MATIUS

MATIUS

¹ Yesus Neno Anan Nai Daud sufan, Nai Abraham in monin, in pe’an esle’ i: ² Nai Abraham nahoni Nai Ishak, Nai Ishak nahoni Nai Yakub, Nai Yakub nahoni Nai Yehuda nok in olif tataf sin. ³ Nai Yehuda nok bi Tamar nahoni Nai Peres ma Nai Zerah, Nai Peres nahoni Nai Hezron, Nai Hezron nahoni Nai Ram, ⁴ Nai Ram nahoni Aminadab, Nai Aminadab nahoni Nai Nahason, Nai Nahason nahoni Nai Salmon, ⁵ Nai Salmon nok bi Rahab nahoni Nai Boas, Nai Boas nok bi Rut nahoni Nai Obed, Nai Obed nahoni Nai Isai, ⁶ Nai Isai nahoni Kesel Nai Daud. Nai Daud nok Nai Uria fel nahoni Nai Salomo. ⁷ Nai Salomo nahoni Nai Rehabeam, Nai Rehabeam nahoni Nai Abia, Nai Abia nahoni Nai Asa, ⁸ Nai Asa nahoni Nai Yosafat, Nai Yosafat nahoni Nai Yoram, Nai Yoram nahoni Nai Uzia, ⁹ Nai Uzia nahoni Nai Yotam, Nai Yotam nahoni Nai Ahas, Nai Ahas nahoni Nai Hizkia, ¹⁰ Nai Hizkia nahoni Nai Manasye, Nai Manasye nahoni Nai Amon, Nai Amon nahoni Nai Yosia, ¹¹ Nai Yosia nahoni Nai Yekhonya nok in oilfin bi batan anpolin to Israel neu pah Babel. ¹² Ma namuni na’ko anpolin to Israel neu pah Babel, Nai Yekhonya nahoni Nai Sealtiel, Nai Sealtiel nahoni Nai Zerubabel, ¹³ Nai Zerubabel nahoni Nai Abihud, Nai Abihud nahoni Nai Elyakim, Nai Elyakim nahoni Nai Azor, ¹⁴ Nai Azor nahoni Nai Zadok, Nai Zadok nahoni Nai Akhim, Nai Akhim nahoni Nai Eliud, ¹⁵ Nai Eliud nahoni Nai Eleazar, Nai Eleazar nahoni Nai Matan, Nai Matan nahoni Nai Yakub, ¹⁶ Nai Yakub nahoni Nai Yusuf bi Maria in mone, le nahoni Yesus ma antek In Neno Anan. ¹⁷ Fun eke batan ok-oke: Na’ko Nai Abraham talan te Nai Daud, eke bo’es amha. Na’ko Nai Daud talan te anpolin to Israel neu pah Babel, eke bo’es am ha. Ma na’ko anpolin to Israel neu pah Babel, talan te nahoni Neno Anan, eke bo’es am ha. ¹⁸ Lasi nahonis Yesus Neno Anan an etu ma naton nani nak on i: Yesus in ainaf bi Maria anmafut nek nok Nai Yusuf. Mes leka sin fe ka nabuan fa te, bi Maria in na’apu, natuin kuasat Smanan Uisneno. ¹⁹ Nai Yusuf le bi Maria anmafut nek nokan in atoni alekot. In kan lomif he namaeba bi Maria anbi mat-mat. Es nane in natenab hen bation nok bi Maria amnes-amnes. ²⁰ Mes leka Nai Yusuf fe natenab onane te Ahake Uisneno nalilon neune anbi nunmait ma nak, "Yusuf Nai Daud sufan, kais mumtau he mafe mok bi Maria, fun anah le anbi in apun nane na’ko Smanan Uisneno kun. ²¹ In of nahonis anmone mese ma ho mes mukanab In Yesus, fun In of namonib In to na’ko sin sanat." ²² Lasi nane anbol he nati’ Uisneno In a’an natiabon natuin Mafefa knino le na’uab nak: ²³ "Kiso, bife aotemef nane of na’apu ma nahonis an mone mese, ma sin nakanab nani In Imanuel" -- a’at Ibrani le in oten nak, "Uisneno nok kit." ²⁴ Oke te Nai Yusuf anfen ma anmo’e natuin sa’ le Ahake Uisneno nak neune, esle’ in he naiti bi Maria anfani in fenai. ²⁵ Mes in ka nabua fa nokan talan te bi Maria nahonis in anmone ma Nai Yusuf nakanab In Yesus.

¹ Leka nahonis nalali Yesus anbi Betlehem pah Yudea bi batan Kesel Nai Herodes naplenat, anmu’i ahin afkun sin neman na’ko neno Saen neu Yerusalem. ² Ma sin natan nak, "Kesel to Yahudi le fe nahonis nane In esme ka? Fun hai mit milali In afkun bi neno Saen es nane hai aim he mibes neu In." ³ Leka Kesel Nai Herodes in nen lasi nane te in naskek, nok ale to anbi Yerusalem. ⁴ Ma in nabua ale Ana’ lasi fuat ma Ahin Sulat to Yahudi sin ma antoti sin nak, "He nahonis Neno Anan esme?" ⁵ Ma sin natae nak, "Bi Betlehem, pah Yudea, fun Mafefa knino antui nani bi sulat nak: ⁶ Ma ho Betlehem, pah Yehuda, ho ka mubau mis fa mu’ko kot bian bi pah Yehuda, fun of anpoi na’ko ko atopus mese le he natuku Au to Israel." ⁷ Onane te Nai Herodes in no’en ahin afkun sin nok tol-tolo ma antoti sin, nak leka es afkun nane nalilon. ⁸ Oke te in anlelu sin neu Betlehem ma nak, "Him nao nai ma ampe’o miknutu antom Anah nane ma leka hi mie’ku mokin, hi miton kau he nati’ au amsa nao he ubes neu In." ⁹ Ma leka sin nen nalali kesel in molok nane te sin anfen ma an naon. Ma leka sin an naon, afkun le afi sin nit anbi neno Saen, nao nahunun talan te sin nem ante bale le Anah nane anbine, afkun nane nasnas bi in fafon. ¹⁰ Leka sin nit afkun nane, te sin malinan maten. ¹¹ Ma sin antam neu ume nane ma sin nit Anah nane nok In ainaf bi Maria, sin anli’tu ma nabes neu In. Ma sin anfei sin bale nok maus mau’pa, oke te sin neki tulu neu In, esle’ mnatu, atu fomeni ma klali. ¹² Ma Uisneno naton neu sin anbi nunmait, he nati’ kais sin anfani neu Nai Herodes, mes sin anfani neu sin pah natuin lanan bian. ¹³ Leka ahin afkun sin an naon te, Ahake Uisneno nalilon neu Nai Yusuf anbi nunmait ma nak, "Hom fennai ma meki Anah nane nok In ainaf, maen nai meu pah Mesir ma mimaika ambin talan te Au uton ko. Fun Nai Herodes natenab he nami Anah nane ma he namate In." ¹⁴ Ma Nai Yusuf anfen ma neki Anah nane nok In ainaf, bi fai nane amsa nao neu pah Mesir. ¹⁵ Ma sin namaika anbi pah nane talan te Nai Herodes nasaebon. Lasi nane anbol he nati’ Uisneno In a’an natision onle afi Mafefa knino sin na’uab nak: "Au boin Au Anah na’ko pah Mesir." ¹⁶ Leka Nai Herodes nahin, nak ahin afkun sin nalosib nani te, in nato’ nae le’uf. Oke te in anlelu he namate ale an atoni bi Betlehem funam natef. Ale anah le uan ton nua nekin sanu, namnes nok leku le in nahim nani na’ko ahin afkun sin. ¹⁷ Onane te natis kun a’at le natonon natuin Mafefa Knino Nai Yeremia, nak: ¹⁸ "Hanaf manena bi Rama, kaet ma kulut mataen le’uf; fun bi Rahel ankae neu in anhin ma in kan lomif hen halin nani, fun katitaf sin." ¹⁹ Leka Nai Herodes nasaebon nalali te, Ahake Uisneno nalil on neu Nai Yusuf anbi nunmait bi pah Mesir ma nak: ²⁰ "Hom fennai, ma meki Anah nane nok In ainaf amfani meu pah Israel, fun atoni le he namate Anah nane anmate nalali." ²¹ Ma Nai Yusuf anfen, ma neki Anah nane nok In ainaf ma an naon neu pah Mesir. ²² Mes leka in nen, nak Nai Arkhelaus anfani kesel bi pah Yudea anseka in amaf Nai Herodes, in namtau he nao neu bale nane. Ma Uisneno anfainek nani anbi nunmait he nati’ Nai Yusuf nao neu pah Galilea. ²³ Ma leka ante bi bale nane, in namaika anbi kuan es kanan Nazaret. Lasi nane anbol he nati’ natis a’at le afi Mafefa knino sin na’uab nani ma nak: "Of antek In Atoni Nazaret."

¹ Fun bi neno nane Nai Yohanes Aslanit anhake bi mnela paha snaen pah Yudea ma an etun nak: ² "Mite’un hi nekam nai fun Plenat Neno Tunan anhaumaken!" ³ Fun Nai Yohanes le i esle’ afi Mafefa Knino Nai Yesaya antek nani nak: "Anmu’i ahunun anbi mnela paha snaen nak: ’Miloitan lanan neu Uisneno, ma mi neo In lanan sin.’ " ⁴ Nai Yohanes in bael pake anmo’e na’ko bikase paha snaen in funun ma in nafutu na’ko pasu, ma in mnahat nane es siboi ma oni hau. ⁵ Onane te ale to na’ko Yerusalem, na’ko pah Yudea ok-oke ma na’ko ale pah funam natef Noe Yordan sin nem neu in. ⁶ Ma sin nahoeb sin sanat oke te Nai Yohanes natam sin neu oe anbi Noe Yordan. ⁷ Mes leka in nit atoni Farisi ma atoni Saduki le neman he naslani sin, in nak neu sin: "Hi atoni abulalut ki natuin kauna sufan ki. Sekau es naton ki he maen misaitan to’as Uisneno le nem neu ki ka? ⁸ Milile nai hi mo’et alekot le natai nok lasi te’un nekaf. ⁹ Ma kais hi mitenab bi nekam mak: Hai ama, es Nai Abraham! Mimnau, Uisneno nabe’i hen mo’e ale fatu i anfani Nai Abraham in sufan! ¹⁰ Fun fani nabelkon hen ote hau talan te ba’an ma ale hau le ka nafuaf fuan alekot of anote nisan ma anpolin neu ai. ¹¹ Fun au uslani ki bi oe on taka te’un nekaf. Mes In le nem namunin kau anmu’i kuasat nesin kau ma au ka tamaf ota he sefi In tani penhae. Of In naslani ki neki Smanan Knino ma ai. ¹² Tupa es In niaman. Of In nakmeu In bale teil ane ma nabua In aen kase neu lopo ma aen ta’uf nane In notu nani anbi ai le kan mate nitaf." ¹³ Oke te Yesus nem na’ko pah Galilea neu Noe Yordan. In nem neu Nai Yohanes ma antoti he naslani. ¹⁴ Mes Nai Yohanes antite ma nak, "Usif, Ho es he muslani kau, leka me Hom koenom aum meu kau?" ¹⁵ Mes Yesus natae ma nak, "Mautu hen bol onane, fun he tatisi Uisneno In lomin kun." Oke te Nai Yohanes naslani Yesus. ¹⁶ Leka naslani nalali te, Yesus anpoi na’ko oe. Naskek onane te neno tunan natfai ma Yesus nit Smanan Uisneno on kol ot kase ansanu nem neu In. ¹⁷ Nalali te hanfes na’ko neno tunan na’uab nak, "I, Au Anmone neka, le Au lomi ani."

¹ Oke te Smanan Uisneno antopu Yesus neu paha snaen he nati’ Nitu ansu’ nani. ² Ma leka Yesus nanahon neno bo’ha ma fai bo’ha, nalali te In namnah. ³ Oke te Nitu nane nem ma nak, "Kalu Uisneno Anah es Ho, muplenat nai ale fatun i hen fani utunu’." ⁴ Mes Yesus natae ma nak, "Antui nani bi sulat knino nak: Mansian anmoni ka al fa nok utunu’ mes nok ale a’at le anpoi na’ko Uisneno In fefan." ⁵ Nalali te Nitu neki Yesus neu Yerusalem ma nahakeb nani anbi Ume Uisneno in penen. ⁶ Ma nak neu Yesus, "Kalu Uisneno Anah es Ho, tokleit nai meu pinan nane, fun antui nani bi sulat knino nak on i, ’Uisneno of anlelu In Ahake neno tunan neu Ko, he nat-nat Ko neki sin niman, he nati’ Ho haem kais nastun neu fatu.’ " ⁷ Mes Yesus natae ma nak, "Mes antui nani amsa bi Sulat Knino nak: Kais hom su’ Ho Uisneno!" ⁸ Ma Nitu neki anteni Yesus neu nu’af mnanu es ma anlekan plenat pah pinan nok in masan neu Yesus. ⁹ Oke te Nitu nak neu Yesus, "Of au fe Ko ale i ok-oke, kalu Hom li’tu ma mubes neu kau." ¹⁰ Mes Yesus nak neune, "Muskot nai Nitu! Fun antui nani anbi sulat knino nak: Ho mes amli’tu ma mubes neu Ho Uisneno, ma antuthae In." ¹¹ Oke te Nitu nao nasaitan Yesus ma ahake neno tunan sin neman ma antuthae Yesus. ¹² Leka Yesus an nen nak anheke Nai Yohanes ma natam nani bi o’of, Yesus naskotu neu pah Galilea. ¹³ Ma In nao nasaitan kuan Nazaret ma namaika anbi Kapernaum anbi nifu ninen bi pah Zebulon ma Naftali, ¹⁴ he nati’ natisi a’at le Mafefa Knino Nai Yesaya antui nani nak, ¹⁵ "Pah Zebulon ma pah Naftali, lalan neu tasi, Noe Yordan panin, Galilea, uf bian le kan tamaf nonot Yahudi sin ini, -- ¹⁶ uf le antoko bi mesokan, sin nit Meusine a’naek ma le atokos anbi mafo maten, Meusine nane an tana sin." ¹⁷ Bi neno nane Yesus na’uba In mepu ma an etun nak, "Mite’un nai hi nekam, fun Plenat Neno Tunan an haumaken!" ¹⁸ Ma leka Yesus fe nao natuin Nifu Galilea in ninen, In nit atifkai sin nua, esle’ Nai Simon le antek nak Nai Petrus ma in olif Nai Andreas. Ma sin fe hen heken ika bi nifu nane, fun sin atoni atifkai ika. ¹⁹ Ma Yesus nak neu sin, "Aim nai ma mituin Kau, ma of Au unoina ki hem kifkai atoni." ²⁰ Bi leku nane amsa sin nao nasaitan sin kifkai ma natuin Yesus. ²¹ Leka Yesus nao anfin, In nit anteni atoni nua ma oil tatan esle’ Nai Yakobus nok in olif Nai Yohanes, Nai Zebedeus in anhin. Ma sin nok sin amaf Nai Zebedeus fe naleko kifkai anbi belo’. Mak Yesus no’en sin ²² bi leku nane amsa sin nasaitan belo’ nok sin amaf ma natuin Yesus. ²³ Ma Yesus In nao anfun pah Galilea ok-oke, fun nanoina sin anbi sin ume buat ma an etun sin lasi Knino Plenat Uisneno ma naleko ale a’menas ma a’lima’et anbi to nane. ²⁴ Fun beno antom Yesus nasitbon neu pah Siria tal atoni namfau nem neun. Ma sin neki ale amenat le a’naben menas huma-huma. Le bian sin niut sae, bian an auma ma bian men ole, mes Yesus naleko sin. ²⁵ Ma atoni namfau natuin Yesus, neman na’ko Galilea, ma na’ko Dekapolis, na’ko Yerusalem ma na’ko Yudea ma Noe Yordan panin.

¹ Leka Yesus nit atoni namfau, In ansae neu tubu tunan ma antok. Oke te In asimo lasi sin nem neu In. ² Ma Yesus nanoina sin nak: ³ "Ua alekot neu atoni le sin nahin nak sin ma’nuk ma al nafnek neu Uisneno, fun sin anbi Plenat Neno Tunan. ⁴ Ua alekot neu atoni le nekan ansusal, fun Uisneno of anhalin sin. ⁵ Ua alekot neu atoni nek baun, fun Uisneno of anfe neu sin sa’ le In anba’an nani. ⁶ Ua alekot neu atoni le ansinmak hen mo’e natuin Uisneno In lomin, fun Uisneno of nahoeb neu sin. ⁷ Ua alekot neu atoni le nek ma namnau sin aon bian, fun Uisneno of a’nek ma namnau sin amsa. ⁸ Ua alekot neu atoni le nekan knino, fun of sin nahin Uisneno. ⁹ Ua alekot neu atoni le neki halan, fun antek sin nak anah-anah Uisneno. ¹⁰ Ua alekot neu atoni le ansutai mane’at natuin nanaoba Uisneno In lomin, fun sin anbi Plenat Neno Tunan. ¹¹ Ua alekot neu ki leka sin nakle’at ki, anli’u ki, ma na’uab amle’ut neu ki natuin Au kanak. ¹² Fun afi sin anli’u mafefa knino sin le nem nahunun ki onane amsa. Mimlil ma mimoek nai fun Uisneno naloitan baen anaek neu ki bi neno tunan." ¹³ "Hi masi ki neu pah pinan. Leka masi nane in min mali namneku he tamalib tafani teki sa’ ka? In ka ma ota anteni fa so mak atpolin ma ateli taklati. ¹⁴ Hi meusine ki neu pah pinan. Kot le anhake anbi tubu tunan ka nabe’i fa he naninbon. ¹⁵ Fun katit fa atoni le notu paku oke te nabela anbi mako nupun, so mes antao nani neu tet paku he nati’ antana sin abit ume nanan. ¹⁶ Onane amsa hi meusine so anpin anbi atoni sin matan, he nati’ sin nit hi mo’et alekot ma naliatas hi Ama abit neno tunan." ¹⁷ "Kais hi mitenab mak: Au aum he uneku Nai Musa in Plenat Knino ma ale Mafefa knino sin lasi noina. Fun Au ka aum fa he uneku ani mes Au aum he utisi ani. ¹⁸ Mes Au ak ki: Leka neno tunan ma pah pinan i fe ka namnekuf, of tuises ai taka an es, na’ko Plenat Knino ka nabe’i fa he namneku leka ale sa’ nane fe ka namtisif. ¹⁹ Es nane kalu sekau antanhai Plenat Knino nane maski lasi an-ana, ma nanoina nani neu atoni bian, of in nabau bi Plenat Neno Tunan. Mes kalu sekau in natis Plenat Knino nane ma nanoina nani neu atoni bian of in nanae bi Plenat Neno Tunan. ²⁰ Mes Au ak ki: Hi of kam tamaf meu Plenat Neno Tunan, leka hi ka mitis fa Uisneno In lomin amnesin ale ahin Plenat Knino ma atoni Farisi sin. ²¹ Him nen milali a’at le aneut nani neu hit mnais unu sin nak: Kais hi mimate; sekau le namate of napeni hukum. ²² Mes Au ak ki: Sekau le nato’an in bian mes napeni sesu; ma sekau na’akan in bian; mes’okan of nokan neu Tolas Alef Lasi sin matan; ma sekau nak neu atoni bian: Amonot, of anpolin natam anbi ai maputu in balan. ²³ Es nane, leka ho meki ho fua tulu neu baki tulu ma ho mumnau mit ho mui lasi sa’ mok ho bae, ²⁴ mubela nai ho fua tulu nane bi baki tulu matan ma amnao hem halan nekaf mokan, oke te hom fani he mutulu ho fua tulu nane. ²⁵ Ma amhalan nekaf nai mok ho musu leka fe hom nao mokan bi lanan atnanan, he nati’ ho musu nane kais nana’at ko neu alef lasi ma alef lasi nana’at ko neu apao o’of ma apao o’of natam ko neu o’of. ²⁶ Au ak ki: Mumnau nai, of ho kam poif, leka ho kam baen fa ho tusa tal natflek. ²⁷ Him nen milali a’an le nak: Kais hi mapaisa. ²⁸ Mes Au ak ki: Sekau le ankiso nit bife ma ansinmakan bife nane, in mapaisa nalali nokan bi in nekan. ²⁹ Leka ho matam ne’u neki sanat neu ko, amloit mupoitan ma ampolin mani, fun leko nesi ho aom ta’un mese namle’u, na’ko anpolin natam ho aom noba temen neu ai maputu in balan. ³⁰ Leka ho nimam ne’u neki sanat neu ko, amketu mfekan ma ampolin mani, fun leko nesi ho aom lokif mese namle’u, na’ko anpolin natam ho aom noba teme neu ai maputu in balan. ³¹ Ma antui nalali a’an nak: Sekau hen baken in fel so anfen sul baken neun. ³² Mes Au ak ki: Sekau hen baken in fel so al natuin mapaisa ai lasi kake, in nafani in fel neu lasi kake; ma kalu sekau in mafe nok bife baken nane, in mapaisa amsa. ³³ Ma him nen milali amsa a’at neu hit mnais unu sin nak: Kais mitotan lasi supat, mes mitiab mani hi lasi manta’en bi Uisneno In matan. ³⁴ Mes Au ak ki: Kais him sup meki neno tunan, fun nane Uisneno In mau toko kun, ³⁵ meki pah pinan amsa kaisa, fun nane Uisneno In mau haen telin kun, ma neki Yerusalem amsa kaisa, fun Yerusalem nane Kesel Amnanut In kot; ³⁶ ma kais hom sup meki nakam amsa, fun ho ka mu’if kuasat he mo’e ho nakfunu mese hen muti ai metan. ³⁷ Mes kalu hi uab namneo, mak: namneo, mes kalu kahaf mak: kahaf, fun uab le nesi na’ko nane, nitu ini. ³⁸ Ma him nen milali a’at nak: Mataf anseka mataf, nisif anseka nisif. ³⁹ Mes Au ak ki: Kais him tobe amle’ut neu atoni le anmo’e amle’ut neu ki, so mak es anpas ko neu su’im ne’u, muklelo su’im li’neu hen pasan teni. ⁴⁰ Kalu sekau natam lasi neu alef lasi natuin anlomi ho sobalu, leko amfem teni ho tainusat fafon. ⁴¹ Ma kalu es naseke ko hem nao mokan kilo mese, leko hom nao mokan kilo nua. ⁴² Hom fe nai neu sekau le antoti sa’ neu ko, ma kais hom tite sekau le hen totin lapat sa neu ko. ⁴³ Fun him nen milali a’at le nak: Him nek hi aom bian ma mimusu mok hi musu sin. ⁴⁴ Mes Au ak ki: Him nek hi musu nai ma amonen toti neu sin le anhamu’i ki. ⁴⁵ He nati’ him fani anah-anah na’ko hi Ama abit neno tunan. Fun In es nasaeb manas neu atoni amle’ut ma atoni alekot ma nasanut ulan neu atoni alekot ma atoni amaufinut. ⁴⁶ Fun leka him nek atoni le a’nek ki of hi mipeni sa’ na’ko Uisneno? Fun ale atoni asimo noni poni amsa anmo’e onane? ⁴⁷ Ma leka him hosen al hi bae sin, hi mo’e anesit sa’na’ko ale atoni bian ka? Fun atoni le ka nahin Uisneno sin amsa anmo’e onane? ⁴⁸ Fun onle hi Ama abit neno tunan In nek ale atoni ok-oke ma kan betif humaf, hi amsa mes amo’e onane."

¹ "Mimnau nai, kais hi mo’e Plenat Knino bi amfaut sin matan he nati’ sin nit ki, fun kalu onane hi ka mipeni fa baen na’ko hi Ama abit neno tunan. ² Es nane leka ho mo’e amnaut neu amamu’it sin, kais hom etun lasi nane neu es am es, onle asafanut sin anmo’e nani bi sin ume buat ma anbi lalan he nati’ anpules sin. Mes Au ak ki: Nane sin ansimo nalali baen. ³ Mes leka ho mo’e lasi amnaut, ho nimam a’li kais nahin ho nimam a’ne’u anmo’e sa. ⁴ Mes hom fe mani nok a’tol-tolo’ ai kol-kolo he nati’ ho Ama le In nit anbi tolo’ ai kolo of antoeb nani neu ko." ⁵ "Ma leka him onen toti, kais him onen onle a’asafanut sin. Fun sin anlomi hen onen toti so anhake anbi ume buat ma anbi lal seki sin he nati’ ale atoni nit sin. ⁶ Mes leka hi hem onen toti, amtam nai meu hi ke’an ma am ek eno ma amonen toti neu hi Ama abit bale tolo’ ai kolo. Ma hi Ama le In nit lasi tolo’ ai kolo nane of antoeb nani neu ki. ⁷ Ma leka him onen toti kais him noni uab he namnanu onle atoni le ka nahin Uisneno. Fun sin natenab nak natuin sin uab namfau anbi onen totis, of ansimo sin. ⁸ Es nane kais hi mo’e onane, fun hi Ama nahin nak him nukan lasi sa’, nahun na’ko le hi hem toti neu In. ⁹ Onane te him onen toti nai mak on i: Hai Ama abit neno tunan, Uisneno Anesit Afinit. Hai mimtausan Ho kanam knino. ¹⁰ Fun Ho, nai Kesel So Ho muplenat anbi pahpinan, ma hai mituin Ho lomim onle anbi neno tunan. ¹¹ Mutis ma muno’u hai mnahat anbi neno i ¹² ma amsako kai hai sanat, onle hai amsako milali hai aom bian sin sanat; ¹³ ma kais mutam kai neu lasi su’at, mes mufetin kai na’ko amle’ut in tuaf. [Fun Ho ana’ Plenat, akuasat, apinat talan te nabal-bal. Amin.] ¹⁴ Fun leka him sako atoni sin sanat, hi Ama abit neno tunan of ansako ki hi sanat amsa. ¹⁵ Mes leka hi kam sako fa atoni sin sanat, hi Ama amsa of kan sako fa hi sanat." ¹⁶ "Ma leka hi minahom-milelnom kais mimofu hi human onle a’asafanut sin. Fun sin namle’u sin human he nati’ ale atoni nit sin nak sin nanahok. Mes Au ak ki, sin ansimo nalali sin baen. ¹⁷ Mes leka ho he munahom, amkili nakam ma mumeu humam; ¹⁸ he nati’ kais es nit ko nak ho munahom, mes al ho Ama abit bale tolo’ ai bale kolo. Mes ho Ama le nit ko bi bale tolo’ ai bale kolo of antoeb ko." ¹⁹ "Kais hi mibuaba maus bi pah pinan, le ap-apu ma nutus nale’un nani ma abakat anpukai ume ma nabak neki. ²⁰ Mes mibuaba nai hi maus bi neno tunan, le naem ma nutus ka nale’un nani fa ma abakat kan pukai nani fa. ²¹ Fun hi maus anbi me, hi nekam amsa anbi nane. ²² Ho matam anfani paku neu ho aom. Kalu ho matam anpin, ansinek ho aom. ²³ Mes kalu ho matam namle’u ho aom nane anmesok. Es nane leka paku le anbi ho aom anmesok of ale sa’mesokan oke. ²⁴ Katit fa atoni mese le hen tuthae tuan nua. Fun kalu kahat of in kan lomif es ma in nek es, ai in anfutun nekan neu es ma kan sian fa es. Hi ka mibe’i fa hem tuthae Uisneno ma maus pah pinan." ²⁵ "Es nane Au ak ki: Kais mi’unu neu hi monim, he hi miah sa ai he minu sa’, ma kais mi’unu neu hi aom of hem pake sa’. Ati hi monim nane ka nesin fa mnahat ma hi aom nane ka nesin fa bael pake ka? ²⁶ Kius mit ale kolo aplelet neno tnanan sin kan senan fa ma ka nonun fa ma ka nabua fa sa’ neu sin lopo mes hi Ama abit neno tunan naloitan sini mnanat. Ati hi kam nesin fa ale kolo nane sin ka? ²⁷ Sekau anbi ki le natuin lasi a’unu neu monit nabe’i hen lut in uan maski onle niman atli’an ka? ²⁸ Ma nansa hi mi’unu neu bael pake ka? Mail mit uk-uki le anmoni bi lele, sin kan mepun fa ma ka nasunan fa abas, ²⁹ mes Au ak ki: Nai Salomo nok in masan apinat kan pakef alekot onle uk-uki nane in masan. ³⁰ Kalu Uisneno namasab nani ma’u anbi lele le neno i anmoni ma noka of anpolin natam neu ai, onane of in namasab nesin ki. Meski natuin hi nekam ka nateb knino fa. ³¹ Es nane kais hi nekam na’unu ma hi mak: Hai he miah sa’ ka? Ma he minu sa’ ka? Ma hai hem pake sa’ ka? ³² Fun ale atoni le ka nahin Uisneno sin nami ale lasi nane. Mes hi Ama abit neno tunan In nahin, nak him nukan ale lasi nane sin. ³³ Es nane hi maim mihunun plenat neno tunan ma anmo’e In lomin of In anfe ki ale lasi bian amsa. ³⁴ Onane te kais hi mi’unu hi nekam neu neno noka, fun neno nane nok kun in susal. Ma kais amsato amteni susal neno i, fun susal neno i noba."

¹ "Kais him fain alef lasi neu es, he nati’ kais Uisneno anfain alef lasi neu ki. ² Fun onle him lefi bian sin lasi, onane amsa Uisneno of anlefi ki hi lasi. Ma atnais le him tai mekin neu atoni bian, of Uisneno antai ki nekin amsa. ³ Nansa ho mit hau lapu’ anbi ho bae in matan, mes hau pisa anbi ho matam ho ka muhinef ka? ⁴ Leka me ho mak neu ho bae: Maut fe upoitan ko hau lapu’ es ho matam mes hau pisa es ho matam kun. ⁵ Hoi asafanut, mupoitan muhunun hau pisa na’ko ho matam, oke te ho mit nok alekot he mupoitan hau lapu’ na’ko ho bae in matan." ⁶ "Kais him fe bale knino neu asu he nati’ kais asu naklelon nem ma ansau ki. Ma kais him polin baun kael usaf neu fafi, he nati’ kais fafi anteli nale’un. ⁷ "Ma him toti nai, of anfe ki; hi mami nai, of hi mipeni; him leku eno nai of nasoitan nani neu ki. ⁸ Fun atoni le antoti of ansimo, ma atoni le in naim sa’ of napeni ma atoni le anleuk eno of nasoitan eno neun. ⁹ Ai anmu’i atoni anbi ki le in anah antoti utunu’ oke te in anfen fatu, ¹⁰ ai in antoti ika oke te anfene kauna ka? ¹¹ Es nane kalu hi on atoni asanat le hi mihin ma amfe lasi alekot neu hi anhin, sa’ anteni hi Ama abit neno tunan! Of In anfe lasi alekot neu sin le antoti neu In." ¹² "Ma ale lasi sa’ le him lomi he nati’ atoni anmo’e nani neu ki, hi mo’e mani amsa onane neu sin. Fun nane Plenat Knino ma Mafefa knino sin sulat in nesan kun. ¹³ So amtam nai mutuin eno malenat nane, fun eno le anaek ma lalan le anmainua an ali neu amle’ut, ma atoni namfau le sin tam natuin, ¹⁴ mes eno le an-ana ma lalan le anmalen an ali neu honis, ma atoni ka namfau fa le napeni nan." ¹⁵ "Him panat nai hi aom na’ko ale mafefa mo’el sin le nem neu ki on bibi kase, mes sin nekan nane on aus fui abulalut. ¹⁶ Mes of hi mihin sin natuin sin mo’et. Nabe’i ka atoni anseu tanu’an sena in fuan na’ko kisan, ai anseu bubuk fuan na’ko put-puta ka? ¹⁷ Onane amsa ale hau alekot nafua fuan alekot ma hau ka alekot nafua fuan ka alekot. ¹⁸ Leka me hau alekot he nafua fuan amle’ut, ai hau ka alekot he nafua fuan alekot. ¹⁹ Ma ale hau le ka nafuaf fuan alekot, of anote nisan ma anpolin neu ai. ²⁰ Onane, ale mafefa mo’el sin, of hi mihin sin na’ko sin mo’et. ²¹ Ka ale atoni le no’en Kau ma nak: Uisneno, Uisneno! Of sin antam neu Plenat Neno Tunan, mes in kun le anmo’e natuin Au Ama abit neno tunan In lomin. ²² Fun bi neno amsoput, of atoni namfau le nak neu Kau nak: Uisneno, Uisneno, ait hai ka mibeno fa Ho kanam ma amli’u ale nitu anbi Ho kanam ma anmo’e lasi amkakat namfau anbi Ho kanam ka? ²³ Ma anbi neno nane of Au utonan sin muti ma nak: Au ka uhin Kif! Miskot nai mi’ko Kau, ale hi anmo’e lasi amle’ut!" ²⁴ "Ale atoni le amnen Au a’ak ma anmo’e natuin, in onle atoni ahinet le nahakeb in ume bi faut putun. ²⁵ Oke te ulan ansanu ma noel ansae nalali te anin anfu ume nane, mes ume nane ka natselaf fun nahakeb anbi faut putun. ²⁶ Mes ale atoni le amnen Au a’ak ma kan mo’e natuinef, in onle atoni amonot le nahakeb in ume anbi snaen. ²⁷ Ma leka ulan ansanu ma noel ansae oke te anin anfu ume nane, of ume nane natsel kun ma namle’u naek." ²⁸ Ma leka Yesus nasopu In a’at i, ale atoni amfaun sin namkakan natuin Yesus In lasi noina nane, ²⁹ fun In nanoina sin neki kuasat ma ka on fa Ahin Sulat sin.

¹ Leka Yesus ansanu na’ko tubu nane, atoni namfau nem natuin In. ² Oke te atoni men poko mese nem neu Yesus, ma nabes neun ma nak, "Usif, kalu Hom lomi, muleko kau au menas i." ³ Ma Yesus nenu In niman ma anpoho atoni nane ma nak "Au lomi, ho muleok nai." Ma bi leku nane amsa atoni nane naleko na’ko in men poko. ⁴ Oke te Yesus nak neune, "Mumnau nai, kais hom etun lasi i neu es, mes hom nao nai, mulile ho aom neu ana’ lasi fuat ma mutulu ho fua tulu le Nai Musa anlek nani, on saksi mese neu sin." ⁵ Leka Yesus antam neu Kapernaum, solalus nakaf mese nem neun ma antoti nak, ⁶ "Usif, au ate antup es ume, fun in aon ano’le ma in sutai menas ka nabe’if." ⁷ Ma Yesus nak neune, "Of Au et he uleko." ⁸ Ma solalus nakaf natae ma nak, "Usif, au ka tamaf ota he simo Ko bi au ume, so mukua Ho a’am fefa mese of au ate nane naleko kun. ⁹ Fun au amsa au sutai plenat ma au solalus amsa ansutai au plenat. Leka au ak neu solalus nane ak: Hom nao nai! Oke te in nao, ma au aka teni neu es: Aum meu i! Oke te in nem, ai au ak neu au ate ak: Hom mepu i!, oket in anmepu." ¹⁰ Leka Yesus In nen lasi nane te, In namkak ma nak neu sin le nao nokan, "Au ak ki, tebes nek ateb knino ba’u i, Au fe ka upeni fa anbi atoni mese na’ko to Israel sin. ¹¹ Mes Au ak ki: Anmu’i atoni namfau of neman na’ko neno Saen ma neno Tesan ma antokon hen bukae nok Nai Abraham, Nai Ishak ma Nai Yakub anbi Plenat Neno Tunan. ¹² Mes ale atoni le hen fani Uisneno In to of anpolin napoitan sin neu mesokan. Ma anbi bale nane sin ankae ma neku nisin." ¹³ Oket Yesus nak neu solalus nakaf nane ma nak: "Hom nao nai, fun of anbol neu ko onle ho nekam nateb nalali." Ma bi leku nane amsa in ate naleko kun. ¹⁴ Ma Yesus antam neu Nai Petrus in ume ma In nit Nai Petrus ain babaf antup fun anmainin. ¹⁵ Oke te Yesus In na’ bife nane ma in naleko kun. Oke te in anfen ma antuthae Yesus. ¹⁶ Fun leka neno hen faien, sin neki atoni aniut saes sin nem neu Yesus ma In anli’u napoitan ale smanan nitu sin neki In a’an ma naleko ale amenat bian amsa. ¹⁷ Fun Yesus anmo’e ale lasi nane he nati’ natisi a’at le Mafefa Knino Nai Yesaya an etun nani nak, "Of In es anloi hit mane’at ma ansutai hit menas." ¹⁸ Leka Yesus nit atoni namfaun funam natef In, oke te In anlelu sin hen lakan neu nifu panin. ¹⁹ Oke te atoni Ahin Sulat mese nem neu Yesus ma nak, "Am kulu, au he utuin Ko neu me-me le Ho hem nao meun." ²⁰ Mes Yesus nak neu in nak, "Asu fui anmu’i boia, ma kolo anmu’i kuna, mes Anmone Pah To kan anmu’i fa bale hen tup." ²¹ Ma In asimo lasi mese nak neun, "Mufetin kau he au nao fe he sub au ama." ²² Mes Yesus nak neune, "Mutuin Kau nai, ma maut he atoni amates ansub sin atoni amates." ²³ Ma Yesus ansae neu belo’; ma In asimo lasi sin nao nokan. ²⁴ Ma naskek onane te anin slutuf anbol anbi nifu nane talan te okin antepo belo’ nane, mes Yesus antup. ²⁵ Oke te Yesus In asimo lasi sin neman ma anpo’ nafena Yesus ma nak, "Usif, ambab kai, hit tamle’uen." ²⁶ Ma Yesus nak neu sin, "Nansa hi mimtau, hi nekam ka nateb knino fa ka?" Onane te Yesus anfen ma nakain anin ma nifu nane, tal nifu nane namne nunfin. ²⁷ Ma ale atoni nane sin namkakan ma nak, "In atoni sa’an ka tal anin ma nifu natuin In plenat?" ²⁸ Leka sin nem ante nifu panin bi pah Gadara, atoni aniut saes nua neman na’ko naukel ne nae’ku nok Yesus. Sin nua sin nek maunun matane tal katit fa atoni le he natuin lalan nane. ²⁹ Ma sin anhunun ma nak, "Ho mu’i lasi sa’ mok kai, hoi Uisneno Anmone? Ait Ho aum meu i he mule’un kai, nahunu na’ko in leku ka?" ³⁰ Fun ka na’lo fa bale nane anmu’i fafi pukan naek esle’ namin mnahat. ³¹ Ma ale nitu nane sin antoti neu Yesus ma nak, "Bait Ho hem li’u kai, so Hom lelu kai hem tam meu ale fafi nane sin." ³² Ma Yesus nak neu sin, "Him nao nai!" Oket ale nitu sin anpoi ma antam neu ale fafi nane sin. Ma ale fafi nane sin anmofun na’ko kefan antaman neu nifu nanan ma anleman maten ok-oke. ³³ Ma atuku fafi nane sin naenan nao neu kot, ma an etun lasi nane, ma an etun amsa antom atoni aniut saes sin nane. ³⁴ Oke te ale atoni abit kot nane sin anpoi ma ansenu Yesus. Ma leka sin nae’ku nokan, sin antoti he nati’ In nao nasaitan sin pah nane.

¹ Nalali te Yesus ansae neu belo’ ma anlak neu nifu panin. Ma In nem ante In kuan. ² Ma atoni sin neki atoni men ole mese nem neu Yesus le antup bi In hala. Leka Yesus nit sin nekan ateb knino, In nak neu atoni men ole nane nak, "Mutetu ho nekam, Au anah, ansako nalali ho sanat sin." ³ Mes atoni Ahin Sulat sin fauk natenab bi sin nekan nak, "In na’uab nale’un Uisneno." ⁴ Mes Yesus nahin nak sin natenab sa’bi sin nekan es nane In nak, "Nansa’ hi mitenab lasi amle’ut bi hi nekam? ⁵ Lasi me es anmanafa nesi, tak: Ansako nalali ho sanat, ai tak: Hom fen nai ma amnao nai ka? ⁶ Me he nati’ hi mihin, nak Anmone Pah To anmu’i kuasat bi pah pinan i hen sako sanat" -- ma In nak neu atoni men ole nane --, "Hom fen nai, maiti ho hala tupa ma amfani nai meu ho ume!" ⁷ Ma atoni nane in anfen ma in anfani. ⁸ Leka ale atoni sin nit lasi nane, sin namtaun ma naliatas Uisneno le In anfe kuasat onane neu mansian. ⁹ Leka Yesus nao na’ko bale nane, In nit atoni mese kanan Nai Matius antoko bi ume noni poni. Oke te In nak neune nak, "Mutuin Kau nai." Ma Nai Matius anfen ma natuin Yesus. ¹⁰ Ma leka Yesus anbukae bi Nai Matius in ume, ale atoni asimo noni poni ma atoni asanat sin neman ma anbukae nok Yesus ma In asimo lasi sin. ¹¹ Ma leka atoni Farisi sin nit lasi nane te, sin nak neu Yesus asimo lasi sin nak, "Nansa’ es hi kulu anbukae nok atoni asimo noni poni sin ma atoni asanat sin?" ¹² Ma Yesus In nen uab nane ma In nak, "Atoni aomina sin ka nami fa apalolit, so al atoni amenat." ¹³ Him nao nai ma minoina a’at le atui nani nak, "An lomi lasi amnaut ma ka lomi fa fuat. Fun Au aum he ka o’en fa amneot sin mes he o’en asanat sin." ¹⁴ Nalali te nai Yohanes in asimo lasi sin nem neu Yesus ma nak, "Nansa’, es hai mok atoni Farisi sin minahom, mes Ho asimo lasi sin kahaf?" ¹⁵ Mes Yesus natae sin nak, "Nabe’i ka atoni amafe fe’u in ini sin ansusal, leka amafe fe’u nane fe nabua nok sin? Leka in neno ante ma naiti amafe fe’u nane na’ko sin, bi leku nane amsa of sin nanahok. ¹⁶ Katit fa atoni mese le anlape in sobalu mna’neki pilu fe’u, kalu kahat pilu fe’u nane anpisu sobalu mna’nane ma natpius nunfin. ¹⁷ Onane amsa ka tesi fa tua mina amtasa fe’u neu aul pasu mna’, kalu kahat aul pasu nane natpisu ma tua mina amtasa nane natop. Ma so amtesi tua mina amtasa fe’u neu aul pasu fe’u amsa he nati’ nuasin naleko nabala." ¹⁸ Leka Yesus fe namolok nok sin onane te, nakaf ume buat nem ma nabes nue Yesus nak, "Au anfeto fe anmate, mes Hom koenom aum ma ampoho meki Ho nimam, of in anmoni." ¹⁹ Oket Yesus anfen ma nok In asimo lasi sin nao natuin atoni nane. ²⁰ Ma bi leku nane amsa anmu’i bife mese le napeni men sopol ton bo’es am nua, anfonat nu anhaumak Yesus na’ko kotin ma anpoho Yesus In sobalu betkone in fukan. ²¹ Fun in natenab anbi in nekan nak, "Lamu au poho In sobalu betkone, of au uleko kuk." ²² Mes Yesus naklelon ma ankiso in ma nak nuene, "Hatane ho nekam nai, Au anah, fun no nekam ateb knino es naleko ko." Ma bi leku nane bife nane naleko kun. ²³ Leka Yesus ante nakaf ume buat in ume ma In nit atoni afu’ feku sin ma atoni namfau le naslutu, ²⁴ Yesus nak neu sin, "Him poi nai, fun anah i kan matef mes antup." Mes sin alsin anmanis Yesus. ²⁵ Leka ale atoni sin anpoin, Yesus antam ma ana’ anah nane niman, oke te anah nane anfen. ²⁶ Ma beno nane nasitbon neu pah nane funam natef. ²⁷ Leka Yesus nao anfin bale nane, atoni matfolo nua nem natuin ma anhunun nak, "Mumnau kai fe, Nai Daud sufan." ²⁸ Leka Yesus antam neu ume mese, atoni matfolo nane sin nua sin nem neu In ma Yesus nak neu sin, "Hi nekam nateb knino ka, nak Au ube’i he uleko ki ka?" Ma sin natae nak, "Koi Usi, hai nekam nateb." ²⁹ Oke te Yesus anpoho sin matan ma nak, "Anbol neu ki natuin hi miteb mani." ³⁰ Ma sin matan nit anfan. Ma Yesus anba’an matane neu sin nak, "Panat nai, kais es nahin lasi i." ³¹ Mes sin anpoi ma an etun lasi nane neu pah nane funam natef. ³² Leka atoni afolot sin nua sin fe anpoin, sin neki atoni amonot mese le aniut sae nem neu Yesus. ³³ Ma leka Yesus anli’u nitu nane, atoni amonot nane in na’uab kun. Mes atoni amfaut nane sin namkakan ma nak, "Hai fe ka mitaf lasi i anbi Israel." ³⁴ Mes atoni Farisi sin nak, "In anli’u nitu neki kuasat nitu sin anakaf." ³⁵ Ma Yesus In nao anfun ale kot ma kuan. In nanoina anbi ale ume buat ma an etun lasi knino Plenat Neno Tunan fun naleko ale menas ma naneku ale manane. ³⁶ Ma leka In nit ale atoni amfaut nane, Yesus nekan anmof ma namnau sin fun sin anhaen ma nanukbok onle bibi kase le kan mu’if atukus. ³⁷ Mes Yesus nak neu In asimo lasi sin, "Abut nane naek kun, mes atoni ameput ka namfauf. ³⁸ Es nane amtoti nai neu abut nane in usin, he nati’ In ansonu ameput neu abut nane."

¹ Ma Yesus no’en In asimo lasi bo’es am nua ma anfen sin kuasat hen li’u smanan nitu ma naneku ale menas ma manane. ² Fun asimo lasi sin bo’es am nua sin kankenu esle’: Ahunut Nai Simon le antek in nak Nai Petrus ma in olif Nai Andreas, ma Nai Yakobus, Nai Zebedeus in anmone ma in olif Nai Yohanes. ³ Nai Filipus ma Nai Bartolomeus, Nai Tomas ma Nai Matius asimo noni poni, Nai Yakobus, Nai Alfeus in anmone ma Nai Tadeus. ⁴ Nai Simon atoni Zelot ma Nai Yudas Iskariot le an aneb neu Yesus. ⁵ Ma Yesus ansonu In asimo lasi sin bo’es am nua ma anba’an neu sin nak, "Kais him nao neu pah uf bian le kan tamaf nonot Yahudi ai amtam neu kot atoni Samaria sin kuan. ⁶ Mes him nao nai meu ale bibi kase amnekut na’ko to Israel. ⁷ Him nao nai ma ametun nai mak: Plenat Neno Tunan anhaumaken. ⁸ Mileko amenat sin; mifena amates sin; miknino men poko sin; amli’u ale nitu sin. Fun him simo ka nok fa baen, es nane him fe amsa kaisa nok baen. ⁹ Kais hi meki noni mnatu ai noin muti ai noin molo anbi hi pasu futu. ¹⁰ Kais hi meki bukael anbi lalan, kais hi meki sobalu nua, penhae ai tes, fun atoni ameput mes napeni in baen. ¹¹ Leka him tam neu kot ai kuan, hi mami atoni le anloim hen sium ki ma mimaika ambin tal him nao amten. ¹² Leka him tam meu atoni in ume, him hosen sin meki tetus. ¹³ Leka sin an simo, of tetus nane an sanu neu sin, kalu kahaf tetus nane anfani nem neu ki. ¹⁴ Ma leka katif fa atoni mese hen simo ki ma ka nenaf hi uab, him poi nai, mai misaitan ume ai kot nane ma amtekal afu na’ko hi haem. ¹⁵ Mes Au ak ki: Of bi neno lef lasi, pah Sodom ma Gomora sin sutais nane anmakafa nesin kot nane." ¹⁶ "Him kiso, Au sonu ki on bibi kase neu aus fui sin atnanan, es nane so hi manoe on kauna ma nek muti on kol ot kase. ¹⁷ Mes him panat nai neu ale atoni; fun bian of nana’at ki neu tolas alef lasi ma anhamu’i ki anbi sin ume buat. ¹⁸ Ma natuin Au kanak of sin antopu ki neu amu’i kuasat sin ma neu kesel sin matan on saksi mese neu sin ma neu ale atoni le ka nahin Uisneno. ¹⁹ Leka sin nana’at ki kais hi mi’unu neu he mi’uab onme ma he mak sa’, fun ale lasi nane of anfe nani neu ki bi leku nane amsa. ²⁰ Fun hi es ka mi uab fa, mes hi Ama in Smanan Knino es na uab anbi ki. ²¹ Ma of atoni nana’at in es he namate, onane amsa amfes neu in anah. ma anah-anah of anbulalun neu sin amaf ma sin ainaf ma namate sin. ²² Ma ale atoni of kan lomi ki fa natuin Au kanak. Mes atoni le nalan tal namsopun of napeni honis. ²³ Leka anhamu’i ki bi kot es, hi maen meu kot bian, fun Au ak ki: Nahunu na’ko hi ka misopu fa ale kot Israel nane, Anmone Pah To ankoenon nemen. ²⁴ Asimo lasi mese in ka nesin fa in kulu ai ate mese in ka nesin fa in tuan. ²⁵ So mak asimo lasi mese anfani on in kulu ma ate mese anfani on in tuan noba nai. Kalu ume tuaf nane sin antek nak Beelzebul, sa’ anteni neu in ume nanan sin. ²⁶ Es nane kais hi mimtausan sin, fun katit fa lasi sa’ es le matobe le of ka natfaif ma katit fa lasi sa’ es le natolo le of ka mahine fa. ²⁷ Sa’ le Au uton ki, anbi mesokan, hi miton nai anbi meusine; ma sa’ le naseo nani neu hi lukem, him kakan nai na’ko ume penen. ²⁸ Ma kais hi mimtausan sin le he namate hi aom, mes kan mu’in fa kuasat he namate hi smanam; so mimtausan amnesin In le anmu’i kuasat he nale’un hi aom ma hi smanam anbi ai maputu balan. ²⁹ Ati ka nasosa fa kol ane nua loit mese ka? Mes katit fa kolo mese na’ko sin le anmofu neu nain ankoit hi Ama In lomin. ³⁰ Ma hi nakam funun amsa ansoi nani sin ok-oke. ³¹ Es nane kais hi mimtau, fun hi upam nesin ale kolo ane nane sin. ³² Ale atoni le nahin Kau bi mansian sin matan, Au amsa of uhin sin bi Au Ama abit neno tunan In matan. ³³ Mes sekau le natotan Kau bi mansian sin matan, Au amsa of utotan sin bi Au Ama abit neno tunan In matan." ³⁴ "Kais hi mitenab, mak Au aum he eki halan nekaf bi pah pinan; Au aum ka eki fa halan nekaf mes Au eki suni. ³⁵ Fun Au aum he bati atoni na’ko in amaf, anbife na’ko in ainaf, nanef na’ko in beif, ³⁶ ma le hen fani musu es le ale atoni anbi ume nanan sin. ³⁷ Sekau le a nekan nesin in amaf ma in ainaf na’ko Kau, in kan tamaf ota neu Kau; ma sekau le a’nekan nesin in anmone ai in anfeto na’ko Kau, in kan tamaf ota neu Kau. ³⁸ Sekau in kan loif in hau nehe ma natuin Kau, in kan tamaf ota neu Kau. ³⁹ Sekau le natau in monin, of in naneku in monin, ma sekau le naneku in monin natuin Au kanak, of in napeni nani. ⁴⁰ Atoni le ansimo Ki, in ansimo Kau. Ma atoni le ansimo Kau, in ansimo In le ansonu Kau. ⁴¹ Atoni le ansimo mafefa knino natuin in mafefa knino, of in ansimo mafefa knino in baen, ma sekau le ansimo atoni alekot natuin in atoni alekot, of in ansimo atoni alekot in baen. ⁴² Sekau le anfe oe manikin maski kui mese neu atoni ka makana i sin es, natuin in Au asium lasi, Au ak neu ki: Tebes in baen nane of ka namneku nitaf."

¹ Leka Yesus anba’an nalali In asimo lasi sin bo’es am nua, In nao na’ko bale nane he nanoina ma an etun Lasi Knino anbi ale sin kot. ² Leka Nai Yohanes Aslanit anbi o’of amnen antom Yesus Neno Anan In mepu, ³ oke te anlelu in asimo lasi sin he natan Yesus nak, "Ho es amnemat nane ka, ai hai hem pao amteni atoni bian ka?" ⁴ Mes Yesus natae sin ma nak, "Him nao nai ma mitonan Nai Yohanes sa’ le him nen ma hi mit: ⁵ mat folo sin nit anfani, hae hela sin anfen ma anaon, men poko sin naknino anfani, luke tono sin an nenan, amates anfen anfani ma an etun Lasi Knino neu amamu’it sin. ⁶ Ma ua alekot neu atoni le nekan ka nao’ni fa ma antite Kua." ⁷ Leka Nai Yohanes in asimo lasi sin anaon, Yesus na’uab neu atoni amfaut nane antom Nai Yohanes nak, "Hi hem nao meu mnela paha snaen neu sa’ ka? Hem kiso petu le anin anfu neum nema ka? ⁸ Ai hi hem nao neu sa’ ka? He kiso atoni le anpake bael amasat ka? Atoni le anpake bael amasat in balan es usif in sonaf. ⁹ Es nane him nao neu sa’ ka? He kiso mafefa knino ka? Namneo, mes Au ak ki, nesi na’ko mafefa knino. ¹⁰ Fun antui nani antom in nak: Kiso nai, Au lelu Au haef he nao nahunun Ko, in of naloitan Ho lanan bi Ho matam. ¹¹ Au ak ki: Fun sin le bife nahoni sin katit fa atoni mese le nanae nesin Nai Yohanes Aslanit, mes atoni abaut bi Plenat Neno Tunan nanae nesin Nai Yohanes Aslanit. ¹² Na’ko Nai Yohanes in nenon talan te tomas i, sin nabeoba Plenat Neno Tunan ma atoni le nabeoba nani in nami he nasik nan. ¹³ Fun ale mafefa knino ma Nai Musa in sulat nabeno nani tal Nai Yohanes ¹⁴ ma -- kalu him lomi hem simo mani -- esle’ Nai Elia le of he nem. ¹⁵ Atoni le maluke, so in natnin nai! ¹⁶ Au he uleta batan i eki sa’ ka? Sin maleta onle anhin le antokon bi masa ma na’uab neu sin bian ma nak: ¹⁷ Haim fu feku neu ki, mes hi ka mibso’ of, haim si sikoli mes hi kam kuluf. ¹⁸ Fun Nai Yohanes nem, in ka nah ma ka ninuf ma sin nak: In niut sae. ¹⁹ Namuni te Anmone Pah To nem, In bukae ma ninu ma sin nak: In atoni apalu ma amninut, masoba nok atoni asimo noni poni sin ma atoni asanat sin. Mes Uisneno In hinen namneob nani na’ko In mepu. ²⁰ Nalali te Yesus nabokan ale kot, le In mo’e lasi amkakat namfau anbin mes sin ka nate’un fa sin nekan ma nak, ²¹ "Amle’ut neu ko Khorazim! Amle’ut neu ko Betsaida! Fun bait afi lasi amkakat sin anbol bi Tirus ma Sidon onle anbol bi hi atnanam oni sin nate’un nalali sin nekan ma ankulun. ²² Mes Au ak ki: Bi neno lef lasi of Tirus ma Sidon sin sutais anmanafa nesin hi sutais. ²³ Ma ho Kapernaum, he na’aiti ko ante neno tunan ka? Kahaf, of nasanut ko ante amates sin balan. Fun bait afi ale lasi amkakat anbol bi Sodom onle anbol bi hi atnanam, kot nane oni anhake nabala tal neno i. ²⁴ Mes Au ak ki: Bi neno lef lasi pah Sodom in sutais of an manafa nesin ho sutais." ²⁵ Bi leku nane Yesus nakua a’an ma nak: "Au u’tulu nekak neu Ko, Ama, Uisneno tunan ma pah pinan, fun ale lasi nane Ho mutolo sin neu atoni maneka ma atoni ahinet, mes Ho mulile neu atoni abaut sin. ²⁶ Koi Ama, Ho lomim onane kun. ²⁷ Ale lasi nana’at nani neu Kau na’ko Au Ama ma katit fa atoni mese le nahin Anmone al Amaf, ma katit fa atoni mese le nahin Amaf nane al Anmone ma atoni le Anmone nane anlomi he nalile nani neun. ²⁸ Aim nai meu Kau, ale hi ahaet ma aloi mafena, of Au fe ki snasat. ²⁹ Mituin nai Au plenat sin ma minoina na’ko Kau, fun Au nek manone ma nek baun Kau ma hi monim of napeni snasat. ³⁰ Fun plenat le Au fe nane neki halinat ma Au baut nane anmanaf."

¹ Bi neno nane, Neno Snasat, Yesus nao natuin lele aen kase atnanan. Fun In asimo lasi sin namnahan, sin anhetun aen kase ma anbukae. ² Mes leka atoni Farisi sin nit lasi nane te sin nak neu Yesus ma nak, "Kiso mit Ho asimo lasi sin anmo’e sa’ le ka nabe’i fa hen mo’e nani bi Neno Snasat." ³ Mes Yesus natae sin nak, "Ait hi kam soi mitaf sa’ le Nai Daud anmo’e, leka in ma in amnokat sin namnahan. ⁴ Ma sin antam neu Ume Uisneno ma sin anbukae utunu’ atnatas le ka nabe’i fa he sin anbukae nani, fun in ma amnokat sin amsa kahaf, so mak al ana’ lasi fuat sin? ⁵ Ait him kam soi mitaf Nai Musa in sulat, nak bi ale Neno Snasat, ale ana’ lasi fuat le anmepu bi Ume Uisneno sin antanhai plenat Neno Snasat mes sin ka nasanab fa? ⁶ Au ak ki: Anbi i anmu’i le a’nesin Ume Uisneno. ⁷ Bait hi mihin a’at in lomin nak: Lasi le Au lomi nane es lasi amnaut ma ka fua tulu fa, of hi ka misanab fa atoni le ka nasanab fa. ⁸ Anmone Pah To nane Uisneno neu Neno Snasat." ⁹ Ma Yesus In nao nasaitan bale nane ma antam neu sin ume buat. ¹⁰ Anbi nane anmu’i atoni mese le niman bian anole. Ale atoni le he nasanab Yesus natan ma nak, "Nabe’i ka he taleko amenat bi Neno Snasat?" Sin natan onane he nati’ nasanab Yesus. ¹¹ Mes Yesus nak sin, "Kalu atoni mese le anmu’i bibi kase mese ma anmofu neu bola bi Neno Snasat, of in hel napoitan ai kahaf? ¹² Mansian ma’upa nesin bibi kase? Es nane nabe’i het mo’e alekot bi Neno Snasat." ¹³ Oket Yesus nak neu atoni nane, "Menu ho nimam nai!" Ma in nenu nani, oket in niman naleko anfani onle niman bian. ¹⁴ Mes atoni Farisi sin anpoi ma anmalekan he namate Yesus. ¹⁵ Mes Yesus nahin nalali sin nek salit nane. Es nane Yesus naskotu na’ko bale nane. ¹⁶ Ma In antal sin matane he kais an etun antom In, ¹⁷ he nati’ natisi a’at le Mafefa Knino Nai Yesaya an etun nalali: ¹⁸ "I, Au Ate le Au beti ani, le Au nek ani, le Au monik anlomi nan; of Au tao Au Smanak neu In, ma In of an etun lef lasi neu ale uf. ¹⁹ Of In kan matoef ma kan hunun fa, ma of atoni ka nenaf In hanan bi lanan-lanan. ²⁰ Petu atli’as of In kan ipu nani fa, ma paku in fukat amasut, of In ka namate fa, talan te In anbe’u lef lasi nane. ²¹ Ma ale pah of nafnekan neu In." ²² Nalali te sin neki atoni aniut saes mese nem neu Yesus. Atoni nane matan anfol ma anmon. Ma Yesus naleko atoni nane, tal in na’uab ma nit anfan. ²³ Ma ale to amfaun nane sin namkak ma nak: Ba’is i onle Nai Daud in sufan." ²⁴ Mes leka atoni Farisi sin nen lasi nane te sin nak, "In onli’u nitu neki Beelzebul, nitu sin nakaf In kuasat." ²⁵ Mes Yesus nahin sin nek tenab nane es nane In nak sin, "Ale plenat le anmamusun of namle’u. Ma kot ai ume le nasulin of kan hakef nok alekot. ²⁶ Onane amsa kalu nitu anli’u nitu, of anbatiok ma sin ma musun nafaniok. Onane sin plenat hen hake onme ka? ²⁷ Es nane kalu Au li’u nitu eki kuasat Beelzebul, hi amnoktin anli’u nitu neki sekau in kuasat ka? Ho atuin sin le’nane es naton nak him san milali. ²⁸ Mes Au li’u nitu eki Smanan Uisneno. Nane nak plenat Uisneno ankoenon nem nalali neu ki. ²⁹ Ai onme bait atoni hen tam neu atoni abe’it in ume he nasik in a’maus. So anfutu nahunun atoni abe’it nane fe, nalali te nabe’i hen tam ma nasik in a’maus. ³⁰ Sekau le ka nok Kau, in namusu nok Kau. Ma sekau le ka nabuab fa nok Kau in nasitab ale sa’. ³¹ Es nane Au ak ki: Ale sanat ma uab amle’ut mansian of masako. Mes uab amle’ut neu Smanan Knino ka masako fa. ³² Atoni le na’uab amle’ut neu Anmone Pah To, of ansako in sanat. Mes leka in na’uab amle’ut neu Smanan Knino, of kan sakof in sanat, bi pah pinan i ma bi neno amnemat. ³³ Kalu hau alekot in fuan amsa naleko. Kalu hau ka nalekof in fuan amsa ka nalekof. Fun hau nane mahine na’ko in fuan. ³⁴ Hi atoni abulalut ki. Leka me hi he mi’uab alekot, kalu hi abulalut ki. Fun sa’ le hi mi’uab nane anpoi na’ko hi nekam. ³⁵ Atoni alekot napoitan lasi alekot na’ko in nekan alekot. Ma atoni abulalut napoitan lasi amle’ut na’ko hi nekan abulalut. ³⁶ Mes Au ak ki: Atoni le na’uab a’at ka ma’ota of in natae nani bi neno lef lasi. ³⁷ Fun natuin ho uab of namneob ko. Mes natuin ho uab amsa of nasanab ko." ³⁸ Nalali te Ahin Sulat sin fauk ma atoni Farisi sin nak neu Yesus, "Anoni, haim lomi he mit taka mese na’ko Ko." ³⁹ Mes Yesus natae sin, "Batan amle’ut ma amaufinut i hen totin lasi taka. Mes of kan fen sinif taka al taka Mafefa Knino Nai Yunus. ⁴⁰ Nai Yunus namaika anbi ika in tein neno tenu ma fai tenu. Onane amsa Anmone Pah To of namaika anbi pah pinan in nupun neno tenu ma fai tenu. ⁴¹ Bi neno lef lasi, atoni Niniwe of anfen nok batan i ma anlefi sin lasi. Fun atoni Niniwe nate’un sin nekan natuin Nai Yunus an etun sin lasi. Mes anbi i anmu’i le a’nesin Nai Yunus. ⁴² Bi neno lef lasi uisneno bife na’ko Neno Li’ of anfen na’ko batan i ma in natam lasi neu sin. Fun uisneno bife nane nem na’ko pah pinan tu’an he nen Nai Salomo in lasi hine. Ma anbi i anmu’i le a nesin Nai Salomo!" ⁴³ "Leka sman amle’ut nane anpoi na’ko mansian in naoinson neu bale ametos he nami snasat. Mes in ka napenif. ⁴⁴ Oke te in nak: Au he fain eu ume le usaitan ani. Oke te in nao ma napeni ume nane luman, ume nane naknino ma namas. ⁴⁵ Nalali te in nao ma anhone sman amle’ut bian sin hitu le anbulalu nesin. Ma sin antam ma namaika anbi bale nane. Ma atoni nane in monin namle’u nesin na’ko neno ahunut. Onane amsa of anbol neu batan amle’ut i." ⁴⁶ Leka Yesus fa na’uab nok atoni amfaut nane, In ainaf ma In olif sin neman. Sin anhake anbi mone ma nami he nae’ku nokan In. ⁴⁷ Atoni es nak neu Yesus, "Kiso mit Ho ina ma Ho oli sin anhaken es mone. Sin nami he nae’ku nok Ko, Usi!" ⁴⁸ Mes Yesus natae, "Au aina es sekau? Ma Au oli sin es sekau ka?" ⁴⁹ Ma In anlul neu asimo lasi sin ma nak, "I nu Au aina ma Au oli sin! ⁵⁰ Atoni le anmo’e natuin Au Ama abit neno tunan, in lomin nane Au oli, Au feto ma Au aina."

¹ Bi neno nane Yesus anpoi na’ko ume nane ma antoko bi nifu ninen. ² Ma atoni namfau neman ma antol nan Yesus. Es nane In ansae neu belo’ ma antok anbin. Mes atoni amfaut nane sin anhake anbi nifu ninen. ³ Ma In na’uab lasi leta namfau neu sin nak, "Anmu’i atoni mese anpoi hen kifun fini. ⁴ Leka in ankifun, fini bian anmofu anbi lanan ninen. Oke te kolo nem ma anlot nan sin. ⁵ Fini bian anmofu anbi faut putun le in nain an-ana es ha. Fini nane anmoni laba natuin in nain nane manihis. ⁶ Leka manas ansae, fini nane in tolon anuknene ma anmeto. Natuin in a’ba’an kan tamaf neu nain. ⁷ Fini bian anmofu neu kisan atnanan. Ma kisan nane anmoni ma a’neo nisan tal anmate. ⁸ Mes fini bian anmofu anbi nain alekot oke te nafua: Bian natun mese, bian bo’ne ma bian bo’tenu. ⁹ Atoni le maluke, so natnin nai!" ¹⁰ Oke te Yesus In asimo lasi sin neman ma antoti nak, "Usi, nansa Ho mu’uab neu sin meki lasi leta ka?" ¹¹ Yesus natae nak, "Anfe ki lasi hine he mihin Plenat Neno Tunan in lasi tolo, mes sin kahaf. ¹² Fun sekau le anmu’i, of anfe nani neu in, tal in nathoe. Mes sekau le kan mu’if, of ansimo nafani sa’le in anmu’i. ¹³ Es nane Au u’uab neu sin eki lasi leta. Fun sin nitan, mes on ka nitan fa. Ma sin nenan mes on ka nenan fa. ¹⁴ Ma of natis neu sin Mafefa Knino Nai Yesaya in beno, le hanan nak: Of him nen ma mitnin, mes hi ka mihinef, of him kiso ma mail, mes hi ka mitaf. ¹⁵ Fun to in nekan anmafaub, ma luken antono, ma matan nabil; he nati’ kais sin nit neki sin matan, ma amnen neki sin luken, ma nahin neki sin nekan, oke te nali’on anfani nem, he nati’ Au uleko sin. ¹⁶ Mes alekot neu ho matam fun sin nitan ma neu hi lukem fun sin nenan. ¹⁷ Fun Au ak ki: Anmu’i Mafefa knino ma atoni amneot namfaun, le anlomi he nit sa’ le hi mit mes sin ka nit nani fa. Ma sin anlomi he nen sa’ le him nen mes sin ka nen nani fa. ¹⁸ Es nane him nen nai lasi leta nane in oten. ¹⁹ Fini le anmofu anbi lanan ninen nane maleta neu atoni le an nen Plenat Neno Tunan, mes ka nahin nani fa. Oke te amle’ut in tuaf nem ma nasik nani fini le ankifun anbi in nekan. ²⁰ Fini le anmofu anbi faut putun nane maleta neu atoni le an nen a’at nane, ma ansimo nani nok amlilit. ²¹ Mes a’at nane ka naba’af anbi sin nekan ma anmoni ka lob fa. Leka susal ai hamu’it nem neu sin natuin a’an knino, sin nekan ateb knino nane namneku. ²² Fini le anmofu anbi kisan nane maleta neu atoni le in nen a’at nane. Mes lasi a’unu ma maus pah pinan a’neo nis a’at nane anbi sin nekan talan te ka nafuaf. ²³ Ma fini le anmofu anbi nain alekot nane maleta neu atoni le in nen a’at nane ma nahin nani. Oke te sin nafuan, bian natun mese, bian bo’ne ma bian bo’tenu." ²⁴ Usif Yesus na’uab anteni lasi leta mese neu sin ma nak, "Plenat Neno Tunan maleta onle atoni le ankifun fini alekot anbi in lele. ²⁵ Mes leka ale atoni sin antup, in musu nem ma ankifun fini humusu anbi aen kase nane atnanan, oke te in nao kun. ²⁶ Leka aen kase nane anmoni ma napune, sin nit humusu nane amsa. ²⁷ Oke te ale ate sin nem neu tuan nane ma nak: Tuan, ati afi ho kam kifun fa fini alekot anbi ho lele ka? Humusu nane nem na’ko me ka? ²⁸ Tuan nane natae sin: Nane musu es anmo’e. Oket ale ate sin nak neun: Neu hom lomi ka he nati’ haim nao he maunu mis humusu nane ka? ²⁹ Mes in nak: Kaisa! Fun kalu hi’ maunu humusu nane of him maunu meik aen kase nane amsa. ³⁰ Maut he nua sin monin nabuan talan te neno abut. Of au ak neu atoni a’abut sin: Hi mibua humusu nane ma amfutu he motu. Nalali te hi mibua aen kase nane ma mitam mani anbi au lopo." ³¹ Usif Yesus na’uab anteni lasi leta mese neu sin nak, "Plenat Neno Tunan maleta onle atoni mese in naiti bonak fuan ma ankifu anbi in lele. ³² Bonak nane in fuan mnut-nutu nesin ale fini. Mes leka in anmoni in nesin ale utan bian ma anfani hau. Oke te ale kolo anbi neno atnanan nem ma nakun anbi in atlaen." ³³ Ma Yesus nua’ab anteni lasi leta mese nak, "Plenat Neno Tunan maleta onle bife mese in naiti lalu haef ma anselo nani nok ut su’at tenu talan te ansae." ³⁴ Ale lasi nane Yesus na’uab nani neu atoni namfau ma katit fa sa’ esle’ In ka na’uab nani fa neki lasi leta. ³⁵ He nati’ natis ale Mafefa knino sin molok nak: "Au he fai Au fefak ma u’uab lasi leta, Au he uton lasi tolo na’ko afi fe nahakeb paha pinan." ³⁶ Oke te Yesus nasaitan atoni amfaut nane ma In anfani. In asimo lasi sin nem neu In ma nak, "Muketi kai fe lasi leta antom humusu anbi lele nane." ³⁷ Usif Yesus natae ma nak, "Atoni le ankifun fini alekot nane, esle’ Anmone Pah To. ³⁸ Lele nane esle’ pah pinan i. Fini alekot nane esle’ atoni le anfani Uisneno In to. Humusu nane esle’ atoni le anaetnon neu Nitu. ³⁹ Musu le ankifun humusu nane esle’ Nitu. Neno abut nane esle’ neno hatas amsoput, ma atoni a’abut nane esle’ ahake neno tunan sin. ⁴⁰ Ma onle nabua humusu nane ma notu anbi ai, onane amsa bi neno hatas amsoput. ⁴¹ Anmone Pah To of anlelu In ahake neno tunan sin he nabua alsin le anmo’e fulit ma alsin le anmo’e lasi amle’ut, na’ko In Plenat. ⁴² Of anpolin natam sin alsin neu ai maputu in balan; bi nane of sin ankae ma neku nisin. ⁴³ Bi leku nane ale atoni le natuin Uisneno lomin of anpin onle manas anbi sin Amaf In Aplenat. Es nane te, atoni le anmu’i luken so in natnin nai!" ⁴⁴ "Plenat Neno Tunan maleta onle maus le natolo anbi lele. Leka atoni napeni maus nane in natolo anteni. Natuin in namlil, in nao ma nasosa ale in mu’in oke te ansos nan lele nane." ⁴⁵ "Onane amsa Plenat Neno Tunan maleta onle atoni a’sosa le in nami baun kael usaf maupa’. ⁴⁶ Leka in napeni baun kael le upan matane, in nao ma nasosa ale in mu’in oke te in ansos nan baun kael usaf mau’pa nane." ⁴⁷ "Onane amsa Plenat Neno Tunan maleta onle kifkai le anpolin natam anbi tasi, oke te nabuab ika huma-huma. ⁴⁸ Leka kifkai nane nahenu, atoni sin anhel neu tasi ninen. Oke te sin antoko ma anbeti ale ika nane, ika alekot sin antao nani neu aba ma ika ka alekot nane sin anpolin. ⁴⁹ Onane amsa bi neno hatas amsoput: Ale ahake neno tunan of sin nao ma anbeti atoni anmo’e amle’ut na’ko atoni le anmo’e lomin Uisneno. ⁵⁰ Nalali te anpolin natam ale anmo’e amle’ut sin neu ai maputu in balan; anbi nane of sin ankae ma neku nisin. ⁵¹ Hi mihin ale lasi nane ka?" Sin natae nak, "Hai mihin Uisneno." ⁵² Usif Yesus nak neu sin, "Es nane Ahin Sulat le ansimo noina na’ko Plenat Neno Tunan maleta on ume tuaf le napoitan maus fe’u ma maus amna’ na’ko in bale maus." ⁵³ Leka Usif Yesus naketi nalali ale lasi leta nane, In nao na’ko bale nane. ⁵⁴ Ma ante kuan le nahonis In anbin, Yesus nanoina ale atoni sin bi sin ume buat. Leka sin nen ale lasi noina nane sin namkakan ma nak, "In napeni lasi hine ma kuasat na’ko me hen mo’e ale lasi amkakat nane ka? ⁵⁵ Ati In ka tukan hau in Anmone fa? Ait In ainaf ka es fa bi Maria ma In oilfin es le Nai Yakobus, Nai Yusuf, Nai Simon ma Nai Yudas ka? ⁵⁶ Ma ait In ka feotfin fa le nabua nok kit? Neu ale lasi nane In napeni na’ko me ka?" ⁵⁷ Es nane sin kan lomif fa ma antite Usif Yesus. Ma Usif Yesus nak neu sin, "Mafefa knino mese napeni kanaf anbi me-me, mes ka napenif kanaf anbi in kuan ma in ume." ⁵⁸ Ma fun sin nekan ka nateb knino fa, Yesus kan mo’ef lasi amkakat namfau anbi kuan nane.

¹ Anbi leku nane Nai Herodes kesel pah Galilea in nen beno antom Yesus. ² Oket in nak neu in ameput sin nak, "I Nai Yohanes Aslanit. In anfen anfani na’ko amates. Es nane in napeni kuasat hen mo’e ale lasi amkakat." ³ Fun Nai Herodes anlelu ma anheke nalali Nai Yohanes Aslanit ma anfutu ma natam nani anbi o’of. Nai Herodes anmo’e onane natuin lasi bi Herodias, le in olif Nai Filipus in fel. ⁴ Fun Nai Yohanes nakain Nai Herodes nak, "Kais ho mafe mok bi Herodias!" ⁵ Nai Herodes anlomi he namate Nai Yohanes mes in namtausan atoni amfaun le sin kiso Nai Yohanes on Mafefa knino. ⁶ Mes bi neno Nai Herodes neno mahonim, bi Herodias in anfeto nabso bi to amfaut sin atnanan. Ma anhalin Nai Herodes in nekan, ⁷ talan te Nai Herodes anmanta’en neki supat hen fe ne sa’ le in antoti. ⁸ Natuin in ainaf anfuli, anbife nane nak, "Amfe kau nai anbi i, Nai Yohanes Aslanit in nakan bi tupa mese." ⁹ Lasi i nasusab kesel nekan; mes natuin in mantaen neki supat ma natuin ale atoni le in anhok sin neman neu tolas nane; in anlelu hen fe nani neun. ¹⁰ In anlelu atoni nao neu o’of hen ote nafek Nai Yohanes in nakan ¹¹ ma sin neki Nai Yohanes in nakan bi tupa mese ma anfe nani neu anbife nane ma in neki nao neu in ainaf. ¹² Oke te Nai Yohanes Aslanit in asimo lasi sin neman ma naiti in aon nitu ma ansub. Oke te sin nao ma an etun lasi nane neu Yesus. ¹³ Leka Usif Yesus nen lasi nane te, In ansae belo’ ma nao nasaitan bale nane. In he nao neu bale le katit fa atoni anbin. Mes leka to amfaut sin nen nani te, sin nasaitan sin kuan ma nao natuin Yesus natuin lal meto. ¹⁴ Leka Yesus ansanu na’ko belo’ neu meto ma In nit to amfaun nane, In namnau nis sin oke te In naleko ale amenat sin. ¹⁵ Leka neno hen faien, Yesus asimo lasi sin nem neun ma nak, "Bale i hufui kun ma neno hen faien. Hom lelu ale to amfaun i he naon ma ansoan mnahat bi kuan-kuan." ¹⁶ Mes Yesus nak neu sin, "Kais sin naon, mes him fen sin hen bukaen." ¹⁷ Sin natae Yesus nak, "Hai mu’i al utunu’ pisa nim ma ika koe nua." ¹⁸ Yesus nak, "Meki sin neman neu Kau." ¹⁹ Yesus anlelu to amfaun nane hen tokon anbi ma’u. Ma Yesus In naiti utunu’ pisa nim ma ika koe nua nene. In anbaisenu neu neno tunan ma antek alekot neun. Oke te In anebi utunu’ nane neki In niman ma anfe nani neu In asimo lasi sin ma In asimo lasi sin anbati neu ale to amfaun nane. ²⁰ Sin ala sin anbukae tal namsenan. Nalali te atoni nabuab ale utunu’ pisa nesif nane nahenu aba bo’es am nua. ²¹ Neu alsin le anbukae nane oni atoni nifun nim, kan so’i fa bifel ma liana sin. ²² Oke te Yesus anlelu In asimo lasi sin ansae belo’ hen lak nahunun neu nifu panin. Fun Yesus fe hen lelu ale to amfaun nane hen fanin. ²³ Ma leka In anlelu ale to amfaun anfani, Yesus ansae neu tubu hen mes kun anonen toti. ²⁴ In asimo lasi sin belo’ suk a’lo na’ko nifu ninen. Ma oe pesen antepo belo’ nane fun anin anfu na’ko belo’ matan. ²⁵ Oni leku tenu neis hen meu, Yesus nao natuin oe tunan nem neu sin. ²⁶ Leka asimo lasi sin nit Yesus nao natuin oe tunan, sin naskek ma anan’bai nak, "Nitu smanaf!" ²⁷ Mes Yesus nak neu sin, "Tainine hi nekam! Au es Kau i, kais mimtau!" ²⁸ Oke te Nai Petrus anan’bai ma natan Yesus, "Usi, bait Ho kum es nane, amlelu kau he au et eu Ko utuin oe tunan." ²⁹ Ma Yesus nak, "Aum nai." Nai Petrus ansanu na’ko belo’ ma nao natuin oe tunan he nem neu Yesus. ³⁰ Mes leka Nai Petrus nit anin, in namtau ma hen lem. Es nane in anbai ma nak, "Usi, amtulun kau!" ³¹ Yesus nenu niman laba ma antopu nan in ma nak, "Hoi atoni, nek tebes an-ana, nansa es ho nekam na’unu?" ³² Oke te sin ansae neu belo’ ma anin nane namne. ³³ Ma ale atoni le anbi belo’ nane sin naluli ma nabes neu In ma nak, "Namneo Ho Uisneno Anmone Ko." ³⁴ Leka sin anlak nalali sin ansanu bi Genesaret. ³⁵ Ma leka ale atoni anbi bale nane nahin Yesus, sin ansonu hanaf neu ale bale funam natef pah nane. Ma sin neki ale amenat nem neu In. ³⁶ Ma sin antoti neu Yesus, he nati’ sin na’ In sobalu betkone In fukan. Ma ale atoni le sin na’ nani, sin naleko na’ko sin menas.

¹ Oke te atoni Farisi ma Ahin Sulat sin fauk neman na’ko Yerusalem neu Yesus ma natan In nak, ² "Nanso es Ho asimo lasi sin antanhai hit mnasi unu sin halat ka? Leka sin hen bukae sin ka nafanu fa sin niman." ³ Mes Yesus natae sin nak, "Nansa es him tanhai plenat Uisneno natuin hi mnasi unu sin halat ka? ⁴ Fun Uisneno nakua a’an nak: Minaeb hi ama ma hi aina; ma: Sekau anle’at in amaf ai in ainaf, of in anmate. ⁵ Mes hi minoina mak: Ale atoni le na’uab neu in amaf ai in ainaf nak: Sa’ le anbi kau le au he fe ani neu ki, nane au utulu ulali neu Uisneno. ⁶ Atoni nane kais nanaeb anteni in amaf. Onane te hi minebet a’an Uisneno natuin hi babfini sin halat. ⁷ Hi atoni asafanut! Namneo Mafefa Knino Nai Yesaya in beno antom ki: ⁸ To i nanaeb Kau neki sin lulun, mes sin nekan na’lo na’ko Kau. ⁹ Sin nabes neu Kau son-sona, fun noina le sin nanoina nane plenat mansian kun." ¹⁰ Oke te Yesus anboin atoni amfaun nane ma nak neu sin, ¹¹ "Mitnin lekleko he nati mihin! Sa’ le antam neu fefak ka nekif hainisit, mes sa’ le anpoi na’ko fefak nane neki hainisit neu atoni." ¹² Oket In asimo lasi sin nem ma natan neun, "Usi, Ho muhin ka nak Ho a’at nane neki fatu astunas neu atoni Farisi sin?" ¹³ Yesus natae nak, "Ale luel le Au Ama abit neno tunan kan sen nani fa of anbok nani nok in aba’an. ¹⁴ Kais moki sin. Fun sin atoni matfolo antopu atoni matfolo. Leka atoni matfolo antopu atoni matfolo, of sin nua sin anmofu neu bola." ¹⁵ Oke te Nai Petrus nak neu Yesus, "Muton kai lasi leta nane fe, Usif." ¹⁶ Yesus natae, "Hi amsa fe ka mihin mani fa ka? ¹⁷ Ait hi ka mihin fa nak sa’ le antam neu fefak ansanu neu teik oket anpolin neu kotif? ¹⁸ Mes sa’ le anpoi na’ko fefak, nane na’ko nekak ma lasi nane es neki hainisit neu atoni. ¹⁹ Fun ale tenab amle’ut anpoi na’ko nekak esle’ lasi mamaten, lasi mapaisa, lasi kalu, lasi bakan, saksi moel ma antek nale’un es in kanan. ²⁰ Ale lasi nane es neki hainisit neu atoni. Mes leka anbukae ma ka nafanu fan niman nane ka neki fa hainisit neu atoni." ²¹ Oke te Usif Yesus nao na’ko bale nane ma naskotu neu pah Tirus ma Sidon. ²² Bife Kanaan mese na’ko pah nane nem neu Yesus ma ananbai nak, "Mumnau kau fe, koi, Usif, Nai Daud sufan. Au anfeto a’niut sae ma namen anaek." ²³ Mes Yesus ka nataef fefa mese. Oke te In asimo lasi sin neman ma antoti nak, "Usif, amlelu bife nane hen nao kun. Fun in anbai piut bi hit kotik." ²⁴ Usif Yesus natae bife nane nak, "Ansonu Kau neu al bibi kase amnekut sin na’ko to Israel." ²⁵ Mes bife nane nem anhaumak ma nabes neu In ma nak, "Usi, mumnau kau." ²⁶ Mes Yesus natae, "Ka nalekof, kalu taiti utunu’ neu anhin ma atpolin neu asu." ²⁷ Bife nane nak, "Namneo, Usif, mes asu amsa sin nah mnah nesif le anmofu na’ko in tuan in mei." ²⁸ Yesus natae ma nak neune, "Aina, ho nek ateb knino nane naek! Maut nai ale sa’ anbol neu ko onle hom lomi." Bi leku nane amsa in anfeto naleko. ²⁹ Ma Yesus nao nasaitan pah nane, ma In nao natuin Nifu Galilea ninen. Oke te In ansae neu tubu mese ma antok anbin. ³⁰ Atoni namfaun sin neki atoni men ole, hae hela, matfolo, amonot, ma amenat bian nem neu Yesus. Ma sin nabela sin anbi Yesus matan ma Yesus naleko sin ok-oke. ³¹ Ale atoni le sin nit sin namkakan, fun amonot sin na’uab, men ole sin anaon, hae hela sin naleko, matfolo sin nitan. Oke te sin naliatas to Israel sin Uisneno. ³² Oke te Yesus In anboin In asimo lasi sin ma nak, "Au nekak namnau nis atoni amfaun i. Sin nok Kau neno tenuen ma sin ka mu’in fa mnahat. Au ka loim fa he lelu sin anfani nok tai luman, of sin anmanan bi lanan." ³³ In asimo lasi sin nak, "Hit he tapeni utunu’ onme bi bale luman i, he nati tamsenab atoni amfaun i." ³⁴ Yesus nak neu sin, "Hi mu’i utunu’ pisa fauk es nane ka?" Sin natae nak, "Pisa hitu, ma ik ana koe fauk." ³⁵ Oke te Yesus anlelu atoni amfaun nane antokon neu nain. ³⁶ Nalali te Yesus naiti utunu’ pisa hitu ma ika nane sin, oke te natulu nani neu Uisneno. Ma In anebi sin ma anfe nani neu In asimo lasi sin. Ma sin anbati neu atoni amfaun nane. ³⁷ Ma sin alsin anbukae tal namsenan. Oke te ale atoni sin nabuab utunu’ pisa nesif nane, nahenu aba hitu. ³⁸ Neu alsin le anbukae nane oni atoni nifun ha, kan so’i fa bifel ma li’ana sin. ³⁹ Oke te Yesus anlelu atoni amfaun nane hen fanin. In ansae neu belo’ ma nao neu pah Magadan.

¹ Oke te atoni Farisi ma Saduki sin fauk neman hen su’ nit Yesus. Sin antoti he nati’ In nalile neu sin taka mese na’ko neno tunan. ² Mes Yesus natae: "Leka manas hen tes, hi mak: Neno ansinek, fun neno amtasa, ³ ma anbi nok-noka, natuin neno amtasa ma anmetak, hi mak: Neno i of na’ul, fun neno anmetak. Hi mitaka mihin neno in masan, mes ale taka neno le’at hi ka mihinef. ⁴ Batan amle’ut ma abulalut i hen toti taka. Mes of kan fen sin fa taka bian al taka Mafefa Knino Nai Yunus." Oke te Yesus nasaitan sin ma nao kun. ⁵ Leka Yesus asimo lasi sin anlak ante nifu panin, sin nahinen nak sin nikan he neki utunu’. ⁶ Usif Yesus nak neu sin, "Panat ma ampao nai atoni Farisi ma Saduki sin lalu haef." ⁷ Leka sin nen Yesus na’uab onane, sin natenab ma na’uaben es nok es nak, "In na’uab onane natuin hit ka tekif utunu’." ⁸ Ma leka Yesus nahin sa’ le sin na’uab nane, In nak, "Nansa hi mimolok neu lasi hi ka mu’if utunu’? Hi nekam ateb knino an-ana! ⁹ Hi fe ka mihin fa ka? Hi ka mimnau fa afi utunu’ pisa nim le Au ebi ani neu atoni nifun nim. Oke te hi mibuab mani nesin aba fauk ka? ¹⁰ Ai neu utunu’ pisa hitu le Au ebi ani neu atoni nifun ha. Ma hi mibuab nesin nane aba fauk ka? ¹¹ Leka me hi ka mihinef, nak Au ka u’uab fa antom utunu’ nane. Him panat nai antom atoni Farisi ma Saduki sin lalu haef." ¹² Bi leku nane fe sin nahinen nak Yesus In lomin kan tomaf neu lalu haef le hen mo’e utunu’. Mes antom neu atoni Farisi ma Saduki sin lasi noina. ¹³ Leka Yesus neman te pah Kaisarea Filipi, In natan In asimo lasi sin nak, "Atoni sin nak, Anmone Pah To nane sekau kun ka?" ¹⁴ Sin natae nak, "Bian sin nak: Nai Yohanes Aslanit. Bian anteni sin nak: Nai Elia. Ma bian sin nak: Nai Yeremia ai mafefa knino mese." ¹⁵ Oke te Yesus natan, "Mes natuin hi, Au le i sekau Kau ka?" ¹⁶ Nai Simon Petrus natae nak, "Ho Kesel Afetin, Uisneno Anmone le anmoni." ¹⁷ Ma Yesus nak neune, "Ua alekot neu ko, Simon, Nai Yunus anmone. Fun ka mansian fa es naton ko lasi nane mes Au Ama abit neno tunan. ¹⁸ Ma Au ak ko: Ho Nai Petrus ma anbi faut putun i of Au uhakeb Au tolas knino. Ma plenat nitu of kan be’u nani fa. ¹⁹ Of Au fe ko letu Plenat Neno Tunan. Sa’ le hom futun bi pah pinan i of mafutun bi neno tunan. Ma sa’ le hom sefi bi pah pinan i of masefi bi neno tunan." ²⁰ Oke te Yesus antal In asimo lasi sin he nati’ kais sin an etun neu es nak In Kesel Afetin kun. ²¹ Na’ko tomas nane Yesus na’uab neu In asimo lasi sin nak In mes he nao neu Yerusalem. Ma of In ansutai mane’at naek na’ko amnasit sin ma ana’ lasi fuat nakaf sin ma Ahin Sulat sin. Of namate In, mes bi neno tenu of In anfen anfan. ²² Mes Nai Petrus anhel Yesus nem neu In aon bian ma nakain nak, "Uisneno, so mak Uisneno naskotun lasi nane! Lasi nane kais anbol neu Ko, Uisneno." ²³ Mes Yesus naklelon ma nak neu Nai Petrus, "Muskot mu’ko i Nitu. Kaisa musenip Kau. Fun ho ka mutenab fa sa’ le Uisneno natenab, mes sa’ le mansian natenab." ²⁴ Oke te Yesus nak neu In asimo lasi sin, "Atoni le he natuin Kau, in mes natotan in aon. Oket anloi in hau nehe ma natuin Kau. ²⁵ Fun atoni le anlomi he nahoni in monin, of naneku in monin. Mes atoni le naneku in monin natuin Au kanak of napeni in monin. ²⁶ Alekot sa’ neu atoni le he napeni pah pinan ok-oke mes in naneku in monin? Ai nabe’i hen seka in monin neki sa’ es ka? ²⁷ Fun Anmone Pah To nok ahake neno tunan sin of neman anbi In Amaf In apinat. Bi leku nane of In antoeb ale atoni natuin sin mo’et. ²⁸ Au ak ki: Na’ko ala ki le him hake ambi i anmu’i atoni le of ka naben fa maten, nahunun sin nit Anmone Pah To ankoenon nem on Kesel anbi In Plenat."

¹ Fun neno ne namsopun te, Yesus nok Nai Petrus, Nai Yakobus ma in olif Nai Yohanes sin ansae neu nu’af amnanut mese. Bi nane sin anmesen. ² Oke te Yesus human nabaina anbi sin matan. In human anpin onle manas ma In bael pake muti nalim onle meusine. ³ Naskek onane sin nit Nai Musa ma Nai Elia namolok nok Yesus. ⁴ Nai Petrus nak neu Yesus, "Uisneno, alekot neu kai bi bale i. Bait Hom lomi, mautu he au uhakeb um-ume tenu anbi i; es neu Uisneno, es neu Nai Musa, ma es neu Nai Elia." ⁵ Ma Nai Petrus fe namolok onane te, nipu apinat nane an amu sin ma sin nen hanaf na’ko nipu nane nak, "I Au Anmone neka, le Au lomi ani, mituin nai neu In." ⁶ Leka In asimo lasi sin nen hanaf nane te, sin ansukbok neu nain ma sin namtaun. ⁷ Mes Yesus nem neu sin ma anpo’ sin ma nak, "Him fen nai, kais mimtau!" ⁸ Ma leka sin naiti sin nakan, sin kan nitaf es al Usif Yesus anmes. ⁹ Leka sin ansanu na’ko nu’af nane, Yesus anba’an sin, "Kais him etun mnitas i neu es, nahunun nafena Anmone Pah To na’ko amates." ¹⁰ Oke te In asimo lasi sin natan neu Yesus nak, "Kalu onane nansa Ahin Sulat sin nak Nai Elia mes he nem nahunu ka?" ¹¹ Yesus natae, "Namneo Nai Elia of nem ma naleko nafani ale sa’. ¹² Mes Au ak ki: Nai Elia nem nalalien mes sin ka nahinef, ma sin anmo’e neun sa’ le sin anlomi. Onane amsa Anmone Pah To of ansutai mane’at natuin sin." ¹³ Tomas nane Yesus asimo lasi sin nahinen nak In na’uab nane antom neu Nai Yohanes Aslanit. ¹⁴ Leka Yesus ma asimo lasi sin anfanin neu to amfaun nane, atoni mese nem neu Yesus ma nabes anbi Yesus matan, ¹⁵ ma nak, "Uisneno, mumnau fa au anah. In men auma, ma in menas nane matani. Fe-fe’at anmof neu ai, ma fe-fe’at anmof neu oe nok. ¹⁶ Afi Au eki neu Ho asimo lasi sin, mes sin ka naleko nani fa." ¹⁷ Oket Yesus nak, "Hi batan ka apalsait ma aseket ki. Au he umaika ok ki talan te leka ka? Au he seusaban ki talan te leka ka? Meki anah nane nem neu i." ¹⁸ Yesus anmahek ai nabinan Nitu nane ma anlelu hen poi na’ko anah nane. Ma anah nane naleko bi leku nane amsa. ¹⁹ Nalali te Yesus asimo lasi sin nem neun ma leka sin anmesen nokan sin natan Yesus nak: "Nansa es hai ka mibe’i fa hem li’u Nitu nane?" ²⁰ Mes Yesus nak neu sin, "Fun hi kam palsaif. Es nane Au ak ki: So hi mu’i nek ateb knino on bonak fuan, of hi mak neu nu’af i, mu’oni nai mu’ko bale i meu nae, -- nuaf nane of in na’oni. Katit fa sa’ esle’ hi ka mibe’i fa he mo’e. [ ²¹ Mes nitu humaf i ka nabe’i fa het li’u, so nok onen totis ma minahom.]" ²² Leka Yesus ma In asimo lasi sin nabuan anbi Galilea, In nak neu sin, "Of nana’at Anmone Pah To neu mansian sin niman. ²³ Ma sin of namate In ma bi neno tenu In of anfen anfan." Oke te In asimo lasi sin nekan antu’. ²⁴ Leka Yesus nok In asimo lasi sin nem ante Kapernaum, asimo noni poni Ume Uisneno nem neu Nai Petrus ma nak, "Hi kulu anbaen noni poni dirham nua ai kahaf?" ²⁵ Nai Petrus natae nak, "Anbaen!" Ma leka Nai Petrus antam neu ume, Yesus natan nahunun nak, "Simon, ho mutenab onme ka?" Kesel pah pinan i sin ansimo noni poni na’ko sekau ka? Na’ko sin to ai atoni anao amnemat?" ²⁶ Nai Petrus natae nak, "Na’ko atoni anao amnemat!" Yesus nak neune, "Kalu onane sin to kan baen fa. ²⁷ Mes he nati’ kais hit atfani fatu astunas neu sin, hom nao nai hem lolu ai hem tanu neu nifu. Ma ika le hom lolu muhunun, hom heke ma amfei in fefan. Ma of ho mupeni noni dirham ha anbi in fefan. Ho maiti noni nane sin ma ambaen hit nua kit noni poni neu sin."

¹ Bi leku nane asimo lasi sin nem neu Yesus ma antoti nak, "Sekau es nanae nesi bi Plenat Neno Tunan ka?" ² Yesus anboin li’ana mese ma nahakeb anbi sin atnanan, ³ oke te nak, "Au ak ki, bait hi ka mite’un fa hi nekam ma amfani on li’ana i, of hi kam tamaf meu Plenat Neno Tunan. ⁴ Fun atoni le nabaunon ma anfani on li’ana i, in es anaet anbi Plenat Neno Tunan. ⁵ Ma atoni le ansimo liana onle i anbi Au kanak, in ansimo Kau." ⁶ "Mes atoni le neki lasi keku neu li’ana i sin le anpalsai neu Kau, leko nesi atfutun fatu fole neu in to’an ma talema neu tasi. ⁷ Amle’ut neu pah pinan nok ale in lasi keku. Namneo, mes hen mu’i lasi keku, mes amle’ut neu atoni le anmo’e nani. ⁸ Leka ho nimam ai ho haem neki keku neu ko, amketu ma ampolin mani. Fun leko nesi hom tam meu honis nok nim tuka ai hae hela, na’ko anpolin natam ko neu ai maputu nok nimaf nua ma haef nua. ⁹ Ma leka ho matam neki keku neu ko, amloit mupoitan ma ampolin mani. Fun leko nesi hom tam meu honis nok mataf mese, na’ko anpolin natam ko neu ai maputu nok mataf nua. ¹⁰ Panat nai, kais miu’ab mile’un es na’ko li’ana i sin. Fun Au ak ki: Sin ahake abit neno tunan anbaisenu piut Au Ama abit neno tunan In human. [ ¹¹ Fun Anmone Pah To ankoenon nem he nahoni amnekut sin.]" ¹² "Hi mitenab onme ka? Bait anmu’i atoni mese le anmu’i bibi kase natun mese. Oket es namneku, of atoni nane anmo’e onme ka? Of in masaitan bibi kase bo’sio am sio anbi neten ma in nao he nami amnekut nane. ¹³ Ma Au ak ki, leka in napeni, tebes in amlilat neu bibi kase mese nane, nesi na’ko bo’sio am sio le ka namnekun fa. ¹⁴ Onane amsa hi Ama abit neno tunan kan lomif he nati’ es na’ko li’ana i sin namnekun." ¹⁵ "Leka ho bae anmo’e sanat, hom nao meun ma amfainek fun al hi nuana ki. Leka in nen ho fainekat nane ho mupeni mufani. ¹⁶ Mes kalu in ka nenaf ho fainekat, ho mokam teni atoni mese ai atoni nua. Fun sulat aknino an etun nak: Leka atoni nua ai tenu anfe saksi, lasi nane of namneo. ¹⁷ Kalu in ka nenaf atoni nane sin, mitam in lasi neu tolas knino. Ma kalu in ka nenaf tolas knino sin fainekat amsa, nane in onle atoni le ka nahin Uisneno ai on atoni asimo noni poni. ¹⁸ Au ak ki: Tebes sa’ le him futun bi pah pinan of mafutun bi neno tunan ma sa’ le hi mifetin bi pah pinan of mafetin bi neno tunan. ¹⁹ Ma Au ak a’teni ki: Kalu atoni nua anbi ki anbi pah pinan i nekaf mese hen toti sa’, of sin totis nane Au Ama abit neno tunan amnen nani. ²⁰ Fun bi bale me le atoni nua ai tenu sin nabuan anbi Au kanak, Au ok sin bi sin atnanan." ²¹ Nalali te Nai Petrus nem neu Yesus ma nak, "Usi, tal hae fauk au he sako au bae le in nasanab neu kau ka? Tal hae hitu ka?" ²² Yesus natae neune nak, "Kahaf! Au ak ki: Ka tal hae hitu, mes hae bo’ hitu no hitu. ²³ Fun Plenat Neno Tunan maleta onle kesel mese le hen so’i tusa nok in ate sin. ²⁴ Leka in fe anso’i onane te sin neki atoni mese nem neun le natus noni talenta nifun bo’es. ²⁵ Mes natuin atoni nane kan baen nabe’if in tusa, kesel nane anlelu he nasosa ate nane nok in fel in anah ma ale in mu’in hen baen in tusa. ²⁶ Oke te ate nane nabes neu usif ma nak, Usi, seusaban kau fe, of au baen au tusa tal natfek. ²⁷ Kesel nane nek mamun ate nane ma ansako ale in tusa sin. ²⁸ Mes leka ate nane anpoi, in nae’ku nok in aon bian ate mese le natus nokan noni dinar natun mese. In anheke in aon bian nane ma ankil in to’an ma nak, ’Baen kau ho tusa.’ ²⁹ Ate nane nabes ma nak neun: Bae, seusaban kau fe, of au baen au tusa tal natfek. ³⁰ Mes in kan lomif ma in nana’at in aon bian nane neu o’of tal anbaen nafek in tusa nane. ³¹ Leka in aon bian sin nit lasi nane te, sin nekan ansusal oke te sin an etun lasi nane neu sin kesel. ³² Kesel anlelu no’en atoni nane ma nak neune: Ho ate abulalut, au sako ale ho tusa natuin hom toti kau. ³³ Nansa ho ka mumnau fa ho bae onle au umnau ko? ³⁴ Oke te usif nato’ ma nana’at ate nane neu ahakamu’it sin, tal in nafek in tusa. ³⁵ Onane amsa of Au Ama abit neno tunan anmo’e neu ki, leka hi kam sakof hi bae in sanat meki hi nekam oke."

¹ Leka Yesus nasopu In lasi noina nane te In nasaitan pah Galilea ma naoina neu pah Yudea bi Noe Yordan panin. ² Ma to namfaun natuin Yesus ma In naleko sin anbi bale nane. ³ Ma atoni Farisi sin neman hen su’ Yesus. Ma sin natan nak, "Nabe’i ka atoni anbation nok in fe natuin lasi sa’ am sa’ ka?" ⁴ Yesus natae nak, "Ati hi kam soi fa le antui nak: In es anmo’e mansian nakakoba? In anmo’e sin atoni ma bife. ⁵ Ma In nakua a’an nak: Es nane atoni of nasaitan amaf ma ainaf ma namesbon nok in fe, tal sin nua sin anfani nesaf mese. ⁶ Onane te sin ka nua fa mes mese. Fun sa’ le Uisneno nameseb nalali, mansian ka nabe’i fa hen bati nani." ⁷ Ma sin nak neu Yesus: "Kalu onane nansa Nai Musa anlelu hen fe sul batis, leka atoni hen bation nok in fel?" ⁸ Yesus nak neu sin, "Natuin hi nekam manu’, Nai Musa anfe ki mainuan he nati’ him batiom mok hi fe. Mes nakakoba ka onfa nane. ⁹ Mes Au ak ki: Atoni le anbation nok in fe, so al lasi mapaisa, oke te in mafe nok bife bian, atoni nane in mapaisa." ¹⁰ Asimo lasi sin nak neu Yesus, "Kalu lasi malutas atoni ma bife onane leko nesi kais atmafe." ¹¹ Mes Yesus nak neu sin, "Ka ale atoni sin nahin a’at nane, al neusin le Uisneno anlek nani. ¹² Fun anmu’i atoni le kan mafe, natuin nahonis sin onane. Bian anteni kan mafe fa, fun atoni bian anmo’e sin. Ma atoni bian anteni kan mafe he nati’ nabe’i antuthae Plenat Neno Tunan. Atoni le nabe’i ansimo noina i, maut he in simo nani." ¹³ Oke te atoni sin neki li’ana neu Yesus he nati’ In na’aiti niman neu sin, ma anonen toti neu sin. Mes In asimo lasi sin nato’an atoni nane sin. ¹⁴ Mes Yesus nak, "Mifetin li’ana nane sin, kais mikain sin he nem neu Kau. Fun ale atoni le human onane sin es anfani to Plenat Neno Tunan." ¹⁵ Oke te Yesus na’aiti niman neu sin. Nalali te In nao na’ko bale nane. ¹⁶ Anmu’i atoni mese nem neu Yesus ma nak, "Kulu, au he mo’e alekot sa’ ka he upeni honis nabal-bal?" ¹⁷ Yesus natae, "Nansa hom toti neu Kau antom sa’ le naleko ka? Al mese es naleko. Mes bait hom lomi he moni, so mutuin plenat Uisneno." ¹⁸ Ma atoni nane natan neu Yesus, "Plenat le me ka?" Yesus nak, "Kais ho mumate atoni, kais ho mapaisa, kais mubak, kais mupoibom; ¹⁹ munaeb ho ama ma ho aina ma hom nek ho aom bian onle hom nek ho aom." ²⁰ Atoni munif nane nak neu Yesus, "Ale plenat nane au utuin ulali sin. Ma he lasi sa’ anteni ka?" ²¹ Yesus nak neune, "Kalu hom lomi he munokbom bi ale sa’, hom nao nai ma musosa ale ho maus. Ma ambait mani neu amamu’it sin, of ho mupeni maus bi neno tunan. Oke te ho aum ma mutuin Kau nai." ²² Leka atoni munif nane in an nen a’at nane te, in nao nok nek tu’as, fun in a’maus anaek. ²³ Usif Yesus nak neu In asimo lasi sin, "Au ak ki, tebes mafen le’uf neu atoni amu’it mese hen tam neu Plenat Neno Tunan. ²⁴ Au ak ateni neu ki, leko nesi bikase paha snaen mese antam natuin anet in luken, na’ko atoni amu’it mese hen tam neu Plenat Uisneno." ²⁵ Leka asimo lasi sin nen uab nane te sin namkakan ma nak, "Kalu onane, of sekau es napeni honis ka?" ²⁶ Usif Yesus nail sin ma nak, "Neu mansian lasi nane ka nabe’if, mes neu Uisneno ale sa’-sa’ nabe’i." ²⁷ Oke te Nai Petrus natae ma nak neu Yesus, "Uisneno, hai misaitan ale sa’-sa’ ma mituin Ko. Ma of hai mipeni sa’ ka?" ²⁸ Yesus nak neu sin, "Tebes, bi neno le nafe’un neno tunan ma pah pinan Anmone Pah To of antoko anbi In toko apinat. Bi neno nane, hi le mituin Kau of him toko amsa bi toko bo’es am nua hem lefi uf Israel bo’es am nua sin lasi. ²⁹ Ma ale atoni le nasaitan in ume, in olif tataf, ai in fetof, amaf in ainaf, anhin ai in lele natuin Au kanak, of in ansimo nafani kuni peni natun mese ma of napeni honis nabal-bal. ³⁰ Mes atoni namfaun le nahunun of anfani amunit, ma amunit of anfani ahunut."

¹ "Fun Plenat Neno Tunan onle uim tuaf mese, le in anpoi nok-noka he naim atoni ameput neu in lele tanu’an sena. ² Leka in malomis nalali nok atoni ameput sin neu baen neno mese dinar mese, in anleul sin he nao neu in lele tanu’an sena. ³ Oni leku sio onane in anpoi anteni ma in nitan teni atoni bian le anhake luman bi masa. ⁴ Ma in nak neu sin: Him nao nai he mepu bi au lele tanu’an sena, of au seb ki nok alekot. Oke te sin naon. ⁵ Oni leku bo’es am nua ma leku tenu neno anmabe in poin ten me anmo’e onle lelo. ⁶ Oni leku nima neno anmabe in poin teni ma napeni atoni bian oket in nak sin: Nansa’ es neno mnanu i hi mioinsom lum-luman ka? ⁷ Ma sin nak neune: Fun kan mu’if atoni le hen seb kai. Ma in nak neu sin: Him nao nai amsa meu au lele tanu’an sena. ⁸ Leka neno hen faien, lele tuaf nane nak neu in manlol: Mo’en ameput sin ma ambaen sin, na’ko atoni le antam namuni talan te atoni le antam nahunu. ⁹ Oke te ale atoni le sin anmepu oni bi leku nima sin neman. Ma sin ansimo esat dinar mese. ¹⁰ Oke te le atam ahunut sin neman. Sin natenab nak of sin ansimo nesin. Mes sin amsa esat ansimo dinar mese. ¹¹ Leka sin ansimo nalali te, sin namunu neu lele tuaf nane nak: ¹² Ameput le antam namunin sin mepun leku mese ah. Mes ho munesa sin nok kai le hai mepu mafena neno mnanu es ma amsutai manas maputu. ¹³ Mes lele tuaf nane natae sin es nak: Bae, au ka usanab fa neu ko. Hit malomi talali tak neno mese dinar mese ai? ¹⁴ Amsimo ho ini ma amnao nai. Au lomi he fe neu atoni le antam namuni i papmese onle ho. ¹⁵ Ait au ka mu’if mainuan ka he mo’e au maus natuin au lomik ka? Ai ho nekam namen neu kau, natuin au mo’e alekot ka? ¹⁶ Onane atoni le namuni of anfani ahunut ma le ahunut of anfani amunit." ¹⁷ Leka Yesus he nao neu Yerusalem, bi lanan atnanan In boin In asimo lasi sin anmes ma nak neu sin: ¹⁸ "Tomas i hit het nao neu Yerusalem. Ma of nana’at Anmone Pah To neu ana’ lasi fuat nakaf sin ma Ahin Sulat sin, he namate. ¹⁹ Ma of sin nana’at In neu atoni le ka nahin Uisneno, he nati’ sin na’akan, anhamu’i ma napeti In. Mes bi neno tenu In of anfen anfani." ²⁰ Oke te Nai Zebedeus in fel nok in anhin nem neu Yesus. Oke te nabes bi Yesus matan hen toti sa’ es na’ko Yesus. ²¹ Yesus nak, "Hom lomi sa’ ka?" In natae nak, "Au lomi he nati’ au anhin nuasin antokon bi Ho plenat leka Hom sae Usif. Es anbi Ho nukum ne’u es anbi Ho nukum ali’." ²² Mes Yesus natae nak, "Hi ka mihinef sa’ le him toti. Nabe’i ka hi minu klas mninut le Au inu?" Ma sin nak, "Hai mibe’i." ²³ Usif Yesus nak neu sin, "Au klas mninut of hi minu. Mes lasi hem toko bi Au aok bian ne’u ai Au aok bian ali’, nane Au ka ube’i fa he fe. Bale nane of anfe nani neu ale atoni le Au Ama naloitan nalali neu sin." ²⁴ Leka asimo lasi bo’es sin nen lasi nane te, sin nato’an asimo lasi nua in nane. ²⁵ Mes Yesus anboin sin ma nak: "Hi mihin mak, ale ana’ plenat naplenat sin to nok to’as ma maunu ma ale anaet sin nanaoba sin kuasat nok matane neu sin. ²⁶ Mes anbi ki ka on fa nane. Atoni le hen fani anaet anbi ki, so in anfani hi atuthaes, ²⁷ ma atoni le hen fani ahunut anbi ki so in anfani hi ate. ²⁸ Onle Anmone Pah To amsa; In koenon nem ka neu he napeni tuthaes mes In koenon nem hen fani atuthaes. Ma nana’at In monin he nafetin atoni amfaut sin." ²⁹ Ma leka Yesus nok In asimo lasi sin anpoi na’ko Yerikho to amfaun nem natuin In. ³⁰ Anmu’i atoni matfolo nua sin antok anbi lanan ninen. Leka sin nen Yesus nao anfin sin anbai nak, "Usif, Nai Daud sufan, mumnau kai fe!" ³¹ Mes to amfaun nane nakain sin he nati’ sin natena. Mes sin anbai nahelnok, nak, "Usif, Nai Daud sufan, mumnau kai fe!" ³² Oke te Yesus anhake ma no’en sin nak, "Him lomi he Au mo’e sa’ neu ki ka?" ³³ Ma sin natae nak, "Usif, haim lomi he mit." ³⁴ Fun Yesus namnau sin oke te In anpoh sin matan. Ma bi leku nane amsa sin nit oke te sin natuin Yesus.

¹ Leka Yesus ma In asimo lasi sin anhaumak Yerusalem sin nem ante Betfage bi Tubu Zaitun. Nalali te Yesus anlelu In asimo lasi nua ² ma nak, "Him nao nai meu kuan le anbi hi matam nane. Ma of hi mipeni bikase luke mnanu ainaf mese mafutun nok in tipun. Him sefi sin ma meki sin nua sin nem neu Kau. ³ Ma kalu anmu’i atoni le anhosen ki, hi mak neune: Uisneno hen pake. Of naskek In anfe nani neu ki." ⁴ Lasi nane anbol he nati’ natisi a’an le Mafefa knino an etun nani nak, ⁵ "Him etun nai neu feotnai Sion: Kiso, ho Kesel nem neu ko, In nek amahoet ma antunon neu bikase luke mnanu mese, bikase luke mnanu saeba mese le fe tipu." ⁶ Oke te asimo lasi nane sin naon ma anmo’e sa’ le Yesus anba’an neu sin. ⁷ Ma sin neki bikase luke mnanu ainaf nok in tipun. Oke te sin ankap nani neki sin bael pake. Ma Yesus antunon neun. ⁸ Atoni namfaun le ka maso’ik fa, sin na’ben sin bael pake bi lalan, atoni bian sin an ote hau no’ ma anlasak bi lalan. ⁹ Ma to amfaun le nahunun Yesus ma le natuin In sin naba’, nak, "Moni Nai Daud Anmone, antek alekot neu In le ankoenon nem nok Uisneno tunan In kanan, pules Uisneno Amnanut Afin-finit bi bale alatan!" ¹⁰ Ma leka In antam neu Yerusalem, ale to anbi kot nane nabeko ma sin natan nak, "Sekau ka es atoni i?" ¹¹ Ma atoni amfaun nane sin natae nak, "I Mafefa Knino Nai Yesus na’ko Nazaret bi pah Galilea." ¹² Oke te Yesus antam neu Ume Uisneno, ma anmli’u napoitan ale atoni le nasosa anbi po’an Ume Uisneno. Yesus aneusbai ale mei le antukal noni anbin ma ale atoni sini toko le nasosa kol ot kase anbin ¹³ ma nak neu sin, "Antui nani anbi Sulat Knino nak: Uisneno nakua a’an nak, ’Au ume of antek nani ume onen totis.’ Mes hi mo’e mani anfani nuat asikat." ¹⁴ Ale atoni matfolo ma hae hela sin nem neu Yesus bi Ume Uisneno ma In naleko sin na’ko sin menas. ¹⁵ Mes leka Ana’ lasi fuat nakaf sin ma Ahin Sulat sin nit ale lasi amkakat le Yesus anmo’e, ma ale li’ana le naba’ bi Ume Uisneno nak, "Moni Nai Daud Anmone!" Sin alsin nato’ ¹⁶ ma nak neu Yesus, "Hom nen li’ana sin nak sa’ ka?" Yesus nak neu sin, "Au nen. Hi fe kam soi fa Sulat Knino le hanan nak, Na’ko ale ana’ me ma li’ana le fe ansusu, sin fefan Ho muloitan han pules amneot?" ¹⁷ Oke te Yesus nao nasaitan sin ma anpoi na’ko kot nane neu Bethania ma antup anbi nane. ¹⁸ Leka fe nok-nok ana’ Yesus anfani nem neu kot, In namnah. ¹⁹ Ma Yesus nit bubuk u’mese anhaumak lalan, oke te In nao neun mes ka napenif sa’ anbine al non anmes. Oke te Yesus nak neu hau nane: "Of ho ka mufua amtenif talan te nabal-bal." Ma bi leku nane amsa bubuk nane anmate. ²⁰ Leka sin nit lasi nane te sin namkakan ma nak: "Bubuk nane naskeket anmeot onme ka?" ²¹ Usif Yesus natae nak: "Au ak ki, kalu him palsai ma hi nekam ka naoni fa, nabe’i hi mo’e sa’ le Au mo’e ulali neu bubuk nane. Ma ka al fa lasi nane; mes nabe’i hi mak neu nu’af i naoni ma mumoftom nai meu tasi," lasi nane of anbol. ²² Ma sa’ le him toti bi onen totis nok palsait, of him simo mani." ²³ Nalali te Yesus antam neu Ume Uisneno ma nanoina anbi nane. Oket Ana’ lasi fuat nakaf sin nok ale amnasit to Yahudi sin nem ma natan neu Yesus nak, "Ho mo’e ale lasi nane meki kuasat sa’ ka? Ma sekau es anfe Ko kuasat nane ka?" ²⁴ Yesus natae sin nak, "Au amsa he utan ki. Ma kalu hi mitae, of Au uton ki, Au mo’e ale lasi nane eki kuasat sa’. ²⁵ Nai Yohanes Aslanit le naslani ki na’ko me ka? Na’ko Uisneno ka ai na’ko mansian?" Oket sin na’uaben nak, "Kalu hit tak na’ko Uisneno, of In nak neu kit, kalu onane nansa’ hi kam palsai fa neune ka? ²⁶ Mes kalu hit tak: Na’ko mansian, hit tamtau neu atoni amfaun, fun ale atoni sin nak Nai Yohanes in Mafefa knino kun." ²⁷ Es nane sin natae Yesus nak, "Hai ka mihinef." Ma Yesus nak neu sin nak, "Onane Au amsa ka uton ki fa, Au mo’e ale lasi i eki kuasat sa’." ²⁸ "Mes hi mitenab onme antom lasi i: Atoni mese anmu’i anmone nua. In nao neu anmone anaet ma nak: Anah, neno i hom nao he mepu bi lele tanu’an sena. ²⁹ Anah nane natae nak: Leko, am. Mes in ka naof. ³⁰ Oke te atoni nane nao neu in anmone kliko ma nak neune onane amsa. Ma anah nane natae nak: Au ka lomif. Mes namuni te in natofon ma in nao. ³¹ Sekau na’ko sin nua sin ka le anmo’e in amaf in lomin ka?" Sin natae nak, "Anah amunit." Yesus nak neu sin: "Au ak ki, namneo asimo noni poni sin ma bife a’paisa sin of antam nahunun ki neu Plenat Uisneno. ³² Fun Nai Yohanes Aslanit nem hen lekan ki lanan amneot mes hi kam palsai fa neun. Mes asimo noni poni sin ma bife a’paisa sin anpalsai neun. Ma maski hi mit milali lasi nane, hi ka mitofom fa ma kam palsaif." ³³ "Him nen amteni lasi leta bian le nak: Anmu’i pah tuaf mese le anmepu lele tua min kase. In anbah lele nane funam natef. Oke te in anhani nopu neu he naes tanu’an sena in oen ma nahakeb pana’ ai haklelo pao moa anbi lele nane. Oke te in nana’at lele nane neu ameput sin ma in nao neu pah bian. ³⁴ Leka neno abut anhaumak in lelu in ate sin nao neu ameup lele nane hen simo in lele afan. ³⁵ Mes ameup lele nane sin anheke in ate sin ma anbiso bian, namate, bian ma anpoli bian neki fatu. ³⁶ Nalali te pah tuaf nane anlelu ate bian namfau nesin le ahunut sin mes sin anmo’e sin papmese onle sin bian amsa. ³⁷ Oke te in anlelu in anmone nao neu sin ma nak: Of sin namtausan au anmone. ³⁸ Leka ameup lele sin nit pah tuaf nane in anmone te sin ma’uaben es nok es nak: Ba’is i asimo bale mnasi, aim he tamate, he nati’ hit atpal kuk in bale mnasi nane. ³⁹ Oke te sin anheke ma anpolin napoitan neu kotif, ma namate in. ⁴⁰ Leka lele tuaf nane in nem, of in anmo’e sa’ ka neu ameup lele nane sin ka?" ⁴¹ Sin natae neu Yesus nak, "Of in namate ale atoni abulalut nane sin ma in nana’at lele nane neu ameup lele bian; le of nana’at in lele afan neun bi neno abut." ⁴² Usif Yesus nak neu sin, "Hi fe kam soi fa ka Sulat Knino le naton nak: ’Fatu le ameup ume anpolin nani, anfani neu fatu sukit, lasi nane anbol na’ko Uisneno, mo’et sanmakat mese bi hit matak.’ " ⁴³ "Es nane, Au ak ki, nak of naiti Plenat Uisneno na’ko ki ma of anfe nani neu uf mese le nalile Plenat nane in fuan. [ ⁴⁴ Ma atoni le anmofu neu fatu nane, of in naklati ma fatu nane antutu antoman atoni me of naskuku nfin.]" ⁴⁵ Leka ana’ lasi fuat nakaf sin ma atoni Farisi sin nen Usif Yesus In lasi leta nane, sin nahin nak Yesus na’uab antom sin. ⁴⁶ Ma sin nami hen heke Yesus, mes sin namtausan atoni amfaun; fun atoni amfaun nane sin nak Yesus Mafefa knino kun.

¹ Oke te Yesus na’uab anteni neu sin neki lasi leta nak: ² "Plenat Neno Tunan maleta onle kesel mese le hen mo’e tolas mafet mamonet neu in anmone. ³ Kesel nane anlelu in ate sin hen hone ale atoni le anhok nani sin he neman neu tolas mafet mamonet nane. Mes ale atoni nane sin kan lomi fa he neman. ⁴ In anlelu anteni ate bian ma nak: Hi mak neu ale atoni le afi anhok sin nak: Au ubalab ulali tolas nane, Au lolo ulali au bia keso ma au mu’it apokat sin. Ale sa’-sa’ namtis, aim nai meu tolas mafet mamonet i. ⁵ Mes ale atoni nane sin kan lae nani fa. Bian sin nao neu sin lele, bian neu sin bale sosa; ⁶ ma bian anheke ate nane sin, oke te anhamu’i sin ma namate sin. ⁷ Kesel nane nato’, oket anlelu in solalus sin he namate ale abulalut nane sin ma not nain sin kot. ⁸ Nalali te in nak neu in ate sin: Tolas mafet mamonet naloitan nalali, mes atoni le afi anhok sin, kan tam fa ota neu tolas nane. ⁹ Es nane him nao nai meu ale lalan tefkin ma amhok ale atoni le hi mieku mokan he neman neu tolas nane. ¹⁰ Ma ate sin anao ma nabuab ale atoni le sin nae’ku nokan bi lalan, amolemut ma alekot; talan te ke’an tolas mafet mamonet nane nahenu nok amnemat sin. ¹¹ Oke te Kesel nane ankoenon antam he na’eku nok ale amnemat sin. In kius nit atoni mese le kan pakef bael tolas. ¹² Kesel nak neune: Bae, leka me hom tam aum meu i ho kam pakef bael tolas neu sa’ ka? Mes atoni nane in ela. ¹³ Oke te Kesel nak neu in ate sin: Him futu nai in haen ma in niman ma anpolin neu bale mesokan. Bi nane of kaet ma nisi kilof. ¹⁴ Fun no’en namfaun, mes anbeti sin fua fauk." ¹⁵ Nalali te atoni Farisi sin naon ma anmalomis hen su’ Yesus neki tanas mese onme. ¹⁶ Ma sin anlelu sin asimo lasi nok atoni Herodian natan Yesus nak, "Kulu, hai mihin Ho atoni amneot Ko. Ho munoina lalan Uisneno nok amneot. Ma Ho ka mumtausan fa sekau amsa, fun Ho kam betif humaf. ¹⁷ Ho muton kai fe Ho mutenab onme: Het baen noni poni neu Kesel ka ai kahaf?" ¹⁸ Mes Yesus nahin sin tenab amle’ut nane oket In nak neu sin, "Nansa’ es hi hem su’ Kau ka, hi atoni asafanut ki? ¹⁹ Milile Kau noni le him pake neu hem baen noni poni." Oke te sin neki noni dinar mese neu Yesus. ²⁰ Yesus natan sin nak, "Sekau in human ma in tuis es i ka?" ²¹ Sin natae nak, "Kesel in human ma in tuis." Oke te Yesus nak neu sin, "Him fe nai neu Kesel sa’ le hi hem fe neu Kesel, ma neu Uisneno sa’ le hi hem fe neu Uisneno." ²² Leka sin nen lasi nane te sin namkakan ma sin nao nasaitan Yesus. ²³ Bi neno nane atoni Saduki sin fauk, le sin nak katit fa amates anfen anfan sin neman neu Yesus. Sin antoti Yesus nak, ²⁴ "Kulu, Nai Musa nak: Leka atoni mese anmate mes kan mu’if anah, in olif mes anmafe nok in fel nane hen talu sufan neu in tataf. ²⁵ Mes anbi kai hai atoni hitu maoil tatan. Le anaet anmafe, oke te anmate. Ma natuin in kan mu’if anah, in nasaitan in fel neu in olif. ²⁶ Onane amsa in olif le natuine ma es anteni talan te sin hitu sin. ²⁷ Ma namuni te, bifel nane anmate. ²⁸ Neu, leka bi neno amates anfen anfan, na’ko atoni hitu nane of sekau es anfani bife nane in mone ka? Fun afi sin alsin anmafe nok bife nane." ²⁹ Usif Yesus natae sin nak, "Hi mitenbam san, fun hi ka mihinef Sulat Knino ma Uisneno In kuasat! ³⁰ Fun bi neno amates anfen anfan of sin kan mafe ma kan mamone anteni fa mes sin monin on ahake abit neno tunan. ³¹ Mes hi kam soi fa sa’ le Uisneno nakua a’an antom atoni amates anfen anfan ka? Uisneno nakua a’an nak: ³² ’Au le i Nai Abraham in Uisneno, Nai Ishak in Uisneno ma Nai Yakub in Uisneno.’ In ka Uisneno atoni amates, mes Uisneno atoni amonit!" ³³ Ale atoni le sin natnin lasi nane sin nekan ansanmak neu In lasi noina nane. ³⁴ Leka atoni Farisi sin nen nak Yesus an ek nan atoni Saduki sin, oke te sin nabuan. ³⁵ Ma atoni mese na’ko sin, atoni Ahin Sulat, antoti hen su’ Usif Yesus nak, ³⁶ "Kulu, plenat me es abainesit bi Plenat Knino ka?" ³⁷ Yesus natae nak, "Hom nek Uisneno, meki ho nekam oke, ho smanam oke, ma ho hinem oke. ³⁸ Nane plenat abainesit ma ahunut kun. ³⁹ Ma plenat nono nua le namnes nokan esle’: Hom nek ho aom bian onle hom nek ho aom. ⁴⁰ Bi plenat nono nua in nane, Plenat Knino ma Mafefa knino sin sulat nau’bon anbin." ⁴¹ Leka atoni Farisi sin fe nabuan, Yesus natan sin nak, ⁴² "Hi mitenab antom Kesel Afetin onme ka? Sekau In sufan ka?" Sin nak neu Yesus, "Nai Daud sufan." ⁴³ Yesus nak neu sin, "Kalu onane, nansa’ es natuin Smanan Knino in mepu Nai Daud antek In nak: In Kesel Afetin, leka in nak: ⁴⁴ Uisneno nakua a’an neu au Usif: Hom tunom nai ambi Au aok bian ne’u talan te Au tao ho musu sin bi Ho haem nupun. ⁴⁵ Es nane kalau Nai Daud antek In, nak In Kesel Afetin, leka me In anfani Nai Daud sufan ka?" ⁴⁶ Katita tenif atoni mese he natae Yesus. Ma na’ko neno nane katita tenif atoni mese amsa’ he natan sa’ neu Yesus.

¹ Oke te Yesus na’uab neu atoni amfaun ma neu In asimo lasi sin nak, ² "Ahin Sulat sin ma atoni Farisi sin antok anbi Nai Musa ini toko. ³ Es nane hi mitun ma anmo’e sa’ le sin nanoina nani neu ki. Mes kais mituin sa’ le sin anmo’e fun sin kan mo’ef sa’ le sin nanoina. ⁴ Sin anfutu baut mafena, oket nasaeba neu atoni sin hanun, mes sin kan loi nitef. ⁵ Ale mepu le’ sin anmo’e he nati’ atoni sin nit, sin anpake tani onen totis mainuab ma namnanub sin sobalu betkone in fukan. ⁶ Sin anlomi hen tokon bi bale makana bi tolas ma antokon bi toko makana bi ume buat. ⁷ Sin anlomi he atoni anhosen sin bi ume masa’ ma antek sin nak, ’Anoni.’ ⁸ Mes hi, kais antek ki nak ’Anoni,’ fun hi Anoni mese ma hi ale ki mabae es nok es. ⁹ Ma kais him tek atoni mese bi pah pinan i mak ’Amaf,’ fun hi Ama mese esle’ In abit neno tunan. ¹⁰ Kais antek ki amsa nak ’Nakaf,’ fun hi Nakaf mese esle’ Kesel Afetin. ¹¹ Atoni le hen fani anaet anbi ki mes anfani hi atuthaes. ¹² Ma atoni le nanaeb in aon of nabaun nani ma atoni le nabaun in aon of nanaeb nanai. ¹³ Amle’ut neu ki, Ahin Sulat ma atoni Farisi. Hi atoni asafanut, fun him es mis eno Plenat Neno Tunan bi atoni sin matan. Hi kam lomif hem tam mes hi misenip atoni le anlomi hen tam. [ ¹⁴ Amle’ut neu ki, Ahin Sulat ma atoni Farisi, hi atoni asafanut, fun hi misik bife banu sin ume; ma him tobe hi mo’et amle’ut meki onen totis amnanut. Es nane of hi mipeni kasat mafena.] ¹⁵ Amle’ut neu ki, Ahin Sulat ma atoni Farisi, hi atoni asafanut, fun him lak tasi ma misopu pah meto; he mite’un atoni mese neu he natuin ki. Mes leka in na’teunon hi mo’e mani neu atoni le hen tam neu ai maputu in balan; le in bulalun kuni nua anesin ki. ¹⁶ Amle’ut neu ki, ale nakaf afolot le na’uab nak: Ansup neki Ume Knino, supat nane ka namneof. Mes amsup neki Ume Knino in noni mnatu supat nane namneo. ¹⁷ Hi atoni amonot ma atoni matfolo, sa’es anbainesi, mnatu ka, ai Ume Knino le naknino mnatu nane? ¹⁸ Ansup neki baki fuat, supat nane ka namneof. Mes ansup neki fuat le nabelkon anbi baki fuat, supat nane namneo. ¹⁹ Hi atoni afolot, sa’ es anbainesi, fuat ka ai baki fuat le naknino fuat nane? ²⁰ Es nane atoni le ansup neki baki fuat, in ansup neki baki fuat ma ale sa le anbine amsa. ²¹ Ma atoni le ansup neki Ume Knino, in ansup neki Ume Knino ma neki Uisneno amsa le namaika anbine. ²² Ma atoni le ansup neki neno tunan, in ansup neki Uisneno In mau toko ma neki Uisneno amsa le antunon anbine. ²³ Amle’ut neu ki, ale Ahin Sulat ma atoni Farisi, hi atoni asafanut, fun hi neki tonene, sip ayo ma onatlao in aobia bo’es. Mes lasi abainesit bi Plenat Knino hi kam lae mani fa, es le amneot, amnaut ma aki’at. Hi minaoba tukan mes ka moki fa tukan bian. ²⁴ Hi atopus afolot, him tai basin le anbi hi bale mninut mes him olo bikase paha snaen le anbin. ²⁵ Amle’ut neu ki, Ahin Sulat ma atoni Farisi, hi atoni asafanut, fun him fase klas ma pika sin kotin mes in nanan nahenu nok asikat ma apalu’. ²⁶ Hoi atoni Farisi afolot, amfase muhunun klas in nanan, in kotin amsa of naknino. ²⁷ Amle’ut neu ki, Ahin Sulat ma atoni Farisi, hi atoni asafanut, fun hi onle naukel malape muti. In kotin nane namas mes in nanan nahenu nok nuif ma punu. ²⁸ Onane amsa hi kotim nane amneot neu atoni sin matan; mes hi nanam nahenu nok asafanut ma tanhais. ²⁹ Amle’ut neu ki, Ahin Sulat ma atoni Farisi, hi atoni asafanut, fun hi mihakeb Mafefa knino sin naukel ma mimasab atoni anmo’e alekot sin fatu taka. ³⁰ Ma hi mak: Bait afi hai moni bi hai babfin sin batan, of hai ka mimesbom fa mok sin he mimate Mafefa knino sin. ³¹ Nok lasi nane him saksi kim hi aom mak afi le namate Mafefa knino sin sufan esle’ hi. ³² Ma hi es mitis hi babfin sin mo’et asanat nane amsa. ³³ Hi kauna ki, hi kauna sufan ki. Hi he mifetin hi aom na’ko ai maputu in balan onme ka? ³⁴ Es nane, kiso, Au sonu ki Mafefa knino sin, atoni ahinet sin ma Ahin Sulat sin. Of hi mimate bian ma hi mipeti bian ma him hamu’i bian bi ume buat ma him li’u bian na’ko kot es neu kot bian. ³⁵ Es nane of him sutai atoni le ka nasanab sin na’ na’ko Nai Habel atoni anmo’e alekot nane talan te Nai Berekhya in anah Nai Zakaria, le hi mimate mani anbi Ume Knino ma baki fuat sin atnanan. ³⁶ Au ak ki: Ale atoni batan i of ansutai ale lasi nane." ³⁷ "Yerusalem, Yerusalem, le ho es mumate Mafefa knino sin ma anpoli ale atoni le ansonu sin neu ko neki fatu. Hae fauk au lomi he ubuab ho anhin onle maun ainaf anu’bul in an ini bi in ninen aspokon mes ho kam lomif. ³⁸ Mail, of nasaitan ume i he luman kun. ³⁹ Ma Au ak ki: Na’ko tomas i of hi ka mitam teni Kau talan te hi mak: Alekot neu In le nakoenon nem anbi Uisneno In kanan."

¹ Oke te Yesus anpoi na’ko Ume Uisneno ma In nao kun. Ma In asimo lasi sin neman ma anlul neu Ume Uisneno nane. ² Yesus nak neu sin, "Hi mit ale nane sin ka? Au ak ki, of katit fa fatu mese anbi i le nabelon nabala anbi fatu bian. Of anpukai nani." ³ Leka Yesus antok bi Tubu Zaitun, In asimo lasi sin neman neun he na’uab nokan anmes. Sin nak, "Muton kai fe, leka lasi nane of anbol. Ma neno Ho hem munoebom aum ini takan sa’ ka ma neno hatas amsoput ini takan sa’ ka?" ⁴ Yesus natae sin nak, "Panat nai, he nati’ kais anmu’i atoni le nasekeb ki. ⁵ Fun of anmu’i atoni namfaun neki Au kanak ma nak: Au Kesel Afetin Kau ma of sin nasekeb atoni namfaun. ⁶ Of him nen slutuf ma beno makenat mes kais mimtau. Fun ale lasi nane mes anbol mes nane fe ka neno amsoput fa. ⁷ Fun uf es of anmaken nok uf bian ma pah es of anma’aut nok pah bian. Amnahas ma nainunus of anbol bi me-me. ⁸ Mes lasi nane al mane’at nau’bon neu batan fe’u le he nem. ⁹ Bi tomas nane of nana’at ki neu hamu’it ma of namate ki. Ma ale to of na’akan ki natuin Au kanak. ¹⁰ Bi tomas nane of atoni namfaun natotan Uisneno ma es of nana’at es ma es ansunan es. ¹¹ Mafefa moel namfaun of anbol ma nasekeb atoni namfaun. ¹² Ma natuin lasi maufinu ansato, atoni namfaun sin lasi manekat namneku. ¹³ Mes atoni le nalan tal namsopun of namonib nani. ¹⁴ Ma Plenat Neno Tunan in lasi knino i, of an etun nani neu paha pinan on saksi neu ale to. Oke te neno hatas amsoput." ¹⁵ "Leka hi mit Amle’ut le he nale’un anhake anbi bale knino natuin Nai Daniel in sulat -- ale atae sulat hen panat nani -- ¹⁶ ale atoni abit pah Yudea sin mes naen neu neten. ¹⁷ Atoni le anbi ume penen kais ansanu he naiti bale na’ko in ume. ¹⁸ Ma atoni le anbi lele kais anfani he naiti in bael pake. ¹⁹ Amle’ut neu bife le na’apu ai le nasusu anah bi neno nane. ²⁰ Amonen toti nai, he nati’ bi neno le hi maen kais antom nok neno mainikin ai nok Neno Snasat. ²¹ Fun bi neno nane of hamu’it anaek anbol onle fe kan bol nitaf na’ko neno le anmo’e pah pinan tal neno i ma le of kan bolan tenif. ²² Ma kalu Uisneno ka na’palan fa in neno of katit fa atoni mese hen moni. Mes natuin In to mabeti Uisneno of na’palan neno nane. ²³ Bi tomas nane kalu atoni nak neu ki: Kiso, Kesel Afetin es i, ai Neno Anan es nane, kais him palsai. ²⁴ Fun Neno Anan moel ma mafefa knino moel of anbol. Of sin anmo’e taka ma lisan matane ma lasi amkakat namfau, talan te sin nasekeb ale atoni mabeti sin amsa. ²⁵ Mimnau, fun Au uton ulali neu ki. ²⁶ Es nane, leka atoni nak neu ki: Kiso In anbi mnela hufui, kais him nao meu nane. Ai mak: Kiso In anbi ke’an nanan, kais him palsai. ²⁷ Fun onle limat anpin na’ko neno saet ma in pinan talan te neno Tes, onane amsa Anmone Pah To in neno he nanoebon nem. ²⁸ Fun punu anbi me te, kol ka’ sin nabuan anbi nane." ²⁹ "Namuni na’ko neno hamu’it naek nane, manas namesok ma funan kan sinek fa. Ale afkun of anmofu na’ko neno tunan ma ale kuasat bi neno tunan of nabeko. ³⁰ Bi tomas nane of sin nit Anmone Pah To In taka anbi neno tunan. Ma ale to pah pinan of sin ankae. Of sin nit Anmone Pah To nanoebon nem anbi nope in fafon nok In kuasat ma In apinat naek. ³¹ Ma of In anlelu ahake neno tunan sin anpu’ knit ma to’is ma sin nabuab ale to mabeti na’ko anin mata’ ha’, na’ko neno tukan bian neu tukan bian. ³² Minoina nai na’ko lasi leta antom bubuk. Leka in atlaen nane makuke ma non anbutu, hi mihin mak faoknais anhaumaken. ³³ Onane amsa leka hi mit ale taka i sin, mihin nai, ma In neno anhaumaken bi ume enon. ³⁴ Au ak ki: Batan i of kan finif, nahunu na’ko ale lasi i hen bol. ³⁵ Neno tunan ma pah pinan of anfin, mes Au a’ak of kan finif. ³⁶ Mes neu neno ma tabu nane, katit fa atoni mese he nahin, ahake neno tunan amsa kahaf, Uisneno Anmone amsa kahaf, al Ama anmes es nahine." ³⁷ "Fun on afi batan Nai Nuh onane te papmese bi neno, le Anmone Pah To he nanoebon nem. ³⁸ Fun on afi sin bi batan nane nahunun noe sako, sin nah ma ninun, anmafe ma anmamonen talan te Nai Nuh antam neu bnao. ³⁹ Ma sin ka nahin fa sa’, nahunun noe sako ansae ma naneku sin alsin onane te papmese bi neno Anmone Pah To he nanoebon nem. ⁴⁰ Bi neno nane kalu anmu’i atoni nua anbi lele, of neki es ma es of nabala. ⁴¹ Kalu anmu’i bife nua le fe anfole aen kase anbi fatu, of neki es ma es of nabala. ⁴² Es nane, him be’ nai, fun hi ka mihinef neno leka hi Usif nanoebon nem. ⁴³ Mes mihin nai: Leka uim tuaf nahin leku fauka anbi fai abakat he nem, of in anbe’ ma kan paleob sin hen pukai in ume. ⁴⁴ Onane te hi amsa miloitan nai, fun leku Anmone Pah To he nanoebon nem hi ka mitenab mani fa." ⁴⁵ "Yesus nak anteni, sekau ka es le ate aki’at ma ate amanoet? Le in tuan naiti hen fani nakaf neu ate bian, he nabalab mnahat neu sin bi leku le’at. ⁴⁶ Alekot neu ate nane leka in tuan anfani nem ma napeni nan anmo’e onane. ⁴⁷ Au ak ki: Of in tuan nasaeb nani hen panat ale in mu’in. ⁴⁸ Mes leka ate nane abulalut ma natenab bi in nekan ma nak: ⁴⁹ Au tuan fe ka nemaf, oke te in anbiso ale ate bian, ma nah ninu nok atoni amafut sin. ⁵⁰ Nalali te in tuan nem bi leku le in ka nahinef, ⁵¹ ma of namate ate nane ma anmo’e nani papmese nok atoni asafanut sin. Bi bale nane of sin ankae ma neku nisin."

¹ "Bi leku nane Plenat Neno Tunan maleta onle li’feto bo’es, le neki sin paku ma anpoi hen senu atoni fe’u. ² Li’feto nim amonot ma li’feto nim ahinet. ³ Li’feto amonot sin neki sin paku, mes ka nekin fa mina. ⁴ Mes li’feto ahinet sin neki sin paku ma neki mina anbi botil. ⁵ Fun atoni fe’u nane ka nem fa suk a’lo, sin alsin ansesa ma antupan. ⁶ Leka fai nanesab onane te sin nen ahunun nak: Atoni fe’u nemen! Him poi nai hem senu! ⁷ Li’feto bo’es nane sin anfenan ma naloitan sin paku. ⁸ Li’feto amonot sin nak neu li’feto ahinet sin nak: Amfe kai fa hi mina akle’o fun hai paku hen mate. ⁹ Mes li’feto ahinet sin nak: Kahaf, mina of kan tiaf neu kai ma neu ki. Him nao hem sos neu asosa mina nane. ¹⁰ Oke te li’feto nim amonot sin nao hen sosan mina. Leka sin fe naon onane te atoni fe’u nem. Li’feto nim ahinet sin naloitan ma nokan antam neu ke’an tolas mafet mamonet ma sin an ek eno nane. ¹¹ Nalali te li’ feto nim amonot nane sin neman, ma anhaman nak: Usi, Usi, musoiton kai eno! ¹² Mes in natae nak: Au ka uhin kif. ¹³ Es nane him be’ nai, fun hi ka mihin fa neno ai leku." ¹⁴ "Fun Plenat Neno Tunan onle atoni mese he nao neu paha lo. In anboin in ate sin ma nana’at ini maus neu sin. ¹⁵ In anfe neu atoni es talenta nim. Es anten talenta nua ma neu atoni es talenta mese. In anfe neu sin es-es nok in be’in oke te in nao. ¹⁶ Oke te ate le ansimo talenta nim nane in nao. In nanaob in talenta nane ma nasuf talenta nim. ¹⁷ Ate le ansimo talenta nua nane in amsa anmo’e onane ma nasuf talenta nua. ¹⁸ Mes ate le ansimo talenta mese nane in nao ma anhani nopu bi nain ma natolo in usin noni anbin. ¹⁹ Ka lo fa onane te ate sin usin anfani nem ma anso’i nok in ate sin. ²⁰ Ate le ansimo talenta nim in nem ma neki sufan talenta nim ma nak: Usif, talenta nim le muna’at kau sin kiso, au upeni sufan talenta nim. ²¹ Ma usif nane nak neune: Ho mo’et nane leok le’uf, ho ate alekot ma aki’at ko; ho mu’ki bi lasi an-ana, of au una’at ko lasi anaek. Hom tam nai bi ho usi in amlilat. ²² Oke te ate le ansimo talenta nua in nem ma nak: Usif, talenta nua le afi ho muna’at neu kau; kiso upeni sufan talenta nua. ²³ Ma usif nane nak: Ho mo’et nane leok le’uf, ho ate alekot ma aki’at ko. Ho mu’ki bi lasi an-ana, of au una’at ko lasi anaek. Hom tam nai bi ho usif in amlilat. ²⁴ Oke te ate le ansimo talenta mese in nem ma nak: Usif, au uhin ak ho atoni amaunu ko. Hom abut bi bale le ho kam kifu fa fini ma amseki bi bale le ho kam senaf. ²⁵ Es nane te au umtau ma au utolo usif ho talenta anbi nain. Neu, usif amsimo nai ho ini! ²⁶ Ma usif nane natae nak: Ho ate abulalut ma apehet ko, ho muhin mak au abut bi bale le au ka kifun fa fini ma au seki bi bale le au ka senaf abine ka? ²⁷ Onane te so ho meki au noni nane neu atoni le nanaoba noni, he nati’ bi neno au fain aum au simo ufani au noni nok in sufan. ²⁸ Es nane maiti talenta nane na’ko in ma amfe mani neu atoni le anmu’i talenta bo’es. ²⁹ Fun atoni le anmu’i nok athoes. Mes atoni le kan muif, sa’am sa’ le in anmu’i of naiti nan na’ko in. ³⁰ Ma anpolin mitam ate ka ma’upa nane bi bale mesokan. Bi nane of in ankae ma neku nisin." ³¹ "Leka Anmone Pah To nanoebon nem bi In apinat ma ale ahake neno tunan nok In, of In antunon bi In mau toko apinat. ³² Oke te of In nabuab ale atoni bi In matan ma anbati sin es nok es, onle atukus anbeti bibi kase na’ko bibi. ³³ Ma of In nahakeb bibi kase sin bi In aon bian ne’u ma bibi sin bi In aon bian ali’. ³⁴ Ma Kesel nane of nakua a’an neu sin abit In aon bian ne’u nak: Aim nai, hi le amsimo alekot na’ko Au Ama. Amtam nai meu Plenat le naloitan nalali neu ki na’ko neno le fe anmo’e pah pinan. ³⁵ Fun leka Au umnah, him fe Kau he bukae; leka Au meno oe, him fe Kau he inu; leka Au on atoni anaot, hi mitam Kau neu hi ume. ³⁶ Leka Au monas, him fe Kau tainusat; leka Au umen, hi mail Kau; leka Au bi o’of, hi aim ma amkiso Kau. ³⁷ Oke te ale atoni nane of sin natae nak: Uisneno, leka es hai mit Ho mumnah, ma haim fe Ko hem bukae ai a meno oe, ma haim fe Ko he minu ka? ³⁸ Leka es hai mit Ho on atoni anaot, ma hai mitam Ho anbi hai ume, ai monas ma haim fen Ho tainusat ka? ³⁹ Leka es hai mit Usi mumen, ai ambi o’of ma haim kiso Usi ka?" ⁴⁰ Ma Kesel natae sin nak: Au ak ki, sa’ le hi mo’e mani neu Au bae olof sin, nane hi mo’e mani neu Kau. ⁴¹ Ma of In nak amsa neu sin le anbi In aon bian ali’ Miskot mi’ko Au matak, hi atoni masukat, amtam nai meu ai maputu in balan le naloitan nalali neu Nitu ma in ahake sin. ⁴² Fun leka Au umnah, hi kam fe Kau fa he bukae; leka Au meno oe, hi kam fe Kau fa he inu. ⁴³ Leka Au on atoni anaot, hi kam fe Kau fe bale; leka Au monas, hi kam fe Kau fa tainusat; leka Au umen ai bi o’of, hi kam kiso Kau. ⁴⁴ Ma sin natae neu In nak: Uisneno leka hai mit Ho mumnah ai ameno oe, ai onle atoni anaot, ai monas, ai mumen, ai ambi o’of, ma hai kam kiso fa Ho ka? ⁴⁵ Oket In natae sin nak: Sa’ le hi ka mo’e mani neu Au bae olof sin, nane hi ka mo’e mani amsa neu Kau. ⁴⁶ Ma ale atoni i of sin antam neu bale hamu’it nabal-bal, mes atoni amneot of sin antam neu honis nabal-bal."

¹ Leka Yesus nasopu In noina te, In nak neu In asimo lasi sin, ² "Hi mihin nak al neno nua of atmoe Tolas Paskah, ma of nana’at Anmone Pah To he napeti." ³ Bi neno nane Ana’ lasi fuat nakaf ma amnasit to Yahudi nem nabuan anbi Nai Kayafas Ana’ lasi fuat Amnanut in sonaf. ⁴ Ma sin manlekan salit mese hen anheke Yesus nok lasi ak’elo he namate. ⁵ Mes sin nak, "Kais nok neno tolas, he nati’ kais taisibu anbol anbi to." ⁶ Leka Yesus anbi Betania, bi Nai Simon atoni men poko in ume, ⁷ bife mese nem neu Yesus. In neki botil mese nok min fomeni le upan matani. Leka Yesus fe antoko ma anbukae, bife nane anop min fomeni neu Yesus nakan. ⁸ Leka asimo lasi sin nit lasi nane te sin nato’an ma nak, "Nahoeb nale’un mina nane neu sa’ ka? ⁹ Mina nane nabe’i hit tasosa nok upan anaek ma hit atbati noni nane neu amamu’it sin." ¹⁰ Mes Yesus nahin sin nek tenab nane ma nak, "Nansa hi misusab bife nane ka? Fun in mo’e alekot neu Kau. ¹¹ Atoni amamu’it sin nok ki piut, mes Au of ka ok ki fa. ¹² Fun anop mina nane neu Au aok, in nabalab neu hen sub Kau. ¹³ Au ak ki: An etun Lasi Knino i bi me-me anbi pah pinan, sa’le bife nane anmo’e of antek nani amsa he namneu In." ¹⁴ Oke te atoni mese na’ko asimo lasi sin bo’es am nua nane, kanan Nai Yudas Iskariot, in nao neu Ana’ lasi fuat nakaf sin. ¹⁵ In nak, "Him fe kau sa’, he nati’ au una’at Yesus neu ki ka?" Oket sin anbaen noin muti bo’ tenu neu Nai Yudas. ¹⁶ Ma na’ko leku nane in nami mainuan alekot he nana’at Yesus. ¹⁷ Bi neno ahunut na’ko Neno Naek Utunu’ Kan Pake fa Lalu haef Yesus In asimo lasi sin nem neun ma nak, "Hom lomi he miloitan mei tolas Paskah neu Ko anbi me ka?" ¹⁸ Yesus natae nak, "Him nao nai meu kot, meu Nai Sa’af ma mak neune: Kulu anba’an nak: Au leku anhaumak; Au he mo’e Paskah ok Au asimo lasi sin bi ho ume." ¹⁹ Oke te In asimo lasi sin anmo’e sa’ le Yesus anlelu sin ma sin nabalab tolas Paskah. ²⁰ Leka neno anfai, Yesus antok ma anbukae nok In asimo lasi sin bo’es am nua. ²¹ Ma leka sin fe anbukae onane te Yesus nak neu sin, "Au ak ki, of es anbi ki nana’at Kau." ²² Ma sin nekan ansusal oke te sin mese-mese na’uab neu Yesus nak, "Ai au ka, koi Usi?" ²³ Yesus natae nak, "Atoni le anlep utunu’ bi pika nok Kau, in of es nana’at Kau. ²⁴ Namneo Anmone Pah To of anao onle antui nalali bi Sulat Knino antom In. Mes amle’ut neu atoni le nana’at Anmone Pah To! Leko nesi afi kais nahonis atoni nane." ²⁵ Nai Yudas le nana’at In natae ma nak, "Tuan, ai au ka?" Yesus nak neune: "Namneo onle ho mak nane." ²⁶ Ma leka sin fe anbukae, Usif Yesus naiti utunu’ ma antek alekot neun. Nalali te In anebi ma anfe neu In asimo lasi sin ma nak, "Maiti, miah, i Au aok." ²⁷ Oke te In naiti klas mninut ma antek alekot neun, oke te anfe neu sin ma nak, "Minu nai aleki na’ko klas i. ²⁸ Fun i Au na’, na’ fefbela knino, le nat’op neu atoni amfaun hen sako sin sanat. ²⁹ Mes Au ak ki: na’ko tomas i of Au ka inu tenif tanu’an sena i talan te neno Au iun ani fe’u nok ki bi Au Ama Ini Plenat." ³⁰ Leka sin ansi nalali sit pules, Yesus nok In asimo lasi sin naon neu Tubu Zaitun. ³¹ Oke te Yesus nak neu sin, "Fai i of hi nek palsait nabeko natuin Au. Fun antui nalali nak: Of Au tepo atukus ma bibi pukan nane of nasitbok. ³² Mes leka Au fen anfani, of Au uhunun ki meu pah Galilea." ³³ Nai Petrus natae nak, "Maski sin alsin palsait nabeko natuin Usif, mes au kahaf." ³⁴ Yesus nak neune, "Au ak ko, bi fai i, nahunu na’ko manu ankokle’o, of ho mutotan Kau haef tenu." ³⁵ Nai Petrus nak neune, "Ai mes he namate kau nok Usif, lof au ka utotan fa Usif." Ale asimo lasi bian amsa sin na’uab onane. ³⁶ Oke te Yesus nok In asimo lasi sin nem ante bale mese kanan Getsemani. Nalali te In nak neu In asimo lasi sin, "Him tok fe anbi i, Au nao eu paina he onen toti." ³⁷ In nok Nai Petrus ma Nai Zebedeus in anmone nua sin. Ma Yesus nekan antu’ ma natai. ³⁸ Oke te In nak neu asimo lasi sin, "Au nekak antu’ a’nae le’uf, onle Au he mate. Mibala ambi i ma ambe’ mok Kau." ³⁹ Ma Yesus nao na’lo kle’o, oke te In anli’tu nabes ma anonen toti nak, "Koi Au Ama, kalu nabe’i maut he klas mnunit i anfin na’ko Kau. Mes kais natuin Au lomik, mes natuin Ama Ho lomim." ⁴⁰ Nalali te In anfani neu In asimo lasi sin ma napeni sin fe antupan. Ma In nak neu Nai Petrus, "Hi ka mibe’i fa ka hem be’ mok Kau leku mese? ⁴¹ Ambe’ nai ma amonen toti, he nati’ kais him tam meu lasi su’at. Hi smanam anlomi hem mo’e alekot mes hi aom ta’um naklati." ⁴² Nalali te In naon teni hae nua ma anonen nak, "Koi Au Ama, kalu klas mninut i kan nabe’i fa hen fin, maut he Au inu, Ama Ho lomim anbol nai!" ⁴³ Ma leka In anfani nem, In napeni asimo lasi sin fe antupan fun sin matan anmafen. ⁴⁴ Yesus ka noki sin fa mes In nao ma anonen hae tenu antek onen le nane amsa. ⁴⁵ Oke te In anfain nem neu In asimo lasi sin ma nak, "Him tup man fe. Kiso, in leku ante, nak he nana’at Anmone Pah To neu atoni asanat sin niman. ⁴⁶ Amfen nai, aim nait het nao. Atoni le he nana’at Kau neman haumaken." ⁴⁷ Leka Usif Yesus fe namolok onane te, Nai Yudas le asimo lasi bo’es am nua sin es in nem. Ma atoni namfaun sin nokan le nekin suni ma hau tuka. Ana’ lasi fuat nakaf sin ma amnasit to Yahudi sin es anlelu sin. ⁴⁸ Atoni le he nana’at Yesus anfen sin taka ma nak, "Atoni le of au nek, In esle’ nane, amheke nai In." ⁴⁹ Naskek Nai Yudas anfonat nem neu Yesus ma nak, "Saomina neu Ko Kulu," oke te in nek Yesus. ⁵⁰ Mes Yesus nak neune, "Bae, ho aum meu i natuin lasi sa’ ka?" Oket atoni amfaun nane sin fonat nem ma anheke Yesus. ⁵¹ Mes atoni anbi sin le nok Yesus in nenu niman, ma anfaik suni ma ansaip neki Ana’ lasi fuat Anaet in ate luken tal natfek. ⁵² Ma Yesus nak neune, "Mutap mufani ho suni neu in tapan, fun ale atoni le nait suni, of in namle’u natuin suni. ⁵³ Ai ho mutenab, mak Au ka ube’i fa he toti Au Ama, he nati’ In ansonu Kau Pukan ahake neno tunan nesin nifun bo’es am nua hen bab Kau ka? ⁵⁴ Kalu onane, he natisi nan sa’ le antui nalali anbi Sulat Knino nane onme ka?" ⁵⁵ Oke te Yesus nak neu atoni amfaun nane, "Hi mitenab mak Au le i atoni asikat Kau, es nane hi aim meki suni ma hau tuka hem hek Kau? Neno-neno Au toko ma unoina bi Ume Uisneno, ma hi kam anheke Kau. ⁵⁶ Mes maut he ale lasi i anbol he natisi sa’le antui nani bi mafefa knino sin sulat." Oke te ale asimo lasi sin naen nasaitan Yesus. ⁵⁷ Leka sin anheke nalali Yesus te, sin nokan neu Ana’ lasi fuat Anaet Nai Kayafas in sonaf; le Ahin Sulat sin ma amnasit to Yahudi sin nabuan anbin. ⁵⁸ Ma Nai Petrus natuin Yesus na’ko lo talan te Ana’ lasi fuat Anaet in sonaf. Ma leka in antam, in antok anbi ale apaot sin atnanan he nit lasi in amsopun. ⁵⁹ Ana’ lasi fuat nakaf sin, ma Tolas Alef lasi ok-oke sin nami saksi moel neu Yesus he nati’ sin namate Yesus, ⁶⁰ mes sin ka napeni fa, maski atoni namfau le neman on saksi moel. Mes namuni te atoni nua sin neman, ⁶¹ ma nak, "Atoni i es na’uab nak: Au ube’i he pukai Ume Uisneno ma uhakeb ufani neno tenu." ⁶² Oke te Ana’ lasi fuat Anaet nak neu Yesus, "Ho ka mutae fa sa’ ka le sin ansaksi neu Ko ka?" ⁶³ Mes Yesus an ela ai anta’ah kun. Oke te Ana’ lasi fuat Anaet nak neu Yesus, "Anbi Uisneno honis In kanan, muton kai fe, Ho Kesel Afetin, Uisneno Anmone Ko ka ai kahaf." ⁶⁴ Yesus natae nak: "Namneo onle ho mak. Mes Au ak ko, na’ko tomas i of hi mit Anmone Pah To antunon bi Uisneno Akuasat Afin-finit ale sa’ aon bian ne’u ma nanoebon nem bi nope anbi neno tunan in fafon." ⁶⁵ Onane te Ana’ lasi fuat Anaet anpisu in bael pake ma nak, "In na’uab nale’un Uisneno. Hit he tami teni saksi neu sa’ ka? Him nen milali le In nale’un Uisneno. ⁶⁶ Neu hi mitenab onme ka?" Sin natae ma nak, "In mes hen mate!" ⁶⁷ Oke te sin nalon ai nakinu In human ma In antufu; ma atoni bian In anbiso, ⁶⁸ ma nak: Ati muton mit kai, hoi Kesel Afetin, sekau es antepo Ko ka? ⁶⁹ Nai Petrus fe antok anbi sonaf anbi mone. Ate bife mese nem neun ma nak, "Ho amsa mok Yesus atoni Galilea nane." ⁷⁰ Mes in natotan anbi ale atoni sin matan nak, "Au ka uhin fa sa’ le ho mu’uab nane." ⁷¹ Leka in anpoi neu eno naek, ate bife bian nit ma nak neu ale atoni le anbi nane, "Atoni i afi nok Yesus atoni Nazaret nane." ⁷² Ma in natotan teni neki supat: "Au ka uhin fa atoni nane." ⁷³ Ka lo fa onane te ale atoni le anbi nane sin neman neu Nai Petrus ma nak, "Namneo ho amsa mok sin. Fun ho a’at papmese nok sin." ⁷⁴ Onane te Nai Petrus ansukat ma ansup nak, "Au ka uhin fa atoni nane." Ma bi leku nane manu ankokle’o. ⁷⁵ Ma Nai Petrus namnau nit sa’ le afi Yesus na’uab neune nak, "Nahunu na’ko manu ankokle’o, ho mutotan mulali Kau hae tenu." Oke te in anpoi neu mone ma ankae nok nek tu’as.

¹ Leka fe nok-noka onane te, ale Ana’ lasi fuat nakaf ma amnasit to Yahudi sin nabuan ma nafek he namate Yesus. ² Sin anfutu Yesus ma nokan ma nana’at neu Nai Pilatus le anfani Kumlol bi pah nane. ³ Leka Nai Yudas le nana’at Yesus, nit nak sin nafek nalali he namate Yesus in antofon. Oke te in fe nafani noin muti pisa bo’tenu nane neu Ana’ lasi fuat nakaf sin ma amnasit sin, ⁴ ma nak, "Au usanab ulali fun una’at atoni le kan mu’if sanat in na’." Mes sin natae ma nak, "Hai ka mihin fa mok lasi nane? Fun nane ho lasi kum!" ⁵ Oke te Nai Yudas anpolin natam noni nane sin neu Ume Knino, ma in nao ma naponi nison kun. ⁶ Ana’ lasi fuat nakaf sin naiti noni nane ma nak: "Ka nabe’i he tao noni i neu peti tulu, fun noni i noni up na’ kun." ⁷ Leka sin anmalomis nalali te sin ansos najan le antek nak Najan Abana Nai neki noni nane. Najan nane sin anpake neu naukel ale atoni anao amnemat sin. ⁸ Es nane tal neno i najan nane antek nak: Najan Na’. ⁹ Onane te natisi nani a’at le afi Mafefa Knino Nai Yeremia naton nak, "Sin ansimo noin muti bo’ tenu, on upaf le to Israel anlomi hen baen neu In. ¹⁰ Ma sin anfe noni nane hen baen Najan Abana Nai, onle Uisneno anba’an neu kau." ¹¹ Oke te sin nahakeb Yesus bi ama Kumlol pah nane matan ma natan In nak, "Ho Kesel atoni Yahudi Ko ka?" Yesus natae nak, "Namneo, onle ama ho mak nane." ¹² Mes ale lasi le Ana’ lasi fuat nakaf ma amnasit to Yahudi sin nasaeb nani neu Yesus, In ka natae fa sin. ¹³ Es nane Nai Pilatus nak neune, "Ati Ho kam nenaf ka ale lasi amfaun le sin ansaksi neu Ko ka?" ¹⁴ Mes In ka natae fa fefa mese, tal ama Kumlol pah nane in namkak. ¹⁵ Natuin anlek nani neu ama Kumlol he nafetin atoni hukum mese bi neno tolas nane le to anbeti nani. ¹⁶ Ma bi leku nane anmu’i atoni mese anbi o’of le makana natuin maufinu. In kanan Nai Yesus Barabas. ¹⁷ Fun sin nabua nanin anbi nane, Nai Pilatus nak neu sin, "Him lomi he ufetin ki sekau ka? Nai Yesus Barabas kai ai Nai Yesus le antek nak Kristus ka?" ¹⁸ Fun in nahin nak sin nana’at Yesus natuin nek a’unu. ¹⁹ Leka Nai Pilatus fe antunon bi in toko lef lasi, in fenai ansonu hanaf neun nak, "Kais ho mok amselo lasi atoni amneot nane, fun natuin In fai i au hamu’iok naek bi nunmait." ²⁰ Mes Ana’ lasi fuat nakaf sin ma amnasit sin nakoke, oke te atoni amfaun nane sin antoti he nafetin Nai Barabas ma namate Usif Yesus. ²¹ Ama Kumlol natae ma nak neu sin, "Him lomi he ufetin ki sekau bi atoni nua in i ka?" Sin nak, "Nai Barabas." ²² Nai Pilatus nak neu sin, "Kalu onane au mo’e sa’ ka nok Yesus le antek nak Kristus ka?" Sin alsin nak, "Mipeti misan." ²³ Nai Pilatus nak, "Mes In mo’e amle’ut sa’ ka?" Mes sin hunun nahel-helok nak, "Mipeti misan." ²⁴ Leka Nai Pilatus ankisot nak in tenab of son-sona ma of sin taisibun. Es nane te in naiti oe ma nafanu niman bi atoni amfaun sin matan ma nak, "Au ka usanab fa neu atoni i in na’. Nane hi lasi kim." ²⁵ Ma to ok-oke sin natae nak, "Mautu he hai ma hai anhin amsutai In na’." ²⁶ Oke te in nafetin Nai Barabas neu sin, mes sin antepo Yesus ma mana’at In he napeti anbi hau nehe. ²⁷ Nalali te ama Kumlol in solalus sin neki Yesus antam neu bale lef lasi, oke te anboin pukan solalus ok-oke neman hen hake antol nan Yesus. ²⁸ Sin nauf nani In bael pake ma napakeb In neki sobalu betkone amtasa. ²⁹ Sin nakano sobe mese na’ko kisan ma antao nani neu Yesus nakan, oke te nana’at neun akmeo nono mese bi In niman ne’u. Nalali te sin anli’tu bi In matan ma namaeb In nak, "Selamat, Kesel Atoni Yahudi!" ³⁰ Sin nalon Yesus ma ansimo akmeo nane ma anbiso Yesus In nakan. ³¹ Leka sin namaeb nalali Yesus te sin nauf nafani sobalu betkone nane ma napakeb nafani Yesus neki In bael pake. Oke te sin nok Yesus anpoi he napeti anbi hau nehe. ³² Leka sin anpoi na’ko kot ma naon, sin na’eku nok atoni mese na’ko Kirene kanan Nai Simon. Sin naseke atoni nane hen loi Usif Yesus hau nehe. ³³ Ma sin ante’ bale mese le kanan Golgota, in oten: Bale Nui Nakaf. ³⁴ Oke te sin fen Yesus tua mina amtasa le anselo nok eun oef. Mes leka Yesus antamis nit, In kan lomi fa he ninu. ³⁵ Leka sin napeti nalali Yesus te sin helan sulat hen bati In bael pake. ³⁶ Oke te sin antoko bi nane hen pao Yesus. ³⁷ Ma sin antao tuis mese bi In nakan fafon le antui In lasi matan nak, "I Yesus Kesel Atoni Yahudi." ³⁸ Sin napeti atoni abulalut nua nok Yesus, es anbi In aon bian ne’u ma es anbi In aon bian li. ³⁹ Ale atoni le naon natuin nane sin na’uab naufbanan In ma anki’un nakan, ⁴⁰ ma nak, "Ho es hem pukai Ume Knino ma muhakeb mufani anbi neno tenu. Muhoni Ho aom, kalu Ho Uisneno Anmone Ko, amsanu mu’ko hau nehe nane." ⁴¹ Onane amsa Ana’ lasi fuat nakaf sin nok Ahin Sulat sin ma amnasit sin namaeb Yesus ma nak, ⁴² "In nahoni atoni bian mes In ka nabe’i fa he nahoni In aon. In Kesel to Israel ka? Leko In sanu nai na’ko hau nehe nane ma of hai nekam nateb neu In. ⁴³ In nafnekan neu Uisneno. Maut he Uisneno nafetin In, kalu Uisneno anlomi In. Fun afi In na’uab nak: Au lo Uisneno Anmone Kau." ⁴⁴ Ma atoni abulalut le napeti sin nok Yesus sin amsa na’uab nale’un Yesus Onane. ⁴⁵ Na’ko leku bo’es am nua pah nane namesok talan te leku tenu. ⁴⁶ Oni leku tenu onane te Yesus an anbai nok hanan anaek nak, "Eli, Eli, lama sabakhtani?" In oten nak, "Au Uisneno, Au Uisneno, nansa es Ho musaitan Kau ka?" ⁴⁷ Leka atoni fauk le anhake bi nane sin nen nani te sin nak, "In no’en Nai Elia." ⁴⁸ Ma atoni mese anbi sin; naen laba ma naiti hau suf putun ma anlep neu tua mahai. Oke te anposun neu akmeo panan, ma anfe neu Yesus he ninu. ⁴⁹ Mes atoni bian sin nak, "Kaisa, maut fe hit kiso, ai Nai Elia he nem he nahoni In." ⁵⁰ Oke te Yesus an anbai anteni nok hanan anaek ma nanaat In monin. ⁵¹ Ma kiso, pilu eka Ume Knino anbation no nua na’ko fafon ante pinan. Ma nainunus anbol ma ale tubu fatu sin anpe’en. ⁵² Ma ale nuat naukel sin natfei ma to knino namfaun le anmate sin anfen anfani. ⁵³ Ma leka Yesus anfen anfani, sin amsa anpoi na’ko nate, oke te antam neu kot knino ma nalile sin aon neu atoni amfaun. ⁵⁴ Solalus nakaf ma ale solalus le anpao Yesus, sin namtau leka sin nit nainunus, ma ale lasi le anbol. Ma sin nak, "Namneo, In lo Uisneno Anmone kun." ⁵⁵ Ma bi nane anmu’i bife namfaun le ankiso na’ko lo. Esle’ ale bife le natuin Yesus na’ko pah Galilea hen tuthae In. ⁵⁶ Ma anbi sin nane bi Maria Magdalena, ma bi Maria Nai Yakobus ma Nai Yusuf sin ainaf ma Nai Zebedeus in anhin sin ainaf. ⁵⁷ Leka neno hen fai onane atoni amu’it mese nem na’ko Arimatea kanan Nai Yusuf. In amsa natuin Yesus. ⁵⁸ In nao neu Nai Pilatus ma antoti Yesus aon nitu. Nai Pilatus anlelu he nana’at nani neun. ⁵⁹ Ma Nai Yusuf naiti Yesus aon nitu nane an amu neki pilu muti fe’u. ⁶⁰ Oke te in natupab anbi in nuat naukel fe’u, le anhani bi tubu fatu. Oke te in antuil fatu naek mese ma antobe nuat naukel nane fefan, nalali te in nao. ⁶¹ Mes bi Maria Magdalena ma bi Maria bian sin antok nabala anbi nane anbi nuat naukel matan. ⁶² Ma nokfa onane te Neno Snasat, Ana’ lasi fuat nakaf sin nok atoni Farisi sin neman neu Nai Pilatus, ⁶³ ma sin nak, "Usi, hai fe mimnau afi ba’is afuil to nane fe In anmoni, In nak: Neno tenu namuni te of Au fen anfani. ⁶⁴ Es nane amlelu hen pao naukel nane tal neno tenu; he nati’ kais In asimo lasi sin neman ma nabak neki In aon nitu. Oke te sin an etun neu to nak: In anfen anfani na’ko amates. Ma fulit amunit nane of namle’u nesin na’ko fulit ahunut nane." ⁶⁵ Nai Pilatus nak neu sin, "Hi mu’i solalus apaot, nao nai ma ampao naukel nane lek-leko." ⁶⁶ Oke te sin nao nok ale solalus apaot sin ma sin antao malak neu naukel nane ma anpao naukel nane nok alekot.

¹ Leka Neno Snasat anfin, fe nok-noka manas hen sae bi neno ahunut klei nane, bi Maria Magdalena ma bi Maria bian sin nao hen kiso naukel nane. ² Naskek onane te nainunus anaek anbol. Fun ahake Usif tunan ansanu na’ko neno tunan ma antuil fatu tobes nane ma antok bi fatu fafon. ³ In human on limat ma In bael pake muti on sen-sene. ⁴ Ma ale solalus apaot sin namtau, ma anfani onle amates. ⁵ Mes ahake neno tunan nua’ab neu ale bife nane sin nak, "Kais hi mimtau, fun Au uhin nak hi mami Yesus le napeti nane. ⁶ In ka es fa i, fun In anfen anfani, onle afi In nak neu ki. Aim, amkiso nai bale le natupab In anbine. ⁷ Ma him mnao nai lab-lab ma am etun In asimo lasi sin mak: In an fen anfani na’ko amates. In au nao nahunnu ki neu Galilea. Bi nane of hi mit In. Mimnau nane sa’ le au uton ulali neu ki." ⁸ Ma bife nane sin nao nasaitan naukel nane. Nok amtaus ma amlilat naek sin naen lab-lab hen etun neu Yesus In asimo lasi sin. ⁹ Naskek onane te Yesus nae’ku nok sin ma nak, "Tetus neu ki." Sin anhaumak Yesus ma anho In haen ma nabes neu In. ¹⁰ Mes Yesus nak neu sin, "Kais mimtau. Him nao nai ma ametun lasi i neu Au bae sin, he nati sin nao neu pah Galilea ma of sin nit Kau anbi nane." ¹¹ Leka sin fe anbi lalan atnanan, solalus apaot sin fauk neman neu kot ma an etun ale lasi nane neu ana’ lasi fuat nakaf sin. ¹² Ma sin manlekan nalali nok amnasit sin, oket sin nafekan hen fen solalus sin noni naek, ¹³ ma nak, "Hi mes miton mak, In asimo lasi sin neman nok fai ma nabak nan In, leka hai fe amtup. ¹⁴ Ma leka ama Kumlol nen lasi i of hai miu’ab mokan talan te hi ka mipeni fa susal sa’." ¹⁵ Sin ansimo noni nane ma sin anmo’e onle anba’an nalali neu sin. Ma lasi i nasitbon kun bi atoni Yahudi sin atnanan tal neno i. ¹⁶ Ma asimo lasi bo’es am mese nane sin naon neu pah Galilea, neu tubu le Yesus anba’an neu sin. ¹⁷ Leka sin nit Yesus, sin nabes neu Yesus mes bian nekan fe nao’ni. ¹⁸ Yesus anhaumak sin ma nak, "Anfe neu Kau ale kuasat, bi neno tunan ma bi pah pinan. ¹⁹ Es nane him nao nai ma amo’e ale pah-pah hen fani Au asimo lasi. Ma mislani sin anbi Amaf ma Anmone ma Smanan Knino In kanan. ²⁰ Minoina sin hen panat ale lasi le Au ba’an neu ki. Mimnau nai Au ok ki piut talan te batan amsoput."