FILIPI

FILIPI

¹ Neu ale to knino anbi Neno Anan Yesus nok ale atopu tolas knino ma diaken ai syamas anbi Filipi. Na’ko hai nua kai Nai Paulus ma Nai Timotius, Neno Anan Yesus In ate. ² Haim toti he nati’ tetus ma aomina na’ko Uisneno, hit Ama, ma na’ko hit Usif Yesus Neno Anan neu ki alki. ³ Au utulu nekak neu au Uisneno hae fauk-fauk au umnau ki. ⁴ Ma anbi ale leku le au onen toti neu ki, au onen toti nok nek amlilat. ⁵ Au utulu nekak neu au Uisneno fun na’ko neno ahunut tal neno i, him tuntaku kau anbi etus Beno Alekot na’ko Uisneno. ⁶ Uisneno anfatan nalali mepu alekot nane anbi ki, ma au ufnekan of In namneob mepu nane tal namsopu bi leku Neno Anan Yesus nanoebon anfani nem. ⁷ Au utenab onane neu ki, fun hi alki anbi au nekak. Hi mipeni pa’ ma nama anbi halinat knino le Uisneno anfe neu kau. Bi leku le au bi o’of ai bi leku le au fe bi mone ma au hake utau ma hatani Beno Alekot. ⁸ Au nekak antu’ neu ki anbi Neno Anan Yesus In manekan. Uisneno anfani saksi neu kau, nak lasi le au umolok i namneo. ⁹ Au onen toti neu ki ak, so hi lasi manekat ansato nok athoes anbi lasi hine amneot ma anbi ale tenab alekot, ¹⁰ he nati’ him beti mihin lasi alekot. Kalu onane hi monim of naknino ma ka kobe fa talan te Neno Anan nanoebon anfani nem. ¹¹ Hi monim of nahenu nok lasi amneot le anbol natuin Neno Anan Yesus neu he nanaeb ma naliatas Uisneno. ¹² Au lomi, bae benu, he nati’ hi mihin, nak lasi le antom neu kau i, nane leko he nati’ Beno Alekot in nao mat piut. ¹³ Lasi nane natonon neu ale atoni anbi sonaf ma neu atoni bian, nak au tam o’of natuin Neno Anan. ¹⁴ Ma lasi au tam o’of anmo’e bae knino amfaut nafnekan neu Usif tunan talan te sin maspetin anbi lasi anetun a’an Uisneno ka nok fa amtaus. ¹⁵ Anmu’i atoni le sin saksit Neno Anan nok nek a’unu ma matoes mes bian an saksi Neno Anan nok nek muti. ¹⁶ Sin le i anetun Neno Anan natuin sin nek Uisneno, fun sin nahin, nak Uisneno anlek kau he utau Beno Alekot nane. ¹⁷ Mes atoni bian sin anetun Neno Anan natuin he naim kanaf ma ka nok fa nek muti. Sin natenab nak sin mo’e onane hen hafen kau anbi o’of. ¹⁸ Mes nane ka sa’-sa’ fa, fun maski onane amsa, of anetun Neno Anan, he nok tenab amle’ut ka ai he nok tenab amneot. Anbi lasi nane au malin, ma of au malin piut. ¹⁹ Fun au uhin, nak natuin hi onen totis ma natuin Yesus Neno Anan In Smanan Knino antuntaku kau, of au upeni tetus. ²⁰ Fun au lomi ma au ufnek nae le’uf he kais namaeb kau anbi ale lasi. Mes au ufnekan he nati’ anbi ale leku nes-nesi muni i, au upeni maspeti talan te nok au monik oke -- he moni ai he mate -- sin nanaeb Neno Anan. ²¹ Fun neu au, monit nane Neno Anan! Ma maten nane neki alekot. ²² Mes kalu au fe moni bi pah pinan i, nabe’i au mo’e mepu alekot. Au ka uhin fa he beit neu me. ²³ Lasi nono nua anhapnesa kau; au lomi he nao he umaika ok Neno Anan, fun nane naleko neis. ²⁴ Mes natuin hi, leko nesi au ubala bi pah pinan. ²⁵ Ma anbi afnekat i, au uhin of au ubala ok ki. Au ubala ok ki anteni he nati’ him nao mat ma mimlil anbi nek ateb knino. ²⁶ Es nane, leka au fani et eu ki, of hi nek amlilat anbi Neno Anan Yesus nathoe natuin au. ²⁷ Al lasi mese, so hi monim namnes nok Neno Anan In Lasi Knino; he nati’ leka au et au it, ma leka au ka et au nen, nak him hake mi’ki anbi smanaf mese, nekaf mese ma mabe’u natuin nek ateb knino le anbol na’ko Beno Alekot. ²⁸ Him hataniom ma kais hi mimtausan hi musu sin. Nane anfani taka amle’ut neu sin, mes taka honis neu ki, fun taka nane na’ko Uisneno. ²⁹ Fun Uisneno anfe neu ki ka al fa hem mifnek neu Neno Anan, mes hem sutai mafena amsa neu In. ³⁰ Hi amsa mok kau anbi au lasi mabe’ut onle afi hi mit anbi kau ma leku i him nen antom kau.

¹ Fun anbi Neno Anan anmu’i fainekat, anmu’i halinat lasi manekat, anmu’i nekaf mese anbi Smanan Knino, anmu’i lasi manekat ma nek mamun. ² So hi minokab au nek amlilat anbi ale lasi i: Hi nekaf mese ma ansaof mese anbi lasi manekat, smanaf mese ma lomif mese. ³ Kais hi mo’e ale lasi nane he maim kanaf neu hi aom ma mipeni pules le ka ma’upa fa. So nok nek baun es natenab neu in aon bian naleko neis na’ko in aon. ⁴ Kais es-es natenab kun neu in aon, mes natenab neu atoni bian amsa. ⁵ So hi mitenab anbi hi nekam onle Neno Anan Yesus natenab anbi In nekan: ⁶ In namnes nok Uisneno, mes In ka natau fa lasi nane nak in namnes nok Uisneno. ⁷ Mes In nafetin ale lasi ma anfani on ate ma namnes nok atoni pah pinan. ⁸ Ma anmoni on atoni pah pinan. In nabaun In aon ma natuin Uisneno talan te anmate anbi hau nehe. ⁹ Es nane Uisneno nalatan In ma anfe neu In kanaf, nesin ale kanaf bian. ¹⁰ Onane te anbi Yesus In kanan, ale amonit abit neno tunan ma abit pah pinan ma abit pah pinan in nupun sin anli’tu ma nanaeb In. ¹¹ Ma ale maf an au ma anlomi nak, "Yesus Neno Anan, lo Usif kun," neu Uisneno Ama In kanan apinat! ¹² Bae benu manekat, onle hi mituin kau piut bi neno fe au ok ki, ma leku i au u’lo ki. So hi maim kim hi aomina nok amtaus ma lilitais neu Uisneno. ¹³ Fun Uisneno es anmepu anbi ki, talan te him lomi ma mibe’i amhalin Uisneno In nekan. ¹⁴ Mepu nai ale sa’ kais nok fef munu ma lasi matoes, ¹⁵ he nati’ hi nek muti ma neka teme ki. On anah-anah Uisneno le nek muti anbi batan nek apenut ma akiku i sin atnanan, him tana sin on afkun-afkun anbi pah pinan. ¹⁶ Him na’ mimepan a’an honis, he nati’ au malin bi leku Neno Anan nanoebon anfani nem. Onane te au mepu nane ka luman fa ma au haet nane ka son-sona fa. ¹⁷ Oni au monik he natulu nani neu he naloitan fua tulu le natulu natuin hi nek ateb knino neu Uisneno. Kalu namneo onane, au utulu nekak neu lasi nane ma au umlil ma umoek ok ki alki. ¹⁸ Ma hi amsa mes mitulu nekam onane ma hi malin nai mok kau. ¹⁹ Au ufneka anbi Usif Yesus he sonu Nai Timotius net neu ki he nati’ au nekak antainine leka au nen hanaf antom neu ki. ²⁰ Fun katitaf atoni mese anbi kau, le nekaf mese ma tenab mese nok in ma natenab lasi alekot neu ki. ²¹ Fun sin alsin al naim alekot neu sin aon ma ka naim fa alekot neu Neno Anan Yesus. ²² Hi mihin Nai Timotius in nek aki’at ma in antuntaku kau bi mepu tuthaes Beno Alekot na’ko Uisneno. Hai nua kai on anah nok amaf. ²³ Es nane leka au uhin ulali au lasi ini naon, au sonu in net neu ki laba. ²⁴ Au ufneka anbi Usif nak, au amsa of et laba eu ki. ²⁵ Onane amsa hit bae ma hit benu Nai Epafroditus le him sonu hen tuntaku kau anbi mepu. Au utenab he lelu anfani net neu ki. In anse’u ai namnono nok kau anbi mepu ma anbi au mabe’ut. ²⁶ In namnau nis ki alki ma in nekan ansusal, fun him nen neu in namen. ²⁷ Namneo afi in namen ma ala kle’o te anmate; mes Uisneno namnau in. Ma ka al fa in, mes Uisneno namnau kau amsa, he nati’ kais ansato anteni au nek susal. ²⁸ Es nane te au manap he sonu in, he nati’ leka hi mit in, hi nekam anmalin ma au susal anma’kaf ai anma’naf. ²⁹ Es nane him simo in nok nek amlilat anbi hit Usif ma him tola ale atoni onle in. ³⁰ Fun natuin Neno Anan In mepu, ala kle’o te in anmate; in nana’at in monin he nanokab sa’ le fe anlabu anbi hi tuthaes neu kau.

¹ (1a) Oke te, au bae benu ki, malin nai anbi hit Usif. (1b) Lasi le au he tui teni i neu ki ka mafena fa neu kau, fun lasi nane neki alekot neu ki. ² Him panat hi aom na’ko ale asu, him panat hi aom na’ko ale atoni le anmo’e lasi amle’ut. Ma him panat hi aom na’ko ale atoni le nanaob lasi helit. ³ Hit le’i atoni maheli amneot, le taluli ma tabes neu Uisneno natuin In mepu Smanan Knino. Hit taliabok atbi Neno Anan Yesus ma hit ka tafnekan fa neu lekat pah pinan. ⁴ Maski au amsa mu’i afnekat neu lekat pah pinan. Kalu anmu’i atoni le natenab nak anmu’i afnekat neu alekot pah pinan, au nesi na’ko nane. ⁵ Afi anheli kau bi neno fanu. Nahonis kau on atoni Israel, na’ko uf Nai Benyamin, atoni Ibrani nesaf. Kalu anbi lasi tatuin Plenat Knino unu, au atoni Farisi. ⁶ Anbi lasi makoet, au hamu’i Tolas Knino. Kalu atkiso na’ko plenat knino unu, au atoni alekot le ka kobe fa. ⁷ Mes natuin Neno Anan, ale lasi le afi au utenab on lasi amnisat neu kau, anfani lasi amnekut neu kau. ⁸ Ale lasi le au utenab on lasi amnekut, natuin lasi hine neu Yesus, Au Usi, naleko nesin ale sa’. Natuin Neno Anan au ufetin ale sa’. Ma au kius ale sa’ nane onle knutu ma ma’lafu, he nati’ au upeni Neno Anan, ⁹ ma namneo-namneo umesbok ok In. Lasi mafutus alekot nok Uisneno, au ka ami fa natuin plenat knino unu. Muni i au mu’i mafutus alekot nok Uisneno natuin fnekat neu Neno Anan. Es nane, lasi mafutus alekot nane nem na’ko Uisneno, ma natuin fnekat neu Yesus Neno Anan. ¹⁰ Au lomi he uhin Neno Anan, ma uhin kuasat le nafena In na’ko amates. Au lomi he sutai ok In ma papmese onle In anbi lasi In anmate. ¹¹ Ma au ufnekan ak of nafena nafani kau na’ko amates. ¹² Anbi lasi i au ka u’uab fa ak, au upeni ulali ma au umneo; mes au li’u it, kal-kalu au upeni amsa. Fun Neno Anan Yesus anhek nalali kau neu lasi nane. ¹³ Bae benu alki, au ka utenab fa ak au upeni ulali lasi nane. Mes lasi mese le au mo’e ani, esle’ nikan sa’ le anbi au kotik ma au tumatan lasi le anbi au matak. ¹⁴ Es nane au aen matani eu lalan panan he upeni baen, esle’ lasi honis abit neno tunan; neu lasi nane Uisneno anboin kit natuin Neno Anan Yesus. ¹⁵ Es nane, aim nai hit tatenab lasi nane on atoni neka teme. Ma kalu hi mitenab maikan antom lasi sa’, Uisneno amsa of nalile nani neu ki. ¹⁶ Mes leko nesi lasi hine le hit tapeni talali, hit tanaoba piut natuin lalan le hit nao tatuin. ¹⁷ Bae benu alki, mituin nai au heta ma amkiso sin, le sin anmoni onle hai ma anfani heta neu ki. ¹⁸ Afi au eut ulali ki hae fauk ma leku i au etu teni ki nok matnu, nak anmu’i atoni namfaun le anmoni on musu nok Neno Anan In hau nehe. ¹⁹ Atoni le anmoni onane, sin amsopun lasi amle’ut. Sin Uisneno es sin taikenu ma sin kan apinat nane es sin mo’et le namaeba sin. Sin nek tenab nane natupuon neu lasi pah pinan. ²⁰ Mes hit le’i plenat neno tunan in ini kit; ma anbi nane amsa hit atpao Usif Yesus Neno Anan on Uis kesel Afetin. ²¹ Neno Anan of nabaina hit aok amle’ut i, talan te namnes nok In ta’un apinat. In anmo’e onane natuin In anmu’i kuasat he naplenat ale sa’ neu In.

¹ Es nane te, au bae benu le au nek ki ma le au umnau ki, au amlilat ma au sobe aliatas. Him haek nai amsa nok matani anbi hit Usif, koi au bae benu manekat! ² Au fainek bi Euodia, ma bi Sintikhe, he nati’ sin nekaf mese ma tenab mese anbi hit Usif. ³ Onane amsa au bae aki’at, au toti ko he nati’ hom tuntaku sin. Fun sin anhae nok kau anbi etus Beno Alekot, nok Nai Klemens ma au bae benu bian le anmepu nok kau. Sin kankenu matui anbi Sulat Honis. ⁴ Hi malin piut anbi hit Usif! Au ak a’teni ki, hi malin nai! ⁵ So hi nek alekot nane mahine neu ale atoni. Usif anhaumaken! ⁶ Kais hi mi’unu hi nekam neu ale sa’. Mes milile hi nek salit neu Uisneno nok onen totis, ma utulu nekaf. ⁷ Uisneno In halan nekaf le anfini ale hine, of anpanat hi nekam ma hi tenab anbi Neno Anan Yesus. ⁸ Oke te, bae benu alki, so him panat anbi hi nekam ale lasi alekot ma malomi, esle’ lasi amneot, lasi amasat, lasi amnonot, lasi aknino, lasi aminat, lasi le tatnine nok alekot, mo’et alekot ma mapules. ⁹ Hi minaoba ale sa’ le hi minoni ma amsimo ma sa’ le him nen milali ma sa’ le hi mit milali anbi kau. Uisneno halan nekaf in un of nok ki alki. ¹⁰ Au nekak anmalina naek anbi Usif, fun muni i hi nek amnaut anmoni anfani ma mitenab neu kau. Namneo hi mimnau kau piut mes hi fe ka mu’if leku manuan neu kau. ¹¹ Au u’uab on i ka natuin fa au nukan sa’, fun au unoni he unokab au monik anbi ale lasi. ¹² Au uhin atmoni bi lasi manukat onme ma atmoni bi lasi athoes onme. Anbi ale lasi, katit fa lasi mese le natolo’on neu kau; he lasi amsenat ka, ai lasi amnahas ka, ai lasi athoes ka ai lasi manukat. ¹³ Ale lasi nane au sutai ube’i anbi Neno Anan le anfe matani neu kau. ¹⁴ Mes hi mo’et nane leko amsa, fun him tuntaku kau anbi au nukat. ¹⁵ Bae benu alki abit Filipi! Hi mihin, nak afi au poi u’ko Makedonia, bi neno au fe fatan Beno Alekot, katit fa Tolas Knino mese le antuntaku ma anbab kau al hi mes kim. ¹⁶ Fun anbi Tesalonika him sonu manekat neu kau hae fauk-fauk. ¹⁷ Lasi anesit ka es fa sa’ le him sonu kau, mes au lomi he nati’ au it lasi nane in fuan natonon anbi ki. ¹⁸ Au simo ulali ale sa’ na’ko ki, fun a’neis ma nathoe. Au simo ulali hi sonu neu kau na’ko Nai Epafroditus. Leku i au mu’i ale sa’ le au nukan ani. Hi sonu nane on fua fomeni mese, on fuat le Uisneno anlomi nani. ¹⁹ Au Uisneno of natis ma nano’u ale hi nukat natuin in mu’in ma In apinat anbi Neno Anan Yesus. ²⁰ Minaeb Uisneno ma hit Ama talan te nabal-bal! Amin. ²¹ Mitiaba au tabe neu ale to knino anbi Neno Anan Yesus. Ale hit bae sin le nok kau anbi i ansonu tabe neu ki. ²² Ale to knino anbi i, nes-nesi sin abit Kesel in sonaf ansonu tabe neu ki. ²³ So Usif Yesus Neno Anan anfe tetus neu ki alki.