1 Timoteo
11 Gábwat iye a sulat nikán a ti Pablo a apostol ni Jesu-Cristo ayun tu utus nu Diyos a Tagapagligtas tam sakay ni Cristo Jesus a pag-asa tam. 2 Para ni Timoteo a tatahoden ko a anak ti pánnampalataya: Magkahod kam nakwa ti págpapala, kagbi, sakay ti kapayapaan a gábwat tu Diyos a Ama sakay ni Jesu-Cristo a Panginoon tam. 3 Konna tu impákpágguhon ko niko nikuna tamuwák ti Macedonia, a gusto ko a mágyan ka pala ti Efeso. Tánni paimangan u sangan a tolay a makántolduwan ti liwat. 4 Sakay dyan de sássayangan i odas diye tu bida hide sakay tu listaan hide nu ginagábwatan nu dadáddikál di hide. Ta paggábwatan la iye nu pamágtalu-talu sakay awan ti metulung tu kákkabiyag nu mánnampalataya hide tu Diyos. 5 U layunin ni bilinan iye ay magkahod kitam ti págmahal a gábwat tu malinis a puso, malinis a isip, sakay ti matapat a pánnampalataya. 6 Iye ay inadággan dán nu sangan a tolay kaya nágketawtaw dán hide tu awan hide ti halaga a uhunan. 7 Gusto de a magin tagapagtoldu nu Kautusan nu Diyos pero awan di la be maintendiyan u kákkagi-kagiyán de maski u bagay hide a ipilit de a itoldu. 8 Tukoy tam labe a maganda u Kautusan, ni gamitán iye ti tama a paraan. 9 Tukoy tam be a u Kautusan ay bakán a para tu mágkabait a tolay, nan para tu awan hide sumássunud tu batas sakay tu loko hide. U Kautusan be ay para tu awan hide tumenggi tu Diyos sakay tu makasalanan hide, tu awan hide masoh a magin banal sakay tu awan hide ti galang tu Diyos. U Kautusan ay para be tu mámmuno hide tu dáddikál de sakay tu agum pa a mágbabonu hide, 10 tu masássohán hide ti mahalay a biyag. Sakay tu masoh tu kapareho na a lállake, tu mággalap hide ti tolay, tu mágkabule hide sakay tu tumistigu hide ti kakabuliyan. U Kautusan ay nedátton para tu atanan a mangkontara tu tama a adal. 11 Iye a adal ay neayun tu Maganda a Baheta a inyintrega nikán nu dakila sakay mapagpala a Diyos. 12 Magpasalamaták ni Jesu-Cristo a Panginoon tam, a nangatád nikán ti begsák kaya magimet ko iye. Dipo imbilangák na a karapat-dapat a tagapagserbi na. 13 Maski tu itod ay pinagupusan ko ti madukás u ngahan na sakay pináppahirapan ko siya ay kinagbiyanák padi nu Diyos dipo awan ko tukoy u gagamitán ko nikuna awanák palla ti pánnampalataya nikuna. 14 Sakay imbuhus nu Panginoon nikán u masagana na a págpapala, pate u pánnampalataya sakay págmahal a katoy nikitam dipo tu pákpagkaessa tam ni Jesu-Cristo. 15 Tatahoden iye a pahayag kaya dapat a paniwalaan nu atanan: Dimmemát ti lutaáy ti Jesu-Cristo para iligtas u makasalanan hide. Sakay hikán u pinakamadukás tu atanan. 16 Pero maski konna hod u kalagayan ko ay kinagbiyanák nu Diyos tánni ipeta ni Cristo u awan masukat a pasensiya na nikán. Sakay magin halimbawa tu manalig hide nikuna a atádden na ti biyag a awan ti kahád. 17 Nadid, U Diyos a Hare a awan ti kahad, awan ti kamatayan, awan ketan sakay maggeessa a Diyos siya u puriyán tam sakay parangalan hanggan-hanggan Amen! 18 Anak ko a Timoteo, iyintrega ko niko i bagayan iye ayun tu nehula dán tungkul niko. Tánni tu pangtupad mo ti hidenye ay magkahod ka ti tapang a umatubang tu kumontara hide tu tama a toldu, 19 sakay nakwa ay lagi a mabegsak u pannampalataya mo sakay malinis u kansensiya mo. Te sangan a tolay a awan sumunud tu konsensiya de kaya u pánnampalataya de ay nasida. 20 Kabilang nide di Himeneo sakay ti Alejandro; kaya pinabayan ko dán hide tu kapangyariyan ni Satanas tánni matolduwan hide a umimang a magupos ti kontara tu Diyos.
21 Nadid, u pinakadipalongo tu atanan a ipákpágguhon ko nikam ay ipagdasal moy u atanan a tolay. Iagum moy hide tu agidán moy hide, pákkekagbi, sakay págpasalamat. 2 Ipagdasal moy be u hare hide sakay tu atanan a te katungkulan tánni magkahod kitam ti tahimik a biyag sakay mapayapa, kagalang-galang sakay maka-Diyos. 3 Iye u maganda sakay makasaya tu Diyos a Tagapagligtas tam. 4 Gugustu na a maligtas u atanan a tolay sakay makatukoy tu tatahoden, 5 a tehhod a eessa a Diyos sakay tehhod be a eessa a mángtaknág tu tolay tu Diyos, u tolay a ti Jesu-Cristo. 6 Siya u náng-atád tu sadile na a biyag tánni tubusán u atanan a tolay tu kasalanan de hide. Iye ay nangyare tu tama a panahun a intakda nu Diyos a nangpatunay tu kagustuwan nu Diyos a maligtas u atanan a tolay. 7 Dipo he ay napiliyák a tagapagbaheta, apostol, sakay tagapagtoldu ti pánnampalataya sakay tu tatahoden tu Hentil hide. Tatahoden i kagiyán kuwáy, awanák magbule-bule. 8 Kaya gusto ko a manalangin u lállake hide tu bawat pággipun-ipun, sakay ni magdasal hide ay maari de a iyontok u kamat de bilang patunay a malinis u paggisipan de sakay awan ti hinanakit oni pamágdadema. 9 Kagiyan kube nikam a u babbey hide ay dapat awan magbadu ti makatokso nan u dapat ay magbadu hide ti marangal. Dapat dibe a iwasan u subra-subra a paggayus ti buuk sakay pagsulot ti ginto oni perlas, sakay mágkamahal a badu. 10 Nan u mágkaganda la a gimet u nebagay tu bábbey hide a maki-Diyos. 11 U bábbey hide ay kailangan a tahimik a magadal sakay pasakup, tu panahun nu págtoldu. 12 Awan ko hide pakultadan a magtoldu oni pagdipalonguwan u lallake hide nan dapat hide a tumahimik. 13 Dipo ti Adan u purumero a nilalang bagu ti Eva. 14 Sakay bakán a ti Adan u nalinlang. Nan u babbey u nalinlang sakay nagkasala. 15 Pero maligtas u bábbey tu pággenak na ni magtulos-tulos siya tu pánnampalataya na, págmahal, pagin banal sakay malinis a kákkabiyag.
31 Nadid, tatahoden i kakagiyanan iye: Nitideyaman u masoh a magin pinuno tu simbaan ay maganda u hangarin na dipo mahalaga i tungkulinan ina. 2 Pero u essa a pinuno ay kailangan a awan ti kapintasan, essa la u kabanga na, kaya a magpugád tu sadile na sakay awan pabigla-bigla. Kailangan a kagalang-galang, mágpatulos tu bilay na, sakay malalake a magtoldu. 3 Sakay awan siya máglalasingán, awan mágbálbág nan masássohán ti kapayapaan, awan mákpágdadima sakay awan be masássohán ti pilak. 4 U sadile na a pamilya ay kailangan a mapangasiwaan na ti maganda. U anak na hide ay dapat a gumalang sakay sumunud nikuna. 5 Dipo ni awan na kaya a mapangasiwaan u sadile na a pamilya, kodya na a mapangasiwaan u simbaan nu Diyos? 6 Kailangan a nalay dán siya ti pánnampalataya, dipo ni awan ay bakay magin hambug siya sakay maparusaan a konna ni Satanas. 7 Kailangan be a igaggalang siya nu awan hide ti pánnampalataya tánni awan siya mamansaan sakay tulos a maekhutan ni Satanas. 8 Konna be tu dyakuno hide tu simbaan, kailangan ay magin kagalang-galang hide, awan mabule, awan máglalasing, sakay awan masássohán ti pilak. 9 Kailangan a matapat hide tu pánnampalataya a impakapos-pos nikitam nu Diyos sakay tehhod a malinis a isip. 10 Sakay kailangan pa hide a purbaan. Sakay ni mapatunayan a karapat-dapat hide, maari dán hide a idátton, bilang dyakuno. 11 U kákkabanga di be hide ay kailangan a mágkatino, awan hide mametmet nan mapagpugád ti sadile sakay matapat tu atanan a bagay. 12 Kailangan be a essa la u kabanga nu dyakuno sakay mapangasiwaan na ti maganda u pamilya de sakay maayus u pagdisiplina na tu anak na. 13 Dipo u dyakuno nu pinuno tu simbaan a matapat tu tungkulin na ay igalang nu atanan. Sakay buo a tiwala de a ipahayag u pánnampalataya de ni Jesu-Cristo. 14 Umasaák a awan magmalay ay magketa kitamon. Pero insulat ku padi i bilinan hidenye niko ta 15 ni mara awanák makademát a pagdaka ay tukoy mu dán u dapat a ugale nu tolay hide a kabilang dan tu pamilya nu biyag a Diyos. Dipo intiwala nikitam u tatahoden tungkul ni Cristo a kuman a hikitam u adigi sakay pundasyon nu tatahoden. 16 Tunay ngane a maganda u impakapos-pos nu Diyos nikitam a tama a pannampalataya: Ti Jesus ay nehayag nikitam nikuna nagin tolay siya, sakay pinatunayan nu Banal a Ispirito a siya ay matuwid sakay netan nu anghel hide. Sakay nadid ay nepahayag dan tu buo a mundu u tungkul nikuna sakay tehhod a simmampalataya. Sakay siya ay inyontok ti langet ni hadya siya a maghare.
41 Nadid, maliwanag a kinagi iye nu Ispirito nu Diyos: Tu dimodyan a aldew ay adággan nu agum u pánnampalataya de. Sunudán de u mágkadaya hide a ispirito sakay u itáttoldu nu makadimonyo hide. 2 I tolduwan iye ay ingkalat nu tolay hide a magkabule kaya immigát dán u isip de sakay awan dán makabate. 3 Ibawal de u pákkabanga sakay u agum a kalase a makan. Makan a u Diyos la u nanglalang a dapat nakwa a kanán ate pagpasalamat lalu dan nikitam a mánnampalataya hide sakay nakatukoy tu tatahoden. 4 Dipo atanan a linalang nu Diyos ay maganda, awan ti dapat a tanggiyan nan tanggapán a tehhod a págpasalamat. 5 Dipo atanan nu makan ay nebilang a malinis dipo itod u kinagi tu Upos nu Diyos sakay dipo dambe tu págdasal tam. 6 Ni itoldu mo tu kákkapatkákka hide iye hide a bilin ay mahusay ka a tagapagserbi ni Cristo Jesus. Sakay itod u patunay a natolduwan ka tu tatahoden hide tungkul tu pannampalataya sakay tu pamamag-itan nu maganda a adal a sássunudán mo. 7 Dyan mo pagsayangan ti odas u awan hide ti kuwenta a bida sakay u awan tatahoden a istorya; nan sanayan mo u sadile mo a mabiyag ate kabanalan. 8 Dipo u págsanay tu bággi ay tehhod a pakinabang, pero u págsanay tu kabanalan ay mas dakál u pakinabang, bakán la tu biyag nadid nan pate tu biyag a pademát. 9 Tatahoden i kinakkagi kuwan iye kaya dapat a paniwalaan nu atanan. 10 Dipo he, kaya kitam a magsumikap sakay magtiyaga dipo u pag-asa tam ay katoy tu biyag a Diyos, u Tagapagligtas nu atanan a tolay, lalu dán tu atanan a mánnampalataya. 11 Itoldu mo sakay ipatupad i atananan iye. 12 Dyan mo pabayan a imemenos kala nu agum dipo ulito ka palla. Nan magin halimbawa ka tu mánnampalataya hide: tu pággupos, ugale, págmahal, pánnampalataya sakay malinis a kákkabiyag. 13 Mentaras a awanák palla hina ay basaán mo u Kasulatan tu atubang nu katolayan sakay itulos mo u pangngaral mo nide sakay palagi mo hide a tolduwan. 14 Dyan mo páppabayan u inyatád niko nu Banal a Ispirito a kakayanan a inpagkatiwala na niko nikuna a itupo niko nu pinuno hide nu simbaan u kama-kamát de hide iye u kinagi nu prupeta a gimitan mo. 15 Igimet mo iye hide a tungkulin sakay ilaan mo he u sadile mo, tánni ketan nu atanan u kállagu mo. 16 Bantayan mo u sadile mo sakay u págtoldu mo. Magtiyaga ka a magtulos-tulos a gimitán iye hide a bagay, tánni maligtas ka sakay u atanan nu nágsaneg niko.
51 Nadid, u mágkatanda hide niko a lállake ay dyan mo págngállan nan pákpágguhunan mo hide a konna tu pángnguhon mo nama mo. Ibilang mo a wáwwadi mo u áolito hide, 2 sakay ituring mo a ina u mágkatanda hide a bábbey. Mákpággagum ka tu mámmadiket hide a tehhod a kalinisan, ibilang mo hide a konna tu wáwwadi mo. 3 Igalang moy sakay tulungan u bilo hide a bábbey a awan dán ti maasaan. 4 Pero ni tehhod a anak oni apo u bilo a bábbey ay hide dapat u purumero a magserbi nikuna. Bilang gante tu dáddakál de hide, sa iye u kasayaan nu Diyos. 5 U tatahoden a bilo a bábbey ay u mággeessa dálla ti kákkabiyag sakay u Diyos dálla u áasaan na, kaya makándasalán siya aldew ay ti gibi. 6 Pero ni u bilo ay magbabalang ti kákkabiyag ay mebilang dán siya a patay maski biyag palla siya. 7 Ipatupad mo nide iye hide a utus tánni awan ti mepintas nide u agum. 8 Ni deya man u awan mangpospos tu kákkapatkákka na, lalu dán tu pamilya na ay immadág ti pánnampalataya, dipo mas madukás pa u ugali na nan tu awan ti pánnampalataya. 9 U isale mo tu listaan nu bilo hide a bábbey a dapat a tulungan ay kailangan a awan kumulang ti ánnám a pulu a taon u idad na sakay pumensan la a nákkabanga. 10 Sakay kailangan a kilala siya dipo tu mágkaganda na a gimet. Napadakál na u anak na ti maganda a paraan, sakay masaya siya a mágpatulos ti bilay na. Nagserbiyan na u pinile hide nu Diyos, tumáttulung tu tehhod a kailangan, sakay inlaan na u biyag na tu pággimet ti maganda. 11 Dyan mo páklista u anak palla a bilo, dipo kákkasoh de a mákkabanga a huway ay mapabayan de u págserbi de tu Diyos. 12 Ni magkakonna hod ay te panagutan hide ta sinida de u pananto de ni Cristo. 13 Bakán la a itod nan magin tamad pa hide sakay mamilaybilay a mákpággauhon. Bakán la hide a tamad nan magin mametmet pa sakay mák-alam tu biyag nu agum sakay maggistorya tu awan dapat a iyistorya. 14 Kaya para nikán ay mas maganda pa ni mákkabanga hide a huway sakay magenak hide. Sakay alagaan u sadile de a pamilya tánni awan ti makagi a madukas u kumontara hide nikitam. 15 Kinagi ko iye dipo tehhod dán a sangan a bilo a netawtaw sakay naakit ni Satanas. 16 Ni u bábbey hide a mánnampalataya ay tehhod a kákkapatkákka a bilo ay kailangan hide i mangpospusay. Tánni u bilo hide a talaga a awan ti maasaan u pospusán dálla nu simbaan. 17 U pinuno hide a mangasiwa ti mahusay ay dapat la a tumanggap ti paggalang sakay madagdagen u suweldu de lalu dán u mángngaral hide sakay mágtoldu tu upos nu Diyos. 18 Dipo nakasulat tu Kasulatan, ‘Dyan mo busalan u baka mentaras a pagággik mo, nan pabayan mo a kuman a tagpensan.’Nakasulat be a, ‘U magtrabaho ay dapat upaan.’ 19 Sakay dyan mo paniwalaan u reklamo kontara tu pinuno ni awan ti mangtistigu a duwwa oni tállo. 20 Pero nite pinuno a tulos-tulos a mággagimitán ti kasalanan ay pagkagiyan mo tu atubang nu kakpalan, tánni meántingan u agum a maggimet ti kasalanan. 21 Iyutus ko niko tu atubang nu Diyos, sakay ni Jesu-Cristo sakay tu anghel na hide a ipatupad mo iye a awan ti panigan. 22 Dyan mo basta itupo i kamát muwe tu maskin deya la para magin pinuno, nan tukuyán mo pa u pagkatolay na. Magingat ka a awan mesale tu kasalanan nu agum. Magtulos-tulos ka a awan ti dangát. 23 Bakán a puro la a dinom i inumán muway: nan uminom ka be ti tágsabadit a alak dipo ti tiyan muwe a lagi a magsaket. 24 Tehhod a tolay a u kasalanan de ay hayag dán bagu a mahatulan, pero u kasalanan nu agum ay tu dimodyan dán a mehayag. 25 Konna labe hod u agum a mágkaganda a gimet ay alisto a ketan; pero ni awan man mapansin a agad ay ketan labe iye dipo awan iye metagu ti atakdug a panahun.
61 Nadid, dapat a igalang nu alipin hide u amo de hide tánni awan mapintasan u ngahan nu Diyos sakay u itattoldu tam. 2 Ni u amo nu alipin ay mánnampalataya be ay dapat awan mawanan u alipin ti pággalang ta matkaka labe hide ti pánnampalataya. Nan dapat di pa ngane a husayán a mágserbi dipo u pagserbiyan de ay kapareho de ti pánnampalataya sakay mahal nu Diyos. Itoldu mo sakay ipasunud i bagayan iye hide. 3 Ni deya man u magtoldu ti iba a adal, sakay awan nakaayun tu Upos nu Panginoon tam a ti Jesu-Cristo sakay tu adal hide a magresulta tu makidiyos a kakkabiyag, 4 ay maghambug la siya pero i tahoday ay awan ti tukoy. Talaga a ugali na dán i manusutay, sakay mákpagtábbegan tungkul tu kahulugan nu upos hide a magbunga la ti sállapan, kontraan, sestiyan, sakay sihiyan. 5 Gugusto na be a mákpágtabbegan tu tolay hide a madukás ti pággisipan sakay umád tu tatahoden. U akala de ay dilan u pagsunud tu Diyos para yumaman. 6 Tahod ngane dakál pakinabangay tu pannampalataya tu Diyos, basta tukoy la nu tolay a makontento tu kalagayan na. 7 Dipo awan kitam ti tawed tu kákkeenak tam ti munduwáy, kaya awan kitam be ti matawed kákkatay tam. 8 Kaya ngani, ni tehhod kitamon a makan sakay mesulot ay dapat kitamon a makontento. 9 Pero u masoh hide a yumaman tu maski ánya man a paraan ay matápduk tu tokso sakay maekhutan hide nu mágkadukás de a kagustuwan a mángpalulung nide tu kamatayan sakay kapahamakan. 10 Dipo u págmahal ti pilak ay paggábwatan nu atanan a madukás. Inadággan dán nu agum u pánnampalataya de dipo tu soh de a magkahod ti makpal a pilak pero garabi a kalungkutan u inyatad ni iye nide. 11 Pero hiko, Timoteo, bilang tagapagserbi nu Diyos, ay umadeyo ka ti iye hide a bagay. Pilitán mo a mabiyag ti matuwid, te kabanalan, pánnampalataya, págmahal, págtiyaga, sakay kahinahunan. 12 Gimitán mo atanan a makaya mo tu pangpakapos-pos mo tu pánnampalataya mo. Sakay palagi mo a isipan a kaguman ka tu biyag a awan ti kahád dipo ina u nangdulawan niko nu Diyos. Sakay i pannampalataya muwan ina ni Cristo u impakapospos mo tu atubang nu makpal a tistigu. 13 Tu ngahan nu Diyos a mangatád ti biyag tu atanan a bagay, sakay tu ngahan ni Cristo Jesus a nagpatunay tu atubang ni Poncio Pilato ay iyutus ko niko 14 a kailangan a sunudán mo a tehhod a katapatan u inyutus ko hide niko hanggan tu káddemát nu Panginoon a ti Jesu-Cristo. 15 U aldew nu káddemát na ay intakda dán nu Diyos a tagapagpala sakay makapangyariyan, Hare nu atanan a hare, sakay Panginoon nu atanan a panginoon. 16 Siya la u awan mata-matay, sakay mágyan tu demlag a awan maláttángngan. Awan ti tolay a naketa oni maketa nikuna. Kao na u karangalan sakay u awan ti katapusan a kapangyariyan. Amen. 17 Itoldu mo tu mágkayaman a dyan magmadakál sakay dyan umasa tu kayamanan a lumipas. Nan tu Diyos la a mángngatád tu atanan a bagay a ikasaya tam. 18 Itoldu mo nide a dapat a u maganda u gimitan de, para yumaman hide tu mágkaganda a gimet. Magin masaya hide a mangatád sakay handa a tumulung tu agum. 19 Ti konna hod ay makapagipun hide ti kayamanan ti langet a awan mawan para tu tamuwán, sakay magkahod hide ti tatahoden a biyag. 20 Timoteo, pakaingatan mo u nepagkatiwala niko. Sakay adeyuwan mo u awan hide ti pinagseserbiyan a uhunan a awan neayun tu kagustuwan nu Diyos, sakay u pángngatuwiran a liwat, a tu pangileng de ay karunungan. 21 Tehhod a tolay a simmunud hide tu liwat a karunungan kaya nelise dán hide tu pánnampalataya. Pagpalaán kam nakwa nu Diyos.