WAHYU

WAHYU

¹ Sulat in nesan antom sa’ le Yesus Neno Anan nalile nani antom ale lasi le of anbol. Uisneno ane’tun nani neu Neno Anan he nati’ In nalile neu ate-ate Uisneno sa’ le hen bol nem laba. Neno Anan ansonu In ahake neno tunan neu In ate Nai Yohanes, hen etun ale lasi nane neu in. ² Oket Nai Yohanes anpeo ale lasi le in nit nalali; ma i on lasi etus antom han ba’an Uisneno le natiaba nani natuin Yesus Neno Anan. ³ Ua alekot neu atoni le ansoi nani ma atoni le natnin nani beno le matui anbi sulat i ma natuin nani sa’ le matui anbine. Fun ka lob anteni ale lasi of anbol. ⁴ Bae benu le anbi Tolas Knino pukan hitu anbi pah Asia! Au, Nai Yohanes, ufnekan he nati’ Uisneno anfe amnaut ma aomina neu ki -- esle’ In le esan ma un-unu le esan ma of ankoenon nem -- ma na’ko smanaf hitu le anhake anbi In mau toko mnatu matan, ⁵ ma na’ko Yesus Neno Anan, saksi aki’at. In es anfen anfan nahunu na’ko amates, ma anmu’i kuasat neu ale uisfin bi pah pinan i. Neno Anan le a’nek kit ma nafetin kit na’ko hit sanat neki Ini maten. ⁶ Ma anmo’e kit het fani uf mese, neu ale ana’ fuat knino neu Uisneno, In Amaf, Yesus Neno Anan apinat ma akuasat talan te nabal-bal. Amin! ⁷ Kiso, In koenon nem nok nope! Ale atoni of nit In, ma sin amsa es napau In. Ma ale uf bi pah pinan of ankae neu In. Koi, namneo, Amin! ⁸ "Uisneno tunan nakua a’an, Au ahunut ma amunit, le esan ma afi te esan ma le of ankoenon nem, le Akuasat Afinit." ⁹ Au Nai Yohanes, hi bae knino le nek bua nok ki anbi hamu’it, le atsutai tani on atoni le natuin Yesus. Anpolin kau neu Pulu Patmos natuin au etun beno na’ko Uisneno, le Usif Yesus natiaba nani. ¹⁰ Bi neno Usif tunan, Smanan Uisneno naplenat kau oket au nen hanaf mese le naek -- onle to’is hanan -- na’uab anbi au kotik. ¹¹ Hanaf nane nak, "Amtui mani sa’ le ho mit, ma amsonu sulat nane neu Tolas Knino pukan hitu esle’: Efesus, Smirna, Pergamus, Tiatira, Sardis, Filadelfia, ma Laodikia." ¹² Au ukle’ok he kiso sekau es na’uab neu kau. Oke te au it tet paku hitu le anmo’e na’ko mnatu. ¹³ Anbi ale tet paku nane sin atnanan, atoni mese anhake mamnita onle mansian. In anpake sobalu betkone le amnanun ante haen. Anbi Ini basan in pake futu basaf mnatu. ¹⁴ Ini nakfunu muti onle bibi kase funun, muti on aba’nasu In matan anpin onle ai; ¹⁵ In haen naklima onle nit molo le notu anbi ai fla. In hanan napunu onle oe satan. ¹⁶ In niman ane’u ana’ afkun hitu ma suni mese le na’aik koti mat anpoi na’ko In fefan. In human anpin nalim onle manas leka in pinan namtetu. ¹⁷ Leka au kiso it In, au sukbok bi In matan onle atoni amates. Mes In poh kau neki In niman a’ne’u oke te nak, "Kais mumtau! Au ahunut ma es amunit. ¹⁸ Au lo In kun es amonit! Au mate mes hom kiso, Au moni talan te nabal-bal. Au mui kuasat neu lasi maten ma neu ale atoni amates sin bale. ¹⁹ Es nane amtui nai ale lasi le ho mit, le anbol bi batan i ma of anbol bi neon amnemat. ²⁰ I lasi tolo’ na’ko afkun hitu le ho mit sin bi Au nimak ne’u ma na’ko tet paku hitu mnatu nane: Afkun hitu nane esle’ ahake neno tunan Tolas Knino pukan hitu, ma tet paku hitu nane esle’ Tolas Knino pukan hitu."

¹ "Amtui nai neu ahake neno tunan Tolas Knino anbi Efesus mak on i: I han ba’an na’ko In le ana’ afkun hitu anbi In niman ne’u ma nao’inson anbi tet paku hitu mnatu sin atnanan. ² Au uhin sa’ le Ho mo’e: ho mepu matani ma ho malan matani. Au uhin, nak ho kam lomif hem fe nekam neu ale atoni amle’ut. Ma atonin le antek sin aon nak haef knino, mes kahaf, fun hom su’ sin ma ho mupeni sin nak sin apoiba. ³ Hom seusab ma amsutai natuin Au, ma ho nekam ka namnekuf. ⁴ Mes i Au mafena neu ki: Ho kam nek amteni Kau fa on afi unun. ⁵ Mi te’un nom nai na’ko hi sanat-sanat sin, ma amo’e nai sa’le afi hi mo’e bi tabu ahunut. Kalu kahaf, of Au aum ma ait ufani ho tet paku nane na’ko in balan. ⁶ Mes anmu’i lasi alekot mese anbi ko, esle’: Ho kam lomif Nai Nikolaus in atuina sin mo’et le Au amsa ka lomifa. ⁷ Sekau maluke, so in natnin nai sa’ le Smanan Uisneno naton nani neu Tolas Knino sin. Sekau le in nis, of Au fe mainuan neu in he nah na’ko hau fua honis le anmoni anbi Po’an Uisneno." ⁸ "Ma amtui nai neu ahake neno tunan Tolas Knino anbi Smirna mak on i: I han ba’an na’ko In le ahunut ma le amunit -- le anmate ma anmoni anfani. ⁹ Au uhin ho susal ma ho mamu’it -- namneo ho amu’it ko! Au uhin sin na’le’uf ko, le antek sin aon nak atoni Yahudi mes kahaf; sin le nane Nitu in to! ¹⁰ Kais mumtausan mane’at le of hom sutai mani ka lob fa. Fun Nitu of natam hi bian neu o’of hen su’ ki. Of him sutai mane’at neno bo’es. So ho mu’ki anbi Kau talan te ho mate, of Au fe ko honis nabal-bal on baen neu amnisat. ¹¹ Sekau maluke, so in natnin nai sa’ le Smanan Uisneno naton nani neu Tolas Knino sin! Sekau le in nis, of in kan sutai fa sa’-sa’ natuin lasi maten hae nua." ¹² "Ma amtui nai neu ahake neno tunan Tolas Knino anbi Pergamus mak on i: I han ba’an na’ko In, le ana’ suni le na’aik koti mat. ¹³ Au uhin ho mumaika anbi me. Ho mumaika anbi bale le Nitu ini toko. Ho mu’ki anbi Kau. Leka Nai Antipas, Au saksi aki’at nane, namate anbi hi atnanam, anbi Nitu in balan, bi leku nane amsa ho ka mutotan fa ho fnekat neu Kau. ¹⁴ Maski onane amsa anmu’i lasi nono fauk le Au ka lomi fa na’ko ki. Anmu’i atoni fauk anbi ki le natuin Nai Bileam in lasi noina. Nai Bileam nanoni Nai Balak he namofu to Israel neu sanat. Ma anfuil sin he nahan mnah fuat ma hen mo’en lasi kake. ¹⁵ Onane amsa anmu’i atoni anbi ki atoni le natuin Nai Nikolaus in atuina sin lasi noina. ¹⁶ Es nane te, miteunom nai mi’ko hi sanat-sanat! Kalu kahaf, of Au aum eu ki laba ma Au maken ok sin eki suni le anbi Au fefak i. ¹⁷ Sekau maluke, so in natnin nai sa’ le Smanan Uisneno naton nani neu Tolas Knino sin! Sekau le in nis, of Au fe mainuan he nah mak muti le natolo’on, ma sin mese-mese of ansimo na’ko Kau fatu muti mese. Ma anbi faut muti nane, antui kanaf fe’u mese, le ka mahine amsa al atoni le ansimo nani." ¹⁸ "Ma amtui nai neu ahake neno tunan Tolas Knino anbi Tiatira mak on i: I han ba’an na’ko Anah Uisneno, le In matan anpin on ai, in haen naklima onle nit molo mamnotu. ¹⁹ Au uhin ale sa’ le ho mo’e mani -- Au uhin ho manek, ho mu’ki, ho mepu ma ho fnekat, ho malan anbi sutais. Au uhin nak ho mepu amunit i namfau nesin na’ko ahunut. ²⁰ Mes i Au mafena neu ko: Hom fe mulali ho nekam neu bi Izebel, bife le antek in aon nak leluf Uisneno. In anfuli Au ate namfau ma nanoina sin hen mo’en lasi kake ma he nahan mnah fuat. ²¹ Ma Au fe neu In leku mainuan he nateunon na’ko in sanat sin, mes in kan lomif he nateunon na’ko in lasi kake nane. ²² Mumnau! Of Au bison in tal namen anbi hala tupa. Anbi nane in ma ale atoni le anmo’e lasi kake nokan of ansutain mafena. Ale nane of Au mo’e ani sin anbi leku i -- so mak sin nasanab ale lasi amle’ut nok in. ²³ Ale in atuina sin of Au umate sin amsa he nati’ Tolas Knino ok-oke nahin nak Au es uhin mansian sin tenab ma sin nekan Hi ok-oke of Au seunbanin natuin hi mo’et mes-mese. ²⁴ Mes neu hi, le atoni bian anbi Tiatira, le ka natuin fa lasi noina amle’ut nane, ma ka nanoina fa sa’ le Nitu na’uab nani neu sin’ Au u’uab ak Au of ka usaeb fa neu ki baut le hen hafen ki. ²⁵ Mes sa’ le anbi ki, him panat lek-leko talan te Au koenok a fain aum. ²⁶ - ²⁷ Ma sekau le in nis, ma in anmo’e piut sa’ le anhalin Au nekak, tal namsop of Au fe neune kuasat papmese onle Au simo na’ko Au Ama. Sin of ansimo kuasat na’ko Kau he naplenat uf-uf neki teas besi, ma he naskuku uf-uf nane onle nai tepas klofo. ²⁸ Sin of ansimo faif nome na’ko Kau. ²⁹ Sekau maluke, so in natnin nai sa’ le Smanan Uisneno naton nani neu Tolas Knino sin!"

¹ "Ma amtui nai neu ahake neno tunan Tolas Knino anbi Sardis mak on i: I han ba’an na’ko In le anmu’i Smanaf hitu na’ko Uisneno ma afkun hitu nane. Au uhin sa’ le ho mo’e mani. Nak ho moni, mes namneo ho mate.! ² Es nane, amfen nai, ma amhatane sa’ le fe anbi ko nahunu na’ko anmate oke. Fun Au upeni nak sa’ le ho mo’e mani, katit fa mese amsa le nanokbon anbi Uisneno matan. ³ Es nane, mumnau mufani sa’ le afi nanoina nalali neu ko ma sa’ le hom nen mulali. So munaoba mani ma muteunom nai mu’ko ho sanat sin. Kalu ho kam fenaf, Au of aum eu ko on abakat; ma of ho ka muhin fa leku le Au he aum. ⁴ Mes anbi ki alki abit Sardis fe anmu’i atoni fauk le anpanat he nati’ sin blua pake muti nabalah. Sin le nane of a’nao nok Kau neki blua pake muti, fun sin antam ota neu lasi nane. ⁵ Sekau le in nis, of napakeb nani blua pake muti le nane. Ma of Au ka nosef in kanan na’ko Sulat Atoni Honis. Ma anbi Au Ama matan ma In ahake neno tunan sin of Au manaku ak sin le nane Au ini. ⁶ Sekau maluke, so in nen nai sa’ le Smanan Uisneno naton nani neu Tolas Knino sin!" ⁷ "Ma amtui nai neu ahake neno tunan Tolas Knino anbi Filadelfia mak on i: I han ba’an na’ko In le Knino ma Amneot. In es ana’ Nai Daud ini letu; kalu In nasoitan, katit fa atoni mese nabe’i hen ek, ma kalu In an ek, katit fa atoni mese nabe’i he nasoitan. ⁸ Au uhin sa’ le ho mo’e mani. Au uhin ak ho matanim an-ana; ho mutuin mulali Au noina ma mu’ki neu Kau. Au usoitan ulali eno mese neu ko, le sekau amsa ka nabe’i hen ek nani. ⁹ Mumnau lasi i: Ale atoni le anfani to neu Nitu nane, sin atoni apoiba le anmanaku sin aon nak atoni Yahudi mes ka namneof onane, of Au mo’e sin tal sin neman ma nabes anbi ho matam. Ma sin of nahin nak Au nek ko. ¹⁰ Fun ho mutuin mulali Au plenat he nati’ malan, Au amsa of uneo ma umafo ko na’ko neno susal le he nem neu pah pinan ok-oke. Lasi nane of anbol hen su’ ale atoni ok-oke anbi pah pinan. ¹¹ Au aum laba. Hom panat mulek-leko sa’ le anbi ko, he nati’ kais atoni mese amsa nasik nan ho baen amnisat nane. ¹² Atoni le in nis, of Au uhakeb ani on ni anbi Au Uisneno In Ume Knino ma of In kan poin tenif na’ko bale nane. Au Uisneno kanan, ma Au Uisneno kot kanan -- esle’ Yerusalem fe’u le of ansanu na’ko neno tunan, na’ko Au Uisneno -- of Au tui neu atoni nane. Au kanak fe’u of Au tui neu in amsa. ¹³ Sekau maluke, so in nen nai sa’ le Smanan Uisneno naton nani neu Tolas Knino sin!" ¹⁴ "Ma amtui nai neu ahake neno tunan Tolas Knino anbi Laodikia mak on i: I han ba’an na’ko Amin, Saksi aki’at ma amneot, ahun-hunut na’ko ale sa’ le Uisneno anmepu nani. ¹⁵ Au uhin sa’ le ho mo’e mani. Au uhin ho ka manikif ma ka maputuf amsa. Leko nesi kalu ho manik ai maputu! ¹⁶ Natuin ho manababu; ka maput, ka manik amsa. Es nane of Au lo’an upoitan ko na’ko Au fefak. ¹⁷ Fun ho mak: ’Au amu’it kau ma au umu’ib kuk au aok ma au ka nukan fa sa’-sa’.’ Mes ho ka muhinef, nak ho manukat a’naek ma ho susal a’naek! Ho mamu’i, ho monas, ma amfol. ¹⁸ Es nane Au fainek ko, he nati’ hom sosa mnatu na’ko Au, esle’ mnatu alekot, he nati’ hom fain amu’it. Ma amsos blua pake muti amsa na’ko Au, he nati’ hom pake ma amkub ho aom le monas ma namaeba ko. Ma amsos mina, hem nose neu ho matam, he nati’ ho mit amfani. ¹⁹ Atoni le Au nek, Au ukain ma Au biso. Es nane te so hom hataniom ma muteu’nom mu’ko ho sanat sin. ²⁰ Kiso! Au hake bi eno ma Au leuk eno. Kalu anmu’i atoni le amnen Au hanak ma nasoitan eno, of Au tam u’eku okan; of Au bukae ok in, ma in bukae nok Kau. ²¹ Sekau le in nis, of Au fe mainuan hen toko nok Kau bi Au toko, onle Au amsa is ulali, ma Au toko ok Au Ama bi In toko. ²² Sekau maluke, so in nen nai sa’ le Smanan Uisneno naton nani neu Tolas Knino sin!"

¹ Namuni na’ko nane au upeni mnitas anten. Au it eno mese masoitan anbi neno tunan. Namuni te au nena teni hanaf le afi na’uab nalali neu kau onle to’is hanan. Hanaf nane nak, "Aum amsae neu i. Au of ulile neu ko sa’ le of anbol." ² Naskek onane te Smanan Uisneno naplenat kau. Oke te au it, anbi neno tunan anmu’i toko mese, ma anmu’i atoni mese antoko anbi toko nane. ³ Atoni nane human anpin onle fatu klima Yaspis ma fatu klima Sardis. Ma enus mese funam natef atoko mnatu nane, anpin nalim human on Zamrud. ⁴ Ma anfun ma natef toko mnatu nane anmu’i toko bo’nuam ha. Amnasit bo’nuam ha antoko anbi toko nane le anpaken blua pake muti, ma anpaken sobe mnatu. ⁵ Toko nane napoitan limat pinan ma napoitan lotos hanan le napunu. Ma anbi toko nane matan anmu’i nopo hitu le anpinan; nane Smanaf hitu le na’ko Uisneno. ⁶ Ma anbi toko nane matan amsa anmu’i tasi nino, naklima on fatu lima’. Anbi toko nane atnanan ma anfun ma natef toko mnatu nane anmu’i amonit ha le sin matan anbi mat ma kotin nok. ⁷ Amonit ahunut nane onle aus neno; amonit nua’e nane onle bijae bia; amonit tenu’e anmu’i humaf on mansian human; ma amonit ha’e nane onle katasi panin le he nat el naplel. ⁸ Amonit ha in nane, mes-mese anmu’i ninef ne, anfun ma natef ma antom nanan nahenu nok mataf. Fai manas amonit-amonit nane sin ansi piut. "Knino, knino, knino Uisneno Akuasat Anesit; le esan, le afi te esan, ma le of ankoenon nem." ⁹ Amonit ha in nane sin ansi sit pules, tola ma nanaeb In le antoko anbi toko nane, esle’ In le anmoni talan te nabal-bal. Ma anbi leku ale amonit nane ansi, ¹⁰ amnasit bo’nuam ha nane sin anbentok anbi le antoko anbi toko mnatu nane matan, oke te nabes neu In le anmoni talan te nabal-bal. Ma sin polin sini sobe neu toko mnatu nane matan oket sin nak, ¹¹ "Koi Uisneno, hai Uisneno! Hom tam ota hem simo pules, tola ma kuasat. Fun Ho es amo’e ale sa’, ma natuin Ho lomin amsa ale sa’ nane mot ma anmoni."

¹ Nalali te au it anbi In niman le antoko anbi toko mnatu nane, anmu’i sulat mese le manunu. Sulat nane nahenu nok tuis anbi bian am bian. Sulat nane anboto neki sulat taka’ hitu. ² Ma au it ahake neno tunan mese le nab’ei anhunun nok hanan a’naek nak, "Sekau antam ota hen ebi ale sulat taka’ nane ma anfei sulat nane ka?" ³ Mes katit fa atoni mese amsa anbi neno tunan, ai anbi pah pinan, ai anbi pah pinan in nupun le nabe’i hen fei sulat nane ma antae nani. ⁴ Oke te au kae ma se’ul fun katit fa atoni mese amsa le nabe’i hen fei sulat nane, ma antae nani. ⁵ Oke te atoni mese na’ko ale amnasit nane nak neu kau, "Kais hom kae! Kiso meo asu na’ko uf Nai Yehuda, Nai Daud sufan le naek, nis nalalien. In nabe’i hen ebi sulat taka’ hitu nane ma anfei sulat nane." ⁶ Nalali te au it Bibi Kase mese anhake anbi toko nane atnanan, ma amonit ha ma ale amnasit anfun natef In. Bibi Kase nane on anlolo nalali. In anmu’i sunaf hitu ma mataf hitu; esle’ Smanaf hitu na’ko Uisneno le ansonu nalali neu pah pinan ok-oke. ⁷ Oke te Bibi Kase nane nem ma ansimo sul manunu nane na’ko atoni le antoko anbi toko mnatu nane niman ne’u. ⁸ Leka Bibi Kase nane fe ansimo sulat nane, amonit ha ma amnasit bo’nuan ha nane ansukbok anbi In matan. Ale amnasit nane es-es ana’ heo mese ma mako’ mnatu mese nahenu nok atu fomeni, le nane onen totis to Uisneno. ⁹ Ma sin ansi sit fe’u mese nak, "Hom tam ota he maiti sulat nane ma amebi in sulat taka’ sin. Fun anlolo nalali Ko, ma nok Ho matem, mansian na’ko ale suku, a’at, pah ma uf hom sos mulali sin neu Uisneno. ¹⁰ Ho mo’e mulali sin uf mese neu ana’ lasi fuat, he nati’ sin antuthae hit Uisneno, ma naplenat anbi pah pinan." ¹¹ Nalali te au it a’teni. Au nen ahake neno tunan le nifun-nifun ma hotun-hotun sin hanan! Sin anhake funam natef toko ma amonit ha nok ale amnasit nane. ¹² Sin ansi nok hanan a’naek nak, "Bibi Kase le anlolo nalali nane, antam ota hen simo kuasat, mu’in, hinet ma be’it; In tam ota he matola, manaeb ma mapules!" ¹³ Ma au nen ale amonit abit neno tunan, abit pah pinan ma abit pah pinan nupun ma abit tasi -- atlefi ha tak ale amonit abit neno tunan ma pah pinan -- ansi, "In le antoko anbi toko mnatu, ma Bibi Kase nane lo mapules ma matola, apinat ma akuasat talan te nabal-bal." ¹⁴ Ma amonit ha nane natae nak, "Amin!" Ma ale amnasit nane amsa ansukbok ma nabes.

¹ Nalali te au it Bibi Kase nane an pisu anpisu sulat taka’ ahunut na’ko sulat taka’ hitu nane. Oket au nen amonit ha in nane sin es na’uab nak, "Aum!" In hanan nane on lotos ini punun. ² Au kiso, oket au it bikase muti mese. In asaet nane ana’klaot mese, ma anfe neune sobe mese. In nao mat onle atoni amnisat le nao he nasik mabe’ut. ³ Namuni te Bibi Kase nane an pisu sulat taka’ nua’e, ma au nen amonit nua’e nak, "Aum!" ⁴ Oke te bikase mese anpoi nem anteni. Bikase nane ao me klima. In asaet nane anfe neune kuasat, he naneku lasi halan na’ko pah pinan, ha nati’ mansian anmalolo es nok es. Anfe neu in suni naek mese. ⁵ Oke te Bibi Kase nane an pisu sulat taka’ tenu’e. Au nen amonit tenu’e nak, "Aum!" Au kiso, ma au it bikase metan mese. In asaet nane ana’ atnais mese anbi in niman. ⁶ Ma au nen sa’ es onle hanaf le an anbai na’ko amonit ha in nane sin atnanan hanaf nane nak, "Aen kase su’at mese upan dinar mese, ma sain su’at tenu upan dinar mese. Mes kais mule’un hau bub fua mina ma lene tanu’an sena!" ⁷ Namuni te Bibi Kase nane an pisu sulat taka’ ha’e ma au nen amonit ha’e nane nak, "Aum!" ⁸ Au kiso, oket au it bikase abu mese. In asaet kanan amates. Plenat maten nao natuin in kotin. Kuasat neu pah pinan ao bia ha nana’at neu sin, he nati’ sin natuin manekat, amnahas, natuin men bono ma natuin mu’it a’lalu. ⁹ Nalali te Bibi Kase nane an pisu sulat taka’ nime. Ma au it anbi baki fuat nupun anmu’i smanaf-smanaf na’ko ale atoni le nana’at sin natuin sin nanaoba beno na’ko Uisneno nok aki’at. ¹⁰ Ma sin an anbai nok hanan a’naek nak, "Koi Usif tunan Akuasat Anesit, ma amneot! Tal leka ka Hom lefi abit pah pinan ma amhukum sin fun namate nalali kai ka?" ¹¹ Namuni te anfe neu sin es-es, sobalu muti mese. Oke te anlelu sin nasnasan akle’o, talan te sin bae atuthaes, ma sin bae bian namtisin, le of namate sin onle sin amsa. ¹² Oke te au it Bibi Kase nane an pisu sulat taka’ ne’e. Nainunus a’naek anbol. Manas anmetak on tai metan ma funan amtasa on na’. ¹³ Afkun-afkun ankua na’ko neno tunan neu pah pinan onle bubuk fuan makuke ankua na’ko ta’un, bi leku anin slutuf anheko nani. ¹⁴ Neno tunan namneku onle anunu sulat, ma ale nu’af ma ale pulu na’oni na’ko sin balan. ¹⁵ Oke te uisfin pah pinan, ale anaet, ale solalus nakaf, ale atoni amu’it, ma ale atoni amu’i kuasat, ma ale atoni bian, he ate ai atoni ao sona, sin natolo’ anbi ale nuat ma anbi ale fatu bola nu’af nane. ¹⁶ Sin an anbai neu ale nu’af ma neu ale fatu nane, "Amkub kai nai! Mutolo’ kai na’ko In le antoko anbi toko mnatu, ma na’ko to’as Bibi Kase nane. ¹⁷ Neno to’as a’naek anbolen ma katit fa atoni mese amsa le nabe’i hen hake anbi sin matan!"

¹ Nalali te, au it ahake neno tunan ha, anhake anbi pah pinan si’un ha sin. Sin an eka anin mata ha sin bi pah pinan he nati’ kais anin anfu anbi meto, ai anbi tasi ai anbi haunu. ² Oket au it ahake neno tunan mese anteni anbol nem na’ko neno saet. In neki malak na’ko Uisneno amonit. Nok hanan a’naek ahake nane anboin ahake neno tunan ha in le napeni nalali kuasat na’ko Uisneno he nale’un meto ma tasi. ³ Ahake neno tunan nane nak, "Kais mile’un meto ai tasi ai haunu, kalu hai fe kam taof malak anbi hit Uisneno In ate sin ilan." ⁴ Oke te ane’ut kau nak anmu’i atoni nifun natun mese bo’ham ha le antao malak na’ko Uisneno neu sin ilan. Ale atoni nane naiti sin na’ko uf Israel bo’es am nua. ⁵ Na’ko uf Nai Yehuda anmalak atoni nifun bo’es am nua, na’ko uf Nai Ruben nifun bo’es am nua, na’ko uf Nai Gad nifun bo’es am nua. ⁶ na’ko uf Nai Asyer nifun bo’es am nua, na’ko uf Nai Naftali nifun bo’es am nua, na’ko uf Nai Manasye nifun bo’es am nua, ⁷ na’ko uf Nai Simeon nifun bo’es am nua, na’ko uf Nai Lewi nifun bo’es am nua, na’ko uf Nai Isakhar nifun bo’es am nua, ⁸ na’ko uf Nai Zebulon nifun bo’es am nua, na’ko uf Nai Yusuf nifun bo’es am nua, na’ko uf Nai Benyamin nifun bo’es am nua. ⁹ Nalali te au kiso teni, oke te au it mansian pukan naek esle’ amfaun mataen le’uf -- katit fa atoni mese amsa le nabe’i hen soi nani! Sin le nane atoni-atoni na’ko ale uf, suku, pah ma a’at. Sin paken sobalu muti mnanu ma sin na’an pet no bi sin niman, ma anhake anbi toko nane matan ma nabesan neu Bibi Kase nane. ¹⁰ Oke te sin an anbai nok hanan anaek nak: "Hit aomina nem na’ko hit Uisneno le antoko anbi toko mnatu, ma na’ko Bibi Kase nane!" ¹¹ Ale ahake neno tunan anhake funam natef a’toko mnatu nane ma ale amnasit ma amonit ha in nane. Ale ahake neno tunan nane anmof hae anbi toko mnatu nane matan ma nabes neu Uisneno. ¹² Sin anbai nak, "Amin! Hit Uisneno lo Uisneno le mapules, Apinat ma Ahinet. In Uisneno le mes nathoe nok han pules ma fef tola. In Uisneno le anmu’i kuasat ma matani talan te nabal-bal! Amin." ¹³ Atoni mese na’ko ale amnasit nane natan neu kau, "Ale atoni le anpaken sobalu muti nane sin sekau ka ma sin neman na’ko me ka?" ¹⁴ Au utae in ak: "Au ka uhin fa tuan. Tuan ho es muhine." Oke te in nak neu kau: "Atoni le nane sin fe anpoin neman na’ko hamu’it a’naek. Sin fase nalali sin sobalu ma namutib nani neki Bibi Kase In na’. ¹⁵ Es nane sin anhake anbi Uisneno Ini toko mnatu matan ma antuthae In fai manas anbi In Ume Knino. Ma In le antoko anbi toko mnatu nane, of anhake nok sin he namafo sin. ¹⁶ Of sin ka namnahan ma kan menon tenin fa; manas ai malala of kan hoin tenif sin. ¹⁷ Fun Bibi Kase le antoko anbi toko mnatu nane atnanan of anfani sin atukus. In of antopu sin neu oe mata le anfe honis neu sin. Ma Uisneno of a’nose ale matnu na’ko sin matan."

¹ Leka Bibi Kase nane an pisu sulat taka’ hitu’e, neno tunan namne, oni leuk batis mese. ² Oke te au it ahake neno tunan hitu le anhake anbi Uisneno matan ma anfe neu sin to’is hitu. ³ Ahake neno tunan mese bian, le neki topa mnatu mese, nem ma anhake anbi mei fuat matan. Anfe nalali neune atu fomeni namfaun hen tao nani neu ale onen totis to Uisneno ma he natulu nani anbi baki fuat mnatu bi toko mnatu nane matan. ⁴ Aut fomeni le fe anpin nane in masu ansae nok ale onen totis to Uisneno na’ko ahake neno tunan niman le anhake anbi Uisneno matan. ⁵ Namuni te ahake neno tunan nane naiti topa nane, ma antao ai neune na’ko baki fuat, oke te anpolin nani neu pah pinan. Ma lotos napunu, nok limat ma nainunus nok. ⁶ Nalali te ahake neno tunan hitu le ana’ to’is hitu nane naloitan hen pu sin to’is. ⁷ Ahake neno tunan ahunut anpu in to’is, ma ulan sensene ma ai maselo nok na’ anmofu nem neu pah pinan. Ao bia tenu na’ko pah pinan anput nain oke; onane amsa ao bia tenu na’ko haunu ma ale hun le fe namate. ⁸ Oke te ahake neno tunan le nua’e anpu in to’is, ma sa’fes onle nu’af a’naek le anpin on ai, anpolin neu tasi nanan. Ao bia tenu na’ko tasi nabaina anfani na’, ⁹ ma ale amonit anbi tasi sin ao bia tenu anmate; onane amsa aobia tenu na’ko ale bnao sin namle’u. ¹⁰ Namuni te ahake neno tunan le tenu’e anpu in to’is, ma afkun a’naek mese, le anpin on nopo, anmofu na’ko neno tunan, antom ao bia tenu na’ko noenu ma oe mata sin. ¹¹ (Afkun nane kanan "Apsintus" ai menu’.) Ma ao bia tenu na’ko oe anfani menu’, ma atoni namfaun anmate natuin sin ninu oe le anfani menu nane. ¹² Oke te ahake neno tunan le ha’e anpu in to’is. Ma anbiso ao bia tenu na’ko manas, ao bia tenu na’ko funan, ma ao bia tenu na’ko ale afkun talan te ao bia tenu na’ko sin anmesok. Onane amsa ao bia tenu na’ko manas kan sinek fa ma onane amsa ao bia tenu na’ko fai. ¹³ Oke te au it, ma au nen katasi mese le fe nat el namnanu anbi neno tnanan, an anbai nok hanan a’naek nak, "Amle’ut! Amle’ut! Amle’ut neu ale atoni le namaika anbi pah pinan, leka sin nen ahake neno tunan tenu bian le hen pu sin to’is."

¹ Oke te ahake neno tunan le nima’e anpu in to’is, ma au it afkun mese anmofu na’ko neno tunan neu pah pinan. Ma anfe neu afkun nane letu nopu maten. ² Ma afkun nasoitan nopu maten nane, oke te masu anpoi na’ko nopu nane on masu na’ko tunaf a naek. Manas ma saknenot anmesok natuin masu’ na’ko nopu nane. ³ Oke te lamat-lamat anpoi na’ko masu’ nane ma ansanu neu pah pinan. Ma anfe kuasat neu ale lamat nane onle anfe nani neu kabiti sin. ⁴ Ma nakain sin he kais nale’un hun, ai ale hau, ai ale luel bian. Sin al nabe’i nale’un ale atoni le kan mu’if malak na’ko Uisneno anbi sin ilan. ⁵ Ale lamat nane ka napenin fa mainuan he namate ale atoni nane, al anhamu’i sin funan nim. Hamu’it le lamat-lamat anmo’e nani papmese onle hamu’it le kabiti sin anmo’e nani. ⁶ Bi funan nim nane ale atoni sin nami hen maten, mes sin ka nabe’i fa hen maten; sin lomin hen maten, mes lasi maten na’lo na’ko sin. ⁷ Ale lamat nane sin humkenu onle bikase le naloitan sin hen maken. Anbi sini nakan anmu’i sa’ es onle sobe mnatu. Sin human onle mansian human. ⁸ Sini nakfunu onle bife ini nakfunu ma sin nisin onle aus neno in nisin. ⁹ Ankub sin ansaon neki sa’es onle sobalu besi. Sin ninen aspepen onle aklet amfaun sin apunun le hen taman neu makenat. ¹⁰ Sin anmu’i ikon ma kmulu onle kabiti. Ma anbi sin ikon nane anmu’in matani he nale’un mansian funan nim ini mnanun. ¹¹ Sin anmu’i usif le naplenat sin, ma usif nane esle’ ahake le he natae neu nopu maten. In kanan anbi a’at Ibrani esle’ Abadon; ma anbi a’at Yunani Apolion (le in oten "Ale’ut"). ¹² Amle’ut ahunut anfinien. Nalali te anmu’i amle’ut nua anteni le mes nem. ¹³ Namuni te ahake neno tunan le ne’e anpu in to’is. Ma au nen hanaf mese nem na’ko baki fuat mnatu in sunan ha sin le anbi Uisneno matan. ¹⁴ Hanaf nane nak neu ahake neno tunan ne’e nane, "Mufetin nai ahake neno tunan ha in le mafutun anbi Noe Efrat nane!" ¹⁵ Oke te nafetin ahake neno tunan ha in nane; le naloitan nalali sin neu leku, neno, funan ma ton nane he namate ao bia tenu na’ko to mansian. ¹⁶ An eut kau nak ale solalus asae bikase nane sini mfaun hotun natun nua. ¹⁷ Ma anbi mnitas, au it ale bikase nane ma atoni le ansae neu ale bikase nane. Ale asaet nane sin paken sobalu besi, le amtasa aklima ma maet metan ma molo in balin. Ale bikase nane sini nakenu on meo asu ini nakan, ma ai, masu’, ma balin anpoi na’ko sin fefan. ¹⁸ Ao bia tenu na’ko to mansian anmate natuin snama nono tenu, esle’ ai, masu’, ma balin le anpoi na’ko ale bikase sin fefan. ¹⁹ Ale bikase nane sin matanin mapeni anbi sin fefan ma anbi sin ikon. Sin ikon onle kauna ma’naka. Ale bikase nane nale’un mansian, neki sin ikon. ²⁰ Mes atoni bian, le kan maten fa natuin ale snama nane, sin ka nateunok fa na’ko sa’ le sin anmo’e nalali. Sin ka nasnasan fa na’ko luli besa neu ale sman amle’ut ma le’u mahuma le anmo’e na’ko mnatu, noin muti, noin molo, fatu ma hau le sin ka nitan fa, ka nenan fa ma ka naon fa. ²¹ Ma sin ka nateunok fa na’ko ma’otes, na’ko mo’et ela mesokan, na’ko mo’et kake ma na’ko lasi bakan.

¹ Oke te au it ahake neno tunan abe’it mese anten, le ansanu na’ko neno tunan. In saklubon neki nope, ma enus mese anbi ini nakan. In human anpin onle manas, ma in haen onle ni ai. ² Anbi ini niman anmu’i sulat manunu mese la natfei. In haen a’ne’u antelin bi tasi, ma in haen a’li antelin bi meto. ³ In anhunun nok hanan a’naek onle meo asu nakunut. Ma leka ahake neno tunan nane anhunun nalali te, lotos hitu nane natae neki sin apunun. ⁴ Ma leka lotos hitu nane sin napunu, au he tui ani, mes au nen hanaf mese na’ko neno tunan nak, "Ampanat nai sa’ le alotos hitu nane sin na’uab ma kais hom tui mani!" ⁵ Oke te ahake neno tunan le au it anteli anbi tasi ma anbi meto nane na’aiti in niman a’ne’u neu neno tunan. ⁶ In ansup neik Uisneno kanan le anmoni talan te nabal-bal, le anmo’e neno tunan, pah pinan, ma tasi nok in nesan ok-oke. Ahake neno tunan nane nak, "In leku of ka taskotun a’teni fa! ⁷ Mes leka ahake neno tunan le hitu’e anpu in to’is, Uisneno of natisi in lasi tolo’ nane, onle In naton nalali neu In ate sin, es le mafefa knino sin." ⁸ Namuni te hanaf le na’uab nalali neu kau na’ko neno tunan, na’uab anteni neu kau, nak, "Hom nao nai, he maiti sulat manunu le natfei anbi ahake neno tunan niman le anteli anbi tasi ma anbi meto nane." ⁹ Oke te au nao eu ahake neno tunan nane ma atoti hen fe kau sulat manunu nane. In na’uab: "Maiti nai ma muah nai. Of in namenun anbi ho teim, mes anbi ho fefam in min noni onle oni hau." ¹⁰ Au aiti sul manunu nane na’ko ini niman oke te uah ani. Anbi au fefak in min noni on oni hau, mes leka au olo ulali, in namenun anbi au teik. ¹¹ Nalali te in naplenat kau, "Ho mubeno amteni beno Uisneno neu ale uf, ale pah, ale a’at ma ale kesel."

¹ Nalali te anfe kau atfob mese, masan onle hau letis luku, nok a’an le nahan nak on i: "Hom nao nai ma amteli Ume Uisneno ma baki fuat. Amsoi sin nai atoni fauk le anonen toti anbine. ² Mes kais amleti po’an le antom kotin Ume Uisneno nane, fun anfe nalali neu uf bian sin le ka nahinef Uisneno. Ma of sin anhali anteli Kot Knino nane funan bo’ham nua." ³ Ma of Au sonu Au saksi atoni nua le anpaken tainusat kulut, ma sin of ane’tun beno Uisneno neno nifun mese natun nua ma bo’ne. ⁴ Saksi nua in nane esle’ bub fua mina u’nua ma tet paku nua le anhake anbi Usif tunan neu neno tunan ma pah pinan In matan. ⁵ Kalu anmu’i atoni le hen mo’e amle’ut neu sin, ai anpoi na’ko sin fefan ma nale’un ale sin musu nane. Ma kalu anmu’i atoni le he namenab sin, atoni nane mes anmate natuin lalan nane. ⁶ Sin anmu’in kuasat hen ek neno tunan, he nati’ kais na’ul, leka sin fe naton beno na’ko Uisneno. Sin anmu’in kuasat amsa neu ale oe mata sin he nabaina nani anfani na’. Ma sin anmu’in kuasat amsa hen hukum pah pinan neki ale snama, leka sin anlomi hen mo’e nani. ⁷ Leka sin nasopu sin beno nane, mu’it le ansae na’ko nopu maten of anlaban sin. In of anbe’u sin ma namate sin. ⁸ Ma sin aon nitu of nabelon anbi lal uf kota naek, le napeti sin Usif anbin. Kot nane in letan esle’ Sodom ai Mesir. ⁹ Ma ale atoni nako uf-uf, suku, a’at ma pah of sin nit sin ta’un aon nitu nane neno tenu ma batis, mes sin kan lomin fa hen sub sin ta’un aon nitu nane. ¹⁰ Ma sin alsin le namaika anbi pah pinan sin namlil ma namo’ek natuin saksi nua in nane sin anmaten. Es nane te sin anmo’en fesat, ma anmasonu sonu, natuin mafefa knino nua in nane le sin neki hamu’it neu ale atoni le namaika nabi pah pinan. ¹¹ Neno tenu ma batis namuni te, snasaf honis nem na’ko Uisneno ma antam anteni neu mafefa knino nua in nane. Oke te sin anfen anfan talan te ale atoni le nit sin namtaun. ¹² Namuni te mafefa knino nua in nane nen hanaf naek mese na’ko neno tunan nak, "Amsae aim nai neu i!" Oke te nope ankub sin, ma sin ansae neu neno tunan, ma sin musu ansaksi lasi nane. ¹³ Anbi leku nane nainunus a’naek anbol. Ao bia bo’es na’ko kot nane nathon, ma atoni nifun hitu anmaten natuin nainunus nane. Atoni bian sin namtaun, oke te sin nanaeb Uisneno anbi neno tunan. ¹⁴ Amle’ut hae nua’e anfinien. Kiso! Amle’ut hae tenu’e he neman tenien. ¹⁵ Oke te ahake neno tunan hitu’e anpu in to’is, ma hanaf nanae manena anbi neno tunan, "Kuasat he naplenat pah pinan muni’i es hit Usif In niman, ma Kesel Afetin le anba’an nani. In of naplenat talan te nabal-bal!" ¹⁶ Ma amnasit sin bo’nuam ha, le antokon anbi sini toko anbi Uisneno In matan, sin anmof hae ma nabes neu Uisneno. ¹⁷ Sin nak, "Koi Uisneno, Akuasat Anesit, le esan ma afi te esan! Haim toti terima kasih neu Ko, fun Hom pake mulali Ho kuasat a’naek, ma Ho muplenat mulali! ¹⁸ Ale atoni le ka nahin Usif tunan, namaunun fun leku antelen he Hom opan Ho to’as, ma leku antia he mufek lasi neu ale atoni amates. Ma leku antea en hem baen Ho ate sin, mafefa knino sin, ma neu ale Ho to, esle’ ale atoni le naluli ma nabes neu Ko, anaet ma abaut. I leku neu he muskuku sin le sin naskuku pah pinan!" ¹⁹ Oke te Ume Uisneno anbi neno tunan natfei, ma In Peti Fef Bela nalilon anbi Ume Uisneno nane. Nalali te limat anpin ma lotos napo ma nainunus anheko ma ulan sensene ansanu nem.

¹ Oke te au it anbi neno tunan sa’ esle’ amkakat ma mataen le’uf. Bife mese le anpake manas on ini blua pake ma anhake anbi funan. Ma sobe le anmo’e na’ko afkun bo’es am nua anbi ini nakan. ² Bife nane in na’apu, fun in leku he nahonien, es nane in anbai natuin men mahonit. ³ Oke te au it a’teni anbi neno tunan sa’ esle’ amkakat. Anmu’i kaun koko mtasa mese le nae le’uf le anmu’i nakaf hitu ma sunaf bo’es. Ini nakan mese-mese anpake sobe mese. ⁴ Ma in ikon anhel neki ao bia na’ko ale afkun anbi neno tunan ma anpolin nani neu pah pinan. Kaun koko nane anhake anbi bife le he nahoni nane in matan, hen ol nan in anah, leka bife nane nahonis nalali. ⁵ Ma bife nane nahonis anmone mese le of naplenat ale uf-uf neki ue besi. Mes nasik nan anah nane na’ko bife nane, oke te neki neu Uisneno ma neu Ini toko matan. ⁶ Bife nane in naen neu mnela paha snaen, anbi bale le Uisneno naloitan nani neu in. Anbi bale nane of anpafa nani neno nifun mese natun nuam bo’ne. ⁷ Oke te makenat anbol anbi neno tunan. Nai Mikhael nok in ahake sin anmaken nok kaun koko nane. Ma kaun koko nane in ahake sin anbab in, hen laban Nai Mikhael. ⁸ Mes sin anbe’u kaun koko nane. In nok in ahake sin ka napeni fa mainuan anteni he namaika anbi neno tunan. ⁹ Kaun koko naek nane anpolin napoitan! In es kauna mnasi nane le antek nak Nitu ai Sman Amle’ut, le nasekeb pah pinan ok-oke. Anpolin in neu pah pinan nok in ahake sin. ¹⁰ Oke te au nen hanaf mese le naek anbi neno tunan nak, "Leku i in leku Uisneno namonib In to! Leku i Uisneno nalile nalali In kuasat on Usif! Leku i Kesel Afetin le anba’an nani nane amsa nalile In kuasat! Fun le natam lasi neu hit bae sin anbi Uisneno matan fai manas, napoitan nalali sin na’ko neno tunan. ¹¹ Hit bae sin anbe’u nalali in neki Bibi Kase nane In na’, ma neki beno amneot na’ko Uisneno le sin ansaksi nani. Sin lomi he nana’at sini smanan talan te anmaten. ¹² Es nane te, so neno tunan ma alsin le namaika anbine, mimlil nai! Mes amle’ut neu pah pinan ma tasi, fun Nitu ansanu nalali neu ki nok to’as nae le’uf, fun in nahin nak in leku ala kle’o." ¹³ Leka kaun koko nane nahin, nak anpolin nalali in neu pah pinan, onane te in anli’u bife le nahonis nalali Anmone nane. ¹⁴ Mes anfe nalali neu bife nane katasi naek in ninen nua sin, he nati’ in nat el neu in balan anbi mnela paha snaen, anbi nane of anpafa in ton tenu ma batis nafetnon na’ko kaun koko. ¹⁵ Oke te kaun koko nane anpulan na’ko in fefan oe nae le’uf neu bife nane, he nati’ oe nane anloi neki. ¹⁶ Mes pah pinan antulun bife nane. Pah pinan anfei in fefan ma an’ol nan oe le anpoi na’ko kaun koko nane fefan. ¹⁷ Kaun koko nane nato’an bife nane, oke te in nao hen maken nok bife nane in sufan bian, esle’ atoni le natuin neu plenat Uisneno, ma le na’ki neu beno amneot na’ko Uisneno le nalilon natuin Yesus. ¹⁸ Oke te kauna nane anhake anbi tasi ninen.

¹ Namuni te au it mu’it mese anbol na’ko tasi nanan. In anmu’i sunaf bo’es ma nakaf hitu. Anbi in sunan mese-mese anmu’i sobe mese ma anbi ini nakan mese-mese anmu’i tuis mese le na’le’uf Uisneno. ² Mu’it le au it nane human onle meo neno, ma in haen onle meo fui haen, ma in fefan onle aus neno fefan. Oke te kaun koko nane anfe neune in matanin ma ini toko ma in kuasat le a’naek. ³ Ma au it nakaf mese anbi nakaf hitu na’ko mu’it nane onle he napap matani, mes papa nane nalekoen. Pah pinan ok-oke natuina kauna nane nok tenab amkakat. ⁴ Ma sin nabes neu kaun koko nane, fun in anfe nalali in kuasat neu mu’it nane. Ma sin nabes neu mu’it nane amsa. Sin nak, "Katit fa es onle mu’it i! Ma katit fa esle’ hen be’u in!" ⁵ Mu’it nane napeni mainuan he na’uab ale lasi nok neka moko ma na’le, na’le’uf Uisneno. In napeni mainuan he naplenat funan bo’ham nua ini lon. ⁶ Oke te in na’le’uf Uisneno, ma antek nale’un Uisneno kanan. Onane amsa in na’le’uf bale maika Uisneno, ma alsin le namaika anbi neno tunan. ⁷ Ma in napeni mainuan hen maken nok to Uisneno ma anbe’u sin. Ma kuasat neu ale suku, pah, a’at ma uf-uf anfe nani neu in. ⁸ Ale atoni le namaika anbi pah pinan of nabes neu mu’it nane, al atoni-atoni le sin kanan antui nalali nahunun anfatan pah pinan, anbi sulat atoni honis na’ko Bibi Kase le anlolo nalali. ⁹ Atoni le maluke, mutnin nai beno i, ¹⁰ "Atoni le mes hen tam neu o’of, in of antam neu o’of. Ma atoni le mes he namate neki suni, of namate nani neki suni. Es nane to Uisneno mes namepan nekan ma na’ki." ¹¹ Oke te au it mu’it mese anteni anpoi na’ko pah pinan. In anmu’i sunaf nua onle bibi kase sunan. In hanan onle kaun koko hanan. ¹² In anpake kuasat anaek na’ko mu’it ahunut nane anbi in matan. In naseke pah pinan ok-oke ma alsin le namaika anbine, he nabes neu mu’it ahunut nane, le in papa nalekoen. ¹³ Mu’it amunit i anmo’e lasi amkakat anaek. Anbi ale atoni sin matan in anmo’e ai ansanu na’ko neno tunan neu pah pinan. ¹⁴ Ma ale atoni le anmoni anbi pah pinan in fuil sin neki ale lasi amkakat le in anmo’e nani anbi mu’it ahunut nane matan. Ma in an lenu sin alsin hen mo’e nan fatu mahuma mese he na’usi mu’it ahunut le napap natuin suni, mes fe anmoni. ¹⁵ Mu’it amunit i napeni mainuan hen fe snasaf neu fatu mahuma nane, he nati’ fatu mahuma nane na’uab nahin ma namate ale atoni le kan lomif he nabes neu in. ¹⁶ Mu’it nane na’seke ale atoni, abaut ma anaet, amu’it ma amamu’it, aosona ai ate hen simo taka anbi sin niman a ne’u ai anbi sin ilan. ¹⁷ Katit fa atoni mese le hen sos ai nasosa sa’ es, kalu in kan mu’if taka nane, esle’ mu’it nane in kanan, ai so’it le nalile kanaf nane. ¹⁸ Anbi i so anmu’i lasi hinef. Atoni le nahin nabe’i anso’i mu’it nane so’in in oten, fun so’it nane lo kanaf mansian. In so’in esle’ natun ne bo’ne am ne.

¹ Namuni te au kiso, oke te au it Bibi Kase nane anhake anbi Tubu Sion. In anhake nok atoni nifun natun mese bo’ham ha, le In kanan ma In Amaf kanan matui anbi sin ilan. ² Oke te au nen hanaf mese na’ko neno tunan napunu on oe sako ini satan ma on lotos ini punun matani. Ma hanaf le au nen nane, onle biol in hanan na’ko ansapu biol le ansapu ini biol. ³ Sin ansi sit fe’u mese anbi toko matan ma anbi amonit ha ma amnasit-amnasit nane sin matan. Ma katit fa atoni mese le nanoni nahin sit nane so mak atoni nifun natun mese bo’ham ha le ansoi nalali sin na’ko pah pinan nane. ⁴ Sin le nane ale atoni le anpanat sin aon fun ka nahutab fa sin aon nok bife. Sin aon naknino on ao temef. Sin es natuin Bibi Kase nane le In nao neu me-me. Na’ko ale to mansian sin le nane ale atoni le nafetin nalali sin on fua tulu ahunut neu Uisneno ma neu Bibi Kase. ⁵ Sin ka napoibok fa; ma kan mu’if kobe an-ana’ amsa anbi sin. ⁶ Oke te au it ahake neno tunan mese bian le nat el namnanu anbi neno tnanan. Ahake tunan nane neki beno antom Beno Alekot le nabal-bal he natiaba neu mansian anbi pah pinan; esle’ neu ale uf, a’at ma pah. ⁷ Ahake tunan nane anhunun nok hanan a’naek nak, "Mimtausan Uisneno nai ma minaeb In Apinat! Fun leku antelen Uisneno hen lefi mansian in lasi. Mibes nai neu In le anmo’e neno tunan, pah pinan, tasi ma ale oe mata!" ⁸ Ahake neno tunan nua’e natuin ahake neno tunan ahunut ma nak, "Kota naek Babel nane natselen, natselen! In es namafu ale uf-uf neki in tua mafu kake nane." ⁹ Ma ahake neno tunan mese bian, ahake neno tunan tenu’e natuin ahake neno tunan nua in nane ma anhunun nok hanan a’naek nak, "Atoni le nabes neu mu’it nane ma in fatu mahuma ma anmu’i taka na’ko mu’it nane anbi ilan ma in niman, ¹⁰ atoni nane of ninu tua Uisneno esle’ In tua to’as le antesi nalali neu in balan, kan kulan fa kle’o amsa! Ale atoni nane of anhamu’i sin anbi ai ma balin anbi ahake neno tunan sin matan ma anbi Bibi Kase In matan. ¹¹ Masu’ na’ko ai le anhamu’i ale atoni nane of ansae piut-piut talan te nabal-bal. Fai manas anhamu’i sin piut, esle’ sin le nabes neu mu’it nane nok in fatu mahuma, ma ale atoni le anmu’i taka na’ko mu’it nane." ¹² Anbi lasi i, to Uisneno le natuin ale plenat Uisneno ma na’ki neu Yesus, so anhataniok. ¹³ Oke te au nen hanaf mese na’ko neno tunan nak, "Amtui nai, ua alekot neu atoni le na’ko leku i anmaten mes fe antuthae Usif!" Smanan Knino nak, "Namneo! Sin of nasnasan na’ko mepu mafena, fun sin tuthaes in fuan of anhaek nok sin." ¹⁴ Oke te au kiso ma au it noep muti mese. Atoni mese antoko anbi nope nane in fafon, human on mansian. Sobe mnatu mese anbi Ini nakan, ma besi lefi mese le na’aik anbi Ini niman. ¹⁵ Namuni te ahake neno tunan mese bian anpoi na’ko Ume Uisneno. In haman nok hanan a’naek neu In le antoko anbi nope nane in fafon nak, "Muknoti Ho besi lefi nane ma amlefi nai, fun neno lefit antelen; pah pinan afan namnatuen!" ¹⁶ Oke te In le antoko anbi nope nane fafon naknoti In besi lefi neu pah pinan ma anlefi pah pinan. ¹⁷ Namuni te au it ahake neno tunan mese bian anteni anpoi na’ko Ume Uisneno anbi neno tunan. In amsa neki besi lefi mese le na’aik. ¹⁸ Nalali te ahake neno tunan mese bian, le anmu’i kuasat neu ai, anpoi na’ko baki fuat. Nok hanan a’naek in anhunun neu ahake neno tunan le ana’ besi lefi a’aikat nane nak, "Muknoti ho besi lefi nane ma amlefi tua min kase bi pah pinan sin fuakin, fun sin fuan nane namnatuen." ¹⁹ Oke te ahake nane naknoti in besi lefi neu pah pinan ma anlefi tanu’an sena bi pah pinan sin fuakin, nalali te anpolin natam sin neu bale teli tanu’an sena to’as Uisneno le maput le’uf. ²⁰ Ma anteli tanu’an sena fuakin nane anbi kot kotin, oke te na’ ansai na’ko bale teli nane, ini lon kilo natun tenu, ma ini mnanun neki ansanu metel nua.

¹ Nalali te au it anbi neno tunan sa’ es le amkakat ma mataen le’uf Anmu’i ahake neno tunan hitu nok snama hitu le amsoput. I haef amsoput Uisneno ano’pan In to’as. ² Nalali te au it sa’fes on tasi nino maselo nok ai. Au it amsa ale atoni le nis nalali neu mu’it ma in fatu mahuma ma nis neu atoni le in kanan mataka’ nok so’it. Ale atoni le sin nis nalali nane anhaken anbi tasi nino ninen ma sin na’ biol le Uisneno anfe neu sin. ³ Ma sin ansi sit Nai Musa, ate Uisneno ma sit Bibi Kase In hanan nak on i, "Koi Usif, Usineno, Akuasat Anesit, Ho mo’et sin lo naek ma amkakat kun! Koi Usif neu uf-uf, Ho lekat sin lo amneot ma amnonot kun! ⁴ Sekau es ka namtauf neu Ko, Usi? Sekau es kan lomif hen etun Ho apinat ka? Ho meskun es aknino. Ale uf-uf nem ma naluli nabes neu Ko, fun Ho fekat sin lo amneot ale atoni sin nit nalali." ⁵ Namuni na’ko nane te, au it Ume Uisneno bi neno tunan nasoitnon, ma Um-ume Bale Uisneno anbin. ⁶ Oke te ahake neno tunan hitu nok snama hitu nane anpoin na’ko Ume Uisneno. Sin blua pake na’ko muti amasat le muit leko ma anpin nalim. Ma sin pake futu basaf le anmo’e na’ko mnatu. ⁷ Oke te es na’ko amonit ha sin nane anfe neu ahake hitu nane, klas mnatu hitu le nahenu nok to’as Uisneno, -- Uisneno le anmoni talan te nabal-bal. ⁸ Ume Uisneno nane nahenu nok masu’ na’ko apinat ma kuasat Uisneno. Leka snama hitu na’ko ahake neno tunan hitu nane fe ka namsopuf, atoni mese ka nabe’i fa hen tam neu Ume Uisneno nane.

¹ Oke te au nen hanaf naek mese na’ko Ume Uisneno nak neu ahake neno tunan hitu nane, "Him nao nai ma amo’pan to’as Uisneno klas hitu nane sin nesan neu pah pinan!" ² Ahake neno tunan ahunut in nao ma ano’pan ini klas nesan neu pah pinan. Oke te bisun amle’ut le neki maten anpoi neu ale atoni le anmu’i taka na’ko mu’it nane, ma neu ale atoni le nabes neu in fatu mahuma. ³ Ahake neno tunan le nua’e ano’pan ini klas nesan neu tasi. Oe tasi nane anfani onle atoni amates in na’, talan te ale amonit anbi tasi anmaet nain oke. ⁴ Ahake neno tunan le tenu’e ano’pan ini klas nesan neu ale noe ma neu ale oe matan, talan te oe ok-oke anfani na’. ⁵ Au nen ahake neno tunan le anmu’i kuasat neu oe nane nak, "Kasat ma lenat le Ho mufek nane lo amnonot kun, koi Aknino Anesit, Uisneno le esan, ma afi te esan! ⁶ Sin opan nalali to Uisneno ma mafefa knino sin na’, leku i Ho mo’e sin he ninun na’. Mo’et nane natai nok sin mo’et!" ⁷ Au nen hanaf mese na’ko baki fuat nak, "Koi Uisneno Akuasat anesit, Ho fekat sin lo amneot ma amnonot!" ⁸ Nalali te ahake neno tunan le ha’e ano’pan ini klas nesan neu manas, ma anfe kuasat neu manas he notu nis ale mansian neki in maputun. ⁹ Ma mansian anputun maet natuin manas in malalan, talan te sin tek nale’un Uisneno In kanan, le anmu’i kuasat neu ale snama nane. Maski onane, sin kan lomin fa he nateunok na’ko sin sanat ma kan lomin fa he nanaeb Uisneno apinat. ¹⁰ Oke te ahake neno tunan le nima’e ano’pan ini klas nesan neu mu’it nane ini toko. Ma mu’it nane ini plenat ok-oke anmesok, talan te mansian anlau sin man natuin menas matani. ¹¹ Oke te sin tek nale’un Uisneno anbi neno tunan natuin sin menas ma natuin sin bisun. Mes sin ka nateunok fa na’ko sin mo’et amle’ut. ¹² Oke te ahake neno tunan le ne’e ano’pan ini klas nesan neu noe Naek Efrat. Ma noe nane anmeti talan te usif-usif na’ko neno saet nabe’i nao natuin noe nane. ¹³ Oke te au it sman amle’ut tenu le sin human onle be’o. Es anpoi na’ko kaun koko in fefan, es anpoi na’ko mu’it nane in fefan, ma es anpoi na’ko mafefa moel nane in fefan. ¹⁴ Sin le nane sman amle’ut na’ko ale nitu le anmo’e ale lasi amkakat. Smanaf tenu nane sin nao neu ale uisfin anbi pah pinan ma nabuab sin neu makenat anbi Neno naek, es le Neno na’ko Uisneno Akuasat Anesit. ¹⁵ "Kiso! Au aum on abakat! Ua alekot neu atoni le anbe’ ma anpanat ini blua pake, talan te in ka nao’inson fa nok monas ma ka namaebon fa anbi paha mfaun sin matan!" ¹⁶ Oke te ale smanaf nane nabuab ale uisfin nane anbi bale mese, le antek neki a’at Ibrani nak: Harmagedon. ¹⁷ Oke te ahake neno tunan le hitu’e ano’pan ini klas nesan neu neno tnanan. Ma au nen hanaf mese le naek na’ko toko anbi Ume Uisneno, le nak, "Oke nalalien!" ¹⁸ Nalali te limat anpin, ma lotos napunu ma nainunus a’naek. Nainunus humaf nane fe kan bol nitaf na’ko neno fe anmo’e mansian. Nainunus nane mataen le’uf kun. ¹⁹ Kot a’naek nane anpe’ anfani pisa’ tenu, ma ale kot ok-oke anbi pah pinan amsa naskuku. Oke te Uisneno namnau nit Babel a’naek nane. Es nane Uisneno nainut in tua na’ko Uisneno klas mninut -- esle’ In tua kasat matani. ²⁰ Ma ale pulu sin namnekun, ma ale nu’af katita tenif sin. ²¹ Ulan sen-sene naek, le mafenan oni kilo bo’nim anmofu na’ko neno tunan ma antutu ale atoni. Ma sin antek nale’un Uisneno natuin snama ulan sen-sene le mafen le’uf nane.

¹ Oke te ahake neno tunan mese na’ko ahake neno tunan hitu le neki klas hitu nane nem neu kau ma nak, "Aum, Au of ulile neu ko he nafek amo’e lasi kake naek nane onme, esle’ kot a’naek nane le nafena anhaumak noenu. ² Kesel pah pinan anmo’e lasi kake nokan ma alsin le namaika anbi pah pinan sin anmafun natuin sin ninu in tua lasi kake nane." ³ Oke te Smanan Uisneno naplenat kau, ma ahake nane neki kau neu mnela paha snaen. Bi bale nane au it bife mese antok anbi mu’it mese le amtasa klima in tunan, le matui nahenu nok ale kanaf si’ut ma akan neu Uisneno. Mu’it nane anmu’i nakaf hitu ma sunaf bo’es. ⁴ Bife nane anpake lipa bauk ulu ma amtasa, ma namasab human neki mnatu, fatu klima ma’upa, ma baunkae usaf. Ma in na’ klas mnatu mese anbi in niman le nahenu nok ale lasi amle’ut ma hainisit, in lasi kake upan. ⁵ Anbi in ilan antui kanaf mese le anmu’i lasi tolo. Kanaf nane esle’ "Babel a’naek, ainaf neu ale amo’e lasi paisa ma ale atoni amle’ut anbi pah pinan." ⁶ Oke te au it bife nane anmafu natuin na’ na’ko to Uisneno ma na’ na’ko ale atoni le anmate fun sin na’ki neu Yesus. Leka au it bife nane au umkaka nae le’uf. ⁷ Oke te ahake neno tunan nane nak neu kau, "Ho mumkak neu sa’ ka? Leko Au uton ko lasi tolo’ na’ko bife nane, ma lasi tolo’ na’ko mu’it le in ansae neune, esle’ mu’it anmu’i nakaf hitu ma sunaf bo’es. ⁸ Mu’it nane afi anmoni, mes muni i anmaten. Ala kle’o te of in poi na’ko nopu maten ma of in nao neu bale amle’ut. Ale atoni le anmoni anbi pah pinan le sin kanan ka matui fa anbi Sulat Atoni Honis, na’ko afi anfatan pah pinan, ale atoni nane of namkakan leka sin nit mu’it nane. Fun mu’it nane afi anmoni. Muni i anmaten, mes of in anbol anten. ⁹ Anbi lasi i so anmu’i lonef le neki lasi ahinet. Nakaf hitu nane esle’ nu’af hitu; esle’ ale nu’af bale bife nane antoko. Ma nakaf hitu nane esle’ kesel hitu. ¹⁰ Ma nakaf hitu nane amsa esle’ usif hitu. Nim na’ko sin natselan, mese fe esan ma es anteni fe ka nemaf. Kalu in nem, in mes naplenat ka lo fa. ¹¹ Ma mu’it le afi anmoni, mes muni i anmaten, nane usif le fanu’e. In le nane mese na’ko usif hitu nane amsa, le leku i fe a’nao neu amle’ut. ¹² Sunaf bo’es le ho mit nane, es usif bo’es le sin fe ka naplenat fa. Mes of anfe neu sin kuasat he naplenat on usif nok mu’it nane leku mese ah. ¹³ Usif bo’es i sin alsin anmu’i salit papmese; sin alsin nana’at sin matanin ma sin kuasat neu mu’it nane. ¹⁴ Of sin maken hen laban Bibi Kase nane. Mes Bibi Kase nane nok In atuina sin le na’ki le In boin nalali sin ma In beti sin nane of anbe’u usif-usif nane, fun In kun lo Uisneno neu ale usif sin, ma Kesel neu ale kesel sin." ¹⁵ Ahake nane na’uab amsa, "Oe le ho mit nane, bale amo’e a’paisa nane antoko, esle’ ale uf, ale to’, ale pah ma ale a’at. ¹⁶ Ma sunaf bo’es le ho mit ma mu’it nane of sin kan lomif amo’e kake nane. Sin of nasik nani ale sa’ le in anmu’i, ma anmo’e in anfani monas. Sin of neku in sisi ma nale’un nani neki ai. ¹⁷ Fun Uisneno nabeko nalali sin nekan he nanaoba lekat Uisneno. Uisneno anmo’e sin nekaf mese he nana’at sin kuasat neu mu’it nane, he nati’ mu’it nane naplenat talan te Uisneno a’at natiabon kun. ¹⁸ Bife le ho mit nane, esle’ kota naek, le naplenat ale uisfin anbi pah pinan."

¹ Nalali te au it ahake neno tunan mese bian ansanu na’ko neno tunan. In mu’i kuasat a’naek ma in pinan nane antana pah pinan. ² Ma in anhunun nok hanan a’naek nak, "Bife nane natselen! Babel a’naek natselen! Muni i in anfani bale neu nitu ma ale sman amle’ut. Ale kolo le’u huma-huma le atoni kan lomi fa anmoni anbine. ³ Ale uf ninu nalali in tua lasi kake. Ale uisfin pah pinan anmo’e lasi kake nokan, ma ale atoni asosa anbi pah pinan sin anfain atoni amu’it natuin in lasi kake athoen." ⁴ Oke te au nen hanaf bian na’ko neno tunan nak, "Him poi nai, hoi Au to! Him poi nai mi’ko in! Kais mituin ale in sanat sin, ma kais amsutai in kasat sin! ⁵ Fun sin sanat natupu’on ante neno tunan, ma Uisneno namnau ale in mo’et apenut sin. ⁶ Amo’e nai neu in onle in anmo’e nalali neu ki; amtobe nai neu in kuni nua neu ale sa’ le in anmo’e nalali. Mitua ini klas meki mninut le in matanin nesi hae nua na’ko mninut le in naloitan nalali neu ki. ⁷ Amfe nai neu in hamu’it ma kulut, le in mafena papmese nok in lasi naeba ma in lasi naliabon le in anfe nani neu in aon kun. Fun in na’uab piut neu in aon nak, ’Au le i usif bife le uplenat! Au ka bife banu kau fa; ma of au ka naben fa nek tu’as!’ ⁸ Natuin lasi nane, anbi neno mese ah in of napeni snama -- menas, nek tu’as ma amnahas. Ma of notu in neki ai, fun Uisneno, le nafek in lasi nane In kuasat matani!" ⁹ Kesel pah pinan, le anmo’e lasi kake ma anmonin nok bife nane of sin ankae ma ankul neu kot nane leka sin nit masu’ le ansae na’ko ai le notu nani. ¹⁰ Sin of anhaken anbi lo’ fun sin namtausan in hamu’it, ma of sin na’uab nak, "Ailo, kot makana i namleu naek -- kot Babel amatani! Anbi leku mese ah ho fekat nale’un nalali ko!" ¹¹ Ale atoni asosa anbi pah pinan amsa ankae ma ankul natuin bife nane, fun kan mu’in tenif atoni mese amsa le hen sos sini bale. ¹² Katit fa le hen sos noni mnatu, noin muti, fatu klima ma’upa ma baun kae usaf; ma pilu muti, lip bauk ulu, le anmo’e na’ko sutra ma lipa mtasa; ale hau huma-huma le susal na’ tapeni, ale bale na’ko sikil ma na’ko hau ma’upa, na’ko nit molo, besi ma faut muti klima; ¹³ hau po’ mina, hau fua fukal huma-huma, ale fomeni ma klali: ma atu fomeni, tua min kase, mina, ut ma aen kase; bijae ma bibi kase, bikase ma klet, ale ate ma atoni in monin amsa. ¹⁴ Ale atoni asosa na’uab neu bife nane, "Ale sa’ le hom lomi he mu’i katita teni fa, ma ale lasi alekot ma ho amasat namneku nalalien. Ho of ka mupeni amteni fa!" ¹⁵ Ale atoni asosa le anfani amu’it natuin nasosa anbi kot nane of anhaken na’ko lo’ natuin sin namtausan in hamu’it. Sin of ankae ma ankul, ¹⁶ oke te sin nak, "Ailo, kot makana i namle’u naek! Le in anpake blua pake muti, lip bauk ulu ma lipa mtasa; le anpake bale mnatu, fatu klima ma’upa ma baun kae usaf! ¹⁷ Mes anbi leku mese ah, in naneku nani ale in mu’in nane!" Ale ana’ belo’, ma ale atoni asae belo’, ma ale atoni anbi bnao, ma ale atoni le sin mepu anbi tasi, sin haken na’ko lo’. ¹⁸ Ma sin anhunun leka sin nit masu’ ansae na’ko ai le notu kot nane. Sin nak, "Kan mu’if kot bian onle kota naek i!" ¹⁹ Ma sin tao afu neu sini nakan on taka kulut, oke te ankaen ma anhunun nak, "Namneo, kot naek i namle’uen! In mu’in anmo’e ale atoni le anmu’i bnao anbi tasi anfani amu’it! Mes anbi leku mese ah, in naneku nani ale sa’ ok-oke! ²⁰ Hoi neno tunan, mumlil nai neu kot nane naskuku! Hoi to Uisneno, ale haef knino ma ale mafefa knino, mimlil nai! Fun Uisneno anhukum nalali in on seunbanit neu sa’ le in anmo’e nalali neu ki! ²¹ Nalali te ahake neno tunan mese le matani naiti fatu mese -- naen onle fatu fole a’naek-oke te anpolin neu tasi nanan ma nak, "Onane amsa kot Babel le makana nane of anpolin nani talan te katita teni fa. ²² Hanaf na’ko abae heo, ma pukan asit, na’ko afekut ma na’ko apu to’is, of ka manena antenif anbi ko! Of katit fa atoni apakaet mese amsa’ anbi ko, ma fatu fole in hanan amsa of ka manena antenif anbi ko. ²³ Atoni of ka nit anteni fa paku pinan anbi ko; ma of kat nena tenif malinat fesat mafet mamonet anbi ko. Ale ho atoni asosa nane atoni-atoni le makana anbi pah pinan, ma nok ale ho lasi hine ho musekeb ale uf anbi pah pinan!" ²⁴ Babel napeni hukum fun anbi kot nane napeni na’ na’ko ale mafefa knino, na’ na’ko to Uisneno atlefiha tak na’ na’ko ale atoni le namate nalali sin anbi pah pinan.

¹ Namuni na’ko ale lasi nane au nen sa’ es onle hanaf a’naek na’ko atoni mfaun na’ko neno tunan le anhunun nak, "Ampules Uisneno! Hit Uisneno nane Uisneno le anfe honis; In Uisneno le apinat ma akuasat! ² In lasi fekat nane amneot ma amnonot! In nafek nalali lasi neu amo’e a’paisa naek, le nale’un pah pinan neki in mo’et poetelo. Uisneno anhukum nalali amo’e kake nane, fun in namate ale ate Uisneno." ³ Oke te hanaf na’ko atoni mfaun nane anhunun anteni nak, "Ampules Uisneno! Masu’ na’ko ai le notu kot nane of ansae ka nasnasaf!" ⁴ Oke te amnasit sin bo’nuam ha ma amonit ha le anfun ma natef toko nane ansukbok ma nabes neu Uisneno le antoko anbi toko mnatu nane. Sin nak, "Amin! Ampules Uisneno!" ⁵ Oke te au nen hanaf mese na’ko toko mnatu nane nak, "Ale ate-ate Uisneno, ma ale atoni -- anaet ma abaut -- le nabes neu Uisneno, ampules Uisneno!" ⁶ Oke te au nen sa’ es onle hanaf na’ko atoni pukan naek; sin hanan onle oe in pesen ma onle lotos ini punun. Au nen sin nak, "Ampules Uisneno! Fun hit Uisneno le Akuasat Anesit nane muni i naplenat! ⁷ Aim nai hit tamlil ma tamo’ek, aim nai hit tanaeb In apinat! Fun neno mafet mamonet neu Bibi Kase nane antelen, ma In fenai naloitan nalalien, neu sin mafet mamonet. ⁸ "Bael pake muti le nalim anfe nalali neu in hen pake." ⁹ Oke te ahake nane nak neu kau, "Amtui nai: Ua alekot neu ale atoni le anhone nalali sin neu fesat mafet mamonet Bibi Kase nane." Namuni te ahake nane nak: Ateni neu kau, "I beno amneot na’ko Uisneno." ¹⁰ Oke te au sukbok a’bi ahake nane matan he ubes neu in, mes in nak neu kau, "Kaisa! Kaisa ho mubes neu kau, mubes neu Uisneno! Fun au amsa ate papmese onle ho ma onle ho bae sin ok-oke le anpanat beno amneot le Yesus natiaba nani!" Fun le anbenon neu ale mafefa knino nane beno amneot le Yesus natiaba nani. ¹¹ Namuni te au it neno tunan natfei, oke te au it bikase muti mese. In asaet kanan, "Aki’at ma Amneot." In amneot anbi fekat ma anbi lasi makenat le In anmo’e nani, ¹² In matan on ai pinan ma anbi Ini nakan In anpake sobe namfau. Anbi In aon antui nalali kanaf mese; ma al In mes kun es nahin kanaf nane. ¹³ Sobalu le In anpake anlep anbi na’. Ma antek In kanan, "A’an Uisneno." ¹⁴ Ale solalus neno tunan natuin In, ma ansaen bikase muti ma anpaken blua pake muti le muit leko. ¹⁵ Suni mese le na’aik anpoi na’ko In fefan le hen be’u ale uf neki suni nane, ma of In naplenat sin neki tias besi. In naes tua min kase anbi bale tua kasat Uisneno Akuasat Anesit. ¹⁶ Anbi In sobalu ma anbi In pusun antui kanaf i nak, "Usif neu ale usif ma Tuan neu ale tuan." ¹⁷ Oke te au it ahake neno tunan mese anhake anbi manas. In anhunun nok hanan a’naek neu ale kolo le nat el anbi neno tnanan nak, "Aim nai mibua he mok neu fesat a’naek le Uisneno anmo’e nani! ¹⁸ Aim nai he miah ale uisfin sin sisi, solalus nakaf sin sisi, ma ale to meo nakaf sin sisi; aim nai he miah asae bikase sin sisi nok ale sin bikase sin sisi ma ale to mansian sin sisi, anaet ma abaut, ate ma atoni ao sona!" ¹⁹ Nalali te au it mu’it nane, ma uisfin pah pinan nok in solalus sin, nabuan hen maken nok Asae bikase muti nane ma In solalus sin. ²⁰ Ma anheke mu’it nane nok in mafefa moel le anmo’e nalali lasi taka anbi mu’it nane matan. Nok ale lasi taka nane mu’it nane nasekeb ale atoni le anmu’i taka na’ko mu’it nane ma ale atoni le nabes neu fatu mahuma na’ko mu’it nane. Oke te anpolin natam mu’it nane ma mafefa moel nane noba honis neu tasi ai le anpin-pin nok balin. ²¹ Ma ale sin solalus namate sin neki suni le anpoi na’ko Asae bikase muti nane In fefan. Ma ale kolo abit neno tnanan nah sin sisi tal namsenan.

¹ Nalali te au it ahake neno tunan mese ansanu na’ko neno tunan. In na’ letu nopu maten ma kolen besi naek mese anbi in niman. ² In heke kaun koko nane, kauna mnasi -- esle’ Nitu ai Sman Amle’ut -- ma in anfutun nani tal ton nifun mese. ³ Oke te ahake nane natam kaun koko nane neu nopu maten, nalali te anek nopu maten nane ma antao sulat taka’ neu fafon, he nati’ kaun koko nane kaisa nasekeb anteni ale uf-uf, tal ton nifun mese nane namsopu. Namuni te of nafetin in anteni neu neno tuk es. ⁴ Oke te au it ale toko, ma ale atoni le antoko anbi ale toko nane sin ansimo kuasat he nafekan lasi. Au it ale atoni sini smanan, le ano’te sini nakan natuin sin ansaksi antom Yesus, ma ane’tun beno na’ko Uisneno. Ale atoni nane sin ka nabesan fa neu mu’it nane ai neu in fatu mahuma. Sin amsa fe kan simof mu’it nane ini taka anbi sin ilan ai anbi sin niman. Sin monin fanin ma naplenat on usif nok Neno Anan ton nifun mese. ⁵ Ale atoni amates le anfen anfani hae ahunut esle’ i. Mes ale atoni amates bian sin kan monin fanin fa tal ton nifun mese nane namsopu. ⁶ Ua alekot ma tetus naek neu ale atoni le anfen anfani anbi hae ahunut nane. Maten hae nua kan mu’if kuasat neu sin. Sin of anfani ana’ lasi fuat neu Uisneno ma neu Neno Anan; ma of sin naplenat nok In ton nifun mese. ⁷ Ma leka ton nifun mese nane namsopun, of nafetin Nitu na’ko in o’of. ⁸ Ma of in nao hen fuli ale uf le nasitbok anbi pah pinan ok-oke, esle’ Gog ma Magog. Nitu nabuab sin hen maken, ma sini mfaun onle snaen anbi tasi. ⁹ Sin nasitbok neu pah pinan ok-oke, oke te anfun natef to Uisneno sin bale snasat ma kot le Uisneno nek nani. Mes ai ansanu na’ko neno tunan ma notu nis sin. ¹⁰ Oke te Nitu, le anfuli sin, anpolin neu tasi ai ma balin. Nane bale le afi mu’it ma mafefa moel anbine. Ma of anhamu’i sin piut-piut fai manas talan te nabal-bal. ¹¹ Oke te au it toko muti mese le naek ma In es antunon neune. Neno tunan ma pah pinan namneku na’ko In matan, talan te ka nit anteni fa. ¹² Ma au it ale atoni amates, anaet ma abaut, anhaken anbi toko nane matan. Oke te anfei ale sulat nane ok-oke. Namuni te anfei sulat mese anteni, esle’ Sulat Honis. Ma anbi leku nane nafek lasi neu ale atoni amates natai nok sin mo’et le antui nani anbi sulat-sulat nane. ¹³ Oke te tasi nana’at ale atoni amates le anmate anbi tasi. Maten ma Plenat Maten nana’at ale atoni amates le anbi nopu maten. Ma nafek lasi neu sin ok-oke natai nok sa’ le sin anmo’e nalali. ¹⁴ Oke te anpolin Natam Maten ma Plenat Maten neu tasi ai. (Tasi ai nane esle’ maten hae nua’e.) ¹⁵ Ale atoni le sin kanan ka matui fa anbi Sulat Honis, ale atoni nane of anpolin sin neu tasi ai.

¹ Oke te au it neno tunan fe’u ma pah pinan fe’u. Neno tunan ahunut ma pah pinan ahunut namneku ma tasi amsa namneku. ² Ma au it kot aknino nane, esle’ Yerusalem fe’u, ansanu na’ko neno tunan, na’ko Uisneno. Kot nane naloitan nalali onle namasab bife fe’u in human he nae’ku nok in mone. ³ Oke te au nen hanaf a’naek mese na’ko toko nane nak, "Muni i bale maika Uisneno nane nabua nok mansian! In of anmoni nok sin, ma sin of anfani In to. Uisneno of nabalah nok sin ma anfani Uisneno neu sin. ⁴ In of anose ale matnu na’ko sin matan. lasi maten of katita tenif; nek tu’as, kaet, ai menas amsa of kan mu’in tenif. Ale lasi mna namneku nalalien." ⁵ Oke te In le antoko anbi toko nane nak, "Kiso Au ufe’un ale sa’ ok-oke!" In nak anteni neu kau, "Amtui nai, fun ale a’at i namneo ma so ampalsai." ⁶ Oke te In nak, "Oke nalalien! Au ahunut ma amunit; Au Usif tunan na’ko Un-unu tal Namsopu. Ale atoni le anmeno, of Au uinut na’ko oe mata le anfe honis; ma neu lasi nane kais in baen sa’-sa’. ⁷ Ale atoni amnisat of ansimo ale i ok-oke na’ko Kau. Of Au fani In Uisneno, ma of In fani Au anah. ⁸ Mes neu ale atoni amtaus, ale atoni le ka na’ki, ale atoni abulalut, ale atoni ama’otes, ale atoni amo’e kake, ale atoni le anpake hine mesokan, ale atoni le anbes neu le’u mahuma, ma ale atoni apoiba, sin bale esle’ tasi ai ma balin le anpin, nane lasi maten hae nua." ⁹ Ma es na’ko ahake neno tunan sin hitu le sin na’ klas hitu, le nahenu nok snama hitu amsoput nane, nem neu kau, oke te nak, "Aum neu i! Au he ulile ko bife fe’u, le Bibi Kase in fenai." ¹⁰ Oke te Smanan Uisneno naplenat kau, ma ahake nane neki kau neu nu’af amnanut. In nalile kau Yerusalem, kot aknino nane. Kot nane ansanu na’ko neno tunan, na’ko Uisneno, ¹¹ neki amasat ma apinat Uisneno. Kot nane naklima onle fatu ma’upa amasat, onle fatu ma’upa Yaspis, naklima on nino. ¹² In baik lape le anfun ma natef nane naek ma mnanu, ma in eno naek bo’es am nua, ma ahake neno tunan bo’es am nua anpao esan. Anbi ale eno naek nane antui uf Israel bo’es am nua sin kankenu. ¹³ Anmu’i eno naek tenu le anbaina neu anin mata ha sin; tenu antom neno Saet, tenu antom neno Li’, tenu antom neno Ne’u, ma tenu antom neno Tes. ¹⁴ Baik lape kot nane anmu’i faut sukit bo’es am nua. Anbi ale fatu sukit nane antui Bibi Kase In haefin bo’es am nua sin kankenu. ¹⁵ Ahake neno tunan le na’uab nok kau nane, anmu’i teas mese na’ko mnatu hen leti kot nane, in eno naek sin ma in baik lape. ¹⁶ Kot nane masi’uf ha, ini mnanun ma ini kabenan namnes. Ma ahake nane anleti kot nane neki in teas nane. Ini mnanun kilo nifun nua ma natun ha; ini kabenan ma ini latan namnes nok ini mnanun. ¹⁷ Leka ahake nane anleti in baik lape nane, ini latan metel bo’ne. Leti le ahake nane anpake, namnes nok leti le mansian anpake. ¹⁸ Baik lape kot nane anmo’e na’ko fatu klima Yaspis ma in kot nane na’ko noni mnatu, naklima on nino. ¹⁹ Kot nane in fuat sukit sin namasab nani neki fatu klima ma’upa huma-huma. Fatu sukit ahunut anmo’e na’ko fatu Yaspis, fatu sukit nua’e, fatu nilam, fatu sukit tenu’e, fatu mirah, fatu sukit ha’e, fatu zamrud. ²⁰ Fatu sukit nima’e, fatu unam, fatu sukit ne’e, fatu sardis, fatu sukit hitu’e, fatu ratna cempaka, fatu sukit fanu’e, fatu beril, fatu sukit sio’e, fatu krisolit, fatu sukit bo’es e, fatu krisopras, fatu sukit bo’es am mese’e, fatu lazuardi, ma fatu sukit bo’es am nua’e, fatu kom-kome. ²¹ Ma eno naek bo’es am nua nane, fatu klima ma upa’ bo’es am nua; eno mese te fatu klima ma upa’ mese. Lal opa kot nane anmo’e na’ko noni mnatu naklima onle nino. ²² Au ka itaf Ume Uisneno anbi kot nane, fun Ume Uisneno lo es Uisneno Akuasat Anesit, ma Bibi Kase nane. ²³ Kot nane ka nukaf manas ai funan hen tana nani, fun Apinat Uisneno antana nani ma Bibi Kase nane anfani in paku. ²⁴ Ale uf-uf anbi pah pinan of nao’nin anbi in pinan, ma ale usif amsa of neki sin mu’in neu kot nane. ²⁵ Ale eno naek kot nane of natfei piut; of ka mae’ka fa, fun katit fa fai anbi nane. ²⁶ Ale uf-uf of neki sin kan tola ma sin mu’in neu kot nane. ²⁷ Mes ale atoni le anmo’e lasi hainisit ma ale atoni apoiba, ka napenin fa mainuan hen tam neu kot nane - atlefiha tak sa’ le nalahi, ka nabe’i fa he teki antam neu kot nane. Le napeni mainuan hen tam neu kot nane al atoni-atoni le sin kanan matui anbi sulat Bibi Kase nane, esle’ sulat honis.

¹ Ahake nane amsa nalile kau noe le meuknino on nino klima; in oe nane anfe honis. Noe nane ansai na’ko toko Uisneno ma Bibi Kase nane, ² neu lal opa atnanan anbi kot nane. Anbi noel nane ninen bian am bian, anmu’i hau honis le nafua hae bo’es am nua ton mese; funan mese te nafua hae mese. Hau nane non anpake on malo he naleko ale uf-uf. ³ Anbi kot nane kan mu’if sa’es le he napeni kasat Uisneno. Toko Uisneno ma Bibi Kase nane of anhake anbi kot nane. Ale ate Uisneno of naluli ma nabes neu Uisneno, ⁴ ma of nit In human. Uisneno kanan of matui anbi sin ilan. ⁵ Sin of ka nukan fa paku ai manas pinan, fun fai of kan mu’in tenif, ma fun Uisneno anmes kun of antana sin. Ma sin of naplenat on usif talan te nabal-bal. ⁶ Oke te ahake nane nak neu kau, "Ale a’at i amneot kun ma so tafnek neu Uisneno. Uisneno le anfe In Smanan neu ale mafefa knino, ansonu In ahake neno tunan he nalile neu In ate sin sa’ le mes hen bol labah." ⁷ "Ampanat nai!" Yesus nak. "Of Au aum labah. Ua alekot neu ale atoni le anpanat ale a’at beno anbi sulat i!" ⁸ Au, Nai Yohanes, au nen ulali ma it ale lasi nane. Leka au nen ma it ulali ale lasi nane, au li’tua bi ahake neno tunan in haen, le nalile nalali kau ale lasi nane, ma au he ubes eu in, ⁹ mes in nak neu kau, "Kaisa! Kaisa mubes neu kau! So mubes neu Uisneno! Fun au amsa ate onle ho ma ho bae mafefa knino sin ma ale atoni le anpanat ale fainekat anbi sulat i!" ¹⁰ Oke te in nak anteni, "Kais mutolo’ ale a’at beno anbi sulat i, fun in leku anhaumaken ale lasi i of anbol. ¹¹ Atoni le anmo’e amle’ut, maut he in mo’e amle’ut piut; atoni le nalahi, maut he in nalahi in aon piut; atoni le natuin lomin Uisneno, maut he natuin lomin Uisneno piut, ma atoni le anmoni neu Uisneno, maut hen moni piut neu Uisneno." ¹² "Ampanat nai!" Yesus nak, "Of Au aum labah ma eki baen he seunbanin atoni mes-mese natuin sa’ le sin anmo’e nalali. ¹³ Au ahunut ma amunit; Au Usif tunan na’ko Un-unu talan te Namsopu." ¹⁴ Ua alekot neu ale atoni le anfase in sobalu betkone. Sin es napeni mainuan he neku hau fua honis ma antam neu kot nane natuin in eno naek. ¹⁵ Mes ale atoni le anmo’e ale lasi ahainisit, anpake lasi hine mesokan, le anmo’e lasi kake, le anmao’te, le nabes neu le’u mahuma, ma le napoibok, he neki a’at ai he neki mo’et, ale atoni nane sin bale es kot kotin, ¹⁶ "Au, Nai Yesus, le Au sonu ulali Au ahake neno tunan hen etun ale lasi i neu ale Tolas Knino. Au le’i hau snuku, le Nai Daud in sufan. Au le i faif nome apinat." ¹⁷ Smanan Uisneno ma bife fe’u nane nak, "Aum nai!" Atoni le in nen, so in nak, "Aum nai!" Ma sekau le in meno oe, so in nem! Sekau le in anlomi, so in naiti oe honis nane ka nok fa baen. ¹⁸ Neu ale atoni le amnen ale a’at beno anbi sulat i, au Nai Yohanes, umnauba ki, "Atoni le ansato anteni sa’ neu ale a’at beno i, Uisneno of ansato atoni nane in kasat neki ale snama le antui nani anbi sulat i. ¹⁹ Ma atoni le napoitan sa’ na’ko ale a’at beno i, Uisneno of napoitan atoni nane in pa’le antui nani anbi sulat i -- esle’ nama’ na’ko hau honis ma na’ko kot aknino nane." ²⁰ In, le ansaksi ale beno i, nakua a’an nak, "Namneo, Au aum labah!" Amin. Namneo! Koenom aum nai, koi Usif Yesus! ²¹ So Usif Yesus anfe In tetus neu ale to Uisneno! Amin.