1 Juan
11 Summulat kame nikam tungkul nikuna a tu sapul pa ay átna dán, u Upos a Makapangatád ti Biyag. Nasaneg mi siya, sakay netan me, namámmalas sakay natawiden. 2 Nikuna a mehayag dán siya a makapangatád ti biyag ay netan mi siya, pinatunayan me sakay inpangaral me nikam a hod nikuna u biyag a awan ti kahád. Sapul pa tu sapul ay kaguman dán siya nu Diyos Ama sakay pimmeta siya nikame. 3 Inpakapospos mi ngane nikam u netan me sakay nasaneg tánni makaguman mikam tu pákpagkaessa me tu Ama sakay tu Anak na a ti Jesu-Cristo. 4 Insulat mi iye tánni magin tunay u kasayaan tam. 5 Sa iye u nasaneg me tu Anak na sakay inpakapospos mi be nikam, u Diyos ay demlag sakay awan ti ányaman a kadiklamman nikuna. 6 Kaya ni kagiyán tam a nákpágkaessa kitam nikuna pero mabiyag kitam palla tu kadiklámman ay nagbuli-bule kitam sakay awan mabiyag ayun tu tatahoden. 7 Pero ni mabiyag kitam ayun tu demlag a konna tu Diyos a katoy tu demlag ay tehod kitam a pákpagkaessa tu balang essa. Sakay u digi ni Jesus a Anak nu Diyos u nanglinis tu atanan a kasalanan tam. 8 Ni kagiyán tam a awan kitam ti kasalanan ay lállokuwán tam la u sadile tam sakay awan nikitam u tatahoden. 9 Pero ni aminán tam tu Diyos u kasalanan tam hide ay siguradu a patawadán na kitam sakay linisan na kitam tu mágkadukás tam a gimet dipo siya ay matapat sakay matuwid. 10 Pero ni kagiyán tam a awan kitam nakagimet ti kasalanan ay ginimet tam a mabule u Diyos sakay awan ketan tu biyag tam u Upos na.
21 Anak ko hide, insulat ko iye hide nikam tánni awan kam magkasala. Pero ni magkasala man u deyaman ay te mángsuhog nikitam, u Ama. Siya ay ti Jesu-Cristo, u Matuwid. 2 Inyalay ni Cristo u bággi na para mapatawad u kasalanan tam hide, sakay bakán la a u kasalanan tam hide nan pate u kasalanan nu atanan a tolay. 3 Nakasigudu kitam a kilala tam u Diyos ni sássunudán tam u utus na hide. 4 Ni ti deya man u magkagi a “Kilala ko siya” pero sumuway labe tu utus na hide ay mabule sakay awan nikuna u tatahoden. 5 Pero ni u tolay ay sumássunud tu upos nu Diyos ay mángpeta iye a u págmahal nu Diyos ay nagin ganap tu biyag na. Konna he u pakatukuyan tam a atoy kitam nikuna. 6 Ni ti deya man u magkagi a nákpagkaessa siya tu Diyos ay dapat a mabiyag a konna tu kákkabiyag ni Jesu-Cristo. 7 Mahal ko hide a kákkapatkákka, bakán a bigu a utus u insulat ko nikam nan u date dán a utus a katoy dán nikam tu itod pa. Iye a mensahe ay nasaneg moy dán. 8 Pero mebilang a bigu a utus i insulat kuwáy nikam; metan i tatahodinan iye tu biyag ni Cristo sakay tu biyag moy. Dipo mawan dán u kadiklámman sakay mágdadedemlag dán u tunay a demlag. 9 U magkagi a katoy siya tu demlag pero maiyamut labe tu kapatkákka na ay atoy padla tu kadiklámman. 10 U magmahal tu kapatkákka na ay katoy tu demlag kanya awan siya magin dahilan nu pagkasalaan nu agum. 11 Pero u maiyamut tu kapatkákka na ay katoy padla tu kadiklámman. Maglakad padla siya tu kadiklámman sakay awan na tukoy u tamuwan na, ta binuhák siya nu kadiklámman. 12 Magsulaták nikam a anak ko hide, dipo pinatawad dán nu Diyos u kasalanan moy dipo tu ginimet ni Cristo. 13 Magsulaták nikam a ama hide, ta nakilala moy siya a tu sapul ay átna dán siya. Magsulaták be nikam, áolito hide sakay mámmadiket, dipo natalo moy dán ti Satanas. 14 Magsulaták nikam anak hide, dipo kilala moy u Ama. Magsulaták be nikam ama hide, dipo kilala moy siya a tu sapul ay átna dán. Magsulaták nikam áolito hide sakay mámmadiket hide dipo mágkatatag kam; pirme a katoy nikam u upos nu Diyos sakay natalo moy dán ti Satanas. 15 Dyan moy sunudán u makamundu a kákkabiyag nu tolay hide ti munduway oni u bagay hide a katoy tu mundu. U magmahal ti munduway ay awan magmahal tu Ama. 16 Dipo u tolay a makamundu ay iye u metan nide. U kákkasoh tu pilas, kákkasoh tu ketan hide sakay u pághambug. U atanan a iye ay bakán a gábwat tu Ama nan gábwat tu mundo. 17 Iye hide sakay i munduway ay mawan pero u sumunud tu kagustuwan nu Diyos ay mabiyag hanggan-hanggan. 18 Anak ko hide, adeni dán u katapusan a panahun! Konna tu nasássaneg moy dán a dumemát u kontara ni Cristo. Kanya nadid ay makpal dán a pummeta a kontara ni Cristo hide. Kaya tukoy tam a adene dán u katapusan. 19 Maski ni date tam hide a kaguman pero awan tam hide kaessa. Dipo ni talaga a kaessa tam hide ay kakaguman tam nakwa hide nadid. Pero summina hide, kanya nángpeta la a awan tam hide talaga a kaessa. 20 Pero inyatád dán nikam u Banal a Ispirito kaya tukoy moy dán u tatahoden. 21 Magsulaták nikam bakán a dipo awan moy palla tukoy u tatahoden nan dipo tukoy moy dán iye. Sakay tukoy moy be a awan ti kakabuliyan a maggábwat tu tatahoden. 22 Deya beman u mabule? Awan beman u magkagi a ti Jesus ay bakán a Cristo? Ni deyaman u magkagi he ay kontara ni Cristo, dipo umád de kilalaán u Ama sakay u Anak. 23 U awan tumenggi tu Anak ay awan be tumenggi tu Ama. Ni deya man u tumenggi tu Anak ay tumenggi be tu Ama. 24 Pakaingatan moy tu puso moy u nasássaneg moy tu sapul nikuna summampalataya kam ni Jesus. Ni gimitán moy iye ay manatili kam a kaessa nu Anak sakay tu Ama. 25 Sakay sa iye u inpananto nikitam ni Cristo: Biyag a awan ti kahád. 26 Insulat ko iye nikam tánni babalaan kam tu tolay hide a masoh a mángtawtaw nikam tu liwat de a toldu. 27 Pero maski ni magkakonna hod ay katoy dán nikam u Banal a Ispirito a inyatád ni Cristo. Mentaras a katoy nikam u Banal a Ispirito ay awan kamon kailangan a tolduwan ni deya man. U Banal a Ispirito u mángtoldu nikam tu atanan, sakay u atanan a itoldu na ay tatahoden, bakán a kakabuliyan. Kanya manatili kam ni Cristo dipo ina u intoldu nikam nu Ispirito. 28 Kanya ngane anak hide, itulos-tulos moy pákkaessa moy ni Cristo tánni káddemát na a huway ay mabegsák u isip tam sakay awan kitam masanike nikuna ti aldiwan itod. 29 Ni tukoy moy a matuwid ti Cristo, ay dapat tukoy moy be a u atanan a mággimet ti matuwid ay anak nu Diyos.
31 Isipán moy la ni sakodya ti kadakál u págmahal nikitam nu Ama. Dinulawan na kitam a anak na, a itona ngane u tatahoden. Iye u dahilan ni bakin awan kitam kilala nu makamundo hide a tolay dipo awan de tenggiyán u Diyos. 2 Mahal ko hide a kákkapatkákka, anak kitamon nadid nu Diyos. Pero awan padla ketan ni ánya u magin kalagayan tam. Tukoy tam a tu káddemát a huway ni Cristo ay magin konna kitam nikuna dipo ketan tam a talaga siya. 3 Kanya ni ti deyaman u te konna he a pag-asa ay dapat a mabiyag a tehhod a kalinisan, konna ni Cristo. 4 U atanan a magkasala ay awan sumunud tu kautusan nu Diyos dipo u kasalanan ay kássuway tu kautusan. 5 Tukoy moy a ti Cristo ay awan ti kasalanan sakay kaya he siya a immangay ay para ibutan u kasalanan tam hide. 6 U nákpagkaessa nikuna ay awan dán magtulos-tulos tu kasalanan. Ni ti deyaman u tulos-tulos a maggimet ti kasalanan ay awan palla tumenggi oni summampalataya ni Cristo. 7 Anak ko hide dyan kam paloko maski ni deya man. U maggimet ti maganda ay essa a matuwid a tolay, konna ni Cristo. 8 U magtulos-tulos a maggimet ti kasalanan ay kaessa ni Satanas dipo sapul pa tu itod ay mággagimitán dán siya ti kasalanan. Kaya ummangay he u Anak nu Diyos ay para sidaán u gimet ni Satanas. 9 U tatahoden a anak nu Diyos ay awan magtulos-tulos a maggimet ti kasalanan dipo katoy nikuna u biyag a gábwat tu Diyos. Sakay dipo u Diyos dán u ama na, awan dán siya maare a magtulos-tulos a maggimet ti kasalanan. 10 Hed tam he a matukuyan ni deya u anak nu Diyos sakay ni deya u anak ni Satanas: Ni deya man u awan maggimet ti maganda sakay awan magmahal tu kapatkákka na ay bakán a anak nu Diyos. 11 Sa iye u adal a nasaneg moy dán sapul nikuna a simmampalataya kam ni Jesus: Magmahalan kitam. 12 Dyan kitam umaheg ni Cain; Naghare nikuna ti Satanas. Binuno na u wadi na. Bakin? Dipo madukás u gimet na pero matuwid u gimet nu wadi na. 13 Kanya kákkapatkákka, dyan kam magtaka ni kaiyamutan kam nu tolay hide ti munduway. 14 Tukoy tam a inumagton kitamon tu biyag gábwat tu kamatayan. Tukoy tam iye dipo mahal tam u kákkapatkákka tam hide. U awan magmahal ay manatile a hiwalay tu Diyos. 15 Mágbabono u maiyamut tu kákkapatkákka na sakay tukoy tam a awan ti biyag a awan ti kahád u essa a mágbabono. 16 Hed tam he a matukuyan u tatahoden a págmahal: inyalay ni Cristo u biyag na para nikitam. Kanya dapat be a iyalay tam u biyag tam para tu kákkapatkákka tam hide. 17 Ni ketan nu te anggen a tehhod a kailangan u kapatkákka na sakay awan na iye tinulungan ay kodya na a makagi a mahal na u Diyos? 18 Anak ko hide, u págmahal tam ay dapat bakán la atu upos, nan ipeta tam tu pamamag-itan nu gimet tam a ayun tu tatahoden. 19 - 20 Ni konna he u págmahal tam, nakasigudu kitam a nabiyag kitam ayun tu tatahoden. Ni balisaán kitam man nu konsensiya tam, maare kitam a umatubang tu Diyos a mapayapa ta tukoy tam a u Diyos, ay makákkagbiyán kasera tu konsensiya tam sakay tukoy na a atanan. 21 Mahal ko hide a kákkapatkákka, ni awan kitam balisaán nu konsensiya tam, ay mapayapa u isip tam a umadene tu Diyos. 22 Matanggap tam u ánya man a agidán tam nikuna dipo sássunudán tam u utus na sakay gággimitán tam u makasaya nikuna. 23 Sa iye u utus na: Maniwala kitam tu Anak na a ti Jesu-Cristo sakay magmahalan kitam konna tu inyutus nikitam ni Cristo. 24 U sumunud tu utus nu Diyos ay mákkaessa tu Diyos sakay mákkaessa be u Diyos nikuna. Tukoy tam a nákkaessa u Diyos nikitam dipo tu Banal a Ispirito a inyatád na nikitam.
41 Mahal ko a kákkapatkákka, dyan moy paniwalaan u balang magkagi a katoy nide u Ispirito nu Diyos. Nan subukán moy pa hide ni talaga a gábwat tu Diyos u Ispirito a katoy nide. Dipo makpal dán a liwat a prupeta ti munduwáy. 2 Iye u pakatukuyan tam ni u Ispirito ngane nu Diyos u katoy nide: Ni kagiyan de a nagin tolay ti Jesu-Cristo. 3 Pero u awan magkagi ti konna hod tungkul ni Jesus ay awan nikuna u Banal a Ispirito nan u ispirito nu kontara ni Cristo u katoy nide. Nasaneg moy a pademát u kontara ni Cristo ti munduwáy sakay nadid ay atoy dán. 4 Anak ko hide, kao kamon nu Diyos sakay napagtagumpayan moy dán u liwat hide a prupeta. Dipo u Ispirito a katoy nikam ay mas makapangyariyan nan u ispirito a katoy ti munduway. 5 Makamundu hide, kanya makamundu labe u itoldu de hide sakay u kapareho di labe hide a makamundu u mágsaneg nide. 6 Pero kao kitamon nu Diyos kanya ni ti deyaman u tumenggi tu Diyos ay mágsaneg nikitam; pero awan mágsaneg nikitam u awan kao nu Diyos. Hed tam he a matukuyan ni tideya u magtoldu ti tatahoden a gábwat tu Ispirito nu Diyos sakay nitideya u magtoldu ti kakabuliyan a gábwat ni Satanas. 7 Mahal ko hide a kákkapatkákka, magmahalan kitam dipo gábwat tu Diyos u págmahal. U magmahal tu kapatkákka na ay anak nu Diyos sakay tumengge tu Diyos. 8 U awan magmahal ay awan tumenggi tu Diyos, dipo u Diyos ay págmahal. 9 Impeta dán nu Diyos u págmahal na nikitam nikuna pinaangay na u kaessa-essa na a Anak ti munduwáy tánni magkahod kitam ti biyag a awan ti kahád tu pamamag-itan na. 10 Iye u tatahoden a págmahal: bakán a minahal tam u Diyos, nan hikitam u minahal na. Iye u dahilan kanya na he a pinaangay u Anak na tánni magin alay para tu kapatawaden nu kasalanan tam hide. 11 Mahal ko hide a kákkapatkákka, dipo konna hod ti kadakál u págmahal nikitam nu Diyos, dapat magmahalan kitam be. 12 Maski nikan ay awan palla ti naketa tu Diyos, pero ni magmahalan kitam ay katoy siya nikitam sakay magin ganap nikitam u págmahal na. 13 Tukoy tam a nákpagkaessa kitam tu Diyos sakay u Diyos ay nákpagkaessa be nikitam dipo inyatád na nikitam u Banal na a Ispirito. 14 Netan me sakay pinatunayan tu agum a pinaangay nu Ama u Anak na tán iligtas u tolay hide ti munduway. 15 U mángpahayag a ti Jesus ay Anak nu Diyos ay katoy tu Diyos sakay katoy be nikuna u Diyos. 16 Tukoy tam a mahal kitam nu Diyos, sakay pinagtiwalaan tam iye a tatahoden. U Diyos ay págmahal. U tolay a pirme a magmahal ay nákpagkaessa tu Diyos sakay nákpagkaessa be u Diyos nikuna. 17 U págmahal ay nagin ganap nikitam kanya awan tam kantingan u Aldew nu Pághukum. Dipo nabiyag kitam a konna tu kákkabiyag ni Cristo, maski katoy kitam palla ti munduway. 18 Awan ti kahalo a ánteng u págmahal, dipo u tatahoden a págmahal ay ibutan na u atanan a ánteng. Kanya ni deya man u manteng ay awan palla nikuna u tatahoden a págmahal. Dipo u ánteng ay kaguman nu parusa. 19 Magmahal kitam dipo u Diyos u dipalongo a nagmahal nikitam. 20 Ni ti deya man u magkagi a “Mahal ko u Diyos” pero maiyamut labe tu kapatkákka na ay mabule. Dipo ni u kapatkákka na a ketan na dán ay awan na pa mamahal, kodya na a mamahal u Diyos a awan na ketan? 21 Sa iye u utus a inyatád nikitam ni Cristo: ni ti deya man u magmahal tu Diyos ay dapat be a magmahal tu kapatkákka na.
51 Ni maniwala kitam a ti Jesus u Cristo a sinugu nu Diyos, ay anak kitam ngane nu Diyos. Sakay ni ti deya man u magmahal tu Ama ay magmahal be tu kapareho de a anak nu Ama. 2 Sa iye u pakatukuyan tam a mahal tam u anak hide nu Diyos: Ni mahalán tam u Diyos sakay sunudán u utus na hide. 3 Dipo u tatahoden a magmahal tu Diyos ay u sumunud tu utus na hide. Sakay awan mahirap a sunudán u utus na hide, 4 dipo napagtagumpayan dán nu atanan a anak nu Diyos u mágkadukás a gimet ti munduway. Nagtagumpay kitam dipo tu pánnampalataya tam ni Jesu-Cristo. 5 Awan ti iba a magtagumpay tu mágkadukás a gimet ti munduway nan u maniwala la a ti Jesus ay Anak nu Diyos. 6 Ti Jesu-Cristo ay immangay ti munduwáy, nabawtismuwan tu dinom sakay timmuhog u digi na tu kákkatay na. Bakán la siya a nabawtismuwan tu dinom nan timmuhog pa u digi na. U Banal a Ispirito u mangpatunay a tatahoden iye, dipo u tatahoden la u katoy tu Banal a Ispirito. 7 Kanya tehhod a tállo a makapagpatunay a ti Jesu-Cristo ay Anak nu Diyos: 8 U Banal a Ispirito, u dinom sakay u digi. Nagkaessa u tállowan iye tu págpatunay de. 9 Ni maniwala kitam tu págpatunay nu tolay hide, ay dapat mas paniwalaan tam u págpatunay nu Diyos. Dipo siya mismo u nangatád ti tálluwan iye a patunay tungkul tu Anak na. 10 Ni ti deyaman u sumampalataya tu Anak nu Diyos ay maniwala ti iye a patunay. Ni ti deyaman u awan sumampalataya tu patunay nu Diyos ay ginimet na a mabule u Diyos. Dipo awan siya maniwala tu págpatunay na tungkul tu Anak na. 11 Sa iye u patunay nu Diyos: Inyatád na nikitam u biyag a awan ti kahád, sakay matanggap tam iye tu pamamag-itan nu Anak na. 12 Ni ti deyaman u nákpagkaessa tu Anak nu Diyos ay tehhod a biyag a awan ti kahád pero u awan hide nákpagkaessa tu nu Anak nu Diyos ay awan ti biyag a awan ti kahád. 13 Insulat ko iye nikam tánni matukuyan moy a u simmampalataya hide tu Anak nu Diyos ay tehhod a biyag a awan ti kahád. 14 Kaya awan kitam magalangan a umadene nikuna dipo tukoy tam a iyatád na u ányaman a agidán tam ni ayun iye tu kagustuwan na. 15 Ni tukoy tam a sanigán na kitam, tukoy tam be a iyatád na u ányaman a agidán tam nikuna. 16 Ni ti deyaman u maketa tu kapatkákka na a naggimet ti kasalanan a awan himmayun tu kákkatay ay ipagdasal na itod a kapatkákka tu Diyos a makapangatád nikuna ti bigu a biyag. Iye ay para tu kapatkákka hide a awan himmayun u kasalanan de tu kákkatay. Dipo tehhod a kasalanan a humayun ti kákkatay, pero awan ko kagiyán a ipagdasal moy u makán gimitán ti konna hod. 17 U atanan a madukás a gimet ay kasalanan pero te kasalanan a awan humayun ti kákkatay. 18 Tukoy tam a u anak hide nu Diyos ay awan tulos-tulos ti págkakasala, dipo bantayan hide ni Jesu-Cristo. Sakay awan hide maare a ahikadán ni Satanas. 19 Tukoy tam a anak kitam nu Diyos sakay tukoy tam be a u buo a mundo ay katoy tu kapangyariyan ni Satanas. 20 Tukoy tam a immangay dán he u Anak nu Diyos sakay inatádden na kitam ti pággintendi tánni matukuyan tam u tatahoden a Diyos. Sakay katoy kitam tu tatahoden a Diyos, tu Anak na a ti Jesu-Cristo. Siya u tatahoden a Diyos sakay u Biyag a awan ti Kahád. 21 Anak ko hide, umadeyo kam tu diyos-diyosan hide.