HAATAꞌINGE

Haataꞌinge

A Jisas Kraes Hunie A Jon

?A tei ni e uusue uusu-uusu ienini?

A Jon Hurulaꞌaa nge e uusue uusu-uusu ienini maholo e repo oto hiitoꞌo. Ingeie noꞌone nge e uusue Tataroha Diana a Jon na e oolu Uusu-uusu a Jon. Maholo e repo oto, a Jon ngaeta mwane paine haahie mo soihaadaꞌinge wau aana poꞌo ni henue i Esia nge huilume i Epesas e iiꞌo aana.

?E uusue uusu-uusu ienini hunie kira tei?

A Jon Hurulaꞌaa e uusue uusu-uusu ienini hunie e hiu soihaadaꞌinge aana mo huilume hai aaopaꞌi i laona poꞌo ni henue i Esia i laona aalahanga ni Rom. Siꞌiri leu ngeena e iiꞌo mola i laona hanue paine kire haaraꞌinie i Taki.

?Nga taa e rau-reu maholo e uusue uusu-uusu ienini?

Ola mala e siwe aawalai helisi mwana oono i purine hutelana a Jisas (96 A.D.), inemauri peine ni Rom ko tohungei teungeꞌinie kira hiiwalaimoli, na e asuie a Jon Hurulaꞌaa ke iiꞌo ni hoꞌo aana mala-malau ni hoꞌo i Patmos.

?E uusue uusu-uusu ienini huni taa?

Oto a Jon e uusue huni ere haꞌasusue mwala aana soihaadaꞌinge nge taungeꞌinilada e lae. E ere lalai i sulie mo dinge ooreta, taꞌe oto liutaa e haꞌa-uusulie mwala i sulie a Jisas Kraes. Oto e ere haꞌasusure hunie kire ke aꞌailaꞌa aani hiiwalaimolinge aana maꞌalana kire ko sapesalu i tehulaꞌana.

A Jon e uusu-uusu oto hiitoꞌo i sulie mo haataꞌinge nge a Kraes e haataꞌiniꞌi hunie. Mo haataꞌinge ngeena kire honu oto liutaa aani nunui ola, na mo haꞌa-uusulinge e lae mola aana mo wala ni aalahuunge. Mo naꞌohai neꞌisaenga i laona uusu-uusu ienini e ooni aani mala kire ko ooni aana kana.

Ngaeta mo haꞌa-uusulinge i laona uusu-uusu ienini kire kele aasa huni saie nga taa kire ko ere-ere i suliꞌi. Taꞌe maꞌalana kolu kaꞌa sai diana aana nga taa kire ko ere lalai i suliꞌi, taꞌe aahuꞌi haꞌa-uusulinge aana uusu-uusu ienini e matapwa taane. I tehulaꞌana a Kraes, a God e sai suuheꞌinie mo maelonga ingeie, lai liu oto aana a Pwelu Eero-eero, a Satan. Na aena aana asunge a Kraes loꞌu, a God kei waaie mo iinoni ingeie nge kire hele maꞌutaꞌa aana hiiwalaimolinge ikire hule aana haꞌamangolana. Oto aena urinena, nge mo iinoni a Kraes ke suꞌuri aakohe aani lulu i sulilana, taꞌe kire ke iiꞌo aakau aani tolaha diana mola peꞌi maaꞌoohinge susutoꞌo. A Kraes kei esuie hanue haalu nada taꞌau i Lengi na mai aano, na kire kei iiꞌo huu peꞌie oto di, oto di.

?Nga taa ni mo pweu ni wala i laona uusu-uusu ienini?

Uusu-uusu ienini ko ere hiitoꞌo noꞌone i sulie mei wala Hiu—e hiu soihaadaꞌinge, e hiu ensel, e hiu liꞌoa, e hiu kao-kao ni leinge, e hiu maa, e hiu aalaha, e hiu rorodara, na mo iini loꞌu. Aana neꞌisaenga mo Jiu, mei wala hiu ngeena e uure hunie mei ola e lae liutaa, wa e ahu oto, wa e hule oto aana 100%. Na e sada mola urine loꞌu aana mei wala aawala mwana rue. Iidumilana mo ola hunge i laona uusu-uusu ienini e lae hule aana aawala mwana rue—aawalai komu mwana rue, aawalai hurulaꞌaa mwana rue, aawalai maai para mwana rue, na nga mo iini loꞌu. Oto aena e ro mei wala ienini, nge kie saie uri uusu-uusu ienini ko ere i sulie mo ola kei lae liutaa, na loꞌu haꞌa-ahulana walu ola.

?Nga taa ni ngaeta mo eehuꞌi tatala i laona uusu-uusu ienini?

Haataꞌinge 1:7, Haataꞌinge 11:15, Na pwau 21 na 22 aana Haataꞌinge nge kire ere diana liutaa i sulie iiꞌonga i Lengi.

?Nga taa ni mo eehuꞌi neꞌisaenga i laona uusu-uusu ienini?

Mei wala ni saediananga hunie e hiu soihaadaꞌinge aana poꞌo ni henue i Esia (1:1-8)

A Jisas e niie e hiu mei wala hunie e hiu soihaadaꞌinge. (1:9–3:22)

A God na a Jisas kirerue ko iiꞌo aana manikuluꞌanga oto paine taꞌau i Lengi. (4:1–5:14)

A God kei haꞌamotaahie walumalau maholo a Jisas kei taꞌaasie e hiu hui edi mwaanie uusu-uusu. (6:1–8:5)

A God kei haꞌamotaahie walumalau maholo e hiu aahuri kei ngara. (8:6–11:19)

Painehaꞌana mwaa ala-ala kei uure honosie a God na mwala ingeie. (12:1–14:20)

A God kei haꞌamotaahie walumalau maholo kire lingisie e hiu kao-kao haahie walumalau. (15:1–16:21)

Hanue aaela i Babilon kei aaꞌoho taꞌingelu. (17:1–19:5)

A Kraes kei ooli mei na kei aalaha mai aano hunie sinolai helisi. (19:6–20:6)

Leinge ooreta a God kei haꞌamangoa a Satan na ahutana mo iini aaela. (20:7-15)

A God kei esuie haꞌaholanga haalu. (21:1–22:5)

Mei wala ooreta (22:6-21)

Mei Wala Ni Ere Luhesilana Uusu-uusu Ie

¹Uusu-uusu ienini e ere i sulie mo ola nge a Jisas Kraes e haataꞌiniꞌi hunieu aana nga taa ko karaꞌi lae oto mai. A God e uusungeꞌinie a Jisas hunie ke haataꞌiniꞌi hunie ahutana mo koni-konihe ingeie, oto a Kraes e uusungeꞌinie ensel ingeie i saaku a Jon huni haataꞌinie mo ola ie hunieu. ²Na ineu a Jon oto, ngaeta koni-konihe mola ingeie, no ko unu tahangaꞌinie huniꞌomu ahutana mo ola nou leesiꞌi ngeena. Na mo wala uure mwaanie a God otona, aana a Jisas Kraes ni e unu haꞌa-oaie uri kire toꞌohuu. ³Deidehie iini nge ko saa-saaie uusu-uusu aana mo erenga lalai ienini, na deidehie mo iini nge kire ko rongoa na ko lulu i sulie, aena aana ko karaꞌinie oto maholo ahutana mo ola ie kei aehotaa.

Mei Wala Ni Saediananga Hunie E Hiu Soihaadaꞌinge

⁴Saediananga mwaanieu a Jon huniꞌomu e hiu soihaadaꞌinge 1:4a E hiu soihaadaꞌinge ngeena kire iiꞌo i laona lio i sulinge a Jon maholo ingeie nga naꞌohai mwane aana soihaadaꞌinge. Taꞌe mei wala “hiu” ngaeta mei wala ni aalahuunge ni ngeena, na ko haataꞌinie uri mo wala ni haꞌa-uusulinge ienini ko lae hunie ahutana mo soihaadaꞌinge taꞌingelu. aana poꞌo ni henue i Esia.

No ko eitanaie a God iini e mauri oto uure mai naꞌo na ko meuri oto siꞌiri ie na kei meuri oto huu. No ko eitanaie a God uri hahuꞌana manata-diananga na hanuelamanga ingeie ke iiꞌo peꞌiꞌomu. Na e ro haꞌadianaꞌanga ngeena kire uure noꞌone mwaanie e hiu liꞌoa1:4b E hiu liꞌoa i naꞌona naunekume a God nge a Jon ko ere i sulie i leu, nge loꞌongaꞌinge aana uri Liꞌoa Maaꞌi a God e iiꞌo loko-loko na e ahu. A God e sai esu mola aana ahutana mo tala peꞌie Liꞌoa Maaꞌi ingeie. Leesie loꞌu Aesaea 11:2, na Haataꞌinge 4:5. nge kire uure i naꞌona naunekume a God, ⁵na kire uure noꞌone mwaanie a Jisas Kraes.

A Jisas oto ko haꞌawalaimoliꞌaa walana God,

na ingeie oto naꞌohai mwane e taꞌelaꞌi mwaanie maenga,

na ingeie oto inemauri haahie ahutana mo aalaha mai welumalau.

Ingeie oto iini nge e manata diana hunikie,

na ingeie oto e luhesikie mwaanie mo oorahaꞌaa ikie aana apune.

⁶Ingeie oto aalaha ikie,

na e asuie uri kie ke mani neꞌi pris oto huni haꞌapainaꞌaa Aamana, a God.

Oto aena urine kie ke haꞌamanikuluꞌaa a Jisas Kraes haahie hahuꞌana nanamanga ingeie oto di oto di.

Ke urine oto.

⁷!Lio kaꞌu!

Ko lae oto mai taꞌaune peꞌie mei uuru,

na taꞌena nga maa kei leesie, hule aana oto noꞌone mo iini nge kire otomie.

Na ahutana mwala mai aano kei ngara maholo kire kei leesie.

Iau, ke urine oto.

⁸A God e unue uuri, “Ineu oto a A na a Z, aana ineu oto aehotalana na haꞌamangolana walu ola. Ineu oto iini Hahuꞌana Nanama uure oto mai naꞌo, na siꞌiri ie, na oto huu.”

A Jon E Leesie A Jisas

⁹Ineu a Jon, aasimiu kolu meni hiiwalaimoli aana a Jisas. Ikolu, kolu ko meni lae peꞌi uure maꞌutaꞌa, maꞌalana mwala ko teungeꞌinikolu haahie uri ikolu oto i laona Aalahanga a God. Kire neꞌieu wau i laona mala-malau ni hoꞌo i Patmos, aena aana no ko tarohaꞌinie walana a God na walaimolinge i sulie a Jisas. ¹⁰Oto aana ngaeta hai dinge maaꞌi1:10 Kire haaraꞌinie Sande uri “hai dinge a Aalaha” aena aana a Jisas e taꞌelaꞌi mwaanie maenga aana dingena. Siꞌiri kie haaraꞌinie dingena uri “Dinge Maaꞌi.” a Aalaha, Liꞌoa Maaꞌi a God e siho i lengiku, na nou rongoa mei wala paine hai puriku mala aawa-aawatana aahuri, ¹¹na ko teꞌuri, “O ke uusue nga taa o ko leesie i laona nga uusu-uusu, na o ke haꞌatolaa uusu-uusu ngeena hunie mo soihaadaꞌinge aana e hiu huilume paine wau i Epesas, na i Smina, na i Pegamam, na i Taeataera, na i Sadis, na i Piladelpia, na i Leodisia.”

¹²Oto nou eelihuꞌiteꞌi huni leesie uri a tei ko ere takoieu, na no ko leesie mola e hiu ola kire asuiꞌi aani kol talai laite, mo ola huni neꞌi-neꞌie mo laite ko eeso-eeso i lengini. ¹³Na i matolana mo ola talai laite ngeena, no ko leesie ola mala iinoni. E hoꞌosie toꞌoni tewa hule i kolune aeꞌaena, na e hoꞌosie noꞌone rorotoꞌoni aani kol i denumana. ¹⁴Na iihune pwaune e rereꞌa oto mala waha-waha, na e ro maana e urihana oto eeso-eesohai dunge. ¹⁵Na e ro aeꞌaena e wana-wana oto mala hau pulu e wana aana dunge e madorohie. Na walana e rongo oto mala kou-kouhaꞌana naho paine. ¹⁶Na e hele aana e hiu ho heeꞌu aana ninime i pwalo-pwalona, na naihi e ala rue-rue e maau mei mwaanie ngidune. Na maana e urihana oto sato ko raa i upui aatowaa.

¹⁷Oto maholo nou leesie, nou reputeꞌi hai sulie aeꞌaena oto mala iinoni e mae. Taꞌe e hele aaku aana nime i pwalo-pwalona, na ko teꞌuri, “O ke suꞌuri meꞌu. Ineu oto aehotalana walu ola na haꞌamangolani. ¹⁸Ineu oto iini meu-meuriꞌe. Nou mae kaꞌu, taꞌe ie nou meuri oto hunie iiꞌonga huu. Iau, na ineu oto nou saka liutaa aana maenga, na nou toꞌo aana kii aana mo kilipweꞌu. ¹⁹Oto o ke uusue mo ola nge o ko leesiꞌi ngeena na mo iini o kei heꞌi leesiꞌi loꞌu mei puri. ²⁰Mei loꞌongaꞌinge e iiꞌo mumuni aana e hiu ho heeꞌu nge o leesiꞌi i laona nime i pwalo-pwaloku na e hiu ola talai laite oto ienini. Ere luhesilana e hiu ola talai laite ngeena uri e hiu soihaadaꞌinge ni ngeena. Na e hiu ho heeꞌu ngeena, nge mo naꞌohai mwane aana e hiu soihaadaꞌinge ni otona.”

Uusu-uusu Hunie Soihaadaꞌinge Wau I Epesas

¹Oto a mwaena e unue loꞌu hunieu uuri, “O ke uusue hunie naꞌohai mwane aana soihaadaꞌinge wau i Epesas oto uuri.

“Ineu iini nge nou hele aana e hiu ho heeꞌu aana ninime i pwalo-pwaloku, na no ko lae-lae i matolana e hiu ola kol talai laite nge no ko ere huniꞌomu ie.

²“Nou saie taane nga taa omu esuie, na uri omu esu hiitoꞌo nakue, na uri omu hele susuleꞌi aani hiiwalaimolinge aaku. Nou saie noꞌone uri omu leledie mo iini nge ko lae i sulie mo tolahai ola aaela, na uri omu oohongie oto mo iini nge kire ko unue uri ikire mo hurulaꞌaa ineu taꞌe haꞌike mola, na uri omu deu oodoie uri kire ko eero mola. ³Nou saie taane uri omu uure maꞌutaꞌa na omu kaꞌa toliꞌaa ike maꞌalana mwala kire taungeꞌiniꞌomu i tehulaꞌaku.

⁴“Taꞌe nga taa nge nou lio oodoie aamiu na nou kaꞌa saetoꞌo aana mola uri omu kaꞌa manata diana ike oto hunieu mala holaꞌinaꞌo. ⁵Omu ke loꞌongaꞌi eelihoꞌi loꞌu aana tolahai iinoni diana iꞌomu holaꞌinaꞌo, hunie omu ke aaliꞌu mwaanie mo oorahaꞌaa iꞌomu, na hunie omu ke asu peꞌie manata-diananga hunieu loꞌu mala omu euꞌesuie kaꞌu holaꞌinaꞌo. Mala uri omu kaꞌa aaliꞌu oto mwaanie mo oorahaꞌaa iꞌomu, nge ne kei lae mai seemiu na ne kei taꞌaasie oto ola talai laite iꞌomu ngeena mwaanie leu nge e iiꞌo aana.2:5 Mei wala “ne kei taꞌaasie oto ola talai laite iꞌomu” neꞌisaenga aana uri a God ke taꞌaasie soihaadaꞌinge ikire na kei eiꞌaa oto.

⁶“Taꞌe ngaeta mei ola diana omu ko esuie taane noꞌone, aana omu ko leledie tolahai ola aaela aana mo iini ko lae i sulie haꞌa-uusulinge tataꞌala a Nikolas, mala oto ineu noꞌone nou leledie leune.

⁷“Omu ke pwaarongo diana, hunie omu ke rongo saie nga taa nge Liꞌoa Maaꞌi ko unu-unue hunie mo soihaadaꞌinge. Mo iini nge kire ko aꞌailaꞌa taraꞌasi honosie aaelanga, nge ne kei toliꞌaasie kire ke lae mai i laona hohola a God hunie kire ngaue hue-huana ai nge e sai niie maurihe huu.”

Uusu-uusu Hunie Soihaadaꞌinge Wau I Smina

⁸Oto a mwaena e heꞌi unue loꞌu hunieu uuri, “O ke uusue hunie naꞌohai mwane aana soihaadaꞌinge wau i Smina oto uuri.

“Ineu oto aehotalana walu ola na haꞌamangolani. Ineu oto iini nou mae kaꞌu, taꞌe ie nou meuri loꞌu na no ko unue huniꞌomu uuri.

⁹“Nou saie taane mo aasanga iꞌomu na uri omu meitale. Taꞌe omu tohungei toꞌo-toꞌo taane aana hiiwalaimolinge. Nou saie taane mwala ko ere aaelasiꞌomu aana kire unue uri ikire oto mo iini a God e saetoꞌo aada. Taꞌe haꞌike. Ikire, kire ko haꞌapainaꞌaa mola a Satan ni ngeena. ¹⁰Mwaanie omu meꞌu-meꞌuteꞌinie nga mei ola aana walu ola nge karaꞌinie oto kire kei reu eemiu ngeena. !Omu ke rongo kaꞌu! A Pwelu Eero-eero kei malaahongamiu na kei aasie ngaeta mo iini eemiu i laona nume ni hoꞌo, na taungeꞌinilemiu kei lae mola i sulie aawalai hei dinge haahuu.2:10 Aawalai hei dinge haahuu ngeena mo wala ni aalahuunge i sulie taungeꞌinilada kei lae hunie nga maholo oꞌoruꞌe mola. Omu ke hele susuleꞌi mola aaku lai hule aana maenga, oto ne kei niie huniꞌomu rorodara ni meurihe.

¹¹“Omu ke pwaarongo diana, hunie omu ke rongo saie nga taa nge Liꞌoa Maaꞌi ko unu-unue hunie mo soihaadaꞌinge. Mo iini nge kire kei aꞌailaꞌa taraꞌasi honosie aaelanga, kire saꞌa sapesalu ike i laona dunge ko weru oto di nge uri ruana nga maenga ni ngeena.”

Uusu-uusu Hunie Soihaadaꞌinge Wau I Pegamam

¹²Oto a mwaena e heꞌi unue loꞌu hunieu uuri, “O ke uusue oto hunie naꞌohai mwane aana soihaadaꞌinge wau i Pegamam uuri.

“Ineu, iini nge nou toꞌo aana naihi e ala rue-rue, no ko unue huniꞌomu uuri.

¹³“Nou saie taane uri omu iiꞌo aana leu nge naunekume a Pwelu Eero-eero e iiꞌo aana,2:13 Mwala hunge kire palo-paloa inemauri ni Rom mala god ikire aana maholona, na kire ko meni lae-lae i Pegamam huni uunu-uunu ola i saana. taꞌe maꞌalana e urine omu hele paipesi toꞌohuu aana sataku. I Pegamam nge leu kire horo maesie a Antipas aana, iini e tohungei sai houleꞌinieu. Taꞌe maꞌalana aana maholo aaela urine, na omu kaꞌa toliꞌaasie ike hiiwalaimolinge iꞌomu eeku i matolana mwala aana hanue a Pwelu Eero-eero ngeena.

¹⁴“Taꞌe tootaꞌi kele mei ola mola nou kaꞌa saetoꞌo aani eemiu. Aana ngaeta mwala ikire peꞌiꞌomu kire ko hele i sulie haꞌa-uusulinge aaela a Balaam, iini nge e haꞌa-uusulie a Balak oto waite aana tala huni naꞌona mwala ni Israel hunie oorahaꞌaa. Aana e da kire ngaa mo ngeulaa kire uunuꞌi i saana mo nunui ola mo liꞌoa aaela, na hunie kire ke hele roroꞌanga peꞌi keni na peꞌi mwane. ¹⁵Ngaeta mo iini eemiu ko deu aaela noꞌone mola urine aana kire ko hele paipesi i sulie haꞌa-uusulinge tataꞌala a Nikolas. ¹⁶Omu ke toliꞌaasie oto mo tolahai ola aaela urine. Mala uri omu kaꞌa toliꞌaasie oto mo tolahai ola urine, nge ne kei lae oto mola mai lau-leu huni horoꞌie mwala ngeena aana naihi nge e maau mwaanie ngiduku.

¹⁷“Omu ke pwaarongo diana, hunie omu ke rongo saie nga taa nge Liꞌoa Maaꞌi ko unu-unue hunie mo soihaadaꞌinge. Mo iini nge kire kei aꞌailaꞌa taraꞌasi honosie aaelanga, nge ne kei niie ngaulaa uure i Lengi 2:17a Aana pongine a Mosis mo Jiu kire haaraꞌinie ngaulaa ngeena mana. Kire ngaue taane, taꞌe neꞌisaenga aana e iiꞌo mumuni mwaanire. Kire kaꞌa saie ike uri iiꞌonga a God peꞌire haꞌalaa e sai niie maurihe hunire. Leesie Eksodas 16:14-35, na Jon 6:48-50. ada, ola nge mwala aana pongine a Mosis kire kaꞌa lio saie neꞌisaenga aana. Na ne kei haꞌa-adora aani heu rereꞌa nge uusulana satai ola haalu2:17b Ohe mala a Ebram na a Jekob wai naꞌo (leesie Jenesis 17:5, 32:28), a God kei niie mei satai ola haalu naka huni haataꞌinie tolahai ola haalu kie toꞌo aana i tehulaꞌana kie ko lulu i sulie mola a Jisas. (Leesie Aesaea 62:2, 65:15.) e lae aana. Satai ola haalu ngeena nga taꞌa-taꞌa iini aaopa e kaꞌa saie loꞌu, taꞌe iini nge niilana ho heu ngeena e lae hunie.”

Uusu-uusu Hunie Soihaadaꞌinge Wau I Taeataera

¹⁸Oto a mwaena e heꞌi unue loꞌu hunieu uuri, “O ke uusue oto hunie naꞌohai mwane aana soihaadaꞌinge wau i Taeataera uuri.

“Ineu, Kalena a God, iini nge e ro maaku domana oto eeso-eesohai dunge, na mo aeꞌaeku kire wana-wana oto mala hau e sae ni pelu-pelu, no ko unue huniꞌomu uuri.

¹⁹“Nou saie taane manata-diananga iꞌomu, na hiiwalaimolinge iꞌomu, na asunge diana iꞌomu aani peꞌilemiu heiliu, na hele-susuleꞌinge iꞌomu eeku maꞌalana ke aasa loꞌu uri taa. Iau, nou saie taane mo ola diana omu ko esuiꞌi ngeena, na uri omu ko esuiꞌi loꞌu liutaa aana mo iini nge omu esuiꞌi keꞌu holaꞌinaꞌo.

²⁰“Taꞌe taꞌa-taꞌa mei ola mola nou kaꞌa saetoꞌo aana aamiu. Aana omu ko lio toliꞌaasie huꞌe aaela ngeena ko iiꞌo ue peꞌiꞌomu, maꞌalana e urihana mola a Jesepel oto waite na ko lae peꞌi eeroa mwala uri ingeie nga propet a God. Taꞌe ingeie ko haꞌa-uusuli aaelasie mola mo koni-konihe ineu, na ko naꞌoda mola takoie aeni-olanga na ngaulana mo ngeulaa kire uunuꞌi i saana mo god eero-eero. ²¹Nou niie maholo oto hunie a keine uri hunie ke oonisae mwaanie mo oorahaꞌaa ingeie, taꞌe e kaꞌa sare aaliꞌu ike loꞌu mwaanie aeni-olanga ngeena nge ko esuie hailiu peꞌie mwala. ²²Oto aena urine ne kei haꞌa-enohie taane i lengine hulite peꞌie mo iini e saetoꞌo aada. Taꞌe kire saꞌa aeꞌaeni ola ike mala waite, aena aana kire kei meni sape raramea mola aana leune. Oto mala uri mo iini urine kire kaꞌa aaliꞌu ike mwaanie aaelanga a huꞌena, na ne kei aasire oto i laona haꞌamotaahinge paine. ²³Na ne kei horo maesie noꞌone mo iini ko lulu i sulie, hunie ahutana mo soihaadaꞌinge kire ke saie uri ineu oto nou lio saie mola ahutana neꞌisaenga na hari-huninge mo iinoni. Na ne ke si waaie huniꞌomu, nga iini oto maraana i sulie asunge ingeie.

²⁴“Taꞌe mo iini eemiu mo Taeataera nge omu kaꞌa lae ike i sulie haꞌa-uusulinge aaela ngeena na omu puꞌotaꞌinie mola nga taa kire unu-unue aana “Saenanaunge mumuni a Pwelu Eero-eero,” 2:24 Mo haꞌa-uusulinge hunge kire iiꞌo nge kire unue uri kire diana liutaa aana haꞌa-uusulinge a Jisas. Leesie Jiud 1:4. nge no ko unue oto huniꞌomu uri nou saꞌa neꞌie ike loꞌu nga hiꞌelaa haahiꞌomu. ²⁵Taꞌe omu ke hele maꞌutaꞌa mola aana nga taa nge omu toꞌo aana oto, lai hule aana ne kei ooli loꞌu mei.

²⁶“Na hunie mo iini nge kei aꞌailaꞌa taraꞌasi honosie aaelanga na kire kei lae peꞌi esuie mola mo esunge ineu lai hule aana ooretalana, nge ne kei niie nanamanga hunire hunie kire kei aalaha haahie ahutana mo aapoloa aana walumalau. ²⁷Kei urine oto aana ne kei niie hunire taꞌa-taꞌa taungei nanamanga mala a Mamaꞌa e niie oto hunieu, aana uusulana e lae kaꞌu uuri, Kire kei aalaha haahie ahutana mo aapoloa aana walumalau, na kire kei uure aꞌailaꞌa oto liutaa honosie mo heitelilinge. Na kire kei ohoie nanamanga aana mo aapoloa ngeena mala iinoni ko pwaasie kao-kao.Sam 2:8-9²⁸Nge ne kei niie noꞌone hunire Madala ni Maahuꞌo-huꞌo.2:28 Madala ni Maahuꞌo-huꞌo nge nga tolimaa aana manikuluꞌanga peꞌie nanamanga paine. Aana Haataꞌinge 22:16 a Jisas e unue uri ingeie oto Madala ni Maahuꞌo-huꞌo.

²⁹“Oto omu ke pwaarongo diana, hunie omu ke rongo saie nga taa nge Liꞌoa Maaꞌi ko unu-unue hunie mo soihaadaꞌinge.”

Uusu-uusu Hunie Soihaadaꞌinge Wau I Sadis

¹Oto a mwaena e heꞌi unue loꞌu hunieu uuri, “O ke uusue oto hunie naꞌohai mwane aana soihaadaꞌinge wau i Sadis uuri.

“Ineu nge nou hele aana e hiu Liꞌoa a God3:1 Leesie kaꞌu ere-luhesilana e hiu liꞌoa a God aana Haataꞌinge 1:4. na e hiu ho heeꞌu, no ko unue huniꞌomu uuri.

“Nou saie taane uri mwala ko unue soihaadaꞌinge iꞌomu e mauri diana. Taꞌe ineu, nou saie mola tolahamiu, uri omu mae oto ni ngeena. ²!Omu ke taꞌelaꞌi! Na omu ke haꞌa-aꞌailaꞌaa nga taa nge ko karaꞌi mae oto ngeena. Omu ke haꞌa-aꞌailaꞌaa oto lau-leu aena aana nou deu oodoie uri asunge iꞌomu e kaꞌa tohungei mango diana ike i maana a God. ³Omu ke loꞌongaꞌi diana mola i sulie mo wala diana kire unuꞌi keꞌu huniꞌomu na omu rongoꞌi oto, hunie omu ke hele i suliꞌi, na omu ke aaliꞌu mwaanie mo tolahai ola aaela iꞌomu. Taꞌe mala omu kaꞌa taꞌelaꞌi oto na omu ke aaliꞌu mwaanie tolahai ola aaela ngeena, ne kei lae mai mala iinoni peli-peli hule aana omu kei aparaꞌi eeku mola aana kele maholoi sato ne kei hule huni haꞌaloilemiu.

⁴“Taꞌe tootaꞌi iinoni eemiu mo Sadis, omu kinetaꞌi diana oto aana helelamiu mala iinoni ko kinetaꞌinie mo toꞌoni3:4 Huilume i Sadis nge kire sai esuie mo toꞌoni diana, oto mwala aana hanuena kire sai loꞌongaꞌi hiitoꞌo i sulie mo toꞌoni ikire. Oto ie a Jisas ko ere ni aalahuunge i sulie nga taa kire neꞌisae paine haahie huni haataꞌinie hunire uri kire ke kinetaꞌinie maurihaꞌada mwaanie oorahaꞌaa. ingeie mwaanie kire madaꞌa. Mo iini urine ne kei haꞌahoꞌosiꞌomu aana mo toꞌoni rereꞌa na omu kei lae peꞌieu, aena aana omu melisine oto leune.

⁵“Na hunie mo iini nge kire kei aꞌailaꞌa taraꞌasi honosie aaelanga, ikire noꞌone ne kei haꞌatoꞌonire aani toꞌoni rereꞌa. Na nou saꞌa taꞌaasie ike satada mwaanie uusu-uusu ni meurihe, taꞌe ne kei unu tahangaꞌinie satada i naꞌona Aamaku na mo ensel ingeie na ne kei teꞌuri, “Mo tohungei iinoni ineu ni oto ie.”

⁶“Omu ke pwaarongo diana, hunie omu ke rongo saie nga taa nge Liꞌoa Maaꞌi ko unu-unue hunie mo soihaadaꞌinge.”

Uusu-uusu Hunie Soihaadaꞌinge Wau I Piladelpia

⁷Oto a mwaena e heꞌi unue loꞌu hunieu uuri, “O ke uusue oto hunie naꞌohai mwane aana soihaadaꞌinge wau i Piladelpia uuri.

“Ineu iini e maaꞌi na e toꞌohuu, nge nou hele aana kii a Deved Inemauri. 3:7 Mo kii ngaeta tolimaa aana nanamanga. Oto iini e toꞌo aana kii a Deved Inemauri e nanama liutaa noꞌone mala a Deved Inemauri. Leesie Aesaea 22:22. Mala no ko tahanie taꞌena nga maa hunie nga iini, na nga iini e saꞌa honoa ike loꞌu. Wa mala uri no ko honoa maa hunie nga mo iini, na nga iini e saꞌa tahanie ike loꞌu hunire. Ineu oto ie no ko unue huniꞌomu.

⁸“Nou saie taane nga taa omu esuie na nou saie taane mola uri maꞌalana iꞌomu nga mo mwane paine haꞌike, taꞌe omu hele i sulie mo haꞌa-uusulinge ineu, na omu kaꞌa taateingeꞌinieu. Aena urine nou tahanie oto maa3:8 Ohe maa nge e taha urine e haꞌamalaa nga maholo diana huni tarohaꞌinie walana Kraes, wa ohe ko haꞌamalaa maa ni meurihe ni ngeena. talamiu nge nga iini e saꞌa honoa ike loꞌu. ⁹Omu saie taane mo iini aana pulitaa a Pwelu Eero-eero nge kire ko unue uri ikire oto mo iini a God e saetoꞌo aada. !Taꞌe haꞌike! Kire ko eero mola. !Omu ke rongo kaꞌu! Ne kei haro dau rarahire hunie kire ke lae mai pouruuru i naꞌomiu. Nge kire ke si saie uri iꞌomu oto nou saetoꞌo aamiu liutaa. ¹⁰Oto aena aana omu hele susuleꞌi i sulie haꞌatolanga ineu, nge ineu noꞌone ne kei kinetaꞌiniꞌomu mwaanie maholo ni siꞌohaꞌanga nge ko lae mai huni oohongie ahutana mwala i laona walumalau. ¹¹E saꞌa tewa na ne kei ooli loꞌu mei. Omu ke hele maꞌutaꞌa aana hiiwalaimolinge omu toꞌo aana oto, mwaanie nga iini e haꞌamweꞌu-mweꞌuꞌomu mwaanie waaitemiu.

¹²“Na hunie mo iini nge kire kei aꞌailaꞌa taraꞌasi honosie aaelanga, ne kei da kire ke neꞌi hunu oodo aana nume maaꞌi a God ineu,3:12 Neꞌisaenga aana hunu oodo aana nume maaꞌi ngeena uri kire kei neꞌie mo mwane paine i laona soihaadaꞌinge. Leesie Kalesia 2:9. na kire saꞌa lae ike loꞌu mwaanie leune. Na ne kei uusue oolu satai ola aana iini urine—satana a God ineu, na satana Jerusalem haalu a God nge kei siho mai uure taꞌau i Lengi mwaanie a God ineu, na satai ola haalu ineu.

¹³“Omu ke pwaarongo diana, hunie omu ke rongo saie nga taa nge Liꞌoa Maaꞌi ko unu-unue hunie mo soihaadaꞌinge.”

Uusu-uusu Hunie Soihaadaꞌinge Wau I Leodisia

¹⁴Oto a mwaena e heꞌi unue loꞌu hunieu uuri, “O ke uusue oto hunie naꞌohai mwane aana soihaadaꞌinge wai Leodisia uuri.

“Ineu oto iini nge no ko haataꞌinie uri ahutana mo heiholotaꞌinge a God kire toꞌohuu. Na ineu oto iini nge no ko unu tahangaꞌinie toꞌohuu mo ola e uure aana God suli maholo. Na ahutana mo ola aana haꞌaholanga a God e uure mola mai eeku.3:14 Mo wala uuri “e uure mola mai eeku,” e toꞌo aana noꞌone neꞌisaenga uuri “ineu oto nou peine haahie.” Leesie kaꞌu Provebs 8:22, na Jon 1:2-3, na Kolosi 1:15-17. Ineu oto ie, no ko unue huniꞌomu.

¹⁵“Nou saiꞌomu taane na nga taa omu esuie, na nou saie taane uri saemiu e kaꞌa madoro ike aana manata-diananga hunieu, na e kaꞌa wawai ike aana ngiduupunge hunieu. Mala uri saemiu ke madoro hiitoꞌo wa omu ke wawai hiitoꞌo, na e kohi mola aaku. ¹⁶Taꞌe mala saemiu ko wawai oosi-oosi mola mala ngeena, nge ne kei pusuleꞌi aasiꞌomu oto mwaanie ngiduku. ¹⁷Omu ko unue uri omu tohungei toꞌo-toꞌo, na uri omu toꞌo aana walu ola omu saetoꞌo aani.3:17 Hanue i Leodisia ngeena e toꞌo aana mo nume ni toꞌoha hunge, na mo leu hunge ni esuie mo sala, na mo ei diana hunie maa ulu. Taꞌe uusu-uusu ie e haataꞌi diana aana uri mo ola poꞌoi sinaha urine kaꞌa sai peꞌie ike maurihaꞌana iinoni. Taꞌe hule aana omu kaꞌa saie ike loꞌu uri i naꞌona God omu tohungei siꞌohaꞌa oto hiitoꞌo. !Aama-aamasilemiu! Iꞌomu mwala omu meitale toꞌohuu, na maamiu e ulu na omu iiꞌo mola mwaakule. ¹⁸Oto no ko unue nga taa e diana liutaa hunie omu kei esuie. Omu ke toliꞌaasie ne ke niie namiu mo ola e aasa hunie omu kei holiꞌi. Toliꞌaasie ne ke luhesiꞌomu mwaanie mo oorahaꞌaa iꞌomu. Urine omu ke si lio oodoie maurihe huu na omu ke si toꞌo-toꞌo toꞌohuu. Oto omu ke toolea loꞌu mwaanieu mo toꞌoni rereꞌa aana oodo-oodonga ineu, huni hoꞌosiꞌi haahie maurihaꞌamiu mwaanie omu masa aana omu iiꞌo oto mola mwaakule. Na loꞌu omu ke toolea noꞌone mwaanieu mo ei ni ulu huni huiꞌi i laona maamiu, hunie omu ke lio taataha aana a God. ¹⁹Omu ke saie mola uri no ko tohungei ere aana mo iini nou manata diana hunire na no ko haꞌaloire. Oto aena urinena, omu ke aaliꞌu mei mwaanie mo oorahaꞌaa iꞌomu, na omu ke asu aꞌailaꞌa peꞌie mwaꞌe-mwaꞌenga. ²⁰!Omu ke rongo kaꞌu! Ineu oto nou uure i aena maa, no ko iiki-iiki ienini. Mala nga iini ko rongoa walaku na ko tahanie maa talaku, nge ne kei sili mei nume ingeie, na ne kei ngeu oto tararuru peꞌie.

²¹“Hunie mo iini nge kire kei aꞌailaꞌa taraꞌasi honosie aaelanga, nge ne kei niie nada iiꞌo-iiꞌoha huni iiꞌo peꞌieu i lengine naunekume ineu, mala kaꞌu nou aꞌailaꞌa taraꞌasi na nou iiꞌo oto peꞌinie a Mamaꞌa i lengine naunekume ingeie.

²²“Omu ke pwaarongo diana, hunie omu ke rongo saie nga taa nge Liꞌoa Maaꞌi ko unu-unue hunie mo soihaadaꞌinge.”

Kire Ko Haꞌapainaꞌaa Iini E Iiꞌo Aana Naunekume Ni Aalaha Taꞌau I Leinge

¹Oto loꞌu i purine leune, nou lio na no ko leesie ngaeta maa e taha taꞌau i Lengi. Na mei wala e rongo mala aawa-aawatai eehuri nge nou rongoa kaꞌu holaꞌi naꞌo, ko heꞌi unue loꞌu hunieu uuri, “O ke lae poi i leu, na ne kei haataꞌinie aamu nga moi taa nge e saꞌa tewa na kire kei reu loꞌu.” ²Oto mola aana maholona nou honu oto aana Liꞌoa Maaꞌi, na no ko leesie oto naunekume ni aalaha taꞌau i Lengi. ³Na iini nge e iiꞌo i lengine, maana domana oto e ro ho heu wana-wana manikuluꞌe, jaspa na kanilian. Na hureꞌaro e lolo haahie naunekume ngeena e raa oto mala hau wana-wana manikuluꞌe emaral. ⁴Na kali-kelie naunekume ngeena nge e ro aawalai neunekume mwana hai noꞌone, na e ro aawalai rato mwana hai kire iiꞌo i lengini. Kire toꞌoni aani toꞌoni rereꞌa, na kire hoꞌosie mo rorodara aani kol i darada. ⁵Na uure mwaanie naunekume paine ngeena, waꞌariri ko eeso na lou-lou ko kakahite. Na i naꞌona naunekume, e hiu maai dunge ko eeso-eeso, na ikire e hiu liꞌoa a God otona. ⁶Na loꞌu weu i naꞌona naunekume ngeena, ola mala aasi manola e wana-wana mala iiro-iiro.

Oto kali-kelie naunekume ngeena e hai ola mauri kire uure i leune. Mo ola mauri ngeena sapeni e honu aana maai ola, hule i naꞌo na hai puri. ⁷E hai ola mauri ngeena kire mani lio hai aaopaꞌi. Iini taꞌi naꞌo e lio mala laeon, na ruana nga iini e lio mala puluke, na oolune nga iini maana e lio mala iinoni, na haine e lio mala hada ko aaro. ⁸E hai ola mauri ngeena kire toꞌo aana e oono apa-apai ola, na mo apa-apai ola ngeena kire honu noꞌone aani maai ola hule i hahana apa-apani. Kire kaꞌa mou-mou ike aani kananga susue dangi na rodo uuri.

“Maaꞌi, Maaꞌi, Maaꞌi,

God Aalaha hahuꞌana nanama,

Iini e mauri oto uure mai naꞌo, na siꞌiri, na oto huu.”

⁹E hai ola mauri ngeena kire iiꞌo mola peꞌie kananga ni haꞌamanikuluꞌanga, na ni haꞌamaꞌunge, na ni paalahenga hunie iini nge e iiꞌo i lengine naunekume, na ko meu-meuri oto huu. Na suli maholo kire ko kana-kana oto urine, ¹⁰na e ro aawalai rato mwana hai ngeena kire ko pouruuru hai naꞌona iini e iiꞌo i lengine naunekume, na kire ko lahea iini nge ko meu-meuri oto huu. Kire ko neꞌie mo rorodara ikire i naꞌona naunekume ingeie na kire ko unue uuri,

¹¹“Iꞌoe oto a God na Aalaha iꞌemi.

O melisine oto o ke hele aana

manikuluꞌanga

na haꞌamaꞌunge

na nanamanga.

Aana o haꞌaholaa walu ola

na oto i sulie saemu

nge kire si aehota neꞌi ola na kire mauri.”

Kire Haꞌapainaꞌaa A Kalei Sipu Aana E Sai Tahanie Uusu-uusu Hio-hio

¹Na nou leesie loꞌu nga uusu-uusu hio-hio i laona nime i pwalo-pwalona iini nge e iiꞌo i lengine naunekume ni aalaha ngeena. Uusu-uusu hio-hio ngeena e toꞌo aana uusu-uusunge aana ahutana e ro aapa hailiu, na kire hioa, kire si honoa aana e hiu hui edi. ²Oto nou leesie loꞌu nga ensel e nanama ko soi-soi aana mei wala paine uuri, “?A tei ni e malisine uri ke taꞌaasie mo hui edi na ke lalaaꞌinie uusu-uusu hio-hio ngeena?” ³Taꞌe nga taꞌa-taꞌa iini haꞌike taꞌau i Lengi, wa mai aano i welumalau, wa aana leu mo iini e mae, uri ke malisine lalaaꞌinilana uusu-uusu hio-hio ngeena wa hunie ke saaie. ⁴Nou si ngara paine aena aana nga iini kaꞌa malisine oto uri ke huꞌesie uusu-uusu hio-hio ngeena wa uri huni saaie.

⁵Oto ngaeta iini aana mo rato ngeena ko teꞌuri hunieu, “!O ke suꞌuri ngara! Lio kaꞌu. Naꞌohai mwane uure aana komu a Jiuda nge kire haaraꞌinie ‘Laeon a Jiuda,’ e aꞌailaꞌasie oto ahutana mo maelonga ingeie. Ingeie naꞌohai mwane huni oolisie weuwana a Deved Inemauri hunie ke iiꞌo aana naunekume ingeie, na ingeie oto e malisine kei taꞌaasie mo hui edi, na huni lalaaꞌinie uusu-uusu hio-hio ngeena.”

⁶Oto i matolana mo rato ni mwane na e hai ola mauri ngeena, nou leesie loꞌu Kalei Sipu e uure i naꞌona naunekume ni aalaha ngeena. Na Kalei Sipu ngeena, e lio mala horoꞌilana e lae oto. E toꞌo aana e hiu rarangoi ola, na mo rarangoi ola ngeena mo tolimaa aana hahuꞌana nanamanga ingeie. E toꞌo aana loꞌu e hiu uꞌumaai ola, na ikire nge e hiu liꞌoa a God, nge e haꞌatolara aana taꞌena nga leu i laona walumalau. ⁷Oto Kalei Sipu ngeena e lae mai i saana iini e iiꞌo i lengine naunekume, na ko toolea oto uusu-uusu hio-hio mwaanie ninime i pwalo-pwalona. ⁸Aana maholo e toolea uusu-uusu hio-hio ngeena, nge e hai ola mauri na e ro aawalai rato mwana hai kire ko pouruuru oto i naꞌona Kalei Sipu ngeena. Kire mani hele aana mo kao-kao aani kol nge kire honu eeni dango wau-wesu. Na mo dango wau-wesu ngeena oto mo palonga mwala maaꞌi a God. Oto kire mani da mo pesi aawa, ⁹na kire suluꞌie kana haalu nana a Kalei Sipu uuri,

“Iꞌoe nge o adona o ke toolea uusu-uusu hio-hio

na o ke taꞌaasie mo hui edi aana,

aena aana horoꞌilemu e lae kaꞌu oto,

na aana apumu o toolea mai

mo iinoni takoie a God

mwaanie taꞌena nga komu

na taꞌena nga erenga

na taꞌena nga aapoloa

na taꞌena nga mala-malau.

¹⁰Iꞌoe oto aalaha ikire,

na o esuie uri kire mani neꞌi pris oto huni haꞌapainaꞌaa a God,

na o haꞌa-aalahara hunie kire ke aalaha haahie walumalau.”

¹¹Oto nou lio loꞌu weu na no ko rongoa walana mo molani ensel kali-kelie naunekume ngeena na mo ola mauri na mo rato. Kire hunge oto hiitoꞌo hule aana nga iini e saꞌa iidu-suuheni ike. ¹²Mo ensel ngeena kire ko kana paine uuri,

“A Kalei Sipu nge horoꞌilana e lae,

e adona kie ke haꞌapainaꞌaa

haahie nanamanga paine ingeie,

na haahie toꞌo-toꞌonga ingeie,

na haahie saenanaunge ingeie,

na haahie aꞌailaꞌanga ingeie.

Na e adona oto kie ke haꞌamaꞌu aana,

na kie ke haꞌamanikuluꞌaa,

na kie ke haꞌapainaꞌaa.”

¹³Na nou rongoa ahutana mo iini taꞌau i Lengi, na mo iini mei aano i welumalau, na aana leu mo iini e mae, kire ko meni kana uuri,

“Ahutana paalahenga,

na haꞌamaꞌunge,

na manikuluꞌanga,

na aꞌailaꞌanga,

ke iiꞌo oto huu

nana iini nge e iiꞌo i lengine naunekume

na noꞌone nana a Kalei Sipu.”

¹⁴Oto e hai ola mauri ngeena kire unue uuri, “Ke urine oto,” na mo rato ni mwane kire mani pouruuru haahie maada i aano, kire ko si lahea.

A Kalei Sipu E Tahanie Mo Hui Edi

¹Oto nou lio loꞌu na no ko leesie a Kalei Sipu e tahanie oto eetana nga iini aana e hiu hui edi mwaanie uusu-uusu hio-hio ngeena. Na no ko rongoa ngaeta iini aana e hai ola mauri ko ere paine na walana e lola oto mala lou-lou uuri, “O ke lae mai.” ²Oto nou lio na hoos rereꞌa ko maau oto. Na mwane ko huru taꞌau aana hoos ngeena e helesie pasi. Kire niie rorodara nana aena aana e aꞌailaꞌasie oto oohotaa, na e huru loꞌu taꞌau huni ooho suu-suu peꞌi aꞌailaꞌanga taraꞌasi.

³Oto a Kalei Sipu ngeena e tahanie loꞌu ruana nga hui edi, na no ko rongoa ruana nga ola mauri ko unue uuri, “O ke lae mai.” ⁴Oto ngaeta hoos e maau loꞌu, na iinine e nonoroꞌa. Oto iini nge e huru taꞌau aana hoos ngeena, kire niie naihi peine hunie, na nanamanga huni taꞌaasie hanuelamanga mwaanie walumalau hunie mwala ke horoꞌire hailiu.

⁵Oto a Kalei Sipu ngeena e tahanie loꞌu oolune nga hui edi, na nou rongoa oolune nga ola mauri e unue uuri, “O ke lae mai.” Oto nou lio na hoos pulu-puluꞌe ko maau oto. Na iini nge ko huru taꞌau aana hoos ngeena, e hele aana nga ola huni totohoa hiꞌanga. ⁶Oto nou rongoa ola mala mei wala e uure mai i matolana e hai ola mauri ngeena, na ko unue uuri, “O ke waelie mo ngeulaa hunie holiteni ke tohungei peine, hule aana mwala ke asu uana taꞌa-taꞌa ho uuhi wa e oolu ho kumara hunie dinge laku. Taꞌe o ke suꞌuri waelie mo ei hungu-hungu.”6:6 Erenga ni Krik ko ere i sulie mo tohungei ngeulaa mo Jiu mala wit na bali na olif na grep.

⁷Oto a Kalei Sipu ngeena e tahanie loꞌu haine nga hui edi, na nou rongoa haine nga ola mauri e unue uuri, “O ke lae mai.” ⁸Oto nou lio na hoos pala-pala ko maau loꞌu. Na iini nge ko huru taꞌau aana hoos ngeena, satana a Maenga. Nga iini loꞌu e lae mai i puri, satana a Haitolinge. Na niilana nanamanga e lae hunirerue huni horo maesie haine nga poꞌo ni iinoni i laona walumalau aani oohotaa, na aani iihiꞌure, na aani maelaa aaela, na aani ola loo-looꞌa ni meꞌesu.

⁹Oto a Kalei Sipu ngeena e tahanie loꞌu limana nga hui edi, na nou leesie i hahana ora ni uunu-uunu, maurihaꞌana mo iini nge horoꞌilada e lae aana kire hiiwalaimoli na kire tarohaꞌinie walana God. ¹⁰Oto mo maurihaꞌai ola ngeena kire ko soi aana mei wala paine uuri, “Hahuꞌana Aalaha iꞌemi, iꞌoe o maaꞌi na o toꞌohuu. ?Maholo uri taa nge o ke si leie mo iinoni hai aano na o kei suꞌue mei epu iꞌemi?” ¹¹Oto niilana toꞌoni rereꞌa e lae hunie taꞌena nga iini aada, na unulana e lae hunire uuri, “Omu ke maaꞌoohi haꞌawali keꞌu. Mala kire horoꞌiꞌomu keꞌu, nge horoꞌilana mo koni-konihe a God ko lae-lae ue. Oto kei saro hule aana iidu-iidunge aana mo eesimiu kire ko horoꞌire kei ehu, nge ne ke si suꞌue mei epu iꞌomu.”

¹²Oto a Kalei Sipu ngeena e tahanie loꞌu oonona nga hui edi, na nunu peine ko tolana hite oto, na sato ko pulu-puluꞌe oto mala loilohi, na waro-waro ko nonoroꞌa oto mala apu. ¹³Mo heeꞌu kire aanguru mei aano oto mala hue-huana ai ko toli sesu mola aana ooru ko nunuie. ¹⁴Na salo e tolana aiꞌaa mola mala haꞌu hio-hio kire hioa. Na ahutana mo toloi henue na taꞌena nga mala-malau kire oopa hailiu oto mwaanie mo leu kire oꞌoꞌo aani. ¹⁵Oto ahutana mwala mai aano, mo inemauri, na mo mwane paine, na mo iini kire toꞌo-toꞌo, na mo naꞌohai mwane, na mo ramo, na mo iinoni reu, na mo koni-konihe, kire mani lai mumuni oto i lalona mo liwe na mo hahale taꞌau i tolona mo uuwo. ¹⁶Na kire ko soi hunie mo toloi henue na mo hahale uuri, “Omu ke aaꞌoho mai haahiꞌemi, na omu ke mumuniꞌemi mwaanie maana iini nge e iiꞌo i lengine naunekume, na omu ke mumuniꞌemi mwaanie saewasunge a Kalei Sipu. ¹⁷Omu ke da ke urine oto aena aana hai dinge paine ni saewasunge ikire e hule oto. ?Oto a tei kei roroꞌa aꞌailaꞌa ni uure honosie leune?”

Leinge E Mamalo Maholo Kire Neꞌi Haꞌa-ara Aana Mo Israel

¹Oto loꞌu i puri nou leesie e hai ensel kire uure aana e hai suꞌu-suꞌue aana walumalau, na kire hele honosie e hai maai dengi aana ooru aana walumalau mwaanie uri nga maai dengi e ooru haahie walumalau wa haahie aasi wa e ooruhie taꞌena nga ai. ²E hai ensel ngeena a God e niie nanamanga hunire huni waelie aano huu na aasi. Oto nou leesie ngaeta ensel e lae mai uure mwaanie pwaalana sato peꞌie nga ola huni neꞌi haꞌa-ara aana mwala huni haataꞌinie uri ikire oto toꞌo-toꞌolana a God Mau-meuriꞌe. Na ensel ngeena e soi aana mei wala paine wau hunie e hai ensel uuri, ³“Omu ke maaꞌoohi keꞌu. Mwaanie omu wae-waelie kaꞌu mo ei na aano huu na aasi, aena aana melu kaꞌa neꞌie ue haꞌa-ara i darana mo koni-konihe a God.”

⁴Na nou rongoa mwala nge kire neꞌi haꞌa-ara oto aada, kire hule aana tangalau peꞌie e hai aawalai sinola mwana hai (144,000). Kire uure mai mwaanie ahutana mo komu ni Israel.

⁵Uure mwaanie komu a Jiuda nge aawalai sinola mwana rue kire neꞌie haꞌa-ara aada.

Uure mwaanie komu a Ruben, nge aawalai sinola mwana rue.

Uure mwaanie komu a Gad, nge aawalai sinola mwana rue.

⁶Uure mwaanie komu a Asa, nge aawalai sinola mwana rue.

Uure mwaanie komu a Naptali, nge aawalai sinola mwana rue.

Uure mwaanie komu a Manase, nge aawalai sinola mwana rue.

⁷Uure mwaanie komu a Simion, nge aawalai sinola mwana rue.

Uure mwaanie komu a Livae, nge aawalai sinola mwana rue.

Uure mwaanie komu a Isaka, nge aawalai sinola mwana rue.

⁸Uure mwaanie komu a Sebiulan, nge aawalai sinola mwana rue.

Uure mwaanie komu a Josep, nge aawalai sinola mwana rue.

Uure mwaanie komu a Benjamin, nge aawalai sinola mwana rue.

Oto kire neꞌie haꞌa-ara aana aawalai sinola mwana rue mwaanie ahutana mo komu ni Israel.

Pulitaa Paine Kire Haꞌamaꞌu Aana God

⁹Oto loꞌu i purine leune, nou lio na no ko leesie loꞌu nikei pulitaa oto paine, nge nga iini e saꞌa roroꞌa iidu-suuhana. Mwala ngeena kire uure mai mwaanie taꞌena nga mwala, na mwaanie taꞌena nga aapoloa, na mwaanie taꞌena nga komu, na mwaanie taꞌena nga erenga i laona walumalau. Kire mani toꞌoni eeni toꞌoni rereꞌa, na kire mani hele apa-apai eꞌe. Kire mani uure i naꞌona naunekume ni aalaha ngeena na a Kalei Sipu, ¹⁰na kire ko soi aana mei wala paine uuri, “Haꞌa-uuringe e uure mai mwaanie a God ikie, iini nge e iiꞌo i lengine naunekume, na mwaanie a Kalei Sipu.” ¹¹Mo rato ni mwane na e hai ola mauri ikire noꞌone i leune, na ahutana mo ensel kire mani uure kali-kelie naunekume. Mo ensel ngeena kire pouruuru hai aano i naꞌona naunekume na kire ko palo-paloa a God. ¹²Kire ko teꞌuri,

“Iau.

Haꞌapainaꞌanga,

na manikuluꞌanga,

na manatanga,

na paalahenga,

na haꞌamaꞌunge,

na nanamanga,

na aꞌailaꞌanga,

mo ola a God ikie otona na oto huu.

Ke urine oto.”

¹³Oto ngaeta iini aana mo rato ngeena e dolosi eeku uuri, “?Kira tei ni kire hoꞌo toꞌoni rereꞌa ngeena, na kire uure i tei?”

¹⁴Oto nou aalamie uuri, “Nou kaꞌa saie ike, poro paine ineu, taꞌe iꞌoe haꞌalaa o saie.”

Oto rato ni mwane ngeena e si teꞌuri hunieu, “Mwala ngeena, ikire nge kire uure maꞌutaꞌa aana maholo taungeꞌinilada e lae na kire iiꞌo i laona siꞌohaꞌanga paine. Kire hoda rereꞌa oto aana mo toꞌoni ikire aana apune a Kalei Sipu. ¹⁵Aena urinena nge kire iiꞌo oto i naꞌona naunekume a God, na kire ko palo-paloa oto susue dangi na rodo i laona nume maaꞌi ingeie. Na iini nge e iiꞌo i lengine naunekume kei lio i suli diana aada. ¹⁶Mwala ngeena kire saꞌa roroꞌa ni hiolo loꞌu, na kire saꞌa roroꞌa ni maarou loꞌu, na sapeda e saꞌa roroꞌa ni raramea loꞌu aana sato, ¹⁷aena aana a Kalei Sipu nge e uure i naꞌona naunekume, ingeie oto kakalihe ikire. E sai naꞌoda takoie huulaa ni wei meuri. Na a God kei usuri aasie ahutana mo wei ni aakalo mwaanie maada.”

A Kalei Sipu E Tahanie Hiune Nga Hui Edi, Oto E Hiu Eehuri Ko Si Ngara

¹Oto a Kalei Sipu ngeena e tahanie hiune nga hui edi. Na aana maholona, nge e pwa-pwaio oto taꞌau i Lengi i sulie nga kele maholoi sato. ²Na nou leesie e hiu ensel nge kire ko uure-uure i naꞌona God, niilana e hiu eehuri e lae hunire.

³Oto ngaeta ensel e lae loꞌu mei, e lae mai uure i saana ora ni uunu-uunu ola nge e iiꞌo i naꞌona naunekume. Na e hele aana kao-kao kol aani dango wau-wesu, na kire niie loꞌu hunie nga mo dango wau-wesu huni uunuꞌi peꞌie mo aarengaꞌinge mwala maaꞌi a God. Oto ensel ngeena e uunuꞌi oto i lengine ora aani kol ngeena, ⁴na pwaꞌulana dango wau-wesu na mo aarengaꞌinge mwala a God, e uure mwaanie nimana ensel na ko loho oto taꞌau i saana a God. ⁵Oto ensel ngeena e toolea dunge mwaanie ora ni uunu-uunu ola, na e neꞌie i laona kao-kao ngeena, na e uuꞌileꞌinie i lalona walumalau. Oto waꞌariri ko eeso, na lou-lou ko kakahite, na nunu ko esu oolo-oolo oto.

⁶Oto e hiu ensel kire hele aana e hiu eehuri ikire na kire dau aakau oto huni uuhiꞌi.

Eetana Nga Aahuri E Waelie Mwakano

⁷Oto eetana nga ensel e uuhie aahuri ingeie. Na mo uudu-uuduhe aani nemo e pou mala hau ko teke oto uure mai taꞌi salo, na dunge na apu ko teke noꞌone peꞌiꞌi. Oto ahutana hahalisi e waru mango, na oolune nga poꞌo ni leu aana aano huu na mo ei i lengine kire waru oto noꞌone.

Ruana Nga Aahuri E Waelie Aasi

⁸Oto ruana nga ensel e uuhie loꞌu aahuri ingeie. Na ngaeta mei ola e lio oto mala toloi henue paine ko weru aana dunge, na aasilana e lae oto hai laona aasi. Oto oolune nga poꞌo ni eesi e neꞌi epu, ⁹na oolune nga poꞌo ni ola mau-meuri i laona aasi kire mae mango, na oolune nga poꞌo ni iini aana mo haka i eesi kire aaela oto noꞌone.

Oolune Nga Aahuri E Waelie Mo Wei

¹⁰Oto oolune nga ensel e uuhie loꞌu aahuri ingeie. Na ngaeta ho heeꞌu peine e eeso mala waꞌariri, na ko ooho toli oto mai uure taꞌi salo. Na e teke i laona oolune ngaeta poꞌo ni leu aana mo wei peine, na i laona mo huulaa aani wei. ¹¹Na satana ho heeꞌu ngeena a Ahaꞌi, na oolune nga poꞌo ni wei e ahaꞌi oto. Oto mwala hunge kire mae aana kire inuhie mo wei ahaꞌi ngeena.

Haine Nga Aahuri E Waelie Salo

¹²Oto haine nga ensel e uuhie loꞌu aahuri ingeie. Na kire hite mwaꞌasie oto oolune nga aapa aana sato, na oolune nga aapa aana waro-waro, na oolune nga poꞌo ni iini aana mo heeꞌu. Oto oolune nga aapa aana mo raa-raa taꞌi salo e rodohono oto, na nga mei ola e kaꞌa sai raa ike loꞌu aana oolune nga aapa aana aatowaa na rodo.

¹³Oto aana maholo no ko lio-lio ue, na no ko leesie nga hada ko loo-loho taꞌi salo, na ko soi-soi aana mei wala paine uuri, “!Aaia! !Aaia! Aama-aamasilana mo iinoni i laona walumalau, aana kei tohungei aaela oto liutaa maholo ngaeta oolu ensel kei uuhie loꞌu mo eehuri ikire.”

Limana Nga Aahuri E Haꞌasapesaluꞌaa Mwala

¹Oto limana nga ensel e uuhie loꞌu aahuri ingeie. Na nou leesie iini kire haaraꞌinie aana a Heeꞌu nge a God e aasie kaꞌu mei aano mwaanie i Lengi. Na kire niie kii hunie, huni tahanie kalinge ni haꞌamotaahinge e kaꞌa toꞌo kaona. ²Oto e lae, e tahanie kalinge ni haꞌamotaahinge ngeena, oto pwaꞌulei dunge piꞌola pulu-puluꞌe e dautaa mwaanie kalinge ngeena oto domana dunge paine ko pweꞌu. Oto pwaꞌulei dunge ngeena ko lae honosie salo na sato ko rodohono oto. ³Oto mo oru kire siho mai laona walumalau uure mwaanie pwaꞌulei dunge ngeena. Na kire niie nanamanga huniꞌi huni ala mala hari-heri. ⁴Na kire ere honosire hunie kire ke suꞌuri waelie apa-apana taꞌena nga hahalisi wa taꞌena nga ai, taꞌe kire ke waelie mola mo iinoni nge kire kaꞌa toꞌo aana haꞌa-ara a God i darada. ⁵Na kire toliꞌaasire hunie kire ke haꞌasapesaluꞌaa mo iinoni hunie e lime waro-waro, na salunge ngeena e paine domana oto hari-heri e alaie iinoni. ⁶Aana mo dingena mwala ko sapesalu ngeena kire kei tola hailiu hunie nga mo ola huni horoꞌire maraada hunie kire ke mae, taꞌe kire saꞌa lio oodoiꞌi ike. Na kire kei sare mae, taꞌe kire saꞌa roroꞌa ni mae ike.

⁷Mo oru ngeena kire lio mala mo hoos nge kire dau aakau eeni hunie oohotaa. Kire hoꞌosie pwaude aana mo ola e lio mala rorodara aani kol, na maada e lio mala maana iinoni. ⁸Iihune pwaude e urihana iihune pwaune mo keni, na nihoda e urihana nihona mo laeon. ⁹Na i roromaꞌi saeda kire hoꞌosie mo ola maꞌutaꞌa aani oohotaa. Aawa-aawatana apa-apada e rongo mala tatakolenga aana mo hoos ko huru peꞌi taetahe aana oohotaa. ¹⁰Kire toꞌo uiꞌuide mala mo heri-heri, na maholo kire kei susuꞌie iinoni aana uiꞌuide, nge kei selu i sulie e lime waro-waro. ¹¹Inemauri mo oru ngeena nge ensel haahie kalinge ni haꞌamotaahinge, na satana aana erenga ni Hibru, a Abadon, na aana erenga mo Krik nge a Apolion. Taꞌe taꞌa-taꞌa neꞌisaenga mola aana uuri, “Iini ko mala-mala.”

¹²Eetana nga mei aaelanga oto e tapaliu mango ngeena, taꞌe e ro iini loꞌu kei haro lae ue mai i puri.

Oonona Nga Aahuri E Horo Maesie Mwala

¹³Oto oonona nga ensel e uuhie loꞌu aahuri ingeie. Na nou rongoa mei wala e uure mai mwaanie mo rarangoi ola i lengine ora aani kol nge e iiꞌo i naꞌona God. ¹⁴Mei wala e unue hunie oonona nga ensel ngeena uuri, “O ke luhesie e hai ensel nge kire hoꞌosire i reune wai peine Iuparetis.” ¹⁵Oto e si luhesire, aana kire mani iiꞌo aakau oto hunie maholona. E tewa oto na kire ko maaꞌoohie mola halisi ngeena, na waro-waro ngeena, na hai dinge ngeena, na maholoi sato ngeena, aana kire iiꞌo aakau mola. Kire iiꞌo aakau huni horo maesie oolune nga poꞌo ni leu aani iinoni i laona walumalau. ¹⁶Nou rongoa iidu-iidunge aana mae ikire, na e hule aana e ro tangalai mola aani ramo (200,000,000) peꞌie mo hoos ikire. ¹⁷Oto nou leesie loꞌu mo iini kire taꞌe aana mo hoos ngeena kire hoꞌosie mo sala ni oohotaa haahie roromaꞌi saeda, na mo olana kire nonoroꞌa mala mela-melahai dunge, na kire pulu-puluꞌe mala aasi, na kire saꞌo-saꞌola mala sato. Na pwaune mo hoos ikire e lio mala pwaune laeon, na dunge ko deutaa mai mwaanie wawada peꞌie pwaꞌulei dunge na mo heu eeso-eeso. ¹⁸Na kire horo maesie ngaeta poꞌo ni iinoni aana e oolu poꞌo ni leu aana walumalau, aana e oolu aaelanga nge kire uure mwaanie wawana mo hoos ngeena—nge dunge na pwaꞌulei dunge na mo heu eeso-eeso. ¹⁹Aana nanamanga mo hoos nge i wawada na loꞌu aana uiꞌuide, aena aana uiꞌuide e toꞌo aana mo pweꞌui ola mala mwaa ala-ala, nge e sai alaie mo iinoni aana.

²⁰Taꞌe ahutana mo iinoni loꞌu i lalona walumalau nge horoꞌilada e kaꞌa lae ike aana mo aaelanga ngeena, kire kaꞌa oonisae ike mwaanie mo takalonga ikire. Kire kaꞌa mamalo ike mwaanie palolana mo liꞌoa aaela na mo nunui ola kire asuiꞌi mola aani kol, na siliva, na bras, na hau, na aani ei. Mo god eero-eero ngeena kire kaꞌa sai lio ike aana maada wa kire ke rorongo aana aalingada wa kire ke lae-lae aana aeꞌaeda. ²¹Na mwala kire kaꞌa oonisae ike hunie kire ke aaliꞌu mwaanie mo horonga ikire, wa mo siꞌonga ikire, wa mo aeni-olanga ikire, wa mo pelinge ikire, taꞌe kire ko lae peꞌi hele paine mola aani.

Ensel E Niie Kele Uusu-uusu Hio-hio Hunie A Jon

¹Oto nou heꞌi leesie loꞌu ngaeta ensel e tohungei nanama liutaa ko siho mai uure i Lengi. Na e aaluhi aana mei uuru oto mala nga toꞌoni ingeie, na hureꞌaro e lolo ahuie pwaune. Maana e raa oto mala sato, na e ro aeꞌaena domana oto e ro mela-melahai dunge oto paine. ²Ensel ngeena e hele aana kele uusu-uusu hio-hio i laona nimana na e taha oto aakau. Oto aeꞌae i pwalo-pwalona e uuri puu i kolune aasi, na aeꞌae i meu-meuline e uuri puu i kolune aano huu. ³Na e si soi aana mei wala paine domana oto nga laeon ko tea, na aana maholona, oto e hiu ho lou-lou kire si ere taa. ⁴Oto mola i purine kire ere taa urine, na no ko deu oto uri ne ke uusue nga taa kire unue. Taꞌe loꞌu mola aana maholona na no ko rongoa mei wala uure i Lengi e teꞌuri hunieu, “Suꞌuri uusue nga taa nge e hiu lou-lou e unue, na o ke suꞌuri haꞌarongoa nga iini aana.”

⁵Oto ensel nge nou leesie e uure i kolune aasi na i kolune aano huu, e susueꞌinie ninime i pwalo-pwalona oto takoie i Lengi, ⁶na ko heiholotaꞌi oto aana satana God Mau-meuriꞌe, na iini e haꞌaholaa walumalau na salo na aasi na walu ola i lalo aani. Ensel ngeena e haiholotaꞌi uuri, “Maholo ni maaꞌoohinge e mango oto. ⁷Aana maholo nge hiune nga ensel kei uuhie aahuri ingeie, nge a God kei haꞌa-oaie oto mei saehaahinge ingeie, mala kaꞌu e unue oto hunie mo koni-konihe ingeie, mo propet maaꞌi.”

⁸Oto mei wala e uure i Lengi ngeena ko heꞌi unue loꞌu hunieu uuri, “O ke lae i toolea uusu-uusu hio-hio e taha oto ngeena mwaanie nimana ensel nge e uure i kolune aasi na i kolune aano huu.”

⁹Oto nou lae wau i saana ensel ngeena, na nou sukaa oto kele uusu-uusu hio-hio ngeena mwaanie.

Oto e teꞌuri hunieu, “Hele aana uusu-uusu hio-hio ngeena na o ke ngaue. Maholo o kei ngeue, kei meli-meli mala ngingidue, taꞌe maholo o kei oonomie nge oopwamu ke si hihiro aana.”

¹⁰Oto nou toolea kele uusu-uusu hio-hio ngeena mwaanie na nou ngeue oto. Na maholo nou ngeue e mali-meli oto hiitoꞌo mala ngingidue, taꞌe purine nou ngeu mangoa, nge oopwaku e si hihiro aana.

¹¹Oto e unue loꞌu hunieu uuri, “O ke heꞌi unu tahangaꞌinie loꞌu walana God i sulie nga taa kei reu loꞌu mei puri aana mo aapoloa hunge hai aaopaꞌi, na mo komu ni iinoni, na mo erenga, na mo inemauri.”

A Satan E Ooho Honosie E Ro Propet A God

¹Oto nga iini e niie mai ei totoho mala apaꞌa hunieu, na e si unue hunieu uuri, “Lae, na o ke lai totohoa nume maaꞌi a God na ora ni uunu-uunu, na o ke iidumie mwala ko palo-palo a God i leune. ²Taꞌe o ke suꞌuri totohoa lolata poi sinaha aana nume maaꞌi. Toliꞌaasie mola, sulie niilana e lae oto hunie mo Aapoloa Aaopa nge ikire nga mo Jiu haꞌike, na kire kei aalaha haahie i Jerusalem i sulie e hai aawalai waro-waro mwana rue.11:2 Ngaeta mo tatala aana Haataꞌinge kire ere i sulie hai aawalai waro-waro mwana rue, na ngaeta iini ko ere i sulie sinola e ro tangalau peꞌie oono aawalai hei dinge, na ngaeta iini loꞌu ko ere i sulie e oolu helisi peꞌie nga aapa. Taꞌe tewanga ahutana mo maholo ngeena kire mani sada mola. Leesie loꞌu Haataꞌinge 11:3, 12:6, 12:14, 13:5. A Propet Daniel e ere noꞌone i sulie nga maholo tewa urine aana Daniel 7:25, 12:7.³Na ne kei uusungeꞌinie poi e ro mwane ineu nge kire sai haꞌawalaimoliꞌaa walaku. Kirerue kei toꞌoni aani toꞌoni aaela ni haataꞌinie uri kirerue ko saehuu, na ne kei niie nanamanga hunirerue hunie kirerue ke unu tahangaꞌinie walaku hunie sinola peꞌie e ro tangalau na e oono aawalai hei dinge ngeena.”

⁴E ro propet ienini ikirerue oto e ro ai olif na e ro ola talai laite, nge kirerue uure i naꞌona a God, aalaha paine haahie walumalau. ⁵Mala uri nga maelonga kei deu huni horoꞌie e ro mwane ngeena, nge dunge kei iisitaa mwaanie ngiduderue na kei horoꞌie oto. Mo maelonga ikirerue kei meni mae oto urine. ⁶E ro mwane ngeena kire toꞌo aana nanamanga huni deu honosie nemo i sulie mo waro-waro nge kire kei unu tahangaꞌinie walana a God. Kire toꞌo aana noꞌone nanamanga huni oolisie wai hunie ke neꞌi epu, na kire toꞌo aana nanamanga huni haꞌatolaa mai taꞌena nga aaelanga i laona walumalau. Kire sai deu urine oto mola tarau i sulie neꞌisaenga ikirerue.

⁷Oto maholo e ro propet ngeena kirerue kei unu tahangaꞌinie walana God mango, nge nga ola loo-looꞌa kei maau poi mwaanie kalinge ni haꞌamotaahinge ngeena. Oto ke si heiseuni peꞌirerue na kei horo maesirerue oto. ⁸Na mo rae aadarue kei kesu mola i sulie tala aana huilume kire ere ni aalahuunge aana uuri i Sodom wa i Ijip.11:8 Hanue ngeena e toꞌo aana mo satai ola hunge aana nge ikire oto mo haꞌa-ara mola hunie walu ola aaela nge ko uure honosie a God. Sodom oto nga haꞌa-ara hunie walu ola mala masinge na aeni-olanga. Leesie Jenesis 18:16–19:29, na Aesaea 1:9-10. Oto Ijip nga haꞌa-ara huni deu rarahie mwala hunie kire ke asu mwaakule wa mala mo koni-konihe. Leesie Eksodas 1:11-14, na Diutronomi 5:6. Mo satai ola ngeena nga tolimaa mola hunie huilume i Jerusalem nge kire horoꞌie a Aalaha ikirerue noꞌone aana. ⁹Oto kire saꞌa toliꞌaasie ike nga iini ke haitoli aadarue, na hunie e oolu hei dinge peꞌie nga aapai dinge mwala aana ahutana mo henue hai aaopaꞌi, na taꞌena nga aapoloa, na taꞌena nga komu, na taꞌena nga ere-erenga, kire kei toꞌo-toꞌomaaie e ro rae aadarue. ¹⁰Na ahutana mwala ni welumalau kire kei ilenimwaꞌe oto hiitoꞌo aena aana e ro propet ngeena kire mae oto. Kire kei deu ngeuhe, na kire kei niie mo niinge hunire hailiu aena aana e ro mwane maaꞌi ngeena kire asuie sapesalunge oto hiitoꞌo hunie mwala aana walumalau.

¹¹Taꞌe i purine e oolu hei dinge na nga aapai dinge ngeena e haro mango, a God e si nii eelihoꞌi aana mei mangoi ola ni meurihe hunie e ro mwane maaꞌi ngeena. Oto kire uure hala-hala aana aeꞌaedarue, na ahutana mwala nge kire leesirerue kire tohungei meꞌu oto hiitoꞌo. ¹²Oto e ro mwane maaꞌi ngeena kirerue ko rongoa mei wala paine uure taꞌau i Lengi ko unue hunirerue uuri, “More ke lae poi leu.” Oto kirerue ko lae oto taꞌau i Lengi i laona mei uuru, na mo maelonga ikirerue kire ko toꞌo-toꞌomaairerue mola. ¹³Na aana maholona nunu oto paine e nunu, na tangahuluꞌana ngaeta poꞌo ni leu aana huilume i Jerusalem ngeena e aaꞌoho oto, na e hiu sinolai iinoni kire mae aana nunu ngeena. Oto mo iini nge kire kaꞌa mae ike, kire ko tohungei meꞌu, na kire ko soi haꞌamanikuluꞌaa oto a God taꞌau i Lengi.

¹⁴I leune, ruana nga mei aaelanga paine e mango eena, taꞌe lio kaꞌu. Karaꞌinie oto loꞌu oolune nga mei aaelanga paine kei lae mai.

Hiune Nga Aahuri E Aehotaa Aalahanga a God

¹⁵Oto hiune nga ensel e uuhie aahuri ingeie, na mo wala paine uure taꞌau i Lengi ko teꞌuri, “A God ikie na iini e lio hilisie hunie ke neꞌie a Haꞌa-uuri, ikire oto kire toꞌo aana nanamanga haahie ahutana walu ola aana walumalau na huni aalaha haahie oto huu.”

¹⁶Oto e ro aawalai rato ni mwane mwana hai nge kire iiꞌo i lengine mo neunekume i naꞌona God, kire mani lai pouruuru i aano i naꞌona God ¹⁷na kire ko ere uuri,

“Emi ko paalaheꞌo, God Aalaha Hahuꞌana Nanama,

nge o iiꞌo kaꞌu oto uure mai naꞌo, na oto loꞌu mei siꞌiri ie.

Emi ko paalaheꞌo aena aana o ko talaꞌai aalaha oto haahie walumalau

peꞌie nanamanga paine iꞌoe,

¹⁸Oto waite mo puꞌo kire ko tohungei saewasu,

taꞌe ie maholo iꞌoe oto huni saewasu.

Na maholo oto hunie o kei leie mo iini kire mae oto,

maholo oto hunie o kei waaie mo koni-konihe iꞌoe, mala mo propet.

Na maholo oto hunie o kei waaie kira hiiwalaimoli,

mo iini nge kire haꞌamaꞌu eemu, e paine wa e mwai-mwei.

Na maholo oto huni horo suuheꞌinie

mo iini nge kire ko waelie walumalau.”

¹⁹Oto nume maaꞌi a God taꞌau i Lengi e taha, na nou leesie oto taꞌau kesi maaꞌi a God nge haiholotaꞌinge ingeie i laona. Oto waꞌariri ko eeso hailiu, na lou-lou ko hoka, na nunu oto paine peꞌie mawasidengi oto paine ko hite, na mo uudu-uuduhe aani nemo e pou mala hau taꞌi salo ko teke oto mai aano mala nemo.

Painehaꞌana Mwaa Ala-ala E Saunie Huꞌe

¹Oto ngaeta tolimaa oto paine e haataꞌi loꞌu taꞌau i Lengi. Nou leesie ngaeta huꞌe12:1 Saꞌa mola huꞌe ngeena e urihana komu ni Israel na kele mwela nge ko sapesalu aana ngeena uri a Jisas. Urine walu ola a Jon e ere i suliꞌi ie, kire rau oto aana pongine a Jisas. e toꞌoni haahie aana rarangana sato, na waro-waro i hahana aeꞌaena, na rorodara aana aawalai ho heeꞌu mwana rue i pweune. ²A huꞌena ko hiꞌe-hiꞌe, oto ko ngara-ngara aana ko sapesalu oto hunie kei meuri eeni mwela.

³Oto ngaeta tolimaa e haataꞌi loꞌu taꞌau i Lengi. Iini ngeena painehaꞌana mwaa ala-ala, na sapena e tohungei nonoroꞌa. E toꞌo aana e hiu pwaꞌui ola aana na aawalai rarangoi ola. Na e hiu pwaꞌui ola ngeena kire mani oa rorodara mango. ⁴Oto e rapu tekelaꞌinie oolune ngaeta poꞌo ni leu aana mo heeꞌu taꞌi salo aana uiꞌuine, na kire ooho toli oto mai aano. Na e lae oto mai uure i naꞌona a huꞌena uri hunie ke ngaue a kalena aana maholo kei hute.12:4 Painehaꞌana mwaa ala-ala ngeena uri a Satan ni ngeena, na aana ko sare ngaue kele mwela ngeena e urihana maholo nge a Herod Inemauri e sasare horoꞌie a Jisas maholo e hute. Leesie Matiu 2:16-18.

⁵Oto a huꞌena e haꞌahutaa kele mwela mwane hunie kei aalaha haahie ahutana mo henue i laona walumalau, na kei tohungei haꞌaloie ahutana mo iini kire ko heitohea. Taꞌe maholo kele mwelana e si hute, oto kire toolea mola i saana God, na e lai iiꞌo oto aana naunekume ingeie. ⁶Na a huꞌena e tahi weu i lalona hanuesala takoie leu nge a God e dau aakau aana oto hunie a huꞌena kei iiꞌo aana. I leune nge lio i sulilana ke si lae i sulie sinolai hei dinge peꞌie e ro tangalau na oono aawalai hei dinge.

⁷Oto oohotaa paine ko aehota oto taꞌau i Lengi. Naꞌohai ensel a Maekol na mo ensel ingeie ni kire ko heiseuni honosie painehaꞌana mwaa ala-ala ngeena na mo ensel ingeie. ⁸Taꞌe a Maekol ni e aꞌailaꞌa liutaa aana mwaa ngeena. Oto uure aana maholona, kire kaꞌa toliꞌaasie ike loꞌu hunie mwaa ngeena wa mo ensel ingeie ke iiꞌo taꞌau i Lengi, ⁹taꞌe kire aasire mango oto mai aano i laona walumalau. Painehaꞌana mwaa ala-ala ngeena ola e uure oto mai i naꞌo. Na ingeie kaꞌu kie ko haa-haaraꞌinie a Pwelu Eero-eero wa a Satan. Na ingeie oto iini nge ko eeroa ahutana mwala aana walumalau huni lae i sulie mo tala aaela. ¹⁰Oto nou heꞌi rongoa loꞌu mei wala paine e uure taꞌau i Lengi ko teꞌuri,

“Aana maholo ie God ikie e haꞌa-uurikie oto.

e haataꞌinie oto uri e toꞌo aana nanamanga huni aalaha oto mala inemauri.

Oto ie a Kraes e haataꞌinie uri ingeie oto ni e aalaha haahie taꞌena nga ola.

Aana iini nge holaꞌinaꞌo e talei haꞌa-haꞌasusungeꞌinie mola mo eesike suli aatowaa na rodo i naꞌona a God ikie,

aasilana e lae oto mai aano.

¹¹Oto maholo ie e saꞌa haꞌasusungeꞌinie loꞌu mo eesike

aana kire aꞌailaꞌasie oto aana apune a Kalei Sipu,

aana walaimolinge kire tarohaꞌinie,

aana kire toliꞌaasie maurihaꞌada i tehulaꞌana.

¹²Aena urinena, omu ke ile-ilenimwaꞌe haahie leune,

iꞌomu mo iini taꞌau i Lengi.

Taꞌe kei tohungei aaela oto liutaa hunie mwakano na aasi, na ahutemiu mo iini omu iiꞌo mai aano i lalona walumalau,

aena aana a Pwelu Eero-eero e siho oto mai aano i seemiu.

Saena e honu mola aani saewasunge,

aena aana e saie oto uri e saꞌa iiꞌo tewa ike loꞌu.”

¹³Oto maholo painehaꞌana mwaa ala-ala ngeena e lio saie uri aasilana e lae oto mai aano, ko si aehota taungeꞌinie huꞌe nge e haꞌahutaa mwela mwane ngeena. ¹⁴Taꞌe a huꞌena kire niie e ro apa-apai hada oto paine nana uri hunie ke loho wau takoie leu ingeie wau i henue sala nge kire dau aakau aana loosie. I leune nge kire kei lio i sulie hunie kei iiꞌo sapemawa mwaanie mwaa ngeena i sulie oolu helisi peꞌie oono waro-waro.

¹⁵Oto mwaa ngeena e pusuleꞌinie wai mwaanie wawana domana oto wai ko kone wau takoie leu a huꞌena e iiꞌo aana uri hunie ke konea. ¹⁶Taꞌe mwakano e peꞌie a huꞌena aana kalinge paine e maau, oto e oonomie mola wai nge ko aahe mai mwaanie wawana mwaa paine ngeena. ¹⁷Oto painehaꞌana mwaa ala-ala ngeena e tohungei saewasulie a huꞌena, na e lae oto huni ooho peꞌie mo kalena. Ikire oto mo iini nge kire ko lulu i sulie mo haꞌatolanga a God, na kire ko haꞌahouleꞌinie walaimolinge i sulie a Jisas.

E Ro Naꞌohai Koni-konihe A Satan Kirerue Ooho Honosie Mwala Maaꞌi A God

¹⁸Oto painehaꞌana mwaa ala-ala ngeena e si lai uure mola i reune aasi.

¹Oto nou heꞌi leesie loꞌu ola loo-looꞌa nge e horo maesie e ro propet ngeena e maau poi mwaanie aasi. E toꞌo aana aawalai rarangoi ola na e hiu pwaꞌui ola aana. Mo rarangoi ola aana ngeena kire mani toꞌo rorodara mango. Na mo pwaꞌui ola aana kire mani toꞌo aana mo satai ola huni ere mwakataꞌinie a God. ²Na ola loo-looꞌa nge nou leesie ngeena e lio ni meꞌunge oto hiitoꞌo mala leopat, taꞌe mo aeꞌaena e lio ni meꞌunge mala aeꞌaena bea, na wawana e lio ni meꞌunge mala wawana laeon.

Oto painehaꞌana mwaa ala-ala ngeena e niie aꞌailaꞌanga na nanamanga ingeie hunie ola loo-looꞌa ngeena ke aalaha peꞌie. ³Ngaeta pwaꞌui ola aana ola loo-looꞌa ngeena, malaka oto paine nge aana. Na e lio adona ke maesie malaka ngeena, taꞌe lae-lae malaka ngeena e haro mola oto loꞌu maraana. Aena urinena ahutana mwala aana walumalau kire ko pangataꞌi, na kire ko lulu i sulie oto. ⁴Ahutana mwala ko meni paloa painehaꞌana mwaa ala-ala ngeena, aena aana e niie aꞌailaꞌanga ingeie hunie ola loo-looꞌa ngeena. Na kire palo-paloa noꞌone ola loo-looꞌa ngeena peꞌie mo wala uuri, “?A tei e sada peꞌie ola loo-looꞌa ngeena?13:4 Mwala nge kire ko dolosi urine kire ko haꞌamwasi mola aana a Ensel Maekol, aana neꞌisaenga aana satana e uuri, “?A tei e sada peꞌie a God?” Nga iini hunie ke aꞌailaꞌa liutaa aana na haꞌike loꞌu.”

⁵Na hunie e hai aawalai waro-waro mwana rue, ola loo-looꞌa ngeena e toꞌo aana nanamanga huni esu mola i sulie saena, na ko ere toohaꞌinie maraana liutaa aana God. ⁶Ko ere waelie oto a God, na satana, na hanue ingeie, na ahutana mo iini nge kire iiꞌo peꞌie taꞌau i Lengi. ⁷Niilana aꞌailaꞌanga e lae noꞌone hunie huni ooho peꞌie mwala maaꞌi a God, na huni aꞌailaꞌasire. Niilana nanamanga e lae noꞌone hunie haahie ahutana mo iinoni ni welumalau maꞌalana nga komu uri taa wa nga ere-erenga uri taa wa nga hanue loꞌu uri taa kire iiꞌo aana. ⁸Ahutana mwala ni welumalau kire kei paloa ola loo-looꞌa ngeena, taꞌe mo iinoni a God haꞌike, aana Kalei Sipu nge horoꞌilana e lae e uusue satada oto i laona uusu-uusu ni meurihe ingeie oto wau i naꞌona haꞌaholalana walumalau.

⁹Omu ke pwaarongo diana kaꞌu, hunie omu ke rongo saie mo wala e aasa ienini. ¹⁰Mala uri a God kei toliꞌaasie taꞌena nga iini ke lae i nume ni hoꞌo, nge kei lae oto i nume ni hoꞌo. Mala uri a God kei toliꞌaasie taꞌena nga iini ke mae aani naihi, nge horoꞌilana kei lae oto aani naihi. Na aana maholo nge mo ola ngeena kei reu urine, nge iꞌomu mo iinoni a God, omu ke uure aꞌailaꞌa mola na omu ke hiiwalaimoli ngei-ngedi mola aana a God.

¹¹Oto nou heꞌi leesie loꞌu ngaeta ola loo-looꞌa e maau poi mwaanie mwakano. E toꞌo aana e ro rarangoi ola mwai-mwei mala mo kalei sipu maneko, taꞌe ko ere-ere aꞌailaꞌa oto mala painehaꞌana mwaa ala-ala ngeena. ¹²Oto maholo ruana nga ola loo-looꞌa ie e iiꞌo peꞌie eetana nga ola loo-looꞌa ngeena, nge ko esu aana nanamanga nge iini holaꞌinaꞌo e toꞌo aana. E asu aana nanamanga ngeena urine huni deu rarahie mola ahutana mwala aana walumalau hunie kire ke palo-paloa iini holaꞌinaꞌo ngeena nge malaka aaela e oꞌoꞌo kaꞌu aana taꞌe e mola loꞌu. ¹³Ruana nga ola loo-looꞌa ngeena ko esuie mo huꞌi-huꞌite paine, hule aana e da dunge e siho mai i aano uure i salo mola i maana mwala. ¹⁴A God e toliꞌaasie hunie ke asuie mo huꞌi-huꞌite aana maholo e iiꞌo peꞌie ola loo-looꞌa holaꞌinaꞌo ngeena, na aena aana mo huꞌi-huꞌite ngeena, nge e haꞌapweue ahutana mwala ni welumalau. Ruana nga ola loo-looꞌa ngeena e unue uri mwala ke asuie nga nunui ola huni haꞌapainaꞌaa iini holaꞌinaꞌo, iini nge e malakaꞌa kaꞌu taꞌe e kaꞌa maesie ike. ¹⁵Oto mwala kire asuie nunui ola mala e unuena, na loꞌu a God e toliꞌaasie ruana nga ola loo-looꞌa ngeena hunie ke niie nga mangoi ola hunie nunui ola nge kire asuie. Oto nunui olana ko ere, na ko lei mae aana mo iini nge kire kaꞌa palo-paloa ike. ¹⁶Na ruana nga ola loo-looꞌa ngeena ko deu rarahie loꞌu ahutana mwala, mwala mwai-mwei na mwala paine, mo iini kire toꞌo-toꞌo na mo iini kire maitale, mo koni-konihe na mo iini kire iiꞌo luhetaꞌi, hunie kire ke mani toꞌo aana haꞌa-ara aana ninime i pwalo-pwaloda wa taꞌi naꞌona darada. ¹⁷Na e haꞌa-uuresie haꞌatolanga uri nga iini e saꞌa roroꞌa ni holi ike wa ke haꞌaholingeꞌinie nga mei ola, na e kaꞌa toꞌo aana haꞌa-ara ngeena. Aana haꞌa-ara ngeena oto satana eetana nga ola loo-looꞌa ngeena, wa iidu-iidunge nge ko uure hunie satana.

¹⁸Omu ke loꞌo-loꞌongaꞌi kohi i sulie mo ola ienini hunie omu ke lio saiꞌi. Mala uri nga iini ko saenanau, nge ke haitale oodoie neꞌisaenga aana iidu-iidunge aana ola loo-looꞌa ngeena, i sulie iidu-iidunge ngeena e uure hunie nga iinoni. Iidu-iidunge ingeie nge oono tangalau, oono aawala mwana oono.

Mo Sinolai Mwane Oodotaꞌi Kire Kanalie Kana Haalu Nana God

¹Oto nou heꞌi lio loꞌu na no ko leesie a Kalei Sipu e uure i lengine toloi henue i Saeon. Na tangalau peꞌie hai aawalai sinolai iinoni mwana hai kire uure noꞌone peꞌie. Kire mani uusue satana a Kalei Sipu i naꞌona darada, na kire uusue noꞌone satana Aamana a Kalei Sipu. ²Na nou rongoa nga aawa-aawatai ola paine uure taꞌau i Lengi domana oto aawa-aawatana wai peine ko kone, na domana oto kou-kouhaꞌana lou-lou peine. Aawa-aawatai ola nou rongoa ngeena e rongo diana mala aawa-aawatana mo pesi aawa mwala ko sikiliꞌi. ³Na mo sinolai iinoni ngeena kire ko kanalie kana haalu i naꞌona naunekume na i naꞌona e hai ola mauri na mo rato ni mwane ngeena. Na taꞌe mo sinolai iinoni nge a Kalei Sipu e tapa oolisire mwaanie walumalau mola kire sai kanalie kana haalu ngeena. ⁴Mo mwane ienini kire kinetaꞌinire maraada hunie kire ke iiꞌo rereꞌa taꞌingelu mala mo iini nge kire kaꞌa hele roroꞌanga ike peꞌie nga keni. Na kire lulu i sulie a Kalei Sipu aana ahutana mo tolahai ola diana ingeie. E tapa oolisire mwaanie walumalau, na ikire oto domana niinge aani hiki-olanga nge niileni e lae hunie a God na a Kalei Sipu. ⁵Kire kaꞌa dau wala aaela ike aani eeronga, taꞌe kire tohungei iiꞌo oodotaꞌi taꞌingelu mola.

E Oolu Ensel Ko Haꞌapasulie Mwala Uri A God Kei Leire

⁶Oto nou heꞌi leesie loꞌu ngaeta ensel e loho taꞌau i salo huni tarohaꞌinie mei wala aana Tataroha Diana nge kei iiꞌo huu. Ko tarohaꞌinie oto hunie ahutana mo iinoni i laona walumalau, hunie taꞌena nga mwala, na taꞌena nga aapoloa, na taꞌena nga ere-erenga, na taꞌena nga komu. ⁷Ensel ngeena ko ere aana mei wala paine uuri, “Omu ke haꞌamaꞌu aana God na omu ke haꞌapainaꞌaa. E hule oto aana maholo a God huni leie ahutana mwala. Oto omu ke haꞌamanikuluꞌaa God aana ingeie oto iini nge e haꞌaholaa salo, na aano huu, na aasi, na mo huulaa mauri, na taꞌena nga ola loꞌu i laona walumalau.”

⁸Oto ruana nga ensel e lae mai sulie na ko heꞌi teꞌuri loꞌu, “Huilume paine i Babilon14:8 Ohe a Jon ko ere mumuni i sulie hanue i Rom, painehaꞌana hanue aaela haahie walumalau aana maholo ngeena. Wa ohe ko ere i sulie tolahai iinoni aaela huni heitalea nanamanga haahie mwala aani eeronga na aani palonga nge e kaꞌa toꞌohuu. Leesie loꞌu Haataꞌinge 16:19, 17:5, 18:2-21. e aaꞌoho oto. !E waetaꞌi oto! Mala i Babilon oto i naꞌo, huilume paine ngeena e hari hunie mola aaelanga na e da uri taꞌena nga hanue aana walumalau noꞌone ke inu mehiri oto mala ingeie. Oto a God ko saewasulire.”

⁹Oto oolune nga ensel e lae loꞌu mei sulie e ro iini i naꞌo, na ko unue mei wala paine uuri, “Kei aaela oto liutaa hunie iinoni nge ko pouruuru i naꞌona ola loo-looꞌa ngeena na nunune. Kei aaela oto hiitoꞌo hunie ahutana mo iini nge haꞌa-ara aana ola loo-looꞌa ngeena i darana wa aana nimana. ¹⁰Mo iini urine kire kei meni hiingeꞌinie saewasunge a God oto toꞌohuu aana e saꞌa pwaidoraa ike saewasunge ingeie peꞌie nga kele mei ola ni aamasinge hunire, taꞌe kei haꞌa-aahesie mola apude. A God kei aasire mola i laona dunge ni haꞌamotaahinge aana mo heu eeso-eeso i naꞌona mo ensel maaꞌi ingeie na a Kalei Sipu. ¹¹Pwaꞌulana dunge ni sapesalunge ikire ngeena e saꞌa mou-mou ike loꞌu, taꞌe kei taꞌelaꞌi taraꞌasi mola susue aatowaa na rodo. Oto nga mamalonga haꞌike loꞌu hunie mo iini nge kire haꞌapainaꞌaa ola loo-looꞌa ngeena na nunune, wa mo iini nge kire toꞌo aana haꞌa-ara aana satana.”

¹²Oto aena urinena, e malisine mo iini maaꞌi a God ke hele susuleꞌi aana hiiwalaimolinge ikire i lalo aana Jisas na aana tola i sulilana mo haꞌatolanga a God.

¹³Oto nou rongoa loꞌu mei wala uure mwaanie i Lengi ko teꞌuri, “O ke uusue uri aehota siꞌiri pwau weu, mo iini nge kire mae i lalo aana Aalaha kire deidehie oto liutaa.”

Na a Liꞌoa e teꞌuri, “Iau, e toꞌohuu oto. Kire kei ile-ilenimwaꞌe mola maholo kire kei mamalo oto taꞌau i Lengi mwaanie mo esunge e aasa ikire, aena aana waaitada haahie mo esunge diana kire asuiꞌi ngeena e iiꞌo aakau oto hunire.”

Mo Ensel Kire Soꞌokonie Hohola Aana Walumalau

¹⁴Oto nou lio-lio na no ko leesie loꞌu nga iini e lio mala iinoni e iiꞌo i lengine mei uuru. E hoꞌosie rorodara aani kol i pweune, na e hele aana naihi e ala huni soꞌokoni. ¹⁵Na ngaeta ensel e lae loꞌu mei mwaanie nume maaꞌi, na ko soi takoie iini nge e iiꞌo i lengine mei uuru ngeena uuri, “O ke toolea naihi iꞌoe na o ke soꞌokoni oto, aena aana hohola aana walumalau e repo diana oto, na maholo hunie soꞌokoninge e hule oto.” ¹⁶Oto iini nge e iiꞌo i lengine mei uuru ngeena e salea walumalau aana naihi lama-lama ingeie, na soꞌokonilana mo iinoni oodotaꞌi aana walumalau e lae oto.14:16 A Jisas e ere noꞌone i sulie soꞌokonilana mo iini oodotaꞌi aana nga mo leu mala Matiu 9:37-38, 13:24-30, na Jon 4:35-38.

¹⁷Oto nou leesie ngaeta ensel e lae loꞌu mei mwaanie nume maaꞌi taꞌau i Lengi, na ensel ngeena noꞌone e toꞌo aana naihi e ala huni soꞌokoni. ¹⁸Oto ensel nge ko lio-lio i sulie dunge aana ora ni uunu ola, e lae mai mwaanie ora ni uunu-uunu na ko soi weu hunie ensel nge e hele aana naihi uuri, “O ke toolea naihi iꞌoe na o ke lae oto i soꞌo niu, aena aana mo niu i laona pariki aana walumalau kire ulu-ulu oto.”14:18 Erenga ni Krik e kaꞌa ere ike i sulie mo niu taꞌe e ere i sulie tolahana mo Jiu maholo kire asuie waen aana mo grep. Kire soꞌokonie mo grep, na kire ko losiꞌi aani uuri puli-pulisiꞌi i laona nga kalinge kire didie aana hau peine. Oto ewe-ewena mo grep e aahe, na kire dedeie mo ateꞌa aani teꞌe-teꞌei nanikot, oto kire ponosie ateꞌa ngeena, na lae-lae ewe-ewena mo grep e si neꞌie waen.¹⁹Oto ensel ngeena e salea walumalau aana naihi lama-lama ingeie na soꞌokonilana mo iinoni oorahaꞌaa aana walumalau e lae oto. Mala mo niu e toli nge mwala ko soꞌohiꞌi huni arasiꞌi, nge ensel ngeena e soꞌohie kira oorahaꞌaa mai i saana saukae aana saewasunge a God. ²⁰E toolera mola i sinaha mwaanie huilume, na arasilada ko lae oto. Oto e losie nimei hero ngeena, na apu mola ko aahe mwaanie ai loi-losi ngeena. Apune kira oorahaꞌaa e aahe ngeena na e kone mala wai ko kone, na totoho aana apu e aahe ngeena e lae haꞌatau hunie oolu tangalai kilomita, na e kokoro nga tahanga.

E Hiu Ensel Kire Dau Aakau Aana Mo Huꞌi-huꞌite Aaela Ooreta

¹Oto nou heꞌi leesie loꞌu ngaeta tolimaa oto paine taꞌau i Lengi, na nou tohungei pangataꞌinie. Nou leesie e hiu ensel nge kei toolea mai e hiu huꞌi-huꞌite aaela ooreta. Maholo mo huꞌi-huꞌite aaela ngeena kei mango, nge saewasunge a God ke si mango oto i leune.

²Oto nga taa nou leesie e lio mala aasi iiro-iiro aaropwailana e lae oto peꞌinie dunge, na i reune aasi ngeena nou leesie mo iini nge kire aꞌailaꞌasie oto ola loo-looꞌa ngeena, na nunune, na iidu-iidunge aana satana. Kire mani hele aana mo pesi aawa huni kanalie mo kana a God e niiꞌi hunire, ³na kire ko kanalie kana a Mosis, koni-konihe a God, na kana a Kalei Sipu uuri,

“God Aalaha Hahuꞌana Nanama,

o esuie mo ola paine na kire tohungei diana oto liutaa.

Iꞌoe oto inemauri haahie ahutana mwala,

ahutana mo ola o esuiꞌi kire oodotaꞌi na kire toꞌohuu.

⁴?A tei e kaꞌa sai meꞌuteꞌiniꞌo, Aalaha?

?Na a tei e saꞌa haꞌamanikuluꞌaa satamu?

Sulie taꞌe iꞌoe oto o maaꞌi,

ahutana mwala kei meni paalaheꞌo

aana o haataꞌinie oto oodotaꞌinge iꞌoe.”

⁵Oto i puri nou heꞌi lio loꞌu taꞌau i Lengi na nou leesie uri leu e tohungei maaꞌi i laona Aapa-aapa aani Heiholotaꞌinge a God e taha oto. ⁶Na e hiu ensel ko toolea mai e hiu mei huꞌi-huꞌite aaela ooreta ngeena kire ko iisitaa oto mai. Kire mani hoꞌosie mo toꞌoni rereꞌa wana-wana na mo rorotoꞌoni aani kol i denumada, ⁷na ngaeta iini aana e hai ola mauri ngeena e niie e hiu kao-kao aani kol wau hunie e hiu ensel ngeena. Mo kao-kao ngeena kire honu mola aana saewasunge a God, iini nge e iiꞌo oto huu. ⁸Oto leu e maaꞌi ngeena e si honu aana pwaꞌulana dunge uure mwaanie manikuluꞌanga na nanamanga a God, hule aana nga iini kaꞌa sai lae ike i laona, lai hule aana maholo e hiu huꞌi-huꞌite aaela aana e hiu ensel ngeena kei haro mango.

Mo Ensel Kire Lingisie E Hiu Kao-kao Aana Saewasunge A God Haahie Walumalau

¹Oto nou heꞌi rongoa loꞌu mei wala paine e uure mwaanie leu e tohungei maaꞌi liutaa na ko unue hunie e hiu ensel uuri, “Omu ke lai lingisie e hiu kao-kao aana saewasunge a God haahie walumalau.”

Eetana Nga Kao-kao E Asuie Mo Osa

²Oto eetana nga ensel e lai lingisie kao-kao ingeie haahie walumalau. Nge sapesalunge aani osa e si lae mai haahie ahutana mwala nge kire toꞌo aana haꞌa-ara aana ola loo-looꞌa ngeena na mo iini nge kire ko paloa nunui ola ingeie.

Ruana Nga Kao-kao E Waelie Aasi

³Na ruana nga ensel e lai lingisie loꞌu kao-kao ingeie haahie aasi, na aasi e neꞌi epu oto, na e lio oto mala apune iinoni e mae, oto ahutana mo ola mauri i laona aasi kire mani mae mango.

Oolune Nga Kao-kao E Waelie Mo Wei

⁴Na oolune nga ensel e lai lingisie loꞌu kao-kao ingeie haahie mo wei peine na mo huulaa na ikire noꞌone kire mani neꞌi epu. ⁵Oto nou rongoa ensel nge ko lio i sulie mo wei, ko teꞌuri,

“Iꞌoe oto o maaꞌi, na o meuri oto uure wau i naꞌo na oto mai siꞌiri ie,

o tohungei deu diana aana o haꞌaloie mwala aaela urine.

⁶Aana kire haꞌa-aahesie apune mwala maaꞌi iꞌoe na mo propet iꞌoe.

Oto ie o haꞌa-inuhire mola aani epu huni oolisie mo horonga kire asuiꞌi i naꞌo.”

⁷Na nou rongoa loꞌu mei wala ko iisitaa mai uure mwaanie ora ni uunu-uunu ko teꞌuri, “Iau, God Aalaha Hahuꞌana Nanama, leinge iꞌoe e oodotaꞌi mola na haꞌaloinge iꞌoe e tohungei melisi oto.”

Haine Nga Kao-kao E Asuie Sato Ke Raramea

⁸Na haine nga ensel e lai lingisie loꞌu kao-kao ingeie haahie sato hunie sato ke madoro oto hiitoꞌo hunie sapena mwala ke raramea. ⁹Oto sapeda e waru aana madorohaꞌana sato e madoro oto hiitoꞌo. Oto kire ko si ere waelie satana God, iini nge e nanama haahie mo huꞌi-huꞌite aaela ngeena. Taꞌe kire sereꞌi oolisie manatada na tolahada huni eeliꞌu takoie a God na huni soi haꞌamanikuluꞌaa.

Limana Nga Kao-kao E Toolea Mai Rodohono

¹⁰Na limana nga ensel e lai lingisie loꞌu kao-kao ingeie i lengine naunekume ola loo-looꞌa ngeena, na rodohono e aaluhie aalahanga ingeie. Oto mwala kire ko alangingite oto aana sapesalunge ko toolera, ¹¹na kire ko ere aaelasie oto a God taꞌau i Lengi aena kire ko hii aaela aana mo osa na aana sapesalunge ikire, taꞌe kire kaꞌa sare oolisie mola manatada mwaanie aaelanga kire ko esuie.

Oonona Nga Kao-kao E Asuie Wai Peine I Iuparetis E Mwaꞌa

¹²Na oonona nga ensel e lai lingisie loꞌu kao-kao ingeie haahie wai peine i Iuparetis. Oto wai ngeena e mwaꞌa huni esuie nga tala nana mo inemauri uure i pwaalana sato huni lae mai. ¹³Oto nou leesie e oolu liꞌoa aaela kire lio mamaꞌelaꞌa mala mo pweri. Kire maau mwaanie wawana painehaꞌana mwaa ala-ala ngeena, na mwaanie wawana ola loo-looꞌa ngeena, na mwaanie wawana ruana nga ola loo-looꞌa ngeena, nge ingeie oto propet eero-eero mwaa paine ngeena. ¹⁴E oolu liꞌoa aaela ienini, kire toꞌo aana nanamanga huni deu huꞌi-huꞌite. Na kire ko lae-lae ngeena huni lokoa ahutana mo inemauri laona walumalau huni ooho honosie a God aana hai dinge paine nge a God Hahuꞌana Nanama kei leie mwala aana. ^15-16Oto e oolu liꞌoa aaela ngeena kire lokoa oto mo inemauri aana leu kire haaraꞌinie aana erenga mo Jiu uuri, “Amakedon.”16:16 Mei wala Amakedon ngeena e toꞌo aana e ro neꞌisaenga. Eetana nge “toloi henue ni lokoa mo ramo ingeie” nge mei wala ni aalahuunge i sulie nga taa kei reu. Na ruana nga mei neꞌisaenga nge “toloi henue i Mekido,” ngaeta toloi henue i Israel nge mo oohotaa hunge kire rau-reu karaꞌinie oto waite. Leesie Jajis 5:19, na 2 King 23:29, na 2 Kronikols 35:22, na Sekaraea 12:11.

Oto a Kraes e si unue uuri, “!Omu ke pwaarongo kaꞌu! Ne kei lae mai mala iinoni peli-peli aana maholo omu saꞌa lio saie ike. Deidehie mo iini nge kire ko iiꞌo aakau loosie oolinge ineu mei. Mo iini urine kire urihana mo iini kire kaꞌa maꞌahu na kire hoꞌo aakau mola aana mo toꞌoni ikire mwaanie kire iiꞌo mwaakule na kire masa maholo ne kei hule.”

Hiune Nga Kao-kao E Nunu Suuheꞌinie Walumalau

¹⁷Na hiune nga ensel e lai lingisie loꞌu kao-kao ingeie mai laona aahowaa. Oto mei wala paine e iisitaa mai mwaanie naunekume i laona nume maaꞌi, na ko teꞌuri, “E mango oto.” ¹⁸Na maholona, kou-kouhaꞌa oto paine taꞌi salo aana waꞌariri ko eeso hailiu, na lou-lou ko kakahite, na nunu peine ko hite oto. Nunu ngeena e tohungei peine na e aaela. Nga nunu ke sada aana e kaꞌa rau ike ue uure oto wau i aehotalana haꞌaholanga aana mo iinoni. ¹⁹Na a God e neꞌisae oodoie aaelanga aana hanue paine nge e urihana Babilon wau i naꞌo, oto e tohungei haꞌa-aahesie apune aana saewasunge ingeie. Nunu peine ngeena e oopaa hanue paine ngeena aana e oolu poꞌo ni leu, na mo huilume paine aana taꞌena nga aapoloa kire aaꞌoho mango oto. ²⁰Ahutana mo mala-malau na mo toloi henue kire mani eiꞌaa oto, na nga iini e saꞌa leesiꞌi loꞌu. ²¹Na mo uudu-uuduhe aani nemo e pou mala hau taꞌi salo,16:21 Aana mo henue paine siꞌiri, taungei uudu-uuduhe aani nemo kire sai pou urine aana wawai e paine. Taꞌe nga hue e kaꞌa hiꞌe ue liutaa aana taꞌa-taꞌa kilo. Oto nga taa kei reu maholo a God kei leie hanue i Babilon ngeena kei aaela loꞌu liutaa. kire ko teke oto mai aano haahie mwala. Na mo heu nge kire ko teke ngeena kire tohungei peine na kire hiꞌe oto hiitoꞌo, hule aana lime aawalai kilo aana nga hue. Oto maholo urine mwala ko isi aaelasie mola a God aana walu ola ko reu ngeena, aena aana kire tohungei aaela oto hiitoꞌo.

Hanue Paine E Nanama Haahie Walumalau E Urihana Repi

¹Oto ngaeta iini aana e hiu ensel nge kire hele-hele aana kaꞌu e hiu kao-kao ngeena, e lae mai ko unue hunieu uuri, “O ke lae mai hunie o ke leesie haꞌamotaahinge e lae hunie hanue nge e iiꞌo i reune mo wei. Hanuena e urihana mei keni repi ²nge e mai-mesi peꞌie ahutana mo inemauri aana walumalau. Na ahutana mwala aana walumalau kire ko pweu oto aana tolahai ola aaela aana hanuena mala iinoni e mahiri aana e inu wei ni pweunge.”

³Oto aana nanamanga a Liꞌoa Maaꞌi, ensel ngeena e tooleau weu i lalona hanuesala. Na i leune nou leesie nga keni e iiꞌo i lengine ola loo-looꞌa e nonoroꞌa. E hiu ho pweꞌuu na aawalai rarangoi ola ikire aana ola loo-looꞌa ngeena, na sapena e honu mola aana mo wala kire uusuꞌi huni ere mwakataꞌinie a God. ⁴A keine e toꞌoni aana toꞌoni lauleuniꞌe na e nonoroꞌa. Mo ola e launi eeni, kire wana-wana mala kol na siliva na mo dehi na mo heu holiteni e paine. A keine e hele aana kao-kao aani kol i nimana, taꞌe i laona e honu mola aana mamaꞌelaꞌanga aana tolahai ola aaela ingeie na aana madaꞌanga aani mesinge ingeie. ^5-6Na nou leesie uri a keine e tohungei ilenimwaꞌe aana e horo maesie mo iini kire ko haꞌarongoa mwala aana Tataroha Diana i sulie a Jisas. Mala mo iini kire ko pweu aana kire inu hiitoꞌo aana wai ni pweunge, ingeie e inu mehiri mola aana apune mwala maaꞌi a God. Taꞌi darana a keine uusulana nga satai ola e lae uuri, INEU IINI PEINE, A BABILON. INEU OTO NIKEI REPI, NA NIKANA TAꞌENA NGA AAELANGA MAI AANO.

Na maholo nou leesie satai ola ngeena, nou saie uri nga neꞌisaenga e iiꞌo mumuni ue aana nga taa nou leesie ngeena, taꞌe nou tohungei deu puꞌotaꞌinie. ⁷Oto ensel ngeena e teꞌuri hunieu, “?Aana e ue kaꞌu o ko deu puꞌotaꞌinie urine? Ola loo-looꞌa nge e toꞌo aana e hiu ho pweꞌuu na aawalai rarangoi ola aana na keni nge e taꞌe i lengine, e ro mei aalahuunge mola ni ngeena. O ke rongoa kaꞌu, hunie ne kei ere luhesie neꞌisaenga aani huniꞌo.

⁸“Oto o ke saie uri ola loo-looꞌa ngeena, ingeie iini e mauri keꞌu waite, taꞌe ie e aiꞌaa oto. Kei maau taane poi mwaanie kalinge ni haꞌamotaahinge ngeena, taꞌe kei lae mola i sulie tala takoie haꞌamangolana. Mwala aana walumalau kei tohungei pangataꞌinie aana maholo kire kei leesie uri e mauri loꞌu, aena aana e mauri keꞌu waite, na e aiꞌaa oto ie, na kei heꞌi meuri loꞌu. Mwala nge kei pangataꞌinie mo iini mola nge uusulana satada e kaꞌa lae ike i laona uusu-uusu ni meurihe uure oto wau aana aehotalana walumalau.”

⁹Oto ensel ngeena e heꞌi unue loꞌu hunieu uuri, “O ke loꞌo-loꞌongaꞌi diana i sulie mo ola ienini hunie o ke lio saiꞌi.

“O ke saie loꞌu uri e hiu pwaꞌui ola aana ola loo-looꞌa ngeena ikire oto e hiu toloi henue17:9 Ohe mo toloi henue ngeena, e hiu uuwo nge kire asuie hanue paine i Rom i lengini. Wa ohe mo toloi henue ngeena nga haꞌa-ara mola hunie e hiu aalahanga, na e hiu inemauri, i sulie ngaeta mo propet oto waite kire ere noꞌone i sulie mo aalahanga mala mo toloi henue. Leesie Aesaea 2:2, na Jeremaea 51:25, na Daniel 2:35, na Sekaraea 4:7. aana hanue nge a huꞌena ko oꞌoꞌo aana, ¹⁰na ikire e hiu inemauri noꞌone aana hanuena. E lime iini aana mo inemauri ngeena kire mae oto, ngaeta iini ko meuri-meuri taane ue ie, na ngaeta iini e kaꞌa lae ike ue mai, taꞌe maholo kei lae mai, kei iiꞌo mola kele maholo oꞌoruꞌe. ¹¹Na ola loo-looꞌa nge e mauri keꞌu waite taꞌe e aiꞌaa oto ie, ingeie nge walune nga inemauri, taꞌe ingeie nga ola mola aana e hiu inemauri holaꞌinaꞌo, na kei lae mola i sulie tala takoie haꞌamangolana.

¹²“Oto o ke saie loꞌu uri aawalai rarangoi ola aana ola loo-looꞌa ngeena, ikire aawalai inemauri nge kire kaꞌa aehota ike ue huni aalaha. Taꞌe kire kei aalaha taane peꞌie ola loo-looꞌa ngeena nga maholo oꞌoruꞌe, kei oꞌoruꞌe mola mala taꞌa-taꞌa maholoi sato. ¹³Ahutana aawalai inemauri ie kire kei neꞌisae mouteꞌi hunie kire ke niie nanamanga na aꞌailaꞌanga ikire hunie ola loo-looꞌa ngeena. ¹⁴Na kire kei ooho honosie a Kalei Sipu ngeena. Taꞌe a Kalei Sipu ingeie oto aalaha paine haahie mo aalaha, na ingeie oto inemauri haahie mo inemauri. Oto ingeie na mo iini e lio hilisire na e soire na kire lulu i sulie taraꞌasi, kire kei aꞌailaꞌasie mola mo inemauri ngeena.”

¹⁵Oto ensel ngeena e heꞌi teꞌuri loꞌu hunieu, “O leesie taane mo wei nge repi ngeena e oꞌoꞌo aani. O ke saie loꞌu uri mo wei ngeena, ikire nga haꞌa-ara aana mwala hiitoꞌo, na mo aapoloa, na mo komu, na mo ere-erenga hai aaopaꞌi nge a keine e haꞌamadaꞌaꞌi aana tolahana. ¹⁶Taꞌe lae-lae ola loo-looꞌa ngeena peꞌie aawalai rarangoi ola o leesiꞌi ngeena, kire kei eeliꞌu honosie mei repi keni ngeena na kire kei leledie oto. Oto kire kei seunie mei repi na kire kei leue ahutana mo ola lauleuniꞌe ingeie mwaanie hunie kei iiꞌo oto mola mwaakule. Na kire kei tohungei waelie a keine mala usu ni meꞌesu ko ngeue hasiꞌona poo e horoꞌie, wa mala iini ko uunu aasie mei ola aani dunge. ¹⁷Aena urinena mo inemauri aaela ngeena kire kei esuie mola nga taa a God e oalaꞌinie, aana a God nge e asuie kire ke neꞌisae tararuru hunie kire ke mani niie nanamanga ikire hunie ola loo-looꞌa ngeena huni aalaha haahire, na kei urine oto lai hule aana walana God kei oa.

¹⁸“Oto o ke saie loꞌu uri mei repi keni ngeena, ingeie oto hanue paine17:18 Ohe hanue paine ngeena nga hanue mai aano taane, taꞌe e ere liutaa i sulie tolahai ola aaela mo iini kire ko lupweꞌi deu-deu huni palo-paloa God, taꞌe i laona saeda kire ko lae mola i sulie a Satan. Mala mei repi keni ko lae aaopa mwaanie tohungana poro ingeie, nge urine loꞌu aana hanuena ko lae aaopa mwaanie tohungana God ingeie. nge ko aalaha haahie mo inemauri aana walumalau.”

Hanue Paine Haahie Walumalau E Aiꞌaa

¹Oto nou leesie loꞌu ngaeta ensel e siho mai uure taꞌau i Lengi. Ensel ngeena e toꞌo aana nanamanga oto paine, na manikuluhaꞌana e raangie walumalau. ²Ensel ngeena e soi aana mei wala paine uuri, “!Hanue paine i Babilon e aiꞌaa oto! Mei repi keni ngeena e neꞌie oto huilume mo liꞌoa aaela, na mo aakalo. Na e neꞌie oto huilume mo menu poo, na ahutana oto mo menu aaela. ³A God e haꞌaloie oto aena aana e da uri ahutana mwala aana walumalau kire inu mehiri aana wai ni pweunge ingeie, oto kire ko heimaanie mola ahutana mo aaelanga na mo oorahaꞌaanga ingeie. E palo-paloa oto toꞌo-toꞌonga liutaa, na mo inemauri kire mani lae takalo i sulie. Mo mwane tei-teri ola aana haꞌaholinge kire mani teri ola paine aena aana saehanalinge aaela ingeie.”

⁴Oto nou heꞌi rongoa loꞌu ngaeta mei wala e uure mai taꞌau i Lengi uuri, “Iꞌomu mo iini ineu, omu ke lae mai mwaanie hanue mei repi keni ngeena. Omu ke suꞌuri hata peꞌie mo oorahaꞌaa ingeie mwaanie leilemiu e lae noꞌone peꞌie. ⁵Mo oorahaꞌaa ingeie, kire haa oto taꞌau i Lengi, na a God e saꞌa pulongosie ike mo aaelanga nge e asuiꞌi.

⁶“Mala e asu aaelasie kaꞌu mo iinoni maaꞌi ineu, nge ne kei suꞌue loꞌu taꞌa-taꞌa taungei aaelanga ngeena hunie, taꞌe kei aaela haꞌarue loꞌu hunie. E haꞌa-inuhie kaꞌu mo iinoni maaꞌi ineu aani wei ahaꞌi, na ingeie kei inu haꞌarue loꞌu aana wai ahaꞌi ngeena. ⁷Mala a keine e niie manikuluꞌanga na toꞌo-toꞌonga mola hunie maraana, nge niilana sapesalunge na saehuunge kei lae noꞌone urine hunie. Aana e ere toohaꞌinie maraana uuri, ‘Ineu oto toro, na no ko aalaha oto. Aana nou kaꞌa toꞌo aana ike nga poro, nge nou saꞌa roroꞌa ngara ike mala mo nao keni.’ ⁸Oto aena urinena, nge ahutana mo ola e aaela oto hiitoꞌo kei hite aana keine mola i laona taꞌa-taꞌa hai dinge—mo ola aaela mala maenga, na ngaranga, na hiolonga oto paine. Na dunge kei weruhie mola a keine, aena aana God Aalaha Hahuꞌana Nanama nge ko leie urine.”

⁹Oto mo inemauri aana walumalau nge kire hikusie a keine na kire hata-hata peꞌie aana saehanalilana toꞌo-toꞌonga, kire leesie pwaꞌulana dunge aana dunge e waruhie a keine, na kire ngarasie na kire uulo oto paine. ¹⁰Kire uure oto wau haꞌatau mwaanie aana kire maꞌuteꞌinie aaelanga nge e hite aana, na kire ko teꞌuri, “!Aama-aamasilemu! !Aama-aamasilemu hanue oto paine! Iꞌoe oto Babilon, hanue e tohungei nanama. Haꞌamangolamu e hule oto aana taꞌa-taꞌa maholoi sato.”

¹¹Oto ahutana mo mwane tei-teri ola aana haꞌaholinge, kire uulo na kire ngarasie a keine, aana nga iini saꞌa roroꞌa ni holi ike loꞌu aana mo ludaa kire ko haꞌaholingeꞌiniꞌi— ¹²mo ludaa aani kol, na siliva, na hau iiro-iiro, na uꞌumaai dehi. Na mo ludaa aani sala mwarau, na sala mae-maekoꞌa, na sala lauleuniꞌe, na sala nonoroꞌa. Na mo ludaa aani ei wau-wesu, na mo ludaa aani ola kire aadumiꞌi aana mo ola hai aaopaꞌi mala nihona elepant. Na mo ludaa aana mo ei holiteni e paine, wa mo teungei aean hai aaopaꞌi, wa mo teungei heu wana-wana hai aaopaꞌi. ¹³Na mo ludaa aani ola hai aaopaꞌi huni haꞌamali-meliꞌaa ngaulaa, na mo ludaa aani ola hai aaopaꞌi kire wasu mangoni. Na mo ludaa aani waen, na rumu, na keke, na bred. Na mo ludaa aani puluke, na sipu, na hoos, na mo taetahe nge hoos e sai ookea. Na mo ludaa ni iinoni mala mo koni-konihe na mo iini kire laure mwaanie mo henue ikire aana oohotaa. ^14-15Iau, mwala kire toꞌo-toꞌo nge kire tai-teri ola aana haꞌaholingeꞌinilana mo ludaa urine aana hanuena, kire uure oto wau haꞌatau mwaanie aana kire ko meꞌu mwaanie sapesalunge ingeie e hite loꞌu aada. Kire ko saehuu haahie, na kire ko ngarasie oto uuri, “Saehuunge paine oto huniꞌo aana mo ola diana o sae-saetoꞌo aani kire aiꞌaa oto mwaaniꞌo. Ahutana toꞌo-toꞌonga na launihaꞌamu e waa oto. O saꞌa toꞌo aani ike loꞌu. ¹⁶!Aama-aamasilemu! !Aama-aamasilemu hanue oto paine! O hoꞌo-hoꞌosie kaꞌu mo toꞌoni diana, na mo toꞌoni lauleuniꞌe, na mo toꞌoni nonoroꞌa. O haꞌa-haꞌalauniꞌo maraamu aani kol, na mo heu iiro-iiro, na mo uꞌumaai dehi. ¹⁷Taꞌe saehuu oto paine huniꞌo aana toꞌo-toꞌonga paine iꞌoe kire mani eiꞌaa mola aana taꞌa-taꞌa maholoi sato.”

Oto mo mwane paine aana mo haka i eesi, na mo mwane auꞌesu aana mo haka, na mo iini kire aali-eelide aana mo haka, na ahutana oto mo iini nge kire tai-teri toꞌoha aana mo haka i eesi, kire uure wau haꞌatau mwaanie i Babilon. ^18-19Kire leesie pwaꞌulana dunge aana a keine ko weru, na kire ko soi oto i lengi uuri, “!Aama-aamasilemu! !Aama-aamasilemu hanue oto paine! Nga huilume e kaꞌa sada ike loꞌu aana huilume paine ngeena. Ahutameelu nge melu toꞌo haka, melu meni toꞌo-toꞌo noꞌone aena aana toꞌo-toꞌonga oto paine a keine. Saehuunge oto paine aana e aiꞌaa oto mola aana taꞌa-taꞌa kele maholoi sato.” Na kire ko aasie pwasaꞌora i lengine pwaude peꞌi ngaranga ni haataꞌinie saehuunge ikire.

²⁰Oto ngaeta mei wala e teꞌuri loꞌu, “Iꞌomu mwala taꞌau i Lengi, omu ke mani ilenimwaꞌe haahie haꞌaloinge e hule oto aana hanuena. Omu ke ilenimwaꞌe, iꞌomu mwala a Kraes, na iꞌomu mo hurulaꞌaa, na iꞌomu mo propet. Aana a God ko haꞌaletehie oto a keine haahie nga taa e dau aaelasie huniꞌomu.”

²¹Oto nou leesie loꞌu ngaeta ensel aꞌailaꞌa e suluꞌie hau oto paine, na ko uuꞌileꞌinie hai laona aasi, ko teꞌuri, “Iꞌomu mo Babilon omu kei urine noꞌone, aana aaꞌohosilana hanue iꞌomu kei lae na omu kei eiꞌaa oto mwaanie walumalau. ^22-23Aawa-aawatai pesi aawa nge mwala ko sisikilie omu saꞌa rongoa ike loꞌu, wa aawa-aawatai eu nge mwala ko uuhi-uuhie wa taꞌena nga kana nge mwala ko kana-kanalie na haꞌike loꞌu. Na nga mei aawatai ola aani tola-keninge wa aani haꞌarurunge na omu saꞌa rongoa ike loꞌu i seemiu. Na mo mwane auꞌesu iꞌomu na e urine loꞌu, aana omu saꞌa lio oodoire ike loꞌu, na aawatai ola aana mo iini ko haꞌa-haꞌalie na omu saꞌa rongoa ike loꞌu. Na hule aana nga laite na e saꞌa raa loꞌu i seemiu. Oto omu kei siꞌohaꞌa oto toꞌohuu mala mei nao keni.

“Aaꞌohosilana hanue iꞌomu e lae oto aena aana iꞌomu, mo mwane tai-teri ola aana haꞌaholinge, omu esuie siꞌonga hunie omu ke eeroa ahutana mo aapoloa aana walumalau huni lae takalo i suliꞌomu, hunie ikire noꞌone kire ke saetoꞌo aana toꞌo-toꞌonga liutaa aana kire saetoꞌo aana a God. ²⁴Iau, na aaꞌohosilana hanue iꞌomu e lae aena aana omu roroꞌa noꞌone aana apune mo propet, na mwala maaꞌi a God, na ahutana mo iini nge horoꞌilada e lae i laona walumalau. Hanue paine iꞌomu mo Babilon ngeena e urihana mei repi keni, na walu ola aaela e haꞌamalaa aani ngeena, ikire oto kire horo maesie mo iini oodotaꞌi urine. Oto aaꞌohosilana hanue iꞌomu e lae mola.”

Mwala Taꞌau I Lengi Kire Lahea A God

¹Oto i purine walu ola ngeena, nou rongoa aawa-aawatai ola mala walana mwala hunge taꞌau i Lengi ko unue uuri, “!Lahea God ikie! Taꞌe ingeie mola e manikuluꞌe na e nanama. Taꞌe ingeie mola ni e sai haꞌa-uuri. ²Mo leinge ingeie kire toꞌohuu na kire oodotaꞌi. A God ikie e haꞌaloie oto mei repi ngeena, keni nge e asuie aaelanga hunie walumalau aana masinge ingeie. A God e haꞌaloie mei repi ngeena huni suꞌue maelana mo koni-konihe ingeie.”

³Na kire unue noꞌone uuri, “!Lahea God ikie! A keine ko weru oto, na pwaꞌulei dunge aana e saꞌa mango oto huu.”

⁴Oto e ro aawalai rato ni mwane mwana hai, na e hai ola mauri ngeena kire si lai pouruuru hai aano, na kire ko lahea God, iini e iiꞌo i lengine naunekume ni aalaha, na kire ko teꞌuri, “!Lahea God ikie! Ke urine oto.”

⁵Na mei wala e uure mwaanie naunekume ni aalaha e teꞌuri, “Lahea God ikie, ahutemiu mo iini omu ko haꞌamaꞌu aana, iꞌomu mo iini mwai-mwei, na iꞌomu mo iini peine.”

⁶Oto nou heꞌi rongoa loꞌu mei wala paine domana oto uri mwala hunge ko ere, na domana oto kou-kouhaꞌana naho paine, na domana oto ho lou-lou ko kakahite, na kire ko teꞌuri, “Lahea God ikie, aana God Aalaha Hahuꞌana Nanama e aalaha oto. ⁷Kie ke sae-sae diana peꞌi ilenimwaꞌenga na kie ke soi haꞌamanikuluꞌaa God, aena aana haꞌarurunge a Kalei Sipu e toꞌo mone oto, na huꞌe haalu ingeie e iiꞌo aakau oto. ⁸E hoꞌosie oto toꞌoni aani sala mwarau, toꞌoni haalu rereꞌa nge niilana e lae oto hunie.” (Omu ke saie uri a huꞌe haalu ngeena nge mo iinoni maaꞌi a God na toꞌoni mwarau rereꞌa ngeena e haꞌamalaa uri mo esunge diana kire asuiꞌi.)

⁹Oto ensel ngeena e heꞌi teꞌuri loꞌu hunieu, “O ke uusue mo erenga ie—Deidehie mo iini nge haꞌarongolada e lae hunie ngaunge aana haꞌarurunge a Kalei Sipu.” Na ensel ngeena e teꞌuri noꞌone, “Mo wala ienini, walana a God oto toꞌohuu.”

¹⁰Oto nou si pouruuru hai sulie aeꞌaena ensel, na no ko haꞌapainaꞌaa oto. Taꞌe e teꞌuri mola hunieu, “O ke suꞌuri haꞌapainaꞌaau, taꞌe o ke haꞌapainaꞌaa mola a God. Aena aana ineu ngaeta koni-konihe mola mala iꞌoe na mo eesimu nge kire helesie oto walaimolinge i sulie a Jisas. Aana walu ola nou haataꞌiniꞌi ie na ahutana walana mo propet ko lae hunie mwala ke saie walaimolinge i sulie a Jisas.”

Mwane E Taꞌe I Lengine Hoos Rereꞌa E Aꞌailaꞌasie Walumalau

¹¹Oto nou heꞌi leesie loꞌu taꞌau i Lengi e taha, na nou leesie nga hoos rereꞌa. Na iini nge e taꞌe i lengine hoos ngeena sailana uuri, “Hahuꞌei iini toꞌohuu huni norutoꞌo aana.” Na aena aana tolahana e tohungei oodotaꞌi, nge ko leie mwala na ko ooho honosie mo maelonga ingeie huni taꞌaasie aaelanga mwaanie walumalau. ¹²Maana ko eeso-eeso oto mala dunge, na mo rorodara hunge i pweune. Uusulana satana e lae oto aana sapena, taꞌe ingeie maraana mola e saie neꞌisaenga aana. ¹³Toꞌoni nge e hoꞌosie ngeena e honu aana apu,19:13 Ohe apu nge e honu aana toꞌoni ngeena e haꞌamalaa apune a Jisas nge e tapa-oolisikie. Wa ohe mei epu ngeena apune mo maelonga ingeie nge e horoꞌire. na sailana e lae mola uuri, “Walana a God.” ¹⁴Na mo pulitaa ni ramo aani mae a God kire ko lae oto mai i sulie. Kire mani huru aana mo hoos rereꞌa noꞌone, na kire mani hoꞌosie mo toꞌoni mwarau na kire wana-wana rereꞌa. ¹⁵Na naihi e ala e maau mwaanie ngidune iini i naꞌo ngeena, hunie kei aꞌailaꞌasie mo henue. E saꞌa lio toliꞌaasie ike nga mei heitohenga i laona aalahanga ingeie, aana ingeie oto iini ko arasi aana saukae ni saewasunge a God Hahuꞌana Nanama.19:15 Erenga ni Krik ko ere ni aalahuunge i sulie saewasunge a God mala iini ko esuie waen aana mo grep. Leesie loꞌu Sam 2:8-9, na Aesaea 63:3, na Joel 3:13, na Haataꞌinge 14:20.¹⁶Na uusulana nga satai ola e lae aana toꞌoni ingeie na sasahana uuri, INEMAURI HAAHIE MO INEMAURI, NA AALAHA HAAHIE MO AALAHA.

¹⁷Oto nou heꞌi leesie loꞌu ngaeta ensel e uure i laona sato, na e soi aana mei wala paine hunie ahutana mo menu ko loo-loho taꞌi salo uuri, “Omu ke lae mai loko tararuru aana ngauhe paine a God. ¹⁸Hunie omu ke ngaue hasiꞌona mo inemauri, na hasiꞌona mo ramo, na hasiꞌona mo mwane aꞌailaꞌa, na hasiꞌona mo hoos, na hasiꞌona mwala nge kire taꞌe aani, na hasiꞌona oto ahutana mwala—mo iini peine na mo iini mwei-mwei, na mo koni-konihe na mo iini kire iiꞌo luhetaꞌi.”

¹⁹Oto nou leesie ola loo-looꞌa ngeena na mo inemauri aana walumalau kire mani lokoa ahutana mo ramo aana mo mae ikire huni ooho honosie iini e taꞌe i lengine hoos rereꞌa ngeena na pulitaa ni ramo ingeie. ²⁰Taꞌe kire tapolie ola loo-looꞌa ngeena peꞌie propet eero-eero ingeie. Propet eero-eero ngeena e dau huꞌi-huꞌite kaꞌu i naꞌo huni pweloa mwala huni haꞌapainaꞌaa nunune ola loo-looꞌa ngeena na huni neꞌi haꞌa-ara aana i darada. Taꞌe kire aa mauri aadarue mola i laona dunge ni haꞌamotaahinge aana mo heu eeso-eeso. ²¹Na ahutana mo ramo aana mae ikirerue, horoꞌilada e lae mola aana naihi nge e maau mei mwaanie ngidune iini nge e taꞌe i lengine hoos rereꞌa ngeena. Oto ahutana mo menu kire ngaue hasiꞌoda hule aana kire mani pote mango.

A Kraes Kei Aalaha Mai Aano Hunie Sinolai Helisi

¹Oto nou heꞌi leesie loꞌu ngaeta ensel ko siho mai uure taꞌau i Lengi. E hele aana iieliheu na e toꞌo aana kii aana kalinge ni haꞌamotaahinge e kaꞌa toꞌo kaona. ²Oto ensel ngeena e tapolie painehaꞌana mwaa ala-ala ngeena, na e pwasue aana iieliheu hunie ke iiꞌo ni hoꞌo hunie sinolai helisi. Mwaa uure oto wau i naꞌo ngeena, ingeie nge naꞌohana mo liꞌoa aaela, na satana a Pwelu Eero-eero wa a Satan. ³Na ensel e uuꞌileꞌinie mwaa hao i laona kalinge ni haꞌamotaahinge, oto e si honoa maa honosie mwaanie e eeroa loꞌu mwala i laona walumalau lai hule aana sinolai helisi kei mango. Oto i purine sinolai helisi kei haro mango, nge kire ke si luhesie loꞌu hunie ke dau loꞌu i sulie saena hunie kele maholo oꞌoruꞌe.

⁴Na nou leesie noꞌone ngaeta mo neunekume, na mo iini kire iiꞌo i lengini kire toꞌo aana nanamanga hunie leinge. Nou leesie noꞌone mangona mo iini nge horoꞌilada e lae oto i naꞌo, aena aana kire tarohaꞌinie a Jisas na walana a God. Kire kaꞌa haꞌapainaꞌaa ike ola loo-looꞌa ngeena wa nunune, na kire kaꞌa toꞌo aana ike haꞌa-ara ingeie i naꞌona darada wa i nimada. Oto kire mauri eelihoꞌi, na kire ko aalaha peꞌie a Kraes hunie sinolai helisi ngeena. ⁵Ikire oto eetana nga taꞌelaꞌinge aana mo iini nge kire mae oto. Ngaeta mwala nge kire mae oto kire kaꞌa mauri ike aana maholona, taꞌe kire ke si taꞌelaꞌi mola i purine sinolai helisi kei mango. ⁶Deidehie mo iini nge kire taꞌelaꞌi aana eetana nga taꞌelaꞌinge ngeena aana ikire oto kire maaꞌi. Kire saꞌa sapesalu ike i laona dunge ko weru oto huu, nge ruana nga maenga ni ngeena. Taꞌe kire kei neꞌi pris a God na a Kraes, na kire kei aalaha peꞌie a Kraes sulie sinolai helisi.

A God Kei Aasie A Satan I Laona Dunge

⁷Oto maholo sinolai helisi ngeena kei haro mango, nge kire ke si luhesie a Satan mwaanie kalinge ni haꞌamotaahinge ngeena. ⁸Oto kei iisitaa poi huni eeroa taꞌena nga mo aapoloa i laona walumalau. Mwala ngeena, tolahada e urihana ngaeta aalaha aaela wau i naꞌo, a Gok. Ingeie peꞌie aalahanga ingeie i Magok kire uure honosie a God suli maholo. Oto a Satan kei lokoa ahutana mwala aana walumalau hunie oohotaa, na kire kei hunge oto mala oone i sulie oone. ⁹Oto mwala aana mae a Satan ngeena kire mani ootaꞌi mei uure aana taꞌena nga leu aana walumalau. Kire lae mai huni heiseuni honosie hanue nge a God e manata diana hunie. Mae ngeena e iiꞌo kali-kelie hanue ngeena oto taꞌingelu, aana kire dau aakau ni horo maesie mo iinoni maaꞌi i leune. Taꞌe dunge e si siho mai uure i Lengi, na e waru aasire oto mango-mango. ¹⁰Oto a Satan nge e eero-eeroa mwala ngeena, kire aasie i laona dunge ni haꞌamotaahinge aana mo heu eeso-eeso, leu nge ola loo-looꞌa ngeena na propet eero-eero ingeie kire iiꞌo aana. Na i leune kire kei iiꞌo i laona haꞌamotaahinge susue aatowaa na rodo na oto huu.

A God Kei Leie Mwala

¹¹Oto nou leesie a God e iiꞌo i lengine naunekume rereꞌa oto paine. Na e lio mala uri walumalau na salo kire tahi mwaanie, na nga leu huni lio oodoiꞌi haꞌike loꞌu. ^12-13Na nou leesie mo iini e mae oto, mo iini peine na mo iini mwei-mwei, kire mani uure i naꞌona naunekume. Aasi e niie taꞌau ahutana mo iini nge kire mae i laona, na mwakano e niie taꞌau mo iini e mae na kire oꞌoꞌo i laona, na ahutana mo iini kire mae kire mani taꞌelaꞌi oto taꞌau.

Oto kire ko tahanie mo uusu-uusu, na kire tahanie uusu-uusu aana maurihe, nge e toꞌo aana satana ahutana mo iini kire kei meuri oto huu. Na kire tahanie mo uusu-uusu loꞌu nge ko unue nga taa mwala kire asuie mai aano. Oto leilada e lae oto i sulie nga taa kire asuie nge uusulana e lae i laona mo uusu-uusu ngeena, nga iini oto i sulie nga taa ingeie maraana e asuie. ^14-15Na mala uri nga iini uusulana satana e kaꞌa lae oto i lalona uusu-uusu ni meurihe ngeena, nge iini urine aasilana kei lae oto i laona dunge ni haꞌamotaahinge. Na ruana nga maenga oto ngeena. Na kire aasie loꞌu maenga na leu ni maenga i laona dunge ngeena, aana a God e haꞌamangoa oto maenga mwaanie nga iini e heꞌi mae loꞌu.

A God Kei Asuie Walumalau Haalu Peꞌie Jerusalem Haalu Nana Mwala Maaꞌi Ingeie

¹Oto nou heꞌi leesie loꞌu walumalau haalu, taꞌe nga aasi haꞌike loꞌu i laona, na salo e haalu noꞌone. Aana walumalau lalahuꞌe peꞌie salo na aasi i laona, kire mani eiꞌaa mango oto. ²Na nou leesie hanue maaꞌi ko lae mai uure taꞌau i Lengi mwaanie a God. Kire dau aakau aana mala huꞌe haalu e toꞌoni eeni toꞌoni lauleuniꞌe hunie kei haꞌaruru peꞌie poro ingeie. Hanue maaꞌi ie nge satana Jerusalem Haalu. ³Oto nou rongoa mei wala paine e uure mwaanie naunekume ko teꞌuri, “Nume a God ingeie oto mai saada mo iinoni. Kei iiꞌo oto peꞌire, na kire kei neꞌie oto mwala ingeie toꞌohuu. A God oto maraana kei iiꞌo oto peꞌire na kei neꞌie oto God ikire. ⁴Ingeie oto kei usuri aasie mo wei ni aakalo mwaanie maada. I leune nge maenga, na saehuunge, na ngaranga, na sapesalunge haꞌike loꞌu. Aana ahutana mo ola lalahuꞌe urine kire mango oto.”

⁵Na iini nge e iiꞌo i lengine naunekume e teꞌuri, “Omu ke lio kaꞌu. No ko esu haalu aana walu ola.” Na e unue hunieu uuri, “O ke uusue mei ola ie, aena aana mo wala ienini kire toꞌohuu na o sai norutoꞌo oto aani.”

⁶Oto e heꞌi teꞌuri loꞌu, “E mango oto eena. Ineu oto a A na a Z, aana ineu oto aehotalana na haꞌamangolana walu ola. Ne kei nii mwaakule mola aana wai mwaanie huulaa ni meurihe hunie taꞌena nga iini ko sare inu. ⁷Taꞌena nga iini nge kei aꞌailaꞌa taraꞌasi honosie aaelanga kei toꞌo aana mo ola ienini. Na ne kei neꞌie oto God ingeie, na ingeie kei neꞌie oto kaleku. ⁸Taꞌe mwala kire ko meꞌuteꞌinie mola sapesalunge i tehulaꞌana Jisas, na mo iini kire ko eeliꞌu mola mwaanie a Jisas, na mo iini kire ko talei deu tataꞌala, na mo iini kire ko talei horo, na mo iini kire ko mei-mesi, na mo iini kire ko siꞌo-siꞌo, na mo iini kire ko palo-paloa mo god eero-eero, na mo iini kire ko eero-eero, kire kei meni iiꞌo mola i laona dunge ni haꞌamotaahinge aana mo heu eeso-eeso, na ruana nga maenga otona.”

⁹Oto ngaeta iini aana e hiu ensel nge kire hele-hele aana kaꞌu e hiu kao-kao aana e hiu haꞌamotaahinge ooreta, e lae mai seeku na ko teꞌuri, “Lae mai i leu, na ne ke haataꞌinie aamu mo iini nge ikire oto domana huꞌe haalu a Kalei Sipu.”

¹⁰Oto peꞌie nanamanga aana Liꞌoa Maaꞌi, ensel ngeena e tooleau taꞌau i lengine toloi henue oto paine e tohungei lae i lengi. Na i leune e haataꞌinie aaku hanue maaꞌi i Jerusalem, ko lae mai uure taꞌau i Lengi mwaanie a God. ¹¹Na hanuena e raa aana manikuluhaꞌana a God, na ko wana-wana oto mala nga hau iiro-iiro ola holitana e paine, na mala hau jaspa e mano-manolaꞌa taꞌingelu. ¹²Na para ahuie hanue ngeena e tohungei lae i lengi, na aawalai maai para mwana rue21:12 Mei iidu-iidunge aawala mwana rue ngeena e toꞌo aana mei neꞌisaenga oto paine hunie mo Jiu. Mei iidu-iidunge ngeena e haataꞌinie uri mei ola ngeena e tohungei diana oto, na e ahu, na nga mei ola e kaꞌa aiꞌaa ike loꞌu mwaanie. Aena urine a Jon ko ere i sulie aawalai maai para mwana rue, na aawalai komu mwana rue, na aawalai hurulaꞌaa mwana rue, na aawalai sinola mwana rue aani tangalai tahanga, na loꞌu tangalau peꞌie e hai aawala mwana hai aani loꞌusuꞌu (12 x 12=144). Hanuena e diana liutaa aana taꞌena nga ola. Leesie Esikieli 48:30-35. ikire aana. Nga taꞌa-taꞌa satai ola aana aawalai komu mwana rue mo Israel ni oto aana nga maai para, na nga ensel ni e kakakalie oto nga maai para. ¹³E oolu maai para nge kire iiꞌo hatarie pwaalana sato, na ngaeta oolu iini hatarie suulana sato, na ngaeta oolu iini poꞌo taꞌau, na ngaeta oolu iini poꞌo hao. ¹⁴Para ahuie hanuena asuilana e lae aana aawalai toliꞌae mwana rue aani heu, na uusulana satana aawalai hurulaꞌaa mwana rue a Kalei Sipu e lae oto aana mo heu ngeena.

¹⁵Na ensel nge e ere peꞌieu ngeena e hele aana totoho aana mai ei kire asuie aani kol, huni totohoa hanuena, na para ahuie, na mo maai para. ¹⁶Na e totohoa tewahaꞌana hanuena e sada loꞌu mola aana aarokahaꞌana. Oto ensel ngeena e totohoa huilume paine ngeena, na e hule aana aawalai sinola mwana rue aani tangalai tahanga aana tewahaꞌana, na aawalai sinola mwana rue aani tangalai tahanga aana aarokahaꞌana, na aawalai sinola mwana rue aani tangalai tahanga noꞌone aana e lae i lengi. ¹⁷Oto ensel e totohoa loꞌu para ahuie hanuena, na e lae i lengi hunie tangalau na e hai aawala mwana hai aani loꞌusuꞌu. Na totoho nge ensel ngeena ko totoho aana, e sada mola aana totoho mo iinoni ko totoho aana.

¹⁸Hanuena asuilana e lae aani tohungei kol, na ko wana-wana oto mala iiro-iiro. Na para ahuie hanuena asuilana e lae aani heu iiro-iiro holiteni e tohungei peine, satana jaspa. ¹⁹Toliꞌae aani heu aana para ngeena, kire haꞌalaunie aana taꞌena nga hau21:19 Mo heu ngeena liotani kire mani lio hai aaopaꞌi, na kire mani lio diana oto liutaa. iiro-iiro oto mola nge holitana e paine—eetana aani jaspa, ruana aani sapaea, oolune aani agit, haine aani emaral, ²⁰limana aani onikis, oonona aani kanilian, hiune aani kuots, walune aani beril, siwana aani topas, tangahuluꞌana aani kalsedoni, na aawala mwana eeta aani tukuoes, na aawala mwana rue aani amitis. ²¹Na aawalai maai para mwana rue aana para ngeena kire haꞌa-ado aani uꞌumaai dehi—nga maai para ni oto nga uꞌumaai dehi. Na tala aana hanuena asuilana e lae aani tohungei kol, na ko wana-wana oto mala iiro-iiro.

²²A God Aalaha Hahuꞌana Nanama na a Kalei Sipu kire iiꞌo oto mone aana hanuena, oto nou kaꞌa leesie ike nga nume maaꞌi i laona hanuena aana kire kaꞌa saetoꞌo aana loꞌu nge nume urine. ²³Na loꞌu, hanuena e kaꞌa saetoꞌo aana ike sato wa waro-waro ke raa-raangie aena aana manikuluhaꞌana a God taane oto matapwanga aana, na a Kalei Sipu taane oto raa-raa hunie hanuena. ²⁴Oto hanuena kei raangie mo aapoloa, na mo inemauri aana walumalau kire kei toolea mo ola manikuluꞌe ikire mai laona hanuena huni haꞌapainaꞌaa God. ²⁵Mo maai para aana hanuena kire saꞌa roroꞌa ni hono ike loꞌu aana nga maholo, aena aana e aasa hunie nga maelonga kei lae mai i rodo, aana nga rodo na haꞌike loꞌu taꞌau. ²⁶Na mwala aana taꞌena nga hanue aana walumalau kei too-toolea mai manikuluhaꞌada na ahutana mo ola diana aana mo toꞌo-toꞌonga ikire huni haꞌamaꞌu aana a God. ²⁷Taꞌe nga mei ola tataꞌala saꞌa roroꞌa lae ike loꞌu mei laona hanuena. Mo iini nge ko deu-deu oorahaꞌaa aaela, wa ko talei eero-eero, kire saꞌa roroꞌa ni lae ike i laona. Taꞌe mo iini nge uusulana satada e lae i laona uusu-uusu ni meurihe a Kalei Sipu, ikire haꞌalaa kire sai lae i laona hanuena.

¹Oto ensel ngeena e haataꞌinie wai ni meurihe aaku nge ko aahe-aahe mai uure mwaanie naunekume a God na a Kalei Sipu. Wai ngeena wai oto paine, na e tohungei mano-manolaꞌa. ²Ko aahe hao i denumana tala paine i Jerusalem Haalu ngeena, na i reune wai ngeena mo ei aana maurihe kire i leune. Kire ko hungu-hungu aawalai maai hungunge mwana rue aana halisi, na hautaꞌai suli waro-waro. Na mo apa-apana ai ngeena kire sai kuraa ahutana mo aapoloa aana. ³Walu ola kei diana oto loꞌu mala maholo haꞌaholanga, aana a God kei taꞌaasie haiꞌuesinge ingeie mwaanie walumalau.

Naunekume a God na a Kalei Sipu kire iiꞌo i leune, na mo koni-konihe ingeie kei palo-paloa. ⁴Kire kei leesie maana, na uusulana satana kei lae i naꞌona darada. ⁵Nga rodohono haꞌike loꞌu taꞌau, na kire saꞌa hari hunie loꞌu nga raa-raa aani dunge wa sato hunie ke raangire, aena aana a God Aalaha oto kei niie raa-raa nada. Na kire kei aalaha mala mo inemauri oto huu.

O Ke Iiꞌo Aakau Loosie Oolinge Mai A Jisas

⁶Oto ensel ngeena e heꞌi unue loꞌu hunieu uuri, “O ke hiiwalaimoli aana mo wala ienini, aena aana kire toꞌohuu. A God Aalaha nge e niie Liꞌoa Maaꞌi ingeie i saana mo propet ingeie nge e uusungeꞌinieu ensel ingeie mai seemu, huni haataꞌinie mo ola ienini eemiu mo koni-konihe ingeie aana e saꞌa tewa na kire kei reu oto.”

⁷Oto nou heꞌi rongoa loꞌu walana a Jisas ko teꞌuri, “Omu ke rongo kaꞌu. E saꞌa tewa na ne kei ooli loꞌu mei. Mo iini nge kire ko tola i sulie walana God e unu lalai eeni i laona uusu-uusu ie, kire ke ilenimwaꞌe mola.”

⁸Walu ola ienini, ineu a Jon oto nou rongoꞌi na nou leesiꞌi. Na maholo nou rongoꞌi na nou leesiꞌi mango, nou si pouruuru i naꞌona ensel nge e haataꞌiniꞌi eeku hunie ne ke palo-paloa. ⁹Taꞌe ensel ngeena e unue mola hunieu uuri, “!Haꞌike! O ke suꞌuri palo-paloau. Ineu ngaeta koni-konihe noꞌone mala iꞌoe, na mala mo eesimu mo propet, na oto mala ahutana mo iini nge kire ko hele i sulie mo wala i laona uusu-uusu ienini. O ke palo-paloa mola a God.”

¹⁰Oto ensel ngeena e heꞌi unue loꞌu hunieu uuri, “O ke suꞌuri mumunie uusu-uusu aana haataꞌinge ienini, aena aana maholo hunie mo ola ienini kei reu e karaꞌini oto. ¹¹Maholo e oꞌoruꞌe mola, oto mo iini nge kire ko euꞌesuie aaelanga na tolahada e tataꞌala, e aasa hunie kire kei eeliꞌu taꞌe kire kei talei iiꞌo mola peꞌie tataꞌalanga na tolahada kei heꞌi tataꞌala loꞌu liutaa. Na mo iini nge kire ko esu aana diananga na tolahada e maaꞌi, kire kei lae peꞌi esu oto mola aana diananga na tolahada kei maaꞌi oto tarau.”

¹²Oto a Jisas ko teꞌuri, “Omu ke rongo kaꞌu. E saꞌa tewa na ne kei ooli loꞌu mei. Na ne kei toolea noꞌone mai waaitana mwala huni waaire oto i sulie nga taa iinoni e asuie. ¹³Ineu oto a A na a Z, aana ineu oto aehotalana na haꞌamangolana walu ola.

¹⁴“Deidehie mo iini kire hoda rereꞌa aana mo toꞌoni ikire, aana ikire oto kire kei lai sili i laona maaꞌi para aana Jerusalem Haalu ngeena, na kire kei ngeue hue-huana ai ni meurihe. ¹⁵Taꞌe mo iinoni oorahaꞌaa kire saꞌa roroꞌa ni lae ike i laona Aalahanga a God, aana kire ko siꞌo-siꞌo, na kire ko mei-mesi, na kire ko talei horo, na kire ko palo-paloa mo god eero-eero, na kire saetoꞌo aana mo wala ni eeronga na kire ko euꞌesuie eeronga mola tarau.

¹⁶“Ineu a Jisas, nou uusungeꞌinie ensel ineu hunie ke haataꞌinie walu ola ienini eemu Jon, hunie o ke haꞌarongoa mo soihaadaꞌinge aani. Ineu Iini e paine liutaa aana komu a Deved Inemauri. Ineu a Jisas nou urihana ho heeꞌu Madala aana no ko haataꞌinie Dinge Haalu a God e karaꞌini oto.”

¹⁷Oto Liꞌoa Maaꞌi e unue uuri, “O ke lae mai.” Huꞌe a Kalei Sipu, nge oto soihaadaꞌinge, e unue noꞌone uuri, “O ke lae mai.” Na e malisine noꞌone hunie taꞌena nga iini ko rongoa mo wala ienini ke unue uuri “O ke lae mai.”

Na mei wala ko lae noꞌone hunie mo iini kire sare toꞌo aana maurihe huu. “Omu ke lae mai.” Mo iini nge omu ko maarou hunie maurihe, omu ke lae mai tola mwaakule mola aana wai ni meurihe ienini.

¹⁸Ineu a Jon no ko haꞌapasulie ahutana mo iini nge kire ko rongoa mo wala ni erenga lalai aana uusu-uusu ie. Mala uri nga iini ko sapeie loꞌu nga mei neꞌisaenga aana mo wala ienini, nge a God kei sapeie loꞌu hunie iinoni ngeena mo haꞌamotaahinge nge uusuleni e lae i laona uusu-uusu ienini. ¹⁹Na mala uri nga iini ko taꞌaasie nga mei neꞌisaenga mwaanie mo wala ni erenga lalai aana uusu-uusu ienini, nge a God kei taꞌaasie mwaanie walu ola diana nge erenga e lae i suliꞌi i lalona uusu-uusu ienini. Iini urine saꞌa lae ike i laona hanue maaꞌi, i Jerusalem Haalu ngeena, hunie ke ngaue hue-huana ai ni meurihe.

²⁰A Jisas, iini nge e unue uri mo ola ie kire toꞌohuu e unue noꞌone uuri, “Iau, e saꞌa tewa na ne kei ooli loꞌu mei.”

Ke urine oto. O ke lae oto mai, Jisas.

²¹Ineu a Jon no ko aarea God uri hahuꞌana manata-diananga Aalaha ikie a Jisas ke iiꞌo peꞌiꞌomu. Ke urine oto.