1 TESALONAEKA

Eetana Nga Uusu-uusu A Pol Hurulaꞌaa Hunie Mo

Tesalonaeka

?A tei ni e uusue uusu-uusu ienini?

A Pol Hurulaꞌaa ni e uusue uusu-uusu ienini, na ingeie nga iini aana mo hurulaꞌaa nge a Jisas e haꞌa-uuresie soihaadaꞌinge i lengide. Oto ingeie ngaeta hunu maꞌutaꞌa aana soihaadaꞌinge, na walana a God nge e lae peꞌi haꞌa-uusuli aana oto waite, e malisine haꞌa-uusulilaka ke lae aana hule mai siꞌiri.

?E uusue uusu-uusu ienini hunie kira tei?

A Pol e uusu-uusu hunie mo iini kire si aehota hiiwalaimoli aana a Jisas oto wau aana huilume i Tesalonaeka. Hanue ngeena e neꞌi naꞌohai huilume aana poꞌo ni henue i Masedonia aana aalahanga ni Rom oto i naꞌo, na hungelada mo Aapoloa Aaopa nge ikire nga mo Jiu haꞌike.

?Nga taa e rau-reu maholo e uusue uusu-uusu ienini?

Maholo a Pol Hurulaꞌaa e lae aana ruana nga laenga ni tarohaꞌinie Tataroha Diana a Kraes, e hule aana huilume i Tesalonaeka, na nga mo iini aada kire hiiwalaimoli oto aana a Jisas. Oto e iiꞌo oto peꞌire na ko haꞌananaure aana tolahana a Kraes. E kaꞌa tewa na mo Jiu ko upwesie oto a Pol aena aana kire heotaꞌinie haahie mo iini hunge ko lulu oto i sulie laeliwalanga ingeie. Oto mo Jiu kire maaola-ola huni horoꞌie, taꞌe kira hiiwalaimoli kire kinetaꞌinie na kire ko uusungeꞌinie oto mwaanie i Tesalonaeka i rodo hunie ke iiꞌo sapemawa aana huilume i Berea. Leesie Palonga 17:1-10. I purine nga kele maholo, a Pol ko tolahiꞌe i sulie kira hiiwalaimoli i Tesalonaeka aana e rongoa uri taungeꞌinilada ko lae. Oto e uusungeꞌinie oana, a Timoti i saada huni haꞌasusue hiiwalaimolinge ikire. Lae-lae maholo a Timoti e ooli mei saana peꞌie mei tataroha i sulie mo Tesalonaeka, nge a Pol ko uusue oto eetana nga uusu-uusu ingeie ienini hunire mo Tesalonaeka. Walu ola ienini e rau ola mala lime aawalai helisi mwana eeta i purine hutelana a Jisas (51 A.D.).

?E uusue uusu-uusu ienini huni taa?

A Pol e uusu-uusu huni paalahera mo Tesalonaeka haahie hiiwalaimolinge na manata-diananga ikire na kire uure maꞌutaꞌa ue. A Pol e uusu-uusu noꞌone huni haꞌa-oodohie loꞌongaꞌinge ikire i sulie oolinge mai a Jisas Kraes, aana ko aalamie mo dolosinge i sulie maholo uri taa a Kraes kei ooli loꞌu mei, na taꞌelaꞌinge kira hiiwalaimoli nge kire mae oto. A Pol e unue kire ke iiꞌo aakau loosie oolinge mai a Kraes, na ko ere haꞌasusure mola uri kire ke lae peꞌi esu mwa-mwanoto mola maholo kire ko maaꞌoohi peꞌi norutoꞌonga hunie hai dinge a Kraes kei ooli loꞌu mei.

?Nga taa ni mo pweu ni wala i laona uusu-uusu ienini?

oolinge mai a Kraes, hai dinge ngeena, manata-diananga

?Nga taa ni mo eehuꞌi tatala i laona uusu-uusu ienini?

1 Tesalonaeka 5:23-24

?Nga taa ni mo eehuꞌi neꞌisaenga i laona uusu-uusu ienini?

Aarengaꞌinge ni paalahenga haahie hiiwalaimolinge mo Tesalonaeka (1:1-10)

A Pol e haꞌa-aamasitoꞌoa mo Tesalonaeka aana maholo e lae i maatolire. (2:1–3:13)

Kie ke iiꞌo oodotaꞌi na kie ke mwaꞌe-mwaꞌesie asunge. (4:1-12)

A Kraes kei ooli taane loꞌu mei. (4:13–5:11)

Mei wala ni saediananga ooreta peꞌie aarengaꞌinge talana mo Tesalonaeka (5:12-28)

Mei Wala Ni Saediananga Hunie Mo Tesalonaeka

¹Saediananga mwaanieu a Pol na a Saelas na a Timoti huniꞌomu aana soihaadaꞌinge wau i Tesalonaeka. Iꞌomu oto mo iinoni a God Aamaka na Aalaha ikie a Jisas Kraes, na melu ko eitanai uri hahuꞌana manata-diananga na hanuelamanga ingeie ke iiꞌo peꞌiꞌomu.

²Suli maholo melu ko aarengaꞌi, melu ko paalahea God haahiꞌomu na melu ko aarengaꞌi talamiu uri a God ke lio i suli diana aamiu. ³Oto tarau aana aarengaꞌinge iꞌemeelu hunie a God Aamaka, melu ko aamasitoꞌo aana mo tolahai iinoni diana nge omu ko lulu i suliꞌi i sulie hiiwalaimolinge iꞌomu aana a Jisas, na mo weonga iꞌomu i tehulaꞌana omu manata diana hunie a God. Na melu ko loꞌongaꞌinie noꞌone uuranga aꞌailaꞌa iꞌomu aani norutoꞌonga aana a Jisas Kraes Aalaha ikie.

Mau-meuringe Mo Tesalonaeka E Haataꞌinie Tala Diana Hunie Mwala Hunge

⁴Maeni eesiku, melu manataꞌinie oto uri a God e manata diana huniꞌomu na e lio hilisiꞌomu oto nana. ⁵Aana maholo melu toolea mai Tataroha Diana huniꞌomu, melu kaꞌa toolea ike mai mola aani wala, taꞌe peꞌie nanamanga a Liꞌoa Maaꞌi, aana e haataꞌi diana aana aamiu uri e toꞌohuu. Na omu lio saie noꞌone urine aena aana mo ola melu euꞌesuiꞌi maholo melu iiꞌo peꞌiꞌomu, mo ola mola huni peꞌilemiu haliꞌite ni ngeena. ⁶Oto maholo omu hiiwalaimoli aana Tataroha Diana, omu heimaanie oto mo tolahai ola diana iꞌemeelu na aana Aalaha ikie. Na maꞌalana omu sapesalu hiitoꞌo kaꞌu i tehulaꞌana Tataroha Diana ngeena, taꞌe a Liꞌoa Maaꞌi e asuie omu ko ile-ilenimwaꞌe mola haahie. ⁷Aena urine, omu neꞌi tolimaa oto huni haataꞌinie tala diana hunie mo iini e hiiwalaimoli aana Jisas i laona mo poꞌo ni henue i Masedonia na i Akaea. ⁸Na e kaꞌa ike mola i Masedonia na i Akaea, taꞌe i tehulaꞌamiu mone, Tataroha Diana a Jisas ko tohungei taro hailiu. Ahutana mwala aana taꞌena nga leu kire mani rongoa oto uri omu hiiwalaimoli aana God, na nga mei ola hunie melu ke unue i suliꞌomu haꞌike loꞌu. ⁹Ahutana mwala ngeena ko meni ere i sulie oto diananga iꞌomu huniꞌemeelu maholo melu maatoliꞌomu, na uri omu eeliꞌu oto mwaanie palolana mo god eero-eero takoie asunge nana tohungei God Meu-meuriꞌe. ¹⁰Na kire ko laladoa noꞌone uri omu ko maaꞌoohie oto a Kalena kei lae mai uure taꞌau i Lengi. Ingeie oto a Jisas nge e taꞌelaꞌi mwaanie maenga, na ko haꞌa-uurikie mwaanie saewasunge a God nge ko lae mai aana dinge ni leinge.

A Pol E Asu Hiitoꞌo I Tesalonaeka

¹Maeni eesiku maaꞌi, omu manataꞌinie oto noꞌone, uri laenga iꞌemeelu weu i seemiu ngeena e kaꞌa totowai ike mola, taꞌe nga tohungei mei ola diana e maau taane mai mwaanie laenga ngeena. ²Omu saie taane uri i naꞌona melu lae mai seemiu i Tesalonaeka, mwala e tohungei teungeꞌiniꞌemeelu na kire ere aaelasiꞌemeelu oto hiitoꞌo wau i Pilipae. Taꞌe maꞌalana mwala hunge kire sare uure honosiꞌemeelu, a God ikie e peꞌi diana aameelu taane mola huni aatopuri aana maꞌunge na huni haꞌarongoꞌomu aana Tataroha Diana a God. ³Oto omu sai kohie mola uri melu kaꞌa haꞌa-olaꞌomu ike aani loꞌongaꞌinge takalo, wa aani eeronga, wa aani pwelonga. ⁴!Haꞌike! A God e lio hilisiꞌemeelu oto na e norutoꞌo oto aameelu uri melu melisine oto tarohaꞌinilana Tataroha Diana. Oto maholo melu ko ere, melu kaꞌa ere ike mola i sulie saena mwala, taꞌe oto i sulie saena God, iini e saenanau uri melu ke asu toꞌohuu nana, na e lio hilisiꞌemeelu huni esu nana. ⁵Na oto mala omu saie, melu kaꞌa lupweꞌi laheꞌomu ike mola aani wala diana huni haꞌa-olaꞌomu. !Haꞌike! A God e saie taane oto noꞌone uri melu kaꞌa saehanalie ike mo ola diana iꞌomu, ⁶na melu kaꞌa loꞌohie ike noꞌone uri iꞌomu wa nga mwala aaopa loꞌu kire ke laheꞌemeelu. ⁷E toꞌohuu oto. Iꞌemeelu, melu neꞌie oto mo hurulaꞌaa a Kraes, mo iini peine oto liutaa haahie soihaadaꞌinge. Oto iꞌemeelu mo hurulaꞌaa, melu sai haaraiꞌomu hunie taꞌena nga ola. !Taꞌe melu kaꞌa dau rarahiꞌomu ike! !Haꞌike oto ooꞌoo! Melu tohungei deu rako mola aamiu mala huꞌe ko lio i sulie kele wee-wee ingeie maholo ko haꞌasusuhie. ⁸Na aena aana melu tohungei manata diana huniꞌomu, melu ko ilenimwaꞌe mola huni peꞌiꞌomu, kaꞌa ike mola aani unulana Tataroha Diana a God huniꞌomu, taꞌe noꞌone aani toliꞌaasilana maurihaꞌameelu i tehulaꞌamiu.

⁹Maeni eesiku maaꞌi, nou saie uri omu ko aama-aamasitoꞌo taane aana weonga iꞌemeelu aana melu esu susue rodo na aatowaa mwaanie melu haꞌahiꞌeie nga iini eemiu maholo melu lae-laeliwala aana Tataroha Diana a God namiu. ¹⁰Maholo melu oꞌoꞌo peꞌiꞌomu mo iini omu hiiwalaimoli, tolahameelu e diana, na e oodo, na e maaꞌi takoiꞌomu. Oto omu meni saie mola leune e toꞌohuu, na a God na e saie noꞌone urine. ¹¹Omu saie taane noꞌone mola uri melu peꞌi diana aamiu oto mala aamana mo mwela ko peꞌi diana aana mo kalena. ¹²Aana melu ere-ere haꞌasusuꞌomu, na melu eitanaiꞌomu huni tola i sulie a Jisas, na melu ere hatongaꞌi huniꞌomu hunie omu ke iiꞌo aani iiꞌonga diana i maana a God. Aana e haaraiꞌomu hunie omu ke neꞌi iinoni aana aalahanga ingeie na hunie omu ke iiꞌo peꞌie aana manikuluhaꞌana.

¹³Melu ko lae peꞌi paalahea God oto liutaa haahie maholo melu lae mai haꞌarongoꞌomu aana walana God, omu rongo peꞌi hiiwalaimolinge aana uri walana God toꞌohuu na e kaꞌa walana ike mola iinoni. Na walana God ngeena ko esu taane oto i lalo aamiu mo iini omu hiiwalaimoli aana. ¹⁴Maeni eesiku, nga taa e raꞌusiꞌomu ngeena e rau taane oto noꞌone aana mo soihaadaꞌinge a Kraes Jisas aana poꞌo ni henue i Jiudia. Iꞌomu, omu sapesalu aana mwala iꞌomu loꞌu mola kire taungeꞌiniꞌomu, na e urihana noꞌone loꞌu mola ikire kire sapesalu aana mwala ikire mo Jiu kire taungeꞌinire. ¹⁵Mwala ngeena kire horo maesie mo propet na Aalaha ikie a Jisas, na kire taungeꞌiniꞌemeelu noꞌone aana kire oohe aasiꞌemeelu mwaanie hanuena. Kire haꞌasaewasuliꞌaa God na kire tohungei waelie taꞌena nga iinoni, ¹⁶aana kire sare uure honosiꞌemeelu mwaanie haꞌa-uusulilana mo Aapoloa Aaopa i sulie haꞌa-uuringe a God. Oto aena kire dau urine, mo oorahaꞌaanga ikire ko pei-peine loꞌu mola hiitoꞌo, na saewasunge a God e hule oto aada.

A Pol E Sare Maatolie Loꞌu Mo Tesalonaeka

¹⁷Maeni eesiku maaꞌi, maꞌalana melu oopa kaꞌu mwaaniꞌomu aena aana mwala kire dau rarahiꞌemeelu, taꞌe melu kaꞌa pupulongosiꞌomu ike. Melu ko eriꞌapasie taane uri melu ke leesiꞌomu loꞌu, ¹⁸aana melu tohungei sasare aalihoꞌi loꞌu weu i seemiu. Ineu a Pol maraaku, nou deu aahonga aana nga mo maholo taane huni lae mai seemiu, taꞌe a Satan e uure honosiꞌemeelu mola. ¹⁹Iau, melu tohungei sare hule i seemiu loꞌu, aena aana melu tohungei norutoꞌo aamiu uri aana maholo a Jisas Aalaha ikie kei ooli mei, taꞌe omu sai uure maꞌutaꞌa mola, na melu sai ilenimwaꞌe haahiꞌomu hule aana melu uure aana totomwameelu. ²⁰Iau, iꞌomu nge omu ke si da melu ke uure aana totomwameelu peꞌie ilenimwaꞌenga.

¹Aena urinena, maholo melu ko lae otoi tolahiꞌe aana melu oopa mwaaniꞌomu ko tewa oto, melu loꞌongaꞌinie uri kei diana oto liutaa hunie ne ke oore mola maraaku i Atens, ²na huni uusungeꞌinie mola wau aasikaelu a Timoti hunie ke ere haꞌasusuꞌomu na ke haꞌa-aꞌailaꞌaa hiiwalaimolinge iꞌomu. Aana ingeie noꞌone ko esu nana God aani laeliwalanga aana Tataroha Diana i sulie a Kraes. ³Melu sereꞌinie uri nga iini eemiu ke toli puri aana hiiwalaimolinge ingeie i tehulaꞌana taungeꞌinilemiu nge ko lae ngeena. Iꞌomu maraamiu na omu saie oto uri taungei ola mala ngeena kei reu urine aaka, ⁴aana melu unu aakau kaꞌu oto aana huniꞌomu maholo melu oꞌoꞌo peꞌiꞌomu. Melu unue uri teungeꞌinilaka kei lae, na e toꞌohuu taane mala omu meni saie oto. ⁵Aena mei olana nge nou tohungei tolahiꞌe aana, na nou uusungeꞌinie oto wau a Timoti hunie ke lae oto wau i leesie hiiwalaimolinge iꞌomu e uri taa. Aana nou maarara mwaanie uri omu domu aana maholo a Pwelu Eero-eero e malaahongamiu, na urine asunge iꞌemeelu namiu e totowai mola.

⁶Taꞌe oto ie a Timoti e uure wau i seemiu na e hule aalihoꞌi oto loꞌu mei saameelu peꞌie mei tataroha e diana i sulie hiiwalaimolinge na manata-diananga iꞌomu uri e susu oto ue. E unue oodoiꞌemeelu uri omu sai aamasitoꞌo aameelu noꞌone aana ilenimwaꞌenga mala iꞌemeelu noꞌone, melu ko loꞌongaꞌiniꞌomu na melu ko sasare leesiꞌomu. ⁷Iau, maeni iinoni maaꞌi, maꞌalana melu ko siꞌohaꞌa peꞌi sapesalunge oto ie, taꞌe tataroha uri omu hiiwalaimoli oto taraꞌasi aana a Kraes urine e tohungei haꞌasusuꞌemeelu na melu ko hii diana loꞌu. ⁸Tolahiꞌanga e wae-waeliꞌemeelu keꞌu, taꞌe ie melu meuri loꞌu mola aana melu rongoa oto uri omu ko uure maꞌutaꞌa taane peꞌie hiiwalaimolinge iꞌomu aana Aalaha.

⁹Melu ko tohungei ilenimwaꞌe na melu ko paalahea God oto liutaa haahiꞌomu. Na paalahenga iꞌemeelu ngeena hule aana e kaꞌa malisine ike noꞌone ahutana ilenimwaꞌenga nge melu toꞌo aana i tehulaꞌamiu. ¹⁰Melu ko tohungei aarengaꞌi susue rodo na aatowaa uri hunie melu ke leesiꞌomu keꞌu loꞌu, na uri melu sai peꞌiꞌomu aana taꞌena nga mei ola omu saetoꞌo aana ue hunie hiiwalaimolinge iꞌomu ke ahu.

¹¹Melu ko eitanai uri a God Aamaka na Aalaha ikie a Jisas ke haꞌa-oodohie nga tala nameelu huni lae loꞌu mei leesiꞌomu. ¹²Saemeelu uri a Aalaha ke da manata-diananga iꞌomu ngeena ke aꞌailaꞌa huniꞌomu heiliu na hunie taꞌena nga iinoni loꞌu, mala manata-diananga iꞌemeelu huniꞌomu e paine loꞌu liutaa. ¹³Melu ko eitanai uri saemiu ke susu aani loꞌongaꞌinge diana, na omu ke iiꞌo maaꞌi, na mwaanie nga iini e pwelu wala i lengimiu, hunie maholo Aalaha ikie a Jisas kei ooli mei peꞌie mo iinoni maaꞌi ingeie, na omu ke suꞌuri masa ni uure i naꞌona God Aamaka.

Kie Ke Iiꞌo Oodotaꞌi I Maana God

¹Oto leu ooreta, maeni eesiku maaꞌi, melu haꞌananauꞌomu oto aana tala omu kei lulu i sulie hunie uri a God ke saemango haahiꞌomu, na omu ko lulu i sulie taane oto tala ngeena. Taꞌe aana satana Aalaha ikie a Jisas, melu ko eitanaiꞌomu loꞌu uri hunie omu ke tohungei lulu i suli diana aana loꞌu liutaa. ²Aana omu manataꞌinie oto uri Aalaha ikie a Jisas e unue hunie melu ke haꞌananauꞌomu urine. ³Aana a God e saetoꞌo aana uri omu ke iiꞌo maaꞌi na omu ke haꞌahili-hiliꞌomu mwaanie masinge, ⁴na uri hunie taꞌena nga iini eemiu ke kinetaꞌinie oto sapena maraana aani iiꞌonga maaꞌi na peꞌi haꞌamaꞌunge hunie ngaeta mwala. ⁵Omu ke suꞌuri talei deu i sulie mo heri-huninge aaela iꞌomu aani mesinge mala mo iini kire puꞌo na kire kaꞌa saie ike a God. ⁶Na mwaanie nga iini eemiu e wae-waelie auhenue ingeie aani aeni-olanga peꞌie keni ingeie. Melu haꞌapasuliꞌomu keꞌu oto aana mei ola ienini, aana a Aalaha kei haꞌaloie mo iini ko deu urine. ⁷Aana a God e kaꞌa haaraikie ike hunie iiꞌonga madaꞌa urine, taꞌe e saetoꞌo aana uri iiꞌolaka ke maaꞌi oto taꞌingelu. ⁸Aena urinena, taꞌena nga iini ko heitohea haꞌa-uusulinge ienini, e kaꞌa haitohea ike mola nga iinoni. !Haꞌike! Ko heitohea oto a God ni ngeena, iini nge e niie Liꞌoa Maaꞌi ingeie huniꞌomu.

⁹Oto leu mala manata-diananga hunie mo eesimiu kira hiiwalaimoli, nga mei ola hunie melu ke uusu-uusu i sulie huniꞌomu haꞌike, aena aana a God ko haꞌa-uusuliꞌomu taane oto uri hunie omu ke mana-manata diana huniꞌomu heiliu urine. ¹⁰Na e toꞌohuu oto, aana omu manata diana kaꞌu oto hunie mo iini kire hiiwalaimoli nge kire iiꞌo tatangasie mo henue wau i laona poꞌo ni henue i Masedonia. Oto melu ko ere haꞌasusuꞌomu loꞌu maeni eesiku maaꞌi, uri hunie omu ke lio susulie tolahai ola ngeena loꞌu liutaa. ¹¹Omu ke alaaꞌinie iiꞌonga iꞌomu maraamiu hunie omu ke iiꞌo aana hanuelamanga, na mwaanie omu oho dauhe aana mo esunge ngaeta mwala, taꞌe omu ke lio i suliꞌomu maraamiu aani esunge talai ngeulaa mola amiu maraamiu, oto mala melu unue kaꞌu huniꞌomu holaꞌinaꞌo. ¹²Aana omu kei deu urine nge hule aana mwala ni puꞌo na kire ke si haꞌamaꞌu eemiu, na omu saꞌa sare sukaa ike loꞌu nga mei ola mwaanie nga iini.

A Aalaha Kei Ooli Mei

¹³Maeni eesiku maaꞌi, saemeelu uri omu ke sai diana aana nga taa kei reu aana mo iini nge kire mae oto. Mwaanie omu sae-saehuu mala mo iini e puꞌo nge kire kaꞌa norutoꞌo ike aana a God. ¹⁴Aana ikie, kie hiiwalaimoli uri a Jisas e mae na e taꞌelaꞌi loꞌu. Oto aena urine nge kie ke hiiwalaimoli noꞌone aana uri a God kei taꞌea loꞌu peꞌie a Jisas mo iini kire mae oto nge kire hiiwalaimoli aana. ¹⁵Oto nga taa nge melu ko unu-unue huniꞌomu ienini, e lae oto mola i sulie haꞌa-uusulinge a Aalaha ikie. E unue uri ikie mo iini nge kie ko meu-meuri ue aana maholo a Aalaha kei ooli mei, kie saꞌa lae ike taꞌau i Lengi i naꞌo aana mo iini nge kire mae oto. !Haꞌike! ¹⁶Taꞌe a Aalaha maraana kei siho mai uure taꞌau i Lengi peꞌie mawataa paine mwaanie naꞌohai ensel na aawatai eehuri a God. Oto kira hiiwalaimoli nge kire mae oto, kire kei holaꞌi taꞌelaꞌi oto hunie maurihe. ¹⁷Oto purihaꞌana, a God ke si tarakonikie mo iini nge kie mauri ue aana maholona peꞌire taꞌau i laona mei uuru huni lae honosie Aalaha taꞌau i Lengi. Na kie ke si iiꞌo huu oto peꞌie Aalaha ikie. ¹⁸Aena urinena, omu ke ere-ere haꞌasusuꞌomu heiliu aana mo wala ienini.

Kie Ke Iiꞌo Aakau Loosie A Aalaha

¹Oto maeni eesiku maaꞌi, leu i sulie tohungei hei dinge na maholo walu ola ienini kei reu, nga mei ola hunie melu ke uusu-uusu i sulie huniꞌomu haꞌike. ²Aena aana iꞌomu maraamiu omu sai diana aana oto uri a Aalaha ikie kei ooli loꞌu mola mai aana taꞌena nga dinge nge mwala kaꞌa loꞌo-loꞌongaꞌinie ike, mala iinoni peli-peli e sai lae mola mai aana taꞌena nga maholo i rodo. ³Maholo nge mwala ko loꞌongaꞌi uri kire iiꞌo sapemawa mola aana hanuelamanga, taꞌe kire ke si aparaꞌi mola aana aaelanga ko tolana toolera oto na ko suuheꞌinire oto. Kei urihana huꞌe nge ko aparaꞌi mola aana sapesalunge hunie toꞌo-mwelanga, na e aasa loꞌu hunie kei tehisie mei olana.

⁴Taꞌe iꞌomu, maeni eesiku maaꞌi, omu kaꞌa iiꞌo ike mone i laona rodohono. Oto aena ngeena, omu saꞌa papangataꞌi ike maholo hai dinge ngeena kei hulesie walumalau mala iinoni peli-peli nge ko lae mai i rodo aana maholo kire kaꞌa loꞌongaꞌinie ike. ⁵Aana iꞌomu, omu meni iiꞌo oto i laona matapwanga na omu meni neꞌi iinoni aana raa-raa. Na ikie nga mwala haꞌike loꞌu aana rodo wa nga mwala aana rodohono. ⁶Oto kie ke suꞌuri urihana mwala aana rodohono ni welumalau nge kire ko talei maꞌa-maꞌahu mola, taꞌe kie ke iiꞌo aakau mola tarau loosie a Aalaha mala mo iini kire ko lio-lio diana taraureꞌi na kire kaꞌa inu wei ni pweu ike. ⁷Maholo e rodo, mwala kire sai maꞌahu na nga mo iini ko inu wei ni pweunge hule aana kire ko mehiri oto. ⁸Taꞌe aana ikie mo iini oto aana aatowaa, e malisine uri kie ke iiꞌo aakau na kie ke lio-lio talaka aani haꞌahili-hilinge. Mala nga ramo ko deu aakau hunie oohotaa, nge ikie noꞌone kie ke dau aakau urine. Mo ramo kire sai hoꞌosie mo toꞌoni ni oohotaa huni kinetaꞌinie mamangoda, na urine loꞌu ikie noꞌone kie ke iiꞌo aakau aani hiiwalaimolinge aana Jisas na aani manata-diananga hunikie hailiu. Na mala nga ramo ko kinetaꞌinie pwaune aana ko hoꞌosie paraimaa ni oohotaa, nge urine ikie noꞌone kie ke kinetaꞌinie loꞌongaꞌinge ikie aani norutoꞌonga uri a Kraes kei haro haꞌa-uurikie taane. ⁹Aana a God e kaꞌa haꞌaholakie ike uri hunie ke haꞌamotaahikie aana dinge ni leinge. !Haꞌike! Taꞌe e haꞌaholakie hunie Aalaha ikie a Jisas Kraes, ke haꞌa-uurikie. ¹⁰A Jisas e mae honotaka uri hunie ke haꞌa-uurikie hunie uri kie ke lae iiꞌo ruru peꞌie aana maholo kei ooli loꞌu mei, maꞌalana uri kie ke mae oto wa kie ke mauri ue aana maholona. ¹¹Aena urinena, omu ke ere haꞌasusuꞌomu heiliu na omu ke peꞌiꞌomu heiliu oto mala omu ko esuie ngeena.

Mo Haꞌananaunge Ooreta Na Mei Wala Ni Saediananga

¹²Oto melu ko eitanaiꞌomu, maeni eesiku maaꞌi, uri omu ke haꞌamaꞌu aana mo iini ko esu hiitoꞌo i matolamiu aana soihaadaꞌinge huni lio i suliꞌomu na huni haꞌa-uusuliꞌomu. ¹³Omu ke lio i suli diana aada peꞌi haꞌamaꞌunge na peꞌi manata-diananga hunire haahie mo esunge kire ko esuiꞌi ngeena. Na omu ke oꞌoꞌo ni henuelama mola i matolamiu maraamiu. ¹⁴Na melu ko eitanaiꞌomu, maeni eesiku, uri omu ke ere aana mo iini ko lalawasie asunge. Omu ke peꞌie mo iini nge kire sai meꞌu hunie saeda ke susu. Omu ke peꞌie mo iini nge loꞌongaꞌinge ikire e mamaelaꞌa, na omu ke haro kele ere hunie ahutana mwala. Na mwaanie saewasunge iꞌomu e lau-leu hunie taꞌena nga iini. ¹⁵Omu ke lio talamiu mwaanie nga iini e heꞌi suꞌue loꞌu tataꞌalanga hunie nga iini. !Haꞌike! Taꞌe omu ke diana mola huniꞌomu heiliu taraureꞌi na noꞌone hunie ahutana mwala.

¹⁶Omu ke oꞌoꞌo ni ilenimwaꞌenga mola taraureꞌi, ¹⁷na omu ke aarea God mola tarau. ¹⁸Na maꞌalana nga taa ke rau-reu loꞌu, taꞌe omu ke paalahea God mola tarau suli maholo. Aana a God e saetoꞌo aana omu ke asu urine aena aana omu lado oto peꞌie a Jisas Kraes.

¹⁹Omu ke suꞌuri deu honosie Liꞌoa Maaꞌi mwaanie maurihaꞌamiu, taꞌe omu ke tola i sulie nga taa e unue huniꞌomu. ²⁰Na mwaanie omu mwaka aana mo wala a God ko niiꞌi mei hunie mo iinoni maaꞌi ingeie. ²¹Taꞌe omu ke holaꞌi lei diana aana kaꞌu ahutana mo haꞌa-uusulinge. Oto omu ke si lulu i sulie mo iini diana, ²²na omu ke iiꞌo haꞌatau mwaanie taꞌena nga mei ola aaela.

²³No ko aarea God nge ko nii-niie hanuelamanga hunikie uri ke da hunie omu ke iiꞌo maaꞌi taꞌingelu. Na no ko aarea hunie uri ke kinetaꞌiniꞌomu oto taꞌingelu, hunie loꞌongaꞌinge iꞌomu, na maurihaꞌamiu, na sapemiu ke mani iiꞌo sapemawa mwaanie taꞌena nga ola tataꞌala maholo Aalaha ikie a Jisas Kraes kei ooli loꞌu mei. ²⁴Iini e soiꞌomu mei i saana e tohungei diana na omu sai norue, na ingeie ni kei esuie leune huniꞌomu.

²⁵Maeni eesiku maaꞌi, omu ke aarengaꞌi noꞌone talameelu. ²⁶Omu ke niie saediananga iꞌemeelu hunie ahutana mo iini kire hiiwalaimoli. ²⁷No ko eitanaiꞌomu aana satana Aalaha ikie uri saailana uusu-uusu ienini ke lae oto nana ahutana mo iini kire hiiwalaimoli. ²⁸No ko eitanaie uri hahuꞌana manata-diananga Aalaha ikie a Jisas Kraes ke iiꞌo peꞌiꞌomu.