1 Corinto
11 Gábwat iye a sulat nikán a ti Pablo a dinulaw ayun tu kaluuban nu Diyos tán magin apostol ni Cristo Jesus. Sakay gábwat be tu kapátkákka tam a ti Sostenes. 2 Iye a sulat ay para tu mánnampalataya hide a katoy ti Corinto a pinili na para magin kao na tu pamamag-itan nu pákpagkaessa ni Cristo Jesus. Kumonna be tu pinile hide tu atanan a lugar a dumulaw tu ngahan nu Panginoon a ti Jesu-Cristo, u Panginoon tam a atanan. 3 Magkahod kam nakwa ti págpapala sakay kapayapaan a gábwat tu Diyos a Ama tam sakay tu Panginoon a ti Jesu-Cristo. 4 Pirmiyák a magpasalamat tu Diyos dipo tu págpapala a inyatád na nikam tu pamamag-itan ni Cristo Jesus. 5 Dipo tu pákpágkaessa moy ni Cristo ay limmagu kam tu atanan a bagay, magin ti paggupos sakay karunungan. 6 U patunay a impangaral me tungkol ni Cristo ay malinaw a ketan nikam. 7 Kaya awan kam nagkulang tu ányaman a pagpapala a ispirituwal, mentaras maguhay kam tu kássole nu Panginoon tam a ti Jesu-Cristo. 8 Sakay u Diyos u mangpabegsák nikam hanggan tu katapusan, tánni demáttan kam a awan ti kapintasan tu kássole nu Panginoon tam a ti Jesu-Cristo. 9 Matapat u Diyos a nangdulaw nikam tánni mákpagkaessa tu Anak na a ti Jesu-Cristo a Panginoon tam. 10 Nadid kákkapatkákka hide, mákkekakagbiyák nikam tu ngahan nu Panginoon tam a ti Jesu-Cristo: mabiyag kam ti maayus a awan mamágdadema magkaessa kam ti isip sakay layunin tánni awan nikam ti pamágkampe-kampe. 11 Dipo inbaheta nikán nu kabilay hide ni Cloe a mamágdadema kam hina. 12 U gusto ko a kagiyán, tehhod kan a magkagi a, “Tagasunudák ni Pablo.” U kagi be nu essa ay “Tagasunudák ni Apolos.” U kagi be nu agum ay “Tagasunudák ni Pedro,” oni te magkagi pa, “Tagasunudák ni Cristo.” 13 Bakin? Nahate beman ti Cristo? Nepako beman ti Pablo para nikam? Nabawtismuwan kam beman tu ngahan na? 14 Magpasalamaták tu Diyos ta awanák ti binawtismuwan nikam maliban di Crispo sakay ti Gayo. 15 Kaya awan ti makapángkagi a nabawtismuwan kam tu ngahan ko. 16 (O bál, binawtismuwan ko bál itod u pamilya ni Estefanas. Maliban nide ay awanák dán ti matandaan a binawtismuwan ko.) 17 Dipo awanák dinulaw ni Cristo para magbawtismo nan para mangaral tu Maganda a Baheta. Impangaral ko ngane iye, pero bakán a tu pamamag-itan nu maganda a pággupos a sigun tu karunungan nu mundu. Dipo ni konna hod u gimitán ko ay makay itod u makaakit tu tolay hide, sakay mebali awan u kákkatay ni Cristo tu kudus. 18 U adal tungkul tu kákkatay ni Cristo tu kudus ay awan de atádden ti kabuluhan nu tolay hide a mepahamak, pero nikitam a naligtas dán ay iye u kapangyariyan nu Diyos. 19 Dipo nesulat, “Sidaán ko u karunungan nu mágkarunung hide, sakay gimitán ko a awan ti kabuluhan u katalinuwan nu mágkalalake hide.” 20 Nadid, anya u lamang nu mágkalalake hide a tolay, u maisto hide nu Kautusan, u mágkalalake a magdibate ti panahunáy nadid? Awan! Impeta nu Diyos a u karunungan ti munduwáy ay awan ti pinagseserbiyan. 21 Sigun tu karunungan nu Diyos, ay awan na impahintulut a matukuyan siya nu tolay tu pamamag-itan nu karunungan ni munduwan iye. Nan, inligtas na u manalig hide nikuna tu pamamag-itan nu Maganda a Baheta a ipáppangaral me a tu pangileng nu agum ay awan ti kabuluhan. 22 U Judio hide ay makántanungán ti himala bilang katunayan. Sakay u áehyukán nu Griego hide ay karunungan. 23 Pero u ipáppangaral me ay ti Cristo a nepako tu kudus a essa a kesángdulan nu Judio hide, sakay para tu Hentil hide ay awan kan iye ti kabuluhan. 24 Pero tu dinulaw hide nu Diyos, Judio man oni Griego, ti Cristo u kapangyariyan sakay karunungan nu Diyos. 25 Dipo u akala de a kamangmangan nu Diyos ay karunungan a mas nan tu atanan a karunungan nu tolay, sakay u akala de a kahinaan nu Diyos ay begsák a mas tu atanan a begsák nu tolay. 26 Kákkapatkákka hide, isipán moy u kalagayan moy nikuna dulawán kam nu Diyos. Sasangan la nikam u makagi a mágkalalake, tehhod a kapangyariyan sakay mayaman a tolay. 27 Pero pinile nu Diyos u nebilang hide a awan ti tukoy a tolay ti munduwáy para ipasanike u mágkalalake. Pinile be nu Diyos u mágkahina hide para ipatagama u mágkabegsák. 28 Pinile nu Diyos u neturing hide nu mundu a mababa a tolay, awan ti halaga, sakay awan ti kabuluhan ti munduwáy tánni ipeta nu Diyos a u inturing a mahalaga nu tolay he hide ti munduway ay inturing nu Diyos a awan ti seserbi. 29 Kaya awan ti tolay a maare a magmadakál tu atubang nu Diyos. 30 Siya u naggábwatan nu biyag moy nadid dipo tu pákpagkaessa moy ni Cristo Jesus. Nikuna tam a natukuyan u karunungan nu Diyos dipo nikuna sakay tu ginimet na tu kudus ay inturing kitam nu Diyos a matuwid, dipo pinatawad na dán u kasalanan tam. Imbilang kitam nu Diyos a banal sakay pinalaya na kitam gábwat tu kasalanan sakay inligtas na kitam. 31 Kaya ngane, konna tu nakasulat tu Kasulatan, “U Panginoon u dapat a ipagmadakál nu masoh a magmadakál.”
21 Kákkapatkákka, nikuna immangayák hina ay inkagi ko nikam u lihim a plano nu Diyos tungkul tu Maganda a Baheta, pero bakán a tu pamamag-itan nu mágkadisalad a pággupos nu tehhod a nagadalan oni mataas a karunungan. 2 Pero nagdisisyonák a awanák ti ibaheta nikam maliban ni Jesu-Cristo sakay u kákkepako na tu kudus. 3 Sakay nikuna hedák hina ay tukoy ko a kulang u kakayanan ko para magtoldu kanya magkábba-kábbaák sakay magpapágpággák ti ánteng a umatubang nikam. 4 Tu pággupos ko sakay tu págbaheta ko ay awan takam inakit tu pamamag-itan nu mágkaganda hide a pággupos sakay tu karunungan nu tolay, nan tu pamamag-itan nu patunay nu Banal a Ispirito sakay tu kapangyariyan na. 5 Tánni awan meayun u pánniwala moy tu karunungan nu tolay nan tu kapangyariyan nu Diyos. 6 Pero tu mágkatatag dán hide tu ispiritwal a kákkabiyag, u itáttoldu me ay u karunungan nu Diyos, bakán a karunungan ni munduwan iye oni u tagapamahala hide ti panahunan iye a u kapangyariyan de ay lumipas. 7 Pero u ipáppangaral me ay u lihim a karunungan nu Diyos a nelihim tu itod pero intalaga na iye para tu kapuriyan tam, bagu pa a lalangán i munduwáy. 8 Essa man tu tagapamahala hide ti panahunáy nadid ay awan ti nakaintendi ti iye a lihim. Dipo ni naintendiyan di iye, ay awan di nakwa inpako tu kudus u Panginoon tam a makapangyariyan. 9 Pero konna he u nakasulat tu Kasulatan, “Awan palla ti tolay a naketa oni nakasaneg, sakay nakatukoy, tu bagay hide a inhanda nu Diyos para tu magmahal hide nikuna.” 10 Pero inhayag iye nikitam nu Diyos tu pamamag-itan nu Banal a Ispirito. Dipo tukoy nu Banal a Ispirito u atanan a bagay, maskin u madisalad a karunungan nu Diyos. 11 Dipo konna be tu tolay, awan ti makatukoy tu áisipán na maliban tu sadile na a ispirito. Konna la bi hod, awan ti makatukoy tu áisipán nu Diyos maliban tu Ispirito nu Diyos. 12 Pero bakán a u ispirito nu mundu u tinanggap tam nan u Ispirito nu Diyos, tánni maintendiyan tam u kaluub hide a inyatád na nikitam. 13 Kaya ngane a mangaral kame tu pamamag-itan nu karunungan nu Banal a Ispirito bakán a ayun tu karunungan nu tolay. U ipáppaliwanag me tu páppágyanan hide nu Ispirito nu Diyos ay u tatahoden a Ispiritwal. 14 Dipo u tolay a awan u Ispirito nu Diyos nikuna ay umád a tumanggap tu kaluub hide a gábwat tu Ispirito nu Diyos. Para nide, awan iye ti kabuluhan sakay awan de maintendiyan, dipo awan nide u Ispirito nu Diyos a mangdemlag tu isip de. 15 U tolay a te Ispirito nu Diyos ay maare na a matukuyan u kahalagaan nu atanan a bagay ni iye ay maganda oni awan pero u tolay a awan nikuna u Ispirito nu Diyos ay awan na matukuyan u tolay a tehhod a Ispirito nu Diyos. 16 Konna he u nakasulat tu Kasulatan, “Deya u makatukoy tu áisipán nu Panginoon? Awan! Kanya awan be ti makapayo nikuna.” Pero hikitam a mánnampalataya hide ay tukoy tam u áisipán ni Cristo.
31 Nadid, kákkapatkákka, awan takam makauhon konna tu gággimitán ko tu tolay hide a katoy nide u Banal a Ispirito. Kailangan a kauhunán takam bilang tolay a mabiyag palla ayun tu kagustuwan nu bággi, sakay anak palla ti pánnampalataya ni Cristo. 2 U itoldu ko nikam ay nebagay tu bigu hide a mánnampalataya dipo awan moy palla kaya a maintendiyan u toldu hide a mangpabegsák tu pánnampalataya moy. Pero maski nadid ay awan moy palla kaya. Kumán a gatas u inyatád ko nikam, bakán a maigát a makan, dipo awan moy palla iye kaya. 3 Dipo maghare palla nikam u kagustuwan nu bággi. Tehhod palla a iyamutan sakay dimaan. Ina u mangpatunay a makamundu kam palla sakay mabiyag ayun tu kagustuwan nu bággi. 4 Ni kagiyán nu essa, “Sakupák ni Pablo,” sakay kagiyán be nu agum, “Sakupák ni Apolos,” awan beman ina u patunay a mabiyag kam palla ayun tu kagustuwan nu bággi? 5 Deya beman ti Apolos? Deyaák beman? Tagapagserbi kami la nu Diyos, ginamit nala tánni maakit kam a manalig ni Cristo. Gággimitán la nu balang essa u tarabaho a tinanggap na tu Panginoon. 6 Konna he u halimbawa nu tarabahu me, kumán a hikán u nagmula, ti Apolos u nagdilig, pero u Diyos u nagpatubu sakay nagpalagu. 7 Bakán a u nagmula oni u nagdilig u mahalaga, nan u Diyos a nangpatubu sakay nágpalagu. 8 U mágmula sakay u mágdilig ay pareho la a mágtarabaho sakay balang essa ay tumanggap ti gantimpala ayun tu pagud na. 9 Dipo pareho kami la ay ti Apolos a mágtarabaho para tu Diyos, sakay hikam u kumán a araduwan sakay hikam u kumán a bilay a ipataknág nu Diyos. 10 Ayun tu kabaitan nu Diyos nikán, hikán u nagdátton tu pundasyon, konna tu essa a malalake a mágpataknág. Sakay u agum be u mángtapos tu bilay. Pero magin maingat u balang essa a mángtapos tu bilay, 11 dipo awan dán ti agum a pundasyon a maare a idátton maliban tu nedátton dán, awan ti agum nan ti Jesu-Cristo. 12 - 13 Balang essa a mánnampalataya ay kailangan de a magin maingat dipo dumemát u aldew nu pághatul a atanan nu gimet de ay mapurbaan tu apoy. Ti aldiwan itod ay masubukan u ginimet nu balang essa ni te pinagserbiyan oni awan: U tolay a naggimet ti tama, kumán a intulos na u pággimet ti bilay a gimet ti ginto, pilak, sakay mágkahalaga a bito, dipo awan iye hide matutod. Pero u tolay a maggimet ti madukás ay kumán a intulos na u págtolnák ti bilay a gimet ti kayo, lamon, oni yaut a matutod. 14 Ni awan natutod u netaknág tu dibbew nu pundasyon ay makatanggap ti gantimpala u nángpataknág hod. 15 Pero ni matutod iye ay awan siya ti matanggap a gantimpala; pero maligtas padi siya. Kaya la ay kumán la siya a nakaligtas tu apoy. 16 Awan moy beman tukoy a templo kam nu Diyos dipo mágyan nikam u Ispirito na? 17 Ni ti deya man u mangsida tu templo nu Diyos ay parusaan na. Dipo banal u templo nu Diyos, hikam i templo wan ina. 18 Dyan moy dayaán u sadile moy. Ni tehhod a magakala nikam a malalake siya ayun tu karunungan ni munduwáy ay dapat ibilang na dán u sadile na a awan ti tukoy tánni matukuyan na u karunungan a gábwat tu Diyos. 19 Dipo u karunungan ti munduwan iye ay awan ti kabuluhan tu pangileng nu Diyos. Konna he u nakasulat tu Kasulatan, “Ekhutan nu Diyos u mágkalalake hide tu kalalakiyan di labe.” 20 Sakay kinagi na pa tu Kasulatan, “Tukoy nu Panginoon a awan ti kabuluhan u áisipán nu tolay hide a magakala a mágkalalake hide.” 21 Kaya dyan moy ipagmadakál u deya man. Dipo mebilang a hod nikam u atanan: 22 hikán a ti Pablo, Apolos, sakay ti Pedro ay inyatád na para nikam. I munduway, u biyag, u kákkatay, sakay u panahun nadid sakay tu dumemát a panahun, iye a atanan ay neatád nikam para tu kapiyaan moy. 23 Sakay hikam ay para ni Cristo, sakay ti Cristo ay para tu Diyos.
41 Nadid, dapat u pangileng moy nikame ay tagapagserbi ni Cristo sakay katiwala a mángpahayag tu upos nu Diyos a date a awan ti makatukoy. 2 U katiwala ay kailangan a magin tapat tu amo na. 3 Pero awan ti ánya man nikán ni hatulanák moy oni maski hádya a pághukuman nu tolay; maski ni hikán a mismo ay awan ko maare a kagiyán a tapaták oni awan. 4 Awan ti mangbalisa ti isip kuwáy, pero bakán a u gusto na kagiyán ay awanák dán ti kasalanan. U Panginoon la u makahatul nikán ni tama oni male u gággimitán ko. 5 Kaya bakán a hikitam u magkagi ni tama oni madukás u essa a tolay. Maguhay kam tu tama a panahun, dipo u Panginoon u maghatul káddemát na. Iluwas na u bagay hide a netagu tu kadiklamman sakay ikagi na u lihim hide a plano nu balang essa. Ti panahunan iye, balang essa ay tumanggap ti papure a karapat-dapat nikuna a gábwat tu Diyos. 6 Kákkapatkákka hide, ginamit ko a halimbawa u sadile ko sakay ti Apolos para maintendiyan moy u gusto a kagiyán ni kakagiyanan iye, “Diyan moy dagdagen u nakasut.” Kaya dyan moy ipagmadakál u essa a tolay sakay hamakán moy labe u essa. 7 Ánya i nanglamangan moyay tu agum? Awan beman atanan a katoy nikam ay gábwat tu Diyos? Ni konna hod, bakin a ipagmadakál moy ina a kumán a awan kaluub nikam nu Diyos? 8 U akala moy beman ay awan kamon ti pagkukulang sakay mágkayaman kamon! Hare kamon bál maske awan mikam tinulungan! Nakwa ay nagin hare kamon ngane tánni magin hari kame be a kaguman moy. 9 Dipo tu pangisip ko, hikame a apostol hide u ginimet nu Diyos a pinakamababa tu atanan a tolay. U kapareho me ay u tolay hide a nahatulan dán ti kákkatay, a áelingán nu anghel hide sakay nu tolay hide. 10 Kagi nu tolay hide, Awan kame kan ti tukoy dipo u itáttoldu me ay tungkul ni Cristo; pero mágkarunung kam kan dipo ni Cristo! Mágkahina kame kan; pero mágkabegsák kam kan! Sássestiyán kame pero igággalang kam! 11 Hanggan ti iye a odas ay magaláp kame, mauwaw, sakay ngahe-ngahe a awan dán ti mesulot; páppasakitan sakay awan kame dálla ti matulu-tulusan. 12 Magtarabaho kame para tehhod a makan. Idáddasal me a pagpalaán u magupos nikame ti madukás; táttiisán me ni sássestiyán di kame. 13 Ni mámmetmetán di kame ay tábbegán me hide tu makasaya hide a pággupos. Hanggan nadid ay kumán kame padi a madangát a sagad, pinakamababa tu atanan a tolay ti munduwáy. 14 Awan ko iye insulat para ipasanike kam, nan para payuwan takam bilang anak ko hide a pinakamamahal. 15 Maskin magkahod kam ti sapulo a libo a tagapagtoldu tu kákkabiyag moy bilang Kristiyano, ay eessa padi u meturing a ama moy tu pánnampalataya. Hikán itod dipo hikán u nakasanigan moy tu Maganda a Baheta tungkul ni Cristo Jesus. 16 Kaya mákkekakagbiyák nikam a umaheg kam nikán. 17 Dipo he, kaya ko a pinaangay hina ti Timoteo, u pinakamamahal ko sakay tapat a anak tu Panginoon. Siya u mángpaala-ala nikam tu tama a kákkabiyag a sássunudán ko nadid a nákpagkaessaák dán ni Cristo Jesus. Ina hide u itáttoldu ko tu bawat mánnampalataya tu atanan a lugar. 18 U sangan nikam ay magmadakál dán dipo u akala de ay awanák dán hina angay. 19 Pero ni kaluuban nu Panginoon, ay angayák hina ti mas maaga, sakay ilingán ku pay ni ánya ipagmadakál diye, ni iye ay upos dila oni tatahoden a hod nide u kapangyarihan nu Diyos. 20 Dipo u tolay a paghariyan nu Diyos ay ketan u kapangyarihan nu Diyos tu gimet na sakay bakán la a tu pággupos na. 21 Ánya u gusto moy: angayák hina a págngállan takam, oni angayák hina a ipeta u págmahal sakay kabaitan ko nikam?
51 Nakademát nikán u baheta a essa kan nikam u naggimet ti madangát dipo inagum na u kabanga nu ama na. Maski u awan hide makidiyos ay awan di ina magimet. 2 Sakay hambug kam palla! Dapat masanike kam sakay maglungkut. Paibután moy tu grupo u makán gimitán ti iye! 3 Maski awanák hina ay kátnaák labe hina ti ispirito, kaya kumánnák labe a katoy hina. Kaya u maggimet ti ina ay hinatulan ko dán 4 tu ngahan nu Panginoon Jesus. Ni mamággipun-ipun kam, kagumanák moy ti ispirito, sakay tu kapangyariyan nu Panginoon tam a ti Jesus, 5 iyatád moy ni Satanas i tolayan ina tánni mepahamak u bággi na sakay tán para maligtas u ispirito na tu Aldew nu Pághatul nu Panginoon. 6 Dyan kam magmadakál. Awan moy bemaán tukoy a u madukás a gimet ay kumán a u págpaalsa ti tinapay? Dipo maski ni badit la ay meahes u atanan. ” 7 Kanya ibutan moy dán u date a págpaalsa, u kasalanan tánni luminis kam. Tánni mepareho kam tu essa a bigu a namasa a awan ti págpaalsa. U tatahoden ay nalinisan kamon dipo nealay ti Cristo para nikitam. Konna siya tu tupa a iyalay kada aldew nu káttaleb. 8 Kaya ngane ipagsaya tam iye a Piyesta, pero bakán a tu pamamag-itan nu tinapay a te date a págpaalsa nan tu pamamag-itan nu tinapay a awan ti págpaalsa. U gusto a kagiyán niiye ay adággen tamon u kadukássan tam sakay kahalayan sakay mabiyag kitam ti malinis sakay tapat. 9 Nagsulaták nikam tu itod a dyan kam mákpággagum tu tolay hide a mangilállake sakay mangibábbey. 10 Bakán a u gustu ko a kagiyán ay adeyuwan moy u awan hide mánnampalataya a mággagimitán ti madukás, madadámmot, matakaw oni sumamba tu diyos-diyosan. Dipo ni adeyuwan moy u awan hide mánnampalataya ay kailangan moy a lumakad ti munduwan iye pero awan be maare. 11 U gusto ko a kagiyán a awan moy pákkagumanan ay u makánkagiyán hide a Kristiyano pero mággagimitán labe hide ti madukás, madadámmot, sumamba tu diyos-diyosan, magsesti, máglalasingán, sakay mágtakaw. Dyan kam mamákkan nide. 12 - 13 Sabagay, awanák ti karapatan a humatul tu awan hide Kristiyano; u Diyos u manghatul nide. Awan beman u kapatkákka moy ti pánnampalataya u dapat moy a hatulan? Konna he u kinagi nu Kasulatan, “Ibutan moy tu grupo u mággagimitán ti madukás.”
61 Nadid, ni te essa nikam a tehhod a reklamo tu kapatkákka na bakin a iyangay napa tu awan manampalataya a huwes? Awan beman dapat iyangay na tu manampalataya hide ni Jesus? 2 Awan moy beman tukoy a u pinile hide nu Diyos u mághatul ti munduway? Ni hikam u maghatul ti munduway, awan moy beman kaya a hatulan u konna hina ti kabadit a bagay? 3 Awan moy beman tukoy a hikitam u manghatul tu anghel hide? Kaya ni ánya u awan moy pamágkaintendiyan nadid dapat ayusán moy dipo badit la ina a bagay. 4 Kaya ni tehhod kam a reklamo, bakin a iyangay moy pa iye tu tolay hide a awan mánnampalataya? 5 Masanike kam be! Awan dán be malla nikam ti maare a máng-ayus tu problema moy a mátkaka? 6 Bakin a mamágkaso kam a mátkaka? Sakay u pángkasuwan moy pa ay u tolay hide a awan ti pánnampalataya. 7 U pángdimanda moy tu kapatkákka moy ay dakál a pagkakamali moy. Bakin awan moy dálla kaya a pasensiyaan u mággagimitán tu madukás sakay makán dayaán nikam? 8 Pero hikam pa a mismo u makán gimitán ti madukás sakay makán dayaán maskin tu kákkapatkákka moy hide ti pánnampalataya. 9 Awan moy beman tukoy a awan ti kabahagi tu kahariyan nu Diyos u makasalanan hide a tolay? Dyan moy dayaán u sadile moy! U tolay a mángngibábbey sakay mángngilállake, sumássamba tu diyos-diyosan, sakay mák-agum tu kaparehas na a lállake oni kaparehas na a bábbey, 10 u mágtakaw, u madadámmot, máglalasing, u mapagdusta sakay tu magdaya hide ay awan ti kabahagi tu kahariyan nu Diyos. 11 Konna hina u agum nikam tu itod. Pero nalinis kamon tu kasalanan moy hide sakay netalaga kamon tu Diyos. Napatawad kamon tu ngahan nu Panginoon tam a ti Jesu-Cristo sakay tu Banal a Ispirito nu Diyos. 12 Tehhod a magkagi hina a: “Maariyák a maggimet ti maski ánya.” Pero awan atanan a bagay ay makatulung nikam. Maari ko be a kagiyán, “Maariyák a maggimet ti maski ánya,” pero awanák magpaalipin tu ánya man a bagay. 13 U kagi be nu agum ay “U makan ay para tu tiyan, sakay u tiyan ay para tu makan.” Tama ina, pero pare-pareho ina a sidaáan nu Diyos. U bággi ay bakán a para tu pángngibábbey sakay pángngilállake nan para tu págserbi tu Panginoon, sakay u Panginoon u bahala a mangalaga tu bággi. 14 Sakay biniyag a huway nu Diyos u Panginoon a ti Jesus. Kaya hikitam be ay mabiyag a huway tu pamamag-itan nu kapangyariyan na. 15 Awan moy beman tukoy a parte kam nu bággi ni Cristo? Kaya ni hikán u bággi ko a kabahagi nu bággi ni Cristo ay talaga awan ko iduhog tu bággi nu belyas? Awan itod maare! 16 Awan moy beman tukoy a ni deya man u nákpággagum tu essa belyas ay magin essa dán hide? Dipo kinagi na tu Kasulatan, “U duwwa ay magin essa.” 17 Pero u nákpagkaessa tu Panginoon, ay magin kaessa na ti Ispirito. 18 Kaya iwasan moy u pángngibábbey sakay pángngilállake. U agum a kasalanan a gággimitán nu tolay ay awan makasida tu bággi, pero u mangibábbey sakay mángilállake ay magkasala tu sadile na a bággi. 19 Awan moy beman tukoy a u bággi moy ay templo nu Banal a Ispirito a kátna nikam sakay tinanggap moy a gábwat tu Diyos? Kaya awan moy dán kao u bággi moy. 20 Dipo natubus kamon ti dakál a halaga. Kaya gamitán moy u bággi moy para maparangalan u Diyos.
71 Nadid, sa iye u makagi ko tungkul tu sulat moy nikán: mas maganda pa ni awan dán mákkabanga u essa a lállake. 2 Pero para maiwasan u pángngibábbey sakay pángngilállake, ay masmaganda a magkahod ti kabanga u bawat lállake sakay bábbey. 3 Dapat tupadán nu lállake u tungkulin na tu kabanga na, sakay dapat konna bi hod u gimitán nu bábbey. 4 Dipo bakán dán a u bábbey u tehhod a karapatan tu sadile na a bággi nan u kabanga na dán; konna bi hod tu lállake, bakán dán a siya la u te karapatan tu sadile na a bággi nan u kabanga na dán. 5 Kanya dyan moy ikemot a mákduhog tu kákkabanga moy, maliban dálla ni napagkasunduwan moy a dyan kam palla magduhog, tánni melaan u panahun moy tu págdasal. Pero káttapos ay maare kamon a magduhog tánni awan kam matokso ni Satanas dipo la a awan kamon makapagpugád tu sadile moy. 6 I kinagi kuwáy nikam ay bakán a utus nan payo tu kalagayan moy. 7 Gusto ko nakwa a umaheg kam nikán a atanan. Pero bawat essa nikitam ay tehhod a kanya-kanya a kaluub a gábwat tu Diyos, sakay awan iye pare-pareho. 8 Sa iye u makagi ko tu mámmadiket sakay tu bábbelo hide a bábbey: mas maganda pa ni awan kamon mákkabanga a konna nikán. 9 Pero ni awan hide makapagpugád tu sadile de ay mas maganda pa ni mákkabanga dálla hide; dipo mas maganda pa ni mákkabanga nan ni awan makapagpugád tu sadili de dipo tu kákkasoh de. 10 Sa iye u utos hide tu tehhod hide a kabanga, bakán iye a gábwat nikán nan gábwat tu Panginoon: dyan mákhiwalay u bábbey tu kabanga na. 11 Pero ni mákhiwalay siya ay itulos-tulos na a awan ti kabanga oni awan ay mákpagkasundu dálla siya a huway tu kabanga na. Sakay dyan be hiwalayan nu lállake u kabanga na. 12 Para tu agum, sa iye u makagi ko: ni u essa a lállake a mánnampalataya ay tehhod a kabanga a awan mánnampalataya sakay gusto na palla a mák-agum nikuna ay dyan na siya hiwalayan. 13 Ni u essa a mánnampalataya a bábbey ay tehhod a kabanga a awan mánnampalataya sakay u lállake ay masoh palla a mák-agum nikuna ay dapat awan na hiwalayan u kabanga na. 14 Dipo u lállake a awan mánnampalataya ay magin karapat-dapat tu Diyos dipo tu kabanga na a mánnampalataya. Sakay u bábbey a awan mánnampalataya ay magin karapat-dapat dipo tu kabanga na a manampalataya. Kaya u anak de hide ay malinis dán tu atubang nu Diyos dipo imbilang dán nu Diyos a malinis u págkabanga de. 15 Pero ni masoh a máksina u awan mánnampalataya tu kabanga na, pabayan moy siya a máksina. Tánni u lállake oni u bábbey a mánnampalataya ay malaya dán. Dipo dinulaw kitam nu Diyos tu mapayapa a biyag. 16 Pero ánya tukoy moyay hikam a bábbey hide, bakay hikam i magin dahilanay nu kákkaligtas nu kákkabanga moy? Hikam be a lállake hide, ánya tukoy moyay, bakay hikam i magin dahilanay nu kákkaligtas nu kákkabanga moy? 17 Mabiyag u balang essa, ayun tu impagkaluub nikuna nu Panginoon, sakay magtulos-tulos tu date na a kalagayan ti biyag nikuna dulawán siya nu Diyos. Ina u itáttoldu ko tu atanan a mánnampalataya. 18 Ni mara la nature dán u essa a tolay nikuna dulawán siya nu Diyos ay dyan na dán ibutan u tanda nu pagigin ture na; ni awan pálla nature ay dyan dán siya magpature. 19 Awan ti halaga ni ture u essa a tolay oni awan ture u mahalaga ay u kássunud tu utus hide nu Diyos. 20 Balang essa ay magtulos-tulos tu kalagayan na ti biyag nikuna dulawán siya nu Diyos. 21 Alipin ka beman nikuna dulawán ka nu Diyos? Dyan mo iye isipán. Pero ni tehhod ka a pagkakataun a makalaya ay gimitán mo iye. 22 U essa alipin tu itod a dinulaw nu Panginoon ay nagin malaya dán dipo tu Panginoon. Konna bi hod, u tolay a malaya nikuna dulawán ni Cristo ay nagin alipin dán ni Cristo. 23 Binale kamon nu Diyos ti dakál a halaga; kaya dyan kamon paalipin tu tolay hide. 24 Kaya kákkapatkákka ko hide, ánya man u kalagayan moy ti kákkabiyag nikuna dulawán kam nu Diyos, itod u itulos-tulos moy tu págserbi moy tu Diyos. 25 Nadid, tungkul be tu mámmadiket sakay tu bábbelo hide, awanák ti mekagi a utus a gábwat tu Panginoon. Pero bilang essa a tolay a mapagkatiwalaan dipo tu kagbi nikán nu Panginoon ay iye u mekagi ko, 26 - 27 Iye u makagi ko nikam nadid a panahun ni sákhirap. Ni tehhod ka dán a kabanga, ay dyan mo dán hiwalayan u kabanga mo. Ni awan ka palla ti kabanga ay mas maganda ni dyan ka dálla mákkabanga. Dipo tu palagay ko ay mas maganda pa a magtulos-tulos ka tu kalagayan mo ti biyag nikuna dulawán ka nu Diyos. 28 Pero ni mákkabanga kam, ay awan kam magkasala. Sakay ni mákkabanga be u madiket ay awan siya magkasala. Pero u mákkabanga ay makadanas ti makpal a hirap ti biyagan iye, sakay ina a hirap u gusto ko a maiwasan moy. 29 Iye u gusto ko a kagiyán, kákkapatkákka: adene dán u netakda a panahun, kaya sapul nadid, u tehhod a kabanga ay mabiyag a kumán a madiket. 30 Dyan moy pabayan a u págluksa, págsaya, sakay pati be tu págbale ti ari-ariyan u magin dahilan nu káadág moy tu págserbi moy tu Diyos. 31 Sakay u mágpapospusán dálla tu bagay hide ti lutaáy ay ibali awan na dán. Dipo u atanan a katoy ti lutaáy ay mawan. 32 Gusto takam a meadeyo tu pakánbalisa. U pággaabalaan nu lállake a awan ti kabanga ay u gawain hide nu Panginoon sakay ni kodya siya a makasaya nikuna. 33 Pero u pággaabalaan nu lállake a tehhod a kabanga ay u bagay hide ti munduwáy, dipo gusto na a mapasaya u kabanga na. 34 Dipo he ay mahate u págserbi na. Konna labe hod tu mámmadiket sakay u bábbey hide a awan ti kabanga, u pakán abalaan de ay u bagay hide a patungkul tu Panginoon dipo gusto de a metalaga u buo de a biyag tu pagserbi tu Panginoon. Pero u bábbey a tehhod a kabanga ay u bagay ti lutaáy u pakán abalaan na, dipo gusto na a mapasaya u kabanga na. 35 Kinagi ko iye tánni matulungan takam. Awan takam higpitan; u gusto kula ay meangay kam ti maayus a kákkabiyag, tánni awan kam maabala a magserbi tu Panginoon. 36 Tungkul iye tu magkatipan a nagkasundu a awan palla pakasal, ni mabate nu lállake a masoh dán siya a mákduhog tu katipan na ay dapat dán hide a magpakasal. Itulos de u date de a plano. Pakasal dán hide, awan iye kasalanan. 37 Pero ni magdisisyon u ulito a awan dán mákkabanga ay maganda iye ni matatag u kaluuban na sakay awan la siya napilitan. Sakay kaya na a magpugád tu sadile na. 38 Kaya maganda mákkabangaáy, pero mas maganda ni makapagpugád tu sadile sakay awan mákkabanga. 39 U bábbey ay tulos-tulos a mák-agum tu kabanga na mentaras biyag siya. Pero ni matay u lállake ay malaya dán siya a mákkabanga a huway maskin deya u kasohan na. Pero dapat ay tu kapareho na la be ti pánnampalataya. 40 Pero palagay ko ay mas magin masaya siya ni awan dán siya mákkabanga a huway. Ina u makagi ko, sakay tukoy ko a he nikán u Ispirito nu Diyos.
81 Nadid, iye u metábbeg ko tu tanung moy tungkul tu makan a nealay tu diyos-diyosan hide. Tukoy tam, “a tehhod kitam a karunungan a atanan.” Iye a “karunungan” u rason tánni magin palalo u tolay, pero u págmahal u makapangpatibay nikitam. 2 U tolay a magkagi a makpal dán siya a tukoy, ay kulang palla a talaga u tukoy na. 3 Pero u mangmahal tu Diyos u kilalaán na a kao na. 4 Kaya tungkul tu makan a nealay tu diyos-diyosan hide, tukoy tam a awan tatahoden iye hide a diyos. Sakay tukoy tam be a eessa u Diyos. 5 Maske ni te kákkagiyán a makpal a diyos ti langet oni ti lutaáy, sakay mákpal pa a ngángngahanan a “diyos hide” sakay “panginoon hide,” 6 para nikitam ay eessa la u Diyos, u Ama a nanglalang tu atanan a bagay, sakay biyag kitam para nikuna. Eessa u Panginoon, ti Jesu-Cristo: tu pamamag-itan na ay nilalang u atanan a bagay sakay tu pamamag-itan na ay biyag kitam. 7 Pero awan atanan ay makatukoy ti iye. U agum ay nasanay ti itod a mágsamba tu diyos-diyosan, kaya hanggan nadid, kapag ni kuman hide ti konna he ay u akala de ay alay padi tu diyos-diyosan u kákkanán de. Dipo wad a kulang u karunungan de, kaya mabalisa hide tu buung akala de a nagkasala hide. 8 Bakán a dipo tu makan kaya kitam a karapat-dapat tu Diyos. Awan ti mawan nikitam ni awan kitam kuman ti konna hod a makan, sakay awan labe ti meatád a maganda ni kuman kitam man he. 9 Pero mag-ingat kam, bakay tu kalayaan moy a kuman ti ánya man a makan ay magin rason a pagkasalaan nu mágkahina hide ti pánnampalataya. 10 Pero hikam a mas nakatukoy ti iye, ay kuman tu disalad nu templo nu diyos-diyosan hide, sakay netan kam nu mágkahina palla hide ti pánnampalataya, awan wád hide meaheg a kuman ti itod a nealay tu diyos-diyosan hide maski para nikuna ay kasalanan iye? 11 U ginimet mo a itod u nagin dahilan nu págkasala nu kapatkákka moy a mahina palla ti pánnampalataya. A natubos be tu kákkatay ni Cristo. 12 Dipo hod ay nagkasala kam ni Cristo dipo hikam u dahilan nu págkakasala nu kapatkákka moy dipo u ginimet mo u nángtoglad nikuna para maggimet ti bagay a labag tu kaluuban na. 13 Kaya ni tu makan la u dahilan a pagkasalaan nu kapatkákka ko ay dyanák dán kuman ti karne tánni awan siya magkasala.
91 Awan beman malayaák? Awan beman apostolák? Awan beman netan ko ti Jesus a Panginoon tam? Awan beman hikam u bunga nu págserbi ko tu Panginoon? 2 Tu agum ay awanák de tenggiyán a apostol pero tukoy ko a kilalaánnák moy a apostol! Dipo hikam a mismo u patunay a apostolák nu Panginoon, dipo simmampalataya kam tu Diyos tu pamamag-itan nu intoldu ko. 3 Sa iye u tábbeg ko tu awan hide mangkilala tu pagkaapostol ko. 4 Awan kame beman ti karapatan a umasa tu mannampalataya hide tu kailangan me hide? 5 Ni te kabanga kame, awan kame beman ti karapatan a mangkuyog tu kabanga me a mánnampalataya a konna tu gággimitán ni Pedro, a konna tu agum hide a apostol sakay kákkapatkákka nu Panginoon tam? 6 Hikame beman la ay ti Bernabe u kailangan a magtrabaho para tu kákkabiyag me? 7 Tehhod beman a sundalo a siya pa u manggastus tu págserbi na? Tehhod beman a magmula a awan makinabang tu bunga nu immula na? Tehhod beman a magalaga ti tupa a awan makinabang tu gatas nu tupa na? 8 U kákkagiyán ko ay awan la neayun tu isip nu tolay; nan konna be hod u nesulat tu Kautusan. 9 Dipo nakasulat tu Kautusan ni Moises: “Dyan mo busalan u baka mentras a pagággik nan pabayan mo a kuman.” Bakin u baka beman hide u pospusan nu Diyos? 10 Awan! Hikitam u gusto a kagiyan nu Diyos. Nesulat iye para nikitam, dipo u mággaradu sakay u mággággik ay pareho a umasa tu kabunong de. 11 Minulaan mikam ti ispiritwal a págpapala; kanya awan beman dapat la a magane kame nikam tu kailangan me hide? 12 Ni u agum hide a mángngaral ay tehhod a karapatan, di mas lalu kame dán! Pero maski ni konna pa man hod ay awan me ginamit iye a karapatan. Nan tiniis me u atanan tanni awan kame magin hadlang tu Maganda a Baheta tungkul ni Cristo. 13 Awan moy beman tukoy a u magserbi hide tu templo ay tumanggap tu makan a gábwat tu templo, sakay u mágserbi hide tu altar ay tehhod be hide a kabahagi tu alay a katoy tu altar? 14 Konna labe hina, inyutus nu Panginoon a u timmanggap tu Maganda a Baheta ay dapat tumulong tu kailangan hide nu mángngaral hide tu Maganda a Baheta. 15 Pero awan ko ginamit iye hide a karapatan, sakay awanák nadid nagsulat nikam tán atáddinák moy ti tulung. Mas gustuwán ku pa a matayák ti aláp nan mák-agidák sakay itod u magin dahilan para awan ku dán mepagmadakál a itáttoldu ko u Maganda a Baheta ti libre. 16 Bakán a dipo a mángngaralák tu Maganda a Baheta ay maariyák dán a magmadakál. Ina u tungkulin a netalaga nikán. Kakagbiyák ni awan ko ibaheta u Maganda a Baheta! 17 Ni gimitán ko iye tu sadile ko a kagustuwan ay tehhodák a mauhay a upa; pero u tatahoden gimitán kula u tungkulin ko dipo iye u nepagkatiwala nikán nu Diyos. 18 Anya nadid i mauhay kuway a gantimpala? Awan ti agum nan u págtoldu ko tu Maganda a Baheta ti libre sakay tu awan ko káasa tu karapatan ko a mangaged bilang mángngaral. 19 Malayaák sakay awanák alipin nu deyaman; pero nagpaalipinák tu atanan tánni makaakiták la ti makpal para sumampalataya tu Panginoon Jesu-Cristo. 20 Kapag ni hedák tu Judio hide ay mabiyagák a konna tu essa a Judio tánni maakit ko hide a sumampalataya ni Jesu-Cristo. Maski ni awanák sakup nu Kautusan nu Judio hide ay sinunud ko iye tánni sumampalataya la hide. 21 Kapag ni hedák tu Hentil hide, a awan makatukoy tu Kautusan ni Moises ay mabiyagák a konna tu essa a tolay a awan sakup nu Kautusan tánni maakit ko be hide. (Pero awan ko kákkagiyán a awanák dán sumássunud tu Kautusan nu Diyos dipo u sássunudán ko ay u utus hide ni Cristo.) 22 Ni hikán ay hod tu mágkahina hide ti pánnampalataya ay mákbagayák para mapabegsák ko hide ni Cristo. Nákbagayák tu atanan a tolay, tánni maskin tu ánya a paraan ay maakit ko u agum nide a sumampalataya ni Jesu-Cristo para maligtas hide. 23 Gággimitán ko iye a atanan dipo tu Maganda a Baheta, tánni mákbahagiyák tu págpapala ni iye. 24 Tukoy moy a u kasale tu ginanan ay sabay-sabay a magginan, pero eessa la u makatanggap ti gantimpala! Kaya husayán moy a magginan tánni makatanggap kam ti gantimpala. 25 Atanan nu máksale tu ayam ay kailangan a magpugád tu sadile na tu atanan a bagay. Tánni matanggap na u gantimpala na a pang-alistuwan. Pero u gantimpala a gusto tam ay u gantimpala a panghanggan-hanggan. 26 Kaya ngani a tehhod a tamuwán u págginan ko. Sakay awanák sumuntuk tu pahás. 27 Disiplinaan ko u sadile ko sakay magpugáddák, dipo ni awan, bakay káttapos ko magbaheta tu Maganda a Baheta tu agum ay hikán pa u awan makatanggap ti gantimpala.
101 Nadid, kákkapatkákka ko hide, gusto ko a maala-ala moy u nangyare tu nuno tam hide a simmunud ni Moises. Linenduman hide nu diklám tu nilakad de sakay tu káahabes tu Madideg a Diget. 2 Ni konna hod, nabawtismuwan hide a atanan tu diklám sakay tu diget tánni magin tagasunud hide ni Moises. 3 Sakay kimman hide a atanan tu makan a gábwat tu Diyos. 4 Sakay imminom be hide tu dinom a inyatád nu Diyos, a gábwat tu Bito. I bituwan itod ay ti Cristo a mangkuyoyog nide. 5 Konna pa man hod, ay awan padi kinasayaan nu Diyos u kakpalan nide, kaya nágkatay hide sakay nagkalat u bangkay de tu parang. 6 Kaya iye hide a pangyayare u makaatád nikitam adal tánni awan tamon gustuwán u mágkadukás hide a bagay, konna tu ginággimet de. 7 Dyan kam sumamba tu diyos-diyosan hide a konna tu agum nide. Ayun tu nesulat: “Nággetnod u tolay hide tánni kuman, uminom, sakay tumaknág tánni magsayaw bilang págsamba de tu diyos-diyosan.” 8 Dyan kitam mangilállake sakay mangibábbey a konna tu ginimet nu agum nide. Kaya 23,000 u natay tu essa la a aldew. 9 Dyan tam purbaan u Panginoon a konna tu ginimet nu agum nide. Kaya natay hide tu kamandag nu kabiklatan. 10 Dyan kitam be mareklamo a konna tu agum nide, kaya binuno hide nu Anghel a Mágpuksa. 11 Nangyare iye nide, tánni magin adal tu atanan a tolay, sakay nesulat iye tánni matolduwan kitam a inabut dán nu dimodyan a panahun a diyan tam ahigán u mágkadukás de a ginimet. 12 Kaya ngane, magingat u magakala a matatag dán ti pánnampalataya, bakay matokso kam sakay magkasala. 13 Awan palla ti pagsubuk a dummemát nikam a awan dinanas nu atanan a tolay. Matapat u Diyos, sakay awan na pakultadan a subukán kam tu mas pa tu kaya moy. Nan, káddemát nu pagsubuk, ay atádden na kam pa ti begsák tánni mapagtagumpayan moy itod. 14 Kaya ngane, kákkapatkákka ko hide, dyan kam sumamba tu diyos-diyosan hide. 15 Kagiyán ko iye nikam bilang essa a tolay a makaintende, hikamon u bahala a mangisip ni u kákkagiyán ko ay tama oni male. 16 Awan beman u káinom tam tu baso a ipáppasalamat tam ay pákbahagi tam tu dige ni Cristo? U kákkan tam tu tinapay a tináppeng-táppeng tam ay pákbahagi be tu bággi na? 17 Makpal kitam pero nagkaessa kitam a kumán a eessa la a bággi dipo eessa la u tinapay a pamághate-hatiyán tam, kaya maski ni makpal kitam ay eessa la a baggi, dipo kabahagi kitam nu eessa a tinapay. 18 Ilingán moy u taga-Israel hide: awan beman u kuman tu alay hide ay mákbahagi tu gággimitán tu pággalayan? 19 Ánya u gusto ko a kagiyán? Kinagi ko beman a tehhod a serbi u diyos-diyosan hide oni u makan a nealay tu diyos-diyosan hide? 20 Awan! U gusto ko a kagiyán ay i alayan ina hide ay inyalay tu dimonyo hide, bakán a tu Diyos. Umád ko a mákpággagum kam tu dimonyo hide. 21 Awan kam maare a mák-enom tu baso nu Panginoon sakay tu baso nu dimonyo hide. Awan kam maare a mákkan tu lamisaan nu Panginoon sakay tu lamisaan nu dimonyo hide. 22 Gusto tam beman a mangimon u Panginoon? Tu pangisip moy beman ay makapangyariyan kitam nan u Panginoon? 23 Tehhod be a magkagi ti konna he, “Malayaák a maggimet ti maskin ánya a bagay,” pero awan atanan ay makapangatád ti maganda. “Malayaák a maggimet ti maskin ánya a bagay,” pero bakán a atanan ay makatulung. 24 Bakán la u kapiyyaan moy u áisipán moy nan dapat pate be u kapiyyaan nu agum. 25 Maare kam a kuman tu maskin ánya a mabale a masida tu tindaan, dyan kamon magtanung ni nealay iye oni awan tánni awan mabalisa u konsensiya moy. 26 Dipo kinagi nu Kasulatan, “U luta sakay u atanan a katoy hod ay kao nu Panginoon!” 27 Ni imbitaan kam nu essa a awan mánnampalataya sakay ummangay kam, kanán moy u ányaman a iyatubang de nikam. Dyan kamon magtanung pa tánni awan mabalisa u konsensiya moy. 28 Pero ni tehhod a mángkagi nikam a, “Nealay iye tu diyos-diyosan hide,” dyan moy iye kanán alang-alang tu nángkagi nikam tánni awan mabalisa u konsensiya. 29 U gusto ko kagiyán ay u konsensiya nu agum bakán a u konsensiya moy. Maare be a makagi nu agum, “Bakin hadlangan nu konsensiya nu agum u kalayaan ko? 30 Bakin a bahángngánnák nu agum tu makan a ipáppasalamat ku dán be tu Diyos?” 31 Kaya ngane, ni kuman kam sakay uminom oni ányaman u gimitán moy, isipán moy pa ni iye ay makapure tu Diyos. 32 Dapat bakán a hikam u magin dahilan nu págkasala nu agum, nu Judio hide, nu Griego hide, oni u kakagumanan moy hide a mánnampalataya. 33 Magporsigiyák a mapasaya u atanan a tolay tu gággimitán ko; bakán la a u sadile ko a kapiyyaan u áisipán ko nan pate u kapiyyaan nu agum, tánni maligtas hide.
111 Nadid, ahigánnák moy a konna tu páng-aheg ko ni Cristo. 2 Ipagmadakál takam, dipo pirmiyák moy a maala-ala tu atanan a bagay sakay sássunudán moy u intáttoldu ko nikam. 3 Pero gusto ko a maintendiyan moy a sakup ni Cristo u bawat lállake sakay u lállake u te sakup tu kabanga na sakay u Diyos u te sakup ni Cristo. 4 U lállake a magdasal oni magpahayag tu upos nu Diyos a tehhod a alibonbun ay awan ti galang ni Cristo a nakasakup nikuna. 5 Sakay u bábbey a magdasal oni magpahayag tu upos nu Diyos a awan ti alibonbun ay awan ti galang tu kabanga na sakay kumán siya a polpok. 6 Pero ni umád nu bábbey a mággalibonbun ay dapat magpapolpok dálla siya. Pero makasani-sanike tu bábbey ni papolpok oni pagapas, kaya mas maganda ni mággalibonbun dálla siya. 7 Pero u lállake ay dapat awan mággalibonbun dipo he nikuna a ketan u idsura sakay karangalan nu Diyos. Pero u bábbey ay karangalan nu lállake. 8 Dipo awan gábwat tu dipalongo a bábbey u lállake nan u dipalongo a bábbey u gábwat tu lállake. 9 Awan be nilalang u lállake para tu bábbey nan u bábbey u para tu lállake. 10 Kaya ngane, dapat a mággalibonbun u bábbey tánni ketan maski nu anghel hide a nagpasakup siya tu kabanga na. 11 Pero hikitam a manampalataya hide ni Cristo lállake man oni bábbey ay pareho hide a mahalaga. Kaya diyan kagiyán nu bábbey a awan na kailangan u lállake sakay diyan be kagiyán nu lállake a awan na kailangan u bábbey. 12 Ni naggábwat man u bábbey tu lállake, u lállake be ay iyáenak nu bábbey; sakay u atanan ay naggábwat tu Diyos. 13 Hikamon u magdisisyon: maganda beman a áelingan u essa a bábbey ni magdasal a awan ti alibonbun? 14 Awan beman date moy dán a tukoy a makasani-sanike para tu essa a lállake ni atakdug u buuk na? 15 Pero karangalan nu bábbey ni tehhod siya a atakdug a buuk. Dipo nepagkaluub iye nikuna bilang alibonbun na. 16 Pero ni tehhod pa a masoh a mákpag-tábbegan tungkul ti iye hide, ay iye u makagi ko: awan kami dán ti iba a kaugaliyan tu págsamba nan sakay iye be u kaugaliyan nu agum pa a mánnampalataya hide tu Diyos. 17 Pero ti sunud kuwáy a kagiyán, ay awan takam mepagmadakál: dipo u pamággipun-ipun moy ay awan ti neatád a maganda nan mas lalo pa a nedukás. 18 Dipo nabaheta ko a tu pamagipun-ipun moy ay awan kam ti pamágkaessa. Sakay maniwalaák a tatahoden iye. 19 (Talaga a magguru-gurupo kam! Pero kaluuban dámbe nu Diyos ina tánni ketan nitideya nikam u matapat?) 20 Tu pamággipun-ipun moy, para tu Banal a Pangapon ay awan tama u gággimitán moy. u kanán moy. 21 Dipo u balang essa kan nikam ay magapura dán a kuman tu bilon na, kaya magaláp dán u agum sakay nalasing dán be u agum. 22 Awan kam beman ti sadile a bilay tánni hod kam a kuman sakay uminom? Oni imemenos moy u mánnampalataya hide sakay pasanikiyán u mágkahirap hide a awan ti matawed a makan? Ánya nadid gimitán kuway? Ahakán takam? Awan! Awan takam maahák! 23 Iye u adal a natanggap ko tu Panginoon sakay ibahagi ko labe iye nikam: tu gibi a nángtokyon de tu Panginoon Jesus ay nangalap siya ti tinapay. 24 Sakay káttapos na a nagpasalamat, ay hinate-hate na itod, sakay kinagi na, “Iye u bággi ko a mealay para nikam. Gimitán moy iye bilang pággala-ala moy nikán.” 25 Konna labi hod, káttapos de a nangapon ay tinawidan na u baso sakay kinagi na, “Iye u baso nu bigu a kasunduwan a pinatunayan nu dige ko. Kada inumán moy iye, ay gimitán moy bilang pággala-ala moy nikán.” 26 Dipo kada mamággipun-ipun kam para kuman ti tinapay sakay uminom tu baso ay ipakapos-pos moy tu tolay hide u kákkatay nu Panginoon, hanggan tu kássole na a huway. 27 Kaya ni deya man u kuman tu tinapay sakay uminom tu baso nu Panginoon a awan karapat-dapat ay nagkasala hide tu Panginoon Jesus a siya u náng-alay tu bággi na sakay tu digi na. 28 Kaya pakasuriyán nu tolay u sadile na bagu a kuman tu tinapay sakay uminom tu baso. 29 Dipo ni deya man u kuman sakay uminom a awan na áisipán u kahalagaan nu bággi nu Panginoon Jesus, ay kumán a kimman sakay umminom tu hatul para tu sadile na. 30 Kaya sa iye u dahilan ni bakin a mágkahina sakay masasaktin u kakpalan nikam, sakay u agum pa nikam ay nágkatay dán. 31 Pero ni pakasuriyan tam u sadile tam, ay awan kitam hatulan nu Panginoon. 32 Pero ni ipakultad nu Panginoon a parusaan na kitam, itod ay para tolduwan na kitam tánni awan kitam mekuyog tu bakán hide a mánnampalataya a parusaan nu Panginoon. 33 Kaya ngane, kákkapatkákka ko hide, kapag magipun-ipun kam a kuman ay mamágguhayan kam. 34 Ni tehhod nikam a magaláp, ay kuman pala tu bilay de tánni awan umabut ti hatul a kaparusaan u pamággipun-ipun moy. Tungkul be tu agum pa hide a bagay, ay saka ko dálla ayusán káddemát ko hina.
121 Nadid, kákkapatkákka, u ipaliwanag ko nikam ay tungkul tu kaluub hide nu Banal a Ispirito. Gusto ko a malinaw iye hide a bagay nikam. 2 Tu itod, nikuna awan kam palla mánnampalataya, ay netaw-taw kam tu pánniwala moy tu diyos-diyosan hide a awan be makapagupos. . 3 Kaya gusto ko a matukuyan moy a maski nikan ay awan makagi nu tolay a igággiya nu Ispirito nu Diyos a, “Sumpaán ti Jesus!” Sakay awan be makagi nu maskin deya a, “Panginoon ti Jesus,” ni awan siya igiya nu Banal a Ispirito. 4 Nadid, tehhod kitam a iba-iba a kaluub, pero eessa la u Ispirito a mágkaluub ti iye. 5 Sakay tehhod be a iba-iba a kalase ni págserbi, pero eessa la a Panginoon u pagserbiyan tam. 6 Sakay tehhod be a iba-iba u ipagimet u Diyos tu balang essa nikitam pero u Diyos labe u nángkaluub tu kakayanan para gimitán iye hide. 7 Inatdden nu Banal a Ispirito u balang essa nikitam ti sadile tam a kaluub, tánni magserbi kitam tu kaguman tam hide para tu kapiyaan de. 8 U agum nikitam ay inatádden nu Banal a Ispirito ti kakayanan a mángbaheta tu upos nu Diyos a nebagay tu kailangan nu mánnampalataya hide. U agum be ay u kakayanan a ipaliwanag u karunungan nu Diyos, pero i iye hide ay naggábwat be tu Banal a Ispirito. 9 Iye labe a Ispirito u nángkaluub tu agum ti dakál a pánnampalataya tu Diyos, sakay u agum ay tehhod a kapangyariyan a magpapiyya tu te saket hide. 10 Tehhod a pinagkaluuben ti kapangyariyan a makagimet ti makataka-taka a bagay; sakay u agum be ay pinagkaluuban ti kakayanan a magin prupeta. Tehhod be a pinagkaluuben ti kakayanan a makatukoy ni u kapangyariyan nu tolay ay gábwat tu Banal a Ispirito oni tu magkadukás hide a ispirito. U agum be ay tehhod a kakayanan a makapagupos ti iba-iba a upos, sakay u agum ay u kakayanan a makapángpaliwanag ti upussan itod hide. 11 Eessa la a Ispirito u náng-atád ti iye a atanan, sakay ibahagi na iye tu balang essa ayun tu kagustuwan na. 12 U bággi ay eessa pero makpal a parte; maski ni binuo nu iba-iba a parte, ay eessa pade iye a bággi konna bihod ti Cristo; makpal u mánnampalataya nikuna pero eessa la ti Cristo a nákpagkaessaan de. 13 Dipo atanan tam, maskin Judio oni ni Griego, alipin man oni malaya, ay nabawtismuwan tu eessa a Ispirito tánni magin essa a bággi. Sakay atanan tam ay nakatanggap tu eessa a Ispirito. 14 U bággi ay binuo nu makpal a parte, bakán la a eessa a parte. 15 Mara ni kagiyán nu tikád, “Bakánnák a kamát, kaya awanák parte nu bággi,” awan dán beman iye parte nu bággi? 16 Sakay mara ni kagiyán nu talinga, “Bakánnák a mata, kaya awanák parte nu bággi,” awan dán beman iye parte nu bággi? 17 Ni puro mata u buo a bággi, kodya wád iye a makasaneg? Ni puro be a talinga u buo a bággi, kodya wád iye a makaahob? 18 Kaya ngane, ayun tu kagustuwan nu Diyos, indátton na u bawat parte nu bággi tam ayun tu tama a kegamitan nu bawat parte. 19 Ni eessa la iye a parte, ay awan iye makagi a baggi. 20 U tatahoden ay mákpal a parte, pero nabuo iye ti essa la a bággi. 21 Kaya awan makagi nu mata tu kamát, “Awan taka kailangan,” kumonna be tu ulo, tu tikád, “Awan taka kailangan.” 22 Ni tuusán, u parte hide a kumán a mágkahina ay sa itod pa u mas kailangan. 23 Sakay u parte hide nu bággi, a tu pangileng tam ay awan masiyadu a mahalaga ay alagaan tam ti husto. Sakay u parte nu baggi a awan maganda ay pagandaán tam ti husto. 24 Awan tamon pagandaan u parte hide a mágkaganda dán. Konna hod u ginimet nu Diyos tu baggi tam, tánni maalagaan tam u parte hide a tu palagay tam ay awan masiyadu a mahalaga u gamit de. 25 Konna hod u ginimet nu Diyos tánni magkaessa a mamágtulung u bawat parte nu bággi, sakay mamágmalasakitan hide. 26 Ni masakitan u essa a parte, ay masakitan be u atanan a bággi. Ni maparangalan u essa a parte, ay masaya hide a atanan. 27 Nadid, hikam u bággi ni Cristo. Sakay u bawat essa ay parte nu bággi na. 28 Sakay nangdatton u Diyos tu mannampalataya hide ti kaluub. U dipalongo ay u apostol hide; u kaduwwa ay u propeta hide, sakay u katallo ay u tagapagtoldu hide tu upos nu Diyos. Nángdátton be siya ti tolay a makagimet ti makataka-taka, makapagpapiyya tu te saket, te tagatulong, te taga pangasiwa, sakay tehhod be a makapagupos ti iba-iba a upos. 29 Awan atanan ay apostol, propeta, oni tagapagtoldu tu upos nu Diyos. Sakay awan be atanan ay makagimet ti makataka-taka a bagay. 30 Awan be atanan ay makapagpapiyya tu tehhod hide a saket sakay makapagupos ti iba-iba a upos sakay awan be atanan ay makapagpaliwanag tu gusto a kagiyán ni itod hide a upos. 31 Pero sikapán moy a magkahod ti kaluub a makatulung tu kapiyaan nu kákkapatkákka tam ti pánnampalataya. Sakay nadid ay itoldu ko nikam u pinakamaganda ti atanan.
131 Nadid, ni makapagupusák man tu iba-iba a upos sakay tu upos nu anghel hide, ni awanák ti págmahal ay kumánnák la a bating-tingan oni pompiyang a makán tánnugán. 2 Sakay ni tehhodák a kakayanan a mángpahayag tu upos nu Diyos, sakay umintendi tu atanan a lihim, maski ni hed dán nikán u atanan a karunungan sakay mepaagton ko man u buked hide dipo tu grabi’t kadakál nu pánnampalataya ko, ni awanák labe ti págmahal ay awanák ti kabuluhan. 3 Ipagatád ko man u atanan a ari-ariyan ko, sakay iyalay ko man u bággi ko para tutudán, ni awanák labe ti págmahal, ay awan labe iye ti kabuluhan nikán! 4 U tolay a te págmahal ay matiyaga sakay mabait, awan masássállapán, awan hambug, oni mapagmadakál. 5 Awan madukás u ugale na, awan makasadile, awan maáiyamután, sakay tukoy na a magpatawad tu kasalanan nikuna nu agum. 6 Awan na ikasaya u madukás a gimet, nan ikasaya na u tatahoden. 7 U tolay a te págmahal ay mapagpatawad, te tiwala tu agum, pirme a tehhod a pag-asa, sakay mapagtiis tu atanan a hirap. 8 Mawan u kakayanan a magpahayag tu upos nu Diyos, mawan u kakayanan a magupos ti iba-iba a upos sakay mawan u karunungan, pero u págmahal ay awan ti kahád. 9 Awan palla husto u karunungan tam sakay kakayanan tu págpahayag tu upos nu Diyos, 10 pero káddemát nu aldew a magin ganap u atanan, iye hide a kakayanan a te pagkukulang ay mawan a atanan. 11 Nikuna a anakák palla ay magupusák, magisipák sakay mangatuwiranák a konna tu anak. Nadid ta te idadák dán ay inibutan ku dán u pagkaanak ko. 12 Nadid a kasalukuyan, awan maliwanag u pákkaintendi tam tungkul tu Diyos a kumán a mahabuháb a hupa u ketan tam tu aspeho, pero dumemát u aldew a ketan tam siya ti harapan. Badit palla u tukoy ko nadid; pero dumemát u aldew a matukuyan ko iye a atanan, konna tu pákkatukoy nu Diyos nikán. 13 Kaya i tálluwan iye ay manatile: u pánnampalataya, pag-asa, sakay págmahal; pero u pinakamahalaga ti tálluwan iye ay u págmahal.
141 Kaya hangadán moy a pirme a mepeta u pagmahal! Hangadán moy a magkahod kam tu kaluub hide a gábwat tu Banal a Ispirito, lalu dán u mángpahayag tu upos nu Diyos. 2 U tolay a magupos ti iba-iba a upos ay mákpágguhon tu Diyos, bakán a tu tolay dipo awan ti makaintendi nikuna. Tu kapangyarihan nu Banal a Ispirito magupos siya tungkul tu bagay hide a awan maintendiyan. 3 Pero u mágpahayag tu upos nu Diyos ay tu tolay u pángkagiyan na tán lumagu u pánnampalataya de sakay pabegsákkán u isip de tán sumaya hide. 4 U magupos ti iba-iba a upos ay pabegsákkán na u sadile na, pero u mángpahayag tu upos nu Diyos ay pabegsákkan na u mánnampalataya hide. 5 Nadid, gusto ko nakwan a makapagupos kam a atanan tu iba-iba a upos, pero mas gusto ko a makapagpahayag kam tu upos nu Diyos. Dipo u tolay a mágpahayag tu upos nu Diyos ay mas mahalaga nan makapagupos ti iba-iba a upos, maliban dálla ni tehhod a mágpaliwanag tu kahulugan nu kákkagiyán na tánni bumegsak u mánnampalataya hide. 6 Kaya kákkapatkákka ko hide, ni ummangayák man hina sakay nagupos ti iba-iba a upos, anya u pakinabang moy nikán? Siyempre awan! Makinabang kam la ni itoldu ko nikam u mensahe nu Diyos a natukuyan ko, oni u pahayag hide nu Diyos tungkul tu mangyare hide tu dumemát a aldew, karunungan, sakay u adal hide a makatulung nikam. 7 Maskin u instrumento hide a awan ti biyag, a konna tu plawta sakay alpa, kodya a matukuyan nu deya man ni ánya u togtog ni awan malinaw u tánnog na? 8 Sakay ni awan malinaw u tánnog nu tambule kodya a matukuyan nu sundalo hide a kailangan di dán a maghanda para mákpaglaban? 9 Konna labe hod, kodya matukuyan nu agum ni ánya u gusto moy a kagiyán ni magupos kam ti iba a upos a awan di labe maintendiyan? Kumán kam a mákpágguhon tu pahás. 10 Makpal a iba-iba a upos ti munduwáy, sakay bawat essa ay tehhod a kahulugan, 11 pero ni awan ko tukoy u upos a ginamit nu kauhon ko ay awan kame magkaintendiyan. 12 Dipo tu hangad moy tu kaluub hide nu Banal a Ispirito, dapat sikapán moy a sumagana kam tu kaluub a makapangpalagu tu mánnampalataya hide. 13 Kaya ngane dapat a ipagdasal nu magupos ti iba-iba a upos a atádden be siya ti kaluub a makapángpaliwanag ti iye. 14 Dipo ni magdasalák ti iba-iba a upos, magdasal laay ay u ispirito ko, pero awan iye ti pakinabang para tu isip ko. 15 Kaya para nikán, ni magdasalák, bakán la au ispiritu ko u magdasal nan gamitán ku be u isip ko a magdasal. Konna bi hod ni mágkansiyonák. Mágkansiyonák tu pamamag-itan nu ispirito ko, pero gamitán ko be u isip ko a mágkansiyon. 16 Ni magpasalamat ka tu Diyos tu pamamag-itan nu ispirito la, kodya a makakagi ti “Amen” u essa a tolay a katoy hod ni awan na naintendiyan u kákkagiyán mo? 17 Dipo maski ni maganda u págpasalamat mo tu Diyos, awan kalabe makatulung tu págpalagu tu pánnampalataya nu agum. 18 Magpasalamaták tu Diyos ta makapagupusák ti iba-iba a upos, higit pa nikam a atanan. 19 Pero tu pamággipun-ipun nu mánnampalataya hide ay mas gusto ko pa a magupos ti limma a upos a maintendiyan sakay makapágtoldu tu agum, nan libu-libu a upos a awan labe ti makaintendi. 20 Kákkapatkákka hide, dyan kam konna tu isip nu anak. Pero ni tungkul tu págkasala magin konna kam tu anak a awan ti tukoy tu mágkadukás. Pero dapat a mágkakáttáng dán i isip moye. 21 Konna he u nakasulat tu Kasulatan a kinagi nu Panginoon, “Magupusák ti iye a banuwan, tu pamamag-itan nu tolay hide a tehhod a iba-iba a upos. Tu pamamag-itan nu labi nu taga-iba hide a lugar. Pero awanák di padi sanigán.” 22 Ni konna hod, u kaluub a makapagupos ti iba-iba a upos ay essa a tanda para ipeta u kapangyarihan nu Diyos tu awan hide mánnampalataya, bakán a tu mánnampalataya hide. Pero u kaluub a magpahayag tu upos nu Diyos ay tanda para ipeta u kapangyarihan nu Diyos tu mánnampalataya hide, bakán a tu awan hide mánnampalataya. 23 Ni tu pamággipun nu mánnampalataya hide ay magpagupos hide ti iba-iba a upos a atanan sakay tehhod a dummemát a tolay a awan ti konna hod a kaluub oni awan mánnampalataya, bakay akalaán de a nagaheng kamon. 24 Pero ni magpahayag tu upos nu Diyos u atanan a mánnampalataya sakay dummemát hod u essa a awan mánnampalataya oni tolay a awan palla nakatukoy ay matukuyan na a siya ay makasalanan sakay mabati na u tunay na a kalagayan. 25 Sakay dipo tu págsaneg na matukuyan na u mágkadukás a hod tu puso na, kanya lumuhud siya sakay sumamba tu Diyos, sakay kagiyán na a, “Tahod! katoy ngani nikam u Diyos!” 26 Ánya nadid u gusto ko a kagiyán ti iye hide a atanan, kákkapatkákka hide? Ni hikam ay mamággipun-ipun, ay dapat tehhod a mágkansiyon, tehhod a magtoldu, tehhod a magpahayag tu kaluuban nu Diyos, tehhod a magupos ti iba-iba a upos, sakay tehhod be a mángpaliwanag tu kákkagiyán na. Gimitán moy iye a atanan tánni lumagu u mánnampalataya hide. 27 Ni tehhod a magupos ti iba-iba a upos ay tama dán u duwwa oni tállo a mamáglewas-lewas sakay dapat a tehhod a mángpaliwanag tu kákkagiyán de. 28 Pero ni awan ti mángpaliwanag ay tumahimik dálla hide tu disalad nu simbaan sakay mákpágguhon ti sadiliyan tu Diyos. 29 Pabayan moy a magupos u duwwa oni tatlo a tolay a tummanggap tu kaluub a makapagpahayag tu upos a gábwat tu Diyos. Sakay suriyán be nu agum u kákkagiyán di. 30 Ni tehhod a nakatanggap ti mensahe a gábwat tu Diyos tu mággetnod hod hide ay dapat a umimang pa u magupos. 31 Dipo hikam a atanan ay maare a essa-essa a magpahayag tu upos a gábwat tu Diyos tán matuto u atanan sakay mapabegsák u pánnampalataya de. 32 Sakay u tumanggap hide ti kaluub nu págpahayag ay dapat a magpugád hide tu sadile de sakay maguhay hide tu odas ni hide dán u magupos. 33 Awan masaya u Diyos tu kaguluwan dipo siya u Diyos nu kaayusan sakay kapayapaan. Tu pággipun-ipun nu atanan a mánnampalataya tu Diyos, 34 u bábbey hide ay dapat a tumahimik tu pággipun-ipun nu mánnampalataya hide. Dipo awan hide payagen a magupos tu pággipun-ipun; kailangan hide a pasakup, konna tu kinagi nu Kasulatan. 35 Ni tehhod hide a gusto a matukuyan, ay magtanung hide tu kákkabanga de káddemát tu bilay de; dipo makasani-sanike a magupos u essa a bábbey tu disalád nu simbaan. 36 Awan dapat a iba u gággimitán moy kada magipun-ipun kam kasera tu gággimitán nu agum a mánnampalataya tu iba a banuwan Bakay be ni pangakala moyay ay naggábwat nikam u upos nu Diyos, oni hikam la u nakatanggap he! 37 Ni tu pangakala nu deya man a tummanggap siya ti adal a gábwat tu Diyos oni maski ánya a kaluub nu Banal a Ispirito ay dapat na a tenggiyán a i sulat kuwáy nikam ay utus nu Panginoon. 38 U awan tumengge he ay dyan moy be tenggiyán. 39 Kaya kákkapatkákka ko hide, hangadán moy a makapagpahayag tu adal a gábwat tu Diyos, pero dyan moy ibawal u magupos ti iba-iba a upos. 40 Pero gimitán moy u atanan a bagay tu tama sakay maayus a paraan.
151 Nadid, gusto ko a ipaalaala nikam, kákkapatkákka ko hide, u Maganda a Baheta a impangaral ko nikam. Ina u upos nu Diyos a tinanggap moy, sakay nagin pundasyon nu pánnampalataya moy. 2 Tu pamamag-itan ni iye ay naligtas kam, ni masibát kam a maniwala tu upos a impangaral ko nikam, maliban dálla ni awan talaga tunay u kássampalataya moy. 3 Dipo impangaral ko nikam i tunayáy a halaga a adal a tinanggap ko labe. Siya iye: natay ti Cristo dipo tu kasalanan tam hide, tánni matupad u nakasulat tu Kasulatan. 4 Nelábbang siya sakay nabiyag a huway tu katállo a aldew, sigun be tu Kasulatan. 5 Sakay pummeta siya ni Pedro, sakay tu sapulo ay ti duwwa a apostol. 6 Káttapos ay pummeta siya tu mahigit a limma a datos a kákkapatkákka a namággipun-ipun. Makpal palla u biyag nide hanggan nadid, pero nágkatay dán u agum. 7 Pummeta be siya ni Santiago sakay tu atanan a apostol hide. 8 U kadimodyanan ay nikuna pummeta siya nikán. Kumánnák a neenak tu awan tama a panahun dipo awanák nakaguman ni Jesus pero nagin apostolák napade maski konnaák tu essa a anak a neenak tu awan tama a panahun. 9 Dipo hikán u pinakamababa tu atanan a apostol; awanák karapat-dapat a madulawan a apostol, dipo pináppahirapan ko u mánnampalataya hide. 10 Pero dipo tu kagbi nu Diyos nikán ay nagin apostolák, sakay awan be nawanan ti kabuluhan u kaluub a iye nikán. Nagtrabahuwák ti husto kasera tu agum nide, pero bakán iye tu sadile ko a kakayanan nan tu kabaitan la nu Diyos nikán. 11 Kaya maski hikán oni hide, iye u ipáppangaral me, sakay sa iye u paniwalaan moy. 12 Nadid, ni ipáppangaral me nikam a nabiyag a huway ti Cristo, bakin a kákkagiyán nu agum nikam a awan mabiyag a huway u nágkatay hide? 13 Pero ni tatahoden a awan ti mabiyag a huway, ay u gusto na a kagiyán ay awan labe nabiyag a huway ti Cristo. 14 Ni awan nabiyag a huway ti Cristo ay awan ti kabuluhan u pángngaral me sakay awan kambe ti pakinabang tu pánnampalataya moy. 15 Bakán la a ina. Ni mara tatahoden u kákkagiyán moy a awan biyagán a huway nu Diyos u patay hide, u gustu na a kagiyán, awan nabe biniyag a huway ti Cristo. Ni konna hod, mágkabule kame a tistigu nu Diyos dipo itáttoldu me a biniyag nu Diyos a huway ti Cristo. 16 Dipo ni awan biyagán a huway u nágkatay hide ay awan be nabiniyag a huway ti Cristo. 17 Ni awan nabiyag a huway ti Cristo, ay awan kam ti pakinabang tu pánnampalataya moy sakay awan kam pade napatawad tu kasalanan moy hide. 18 Sakay bakán la ina, u gusto na a kagiyán atanan nu nágkatay dán hide a naniwala ni Cristo ay nepahamak. 19 Ni u pag-asa tam ni Cristo ay para la ti biyagáy a iye, ay hikitamon u pinakakakagbi tu atanan a tolay. 20 Pero u tatahoden ay nabiyag a huway ti Cristo bilang katunayan a biyagán na a huway u nágkatay dán hide. 21 Ni kodya a dummemát u kákkatay tu pamamag-itan nu essa tolay ay konna labe hod, dumemát be u kákkabiyag a huway tu pamamag-itan nu essa a tolay. 22 Dipo ni kodya a matay u atanan dipo hide ay lahe ni Adan, ay mabiyag be u atanan dipo tu pákpágkaessa de ni Cristo. 23 Pero u kákkabiyag a huway nu balang essa ay tehhod a netakda a panahun: u kadipalonguwan a nabiyag a huway ay ti Cristo; sakay tu kássole na he ti munduway ay u mánnampalataya dámman hide u biyagán na a huway. 24 Káttapos ni itod dumemát u katapusan. Sakay káttapos a matalo ni Cristo u atanan nu kaharian, pamahalaan sakay kapangyariyan ay iyatád na tu Diyos a Ama u paghare tu atanan. 25 Dipo ti Cristo ay dapat a maghare hanggan matalo na sakay mapasuko na u atanan a kadima na. 26 U kadimodyanan a kadima a taluwán na ay u kamatayan. 27 Dipo kinagi nu Kasulatan: “U atanan a bagay ay impasakup nikuna nu Diyos.” (Pero u upos a, “atanan a bagay,” ay maliwanag a awan he kaguman u Diyos a nángdátton tu atanan a bagay tu sakup nu kapangyariyan ni Cristo.) 28 Ni nasakup dán nu kapangyariyan ni Cristo u atanan a bagay, u Anak dámman be u pasakup tu kapangyariyan nu Diyos a nángdátton tu atanan a bagay a nasakupan nu kapangyariyan nu Anak. Tu konna hod ay maghare u Diyos tu atanan. 29 Nadid, te kaugaliyan u agum a tolay a magpabawtismo hide alang-alang tu nágkatay hide. Pero ni awan hide maniwala a huway a biyagán u nágkatay hide, bakin dipa a gimitán i kaugaliyan diyan itod? 30 Sakay hikame, bakin mi pa a itaya u biyag me tu dilikadu a kalagayan kada odas? 31 Awan ti odas a awanák katoy tu dilikadu a kalagayan, kákkapatkákka! Ni kodya a tatahoden a ipágmadakál takam dipo tu pákpagkaessa tam ni Cristo Jesus a Panginoon tam, tatahoden be i kagiyán kuwan iye! 32 Ni u pákpáglaban ko tu mágkatapang a kadima he ti Efesowáy ay para la tu tolay, anya pakinabang kuway? Ni awan be mabiyag a huway u nágkatay hide, maganda pa ni sunudán tam i kakagiyánán iye: “Kuman kitam sakay uminom, dipo ni ilaw ay matay kitamon.” 33 Dyan kam padaya, dipo “U madukás a kaguman ay makasida ti mágkaganda a ugale.” 34 Magpakatino kam sakay adággen moy dán u kasalanan. U agum nikam ay liwat u pákkatukoy na tu Diyos; kagiyán ko iye tánni mepasanike kam. 35 Pero ni te magtanung, “Kodya a mabiyag a huway u nágkatay dán hide? Ánya u magin idsura nu bággi de?” 36 Awan ti tukoy u magtanung ti konna hina! Awan mabiyag u bine a nemula ni awan iye matay. 37 Sakay ni magmula kam ti trigu sakay tu agum pa a bine, u imula moy ay u bukál la, bakán a u dakál dán a mula. 38 U Diyos u mangatád tu bággi nu bine, ayun tu kaluuban na; bawat bine ay átádden na ti tama a bággi. 39 Konna bihod tu bággi; awan pare-pareho u bággi nu nilalang hide a tehhod a biyag; iba u bággi nu tolay, iba u bággi nu hayup, iba tu manok hide, sakay iba be tu ikan hide. 40 Te bággi a panglanget sakay tehhod be a pangluta; iba u ganda nu pangluta a bággi sakay iba be u ganda nu panglanget. 41 Iba u demlag nu aldew, iba be u demlag nu bulan, sakay iba be u demlag nu biton hide. Sakay maski u biton hide ay tehhod a iba-iba a demlag. 42 Konna labe hina tu kákkabiyag a huway. U melábbang a bággi ay mahunot, pero awan mahuno-hunot maski nikan u bággi a biniyag a huway. 43 Madukás sakay awan ti kaya u baggi a nelábbang, pero ni biyagan dán iye a huway ay maganda sakay mabegsák dán. 44 U bággi a nelábbáng ay pangluta, pero ni biyagán dán a huway ay bággi dán a panglanget. Dipo ni tehhod a bággi a pangluta tehhod be a bággi a panglanget. 45 Konna he u nakasulat tu Kasulatan, “U kadipalonguwan a tolay a inatádden ti biyag ay ti Adan.” Pero u kadimodyanan a Adan ay ti Cristo a Ispirito a mángngatád ti biyag. 46 Pero u dipalongo a inyatád nu Diyos nikitam ay u bággi tam a pangluta pero káttapos ni iye ay palitan na iye ti bággi a panglanget. 47 U kadipalonguwan a tolay ay gábwat tu luta, pero u kaduwwa a tolay ay gábwat ti langet. 48 Atanan a tolay ti muduwáy u bággi de ay konna tu bággi ni Adan a naggábwat tu luta. Pero u katoy ni Cristo ay magin kapareho nu bággi ni Cristo a gábwat ti langet. 49 Ni kodya kitam a kapareho nu tolay a naggábwat tu luta ay dumemát u aldew a u bággi tam ay pumareho ni Cristo a naggábwat ti langet. 50 Iye u gusto ko a kagiyán, kákkapatkákka ko hide: u bággi tam a nabuo nu pilas sakay dige ay awan magkahod ti bahagi tu kahariyan nu Diyos. U bággi a iye a mahunot ay awan maare a makatanggap ti biyag a awan ti kahád. 51 Mágsaneg kam ta te kagiyánnák a lihim nikam: bakán a atanan ay matay, pero mabagu kitam a atanan, 52 ti essa a kisáp ni mata, kasabay nu dimodyan a tánnog nu trumpeta. Káttánnog nu trumpeta, u nágkatay dán hide ay mabiyag a huway sakay awan dán matay. Sakay mabagu kitam a atanan. 53 Dipo i bággiyan iye a mahunot ay mapalitan ti awan mahunot sakay u bággi a matay ay mapalitan ti awan mata-matay. 54 Ni mapalitan dán ti awan mahunot u bággi sakay mapalitan dán ti awan matay u bággi ay matupad u kinagi na tu Kasulatan: “Natalo dán u kamatayan; ganap dán u tagumpay!” 55 “Awan dán ti tagumpay, U kamatayan sakay awan dán siya ti kapangyariyan.” 56 U kamandag nu kákkatay ay u kasalanan, sakay u kapangyariyan nu kasalanan ay naggábwat tu Kautusan. 57 Pero magpasalamat kitam tu Diyos ta inatádden na kitam ti tagumpay tu pamamag-itan nu Panginoon tam a ti Jesu-Cristo! 58 Kaya ngane, mahal ko hide a kákkapatkákka, magpakatatag kam sakay dyan manghina. Magpakasipag kam tu págserbi tu Panginoon dipo tukoy moy a awan masayang u pagud moy para nikuna.
161 Nadid ay tungkul be tu tulung a naipun moy para tu kákkapatkákka hide ti Judea, gimitán moy u konna tu kinagi ko tu mánnampalataya hide ti Galacia. 2 Kada dipalongo a aldew nu sasimba ay mangsáddi dán u balang essa ayun tu kitaán na, sakay ipunán itod para awan dán kailangan a magaged ti tulung káddemát ko hina. 3 Káddemát ko hina ay paangayán ko ti Jerusalem u tolay hide a napili moy a mangtawed tu tulung moy sakay manggimiták be ti sulat para ipakilala hide tu mánnampalataya hide ti Jerusalem. 4 Pero ni kailangan a umangayák be ti Jerusalem ikuyog ko dálla hide. 5 Bumisitaák hina kággábwat ko ti Macedonia, dipo kailangan ko a humoyot hod. 6 Bakay magmalayák hina sakay hedák dán hina a magpalipas ti amiyan tán matulunganák moy tu pangangailangan ko tu sumunud ko a páglakbay ni hádya man itod. 7 Dipo umád ko a basta la a humoyot hina; nan gusto ko nakwa a magmalay hina ni kaluuban nu Panginoon. 8 Pero plano ko a mágyan he ti Efeso wáy hanggan tu Pentecostes. 9 Dipo makpál he a pagkakataun para tu págserbi tam, maski makpal u kumontara nikán. 10 Káddemát hina ni Timoteo ay tanggapán moy siya ti maganda tánni mapayapa u kaluuban na, dipo kapareho ko siya a tagapagserbi nu Panginoon. 11 Dyan moy siya imemenos. Nan tu kállakad na ay tulungan moy siya tu kailangan na hide tánni makasole he siya nikán a tehhod a kapayapaan. Dipo áuhayán ko siya sakay tu kákkapatkákka tam hide. 12 Tungkul be tu kapatkákka tam a ti Apolos mahigpit ko siya a pinákpágguhunan a bumisita hina, kaguman nu kákkapatkákka hide, pero awan kan palla siya hina makaangay nadid. Pero ni tehhod kan a pagkakataun ay bumisita siya hina. 13 Magin handa kam sakay magpakatatag tu pánnampalataya moy. Magpakatapang kam sakay magpakatibay. 14 Anya man u gimitán moy ay dapat gimitán moy a tehhod a págmahal. 15 Nadid, kákkapatkákka ko hide, tukoy moy a u pamilya ni Estefanas u kadipalonguwan a Kristiyano ti Acaya; sakay inlaan de u sadile de tu pagserbi tu pinile hide nu Diyos. Ipákpágguhon ko nikam, 16 a pasakup kam tu konna nide sakay tu deya man a tumáttulung tu tagapagserbi hide nu Panginoon. 17 Masayaák a tahod tu káddemát di Estefanas, Fortunato, sakay ti Acaico. Maammawák nikam a atanan pero nabawasan ti badit dipo katoy he hide dakál u tulung de nikán. 18 Hide u nangpasaya nikán, sakay konna be nikam. Pahalagaan moy u konna hina hide a tolay. 19 Kumustaán kam nu mánnampalataya hide ti Asia. Kumustaán kam be tu ngahan nu Panginoon di Aquila sakay Priscila sakay u kákkapatkákka hide a mamággipun-ipun tu bilay de. 20 Sakay kumusta kam be kagi nu atanan a kákkapatkákka he. Magkumustaan kam bilang mátkaka ni Cristo. 21 Hikán a ti Pablo u nagsulat ti iye a pángngumusta. 22 Parusaan nakwa nu Panginoon u awan magmahal nikuna! Dumemát ka dán nakwan, Panginoon me! 23 Pagpalaán kam nakwa nu Panginoon a ti Jesus. 24 Mahal takam a atanan bilang kákkapatkákka ko ni Cristo Jesus. Amen.