2 Corinto
11 Gábwat iye a sulat nikán a ti Pablo a apostol ni Jesu-Cristo, ayun tu kaluuban nu Diyos sakay gábwat tu kapatkákka tam a ti Timoteo. I sulatan iye ay para tu mánnampalataya hide ti Corinto sakay tu mánnampalataya hide a mágyan ti buo a Acaya: 2 Pagpalaán kam nakwa sakay magkahod ti kapayapaan a gábwat tu Diyos a Ama tam sakay tu Panginoon a ti Jesu-Cristo. 3 Puriyán tam u Diyos sakay Ama nu Panginoon tam a ti Jesu-Cristo, siya u maháhhabagán a Ama. Siya u Diyos a pinaggábwatan nu atanan tulung. 4 Pinabegsák na kitam tu kalungkutan tam hide para makatulung kitam be tu maglungkut hide, tu pamamag-itan nu kasayaan a natanggap tam tu Diyos. 5 Dipo ni sa kodya ti kadágge u táttiisán me a hirap tu pákpágkaessa ni Cristo, ay konna bi hod u kasayaan a natanggap me a gábwat nikuna. 6 Ni maghirap man kame, ay para iye tu kasayaan sakay tu kaligtasan moy. Ni paha-pahaán kame, ay mapaha-paha kam be sakay bumegsák kam be tánni matággád moy u kahirapan a dáddanasán moy a konna nikame. 7 Kaya matibay u pag-asa me para nikam dipo tukoy me a ni kodya a nagin kaguman mi kam tu pághirap ay konna labi hod kaguman mikam tu kasayaan me. 8 Kákkapatkákka hide, ibaheta mi nikam u kahirapan a nadanas me ti Asia. Tunay ti kadágge iye a nadanas me, akala me ni matay kami dán. 9 U akala me ay dummemát dán u odas me. Pero nangyare itod tánni awan kame magtiwala tu sadile me nan tu Diyos a mangbiyag a huway tu patay hide. 10 Inligtas na kame tu kákkatay sakay tulos-tulos a ilálligtas, sakay umasa kame a tulos-tulos padi u pangligtas na nikame, 11 tu tulung nu dasal moy hide. Ni konna hod, ay makpal u magpasalamat nikuna dipo tu págpapala na nikame bilang tábbeg tu dasal nu kakpalan. 12 Essa a bagay u mepagmadakál me: nabiyag kame ti matuwid sakay tapat tu atubang nu atanan a tolay, lalu dán nikam. Nagimet mi iye dipo tu kagbi nu Diyos bakán a tu pamamag-itan nu karunungan nu mundu. Sakay mapatunayan nu isip me a tatahoden u ipagmadakál me. 13 U insulat mila nikam ay u kaya moy a basaán sakay intendiyán kaya umasaák, kaya umasaák a tu dimodyan a aldew ay maintendiyan moy kame ti husto. 14 Para káddemát nu aldew a kássole nu Panginoon Jesus, ay mepagmadakál moy kame, a konna tu pángmadakál me nikam. 15 Dipo ti pánniwala kuwan iye, ay binalak ko a penduwaák hina a umangay tánni maduble u págpapala moy. 16 Nagplanuwák a humoyot pa hina káangay ko ti Macedonia. Sakay tu kássole ko, ay humoyuták dámman hina tánni matulunganák moy tu págbiyahe ko ti Judea. 17 Dipo beman a konna he u plano ko ay makagi moy dán a pabagu-baguwák ti isip? Akala moy beman a pabagu-bagu u plano ko konna tu gággimitán nu tolay a makamundu, a kagiyán na nadid a, “On” sakay mamaya-maya ay “Awan?” 18 Ni kodya a tapat u Diyos, ay konna bi hod u upos ko nikam: u “On” ko nadid ay manatile a “On.” 19 Hikame ay di Silvano sakay Timoteo ay nangaral nikam tungkul ni Jesu-Cristo a anak nu Diyos. Sakay tukoy moy a ti Cristo ay tapat tu upos na. Talaga a tupadán na u panantu na. 20 Dipo atanan a pananto nu Diyos ay natupad ni Jesu-Cristo. Kaya ngane makagi tam a tapat u Diyos sakay iye ay makapangatád ti kapuriyan nikuna. 21 U Diyos u nangpatibay nikame sakay nikam tu pákpágkaessa tam ni Cristo, sakay siya be u nangpile nikitam. 22 Tinatakan na kitam bilang kao na tu pamamag-itan nu pángkaluub na nikitam tu Ispirito na. Iye u patunay a matanggap tam u atanan a impanantu na. 23 Tistigu ko u Diyos, tukoy na u katoy tu puso ko a kayaák a awan immangay hina ti Corinto ay dipo gusto takam a atádden ti pagkakataun a magsise tu mágkadukás moy hide a gimet. Sakay para awan takam makagiyan. 24 Bakán a gusto mi kam a págdipalonguwan tu pánnampalataya moy nan gusto mi la a tumulung tánni magin masaya kam tu pánnampalataya moy. Dipo matatag kamon tu pánnampalataya moy hina.
21 Kanya naisip ko a dyanák palla hina umangay ni makapagpalungkut la nikam i káangay kuwe hina. 2 Dipo ni atádden takam ti kalungkutan, deya pa i mangpasayaay nikán? Awan beman hikam la be? 3 Kaya nagsulaták pa nikam. Tánni, káangay ko hina ay bakán dán a lungkut u iyatád moy nikán, nan hikamon u mangpasaya nikán. Dipo maniwalaák a u kasayaan ko ay kasayaan moy be. 4 Dipo nikuna sulatan takam, ay grabiyák ti lungkut sakay balisa, magtákták luwa kuwáy mentras magsulaták. Sinulatan takam bakán a para atádden ti kalungkutan nan para ipabate ko nikam ni sa kodya ti kadakál u págmahal ko. 5 U essa hina a kapatkákka moy a nagkasala, bakán la a hikán u pinasakitan na. Bakán be a padakállán ko i bagayan iye, pero u tatahoden, hikam a atanan u pinasakitan na. 6 Pero sapat dán u págparusa a ginimet nikuna nu kakpalan nikam. 7 Kaya patawadán moy dán siya sakay tulungan moy siya a magin matatag tu pánnampalataya na tánni awan siya matuluyan a manghina ti isip dipo tu matindi a kalungkutan. 8 Kaya mákkekakagbiyák nikam a ipabate moy nikuna a mahal moy padi siya. 9 Dipo iye u dahilan ni bakin a nagsulaták nikam, para matukuyan ko ni sássunudán moy ti husto u atanan a impáppangaral ko. 10 Ni deya man u pinatawad moy ay pinatawad ko dán be. Ni nagpatawadák man tistigu ko ti Cristo a ginimet ko itod alang-alang nikam. 11 Dapat la a magpatawad kitam tánni awan kitam malinlang ni Satanas. Dipo tukoy tam u plano na a madukás. 12 Nikuna immangayák ti Troas para mangaral tu Maganda a Baheta tungkul ni Cristo, ay inatáddinák nu Panginoon ti maganda a pagkakataun para magimet ku itod. 13 Pero awanák labe ti kapayapaan dipo awan ko netan hod u kapatkákka ko a ti Tito. Kaya nagpaalamák nide sakay dummiretso ti Macedonia. 14 Pero magpasalamaták tu Diyos dipo siya u mángdipalongo tu págserbi me ni Cristo kaya lagi kame a magtagumpay. Hádya kami man a umangay ay gamitán kame nu Diyos para ipakilala ti Cristo tu tolay hide iye ay mehalimbawa tu kákkalat nu masáppot a ahob. 15 Dipo konna kame tu masáppot a handug a iyáalay ni Cristo para tu Diyos. Sakay maahob iye nu nágkaligtas dán hide sakay tu mágkepahamak hide. 16 Tu mágkepahamak hide, iye ay essa a makatay a ahob, pero tu nágkaligtas dán hide, iye ay sáppot a mangatád ti biyag. Deya u tehhod a sapat a kakayanan a makagimet ti konna hina a págserbi? 17 Dipo awan kame konna tu agum a gággimitán de a negosyo u upos nu Diyos. Tukoy me a áelingán kame nu Diyos kaya bilang mánnampalataya ni Cristo sakay tagapagserbi nu Diyos, ay tapat kame a mangaral tu upos na.
31 Nadid, tu palagay moy beman ay páppuriyán me dámman i sadile miyáy? Awan kame konna tu agum a kailangan pa ti sulat para tanggapán moy oni sulat a gábwat nikam para tanggapán be tu agum a lugar. 2 Hikamon u patunay me, a kumán a nakasulat dán tu puso me. Dipo u kákkabiyag moy ay kumán a sulat a matenggi sakay mabasa nu atanan a tolay. 3 Maliwanag a u biyag moy ay kumán a essa a sulat a gábwat ni Cristo a nesulat tu pamama-itan me. Nesulat iye, bakán a tu tinta nan tu Ispirito nu Diyos a biyag. Sakay bakán bi iye a nesulat tu natáppeng a bito nan tu puso nu tolay hide. 4 Makagi me u konna hod dipo tu págtiwala me tu Diyos tu pamamag-itan ni Cristo. 5 Ni tu sadile mi la, ay awan sapat u kakayanan me a gimitán iye; nan u Diyos u nángkaluub nikame ti kakayananan iye. 6 Inatádden na kame ti kakayanan para ipangaral u tungkul tu bigu na a tipan. Sakay i ipáppangaral miyan iye ay awan neayun tu nakasulat tu Kautusan nan tu Ispirito. Dipo u iyatád nu nakasulat a Kautusan ay kamatayan, pero u Ispirito ay mangatád ti biyag. 7 Nikuna iyatád u patakaran a nakasulat tu natáppeng a bito, kaguman a nehayag u demlag nu Diyos. Awan maileng nu Israelita hide u hupa ni Moises, kaya la iye a demlag ay limmipas. Nadid ni nángpeta u Diyos tu kapangyarihan na nikuna a iyatád na u Kautusan a nakapangatád ti kamatayan, 8 maspa u ipeta na a kapangyarihan ni magahikad dán u Banal a Ispirito. 9 Ni nángpeta u Diyos tu kapangyarihan na nikuna a iyatád na u Kautusan a nakapangatád ti kamatayan, maspa u ipeta na a kapangyarihan ni ibutan na dán u kasalanan nu tolay. 10 Dipo hina, makagi tam a u date a demlag ay awan dán dipo napalitan dán ti mas mademlag. 11 Ni tehhod a kapangyarihan a impeta u Diyos tu páng-atád na tu Kautusan a limmipas maspa u kapangyarihan a ipeta na tu bigu a tipan a manatile hanggan-hanggan. 12 Dipo ti pag-asa miyan iye, ay mabegsák u pággisipan me a ibaheta u upos nu Diyos. 13 Bakán kame a konna ni Moises a tinakáppan na u hupa na tánni awan ketan nu Israelita hide u kállipas ni demlagan itod. 14 U tatahoden, awan naintendiyan nu Israelita hide u kahulugan ni iye tu itod dipo mágkaigát u ulu de a kumán a te tumáttakáp tu isip de. Sakay hanggan nadid ay awan di palla naintediyan iye kada basaán de u date a kasunduwan dipo te tumáttakáp palla tu isip de. Sakay mawan la i takáppan ina, ni nákpágkaessa u essa a tolay ni Cristo. 15 Hanggan nadid, ay tehhod palla a tapoh u isip de kada basaán de u libro ni Moises dipo awan di iye naintendiyan. 16 Pero ni sumole u tolay sakay maniwala tu Panginoon, ay mawan u nakatapoh tu pággisipan na. 17 U Panginoon a nabanggit he ay u Banal a Ispirito, sakay ni hádya u Banal a Ispirito nu Panginoon, ay tehhod bi hod a kalayaan a gimitán u kagustuwan nu Diyos. 18 Sakay nadid ay nawan dán u tapoh tu isip tam, sakay netan dán nikitam u kapangyarihan nu Panginoon. I kapangyarihanan iye ay gábwat tu Panginoon a Banal a Ispirito. Siya u utay-utay a mangbagu nikitam, hanggan magin kapareho na kitam.
41 Nadid, dipo tu kagbi nu Diyos, ay pinili na kame para ti iye a tarabaho, kaya awan kame panghinaan ti isip. 2 Inadággen midán u gimet me hide a makasani-sanike sakay gággimitán ti tagu. Awan kame mángloko sakay awan me dag-dagen oni palitan u upos nu Diyos. Nan hayagan me a impangaral u tatahoden sakay iye ay tukoy nu Diyos. Kaya handa kame a pahatul maskin deya. 3 Pero maski ni maliwanag u ibbbaheta me. Kumán pade iye a te tapoh dipo u netakda hide a maparusaan ay awan de maintendiyan u gusto ni iye a kagiyán. 4 Awan hide summampalataya, dipo u isip de ay binuhák nu diyos ni munduwáy. Binuhák na hide tánni awan de ketan u demlag nu Maganda a Baheta tungkul tu demlag ni Cristo a kapareho nu Diyos. 5 Bakán a u sadile me u ipáppangaral me nan ti Cristo Jesus a Panginoon tam. Nagserbi kame nikam dipo tu págmahal me ni Cristo Jesus. 6 Dipo u Diyos mismo u nagkagi a,“Magkahod ti demlag tu kadiklámman.”Siya be u nangdemlag tu puso me hide tánni ketan me u kadakilaan nu Diyos a netan tu hupa ni Cristo. 7 Kumán kame la a pággasákkan a banga dipo awan kame ti kakayanan, pero intiwala na nikame i kayamanan iye a Ispirituwal dipo gustu na a ipatengge au awan masukat a kapangyarihan ay gábwat nikuna bakán me a kao. 8 Páppahirapan di kame ti husto pero awan kame summuko. Ni minsan, ay awan me tukoy u gimitán me pero awan padi mawanan ti pag-asa. 9 Usigán di kame pero awan kame pinabayan nu Diyos. Páppasakitan dikame pero awan pade matuluyan a matay. 10 Lagi kame a dumanas ti kahirapan konna tu pághirap a dinanas ni Cristo nikuna a natay siya; para ipareho me u biyag me tu biyag ni Cristo a siya u mángpeta a biyag pade ti Jesus a atoy nikame. 11 Dipo lagi kame a katoy tu dilikadu a kalagayan alang-alang ni Cristo, tanni tu pamamag-itan nu bággi me a matay, ay mehayag a biyag siya. 12 Kaya maski ni kamatayan u maguhay nikame dipo tu pángngaral me tu Maganda a Baheta, itod u ingkapiya moy dipo nagkahod kamon ti biyag a awan ti kahád. 13 Kinagi tu Kasulatan, “Nagupusák dipo simmampalatayaák.” Konna bihod u ginággimet me, kaya magupos kame dipo simmampalataya kame. 14 Dipo tukoy ko a u Diyos a nangbiyag a huway tu Panginoon a ti Jesus, ay siya labe u huway a mangbiyag nikame a konna tu ginimet na ni Jesus. Sakay siya u máng-angay nikam sakay nikame tu atubang na. 15 Dipo u atanan nu págtiis me ay para tu kapiyyaán moy, tánni lalu pa a kumáppal u tolay a makatanggap tu págpapala nu Diyos. Para makpal be u magpasalamat sakay magpure nikuna. 16 Kaya awan kame manghina ti isip. Maski ni humina dán u bággi me ti lutaáy, ay tulos - tulos pade a bumegsák u ispirito me aldew-aldew. 17 Dipo u pághirap a nadanas me nadid, ay pangsandaliyan la sakay awan masiyadu a madágge. Dipo tukoy me a tehhod a inhanda a dakál a gantimpala u Diyos para nikame. Iye ay manatile a magpakahanggan sakay awan mapantayan. 18 Kaya awan me pahalagaan u bagay hide a ketan nan tu bagay hide a awan ketan. Dipo pansandaliyan la u bagay hide a ketan, pero awan ti kahád u bagay hide a awan ketan.
51 Nadid, tukoy tam a masida u bággi tam a luta a kumán a bilay a páppágyanan tam mentaras a katoy kitam palla ti munduwáy. Pero tukoy tambe a te inhanda u Diyos a para nikitam a bággi a panglanget. Iye ay awan mata-matay magpakahanggan dipo iye ay ginimet nu Diyos, bakán a ginimet nu tolay. 2 Mágdadaingán kitam dipo gustu tamon a mapalitan u bággi tam ti bággi a panglanget. 3 Ni mabihisan kitamon ti iye a bigu a bággi, ay awan kitamon kedemáttan a uba. 4 Mentaras a hed palla nikitam u date tam a bággi, ay makán daingán kitam dipo tu kahirapan tam. Bakán a dipo gusto tamon a matay, nan dipo gusto tamon a mesulot u bigu a bággi, tánni u bággi a matay ay mapalitan ti bággi a awan mata-matay. 5 U Diyos be u nánghanda nikitam tánni tanggapán tam u bigu a bággi. U patunay ay inyatád na nikitam u Banal na a Ispirito. 6 Kaya pirme a mabegsák u pággisipan me maski ni tukoy me a mentras biyag kitam palla, ay awan kitam palla makasáddáp tu bilay a inhanda nu Panginoon. 7 Dipo mabiyag kitam ayun tu pánnampalataya tam tu Diyos, bakán a tu bagay hide a ketan. 8 Kaya awan kame panghinaan ti isip maski u gusto me ay iwahak dán i bággiyan iye tánni makaguman mi dán u Panginoon. 9 Kaya ngani, u pinakagugusto me ay makasaya kame tu Diyos, he man ti munduwáy oni ti langet. 10 Dipo atanan tam ay umatubang ni Cristo, sakay hatulan na u ginimet tam hide maganda man oni madukás, mentaras biyag kitam palla he ti munduáy. Tanggapán nu balang essa u karapat-dapat a hatul ayun tu ginimet na. 11 Kaya ngani, dipo te ánteng kame tu Diyos, ay gimitán me u atanan para maakit me u tolay hide a sumole nikuna. Tukoy nu Diyos u tunay me a pagkatolay, nakwa ay tukoy moy kami be. 12 Kinagi me iye nikam a huway, bakán a para ipagmadakál nikam i sadile miyáy, nan para atádden kam ti rason a mepagmadakál moy kame. tanni matábbeg moy u tolay hide a mangpuri la tu bagay hide a pangluwas bakán a u maganda a ugale. 13 Ni kumán kame man a nasidaan ti isip, alang-alang iye tu Diyos, sakay ni matino kami man ay para iye tu kapiyyaan moy. 14 U págmahal ni Cristo nikitam, ay ina u mangatád tu kasipag me a sumunud tu kaluuban na. Maniwala kame a natay siya para tu atanan a tolay. Kaya nadid, u atanan a tolay ay mebilang a natay. 15 Natay siya para tu kapiyaan nu atanan a tolay, tánni u atanan a biyag, ay awan dán mabiyag para tu sadile de, nan para ni Cristo, a natay sakay nabiyag a huway para nide. 16 Kaya nadid, u pangileng mi dán tu atanan ay awan dán neayun tu sukatan nu tolay hide a awan mangkilala tu Diyos. Tu itod ay konna hod u pákkatukoy me ni Cristo, pero nadid ay awan dán. 17 Kaya ni deya man u nákpagkaessa ni Cristo ay essa dán a bigu a nilalang. Awan dán u date na a pagkatolay; siya ay binagu dán. 18 Iye a atanan ay gábwat tu Diyos, a nángsole nikitam nikuna tu pamamag-itan ni Cristo. Sakay inyatád na nikame u tungkulin a mangpasole tu tolay hide nikuna. 19 Gusto ni iye a kagiyán, a tu pamamag-itan ni Cristo, ay pinagsole nu Diyos u tolay hide nikuna, imbilang na hide a amigu na, sakay nilimon na dán u kasalanan de hide. Impagkatiwala na nikame u págbahagi ti iye a baheta. 20 Kaya hikame ay inutusan ni Cristo; a u Diyos a mismo u mákpágguhon nikam tu pamamag-itan me. Mákpágguhon kame nikam alang-alang ni Cristo; a magsole kamon tu Diyos. 21 Maski nikan ay awan nagkasala ti Cristo, pero dipo nikitam, ay nebilang siya a makasalanan tánni meturing kitam nu Diyos a matuwid tu atubang na tu pamamag-itan nu pákpágkaessa tam ni Cristo.
61 Nadid, bilang kaguman tu gawain nu Diyos, ay mákkekakagbi kame nikam a dyan moy sayangán u inyatád nikam nu Diyos a pagpapala. 2 Dipo kinagi nu Diyos: “ Sinaneg takam tu tama a panahun, Sakay tinulungan taka tu aldew nu págligtas.” Magsaneg kam! Nadid dán u tama a panahun! Nadid dán u aldew nu págligtas! 3 Iniwasan me a makagimet ti makasaket tu agum, tánni awan hide ti makagi tu págserbi me tu Diyos. 4 Nan impeta me tu atanan a gimitán me a tagapagserbi kame nu Diyos: tu pamamag-itan nu págtiis tu atanan kalase nu kahirapan, kalungkutan, sakay kagipitan. 5 Binálbág di kame, impireso, sakay ginulo kame nu katolayan. Nadanas me a magtrabaho ti husto, awan mátdug ti magdamag sakay awan kuman ti sangan a aldew. 6 Pinatunayan me a tagapagserbi kame nu Diyos tu pamamag-itan nu malinis a kákkabiyag, karunungan, págtiyaga, kabaitan, tu pamamag-itan nu pángdipalongo nu Banal a Ispirito sakay tapat a págmahal. 7 Tapat me a impangaral u Maganda a Baheta tungkul tu kapangyariyan nu Diyos. U matuwid a kákkabiyag u armas me a panglaban sakay pangsangga. 8 Bilang tagapagserbi nu Diyos, nadanas me a ahakán sakay imetmet, puriyán sakay sestiyan. Neturing kame a mabule, maski ni tatahoden u kagiyán me. 9 Inturing kame nu agum a awan di kame kilala, maski tanyag kame lagi a dilikadu u biyag me pero biyag kame palla hanggan nadid. Maski ni pinahirapan di kame, ay awan kame padi natay. 10 Maski maglungkut kame, ay tehhod kame padi a kasayaan; maski ni mahirap, pero mapayaman be u agum; lubu-lubus, pero u tatahoden kao me u atanan a bagay. 11 Tapatan kame a nagupos nikam taga-Corinto hide. Ni ánya u katoy tu puso me ay siya u ingkagi me nikam. 12 Awan kame nagkulang tu págmahal me nikam, pero hikam u nagkulang tu págmahal moy nikame. 13 Mákpagguhunák nikam a konna tu essa ama, mahalán moy kame a konna tu págmahal me nikam. 14 Dyan kam mákkaessa tu awan hide mánnampalataya. Dipo awan maare a magkaessa u malinis sakay u madukás, oni demlag sakay u diklám. 15 Ni kodya a awan magkasundu ti Cristo sakay ti Satanas konna bi hod u mánnampalataya tu awan mánnampalataya. 16 U Diyos u hed nikitam kaya hikitamon u Templo nu Diyos a biyag dipo hina madukás nite ugnayan u Templo Diyos tu diyos-diyosan. Siya dán u nagkagi: “Mágyanák sakay mákkabiyagák nide, Hikán u magin Diyos de, sakay hide ay magin kao ko. 17 Kaya umadeyo kam tu tolay hide a awan sumássunud nikán, Humiwalay kam nide,” kagi nu Panginoon. “Dyan kam kumahap tu ánya man a neturing a madangát, tánni tanggapán takam. 18 Hikán u magin ama moy, sakay hikam be u magin anak ko hide. Kagi nu Panginoon a Makapangyariyan.”
71 Nadid, mahal me hide a kákkapatkákka, nadid ta inpananto nikitam nu Diyos iye hide a bagay ay adággen tam u atanan a mágkadukás a gimet a makapangatád ti dangát tu isip tam sakay makedukás tu bággi tam. Sikapán tam a mabiyag ti banal sakay tehhod a ánteng tu Diyos. 2 Tanggapán moy kame tu puso moy. Awan kame ti ginimet a madukás maski ni tideya man nikam. Awan me sinida oni dinaya u tideyaman. 3 Awan ko iye kagiyán para págngállan takam. Konna ngane tu kinagi ko nikam, mahal takam a tahod. Kaya biyag man oni kamatayan awan magbagu u págmahal ko nikam. 4 Grabi ti kadakál u págtiwala ko nikam, lagi takam a ipagmadakál! Maski makpal kame a tiniis, u mabate ko ay kasayaan a awan ti kapareho. 5 Nikuna dimmemát kame ti Macedonia ay awan kame padi ti imang, Dipo maski ni hádya ay puro hirap u nadanas me. Tu palebut me ay atoy hod u kumontara hide nikame sakay tu pusu me ay tehhod a ánteng. 6 Pero u Diyos a mangpáppasaya tu mágkalungkut hide ay pinasaya na kame tu pamamag-itan nu káddemat ni Tito. 7 Sakay bakán la a tu káddemát na u nangpasaya nikame nan u kabaitan a ginimet moy nikuna. Imbaheta na a maammaw kam a tahod nikán. Imbaheta na be u kalungkutan moy dipo tu nangyare hide, sakay u págmalasakit moy nikán, kaya mas laluwák a minasaya. 8 Dipo maski ni nakapangatád ti kalungkutan i sulat kuwáy ay awan ko padi pinagsisiyan u págsulat ko. Nagsisiyák tu dipalongo dipo tukoy ko a nakapangatád nikam ti kalungkutan u sulat ko, pero awan la nalay. 9 Pero nadid ay masayaák dipo u kalungkutan a itod u nánggiya nikam tánni magsise sakay addággen moy u kasalanan. Iye a kalungkutan ay kaluuban nu Diyos, kaya awan nakepadukás nikam u insulat ko hide. 10 Dipo u kalungkutan a ayun tu kaluuban nu Diyos, u mánggiya nikam tánni magsise sakay magbagu, para maligtas kam. U konna he a kalase ni kalungkutan ay awan pagsisiyan. Pero u kalungkutan nu bakán hide a taga sunud nu Diyos ay kamatayan u demáttán na dipo awan ti págsise. 11 Ilingán moy u inyatád nu kalungkutan a ayun tu kaluuban nu Diyos. Dipo ti ina ay nagin masigasig kam a patunayan a awan kam ti kasalanan tungkul tu bagay hide a kinagi ko. Naiyamut kam tu gimet a madukás sakay nagkahod kam ti ánteng. Nagin masigasig kam a mesole u date tam a pamággagum. Sakay pinarusaan moy a agad u te kasalanan hide. Pinatunayan moy dán ina nikán a áwan kam ti tukoy ti kasalananan itod. 12 Tukoy nu Diyos a u sulat ko nikam, ay bakán la a para tu nagkasala oni tu nagkasalaan na, nan tánni ipeta ko nikam tu atubang nu Diyos a hikam ay tunay a tapat nikán. 13 Kaya u ginimet moy u nangpasaya nikán a tahod. Mas laluwák pa a nasaya dipo tu kasayaan a nabate ni Tito nikuna nakaguman nakam hina. 14 Dipo impagmadakál takam nikuna tu itod, sakay nadid ay napatunayan na a tatahoden u atanan a kinagi ko nikuna tungkul nikam kanya awanák nasanike. 15 Sakay nadid maslalo kampa a nepamahal nikuna dipo awan na be malimu-limunan u kássunud moy sakay u maganda a págtanggap sakay pággalang moy nikuna. 16 Masayaák dipo napatunayan ko a mapagkatiwalaan takam ti husto.
81 Nadid, kákkapatkákka me hide, gusto ko a ibaheta nikam u nagimet nu págmahal nu Diyos tu mánnampalataya hide ti Macedonia. 2 Nagdanas hide ti matindi a kahirapan, madággi iye a pagsubuk nide. Pero te kasayaan pade hide kaya masaya hide a mangatád ti makpal a tulung maski grabi u hirap de. 3 Nagbuluntaryo hide a mangatád bakán la a ayun tu makaya de, nan susubra pa. Tukoy ko iye dipo, 4 mákkekakagbi hide nikame a atádden hide ti pagkakataun a makatulung tu kákkapatkákka ti Judea. 5 Sakay higit pa tu áasaan me u ginimet de; dipo inlaan de u sadile de tu Panginoon, sakay káttapos ay inyalay de u sadile de nikame, ayun tu kaluuban nu Diyos. 6 Dipo ti iye ay naisip me a maganda nakwa ni itulos moy u pággipun tu tulung para tu mágkahirap hide. Kaya ti Tito a nangsapul ti gawainan iye hina nikam ay inuhon me a magsole hina para tapusán na u sinapulan na a pággipun tu tulung moy. 7 Hikam a taga Corinto hide ay tanyag dipo mabegsák u pánnampalataya moy, mágkalalake kam a mangaral, makpal kam a tukoy, masipag kam a magserbi tu Diyos, sakay dakál u págmahal moy nikame. Nadid, gusto ko a magin tanyag kam tu pángngatád. 8 Awan ko iye kagiyán para utusan takam; nan kagiyán ko la iye a káttulung nu agum a simbaan tánni mepeta moy nikame u katapatan nu págmahal moy. 9 Dipo tukoy moy ni sa kodya ti kadakál u págmahal nu Panginoon tam a ti Jesu-Cristo, a maski mayaman siya ay nagin mahirap tánni yumaman kam tu pamamag-itan nu pagka-mahirap na. 10 Sakay sa iye u mepayo ko tungkul hina: itulos-tulos moy u pángngatád a nasapulan tu taon he. Hikam u nángdipalongo bakán la a tu pággimet nan pate tu págplano. 11 Kaya itulos-tulos moy dán iye! U págsumikap a impeta moy tu itod ay itulos-tulos moy hanggan a matapos. Mangatád kam ayun tu makaya moy. 12 Dipo ni kusang-luub u pángngatad moy, tanggapán nu Diyos u ánya man a kaya moy a meatád; awan nakam pagagiden tu awan nikam. 13 Awan ko kagiyán a mangatád kam tánni magaanan u agum sakay hikam be u maghirap nan u gusto ko la ay pareho kam a makatulung tu bawat essa para magkahod kitam ti pantay-pantay a kalagayan. 14 Pero masagana kam be nadid kaya dapat la a tulungan moy u tehhod hide a kailangan. Ni hikam be u tehhod a kailangan sakay hide ay masagana, ay hide be u tumulung nikam. Tánni mamagtulungan kam tu odas nu pangangailangan. Ti konna hod ay pantay-pantay u kalagayan nu balang essa. 15 Ayun tu kinagi na tu Kasulatan: “U nagipun ti makpal ay awan summubra, Sakay u nagipun ti badit ay awan be kinulang.” 16 Pero magpasalamaták tu Diyos dipo impabate na ni Tito u págmalasakit na nikam a kapareho nu págmalasakit ko nikam. 17 Dipo bakán la a pimmayag siya tu impákpágguhon me, nan siya dán u nagpirisenta dipo gusto na be a angay hina. 18 Pakuyugán me nikuna u kapatkákka tam a matengge nu atanan a mannampalataya hide dipo tu pángngaral na tu Maganda a Baheta. 19 Sakay bakán la a ina! Siya u pinile nu mánnampalataya hide a makaguman me tu págbiyahe tánni matulungan di kame tu pángngasiwa a págtugán tu iambag moy ti Judea. U konna he a págserbi ay para tu kadakilaan nu Panginoon, sakay para mepeta me u kagustuwan me a makatulung. 20 Iye u ginimet me bilang pággingat tánni awan ti makagi u deya man tungkul tu pángngasiwa me ti iye a kakpal a tulung a táttawidán me. 21 Sikapán me a megimet iye ti maayus, bakán la tu pangileng nu Panginoon nan magin tu pangileng nu tolay hide. 22 Kaya paangayán me hina para makaguman de u essa tam pa a kapatkákka a napurbaan mi dán tu makpal a pagkakataun sakay netan me nikuna a masigasig siya a tumulung. Mas lalo siya a matiyaga a tumulung nadid dipo tu págtiwala na nikam ti husto. 23 Tungkul ni Tito, siya u kaguman ko sakay katulung ko tu gawain. Tungkul be tu kákkapatkákka a kaguman na, hide u pinaangay nu mánnampalataya hide. Sakay ti Cristo u maparangalan dipo tu gawain de hide. 24 Kaya ipabate moy nide u tapat moy a págmahal tánni ketan nu mánnampalataya hide a awan kame nagkamale tu pángmadakál me tungkul nikam.
91 Nadid, awan ku dán kailangan a magsulat pa nikam tungkul tu káttulung tu kákkapatkákka hide ti Jerusalem. 2 Dipo tukoy ko a handa kamon a tumulung, sakay impagmadakál takam pa tu taga-Macedonia hide. Kinagi ko a handa kamon a taga-Acaya hide, tu nakalipas pa he a taon; kaya makpal u nalukag tu págtulung dipo tu págmalasakit moy. 3 Kaya pinágdipalongo ku dán hina u kákkapatkákka tam hide tánni awanák mepasanike tu pángmadakál ko tungkul nikam sakay tánni mehanda dán u tulung moy, a konna tu kinagi ko. 4 Dipo ni dimmemátták hina sakay ti kákkapatkákka tamáy hide a taga-Macedonia, sakay ketan de a awan kam palla handa, ay mepatagamaák la sakay pati hikam. 5 Kaya naisip ko a mágdipalongo dálla hina u kákkapatkákka tam bagu hikán tánni mehanda de u tulung a inpananto moy. Tánni konna hod ketan a magaan tu pággisipan moy u pángngatád moy bakán a sapilitan. 6 Tandaan moy iye: u magmula ti badit ay mag-ane labe ti badit, sakay u magmula ti makpal ay mág-ani labe ti makpal. 7 U balang essa ay dapat mangatád ayun tu kagustuwan na sakay tehhod a kasayaan bakán a napilitan la, dipo mahal nu Diyos u mangatád ti kusa a te kasayaan. 8 Sakay kaya kam a pasaganaán nu Diyos tu atanan a bagay a higit pa tu kailangan moy hide. Para tu atanan a panahun ay magin sapat kam tu atanan a bagay, tánni tehhod kam a metulung tu te kailangan hide. 9 Konna tu kinagi nu Kasulatan: “ Siya u mángngatád tu mágkahirap hide; Awan ti kahád u kabaitan na.” 10 U Diyos a mangatád ti bine tu mágmula sakay makan ay siya be u mangatád sakay mangpasagana tu atanan a kao moy para maslalo kampa a makatulung tu agum. 11 Pasaganaán nakam tu atanan a bagay para lalu kam a makatulung tu agum. Tu pamamag-itan moy ay kumakpal u magpasalamat tu Diyos dipo tu tulung moy a iyangay ko nide. 12 U káttulung moy tu kákkapatkákka hide ay bakán la a pángsuporta tu pangangailangan de, nan magin dahilan pa nu awan ti kahád a págpasalamat de tu Diyos. 13 U pángngatád moy ay mangpatunay nide a tapat moy a sinunud u Maganda a Baheta tungkul ni Cristo. Dipo hina, magpure hide tu Diyos. 14 Kaya buo a págmahal di kam a idáddasal, dipo tu dakila a kaluub nu Diyos nikam. 15 Salamat tu Diyos dipo tu kaluub na a awan ti kapareho!
101 Nadid, hikán ti Pablo a u kagi nu agum a mapagpakumbaba tu atubang moy pero matapang ni adeyo, mákkekakagbiyák nikam alang-alang tu kapakumbabaan sakay kabaitan ni Cristo. 2 Ipákpágguhon ko nikam a dyanák moy pilitán a magupos ti masaket káddemát ko hina. Dipo handaák a umatubang sakay pagupusan u tolay a nagkagi nikam a makamundu kan u kákkabiyag me. 3 Dipo maski ni tolay kami la ay awan kame mákpaglaban ayun tu pámmalakad ni munduway. 4 Dipo u armas me ay bakán a pangmundu nan u kapangyariyan nu Diyos a makapangsida tu kumalaban hide nikuna sidaán me u liwat a katuwiran. 5 Sidaán me u bawat katuwiran a mapagmataas a manghadlang tu pángtengge nu tolay tu Diyos, sakay pasukuwán me u atanan a áisipán de hide tánni sumunud hide ni Cristo. 6 Ni matukuyan mi dán a masássunudán kam, handa kame dán magparusa tu atanan a awan sumássunud. 7 U problema nikam ay u panluwas la u áelingan moy. Tehhod hina a tolay a magkagi a hide kan ay tagapagserbi ni Cristo, ni konna hod ay dapat dibe a isipán a maski hikame ay hed ni Cristo. 8 Dipo maski susubra dán u págmadakál ko tu kapangyariyan a inyatád nu Diyos nikán ay awanák masanike dipo iye ay pángpasibát tu pánnampalataya moy bakán a para tu kákkepahamak moy. 9 Dyan moy isipán a pangpakanteng la u sulat ko nikam. 10 Dipo kagi nu agum ay,“Tu sulat la siya a matapang; pero tu harapan ay awan ti magimet.” 11 Dapat a matukuyan ni nagkagiyán iye a tolay a ni ánya u insulat me nadid a adeyo kame, ay itod labe u gimitán me ni kaharap moy kame dán. 12 Awan ko gusto a ibilang oni ipareho u sadile ko tu agum a magmadakál tu sadile de. Awan ti tukoy i tolayan ina hide! Dipo u sadile dila u ginimet de a sukatan sakay parisan. 13 Pero awan kame lummampas tu kahád a inyatád nu Diyos nikame, u tarabaho a inlaan na nikame, kaguman dán u pángngaral me nikam. 14 Bakán a essa a págmadakál ni kagiyán me a hikam u nagin bunga nu gawain me dipo ina u tatahoden. Awan beman hikame u dipalongo a immangay hina nikam, a tawed u Maganda a Baheta tungkul ni Cristo? 15 Awan me ipagmadakál u nagpagudan nu agum. Nan asaan me a tu káttibay nu pánnampalataya moy, ay lumawak palla u gawain me nikam, pero awan kame lummampas tu impagimet nu Diyos nikame. 16 Tánni ipangaral me u Maganda a Baheta tu banuwan hide tu palebut moy a awan padla ti nagtoldu. Dipo umád me a angkinán u nagpagudan nu agum. 17 Konna tu kinagi tu Kasulatan, “Ni gusto a magmadakál nu deya man, u Panginoon u ipagmadakál na.” 18 U parangalan nu Diyos ay u tolay a karapat-dapat tu kaluuban na bakán a u mánglangkaw tu sadile na.
111 Nadid, pagpasensiyaanák moy ni magupusák a kumán a tolay a awan ti tukoy. Sabagay páppasensiyaannák moy labe. 2 Dakál u págmalasakit ko nikam konna tu págmalasakit nu Diyos. Konna kam tu essa a malinis a madiket a ingkasundu ko tu essa a lállake, ni Cristo. 3 Pero mabalisaák baka malasun u isip moy sakay meadeyo kam tu tapat sakay malinis a pánnalig ni Cristo, konna ni Eva a nalinlang nu biklat. 4 Dipo masaya kam a mangtanggap tu maskin deya a dumemát sakay mangaral ti iba a Jesus kesa tu impangaral me. Tinanggap moy u ispirito sakay adal a iba tu itáttoldu me nikam. 5 Tu palagay ko be ay awanák medimodyan ti mágkalalakiyan ina hide a apostol. 6 Maski ni awanák malalake tu pággupos, ay awanák be kinulang ti karunungan. Tu atanan a pagkakataun ay pinatunayan me iye nikam. 7 Awanák nák-aged ti upa nikuna impangaral ko nikam u Maganda a Baheta. Nagpakababaák tánni melangkaw kam. Makagi beman a kasalanan ko iye? 8 Iba a simbaan u mággaatáddán tu kailangan ko hide nikuna magserbiyák nikam; kumán ko hide a pakán takawan para la matulungan kam. 9 Sakay nikuna nagkulangák hina ay awanák nakadágge maskin deya man nikam dipo tinulunganák nu kákkapatkákka hide ti Macedonia. Sapul pa ti sapul ay iniwasan ko dán a makadággi nikam ti anya man a paraan sakay ina u gimitán ko hanggan-hanggan. 10 Mentaras a he nikan u tatahoden tungkul ni Cristo, ay awan ko iyemang i págmadakál kuway a iye maski ni hádya ti Acaya. 11 Bakin ginimet ko iye? Dipo beman a awan takam mahal? Tukoy nu Diyos, a mahal takam a tahod! 12 Sakay tulos-tulos ko a gimitán u gággimitán ko nadid tánni awan magkahod ti rason u mágbabahetaán hide a u pagserbi de ay konna tu gággimitán me. 13 Dipo iye hide a tolay ay bakán a tunay a apostol nan makándayaán la sakay magkukunware a apostol ni Cristo. 14 Sakay awan iye págtakaan! Dipo maski ti Satanas ay maare a magkunware a anghel nu Diyos. 15 Kaya awan pagtakaan a magkunware a alipin nu katuwiran u tagapagserbi hide ni Satanas. Kaya dumemát u aldew a maparusaan hide ayun tu atanan nu ginimet de hide. 16 Huwayán ko: dyan moy isipán a awanák ti tukoy. Pero ni konna hod u pangakala moy ay tanggapán ku dán tánni makapagmadakállák be a konna tu essa awan ti tukoy. 17 U kákkagiyán ko a págmadakál ay bakán a gábwat tu Panginoon nan págmadakál nu tolay a awan ti tukoy. 18 Nadid, dipo makpal u magmadakál tungkul tu bagay hide a makamundu, hikán be ay dapat a magmadakál. 19 Dipo págtatiyagaan moy u awan hide ti tukoy, palibhasa a mágkalalaki kam. 20 U tatahoden, págtatiisan moy la a alipinán dikam, maski ni lokuwán dikamon, áagiwan ti kayamanan, badit-baditán dikam sakay ipasanike ay tiisán moy pade hide! 21 Makasani-sanike man, aminán ko a mahinaák ngane dipo awan ko kaya a gimitán ina! Pero ni tehhod a magmadakál ay makapagmadakállák be maski ni kumánnák a essa a awan ti tukoy. 22 Ipagmadakál di beman a Judio hide, oni Israelita hide, sakay kaguman tu lahe ni Abraham? Hikán be. 23 Tukoy ko a kumánnák dán a essa a magaheng, pero ni kagiyán de a tagapagserbi hide ni Cristo, mas malalakeyák a tagapagserbi ni Cristo nan hide. Susubra u págpagud ko nan hide; sangan a besesák a nepireso, nabálbág sakay pirme a te áng-áng ti kamatayan. 24 Pumenlimmaák a makatanggap ti tállo a pulo ay ti siyam a latigu a gábwat tu Judio hide. 25 Pumentállo ko a nadanas u bálbág nu Romano hide, pumensan a binatikal. Pumentállo a mehombak u barko a sássakayan ko, saldiwák sakay sagibi a palatak-latak tu diget. 26 Tu madalas ko a págbiyahe ay nadanas ko u iba-iba a delikadu a kalagayan: tu dilikadu a dinom, tu mágbabano hide, tu kalugar ko hide a Judio sakay tu Hentil hide. Tu dilikadu hide a banuwan, paparang, tu diget, sakay tu tolay hide a magkukunware a mánnampalataya. 27 Nadanas ko be u matindi a hirap sakay pagud, pirme a magpuyat, matindi a aláp sakay uwaw. Nagdanasák ti dágnen dipo awanák ti mealikábkáb. 28 Maliban tu agum pa a karanasan a awan ko nabanggit, áisipán ko pa aldew-aldew u mánnampalataya hide. 29 Ni tehhod a manghina ay karamayák de; sakay ni tehhod a nagkasala, grabi u pághirap ni puso kuwáy. 30 Ni magmadakállák ay mas maganda pa ni ipagmadakál ko u kahinaan ko hide. 31 Awanák magbule-bule. Tukoy ina nu Diyos sakay Ama nu Panginoon a ti Jesus. Puriyán u ngahan na a awan ti kahád. 32 Nikuna hedák ti Damasco ay pinabantay nu gubernador a sakup ni Hare Aretas u pintuan nu banuwan tánni ipadakáppák na. 33 Pero inyasákkák nu kaguman ko hide tu kumán a balulang sakay intostosák de tu dilupot nu pader kaya nakaginanák.
121 Nadid, dipo kailangan ko a mágmadakál, maski tukoy ko a awanák ti pakinabang tu pággimet ti iye, ay itulos-tulos ko. U kagiyán ko nadid ay u pangitain sakay mensahe hide a gábwat tu Panginoon. 2 - 3 Tehhodák a kilala a essa a Kristiyano a neangay tu katállo a langet, sapulo ay ti áppat dán a taon u nakalipas. Awan ko la tukoy ni pangitain itod oni tunay a nangyare, u Diyos la u makatukoy. 4 Sakay nakasanigák hod ti bagay hide a awan kaya a mepaliwanag sakay awan maare a kagiyán tu maskin deya. 5 Mepágmadakál ko i karanasan kuwan iye. pero ni hikán la ay awanák ti mepagmadakál, maliban tu kahinaan ko hide. 6 Ni magmadakállák man ay bakánnák a kumán a awan ti tukoy, dipo tatahoden u kagiyán ko. Pero magpugáddák la ta umád ko a magisip u tolay hide a masmataasák kasera tu ketan de a ginimet ko sakay tu nasaneg de a págtoldu ko. 7 Para awan ko mehambug u makataka-taka a mensahe nu Diyos nikán, áy inatáddinák na ti kahirapan tu bággi ko a kumán a saet tu pilas ko. Pinakultaden na u essa a utusan ni Satanas a nagpahirap nikán, tán para áwanák magmadakál. 8 Tállo ko a beses a indáddasal tu Panginoon a ibutan na iye pero, 9 kinagi na nikán, “U tulung ko ay sapat tu atanan a kailangan mo; mas lalu a mehayag u kapangyariyan ko ni mahina ka.” Kaya mas masayaák a ipagmadakál u kahinaan ko tánni pabegsákkánnák nu kapangyariyan ni Cristo. 10 Dipo ni Cristo ay awan nikán ti halaga ni mahinaák, insultuwán, pahirapan, usigán, sestiyán, sakay magtiis. Dipo ni nikanák a mahina ay sakaák be a pabegsákkán nu Diyos. 11 Kumánnák a essa a tolay a awan ti tukoy dipo tu pághambug ko, pero hikam u nángtoglad nikán a manggimet ti konna hina. Hikam nakwa u dapat a mangpure nikán, dipo maski awanák ti kabuluhan, awanák be medimodyan ti mágkalalakiyan ina hide a apostol kan. 12 Buo ko a tiyaga a pinatunayan nikam a hikán ay tunay a apostol tu pamamag-itan nu makataka-taka hide sakay u agum pa a tanda. 13 Anya beman u lamang nikam nu agum a mánnampalataya? Awan, maliban tu awan ko pángngaged nikam tu maskin ánya. Patawadánnák moy ni essa itod a pagkukulang ko. 14 Handaák dán tu katállo ko a káangay hina pero konna tu date awanák makadágge nikam. Hikam u kailangan ko, bakán a u ari-arian moy. U dáddakál hide u dapat a magipun para tu anak de hide, bakán a u anák de hide u mag-ipun para tu dáddakál de. 15 Masaayaák maski ni iyatád ko u atanan a hod nikán sakay maski ni iyalay ko u biyag ko para tu kapiyyaan moy. Ni minahal takam ti husto, bakin awanák moy mamahal ti konna hod? 16 Maski tukoy moy a awanák nakadággi maskin deya nikam, kinagi pade nu agum nikam a mautákkák sakay dáddayaán takam la. 17 Bakin? Pinagsamantalaan ku beman u kabaitan moy tu pamamag-itan nu pinaangay ko hina hide? 18 Nákpágguhunák ni Tito a umangay hina sakay pinákkuyog ko nikuna u essa tam a kapatkákka. Dinaya kam beman ni Tito? Awan! Dipo eessa a Ispirito u sássunudán me sakay eessa u layunin me. 19 Akala moy beman ay isuhog ko u sadile ko? Awan! Mahal me hide a kákkapatkákka, kagiyán ko nikam nadid tu atubang nu Diyos sakay bilang alipin ni Cristo, a atanan nu gággimitán ko ay para bumegsák u pánnampalataya moy. 20 Dipo mággaisipánnák a bakay tu káangay ko hina ay te ketanák a awan ko gusto nikam sakay te ketan kam be a awan moy gusto nikán. Bakay u medemáttan ko ay dimaan, seniyan, iyamután, makasadile, págsidaan, metmetan, pághambug, sakay kaguluwan. 21 Mággaisipánnák a bakay káangay ko hina a huway ay mepasanikiyák tu atubang nu Diyos dipo nikam. Makay malungkuták ni tu káddemát ko hina, ay te sangan padi nikam a áwan palla nagsise to ginimet de a madukás. Lalu dán tu pángngibábbey sakay tu pángngilállake.
131 Nadid, iye u katállo ko a káangay hina nikam. Kinagi tu Kasulatan. “ U ánya man a kaso ay kailangan a tehhod a duwwa oni tállo a magtistigu.” 2 Gusto ko a huwayán a kagiyán tu nagkasala hide sakay tu agum pa a awan ti makaiwas tu disiplina ko. Kinagi ku dán iye nikuna kapenduwwa ko hina a káangay sakay huwayán ko iye nadid mentaras a awanák palla nakademát hina: 3 Gimitán ko iye tánni mapatunayan nikam a ti Cristo ay magupos tu pamamag-itan ko, dipo iye u áehyukán moy nikán. Awan siya mahina tu págdisiplina na nikam, nan makapangyariyan. 4 Dipo maski ni mahina siya nikuna ipako siya tu kudus, pero nabiyag siya tu kapangyariyan nu Diyos. Mahinaák be konna ni Cristo tu itod, pero dipo tu pákpagkaessa ko ni Cristo ay mabiyagák nadid tu kapangyariyan nu Diyos tánni mangaral nikam. 5 Suriyán moy u sadile moy tánni matukuyan moy talaga ni tehhod kam a pánnampalataya Cristo; purbaan moy sadile moye. Awan moy beman tukoy a katoy nikam ti Cristo Jesus? Maliban dálla ni awan kam tunay a mánnampalataya. 6 Umasaák nikam, a áisipán moy a tunayák a apostol ni Cristo. 7 Pero idáddasal ko tu Diyos, a nakwa ay awan kam mággimet ti madukás, bakán a para paluwasán a tamaák, nan para makagimet kam ti maganda maski ni lumitaw a liwaták. 8 Dipo awan me maare a kontraán u tatahoden; nan u gimitán mila ay u tatahoden. 9 Dipo masayaák ni mahinaák sakay hikam ay bumegsák. Kaya, u idáddasal ko ay tulos-tulos kam a lumagu. 10 Insulat ko iye hide a bagay mentras awanák palla hina, tánni káddemát ko ay awan ko dán kailangan a magpakatapang tu pánggamit tu kapangyariyan a inyatád nikán nu Panginoon. Iye a kapangyariyan ay inyatád na nikán para gamitán tu kapiyyaan moy, bakán a tu kasidaan moy. 11 Hanggan dálla he, kákkapatkákka, paalam dán nikam. Sikapán moy a lumagu kam sakay sunudán moy u payo ko hide; magkaessa kam, sakay mabiyag a tehhod a kapayapaan. Ni konna hod, u Diyos nu págmahal sakay kapayapaan ay makaguman moy. 12 Magkumustaan kam bilang mátkaka ni Cristo. Kumustaán kam nu atanan a kákkapatkákka tam he. 13 Nákwa ay hod nikam u atanan a págpapala a gábwat tu Panginoon tam a ti Jesu-Cristo, u págmahal nu Diyos sakay tu pákpágkaessa nu Banal a Ispirito.