2 KORINIT

Ruana Nga Uusu-uusu A Pol Hurulaꞌaa Hunie Mo

Korinit

?A tei ni e uusue uusu-uusu ienini?

A Pol Hurulaꞌaa ni e uusue uusu-uusu ienini, na ingeie oto iini nge e haꞌa-uuresie soihaadaꞌinge wau aana huilume i Korinit. A Timoti e iiꞌo noꞌone peꞌie maholo e uusue uusu-uusu ienini.

?E uusue uusu-uusu ienini hunie kira tei?

A Pol e uusu-uusu hunie kira hiiwalaimoli oto wau aana huilume paine i Korinit.

?Nga taa e rau-reu maholo e uusue uusu-uusu ienini?

A Pol e uusue eetana nga uusu-uusu ingeie hunire mo Korinit hunie uri kire ke oonisae mwaanie aaelanga kire asuie kaꞌu ngeena, na hunie uri kire ke haꞌaloie iini nge e dau aaela oto hiitoꞌo aana ko iiꞌo ruru peꞌie huꞌe aamana. Oto mo Korinit kire rongoa walana Pol na kire tola i sulie oto nga taa e unue hunire. Taꞌe lae-lae ngaeta mo haꞌa-uusuli eero-eero kire hule loꞌu weu i Korinit na kire ko haꞌatakaloa oto kira hiiwalaimoli weu. Mo haꞌa-uusuli eero-eero kire ere aaelasie a Pol Hurulaꞌaa noꞌone, aana kire ko unue uri ingeie nga hurulaꞌaa toꞌohuu a Kraes haꞌike, na loꞌu kire ko haꞌasusungeꞌinie a Pol uri ko sare pelie mola toꞌo-toꞌolana mo Korinit. Na aena aana a Pol e oolisie laenga ingeie na e kaꞌa hule lau-leu i Korinit aana maholo kire loꞌongaꞌinie, nge mo haꞌa-uusuli eero-eero ngeena kire ko unue uri mwala ke suꞌuri norutoꞌo aana walana.

?E uusue uusu-uusu ienini huni taa?

A Pol e tohungei sare unue hunire mo Korinit uri e hii diana oto liutaa huni rongoa mei tataroha a Taetas uri kire rongo i sulie walana aana eetana nga uusu-uusu e ere aꞌailaꞌa i laona nge e haꞌatolaa wau hunire. Taꞌe aahuꞌi neꞌisaenga i manatana a Pol uri hunie mo Korinit ke dau aakau hunie maholo a Pol kei liu weu i saada. Saena hunie kire ke leie tolahada maraada hunie tolahada ke tohungei oodo maholo kei hule i saada. Na saena loꞌu hunie kire ke dau aakau aana nga mei niinge huni peꞌie mo iini kire ko siꞌohaꞌa aana soihaadaꞌinge taꞌau i Jerusalem.

?Nga taa oto mo pweu ni wala i laona uusu-uusu ienini?

saehuunge, sapesalunge, aꞌailaꞌasilana mamaelaꞌanga, ere ni haꞌasusunge, manikuluꞌanga, niinge

?Nga taa ni mo eehuꞌi tatala i laona uusu-uusu ienini?

2 Korinit 4:7-11, 2 Korinit 5:20-21

?Nga taa ni mo eehuꞌi neꞌisaenga i laona uusu-uusu ienini?

Mei wala ni saediananga hunie mo Korinit (1:1-11)

Nga mo ola kire oopa-oopaa kaꞌu mo Korinit mwaanie a Pol, taꞌe maholo ie walu ola kire oodo oto. (1:12–7:16)

Kira hiiwalaimoli ke peꞌi-peꞌire hailiu aani niinge hunie kira siꞌohaꞌa. (8:1–9:15)

A Pol ko uure honosie upwanga mo iini kire unue ingeie nga hurulaꞌaa toꞌohuu haꞌike. (10:1–13:10)

Mei wala ni saediananga ooreta (13:11–13:14)

Mei Wala Ni Saediananga

¹Saediananga mwaanieu a Pol, iini nge a God maraana e lio hilisieu uri hunie ne ke neꞌi hurulaꞌaa nana a Jisas Kraes. Iꞌemereꞌi aasikaelu a Timoti, nge ni mere ko uusu-uusu hao huniꞌomu mwala aana soihaadaꞌinge a God hao i Korinit, na noꞌone hunie ahutana mo iinoni maaꞌi a God aana taꞌena nga leu hao i laona poꞌo ni henue iꞌomu i Akaea. ²Mere ko eitanaie a God Aamaka na a Jisas Kraes Aalaha ikie, uri kire ke haataꞌinie hahuꞌana manata-diananga huniꞌomu, na uri kire ke niie hanuelamanga huniꞌomu.

A God Ko Haꞌadodoa Saeka Hunie Kie Ke Haꞌadodoa Saena Mo Iini Kire Ko Lae Oodoie Aasanga

³Kie ke mani paalahea God, Aamana Jisas Kraes Aalaha ikie, aana a Mamaꞌa oto aahuꞌine aamasinge na iini ni haꞌadodoa saeka mo iinoni. ⁴Ingeie oto ko haꞌadodoa saemeelu i suli maholo melu ko lae oodoie mo aasanga, uri hunie iꞌemeelu noꞌone melu ke haꞌadodoa saena mo iini kire ko lae oodoie noꞌone mo aasanga, na melu ke asu urine aana taꞌa-taꞌa mei peꞌinge nge a God e haꞌadodoa saemeelu aana. ⁵Iꞌemeelu, melu ko sapesalu oto hiitoꞌo i tehulaꞌana melu ko lulu i sulie a Kraes, taꞌe maholo ko lae urine, nge a God ko si haꞌadodoa saemeelu oto hiitoꞌo i tehulaꞌana a Kraes. ⁶Oto maholo melu ko sapesalu, nge sapesalunge ngeena ko heꞌi peꞌiꞌomu loꞌu hunie omu ke hele aana maurihe huu. E toꞌohuu oto, i sulie a God ko haꞌadodoa saemeelu hunie iꞌemeelu noꞌone melu ke haꞌadodoa loꞌu saemiu. Oto urine omu ke uure aꞌailaꞌa taraꞌasi mola maholo omu ko sapesalu loꞌu mala iꞌemeelu ienini. ⁷Oto melu hiiwalaimoli toꞌohuu uri omu sai uure maꞌutaꞌa taane, aena aana melu saie mola uri omu ko sapesalu noꞌone mola aana taꞌa-taꞌa taungei ola nge melu ko sapesalu aana, na a God ko haꞌadodoa loꞌu saemiu noꞌone mala ko haꞌadodoa saemeelu ie.

⁸Maeni eesiku maaꞌi, melu saetoꞌo aana uri omu ke sai diana aana mei siꞌohaꞌanga nge e hite kaꞌu aameelu weu aana poꞌo ni henue i Esia uri e hiꞌeiꞌemeelu oto liutaa, na e tohungei aasa oto hiitoꞌo huniꞌemeelu hule aana melu loꞌo-loꞌongaꞌinie oto uri melu ke maesie mola. ⁹Na melu saie uri melu ke tohungei mae toꞌohuu oto. Taꞌe leune e rau urine, uri hunie melu ke suꞌuri norutoꞌo mola aameelu maraameelu, taꞌe hunie melu ke norutoꞌo mola aana God, iini e sai taꞌea mo iini e mae oto. ¹⁰Na maholo melu karaꞌi mae ngeena, a God e haꞌa-uuriꞌemeelu oto toꞌohuu, na kei haro haꞌa-uuriꞌemeelu taane ue. Melu maaꞌoohi susutoꞌo peꞌie hiiwalaimolinge aana uri kei haro haꞌa-uuriꞌemeelu taane mola ue. ¹¹Na omu sai peꞌiꞌemeelu noꞌone aani aarengaꞌinge talameelu. Urine mwala oto hunge ke si paalahea a God, aena aana kire kei meni leesie uri a God e sai rongo hunie aarengaꞌinge mo iini hunge na e sai haꞌadianaꞌaꞌemeelu i tehulaꞌana mo aarengaꞌinge ikire ngeena.

Neꞌisaenga A Pol E Oodo Mola Maholo E Oolisie Laenga Ingeie

¹²Maeni eesiku, manataku e taha mola aana nou saie uri melu kaꞌa eeroa ike nga iini aana nga maholo, taꞌe melu ko lulu i sulie mola oodo-oodonga nge a God e saetoꞌo aana. Walu ola melu ko euꞌesuiꞌi e uure mola aana hahuꞌana manata-diananga a God, na melu kaꞌa asuie ike nga mei ola i sulie saenanaunge ni iinoni. Tolahameelu e diana oto urine tarau peꞌie ahutana mo iinoni, na oto liutaa maholo melu oꞌoꞌo peꞌiꞌomu. ^13-14Mo ola melu ko uusu-uusuꞌi huniꞌomu, mo ola omu sai saenanau eeni taane, na mwaanie omu heitalea loꞌu nga neꞌisaenga e aasa wa e iiꞌo mumuni i laona uusu-uusu ienini. !Haꞌike! Taꞌe omu ke saa-saaie mola mo uusu-uusu ineu, na maꞌalana uri omu kaꞌa sai diana aameelu ue, taꞌe melu loꞌongaꞌinie uri omu kei sai diana aameelu taane. Oto aana maholo Aalaha ikie a Jisas kei ooli mei, nge omu ke si toohaꞌiniꞌomu haahie omu lado peꞌiꞌemeelu, mala iꞌemeelu noꞌone melu ko toohaꞌiniꞌemeelu aena aana melu lado peꞌiꞌomu.

¹⁵Oto aena aana nou tohungei hiiwalaimoli uri omu ko saediana hunieu urine, nge nou loꞌongaꞌinie kaꞌu uri ne ke holaꞌi lae oto hao i leesiꞌomu, hunie uri ne ke leesiꞌomu aana e ro maholo na urine nge omu kei ilenimwaꞌe haꞌarue. ¹⁶Oto nou oalaꞌi keꞌu huni lae hao i leesiꞌomu aana maholo nou neꞌisae huni lae mai hunie poꞌo ni henue i Masedonia, na uri ne ke si leesiꞌomu loꞌu aana maholo ne kei uure mwaanie i leu, aana ne ke lae loꞌu hunie i Jiudia. Urine nou loꞌongaꞌi uri omu ke si peꞌieu aana laenga ngeena. ¹⁷Saꞌa mola omu ko loꞌo-loꞌongaꞌinie uri no ko eero wa no ko ere-ere mwaakule mola, aena aana nou kaꞌa lae ike i sulie oalaꞌinge ineu ngeena. !Taꞌe haꞌike! Ineu, nou kaꞌa asuie ike mo oalaꞌinge mala mo iinoni ni welumalau ko euꞌesuiꞌi. Ineu nou kaꞌa sai unue ike, “Iau, ne kei teꞌurine” maholo no ko loꞌongaꞌinie, “Haꞌike, nou saꞌa teꞌurine ike.” ¹⁸Maholo no ko unue, “Iau,” no ko neꞌisae oto toꞌohuu huni esuie urine, na nou saꞌa talei unue mola “Haꞌike” mai puri. Mala a God ko ere-ere toꞌohuu oto tarau, ineu noꞌone no ko ere toꞌohuu, ¹⁹aena aana no ko lulu i sulie tolahana a Jisas Kraes. Ingeie oto Kalena God, nge iꞌemeelu a Saelas na a Timoti, melu tarohaꞌinie huniꞌomu, na omu meni saie oto uri ingeie e kaꞌa unue “Iau” hunikie, na ko tolana unue loꞌu “Haꞌike.” Taꞌe i tehulaꞌana a Kraes mone, a God ko unu-unue “Iau” hunikie mo iinoni, ²⁰aana a Jisas oto ko haꞌa-oaie ahutana mo heiholotaꞌinge a God hunikie mo iinoni. Oto loꞌu mola i tehulaꞌana a Kraes, ikie noꞌone kie sai haꞌamanikuluꞌaa God uuri, “Iau, ke urine oto mala o ko unuena.” ²¹A God maraana ni ko haꞌamaꞌutaꞌaa hiiwalaimolinge ikie aana a Kraes. Na ingeie maraana noꞌone nge e lio hilisikie, ²²na e niie Liꞌoa Maaꞌi ingeie ke iiꞌo huu oto i lalo aaka mala haꞌa-ara a God. Liꞌoa Maaꞌi ko haataꞌinie uri ikie mo iinoni a God, na ahutana mo heiholotaꞌinge a God kei oa oto hunikie.

²³Oto ne ke unue oodoiꞌomu aana e ue kaꞌu nou kaꞌa ooli ike mai i seemiu mala nou unue. A God e saie mola manataku, na e saie taane uri nga taa no ko unue e toꞌohuu. Nou kaꞌa lae ike ue hao i Korinit, i sulie nou kaꞌa sare ere aamiu loꞌu na urine kei aasa loꞌu huniꞌomu. ²⁴Iau, e toꞌohuu oto aana melu ko sare asu loko-loko mola peꞌiꞌomu hunie omu ke ilenimwaꞌe, na melu kaꞌa sare paine ike haahiꞌomu huni deu rarahiꞌomu hunie omu ke hiiwalaimoli, aana melu saie uri omu uure maꞌutaꞌa oto aana hiiwalaimolinge aana God.

¹Maholo nou oꞌoꞌo kaꞌu peꞌiꞌomu oto i naꞌo, nou ere aamiu hiitoꞌo na nou da omu hii aaela. Oto aena leune nou heꞌi loꞌongaꞌinie loꞌu uri nou saꞌa ooli ike loꞌu hao i seemiu lau-leu, mwaanie omu hii aaela loꞌu mola. ²?Aana uri ne kei da omu ke hii aaela, haꞌalaa a tei loꞌu nge ke si da ne ke ilenimwaꞌe? Aena aana iꞌomu mola nge omu sai da hunie uri ne ke ilenimwaꞌe. ?Taꞌe omu sai deu urine loꞌu uri taa na hule aana iꞌomu na omu ko saehuu noꞌone mola? !E aasa! ³Ineu nou kaꞌa ere ike mola i sulie ilenimwaꞌenga ineu maraaku, taꞌe ilenimwaꞌenga ineu e uure mola aana ilenimwaꞌenga iꞌomu, aana kolu sai ilenimwaꞌe mola tararuru. Aena urinena, nge nou holaꞌi uusu-uusu mola hao huni ere aamiu haahie mo ola omu deu aaelasiꞌi, hunie uri maholo ne kei hule loꞌu hao i seemiu, na mo ola ngeena kire oodo oto. Iau, nou esuie mola urine mwaanie uri mo iini hunie omu ke da ne ke ilenimwaꞌe, omu si da loꞌu mola ne ke saehuu. ⁴Maholo nou uusue eetana nga uusu-uusu ngeena, saeku e tohungei makaka oto, na nou uusu-uusu oto mola peꞌie saehuunge na peꞌie ngaranga. Ineu nou tohungei saehuu haahie nga taa nou uusue kaꞌu huniꞌomu, taꞌe nou kaꞌa ere aamiu ike urine hunie omu ke saehuu loꞌu, taꞌe saeku hunie omu ke lio saie uri nou manata diana oto liutaa hunie ahutemiu mango.

Mo Korinit Ke Saeꞌaasi Hunie Mwane E Oonisae Mwaanie Aaelanga E Asuie Kaꞌu

⁵Nou sereꞌi ere hiitoꞌo huniꞌomu haahie nga taa nge ngaeta mwane aamiu e dau aaelasie ngeena. Taꞌe mei roroꞌanga oto paine ni ngeena, na e kaꞌa asuie ike mola saehuunge hunieu, taꞌe oto liutaa, e da hunie ahutemiu mango. ⁶Oto mo iini hunge aamiu, omu leie a mwaena na omu haꞌaloie oto. Na haꞌaloinge omu esuie ngeena e ado oto. ⁷Oto ienini e malisine uri omu ke saeꞌaasi oto hunie, na omu ke ere haꞌasusue hunie ke hii diana loꞌu. A mwaena e saehuu oto, na mwaanie uri e tohungei saehuu loꞌu hiitoꞌo na saehuunge paine ingeie e waelie oto taꞌingelu. ⁸Aena ngeena no ko eitanaiꞌomu uri omu ke peꞌie a mwaena hunie uri ke saie oto uri omu manata diana hunie toꞌohuu.

⁹Maholo nou uusue uusu-uusu ngeena huniꞌomu oto i naꞌo, nou kaꞌa loꞌongaꞌinie mola haꞌa-oodohilana a mwaena, taꞌe nou sare manataꞌinie noꞌone uri ohe omu kei mwaꞌe-mwaꞌe taane huni tola i sulie walu ola no ko unu-unuꞌi huniꞌomu, wa haꞌike. ¹⁰Oto ie aana nou leesie uri omu sai tola i sulie walaku toꞌohuu, oto mala uri omu ko saeꞌaasie nga mei aaelanga nga iini e dau huꞌisiꞌomu aana, nge ineu e urine noꞌone. Na mala iinonine e dau huꞌisie noꞌone mei olana hunieu, nge ineu noꞌone ne ke saeꞌaasie mei olana hunie. A Kraes e saie oto uri no ko deu-deu urine, aana saeku mola hunie ne ke peꞌiꞌomu. ¹¹Na aena aana saeꞌaasinge hailiu urine, nge a Pwelu Eero-eero e saꞌa roroꞌa tari mwadaꞌu ike aakaelu huni waelikolu, aena aana kolu saie oto mo loꞌongaꞌinge aaela ingeie.

A Pol E Lae Mwaanie Asunge Diana I Troas Aana Ko Tolahiꞌe I Sulie Mo Korinit

¹²Maholo nou hule wau aana huilume i Troas huni laeliwala aana Tataroha Diana i sulie a Kraes, nou deu oodoie uri a Aalaha e tahanie oto maa talana asunge ngeena hunie ke lae diana i leune. ¹³Taꞌe nou tohungei tolahiꞌe mola aena aana nou kaꞌa rongoa ike nga mei wala i suliꞌomu aana nou kaꞌa oodoie ike aasikaelu a Taetas hunie ke haꞌarongoau. Oto nou ere ni saediananga mola peꞌie mwala i leune, nge nou si toliꞌaasire, na nou aatoholo mai hunie poꞌo ni henue i Masedonia aana nou heitalea nga mei wala diana i suliꞌomu.

A Pol Ko Esu Mala Koni-konihe Hunie Uri Mwala Hunge Ke Tola I Sulie Haiholotaꞌinge Haalu A God

¹⁴Oto no ko paalahea God oto liutaa, aana a Kraes e aꞌailaꞌasie oohotaa, na oto ie melu lado oto peꞌie a Kraes na melu ko lae-lae oto i sulie mala mo koni-konihe ingeie. A God e asu i lalo aameelu hunie tataroha i sulie a Kraes ke lai hule oto aana ahutana mo henue, mala wasuhaꞌana dango wau-wesu nge e tohungei wesu mangoni oto hiitoꞌo e sai hule aana taꞌena nga leu i laona nume. ¹⁵Na melu urihana dango wau-wesu i maana God, aana a God ko ilenimwaꞌe haahie asunge melu ko euꞌesuie aana tarohaꞌinilana a Kraes hunie ahutana mo iinoni, mo iini nge haꞌa-uurilada kei lae, na loꞌu mo iini nge kire kei eiꞌaa mwaanie a God. ¹⁶Hunie mo iini nge a God ko haꞌa-uurire, tataroha ngeena e tohungei rongo diana hunire, aana ko naꞌoda hunie maurihe, na kire ko ilenimwaꞌe haahie mala mwala nge ko nonowasune dango wau-wesu. Taꞌe mo iini nge kire kei eiꞌaa mwaanie a God, kire kei sereꞌi rongoa tataroha ngeena, aana ko da kire ko loꞌongaꞌi mola i sulie leinge na maenga, mala mo iini nge kire ko nonowasune kasuhaꞌana rae. Mei esunge aana tarohaꞌinilana a Kraes urine hunie mwala e tohungei aasa. ?Oto a tei keꞌu ke si melisine asunge ngeena? ¹⁷Mo iini oto hunge ko lupweꞌi tarohaꞌinie walana God, taꞌe kire kaꞌa asu toꞌohuu ike, aena aana saeda mola hunie kire ke tari toꞌoha aana. Taꞌe iꞌemeelu, melu aaopa oto mwaanire aana melu ko tarohaꞌinie walana God aani sae manola peꞌie nanamanga a Kraes. Na melu saie uri a God nge e uusungeꞌiniꞌemeelu mala mo koni-konihe ingeie, na ko toꞌo-toꞌomaaie taane nga taa melu ko euꞌesuie.

¹Mwaanie omu loꞌongaꞌi uri melu ko ere urine aena aana melu ko ere toohaꞌiniꞌemeelu hunie omu ke rongo huniꞌemeelu. !Haꞌike oto ooꞌoo! Ngaeta mo iini aaopa kire saetoꞌo aana nga uusu-uusu huni unu haadaꞌi aana huniꞌomu uri ikire mo tohungei koni-konihe a God. Na maholo kire ko uure mwaaniꞌomu huni lae-lae aana ngaeta hanue, kire saetoꞌo aana uri omu ke uusu-uusu urine loꞌu hunie mwala aana hanue kire ko lae hunie ngeena. Taꞌe iꞌemeelu, melu kaꞌa saetoꞌo aana ike nga mei ola urine. ²?Mei ola urine huni taa? Aana mauringe iꞌomu oto domana uusu-uusu huni unu haadaꞌi aana uri iꞌemeelu mo tohungei koni-konihe a God. Ahutana mwala kire ko leesie uri tolahamiu e hai-oolisi diana oto, na i leune kire si lio saie asunge diana iꞌemeelu. ³Oto mauringe haalu iꞌomu ngeena domana uusu-uusu huni haataꞌinie asunge iꞌemeelu e toꞌohuu. Na e matapwa taane mola uri a Kraes ni e uusue uusu-uusu ngeena, aana a Kraes e kaꞌa uusue ike aani inki wa aani baero, taꞌe aana Liꞌoa Maaꞌi nge e uure mwaanie a God Mau-meuriꞌe. Na a Kraes e kaꞌa uusue ike mola i lengine mo rerepatai heu mala mo Haꞌatolanga nge a God e niiꞌi hunie a Mosis oto waite, taꞌe e uusue oto i laona saemiu.

⁴Melu hiiwalaimoli uri walu ola ienini e toꞌohuu oto, aena aana melu norutoꞌo mone aana God i tehulaꞌana a Kraes. ⁵Melu kaꞌa toꞌo aana ike nga mei ola tohumeelu hunie melu ke malisine asunge paine ngeena. A God mone e si da melu ke malisine asunge ngeena. ⁶Aana ingeie oto e da melu ke adona mei esunge mala mo koni-konihe ingeie huni tarohaꞌinie haiholotaꞌinge haalu e asuie peꞌikie mo iinoni. Na haiholotaꞌinge haalu ngeena e kaꞌa ola ike mola aana lulu i sulilana mo Haꞌatolanga, taꞌe aana lulu i sulilana a Liꞌoa Maaꞌi. I tehulaꞌana mo Haꞌatolanga a Mosis, a God kei leie ahutana mo iinoni hunie maenga, taꞌe i tehulaꞌana Liꞌoa Maaꞌi, mwala e sai oodoie maurihe huu.

⁷Mo Haꞌatolanga a Mosis nge uusuleni e lae i lengine e ro rerepatai heu, ko da mola maenga hunie mwala, taꞌe maꞌalana e urine, na mo Haꞌatolanga ngeena e lae mai peꞌie manikuluhaꞌana God, nge e raangie maana Mosis oto waite. Na maꞌalana rarangana maana a Mosis ko aehota huni eehutata oto maholo e siho mwaanie toloi henue ngeena, na hule aana mwala ni Israel kaꞌa sare toꞌomaaie ike raa-raa paine ngeena. ⁸Taꞌe nou saie uri asunge aana Liꞌoa Maaꞌi e manikuluꞌe oto loꞌu liutaa. ⁹?Aana mala uri mo Haꞌatolanga nge e toolea mai maenga e lae mai peꞌie manikuluhaꞌana God, nge manikuluhaꞌana haiholotaꞌinge haalu nge ko haꞌa-oodohie mwala peꞌie a God kei peine loꞌu uri taa eena? ¹⁰Iau, e toꞌohuu oto, aana manikuluhaꞌana iini lalahuꞌe ngeena kei lio mala nga mei ola mwaakule mola, aena aana manikuluhaꞌana iini haalu e tohungei peine loꞌu liutaa aana. ¹¹Haiholotaꞌinge lalahuꞌe nge uusulana e lae i laona mo Haꞌatolanga a Mosis e lio manikuluꞌe taane, maꞌalana e saꞌa iiꞌo huu ike. Taꞌe haiholotaꞌinge haalu huni haꞌa-oodohie mwala peꞌie a God kei toꞌo aana manikuluꞌanga e tohungei peine loꞌu liutaa, aana kei iiꞌo huu.

¹²Oto melu kaꞌa maꞌu ike huni tarohaꞌinie Tataroha Diana, aena aana melu norutoꞌo mola aana uri manikuluhaꞌana haiholotaꞌinge haalu a God ngeena e saꞌa aiꞌaa ike. ¹³Melu kaꞌa mumunie ike nga mei ola i sulie haiholotaꞌinge a God mala a Mosis, aana a Mosis e haro aaluhie loꞌu maana, mwaanie uri mo Israel kire leesie uri raa-raa aana manikuluhaꞌana God ko eehutata mwaanie maana. ¹⁴Mo Israel kire kaꞌa sare saie ike, na saeda e hau mola. Na hule siꞌiri maꞌalana kire ko saa-saaie mo wala aana haiholotaꞌinge lalahuꞌe, taꞌe kire kaꞌa sai lio saiꞌi ike. E urihana mola mei sala a Mosis e aaluhie maana aana, e iiꞌo ue i maada. Na mei sala ngeena taꞌaasilana e sai lae mola hunie mo iini kire iiꞌo ruru peꞌie a Kraes. ¹⁵Maꞌalana siꞌiri, maholo kire ko saaie mo uusu-uusu a Mosis, mei olana e honoa ue maada na e ponosie mola ue saeda mwaanie kire lio saie. ¹⁶Taꞌe maholo nga iini ko eeliꞌu takoie a Aalaha, nge mei ola ngeena ko eiꞌaa oto mwaanie. ¹⁷Na a Aalaha na Liꞌoa Maaꞌi, ikire taꞌa-taꞌa iini mola. Na taꞌena nga iini Liꞌoa Maaꞌi a Aalaha ko iiꞌo i lalo aana, nge Liꞌoa ko luhesie iinine mwaanie nanamanga aana aaelanga. ¹⁸Oto ahutaka mo iini kie lado peꞌie a Kraes, a God e taꞌaasie oto mei sala ngeena mwaanie maaka hunie kie ke haataꞌinie manikuluhaꞌana Aalaha mala iiro-iiro ko wana-wana i laona sato. Na oto tarau Liꞌoa Maaꞌi a Aalaha ko esu i lalo aaka huni oolisikie hunie kie ke urihana oto ingeie maraana, na kie ke haataꞌinie manikuluhaꞌana oto liutaa.

Asunge A Pol Huni Sinelie Saena Mwala Aana Raa-raa A God

¹A God e tohungei aamasiꞌemeelu maholo e niie mei esunge ienini hunie melu ke tarohaꞌinie Tataroha Diana a Kraes, na aena urinena nge melu kaꞌa aakohe ike mwaanie. ²Melu ko tarohaꞌinie a Kraes mola aana mo tolahai ola diana, na melu toliꞌaasie oto taꞌena nga tolahai ola aaela huni tarohaꞌinie. Melu kaꞌa tarohaꞌinie ike a Kraes aana mo tolahai ola e kaꞌa malisi, wa aana mo tolahai ola mumuni, wa aana mo tolahai ola nge ko esuie masanga. Melu kaꞌa haꞌa-olaa ike nga mo iini aani eeronga, na melu kaꞌa sai huꞌisie ike walana God. !Haꞌike oto ooꞌoo! Taꞌe melu ko lae peꞌi unu tahangaꞌinie mola walaimolinge haliꞌite i maana God, hunie ahutana mwala kire ke lio saie uri melu ko ere toꞌohuu. ³Mala uri Tataroha Diana melu ko laeliwala aana ko iiꞌo mumuni ue, wa e aasa hunie nga iini ke rongo saie, nge e iiꞌo mumuni urine mola mwaanie mo iini kire ko lae hunie maenga huu eena. ⁴Kire kaꞌa hiiwalaimoli ike aana a Jisas, aena aana aalaha haahie walumalau ienini ko da mola manatada ko rodohono. Oto kire kaꞌa sai leesie ike raa-raangana Tataroha Diana nge ko raa haahire. Kire kaꞌa lio saie ike mei wala melu ko tarohaꞌinie i sulie manikuluhaꞌana a Kraes, iini e tohungei sada oto peꞌie a God. ⁵Iꞌemeelu, melu kaꞌa laeliwala ike mola i suliꞌemeelu maraameelu, taꞌe melu ko laeliwala aana a Jisas Kraes uri ingeie oto Aalaha, na iꞌemeelu mo iinoni euꞌesu iꞌomu mola aana melu ko lulu i sulie a Jisas. ⁶Aana haꞌaholanga a God e unue uuri, !Raa-raa kei raangie rodohono!Jenesis 1:3 Na ingeie noꞌone nge e sinelie saemeelu aana raa-raa ingeie, hunie melu ke lio saie uri mwala e sai leesie manikuluhaꞌana God aana a Jisas Kraes.

Nanamanga A God Mone E Peꞌie A Pol Huni Tarohaꞌinie Walana God I Laona Aasanga

⁷Iꞌemeelu, melu kaꞌa roroꞌa ike, taꞌe Tataroha Diana melu ko tarohaꞌinie e paine oto liutaa. Mo sapei ola melu toꞌo aani ie kire kaꞌa neꞌie ike nga mei ola, na melu urihana mola mo kao-kao kire asuiꞌi aani mwakano. Taꞌe melu toꞌo aana taane dianahaꞌana a God mola i laona mo kao-kao aaela ngeena, aana melu ko tarohaꞌinie Tataroha Diana a Kraes. Na leune e haataꞌinie uri nanamanga e manikuluꞌe ngeena e kaꞌa ola ike iꞌemeelu, taꞌe mei ola a God. ⁸Mo maholo oto hunge sapesalunge ko haapilingaꞌa haahiꞌemeelu, taꞌe e kaꞌa pili memesoꞌemeelu ike. Mo maholo oto hunge melu ko tolahiꞌe, taꞌe melu kaꞌa neꞌisae rue-ruaꞌa ike. ⁹Mo maholo oto hunge kire ko teungeꞌiniꞌemeelu, taꞌe a God e iiꞌo mola peꞌiꞌemeelu tarau. Mo maholo oto hunge kire ko horo aaelasiꞌemeelu, taꞌe kire kaꞌa sai horo suuheꞌiniꞌemeelu ike. ¹⁰Sapemeelu ko deu oodoie sapesalunge oto noꞌone tarau mala a Jisas e dau oodoie kaꞌu na hule aana e maesie oto. Taꞌe maꞌalana melu ko sapesalu urine, melu meuri taane mola ue, na aena leune ahutana mwala kire ko si lio saie uri a Jisas e mauri taane ue, aana ingeie oto ni ko lio i sulie sapemeelu. ¹¹Iau, mwala ko sare horoꞌiꞌemeelu oto tarau i tehulaꞌana melu ko lulu i sulie a Jisas, taꞌe e diana mola, aena aana mei sape nge kei mae mola ienini ko haataꞌinie oto maurihaꞌana a Jisas. ¹²Melu ko lae peꞌi sapesalu takoie maenga urine, hunie uri iꞌomu omu ke manataꞌinie maurihe toꞌohuu i lalo aamiu.

¹³Aana ngaeta leu mo Uusu-uusu Maaꞌi e unue uuri, No ko ere i sulie a God, aena aana nou hiiwalaimoli oto aana.Sam 116:10 Oto iꞌemeelu noꞌone, melu hiiwalaimoli oto urine, na aena leune melu ko tarohaꞌinie a Jisas. ¹⁴Melu manataꞌinie oto uri a God, iini nge e taꞌea Aalaha ikie a Jisas, kei heꞌi taꞌeꞌemeelu noꞌone loꞌu mala a Jisas, na kei tooleꞌemeelu tararuru peꞌiꞌomu hunie leu nge e iiꞌo aana. ¹⁵Melu ko mwaꞌe-mwaꞌe ni sapesalu urine huni peꞌiꞌomu, na hunie mwala oto hunge kire ke sai diana aana hahuꞌana manata-diananga a God hunire. Urine mwala oto hunge loꞌu kire ke si soi haꞌamanikuluꞌaa God peꞌi paalahelana.

Mauringe Mai Aano E Saꞌa Iiꞌo Huu Ike Mala Maurihe Taꞌau I Lengi

¹⁶Aena urinena melu saꞌa mou-mou ike aani tarohaꞌinilana a Jisas. Maꞌalana uri sapemeelu ke lae peꞌi aaela loꞌu, taꞌe maurihaꞌameelu poꞌo i lalo ko lae peꞌi haꞌahaalu taane tarau suli dinge. ¹⁷Na mei siꞌohaꞌanga nge ko tooleꞌemeelu mola hunie kele maholo oꞌoruꞌe ienini, ko da melu ke si hele liutaa aana mo ola manikuluꞌe oto hiitoꞌo loꞌu aana maurihe huu peꞌie a God taꞌau i Lengi. ¹⁸Oto melu kaꞌa neꞌisae paine ike mola haahie mo ola nge kie sai leesiꞌi, taꞌe melu neꞌisae paine haahie mo ola nge kie kaꞌa sai leesiꞌi ike aana maaka. Aana mo ola nge kie sai leesiꞌi aana maaka, kire kaꞌa sai iiꞌo tewa ike. Taꞌe mo ola nge kie kaꞌa sai leesiꞌi ike aana maaka, nge haꞌalaa kire sai iiꞌo huu.

¹Kie ko oꞌoꞌo mola mai laona walumalau peꞌie mei sape mamaelaꞌa nge hule aana e kaꞌa sai iiꞌo tewa ike, na e urihana mola iiꞌonga aana mo aapa-aapa i meꞌesu. Na maholo oho-aasilana mo aapa-aapa ngeena kei lae, nge kie ke si lae hunie mo nume diana oto liutaa. Aana kie saie uri a God e dau aakau aana mei sape diana liutaa naka huni iiꞌo aana taꞌau i Lengi, ola ingeie maraana e asuie na iini kei iiꞌo oto huu. ²Taꞌe aana iiꞌonga mei sape ienini mai aano i leu, kie ko iiꞌo mola peꞌie ngaranga, aana kie ko heri hunie oto liutaa uri kie ke toꞌo aana oto mei sape haalu uure i Lengi na hunie ke aaluhikie oto. ³Aena aana maholo mei sape lalahuꞌe ienini kei mae, nge maurihaꞌai ola e saꞌa iiꞌo mwaakule ike mala iinoni e kaꞌa hoꞌo sala, taꞌe mala iinoni ko hoꞌosie mei sala haalu, nge maurihaꞌai ola kei eeluhi aana mei sape haalu uure i Lengi. ⁴Aana maholo kie ko oꞌoꞌo ue i laona mo aapa-aapa mai welumalau ie, kie ko aawa-aawasirahe mola aana mo aasanga mai leu ko hiꞌeikie, na kie ko tohungei heri hunie oolisinge aana sapeka. E kaꞌa ike aana uri kie ko sare taꞌaasie oto mei sape ni welumalau ikie, aena urine nge maurihaꞌai ola kei iiꞌo mwaakule mola mala iinoni e kaꞌa hoꞌo sala ike. Taꞌe kie saetoꞌo aana oto liutaa uri mei sape ni Lengi ngeena ke aaluhie maurihaꞌaka oto mola lau-leu, uri hunie ahutana walu ola aana maenga ke mango mwaanikie, na mei sape haalu aana maurihe huu ke oolisie mei sape mamaelaꞌa ienini oto taꞌingelu. ⁵Na a God e pwaokie oto hunie ke urine, na e niie oto Liꞌoa Maaꞌi hunikie huni haataꞌinie uri leune kei reu oto toꞌohuu taane aana maholo hunie.

⁶Oto kie kaꞌa maꞌu ike taꞌe saeka e susu mola. Kie saie taane uri maholo kie iiꞌo ue i laona mei sape ni welumalau, kie kaꞌa iiꞌo ike ue taꞌau i Lengi i saana a Aalaha. ⁷Oto mau-meuringe ikie ko lae-lae mola aani hiiwalaimolinge, na e kaꞌa lae ike i sulie walu ola kie sai leesie aana maaka. ⁸Oto kie kaꞌa maꞌu ike, taꞌe kie loꞌongaꞌi meꞌutaꞌa mola uri e lae oto i diana liutaa huni toliꞌaasie mola mei sape ni welumalau ngeena, na hunie kie ke lai iiꞌo aana tohungei henue ikie i saana a Aalaha. ⁹Taꞌa-taꞌa mei eehuꞌi ola kie saetoꞌo aana, maꞌalana kie ke iiꞌo aana sapeka mai aano i leu wa kie ke oopa mwaanie na kie ke iiꞌo oto taꞌau i Lengi, taꞌe kie saetoꞌo aana mola uri a Aalaha ke ilenimwaꞌe haahikie. ¹⁰Aana kie mani manataꞌinie oto uri ahutaka mo iinoni, kie kei meni lae i uure i naꞌona naunekume ni leinge a Kraes taꞌau i Lengi hunie ingeie kei waaikie oto i sulie helelaka mai aano i leu e diana wa e aaela.

Asunge A Pol Huni Toolea Mwala Mai Saana A Kraes

¹¹Oto aana melu saie uri dinge ni leinge ngeena mei ola ni meꞌunge oto paine, nge melu ko eriꞌapasie huni peꞌie mwala hunie kire ke aaliꞌu na kire ke hiiwalaimoli aana a Jisas. A God e sai diana aameelu uri melu ko esu toꞌohuu taane nana, na nou tohungei heri hunie uri iꞌomu noꞌone omu ke sai diana aameelu loꞌu urine. ¹²Melu kaꞌa sare ere ike urine mola huni haꞌapainaꞌaꞌemeelu maraameelu, taꞌe melu ko sare haataꞌinie mola nga taa diana melu ko esuie, hunie uri omu ke ilenimwaꞌe haahiꞌemeelu. Oto urine omu sai ere oolisie mo iini kire ko ere aaelasiꞌemeelu aana kire kaꞌa neꞌisae paine ike aana oodo-oodonga wa aana nga taa i laona sae, taꞌe kire ko toohaꞌinire mola haahie mo ola poꞌoi sinaha nge mwala e sai lahera haahiꞌi. ¹³Ngaeta mo iini kire ko unu-unue uri iꞌemeelu nga mo pweu mola, taꞌe leune e kohi mola aameelu aena aana melu saie e lio taane mola mala uri melu pweu aana melu ko weo mola nana God. Taꞌe ngaeta mo iini kire lio saie uri melu kaꞌa pweu ike, na leune e kohi loꞌu aameelu aana weonga iꞌemeelu mei ola huni peꞌilemiu. ¹⁴Taꞌena nga mei ola melu ko esuie, melu ko esuie mola aena aana manata-diananga a Kraes. Na aana melu hiiwalaimoli uri taꞌa-taꞌa iinoni e mae oto honotaka, nge melu hiiwalaimoli noꞌone uri ahutaka, kie mani mae tararuru oto peꞌie iinonine mwaanie mauringe lalahuꞌe e aaela ikie i naꞌo. ¹⁵Na a Kraes e mae toꞌohuu huni peꞌie ahutana mo iinoni, uri hunie ahutaka mo iini kie toꞌo aana maurihe haalu kie ke suꞌuri lae loꞌu i sulie mo loꞌongaꞌinge ikie maraaka, taꞌe hunie kie ke lulu i sulie mola a Kraes, iini e mae kaꞌu na e taꞌelaꞌi eelihoꞌi loꞌu i tehulaꞌaka.

¹⁶Oto maholo ienini neꞌisaenga ikie i sulie mwala e hai-oolisi oto, na kie kaꞌa loꞌongaꞌi ike i sulie nga iini i sulie tolahai iinoni ni welumalau. E toꞌohuu taane uri kie lio toli keꞌu aana a Kraes i sulie tolaha ni iinoni urine holaꞌinaꞌo, taꞌe maholo ienini kie kaꞌa sai teꞌurine ike loꞌu. ¹⁷Oto iini nge e neꞌie iinoni a Kraes, nge a God ko haꞌahaalue oto iinoni ngeena hunie ke neꞌie iinoni haalu oto. Mo tolahai ola lalahuꞌe ko eiꞌaa oto mwaanie, na mo tolahai ola haalu ko lae oto mai. ¹⁸Ahutana walu ola ngeena a God ni ko esuiꞌi hunikie aana a Kraes. A God e uusungeꞌinie mone a Kraes hunie kie ke aaliꞌu loꞌu mei takoie hunie kie ke uure ruru peꞌie. Na e niie mei esunge ngeena nameelu huni toolea mai mo iinoni takoie hunie ikire noꞌone kire ke uure ruru peꞌie. ¹⁹Oto melu ko tarohaꞌinie uri a Kraes e asu mola nana a God hunie ahutana iinoni aana walumalau kire ke aaliꞌu mei takoie hunie kire ke uure ruru peꞌie a God. Na aena aana a Kraes mone, a God e kaꞌa loꞌongaꞌinie ike loꞌu mo oorahaꞌaanga ikire. Na e niie mei tataroha diana ngeena nameelu hunie melu ke tarohaꞌinie hunie mwala ke saie tala hunie ikire noꞌone kire ke sai uure ruru peꞌie a God. ²⁰Oto ienini, melu ko ere-ere oto oolitana a Kraes, na aena ngeena, maholo melu ko ere-ere peꞌiꞌomu e urihana uri a God maraana ni ko eitanaiꞌomu hunie omu ke uure ruru oto peꞌie. Oto melu ko ere oolitana a Kraes oto ie, na melu ko eitanaiꞌomu hunie uri omu ke aaliꞌu takoie a God na omu ke uure ruru oto peꞌie. ²¹A Kraes ingeie e kaꞌa toꞌo aana ike nga mei oorahaꞌaanga, taꞌe a God e da mola hunie ke toꞌo aana mo oorahaꞌaanga ikie mo iini kie lado toꞌohuu peꞌie a Kraes, hunie ikie noꞌone kie ke si toꞌo aana oodotaꞌinge ingeie.

¹Oto aani esunge tararuru peꞌie a God, melu ko eitanaiꞌomu, mo iini omu hele aana oto niinge paine a God ngeena, mwaanie omu toliꞌaasie niinge paine ngeena e totowai mola. ²Omu ke rongoa kaꞌu nga taa a God e unue aana e teꞌuri, Aana tohungana maholo huni haataꞌinie manata-diananga ineu eemiu, nou rongo i sulie aarengaꞌinge iꞌomu, na maholo omu saetoꞌo aana nga iini ke peꞌiꞌomu, nge nou haꞌa-uuriꞌomu oto.Aesaea 49:8 !Oto omu ke rongo kaꞌu! Maholo huni hele aana manata-diananga a God ni oto ienini. !Siꞌiri oto dinge ni haꞌa-uuringe!

A Pol E Tarohaꞌinie A Kraes Maꞌalana Mo Aasanga Oto Hunge Kire Hite Aana

³Melu eriꞌapasie taane uri walu ola melu ko esuiꞌi ke oodo na kire ke suꞌuri liu honosie hiiwalaimolinge nga iini aana a Jisas, na mwaanie nga iini e ere aaelasie asunge iꞌemeelu ienini. ⁴Taꞌe aana ahutana walu ola melu ko euꞌesuiꞌi, melu ko haa-haataꞌinie taane oto uri iꞌemeelu mo koni-konihe a God. Melu ko uure maꞌutaꞌa taane mola loosie taꞌena nga siꞌohaꞌanga na aasanga na sapesalunge ko lae mai takoiꞌemeelu. ⁵Mwala kire rapusiꞌemeelu oto, na kire neꞌiꞌemeelu oto i laona nume ni hoꞌo, na kire maaola-ola peꞌi waeliꞌemeelu oto. Taꞌe maꞌalana e urine melu ko haꞌaweoꞌemeelu oto mola aani tarohaꞌinilana a Jisas taraureꞌi, hule aana nga maꞌahunge wa ngaunge na haꞌike loꞌu. ⁶Na melu haataꞌinie loꞌu uri iꞌemeelu mo koni-konihe a God aana iiꞌonga rereꞌa iꞌemeelu, na aana saenanaunge iꞌemeelu, na aana toli-rakonga iꞌemeelu, na aana saediananga iꞌemeelu hunie ahutana iinoni, na aana nanamanga a Liꞌoa Maaꞌi, na aana melu manata diana toꞌohuu hunie ahutana iinoni. ⁷Melu haataꞌinie uri iꞌemeelu mo koni-konihe a God toꞌohuu aana melu sai ere mola aana walaimolinge. A God e niie mai nanamanga ingeie nameelu, na melu toꞌo aana oodotaꞌinge mala talo huni deu honosie mo maelonga. Na oodotaꞌinge e urihana noꞌone nga reisinge huniꞌemeelu, huni haataꞌinie mo takalonga ikire. ⁸Melu ko esu nana God maꞌalana mwala ko haꞌamaꞌu aameelu wa kire ko haꞌamasaꞌemeelu mola, maꞌalana kire ko laheꞌemeelu wa kire ko haꞌamwasi mola aameelu. Ngaeta mwala kire ko haaraꞌi haꞌa-uusuli eero-eero mola aameelu, taꞌe maꞌalana ke urine loꞌu, iꞌemeelu, melu ko lae peꞌi haꞌa-uusuli taane aana walaimolinge. ⁹Ngaeta mwala kire ko unue uri kire kaꞌa saiꞌemeelu ike, taꞌe kire saiꞌemeelu taane mola. Melu ko karaꞌi mae-mae oto, taꞌe melu meuri mola ue. Nga mo iini ko haꞌaloiꞌemeelu taane, taꞌe kire kaꞌa horo maesiꞌemeelu ike. ¹⁰Aena aana mo aasanga ngeena, e malisine oto melu ke sae-saehuu, taꞌe melu ilenimwaꞌe mola tarau. Melu sai meitale taane, taꞌe melu ko peꞌie mola mwala hunge hunie kire ke toꞌo-toꞌo loꞌu. Melu kaꞌa toꞌo aana ike taane nga mei ola, taꞌe melu ko si toꞌo aana mola ahutana walu ola mango.

¹¹Maeni eesiku maaꞌi, ahutana walu ola melu unu mangoꞌi oto huniꞌomu mo Korinit, na melu kaꞌa mumunie ike loꞌu nga mei ola mwaaniꞌomu. Na melu haataꞌinie oto uri melu tohungei manata diana huniꞌomu toꞌohuu aana ahutana saemeelu. ¹²Iꞌemeelu maraameelu melu kaꞌa rohu ike aani manata-diananga huniꞌomu, taꞌe iꞌomu maraamiu mola omu kaꞌa haataꞌinie ike manata-diananga iꞌomu huniꞌemeelu. ¹³No ko ere-ere huniꞌomu oto mala iꞌomu maeni kaleku. Omu ke haataꞌinie oto tolahai ola diana nge melu haataꞌinie oto aamiu. Omu ke haataꞌinie oto uri omu manata diana huniꞌemeelu toꞌohuu.

Kie Ke Suꞌuri Hata-hata Peꞌie Mo Iini Kire Kaꞌa Hiiwalaimoli Aana Jisas

¹⁴Iꞌomu, omu aaopa oto mwaanie mo puꞌo, oto omu ke suꞌuri hata-hata loꞌu peꞌire. ?Aana oodotaꞌinge na tataꞌalanga kei hata uri taa? ?Wa raa-raa na rodohono kei iiꞌo tararuru uri taa? ¹⁵?Wa a Kraes na a Pwelu Eero-eero kei neꞌisae tararuru uri taa? ?Wa iinoni e hiiwalaimoli saena kei sada peꞌie iini e kaꞌa hiiwalaimoli uri taa? ¹⁶?Wa mo liꞌoa aaela kei iiꞌo i laona nume maaꞌi a God uri taa? Oto kie ke suꞌuri hata-hata peꞌie mo iini kire kaꞌa hiiwalaimoli, aana ikie oto nume maaꞌi a God Meu-meuriꞌe. Iau, kie neꞌie oto nume maaꞌi a God, aana a God maraana e unue uuri, Ne kei iiꞌo oto peꞌie mwala ineu, na ne kei aawe-aawe oto i matolada. Ne kei neꞌie oto God ikire, na ikire kire kei neꞌie oto mwala ineu.Levitikas 26:12¹⁷Aena urinena a Aalaha e unue noꞌone uuri, Omu ke toliꞌaasie mo puꞌo, na omu ke iiꞌo aaopa oto mwaanire. Omu ke suꞌuri hele i sulie loꞌu nga mei ola e madaꞌa, aana omu kei iiꞌo oodotaꞌi urine nge ne kei ilenimwaꞌe peꞌiꞌomu.Aesaea 52:11¹⁸Na ineu ne ke si neꞌie oto Aamamiu, na iꞌomu, omu ke neꞌie kaleku mwane na kaleku keni. Ineu a God, iini e aalaha haahie walutana nga ola, nge no ko ere ienini.2 Samuel 7:14

¹Maeni iinoni maaꞌi, ahutana mo heiholotaꞌinge ngeena a God e niiꞌi oto hunikie. Aena urine kie ke kinetaꞌinikie maraaka mwaanie walutana nga ola madaꞌa nge e sai haꞌamadaꞌaa maurihaꞌaka, na mwaanie kie asuie taꞌena nga ola aaela wa kie neꞌisae aaela hunie nga iini. Na aena aana kie haꞌamaꞌu aana God, kie ke lulu i sulie oto tolahana e maaꞌi.

A Pol Ko Ilenimwaꞌe Haahie Oonisaenga Mo Korinit

²Omu ke haataꞌinie oto uri omu manata diana huniꞌemeelu, aana iꞌemeelu, melu kaꞌa dau aaelasie ike nga mei ola aana nga iini. Melu kaꞌa waelie ike nga iini, wa melu ke haꞌamweꞌu-mweꞌue nga iini. Ngaeta mo iini eemiu ko haꞌapeliꞌemeelu urine, taꞌe e kaꞌa toꞌohuu ike. ³Nou kaꞌa ere ike urine huni ere aaelasiꞌomu, aana nou unue kaꞌu oto huniꞌomu uri melu manata diana huniꞌomu toꞌohuu. Na maꞌalana uri kolu ke mauri wa kolu ke mae loꞌu, taꞌe saemeelu hunie kolu ke iiꞌo tararuru oto tarau. ⁴Suli maholo nou sai unu tahangaꞌinie mola saeku huniꞌomu, na no ko ere toohaꞌiniꞌomu mola tarau. Maꞌalana melu sapesalu aana mo ola oto hiitoꞌo, taꞌe mo maholo no ko loꞌongaꞌiniꞌomu, nge no ko si ilenimwaꞌe na saeku e susu oto.

⁵Oto ne ke lalado loꞌu i sulie laenga iꞌemeelu nge nou aehota ladoa kaꞌu holaꞌinaꞌo. Iau, melu uure oto mwaanie i Troas na melu lae i hule hao aana poꞌo ni henue i Masedonia. Taꞌe maholo melu hule hao, melu kaꞌa toꞌo aana loꞌu nga kele maholo huni mamalo. Mo ola hunge kire rau aameelu aana maholona, aana mwala kire uure honosiꞌemeelu mola, na iꞌemeelu maraameelu melu tohungei tolahiꞌe oto hiitoꞌo. ⁶Taꞌe maꞌalana e urine, a God iini e sai peꞌie mo iini kire ko saehuu, e da hunie melu ke ilenimwaꞌe loꞌu maholo e uusungeꞌinie mai a Taetas i saameelu. ⁷Melu kaꞌa ilenimwaꞌe ike mola hahaiteli haahie a Taetas e hule, taꞌe melu ilenimwaꞌe oto noꞌone haahie mei tataroha e unue uri iꞌomu, omu haꞌasaedianaꞌaa noꞌone. E unue oodoiꞌemeelu uri omu ko tohungei sare leesieu loꞌu, na uri omu ko saehuu oto hiitoꞌo haahie nga taa e rau ngeena, na omu ko sare uure mola aana aapa ineu siꞌiri ienini. Oto ineu na no ko tohungei ilenimwaꞌe hiitoꞌo noꞌone.

⁸Waite nou saehuu keꞌu aana nou saie uri uusu-uusu ineu holaꞌinaꞌo e da omu saehuu. Taꞌe maꞌalana uusu-uusune e da kaꞌu omu saehuu, taꞌe siꞌiri nou kaꞌa saehuu loꞌu aana uri nou uusu-uusu urine huniꞌomu, aana saehuunge iꞌomu ngeena mei ola mola hunie kele maholo oꞌoruꞌe. ⁹Oto ienini nou ilenimwaꞌe mola aana uri nou uusu-uusu oto urine huniꞌomu. Ilenimwaꞌenga ineu e kaꞌa ike i sulie uri nou da omu saehuu, taꞌe i sulie saehuunge iꞌomu e da omu oolisie tolahamiu. Tolahai saehuunge urine a God ko ilenimwaꞌe haahie, oto uusu-uusu ineu ngeena e kaꞌa waeliꞌomu ike, taꞌe e peꞌiꞌomu mola. ¹⁰Aana saehuunge a God ko ilenimwaꞌe haahie ngeena ko da iinonine ko oonisae na ko oolisie tolahana oto takoie tala ni meurihe. Oto kie saꞌa saehuu ike haahie taungei saehuunge urine. Taꞌe maholo iinoni ko saehuu mola i sulie tolaha ni welumalau, nge maenga mola i leune, aana saehuunge urine e kaꞌa peꞌie ike iinonine hunie ke oonisae. ¹¹Omu ke leesie kaꞌu mei saehuunge nge a God e asuie aamiu ngeena, aana ko si da omu ko sare asuie walu ola diana, na omu ko sare haataꞌinie uri omu kaꞌa takalo ike mala iini e asuie mei roroꞌanga ngeena. Na mei saehuunge ngeena ko si da omu ko saewasulie mo iini ko deu-deu aaela, na omu ko meꞌuteꞌinie noꞌone haꞌaloinge a God. Na omu ko si sare leesieu oto liutaa. Na loꞌu ko si da omu ko neꞌisae haꞌahiꞌe aana a God, na omu ko sare haꞌaloie mo iini ko deu aaela. Oto aana ahutana walu ola omu ko deuꞌi ngeena, omu ko haataꞌinie oto uri omu rereꞌa mwaanie mei roroꞌanga ngeena. ¹²Oto maꞌalana nou uusue kaꞌu uusu-uusu ngeena, taꞌe nou kaꞌa uusue ike mola aena aana nou loꞌongaꞌinie iini nge e dau roroꞌanga ngeena. Na e kaꞌa ike mola aena aana nou loꞌongaꞌinie iini nge mei roroꞌanga e hite aana. Taꞌe nou uusue huniꞌomu hunie uri omu ke aamasitoꞌo aana manata-diananga iꞌomu hunieu, na aena aana nou unue uri leune ke da omu ke lio saie i maana a God uri omu ko neꞌisae paine aameelu toꞌohuu. ¹³Oto aena leune e rau urine, nge melu ko tohungei ilenimwaꞌe oto liutaa haahiꞌomu.

Na loꞌu sapeitana ilenimwaꞌenga iꞌemeelu haahiꞌomu, melu ko tohungei saemango noꞌone liutaa huni leesie a Taetas ko ilenimwaꞌe aana omu meni haꞌasaedianaꞌaa oto liutaa. ¹⁴Na mo ola nou ere toohaꞌiniꞌomu eeni i saana Taetas, nou kaꞌa masa ike aani, aana ahutana walu ola nge nou unu-unuꞌi i suliꞌomu kire mani toꞌohuu mango, mala ahutana walu ola nge nou unu-unuꞌi huniꞌomu kire mani toꞌohuu mango noꞌone. ¹⁵Oto maholo ienini, a Taetas noꞌone e tohungei neꞌisae paine aamiu aana ko loꞌongaꞌi i sulie uri omu meni lio i suli diana aana, na omu meꞌuteꞌinie peꞌi haꞌamaꞌunge aana, hule aana omu meni mwaꞌe-mwaꞌe ni tola i sulie walana. ¹⁶Oto no ko tohungei ilenimwaꞌe aena aana nou sai norutoꞌo oto aamiu.

Kie Ke Peꞌie Kira Siꞌohaꞌa Aani Niinge

¹Oto ienini, maeni eesiku maaꞌi, melu ko sare haꞌarongoꞌomu aana haꞌadianaꞌanga a God hunie mo iini kire hiiwalaimoli aana a Jisas oto mai aana poꞌo ni henue i Masedonia. Aana manata-diananga ingeie e paine hunire mone, a God e tohungei haꞌadianaꞌara aana mei ola diana. ²Oohongilada e lae kaꞌu aana mo aasanga oto paine e hite aada, na kire maitale oto hiitoꞌo. Taꞌe maꞌalana e urine, ilenimwaꞌenga ikire e paine oto liutaa hule aana kire ko sare nii huni peꞌie ngaeta mwala. ³Ineu maraaku nou sai ere haꞌawalaimoliꞌaa uri kire kaꞌa nii ike mola hule aana leu e malisine kire ke niie, taꞌe kire tohungei liue oto leune, aana niinge ikire e paine loꞌu liutaa aana nga taa taꞌena nga iini ke loꞌongaꞌinie kire sai niie. Na kire asuie oto urine mola i sulie hari-huninge ikire maraada. ⁴Ikire maraada nge kire lae peꞌi eitanaiꞌemeelu uri hunie melu ke toliꞌaasie hunire uri ikire noꞌone kire ke peꞌie mo iinoni a God taꞌau i Jerusalem. ⁵Na niinge ikire ngeena, e lae liutaa aana loꞌu nga taa melu loꞌo-loꞌongaꞌinie, aana kire tohungei deu i sulie saena God aana kire holaꞌi toliꞌaasire maraada huni tola i sulie walana a Aalaha, oto loꞌu kire heꞌi toliꞌaasire maraada huni tola i sulie walameelu. ⁶Oto aena aana a Taetas e da omu aehotaa tolahai niinge, nge melu eitanaie hunie ke ooli loꞌu i seemiu huni ere haꞌasusuꞌomu hunie omu ke haꞌamangoa mo niinge iꞌomu. ⁷Iꞌomu, omu ko hele diana aana oto ahutana tolahai ola diana. Hiiwalaimolinge iꞌomu e susu oto, na omu tohungei saenanau i sulie tolahana a Jisas, na omu sai haꞌa-uusuli aana mo ola urine. Oto tarau omu mwaꞌe-mwaꞌe huni peꞌi-peꞌie mo iinoni, na manata-diananga iꞌomu huniꞌemeelu e paine. Oto melu saetoꞌo aana uri omu ke aꞌailaꞌa noꞌone aana tolaha ni niinge peꞌie manata-diananga.

⁸Maholo no ko ere urine, nou kaꞌa neꞌie ike nga haꞌatolanga huniꞌomu. Taꞌe no ko ere urine mola aana nou leesie uri ngaeta mo soihaadaꞌinge kire ko tohungei mwaꞌe-mwaꞌe huni peꞌi-peꞌi, na mala uri omu ke peꞌi-peꞌi noꞌone urine, nge e haataꞌinie uri manata-diananga iꞌomu nga ola toꞌohuu taane. ⁹Aana saeku hunie omu ke haimaanie hahuꞌana manata-diananga Aalaha ikie a Jisas Kraes. Omu saie mola uri e tohungei toꞌo-toꞌo kaꞌu oto taꞌau i Lengi, taꞌe e si lae mai neꞌi iinoni meitale mola i tehulaꞌamiu, uri hunie omu ke neꞌi iinoni toꞌo-toꞌo i tehulaꞌana maitalenga ingeie ngeena.

¹⁰Oto loꞌongaꞌinge ineu uri e lae oto i diana hunie omu ke haꞌamangoa oto nga taa nge omu aehotaa aana halisi e mango haona. Aana iꞌomu oto eetana nga mwala huni loꞌongaꞌinie leune, na iꞌomu oto noꞌone nge omu holaꞌi aehotaa niinge. ¹¹Aena urine, omu ke haꞌamangoa oto mei esunge diana omu aehotaa ngeena. Mei mwaꞌe-mwaꞌenga nge omu aehotaa asunge ngeena aana, nge omu ke lae taraꞌasi oto peꞌie hule aana haꞌamangolana. Na omu ke nii oto mola mwaanie nga taa nge omu toꞌo aana. ¹²Mala uri omu ko mwaꞌe-mwaꞌe toꞌohuu huni niie nga mei ola, nge a God kei tohungei ilenimwaꞌe haahie leune. Na mwaanie omu tolahiꞌe mala uri niinge e kaꞌa paine ike, aana e kaꞌa unue ike uri kie ke niie mo ola kie kaꞌa toꞌo aani ike.

¹³Nou kaꞌa sare da ike nga mei hiꞌelaa huniꞌomu na uri hunie ngaeta mwala kire ke tola mwa-mwate, taꞌe saeku uri ahutana mwala kire ke mani tola sada. ¹⁴Oto maholo omu toꞌo aana mo ola hunge mala ngeena, e tohungei diana oto liutaa uri hunie omu ke peꞌie mo iini nge kire kaꞌa toꞌo aana ike nga mei ola. Hunie loꞌu mei i puri, mala uri omu kaꞌa toꞌo aana nga taa e adongamiu na uri kire toꞌo aana nga mo ola hunge, nge kire sai peꞌiꞌomu noꞌone urine. Oto urine omu kei meni tola sada eena. ¹⁵Oto aana peꞌinge huniꞌomu heiliu urine, mei wala nge uusulana e lae i laona mo Uusu-uusu Maaꞌi kei toꞌohuu noꞌone huniꞌomu, aana uusulana e lae uuri, Iini nge e soꞌokonie mo ola hunge, e kaꞌa loohaꞌinie loꞌu nga mei ola, na iini e soꞌokonie mo kele ola mwai-mwei mola, taꞌe e adona taane mola.Eksodas 16:18

Mo Mwane Diana Ke Lio I Sulie Mo Niinge

¹⁶Melu ko paalahea God oto liutaa haahie e niie mei neꞌisaenga ngeena hunie a Taetas huni peꞌilemiu oto mala iꞌemeelu noꞌone, melu ko peꞌiꞌomu. ¹⁷Aana e kaꞌa mwaꞌe-mwaꞌe ike mola aana uri melu haaraie, taꞌe aena aana e tohungei sare peꞌiꞌomu oto noꞌone, na ingeie oto maraana nge e loꞌongaꞌinie uri ke lai hule oto hao i seemiu. ¹⁸Na melu ko uusungeꞌinie ngaeta aasikaelu loꞌu oto noꞌone hao peꞌie a Taetas. Ahutana mwala aana ahutana mo soihaadaꞌinge hailiu kire haꞌamaꞌu aana aasikaelu ienini haahie asunge ingeie aani tarohaꞌinilana Tataroha Diana. ¹⁹Na loꞌu sapeitana leune, mo soihaadaꞌinge kire lio hilisie a porona huni lae peꞌiꞌemeelu aana melu ko toolea niinge ni saediananga ngeena hunire kira hiiwalaimoli i Jerusalem. Melu ko toolea niinge ngeena huni haꞌamanikuluꞌaa Aalaha ikie, na huni haataꞌinie uri kie neꞌisae mouteꞌi toꞌohuu huni peꞌie kira hiiwalaimoli. ²⁰Na maholo melu ko toolea niinge ngeena, melu ko tohungei hei kinetaꞌi mwaanie uri nga mo iini e upwesiꞌemeelu haahie lio i sulilana toꞌoha oto paine nge niilana e lae ienini. ²¹Aana saemeelu uri hunie melu ke asuie hunie ke oodo i maana Aalaha ikie, na noꞌone i maana mo iinoni.

²²Na melu ko uusungeꞌinie ngaeta aasikaelu loꞌu noꞌone hao peꞌirerue. Aana mo maholo oto hunge oolune nga aasikaelu ienini e haataꞌinie huniꞌemeelu uri e mwaꞌe-mwaꞌe toꞌohuu huni peꞌi-peꞌi aana taꞌena nga ola. Na oto ienini ko si mwaꞌe-mwaꞌe loꞌu liutaa huni peꞌi, aena aana e norutoꞌo oto aamiu uri iꞌomu noꞌone omu ke nii-nii peꞌi saediananga.

²³Omu saie mola uri a Taetas, ingeie a oaku ni ngeena na ko esu tararuru peꞌieu hunie peꞌilemiu. Na ngaeta ro aasikaelu nge kirerue ko lae-lae peꞌie, ikirerue oto e ro hurulaꞌaa mo soihaadaꞌinge ni ngeena, na asunge ikirerue ko haꞌamanikuluꞌaa satana Kraes. ²⁴Oto aena urinena, omu ke tohungei haataꞌinie oto manata-diananga iꞌomu aana e oolu mwane ngeena, hunie mo soihaadaꞌinge mai leu kire ke rongoa oto tolahamiu, na hunie kire ke saie oto uri e tohungei melisine oto melu ke toohaꞌiniꞌomu mala melu ko esuie ienini.

A Pol E Hatongaꞌi I Sulie Niinge Hunie Kira Hiiwalaimoli Taꞌau I Jerusalem

¹Nou saie uri omu saenanau taane oto aana niinge nge kolu ko uusungeꞌinie taꞌau huni peꞌie mwala a God i Jerusalem, na nou kaꞌa sare ere hiitoꞌo ike loꞌu i sulie leune. ²Nou saie oto uri omu mwaꞌe-mwaꞌe huni peꞌire, oto nou lae peꞌi ere laheꞌomu i saana mwala mai aana poꞌo ni henue i Masedonia uuri, “Kira hiiwalaimoli hao i Korinit i laona poꞌo ni henue i Akaea, na oto ahutana kira hiiwalaimoli aana poꞌo ni henue ngeena, kire aehota dau aakau oto huni peꞌi aana halisi e mango haona.” Na mwaꞌe-mwaꞌenga iꞌomu e taꞌelaꞌinie saena mo iini hunge mai leu i Masedonia, oto kire ko meni sare nii oto noꞌone. ³Oto ie no ko uusungeꞌinie e oolu aasikaelu hao uri hunie omu ke dau aakau aana niinge iꞌomu oto mala nou unuena, mwaanie ere toohaꞌinilemiu nge nou esuiena e neꞌi wala mwaakule mola. ⁴Aana mala uri nga mo iini aana mwala mai Masedonia kei lae hao i seemiu peꞌieu, na kire kei lio oodoie mola uri omu kaꞌa dau aakau mala nou unuena, nge ne kei tohungei masa aana nou norutoꞌo mone oto aamiu. Na iꞌomu noꞌone, omu kei masa oto hiitoꞌo. ⁵Aena urine, nge nou unue uri e oolu aasikaelu ke holaꞌi lae hao i seemiu hunie kire ke peꞌiꞌomu huni deu aakau aana niinge nge omu heiholotaꞌinie uri omu kei niie. Urine na omu ko haataꞌinie uri niinge ngeena mei ola omu deu aakau oto mola aana peꞌi saediananga, na e kaꞌa ola ike aana melu deu rarahiꞌomu.

Kie Ke Nii Aani Ilenimwaꞌenga Na Mwaanie Kie Nii Mola Aena Aana Kire Dau Rarahikie

⁶Omu ke sai diana aana uri nga iini nge ko hesie mola tootaꞌi kele litei ola, kei soꞌokonie noꞌone mola tootaꞌi kele hue-huei ola mwaaniꞌi. Na nga iini ko hesie mo litei ola hunge nge kei soꞌokonie mo hue-huei ola hunge noꞌone mwaaniꞌi. ⁷Oto nga iini na e nii-nii oto i sulie saena, na mwaanie e nii mola aana kire ko deu rarahie, na ingeie e lalawa huni nii. Taꞌe ke nii oto aani mwaꞌe-mwaꞌenga, aana a God e manata diana hunie iini ko nii aani ilenimwaꞌenga. ⁸Na a God e sai haꞌadianaꞌaꞌomu oto liutaa, hunie uri omu ke toꞌo aana ahutana walu ola e malisine omu ke toꞌo aani, hunie ke mwadaꞌusie taꞌena nga asunge diana suli maholo. ⁹Aana mo iinoni diana, uusulana e lae i sulire i laona mo Uusu-uusu Maaꞌi uuri, E nii aani saediananga hunie kira maitale, na asunge diana ingeie mwala kei aamasitoꞌo aana oto taraꞌasi.Sam 112:9¹⁰A God oto iini e sai da mo litei ola kie ko hesiꞌi ke aahu diana hunie maholo ni soꞌokoninge kie ke toꞌo ngaulaa huni ngeuꞌi, na kie ke toꞌo aana mo litei ola loꞌu huni hesiꞌi. Oto urine, maholo omu ko nii peꞌi saediananga, nge a God ke si haꞌahungeꞌaa nga taa omu toꞌo aana, hunie uri omu sai nii oto loꞌu liutaa hunie kira maitale. ¹¹A God ke si da hunie omu ke toꞌo aana taꞌena nga ola e malisine omu ke toꞌo aani hunie ke mwadaꞌusie niinge ke paine loꞌu. Oto mwala hunge ke si paalahea God haahie niinge iꞌomu maholo melu kei toolea taꞌau hunire. ¹²Aana mei esunge diana nge omu ko esuie ngeena e kaꞌa lae ike mola huni haꞌa-adoa mo iinoni a God aana mo ola kire maitale aani, taꞌe kei da noꞌone uri mo iini hunge kei paalahea God. ¹³Na i tehulaꞌana mei esunge diana iꞌomu ngeena ko haataꞌinie hiiwalaimolinge iꞌomu e toꞌohuu, nge mwala oto hunge kei paalahea God. Omu hiiwalaimoli aana Tataroha Diana a Kraes na omu tola i sulie Tataroha Diana ngeena aani peꞌinge hunire na ahutana mwala loꞌu. Oto mwala hunge kei haꞌamanikuluꞌaa God haahie mwaꞌe-mwaꞌenga iꞌomu. ¹⁴Oto kire kei aarengaꞌi talamiu peꞌi manata-diananga huniꞌomu, aena aana omu haataꞌinie hahuꞌana manata-diananga a God hunire. ¹⁵Na ahutaka kie ke paalahea God haahie hahuꞌana niinge oto paine e niie hunikie, nge hule aana nga mo wala e kaꞌa malisine ike ere-luhesilana.

A Pol Kei Haꞌaloie Mo Haꞌa-uusuli Eero-eero I Korinit

¹Oto ineu a Pol maraaku no ko eitanaiꞌomu hunie uri omu ke rongo hunieu. Nou rongoa uri ngaeta mo iini eemiu kire ko unue uri nou sai ere hiitoꞌo huniꞌomu mola aani uusu-uusu maholo nou iiꞌo haꞌatauliꞌomu, taꞌe no ko meꞌu ni ere urine maholo nou iiꞌo peꞌiꞌomu. !Haꞌike! Taꞌe no ko heimaanie tolahana a Kraes aana ingeie e saemamae na e lai maneko ²na aena urine no ko eitanaiꞌomu uri hunie omu ke oolisie tolahamiu. Omu ke suꞌuri deu rarahieu uri hunie ne ke tohungei ere raramaa oto huniꞌomu aana maholo ne kei heꞌi lae loꞌu hao i seemiu. Aana ne kei tohungei ere hiitoꞌo taane aana mo iini nge kire ko unue uri melu ko esu mola i sulie tolahana mo iinoni ni welumalau hunie uri melu ke toꞌo-toꞌo. ³E toꞌohuu taane uri iꞌemeelu mo iinoni mola, taꞌe melu kaꞌa ooho ike aana nga mo reisinge ni welumalau wa aani tolahai ola aaela. ⁴Mo reisinge nge melu ko ooho aani, kaꞌa mo ola ike aana walumalau, taꞌe mo reisinge kire honu aana nanamanga a God, na hule aana kire sai aꞌailaꞌasie mo maelonga a God maꞌalana kire nanama loꞌu uri taa. ⁵Oto melu sai ohoie mola taꞌena nga neꞌisaenga honosie a God aana mo reisinge ngeena, na melu sai oho aasie mola taꞌena nga ere-toohaꞌinge nge mwala ko unu-unue aana kire sereꞌi eeliꞌu huni tola i sulie a God. Na aana mo reisinge ngeena melu tola hehesie oto mo neꞌisaenga takalo ikire na melu ko haꞌa-uusulire huni tola i sulie a Kraes. ⁶Na maholo omu tola i sulie oto ahutana walu ola i sulie a Kraes, nge ne ke si haꞌaloie mo iini nge kire ko hei-heitohe ue, aana melu keluie oto pasi aakau loosire.

⁷Ngaeta mei ola omu ko deu aaelasie nge omu ko lio mola hunie mo ola e lio kohi poꞌoi sinaha. Taꞌe mala uri nga mo iini eemiu ko loꞌongaꞌinie uri ikire oto mo hurulaꞌaa a Kraes, nge e diana uri hunie kire ke lio saie uri iꞌemeelu noꞌone mo hurulaꞌaa a Kraes, na taꞌe ikire mola haꞌike. ⁸E lio mala uri no ko ere toohaꞌi oto i sulie nanamanga aana iiꞌo-iiꞌoha a Aalaha e niie hunieu, taꞌe aana ke urine na nou saꞌa masa ike huni ere i sulie, aena aana nanamanga ngeena ola huni haꞌamaꞌutaꞌaa hiiwalaimolinge iꞌomu, kaꞌa ola ike huni waeliꞌomu. ⁹Na nou kaꞌa sare da ike omu ke loꞌongaꞌinie uri no ko sare haꞌamaꞌusiꞌomu mola aana mo uusu-uusu ineu. ¹⁰Nou saie taane uri nga mo iini eemiu ko unue uuri, “Mo uusu-uusu a Pol kire tohungei rongo hiꞌe oto hiitoꞌo, taꞌe maholo kei iiꞌo peꞌikolu oto e si mamaelaꞌa mola na walana kaꞌa urihana ike loꞌu nga mei ola.” ¹¹Mwala urine, e malisine kire ke sai diana aana uri nga taa melu ko unu-unue aani uusu-uusunge takoiꞌomu aana melu iiꞌo haꞌatauliꞌomu, e sada mola aana nga taa melu sai esuie aana maholo melu ko iiꞌo peꞌiꞌomu.

Iini A God E Neꞌisae Paine Aana Nge E Paine Liutaa

¹²Oto mwala nge kire ko haꞌapainaꞌara maraada ngeena, melu kaꞌa sare unue ike uri melu sada mola peꞌire wa uri melu peine sada mala ikire. !Haꞌike! Aana ikire, kire haꞌa-uuresie mola mo haꞌatolanga ikire maraada huni totohoa tolahada maraada, na kire ko lio-lio mola i matolada huni lio saie a tei aada ko deu diana aana mo haꞌatolanga ikire maraada ngeena. !Taꞌe hero-heronga mola ni ngeena! ¹³Na iꞌemeelu, melu saꞌa totohoa ike tolahameelu aana mo haꞌatolanga ikire ngeena, taꞌe iꞌemeelu melu sai ere toohaꞌiniꞌemeelu mola haahie mei ola e malisine melu ke ere urine aana. Oto melu kei ere toohaꞌi mola i sulie mei esunge nge a God e niie huniꞌemeelu, na iꞌomu oto nga aapa aana mei esunge ngeena. ¹⁴Na maholo melu ko ere toohaꞌi i suliꞌomu ngeena, melu kaꞌa ere toohaꞌi ike liutaa aana nga taa e malisi. Taꞌe melu sai ere toohaꞌi i suliꞌomu urine aena aana iꞌemeelu kaꞌu ni melu holaꞌi lae hule oto hao i seemiu peꞌie Tataroha Diana i sulie a Kraes. ¹⁵Na melu kaꞌa ere toohaꞌiniꞌemeelu ike haahie mei esunge nge ngaeta mwala kire asuie. Taꞌe saemeelu hunie uri hiiwalaimolinge iꞌomu ke paine, na asunge iꞌemeelu i matolamiu ke paine loꞌu na ke hungu diana. ¹⁶Urine nge melu sai lae i tarohaꞌinie Tataroha Diana loꞌu aana ngaeta mo henue poꞌo wau eemiu nge kire kaꞌa rongoa ue. Aana melu kaꞌa sare toohaꞌinie ike mei esunge ngaeta mwala e asu mangoa oto. ¹⁷Taꞌe melu ko sare tola i sulie nga taa mo Uusu-uusu Maaꞌi e unue uuri, A tei ko sare ere toohaꞌi, ke toohaꞌinie mola nga taa a Aalaha e asuie.Jeremaea 9:24¹⁸Aana iinoni nge a Aalaha e neꞌisae paine aana haꞌalaa a God ko saetoꞌo aana, e kaꞌa ike iinoni nge e neꞌisae paine aana mola maraana.

Omu Ke Hiiwalaimoli Aana Haꞌa-uusulinge Toꞌohuu Mola

¹No ko ere ni pweu oto ni ie, taꞌe nou saetoꞌo aana uri omu ke rongo rako kaꞌu loꞌu eeku. ²Mala mo mamaꞌa ko lio i sulie mo keni kaleda hunie kire ke neꞌi keni raoriꞌi lae-lae hule aana kire kei haꞌaruru aana kire toꞌo poro, nge ineu noꞌone no ko lio i suliꞌomu urine i naꞌona God. No ko lio i suliꞌomu oto mala a God ko lio i suliꞌomu, aana nou heiholotaꞌinie oto uri omu kei toꞌo aana mola nga taꞌa-taꞌa poro, na porona oto a Kraes. Saeku omu ke hiiwalaimoli mola aana a Kraes hahaiteli hunie uri aana hai dinge haꞌarurunge, nou sai maaiꞌomu taꞌau nana a Kraes mala oto nga keni raoriꞌi. ³Taꞌe no ko maarara, mwaanie nga mo iini e waelie manata-diananga iꞌomu hunie a Kraes na mei sae manola huni lulu i sulie. Na no ko maarara mwaanie e si urihana mola maholo mwaa e eeroa a Iv aana mo eeronga ingeie oto i naꞌo. ⁴No ko maarara urine aena aana omu ko toliꞌaasie mola mwala ko lae mai huni ere i sulie ngaeta Jisas nge e aaopa mola mwaanie iini nge iꞌemeelu melu tarohaꞌinie kaꞌu huniꞌomu oto waite. Na omu ko ilenimwaꞌe mola peꞌie ngaeta taungei liꞌoa na ngaeta taungei tataroha diana nge kire tohungei aaopa oto hiitoꞌo mwaanie Liꞌoa Maaꞌi na Tataroha Diana a Jisas nge melu toolea mai huniꞌomu. ⁵Ineu nou loꞌongaꞌinie uri nou kaꞌa mwai-mwei ike mwaanie mo iini nge omu ko unu-unue uri ikire mo hurulaꞌaa paine. ⁶Ohe nou kaꞌa sai haꞌalaunie ike walaku mala ikire, taꞌe ineu nou tohungei saenanau oto liutaa aada aana Tataroha Diana, na no ko haataꞌi diana aana leune huniꞌomu tarau aana ahutana mo esunge ineu i matolamiu.

⁷Nou kaꞌa lae ike peꞌi sukaa nga mei ola mwaaniꞌomu maholo nou tarohaꞌinie Tataroha Diana a God namiu, taꞌe nou haꞌamwai-mweiꞌaau oto mola uri hunie omu ke neꞌi iinoni peine na iinoni diana. ?Ohe nou deu aaela ni urine? ⁸Ohe omu kaꞌa saie ike uri mo soihaadaꞌinge aana ngaeta mo poꞌo ni henue ni kire nii-niie taane waaiteku hunie uri ne ke lae peꞌi esu aani peꞌilemiu. Aana nga taa nge e malisine ne ke asuie nada, kaꞌu no ko si esuie mola namiu ie, oto nou karaꞌi hii mala uri nou pelire ni ngeena. ⁹Oto aana maholo nou iiꞌo hao peꞌiꞌomu, nou kaꞌa loꞌohie ike nga mei ola aamiu. !Haꞌike! Taꞌe mo mwaasine aani hiiwalaimolinge nge kire oꞌoꞌo mai aana poꞌo ni henue i Masedonia ni kire lae hao i Korinit huni peꞌieu aana mei toꞌoha. Nou tohungei kinetaꞌinie tolahaku mwaanie nou da nga mei hiꞌelaa huniꞌomu aana taꞌena nga mei ola, na ne kei lae taraꞌasi oto mola urine. ¹⁰Mala no ko unu-unue mola walaimolinge i sulie a Kraes, nge no ko ere toꞌohuu noꞌone uri nga iini eemiu aana poꞌo ni henue iꞌomu i Akaea e saꞌa roroꞌa da ike uri ne ke mamalo mwaanie toohaꞌinge ineu ienini. ¹¹?Oto e ue? ?Uri omu loꞌongaꞌinie uri no ko ere urine aena aana nou kaꞌa manata diana ike huniꞌomu? !Haꞌike! A God e saie taane uri nou tohungei manata diana huniꞌomu.

¹²Ngaeta mwala kire ko sare ere toohaꞌinire maraada uri kire ko esu sada mala iꞌemeelu mo hurulaꞌaa. Taꞌe leune e kaꞌa toꞌohuu ike, na ineu, no ko uure honosie mwala urine. Aena urine nge nou saꞌa mamalo ike mwaanie nga taa nge no ko esuie ienini huni haataꞌinie uri ere-toohaꞌinge ikire ngeena e kaꞌa toꞌo aahuꞌine ike. ¹³Aana mwala urine, ikire nga mo hurulaꞌaa toꞌohuu haꞌike na asunge ikire mei ola toꞌohuu haꞌike noꞌone. Ikire mwala eero-eero na kire ko lupweꞌi deu mola mala uri ikire mo hurulaꞌaa maaꞌi a Kraes. ¹⁴Na leune e kaꞌa ola ike huni pangataꞌinie, aena aana hule aana a Pwelu Eero-eero e sai haꞌakolo noꞌone hunie ke lio oto mala nga ensel ni raa-raa. ¹⁵Oto mwaanie kie pangataꞌi aana maholo mo koni-konihe ingeie noꞌone kire ko haꞌakolo urine, hunie kire ke lio mala mo koni-konihe a God. Taꞌe aana Dinge Ooreta, nge haꞌaloilada ke si lae taane, na kei tohungei adona oto aaelanga kire ko esuie ngeena.

A Pol E Ere Toohaꞌi I Sulie Sapesalunge Ingeie, Aana Leune E Haataꞌinie Nanamanga A God

¹⁶No ko sare heꞌi unue loꞌu mola uri omu ke suꞌuri loꞌongaꞌinie uri ineu nga pweu. Taꞌe mala uri nga iini eemiu ko loꞌongaꞌi takalo urine, nge saeku uri omu ke rongo hunieu mala omu ko rongo hunie mo pweu, na omu ke toliꞌaasieu hunie uri ne ke kele ere toohaꞌinieu. ¹⁷A Aalaha e kaꞌa sai ere toohaꞌi ike urine, taꞌe no ko ere toohaꞌi mola urine mala mo pweu. ^18-19No ko ere urine aena aana nou leesie uri maꞌalana omu ko unue kaꞌu uri iꞌomu mo iinoni saenanau, taꞌe omu ko tohungei sare rongo hunie mwala e pweu. Mo haꞌa-haꞌa-uusuli eero-eero oto hunge ngeena ko ere toohaꞌinire mola i sulie mo neꞌisaenga ni welumalau, na iꞌomu, omu ko sare pwaarongo mola hunire. Oto saeku ne ke ere toohaꞌinieu noꞌone urine, hunie omu ke saetoꞌo aaku. ²⁰Nou leesie loꞌu uri omu ko saetoꞌo aana mola mo poro paine huni deu rarahiꞌomu, na kire ko haꞌamweꞌu-mweꞌuꞌomu, na kire ko pweloꞌomu, na kire ko lio toli mola aamiu, na kire ko hide-hidelie papalimiu. !Haꞌike eena mwae! ²¹Oto no ko masa huni unue uri e toꞌohuu taane uri nou kaꞌa sada ike peꞌire. Nou kaꞌa sada ike peꞌire aana leune, aena aana nou kaꞌa sai neꞌisae mouteꞌi ike huni da nga mei ola urine aamiu.

Taꞌe mala mo iini nge kire ko neꞌisae mouteꞌi huni ere toohaꞌinire, nge ineu na nou neꞌisae mouteꞌi huni ere toohaꞌi noꞌone urine, maꞌalana erenga ngeena ke rongo mala erenga mo iini e pweu. ²²Mala kire ko unue uri ikire oto mo ai iinoni toꞌohuu ni Jiu, ineu na e urine noꞌone. Kire ko unue uri ikire aana aalahanga mo Israel, ineu na e urine noꞌone. Kire ko unue uri ikire mo weuwana Ebraham, ineu na e urine noꞌone. ²³Kire ko unue uri ikire oto mo koni-konihe a Kraes. No ko ere loꞌu mala iinoni e pweu, taꞌe ineu oto nou tohungei esu mala koni-konihe a Kraes loꞌu liutaa aada. I tehulaꞌana asunge a Kraes ienini nou sapesalu oto hiitoꞌo liutaa aada. Ineu oto nou iiꞌo i nume ni hoꞌo mo maholo hunge liutaa aada. Ineu oto kire wini-winieu hiitoꞌo liutaa aada. Ineu oto nou karaꞌi mae mo maholo hunge liutaa aada. ²⁴I tehulaꞌana asunge nana Kraes ienini, e lime maholo nge mo naꞌohai mwane ni Jiu, kire haꞌaletehieu aani repusileku i sulie tolahada nge kire sai repusie iinoni aana e oolu aawalai maai repunge mwana siwe. ²⁵Na e oolu maholo nge mo naꞌohai mwane ni Rom kire rapusieu aani mai ei. Na ngaeta maholo mwala kire uuꞌieu aani heu huni horo maesieu. Na e oolu maholo oto mo haka nou lae-lae aani kire dodo peꞌieu. Na ngaeta maholo melu dodo i laona matawa na aasi e talei aahe-aahesieu mola hunie hai dinge laku peꞌie nga hai rodo nge kire si leuhieu. ²⁶Mo maholo oto hunge nou weo aani laenga, na nou oodoie mo ola oto hunge ni maesiꞌi. Nga mo maholo ne ke lae oodoie mo wei ko kone, na ne ke oodoie mo horopeli. Nga mo maholo ne ke lae oodoie mwala ineu loꞌu mola mo Jiu kire ko karaꞌi horoꞌieu, na loꞌu mo iini nge ikire nga mo Jiu haꞌike. Na hule aana ngaeta mo maholo mo iini ko unue uri ikire mo eesike aana hiiwalaimolinge aana Kraes, na ikire noꞌone kire ko karaꞌi horoꞌieu noꞌone. Taꞌe ikire mo eesike toꞌohuu haꞌike ni ngeena. Nga mo maholo ne ke lae oodoie mo ola ni maesiꞌi aana mo huilume paine, na i laona hanuesala, na noꞌone i eesi. ²⁷Nou iiꞌo mola aani weonga, na nou oodoie mo aasanga oto hunge aena aana asunge nana Kraes. Mo maholo oto hunge asunge ngeena ko haapilingaꞌa haahieu hule aana nga maholo ni maꞌahunge na haꞌike loꞌu. Mo maholo hunge nou hiolo na nou maarou, na ngaeta mo dinge nga kele mei ngeulaa ne ke hikana na haꞌike loꞌu. Mo maholo hunge no ko maꞌahu mola mala iiola, na aana mo maholo hunge no ko maesie mola mamaꞌudi aana wawai e paine, na nou kaꞌa toꞌo aana ike nga mei ola ni eeluhieu aana. ²⁸Oto loꞌu sapeitana walu ola ienini, na no ko tolahiꞌe mola i suli dinge aani lio sulilana mo soihaadaꞌinge. ²⁹Aana maholo hiiwalaimolinge nga iini e mamaelaꞌa, nge saeku ko hii mamaelaꞌa oto noꞌone haahie. Na maholo nga iini ko haꞌatataroa nga iini huni domu i laona oorahaꞌaa, nge saeku ko mela mala dunge aana aaelanga urine ko da no ko tohungei saewasu oto hiitoꞌo.

³⁰Aena aana omu deu rarahieu mone, nge nou ere toohaꞌinieu. Taꞌe nou sai ere toohaꞌinieu taane mola aana mo aasanga kire raꞌusieu aana leune e haataꞌinie uri nou kaꞌa toꞌo aana ike nga mei aꞌailaꞌanga tohuku. ^31-33Nou sai ere mola i sulie mo aasanga mala maholo nou oꞌoꞌo wau aana huilume i Damaskas na mwane paine haahie huilume ngeena e sasare tapolieu. A porona ko esu aana nanamanga a Aretas Inemauri, oto e uusungeꞌinie mo ramo huni tapolieu, na ngaeta mo ramo kire kakakalie mo maai para aana para paine ahuie huilume ngeena. Taꞌe ngaeta mo iini aana kira hiiwalaimoli kire peꞌieu hunie ne ke tahi mwaanire. Melu hane taꞌau hunie ngaeta maaureꞌi aana para paine ahuie huilume i Damaskas, na kire neꞌieu i laona luluꞌe oto paine, oto kire si uukueu i aano poꞌoi sinaha mwaanie huilumena. Iau, God Aamana Aalaha ikie a Jisas nge kie ko soi haꞌamanikuluꞌaa oto tarau, e saie uri nou kaꞌa eero ike.

Maꞌalana A Pol E Sai Ere Toohaꞌinie Maraana Toꞌohuu, Taꞌe E Sereꞌi Esuie

¹Nou saie mola uri e kaꞌa diana ike huni ere toohaꞌinieu, aana mei ola mwaakule mola ni ngeena, taꞌe aana omu ko deu rarahieu, nge ne ke ere toohaꞌinieu loꞌu haahie mo ola e waꞌaraa hunieu aana a Aalaha e haataꞌiniꞌi oto aaku. ^2-3Ola mala aawalai helisi mwana hai e mango, a God e tooleau12:2-3 Aana erenga ni Krik a Pol e aalahuu i sulie maraana peꞌie mo wala uuri, “a God e toolea ngaeta mwane a Kraes oto taꞌau i Lengi.” oto hunie hahuꞌana leu taꞌau i Lengi nge e iiꞌo aana. Nou kaꞌa sai diana aana, ohe nou lae toꞌohuu aana sapeku wa ohe taꞌe maurihaꞌaku mola e lae. Taꞌe a God mola e saie. ⁴Nou saie mola uri a God e tooleau oto taꞌau i saana i Paradaes, kaꞌu nou rongoa mo ola kire tohungei menikuluꞌe oto liutaa, hule aana ere-erenga ikie mo iinoni e kaꞌa toꞌo aana ike mo wala diana huni lado luhesie mo tohungei ola manikuluꞌe ngeena. ⁵Oto taungei ola urine e malisine ne ke ere toohaꞌinie taane, taꞌe nou saꞌa asuie ike, aana nou neꞌisae mouteꞌi huni ere toohaꞌinieu mola haahie nga taa ko haataꞌinie uri nou kaꞌa toꞌo aana ike nga mei nanamanga tohuku. ⁶Mala uri ne ke sare ere toohaꞌinieu, nou saꞌa dau ike mala mo iinoni e pweu ngeena, aena aana nou sai ere toohaꞌinieu toꞌohuu aana mo ola oto hunge. Taꞌe ineu, nou kaꞌa sare ere toohaꞌinieu ike loꞌu, aana nou sereꞌinie uri mwala ke haꞌamaꞌu eeku liutaa aana nga taa e malisine kire ke asuie takoieu haahie asunge ineu na haꞌa-uusulinge ineu.

⁷Oto uri hunie ne ke suꞌuri toohaꞌinieu haahie walu ola paine nge a God e haataꞌiniꞌi eeku ngeena, e niie loꞌu mei ola huni waelie sapeku. E toliꞌaasie a Satan ke saunie sapeku aana mei olana, mwaanie nou toohaꞌinieu. ⁸Nou eitanaie kaꞌu a Aalaha haꞌa-oolu uri ke taꞌaasie mei olana mwaanieu. ⁹Taꞌe e unue mola hunieu uuri, “Manata-diananga ineu huniꞌo e paine na e adomu oto, aana nanamanga ineu e sai peine oto liutaa maholo o ko mamaelaꞌa.” Oto no ko tohungei ilenimwaꞌe huni toohaꞌinieu haahie mamaelaꞌanga ineu, hunie uri nanamanga a Kraes ke iiꞌo oto i lalo aaku. ¹⁰Aena mei olana nge nou ilenimwaꞌe mola haahie mamaelaꞌanga, na maaleledinge, na mo aasanga, na haꞌamotaahinge, na taꞌena nga ola urine no ko lae oodoiꞌi i tehulaꞌana a Kraes. Iau, no ko ilenimwaꞌe mola aena aana maholo no ko mamaelaꞌa, nge no ko si aꞌailaꞌa loꞌu hiitoꞌo aana nanamanga a God.

A Pol E Tolahiꞌe Haahie Mo Korinit

¹¹No ko deu oto mala pweu aana nou ere toohaꞌinieu urine, taꞌe iꞌomu ni omu ko si da no ko teꞌurine. Aana e malisine uri omu ke lalado diana oto i sulie asunge ineu, taꞌe omu rohu mola. Ineu nou kaꞌa adona ike taane nga mei ola, taꞌe aena aana nanamanga a God e iiꞌo i lalo aaku, oto mo hurulaꞌaa paine nge omu tohungei saetoꞌo aada ngeena, na kire kaꞌa paine ike liutaa aaku aana nga mei ola oto ooꞌoo. ¹²Maholo nou oꞌoꞌo peꞌiꞌomu ngeena nou toli rako mola peꞌiꞌomu, na nou lae peꞌi esuie mo huꞌi-huꞌite na mo ola ni pangataꞌinge na mo tolimaa aana nanamanga a God. Walu ola huni haataꞌinie uri ineu nga hurulaꞌaa toꞌohuu a God ni ngeena. ¹³Nou peꞌi-peꞌi diana aamiu oto mala ngaeta mo soihaadaꞌinge no ko peꞌire, na peꞌinge ineu huniꞌomu e sada mola aana peꞌinge no ko niie hunire. Taꞌa-taꞌa mei ola mola nou esuie hunire nge nou kaꞌa da huniꞌomu, aana nou kaꞌa unue ike uri omu ke peꞌieu aani toꞌoha. ?Uri omu loꞌongaꞌinie uri nou deu aaela huniꞌomu aana leune? !Haꞌike eena mwae! Mala omu ko loꞌongaꞌinie uri nou deu aaela huniꞌomu aana leune, na omu ke neꞌisae-aasie kaꞌu mola hunieu.

¹⁴Ie no ko deu aakau oto loꞌu hunie oolune nga laenga ineu hao i seemiu eena. Na mala no ko esuie tarau, nou saꞌa haꞌahiꞌeiꞌomu ike aana nga mei ola. Nou kaꞌa saetoꞌo aana ike nga mei ola mwaaniꞌomu, taꞌe iꞌomu ni mola nou saetoꞌo aamiu. Aana omu ke saie uri mo kele mwela e kaꞌa malisine ike uri kire ke nii ola nana aamada na nikada, taꞌe e ro mauꞌana ngeena ni e malisine kirerue ke nii ola nana mo kaledarue. ¹⁵Oto no ko tohungei ilenimwaꞌe mola huni niie ahutana mo ola nou toꞌo aani namiu, hule oto aana ineu maraaku, huni peꞌiꞌomu huni hele aana maurihe huu. ?Oto aana ineu no ko manata diana liutaa huniꞌomu urine, uri iꞌomu, omu kei manata aaela mola hunieu?

¹⁶Omu saie taane mola uri nou kaꞌa haꞌahiꞌeiꞌomu ike, wa ne ke toolea nga mei ola mwaaniꞌomu. Taꞌe maꞌalana e urine, nga mo iini eemiu ko unue ue uri nou pweloꞌomu mola aani eeronga hunie uri ne ke toolea mo toꞌoha iꞌomu. ¹⁷?Oto e ue? ?Nou pweloꞌomu aana nga mei toꞌoha uri taa? ?Uri mo mwane nge nou uusungeꞌinire hao i seemiu kire pweloꞌomu aana nga mei toꞌoha? !Nou saie haꞌike! ¹⁸Nou eitanaie a Taetas uri hunie ke lae hao i maatoliꞌomu, na nou uusungeꞌinie noꞌone hao peꞌie ngaeta aasikaelu aana hiiwalaimolinge. ?Haꞌalaa omu loꞌongaꞌinie uri kirerue a Taetas kire eeroꞌomu aana maholona? !Haꞌike oto ooꞌoo! Na ineu, nou peꞌiꞌomu mola mala ingeie, aana iꞌemereꞌi a Taetas mere mani toꞌo aana mola e taꞌa-taꞌa mei sae takoiꞌomu, na tolahamereꞌi e sada mola huniꞌomu.

¹⁹Saꞌa mola omu ko loꞌongaꞌinie uri melu uusue walu ola ienini mola huni ere talihe aana nga moi taa kire ere aaelasiꞌemeelu eeni. !Haꞌike oto ooꞌoo! Taꞌe melu ere-ere oto mola mala a Kraes e saetoꞌo aana, na walu ola melu unu-unuꞌi, melu unuꞌi i maana God ni ngeena. Na ahutana walu ola melu uusuꞌi ienini, maeni iinoni maaꞌi, mo ola oto huni haꞌa-aꞌailaꞌaa hiiwalaimolinge iꞌomu ni ngeena. ²⁰Aana no ko maarara mwaanie uri maholo ne kei hule hao, na nou leledie helelamiu. Na ohe iꞌomu, omu saꞌa rongo ike hunieu maholo ne kei haꞌa-oodohiꞌomu. No ko maarara mwaanie nou lae hao i seemiu na nou oodoie mola walu ola mala haꞌa-erenga, na heotaꞌinge, na saewasunge, na sae aaelanga, na oopanga, na isinge, na sihoai-olanga, na toohaꞌinge, na maaola-olanga kire iiꞌo mola i matolamiu. ²¹No ko maarara mwaanie uri mo iini hunge nge kire oorahaꞌaala kaꞌu waite, na kire kaꞌa oonisae ike mwaanie iiꞌonga madaꞌa, na aeni-olanga, na walu ola ni masanga nge kire ko esuiꞌine. Oto urine ne kei tohungei saehuu, na ne kei masa i maana God i tehulaꞌamiu.

A Pol Kei Haꞌaloie Mo Korinit Mala Uri Kire Kaꞌa Holaꞌi Leie Tolahada Maraada

¹Oolune nga mai laenga ineu loꞌu mei huni maatoliꞌomu oto ienini. Oto omu ke lio talamiu, aana kolu saie oto uri mo Uusu-uusu Maaꞌi e unue uuri, Maholo nga iini ko haꞌasusungeꞌinie ngaeta iinoni i naꞌona mo mwane lei-lei, nga ro iinoni wa e oolu ke haro ere haꞌa-oaie nga taa ko unue ngeena, haꞌalaa kire ke si haꞌaloie.Diutronomi 19:15²Nou holaꞌi haꞌapasulie mo iini kire oorahaꞌaa kaꞌu oto waite aana ruana nga mai laenga ineu hao huni maatoliꞌomu. Oto ienini no ko haꞌapasulire loꞌu, na ngaeta mo iini nge kire kaꞌa mamalo ue mwaanie oorahaꞌaa. Omu ke saie uri maholo ne kei lae loꞌu hao i maatoliꞌomu, nou saꞌa aamasie ike loꞌu nga taꞌa-taꞌa iini eemiu nge ko oorahaꞌaa. ³Oto leune ke haataꞌinie toꞌohuu huniꞌomu uri no ko ere oalana a Kraes ni ngeena, aana omu kei leesie taꞌa-taꞌa nanamanga aaku nge omu ko leesie noꞌone aana a Kraes nge ko esu aꞌailaꞌa mola peꞌie nanamanga paine ingeie i matolamiu ngeena. ⁴E toꞌohuu taane uri e lio mala a Kraes e mamaelaꞌa kaꞌu, aana kire rapu taalengasie i lengine poꞌu-poꞌu. Taꞌe leune e si haataꞌinie mola nanamanga paine a God, aana e mauri loꞌu mwaanie maenga. Na iꞌemeelu noꞌone, melu lio mamaelaꞌa mala ingeie. Taꞌe melu kaꞌa mamaelaꞌa ike, aana melu ko meuri tararuru peꞌie a Kraes aana nanamanga paine a God, mei nanamanga nge melu ko esu oto aana huni peꞌiꞌomu huni lulu i sulie tolahana.

⁵Omu ke lio-lio diana talamiu na omu ke leiꞌomu maraamiu. Omu ke leie tolahamiu maraamiu huni leesie uri ohe omu ko lulu i sulie tala aana hiiwalaimolinge toꞌohuu taane wa haꞌike. Mala uri omu kaꞌa sai leesie ike tolahana a Jisas Kraes i lalo aamiu, nge omu kaꞌa sai diana aana ike a Kraes kaꞌune. ⁶Nou hiiwalaimoli uri omu kei lio saie taane aana tolahameelu uri iꞌemeelu mo hurulaꞌaa, melu sai diana aana a Kraes toꞌohuu taane. ⁷Na melu ko aarea a God uri ke peꞌiꞌomu mwaanie omu deu huꞌisie nga mei ola aaela. Melu kaꞌa aarengaꞌi ike urine hunie mwala ke laheꞌemeelu haahie asunge diana melu esuie i matolamiu. !Haꞌike! Taꞌe melu ko aarea God urine hunie uri helelamiu ke diana, maꞌalana nga taa mwala kei unue i suliꞌemeelu e diana wa e aaela. ⁸Aana melu saꞌa da ike nga mei ola huni waelie mo ola toꞌohuu, taꞌe melu ko esu oto mola tarau hunie walaimolinge ke mauri taraꞌasi. ⁹Melu ko ilenimwaꞌe mola huni iiꞌo mamaelaꞌa mala uri leune ke da uri iꞌomu, omu ke uure aꞌailaꞌa. Na melu ko aarengaꞌi oto tarau hunie uri hiiwalaimolinge iꞌomu ke ahu toꞌohuu hunie nga mei tolahai iinoni diana ke suꞌuri eiꞌaa mwaaniꞌomu.

¹⁰Oto aena urinena maholo nou kaꞌa iiꞌo ue peꞌiꞌomu taꞌe no ko uusue oto hao uusu-uusu ienini, hunie maholo ne kei hule hao ne ke suꞌuri ere raramaa huniꞌomu aana nanamanga nge a Aalaha e niie hunieu. Aana nanamanga ngeena niilana e lae hunieu uri hunie ne ke peꞌie hiiwalaimolinge iꞌomu ke maꞌutaꞌa loꞌu hiitoꞌo, na e kaꞌa ola ike huni waeliꞌomu.

Mei Wala Ni Saediananga Ooreta

¹¹Oto leu ooreta, maeni eesiku maaꞌi, ne ke unue mola hao huniꞌomu uri omu ke iiꞌo ni ilenimwaꞌenga mola. Omu ke dau aahonga hunie nga mei tolahai iinoni diana ke suꞌuri eiꞌaa mwaaniꞌomu, na omu ke tola i sulie walaku. Omu ke neꞌie taꞌa-taꞌa mei sae, na omu ke iiꞌo ni henuelama. Oto a God, iini nge ingeie aahuꞌine manata-diananga na hanuelamanga, ke si iiꞌo peꞌiꞌomu.

¹²Na saeku hunie omu ke mani hele kiꞌi heiliu13:12 Erenga ni Krik e unue uri kire ke “nono peꞌire hailiu” oto mala tolahada, taꞌe aana mo henue hunge siꞌiri tolaha ni hele-kiꞌinge e oolisie oto tolaha ni nononga ngeena. Maꞌalana e urine, taꞌe tolaha ni nononga ngeena e iiꞌo ue hule siꞌiri aana ngaeta mo henue karaꞌinie i Israel. mala mo heꞌimalahunanga maaꞌi. ¹³Ahutana mo iini maaꞌi a God mai leu ko niie hao saediananga ikire huniꞌomu.

¹⁴No ko aarengaꞌi hunie uri Aalaha ikie a Jisas Kraes ke haataꞌinie hahuꞌana manata-diananga ingeie huniꞌomu, na hunie uri a God ke haꞌadianaꞌaꞌomu aana manata-diananga ingeie, na hunie a Liꞌoa Maaꞌi ke lokoa ahutana saemiu aani hatanga peꞌie.