Ruana Nga Uusu-uusu A
Pita
?A tei ni e uusue uusu-uusu ienini?
A Pita Hurulaꞌaa ni e uusue uusu-uusu ienini. A Pita e asu mala eetana nga naꞌohai mwane aana soihaadaꞌinge, na i tehulaꞌana a Pita aana dinge Pentekos, nge a God e haꞌa-uuresie soihaadaꞌinge e si aꞌailaꞌa i matolana mo Jiu. Loꞌu mei puri, maholo a Pita e tarohaꞌinie a Jisas hunie nga ramo ni Rom nge satana a Konilias, nge a God e si tahanie maa talana mo Aapoloa Aaopa nge ikire nga mo Jiu haꞌike, hunie uri ikire noꞌone kire ke iiꞌo i laona soihaadaꞌinge.
?E uusue uusu-uusu ienini hunie kira tei?
A Pita e uusue loꞌu ruana nga uusu-uusu ingeie ienini hunie taꞌena nga iini ko hiiwalaimoli aana Jisas (leesie 2 Pita 1:1), na e uusu-uusu noꞌone hunie kira hiiwalaimoli nge e holaꞌi uusu-uusu hunire aana eetana nga uusu-uusu ingeie (leesie 2 Pita 3:1). Ikire oto mo iini kire iiꞌo wau aana ngaeta mo poꞌo ni henue i laona aalahanga ni Rom. Siꞌiri, ahutana mo poꞌo ni henue ngeena kire mani iiꞌo oto i laona aalahanga ni Taki.
?Nga taa e rau-reu maholo e uusue uusu-uusu ienini?
Eetana nga uusu-uusu a Pita e ere hiitoꞌo i sulie mo aasanga kire uure mwaanie mo puꞌo poꞌoi sinaha aana soihaadaꞌinge, aana kire ko teungeꞌinie kira hiiwalaimoli. Oto aana ruana nga uusu-uusu ienini, a Pita ko ere hiitoꞌo i sulie mo aasanga kire rau i laona soihaadaꞌinge aena aana mo haꞌa-uusuli eero-eero ko haꞌatakaloa mwala. A Pita e uusue eetana nga uusu-uusu ingeie aana mo helisi ooreta ingeie i naꞌona mo Rom kire horo maesie, ola mala e oono aawalai helisi mwana lime i purine hutelana a Jisas (65 A.D.) Ohe ruana nga uusu-uusu ienini e uusue mola aana halisi ooreta ingeie aana mo waro-waro i naꞌona e mae. Taꞌe e aasa huni sai kohie tohungana maholo e uusue.
?E uusue uusu-uusu ienini huni taa?
A Pita e uusue uusu-uusu ienini hunie kira hiiwalaimoli ke uure aꞌailaꞌa honosie asunge mo haꞌa-uusuli eero-eero. Ngaeta mo haꞌa-uusuli eero-eero ngeena ko lae peꞌie mei wala uri a Jisas e saꞌa ooli ike loꞌu mei. Taꞌe a Pita e unue hunie kira hiiwalaimoli uri kire ke hele maꞌutaꞌa mola aana mo wala toꞌohuu kire rongoꞌi oto mai mwaanie mo hurulaꞌaa nge kire manataꞌinie a Jisas. A Pita e unue uri a Jisas e saꞌa ooli ue mai lau-leu aena aana a God e kaꞌa saetoꞌo aana ike nga taꞌa-taꞌa iinoni ke aiꞌaa. A Jisas kei ooli taane mai, taꞌe a God ko niie ue nga kele maholo hunie mo iinoni ke mani oonisae mwaanie mo oorahaꞌaa ikire na kire ke mani eeliꞌu mei takoie.
Hungelana mo haꞌananaunge i laona uusu-uusu ienini e karaꞌi rongo mala mo haꞌananaunge i laona uusu-uusu a Jiud, na ohe a Pita e holaꞌi saaie uusu-uusu a Jiud na ko sapeie loꞌu mo neꞌisaenga ingeie huni uure honosie loꞌu haꞌa-uusulinge eero-eero nge ko si aehota aana maholona.
?Nga taa ni mo pweu ni wala i laona uusu-uusu ienini?
sai-olanga, aamasitoꞌonga, haꞌa-uusulinge eero-eero, leinge, dinge ooreta
?Nga taa ni mo eehuꞌi tatala i laona uusu-uusu ienini?
2 Pita 1:5-8, 2 Pita 1:21, 2 Pita 3:9
?Nga taa ni mo eehuꞌi neꞌisaenga i laona uusu-uusu ienini?
Mei wala ni saediananga (1:1-2)
God e lio hilisikie huni iiꞌo diana nana. (1:3-21)
Tolahana mo haꞌa-uusuli eero-eero e tohungei aaela, na kire ko haꞌatakaloa mwala oto hunge. (2:1-22)
A Kraes kei haro ooli taane mai toꞌohuu. (3:1-18)
1Mei Wala Ni Saediananga
1Saediananga mwaanieu a Saemon Pita, koni-konihe na hurulaꞌaa a Jisas Kraes, huniꞌomu mo iini nge omu hiiwalaimoli noꞌone aana a Jisas Kraes mala iꞌemeelu. Ingeie oto a God na a Haꞌa-uuritaka, na aena aana e tohungei oodotaꞌi na ko sare dau diana mola hunie ahutaka, nge hiiwalaimolinge e niie mai huniꞌomu ngeena e sada mola peꞌie hiiwalaimolinge iꞌemeelu mo hurulaꞌaa.
2No ko eitanaie a God uri hahuꞌana manata-diananga na hanuelamanga ingeie ke iiꞌo peꞌiꞌomu maholo omu ko pei-peine i lalo aana sai-olanga a God na Aalaha ikie a Jisas.
Kie Helesie Oto Walu Ola E Adona Iiꞌonga Oodotaꞌi
3A God e niie taꞌe-taꞌena nga ola e ado hunikie hunie kie ke malisine iiꞌonga oodotaꞌi oto mala e saetoꞌo aana. Nanamanga a God e da ahutana walu ola ngeena hunikie aana e soikie mai i saana hunie kie ke tohungei sai diana aana, na hunie kie ke toꞌo aana noꞌone manikuluhaꞌana na mauringe diana ingeie. 4Oto aena urine, e niie oto mo tohungei niinge paine e lae oto i diana nge e haiholotaꞌiniꞌi hunikie. Na aena aana mo olana mone, kie ko si toꞌo aana nanamanga huni tehisie taꞌena nga tolahai ola aaela aana walumalau, na kie sai lado oto peꞌie a God hunie kie ke toꞌo aana maurihe diana peꞌie.
5Oto i tehulaꞌana walu ola a God e asuiꞌi huniꞌomu ngeena, iꞌomu noꞌone omu ke ariꞌapasie omu ke hele diana aana ahutana mo ola ienini. Omu ke hele maꞌutaꞌa oto aana hiiwalaimolinge iꞌomu, na omu ke sapeie loꞌu iiꞌonga oodotaꞌi, na omu ke sapeie loꞌu saenanaunge diana, 6na omu ke sapeie loꞌu kinetaꞌinge aana tolahamiu, na omu ke sapeie loꞌu mei tolahai esunge taraꞌasi aani hiiwalaimolinge, na omu ke sapeie loꞌu iiꞌonga maaꞌi, 7na omu ke sapeie loꞌu manata-diananga hunie mo eesimiu aana hiiwalaimolinge, na omu ke heꞌi sapeie loꞌu noꞌone manata-diananga hunie ahutana mo iinoni. 8Mala uri mo tolahai ola diana urine ke pai-peine i lalo aana mau-meuringe iꞌomu, nge omu ke si lae diana eena. Na omu sai eehu eeni hue-huei ola diana i lalo aana mau-meuringe iꞌomu aana omu manataꞌinie oto a Jisas Kraes Aalaha ikie. 9Taꞌe mala uri nga iini nge e kaꞌa toꞌo aana ike mo tolahai ola ngeena i lalo aana mau-meuringe ingeie, iinoni ngeena e urihana mola iinoni e kaꞌa sai lio kohi ike, wa maana e ulu toꞌohuu. E pulongosie oto uri a God ni e hoda rereꞌa aana mwaanie mo oorahaꞌaanga ingeie i naꞌo.
10Oto e lae otoi diana, maeni eesiku maaꞌi, uri hunie omu ke asu aꞌailaꞌa loꞌu hunie omu ke haataꞌinie uri a God e tohungei lio hilisiꞌomu oto nana maraana. Omu ke haataꞌinie uri e soiꞌomu mei i saana toꞌohuu aana mo tolahai ola diana aana mau-meuringe iꞌomu. Na mala uri omu kei esu urine, omu saꞌa heꞌi lae takalo loꞌu mwaanie tala oodo, wa omu ke tataro aana laenga i sulie. 11Oto a God ke si tohungei tola koniꞌomu oto taꞌau i Lengi aana walumalau haalu nge e saꞌa mango loꞌu. Walumalau ngeena, a Jisas Kraes Aalaha ikie na a Haꞌa-uuritaka, nge e aalaha haahie.
12Nou saie uri omu saenanau taane oto aana walu ola ngeena, na omu ko uure maꞌutaꞌa noꞌone peꞌie mo wala toꞌohuu nge haꞌa-uusulilemiu e lae aani. Taꞌe maꞌalana ke urine, ne kei lae peꞌi haꞌa-haꞌa-aamasitoꞌoꞌomu loꞌu eeni suli maholo. 13Aana no ko loꞌongaꞌi uri e lae oto i diana hunie ne ke haꞌa-haꞌa-aamasitoꞌoꞌomu aana walu ola ngeena maholo no ko meu-meuri ue, mwaanie omu pulongosiꞌi mola. 14A Jisas Kraes Aalaha ikie e haataꞌinie oto hunieu uri pongiku mai aano i leu e kaꞌa tewa oto. 15Oto ne kei eriꞌapasie uri omu ke suꞌuri pulongosie walu ola ngeena i puriku aana ne kei mae mwaaniꞌomu.
Mo Hurulaꞌaa Kire Tarohaꞌinie Mola Tataroha Toꞌohuu
16Maholo iꞌemeelu mo hurulaꞌaa melu haꞌarongoꞌomu aana uri a Jisas Kraes Aalaha ikie kei ooli loꞌu mei peꞌie nanamanga paine, melu kaꞌa talei ere ike mola i sulie mo laladonga taꞌewau. !Haꞌike! Melu leesie oto aana maameelu uri a Kraes e toꞌo aana painehaꞌana nanamanga a God. 17A God Mamaꞌa e tohungei haꞌapainaꞌaa satana Kraes, aana walana Iini E Paine Liutaa e soi haꞌamanikuluꞌaa a Kraes aana e teꞌuri, “A kaleku ni oto ienini, iini nou tohungei saetoꞌo aana oto liutaa.” 18Iꞌemeelu maraameelu oto, melu rongoa mei wala ngeena e lae mai uure taꞌau i Lengi maholo melu iiꞌo peꞌie a Jisas taꞌau i lengine toloi henue maaꞌi.
19Aena mo olana, nge melu si tohungei hiiwalaimoli oto liutaa aana nga moi taa nge mo propet kire unu-unuꞌi. Oto kei tohungei diana loꞌu liutaa uri hunie iꞌomu noꞌone omu ke pwaarongo i sulie mo ere-erenga mo propet, aena aana mo ere-erenga ngeena domana oto nga raa-raa ko raangie lehu e tohungei rodohono. Oto omu ke pwaarongo i sulie mo ere-erenga ikire ngeena lae hule i waꞌalie aana hai dinge a Kraes kei hule loꞌu na rarangana ke si raangie saemiu. 20Na e tohungei roroꞌa oto liutaa hunie omu ke lio saie uri nga taꞌa-taꞌa mei wala nge mo propet kire uusue i laona Uusu-uusu Maaꞌi, e kaꞌa uusue ike i sulie nga mei neꞌisaenga ingeie mola maraana.1:20 Erenga ni Krik e kaꞌa tohungei matapwa ike i leu, na ohe neꞌisaenga aana tatala ienini e lae mola uuri. “Na e tohungei roroꞌa oto liutaa hunie omu ke lio saie uri nga iini e saꞌa roroꞌa lae ike i sulie loꞌongaꞌinge ingeie maraana maholo ko lado luhesie loꞌongaꞌinge aana mo ere-erenga mo propet, taꞌe peꞌie saenanaunge a Liꞌoa Maaꞌi haꞌalaa.”21Aana mo propet ngeena, kire kaꞌa unue ike nga taꞌa-taꞌa mei wala tohude, taꞌe a Liꞌoa Maaꞌi nge ko da kire ko unu tahangaꞌinie neꞌisaenga a God.
2O Ke Lio Talamu Mwaanie Mo Haꞌa-uusuli Eero-Eero
1Oto wau i naꞌo, mo propet eero-eero kire oꞌoꞌo noꞌone i matolana mwala ni Israel, na kei urine loꞌu aana mo haꞌa-uusuli eero-eero kei lae noꞌone mai mumuni i matolamiu. Kire kei unue mo haꞌa-uusulinge eero-eero i sulie a God nge kire sai waelie hiiwalaimolinge nga mo iini. Na kire ke aatopuri loꞌu mola aana a Aalaha nge e niie mei holite oto paine huni haꞌa-uurie maurihaꞌada. Na i tehulaꞌana walu ola ngeena, nge kire sai waelire loꞌu mola maraada lau-leu. 2Maꞌalana e urine, taꞌe mo iini hunge kei lulu i sulie mo tolahai ola aaela ikire ngeena, na mwala kei aehota ere aaelasie loꞌu mola Tataroha Diana toꞌohuu ngeena. 3Na aena aana mo haꞌa-uusuli eero-eero ngeena kire ko heri hunie mone mola toꞌoha, oto kire kei da taꞌena nga haꞌa-uusulinge eero-eero mola huni weꞌinie mola mo toꞌoha iꞌomu. Taꞌe a God e kaꞌa sai maꞌahu ike, oto e leesie mola mo tolahai ola aaela ikire, na kei haro haꞌaloire taane. E pwani leie oto mo tolahai ola urine, na leilada e iiꞌo aakau oto loosire uure mai waite.
4Na kie mani saie oto uri maholo mo ensel kire oorahaꞌaa kaꞌu waite, a God e haꞌaloire aana e pwasure aani iieliheu, na e oohe aasire i laona leu ni haꞌamotaahinge nge e tohungei rodohono oto hiitoꞌo. Na kire kei iiꞌo i leune lae-lae hule aana Dinge Ni Leinge aana maholo ooreta. 5Oto wau i naꞌo noꞌone, a Noa e ere-ere i sulie tolahana oodotaꞌinge nana mwala. Na maholo mwala ngeena kire kaꞌa sai rongo hunie a God, oto a God e haꞌaloire. E uusungeꞌinie wai uri ke kone paine huni horo mae aada. Taꞌe a Noa na e hiu iinoni peꞌie mola a God e si haꞌa-uurire. 6Na loꞌu a God e leie e ro huilume i Sodom na i Gomora noꞌone, na e uunu aasire mango-mango aana dunge. Tolahai ola ngeena e haataꞌinie nga mo taungei ola uri taa kei haro hite aana mwala nge kire kaꞌa manataꞌinie ike a God. 7Taꞌe a God e haꞌa-uurie mola a Lot mwaanie huilume i Sodom, aana ingeie e iiꞌo oodotaꞌi na e hii aaela i sulie mo tolahai ola tataꞌala ikire mwala oorahaꞌaala aana e ro huilume ngeena. 8A mwane oodotaꞌi ngeena e oꞌoꞌo tewa peꞌire, na saena e salu mola i suli dinge aana ko leesie na ko rongoa mwala aaela ngeena kire ko talei deu taꞌewau oto mola.
9Oto urine kie sai leesie uri mo iini kire ko esu nana a God maꞌalana ko aasa uri taa, taꞌe a God e sai haꞌa-uurire mola mwaanie mo siꞌohaꞌanga ikire. Na a God e sai hele aakau aana haꞌaloinge hunie mo iini tataꞌala loosie Dinge Ni Leinge. 10Na a God kei lei aaelasie oto liutaa mo iini kire iiꞌo ni deu aaela oto mola i sulie saeda maraada na kire ko mwakataꞌinie mola nanamanga a God. Mo haꞌa-uusuli eero-eero ngeena ko tohungei toohaꞌinire mola maraada, hule aana kire kaꞌa sai haꞌamaꞌu ike aana mo ensel taꞌau i Lengi, taꞌe kire ko talei ere aaelasire oto mola. 11Taꞌe maꞌalana mo ensel kire paine liutaa na kire toꞌo aana nanamanga liutaa aana mo haꞌa-uusuli eero-eero ngeena, kire kaꞌa sai ere aaelasie ike nga iini i maana Aalaha.
12Taꞌe mo haꞌa-uusuli eero-eero ngeena, kire urihana mola mo ola loo-looꞌa ni meꞌesu nge kire kaꞌa sai loꞌongaꞌinie ike nga mei ola, na e adona mola horo-aasileni ke lae. Kire sai ere aaelasie mola mo ola nge kire kaꞌa sai diana aani ike, taꞌe lae-lae mo ola aaela kire ko esuiꞌi ngeena kei eeliꞌu na kei heꞌi waelire loꞌu. 13Mo haꞌa-uusuli eero-eero ngeena kire kei sapesalu oto hiitoꞌo, aena aana ikire nge kire asuie kaꞌu ngaeta mwala e sapesalu holaꞌinaꞌo. Kire tohungei sare asuie mo ngeuhe aaela hunie kire ke inu mehiri mola peꞌi deu aaela, maꞌalana i upui aatowaa. Na maholo kire ko lae mai huni ngeu peꞌiꞌomu aana mo ngeu-maaꞌinge iꞌomu, kire ko lae taraꞌasi mola peꞌie mo tolahai ola aaela ikire ngeena. Oto aana kire ko eeroꞌomu mola urine, nge kire ko da mwala ko ere aaelasie oto mo ngeuhe iꞌomu ngeena. 14Saeda e painesie mola uri kire ke hele roroꞌanga mola peꞌie mo huꞌe tarau. Kire saꞌa tohungei mamalo ike mwaanie tolahai ola aaela ikire ngeena, na kire sai haꞌa-olaa noꞌone mwala nge hiiwalaimolinge ikire e kaꞌa susu hunie kire ke lae takalo noꞌone. Kire tohungei sai saehanalie noꞌone mo ola ngaeta mwala. Oto aena urine kaꞌu a God e unue oto uri ke haꞌaloire. 15Mo haꞌa-uusuli eero-eero ngeena kire ko lae mwaanie tala oodo na kire lae takalo oto mola, aana kire ko lae mola i sulie tolahana propet a Belam oto waite, mwane kalena a Beo. A Belam e oalaꞌi keꞌu ni esuie mei ola e kaꞌa oodo ike, aena aana saena e tohungei peinesie mola mei toꞌoha. 16Taꞌe dongki ingeie e uure honosie mwaanie e lae loꞌu i sulie tolahai ola aaela ingeie ngeena. Dongki ngeena e ere mala mo iinoni, na e ere aana a Belam oto hiitoꞌo haahie hero-heronga e oalaꞌinie ngeena.
17Mo haꞌa-uusuli eero-eero ngeena, ikire mo ola mwaakule mola. Kire ko heiholotaꞌinie mo ola diana, taꞌe mo wala mwaakule mola ni ngeena. Oto kire urihana mola mo huulaa e mwaꞌa. Na kire urihana mola mei rorodo e aꞌate nge e kaꞌa sai niie nemo hunie hohola ke aahu. Na a God e hele aakau oto aana leu ni haꞌamotaahinge talada, nge rodohono e paine aana. 18Kire sai haꞌa-olaa mwala mola hunie aaelanga peꞌie mo wala mwaakule ni toohaꞌinge, aana kire ko unu-unue uri e diana mola huni deu i sulie mo heri-huninge aana sape. Na urine kire ko weꞌi eelihoꞌi mola aana mwala nge kire ko si aehota huni lae i sulie tala oodo mwaanie mo tolahai ola aaela ngeena. 19Mo haꞌa-uusuli eero-eero ngeena, kire ko heiholotaꞌinie hunie mwala uri kire kei iiꞌo luhetaꞌi mola mwaanie iiꞌonga i mamalutana nga iini. Taꞌe eeronga paine mola ni ngeena, aena aana ikire maraada na kire iiꞌo mola i mamalutana oorahaꞌaa. Na e toꞌohuu oto aana mala uri nga mei ola ko aꞌailaꞌasie nga iini, nge iinoni ngeena e neꞌi koni-konihe oto nana mei olana. 20Mala uri mwala ke sai diana aana a Jisas Kraes Aalaha ikie, haꞌalaa kire sai iiꞌo luhetaꞌi mola mwaanie mo tolahai ola aaela aana walumalau ie. Taꞌe mala uri kire kei ooli loꞌu takoie mo tolahai ola aaela ngeena, nge mauringe ikire ke si aaela oto mwaanie holaꞌinaꞌo eena. 21E lae oto i diana uri kire ke suꞌuri lio saie tolahai ola diana ngeena, aana urine haꞌalaa haꞌaloinge ikire e saꞌa tohungei peine ike. Taꞌe mo iini nge kire saie oto tala diana a God na kire ko aatopuri mola aana, ikire oto a God kei tohungei lei aaelasire oto liutaa. 22Kire ko tohungei deu oto mala mei aalahuunge nge e unue uuri, Usu e moa kaꞌu, oto ko heꞌi ngeuꞌi loꞌu.Provebs 26:11 Na ngaeta mei wala e unue noꞌone uuri, “Maꞌalana kie ko loto rereꞌa kaꞌu aana poo, taꞌe kei heꞌi lae loꞌu mola i ipe aana pwii-pwii.”
3A Jisas Kei Ooli Taane Loꞌu Mei
1Maeni eesiku maaꞌi, ruana nga uusu-uusu ineu huniꞌomu oto ie. Nou saie uri saemiu e manola mola, oto aana e ro uusu-uusu ineu ienini, no ko haꞌa-aamasitoꞌoꞌomu mola uri hunie omu ke tohungei loꞌo-loꞌongaꞌi diana. 2Saeku uri omu ke aama-aamasitoꞌo aana mo wala nge mo propet maaꞌi kire unuꞌi oto wau i naꞌo, na loꞌu aana haꞌa-uusulinge iꞌemeelu mo hurulaꞌaa i sulie haꞌatolanga Aalaha ikie, a Haꞌa-uuritaka.
3Oto e tohungei roroꞌa hunie omu ke saenanau diana aana uri maholo hunie walumalau ie kei mango e kaꞌa tewa ike loꞌu, na ngaeta mwala kei mwesi mwaaniꞌomu. Kire sai lae mola peꞌi haꞌa-eero aana walu ola diana, 4na kire kei unue uuri, “?A Jisas oto i tei? ?Mwane nge e unue uri kei ooli loꞌu mei, ingeie oto i tei? Mo naꞌohai mwane iꞌomu weu i naꞌo ngeena, kire mani mae oto, taꞌe ahutana walu ola ngeena kire mani sada mola mala maholo a God e haꞌaholaa walumalau.”
5Taꞌe mwala nge kire ko ere urine ngeena, nga taꞌa-taꞌa mei ola kire kaꞌa sare aamasitoꞌo aana. Kire sare pulongosie mola uri wau i naꞌo, a God e unue mola mei wala, na salo na aano huu e maau oto. A God e haꞌaholaa aano huu hunie ke maau i matolana mo wei, na mo wei kire ke iiꞌo mola ahuie aano huu. 6Na aana wai loꞌu mola, nge a God e waelie walumalau wau i naꞌo, aana e da hunie wai aana lue-lue ke hane i lengi na ke aaluhie aano huu. 7Oto aana taꞌa-taꞌa mei wala a God noꞌone mola, nge salo na aano huu kire iiꞌo siꞌiri, na nanamanga aana walana mola nge ko hele aadarue loosie Dinge Ni Leinge. Aana maholona dunge kei lae mai huni weru suuheꞌinie walumalau na ahutana mo iinoni nge kire kaꞌa manataꞌinie ike a God.
8Oto iꞌomu, maeni eesiku maaꞌi, taꞌa-taꞌa mei ola mola omu ke aamasitoꞌo aana loꞌu. Omu ke saie uri Aalaha ikie e kaꞌa loꞌongaꞌinie ike uri taꞌa-taꞌa hai dinge nga maholo oꞌoruꞌe, wa uri sinolai helisi nga maholo tewa. !Haꞌike! Taꞌe kire tewa sada mola i maana. 9Ngaeta mwala kire ko loꞌo-loꞌongaꞌinie uri Aalaha ikie ko tohungei haꞌahiru huni haꞌa-oaie mo heiholotaꞌinge ingeie i sulie oolinge mai ingeie. Taꞌe kire kaꞌa lio saie ike loꞌongaꞌinge ingeie, aana a God ko maaꞌoohi mola hunie mwala kire ke oonisae na kire ke aaliꞌu loꞌu i saana mwaanie kire aiꞌaa aana leilada kei lae. 10Taꞌe hai dinge Aalaha ikie kei ooli loꞌu mei, hai dinge ngeena kei lae mai mola mala iinoni peli-peli aana kie saꞌa manataꞌinie ike maholo kei lae mai wa kie ke loꞌongaꞌinie. Na aana hai dingena, painehaꞌana kou-kouhaꞌa oto paine kei reu uure mai taꞌau i Lengi na salo kei eiꞌaa oto. Na dunge oto paine kei ngaa oto ahutana walu ola taꞌau i salo hule aana kire kei meni aaela mango oto. Na walumalau ngeena oto peꞌie walu ola aana, kire kei meni eiꞌaa oto.
11Oto aena aana ahutana walu ola kei meni aaela mango oto urine, omu ke lio-lio diana aana mau-meuringe iꞌomu. Omu ke iiꞌo maaꞌi na omu ke lae peꞌi iiꞌo oodotaꞌi mola i sulie saena God. 12Na maholo omu ko lae peꞌi maaꞌoohie hai dinge paine a God ngeena, omu ke asu waaꞌiniꞌini hunie hai dingena ke hule lau-leu. Aana hai dinge ngeena, dunge kei ngaa salo lai hule aana kei aano talihu oto, na walu ola aana haꞌaholanga dunge kei madorohiꞌi hule aana kire kei aahe mango. 13Taꞌe a God e haiholotaꞌi oto hunikie uri kei esuie loꞌu aano huu haalu peꞌie salo haalu naka, na aana walumalau haalu ngeena, taꞌe ikie mo iinoni oodotaꞌi haꞌalaa kie kei iiꞌo i leune.
14Maeni eesiku maaꞌi, aena aana omu ko iiꞌo peꞌi maaꞌoohilana mone walu ola urine kei reu, nge omu ke tohungei esu waaꞌiniꞌini hunie omu ke toꞌo aana hanuelamanga toꞌohuu peꞌie a God. Mau-meuringe iꞌomu ke diana, na omu ke iiꞌo oodotaꞌi oto i maana. 15Aalaha ikie ko niie maholo huniꞌomu ni ngeena, kaꞌu e kaꞌa lae-lae ue mai lau-leu. Oto omu ke toꞌo maaie mala uri nga maholo oto hunie haꞌa-uurilemiu kei lae ni ngeena. Taꞌa-taꞌa mei neꞌisaenga urine a God e niie noꞌone hunie aasikaelu maaꞌi a Pol, mala e uusue kaꞌu taꞌa-taꞌa taungei erenga ngeena noꞌone huniꞌomu. 16Na i laona ahutana mo uusu-uusu ingeie e ere urine oto tarau maholo e uusu-uusu i sulie mei ola ngeena. I laona mo uusu-uusu a Pol ngeena, ngaeta mo wala kire kaꞌa tohungei matapwa diana ike huni rongo saiꞌi. Na ngaeta mwala nge kire kaꞌa saenanau na loꞌongaꞌinge ikire kaꞌa oodo, kire ko lae peꞌi oolisie mola loꞌongaꞌinge aana mo wala ngeena na kire ko lae huꞌisiꞌi oto. Na kire ko lae peꞌi teꞌurine noꞌone mola aana taꞌena nga mo wala i laona mo Uusu-uusu Maaꞌi i naꞌo. Taꞌe aana tolahai ola urine, kire ko si tohungei da oto haꞌamotaahinge ikire maraada kei aaela oto liutaa ni ngeena.
17Taꞌe iꞌomu, maeni eesiku maaꞌi, omu saie oto mo wala ngeena. Oto omu ke lio talamiu maraamiu, mwaanie omu lae takalo i sulie mo haꞌa-uusulinge mo iinoni tataꞌala. Nou sereꞌinie omu ke domu mwaanie leu diana omu uure puu oto aana karaꞌinie a God. 18Taꞌe omu ke pai-peine taraꞌasi mola i lalo aana manata-diananga na sai-olanga hunie Aalaha ikie na a Haꞌa-uuritaka, a Jisas Kraes. Nge manikuluꞌanga ingeie e saꞌa mango oto ooꞌoo. Ke urine oto.