Ruana Nga Uusu-uusu A
Jon
?A tei ni e uusue uusu-uusu ienini?
Uusu-uusu ienini kie saie uri a Jon Hurulaꞌaa ni e uusue, aena aana hungelana mo wala na mo haꞌananaunge kire sada mola peꞌie Tataroha Diana a Jon.
?E uusue uusu-uusu ienini hunie kira tei?
A Jon e unue uri ko uusu-uusu hunie ngaeta keni peine nge a God e manata diana hunie na e lio hilisie huni neꞌie iinoni ingeie. Kie kaꞌa sai diana aana a tei ni keni peine ngeena wa e iiꞌo i tei. Ngaeta mo iini kire unue uri a Jon e kaꞌa ere ike i sulie nga keni, taꞌe ko ere ni aalahuunge mola i sulie soihaadaꞌinge aana ngaeta hanue i laona lio i sulinge ingeie. Mala uri ko toꞌohuu, nge mo kalena toro ngeena ikire oto kira hiiwalaimoli aana soihaadaꞌinge ngeena, na mo kalena keni eesine keni peine ngeena (leesie 1:13) ikire oto kira hiiwalaimoli i laona soihaadaꞌinge nge a Jon ko oꞌoꞌo aana.
?Nga taa e rau-reu maholo e uusue uusu-uusu ienini?
Aana mo helisi i purine maelana a Jisas, mo haꞌa-uusuli kire lae peꞌi eelide hailiu aani tolalana Tataroha Diana i suli henue. Oto i sulie tolahada wau i naꞌo, kira hiiwalaimoli aana Kraes aana taꞌena nga leu, kire tola konie mo haꞌa-uusuli ngeena i laona mo nume ikire, na kire peꞌi-peꞌire aana mo niinge huni haꞌamwadaꞌue mo laenga ikire. Taꞌe mo haꞌa-uusuli eero-eero kire loꞌongaꞌinie noꞌone taꞌa-taꞌa tala ngeena huni laengaꞌinie mo haꞌa-uusulinge takalo ikire.
?E uusue uusu-uusu ienini huni taa?
A Jon Hurulaꞌaa e uusue uusu-uusu ienini hunie kira hiiwalaimoli aana Kraes kire ke manata diana hunire hailiu, taꞌe kire ke lio talada mwaanie kire peꞌie mo haꞌa-uusuli eero-eero nge kire ko naꞌona mwala mwaanie tala aana walaimolinge.
?Nga taa ni mo pweu ni wala i laona uusu-uusu ienini?
manata-diananga, haꞌa-uusulinge eero-eero
?Nga taa ni ngaeta mo eehuꞌi tatala i laona uusu-uusu ienini?
2 Jon 1:9
?Nga taa ni mo eehuꞌi neꞌisaenga i laona uusu-uusu ienini?
Mei wala ni saediananga (1:1-3)
Kie ke peꞌikie hailiu aani manata-diananga, taꞌe e kaꞌa diana ike hunie kie ke peꞌie mo haꞌa-uusuli eero-eero nge ko haꞌatakaloa mwala. (1:4-11)
Mei wala ni saediananga ooreta (1:12-13)
1Mei Wala Ni Saediananga
1Saediananga mwaanieu Rato ni mwane aana soihaadaꞌinge, huniꞌo tohungei keni diana a God peꞌie maeni kalemu. Ineu peꞌie ahutana oto mo iini e manataꞌinie walaimolinge ko manata diana huniꞌomu, 2aena aana walaimolinge a God ko iiꞌo oto i lalo aana ahutaka mango na kei iiꞌo huu oto peꞌikie.
3Oto hahuꞌana manata-diananga, na aamasinge, na hanuelamanga a God Aamaka na a Kalena a Jisas Kraes, ke lae mai hunie ahutaka nge kie ko iiꞌo aana walaimolinge na manata-diananga.
Mwaanie Kie Peꞌie Mo Haꞌa-uusuli Eero-Eero
4No ko tohungei ilenimwaꞌe oto liutaa aana nou si lio saie uri ngaeta mo iini aana mo kalemu kire ko lulu i sulie tolahai walaimolinge oto mala a Mamaꞌa e unue hunikie aana haꞌatolanga ingeie. 5Mei wala no ko unue huniꞌomu ienini, keni diana ineu, nga mei ola haalu haꞌike, taꞌe mei haꞌatolanga kie rongoa oto i naꞌo uure aana maholo kie holaꞌi hiiwalaimoli aana Jisas, uri kie ke manata diana hunikie hailiu. 6Na taꞌena nga iini ko iiꞌo aana manata-diananga, nge ke iiꞌo peꞌie tola i sulilana nga taa a God e unue. Na uure i aehotalana omu rongoa oto uri e unue uri omu ke mani iiꞌo aani manata-diananga.
7No ko haꞌa-aamasitoꞌoꞌomu mola aana leune, aena aana mo haꞌa-uusuli eero-eero hunge kire lae hailiu oto i laona walumalau. Ikire ngeena kire ko haꞌa-uusuli aana uri a Jisas Kraes e kaꞌa neꞌi iinoni ike. Mo iini urine ikire mwala eero-eero, na ikire mo maelonga a Kraes. 8Oto omu ke lio talamiu mwaanie omu deu tekelaꞌinie tolahai iinoni diana iꞌomu nge melu esu oto hiitoꞌo hunie omu ke toꞌo aana. Taꞌe omu ke lae taraꞌasi peꞌie hunie omu ke hele haꞌamangoa oto waaitemiu.
9Taꞌena nga iini nge e kaꞌa iiꞌo susu aana mo haꞌa-uusulinge a Kraes taꞌe ko sapeie loꞌu mola mo neꞌisaenga ingeie, iini urine, a God e kaꞌa iiꞌo ike i lalo aana. Taꞌe iini nge ko iiꞌo susu peꞌie lulu i sulilana mo haꞌa-uusulinge a Kraes, iini urine, a Mamaꞌa na a Kale kire mani iiꞌo oto i lalo aana. 10Mala uri nga haꞌa-uusuli ko hule i seemiu na haꞌa-uusulinge ingeie ko lae aaopa mwaanie haꞌa-uusulinge a Kraes ienini, nge omu ke suꞌuri tola konie i nume iꞌomu, na hule aana omu ke suꞌuri unue loꞌu nga mei wala ni saediananga hunie. 11Aana omu kei ere ni saediananga peꞌie iini urine, nge omu ko peꞌie asunge aaela ingeie eena.
Mei Wala Ni Saediananga Ooreta
12Mo ola hunge taane huni haꞌarongoꞌomu eeni, taꞌe nou kaꞌa sare ere ike aani uusu-uusunge. Taꞌe nou norutoꞌo mola aana uri nga maholo ne kei haro lae wau huni leesiꞌomu na huni ere peꞌiꞌomu maraaku, hunie uri ilenimwaꞌenga ikolu ke paine. 13Mei wala ni saediananga noꞌone huniꞌo mwaanie mo kalena a keni eesimu, tohungei keni diana a God noꞌone mala iꞌoe.