1 Pedro

¹ Hikán ti Pedro, apostol ni Jesu-Cristo, nagsulatak nikam a pinile hide nu Diyos a mákpágyan ti Ponto, Galacia, Capadocia, Asia, sakay Bitinia. ² Pinile kamon nu Diyos a Ama sapul pa tu sapul dipo itod u kagustuwan na. Sakay u Banal a Ispirito u nangpabanal nikam. Kanya magpasakup kamon ni Jesu-Cristo, tánni malinisan kam tu kasalanan moy tu pamamag-itan nu kákkatay na tu kudus. Magkahod kam nakwa ti págpapala sakay kapayapaan. ³ Magpasalamat kitam a pirme tu Diyos a Ama nu Panginoon tam a ti Jesu-Cristo. Dipo tu tunay a kadakál a kagbi na nikitam, kanya inatádden na kitam ti bigu a biyag, tu pamamag-itan nu kákkabiyag a huway ni Jesu-Cristo. Iye u nangatád nikitam ti biyag a pag-asa. ⁴ Sakay matanggap tam u pagpapala a awan masisida, awan ti dangát sakay awan magkukupas a inhanda nu Diyos ti langet para nikam. ⁵ Dipo tu pánniwala moy ni Jesu-Cristo kaya ingatan kam nu kapangyariyan nu Diyos, mentaras a maguhay kam tu kaligtasan a iyatád na káddemát nu katapusan a aldew. ⁶ Dipo ti iye dapat kam a magsaya, maske ni magdanas kam pa ti iba-iba a pagsubuk ti sabadit a panahun. ⁷ U ginto a masida ay subukán tu apoy para matukuyan ni talaga a ginto. Konna labi hod, tu pánnampalataya moy, a mas mahalaga kasera tu ginto ay subukán be ti pagsubuk tán matukuyan ni talaga a matapat kam. Tánni mapuriyan, dakilaán, sakay parangalan kam tu Aldew a mehayag ti Jesu-Cristo. ⁸ Maski ni awan moy siya netan ay minahal moy dán siya. Sakay maski ni awan moy palla siya netan hanggan nadid ay naniwala kamon nikuna. Kaya awan masukat u kasayaan moy sakay awan mepaliwanag tu pamamag-itan nu pággupos. ⁹ Dipo magtanggap kamon tu bunga nu pánnampalataya moy, iye ay u kaligtasan moy. ¹⁰ U prupeta hide tu itod a nángpahayag tungkul tu kaligtasan a kaluub nikitam nu Diyos ay pinakaadal de ti husto u tungkul tu kaligtasan. ¹¹ Kinagi dán nide nu Banal a Ispirito a ti Cristo ay maghirap pa bagu na a matanggap u karangalan. Inadal de ti husto ni nikan sakay ni kodya iye a mangyare. ¹² Nikuna a ipakapospos di iye, ay impaunawa nide nu Diyos a u gággimitán de ay para nikam bakán a para nide. Iye a tatahoden ay masaneg moy dán nadid tu magbaheta hide tu Maganda a Baheta nu Diyos tu kapangyariyan nu Banal a Ispirito a pinaangay nide a gábwat ti langet. Maske u anghel hide ti langet ay tunay u pagkasoh de a maintendiyan iye a katutuhanan. ¹³ Kanya ngani dapat kam a handa a gimián u kaluuban nu Diyos. Magin mahinahun kam sakay ituun moy u pag-asa moy tu págpapala hide a tanggapán moy ni mehayag dán ti Jesu-Cristo. ¹⁴ Bilang anak a masássunudán, ay dapat dyan kam magpaalipin tu mágkadukás a kagustuwan nu pilas konna tu gággimitán moy tu itod nikuna a awan moy palla tukoy u Diyos. ¹⁵ Banal u Diyos a nangpile nikam kanya awan kamon dapat a magkasala tu atanan a gimitán moy. ¹⁶ Dipo nesulat tu banal na a Kasulatan, “Magpakabanal kam dipo banalák.” ¹⁷ Pare-pareho u pangileng nu Diyos nikitam a atanan. Hatulan na u balang essa a ayun tu ginimet na. Kanya ni dulawán tam a Ama u Diyos ni magdasal kitam ay dapat tam labe siya a igalang, mentaras a biyag kitam palla. ¹⁸ Tukoy tam dámbe ni ánya u nangtubus na nikitam tu date tam a biyag a awan ti pinagseserbiyan a mana tam palla tu nuno tam hide. U nangtubus na nikitam ay bakán a ginto oni pilak a masida sakay maubus. ¹⁹ Nan u nangtubus na nikitam ay u dige ni Cristo. Siya u konna tu tupa a awan ti dangát sakay kapintasan, a ne alay tu Diyos tánni matubus u kasalanan nu tolay. ²⁰ Bagu a linalang nu Diyos i munduway ay inlaan na dán ti Jesus para mangtubus nikitam tu kasalanan tam. Kanya nadid a dimodyan a aldew ay immangay he siya ti lutaáy tánni iligtas na kitam. ²¹ Dipo ni Cristo ay naniwala kamon tu Diyos a nangbiyag a huway nikuna, sakay nangatád nikuna ti kapangyariyan. Kanya u pánniwala moy sakay u pag-asa moy ay katoy tu Diyos. ²² Nadid ay malinis kamon tu kasalanan moy hide dipo tu kássunud moy tu tatahoden sakay nagin tapat kamon tu págmahal moy tu kákkapatkákka moy hide. Nakwa ay tatahoden u págmahal moy. ²³ Dipo neenak kamon a huway, bakán a tu pamamag-itan nu kákkeenak a maare palla a matay, nan tu bigu a biyag a hod nikam nadid a awan ti kahád, sakay inyatád nikam nikuna a simmampalataya kam tu awan magbabagu a upos nu Diyos. ²⁴ Konna tu nakasulat tu Kasulatan, “U biyag nu tolay ay kumán a lamon Sakay u ganda na ay kumán a bulaklak. Malanás u lamon sakay mahaghag u bulaklak na. ²⁵ Pero u upos nu Diyos ay awan magbabagu sakay awan maglilipas maski ni nikan.” Iye a upos ay u Maganda a Baheta a inpakapospos nikam.

¹ Kanya adággen moy dán u atanan a mágkadukás, u pakándaya, pakánwari-ware, kákkaiyamut, sakay pakán upos ti awan ti pinagseserbiyan tu agum. ² Dapat kam a mauwaw tu Upos nu Diyos, konna tu kákkauwaw nu anak ti gatas, tánni bumegsák u pánnampalataya moy hanggan matanggap moy u kaligtasan. ³ Dipo kinagi na tu Kasulatan, “Naranasan moy dán u kabaitan nu Panginoon.” ⁴ Kanya umadene kam nikuna; siya u mangatád ti biyag sakay siya u konna tu bito a inadiyan nu tolay hide pero pinile nu Diyos a pinakamahalaga tu pangileng na. ⁵ Nadid, ay tehhod kamon a bigu a biyag a gábwat tu Diyos. Sakay nagkaessa kam a nagin konna tu essa a Templo. Kumán kam a bito a biyag a ginimet a templo na. Konna kam be tu essa a saserdote a nelaan para tu Diyos. U alay a ispiritwal a makasaya tu Diyos ay u págserbi moy nikuna alang-alang ni Jesu-Cristo. ⁶ Dipo kinagi na tu Kasulatan a, “U pinile ko a bito ay indátton ko ti Sion dipo mahalaga itod a bito. Ni ti deyaman u maniwala ti pinile kuwan iye ay awan mapasanike.” ⁷ Kanya i bituwan itod ay mahalaga nikitam a maniwala hide. Pero tu awan hide maniwala ay hide u mangpatunay tu Kasulatan, “U bito a inumádden nu mágbilay hide ay siya bál u mahalaga a mangtággád tu bilay. ⁸ Sakay nakasulat be a, “Itod labe a bito u kesángdulan sakay kehakpaan nu tolay hide.” Nesángdul hide dipo awan hide sumunud tu upos nu Diyos, sakay iye u inhanda nu Diyos para nide. ⁹ Pero hikam u lahe hide a pinile nu Diyos, a magin saserdote na a magserbi tu tatahoden a Hare, essa a bansa para tu Diyos. Pinile kitam nu Diyos a magin sakup na sakay mángpakapos-pos tu makataka-taka hide a ginimet na a mágkaganda. Siya be u náng agton nikitam tu makataka-taka a demlag na nikuna a katoy kitam palla tu kadiklámman. ¹⁰ Tu itod ay bakán kam palla a sakup nu Diyos pero nadid ay sakup na kamon. Awan nikam tu itod u kagbi nu Diyos, pero nadid ay hod dán nikam u kagbi na. ¹¹ Kákkapatkákka ko hide, bakán a munduwáy u permamente tam a págyanan nan kumán kitam la a bisita ti iye. Kanya mákkekagbiyák nikam, adággen moy dán u mágkadukás a kagustuwan nu bággi moy dipo ina u mangsida tu kássunud moy tu Diyos. ¹² Dapat kitam a mabiyag ti maayus tu atubang nu Hentil hide, ta maski ni bintangán dikam ti madukás, pero ketan de u mágkaganda moy a gimet ay magpure hide tu Diyos káddemát nu aldew a kássole na. ¹³ Alang-alang tu Panginoon ay magpasakup kam tu tehhod hide a tungkulin tu banuwan moy sakay tu Hare a siya u pinakataas a pinuno tu lugar tam. ¹⁴ Sunudán moy be u gubernador hide a pinaangay na tán magparusa tu makángimitán hide ti madukás sakay hide be u magparangal tu makán gimitán hide ti maganda. ¹⁵ Gusto nu Diyos a gimitán tam u tama tán tumahan u tolay hide a apehet ti pággisipan a mágga-upusán ti baka-bakán kontara tu upos nu Diyos. ¹⁶ Mabiyag kitam a konna tu tolay hide a tehhod a kalayaan. Pero diyan moy gimitán u kalayaan a iye tu pággimet ti madukás nan mabiyag kam bilang alipin nu Diyos. ¹⁷ Igalang moy u atanan a tolay sakay mahalán u kákkapatkákka tam ni Cristo. Mabiyag kam a tehhod a ánteng tu Diyos sakay tehhod a pággalang tu Hare. ¹⁸ Hikam a utusan hide, igalang moy sakay sunudán u amu moy sakay pasakup kam nide, bakán la a tu mágkabait hide nan pate be tu amu moy a awan makákkagbiyán. ¹⁹ Dipo u magtiis ti págpahirap maski ni awan siya ti ginimet a madukás ay kahabagen nu Diyos ni tiniis na iye dipo tu kássunud na tu kagustuwan nu Diyos. ²⁰ Awan ti seserbi u págtiis moy ti parusa ni dipo tu ginimet moy a madukás. Dipo awan kam kasayaan nu Diyos. Pero ni pápparusaan kam maski maganda u gággimitan moy, ay kasayaan kam nu Diyos. ²¹ U págtiis ti hirap ay kaguman tu pángpile nikam nu Diyos; dipo maski ti Cristo ay nagtiis ti hirap para nikam, I págtiis naan iye ay essa a halimbawa a dapat moy a ahigán. ²² Maski nikan ay awan siya nagkasala sakay nagbule-bule. ²³ Awan siya gummante nikuna a dustaán siya, sakay awan siya ti kákkagi nikuna a pahirapan de nan impabahala na u atanan tu Diyos dipo u Diyos la u tapat a huwes. ²⁴ Ti Cristo ay naparusaan dipo tu kasalanan tam. Nepako siya tu kudus tánni himinto kitamon tu págkasala a konna tu patay a awan dán magkasala, sakay sumunud kitamon tu kagustuwan nu Diyos. Sakay dipo tu talingu na hide ay nagpiyya kitamon. ²⁵ Dipo kumán kam a tupa a nágketawtaw pero nadid ay inipun kamon a huway nu Diyos tu pamamag-itan ni Jesus a pastol tam a mággalaga tu kaliduwwa tam.

¹ Hikam a bábbey hide, pasakup kam tu kákkabanga moy hide. Ni tehhod palla nide a awan naniwala tu upos nu Diyos ay maakit la be ina hide dipo tu maganda moy a gimet. Maski ni awan kamon magpaliwanag nide, ² dipo dakál dán a patunay u mágkaganda moy hide a ugale sakay u pággalang moy. ³ U ganda moy ay dapat bakán a u ketan tu luwas a konna tu pakánayus ti buuk, pakánsulot ti ginto sakay tu pakánsulot tu mágkamahal hide a damit. ⁴ Nan u dapat moy a husayán ay u isip moy dipo iye u kagandaan a awan maglilipas. Dapat kam a magin mahinahun sakay mabait dipo itod u mahalaga tu atubang nu Diyos. ⁵ Konna hod u ugale nu bábbey hide a banal a immasa tu Diyos tu itod a panahun. Nagpasakup hide tu kákkabanga de. ⁶ Konna ni Sara, sinunud na sakay dinulaw na a amo u kabanga na a ti Abraham. Mebilang kam be tu anak na ni maganda u ugale moy sakay awan kam ti gággimitán a dapat moy a ikanteng. ⁷ Nadid, hikam be a lállake hide a te manga-kákkabanga, igalang moy u kákkabanga moy hide, intendiyán moy u kahinaan de. Isipán moy a konna labe hide nikam a te karapatan a tumanggap ti biyag a awan ti kahád a kaluub nu Diyos. Gimitán moy iye tán awan ti hadlang tu págdasal moy. ⁸ Nadid, sa iye u bilin ko nikam kákkapatkákka ko hide, dapat kam a mamággagum ti maganda, magkaessa sakay magmahalan a konna tu mátkaka, dapat kambe a makákkagbiyán sakay mapagpakumbaba. ⁹ Diyan moy gantiyan ti madukás u maggimet nikam ti madukás. Diyan moy sumpaán u mangsumpa hide nikam. Nan ipagdasal moy a pagpalaán hide nu Diyos dipo konna hod u gusto nu Diyos a gimitán moy. ¹⁰ Konna tu nakasulat tu banal a Kasulatan, “ U masoh a magkahod ti maganda sakay mapayapa a kákkabiyag ay pugáddán na u dila na a makán upos ti madukás sakay awan magbuli-bule. ¹¹ Dapat kam a magbagu tu mágkadukás moy hide a gimet, pagsikapan moy a maggimet ti maganda sakay mabiyag ti mapayapa. ¹² Bábbantayan nu Panginoon u tolay hide a maggimet ti maganda, sakay tábbegán na u dasal de. Pero u maggimet ti madukás ay sasala na.” ¹³ Sakay awan ti mangperhisyo nikam ni magsikap kam a maggimet ti maganda. ¹⁴ Pero ni pahirapan dikam padi maski ni maggimet kam ti tama ay pinagpala kam pade nu Diyos. Diyan kam manteng maski ni deya sakay diyan kam la mabalisa. ¹⁵ Igalang moy ti Cristo sakay sambaán moy siya bilang Panginoon. Dapat Pirme kitam a handa a magpaliwanag tu maski ni ti deya a magtanung nikam tungkul tu pánnampalataya tam. ¹⁶ Pero magin magalang kam sakay magin mahinahun ni magpaliwanag kam. Dipo bilang tagapagserbi ni Cristo ay diyan tam pabayan a makagimet kitam ti liwat, tán u tolay hide a mangdáddusta nikitam ay mapasanike tu kákkagiyán de a kontara nikitam. ¹⁷ Mas mapiyya pa a maghirap kam dipo tu pággimet moy ti maganda ni saiye u kagustuwan nu Diyos, nan maghirap kam dipo tu pággimet moy ti madukás. ¹⁸ Dipo ti Cristo ay natay a pumensan para tu atanan. Siya ay awan ti kasalanan pero natay siya para nikitam a atanan a makasalanan tánni iyadene nakitam tu Diyos. Natay u bággi na, pero u Ispirito na ay biyag. ¹⁹ Sakay tu pamamag-itan nu Ispirito ay immangay siya tu lugar a páppiresuwan nu ispirito hide nu tolay a nágkatay dán sakay impakapospos na hod u tungkul tu kaligtasan. ²⁰ Iye hide u ispirito nu tolay a umád a sumunud nikuna tu panahun ni Noe tu itod. Matiyaga a naguhay u Diyos a sumampalataya hide mentaras a gimitán ni Noe u dakál a abang pero awan maski essa ti tolayan iye hide u simmampalataya. Walo la a tolay u nakaligtas tu lonso. ²¹ I dinuman itod a lonso ay sa itod u mage letrato nu págbautismo a mangligtas nikam. Tu pamamag-itan nu kákkabiyag a huway ni Jesu-Cristo. U págbawtismo a iye ay bakán a para linisán u dangát nu bággi tam nan iye ay tanda a nagsise kitamon tu kasalanan tam hide. Dipo ti iye ay maare kitamon a iligtas nu Diyos dipo ti Cristo ay huway a nabiyag. ²² Ti Cristo ay katoy dán ti langet sakay mággetnod dán tu kawanan nu Diyos. Maghare siya hod nadid tu anghel hide sakay tu agum pa hide a tehhod a kapangyariyan ti langet.

¹ Nadid, dipo naghirap ti Cristo ay dapat kitam be a magin handa a maghirap a konna nikuna. Dipo u magtiis ti hirap ay immadág dán tu kasalanan. ² Kanya mentaras biyag kitam he ti munduwáy hanggan ay diyan tamon sunudán u makaluta hide a kagustuwan nu sadile tam nan sapulan tamon a mabiyag a ayun tu kagustuwan nu Diyos. ³ Tama dán u panahun a sinayang moy tu pakánggimet tu bagay hide a makaluta a gággustuwán nu awan hide makidiyos: konna tu kahalayan, madukás a kagustuwan nu pilas, páglasing, subra a kasayaan a awan ti pinagseserbiyan, inuman, sakay u págsamba tu diyos-diyosan hide. ⁴ Kanya, magtaka dán hide ni bakin a awan kamon mákpággagum nide tu pággimet de ti madukás, kanya sidaán dikamon sakay sestiyán. ⁵ Pero panagutan de iye tu Diyos a mághatul tu biyag sakay tu patay hide. ⁶ Kanya saiye u dahilan ni bakin u Maganda a Baheta ay nepakapospos maski tu nágkatay dán hide tánni maski nágkatay dán hide a konna tu nakatakda tu atanan a tolay ay mabiyag u ispirito de tu pamamag-itan nu kapangyariyan nu Diyos. ⁷ Adene dán u katapusan nu atanan a bagay; kanya magpugád kam tu sadile moy sakay pirme a tama u pággisipan moy tánni awan ti hadlang tu págdasal moy. ⁸ U mahalaga tu atanan ay magmahalan kam ti tapat, dipo u págmahal ay makapagpatawad maski sakodya a kakpal u kasalanan. ⁹ Tanggapán moy ti maayus u kákkapatkákka tam hide ni tumulos hide tu bilay moy. ¹⁰ Pinagkaluuben nu Diyos u balang essa nikitam ti sadile na a kakayahan, kanya gamitán tam itod a kaluub para tu kapiyyaan nu atanan bilang mahusay a katiwala tu iba-iba a kaluub nu Diyos. ¹¹ Ni tagapangaral u kaluub mo ay ipangaral mo u upos nu Diyos. Ni tagapagserbi u kaluub mo ay gamitán mo u begsák mo tu págserbi a inyatád niko nu Diyos tán puriyán de u Diyos tu pamamag-itan ni Jesu-Cristo. Kao nu Diyos u kapangyariyan sakay u karangalan hanggan-hanggan. Amen. ¹² Kákkapatkákka ko hide, diyan kamon magtaka tu garabi a hirap a dáddanasán moy nadid a pagsubuk tu pánnampalataya moy. U tatahoden u atanan a simmampalataya ni Cristo ay magdanas ti kahirapan. ¹³ Nan magsaya kam tu pághirap moy dipo nákpaghirap kam ni Cristo, tán masaya kam a tahod káddemát nu aldew a ketan tam u kadakilaan na. ¹⁴ Mapalad kam ni dáddustaán di kam dipo ni Cristo, dipo tukoy moy a katoy nikam u Banal a Ispirito nu Diyos a makapangyariyan. ¹⁵ Diyan nakwa mangyare a kanya kam a magdanas ti kahirapan ay bilang parusa dipo namuno kam, nagtakaw, sumássuway tu kautusan, oni mák-alam tu biyag nu agum. ¹⁶ Pero ni maghirap kam dipo tu pánniwala moy ni Cristo ay diyan moy ikasanike; nan magpasalamat kam tu Diyos, dipo nadulaw kamon a tolay ni Cristo. ¹⁷ Nadid, adene dán a dumemát u panahun nu pághatul nu Diyos. Tu pághatul na ay idipalongo na a hatulan u pinile na hide. Ni hikitam a anak na idipalongo naay a hatulan ay tunay ti dágge u parusa a maguhay tu tolay hide a awan maniwala tu Maganda a Baheta a gábwat tu Diyos. ¹⁸ Konna tu nakasulat tu Kasulatan, “Ni u tolay dán ngane hide a makadiyos ay mahirap a maligtas, itod pa beman wád u tolay hide a makasalanan a awan tumengge tu Diyos? ¹⁹ Kanya hikam a maghirap hide dipo tu kagustuwan nu Diyos ay dapat itulos-tulos moy la u pággimet moy ti maganda sakay magtiwala kam tu Diyos a Nanglalang, dipo tapat siya tu pananto na hide.

¹ Hikam a pinuno hide nu mánnampalataya hide, mákkekagbiyák nikam bilang essa be a konna nikam. Tistiguwák tu pághirap ni Cristo, sakay kabahagiyák be tu karangalan na a adene dán a mehayag. Mákkekakagbiyák nikam ² a alagaan moy hide ti maayus u pinile hide nu Diyos a inpagkatiwala na nikam. Alagaan moy hide a konna tu pággalaga nu pastol tu tupa na hide. Pospusán moy hide a maluwag tu isip moy dipo itod u gusto nu Diyos, bakán a u mapilitan kam la. Gimitán moy u tungkulin moy bakán a tu pangsadile moy a kapiyyaan nan gimitán moy itod dipo gusto moy a magserbi. ³ Diyan moy ituring a alipin u tolay hide a intiwala nikam nu Diyos nan ipeta moy a maganda kam a halimbawa nide tánni ahigán di kam. ⁴ Sakay káddemát nu kapunuwan nu Pastol hide ay makatanggap kitam ti magkislap-kislap a kurona a awan masisida. ⁵ Kaya hikam be a áolito sakay mámmadiket hide, pasakup kam tu mágkatanda hide. Magpakababa kam a atanan dipo nesulat tu Kasulatan, “Sasala nu Diyos u palalo hide, sakay kasayaan na u magpakababa hide.” ⁶ Kanya pasakup kam tu kapangyariyan nu Diyos tán parangalan nakam tu intakda na a panahun. ⁷ Ipebahala moy tu Diyos u atanan a kabalisaan moy hide dipo siya u mángmalasakit nikam. ⁸ Pirme kam a humanda sakay magbantay dipo u kadima moy a ti Satanas ay dumahi-dahengding a kumán a liyon a magtágguwang a magehyok ti sangwabán na. ⁹ Labanan moy siya sakay magpakatatag kam tu pánnampalataya moy tu Diyos. Dipo tukoy moy labe a bakán la a hikam i magdanasay ti konna he a hirap, nan pate u kákkapatkákka moy hide tu buo a mundu. ¹⁰ U Diyos a naggábwatan nu Págpapala, siya u nangpile nikam tu pamamag-itan ni Jesu-Cristo tánni makabahagi nakam tu kapuriyan na a awan ti kahád, kaguman ni Cristo. Pero ipakultad napa a magtággád kam ti hirap tu sabadit a panahun, tánni gimitán nakam a ganap, sakay siya u mangpabegsák ti isip moye, sakay mangpatatag tu pánnampalataya moy nikuna. ¹¹ Katoy nikuna u atanan a kapangyariyan hanggan-hanggan. Amen! ¹² Ti Silvano u nangtulung nikán ti iye a sulat. Essa siya a kapatkákka tam a tapat sakay pagtiwalaan ko. Tu pamamag-itan ni sulat kuwan iye ay gusto ko a pabegsákkán u isip moy sakay patunayan a u atanan a intoldu ko nikam tungkul tu kagbi nu Diyos ay tatahoden. Kanya diyan kam humiwalay ti kagbi naan iye. ¹³ Mákkumusta nikam u kákkapatkákka tam a katoy ti Babilonia, u pinile hide nu Diyos a kapareho tam labe a mánnampalataya. Mákkumusta be nikam ti Marcos a mahal ko a anak ti pánnampalataya. ¹⁴ Ipeta moy u págmahalan tu bawat essa. Nakwa u kapayapaan ni Cristo u pirme a katoy nikam a mánnampalataya hide.