1 Tesalonica

¹ Hikán ti Pablo sakay kaguman ku he di Silas ay ti Timoteo a summulat nikam a mánnampalataya hide a taga-Tesalonica, sakay sakup nu Diyos a Ama sakay nu Panginoon a ti Jesu-Cristo. Magkahod kam nakwa ti págpapala sakay kapayapaan a gábwat tu Diyos. ² Pirme kame a magpasalamat tu Diyos dipo nikam a atanan sakay pirmi mikam a ipagdasal, ³ dipo kada magdasal kame tu Diyos a Ama tam ay maisip me u maganda moy a gimet a bunga nu pánnampalataya moy ni Jesu-Cristo. Sakay u pághirap moy dipo tu págmahal sakay tu págtággád moy dipo umasa kam a sumole u Panginoon tam a ti Jesu-Cristo. ⁴ Kákkapatkákka mi hide, tukoy me a mahal kam nu Diyos sakay pinili nakam a ipisan tu tolay hide a sakup na ⁵ Impakapos-pos me nikam u Maganda a Baheta a awan kame nagduwwa-duwwa, sakay bakán la a tu pággupos nan tu kapangyariyan nu Diyos sakay tu tulung nu Banal a Ispirito. Sakay netan moy ni kodya kame a nabiyag nikuna nákpágyan kami hina. Ginimet mi ina para tu kapiyaan moy. ⁶ U kakkabiyag me sakay u Panginoon tam a ti Jesu-Cristo u inaheg moy. Sakay nikuna a tanggapan moy u Maganda a Baheta ay nagdanas kam ti makpal a kahirapan, pero maski konna paman hod ay katoy padi nikam u kasayaan a inpagkaluub nu Banal a Ispirito. ⁷ Kanya nagin halimbawa kam tu kákkapatkákka tam ti Macedonia sakay ti Acaya. ⁸ Dipo tu maganda a halimbawa moy ay kimmalat u upos nu Panginoon ti Macedonia sakay ti Acaya. Maske u pánnampalataya moy tu Diyos ay nebaheta be tu atanan a lugar. Kanya ngani awan dán kailangan a magupos kame tungkul nikam. ⁹ Dipo hide dán a mismo u nágbaheta tu maganda moy a pángtanggap nikame. Sakay hide dán be u nágbaheta ni kodya moy a inadággen u pagsamba tu diyos-diyosan hide tánni sumunud tu tatahoden sakay biyag a Diyos. ¹⁰ Kinagi di pa a áuhayán moy dán u kássole ni Jesus a Anak nu Diyos a gábwat ti langet a biniyag nu Diyos a huway. Ti Jesu-Cristo u mángligtas nikitam tu pádemát a iyamut nu Diyos.

¹ Kákkapatkákka mi hide, hikamon u makatukoy a te pakinabang kam tu káangay me hina nikam. ² Tukoy moy be a pináppasakitan di kame sakay ináinsulto ti Filipos, pero maski ni makpal a hadlang ay inatádden kami pade nu Diyos ti begsák isip a ipakapospos nikam u Maganda a Baheta a gabwat nikuna. ³ U impakapospos me nikam ay awan kakabuliyan. Awan kame nagtoldu tánni lokuwán mikam la, oni pagustuwan u madukás a gimet. ⁴ Tinanggap kame nu Diyos sakay pinagkatiwalaan tu págpakapospos tu Maganda a Baheta. Inpakapospos me iye, bakán a para pasayaán u tolay hide nan u Diyos a makatukoy tu bawat puso tam. ⁵ Tukoy moy be a maski nikan ay awan kame naggamit ti makaakit a paggupos tanni maakit mikam. Sakay awan kame ti madukás a hangad tu págpakapospos me. U Diyos u tistigu me. ⁶ Awan me hinangad a puriyán moy kame oni puriyán nu agum a tolay. ⁷ Maski bilang apostol ni Cristo ay tehhod kame a karapatan a umasa ti konna hod pero awan mi iye ginimet. Nan nagin mabait kame nikam, a konna tu essa a ina a magalaga tu anak na hide. ⁸ Dipo grabi ti kadakál u págmahal me nikam ay inlaan mi dán u sadile me tu pángpakapospos me nikam tu Maganda a Baheta. Sakay bakán la a ina, nan iyalay mi pa u biyag me alang-alang nikam dipo mahal mikam a tahod. ⁹ Kákkapatkákka mi hide, siguradu a matandaan moy palla ni kodya kame a nagpagud a nagtrabaho aldew ay ti gibi tánni awan kami la makadágge nikam mentaras a ipakapospos me nikam u Maganda a Baheta a gábwat tu Diyos. ¹⁰ Hikam u tistigu me sakay u Diyos, a tapat kame sakay awan ti mepintas tu ugale me sakay maayus u pákpággagum me nikam a mánnampalataya hide. ¹¹ Tukoy moy dán be a nagin konna kame tu essa a ama tu balang essa nikam. ¹² Pinabegsák me u isip moy, pinagkagiyan mikam sakay nákkekagbi kame nikam a mabiyag kam ti tapat tu atubang nu Diyos. Dipo siya u nangpile nikam tánni masakup kam tu kaharian na sakay tu kaluwalhatian na. ¹³ Kaya ngane, pirme kame a magpasalamat tu Diyos, dipo nikuna a ipakapospos me nikam u Upos na, ay tinanggap moy iye dipo naintendiyan moy a tatahoden iye a Upos nu Diyos, bakan a upos nu tolay. Kaya ngane u kapangyariyan nu Upos na ay ketan tu maayus moy a kákkabiyag a mánnampalataya hide. ¹⁴ U nangyare nikam kákkapatkákka mi hide, ay konna tu nangyare tu gurupo nu mánnampalataya hide ni Cristo a mágyan ti Judea. Pinasakitan kam nu kabanuwan moy hide a konna tu taga-Judea hide pinasakitan hide nu kasa-Judio di labe hide. ¹⁵ U Judio hide u nangpabuno tu Panginoon a ti Jesu-Cristo sakay tu prupeta hide tu itod. Sakay hide be u nangpasaket nikame. Sasala nu Diyos u ugali de, sakay kadima hide nu atanan a tolay! ¹⁶ Pilitán di kame a pugáddan tánni awan me mepangaral u Maganda a Baheta nu kaligtasan tu Hentil hide. Naputát dán hide ti kasalanan, kaya nadid ay meangay dán nide u iyamut nu Diyos. ¹⁷ Nadid kákkapatkákka mi hide, maski sabadit la a panahun a neadeyo kame nikam ay grabi dan i ammaw miyay nikam, konna bi hod u pagkasoh me a ketan mikam a huway. Tatahoden a neadeyo kame nikam pero lagi mikam a aisipan. ¹⁸ Sakay tunay u pagkasoh me a makasole hina. Bakán la a pumensangan a beses a binalak ko a bumisita hina nikam. Pero pirme kame a páppugáddan ni Satanas. ¹⁹ Gugusto me a ketan mikam dipo hikam la u dahilan nu kasayaan me sakay hikam be u aasaan me para hikame ay maatadden ti gantimpala. Sakay u kurona a mepagmadakál me tu atubang nu Panginoon kássole na. ²⁰ On, hikam u karangalan sakay kasayaan me.

¹ Nikuna awan mi dán matággád u ammaw me nikam ay nagdisisyon kame a magwahak dálla ti Atenas. ² Sakay pinaangay mi hina nikam ti Timoteo a kapatkákka tam sakay kaguman me a tagapagserbi tu Diyos tu pángpakapospos tu Maganda a Baheta patungkul tu Panginoon tam a ti Cristo. Pinaangay me siya hina nikam tán pabegsákkán u isip moy sakay tán patibayan u pánnampalataya moy. ³ Tánni awan manghina u deyaman nikam dipo tu págpahirap di nikam. Tukoy tam labe a u hirap hide ay kaguman tu plano nu Diyos para nikitam. ⁴ Kinákkagi ku dán nikam, nikuna a katoy kami palla hina a talaga a magdanas kitam ti hirap. Kaya konna ngani hod nadid u mangyare konna tu tukoy moy dán. ⁵ Kaya ngane, nikuna a awanák dán makatiis ay nangutusák ti umangay hina tánni ilingán ni kumusta dán u pánnampalataya moy tu Panginoon. Mabalisaák bakay ni nalinlang kamon ni Satanas, ay ni mara konna hod i mangyariyay ay mawanan ti serbi u pángngaral me. ⁶ Nadid ay nagsole dán he ti Timoteo, maganda u inbaheta na tungkul tu pánnampalataya sakay págmahal moy. Sakay inbaheta na be nikame a pirme moy kame a maalaala sakay tunay u pagkasoh moy a metan kame. Konna tu pagkasoh me a metan mikam. ⁷ Dipo tu nabaheta me a matibay u pánnampalataya moy ni Cristo, kákkapatkákka, ay nasaya kame maski makpal kame a kabalisaan sakay kahirapan. ⁸ Gimmaganda u bábbatiyán me dipo tu pagtulos-tulos moy a pagin matatag ti pánnampalataya. ⁹ Kodya mi wád a mapasalamatan ti husto u Diyos dipo tu kasayaan a natanggap me dipo nikam? ¹⁰ Idáddasal me ti husto aldew ay ti gibi a nakwa ay magketa kitam a huway tánni madagdagen ni anyaman u kulang pa tu pánnampalataya moy. ¹¹ Nakwa ipakultad nu Diyos a Ama sakay nu Panginoon tam a ti Jesu-Cristo a makaangay kami hina. ¹² Palaguwan pa nakwa nu Panginoon u págmahalan moy tu balang essa sakay tu atanan a tolay, konna tu págmahal mi nikam. ¹³ Pabegsákkán na u isip moy tánni manatili kam a banal sakay awan ti kapintasan tu atubang nu Diyos tam a Ama hanggan tu káddemát a huway nu Panginoon tam a ti Jesus, kaguman u pinili na hide.

¹ Kaya ngani kákkapatkákka, essa pa a bagay u pákkekakagbi me nikam sakay ipayo tu ngahan nu Panginoon Jesus. Ipakpagguhon me nikam a mabiyag kam a ayun tu natukuyan moy nikame dipo ina u masaya tu Diyos. Konna ngani hod u kakkabiyag moy nadid pero maspagandaan moy pa. ² Tukoy moy dán be au toldu hide a inpáppakapospos me nikam ay gábwat tu Panginoon a ti Jesu-Cristo. ³ U gusto la nu Diyos ay magin banal kam sakay umadeyo tu atanan a klase a kadukássan. ⁴ Hikam a lallake hide dapat a magin banal sakay marangal u pákpággagum moy tu balang essa tu kakkabanga moy. ⁵ Diyan kam paalipin tu kagustuwan nu pilas konna tu gággimitán nu awan hide nakatukoy tu Diyos. ⁶ Ni sunudán moy iye a adal ay awan dán ti mangagew nikam tu kákkabanga nu deyaman a kapareho na a tolay, lalu dán tu kabanga nu essa a tolay a kapareho na a mánnampalataya tu Diyos. Inpangaral mi dán nikam tu itod, a parusaan nu Diyos u deyaman a manggimet ti iye a kadukassan. ⁷ Dinulaw kitam nu Diyos para mabiyag a tehhod a kabanalan bakán a tu kadukássan. ⁸ Kaya ni ti deya man u mangadi ti iye a adal ay bakán a tolay u inadiyan na nan u Diyos a náng-atád nikam tu Banal na a Ispirito. ⁹ Nadid, tungkul dámman tu págmahal para tu kákkapátkákka, awan kamon dapat a paalaalaan dipo intoldu dán nikam nu Diyos ni kodya kam a magmahalan. ¹⁰ Tukoy me a mahal moy dán u kákkapatkákka tam hide a taga-Macedonia. Pero konna paman hod ay mákkekakagbiyák padi nikam a dagdagan moy pa u págmahal moy nide. ¹¹ Pilitán moy a mabiyag ti tahimik sakay pospusán moy u sadili moy a gimet. Sakay magtarabaho kam tánni mabiyag kam, konna tu intoldu mi nikam. ¹² Ni ina i gimitán moyay ay irespeto kam nu awan hide mánnampalataya sakay awan kam umasa tu agum tu kákkabiyag moy. ¹³ Kákkapátkákka mi hide, gusto me a matukuyan moy ni ánya u mangyare tu mánnámpalataya hide a nagkatay dán, tánni awan kam maglungkut a konna tu tolay hide a awan ti pag-asa. ¹⁴ Maniwala kitam a natay ti Jesu-Cristo pero nabiyag siya a huway. Kaya maniwala kitam be a biyagan a huway nu Diyos u atanan a mánnampalataya a nágkatay dán, sakay ipisan na hide ni Jesu-Cristo kássole na. ¹⁵ Sa iye i adalay nu Panginoon a kákkagiyán mi nikam: hikitam a biyag palla ay awan mágdipalongo tu mánnampalataya hide a nágkatay dán a tumagbu tu Panginoon. ¹⁶ Ti aldiwan itod a kassidung nu Panginoon a gábwat ti langet, ay tehhod a masaneg u tolay hide a mabegsák a utus, a ipakhaw nu arkanghel, sakay u tánnog nu trumpeta nu Diyos. U nágkatay dán hide a mánnampalataya ni Cristo ay biyagán pa. ¹⁷ Sakay hikitam a biyag palla ay maipun tu panganurin kaguman u biniyag hide tánni tagbuwán u Panginoon tu panganurin. Tánni makaguman tam siya hanggan-hanggan. ¹⁸ Kaya ngani, pabegsákkán moy u isip nu bawat essa tu pamamag-itan ni adalan iye.

¹ Kákkapátkákka ko hide, awan ku dán kailangan a isulat pa nikam ni nikan a mangyare i bagayan hidenye. ² Dipo tukoy moy dán a u káddemát nu Panginoon ay konna tu káddemát nu mágtakaw ti gibi. ³ Kapag kagiyán nu tolay hide a,“Tehhod a kapayapaan sakay awan kitamon ti kabalisaan”ay hed hod a bigla a dumemát u parusa a konna tu biglaan a paggássok nu essa a mabuktet. Kaya awan hide makaiwas ti iye. ⁴ Pero awan kamon tu kadiklámman kákkapatkákka, kaya awan kamon mabigla ni dumemát dán u Aldew nu Pághatul a konna tu káddemát nu essa a mágtakaw. ⁵ Sakup kamon nu Diyos. Kaya mabiyag kamon a atanan a konna tu essa a katoy tu demlag, bakán a konna tu essa a katoy tu kadiklámman. ⁶ Kanya dapat kitam a pirme a lukag sakay nakahanda sakay malinaw ti pággisipan. Bakán a konna tu agum a tidug. ⁷ Awan beman sáktidug ni tolay ti gibi sakay ti gibi be hide a maglasing? ⁸ Pero hikitam a sakup dán nu demlag ay dapat kitamon a magisip ti maayus. U pannampalataya sakay pagmahal u kuman a pangsangga a Isulot tam. Sakay u pag-asa nu kaligtasan a gimitán nikitam nu Diyos u kuman a helmet a mang-ingat nikitam. ⁹ Awan kitam pinile nu Diyos para parusaan nan para iligtas na kitam tu pamamagitan nu Panginoon tam a ti Jesu Cristo. ¹⁰ Natay ti Jesu-Cristo para nikitam tánni maski natay kitamon oni biyag palla kássole na a huway ay mabiyag kitam a kaguman na. ¹¹ Kaya pabegsákkán moy u isip nu balang essa sakay magtulungan kam konna tu gággimitan moy nadid a panahun. ¹² Kákkapatkákka mi hide, mákkekagbi kame nikam a igalang moy u nagpagud hide nikam, a pinile nu Panginoon a mamahala sakay magtoldu nikam. ¹³ Igalang moy hide ti husto sakay pakamahalán dipo tu tarabaho de nikam. Mamággagum kam ti maayus sakay mapayapa. ¹⁴ Kákkapatkákka mi hide, ipákkekagbi mi nikam a pagkagiyan moy u tamad hide sakay pabegsákkán moy u isip nu mágkahina hide sakay tulungan moy hide. Pagtiyagaan moy u atanan a tolay. ¹⁵ Diyan kam gumante tu naggimet nikam ti madukás nan itulos-tulos moy la a maggimet ti maganda tu balang essa sakay tu atanan a tolay. ¹⁶ Pirme kam a magsaya. ¹⁷ Pirme kam a magdasal. ¹⁸ Sakay magpasalamat kam tu Diyos maski anya u mangyare. Dipo sa iye u kagustuwan nu Diyos a gimitan moy nadid a nakpagkaessa kamon ni Cristo Jesus. ¹⁹ Dyan moy pugáddan u Banal a Ispirito. ²⁰ Dyan moy baliawanan u adal a gábwat tu Diyos. ²¹ Pagadalan moy ti husto u toldu hide ni iye ay gabwat tu Diyos oni awan sakay ni anya u maganda ay sala itod u sunudan moy. ²² Umadeyo kam tu atanan a madukás. ²³ Nakwa ay lalu kam a gimitán a banal nu Diyos a tagapangatád ti kapayapaan. Sakay nakwa ay panatiliyán na a awan ti kapintasan u buo moy a pagkatolay, u ispirito moy, kaliduwwa sakay u baggi moy hanggan tu kássole nu Panginoon a ti Jesu-Cristo. ²⁴ Matapat u Diyos a nangdulaw nikam kaya tupadán na iye a talaga. ²⁵ Kákkapatkákka mi hide, ipagdasal moy kami be. ²⁶ Sakay ikumusta moy kame ped hina tu kákkapatkákka tam hide. ²⁷ Ipákkekakagbi me nikam tu ngahan nu Panginoon a basaán i sulatán iye tu kákkapatkákka tam hide a atanan. ²⁸ Pagpalaan kam nakwa nu Panginoon a ti Jesu-Cristo.