Eetana Nga Uusu-uusu A
Jon
?A tei ni e uusue uusu-uusu ienini?
Uusu-uusu ienini e kaꞌa unue ike uri a tei ni e uusue, taꞌe mo rato aana soihaadaꞌinge oto wau i naꞌo kire unue uri a Jon Hurulaꞌaa ni e uusue puke ie maholo e repo oto, ola mala siwe aawalai helisi i purine hutelana a Jisas (90 A.D.). A Jon Hurulaꞌaa ingeie kalena Sepedi na aasine a Jemes nge a Herod Inemauri e horo maesie. A Jon e uusue noꞌone Tataroha Diana a Jon, na Ruana na Oolune nga Uusu-uusu a Jon, na puke Haataꞌinge. Maholo a Jon Hurulaꞌaa e repo, ingeie nge naꞌohai mwane haahie soihaadaꞌinge wau aana huilume i Epesas.
?E uusue uusu-uusu ienini hunie kira tei?
Uusu-uusu ienini e kaꞌa unue ike uri ko lae hunie a tei, taꞌe mo rato oto i naꞌo kire unue noꞌone uri e lae hunie kira hiiwalaimoli aana Jisas aana mo poꞌo ni henue karaꞌinie huilume i Epesas.
?Nga taa e rau-reu maholo e uusue uusu-uusu ienini?
Ngaeta mo haꞌa-uusuli eero-eero kire aehota huni haꞌa-uusulie mwala uri walu ola nge kire toꞌo aana mei sape, kire mani aaela. Na kire ko haꞌa-uusuli loꞌu uri mo ola nge kire kaꞌa toꞌo aana ike mei sape mala mo ensel na mo liꞌoa, taꞌe ikire mola ni kire diana. Aena neꞌisaenga takalo ngeena, mo haꞌa-uusuli eero-eero kire unue uri a Jisas ingeie Kalena God taane, taꞌe e kaꞌa neꞌi iinoni ike toꞌohuu peꞌie mei sape mala sapeka. Kire ko haꞌatakaloa mwala loꞌu uri lulu i sulilana a Jisas e saꞌa tohungei peꞌie ike iinoni huni helesie maurihe huu, taꞌe iinoni e sai helesie maurihe huu mola aena aana e toꞌo aana saenanaunge mumuni mala saenanaunge mo haꞌa-uusuli eero-eero. Oto aena aana kire ko unue uri saenanaunge mola ni e roroꞌa, kire unue noꞌone uri nga taa o ko esuie peꞌie sapemu e kaꞌa hiꞌe ike. Oto kire ko haꞌatakaloa mwala mwaanie tala oodo na manata-diananga hunie taꞌena nga iini.
?E uusue uusu-uusu ienini huni taa?
A Jon Hurulaꞌaa e toꞌo aana e ro mei eehuꞌi neꞌisaenga aana maholo e uusue uusu-uusu ienini. Eetana uri huni haꞌasusue kira hiiwalaimoli aana iiꞌonga ikire tararuru peꞌie a Jisas Kraes. Ruana nga mei neꞌisaenga uri huni haꞌapasulire mwaanie mo haꞌa-uusulinge eero-eero nge ko aehota ngeena, aena aana e kaꞌa toꞌohuu na e sai waelie iiꞌo-rurunge aana soihaadaꞌinge. Oto huni uure honosie haꞌa-uusulinge urine, a Jon Hurulaꞌaa e haataꞌi diana aana uri a Jisas Kraes e neꞌi iinoni toꞌohuu peꞌie mei sape. E heꞌi haꞌa-uusulire loꞌu uri mo iini ko hiiwalaimoli aana a Jisas toꞌohuu, kire ke manata diana noꞌone hunire hailiu.
?Nga taa ni mo pweu ni wala i laona uusu-uusu ienini?
sai-olanga, hiiwalaimolinge, manata-diananga, raa-raa, mo mwela, iiꞌo-rurunge, Mamaꞌa, Kale
?Nga taa ni ngaeta mo eehuꞌi tatala i laona uusu-uusu ienini?
1 Jon 1:8-10, 1 Jon 3:1-2, 1 Jon 4:16-18
?Nga taa ni mo eehuꞌi neꞌisaenga i laona uusu-uusu ienini?
A Jon ko ere haꞌawalaimoliꞌaa uri a Kraes e neꞌi iinoni toꞌohuu. (1:1-4)
Tolaha ni raa-raa e kaꞌa pwaidora ike peꞌie mo tolaha tataꞌala aana rodohono. (1:5–2:29)
Tolahaka ko haataꞌinie uri ikie mo kalena God wa mo kalena a Satan. (3:1-24)
Kie ke oohongie mo liꞌoa uri kire uure mwaanie a God toꞌohuu wa haꞌike. (4:1-6)
A God oto aahuꞌine manata-diananga. (4:7-21)
O ko manata diana hunie a God toꞌohuu, nge o ke manata diana noꞌone hunie mo kalena. (5:1-21)
1A Jon Ko Haꞌawalaimoliꞌaa Uri A Kraes E Neꞌi Iinoni Toꞌohuu
1Ie melu ko uusue uusu-uusu huniꞌomu i sulie tohungei iinoni e uure oto mai aehotalana, nge ingeie mei Wala ni Meurihe. Melu ko uusue oto mala melu rongoa aana aalingameelu, na melu leesie aana maameelu. Melu toꞌomaaie, na melu hele aana oto aana kiꞌimeelu. 2Maurihe Huu nge melu ko haꞌarongoꞌomu aana ie, e iiꞌo oto wau i naꞌo peꞌie a Mamaꞌa. Oto haataꞌinilana e lae huniꞌemeelu na melu leesie, na melu saie uri e toꞌohuu oto. 3Melu ko haꞌarongoꞌomu urine aana nga taa melu leesie na melu rongoa, hunie uri iꞌomu noꞌone omu ke iiꞌo ruru peꞌiꞌemeelu aana iiꞌo-rurunge peꞌie a Mamaꞌa na a Kalena, Jisas Kraes. 4Melu ko uusu-uusu huniꞌomu urine, uri hunie omu ke honu eeni ilenimwaꞌenga noꞌone peꞌiꞌemeelu.
A God Oto Raa-raa
5Na mei wala melu rongoa mwaanie a Kale kaꞌu oto melu ko haꞌarongoꞌomu aana nge uri a God oto raa-raa, na nga mei rodohono haꞌike loꞌu aana oto ooꞌoo. 6Oto mala kie ko unue uri kie iiꞌo ruru peꞌie a God, taꞌe kie ko talei oꞌoꞌo mola i laona rodohono, ikie mo iinoni eero-eero mola na kie kaꞌa lulu i sulie ike walaimolinge. 7Taꞌe mala uri kie ko iiꞌo i laona raa-raa mala a God noꞌone ko iiꞌo i laona raa-raa, nge kie ke iiꞌo ruru peꞌikie hailiu, na apune Kalena, a Jisas, ke si haꞌarereꞌakie mwaanie ahutana oorahaꞌaa.
8Mala nga iini ko unue uri e kaꞌa oorahaꞌaa ike, nge iinonine ko eeroa mola maraana ni ngeena, na walaimolinge e kaꞌa iiꞌo ike aana. 9Taꞌe mala kie ko haꞌahoue mo oorahaꞌaa ikie hunie a God, nge kie sai norutoꞌo aana huni saeꞌaasie mo oorahaꞌaa ikie, aana ingeie e oodotaꞌi na kei tohungei haꞌarereꞌakie mwaanie taꞌena nga takalonga ikie. 10Mala kie ko unue uri kie kaꞌa oorahaꞌaa ike, nge kie ko unue oto uri a God e sai eero, na kie ko haataꞌinie uri kie kaꞌa sai rongo oto hunie walana.
21Maeni mwela ineu, no ko uusue oto urine huniꞌomu uri hunie omu ke suꞌuri oorahaꞌaa. Taꞌe mala uri nga iini ko oorahaꞌaa, kie toꞌo aana taane iini huni peꞌikie aani erenga oolitaka peꞌie a Mamaꞌa. Na ingeie oto a Jisas Kraes, iini e oodotaꞌi taꞌingelu. 2Aana ingeie oto e neꞌi uunu-olanga i saana Mamaꞌa, nge e sai haꞌa-oodohie mo oorahaꞌaa ikie. Na e kaꞌa ike taꞌe mo oorahaꞌaa ikie hahaiteli, taꞌe ahutana mo oorahaꞌaa mo iinoni aana walumalau oto noꞌone.
3Kie ke si saie uri kie manataꞌinie a God, mala uri kie ko tola i sulie mo haꞌatolanga ingeie. 4Aana nga iini ko unue uri e manataꞌinie a God, taꞌe e kaꞌa tola i sulie mo haꞌatolanga ingeie, iini urine ingeie iinoni eero-eero mola na walaimolinge haꞌike aana. 5Taꞌe iinoni nge ko tola i sulie walana a God, ingeie oto iini nge ko tohungei manata diana hunie a God toꞌohuu. Aana urine nge kie ke si manataꞌinie uri ikie mo iinoni ingeie toꞌohuu. 6Aana nga iini ko unue uri ingeie oto iinoni a God, nge ke iiꞌo oodotaꞌi oto mala a Jisas Kraes e oꞌoꞌo kaꞌu.
Kie Ke Manata Diana Hunikie Hailiu, Aana Haꞌatolanga Haalu A Kraes Ni Otona
7Maeni eesiku, mei haꞌatolanga nge no ko uusue huniꞌomu ie, e kaꞌa mei ola haalu ike. Mei haꞌatolanga lalahuꞌe omu toꞌo aana taane oto uure mai maholo omu aehota hiiwalaimoli, na mei haꞌa-uusulinge omu rongoa taane oto. 8Taꞌe nga taa no ko uusue huniꞌomu ienini mei haꞌatolanga haalu, maꞌalana omu rongoa taane oto i naꞌo, aana kie si leesie tohungei neꞌisaenga aana manata-diananga maholo kie leesie tolahana a Jisas. Na mwala kire sai leesie tohungei neꞌisaenga aana noꞌone aamiu, aana rodohono ko suu oto, na tohungei raa-raa aana haꞌa-uusulinge ingeie ko raa tahairaa oto ie i manatamiu. 9Taꞌena nga iini ko unue uri ingeie i laona raa-raa, taꞌe ko ngiduupu mola hunie aasine aana hiiwalaimolinge, nge ingeie mola ue i laona rodohono hule oto molana. 10Taꞌena nga iini nge ko manata diana hunie aasine i lalo aana Kraes, nge ingeie e iiꞌo i laona raa-raa na nga taꞌa-taꞌa mei ola huni haꞌatataroa mwala mwaanie hiiwalaimolinge haꞌike loꞌu aana. 11Taꞌe iini nge ko ngiduupu hunie aasine, ingeie e iiꞌo ue i laona rodohono, na ko lae-lae mola i laona rodohono, na e kaꞌa saie ike leu ko lae takoie, aena aana rodohono e haꞌa-ulue oto maana.
12No ko uusu-uusu huniꞌomu, maeni mwela ineu, i sulie a Mamaꞌa e saeꞌaasie oto mo oorahaꞌaanga iꞌomu i tehulaꞌana a Jisas Kraes.
13No ko uusu-uusu huniꞌomu maeni rato ineu, aena aana omu saie oto iini e uure oto mai aehotalana.
No ko uusu-uusu huniꞌomu maeni saanau ineu, aena aana omu aꞌailaꞌasie iini tataꞌala.
14No ko uusu-uusu huniꞌomu maeni mwela ineu, aena aana omu saie oto a Mamaꞌa.
No ko uusu-uusu huniꞌomu maeni rato ineu, aena aana omu saie oto iini e uure oto mai aehotalana.
No ko uusu-uusu huniꞌomu maeni saanau ineu, aena aana iꞌomu oto mo iini aꞌailaꞌa, na aena aana walana God e iiꞌo i lalo aamiu, na aena aana omu aꞌailaꞌasie iini tataꞌala.
15Omu ke suꞌuri manata diana hunie walumalau, wa nga mei ola loꞌu aana walumalau. Mala uri omu ko manata diana hunie walumalau, nge omu kaꞌa manata diana ike hunie a Mamaꞌa. 16Aana mo tolahai ola aana walumalau ie mala saehanalilana mo ola sape ko heri huniꞌi, na saehanalinge aani leesilana mo ola, na toohaꞌinilaka haahie mo ola kie asuiꞌi wa kie toꞌo aani, nga taꞌa-taꞌa mei ola aana walu ola ienini e kaꞌa uure ike mai mwaanie a Mamaꞌa, taꞌe kire mani uure mola mai mwaanie walumalau. 17Walumalau na ahutana walu ola i laona nge mwala ko sae-saetoꞌo aani, kire kei meni eiꞌaa mola, taꞌe iini ko tola i sulie saena God nge kei iiꞌo huu.
Mwaanie O Toliꞌaasie Maelonga A Kraes E Eeroꞌo
18Maeni mwela ineu, mo dinge ooreta i naꞌona a Kraes kei ooli loꞌu mei oto ienini. Omu rongoa oto i naꞌo uri maelonga a Kraes kei lae mai. Oto ie mo maelonga hunge a Kraes ko haataꞌi oto, na aena urinena kie si saie uri haꞌamangolana walumalau e karaꞌini oto. 19Mwala ngeena kire kaꞌa hiiwalaimoli ike mala ikie, na ikire nga mo tohungei iinoni ikie haꞌike. Kire auꞌesu tararuru taane peꞌikie, taꞌe kire oopa oto mwaanikie. Ikire nga mwala haꞌike loꞌu aaka. Mala uri kire ke neꞌie nga mwala aaka, haꞌalaa kire iiꞌo oto peꞌikie taraꞌasi. Taꞌe aana kire oopa oto mwaanikie urine, e haataꞌinie oto uri nga taꞌa-taꞌa iini aada e kaꞌa neꞌie loꞌu iinoni a Kraes mala ikie.
20Taꞌe iꞌomu, a Kraes e niie oto Liꞌoa Maaꞌi ingeie huniꞌomu, na omu meni saie oto walaimolinge. 21Nou kaꞌa uusu-uusu ike huniꞌomu i sulie omu kaꞌa saie ike walaimolinge. Nou saie uri omu saie taane walaimolinge. Taꞌe no ko uusu-uusu mola huni peꞌiꞌomu hunie omu ke lio saie mo haꞌa-uusulinge eero-eero, aana nga mei eeronga e kaꞌa uure ike mwaanie walaimolinge. 22?Oto kira tei keꞌu mo iini kire sai eero liutaa? Ikire oto mo iini nge kire ko taateingeꞌinie uri a Jisas oto a Kraes, a Haꞌa-uuritaka nge a God e haiholotaꞌinie kaꞌu huni uusungeꞌinie mai. Iinoni urine nge ingeie maelonga a Kraes, aana ko meni leledie oto a Mamaꞌa na a Kalena. 23Aana iini ko leledie a Kale, nge ko leledie noꞌone a Mamaꞌa. Taꞌe iini e saetoꞌo aana a Kale, nge a Mamaꞌa e iiꞌo noꞌone peꞌie.
24Omu ke kinetaꞌinie saemiu hunie nga taa nge omu rongoa oto uure mai aehotalana ke iiꞌo susu oto aamiu. Aana mala uri omu ke hiiwalaimoli taraꞌasi, haꞌalaa omu ko iiꞌo susu peꞌie a Kale na a Mamaꞌa. 25Aana a Kale e haiholotaꞌi huni niie maurihe huu hunikie.
26No ko uusue mo wala ienini huniꞌomu huni haꞌapasuliꞌomu mwaanie mo iini nge kire ko sare haꞌatakaloꞌomu. 27Taꞌe iꞌomu, nou saie uri omu saꞌa rongo ike hunire aana a Kraes e neꞌie Liꞌoa Maaꞌi oto i lalo aamiu. Na aena aana ko iiꞌo taraꞌasi i lalo aamiu, omu kaꞌa saetoꞌo aana ike loꞌu nga iini hunie ke haꞌa-uusuliꞌomu, aana Liꞌoa Maaꞌi ko haꞌa-uusuliꞌomu oto aana ahutana walu ola, na nga taa ko haꞌa-uusuliꞌomu aana, e toꞌohuu na nga eeronga haꞌike. Oto omu ke iiꞌo susu i lalo aana a Kraes mala a Liꞌoa Maaꞌi e haꞌa-uusuliꞌomu.
28Iau, maeni mwela ineu, omu ke iiꞌo susu oto i lalo aana a Kraes, uri hunie maholo kei ooli mei, kie ke suꞌuri meꞌu na kie ke suꞌuri masa i maana. 29Omu saie oto uri a Kraes ingeie e oodotaꞌi. Oto e malisine uri omu ke saie loꞌu uri ahutana mo kalena God, helelada e oodotaꞌi noꞌone.
3Ikie Mo Kalena God
1!Leesie kaꞌu! Aamaka i Lengi e tohungei manata diana paine hunikie mo iini kie ko lulu i sulie a Jisas. Manata-diananga ingeie hunikie e paine liutaa, kaꞌu hule aana e haaraꞌinikie oto aana maeni kalena, na e kaꞌa satai ola mwaakule mola, taꞌe ikie mo kalena oto toꞌohuu. Na aena aana mwala aana walumalau kire kaꞌa manataꞌinie ike a God, nge kire kaꞌa manataꞌinikie noꞌone. 2Iau maeni malahuku, kie neꞌi mwela oto a God, na kie kaꞌa saie ue uri a God kei oolisikie loꞌu uri taa taꞌau i Lengi. Taꞌe kie saie taane oto uri maholo a Kraes kei ooli loꞌu mei, kie kei hei-oolisi mala ingeie, aana kie kei leesie tohungana manikuluhaꞌana. 3Na ahutaka nge kie ko lio-lio peꞌie maaꞌoohinge loosie maholo ngeena, kie ko kinetaꞌinikie hunie kie ke iiꞌo rereꞌa oto mala a Kraes e rereꞌa.
4Taꞌe-taꞌena nga oorahaꞌaa ko waelie mo haꞌatolanga a God, oto mo iini kire ko oorahaꞌaa kire ko heukama honosie a God eena. 5Omu manataꞌinie oto uri a Kraes e lae mai huni taꞌaasie oorahaꞌaa, na uri ingeie maraana nga mei oorahaꞌaanga haꞌike aana. 6Oto nga iini ko iiꞌo i lalo aana a Kraes, e saꞌa oora-oorahaꞌaa ike. Aana taꞌena nga iini nge ko talei lae peꞌi oorahaꞌaa mola, e kaꞌa tohungei leesie ike a Kraes wa ke manataꞌinie.
7Maeni mwela ineu, suꞌuri toliꞌaasie nga iini ke haꞌatakaloꞌomu. Aana iini nge helelana e lae oto i sulie oodotaꞌinge, iini urine e oodotaꞌi oto, mala kaꞌu oto a Kraes e oodotaꞌi. 8Taꞌe iini nge ko oora-oorahaꞌaa oto mola, iini a Pwelu Eero-eero eena, aena aana a Pwelu Eero-eero ingeie e uure ni oorahaꞌaala oto mai aehotalana. Na Kalena God e lae oto mai huni oho aasie mola mo esunge a Pwelu Eero-eero ngeena. 9A tei nge e neꞌie oto kalena God, e kaꞌa oora-oorahaꞌaa ike, aena aana mei epu a God oto i lalo aana. Na aena aana a God oto aamana, e aasa hunie kei oorahaꞌaa loꞌu. 10Oto i leune kie sai lio saie uri a tei nge e neꞌi kalena God, na a tei e neꞌi kalena a Pwelu Eero-eero. Aana taꞌena nga iini nge helelana e kaꞌa oodotaꞌi, wa ke manata diana hunie aasine, ingeie nga kalena God haꞌike.
Kie Ke Manata Diana Hunikie Hailiu Toꞌohuu Aana Saeka
11Uure oto mai aana maholo omu aehota hiiwalaimoli, omu rongoa oto tarau uri kie ke manata diana hunikie hailiu. 12Kie ke suꞌuri urihana a Kein wau i naꞌo, aana ingeie iini a Pwelu Eero-eero mola, na e horo maesie oto aasine, a Ebol. ?Aena e ue kaꞌu nge a Kein e horoꞌie aasine urine? E horoꞌie aena aana a Ebol e oodotaꞌi, na iiꞌonga diana ingeie e haataꞌinie uri iiꞌolana a Kein e kaꞌa oodo. 13Oto omu ke suꞌuri pangataꞌi, maeni eesiku, mala uri walumalau ko ngiduupu huniꞌomu.
14Kie manataꞌinie oto uri kie tahisie nanamanga aana maenga na uri kie toꞌo aana oto maurihe. Kie manataꞌinie leune aena aana kie manata diana hunie mo eesike. Taꞌe iini nge manata-diananga haꞌike aana, iini urine e iiꞌo susu ue i mamalutana maenga. 15Taꞌena iini nge ko ngiduupu hunie aasine, ingeie oto iinoni horo-horo, na omu saie oto uri iini urine e kaꞌa toꞌo aana ike maurihe huu i lalo aana.
16Na kie ko si lio saie tohungana manata-diananga aena aana a Kraes e toliꞌaasie mangona i tehulaꞌaka. Oto ikie noꞌone kie ke mwaꞌe-mwaꞌe ni mae huni peꞌie mo eesike. 17Loꞌongaꞌi keꞌu i sulie iini e toꞌo aana taane nga mo ola, na ko lee-leesie aasine ko siꞌohaꞌa taꞌe hule aana e kaꞌa sare aamasie. ?Uri iinoni urine ko haataꞌinie taane manata-diananga a God? !Haꞌike oto ooꞌoo!
18Maeni mwela ineu, kie ke suꞌuri mana-manata diana mola aani wawa wa aani wala, taꞌe manata-diananga toꞌohuu nge ko haataꞌi aana nga taa kie ko esuie. 19Mala uri kie ko manata diana hunikie hailiu urine, nge kie ko saie oto uri kie iiꞌo aana tala toꞌohuu, na kie saꞌa maꞌu ike huni lae mai i saana God. 20Taꞌe maꞌalana ohe kie ko meꞌu-meꞌu ue, kie ke suꞌuri meꞌu-meꞌu loꞌu, aena aana a God e saie walu ola i sulikie, na aamasinge ingeie e paine loꞌu liutaa aana mo hiinge aana saeka.
21Oto maeni malahuku, mala uri kie saie uri manataka e taha mola mwaanie roroꞌanga, nge kie saꞌa maꞌuteꞌinie ike laenga mai peꞌie nga mei neꞌisaenga huni sukaa aana a God. 22Na a God kei niie mola nga taa kie ko sukaa aana, aena aana kie ko tola i sulie mo haꞌatolanga ingeie, na kie ko esuie mo ola e saetoꞌo aani. 23Na mei haꞌatolanga ingeie ni otona, uri hunie kie ke hiiwalaimoli aana Kalena, a Jisas Kraes, na hunie kie ke manata diana hunikie hailiu, mala e unue oto hunikie. 24Mo iini ko tola i sulie mo haꞌatolanga ingeie, nge kire iiꞌo oto i lalo aana, na ingeie oto i lalo aada. Na Liꞌoa Maaꞌi nge a God e niie hunikie ko haataꞌinie aaka uri ko iiꞌo toꞌohuu oto peꞌikie.
4Oohongie Mo Liꞌoa Uri Kire Uure Mwaanie A God Toꞌohuu Wa Haꞌike
1Maeni malahuku, omu ke suꞌuri hiiwalaimoli aana ahutana mo propet nge kire ko unue uri kire ko ere oolitana a God, aana mo propet eero-eero hunge kire ko lae hailiu i laona walumalau, na mo liꞌoa eero-eero mola nge aada. Oto omu ke holaꞌi oohongie kaꞌu mo propet ngeena, hunie omu ke lio saie uri kire uure taane aana God toꞌohuu wa haꞌike. 2Aana omu sai lio saie mo iini toꞌohuu, aana Liꞌoa Maaꞌi a God ko unu tahangaꞌinie uri a Jisas Kraes e lae mai aano na e neꞌi iinoni. 3Taꞌe mo iini kire ko taateingeꞌinie walaimolinge ngeena, nge Liꞌoa Maaꞌi a God haꞌike i lalo aada, taꞌe liꞌoa e uure mola mwaanie Maelonga a Kraes ni ngeena. Omu rongoa oto uri liꞌoa ngeena kei lae mai, na e hule oto mai i leu i laona walumalau.
4Maeni mwela ineu, iꞌomu mo iini a God eena, na omu aꞌailaꞌasie oto mo propet eero-eero, aena aana Liꞌoa Maaꞌi nge e iiꞌo i lalo aamiu, e saka liutaa aana liꞌoa i lalo aada mo iini ni welumalau. 5Ikire ngeena, kire uure mone aana walumalau, oto ere-erenga ikire ko uure mola mwaanie neꞌisaenga ni welumalau, na aena urine walumalau ko rongo oto hunire. 6Taꞌe ikie mo iini oto a God. A tei nge e saie a God, nge kei rongo hunikie, taꞌe a tei nge e kaꞌa saie a God, nge e saꞌa rongo ike hunikie. Oto i leune loꞌu, kie ke si lio saie liꞌoa aani walaimolinge na liꞌoa aani eeronga.
Manata-diananga E Uure Aana God
7Maeni iinoni maaꞌi ineu, kie ke manata diana hunikie hailiu, aana manata-diananga e uure aana God. Taꞌena nga iini ko mana-manata diana, nge ko haataꞌinie uri ingeie oto kalena a God na e saie a God. 8Taꞌe iini nge e kaꞌa mana-manata diana, ingeie e kaꞌa saie ike a God, aana a God oto aahuꞌine manata-diananga. 9A God e haataꞌinie manata-diananga ingeie hunikie aana e uusungeꞌinie mai taꞌa-taꞌa mwela mouteꞌi ingeie i laona walumalau hunie kie ke si meuri oto i tehulaꞌana. 10Tohungana manata-diananga ni otona. Manata-diananga ikie hunie a God e kaꞌa tohungei diana ike urine, taꞌe ingeie ni e tohungei manata diana hunikie toꞌohuu aana e uusungeꞌinie mai a Kalena uri hunie ke neꞌi uunu-olanga huni tapa oolisie mo oorahaꞌaanga ikie.
11Maeni eesiku maaꞌi, oto mala a God e manata diana hunikie urine, nge ikie noꞌone kie ke manata diana hunikie hailiu. 12Maꞌalana nga taꞌa-taꞌa iinoni e kaꞌa leesie ue a God, taꞌe mala uri kie ko manata diana hunikie hailiu, nge a God ke si iiꞌo oto i lalo aaka, na manata-diananga ingeie ko tohungei eehu diana oto i lalo aaka.
13A God e niie oto Liꞌoa Maaꞌi ingeie naka, na aena leune kie sai diana aana uri kie iiꞌo susu oto i lalo aana God na ingeie oto i lalo aaka. 14Na melu leesie oto a Jisas aana maameelu, na melu ko haꞌarongoa oto walumalau uri a God e uusungeꞌinie mai a Kalena hunie ke neꞌie a Haꞌa-uuri hunie ahutana mwala aana walumalau. 15Oto aena urinena, taꞌena nga iini ko hiiwalaimoli na ko unu tahangaꞌinie uri a Jisas ingeie oto Kalena God, nge a God ko iiꞌo susu oto i lalo aana, na ingeie i lalo aana God. 16Aena urine, kie manataꞌinie manata-diananga nge a God e manata diana hunikie aana, na kie ko norutoꞌo oto aana.
A God ingeie oto aahuꞌine manata-diananga, na iini ko iiꞌo susu aana manata-diananga, nge ko iiꞌo susu aana God otona, na a God ko iiꞌo susu oto aana. 17Na mala uri manata-diananga ingeie ke tohungei eehu diana oto i lalo aaka urine, na iiꞌolaka mai welumalau ke urihana tolahana a Kraes, nge kie saꞌa maꞌuteꞌinie ike uuranga i naꞌona God aana hai dinge ni leinge. 18Mala uri kie ko meꞌu-meꞌu, nge kie kaꞌa iiꞌo susu ike aana manata-diananga a God hunikie, aana kie loꞌongaꞌinie mola haꞌamotaahinge. Taꞌe kie saꞌa maꞌu ike, aena aana tohungei manata-diananga a God ko taꞌaasie mola taꞌena nga maꞌunge mwaanikie.
19Oto ikie, kie ko mana-manata diana aena aana a God oto e holaꞌi manata diana hunikie. 20Mala nga iini ko unue uuri, “Nou manata diana hunie a God,” taꞌe ko ngiduupu mola hunie aasine, ingeie ngeena iinoni eero-eero mola. Aana e aasa kei manata diana hunie a God, iini e kaꞌa lee-leesie, mala uri e kaꞌa sai manata diana hunie aasine, iini nge ko lee-leesie tarau. 21Na a Kraes e niie haꞌatolanga hunikie uuri, “A tei ko manata diana hunie a God, ke manata diana noꞌone hunie aasine.”
5Hiiwalaimolinge Aana A Jisas E Aꞌailaꞌasie Mola Walumalau
1Taꞌena nga iini ko hiiwalaimoli aana a Jisas uri ingeie a Kraes, a Haꞌa-uuritaka nge a God e haiholotaꞌinie kaꞌu huni uusungeꞌinie mai, nge iinoni ngeena e hute haalu mala ngaeta kalena God. Na taꞌena nga iini ko manata diana hunie Mamaꞌa i Lengi, nge ke manata diana noꞌone hunie mo iini nge e hute aana. 2Mala uri kie ko manata diana hunie a God peꞌi tola i sulilana mo haꞌatolanga ingeie, nge kie saie uri kie ke manata diana noꞌone hunie mo kalena God. 3Kie ko haataꞌinie manata-diananga ikie hunie a God aana tola i sulilana mo haꞌatolanga ingeie. Na mo haꞌatolanga ingeie e saꞌa aasa ike hunikie, 4aena aana taꞌena nga iini e neꞌi kalena God oto, ko aꞌailaꞌasie mola walumalau aani norutoꞌonga aana Kraes. 5?A tei ni e aꞌailaꞌa honosie walumalau? Iini nge ko hiiwalaimoli uri a Jisas ingeie Kalena God haꞌalaa.
6-8Na e oolu mei ola nge kire ko unu haꞌa-oaie hunikie uri a Jisas ingeie Kalena God toꞌohuu. Eetana oto mei wei aana loto-maaꞌinge, na ruana oto mei epu aana maenga. Nga taa e rau aana e ro maholo ngeena kire mani haꞌawalaimoliꞌaa uri a Jisas Kraes Kalena God toꞌohuu. Oto mei epu noꞌone ko haataꞌi diana aana uri leune e toꞌohuu, na mei wei mola maraana haꞌike. Na oolune oto Liꞌoa Maaꞌi nge ko unue i laona saeka uri leune e toꞌohuu, aena aana Liꞌoa Maaꞌi oto walaimolinge. Na e oolu mei olana kire mani ere sada uri a Jisas Kalena God oto toꞌohuu.5:6-8 Erenga ni Krik e kaꞌa tohungei matapwa ike i leu. Ngaeta mo iini kire loꞌongaꞌinie uri mei wei na mei epu a John ko ere i suliꞌi ko haꞌa-aamasitoꞌokie aana mei wei na mei epu e aahe mwaanie sapena Jisas maholo ramo e otomie paparaꞌana aana noma. Leesie Jon 19:34.9Mala uri kie ko hiiwalaimoli aana nga taa iinoni ko unu-unue, nge kie ke hiiwalaimoli noꞌone aana Jisas, aena aana nga taa a God e unue e paine liutaa, na ingeie maraana e unu haꞌa-oaie a Kalena. 10Taꞌena nga iini ko hiiwalaimoli aana Kalena God, e saie uri nga taa a God e unue e toꞌohuu. Taꞌe iini e kaꞌa hiiwalaimoli aana a God, nge ko unue oto uri a God e sai eero, aena aana e kaꞌa hiiwalaimoli ike aana nga taa a God e unue i sulie a Kalena. 11A God e unue uri e niie oto maurihe huu hunikie, na uri mei meurihe ngeena nge oto i lalo aana a Kalena. 12Oto a tei nge e toꞌo aana a Kale i lalo aana, nge e toꞌo aana mei meurihe ngeena. Taꞌe a tei nge e kaꞌa toꞌo aana Kalena God i lalo aana, e kaꞌa toꞌo aana ike nga mei meurihe i lalo aana.
Kie Toꞌo Aana Oto Maurihe Huu
13No ko uusue walu ola ienini huniꞌomu, mo iini omu hiiwalaimoli aana satana Kalena God, hunie uri omu ke manataꞌinie uri omu toꞌo aana oto maurihe huu. 14Na hiiwalaimolinge ikie aana God otona, uri kie ko sukaa taꞌena nga mei ola i sulie saena, na ko rongo oto hunikie. 15Na aana kie ko manataꞌinie oto ko rongo hunikie aana taꞌena nga sukanga i sulie saena, kaꞌu kie saie oto uri kie kei hele aana nga taa kie sukaa aana.
16Oto maholo kie ko leesie ngaeta aasike aani hiiwalaimolinge ko esuie nga mei oorahaꞌaa, e malisine kie ke aarengaꞌi talana. Oto a God ke si hoda rereꞌa aana saena hunie ke mauri. Taꞌe nou kaꞌa ere ike i sulie mo iini kire ko aatopuri aana God na ko iiꞌo mola hunie aaelanga. Oorahaꞌaa urine e adona maenga huu taane, na nou kaꞌa unue ike uri kie ke aarengaꞌi talana mo iini kire ko oorahaꞌaa urine.5:16 A Jon ko ere i sulie mo iini nge kire unue i naꞌo uri kire hiiwalaimoli, taꞌe lae-lae saeda e hau loꞌu, na kire ko ngiduupu hunie walaimolinge nge a Liꞌoa Maaꞌi e haataꞌinie i sulie a Jisas. A Jon e unue aana 1 Jon 2:19 uri hiiwalaimolinge mo iini urine e kaꞌa toꞌohuu ike. Oto mo iini urine kei lae mola i laona maenga huu. Leesie Mak 3:29, na Hibru 6:4-8.17Taꞌena nga oorahaꞌaa mwala ko esuie kire dau huꞌisie a God ni ngeena, taꞌe ngaeta mo oorahaꞌaa kire sai oonisae mwaaniꞌi hunie a God ke saeꞌaasiꞌi.
18Kie manataꞌinie oto uri taꞌe-taꞌena nga iini e hute aana a God, e kaꞌa talei oora-oorahaꞌaa ike, aana a Kalena God ko kinetaꞌinie mwaanie uri Naꞌohai Iini Tataꞌala, a Pwelu Eero-eero, e kopi aana huni waelie. 19Kie manataꞌinie oto noꞌone uri ikie mo kalena God, maꞌalana ahutana mwala loꞌu i laona walumalau kire iiꞌo mola i mamalutana a Pwelu Eero-eero. 20Na kie manataꞌinie oto noꞌone uri a Kalena God e lae mai na e niie oto saenanaunge naka, uri hunie kie ke manataꞌinie Iini Toꞌohuu. Na maurihaꞌaka oto i lalo aana Iini Toꞌohuu, aana ikie i lalo aana Kalena, a Jisas Kraes. Taꞌe ingeie mola tohungei God, na ingeie oto aahuꞌine maurihe huu. 21Aena urine, maeni mwela ineu, omu ke kinetaꞌinie saemiu mwaanie omu rongo hunie mo haꞌa-uusulinge eero-eero, aana o ko deu urine, nge o kaꞌa paloa ike tohungei God, taꞌe o ko palo-paloa mola mo god eero-eero.5:21 Mo god eero-eero e kaꞌa mola mo nunui ola wa mo aakalo wa mo liꞌoa aaela haliꞌite, taꞌe ikire noꞌone taꞌena nga ola nge kie ko haꞌapainaꞌaa liutaa aana God, wa saeka ko heri hunie liutaa aana oodo-oodonga a God.