2 Pedro

¹ Hikán ti Simon Pedro a apostol sakay tagapagserbi ni Jesu-Cristo. Iye a sulat ay para tu atanan a tummanggap ti pánnampalataya a mahalaga. I pánnampalatayaan iye ay inyatád nikitam ni Jesu-Cristo a Diyos tam sakay tagapagligtas, dipo matuwid siya. ² Magkahod kam nakwa ti masagana a kapayapaan sakay págpapala a gábwat tu Diyos dipo tu pákkatukoy moy tu Diyos sakay tu Panginoon tam a ti Jesu-Cristo. ³ Tu pamamag-itan nu kapangyariyan nu Diyos. Inyatád na nikitam u atanan nu kailangan tam hide tánni mabiyag kitam a te ánteng ni Jesu-Cristo. Iye ay tu pamamagitan nu pákkatukoy tam nikuna a nangdulaw nikitam para makabahagi kitam tu karangalan na. ⁴ Tu pamamagitan nu kapangyariyan na, ay nagpananto siya tu bagay hide a mahalaga sakay makataka-taka para magkahod kitam ti ugale a konna tu ugale nu Diyos, sakay para makaiwas kitam tu mágkadukás hide a gimet ti munduway. ⁵ Dipo ti iye, sikapán moy a idagdag tu pánnampalataya moy u mágkaganda a ugale; u maganda a ugale, dagdagen moy ti karunungan; ⁶ u karunungan ay dagdagen moy ti págpugád tu sadile; u págpugád ti sadile ay dagdagen moy ti katatagen; u katatagen ay dagdagen moy ti pagkamaka-Diyos; ⁷ u pagkamaka-Diyos ay dagdagen moy ti págmalasakit tu kákkapatkákka hide ni Cristo; sakay tu págmalasakit ay dagdagen moy ti págmahal. ⁸ Itona hide a ugale u kailangan a ketan tu biyag moy sakay dapat palaguwán moy, tánni u kássampalataya moy tu Panginoon Jesu-Cristo ay awan mawanan ti kabuluhan sakay mapakinabangan. ⁹ Pero u kulang hide ti iye a ugale ay kulang be ti pákkatukoy tu tama a pánniwala a konna tu buhák tu tatahoden. Nalimunan di dán a nalinis dán hide nu Diyos tu kasalanan de hide. ¹⁰ Kaya ngane, kákkapatkákka ko hide, lalu kam a sumigasig a máng-aheg tu ugale moy tu pángpile nikam nu Diyos. Ni ginimet moy iye ay mapatunayan moy a dinulaw kam ngane nu Diyos sakay awan kam manghina tu pánnampalataya moy. ¹¹ Ni konna hod ay masaya u Diyos a mangpasáddáp nikam tu awan ti kahád a kahariyan nu Panginoon sakay tagapagligtas tam a ti Jesu-Cristo. ¹² Kaya ngane, maskin tukoy moy dán iye hide sakay matatag kamon tu tatahoden a katoy nikam ay pirme takam padi a paalaalaan ti iye hide a bagay. ¹³ Tu palagay ko ay tama la a paalaalaan takam ti bagayan hidenye mentaras biyagák padla. ¹⁴ Dipo tukoy ko a awanák dán magmalay ti munduwáy, u Panginoon tamon a ti Jesu-Cristo a mismo i nángpabatiyay nikán. ¹⁵ Kanya gimitán ko u atanan para masigudu ko a maalala moy padi u atanan nu intáttoldu ko maskin matayák dán. ¹⁶ U impakapospos me nikam a tungkul tu kapangyariyan sakay tu káddemát a huway nu Panginoon tam a ti Jesu-Cristo ay bakán a bida a ginimi-gimet la nu tolay. Nan netan me a mismo u kapangyariyan na. ¹⁷ Dipo nikuna a parangalan sakay papuriyan nu Diyos Ama ti Jesu-Cristo, ay nasaneg me u boses nu Makapangyariyan a Diyos a nagupos, ‘Iye u pinakamahal ko a anak, sakay masayaák nikuna a tahod.’ ¹⁸ Mismo me a nasaneg u boses a gábwat ti langet, nikuna a kaguman me ti Jesus tu banal a buked. ¹⁹ Kaya lalo a timmibay u pánniwala me tu inpakapospos nu prupeta hide. Kaya dapat la a pakaisipán moy iye ti husto, dipo kumán iye a simbuwan a mangdemlag tu madiham a lugar hanggan tu aldew a káddemát nu Panginoon. Kapareho siya nu biton ti dimadimang a mangatád ti demlag tu isip moy. ²⁰ Higit tu atanan, ay dapat moy a tandaan, a atanan nu insulat nu prupeta hide tu Kasulatan ay awan gábwat tu sadile di la a karunungan oni pákkaintendi. ²¹ Dipo u hula nu prupeta hide ay bakán a gábwat tu isip nu tolay, nan tu Diyos. Pero tu tulung nu Banal a Ispirito ay impakapospos de u kinagi hide nu Diyos.

¹ Pero nagkahod be ti mágkabule a prupeta tu itod ti Israel. Sakay nadid ay konna bihod dipo tehod nikam a dumemát a mágkabule a prupeta. Magkunware hide a tatahoden u itáttoldu de nikam pero baka-bakán bal. Iye a adal de ay maka sida tu pánniwala moy. Adiyan de u Panginoon a nangtubus nide kaya bigla a dumemát u kapahamakan bilang parusa nide. ² Sakay makpal hide a maakit a mánnampalataya a sumunud tu gimet de a malaswa. Kaya dipo he ay hamak-hamakán nu awan hide mánnampalataya u pánnampalataya tam ni Cristo. ³ Sakay tu makasadile de a kagustuwan, ay dayaán dikam tu pamamagitan nu mágkaganda a upos para maalap de u kayamanan moy. Nalay dán a nakahanda u hatul a para nide, sakay u Diyos a mangparusa nide ay awan tidug. ⁴ Dipo maski u anghel hide ay awan pinatawad nu Diyos nikuna nagkasala hide. Nan, intápduk na hide tu madisalad sakay madiham a ábbut tánni he di dán hod a uhayán u Aldew nu Pághatul. ⁵ Awan be kinagbiyan nu Diyos u tolay hide tu itod dipo tu kadukássan de. Awan siya ti inligtas maliban la ni Noe a nángpakapospos tungkul tu malinis a kákkabiyag, sakay tu pitto na a kaguman. ⁶ Pinarusaan be nu Diyos u banuwan a Sodoma sakay Gomora dipo tu kasalanan de, para ipeta tu mággagimitán ti mágkadukás u sangpáttán de. ⁷ Pero inligtas nu Diyos ti Lot a essa a malinis a tolay. Nabalisa siya a tahod dipo tu gággimitán a mágkalaswa nu tolay hide a awan maki-Diyos. ⁸ Aldew-aldew ay awan ti kasayaan ti Lot a mangáeleng tu kadukássan a gággagamitán nu tolay hide mentaras a mákpágyan siya ti lugaran itod. ⁹ Pero tukoy nu Panginoon ni kodya a iligtas tu pagsubuk hide u atanan a tapat nikuna. Sakay ni kodya na a parusaan u mággagimitán hide ti madukás káddemát nu Aldew nu Pághatul. ¹⁰ Lalu dán u sumunud hide tu kagustuwan nu pilas sakay sumássuway tu kapangyariyan nu Diyos. Palalo iye hide a tagapagtoldu a kákkagiyán ko. Awan hide ti ánteng a insultuwán u makapangyariyan hide a linalang ti langet. ¹¹ Pero maski u anghel hide a mas mabegsák sakay mas makapangyariyan, ay awan hide ti kinagi a madukás tu atubang nu Panginoon tungkul tu mágkabule hide a tagapagtoldu. ¹² Iye hide a tolay ay kumán a hayup a awan ti isip. Sássestiyán de u bagay hide a awan de maintendiyan. Kanya maparusaan hide a konna tu mailam a hayup a neenak para dakáppán sakay bunuwán. ¹³ Iye u kagantiyan nu ginággimet de a madukás. Mahilig hide a maggimet ti kalaswaan maskin tu atubang nu katolayan. Dakál a kákkasanike sakay kapintasan u iyatád de nikam. Ikasaya de u págdaya de nikam mentaras hide ay kuman a kaguman moy tu pamágkasayaan moy. ¹⁴ Ni umileng hide ti bábbey, ay putat ti kákkasoh. Awan hide ti imang ti pakán gimet ti kasalanan sakay ipahamak dipa ti kasalanan u mágkahina hide ti pánnampalataya. Hide ay sakim. Binusong dán hide! ¹⁵ Inadággen di dán u tama a ugale a gusto nu Diyos sakay u sinunud de ay u madukás a gimet. Inaheg de ti Balaam a anak ni Beor a nagpabayad tu pággimet ti madukás. ¹⁶ Sakay dipo sinuway na u utus nu Diyos, ay pinagkagiyan siya nu hayup na a asno, nagupos a kumán a tolay para masaway siya tu madukás a gággamitán na. ¹⁷ U kapareho ni mágkabuliyán iye hide a tagapagtoldu ay u sapa hide a nasáttan sakay tu diklám a inyáppah nu mabegsák a pahás. Inhanda dán nu Diyos u grabit diham a lugar para nide. ¹⁸ Dipo u pangisip de ay tunay hide ti kalalake, pero awan labe ti seserbi u kákkagiyán de. Kákkagiyán de a awan madukás u kássunud tu kagustuwan nu pilas. Kanya maakit de a maggimet a huway ti madukás u bigu palla hide a immadág tu date de a madukás a kákkabiyag. ¹⁹ Ipáppananto de u kalayaan tu tolay hide a maakit de, pero mismo hide ay alipin nu kasalanan a mángpahamak nide. Dipo u tolay ay alipin nu ányaman a bagay a mangpugád nikuna. ²⁰ U tolay hide a nakatukoy dán ni Jesu-Cristo a Panginoon sakay Tagapagligtas ay immadág dán tu magkadukás hide a gimet ti munduwáy. Pero ni sumole hide tu gimet a madukás sakay paalipin hide a huway ti iye, ay mas grabi pa tu date u magin kalagayan de. ²¹ Mas maganda pa ni awan de natukuyan u tungkul tu makadiyos a kákkabiyag, kasera ni natukuyan de iye sakay adággen de labe tu dimodyan a aldew u banal hide a utus a inyatád nide. ²² Ni konna hod ay nebagay la nide u kakagiyan a, ‘U aso ni magota ay kanán nala be a huway u inyota na. ‘Konna be tu babuy, ni digusán mu ay sumole labe tu lusak.’

¹ Mahal ko hide a kákkapatkákka, iye u kaduwwa ko a sulat nikam. Tu sulat ko hide, ay pinagsumakitan ko a lukagán u isip moy tu mágkaganda hide a gimet, tu pamamag-itan nu pág-paalaala nikam tu sangan hide a bagay. ² U gusto ko ay lagi a sumariwa tu isip moy u upos nu prupeta hide nu Diyos tu itod, sakay u utus a inyatád nu Panginoon sakay Tagapagligtas tu pamamag-itan nu apostol hide, a pinaangay na hina nikam. ³ Dipalongo tu atanan, ay dapat moy a matukuyan a tu dimodyan a aldew ay dumemát u magseste hide sakay sunudán de u mágkadukás de a kagustuwan. ⁴ Sakay kagiyán de a,“Awan beman nagpananto ti Cristo a dumemát? Hadya ran siya nadid? Nágkatay dán u dáddakál me hide pero awan pade ti págbabagu sapul nikuna a lalangan i munduwáy.” ⁵ Umád de a kilalaán a linalang nu Diyos u langet sakay tu luta tu kapangyariyan nu upos na. Nilalang u luta gábwat tu dinom sakay tu pamamag-itan nu dinom. ⁶ Sakay tu pamamag-itan be nu dinom ay linonso tu itod nu Diyos i munduwáy. ⁷ Tu pamamag-itan be nu upos na, u kasalukuyan nadid a langet sakay luta ay intakda nu Diyos a tutudán ti apoy tu aldew nu pághatul sakay págparusa tu awan hide sumunud tu Diyos. ⁸ Pero dyan moy nakwa kali-kalimunan, mahal ko hide a kákkapatkákka: a tu Panginoon, u essa a aldew ay kumán a sanglibu a taon, sakay u sanglibu a taon ay kumán la a saldew. ⁹ Kaya dyan moy isipán a nalimunan dán nu Panginoon u impananto na tungkul tu katapusan ni munduwáy a konna tu akala nu agum a tolay. U tatahoden ay atádden na palla ti pagkakataun u atanan tolay a makapagsise, dipo awan na gusto a mepahamak u maskin deya man. ¹⁰ Pero u aldew a kássole nu Panginoon ay dumemát a konna tu káddemát nu essa a mágtakaw. Awan ti makatukoy! Ti aldiwan itod, u langet ay bigla a mawan a tehhod a makaánteng a galungogung. Matunaw tu apoy u atanan a bagay. Maski u luta sakay tu atanan a katoy he ay matutod. ¹¹ Ni konna he u mangyare tu atanan a bagay, ay dapat kam a mabiyag a tehhod a kalinisan sakay makadiyos a kákkabiyag, ¹² mentaras a uhayán moy u aldew a káddemát nu Diyos. Ti aldiwan itod ay matutod u langet sakay matunaw u atanan bagay a katoy ti lutaáy. ¹³ Pero ayun tu pananto nu Diyos, ay maguhay kitam tu bigu a langet sakay bigu a luta a awan ti maski ánya man hod a kadukássan. ¹⁴ Kaya ngane, mahal ko hide a kákkapatkákka, mentaras maguhay kam ti iye hide a bagay, ay pagsikapan moy a mabiyag a te kapayapaan, malinis sakay awan ti dangát tu pangileng na. ¹⁵ Alalahanán moy a kaya awan palla dumemát u Panginoon ay para atádden na pa ti pagkakataun a maligtas u tolay hide, konna tu insulat nikam nu kapatkákka tam a ti Pablo tu pamamag-itan nu karunungan a inyatád nikuna nu Panginoon. ¹⁶ Tu atanan nu sulat na hide ay pirme a konna hina i paalaala naay. Tehhod a parte nu sulat na a mágkatánnáb kaya mahirap a maintendiyan. Kaya male u pángpakahulugen nu kulang hide ti karunungan. Konna be hina u gággimitán de tu agum a parte nu banal a Kasulatan, kaya dipo ti iye ay mismo a hide u mángpahamak tu sadi-sadile de. ¹⁷ Nadid ta tukoy moy dán iye, mahal ko hide a kákkapatkákka, dapat kam a mag-ingat para awan kam metaw-taw nu tolay hide a awan ti maganda a gimet. Tán para awan kam mehiwalay tu maganda moy a kalagayan tu atubang nu Diyos. ¹⁸ Pero lumagu kam tu kagbi nu Diyos sakay tu pákkatukoy moy tu Panginoon tam sakay Tagapagligtas a ti Jesu-Cristo. Puriyán siya nadid sakay magpakahanggan! Amen.