12345678910111213141516171819202122232425262728
12345678910111213141516
123456789101112131415161718192021222324
123456789101112131415161718192021
12345678910111213141516171819202122232425262728
12345678910111213141516
12345678910111213141516
12345678910111213
123456
123456
1234
1234
12345
123
123456
1234
123
1
12345678910111213
12345
12345
123
12345
1
1
1
12345678910111213141516171819202122

2 Tesalonica

1

1 I sulatan iye ay gabwat nikan a ti Pablo, sakay kaguman ko di Silas ay ti Timoteo. Tu Simbaan ti Tesalonica, mákkumusta kame nikam a mánnampalataya hide a taga-Tesalonica, a pinile nu Diyos Ama sakay u Panginoon tam a ti Jesu-Cristo. 2 Magkahod kam nakwa ti págpapala sakay kapayapaan a gábwat tu Diyos Ama sakay tu Panginoon tam a ti Jesu-Cristo. 3 Kákkapatkákka me hide, lagi kame a magpasalamat tu Diyos dipo nikam. Dapat mila iye a gimitán, dipo tulos-tulos la u kállagu nu pánnampalataya moy ni Cristo, sakay mas pa u págmahal moy tu balang essa. 4 Kanya ipagmadakál mikam tu agum hide a mánnampalataya tu Diyos dipo tu katatagen moy sakay tu pánnampalataya moy. Mepagmadakál me be u pagtiis moy tu atanan a hirap sakay tu tulos-tulos moy a kassampalataya tu Diyos maski ni makpal u mangpahirap nikam. 5 Nadid u matibay a kassampalataya moy, ay saina u katunayan a tama u hatul nu Diyos. U keangayan ni ina a hirap moy, ay gimitán kam nu Diyos a karapat-dapat a pasakup tu kahariyan na. Kanya u págtiis moy nadid, ay alang-alang tu kahariyan na. 6 Gimitán nu Diyos u karapat-dapat; talaga a parusaan na u nagpahirap hide nikam. 7 Sakay hikam be a mághahirapán hide ay atádden na ti imangan moy a kaguman me. Mangyare ina tu kássole nu Panginoon Jesus a gábwat ti langet a kaguman nu makapangyariyan na hide a anghel. 8 Dumemát siya a tehhod a maggehab a apoy, sakay parusaan na u awan hide nangtengge tu Diyos sakay awan naniwala tu Maganda a Baheta tungkul tu Panginoon tam ati Jesus. 9 U parusa de ay awan ti katapusan a paghihirap, mehiwalay hide tu Panginoon, sakay hiwalay be hide tu makataka-taka a kapangyariyan na. 10 Sa ina u mangyare nide tu aldew nu káddemát na. Ta itona a aldew ay puriyán siya sakay parangalan siya nu pinagin banal na hide, a awan ti agum nan u atanan a simmampalataya nikuna. Sakay hikam ay kasale kam bi hod, ta tinanggap moy be u Maganda a Baheta a ingkagi me nikam. 11 Iye u dahilan ni bakin lagi me kam a idáddasal. U dasal me ay nakwa ay magin karapat-dapat kam tu Diyos tu pángdulaw na nikam. Sakay idasal mi be a tu tulung nu kapangyariyan na ay magimet moy u atanan a mágkaganda a bagay a gusto moy a gimitán dipo tu pánnampalataya moy. 12 Para tu konna hod ay puriyán nu iba hide a tolay u Panginoon Jesus, dipo tu ugale moy a maganda. Sakay maparangalan kam be a kaguman na. Mangyare ina dipo tu kagbi nu Diyos, sakay nu Panginoon Jesu-Cristo.

2

1 Nadid, kákkapatkákka me hide, tungkul be tu kássole nu Panginoon a ti Jesu-Cristo ay maipun kitam a tumagbu nikuna, kaya ipákkekagbi ko nikam, 2 diyan kam manteng oni mabalisa tu mabaheta moy a dumemát dán u Panginoon. Diyan kam maniwala maski ni kagiyán de a kinagi nide nu Banal a Ispirito, oni nabaheta de oni nabasa de tu essa a sulat a gábwat kan nikame. 3 Diyan kam magpalinlang nide maski ni ánya man a kaparaan. Dipo u aldew nu káddemát nu Panginoon ay awan dumemát mentaras awan magsapul u páng-adi nu tolay hide tu Diyos, sakay awan palla dummemát u tolay a masássuwayán a netakda tu awan ti kahád a kaparusaan. 4 Kalabanán na u atanan a sássambaán sakay diyos nu tolay hide, sakay ilangkaw na u sadile na. Mággetnod siya tu disalad nu Templo nu Diyos sakay ikagi na u sadile na a siya u Diyos. 5 Awan beman kinagi ko dán iye hide a bagay nikuna a kagumanák moy palla hina? 6 Sakay tukoy moy a kaya awan palla mangyare ay te mangpugád palla nikuna a lumuwas. Pero tu netakda a panahun, ay lumitaw a talaga i itona a tolay a masássuwayán. 7 Nadid, u tarabaho ni itona a masássuwayán, ay nagsapul dán ti lihim. Pero siya a mismo ay awan palla pimmeta, ta awan palla naibut ti munduway u mangpugád nikuna. 8 Pumeta siya kapag naibut dán u mangpugád nikuna. Pero tu káddemát nu Panginoon Jesu-Cristo, ay bunuwán na i tolayan iye a masássuwayán. Puksaán na iye tu pamamag-itan la nu angás na. Sakay tunawán nu makasile a demlag a katoy nikuna tu káddemat na. 9 Pumeta i tolayan iye a madukás a tehhod a kapangyariyan ni Satanas. Maggimet siya tu himala hide sakay tu atanan a bagay a makataka-taka para linlangan na u tolay hide. 10 Gimitán na u sari-sare a paraan a pagkamaliyan nu tolay hide a mepahamak. Mepahamak hide dipo umád de a pahalagaan u tatahoden a makapángligtas nide. 11 Dipo umád de a tanggapán u tatahoden ay pabayan dálla hide nu Diyos tu kákkalinlang de para maniwala hide tu kakabuliyan. 12 Kaya maparusaan u atanan a awan maniwala tu tatahoden, dipo u gugusto de ay u gimet a madukás. 13 Kákkapatkákka ko hide, lagi kame a magpasalamat tu Diyos dipo nikam a mahal nu Panginoon. Sakay dapat la a magpasalamat kame, dipo sapul pa tu sapul ay pinile kamon nu Diyos a maligtas tu pamamag-itan nu Banal a Ispirito a mangpabanal nikam, sakay tu pamamag-itan nu pánnampalataya moy tu Tatahoden. 14 Dinulaw kam nu Diyos tu pamamag-itan nu Maganda a Baheta a intoldu me nikam, para makaguman moy be u Panginoon tam a ti Jesu-Cristo tu kaluwalhatiyan na. 15 Kanya nadid, kákkapatkákka me hide, manatile kam a matatag a tumáttawed tu intoldu me nikam tu pággupos man oni tu sulat. 16 Paha-pahaán kam nakwa nu Panginoon tam a ti Jesu-Cristo sakay u Diyos tam a Ama a magmahal nikitam. Sakay tu pamamag-itan nu kagbi na, ay inatadden na kitam ti awan magbabagu a begsák ni isip sakay matibay a pag-asa. 17 Atádden kam nakwa nu Diyos ti matatag a kaluuben para mepahayag moy sakay megimet u atanan a mágkaganda.

3

1 Nadid, kákkapatkákka me hide, ipagdasal moy kami be para u upos nu Panginoon ay mabilis a mekalat sakay masaya a tanggapán nu iba pa hide a lugar, a konna tu ginimet moy. 2 Ipagdasal moy kami be a iligtas kame nu Diyos tu mágkadukás a tolay. Dipo awan atanan a tolay ay maniwala tu itoldu me. 3 Matapat u Panginoon. Atádden na kam ti begsak ni pannampalataya sakay ingatan na kam para awan kam matalo ni Satanas. 4 Dipo tu Panginoon ay dakál u tiwala me tu nikam sakay tukoy me a tulos-tulos moy a sunudán u intoldu me nikam. 5 Igiya kam nakwa nu Panginoon tán lalo moy a maintendiyan u tungkul tu pagmahal nu Diyos sakay tu tiyaga a gabwat ni Cristo. 6 Nadid, kákkapatkákka, te iyutus kame nikam a gábwat tu Panginoon Jesu-Cristo, adeyuwan moy u tamad hide sakay u umád a sumunud tu itáttoldu me nikam. 7 Tukoy moy labe a dapat moy a ahigán u ginimet me. Awan kame nagin tamad a magtarabaho nikuna a hod kami palla hina. 8 Awan kame immasa maski ni ti deya nikam tu kákkabiyag me, nan binayaden me u natanggap me nikam. Aldew ay ti gibi ay nagtarabaho kame para awan kame kailangan a mangabala nikam a mangaged ti magastus me. 9 Ginimet mi iye bakán a awan kame ti karapatan a maguhay tu tulung moy nan atáden me kam ti halimbawa a dapat moy a ahigán. 10 Nikuna a kaguman moy kame palla, ay sa iye u utus a kinagi me nikam: “Diyan moy pakanán u deyaman a umád a magtarabaho.” 11 Kanya ikagi me nikam nadid iiye a utus, dipo nabaheta me a te umád nikam a magtarabaho, a awan ti agum a gággimitán nan mak-alam tu biyag nu agum a tolay. 12 Tu ngahan nu Panginoon tam a ti Jesu-Cristo, mahigpit me a kagiyán ti tolayan iye hide a ayusan de u biyag de sakay magtarabaho hide para tu kabiyagen. 13 Kákkapatkákka me hide, diyan kam magsawa a maggimet ti maganda. 14 Ni tehhod man hina a awan sumunud ti kákkagiyan kuwáy ti sulatáy, tandaan moy siya sakay iwasan para mapasanike siya. 15 Pero diyan moy be siya ibilang a kadima moy. Nan, tolduwan moy siya, ta dipo siya ay nebilang dán a kapatkákka moy. 16 U Panginoon tam a naggábwatan nu kapayapaan ay siya nakwa u mangatád nikam ti kapayapaan tu atanan a pagkakataun. Nakwa ay pirme kam a aguman nu Panginoon. 17 Hikán a ti Pablo u nagsulat ti iye a pángngumusta nikam: Iye u pirma ko tu atanan a sulat ko. Konnaák he a magsulat. 18 Pagpalaan kam nakwa nu Panginoon tam a ti Jesu-Cristo.