MARKUS

MARKUS

¹ Lasi Knino na’ubon neu Yesus Neno Anan, Uisneno Anmone. ² Onle antui nani anbi Mafefa Knino Nai Yesaya in sulat nak, "Kiso, Au lelu Au haef nahunun Ko, in of naloitan lalan neu Ko; ³ anmu’i atoni le anhunun bi mnela paha snaen nak: Miloitan lalan nai neu Uisneno, minono lalan neu In." ⁴ Onle matui anbi Mafefa Knino Nai Yesaya in sulat, onane te Nai Yohanes Aslanit anbol bi mnela paha snaen ma anhunun nak, "Mite’un hi nekam nai ma amfe hi aom he naslani ki ma Uisneno of ansako hi sanat." ⁵ Oke te ale atoni pah Yudea ma kot Yerusalem sin anpoi nem neu Nai Yohanes. Ma sin nahoeb sin sanat oket naslani sin bi Noe Yordan. ⁶ Nai Yohanes anpake sobalu betkone le anmo’e na’ko bikase paha snaen in funun. Ini futu na’ko pasu ma ini mnahat nane siboi ma oni hau. ⁷ In naton hanaf nak, "Amnemat mese of nem namunin kau ma In mu’i kuasat nesin kau. Au ka tamaf ota he ubes ma sefi In penhae tanin. ⁸ Au uslani ki eki oe mes In of naslani ki neki Smanan Knino." ⁹ Bi neno nane Usif Yesus nem na’ko Nazaret pah Galilea ma Nai Yohanes naslani In anbi Noe Yordan. ¹⁰ Bi leku Yesus anpoi na’ko oe, In nit neno tunan natfei, ma Smanan Knino ansanu nem neun onle kol ot kase. ¹¹ Namuni te In nen hanaf mese na’ko neno tunan nak, "Ho, Au Anmone bi’an Ko, Au nek lomik anbi Ko." ¹² Nalali te Smanan Knino antopu Yesus neu mnela paha snaen. ¹³ In namaika anbi mnela paha snaen neno bo’ha, he nitu ansu’ nitu. In nabala anbi nane bi ale mu’i fui sin atnanan ma ahake neno sin antuthae In. ¹⁴ Leka anheke nalali Nai Yohanes, Yesus nem neu pah Galilea ma anetun Lasi Knino na’ko Uisneno, ¹⁵ nak, "Leku namtisien; Plenat Uisneno neman haumaken. Mite’un hi nekam nai ma ampalsai nai neu Lasi Knino!" ¹⁶ Leka Yesus fe a’nao natuin Nifu Galilea ninen, In nit Nai Simon ma in olif Nai Andreas. Sin fe ano’kal sin kifkai neu nifu nane fun sin atoni akifkai ika. ¹⁷ Yesus nak neu sin, "Aim nai mituin Kau. Au of unoni ki hem fani akifkai atoni." ¹⁸ Oke te sin nasaitan sin kifkai ma natuin Yesus. ¹⁹ Ma leka Yesus In naon fini kle’o, In nit Nai Zebedeus in anhin Nai Yakobus ma in olif Nai Yohanes. Sin amsa fe naleko’ sin kifkai anbi belo’ tunan. ²⁰ Oke te Yesus anboin sin ma sin nasaitan sin amaf Nai Zebedeus anbi belo’ nok in atoni ameput sin. Ma sin natuin Yesus. ²¹ Ma sin nem ante anbi Kapernaum. Leka ante Neno Snasat, Yesus antam neu ume buat ma nanoni. ²² Sin namkakan antom In noina, fun In nanoni sin onle atoni amu’i kuasat ma ka onle fa ahin Sulat sin. ²³ Bi leku nane anmu’i atoni a’niut saes mese anbi ume buat. Atoni nane anhunun nak, ²⁴ "Ho mu’i lasi sa’ mok kai koi Yesus atoni Nazaret? Ho aum he mule’un kai ka? Au uhin Ko, Ho sekau Ko: Ho aknino Ko mu’ko Uisneno." ²⁵ Mes Yesus ankatal in ma nak, "Mutena, ampoi nai mu’ko atoni!" ²⁶ Ma sman nitu nane anheko atoni nane ma anpoi, fun an’anbai nok hanan anaek. ²⁷ Sin alsin namkak tal sin nau’abin es nok es nak, "I lasi sa’ka? Noina fe’u mese! In na’uab neki kuasat. In naplenat ale sman nitu ma sin natnin neu In." ²⁸ Ma beno antom Yesus nasitbon laba neu pah Galilea funam natef. ²⁹ Leka sin anpoi na’ko ume buat nane Yesus nok Nai Yakobus ma Nai Yohanes sin nao neu Nai Simon ma Nai Andreas sin ume. ³⁰ Nai Simon baif antup fun anmainin. Sin naton lasi nane neu Yesus. ³¹ Yesus a’nao neu bife nane ma antopu in niman oke te In nafena bife nane. Nalali te bife nane in maininit nane naleko kun. Oke te bife nane antuthae sin. ³² Leka neno hen faien, ma manas antes, sin neki ale atoni le naben menas ma ale niut saes sin neu Yesus. ³³ Ma ale to anbi kuan nane sin nem nabuan anbi ume enon. ³⁴ In naleko’ atoni namfaun le naben menas huma-huma ma anli’u napoitan nitu namfaun. In ka namautu fa nitu sin he na’uab, fun sin nahin In. ³⁵ Anbi nok-nok ana, leka neno fe anmesok, Yesus anfen ma anpoi. In nao neu bale teta’ ma anonen toti anbi nane. ³⁶ Mes Nai Simon nok in biakin natuin Yesus. ³⁷ Leka sin napeni Yesus, sin nak, "Ale to ok-oke sin nami Usi." ³⁸ Yesus natae nak, "Aim nai hit nao teu bale bian. Hit nao teu ale kot le anmahaumakan. Au he etun lasi knino anbi bale nane sin amsa, fun neu lasi nane es Au aum." ³⁹ Oke te Yesus a’nao neu pah Galilea funam natef, ma anetun lasi knino anbi sin ume buat ma anli’u ale nitu sin. ⁴⁰ Atoni men poko mese nem neu Yesus. Atoni nane anli’tu anbi Yesus matan ma nak, "Kalu Usi amlomi, Usi muleko kau." ⁴¹ Usif Yesus namnau atoni nane. Es nane In nenu niman ma anpoe atoni nane ma nak, "Au lomi muleko nai." ⁴² Anbi leku nane amsa atoni nane in men poko namneku ma in naleko kun. ⁴³ Oke te Yesus anlelu atoni nane he nao nok talas matane, ⁴⁴ "Mumnau, kais hom etun sa’ neu es, mes hom nao nai he mulile ho aom meu ana’ lasi fuat. Ma meki fua tulu neu ho muleko, natuin lekat Nai Musa, on saksi neu sin." ⁴⁵ Mes atoni nane in nao, ma anetun lasi nane neu me-me, talan te Yesus ka nabe’i fa hen tam neu kot mat-mat. In namaika anbi mnefu le katit fa tuaf anbin. Mes atoni nem piut neu In na’ko ale bale-bale.

¹ Neno fauk namuni te, Yesus neman teni neu Kapernaum. Beno nasitbon nak In es ume. ² Oke te to namfau sin neman talan te katita tenif bale. Bi ume enon amsa nahenu nok atoni. Leka In fe anetun a’an Uisneno neu sin, ³ anmu’i atoni ha le sin anloi neki atoni men ole mese nem neu In. ⁴ Mes natuin atoni namfaun sin ka nabe’i fa he neki anhaumak Yesus. Es nane sin pukai ume penen le antom In fafon. Oke te sin nasanut nahe’ nok atoni men ole le antup anbine. ⁵ Leka Yesus nit sin palsait, In nak neu atoni men ole nane, "Hoi Au anah, ansako nalali ho sanat sin." ⁶ Mes anbi nane amsa anmu’i ahin sulat sin fauk antoko, le sin natenab bi sin nekan, ⁷ "Nansa es atoni i na’uab onane ka? In na’uab nale’un Uisneno. Sekau es nabe’i hen sako sanat so al Uisneno anmes kun ka?" ⁸ Mes Yesus nahin nalali bi In nekan, nak sin natenab onane. Oke te In nak neu sin, "Nansa’ es hi mitenab bi hi nekam onane ka? ⁹ Lasi me es anmakafa nesi: He tak neu atoni men ole i: Ansako nalali ho sanat, ai he tak: Hom fen nai, maiti ho nahe’ ma amnao nai! ¹⁰ Mes he nati’ hi mihin, nak bi pah pinan i Anmone Pah To anmu’i kuasat hen sako sanat" -- In nak neu atoni men ole nane --, ¹¹ "Au ak ko, hom fen nai, maiti ho nahe’ ma amnao nai meu ho ume." ¹² Ma atoni nane in anfen ma naiti in nahe’ ma anpoi anbi atoni namfaun sin matan. Ale atoni sin ok-oke namkakan, oke te anpules Uisneno nak, "Lasi humaf i hai fe ka mit." ¹³ Nalali te Yesus naon teni neu Nifu Galilea ninen. Ma atoni anmfaun nem neun, ma In nanoina sin. ¹⁴ Leka Yesus nao natuin nane te In nit Nai Lewi, Nai Alfeus anmone antoko anbi ume noni poni. Oke te In nak neune, "Mutuin Kau nai." Oke te Nai Lewi anfen ma natuin Yesus. ¹⁵ Nalali te Yesus anbukae bi atoni nane in ume, atoni asimo noni poni namfaun ma atoni asanat sin anbukae nok Yesus ma In asimo lasi sin. Fun atoni namfaun le natuin Yesus. ¹⁶ Leka ahin sulat sin na’ko nonot Farisi sin nit, nak Yesus anbukae nok atoni asimo noni poni ma atoni asanat,, sin nak neu In asimo lasi sin, "Nansa’ ka es In anbukae nok atoni asimo noni poni ma atoni asanat?" ¹⁷ Yesus a nen sin han tanas nane ma In natae sin nak, "Ka atoni aomina fa es he nem neu mnane, mes so atoni amenat. Au ka aum fa he boin atoni amneot mes atoni asanat." ¹⁸ Bi haefes onane Nai Yohanes in asimo lasi sin ma atoni Farisi sin nanahok. Oke te anmu’i atoni le nem ma natan Yesus nak, "Nansa’ ka es Nai Yohanes in asimo lasi sin ma atoni Farisi sin asimo lasi sin nanahok, mes Usi asimo lasi sin kahaf?" ¹⁹ Yesus natae sin nak, "Nabe’i ka atoni fe’u nane in ini nanahok leka atoni fe’u nane fe antoko nok sin ka? Leka atoni fe’u nane antoko nok, sin ka nabe’i fa he nanahok. ²⁰ Mes of neno ante le naiti atoni fe’u nane na’ko sin, ma bi leku nane of sin nanahok. ²¹ Katit fa atoni mese le anlape sobalu mna’ neki muti fe’u. Kalu kahat muti fe’u nane anhel napisu sobalu nane talan te in natpisu naek. ²² Onane amsa katit fa atoni mese le antesi tua mina amtasa fe’u neu alu pasu mna’. Oni kahat tua mina amtasa fe’u nane anpeti napisu aul pasu nane. Oke te anpolin sin nua sin. Mes tua mina amtasa fe’u so antao nani anbi aul pasu fe’u amsa." ²³ Bi haefes bi neno Snasat, leka Yesus nao natuin lele aen kase, In asimo lasi sin anhetun aen kase. ²⁴ Oke te atoni Farisi sin nak neu Yesus, "Mail, nansa’ es sin anmo’e sa’ le ka nabe’i fa bi neno Snasat ka?" ²⁵ Yesus natae sin, "Hi fe kam soi fa ka sa’ le Nai Daud anmo’e, leka in ma sin le natuine nalalin bukael ma sin namnahan. ²⁶ Leka In antam neu Ume Uisneno, bi neno Nai Abyatar on ana’ lasi fuat anaet. Oke te sin bukae u tunu atnatas - le ka nabe’i fa hen bukae so al ana’ lasi fuat sin - ma anfe nani amsa neu in atuina sin ka?" ²⁷ Oke te Yesus nak anteni neu sin, "Anmo’e Neno Snasat neu mansian ma ka mansian neu neno Snasat. ²⁸ Es onane te Anmone Pah To nane amsa Usif neu Neno Snasat."

¹ Oke te Yesus antaman teni neu ume buat. Bi nane anmu’i atoni mese le niman ano’le. Bi nane amsa anmu’i atoni le he nami Yesus In sanat. ² Sin ankiso Yesus, kalu In he naleko atoni nane bi Neno Snasat. Oke te sin nabe’i he nasanab Yesus. ³ Yesus nak neu atoni le niman bian anole nak, "Aum, amhake bi tnanan i!" ⁴ Oke te In nak neu ale atoni le anbi nane, "Lasi me esle’ het mo’e bi Neno Snasat ka? Moe alekot ka ai mo’e amle’ut? Tamonib atoni ka ai tamate atoni?" Mes sin anta’nah. ⁵ Yesus nekan antu’ fun sin nekan manu’kun. Mes nok to’as Yesus ankiso sin funam natef ma nak neu atoni nane, "Menu ho nimam nai!" Ma in nenu nani, oke te in niman nane naleko kun. ⁶ Oke te atoni Farisi sin anpoi ma sin manlekan laba nok atoni Herodian sin he namate Yesus. ⁷ Oke te Yesus nok In asimo lasi sin naskotun neu Nifu Galilea. Ma atoni namfaun nem na’ko Galilea natuin Yesus. Ma atoni namfaun amsa neman na’ko Yudea, ⁸ na’ko Yerusalem, na’ko Idumea, na’ko Noe Yordan panin, na’ko pah Tirus ma Sidon. Sin alsin nem neu Yesus, fun sin nen ale lasi le In anmo’e. ⁹ Natuin atoni namfaun, Yesus anlelu In asimo lasi sin he naloitan belo’ mese neun, he nati’ atoni mfaun nane kais anhapnesa In. ¹⁰ Fun In naleko’ atoni namfaun, talan te ale amenat sin anmabe’un nem neu In hen na’ nan In. ¹¹ Leka nitu sin nit In, sin anmofu bi In matan ma anan’bai nak, "Ho Uisneno In Anmone Ko." ¹² Mes Yesus antal sman nitu sin matane he kais naton nak In sekau. ¹³ Nalali te Yesus ansae neu tubu mese in tunan, ma In no’en ale atoni le In anlomi ma sin neman neu In. ¹⁴ Oke te In anbeti atoni bo’es am nua he nati’ nok In. Ma In ansonu sin hen etun lasi knino. ¹⁵ Ma In anfen sin kuasat he nati’ sin anli’u ale nitu. ¹⁶ Atoni bo’es am nua le In anbeti sin nane esle’: Nai Simon le In nakanab nak Nai Petrus. ¹⁷ Nai Yakobus ma in olif Nai Yohanes, Nai Zebedeus in anhin, le In nakanab sin nua sin Boanerges, in oten nak lotos anhenu, ¹⁸ Nai Andreas, Nai Filipus, Nai Bartolomeus, Nai Matius, Nai Tomas, Nai Yakobus, Nai Alfeus anmone, Nai Simon atone Zelot, ¹⁹ Nai Yudas Iskariot le na naat neu Yesus. ²⁰ Oke te Yesus antam neu ume mese. Ma atoni namfaun sin neman teni ma antol nan sin talan te sin ka napeni fa mainuan hen bukaen. ²¹ Leka In ini sin nen lasi nane te, sin he nem nan In fun sin nak In namaun. ²² Ma ahin sulat sin neman na’ko Yerusalem nak, "Beelzebul ansae neu In," ma "In anli’u nitu neki nitu ini nakaf in kuasat." ²³ Yesus anboin sin ma na’uab neu sin neki lasi leta nak, "Leka me nitu nabe’i hen li’u nitu ka? ²⁴ Kalu plenat mese anbation, plenat nane of kan haek nabe’if. ²⁵ Ma kalu ume mese anbation, ume nane of kan haek nabe’if. ²⁶ Onane amsa kalu nitu anmatoe in aon ma anbation in kan haek nabe’if, mes in lasi namsopuen. ²⁷ Katit fa atoni mese hen tam neu atoni abe’it in ume he nasik in bale kalu in kan futu nahunun fa atoni abe’it nane. Nalali te in nabe’i he nasik ume nane. ²⁸ Mes Au ak ki: Tebes of ansako ale atoni sin sanat ma sin amle’ut, ale sa’ le sin antek nale’un. ²⁹ Mes kalu atoni le antek nale’un Smanan Knino, of kan mu’if sako sanat neu in sanat talan te nabal-bal." ³⁰ In na’uab onane fun sin nak In aniut sae. ³¹ Oke te Yesus In ainaf ma In oilfin neman. Sin fe anhake bi mone, sin anlelu atoni hen boin Yesus. ³² Atoni namfaun le antoko natef nan In sin nak neun, "Mail Usi, Ho aina ma Ho oli sin anhake eskin mone. Ma sin nami Ko, Usi." ³³ Yesus natae sin nak, "Au aina es sekau ka? Au oli sin es sekau ka?" ³⁴ In ankiso neu ale atoni le antoko natef nan In ma nak, "Au aina ma Au oli sin esle’ hi! ³⁵ Atoni le anmo’e natuin Uisneno In lomin, nane Au oli, nane Au feto, nane Au aina."

¹ Usif Yesus nanoina anteni bi nifu Galilea ninen. Atoni namfaun nem antol nan Yesus. Es nane In ansae ma antoko bi belo’ mese anbi nifu, ma atoni mfaun nane sin anhake bi nifu ninen. ² Ma In nanoina sin lasi namfaun neki leta. Bi lasi noina nane In nak neu sin, ³ "Mitnin nai! Anmu’i atoni akifu fini mese anpoi hen kifu fini. ⁴ Leka In ankifu, fini bian anmofu bi lalan ninen. Oke te kolo nem ma anlot nani. ⁵ Fini bian anmofu bi faut putun le in nain kan mafaubaf. Fini nane anmoni laba fun in nain manihis. ⁶ Mes leka manas ansae, in uknene ma anmeto fun ini ba’an kan tamaf neu nain. ⁷ Fini bian anteni anmofu bi kisan. Kisan anmoni ma neo nisan talan te in ka nafuaf. ⁸ Ma bian anmofu bi nain alekot. Fini nane anmoni ma nanae oke te nafua. Bian kuni bo’tenu, kuni bo’ne ma bian kuni natun mese." ⁹ Ma Yesus nak, "Atoni le anmu’i luken he natnin, so in natnin nai." ¹⁰ Leka Yesus anmes, In amnoktin ma asimo lasi sin bo’es am nua natan In neu lasi leta nane. ¹¹ In natae nak: "Anfe neu ki he mihin lasi tolo’ plenat Uisneno. Mes neu atoni abit mone nanoina sin neki lasi leta, ¹² he nati, ’Sin ankiso mes ka nitan fa, sin nenan mes ka nahinen fa, he kais sin neman neu Uisneno ma Uisneno ansako sin sanat.’ " ¹³ Oke te In nak neu sin, "Hi ka mihin fa lasi leta i ka? Kalu onane leka me hi he mihin lasi leta bian ka? ¹⁴ Atoni akifu nane esle’ atoni le anetun a’at Uisneno. ¹⁵ Fini le anmofu anbi lalan ninen nane, esle’ atoni le sin nen a’at Uisneno mes ka nahin nani fa. Oke te nitu nem ma nait nan a’at le fe ankifu bi sin nekan. ¹⁶ Onane amsa fini le ankifu bi faut putun esle’ atoni le sin nen a’at Uisneno ma sin ansimo laba nok nek amlilat. ¹⁷ Mes a’at nane ka na’ba’af bi sin nekan talan te in kan monif a lo. Leka susal ai hamu’it nem natuin a’at nane, sin fani kotin. ¹⁸ Ma bian le ankifu bi kisan, esle’ atoni le sin natnin lasi nane, ¹⁹ mes lasi a’unu neu sin monin ma sin lomi hen moni nok alekot. Ma lasi keku bian antam neu sin nekan. Oke te a neo nis a’at nane ma ka nafuaf. ²⁰ Ma fini le ankifu bi nain alekot nane, esle’ atoni le natnin ma ansimo a’at nane, oke te nafua, bian kuni bo’tenu, bian kuni bo’ne ma bian kuni natun mese." ²¹ Oke te Yesus nak neu sin, "Atoni ka neki fa paku hen toeb nani neki mako’ ai nabela bi hala nupun, mes so in nabela anbi tet paku. ²² Fun katit fa sa’ esle’ na’kolo le kan poi natonon fa, ma katit fa sa’ esle’ naninbon le ka mahine fa. ²³ Atoni le anmu’i luken he natnin, so in natnin nai!" ²⁴ Oke te In na’uab anteni nak, "Mitnin lek-leko sa’ le him nen. Luku le him luku es mekin, of Uisneno anluku ki nekin ma of ansato anteni neu ki. ²⁵ Fun atoni le anmu’i of anfene nes, ma atoni le kan mu’if, sa’ le in anmu’i of naiti nan." ²⁶ Oke te Yesus na’uab anteni nak, "Plenat Uisneno nane maleta onle atoni le ankifu fini bi nain. ²⁷ Neno anfai in antup ma nok-noka in anfen. Fini nane natol ma namnanu mes atoni nane in ka nahinef. ²⁸ Pah pinan in mes kun napoitan fuan. Ta’un nahun, oket punen, nalali te fuan le nahenu anbi punen nane. ²⁹ Leka in fuan nane namnatu, atoni nane anlefi fun neno abut antelen." ³⁰ Yesus nak anteni, "Hit he tanesa plenat Uisneno teki sa ka? Ai hit te tanaoba teki lasi leta me ka? ³¹ Plenat neno tunan maleta onle ankifu bonak fuan bi nain. Bonak in fuan nane mnut-nutu nesin ale fini bian bi pah pinan. ³² Mes leka ankifu nalali, in anmoni ma nanae nesin ale utan bian. In napoitan tlaen a anek, talan te kolo anbi neno tnanan anmoe kuna bi in aslubun." ³³ Ma nok lasi leta namfaun onane, In anetun a’an Uisneno neu sin, natai nok sin hinen. ³⁴ In nanoina ale atoni sin neki lasi leta. Mes kalu In asimo lasi sin anmes In naketi ale lasi nane neu sin. ³⁵ Bi neno nane, leka neno anmabe, Yesus nak neu sin, "Aim nai hit lak teu nifu panin." ³⁶ Oke te sin nao nasaitan atoni mfaun nane. Ma sin ansae neu belo’ le Yesus antoko nalali anbi belo’ nane oke te sin naon. Ma belo’ bian amsa sin nao nok Yesus. ³⁷ Naskek onane te anin slutuf nae le’uf anbol. Oe pesen antam neu belo’ nane talan te belo’ nane nahenu nok oe. ³⁸ Bi leku nane Yesus antup bi nahe’ bi belo’ kotin. In asimo lasi sin anpo’ Yesus ma nak neun, "Pak, ati Ho kam lae fa, he hit tamle’u ka?" ³⁹ Yesus anfen ma nakain anin nane ma nak neu nifu nane: "Mutena! Tainine nai!" Oke te anin namne ma nifu nane antainine kun. ⁴⁰ Oke te In nak neu sin, "Nansa’ es hi mimtau ka? Nansa’ es hi kam palsai fa ka?" ⁴¹ Sin alsin namtau ma na’uaben es neu es nak: "Atoni i sekau kun ka, talan te anin ma nifu natnin neu In ka?"

¹ Nalali te sin ante Nifu Galilea Panin, bi pah Gerasa. ² Yesus fe ansanu na’ko belo’ onane te, atoni a niut saes mese anpoi na’ko nuat naukel nem nae’ku nok In. ³ Atoni nane namaika bi bale nane. Katit fa atoni mese nabe’i hen futu neki kolen besi. ⁴ Sin anfutu neki kolen besi mes in fek nis ale kolen besi ma nale’un nis kolen besi anbi haen. Ma katit fa antoni mese le hen manat nan. ⁵ Fai manas in na’oni piut bi nuat naukel ma bi ale tubu sin ma ankoa ma antutu in aon neki fatu. ⁶ Leka in kius nit Yesus na’ko lo in naen nem ma nabes neu Yesus. ⁷ Oke te ankoa nok hanan a naek nak, "Ho mu’i lasi sa’ mok kau, hoi Yesus, Uisneno Alatan Anmone Ko ka? Nok Uisneno In kanan, kais Hom hamu’i kau!" ⁸ Fun nahunu na’ko nane Yesus nak neu in, "Sman nitu, ampoi nai mu’ko atoni i!" ⁹ Nalali te Yesus natan atoni nane nak, "Ho kanam sekau ka?" In natae nak, "Au kanak Legion, fun hai mimfau." ¹⁰ In toti matani he nati’ Yesus kais anli’u ale smanaf nane sin anpoi na’ko pah nane. ¹¹ Anhaumak bale nane anmu’i fafi puknes le nami mnahat anbi panaf, ¹² oke te ale smanaf nane sin antoti neu Yesus nak, "Amlelu kai he haim tam meu fafi nane sin." ¹³ Yesus ansimo sin totis nane. Oke te ala sman nitu sin antam neu ale fafi nane sin. Fafi pukan nane oni nifun nua, sin an oklok na’ko bnapaf neu nifu nane ma sin leman mate anbin. ¹⁴ Ma ale atuku fafi nane sin naen ma anetun lasi nane bi kot ma bi ale kuan funam natef. Oke te ale atoni sin anpoi hen kiso lasi sa’ le anbol. ¹⁵ Sin nem neu Yesus ma sin nit atoni aniut saes nane antok anbin. In anpake lek-leko ma in nekan naleko kun. Oke te sin namtau. ¹⁶ Ale atoni le sin nit lasi nane sin anetun neu sin antom sa’ le anbol neu atoni a’niut saes nane ma neu ale fafi nane sin. ¹⁷ Oke te sin antoti matane he nati’ Yesus nao nasaitan sin pah. ¹⁸ Leka Yesus ansae anfani neu belo’, atoni aniut saes nane antoti he nok Yesus. ¹⁹ Mes Yesus kan lomif, ma In nak neu atoni nane, "Hom fani nai meu ho ume, ma ho ini sin. Oke te ametun sin lasi, le Usif tunan anmo’e nalali neu ko ma In namnau ko onme." ²⁰ Atoni nane in nao ma anetun bi pah Dekapolis ale lasi le Yesus anmo’e nalali neu in. Oke te sin alsin namkak natuin lasi nane. ²¹ Yesus anlak anfani nok a belo’ neu nifu panin. In fe anbi nifu ninen te, atoni namfaun sin neman ma antol nan. ²² Atoni mese kanan Nai Yairus in nem. Atoni nane nakaf neu ume buat bi pah nane. Leka in nit Yesus te, in anli’tu ma nabes bi Yesus haen, ²³ ma antoti nok matane neu Yesus nak, "Pak, au anfeto namen ma hen maten. Hom koenom aum nai ma ampoho meki Ho nimam, he nati’ in naleko ma anmoni." ²⁴ Oke te Yesus In nao nok atoni nane. Atoni mfaun nane ansai ma natuin Yesus ma anmabe’un hen haumak In. ²⁵ Anmu’i bife mese le in opan na’ ton bo’es am nua. ²⁶ In nalali ini maus hen baen ale mnane. Mes in menas nane ka nalekof so mak menas nane anfoe. ²⁷ In nen nalali antom Yesus. Es nane te in antam nok atoni mfaun sin atnanan ma anhaumak Yesus kotin ma a’na’ Yesus In sobalu betkone. ²⁸ Fun in nak, "Lamu au na’ In sobalu betkone of au uleko." ²⁹ Bi leku nane amsa in na’ anhetu. In natnin bi aon nak in menas naleko. ³⁰ Bi leku nane amsa Yesus nahin nak anmu’i matane anpoi na’ko In aon. Oke te In nik koti neu atoni mfaun ma natan nak, "Sekau es a’na’ Au sobalu betkone ka?" ³¹ In asimo lasi sin natae nak, "Usi, Hom kiso mit atoni mfaun le anmabe’un haumak Ko ma Usi Hom toti mak: Sekau es a’na’ Kau ka?" ³² Oke te In kiso sin funam natef he nami atoni le anmo’e lasi nane. ³³ Bife nane nahin nak lasi sa’ anbol neun, oke te in namtau ma natai fun nabes bi Yesus ma naton ale lasi nane neu Yesus. ³⁴ Ma In nak neu bife nane, "Au anah, ho palsait nane es nahoni ko. Hom nao nai mok tetus ma muleko nai mu’ko ho menas!" ³⁵ Leka Yesus fe namolok onane te, atoni fauk sin neman na’ko Nai Yairus in ume ma nak, "Ho anfeto anmaten, ho mususab Pak neu sa’ anteni ka?" ³⁶ Mes Yesus kan lae nok fa sin uab nane. In nak neu Nai Yairus, "Kais mumtau, so ampalsai nai!" ³⁷ Oket Yesus kan lomif he atoni mese nok, al Nai Petrus, Nai Yakobus ma in olif Nai Yohanes. ³⁸ Ma sin nem ante Nai Yairus in ume, Yesus nit atoni sin naslutu, ankae ma anse’ul nok hanan a naek. ³⁹ Oke te Yesus antam ma nak neu sin, "Hi mislutu ma amkae neu sa’ ka? Anah nane kan matef mes in antup kun." ⁴⁰ Mes sin anmanis Yesus. Ma Yesus anli’u ale atoni nane sin hen poi. Oke te In nok anah nane in amaf ma in ainaf ma In asimo lasi tenu sin antaman neu anah nane in ke’an. ⁴¹ Yesus ana’ anah nane niman, ma In nak, "Talita kum" le in oten, "Hoi anfeto, Au ak neu ko, amfen nai!" ⁴² Bi leku nane amsa anah nane anfen ma in nao, fun in uan oni ton bo’es am nua. Ale atoni le sin nit lasi nane sin namkakan. ⁴³ Usif Yesus anba’an matane neu sin, he nati’ kais atoni mese amsa nahin lasi nane. Oke te In nak, amfene he nah.

¹ Usif Yesus nok In asimo lasi sin naon na’ko bale nane neu In kuan. ² Bi Neno Snasat In nanoina anbi ume buat. Anmu’i atoni namfaun bi bale nane. Leka sin nen Yesus In nanoina, sin namkakan, ma sin nak, "In napeni ale lasi nane na’ko me ka? Lasi hine sa’ ka anfe nani neune ka? In hen mo’e ale lasi amkakat nane neki In niman onme ka? ³ Ait In ka apakae hau fa, bi Maria anmone ma Nai Yakobus, Nai Yoses, Nai Yudas ma Nai Simon, sin tataf es In ka? Ma In feotfin amsa namaika nok kit?" Natuin lasi nane te sin antite Usif Yesus. ⁴ Oke te Yesus nak neu sin, "Mafefa knino mese in napeni kanaf bi me-me; al anbi in kuan, anbi in ini sin ma anbi in ume ka napenif kan tola." ⁵ Bi kuan nane Yesus kan mo’ef lasi amkakat mese. Al In naleko atoni amenat fauk ma naiti In niman neu sin. ⁶ In namkak fun sin kan palsai fa. ⁷ In no’en asimo lasi sin bo’es am nua ma ansonu sin nua-nua. In anfen sin kuasat hen li’u ale smanan nitu. ⁸ In anba’an sin he nati’ kais sin neki bael sa’ bi sin lalan, al tes anmes. Kais nekin utunu’, kais nekin bukael, kais nekin noni bi sin pasu futu amsa. ⁹ Ampake penhae mes kais ampake sobalu nua. ¹⁰ Ma In nak anteni neu sin, "Kalu anbi bale me ansimo ki hem tam meu ume nane, mimaik ambine talan te him nao mi’ko bale nane. ¹¹ Ma kalu ambi bale me sin kan simo ki ma ka natnin ki him poi mi’ko bale nane. Ma amtekal afu bi hi haem hen fani saksi neu sin." ¹² Oke te sin naon ma anetun, nak ale atoni mes nate’unon na’ko sin sanat. ¹³ Ma sin anli’u napoitan nitu namfaun, ma antao mina neu atoni amenat namfaun ma naleko’ sin. ¹⁴ Usif Nai Herodes amsa amnen antom Yesus, fun In kanan mateka bi me-me. Ma anmu’i atoni le na’uab nak, "Nai Yohanes Aslanit anfen anfain na’ko amates. Es nane In napeni kuasat hen mo’e ale lasi amkakat nane." ¹⁵ Mes atoni bian sin nak, "In Nai Elia!" Ma bian anteni sin nak, "In mafefa knino onle mafefa knino ahunut sin." ¹⁶ Leka Nai Herodes in nen lasi nane in nak, "Kahaf, in Nai Yohanes Aslanit le afi au ote ufek ini nakan ma in fen anfain." ¹⁷ Fun afi Nai Herodes es anlelu hen heke Nai Yohanes ma natam nani neu o’of. Natuin bi Herodias, le in olif Nai Filipus in fel. Mes Nai Herodes anmafe nokan. ¹⁸ Nai Yohanes nakain Nai Herodes nak, "Ka nalekof kalu ho maiti ho oli in fel!" ¹⁹ Es nane bi Herodias nabela nekaf neu Nai Yohanes ma in lomi he namate Nai Yohanes, mes ka nabe’if. ²⁰ Nai Herodes namtausan Nai Yohanes fun in nahin nak, Nai Yohanes nane atoni alekot le Uisneno ansonu, es nane te in nanini nani. Mes leka in nen Nai Yohanes in nekan ansae ma ansanu, mes in lomi amsa he natnin Nai Yohanes. ²¹ Namuni te bi Herodias napeni mainuan bi neno Nai Herodes hen mo’e in neno mahonin. Leka Nai Herodes anmo’e tolas neu in anaet sin ma in solalus nakaf sin ma ale atoni makana bi pah Galilea. ²² Bi leku nane bi Herodias anfeto antam nem ma nabso ma in anhalin Nai Herodes nekan ma ale amnemat sin amsa. Usif nakua a’an neu feotnai nane nak, "Hom lomi sa’, amtoti nai, of au fe neu ko." ²³ Ma Nai Herodes naiti supat neu feotnai nane nak, "Sa’ le hom toti of au fe neu ko, tal au plenat in aon bian amsa!" ²⁴ Feotnai nane anpoi ma natan in ainaf, "Aina, au he toti sa’ ka?" In ainaf natae nak, "Amtoti Nai Yohanes Aslanit ini nakan!" ²⁵ Oke te in antam laba neu Nai Herodes ma nak, "Au lomi he nati’ bi leku i amsa hom fe kau Nai Yohanes Aslanit ini nakan bi topa mese." ²⁶ Leka Nai Herodes amnen lasi nane te in nekan ansusal. Mes in kan tite fa totis nane fun in naiti nalali supat bi in amnemat sin matan. ²⁷ Usif napoitan plenat he nati’ solalus apaot sin nao he naiti Nai Yohanes ini nakan. Solalus nane in nao neu o’of ma ano’te nafek Nai Yohanes ini nakan. ²⁸ Oke te in neki nakaf nane bi topa mese ma anfe nani neu feotnai. Ma feotnai anfe nani neu in ainaf. ²⁹ Leka Nai Yohanes in asimo lasi sin nen lasi nane te sin neman ma naiti in aon nitu ma natupab nani anbi nuat naukel. ³⁰ Oke te asimo lasi sin anfani neman ma nabua nok Usif Yesus. Ma sin anetun neu Yesus ale lasi le sin anmo’e ma nanoina nalali. ³¹ Oke te Yesus nak neu sin, "Aim nai hit nao teu bale teta’, he nati’ hit atmes, ma tasnas akle’o!" Fun atoni namfaun le neman ma anfanin talan te sin ka napeni fa mainuan hen bukae. ³² Oke te sin ansae neu belo’ ma nao na’tetok neu bale teta’. ³³ Mes leka sin naon, atoni namfaun nit sin ma nahin bale le sin he nao neun. Es nane te ale atoni na’ko ale kuan bi pah nane sin a’nao haen ma ante nahunun sin. ³⁴ Leka Yesus ansanu na’ko belo’ In nit atoni mfaun matane anbi bale nane. Oke te Yesus nekan anmof fun In namnau sin, fun sin onle bibi kase le kan mu’if atukus. Nalali te In nanoina lasi namfau neu sin. ³⁵ Leka neno hen faien, In asimo lasi sin nem neun ma nak, "Usi, bale i hufui ma neno hen faien. ³⁶ Hom lelu sin he nao, he nati’ sin ansosan mnahat bi ale kot ma kuan apaumakat i." ³⁷ Mes Yesus natae nak, "Him fen sin hen bukae!" Sin nak neu Yesus, "Hai hem nao ka, hem sos utunu’ meki noni dinar natun nua hem fen sin hen bukaen ka?" ³⁸ Mes Yesus nak neu sin, "Hi mu’i utunu’ pisa fauk ka?" Ati him tae mit!" Leka sin tae nalali te sin nak, "U’tunu pisa nim ma ika koe nua, Usi!" ³⁹ Oke te Yesus anlelu atoni mfaun nane hen toko anpuknok bi hu mate fafon. ⁴⁰ Ma sin antoko puknok, bian natun mese, ma bian atoni bo’ nim. ⁴¹ Oke te Yesus naiti utunu’ pisa nim ma ika koe nua nane. In anbaisenu neu neno tunan ma anonen toti neu Uisneno. Nalali te In anebi utunu’ nane neki In niman ma anfe nani neu In asimo lasi sin hen bati neu atoni mfaun nane. Onane amsa ika koe nua nane In anbati neu sin alsin. ⁴² Ma sin alsin anbukae tal namsenan. ⁴³ Oke te sin nabua ale utunu’ pisa anesit, nahenu aba’ bo’es am nua. Ika le a’nesi ka maso’it fa. ⁴⁴ Atoni le anbukae utunu’ nane oni’ nifun nim. ⁴⁵ Nalali te Yesus anlelu In asimo lasi sin hen sae neu belo’ ma nao nahunun neu Betsaida, anbi nifu panin. Fun In fe hen lelu atoni mfaun nane hen fanin. ⁴⁶ Leka In naseon nalali sin, In ansae neu tubu hen onen toti. ⁴⁷ Leka neno anfaien, belo’ nane ante nifu atnanan, mes Yesus fe anmes anbi meto. ⁴⁸ In nit sin anhae natuin ansepo oe, fun anin slutuf na’ko mat. Es nane, oni’ leku tenu nesi hen meu, Yesus nao natuin oe fafon nem neu sin. In asafanu he naon finin sin. ⁴⁹ Leka sin nit Yesus nao natuin oe fafon sin natenab nak nane smanaf oke te sin an’anbai. ⁵⁰ Fun sin alsin nit Yesus ma sin naskeken. Mes In nak neu sin, "Tainine nekam! Au es Kau i, kais mimtau!" ⁵¹ Oke te In ansae neu belo’ nok sin, ma anin namne kun. Sin alsin namkak ma nekan namneku. ⁵² Fun lasi amkakat neu utunu’ nane sin fe ka nahin nani fa. Ma sin nekan fe manu’ kun. ⁵³ Leka Yesus nok In asimo lasi sin ante nifu panin, sini belo’ anhake anbi Genesaret ninen. ⁵⁴ Leka sin ansanu na’ko belo’ atoni mfaun nane nahin nak, amnemat nane Yesus kun. ⁵⁵ Oke te sin naen laba neu pah nane ma anloi neki ale amenat nok sin a’nahe’ nem neu Yesus. Kalu sin nen Yesus anbi me te sin neki amenat neu bale nane. ⁵⁶ Yesus In nao neu me, neu kuan ka, neu kot ka ai neu bale me. Ale atoni sin neki amenat ma nabela sin anbi masa. Oke te sin antoti neu Yesus, he nati’ sin a’na’ In sobalu betkone fukan. Ma ale atoni le sin na’ nani sin naleko kun.

¹ Atoni Farisi puknes ma ahin sulat sin fauk neman na’ko Yerusalem he nae’ku nok Yesus. ² Sin nit nalali Yesus asimo lasi bian sin nah nok niman fun sin ka nafanu fa. ³ Ale atoni Farisi, onane amsa atoni Yahudi sin panat matane sin mnais unu sin halat. Sin ka nah fa kalu sin fe ka nafanu fa sini niman. ⁴ Ma kalu sin anfain neman na’ko masa sin ka nah fa, so sin anboe sin aon fe, lasi namfau anteni le sin anpanat matani, esle’ lasi anfase klas, bo’i ma ale bale le anmo’e na’ko nit molo. ⁵ Es nane atoni Farisi sin ma ahin sulat sin natan neu Yesus nak, "Nansa’ ka es Ho asimo lasi sin kan mo’e natuin fa hit mnais unu sin halat ka? Mes sin nah nok niman lahi ka?" ⁶ Yesus natae sin nak: "Hi atoni asafanut ki! Namneo onle Nai Yesaya nabeno nani antom ki esle’ antui nani nak, "To i na’usi Kau neki sin lulun, mes sin nekan na’lo na’ko Kau. ⁷ Sin namtausan Kau son-sona, fun lasi noina le sin nanoina nane lekat mansian kun.’ ⁸ Hi maikoti plenat Uisneno ma him na’ neu mansian in halat." ⁹ Yesus na’uab neu sin, "Namneo hi atoni ahinet ki amtite plenat Uisneno, he nati’ hi mitau hi halat. ¹⁰ Fun Nai Musa nak: Mimtausan hi ama ma hi aina, ma sekau le na’uab nale’un in amaf ma in ainaf mes anmate. ¹¹ Mes hi minoina mak: Kalu atoni na’uab neu in amaf ma in ainaf nak: Sa’ le au he fe neu ki, anfe nani neu tulu knino -- esle’ fua tulu neu Uisneno --. ¹² Ma hi ka mifetin fa atoni nane he nati’ in anmo’e sa’ neu in amaf ma in ainaf. ¹³ Natuin lasi nane him sab mineku Uisneno In a’an ma hi mituin kim hi lasi halat. Ma anmu’i lasi namfaun le hi mo’e mani onane." ¹⁴ Oke te Yesus no’en atoni namfaun teni ma nak neu sin, "Hi ala ki, amnen nai neu Kau ma mitnin lek-leko. ¹⁵ Katit fa sa’ esle’ na’ko kotin antam neu atoni he neki hainisit. So sa’ le anpoi na’ko atoni nane es neki hainisit neun." [ ¹⁶ Atoni le anmu’i luken he natnin, so in natnin nai!] ¹⁷ Leka Yesus nasaitan atoni mfaun nane ma antam neu ume, In asimo lasi sin natan neu In antom lasi leta nane in oten. ¹⁸ Yesus natae sin nak, "Ati hi amsa ka mihinef lasi nane ka? Hi ka mihin fa nak ale sa’ na’ko kotin le antam neu atoni nane ka neki fa hainisit. ¹⁹ Fun kan tamaf neu in nekan mes antam neu in tein, oke te anpolin neu kotif ka?" Nok uab nane, Yesus ka naton nak ale mnahat nane ok-oke knino kun. ²⁰ Yesus na’uab anteni nak, "Sa’ le anpoi na’ko atoni nane es neki hainisit neu in. ²¹ Fun anpoi na’ko nanan, na’ko atoni nekan le natenab lasi amle’ut esle’, lasi kake, lasi bakan, mamaten, ²² mapaisa, sinmakat, lasi loep, lasi ak’elo, lasi folu, nek a’unu, uab naufbanan, lasi moko’ ma lasi amonot. ²³ Ale lasi amle’ut nane anpoi na’ko nanan ma neki hainisit neu atoni." ²⁴ Oke te Usif Yesus nasaitan bale nane ma nao neu pah Tirus. In antam neu ume mese ma kan lomif he atoni mese nahin. Mes In ka nabe’i fa he natolo’ In aon. ²⁵ Bife mese le in anfeto a’niut sae, in nen antom Yesus. In nem neu Yesus ma nabes bi In matan. ²⁶ Bife nane bife Yunani uf Siro-Fenisia. In antoti he Yesus anli’u nitu nane na’ko in anfeto. ²⁷ Oket Yesus nak neu bife nane, "Maut he liana sin namsenan fe, fun ka nalekof kalu hit taiti utunu’ le taloitan neu liana sin ma atpolin neu asu." ²⁸ Mes bife nane natae nak, "Namneo, Usi. Mes asu le anbi mei nupun amsa in nah mnah lapuf le liana sin namofu." ²⁹ Yesus nak neu bife nane, "Natuin ho uab nane, hom nao nai. Nitu nane anpoi nalali na’ko ho anfeto." ³⁰ Bife nane anfani neu in ume. Ma napeni in anfeto antup bi hala, ma nitu nane anpoi nalali na’ko in anfeto. ³¹ Nalali te Yesus nasaitan pah Tirus ma nao natuin pah Sidon neu Nifu Galilea bi pah Dekapolis atnanan. ³² Binane, atoni sin neki neu Yesus, atoni mese le luken antono ma na’uab ka nahinef. Sin antoti Yesus he nati’ In na’aiti niman neu atoni nane. ³³ Ma Yesus anhel nan atoni nane na’ko paha mfaun tal sin anmesen. Oke te Yesus natam in aklulun neu atoni nane luken. Yesus nalon nakinu ma In na’ atoni nane in man. ³⁴ Nalali te Yesus anbaisenu neu neno tunan oke te anhel In asnasan ma nak neu atoni nane, "Efata!" in oten nak, "Mutsoi nai!" ³⁵ Naskek onane te atoni nane luken natsoi ma in man anmalule ma in na’uab kun nok alekot. ³⁶ Oke te Yesus antal matane neu ale atoni le anbi nane he nati’ kais sin anetun lasi nane neu atono bian. Maski antal onane, sin anetun piut lasi nane. ³⁷ Sin alsin nekan namneku ma namkakan ma na’uab nak, "In mo’e ale sa’-sa’ nok alekot. In anmo’e atoni atono he nen, ma atoni amonot he na’uab."

¹ Bi neno nane anmu’i atoni namfaun anbi nane ma sin kan mu’in fa mnahat. Es nane Yesus anboin In asimo lasi sin ma nak, ² "Au antu’fun umnau is atoni mfaun le i. Sen natuin kau neno tenuen ma sin kan mu’in fa mnahat. ³ Au he lelu sin hen fani nok tei luman, of sin natselan anbi lalan. Fun sin bian neman na’ko bale lo." ⁴ In asimo lasi sin natae nak, "Leka me bi bale luman i atoni nabe’i hen fen sin utunu’ tal namsenan ka?" ⁵ Yesus natan sin nak, "Hi mu’i utunu’ pisa fauk ka?" Sin natae nak, "Pisa hitu." ⁶ Oke te Yesus anlelu atoni mfaun nane antoko anbi nain. Oke te In naiti utunu’ pisa hitu nane ma anonen toti neu Uisneno. Oke te In anebi utunu’ nane neki In niman ma anfe nani neu In asimo lasi sin hen bati neu atoni mfaun nane. ⁷ Ma sin anmu’i ika koe fauk amsa. Yesus anonen toti neu ika nane. Oke te in anlelu hen bati ika nane amsa neu atoni mfaun nane. ⁸ Ma sin alsin anbukae tal namsenan. Nalali te atoni sin nabua utunu’ pisa anesit nane, tal nahenu aba’ hitu. ⁹ Ale atoni le anbukae nane oni sin nifun ha. Oke te Yesus anlelu sin hen fanin. ¹⁰ Ma In nok asimo lasi sin ansae neu belo’ ma anaon neu pah Dalmanuta. ¹¹ Oke te atoni Farisi sin fauk neman hen su’ nit Usif Yesus. Sin antoti Yesus hen mo’e taka mese na’ko neno tunan. ¹² Yesus na’unu bi In nekan nak, "Nansa ka es batan i hen toti taka ka? Au ak ki, tebes of kan fe fa taka neu batan i." ¹³ Yesus nasaitan sin. In ansae neu belo’ ma anlak neu nifu panin. ¹⁴ Yesus asimo lasi sin anikan u tunu, al sin neki pisa mese anbi belo’. ¹⁵ Oke te Yesus anba’an sin nak, "Him panat nai neu atoni Farisi ma Nai Herodes sin lalu haef." ¹⁶ Ma leka Yesus nahin sin tenab nane, In nak neu sin, "Nansa ka es hi mi’uab neu hi ka mu’if u tunu? Hi fe ka mihin fa ka? Hi nekam fe manu’ ka?" ¹⁷ Ma leka Yesus nahin sin tenab nane, In nak neu sin, "Nansa ka es hi mi’uab neu hi ka mu’if u tunu? Hi fe ka mihin fa ka? Hi nekam fe manu’ ka? ¹⁸ Hi mu’i mataf, mes hi ka mitaf, hi mu’i lukef mes hi kam nenaf neu sa ka? Ma hi ka mimnau fa, ¹⁹ bi neno le Au ebi u tunu pisa nim neu atoni nifun nim ka? Hi mibua u tunu pisa anesit aba’ fauk ka?" Sin natae nak, "Aba’ bo’es am nua Usi!" ²⁰ "Ma bi neno u tunu pisa hitu neo atoni nifun ha nane, hi mibua utunu’ pisa anesit fauk ka?" Sin natae nak, "Aba’ hitu, Usi!" ²¹ Oke te Yesus nak neu sin, "Ati hi fe ka mihin fa ka?" ²² Yesus nok In asimo lasi sin nem ante Betsaida. Sin neki atoni matfolo mese nem neu Yesus anbi nane ma sin antoti Yesus he nati’ In anpoh in matan. ²³ Yesus antopu atoni matfolo nane in niman ma nokan anpoi na’ko kuan nane. Oke te Yesus nalon atoni nane in matan ma antao In niman neu atoni nane ma natan nak, "Hom kiso mit sa ka?" ²⁴ Atoni nane na’aiti matan ma nak, "Au it atoni, mes sin naon onle haunu es a’naon." ²⁵ Yesus antao anteni In niman neu atoni nane. Atoni nane ankiso nok alekot fun matan nalekoen, ma ankiso nit ale sa’. ²⁶ Oke te Yesus anlelu hen fani neu in ume ma nak nenune, "Kais hom tam meu kuan!" ²⁷ Nalali te Yesus nok In asimo lasi sin naon neu ale kuan bi pah Kaisarea Filipi. Leka sin ante lalan atnanan Yesus natan neu In asimo lasi sin nak, "Atoni sin na’uaben, Au le i sekau ka?" ²⁸ Sin natae nak, "Bian sin nak: Nai Yohanes Aslanit, bian sin nak Nai Elia ma bian anteni sin nak: Mafefa knino sin es." ²⁹ In natan anteni neu sin, "Mes natuin hi, Au le i sekau ka?" Nai Petrus natae nak, "Ho lo Neno Anan!" ³⁰ Oke te Yesus antal matane, he nati’ kais sin anetun es antom In. ³¹ Nalali te Yesus nanoina sin, nak Anmone Pah To mes ansutai mane’at namfau ma ale amnasit sin, ma ale ana’ lasi fuat nakaf ma ale ahin sulat sin of antite In ma namate In, ma neno tenu namuni te anfen anfain. ³² In na’uab lasi muti monas. Mes Nai Petrus anhel Yesus neu in aon bian ma nakain In. ³³ Mes Yesus naklelon ma ankiso In asimo lasi sin, oke te anmahek Nai Petrus nak, "Muskot nitu, fun ho ka mutenab fa sa’ le Uisneno natenab, mes sa’ le mansian natenab nani." ³⁴ Oke te Yesus anboin ale atoni mfaun ma In asimo lasi sin ma nak neu sin, "Atoni le anlomi he natuin Kau, mes natotan in aon, oke te anloi in hau nehe ma natuin Kau. ³⁵ Fun atoni le anlomi he namonib ini smanan natuin Au mepu ma lasi knino, in of namonib nani. ³⁶ Fun alekot sa’ ka atoni le napeni pah pinan ok-oke mes naneku nis ini smanan ka? ³⁷ Ai nabe’i anfene sa’ ka hen seka ini smanan? ³⁸ Fun atoni le anmaen Kau ma anmaen Au a’ak bi batan amle’ut ma asanat i, Anmone Pah To of anmaen nani amsa leka In ankoenon nem bi In Amaf In apinat nok ale ahake knino sin."

¹ Yesus nak anteni neu sin, "Au ak ki, tebes anmu’i atoni na’ko ale ahaket i sin of ka naben fa maten nahunun sin nit Plenat Uisneno nem nalali nok matane." ² Neno ne namuni te, Yesus anhel neki Nai Petrus, Nai Yakobus ma Nai Yohanes sin ansae anmes neu nu’af amnanut mese. Oke te Yesus human nabaina bi sin matan. ³ Ma In bael pake muti nalim-lim. Katit fa atoni mese bi pah pinan i le nabe’i namutib bael pake onane. ⁴ Oke te sin nit Nai Elia nok Nai Musa, sin nua sin namolok nok Yesus. ⁵ Nai Petrus nak neu Yesus, "Anoni, naleko haim bi bale i. Leko nesi hai mo’e la’at tenu, es neu Ko, es neu Nai Musa ma es neu Nai Elia." ⁶ In nak onane, fun ka nahin fa sa’ le mes in na’uab fun sin namtau nasekeok. ⁷ Oke te nope mese nem ankub nan sin ma na’ko nope nane sin nen hanaf nak, "I Au Anah le Au nek ani, mitnin nai neu In." ⁸ Ma leka sin ankiso laba funam natef, sin ka nitaf atoni mese anten nok sin al Yesus anmes kun. ⁹ Leka sin ansanu na’ko nu’af nane, Yesus anba’an sin, he nati’ kais anetun neu es sa’ le sin nit nalali, nahunu Anmone Pah To anfen anfain na’ko amates. ¹⁰ Sin anpanat lasi ba’an nane, mes sin anmatotin antom sa’ le In nak, "Anfen anfain na’ko amates." ¹¹ Oket sin natan neu In, "Nansa ka, ahin sulat sin nak: Nai Elia mes nem nahunu ka?" ¹² Yesus natae nak, "Namneo, Nai Elia of nem nahun ma naloitan ale sa’. Mes onme ka neu sa’ le antui nalali antom Anmone Pah To ka? Nak In mes ansutai mane’at namfau ma na’akan In. ¹³ Mes Au ak ki, Nai Elia nem nalali ma atoni anmo’e in natuin sin lomin; namnes nok le antui nalali antom in." ¹⁴ Leka Yesus, Nai Petrus, Nai Yakobus ma Nai Yohanes anfani neu asimo lasi bian, sin nit atoni mfaun anbi nane. Ma ahin sulat fauk anmatoe nok sin. ¹⁵ Leka atoni mfaun nane nit Yesus, sin namkakan ma naen nu ansenu In. ¹⁶ Oke te Yesus natan sin, "Hi matoe lasi sa’ mok sin ka?" ¹⁷ Ma atoni mese na’ko atoni mfaun nane natae nak, "Pak, au eki au anah i neu Ko, fun in aniut sae ma anmono. ¹⁸ Kalu smanaf nane ansae neun, anbison neu nain; oke te in fefan nafule, neku nisin ma in aon nakbet. Au toti neu Ho asimo lasi sin hen li’u nitu nane mes sin ka nabe’i fa." ¹⁹ Yesus nak neu sin, "Hi batan ka apalsait, Au he ubala ok ki tal leka ka? Au he seusaban ki tal leka ka? Meki li’ana nane nem neu i!" ²⁰ Oke te sin nokan nem neu In. Leka smanaf nane nit Yesus, in antetak liana nane, ma li’ana nane anteopnon neu nain ma antihoelnon ma fefan nafule. ²¹ Oke te Yesus natan li’ana in amaf ma nak, "In naben menas nane es leka ka?" In natae nak, "Na’ko fe aktia nabau. ²² Fe fe’at smanaf nane anpolin neu ai, ma neu oe he nale’un li’ana nane. Mes so Ho mube’i he mo’e onme ka, ambab kai ma mumnau kai fa." ²³ Yesus natae nak, "Ho mak so Ho mube’i? Ale sa’ nabe’i neu atoni apalsait." ²⁴ Onane te li’ana nane in amaf ananbai nak, "Au palsai. Ambab kau le ka apalsait i!" ²⁵ Leka Yesus nit atoni mfaun nane neman, In anli’u smanaf nane anpoi ma nak, "Hoi smanaf le anmo’e atoni hen mono ma antono, Au uplenat ko, hem poi nai mu’ko li’ana i ma kais amtam amteni meu in!" ²⁶ Oke te smanaf nane anpoi ma an’anbai fun antetak li’ana nane. Li’ana nane human on amates, tal atoni mfaun sin nak, "In anmaten." ²⁷ Oke te Yesus na’ li’ana nane niman ma anfiti. Oke te in anfen kun. ²⁸ Leka Yesus ante ume, ma In asimo lasi sin anmesen nokan, sin natan In nak, "Nansa ka es hai ka mibe’i fa hem li’u nitu nane?" ²⁹ Yesus natae sin nak, "Smanaf humaf i ka nabe’i fa het li’u, al nok onen totis." ³⁰ Usif Yesus nok In asimo lasi sin nasaitan bale nane ma sin anfin pah Galilea ma Yesus kan lomif he atoni nahin lasi nane. ³¹ Fun In fe nanoina In asimo lasi sin. In nak neu sin, "Of nana’at Anmone Pah To neu mansian sin niman, ma sin namate In, ma neno tenu namuni te of In anfen anfain." ³² Sin ka nahin fa a’at nane, mes sin ka nabe’i fa he natan In. ³³ Nalali te Yesus ma In asimo lasi sin ante bi Kapernaum. Leka Yesus ante ume, In natan neu In asimo lasi sin nak, "Lelo hi mimolok sa’ ka bi lalan atnanan?" ³⁴ Mes sin ka nataen fa, fun lelo anbi lalan atnanan sin matoe neu sekau le nanae nesi anbi sin. ³⁵ Oke te Yesus antok ma anboin asimo lasi sin bo’es am nua nane. In nak neu sin, "Atoni le anlomi hen fani ahunut, so in anfani amunit ma antuthae ale atoni." ³⁶ Oke te Yesus anhel nan li’ana mese ma nahakeb anbi sin atnanan. Nalali te In anho li’ana nane ma nak neu sin, ³⁷ "Atoni le ansimo li’ana mese onle i anbi Au kanak, in ansimo Kau. Ma atoni le ansimo Kau, nane in kan simo Kau fa, mes ansimo In le ansonu Kau." ³⁸ Nai Yohanes nak neu Yesus, "Pak, hai mit atoni mese le ka natuin kit fa anli’u nitu neki Ho kanam. Oket hai mikain atoni nane fun in ka natuin kit fa." ³⁹ Mes Yesus nak, "Kais mikain! Fun katit fa atoni mese le anmo’e lasi amkakat neki Au kanak, nabe’i bi leku nane amsa in na’uab nale’un Kau. ⁴⁰ Atoni le kan laban kit, in haek nok kit. ⁴¹ Au ak ki mimnau, atoni le na’inut ki oe kui mese fun hi atuin Kesel Afetin, of in ansimo baen." ⁴² "Sekau le nasekeb es na’ko li’ana abaut apalsait i sin, leko nesi anfutun fatu fole mese neu in to’an ma atpolin tatam in neu tasi. ⁴³ Ma kalu ho nimam nasekeb ko amketu mani. Fun leko nesi hom tam meu honis nok nim tuka na’ko anpolin natam ko nok nimaf nua neu bale maputu, neu ai le ka masifo fa. [ ⁴⁴ Bi bale nane in kaun sibe of kan mate nitaf, ma in ai of ka masifo fa.] ⁴⁵ Ma kalu ho haem nasekeb ko, amkeut mani. Fun leko nesi hom tam meu honis nok hae hela, na’ko anpolin natam ko nok haef nua neu bale maputu. [ ⁴⁶ Bi bale nane in kaun sibe of kan mate nitaf ma in ai of ka masifo fa.] ⁴⁷ Ma kalu ho matam nasekeb ko, amloit mupoitan. Fun leko hom tam meu plenat Uisneno nok mataf mese, na’ko anpolin natam ko nok mataf nua neu bale maputu. ⁴⁸ Bi nane sin kaun sibe of kan mate nitaf ma ai ka masifo fa. ⁴⁹ Fun ale atoni of anmasi nani neki ai. ⁵⁰ Masi nane leko kun, mes kalu masi nane in min mali namneku, hi mimalib mifani meki sa’ ka? Es nane, so hi mu’i masi bi hi aom ma a’moni nok halan nekaf es nok es."

¹ Yesus nasaitan bale nane, ma a’nao neu pah Yudea ma neu pah Noe Yordan panin. Atoni namfaun nem antol nan In. Oke te In nanoina sin. ² Atoni Farisi sin neman hen su’ nit Yesus ma sin natan nak, "Nabe’i ka atoni anbation nok in fel?" ³ Mes In natae sin nak, "Nai Musa anba’an sa’ neu ki ka?" ⁴ Sin natae nak, "Nai Musa anfe mainuan hen batiok lamu anmo’e sulat mabatis." ⁵ Oke te Yesus nak neu sin, "Natuin hi nekam manu’ kun es, nane Nai Musa antui plenat nane neu ki. ⁶ Fun na’ko pah pinan anfatnon, Uisneno anmo’e mansian. Uisneno anmo’e sin atoni ma bife. ⁷ Es nane atoni of nasaitan in amaf ma in ainaf ma namesbon nok in fel. ⁸ Talan te sin nua sin anfani nesaf mese. Onane te sin ka nua antenif, mes mese. ⁹ Fun sa’ le Uisneno nameseb nalali, mansian ka nabe’i fa hen bati." ¹⁰ Leka sin ante ume, asimo lasi sin natan lasi nane neu Yesus. ¹¹ Yesus nak neu sin: "Atoni le anbation nok in fel oket anmafe nok bife bian, in mo’e mapaisa nok in fel nane. ¹² Ma kalu bife anbation nok in mone ma anmamone nok atoni bian, in mo’e mapaisa." ¹³ Oket atoni sin neki li’ana sin nem neu Yesus, he nati’ In anpoh sin. Mes In asimo lasi sin nato’an atoni nane sin. ¹⁴ Leka Yesus nit lasi nane te In nato’ ma nak neu sin, "Mifetin li’ana nane sin he nem neu Kau. Kais misenip sin, fun ale atoni onle nane sin es napeni plenat Uisneno. ¹⁵ Au ak ki, atoni le kan simof plenat Uisneno on li’ana mese, in of kan tamaf neun." ¹⁶ Oke te In anho li’ana nane sin ma naiti Ini niman neu sin fun antek alekot neu sin. ¹⁷ Leka Yesus he nao anfini onane te, atoni mese naen laba ma napeni In. Atoni nane anli’tu bi In matan ma natan nak, "Anoni alekot, au mo’e sa’ ka he upeni honis nabal-bal?" ¹⁸ Yesus natae nak, "Hom tek Kau alekot neu sa’ ka? Katit fa atoni mese le naleko al Uisneno anmes. ¹⁹ Ho muhin ale plenat Uisneno: Kais ho mumate atoni, kais ho mapaisa, kais ho mubak, kais hom saksi moel, kais ho musik, munaeb ho ama ma ho aina!" ²⁰ Oke te atoni nane nak neu Yesus, "Pak, ale lasi nane sin, au utuin ulali sin na’ko fe au munif kau." ²¹ Mes Yesus ankiso atoni nane nok manekat ma nak neune, "Al hom nuk lasi mese anteni. Hom nao nai, musosa ale ho maus. Oke te hom fe in upan neu atoni amamu’it sin ma of ho mupeni maus bi neno tunan. Nalali te aum nai ma mutuin Kau." ²² Leka in nen lasi nane te, in nekan na’unu, oke te in nekan ansusal, fun ini maus anaek kun. ²³ Oke te Yesus ankiso In asimo lasi sin funam natef ma nak neu sin, "Susal anaek atoni amu’it antam neu Plenat Uisneno." ²⁴ In asimo lasi sin namkak leka sin nen In a’at nane. Mes Yesus anlut anteni nak: "Au anhenu ki, susal anaek he tam teu Plenat Uisneno. ²⁵ Leko nesi bikase paha snaen antam natuin anet luken na’ko atoni amu’it mese hen tam neu Plenat Uisneno." ²⁶ Sin alsin ansanmak ma na’uaben es neu es nak, "Kalu onane, sekau ka es napeni honis?" ²⁷ Yesus ankiso sin ma nak, "Neu mansian lasi nane ka nabe’i, mes neu Uisneno ka on fa nane. Fun ale lasi nabe’i neu Uisneno." ²⁸ Nai Petrus nak neu Yesus, "Hai misaitan ale sa’ ma mituin Usi!" ²⁹ Yesus natae nak, "Tebes, atoni le nasaitan in ume, in olif tataf sin, ai in feotfin, in ainaf ai in amaf, in anhin ai in lele, natuin Au mepu ma lasi knino, ³⁰ tomas i amsa atoni nane of ansimo nafani kuni natun mese: ume, olif, tataf, feotfin, ainaf, anah ma lele nok mane’at namfaun. Ma bi batan amnemat of in napeni honis nabal-bal. ³¹ Mes atoni namfaun le ahunut of anfani amunit ma le amunit of anfani ahunut." ³² Yesus ma In asimo lasi sin fe anbi lalan he nao neu Yerusalem. Yesus ankoenon nahun ma In asimo lasi sin nekan na’unu. Ma ale atoni le natuin sin amsa sin namtau. Yesus no’en In asimo lasi sin bo’es am nua anmesen ma anetun sin lasi le hen bol neu In. ³³ Yesus nak, "Mitnin, hit het nao teu Yerusalem. Ma Anmone Pah To of nana’at nani neu ana’ lasi fuat nakaf ma ahin sulat sin. Ma sin of anlef lasi he namate In. Oke te sin nana’at In neu ale atoni le ka nahin Uisneno. ³⁴ Of sin nasi’u In, nakinu, antepo ma namate In, mes neno tenu namuni te of In anfen anfain." ³⁵ Oke te Nai Zebedeus in anhin Nai Yakobus ma Nai Yohanes sin anhaumak Yesus ma nak neune, "Pak, hai mifnekan he nati’ Hom lut hai totis!" ³⁶ In natae sin nak, "Him lomi he Au mo’e ki sa’ ka?" ³⁷ Oke te sin nak, "Haim lomi hem toko anbi Ho apinat, es anbi Ho aom bian ne’u ma es anbi Ho aom bian a’li." ³⁸ Mes Yesus nak neu sin, "Hi ka mihin fa sa’ le him toti. Hi mibe’i ka he minu klas mninut le Au he inu ma naslani ki neki oe le Au he simo ka?" ³⁹ Sin natae nak, "Hai mibe’i." Yesus nak neu sin, "Namneo, of hi minu klas mninut le Au he inu, ma of naslani ki neki oe le Au he simo. ⁴⁰ Mes lasi hem toko anbi Au aok bian ne’u ai Au aok bian a’li, Au ka mu’if hak he fe ki. Nane of anfe nani neu atoni sekau le naloitan nalali neune." ⁴¹ Leka asimo lasi bo’es sin nen lasi nane te sin nato’an Nai Yakobus ma Nai Yohanes. ⁴² Mes Yesus anboin sin ma nak neu sin, "Hi mihin, nak sin le antek sin ana’ aplenat, naplenat sin to nok matani. Ma anaet sin nanaoba sin kuasat nok matani neu sin. ⁴³ Mes anbi ki ka on fa nane. Atoni le anlomi hen fani anaet anbi ki, so in fani atuthaes neu ki. ⁴⁴ Ma atoni le anlomi hen fani ahunut, so in anfani ate neu sin ok-oke. ⁴⁵ Fun Anmone Pah To amsa kan koenon nem fa he nati’ antuthae nani, mes In hen tuthae kun. Ma anfe In monin hen fani asoit neu atoni amfaut sin." ⁴⁶ Oke te Yesus ma In asimo lasi sin nem ante kot Yerikho. Ma leka Yesus nok In asimo lasi sin ma atoni mfaun nasaitan kot nane, anmu’i atoni afolot mese antoko bi lalan ninen. In kanan Nai Bartimeus, Nai Timeus in anmone. ⁴⁷ Leka in nen nak nane Yesus atoni Nazaret, in an’anbai nak, "Koi Yesus, Nai Daud sufan, mumnau kau fe!" ⁴⁸ Atoni namfau nakain in he natena ai nameka. Mes in anbai nahelon nak, "Nai Daud sufan mumnau kau fe!" ⁴⁹ Oke te Yesus anhake ma nak, "Mo’en he nem!" Sin no’en atoni afolot nane ma nak neune, "Hatani ho nekam nai, hom fen nai, fun In no’en ko." ⁵⁰ Oke te in nauf nani in sobalu, anfen laba ma nao neu Yesus. ⁵¹ Yesus natan in nak, "Hom lomi he Au mo’e ko sa’ ka?" Atoni afolot nane natae nak, "Pak, au lomi he it!" ⁵² Oke te Yesus nak neune, "Hom nao nai, ho palsait nane es namonib ko!" Bi leku nane amsa, in nit anfani oket in natuin Yesus bi In lalan nane.

¹ Leka Yesus ma In asimo lasi sin nem anhaumak Yerusalem, sin ante kuan Betfage ma Betania bi Tubu Zaitun. Bi nane Yesus anlelu In asimo lasi nua ² le anba’an sin nak, "Him nao nai meu kuan le anbi hi matan nane. Leka him tam meu kuan nane, of hi mipeni bikase tipu luke mnanu mese mafutu le fe ka masaen fa. Him sefi bikase nane ma meki nem neu i. ³ Ma kalu anmu’i atoni nak neu ki: Nansa him sefi bikase nane, hi mitae mak: Uisneno hen pake. Of In ansonu nafani nem laba neu i." ⁴ Oke te sin naon, ma napeni bikase tipu luke mnanu nane mafutu bi ume enon, bi lalan ninen. Oke te sin ansefi bikase nane. ⁵ Ma atoni fauk le anbi nane sin nak neu sin, "Bae, him sefi bikase nane neu sa’ ka?" ⁶ Oke te sin natae onle Yesus anba’an sin. Ma atoni nane sin ka nokif sin. ⁷ Nalali te sin neki bikase nane neu Yesus. Ma ankap nani neki sin bael pake, oke te Yesus antunon neun. ⁸ Atoni mfaun sin na’ben sin bael pake bi lalan, bian sin antao hau tlaef le sin an ipu bi lele. ⁹ Ale atoni le sin nahunun ma sin le namuni sin anhunun nak, "Ampules Uisneno! Antek alekot neu In le ankoenon nem bi Abal-balat In kanan! ¹⁰ Antek alekot neu plenat le he nem, hit ama Nai Daud ini plenat, ampules Uisneno bi bale alatan!" ¹¹ Leka sin ante bi Yerusalem, In antam neu Ume Uisneno. Bi nane In nail ale sa’ ok-oke. Mes natuin neno hen faien, In anpoi neu Betania nok In asimo lasi sin bo’es am nua. ¹² Nok fa onane, leka Yesus ma In asimo lasi sin bo’es am nua anpoi na’ko Betania, Yesus natnin te namnah. ¹³ Ma na’ko lo In nit bubuk u’mese le anmu’i nof. In nao anhaumak hen kiso nit kalu In napeni sa’ anbi hau nane. Mes leka In nun te bale nane, In ka napeni fa sa’ al hau no, fun neno bubuk he nafua fe kan tiaf. ¹⁴ Oke te In nak neu hau nane, "Kais atoni mese neku anteni ho fuam tal nabal-bal!" Ma In asimo lasi sin amnen nani. ¹⁵ Oke te Yesus ma In asimo lasi sin ante Yerusalem. Leka Yesus antam neu Ume Uisneno, In anli’u ale atoni le anmakasosa bi Ume Uisneno. In aneusbai nis ale mei le antukal noni anbin ma ale toko le nasosa kol ot kase anbin. ¹⁶ Ma In kan fe fa mainuan neu atoni he neki bale nao natuin po’an Ume Uisneno. ¹⁷ Oke te In nanoina sin nak: "Ati kan tui nani fa nak: Au ume of antek nani nak ume onen totis neu ale to ka? Mes hi mo’e mani anfani nuat asikat!" ¹⁸ Ana’ lasi fuat nakaf sin ma ahin Sulat sin nen lasi nane. Es nane te sin nami lalan he namate In. Mes sin namtausan In, fun ale to mfaun sin nekan ansanmak neu In noina nane. ¹⁹ Ma leka neno anfai sin anpoi na’ko kot nane. ²⁰ Leka fe nok-nok ana’ te Yesus ma In asimo lasi sin nao natuin lalan, sin nit hau bubuk nane anmeto talan te ini ba’an. ²¹ Nai Petrus namnau nit sa’ le anbol nalali te, in nak neu Yesus, "Pak, kiso bubuk le afi Hom le’at nane anmeto kun!" ²² Yesus natae sin nak, "Palsai neu Uisneno! ²³ Au ak ki tebes, sekau nak neu nu’af i: Mua’ition ma ampoilnom neu tasi nai! Lamu nekan kais na’oni, mes ampalsai mak, sa’ le mi’uab mes anbol. Lasi nane of anbol neu ki. ²⁴ Es nane Au ak ki: Leka him onen ma amtoti sa’ so ampalsai nai mak him simo milali, lasi nane of anfe nani neu ki. ²⁵ Ma leka him hake hem onen totis, him sako mihunun sa’ le him mitenab bi nekam neu es, he nati’ hi Ama abit neno tunan amsa ansako hi sanat sin." [ ²⁶ Mes kalu hi kam sako fa hi bia sin sanat, hi Ama abit neno tunan amsa of kan sako fa hi sanat sin.] ²⁷ Yesus ma In asimo lasi sin anfani nem anteni neu Yerusalem. Leka Yesus fe a’nao bi Ume Uisneno in po’an, ana’ lasi fuat nakaf, ma ahin Sulat sin ma amnasit sin nem neu Yesus. ²⁸ Ma sin natan neu In nak, "Ho mo’e ale lasi nane meki kuasat sa’ ka? Ma sekau ka es anfe Ko kuasat nane he nati’ Ho mo’e lasi nane ka?" ²⁹ Yesus natae sin nak, "Au he utan ki lasi mese. Mitae Kau nai, of Au uton ki Au mo’e ale lasi nane eki kuasat sa’. ³⁰ Nai Yohanes in mepu le naslani atoni nane, na’ko neno tunan ka ai na’ko mansian? Mitae Kau nai!" ³¹ Ma sin malomis nak, "Kalu hit tak: Na’ko neno tunan of In nak kit: Nansa hi kam palsai fa neune ka? ³² Mes leka me hit he tak: Na’ko mansian!" Fun sin namtausan atoni mfaun nane, le sin alsin antebes nak: Nai Yohanes nane mafefa knino kun. ³³ Oke te sin natae neu Yesus nak, "Hai ka mihinef." Yesus nak neu sin, "Onane amsa Au ka uton ki fa, Au mo’e ale lasi nane eki kuasat sa’."

¹ Oke te Yesus na’uab neu sin neki lasi leta nak: "Anmu’i atoni mese le anmepu lele tanu’an sena ma in anmo’e bahan funam natef. In anhani nopu neu he naes tanu’an sena in oen. Oke te in anmo’e haklelo pana, hen pao lele nane. Nalali te in nana’at lele nane neu atoni ameput sin fun in he nao neu pah bian. ² Leka ante neno hen seu tanu’an sena in fuan, in lelu in ate mese neu atoni ameput sin hen simo in lele afan na’ko sin. ³ Mes sin anheke ate nane ma antepo, oke te anlelu hen fani nok nim luman. ⁴ Oke te in lelu anteni ate bian neu sin. Mes atoni ameput sin antepo ate nane ini nakan tal napap ma sin namaeb in nok. ⁵ Oke te lele tuaf nane anlelu anteni ate mese, mes namate ate nane. Ma bian namfau anteni, mes sin antepo bian ma namate bian. ⁶ Al in anmone anmes le in nek nisan. Nalali te in anlelu nani neu sin fun in nak: I au anah, of sin namtausan. ⁷ Mes apao lele nane sin na’uaben es nok es nak: Ba’is i apao bale mnasi. Aim het tamate, he nati’ bale mnasi i anfani hit ini. ⁸ Ma sin anheke anah nane ma namate, oke te anpolin napoitan na’ko lele tanu’an sena nane. ⁹ Nalali te lele tuaf nane of anmo’e sa’ ka? In of nem ma nale’un apao lele nane sin, oke te nana’at lele nane neu atoni bian. ¹⁰ Ait hi kam soi mit fa sa’ le antui nani nak: Fatu le amo’e ume sin anpolin nani anfani fatu sukit: ¹¹ Lasi nane anbol na’ko Uisneno, Sanmakat mese bi hit matak." ¹² Oke te sin nami hen heke Yesus, fun sin nahinen, nak In nua’ab lasi leta nane antom neu sin. Mes sin namtausan atoni mfaun, es nane te sin naon ma ka noki fa In. ¹³ Nalali te anlelu atoni Farisi sin fauk ma atoni Herodian, neu Yesus hen su’ nit In neki lasi tanas mese. ¹⁴ Atoni nane sin neman ma nak neu In, "Pak, hai mihin, Ho atoni amneot Ko, ma Ho kam sian fa es amsa. Fun Ho kam beti fa humaf, mes munoina lalan Uisneno nok amnenot. Nabe’i ka het baen noni poni neu Uiskesel ai kahaf? Hai mes hen baen ka ai kahaf?" ¹⁵ Mes Yesus nahin nalali sin asafanut nane, oke te In nak neu sin, "Nansa es him su’ Kau ka? Meki noni dinar nane nem he Au kiso it!" ¹⁶ Oke te sin neki nem. Yesus natan sin nak, "Sekau in human ma in tuis es i ka?" Sin natae nak, "Uiskesel in human ma in tuis." ¹⁷ Oke te Yesus natae sin nak, "Him fe nai neu Uiskesel sa’ le hi hem fe neu Uiskesel. Ma him fe nai neu Uisneno sa’ le hi hem fe neu Uisneno!" Leka sin nen lasi nane te sin namkakan neu In. ¹⁸ Atoni Saduki sin fauk neman neu Yesus, le sin nak kan mu’if amates anfen anfain. Sin natan neu Yesus nak, ¹⁹ "Pak, Nai Musa antui plenat i neu kai nak: Leka atoni mese anmate, ma kan mu’if anah, in olif mese anmafe nok in fel nane he nati’ nahoni anah neu in tataf amates nane. ²⁰ Anmu’i atoni hitu le anmaoil tatan. Le anaet anmafe nok bife mese ma anmate mes ka nahonif anah. ²¹ Oke te olif le natuin neune anmafe nok bife nane mes anmate ma ka nahonif anah amsa. Onane amsa in olif es anteni. ²² Ma onane talan te sin hitu sin ka nahonin fa anah. Namuni te bife nane amsa anmate. ²³ Bi neno amates anfen anfain, leka sin anfen anfain, bife nane anfani sekau in fel ka? Fun sin hitu sin anmafe nokan." ²⁴ Yesus natae sin nak, "Hi mitenab amsan, fun hi ka mihin fa Sulat Knino ma Uisneno In kuasat. ²⁵ Fun leka atoni anfen anfain na’ko amates sin kan mafe antenin fa, mes sin anmoni on ahake abit neno tunan. ²⁶ Ma neu lasi amates anfen anfain, hi kam soi fa Nai Musa in sulat, antom lasi nu’un kis lubu le anpin? Le Uisneno nakua a’an neu in nak: Au le i Nai Abraham in Uisneno, Nai Ishak in Uisneno, ma Nai Yakub in Uisneno. ²⁷ In ka Uisneno fa neu atoni amates, mes Uisneno neu atoni amonit. Namneu-namneo him sek ma ambeo!" ²⁸ Oke te ahin sulat mese le in nen Yesus ma atoni Saduki sin matoen, nahin nak Yesus natae sin nok alekot, in nem ma natan Yesus nak, "Plenat Knino me es abainesit kun?" ²⁹ Yesus natae nak, "Plenat Knino abainesit esle’: Mitnin nai hoi to Israel, hit Abal-balat Uisneno, Uisneno mese kun. ³⁰ Him nek Abal-balat, hi Uisneno, meki hi nekam oke, ma hi smanam oke, ma hi hinem oke ma hi matanem oke. ³¹ Ma plenat nua le nak: Him nek hi bia onle him nek hi aom. Katit fa plenat bian le a’nesi na’ko plenat nono nua i." ³² Oke te ahin sulat nane nak neu Yesus: "Namneo Pak, namneo onle Ho mu’uab nane, nak In mese kun, ma katit fa bian, al In mes. ³³ Es nane te him nek In meki nekam oke, ma amnek hi bia onle hi aom. Nane leko nesi na’ko ale fua mnotu ma fua lolo." ³⁴ Ma Yesus nit, nak atoni nane natae nok nek ahinet, In nak neune, "Ho ka mu’lo fa mu’ko plenat Uisneno!" Ma katit fa atoni mese he natan anteni Yesus. ³⁵ Leka Yesus nanoina bi Ume Uisneno, In nak, "Leka me ahin sulat sin nak Neno Anan nane Nai Daud in sufan ka? ³⁶ Fun natuin Smanan Knino in mepu, Nai Daud nak: Uisneno tunan nakua a’an neu au Usif nak: Hom tok nai bi Au aok bian ne’u, talan te Au tao Ho musu sin bi Ho haem nupun. ³⁷ Kalu Nai Daud antek In nak in Usif, leka me In hen fani In anah ka?" Atoni mfaun nane sin lomi hen nen In nok amlilat. ³⁸ Bi In lasi noina Yesus nak, "Him pantom mi’ko Ahin Sulat sin. Sin anlomi he nao nok sobalu betkone mnanu ma anlomi he napeni kan tola bi masa. ³⁹ Sin anlomi hen toko antom mat bi ume buat ma bale makana bi tolas. ⁴⁰ Le nasik nan bife banu sin ume ma an a’safanu neki onen toti amnanu. Sin le nane of napeni kasat mafena nes." ⁴¹ Leka Yesus antoko mabaina nok peti fua tulu bi Ume Uisneno, In ankiso ale atoni mfaun le natam sin loi tulu neu peti nane. Atoni amu’it namfau sin natam noni anaek. ⁴² Oke te bife banu mamu’it mese nem ma natam kisi nua, nane loit mese kun. ⁴³ Yesus no’en In asimo lasi sin ma nak neu sin, "Him kiso mit bife banu amamu’it i, in fe nesi na’ko ale atoni le natam loit neu peti fua tulu nane. ⁴⁴ Fun sin alsin anfe na’ko sin athoes, mes bife banu’i anfe na’ko in mamu’it. In anfe sa’ le in anmu’i, le he nah neu in monin."

¹ Leka Yesus anpoi na’ko Ume Uisneno, In asimo lasi mese nak neune, "Pak, amkiso mit ale fatu nane ma ale ume amasat nane!" ² Oke te Yesus nak neune, "Ho mit ale ume amasat i ka? Of kan paleob fa fatu mese he naktuton bi fatu bian of anpukai nani oke." ³ Oke te Yesus antoko bi Tubu Zaitun tunan mabaina nok Ume Uisneno, Nai Petrus, Nai Yakobus, Nai Yohanes ma Nai Andreas natan neu In anmes nak, ⁴ "Muton kai fe, lasi nane of anbol onme. Ma ini takan nane sa’, kalu ale lasi nane ante neu in amsopun." ⁵ Oke te Yesus na’uab neu sin nak, "Him panat nai he nati’ kais anmu’i atoni le nasekeb ki! ⁶ Of anmu’i atoni namfau neman neki Au kanak ma nak: Au es kau i, ma of sin nasekeb atoni namfau. ⁷ Ma leka him nen lasi makenat ai beno antom makenat kais hi mi’unu. Ale lasi nane mes hen bol, mes neno amsoput fe kahaf. ⁸ Fun uf es of anfen ma an laban nok uf es. Ma plenat nok aplenat an maken es nok es. Nainunus of anbol bi ale bale ma of anmu’i amnahas naek. Ale lasi nane fe mane’at na’ubon neu neno fe’u, onle’ bife mese namen neu he nahoni. ⁹ Mes hi le i him panat nai. Of nana’at ki neu tolas alef lasi. Of antepo ki bi ume buat. Of neki ki neu anaet ma kesel sin matan natuin Au kanak, on saksi neu sin. ¹⁰ Mes am’etun mihunun Lasi Knino neu ale uf-uf. ¹¹ Ma leka sin neki ki amnao ma nana’at ki neu alef lasi, kais hi mimtau neu sa’ le he mi’uab. Mes mi’uab sa’ le anfe neu ki bi leku nane. Fun hi es ka mi’uab mes Smanan Knino kun. ¹² Atoni of nana’at in bia neu he namate. Onane amsa amaf nok in anah. Ma liana sin of anlaban sin amaf ma sin ainaf ma of namate sin. ¹³ Of ale atoni sin kan lomi ki fa natuin Au kanak. Mes atoni le nalan tal namsopun of in napeni honis." ¹⁴ "Leka hi mit Ahainisit amle’ut anhake bi bale le ka nabe’i hen hake anbin -- atae sulat so him panat mani -- atoni le anbi pah Yudea mes naenan neu neten. ¹⁵ Atoni le anbi ume penen kais ansanu ma antam he naiti sa’ na’ko in ume. ¹⁶ Ma atoni le anbi lele kais anfani he naiti in bael pake. ¹⁷ Amle’ut neu nonot ainaf le fe na’apu ai le fe nasusu anah bi leku nane. ¹⁸ Onen toti nai he nati’ ale lasi nane kais anbol bi neno manikin. ¹⁹ Fun bi neno nane of hamu’it anaek anbol. Hamu’it onane fe kan bol nit fa na’ko neno Uisneno anmo’e pah pinan tal neno i ma of kan bol anteni fa. ²⁰ Ma leka Uisneno ka napalan fa In neno, of katit fa atoni mese hen anmoni. Mes natuin ale atoni mabeti le In anbeti nain sin, Uisneno napalan In neno. ²¹ Bi neno nane leka anmu’i atoni le nak neu ki: Kiso, Neno Anan es i, ai: Kiso Neno Anan es nane, kais him palsai. ²² Fun Neno Anan moel ma mafefa knino moel of sin neman. Ma sin anmo’e ale taka ma ale lasi amkakat he nati’ nasekeb ale atoni mabeti sin. ²³ Es nane te him panat nai! Au uton uhunun ki ale lasi i neu ki." ²⁴ "Mes bi neno nane, leka hamu’it anfini te, manas of namesok ma funan of kan sinek fa. ²⁵ Ma afkun of anmofu na’ko neno tunan ma neno in matanen of nabeko kun. ²⁶ Bi leku nane of sin nit Anmone Pah To ankoenon nem bi nope nok In kuasat ma In apinat. ²⁷ Bi leku nane amsa of In anlelu In ahake neno tunan sin anpoi he nabuab ale atoni mabeti na’ko pah pinan mata’ ha, na’ko pah pinan tukan talan te neno tunan tukan. ²⁸ Hi minoina na’ko lasi leta antom hau bubuk. Leka in tlaen makuke ma ambutu, hi mihin mak faoknais anhaumaken. ²⁹ Onane amsa leka hi mit ale lasi nane anbol, hi mihin mak in leku anhaumaken es ume enon. ³⁰ Au ak ki: Batan i of kan finif, nahunu ale lasi nane anbol. ³¹ Neno tunan nok pah pinan of anfini, mes Au a’ak of kan finif. ³² Mes neu neno ai leku nane, katit fa atoni mese le nahin, ale ahake abit neno tunan amsa kahaf, ma Anmone amsa kahaf, al Amaf anmes es nahin." ³³ "Him panat nai ma ambe’ nai! Fun hi ka mihin fa leku le’at nane leka he nem ante. ³⁴ Ma ini letan onle atoni mese le in nao neu paha lo. Le in nasaitan in ume ma nana’at nani neu in ate sin, es-es nok in mepu kun ma anlelu apao eno he nati’ in anbe’. ³⁵ Es nane him be’ nai, fun hi ka mihin fa, ume tuaf nane of leka te in anfani nem. He nok fai ka, ai fai nanesab ka, ai nesi hen meu ka, ai fe ansapal ka. ³⁶ He nati’ kalu ankoenon nem te kais napeni ki fe amtup. ³⁷ Sa’ le Au u’uab neu ki. Au u’uab neu ale atoni: Him be’ nai!"

¹ Al neno nua te Tolas Paskah ma neno naek utunu’ ka malalu haef nanaobon. Ana’ lasi fuat nakaf ma ahin sulat sin nami lalan hen heke ma namate Yesus neki ela sa’. ² Fun sin nak, "Kais nok neno naek, he nati’ kais anmu’i taisibu anbi to." ³ Leka Yesus anbi Betania, bi Nai Simon men poko in ume fe antoko hen bukae, bife mese nem neu In. In neki min fomeni botil mese le upan matane. Oke te in nape’ botil nane ma an op mina nane neu Yesus Ini nakan. ⁴ Anmu’i atoni le nato’ ma na’uaben es neu es nak: "An opan nale’un min fomeni i neu sa’ ka? ⁵ Fun mina nane nabe’i hit tasosa teki upan dinar natun tenu ma nesi ma in upan nane hit atfe neu atoni amamu’it sin." Oke te sin nato’an bife nane. ⁶ Mes Yesus nak, "Kais moki. Nansa’ es hi misusab in ka? In mo’e lasi alekot mese neu Kau. ⁷ Atoni amamu’it sin, hi mok sin piut, ma nabe’i him tulun sin leka him lomi. Mes Au of ka ok ki fa piut. ⁸ In anmo’e nalali sa’ le nabe’i in hen mo’e. In an op min fomeni neu Au aok on naloitan neu hen bebin Kau. ⁹ Au ak ki: Leka anetun Lasi Knino bi me anbi pah pinan, sa’ le in anmo’e i of antek nani amsa he namnau in." ¹⁰ Oke te Nai Yudas Iskariot, atoni mese na’ko asimo lasi sin bo’es am nua nao neu ana’ lasi fuat nakaf nok salit he nana’at Yesus neu sin. ¹¹ Leka sin nen onane te sin namlil ma anba’an hen fene noni. Namuni te in nami leku mainuan he nana’at Yesus. ¹² Bi neno ahunut na’ko Neno Naek U’tunu Kan Pake fa Lalu, bi leku atoni hen lolo bibi kase Paskah, Yesus asimo lasi sin nak neu In, "Usi amlomi he haim nao miloitan tolas Paskah neu Ko bi bale me ka?" ¹³ Oke te In anlelu In asimo lasi nua ma anba’an sin nak, "Him nao nai meu kot, bi nane of hi mi’eku mok atoni mese le neki nai oe. Hi mituina ¹⁴ ma mak neu ume tuaf le in hen tam neune: Pak nak: Hi miloitan ke’an me neu Kau ka he nati’ Au bukae Paskah ok Au asimo lasi sin ka? ¹⁵ Atoni nane of anlekan ki ke’an fafon le naek, le naloitan nani ale sa’-sa’. Hi miloitan ke’an nane neu kit het mo’e tolas Paskah." ¹⁶ Oke te asimo lasi nua nane sin naon. Leka sin nun te kot nane, sin napeni ale sa’ onle Yesus nak neu sin. Oke te sin naloitan tolas Paskah. ¹⁷ Leka neno anfai, Yesus nem nok asimo lasi sin bo’es am nua. ¹⁸ Leka sin antoko ma anbukaen, Yesus nak, "Au ak ki, atoni mese anbi ki of nana’at Kau, esle’ in le anbukae nok Kau." ¹⁹ Leka sin nen lasi nane te sin nekan antu’ ma sin mes-mese nak neu Yesus, "Usi, ai au ka?" ²⁰ In nak, "Atoni nane, es anbi ki bo’es am nua le i, le anlep u tunu bi pika mese nok Kau. ²¹ Anmone pah to of a nao, namnes nok sa’ le antui nani antom In. Mes amle’ut neu atoni le nana’at Anmone pah to nane. Leko nesi kais nahonis atoni nane." ²² Leka Yesus ma In asimo lasi sin anbukae, Yesus naiti u tunu ma antek alekot neun. Nalali te In anebi utunu’ nane ma anfe neu sin ma nak, "Maiti ma ambukae, i Au aok." ²³ Oke te In naiti klas mninut ma antek alekot neun. Oke te anfe neu sin ma sin alsin ninu na’ko klas mninut nane. ²⁴ Ma In nak neu sin, "I Au na’, na’ fefbela, le an op nani neu to mfaun. ²⁵ Au ak ki, of Au ka inu teni fa tanu’an sena in oen talan te Au iun ani fe’u, bi plenat Uisneno." ²⁶ Leka sin ansi nalali sit pules, sin naon neu Tubu Zaitun. ²⁷ Oke te Yesus nak neu sin, "Hi palsait of na’oni, fun antui nalali nak: Of Au tepo atukus ma bibi nane sin of naen nasitbok. ²⁸ Mes leka Au fena fani, of Au uhunun ki bi pah Galilea." ²⁹ Nai Petrus nak neu In, "Maski sin nekan na’oni, mes au kahaf." ³⁰ Oke te Yesus nak neune, "Au ak ko, bi neno i, fai i amsa, nahunun na’ko manu ankokle’o hae nua, ho mutotan mulali Kau hae tenu." ³¹ Mes Nai Petrus namep anteni nak, "Maski nak au he mate ok Ko, of au ka utotan fa Usi." Asimo lasi bian amsa na’uab onane. ³² Oke te Yesus ma In asimo lasi sin nem ante bale mese kanan Getsemani. Yesus nak neu In asimo lasi sin, "Him tok nai ambi i, Au nao fe he onen toti." ³³ Ma In nok Nai Petrus, Nai Yakobus ma Nai Yohanes, In namtau ma natai, ³⁴ oke te In nak neu sin, "Au nekak antu’ utninet on he mate. Hi mibala ambi i ma ambe." ³⁵ In anfonat nao kle’o, ma ansukbon neu nain ma anonen toti. He nati’ bait nabe’i leku mane’at nane anfin na’ko In. ³⁶ Ma In nak, "Koi Ama, koi Ama, katit fa lasi sa’ esle’ ka nabe’i neu Ko. Ho maiti mani hamu’it i na’ko Kau. Mes kais natuin Au lomik, so natuin Ho lomim." ³⁷ Nalali te In anfani nem, ma napeni sin tenu sin antupan. Ma In nak neu nai Petrus, "Simon, ho fe amtup ka? Ho ka mube’i fa hem be’ leku mese ka? ³⁸ Ambe’ nai ma amonen toti, he nati’ kais him tam meu lasi su’at. Hi smanam anlomi, mes hi aom nane naklati kun." ³⁹ Oke te In nao anteni ma antek onen totis le nane amsa. ⁴⁰ Ma leka In anfani nem, In napeni sin fe antupan, fun sin matan anmafen. Ma sin ka nahin fa sa’ le sin mes he natae neu Yesus. ⁴¹ Nalali te In anfani nem hae tenu ma nak neu sin, "Him tup nai ma misnas. Noba nai. Kiso leku antelen he nana’at Anmone pah to neu atoni asanat sin niman. ⁴² Him fen nai, aim nai het nao. In le he nana’at Kau anhaumaken." ⁴³ Leka Usif Yesus fe namolok te, Nai Yudas, le asimo lasi sin bo’es am nua sin ese natbol. Ma in nok atoni puka naek esle’ nekin suni ma hau tuka. Fun ana’ lasi fuat nakaf, ahin sulat sin ma amnasit sin es anlelu sin. ⁴⁴ Atoni le he nana’at In anetun nain sin taka i neu sin, "Atoni le Au nek ani, In esle’ nane. Him heke nai ma mokan hem nao nok alekot." ⁴⁵ Ma leka in nem ante bale nane in anfonat nu neu Yesus ma nak, "Pak," oke te in nek Yesus. ⁴⁶ Ma sin anheke Yesus ma anfutu In. ⁴⁷ Mes atoni mese le anbi nane in anfaki suni, oke te ansapi ana’ lasi fuat anaet in ate luken tal natfek. ⁴⁸ Mes Yesus nak neu sin, "Oni hi mitenab mak, Au atoni asikat Kau, es hi aim meki suni ma hau tuka hem heke Kau ka? ⁴⁹ Neno-neno Au ubua ok ki ma unoina bi Ume Uisneno, mes hi kam heke Kau. Mes mautu he natisi sa’ le antui nalali bi Sulat Knino." ⁵⁰ Oke te asimo lasi sin alsin naen nasaitan Yesus. ⁵¹ Bi leku nane anmu’i atoni munif mese, le antainus neki mau muti kase natuin Yesus. Sin hen heke In, ⁵² mes in nafetin in tainusat nane ma in naen nok monas. ⁵³ Nalali te sin neki Yesus nao neu ana’ lasi fuat anaet in sonaf. Oke te ale ana’ lasi fuat nakaf, amnasit sin ma ahin sulat sin nabuan anbi bale nane. ⁵⁴ Nai Petrus natuin Yesus na’ko lo talan te ana’ lasi fuat anaet in sonaf haen. In antoko anlal ai nok apaot sin bi bale nane. ⁵⁵ Ana’ lasi fuat nakaf ma ale Tolas Alef Lasi sin nami saksi he napeni Yesus In sanat, oke te nafek lasi he namate In. Mes sin ka napenin fa saksi. ⁵⁶ Fun atoni namfaun le sin ansaksi moel neu Yesus, mes sin saksi nane nasulin es nok es. ⁵⁷ Oke te atoni saksi sin fauk sin neki saksi moel hen be’u Yesus nak, ⁵⁸ "Haim nen milali atoni i afi na’uab nak: Of Au pukai ani Ume Knino le anmo’e neki niman mansian i, ma bi neno tenu of Au uhakeb ufani ume bian, le kan mo’e nani fa neki niman mansian." ⁵⁹ Bi lasi i amsa sin saksi nane kan matom fa es nok es. ⁶⁰ Oke te ana’ lasi fuat anaet anfen bi sin matan ma natan Yesus nak: "Ho ka mutae fa ale saksi le sin antek nani neu Ko ka?" ⁶¹ Mes Yesus ane’la, ma ka natae fa fefa mese. Ana’ lasi fuat anaet natan anteni Yesus hae mese nak, "Ai Ho Kesel Afetin, Uisneno Knino An mone Ko ka?" ⁶² Usif Yesus natae nak, "In kun esle’ Au. Ma of hi mit Anmone pah to le antunon bi Uisneno Ama Akuasat Afin-finit aon bian ne’u ma ankoenon nem bi nope anbi neno tunan." ⁶³ Oke te ana’ lasi fuat anaet anpisu In bael pake ma nak, "Hit he tami teni saksi neu sa’ ka? ⁶⁴ Him nen milali In na’uab nale’un Uisneno. Neu hi mitenab onme ka?" Oke te sin nafek hanaf mese nak, In mes hen mate. ⁶⁵ Oke te bian nakinu (nalon) Yesus ma anpoho In matan ma bian anfutu In ma nak neune, "Hoi mafefa knino, amtek mit, sekau es antepo Ko!" Ma apaot sin amsa antepo Yesus. ⁶⁶ Bi leku nane Nai Petrus fe anbi sonaf haen. Oke te ana’ lasi fuat anaet in ate bife mese nem. ⁶⁷ Leka bife nane nit Nai Petrus fe anlal ai, in kiso nalek-leko ma nak, "Hoi soba, ho amsa mok Yesus atoni Nazaret nane." ⁶⁸ Mes in natotan ma nak, "Au ka uhin fa sa’ le ho mu’uab nane." Oke te in anpoi neu eno (ma manu ankokle’o.) ⁶⁹ Leka ate bife nane nitan teni Nai Petrus, in na’uab neu ale atoni le anbi nane nak, "Sin atoni amsa es atoni i." ⁷⁰ Mes Nai Petrus natot anteni. Ka lo fa onane te, atoni le anbi nane sin nak anteni Nai Petrus nak, "Namneo, ho amsa sin ese ko, fun ho atoni Galilea ko." ⁷¹ Mes Nai Petrus anle’at ma ansup nak, "Au ka uhin fa atoni le him tek nane." ⁷² Ma bi leku nane, manu ankokle’o hae nua. Oke te Nai Petrus namnau nit, nak lelo Usif Yesus nak neune, "Nahunun manu ankokle’o hae nua, ho mutotan mulali Kai hae tenu." Oke te Nai Petrus ankae ma anseul.

¹ Fe nok-nok ana te, ana’-ana’ lasi nakaf sin nok ale amnasit sin ma ahin Sulat sin nekaf mese. Sin anfutu Yesus oke te neki In ma nana’at neu Nai Pilatus. ² Nai Pilatus natan Yesus nak: "Namneo ka, Ho Usif atoni Yahudi Ko ka?" Yesus natae nak, "Onle ho mu’uab nane tuan." ³ Oke te ana’ lasi fuat nakaf sin nasub lasi namfau neu In. ⁴ Nai Pilatus natan anteni Yesus nak, "Ho ka mutae fa ka? Kiso mit sin nasub Ko lasi namfau le’uf." ⁵ Mes Yesus ka natae fa sa’ anten, talan te Nai Pilatus in namkak. ⁶ Ma natuin lekat atoni Yahudi, kalu neno naek onane, sin antoti he nafetin atoni o’of mese neu sin. ⁷ Bi leku nane anmu’i atoni mese kanan Nai Barabas le anbi o’of nok atoni abulalut bian. Sin anmo’e taisibu ma namate atoni. ⁸ Atoni namfau sin nem neu Nai Pilatus ma antoti, he nati’ nafetin atoni o’of mese neu sin. ⁹ Nai Pilatus natan sin nak, "Him lomi ka he nati’ au ufetin Usif atoni Yahudi i ka?" ¹⁰ In nahin nalali, nak ana’ lasi fuat nakaf sin nana’at Yesus natuin nek a’unu. ¹¹ Mes ana’ lasi fuat nakaf sin na’koke atoni mfaun, he nati’ nafetin Nai Barabas neu sin. ¹² Nai Pilatus natan anteni neu sin nak, "Kalu onane au he mo’e sa’ ka neu atoni le him tek mak Usif atoni Yahudi ka?" ¹³ Oke te sin antekal baf nak, "Mipeti In neu hau nehe!" ¹⁴ Oke te Nai Pilatus nak neu sin, "In mo’e amle’ut sa’ ka?" Mes sin naiti baf anteni nak, "Mipeti In neu hau nehe!" ¹⁵ Ma natuin Nai Pilatus he neka mina atoni mfaun nane, in nafetin Nai Barabas neu sin. Mes in anlelu hen tepo Yesus ma nana’at nani he napeti In. ¹⁶ Nalali te solalus sin neki Yesus neu bale lef lasi bi sonaf. Ma anboin ale pukan solalus he nabua. ¹⁷ Oke te sin napakeb Yesus sobalu betkone amtasa ma nakano sobe kisan mese ma antao nani bi Ini nakan. ¹⁸ Nalali te sin nateb neu In fef tola, Nak, "Selamat, Usif atoni Yahudi!" ¹⁹ Sin anbiso Ini nakan neki kmeo ma nakinu Yesus ma anli’tu nabes neu In. ²⁰ Leka sin namaeb nalali In, sin nauf nani sobalu amtasa nane na’ko In ma napakeb nafani Ini bael pake neune. ²¹ Bi lalan atnanan sin naseke atoni mese hen loi Yesus hau nehe. Atoni nane fe anfani nem na’ko kuan hen tam neu kot. In kanan Nai Simon, atoni Kirene, Nai Aleksander ma Nai Rufus sin amaf. ²² Sin neki Yesus neu bale mese le kanan Golgota, in oten nak, "Bale Nui nakaf." ²³ Oke te sin anfe neu In tua mina amtasa le anselo nok lalu haef mes In kan simo fa. ²⁴ Nalali te sin napeti In, ma sin nosun sulat hen bati Ini bael pake, hen lekan mes-mese sini. ²⁵ Leka sin napeti In bi hau nehe te leku sio nok-noka. ²⁶ Ma sin antui tuis mese bi hau nehe antom fafon antom In mo’et nak, "Usif atoni Yahudi." ²⁷ Ma sin napeti atoni asikat nua nok In bi hau nehe. Atoni es anbi In aon bian a ne’u ma atoni es anbi In aon bian a li. [ ²⁸ Onane te Sulat Knino hanan natiabon kun nak: "Of In maso’it anbi atoni amaufinut sin."] ²⁹ Ale atoni le sin naon natuin nane, sin na’uab nale’un In ma anki’un sini nakan ma nak, "Hoi, Ho es hem pukai Ume Knino ma he muhakeb mufani bi neno tenu. ³⁰ Hom sanu nai mu’ko hau nehe nane ma muhoni kum Ho aom!" ³¹ Onane amsa ana’ lasi fuat nakaf sin ma ahin sulat sin namaeb In. Ma sin na’uaben es neu es nak: "In nahoni atoni bian, mes In ka nabe’i fa he nahoni In aon. ³² Kalu In usif Israel, Kesel Afetin, leko In sanu na’ko hau nehe nane, he nati’ hit tit ma atpalsai!" Ma atoni nua in le napeti sin nok In, sin asma na’uab nale’un Yesus. ³³ Leka leku bo’es am nua onane te, mesokan ankub nan pah nane talan te leku tenu. ³⁴ Ma bi leku tenu, Yesus anan’bai nok hanan a naek nak, "Eloi, Eloi, lama sabakhtani?" Le in oten nak, "Au Uisneno, Au Uisneno, nansa’ Ho musaitan Kau ka?" ³⁵ Ma leka atoni fauk le anhake bi nane sin nen te sin nak, "Kiso, In no’en Nai Elia." ³⁶ Oke te atoni es in nem ma anlep hau suf putun neu tua mahai; ma anposun neu kmeo panan ma anfe neu Yesus he ninu ma nak, "Maut fe hit kiso tit kalu Nai Elia nem he nasanut In na’ko hau nehe." ³⁷ Oke te Yesus anan’bai nok hanan a naek ma nana’at In monin. ³⁸ Bi leku nane beti eka Ume Knino anpisun bation na’ko fafon talan te pinan. ³⁹ Leka solalus nakaf le anhake mabaina nok In nit nak Yesus anmate onane te in nak, "Namneo, atoni i lo Uisneno In Anmone kun!" ⁴⁰ Ma anmu’i bife fauk anbi nane le sin kiso na’ko lo. Bife nane sin esle’, bi Maria Magdalena, bi Maria Nai Yakobus kliko ma Nai Yoses sin ainaf ma bi Salome. ⁴¹ Sin alsin afi natuin Yesus ma antuthae In bi pah Galilea. Ma anmu’i bife bian namfau anteni le neman neu Yerusalem nok Yesus. ⁴² Neno hen faien, ma neno nane amsa neno loitan neu Neno Snasat. ⁴³ Es nane te Nai Yusuf atoni Arimatea nem. In amsa aof na’ko Tolas Alef lasi ma atoni makana. Fun anpao plenat Uisneno nok. In nem neu Nai Pilatus ma antoti Usif Yesus In aon nitu. ⁴⁴ Nai Pilatus namkak leka in nen nak Yesus anmate. Ma in no’en solalus nakaf ma natan neune nak Yesus anmaten ka ai fe kahaf. ⁴⁵ Leka in nen nalali solalus nakaf nane te in anlomi hen fe Yesus aon nitu neu Nai Yusuf. ⁴⁶ Nai Yusuf ansos pilu muti ma leka nasanut nalali Yesus aon nitu na’ko hau nehe in an amu neki pilu muti nane. Nalali te natupab nani In bi nuat naukel le anhani bi fatu. Oke te anfolek fatu naek es neu nuat naukel nane enon. ⁴⁷ Bi Maria Magdalena ma bi Maria Nai Yoses ainaf sin nit bale le natupab Yesus anbin.

¹ Leka Neno Snasat anfin, bi Maria Magdalena ma bi Maria Nai Yakobus ainaf nok bi Salome ansosan min fomeni he naon neu naukel he nose neu Yesus aon nitu. ² Fe nok-nok ana’ bi neno ahunut klei nane, fe manas hen sae, sin naon neu naukel. ³ Sin na’uaben es neu es nak, "Sekau es of anfoel kit fatu nane na’ko naukel in enon ka?" ⁴ Mes leka sin neman haumakan te, sin nit fatu naek nane antihoel nalalien. ⁵ Oke te sin antam neu naukel nane ma sin nit atoni munif mese anpake sobalu muti mnanu antoko bi aon bian a’ne’u. Sin naskeken, ⁶ mes atoni munif nane nak neu sin, "Kais mimtau! Hi mami Yesus atoni Nazaret le napeti nane. In anfen anfanien. In ka es fa i. Kiso, bale le sin natupab In anbin. ⁷ Mes him nao nai, ametun In asimo lasi sin ma ametun Nai Petrus mak: In nahunun ki bi pah Galilea. Of hi mit In bi nane, onle In nak nalali neu ki." ⁸ Oke te sin poin ma naen nasaitan naukel nane, fun sin na’tai ma namtau nok. Sin kan etun fa lasi nane neu es am es amsa fun sin namtau. ⁹ Leka Yesus anfen anfain nok-noka bi neno ahunut klei nane, In nalilon neu bi Maria Magdalena. Le afi Yesus anli’u nitu hitu na’kon. ¹⁰ Oke te bife nane in nao ma anetun lasi nane neu sin le afi natuin Yesus le sin fe ankul ma ankae. ¹¹ Leka sin nen nak Yesus anmoni ma bi Maria in nit nalali, sin kan palsain fa. ¹² Nalali te In nalilon anteni nok humaf bian neu atoni nua na’ko sin, leka sin nua sin fe a’nao natuin lalan neu kuan es. ¹³ Oke te sin fani neman ma anetun lasi nane neu sin bian, mes sin kan palsain fa amsa. ¹⁴ Namuni te Yesus nalile In aon neu asimo lasi sin bo’es am mese leka sin fe anbukae. In nabokan sin, fun sin kan palsai fa ale atoni le sin nit nalali In, leka In anfen anfain. ¹⁵ Oke te In nak neu sin, "Him nao nai meu pah pinan funan natef ma ametun lasi knino neu ale to mansian. ¹⁶ Atoni le anpalsai ma naslani of napeni honis. Mes atoni le kan palsai fa of napeni le’at. ¹⁷ Lasi le hen fani taka neu atoni apalsait sin esle’: Of sin anli’u nitu neki Au kanak, ¹⁸ ma leka sin ninu laso maten, of sin ka napeni fa amle’ut. Of sin na’ati niman neu atoni amenat ma amenat nane naleko kun." ¹⁹ Leka Usif Yesus na’ati nalali onane neu sin, In na’aition neu neno tunan, oke te antunon bi Uisneno In aon bian a’ne’u. ²⁰ Ma asimo lasi sin anpoi ma anetun lasi knino bi me-me fun Usif tunan anmepu nok sin ma anhatane a’at nane neki ale lasi taka le sin anmo’e nani.