Ruana Nga Uusu-uusu A Pol Hurulaꞌaa Hunie A
Timoti
?A tei ni e uusue uusu-uusu ienini?
A Pol Hurulaꞌaa ni e uusue uusu-uusu ienini maholo karaꞌinie oto kei mae. A porona e asu waaꞌiniꞌini nana Kraes hunie mo helisi oto hunge, na e asu toꞌohuu nana Kraes oto taraꞌasi hule aana haꞌamangolana mau-meuringe ingeie.
?E uusue uusu-uusu ienini hunie kira tei?
Uusu-uusu ooreta a Pol ienini e uusue hunie tohungana malahune a Timoti. A Timoti ingeie ue wau aana huilume i Epesas i laona poꞌo ni henue i Esia, aana ko peꞌie soihaadaꞌinge wau aani laeliwalanga, na haꞌa-uusulinge, na haꞌa-oodohilana mo iini ko oorahaꞌaa wa ko aehota hiiwalaimoli aana mo haꞌa-uusulinge eero-eero.
?Nga taa e rau-reu maholo e uusue uusu-uusu ienini?
Mo Rom kire aasie a Pol Hurulaꞌaa i nume ni hoꞌo mola aana ko tarohaꞌinie a Jisas. Aana eetana nga maholo mo Rom kire tapolie a Pol Hurulaꞌaa, e iiꞌo i laona nume ni hoꞌo hunie ngaeta mo helisi, taꞌe lae-lae kire toliꞌaasie loꞌu. Taꞌe i purine ngaeta mo helisi loꞌu, kire heꞌi tapolie loꞌu. Oto aana ruana nga maholo ienini, a Pol e saie uri mo Rom kei horoꞌie oto. Leesie 2 Timoti 4:6. Oto a Pol ko heꞌi uusu-uusu loꞌu hunie a Timoti aana halisi e oono aawala mwana hiu i purine hutelana a Jisas (67 A.D.).
?E uusue uusu-uusu ienini huni taa?
A Pol e uusu-uusu hunie a Timoti aena aana e iiꞌo maraana na saena hunie ke leesie a Timoti i naꞌona kei mae. Na e uusu-uusu noꞌone hunie a Timoti aana ko sare haꞌasusue saena Timoti aana asunge nana a Aalaha. E unue uri a Timoti ke asu waaꞌiniꞌini nana Jisas mala ngaeta ramo, maꞌalana kira tei ko uure honosie. Na a Pol e uusu-uusu noꞌone aana ko sare peꞌie a Timoti huni haꞌa-oodohie ngaeta mo ola nge kire kaꞌa tohungei oodo oto wau aana soihaadaꞌinge i Epesas.
?Nga taa ni mo pweu ni wala i laona uusu-uusu ienini?
sapesalunge, masanga haꞌike, unulana mo haꞌatolanga hunie mwala, Walana God, hiiwalaimolinge ke lae hule i haꞌamangolana, iinoni euꞌesu toꞌohuu
?Nga taa ni ngaeta mo eehuꞌi tatala i laona uusu-uusu ienini?
2 Timoti 2:15, 2 Timoti 3:16-17
?Nga taa ni mo eehuꞌi neꞌisaenga i laona uusu-uusu ienini?
Mei wala ni saediananga hunie a Timoti (1:1-2)
A Pol ko lahea God haahie a Timoti, na ko haꞌananau honosie mo ola takalo nge ko hane i laona soihaadaꞌinge. (1:3–4:5)
A Pol ko uusu-uusu i sulie iiꞌonga ingeie, na ko unue hunie a Timoti ke peꞌie aana ngaeta mo kele ola. (4:6-18)
Mei wala ni saediananga ooreta (4:19-22)
1Mei Wala Ni Saediananga Hunie Mwane Saanau A Timoti
1Saediananga mwaanieu a Pol, iini nge a God maraana e lio hilisieu uri hunie ne ke neꞌi hurulaꞌaa a Kraes Jisas, hunie ne ke tarohaꞌinie maurihe huu e haiholotaꞌinie hunie mo iini kire lado peꞌie Kalena, a Kraes Jisas. 2Na no ko uusu-uusu oto ie huniꞌo kaleku Timoti, aana iꞌoe oto mwela maaꞌi ineu.
No ko eitanaie a God Aamaka na a Kraes Jisas Aalaha ikie uri hahuꞌana manata-diananga, na aamasinge, na hanuelamanga ingeie ke iiꞌo peꞌiꞌo.
O Ke Asu Aꞌailaꞌa Aana Nanamanga A Liꞌoa Maaꞌi Huni Houleꞌinie a Jisas
3No ko aarengaꞌi talamu susue rodo na aatowaa, na no ko tohungei sae-saemango haahiꞌo suli maholo no ko aarea God ineu nge no ko esu nana peꞌie mei manatanga rereꞌa oto noꞌone mala mo weuweku kire auꞌesuie. 4No ko aama-aamasitoꞌo taane aana maholo kure oopa nge o ngarasieu, oto saeku uri ne ke leesiꞌo kaꞌu loꞌu hunie ne ke saemango. 5No ko aamasitoꞌo noꞌone aana mei hiiwalaimolinge toꞌohuu nge a nikemu a Iunis na a pwaa-pwaamu a Lois kire mani toꞌo aana, na nou saie uri iꞌoe noꞌone o toꞌo aana. 6Oto no ko eitanaiꞌo uri o ke tohungei esu diana peꞌie mei nanamanga nge a God e niie huniꞌo aana maholo nou hele i pweumu. O ke asu diana aana mala o ko terehie dunge hunie ke waru diana, na mwaanie o toliꞌaasie e mwaꞌa mola. 7Aana maꞌunge e kaꞌa uure ike mwaanie Liꞌoa Maaꞌi nge a God e niie mai naka. Taꞌe Liꞌoa Maaꞌi ko niie nanamanga hunie kie ke adona asunge a God, na hunie kie ke manata diana hunie mwala, na hunie kie ke kinetaꞌinie tolahaka maraaka mwaanie kie dau aaela.
8Oto aena ngeena o ke suꞌuri masa ni houleꞌinie a Jisas Kraes oodoie mwala. Na o ke suꞌuri masa honosieu i sulie uri nou iiꞌo i nume ni hoꞌo haahie asunge nana. Taꞌe o ke hele maꞌutaꞌa mola aana nanamanga a God, na o ke mwaꞌe-mwaꞌe mola ni sapesalu aana o ko tarohaꞌinie Tataroha Diana a Jisas mala ineu. 9Aana a God e haꞌa-uurikie na e lio hilisikie oto hunie kie ke neꞌi iinoni maaꞌi ingeie. E kaꞌa asuie ike mola leune aena aana kie malisi wa uri kie asuie nga mei ola diana adongana. !Haꞌike! Taꞌe e oalaꞌinie urine mola aana e tohungei sare haꞌadianaꞌakie. Uure oto wau i naꞌo na haꞌaholanga haꞌike ue, a God e oalaꞌinie oto uri a Jisas Kraes kei haꞌadianaꞌakie oto urine. 10Oto maholo ie, a Jisas Kraes e hule oto huni haataꞌinie aamasinge a God hunikie. A Haꞌa-uuritaka, a Jisas Kraes e haꞌamangoa oto maenga, na e haataꞌinie oto Tataroha Diana hunikie, nge ko haꞌasinelie saeka, na ko haataꞌinie tala huni toꞌo aana maurihe nge e saꞌa heꞌi mango loꞌu. 11A God e lio hilisieu uri hunie ne ke tarohaꞌinie Tataroha Diana ngeena, na ne ke neꞌi hurulaꞌaa, na hunie ne ke haꞌa-uusulie mwala. 12Aena urinena nge no ko sapesalu siꞌiri ie. Taꞌe nou saꞌa roroꞌa ni masa ike, aena aana nou manataꞌinie a Jisas, iini nge nou norutoꞌo aana. Na nou saie uri ingeie e sai kinetaꞌinie walu ola nou neꞌiꞌi i nimana huni lio i suliꞌi, na kei kinetaꞌi diana aani lai hule aana dinge ooreta.
13Oto o ke lae i sulie mo haꞌa-uusulinge toꞌohuu nge o rongoꞌi mwaanieu, na o ke haꞌa-aꞌailaꞌaa hiiwalaimolinge iꞌoe aana a Jisas Kraes, na o ke haimaanie manata-diananga ingeie hunie mwala. 14Aana a God e niie oto walaimolinge diana i sulie a Jisas ngeena namue. Oto o ke lio i suli diana aana, na a Liꞌoa Maaꞌi i lalo aaka kei peꞌiꞌo.
15O saie mola uri ahutana mo eesikaelu aana hiiwalaimolinge aana poꞌo ni henue i Esia nge o iiꞌo aana ngeena, kire aatopuri eeku mola, hule aana a Pijelas na a Hemojenis ikirerue noꞌone. 16Taꞌe a Onesiporas e kaꞌa toliꞌaasieu ike, na e tohungei peꞌi-peꞌieu tarau na e kaꞌa masa ike honosieu maꞌalana nou oꞌoꞌo i nume ni hoꞌo. Aena urine nge no ko aarea a Aalaha ke haꞌadianaꞌaa uluhe ingeie. 17Aana maholo e lae mai hunie huilume paine i Rom, oto e tohungei loꞌohieu oto hiitoꞌo lai hule aana e lio oodoieu. 18Na o saie taane noꞌone mola uri e peꞌi-peꞌieu tarau maholo nou oꞌoꞌo wau aana huilume i Epesas nge o iiꞌo aana ngeena. Oto no ko aarea a Aalaha hunie ke haꞌadianaꞌaa na ke aamasie a Onesiporas oto noꞌone urine aana dinge ooreta.
2O Ke Neꞌi Ramo Toꞌohuu Nana Jisas Kraes
1Oto iꞌoe, kaleku, o ke aꞌailaꞌa aana asunge nana a Aalaha, na ingeie oto ke si peꞌiꞌo aana saena mone hunie ke peꞌikie. 2O rorongoa oto mo haꞌa-uusulinge ineu hunie mwala. Oto saeku uri taꞌa-taꞌa taungei olana loꞌu mola nge iꞌoe noꞌone o ke haꞌa-uusulie mwala aani. Na oto liutaa, o ke haꞌa-uusuli aana mo ola ngeena hunie mo mwane ni nou-norue nge o saie uri ikire noꞌone kire sai haꞌa-uusulie ngaeta mwala loꞌu eeni.
3Na mala nga ramo e kaꞌa sai aapwasu ike aana sapesalunge taꞌe ko esu taraꞌasi mola, nge iꞌoe noꞌone o ke asu aꞌailaꞌa urine loꞌu mala nga ramo diana a Jisas Kraes maꞌalana sapesalunge nge ko reꞌusieu ie ke rau noꞌone aamu urine. 4Na loꞌu, o ke haimaanie noꞌone tolahana mo ramo, aana ramo nge ko sare da hunie uri aalaha ingeie ke ilenimwaꞌe peꞌie, e saꞌa asuie ike nga kele mei esunge ingeie maraana. Taꞌe ramo diana ngeena ko esu tarau mola i sulie asunge nana aalaha ingeie. 5Na ne ke haꞌamalaa asunge iꞌoe loꞌu mala nga iini ko sare naꞌo aana nga halinge. Iinonine e saꞌa hahuꞌei toolea ike nga waaite na e kaꞌa lae ike i sulie mo haꞌatolanga aana halinge ngeena. 6Na asunge iꞌoe ke urihana noꞌone iinoni nge ko esu waaꞌiniꞌini aana hohola ingeie. Iinonine e malisine oto uri ingeie ni kei holaꞌi ngeue mo ngeulaa aana hohola ngeena. 7O ke loꞌongaꞌi diana i sulie nga taa nge no ko unue huniꞌo ienini, na a Aalaha kei peꞌiꞌo taane aani haataꞌinilana saenanaunge i sulie ahutana walu ola ngeena.
8O ke loꞌo-loꞌongaꞌinie mola a Jisas, aana ingeie a Kraes, iini a God e haiholotaꞌinie kei haꞌa-uurie mo iinoni ingeie. E haꞌa-oaie walana mo propet aana e uure mwaanie komu a Deved Inemauri. Na e taꞌelaꞌi mwaanie maenga mala no ko unu-unue oto tarau maholo no ko laengaꞌinie Tataroha Diana 9Na i tehulaꞌana Tataroha Diana ngeena mola nge hoꞌosileku e lae aani iieliheu ie. Taꞌe haꞌa-uusulinge a God nga walo hoꞌo-hoꞌo haꞌike aana. 10Aena urine kaꞌu, maꞌalana mwala ko haꞌaloieu mala ie, taꞌe no ko iiꞌo susu mola. Aana tala urine nge no ko peꞌie mwala nge a God e lio hilisire oto, hunie kire ke toꞌo aana maurihe peꞌie a Jisas Kraes na kire ke iiꞌo peꞌie aana manikuluhaꞌana oto di. 11Mei wala toꞌohuu oto ienini.
Mala uri kie ko mae tararuru peꞌie a Kraes,
nge kie kei meuri tararuru noꞌone peꞌie.
12Mala uri kie ko iiꞌo susuleꞌi mola aana hiiwalaimolinge maꞌalana kie ko sapesalu,
nge kie sai aalaha noꞌone mola peꞌie.
Taꞌe mala uri kie ko taateingeꞌinie uri kie kaꞌa saie ike a Kraes,
nge ingeie kei taateingeꞌinikie noꞌone uri e kaꞌa saikie.
13Maꞌalana uri kie kaꞌa sai hele i sulie mo heiholotaꞌinge ikie,
taꞌe ingeie kei hele maꞌutaꞌa mola aana mo heiholotaꞌinge ingeie tarau,
aana tolahana maraana e kaꞌa toliꞌaasie ike hunie ke eero,
wa huni lae aaopa mwaanie haiholotaꞌinge ingeie.
O Ke Neꞌi Mwane Auꞌesu Diana Nge E Toꞌohie Saena A God
14O ke lae peꞌi haꞌa-haꞌa-aamasitoꞌoa kira hiiwalaimoli aana mo ola ngeena. O ke ere hiitoꞌo hunire aana nanamanga a God uri kire ke suꞌuri ere haitelili aana mo ola kire kaꞌa roroꞌa ike. Aana tala urine e tohungei aaela oto hiitoꞌo, na e sai waelie mola mo iini ko pwaarongoa mo erenga haitelili urine. 15O ke ariꞌapasie o ke neꞌi iinoni auꞌesu diana, hunie a God ke saemango haahie asunge iꞌoe. O ke haꞌa-uusuli toꞌohuu aana walana God, hunie o ke suꞌuri hii masanga i maana. 16O ke neꞌi aasie taꞌena nga erenga aaela na mo wala mwaakule i purimu, aena aana mwala ko ere-ere urine, kire ko si oohea oto mwala haꞌataulie a God ni ngeena. 17Mo erenga ikire ngeena e urihana mola ho osa nge e kaꞌa sai mola ike. Ere-erenga e ro mwane, a Haemeneas na a Pilitas, na e urine oto. 18Kirerue toliꞌaasie oto mo erenga toꞌohuu, na kirerue ko si lae peꞌi unu heiliu mola aana uri taꞌelaꞌinge kira hiiwalaimoli mwaanie maenga e rau oto. Na peꞌie mo wala takalo urine, kirerue ko waelie mola hiiwalaimolinge ngaeta mwala. 19Taꞌe maꞌalana ngaeta mo iini ko neꞌisae rue-ruaꞌa urine, soihaadaꞌinge e saꞌa rongo ike hunire aena aana soihaadaꞌinge e toꞌo aana taane poo-pootana nge e kaꞌa sai esuleꞌi ike. Na a God e uusue mo wala i sulie soihaadaꞌinge ingeie uuri, “A Aalaha e manataꞌinie taane mo iini ingeie,” na loꞌu uuri, “Ahutana mo iini ko unue uri kire hiiwalaimoli aana a Aalaha, kire ke mani toliꞌaasie oto mo tolahai ola aaela ikire.”
20E Timoti, o saie taane uri mo nume paine kira toꞌo-toꞌo kire toꞌo aana mo nime ikire nge kire asuiꞌi aani kol na aani siliva, na ngaeta mo iini kire asuiꞌi mola aani ei wa aani mwakano. Ngaeta mo iini aana mo nime ngeena kire malisine mo maholo roroꞌa na mo maholo ni haꞌamaꞌunge, taꞌe ngaeta mo iini kire kaꞌa malisine ike mo maholo paine ngeena, aana taungei nime urine mo nime taꞌewau mola. 21E urine noꞌone mola aana mo iinoni. Mo iini nge kire ko toliꞌaasie mo tolahai ola aaela ngeena oto taꞌingelu mwaanire, nge kire kei iiꞌo maaꞌi oto i maana Aalaha ikire. Mauringe ikire kei toꞌohie saena a Aalaha, na kire sai esuie taꞌena nga mei esunge diana oto mola nana.
22Oto o ke lio talamu mwaanie mo saehanalinge nge ko too-toolea mo saanau, taꞌe o ke dau diana mola tarau. Na o ke ariꞌapasie mola lulu i sulilana oodotaꞌinge, na hiiwalaimolinge iꞌoe ke susu, na o ke manata diana hunie ahutana mwala, na o ke iiꞌo ni henuelama mola peꞌie taꞌena nga iinoni. Na o ke hikusie mo iini ko palo-paloa a God toꞌohuu aani sae manola. 23O ke kinetaꞌiniꞌo mwaanie taꞌena nga haꞌa-erenga takalo na mo erenga taꞌewau. Aana o saie oto uri mo erenga urine kire sai esuie mola haꞌa-erenga ke paine i matolana mwala, 24na iinoni euꞌesu a God ke suꞌuri neꞌi iinoni haꞌa-haꞌa-ere. Urine haꞌike, taꞌe ke toli rako mola peꞌie mwala, na ke saenanau diana aana tolaha ni haꞌa-uusulinge, na ke suꞌuri sae-saewasu lau-leu. 25Na iinoni euꞌesu a God ke haro kele lae rako mola maholo ko haꞌa-oodohie mwala nge kire ko leledie haꞌa-uusulinge ingeie. Aana ko urine, ohe a God kei peꞌie mwalana hunie kire ke oolisie loꞌongaꞌinge ikire, na hunie kire ke sai diana aana mo haꞌa-uusulinge toꞌohuu. 26A Pwelu Eero-eero ni mola e tapolie mwala ngeena aana lolosilana hune ingeie hunire, na ingeie ni mola ko si deu rarahire uri hunie kire ke dau aaela i sulie nga taa e saetoꞌo aana. Taꞌe mala uri kire kei aehota lio saie mo haꞌa-uusulinge toꞌohuu, nge luhesilada e sai lae taane mola, na kire sai tehisie mola a Pwelu Eero-eero.
3Mwala Kei Aaela Oto Liutaa Aana Mo Dinge Ooreta
1O ke sai diana aana uri, aana mo dinge ooreta ahutana walu ola kei meni deu aasa oto hiitoꞌo. 2Mwala kei loꞌo-loꞌongaꞌinire oto mola maraada. Kire kei neꞌi-neꞌisae paine oto hiitoꞌo aana toꞌoha, na kire kei lae-lahera maraada, na kire kei too-toohaꞌinire oto hiitoꞌo. Kire kei talei ere-ere aaela mola, na kire saꞌa totola i sulie ike mo nikada na mo aamada. Kire saꞌa paa-paalahea ike nga iini haahie nga mei ola nge niilana e lae oto hunie, na kire saꞌa loꞌo-loꞌongaꞌinie ike loꞌu a God. 3Kire saꞌa saie ike loꞌu manata-diananga, na kire saꞌa sae-sae aasi ike loꞌu hunie nga iinoni. Kire kei eero-eerotaꞌinie mola mwala, na kire saꞌa kinetaꞌinie ike tolahada mwaanie aaelanga. Kire saꞌa aama-aamasie ike nga iini, na kire kei leledie mola taꞌena nga ola diana. 4Maꞌalana mo malahude, taꞌe kire kei pwelora mola, na kire saꞌa holaꞌi loꞌongaꞌi keꞌu i sulie taꞌena nga ola kire ko sare asuie, na kire kei too-toohaꞌinire oto e pulo. Kire kei saetoꞌo aana mola mo ola nge ko da kire ke hii diana, taꞌe kire kaꞌa saetoꞌo aana ike a God. 5Kire kei lupweꞌi esu taane huni haataꞌinie uri ikire mo iinoni maaꞌi, taꞌe e kaꞌa toꞌohuu ike, na hule aana kire kaꞌa kele saetoꞌo aana ike nanamanga a God ke lio i sulie maurihaꞌada. Mwala urine, o ke suꞌuri lae i sulire, taꞌe o ke iiꞌo haꞌataulire mola. 6Ngaeta mo iini aana mwala ngeena kire sai walo liu i matolana mo nume peꞌie haꞌa-uusulinge takalo, na kire ko haꞌa-olaa mo huꞌe nge kire ko neꞌi-neꞌisae rue-ruaꞌa. Mo huꞌe ngeena kire oorahaꞌaala na kire ko lae mola i sulie taꞌena nga saehanalinge ikire. 7Kire ko eriꞌapasie taane uri kire ke sai diana aana mo ola oto hunge, taꞌe kire kaꞌa sai deu oodoie ike tohungana saenanaunge aana walaimolinge. 8Mwala nge kire ko lae hailiu i sulie mo huꞌe urine, kire ko ere aaelasie tohungana walaimolinge, mala a Janis na a Jambris kirerue ere aaelasie a Mosis wau i naꞌo.3:8 Laladonga mo Jiu wau i naꞌo e unue uri a Janis na a Jambris ikirerue e ro mwane aakalohola nge kire peꞌie inemauri mo Ijip huni uure honosie a Mosis. Eksodas 7:22 e ladoa maholo ngeena, taꞌe e kaꞌa unue ike satana mo mwane ngeena. Kire kaꞌa toꞌo aana ike nga mei loꞌongaꞌinge ke oodo, na hiiwalaimolinge ikire pweai ola mola ni ngeena. 9Taꞌe kire saꞌa lae haꞌatau ike peꞌie tolahai iinoni aaela ikire ngeena. Aana e saꞌa tewa na mwala kei lio saie oto puꞌonga ikire, mala kaꞌu lio sailana a Janis na a Jambris e lae lau-leu mola wau i naꞌo.
A Timoti Ke Haimaanie A Pol Aana Tarohaꞌinilana Walana God
10Taꞌe iꞌoe, kaleku, o saie oto mo haꞌa-uusulinge ineu na iiꞌolaku e uri taa, na nga moi taa no ko sare asuiꞌi. O lio saie kaꞌu oto hiiwalaimolinge ineu, na toli-rakonga ineu, na manata-diananga ineu hunie ahutana mwala, na toli-susuleꞌinge ineu aana maholo e aasa oto hiitoꞌo. 11O saie kaꞌu mola haꞌaloileku e lae na nou sapesalu oto hiitoꞌo mala o leesie aana mo huilume i Antiok, na i Aekoniam, na i Listra. Nou tohungei sapesalu oto hiitoꞌo, taꞌe no ko paalahea a Aalaha oto liutaa aana e haꞌa-uurieu mola mwaanie walu olana. 12Na e toꞌohuu oto uri taꞌe-taꞌena nga iini ko lado peꞌie a Jisas Kraes na ko sare iiꞌo maaꞌi nana, nge mwala kei haꞌaloie oto urine. 13Taꞌe mwala tataꞌala nge kire ko haꞌapweue mola mwala, kire kei hunge oto loꞌu liutaa. Kire kei aaela oto loꞌu, na kire kei lae peꞌi eeroa mwala oto hiitoꞌo, taꞌe lae-lae na mwala kei haro pwelora loꞌu noꞌone.
14Taꞌe iꞌoe, kaleku, o ke hele susuleꞌi mola aana nga taa nge haꞌa-uusulilemu e lae oto aana na o hiiwalaimoli oto noꞌone aana, aena aana o sai diana aameelu oto mo iini melu haꞌa-uusuliꞌo. 15O sai diana aana kaꞌu oto mo Uusu-uusu Maaꞌi na hule aana o neꞌi mwela ue. Na mo haꞌa-uusulinge aana kire sai peꞌikie aani loꞌongaꞌinge diana na aani hiiwalaimolinge aana a Jisas Kraes hunie uri a God ke haꞌa-uurikie. 16Taꞌe-taꞌena nga ola i laona mo Uusu-uusu Maaꞌi, walana God ni ngeena. Na ingeie ni e unue hunie mwala ke uusu-uusu oto i sulie loꞌongaꞌinge ingeie maraana. Oto Uusu-uusu Maaꞌi e tohungei diana huni haꞌananaukie, na huni haataꞌinie mo oorahaꞌaanga ikie aaka, na huni haꞌa-oodohie tolahaka, na huni haꞌa-uusulikie aana mau-meuringe nge e oodo i maana God. 17Aana ko urine haꞌalaa ikie mo iinoni a God kie sai deu diana aani lulu i sulilana mo tolahai ola diana na kei tohungei melisine oto uri kie ke asuie mo tohungei esunge diana.
41Maholo a Jisas Kraes kei ooli loꞌu mei mala inemauri, nge ke si leie ahutana mo iinoni, mo iini e mauri ue na mo iini e mae oto. Oto no ko unu tahangaꞌinie oto huniꞌo i maana a God na a Jisas Kraes 2uri o ke lae taraꞌasi oto peꞌie tarohaꞌinilana walana God. O ke laeliwala hunie mwala oto tarau, maꞌalana mwala kaꞌa sare rongo huniꞌo. O ke haꞌa-oodohie tolahada maholo kire ko lae takalo, na o ke haataꞌinie mo oorahaꞌaa ikire hunire hunie kire ke aaliꞌu mwaaniꞌi, na o ke ere haꞌasusure noꞌone. Walu ola ngeena o ke asuiꞌi peꞌi toli-rakonga, na peꞌi haꞌananaunge diana. 3O ke asu urine, aena aana maholo kei lae ue mai nge mwala e saꞌa sare rongo ike hunie mo haꞌa-uusulinge toꞌohuu, na kire kei lae mola i sulie saeda maraada. Kire kei loꞌohi haꞌa-uusuli taꞌewau mola hunie uri kire ke sai rongoa haꞌa-uusulinge nge kire ko sasare rongoa. 4Na kire kei eeliꞌu mola mwaanie walaimolinge huni rongo i sulie mo laladonga eero-eero. 5Taꞌe iꞌoe oto o ke loꞌo-loꞌongaꞌi diana tarau, na o ke uure aꞌailaꞌa mola maꞌalana uri o ko lae oodoie loꞌu aasanga. O ke lae taraꞌasi mola peꞌie tarohaꞌinilana Tataroha Diana, na o ke asuie toꞌohuu mei esunge a God e niie huniꞌo ngeena.
6Oto aana ineu maraaku, o saie taane uri mauringe ineu nou niie kaꞌu oto i naꞌo mala uuraaꞌinge hunie a God, na oto ie e hule oto aana leu ooreta, aana e hule oto aana maholo ineu huni mae. 7Na mauringe ineu e urihana noꞌone halinge. Na nou huru diana aana halinge ngeena, aana maꞌalana nga taa e raꞌusieu, taꞌe nou esu diana mola nana a Aalaha. Oto maholo ie nou hule oto aana haꞌamangolana halinge ngeena, aana nou haꞌamangoa oto asunge e niie mai hunieu. Nou hele maꞌutaꞌa aana hiiwalaimolinge toꞌohuu, na nou lae-lae peꞌi haꞌa-uusulilana mwala aana. 8Na waaite nge ne kei toolea i maana halinge ngeena e iiꞌo aakau loosieu oto, aana ineu nou iiꞌo oodotaꞌi oto i maana God. A Aalaha kei lei oodotaꞌi aana ahutana mwala, na aana Dinge Ooreta ke si waaieu taane. E saꞌa da ike leune hunieu haliꞌite, taꞌe hunie ahutana mo iini kire manata diana hunie na kire ko maaꞌoohie oolinge ingeie mai.
A Pol E Unue A Timoti Ke Lae Mai Saana
9Kaleku, saeku hunie o ke dau aahonga oto huni lae mai seeku lau-leu. 10A Dimas e toliꞌaasieu aana ko tohungei saetoꞌo aana mo ola aana walumalau ie, na e lae oto aana huilume i Tesalonaeka. A Kresens e lae huni esu nana God aana poꞌo ni henue i Kalesia, na a Taetas e lae urine noꞌone hunie poꞌo ni henue i Dalmesia. 11-12A Luk mola e si oore mai peꞌieu ie, aana a Tikikas nou uusungeꞌinie oto wau i seemiu aana huilume i Epesas. Maholo o ko lae mai, o ke toolea oto mai a Mak, aena aana ingeie e sai peꞌi diana aana asunge ineu.4:11-12 I naꞌo a Pol na a Banabas kire ere haitelili i sulie a Mak aena aana a Pol e sereꞌinie a Mak ke lae loꞌu peꞌirerue a Banabas. Leesie Palonga 15:36-41. Taꞌe tatala ie e haataꞌinie uri kirerue a Pol na Mak ko esu loko-loko loꞌu.13Na o ke toolea mai mei sala tetewa mwaanie wawai nge nou haꞌa-oorea peꞌie a Kapas wau aana huilume i Troas. Na o ke toolea noꞌone mai mo uusu-uusu hio-hio ineu, oto liutaa mo iini nou tohungei saetoꞌo aani nge uusuleni e lae aani teꞌe-teꞌei nanikot.4:13 Saꞌa mola mo Uusu-uusu Maaꞌi ngeena nge siꞌiri kie ko haaraꞌinie aana “Haiholotaꞌinge Lalahuꞌe.”
14-15O ke lio talamu mwaanie ngaeta mwane satana a Aleksanda. Ingeie ngaeta mwane nge e sai esuie taꞌena nga ola oto mola aani aean. E tohungei waelieu aana e tohungei sereꞌinie haꞌa-uusulinge ikolu. A Aalaha ke si haꞌaletehie taane haahie nga taa e asuie ngeena.
16Eetana nga maholo leileku e lae, nga taꞌa-taꞌa iini e kaꞌa lae ike mai huni ere ooliteku. !Haꞌike! Ahutana mwala kire mani toliꞌaasieu mola, taꞌe no ko aarengaꞌi mola talada, hunie a God ke pulongosie mola takalonga ikire ngeena. 17Taꞌe a Aalaha e lae peꞌi haꞌa-uurieu na e niie nanamanga hunieu uri hunie ne ke tarohaꞌinie Tataroha Diana hunie mo Aapoloa Aaopa kire ke rongoa. Na e peꞌieu noꞌone aana maholona hunie kira lei-lei ke suꞌuri lei mae aaku. 18Nou tohungei norutoꞌo mola aana uri a Aalaha kei lio i suli diana aaku maꞌalana mei aaelanga uri taa ke rau loꞌu eeku, na ingeie kei tola konieu taane oto taꞌau i laona aalahanga ingeie taꞌau i Lengi. !Iau! Kie ke haꞌamanikuluꞌaa taraureꞌi oto di. Ke urine oto.
Mei Wala Ni Saediananga Ooreta
19O ke niie mei wala ni saediananga ineu hunie a Prisila na poro ingeie a Akuila, na noꞌone hunie uluhe ni iinoni a Onesiporas. 20Mwane oamu a Erastas e kaꞌa lae ike mai peꞌieu, taꞌe e oore mola wau aana huilume i Korinit. Na ngaeta mwane oamu loꞌu, a Tropimas, nou lae mwaanie mola wau aana huilume i Maelitas aana mweitaꞌaa ko mataꞌi hiitoꞌo. 21O ke dau aahonga huni hule mai seeku i naꞌona mo waro-waro wawai aana iihiꞌure mwaanie aasi e mawa honosiꞌo. A Iubiulas, na a Piudens, na a Laenas, na keni aasikaelu a Klodia, kire ko meni niie noꞌone mei wala ni saediananga huniꞌo na hunie kira hiiwalaimoli wau i leune.
22No ko eitanaie Aalaha ikie ke iiꞌo i laona manatamu, na hahuꞌana manata-diananga ingeie ke iiꞌo peꞌiꞌo.