Ruana Nga Uusu-uusu A Pol Hurulaꞌaa Hunie Mo
Tesalonaeka
?A tei ni e uusue uusu-uusu ienini?
Ngaeta naꞌohai mwane aana soihaadaꞌinge oto i naꞌo, a Pol Hurulaꞌaa, ni e uusue uusu-uusu ienini.
?E uusue uusu-uusu ienini hunie kira tei?
A Pol e uusu-uusu loꞌu hunie mwala kire si aehota hiiwalaimoli aana a Jisas oto wau aana huilume i Tesalonaeka.
?Nga taa e rau-reu maholo e uusue uusu-uusu ienini?
Ngaeta mo waro-waro loꞌu mola i purine e holaꞌi uusu-uusu hunie mo Tesalonaeka, a Pol e si lio saie uri e kaꞌa aalamie ike ahutana mo dolosinge ikire, na hule aana ngaeta mo iini aada ko haꞌa-uusulie mwala takalo uri a Jisas e pwani ooli oto mai uure i Lengi.
?E uusue uusu-uusu ienini huni taa?
A Pol ko uusu-uusu loꞌu hunie mo Tesalonaeka huni haꞌa-oodohie mo neꞌisaenga takalo ikire i sulie oolinge mai a Jisas. E haataꞌi diana aada uri i naꞌona a Jisas Kraes kei ooli mei, a naꞌohai mwane nge e tohungei sai liu honosie a Kraes kei holaꞌi lae mai na kei eeroa mwala uri ingeie oto a God. Oto aana mei olana e kaꞌa rau ike ue, a Pol e unue hunie mo Tesalonaeka uri kire ke suꞌuri tolahiꞌe, taꞌe kire ke iiꞌo aakau mola.
A Pol ko uusu-usu loꞌu huni haꞌasusue hiiwalaimolinge ikire na hunie uri kire ke uure maꞌutaꞌa maꞌalana taungeꞌinilada ko lae oto uri taa. Na e hatongaꞌinie loꞌu uri kire ke lae peꞌi esu aꞌailaꞌa mola talai ngeulaa ada maraada mala a Pol e asuie.
?Nga taa ni mo pweu ni wala i laona uusu-uusu ienini?
tataꞌalanga, haꞌaletehinge, aarengaꞌinge, asunge aꞌailaꞌa, manikuluꞌanga
?Nga taa ni mo eehuꞌi tatala i laona uusu-uusu ienini?
2 Tesalonaeka 2:9-10
?Nga taa ni mo eehuꞌi neꞌisaenga i laona uusu-uusu ienini?
Mei wala ni saediananga hunie mo Tesalonaeka (1:1-2)
A God kei leie mo iini nge kire ko teungeꞌinie kira hiiwalaimoli. (1:3-12)
Mwane tataꞌala oto liutaa kei holaꞌi lae mai i naꞌona oolinge mai a Kraes. (2:1-17)
Helelaka ke diana na kie ke mwaꞌe-mwaꞌesie asunge. (3:1-15)
Mei wala ni saediananga ooreta (3:16-18)
1Mei Wala Ni Saediananga Hunie Mo Tesalonaeka
1Saediananga mwaanieu a Pol na a Saelas na a Timoti huniꞌomu aana soihaadaꞌinge wau i Tesalonaeka. Iꞌomu oto mo iinoni a God Aamaka na Aalaha ikie a Jisas Kraes, 2na melu ko eitanai uri hahuꞌana manata-diananga na hanuelamanga ingeie ke iiꞌo peꞌiꞌomu.
A God Kei Leie Mo Iinoni Nge Ko Teungeꞌinie Kira Hiiwalaimoli
3Maeni eesiku maaꞌi, melu ko paalahea God mola tarau haahiꞌomu. Na e diana hunie melu ke asuie urine, aana hiiwalaimolinge iꞌomu ko peine aꞌailaꞌa mola i suli maholo, na manata-diananga nge omu toꞌo aana huniꞌomu heiliu ko lae peꞌi peine noꞌone loꞌu tarau. 4Aena urinena, nge melu ko lae peꞌi laheꞌomu i laona mo soihaadaꞌinge a God aana taꞌena nga leu. Melu ko laheꞌomu haahie tala nge maꞌalana omu ko sapesalu hiitoꞌo na mwala ko teungeꞌiniꞌomu, taꞌe omu uure aꞌailaꞌa mola aana hiiwalaimolinge iꞌomu.
5Aana omu ko sapesalu hiitoꞌo i tehulaꞌana a God oto ienini, nge a God ke si haataꞌinie uri omu tohungei melisine Aalahanga ingeie. Na aana nga maholo ue mai sapesalunge iꞌomu ngeena kei haataꞌinie noꞌone uri leinge a God e oodo taane mola. 6Na aana leinge a God mone e oodo, nge kei haro haꞌaloie taane mwala nge kire ko teungeꞌiniꞌomu siꞌiri ngeena. 7Na a God kei haꞌamangoa taane mo weonga mo iini nge taungeꞌinilada ko lae i tehulaꞌana. Oto maꞌalana kolu ko meni sapesalu oto ie, taꞌe aana nga maholo ue mai, kolu saꞌa heꞌi sapesalu loꞌu. Na leune ke si reu taane aana maholo nge Aalaha ikie a Jisas kei uure taꞌau i Lengi na kei siho mai peꞌie mo ensel ingeie nge kire toꞌo aana nanamanga paine. 8Na ke lae mai peꞌie dunge oto paine huni haꞌaloie mwala nge kire ko sereꞌinie a God na kire kaꞌa sare tola i sulie ike Tataroha Diana i sulie Aalaha ikie a Jisas. 9Na mei haꞌaloinge nge kei hite aada ngeena nge e tohungei aaela oto liutaa, na e saꞌa mango oto ooꞌoo. Na kire kei iiꞌo oto haꞌataulie a Aalaha na manikuluhaꞌana aana nanamanga ingeie taꞌau i Lengi. 10Leu ngeena kei reu aana hai dinge nge a Aalaha kei ooli loꞌu mei, hunie ahutana mwala ke haꞌamanikuluꞌaa haahie walu ola diana e asuiꞌi nana mwala ingeie. Mo iini nge kire hiiwalaimoli aana kire kei tohungei lahea noꞌone aana maholona, na iꞌomu noꞌone, omu kei iiꞌo peꞌie mwala ingeie aana omu hiiwalaimoli oto aana mo wala melu haꞌarongoꞌomu eeni.
11Oto aena mo olana nge melu ko aare-aarengaꞌi mola talamiu tarau. Melu ko eitanaie a God ikie hunie ke da omu ke malisine mau-meuringe diana nge e soiꞌomu hunie uri omu ke iiꞌo aana. Na melu ko eitanaie a God hunie ke haꞌa-oaie mo neꞌisaenga diana iꞌomu aana nanamanga ingeie, na hunie ke peꞌiꞌomu huni haꞌamangoa mo esunge diana nge omu ko esuiꞌi i tehulaꞌana hiiwalaimolinge iꞌomu aana. 12Na melu ko aarengaꞌi oto urine hunie uri mwala ke lahea Aalaha ikie a Jisas i tehulaꞌana tolahamiu, na kire ke laheꞌomu noꞌone peꞌie. Na aena aana manata-diananga a God na a Jisas Kraes e tohungei peine oto hunikie, nge melu norue oto uri a God kei aalamie taane aarengaꞌinge iꞌemeelu.
2Tataꞌalanga Paine Kei Reu I Naꞌona A Kraes Kei Ooli Loꞌu Mei
1Maeni eesiku maaꞌi, no ko sare ere loꞌu peꞌiꞌomu i sulie maholo a Jisas Kraes Aalaha ikie kei ooli loꞌu mei huni lokokie i saana. 2Nou sereꞌinie uri omu ke taipuꞌo-puꞌo wa omu ke tolahiꞌe aana omu ko rongoa taꞌena nga wala ko loho hailiu uri hai dinge a Aalaha e hule oto. Mwaanie mwala kire eeroꞌomu urine na kire unue uri Liꞌoa ni e unue, wa uri iꞌemeelu ni melu unue, wa melu uusue i laona nga uusu-uusu iꞌemeelu. 3Omu ke suꞌuri toliꞌaasie nga iini ke eeroꞌomu urine, aena aana dinge ooreta e saꞌa talei reu ike mola maraana. !Haꞌike! Taꞌe ngaeta mo ola kei holaꞌi reu. Mwala oto hunge kei haro ooho honosie a God, na loꞌu nga mwane e tataꞌala oto liutaa kei holaꞌi lae noꞌone mai huni heli peꞌie a God. Taꞌe a God kei tohungei haꞌaloie oto hiitoꞌo. 4Mwane tataꞌala ngeena kei ere aaelasie ahutana mo god na taꞌena nga ola nge mwala ko palo-paloa. Na kei haꞌapainaꞌaa maraana uri hunie ke paine loꞌu liutaa aana taꞌena nga ola, na hule aana kei lae iiꞌo i laona Nume Maaꞌi Peine a God na ni unue uri ingeie oto a God.
5?Oto e ue? ?Uri omu pulongosie mola nou unu tahangaꞌinie oto ahutana walu ola oodoiꞌomu aana maholo nou oꞌoꞌo ue peꞌiꞌomu? 6Na omu saie oto iini nge e uure honosie mwane tataꞌala ngeena mwaanie e haataꞌi i naꞌona maholo ingeie. 7Mwane tataꞌala ngeena ko esu taane oto aana maholo ie, taꞌe e iiꞌo mumuni mola ue, lai hule aana a God kei taꞌaasie iini nge ko uure honosie mwane tataꞌala ngeena. 8-12Oto aana maholona, mwane tataꞌala ngeena ke si haataꞌi peꞌie nanamanga a Satan, na kei lae peꞌi esuie mo huꞌi-huꞌite eero-eero hei aaopaꞌi hunie uri mwala ke pangataꞌinie. Kei lae peꞌi esuie noꞌone taꞌena nga pwelonga oto mola huni eeroa mwala. Walaimolinge e sai haꞌa-uurire taane, taꞌe aana kire kaꞌa sare manata diana ike hunie walaimolinge, nge a God kei toliꞌaasie hunie kire ke hiiwalaimoli aana mo wala ni pwelonga ngeena. Na aena aana kire kaꞌa hiiwalaimoli ike aana mo wala toꞌohuu, na kire ko ilenimwaꞌe mola haahie mo ola aaela aana oorahaꞌaanga, nge a God kei lei mae aada. Taꞌe mwaanie omu totolahiꞌe, aana Aalaha ikie a Jisas Kraes, ke si lae mai i purine mwane tataꞌala ngeena. Aalaha ikie kei ooli mei peꞌie manikuluhaꞌana na kei horo aasie mola mwane tataꞌala ngeena, aana kei uuhi maesie mola aana kele mei iiru mwaanie ngidune.
Kie Ke Uure Maꞌutaꞌa Aana Walaimolinge Kie Toꞌo Aana
13Maeni eesiku maaꞌi, e malisine melu ke paalahea God mola tarau haahiꞌomu, aana iꞌomu mo iini a Aalaha e manata diana huniꞌomu. A God e lio hilisiꞌomu uure oto wau i naꞌo huni haꞌa-uuriꞌomu, na e haꞌa-uuriꞌomu aana omu hiiwalaimoli aana mo wala toꞌohuu, na a Liꞌoa Maaꞌi e da omu neꞌi iinoni maaꞌi. 14Mo wala toꞌohuu nge a God e haaraiꞌomu mei eeni ngeena, nge oto Tataroha Diana nge melu lae peꞌi tarohaꞌinie huniꞌomu. Na e haaraiꞌomu urine ngeena aana e saetoꞌo aana uri omu ke toꞌo aana noꞌone manikuluhaꞌana a Jisas Kraes Aalaha ikie. 15Oto maeni eesiku maaꞌi, omu ke uure maꞌutaꞌa na omu ke hele maꞌutaꞌa aana walaimolinge nge melu haꞌananauꞌomu oto aana maholo melu oꞌoꞌo peꞌiꞌomu, na loꞌu maholo melu uusu-uusu huniꞌomu.
16-17Oto melu ko eitanai uri Aalaha ikie a Jisas Kraes na a God Aamaka, ke haꞌasusue saemiu na ke haꞌa-aꞌailaꞌaꞌomu hunie taꞌena nga mei ola diana omu ko esuie wa omu ko unue. Na kei toꞌohuu oto aana melu saie oto uri e tohungei manata diana hunikie na haꞌasusulaka e saꞌa mou-mou ike oto ooꞌoo, na haiholotaꞌinge ingeie hunikie e tohungei diana na kie sai nou-norue oto mola haliꞌite.
3Kie Ke Aarengaꞌi Talana Mo Iini Nge Kire Ko Tarohaꞌinie Walana God
1Oto maeni eesiku maaꞌi, omu ke aarengaꞌi talameelu hunie uri melu ke sai tarohaꞌinie walana a Aalaha oto hailiu hunie taꞌena nga hanue, na hunie uri mwala ke rongo peꞌi haꞌamaꞌunge aana oto mala iꞌomu omu esuie aana maholo omu rongoa. 2Na omu ke aarengaꞌi noꞌone hunie a God ke kinetaꞌiniꞌemeelu mwaanie nimana mwala aaela nge tolahada e tataꞌala. Aana ahutana mwala saꞌa mani hiiwalaimoli ike aana Tataroha Diana. 3Taꞌe a Aalaha mone kei deu i sulie walana, na ingeie kei haꞌa-aꞌailaꞌaꞌomu na kei lio i suli diana aamiu mwaanie uri nanamanga a Satan e waeliꞌomu. 4Na Aalaha ikie oto e da hunie melu ke norutoꞌo aamiu, kaꞌu omu ko lulu i sulie oto nga taa nge melu ko unu-unue huniꞌomu. Na melu saie noꞌone uri omu kei lae taraꞌasi tarau. 5Oto melu ko eitanaie Aalaha ikie uri ingeie ke haꞌasusue mo loꞌongaꞌinge iꞌomu hunie omu ke saenanau diana aana manata-diananga a God huniꞌomu, na aana tolahana a Kraes hunie omu ke uure aꞌailaꞌa taraꞌasi.
Kie Ke Asu Aꞌailaꞌa Na Mwaanie Kie Lalawasie Asunge
6Maeni eesiku maaꞌi, melu ko eitanaiꞌomu aana satana a Jisas Kraes Aalaha ikie, uri omu ke suꞌuri hikusie mo eesike nge kire ko lalawa huni esu, na kire kaꞌa tola i sulie ike mo ola melu ko unu-unuꞌi huniꞌomu. 7Iꞌomu maraamiu na omu saie oto uri omu ke lulu i sulie oto tolahameelu. Aana maholo melu oꞌoꞌo peꞌiꞌomu, melu kaꞌa lalawa ike huni esu. 8Na melu kaꞌa totola mwaakule ike aana nga mei ngeulaa mwaanie mwala, taꞌe melu haro holi-holiꞌi mola. Oto melu esu susue mola aatowaa na rodo mwaanie nga iini eemiu e tolahiꞌe loꞌu aana nga mei ola. 9Maholo melu ko lae peꞌi esu urine, e kaꞌa ike i sulie uri melu kaꞌa toꞌo aana nga nanamanga huni da peꞌinge mwaaniꞌomu. !Haꞌike! Taꞌe melu sare haataꞌinie mola aamiu uri tohungei tala diana hunie uri omu ke lae i sulie ni otona. 10Maholo melu oꞌoꞌo ue peꞌiꞌomu, melu haataꞌinie oto haꞌatolanga aamiu uuri, “Mala nga iini ko lalawaꞌa huni esu, omu ke suꞌuri nii ngeulaa ana.”
11Melu ko ere urine, aena aana melu rongoa oto uri ngaeta mo iini eemiu kire tohungei lalawaꞌa ni esu. Kire iiꞌo oto mola na kire kaꞌa da ike nga mei ola, taꞌe kire ko talei lae hailiu mola i matolana mwala huni oho dauhe mola aana mo asunge diana ikire. 12Oto aana satana Jisas Kraes Aalaha ikie, melu ko unue oto hunie mwala ngeena uri kire ke iiꞌo oto aana tolahai ola diana, na kire ke asu aꞌailaꞌa talai ngeulaa aada maraada. 13Taꞌe iꞌomu, maeni eesiku maaꞌi, mwaanie omu poo-poosuaꞌa huni esuie mo esunge diana.
14Mala uri nga mo iini eemiu kire kaꞌa tola i sulie ike mo wala melu ko uusuꞌi weu huniꞌomu ngeena, nge e lae oto i diana hunie omu ke lee-leesie uri kira tei, na omu ke oopa mwaanire hunie kire ke masa mola i sulie tolahada maraada. 15Taꞌe omu ke suꞌuri talei deu aada mala uri mo maelonga iꞌomu. Kei lae oto i diana hunie uri omu ke haꞌapasulire mola, aana ikire mo eesimiu maaꞌi taane ni ngeena.
Mei Wala Ooreta A Pol Hunie Mo Tesalonaeka
16No ko eitanaie a Aalaha aana ingeie maraana oto aahuꞌine hanuelamanga uri ke iiꞌo peꞌiꞌomu na ke niie hanuelamanga ingeie huniꞌomu tarau maꞌalana nga taa ke rau loꞌu.
17Mei wala ni saediananga huniꞌomu ienini, ineu a Pol ni no ko uusue oto maraaku mala no ko euꞌesuie tarau huni haataꞌinie uri ineu toꞌohuu ni oto no ko uusu-uusu ie.
18No ko eitanaie Aalaha ikie a Jisas Kraes uri hahuꞌana manata-diananga ingeie ke iiꞌo peꞌiꞌomu.