ti Joppa. ¹⁴ Kagiyán na niko ni kodya ka a maligtas sakay u kasabilay mo hide.’ ¹⁵ Magsapulák padla a magupos ay dimmibbe dán nide u Banal a Ispirito konna tu káddibbe na nikitam tu itod. ¹⁶ Sakay naisip ko u kinagi nu Panginoon, ‘Ti Juan ay nagbawtismo ti dinom, pero bawtismuwan kam nu Banal a Ispirito.’ ¹⁷ Ni inatádden hide nu Diyos ti kaloob a konna tu inyatád na nikitam nikuna maniwala kitam tu Panginoon a ti Jesu-Cristo, deyaák para humadlang tu Diyos?” ¹⁸ Nikuna masaneg di iye ay awan dán hide nagbaháng nan nagpure hide tu Diyos, kinagi de “Ni konna hod ay inatádden be nu Diyos u Hentil hide ti pagkakataun a magsise tu kasalanan de sakay magbagu tánni maligtas.” ¹⁹ Nadid, u mánnampalataya hide ay minawatak-watak dipo tu págpahirap nide sapul nikuna mabuno ti Esteban. Te nakademát ti Fenicia, ti Chipre hanggan ti Antioquia. Maskin hadya demáttán diyay ay ipáppangaral de u Maganda a Baheta pero tu Judio la hide. ²⁰ Pero u iba tu mánnampalatay hide a taga-Chipre sakay taga-Cirene, a immangay ti Antioquia sakay nangaral be tu Griego hide tu Maganda Baheta tungkul tu Panginoon a ti Jesu-Cristo. ²¹ U kapangyariyan nu Panginoon ay katoy nide sakay makpal a naniwala sakay nanalig tu Panginoon. ²² Nabaheta iye nu mánnampalataya hide ti Jerusalem, kanya pinaangay de ti Antioquia ti Bernabe. ²³ Nikuna dumemát hod sakay netan na u págpapala nu Diyos nide ay nasaya siya sakay pinayuwan na hide a atanan a manatile hide a tapat tu Panginoon. ²⁴ Mabait a tolay ti Bernabe, sakay u Banal a Ispirito u giyya na tu biyag na sakay matibay u pánnampalataya na kanya makpal pa u tolay a naakit tu Panginoon. ²⁵ Kanya immangay ti Bernabe ti Tarso para ehyukán na ti Saulo. ²⁶ Sakay nikuna netan na dán siya ay kinuyog na ti Antioquia. Tu buo a sa taon ay nágyan hide hod a kakaguman nu mánnampalataya hod hide sakay nangaral tu makpal a tolay. Ti Antioquia u kadipalonguwan a lugar a nangahanan a Cristiyano u mánnampalataya hide. ²⁷ Nadid ti panahunan itod ay te dimmemát a sangan a prupeta hide ti Antioquia a gábwat ti Jerusalem. ²⁸ Timmaknág u essa nide, u ngahan na ay ti Agabo. Tu pamamag-itan nu Banal a Ispirito ay nagpahayag siya a te dumemát a matindi a sák-aláp ti munduwáy. (Nangyare iye tu kapanahunan ni Emperador a Claudio.) ²⁹ Kanya nagplano u disepulus hide a magpatawed ti tulung tu mánnampalataya hide a mámmágyan ti Judea, ayun tu makaya nu bawat essa. ³⁰ Konna ngane hod u ginimet de, inpatawed de u tulung de tu pinuno de hide ti pánnampalataya tu pamamag-itan di Bernabe sakay ti Saulo.

¹ Nadid, ti panahun biyan itod ay sinapulan ni hare a Herodes a páppahirapan u sangan a gurupo nu mánnampalataya hide. ² Pinaputol na u ulo ni Santiagu a ákka ni Juan tu pamamag-itan nu áttak. ³ Sakay nikuna metan na a nasaya u Judio hide ay impadakáp na pa ti Pedro. (Nangyare iye tu Piyesta nu Tinapay a Awan ti Págpaalsa.) ⁴ Sakay nikuna madakáp de siya ay impepireso na sakay pinabantay na tu áppat a gurupo nu sundalo hide ti tággi-áppat. U balak ni Herodes ay iyatubang na siya tu katolayan káttapos nu Piyesta. ⁵ Kanya nanatile a pumáppireso ti Pedro. Pero mahigpit siya a idáddasal nu mánnampalataya hide. ⁶ Ti gibiyan itod ay tidug ti Pedro tu sállat nu duwwa a sundalo. Pinungo de siya ti duwwa a kadena te guwardiya pa a mágbantay tu pintuwan nu págpiresuwan. Balak a iyatubang ni Herodes ti Pedro tu Judio hide tu sumunud a aldew. ⁷ Nadid, bigla dálla a te pimmeta a anghel nu Panginoon, kaya nagdemlag ti husto u piresuwan. Kinuyág-kuyág na u wahes ni Pedro para malukag. Kinagi na, “Umikat ka, magalisto ka!” Sakay pagdaka a naokbis u kadena tu kama-kamát na. ⁸ Sakay kinagi nikuna nu anghel, “Isulot mo badu muwe sakay ti sandalyas muwe.”Konna ngani hod u ginimet na. Kinagi pa nu anghel nikuna, “Iyalikábkáb mo i malayon muwe a badu sakay umusoseg ka nikán.” ⁹ Ummusoseg ti Pedro tu Anghel a paluwas tu piresuwan. Pero awan na tukoy ni tatahoden u gággagamitán na. U buung-akala na ay mágtagináp la siya. ¹⁰ Nalampasan de u purumero sakay u kaduwwa a guwardiya sakay nakademát hide tu pintuwan a bakal a lálluwasan a patamo tu banuwan. Kusa iye a bimmukas kanya limmuwas hide. Kállipas de tu essa dilan ay bigla dálla a nawan u anghel. ¹¹ Sakay hod la a nahiwaswasan ti Pedro a bakán bál a taginap u nangyare nikuna. Kinagi na, “Nadid ku la a natukuyan a tatahoden bál iye a atanan! Pinaangay nu Panginoon u anghel na para iligtasák na ni Herodes sakay tu atanan a áasaan nu Judio hide a gimitán de nikán.” ¹² Nikuna maisip na u atanan a nangyare ay immangay siya tu bilay ni Maria a ina ni Juan a ngángngahanan de a Marcos. Makpal hod a mánnampalataya a napisan-pisan a mágdadasalán. ¹³ Timmoktok ti Pedro tu pintuwan sakay angay inileng nu utusan a bábbey a Roda u ngahan na ni deya u nagtoktok. ¹⁴ Nabosesan na agad ti Pedro, tu saya na ay awan na dán nahawe a bukasan u pintuwan nu kudal. Nan gumággenan a pasaddáp sakay imbaheta na a mágtaknág ti Pedro tu pintuwan. ¹⁵ Kinagi de nikuna, “Nagaheng ka dáwwad?” Pero ipákpagpilit na a ti Pedro u katoy tu luwas. Kanya kinagi de, “ Bakay anghel itona ni Pedro!” ¹⁶ Pero tulos-tulos la u págtoktok ni Pedro. Kaya binukasan de u pintuwan. Nikuna ketan de ti Pedro ay awan hide makapaniwala. ¹⁷ Pero sininyasan na hide a tumahimik, sakay kinagi na nide ni kodya siya a inluwas nu Panginoon tu piresuwan. Sakay inbilin na be a ibaheta di ni Santiago sakay tu agum hide a mánnampalataya u nangyare. Káttapos ay naghektat dán siya a angay ti iba a lugar. ¹⁸ Nadid tu kadimadimangan na ay namágkagulo u guwardiya hide tu kákkawan ni Pedro. Awan de tukoy ni ánya nangyariyay nikuna. ¹⁹ Pinaehyok siya ni Herodes pero awan de siya netan. Kanya inpaimbistiga na u guwardiya hide sakay impabuno na hide. Sakay káttapos, ay limmakad ti Herodes ti Judea sakay immangay ti Cesarea sakay he dán hod a nágyan. ²⁰ Nadid, nalay dán a maiyamut ti hare a Herodes tu tolay hide ti Tiro sakay ti Sidon. Kanya namágkaessaan nu tolay hide a umadene nikuna. U ginimet de ay inamigu de ti Blasto a mayordomo nu hare a aguman na hide para mákpag-ayus ni Herodes, dipo gábwat tu banuwan nu hare u pagalapan de ti makan. ²¹ Nikuna aldew dán nu pákpágguhon ni Herodes tu taga-Tiro hide sakay tu taga-Sidon hide ay insulot na u damit na a panghare sakay nággetnod tu trono sakay nagupos. ²² Sakay pimmakhaw u tolay hide, “Essa a diyos i magupuse, bakán a tolay!” ²³ Ti odas biyan itod ay pinagkasakit siya nu anghel nu Panginoon, dipo inangkin na u kapuriyan a para tu Diyos; inuhád siya hanggan a natay. ²⁴ Pero u Upos nu Diyos ay kimmalat sakay nágkakakáppal u mánnampalataya hide. ²⁵ Sakay di Bernabe ay ti Saulo ay limmakad dán ti Jerusalem káttapos de a netugán u tulung de hide tu mánnampalataya hide ti Jerusalem. Kinuyog di be ti Juan a ngángngahanan de a Marcos.

¹ Nadid, u mannampalataya hide ti Antioquia ay tehhod a sangan a magpahayag tu Maganda a Baheta sakay tehhod be a sangan a magtoldu tu mánnampalataya hide. Kaguman he di Bernabe, ti Simon a nginahanan de a Negro, sakay ti Lucio a taga-Cirene, ti Manaen (a kaguman ni gubernador a Herodes nikuna anak palla hide a duwwa) sakay ti Saulo. ² Essa aldew mentaras a magkulasyon sakay magpure hide tu Panginoon, kinagi nu Banal a Ispirito nide, “Ibukod moy di Bernabe sakay ti Saulo. Tehhodák a inlaan a tarabaho para nide.” ³ Káttapos de a magkulasyon sakay magdasal ay intupo de tu duwwa u kamát de sakay pinaghektat di dán hide. ⁴ Nadid, inyutus nu Banal a Ispirito di Bernabe ay ti Saulo a umangay ti Seleucia. Sapul hod ay nággabeng hide tu dakal a abeng a paangay ti Chipre a dakál a puduk. ⁵ Nikuna dummemát hide ti Salamina ay inpangaral de u Upos nu Diyos tu sinagoga nu Judio hide. Sakay kakaguman di ti Juan, a ngángngahanan di a Marcos a timmulung nide. ⁶ Nikuna nalebut de u buo a puduk hanggan tu siyudad a Pafos ay nesapulan di hod u essa a mággalbularyo a Judio a magkukunware a prupeta. Bar-Jesus u ngahan na. ⁷ Kaguman siya ni Sergio Paulo a gubernador, essa a malalake a tolay. Impadulaw nu Gobernador di Bernabe ay ti Saulo dipo gusto na a masaneg u Upos nu Diyos. ⁸ Pero sinaway hide nu mággalbularyo a ti Elimas (iye u ngahan na tu upos a Griego) tánni awan sumampalataya u gubernador. ⁹ Pero ti Saulo a ngángngahanan di labe a Pablo, ay putat tu kapangyariyan nu Banal a Ispirito. Lináttángngan na ti Elimas, ¹⁰ sakay kinagi na, “Hiko! Anak ka nu diyablo! Kadima mo u atanan a bagay a tama! Katoy niko atanan a kakabuliyan sakay págdaya! Bakin pirme mo a baliktadan u tatahoden tungkul tu Panginoon? ¹¹ Kaya maparusaan ka nadid! Mabuhák ka hanggan tu aldew a intakda nu Diyos!” Kaya pagdaka a nabate ni Elimas a kumán a tinakáppan ti mangitet a diklam u mata na sakay nagkapa-kapa siya ti mangantabay nikuna. ¹² Summampalataya u gubernador nikuna netan na u nangyare sakay minagtaka siya tu intoldu di Bernabe tungkul tu Panginoon. ¹³ Nadid, limmakad di Pablo sakay tu kaguman na hide ti Pafos, sakay bimmiyahe hide a paangay ti Perga a sakup ni Panfilia. Kaddemat di hod ay himmiwalay nide ti Juan, a ngángngahanan a Marcos, sakay nagsole ti Jerusalem. ¹⁴ Pero di Pablo ay nagtulos-tulos ti Antioquia a sakup ni Pisidia. Sakay tu Aldew nu Káimang ay immangay hide tu sinagoga nu Judio hide sakay nággetnod. ¹⁵ Káttapos a mabasa u sangan a parte nu libro nu Kautusan sakay tu prupeta hide, ay kinagi nide nu puno hide nu sinagoga, “Kákkapatkákka ko hide, ni tehhod kam a makagi a makapagpabegsak tu tolay hide ay kagiyán moy dán!” ¹⁶ Kanya timmaknág ti Pablo sakay sininyasan na hide a tumahimik. “Hikam a Israelita hide sakay tolay hide a tehhod a ánteng tu Diyos, magsaneg kam! ¹⁷ U Diyos nu bansa tam a Israel u nangpile tu ninuno tam hide. Pinakakpal na hide ti husto mentaras a mámmágyan hide ti Egipto. Inluwas na hod hide tu pamamag-itan nu kapangyariyan na. ¹⁸ Nagtiisan na hide a inalagaan ti áppat a pulo a taon nikuna a katoy hide tu parang. ¹⁹ Sakay káttapos na a sidaan u pitto a bansa ti Canaan, ay inyatád na nide u lugar de bilang mana, ²⁰ tu luub nu halus áppat a datos sakay limmapulo a taon. “Sakay káttapos ay inatádden na hide ti huwes a magin puno de hanggan ni prupeta a Samuel. ²¹ Nikuna nangaged hide ti hare ay inatádden hide nu Diyos ti essa a lállake a gábwat tu lahe ni Benjamin, ti Saulo a anak ni Cis. Naghare ti Saulo ti áppat a pulo a taon. ²² Sakay nikuna ibutan siya nu Diyos tu katungkulan na ay inpalit na ti David para magin hare. Sakay konna he u kinagi nu Diyos tungkul nikuna, ‘Netan ko ni David a anak ni Jesse u atanan a gusto ko, dipo tukoy ko a nakahanda siya a sumunud tu atanan a iyutus ko!’ ²³ Gábwat tu lahe ni lállakiyan iye u inpananto nu Diyos tu lahe hide ni Israel a Tagapagligtas. ²⁴ Bago siya dummemát ay impangaral ni Juan tu buo a Israel a dapat hide a magsise tu kasalanan de hide sakay magpabawtismo. ²⁵ Sakay nikuna adene dán a matapos ti Juan tu gimet na ay kinagi na tu tolay hide, ‘Ti deyaák beman tu palagay moy? Bakán a hikán u Cristo. Pero dumemát siya a kasunud ko. Sakay awanák karapat-dapat maskin tagaibut tu sandalyas na.’ ²⁶ Kinagi pa ni Pablo, “Kákkapatkákka ko hide a gábwat tu lahe ni Abraham, sakay hikam a Hentil a tehhod a anteng tu Diyos. Sanigánnák moy, hikitam u nángpatawidan nu Diyos tu Maganda a Baheta tungkul tu kaligtasan. ²⁷ Awan tinengge nu taga-Jerusalem hide sakay u puno de hide a ti Cristo u Tagapagligtas. Maski u Kasulatan a hula nu prupeta hide a bábbasaán de kada Aldew nu Káimang nu Judio hide ay awan de naintendiyan. Hide pa u nángpatupad ti hulaan itod nikuna hatulan de ti kamatayan ti Jesus. ²⁸ Maskin awan hide ti katibayan para hatulan siya ti kamatayan ay inaged de ni Pilato a ipabuno siya. ²⁹ Sakay nikuna matupad di dán u atanan nu nakasulat tungkul nikuna ay inyogsad di siya tu kudus sakay inlábbáng. ³⁰ Pero biniyag siya a huway nu Diyos. ³¹ Makpal a aldew a pimmeta siya tu nákkuyoyog hide nikuna ti Jerusalem a gábwat ti Galilea. Nadid, hide dán u mángpatunay tungkul nikuna. ³² Katoy kami he para ibaheta nikam u Maganda a Baheta. Iye u pananto nu Diyos tu nuno tam hide. ³³ Tinupad na dán itod nadid tu pangbiyag na a huway ni Jesus. Konna tu nakasulat tu libro nu Kansiyon: ‘Hiko u Anak ko, Sakay nadid hikán dán u Ama mo.’ ³⁴ Tungkul tu kákkabiyag na a huway sakay tu awan kákkahunot nu bággi na ay konna he u kinagi nu Diyos, ‘Tatahoden a pagpalaán taka a konna tu inpananto ko ni David.’ ³⁵ Sakay kinagi na pa tu agum a bahagi nu libro nu Kansiyon a, ‘Awan mo pabayan a mahunot u bággi nu banal mo a Tagapagserbi.’ ³⁶ Nikuna masunud dán ni David u atanan a kagustuwan nu Diyos ay natay siya sakay nelábbáng a kaguman nu ninunu na hide sakay nahunot. ³⁷ Pero ti Jesus a biniyag a huway nu Diyos ay awan dimmanas ti kákkahunot. ³⁸ Dapat moy a matukuyan kákkapatkákka ko hide a tu pamamag-itan ni Jesus ay napatawad dán u kasalanan tam. ³⁹ Sakay u atanan nu sumampalataya hide nikuna ay napatawad dán tu atanan nu kasalanan de a awan mapatawad maski tu págsunud tu Kautusan hide ni Moises. ⁴⁰ Kanya magingat kam tánni awan mangyare nikam u kinagi nu prupeta hide, ⁴¹ ‘Hikam a makán upusán ti mágkadukás kontara tu Diyos, Magtaka kam sakay mepahamak! Dipo gimitán ko tu kapanahunan moy U essa bagay a awan moy mapaniwalaan maskin ni ipakapospos di nikam!”’ ⁴² Nikuna paluwas dán di Pablo sakay ti Bernabe tu sinagoga, nákkekagbi u tolay hide a mangaral hide a huway tungkul ti iye hide a bagay tu sumunud a Aldew nu Káimang. ⁴³ Káttapos nu pamággipun-ipun ay immunonod di Pablo sakay ti Bernabe u mákpal a Judio sakay u bakán hide a Judio a nák-agum tu rilihiyon nu Judio hide. Kinauhon hide nu apostol hide sakay pinayuwan a itulos-tulos di la a magtiwala tu kabaitan nu Diyos. ⁴⁴ Tu sumunud a Aldew nu Káimang ay ngahe-ngahe a atanan nu tolay tu banuwan ay namágpisan-pisan tánni mágsaneg tu Upos nu Diyos. ⁴⁵ Pero nikuna ketan nu Judio hide u tuna’t káppal a tolay ay nagsállap hide, kaya kinontara de u kákkagiyan ni Pablo sakay impasanike de siya. ⁴⁶ Pero tunay ti begsák u isip di Pablo sakay ti Bernabe a nagupos, “Dapatay ay hikam pa u purumero me a pángpakapospusan tu Upos nu Diyos. Pero dipo awan moy tinanggap iye, impeta moy a awan kam karapat-dapat tu biyag a awan ti kahád, kanya angay kame dálla mangaral tu bakán hide a Judio. ⁴⁷ Dipo sa iye u inyutus nikame nu Panginoon, ‘Indátton taka a magin demlag nu Hentil hide Tánni mebaheta mo u kaligtasan hanggan tu kaontok-ontukan ni munduway.” ’ ⁴⁸ Nikuna nasaneg iye nu hentil hide ay tunay u saya de sakay nagpure hide tu Panginoon dipo tu upos na. Sakay atanan a pinile nu Panginoon a magkahod ti biyag a awan ti kahád ay summampalataya. ⁴⁹ Kanya kimmalat u Upos nu Panginoon ti lugaran itod. ⁵⁰ Pero sinulsulan nu Judio hide u bábbey hide a igággalang, sakay u lállake hide a pinuno tu banuwan a kalabanán di Pablo sakay ti Bernabe tánni mapalakad di hide ti banuwanan itod. ⁵¹ Kanya impagpag nu duwwa u alikabuk tu tikád de ti itod a banuwan bilang tanda a awan dán hide ti pananagutan nide, sakay immangay hide ti Iconio. ⁵² U disepulus hide ti Antioquia ay tunay ti saya sakay naputat hide tu Banal a Ispirito.

¹ Nadid, tu banuwan a Iconio ay konna bi hod u ginimet di Pablo ay ti Bernabe. Immangay hide tu sinagoga nu Judio hide sakay nangaral kanya makpal a Judio sakay Griego u summampalataya. ² Pero u ginimet nu Judio hide a awan summampalataya ay sinida de u mánnampalataya hide tu awan summampalatay a Hentil, sakay sinulsulan de hide kumontara tu mánnampalataya hide. ³ Nanalay pa hod a nágyan di Pablo sakay ti Bernabe sakay mabegsak u pággisipan de a mangaral tungkul tu Panginoon. Pinatunayan be nu Panginoon a tatahoden u ipáppangaral de tungkul tu kabaitan na tu pamamag-itan nu kapangyariyan a inyatád na nide a maggimet ti makataka-taka a bagay. ⁴ Kanya nahate u tolay hide tu banuwan, u agum ay pimmisan tu Judio hide sakay u agum be ay tu apostol hide. ⁵ Nagplano a agad ti madukás u Hentil hide sakay u Judio hide, kaguman u pupuno de hide kontara tu apostol hide. Binalak de a pasakitan hide sakay budasán. ⁶ - ⁷ Nikuna matukuyan iye nu apostol hide ay gimminan hide sakay impangaral de u Maganda a Baheta ti Listra sakay ti Derbe a banuwan ti Licaonia sakay tu palebut na a lugar. ⁸ Nadid, tehhod a essa a lállake a awan makalakad sapul pa nikuna a anak a mámmágyan ti Listra. ⁹ Mággetnod siya hod a mágsaneg tu pángngaral ni Pablo. Lináttángngan siya ni Pablo sakay netan na a tehhod siya a pánnampalataya a magpiyya. ¹⁰ Kinagi na ti mabegsák, “Tumaknág ka!”Limmukso u lállake sakay tulos a naglakad. ¹¹ Nikuna ketan nu tolay hide u ginimet ni Pablo ay impákhaw de tu upos a Licaonia a, “Immogsad he nikitamáy u diyos hide a naghupa a tolay!” ¹² Nginahanan de a Zeus ti Bernabe sakay nginahanan di be a Hermes ti Pablo, dipo siya u tagaupos. ¹³ U templo nu diyos-diyosan de a ti Zeus ay katoy la tu luwas nu sássáddáppán nu banuwan. Kanya náng-angay u saserdote hide ni Zeus ti kabakaan a tehhod a ulay a bulaklak tu sássáddáppan nu banuwan tánni iyalay na sakay u tolay hide ni Bernabe ay ti Pablo. ¹⁴ Pero nikuna matukuyan iye di Bernabe sakay ti Pablo ay pinisad-pisad de u damit de dipo umád de u gusto nu tolay hide a gimitán de nide. Kanya gimmággenan hide a immangay tu bállog nu katolayan sakay pimmákhaw. ¹⁵ “Dyan moy ina gimitán, tolay kami labe a konna nikam! Katoy kame he para ipangaral me nikam u Maganda a Baheta tánni adággen moy dán ina hide a gimet a awan ti pinagseserbiyan sakay sumole kam tu biyag a Diyos a nanggimet tu langet, tu luta, tu diget, sakay u atanan a katoy hod. ¹⁶ Tu limmipas a panahun ay pinabayan na a sunudán nu atanan a tolay u gusto de hide a gimitán. ¹⁷ Konna pa man hod ay nangatád siya ti sapat a katibayan a mangpatunay ni deya siya tánni matengge moy siya tu pamamag-itan nu mágkaganda hide a bagay a ginággimet na para nikam. Inatádden nakam ti uden a gábwat ti langet sakay ti makpal a ane tu netakda a panahun. Inatádden na kam pa ti sapat a makan sakay kasayaan tu puso moy.” ¹⁸ Maskin konna hod u kinagi de, ay nahirapan pade di Bernabe ay ti Pablo a mangpugád tu tolay hide a makán alayán nide. ¹⁹ Pero te dummemát a Judio hide a gábwat ti Antioquia sakay ti Iconio. Sakay sinulsulan de u tolay hide ti Listra a kumontara ni Pablo kaya binábbatikal di siya. Káttapos ay binehbeh di siya a paluwas tu banuwan tu buung akala de a patay dán. ²⁰ Pero nikuna palebutan siya nu disepulus hide ni Jesus ay timmáknág siya sakay nagsole tu banuwan. Sakay tu kadimadimangan ay immangay hide ay ti Bernabe ti Derbe. ²¹ Nikuna mepangaral di Pablo sakay ti Bernabe u Maganda a Baheta ti Derbe ay makpal hide a naakit a summampalataya. Káttapos ay nagsole hide ti Listra, ti Iconio, sakay ti Antioquia a lugar ti Pisidia. ²² Pinabegsák de u isip nu mánnampalataya hide tu lugar a hinoyutan de sakay pinayuwan de hide a magtulos-tulos a tapat tu pánnampalataya de. Kinagi de, “Magdanas kitam pa ti makpal a hirap bagu kitam a makasáddáp tu kahariyan nu Diyos.” ²³ Tu balang simbaan nu mánnampalataya hide ay nagpile ti Bernabe sakay ti Pablo ti magin pinuno tu simbaan de. Káttapos de a nagdasal sakay nagkulasyon ay impagkatiwala de tu Panginoon a pánnaligan de. ²⁴ Nadid nalebut di dán u lugar a Pisidia hanggan nakademát hide tu lugar a Panfilia. ²⁵ Sakay impangaral de ti Perga u Upos nu Diyos káttapos ay immangay hide ti Atalia. ²⁶ Sapul ti Atalia ay nággabeng dán hide a pasole ti Antioquia. Dipo u mánnampalataya hod u nagdasal a tulungan hide nu Diyos tu gawain de. Kanya, nagsoli hide ti Anntioquia dipo natapos di dán u gawain de. ²⁷ Sakay káddemát de ti Antioquia ay tinipun de u atanan a mánnampalataya sakay imbaheta de u atanan a ginimet nu Diyos tu pamamag-itan de; sakay ni kodya a inatádden nu Diyos u Hentil hide ti pagkakataun a sumampalataya. ²⁸ Sakay nalay hod hide a nákpágyan, kaguman nu mánnampalataya hide.

¹ Pero te sangan a tolay a dimmemát hod a gábwat ti Judea a nagtoldu tu mánnampalataya hide ti konna he, “Kapag awan kam nagpature sigun tu Kautusan ni Moises ay awan kam maligtas.” ² Awan immayun di Pablo sakay ti Bernabe kaya nagin mainit u pamágguhon de tungkul ti iye. Kanya namágkaessaan de a paangayán di Pablo sakay ti Bernabe ti Jerusalem sakay tu sangan pa a mánnampalataya ti Antioquia, para itanung tu apostol hide sakay tu puno hide nu mánnampalataya hide u tungkul tu uhunanan itod. ³ Kanya pinahektat ngane nu mánnampalataya hide di Pablo. Tu káhhoyot de ti Fenicia sakay ti Samaria ay imbaheta de tu kákkapatkákka hod a makpal dán a mánnampalataya a Hentil. Minasaya u mánnampalataya hide ti bahetaan itod. ⁴ Káddemát de ti Jerusalem ay masaya hide a tinanggap nu mánnampalataya hide, apostol, sakay u pinuno hide sakay imbaheta de u atanan a ginimet nu Diyos tu pamamag-itan de. ⁵ Pero timmaknág u sangan a mánnampalataya a kaguman tu gurupo nu Pariseo hide sakay kinagi de, “Dapat a turiyán u Hentil hide a summampalataya sakay kagiyán a sumunud tu Kautusan ni Moises.” ⁶ Namágguhon u apostol hide sakay u pinuno hide tánni pagadalan i bagayan itod. ⁷ Káttapos nu atakdug a pamágtábbegan ay timmaknág ti Pedro sakay kinagi na nide, “Kákkapatkákka ko hide, tukoy moy a piniliyák nu Diyos para ipangaral tu Hentil hide u Maganda a Baheta tánni sumampalataya be hide. ⁸ U Diyos a makatukoy tu isip nu balang essa i nángpatunayay a tinanggap na dán u Hentil hide nikuna inyatád na nide u Banal a Ispirito a konna labe nikitam. ⁹ Eessa u pangileng nu Diyos nikitam sakay hide; pinatawad na hide tu kasalanan de dipo tu pánnampalataya de. ¹⁰ Bakin a gusto moy a purbaan u Diyos? Bakin a pagimet moy tu mánnampalataya hidi u bagay hide a mágkahirap a maski u ninunu tam hide sakay hikitam ay awan tam magimet? ¹¹ Pero maniwala kitam a naligtas kitam tu pamamag-itan nu habag nu Panginoon a ti Jesus, konna be nide.” ¹² Timmahimik hide a atanan sakay nágsaneg di Pablo sakay ti Bernabe mentaras a magbaheta hide tungkul tu makataka-taka a bagay a ginimet nu Diyos tu Hentil hide tu pamamag-itan de. ¹³ Káttapos de a magupos ay kinagi ni Santiagu, “Kákkapatkákka ko hide, sanigán moy kagiyán kuwáy. ¹⁴ Káttatapos la a impaliwanag ni Simon u purumero a pángdulaw nu Diyos tu Hentil hide tánni pate hide ay magin banuwan na. ¹⁵ Iye ay ayun labe tu insulat nu prupeta hide: ¹⁶ ‘Káttapos ni iye ay soliyák, Sakay ihuway ko a itatag u nasida a kahariyan ni David. Itaknág ko a huway u pághare na a nasida, ¹⁷ tánni ehyukán sakay sambaán nu atanan a tolay u Panginoon; Sakay u atanan a Hentil a dinulaw ko para magin kao ko. ¹⁸ Iye u kinagi nu Panginoon a nángpakapospos ti bagayan hidenye sapul pa tu itod.’ ¹⁹ Kinagi pa ni Santiagu a, “Kanya para nikán ay dyan tamon paghirapán u Hentil hide tu káadene de tu Diyos. ²⁰ Nan sulatan tam hide a diyan kuman tu neatang tu diyos-diyosan; diyan mangibábbey oni mangilállake; diyan kuman tu nabitte a hayup sakay u digi. ²¹ Dipo sapul pa tu itod a panahun, u Kautusan ni Moises ay bábbasaan dán tu sinagoga hide kada Aldew nu Káimang, sakay ipáppangaral u upos na tu kada banuwan.” ²² Kanya nagkasundu u apostol hide, u pupuno hide, sakay u atanan a mánnampalataya a magpile tu sangan nide para paangayán ti Antioquia, a kaguman di Pablo sakay ti Bernabe. U napile a paangayán hod ay u kákkapatkákka, a ti Judas a ngángngahanan a Barsabas, sakay ti Silas. Hide ay duwwa tu pinuno nu mnnampalataya ti Jerusalem. ²³ Impatawed de u sulat a konna he: “Hikame a apostol hide sakay pupuno hide ay mangumusta tu kákkapatkákka tam a Hentil ti Antioquia, ti Siria sakay ti Cilicia. ²⁴ Nabaheta me a angen kam lálligaligán nu agum hide a kakagumanan tam a gábwat he, maski awan me hide inutusan a mángkagi nikam ti konna hod. ²⁵ Kanya namágkaessaan me a nangpile ti tolay a paangayan mi hina. Kaguman hide nu mahal tam a kákkapatkákka a ti Bernabe sakay ti Pablo, ²⁶ a nángtaya tu biyag de tu pagserbi tu Panginoon tam a ti Jesu-Cristo. ²⁷ Pinaangay me hina di Judas sakay ti Silas para ipaliwanag nikam u nakasulat he. ²⁸ Dipo tu tulung nu Banal a Ispirito ay naisipan me a diyan kamon atádden ti agum pa a utus nan u mágkahalaga la hide a bagay, konna ti iye hide: ²⁹ Dyan moy kanán u neatang hide tu diyos-diyosan hide, dyan kamon kuman tu tehhod hide a dige sakay dyan moy dán kanán u hayup a nabitte. Sakay diyan kamon mangibábbey oni mangilállake. Adeyuwan moy i bagayan ina hide, dipo kapiyyaan moy u págsunud tu utus me a iye. Sigi hanggan dálla he.” ³⁰ Kanya pinahektat di dán u umangay hide ti Antioquia. Káddemat di hod ay pinisan de u atanan a mánnampalataya hide sakay inyatád de u sulat. ³¹ Sakay pákkabasa de tu sulat ay tunay u saya nu tolay hide dipo tu nasaneg de. ³² Sakay di Judas sakay ti Silas a prupeta be ay makpal a intoldu tu mánnampalataya hide a nangpabegsak tu isip de sakay nángpatibay tu pánnampalataya de. ³³ Káttapos nu sangan a aldew a pákpágyan hod nu duwwa ay nagsole dán hide tu nangpaangay hod nide a tehhod a pakkumusta a gábwat tu taga hod hide. ³⁴ [Pero mas ginusto ni Silas a mawahak ti Antioquia.] ³⁵ Di Pablo sakay ti Bernabe ay nágyan pa ti Antioquia. Intoldu de sakay impangaral u Upos nu Panginoon kaguman de u agum pa a mánnampalataya. ³⁶ Kállipas nu sangan a aldew ay kinagi ni Pablo ni Bernabe, “Angen ta soliyán sakay bisitaán u kákkapatkákka tam hide tu banuwan hide a nangaralan ta tu Upos nu Panginoon. Sakay ilingán ni anya dán i kalagayan diyay.” ³⁷ Gusto ni Bernabe a kuyugán ti Juan a ngángngahanan di labe a Marcos. ³⁸ Pero umád ni Pablo a kuyugán ti Marcos dipo awan siya nákpagtulos-tulos tu tarabaho de ni awan nákhiwalay nide ti Panfilia. ³⁹ Kanya namágtábbegan hide sakay naghiwalay a duwwa. Ingkuyog ni Bernabe ti Marcos sakay nággabang hide a patamo ti Cyprus. ⁴⁰ Pero pinile ni Pablo ti Silas; sakay limmakad káttapos a idasal nu mánnampalataya hide a ingatan hide nu Panginoon. ⁴¹ Immangay di Pablo ti Siria sakay ti Cilicia, sakay pinabegsák na u pánniwala nu mánnampalataya hide.

¹ Immangay be ti Pablo tu banuwan a Derbe sakay ti Listra. Tehhod hod a mánnampalataya a u ngahan na ay ti Timoteo a anak nu essa a bábbey a Judio a mánnámpalataya, pero u ama na ay essa a Griego. ² Igággalang nu atanan a mánnampalataya a taga-Listra sakay taga-Iconio ti Timoteo. ³ Gusto a kuyugán ni Pablo ti Timoteo, kanya tinure na siya dipo tukoy nu Judio hide a mámmágyan ti lugaran itod a Griego u ama ni Timoteo. ⁴ Tu balang lugar a angayan de ay ipakapospos de tu mánnampalataya hide u napagkasunduan nu apostol hide sakay u puno hide ti Jerusalem sakay inyutus de a sunudán de itod. ⁵ Kanya lalo a timmibay u pánnampalataya nu kákkapátkákka hide, sakay kumákkakakáppal u sumampalataya hide a medag-dag ti aldew-aldew. ⁶ Sakay immangay di Pablo tu lugar nu Frigia sakay ti Galacia, dipo awan hide pinayagen nu Banal a Ispirito a mangaral tu Upos nu Diyos ti Asia. ⁷ Káddemát de tu hangganan nu Misia ay gusto di nakwa a umangay ti Bitinia, pero awan hide pinayagen nu Ispirito ni Jesus. ⁸ Kanya nagtaleb dálla hide ti Misia sakay nagdiretso ti Troas. ⁹ Ti gibiyan itod ay nagkahod ti essa a pangitain ti Pablo: te essa a lállake a taga-Macedonia a te taknág sakay mákkekakagbi nikuna, kinagi na, “Umangay ka pay ti Macedoniaáy sakay tulungan moy kame.” ¹⁰ Kanya káttapos a ketan ni Pablo i pangitainan itod ay agad kame a immangay ti Macedonia, dipo nabate me a dinulaw kame nu Diyos a mangaral tu Maganda a Baheta tu tolay hod hide. ¹¹ Sapul ti Troas ay nággabeng kame a patamo ti Samotracia sakay tu kadimadimangan ay dimmemát kame ti Neapolis. ¹² Kággábwat me ti Neapolis ay immangay kame ti Filipos, essa a dakál a banuwan ti Macedonia a sakup ni Roma. Nákpágyan kame hod ti sangan a aldew. ¹³ Sakay tu Aldew nu Káimang ay limmuwas kame tu banuwan sakay immangay tu bihebi nu dinom, tu essa a lugar a natukuyan me a lugar nu págdasalan nu Judio hide. Nággetnod kame sakay nákpágguhon tu bábbey hide a nagipun-ipun hod. ¹⁴ U essa nide ay ti Lydia a taga-Tiatira, essa a negosyante a máglako ti mágkamahal a tela a kulay ubi. Te ánteng siya tu Panginoon. Mentaras a mágsaneg siya ni Pablo ay binukasan nu Panginoon u isip na sakay naniwala siya tu kinákkagi ni Pablo. ¹⁵ Sakay nagpabawtismo siya sakay tu buo na a pamilya. Káttapos ay inakit na kame,“Ni maniwala kam a tatahodinák dán a mánnampalataya tu Panginoon ay tumulos kam ti bilay.” Kanya tinanggap me u pággakit na. ¹⁶ Essa a aldew, nikuna paangay kame tu lugar a págdasalan ay natagbuwan me u madiket a alipin. Te bunog siya a mangatád nikuna ti kapangyariyan a maghula. Dakál u kitaán nu amo na hide dipo tu pághula na. ¹⁷ Tagu-tagubetan na kame ay di Pablo, sakay mágpapákhawán ti konna he, “Iye hide a tolay u tagapagserbi nu Kataasan a Diyos! Immangay hidehe para ibaheta de nikam ni kodya kam a maligtas!” ¹⁸ Aldew-aldew ay gággimitán na itod nide kanya nágngál ti Pablo. Inatubang na u bábbey sakay kinagi na tu madukás a ispirito, “Tu ngahan ni Jesu-Cristo, utusan taka a lumakad ti bábbiyan itona!” Kanya ti itod be ay lummakad u madukás a ispirito. ¹⁹ Nikuna ketan nu amo na hide a nawanan dán hide ti pagkakitaan ay intoglad de ti Pablo sakay ti Silas sakay inyangay de hide tu matolay a lugar para iyatubang tu pinuno hide nu banuwan. ²⁰ Sakay kinagi de nide,“I duwwaan iye a Judio ay mággaguluwán ti banuwan tamáy. ²¹ Mágtatolduwán hide tu kaugalian a bawal tu Kautusan tam a Romano. Awan tam maare a tanggapán i itáttoldu diye.” ²² Sabay-sabay a intoglad nu katolayan ti Pablo sakay ti Silas, sakay pinaeklas hide nu pinuno hide sakay tulos de a pinabálbag. ²³ Sakay káttapos di hide a binábbálbág ay impireso de hide sakay pinabantay de ti mapiyya. ²⁴ Insáddáp hide nu guwardiya tu kadisaladen nu págpiresuwan sakay ingkandadu de u tabla a nángsulutan de tu tika-tikád de. ²⁵ Pero nikuna bállog dán ni gibi ay nagdasal di Pablo sakay ti Silas sakay nágkansiyon hide ti papure sakay págsamba tu Diyos. U agum a pireso ay mágsaneg nide. ²⁶ Sakay bigla dálla a naglinog ti mabegsak sakay nayanág u pundasyon nu págpiresuwan. Nabukasan u atanan nu pintuwan nu piresuwan sakay naokbis u kadena nu atanan a pireso. ²⁷ Minamulag-pulag u guwardiya sakay nikuna netan na a bukas dán u pintuwan hide ay binagut na u áttak na sakay laan na dán a bunuwan u sadili na ta akala na ni nakaginan dán u pireso hide. ²⁸ Pero pimmákhaw ti Pablo, “Diyan mo bunuwan i sadili muwe! Katoy kame he a atanan!” ²⁹ Nák-aged ti sulo u guwardiya sakay mágpapágpággán a nagginan a simmáddáp sakay limmuhud tu atubang di Pablo ay ti Silas. ³⁰ Inluwas na hide sakay tinanung na hide, “Ánya u dapat ko a gimitán tánni maligtasák?” ³¹ Kinagi de, “Maniwala ka tu Panginoon Jesus tán maligtas ka, pate u pamilya mo.” ³² Sakay impangaral de nikuna u Upos nu Panginoon sakay u atanan a kaguman tu bilay na. ³³ Sakay ti itod be a gibi ay lininisan nu guwardiya u talingu de, sakay nagpabawtismo siya pate u buo na a pamilya. ³⁴ Káttapos ay ingkuyog na hide tu bilay na sakay pinakan. Tunay u saya na sakay u pamilya na dipo summampalataya hide tu Diyos. ³⁵ Pero tu kadimadimangan ay inutusan nu pupuno hide nu banuwan u sundalo hide a palayaan di Pablo ay ti Silas, ³⁶ kanya kinagi nu guwardiya ni Pablo, “Inyutus nu pinakapuno hide nu banuwan a maare kamon a lumuwas. Kád moy dán, lumakad kamon a tehhod a kapayapaan. ³⁷ Pero kinagi ni Pablo tu sundalo hide, “Pinabálbág dikame tu atubang nu kákpalan sakay inpepireso a awan palla naimbistigaan, maski taga-Roma kami labe! Sakay nadid ay gusto dikame a paluwasán ti lihim! Awan maare hide he angayay a mángpaluwas nikame.“ ³⁸ Ingkagi nu sundalo hide tu pupuno nu banuwan u kinagi ni Pablo. Minanteng hide nikuna matukuyan de a taga-Roma bál di Pablo sakay ti Silas. ³⁹ Kanya immangay u puno hide tu págpiresuwan sakay naktawad di Pablo sakay ti Silas. Inluwas di hide tu págpiresuwan sakay kinauhon a lumakad dán ti itod a banuwan. ⁴⁰ Nadid kálluwas de tu piresuwan ay nagtulos hide tu bilay ni Lydia. Nedemáttan di hod u mánnampalataya hide. Bagu hide a limmakad ay pinabegsak de hide ti isip a magpakatibay tu pánnampalataya de.

¹ Nadid himmoyot di Pablo sakay ti Silas ti Amfipolis sakay ti Apolonia, sakay nagtulos hide ti Tesalonica. Ti itod a lugar ay te sinagoga u Judio hide. ² Ugale dán ni Pablo a umangay tu sinagoga. Tu luub nu tállo a simba kada Aldew nu Káimang ay mákpagpaliwanagan siya tungkul tu Kasulatan, ³ impaliwanag na sakay pinatunayan na a dapat pa a magdanas ti hirap u Cristo sakay mabiyag a huway. Kinagi na a, “Ti Jesus a ibábbaheta ko nikam ay siya u Cristo!” ⁴ Naniwala sakay nákkuyog di Pablo ay ti Silas u sangan nide, konna be tu tányag hide a bábbey sakay u Griego hide a makadiyos. ⁵ Pero nagsállap u Judio hide kanya inipun de u abusador hide sakay inutusan di hide a manggulo tu banuwan. Sináddáp de u bilay ni Jason, sakay pilit de a inahyok di Pablo sakay ti Silas tánni iyatubang tu tolay hide. ⁶ Nikuna awan di netan u duwwa ay binehbeh de ti Jason sakay u agum a mánnampalataya sakay inyangay de hide tu puno nu banuwan. Konna he u ipáppákhaw de, “Iye hide a tolay ay manggagolo maskin hádya hide angayan sakay nadid ay atoy dán he hide ti banuwan tamáy! ⁷ Kanya pinatulos hide ni Jason tu bilay na. Sinuway de a atanan u utus nu Emperador. Kinagi di pa a tehhod a iba a hare a ngahan naay ay ti Jesus.” ⁸ Kanya nagulo u tolay hide sakay tu pupuno hide dipo ti nasaneg diyan iye. ⁹ Bagu a pinaluwas nu puno hide ti Jason sakay tu agum na hide ay pinagbayad di hide ti piyansa. ¹⁰ Ti itod labe a gibi ay pinaangay nu mánnampalataya hide ti Pablo sakay ti Silas tu banuwan a Berea. Káddemát di hod ay simmáddáp hide tu sinagoga nu Judio hide. ¹¹ Mas maganda a kauhon u Judio hide a taga-hod nan u Judio hide a taga-Tesalonica; dipo gugusto de a mágsaneg tu ipáppaliwanag ni Pablo. Pagadalan de ti aldew-aldew u Kasulatan para mapatunayan de ni tatahoden u kákkagiyán na. ¹² Makpal u summampalataya hod a Judio konna be tu Griego hide, puro a kalállakiyan sakay kabábbiyan a tanyag ti itod a lugar. ¹³ Pero nikuna mabaheta nu Judio hide a taga-Tesalonica a impangaral be ni Pablo ti Berea u Upos nu Diyos ay immangay be hide hod tánni sulsulan de u tolay hide a manggulo tu banuwan. ¹⁴ Pagdaka a inyangay nu mánnampalataya hide ti Pablo tu bihebi nu diget, pero nagwahak di Silas ay ti Timoteo ti Berea. ¹⁵ U nagtugán hide ni Pablo ay nákkuyog nikuna hanggan ti Atenas. Káttapos ay nagsole hide ti Berea, a tawed u bilin ni Pablo para di Silas sakay ti Timoteo a tumagubet hide a pagdaka. ¹⁶ Mentaras a maguhay ti Pablo tu duwwa ti Atenas ay netan na a makpal a diyos-diyosan tu siyudad. Kanya nalungkot siya ti husto. ¹⁷ Kanya nákpagpaliwanagan siya tu sinagoga hide hod, tu Judio hide sakay tu maka-diyos hide a tolay, sakay maskin deya u matagbu na tu matolay a lugar aldew-aldew. ¹⁸ Nákpagtábbegan be siya tu sangan a pinakamaisto a kasale tu gurupo nu Epicureo sakay Estoico. Tehhod be a sangan a nagkagi a, “Ánya wád i kákkagi-kagiyán ne ni mumaru-marunungay a tolay?” Kinagi be nu agum, “Mangaral wád tungkul tu agum a diyos nu taga iba a banuwan.” Konna hina u kagi de dipo nangaral ti Pablo tungkul ni Jesus sakay tu kákkabiyag a huway. ¹⁹ Kanya kinuyog di siya sakay inyatubang tu pággipun-ipunan tu Areopago sakay tinanung a, “Maare mi beman a matukuyan ni ánya i bigu muwe a itáttoldu? ²⁰ Iba ina a toldu dipo pákkasaneg mi palla kanya gusto me a matukuyan ni ánya i gustu naay a kagiyán.” ²¹ Dipo awan dán ti agum a gággimitán u taga-Atenas hide sakay u dayo hide a mámmágyan hod nan mamágguhon sakay mágsaneg tungkul tu bigu hide a toldu. ²² Kanya timmaknág ti Pablo tu atubang nu pamágguhunan tu Areopago sakay kinagi na,“Hikam a taga-Atenas, netan ko a tunay kam a relihiyoso. ²³ Dipo tu páglalebut ko ti banuwan moyáy ay neilingan ko tu lugar hide a págdasalan moy u essa a altar a nakasulat u konna he, “Tu Diyos a awan matengge.” U Diyos a awan moy matengge a páppuriyán moy ay siya u ipáppangaral ko nikam. ²⁴ U Diyos a nanglalang ti munduway sakay tu atanan a mágyan hod ay siya u Panginoon ti langet sakay ti lutaáy. Awan siya mágyan tu templo a ginimet nu tolay. ²⁵ Awan siya mangailangan ti ánya man a tulung nu tolay, nan siya u nangatád ti biyag, angás sakay atanan a bagay tu atanan a tolay. ²⁶ Nilalang na u atanan a lahe ti munduway a gábwat tu essa a tolay sakay pinágyan na hide ti buuwáy a mundu. Intakda na u panahun nu kákkabiyag di he ti munduwáy sakay u kahád nu páppágyanan nu balang essa. ²⁷ Ginimet iye nu Diyos tánni ehyukán siya nu tolay. Sakay tu pággehyok tam ay makay sakale a maehyok tam siya. Pero i tatahodinay u Diyos ay awan adeyo tu balang essa nikitam. ²⁸ Dipo táttawed na u angás tam, pággahikad sakay pagkatolay tam. Konna tu kinagi nu sangan tu mágtula moy hide, ‘Anak na kitam ngani.’ ²⁹ Nadid, dipo anak kitam nu Diyos ay diyan tam ipalagay a konna la siya tu letrato a ginto, pilak, oni bito a ginimet la nu tolay. ³⁰ Nalay a panahun a pinabayan nu Diyos u tolay hide tu awan de pángtengge nikuna. Pero nadid ay inyutus na tu atanan a tolay tu bawat lugar a magsise sakay adeyuwan di dán u madukás de a kákkabiyag. ³¹ Dipo intakda na dán u aldew nu paghatul ti munduway sakay gimitán na iye a tehhod a katarungan tu pamamag-itan nu essa a tolay a pinile na. Pinatunayan na itod nikuna biyagán na a huway i tolayan itod!” ³² Pákkasaneg de tu kinagi ni Pablo tungkul tu kákkabiyag a huway ay pinagtawaan siya nu agum. Kinagi be nu agum, “Gusto me a masaneg a huway i kinákkagi muwe.” ³³ Pákkakagi di hod ay lilakaden ni Pablo u katolayan. ³⁴ Te sangan a nákkuyog nikuna sakay summampalataya tu Diyos. Kaguman he di Dionisio a kaguman tu grupo nu mamággipun-ipun tu kákkagiyán de a Areopago, sakay essa a bábbey a ngángngahanan de a Damaris, sakay tu agum pa.

¹ Káttapos ay limmakad ti Pablo ti Atenas sakay immangay ti Corinto. ² Nakilala na hod ti Aquila, essa a Judio a taga-Ponto. Káddedemát na la a gábwat ti Italia kaguman u kabanga na a ti Priscila. Lummakad hide hod dipo pinalakad ni emperador a Claudio u atanan a Judio ti Roma. Immangay ti Pablo tu bilay de, ³ sakay dipo pare-pareho hide a mággimet ti tolda ay nákpágyan dán hod siya sakay nákpagtarabaho a kaguman de. ⁴ Sakay kada Aldew nu Káimang ay angay mákpagpaliwanagen ti Pablo tu Judio hide sakay Griego tu sinagoga tánni maakit na hide a atanan a sumampalataya. ⁵ Nikuna dimmemát di Silas sakay ti Timoteo a gábwat ti Macedonia, inyatád dán ni Pablo u buo na a odas tu pángngaral sakay magpatunay tu Judio hide a ti Jesus u Cristo. ⁶ Nikuna kinontara de siya sakay ininsulto ay impagpag na u alikabuk tu badu na, bilang babala nide. Kinagi na, “Kasalanan moy dán ina ni mepahamak kam! Awanák dán ti pananagutan nikam! Sapul nadid ay hedák dán mangaral tu Hentil hide.” ⁷ Kanya limmakad siya hod sakay timmulos tu bilay ni Ticio Justo, essa siya a Hentil a sumássamba tu Diyos; kasadát nu sinagoga u bilay na. ⁸ Ti Crispo a pinuno nu sinagoga sakay tu buo na a pamilya ay summampalataya tu Panginoon. Sakay makpal pa a taga-Corinto a nágsaneg ni Pablo u summampalataya sakay nagpabawtismo. ⁹ Essa a gibi ay nákpágguhon u Panginoon ni Pablo tu pangitain, kinagi na, “Diyan ka manteng nan itulos mo u pángngaral mo maski ánya man u mangyare ay diyan ka umimang. ¹⁰ Pirmiyák mo a kakaguman kanya awan niko ti mangpasa-pasaket, sakay makpal u mánnampalataya nikán ti iye a banuwan.” ¹¹ Kanya nákpágyan hod siya ti sataon ay ti kalahate sakay impangaral na tu tolay hide u Upos nu Diyos. ¹² Pero nikuna maging gobernador ti Galion ti Acaya ay namágkaessa u Judio hide a dakáppán ti Pablo sakay inyangay tu pághatulan. ¹³ Káddemát di hod ay kinagi de a, “I tolayan iye ay áakitán na u tolay hide a sumamba tu Diyos tu paraan a bawal tu batas!” ¹⁴ Magupos dán nakwa ti Pablo pero nagupos dán ti gubernador a Galion, “Hikam a Judio hide, ni madágge a kasalanan ireklamo moye sakay ni páglabag tu batas ay dapat la pospusán takam. ¹⁵ Pero dipo u reklamo moy ay tungkul la ti upos, ngaha-ngahan sakay u Kautusan moy hide a Judio bahala kamon hina! umándák a mák-alam ti itona hide a bagay.” ¹⁶ Sakay pinaluwas na hide tu pághatulan. ¹⁷ Kanya ti Sostenes a puno nu sinagoga u sinunggaban de sakay binálbág tu luwas nu pághatulan. Pero awan itod rinipara ni Galion. ¹⁸ Káttapos ni itod a pangyayare ay nákpágyan pa ti Pablo ti sangan a aldew ti Corinto, sakay nagpaalam tu mánnampalataya hide. Káttapos ay immangay siya ti Cencrea a adene tu diget, kaguman na u magkabanga a Priscila sakay Aquila. Ti Cencrea ay nagpagapas siya ti buuk dipo natupad na dán u pananto na tu Diyos. Káttapos, nággabeng hide a patamo ti Siria. ¹⁹ Káddemát de ti Efeso ay inwahak na u duwwa sakay simmáddáp siya tu sinagoga sakay nákpagpaliwanagen tu Judio hod hide. ²⁰ Inakit de siya a ni maare a mágyan pa siya hod ti sangan a aldew pero inumád siya. ²¹ Pero nikuna kadnadán ay kinagi na nide, “Magsoliyák he, ni kaluuban nu Diyos.”Sakay limmakad ti Efeso a nágsakay tu abeng. ²² Káddung de ti Cesarea ay immangay siya ti Jerusalem sakay nákkumusta tu mánnampalataya hod hide. Káttapos ay nagtulos siya ti Antioquia. ²³ Nágyan hod siya ti sangan a aldew sakay káttapos ay naghektat dámman siya. Linebut na u atanan a lugar a sakup ni Galacia sakay ti Frigia, sakay pinabegsák na u pánnampalataya nu atanan a mánnampalataya hod. ²⁴ Tehhod a dimmemát a essa a Judio ti Efeso a Apolos u ngahan na, neenak siya ti Alejandria sakay malalake siya a magupos sakay makpal siya a tukoy tu Banal a Kasulatan. ²⁵ Natolduwan siya tungkul tu Dilan nu Panginoon Jesus sakay masipag siya a mangaral sakay itoldu na ti tama u tungkul ni Jesus. Pero u tukoy na la ay u intáttoldu hide ni Juan sakay u tungkul tu págbawtismo ni Juan. ²⁶ Mabegsák u pággisipan na a mangaral tu sinagoga nu Judio hide. Nikuna masaneg nu magkabanga a Aquila sakay Priscila u págpaliwanag ni Apolos ay inakit de siya tu bilay de. Sakay impaliwanag di pa nikuna ti husto u bagay hide a awan na palla tukoy tungkul tu pamamaraan nu Diyos. ²⁷ Sakay nikuna maggayak siya a angay ti Acaya ay nagsulat u mannampalataya hide a taga-Efeso para tu mánnampalataya hide hod a tanggapán de ti mahusay ti Apolos. Káddemát na hod ay dakál u netulung na tu mánnampalataya hide dipo tu kabaitan nu Diyos. ²⁸ Dipo tunay siya ti husay a nagpaliwanag ay awan siya nadaig nu Judio hide tu atubang nu katolayan. Pinatunayan na nide tu pamamag-itan nu Banal a Kasulatan a ti Jesus u Cristo.

¹ Mentaras katoy palla ti Apolos ti Corinto ay linakad be ni Pablo u mabuke-buked a lugar tu prubinsiya hanggan a nakademát siya ti Efeso. Netan na hod u sangan a mánnampalataya. ² Sakay tinanung na hide, “Tinanggap moy beman u Banal a Ispirito nikuna sumampalataya kam? ‘Awan palla, awan me pa ngane nasasaneg a tehhod bál a Banal a Ispirito.” kagi de. ³ Kanya kinagi ni Pablo, “Ni konna hod, ánya a kalase nu pagbawtismo u natanggap moy?” Kinagi de, “U konna ben tu págbawtismo ni Juan.” ⁴ Kanya kinagi ni Pablo, “U bawtismo ni Juan ay para tu tolay hide a nagsise dán tu kasalanan de. Pero kinagi nabe tu tolay hide a kailangan de a manampalataya tu dumemát a kasunud na a awan ti iba nan ti Jesus.” ⁵ Nikuna masaneg de itod ay nagpabawtismo hide tu ngahan nu Panginoon a ti Jesus. ⁶ Sakay ti Pablo ay intupo na u kamát na nide sakay simmidung nide u Banal a Ispirito. Nagupos hide ti iba-iba a upos sakay nagpahayag tu upos a gábwat tu Diyos. ⁷ Tehhod wád hide a sapulo ay ti duwwa a lállake a nagpabawtismo ni Pablo. ⁸ Mággangay ti Pablo tu sinagoga tu luub nu tállo a bulan sakay mabegsak u isip na a nangaral tu tolay hide. Nákpagtábbegen siya sakay impaliwanag na nide u tungkul tu pághare nu Diyos. ⁹ Pero tehhod a sangan a awan summampalataya, maigát u págguluwan de sakay nagupos pa ti madukás kontara tu Toldu nu Diyos tungkul tu kaligtasan a hod ni Cristo tu atubang nu tolay hide. Kanya nilakaden ni Pablo u sinagoga sakay inkuyog na u mánnampalataya hide tu iskuwilaan ni Tirano sakay nagtulos-tulos siya a nagtoldu aldew-aldew. ¹⁰ Nagnalay siya hod ti duwwa a taon, kanya u tolay hide a mágyan ti Asia ay nakasaneg tu Upos nu Diyos, Judio man oni Griego. ¹¹ Naggimet hod u Diyos ti makataka-taka a bagay tu pamamag-itan ni Pablo. ¹² Maski panyo oni badu a ginamit ni Pablo ay iyangay de tu tehhod hide a saket. Nagpiyya hide maski u madukás hide a ispirito a magpahirap nide ay lumakad. ¹³ Tehhod hod a sangan a Judio a maglebut a mágpalayas ti mágkadukás a ispirito. Pinurbaan de a gamitán u ngahan ni Jesus tu págpalayas de. Kinagi de tu madukás a ispirito a, “Tu ngahan ni Jesus a ipáppangaral ni Pablo ay utusan takam a lumakad hina!” ¹⁴ U naggimet ti iye ay u pitto a anak a lállake nu pinakapuno a saserdote nu Judio hide a u ngahan na ay Esceva. ¹⁵ Pero tinábbeg hide nu mágkadukás a ispirito,“Matengge ko ti Jesus sakay matengge ku be ti Pablo. Pero dideya kam?” ¹⁶ Sakay bigla hide a linuksuwan nu lállake a nasaniban nu madukás a ispirito. Natalo na hide a atanan sakay tináttalinguwan tulos na a pinisad-pisad u babadu de hide kanya eklas hide a gimminan ti itod a bilay. ¹⁷ Nabaheta iye nu atanan a mágyan ti Efeso, Judio ay ti Griego; kanya nanteng hide a atanan sakay pinure de u ngahan nu Panginoon a ti Jesus. ¹⁸ Makpal be tu mánnampalataya hide u nángtapat tu káppalan nu tolay tu mágkadukás di hide a gimet. ¹⁹ Inipun nu te galing-galing hide u lilibro de hide sakay tinutod de tu atubang nu kakpalan. U karkula de tu halaga nu libro ay ummabut ti limmapulo a libo a pilak. ²⁰ Dipo tu kapangyariyan nu Panginoon ay tulos-tulos a kimmalat sakay nagtagumpay u Upos na. ²¹ Káttapos ni itod a pangyayare, tu tulung nu Banal a Ispirito ay naisip ni Pablo a humoyot ti Macedonia sakay Acaya bagu a angay ti Jerusalem sakay kinagi na, “Kailangan ko be a angay ti Roma, kággábwat ko ti Jerusalem.” ²² Pinágdipalongo na ti Macedonia di Timoteo sakay ti Erasto, u kaguman na a duwwa, sakay nákpágyan palla siya ti Asia ti sangan a aldew. ²³ Ti itod labe a panahun ay nagkahod ti dakál a kaguluwan dipo tu Toldu nu Diyos tungkul tu kaligtasan a hod ni Cristo. ²⁴ Tehhod a essa a mágpanday a u ngahan na ay ti Demetrio. Mággimet siya ti bábbadit a templo a yare ti silber para tu diyos-diyosan de a ti Artemis. Tunay ti kadakál i kita naay he. ²⁵ Pinisan na u atanan nu tarabahador na hide sakay u agum pa hide a tolay a konna labe he u tarabaho de. Kinagi na, “Kakagumanan ko hide, i tarabaho tamlaáy u paggábwatan nu kabiyagan tam. ²⁶ Nadid netan moy sakay nasaneg u kákkagiyán ni Pabluwan itona. Kinagi na a u diyos kan a ginimet la nu tolay ay bakán a tatahoden a diyos sakay makpal dán u naakit na. Bakán la a ti Efesowáy nan ngahe-ngahe dán a buo a Asia. ²⁷ Madukás i risultaay ni itáttoldu nae. Dipo awan dán ti mamale ti gággimitán tamáy dipo ituring di dán a awan iye ti serbi. Bakán la itod nan pate u templo nu mataas a diyos tam a ti Artemis ay mawanan ti serbi sakay awan di dán siya igalang. Siya pabe u diyos a sambaán nu buo a Asia sakay u atanan a tolay ti munduway. ²⁸ Nikuna masaneg de itod ay tunay u iyamut de sakay impákhaw de a, “Ti Artemis a diyos tam a taga Efeso ay kataasan!” ²⁹ Kanya dipo hod ay nagkagulo u buo a banuwan tu pákhawan. Binehbeh de di Gayo ay ti Aristarco a taga-Macedonia a kaguman ni Pablo sakay sabay-sabay de hide a inyangay tu pággipun-ipunan. ³⁰ Gusto nakwa ni Pablo a angay tu atubang nu tolay hide pero sinaway siya nu mánnampalataya hide. ³¹ Impekagi be nu amigu na hide a pinuno nu prubinsiya a Asia a mahigpit a dyan siya umangay tu pamág-ipun-ipunan. ³² Tunay ti kagulo u pamággipun-ipunan. U agum ay magpákhaw ti essa a bagay, sakay u agum ay iba be u ipáppákhaw de sakay awan tukoy nu káppalan ni bakin mamággipun-ipun hide hod. ³³ Te essa hod a tolay a u ngahan na ay ti Alejandro. Intoglad siya nu Judio hide tu atubang para magpaliwanag a hide a Judio ay awan ti tukoy tungkul tu kaguluwan. Nikuna makataknág dán ay sininyasan na u tolay hide a tumahimik tánni makapagpaliwanag siya. ³⁴ Pero nikuna matukuyan de a Judio labe siya ay lalu hide a nágpapákhawán tu luub nu duwwa a odas ti konna he, “Ti Artemis a diyos nu taga-Efeso hide ay kataasan!” ³⁵ Pero napatahimik hide nu pinuno nu banuwan. Kinagi na a, “Hikam a taga-Efeso hide deya beman i awanay nakatukoy a u banuwan a Efeso ay siya u nakabahala tu templo nu kataasan a Artemis, konna be tu banal a bito a natákneg a gábwat ti langet? ³⁶ Awan ti makapagkagi a kakabuliyan i bagayan iye. Kanya tumahimik kam sakay diyan pabigla-bigla. ³⁷ I duwwae a inyangay moy he ay awan nagtakaw tu templo sakay awan nagupos ti madukás tu diyos tam. ³⁸ Kanya ni ti Demetrio sakay u katarabaho na u te reklamo kontara tu deyaman ay maari na a iyangay u kaso tu pághatulan, tehhod a puno a maare a manghatul. ³⁹ Pero ni tehhod kam pa a gusto a kagiyán ay dapat pamágguhunan sakay disisyonan tu uhunan a intakda nu batas. ⁴⁰ Dilikadu kitam ti nangyariyáy nadid a aldew bakay ni sihiyán di kitam ay awan kitam ti mekatuwiran ni bakin nagkagulo i banuwan tamáy.” ⁴¹ Káttapos na a nagupos ay pinalakad na dán u tolay hide.

¹ Nikuna immimang dán u kaguluwan ay pinadulaw ni Pablo u mánnampalataya hide sakay pinayuwan na hide a magpakatatag. Káttapos ay nagpaalam siya sakay immangay ti Macedonia. ² Sakay immangay siya tu banu-banuwan ti Macedonia a nagtoldu sakay pinayuwan na u mánnampalataya hod hide a magpakatatag. Káttapos ay nagtulos siya ti Grecia. ³ Nágyan siya hod ti tállo a bulan. Lumakad dán nákwa siya a patamo ti Siria, pero nabaheta na a te balak a madukás u Judio hide. Kanya naisip na a tumaleb dálla siya ti Macedonia tu kássole na. ⁴ Nákkuyog nikuna ti Sopater a anak ni Pirro a taga-Berea, di Aristarco sakay ti Segundo a taga-Tesalonica, ti Gayo a taga-Derbe, ti Timoteo, di Tiquico sakay ti Trofimo a taga-Asia. ⁵ Nágdipalongo hide sakay naguhay dán hide nikame ti Troas. ⁶ Káttapos nu Piyesta nu Tinapay a awan ti Págpaalsa ay limmakad kame ti Filipos. Kállipas nu limma a aldew ay nakademát kame ti Troas sakay nágyan kami pa hod ti pitto a aldew. ⁷ Tu purumero a aldew nu sasimba ay napisan-pisan kame para tu pángtappeng-tappeng ti tinapay. Nangaral ti Pablo nide hanggan tu bállog nu gibi dipo palakad siya tu kadimadimangan. ⁸ Makpal a simbuwan tu ontok nu bilay a pamág-gipunan me. ⁹ Mággetnod u essa a ulito tu bintana a u ngahan na ay ti Eutico. Dipo tu katakdug nu pángngaral ni Pablo ay tinongka siya sakay netidug ti mahimbing. Kanya natápduk siya sapul tu páppágyanan na a katállo a palapag hanggan ti sidung. Sakay patay dán siya nikuna ágkatan de. ¹⁰ Pero immogsad ti Pablo sakay kinábkábben na siya sakay kinagi na tu tolay hide, “Dyan kam mabalisa, biyag siya!” ¹¹ Sakay simmangkay a huway ti Pablo sakay tináppeng-táppeng na u ti tinapay sakay kimman hide. Káttapos ay intulos na u pángngaral na hanggan a magamulaldew dán sakay limmakad. ¹² Intugn de a biyag u ulito tu bilay na kanya grabi u saya de. ¹³ Pero nágdipalongo kame a simmakay tu barko a patamo ti Ason. Sakay hed kame dán hod a mamágketa ay di Pablo para hod dán hod siya a máksakay nikame tu barko. Itod u inbilin na nikame, dipo plano na a maglakad. ¹⁴ Nikuna mamágketa kame ti Ason ay náksakay siya tu sássakayan me, sakay namágkaguman kame dán a immangay ti Mitilene. ¹⁵ Sapul hod ay nággabeng kame sakay tu kadimadimangan ay timmaleb kame tu tapat ni Quio. Tu sumunud a aldew ay dimmemát kame tu puduk a Samos, sakay kállipas nu essa pa a aldew ay dimmemát kame ti Mileto. ¹⁶ Nagdisisyon ti Pablo a awan dán humoyot ti Efeso tánni awan dán siya maabala ti Asia. Dipo gusto na a ni maare ay hedán siya ti Jerusalem tu aldew nu Pentecostes. ¹⁷ Nikuna a katoy palla ti Pablo ti Mileto ay pinadulaw na u pinuno hide nu mánnampalataya hide ti Efeso. ¹⁸ Káddemát de ay kinagi na, “Tukoy moy ni kodyaák a nabiyag nikuna kagumanák moy palla, sapul tu dipalongo ko a káaangay ti Asia. ¹⁹ Nagserbiyák tu Panginoon a tehhod a kapakumbabaan sakay magtákták i luwa kuwáy dipo tu págmalasakit ko tu tolay hide. Makpal a pagsubuk u tiniis ko dipo tu pakán balak nu Judio hide nikán ti madukás. ²⁰ Tukoy moy a tu págtoldu ko sakay tu pángngaral ko nikam ay awanák nagalanganin a magkagi nikam maski ánya man a bagay a ikapiyya moy. Nagtolduwák ti hayagan pati be tu bilay-bilay. ²¹ Impangaral ko tu Judio hide sakay tu Griego hide a dapat de adággen u kasalanan de sakay magsole tu Diyos sakay sumampalataya tu Panginoon tam a ti Jesu-Cristo. ²² Nadid, bilang kássunud tu Banal a Ispirito ay angayák ti Jerusalem, awan ko tukoy ni ánya mangyariyay hod nikán. ²³ Nan sa iye u tukoy ko: a tu kada banuwan a inangayan ko ay impakapospos dán nikán nu Banal a Ispirito a maguhay dán nikán u kákkekulung sakay pághirap. ²⁴ Pero awan nikán ti halaga u biyag ko, u mahalaga ay magimet kula u tungkulin ko sakay matapos u tarabaho a inyatád nikán nu Panginoon Jesus u págbaheta tu Maganda a Baheta tungkul tu kabaitan nu Diyos. ²⁵ “Nákpággagumák nikam mentaras a mangaralák tu pághare nu Diyos. Nadid, tukoy ko a awanák moy dán ketan a huway. ²⁶ Kanya kagiyán ko nikam nadid a aldew, awanák dán ti pananagutan tu Diyos ni tehhod man nikam a awan maligtas. ²⁷ Dipo awanák nagkemot nan impakapospos ko nikam u atanan a layunin nu Diyos. ²⁸ Ingatan moy u sadile moy sakay u atanan a mánnampalataya a pinabantay nikam nu Banal a Ispirito. Alagaan moy ti husto u mánnampalataya hide tu Diyos dipo tinubus na hide tu pamamag-itan nu digi nu Anak na. ²⁹ Tukoy ko a tu kállakad ko ay makpal a magdemáttan a mágkatapang a aso a mangubus tu katupaan. ³⁰ Dumemát be u panahun a tehhod a magtoldu ti kakabuliyan a gábwat labe tu gurupo moy tánni maakit de u mánnampalataya hide a humiwalay sakay mákkuyog nide. ³¹ Kanya magingat kam! Isipán moy a makpalák a luwa a timmuhog tu págtatoldu ko nikam aldew ay ti gibi tu tállo a taon a kakagumanák moy. ³² Nadid ay ipabahala takamon tu Diyos sakay tu Upos na a mangpatunay tu kabaitan na. Siya u makapangpatibay nikam sakay makapangatád tu págpapala a inhanda na tu atanan a pinile na a magin kao na. ³³ Awanák naghangad ti pilak, ginto oni damit tu maskin deya. ³⁴ Tukoy moy a nagtarabahuwák ti husto tánni mabiyag kame ay tu kakaguman ko hide. ³⁵ Tu atanan a pagkakataun ay impeta ko nikam tu pamamag-itan nu konna he a págsumikap a dapat moy a tulungan u mágkahirap. Isipán moy u kinagi nu Panginoon a Jesus, “Pinagpala u mangatád nan u tumanggap.” ³⁶ Pákkakagi na hod ay limmuhud ti Pablo sakay nagdasal a kaguman de a atanan. ³⁷ Sakay namágsangitan hide a atanan a kimmábkáb sakay immámmo ni Pablo. ³⁸ Nalungkut hide a tahod tu kinagi na a awan di dán siya ketan a huway. Sakay impatolak de siya tu barko.

¹ Nadid, káttapos me a nagpaalam nide ay nággabeng kami dán a patamo ti Cos. Tu kadimadimangan ay dimmemát kame ti Rodas sakay sapul hod ay nagdiretso kame dán ti Patara. ² Dinemáttan mi hod u essa a barko a patamo ti Fenicia, kanya immagton kami hod a simmakay. ³ Dimmemát kame tu tapat nu Cyprus a matannaw tu banda ti kawihe. Nagdire-diretso kame hanggan ti Siria pero pimmundu kame ti Tiro dipo magawas ti karga u abeng. ⁴ Inehyok mi hod u disepulus hide a katoy hod, sakay náktulos kami nide ti pitto a aldew. Tu tulung nu Banal a Ispirito ay kinagi de ni Pablo a diyan siya tumulos ti Jerusalem. ⁵ Nikuna a dumemát dán u aldew a kállakad me ay nagtulos-tulos kame dán tu págbiyahe me. Intugán di kame a atanan hanggan tu luwas nu banuwan, kaguman de u kákkabanga de sakay u anak de hide. Káddemát me tu bihebi nu diget ay limmuhud kame sakay nagdasal. ⁶ Káttapos me a nagpaalaman ay simmakay kame dán tu barko, sakay nagsole dámbe hide tu bila-bilay de. ⁷ Sapul ti Tiro ay nagtulos-tulos kame a nagbiyahe hanggan makademát kame ti Tolemaida. Nákpagketa kame tu mánnampalataya hide sakay he kame hod a saldew. ⁸ Tu kadimadimangan ay nagdiretso kame ti Cesarea sakay náktulos tu bilay ni Felipe a essa be a mangngaral tu Maganda a Baheta. Essa siya tu pitto a lállake a napile ti Jerusalem tu itod. ⁹ Tehhod siya a áppat a anak a mámmadiket a prupeta. ¹⁰ Kállipas nu sangan a aldew a págyan mi hod ay dimmemát u essa a prupeta a ti Agabo a gábwat ti Judea. ¹¹ Sakay immangay siya nikame, inalap na u sinturon ni Pablo sakay inigutan na u kamát na sakay u tikád na. ‘Saiye u kinagi nu Banal a Ispirito: Konna he a igutan nu Judio hide ti Jerusalem u makákkao ti sinturonáy, sakay ipadakáp de siya tu Hentil hide.”’ ¹² Tu pákkasaneg mi he ay impákkekagbi me sakay tu taga hod hide a diyan dán siya angay ti Jerusalem. ¹³ Pero timmábbeg siya, “Bakin magsanget kam? Diyan moy panghinaán isip kuwáy! Dipo nakahandaák a papungo maski matayák pa ti Jerusalem ni kailangan, alang-alang tu ngahan nu Panginoon Jesus.” ¹⁴ Nikuna awan me siya mapugád ay timmahimik kami dán. Sakay kinagi mi dálla a,“Masunud u kagustuwan nu Panginoon.” ¹⁵ Kállipas nu sangan a aldew ay naghektat kame dán a paangay ti Jerusalem. ¹⁶ Sakay nákkuyog nikame u sangan a mánnampalataya a taga-Cesarea sakay inyangay de kame tu bilay ni Manason a taga-Cyprus sakay hed kame hod a náktulos. Nalay dán siya a mánnampalataya. ¹⁷ Nikuna makademát kame dán ti Jerusalem ay masaya kame a tinanggap nu mánnampalataya hod hide. ¹⁸ Tu kadimadimangan na ay bimmisita kame ay di Pablo tu kán Santiago. Katoy bi hod u pupuno hide nu mánnampalataya hide. ¹⁹ Káttapos na hide a kumustaán ay essa-essa na a kinagi u bagay hide a ginimet nu Diyos tu Hentil hide tu pamamag-itan nu págserbi na. ²⁰ Nikuna masaneg di iye ay nagpure hide tu Diyos. Sakay kinagi de ni Pablo, “Tukoy mo kapátkákka, tehhod dán a sangan a libu a Judio u summampalataya ni Jesus pero atanan de ay masigasig pade a sumunud tu Kautusan ni Moises. ²¹ Sakay nabaheta de a itáttoldu mu kan tu Judio hide a mámmágyan tu banuwan nu Hentil hide a awan di dán kailangan a sumunud tu Kautusan ni Moises. Kinagi mo kam pa a diyan di dán turiyán u aanak di hide oni diyan di dán sunudán u kaugaliyan tam a Judio hide. ²² Ánya nadid i dapat tamay a gimitán? Siguradu a mabaheta de a dimmemát ka. ²³ Kanya konna he u gimitán mo: tehhod he a áppat a lállake a nagpananto tu Diyos. ²⁴ Ikuyog mo hide sakay gimitán moy u páglinis sigun tu Kautusan. Hiko dán u bahala tu magastus, tánni mapagappás di dán u buuk de. Tán matukuyan nu atanan a awan tatahoden u baheta tungkul niko nan sássunudán mo u Kautusan ni Moises. ²⁵ Pero tu mánnampalataya hide a Hentil, insulat mi dán nide u disisyon me a diyan hide kuman tu ányaman a nealay tu diyos-diyosan, pate u dige sakay u hayup a natay a awan napadigiyan, sakay diyan mangibábbey oni mangilállake.” ²⁶ Tu kadimadimangan na ay kinuyog ngane ni Pablo u lállake hide sakay tinupad de u pananto de u páglinis. Káttapos ay immangay siya tu templo sakay impakapospos na ni nikan a matapos u takda a panahun nu páglinis tánni mealay u alay para tu balang essa. ²⁷ Nikuna adene dán a matapos u netakda a pitto a aldew ay hed ti Pablo tu Templo. Netan siya hod nu Judio hide a taga-Asia. Kaya sinusutan de u makpal a tolay tu Templo a dakáppán de ti Pablo. ²⁸ Ipáppákhaw de, “Kalugaran me hide, tulungan moy kame! Iye a tolay u mágtatolduwán ti kontara tu bansa a Israel, kontara tu Kautusan ni Moises, sakay kontara tu templo, maskin hádya siya a dumemát. Nangkuyog pa siya ti Griego hide tu templo; dinangáttan na iye a banal a lugar.” ²⁹ (Konna hod u kinagi de dipo netan de a kaguman ni Pablo tu banuwan ti Trofimo a taga-Efeso. Inisip de a kinuyog siya ni Pablo tu disalad nu templo.) ³⁰ Kanya nagkagulo u tolay hide tu buo a Jerusalem, sakay bigla dálla a nagdemáttan u tolay hide tu templo para dakáppán de ti Pablo. Pákkadakáp de nikuna ay ginuyod de siya a paluwas sakay insiradu de a pagdaka u pintuwan nu templo. ³¹ Bunuwán di dán nakwa ti Pablo, pero nabaheta nu pinuno nu sundalo nu Romano hide a nagkagulo ti buo a Jerusalem. ³² Nangkuyog siya a agad ti sundalo sakay tu kapitan de hide, sakay gummággenan hide a paangay tu páppágyanan nu tolay hide. Pákketa de tu puno sakay tu sundalo hide ay inyemang de u págbabálbág de ni Pablo. ³³ Immadene u pinuno sakay dinakáp na ti Pablo, sakay pinapungo na ti duwwa a kadena. Sakay tinanung na u tolay hide, “Deya i tolayan iye? Ánya ginimet naay?” ³⁴ Pero awan pare-pareho u ipáppákhaw nu katolayan. Dipo magulo kaya awan maintendiyan nu pinuno ni ánya nangyariyay, kanya inpeangay na ti Pablo tu kampo. ³⁵ Sakay káddemát de tu agdenan ay inágkat dán nu sundalo hide ti Pablo dipo lalo dán a nagkagulo u tolay hide. ³⁶ Dipo umusoseg hide a magpapákhawán ti konna he, “Bunuwán siya!” ³⁷ Nikuna isáddáp di dán ti Pablo tu kampo ay nákkekakagbi siya tu pinuno, “Maare taka a makauhon?“Malalake kabál a magupos ti Griego!” Tábbeg nu pinuno. ³⁸ “Kagi ko ni hiko itod u Egipcio a nángdipalongo tu págribeldi sakay immangay hide tu kaparangan, kaguman na u áppat a libu a lállake.” ³⁹ Timmábbeg ti Pablo, “Essaák a Judio, dimmakállák ti Tarso nu Cilicia, tagahodák ti banuwanan itod a tanyag. Mákkekagbiyák niko a payaginák moy a makapagupos ti tolaye hide.” ⁴⁰ Pinakultaden be siya nu pinuno, kanya timmaknág ti Pablo sakay gimmemmak tu balitang nu agdenan sakay sininyasan na u tolay hide a tumahimik. Nikuna tahimik dán hide a atanan ay nagupos ti Pablo ti upos a Hebreo.

¹ “Nadid, kákkapátkákka hide sakay dáddakál hide, sanigán moy kagiyán kuwáy nadid bilang págdipensa ti sadile kuwáy.” ² Sakay nikuna masaneg de a nagupos siya ti upos a Hebreo ay lalo hide a timmahimik. Kanya nagtulos-tulos a nagupos ti Pablo kinagi na, ³ “Hikán ay essa a Judio, neenakák ti Tarso nu Cilicia pero dimmakállák he ti Jerusalemáy. U maisto ko ay ti Gamaliel mahigpiták na a tinolduwan tu Kautusan nu ninuno tam hide. Sakay mahigpit tu itod u págserbi ko tu Diyos, konna nikam. ⁴ Pinahirapan ko u tolay hide a simmunud tu Toldu nu Diyos tungkul tu kaligtasan a hod ni Cristo. Sakay pinabuno kupa u agum. U agum be ay pinapungo ko hide sakay impepireso, bábbey man oni lállake. ⁵ Makapagpatunay tungkul ti iye u pinakapuno nu saserdote hide sakay u buo a gurupo nu pinuno hide. Inatáddinák di pa ti sulat para tu Judio hide ti Damasco, kanya immangayák hod para dakáppán u kaguman ti tolduwan iye hide tungkul ni Cristo sakay iyangay he ti Jerusalemáy para parusaan.” ⁶ “Adene dán a magtanghale tu itod sakay adeniyák dán ti Damasco nikuna a bigla a tehhod a kimmislap tu palebut ko a tunay ti demlag a gábwat ti langet. ⁷ Kanya nágdámmohák tu luta sakay nasaneg ko u boses a nagkagi nikán, ‘Saulo, Saulo! Bakin a páppahirapanák mo?’ ⁸ Timmábbegák, ‘Deya ka, Panginoon?’ ‘Hikán ti Jesus a taga-Nazaret a páppahirapan mo.”Kagi na. ⁹ Nadid netan nu kaguman ko hide u demlag, pero awan de nasaneg u boses a nákpágguhon nikán. ¹⁰ Sakay tinanung ko siya, ‘Ánya u gimitán ko, Panginoon?’ Kanya kinagi na, ‘Tumaknág ka sakay angay ka ti Damasco. Hod mu hod a matukuyan u nelaan a dapat mu gimitán.’ ¹¹ Nabuhákkák dipo ti makasiliyan itod a demlag, kanya kinabitanák dálla nu kaguman ko hide hanggan ti Damasco. ¹² Nadid tehhod a essa a lállake ti Damasco, u ngahan na ay ti Ananias. Tehhod a ánteng tu Diyos, sumássunud tu Kautusan, sakay igággalang nu Judio hide a mámmágyan hod. ¹³ Immangay tu páppágyanan ko sakay kinagi na nikán, ‘Kapatkákka a Saulo, maketa ka dán.’Ti itod bila ay naketaák a huway sakay inileng ko siya. ¹⁴ Kinagi na pa a, ‘Pinile ka nu Diyos nu nuno tam hide tán matukuyan mo u kagustuwan na, tán ketan mo u Banal na a Tagapagserbi tánni masaneg mo u boses na. ¹⁵ Dipo hiko u magin sistigu na tánni patunayan tu atanan a tolay u netan sakay nasaneg mo. ¹⁶ Awan kadán ti dapat a uhayán? Tumaknág ka dán sakay magpabawtismo sakay dumulaw tu ngahan nu Panginoon tán mapatawad ka tu kasalanan mo hide.’ ” ¹⁷ “Nagsoliyák dán ti Jerusalemay, mentaras a pasiyaanák a magdasal tu templo ay nagkahodák ti pangitain. ¹⁸ Netan ko u Panginoon, kinagi na nikán, ‘Magalisto ka! Lumakad ka agad ti Jerusalemáy, dipo awan tanggapán nu tolay he hide u patunay mo tungkul nikán.’ ¹⁹ Pero kinagi ko, ‘Panginoon, tukoy de a balang sinagoga ay sáddappán ko tu itod tánni ipepireso sakay ipabálbág ko u mánnampalataya hide. ²⁰ Sakay nikuna bunuwán de ti Esteban a sistigu mo ay katoyák hod sakay nákpagkaessaák pa tu ginimet de. Hikán pa ngane u nagbantay tu damit nu nangbuno hide nikuna.’ ²¹ Pero kinagi nikán nu Panginoon, ‘Lumakad ka dán dipo paangayán taka tu adeyo a lugar, tu Hentil hide.’ ²² Nágsaneg hide ni Pablo, pero pákkakagi na ti konna hod ay nagpákhawan hidi ti husto a, “Bunuwán moy tolayan itona! Awan siya dapat a mabiyag!” ²³ Sakay tulos-tulos hide a makán pákhawán, mentaras a iwáwwasiwas de u alikábkáb sakay isássapwah de tu pahás u alikabuk. ²⁴ Kanya inyutus nu puno nu sundalo hide a iyangay ti Pablo tu kampo, sakay ipabálbág tánni matukuyan ni bakin konna dálla hod u pákhaw nu Judio hide kontara nikuna. ²⁵ Pero nikuna mapungo di dán siya ay kinagi ni Pablo tu kapitan a katoy hod, “Katoy beman tu batas a bálbággán u essa a Romano maskin awan palla nahatulan?” ²⁶ Nikuna masaneg iye nu kapitan ay immangay siya tu pupuno sakay kinagi na nikuna, “Kodya dán iye? Romano bál i tolayan iye!” ²⁷ Kanya immadene u pinuno ni Pablo sakay tinanung na siya, “Romano ka beman?” “On,”kagi na. ²⁸ Kinagi nu pinuno, “Dakál nagastus kuway tánni magin Romano.” “Pero hikán ay Romanuwák dán sapul pa a anakák.” kagi ni Pablo. ²⁹ Pagdaka a immadeyo u magimbistiga hide nikuna. Nanteng be u pinuno nu sundalo hide dipo impapungo na ti Pablo, a essa bál a Romano. ³⁰ Pero gusto a matukuyan nu pinuno ni bakin a pinagbintangan nu Judio hide ti Pablo. Kanya tu kadimadimangan ay pinadulaw na u puno nu saserdote hide sakay tu buo a miyembro nu Sanedrin. Káttapos ay pinaokbis na u pungo ni Pablo sakay inyatubang na nide.

¹ Nadid, lináttángngan ni Pablo u pinuno hide, sakay kinagi na, “Kákkapatkákka ko hide, tukoy nu Diyos a natupad ko u atanan a gusto na a gimitán ko a maganda u kaluuban ko hanggan nadid a aldew.” ² Pákkakagi he ni Pablo ay inyutus nu pinakapuno a saserdote a ti Ananias tu mágtaknág hide tu adene na a dapangán siya. ³ Kanya kinagi ni Pablo nikuna, “Dapangán ka nakwa nu Diyos! kumán ka a kudal a bito a pinintoran la ti mapudew, ta mapagpakunware ka! Mággetnod ka hina tán hatulanák sigun tu Kautusan, pero labag tu Kautusan u pángpadapang mo nikán.” ⁴ Kinagi nu mágtaknág hod hide, “Awan ka ti gagalang tu pinakapuno a saserdote nu Diyos!” ⁵ Timmábbeg ti Pablo,“Kákkapatkákka ko, awan ko tukoy a siya bál u puno a saserdote. Dipo nakasulat ngani, ‘Dyan ka magupos ti madukás kontara tu pinuno nu banuwan.”’ ⁶ Natukuyan ni Pablo a tehhod hod a Saduseo sakay Pariseo hide, kanya kinagi na ti mabegsák, “Kákkapatkákka ko hide, Pariseowák, anakák nu Pariseo hide. Naimbistigaanák nadid dipo tu pánniwala ko a mabiyag a huway u patay hide.” ⁷ Pákkakagi he ni Pablo ay namagtalu-talo u Pariseo hide sakay u Saduseo hide, kanya nahate u katolayan. ⁸ (Dipo u pánniwala nu Saduseo hide ay awan mabiyag a huway u patay hide sakay awan ti anghel oni ispirito, pero u Pariseo hide ay maniwala ti atananan iye.) ⁹ Kanya bimmegsák u pákhawan de. Timmaknág u sangan a Pariseo a tagapagtoldu tu Kautusan sakay impagpumilit de a awan hide umayun sakay kinagi de, “Awan kame ti ketan a kasalanan ni tolayan iye. Makay ni tehhod nikuna a nagupos a ispirito oni anghel? ¹⁰ Sakay nikuna mainit dán u pamagtalu-talo de ay nanteng u puno nu sundalo hide a makay matay ti Pablo dipo pamágpáttangan nu magdilupot a grupo, kanya inutusan na u sundalo hide, sakay impaangay na ti Pablo sakay impesáddap na tu kampo. ¹¹ Ti gibi labiyan itod ay pimmeta u Panginoon ni Pablo sakay kinagi na nikuna,“Begsákkan mo isip muwe! Nagpatunay ka tungkul nikán ti Jerusalemáy; konna be hina u gimitán mo ti Roma.” ¹² Tu kadimadimangan ay nágkasundu u Judio hide sakay nagpananto a awan kuman oni uminom mentaras awan de mabuno ti Pablo. ¹³ Mahigit a áppat a pulo a lállake u nanumpa ti konna hod. ¹⁴ Sakay immangay hide tu puno nu saserdote hide sakay tu pupuno nu banuwan, sakay kinagi de, “Nagpananto kame a awan kuman mentaras awan me mabuno ti Pablo. ¹⁵ Kanya agidán moy tu Sanedrin tu pinuno nu sundalo hide a iyangay di he a huway ti Pablo. Kagiyán moy a gusto moy pa a imbistigaan ti husto u kaso na tánni tu dilan palla ay bunuwán mi dán.” ¹⁶ Nadid, u balak de ay nasaneg nu pamangkin ni Pablo, anak a lállake nu wadi na a bábbey, kanya immangay siya tu kampo sakay ingkagi na ni Pablo. ¹⁷ Dinulawan ni Pablo u essa tu kapitan hide sakay kinagi na, “Aguman mo ped i ulitowan iye tu pinuno moy dipo tehhod siya a gusto a kagiyán.” ¹⁸ Inaguman ngani siya nu kapitan tu pinuno nu sundalo hide sakay kinagi na, “Dinulawanák nu pireso a ti Pablo sakay pinaagum na i ulitowáy a angay he, dipo tehhod kan siya a kagiyán nikam.” ¹⁹ Tinawiden nu pinuno u kamát nu ulito sakay inyadeyo na sakay tinanung na, “Ánya kagiyán muwáy nikán?”kagi na. ²⁰ Timmábbeg siya, “Pinamágkaessaan nu Judio hide a agidán niko a iyatubang ti Pablo niilaw tu Sanedrin sakay magkukunware a paimbistigaan ti husto. ²¹ Pero diyan kam maniwala, dipo tambangan siya nu mahigit a áppat a pulo a tolay a nagpananto a awan kuman oni uminom mentaras a awan de mabuno ti Pablo. Nakahanda dán hide, u disisyon mo dálla u uhayán de.” ²² “Diyan mo kagiyán maskin ti deya a ingkagi mo iye nikán,” kagi nu pinuno nu sundalo hide. Sakay pinagsole na siya. ²³ U pinuno ay nangdulaw ti duwwa a kapitan sakay kinagi na nide, “Mánghanda kam ti duwwa a datos a sundalo, magkuyog kam be ti pitto a pulo a nakakabayo sakay duwwa a datos a te gayang tán angay ti Cesarea nadid a alas nuwebe ti gibi. ²⁴ Mánghanda kam be ti kabayo a págsakayan ni Pablo sakay itugán moy tu kán Gobernador Felix. Bantayan moy siya ti husto para awan ti maduks a mangyare nikuna tu dilan!” ²⁵ Sakay nagsulat u kapitan ni gobernador Felix ti konna he: ²⁶ “Kagalang-galang a gobernador Felix, kumusta ka la? Gabwat iye nikán, ti Claudio Lisias! ²⁷ Dinakáp nu Judio hide i lállakiyan iye sakay laan di dán nakwa a bunuwán. Nadid natukuyan ko a Romano bál siya, kanya nángkuyugák tu sundalo hide sakay inligtas siya. ²⁸ Sakay tu pagkagusto ko a matukuyan ni anya u kasalanan a ibábbintang de nikuna ay impeangay ko siya tu Sanedrin. ²⁹ Natukuyan ko a tungkul la tu bagay ate kaugnayan tu Kautusan de u ibábbintang di nikuna pero awan itod sapat a dahilan para ipabuno di siya oni ipepireso. ³⁰ Natukuyan ko be a planuwán siya a bunuwan nu Judio hide kanya agad ko siya a impeangay niko. Kinagi ko tu makanbintangán hide nikuna a niko dálla hide a magreklamo.” ³¹ Sinunud be nu sundalo hide u utus nide. Tu kagibiyan ay inangay de ti Pablo sakay inyangay ti Antipatris. ³² Tu kadimadimangan ay nagsole tu kampo u agum hide a sundalo pero nagwahak u nakakabayo hide para bantayan ti Pablo. ³³ Nikuna makademát dán hide ti Cesarea ay inyatd de u sulat tu gobernador sakay inpaubaya de ti Pablo nikuna. ³⁴ Pákkabasa na tu sulat ay tinanung nu gobernador ni taga hadya ti Pablo. Sakay nikuna matukuyan na a taga-Cilicia ay ³⁵ kinagi na, “Sanigán ko u kaso mo káddemát nu nángkaso hide niko.” Sakay pinabantay na ti Pablo tu palasyo ni Herodes.

¹ Nadid, kállipas nu limma a aldew ay dimmemát ti Cesarea u pinakapuno nu saserdote hide a ti Ananias, kaguman u sangan tu pinuno hide nu banuwan sakay essa a abugadu a u ngahan na ay ti Tertulo. Inyatubang de tu gobernador u dimanda de kontara ni Pablo. ² Sakay nikuna meatubang dán ti Pablo ay sinapulan dán ni Tertulo a ingkagi u reklamo na kontara ni Pablo. Kinagi na, “Kagalang-galang a Gobernador Felix, dipo tu maganda mo a pámmalakad ay nagin payapa u bansa me, makpal pa a pagbabagu para tu kapiyyaan ni bansa miyáy. ³ Maski ni hádya sakay maski nikan, tenggiyán me iye a utang a luub sakay grabi ti kadakál u pasalamat me niko. ⁴ Tánni awan kam masiyadu a maabala, nakwa sanigán moy i kagiyán miyáy awan la mamalay. ⁵ Dipo netan me i tolayan iye a mággaguluwán. Gágguluwán na u atanan a Judio, maski hádya siya angayan sakay siya u puno nu tolay hide a simmunud tu toldu nu essa a lállake a taga Nazaret. ⁶ Pati u templo me ay awan na inggalang, kanya dinakáp me siya. Hatulan mi dán nakwa siya sigun tu Kautusan, ⁷ pero dimmemát ti Lisias a puno nu sundalo hide, sakay inagew na nikame ti Pablo. ⁸ Sakay kinagi na a ireklamo mi kan dálla niko i tolayan iye. Ni imbistigaan mo siya ay matukuyan mo u atanan nu reklamo me kontara nikuna.” ⁹ Inayunan be nu Judio hide u atanan a kinákkagi ni Tertulo. ¹⁰ Sakay sininyasan nu gobernador ti Pablo a magupos kaya kinagi na, “Kagalang-galang a gobernador, tukoy ko a nalay ka dán a Huwes ti iye a bansa, kanya masayaák a mangatuwiran ti atubang muwe. ¹¹ Awan palla ti sapulo ay ti duwwa a aldew sapul dimmemátták ti Jerusalem para sumamba. Matukuyan mo iye ni magimbistiga ka. ¹² Sakay awanák di palla netan a nákpagdima maskin deya tu disalad nu templo, oni naggulo tu sinagoga oni maskin hádya a parte nu banuwan. ¹³ Awan hide ti mepeta a katibayan ti ibábbintang diye nikán. ¹⁴ Pero aminán ko a sumássampalatayaák tu Diyos nu nuno me hide sigun tu intoldu ni Jesus a kákkagiyán de a liwat a rilihiyon. Pero maniwalaák be tu atanan nu nakasulat tu Kautusan ni Moises sakay tu atanan a insulat nu prupeta hide. ¹⁵ Konna nide, sumampalatayaák tu Diyos a huway na a biyagán u atanan a tolay, matuwid oni awan matuwid. ¹⁶ Kanya gimitán ko u atanan nu makaya ko tán awanák magkasala tu atubang nu Diyos sakay tu tolay hide. ¹⁷ “Sangan dán a taon a awanák ti Jerusalem; nagsoliyák para magtugán ti tulung tu kalugaran ko hide, sakay mag-alay tu Diyos. ¹⁸ Ina u ginimet ko nikuna a demáttanák de tu templo natapos ku dán a gimitán tu itod u atanan a bagay para tu páglinis sigun tu Kautusan. sasangan la a tolay u kaguman ko tu itod sakay awanák nanggulo. ¹⁹ Pero u hed la hod ay u sangan la hide a Judio a gábwat ti Asia. Hide nakwa u immadene niko para magreklamo kontara nikán ni tehhod hide a reklamo. ²⁰ Sakay dipo awan he hide, u tolay la hide a atoy he u magkagi nite napatunayan hide a tehhodák a nagimet a kasalanan nikuna hikán ay iyatubang de tu Sanedrin. ²¹ U maare dila a ibintang nikán ay u impákhaw ko a konna he, ‘Imbistigaanák moy nadid dipo tu pánniwala ko a huway a mabiyag u patay hide.” ’ ²² Dipo tukoy dán ni gobernador Felix u tungkul tu Toldu ni Jesus, kanya impeimang na u pággimbistiga. Kinagi na, “Iyatád ko u hatul ko ti kasuwan iye káddemát ni Lisias.” ²³ Káttapos ay inyutus na tu kapitan a bantayan ti Pablo, pero diyan de siya higpitan nan payagen dila siya a bisitaán sakay tulungan nu amigu na hide. ²⁴ Nadid kállipas nu sangan a aldew ay simmole ti gobernador Felix kaguman u kabanga na ati Drusila. Impadulaw na ti Pablo sakay nágsaneg siya tu kákkagiyan ni Pablo tungkul tu pánnalig ni Cristo Jesus. ²⁵ Pero nikuna ipaliwanag ni Pablo a dapat mabiyag a malinis u tolay, sakay magpugád tu sadile para awan magkasala, sakay impaliwanag nabe u tungkul tu pághatul a dumemát ay neántingan ti gobernador Felix. Kinagi na, “Maare ka dán a lumakad, ipadulaw taka dálla a huway ni tehhodák dámman a odas.” ²⁶ Pirme na a padulaw ti Pablo sakay kauhunán, dipo makán uhayan siya a pasoksukan siya ni Pablo ti pilak. ²⁷ Pero kállipas nu duwwa a taon ay pinalitan ni Porcio Festo ti Felix bilang gobernador. Dipo tu soh ni Felix a magustuwan siya nu Judio hide ay pinabayan na ti Pablo a pumáppireso.

¹ Nadid, dimmemát ti Festo tu prubinsiya a pangasiwaan na. Kállipas nu tállo a aldew ay immangay siya ti Jerusalem gábwat ti Cesarea. ² Immadene nikuna u pinuno nu saserdote hide sakay u pinuno nu Judio hide sakay inyatubang de u reklamo kontara ni Pablo. Nákkekakagbi hide ni Festus ³ a ni maare ay paangayán na ti Pablo ti Jerusalem. Dipo u planu de ay harangán de siya tu dilan tánni bunuwán de. ⁴ Timmábbeg ti Festo, “Nakakulung ti Pablo ti Cesarea. Sakay hikán ay Soliyák la hod a agad. ⁵ Pákkuyugán moy nikán u pinuno moy hide sakay ni tehhod a nagimet a madukás i lállakiyan itod ay hod moy dálla siya a ikaso.” ⁶ Nagpalipas pa ti Festo ti walo oni sapulo a aldew ti Jerusalem, sakay nagsole ti Cesarea. Tu kadimadimangan ay immangay siya tu pággimbistigaan sakay inyutus na a iyangay di nikuna iyatubang ti Pablo. ⁷ Káddemát ni Pablo ay kinalibung-bungan siya nu Judio hide a gábwat ti Jerusalem. Makpal sakay mágkadágge u ibábbintang de kontara nikuna, pero awan di labe mapatunayan. ⁸ Bilang págtanggul ni Pablo tu sadile na ay kinagi na, “Awanák ti ginimet a labag tu Kautusan nu Judio hide, oni kontara tu templo oni tu hare ti Roma.” ⁹ Dipo gusto ni Festo a pagustuwan u Judio hide, kanya tinanung na ti Pablo, “Gusto mo beman a angay ti Jerusalem tánni hod ko a litisán u kaso mo?” ¹⁰ Pero timmábbeg ti Pablo, “Katoyák he a mágtaknág tu atubang nu pághatulan nu hare ti Roma, kanya dapatay ay hedák dán he a litisán. Awanák ti nagimet a kasalanan tu Judio hide, tukoy mo itona. ¹¹ Ni limmabagák tu batas oni nakagimeták ti kasalanan, sakay hikán ay hatulan mo ti parusa a kamatayan ay tanggapán ko. Pero ni awan tatahoden u ibábbintang ni Judiowan iye hide nikán ay awanák dapat meatád nide. U gusto ko a magdisisyon tu kaso ko ay u hare ti Roma.” ¹² Nák-aged siya ti payo tu tagapayo na hide, sakay kinagi na, “Ta kinagi mo a mák-atubang ka tu Hare ti Roma ay peangay taka hod.” ¹³ Kállipas nu sangan a aldew ay dimmemát ti Cesarea ti Hare a Agripa sakay ti Bernice para bumate ni Festo. ¹⁴ Sakay nágyan hide hod tu sangan a aldew, kinagi ni Festo tu hare u tungkul tu kaso ni Pablo. Kinagi na, “Tehhod he a pireso a inwahak nu date a gobernador a ti Felix. ¹⁵ Nikuna katoyák ti Jerusalem ay inreklamo nikán nu puno hide a saserdote sakay u puno nu Judio hide sakay inaged de a maparusaan siya. ¹⁶ Tinábbeg ko hide, a awan tam ugale a Romano hide a magparusa tu essa a tolay ni awan na palla nakatubang u nangbintang nikuna, sakay ni awan palla naatádden ti pagkakataun a ipaliwanag u bintang hide nikuna bilang págtanggul tu sadili na. ¹⁷ Nikuna dimmemát he hide ay awanák dán nagabala; kaya tu kadimadimangan labe ay nággetnudák tu pághatulan sakay inyutus ko a iyangay de he i tolayan itod. ¹⁸ Nikuna a kagiyán nu nagdimanda hide u reklamo de kontara nikuna buung akala ko ay tehhod hide a kagiyán a madágge a kasalanan na, pero awan labe. ¹⁹ Pero u namágtaluwan di la ay u tungkul tu relihiyon de a Judio, sakay tu essa a tolay a u ngahan na ay Jesus. Patay dán i tolayan iye, pero ipákpagpumilit ni Pablo a biyag siya. ²⁰ Awan ko tukoy ni ánya gimitán kuway ti iye a kaso kanya tinanung ko siya ni gusto na a ti Jerusalem dálla siya litisán. ²¹ Pero immád ti Pablo sakay impákkekagbi na a ipasa pala tu Hare ti Roma u kaso na. Kanya inyutus ko a bantayan palla he siya hanggan mepeangay ko siya tu Hare.” ²² Sakay kinagi ni Agripa ni Festo, “Gusto ko a masaneg tolayan itod.” “Masaneg mo siya ni ilaw.” kagi ni Festo. ²³ Kanya tu kadimadimangan na ay dimmemát di Agripa sakay tu kabanga na a ti Bernice a nakasulot ti mamahalin tánni parangalan hide nu katolayan. Makpal hide a kaguman a pinuno nu sundalo hide sakay mágkataas hide a tolay tu banuwan. Simmáddáp hide a atanan tu pághatulan, káttapos ay inyutus ni Festo a iyangay hod ti Pablo. ²⁴ Sakay kinagi ni Festo, “Kagalang-galang a hare a Agripa sakay hikam a atanan a katoy he nadid: u lállake a ingkaso nu Judio hide ti Jerusalem sakay he ti Cesarea áy ay katoy he. Ipáppákhaw de a awan siya dapat mabiyag. ²⁵ Pero tu pággimbistiga ko ay awanák ti netan a dahilan para parusaan siya ti kamatayan. Dipo inaged na a iyadene u kaso na tu Hare ti Roma, nagdisisyonák a ipeangay kuhod siya. ²⁶ Pero awanák ti mesulat a dahilan tu hare ti Roma ni bakin a impeangay ko siya hod. Kanya inyatubang ko siya nikam nadid, lalu dán niko kagalang-galang a hare a Agripa, tánni tehhodák a mesulat káttapos tam siya a litisán. ²⁷ Dipo para nikán, awan maganda ni ipeangay ko tu Hare ti Roma u essa a pireso a awan melinaw u kaso na.”

¹ Kinagi ni Agripa ni Pablo, “Maare ka dán a magupos; ánya makagi muway nadid tungkul ti sadile muwe?” Nagpatabi pa ti Pablo bilang pággalang na, sakay nagupos tu págtanggul tu sadile na: ² “Kagalang-galang a hare a Agripa, mapaladák dipo inatáddinák mo ti pagkakataon a tumaknág tu atubang mo para ipagtanggul i sadile kuwáy tu atanan a ibábbintang nu Judio hide, kontra nikán. ³ Dipo tukoy mo u kaugaliyan sakay u bagay hide a namágtábbegan nu Judio hide. Kanya mákkekakagbiyák niko a ni maare ay pagtiyagaan mo a sanigán i kagiyán kuwáy. ⁴ “Tukoy nu Judio hide ni kodyaák a nabiyag sapul pa nikuna anakák, tu sadile ko a lugar sakay ti Jerusalem. ⁵ Nalay di dán a tukoy, sakay hide dán u makapagpatunay ni gustuwan di la, a sapul pa ti sapul ay kabilangák dán tu pinakaistrikto a sekta a relihiyon me ta nabiyagák bilang essa a Pariseo. ⁶ Nadid ay katoyák he tán litisán dipo tu káasa ko tu pananto nu Diyos tu ninuno me hide. ⁷ Itona be a pananto u áasaan nu sapulo ay ti duwwa a lahe kanya taimtim hide a magpure tu Diyos aldew ay ti gibi. Sakay dipo labe ti iye a pag-asa, Kagalang-galang a Hare a Agripa, kanya pinagbintanganák nu Judio hide! ⁸ Bakin mahirap kam a maniwala a biyagán nu Diyos u nágkatay dán hide? ⁹ “Akala ko be tu itod ay kailangan ko a gimitán u atanan a makaya ko kontara tu ngahan ni Jesus a taga-Nazaret. ¹⁰ Kanya konna hod u ginimet ko ti Jerusalem. Makpal a kristiyano u impepireso ko, dipo tu kapangyariyan a inyatád nikán nu puno nu saserdote hide. Sakay nikuna a hatulan u agum nide ti kamatayan ay essaák be a immayun nide. ¹¹ Sináddáp ko atanan a sinagoga, sakay ni deya man u kedemáttan ku hod ay pinahirapan ko tánni pilitán a magupos kontara ni Jesus. Tu subra ko iyamut tu mánnampalataya hide ay immangayák pa tu agum a bansa para pahirapan ko hide.” ¹² “Iye u dahilan ni bakin a immangayák ti Damasco a te kapangyariyan a inpakultad nu puno hide a saserdote. ¹³ Mentaras a maglakad kame tu tanghale a tapat. Hare a Agripa, ay naketaák ti grabi’t demlag a gábwat ti langet, mas mademlag pa iye nan u aldew. Nagdemlag u lebut me a mamágkakaguman. ¹⁴ Nalugmuk kame a atanan tu luta sakay te nasanigák a boses a magupos nikán ti upos a Hebreo, ‘Saulo, Saulo, bakin páppahirapanák mo? Páppahirapan mu la i sadile muwe tu pángkontara mo nikán. Kumán ka a mangtáttendak tu mamuhok a kayo.’ ¹⁵ Kanya kinagi ko a, ‘Deya ka Panginoon?’ Kanya kinagi na, ‘Hikán ti Jesus a páppahirapan mo. ¹⁶ Tumaknág ka! Pimmetaák niko dipo hiko u pinile ko a magin tagapagserbi ko. Hiko u mangpatunay tungkul tu netan mo nadid sakay tu ipeta ku pa hide niko. ¹⁷ Hiko u paangayán ko para magtoldu tu tungkul nikán tu Hentil hide. Sakay iligtas taka tu kabanuwan mo hide sakay tu Hentil hide a kumontara niko. ¹⁸ Paangayán taka ti itod hide a tolay tánni mabukasan u mata de. Sakay mesole hide tu demlag gábwat tu kadiklámman, tánni meligtas hide tu kapangyariyan ni Satanas sakay isole tu Diyos. Tu pamamag-itan nu pánniwala de nikán ay mapatawad hide tu kasalanan de hide sakay mebilang hide tu pinile hide nu Diyos! ¹⁹ Dipo ti iye, kagalang-galang a hare a Agripa, kanya awanák simmuway tu pangitain a gábwat ti langet. ²⁰ U purumero ko a nangaralan ay ti Damasco, káttapos ay ti Jerusalem sakay tu buu a Judea hanggan tu Hentil hide. Inpangaral ko a kailangan hide a magsise sakay magpasakup tu Diyos sakay ipeta de tu gimet de a nagsise dán hide. ²¹ Dipo ti iye hide a ginimet ko kaya dinakáppák nu Judio hide mentaras hedák tu templo, sakay gustuwák de pa a bunuwán. ²² Pero maskin nikan ay awanák pinabayan nu Diyos, kanya katoyák he nadid a magpatunay tungkul nikuna tu atanan a tolay, mababa man oni u mágkataas hide a tolay. Awanák ti itáttoldu ni awan u kinagi la nu prupeta hide sakay ni Moises, ²³ a kailangan a maghirap ti Cristo, sakay siya u kadipalonguwan a mabiyag a huway para mángligtas tu kabanuwan na hide a Judio sakay tu Hentil hide.” ²⁴ Mentaras a magupos ti Pablo ay kinagi ni Festo ti mabegsák, “Magaheng ka dán Pablo! Nasubraan ka dán ti talino kanya ka nagaheng-aheng!” ²⁵ Pero timmábbeg ti Pablo, “Awanák magaheng, kagalang-galang a Festo! Malinaw i isip kuwáy sakay i kákkagiyán kuwáy ay tatahoden. ²⁶ Tukoy ni Hare a Agripa iye hide a bagay. Kanya awanák manteng a magupos tu atubang na dipo tukoy na iye hide a bagay. Awan ti nangyare a awan mu tukoy dipo awan iye nangyare ti essa a tagu a lugar. ²⁷ Kagalang-galang a Hare a Agripa, tukoy ko a maniwala kam tu prupeta hide, awan beman?” ²⁸ Kinagi ni Hare a Agripa ni Pablo, “Akala mu beman ay maakiták mo a magin Cristiano tu badit la a odas?” ²⁹ Timmábbeg ti Pablo,“Maski dakál oni badit a odas, basta i dasal kuwáy tu Diyos ay bakán la nakwa hiko nan pate u atanan a magsaneg nikán nadid ay magin konna nikán, pero dyan la nakwa u pákkapungo ko. ³⁰ Timmaknág u hare, u gubernador, ti Bernice sakay u atanan a kaguman de ³¹ sakay kálluwas de ay kinagi de tu balang essa nide: “I tolayan iye ay awan ti ginimet a ányaman para hatulan ti kamatayan oni kákkepireso.” ³² Sakay kinagi pa ni hare a Agripa ni Festo, “Maare tamon nákwa siya a paluwasán ni awan na la impákkekagbi a iyatubang u kaso na tu hare ti Roma.”

¹ Nikuna a nadisisyonan dán a mággabeng kame patamo ti Italia ay impabahala de ti Pablo sakay u agum hide a pireso tu essa a kapitan nu sundalo hide a u ngahan na ay ti Julio. Siya ay kaguman tu kákkagiyan de a, “Sundalo nu hare ti Roma.” ² Simmakay kame tu barko a gábwat ti Adramicio a patamo tu dáddungan tu prubinsiya a Asia. Kaguman me ti Aristarco a taga-Tesalonica a sakup ni Macedonia. ³ Tu kadimadimangan ay dimmung kame ti Sidon. Mabait ti kapitan a Julio ni Pablo; páppayagen na siya a angay bumisita tu amigu na hide tánni makatulung hide tu kailangan na. ⁴ Nággabeng kame sapul ti Sidon, sapul ti Sidon ay nággabeng kame a huway. Pero dipo pasagupang u pahás, kanya nágpadegdig kame tu dilupot nu puduk a Cyprus. ⁵ Nagtaleb kame tu tapat nu Cilicia sakay ti Pamfilia, sakay nakademát kame ti Mira, essa a banuwan nu Licia. ⁶ Nakaehyok hod u kapitan ti essa a barko a gábwat ti Alejandria a patamo ti Italia, kanya pina-agton na kame hod. ⁷ Nalay kame a nággabeng. Immalay iye ti sangan a aldew, sakay nahirapan kame bagu kame a nakademát tu tapat nu Cinido. Sapul hod ay awan kame nakatulos tu págbiyahe dipo pasagupang nikame u páhas. Kanya naglekaw kame tu dilupot ni Creta a awan ti pahás. Nagtaleb kame tu Luuk nu Salmon. ⁸ Nahirapan kame tu pággabeng me dipo tu pahás, kanya nágpadegdig kame hanggan nakademát kame tu badit a luuk a nginahanan de a Maganda a Dáddungan a adene tu siyudad a Lasea. ⁹ Nalay kame pa hod hanggan inabut kame nu panahun a dilikadu dán a pagbiyahe, dipo nakalipas dán u Aldew nu Págkulasyon. Kanya pinayuwan hide ni Pablo. ¹⁰ Kinagi na, “Kakagumanan ko hide, ti palagay kuwáy ay dilikadu kitamon a magbiyahe, masayang la i kargaáy hide sakay i abingáy sakay dilikadu pa i biyag tamáy.” ¹¹ Pero mas sinaneg pa nu kapitan nu sundalo hide u kinagi nu kapitan nu barko sakay u makákkao tu barko nan tu payo ni Pablo. ¹² Dipo awan maganda u págdungan ti iye a lugar ni amiyan, kaya mas ginusto pa nu kákpalan a magdiretso tu págbiyahe. Tu kagustuwan de a makademát kame ti Fenix sakay hed hod a magpalipas ti amiyan. Dipo iye a lugar ay essa a dáddungan ti Creta a maganda a lembuwan ni mapahás. ¹³ Nikuna bumugso dán u mahina a pahás a gábwat ti abagatan ay inakala de a maare kami dán a bumiyahe. Kanya insangpa di dán u angkla sakay nagbiyahe kame a namihebi ti Creta. ¹⁴ Pero awan nagnalay ay bimmegsák u pahás a gábwat ti Creta, tu parte ti amiyanan. ¹⁵ Sinabád nu mabegsák a pahás u abeng, kanya awan mi kaya a ságsággán. Kanya impepáhpáh kame dálla tu pahás. ¹⁶ Nikuna makalembu kami dán tu badit a puduk a ngángngahanan de a Cauda ay insangpa de u badit a abeng tu barko a sássakayan me pero nahirapan kame ti husto. ¹⁷ Nikuna a nesangpa dán u badit a abeng ay inigutan de ti mágkábaál a igut u bággi nu barko bilang dagdag dipensa nu barko. Dipo tu ánteng de a mesadsad hide ti Sirte ay insidung de u layag sakay nágpaanod kami dálla. ¹⁸ Lalo a bimmegsák u bagyo kanya tu kadimadimangan ay sinapulan di dán a impágbut u pangarga de hide tu diget. ¹⁹ Sakay tu sumunud dámman a aldew ay u kagamitan dán mismo nu barko u imbábbut de hide. ²⁰ Sangan dán a aldew a awan me netan u aldew ay tu biton hide. Sakay tulos-tulos la u mabegsák a bagyo, kanya nawanan kami dán ti pag-asa a mabiyag. ²¹ Nanalay kami dán a awan ti kákkan, kaya timmaknág ti Pablo sakay kinagi na, “Kakagumanan ko hide, ni nágsaneg kamla nakwa nikán a dyan kitamon lumakad ti Creta ay awan nakwa iye nangyare nikitam a kahirapan sakay kákkawan nu karga tam hide. ²² I mepayo kuwáy nikam nadid ay begsákkan moy isip moye dipo awan ti matay maski essa nikam. Kanya la ay mahukat i barkuwáy. ²³ Dipo pimmeta nikán tu gibi he u anghel nu Diyos. U Diyos a sássambaán ko sakay pagserbiyan. ²⁴ Sakay kinagi na nikán, ‘Diyan ka manteng Pablo. Kailangan a umatubang ka tu hare ti Roma. Alang-alang niko ay iligtas nu Diyos u kakagumanan mo hide ti barkuwáy.’ ²⁵ Kanya begsákkán moy isip moye, kakaguman ko hide! Dipo maniwalaák tu Diyos a mangyare u atanan ayun tu kinagi na nikán. ²⁶ Kanya la ay mesadsad kitam tu essa a puduk.” ²⁷ Kasapulo ay ti áppat mi dán a gibi a ipáppáhpáh nu pahás tu bállog nu diget nu Adriatico. Nikuna bállog dán ni gibi ay naino nu tripulante hide a mággade-adene kame dán tu bihebi. ²⁸ Kanya tinuko de ti igut u kabáttong nu diget kanya natukuyan de a datos ay ti duwapulo a piye dálla u kabáttong na. Nikuna a maka-ahen-en hide ti sabadit ay tinuko di dámman sakay nagin siyam a pulo dálla a piye u kabáttong na. ²⁹ Dipo tu ánteng de a mesadsad kame tu bito-bito ay intonton de u áppat a angkla tu dipos nu barko. Sakay indasal de a nakwa magdimadimang dán. ³⁰ Nagplano u tripulante hide a guminan tu barko kanya intostos de tu diget u abang sakay nagkukunware hide a magtostos ti angkla tu dulong nu barko. ³¹ Pero kinagi ni Pablo tu kapitan sakay tu sundalo hide, “Ni guminan i tripulante ye hide ay awan kam makaligtas.” ³² Kanya kináttol nu sundalo hide u igut nu abeng sakay pinabayan de a mágganod. ³³ Nikuna magamulaldew dán ay inakit hide ni Pablo a kuman. Kinagi na, “Kasapulo ay ti áppat moy dán nadid a aldew a awan ti kákkan dipo ti pakánbalisa sakay pakán uhay. ³⁴ Kuman kamon dipo iye u kailangan moy para bumegsák kam, dipo awan ti matay maski essa nikam.” ³⁵ Sakay kákkatapos ni Pablo a nagupos ay nangalap siya ti tinapay, sakay nagpasalamat tu Diyos tu atubang nu katolayan. Tináppeng-táppeng na u tinapay sakay kinuman. ³⁶ Bimmegsák u isip de a atanan kanya kinuman hide. ³⁷ (Duwwa a datos ay ti pitto a pulo ay ti ánnám kame a atanan a nakasakay tu barko.) ³⁸ Nikuna makakan dán u tolay hide ay imbut de tu diget u tawed de hide a trigu tánni lumagen u barko. ³⁹ Nikuna magamulaldew dán ay tehhod hide a natánnaw a essa a lugar pero awan de tukoy ni hádya itod a lugar. Napansin de u essa a sállong a tehhod a págdungan, sakay inisip de a isadsad di hod u barko ni maare. ⁴⁰ Kanya kináttol de u igut nu angkla hide sakay inwahak de tu diget sakay inokbis di be u igut na hide tu timon. Sakay inyontok de u layag tu dulong tánni idegdig nu pahás u barko. ⁴¹ Pero simmayad u barko tu makate a parte nu diget. Nesadsad u dulong nu barko kanya awan dán makaahikad. U dipos nabe ay minawasak dipo tu mabegsák a tagmák a mangsássalpuk. ⁴² U balak nu sundalo hide ay bunuwán u atanan a pireso hide tánni awan ti makanangoy sakay makaginan. ⁴³ Pero gusto a iligtas nu kapitan nu sundalo hide ti Pablo kanya binawalan na hide. Pinalukso na tu diget u atanan a makanangoy tán makaapet hide tu degdig. ⁴⁴ Sakay pinatagubet na u agum a awan makanangoy a mágpataw tu tabla sakay tu parte hide nu barko a máglataklatak. Konna hod u ginimet me, sakay atanan me ay nakaapet tu degdig a ligtas.

¹ Nikuna makaapet kami dán ay natukuyan me a puduk bál lan itod ay ngángngahanan de a Malta. ² Mabait a tahod u tolay hod hide sakay tinanggap di kame ti maayus. Pinagnamo di kame ta madagnen dipo naguden sakay inasikaso di kame ti husto. ³ Nangopkop ti Pablo ti kayo sakay nikuna itolo na dán ay tehhod a bigla a limmuwas a makamandag a ulag dipo tu init nu apoy. Sakay kinaget na u kamt ni Pablo. ⁴ Nikuna ketan nu tagahod hide u ulag a bumábbátten tu kamát ni Pablo ay nakagi de tu balang essa nide, “Talaga a mágbabono i lállakiyan iye. Nakaligtas ngane siya tu diget, pero awan be siya pinakultaden nu hed ti langet a mabiyag pa siya. ⁵ Pero inwatek la ni Pablo u ulag tu apoy sakay awan siya naaánya. ⁶ Áuhayán de ni bumige u kamát ni Pablo oni pagdaka a matumba sakay matay. Pero nalay dán hide a makán uhayán ay awan la ti nangyare nikuna, kanya nagbagu u isip de, kinagi de, “Essa siya a diyos!” ⁷ Ti itod ay te adene a luta a kao nu pinuno ti lugaran itod u ngahan na ay ti Publio; pinatulos nakame ti mahusay tu bilay na sakay inasikaso nakame ti husto tu luub nu tállo a aldew. ⁸ Nagkataun a te saket u ama ni Publio dipo maladu sakay magkurso. Kanya binisita siya ni Pablo, káttapos na a ipagdasal ay intupo na u kamát na tu te saket sakay nagpiyya. ⁹ Dipo ti iye a pangyayare ay nagdemáttan u agum hide a taga hod a tehhod a saket, sakay pinagpiyya na be hide. ¹⁰ Inatádden di kame ti makpal a regalo. Sakay nikuna maghektat kami dán ay indátton de tu abeng u kailangan mi hide. ¹¹ Tállo a bulan u limmipas bagu kami hod a limmakad. Simmakay kami dámman tu essa hod a barko a gábwat ti Alejandria a nagpalipas be ti amiyan hod. U ngahan nu barko ay “U Kambal a diyos.” ¹² Dimmung kame ti Siracusa sakay tállo kami hod a aldew. ¹³ Sapul ti Siracusa ay nagtulos-tulos kame a nágbarko hanggan ti Regio. Tu sumunud a aldew ay nagabagat, kanya tu alay nu duwwa la a aldew ay dimmung kame ti Puteoli. ¹⁴ Tehhod kame hod a netan a kákkapátkákka ti pánnampalataya, inakit dikame a mágyan pala hod ti sasimba. Sapul ti Puteoli ay nagtulos kame dán ti Roma. ¹⁵ Nikuna a mabaheta nu kákkapátkakka hide ti pánnampalataya ti Roma u tungkul nikame ay immangay hide tu Tindaan de Apio, sakay u agum ay hod tu Tállo a bilay a áupaan tanni tagbuwan di kame hod. Nikuna ketan ni Pablo u kákkapátkakka hide ay nagpasalamat siya tu Diyos sakay bimmegsák u isip na. ¹⁶ Káddemát me ti Roma ay pinakultadan de ti Pablo a mangupa ti sadile na a págyanan, pero kaguman na u essa a sundalo a mágbantay nikuna. ¹⁷ Kállipas nu tállo a aldew ay impadulaw ni Pablo u puno nu Judio hide ti Roma. Nikuna namagkatipun dán hide ay kinagi na, “Kákkapatkákka ko hide, maskin awanák ti nagimet a kasalanan kontara tu banuwan tam oni tu patakaran nu nunu tam hide ay dinakappák de ti Jerusalem sakay inpiresuwák de tu gubiyerno ni Roma. ¹⁸ Nikuna matapusák a malitis ay palayaannák di dán nakwa dipo awanák be ti ginimet a madukás para maparusaan ti kamatayan. ¹⁹ Pero kinontra nu Judio hide, kanya napilitanák a iyadene u kaso ko tu hare, maskin awanák ti reklamo kontara tu kalugaran ko hide. ²⁰ Impadulaw takam dipo gusto takam a ketan sakay para makagi ko nikam a kanyaák a hod he a nakapireso dipo tu pánniwala ko ni Jesus a pag-asa nu Israelita hide. ²¹ Kinagi di nikuna, “Awan kame ti natanggap a sulat a gábwat ti Judea tungkul niko, sakay tu kalugaran tam hide a immangay he ay awan ti nagbaheta oni nagupos ti maskin ányaman a kontara niko. ²² Pero gusto mi be a masaneg ni ánya makagi muway, dipo tukoy me a maski ni hádya a lugar ay ipáppadukás nu tolay hide i pánniwala muwe. ²³ Kanya nagtakda hide ti essa a aldew, sakay makpal u immangay tu páppágyanan ni Pablo káddemát ni itod a aldew. Saldew siya a nagpaliwanag nide sakay nángpatunay tungkul tu pághare nu Diyos. Tu pamamag-itan nu Kautusan ni Moises sakay u insulat nu prupeta hide ay ginimet na u atanan a makaya na tán maakit na hide a sumampalataya ni Jesus. ²⁴ Tehhod a naniwala sakay tehhod labe a awan naniwala tu kinagi na. ²⁵ Kanya nikuna a awan hide mamágkasundu ay limmakad hide káttapos iye a kagiyán ni Pablo, “Tahod u kinagi nu Banal a Ispirito tu nunu tam hide tu pamamag-itan ni prupeta Isaias: ²⁶ ‘Umangay kahod ti iye hide a tolay sakay kagiyán mo nide, Mágsaneg kam man a mágsaneg ay awan kam makaintendi, Sakay umileng kam man a umileng ay awan kam maketa. ²⁷ Dipo tunay ti igát i puso way ni tolayan hidenye, Tinakáppan de u talinga de, Sakay ingkiháp de u mata-mata de. Dipo umád de a maketa u mata-mata de, oni makasaneg u tali-talinga de. Dipo makay maketa u mata de Sakay makasaneg u tali-talinga de, ay makaintendi u isip de hide, Sakay magpakumbaba hide nikán, sakay pagpiyyaán ko hide.” ’kagi nu Panginoon. ²⁸ Kinagi pa ni Pablo,“Kanya nadid gustu ko a matukuyan moy a iye a impakapospos ko nikam tungkul tu kaligtasan a gubwát tu Diyos ay impáppangaral dán tu Hentil hide sakay hide pa u naniwala ti iye!” ²⁹ Káttapos iye a kagiyán ni Pablo ay naglakaden u Judio hide a mágdadibatiyán hide ti mahigpit. ³⁰ Sakay duwwa a taon ti Pablo a nágyan tu nákkaseruwan na sakay tinanggap na ti mahusay atanan a tolay a umadene nikuna. ³¹ Mabegsák u isip na sakay malaya siya a nangaral tungkul tu pághare nu Diyos sakay tungkul tu Panginoon Jesu-Cristo.