TITUS

TITUS

¹ Au anah Nai Titus! Au, Nai Paulus, au tui sulat i on Uisneno In ate ma on haef knino Yesus Neno Anan. In anbeti kau ma ansonu kau he tuntaku Uisneno atoin mabeti sin he nati’ anhataniok anbi sin fnekat. Ma he topu sin he nati’ nahin lasi amneot le nanoina nani natuin hit luli besa knino, ² natuin afnekat neu lasi honis nabal-bal. Uisneno anba’an nalali honis nane na’ko neno fe kan fatan fa pah pinan -- ma Uisneno In ka napoibon. ³ Bi leku malomi, Uisneno nalile nani anbi In han ba’an neu pah pinan. Han ba’an nane nana’at nalali neu kau, ma au etun ulali natuin lekat Uisneno hit Afetin. ⁴ Nai Titus, ho namneo-namneo au anah ko, fun hit alkit atpalsai neu Neno Anan. Au ufnekan he nati’ Uisneno hit Ama ma Yesus Neno Anan hit Kesel Afetin, anfe tetus, amnaut ma halan nekaf neu ko. ⁵ Au usaitan ko anbi Kreta he nati’ ho musopu ale lasi le fe ho he mepu mani. Ma he nati’ ho maiti penatua-penatua anbi kuan mes-mese. Ma mumnau ale au lekat i: ⁶ Atoni le hen fani penatua so atoni le kan mo’ef lasi amle’ut; in mes anmafe bife mese; in anhenu mes nafnek nalali neu Neno Anan ma ka anah-anah le mahine on anah-anah le anmo’en bute-bute ai le ka natuin fa fainekat alekot. ⁷ Fun atopu Tolas Knino nane so atoni le anpanat mepu Uisneno. In kan mo’ef lasi amle’ut, in ka nanaebon, ai ka ato’as, ai anmafu tua, ai amaunu ai ansinmakan noni. ⁸ In lomi hen simo atoni le nem neu in ume, in lomi lasi alekot, amakesit, amneot, nek muti ma naplenat in aon. ⁹ In mes na’ namepan fef bela na’ko Uisneno, esle’ beno alekot, onle nanoina nalali neu in. Natuin lasi nane, in nabe’i hen fainek atoni natuin lasi noina amneot ma nalile ale atoni sin sanat le he nasuli nokan. ¹⁰ Fun atoni namfau le ka natuin fa, nes-nesi nonot Yahudi; sin nasekeb atoni bian neki sin lasi poiba. ¹¹ Atoni humaf nane sin, so ta’umut sin fefkenu, fun sin nale’un ume namfau neki lasi noina le kan tamaf ota. Sin mo’e ale lasi nane he nami osaf le ka nalekof. ¹² Sin mafefa mese, le na’ko Kreta afi na’uab nak, "Atoni Kreta sin atoni apoiba, mu’it alalu, apalu ai akomat apehet." ¹³ Saksit nane namneo. Es nane te ho mukain sin matani, he nati’ sin fnekat neu Uisneno nok amneot. ¹⁴ Ma kais natuin atoni Yahudi sin lasi nu’un ai ale lekat-lekat le atoni antite noina amneot anmo’e nani. ¹⁵ Fun ale sa’, knino neu ale atoni knino. Mes neu ale atoni le sin natenab amle’ut ma kan mu’in fa fnekat, katit fa sa’ esle’ knino, fun sin tenab ma sin nekan namle’u nalali. ¹⁶ Sin na’uab nak nahin Uisneno, mes sin mo’et nane natotan Uisneno. Nekan anbulalu ma kan lomif he natuin; sin le nane atoni le ka nabe’i fa hen mo’e lasi alekot mese.

¹ Mes ho, Nai Titus, so leko ho munoina lasi noina le neki aomina. ² Hom fainek atoni mnasi sin, he nati’ sin nanebet sin monin, anmu’i kan tola, amkesit, nafnek neu Uisneno nok amneot, anmoni nok manekat ma nok sutais. ³ Onane amsa hom fainek bife mnasi sin, so sin mo’et knino onle bife le naluli ma nabes neu Uisneno. Sin ka nabe’i antek nale’un es in kanan, sin ka nabe’i he ninun tua amafut. Sin mes nanoina lasi alekot, ⁴ ma nok lasi nane, sin nanoina bife munif sin he nati’ sin nek sin mone ma sin anhenu, ⁵ monin nok nek hine ma knino, ma hen fani ainaf alekot anbi sin ume, ma nabaunok neu sin mone. Nok lasi nane of kan mu’if atoni le nabe’i na’uab nale’un beno na’ko Uisneno. ⁶ Onane amsa anfainek atoni munif sin, he nati’ sin panat sin aon na’ko ale lasi. ⁷ Ma so anbi ale lasi ho mulile mo’et alekot on a’heta. So munoina sin nok nek muti ma namneo-namneo. ⁸ Ho munoina sin meki a’at amkesit, le kan mu’if atoni he naslaet nani, he nati’ ho musu sin anmaen, fun kan mu’if lasi amle’ut le nabe’i sin na’uab nani antom kit. ⁹ Ale ate sin so nabaunok neu sin tuan ma anhalin sin nekan anbi ale lasi. Sin ka nabe’i hen sulin, ¹⁰ ai nabakan. So sin nalile nak sin mo’et leko ma aki’at; he nati’ atoni anpules noina antom Uisneno, hit Kesel Afetin, fun ale sa’ le sin anmo’e nane. ¹¹ Fun Uisneno nalile nalali In amnaut neu he namonib ale mansian. ¹² Amnaut Uisneno nane nanoina kit he nati’ hit monik ka nasuli nok lomin Uisneno ma ka tatuin fa sinmakat pah pinan. Nanoina kit het moni atbi pah pinan i, atpanat hit aok, nek muti ma taluli tabes neu Uisneno. ¹³ Tomas i hit fe atpao neno hatas le hit tafnekan. Bi neno nane pah pinan of nit Uisneno Naek In apinat ma hit Afetin Yesus Neno Anan. ¹⁴ In natulu nalali In aon neu kit he namonib kit na’ko ale lasi amle’ut, ma anmo’e kit on to knino le anfani In ini, ma anmakoe hen mo’e alekot. ¹⁵ Munoina sin ale lasi nane, ma amfainek ma mukain sin meki ho uab ma ho mo’et alekot. Kais mumautu atoni mese amsa he nanebet ko.

¹ Ho mumnaub sin he nati’ sin nanebtok neu ana’ aplenat ma ale atoni makana ma naloitnok he nanaob ale mepu alekot. ² Am etun sin amsa he nati’ kais sin na’uab nale’un es in kanan, kais sin matoen, so sin nalile nek baun neu ale atoni. ³ Fun afi hit amsa amonot, akiku ma ka tatuin fa plenat. Hit aetnok neu ale lasi sinmakat huma-huma ma ta’unu nekak ma kat malomif es nok es. ⁴ Mes Uisneno hit Afetin nalile manekan ma In nek mamun neu kit. ⁵ In namonib kit, ka natuin fa hit mo’et alekot, mes natuin In nek mamun neu kit. In namonib kit natuin Smanan Knino, le nahonis kit fe’u ma anfe kit monit fe’u nok lalan anboe kit. ⁶ Uisneno nasanut In Smanan Knino neu kit, natuin Yesus Neno Anan hit Kesel Afetin, ⁷ he nati’ natuin Yesus manekan, hit taleko atfani tok Uisneno ma hit atsimo honis nabal-bal le hit tafnekan tani. ⁸ Tebes namneo a’at i. Au lomi he nati’ ho mutesan ale lasi i, he nati’ ale atoni le nafnek nalali neu Uisneno namneo-namneo sin naim lalan hen mo’e ale mepu alekot ma antam ota neu ale atoni. ⁹ Miskotun ale lasi ka mahine le kan tamaf ota ma lasi pe’ot huma-huma. Misaitan ale lasi matoes, lasi mabisot antom Plenat Knino unu. Ale lasi nane kan tamaf ota ma luman kun. ¹⁰ Atoni le neki lasi suli neu Tolas Knino hom fainek mani hae mese ai hae nua; oke te kais mumnono amteni mokan. ¹¹ Ho muhin, nak atoni humaf nane atoni abulalut ma ale in sanat nane nalilon nak in nasanab. ¹² Leka au lelu Nai Artemas ai Nai Tikhikus net neu ko, ho aum laba neu kau anbi Nikopolis, fun au sali he umaika anbi bale nane bi neno oefat manikin. ¹³ Amtuntaku lek-leko Nai Zenas, ahine plenat knino nane ma Nai Apolos, he nati’ kais sin nuk sa’ anbi lanan. ¹⁴ Hit atoni sin amsa, maut he nanoni hen mepu alekot he nano’u sin monin neno-neno. Kais sin monin nane kan tamaf ota. ¹⁵ Ale bae le sin nok kau anbi i sin sonu tabe neu ko. Mutiaba au tabe neu hit bae benu le sin nafnek neu Neno Anan. So Usif tunan anfe tetus neu ki alki.