ROMA

ROMA

¹ Neu bae knino alki anbi Roma, le Uisneno a’nek ki ma anboin ki hem fani In to knino. Na’ko Nai Paulus, Neno Anan Yesus, In ate, le anboin hen fani haef ma naknino nani neu hen etun Uisneno In Beno Alekot. ² Beno Alekot nane Uisneno anba’an nani anbi neon unu natuin In Mafefa Knino sin anbi sulat knino. ³ Beno Alekot nane antom In Anmone, le natuin nesaf pah pinan nahonis In na’ko Nai Daud in sufan. ⁴ Mes natuin mepu Smanan Knino, anlek nan In on Uisneno Anmone. Lasi nane natonon nok kuasat matane natuin In fen anfani na’ko amates. ⁵ Natuin In, haim simo halinat ma mepu haef knino hem topu ale uf, he nati’ nekan nateb knino ma natuin In kanan. ⁶ Fun anbi sin hi amsa le ambi pah Roma; anboin ki hem fani Yesus Neno Anan In ini. ⁷ Es nane te, au tui ki sulat i bae benu alki. So tetus ma halan nekaf na’ko Uisneno, hit Ama, ma na’ko Usif Yesus Neno Anan nok ki alki. ⁸ Nahun-hunu au utulu nekak neu Uisneno antom ki natuin Yesus Neno Anan; fun pah pinan funam natef sin nen, nak hi nekam nateb knino namneo neu Neno Anan. ⁹ Au umnau ki piut anbi onen totis. Uisneno anfani saksi, nak sa’ le au u’uab i namneo. In kun Uisneno le au tuthae eki au nekak oke, he etun In Anmone In Beno Alekot. ¹⁰ Au onen toti, he nati’ Uisneno anlomi, oke te au upeni manuan he eti kiso ki. ¹¹ Au lomi he it ki, he nati’ au bati sankolan Smanan Knino, hen hatain ki. ¹² Au salit natuin hit alkit nekak nateb neu Yesus Neno Anan, oket him mahatanen tuk nam tuk. ¹³ Bae benu alki, au lomi he nati’ hi mihin nak, au bekot teni-teni he eti eu ki -- mes tal neno i au useni piut -- Au lomi he nati’ upeni mepu in nesan anbi ki, onle au upeni amsa anbi uf bian le kan tamaf nonot Yahudi anbi bale bian. ¹⁴ Au fe utus neu atoni Yunani ma neu atoni le kan tamaf nonot Yunani. Ma neu atoni ahinet ma neu atoni amonot. ¹⁵ Es nane au lomi he etun Beno Alekot neu ki amsa le namaika anbi Roma. ¹⁶ Au nekak nateb namneo neu Beno Alekot nane, fun Beno Alekot nane matanin Uisneno le namonib ale atoni le nekan nateb knino. Nahun-hunu neu atoni Yahudi, mes neu atoni Yunani amsa. ¹⁷ Fun anbi Beno Alekot nane, Uisneno an etun nak lasi mafutus mansian nok Uisneno naleko anfani; ini naon esle’ nok palsait neu Uisneno, na’ko palmelu tal namsopu. Nane papmese onle antui anbi Sulat Knino, "Atoni le anpalsai neu Uisneno talan te in mafutus nok Uisneno naleko anfani, atoni nane of napeni honis." ¹⁸ Uisneno nalile In to’as na’ko neno tunan neu ale atoni asanat ma atoni amaufinut, fun maufinut nane nasenip mansian le he naleko anfani nok Uisneno. ¹⁹ Fun sa’ le sin he nahine antom Uisneno, nalilon neu sin, fun Uisneno nalile nalali neu sin. ²⁰ Na’ko neno le Uisneno anmo’e pah pinan, Uisneno In lasi ka mamnita fa, esle’ In monin on Uisneno ma In kuasat nabal-bal, atoni pah pinan nit nalali natuin ale sa’ le In anmo’e. Es nane atoni pah pinan kan mu’if uab he namneob sin aon. ²¹ Sin nahin Uisneno mes sin ka naliatas fa In on Uisneno ma ka natulu fa nekan neu In. Mes sin natenab lasi kahahine ma sin nekan amonot anfani mesokan. ²² Sin moesok on atoni ahinet, mes sin fani amonot kun. ²³ Sin anseka Uisneno In apinat le ka namle’u nit neki humaf atoni pah pinan le namle’u kun, kolo-kolo, ale mu’it hae ha, ma ale mu’it le anonok. ²⁴ Natuin lasi nane, Uisneno namautu sin anbi sinmakat nekaf pah pinan neu hen mo’e amle’ut, talan te sin anmo’e ale lasi alahit neu sin aon. ²⁵ Uisneno amneot, sin anseka neki lasi poiba. Sin ka naluli ma nabes fa neu Apakaet, mes sin naluli ma nabes neu le anpakae nani. So mak anpules Apakaet nane talan te nabal-bal! Amin. ²⁶ Es nane te Uisneno namautu sin neu nek sinmakat le namaeba sin. Bife-bife sin kan lomi fa hen tup nabua nok atoni, mes bife anmo’e amle’ut nok bife. ²⁷ Onane amsa atoni kan lomi fa hen tup nabua nok bife, mes sin nek sinmakat nane ansae, talan te atoni anmo’e amle’ut nok atoni. Ma onane te sin ansimo seunbanit amle’ut neu sin aon natai nok sin mo’et nane. ²⁸ Fun sin kan lomif he nahin Uisneno, es nane te Uisneno namautu sin neu tenab amle’ut, talan te sin anmo’e sa’ le ka nabe’i he sin mo’e. ²⁹ Sin nekan nahenu nok lasi maufinu, lasi amle’ut, lasi komat ai lasi palu, lasi bulalu, nahenu nok to’as, ma’otes ma matoes, lasi ak’elo ma lasi amle’ut bian. ³⁰ Sin na’uab nale’un es in kanan, na’akan, antek nale’un Uisneno, ka nahin lasi noina, naliabok, namoko’ok, ahin ela amle’ut, nak fatu neu amaf ainaf. ³¹ Sin kan mu’if tenab alekot, kan mu’in fa nek aki’at, kan mu’in fa manekat ma ka nahinef lasi manekat. ³² Sin nahinen, nak natuin Plenat Uisneno, ale atoni le anmo’e lasi amle’ut onane, mes anlek he namate sin. Maski onane amsa, sin anmo’e lasi amle’ut nane. Ma sin anlomi amsa he nati’ atoni bian anmo’e lasi amle’ut nane.

¹ Es nane, koi bae, ho sekau ko ka, le hom fain alef lasi neu atoni bian, mes ho amsa atoin asanat ko. Fun leka ho musanab atoni bian, ho musanab kum ho aom, natuin ho mo’e kum lasi le ho musanab mani. ² Mes hit tahin, nak kalu Uisneno nanaoba In kasat neu ale atoni le anmo’e onane, Uisneno fekat nane namneo. ³ Ma ho, koi bae, le ho musanab sin natuin sin mo’et, mes ho amsa amo’e lasi nane. Kais ho mutenab mak, of ho mufetnom mu’ko Uisneno In kasat. ⁴ Ai ho mutenab amsan Uisneno In nek mamun athoes, In nek manuan ma nek seusabat anaek ka? Ai ho ka muhin fa ka, nak Uisneno In nek mamun nane anhel ko neu te’un nekaf ka? ⁵ Natuin ho nekam manu’ ma ho kam lomif he mute’un ho nekam. Es nane ho mutupu to’as Uisneno neu ho aom, bi neno Uisneno In to’as ma In neno lef lasi amneot le of nalilon. ⁶ Fun Uisneno of anseunbanin ale atoni natuin sin mo’et. ⁷ In anfe honis nabal-bal neu ale atoni le anmo’e lasi alekot, ma naim lasi apinat, lasi makana ma lasi le ka namle’u nitaf. ⁸ Mes ale atoni le natenab neu in aon, le ka natuin fa lasi amneot mes natuin lasi amle’ut, Uisneno In to’as ma In maunu of nem neu sin. ⁹ Ale atoni le anmo’e lasi amle’ut, of napeni hamu’it ma malenat; nahun-hunu atoni Yahudi ma atoni Yunani amsa. ¹⁰ Mes ale atoni le anmo’e alekot, of napeni kan apinat ma kan tola ma halan nekaf na’ko Uisneno; nahun-hunu atoni Yahudi ma atoni Yunani amsa. ¹¹ Fun Uisneno kan betif humaf ma masaf. ¹² Ale atoni anmo’e sanat fun ka nahine fa Plenat Knino, of sin napeni lenat amsa ka nok fa Plenat Knino. Mes ale atoni le nahine fa Plenat Knino mes anmo’e sanat, of anlef sin lasi amsa natuin Plenat Knino. ¹³ Fun atoni le naleko anfani nok Uisneno, ka natuin fa atoni nane nahin Plenat Knino, mes natuin in mo’e Plenat Knino nane. ¹⁴ Atoni le kan tamaf nonot Yahudi, sin ka nahin fa Plenat Knino unu. Mes kalu sin mo’e natuin Plenat Knino nane in lomin, natuin sin nekan kun, of sin anfani Plenat Knino neu sin aon; maski sin ka nahin fa Plenat Knino nane. ¹⁵ Fun nok lasi nane, sin nalile nak Plenat Knino matui anbi sin nekan. Sin nek amnonot ansaksi lasi nane, fun sin nek tenab nane nasanab sin nok ma namneob sin nok. ¹⁶ Lasi nane of anbol bi neno le Uisneno anlek nani. Fun natuin Beno Alekot le au eut ani neu ki, Uisneno of anlef ale lasi le natolo’on anbi atoni pah pinan sin nekan, natuin Neno Anan Yesus. ¹⁷ Mes neu hi, hi mitenab onme ka? Him tek hi aom, atoni Yahudi. Him sonlaitan meu Plenat Knino unu, hi miliabom ambi Uisneno. ¹⁸ Plenat Knino nanoni ki, he mihin Uisneno In lomin, oke te mihin lasi alekot ma lasi amle’ut. ¹⁹ Hom saksiom mak, hom fain atopus neu atoni matfolo ma meusine neu atoni le anbi mesokan. ²⁰ Hom fain anoni neu amonot sin, ma kulu neu li ana sin. Fun ho muhin mak anbi ale Plenat Knino, ho mu’i ale lasi hine ma noina amneot. ²¹ Leka me ho he munoni atoni bian, mes ho ka munoni fa ho aom? Ho munoni mak, "Kais mubak," nansa’ es ho mubak? ²² Ho mu’uab mak, "Kais mapaisa," nansa’ es ho mapaisa ka? Ho mainisin ale le’u mahuma, nansa’ ho musikan uim le’u ka? ²³ Ho muliabom ambi Plenat Knino mes nansa’ ho mumaeb Uisneno ma ka mutuin fa Ini plenat ka? ²⁴ Fun antui nani anbi Sulat Knino nak, "Natuin hi, atoni Yahudi, namaeb Uisneno In kanan anbi ale uf-uf bian sin atnanan." ²⁵ Kalu ho mutuin Plenat Knino, lasi helit nane ma’upa. Mes kalu hom tanhai Plenat Knino, lasi helit nane ka ma’upa fa. ²⁶ Es nane, bati atoni le ka maheli in anpanat Plenat Knino in lekat, ai in ka namnesaf nok atoni maheli ka? ²⁷ Kalu onane, atoni ka maheli, mes in mo’e natuin Plenat Knino, of anfani alef lasi neu ki le hi mu’i Plenat Knino ma maheli, mes him tanhai Plenat Knino. ²⁸ Fun atoni Yahudi amneot, ka al fa antek in kanan nak Yahudi; ma atoni maheli namneo, ka al fa atoni le anmo’e lasi helit anbi in aon. ²⁹ Mes atoni Yahudi namneo, esle’ atoni Yahudi anbi nekan; ma lasi helit nane anbi nekan natuin mepu Smanan Knino, ka natuin fa tuis le mamnita. Atoni humaf nane ansimo pules na’ko Uisneno, kan simof pules na’ko mansian.

¹ Kalu onane atoni Yahudi sin anesit es sa’ ka? Ma lasi helit in neki leko sa’ ka? ² In lasi alekot nane naek. Nahun-hunu: fun nana’at Uisneno In a’an neu atoni Yahudi sin. ³ Leka sin kan mu’in fa nek aki’at onane te onme ka? Lasi nane naikoti Uisneno In lasi aki’at ka? ⁴ Ka nabe’i. Fun Uisneno nane amneot, ma ale atoni pah pinan apoiba, onle antui nani anbi Sulat Knino nak, "He nati’ Ho mulile lasi amneot anbi Ho a’am, ma Ho mis, bi neno nafek Ho lasi." ⁵ Mes kalu hit lasi ma amneot nane nalile Uisneno In amneot, of hit tak sa’ ka? Uisneno ka amneot fa ka - au u’uab on mansian -- leka in nalile In to’as ka? ⁶ Ka nabe’i. Kalu onane, Uisneno anlef pah pinan in lasi onme ka? ⁷ Mes kalu natuin au lasi ka amneot, Uisneno In lasi amneot nathoe neu In kanan apinat; anlef anteni au lasi on atoni asanat neu sa’ ka? ⁸ Nansa’ hit ka ta’uab fa ma tak, "Leko hit mo’e lasi amle’ut, he nati’ lasi alekot anpoi." Atoni humaf nane sin napeni hukum namneo na’ko Uisneno. ⁹ Neu onme ka? Hit atoni Yahudi atmui lasi anesit sa’ ka na’ko bian? Kan mu’if. Fun hai misanab milali atoni Yahudi ma atoni Yunani, mak sanat naplenat sin oke. ¹⁰ Onle antui nani anbi Sulat Knino nak, "Katit fa atoni mese le namneo. ¹¹ Katit fa atoni mese le nahin, katit fa atoni mese le naim Uisneno. ¹² Ale atoni sin ansek ma ka natuin fa Uisneno, katit fa atoni mese le anmo’e lasi alekot; atoni mese amsa kahaf! ¹³ Sin po’an namkak onle nopu, sin man nahenu nok lasi poiba, sin lulun matua nok kauna in laso. ¹⁴ Sin fefan nahenu nok kasat ma le’at, ¹⁵ sin haen anmanap he namate atoni. ¹⁶ Lasi atselas ma amle’ut sin nabela anbi sin lanan. ¹⁷ Sin ka nahinef lalan le he neki halan; ¹⁸ ma lasi amtaus neu Uisneno kan mu’if anbi atoni nane." ¹⁹ Mes hit tahin, nak ale lasi le antui nani anbi Nai Musa in sulat nane neu sin le anmoni natuin Plenat Knino. Nok lasi nane te, katit fa atoni mese le he na’uab, ma pah pinan ok-oke napeni kasat Uisneno. ²⁰ Fun kan mu’if atoni mese le naleko anfani nok Uisneno fun in mo’e natuin Plenat Knino. So mak natuin Plenat Knino, ale atoni nahin in sanat. ²¹ Mes tomas i, Uisneno nalile nalali lanan neu mansian he naleko anfani nok Uisneno onme; ma lasi nane ka natuin fa Plenat Knino. Onle antui nalali anbi Nai Musa in sulat ma Mafefa knino sin sulat nak, ²² Uisneno anfe manuan he mansian naleko anfani nok Uisneno al natuin nek ateb knino anbi Neno Anan Yesus neu ale atoni le nekan nateb knino. Fun lasi nane ka nasulin fa. ²³ Ale atoni le anmo’e sanat ma na’lo na’ko Uisneno le he namonib sin. ²⁴ Ma al natuin halinat Uisneno le anfe neu sin lumluman, mansian naleko anfani nok Uisneno natuin Neno Anan Yesus. ²⁵ Uisneno anlek nalali Neno Anan Yesus hen fani ahal nekaf natuin nek ateb knino anbi Neno Anan Ini maten. Uisneno anmo’e lasi i he nalile In amneot ma amnonot. Fun Uisneno anpaleoba sin sanat le sin anmo’e bi neno unu, le In anseusaban sin sanat. ²⁶ Mes muni i, Uisneno antumatan sanat he nalile In amneot ma amnonot. Nok lasi nane In nalilon nak In amneot; ma ale atoni le anpalsai neu Yesus, natonon on atoni le naleko anfani nok Uisneno. ²⁷ Kalu onane hit he taliabok neu sa’ ka? Kan mu’if. Natuin lasi sa’ ka? Natuin hit mo’et ka? Kahaf, al natuin nek ateb knino! ²⁸ Hai mitenab mak, namneob atoni pah pinan natuin nek ateb knino, ka natuin fa Plenat Knino. ²⁹ Ai Uisneno nane al neu atoni Yahudi ka? Ai In ka Uisneno fa neu uf-uf bian amsa? Namneo, In amsa Uisneno neu uf-uf bian. ³⁰ Nane nak, anmu’i Uisneno mese ha. In es anfe manuan he atoni Yahudi naleko anfani nok Uisneno fun sin nek ateb knino. Ma In amsa anfe manuan neu ale uf bian he naleko anfani nok Uisneno; nane amsa natuin sin nekan ateb knino. ³¹ Kalu onane, hai mineku Plenat Knino unu natuin nek ateb knino ka? Ka nabe’i. Mes natuin nek ateb knino, haim hatani Plenat Knino nane.

¹ Es nane te, hit he tak sa’ ka neu hit am uf Nai Abraham? ² Fun kalu ansimo Nai Abraham natuin in mo’et, of in naliabon kun mes ka nok fa Uisneno. ³ Fun antui anbi Sulat Knino nak, "Oke te Nai Abraham nekan nateb knino neu Uisneno, ma Uisneno ansimo in on atoni le anhalin Uisneno nekan." ⁴ Atoni le anmepu, in ansimo baen; ma baen nane ka on fa halinat mes natuin in haet ma ini puse. ⁵ Mes kalu anmu’i atoni le kan mepuf, mes in nekan nateb knino neu In le nafetin na’ko sanat. Nok lasi nane Uisneno ansimo in on atoni le anhalin Uisneno. ⁶ Onane amsa Nai Daud antek ua alekot neu atoni le Uisneno ansimo nani ka natuin in mo’et nak, Nai Daud na’uab nak on i, ⁷ "Ua alekot neu atoni le ansako sin tanhais, ma Uisneno ankub sin sanat! ⁸ Ua alekot neu atoni le Usif tunan kan so’i fa in sanat neu in." ⁹ Tekas ua alekot nane al neu atoni maheli ai neu atoni ka maheli amsa? Fun haim tek, mak Uisneno ansimo Nai Abraham natuin anpalsai Uisneno. ¹⁰ Ansimo in on atoni apalsait es leka ka? Natuin Nai Abraham maheli nani ai fe kahaf? Ka maheli nani fa, mes leka in fe ka maheli fa. ¹¹ In ansimo helit nane on taka na’ko Uisneno natuin nek ateb knino le anlek nani nahunun in maheli. Onane te in anfani amaf neu atoni nek ateb knino le ka maheli fa; he nati’ ansimo sin on atoni le anhalin Uisneno. ¹² Ma anfani amaf amsa neu atoni maheli, le ka al fa sin maheli; mes sin nao natuin hit am uf Nai Abraham in nobin, bi neno in fe ka maheli fa. ¹³ Uisneno anba’an neu Nai Abraham nok in sufan ka’un, nak pah pinan i of anfani Nai Abraham in ini. Uisneno anba’an onane ka natuin fa nai Abraham anmo’e natuin Plenat Atoni Yahudi, mes natuin in nekan nateb knino neu es nane Uisneno anlomi ma ansimo in. ¹⁴ Fun kalu al atoni le natuin Plenat Knino unu, sin ansimo fef bela Uisneno, nek ateb knino nane luman kun. Ma fef ba’an knino nane ka ma’upa fa. ¹⁵ Fun Plenat Knino unu neki kasat Uisneno. Mes kalu kan mu’if Plenat Knino unu, lasi tanhais amsa kan mu’if. ¹⁶ Es nane te, Uisneno fef ba’an nane natuin nek ateb knino neu Uisneno. Lasi nane anfani fef ba’an neu Nai Abraham sufan ok-oke, nak Uisneno anfe neu sin lumluman; ka al fa neu sin le anmoni na’ko Plenat Knino unu, mes neu sin amsa le nekan nateb knino neu Uisneno onle Nai Abraham in nek ateb knino neu Uisneno. Fun Nai Abraham anfani amaf neu kit ok-oke. ¹⁷ Onle antui nani anbi Sulat Knino nak, "Au lek ulali ko he nati’ hom fani amaf neu uf namfaun." Anbi Uisneno In human, le Nai Abraham nekan nateb knino neu In; Uisneno le namonib amates ma Uisneno le anmo’e ale sa’ neki In a’an. In anmo’e kun sa’ le kan mu’if, anfani kun sa’ le anmu’i esan. ¹⁸ Nai Abraham nafnekan piut ma anpalsai piut maski kan mu’in tenif afnekat. Es nane te in anfani amaf neu uf namfaun, natuin a’at le antui nani nak, "Ho sufam ho ka’um of namfau onane." ¹⁹ Nai Abraham in nekan ateb knino kan lima’e ai kan ole nit, maski in nahin nak in aon anlimae; fun in uan oni ton natun mese. Ma in fel bi Sara in apun amsa anbitu’en. ²⁰ In nekan nateb knino nabala ma in ka nu’anu fa neu Uisneno In fef ba’an. Mes in nekan ateb knino anhatani in talan te in naliatas Uisneno In kanan. ²¹ In nekan nateb namneo nak Uisneno anmu’i kuasat anhalin he natis lasi le anba’an nalali. ²² Es nane te Uisneno ansimo Nai Abraham on atoni le anhalin Uisneno. ²³ A’at le nahan nak, "Ansimo on atoni le anhalin Uisneno" ka al fa neu Nai Abraham, ²⁴ mes neu kit amsa. Fun Uisneno ansimo kit amsa on atoni le anhalin In nekan, natuin hit nekak nateb knino neu In, le nafena Yesus, hit Usi, na’ko amates. ²⁵ Yesus le nana’at nani he namate natuin hit tanhais; oke te Uisneno nafena nafani In he naleko nafani kit nok Uisneno.

¹ Muni i hit taleko atfani tok Uisneno natuin hit nek ateb knino. Ma hit moni atbi halan nekaf tok Uisneno natuin hit Usi, Yesus Neno Anan. ² Natuin Yesus Neno Anan, hit tapeni manuan het simo Uisneno In manekan. Ma anbi lasi manekat i hit hake ma hit taliabok fun tafnekan het simo Uisneno In apinat. ³ Ma ka al fa lasi nane. Mes hit taliabok amsa atbi hit lasi hamu’it, fun hit tahin, nak lasi hamu’it nane neki atahas. ⁴ Ma nek atahas neki nek besi ma nek besi neki afnekat. ⁵ Ma afnekat nane ka namaeb kit fa, fun Uisneno natua hit nekak neki In manekan. Uisneno anmo’e lasi nane natuin In Smanan Knino le In anfe naleli neu kit. ⁶ Leka hit fe atlimae, Neno Anan anmate bi leku le Uisneno anlek nani, natuin hit atoni abulalut. ⁷ Fun mafen le’uf neu atoni le hen maten seka atoni amneot ma amnonot -- so neu atoin alekot oni anmu’i atoni le hen maten seka in -- ⁸ Mes Uisneno nalile In manekan neu kit, es nane Neno Anan anmaten seka kit, leka hit fe asanat kit. ⁹ Nes-nesi muni i, hit taleko atfani tok Uisneno natuin Neno Anan Ini maten; es nane of namonib kit amsa na’ko to’as Uisneno. ¹⁰ Fun leka hit fe tamusu tok Uisneno, In anhalan kit nok Uisneno, natuin In An mone anmate; nes-nesi hit, muni i le anhalan nalali kit, of namonib kit natuin Neno Anan In monin. ¹¹ Ma ka al fa lasi nane. Mes hit taliabok anbi Uisneno, natuin Neno Anan, hit Usif, fun natuin In hit tapeni lasi halan nane. ¹² Sanat antam neu pah pinan natuin atoni mese, ma lasi maten anbol na’ko sanat nane. Oke te lasi maten anbol neu ale atoni fun sin alsin anmo’e sanat. ¹³ Fun nahunun anmu’i Plenat Knino, sanat antam nalali neu pah pinan, mes sanat nane ka maso’ik fa, kalu Plenat Knino kan mu’if. ¹⁴ Maski onane na’ko batan Nai Adam talan te batan Nai Musa, lasi maten naplenat ale atoni pah pinan. Ma ale atoni le kan mo’ef sanat papmese nok Nai Adam sin amsa lasi maten naplenat sin. Fun Nai Adam anfani heta neu In le he nanoebon nem. ¹⁵ Fun Uisneno In sankolan kan namnes fa nok Nai Adam in tanhais. Fun natuin atoni mese in tanhais, atoni namfau anmate. Nes-nesi Uisneno In halinat knino le In nahoeb nani neu atoni namfau, natuin atoni mese, lo Yesus Neno Anan kun. ¹⁶ Ma halinat knino Uisneno nesin na’ko atoni mese nane in sanat. Fun leka atoni mese anmo’e nalali tanhais, fekat anpoi, nak "nasanab." Mes leka atoni amfaun anmo’e nalali sanat, halinat Uisneno nak, "Ka nasanab fa." ¹⁷ Fun natuin atoni mese in tanhais, lasi maten nem natuin atoni mese nane. Nes anteni na’ko sa’ le atoni mese bian anmo’e esle’ Yesus Neno Anan neu atoni amfaun. Uisneno of nahoeb In manekan neu sin lum-luman ma naleko nafani sin nok Uisneno; of sin naplenat anbi pah pinan i natuin Neno Anan. ¹⁸ Onane te, onle natuin atoni mese in tanhais, ale atoni napeni kasat, onane amsa natuin atoni mese in mo’et le natuin Uisneno In lomin, ale atoni napeni sako sanat ma napeni honis. ¹⁹ Es nane te, on atoni mese le ka natuin fa Uisneno In lomin, atoni namfau anfani atoni asanat; onane amsa, on atoni mese le natuin Uisneno In lomin, atoni namfau anfani atoni le natuin Uisneno In lomim. ²⁰ Uisneno anfe Plenat Knino nane, he nati’ lasi tanhais ansaton; ma sanat anbi me te, Uisneno In halinat knino nathoe anbi nane. ²¹ Onle sanat naplenat anbi maten, onane amsa Uisneno naleko’ nafani kit natuin In nek kit. Ma natuin hit taleko atfani tok Uisneno, In fe kit honis nabal-bal; natuin Yesus Neno Anan, hit Usi.

¹ Kalu onane hit he tak sa’ ka? Hit moni tabala atbi sanat, he nati’ Uisneno In halinat knino ansato piut neu kit ka? ² Ka on fa nane. Leka me hit atmaet talali natuin sanat, hit het moni tabala atbine ka? ³ Ai hi ka mihin fa ka, nak hit alkit le atsu oe anbi Neno Anan, ansub kit anbi Ini maten ka? ⁴ Onane te ansub kit nok In natuin hit su oe atbi Ini maten, he nati’ on nafena Neno Anan na’ko amates neki Amaf In apinat, onane amsa of hit moni atbi monit fe’u. ⁵ Fun kalu hit fani mese tok Neno Anan bi Ini maten, of hit fani mese amsa tok In anbi In anfen anfani. ⁶ Fun hit tahin, nak naponi nalali hit atoni mna nok In anbi hau nehe; he nati’ hit aok asanat in kuasat namneku ma kais hit aetnok a’teni neu sanat. ⁷ Fun atoni le anmate nalali, in nafetnon na’ko sanat. ⁸ Kalu hit mate tok Neno Anan, hit nekak nateb knino nak of hit atmoni amsa tok In. ⁹ Fun hit tahin, nak Neno Anan anfen anfani na’ko amates, In kan maten tenif. Maten ka mu’in tenif kuasat neu In. ¹⁰ In anmate neu sanat, ma In maet no mese talan te nabal-bal. Ma In monin nane, anmoni neu Uisneno. ¹¹ Onane amsa hi mihin, nak hi mate neu sanat, mes hi moni neu Uisneno anbi Neno Anan Yesus. ¹² Onane te so kais sanat naplenat hit ta’um amle’ut anbi pah pinan i, he nati’ kais hi mituin in sinmakat amle’ut. ¹³ Kais hi mina’at hi aom ta’um neu sanat hen mo’e lasi amle’ut. Mes hi mina’at hi aom neu Uisneno on atoni le afi anmate mes muni i anmoni. Ma mina’at hi aom ta’um neu Uisneno he nati’ anpake hen mo’e lomin Uisneno. ¹⁴ Sanat ka naplenat anteni ki, fun hi ka monif ambi Plenat Knino unu, mes hi moni ambi Uisneno In halinat knino. ¹⁵ Es nane te lasi onme ka? Ai hit het mo’e sanat ka, fun Plenat Knino unu ka naplenat kit, mes Uisneno In halinat knino es naplenat kit? Ka nabe’i. ¹⁶ Ai hi ka mihin fa ka nak leka hi mina’at hi aom neu es on ate he mituin in lomin, him fani ate neu atoni nane, he mitnin neu in; he neu sanat le antopu ki neu maten ka ai he mituin Uisneno, ma nok lasi nane mileko amfani mok Uisneno. ¹⁷ Mes hit tatulu nekak neu Uisneno! Afi him fain ate neu sanat, mes muni i hi mituin lasi noina le anfe neu ki meik hi nekam oke. ¹⁸ Hi mifetnom mi’ko sanat ma him fani ate neu Uisneno In lomin. ¹⁹ Au u’uab lasi i on mansian fun hi nekam anlimae. Fun onle hi mina’at hi aom ta’um hen fani ate neu lasi amolemut ma lasi bulalu he nati’ him bulalu. Onane amsa muni i hi mina’at hi aom ta’um hem fani ate neu Uisneno In lomin he mitiaba Uisneno In salit alekot. ²⁰ Fun bi neno him aetnom neu sanat, Uisneno In lomin ka naplenat ki fa. ²¹ Ma hi mipeni lasi alekot sa’ ka? Ale lasi nane namaeb ki, fun in amsopun nane maten. ²² Mes muni i, leka hi mifetnom mi’ko sanat, ma him aetnom neu Uisneno, hi mipeni alekot neu he miknino’om ma in amsopun honis nabal-bal. ²³ Fun sanat in upan nane maten. Mes Uisneno In halinat knino nane honis nabal-bal, anbi Neno Anan Yesus, hit Usi, le Uisneno anfe nani lum-luman.

¹ Ai hi ka mihin fa ka, bae benu alki, -- fun au u’uab neu sin le nahine plenat -- nak plenat nanaobon neu atoni talan te atoni nane in monin namsop? ² Fun bife mamone anfutnon neu in mone natuin plenat talan te in mone monin namsop. Mes leka in mone anmate, in nafetnon na’ko plenat le anfut in nok in mone. ³ Kalu bife nane anmamone anteni nok atoni bian, leka in mone fe anmoni, bife nane in mo’e lasi kake. Mes kalu bife nane in mone anmate, in nafetnon na’ko plenat le anfut in nok in mone. Ma kalu in mamone anteni nok atoni bian, nane in kan mo’ef lasi kake. ⁴ Es nane bae benu alki! Hi amsa amaet milalien neu Plenat Knino unu, natuin Neno Anan In aon; he nati’ him fani Neno Anan In ini le anfen anfani na’ko amates. Oke te hit fani atoni alekot neu Uisneno. ⁵ Fun leka hit fe atmoni natuin nekaf pah pinan, sanat in lasi sinmakat, le anbol natuin Plenat Knino unu, anmepu anbi hit aok ta’un. Oke te hit mo’e lasi amle’ut le neki kit neu maten. ⁶ Mes tomas i hit tafetnok ta’ko Plenat Knino unu. Fun hit atmaet talalien neu Plenat Knino unu le ane’ka kit. Muni i hit aetnok nok monit fe’u natuin Smanan Knino, ma ka nok fa monit mna’ natuin plenat in tuis ai in lulat. ⁷ Kalau onane, hit he tak sa’ ka? Plenat Knino unu nane sanat ka? Kahaf! Fun natuin Plenat Knino unu au uhin sanat. Fun au amsa ka uhinef lasi sinmakat nane sa’. Kalu Plenat Knino unu ka na’uab nani nak, "Kais hom sinmak." ⁸ Mes natuin plenat nane, sanat napeni manuan he nafena lasi sinmakat huma-huma anbi au nekak; fun kalu Plenat Knino kan mu’if, sanat nane anmate. ⁹ Afi au moni ka natuin fa Plenat Knino unu. Mes leka Plenat Knino nem, sanat anmoni, ¹⁰ ma au mate. Ma Plenat Knino le he neki kau neu honis, nalilon neu kau ma neki kau neu maten. ¹¹ Fun natuin Plenat Knino nane, sanat napeni manuan hen nalosib kau ma namate kau. ¹² Kalu onane Plenat Knino nem na’ko Uisneno, ma ale plenat le nem na’ko Uisneno, namneo ma leko. ¹³ Kalu onane, alekot nane anfani maten neu kau ka? Kahaf! Sanat anpaek alekot he neki maten neu kau, he nati’ in mo’et nane nalilon on sanat. Ma natuin plenat nane sanat nalile anteni in mo’et on sanat. ¹⁴ Fun hit tahin, nak Plenat Knino nane Smanan Knino ini, mes au atoni alima’et kau. Nasosa kau neu sanat in kuasat. ¹⁵ Fun sa’ le au mo’e, au ka uhinef. Au ka mo’ef sa’ le au lomi, mes au mo’e sa’ le au ka lomi. ¹⁶ Kalu au mo’e sa’ le au ka lomi, au lomi, au ak Plenat Knino nane leko. ¹⁷ Kalu onane, au es ka mo’e, mes sanat le namaika anbi kau. ¹⁸ Fun au uhin, nak kan mu’if alekot sa’ anbi kau, bi au aok taun pah pinan. Au mui nek lomif, mes au ka mo’ef lasi alekot. ¹⁹ Fun au ka mo’ef alekot le au lomi, mes au mo’e amle’ut le au ka lomi. ²⁰ Kalu au mo’e sa’ le au ka lomi, nane au es ka mo’e, mes sanat le namaika anbi kau. ²¹ Au upeni plenat i onane, leka au lomi he mo’e alekot, amle’ut nane anbol neu kau. ²² Fun anbi au nekak, au lomi Plenat Uisneno, ²³ mes anbi au lokif taluf, au it plenat bian le anmabe’u nok plenat le au uhine eki au nekak ahinet. Es nane te anfut kau anbi ini plenat, le anbi lokif taluf nane. ²⁴ Au atoni amle’ut kau! Sekau he nafetin kau na’ko aof maten i ka? ²⁵ So tulu nekaf neu Uisneno, natuin Yesus Neno Anan, hit Usi. ²⁶ Onane te au aetnok neu Plenat Uisneno eki au nek hine alekot, mes au aetnok neu sanat eki au aok ta’uk pah pinan.

¹ Onane te kan mu’if alef lasi neu sin le anmoni anbi Neno Anan Yesus. ² Smanan Knino le anfe honis, nafetin ki anbi Neno Anan na’ko sanat in kuasat ma maten in kuasat. ³ Fun sa’ le Plenat Knino kan mo’e nani natuin nek ole pah pinan, Uisneno anmo’e nani. Uisneno ansonu In Anmone anbi ta’un pah pinan, le namnes nok ta’un pah pinan, hen be’u sanat in kuasat. In anlef lasi neu sanat anbi ta’un pah pinan, ⁴ he natisi Plenat Knino in lomin anbi kit, le kan monif natuin ta’un pah pinan, mes natuin Smanan Knino. ⁵ Fun sin le anmoni anbi ta’un pah pinan, sin natenab lasi natuin ta’un pah pinan. Mes sin le anmoni anbi Smanan Knino, sin natenab lasi le na’ko Smanan Knino. ⁶ Fun ta’un pah pinan in lomin nane maten. Mes Smanan Knino nane in lomin nane honis ma halan nekaf nok Uisneno. ⁷ Fun ta’un pah pinan in lomin namusu nok Uisneno, fun in ka natuin fa Uisneno In plenat. Ma in ka nabe’i fa he natuin Uisneno Ini plenat. ⁸ Atoni le anmoni anbi ta’un pah pinan, ka nabe’i fa hen halin Uisneno In nekan. ⁹ Mes hi ka monif ambi ta’un pah pinan mes anbi Smanan Knino, kalu onane Smanan Knino natua anbi he nekam. Mes atoni le kan mu’if Neno Anan Ini Smanan Knino, atoni nane ka Neno Anan Ini fa. ¹⁰ Mes kalu Neno Anan anmoni anbi hi nekam, hi aom anmate natuin sanat, mes Smanan Knino anfe honis neu ki, fun hi mileko amfani mok Uisneno. ¹¹ Kalu Uisneno In Smanan Knino, le nafena Yesus na’ko amates, In natua anbi hi nekam, of In le nafena Neno Anan Yesus na’ko amates, of In nafena hi aom amle’ut nane amsa, neki Ini Smanan Knino le natua anbi hi nekam. ¹² Es nane, bae benu alki, hit tatus, mes ka tatusaf neu ta’uf pah pinan, he nati’ hit moni tatuin ta’uf pah pinan. ¹³ Fun kalu hi moni mituin ta’uf pah pinan, of hi mate. Mes kalu nok kuasat Smanan Knino, hi mimate hi aom in mo’et of hi moni. ¹⁴ Fun ale atoni le Smanan Knino antopu sin, sin le nane anah-anah Uisneno. ¹⁵ Fun hi kam simof sman ate le hen hakatau ki, mes him simo Smanan Knino le nafani ki on anah Uisneno. Ma natuin Smanan Knino nane hit anbai tak, "Koi Abba! Koi Ama!" ¹⁶ Smanan Knino nane ansaksi nabua nok hiti smanak, nak hit lo anah-anah Uisneno kit. ¹⁷ Kalu hit le i In anah kit, hit amsa apal bale bela mnasi kit, le het simo Uisneno In fef bela, tabua tok Neno Anan, fun kalu hit sutai mane’at tok In, of naliatas kit amsa nok In. ¹⁸ Fun au tebes, ak lasi mane’at batan i ka maleta fa nok kan apinat le of nalile neu kit. ¹⁹ Ale amonit anbi pah pinan anhat ma anpao nok nek sinmakat leku le Uisneno he nalile In kan apinat neu In anhenu. ²⁰ Fun namautu ale amonit neu lasi ka ma’upa, ka natuin fa sin lomin, mes natuin Uisneno In lomin onane. ²¹ Maski onane amsa anmu’i afnekat, fun of nafetin ale amonit nane sin na’ko anaetnok neu lasi amle’ut ma natam sin ao sona apinat nok anah-anah Uisneno. ²² Fun hit tahin, talan te tomas i ale amonit ansaksi natuin mane’at onle bife ansutai men mahonit. ²³ Ma ka al fa sin anmes es ansakoi, mes hit amsa atsakoi atbi hit nekak. Fun hit simo Smanan Knino, on manekan Uisneno le ahunut; ma hit fe atpao he nafetin hit aok ta’un ma nait kit het fani on anah. ²⁴ Fun namonib kit anbi lasi afnekat. Mes kalu sa’ le hit tafnekan hit tit talali, nane ka afnekat fa. Fun leka me atoni he nafnekan sa’ le in nit nalali? ²⁵ Mes leka’ hit tafnek neu sa’ le hit ka titefa, hit at pao in nok a’ki’at. ²⁶ Onane te Smanan Knino anbab kit anbi hit lima’et; fun hit ka tahin fa het onen toti onme. Mes Smanan Knino anonen toti neu Uisneno anseka kit neki hit sananet le hit ka tek tani fa anbi hit onen totis. ²⁷ Ma Uisneno nit hit nekak nanan, ma nahin Smanan Knino In lomin. Fun Smanan Knino antoti Uisneno neu ale to knino namnes nok Uisneno In lomin. ²⁸ Tomas i hit tahin, nak Uisneno anmepu anbi ale sa’ he neki alekot neu ale atoni le sin nek In ma le anboin neu In bekot. ²⁹ Fun ale atoni le Uisneno anbeti nani sin na’ko afi unun, In anlek nani sin hen fani humaf mese nok In Anmone, lo Yesus Neno Anah kun. Onane te In Anmone nane, anfani Anan ahunut anbi bae knino namfau. ³⁰ Fun sin le anlek nani sin na’ko afi unun, In anboin sin. Ma sin le In anboin sin, In naleko nafani sin nok Uisneno. Ma sin le In naleko nafani sin nok Uisneno, napeni honis anbi Uisneno. ³¹ Hit he tak sa’ ka neu ale lasi nane? Kalu Uisneno anhake nok kit, sekau hen be’u kit ka? ³² Uisneno ka nekaf In Anmone, mes In nana’at neu kit alkit. Leka me In he kan fe kit ale sa’ nok In ka? ³³ Sekau es he nasanab kit on to mabeti Uisneno, kalu Uisneno nalile nak hit ka tasanab fa? Sekau es anlef hit lasi ka? ³⁴ Neno Anan Yesus le anmate ka? Nesin teni na’ko nane, In le anfen anfani, le antunon anbi Uisneno In aon bian ne’u, In es of anhake he natau kit. ³⁵ Sekau hen soel kit na’ko Neno Anan In manekan ka? Lasi hamu’it ka, ai lasi manukat ka, ai lasi amli’ut ka, ai amnahas ka, ai monas ka ai suni ka? ³⁶ Fun antui anbi Sulat Knino nak, "Haim bi maten neno teme mese, natuin Ho, anmo’e kai onle bibi kase le hen lolo." ³⁷ Mes kahaf! Anbi ale lasi nane hit nesin ale atoin abe’ut sin, natuin In le nalile In manekan neu kit. ³⁸ Fun au uteb, ak he lasi maten ka, ai he lasi monit ka, he ahake neno tunan ka, he ana’ aplenat ka, le anbi tomas i ai anbi neon amnemat ka, ³⁹ ai ale kuasat abit neno tunan ma abit pah pinan ka, ai amonit bian, ka nabe’i hen sole kit na’ko Uisneno In manekan, le anbi Neno Anan Yesus hit Usi.

¹ Au u’uab lasi amneot anbi Neno Anan. Au ka upoibok ai au ka umoe fa. Au nekak ansaksi kau anbi Smanan Knino nak au a’at i namneo. ² Au nekak antu, ma au susal piut, ³ natuin au bae sin le uf mese nok kau natuin ta’uf pah pinan. Au lomi he Uisneno ansukat kau, ma ansole kau na’ko Neno Anan natuin sin. ⁴ Fun sin le nane to Israel, Uisneno nait sin on In anah sin ma anfe kan apinat neu sin. In nabela fef ba’an ma Plenat Knino ma luli besa knino ma lasi manta’en neu sin. ⁵ Sin le nane anpoi na’ko hit am uf sin. Neno Anan natuin ta’un pah pinan anpoi na’ko sin. In namnau nesin ale sa’. In kun, Uisneno le het pules In kanan talan te nabal-bal. Amin! ⁶ Mes Uisneno In a’an ka nabe’i fa he luman. Fun ale atoni ka na’ubok fa na’ko atoni Israel. ⁷ Ma ale atoni le maso’ik anbi Nai Abraham in sufan nane ka Nai Abraham in anah sin. Mes Uisneno nakua In a’an neu Nai Abraham nak, "Al Nai Ishak in sufan nane of antek sin nak ho sufam." ⁸ Nane in oten, nak Nai Abraham sufan le hen fani anah-anah Uisneno, al in sufan le nahonis sin natuin fef ba’an Uisneno; ma ka in sufan ok-oke fa. ⁹ Fun Uisneno In a’an matua fef ba’an nak, "Bi ton amnemat onle neno i, of Au unoebok aum ma bi Sara of napeni anmone mese." ¹⁰ Mes ka al fa lasi nane. Ma bi Ribka le na’apu natuin atoni mese, hit am uf Nai Ishak. ¹¹ Fun leka in fe ka nahonis fa anhin nane, ma anhin nane fe kan mo’ef lasi amle’ut, -- he nati’ Uisneno In bekot antom In betis nane nabala, fun ka natuin fa mo’et, mes natuin In han boin -- ¹² In nakua a’an neu bi Ribka nak, "An anaet of anfani ate neu in olif." ¹³ Onle antui nani anbi Sulat Knino nak, "Au nek Nai Yakub, mes au ka nekaf Nai Esau." ¹⁴ Kalu onane hit he tak sa’ ka? Uisneno ka amneot ma ka amnonot fa ka? Ka on fa nane! ¹⁵ Fun In nakua a’an neu Nai Musa nak, "Of Au ulile Au nek mamun neu atoni le Au lomi he ulile Au nek mamun, ma of Au ulile Au manekak neu atoni le Au lomi he ulile Au manekak." ¹⁶ Uisneno fekat nane kan futnon fa neu atoni in lomin ai atoni in lekat mes anfutnon neu Uisneno In lomin. ¹⁷ Fun Sulat Knino an etun nak, "Uisneno nakua a’an neu Nai Firaon nak, ’Au uhakeb ko neu lasi i, he nati’ Au kuasat anbi ko, ma hen tek Au kanak anbi pah pinan funam natef.’ " ¹⁸ Es nane te Uisneno nalile In manekan neu sekau le In anlomi, ma In namanub sekau in nekan natuin In lomin. ¹⁹ Onane te of hi mi’uab neu kau mak, "Kalu onane, Uisneno nasanab lasi sa’ anteni ka? Fun sekau hen eka In lomin ka?" ²⁰ Hoi atoni, hi sekau ki ka, he matoe mok Uisneno ka? Nabe’i ka bale le anmo’e, nak neu amo’e bale nane nak, "Nansa’ es ho mo’e kau on in ka?" ²¹ Ai amo’e nai nane kan mu’if kuasat neu klofo ai tepaleob, hen mo’e na’ko bua mese le namnes es hen pake neu salit amasat es hen pake nani neu salit ka amasat? ²² Onane amsa neu lasi le Uisneno anmo’e nani. In lomi he nalile In to’as ma nalile In kuasat. Uisneno nalile In seusabat naek neu ale sa’ le In nato’an, le naloitan nani neu amle’ut -- ²³ Mes In nalile In apinat nok athoes neu ale sa’ le In nek nani le In naloitan nani neu kan apinat. ²⁴ Esle’ hit, le In anboin kit ka al fa na’ko atoni Yahudi, mes na’ko uf bian amsa. ²⁵ Onle In nakua In a’an amsa anbi Mafefa Knino Nai Hosea in sulat nak, "Atoni le Au ka to, of Au tek ani ak Au to. To le Au ka nek ani, of Au tek sin ak Au to bi’an." ²⁶ Ma anbi bale le antek sin nak, "Hi le i Au ka to ki fa," anbi nane of antek sin nak, "Anah-anah Uisneno le an-moni." ²⁷ Ma Nai Yesaya anhunun neu to Israel nak, "Maski Israel in anhin onle snaen anbi tasi, mes of sin faukah es napeni honis. ²⁸ Fun Usif tunan nakua a’an onme te, of In natis nani laba anbi pah pinan." ²⁹ Ma onle Nai Yesaya na’uab nani nahunu nak, "Kalu afi Usif tunan ka nabela kit fa sufa ma ka’uf, hit atfani on Sodom ma tamnes tok Gomora." ³⁰ Kalu onane te hit he tak sa’ ka? Lasi nak on i, ale uf bian le kan tamaf nonot Yahudi sin ka namif he nati’ sin lasi mafutus naleko anfani nok Uisneno. Mes natuin sin palsait, Uisneno naleko anfani nok sin. ³¹ Mes to Israel le sin anpanat plenat knino, sin nami piut he nati’ sin lasi mafutus naleko anfani nok Uisneno, mes sin ka napeni nani fa. ³² Sin ka napeni fa neu sa’ ka? Fun sin nanaoba lasi nane ka natuin fa nek ateb knino neu Uisneno, mes natuin sin mo’et kun. Es nane sin nastun ai antofuok neu fatu astunas. ³³ Onle antui nani anbi Sulat Knino nak, "Panat nai, Au ubela fatu aktulis ma faut astunas mese anbi Sion, atoni le nekan nateb knino neu In of ka namaeb nani fa."

¹ Balebenu alki! Au nekak ansinmak ma au onen toti neu Uisneno he nati’ namonib sin. ² Fun au saksi neu sin, nak sin anlomi he natuin Uisneno, mes sin kan mu’if nek hine amneot neu Uisneno. ³ Fun sin ka nahin fa sa’ le Uisneno anmo’e he mansian naleko anfani nok In. Ma fun sin lomi he natuin kun sin mo’et, es nane te sin ka natuin fa lasi le Uisneno anlek nani. ⁴ Plenat Knino nane Neno Anan natis nalalien. Es nane ale atoni le he naleko anfani nok Uisneno, so anpalsai neu In. ⁵ Nai Musa antui nak, atoni le naleko anfani nok Uisneno natuin Plenat Knino atoni nane of anmoni fun in natuin Plenat Knino nane. ⁶ Mes lasi atoni naleko anfani nok Uisneno natuin nek ateb knino neu Uisneno, nak on i, "Kais ho mutenab anbi ho nekam mak, Sekau hen sae neu neno tunan ka?", he nasanut Neno Anan, ⁷ ai, "Sekau hen sanu neu nopu maten ka?" he nasaeb Neno Anan na’ko amates. ⁸ Mes lasi nane in salin nak on i, "Uisneno In a’an anhaumak ki, anbi hi fefam ma anbi hi nekam." ⁹ Kalu hi miteb meki hi fefam mak, Yesus nane Usif tunan ma hi miteb knino ambi hi nekam mak, Uisneno nafena Neno Anan na’ko amates, of hi mipeni honis. ¹⁰ Fun atoni nekan nateb knino neki nekan, tal Uisneno ansimo on atoni le naleko anfani nok Uisneno. Ma atoni le ana’u neki fefan, Uisneno of namonib nani. ¹¹ Antui anbi Sulat Knino nak, "Atoni le nekan nateb knino neu In, of ka namaeb nani fa." ¹² Fun kan mu’if lasi mabetis neu atoni Yahudi ma atoni Yunani. Fun Uisneno mese, lo Usif tunan kun neu ale atoni. In nahoeb In manekan neu ale atoni le antoti neu In. ¹³ Atoni le antoti neu Usif tunan of napeni honis. ¹⁴ Mes leka me sin hen toti neu Usif tunan, kalu sin nekan ka nateb knino fa neu In ka? Leka me sin nekan he nateb knino neu In, kalu sin ka nenaf antom In ka? Leka me sin he nen antom In, kalu kan mu’if atoni le an etun antom In ka? ¹⁵ Ma leka me sin hen etun antom In, kalu kan sonu sin ka? Onle antui nani anbi Sulat Knino nak, "Alekot neu ale atoni le sin neman ma neki Beno Alekot na’ko Uisneno!" ¹⁶ Mes ka alsin ok-oke ansimo Beno Alekot nane. Nai Yesaya nak, "Usi, sekau es hen palsai hai lasi tonas nane ka?" ¹⁷ Es nane, atoni nekan nateb knino natuin sin nen lasi tonas, ma sin nen lasi tonas nane natuin anmu’i atoni le an etun antom Neno Anan. ¹⁸ Mes au utan ak: Ai sin fe ka nenaf lasi tonas nane ka? Namneo sin nen nalali. Fun antui anbi Sulat Knino nak, "Sin hanan ante pah pinan funam natef, ma sin a’an ante pah pinan tu’an." ¹⁹ Mes au utan a’teni ak: Ait atoni Israel sin fe ka nahin fa ka? Nahun-hunu Nai Musa na’uab nak, "Of Au mo’e ki he hi mituin uf bian le kan tamaf Au to, ma Au ufena hi to’as neu uf le anmono." ²⁰ Ma Nai Yesaya anhatanion ma na’uab anteni nak, "Uisneno nakua In a’an nak on i, ’Atoni le ka nami Kau, sin napeni Kau, ma Au ulilok neu atoni le ka natanaf neu Kau.’ " ²¹ Mes Nai Yesaya na’uab neu to Israel nak, "Uisneno nakua In a’an nak on i, Au enu Au nimak neno mnanu es, neu uf le nakfatu ma ka natuin fa plenat."

¹ Oke te au toti ak: Ait Uisneno antite In to ka? Kahaf! Fun au amsa atoni Israel kau, Nai Abraham in sufan, u’ko uf Nai Benyamin. ² Uisneno kan tite fa In to le In beti nalali. Ait hi ka mihin fa ka, sa’ le antui anbi Sulat Knino antom Nai Elia, le afi in natam Israel sin lasi neu Uisneno nak, ³ "Usi, sin namate Ho Mafefa knino sin ma antite namofu Ho baik fuat. Al au mes a moni ma sin lomi he namate kau amsa." ⁴ Mes Uisneno nakua In a’an neu Nai Elia onme ka? Uisneno nakua a’an nak, "Au fe mu’i atoni nifun hitu neu Kau, le sin ka naluli ma nabes fa neu Ba’al." ⁵ Onane amsa bi tomas i, fe anmu’i to Israel le Uisneno anbeti sin natuin In halinat knino. ⁶ Uisneno anbeti sin ka natuin fa sin mo’et alekot, mes natuin Uisneno In nek mamun. Fun kalu Uisneno anbeti sin natuin sin mo’et alekot, halinat nane ka halinat Uisneno fa. ⁷ Es nane te lasi onme ka? To Israel sin nami mes ka napeni fa, so atoni le Uisneno anbeti sin, sin napeni nani. Ma atoni bian sin namanub sin nekan neu Uisneno. ⁸ Onle antui nani anbi Sulat Knino nak, "Uisneno anmo’e sin talan te sin tupan finin, sin matkenu ka nitan fa ma sin lukek ka nenan fa, talan te neno i." ⁹ Ma Nai Daud nak amsa, "Maut he sin fesat nane anfani leo ma beku’ neu sin, lasi aseket ma lasi seunbanit neu sin. ¹⁰ Ma maut he sin matkenu anmesokan talan te sin ka nitan tenin fa, ma anmo’e sin koitkenu anluinen talan te nabal-bal." ¹¹ Au utan a teni ak: Ai atoni Israel nastun-antofuok hen belan finin ka? Kahaf! Mes natuin sin mo’et tanhais, Uisneno anfe tetus neu uf bian le kan tamaf nonot Yahudi, he na’koke sin nek atinos. ¹² Fun kalu atoni Israel sin mo’et tanhais nane on athoes neu pah pinan, sin lasi tanhais nane on athoes neu uf bian. Nes-nesi anteni kalu sin nanokbok neu Uisneno. ¹³ Au u’uab neu ki, hoi uf-uf le kan tamaf nonot Yahudi. Natuin au haef knino kau neu uf-uf le kan tamaf nonot Yahudi. Au ak lasi nane on lasi makana neu au mepu tuthaes. ¹⁴ Esle’ kal-kalu au ufena lasi tinos anbi to le uf mese nok kau sin nekan natuin nesaf ma umonib atoni bian na’ko sin. ¹⁵ Fun kalu Uisneno antite sin, lasi mafutus pah pinan nok Uisneno naleko anfani. Ma kalu Uisneno ansimo sin, nane on amates anfen anfani. ¹⁶ Kalu utunu’ pis ahunut nane sin anfe nalali neu Uisneno, nane nak sin utunu’ ok-oke anfe neu Uisneno amsa. Ma kalu hau ba’at nane Uisneno Ini, nane nak ale atlaen ok-oke In ini amsa. ¹⁷ Bub fua mina nane in atlaen bian esle’ atoni Yahudi, le anketu nani sin. Ma antapas ki neu tlaen nane in papan, on tol fui, esle’ atoni le kan tamaf nonot Yahudi. Ma hi mipeni alekot na’ko bub fua mina nane ini ba’an. ¹⁸ Es nane te kais hi miliabom neu hau atlaef nane sin. Leka hi miliabom, mimnau nai, fun hi hau atlaef ki. Ma hau atlaef ka namonib fa hau ba’at, so mak hau ba’at es namonib hau atlaef. ¹⁹ Oni hi mi’uab mak: Anmu’i atlaef-atlaef le maketu he nati’ antapas kau anbi sin on hau snuku. ²⁰ Leko! So ankeut napoitan sin natuin sin kan palsain fa, mes hi mi’ki natuin him palsai. Kais hi mikmok’om natuin lasi nane, so hi mimtau! ²¹ Fun kalu Uisneno kan mu’if lasi manekat neu hau tlae uf nane, of In kan mu’if lasi manekat neu ki amsa. ²² Es nane te ampanat nai Uisneno In nek mamun ma In matanin amsa. In matanin neu sin le natselan, mes In nek mamun neu ki. Kalu kahaf of ankeut nain ki amsa. ²³ Ma neu atoni Yahudi nane, kalu sin nasnasan anbi nekan ka nateb knino of antapas nafani sin. Fun Uisneno anmui kuasat hen tapas nafani sin. ²⁴ Fun leka anketu ki on atlaef na’ko bub fua mina fui le nasuil nok hi mo’et nane te antapas ki neu bub fua amneot. Nesin teni neu sin, le natuin sin na’in of antapas nafani sin neu sin bub fua mina in un. ²⁵ Bae benu alki! Au lomi he nati’ kais hi mak, hi mihin ale sa’. Fun anmu’i lasi tolo’ mese le es ka nahinef. Au lomi he nati’ hi mihine, fun to Israel sin bian namanub sin nekan talan te uf bian antam nalalien. ²⁶ Onane te of namonib to Israel ok-oke, onle antui nani anbi Sulat Knino nak, "Kesel Afetin of nanoebon nem na’ko Sion, of In nait naneku ale mo’et amle’ut na’ko Nai Yakub. ²⁷ Ma au mo’e fef bela ok sin on i, leka au ait uneku sin sanat." ²⁸ Atoni Yahudi namusu nok Uisneno ma kan lomif hen simo Beno Alekot na’ko Uisneno. Mes neu lasi betis, Uisneno nek sin fun natuin sin babfin. ²⁹ Fun Uisneno ka natofon fa neu In nek mamun ma In han haman nane. ³⁰ Afi hi ka mituin fa Uisneno, mes muni i hi mipeni Uisneno In nek mamun, fun atoni Yahudi sin ka natuin fa Uisneno. ³¹ Onane amsa tomas i, sin ka natuin fa Uisneno he nati’ hi mipeni Uisneno In nek mamun. Oke te sin amsa of napeni Uisneno In nek mamun. ³² Fun Uisneno natau sin alsin anbi nek manu’, he nati’ Uisneno nalile In amnaut neu sin alsin. ³³ Tebes Uisneno In athoen, In hinen ma In keon, matani le’uf kun! Sekau es nahin In lasi fekat ka? Sekau es ansu’ nit In mepu ka? ³⁴ Sekau es nahin Usif tunan In nek tenab ka? Ai sekau hen fani afainekat neu In ka? ³⁵ Ai sekau anfe sa’ ka neu Usif tunan, he nati’ In anseka nani ka? ³⁶ Fun ale sa’ nane na’ko Uisneno, ma natuin Uisneno ma neu Uisneno kun. So tanaeb Uisneno talan te nabal-bal! Amin.

¹ Es nane bae benu alki! Natuin Uisneno In nek mamun, au fainek ki, he nati’ hi mitulu hi aom on tulu honis ma knino le Uisneno anlomi. Hi luli besa neu Uisneno so onane. ² Kais hi mituin pah pinan in lomin. So hi mite’un hi nekam, he nati’ hi mihin Uisneno In lomin esle’ me. Sa’ le alekot, le Uisneno anlomi ma teme kun. ³ Natuin halinat knino, le Uisneno anfe nalali neu kau, au fainek ki alki. Kais hi mitenab ale lasi namnanu nesin na’ko sa’ le hi mitenab. So hi mitenab natuin luku nek ateb knino, le Uisneno anbait nani neu ki mes-mese. ⁴ Fun onle anbi aof mese, anmu’i lokif taluf namfau. Mes ale lokif taluf nane sin mepu ka papmese fa. ⁵ Onane amsa hit, maski hit tamfau, mes aof mese anbi Neno Anan. Mes hit mes-mese on lokif taluf es neu es. ⁶ Onane amsa hit atmu’i halinat knino le nasuli es nok es natuin halinat knino le Uisneno anfe nani neu kit. Kalu halinat knino nane he teki lasi beno, hit tanaoba tani natuin hit nek ateb knino. ⁷ Kalu halinat nane neu tuthaes, leko hit atuthae. Kalu halinat nane neu het fain anoni, leko hit fe lasi noina. ⁸ Kalu halinat nane neu het fainek, leko hit fe lasi fainekat. Sekau le anfani abatis, so in nanaoba nani nok nek muti. Sekau anfani atopus ai ahel lanan, so in nanaoba nani nok makoet. Sekau le nalile lasi amnaut, so in nanaoba nani nok nek malinat. ⁹ Lasi manekat nane kais nok asafanu. Miskotun lasi amle’ut ma hi mo’e lasi alekot. ¹⁰ So hi manek es nok es on bae manekat ma hi milile mihunun fef tola ma han tola. ¹¹ Hi mepu nok makoet ma kais him peh. Hi mepu hem tuthae Usif tunan natuin Smanan Knino. ¹² Mimlil nai ambi afnekat neu Usif tunan, malan ambi hamu’it ma amhataniom ambi onen totis! ¹³ Ambab to knino sin nukat ma miloitan bale neu anao amnemat sin! ¹⁴ Amtek alekot neu atoni le anhamu’i ki, amtek alekot neu sin ma kais amsukat sin! ¹⁵ Malin nai mok ale atoni le anmalin. Ma amkae nai mok ale atoni le ankae! ¹⁶ Hi moni nekaf mese ma ansaof mese. Kais hi mitenab lasi amnanut, mes hi mibaunom neu ale lasi an-ana. Kais hi mitenab mak hi ahinet ki! ¹⁷ Kais him seunbanin lasi amle’ut meki lasi amle’ut. So hi mo’e alekot neu ale atoni ok-oke! ¹⁸ So hi mami he nati’ him halan nekaf mok ale atoni ok-oke. ¹⁹ Bae benu manekat! Kais him seunbanin lasi amle’ut neu es. Him fe mainuan neu kuasat Uisneno, fun antui nani anbi Sulat Knino nak, "Usif tunan nakua a’an nak: Aseunbanit nane es Au, of Au es seunbanin." ²⁰ Mes kalu ho musu namnah, hom fen he nah. Kalu in meon oe, hom fen oe hen ninu! Fun leka hi mo’e onane te, hi mitupu ai fla anbi in fufun. Oke te of in anmae. ²¹ Kais him paleob lasi amle’ut hen be’u ki, mes him be’u lasi amle’ut meki lasi alekot!

¹ So ale atoni mes natuin ana’ aplenat. Fun katitaf ana’ aplenat le ka na’ko fa Uisneno. Ma ale ana’ aplenat nane Uisneno es anlek nani. ² Es nane, atoni le anlaban ana’ aplenat, in laban Uisneno In lekat. Ma atoni le anmo’e onane, of napeni kasat Uisneno. ³ Fun atoni le anmo’e lasi alekot, kais namtausan ana’ aplenat, al atoni le anmo’e lasi amle’ut es namtausan ana’ aplenat. Ai him lomi he nati’ kais mituin ana’ aplenat ka? So ho mo’e alekot nai of ho mupeni pules na’ko ana’ aplenat. ⁴ Fun ana’ aplenat nane, Uisneno In ate, le hen meup alekot neu ki. Mes kalu hi mo’e lasi amle’ut, mimtau nai. Fun ana’ aplenat neki suni nane ka son-sona fa. Ana’ aplenat nane Uisneno In ate, le he neki to’as Uisneno neu ale atoin amo’e amle’ut sin. ⁵ Es nane te hit mes tatuin ana’ aplenat, ka al fa natuin kasat Uisneno, mes natuin hit nek amnono knino. ⁶ Ma natuin lasi nane amsa him baen noni poni. Fun ana’ aplenat le nanaoba mepu nane, Uisneno ameput sin. ⁷ Es nane te him baen neu ana’ aplenat sa’ le mes hi hem baen noni poni neu atoni le ansimo noni poni. Ma him baen noni nakaf neu atoni le ansimo noni nakaf. Mimtausan atoni le hi mes mimtausan ma amtola atoni le hi mes amtola mani. ⁸ Kais hi mitus sa’ am sa’ neu sekau amsa, mes hi manek es nok es. Fun atoni le in nek in aon bian, in natisi Plenat Knino. ⁹ Fun plenat knino nane esle’: Kais hi mapaisa, kais hi mamaten, kais hi mibak, kais him sinmak. Ma plenat bian amsa, nameseb nani anbi plenat i le in hanan nak:; So hom nek ho aom bian onle hom nek ho aom. ¹⁰ Atoni le a nek in aon bian, of kan mo’ef amle’ut neu atoni nane. Es nane atoni le a’nek in aon bian in natisi Plenat Knino. ¹¹ Hi mes minaoba ale lasi i, fun hi mihin lasi muni i, nak leku antelen he nati’ him fen mi’ko tupas. Fun tomas i lasi honis anhaumakan nesin kit na’ko afi hit fe atam teu nek ateb knino. ¹² Fai hen finien ma neno hen meuen. Es nane te hit tabela hit mo’et mesokan ma atpake hit bale manuat meusine. ¹³ So hit moni nok alekot, onle hit mo’e tani anbi manas. Kais hit mo’e tolas malinat, kais hit mauf tua, kais hit mo’e lasi amolemut ma kais hit mo’e lasi kake, kais hit matoe ma kais hit manek nanan. ¹⁴ Mes so hit pake Usif Yesus Neno Anan on bale manuat meusine. Ma kais hit mo’e tatuin aof sanat in sinmakan he taminab in lomin.

¹ Atoni le nekan nateb knino anlimoe, him simo in nok alekot. Kais hi mimolok in lasi. ² Anmu’i atoni le nateb anbi in nekan he nah ale mnahat huma-huma. Mes anmu’i atoni bian le nekan nateb knino anlimae al in nah utan. ³ Atoni le in nah, kais musan atoni le in ka nah. Ma atoni le ka nah, kais amfain alef lasi neu atoni le in nah. Fun Uisneno ansimo atoni nane. ⁴ Hi sekau ki ka, talan te him fain alef lasi neu atoni bian in ate ka? Ate nane hen hake ka, ai hen bel, nane in tuan in lasi. Mes of in anhake nabala, fun Usif tunan anmu’i kuasat he nahakeb in. ⁵ Anmu’i atoni le in kius neno es naleko nesi na’ko neno bian. Mes atoni bian sin kius ale neno nane papmese. So ale atoni mes-mese namneo-namneo nateb kun anbi in nekan nanan. ⁶ Atoni le natenab antom neno me, in anmo’e nani neu Uisneno. Atoni le in nah ale sa’-sa’, in mo’e onane he nanaeb Usif tunan,, fun in natulu nekan neu Uisneno natuin mnahat nane. Onane amsa atoni le in nah al mnahat me; atoni nane nanaeb Usif tunan ma natulu nekan neu Uisneno. ⁷ Fun kan mu’if atoni le anmoni neu in aon; ma kan mu’if atoni le anmate neu in aon. ⁸ Kalu hit moni, hit moni neu Uisneno. Ma kalu hit mate, hit mate neu Uisneno. Es nane te het moni ka ai het mate ka, Usif tunan ini kit. ⁹ Neno Anan anmate ma anfen anfani, he nati’ In fain Usif neu ale atoin amates ma neu ale atoin amonit. ¹⁰ Mes ho, nansa hom fain alef lasi neu ho bae ka? Ai nansa’ es ho mumaeb ho bae ka? Fun hit alkit of athake atbi Uisneno In atoko alef lasi. ¹¹ Fun antui anbi Sulat Knino nak, "Usif tunan nakua a’an nak, Au moni, ale atoni of anli’tu anbi Au matak ma ale atoni of naliatas Uisneno." ¹² Onane te ale atoni anbi kit of natae kun in lasi neu Uisneno. ¹³ Es nane te kais hit fani alef lasi es neu es! Mes leko nesi hi mituin lasi i: Kais him fani fatu astunas ai fatu aktulis neu hi bae. ¹⁴ Au uhin ma au uteb anbi Usif Yesus, nak katit fa sa’ esle’ nalahion kun. Al neu atoni le nak, sa’af nane lahi, of lahi neu atoni nane. ¹⁵ Fun kalu ho mumenab ho bae in nekan natuin sa’ le ho muah nane, onane te ho ka monim tenif mutuin lasi manekat. Kais ho mule’un ho bae natuin ho mnahat, natuin Neno Anan anmate neu in. ¹⁶ Es nane sa’ le hi mak naleko, kais mimautu he nati’ atoni bian na’uab nale’un nani. ¹⁷ Fun Plenat Uisneno nane ka lasi mnahat fa ai lasi mninut; mes so mansian natuin Uisneno lomin, ma halan nekaf ma malinat natuin Smanan Knino. ¹⁸ Atoni le antuthae Neno Anan onane, atoni nane anhalin Uisneno ma napeni kan tola na’ko atoni bian. ¹⁹ Es nane te hit mo’e lasi alekot le neki halan nekaf ma antam ota neu he nafena es nok es. ²⁰ Kais ho mule’un mepu Uisneno natuin lasi mnahat. Ale mnahat nane leko, mes amle’ut neu atoni le natuin ini mnahat, anfani aktulis neu atoni bian. ²¹ Leko nesi kais ho muah sisi, ai miun tua ai ho mo’e sa’ le anfani aktulis neu ho bae. ²² Hom na’ mumepan lasi ateb knino le ho mu’i, neu ho aom ambi Uisneno In human. Ua alekot neu atoni le ka nafekaf lasi neu in aon, bi lasi le in natenab nak leko. ²³ Mes atoni le nekan na’oni, kalu in nah, in simo nalali lenat neu in aon; fun in kan mo’ef lasi nane natuin nek ateb knino. Fun ale sa’ le ka natuin fa nek ateb knino, nane sanat.

¹ Hit apalsait abe’it neu Uisneno mes atsutai atoni alima’et le ka nabe’if ma kais hit taim lasi alekot neu hit aok. ² So hit es-es athalin hit aok bian sin nekan neu sin alekot, he nati’ sin palsait neu Uisneno anmatane. ³ Fun Neno Anan amsa ka naim fa alekot neu In aon, mes on antui nani anbi Sulat Knino nak, "Ale u’uab amle’ut le sin antek nani neu ko, antom neu Kau." ⁴ Ale lasi le antui nani anbi Sulat Knino, nane he nanoina kit. Fun ale lasi noina le hit simo na’ko Sulat Knino anhatani kit neu lasi afnekat, ma halinat neu Uisneno. ⁵ So Uisneno le lasi asutais ma ahalinat in un, anfe ki nek mese natuin Neno Anan Yesus In lomin; ⁶ he nati’ nok nekaf mese ma hanaf mese hi miliatas Uisneno, hit Usif Yesus Neno Anan In Amaf. ⁷ Es nane te hi masimo es nok es nok nek malinat, onle Neno Anan amsa ansimo ki neu he miliatas Uisneno. ⁸ Fun mimnau nai, nak Neno Anan antuthae atoni Yahudi he nalile nak Uisneno na’ki anbi In fef ba’an neu hit am ufenu. ⁹ Ma hen fe manuan neu ale uf-uf he naliatas Uisneno, natuin In manekan onle antui nani anbi Sulat Knino nak, "Onane te of Au uliatas Ko anbi uf-uf sin atnanan, of au sulat Sit Pules neu Ho kanam." ¹⁰ Ma in talun nak, "Mimlil nai hoi uf-uf mok In to tafa sin." ¹¹ Ma anteni nak, "Muliatas Usif tunan, hoi ale uf-uf ma maut nai he ale mansian nanaeb In." ¹² Ma Nai Yesaya nak anteni, "Atoni mese of anbol na’ko Nai Isai in sufan, le of naplenat uf-uf, uf-uf nane of nafnekan neu In." ¹³ So Uisneno lasi afnekat in un, nahenu ki nok malinat ma halan nekaf anbi hi nek ateb knino, he nati’ hi mithoe ambi lasi afnekat natuin Smanan Knino In matanin. ¹⁴ Bae benu alki! Au uhin lek-leko antom ki, fun nahenu ki nok lasi alekot ma lasi hine ma hi mafainek es nok es. ¹⁵ Mes antom ale lasi, au umnauba ki nok amneot anbi sulat i, natuin Uisneno anfe kau mepu i. ¹⁶ Au hake on Neno Anan Yesus In ameput le ansonu kau neu uf-uf le kan tamaf nonot Yahudi. Ma au hake on Ana’ Lasi Fuat, le an etun Beno Alekot na’ko Uisneno, he nati’ ale atoni le kan tamaf nonot Yahudi, Uisneno ansimo sin on fua tulu le malomi neu In, le naknino ok neki Smanan Knino. ¹⁷ Es nane te au uliabok anbi Neno Anan natuin au mepu neu Uisneno. ¹⁸ Au u’uab onane, al natuin lasi le Neno Anan anmepu nalali natuin kau, he nati’ ale uf bian, sin natuin Uisneno anbi uab ma mo’et, ¹⁹ ma natuin ale taka ma lasi amkakat ma natuin Smanan Knino in matanin. Beno Alekot antom Neno Anan au etun ulali nok alekot funam natef na’ko Yerusalem talan te Ilirikum. ²⁰ Au lomi he etun Beno Alekot na’ko Uisneno anbi bale le atoni fe ka nenaf antom Neno Anan. Fun au ka lomif he ufena mepu anbi atoni bian in sukit. ²¹ Mes onle antui nalali anbi Sulat Knino nak, "Atoni le fe kan simof beno antom In, of sin nit In, ma atoni le fe ka nenaf, of sin nahinen." ²² Es nane te au useni piut he eti kius ki. ²³ Mes tomas i au ka mu’i tenif bale he mepu bi pah i. Ma ton fauken au lomi he eti kiso ki. ²⁴ Leka au he nao eu pah Spanyol, au ufnekan he eti ok nane ma he u’eku ok ki he nati’ umlil ok ki kle’o. Oke te him tulun kau he mimat kau neu pah Spanyol. ²⁵ Mes tomas i au he nao eu Yerusalem he eki tuntakus neu to Uisneno anbi nane. ²⁶ Fun tolas knino Makedonia ma Akhaya sin malomin hen sonu tuntakus neu bae benu amamu’it anbi to Uisneno bi Yerusalem. ²⁷ Sin malomin nok nek malinat hen mo’e lasi nane. Namneo sin mes hen tuntaku bae benu amamu’it anbi Yerusalem. Fun ale atoni le kan tamaf nonot Yahudi sin napeni manekan Uisneno na’ko atoni Yahudi. Es nane te ale atoni le kan tamaf nonot Yahudi sin mes hen tuntaku atoni Yahudi neki maus pah pinan. ²⁸ Leka au usopu mepu i, ma una’at ulali tuntakus le sin nabuab nalali nane neu sin le anbi Yerusalem, of au nao eu Spanyol utuin hi kuan. ²⁹ Ma au uhin, leka au eti eu ki, of au eti nok Neno Anan In athoes anaek neu ki. ³⁰ Mes au fainek ki bae, natuin Neno Anan, hit Usi, ma natuin Smanan Knino, he nati’ him bab kau anbi onen totis neu Uisneno. ³¹ Him onen toti he nati’ Uisneno nafetin kau na’ko atoni ka apalsait sin anbi Yudea, oke te au tuthaes neu Yerusalem, to Uisneno anbi nane ansimo nok nek malinat. ³² Onane te kalu Uisneno anlomi, au et eu ki nok nek malinat, oke te au umlil ok ki. ³³ So Uisneno, halan nekaf in un, nok ki alki! Amin.

¹ Au toit ki he nati’ him kius kit hit feto bi Febe, le antuthae tolas knino anbi Kengkrea. ² Him simo in ambi hit Usi, onle to knino ma amfe neune sa’ le in anlabu nani. Fun in bab nalali atoni namfau ma in anbab kau amsa. ³ Hi mitiaba au tabe neu bi Priska ma neu Nai Akwila, au bae knino sin le anmeup nok kau anbi Neno Anan Yesus. ⁴ Ala kle’o te sin mate natuin he nahoni kau. Au tek alekot anaek neu sin. Ka al fa au, mes ale tolas knino na’ko uf bian le kan tamaf nonot Yahudi, sin amsa antek alekot neu sin. ⁵ Au sonu tabe amsa neu tolas knino le anbi sin ume. Au sonu tabe neu au bae manekat Nai Epenetus. In atoni ahunut le anpalsai neu Neno Anan anbi pah Asia. ⁶ Au sonu tabe neu bi Maria, le anmepu matani neu ki. ⁷ Au sonu tabe neu Nai Andronikus ma Nai Yunias. Sin nua sin uf mese nok kau ma sin antam o’of nok kau. Afi au fe ka palsai fa neu Neno Anan sin palsai nahunun kau. Sin nua sin amsa makana anbi ale haef knino sin. ⁸ Au sonu tabe neu Nai Ampliatus bae manekat anbi hit Usi. ⁹ Au sonu tabe neu Nai Urbanus, au bae manekat le anmeup nok kau anbi Neno Anan. Ma au tabe neu Nai Stakhis au bae manekat. ¹⁰ Au sonu tabe neu Nai Apeles, le nalan sutais anbi Neno Anan, Au sonu tabe neu sin le anbi Nai Aristobulus in ume. ¹¹ Au sonu tabe neu Nai Herodion, au bae manekat le uf mese nok kau. Au sonu tabe neu sin anbi hit Usi, le namaika anbi Nai Narkisus in ume. ¹² Au sonu tabe neu bi Trifena ma bi Trifosa, le nahaebok anbi hit Usi In mepu. Au sonu tabe neu Nai Persis, au bae manekat, le nahaebon anbi hit Usi in mepu. ¹³ Au sonu tabe neu Nai Rufus, atoni mabeti anbi hit Usi. Ma neu in ainaf amsa le anfani on au ain honi. ¹⁴ Au sonu tabe neu Nai Asinkritus, Nai Flegon, Nai Hermes, Nai Patrobas, Nai Hermas, ma au bae knino le nabua nok sin. ¹⁵ Au sonu tabe neu Nai Filologus ma Nai Yulia, Nai Nereus nok in fetof ma Nai Olimpas ma neu ale atoni apalsait le nabua nok sin. ¹⁶ Hi matabe es nok es nok manekat knino. Neno Anan In tolas knino ok-oke ansonu tabe neu ki. ¹⁷ Bae benu manekat! Au fainek ki, he nati’ him pantom mi’ko ale atoni le neki suli ma koke antom lasi palsait neu Usif tunan. Lasi nane nasuli nok sa’ le nanoina nalali neu ki. So leko hi mi’lo mi’ko ale atoni nane sin. ¹⁸ Fun ale atoni nane, sin kan mepun fa neu Neno Anan, hit Usi, mes sin anmepu neu sin taikenu. Ma sin fuil ale atoni nek muti, neki sin uab amasat ma sin a’at aminat. ¹⁹ Beno antom hi nek atahas, ale atoni ok-oke sin nen nalalien. Es nane te au malin neu ki. Mes au lomi he nati’ hi nek ahinet ki neu ale lasi alekot ma hi nek muti neu ale lasi amle’ut. ²⁰ So Uisneno, halan nekaf in un, naskuku ma nakpete santuaf ambi hi haem nupun. So hi ala ki amsimo tetus na’ko Yesus Neno Anan hit Usi! ²¹ Nai Timotius, au bae knino le anmeup nok kau ansonu tabe neu ki. Onane amsa Nai Lukius, Nai Yason ma Nai Sisopater, au bae knino sin le uf mese nok kau. ²² Au Nai Tertius kau, le au es a’tui sulat i. Au sonu tabe neu ki anbi hit Usi. ²³ Nai Gayus ansonu tabe neu ki. Au umaika bi in ume ma au ok tolas knino amo’e klei anbi in ume. Nai Erastus, apanat noni kuan ma hit bae Nai Kwartus, ansonu tabe neu ki. [ ²⁴ So hit Usif Yesus Neno Anan anfe tetus neu ki alki. Amin.] ²⁵ Neu In kun, le anmu’i kuasat hen hatani ki, natuin beno knino le au etun ki ma etus antom Yesus Neno Anan. Au etun ki beno nane natuin sa’ le Uisneno, nalile nani ma ka nahine fa na’ko batan-batan. ²⁶ Mes tomas i, natuin Uisneno, In lekat nalilon neu ale uf-uf natuin Mafefa knino sin sulat, antopu sin neu nek ateb knino -- ²⁷ neu In, lo Uisneno mese, le nahenu nok lasi hine. Natuin Yesus Neno Anan, han aliatas neu In talan te nabal-bal! Amin.