Tataroha Diana I Sulie A Jisas Kraes Nge A
Luk
E Uusue
?A tei ni e uusue uusu-uusu ienini?
A Luk ingeie nga mwane kure-kure (leesie Kolosi 4:14) nge e uusue Tataroha Diana ienini. Ingeie nga mwane haꞌike aana aawalai naꞌohai pwaarongoisuli mwana rue a Jisas, na ingeie nga mwane ni Jiu haꞌike, taꞌe ingeie e hute aana mo Aapoloa Aaopa. Taꞌe maꞌalana e urine, a Luk e sai diana aana walu ola i sulie a Jisas aana e hikusie a Pol Hurulaꞌaa, na e lae-lae noꞌone peꞌie huni tarohaꞌinie a Jisas. Ngaeta mo maholo a Luk e lae-lae noꞌone i Jerusalem, na e leesie mo leu nge walu ola e rau-reu eeni aana pongine a Jisas. A Luk e uusue noꞌone Palonga, nge ngaeta uusu-uusu i sulie nga taa mo hurulaꞌaa kire auꞌesuie i purine a Jisas e taꞌelaꞌi mwaanie maenga. Leesie Palonga 16:10, na 2 Timoti 4:11.
?E uusue uusu-uusu ienini hunie kira tei?
A Luk e uusue Tataroha Diana ienini hunie ngaeta poro paine satana a Tiofilas. Poro paine ngeena ingeie ngaeta mwane ni Krik, na nga taa a Luk e uusue ienini a lae noꞌone hunie ahutana mo Krik na oto ahutana mo Aapoloa Aaopa nge ikire nga mo Jiu haꞌike. Satai Tiofilas ngeena, neꞌisaenga aana uuri “Iini e manata diana hunie a God.”
?Nga taa e rau-reu maholo e uusue uusu-uusu ienini?
A Luk e lae peꞌie a Pol Hurulaꞌaa na e iiꞌo oto peꞌie aana eetana nga maholo mo Rom kire aasie i laona nume ni hoꞌo i Rom. E lio mala a Luk e uusue e ro uusu-uusu ingeie aana maholona, ola mala oono aawalai helisi i purine hutelana a Jisas (60 A.D.). Oto maꞌalana mo Rom kire hoꞌosie a Pol, taꞌe walana God e kaꞌa iiꞌo hoꞌo-hoꞌo ike.
?E uusue uusu-uusu ienini huni taa?
A Luk e haitalengaꞌinie walu ola i sulie a Jisas Kraes na e uusu samangaꞌinie mo eehuꞌi laladonga i sulie hunie mwala ke sai diana aana uri nga moi taa nge soihaadaꞌinge e haꞌa-uusulire aani mo ola toꞌohuu oto.
?Nga taa ni mo pweu ni wala i laona uusu-uusu ienini?
Liꞌoa Maaꞌi, aarengaꞌinge, Kale Ni Iinoni, manata-diananga, kira oorahaꞌaala
?Nga taa ni ngaeta mo eehuꞌi tatala i laona uusu-uusu ienini?
Luke 19:10, Na mo tatala nge e ere diana liutaa i sulie aarengaꞌinge nge Luk 11:1-13
?Nga taa ni mo eehuꞌi neꞌisaenga i laona uusu-uusu ienini?
Mo ola ni pangataꞌinge kire rau maholo a Jon Loto Maaꞌi na a Jisas kire hute. (1:1–2:52)
A God e dau aakau aana mo ola loosie asunge a Jisas. (3:1–4:13)
A Jisas e dau esunge aana poꞌo ni henue i Kalili. (4:14–9:9)
A Jisas e dau esunge i matolana mo Aapoloa Aaopa mwaanie i Kalili. (9:10–9:50)
A Jisas e dau esunge aana mo poꞌo ni henue e liu eeni maholo e lae-lae hunie i Jerusalem. (9:51–19:27)
Wiki ooreta a Jisas e iiꞌo i Jerusalem. (19:28–21:38)
A Jisas e mae na e mauri eelihoꞌi loꞌu. (22:1–24:53)
1Mei Wala Ni Saediananga
Hunie A Tiopilas
1Mwala hunge kire dau-deu aahonga huni uusu-uusu i sulie nga moi taa nge kire oa i saakaelu. 2Kire uusue mo ola kire rongoꞌi mwaanie mo iini e lae-laeliwala nameelu aana nga taa kire leesie oto aana maada, uure mai aehotalana laladonga i sulie a Jisas. 3Oto ineu maraaku noꞌone, poro paine Tiopilas, aena aana nou heitalengaꞌinie na nou sai diana aana walu olana uure oto mai aehotalana, nou loꞌongaꞌinie uri ne ke uusu samangaꞌiniꞌi oto namue. 4No ko uusuꞌi urine hunie o ke sai diana aana uri nga moi taa nge haꞌa-uusulilemu e lae aani mo ola toꞌohuu.
Ensel Gebrel E Haataꞌi Aana A Sekaraea
5A Sekaraea ingeie ngaeta pris aana maholo nge a Herod e aalaha haahie i Israel. Ingeie aana poꞌo ni iinoni a Abaeja aana komu ni pris. Na satana huꞌe ingeie a Elisabet. Ingeie noꞌone e uure mwaanie komu a Eron, ikire mo pris. 6Tolahadarue e tohungei oodotaꞌi na kirerue hele i sulie ahutana mo haꞌatolanga God. 7E ro mauꞌana ngeena kirerue kaꞌa toꞌo mwela ike, aena aana a Elisabet e amara. Na kirerue ko meni repo oto hiitoꞌo.
8Oto aana ngaeta maholo e hule oto loꞌu hunie poꞌo ni iinoni a Sekaraea huni esu mala pris i laona Nume Maaꞌi Peine a God i Jerusalem. 9Oto mala tolahana mo pris, kire inie daes huni leesie iini uri taa aada nge a God e lio hilisie huni uunue dango wau-wesu i lengine ora ni uunu-uunu aana Hahuꞌana Leu Maaꞌi i laona Nume Maaꞌi a God. Oto aana hai dingena, lio-hilisilana a Sekaraea e lae. 10Na aana maholo a Sekaraea ko uunue dango wau-wesu, ahutana mwala mola poꞌoi sinaha peꞌi aarengaꞌinge.
11Oto ensel a God e haataꞌi aana a Sekaraea, e uure karaꞌinie pwalo-pwalona ora ni uunu-uunue dango wau-wesu. 12Maholo a Sekaraea e leesie ensel ngeena, ko si teipuꞌo-puꞌo na ko tohungei meꞌu oto hiitoꞌo. 13Taꞌe ensel e teꞌuri hunie, “!Mwaanie o meꞌu-meꞌu Sekaraea! A God e rongoa oto aarengaꞌinge iꞌoe, na huꞌe iꞌoe a Elisabet kei haꞌahutaa oto kele mwela mwane, na o ke haaraꞌinie satana aana a Jon. 14O kei ile-ilenimwaꞌe na o kei sae-saediana oto liutaa haahie. Mwala hunge noꞌone kire kei ilenimwaꞌe haahie aana kei hute. 15A Jon kei neꞌie tohungei iinoni peine a God. Niilana kei lae hunie a God, na huni haataꞌinie urine aana mwala, e saꞌa roroꞌa ni inu waen ike wa nga mei wei ni mehiri. Kei honu oto aana Liꞌoa Maaꞌi uure i iiana nikana. 16Kei peꞌie mo iini hunge aana mwala ni Israel huni haꞌa-aaliꞌure takoie a God, Aalaha ikire. 17Ingeie maraana kei lae i naꞌona a Aalaha huni deu aakau aana mwala loosie laenga ingeie mai. A Jon kei tohungei aꞌailaꞌa na kei nanama aani Liꞌoa mala a Propet Elaeja. Ingeie kei da hanuelamanga i matolana mo heꞌi aamana, na kei haꞌa-aaliꞌue kira haitohe takoie tala ni loꞌongaꞌinilana oodotaꞌinge.”
18Oto a Sekaraea ko teꞌuri hunie ensel, “?Uri ne kei manataꞌinie leu o ko unuena uri e toꞌohuu uri taa? Aana ineu nou repo oto, na huꞌe ineu e repo oto noꞌone.”
19Ensel ko aalamie uuri, “Ineu a Gebrel, na nou uure i naꞌona God. Na ingeie oto ni e uusungeꞌinieu mei huni ere peꞌiꞌo, na ni haꞌarongoꞌo aana tataroha diana ie. 20Na nga taa no ko unue ie kei saro lae taane mai oa, aana maholo hunie. Taꞌe iꞌoe aena aana o kaꞌa hiiwalaimoli ike aana walaku, o saꞌa ere-ere ike, lai hule aana hai dinge walu ola ienini kei oa.”
21Aana maholona na mwala ko maa-maaꞌoohie ue a Sekaraea taꞌi sinaha. Kire ko papangataꞌi oto aana ko iiꞌo tewa oto wau i Nume Maaꞌi. 22Maholo a Sekaraea e iisitaa poi sinaha, na e kaꞌa sai ere oto peꞌire, taꞌe ko haꞌa-haꞌamalaa ola mola aana nimana. Oto kire si saie uri e leesie oto nga aanoa wau i Nume Maaꞌi. 23Maholo mo dinge ingeie huni deu esunge i Nume Maaꞌi mala pris e haro mango, nge e si eelihoꞌi taꞌau i nume ingeie. 24E kaꞌa tewa ike loꞌu i purine leune e rau, na huꞌe ingeie a Elisabet ko hiꞌe-hiꞌe oto. Na e iiꞌo hahuroto mola i nume ikirerue hunie e lime waro-waro. Oto a Elisabet ko teꞌuri, 25“Leesie kaꞌu nga taa a Aalaha e da hunieu. Mwala ineu kire maa-masa kaꞌu i tehulaꞌaku aana nou amara, taꞌe ie a Aalaha e aamasieu na e taꞌaasie oto mei masanga ngeena mwaanieu.”
Ensel Gebrel E Haataꞌi Aana A Meri
26Aana oonona nga waro-waro i purine a Elisabet ko hiꞌe-hiꞌe oto, a God e uusungeꞌinie ensel Gebrel hunie huilume i Nasaret aana poꞌo ni henue i Kalili. 27Ensel ngeena e toolea mai tataroha hunie nga keni raoriꞌi, na a keine e ere ruru oto huni toꞌo aana mwane satana a Josep aana komu a Deved Inemauri. Satana a keine a Meri.
28Oto ensel e sili mei saana ko teꞌuri, “Saediananga a God huniꞌo. A Aalaha e iiꞌo oto peꞌiꞌo.” 29Oto a Meri saena ko si liki i tehulaꞌana walana ensel ngeena, na ko loꞌongaꞌi hiitoꞌo i sulie uri nga taa ni loꞌongaꞌinge aana mo wala ngeena.
30Oto ensel ko teꞌuri hunie, “Mwaanie o maꞌu-meꞌu Meri. A God ko tohungei ilenimwaꞌe oto hiitoꞌo haahiꞌo. 31Na o kei hiꞌe-hiꞌe aani mwela, oto o kei haꞌahutaa kele mwane, na o ke haaraꞌinie satana aana a Jisas. 32Ingeie kei neꞌi mwane paine, na mwala kei haaraꞌinie uri ingeie Kalena iini e Paine Liutaa. Na a God Aalaha ikie kei haꞌa-aalahaa noꞌone mala weuwana, a Deved Inemauri. 33Oto ingeie kei aalaha taraꞌasi oto haahie mwala ni Israel, na aalahanga ingeie e saꞌa mango oto ooꞌoo.”
34Oto a Meri ko unue hunie ensel uuri, “?Mo ola ienini ke si reu uri taa eena, na nou kaꞌa saie ike nga mwane?”
35Oto ensel ko aalamie uuri, “Liꞌoa Maaꞌi kei siho i lengimu, na nanamanga iini e Paine Liutaa kei melusiꞌo. Na aena ngeena kele wee-wee iꞌoe kei maaꞌi na sailana kei lae uri ingeie Kalena a God. 36O ke leesie kaꞌu keni tekihemu a Elisabet, e tohungei repo aaela oto. Taꞌe ingeie noꞌone ko hiꞌe-hiꞌe aani mwela. Ahutana mwala kire mani loꞌongaꞌi uri e saꞌa toꞌo mwela loꞌu, taꞌe ko hiꞌe-hiꞌe oto na e oono waro-waro e mango oto aana. 37Aana taꞌe-taꞌena nga mei ola e saꞌa aasaie ike a God huni esuie.”
38Oto a Meri ko si unue hunie ensel uuri, “Ineu oto koni-konihe a Aalaha. Leune ke oa oto hunieu mala o ko unuena.” Oto ensel e si lae mwaanie.
A Meri E Lae Huni Leesie A Elisabet
39Oto loꞌu mola i purine, a Meri e tauleꞌi, oto ko tolana lae oto hunie ngaeta huilume taꞌau i lengine mo uuwo i Jiudia. 40E lae taꞌau i sili i nume a Sekaraea, oto ko ere ni saediananga hunie a Elisabet. 41Maholo a Elisabet e rongoa mola mei wala ni saediananga a Meri, oto kele mwela i iiana ko esuleꞌi na ko lalaaꞌi sape oto. Na maholona Liꞌoa Maaꞌi ko siho oto i lengine a Elisabet, 42na ko unue oto uuri, “A God ke haꞌadianaꞌaꞌo liutaa aana ahutana mo keni, na ke haꞌadianaꞌaa kele wee-wee o ko hiꞌe-hiꞌe aana ngeena. 43Iꞌoe oto nikana a Aalaha ineu, na o lae mai seeku. ?Aana e ue kaꞌu mei ola diana urini ko reu eeku? 44Maholo nou rongoa walamu, oto kele wee-wee e si lalaaꞌi sape oto peꞌie ilenimwaꞌenga i iieku. 45Deidehiꞌo keine, aana o hiiwalaimoli uri nga taa a Aalaha e unue huniꞌo kei oa oto.”
A Meri E Kana Ni Soi Haꞌamanikuluꞌaa God
46Oto a Meri ko teꞌuri,
“Saeku ko soi haꞌamanikuluꞌaa Aalaha,
47Na maurihaꞌaku ko ilenimwaꞌe aana God, a Haꞌa-uurileku,
48aana a God e loꞌongaꞌinieu mei iinoni reu ingeie.
Uure siꞌiri pwau weu ahutana mwala kei saieu uri keni deidehie,
49aana a God, iini e nanama na e maaꞌi, e da mo ola e hiꞌe hunieu.
50A God e aamasie mo iini kire haꞌamaꞌu aana,
uure oto aana mo pweunge i naꞌo lae mai hule siꞌiri na mo pweunge ue mai.
51E haataꞌinie ramolana aana nimana,
aana e tatangaꞌinire mwala e sai toohaꞌinire aani loꞌongaꞌinilada maraada.
52E haꞌasihoa mo aalaha mwaanie mo neunekume ikire,
na e sulu alaꞌa aana mo mei iinoni reu.
53E niie mo ola diana hunie mo iini kire hiolo,
taꞌe mo iini e toꞌo-toꞌo e uusungeꞌi mwaakule mola aada.
54E hule oto mai huni peꞌie mwala ingeie mo Israel, mo koni-konihe ingeie.
E kaꞌa pulongosie ike haiholotaꞌinge ingeie huni aamasie mwala ingeie,
55aana e da oto nga taa e haiholotaꞌinie hunie mo weuwaka,
hunie a Ebraham na hunie mo kalena, uri kei aamasire oto tarau.”
56A Meri e iiꞌo peꞌie a Elisabet hunie ola mala e oolu waro-waro, oto e si eelihoꞌi loꞌu i henue ingeie.
Hutelana A Jon Loto Maaꞌi
57Oto e hule aana pongine a Elisabet, ko si haꞌahutaa kele mwela mwane. 58Mo euhenue ingeie na mo tekihana kire rongoa uri a Aalaha e haꞌa-oaie aamasinge ingeie hunie a Elisabet urine, kire si meni ilenimwaꞌe peꞌie. 59Oto wiki e ahu i purine kele wee-wee e hute,1:59 Maholo mo Jiu kire ko iidumie mo hei dinge, iidu-iidunge ikire e aaopa mwaanie iidu-iidunge ikie. Aana kire ko aehota iidu aana dinge mei olana e rau, taꞌe ikie, kie ko aehota iidu aana dinge i puri. Oto walune nga hai dinge aana iidu-iidunge ikire, e hule mola aana e hiu hei dinge aana iidu-iidunge ikie. kire si meni loko hunie torilana na hunie kire ke haaraꞌinie aana aamana, a Sekaraea.
60Taꞌe a nikana e unue uuri, “Haꞌike, omu ke haaraꞌinie satana aana a Jon.”
61Oto mwala a nikana ko teꞌuri hunie, “Taꞌe more kaꞌa toꞌo aana ike nga satai ola urine aana komu iꞌomoreꞌi.”
62Oto kire ko si haꞌamalaa hunie aamana uri e sare haaraꞌinie satana aana a tei. 63Oto a Sekaraea e sukaa ola ni uusu-uusu, ko si uusue uuri, “Satana a Jon.” I leune kire ko si meni pangataꞌinie oto hiitoꞌo. 64Oto mola aana maholoi satona, a Sekaraea ko si aehota ere-ere oto loꞌu, na ko paalahea God. 65Oto mo euhenue ikirerue kire ko si meꞌu oto hiitoꞌo, na tataroha aana mo olana e si tarohie ahutana mo henue taꞌau i lengine mo uuwo i Jiudia. 66Na ahutana mo iini e rongoa mo olana, kire ko si loꞌo-loꞌongaꞌi i suliꞌi na kire ko unue uuri, “?A mwaꞌu ie kei ue taane? Aana e lio mala uri nanamanga a Aalaha oto aana.”
A Sekaraea
E Soi Haꞌamanikuluꞌaa God
67Oto a Sekaraea, aamana a Jon, e honu aana Liꞌoa Maaꞌi, e si ere rarangana walana God uuri,
68“Kolu ke paalahea God, Aalaha ikie mo Israel,
aana e lae mai huni peꞌikie mo iinoni ingeie, na e tapa-oolisikie.
69Na uure mwaanie komu a Deved koni-konihe ingeie,
e niie iini nanama huni haꞌa-uurikie.
70Uure oto mai naꞌo, e unue kaꞌu aana mo propet maaꞌi ingeie
71uri kei haꞌa-uurikie mwaanie mo maelonga ikie,
na mwaanie nimada kira ngiduupu hunikie.
72E unue kei haataꞌinie aamasinge hunie mo weuwaka,
huni aamasitoꞌo aana haiholotaꞌinge maaꞌi ingeie,
73nge e haiholotaꞌinie hunie a Ebraham aamaka.
74Aana e haiholotaꞌi uri kei haꞌa-uurikie mwaanie mo maelonga ikie, mwaanie kie maꞌuteꞌinire.
Taꞌe kie ke asu mamanutoꞌo mola nana,
75uri hunie kie ke iiꞌo maaꞌi na iiꞌo oodotaꞌi i naꞌona, i suli hei dinge aana maurihaꞌaka.
76“Na iꞌoe wee-wee ineu, sailemu kei lae uri nga propet nana iini e Paine Liutaa, aana o kei lae i naꞌona Aalaha huni salea tala ingeie loosie. 77Na huni haꞌarongoa mwala ingeie uri ingeie kei haꞌa-uurire aani saeꞌaasilana mo roroꞌanga ikire. 78Aena aana aamasinge a God ikie mone, ingeie kei siho mai uure taꞌau i Lengi mala sato ko pwaa, 79huni raangie mo iini kire iiꞌo i laona rodohono na i mamalutana maenga, na huni haꞌa-oodohie aeꞌaeka i sulie tala ni henuelama.”
80Oto kele mwelana e paine taꞌe, na ko manata peꞌi loꞌongaꞌinge diana. E talei oꞌoꞌo mola i laona hanuesala, lai hule aana hai dinge e aehotaa asunge ingeie i matolana mwala ni Israel.
2A Josep E Toolea A Meri I Betlehem
1Aana maholona, inemauri peine ni Rom, a Ogastas, e neꞌie haꞌatolanga hunie ahutana mwala aana mo henue i mamalutana. Haꞌatolanga ngeena e unue uri ahutana iinoni ke mani uusu sata huni toolea wilinge mwaanire. 2Uusu-satanga ie nge eetana nga iini e rau aana maholo a Kuaerinias e aalaha aana poꞌo ni henue i Siria. 3Oto ahutana mwala ko meni lae oto huni uusu sata aana mo henue ikire, nga iini ni oto aana hanue ingeie.
4Oto a Josep e uure i Nasaret, ngaeta huilume wau aana poꞌo ni henue i Kalili, ko lae oto hunie huilume i Betlehem wau aana poꞌo ni henue i Jiudia, huilume nge a Deved Inemauri e hute aana. E lae wau i leune aena aana ingeie e uure aana komu a Deved Inemauri. 5A Josep e lae huni uusu sata peꞌie a Meri, keni nge e ere ruru peꞌie huni toꞌo aana. Maholona na a Meri ko hiꞌe-hiꞌe oto. 6Maholo ikirerue ue i Betlehem na ko hule oto aana pongine a Meri huni meuri eeni mwela. 7Oto ko haꞌahutaa oto naꞌohai mwela ingeie, ko uloa aani sala na ko haꞌa-enohie aana leu ni haꞌangau puluke, aana nga leu haꞌike talada i nume ni awataa.
Mo Kakali Sipu Kire Haꞌapainaꞌaa A Jisas
8Oto aana hai rodona ngaeta mo mwane kire iiꞌo poꞌoi sinaha kaꞌa haꞌatau loꞌu mwaanie huilume aana kire ko kakalie mo sipu ikire. 9Oto ensel a God e lae mai saada na manikuluhaꞌana a God ko raa kali-kelire. Oto kire ko si tohungei meꞌu oto liutaa. 10Oto ensel ngeena ko teꞌuri hunire, “!Mwaanie omu meꞌu-meꞌu! Nou toolea mai tataroha diana namiu na ilenimwaꞌenga oto liutaa hunie ahutana mo iinoni. 11Iini nge kei haꞌa-uuriꞌomu e si kele hute oto molana aana hanue a Deved. Ingeie oto a Kraes, Aalaha ikie. 12Na tolimaa nge kei haꞌawalaimoliꞌaa walaku huniꞌomu nge uri, omu kei lio oodoie kele wee-wee kire uloa aani sala i laona leu ni haꞌangau puluke.”
13Na oto mola lau-leu, pulitaa ni ensel uure taꞌau i Lengi oto peꞌie iini nge ko ere-ere ngeena, kire ko meni paalahea God, kire ko teꞌuri, 14“Manikuluꞌanga hunie a God i Lengi, na hanuelamanga mai aano hunie mo iini e ilenimwaꞌe haahire.”
15Oto maholo mo ensel kire aalihoꞌi i Lengi mwaanire, mo kakali sipu ko si ere hailiu hunire uuri, “Kolu ke lae kaꞌu i Betlehem huni leesie nga taa nge a Aalaha e unue hunikolu ie.”
16Oto kire ko tolana lae lau-leu oto wau, na kire ko leesie a Meri na a Josep peꞌie kele wee-wee, na e eno mola aana leu ni haꞌangau puluke. 17Maholo mo kakali sipu kire lae wau i leesie kele wee-wee na e eno aana leu ni haꞌangau puluke, oto kire ko si ladoa nga taa ensel e unue hunire i sulie kele wee-wee ngeena. 18Ahutana mwala ko si pangataꞌi aana kire ko rongoa nga taa mo kakali sipu kire ko ladoa. 19Taꞌe a Meri e neꞌie walu ola ienini mola i saena, na ko si talei loꞌo-loꞌongaꞌi mwa-mwanoto mola i suliꞌi maraana. 20Oto mo kakali sipu kire si eelihoꞌi takoie mo sipu ikire peꞌi soi haꞌamanikuluꞌaa God na peꞌi paalahenga aena aana walu ola ensel e unuꞌi hunire, kire leesiꞌi uri kire toꞌohuu oto.
Kire Toolea A Jisas I Nume Maaꞌi Peine Huni Niie Hunie A God
21Oto wiki e ahu i purine kele wee-wee e hute,2:21 Maholo mo Jiu kire ko iidumie mo hei dinge, iidu-iidunge ikire e aaopa mwaanie iidu-iidunge ikie. Aana kire ko aehota iidu aana dinge mei olana e rau, taꞌe ikie, kie ko aehota iidu aana dinge i puri. Oto walune nga hai dinge aana iidu-iidunge ikire, e hule mola aana e hiu hei dinge aana iidu-iidunge ikie. nge kire si esuie torihesiꞌonga aana kele wee-wee i sulie mo Haꞌatolanga a Mosis, na kire haaraꞌinie aana a Jisas, satai ola nge ensel e unue kaꞌu oto maholo na e kaꞌa lodo ue i iiana nikana.
22Na lae-lae, e haro hule oto aana maholo huni haꞌarereꞌanga a Meri i purine haꞌahutanga i sulie mo Haꞌatolanga a Mosis. Oto a Josep na a Meri kirerue si toolea taꞌau kele wee-wee i Jerusalem, huni niie hunie a Aalaha, 23oto mala uusulana e lae i laona Haꞌatolanga a God uuri, Niie ahutana taꞌena nga naꞌohai mwela mwane hunie a Aalaha. Eksodas 13:224Oto a Josep na Meri kire lae huni esuie uunu-olanga mala Haꞌatolanga a God e unue, aana e ere uuri, O ke niie e ro hiroikuu wa e ro kalei urou.Levitikas 12:8
A Propet Simeon E Paalahea God Haahie A Jisas
25Aana maholona, ngaeta mwane satana a Simeon e oꞌoꞌo noꞌone i Jerusalem. A mwane ngeena ingeie nga mwane oodotaꞌi, na e iiꞌo mola peꞌi palolana a God, na Liꞌoa Maaꞌi noꞌone peꞌie. A Simeon e maa-maaꞌoohie a Kraes nge a God e haiholotaꞌi huni uusungeꞌinie mai huni haꞌa-uurie mwala ni Israel. 26Aana Liꞌoa Maaꞌi e unue hunie uri e saꞌa mae ue na e kaꞌa haro leesie a Haꞌa-uuri. 27Oto Liꞌoa Maaꞌi e naꞌona a Simeon hunie Nume Maaꞌi Peine, na maholona a Josep na Meri ko toolea noꞌone mai a Jisas huni deu i sulie Haꞌatolanga a Mosis.
28Oto a Simeon e aapalaa kele wee-wee, e si paalahea God, ko teꞌuri,
29“Hahuꞌana Aalaha, ineu oto koni-konihe iꞌoe,
na oto ie ne kei mae ni henuelama.
Aana o deu oto
i sulie haiholotaꞌinge iꞌoe hunieu.
30Aana nou leesie oto aana maaku
a Haꞌa-uuri nge o uusungeꞌinie mai.
31Ingeie oto kei haꞌa-uurie mwala iꞌoe.
32Ingeie oto raa-raa hunie mo Aapoloa Aaopa,
na kei toolea mai manikuluꞌanga hunie mo iinoni iꞌoe mo Israel.”
33Aamana a Jisas na nikana, kirerue ko tohungei pangataꞌinie mo ola nge a Simeon ko unuꞌi i sulie kele wee-wee. 34Oto a Simeon e si haꞌadianaꞌaraelu, na ko teꞌuri hunie a Meri, “Kele wee-wee ienini a God e lio hilisie huni haꞌa-uurie mo iini hunge ni Israel. Taꞌe ingeie kei haꞌatekehie noꞌone mo iini hunge loꞌu, aena aana ingeie kei neꞌie tolimaa a God nge kire sereꞌi lae i sulie. 35Na mo loꞌongaꞌinge mumuni mwala ngeena ke si haataꞌi i leune. Oto iꞌoe, o kei saehuu na o kei hii aaela oto mala kire otomie saemu aana naihi.”
A Propet Anna E Paalahea God Haahie A Jisas
36Na ngaeta mei nao keni satana a Anna ingeie noꞌone aana maholona. A huꞌena ingeie nga propet noꞌone na ingeie kalena a Panueli, mwane aana komu a Asa. E toꞌo-toꞌo poro taane, taꞌe e iiꞌo mola peꞌie poro ingeie hunie e hiu aata halisi, 37na poro ingeie ko mae oto mwaanie, oto e si iiꞌo mola maraana. A keine e walu-aawalai helisi mwana hai e mango oto aana, na e talei oꞌoꞌo mola i Nume Maaꞌi na e palo-paloa mola a God susue aatowaa na rodo aani oolongaunge na aani aarengaꞌinge. 38Oto mola aana taꞌa-taꞌa maholoi satona, nge a huꞌena e lae mai saada na ko talaꞌai paalahea God. Oto aana mo dinge loꞌu i puri, a huꞌena ko si haꞌa-haꞌarongoa mwala uri a Jisas ingeie oto a Haꞌa-uuri. E ere urine hunie ahutana mo iini nge kire ko maaꞌoohie uri a God kei tapa oolisie mwala ni Israel.
39A Josep na Meri kirerue haro asu mangoa mo ola i sulie haꞌatolanga a Aalaha, nge kire si ooli takoie huilume ikire i Nasaret hao i Kalili. 40Oto kele wee-wee ko peine taꞌe oto hao. E paine aꞌailaꞌa, na e honu aani saenanaunge, na haꞌadianaꞌanga a God e iiꞌo oto aana.
A Mwaꞌune E Lai Ere Peꞌie Mo Haꞌa-uusuli I Nume Maaꞌi Peine
41E ro mauꞌana a Jisas kirerue ko lae-lae i Jerusalem i suli helisi hunie Houlaa Ni Liumwaanie. 42Oto maholo a Jisas e hule aana aawalai helisi mwana rue, kiraelu ko lae oto loꞌu mala kirerue ko lae-lae i suli helisi. 43Maholo mo dinge paine ngeena kire mango oto, nge mwala ko si ooli takoie mo henue ikire. Taꞌe a Jisas e oore mola ue i puri taꞌau i Jerusalem, na aamana na nikana kaꞌa saie. 44Kirerue ko loꞌo-loꞌongaꞌi uri ingeie taane peꞌire i laona laeha. Kire ko lae oto hunie hai dinge laku, oto i seulehi kirerue ko si aehota loꞌohie i saana mwala ikire na mo malahude. 45Kirerue loꞌo-loꞌohie na kirerue kaꞌa lio oodoie, oto kirerue ko eelihoꞌi loꞌu hunie i Jerusalem. 46Oto i purine e oolu hei dinge e saro mango oto, nge kirerue ko si lai lio oodoie i matolana mo haꞌa-uusuli ni Jiu taꞌau i laona Nume Maaꞌi Peine, na ko rorongo i sulire peꞌi dodolosi ola aada. 47Na ahutana mwala nge kire rorongoa ere-erenga ingeie, kire ko tohungei pangataꞌinie saenanaunge ingeie oto hiitoꞌo na mo aalaminge e dauꞌine.
48Aamana na nikana kirerue lae taꞌau i lio oodoie, kirerue ko tohungei pangataꞌi oto hiitoꞌo. Oto a nikana ko teꞌuri hunie, “?Kaleku, e ue ni o ko teꞌurine aamereꞌi? Ineu na aamamu, mere ko tohungei heitaleꞌo peꞌi saehuunge oto hiitoꞌo.”
49Oto a Jisas ko aalamirerue uuri, “?E ue nge more ko heitaleau urine? ?Uri more kaꞌa saie ike leu i sapeku hunie ne ke iiꞌo i nume Aamaku?” 50Taꞌe kirerue kaꞌa rongo saie ike nga taa e unue.
51Oto a Jisas e si eelihoꞌi peꞌirerue hunie i Nasaret, aana e tola i sulirerue. A nikana ko talei loꞌo-loꞌongaꞌi mola i sulie mo ola e rau ngeena i saena. 52Oto a Jisas ko si peine taꞌe peꞌi saenanaunge oto loꞌu liutaa. Na a God ko tohungei saemango oto hiitoꞌo haahie, na mwala ko meni ilenimwaꞌe oto noꞌone haahie.
3A Jon Loto Maaꞌi E Dau Aakau Aana Saena Mwala Hunie Hulanga A Jisas
Matiu 3:1-12, Mak 1:1-19, Jon 1:19-28
1Oto e hule aana aawalai helisi mwana lime aana mo helisi nge a Taebirias e inemauri haahie aalahanga mo Rom. Aana maholona a Pontias Paelat ko aalaha haahie poꞌo ni henue i Jiudia, na a Herod Antipas ko aalaha haahie poꞌo ni henue i Kalili. A Pilip, aasine a Herod, ko aalaha haahie e ro poꞌo ni henue i Iturea na i Trakonaetis, na a Lisanias ko aalaha haahie poꞌo ni henue i Abilin. 2E ro naꞌohai pris mo Jiu aana maholona oto a Anas na a Kaiapas. Aana maholona, nge mei wala e si uure mwaanie a God hunie a Jon kalena Sekaraea, na ingeie i laona hanuesala.
3Oto a Jon ko lae oto i sulie ahutana mo henue kali-kelie wai peine i Jodan na ko tarohaꞌinie hunie mwala uri kire ke aaliꞌu toꞌohuu mwaanie oorahaꞌaa, nge kire ke si loto maaꞌi hunie a God ke saeꞌaasie mo oorahaꞌaa ikire. 4E asuie oto urine mala uusulana e lae i laona uusu-uusu a Propet Aesaea aana e unue uuri, Nga iini ko soi-soi peine i laona hanuesala uuri, “Omu ke dau aakau aana tala loosie laenga mai a Aalaha, na omu ke haꞌa-oodohie tala ni lae ingeie.5Omu ke aanomie ahutana mo deiderie. Omu ke haꞌasadaa mo uuwo na mo toloihenue, na omu ke haꞌa-oodohie mo tala kire mwaꞌilu, na omu ke mwanaa mo tala hunie kire ke mwana-mwanaꞌa.6Hunie ahutana mwala ke mani leesie haꞌa-uuringe a God.”Aesaea 40:3-5
7Mwala oto hunge kire lae mai saana a Jon hunie ke loto maaꞌi aada. Oto e si teꞌuri mola hunire, “!Iꞌomu oto mo mwaa ala-ala! ?Omu ko loꞌo-loꞌongaꞌi uri mala omu ko loto maaꞌi haꞌalaa, omu ko tehisie saewasunge a God nge kei lae maine? 8!E aasa! Taꞌe omu ke hungu eeni hue-huei ola diana i laona mau-meuringe iꞌomu huni haataꞌinie uri omu oonisae toꞌohuu oto mwaanie ahutana mo oorahaꞌaanga iꞌomu. Na mwaanie omu loꞌo-loꞌongaꞌinie uri omu kei tehisie saewasunge a God aena aana omu hute aana komu a Ebraham. Leune e saꞌa peꞌiꞌomu ike aana no ko unue huniꞌomu uri a God e sai huꞌisie mola mo heu ienini hunie kire ke neꞌi iinoni haalu hunie komu a Ebraham. 9Aana a God e urihana mwane e neꞌi aakau oto aana hau tou-tohu i aeꞌaena mo ei, na mo ei nge kire kaꞌa hungu ike aani hue-huei ei diana, kei tohu aasiꞌi na aasileni kei lae i laona dunge.”
10Oto mwala ko dolosi aana uuri, “?Nge ko urine, nga taa kaꞌu melu ke si esuie?”
11Oto a Jon ko aalamire ko teꞌuri, “A tei ko toꞌo aana nga ro toꞌoni, ke niie nga iini nana iinoni nge e kaꞌa toꞌo aana ike nga iini. Na a tei ko toꞌo ngaulaa, ke nii-niiꞌi noꞌone urine.”
12Ngaeta mwala susulu toꞌoha hunie aalahanga ni Rom kire lae noꞌone mai uri hunie a Jon ke loto maaꞌi aada. Oto kire ko dolosi aana uuri, “?Haꞌa-uusuli, oto iꞌemeelu, melu kei ue?”
13Oto a Jon ko teꞌuri hunire, “Omu ke suꞌuri tola toꞌoha liutaa aana loꞌu nga taa kire hatongaꞌinie huniꞌomu mwaanie mwala.”
14Ngaeta mo ramo ko dolosi noꞌone aana a Jon uri, “?Nge iꞌemeelu? ?Melu kei ue?”
Oto ko teꞌuri hunire, “Mwaanie omu deu-deu rarahie nga iini hunie mo toꞌoha ingeie, wa omu ke ere-ere aana mola tototala. Taꞌe omu ke ilenimwaꞌe mola haahie holitemiu.”
15Mwala ko meni maaꞌoohie mone a Kraes, oto kire ko loꞌongaꞌi heiliu oto i sulie a Jon. Kire ko loꞌongaꞌi oto uuri, “Ohe ingeie ni oto a Kraes.”
16Oto a Jon ko si aalamire ko teꞌuri, “Ineu a Kraes haꞌike. Ineu no ko loto maaꞌi eemiu mola aani wei, taꞌe iini nge ko lae mai i puriku, e paine loꞌu liutaa aaku, hule aana ineu na nou kaꞌa diana ike malisine ne ke asu mala koni-konihe huni luhesie hoꞌohaahiꞌae ingeie. Ingeie ke si loto maaꞌi aana ngaeta mwala aana Liꞌoa Maaꞌi, na ngaeta mwala kei lotohire aana dunge ni haꞌamotaahinge. 17Ingeie ni e toꞌo aana nanamanga huni leie ahutana iinoni. Aana e urihana iinoni nge ko taꞌaasie mo hule-hulei kooni mwaanie mo tohungei ola. Oto ko si neꞌi konie mo tohungei ola i lengine haa i laona nume ni duru ingeie. Taꞌe mo hule-hulei ola aaela ngeena, nge kei uunuꞌi aana dunge nge e saꞌa mwaꞌa ike loꞌu.”
18Mo tala hunge a Jon Loto Maaꞌi e lae peꞌi laeliwala aana Tataroha Diana hunie mwala aani, na huni ere haꞌasusue mwala. 19Na e tohungei ere aana a Herod Antipas hiitoꞌo haahie e toꞌo aana loꞌu mola a Herodias, huꞌe a mwane aasine. Na e ere aana noꞌone a Herod haahie ahutana mo ola aaela e dau huꞌisiꞌi. 20Oto a Herod e si sapeie loꞌu mo aaelanga ngeena aana e neꞌie a Jon i laona nume ni hoꞌo.
A Jon E Loto Maaꞌi Aana A Jisas
21Maholo kire kaꞌa neꞌie ue a Jon i laona nume ni hoꞌo, ngaeta hai dinge e loto maaꞌi aana mwala, na e loto maaꞌi loꞌu aana a Jisas. Na aana maholo a Jisas ko aarea a God, nge i Lengi e si taha, 22na Liꞌoa Maaꞌi e siho mai i lengine mala hiroikuu. Oto mei wala e uure mai Lengi, na ko teꞌuri, “Iꞌoe oto hahuꞌana kaleku, na nou tohungei manata diana huniꞌo, na no ko ilenimwaꞌe oto liutaa haahiꞌo.”
Uusulana Mo Weuwana A Jisas
23Maholo a Jisas e aehotaa asunge ingeie, na ola mala e oolu aawalai helisi mola ue e mango aana, na mwala e loꞌongaꞌi uri ingeie kalena Josep.
A Josep e uure mwaanie a Hilae.
24A Hilae e uure mwaanie a Matat.
A Matat e uure mwaanie a Livae.
A Livae e uure mwaanie a Melkae.
A Melkae e uure mwaanie a Janae.
A Janae e uure mwaanie a Josep.
25A Josep e uure mwaanie a Matataeas.
A Matataeas e uure mwaanie a Emos.
A Emos e uure mwaanie a Neham.
A Neham e uure mwaanie a Eslae.
A Eslae e uure mwaanie a Nagae.
26A Nagae e uure mwaanie a Meata.
A Meata e uure mwaanie a Matataeas.
A Matataeas e uure mwaanie a Semein.
A Semein e uure mwaanie a Josek.
A Josek e uure mwaanie a Joda.
27A Joda e uure mwaanie a Joanan.
A Joanan e uure mwaanie a Risa.
A Risa e uure mwaanie a Serababel.
A Serababel e uure mwaanie a Sialtiel.
A Sialtiel e uure mwaanie a Nirae.
28A Nirae e uure mwaanie a Melkae.
A Melkae e uure mwaanie a Adae.
A Adae e uure mwaanie a Kosam.
A Kosam e uure mwaanie a Elmadam.
A Elmadam e uure mwaanie a Ere.
29A Ere e uure mwaanie a Josua.
A Josua e uure mwaanie a Eliesa.
A Eliesa e uure mwaanie a Jorim.
A Jorim e uure mwaanie a Matat.
A Matat e uure mwaanie a Livae.
30A Livae e uure mwaanie a Simeon.
A Simeon e uure mwaanie a Jiuda.
A Jiuda e uure mwaanie a Josep.
A Josep e uure mwaanie a Jonam.
A Jonam e uure mwaanie a Elaeakim.
31A Elaeakim e uure mwaanie a Milia.
A Milia e uure mwaanie a Mena.
A Mena e uure mwaanie a Matata.
A Matata e uure mwaanie a Netan.
A Netan e uure mwaanie a Deved Inemauri.
32A Deved Inemauri e uure mwaanie a Jesi.
A Jesi e uure mwaanie a Obed.
A Obed e uure mwaanie a Boas.
A Boas e uure mwaanie a Salmon.
A Salmon e uure mwaanie a Nason.
33A Nason e uure mwaanie a Aminadab.
A Aminadab e uure mwaanie a Admin.
A Admin e uure mwaanie a Anae.
A Anae e uure mwaanie a Hesron.
A Hesron e uure mwaanie a Pires.
A Pires e uure mwaanie a Jiuda.
34A Jiuda e uure mwaanie a Jekob.
A Jekob e uure mwaanie a Aesak.
A Aesak e uure mwaanie a Ebraham.
A Ebraham e uure mwaanie a Tera.
A Tera e uure mwaanie a Neho.
35A Neho e uure mwaanie a Sirag.
A Sirag e uure mwaanie a Riu.
A Riu e uure mwaanie a Pileg.
A Pileg e uure mwaanie a Eba.
A Eba e uure mwaanie a Sila.
36A Sila e uure mwaanie a Keinan.
A Keinan e uure mwaanie a Afaksad.
A Afaksad e uure mwaanie a Siem.
A Siem e uure mwaanie a Noa.
A Noa e uure mwaanie a Lamek.
37A Lamek e uure mwaanie a Metusala.
A Metusala e uure mwaanie a Inok.
A Inok e uure mwaanie a Jered.
A Jered e uure mwaanie a Mahelalel.
A Mahelalel e uure mwaanie a Kenan.
38A Kenan e uure mwaanie a Enos.
A Enos e uure mwaanie a Set.
A Set e uure mwaanie a Adam.
A Adam e uure mwaanie a God.
4A Satan E Malaahongana A Jisas
1Oto a Jisas e aalihoꞌi mwaanie wai i Jodan, na Liꞌoa Maaꞌi e iiꞌo oto peꞌie, e si toolea taꞌau i henuesala. 2Na a Satan e malaahongana hunie hai aawalai hei dinge, na e kaꞌa hikana nga mei ngeulaa aana maholona, oto ko hiolo.
3Oto a Satan ko teꞌuri hunie, “Mala o ko neꞌie Kalena God toꞌohuu, o ke unue ho heu ie ke neꞌi bred.”
4Taꞌe a Jisas e aalamie mola uuri, “Mo Uusu-uusu Maaꞌi e unue uuri, Iinoni e saꞌa mauri ike mola aani bred hahaiteli.”Diutronomi 8:3
5Oto a Satan ko heꞌi toolea loꞌu taꞌau, na ko tolana haataꞌi lau-leu oto aana ahutana mo aalahanga aana walumalau hunie. 6Oto a Satan ko heꞌi teꞌuri loꞌu hunie, “Nou sai niie ahutana mo aalahanga ie namue peꞌie manikuluhaꞌani hunie o ke paine haahiꞌi, aana niilana e lae oto hunieu uri ineu ne ke si niiꞌi hunie taꞌena nga iini i sulie saeku. 7Oto mala uri o kei pouruuru ni haꞌamaꞌunge aaku na o kei palo-paloau, nge ne kei niie ahutana mo ola ienini namue.”
8Oto a Jisas ko aalamie loꞌu uuri, “Mo Uusu-uusu Maaꞌi e unue uuri, Omu ke palo-paloa mola taꞌe a God Aalaha iꞌomu, na omu ke asu mola nana taꞌe ingeie haliꞌite.”Diutronomi 6:13
9Oto a Satan ko heꞌi toolea loꞌu a Jisas taꞌau i Jerusalem, na ko lai haꞌa-uuresie oto taꞌau i lengine ho susumaa aana Nume Maaꞌi Peine, ko si teꞌuri loꞌu hunie, “Mala o ko neꞌie Kalena God toꞌohuu, o ke toliꞌaasiꞌo uure i lengi i leu hunie o ke teke hao i aano. 10Aana mo Uusu-uusu Maaꞌi e unue uuri, A God kei uusungeꞌinie mo ensel ingeie huni lio i suli diana aamu.11Kire kei talaꞌahuaꞌo aana nimada mwaanie aeꞌaemu e hite aana nga ho heu.”Sam 91:11-12
12Oto a Jisas ko aalamie loꞌu a Satan ko teꞌuri, “Taꞌe mo Uusu-uusu Maaꞌi e unue noꞌone uuri, Omu ke suꞌuri oohongie a God Aalaha iꞌomu.”Diutronomi 6:16
13Oto maholo a Satan e malaahongana a Jisas aana mo tala ngeena mango, nge e si lae mwaanie a Jisas, ko lai maaꞌoohie nga maholo aaopa huni malaahongana loꞌu.
A Jisas E Aehotaa Asunge Ingeie Aana Poꞌo Ni Henue I Kalili
14A Jisas e aalihoꞌi loꞌu hunie poꞌo ni henue i Kalili, na e honu oto aana nanamanga aana Liꞌoa Maaꞌi. Oto tarohaꞌana e si taro i sulie ahutana mo henue aana poꞌo ni henuena. 15Na a Jisas e aehota haꞌa-haꞌa-uusuli i laona mo nume ni palo-palo na ahutana mwala kire ko meni lahea.
Mwala Ni Nasaret Kaꞌa Sare Rongo Hunie A Jisas
16Oto a Jisas e aalihoꞌi loꞌu i Nasaret, huilume nge e paine taꞌe aana. Oto aana Dinge Maaꞌi Mo Jiu, e lai sili weu i nume ni palo-palo ikire oto mala ko lae-lae tarau, na e uure i lengi huni saaie mo Uusu-uusu Maaꞌi. 17Oto kire ko niie uusu-uusu hio-hio a Propet Aesaea hunie, na ko tahanie oto aana leu nge e uusue uuri, 18Liꞌoa Maaꞌi a God oto peꞌieu, aena aana e lio hilisieu huni tarohaꞌinie Tataroha Diana hunie mo iinoni meitale. E uusungeꞌinieu huni tarohaꞌinie uri mo iini kire hoꞌosire i nume ni hoꞌo uri kire ke iiꞌo luhetaꞌi oto, na huni haꞌarongoa mo ulu uri kire ke lio loꞌu,Aesaea 61:1na huni unue hunie mo iini kire iiꞌo i mamalutana mwala e sai haꞌamweꞌu-mweꞌu uri kire ke iiꞌo luhetaꞌi loꞌu,Aesaea 58:619na huni tola tahangaꞌinie uri e hule oto aana maholo a God kei peꞌie mwala ingeie.Aesaea 61:2
20Oto a Jisas e si lulungie uusu-uusu hio-hio, ko niie hunie iini ko hei raretaꞌi aana nume ni palo-palo ngeena, na ko iiꞌo oto i aano huni haꞌa-uusuli. Maholona oto ahutana mwala i laona nume ni palo-palo ngeena kire ko si meni lio hahuroto oto aana.
21Oto a Jisas ko aehota ere-ere hunie mwala e loko ngeena na ko teꞌuri, “Mei wala aana mo Uusu-uusu Maaꞌi nge omu si kele rongoa saailana e lae namiu ngeena, ko oa oto huniꞌomu siꞌiri.”
22Oto ahutana mwala ngeena kire ko si meni lahea oto peꞌi pangataꞌinilana mo eehuꞌi wala nge ko unuꞌine, taꞌe kire ko unue loꞌu uuri, “A mwane ngeena, ingeie kalena Josep mola ni ngeena.”
23Oto a Jisas ko teꞌuri hunire, “Nou saie mola karaꞌinie omu kei unue mei wala ni aalahuunge ngeena hunieu uuri, ‘Mwane kure-kure, o ke haꞌa-uuriꞌo kaꞌu.’ Aana omu ko loꞌongaꞌinie mola uri, e lae otoi diana uri mo huꞌi-huꞌite nge omu rongoa nou esuiꞌi keꞌu hai Kapaneam, ne ke asuiꞌi loꞌu mei leu. 24Taꞌe no ko unue oto huniꞌomu uri mwala aana tohungei henue nga propet, e aasa oto hunie kire ke haꞌamaꞌu aana wa kire ke rongo hunie. 25Nga taa no ko unue ie e toꞌohuu. Aana maholo pongine a Propet Elaeja, mo nao keni hunge kire oꞌoꞌo i Israel. Aana maholona e kaꞌa nemo ike hunie e oolu helisi peꞌie e oono waro-waro, na hiolonga paine e toolea ahutana hanue. 26Taꞌe hule aana uusungeꞌinilana Elaeja e kaꞌa lae ike i saana nga taꞌa-taꞌa iini aada. Uusungeꞌinilana e lae mola huni peꞌie mei nao keni aana huilume mo puꞌo wau i Serepat aana poꞌo ni henue i Saedon. 27Na aana maholo pongine a Propet Elaesa mwala hunge ni Israel kire toꞌo aana maelaa ni osa, taꞌe e kaꞌa haꞌa-uurie ike nga iini aada. Taꞌa-taꞌa iini e haꞌa-uurie oto a Neman, mwane aana aalahanga mo puꞌo i Siria.”
28Oto maholo mwala i laona nume ni palo-palo ngeena kire rongoa walu ola ienini, kire ko si tohungei saewasu. 29Oto kire tauleꞌi, kire ko oohea oto taꞌau i lengine tolana uuwo nge hanue ikire e iiꞌo aana, aena aana kire sasare pwelusie i kere-kerena maoꞌi aana leu e aasa. 30Taꞌe maholo kire hule aana leune, a Jisas e liu mola i matolada, e si lae mwaanire.
A Jisas E Haꞌa-uurie Mwane Liꞌoa Aaela E Hite Aana
31Oto a Jisas e si lae hunie huilume i Kapaneam aana poꞌo ni henue i Kalili. Na aana Dinge Maaꞌi Mo Jiu e si haꞌa-uusulie mwala. 32Ahutana mwala ko tohungei pangataꞌinie haꞌa-uusulinge ingeie, aana ko haꞌa-uusuli aana nanamanga.
33Na nga mwane liꞌoa aaela aana ingeie noꞌone wau i laona nume ni palo-palo aana maholona. A mwaena ko toolea oto aawaranga paine na ko unue uuri, 34“!Aaia! !Jisas ni Nasaret! ?O kei ue emeelu loꞌu eena? ?Ohe o lae oto mai huni waeliꞌemeelu ni ngeena? Ineu nou saiꞌo mola. Iꞌoe iini maaꞌi a God.”
35Oto a Jisas ko si ere aana liꞌoa aaela ngeena ko teꞌuri, “O ke rohu oto, na o ke lae mwaanie a mwane ngeena.” Oto liꞌoa aaela ngeena e kaꞌa waelie loꞌu a mwaena, taꞌe e si reputeꞌinie mola hai aano i matolana mwala na ko iisitaa oto mwaanie.
36Ahutana mwala ko si meni pangataꞌi na kire ko ere hailiu oto i matolada uuri, “?Nga mei haꞌa-uusulinge uri taa ni ienini? Aana a mwane ie e toꞌo aana nanamanga huni ere aana mo liꞌoa aaela peꞌie mei wala e saka, oto kire iisitaa oto.” 37Oto tataroha aana Jisas ko si tatangasie oto ahutana poꞌo ni henuena.
A Jisas E Haꞌa-uurie Mwala Hunge
38Oto a Jisas e uure mwaanie nume ni palo-palo mo Jiu ko si lai sili i nume a Saemon. Keni hungaona Saemon ko tohungei mataꞌi oto hiitoꞌo, oto mwala ko aitanaie Jisas uri ke peꞌie. 39Oto e lae wau i uure i sulie tahe a huꞌena, ko si ere aana mataꞌi ngeena uri ke lae mwaanie. Mataꞌi ngeena e lae oto mwaanie a huꞌena, na e tolana taꞌelaꞌi, na ko raretaꞌinire oto.
40Oto aana maholo ko seulehi oto, mwala e toꞌo aana mo iini ko mweri aani maelaa hai aaopaꞌi kire ko toolera oto mai saana a Jisas. Na e hele i sapeda aana nimana, na ko haꞌa-uurire oto. 41Mo iini hunge mo liꞌoa aaela e iisitaa noꞌone mwaanire, na kire ko aawara uuri, “!Iꞌoe oto Kalena God!” Taꞌe a Jisas e ere aada mwaanie uri kire heꞌi unue loꞌu nga mei wala, aana kire saie uri ingeie ni oto a Kraes.
A Jisas E Laeliwala I Laona Mo Nume Ni Palo-palo Mo Jiu
42Oto e dangi hoꞌowa, a Jisas e uure mwaanie huilumena ko si lae huni iiꞌo maraana aana nga leu, taꞌe mwala ko loꞌohie loꞌu mola. Maholo kire lio oodoie, oto kire ko sare uure honosie uri mwaanie e heꞌi lae loꞌu mwaanire. 43Taꞌe a Jisas e teꞌuri hunire, “Ne kei lae peꞌi laeliwala noꞌone aana Tataroha Diana aana Aalahanga God nana ngaeta mo henue, aena aana leune mone a God e uusungeꞌinieu mei.” 44Oto a Jisas e si lae peꞌi laeliwala i laona ahutana mo nume ni palo-palo mo Jiu ahusie oto ahutana hanue i Jiudia.
5Mo Pwaarongoisuli A Jisas E Holaꞌi Soire
1Ngaeta hai dinge a Jisas e uure i reune Aasi I Kalili na mwala hunge kire loko noꞌone mai saana. Oto mwala ngeena kire ko uure suꞌu-suꞌuie, aena aana kire ko sare rongoa walana God. 2Oto a Jisas e leesie e ro iiola kire ooke puri eeni hai oone, na mwala wee-weesi e lae oto mwaaniꞌi aana kire ko hodalie mo huꞌo ikire. 3A Jisas e hane i laona ngaeta iiola, iini a Saemon, na ko unue hunie uri ke kele uusue wau mwaanie oone. Oto e iiꞌo i laona iiola, ko si haꞌa-uusulie mwala.
4Maholo e ere-ere mango nana mwala, e si unue hunie a Saemon uuri, “O ke dau suꞌuweu aana leu kokoro, na omu ke aatongie huꞌo i eesi hunie nga mo iiꞌe.”
5Oto a Saemon ko aalamie na ko teꞌuri, “Poro paine, melu haꞌaweoꞌemeelu kaꞌu aani lionga haidengieꞌi, na melu kaꞌa kele saunie ike nga mei ola. Taꞌe i sulie walamu, nge ne kei heꞌi aatongie loꞌu huꞌo.”
6Oto kire ko aatongie loꞌu huꞌo, na kire ko si weꞌi haahie mo iiꞌe oto hunge, hule aana huꞌo na ko karaꞌi haka oto loꞌu. 7Oto kire soie mo oada aana ngaeta iiola huni lae mai peꞌire. Mo oada kire lae mai saada, kire ko si haꞌahonue ahutana e ro iiola aani iiꞌe, hule aana kire ko karaꞌi dodo oto.
8Maholo a Saemon Pita e leesie nga taa e rau ngeena, oto ko si pouruuru i naꞌona Jisas na ko teꞌuri, “O ke lae mwaanieu Aalaha, aana ineu iinoni ni oorahaꞌaa.” 9Aana a Pita na mo iini loꞌu peꞌie kire ko si meni pangataꞌinie mo iiꞌe oto hunge nge kire waꞌi haahiꞌine. 10A Jemes na a Jon, e ro kalena Sebedi, e ro oana a Saemon na kirerue ko tohungei pangataꞌi noꞌone.
Oto a Jisas ko teꞌuri hunie a Saemon, “Mwaanie o maꞌu-meꞌu. Uure siꞌiri pwau weu, o kei neꞌi iinoni wee-weesi oto hunie mo iinoni.” 11Oto kire ookea mo iiola i oone, na kire toli puri aana toꞌo-toꞌolada, kire si lulu i sulie a Jisas.
A Jisas E Haꞌa-uurie Mwane Ko Mweri
12Ngaeta maholo a Jisas e iiꞌo aana ngaeta huilume na mwane ko sapesalu aana maelaa ni osa, ingeie noꞌone i leune. Oto maholo a mwaena e leesie a Jisas, ko si lai pouruuru honosie na ko haꞌatohu aana uuri, “Aalaha ineu, mala o ko mwaꞌe-mwaꞌe, o ke kuraa sapeku hunie ne ke rereꞌa adona iiꞌonga loꞌu peꞌie mwala a God.”5:12 Mo Haꞌatolanga mo Jiu e unue uri mwala peꞌie maelaa aaela ngeena, kire tohungei madaꞌa i maana God. Kire madaꞌa oto liutaa, hule aana iini nge ko kele kopi mola aana iini e toꞌo aana maelaa ngeena kei madaꞌa noꞌone mala ikire. Aena urine mo Jiu kaꞌa toliꞌaasie kire ke iiꞌo i laona mo huilume, wa kire ke lae mai i laona leu ni uusiꞌe, wa kire ke lae mai i laona mo nume ni palo-palo mo Jiu. Leesie Levitikas 13:45-46.
13Oto a Jisas e si susueꞌinie wau nimana huni hele i sapena mwaena, na ko aalamie uuri, “Iau, nou mwaꞌe-mwaꞌe taane. Sapemu ke mola oto.” Oto maelaa ni osa ngeena e tolana mango oto mwaanie.
14Oto a Jisas ko si teꞌuri hunie, “Mwaanie o haꞌa-haꞌarongoa nga iini aana nga taa e rau. Taꞌe o ke oodo mola i saana mo pris hunie kire ke saie uri sapemu e mola oto. Na o ke niie uuraaꞌinge hunie a God mala mo Haꞌatolanga a Mosis e unue. Urine ahutana mwala kire ke si meni saie uri sapemu e mola oto.”
15Taꞌe tataroha aana Jisas e si taro hiitoꞌo loꞌu mola, nge mwala hunge e si lae mai huni rongoa Jisas, na hunie ke haꞌa-uurire mwaanie taꞌena nga maelaa. 16Taꞌe ingeie e heꞌi lae loꞌu mola mwaanire huni iiꞌo maraana huni aarengaꞌi.
A Jisas E Haꞌa-uurie Mwane E Rarasi
17Aana ngaeta hai dinge a Jisas e haꞌa-uusulie mwala, na ngaeta mo Parise na mo haꞌa-uusuli aana mo Haꞌatolanga a Mosis, ikire noꞌone i leune. Kire uure noꞌone mai mwaanie i Jerusalem na ahutana mo huilume aana mo poꞌo ni henue i Kalili na i Jiudia. Na a Jisas e toꞌo aana nanamanga a God e waꞌu huni haꞌa-uurie mo iini ko mweri. 18Ngaeta mo mwane kire lae mai na kire aangaꞌinie mwane e rarasi aana hulite. Oto mo mwaena ko sare toolea i nume hunie kire ke neꞌie i naꞌona Jisas. 19Taꞌe aena aana mwala e hunge, oto kire kaꞌa saie ike uri kire kei liu peꞌie uri taa i nume. Oto kire aangaꞌinie, kire ko si hane peꞌie mola taꞌau i koluhana nume. Oto kire si hokaꞌie koluhana nume talana mwane rarasi ngeena. Oto kire uukue mola i aano i matolana mwala i naꞌona Jisas. 20A Jisas e leesie hiiwalaimolinge mo mwane ngeena e paine, e si teꞌuri hunie mwane e rarasi ngeena, “Kaleku, mo oorahaꞌaa iꞌoe saeꞌaasileni e lae oto.”
21Oto mo Parise na mo haꞌa-uusuli aana mo Haꞌatolanga a Mosis, kire ko aehota papanguru-nguru oto hunire maraadaelu uuri, “?A tei mwane ni ko ere toohaꞌinie uri ingeie e paine mala God ie? Taꞌa-taꞌa iini e sai saeꞌaasi oorahaꞌaa oto mola nge a God.”
22Oto a Jisas mone e saie mola mo loꞌongaꞌinge ikire, ko si teꞌuri hunire, “?E ue nge omu ko loꞌo-loꞌongaꞌi oto hiitoꞌo urine? 23Omu saie kaꞌu uri erenga ni mola e mwadaꞌu, na taꞌena nga iini e sai unue mola uuri, ‘Mo oorahaꞌaa iꞌoe saeꞌaasileni e lae oto,’ na loꞌu uuri, ‘!Taꞌelaꞌi! !O ke lae-lae oto!’ Taꞌe huni esuie e ro mei neꞌisaenga ngeena, kire tohungei aasa oto hiitoꞌo hunie iinoni. 24Taꞌe ineu, a Kale Ni Iinoni, ne kei esuie mola mei ola hunie omu ke lio saie uri ineu, nou toꞌo aana noꞌone nanamanga huni saeꞌaasi oorahaꞌaa mai aano i leu.”
Oto a Jisas e si unue hunie mwane e rarasi ngeena uuri, “!Taꞌelaꞌi! O ke toolea hulite iꞌoe na o ke lae-lae oto i nume iꞌoe.”
25Oto a mwaena e tolana taꞌelaꞌi oto i naꞌona ahutada, e toolea hulite nge e eno-enohie, na ko lae oto peꞌi paalahea God i nume ingeie. 26Oto ahutana mwala ko si meni pangataꞌi, na kire ko soi haꞌamanikuluꞌaa God. Taꞌe kire ko meꞌu noꞌone, oto kire ko unue uuri, “!Haꞌike eena! Mo ola e si lai lio aaopa kaꞌu kolu ko leesiꞌi siꞌiri ie.”
A Jisas E Soie A Livae
27Oto i purine, a Jisas e si lae mwaanie huilume na ko leesie nga mwane satana a Livae e iiꞌo aana leu ingeie huni totola toꞌoha aana takis hunie aalahanga ni Rom. Oto a Jisas ko teꞌuri hunie, “O ke lulu i sulieu.” 28Oto a Livae e taꞌelaꞌi, ko toli puri oto aana toꞌo-toꞌolana na ko lulu i sulie oto.
29Oto a Livae ko esuie ngaunge paine hunie a Jisas i nume ingeie, na mwala hunge kire loko aana ngaunge ngeena. Hungelana mwala e loko ngeena, ikire mwala susulu toꞌoha noꞌone. 30Aena leune, ngaeta mo iini aana mo Parise na mo haꞌa-uusuli aana mo Haꞌatolanga a Mosis kire ko upwesie mo pwaarongoisuli a Jisas uuri, “?E ue nge omu ko ngeu na omu ko inu peꞌie mo iinoni oorahaꞌaala mala mo mwane susulu toꞌoha ngeena?”
31Taꞌe a Jisas ko aalamire uuri, “Iinoni nge e awaa mola saꞌa saetoꞌo aana ike mwane kure-kure, taꞌe iini nge ko maelaaꞌa haꞌalaa. 32Nou lae mai huni haaraie mo iinoni oorahaꞌaa ke oonisae, na nou kaꞌa lae ike mai huni haaraie mo iini kire unue kire diana oto.”
Haꞌa-uusulinge Haalu Ke Suꞌuri Pwaidora Peꞌie Haꞌa-uusulinge Lalahuꞌe
33Oto ngaeta mo iini ko unue hunie a Jisas uuri, “Mo pwaarongoisuli a Jon nge kire ko oolo-oolongau tarau, hunie aarengaꞌinge. Mo iini ikire mo Parise na kire ko teteꞌurine noꞌone. ?Taꞌe e ue nge mo pwaarongoisuli iꞌoe kire ko talei ngeu-ngeu na inu-inu mola?”
34Oto a Jisas ko aalamire uuri, “?Mo malahune a poro haalu kire kei saehuu uri taa na kire ko ngeu-ngeu ue aana ngauhe ni haꞌarurunge na a poro haalu e iiꞌo ue peꞌire? 35Taꞌe kei hule aana hai dinge nge kire kei toolea poro haalu mwaanire, nge kire ke si oolongau taane.”
36Oto a Jisas ko heꞌi unue loꞌu mei wala ni aalahuunge ie i sulie haꞌa-uusulinge haalu ingeie hunire uuri, “Nga iini e saꞌa aꞌarie ike nga leu aana toꞌoni haalu huni loꞌamenaa nga toꞌoni lalahuꞌe. Mala uri kei teꞌurine, ko waelie mola toꞌoni haalu ni ngeena, aena aana mei loꞌamena haalu e saꞌa sada ike peꞌie toꞌoni lalahuꞌe. 37Wa uri nga iini saꞌa huie ike waen haalu i laona mo ateꞌa lalahuꞌe nge kire asuiꞌi eeni teꞌe-teꞌei nanikot. Mala kei teꞌurine, ahutana e ro mei ola ngeena kei meni aaela, aana waen haalu kei hokaꞌie mola mo teꞌe-teꞌei olana, oto waen ko si aahe aasie mola. 38!Haꞌike! Taꞌe neꞌi-neꞌie oto waen haalu i laona mo ateꞌa aani teꞌe-teꞌei nanikot haalu haliꞌite. 39Taꞌe omu saie mone tolahana mo iinoni. Kire kei sereꞌinie haꞌa-uusulinge haalu ineu mala mwala kaꞌa saetoꞌo aana ike waen haalu i purine inuhilana waen lalahuꞌe.”
6Mo Parise Kire Ere Haitapali Peꞌie A Jisas Haahie Hai Dinge Maaꞌi
1Ngaeta Dinge Maaꞌi Mo Jiu a Jisas e lai liu i laona mo hohola aani ola mala kooni. Oto mo pwaarongoisuli ingeie kire ko aroa mo hue-huei ola, kire taꞌaasie hule-huleni, oto kire ko ngeuꞌi. 2Oto ngaeta mo Parise kire ko dolosi uuri, “?E ue nge omu ko deu esunge mola aana Dinge Maaꞌi ikie, mei ola e aapu aana Haꞌatolanga a Mosis?”
3Oto a Jisas e aalamire ko teꞌuri, “Omu saie taane nga taa nge a Deved Inemauri e asuie, aana maholo ingeie na ngaeta mo iini loꞌu peꞌie kire hiolo. ?Taꞌe e ue ni omu kaꞌa rongo saie ike neꞌisaenga aana? 4A Deved e lae sili i laona nume maaꞌi a God, na e ngaue ho bred maaꞌi, ola niilana e lae hunie a God. Taꞌe mo Haꞌatolanga a Mosis e unue e kaꞌa malisine ike ke ngaue, aana taꞌe mo pris haliꞌite kire sai ngaue taungei bred maaꞌi urine. Na a Deved e nii noꞌone ana mo iini kire lae peꞌie. Taꞌe maꞌalana e urine, a God kaꞌa leie ike haahie.” 5Oto a Jisas ko heꞌi teꞌuri loꞌu hunire, “Ineu a Kale Ni Iinoni oto nou aalaha haahie Dinge Maaꞌi.”
A Jisas E Haꞌa-uurie Mwane Nimana E Heko
6Oto aana ngaeta Dinge Maaꞌi Mo Jiu loꞌu, a Jisas e lai sili i nume ni palo-palo huni haꞌa-uusulie mwala. Na ngaeta mwane i leune kiꞌine i pwalo-pwalona e heko. 7Oto mo Parise na mo haꞌa-uusuli aana mo Haꞌatolanga a Mosis, kire ko talei toꞌo-toꞌomaaie ohe kei haꞌa-uurie a mwaena aana Dinge Maaꞌi, aana kire sare leesie uri a Jisas ke dau aaelasie nga mei ola hunie kire ke ere aana na kire ke toolea huni leie haahie.
8Taꞌe a Jisas e saie mone mola loꞌongaꞌinge ikire, ko si teꞌuri hunie mwane kiꞌine e heko ngeena, “O ke uure kaꞌu i naꞌona mwala.” Oto a mwaena e taꞌelaꞌi, e si uure haadaꞌi i naꞌona mwala. 9Oto a Jisas ko teꞌuri hunie mo iini kire ko upwesie ngeena, “Taꞌa-taꞌa mei ola nou sare dolosie aamiu. ?Nga taa ni Haꞌatolanga ikolu e toliꞌaasie huni esuie aana Dinge Maaꞌi? ?Huni peꞌie iinoni wa huni waelie mola? ?Huni haꞌa-uurie iinoni wa huni horoꞌie?” 10E ere mango urine, ko si toꞌomaaie nga iini, na e toꞌomaaie loꞌu nga iini. E toꞌomaaire mango, oto ko unue hunie mwane kiꞌine e heko ngeena uuri, “O ke lalaaꞌinie kiꞌimu.” Oto a mwaena ko lalaaꞌinie kiꞌine, na e diana oto loꞌu.
11Oto mo Parise na mo haꞌa-uusuli aana mo Haꞌatolanga a Mosis kire ko tohungei saewasu, na kire ko aehota ere oto i matolada maraada uuri, “?Ohe kolu kei uaa kaꞌu a mwane ngeena?”
A Jisas E Lio Hilisie Aawalai Hurulaꞌaa Mwana Rue
12Aana maholona a Jisas e hanetaa taꞌau i lengine ngaeta uuwo huni aarengaꞌi. E iiꞌo taꞌau i leune hai rodo laku aani aarengaꞌinge hunie a God. 13Oto e dangi hoꞌowa e soie mo iini ko lulu i sulie mai i saana, ko si lio hilisie aawalai mwane mwana rue mwaanire, na ko haaraꞌinire aana mo hurulaꞌaa. 14Na satana aawalai mwane mwana rue ngeena e uuri,
a Saemon nge a Jisas e heꞌi haaraꞌinie loꞌu aana a Pita,
na a Andru aasine,
na a Jemes,
na a Jon,
na a Pilip,
na a Batolomiu,
15na a Matiu,
na a Tomas,
na a Jemes kalena Alpeas
na a Saemon, ngaeta iini aana pulitaa nge ko sare haiseuni huni taꞌaasie aalahanga ni Rom mwaanie hanue i Israel,
16na a Jiudas kalena Jemes,
na a Jiudas Iskariot iini oto e pweloa Jisas.
Mwala Hunge Kire Aehota Lae I Sulie A Jisas
17Oto a Jisas na mo hurulaꞌaa ingeie kire siho mai mwaanie uuwo, kire si lae mai uure i laona mei oote. Aana maholona nge mwala hunge aana mo iini ko lulu i sulie a Jisas kire si loko mai i saana. Mwala hunge kire loko noꞌone uure mai mwaanie i Jerusalem na mwaanie ahutana oto poꞌo ni henue i Jiudia na mwaanie mo henue i sulie hatalea i Taea na i Saedon. 18Mwala ngeena kire lae mai huni rongoa a Jisas ko haꞌa-uusuli, na uri hunie haꞌa-uurilada ke lae mwaanie mo maelaa ikire. Mo iini ko siꞌohaꞌa aana mo liꞌoa aaela e hite aada na kire hule noꞌone, oto a Jisas e haꞌa-uurire. 19Ahutana mwala kire mani deu-deu uri kire ke kopi mola aana a Jisas, aena aana nanamanga ingeie ko haꞌa-uurie ahutana mo maelaa ikire.
Ilenimwaꞌenga Toꞌohuu E Aaopa Mwaanie Ilenimwaꞌenga Ni Welumalau
20Na a Jisas e toꞌo-toꞌomaaie mo pwaarongoisuli ingeie, ko si unue hunire uuri,
“Deidehiꞌomu mo iini nge omu meitale,
aena aana Aalahanga a God oto toꞌolamiu.
21Deidehiꞌomu mo iini nge omu ko hiolo oto ie,
aena aana omu kei pote taane.
Deidehiꞌomu mo iini nge omu ko ngara-ngara oto ie,
aena aana omu kei mwesi taane.
22Deidehiꞌomu mo iini nge mwala ko maalelediꞌomu, na kire ko teungeꞌiniꞌomu, na kire ko ere aaelasiꞌomu uri iꞌomu mo iinoni aaela aana omu ko lulu i sulieu a Kale Ni Iinoni.
23Omu ke tohungei ilenimwaꞌe aana maholona na omu ke mao-mao peꞌi saediananga,
aena aana waaitemiu e paine oto taꞌau i Lengi.
Na urine e haataꞌi diana aana uri omu urihana mo propet a God oto i naꞌo,
aana mo weuwada i naꞌo kire taungeꞌinire noꞌone urine.
24Taꞌe aama-aamasilemiu mo iini omu toꞌo-toꞌo oto,
aana ahutana walu ola e mani mwadaꞌusiꞌomu mango oto, taꞌe aasanga paine kei reꞌusiꞌomu taane.
25Aama-aamasilemiu mo iini omu ko pote oto ie,
aana omu kei saronai hiolo taane.
Aama-aamasilemiu mo iini omu ko mwesi peꞌi saediananga aana maholo ienini,
aana omu kei saronai saehuu peꞌi ngara aamasiꞌomu taane.
26Aama-aamasilemiu maholo mwala ko ere haꞌadianaꞌaꞌomu,
aana leune e haataꞌi diana aana uri omu meni sada oto peꞌie mo propet eero-eero i naꞌo, i sulie taꞌa-taꞌa taungei olana e rau keꞌu noꞌone aada.”
Kie Ke Manata Diana Hunie Ahutana Mwala
27Oto a Jisas e heꞌi unue loꞌu uuri, “Taꞌe ineu no ko unue huniꞌomu, mo iini omu ko pwaarongoa ere-erenga ineu, uri omu ke manata diana noꞌone hunie mo maelonga iꞌomu. Omu ke dau diana hunie mo iini ko maalelediꞌomu. 28Omu ke aitanaie a God hunie ke haꞌadianaꞌaa mo iini ko ere aaelasiꞌomu, na omu ke aarengaꞌi talana mo iini ko teungeꞌiniꞌomu. 29Mala nga iini ko mwakataꞌiniꞌo aani hidelilana papalimu, nge o ke toliꞌaasie ngaeta poꞌo ni papali loꞌu hunie. Mala nga iini ko toolea toꞌoni ni eeluhi iꞌoe, toliꞌaasie noꞌone toꞌoni ni lengi iꞌoe hunie. 30Omu ke nii-nii hunie taꞌena nga iini ko suke aamiu. Mala uri nga iinoni ko toolea nga mei ola iꞌoe, suꞌuri suke aalihoꞌi loꞌu aana. 31Mo ola nge saemiu mwala ke dauꞌi huniꞌomu, nge iꞌomu noꞌone omu ke dauꞌi hunie mwala. 32?Aana mala uri omu kei manata diana mola hunie mo iini e manata diana huniꞌomu, omu unue uri a God kei haꞌadianaꞌaꞌomu haahie leune? !Haꞌike oto ooꞌoo! Aena aana mo iinoni oorahaꞌaa na kire ko maa-manata diana noꞌone mola urine hunie mo iini e manata diana hunire. 33?Na mala uri omu kei deu diana mola hunie mo iini ko deu-deu diana huniꞌomu, omu ko loꞌo-loꞌongaꞌi uri a God kei haꞌadianaꞌaꞌomu haahie leune? !Haꞌike oto ooꞌoo! Aena aana mo iinoni oorahaꞌaa na kire ko teteꞌurine noꞌone mola. 34?Na mala uri omu ko sai nii ola mola hunie mo iini nge omu saie uri kire kei heꞌi suꞌuꞌi loꞌu huniꞌomu, omu ko loꞌo-loꞌongaꞌi uri a God kei haꞌadianaꞌaꞌomu haahie leune? !Haꞌike oto ooꞌoo! Aena aana mo iinoni oorahaꞌaa kire sai nii urine noꞌone hunie ngaeta mo iinoni oorahaꞌaa uri hunie kire ke suꞌu sada aani loꞌu hunire. 35!Taꞌe haꞌike! Omu ke manata diana hunie mo maelonga iꞌomu na omu ke dau diana hunire. Omu ke nii-nii na omu ke suꞌuri loꞌongaꞌinie loꞌu suꞌuleni eelihoꞌi huniꞌomu. Mala uri omu kei teꞌurine nge waaitemiu ke si peine loꞌu liutaa, na omu ke si neꞌi kalena God, iini e paine liutaa. Aana ingeie noꞌone hule aana e diana hunie mo iini e oorahaꞌaala na mo iini kaꞌa sai paalahea. 36Omu ke hai-hei aamasi oto mala Aamamiu i Lengi ko hei-hei aamasi hunie taꞌena nga iinoni.”
Mwaanie O Lupweꞌi Leie Mwala
37Oto a Jisas ko heꞌi teꞌuri loꞌu, “Mwaanie omu talei lei-leie taꞌena nga iinoni, mwaanie a God e leiꞌomu noꞌone urine. Mwaanie omu talei lei-lei maesie nga mwala, hunie a God ke suꞌuri lei maesiꞌomu noꞌone. Na omu ke sae-sae aasi hunie mo iinoni, hunie a God ke si saeꞌaasi noꞌone huniꞌomu. 38Omu ke nii-nii hunie taꞌena nga iinoni, nge a God ke si nii loꞌu liutaa huniꞌomu. Aana toꞌohuu niilana kei lae huniꞌomu, hule aana omu kaꞌa saie omu kei hele uri taa aani aana nimemiu, oto kire ko maalingi mola. Aana nga tolahai niinge uri taa nge omu ko nii-nii hunie mwala aana, nge a God kei nii noꞌone huniꞌomu aana.”
39Oto a Jisas ko ere ni aalahuunge loꞌu uuri, “Nga iinoni e ulu e saꞌa naꞌona ike loꞌu ngaeta ulu, mwaanie kirerue mani domu mola i laona kalinge. 40Iinoni haꞌa-uusulilana ko lae-lae ue, e kaꞌa paine ike liutaa aana haꞌa-uusuli ingeie. Taꞌe mala kei esu waaꞌiniꞌini nge ke si urihana mola haꞌa-uusuli ingeie. 41?E ue kaꞌu o ko ili lio susulie kele ngangaꞌai ola oto mola mwai-mwei i maana aasimu? Taꞌe hule aana iꞌoe, rotoi ei leku e eno honosie maamu na o kaꞌa sai hiingeꞌinie. 42Na e kaꞌa diana ike noꞌone uri hunie o ke unue hunie aasimu uuri, ‘Kaꞌu, ne ke taꞌaasie kele ngangaꞌai ola ngeena mwaanie maamu,’ na hule aana iꞌoe maraamu rotoi ei laku noꞌone mola e eno honosie maamu. !Nga hero-heronga kaꞌa urine ike! Mala uri o ko teꞌurine, nge o ko lupweꞌi deu-deu mola ni ngeena. Taꞌe o ke holaꞌi taꞌaasie kaꞌu rotoi ei laku ngeena mwaanie maamu hunie maamu ke manola. Oto o ke si lio susulie kele ngangaꞌai ola i maana aasimu hunie o ke kae aasie.”
O Sai Lio Saie Ai Aana Hue-Huana
43Oto a Jisas ko heꞌi teꞌuri loꞌu, “Ai diana e saꞌa roroꞌa hungu ike aani hue-huei ei aaela, wa ai aaela ke hungu eeni hue-huei ei diana. 44Taꞌena nga ai, lio sailana ko lae-lae oto aana hue-huana, aana mwala e saꞌa hisue ike nga hue-huei fik mwaanie nga puli-pulisi poo, wa kire ke hisue nga hue-huei grep mwaanie nga walo kau-keu. 45Iinoni diana e toꞌo aana mo loꞌongaꞌinge diana i laona saena, na kei haataꞌiniꞌi aana mo ola diana kei esuiꞌi. Taꞌe iinoni aaela e toꞌo aana mo loꞌongaꞌinge aaela i laona saena, na kei haataꞌiniꞌi aana mo ola aaela kei esuiꞌi. Aana iinoni ko ere-ere i sulie nga taa nge saena e honu aana.”
Iini Ko Tola I Sulie A Jisas E Urihana Mwane Saenanau E Tohue Nume Diana
46Oto a Jisas e heꞌi teꞌuri loꞌu, “?E ue ni omu ko soieu na ni omu unue oto, ‘!Aalaha ineu!’ taꞌe hule aana omu saꞌa dau i sulie nga taa no ko unue? 47Taꞌe-taꞌena nga iini ko lae mai seeku na ko rongoa walaku peꞌi sulu i suliꞌi, 48e urihana iinoni saenanau e tohue nume ingeie aana e eli kokoro talana mo hunu, na e neꞌie mo heu i poo-pootana mo hunu aana nume ngeena. Oto lae-lae maholo wai kei kone na kei halolo aana nume ngeena, taꞌe hule aana e saꞌa asuleꞌi ike, aena aana e tohu diana aana. 49Taꞌe nga iini nge ko rongoa walaku na e kaꞌa sulu ike i sulie, ingeie e urihana iinoni e tohue nume ingeie mola i lengine oone mwaakule. E kaꞌa eli kokoro ike wa ke neꞌie mo heu ehuie mo hunu. Oto lae-lae maholo kone kei halolo aana numena, na kei tolana aaꞌoho taꞌingelu oto.”
7Naꞌohai Mwane Aana Mae Ni Rom E Hiiwalaimoli Aana Jisas
1I purine a Jisas e saro ere-ere mango aana walu ola ienini hunie mwala, e si lae hunie i Kapaneam. 2Na koni-konihe ngaeta naꞌohai mwane aana mae ni Rom ko tohungei mweri oto hiitoꞌo wau i leune. Koni-konihe ngeena ko karaꞌi mae oto, na poro paine ingeie e tohungei neꞌisae paine haahie.
3Oto maholo naꞌohana mae ngeena e rongo tarohana a Jisas, oto ko uusungeꞌinie ngaeta mo rato aana mo Jiu, uri kire ke lai eitanaie a Jisas hunie ke lae mai haꞌa-uurie koni-konihe ingeie nge ko mweri ngeena. 4Mo rato ni mwane ngeena kire lae mai saana a Jisas, oto kire ko eitanaie uuri, “E tohungei adona oto uri o ke peꞌie a poro paine aana mae ie, 5aena aana e manata diana hunikie mo Jiu, hule aana ingeie maraana e tohue nume ni palo-palo hunie huilume iꞌemeelu.”
6Oto a Jisas e lae oto peꞌie mo mwaena. Maholo ko lae oto mai karaꞌinie nume a poro painena, na a porona ko uusungeꞌinie oto taꞌau ngaeta mo malahune honosie huni haꞌarongoa uuri, “Aalaha ineu, o ke suꞌuri haꞌaweoꞌo loꞌu huni lae mai, aana nou kaꞌa malisine ike uri o ke lai sili i nume ineu. 7Aena leune noꞌone nge nou loꞌongaꞌinie uri nou kaꞌa malisine ike laenga mai honosiꞌo. Taꞌe nou hiiwalaimoli uri aana o ke unue mola nga mei wala, na koni-konihe ineu kei awaa oto. 8Aana ineu na nou iiꞌo noꞌone i mamalutana nanamanga ngaeta mo poro paine, na nou toꞌo aana noꞌone mo ramo i meluteku. Na mala no ko unue hunie nga ramo uuri, ‘Lae wau,’ na ko lae oto wau. Na mala no ko unue hunie ngaeta ramo uuri, ‘Lae mai,’ na ko lae oto mai. Na mala no ko unue hunie koni-konihe ineu uuri, ‘O ke asuie mei esunge waune,’ na ko esuie oto.”
9Maholo a Jisas e rongo urine, e si pangataꞌinie na ko teꞌuri hunie mo iini ko lae i sulie, “Toꞌohuu no ko unue huniꞌomu uri nou kaꞌa lio oodoie ike ue nga mwane ni Israel ke hiiwalaimoli eeku mala mwane ni Rom ie.”
10Oto mo malahune a poro paine ngeena kire aalihoꞌi taꞌau i nume ingeie, na kire ko leesie oto koni-konihe ingeie e awaa oto loꞌu.
A Jisas E Taꞌea Kalena Mei Nao Keni
11Oto loꞌu mola i purine leune e rau, a Jisas na mo pwaarongoisuli ingeie kire ko heꞌi lae loꞌu hunie huilume i Nein. Na mwala hunge kire hakusire noꞌone aana maholona. 12Maholo ko nanauhie mai maana para aana huilume, na ko leesie mwala ko lai heitoli. Kire aangaꞌinie rae aana taꞌa-taꞌa kele mwela mouteꞌi, kalena mei nao keni, na mwala hunge aana hanuena noꞌone peꞌie.
13Oto maholo a Aalaha e leesie ko si aamasie, na ko teꞌuri hunie, “Suꞌuri ngara-ngara.” 14Oto a Jisas e lae wau karaꞌinie, ko hele aana taetahe, na mwala e aangaꞌi kire uure hahuroto oto. Oto ko teꞌuri, “!Saanau, no ko unue huniꞌo, o ke taꞌelaꞌi!” 15Oto saanau ngeena e taꞌelaꞌi, na ko aehota ere-ere oto. Oto a Jisas e si toliꞌaasie hunie a nikana.
16Oto ahutana mwala ko meni pangataꞌi na kire ko soi haꞌamanikuluꞌaa God uuri, “!Nga propet paine liutaa kaꞌu e taꞌelaꞌi i matolakaelu ie! !A God e lae oto mai huni haꞌa-uurie mo iinoni ingeie!”
17Oto tataroha aana a Jisas e si taro i sulie ahutana poꞌo ni henue i Jiudia na ahutana mo henue kali-kelie.
A Jisas E Ere Haꞌasusue Hiiwalaimolinge A Jon Loto Maaꞌi
18Maholo mo pwaarongoisuli a Jon kire haꞌarongoa aana walu ola nge a Jisas e asuiꞌine, oto a Jon ko haaraie ngaeta ro iini aada i saana. 19Oto ko uusungeꞌinire i saana a Jisas hunie uri kire ke lai dolosi aana uri ohe ingeie ni oto a Haꞌa-uuri nge kire hiiwalaimoli aana uri kei lae mai, wa ohe kire kei maaꞌoohie ue nga iini aaopa.
20Oto maholo e ro mwane ngeena kire hule i saana Jisas, kire ko teꞌuri hunie, “A Jon Loto maaꞌi e uusungeꞌiniꞌemereꞌi huni dolosi eemu uuri, ‘?Uri iꞌoe ni oto a Haꞌa-uuri kei lae mai, wa melu kei maaꞌoohie ue nga iini aaopa?’ ”
21Aana maholona noꞌone a Jisas ko haꞌa-uurie mwala hunge peꞌie mo maelaa hai aaopaꞌi. E haꞌa-uurie mo mae-maeaꞌa na mo iini hunge mo liꞌoa aaela e hite aada, na e tahanie maana mo iini hunge maada e ulu. 22Oto a Jisas ko aalamie e ro mwane ngeena uuri, “More ke aalihoꞌi na more ke haꞌarongoa a Jon aana nga moi taa more ko leesiꞌi na more ko rongoꞌi ienini. Aana mo ulu ko lio-lio oto, mo rarasi ko lae-lae diana oto loꞌu, mo iini ko sapesalu aana maelaa ni osa kire mola oto, mo iini e pungu ko rorongo oto loꞌu, na mo iini e mae kire ko meuri eelihoꞌi oto loꞌu. Na laeliwalanga aana Tataroha Diana ko lae oto hunie mo meitale. 23Na more ke haꞌarongoa noꞌone a Jon uri ilenimwaꞌenga paine kei lae hunie mo iini hiiwalaimolinge ikire e susu, na kire kaꞌa neꞌisae rue-ruaꞌa aaku.”
24Maholo e ro pwaarongoisuli a Jon kirerue aalihoꞌi oto, a Jisas ko si aehota ere-ere nana mwala i sulie a Jon uuri, “?Maholo omu lae taꞌau i saana Jon i henuesala, nga taa ni omu lae taꞌau huni leesie? ?Ohe omu loꞌongaꞌinie uri a Jon nga iinoni saena e rue-ruaꞌa mala apai rade ko euꞌesuleꞌi aana iiru? !Haꞌike! 25?Wa nga ola uri taa ni omu lae-lae taꞌau huni leesie? ?Ohe iinoni e toꞌoni eeni toꞌoni lio manikuluꞌe? !Haꞌike loꞌu! Aana mwala nge kire toꞌo aana walu ola manikuluꞌe na kire hoꞌo toꞌoni diana urine, kire ko oꞌoꞌo mola aana mo nume mo inemauri. 26?Taꞌe nga taa ni omu lae taꞌau huni leesie? ?Huni leesie nga propet? !Iau! !E toꞌohuu oto! Na a Jon nge omu leesie e paine loꞌu liutaa aana mo propet oto i naꞌo. 27Aana ingeie oto iini nge a God e ere rarangana i laona mo Uusu-uusu Maaꞌi uuri, Ne kei uusungeꞌinie hurulaꞌaa ineu wau i naꞌomu hunie ke dau aakau aana tala iꞌoe loosiꞌo.”Malakae 3:1
28Oto a Jisas ko heꞌi unue loꞌu uuri, “No ko unue oto huniꞌomu uri a Jon Loto Maaꞌi e paine liutaa aana taꞌena nga iini e hute mai welumalau. Taꞌe iini nge e mwai-mwei oto liutaa aana Aalahanga a God e paine loꞌu liutaa aana a Jon.”7:28 Asunge a Jon Loto Maaꞌi e tohungei haataꞌi diana aana hunie mwala uri a Jisas oto Kalena God, taꞌe ikie aana soihaadaꞌinge siꞌiri kie sai haataꞌinie leune diana loꞌu liutaa aena aana kie saie uri a Jisas e taꞌelaꞌi mwaanie maenga.
29Maholo kire rongo urine, oto ahutana mo iini nge a Jon e loto maaꞌi aada, na oto mo iini e aaela oto hiitoꞌo mala mwala susulu toꞌoha, kire mani unue uri leinge a God e oodotaꞌi. 30Taꞌe mo iini nge kire sereꞌinie uri a Jon ke loto maaꞌi aada mala mo Parise na mo haꞌa-uusuli aana mo Haꞌatolanga a Mosis, ikire maraada kire waelie mola neꞌisaenga diana a God hunire.
31Oto a Jisas ko heꞌi unue loꞌu uuri, “?Ne kei unu haꞌamalaa pwaunge aana maholo ienini aana nga taa? ?Na uri kire urihana nga taa? 32Kire urihana mola pulitaa ni mwela nge ko pwarero i laona amaa, oto ruana nga pulitaa ko ere uuri hunire,
Iꞌomu, omu sereꞌinie mola ahutana mo pwareronga,
Maholo melu ko kanalie mo kana ni haꞌarurunge namiu,
omu saꞌa ilenimwaꞌe wa omu ke mao.
Na maholo melu ko kanalie mo kana ni heitolinge namiu,
omu saꞌa saehuu wa omu ke ngara.
33“Iꞌomu, omu urihana mola mo mwela ngeena aena aana maholo a Jon e lae mai, e oolongau na e kaꞌa inu waen ike. Oto ahutana iinoni ko unue uuri, ‘A mwane ngeena nga liꞌoa aaela nge aana.’ 34Oto ineu a Kale Ni Iinoni, nou lae mai na no ko ngeu na no ko inu waen mola, oto mwala ko unue loꞌu mola uuri, ‘A mwane ngeena ngauhana e paine na e tohungei sai inu hiitoꞌo. Na mo malahune oto mola mwala susulu toꞌoha na mo iinoni oorahaꞌaa.’ ”
35Oto a Jisas e haꞌamangoa erenga ingeie uuri, “Taꞌe tolahana mo iini kire toꞌo aana saenanaunge a God kei haataꞌinie uri ikire oto mo iinoni toꞌohuu.”
Ngaeta Keni Oorahaꞌaala E Hodalie E Ro Aeꞌaena A Jisas
36Ngaeta maholo a Saemon, ngaeta iini aana mo Parise, e haaraie a Jisas hunie ke ngau peꞌie i nume ingeie. Oto a Jisas e lai sili i nume a mwaena, kire ko eno i aano oto i sulie tolahada hunie ngaunge. 37Na ngaeta keni aana hanuena e tohungei oorahaꞌaala oto hiitoꞌo. Maholo a keine e rongoa uri a Jisas ko ngeu i nume Parise ngeena, oto e toolea mai ho ateꞌa diana e honu eeni rumu, ola e wasu mangoni oto hiitoꞌo. 38Oto a keine e lae mai i saana a Jisas ko pouruuru i saana e ro aeꞌaena, ko si ngara peꞌi oonisaenga na ko haꞌamedoa e ro aeꞌaena a Jisas aana mo wei ni aakalo ko aahe mwaanie maana. Na ko hulo aꞌate aana e ro aeꞌaena aana iihune pwaune. Oto ko nonoꞌie e ro aeꞌaena, na ko huie ho rumu e wasu mangoni ngeena i lengini.
39Maholo Parise nge e haaraie mai a Jisas e leesie urine, ko si loꞌongaꞌi mola i saena maraana uuri, “Mala uri a mwane ie ke neꞌie nga propet toꞌohuu, haꞌalaa e lio saie mola taungei keni ie na e kaꞌa toliꞌaasie ike uri ke hele i sapena, aena aana keni ienini e oorahaꞌaala.”
40Oto a Jisas ko teꞌuri hunie, “Saemon, nou toꞌo aana nga mei ola huni unue huniꞌo.”
Oto a Saemon ko aalamie uuri, “!Iau, Haꞌa-uusuli! O ke unue kaꞌu.”
41Oto a Jisas ko unue uuri, “Ngaeta ro mwane kire oꞌoꞌo, kirerue mani tola kaoni aani toꞌoha mwaanie nga taꞌa-taꞌa aalaha huni suꞌue loꞌu mei puri. Nga iini e toolea e lime tangalai mei toꞌoha huni suꞌue, na ngaeta iini e toolea mola e lime aata aawala. 42Taꞌe lae-lae e ro mwane ngeena kaꞌa toꞌo aana ike nga mei toꞌoha huni suꞌue loꞌu nga taa kirerue tola kaoni aana. Oto aalaha ngeena, e unue mola uri kirerue saꞌa suꞌue loꞌu nga taa kirerue tola kaoni aana ngeena. Oto ne ke dolosi mola uuri aamu, Saemon. ?Haꞌalaa iini uri taa aadarue nge kei manata diana liutaa hunie aalaha ngeena?”
43Oto a Saemon ko aalamie uuri, “Nou loꞌongaꞌinie uri saꞌa mola iini nge e tola toꞌoha hiitoꞌo mwaanie.”
Oto a Jisas ko teꞌuri hunie a Saemon, “Ingeie otona. O ko ere toꞌohuu oto.”
44Oto a Jisas e aaliꞌu takoie a keine na ko teꞌuri hunie a Saemon, “?O leesie taane a keni ie? Maholo nou lae mai sili i nume iꞌoe, o kaꞌa kele niie ike nga mei wei huni hodalie e ro aeꞌaeku i sulie tolahaka. Taꞌe keitaꞌaa ie nge e hodalie e ro aeꞌaeku aana mo wei ni aakalo e aahe mwaanie maana, na e hulo aꞌate aani aana iihune pwaune. 45Iꞌoe o kaꞌa tolakonieu ike aani nononga i sulie tolahaka, taꞌe ingeie e uure ni nonoꞌie e ro aeꞌaeku aana nou lae mai ue ie. 46Iꞌoe, o kaꞌa kele suuhie ike pwauku aana nga mei rumu i sulie tolahaka, taꞌe keitaꞌaa ie hule aana ko aalohie oto e ro aeꞌaeku aani rumu nge e tohungei wesu mangoni. 47No ko unue oto huniꞌo uri mo oorahaꞌaa ingeie e talei hunge taane, taꞌe a God e saeꞌaasiꞌi mango oto i tehulaꞌana manata-diananga ingeie e paine. Aana iinoni nge saeꞌaasilana kele mei ola mola mwai-mwei ko lae hunie, manata-diananga ingeie kei mwei-mwei noꞌone mola.”
48Oto a Jisas e si teꞌuri hunie a keine, “Mo oorahaꞌaa iꞌoe, saeꞌaasileni e lae oto huniꞌo.”
49Ngaeta mo iini kire iiꞌo noꞌone peꞌire aana maholona, kire ko si loꞌongaꞌi maraada uuri, “?A tei mwane ni ie, na uri kei saeꞌaasi oorahaꞌaa uri taa?”
50Taꞌe a Jisas ko heꞌi unue loꞌu mola hunie a keine uuri, “Hiiwalaimolinge iꞌoe e haꞌa-uuriꞌo oto. O ke lae ni henuelama.”
8Ngaeta Mo Keni Kire Peꞌi-peꞌie A Jisas Aana Toꞌo-Toꞌolada
1Oto purihaꞌana walu olana e saro mango, a Jisas e si lae i sulie ahutana mo henue paine na mo kele huilume mwai-mwei aana poꞌo ni henuena, aana ko laengaꞌinie Tataroha Diana aana Aalahanga a God. Aawalai pwaarongoisuli mwana rue ingeie kire lae noꞌone peꞌie. 2Na ngaeta mo keni noꞌone peꞌire, mo iini nge haꞌa-uurilada e lae mwaanie mo liꞌoa aaela na mo maelaa. Ngaeta mo iini aada, a Meri (keni aana huilume i Makdala nge a Jisas e oohea e hiu liꞌoa aaela mwaanie), 3na a Susana, na a Joana nge poro ingeie a Kusa (nge ingeie naꞌohai mwane auꞌesu haahie ahutana mo mwane auꞌesu i nume a Herod Antipas), na mo keni hunge loꞌu. Mo keni ngeena kire ko peꞌi-peꞌie a Jisas na mo pwaarongoisuli ingeie aana toꞌo-toꞌolada.
A Jisas E Aalahuu Aana Iini Ko Hesi Lite
4Na mwala hunge e ruru mei saana Jisas uure mwaanie taꞌena nga hanue. Oto ingeie ko si ere ni aalahuunge hunire uuri, 5“Ngaeta mwane auꞌesu hohola e oꞌoꞌo, oto ko lai hesie mo litei ola ingeie mala mo kooni. Hasinge ngeena ko lae mola aana tataaꞌinilana mo lite, na maholo ko tatataaꞌinie mo litei ola hailiu i laona hohola ingeie, ngaeta mo lite iini eeni kire ko teke i sulie tala. Oto mwala ko uuriꞌi na mo menu ko ngeuꞌi mola. 6Ngaeta mo iini eeni kire ko teke i lengine mei heu-heue. Oto maholo kire ko pwito poi, kire ko tolana nunulu mola aena aana leune e aꞌate. 7Ngaeta mo litei ola kire ko teke i matolana mo walo kau-keu. Oto kire ko pwito tararuru peꞌie mo walo kau-keu, taꞌe mo walo kau-keu kire paine haahiꞌi na kire ko si melusiꞌi mola. 8Taꞌe ngaeta mo litei ola kire teke i lengine mei mwakano diana, na kire ko pwito diana. Oto kire ko si hungu haꞌatangalau loꞌu.”
Oto a Jisas e si ere ooreta hunire uuri, “Mwaanie omu rorongo aasie mola mo wala ienini, taꞌe omu ke loꞌo-loꞌongaꞌi diana i suliꞌi.”
?Aena E Ue Nge A Jisas E Haꞌa-uusuli Aani Aalahuunge Haliꞌite?
9Oto mo pwaarongoisuli ingeie kire ko dolosi aana uuri, “?Nga taa ni loꞌongaꞌinge aana aalahuunge ienini?”
10Oto a Jisas ko unue uuri, “A God e lio hilisiꞌomu hunie omu ke saenanau aana walaimolinge mumuni aana Aalahanga a God. Taꞌe hunie mo iini aaopa, no ko ere ni aalahuunge oto haꞌalaa, hunie uri kire ko lio-lio na kire ke suꞌuri lio saiꞌi, kire ko rorongo na mwaanie kire rongo saiꞌi.”
A Jisas E Luhesie Aalahuunge Aana Iini Ko Hesi Litei Ola
11Na a Jisas e heꞌi unue loꞌu uuri, “Loꞌongaꞌinge aana aalahuunge ienini e lae uuri. Mo lite walana God ni ngeena. 12Tala nge mo lite ngeena kire teke i sulie e urihana mo iini nge kire rongoa taane mo wala. Taꞌe e kaꞌa tewa na a Satan e lae mai ko taꞌaasie mwaanie manatada, hunie uri kire ke suꞌuri hiiwalaimoli na mwaanie uri haꞌa-uurilada e lae. 13Na mo iini nge manatada e urihana mei mwakano hau-heue ngeena, kire rongoa walana God, na oto lau-leu kire ilenimwaꞌe haahie. Taꞌe ola mala nga ai ke uure i laona mei mwakano urine, haꞌalaa imi-imine e kaꞌa susuꞌimi ike hiitoꞌo i aano. Kire hiiwalaimoli mola haꞌawali, na aana maholo malaahongalada kei lae, oto kire ko tolana toliꞌaa mola. 14Nga mo iini loꞌu manatada e urihana mei mwakano e honu aana walo kau-keu ngeena, kire rongoa noꞌone walana God, taꞌe kire neꞌisae painesie mola mau-meuringe aana walumalau. Kire tolahiꞌe, na kire saetoꞌo aana mola toꞌo-toꞌonga, na kire ko saehanalie taꞌena nga ola. Oto mo wala diana ngeena kire kaꞌa pwito kohi, na kire kaꞌa hungu ike loꞌu. 15Taꞌe mo iini loꞌu, mo iini urihana mei mwakano diana ngeena, kire rongoa mo wala ngeena, na kire koni diana aani i laona manatada. Kire tola i sulie mo haꞌa-uusulinge ngeena, na kire ko si hungu eeni norutoꞌonga peꞌi esunge susuleꞌi hunie Aalahanga a God.”
?A Tei Kei Neꞌie Laite I Hahana Nime?
16Oto a Jisas ko heꞌi unue loꞌu uuri, “Na nga taꞌa-taꞌa iini e saꞌa haꞌakaunie ike mola nga laite na ke pwaohaꞌinie nga nime haahie, wa ke mumunie mola i hahana nga tahe. Taꞌe kei aaroroa oto i lengi hunie ke matapwa i laona numena, na hunie ahutana mwala nge ko sili mei nume kire sai lio diana. 17Aana taꞌena nga ola mumunilana e lae, nge haataꞌinilana kei saronai lae taane mai haadaꞌi aana leu matapwa. Na nga taa nge aaluhilana e lae, aelilana kei saronai lae taane mai haadaꞌi huni leesie. 18Aena ngeena, omu ke rorongo mwako. Aana taꞌena nga iini e mwaꞌe-mwaꞌe huni rongo i sulie mo haꞌa-uusulinge ineu, nge sapeilana saenanaunge ni Lengi kei lae loꞌu hunie. Taꞌe a tei nge e kaꞌa mwaꞌe-mwaꞌe huni rongo i sulie mo haꞌa-uusulinge ineu, nge maꞌalana uri nga kele mei saenanaunge ni Lengi e toꞌo aana, taꞌe taꞌaasilana kei lae mola mwaanie.”
?Kira Tei Mo Tohungei Eesine A Kraes?
19Oto nikana Jisas na mo eesine mwane kire mani hute, kire sare lae mai saana, taꞌe kire kaꞌa sai lae mai karaꞌinie, aena aana mwala e hunge. 20Oto ngaeta iini aana mwala ngeena ko unue hunie a Jisas uuri, “!Lio kaꞌu! A nikemu na mo eesimu kire uure mola taꞌi sinaha, na kire ko sare leesiꞌo.”
21Oto a Jisas ko aalamie uuri, “A nikeku na mo eesiku oto ahutana mo iini nge ko rongoa walana God na kire ko lulu i sulie oto.”
A Jisas E Ere Aana Ooru
22Aana ngaeta hai dinge a Jisas ko teꞌuri hunie mo pwaarongoisuli ingeie, “Kolu ke aatoholo kaꞌu hunie raune aasi poꞌo taꞌau.” Oto kire taꞌelie iiola, kire ko si lae, 23na lae-lae a Jisas e lae otoi eno huni maꞌahu, no ko maꞌahu eelisuu oto. E kaꞌa tewa na painehaꞌana mawasidengi ko hite aada oto i laona aasi, na iiola ko aehota honu oto aana aasi, hule aana kire ko karaꞌi dodo oto.
24Oto mo pwaarongoisuli kire ko haꞌalioa Jisas na kire ko teꞌuri hunie, “!Poro paine! !Poro paine! !O ke lio kaꞌu, kolu ko karaꞌi mae oto!”
Oto a Jisas e taꞌelaꞌi ko ere aana ooru na aahe, oto kire ko tolana aapwanaꞌi na ko hoolaa oto. 25Oto a Jisas ko si teꞌuri hunie mo pwaarongoisuli ingeie, “?Nge i tei hiiwalaimolinge iꞌomu?”
Taꞌe kire ko meꞌu peꞌi pangataꞌinge, na kire ko unue oto hunire maraada uuri, “?A tei mwane ni ie? !Oto hule aana e ere aana mola ooru na aahe, oto kire ko meni tola i sulie oto walana!”
A Jisas E Haꞌa-uurie Mwane Liꞌoa Aaela E Hite Aana
26A Jisas na mo pwaarongoisuli ingeie kire aatoholosie aasi uure i Kalili hunie poꞌo ni henue mo Kerasa. 27-29Maholo a Jisas ko siho hai oone i leune mwaanie iiola, na ko oodoie oto ngaeta mwane mo liꞌoa hunge aaela aana. Mwala aana hanuena kire ko pwesue kaꞌu mo kiꞌine na mo aeꞌaena aani iieli heu, taꞌe ko mousiꞌi mola na ko tehi oto i henuesala. Ko lae tewa oto mai, na mwaena e kaꞌa sai hoꞌosie nga mei sala wa nga toꞌoni, na iiꞌolana oto tarau mola i saana mo kilipweꞌu. 8:29 Mo Jiu oto i naꞌo sai didie mo heu hunie mo kilipweꞌu ikire, wa kire sai heitolingeꞌinie mo rae i laona mo hahale mala mo kilipweꞌu ikire.
Oto maholo a Jisas e oodoie a mwaena, ko si ere aana mo liꞌoa aaela ngeena hunie kire ke iisitaa mwaanie. Oto a mwaena ko uulo na ko lai pouruuru oto i naꞌona Jisas peꞌie mei wala paine uuri, “!Jisas Kalena God, iini e paine liutaa! ?O kei uaau oto eena? !No ko eitanaiꞌo, uri o ke suꞌuri haꞌaloieu!”
30Oto a Jisas ko dolosi aana uuri, “?A tei ni satamu?”
Oto a mwaena ko aalamie uuri, “Sataku a Hunge.” E ere urine aena aana mo liꞌoa aaela hunge ni kire aana. 31Na mo liꞌoa aaela ngeena kire aitanaie a Jisas uri ke suꞌuri uusungeꞌi aasire i laona kalinge ni haꞌamotaahinge nge e kaꞌa toꞌo kaona.
32Maholona na hakaa ni poo oto paine ko susude taꞌau i sulie uuwo i leune. Oto mo liꞌoa aaela ngeena kire aitanaie a Jisas uri ke toliꞌaasire hunie kire ke lai sili i laona mo poo ngeena. Oto a Jisas e si toliꞌaasire mola. 33Na maholo mo liꞌoa aaela ngeena kire iisitaa mwaanie a mwaena, oto kire si lai sili i laona mo poo. Amaa ni poo ngeena e mani tehi, na kire ko lai pola oto i sulie maoꞌi i laona aasi, na kire ko meni inu oto.
34Oto mwala nge kire lio-lio i sulie mo poo ngeena kire leesie nga taa e raune, kire si huru na kire ko lae otoi tarohaꞌinie tataroha aana i laona huilume ikire, na loꞌu aana mo henue kali-kelie. 35Oto mwala kire lae mai huni leesie nga taa e raune, kire lai hule i saana a Jisas, na kire ko lio oodoie uri mwane nge a Jisas e oohea mo liꞌoa aaela mwaanie, e iiꞌo oto i saana Jisas. E manata na e hoꞌo sala oto. Oto mwala ngeena ko si meni meꞌu oto. 36Na mo iini e leesie mei olana, kire ko si haꞌarongoa mwala aana uri a Jisas e haꞌa-uurie a mwaena uri taa. 37Oto ahutana mwala aana poꞌo ni henuena kire ko si meni eitanaie a Jisas uri ke lae mwaanire, aena aana kire ko tohungei meꞌu oto hiitoꞌo. Oto a Jisas e taꞌelie iiola ko si lae mwaanire.
38Oto mwane nge mo liꞌoa aaela e iisitaa mwaanie ngeena ko eitanaie a Jisas uri ke hakusie, taꞌe a Jisas e uusungeꞌi eelihoꞌi mola aana, na ko unue hunie uuri, 39“O ke aalihoꞌi mola i saana uluhe iꞌoe, na o ke haꞌarongoa mwala aana walu ola diana nge a God e asuiꞌi huniꞌo.” Oto a mwaena e si lae hailiu i laona huilumena peꞌi tarohaꞌinie oodoie mwala nga taa a Jisas e asuie aana.
A Jisas E Haꞌa-uurie Kele Pule A Jaeras Mwaanie Maenga
40Maholo a Jisas e aalihoꞌi loꞌu hunie poꞌo ni eesi taꞌau, na mwala oto hunge kire maaꞌoohie i leune peꞌie saemangonga oto liutaa haahie. 41Oto ngaeta mwane satana a Jaeras e lae mai, na ingeie nga naꞌohai mwane aana nume ni palo-palo mo Jiu aana hanuena. A mwaena ko pouruuru i aano oto i naꞌona Jisas, na ko eitanaie a Jisas uri ke lae kaꞌu taꞌau i nume ingeie, 42aana kele pule ingeie ko karaꞌi mae oto. A pulena taꞌa-taꞌa mwela mouteꞌi, na ola mala aawalai helisi mwana rue ue aana.
Maholo a Jisas ko lae hunie nume a Jaeras, mwala oto hunge ko si lae mai kali-kelie. 43Na i matolana mwala e hunge ngeena, ngaeta keni noꞌone i leune maelaa madaꞌa aana apu raha-raha ko seunie oto hunie aawalai helisi mwana rue.8:43 Haꞌatolanga a Mosis e unue uri mo keni apu raha-raha nge aada urine kire madaꞌa i maana God, na kire ke suꞌuri kopi aana nga iini loꞌu mwaanie kire haꞌamadaꞌaa iini kire kopi aana ngeena. Leesie Levitikas 15:25-33. A keine e nii mangoa oto toꞌo-toꞌolana hunie mwala kure-kure, taꞌe nga iini na e kaꞌa haꞌa-uurie ike. 44A keni ngeena e lae poi i matolana ruruhaa i purine a Jisas, oto ko kopi aana ngongoꞌana toꞌoni ingeie, na apu raha-raha ngeena ko tolana mango oto mwaanie.
45Oto a Jisas ko dolosi uuri, “?A tei ni e kopi eeku?” Taꞌe kire ko meni taateingeꞌinie mola.
Oto a Pita ko teꞌuri, “Aalaha, mwala hunge kaꞌu kire ruru kali-keliꞌo ngeena, na kire ko lae peꞌi helipaꞌo uri huni leesiꞌo.”
46Taꞌe a Jisas ko teꞌuri, “!Haꞌike! Nga iini e kopi eeku, aana nou hiingeꞌinie uri nanamanga ineu e haꞌa-uurie nga iini.” 47Na a keine e saie mola uri e saꞌa mumuni ike loꞌu, oto ko si eriri na ko lai pouruuru oto i naꞌona Jisas. Oto ko unu tahangaꞌinie hunie a Jisas i naꞌona mwala uri aena nga taa e kopi aana, na uri haꞌa-uurilana e tolana lae oto mola aana maholona. 48Oto a Jisas ko si unue hunie a keine uuri, “Kaleku, hiiwalaimolinge iꞌoe e haꞌa-uuriꞌo oto. O ke lae ni henuelama.”
49Maholo na a Jisas ko ere-ere ue, ngaeta mwane e uure taꞌau i nume a Jaeras, e lae mai hule i saada, oto ko teꞌuri hunie a Jaeras, “Kele pule iꞌoe e mae oto. O ke suꞌuri haꞌaweoa loꞌu a Haꞌa-uusuli.”
50Oto maholo a Jisas e rongo urine, ko si teꞌuri hunie a Jaeras, “O ke suꞌuri tolahiꞌe, taꞌe o ke hiiwalaimoli mola aaku na a kalemu haꞌa-uurilana kei lae oto.”
51Maholo a Jisas e lai hule taꞌau i nume a Jaeras, e kaꞌa toliꞌaasie ike nga iini ke sili loꞌu peꞌie hai nume. Taꞌe a Pita, a Jon, na Jemes peꞌie aamana na nikana a pulena, nge a Jisas e toliꞌaasire hunie kire ke lae sili i nume peꞌie. 52Na aana maholona, ahutana mwala ko meni ngara-ngarasie oto a pulena peꞌi saehuunge. Taꞌe a Jisas e teꞌuri hunire, “Omu ke suꞌuri ngara-ngara. A pule ie e kaꞌa mae ike, taꞌe ko maꞌahu mola.” 53Oto ahutana mwala ngeena kire ko meni mwesi mola mwaanie a Jisas, aena aana kire saie uri a pulena e pwani mae.
54Oto a Jisas e sili hai nume, e hele i nimana pulena na ko soie uuri, “!Kaleku, o ke taꞌelaꞌi!” 55Oto mangona pulena ko tolana aalihoꞌi oto loꞌu, na ko taꞌelaꞌi oto. Oto a Jisas ko si unue hunire uri kire ke nii ngeulaa ana. 56Oto nikana a pulena na aamana, kirerue ko si tohungei pangataꞌi oto hiitoꞌo. Taꞌe a Jisas ko si ere honosire mola uri mwaanie kire haꞌa-haꞌarongoa nga iini aana walu ola e raune.
9A Jisas E Uusungeꞌinie Mo Hurulaꞌaa Huni Tarohaꞌinie Aalahanga A God
1Oto a Jisas e soie mai ahutana aawalai hurulaꞌaa mwana rue i saana, na ko niie nanamanga e saka hunire hunie kire ke oohe aasie ahutana mo liꞌoa aaela, na huni taꞌaasie taꞌena nga maelaa. 2Na e uusungeꞌinire hunie kire ke lai laeliwala aana Aalahanga a God na huni haꞌa-uurie mo iini ko mweri. 3Oto ko si teꞌuri hunire, “Maholo omu ko lae, omu ke suꞌuri toolea loꞌu nga mei ola peꞌiꞌomu, nga apaꞌa, wa nga mwaꞌi, wa nga mei ngeulaa, wa nga mei toꞌoha. Maꞌalana uri nga ro toꞌoni na suꞌuri loꞌu, taꞌe mo iini oto omu hoꞌosiꞌi mola. 4Maholo omu ko lai sili aana nga nume, omu ke iiꞌo oto i leune lai hule aana maholo ni lae mwaanie hanuena. 5Mala uri mwala aana hanuena kaꞌa takuhiꞌomu oto, nge omu ke lae mwaanie hanuena, na omu ke tataaꞌinie mo wasa-wasa mwaanie aeꞌaemiu, domana uri nga haꞌapasunge hunire uri a God kei haꞌaloire.”
6Oto mo hurulaꞌaa e tauleꞌi, kire ko si lae i sulie ahutana mo henue huni tarohaꞌinie Tataroha Diana, na kire ko haꞌa-uurie mwala aana taꞌena nga leu.
A Herod E Rongo Tarohana A Jisas
7Maholo a Herod Antipas, aalaha ni Kalili, e rongo tarohana walu ola nge ko reune, ko tohungei teipuꞌo-puꞌo, aena aana ngaeta mwala ko unue uuri, “A Jon Loto maaꞌi ni e mauri loꞌu.” 8Ngaeta mo iini ko unue uuri, “A Elaeja e maau aameelu.” Na ngaeta mo iini ko unu-unue ue uuri, “Nga iini aana mo propet oto i naꞌo ni e heꞌi meuri loꞌu ngeena.”
9Oto a Herod ko unue uuri, “A Jon nou lamasie kaꞌu oto pwaune. ?A tei mwane ni no ko rongo tarohana loꞌu ienini?” Oto ko si eriꞌapasie uri ke leesie a Jisas.
A Jisas E Haꞌangaue Lime Sinolai Mwane
Matiu 14:13-21, Mak 6:30-44, Jon 6:1-14
10Maholo mo hurulaꞌaa kire ooli mei, oto kire ko haꞌarongoa Jisas aana walu ola nge kire lae peꞌi esuiꞌi. Oto e toolera kire ko lae maraada hunie huilume i Betsaeda. 11Oto maholo mwala e rongo tarohana urine, kire ko si lae i sulire. Na a Jisas e takuhie mwalana, e haꞌa-uusulire i sulie Aalahanga a God, na e haꞌa-uurie mo iini ko mweri.
12Oto maholo karaꞌinie sato kei suu, aawalai hurulaꞌaa mwana rue kire lae mai saana a Jisas, oto kire ko teꞌuri hunie, “O ke uusungeꞌinie mwala ngeena hunie kire ke lai loꞌohi ngeulaa ada na mo leu ni maꞌahu ikire aana mo huilume, aena aana ikolu aana hanuesala ni ie.”
13Oto a Jisas ko teꞌuri hunire, “Iꞌomu, omu ke nii ngeulaa mola ada.”
Oto kire ko aalamie uuri, “!Haꞌike eena! Melu toꞌo aana mola e lime aata ho bred na e ro ho iiꞌe. ?Taꞌe mo ola urine kei adona mwala hunge urine uri taa? ?Ohe o saetoꞌo aana melu ke lae holi ngeulaa ada?” 14Sulie ola mala e lime sinolai mwane ni ngeena.
Oto a Jisas ko teꞌuri hunie mo pwaarongoisuli ingeie, “Omu ke haꞌa-iiꞌosie mwala aani pulitaa ni lime aawalai iinoni nga pulitaa.” 15Oto mo pwaarongoisuli ko deu oto i sulie nga taa a Jisas e unue hunire, na mwala kire iiꞌo oto aani pulitaa. 16Oto a Jisas e hele aana lime ho bred ngeena na e ro ho iiꞌe, oto ko si lio i lengi, na ko paalahea a God. Oto e nisie mo ho bred ngeena, ko si niiꞌi hunie mo pwaarongoisuli ingeie hunie kire ke haꞌa-adoa mwala aani. Na e teꞌurine noꞌone aana e ro ho iiꞌe hunie ahutada mango. 17Oto ahutana mwala kire mani ngeu pote, na i purine kire ngau mango, mo pwaarongoisuli ko si haꞌahonue aawalai luꞌe mwana rue aana mo ooretai ngeulaa.
A Pita E Unu Tahangaꞌinie A Jisas Uri Ingeie A Kraes
18Ngaeta hai dinge a Jisas e iiꞌo mola peꞌie aarengaꞌinge, na mo pwaarongoisuli ingeie mola kire iiꞌo peꞌie. Oto ko si dolosi aada uuri, “?Haꞌalaa mwala ko unu-unue uri ineu a tei?”
19Oto kire ko aalamie uuri, “Ngaeta mo iini ko unu-unue uri iꞌoe a Jon Loto Maaꞌi e mauri eelihoꞌi. Na nga mo iini ko unu-unue uri iꞌoe a Propet Elaeja. Na ngaeta mo iini loꞌu ko unu-unue uri iꞌoe nga iini hikana mo propet oto i naꞌo ni e heꞌi meuri loꞌu ngeena.”
20Oto a Jisas ko heꞌi dolosi loꞌu aada uuri, “?Oto e ue aana iꞌomu? ?Haꞌalaa omu ko unu-unue uri ineu a tei?”
Oto a Pita ko aalamie uuri, “Iꞌoe oto a Kraes, a Haꞌa-uuri nge a God e haiholotaꞌinie kei lae mai.”
21Oto a Jisas ko ere honosire mwaanie kire haꞌarongoa loꞌu nga iini aana leune.
A Jisas E Ere I Sulie Sapesalunge Na Maenga Ingeie
22Oto a Jisas ko heꞌi unue loꞌu uuri, “Leu oto i sapeku uri hunie ineu a Kale Ni Iinoni, ne ke sapesalu oto hiitoꞌo. Aana mo naꞌohai pris na mo haꞌa-uusuli aana mo Haꞌatolanga a Mosis na ngaeta mo rato loꞌu, kire kei leledieu. Oto kire kei horo maesieu, taꞌe aana oolune nga hai dinge ne kei taꞌelaꞌi eelihoꞌi loꞌu mola mwaanie maenga.”
23Na ko heꞌi unue loꞌu hunie ahutada uuri, “Mala uri nga iini ko sare lulu i sulieu, nge ke pulongosie walu ola e sae haahiꞌi, na ke lulu i sulieu i suli hei dinge, maꞌalana ke sapesalu i tehulaꞌaku, hule aana maenga i lengine poꞌu-poꞌu. Iini nge ko aangaꞌinie poꞌu-poꞌu ingeie urine, haꞌalaa e sai lulu i sulieu. 24Aana taꞌena nga iini ko sare kinetaꞌinie mola maurihaꞌana, nge kei deu tekelaꞌinie oto. Taꞌe nga iini nge ko deu tekelaꞌinie maurihaꞌana i tehulaꞌaku, nge kei haꞌa-uurie tohungana maurihaꞌana eena. 25?Haꞌalaa nga mei taa diana nge iinoni kei terie aana kei toꞌo aana oto ahutana mo toꞌo-toꞌonga aana walumalau ie, na ko deu tekelaꞌinie mola maurihaꞌana oto i tehulaꞌani? ?Oto uri toꞌo-toꞌolana kei peꞌie aana maholona? !Haꞌike oto ooꞌoo! Nga mei ola hunie ke niie huni tola aalihoꞌi aana maurihaꞌana, haꞌike loꞌu. 26Mala uri nga iini ko masa huni unu tahangaꞌinieu na mo haꞌa-uusulinge ineu, nge ineu noꞌone ne kei masa huni unu tahangaꞌinie aana maholo ne kei lae mai peꞌie manikuluhaꞌaku na manikuluhaꞌana a Mamaꞌa na mo ensel maaꞌi. 27Toꞌohuu no ko unue oto huniꞌomu uri ngaeta mo iini hikemiu mwala nge omu uure ngeena, omu kei saronai leesie Aalahanga a God kei lae mai, omu ke si mae.”
A Jisas E Haataꞌinie Manikuluꞌanga Ingeie
28Oto ola mala e walu hei dinge e mango i purine a Jisas e unue walu ola ienini, e si toolea a Pita, na a Jon, na a Jemes, na kire ko hanetaa taꞌau i lengine toloi henue huni aarea God. 29Na maholo ko aarea God ngeena, nge maana ko si lio aaopa, na mo toꞌoni ingeie kire ko tohungei lio wana-wana na ko raa oto mala waꞌariri. 30-31Oto mola aana maholona a Mosis na Elaeja ko tolana maau peꞌie manikuluhaꞌana a God, na kirerue ko ere oto peꞌie a Jisas i sulie maelana nge kei reu i Jerusalem huni haꞌa-oaie oalaꞌinge a God.
32Aana maholona na a Pita peꞌie e ro oana kiraelu ko maꞌahu. Oto maholo kiraelu lio, kire ko si leesie rarangana God e raa kali-kelie a Jisas na e ro mwane e uure oto peꞌie. 33Oto maholo e ro mwane ko deu huni lae oto mwaanie a Jisas, a Pita ko teꞌuri hunie, “Poro paine, e tohungei diana aana iꞌemeelu oto i leu. Melu kei esuie oto nga oolu aapa-aapa i leu—nga iini nemue, nga iini nana a Mosis, na nga iini nana a Elaeja.” A Pita e talei ere mola urine, taꞌe e kaꞌa saie ike nga taa ko unue.
34Maholo a Pita ko ere-ere ue urine, na mei uuru ko tolana lae oto mai, na e oolu mwane ngeena ko tohungei meꞌu oto aana mei uuru ngeena ko siho oto mai haahire. 35Na kire ko rongoa mei wala e uure mai mwaanie mei uuru ngeena ko teꞌuri, “Tohungei Kaleku ni ienini, iini nou lio hilisie. Omu ke rongo hunie.” 36Oto maholo mei wala ngeena e mango, kiraelu ko si leesie mola a Jisas e uure maraana. Oto mo pwaarongoisuli kiraelu rohu mola haahie, na kiraelu kaꞌa haꞌarongoa loꞌu nga iini aana mo dingena, aana nga moi taa nge kiraelu leesiꞌi.
A Jisas E Haꞌa-uurie Kele Mwaꞌu Liꞌoa Aaela E Hite Aana
37Oto aana hai dinge loꞌu i sulie, i purine a Jisas na e oolu pwaarongoisuli kiraelu siho toli mei mwaanie uuwo, oto kire ko oodoie mwala oto hunge. 38Oto ngaeta iini hikada ko aawara, na ko unue uuri, “!Haꞌa-uusuli! No ko eitanaiꞌo uri o ke peꞌie kaꞌu kele mwaꞌu ineu, aana taꞌa-taꞌa mwela mouteꞌi ineu ni otona. 39Maholo liꞌoa aaela kei hulesie, oto ko aawara na ko eriri oto, na huto-huto ko tahe oto aana wawana. Liꞌoa aaela ngeena ko talei waelie oto mola tarau urine, na e kaꞌa sai mango ike loꞌu mwaanie. 40Nou haaraie kaꞌu mo pwaarongoisuli iꞌoe uri kire ke taꞌaasie mwaanie, taꞌe kire dau kasoa mola.”
41Oto a Jisas ko teꞌuri, “Iꞌomu pwaunge siꞌiri ie, iꞌomu mo iinoni aaela, suata mone hule aana omu kaꞌa hiiwalaimoli ike aana a God. !No ko talei haꞌaweoau oto mola peꞌiꞌomu! ?Uri ne kei iiꞌo tewa kaꞌu loꞌu uri taa peꞌiꞌomu, omu ke si hiiwalaimoli?” Oto ko si teꞌuri hunie a mwaena, “Toolea kaꞌu mei a kalemu i leu.”
42Oto maholo nge a mwaꞌune ko lae mai takoie a Jisas, liꞌoa aaela ko reputeꞌi lae-laeꞌi oto aana a mwaꞌune i aano. Taꞌe a Jisas e ere aana liꞌoa aaela ngeena, ko si haꞌa-uurie a mwaꞌune, na ko toliꞌaasie oto hunie aamana. 43Oto ahutana mwala ko si meni pangataꞌinie loꞌu painehaꞌana nanamanga a God ngeena.
A Jisas E Heꞌi Ere Loꞌu I Sulie Maenga Ingeie
Maholo na ahutana mwala ko papangataꞌinie ue walu ola nge a Jisas ko deuꞌine, a Jisas ko si teꞌuri hunie mo pwaarongoisuli ingeie, 44“Mwaanie omu pupulongosie nga taa nge no ko unue huniꞌomu ienini. Ineu a Kale Ni Iinoni, pwelolaku kei lae i laona nimana mo iinoni.” 45Taꞌe mo pwaarongoisuli ko teipuꞌo-puꞌo mola aana nga taa nge a Jisas e ere urine hunire aana. A God e mumunie loꞌongaꞌinge aana mo wala ienini mwaanire, mwaanie kire rongo saiꞌi. Oto aana maholona, ikire na kire ko meꞌu loꞌu mola huni dolosi aana a Jisas, uri nga taa loꞌongaꞌinge aana erenga ingeie.
?A Tei Ni E Paine Liutaa?
46Oto mo pwaarongoisuli ingeie ko aehota ere haitelili maraada i sulie uri a tei hikada kei peine liutaa. 47Taꞌe a Jisas mone e saie mola loꞌongaꞌinge ikire, oto e si toolea kele mwela, ko haꞌa-uuresie i sulie, 48na ko teꞌuri hunire, “Taꞌena nga iini nge ko tola konie nga kele mwela mala ienini aana sataku, nge ko tola konieu eena. Na taꞌena nga iini nge ko tola konieu, ko tola konie noꞌone iini e uusungeꞌinieu mei eena. Aana a tei hikemiu nge ko haꞌamwai-mweiꞌaa toꞌohuu, ingeie ni oto e paine liutaa.”
49Oto a Jon ko aalamie a Jisas uuri, “Poro paine, melu leesie nga iini ko oohe liꞌoa aaela mwaanie mwala aana satamu, na melu ere aana oto mwaanie e heꞌi teꞌurine loꞌu, aana ingeie haꞌike aana pulitaa ikolu.”
50Oto a Jisas ko teꞌuri hunie, “Omu ke suꞌuri uure honosie, aena aana nga iini nge e kaꞌa uure honosikolu, ingeie iini peꞌikolu eena.”
Mo Samaria Kire Sereꞌinie A Jisas
51Maholo ko karaꞌinie oto uri a God kei tola aalihoꞌi loꞌu aana a Jisas i saana taꞌau i Lengi. Oto a Jisas e loꞌongaꞌinie uri ke lae hunie i Jerusalem, 52na e uusungeꞌinie ngaeta mo mwane uri kire ke lae i naꞌo. Oto mo mwane ngeena kire lae aana ngaeta huilume i Samaria huni deu aakau aana ahutana mo ola loosie a Jisas. 53Taꞌe mwala aana huilume ngeena, kire kaꞌa sare takuhie ike a Jisas, aena aana kire lio saie uri ko lae hunie i Jerusalem. 54Maholo ngaeta ro pwaarongoisuli ingeie, a Jemes na a Jon kirerue leesie urine, oto kirerue ko unue hunie a Jisas uuri, “?E ue Poro paine, o saetoꞌo aana mere ke unue nga dunge ke siho mai uure i Lengi hunie ke waelie mwala ngeena?”
55Taꞌe a Jisas e aaliꞌu oto ko si ere aadarue mola. 56Oto a Jisas na mo pwaarongoisuli ingeie kire si lae loꞌu mola hunie ngaeta huilume.
Mo Iini Ko Neꞌisae Mouteꞌi Haꞌalaa Kire Sai Lulu I Sulie A Jisas
57Maholo kire ko lae oto i sulie tala, ngaeta mwane ko si teꞌuri hunie a Jisas, “Nou mwaꞌe-mwaꞌe ni lulu i suliꞌo aana taꞌena nga leu o ko lae aana.”
58Oto a Jisas e aalamie ko teꞌuri, “Mo usu ni meꞌesu na hule aana kire toꞌo liwe ni maꞌahu ikire, na mo menu loꞌu kire mani toꞌo niuꞌi taane noꞌone, taꞌe ineu a Kale Ni Iinoni hule aana nga leu ni mamalo ineu na haꞌike loꞌu.”
59Oto ko teꞌuri loꞌu hunie ngaeta mwane, “O ke lulu i sulieu.”
Taꞌe a mwaena e unue uuri, “Poro paine, o ke holaꞌi toliꞌaasieu keꞌu hunie ne ke lai heitolingeꞌinie aamaku.”
60Taꞌe a Jisas e aalamie oto ko teꞌuri, “Haꞌike, taꞌe o ke lulu i sulieu oto molana, na mwaanie o maaꞌoohie mo tolahiꞌanga ni welumalau e mango nge o ke si lulu i sulieu.9:60 Erenga ni Krik e aalahuu uuri, “O ke toliꞌaasie mo iini e mae oto ke haitolingeꞌinie mo rae ikire maraada.” Taꞌe o ke lae oto molana huni tarohaꞌinie Aalahanga a God.”
61Ngaeta mwane loꞌu e unue uuri, “Ne kei lulu i suliꞌo taane, Poro paine, taꞌe o ke holaꞌi toliꞌaasieu keꞌu hunie ne ke lai haꞌarongoa mwala taꞌau i nume ineu.”
62Taꞌe a Jisas e unue uuri, “Taꞌena nga iini ko esu i hohola ingeie, taꞌe ko talei loꞌo-loꞌongaꞌinie loꞌu mola nga mo ola aaopa kei waelie oto hohola ngeena. Na e urine noꞌone mala nga iini ko sare neꞌi pwaarongoisuli ineu taꞌe ko loꞌo-loꞌongaꞌinie mola mo ola aaopa. Iinoni urine e kaꞌa malisine ike Aalahanga a God.”
10A Jisas E Uusungeꞌinie E Hiu Aawalai Mwane Mwana Rue Huni Tarohaꞌinie Aalahanga A God
1Oto i purine walu ola ie e haro mango, a Aalaha e si lio hilisie loꞌu ngaeta hiu aawalai mwane mwana rue. Oto ko holaꞌi uusungeꞌinire oto i naꞌo takoie ahutana mo huilume na mo leu nge e loꞌongaꞌi huni lae aani. 2Oto a Jisas ko teꞌuri hunire, “Soꞌokoninge e paine hiitoꞌo, taꞌe mwala auꞌesu kaꞌa hunge ike huni soꞌokoni. Omu ke aitanaie iini e toꞌo aana hohola hunie ke uusungeꞌinie loꞌu mei nga mwala auꞌesu huni soꞌokoni nana. 3No ko uusungeꞌiniꞌomu i matolana mwala e oorahaꞌaa, na saeda huni horoꞌiꞌomu mala mo wawaulo ni meꞌesu ko seunie mo sipu. 4Mwaanie omu too-toolea nga mwaꞌii toꞌoha, wa nga mwaꞌi ni laeha, wa nga hoꞌohaahiꞌae. Na mwaanie omu waelie maholo mola aana erenga peꞌie nga iini omu ko oodoie i sulie tala.
5“Maholo omu ko lai sili aana nga nume, omu ke holaꞌi aarengaꞌi talana mwala aana nume ngeena hunie a God ke haꞌadianaꞌara aani henuelamanga. 6Mala uri nga iinoni diana na tolahana e maneko ko iiꞌo aana nume ngeena, nge hanuelamanga ke iiꞌo peꞌie. Ko haꞌike, na kire saꞌa hele aana ike haꞌadianaꞌanga ngeena. 7Na omu ke iiꞌo rako oto mola aana numena. Mwaanie omu lae-lae hailiu loꞌu aana ngaeta mo nume. Omu ke ngau-ngeu mola na omu ke inu-inu aana nga moi taa kire ko niiꞌi huniꞌomu. Aana e diana hunie mwala ke peꞌiꞌomu, aana iinoni auꞌesu e malisine oto uri ke hele aana waaitana.
8“Mala uri omu ko lae aana nga huilume na mwala ko tekuhiꞌomu, nge omu ke ngau-ngeu mola aana nga moi taa kire ko niiꞌi huniꞌomu. 9Omu ke haꞌa-uurie mo iini ko mweri aana hanuena, na omu ke unue hunie mwala i leune uuri, ‘Aalahanga a God ko karaꞌiniꞌomu oto mai.’ 10Taꞌe nga huilume omu ko lae aana na mwala kaꞌa takuhiꞌomu, nge omu ke lae loꞌu mola mwaanie huilume ngeena, na omu ke unue hunire uuri, 11‘Kele mei mada aana huilume iꞌomu e raraꞌo aana aeꞌaemeelu na melu ko usuri aasie aani haꞌapasunge huniꞌomu uri a God kei haꞌaloiꞌomu. Taꞌe omu ke manataꞌinie uri Aalahanga a God ko karaꞌini oto mai.’ ”
12Oto a Jisas ko teꞌuri hunire, “No ko unue oto huniꞌomu, aana dinge ni leinge, haꞌaloilana mwala aana huilume ngeena kei aaela loꞌu hiitoꞌo liutaa aana haꞌaloinge nge kei lae hunie mwala tataꞌala aana huilume i Sodom.”
Kei Aaela Liutaa Hunie Mo Henue Nge Kire Kaꞌa Hiiwalaimoli
13Na a Jisas ko heꞌi teꞌuri loꞌu, “!Kei aaela oto liutaa huniꞌomu mo Korasin! !Na noꞌone huniꞌomu mo Betsaeda! Mala uri mo huꞌi-huꞌite nge asuileni e lae huniꞌomu ngeena, asuileni ke lae urine hunie mo puꞌo i Taea na i Saedon, haꞌalaa mwala aana e ro huilume ngeena kire pwani oonisae oto waite. Kire karaꞌi haꞌamwai-mweiꞌara aani hoꞌosilana mo toꞌoni lalahuꞌe na ipe aani pwasaꞌora huni haataꞌinie uri kire aaliꞌu oto mwaanie mo oorahaꞌaa ikire. 14Taꞌe aana dinge ni leinge, a God kei aamasie mo iinoni tataꞌala i Taea na i Saedon loꞌu liutaa aamiu. 15?Na iꞌomu mo Kapaneam, omu ko loꞌo-loꞌongaꞌi uri a God kei sulu alaꞌa aamiu taꞌau i Lengi? !Haꞌike! A God kei aasiꞌomu mola hai aano aana leu ni haꞌamotaahinge.”
16Oto a Jisas ko heꞌi teꞌuri loꞌu hunie mo pwaarongoisuli ingeie, “Nga iini nge ko rongo huniꞌomu, ko rongo hunieu noꞌone eena. Na nga iini nge ko lelediꞌomu, ko leledieu noꞌone. Na iini nge ko leledieu, ko leledie noꞌone iini nge e uusungeꞌinieu mei eena.”
E Hiu Aawalai Mwane Mwana Rue Kire Aalihoꞌi
17Oto e hiu aawalai mwane mwana rue ngeena kire aalihoꞌi mei peꞌie ilenimwaꞌenga, na kire ko teꞌuri hunie a Jisas, “Aalaha iꞌemi, maholo melu sasaie satamu, hule aana mo liꞌoa aaela na kire maꞌuteꞌiniꞌemeelu oto peꞌi tola i sulilameelu.”
18Oto a Jisas e aalamire ko teꞌuri, “Nou leesie taane a Satan e domu uure mwaanie i Lengi mala waꞌariri. 19Aana nou niie oto huniꞌomu nanamanga huni uuri haahie mo mwaa ala-ala na mo heri-heri. Na nou niie oto noꞌone nanamanga e saka loꞌu liutaa aana nanamanga a Satan. Oto nga mei ola e saꞌa huꞌisiꞌomu ike loꞌu. 20Omu ke ile-ilenimwaꞌe mola. Taꞌe suꞌuri ilenimwaꞌe haahie uri mo liꞌoa aaela ko meꞌuteꞌiniꞌomu. Omu ke ilenimwaꞌe haahie a God e uusue oto satamiu taꞌau i Lengi.”
A Jisas E Aarengaꞌi Hunie A God Aani Ilenimwaꞌenga
21Aana maholona a Jisas e honu aani ilenimwaꞌenga aana Liꞌoa Maaꞌi, oto ko teꞌuri, “Mamaꞌa, iꞌoe oto o aalaha haahie i Lengi na mai aano. Uure oto waite o mumunie Tataroha Diana mwaanie kira saenanau, taꞌe ie o ko haataꞌinie oto hunie mo iini kaꞌa saenanau. Oto no ko tohungei paalaheꞌo, Mamaꞌa, aana o oalaꞌinie hunie ke lae oto urine.”
22Oto ko heꞌi unue loꞌu hunie mwala uuri, “Aamaku e niie oto ahutana walu ola hunieu hunie ne ke paine haahiꞌi. Na nga iini kaꞌa manataꞌinie ike a Kale taꞌe a Mamaꞌa mola haliꞌite. Na nga iini e kaꞌa manataꞌinie ike a Mamaꞌa taꞌe a Kale mola haliꞌite, na mo iini nge a Kale ko lio hilisire huni unu haataꞌi aana Aamana.”
23Oto a Jisas e aaliꞌu takoie mo pwaarongoisuli, ko si unue hunire maraada uuri, “Deidehiꞌomu aana omu ko leesie walu ola ienini. 24Aana no ko unue oto huniꞌomu uri hungelana mo propet na mo inemauri kire tohungei sasare leesie mo ola omu ko leesiꞌi ie, taꞌe kire kaꞌa lio mangini, na uri huni rongoa mo ola omu ko rongoꞌi ie, taꞌe kire kaꞌa rongo lelengani.”
A Jisas E Aalahuu Aana Mwane Diana Ni Samaria
25Oto ngaeta haꞌa-uusuli aana mo Haꞌatolanga a Mosis e lupweꞌi dolosi pweloa a Jisas uuri, “?Haꞌa-uusuli, nga mei taa ni ne kei esuie kaꞌu hunie ne ke helesie maurihe huu?”
26Oto a Jisas ko aalamie uuri, “?Nga taa ni uusulana e lae i laona mo Haꞌatolanga a Mosis? ?O ko saa-saai uri taa aani?”
27Oto a mwaena ko aalamie a Jisas uuri, “O ke manata diana hunie a God, Aalaha iꞌoe oto aana ahutana saemu, na aana ahutana maurihaꞌamu, na aana ahutana aꞌailaꞌanga iꞌoe, na aana ahutana mo neꞌisaenga iꞌoe,Diutronomi 6:5na o ke manata diana hunie auhenue iꞌoe oto mala o manata diana huniꞌo maraamu.”Levitikas 19:18
28Oto a Jisas ko aalamie a mwaena uuri, “Iau, o ko ere toꞌohuu. O kei teꞌurine nge o ke si hele aana maurihe huu.”
29Taꞌe a mwaena mone ko heitalea nga mei neꞌisaenga hunie haꞌatolanga e aasa ngeena ke mwadaꞌu mola hunie. Oto ko teꞌuri hunie a Jisas, “?Haꞌalaa, a tei ni nge auhenue ineu?”
30Oto huni aalamie dolosinge ngeena, a Jisas ko teꞌuri hunie, “Nga mwane ikie mo Jiu e uure i Jerusalem ko pweu hao i sulie tala hunie i Jeriko. Oto lae-lae e oodoie ngaeta mo horopeli. Oto kire tapolie, kire ko si repusie, na kire ko taꞌaasie oto mo toꞌoni ingeie mwaanie. Oto kire si lae mwaanie na e maehunu oto. 31Oto ngaeta pris ikie mo Jiu e tapaliu hao i sulie tala na ko leesie a mwaena, oto e si eeliꞌu mola mwaanie. 32Oto lae-lae, ngaeta mwane loꞌu ikie mo Jiu, mwane aana komu a Livae nge ko hei-hei raretaꞌi wau i Nume Maaꞌi Peine, na e urine loꞌu. E liu taane hai leesie mweitaꞌaana, taꞌe e liu taraꞌasi noꞌone mola mwaanie. 33Taꞌe lae-lae, ngaeta mwane ni Samaria, mwane aana hanue mo maelonga ikie mo Jiu, ko lae noꞌone hao i sulie tala ngeena. E lae hao i leesie a mwaena na e eno mola i sulie tala, oto ko tohungei aamasie. 34Mwane ni Samaria ngeena e da ho waen na ho rumu, oto ko lingisiꞌi mala meresine i laona mo malaka i sapena mwaena, ko si hoꞌo haahiꞌi. Oto e neꞌie i lengine dongki ingeie nge ko lae-lae aana, e si toolea ko lai lio i sulie taꞌau i nume ni awataa. 35Oto hai dinge loꞌu i sulie, mwane ni Samaria e taꞌaasie mei toꞌoha mwaanie mwaꞌi ingeie adona iiꞌonga aana nume ngeena ola mala e oolu wiki. Oto ko niiꞌi hunie mwane ko lio i sulie nume ngeena, na ko unue hunie uuri, ‘O ke lio i suli diana aana oto a mwane ie. Mala uri o ko aasie loꞌu nga mei toꞌoha huni holie nga mei ola aana, ne ke si suꞌue huniꞌo aana maholo ne kei ooli loꞌu mei.’ ”
36Oto a Jisas ko si teꞌuri hunie haꞌa-uusuli aana mo Haꞌatolanga a Mosis ngeena uuri, “?Iini uri taa aana e oolu mwane ngeena nge iꞌoe o loꞌongaꞌinie uri e neꞌi euhenue toꞌohuu hunie mwane nge mo horopeli e horoꞌiena?”
37Oto haꞌa-uusuli aana mo Haꞌatolanga ko aalamie a Jisas uuri, “Iini nge e aamasie.”
Oto a Jisas ko si teꞌuri hunie, “O ke lae, na o ke asu noꞌone urine mala ingeie.”
A Maata E Upwesie A Meri Aana E Kaꞌa Peꞌie
38Maholo a Jisas na mo pwaarongoisuli ingeie kire lae-lae, oto kire lai hule aana ngaeta huilume. Oto aana huilume ngeena keni satana a Maata e tolakonie a Jisas wau i nume ingeie. 39A Maata e toꞌo aana nga keni eesine, satana a Meri, taꞌe a Meri e iiꞌo mola i saana a Jisas huni pwaarongo i sulie mo haꞌa-uusulinge ingeie. 40Oto, a Maata ko tohungei hii aaela aana ko hei raretaꞌi maraana. E lae wau, oto ko teꞌuri hunie a Jisas, “?Poro paine, uri e kohi mola aamu aana a keni eesiku e toliꞌaasieu mola hunie ne ke haꞌalie maraaku? !O ke unue ke lae mai esu noꞌone peꞌieu!”
41Oto a Jisas e aalamie mola uuri, “Maata, Maata. O ko lae otoi tolahiꞌe aana mo ola hunge. 42Taꞌe taꞌa-taꞌa mei ola ni mola e roroꞌa, na a Meri ko lae otoi deu diana, aana e lio hilisie oto tohungana mei ola diana, na nga iini e saꞌa heꞌi taꞌaasie loꞌu mwaanie.”
11A Jisas E Haꞌa-uusuli I Sulie Aarengaꞌinge
1Ngaeta hai dinge a Jisas e lai iiꞌo aana ngaeta leu, oto ko aarengaꞌi. Maholo e aarengaꞌi mango oto, nge ngaeta iini aana mo pwaarongoisuli ingeie ko si teꞌuri hunie, “Aalaha ineu, o ke haꞌasaiꞌemeelu noꞌone aana tolahana aarengaꞌinge, oto mala a Jon e haꞌasaie kaꞌu mo pwaarongoisuli ingeie.”
2Oto a Jisas ko teꞌuri hunire, “Maholo omu ko aarengaꞌi, omu ke ere uurini.
Mamaꞌa,
Mwala ke haꞌamaꞌu aana satamu.
Aalahanga iꞌoe ke lae mai.
3O ke niie mai huniꞌemi suli hei dinge,
mo ngeulaa e adona dinge ngeena.
4O ke saeꞌaasie huniꞌemi mo oorahaꞌaa iꞌemi,
aana emi ko saeꞌaasie noꞌone mo roroꞌanga taꞌena nga iini ko deu huꞌisiꞌemi.
Na mwaanie o toliꞌaasiꞌemi huni oorahaꞌaa maholo malaahongalamami ko lae.”
5Na a Jisas e teꞌuri hunie mo pwaarongoisuli ingeie, “Mala uri nga iini hikemiu ke lae i saana a malahune i upui rodo, oto ko teꞌuri hunie, ‘Malahuku, o ke niie nga oolu ho ngeulaa hunieu, 6aana ngaeta malahuku ko lae i suli henue, na e si kele hule taꞌau i nume ineu oto molana, taꞌe nga mei ola hunie ne ke niie ana haꞌike.’ 7Oto uri a malahumu ke aalamiꞌo uure wau i nume uuri, ‘!Suꞌuri kotahieu! Maa e hono oto, na ahutameelu melu ko maꞌahu oto. Oto nou saꞌa taꞌelaꞌi ike loꞌu huni niie nga mei ola amoreꞌi.’ 8?Oto nga taa eena? No ko unue oto huniꞌomu, maꞌalana e unue uri e saꞌa taꞌelaꞌi loꞌu huni niie nga kele ho ngeulaa huniꞌo aena aana iꞌoe oto malahune, taꞌe kei taꞌelaꞌi taane na kei haro niie mola mo ola saemu huniꞌi, aena aana o kaꞌa masa ike huni deu suꞌu-suꞌuie.
9“Oto no ko unue huniꞌomu uri omu ke susuke aana a God, na ingeie ke si niie huniꞌomu. Omu ke hai-heitalea i saana God, na omu ke si lio oodoie. Na omu ke iiki-iiki i kolune maa ingeie, na ingeie ke si tahanie maa talamiu. 10Aana taꞌena nga iini ko sukaa nga mei ola aana a God, nge kei niie oto hunie. Na taꞌena nga iini ko heitalea nga mei ola aana a God, kei lio oodoie oto. Na taꞌena nga iini ko iiki-iiki ikolune maa ingeie, nge a God kei taha maa talana oto. 11?E ue aana iꞌomu mo mamaꞌa? ?Mala uri kalemu ko sukaa nga ho iiꞌe aamu, o sai niie mola nga mwaa ana? 12?Wa uri ko sukaa nga ho maꞌopu, o kei niie mola nga hari-heri ana? !Haꞌike! 13Iꞌomu mo iinoni oorahaꞌaa, taꞌe hule aana omu sai niie mo ola diana hunie mo mwela iꞌomu. ?Ilisie Aamamiu i Lengi iini e diana liutaa aana taꞌena nga iinoni, uri e saꞌa niie Liꞌoa Maaꞌi hunie nga mo iini ko suke aana?”
A Jisas E Nanama Liutaa Aana A Satan
14Ngaeta maholo a Jisas ko oohe aasie liꞌoa aaela mwaanie mwane e kaꞌa sai ere ike. Maholo liꞌoa aaela ngeena e iisitaa oto mwaanie a mwaena, nge ko si ere-ere loꞌu. Mwala oto hunge kire loko i leune na kire ko tohungei pangataꞌi. 15Taꞌe ngaeta mo iini aana mwala ngeena, kire ko unue mola uuri, “A Bielsebul, naꞌohana mo liꞌoa aaela nge e niie nanamanga ngeena hunie huni oohe aasie mo liꞌoa aaela urine.” 16Na ngaeta mwala loꞌu kire ko sare lupweꞌi oohongie mola a Jisas aana kire loꞌongaꞌinie uri e kaꞌa uure ike mwaanie a God, oto kire ko unue hunie uri ke da nga huꞌi-huꞌite hunie kire ke leesie.
17Taꞌe a Jisas mone e saie mola nga taa kire ko loꞌo-loꞌongaꞌinie, oto ko si teꞌuri hunire, “Taꞌena nga aalahanga kei oopa aani heiseuninge honosie maraana, nge kei naꞌonga oto. Na nga nume nge kei oopaa aani heiseuninge honosie maraana, nge kei eiꞌaa oto. 18Iꞌomu, omu ko unue uri no ko oohe aasi liꞌoa aaela aana nanamanga a Bielsebul, taꞌe omu ke rongo kaꞌu. ?Mala uri aalahanga a Satan kei heiseuni honosie loꞌu mola maraana, nge aalahanga ingeie ke si iiꞌo susu uri taa eena? 19?Mala uri ineu no ko oohe aasi liꞌoa aaela aana nanamanga a Bielsebul, oto nga nanamanga uri taa kaꞌu nge mo pwaarongoisuli iꞌomu ko oohe aasi liꞌoa aaela aana? Mo pwaarongoisuli iꞌomu kire haataꞌi diana aana uri iꞌomu ni omu takalo. 20Taꞌe ineu, no ko oohe aasie mo liꞌoa aaela aana nanamanga a God. Na leune e haataꞌi diana aana oto uri Aalahanga a God e hule oto i seemiu.”
21Oto a Jisas ko heꞌi ere ni aalahuunge loꞌu i sulie nanamanga ingeie e saka liutaa aana Satan, na ko teꞌuri, “Mala uri nga mwane aꞌailaꞌa e toꞌo aana mo reisinge huni heiseuni na a mwaena ko kakalie nume ingeie, nge ahutana mo ola i laona nume ingeie kei iiꞌo pupupu. 22Taꞌe mala uri ngaeta mwane e aꞌailaꞌa loꞌu liutaa aana kei polahie na kei horoꞌie oto, nge mwane aꞌailaꞌa liutaa ngeena kei leue oto mo reisinge a mwaena e puu-puutoꞌo aani ngeena, na ke si niie mola walu ola e tooleꞌi mwaanie nume ngeena hunie mo malahune.11:22 A Jisas e haꞌamalaa uri a Satan domana ngaeta ramo, taꞌe a Jisas domana iini nge e aꞌailaꞌa oto liutaa. A Jisas e sai pwesue mola a Satan huni toolea ahutana mo ola ingeie, na aana e urine, nge a Jisas e sai luhesie mo iinoni mwaanie aalahanga ni rodohono a Satan huni toolera i saana aalahanga ni matapwanga taꞌau i Lengi.
23“Nga iini oto e kaꞌa lulu i sulieu, ingeie oto maelonga ineu. Na nga iini oto e kaꞌa peꞌieu huni toolea mai mo iinoni takoie a God, ingeie e urihana uri ko peesie mola mwala mwaanie a God.”
24Oto a Jisas ko heꞌi teꞌuri loꞌu, “Maholo nga liꞌoa ni oorahaꞌaa ko iisitaa mwaanie nga iinoni, kei waloliu i laona hanuesala ni lio hunie nga leu ni mamalo ingeie. Mala uri e kaꞌa lio oodoie oto nga leu, nge ke si teꞌuri hunie maraana, ‘Ohe ne kei ooli loꞌu mola takoie nume ineu, iini nou iisitaa kaꞌu mwaanie.’ 25Oto e ooli taꞌau na ko lio oodoie a mwaena e urihana nume nge kire tala rereꞌa aana, na kire hataaꞌi diana aana mo ola i laona. 26Oto ko si lae loꞌu huni toolea mai ngaeta hiu liꞌoa ni oorahaꞌaa aaela loꞌu liutaa aana ingeie. Oto kire lae, kire ko si lae oto iiꞌo huu i laona iinonine. Oto aana haꞌamangolana, tolahana iinonine loꞌu mei puri ko si tohungei aaela oto hiitoꞌo liutaa aana tolahana holaꞌinaꞌo.”
27Maholo a Jisas ko ere-ere ue urine, na ngaeta keni aana mwala e ruru ngeena ko teꞌuri hunie, “!Deidehie oto a nikemu!”
28Taꞌe a Jisas e aalamie uuri, “Iau, taꞌe ilenimwaꞌenga oto liutaa hunie ahutana mo iini ko rongoa walana God na kire ko lulu i sulie.”
Mo Parise Kire Sukaa Nga Huꞌi-huꞌite
29Na maholo mwala hunge ko ruru mei saana a Jisas, oto ko si ere uuri hunire, “Iꞌomu mwala aana maholo ienini, tolahamiu e tohungei aaela. Omu ko sukaa uri omu ke leesie mola nga huꞌi-huꞌite mwaanie a God. Taꞌe nou saꞌa asuie ike. Taꞌa-taꞌa huꞌi-huꞌite nou sai haataꞌinie aamiu oto nga taa e rau aana a Propet Jona oto waite. 30Aena aana nga taa e rau aana a Jona ngeena, e haataꞌinie uri a God ni nge e uusungeꞌinie a Jona i saada mwala ni puꞌo i Ninive. Na e urine noꞌone aana ineu a Kale Ni Iinoni, aana nga taa kei reu eeku kei haataꞌinie uri a God ni e uusungeꞌinieu mei huniꞌomu, mwala aana maholo ienini. 31Aana dinge ni leinge Toro ni Siba kei taꞌelaꞌi noꞌone honosiꞌomu aana pwaunge ienini, na kei ere aamiu uri omu tohungei takalo oto liutaa. Aana ingeie e uure haꞌatau oto i ngongoꞌana walumalau huni lae mai rongoa mo haꞌa-uusulinge ni saenanaunge a Solomon Inemauri. Na no ko unue oto huniꞌomu uri ngaeta iini e paine loꞌu liutaa aana Solomon taane i matolamiu i leu, taꞌe omu ko leledie mola. 32Na aana dinge ni leinge, mo Ninive noꞌone kei taꞌelaꞌi honosie mwala aana maholo ienini. Oto kire kei haataꞌinie uri omu tohungei takalo oto hiitoꞌo, aena aana maholo a Jona e laeliwala nana mwalana, kire oonisae oto. Taꞌe lio kaꞌu, ngaeta iini e paine liutaa aana a Jona kaꞌu taane oto ie, na omu kaꞌa oonisae ike.”
Hari-hunilana Mo Ola Ni Lengi E Urihana Raa-raa
33Oto a Jisas ko heꞌi teꞌuri loꞌu, “Maholo nga iini ko haꞌakaunie nga laite, e saꞌa neꞌi mumuni ike aana wa ke pwaohaꞌinie luluꞌe haahie. !Haꞌike! Taꞌe kei neꞌi haadaꞌi aana oto taꞌau i lengi, hunie mwala ko sili mei nume na kire ke leesie oto rarangana laite ngeena. 34Oto maamu e urihana raa-raa hunie sapemu. Mala uri maamu e manola, nge ahutana sapemu kei matapwa oto, taꞌe mala uri maamu e kaꞌa manola, nge ahutana sapemu kei rodohono oto. 35Lio diana aana, mwaanie o unu-unue uri saemu e manola taane, taꞌe e rodohono mola. 36Aana ahutana sapemu kei honu aana raa-raa na nga leu aana kaꞌa rodohono loꞌu, nge e urihana maholo laite e raangiꞌo na ahutana sapemu e matapwa mango.”
A Jisas E Ere Aana Mo Parise
37Maholo a Jisas e ere-ere mango, nge ngaeta Parise ko si haaraie uri huni lai ngeu peꞌie i nume ingeie. Oto a Jisas e lae peꞌie na maholo kirerue hule wau i nume a mwaena, a Jisas e iiꞌo mola i aano huni ngeu 38na e kaꞌa holaꞌi hodalie ike kiꞌine i sulie tolahada mo Parise. Oto Parise ngeena ko tohungei pangataꞌi aana e leesie urine.
39Oto a Aalaha ko teꞌuri hunie, “Iꞌomu mo Parise omu urihana mola mo nime na mo kao-kao kire hoda rereꞌa aana aapa poꞌoi sinaha, taꞌe wau i laona e honu mola aana ngaulaa e kasu. Omu ko sasare lio kohi i maana mwala, taꞌe hule aana saemiu e honu oto mola aana horo-pelinge na taꞌena nga loꞌongaꞌinge aaela. 40!Omu tohungei pweu! ?Ohe omu ko loꞌongaꞌinie uri iini e haꞌaholaa poꞌoi sinaha, e kaꞌa haꞌaholaa ike poꞌoi lalo noꞌone? 41Taungei hoda-olanga urine e kaꞌa roroꞌa ike. Taꞌe mala omu ke nii ola mola i laona mo nime na mo kao-kao ngeena ana kira maitale, haꞌalaa ahutana walu ola ngeena ke si meni rereꞌa toꞌohuu huniꞌomu. 42!Aama-aamasilemiu mo Parise! Aana omu sai niie tangahuluꞌana tari-olanga iꞌomu hunie a God, na hule aana omu ko niie noꞌone tangahuluꞌana mo kele takai ei mwei-mwei uure mwaanie mo hohola iꞌomu. Taꞌe hunie haꞌa-oodohilemiu peꞌie mwala na huni manata diana hunie a God, nge omu kaꞌa sai aapwasu ike aana. Mo naꞌohai ola uri hunie omu ke dau i suliꞌi kaꞌu ienini. Na loꞌu mwaanie omu pulongosie mo haꞌa-uusulinge mwai-mwei mala niilana tangahuluꞌana tari-olanga iꞌomu. 43!Aama-aamasilemiu mo Parise! Aana omu ko heri hunie mo naꞌohai iiꞌo-iiꞌoha haliꞌite i laona mo nume ni palo-palo, na uri mwala ke haꞌapainaꞌaꞌomu aana maholo omu ko walo liu i laona mo leu ni uusiꞌe. 44!Aama-aamasilemiu! Aana omu urihana mola mo kilipweꞌu kire aano oto, aana aapa poꞌoi sinaha e lio diana taane na mwala saꞌa lio saie ike uri rae kire aanomie i leune.”
45Oto ngaeta iini hikana mo haꞌa-uusuli aana mo Haꞌatolanga a Mosis ko aalamie a Jisas uuri, “Haꞌa-uusuli, o ko ere urine, o ko ere aaelasiꞌemi oto noꞌone ni ngeena.”
46Oto a Jisas ko aalamie ko teꞌuri, “!Aama-aamasilemiu noꞌone mo haꞌa-uusuli aana mo Haꞌatolanga! Iꞌomu, omu ko da ludaa e hiꞌe aana mo haꞌatolanga hunie mwala. Taꞌe hule aana iꞌomu maraamiu na omu saꞌa nii kiꞌi huni peꞌie mwala huni suluꞌie ludaa ngeena. 47!Aama-aamasilemiu! Aana omu esu diana aana mo kilipweꞌu talana mo propet nge mo aamamiu e horo maesire. 48Aena urinena, iꞌomu, omu ko haꞌawalaimoliꞌaa nga taa nge mo aamamiu kire asuie eena. Aana ikire, nge kire horoꞌie mo propet, na iꞌomu, omu ko esuie mo kilipweꞌu huni aamasitoꞌo aana horoꞌilada. 49Aana e urine kaꞌu, a God e ere ni saenanaunge uuri, ‘Ne kei uusungeꞌinie mai mo propet na mo hurulaꞌaa i saada. Na kire kei horo maesie nga mo iini aada, na kire kei teungeꞌinie nga mo iini.’ 50Oto haꞌaloilemiu pwaunge siꞌiri kei lae haahie maelana mo propet nge horoꞌilada e lae kaꞌu uure oto i aehotalana walumalau. 51Haꞌaloilemiu kei lae haahie horoꞌilada, aehota peꞌie a Ebol lae hule aana a Sekaraea, iini horoꞌilana e lae karaꞌinie ora ni uunu-uunu aana Nume Maaꞌi Peine. Toꞌohuu no ko unue oto huniꞌomu uri iꞌomu pwaunge siꞌiri ie a God kei haꞌaloiꞌomu haahie horoꞌilana ahutada mango. 52!Aama-aamasilemiu mo haꞌa-uusuli aana mo Haꞌatolanga! Aana omu ko mumunie kii huni tahanie maa aana nume ni saenanaunge i sulie tolahana a God. Na iꞌomu maraamiu noꞌone hule aana omu kaꞌa sare sili ike i laona numena, na omu ko deu honosie mo iini ko sare sili i nume.”
53Maholo a Jisas ko iisitaa oto mwaanie leune, mo haꞌa-uusuli aana mo Haꞌatolanga a Mosis na mo Parise ko si aehota ere aaelasie oto hiitoꞌo, na uure aana maholona kire ko talaꞌai dolosie oto mo ola hunge aana, 54aena aana kire sare lupweꞌi da mola uri hunie ke unue nga mei wala huni waelie maraana.
12A Jisas E Haꞌapasulie Mwala Mwaanie Kire Lupweꞌi Deu-Deu Mala Mo Parise
1Ngaeta maholo, mo sinolai iinoni oto hunge kire ruru mei saana a Jisas, na leune e lae wai honu aani iinoni hule aana nga leu ni uure haꞌike loꞌu. Oto a Jisas ko si holaꞌi teꞌuri hunie mo pwaarongoisuli ingeie, “Omu ke lio talamiu mwaanie tolahana mo Parise, aana ikire mwala eero-eero. Mala nga kele mei iis ko esuie nga nime pulaoa paine ke hane, nge tolahana eeronga ikire ko toꞌohie walu ola kire ko esuiꞌi. 2Taꞌe-taꞌena nga mei ola iinoni ko mumumunie, haataꞌinilana kei saro lae mola, na taꞌena nga mei ola ko reu mumuni, sailana kei saronai lae taane. 3Na nga taa nge omu ko ere-ere mumuni aana, na mwala kei saronai saie mola. Na nga taa nge omu ko kele sasawarungeꞌinie oto mola i eelingemiu i laona duru iꞌomu maraamiu, soingeꞌinilana kei lae taane hunie mwala ke mani rongoa.”
O Ke Maꞌuteꞌinie Mola Taꞌe A God
Matiu 10:28-33, 12:32, 10:19-20
4Oto a Jisas ko heꞌi teꞌuri loꞌu, “Maeni malahuku, omu ke suꞌuri meꞌuteꞌinie mwala ko sare horoꞌiꞌomu, aana kire saꞌa da loꞌu nga mei ola aaela huni waeliꞌomu mei puri. 5Taꞌe ne ke haataꞌinie aamiu iini hunie omu kei meꞌuteꞌinie. Omu ke maꞌuteꞌinie mola a God, iini nge e sai horo maesiꞌomu, na e toꞌo aana noꞌone nanamanga huni aasiꞌomu i laona dunge ni haꞌamotaahinge loꞌu mei puri. Iau, no ko unue loꞌu huniꞌomu, ingeie ni oto iini omu ke maꞌuteꞌinie. 6E lime kele pipisu holileni e lae mola aana e ro peni pulu. Taꞌe hule aana a God e saꞌa roroꞌa pulongosie ike nga taꞌa-taꞌa kele iini eeni. 7Omu ke saie uri a God hule aana e sai susulie warai iihune pwaumiu. Oto omu ke suꞌuri meꞌu, aena aana omu tohungei hiꞌe liutaa aana mo pipisu oto hunge.
8“Ineu, no ko unue oto huniꞌomu uri taꞌena nga iini kei unu tahangaꞌinieu i naꞌona mo iinoni uri ingeie iinoni ineu, nge ineu a Kale Ni Iinoni, ne kei unu tahangaꞌinie iinonine noꞌone urine i naꞌona mo ensel a God, uri ingeie iinoni ineu. 9Taꞌe nga iini nge kei taateingeꞌinieu i naꞌona mo iinoni, nge ineu a Kale Ni Iinoni, ne kei taateingeꞌinie noꞌone i naꞌona mo ensel a God uri iinoni ngeena nga iinoni ineu haꞌike. 10Na mala nga iini kei unue nga mei wala honosieu a Kale Ni Iinoni, a God e sai saeꞌaasie mola hunie. Taꞌe mala nga iini kei ere mwakataꞌinie Liꞌoa Maaꞌi, nge a God e saꞌa roroꞌa saeꞌaasie loꞌu mwaanie iinonine.12:10 A Jisas e ere i sulie “mei oorahaꞌaa a God e saꞌa roroꞌa saeꞌaasie loꞌu” aana maholo ngaeta mwala ko leledie walaimolinge nge Liꞌoa Maaꞌi e haataꞌinie hunire i sulie a Jisas. Oto urine kire oorahaꞌaa ni ngeena, aana saeꞌaasilana saꞌa lae ike oto ooꞌoo hunie taꞌena nga iini e ere mwakataꞌinie Liꞌoa Maaꞌi aana e sereꞌinie walaimolinge nge Liꞌoa Maaꞌi ko haataꞌinie hunie.
11“Na iꞌomu mo iinoni ineu, maholo kire kei tooleꞌomu hunie leilemiu i laona mo nume ni palo-palo mo Jiu, wa i naꞌona mo aalaha, wa i naꞌona mo inemauri, omu ke suꞌuri tolahiꞌe i sulie omu kei uure maꞌutaꞌa uri taa, wa nga taa omu kei unue. 12Aana Liꞌoa Maaꞌi kei haataꞌinie taane aamiu nga taa ni unue aana maholona.”
A Jisas E Aalahuu I Sulie Mwane Toꞌo-Toꞌo E Pweu
13Oto ngaeta mwane aana ruruhaa ko teꞌuri hunie, “Haꞌa-uusuli, o ke unue hunie aasiku ke oopaa toꞌo-toꞌonga nge aamamereꞌi e niie namereꞌi aana hai dinge e mae.”
14Oto a Jisas ko aalamie uuri, “!Mwaena! Lio hilisileku e kaꞌa lae ike hunie ne ke oopa toꞌo-toꞌolamoreꞌi wa uri ne ke leie mo ola urine.”
15Na a Jisas ko heꞌi lae loꞌu peꞌi erenga uurini hunie ahutada, “Omu ke lio talamiu na omu ke kinetaꞌiniꞌomu mwaanie taꞌena nga saehanalinge. Aana tohungana maurihaꞌana iinoni e kaꞌa lae ike i sulie nga taa nge iinoni e toꞌo aana, maꞌalana iinoni ngeena ke toꞌo-toꞌo loꞌu uri taa.”
16Oto a Jisas ko ere ni aalahuunge hunire uuri, “Ngaeta mwane toꞌo-toꞌo e toꞌo aana mei aano diana nge ahutana ola e aahu diana i laona. 17E oꞌoꞌo, oto ko aehota loꞌo-loꞌongaꞌi uuri, ‘Nga leu ni durue mo ngeulaa ineu haꞌike. ?Oto ne ke si ue eena?’ 18Oto ko heꞌi loꞌongaꞌi loꞌu uuri, ‘Nou saie oto nga taa ne kei esuie. Ne kei ohoie mola mo nume ni duru ineu, na ne ke asu peine loꞌu eeni. Oto ne ke si durue mo ngeulaa ineu, na oto ahutana walu ola ineu i laona nume haalu ngeena. 19Purine, ne ke si unue hunieu maraaku uuri, !Ingeie kaꞌune! Nou toꞌo aana oto walu ola diana adona mo helisi hunge. Ne ke mamalo mola, aana mauringe e mwadaꞌu oto hunieu.’ 20Taꞌe a God e teꞌuri hunie a mwaena, ‘!O tohungei pweu! Siꞌiri rodo, oto o kei mae. ?Haꞌalaa, a tei nge kei toꞌo aana ahutana walu ola nge o ko duduruꞌi mola namue maraamune eena?’ ”
21Oto a Jisas ko si ere uuri, “Kei urine oto hunie mo iini nge ko dudurue mola dianahaꞌana mo ola aana walumalau ie nada maraada, taꞌe kire kaꞌa toꞌo-toꞌo ike aana tolahana a God.”
Mwaanie O Tolahiꞌe, Taꞌe O Ke Norutoꞌo Mola Aana God
22Oto a Jisas ko unue hunie mo pwaarongoisuli ingeie uuri, “Aena urinena, no ko unue oto huniꞌomu uri mwaanie omu neꞌi-neꞌisae paine aana mei ngeulaa ni meuri aana iꞌomu, wa mo toꞌoni huni toꞌoni haahie sapemiu. 23Aana mauringe e roroꞌa liutaa aana ngaulaa, na sapemiu e roroꞌa liutaa aana toꞌoni. 24Omu ke leesie kaꞌu mo menu ko loo-loho hailiu ngeena. Kire kaꞌa auꞌesu hohola, wa uri kire ke soꞌo-soꞌokoni huni duruꞌi. Taꞌe a God ko haꞌa-haꞌangaure taane. !Ilisie iꞌomu mo iinoni! Omu roroꞌa liutaa aana mo menu i maana a God. 25Oto aana maꞌalana omu ke loꞌo-loꞌongaꞌi liutaa loꞌu i sulie mauringe iꞌomu, taꞌe omu saꞌa roroꞌa da ike mauringe ngeena ke tewa loꞌu. 26?Mala uri omu kaꞌa sai deu i sulie mo kele ola mwai-mwei urine, na e ue omu ko si lae otoi tolahiꞌe i sulie mo ola paine? 27Omu ke leesie kaꞌu mo ei tataka nge kire ko pwito hailiu ngeena. Kire kaꞌa auꞌesu wa kire ke tau-teuri sala. Taꞌe no ko unue huniꞌomu uri maꞌalana a Solomon Inemauri e toꞌo-toꞌo liutaa na e sai toꞌoni aana mo toꞌoni manikuluꞌe, taꞌe mo ei tataka ngeena kire hoꞌo sala lio diana liutaa aana. 28Mo ei tataka ngeena, mo ola kaꞌa oꞌoꞌo tewa ike noꞌone. Kire ko eehurara mola i matana hoꞌowa, na i seulehi kire ko nunulu oto loꞌu, na mwala ko aasiꞌi mola i laona dunge. ?Oto mala a God ko haꞌatoꞌonie mo takai ei ngeena, ohe omu unue uri a God e saꞌa nii toꞌoni ike haahiꞌomu? !Hiiwalaimolinge iꞌomu e lae otoi mwei-mwei hiitoꞌo! 29Omu ke suꞌuri lae otoi tolahiꞌe hiitoꞌo loꞌu aani loꞌongaꞌinge aakau i sulie nga taa omu kei ngaa na nga taa omu kei inuhie. 30Mwala ni puꞌo ni kire ko lae otoi totolahiꞌe hiitoꞌo i sulie mo ola urine. Taꞌe iꞌomu, Aamamiu e saie taane oto uri omu saetoꞌo aana mo olana. 31Taꞌe omu ke neꞌi-neꞌisae aana Aalahanga a God liutaa aana taꞌena nga ola mai aano, na ingeie ke si sapeie taꞌena nga ola huniꞌomu.
32“Maꞌalana omu kaꞌa hunge, taꞌe mwaanie omu meꞌu-meꞌu, maeni mwela, aena aana Aamamiu ko tohungei ilenimwaꞌe hunie omu kei aalaha peꞌie i laona Aalahanga ingeie. 33Oto omu ke haꞌaholingeꞌinie mola toꞌo-toꞌolamiu, na omu ke niie mei toꞌoha aani hunie kira maitale. Omu ke mwaꞌie mo toꞌoha iꞌomu i laona mwaꞌi e saꞌa moka ike. Na omu ke loohaꞌinie toꞌolamiu i Lengi, aana leu kire saꞌa peliꞌi ike aana, wa mo kokorosi ke waeliꞌi. 34Aena aana leu nge toꞌolamiu e iiꞌo aana, nge saemiu kei talei oꞌoꞌo noꞌone mola aana leune.”
A Jisas E Aalahuu Aana E Ro Koni-Konihe Ko Maaꞌoohie Poro Paine Ikire
Matiu 24:45-51, 25:1-13, Mak 13:33-37
35Oto a Jisas ko heꞌi teꞌuri loꞌu, “Omu ke dau aakau taraureꞌi loosie nga taa ko lae mai. Omu ke roro maꞌutaꞌa aana mo toꞌoni iꞌomu, na omu ke haꞌakaunie mo laite iꞌomu kire ke eeso-eeso, 36mala mo koni-konihe ko maaꞌoohie aalaha ikire kei ooli mei mwaanie aaharota. Aana maholo kei lae mai iiki ikolune maa, oto kire ko tolana tahamaa oto talana. 37Deidehie mo koni-konihe ngeena nge aalaha ikire e hule na kire ko lio-lio mola ue aana kire dau aakau loosie. No ko unue oto huniꞌomu uri aalaha ikire ngeena kei oolisi aana mo toꞌoni ni esunge, kei haꞌa-iiꞌosire oto hunie ngaunge, na kei raretaꞌinire oto aani haꞌalianga hunire. 38Deidehie mo koni-konihe ngeena, aana maꞌalana aalaha ikire ko si hule mola i upui rodo wa i hatari dengi, taꞌe kei lio oodoie oto kire dau aakau loosie peꞌie maaꞌoohilana.
39“Oto omu ke sai diana aana uri, mala iinoni e toꞌo aana nume ko saie maholo iinoni peli-peli kei lae mai, e saꞌa roroꞌa ni toliꞌaasie ike uri iinoni peli-peli ngeena ke sili i nume ingeie. 40Oto iꞌomu noꞌone, omu ke iiꞌo aakau, mwaanie ineu a Kale Ni Iinoni, nou lae mola mai aana maholo omu kaꞌa loꞌo-loꞌongaꞌinie ike ne kei lae mai aana.”
41Oto a Pita ko teꞌuri, “?Poro paine, uri o unue aalahuunge ie mola huniꞌemeelu haliꞌite, wa noꞌone hunie mwala e loko ngeena?”
42Oto a Jisas ko aalamie a Pita uuri, “No ko unue huniꞌomu na hunie taꞌena nga iini e saenanau. ?Aana a tei kaꞌu e saenanau na e neꞌi koni-konihe diana? Ingeie oto iini nge aalaha ingeie e neꞌie hunie ke lio i sulie ngaeta mwala auꞌesu aana maholo ko lae, na hunie ke nii-niie waaitada hunire i suli maholo. 43Na kei tohungei diana oto liutaa hunie koni-konihe ngeena, mala uri aalaha ingeie kei lio oodoie ko esu diana urine maholo kei ooli mei. 44Mala ko urine, nge no ko unue oto huniꞌomu uri aalaha ngeena ke si neꞌie oto koni-konihe ngeena hunie ke lio i sulie oto ahutana toꞌo-toꞌolana.
45“Taꞌe mala uri koni-konihe ngeena ko loꞌongaꞌinie mola uri aalaha ingeie e saꞌa hule ike lau-leu, oto ko talei seu-seunie mola ngaeta mwala auꞌesu, na ko talei tara mola aana ngaunge, na ko pweu mola aana inuhilana wai ni mehiri, 46oto aalaha ingeie kei hule mola, na e kaꞌa dau aakau ike. Na ko hule noꞌone mola aana maholo koni-konihe ngeena e kaꞌa loꞌongaꞌinie huni maaꞌoohie. Oto aalaha ngeena kei tohungei haꞌaloi letehie koni-konihe ingeie ngeena, na kei uusungeꞌi aasie oto peꞌie mwala hai-heitohe. 47Aana koni-konihe nge e saie taane saena aalaha ingeie uri nga moi taa e saetoꞌo aani, taꞌe e kaꞌa dau aakau wa ke dau i suliꞌi, kire kei tohungei haꞌaloi letehie oto hiitoꞌo.
48“Taꞌe koni-konihe nge e kaꞌa saie ike saena aalaha ingeie, na ko deu huꞌisie mola saena aalaha ingeie, kire saꞌa lae otoi haꞌaloi letehie hiitoꞌo. Aana nga iini nge niilana nga mo ola hunge e lae hunie, a God kei saetoꞌo aana loꞌu a mwaena ke asuie nga mo ola hunge. Na nga iini nge niilana mo ola hunge liutaa e lae hunie, nge a God kei saetoꞌo aana loꞌu a mwaena ke asuie nga mo ola hunge liutaa.”
Walumalau Kei Oopa Aena Aana A Jisas
49Na a Jisas ko heꞌi teꞌuri loꞌu, “Nou lae mai huni eerehaꞌinie walumalau, na nou saetoꞌo aana uri dunge ngeena ke eeso-eeso oto, hunie ke oopaa mo iini diana mwaanie mo iini aaela. 50Nou manataꞌinie oto uri ne kei sapesalu oto hiitoꞌo hule aana maenga, na ne kei tolahiꞌe oto hiitoꞌo i sulie sapesalunge ngeena lae hule aana kei oa.
51“Mwaanie omu loꞌo-loꞌongaꞌinie uri nou lae mai huni toolea mai hanuelamanga hunie walumalau. !Haꞌike! Kaꞌa hanuelamanga ike, taꞌe oopanga. 52Uure siꞌiri pwau weu, mo uluhe ni iinoni kei heukama honosire hailiu. Nga oolu iini kei heukama honosie nga ro iini, na nga ro iini kei heukama honosie nga oolu iini. 53Mo heꞌi aamana kei heukama honosire hailiu, na mo heꞌi nikana kei heukama honosire hailiu, na mo mahungaona keni kei heukama honosire hailiu.”
O Ke Uure Ruru Peꞌie a God, Aena Aana Leinge E Karaꞌini Oto
54A Jisas e unue noꞌone hunie mwala uuri, “Maholo omu ko leesie mei rorodo pulu-puluꞌe ko hane, oto omu ko tolana unue oto uuri, ‘Kei nemo oto eena,’ na kei nemo oto. 55Na maholo omu ko hiingeꞌinie ko iiru ni maraau, na ni omu unue uuri, ‘I eesi meuri kei aaela oto eena,’ na kei aaela oto urine.12:55 Erenga ni Krik e ere i sulie iiru na nemo wau aana hanue i Israel.56!Iꞌomu kira lupweꞌi deu! Omu tohungei pweu oto toꞌohuu. Omu sai lio saie kaꞌu mola walu ola aana walumalau ie na mo ola taꞌau i salo. ?Taꞌe e ue omu kaꞌa sai lio saie nga taa ko reu aana maholo ienini?”
57Na a Jisas e heꞌi aalahuu loꞌu i sulie uure-rurunge peꞌie a God, ko teꞌuri, “?Aana e ue ni omu kaꞌa sai leiꞌomu maraamiu nga taa e diana huni esuie? 58Mala nga iini ko sare tooleꞌo i laona leinge, o ke uure ruru oto lau-leu peꞌie iinoni ngeena maholo iꞌomoreꞌi ue i sulie tala takoie nume ni lei-lei. Mala o kaꞌa teꞌurine, nge maelonga iꞌoe kei toliꞌaasiꞌo hunie mwane lei-lei na a lei-lei kei toliꞌaasiꞌo i nimana mo ramo, oto kire kei aasiꞌo i laona nume ni hoꞌo. 59Toꞌohuu no ko unue oto huniꞌomu uri omu saꞌa roroꞌa ni iisitaa ike na omu kaꞌa saro suꞌu mangoa mei toꞌoha nge kire holosie huniꞌomu.”
13Mo Iini Kire Kaꞌa Oonisae Kei Mae Oto Huu
1Aana maholona ngaeta mwala e oꞌoꞌo peꞌie a Jisas, kire haꞌarongoa aana mwala ni Kalili nge a Paelat e horo maesire aana maholo kire uunu-uunu ola i saana God. 2Oto a Jisas ko teꞌuri hunire, “?Ohe omu ko loꞌo-loꞌongaꞌinie uri mwala ni Kalili ngeena kire mae urine, e haataꞌinie uri kire oorahaꞌaala loꞌu liutaa aana ahutana mwala aaopa ni Kalili? 3!Haꞌike oto ooꞌoo! Na no ko unue oto huniꞌomu uri mala omu kaꞌa oolisie saemiu na omu ke toliꞌaasie tolahai iinoni aaela iꞌomu ngeena, omu kei meni mae noꞌone mola mala ikire. 4?E ue aana aawalai iinoni mwana walu ni Jerusalem nge kire mae aana saohai nume e aaꞌoho haahire i Saeloam? ?Omu loꞌongaꞌinie uri mwala ngeena kire oorahaꞌaala liutaa aana loꞌu ahutana mo iini nge kire iiꞌo noꞌone i Jerusalem? 5!Haꞌike oto ooꞌoo! Na no ko unue oto huniꞌomu uri mala omu kaꞌa oolisie saemiu na tolahamiu, omu kei meni mae noꞌone mola mala ikire.”
6Oto a Jisas ko ere ni aalahuunge hunire uuri, “Nga mwane e hasie ai hungu-hungu i laona hohola ingeie. Ahutana maholo a mwaena ko lae mai lio-lio hunie ohe ai ngeena ko hungu-hungu taane, taꞌe haꞌike mola. 7Oto a mwaena ko teꞌuri hunie koni-konihe ingeie nge ko lio i sulie hohola, ‘No ko talei lio-lio hunie ohe ai ngeena ko hungu-hungu taane aani hue-huei ei suli maholo, taꞌe oolune nga halisi loꞌu ie na e kaꞌa sai hungu ike. E lae otoi diana uri o ke tohu aasie mola mwaanie e waelie mei mwakano kohi ngeena.’ 8Taꞌe koni-konihe ingeie e aalamie uuri, ‘O ke toliꞌaasie kaꞌu, aalaha ineu, hunie ne ke eli mwakano kaꞌu loꞌu i aeꞌaena, na ne ke lio diana i sulie loꞌu hunie nga taꞌa-taꞌa halisi. 9Mwaanie ohe ne kei esu urine aana, kei hungu taane aana halisi meine. Mala uri e kaꞌa hungu loꞌu, nge o ke si tohu aasie taane.’ ”
A Jisas E Haꞌa-uurie Keni Kolune E Kokosu
10Aana ngaeta Dinge Maaꞌi Mo Jiu, a Jisas e haꞌa-uusulie mwala i laona nume ni palo-palo mo Jiu. 11Maholona na ngaeta keni liꞌoa aaela e hite aana ingeie noꞌone i leune. A keine, kolune e kokosu oto, na e kaꞌa sai uure hala-hala ike loꞌu. E iiꞌo mola urine hunie aawalai helisi mwana walu. 12Maholo a Jisas e leesie a keine, oto ko soie mai saana na ko teꞌuri hunie, “Keine, mei maelaa iꞌoe e aiꞌaa oto mwaaniꞌo.” 13Oto a Jisas e hele i sapena a keine, na a keine ko tolana uure oodo oto peꞌi haꞌamanikuluꞌaa God.
14Maholo naꞌohai mwane haahie nume ni palo-palo ngeena e leesie a Jisas e haꞌa-uurie a keine aana Dinge Maaꞌi Mo Jiu, oto ko saewasu na ko teꞌuri hunie mwala, “E oono aata hai dinge mola kolu sai deu esunge aani. Oto omu ke lae mola mai aana e oono hai dinge ngeena. Omu ke suꞌuri lae mai hunie haꞌa-uurilemiu aana Dinge Maaꞌi.”
15Oto a Jisas ko aalamie uuri, “!Iꞌomu oto mwala mola huni lupweꞌi deu-deu! Ahutemiu omu ko luluhesie kaꞌu mola mo puluke na mo dongki iꞌomu, na omu ko too-tooleꞌi kaꞌu mola i wei huni inu-inu aana ahutana dinge, maꞌalana uri aana Dinge Maaꞌi. 16A keni nge nou haꞌa-uurie ie, ingeie keni aasikaelu noꞌone mo Jiu, na a Satan e hele aana oto hunie aawalai helisi mwana walu. ?Oto e ue? ?Uri e kaꞌa diana ike huni haꞌa-uurie aana Dinge Maaꞌi?”
17Maholo a Jisas e ere urine, oto mo maelonga ingeie kire ko tohungei masa oto hiitoꞌo, taꞌe ahutana mwala ko si meni ilenimwaꞌe mola haahie walu ola manikuluꞌe nge a Jisas ko esuiꞌine.
A Jisas E Aalahuu Aana Litana Ai Na Aana Iis
18Oto a Jisas ko dolosi aana mwala uuri, “?Aalahanga a God e urihana nga taa? ?Nga taa ni ne kei haꞌamalaa aana? 19Ne kei haꞌamalaa aana kele litei ola aana ai mastad nge iinoni e toolea, oto e hasie i laona hohola ingeie. Oto maholo e pwito poi na ko peine, ko neꞌi ei oto, na mo menu ko si lae mai tola niuꞌi i lengine mo sasarana.”13:19 Aalahanga a God e urihana litana ai, aena aana maꞌalana kire hasie na e mwai-mwei taꞌe kei peine taane, na kei peꞌie mwala oto hunge.
20Na ko heꞌi dolosi loꞌu uuri, “?Nga taa ni ne kei haꞌamalaa Aalahanga a God aana? 21E urihana noꞌone kele mei iis nge huꞌe e pwaie i laona nimei pulaoa oto paine, na ahutana e haro poꞌo mango mola aana e hane.”13:21 Aalahanga a God e urihana iis aena aana ko esu i laona mo iinoni huni oolisie tolahada hunie ke diana. A God e kaꞌa dau rarahie aapa poꞌoi sinaha hunie kei diana, taꞌe ko esu i lalo aana nga iini hunie saena ke holaꞌi hei-oolisi. Urine, nge ko toꞌohie walu ola aana mauringe iinoni ngeena hunie ke diana.
A Jisas E Aalahuu Aana Maa E Kokohisi
22Oto a Jisas ko lae peꞌi haꞌa-uusulie mwala aana mo huilume paine na mo iini mwai-mwei aana ko lae hunie i Jerusalem. 23Na ngaeta iini e dolosi aana uuri, “?Poro paine, e nite iinoni ni haꞌa-uurilada kei lae? ?Mwaanie nga tootaꞌi iini mola nge a God kei haꞌa-uurire?”
Oto a Jisas ko aalamire uuri, 24“Omu ke dau aahonga toꞌohuu huni sili i sulie maai para e kokohisi, aana no ko unue oto huniꞌomu uri mo iini hunge kei eriꞌapasie silinge wau, taꞌe e saꞌa mwadaꞌusire ike. 25Na maholo mwane e toꞌo aana nume kei honoa maa aana nume ingeie, omu kei uure mola poꞌoi sinaha, na omu kei talei iiki-iiki mola peꞌie erenga uuri, ‘Poro paine, o ke tahamaa talameelu.’ Oto kei aalamiꞌomu mola uuri, ‘Nou kaꞌa manataꞌiniꞌomu ike. ?Omu uure i tei?’ 26Oto omu kei heꞌi teꞌuri loꞌu hunie, ‘Iꞌemeelu kaꞌu melu ngeu-ngeu na melu inu-inu peꞌiꞌo, na o haꞌa-uusuliꞌemi aana mo henue iꞌemi.’ 27Taꞌe a mwaena ke si heꞌi teꞌuri loꞌu mola huniꞌomu, ‘Nou kaꞌa tohungei saiꞌomu ike wa ne ke saie mo henue iꞌomu. Omu ke tahi mwaanieu, iꞌomu mo iinoni aaela.’
28“I leune omu kei iiꞌo ni saehuunge mola peꞌie ngaranga. Aana omu kei leesie a Ebraham, na a Aesak, na a Jekob peꞌie mo propet oto i naꞌo ikire i laona Aalahanga a God, na iꞌomu, aasilemiu kei lae mola poꞌoi sinaha mwaanie leune. 29Na mwala hunge kei ruru mei mwaanie ahutana mo henue i laona walumalau. Kire kei iiꞌo i aano hunie ngauhe aana Aalahanga a God. 30Oto mo iini nge kire iiꞌo aana mo iiꞌo-iiꞌoha mwai-mwei aana mauringe siꞌiri, kire kei toꞌo aana mo iiꞌo-iiꞌoha paine aana maurihe ue mai. Na mo iini nge kire iiꞌo aana mo iiꞌo-iiꞌoha paine siꞌiri, kire kei iiꞌo aana mo iiꞌo-iiꞌoha mwai-mwei aana maurihe ue mai.”
A Jisas E Ngarasie Mo Jerusalem Aana Kire Kaꞌa Hiiwalaimoli Aana
31Oto aana maholona, ngaeta mo Parise kire lae mai saana Jisas, oto kire ko teꞌuri hunie, “!O ke tahi oto mwaanie i leu! A Herod ko sare horo maesiꞌo.”
32Oto a Jisas ko aalamire uuri, “E aasa hunie a Herod ke waelie asunge ineu, aana ingeie nga kele usu ni meꞌesu mola. Omu ke lai haꞌarongoa uri aana mo dinge ienini, no ko haꞌa-uurie mo mae-maeaꞌa na no ko oohe aasi liꞌoa aaela mwaanie mo iinoni. Taꞌe aana nga dinge e saꞌa tewa taane loꞌu, ne ke si haꞌamangoa taane asunge ineu ie. 33Taꞌe aana e urine na ne kei saro lae ue i sulie asunge ineu ie siꞌiri, i hoꞌowa, na i weite. Aana e kaꞌa diana ike uri hunie nga propet horo-maesilana ke lae aana nga leu aaopa, mwaanie oto i Jerusalem haꞌalaa.”
34Oto a Jisas ko si teꞌuri, “!Aaia Jerusalem, Jerusalem! Iꞌomu oto omu ko horo suuheꞌinie mo propet na omu ko uuꞌi maesie mo iini a God e uusungeꞌinire mai huniꞌomu. Mo maholo hunge nou sasare peꞌiꞌomu mala pwa-pwa ni kue ko lokoa mo kalena i hahana apa-apana huni haꞌa-uurire. Taꞌe omu kaꞌa saetoꞌo aaku ike. 35Oto omu ke saie, a God kei toliꞌaasie hanue iꞌomu, na kei naꞌonga oto. Na no ko unue oto huniꞌomu uri omu saꞌa heꞌi leesieu loꞌu lai hule aana omu kei ere i sulieu uuri, God o ke haꞌadianaꞌaa iini ko lae mai nunuhaꞌana satana Aalaha.” Sam 118:26
14?E Diana Taane Huni Haꞌa-uuri Aana Dinge Maaꞌi Wa Haꞌike?
1Aana ngaeta Dinge Maaꞌi Mo Jiu, a Jisas e lae huni ngeu peꞌie ngaeta naꞌohai Parise i nume ingeie. Na aana maholona, mwala i leune kire ko talei lio-lio hahuroto aana a Jisas uri huni leesie nga taa kei esuie. 2Oto ngaeta mwane e ro kiꞌine na e ro aeꞌaena kire uupu, e lae mai saana a Jisas. 3Na a Jisas ko holaꞌi dolosi aana mo Parise na mo haꞌa-uusuli aana mo Haꞌatolanga a Mosis uuri, “?Ohe e diana taane aana mo Haꞌatolanga huni haꞌa-uuri aana Dinge Maaꞌi wa haꞌike?” 4Taꞌe kire kaꞌa sai aalamie ike dolosinge ingeie.
Oto a Jisas e hele aana a mwaena, e haꞌa-uurie, e si toliꞌaasie hunie ke lae. 5Oto a Jisas ko heꞌi dolosi loꞌu aana mo mwaena uuri, “?A tei hikemiu e kaꞌa sai esu aana Dinge Maaꞌi? ?Mala uri kalemu wa nga puluke iꞌoe e teke i laona nga kalinge aana Dinge Maaꞌi, nge o kei uaa? ?Uri maꞌalana Dinge Maaꞌi na o saꞌa lai hele aana hunie o ke waꞌi eelihoꞌi aana mwaanie kalinge?” 6Taꞌe kire kaꞌa sai aalamie ike noꞌone aana leune.
Mwaanie O Haꞌa-haꞌapainaꞌaꞌo
7Na a Jisas e lio saie uri ngaeta mo iini aada ko sare iiꞌo aana mo naꞌohai iiꞌo-iiꞌoha. Oto ko unue mei aalahuunge ie hunire uuri, 8“Mala nga iini ko haaraiꞌo hunie aaharota, o ke suꞌuri iiꞌo kaꞌu aana naꞌohai iiꞌo-iiꞌoha taꞌau i naꞌo peꞌie mo aalaha. Mwaanie da na iinoni ko esuie ngauhe ngeena e haaraie noꞌone nga iini e paine liutaa aamu. 9Oto iini e haaraiꞌomoreꞌi kei lae mai unue huniꞌo uuri, ‘O ke ada mwaanie leu ngeena, hunie a mwane ie ke iiꞌo i leune.’ Urine, o kei tohungei masa oto hiitoꞌo aana o kei lai iiꞌo oto hai puri. 10Taꞌe maholo kire ko haaraiꞌo urine, o ke lae kaꞌu mei, iiꞌo aana iiꞌo-iiꞌoha mwai-mwei. Hunie poro paine haahie ngauhe ngeena kei lae mai seemu, ke si unue huniꞌo uuri, ‘Malahuku, o ke ada taꞌau i naꞌo.’ Oto urine nge ahutana mo iini aana ngauhe ngeena ke si haꞌapainaꞌaꞌo. 11Aana taꞌena nga iini ko haꞌapainaꞌaa maraana, haꞌamwai-mweiꞌalana kei lae. Na nga iini ko haꞌamwai-mweiꞌaa maraana, nge haꞌapainaꞌalana ke si lae.”
12Oto a Jisas ko si teꞌuri hunie mwane nge e haaraie huni ngeu peꞌie, “Maholo o ko esuie nga ngauhe, o ke suꞌuri haaraie mola mai mo malahumu, wa mo eesimu, wa mo tekihemu, wa mo euhenue toꞌo-toꞌo iꞌoe, aana kire sai haaraiꞌo loꞌu huni suꞌu ola huniꞌo aana nga taa o da kaꞌu hunire. 13Taꞌe maholo o ko esuie nga ngauhe, o ke haaraie mai kira maitale, na kira toꞌu, na kira rarasi, na kira ulu. 14Na haꞌadianaꞌalamu ke si lae i leune, aana kire saꞌa roroꞌa ni suꞌu ola ike loꞌu huniꞌo. Aana a God ke si suꞌu ola oto huniꞌo aana dinge mo iini oodotaꞌi kei taꞌelaꞌi.”
A Jisas E Aalahuu Aana Ngauhe Paine
15Na maholo ngaeta iini aana mwala e iiꞌo peꞌie a Jisas e rongoa mo ola ie, oto ko si teꞌuri hunie, “Deidehie mo iini kei ngeu aana ngauhe aana Aalahanga a God.”
16Oto a Jisas ko teꞌuri hunie, “Ngaeta iinoni e asuie ngauhe paine, oto e haaraie mai mwala hunge. 17Maholo e dau aakau aana ahutana walu ola mango, oto ko si uusungeꞌinie koni-konihe ingeie huni lai haꞌarongoa mwala nge e haaraire ngeena uuri, ‘Omu ke lae mai aana walu ola e dau aakau mango oto.’
18“Taꞌe kire ko meni aehota ere hailiu oto. Eetana nga iini ko unue hunie koni-konihe uuri, ‘Nou si holie mola mei aano haalu, na saeku uri ne ke lae kaꞌu i leesie. No ko eitanaiꞌo, o ke toliꞌaasieu keꞌu.’ 19Ngaeta iini ko unue uuri, ‘Nou si holie aawalai puluke haalu, na nou sare lai deu aadongani aana asunge ikire. No ko eitanaiꞌo, o ke toliꞌaasieu keꞌu.’ 20Na ngaeta iini ko unue uuri, ‘Nou si tola huꞌe haalu, oto nou saꞌa lae ike taꞌau.’
21“Oto koni-konihe ngeena e ooli weu, ko si haꞌarongoa aalaha ingeie aana mo olana. Poro paine ngeena ko tohungei saewasu, oto ko teꞌuri hunie koni-konihe ingeie, ‘O ke lae oto lau-leu taꞌau i sulie mo tala paine na mo hari-heri tala i laona huilume, na o ke toolea mai mo iini e maitale, na mo toꞌu, na mo ulu, na mo rarasi.’ 22Oto maholo koni-konihe ngeena e ooli loꞌu mei ko si teꞌuri, ‘Aalaha ineu, nga taa o unue hunieu, nou deu i sulie mango oto eena, taꞌe mo leu hunge kire pwala mola ue adona mwala hunge.’
23“Oto poro paine ngeena ko heꞌi teꞌuri loꞌu, ‘O ke lae loꞌu i sulie mo tala mwai-mwei, na mo maai tala poꞌoi sinaha aana hanue, na nga mwala o ko leesire, o ke dau rarahire uri kire ke lae mola mai hunie nume ineu ke haro honu. 24No ko unue oto huniꞌo uri nga taꞌa-taꞌa iini aana mwala nge nou holaꞌi haaraire, e saꞌa lae ike mai ngeu aana ngauhe ineu ienini.’ ”
Mo Iini Ko Neꞌisae Mouteꞌi Haꞌalaa Kire Sai Lulu I Sulie A Jisas
25Ngaeta maholo, mwala hunge kire hakusie a Jisas. Oto e aaliꞌu takoire na ko teꞌuri hunire, 26“Nga iini ko lae mai seeku aana ko sare neꞌi pwaarongoisuli ineu, nge ke manata diana hunieu liutaa aana loꞌu aamana, na nikana, na huꞌe ingeie, na mo kalena, na mo eesine mwane, na mo eesine keni. Na hule aana ke manata diana hunieu loꞌu liutaa aana maurihaꞌana maraana. 27Na nga iini e kaꞌa mwaꞌe-mwaꞌe huni sapesalu hule aana maenga i lengine poꞌu-poꞌu i tehulaꞌaku, nge e saꞌa roroꞌa neꞌi pwaarongoisuli ineu ike.
28“Mala uri nga iini hikemiu ko sare tohue nga sao-saohai nume, kei holaꞌi iiꞌo kaꞌu i aano na ke iidumie mei toꞌoha ingeie, huni leesie uri ohe e toꞌo-toꞌo adona taane kei haꞌamangoa nume ngeena. 29Mala uri e kaꞌa asuie urine, kei aehotaa taane asunge aana nume, taꞌe e saꞌa haꞌamangoa ike numena. Oto mala uri nume ngeena e kaꞌa mango, mwala kei leesie na kire kei haꞌamwasi aana uuri, 30‘A mwane ngeena e aehota tohue taane nume, taꞌe e kaꞌa sai haꞌamangoa ike.’
31“Mala uri nga inemauri e toꞌo aana mola nga aawalai sinolai ramo huni ooho honosie ngaeta inemauri nge e toꞌo aana e ro aawalai sinolai ramo, nge kei holaꞌi iiꞌo kaꞌu i aano na ke neꞌisae i sulie ohe kei aꞌailaꞌa taane huni ooho honosie ngaeta inemauri ngeena wa haꞌike. 32Mala ko haꞌike, na kei uusungeꞌinie oto nga mo mwane i naꞌo hunie kire ke lai ere peꞌie ngaeta inemauri mola hunie hanuelamanga.”
33Oto a Jisas ko si ere ooreta uuri, “E urine noꞌone aana nga iini ko sare neꞌi pwaarongoisuli ineu, ke toliꞌaasie oto ahutana toꞌo-toꞌolana. Ko haꞌike na e saꞌa roroꞌa neꞌi pwaarongoisuli ineu ike. 34Ahaa tohungei ola diana, taꞌe mala dianahaꞌana kei eiꞌaa mwaanie, nge nga tala uri huni esuie ke ahaala haꞌike loꞌu. 35E kaꞌa diana loꞌu hunie nga mei ola, taꞌe mwala kei aasie mola.”
Oto a Jisas e si haꞌamangoa ere-erenga ingeie peꞌie mei wala uuri, “Mwaanie omu rorongo aasie mola mo wala ienini, taꞌe omu ke loꞌo-loꞌongaꞌi diana i suliꞌi.”
15A Jisas E Aalahuu I Sulie Sipu E Takalo Kaꞌu
1Aana ngaeta hai dinge, mwala susulu toꞌoha na mo iini e oorahaꞌaala kire lae mai saana Jisas huni rongoa mo haꞌa-uusulinge ingeie. 2Oto mo Parise na mo haꞌa-uusuli aana mo Haꞌatolanga a Mosis kire ko aehota upwesie a Jisas, kire ko teꞌuri, “!Lio kaꞌu! A mwane ie ko tekuhie mola kira oorahaꞌaala na hule aana ko ngeu oto peꞌire.”
3Oto a Jisas ko ere ni aalahuunge hunire uuri, 4“?Mala uri nga iini hikemiu e toꞌo aana tangalai sipu, na uri nga taꞌa-taꞌa iini eeni e takalo, a mwane ngeena kei ue? Kei toliꞌaasie oto siwe aawala mwana siwe aana leu kire ko ngeu-ngeu aana, na kei lae otoi heitalea iini nge e takalo lai hule aana kei lio oodoie. 5Na maholo e lio oodoie, ko si tohungei ilenimwaꞌe oto liutaa haahie. E aangaꞌinie, 6na ko lae oto peꞌie i nume ingeie. Oto ko si haaraie mai maeni malahune na mo euhenue ingeie, na ko teꞌuri hunire, ‘Omu ke lae mai ilenimwaꞌe peꞌieu, aana nou lio oodoie oto sipu ineu nge e takalo kaꞌu.’ 7Oto no ko unue huniꞌomu uri kei urine noꞌone taꞌau i Lengi. Aana ilenimwaꞌenga haahie nga taꞌa-taꞌa iini ni oorahaꞌaa ko oonisae oto mwaanie tolahana e tataꞌala, kei peine loꞌu liutaa aana ilenimwaꞌenga haahie siwe aawalai iinoni mwana siwe kire unue uri kire oodotaꞌi na kire kaꞌa toꞌo aana ike nga mei ola aaela huni oonisae mwaanie.”
A Jisas E Aalahuu I Sulie Mei Toꞌoha E Takalo Kaꞌu
8Na a Jisas ko heꞌi unue loꞌu uuri, “?Oto mala nga keni e toꞌo aana nga aawalai kawei haꞌatahanga, na e haꞌatekehie tangahuluꞌana nga kawei iini, a keine kei ue? A keine kei haꞌakaunie oto laite hunie ke sine hunie, na kei talaa oto nume ingeie, na kei heitale diana oto hunie, lai hule aana kei saronai lio oodoie. 9Na e saro lio oodoie oto, ko si haaraie mai maeni malahune na mo euhenue ingeie, na ko teꞌuri hunire, ‘Omu ke lae mai ilenimwaꞌe peꞌieu, aana nou lio oodoie oto mei toꞌoha ineu nge e takalo kaꞌu.’ 10No ko unue huniꞌomu uri kei urine noꞌone taꞌau i Lengi. Aana mo ensel a God kire kei ilenimwaꞌe haahie nga taꞌa-taꞌa iini ni oorahaꞌaa ko oonisae oto mwaanie tolahana e tataꞌala.”
A Jisas E Aalahuu I Sulie Saanau Ni Jiu E Takalo Kaꞌu
11Na a Jisas ko heꞌi ere uuri loꞌu, “Ngaeta iinoni ni Jiu e toꞌo aana e ro mwela mwane. 12Oto mwane i puri ko teꞌuri hunie aamana, ‘Mamaꞌa, o ke oopaa oto poꞌo ni iini nakue aana toꞌo-toꞌolamu.’ Oto aamadarue ko oopaa oto toꞌo-toꞌolana i matolana e ro kalena.
13“E kaꞌa tewa ike loꞌu mei puri, na mwane i puri ngeena ko haꞌaholingeꞌinie oto toꞌo-toꞌolana, oto e hele aana mei toꞌoha ingeie, e si lae mwaanie hanue ingeie, na ko lae oto hunie ngaeta hanue haꞌatau. Na i leune e si waiahea mo toꞌoha ingeie aana taꞌena nga ola aaela oto mola. 14Maholo e waiahea oto toꞌo-toꞌolana mango, nge iihiꞌure ahaꞌi e si toolea hanuena. Oto a mwaꞌune ko si siꞌohaꞌa oto hiitoꞌo aana nga mei toꞌoha haꞌike oto aana.
15“Oto a mwaꞌune e lae, nge ko si lai esu nana ngaeta mwane aana mo Aapoloa Aaopa aana hanuena. A mwaena e uusungeꞌinie saanaune hunie ke asuie asunge aaela aana e uusungeꞌinie hunie ke nii-nii ana amaa ni poo ingeie. 16Kele mweitaꞌaa ko sereꞌinie taane mei esunge e tohungei eepune ngeena, taꞌe ko esuie mola aana ko oolo mone oto aana hiolo, hule aana ko sasare ngau oto peꞌie mo poo, aena aana nga iini hunie ke nii ngeulaa ana haꞌike loꞌu. 17A mwaꞌune e talei teteꞌurine, lae-lae na ko lai loꞌongaꞌi saie uri ingeie ni mola ko deu aaela. Oto ko si loꞌongaꞌi uuri, ‘Ahutana mwala nge ko esu nana aamaku kire toꞌo ngaulaa tarau mola, na kire ko ngeu-ngeu ni pote. Taꞌe ineu no ko si karaꞌi maesie mola hiolo. 18Ne kei taꞌelaꞌi na ne kei ooli oto takoie aamaku. Ne kei teꞌuri hunie, Mamaꞌa, nou oorahaꞌaa oto i naꞌona God na oto i naꞌomu. 19Nou kaꞌa malisine ike uri o ke saieu loꞌu aana a kalemu. Taꞌe o ke da hunie ne ke neꞌie mola ngaeta koni-konihe iꞌoe.’ ”
20“Oto e si taꞌelaꞌi, ko eelihoꞌi takoie aamana. Na maholo a mwaꞌune ko lae-lae ue mai taꞌau haꞌatau, na aamana ko leesie oto taꞌau ko lae mai. Oto aamana e leesie na e aamasie. E si huru, ko lai ako haahie, na ko nonoꞌie oto. 21Oto a mwaꞌune ko teꞌuri hunie aamana, ‘Mamaꞌa, nou oorahaꞌaala oto i naꞌona God na oto noꞌone i naꞌomu, na nou kaꞌa malisine ike loꞌu uri o ke saieu aana a kalemu.’ 22Taꞌe aamana e unue hunie mo koni-konihe ingeie uuri, ‘Omu ke toolea mai nga mo toꞌoni diana lau-leu, na omu ke haꞌatoꞌonie aani. Omu ke neꞌie nga ringi i riꞌi-riꞌine, na nga mo hoꞌohaahiꞌae i aeꞌaena. 23Oto omu ko lai toolea mai kele puluke pwiꞌe-pwiꞌala ineu na omu ke horoꞌie hunie kolu ke ngau ni ilenimwaꞌenga peꞌie a kaleku. 24Aana a kaleku e mae oto kaꞌu, taꞌe ie e mauri oto loꞌu. E aiꞌaa kaꞌu, taꞌe kolu lio oodoie oto loꞌu.’ Oto kire ko si ngeu ni ilenimwaꞌenga peꞌie a mwaꞌune.
25“Na maholo walu ola ngeena ko reu-reu, mwane i naꞌo ingeie mola ue i meꞌesu. Maholo ko ooli oto mai karaꞌinie nume, na ko rongoa aawatai eu na maonga. 26Oto ko soie ngaeta koni-konihe ikire, na ko dolosi aana uuri, ‘?Nga taa ni ko reu ngeena?’ 27Oto koni-konihe ngeena ko teꞌuri hunie, ‘Aasimu e aalihoꞌi oto mai. Na aamamu e horoꞌie kele puluke pwiꞌe-pwiꞌala huni ngeu ni ilenimwaꞌenga peꞌie aana e hule sapemawa loꞌu.’ 28Oto mwane i naꞌo ngeena ko saewasu, na e kaꞌa sare lae ike loꞌu weu i nume na aana ngauhe. Aamana e iisitaa, oto ko lai haaraie uri ke lae mai nume. 29Taꞌe e aalamie mola aamana uuri, ‘Lio kaꞌu, mo helisi hunge oto no ko talei euꞌesu nemue, na nou kaꞌa haitohea walamu. Taꞌe hule aana o saꞌa sare niie ike nga mei ola hunieu, maꞌalana uri nga kele kalei nanikot hunie ne ke ngau keꞌu peꞌie mo malahuku. 30Taꞌe a kalemu ie, e lai waiahea toꞌo-toꞌolamu mola aana mo repi, oto e aalihoꞌi mei, o ko si horoꞌie oto kele puluke pwiꞌe-pwiꞌala ana.’ 31Oto aamana ko aalamie uuri, ‘Kaleku, iꞌoe, o iiꞌo susuleꞌi mola peꞌieu, na nga moi taa nou toꞌo aani, mo ola oto iꞌoe. 32Taꞌe ie, e malisine oto kolu ke ngau ni ilenimwaꞌenga peꞌie aasimu. Aana e mae oto kaꞌu, taꞌe ie e mauri oto loꞌu. E aiꞌaa kaꞌu, na lio oodoilana e lae loꞌu.’ ”
16A Jisas E Aalahuu I Sulie Naꞌohai Mwane Auꞌesu Nge E Pweloa Poro Paine Ingeie
1Na a Jisas e teꞌuri loꞌu hunie mo pwaarongoisuli ingeie, “Ngaeta mwane toꞌo-toꞌo e toꞌo aana nga naꞌohai mwane auꞌesu huni lio i sulie mo esunge ingeie. Mwane toꞌo-toꞌo ngeena, e oꞌoꞌo na ko rongoa mwala ko unue uri naꞌohai mwane ngeena ko waelie mola mo toꞌoha ingeie. 2Oto e soie mai na ko teꞌuri hunie, ‘?Nga taa ni no ko rongoa mwala ko unue aamu? O ke uusu samangaꞌinie kaꞌu mei nga moi taa o esuiꞌi aana o lio-lio i sulie toꞌo-toꞌolaku, aena aana o saꞌa lio i suli ike loꞌu.’
3“Oto naꞌohai mwane lio-lio i suli ngeena ko loꞌongaꞌi mola i saena maraana uuri, ‘E lio mala poro paine ineu kei haꞌamangoau oto mwaanie mei esunge ineu ni ngeena. ?Nga mei taa ni ne kei da? Ineu, nou kaꞌa adona oto elilana nga ineli, na no ko mamasa huni suke toꞌoha mwaanie mwala. 4!Oo! Nou saie oto nga taa ne kei da hunie uri maꞌalana no ko mango mwaanie asunge ineu, na mwala e sai soi konieu mola aana mo nume ikire.’
5“Oto e soie mai ahutana mwala nge kire kaꞌa suꞌu ola ue hunie poro paine ingeie. Na ko dolosi aana eetana nga mwane uuri, ‘?E nite mei ola o kaꞌa suꞌuꞌi ue hunie poro paine ineu?’ 6Oto a mwaena ko aalamie uuri, ‘Ne kei suꞌue ue, e ro aawalai taramu peine aani rumu.’ Oto mwane lio-lio i suli ngeena ko teꞌuri hunie, ‘Kaoni iꞌoe uusulana e lae, na ingeie mola aaku ie. O ke iiꞌo kaꞌu i aano, na o ke haꞌasihoa mola hunie taꞌa-taꞌa aawala.’ ”
7“Oto ko dolosi loꞌu aana ngaeta mwane uuri, ‘?Oto iꞌoe e nite o kei suꞌue ue hunie poro paine ineu?’ Oto ko aalamie uuri, ‘Ne kei suꞌue ue sinolai luꞌe aani ngeulaa.’ Oto mwane lio-lio i suli ngeena ko teꞌuri hunie, ‘Kaoni iꞌoe, uusulana e lae, na ingeie mola aaku ie. O ke iiꞌo kaꞌu i aano na o ke haꞌasihoa mola hunie walu tangalai luꞌe.’
8“Oto lae-lae, a poro paine ngeena e tohungei pangataꞌinie sai-olanga mwane auꞌesu eero-eero ngeena aana e pweloa urine.”
Na a Jisas ko heꞌi unue loꞌu uuri, “Oto e toꞌohuu oto, mwala ni welumalau kire tohungei saenanau i sulie iiꞌonga mai aano i leu peꞌie mo iinoni ni welumalau mala ikire. Sai-olanga ikire ngeena e tohungei peine loꞌu liutaa aana sai-olanga mo iinoni aana raa-raa. 9Oto iꞌomu noꞌone, omu ke sai ola mala ikire. Iꞌomu noꞌone omu ke haꞌimalahune peꞌie mwala aana mo ola omu holiꞌi peꞌie mei toꞌoha omu pelie. Taꞌe mwaanie omu pola mola peꞌie mei wala no ko unue ienini, aana maholo toꞌolamiu kei aiꞌaa mwaaniꞌomu, nge mo malahumiu mai aano i leu kei deu aasaie tolakonilemiu aana mo nume huu. Taꞌe omu ke saenanau aana iiꞌonga i laona raa-raa. 10Nga iini nge e sai kinetaꞌinie nga mo ola kaꞌa hunge, ingeie ngeena e sai kinetaꞌinie noꞌone mo ola hunge. Na nga iini nge e kaꞌa sai lio i suli diana aana mo ola kaꞌa hunge, ingeie ngeena e saꞌa lio i suli diana aana ike noꞌone mo ola hunge. 11Oto mala uri omu kaꞌa sai lio i suli diana aana toꞌo-toꞌonga ni welumalau, nga iini e saꞌa roroꞌa toliꞌaasie ike hunie omu ke lio i sulie toꞌo-toꞌonga toꞌohuu ni Lengi. 12Na mala uri omu kaꞌa sai lio i suli diana aana toꞌo-toꞌolana ngaeta iinoni, nge niilana nga mo ola namue e saꞌa lae ike huniꞌo. 13Nga taꞌa-taꞌa koni-konihe e saꞌa roroꞌa asu susuleꞌi ike nana nga ro poro paine hai aaopaꞌi. Aana kei manata diana mola hunie eetana nga iini, na kei ngiduupu hunie ruana nga iini, wa kei haꞌamaꞌu mola aana ruana nga iini, na kei maaleledie eetana nga iini. Oto e tohungei aasa hunie omu kei neꞌisae haꞌamaꞌu aana a God na toꞌo-toꞌonga aana walumalau ie mala e ro poro paine iꞌomu.”
14Na maholo mo Parise kire rongoa walu ola ienini, oto kire ko si haꞌamwasi mola aana a Jisas, i sulie ikire ngeena mwala e neꞌisae paine aana toꞌoha oto liutaa. 15Oto a Jisas e teꞌuri hunire, “Iꞌomu, omu ko tohungei sare da mola uri omu ke lio diana i maana mwala. Taꞌe a God oto e sai diana aana nga taa i laona saemiu. Aana mo ola nge mo iinoni kire neꞌisae paine aani kire lio aaela mola i maana God.”
16Na a Jisas e heꞌi teꞌuri loꞌu, “Holaꞌinaꞌo mo Haꞌatolanga a Mosis na walana mo propet kire haataꞌinie tala hunie mwala. Taꞌe uure aana a Jon Loto Maaꞌi e lae mai, oto tarohaꞌinilana Tataroha Diana i sulie Aalahanga a God ko si lae. Na mo pulitaa ni iinoni hunge ko si meni eriꞌapasie silinge mai i laona aalahanga ngeena. 17I Lengi na i aano e sai suu mola, taꞌe nga taꞌa-taꞌa kele ngangaꞌai ola aana mo Haꞌatolanga a Mosis e saꞌa suu oto ooꞌoo.
18“Oto mala nga iini ko sikaa huꞌe ingeie na ko heꞌi toꞌo aana loꞌu ngaeta keni aaopa, iinoni ngeena ko mesi oto. Na mwane ko toꞌo aana keni nge poro ingeie e sikaa kaꞌu, a mwane ngeena ko mesi oto noꞌone.”
A Jisas E Aalahuu Aana Mwane Toꞌo-Toꞌo Na A Lasaros
19Oto a Jisas ko teꞌuri loꞌu, “Ngaeta mwane toꞌo-toꞌo e oꞌoꞌo na e iiꞌo ni ilenimwaꞌenga peꞌi ngeu-ngeu ni pote mola i suli hei dinge, na e toꞌo-toꞌoni eeni toꞌoni lio manikuluꞌe haliꞌite. 20Na ngaeta iinoni siꞌohaꞌa noꞌone i leune, satana a Lasaros, na sapena e honu eeni osa. A Lasaros ko talei oꞌoꞌo mola i aena maa aana nume mwane toꞌo-toꞌo ngeena suli maholo. 21Aana e sasare ngaue mo eehuhuꞌei ngeulaa nge ko tee-teke mwaanie taetahe mwane toꞌo-toꞌo ngeena. Na ahutana mo usu kire sai lae mai mealie mo osa i sapena.
22“A Lasaros e oꞌoꞌo, na ko mae. Oto mo ensel kire toolea na kire ko lai haꞌa-iiꞌosie oto peꞌie a Ebraham. Mwane toꞌo-toꞌo ngeena e mae noꞌone na kire haitoli oto aana. 23Taꞌe uusungeꞌinilana e lae aana leu mo iini e mae na kire iiꞌo oto mola peꞌie sapesalunge. Mwane toꞌo-toꞌo ngeena e leesie a Ebraham wau haꞌatau na a Lasaros oto peꞌie.
24“Oto ko soi weu hunie a Ebraham na ko teꞌuri, ‘Mamaꞌa Ebraham, o ke aamasieu, na o ke uusungeꞌinie mai a Lasaros hunie ke toongaꞌinie mola ngongoꞌana riꞌi-riꞌine i laona mei wei huni haꞌawawaie meaku. Aana ko tohungei rako aaela aaku oto hiitoꞌo i laona dunge ni haꞌamotaahinge ie.’
25“Taꞌe a Ebraham e teꞌuri mola, ‘Kaleku, o ke aamasitoꞌo aana maholo o oꞌoꞌo mauri, o toꞌo aana oto dianahaꞌana ahutana mo ola, taꞌe a Lasaros e lae peꞌi siꞌohaꞌa oto hiitoꞌo. Oto ie, a Lasaros e iiꞌo ni ilenimwaꞌenga na iꞌoe ko motaahiꞌo. Oto e aasa hunie ke peꞌiꞌo. 26Na ngaeta leu loꞌu, aena aana kalinge paine nge e liu honosikolu ie, nga iini saꞌa peꞌiꞌo ike. E aasa hunie nga iini ke lae wau huni peꞌiꞌo, na e aasa hunie nga iini ke uure wau huni lae mai.’
27“Oto mwane toꞌo-toꞌo ngeena ko teꞌuri, ‘Ko urine oto mamaꞌa ineu Ebraham, no ko eitanaiꞌo, o ke uusungeꞌinie a Lasaros hai nume aamaku i welumalau. 28Aana nou toꞌo aana e lime aasiku hao, na e diana uri a Lasaros ke haꞌapasulire mwaanie kire lae loꞌu poi aana leu ni haꞌamotaahinge ie.’
29“Taꞌe a Ebraham e teꞌuri, ‘Mo eesimu kire toꞌo aana oto mo Haꞌatolanga a Mosis na mo Uusu-uusu Maaꞌi mo propet hao huni saaiꞌi. Toliꞌaasie kire ke saaiꞌi maraada.’
30“Oto mwane toꞌo-toꞌo ngeena ko teꞌuri, ‘Haꞌike mamaꞌa Ebraham. Mala uri nga iini aana mwala e mae oto, ko meuri eelihoꞌi loꞌu na ko lae oto i saada, haꞌalaa kire ko hiiwalaimoli, na kire ko oolisie saeda na tolahada.’
31“Taꞌe a Ebraham e teꞌuri hunie, ‘Mala uri mo eesimu kaꞌa sai hiiwalaimoli oto aana mo Haꞌatolanga a Mosis na mo Uusu-uusu Maaꞌi mo propet, maꞌalana nga iini ko meuri eelihoꞌi loꞌu mwaanie maenga, na kire saꞌa hiiwalaimoli ike loꞌu eeni.’ ”
17A Jisas E Haꞌa-uusuli I Sulie Saeꞌaasinge, Na Hiiwalaimolinge, Na Asunge Waaꞌiniꞌini
1Oto a Jisas ko teꞌuri loꞌu hunie mo pwaarongoisuli ingeie, “Mo ola huni haꞌatataroa mwala hunie oorahaꞌaa kei reu oto. Taꞌe aama-aamasilana iini nge kei esuie mo olana hunie kire ke rau. 2Oto mala nga iini ko haꞌatataroa nga kele iini aana mo iini ko hiiwalaimoli eeku ienini, e lae otoi diana hunie iini urine pwarolana nga hau peine ke lae mola i luana, oto kulu-aasilana ke lae mola i laona aasi. 3Oto omu ke lio talamiu aana taꞌe-taꞌena nga ola omu ko euꞌesuie. Mala uri aasimu ko oorahaꞌaa, ere aana, na o ke unue hunie uri ko deu aaela. Na mala ko oonisae, o ke saeꞌaasi oto hunie. 4Mala uri ko deu huꞌisiꞌo haꞌahiu aana taꞌa-taꞌa hai dinge, na suli maholo ko lae mai seemu huni unue uri e oonisae oto, nge o ke saeꞌaasi oto hunie.”
5Mo hurulaꞌaa kire teꞌuri hunie, “O ke sapeie hiiwalaimolinge iꞌemi hunie ke paine.”
6Oto a Aalaha ko aalamire uuri, “Maꞌalana omu ke toꞌo aana mola nga hiiwalaimolinge mwai-mwei mala nga kele litei ola, na omu kei unue hunie ai weune uuri, ‘O ke aalangu oto maraamu aana imi-imimu, na o ke lai hesiꞌo maraamu wau i eesi.’ Na aine kei tola i suliꞌomu oto.”
7Na a Jisas e teꞌuri loꞌu, “Maholo iinoni euꞌesu ko ooli oto i nume mwaanie asunge i hohola wa lio i sulilana mo sipu, e saꞌa lae mola mai iiꞌo i aano hunie ke ngau. 8Taꞌe poro paine ingeie kei unue hunie uuri, ‘O ke dau aakau kaꞌu aana mo ngeulaa akue. Mango o ke si oolisi na o ke raretaꞌinieu. Ne kei ngeu na ne kei inu mango, nge iꞌoe o ke si ngeu loꞌu.’ 9Na koni-konihe ngeena e saꞌa loꞌongaꞌinie ike uri aalaha ingeie kei paalahea haahie walu ola e asuiꞌi. 10Oto e urine noꞌone aana iꞌomu. Maholo omu ko esuie mo ola haarailemiu e lae huni esuiꞌi, omu ke unue mola uuri, ‘Ikie mo koni-konihe mola ni ngeena, na e kaꞌa adona ike nga iini ke haꞌapainaꞌakie, aena aana kie ko esuie mola mo ola malisine oto kie ke asuiꞌi.’ ”
A Jisas E Haꞌa-uurie Aawalai Mwane Taꞌe Kire Kaꞌa Paalahea Ike
11Maholo a Jisas e lae hunie i Jerusalem, e lai liu i sulie taitelihe i matolana i Samaria na i Kalili. 12Oto maholo e lae mai hule aana ngaeta kele huilume, na ko oodoie aawalai mwane. Mo mwane ngeena kire toꞌo aana maelaa ni osa. Oto kire uure mola mai haꞌatau, 13na kire ko si soi hunie a Jisas uuri, “!Jisas! !Aalaha! O ke aamasiꞌemeelu.”
14Na maholo a Jisas e leesire, oto ko teꞌuri hunire, “Omu ke lae kaꞌu i saana mo pris hunie kire ke holaꞌi leesiꞌomu mala Haꞌatolanga a Mosis e unue.”
Maholo kire lae taꞌau mwaanie a Jisas na ikire ue i sulie tala, sapeda e tolana mola oto. 15Maholo ngaeta iini aada e leesie uri sapena e mola oto, ko si eelihoꞌi mei i saana a Jisas, na ko soi haꞌamanikuluꞌaa God. 16Oto e lai pouruuru i aano i naꞌona a Jisas, na ko paalahea. Na a mwane ngeena, ingeie mwane ni Samaria.
17Oto a Jisas ko dolosi aana mwala e ruru ngeena, ko teꞌuri, “Aawalai mwane kaꞌu haꞌa-uurilada e lae. ?Ngaeta siwe iini kaꞌu i tei? 18?E ue kaꞌu mwane nge ingeie nga Jiu haꞌike ie mola ko ili lae mai paalahea God?”
19Oto a Jisas ko si teꞌuri hunie a mwaena, “Taꞌelaꞌi na o ke lae, hiiwalaimolinge iꞌoe e haꞌa-uuriꞌo oto.”
Aalahanga A God Nge Mau-meuringe A God E Paine Haahie
20Ngaeta mo Parise kire dolosi aana a Jisas uuri, “?Maholo uri taa ni Aalahanga a God kei lae mai?”
Oto a Jisas e aalamire ko teꞌuri, “Aalahanga a God ko lae taane mai, taꞌe e kaꞌa lae ike mai aana tala nge omu sai leesie aana maamiu. 21Na nga iini e saꞌa teꞌuri ike, ‘!Lio kaꞌu, Aalahanga a God oto ie!’ wa, ‘!Ingeie oto ngeena!’ !Haꞌike! Aana Aalahanga a God ingeie oto i lalo aana mo iinoni.”
22Oto ko si teꞌuri hunie mo pwaarongoisuli ingeie, “Maholo hunie kei lae taane mai, na iꞌomu, omu kei tohungei sare leesie noꞌone pongine a Kale Ni Iinoni, taꞌe omu saꞌa leesie ike. 23Nga mo iini kei unue huniꞌomu uuri, ‘!Lio kaꞌu, ingeie oto ngeena!’ wa ‘!Lio kaꞌu, ingeie oto ie!’ Taꞌe suꞌuri aapwasu aada na suꞌuri lae loꞌu huni leesie nga taa kire ko unue. 24Aana maholo ineu a Kale Ni Iinoni ne kei ooli mei, kei urihana waꞌariri ko eeso paine i laona salo. Oto ko raa hailiu weu na mai i laona walumalau. 25Taꞌe i naꞌona maholo ngeena kei hule, mwala aana maholo ienini kei maaleledieu keꞌu, na ne kei haro sapesalu hiitoꞌo kaꞌu.
26“Na nga taa kei reu aana maholo ineu a Kale Ni Iinoni ne kei ooli mei, kei urihana noꞌone nga taa e rau aana pongine a Noa. 27Mo dinge i naꞌona lue-lue e tola, mwala kaꞌa saie ike, oto kire ngau-ngeu na kire inu-inu mola. Kire totola keni na kire toꞌo-toꞌo poro mola lai hule aana hai dinge a Noa e taꞌe i laona haka paine. Oto lue-lue e hane haahire, na ahutana mwala kire mani mae mango.
28“Na kei urihana noꞌone nga taa e rau aana pongine a Lot. Mwala kire ngau-ngeu na kire inu-inu mola. Kire holi-holi na kire haꞌa-haꞌaholi mola. Kire hai-hesi na kire tou-tohu nume mola. 29Kire auꞌesuie mola mo olana, lai hule aana hai dinge nge a Lot e lae mwaanie i Sodom. Oto dunge peꞌie mo heu eeso-eeso kire ooho toli mei uure i Lengi, na e suuheꞌinire mango.
30“Aitana kei urine noꞌone aana hai dinge nge ineu a Kale Ni Iinoni ne kei ooli mei. 31Aana hai dingena, mala nga iini ko iiꞌo taꞌau i koluhana nume ingeie, ke tahi oto na ke suꞌuri waelie loꞌu nga maholo huni lai toolea nga mo ola ingeie hai nume. Na mala nga iini ko euꞌesu i hohola, ke tahi oto na ke suꞌuri waelie loꞌu nga maholo huni lai toolea nga mo toꞌoni ingeie mai nume. 32Omu ke aama-aamasitoꞌo aana nga taa e rau aana huꞌe a Lot. 33Aana nga iini ko sare kinetaꞌinie maurihaꞌana, nge kei deu tekelaꞌinie oto tohungana maurihaꞌana. Taꞌe nga iini ko deu tekelaꞌinie maurihaꞌana i tehulaꞌaku, nge kei hele aana maurihe huu. 34No ko unue oto huniꞌomu uri aana maholo nge ne kei ooli loꞌu mei ngeena, nga ro iinoni e maꞌa-maꞌahu i lengine nga taꞌa-taꞌa tahe. A God kei toolea taꞌa-taꞌa iini, na ngaeta iini kei oore mola. 35Na nga ro keni kei meni euꞌesu tararuru huni uusu hui. Taꞌa-taꞌa iini noꞌone mola kire kei toolea. Ngaeta iini kei oore mola.” 3617:36 Erenga ni Krik e ere i sulie asuilana pulaoa mwaanie wit. Na ngaeta mo uusu-uusu i naꞌo aana erenga ni Krik kire sapeie loꞌu tatala 36 uuri, “Na nga ro mwane kei meni euꞌesu tararuru i laona hohola. Taꞌa-taꞌa iini noꞌone mola kire kei toolea, na ngaeta iini kei oore mola.”
37Oto mo pwaarongoisuli ko dolosi aana a Jisas uuri, “?Uri mo ola ngeena kei reu i tei, Poro paine?”
Oto a Jisas ko aalamire uuri, “Oolinge mai ineu e saꞌa mumuni ike, taꞌe kei urihana noꞌone waieu tola manu. Aana mwala kei leesie mo keule, kire kei meni saie oto uri waieu oto i leune.”17:37 Erenga ni Krik ko aalahuu aana mo hada nge kire sai ngaa mo rae, taꞌe neꞌisaenga aana uri ahutana mwala kei saie nga taa ko reu, aana kire kei meni leesie mo tolimaa.
18A Jisas E Aalahuu Aana Mwane Lei-lei Na Mei Nao Keni
1Oto a Jisas e ere ni aalahuunge huni haataꞌinie aana mo pwaarongoisuli ingeie uri kire ke aarengaꞌi tarau mwaanie kire aakohe na mwaanie kire mou-mou mwaanie. 2Oto ko teꞌuri, “Nga mwane lei-lei e oꞌoꞌo aana huilume, na a mwane ngeena e kaꞌa sai haꞌamaꞌu ike aana a God wa ke maꞌuteꞌinie mo iinoni. 3Ngaeta mei nao keni e oꞌoꞌo noꞌone aana huilume ngeena, na ko lae mola mai taraureꞌi i saana mwane lei-lei ngeena, na ko unu-unue uuri, ‘O ke haꞌa-oodohie kaꞌu hunieu mei roroꞌanga i matolamereꞌi maelonga ineu.’ 4Taꞌe ko tewa oto na mwane lei-lei ngeena kaꞌa aapwa-aapwasu ike aana. Taꞌe lae-lae, aana ko teꞌurine mola i suli maholo, oto mwane lei-lei ngeena e oꞌoꞌo na ko loꞌongaꞌi mola maraana uuri, ‘Maꞌalana uri nou kaꞌa haꞌamaꞌu aana a God wa ne ke maꞌuteꞌinie mo iinoni, 5taꞌe ne kei haꞌa-oodohie oto mei neꞌisaenga a keni ie hunie. Aena aana uri nou kaꞌa haꞌa-oodohie hunie, kei talei aeolieu mola mai na mwaanie e haꞌapweueu mola.’ ”
6Oto a Jisas ko heꞌi teꞌuri loꞌu, “Omu rongoa oto nga taa nge mwane lei-lei aaela ngeena e unue. 7?Uri omu loꞌongaꞌinie a God e saꞌa haꞌa-oodohie ike nga mei ola urine hunie mo iini kire hiiwalaimoli aana, aena aana kire ko ngarasie i suli rodo na aatowaa huni peꞌinge? ?Na e ue? ?Uri omu loꞌongaꞌinie e saꞌa peꞌire ike lau-leu? 8No ko unue oto huniꞌomu uri kei peꞌire lau-leu taane. ?Taꞌe e ue aana maholo ineu a Kale Ni Iinoni ne kei ooli loꞌu mei? ?Nou sai lio oodoie taane mo iinoni kire hiiwalaimoli eeku wa haꞌike?”
A Jisas E Aalahuu Aana Parise Na Mwane Susulu Toꞌoha
9Oto a Jisas ko heꞌi unue loꞌu ngaeta mei aalahuunge i sulie mwala nge kire loꞌongaꞌinie uri ikire oto kire oodotaꞌi, na kire ko lio toli mola aana ahutana mwala. 10A Jisas e unue uuri, “Ngaeta hai dinge e ro mwane e oꞌoꞌo, oto kirerue ko hanetaa taꞌau i Nume Maaꞌi Peine huni aarea a God. Nga iini Parise, na ruana nga iini mwane susulu toꞌoha hunie aalahanga ni Rom. 11Oto Parise ngeena e uure wau maraana mwaanie mwane susulu toꞌoha, ko si aarengaꞌi i sulie maraana, na ko teꞌuri, ‘God, no ko paalaheꞌo aana nou kaꞌa aaela ike mala ngaeta mwala. Nou kaꞌa urihana ike mwala nge kire sai peli, kire sai leu-leu ola, na kire ko mei-mesi. No ko paalaheꞌo aana nou kaꞌa urihana ike mwane susulu toꞌoha waune. 12No ko oolongau haꞌarue suli wiki, na no ko nii-niie tangahuluꞌana tari-olanga ineu huniꞌo.’
13“Taꞌe mwane susulu toꞌoha ngeena, e uure mola mai haꞌatau, hule aana e kaꞌa sare lio loꞌu i lengi. Ko kukumu mola i mamangona aani saehuunge, na ko unue uuri, ‘God, o ke aamasieu, ineu iinoni ni oorahaꞌaa.’ ”
14Oto a Jisas ko si unue uuri, “No ko unue oto huniꞌomu uri a mwane susulu toꞌoha ngeena e ooli hai nume ingeie, na a God e haꞌa-oodohie oto. Taꞌe Parise ngeena haꞌike. Aana taꞌena nga iini ko haꞌapainaꞌaa, nge haꞌamwai-mweiꞌalana kei lae. Taꞌe iini ko haꞌamwai-mweiꞌaa, nge haꞌapainaꞌalana kei lae.”
A Jisas E Tolakonie Mo Mwela
15Ngaeta mwala kire toolea mai mo kele wee-wee ikire i saana a Jisas hunie ke hele aada huni haꞌadianaꞌara. Maholo mo pwaarongoisuli kire leesie urine, oto kire ko ere aada. 16Taꞌe a Jisas e soie mai mo kele mwela i saana, na ko unue hunie mo pwaarongoisuli ingeie uuri, “Omu ke toliꞌaasie mo mwela hunie kire ke lae mai seeku, na omu ke suꞌuri uure honosire. Aena aana mo iini kire urihana mo mwela ngeena haꞌalaa kire ko sili i laona Aalahanga a God. 17Toꞌohuu no ko unue huniꞌomu uri mala nga iini e kaꞌa haꞌamwai-mweiꞌaa mala mo mwela mwai-mwei nge e saꞌa roroꞌa sili ike i laona Aalahanga a God.”
Mwane Toꞌo-toꞌo E Dolosi I Sulie Tala Takoie Maurihe
18Oto ngaeta naꞌohai mwane aana mo Jiu, e dolosi aana a Jisas uuri, “Haꞌa-uusuli diana. ?Nga mei taa ni ne kei da kaꞌu hunie ne ke si hele aana maurihe huu?”
19Oto a Jisas ko aalamie uuri, “?E ue o ko unue uri ineu nou diana? Nga taꞌa-taꞌa iini kaꞌa diana ike taꞌe a God haliꞌite. 20Taꞌe aana dolosinge iꞌoe, o saie kaꞌu oto mo Haꞌatolanga a Mosis. Mwaanie o talei horo-horo, na mwaanie o mai-mesi, na mwaanie o peli-peli, na mwaanie o pwelu wala eero-eero, na o ke haꞌamaꞌu aana aamamu na nikemu.”Eksodas 20:12-16
21Oto naꞌohai mwane ngeena ko aalamie a Jisas uuri, “Nou tola i sulie walu ola ngeena uure oto i mwei-mweihaꞌaku.”
22Maholo a Jisas e rongo urine, ko si teꞌuri hunie a mwaena, “Taꞌa-taꞌa mei ola ni mola ue o saetoꞌo aana loꞌu huni esuie. O ke haꞌaholingeꞌinie toꞌo-toꞌolamu, na o ke niie mo toꞌoha aani nana kira maitale. Aana ko urine nge o ke si toꞌo-toꞌo loꞌu aana mo ola diana i Lengi. Mango urine o ke si lae mai lulu i sulieu.”
23Taꞌe maholo a mwaena e rongo urine, ko si saehuu oto hiitoꞌo aena aana e tohungei toꞌo-toꞌo oto liutaa.
24Maholo a Jisas e leesie a mwaena ko saehuu oto hiitoꞌo, ko si teꞌuri, “Kei tohungei aasa oto hiitoꞌo hunie mwala e toꞌo-toꞌo huni sili i laona Aalahanga a God. 25E mwadaꞌu mola hunie uri nga kamel kei sili i sulie kele waa-waata aana nile tau-teuri, liutaa aana iinoni toꞌo-toꞌo ke sili i laona Aalahanga a God.”
26Oto maholo mwala e rongoa a Jisas e ere urine, kire ko si dolosi aana uuri, “?Oto a tei kaꞌu ke si helesie maurihe huu?”
27A Jisas e aalamire uuri, “Nga taa nge e aasa hunie iinoni, e tohungei mwadaꞌu mola hunie a God.”
28Oto a Pita ko dolosi aana a Jisas uuri, “?E ue aana iꞌemeelu? Melu toliꞌaasie oto ahutana toꞌo-toꞌolameelu mango huni lulu i suliꞌo.”
29Oto a Jisas e teꞌuri hunire, “No ko unue oto huniꞌomu uri nga iini nge ko toliꞌaasie nume ingeie, wa huꞌe ingeie, wa mo eesine, wa aamana, wa nikana, wa mo kalena i tehulaꞌana Aalahanga a God, 30kei hele liutaa aana maurihe ienini, na i purine maenga kei iiꞌo huu oto peꞌie a God aana maurihe huu.”
Oolune Nga Maholo A Jisas E Ere I Sulie Maenga Ingeie
31Oto a Jisas e toolea aawalai pwaarongoisuli mwana rue, na kire ko lae maraada, ko si unue hunire uuri, “!Omu ke rongo kaꞌu! Kolu ko lae oto hunie i Jerusalem eena, leu nge ahutana walu ola mo propet kire uusu-uusu i sulieu a Kale Ni Iinoni kei oa aana. 32Na kire kei pweloau hunie mo Aapoloa Aaopa. Oto mwala ngeena kei haꞌamwasi eeku, na kire kei repusieu na kire kei ngisuhieu. 33Kire kei repusieu na kire kei horo maesieu oto. Taꞌe aana oolune nga hai dinge, ne kei taꞌelaꞌi eelihoꞌi loꞌu mwaanie maenga.”
34Taꞌe mo pwaarongoisuli kire kaꞌa rongo saie ike nga mei ola aana mo olana. Loꞌongaꞌinge aani e iiꞌo mumuni mwaanire, oto kire kaꞌa saie ike nga taa a Jisas ko ere i sulie.
A Jisas E Haꞌa-uurie Mwane E Ulu
35Maholo a Jisas ko lae mai karaꞌinie huilume i Jeriko, na ngaeta mwane e ulu e iiꞌo i reune tala i leune, ko susuke toꞌoha. 36Mwane e ulu ngeena e rongoa mwala ko liu i sulie tala, oto ko dolosi aada uuri, “?Nga taa ni ko reu ngeena?”
37Oto kire ko unue hunie uuri, “A Jisas, iini ni Nasaret, ni ko liu ie.”
38Oto a mwaena ko uulo oto paine, na ko teꞌuri, “!Jisas! !Kalena Deved Inemauri! !O ke aamasieu!” 39Mwala e naꞌo aana laeha ngeena kire ko ere aana uri hunie ke rohu. Taꞌe ko si uulo paine mola liutaa mwaanie holaꞌinaꞌo uuri, “!Kalena Deved Inemauri! !O ke aamasieu!”
40Oto a Jisas e uure hahuroto, na ko unue hunire uri kire ke toolea mai mwane e ulu ngeena i saana. Maholo ko lae oto mai karaꞌinie, a Jisas ko si dolosi aana uuri, 41“?Nga taa ni o saetoꞌo aana ne ke asuie huniꞌo?”
Oto mwane e ulu ngeena ko aalamie a Jisas uuri, “Aalaha ineu, saeku hunie ne ke lio-lio loꞌu.”
42Oto a Jisas ko teꞌuri hunie, “!O ke lio-lio oto! Hiiwalaimolinge iꞌoe e haꞌa-uuriꞌo oto.” 43Oto maana a mwaena ko tolana lio-lio loꞌu, na ko lulu i sulie oto a Jisas peꞌi paalahelana a God. Na ahutana mwala kire leesie urine, kire ko si meni paalahea God noꞌone.
19A Sakias E Si Saie A Jisas
1Oto a Jisas e lai liu i laona huilume i Jeriko, 2na ngaeta mwane satana a Sakias i leune. Ingeie nga mwane toꞌo-toꞌo aena aana ingeie nga naꞌohai mwane aana mo iini ko susulu toꞌoha hunie aalahanga ni Rom. 3E sasare leesie a Jisas uri ingeie a tei, taꞌe e kaꞌa sai leesie ike, aena aana mwala e hunge na ingeie e tohungei oꞌoruꞌe.
4Oto a Sakias e huru taꞌau i naꞌona mwala aana leu nge e saie uri a Jisas kei liu aana, e si hane i lengine ai hunie ke leesie. 5Maholo a Jisas e liu mei aana leune, e lio taꞌau i lengi na ko leesie a Sakias i lengine ai. Oto ko teꞌuri hunie, “Sakias, o ke siho mai aano lau-leu, aana siꞌiri ne kei iiꞌo peꞌiꞌo i nume iꞌoe.”
6Oto a Sakias e tolana siho oto i aano aana maholona, na e takuhie oto peꞌi ilenimwaꞌenga. 7Na maholo mwala e leesie urine, kire ko si meni upwesie a Jisas na kire ko teꞌuri, “A mwane ngeena ko lae mola huni ngeu peꞌie iinoni oorahaꞌaala.”
8Taꞌe a Sakias e taꞌelaꞌi, oto ko teꞌuri hunie poro painena, “!Aalaha ineu! Ne kei niie ngaeta poꞌo ni leu aana toꞌo-toꞌolaku nana mo iinoni meitale. Na mo iini nge nou pwelora aana nou tola toꞌoha mola mwaakule mwaanire, ne kei nii eelihoꞌi loꞌu aana mo toꞌoha ikire, na ne kei nii haꞌahai liutaa aana loꞌu nga taa nou toolea mwaanire.”
9Oto a Jisas ko teꞌuri hunie, “Siꞌiri a God ko haꞌa-uurie mwala aana nume iꞌoe ienini, aena aana iꞌoe, o si hute haalu aana komu a Ebraham. 10Ineu a Kale Ni Iinoni, nou lae mai huni loꞌohie mwala e takalo kaꞌu, na huni haꞌa-uurire.”
A Jisas E Aalahuu Aana E Oolu Koni-konihe Na Mo Mweꞌii Toꞌoha
11Oto maholo mwala ko meni pwaa-pwaarongo ue i sulie a Jisas, oto ko ladoa loꞌu nga aalahuunge hunire, aana e karaꞌinie oto i Jerusalem, na mwala hunge ko loꞌongaꞌinie uri Aalahanga a God kei talaꞌae oto molana. 12Taꞌe a Jisas e saie mone uri kire ko loꞌo-loꞌongaꞌi urine, oto ko si ladoa mei aalahuunge ie nada, “Ngaeta naꞌohai mwane e oꞌoꞌo, oto ko lae aani henue haꞌatau hunie kire ke haꞌa-aalahaa haahie mwala aana hanue ingeie. 13Oto i naꞌona a mwaena e lae, e soie mai aawalai mwane auꞌesu ingeie, na ko haꞌa-adora aani mweꞌii toꞌoha na ko teꞌuri hunire, ‘Omu ke asu aana mo toꞌoha ngeena, na omu ke tarie loꞌu nga mo iini peꞌiꞌi aana maholo no ko lae mwaaniꞌomu.’
14“Oto e lae oto, taꞌe mwala aana hanue ingeie kire kaꞌa saetoꞌo aana ike. Oto kire uusungeꞌinie nga mo iini i sulie peꞌie mei wala uuri, ‘Melu kaꞌa saetoꞌo aana ike a mwane ie ke aalaha haahiꞌemeelu.’
15“Taꞌe a mwaena e neꞌi aalaha oto haahie hanue ingeie. Oto maholo e aalihoꞌi mei, e soie mo mwane auꞌesu ingeie nge e nii toꞌoha hunire, hunie ke leesie uri nga mei toꞌoha uri taa kire tarie aana kire asu i purine.
16“Oto eetana nga mwane auꞌesu e lae mai saana, ko teꞌuri, ‘Aalaha ineu, nou terie aawalai mei toꞌoha loꞌu haahie leu nge o niie hunieu.’ 17Oto aalaha ngeena ko teꞌuri hunie, ‘!E diana! Iꞌoe oto mwane auꞌesu diana. Nou lio saie uri o sai kinetaꞌinie mo ola mwai-mwei. Ngeena, ne kei neꞌiꞌo o ke aalaha oto haahie ngaeta aawalai huilume ineu.’
18“Ruana nga mwane auꞌesu e lae loꞌu mei na ko teꞌuri, ‘Aalaha ineu, nou terie e lime leu loꞌu peꞌie leu nge o niie hunieu.’ 19Oto aalaha ingeie ko teꞌuri hunie, ‘Urine, iꞌoe o kei aalaha haahie e lime huilume ineu.’
20“Na ngaeta mwane auꞌesu e lae mai, oto ko teꞌuri, ‘!Aalaha ineu, leesie kaꞌu! Mei toꞌoha iꞌoe mola ie. Nou ulo haahie mola aana mei sala, oto nou mumunie mola. 21!Nou kele maꞌuteꞌiniꞌo mwae! Aena aana iꞌoe, o lae otoi raramaa hiitoꞌo, na hule aana o sai toolea mola mei toꞌoha o kaꞌa tarie ike maraamu, na iꞌoe o ko soꞌokonie mo ngeulaa mwala aaopa e hasiꞌi noꞌone.’ 22Oto aalaha ingeie ko teꞌuri hunie, ‘Iꞌoe oto mwane auꞌesu aaela. Ngeena, ne kei leiꞌo oto i sulie walamu maraamu. O unue kaꞌu oto uri nou lae otoi raramaa hiitoꞌo aani tolalana mola mei toꞌoha nge nou kaꞌa tarie maraaku, na uri no ko eli-elie mola mo ngeulaa nou kaꞌa hasiꞌi ike. 23?Nge ko urine, na e ue o kaꞌa neꞌie mola mei toꞌoha ineu i laona nume ni toꞌoha hunie ne ke tarie nga kele leu loꞌu peꞌie?’
24“Oto aalaha ngeena ko unue hunie mwala kire uure-uure karaꞌinie uuri, ‘Omu ke toolea mei toꞌoha ngeena mwaanie, na omu ke niie nana iini nge e tarie aawalai mei toꞌoha.’ 25Oto kire ko teꞌuri hunie aalaha ngeena, ‘Poro paine, taꞌe ingeie e toꞌo aana oto aawalai mei toꞌoha.’
26“Oto aalaha ngeena ko aalamire uuri, ‘No ko unue oto huniꞌomu, nga iini nge ko esu diana aana nga taa e toꞌo aana oto, nge aalaha ingeie kei nii hiitoꞌo loꞌu hunie. Taꞌe nga iini nge e kaꞌa asu diana ike aana nga taa e toꞌo aana oto, maꞌalana nga kele mei ola mola mwai-mwei e toꞌo aana, na aalaha ingeie kei taꞌaasie oto mwaanie. 27Oto, hunie mo maelonga ineu nge kire sereꞌinie uri ne ke aalaha haahire, no ko unue huniꞌomu, omu ke toolera mai i leu, na omu ke horoꞌire mango oto i naꞌoku.’ ”
A Jisas E Hule I Jerusalem Mala Inemauri
Matiu 21:1-11, Mak 11:1-11, Jon 12:12-19
28Oto i purine a Jisas e ere urine mango, e si lae loꞌu hunie i Jerusalem. 29Na e lae mai karaꞌinie i Betfeis na i Betani, e ro huilume karaꞌinie uuwo nge kire haaraꞌinie Uuwo Ni Ei Olif. Oto e uusungeꞌinie e ro pwaarongoisuli ingeie uri kirerue ke lae oto i naꞌo, na ko unue hunirerue uuri, 30“More ke lae i naꞌo aana huilume nge kolu ko leesie taꞌaune. Na maholo more kei hule taꞌau, more kei leesie kele dongki haalu kire pwasue taꞌau i leune. Dongki ngeena, nga iinoni kaꞌa taꞌe ike ue aana. Oto more ko luhesie, more ko toolea mai hunieu. 31Mala uri nga iini ko dolosi aamoreꞌi uuri, ‘?More ko luhesie huni taa?’ oto more ke unue oodoie uuri, ‘A poro paine e saetoꞌo aana.’ ”
32Oto e ro pwaarongoisuli ko lae oto i naꞌo. Kirerue lae taꞌau na kirerue ko lio oodoie oto mo ola nge a Jisas e unuꞌi hunirerue. 33Maholo kirerue ko luluhesie dongki haalu ngeena, na mo mwane e toꞌo aana ko lae oto mai. Oto kire ko dolosi aana e ro pwaarongoisuli uuri, “!Ei! ?More ko luhesie dongki ngeena huni taa?”
34Oto kirerue ko aalamie uuri, “A poro paine e saetoꞌo aana.”
35Oto kirerue si toolea dongki ngeena hunie a Jisas, na kire ko aasie mo toꞌoni ikire ikolune dongki, na kire ko peꞌie oto a Jisas huni taꞌe i lengine. 36Na maholo a Jisas ko lae hunie i Jerusalem aana dongki ngeena, mwala ko lae peꞌi eepasie tala aana mo toꞌoni ikire.
37Oto maholo a Jisas ko nanauhie i Jerusalem, aana leu nge tala e sihotoli mei mwaanie Uuwo Ni Ei Olif ngeena, ahutana mwala ko lae peꞌie kire ko meni ilenimwaꞌe peꞌi paalahelana God haahie mo huꞌi-huꞌite kire leesie a Jisas e asuiꞌi. 38Na kire ko teꞌuri, “!God ke haꞌadianaꞌaa inemauri ko lae mai nunuhaꞌana satana Aalaha! !Hanuelamanga i Lengi na manikuluꞌanga hunie a God!”Sam 118:26
39Ngaeta mo Parise kire iiꞌo noꞌone aana maholona, kire ko teꞌuri hunie a Jisas, “Haꞌa-uusuli, o ke unue mo pwaarongoisuli iꞌoe kire ke suꞌuri unue mo ola ngeena.” 40Taꞌe a Jisas e aalamire mola uuri, “No ko unue oto huniꞌomu, mala uri mo pwaarongoisuli ineu kire kaꞌa unue mo olana, nge mo heu kei mawa peꞌi paalahelana God noꞌone urine.”
A Jisas E Ngara Haahie I Jerusalem
41Na maholo a Jisas e lae loꞌu mei karaꞌinie i Jerusalem, e si hule aana leu e sai leesie hanue aana, oto ko si ngarasie. 42Na ko teꞌuri hunie hanuena, “E tohungei diana hunie o ke lio saie siꞌiri tala takoie hanuelamanga, taꞌe o saꞌa saie ike, aena aana e iiꞌo mumuni mwaaniꞌo. 43Kei hule taane aana maholo mo maelonga iꞌoe kire kei para ahuiꞌo, na kire kei aala honosiꞌo aana ahutana mo leu ngeena, mwaanie uri nga iini eemiu e tahi loꞌu. 44Kire kei oho aasiꞌo oto peꞌie ahutana mo mwela iꞌoe. Na nga taꞌa-taꞌa ho heu e saꞌa oore ike loꞌu i huline, aena aana o kaꞌa lio saie ike maholo nge a God e lae mai huni haꞌa-uuriꞌo.”
A Jisas E Lae I Nume Maaꞌi Peine
Matiu 21:12-17, Mak 11:15-19, Jon 2:13-22
45Oto a Jisas e lai sili taꞌau i laona lolata aana Nume Maaꞌi Peine, na ko aehota oohea mwala e haꞌa-haꞌaholingeꞌi ola, 46na ko ere aada uuri, “A God e unue aana mo Uusu-uusu Maaꞌi uuri, Nume ineu oto nume ni aarengaꞌinge.Aesaea 56:7 Taꞌe omu ko si da mola ko neꞌie hahale kira horopeli kire sai mumuni i laona.”Jeremaea 7:11
47Oto i suli hei dinge a Jisas e haꞌa-haꞌa-uusuli i laona Nume Maaꞌi Peine. Oto mo naꞌohai pris, na mo haꞌa-uusuli aana mo Haꞌatolanga a Mosis, na mo naꞌohai mwane aana mo Jiu, kire eriꞌapasie uri kire ke horo maesie. 48Taꞌe kire kaꞌa lio oodoie ike nga tala huni horoꞌie, aena aana ahutana mwala kire mani oꞌoꞌo mola peꞌie i suli maholo, aana kire sereꞌi liue nga taꞌa-taꞌa mei wala aana mo haꞌa-uusulinge ingeie.
20Mo Rato Ni Jiu Kire Lupweꞌi Dolosi I Sulie Nanamanga A Jisas E Uure I Tei
1A Jisas e haꞌa-uusulie mwala taꞌau i laona lolata aana Nume Maaꞌi Peine, na e lae-laeliwala aana Tataroha Diana. Oto aana ngaeta hai dinge, mo naꞌohai pris na mo haꞌa-uusuli aana mo Haꞌatolanga a Mosis peꞌie mo rato ni mwane kire lae taꞌau huni ere peꞌie. 2Oto kire ko teꞌuri hunie, “?Nga nanamanga uri taa ni o toꞌo aana huni esuie walu ola o ko deuꞌi ngeena? ?Na a tei ni e niie nanamanga ngeena huniꞌo?”
3Oto a Jisas e aalamire ko teꞌuri, “Ne ke holaꞌi dolosi keꞌu eemiu uuri, 4?A tei ni e niie nanamanga hunie a Jon huni loto maaꞌi aana mwala? ?A God wa mo iinoni mola?”
5Oto kire ko aehota ere hailiu i matolada uuri, “?Oto nga taa kolu kei unue? Mala uri kolu kei unue a God ni e niie nanamanga ngeena hunie a Jon, nge kei unue hunikolu uuri, ‘?Nge ko urine, na e ue omu kaꞌa hiiwalaimoli aana?’ 6Taꞌe mala kolu kei unue, iinoni mola ni e niie nanamanga ngeena hunie a Jon, ahutana mwala ie kire kei meni uuꞌi kolu aani heu, aena aana kire hiiwalaimoli aana a Jon uri ingeie nga propet e uure mwaanie a God.” 7Oto kire aalamie mola a Jisas uuri, “!Oo! Melu kaꞌa saie ike.”
8Oto a Jisas ko teꞌuri loꞌu hunire, “Ko urine, nge ineu na nou saꞌa unue ike noꞌone oodoiꞌomu nga nanamanga uri taa no ko esuie mo ola ienini aana.”
A Jisas E Aalahuu Aana Mo Mwane Aaela Ko Lio I Sulie Pariki
9Oto a Jisas ko ere ni aalahuunge loꞌu hunie mwala uuri, “Ngaeta mwane e oꞌoꞌo oto ko hesie hohola aani grep. Oto e haꞌahaulaa aana ngaeta mo mwane hunie kire ke lio i sulie maholo ingeie ko lae i suli henue, na e lae ngeena e kele lai iiꞌo tewa. 10Oto e hule aana maholo ni soꞌokoninge, a mwaena ko uusungeꞌinie ngaeta koni-konihe ingeie huni toolea mai nga taa mo mwane ko lio i sulie hohola ingeie kei niie hunie. Taꞌe mo mwane ngeena kire wini-winie mola koni-konihe ngeena, na kire uusungeꞌi eelihoꞌi aana mola mwaakule. 11Oto poro painena ko heꞌi uusungeꞌinie loꞌu ngaeta koni-konihe, taꞌe mo mwane ko lio i suli ngeena kire ko heꞌi wini-winie loꞌu mola, na kire ko tohungei waelie oto hiitoꞌo, na kire ko uusungeꞌi eelihoꞌi loꞌu mola aana mwaakule. 12Na a porona ko heꞌi uusungeꞌinie loꞌu oolune nga koni-konihe. Taꞌe kire neꞌi malaka loꞌu mola aana, na kire si aasie poꞌoi sinaha mwaanie leune.
13“Oto poro paine nge e toꞌo aana hohola ngeena ko loꞌongaꞌi uuri, ‘?Ne kei ue eena? Ne kei uusungeꞌinie kele madu ineu. Saꞌa mola ingeie haꞌalaa kire kei haꞌamaꞌu aana.’
14“Taꞌe maholo kire leesie a kalena, kire ko si meni ere i sulie mola uuri, ‘Mwane nge kei toꞌo aana hohola ngeena oolisie aamana oto ie. Kolu ke horo maesie mola hunie kolu ke toꞌo aana oto hohola ienini.’ 15Oto mo mwane ko lio i sulie hohola ngeena kire aasie kalena poro painena i sinaha mwaanie hohola, na kire ko horo maesie oto.”
Oto a Jisas ko heꞌi dolosi loꞌu aana mwala uuri, “?Haꞌalaa nga taa nge poro paine haahie hohola ngeena kei esuie aana mwala ngeena? 16Maholo kei lae mai, nge kei tohungei horo suuheꞌinie oto mwala aaela ngeena, na kei haꞌahaulaa loꞌu hohola ngeena aana ngaeta mwala aaopa.”
Maholo mwala e rongo urine, kire si meni teꞌuri, “!Haꞌike, ke suꞌuri urine!”
17Taꞌe a Jisas e toꞌomaaire, ko si teꞌuri, “?Oto nga taa ni loꞌongaꞌinge aana mo wala uusuleni e lae ienini, Hau nge mwala tou-tohu nume kire leledie kaꞌu, e neꞌi tohungei heu susu oto aana nume?Sam 118:2218Oto no ko unue huniꞌomu uri nga iini ko domu i lengine hau ngeena kei maꞌoi oto, na mala uri kei teke haahie nga iini na kei pili memesoa oto.”
19Oto mo haꞌa-uusuli aana mo Haꞌatolanga a Mosis na mo naꞌohai pris kire rongo saie uri aalahuunge a Jisas aana mo mwane aaela ngeena ko ere mola i sulire. Kire ko si sare tapolie oto aana maholona, taꞌe kire ko meꞌuteꞌinie noꞌone mwala.
Mo Naꞌohai Mwane Aana Mo Jiu Kire Sare Pweloa Jisas
20Oto kire ko si lio hunie nga maholo huni tapolie a Jisas. Na kire si uusungeꞌi mumuni aana ngaeta mo mwane uri kire ke lupweꞌi lai dolosi aana mala ikire mwala oodotaꞌi. Aena aana saeda uri a Jisas ke unue nga mei wala huni waelie maraana, huni uusu i maana i naꞌona aalaha ni Rom.
21Oto mo mwaena ko teꞌuri hunie a Jisas, “Haꞌa-uusuli, melu saie uri nga taa o ko unu-unue na o ko haꞌa-haꞌa-uusuli aana e toꞌohuu. Na iꞌoe, o kaꞌa aapwasu ike aana loꞌongaꞌinge nga iini, taꞌe o ko haꞌa-haꞌa-uusuli mola aana walaimolinge i sulie tolahana God. 22?Oto e ue, ohe e adona taane huni niie takis hunie aalahanga ni Rom wa haꞌike?”
23Taꞌe a Jisas mone e saie mola kire ko raomae hunie, oto ko si teꞌuri hunire, 24“Omu ke haataꞌinie kaꞌu seleni hunie takis ngeena aaku. ?A tei ni nunune na satana aana seleni ienini?”
Oto kire ko unue uuri, “Inemauri ni Rom ni ngeena.”
25Oto a Jisas ko teꞌuri hunire, “Ko urine, omu ke nii eelihoꞌi aana hunie inemauri ngeena mo ola ingeie, na hunie a God mo iini a God.”
26Oto kire ko si meni pangataꞌinie aalaminge ingeie. Kire toli rohu, na nga iini kaꞌa nguu. Na kire kaꞌa saie ike loꞌu nga mei ola huni raomae hunie aana i naꞌona mwala.
Mo Sadiusi Kire Lupweꞌi Dolosi I Sulie Taꞌelaꞌinge Mwaanie Maenga
27Oto ngaeta mo Sadiusi kire lae mai saana Jisas. Mo Sadiusi ngeena kire hiiwalaimoli uri nga iini saꞌa taꞌelaꞌi ike loꞌu mwaanie maenga. Oto kire ko dolosi aana uuri, 28“Haꞌa-uusuli, a Mosis e uusue haꞌatolanga ie hunikie. Mala uri nga mwane ko mae mwaanie huꞌe, na e kaꞌa toꞌo kalena, nge aasine mwane ke toꞌo aana loꞌu mola nao keni iihana, hunie ke haꞌahute mwela oolisie aasine nge e mae ngeena.Diutronomi 25:5-629Oto wau i naꞌo, e hiu mwaasine mwane kire mani hute na kire oꞌoꞌo i leu. A naꞌohada e tola huꞌe, oto e mae mola na e kaꞌa toꞌo mwela. 30Oto ruana nga mwane e heꞌi toꞌo aana loꞌu naona, na ko mae loꞌu. 31Na oolune nga mwane ko heꞌi toꞌo aana loꞌu mei nao keni ngeena, na ko heꞌi mae loꞌu. E hiu mwaasine ngeena kire ko meni toꞌo aana oto mola taꞌa-taꞌa huꞌe ngeena urine, taꞌe kire kaꞌa toꞌo mwela ike. 32Lae-lae, oto a huꞌena e si mae ooreta. 33?Haꞌalaa, kei hule aana hai dinge taꞌelaꞌinge, a huꞌe ngeena kei neꞌi huꞌe a tei aana e hiu mwaasine ngeena, aana kire mani toꞌo aana mola urine?”
34Oto a Jisas ko aalamire uuri, “Mai aano i leu mone mwala ko toꞌo poro na kire ko tola huꞌe. 35Taꞌe mo iini nge kire kei adona taꞌelaꞌinge aalihoꞌi mwaanie maenga, na huni iiꞌo aana walumalau haalu nge kei lae maine, kire saꞌa toꞌo-toꞌo poro wa kire ke totola huꞌe loꞌu, 36na kire saꞌa mae loꞌu. Oto aana iiꞌonga urine nge kire kei iiꞌo oto mola mala mo ensel. Mwala ngeena oto mo kalena God, nge kire taꞌelaꞌi eelihoꞌi loꞌu mwaanie maenga hunie maurihe haalu. 37A Mosis e haataꞌi diana aana oto uri iinoni e sai taꞌelaꞌi eelihoꞌi loꞌu mwaanie maenga. Maholo e uusu-uusu i sulie kele ai nge e kaꞌa waru ike aana dunge, e ere i sulie a Aalaha uri ingeie oto God nge a Ebraham, na Aesak na Jekob ko palo-paloa.Eksodas 3:638Oto aana ko unue uri kiraelu ko palo-paloa ue a God maꞌalana kire mae e tewa oto, a God e haataꞌinie uri maꞌalana nga iini e mauri ue wa e mae oto, taꞌe ahutana mwala kire mani meuri mola i naꞌona God. Oto a God e kaꞌa ike nada mo iini e mae, taꞌe God nada mo iini e mauri.”
39Oto ngaeta mo haꞌa-uusuli aana mo Haꞌatolanga a Mosis ko teꞌuri, “Haꞌa-uusuli, aalaminge iꞌoe e toꞌohuu oto.”
40Na kire ko meni maarara oto huni dolosie loꞌu nga mei ola aana a Jisas.
A Jisas E Aꞌailaꞌasie Mo Parise Aana Dolosinge
41Oto a Jisas ko dolosi aada uuri, “?Aana e ue ni mwala ko unue uri a Kraes kei hute mola mai aana komu a Deved Inemauri? 42Aana a Deved nge e unue maraana i laona puke ni kananga uuri, A God e unue hunie aalaha ineu, uuri ‘O ke iiꞌo kaꞌu i pwalo-pwaloku aana naꞌohai iiꞌo-iiꞌoha,43lai hule aana ne kei kama haahie mo maelonga iꞌoe i aano hunie o ke uuri puli-pulisire.’Sam 110:144A Deved maraana ni e unue uri a Kraes e neꞌi aalaha ingeie. ?Taꞌe e ue? ?Mwane nge e hute mola aana komu a Deved maraana, kei heꞌi neꞌi aalaha ingeie loꞌu uri taa eena?”
A Jisas E Haꞌapasu Honosie Mo Haꞌa-uusuli Aana Mo Haꞌatolanga A Mosis
45Maholo ahutana mwala ko meni pwaarongo ue i sulie erenga ingeie, a Jisas ko si teꞌuri hunie mo pwaarongoisuli ingeie. 46“Omu ke kinetaꞌiniꞌomu mwaanie mo haꞌa-uusuli aana mo Haꞌatolanga a Mosis. Kire ko sare walo liu mola peꞌie launihaꞌana mo toꞌoni maaꞌi, na hunie uri mwala ke haꞌapainaꞌara maholo kire ko walo liu i laona mo leu ni uusiꞌe. Na kire ko lio hilisie mo naꞌohai iiꞌo-iiꞌoha i laona mo nume ni palo-palo, na mo naꞌohai tolinge aani ngeuhe. 47Na loꞌu kire ko sare da mola uri kire ke lio manikuluꞌe aani aarengaꞌinge tewa i maana mwala. Taꞌe hule aana kire ko haꞌa-haꞌamweꞌu-mweꞌue mola mo nao keni, na kire ko leue mola mo nume ikire peꞌie ahutana toꞌo-toꞌolada. Ikire ngeena, haꞌaloilada kei lae loꞌu liutaa.”
21Mei Nao Keni E Niie E Ro Peni Pulu
1A Jisas e lio-lio hailiu na ko leesie mwala e toꞌo-toꞌo kire ko niie mo niinge ikire i laona mwaꞌi aana Nume Maaꞌi Peine. 2Na lae-lae mei nao keni meitale e lae loꞌu mei, oto ko niie mola e ro kele peni pulu.
3Oto a Jisas ko teꞌuri, “No ko unue oto huniꞌomu uri nao keni meitale ienini e nii peine liutaa aana ahutana mwala ko nii ie. 4Aana ahutana mwala ngeena, kire ko niie mola kele ngangaꞌai ola aana toꞌo-toꞌonga ikire. Taꞌe mei nao keni meitale ie, kele mei toꞌoha uri huni meu-meuri aana ingeie oto ko nii mangoa ienini.”
A Jisas E Ere Lalai I Sulie Ohoilana I Jerusalem Na Nume Maaꞌi Peine
5Ngaeta mo pwaarongoisuli a Jisas kire ko ere-ere i sulie Nume Maaꞌi Peine uri e lae otoi lio manikuluꞌe aena aana kire haꞌalaunie peꞌie mo heu diana na mo niinge niilana ko lae huni haꞌamanikuluꞌaa God. 6Taꞌe a Jisas e teꞌuri hunire, “Ahutana walu ola omu ko lee-leesiꞌi ngeena, aana nga maholo oho-aasileni kei saro lae, na nga taꞌa-taꞌa ho heu e saꞌa oore ike loꞌu aana leu e oꞌoꞌo aana.”
7Oto ngaeta mo pwaarongoisuli ko dolosi aana Jisas, kire ko teꞌuri, “?Haꞌa-uusuli, maholo uri taa ni walu ola ngeena kei reu? ?Na nga tolimaa uri taa ni huni haataꞌinie uri maholo hunie mo olana e karaꞌini oto?”
8Oto a Jisas ko teꞌuri, “Omu ke lio talamiu mwaanie nga iini e eeroꞌomu. Aana mo iini hunge kei lae mai aana sataku, na kire kei unue uuri, ‘Ineu oto a Kraes,’ na loꞌu uuri, ‘Pongi e hule oto.’ Taꞌe omu ke suꞌuri rongo hunire wa omu ke lae i sulire. 9Na maholo omu ko rongoa mo oohotaa, na mo heiseuninge honosie mo kahamani, mwaanie omu meꞌu-meꞌu, aana walu ola ngeena kei holaꞌi reu i naꞌo. Taꞌe haꞌamangolana walumalau ie haꞌike ue ni ngeena.”
10Oto ko heꞌi unue loꞌu uuri, “Mwala aana ngaeta hanue kei ooho honosie mwala aana ngaeta hanue. Nga aalahanga kei taꞌelaꞌi honosie ngaeta aalahanga. 11Na mo nunu peine kei tola. Hiolonga paine na liunge ni maelaa kei tola aana mo poꞌo ni henue hunge. Mo ola ni meꞌu i suliꞌi na mo tolimaa paine kei siho mai uure i lengi.
12“Taꞌe i naꞌona walu ola ienini ke si reu, mwala kei tapoliꞌomu na kire kei teungeꞌiniꞌomu. Kire kei tooleꞌomu i laona mo nume ni palo-palo hunie mo mwane paine kei leiꞌomu. Na kire kei tooleꞌomu loꞌu i naꞌona mo aalaha na mo inemauri hunie kire kei leiꞌomu noꞌone. Na kire kei meni aasiꞌomu i laona mo nume ni hoꞌo aena aana omu ko lulu i sulieu. 13Aana maholo walu olana kei reu uurini, maholo iꞌomu otona huni unu diana aana Tataroha Diana hunire. 14Omu ke loꞌo-loꞌongaꞌi diana mola, na mwaanie omu lae otoi tolahiꞌe aana nga taa ni unue honosiꞌomu. 15Ineu, ne kei haataꞌinie taane aamiu nga taa ni unue aana tohungana saenanaunge hule aana nga iini aana mo maelonga iꞌomu, na e saꞌa oolisie ike loꞌu nga mei wala aana erenga iꞌomu. 16Ahutana mwala kei meni lelediꞌomu. Maꞌalana mo aamamiu, na mo nikemiu, na mo eesimiu, mo tekihemiu, na mo malahumiu, na kire kei teungeꞌiniꞌomu noꞌone. Hule aana kire kei horo maesie ngaeta mo iini eemiu. 17Ahutana mwala kei teungeꞌiniꞌomu aena aana omu ko lulu i sulieu. 18Taꞌe nga taꞌa-taꞌa mei ola aana mo ola ngeena e saꞌa roroꞌa toꞌohiꞌomu ike. 19Na a God ke si haꞌa-uurie ahutemiu nge omu kei uure aꞌailaꞌa taraꞌasi aani hiiwalaimolinge lai hule aana haꞌamangolana.”
20Oto a Jisas ko heꞌi teꞌuri loꞌu, “Maholo omu ko leesie mae e aala ahuie oto i Jerusalem, omu ke si saie uri e karaꞌinie oto oho-aasilana hanue paine ngeena eena. 21Oto aana maholona, mwala i Jiudia kire ke tahi oto i mumuni honosie mo toloi henue. Mo iini e iiꞌo i Jerusalem kire ke tahi oto mwaanie hanue painena, na mo iini e iiꞌo kali-kelie i Jerusalem kire ke suꞌuri lae loꞌu weu i laona hanue. 22Aena aana mo dinge ni haꞌaloinge a God ni otona, huni haꞌa-oaie mo ola uusuleni e lae oto i laona mo Uusu-uusu Maaꞌi. 23Na aama-aamasilana mo huꞌe ko hiꞌe-hiꞌe aani mwela, na mo iini nge kire ko haꞌa-haꞌasusuhie ue mo wee-wee ikire. Aana siꞌohaꞌanga paine kei toolea hanue ie aana maholona, na saewasunge a God kei toꞌohie oto mwala ingeie mo Jiu. 24Nga mo iini horo maesilada kei lae aani naihi, na ngaeta mo iini kire kei tola mauri aada takoie mo henue hai aaopaꞌi mala mwala e iiꞌo ni hoꞌo. Mwala aaopa nge ikire nga mo Jiu haꞌike, kire kei uuri puli-pulisie i Jerusalem lai hule oto aana maholo mo Aapoloa Aaopa kei saro mango.”
A Jisas E Ere Lalai I Sulie Maholo Kei Eelihoꞌi Loꞌu Mei Aano
25Na a Jisas ko heꞌi teꞌuri loꞌu, “Mo tolimaa hai aaopaꞌi kei reu aana sato na waro-waro na mo heeꞌu taꞌau i salo. Na ahutana mo henue mai laona walumalau kire kei meni meꞌuteꞌinie kou-kouhaꞌana naho na kone-kone i eesi, na hule aana kire saꞌa saie ike loꞌu nga taa ni da. 26Mwala kei maesie maꞌunge aana maholo kire ko maaꞌoohie nga taa kei siho mai haahie ahutana walumalau, aana ahutana mo ola taꞌau i salo kei meni esu oolo-oolo mango, na kire kei meni hei-oolisi mango oto. 27Oto aana maholona, mwala ke si leesieu a Kale Ni Iinoni, aana ne kei lae mai i laona mei uuru peꞌie nanamanga na manikuluꞌanga paine. 28Na maholo walu ola ienini kei aehota rau, suꞌuri meꞌu, taꞌe omu ke uuwe pwau mola i lengi, aana maholo a God kei haꞌa-uuriꞌomu ko karaꞌini oto mai.”
A Jisas E Aalahuu Aana Ai Fik
29Oto a Jisas ko si ere ni aalahuunge hunire uuri, “Omu ke loꞌongaꞌi keꞌu i sulie ai fik na oto ahutana mo ei. 30Maholo omu ko leesie kire ko aehota ure, omu saie oto uri mo waro-waro ni madoro ko karaꞌini oto mai eena. 31Na e urine noꞌone aana maholo omu kei leesie walu ola ienini ko reu uurini, omu ke si manataꞌinie uri Aalahanga a God ko karaꞌini oto mai.”
32“No ko unue oto huniꞌomu uri walu ola ienini kei saro oa mango mola ue oodoie mwala aana pwaunge siꞌiri ie, na kire kaꞌa mae ue.21:32 A Jisas ko ere loꞌu i sulie oho-aasilana i Jerusalem nge e rau aana 70 A.D., ola mala hai aawalai helisi mola i purine e unue mo wala ienini. Leesie Matiu 24:34.33I Lengi na i aano kei suu, taꞌe walaku e saꞌa suu ike oto ooꞌoo.”
O Ke Iiꞌo Aakau Mola Loosie Oolinge Mai A Jisas
34Oto a Jisas ko heꞌi teꞌuri loꞌu, “!Omu ke lio talamiu! Mwaanie omu tolahiꞌe mola aana mo ola ni welumalau, wa mwaanie omu talei tara mola aani ngeuhe na aani inunge. Aana mala omu kei tara mola aana mo ola urine, hai dingena kei hule mola na omu kaꞌa dau aakau ike. 35Hai dinge ngeena kei sikileꞌi mala hune kire lolosie, aani haꞌaparasilana ahutana mwala aana walumalau. 36Oto omu ke kakali diana peꞌi aarengaꞌinge taraureꞌi, hunie omu ke uure aꞌailaꞌa huni lae sapemawa i matolana walu ola kei reu ngeena, lai hule aana maholo omu kei uure i naꞌoku a Kale Ni Iinoni.”
37Mo dinge ngeena a Jisas e sai haꞌa-uusulie mwala taꞌau i laona lolata aana Nume Maaꞌi Peine aana aatowaa, na maholo ko seulehi na ni e lae huni maꞌahu taꞌau i lengine Uuwo Ni Ei Olif. 38Ahutana mwala kire ko meni haꞌa-haꞌahuꞌo taꞌau i lolata aana Nume Maaꞌi Peine huni rongoa mo haꞌa-uusulinge ingeie suli dinge.
22Mo Mwane Paine Ni Jiu Kire Oalaꞌi Huni Horo Maesie A Jisas
Matiu 26:1-15, Mak 14:1-2, Jon 11:45-53
1Maholona na ko karaꞌinie oto Houlaa Ni Bred Iis Haꞌike Aana, nge kire haaraꞌinie noꞌone aana Houlaa Ni Liumwaanie. 2Mo naꞌohai pris na mo haꞌa-uusuli aana mo Haꞌatolanga a Mosis kire ko loꞌo-loꞌongaꞌinie horo-maesilana a Jisas kei lae uri taa, taꞌe kire ko meꞌuteꞌinie mwala mwaanie kire maaola-ola. 3Oto a Satan e sili i saena ngaeta iini aana aawalai hurulaꞌaa mwana rue a Jisas nge sailana uri a Jiudas Iskariot. 4Na e lae, oto ko lai ere ruru peꞌie mo naꞌohai pris na mo mwane paine aana pulitaa ko kakakalie Nume Maaꞌi Peine. Na ko unue uri kei pweloa a Jisas uri taa hunire. 5Oto kire ko tohungei saemango hiitoꞌo na kire ko heiholotaꞌi oto huni nii toꞌoha nana. 6Oto a Jiudas e neꞌisae mouteꞌi peꞌire, na ko aehota heitalea oto nga maholo diana huni nii mumuni aana a Jisas hunire, mwaanie uri mwala e saie loꞌu.
Mo Pwaarongoisuli Kire Dau Aakau Aana Ngaunge Aana Liumwaanie
Matiu 26:17-25, Mak 14:12-21, Jon 13:21-30
7Oto e hule aana eetana nga hai dinge aana Houlaa Ni Bred Iis Haꞌike Aana, na dinge ngeena oto dinge huni horoꞌie mo kalei sipu hunie ngaunge aana Liumwaanie. 8A Jisas ko si uusungeꞌinie a Pita na Jon, na ko teꞌuri hunirerue, “More ke lae na more ke dau aakau aana ngaunge aana Liumwaanie hunie kolu kei ngeu.”
9Oto kirerue ko dolosi aana uuri, “?Mere kei lai deu aakau aana i tei eena?”
10Oto a Jisas ko aalamirerue uuri, “Maholo more kei lae taꞌau i hule i henue, more kei oodoie nga mwane nge ko aangaꞌinie ho ateꞌai wei. More ke lae oto i sulie hunie nume nge kei lai sili aana. 11Oto more ko unue hunie iinoni e toꞌo aana nume ngeena uuri, ‘A Haꞌa-uusuli e unue uri o ke haataꞌinie aamereꞌi duru nge kei hele aana ngaunge aana Liumwaanie peꞌie mo pwaarongoisuli ingeie.’ 12A mwane ngeena ke si haataꞌinie duru paine ingeie taꞌau i lengi aamoreꞌi, iini kire dau aakau oto aana. Nge more kei deu aakau aana mo ola hunikolu i leune.”
13Oto a Pita na a Jon kirerue lae taꞌau na kirerue ko leesie walu ola ko reu oto mala a Jisas e unue hunirerue. Oto kirerue ko deu aakau oto aana ngaunge aana Liumwaanie.
A Jisas E Aehotaa Ngau-maaꞌinge
Matiu 26:26-30, Mak 14:22-26, 1 Korinit 11:23-25
14Oto e hule aana maholoi sato hunie ngaunge i seulehi, nge a Jisas na mo hurulaꞌaa kire si iiꞌo huni ngeu. 15Na ko teꞌuri hunire, “Maholo nou maa-maaꞌohie peꞌie hari-huninge paine e hule oto, aana nou neꞌi-neꞌisae haahie ngaunge aana Liumwaanie ienini peꞌiꞌomu i naꞌona sapesalunge ineu kei aehota. 16Aana no ko unue oto huniꞌomu uri nou saꞌa roroꞌa ngau loꞌu aana nga ngaunge aana Liumwaanie mala ie peꞌiꞌomu lai hule aana mo loꞌongaꞌinge aana kei saro oa aana Aalahanga a God.”
17Oto a Jisas e hele aana kao-kaoi waen, e ere ni paalahenga mango, ko si teꞌuri hunire, “Omu ke hele aana na omu ke mani inu aana. 18No ko unue oto huniꞌomu uri nou saꞌa inuhie loꞌu nga mei waen lai hule aana Aalahanga a God kei lae mai.”
19Oto e hele aana ho bred, oto ko ere ni paalahenga haahie, ko si nisie, na ko haꞌa-adoa mo pwaarongoisuli aana. Oto ko teꞌuri, “Hasiꞌoku oto ienini nge toliꞌaasilana e lae i tehulaꞌamiu. Omu ke teteꞌurine, huni aamasitoꞌonga aaku.”
20E urine loꞌu i purine ngaunge e mango, e hele aana loꞌu kao-kaoi waen, na ko teꞌuri, “Apuku oto ienini nge e aahe huniꞌomu, na mei epu nge ko haꞌa-oaie haiholotaꞌinge haalu a God ko esuie peꞌie mo iinoni ingeie. 21!Taꞌe omu ke saie! Iini ko pweloau taane oto peꞌieu i leu. 22Na ineu a Kale Ni Iinoni ne kei mae taane oto i sulie oalaꞌinge a God, taꞌe aama-aamasilana iini nge ko pweloau.”
23Oto mo pwaarongoisuli ko si aehota dolosi aada hailiu uri a tei iini hikada kei pwaoa leune.
24Kire ere-ere, na kire ko aehota ere haitapali oto haahie uri a tei hikada e paine liutaa. 25Taꞌe a Jisas e teꞌuri hunire, “Mo inemauri aana walumalau ie oto kire ko sasare haataꞌinie nanamanga ikire haahie mwala ikire. Na mwala nge kire toꞌo aana nanamanga haahie ngaeta mwala, saeda uri mwala ke haꞌapainaꞌara mala uri taꞌe ikire oto mo iini ko peꞌie mwala. 26Taꞌe iꞌomu, omu ke suꞌuri teꞌurine. Nga iini ko neꞌi naꞌohai mwane iꞌomu, nge ke neꞌi iinoni mwei-mwei. Na mwane paine iꞌomu, ke neꞌi koni-konihe mola namiu. 27?A tei ni e roroꞌa, iini e iiꞌo i aano nge ko maaꞌoohie mola ngaunge, wa iini nge ko raretaꞌi? Toꞌohuu iini nge e iiꞌo i aano oto e roroꞌa. Taꞌe ineu, nou iiꞌo i matolamiu ie mala iini ko hei raretaꞌi.
28“Iꞌomu, omu iiꞌo oto peꞌieu taraureꞌi aana ahutana maholo aasanga ko oohongieu. 29Na oto mala Aamaku e niie nanamanga nakue huni aalaha haahie mo iinoni, nge ineu no ko niie taꞌa-taꞌa taungei nanamanga ngeena noꞌone huniꞌomu. 30Hunie uri omu kei ngeu na omu kei inu peꞌieu aana aalahanga ineu. Na omu kei iiꞌo i lengine mo neunekume ni aalaha huni leie aawalai komu mwana rue ni Israel.”
A Jisas E Unue Uri A Pita Kei Taateingeꞌinie
Matiu 26:31-35, Mak 14:27-31, Jon 13:36-38
31Na a Jisas e heꞌi teꞌuri loꞌu, “!Saemon, Saemon! O ke saie, a God e toliꞌaasie uri a Satan ke dau aahongamiu huni leesie uri a tei kei uure aꞌailaꞌa. 32Taꞌe ineu, no ko aarengaꞌi taane talamu Saemon hunie uri hiiwalaimolinge iꞌoe ke susu. Oto maholo o ko eeliꞌu mei takoieu, o ke si haꞌasusue mo eesimu hunie kire ke aꞌailaꞌa noꞌone.”
33Oto a Pita ko teꞌuri, “Aalaha ineu, no ko maaꞌoohie mola laenga peꞌiꞌo i nume ni hoꞌo na oto huni mae peꞌiꞌo.”
34Oto a Jisas ko aalamie uuri, “No ko unue oto huniꞌo Pita, i naꞌona kue kei ngara i rodo siꞌiri, o kei saronai taateingeꞌinieu haꞌa-oolu uri o kaꞌa manataꞌinieu ike.”
A Jisas E Haꞌapasulie Mo Pwaarongoisuli Uri Mwala Kei Teungeꞌinire
35Oto a Jisas ko teꞌuri loꞌu hunie mo pwaarongoisuli ingeie, “Omu ke loꞌongaꞌinie kaꞌu aana maholo nou uusungeꞌiniꞌomu keꞌu waite, na omu kaꞌa toolea nga mwaꞌii toꞌoha, wa nga mwaꞌi loꞌu, wa nga hoꞌohaahiꞌae. ?Ohe omu tola talea nga mei ola loꞌu huni peꞌiꞌomu wa haꞌike?”
Oto kire aalamie a Jisas uuri, “Haꞌike taane.”
36Oto a Jisas ko teꞌuri, “Taꞌe oto molana, nga iini ko toꞌo aana nga mwaꞌii toꞌoha wa nga mwaꞌi loꞌu nge ke toolea oto. Na nga iini kaꞌa toꞌo aana nga naihi hei-heiseuni ke haꞌaholingeꞌinie toꞌoni ingeie hunie ke holie loꞌu nga naihi. 37Aana no ko unue oto huniꞌomu uri nga taa nge mo Uusu-uusu Maaꞌi e unue kei oa oto hunieu, aana e unue uuri, Mwala ko ere takalo uri ingeie ngaeta iinoni oorahaꞌaa mola.Aesaea 53:12 Ahutana mo ola uusuleni e lae i sulieu, kire ko reu oto.”
38Oto mo pwaarongoisuli ko teꞌuri, “Lio kaꞌu, Poro paine, e ro naihi kaꞌu oto ie.”
Oto a Jisas ko teꞌuri, “E ado oto.”
A Jisas E Lai Aarengaꞌi Maraana I Ketsemani
39Oto a Jisas e uure mwaanie huilume paine ngeena, ko si lae hunie Uuwo Ni Ei Olif oto mala ko lae-lae suli maholo. Mo pwaarongoisuli ingeie na kire lae noꞌone peꞌie aana maholona. 40Maholo e hule oto taꞌau i leune, e si teꞌuri hunie mo pwaarongoisuli ingeie, “Omu ke aarengaꞌi mwaanie malaahonga e hane haahiꞌomu.”
41Oto e kele lae mola taꞌau mwaanire, e pouruuru i aano ko si aarengaꞌi, 42ko teꞌuri, “Mamaꞌa, iiola o niie mai hunie ne ke hotelaꞌinie ko aasaieu oto.22:42 Erenga ni Krik e aalahuu i sulie sapesalunge aana erenga i sulie kao-kao. Mala ko mwadaꞌu, saeku o ke oolisie aana nga iini mwa-mwate. Taꞌe neꞌewau oto, o ke dau mola i sulie nga taa o saetoꞌo aana, na o ke suꞌuri deu i sulie nga taa nou saetoꞌo aana.”
43Oto ensel uure i Lengi ko haataꞌi aana a Jisas, na ko ere haꞌasusue saena. 44Na aena aana sapesalunge e paine hiitoꞌo, a Jisas ko si aarea God loꞌu liutaa. Na ko madaraꞌa oto hiitoꞌo hule aana mo uudu-uuduhe ni madaraꞌanga kire lio oto mala mo uudu-uuduhe ni epu.
45Oto e aarengaꞌi mango, e taꞌelaꞌi ko si lae i saana mo pwaarongoisuli, na ko leesie mola kire ko maꞌahu aena aana kire tohungei weo aana kire saehuu. 46Oto ko teꞌuri hunire, “?Uri omu ko maꞌahu mola? Omu ke taꞌelaꞌi na omu ke aarengaꞌi mwaanie malaahonga e hane haahiꞌomu.”
Kire Tapolie A Jisas
Matiu 26:47-56, Mak 14:43-50, Jon 18:3-11
47Maholo a Jisas ko ere-ere ue, na mwala hunge kire ko maau oto aana. A Jiudas ngaeta iini aana aawala mwana rue, nge ni e naꞌoda. Oto a Jiudas e lae mai saana a Jisas hunie ke nono peꞌie.
48Taꞌe a Jisas e teꞌuri hunie, “?Jiudas, uri o ko pweloau a Kale Ni Iinoni mola aani nononga peꞌieu?”
49Maholo mo pwaarongoisuli kire leesie nga taa ko reune, oto kire ko teꞌuri, “?Poro paine, uri melu ko heiseuni oto aani naihi?” 50Oto ngaeta iini hikada e lama mousie aalinge i pwalo-pwalo aana koni-konihe a Naꞌohana Mo Naꞌohai Pris.
51Taꞌe a Jisas e teꞌuri hunire, “!Suꞌuri teꞌurine loꞌu!” Na ko hele wau aana aalingana, ko haꞌa-uurie oto.
52Oto a Jisas ko si ere hunie mo naꞌohai mwane aana mo pulitaa hai aaopaꞌi kire hule ngeena, aana ngaeta mo naꞌohai pris, na mo naꞌohai ramo nge kire ko kakakalie Nume Maaꞌi Peine, na mo rato ni mwane ni Jiu kire hule noꞌone. Oto ko teꞌuri hunire, “?Uri omu unue uri ineu nga horopeli nge omu ko lae mai honosieu peꞌi naihi na peꞌi diꞌe? 53Ahutana dinge kaꞌu no ko talei oꞌoꞌo mola peꞌi haꞌa-uusulinge taꞌau i laona Nume Maaꞌi Peine. ?Aana e ue kaꞌu omu kaꞌa tapolieu oto aana maholona? !Taꞌe neꞌewau! Maholoi sato iꞌomu hunie aalahanga ni rodohono ke paine oto ienini.”
A Pita E Unue Uri E Kaꞌa Manataꞌinie Ike A Jisas
Matiu 26:69-75, Mak 14:66-72, Jon 18:15-18,25-27
54Oto kire si tapolie a Jisas na kire ko toolea oto taꞌau i nume a Naꞌohana Mo Naꞌohai Pris, na a Pita ko holo maholoi tala taane mola i sulire. 55Oto taꞌau i nume ngeena, mo ramo kire rurue dunge i denumana lolata na kire iiꞌo i aano kali-kelie. Oto a Pita e lae mai ko iiꞌo i aano noꞌone peꞌire. 56Na ngaeta keni euꞌesu e leesie a Pita maholo dunge ko raangie maana, oto ko lio hahuroto oto aana na ko teꞌuri, “!A mwane ienini noꞌone peꞌie a Jisas!”
57Taꞌe a Pita e taateingeꞌinie, ko teꞌuri, “!Keine, nou kaꞌa saie ike a mwane ngeena!”
58E kaꞌa tewa ike loꞌu i purine na ngaeta iini loꞌu ko leesie a Pita na ko teꞌuri, “Iꞌoe noꞌone ngaeta iini aada.”
Oto a Pita ko teꞌuri, “!Mwae! !Ineu haꞌike!”
59Ola mala nga taꞌa-taꞌa maholoi sato loꞌu mola i purine, na ngaeta mwane ko si susuleꞌinie na ko teꞌuri, “Saꞌa mola a mwane ngeena e oꞌoꞌo noꞌone peꞌie a Jisas. Aana ingeie mwane ni Kalili noꞌone.”
60Taꞌe a Pita e aalamie uri, “!Mwae! !Nou kaꞌa manataꞌinie ike nga taa o ko unuena!” Na oto mola aana maholo nge ko ere-ere ue ngeena, kue ko tolana ngara oto. 61Na aana kele maholoi satona, a Aalaha e aaliꞌu, e si toꞌomaaie a Pita. Oto a Pita ko si aamasitoꞌo aana nga taa poro painena e unue kaꞌu hunie uuri, “I naꞌona kue kei ngara i rodo siꞌiri, o kei saronai taateingeꞌinieu haꞌa-oolu uri o kaꞌa manataꞌinieu ike.” 62Oto a Pita e lae taꞌau i iisitaa i sinaha, ko si ngara uulo-uulo.
63Na aana maholona mo iini kire kakakalie a Jisas kire ko si aehota haꞌamwasi aana na kire ko repusie. 64Kire pwasu honosie maana, na kire ko si dodolosi aana uuri, “!Hoe propet! !O ke unue kaꞌu oodoiꞌemeelu! ?A tei ni e si repusiꞌo ngeena?” 65Na kire ko ere aaelasie a Jisas oto noꞌone aana mo ola hunge.
Kire Toolea A Jisas I Naꞌona Pulitaa Ni Lei-Lei Mo Jiu
Matiu 26:63-66, Mak 14:53-65, Jon 18:13-14,19-24
66Oto maholo na ko aehota dangi oto, mo rato ni mwane na mo naꞌohai pris oto peꞌie mo haꞌa-uusuli aana mo Haꞌatolanga a Mosis, kire meni loko oto. Na i leune kire ko si toolea mai a Jisas i naꞌoda. 67Oto kire ko dolosi aana a Jisas uri, “O ke unue kaꞌu oodoiꞌemeelu. ?Uri iꞌoe ni oto a Kraes?”
Oto a Jisas ko aalamire uuri, “Maꞌalana no ko unue kaꞌu oodoiꞌomu, na omu saꞌa hiiwalaimoli ike aaku. 68Na maꞌalana no ko dolosie nga mei ola aamiu, na omu saꞌa mwaꞌe-mwaꞌe ni aalamieu ike noꞌone. 69Taꞌe uure aana maholoi sato ienini pwau weu, ineu a Kale Ni Iinoni ne kei iiꞌo oto aana naꞌohai iiꞌo-iiꞌoha i pwalo-pwalona God Hahuꞌana Nanama.”
70Oto kire ko meni dolosi loꞌu aana uuri, “?Nge uri iꞌoe oto Kalena God?”
Oto a Jisas ko aalamire uuri, “Nge kaꞌu oto omu ko unuena.”
71Oto kire ko si teꞌuri, “!Rongo kaꞌu! !Kolu rongoa oto maraakaelu nga taa e unue! !Ngeena kolu kaꞌa saetoꞌo aana ike loꞌu nga iini ke ere takoie!”
23Mo Jiu Kire Toolea A Jisas I Naꞌona A Paelat Hunie Ke Leie
Matiu 27:1-2,11-14, Mak 15:1-5, Jon 18:28-38
1Oto kire mani taꞌelaꞌi, kire ko toolea oto a Jisas i naꞌona a Paelat. 2Na kire ko aehota unue oto mo ola hunge i sulie a Jisas uuri, “Melu deu oodoie oto a mwane ienini ko haꞌatakaloa mwala iꞌemi mo Jiu, na ko ere aada mwaanie nii-toꞌohanga hunie aalahanga ni Rom, peꞌie ko unue uri ingeie oto a Kraes, Inemauri iꞌemi mo Jiu.”
3Oto a Paelat e dolosi aana a Jisas, ko teꞌuri, “?Uri iꞌoe ni oto Inemauri mo Jiu?”
Oto e aalamie a Paelat ko teꞌuri, “Nge kaꞌu oto o ko unuena.”
4Oto a Paelat ko teꞌuri hunie mo naꞌohai pris na ahutana mwala, “Nou kaꞌa lio oodoie ike nga mei roroꞌanga aana a mwane ienini.”
5Taꞌe kire ko meni rara oto uuri, “A mwane ngeena ko talei kotahie mola iꞌemi mo Jiu aana haꞌa-uusulinge ingeie i sulie mo henue, uure oto hao aana poꞌo ni henue i Kalili, na hule oto mai aana poꞌo ni henue i Jiudia.”
A Paelat E Uusungeꞌinie A Jisas I Saana A Herod Hunie Ke Leie
6Maholo a Paelat e rongo urine, ko si dolosi aada uuri, “?Uri a mwane ienini ingeie nga mwane ni Kalili?” 7Maholo e rongoa uri a Jisas e uure mwaanie poꞌo ni henue nge a Herod Antipas ko aalaha haahie, e si uusungeꞌinie i saana a Herod, aena aana maholona a Herod ingeie noꞌone i Jerusalem. 8A Herod e tohungei ilenimwaꞌe oto hiitoꞌo maholo e leesie a Jisas, aena aana e talei rorongo tarohana na e sasare leesie ko tewa oto mai. Na uri hunie a Jisas ke asuie kaꞌu nga huꞌi-huꞌite hunie ke leesie.
9Oto a Herod e dolosie mo ola hunge aana a Jisas, taꞌe a Jisas kaꞌa aalamie ike oto ooꞌoo. 10Mo naꞌohai pris na mo haꞌa-uusuli aana mo Haꞌatolanga a Mosis kire mani lae noꞌone mai, oto kire ko meni rara oto aani unulana taꞌena nga ola honosie a Jisas. 11Oto a Herod na mo ramo ingeie kire ko si haꞌamwasi mola aana Jisas, na kire ko ere mwakataꞌinie. Kire haꞌatoꞌonie aana toꞌoni tetewa nonoroꞌa mala mo aalaha ko hoꞌo-hoꞌosiꞌi, kire si uusungeꞌi eelihoꞌi loꞌu aana i saana a Paelat. 12Aana hai dingena a Paelat na a Herod kirerue ko si heꞌimalahune loꞌu, taꞌe holaꞌinaꞌo ikirerue e ro maelonga ni ngeena.
A Paelat E Lei Mae Aana A Jisas
Matiu 27:15-26, Mak 15:6-15, Jon 18:39–19:16
13Oto a Paelat e lokoa mo naꞌohai pris, na mo rato ni mwane, na ahutana mwala, 14ko si teꞌuri hunire, “Omu toolea mai mwane ienini i seeku aana omu ko unue uri ko haꞌatakaloa mwala aani hei polanga honosie aalahanga ni Rom. Taꞌe lio kaꞌu. Nou dodolosi oto aana i naꞌomiu na nou kaꞌa lio oodoie ike nga mei roroꞌanga omu unue a mwane ie e dau huꞌisie. 15A Herod na e kaꞌa lio oodoie ike noꞌone nga mei roroꞌanga aana, kaꞌu e uusungeꞌi eelihoꞌi aana mola mai seeku. E lio mala uri a mwane ienini e kaꞌa dau huꞌisie ike nga mei ola adona maenga. 16Oto ne kei repusie mola, na no ko toliꞌaasie ke iiꞌo luhetaꞌi oto.” 1723:17 Ngaeta mo uusu-uusu i naꞌo aana erenga ni Krik kire sapeie loꞌu tatala 17 uuri, “Suli helisi aana maholo aana Houlaa Ni Liumwaanie, e malisine a Paelat ke luhesie nga taꞌa-taꞌa mwane hunire mwaanie nume ni hoꞌo.”
18Taꞌe ahutana mwala ko si meni tea paine mola aana maholona na kire ko unue uuri, “!Horo maesie mola! A Barabas ni melu saetoꞌo aana o ke luhesie.” 19(A Barabas ko iiꞌo i nume ni hoꞌo aena aana e horo maesie nga mo iini i Jerusalem maholo pulitaa ingeie kire haiseuni honosie aalahanga ni Rom.)
20Taꞌe a Paelat e sare toliꞌaasie mone a Jisas ke iiꞌo luhetaꞌi, oto ko heꞌi haꞌarongoa loꞌu mwala aana leune. 21Taꞌe kire ko meni soi peine loꞌu mola uuri, “!Horo maesie! !Horo maesie mola i lengine poꞌu-poꞌu!”
22Oto oolune nga maholo a Paelat ko heꞌi unue loꞌu hunire uuri, “?Aana e ue? ?Haꞌalaa nga mei taa ni e dau aaelasie? Nou kaꞌa lio oodoie ike nga mei ola huni horo maesie i tehulaꞌana. Aena urine, ne kei repusie mola na no ko toliꞌaasie oto ke iiꞌo luhetaꞌi.”
23Taꞌe kire ko si heꞌi soi peine loꞌu mola uri a Paelat ke horo maesie a Jisas i lengine poꞌu-poꞌu. Na lae-lae walada e hane haahie oto a Paelat. 24Oto a Paelat e si tolatahangaꞌinie leinge ingeie uri mei ola kire saetoꞌo aana kei lae oto urine. 25E luhesie a Barabas, mwane e haiseuni na e horo mwaanie nume ni hoꞌo, na e si toliꞌaasie a Jisas i laona nimada hunie kire ke dau mala saeda aana.
Kire Horo Maesie A Jisas
Matiu 27:32-44, Mak 15:21-32, Jon 19:17-27
26Maholo mo ramo kire toolea a Jisas mwaanie nume a Paelat, na kire ko oodoie nga mwane satana a Saemon, mwane aana huilume i Saerin, e si uure mola mwaanie hohola. Oto kire si deu rarahie mola hunie ke aangaꞌinie poꞌu-poꞌu i sulie a Jisas.
27Na mwala oto hunge kire ko lulu i sulie a Jisas noꞌone aana maholona. Na mo keni hunge ko lae peꞌi ngarasie a Jisas lae-laeꞌi. 28Oto a Jisas e aaliꞌu takoire, ko teꞌuri hunire, “!Maeni keni ni Jerusalem! Omu ke suꞌuri ngara-ngarasieu, taꞌe omu ke ngara-ngarasiꞌomu mola maraamiu na mo kalemiu. 29Aana mo dinge ko lae maine mwala kei unue uuri, ‘Deidehie mo iini e amara, na mo iini kaꞌa haꞌahute, na mo iini nge mo wee-wee haꞌike ikire huni haꞌasusuhire.’ 30Na aana maholona nge mwala ke si unue uuri, ‘Iꞌomu mo toloi henue ngeena, omu ke aaꞌoho mola mai haahiꞌemi haꞌalaa e diana.’ Na kire kei unue noꞌone hunie mo uuwo uuri, ‘Iꞌomu, mo uuwo ngeena, omu ke aanomiꞌemeelu mola.’Hosea 10:831Ineu nou urihana ai nge e mauri, aana nou kaꞌa dau huꞌisie nga mei ola, taꞌe maꞌalana e urine walu ola aaela ko reu oto aaku ienini. ?Oto kei uri taa taane huniꞌomu, mo iinoni oorahaꞌaala? Kei tohungei aaela oto liutaa huniꞌomu aana omu urihana mola ai nge e mae aakau oto loosie aasilana i laona dunge.”
32Na mo ramo kire toolea noꞌone ngaeta ro mwane horopeli huni horo maesirerue peꞌie a Jisas. 33Maholo kire lai hule oto aana leu sailana uuri “Leu ni Rarata,” kire si repu taalengasie a Jisas i lengine poꞌu-poꞌu. Na e ro mwane horopeli ngeena kire ko repu taalengasirerue noꞌone i lengine ngaeta ro poꞌu-poꞌu. Oto kire ko si neꞌie nga iini i pwalo-pwalona a Jisas, na nga iini i meu-meuline.
34-35Oto a Jisas e teꞌuri, “Mamaꞌa, o ke neꞌisae-aasie leu ie mwaanire, aana kire kaꞌa saie ike uri nga taa kire ko da.”
Na maholo mwala ko maa-maa ni ola ue aana maelana e oolu mwane, mo ramo kire ko si inie daes huni leesie iini uri taa aada kei toꞌo aana mo sala a Jisas. Na mo rato ni Jiu ko haꞌamwasi aana a Jisas, kire ko teꞌuri, “E roroꞌa haꞌa-haꞌa-uurie mwala aaopa. Kolu ke lio kaꞌu ohe ko haꞌa-uurie maraana, mala ko neꞌie a Kraes toꞌohuu, inemauri a God e lio hilisie hunikie mo Jiu.”
36Mo ramo noꞌone na kire haꞌamwasi aana a Jisas. Kire lae mai saana, oto kire ko niie waen ahaꞌi hunie ke inuhie. 37Na kire ko teꞌuri, “O ke haꞌa-uuriꞌo kaꞌu, mala o ko neꞌie nga inemauri mo Jiu toꞌohuu.”
38Na nga taa kire uusue na kire neꞌie i pweune poꞌu-poꞌu a Jisas e ere uuri, INEMAURI MO Jiu KAꞌU IE.
39Oto ngaeta iini aana e ro mwane horopeli nge aaroroladarue e lae peꞌie, ko ere aaelasie a Jisas na ko teꞌuri, “?Uri iꞌoe ni oto a Kraes wa haꞌike? O ke haꞌa-uurikolu mone.”
40Taꞌe ngaeta iini ko si ere aana mola uuri, “?Uri o kaꞌa maꞌuteꞌinie ike a God? Aana leilemu ko lae tararuru peꞌie a mwane ienini. 41Ikure aana e urine, na horoꞌilakarue ko lae oto haahie mo ola kure dau aaelasiꞌi. Taꞌe a mwane ienini, ingeie e kaꞌa dau aaelasie ike nga mei ola oto ooꞌoo.”
42Oto ko si teꞌuri hunie a Jisas, “Jisas, o ke neꞌisae aaku maholo o kei iiꞌo aana aalahanga iꞌoe.”
43Oto a Jisas ko teꞌuri hunie a mwaena, “No ko unue oto huniꞌo uri siꞌiri o kei iiꞌo peꞌieu i Lengi.”
A Jisas E Mae
Matiu 27:45-56, Mak 15:33-41, Jon 19:28-30
44Ola mala i upui aatowaa aana hai dingena, rodohono e dau haahie ahutana hanue lai hule aana sato e ngara e oolu i aapai sato. 45Na sala paine kire lohea honosie Hahuꞌana Leu Maaꞌi wau i laona Nume Maaꞌi Peine, e aꞌari i denumana. 46Oto a Jisas e si soi aana mei wala paine na ko teꞌuri, “Mamaꞌa no ko neꞌie mangoku i laona nimemu.” A Jisas e ere mango urine na ko mae oto.
47Oto naꞌohana mo ramo ni Rom e uure-uure i leune, maholo e leesie mei olana e rau urine, ko si ere ni haꞌamaꞌunge hunie a God, na ko teꞌuri, “Toꞌohuu oto, a mwane ie nga mwane oodotaꞌi.”
48Maholo mwala e loko ngeena kire leesie walu olana e rau, kire ko si meni ooli hunie mo nume ikire peꞌi saehuunge oto hiitoꞌo. 49Taꞌe mo malahune a Jisas peꞌie mo keni nge kire lulu i sulie a Jisas uure oto i Kalili, kire uure mola wau haꞌatau, kire ko haꞌa-haꞌamaesie nga taa ko reu.
Kire Haitolingeꞌinie A Jisas
Matiu 27:57-61, Mak 15:42-47, Jon 19:38-42
50-51Na a Josep, mwane aana huilume i Arimatia aana poꞌo ni henue i Jiudia, ingeie noꞌone i leune aana maholona. Ingeie mwane diana na e oodotaꞌi, na ko maa-maaꞌoohie Aalahanga a God kei lae mai. A Josep mwane taane noꞌone aana pulitaa ni lei-lei mo Jiu, taꞌe e kaꞌa ilenimwaꞌe ike peꞌie walu ola kire asuiꞌi aana a Jisas.
52Oto a Josep e lae i saana a Paelat, na ko haꞌatohue rae aana a Jisas. 53Oto e oohosie mwaanie poꞌu-poꞌu, ko si uloa aana mei sala rereꞌa, na ko lai neꞌie i laona kilipweꞌu ingeie. Kilipweꞌu ingeie ngeena, kire didie aana hau, na kire kaꞌa haitolingeꞌinie ue nga iini i laona. 54Na hai dinge ngeena, Dinge Ni Talamaꞌinge, aana ko seulehi mei na Dinge Maaꞌi Mo Jiu ko karaꞌi aehota oto. 55Mo keni nge kire hakusie a Jisas oto uure i Kalili, kire holo maholoi tala mola i sulie a Josep, na kire leesie leu nge kira Josep kire haꞌa-enohie rae aana a Jisas i laona kilipweꞌu. 56Oto kire aalihoꞌi i nume, kire ko si deu aakau aana mo ola wasu mangoni hunie lingisiꞌi i lengine sapena a Jisas. Kire dau-deu aakau taane aana mo rumu wasu mangoni ngeena, taꞌe kire kaꞌa lae loꞌu i saana kilipweꞌu, aena aana e seulehi oto na Dinge Maaꞌi Mo Jiu e aehota oto. Oto kire si mamalo mola aana hai dinge laku ngeena i sulie mo Haꞌatolanga a Mosis.
24A Jisas E Taꞌelaꞌi Mwaanie Maenga
Matiu 28:1-10, Mak 16:1-8, Jon 20:1-10
1Oto mola i maahuꞌo-huꞌo i hoꞌowa aana dinge i purine Dinge Maaꞌi Mo Jiu, mo keni kire lae mai saana kilipweꞌu, na kire toolea mai mo ola wasu diana nge kire dau aakau eeni. 2Na kire lio oodoie hau taꞌaasilana e lae oto mwaanie maana kilipweꞌu. 3Oto kire sili hao i laona kilipweꞌu, taꞌe kire kaꞌa lio oodoie ike loꞌu rae aana a Jisas Aalaha. 4Maholo kire ko loꞌo-loꞌongaꞌi peꞌie taipuꞌo-puꞌonga i sulie nga taa e raune, na e ro mwane kire toꞌoni aani toꞌoni rereꞌa wana-wana kire uure oto peꞌire. 5Oto maholona mo keni kire liotoli oto i aano aana kire ko tohungei meꞌu hiitoꞌo. Oto e ro mwane ngeena ko teꞌuri hunire, “?E ue ni omu ko heitalea iini e mauri oto loꞌu i matolana mo iini e mae? 6Ingeie haꞌike oto i leu, taꞌe e taꞌelaꞌi oto. Omu ke aamasitoꞌo aana nga taa e unue huniꞌomu maholo na ingeie ue peꞌiꞌomu hai Kalili. Aana e unue uuri, 7‘Kire kei niieu a Kale Ni Iinoni i laona nimana kira oorahaꞌaala huni horo maesieu i lengine poꞌu-poꞌu, na oolune nga hai dinge ne kei taꞌelaꞌi loꞌu.’ ” 8Oto mo keni kire si aamasitoꞌo aana nga taa a Jisas e unue.
9Oto kire lae mwaanie kilipweꞌu, kire ko si lai haꞌarongoa aawalai pwaarongoisuli mwana eeta, na ngaeta mo iini loꞌu. 10Mo keni nge kire haꞌarongoa mo hurulaꞌaa aana nga taa e rau, nge a Meri ni Makdala, na a Joana, na Meri nikana Jemes, na ngaeta mo keni loꞌu. 11Taꞌe mo hurulaꞌaa kire loꞌongaꞌinie mola uri nga taa mo keni e unue e kaꞌa rongo ike mala nga mei ola, na kire kaꞌa hiiwalaimoli ike aada. 12Taꞌe a Pita e taꞌelaꞌi, na ko huru oto i saana kilipweꞌu. E lae taꞌau i aongaꞌi, na ko leesie mola taꞌe sala rereꞌa nge kire uloa sapena Jisas aana. Oto e si eelihoꞌi mola peꞌi tola ohie nga taa e raune.
A Jisas E Haataꞌi Aana E Ro Iini I Sulie Tala Hunie I Emeas
13Oto loꞌu mola aana hai dingena, ngaeta ro iini aana mwala ko lulu i sulie a Jisas ko lae hunie huilume i Emeas, ola mala aawalai kilomita mwana eeta haꞌataulie i Jerusalem. 14Na kirerue ko lae peꞌi ere-ere i sulie walu ola e raune. 15Maholo kirerue ko lae peꞌi totola i sulie walu olana, na a Jisas maraana ko lae oto mai saadarue na ko hekusirerue oto. 16Kirerue leesie taane a Jisas, taꞌe kirerue kaꞌa lio saie ike. 17A Jisas ko teꞌuri hunirerue, “?Nga taa ni more ko lae peꞌi ere-ere i suliena?”
Oto kirerue uure hahuroto na maadarue ko rehitou oto. 18Oto ngaeta iini aadarue, iini nge satana a Kleiopas, ko teꞌuri hunie a Jisas, “!Haꞌike eena! Saꞌa mola iꞌoe oto taꞌa-taꞌa iini ni Jerusalem nge o kaꞌa sasaie ike nga taa e rau aana mo dinge e mango haona.”
19Oto a Jisas ko dolosi aadarue uuri, “?Nga mo ola uri taa?”
Oto kirerue ko unue uuri, “Mo ola nge kire rau aana a Jisas iini ni Nasaret. A mwaena ingeie nga haꞌa-uusuli diana na propet nanama nge a God e neꞌisae paine haahie na ahutana mwala kire haꞌamaꞌu aana. 20-21Oto iꞌemeelu, melu loꞌo-loꞌongaꞌinie uri ingeie ni oto iini kei esuie mwala ni Israel ke iiꞌo luhetaꞌi mwaanie aalahanga ni Rom. Taꞌe mo naꞌohai pris na mo aalaha, kire niie oto hunie mo Rom kire ke lei mae aana na kire horo maesie oto i lengine poꞌu-poꞌu. Na oolune nga hai dinge uure oto aana mo olana e rau loꞌu ie. 22Oto ngaeta mo keni aameelu ko si ladoa loꞌu mo ola ni pangataꞌinge uri kire haꞌahuꞌolie kilipweꞌu, 23taꞌe kire kaꞌa lio oodoie ike rae aana i laona. Mo keine kire aalihoꞌi mei, oto kire ko unue uri kire leesie mo ensel e haataꞌi hunire, na mo ensel ngeena kire unue uri a Jisas e mauri loꞌu. 24Ngaeta mo iini aameelu kire lae noꞌone i saana kilipweꞌu, na kire lio oodoie oto mala mo keni e unue kaꞌu. Taꞌe kire kaꞌa leesie ike a Jisas.”
25Oto a Jisas ko teꞌuri hunirerue, “!Mwae! More tohungei pweu na more kaꞌa sai lio saie ike nga taa e toꞌohuu lau-leu. E malisine uri more ke hiiwalaimoli oto aana mo ola mo propet kire unuꞌi. 26Aana kire unue uri a Kraes kei saro sapesalu na kei mae oto urine, nge ke si lai iiꞌo aana manikuluhaꞌana.” 27Oto a Jisas ko aehota luhesie hunirerue mo ola uusuleni e lae i sulie maraana i laona mo Haꞌatolanga a Mosis lae hule aana mo Uusu-uusu Maaꞌi mo propet.
28Maholo kiraelu lae mai karaꞌinie huilume nge kirerue ko lae huniena, oto a Jisas ko deu uri ke liu taraꞌasi mola mwaanirerue. 29Taꞌe kirerue haaraie, kire ko teꞌuri, “Kolu ke iiꞌo kaꞌu i leu aana ko seulehi oto, na karaꞌinie ke rodo oto.” Oto a Jisas e si lae na ko iiꞌo oto peꞌirerue aana nume kirerue iiꞌo aana. 30Oto maholo kiraelu iiꞌo i aano huni ngeu, a Jisas e hele aana ho bred na ko ere ni paalahenga haahie. Oto e nisie, ko si niie hunirerue. 31Oto aana maholoi satona, maadarue e si taha na kirerue ko lio saie oto a Jisas. Taꞌe e tolana waa loꞌu mola mwaanirerue.
32Oto kirerue ko si ere hailiu hunirerue uuri, “!Mwae! Maholo nge e ere-ere hunikure i sulie tala na e luhesie loꞌongaꞌinge i laona mo Uusu-uusu Maaꞌi, e tohungei rongo hai saiꞌi oto.”
33Oto kirerue ko tolana taꞌelaꞌi oto aana maholona, na kirerue ko eelihoꞌi oto hunie i Jerusalem. Kirerue lae taꞌau na kirerue ko lio oodoie aawalai pwaarongoisuli mwana eeta peꞌie ngaeta mwala loꞌu kire loko. 34Oto kire ko holaꞌi haꞌarongorarue uuri, “A Aalaha e taꞌelaꞌi oto toꞌohuu na e haataꞌi hunie a Saemon.” 35Oto kirerue ko ladoa loꞌu nga taa e rau i sulie tala, na aana kirerue lio saie a Jisas maholo e nisie ho bred.
A Jisas E Haataꞌi Aana Mo Pwaarongoisuli Ingeie
36Maholo kirerue ko haꞌa-haꞌarongora aana mo olana, na a Jisas maraana e uure oto i matolada na ko teꞌuri, “Hanuelamanga ke iiꞌo peꞌiꞌomu.”
37Oto kire aparaꞌi na kire ko tohungei meꞌu oto, aana kire loꞌongaꞌinie uri kire ko leesie aakalo. 38Taꞌe a Jisas e teꞌuri hunire, “?E ue ni omu ko lae otoi meꞌu hiitoꞌo urine? ?Na e ue ni saemiu ko rue-ruaꞌa? 39Omu ke leesie kaꞌu e ro nimeku na e ro aeꞌaeku. Ineu taane ni ie. Omu ke hele kaꞌu i sapeku hunie omu ke saie, aana aakalo kaꞌa toꞌo hasiꞌo ike na kaꞌa toꞌo suisuli ike, mala omu ko leesiꞌi eeku ie.”
40E ere urine mango, ko si haataꞌinie e ro nimana na e ro aeꞌaena aada. 41Kire ko tohungei pangataꞌi na kire ko ilenimwaꞌe oto liutaa, taꞌe maꞌalana e urine na kire kaꞌa hiiwalaimoli ike ue aana. Oto a Jisas ko dolosi aada uuri, “?Omu toꞌo aana nga mei ola ni nga i leu?”
42Oto kire ko niie mei iiꞌe maadoꞌo hunie, 43na e hele aana, ko si ngaa i maada huni haataꞌinie uri ingeie nga aakalo haꞌike. 44Oto ko teꞌuri hunire, “Mei ola nge e rau eeku ngeena, nou unu mangoa oto oodoiꞌomu maholo nge nou oꞌoꞌo ue peꞌiꞌomu. Aana nou unue uri ahutana walu ola uusuleni e lae i sulieu i laona Haꞌatolanga a Mosis na aana mo Uusu-uusu Maaꞌi mo propet na aana Puke ni Kana, kire kei saronai oa mango.”24:44 A Jisas ko ere i sulie ahutana mo puke aana Haiholotaꞌinge Lalahuꞌe ni ngeena. Mo Jiu kire oopaa mo Uusu-uusu Maaꞌi ikire ngeena aana e oolu aapa nge e Jisas e ere i suliꞌi ngeena.
45Oto a Jisas e si tahanie manatada hunie kire ke lio saie mo Uusu-uusu Maaꞌi. 46Na ko teꞌuri hunire, “Uusulana e lae oto uurini. A Kraes kei saronai sapesalu na kei saronai taꞌelaꞌi loꞌu mwaanie maenga aana oolune nga hai dinge. 47-48Kire unue noꞌone uri mei wala i sulieu ke lae hunie ahutana mo iinoni ni welumalau ke aaliꞌu takoie God hunie ke saeꞌaasie mo oorahaꞌaa ikire. Oto omu ke lai haꞌarongoa mwala aana walu olana, aehota mai i Jerusalem, lae hule aana ahutana mo komu ni welumalau. 49Na ineu maraaku, ne ke si uusungeꞌinie mai haahiꞌomu nga taa nge Aamaku e haiholotaꞌinie. Taꞌe omu ke iiꞌo kaꞌu i Jerusalem hule aana omu kei hele aana nanamanga ngeena uure i Lengi.”
A Jisas E Aalihoꞌi I Lengi
50Oto a Jisas e toolera taꞌau mwaanie i Jerusalem hule i hoorana huilume i Betani, e si susueꞌinie e ro nimana, ko haꞌadianaꞌara. 51Maholo ko ere-ere ni haꞌadianaꞌara ue, na ko oopa oto mwaanire aana a God e tahelaꞌinie oto taꞌau i Lengi, 52na kire ko mani pouruuru ni haꞌamaꞌunge aana. Oto kire si eelihoꞌi peꞌie saemangonga oto liutaa taꞌau i Jerusalem. 53Na kire si iiꞌo mola suli maholo taꞌau i Nume Maaꞌi Peine peꞌi paalahelana God.