LUKAS

LUKAS

¹ Neu Nai Teofilus atoni makana. Atoni namfaun afi nami lanan he naketin lasi le antom mo’et-mo’et le anbol bi hit atnanak, ² sin nana’at neu kit, natuin afi sin anfani amnitas neki matan ma amneki lasi. ³ Onane, lek-leka au peo ufani ale mo’et nane nok amneot na’ko lasi in un, au utenab he nati’ tui ani neu ko, ⁴ he nati’ ho muhin, mak ale a’at le afi nanoni nani neu ko tebes namneo. ⁵ Bi batan Nai Herodes anfani Kesel to Yudea, anmui ana’ lasi fuat mese kanan Nai Zakaria, na’ko uf Abia. In fel nane na’ko Nai Harun in sufan, kanan bi Elisabet. ⁶ Sin nua sin amneot bi Uisneno In human ma sin nua sin anmoni ma nao natuin Uisneno Ini plenat ma In lekat nok alekot. ⁷ Mes sin kan mu’in fa anah, natuin bi Elisabet in ankiu ma sin nua sin namnasin finin. ⁸ Bi neno Nai Zakaria he natis in mepu on ana’ lasi fuat bi Uisneno In human bi tomas nane uf Abia napeni lekat. ⁹ Natuin lasi fuat in lekat, Nai Zakaria es napeni, hen tam neu Ume Knino ma notu fomeni. ¹⁰ To ok-oke sin nabuan anbi mone ma anonen toti fun tabu nane notu fua fomeni. ¹¹ Oke te ahake Uisneno mese nalilon neu Nai Zakaria anhake bi baki fua fomeni aon bian ne’u. ¹² Leka in nit ahake neno tunan nane in naskek ma in namtau nok. ¹³ Mes ahake neno tunan nane nakua a’an nak, "Kais mumtau Nai Zakaria, fun ho onen totis nane masimo nalali, ma ho fel bi Elisabet of nahonis ko an atoni mese ma of ho mukanab in Nai Yohanes. ¹⁴ Lof ho mumlil ma mumoek, ma atoni namfau of namlil amsa natuin nahonis anah nane. ¹⁵ Of in anfani atoni anaet bi Uisneno In matan ma of in ka ninu fa tua min kase ai tua amafut. Ma of nahenu nani neki Smanan Knino, na’ko in ainaf in apun; ¹⁶ ma of in hel to Israel namfau nali’ok anfani neman neu sin Uisneno. ¹⁷ Fun of in nao nahunun Uisneno neki Nai Elia in kuasat ma in matanin hen hel nafani amfini sin nekan neu anhenu. Ma antopu atoni amaufinut sin neu lanan amneot ma naloitan to atam ota neu Uisneno." ¹⁸ Nai Zakaria na’uab neu ahake nane nak, "Leka me au he uhin ak lasi nane of anbol neu kau? Au umnasien ma au fel amsa namnasien." ¹⁹ Ma ahake nane natae neu in nak, "Au Nai Gabriel kau le au hake piut bi Uisneno In human In es anlelu kau he u’uab ok ko ma he uton ko lasi alekot i. ²⁰ Of ho mono ma ka mu’uab muhinef talan te neno lasi nane anbol, fun ho nekam ka nateb fa neu au a’ak le of natision nok amneot bi in neno lekat." ²¹ Onane te atoni namfaun le sin anpao Nai Zakaria, sin namkakan fun in lo le’uf bi Ume Knino. ²² Leka in anpoi nem, in ka na’uab fa nok sin, ma sin nahin nak in nit amnitas bi Ume Knino. In anlaleka neki ini niman neu sin fun in anmono nabala. ²³ Leka in neno tuthaes namsopun in anfani neu in ume. ²⁴ Namuni neno fauk onane in fel bi Elisabet na’apu, ma in natolo funan nim, fun in nak: ²⁵ "Uisneno anmo’e lasi i neu kau, ma In anlomi he naiti naskotun au nek mae anbi to sin matan." ²⁶ Leka bi Elisabet na’apu funan ne onane te Uisneno anlelu ahake neno tunan Nai Gabriel neu kuan es bi pah Galilea kanan Nazaret. ²⁷ Nai Gabriel nem neu bifel ao temef mese le anmafut nekaf nok atoni mese kanan Nai Yusuf na’ko uf Nai Daud kanan bi Maria. ²⁸ Ahake nane antam neu bi Maria in ume ma nak, "Mumlil nai, fun anhalin nalali ko, Uisneno nokan ko." ²⁹ Bi Maria in na’unu neu a’at nane ma in antai bi nekan uab senut nane in laisne he sa’ ka? ³⁰ Ahake neno tunan nak neu in nak, "Kais mumtau Maria, fun ho mupeni halinat na’ko Uisneno. ³¹ Ho mes amtu’ ma mu’apu fun of muhonis anmone mese ma of ho mukanab in mak Yesus. ³² Of In naek kun ma antek In Anmone Uisneno Amnanut Afinit. Ma Uisneno of anfe neu In toko, le In am uf Kesel Nai Daud ini. ³³ Ma of In ansae Usif ma naplenat ume mnasi Nai Yakub talan te nabal-bal, ma In aplenat ka namsopu nitaf." ³⁴ Bi Maria na’uab neu ahake neno tunan nane nak, "Lasi nane hen bol onme, natuin au fe ka uhin fa atoni." ³⁵ Ahake neno tunan natae bi Maria nak, "Smanan Knino of ansanu nem neu ko; ma kuasat Uisneno Afin-finit of naneo ma namafo ko; anah le ho muhonis nane antek nani knino, Uisneno In Anmone. ³⁶ Kiso mit Ho ini bi Elisabet in amsa na’apus anmone mese bi neno namnasi ma in na’apu funan ne, le afi antek in ankiu kun. ³⁷ Fun neu Uisneno katit fa lasi le ka nok fa in matanin." ³⁸ Bi Maria na’uab nak, "Uisneno In ate kau; mautu In a’an anbol neu kau natuin ho a’am nane." Nalali te ahake neno tunan in nao nasaitan bi Maria. ³⁹ Neno fauk onane te bi Maria anfen ma nao neu pah neten kuan mese anbi pah Yehuda. ⁴⁰ Bi nane in antam neu Nai Zakaria in ume ma anfe han seon neu bi Elisabet. ⁴¹ Ma leka bi Elisabet in nen bi Maria in han seon nane, li’ana an ok’lon anbi in apun, ma bi Elisabet nahenu nok Smanan Knino. ⁴² In anhunun nok hanan naek nak, "Ua alekot neu ko anbi ale bifenu ma ua alekot neu ho apum in fuan. ⁴³ Au sekau kau ka, talan te au Usi in ainaf nem neu kau? ⁴⁴ Leka ho han seon ante au lukek, liana bi au apuk anoklon nok amlilat. ⁴⁵ Amtetus neu in, le nateb knino nak, Uisneno In a’an of nateabon neu in." ⁴⁶ Bi Maria nak, "Au smanak nanaeb Uisneno, ⁴⁷ ma au nekak namlil neu Uisneno, au Afetin, ⁴⁸ fun In nit In ate nabaunon kun. Na’ko tomas i ale batan antek au amtetus. ⁴⁹ Fun Uisneno Akuasat Afin-finit anmo’e lasi naek neu kau, ma In kanan lo knino kun. ⁵⁰ In manekan na’ko batan tea batan neu atoni le namtausan In. ⁵¹ In nalile In matanin neki niman matua kuasat ma In nasitab ale atoni neka moko; ⁵² In nasanut ale Usif na’ko toko usif ma nasaeb a’baut sin; ⁵³ In namsenab atoni amnahas neki lasi alekot, ma atoni amu’it sin In anlelu sin anfani luman; ⁵⁴ In anfiti ma anbab to Israel, In tob, fun In namnau In manekan. ⁵⁵ Onle In anba’an nalali neu hit babfini, neu Nai Abraham ma in sufan talan te nabal-bal." ⁵⁶ Bi Maria namaika nok bi Elisabet oni funan tenu, nalali te in anfani neu in ume. ⁵⁷ Bi Elisabet in leku in tabu ante he nahoni ma in nahonis an atoni mese. ⁵⁸ Ma ale ume apaumakat ma in aonbian sin nen nak Uisneno nanaeb kun In manekan neu in, sin namlil nokan. ⁵⁹ Fun neno fanu ante, sin neman hen heli liana ma nakanab in Nai Zakaria natuin in amaf kanan, ⁶⁰ mes in ainaf natae sin nak, "Kahaf, mes takanab in Nai Yohanes." ⁶¹ Ma sin nak neu in nak, "Katif fa es anbi ho ini sin le in kanan on." ⁶² Ma sin anlekan neu in amaf ai anlomi he nakanab anah nane sekau. ⁶³ Ma in antoti bena ninik ma in antui nak, "In kanan Nai Yohanes." Ma sin alsin namkak. ⁶⁴ Naskek onane in fefan natfei ma in man natsefi oke te in na’uab ma anpules Uisneno. ⁶⁵ Lasi amtaus nem neu in-ini sin funam natef ma lasi nane anfani uab ma molok bi ale pah neten Yudea. ⁶⁶ Ma ale atoni le sin nen lasi nane sin natenab bi sin nekan nak, "Liana i of namuni anfani sa’ ka?" Fun Uisneno In nukun lo nokan. ⁶⁷ Ma in amaf Nai Zakaria, nahenu nok Smanan Knino ma in na’uab mat-mat nak, ⁶⁸ "So anpules Uisneno, to Israel sin Uisneno, fun In nem nail In to ma he neki lasi fetis neu sin. ⁶⁹ In nahakeb sun tetus aomina neu kit bi In ate Nai Daud in ume. ⁷⁰ Onle In nakua nalali In a’an nakakoba neki In mafefa knino sin fefan ⁷¹ he nafetin kit na’ko ale hit musu ma na’ko ale atoni le na’un to’an neu kit sin niman, ⁷² He nalile In manekan neu hai nai enu ma namnau In fefba’an knino. ⁷³ Supat le afi In ansup neu hit ama, mnasi Nai Abraham nak, ⁷⁴ In nek ma namnau kit he nafetin kit, na’ko hit musu sin niman, ⁷⁵ nok aknino ma amneot bi In human anbi hit monik nabelkon. ⁷⁶ Ma ho Au anah ko, of antek ko nak mafefa Uisneno amnanut afinit; fun of hom nao muhunun Uisneno he muloitan In lalan, ⁷⁷ hen fe neu In to lasi hine antom tetus, leka ansako nalali sin sanat. ⁷⁸ Natuin hit Uisneno amnaut ma amanekat le In nail kit na’ko fafon, on manas pinan ansae nok-noka bi bale alatan; ⁷⁹ hen tana abit mesokan sin ma atokos abit mafo maten He nanon hit haek neu lalan halan pah." ⁸⁰ Liana nane nanae ma anmaspeti bi in monin. Ma in natua bi mnela paha snaen talan te neno in nem nalilon neu to Israel.

¹ Bi neno nane Kesel Agustus napoitan plenat he nati’ ale atoni bi ini Plenat Roma natam kanan neu sul so’it smanaf. ² I so’it smanaf pal melu ai so’it ahun-hunut bi neno Nai Kirenius ansae kumlol bi pah Siria. ³ Onane te ale atoni es-esat anao neu in kuan mnasi he natam kanan bi sulat. ⁴ Nai Yusuf amsa ansae na’ko kot Nazaret pah Galilea nem neu pah Yudea, Nai Daud in kot le antek nak Betlehem, -- natuin in na’ko uf Nai Daud --. ⁵ He natam in kanan neu sulat nok bi Maria le in fe anmafut nekan nokan, ma in fe na’apu. ⁶ Leka sin ante Betlehem neno antelen bi Maria he nahoni, ⁷ ma in nahonis in Anmone ale’u ta’uf; oke te sin ana’mu neki tainusat ma natupab anbi ba’i fun sin ka napeni fa bale bi ume lalan. ⁸ Bi kuan nane anmu’i atuku bibi le natuku sini bibi bi mnesat nok fai. ⁹ Ahake Uisneno mese nalilon neu sin ma Uisneno In pinan neno antana sin ma sin namtau. ¹⁰ Mes ahake nane nak sin nak, "Kais mimtau au uton beno amlilat naek neu ki ma neu ale to ok-oke. ¹¹ Neno i nahonis Kesel Afetin, Kristus hit Uisneno, anbi Nai Daud in kuan, ¹² I taka neu ki, of hi mipeni liana nane matainusat ma natupab anbi ba’i." ¹³ Ma naskek sin nit ahake nane nok to meo neno tunan pukan mese sin ansi ma ampules Uisneno nak, ¹⁴ "Apinat neu Uisneno abit pano latan, ma halan nekaf bi pah pinan neu atoni le In anlomi nan." ¹⁵ Leka ahake neno tunan nao nasaitan sin ma anfani neu neno tunan, atukus sin na’uaben es nok es, "Aim het nao nai teu Betlehem het kiso tit sa’ le anbol anbi nane onle Uisneno naton neu kit." ¹⁶ Sin nao lab-lab ma sin napeni bi Maria ma Nai Yusuf ma liana antup anbi mu’it aba’i. ¹⁷ Leka sin nit nalali te, sin anetun antom a’an le nakua nani neu sin antom Liana nane. ¹⁸ Ma alsin le sin nen, sin namkak antom lasi le atukus sin na’uab neu sin. ¹⁹ Mes bi Maria in napan ale lasi ma nahik nani bi in nekan nanan. ²⁰ Ma atukus sin anfani fun anpules ma nanaeb Uisneno natuin ale lasi le sin nen ma nit nalali, namnes nok a’at le natkua nem neu sin. ²¹ Ma leka neno fanu namsopun onane hen hapi ma hen heli liana nane ma antek In kanan Yesus; kanaf le afi ahake neno tunan antek nani nahunu na’ko In ainaf na’apus. ²² Ma leka neno nuni namsopun, natuin plenat Nai Musa, sin neki In nao neu Yerusalem he natulu nani neu Uisneno, ²³ onle matui anbi plenat Uisneno nak, "Ale an atoni le nahonis nahunun mes naknino nani neu Uisneno." ²⁴ Ma hen fe fuat natuin a’an anbi plenat Uisneno, kol otos pasnes ai kol ot kase ana nua. ²⁵ Anmu’i atoni mese bi Yerusalem kanan Nai Simeon. Atoni i amneot ma nek muti, le anpao lasi he nafetin to Israel. Smanan Knino natua anbi in nekan, ²⁶ ma afi Smanan Knino naton nani nak: Of in kan mate fe nahun na’ko in nit Kristus Neno Anan Usif tunan ini. ²⁷ In nem neu Ume Uisneno natuin mepu Smanan Knino. Leka Nai Yusuf nok bi Maria sin neki liana Nai Yesus antam, hen mo’e halat plenat antom In, ²⁸ Nai Simeon ansimo liana nane ma nasnono nani fun anpules Uisneno nak, ²⁹ "Tomas i Usi, mufetin Ho ate kau he nao nok halan nekaf, natuin Ho a’am, ³⁰ fun au matak nit nalali Ho tetus, ³¹ le Ho muloitan bi ale uf-uf sin matan, ³² pina le hen tana ale uf-uf bian, ma anfani apinat neu Ho to Israel." ³³ In amaf ma In ainaf sin namkakan neu ale a’at le na’uab nani antom In. ³⁴ Oket Nai Simeon antek alekot neu sin ma na’uab neu bi Maria liana nane in ainaf nak, "Anah i Uisneno anlek nani he namofu ma he nafena atoni namfau bi to Israel ma anfani taka le he neki matoes. ³⁵ Ma on suni le napau nbol ho nopam, he nati’ amfaut sin lasi le natenab bi nekan nanan natonon." ³⁶ Anbi nane anmu’i bife mese kanan bi Hana, Nai Fanuel in anfeto na’ko uf Aser. In amsa namnasin fin-fin. In mamoen nalali ma in moni nok in mone ton hitu, ³⁷ nalali te in banu ma in uan ton bo’ fanum ha. In ka nasaitan nitaf Ume Uisneno ma fai manas in lelnon ma anonen toti neu Uisneno. ³⁸ Bi leku nane in amsa nem neu bale nane ma natulu nekan neu Uisneno ma na’uab antom anah nane neu ale atoni le anpao lasi he nafetin Yerusalem. ³⁹ Leka ale lasi namsopun natuin plenat Usif tunan, sin anfani neu sin kuan, esle’ kuan Nazaret pah Galilea. ⁴⁰ Anah nane nanae ma anmaspeti nahenu nok lasi hine, ma halinat Uisneno nokan. ⁴¹ Bi ton-ton, Usif Yesus in amaf ma in ainaf anao neu Yerusalem anbi Neno Tolas Paskah. ⁴² Ma leka In uan ante ton bo’es am nua, sin nao neu Yerusalem anbi neno tolas nane onle antak nani. ⁴³ Nasopu neon tolas onane, sin naon fanin; Usif Yesus nabalah anbi Yerusalem ma In amaf In ainaf ka nahinen fa. ⁴⁴ Sin natenab nak In anbi atoni amfaut sin atnanan, natuin lalan le sin nao natuin. Sin nao neno mnanu mese onane, sin nami Usif Yesus bi sin aok biakenu. ⁴⁵ Fun sin ka napeni fa In, sin nali’ok anfani neu Yerusalem he nami piut. ⁴⁶ Neno tenu namuni onane te sin napeni In bi Ume Uisneno; In antok bi anoni sin atnanan ma In natnin ma In natan sin nok. ⁴⁷ Ma ale atoni le sin amnen In, sin sanmak neu In hinen ma In lasi taes neu sin. ⁴⁸ Ma leka In amaf ma In ainaf nit In te sin namkak. In ainaf nak neu In, "Anah, nansa’ Ho mo’e kai onane? Ho ama ma au amsa, hai mami Ko nok nek a’unu." ⁴⁹ In natae neu sin nak, "Nansa’ hi mami Kau? Ai hi ka mihinef nak Au mes he bi Au Ama In Ume?" ⁵⁰ Mes Nai Yusuf ma bi Maria sin ka nahin fa sa’ le Usif Yesus na’uab neu sin. ⁵¹ Oket Usif Yesus anfani nok sin neu Nazaret; ma In moni nok sin fun natnin neu sin. Ma In ainaf napan ale lasi anbi in nekan nanan. ⁵² Ma Usif Yesus natbo ma nanae ma In hinen amsa ansaton ma Uisneno ma mansian anlomi nani.

¹ Bi ton bo’es am nim le Kesel Nai Tiberius in aplenat, Nai Pontius Pilatus ansae kumlol bi pah Yudea, ma Nai Herodes usif bi pah Galilea, ma in olif Nai Pilipus usif bi Iturea, ma Trakhonitis ma Nai Lisanias usif anbi Abilene. ² Fun Nai Hanas ma Nai Kayafas sin Ana’ Lasi Fuat Nakaf, Uisneno a’an anpoi nem neu Nai Yohanes, Nai Zakaria in anmone anbi mnela hufui. ³ Nai Yohanes nem neu Noe Yordan bian am bian funam natef ma anhunun, "Mipis nai ma meki hi aom he naslani ki ma Uisneno of ansako hi sanat; ⁴ on antui anbi Sulat Knino, Mafefa Knino Nai Yesaya nak: Han ahunun bi mnela hufui: Miloitan lanan neu Uisneno, mimneoba lanan neu In. ⁵ Amnae ale nonof le naklopu ma minel mani ale nu’af ma tubu, ma mimneoba ale lanan apenut, amkek ma amili ale lan aklopu, ⁶ ma ale atoni of sin nit Uisneno In tetus." ⁷ Oket Nai Yohanes in na’uab neu to amfaut le anpoi nem, he in naslani sin nak, "Kaun laso alosib in sufan ki! Sekau es naton ki nak he maen mi’ko to’as Uisneno le he nem neu ki? ⁸ Mipoitan nai mo’et alekot le natai nok lasi apisat. Ma kais hi mitenab bi hi nekam mak: Hai Ama es Nai Abraham! Fun au uton ki ak: Uisneno nabe’i anmo’e sufan neu Nai Abraham na’ko fatu-fatu i! ⁹ Fani nabelon bi ale hau ini ba’an ma ale hau le ka nafuaf fuan alekot, of ano’te nisan ma anpolin natam anbi ai." ¹⁰ To mfaun nane sin natan neu in nak, "Kalu onane hai he mo’e sa’ka?" ¹¹ Nai Yohanes natae sin nak, "Sekau anmui sobalu nua, in anbati neu atoni le kan mu’if, ma sekau anmu’i amnahat anmo’e onane amsa." ¹² Asimo noni poni sinit neman he naslani sin ma sin natan Nai Yohanes nak, "Kulu, hai he mo’e sa’ ka?" In natae sin nak, ¹³ "Kais him toti nesi na’ko le anlek nain ki." ¹⁴ Fun solalus sin amsa natan neu in nak, "Ma hai amsa he mo’e sa’ ka?" Nai Yohanes natae sin nak, "Kais miseke es ma kais misik es in sa’ ma minokbom meki hi noni funan." ¹⁵ Fun to mfaun nane sin anpao ma nafnekan, ma natenab bi sin nekan antom Nai Yohanes, oni in Neno Anan, kun ka? ¹⁶ Nai Yohanes natae neu sin alsin nak, "Au uslani eki oe, mes In le anmu’i kuasat nesin kau of nem ma au ka tamaf ota he sefi In tani penhae. Of In naslani ki neki Smanan Knino ma ai. ¹⁷ Tupa es In niman he nakmeu In bale teli ane ma he nabua In ane bi In lopo, mes aen ta’u of notu nani anbi ai le kamasifo fa." ¹⁸ Nai Yohanes anetun lasi knino neu to ma neki fainekat bian amsa. ¹⁹ Mes leka In anfainek Nai Herodes usif pah Galilea antom bi Herodias in olif in fel, ma antom mo’et amle’ut bian le Nai Herodes anmo’e nalali sin, ²⁰ usif nane anlolu in mo’et amle’ut ma natam Nai Yohanes anbi o’of. ²¹ Leka naslani nalali ale atoni, ma Usif Yesus amsa naslani nani ma In fe anonen toti, neno tunan natfai, ²² ma Smanan Knino ansanu nem neu In namasbon on kol otos. Ma hanaf nem na’ko neno tunan nak, "Ho Au Anmone le Au nek ani, fun Au lomi Ko." ²³ Bi neno leka Usif Yesus In na’uba In mepu, In uan oni ton bo’tenu fun sin natenab nak: In Nai Yusuf anah, Nai Elia anah, ²⁴ Nai Matat anah, Nai Lewi anah, Nai Malkhi anah, Nai Yanai anah, Nai Yusuf anah, ²⁵ Nai Matica anah, Nai Amos anah, Nai Nahum anah, Nai Hesli anah, Nai Nagai anah, ²⁶ Nai Maat anah, Nai Matica anah, Nai Simei anah, Nai Yosekh anah, Nai Yoda anah, ²⁷ Nai Yohanan anah, Nai Resa anah, Nai Zerubabel anah, Nai Sealtiel anah, Nai Neri anah, ²⁸ Nai Malkhi anah, Nai Adi anah, Nai Kosam anah, Nai Elmadam anah, Nai Er anah, ²⁹ Nai Yesua anah, Nai Elieser anah, Nai Yorim anah, Nai Matat anah, Nai Lewi anah, ³⁰ Nai Simeon anah, Nai Yehuda anah, Nai Yusuf anah, Nai Yonam anah, Nai Elyakim anah, ³¹ Nai Melea anah, Nai Mina anah, Nai Matata anah, Nai Daud anah, ³² Nai Isai anah, Nai Obed anah, Nai Boas anah, Nai Salmon anah, Nai Nahason anah, ³³ Nai Aminadab anah, Nai Admin anah, Nai Arni anah, Nai Hezron anah, Nai Peres anah, Nai Yehuda anah, ³⁴ Nai Yakub anah, Nai Ishak anah, Nai Abraham anah, Nai Terah anah, Nai Nahor anah, ³⁵ Nai Serug anah, Nai Rehu anah, Nai Peleg anah, Nai Eber anah, Nai Salmon anah, ³⁶ Nai Kenan anah, Nai Arpakhsad anah, Nai Sem anah, Nai Nuh anah, Nai Lamekh anah, ³⁷ Nai Metusalah anah, Nai Henokh anah, Nai Yared anah, Nai Mahalaleel anah, Nai Kenan anah, ³⁸ Nai Enos anah, Nai Set anah, Nai Adam anah, Uisneno anah.

¹ Usif Yesus, le nahenu nok Smanan Knino, anfani nem na’ko Noe Yordan, ma Smanan Knino anhel neki neu mnela hufui. ² In namaika anbi nane neno bo’ ha ma Nitu ansu’ nani. In kan bukae nit fa sa’ es bi neno-neno le nane ma leka neno namsopun onane te In namnah. ³ Nitu nak neu In nak, "Kalu Ho Uisneno In anah Ko, Ho mak fatu i hen fani utunu’." ⁴ Usif Yesus natae neu in nak: "Mansian anmoni ka al fa nok utunu’ anmes." ⁵ Nitu neki Usif Yesus neu tubu mese ma onle tasmela matak, Nitu nalile neu Usif Yesus ale plenat pah pinan. ⁶ Nitu nak neu In: "Of au fe Ko ale kuasat nok apinat fun ale sa’ nane nana’at nalali neu kau ma au fe neu sekau le au lomi. ⁷ Kalu Ho mofhae meu kau, Hom pal kum ale i ok-oke." ⁸ Nai Yesus natae in nak: "Antui nalali nak: Ho es mofhae neu Uisneno, ma amonen neu In anmes!" ⁹ Namuni te in neki Usif Yesus neu Yerusalem ma nahakeb nan In bi Ume Uisneno penen, oket nak neu In, "Kalu Ho Uisneno Anmone Ko, mumofut Ho aom mu’ko i, ¹⁰ fun antui nani nak: Of anlelu In ahake neno tunan neu Ko, hen pao Ko, ¹¹ ma of sin nat-nat Ko bi sin niman he nati’ Ho haem kais antom neu fatu." ¹² Usif Yesus natae neu in nak, "A’an nabel’on nak: Kais hom su’ ho Uisneno!" ¹³ Nitu nasopu ale in lasi su’at, in naskot na’ko Usif Yesus ma anpao leku le’at. ¹⁴ Anbi kuasat Smanan Knino Usif Yesus anfani neu Galilea. Ma In kanan nasitbon bi pah nane funam natef. ¹⁵ In nanoina sin anbi sin ume buat ma sin alsin naliatas In kanan. ¹⁶ Ma Usif Yesus nem neu Nazaret bale le In nanae anbine, ma natuin In antak nalali bi Neno Snasat antam neu ume buat, ma In anfen hen soi Sulat Knino. ¹⁷ Ma anfe neu In Mafefa Knino Nai Yesaya in sulat ma In anfei sulat ma In napeni lasi le matui nak, ¹⁸ "Uisneno Smanan anbi Kau, natuin In anop nalali min fomeni neu Kau, he etun beno alekot neu amamu’it sin. Ma In ansonu Kau, ¹⁹ he kakan lasi fetis neu atoni mafutu sin, ma etun lasi mnitas neu afolot sin, he ufetin ale atoni le anbi hamu’it, he uton leku Usif tunan le ankoenon nemen." ²⁰ Usif Yesus anunu nafani sulat nane ma anfe nafani neu ameput, oket In antok. Ale atoni abit ume buat nane sin matkenu nake’ neu In. ²¹ Oket In nanoina sin nak, "Neno i tuis i natiabon bi hi lukem." ²² Ma sin alsin antebes ma namkakan antom a’at ma uab le anpoi na’ko In fefan ma sin nak, "Ai i ka Nai Yusuf in anmone ka?" ²³ Oket Usif Yesus nak neu sin, "Of hi miton Kau leta i mak, Mnane, muleko kum ho aom! Ho moe nai amsa bi Ho kuan ale lasi le haim nen nak Ho moe mani anbi Kapernaum!" ²⁴ In nak anteni neu sin, "Au eut ki namneo, katit fa Mafefa knino le ansium nani anbi in kuan. ²⁵ Au u’umo neu ki, ma Au a’at nane namneo. Bi batan Nai Elia anmu’i bife banu namfau bi Israel. Afi neno tunan anekon ton tenu ma funan ne, leka amnahas naek bi pah nane. ²⁶ Ma kan sonu fa Nai Elia neu bife mese na’ko sin, mes neu bife banu mese anbi kuan Sarfat pah Sidon. ²⁷ Bi batan Mafefa Knino Nai Elisa anmu’i atoni men poko namfau bi Israel mes katit fa es na’ko sin he naleok al Nai Naaman, atoni Siria nane." ²⁸ Leka sin nen lasi onane sin alsin abit ume buat nane nato’an. ²⁹ Sin anfen, ma antite napoitan Usif Yesus neu kuan kotin ma neki neu tubu tunan le nahakeb kuan nane anbin, hen polin nasanut In na’ko panaf ninen. ³⁰ Mes Usif Yesus anpoi natuin sin atnankenu ma nao kun. ³¹ Nalali te Usif Yesus nao neu Kapernaum, kot es anbi pah Galilea, ma In nanoina sin bi Neno Snasat. ³² Sin nekan namnekun neu In noina, fun In a’an nahenu nok kuasat. ³³ Anbi ume buat nane anmu’i atoni mese le niut sae ma in an’anbai nok hanan naek, ³⁴ "Hoi Yesus atoni Nazaret, ai Ho mu’i lasi sa’ mok kai ka? Ho aum he mule’un kai ka? Au uhin Ko, Ho sekau Ko: Le’u Knino mu’ko Uisneno." ³⁵ Usif Yesus ankas in ma nak, "Mutena, ampoi nai mu’ko in!" Ma nitu nane antepon atoni nane neu atoni mfaun sin atnanan, oket in anpoi ma ka namenab fa atoni nane. ³⁶ Sin namkak nain oke, ma anmau’aben es nok es nak, "A’at i matain le’uf, nok In kuasat ma In matanen In naplenat ale kuasat nitu ma sin anpoi." ³⁷ Ma beno antom In anpoi funam natef bale-bale. ³⁸ Usif Yesus nao nasaitan ume buat nane ma nao neu Nai Simon in ume. Nai Simon in baif anmainin naek ma sin antoti Usif Yesus hen tulun nan. ³⁹ Usif Yesus anhake bi bife nane aon bian, ma anli’u maininit nane, ma menas nane anpoi. Bife nane anfen oket nabiku sin. ⁴⁰ Manas anmof ai antes onane te atoni namfau sin neki neu Usif Yesus ale atoni amenat le anmu’i menas huma-huma. In anpoh sin mes-mese neki In niman ma naleko’ sin. ⁴¹ Nitu anpoi na’ko ale amenat sin ma an’anbai nak, "Ho Uisneno Anmone Ko." In tal sin matani ma ka nabe’i sin na’uab fun sin nahin nak In Neno Anan kun. ⁴² Neno nok-noka onane te Usif Yesus anpoi na’ko kot nane ma nao neu bale teta es. Ma atoni namfau sin nami In oket nae’ku nokan ma sin natau In he kais nao nasaitan sin. ⁴³ Mes In nak neu sin, "Bi kuan-kuan bian amsa, Au mes he etun Plenat Uisneno, fun ansonu Kau neu lasi i." ⁴⁴ Ma In anetun Lasi Knino bi ume-ume buat pah Yudea.

¹ Anbi neno mese onane leka Usif Yesus anhake bi Nifu Genesaret ninen, to namfau nem antol nan In he nen a’an Uisneno. ² In nit belo’ nua bi nifu ninen. Atifkai ika sin ansanu na’ko belo’ ma anfase sin tifkai. ³ In antam bi belo’ esle’ Nai Simon ini ma anlelu hen tite naskotun kle’o na’ko tasi ninen. Ma In antok bi belo’ tunan ma In nanoni to namfau. ⁴ Leka In nasopu molok te, In nak neu Nai Simon, "Tite mutam belo’ neu oe amnanut ma musanut ho kifkai hem hek ika." ⁵ Nai Simon natae nak, "Anoni, fai mnanu es haim hae mate mes hai kam hek man fa sa’ es! Mes natuin Ho es amlelu of au usanut tifkai." ⁶ Leka sin anmo’e natuin, sin anhek nan ika pukan naek es ma tifkai natpisu. ⁷ Ma sin an aunapen sin biakenu bi belo’ es he nem anbab sin. Ma sin neman oket sin natua sin belo’ nua sin neki ika, ala kle’o anlem. ⁸ Leka Nai Simon Petrus in nit lasi onane in anmof li’tu bi Yesus matan ma nak, "Uisneno, kais ampaumak kau fun au atoni asanat kau." ⁹ Nai Simon ma ale atoni le sin nok In namkakan natuin sin hek ika namfau. ¹⁰ Onane amsa Nai Yakobus ma Nai Yohanes, Nai Zebedeus in anmone sin le anmase’u nok Nai Simon. Usif Yesus na’uab neu Nai Simon nak, "Kais mumtau, na’ko tomas i of hom kifkai mansian." ¹¹ Ma sin anhel belo’ sin neu tasi ninen oke te sin nasaitan ale sa’ ma natuin Usif Yesus. ¹² Bi neno es Usif Yesus anbi kuan es. Bi kuan nane anmu’i atoni mese napeni men poko. Leka in nit Usif Yesus, in anmof li’tu ma antoti In nak, "Usi, kalu Hom lomi, Ho muleko’ kau." ¹³ Usif Yesus nenu In niman, ma anpoho atoni nane ma nak, "Au lomi, ho muleko’ nai." Bi leku nane amsa in men poko nane namneku. ¹⁴ Usif Yesus anba’an atoni nane he kais anetun es ma In nak, "Hom nao nai, mulile ho aom neu ana’ lasi fuat ma meki fuat natuin ho muleko’, on afi Nai Musa anlek nani, on saksi neu sin." ¹⁵ Beno neu Usif Yesus nasitbon piut ma to namfau ansai nem neu In he nen In a’an ma he naleko’ sin na’ko sin menas. ¹⁶ Mes In naskotun sin ma nao neu bale teta ma anonen toti. ¹⁷ Ante neno mese leka Usif Yesus fe nanoni, anmu’i atoni Farisi ma ahin Sulat sin fauk antok he natnin In. Sin neman na’ko ale kuan-kuan bi pah Galilea ma Yudea ma na’ko Yerusalem. Kuasat Uisneno tunan nok In he naleko’ atoni amenat. ¹⁸ Ma atoni fauk sin neman ma anloi atoni men ole bi in hala tupa, ma sin nami he neki antam fun nabela bi Usif Yesus human. ¹⁹ Fun sin ka napeni fa lanan he neki amenat nane antam, fun atoni namfau anbi nane, sin ansae neu ume penen, anpukai nani ma nasanut atoni nane nok in hala bi to mfaun sin atnanan bi Usif Yesus In matan. ²⁰ Leka Usif Yesus nit sin nek palsait, In nak, "Bae, ho sanat masako nalali." ²¹ Ma ahin sulat ma Farisi sin natenab bi sin nekan, "Atoni i sekau kun ka, in na’uab nale’un Uisneno In kanan? Sekau nabe’i ansako sanat so Uisneno In meskun ai ka?" ²² Ma Usif Yesus In nahin sin natenab sa’, ma In na’uab neu sin nak, "Hi mitenab sa’ anbi hi nekam? ²³ Sa’ es anmakaf nesi kalu hit ta’uab: Ansako ho sanat, ai so tak: Hom fen nai ma amnao nai! ²⁴ He nati hi mihin, bi pah pinan i Anmone Pah To anmu’i kuasat hen sako sanat." In na’uab neu atoni men ole nane, "Au ak ko, hom fen nai maiti ho hala tupa, ma hom nao meu ho ume!" ²⁵ Ma leku nane amsa in anfen bi sin matan, in naiti hala tupa ma anfani neu in ume, fun anpules Uisneno. ²⁶ Ma ale atoni nane sin nekan namnekun ma naliatas Uisneno, ma sin namtaun fun sin na’uab nak, "Neno i hai mit lasi le namkakab nis kai." ²⁷ Namuni Usif Yesus anpoi, In nit atoni asimo noni poni mese kanan Nai Lewi le antok bi ume noni poni. Yesus na’uab neu in nak, "Mutuin Kau nai!" ²⁸ Ma Nai Lewi anfen oket nasaitan ale sa’-sa’ ma natuin In. ²⁹ Ma Nai Lewi anmo’e tolas naek neu Yesus bi In ume ma asium noni poni namfau ma atoni bian amsa nem antol nabua nok Yesus bi mei. ³⁰ Atoni Farisi sin ma ale ahin Sulat sin na’munu neu Yesus in asium lasi sin nak, "Nansa hi miah ma minu mibua mok atoni asimo noni poni ma atoni asanat?" ³¹ Usif Yesus natae sin nak, "Atoni aomina kan palufa mnane, so atoni amenat; ³² Au ka aum fa he boin atoni amneot, mes asanat, neu he nate’un sin nekan." ³³ Atoni Farisi sin nak anteni neu Usif Yesus, "Nai Yohanes in asium lasi sin nalenok piut ma anonen toti, onane amsa atoni Farisi sin ini, mes Ho ini sin nah ma ninu." ³⁴ Usif Yesus natae sin nak, "Nabe’i atoni amafe fe’u in-ini sin nalenok leka atoni fe’u nane fe nabua nok sin? ³⁵ Mes leka in neno ante, of naiti atoni fe’u nane na’ko sin, bi neno nane of sin nalenok." ³⁶ In nak neu sin amsa lasi leta’ mese, "Katit fa es, hen pisu muti pisa mese na’ko sobalu fe’u hen lape neu sobalu mna’. Of onane, le fe’u natpisu amsa ma le mna’ nane kan matomaf nok pisa’ le anpisu na’ko fe’u nane. ³⁷ Onane amsa katit fa es in an op tua min kase fe’u bi alu pasu amna’ oni kahat tua min fe’u nane anpisu ale pasu ma tua mina nane nat’op ma alu pasu nane namle’u. ³⁸ Mes tua min kase fe’u mes antao nani bi pasu fe’u. ³⁹ Ma katit fa esle’ in ninu tua min kase mna’ anlomi he ninu tua min kase fe’u, fun of in nak, ’Tua mna’ nane leko le’uf kun.’ "

¹ Fun ante Neno Snasat mese, Usif Yesus nao natuin lene ane kase, ma In asium lasi sin anhetu ane kase punen. Ma anu’sa neki nimkenu ma sin nekun. ² Mes atoni Farisi sin nak, "Nansa’ hi mo’e lasi le ka nabe’i amoe mani nok Neno Snasat ka?" ³ Oket Usif Yesus natae sin nak, "Ai hi kam soi fa sulat, le Nai Daud anmo’e, leka in ma in atoin enu namnahan, ⁴ le in antam neu Ume Uisneno ma in naiti utunu’ atnatas ma in nah ma anfe nani neu in atoin amnoktenu. Le ka nabe’i sin nahan so mak ana’ lasi fuat?" ⁵ Usif Yesus nak anteni sin, "Anmone Pah To, Usif neu Neno Snasat." ⁶ Ante Neno Snasat bian, Yesus antam bi ume buat ma nanoina. Bi nane anmu’i atoni mese le in niman ne’u anmate. ⁷ Ahin sulat sin ma atoni Farisi sin natnu Yesus, kalu In he naleko’ atoni bi Neno Sansat, nati’ sin napeni he nasanab In. ⁸ Mes Yesus nahin sin nek tenab nane, ma In nak neu atoni nima maten nak: "Hom fen nai ma amhake bi atnanan!" Atoni nane anfen ma anhake. ⁹ Yesus nak neu sin, "Au utan ki: Nabe’i bi Neno Snasat, atmoe alekot ai atmoe amle’ut ka? Tamonib atoni ka ai tamate atoni?" ¹⁰ Ma In ankiso sin funam natef, ma na’uab neu atoni amenat nane, "Menu ho niman nai!" Atoni nane in anmo’e onane ma in niman naleko’ kun. ¹¹ Ahin sulat sin ma atoni Farisi sin nato’an anaek ma sin na’uaben es nok es hen mo’e sa’ neu Yesus ka? ¹² Anbi neno nane Usif Yesus nao neu nu’af hen onen toti ma In anonen fai mnanu mese neu Uisneno. ¹³ Leka nok-noka In no’en In asimo lasi sin nem neu In, ma anbeti na’ko sin bo’es am nua le In antek sin nak amnek lasi: ¹⁴ Simon, le nakanab in Petrus amsa, ma Andreas Nai Simon in olif, Yakobus ma Yohanes, Filipus ma Bartolomeus, ¹⁵ Matius ma tomas, Nai Alfeus anmone, ma Simon le antek in atoni Zelot, ¹⁶ Yudas Nai Yakobus anmone, ma Yudas atoni kuan Kariot le namuni anfani a’aneb. ¹⁷ Ma Yesus ansanu nok sin nalali anhake bi mnela es, bi nane In asimo lasi sin namfau nabuan ma atoni amfaut bian neman na’ko Yudea ma Yerusalem ma tasi ninen pah Tirus ma Sidon. ¹⁸ Sin neman he nen In ma he naleko’ sin na’ko sin menas; fun naleko’ nani ale aniut sae sin amsa. ¹⁹ Ma atoni namfau sin nami hen poe Yesus, fun anmu’i kuasat le anpoi na’ko In ma In naleko’ sin alsin. ²⁰ Yesus ankiso In asimo lasi sin ma nak, "Alekot, hi amamu’it, fun plenat Uisneno hi ini kim. ²¹ Alekot, hi le mimnah ambi neot i, fun of namsenab ki. Alekot, hi le amkae ambi neot i, fun of hi mani. ²² Alekot, hi le mituin Anmone Pah To, atoni na’akan ki, ma sin anli’u napoitan ki, ma nasiu ki ma antite hi kanam on lasi amle’ut. ²³ Mimlil nai bi neno nane ma amokaleti nai, fun hi baene naek bi neno tunan; fun afi sin amfini anmo’e onane amsa neu mafefa knino sin. ²⁴ Mes amle’ut neu ki atoni amu’it, fun hi mipeni milali hi amlilat. ²⁵ Amle’ut neu ki le hi mimsen ambi neot i, fun of hi mimnah. Amle’ut neu ki le hi mani ambi neot i, fun of him kul ma amkae. ²⁶ Amle’ut neu ki leka ale atoni anpules ki; fun afi sin amfini anmo’e lasi nane neu mafefa moel sin." ²⁷ "Mes Au ak neu ki le him nen Kau, amnek hi musu nai, mo’e alekot neu atoni le nato’an ki. ²⁸ Mi’uab alekot neu atoni le ansukat ki; onen toti neu atoni le na’akan ki. ²⁹ Atoni le anpas ho su’im bian, amtulu su’im bian anten. Ma atoni le naiti ho sobalu kotif, kais mutau he in naiti ho sobalu nanaf amsa. ³⁰ Fe nai, neu sekau le antoti ko, ma naik ai kais amtoti mufani in le in naiti ho sa’an. ³¹ Ma onle him lomi he atoni anmo’e sa’ neu ki, onane amsa hi mo’e mani neu sin. ³² Ma kalu him nek atoni le sin nek ki, alekot sa’ neu ki ka? Fun atoni asanat sin amsa nek atoni le nek sin. ³³ Fun kalu hi mo’e alekot neu atoni le anmo’e alekot neu ki, alekot sa’ neu ki ka? Atoni asanat amsa sin anmo’e onane. ³⁴ Ma kalu him fe mlapat sin sa’es, le mifneka hem simo mifani sa’ na’ko in, hi mipeni halinat sa’? Asanat sin amsa anfe nlapat neu asanat, he nati’ sin simo nafani papmese. ³⁵ Mes hi, amnek hi musu nai, ma mo’e alekot ma amfe mlapat ma kais mifneka seunbanit; fun hi baen nane naek ma of him fani anah-anah Uisneno Amnanut. Fun Uisneno namnau ale atoni le kan tek nahin fa lasi alekot ma atoni apenut sin. ³⁶ So hi mu’i manekat, onle hi Ama amsa’ anmu’i manekat." ³⁷ "Kais him lefi lasi, of onane es kan lefi lasi neu ki. Ma kais hi mifek lasi, of onane es ka nafek fa hi lasi; so him sako ma hi amsa of masako. ³⁸ Fe nai ma of onane anfe ki; su’at alekot, le manene ma anheko nani ma nat’op of nahoeb nani neu hi aifam. Fun him su’ meki su’at sa’, of ansu’ ki nekin." ³⁹ Usif Yesus na’uab anteni neu sin lasi leta mese nak, "Nabe’i ka atoni matfolo antopu atoni matfolo? Kalu kahat nua sin anmofun bi bola. ⁴⁰ Asimo lasi ka nesin fa in kulu, mes sekau le nasopu in lasi noina of namnes nok in kulu. ⁴¹ Nansa’ ho mit hau lapu’, bi ho bia’ in matan, ma hau kbat bi ho matam kum ho ka mit mani fa ka? ⁴² Leka me ho mube’i mak ho bae: Bae, maut fe he upoitan hau lapu’ bi ho matam, ma ho ka mit fa hau kbat bi ho matam? Atoni asafanut, mupoitan hau kbat bi ho matam fe, he ho mit nok alekot ma mupoitan hau lapu’ nane na’ko ho bae in matan." ⁴³ "Fun hau alekot ka nafuan fa fuan amle’ut, ma hau amle’ut ka nafuan fa fuan alekot. ⁴⁴ Fun ale hau, mahine bi in fuan. Fun hit kat seu fa bubuk fuan na’ko kisan ma tanu’an sena fuan na’ko kasunat. ⁴⁵ Atoni alekot napoitan lasi alekot na’ko nekan nanan alekot ma atoni amle’ut napoitan lasi amle’ut na’ko nekan amle’ut. Fun in uab anpoi na’ko in nekan." ⁴⁶ "Nansa’ him tek Kau mak: Usi, Usi, ma hi ka mo’e fa sa’ le Au u’uab neu ki ka? ⁴⁷ Sekau le in nem neu Kau ma in amnen Au a’ak ma anmo’e natuin -- of Au ulile ki, in onle sekau --, ⁴⁸ in onle atoni le he nahakeb ume: Atoni nane in anhani namnanu nalali te in ansuki nani bi fatu. Ul sako ansanu ma noe sako ansae antom ume le nane ma ume nane ka nabeko fa, fun nahakeb nani matani. ⁴⁹ Mes neu sekau le in nen nalali Au a’ak ma ka natuin nani fa, in onle atoni le nahakeb ume anbi naijan ka nok fa sukin. Leka noe sako antom nani te, ume nane natsel ma namle’u naek."

¹ Fun Yesus natis nalali In a’an neu to mfaun, oket In antam neu kuan Kapernaum. ² Bi nane to meo nakaf mese in anmu’i ate mese le in nek nani. Ate nane namen mafena nak hen mate. ³ Ma leka nakaf nane in nen uab antom Yesus, in anlelu amnasit atoni Yahudi sin fauk neu Yesus ma antoti, he In nem ma naleko’ in ate. ⁴ Sin nem ante Yesus sin antoti In nok nek atebes nak, "In antam ota he Ho mo’e mani neu in, ⁵ fun in nek hit to ma in es nahakeb ume buat neu kai." ⁶ Ma Yesus nao nok sin. Leka In ka nalo’ fa to meo nakaf in ume nane, to meo nakaf ansonu in aon bian sin he nak neu In, "Usi, kais muhaebom, fun au ka tam fa ota he simo Ko bi au ume; ⁷ es nane au amsa, utenab, au ka tamaf ota he ue’ku nok Ko. Mes mu’uab nai fefa mese, of au ate in naleko’. ⁸ Fun au amsa atoni asutai kuasat, ma anmu’i to meo ansutai au plenat. Kalu au plenat es ak: Hom nao nai!, ma in nao, ma neu es anteni: Aum fa nai!, ma in nem, ma au ak au ate: Mepu i nai!, ma in anmepu." ⁹ Ma leka Yesus nen uab nane, In namkak ma In naklelon neu to mfaun le natuin In, ma nak, "Au ak ki, nek ateb knino humaf i Au ka upeni fa, anbi to Israel!" ¹⁰ Ma atoni le ansonu sin nane anfani neu ume sin napeni ate nane naleko kun. ¹¹ Namuni te Yesus nao neu kuan es kanan Nain. Ma In asium lasi nao nokan ma to pukan naek nok In. ¹² Ma leka In nem anhaumak kot in eno, anloi atoin amates mese anpoi, an atoni fua mese na’ko in ainaf le bife banu kun, ma atoni namfau na’ko kot nane sin nok bife banu nane. ¹³ Ma leka Usif Yesus nit bife banu nane, In nekan namnau nis in ma nak, "Kais hom kae!" ¹⁴ In fonat nu anpaumak ma anpoho hau loi ma aloit sin hake; In nak, "Atoni munif, Au ak ko, hom fen nai!" ¹⁵ Ma atoni amates nane anfen ma antok ma na’uab, oket Yesus nana’at in neu ainaf. ¹⁶ To mfaun le nane sin namtau ma sin nanaeb Uisneno ma nak, "Mafefa knino naek mese anbol bi hit atnanak" ma "Uisneno nail kun In to." ¹⁷ Ma beno antom Yesus anpoi bi ale pah Yudea ma bi ale pah funam natef. ¹⁸ Leka Nai Yohanes napeni hanaf antom ale lasi nane na’ko in asium lasi sin, ¹⁹ in no’en asium lasi nua ma anlelu sin nao neu Usif Yesus ma nak, "Ati Ho es he aum ka ai hai hem pau meu es anteni ka?" ²⁰ Leka sin nua sin nem ante Yesus, sin nak, "Nai Yohanes Aslanit anlelu kai hem toti Ko mak, Ho es of amnemat nane ai hai hem pao atoni bian ka?" ²¹ Bi tabu nane Yesus naleko’ atoni namfau na’ko ale menas ma na’ko ale niut sae sin, ma In anfe mnitas neu ale atoni afolot namfau. ²² Ma Yesus natae sin nak, "Him nao nai, ma miton neu Nai Yohanes sa’ le hi mit ma him nen milali: Atoni afolot nit anfani, atoni hae ole in nao, men poko sin nakninon, atoni atoni sin nen, nafena nafani atoni amates ma anetun lasi alekot neu amamu’it sin. ²³ Ma ua alekot neu atoni le nekan ka na’unu fa ma antite Kau." ²⁴ Leka Nai Yohanes in haefenu sin nao, Yesus namolok neu to mfaun nane antom Nai Yohanes nak, "Him nao meu mnela hufui hem kiso sa’ ka? Atfob le anin anfu noebanin ka? ²⁵ Ai him nao hem kiso sa’ ka? Kiso atoni le anpake amasat ka? Atoni le anpaek alimat ma anmoni nok aminat namaika anbi sonaf. ²⁶ Mes him nao neu sa’ ka? Kiso Mafefa knino ka? Namneo, Au ak ki, nesin na’ko Mafefa knino. ²⁷ Fun antom Nai Yohanes antui nani nak: Kiso, Au sonu Au haef nahunun Ko, in of naloitan Ho lalan bi Ho matam. ²⁸ Au uton neu ki: Anbi sin le nahonis sin na’ko bife katit fa esle’ naek nesin Nai Yohanes, mes atoni abaut afinit bi plenat Uisneno naek nesin in kun." ²⁹ Ale to le sin nen nalali In a’an, ma ale asimo noni poni, sin tebes Uisneno In amneot, fun Nai Yohanes naslani nalali sin. ³⁰ Mes atoni Farisi sin ma ahinet plenat knino sin antite Uisneno In lekat neu sin aon, fun sin kan lomif he Nai Yohanes naslani sin. ³¹ Usif Yesus nak, "Au he uleta atoni bat muni i eki sa’ ma sin onle sa’an ka? ³² Sin maleta on liana-liana le antok anbi masa’ ma anmaboinen es nok es nak: Haim fu feku neu ki, mes hi ka mibso fa, haim si kulut, mes hi kam kae fa. ³³ Fun Nai Yohanes Aslanit nem, ka nah fa utunu’ ma ka ninu fa tua mina amtasa ma hi mak: In niut sae. ³⁴ Namuni Anmone Pah To nem, In nah ma ninu, ma hi mak: Kiso, In atoni apalu ma amninut, masoba nok asimo noni poni ma atoni asanat sin. ³⁵ Mes lasi hine neno tunan namneob nani natuin ale atoni le ansimo nani." ³⁶ Atoni Farisi mese anhone Yesus he nati’ anbukae anbi in ume. Yesus nem neu atoni Farisi nane in ume ma antoko hen bukae. ³⁷ Bi kuan nane anmu’i bife mese lo mahine on bife asanat. Leka bife nane in nen nak Yesus anbukae bi atoni Farisi in ume, nalali te in nem neki min fomeni botil mese. ³⁸ Le in ankae ma nao anhake anbi Yesus In kotin antot In haen nane oket napet Yesus haen neki in matnu ma nose nameto neki in nakan funun. Nalali te in nek Yesus haen ma nose neki min fomeni nane. ³⁹ Mes leka atoni Farisi le anhone Yesus nit lasi nane, in natenab bi in nekan nak, "Kalu In Mafefa knino, of In nahin, sekau ka, ma bife sa’ ka le anpoh In; of In nahin nak bife nane asanat kun." ⁴⁰ Oket Yesus na’uab neu in nak, "Simon, anmu’i sa’ es le Au he uton neu ko." Nai Simon natae, "Mukua a’am Ama Anoni." ⁴¹ "Anmu’i atoni atusat nua le natus neu atoni abait noni. Le es natus noni dinar natun nim, in bian nane bo’nim. ⁴² Fun sin kan mu’in fa sa’ hen baen, in nose atoni nua in nane sin tusa. Sekau bi sin nua sin le namnau nesin noni tuaf nane?" ⁴³ Nai Simon nak, "Au utenab ak, in le anose in tusa naek." Yesus nak neu in, "Ho tenab nane namneo." ⁴⁴ Ma In nik neu bife nane ma In na’uab neu Nai Simon nak, "Ho mit bife i ka? Au tam eu ho ume, mes ho kam fe Kau fa oe he Au boe Au haek. Mes bife i napet Au haek neki in matnu ma nose nameto neki in nakfunu. ⁴⁵ Ho kam nek Kau fa, mes na’ko Au tam om, bife i ka nas-nas nitaf anek Au haek. ⁴⁶ Ho kam nosef mina neu Au nakak, mes in nose min fomeni neu Au haek. ⁴⁷ Es nane Au ak ko: Ansako nalali in sanat namfau fun in nalile manekan naek. Mes atoni le in sanat masako an-ana, in nalile manekat an-ana amsa." ⁴⁸ Oke te in nak neu bife nane, "Ho sanat masako nalali." ⁴⁹ Ma alsin le antokon bukae nokan, sin natenab bi sin nekan, "In sekau kun ka es In ansako sanat?" ⁵⁰ Mes Yesus na’uab neu bife nane nak, "Ho nekam ateb knino nane nahoin ko. Hom nao mok tetus!"

¹ Ma kalob fa onane te Yesus nao fun ma natef kot-kot ma na’ko kuan es neu kuan es fun anetun beno knino plenat Uisneno. In asimo lasi bo’es am nua sin nok In’, ² ma bife bian amsa, le naleko’ sin na’ko niut sae ma menas bian, esle’ bi Maria le antek nani bi Magdalena le napoitan nitu hitu na’ko in, ³ ma bi Yohana Nai Khuza le Nai Herodes in apao noni in fel, ma bi Susana ma bife-bife bian. Bife-bife nane sin tuthae Yesus nok In amnoktin neki sin mu’in kun. ⁴ Leka atoni namfau anpoi nem, na’ko kot-kot ma namesbok neu Yesus, nalali te In namolok neki lasi leta mese nak, ⁵ "Anmu’i atoni akifu’ fini mese anpoi hen kifu’ in fini. Bi neno in ankifu’, onane te fini bian anmofu bi lalan ninen, ma atoni anteli nani, ma kolo-kolo bi neno atnanan nem ma anlot nani. ⁶ Bian anmofu bi faut putun, ma anmoni nalali te anmaknene, fun ka napeni fa oe. ⁷ Ma bian anmofu bi katila atnanan, ma katila nane anmoni nokan ma aneo nisan. ⁸ Ma bian anmofu bi nain alekot, nalali te anmoni ma nafua ante peni natun mese." Leka Yesus na’uab nalali te In nak, "Sekau le anmu’i luken he natnin, so in natnin nai." ⁹ In asium lasi antoti In, lasi leta nane in oten sa’ ka. ¹⁰ Ma In natae nak, "Anfe nalali ki he mihin lasi tolo’ plenat neno tunan, mes neu atoni bian anfe nani neki lasi leta, he nati’ sin kiso mes ka nitan, fun sin nenan mes ka nahinen fa. ¹¹ Lasi leta i in oten nak: Fini nane a’an Uisneno kun. ¹² Amofut bi lalan ninen nane esle’ atoni anenat; nalali te nitu in nem naiti a’an nane na’ko sin nekan he nati’ kais sin nekan nateb knino ma napeni honis. ¹³ Ma amofut bi fatu nane esle’ sin le nen a’an nane ma ansimo nani nok nek amlilat. Mes a’at nane kan mu’if ba’at anbi sin nekan. Sin nateb leku tuka, ma kalu su’at nem neu sin oke te sin naskotun. ¹⁴ Le amofut anbi katila nane esle’ atoni le sin nen a’an nane, ma anbi a’at nane in monin, sin hapnesok nok lasi a’unu, ma lasi amu’it, ma monit amlilat, talan te sin ka napoitan fa fuaf amnatus. ¹⁵ Ma amofut bi nain alekot nane, esle’ atoni le sin nen a’an nane, ma napan bi sin nekan alekot oket napoitan fuan nok nek asutais." ¹⁶ Katit fa esle’ in not nalali paku oke te antoeb nani neki kusi, ai antao nani bi hala nupun, mes in antao nani bi tet paku, he nati’ atamas sin nit nani in pinan. ¹⁷ Fun katit fa sa’ esle’ nakolo, le kan poi natonon, ma katit fa sa’ esle’ naninbon, le ka mahine fa bi mat-mat. ¹⁸ Es nane him kiso ma him nen onane. Fun atoni le anmu’i, of anfe nes neu in, mes atoni le kan mu’if of naiti amsa na’ko in, sa’ le in natenab in ini kun. ¹⁹ Yesus In ainaf ma In oilfenu nem neu In, mes sin ka nem ante fa In fun atoni namfau. ²⁰ Atonas nem naton neu In nak, "Ho aina ma Ho oilenu anhake es mone ma anlomi hen nae’ku nok Ko." ²¹ Mes In natae sin nak, "Au aina ma Au olif sin, esle’ sin nen a’an Uisneno ma anmo’e natuin." ²² Anbi neno es Yesus nok In asium lasi sin ansae neu belo’ es ma In na’uab neu sin nak, "Hit atlak teu nifu bian." Oke te sin anlak. ²³ Ma leka sin fe hen lakan Yesus antup. Naskek onane te anin nautus ansanu nem neu nifu, ma oe antam neu belo’ ma sin nekan nahenu nok amtaus. ²⁴ Asium lasi sin nem anpo’ nafena In ma nak, "Am Kulu, Am Kulu, hit tamle’u!" Yesus anfen, nalali te In nabin anin ma oe apesen nane. Ma anin ma oe nane namne ma nifu nane antainine nunfin. ²⁵ Ma In nak sin nak, "Hi nek ateb knino nane es me ka?" Mes sin namtau ma namkak, fun anma’uaben es nok es nak, "In sekau kun ka, le In naplenat anin ma oe ma sin natuin In?" ²⁶ Yesus nok In asium lasi sin anlak ante pah Gerasa le anmatot nok pah Nifu Galilea. ²⁷ Leka Yesus ansae neu meto, atoni mese na’ko kot nane nem nae’ku nokan; atoni nane nekmaun ma in kan abtai fa suk a’lo’ ma in ka namaika fa anbi ume, mes anbi nuat naukel. ²⁸ Leka in nit Yesus, in anhunun ma anmof bi Yesus In haen ma na’uab nok hanan naek nak, "Ho mu’i lasi sa’ mok kau ka, Yesus Uisneno Amnanut Anmone Ko? Au toti Ko, kais Hom hamu’i kau." ²⁹ In na’uab onane fun Yesus anlelu maunu tuaf nane hen poi na’ko atoni nane. Fun fe fe’at maunu tuaf nane anhel in, ma hen pao in, sin anfutu ma ankolen, mes in nafek nain ale tain futus ma maunu tuaf anli’u nani neu bale hufui. ³⁰ Ma Yesus natan in nak, "Ho kanam sekau ka?" In natae nak, "Au kanak Legion," fun maunu tuaf namfau antam anbi in. ³¹ Ma nitu sin antoti neu Yesus, he kais anli’u natam sin neu kefan maten. ³² Anbi nane anmu’i fafi pukan naek le nami mnahat anbi nu’af, nitu sin antoti neu Yesus he namautu sin antam bi fafi-fafi nane. Yesus anlut sin totis nane. ³³ Ma nitu sin anpoi na’ko atoni nane ma antam neu fafi pukan nane. Ma fafi pukan nane anoklok na’ko ki’af antam neu nifu ma anleman mate ok-oke. ³⁴ Leka atukus sin nit lasi nane, sin naen ma anetun lasi nane bi kot ma kuan-kuan funam natef. ³⁵ Ma ale atoni sin anpoi he nit lasi sa’ le anbol. Sin nem neu Yesus ma sin nit atoni le nitu nasaitan in antok bi Yesus In haen; in anpake abtais ma nekan naleko kun. Oke te sin namtaun. ³⁶ Fun alsin le sin nit, sin anetun neu sin, nak atoni le nitu antam neune in naleko kun. ³⁷ Ma ale atoni pah Gerasa antoti Yesus, he nati’ In nao nasaitan sin, fun sin namtau ka nabe’if. Oke te Yesus ansae neu belo’ ma In anfani. ³⁸ Fun atoni le nitu sin nafetin nani antoti he nok Yesus. Mes Yesus anlelu in nao ma In nak, ³⁹ "Hom fani meu ho ume ma muton ale lasi le Uisneno anmo’e nani neu ko." Ma in nao napun kot ok-oke ma anetun ale sa’ le Yesus anmo’e nani neu in. ⁴⁰ Leka Yesus anfani neu nifu bian, atoni namfau nem ansenu In fun sin alsin anpao In. ⁴¹ Ma atoni mese kanan Nai Yairus nem. In nakaf neu ume buat. In anmof bi Yesus haen ma antoti In he nati’ Yesus nem neu in ume, ⁴² fun in anfeto fua mese in uan ton bo’es am nua hen mate. Fun Yesus fe he nao neu ume nane, to namfau anhaip nan In. ⁴³ Anmu’i bife mese le in namen sopol opan na’ ton bo’es am nua ma es ka nabe’i fa he naleko nan in. ⁴⁴ In fonat nu anpaumak Yesus In kotin ma in na’ Yesus In tainusat betan, ma bi leku nane amsa in men sopol nane anhetu. ⁴⁵ Yesus na’uab nak, "Sekau in na’ Kau ka?" Fun sin alsin natotan, Nai Petrus nak, "Usif, to namfau natnana Ko ma anbe’u Ko." ⁴⁶ Mes Yesus nak, "Anmu’i tuaf mese le na’ Kau, fun Au uhin anmu’i matani anpoi na’ko Kau." ⁴⁷ Leka bife nane in nit, nak in moet nane mahine, in na’tai ma nem anmof bi Yesus In matan ma anetun neu to amfaut, nansa es in na’ Yesus ma bi leku nane amsa in naleko’ kun. ⁴⁸ Ma Yesus nak neu bife nane, "Anah, ho nek ateb knino es naleko’ ko, hom nao nai mok tetus." ⁴⁹ Yesus fe na’uab onane, atoni es nem na’ko ume buat nakaf in ini sin ma nak, "Ho anfeto anmaten, kais Ho mususab Ama Anoni!" ⁵⁰ Mes Yesus In nen ma na’uab neu Nai Yairus nak, "Kais mumtau so ho nekam nateb knino nai, ma ho anah of anmoni." ⁵¹ Ma leka in nem ante Nai Yairus ume, In kan lomi he es antam nok In, al Nai Petrus, Nai Yohanes ma Yakobus ma anah nane in ainaf ma in amaf. ⁵² Sin ankae ma ankul neu anah nane. Mes Yesus nak, "Kais amkae; in kan mate, mes in tup." ⁵³ Sin anmanis Yesus fun sin nahin nak anah nane anmate. ⁵⁴ Mes Yesus ana’ li’ana nane in niman ma In nak, "Anah hom fen nai!" ⁵⁵ Ma oke te anah nane in asmanan anfani nem ma naskek in anfen ma anhake. Yesus anlelu hen fene he nah. ⁵⁶ Ma anah nane in amaf ainaf sin nekan namnekun, mes Yesus anbanu sin ka nabe’i natonan es neu lasi sa’ le anbol nalali.

¹ Usif Yesus no’en In asimo lasi bo’es am nua, ma anfe neu sin matani ma kuasat hen li’u ale nitu ma he naleko ale menas. ² Ma In ansonu sin hen etun plenat Uisneno ma he naleko amenat, ³ Yesus nak sin, "Kais meki sa’ bi lalan, he tes ka, ai bukael ka, utunu’ ka ai noni ka, ai sobalu nua. ⁴ Ma leka ansimo ki ma amtam bi ume me, nati’ mimaika ambin talan te him poi mi’ko. ⁵ Ma kalu sin kan simo ki fa, him poi mi’ko kot nane ma amtekal afu na’ko hi haem hen fani saksi neu sin." ⁶ Oke te sin anpoi ma sin nao neu kuan-kuan ma anetun Lasi Alekot ma naleko’ amenat bi me-me. ⁷ Nai Herodes, usif pah Galilea in nen ale lasi nane ma in nekan na’oni, fun bian sin na’uab nak, Nai Yohanes anfen anfani na’ko amates. ⁸ Ma bian sin nak, Nai Elia nalilon, ma bian nak, mafefa knino na’ko ahunut sin anfen anfani. ⁹ Mes Nai Herodes nak, "Nai Yohanes in nakan au ote ufek ulali. I sekau kun ka, le au nen in lasi onane ka?" Ma in nami lalan he na’eku nok Yesus. ¹⁰ Ma haefin anfani nem, ma anetun neu Yesus ale lasi le sin anmo’e nalali. Oke te Yesus nok sin anhelok neu kuan esle’ antek nani nak Betsaida. ¹¹ Leka to mfaun nahin, nalali te sin nao natuin In. Yesus ansimo sin ma na’uab neu sin Plenat Uisneno ma In naleko’ ale atoni amenat sin. ¹² Leka neno hen faien In asimo lasi bo’es am nua nem neu In ma nak, "Amlelu to mfaun i he nao neu kuan-kuan ma kot-kot he naim bale ma mnahat fun hit bi i bale hufui." ¹³ Mes Usif Yesus nak neu sin, "Him fen sin hen bukaen!" Mes sin natae, "Le hai mu’i ka nesif na’ko utunu’ pisa nim ma ika koe nua, so mak haim nao hem sos mnahat neu to pukan naek i." ¹⁴ Fun anbi nane oni atoni nifun nim. Mes In nak neu In asium lasi sin nak, "Amlelu sin hen tok pukan-pukan, oni pukan es atoni bo’nim." ¹⁵ Sin anmo’e onane ma anlelu sin antok. ¹⁶ Usif Yesus naiti utunu’ pisa nim ma ika koe nua nane, nalali te In anbaisenu neu neno tunan, antek alekot neune, ma ane’bi utunu’ ma ika ma anfe nani neu In asimo lasi sin hen bati nani neu ale atoni sin. ¹⁷ Ma sin anbukae talan te namsenan fin. Sin nabua nafani ale mnah nesif nane nahenu aba’ bo’es am nua. ¹⁸ Anbi haef es leka Usif Yesus anmes kun hen onen toti, In asimo lasi sin nem neu In. Ma In antoti sin nak, "Paha mfaun sin antek Kau sekau ka?" ¹⁹ Sin natae nak, "Nai Yohanes Aslanit, bian nak Nai Elia, ma bian nak anteni nak mafefa knino es na’ko ahunut sin anfen anfani." ²⁰ Mes Usif Yesus nak sin, "Mes hi, hi mak Au le i sekau ka?" Nai Petrus natae nak, "Neno Anan mu’ko Uisneno." ²¹ Ma Yesus antal matani, he nati’ kais sin anetun lasi nane neu es. ²² Ma Yesus na’uab nak, "Anmone Pah To mes ansutai mane’at namfau ma ale amnasit sin, ma ale ana’ lasi fuat nakaf sin ma ale ahin sulat sin of antite In ma namate In mes bi neno tenu nafena nafani." ²³ Yesus nak sin alsin, "Sekau anlomi he natuin Kau, in mes natotan in aon, ma anloi in hau nehe neno-neno ma natuin Kau. ²⁴ Fun sekau anlomi he nahoni ini smanan, of in naneku nani, mes sekau anlomi he naneku in smanan natuin Au mepu, of in nahoni nani. ²⁵ Alekot sa’ ka neu atoni le napeni pah pinan ok-oke, mes in nanukab ma nalukib in aon? ²⁶ Fun sekau in anmaen Kau ma in anmaen Au a’ak, Anmone Pah To of anmaen nani amsa leka In koenon nem bi In apinat ma bi Amaf In apinat ma ahake knino sin. ²⁷ Mes Au ak ki: Tebes anmu’i atoni anbi ki le anhake anbi i, of sin kan maten fa nahunun sin nit Plenat Uisneno." ²⁸ Neno fanu namuni na’ko ale a’an i te, Yesus neki Nai Petrus, Yohanes ma Yakobus ansae neu nu’af tunan hen onen toti. ²⁹ Ma In fe hen onen toti, In human nabaina ma In bale pake nane muti nalim-nalim. ³⁰ Ma kiso te atoni nua namolok nok In, esle’ Nai Musa ma Nai Elia. ³¹ Sin nuasin natonok bi apinat nane ma sin na’uab antom Yesus Ini maten le mes he natis nani bi Yerusalem. ³² Fun Nai Petrus nok in bia sin antup anfin, ma leka sin anbe’ sin nit Yesus anbi apinat; ma atoni nua nane anhake nok In. ³³ Ma leka atoni nua nane he nabatiok nok Yesus, Nai Petrus nak neu In, "Anoni, leko nesi haim bi bale i. So hai mihakeb la’at tenu, es neu Ko, es neu Nai Musa, ma es neu Nai Elia." Mes Nai Petrus in ka nahin fa sa’ le in nauab. ³⁴ Leka in fe na’uab onane te, nope anbol ma ankub nan sin. Ma leka sin antam bi nope nane te sin namtau. ³⁵ Ma hanaf mese anbol na’ko nope nane ma nak, "I Au Anah le Au beti ani, him nen nai na’ko In." ³⁶ Leka hanaf nane anbol, sin nit Yesus anmes kun. Ma asimo lasi sin anta’ kun ma bi neno nane sin ka na’uab fa neu es am es antom lasi le sin nit nalali. ³⁷ Fun nokfa onane leka sin ansanu na’ko nu’af nane atoni namfau ansai nem he nae’ku nok Yesus. ³⁸ Ma kiso atoni mese na’ko atoni mfaun nane anan’bai nak, "Pak, au toti Ko he mail au anah, fun in au anmone fua mese. ³⁹ Ma leka nitu smanaf anhek in, naskek in anan’bai ma nitu smanaf nane anbeko nani talan te in fefan nafule. Nitu smanaf nane nasusab in ma kan lomi fa he nasaitan anah nane. ⁴⁰ Ma au toti Ho asimo lasi sin hen li’u napoitan nani, mes sin ka nabe’i fa." ⁴¹ Yesus natae nak, "Hoi batan le ka apalsait ma nakfatu, talan te leka Au he ubala ok ki ma he sutai ki ka? Mok ho anah nane nem neu i!" ⁴² Ma leka anah nane nem anpaumak Yesus, nitu nane antepon in neu nain ma antetak in. Mes Yesus nakain nitu smanaf nane ma naleko’ anah nane ma anfe nafani neu in amaf. ⁴³ Sin alsin nekan namnekun natuin Uisneno In kuasat matani. ⁴⁴ "Mitnin nai ma ampanat ale Au a’at i: Fun Anmone Pah To of mana’at neu nimaf mansian." ⁴⁵ Ma sin ka nahin fa a’at nane, fun a’at nane In oten fe nakolo’on neu sin, he kais sin nahin nani. Ma sin namtau he natan a’at nane neu Yesus. ⁴⁶ Ma lasi matoes mese anbol neu Yesus asium lasi sin antom neu sekau es nanae nesi anbi sin. ⁴⁷ Mes Yesus nahin sin nek tenab nane. Es nane te In antopu nan liana mese ma nahakeb bi In aon bian, ⁴⁸ ma nak neu sin, "Sekau ansimo liana i bi Au kanak, in ansimo Kau; ma sekau in ansimo Kau, in ansimo In, le ansonu Kau. Fun sekau le nabau nis anbi hi alki, in es anaek." ⁴⁹ Ma Nai Yohanes nak, "Tuan, hai mit atoni es anli’u napoitan nitu sin neki Ho kanam, oke te hai mikain mani, fun in ka nao natuin kit fa." ⁵⁰ Ma Yesus nak neu in, "Kais hi mikain, fun sekau le kan laban ki fa, in anhaek nok ki." ⁵¹ Leka neno anpaumak he naiti Yesus neu neno tunan, In nafek he nao neu Yerusalem, ⁵² ma In ansonu tuaf fauk he nahunun In. Sin nao ma antam bi atoni Samaria sin kuan he naloitan ale sa’ neu Usif Yesus. ⁵³ Mes atoni Samaria sin kan simo fa In, fun In sali he nao neu Yerusalem. ⁵⁴ Leka asimo lasi nua, esle’ Nai Yakobus ma Nai Yohanes nit lasi nane sin nak, "Usif, bait Hom lomi, haim toti ai ansanu na’ko neno tunan he notu nis sin ka?" ⁵⁵ Mes Yesus naklelo on ma nakain sin. ⁵⁶ Oke te sin nao neu kuan bian. ⁵⁷ Leka Yesus nok In asimo lasi fe nao natuin lalan, atoni mese na’uab neu Yesus nak, "Au he utuin Ko, neu lalan me le Ho hem nao." ⁵⁸ Yesus nak neu In, "Asu fui anmu’i bola ma kolo anmu’i kuna, mes Anmone Pah To kan mu’if bale he natuta Ini nakan." ⁵⁹ Ma In nak neu atoni bian, "Mutuin Kau nai!" Mes atoni nane nak, "Mufetin kau fe he au nao he sub au ama." ⁶⁰ Mes Yesus nak neu in, "Mautu nai amates ansub sin amates; mes ho amnao nai he muton Plenat Uisneno." ⁶¹ Ma atoni es anteni nak, "Au he utuin Ko, Usif, mes mufetin kau fe, he useon au ume nanan sin." ⁶² Mes Yesus nak neu in nak, "Katit fa atoni le antao nalali niman neu besi foi afu, oke te in nike koti, in antam ota bi Plenat Uisneno."

¹ Namuni na’ko nane te, Usif Yesus anlek asium lasi bian sin bo’hitu, ma ansonu sin nua-nua nao nahunun In neu ale kot ma bale le In he nao neune. ² Yesus nak neu sin, "Hetus ma mnonut nae le’uf, mes ameput ka namfauf. Es nane him toti nai neu hetus ma mnonut in Usin, he In anfe ameput neu mnonut nane. ³ Him nao nai, kiso Au sonu ki on bibi kase bi asu fui sin atnanan. ⁴ Kais meki alu nok noni ai bukael ai penhae, ma kais hi mahosen bi lalan. ⁵ Kalu him tam meu ume me, nahunu te hi mak: Halan nekaf neu ume i. ⁶ Ma bait anmu’i atoni le ansimo halan nane, lof hi halan nane nabala bi in. Mes kalu kahaf halan nane of anfani nem neu ki. ⁷ Hi mimaika anbi ume nane, miah ma minu sa’ le nabalab neu ki, fun ameput nane lo mes he napeni palseb. Kais mi’oni mi’ko ume es meu ume bian. ⁸ Ma leka him tam ambi kot me ma sin ansimo ki, miah nai sa’ le sin nabalab ki neu ki. ⁹ Mileko’ nai amenat le sin anbine ma ametun sin mak: Plenat Uisneno nem haumakan ki. ¹⁰ Mes leka him tam meu kot me ma sin kan simo ki fa, him poi nai meu ale lal uf ma hi mak: ¹¹ Afu skuku bi hi kuan na’ki bi hai haem, of haim tekal mani neu ki; mes so hi mihin nai mak: Plenat Uisneno nem anhaumak. ¹² Au ak ki: of kot Sodom in sutais anmakafa nesin kot nane." ¹³ "Amle’ut neu ko Khorazim! Amle’ut neu ko Betsaida! Fun bait afi bi kot Tirus ma Sidon mo’et amkakat anbol neu sin, le anbol bi hi atnanam, oni sin nate’un sin nekan ma antok nok kulut. ¹⁴ Bi neno kasat nateabon of kot Tirus ma Sidon sin lenat anmakaf nesin ki. ¹⁵ Ma ho Kapernaum, ati he nasaeb ko ante neno tunan ka? Kahaf, of nasanut ko talan te amates balan! ¹⁶ Sekau in nen ki, in nen Kau, ma atoni le antite ki, in antite Kau; ma sekau in antite Kau, in antite In kun le ansonu Kau." ¹⁷ Namuni te asium lasi bo’hitu nane sin anfani nem nok amlilat ma sin nak, "Usif, ale nitu, sin naluli neu kai kalu haim tek Ho kanam." ¹⁸ Yesus nak neu sin, "Au it Sanat in tuaf anmof on limat na’ko neno tunan. ¹⁹ Mimnau Au fe ulali ki kuasat hem teli bi kauna, kabiti ma ale musu sin kuasat, ma sa’es of kan hamu’i ki. ²⁰ Mes kais hi mimlil natuin ale smanaf nane sin naluli neu ki, mes mimlil nai natuin hi kanam matui bi neno tunan." ²¹ Bi leku nane amsa’ Usif Yesus In namlil bi Smanan Knino ma nak, "Au utulu nekak neu Ko, Ama, Usif neno tunan ma pah pinan, fun ale lasi nane Ho mutolo neu malole sin ma ahinet sin ma Hom muton mani neu ka ahinet sin. Koi Ama, onane Ho nek alomit anbol. ²² Fun ale lasi Au Ama nana’at nani neu Kau ma katit fa esle’ nahin Anmone nane sekau, al Amaf, ma Amaf nane sekau kun, al Anmone, ma sekau le Anmone anlomi he naton nani neu in." ²³ Nalali te Yesus naklelon neu asium lasi sin anmes ma nak, "Alekot neu ale mataf le sin nit sa’ le hi mit. ²⁴ Mes mimnau: Ale Mafefa knino ma kesel sin anlomi he nit sa’ le hi mit, mes sin ka nit nani fa, ma he nen sa’ le him nen, mes sin ka nen nani fa." ²⁵ Bi neno es atoni ahin plenat mese anfen hen su’ Yesus, nak, "Anoni, au mo’e onme ka he upeni honis nabal-bal?" ²⁶ Yesus nak neu in, "Antui sa’ bi plenat knino ka? Hom soi onme ka?" ²⁷ Atoni nane natae nak, "Mes hom nek Abal-balat, Uisneno meki ho nekam oke ma meki ho smanam oke ma meki ho matanim oke ma meki ho lolem oke ma amnek ho bia ho benu onle amnek ho aom" ²⁸ Yesus nak neu in, "Namneo onane; mo’e mani nai of ho mupeni honis." ²⁹ Mes in lomi he namneob kun in aon, in nak neu Yesus, "Ma au bia benu nane sekau kun ka?" ³⁰ Yesus natae nak, "Anmu’i atoni mese ansanu na’ko Yerusalem neu Yerikho; in anmof neu atoni abulalut sin niman, ma nasik nan ale ini bale, oket antepo nalali te anpaleob nani, ala kle’o in anmate. ³¹ Anbi leku nane ana’ lasi fuat mese ansanu natuin lalan nane; in nit atoni nane mes in nao anfin kun natuin lalan aon bian. ³² Onane te atoni Lewi mese nem neu bale nane; leka in nit atoni nane, in nao anfin kun natuin lalan aonbian. ³³ Mes atoni Samaria mese anao lalan nem neu bale nane; leka in nit atoni nane, in nekan anmof ma nekan namnoe. ³⁴ In anfonat nu ma ana’mu in papa’ ma antosi mina ma tua amtasa neune. Oke te in nasaeb neu in bikase ma nokan nao neu ume snasat ma anpaloli nani. ³⁵ Nokfa onane, in anfe noni dinar nua neu apao ume snasat nane nak: Hom paloli in ma leka hom baen nes na’ko le i of au ufani ko sin, leka au fani aum. ³⁶ Ma na’ko atoni teun in i, ho mutenab mani, sekau es anfani bia benu neu atoni le anmof bi abulalut sin niman?" ³⁷ In natae nak, "In kun le anmo’e alekot neu atoni nane." Yesus nak neune, "Hom nao nai, ma ho mo’e onane!" ³⁸ Leka Usif Yesus a’nao nok asium lasi sin, In antam bi kuan mese. Ma bife mese in kanan bi Marta ansimo In anbi in ume. ³⁹ In anmu’i olif mese kanan bi Maria. Bi Maria antok paumak Usif Yesus In haen ma nen In a’an. ⁴⁰ Bi Marta in nabiku anfin neu hen tuthae Usif Yesus. In nem anpaumak Yesus ma nak, "Usif, ait Ho kam laef, he au oli nane anpaleoba kau mes he ubiku? So Hom lelu in anbab kau fe." ⁴¹ Mes Usif natae in nak: "Marta, Marta, ho mu’unu ma ho muhaebom neu lasi namfau, ⁴² mes al lasi an-ana nono mese hom nuk mani: Bi Maria anbeti nalali lasi tukan alekot, le of ka nait nani fa na’ko in."

¹ Bi neno nane Usif Yesus anonen totis bi bale mese. Leka In nasopu onen totis onane te In asimo lasi es nak neu In: "Usi, munoni kai onen totis, on Nai Yohanes nanoni in asimo lasi sin." ² Yesus natae sin nak, "Leka him onen totis mak on i: Ama, hai mimtausan Ho kanam; Ho Plenat in nem. ³ Fe kai hai mnahat neno-neno bi neno i ⁴ ma amsako kai hai sanat, on hai amsa amsako atoni le nasanab neu kai; ma kais mutam kai neu su’at." ⁵ Nalali te In nak neu sin, "Sekau anbi ki le anmu’i baef, ma he nao neu in bi fai atnanas ma nak neu sin: Bae, amfe mlapat kau utunu’ pisa tenu fe, ⁶ fun au bae na’ko lalan nem antam es au ume ma au ka mu’if sa’ he ubalab ani. ⁷ Leka in le abit ume nanan natae ma nak: Kais mususab kau, fun eno mae’ka nalali, ma au nok au anhenu amtupen; au ka ube’i he fen he fe ko sa’. ⁸ Mes Au ak ki: Maski in kan fen fa hen fe neu in, natuin in baef, mes natuin atotis nane kan mae nahin fa, of in anfen ma anfe neu in fauk le in nuk nani. ⁹ Es nane Au ak ki: Toti nai, of anfe ki; mami nai of mipeni; leku eno of nasoitan ki. ¹⁰ Fun sekau le antoti, mes ansimo ma sekau le nami, mes napeni ma sekau le anleku eno of nasoitan nani. ¹¹ Amaf me anbi ki, leka in anah antoti ika, oke te in amaf anfe kauna hen seka ika nane? ¹² Ai hen toti teko, anfe neune kabiti ka? ¹³ Leka hi apenut ki hi mihin hem fe bale alekot neu hi anhenu, nes-nesi hi Ama abit neno tunan! Of In anfe Smanan Knino neu sin le antoti In." ¹⁴ Bi neno es Usif Yesus anli’u napoitan nitu na’ko atoni amonot mese. Leka nitu nane anpoi, te atoni amonot nane na’uab. Ma atoni namfau namkak. ¹⁵ Mes bian sin nak, "In napoitan nitu neki kuasat Beelzebul, sanat in tuaf." ¹⁶ Mes bian sin antoti taka na’ko neno tunan, fun hen su’ Usif Yesus. ¹⁷ Ma Yesus nahin sin nek tenab nane ma nak, "Ale plenat le anmu’i han suli of namle’u kun, ma ume la anmu’i suli of natsel kun. ¹⁸ Onane amsa kalu santuaf masulin of ini plenat hen hake onme? Fun hi mak Au upoitan sanat in tuaf eki kuasat Beelzebul. ¹⁹ Bait Au upoitan sanat in tuaf eki kuasat Beelzebul, of hi atoni sin napoitan neki sa’ ka? Natuin lasi i, sin of anfani alef lasi neu ki. ²⁰ Mes kalu Au upoitan sanat in tuaf eki kuasat Uisneno, tebes Plenat Uisneno nem nalali neu ki. ²¹ Leka atoni abe’it neki suni ma anpao in ume of in sa’-sa’ naleko. ²² Mes leka atoni nabe’i nesin nem ma anbe’u nani te, of nasik nan in suni auni, le in nafnekan, ma anbati nani ale in sa’-sa’. ²³ Sekau le in ka nok Kau, mes in tumatan Kau, ma sekau le in kan tuntaku Kau, of in nale’un Au mepu." ²⁴ "Leka smanan nitu anpoi na’ko atoni, in anfun natef bale-bale hufui ma nami snasat, ma ka napeni te in nak: Au he fani eu au ume le usaitan ani. ²⁵ Fun in nao ma napeni ume nane manako, naleko ma namas. ²⁶ Oke te in anpoi ma anhone smanaf hitu le anbulalun nesin in, ma sin antam ma namaika anbi nane. Atoni nane in monin namle’u nesin neno ahunut." ²⁷ Leka Usif Yesus fe na’uab onane te, bife mese na’lo atoni mfaun sin atnanan naiti in hanan nak neu In, "Ua alekot neu ainaf le nahonis Ko, ma susu le nasusu Ko." ²⁸ Mes In nak, "Le he napeni alekot amneot es le alsin le nen a’an Uisneno ma napan nani, oke te anmo’e natuin." ²⁹ Leka to namfaun nem antol nan In, Yesus na’uab ma nak: "Batan i batan amle’ut kun. Sin antoti he nit taka, mes of kan fe fa taka, neu sin, al taka Mafefa Knino Nai Yunus. ³⁰ Fun on Nai Yunus anfani taka neu atoni Niniwe, onane amsa Anmone Pah To anfani taka neu batan i. ³¹ Bi neno kasat, usif bife nem na’ko pah Li anfen nok atoni batan i ma of in nafek sin lasi. Fun usif bife in nem na’ko pah tukan he nen Nai Salomo in lasi hine. Mes kiso, anbi i anmu’i le a’nesin Nai Salomo! ³² Bi neno kasat, atoni Niniwe of anfen nok atoni batan i ma nafek sin lasi. Natuin atoni Niniwe sin nate’un sin nekan leka sin amnen Nai Yunus in han beno ma kiso le abit i, nesin Nai Yunus!" ³³ "Fun katit fa esle’ in not paku, nalali te in antao nani bi bale kolo, ai antobe neki mako su’at, so antao nani neu tet paku, he nati’ atamas nit in pinan. ³⁴ Ho matam anfani paku neu ho aom. Kalu ho matam anpin ho aom meusine, kalu ho matam nanipu ho aom anmesok. ³⁵ Es nane panat nai he nati’ meusine le anbi ko kais anfani mesokan. ³⁶ Bait ho aom nane meusine ma kan mu’if mesokan, of meusine nunfin onle paku antana ko neki in pinan." ³⁷ Leka Yesus nanoina nalali te, atoni Farisi mese anhone Yesus he nati’ In bukae nokan bi in ume. Yesus antam neu ume nane ma antoko bi mei hen bukae. ³⁸ Atoni Farisi nane in namkak fun Usif Yesus ka nafanu fa In niman nahunu na’ko hen bukae. ³⁹ Mes Usif Yesus nak neu in, "Hi atoni Farisi him fase mako ma pika in kotin mes hi nekam nane nahenu nok asikat ma bulalu. ⁴⁰ Hi amonot ki, ati hi ka mihin, nak In le anmepu kotin nane, In amsa of anmepu nanan! ⁴¹ Sa’ le anbi mako ma pika nanan amfe mani neu amamu’it sin of ale sa’ anfani knino neu ki. ⁴² Amle’ut neu ki, atoni Farisi, fun him fe ao bia bo’es na’ko sip ayo, tonene ma ale utan neu Uisneno mes hi ka mimnau fa amneot ma manekan Uisneno. Hi mitiaba nane ma kais amnikan bian. ⁴³ Amle’ut neu ki, atoni Farisi, him lomi hem toko bi mat bi ume buat ma him lomi hem simo kan tola bi ume masa. ⁴⁴ Amle’ut neu ki, fun hi on nate-naukel le ka mabaki fa; ale atoni anteli natuin in fafon mes ka nahin nani fa." ⁴⁵ Ma ahin plenat mese nak neu Yesus, "Anoni, Ho mu’uab onane Ho mumenab hai nekam amsa." ⁴⁶ In natae nak, "Amle’ut neu ki amsa, ale ahinet plenat, fun hi misaeb baut mafena neu atoni le anloi ka nabe’if, mes hi kam poe mani fa meki hi kalulu mese amsa. ⁴⁷ Amle’ut neu ki, fun mihakeb fatu naukel amasat neu Mafefa knino sin, mes hi amfini afi es namate sin. ⁴⁸ Neu hi miteb ma mimneob hi mnais unu sin moet nane, fun sin es namate Mafefa knino sin, ma mihakeb fatu naukel neu sin. ⁴⁹ Es nane te lasi hine Uisneno nak: Au sonu neu sin Mafefa knino ma haef knino ma bian na’ko ale Mafefa knino ma haef knino nane of namate sin ma anhamu’i sin, ⁵⁰ he nati’ na’ko batan i atoni nafani na’ ale Mafefa knino le nat op nalali na’ko nahakeb paha pinan, ⁵¹ na’ko afi Nai Habel in na’ talan te Nai Zakaria ini le namate nani bi baki fuat ma anbi ume Uisneno. Tebes Au ak ki of nami nafani anbi batan i. ⁵² Amle’ut neu ki, ale ahinet plenat fun hi maiti letu ma fo’i ahinet; oke te hi kam tamaf meun, ma sin le hen tam neun hi misenib sin." ⁵³ Ma Usif Yesus anpoi na’ko nane, ahinet plenat ma Farisi sin nato’ ma na’koke In neki totis namfau. ⁵⁴ Sin mo’e onane he nati’ anheke Yesus natuin uab le In na’uab neu sin.

¹ Fun pah namfau te nifun-nifun, sin anhake funam natef, talan te anmateli haen es nok es. Oket Yesus na’uab nahunu neu In asimo lasi sin nak, "Panat nai hi aom na’ko lalu haef atoni Farisi, esle’ lasi asafanu. ² Fun katit fa sa’ esle’ ankub nani le kan fei nani fa ma katit fa sa’ le nakolo nani le ka natonon fa. ³ Es nane sa’ le hi mi’uab bi mesokan of manena bi meusine, ma sa’ le miseo bi lukem bi ke’an nanan of anetun nani na’ko ume in penen." ⁴ "Au ak ki, hoi Au bae, kais mimtausan sin le namate aof nane, mes namuni sin ka nabe’i fa hen mo’e sa’ nesi anteni. ⁵ Mes Au he ulile ki sekau le hi he mimtausan. Mimtausan nai In le namate ki, In anmu’i kuasat hen polin natam ki bi ai. Namneo Au ak ki mimtausan nai In! ⁶ Ati ka nasosa fa kolo ane nim upan loit nua? Onane amsa kolo mese ka manikan fa bi Uisneno, ⁷ tebes hi nakfunu amsa ansoi nain sin. Es nane te kais mimtau, fun hi upam nesi ale kolo ane nane sin." ⁸ "Ma Au ak ki: Sekau in nateb Kau bi mansian in matan, Anmone Pah To of nateb nani amsa bi Ahake Uisneno sin matan. ⁹ Ma sekau natotan Kau bi mansian in matan of natotan in amsa bi ahake Uisneno sin matan. ¹⁰ Sekau le antek nale’un Anmone Pah To, in sanat masako; mes sekau le antek nale’un Smanan Knino, in sanat ka masako fa. ¹¹ Ma leka sin neki neu ume buat ma neu nakaf-nakaf, ma ana’ plenat ma akuasat sin, kais mi’unu hi nekam he mitae onme ai he mi’uab mak sa’. ¹² Bi leku nane Smanan Knino of nanoina ki sa’ le he mitae mani." ¹³ Ma atoni es na’ko atoni amfaut na’uab neu Yesus nak, "Anoni, mak au tata hen bati bale mnasi nok kau." ¹⁴ Mes Yesus nak neu in, "Bae, sekau es nait kau hen fani alef lasi ai atoni atnana neu ki ka?" ¹⁵ Ma In na’uab anteni neu sin, "Panat nai ma ampao hi aom na’ko lasi sinmakat, fun atoni le in maus nathoe, in monin ka na’bon’in fa neu in mu’in nane." ¹⁶ Nalali te In na’uab neu sin lasi leta mese nak, "Atoni amu’it mese le anmu’i nain ma’afa ma napoitan afan naek. ¹⁷ In natenab bi nekan nak: Au he mo’e sa’ ka, fun au ka mu’if bale he upan au nain in afan. ¹⁸ Ma in nak: Au he mo’e on i; Au he pukai ale Au lopo sin ma uhakeb fe’u le naek nesin ma au upan ale ane ma ale au maus anbi nane. ¹⁹ Nalali te au ak neu au smanak: Smanaf, ho maus anaek, le natupu nani neu ton-ton amnemat. Musnas nai, muah ma minu nai ma mumlil nai! ²⁰ Mes Uisneno nakua a’an neu in nak: Hoi amonot, bi fai i amsa mes naiti ho smanam le anbi ko, ma sa’ le ho muloitan nane of neu sekau ka? ²¹ Lasi antom neu atoni le nabua maus neu in aon, mes in kan mu’if sa’ bi Uisneno In human." ²² Yesus nak neu In asimo lasi sin, "Es nane Au ak ki, kais mi’unu neu hi monim, of hi he miah sa’, ma kais mi’unu neu hi aom, of hi hem pake sa’. ²³ Hi monim nesin mnahat ma hi aom nane nesin bael pake. ²⁴ Him kiso mit ale kol ka’le kan sen ma kan seki fa ma kan mu’i fa ume ma lopo, mes Uisneno anhao nain sin. Fun hi monim nesin ale kolo nane sin! ²⁵ Sekau le anbi ki le in nekan na’unu, nabe’i antalu in monin, mnanun niman li’an mese ka? ²⁶ Ati hi ka mibe’i he mo’e lasi an-ana, nansa hi mi’unu neu lasi bian? ²⁷ Kiso mit uk-uki in sufan, le ka nasun fa abas ma kan tenu fa, mes Au ak ki: Nai Salomo nok ale in mu’in in pake ka namas fa on tuna’ nane in sufan. ²⁸ Hun anbi mnela le neno i anmoni ma noka anpolin bi ai, Uisneno naloitan nani, nes-nesi neu ki, hoi atoni nek an-ana ki! ²⁹ Kais hi mitenab ma mi’unu neu he miah sa’ ma minu sa’ ma kais hi nekam naklati. ³⁰ Ale uf-uf pah pinan, le ka nahin Uisneno, sin es nami ale lasi nane. Mes hi Ama nahin, hi minuka ale lasi i. ³¹ Mami nai In plenat, ale sa’ nane of In nabalab nani neu ki. ³² Kais mimtau, pukan an-ana ki, fun hi Ama natenab leko hen fe ki plenat neno tunan. ³³ Misosa mani ale hi mu’im ma amfe mani neu amamu’it sin. Moe nai neu hi aom alu noni le ka namle’u nit, esle’ maus bi neno tunan le ka oke nitaf, le abakat ka nem paumak ma ap-apu ka neku nani fa. ³⁴ Fun hi maus anbi me te, hi nekam amsa anbi nane." ³⁵ "So hi tnanam mafutu piut ma hi paku anpin piut. ³⁶ Ma him fani on atoni le anpao in usi leka anfani nem na’ko tolas mafe fe’u, leka in nem ma anleku eno, nasoitan nani lab-lab neu in. ³⁷ Alekot neu ate le sin usin nem napeni sin anpao. Au ak ki: Of in anfutu in atnanan ma natokob sin bi mei, nalali te in nem ma antuthae sin. ³⁸ Ma leka in nem bi fai batis ka ai mes hen meu ka, ma napeni sin anmo’e onane, alekot neu sin. ³⁹ Mes mihin nai: Leka ume tuaf nahin leku me abakat he nem, of in kan paleo fa in ume hen pukai nani. ⁴⁰ Hi amsa ampao nai, fun Anmone Pah To of In koenon nem bi leku le hi ka mitenab mani fa." ⁴¹ Nai Petrus nak, "Usi, Hom tek lasi leta i neu kai ka, ai neu to ok-oke?" ⁴² Usi In natae nak, "Apao ume akiat ma ahinet es sekau le in usi of nahakeb nani hen fani nakaf neu ale ate sin hen fen sin mnahat bi leku le’at ka? ⁴³ Alekot ate le napeni nan anmo’e onane leka in usi nem. ⁴⁴ Au ak ki, tebes of usi nane naiti nani hen fani apao maus. ⁴⁵ Mes leka ate nane atoni abulalut ma in natenab bi in nekan nak: Au usi oni ka nemaf, oke te in tepo ale ate atoni ma ale ate bife sin, ma nah ma ninu ma anmafu nok, ⁴⁶ ate nane in usif of nem bi neno le in ka natenab nani ma bi leku le in ka nahin nani fa, of namate in ma anmo’e papmese on atoni ka akiat. ⁴⁷ Fun ate le nahin in usi in lomin ma in kan pao fa ma kan mo’e natuin in lomin of ansimo tepos anaek. ⁴⁸ Mes ate le ka nahin fa in usi lomin ma anmo’e sa’ le mes he napeni tepos of napeni tepos an-ana. Fun anfe naek neu sekau, of antoti nafani naek amsa, ma nana’at naek neu sekau of antoti nafani bi in nesin teni." ⁴⁹ "Au aum he polin ai neu pah pinan ma Au ufneka bait ai nane anpin nalali! ⁵⁰ Au of sutai hamu’it naek ma Au nekak anmalel, leka lasi nane fe ka nateabon. ⁵¹ Ati hi mitenab mak Au aum he eki halan pah neu pah pinan ka? Kahaf, Au ak ki, ka lasi halan fa, mes lasi suli. ⁵² Fun na’ko tomas i, of anmu’i lasi suli na’ko atoni nim bi ume mese, tenu nok nua ma nua nok tenu. ⁵³ Of sin nasulin amaf nok in anmone ma anmone nok in amaf, ainaf nok in anfeto ma anfeto nok in ainaf, babaf nok in nanef ma nanef nok in babaf." ⁵⁴ Yesus nak anteni neu to mfaun, "Leka hi mit nope ansae bi neno tes, onane hi mak: Ulan he nem ma namneo onane. ⁵⁵ Ma leka hi mit anin anfu na’ko neno tes hi mak: Manas of nakiti, ma anbol onane. ⁵⁶ Hi asafanut pah pinan ma neno i hi mitenab mihin, nansa hi ka mitenab mihin fa batan i ka? ⁵⁷ Ma nansa hi ka mifek mihin fa lasi amneot? ⁵⁸ Leka hom nao mok atoni le anmatoe nok ko neu anaet sin so ho maim lalan he muleko mokan bi lalan atnanan, he nati’ kais in hel neki ko neu alef lasi ma alef lasi nana’at ko neu in sukin ma in sukin nana’at nani ko neu apao pa’an. ⁵⁹ Au ak ko: Of ho kam poi mitaf talan te hom baen mufek ho tusa sin."

¹ Bi neno nane atoni fauk sin nem neu Yesus neki hanaf antom atoni Galilea sin, fun Nai Pilatus namate sin ma anselo sin na’ nok na’ na’ko mu’it le sin neki neu fua tulu. ² Yesus natae sin nak, "Hi mitenab mak atoni Galilea i sin asanat nesin atoni Galilea bian, fun sin napeni mane’at onane ka? ³ Kahaf! Mes mimnau nai: Kalu hi ka mite’un fa hi nekam, hi mes mimle’u onane amsa. ⁴ Ai hi mitenab mak atoni bo’es am fanu le anmate bi Siloam natuin el fatu anmofu ma antutu sin, sin nasanab nesin ale atoni bi Yerusalem bian ka? ⁵ Kahaf! Au ak ateni: Kalu hi ka mite’un fa hi nekam, hi mes mimle’u onane." ⁶ Ma Yesus naton anteni lasi leta mese nak on i, "Atoni mese anmu’i hau bubuk u’mese anbi in lene tanu’an sena, ma in nem he nami in fuan, mes in ka napeni fa. ⁷ In nak neu apao lene tanu’an sena nane nak: Kiso, ton tenuen au aum he ami bubuk i in fuan mes au ka upeni fa; ote misan! In moni lum-luman ma anmusi nain in afan son-sona! ⁸ Mes apao lene natae nak: Tuan, mautu fe in moni bi ton i, au of foi nain funam natef ma au tao pupuk neun. ⁹ Oni ton amnemat in nafua, kalu kahaf, hom lek het ote tisan!" ¹⁰ Bi Neno Snasat Yesus fe nanoina anbi ume buat. ¹¹ Bi neno nane anmu’i bife mese le ton bo’es am fanu smanan amle’ut antam neu in talan te in namen ma in akmunin ka natetu nani fa. ¹² Leka Yesus nit bife nane, In no’en in ma nak, "Aina, ho menas nane naleko nai." ¹³ Oket In anpoh bife nane neki Ini niman ma bi leku nane amsa bife nane anhake ma ampules Uisneno. ¹⁴ Mes ume buat nakaf nane in nato’ fun Yesus naleko amenat bi Neno Snasat, ma in nak neu atoni namfaun nak, "Anmu’i neno ne he mepu. Aim nai bi neno-neno le nane, he naleko’ ki ma kais hi aim bi Neno Snasat." ¹⁵ Mes Uisneno natae in nak, "Hi atoni asafanut, ati anbi ki, hi ka mifetin fe hi bijae ma hi bikase luke mnanu na’ko o’of, bi Neno Snasat, he neki sin ma miinut sin ka? ¹⁶ Bife i Nai Abraham in sufan, Nitu anfutu in ton bo’es am fanu. Kais at sefi in tani futus bi Neno Snasat ka?" ¹⁷ Ma leka In na’uab onane, alsin le antumatan In sin anmae, mes atoni bian sin malinan fun ale mo’et apinat, le Yesus anmo’e nani. ¹⁸ Ma Yesus nak, "Plenat Uisneno nane in human onle sa’ ma Au he uleta ani eki sa’? ¹⁹ In onle bonak fuan, atoni naiti ma ansenan bi in lele; in anmoni ma anfani hau uf ma kolo-kolo bi neno tnanan nem anmo’e kuna bi in tlaen sin." ²⁰ Ma In na’uab anteni nak, "Au he uleta Plenat Neno Tunan eki sa’ ka? ²¹ In maleta on lalu haef le bife es naiti ma anselo nok ut su’at tenu talan te ansae ma anbo." ²² Ma Yesus anfun kot-kot ma na’ko kuan es neu kuan es fun In nanoni sin ma In he nao anfin neu Yerusalem. ²³ Ma atoni es nak neu In, "Uisneno, ait al atoni fauk le he nahoni nani sin ka?" ²⁴ Mes Yesus nak neu sin, "Him hataneom nai hem tam mituin eno ma’lenta! Fun Au ak ki: Atoni namfau sin nami hen tam, mes sin ka nabe’i fa. ²⁵ Leka ume tuaf anfen ma an ek nesu, of him hake bi mone ma hi mak: Usi, musoitan kai nesu fe! Of In natae ma nak neu ki: Au ka uhin ki fa, hi aim mi’ko me. ²⁶ Ma hi of mitae mak: Hai miah ma minu bi Ho matam ma Ho es munoni kai bi hai lalan sin. ²⁷ Ma of In na’uab neu ki nak: Au ka uhin ki fa hi mi’ko me, miskot mi’ko Kau hi atoin amo’e amle’ut! ²⁸ Bi nane of hi mipeni kaet ma nisi kilof leka hi mit Nai Abraham ma Nai Ishak ma Nai Yakub ma ale mafefa knino sin bi Plenat Uisneno neno, mes hi of anpolin napoitan ki. ²⁹ Ma of ale atoni nem na’ko neno Saet ma neno Tes na’ko neno A’li ma neno A’ne’u ma of sin tok ma nah bi Plenat Uisneno. ³⁰ Tebes, atoni amunit anfani atoni ahunut ma atoni ahunut anfani atoni amunit." ³¹ Bi tabu nane amsa atoni Farisi sin fauk nem neu Yesus ma nak, "Kais mubala bi bale i, Hom nao nai, fun Nai Herodes he namate Ko." ³² Yesus nak neu sin, "Him nao ma mitonan asu fui nane mak: Neno i ma noka Au upoitan nitu ma uleko amenat mes bi neno tenu Au he ulail Au mepu. ³³ Fun neno i ma noka ma anmeu Au mes he usopu Au lanan fe, fun ka naleko fa nak mafefa knino mese he namate nani bi Yerusalem kotin. ³⁴ Yerusalem, Yerusalem, ho es mumate mafefa knino sin. Ho es ampoli haef Uisneno sin meki fatu. Hae fauk Au lomi he ubua ho anhenu, onle maun ainaf an u’bul in an enu bi in ninen, mes ho kam lomif! ³⁵ Es nane Uisneno of ka nokan teni ki fa. Ma Au ak ki: Of hi ka mit amteni Kau fa talan te hi mak: Nahoeb alekot neu In le ankoenon nem anbi Uisneno In kanan."

¹ Fun bi Neno Snasat es Usif Yesus antam bi Farisi sin nakaf in ume hen bukae. Sin abuat bi bale nane ankison kakoet In. ² Onane atoni mese nem le in napeni men mu’an ma in anhake bi Usif Yesus matan. ³ Oket Yesus antoti neu ahinet plenat ma Farisi sin nak, "Hi mitenab onme, taleko’ amenat bi Neno Snasat leko ka ai kahaf?" ⁴ Sin ok-oke mnesa mnes es ka natae fa. Yesus antopu atoni nane in niman ma naleko’ nani na’ko in menas oket anlelu hen fani. ⁵ Oket Yesus nak neu sin, "Ait sekau anbi ki le in anah ai in bijae anmof neu oe hani nok Neno Snasat, of hi mipoitan ai kahaf?" ⁶ Katit fa es hen suli Usif Yesus. ⁷ Fun Yesus nit, atoni le anhone sin anbeti bale alekot hen toko bi matan, In na’uab neu sin lasi leta mese nak, ⁸ "Leka es anhone ko neu tolas mafe mamone fe’u, kais hom toko bi bale makana. Fun oni tol tuaf nane anhone atoni bian le makana nesin ko. ⁹ He nati’ kais in nem neu ko ma nak: Bale i au uloitan neu atoni makana nane. Of nok nek maet hom fen, ma hom nao meu bale bi kotin nae. ¹⁰ Ma leka anhone ko, leko hom nao ma amtoko bi bale antom kotin. He tol tuaf nane nem ma nak neu ko: Bae, leko hom toko bi matan i. Onane te of ho mupeni kan alekot bi to amfaut sin matan. ¹¹ Fun sekau nanaeb in aon, of napalan nani ma sekau napalan in aon, of nanaeb nani." ¹² Ma Yesus na’uab neu atoni le anhone In: "Leka ho mo’e tolas he fai ka ai he manas ka, kais hom hone ho bae benu sin ai ho oli ma ho tata sin, ai ho ini amu’it le anpaumak nok ko. Fun of sin amsa anhone ko, onane te antobe ko ale sa’. ¹³ Mes leka ho mo’e tolas, anhone ale atoni amamu’it sin, ale atoni ao amle’ut sin, ale atoni hae hela ma ale atoni matfolo sin. ¹⁴ Ma alekot neu ko, fun sin kan mu’if sa’ hen seunbanin neu ko. Mes Uisneno of anseunbanin ko leka amneot sin anfen anfani na’ko amates." ¹⁵ Leka atokos bi mei sin nen lasi nane te atoni mese na’ko sin nak neu Yesus, "Alekot neu atoni le he nah nok Uisneno bi Plenat Neno Tunan." ¹⁶ Mes Yesus nak neu in, "Atoni mese anmo’e tolas naek ma in anhone atoni namfau. ¹⁷ Leka tolas nane anhaumak in anlelu in ate sin hen etun le anhone sin nak, ’Koenom aim nai, fun ale sa’ nabalab nalali!’ ¹⁸ Mes sin alsin ok-oke neki mafena. Ahunut nane nak neu in: ’Au fe sos an po’an mese ma au nao he kiso ani. Kais muto’an kau.’ ¹⁹ Ma bian nak, ’Au fe sos bijae pasan nim ma au poi he su’ it sin. Kais muto’an kau.’ ²⁰ Ma es anten nak, ’Au fe mafe ulali es nane au ka etif.’ ²¹ Ate nane anfani nem ma anetun ale lasi nane neu in usin. Uim tuaf nane nato’ ma nak neu in ate, ’Hom poi nai lab bi lalan ma eno kot i. Mok sin nem ale amamu’it ma ao amle’ut ma afolot ma hae hela sin.’ ²² Nalali te ate nane nak, ’Usi, ho plenat i au unaoba ulali, mes bale fe anmu’i esan.’ ²³ Mes Usif nane nak in ate, ’Hom poi nai bi ale lal uf ma lal seki sin ma museke ale atoni hen tam nem nahenu au ume. ²⁴ Fun Au ak ki: Katit fa atoni mese na’ko alsin le anhone sin hen tamis mnahat bi Au tolas.’ " ²⁵ Atoni namfau nao natuin Yesus. Ma Yesus anik koti ma nak neu sin, ²⁶ "Bait es nem neu Kau ma in ka na totan fa in amaf, in ainaf, in fel, in anhenu, in olif tataf ai in fetof sin ma in aon kun in ka nabe’i hen fani Au asimo lasi. ²⁷ Sekau le in kan loi in hau nehe ma natuin Kau in ka nabe’i hen fani Au asimo lasi. ²⁸ Sekau anbi ki le in he nahakeb el fatu, in kan toko nahunu fa hen so’i in baen, oni in noni hen tea ka, neu he nasop mepu nane ai kahaf? ²⁹ Fun bait it anmo’e nalali in sukin ma ka nasopu nani fa, of alsin le nit nani, sin anmanis in ³⁰ ma nak: ’Atoni i he nahakeb el fatu, mes in ka nabe’i he nalali nan.’ ³¹ Ai, kesel me le in poi ma hen maken nok usif bian in antoko nahun hen so’i, in anpoi nok atoni nifun bo’es of nabe’i hen maken nok atoni nifun bo’ nua ka? ³² Bati in ka nabe’if, of in anlelu haef leka in musu fe anbi lo hen toti halan pah. ³³ Onane amsa hi, le ka nabela fa in mu’in, ka nabe’i hen fani Au asimo lasi. ³⁴ Masi nane leko, mes bait in minan namneku, of naminab nafani neki sa’ ka? ³⁵ Ka naleko anten fa neu po’an ka, neu naet ka, so atpolin. Sekau anmu’i luken so mitnin nai!"

¹ Ma ale asimo noni poni sin ma atoni asanat bian sin nem neu Yesus he amnen In a’an. ² Ma Farisi sin ma ahin sulat sin, na’munu ma nak, "In ansimo atoni asanat sin ma nah nok sin." ³ Es nane Yesus na’uab neu sin lasi leta i, ⁴ "Bait anbi ki anmu’i bibi kase natun mese, ma in naneku mese, of in anmo’e sa’ ka? In mes nasaitan bibi kase bo’sio am sio nane bi mnela ma in nao nami le amnekut nane tal napeni nafani. ⁵ Ma leka in napeni bibi kase nane, in malin ma nasae nani bi in hanun. ⁶ Ma in nem ante in ume, in no’en in ini sin ma apaumakat sin ma nak neu sin: Malin nai mok kau, fun au bibi kase amnekut nane au upeni ufani. ⁷ Au ak ki: Bi neno tunan anmu’i malinat naek neu atoni asanat mese le napis, nesin amneot sin bo’sio am sio le sin ka nate’un fa sin nekan." ⁸ "Ai bife me le anmu’i dirham bo’es, ma in naneku mese -- of in anmo’e sa’ ka? In mes notu paku ma anpik ume ma naksani tal napeni nafani dirham nane. ⁹ Leka in napeni nafani dirham nane, in no’en in ini sin ma in apaumakat sin ma nak: Mimlil nai mok kau, fun au dirham amnekut nane au upeni ufani. ¹⁰ Onane amsa ahake Uisneno sin namlil fun atoni asanat mese napis na’ko in sanat sin." ¹¹ Yesus na’uab anteni, "Anmu’i amaf mese anmu’i anmone nua. ¹² Anmone kliko nak neu in amaf nak: Ama, Hom fe kau nai au ini na’ko hiti maus. Oke te sin amaf anbati maus nane neu sin. ¹³ Neno fauk namuni te anmone kliko nasosa ale sa’ nane ma in nao kun neu paha lo. Bi nane in ansaken ale in maus ok-oke. ¹⁴ Leka in maus nane oke, amnahas mafena anbol bi pah nane ma oket in napeni mamu’it. ¹⁵ Nalali te in nao ma anmepu bi atoni mese bi pah nane. Atoni nane anlelu in hen pao in fafi sin bi lele. ¹⁶ In lomi he natua in tain neki fafi in mnahat mes katit fa es hen fe neu in. ¹⁷ Nalali te in nekan anbe’ ma nak: Ale atoni le anmepu bi au ama, sin nahan nok athoes, mes au bi i he mate natuin amnahas. ¹⁸ Au he fen ma nao eu au ama ma au ak neu in: Ama, au usanab neu Uisneno ma neu ama nok, ¹⁹ au ka tamaf ota hem tek kau ho anmone; mo’e kau on ho atoni ameput mese. ²⁰ Oket in anfen ma nao neu in amaf. Leka in fe bi lo onane te, in amaf nit in, ma nekan antu fun namnau nisan. In amaf naen nu ma anho nan ma nek in. ²¹ Anah nane nak neu in: Ama, au usanab neu Uisneno ma neu ama nok, au ka tamaf ota hem tek kau ho anmone. ²² Mes amaf nane no’en in atuthaes sin ma nak: Lab, meki kit blua pake alekot, he mipakeb in ma amtao kaleni neu in klulun ma penhae neu in haen. ²³ Ma amhel man bia apokat nane, ma him lolo nai ma hit tol he tah ma atmalin. ²⁴ Fun au anmone in anmate mes anmoni anfani, in namneku mes tapeni anfani. Ma sin anmo’e tolas amlilat. ²⁵ Mes in anmone anaet bi lene ma leka in anfani nem ma anhaumak ume te, in nen tufu hanan, ma bonet hanan. ²⁶ Oket in boin atuthaes mese ma natan in oni he lasi sa’ bi ume. ²⁷ Atuthaes nane nak: Ho oli anfani nem ma ho ama anlolo bia apokat, fun in napeni nafani in anmone nok aomina. ²⁸ Anmone anaet nato’kun ma kan lomi fa hen tam. Onane te in amaf anpoi ma na’uab nok in. ²⁹ Mes in natae amaf ma nak: Bi ton fauk-fauk au mepu mate fin he tuthae ama, ma au ka tanhai it fa ama ho plenat; mes ama ho kam fe mit kau fa bibi mese he au umlil ok au ini sin! ³⁰ Mes leka ho anmone le ansaken nani ale ho maus nok bife a’paisa sin, in nem ante, ama hom lek hem lolo bia apokat neu in. ³¹ In amaf nak neu in: Anah, ho mok kau piut bi i, ma ale sa’ nane ho ini kun. ³² So hit tamlil ma tam’oek nai, fun ho oli anmate mes anmoni anfani, in namneku ma mapeni anfani."

¹ Ma Yesus nak neu In asimo lasi sin, "Anmu’i atoni amu’it mese le anmu’i apao maus mese. Atoni amu’it nane napeni hanaf nak in apao maus nane ansaken ini maus. ² Oket in boin apao maus nane ma nak: Au nen sa’ le antom ko ka? Ho mutae nai antom ho mepu pao maus, fun ho ka mube’i fa hem pao amteni maus. ³ Apao maus nane natenab bi in nekan: Au he mo’e sa’ka? Fun au tuan he napoitan kau u’ko au mepu. Foi afu au ka ube’if, he uktoti au mae kuk. ⁴ Au mu’i akal, leka napoitan kau na’ko au mepu, anmu’i atoni le ansimo kau bi sin ume. ⁵ Apao maus nane in boin ale atoni le natus neu in tuan. In nak neu ahunut nane nak: Ho mutus neu au tuan fauk ka? ⁶ Atoni nane natae nak: Mina kusi natun mese. In nak neu atoni nane: Ho sul tusa es i, hom toko nai ma amtui lab: Kusi bo’nim. ⁷ Nalali te in nak neu bian: Ma ho, ho mutus fauk ka? Atoni nane natae nak: Ane kase kalo natun mese. In nak neu atoni nane: Ho sul tusa es i, hom tui nai: Kalo bo’fanu. ⁸ Ma tuan nane nanaeb apao maus ak’elo nane, fun in mo’e ale sa’ nok in manoen. Fun anah-anah pah pinan manoe nesin na’ko anah-anah meusine. ⁹ Ma au ak ki: Him pake nai maus pah pinan le ka namneo he mipeni hi nonot, he nati’ leka maus pah pinan nane ka ma’upa fa, ansimo ki anbi um-ume Uisneno." ¹⁰ "Sekau na’ki anbi ale lasi an-ana, in na’ki amsa anbi ale lasi naek. Ma sekau apenut anbi ale lasi an-ana, in apenut amsa anbi ale lasi naek. ¹¹ Bait hi ka mi’ki ambi maus pah pinan le ka namneo, sekau he nana’at neu ki maus le namneo ka? ¹² Ma hi ka mi’ki neu es in maus, sekau he nana’at ki maus le hi ini kim? ¹³ Katit fa atuthaes le hen tuthae tuan nua; fun of in na’akan es ma in nek bian, ai in na’ki neu es ma kan lae fa bian. Onane hi ka mibe’i fa hem tuthae Uisneno ma maus pah pinan." ¹⁴ Farisi sin nen ale lasi nane, sin anmanis Yesus fun sin anlomi noni. ¹⁵ Ma In nak neu sin: "Hi mimneob hi aom bi pah pinan sin matan, mes Uisneno nahin hi nekam. Fun sa’le namnanu bi mansian, Uisneno anmainisin nani. ¹⁶ Plenat Knino ma mafefa knino sin noina ante batan Nai Yohanes Aslanit. Na’ko batan nane anetun Plenat Uisneno ini ma es-es anlomi he napeni nani. ¹⁷ Neno tunan ma pah pinan namneku, makafa nesin na’ko ale plenat Knino le Uisneno anfe nani fua mese anmofu luman. ¹⁸ Sekau le anpolin in fel ma anmafe nok bifel bian, nane in mo’e lasi kake; ma sekau anmafe nok bife mapolin, nane in mo’e kake amsa." ¹⁹ "Anmu’i atoni amu’it mese, antainus neki tainusat aklima ma pilu muti, neno-neno in malin piut. ²⁰ Ma anmu’i atoni amamu’it mese kanan Nai Lazarus, in aon papa oke natupab nani anbi atoni amu’it sonaf nesun. ²¹ In lomi he natua in tain neki mnah lapuf le anmof na’ko amu’it nane in mei. Ma ale asu sin nem anlami in papa’. ²² Nalali te atoni amamu’it nane anmate, ahake neno tunan anloi neki neu Nai Abraham in aifan. ²³ Atoni amu’it nane amsa anmate ma ansub nani. Ma in ansutai mane’at bi bale kasat. In anbaisenu ma na’ko lo in nit Nai Abraham, ma Nai Lazarus bi in aifan. ²⁴ Ma in anbai ma nak: Ama Abraham, mumnau kau. Amlelu Nai Lazarus, hen lep in klulun tunan bi oe ma napet au mak, fun au upeni menas bi ai maputu i. ²⁵ Mes Nai Abraham nak: Anah, mumnau fe, afi hom simo mulali alekot bi pah pinan mes Nai Lazarus ansimo amle’ut. Leku i in napeni halinat ma hom sutai amle’ut. ²⁶ Ma nesi na’ko nane anbi hit atnanak anmu’i kefa mnanu le kat lak tani fa, he nati’ sin le hen lak na’ko i net neu ki ai sin le hen lak na’ko nane nem neu kai ka nabe’i fa. ²⁷ Ma atoni nane nak: Kalu onane, au toti ko, ama, he nati’ hom lelu in neu au ama ume. ²⁸ Au oilfenu sin nim fe esan, he nati’ in na’uab sin lek-leko, he kais sin antam nem neu bale mane’at i. ²⁹ Mes Nai Abraham nak: Sin anmu’i Nai Musa ma mafefa knino sin sulat; maut sin nen ma natuin sa’ le antui nani bi sulat nane. ³⁰ Mes atoni nane nak: Kahaf, ama Abraham, bait es anfen na’ko amates nao neu sin of sin nate’un sin nekan. ³¹ Mes Nai Abraham nak neu in: Bati sin ka nen fa Nai Musa ma mafefa knino sin hanan, onane amsa of sin ka nenaf atoni amates le anfen anfani sin hanan."

¹ Usif Yesus na’uab neu In asimo lasi sin, "Lasi keku of anbol, mes amle’ut neu atoni le neki lasi keku nane. ² Leko nesi anfutun fatu esu neu in neon, ma atpolin tatam in neu tasi, na’ko in nakeku atoni mese hen mo’e sanat. ³ Panat nai hi aom! Bati ho bia in anmo’e sanat, mukain mani ma bait in na’tofon amsako in sanat. ⁴ Bati in nasanab neu ko neno mese haef hitu ma in nem neu ko haef hitu ma nak: Au utofoken, ho mes amsako in sanat." ⁵ Oket asimo lasi sin nak neu Usif Yesus nak, "Usif, amhatani kai hai nek palsait!" ⁶ Ma Usif In nak: "Kalu hi nek palsait ini naen on bonak fuan, of hi mak neu hau bubuk i: Mutbok nai ma amsenom bi tasi, ma in of natuin hi plenat." ⁷ "Sekau anbi ki anmu’i atuthaes mese le anfoi nain ai natuku mu’it, le nak neu in atuthaes nane, leka in fani nem na’ko lele: Aum nai he muah! ⁸ Kahaf, of in nak neu atuthaes nane: Mubalab kau he au bukae. Hom futu ho tnanam ma amtuthae kau fe, tal au uah ma inu ulali. Oke te nabe’i ho muah ma minu kum. ⁹ Ai in antoti telima kasih neu atuthaes nane, fun in anmo’e nalali sa’ le anlek nani neu in ka? ¹⁰ Onane te hi amsa. Leka hi mo’e milali sa’ le anlek nalali neu ki, hi mes mak: Hai le i atuthaes ka ma’upa kai; al hai mo’e sa’ le anlekan nani neu kai." ¹¹ Anbi In lalan nao neu Yerusalem Yesus anfini pah Samaria ma Galilea atnanan. ¹² Leka In antam bi kuan mese, atoni men poko bo’es nem naeku nokan. Sin anhake bi lo, ¹³ ma sin anbai nak, "Yesus, Anoni, mumnau kai fe!" ¹⁴ Yesus ankiso sin ma nak, "Him nao nai, milile hi aom neu Ana’ fuat knino." Ma leka fe sin anbi lalan atnanan sin menas nane namneku. ¹⁵ Mes amenat mese leka in nit nak in naleko na’ko in menas, in fani nem, fun anpules Uisneno nok hanan naek; ¹⁶ ma anmof hae neu Yesus ma natulu nekan neu In. Atoni nane atoni Samaria. ¹⁷ Ma Yesus nak: "Ait sin ka atoni bo’es fa le nalekon ka? Sio enu es kin me ka? ¹⁸ Ma katit fa es na’ko sin anfani nem hen pules Uisneno al atoni mese i ka?" ¹⁹ Oke te Yesus nak neu atoni nane nak, "Hom fen nai, ma hom nao nai, ho nek ateb knino es naleko’ ko." ²⁰ Atoni Farisi sin natan Yesus, leka Plenat Uisneno he nem. Ma Yesus natae sin nak, "Plenat Uisneno nem ka nok fa taka le mamnita, ²¹ he atoni sin na’uab nak: Kiso, in es i, ai in es nae! Fun Plenat Uisneno es hi atnanam." ²² Ma In nak neu In asimo lasi sin: "Of In neno nem ma him lomi he mit neno mese na’ko Anmone Pah To in neno-neno nane, ma hi ka mit mani fa. ²³ Ma of sin nak neu ki: Kiso, in es nae, kiso in es i! Kais him nao meu nane, ma kais hi mituin. ²⁴ Fun on limat anpin na’ko neno tukan neu tukan bian, onane amsa anbi neno Anmone Pah To hen koenon nem. ²⁵ Nahunun In mes ansutai mane’at naek, ma batan i of antite In. ²⁶ Ma on afi bi batan Nai Nuh, onane amsa bi neno Anmone Pah To. ²⁷ Sin nah ma sin ninu, sin mafe ma anmamonen talan te Nai Nuh antam bi bnao, ma oe sako nem ma nale’un sin ok-oke. ²⁸ Onane amsa bi batan Nai Lot: Sin nah ma sin ninu, sin ansos ma nasosa, sin ansen ma nafena ume. ²⁹ Mes bi neno Nai Lot anpoi na’ko Sodom, ul ai ma ul upat ansanu na’ko neno tunan ma nale’un nani sin alsin. ³⁰ Onane amsa bi neno Anmone Pah To he naklile In aon. ³¹ Bi neno nane sekau nbi ume penen ma in bale bi ume nanan, kais in sanu he naiti nani, ma onane amsa sekau anbi lene, kais in anfani. ³² Mimnau Nai Lot in fel! ³³ Sekau in nami he namonib in smanan of naneku nani, ma sekau naneku in smanan of namonib nani. ³⁴ Au ak ki: Of bi fai nane anmu’i atoni nua antup bi hala mese, of neki es ma es nabalah. ³⁵ Anmu’i bife nua anfole esu bi bale mese, of neki es ma in es nane nabala." ( ³⁶ Anmu’i atoni nua anbi lele of neki es ma in es nane nabalah.) ³⁷ Sin nak neu Yesus, "Uisneno, lasi nane of anbol bi me." Yesus nak neu sin, "Punu’ anbi me te, kol ka anbi nane amsa."

¹ Ma Yesus na’uab neu sin lasi leta mese hen etun, nak sin an o’nen toti piut ma kais anlenan. ² Yesus nak, "Bi kuan mese anmu’i alef lasi mese le ka namtausan fa Uisneno ma kan sian fa sekau amsa. ³ Ma bi kuan nane amsa anmu’i bife banu mese le in nem piut-piut neu alef lasi nane ma nak: Mumnau kau fe antom atoni le anmatoe nok kau. ⁴ Alef lasi nane kan lomif. Mes namuni te in natenab bi in nekan: Maski au ka umtausan fa Uisneno ma ka sian fa sekau, ⁵ mes natuin bife i nem piut, leko au lefi in lasi, he nati’ kais in nasusab kau." ⁶ Ma Usi nak: "Him tai lek-leko sa’ le alef lasi apenut nane na’uab nani! ⁷ Ait Uisneno of ka namneob fa In atoni mabeti sin le ananbai neu In fai manas ka? Ait In naniaon neu hen tulun sin ka? ⁸ Au ak ki: In of namneob sin laba. Mes leka Anmone Pah To nem, of In he napeni atoni apalsait bi pah pinan ka?" ⁹ Ma Yesus na’uab anteni lasi leta i neu atoni le in tek in aon amneot kun ma ankiso tanhai atoni bian. ¹⁰ Yesus nak, "Anmu’i atoni nua nao neu Ume Uisneno hen onen toti; le es atoni Farisi ma es atoni asimo noni poni. ¹¹ Atoni Farisi anhake ma anonen bi in nekan nak: Koi Uisneno, au utulu nekak neu Ko, fun au ka on fa atoni bian, asikat, abulalut, amo’e lasi kake. Ma au ka on fa atoni asimo noni poni i. ¹² Au unahok klei mese hae nua, au utulu bati bo’es na’ko ale au sa’-sa’. ¹³ Mes atoni asimo noni poni nane anhake bi lo, ma in kan lomi fa amsa hen baisenu neu neno tunan mes in anke basan ma nak: Koi Uisneno, mumnau kau, atoni asanat kau. ¹⁴ Au ak ki: Atoni asimo noni poni nane anfani neu in ume on atoni le Uisneno namneob nani ma atoni Farisi nane kahaf. Fun sekau nanaeb in aon, of nabaun nani; ma sekau nabaun in aon of nanaeb nani." ¹⁵ Anmu’i atoni le sin neki li’ana nem neu Yesus, he nati’ In anpoh sin. Leka asimo lasi sin nit onane te sin nato’an ale atoni nane. ¹⁶ Mes Yesus no’en liana sin ma nem neu In ma nak, "Mifetin li’ana-li’ana nane he nem neu Kau. Kais mikain sin, fun atoni onle nane es napeni Plenat Uisneno. ¹⁷ Tebes Au ak neu ki: Atoni le kan simof Plenat Uisneno onle li’ana mese in of kan tamaf neun." ¹⁸ Atoni makana mese antoti Yesus nak, "Anoni alekot, au he mo’e sa’ ka he upeni honis nabal-bal?" ¹⁹ Yesus natae ma nak, "Nansa hom tek Kau mak alekot ka? Kan mu’if atoni alekot al Uisneno In mes kun. ²⁰ Ho muhin mulali ale plenat Uisneno: Kais mo’e lasi kake, kais matoe, kais mubak, kais mupoibom, mumtausan ho ama ma ho aina." ²¹ Atoni nane nak, "Ale plenat i au utuin ulali sin na’ko fe au munif kau." ²² Leka Yesus nen uab nane In nak neu atoni nane, "Al lasi nono mese le ho fe ka mo’e mani. Musosa mani ale ho maus ma ambait mani neu amamu’it sin, ma of ho mupeni maus bi neno tunan. Oket aum nai ma mituin Kau." ²³ Leka atoni nane in nen a’at nane, in nekan na’unu, fun in atoni amu’it kun. ²⁴ Leka Yesus nahin nak atoni nane nekan antu’ In na’uab neu in nak, "Mafen le’uf neu atoni amu’it hen tam neu Plenat Uisneno. ²⁵ Bikase paha snaen antam nan anet in a’bolan, makafa nesin atoni amu’it hen tam neu Plenat Uisneno." ²⁶ Ale atoni le sin nen Yesus uab nane sin nak, "Kalu onane sekau es he napeni honis ka?" ²⁷ Yesus nak, "Sa’ le ka nabe’i fa neu mansian, nabe’i neu Uisneno." ²⁸ Nai Petrus nak, "Kiso, hai misaitan ale hai ini ma mituin Ko." ²⁹ Yesus nak neu sin, "Atoni le nasaitan in ume, in fel ai in olif tataf, in amaf ainaf ai in anhenu, natuin mepu Uisneno, ³⁰ of napeni baen kuni peni batan i, ma bi batan amnemat of napeni honis nabal-bal." ³¹ Usif Yesus nabuab In asimo lasi bo’es am nua ma na’uab neu sin nak, "Mnen nai, hit het nao teu Yerusalem ma ale lasi antui nani bi mamfefa knino sin sulat antom Anmone Pah To, of natiabon. ³² Ma of nana’at nani In neu atoni le ka nahin Uisneno, oket sin nasi’u, na’akan ma nakinu In. ³³ Of sin hamu’i ma namate In, mes bi neno tenu In fen anfain." ³⁴ Mes asimo lasi sin ka nahin fa ale lasi i; a’at in oten naninbon neu sin, ma sin ka nahin fa Yesus In molok nane he sa’ ka. ³⁵ Bi neno Yesus anpaumak kot Yerikho anmu’i atoni afolot mese antok bi lalan ninen ma naktoti ai anlomati. ³⁶ Leka in nen atoni namfau nao natuin nane te in natan ma nak, "Sa’ es nane ka?" ³⁷ Oket sin etun nak, "Yesus, atoni Nazaret anfin nok i." ³⁸ Afolot nane anhunun ma nak, "Yesus Nai Daud sufan, mumnau kau fa!" ³⁹ Ma atoni le anao ahunut sin nakain in he nati’ natena. Mes in naiti hanan nesi anten nak, "Koi, Nai Daud sufan mumnau kau fe!" ⁴⁰ Ma Yesus nasnas ma anlelu sin he neki afolot nane nem neu In. Ma leka in nem paumak, Yesus natan in nak, ⁴¹ "Hom lomi, Au mo’e sa’ neu ko ka?" Atoni nane nak, "Uisneno, au lomi he it fani." ⁴² Oket Yesus nak, "Mu’et nai, ho nek ateb knino naleko’ ko." ⁴³ Bi leku nane amsa in nit anfani, ma natuin Yesus fun anpules Uisneno. Ma ale to sin nit lasi nane ma naliatas Uisneno.

¹ Ma Yesus antam bi kot Yerikho ma In nao anfin kot nane. ² Bi kot nane anmu’i atoni mese kanan Nai Zakheus, asimo noni poni sini nakaf ma Nai Zakheus nane atoni amu’it kun. ³ In lomi he nit Usif Yesus, mes in ka nit nani fa fun atoni namfau ma in kol-kole kun. ⁴ Es nane in naen nahunun atoni mfaun ma ansae neu bubuk tunan he nit Yesus le he naon fin natuin nane. ⁵ Leka Usif Yesus ante bale nane, In anbaisenu ma nak, "Zakheus, hom sanu nai, fun neno i Au he umaika bi ho ume." ⁶ Ma Nai Zakheus ansanu lab-lab ma ansimo Yesus nok amlilat. ⁷ Mes atoni le sin nit lasi nane sin na’munu ma nak, "In hen tam neu atoni asanat in ume." ⁸ Mes Nai Zakheus anhake ma nak neu Yesus, "Usif, au mu’ik in aon bian au he bati neu amamu’it sin ma kalu au ukliup es in sa’ of au fe ufani no ha." ⁹ Yesus nak, "Neno i tetus ma mnit anbol neu ume i, fun atoni i amsa Nai Abraham in sufan. ¹⁰ Fun Anmone Pah To In nem he nami ma nahoni amnekut sin." ¹¹ Ma sin fe natnin lasi le Yesus na’uab nani, In na’uab anteni lasi leta mese. Fun Yesus haumak kot Yerusalem ma sin natenab nak Uisneno he nanaob In plenat on Usif bi pah pinan. ¹² Ma Yesus In nak, "Anmu’i atoni makana mese in nao neu pah mese le na’lo he naiti anfani kesel anbi nane ma namuni te in fani nem. ¹³ In boin in ate sin bo’es ma anfe sin noni mnatu bo’es, ma in nak: Him pake noni i he misosa talan te au fani aum. ¹⁴ Mes ale atoni le sin kuan mese nekan na’unu neu atoni nane, es sin ansonu haef nao natuin in he naton nak: Hai kam lomif he atoni nane ansae usif bi kai. ¹⁵ Leka naiti nalali atoni nane fani kesel, in fani nem neu in kuan. In lelu hen boin in ate sin, le afi in anfe noni neu sin, fun in he nahin sini sosa nane onme ka. ¹⁶ Ate ahunut in nem ma nak: Usi, noni mnatu mese le hom fe kau au usufab fani bo’mese. ¹⁷ In nak neu ate nane: Leko, ho ate alekot ko. Fun ho nek amneot ko bi lasi an-ana, au aiti ko hem fani akuasat bi kot bo’es. ¹⁸ Ma ate tnanan nem nak: Usi, ho noni mnatu nane au usufab fani nim. ¹⁹ In nak neu ate nane: Ho muplenat nai kot nim. ²⁰ Ma ate amunit nane in nem ma nak: Usi, ho noni mnatu es i, au ubela ani bi pilu. ²¹ Fun au umtausan ko, ho atoni maspeti ko; ho maiti sa’ le ho ka mubela mani fa, ma hom abut sa’ bi bale le ho kam sen mani fa. ²² Usif nane nak neu in: Ho ate apenut ko, au lefi lasi natai nok ho fefam kum. Ho muhin mak au atoni amaspetis kau, au ait sa’ le au ka ubela ani fa ma au abut sa’ le au ka sen ani fa. ²³ Nansa ho ka muna’at fa au noni neu atoni le nasufab noni ka? He nati’ leka au fani aum te au simo ufani noni nane nok in sufan. ²⁴ Ma usif nane nak neu sin le anhake bi nane: Maiti nai noni mnatu mese i na’ko in ma amfe mani neu atoni le anmu’i noni mnatu bo’mese nane. ²⁵ Ma ale atoni nane sin nak neu in: Usi, in anmu’i kun noni bo’mese. ²⁶ Usif nane natae: Mimnau, atoni le anmu’i of anfe neu in nesi, mes sekau le kan mu’if, naiti na’ko in sa’ le in anmu’i. ²⁷ Mes ale au musu sin, le sin kan lomi fa he au fani kesel neu sin, mok sin nem bi i ma mimate sin bi au matak." ²⁸ Ma leka Usif Yesus na’uab nalali onane, In nao nahunun sin neu Yerusalem. ²⁹ Leka sin nem anhaumak kuan Betfage ma Betania, bi Tubu Zaitun, Usif Yesus anlelu In asimo lasi nua ³⁰ ma nak, "Him nao neu kuan le anbi hi matam nane: Leka him tam bi nane of hi mit bikase luke mnanu tipu mese mafutu ma fe ka nam nonon fa. Him sefi tani ma meki nem neu i. ³¹ Kalu es natan ki: Nansa es him sefi bikase nane? Hi mitae mak: Usif hen sae." ³² Sin nua sin nao, ma sin napeni sa’ onle Usif Yesus anba’an sin. ³³ Leka sin sefi bikase nane, te bikase tuaf nak, "Nansa him sefi bikase nane?" ³⁴ Sin nak, "Usif hen sae." ³⁵ Sin neki bikase nane neu Usif Yesus. Oket sin na’peni nani neki sin tainusat ma nasaeb Yesus neu bikase nane. ³⁶ Ma leka In ansae ma nao, sin nauf sin tainusat ma na’ben bi lalan nane. ³⁷ Leka Yesus anhaumak kot Yerusalem bi lalan le ansanu na’ko Tubu Zaitun, ale amnaubat sin namlil ma nanaeb Uisneno neki hanan naek fun ale lasi amkakat le sin nit nalali. ³⁸ Ma sin nak: "Nahoeb alekot neu Usif Yesus le ankoenon nem on Kesel anbi Uisneno In kanan, halan nekaf bi neno tunan ma apinat bi tuna’ latan!" ³⁹ Atoni Farisi fauk na’ko to mfaun nane nak neu Yesus, "Anoni, mukaina Ho asimo lasi sin." ⁴⁰ Yesus natae sin, "Bati sin natena, of ale fatu i sin tekal a’baf." ⁴¹ Ma leka Yesus nem haumak ma ankiso nit kot Yerusalem te In ankae ma nanof matnu neun. ⁴² Ma In nak, "E, kasian, bait neno i ho muhin lasi sa’ le he neki neu hal nekaf! Mes tomas i lasi nane naninbon bi ho matam. ⁴³ Fun of in neno nem, ho musu anmo’e nenu’ funam natef ko ma anhake napun ko ma anhabnesa nan ko. ⁴⁴ Ma sin of naskuku ko nok ale ho to ma anbi ho baki lape of sin ka na’oi fa fatu mese nabala bi in balan, fun ho kam panat fa leku tabu le Uisneno he namonib ko." ⁴⁵ Ma Yesus antam neu Ume Uisneno ma anliu napoitan ale atoni a’sosa bi nane. ⁴⁶ In nak neu sin, "Antui bi Sulat Knino nak on i: Uisneno nak: Au Ume nane Ume onen totis. Mes hi mo’e mani on nuat asikat." ⁴⁷ Neno-neno Yesus nanoni bi Ume Uisneno. Ale Ana’ fuat knino nakaf ma ahinet Sulat sin ma atopu to Yahudi sin nami he namate In. ⁴⁸ Mes sin ka napeni fa lalan hen mo’e nani onme, fun to ok-oke futun nekan neu In ma anlomi he natnin In a’an.

¹ Ma ante neno mese leka Yesus nanoni ma anetun Beno Alekot na’ko Uisneno neu to bi Ume Uisneno. Oke te Ana’ fuat knino ma Ahin Sulat nok atopu to Yahudi sin nem bi bale nane. ² Ma sin na’uab neu Yesus nak, "Muton kai fe. Ho mo’e ale lasi i meki kuasat me ma sekau es anfe Ko kuasat nane?" ³ Yesus natae sin, "Au amsa he utan ki lasi mese. Miton Kau nai: ⁴ Nai Yohanes le naslani atoni nane in napeni na’ko Uisneno ai na’ko mansian?" ⁵ Sin malomin ma nak: "Kalu hit tak: Na’ko Uisneno, lof In nak: Nansa’ hi nekam ka nateb nani fa? ⁶ Mes kalu hit tak: Na’ko mansian, ale to ok-oke lof anpoli kit neki fatu, fun sin nateb nak Nai Yohanes nane mafefa knino kun." ⁷ Es nane te sin natae nak’ hai ka mihin fa lasi nane na’ko me. ⁸ Ma Yesus natae sin nak: "Onane Au amsa ka uton ki fa Au mo’e ale lasi nane eki kuasat sa’." ⁹ Ma Yesus na’uab neu to mfaun neki lasi leta mese nak, "Atoni mese ansen lele tanu’an sena. In nana’at lele nane neu atoni ameup lele ma in nao kun neu pah bian ma namaika suk a’lo. ¹⁰ Ma leka etin ante, lele tuaf anlelu in ate nao neu ameup lele sin he nati’ sin anfe neu sin tanu’an sena fuan bian. Mes ameup lele sin anbiso ate nane ma anlelu in fani nok nim luman. ¹¹ Oke te lele tuaf ansonu anten ate bian, ma sin anbiso ate nane ma namaeb nisan oket ansonu in anfani nok nim liman. ¹² Mes in ansonu anteni ate hae tenu, mes sin napapa’ ate nane amsa ma anpolin napoitan neu lele kotin. ¹³ Oket lele tuaf nane nak: Au he mo’e sa’ ka? Au he sonu au anmone le au nek ani of sin namtausan in. ¹⁴ Mes leka amepu lele sin nit anah nane sin makusab uab, nak: Amnemat i in of es ansimo bale mnasi, leko hit tamate; he nati’ hit tapeni bale mnasi nane. ¹⁵ Ma sin anhel napoitan neu lele kotin ma namate in. Onane te lele tuaf of anmo’e sin onme ka? ¹⁶ Of in nem ma namate ale amepu lele nane sin, ma anfe lele nane neu atoni ameput bian." Leka sin nen a’an nane atoni sin nak neu Yesus, "Kaisa onane!" ¹⁷ Mes Yesus ankiso sin ma nak, "Kalu onane a’an bi Sulat Knino i in oten sa’ ka? Fatu le amepu ume anpolin nani, anfani fatu sukit makana. ¹⁸ Sekau anmofu bi fatu nane, of in nakpete, ma fatu nane na’beku sekau of in naskuku." ¹⁹ Ma Ahin Sulat ma Ana’ fuat knino nakaf sin sali hen heke Yesus bi leku nane amsa; fun sin nahin nak lasi nane antom neu sin. Mes sin namtausan to mfaun nane. ²⁰ Ahinet Sulat ma ana’ lasi fuat nakaf sin natnu’ Yesus. Es nane sin lelu atoni le anmo’e son on atoni alekot he natnu’ Yesus. Ma na’koke neki totis namfau he nati’ napeni Yesus bi In uab oke te nana’at nani neu ana’ kuasat ama kumlol ini. ²¹ Atoni-atoni nane sin neki tanas neu Yesus nak, "Anoni, hai mihin. Ho uab ma Ho noina nane namneo ma Ho kam beti fa humaf, fun Ho munoni lalan Uisneno nok amneot. ²² Mes hai mitan Ko, hai mes hem baen noni poni neu Kesel ka ai kahaf?" ²³ Mes Yesus nahin sin ak’elon nane, ma nak neu sin, ²⁴ "Ati milile Kau noni mese fe; sekau human ma sekau tuis anbi nane ka?" Sin natae nak, "Kesel ini." ²⁵ Yesus nak neu sin, "Bati onane him fe nai neu Kesel sa’ le Kesel ini ma neu Uisneno sa’ le Uisneno ini." ²⁶ Ma sin ka napeni fa Yesus In sanat bi uab fefa mese amsa anbi to sin matan. Mes sin namkakan neu In han taes nane ma sin natena. ²⁷ Ma atoni Saduki bian le sin natotan lasi amates anfen anfani sin nem neu Yesus ma natan In nak, ²⁸ "Anoni, Nai Musa antui neu kai: Kalu atoni mese anmate mes ka nahonif anah, onane te olif hen mafe nok in tataf fe banu, he nahonis anah neu in tataf amates nane. ²⁹ Neu anmu’i atoni hitu le maoli tatan. Ma anaet nane in mafe nok bife es, mes in anmate ma ka nahonif. ³⁰ Onane te olif le natuin in anmafe nok bifel nane. ³¹ Onane amsa olif hae tenu talan te sin hitu sin ma’akatuin, sin anmate oke ma ka nahonin fa anah. ³² Namuni te bife nane anmate amsa. ³³ Neu, leka amates anfen anfani bifel nane in mone es sekau? Fun sin hitu alsin mafe nalali nokan." ³⁴ Ma Yesus nak neu sin nak, "Bi pah pinan i mansian anmafe ma anmamone; ³⁵ mes atoni le antam ota hen fen anfani, ma anmoni bi batan amnemat of sin ka mafe mamone fa. ³⁶ Fun sin kan mate fa; mes sin namnes nok ahake neno tunan, ma on anah-anah Uisneno fun nafena nafani sin na’ko amates. ³⁷ Lasi amates anfen anfani nane, Nai Musa anetun nalali anbi Sulat Knino antom kis lubu, le in antek Uisneno nane Uisneno Nai Abraham, Nai Ishak ma Nai Yakub. ³⁸ Fun Uisneno nane ka Uisneno atoni amates, mes Uisneno atoni amonit, fun sin anmoni alsin neu Uisneno." ³⁹ Ma Ahin Sulat bian nak, "Anoni, Ho han taes nane namneo." ⁴⁰ Kiso, katit fa es he natan anten sa’ neu Usif Yesus. ⁴¹ Ma Usif Yesus natan neu sin nak, "Leka me antek nak, Kesel Afetin amneki honis nane Nai Daud in anmone? ⁴² Nai Daud in neknon antui bi sulat Sit Pules nak: Uisneno nak neu au Usi nak: Hom tunom nai bi Au nimak ne’u, ⁴³ talan te Au tao Ho musu anbi Ho haem nupun. ⁴⁴ Es Nai Daud antek Kesel Afetin amneki honis nane in Usi, leka me In anfani Nai Daud sufan?" ⁴⁵ Leka ale to sin nem ok-oke, Yesus na’uab neu In asimo lasi sin nak, ⁴⁶ "Him panat nai hi aom neu Ahin Sulat sin, le naoinsok nok pake amasat ma he napeni kan tola bi masa; lomi hen tok bi bale makana anbi ume buat ma anbi tolas. ⁴⁷ Sin nasik bife banu sin ume, ma antobe sin moet apenut neki onen totis mnanu. Of sin napeni kasat mafen le’uf."

¹ Leka anbi Ume Uisneno, Yesus nit atoni amu’it natam sin fua tulu bi peti fua tulu. ² Fun Yesus nit amsa bife banu amamu’it mese natam loi molo pisa nua neu peti nane. ³ Ma Yesus nak, "Mitnin nai, bife banu amamu’it i natam nesin na’ko ale atoni bian. ⁴ Fun ale atoni nane sin natam fua tulu na’ko sin athoes. Mes bife banu i anfe na’ko in manukat ma anfe in mu’in ok-oke." ⁵ Ma bian sin namolok antom Ume Uisneno le namasab nani neki fatu alekot ma ale bale le natulu neu Uisneno. Yesus nak: ⁶ "Leka in neno ante, ale sa’ le hi mit nane of anpukai nani; katit fa fatu mese le naktut’on bi fatu bian." ⁷ Ma asimo lasi sin natan neu Yesus nak, "Anoni, ale lasi nane of leka anbol ka? Ma ini taka nane sa’ leka ale lasi anbol?" ⁸ Yesus nak, "Panat nai, kais anhel ansan ki lanan. Fun atoni namfau of sin nem neki Au kanak ma nak: Au es kau i, leku anbolen. Kais hi mituin sin. ⁹ Ma leka him nen lasi makenat ma bulalu, kais hi mimtau. Fun ale lasi nane of anbol nahun, mes neno hatas amsoput nane fe ka nem ante." ¹⁰ Yesus na’uab neu sin nak, "Uf nok uf naiti makenat ma pah nok pah bian an ma’autun. ¹¹ Ma nainunus naek, amnahas ma menas of anbol bi bale-bale. Fun hakataus ma taka na’ko neno tunan anbol ma naskekeb ki. ¹² Mes nahunu na’ko ale lasi nane of anheke ki ma anhamu’i ki. Ma nana’at ki bi ume-ume buat ma pa’an-pa’an ma antopu neki ki bi kesel-kesel ma anaet-anaet sin matan natuin Au kanak. ¹³ Nane anfani leku mainuan he nati’ him etun lasi knino. ¹⁴ Miloitan nai hi nekam, kais mitenab mak of hi mi’uab sa’ antom hi aom. ¹⁵ Fun of Au fe ki hine ma keon talan te katit fa es le hem be’u ki. ¹⁶ Ma hi ama hi aina, ma hi olif hi tataf, ma hi bae ma hi benu sin of nana’at ki, ma of bian anbi ki sin namate nani. ¹⁷ Ma of sin anli’u ki natuin Au kanak. ¹⁸ Mes hi nakfunu nono mese of ka namneku nitaf. ¹⁹ Leka hi malan mibe’i of hi mipeni honis." ²⁰ "Leka hi mit solalus hake natef kot Yerusalem, mihin nai mak kot nane haumak he namle’u. ²¹ Bi tomas nane ale atoni bi pah Yudea sin mes naen neu pah neten. Ale atoni bi kot Yerusalem sin poi nasaitan ma ale atoni bi kuan kais sin antam bi kot nanan. ²² Fun nane neno sesut anbol he nati’ Sulat Knino in hanan nateabon kun. ²³ Amle’ut neu bife le sin na’apu ai ainaf le fe nasusu anah bi neno nane. Fun of susal mafena nem neu pah nane ma to’as Uisneno nem neu to i. ²⁴ Ma sin natsel natuin suni aikan ma neki bian neu pah-pah on ate ma ale to le ka nahin Uisneno anteli naklati kot Yerusalem talan te natiab lekat Uisneno neu batan nane." ²⁵ "Ma of anmu’i taka bi manas, ma bi funan ma bi afkun-afkun. Bi pah pinan ale pah namtau ma nasu’nu natuin tasi in oki ma slutun. ²⁶ Ale atoni sin anmate natuin amtaus ma nekan namneku natuin ale sa’ le nem neu pah pinan, fun neno tunan nok in matanin nabeko nok. ²⁷ Bi leku nane Anmone Pah To of nem bi nope nok kuasat ma apinat naek. ²⁸ Leka ale lasi nane anbol, fen nai mutetu nekam nai, fun hi afetin haumaken." ²⁹ Oket Yesus na’uab neu sin lasi leta mese nak, "Kiso nai hau bubuk ai ale hau bian. ³⁰ Leka hi mit ale hau nane sin nasnuk nalali, hi mihin mak fauknais anhaumaken. ³¹ Onane amsa, leka hi mit ale lasi nane anbol te, hi mihin mak plenat Uisneno haumaken. ³² Au aki ki: Batan i of kan fini fa, talan te ale lasi anbol. ³³ Neno tunan ma pah pinan of anfin, mes Au a’ak nane nabala talan te nabal-bal." ³⁴ "Him panat nai hi aom he nati’ kais hi nekam nasenipon neu fesat ma mafu tua ma ale paisa paha pinan, he nati’ kais Uisneno leku le’at nem neu ki onle le’o le naskekeb ki. ³⁵ Fun of In nem neu ale to bi pah pinan i. ³⁶ Es nane him be’ nai ma him panat nai fun him onen toti bi ale leku, he nati’ hi mipeni matani ma miskotun ale sa’ le hen bol nem ma hi ala ki amhake bi Anmone Pah To In matan." ³⁷ Yesus nanoni bi Ume Uisneno nok manas ma fafai In nao neu Tubu Zaitun. ³⁸ Ma nok-noka te ale to nem neu In bi Ume Uisneno he nen In noina.

¹ Neno Naek Utunu’ Kan Pake fa Lalu haef, le antek nak Paskah ai fuat afinit nem an haumak. ² Ale Ana’ fuat knino nakaf ma ahinet Sulat sin nami lalan, he namate Yesus onme fun sin namtausan to mfaun nane. ³ Oke te Nitu antam neu Nai Yudas, le antek nak Iskariot, asimo lasi mese na’ko Yesus In asimo lasi bo’es am nua. ⁴ Ma Nai Yudas anpoi ma nao neu ale Ana’ fuat knino nakaf ma ale nakaf apao Ume Uisneno, ma na’uab nok sin, he nana’at Yesus neu sin onme. ⁵ Ma sin namlil ma malomin hen fe Nai Yudas noni. ⁶ Nai Yudas anlomi, ma in nami leku manuan he nana’at Yesus neu sin fun to mfaun nane kais nahinen. ⁷ Fun Neno Naek Utunu’ Kan Pake fa Lalu haef ante nak hen lolo bibi kase ma naloitan mnahat neu Tolas Paskah. ⁸ Oket Yesus anlelu Nai Petrus ma Nai Yohanes nak, "Him nao nai, mibalab kit Tolas Paskah he hit bukae." ⁹ Ma sin nak neu Yesus, "Hom lomi hai mibalab bi me ka?" ¹⁰ Yesus nak, "Leka him tam bi kot nane of hi mie’ku mok atoni mese le neki nai oe. Mituin in neu ume le hen tam neun, ¹¹ ma hi mak neu ume tuaf nane: Anoni natan ko nak: Bi ke’an me ka Au ok Au asimo lasi sin hem bukae Tolas Paskah? ¹² Oket ume tuaf nane of anlekan ki ke’an naek mese bi fafon le naloitan nani; ma hi mibalab anbi nane." ¹³ Ma Nai Petrus nok Nai Yohanes sin nao ma sin napeni sa’ onle Yesus naton nalali sin. Ma sin nabalab Tolas Paskah onane. ¹⁴ Leka leku ante, Yesus antok bi mei tolas ma anbukae nok In asimo lasi sin. ¹⁵ Ma Yesus nak neu sin, "Au lomi he bukae Tolas Paskah i ok ki nahunun Au he sutai mafena. ¹⁶ Fun Au ak ki: Of Au ka bukae teni fa ok ki talan te tolas in nateabon bi Plenat Uisneno." ¹⁷ Oket Yesus naiti klas nok tua mina amtasa ma natulu nani neu Uisneno ma nak, "Maiti nai ma ambati nai neu ki. ¹⁸ Ma mihin nai, na’ko leku i Au ka inu teni tanu’an sena in oen talan te plenat Uisneno nem." ¹⁹ Oket Yesus naiti utunu’ ma natulu nani, oket anebi nani ma anfe neu sin, ma nak: "I Au aok (le anfe nani neu ki; mo’e nai lasi i anfani amnaut neu kau." ²⁰ Onane amsa Yesus anmo’e neu klas mninu leka sin bukae nalali, nak, "Klas mninu i lasi mantaen fe’u bi Au na’ le an op nani neu ki. ²¹ Mes him kiso, atoni le he nana’at Kau, antoko nabua nok Kau bi mei i. ²² Fun Anmone Pah To In nao onle Uisneno anlek nani, mes amle’ut neu atoni le ana’neb In." ²³ Nalali te sin matoti es nok es nak, sekau es hen mo’e lasi nane. ²⁴ Onane amsa lasi matoes anbi Yesus asimo lasi sin, sekau es nanae nesi anbi sin. ²⁵ Ma Yesus nak neu sin, "Ale kesel pah naplenat sin to ma ale atoni le nanaeb kuasat neu sin nane, antek sin aneot amafot. ²⁶ Mes hi kais onane, so anaet anfani on abaut ma nakaf nane anfani atuthaes. ²⁷ Fun sekau es naek nesi, le antoko ma anbukae, ai le antuthae nane? So mak atokos nane ai? Mes Au bi hi atnanam on atuthaes. ²⁸ Hi mibala mok Kau bi ale lasi su’at le Au he sutai ani. ²⁹ Fun onle Au Ama anfe Kau he uplenat, onane amsa Au fe neu ki. ³⁰ Onane te of hi miah ma minu mok Kau bi mei mese anbi Au plenat ma of him toko bi toko alef lasi he miplenat uf Israel bo’es am nau. ³¹ Simon, Simon, kiso, Nitu anto’i ki he nakpese ki onle aen kase. ³² Mes Au onen toti neu ko, he nati’ ho palsait nane kais namneku. Ma leka ho nekam anbe’ hom hatani ho ini sin." ³³ Nai Petrus natae nak, "Uisneno, au uloitan uleli he tam o’of ma mate ok Ko!" ³⁴ Mes Yesus nak, "Petrus, neno i of manu fe kan kokle’o fa, ho mutotan Kau hae tenu." ³⁵ Ma Yesus nak neu sin, "Leka Au sonu ki, fun ka meki fa alu noni, bukael ma penhaef, ati him nukan sa’ ka?" ³⁶ Ma sin natae nak, "Kahaf." Ma Yesus nak neu sin, "Mes tomas i, sekau anmu’i alu noni so in neki, onane amsa anmu’i bukael; ma sekau le kan mu’if, so nasosa in bael pake ma ansos suni. ³⁷ Fun Au ak ki, a’an Sulat Knino he namtis anbi Kau; le antui nani nak: In maso’it anbi amaufinut sin atnanan. ³⁸ Oke te sin nak, "Uisneno, suni nua es i." Yesus nak, "Noba nai." ³⁹ Oke te Yesus anpoi na’ko kuan ma nao neu Tubu Zaitun. In asimo lasi sin amsa natuin In. ⁴⁰ Leka ante bale nane In nak neu sin, "Onen toti nai he nati’ kais him tam bi lasi su’at." ⁴¹ Ma In nao naskot na’ko sin onle anpolin fatu mese ma In anlitu ma anonen toti ⁴² nak, "Koi Ama, bait Hom lomi, mufinib lasi mane’at i na’ko Kau, mes kais natuin Au lomik so Ho lomim anbol nai." ( ⁴³ Fun ahake na’ko neno tunan nalilon neu In ma anhatani In. ⁴⁴ Yesus namtau nasekeon ma In anonen toti nok amneot. In puse onle na’ anloli neu nain.) ⁴⁵ Leka In anonen nalali In anfen ma anfani neu In asimo lasi sin, ma napeni sin antup fun sin nekan antu’. ⁴⁶ Ma In nak neu sin, "Nansa es him tup? Fen nai ma amonen toti, he nati’ kais him tam bi lasi su’at." ⁴⁷ Leka Yesus fe na’uab onane te pah namfaun nem, Nai Yudas In asimo lasi na’ko bo’es am nua sin nao nahun bi sin matan. Nai Yudas nem haumak Yesus ma nekat In. ⁴⁸ Ma Yesus nak neu in, "Yudas, ho muna’at Anmone Pah To meki nekat ka?" ⁴⁹ Leka alsin, le nok Yesus nit lasi nane te, sin nak, "Usi, haim ote sin meki suni ka?" ⁵⁰ Ma atoni mese anbi sin ano’te Ana’ Lasi Fuat Naek in ate luken ne’u tal natfek. ⁵¹ Mes Yesus nak, "Maut nai." OKe te In anpoho atoni nane luken ma naleko nafani. ⁵² Ma Yesus nak neu ale nakaf Ana’ fuat knino ma ale nakaf apao Ume Uisneno ma ale amnasit Yahudi le nem hen heke In, nak, "Ait hi mak Au atoni abulalut Kau, es hi aim meki suni ma hau tuka ka? ⁵³ Neno-neno Au ok ki bi Ume Uisneno, ma him kam heke Kau. Mes i hi leku mainuan, ma kuasat mesokan in leku kun." ⁵⁴ Ma sin anheke Yesus ma nokan nao neu Ana’ Lasi Fuat Naek in ume. Mes Nai Petrus natuin na’ko lo. ⁵⁵ Fun sin nahopi ai bi po’an atnanan ma Nai Petrus nao ma antoko nok ale atoni le sin toko antol ai nane. ⁵⁶ Ma ate bife mese le nit Nai Petrus toko haumak ai; in kiso nalek-leko ma nak, "Atoni i amsa afi nok Yesus!" ⁵⁷ Mes Nai Petrus natotan ma nak, "Kahaf, au ka uhin fa atoni nane." ⁵⁸ Kalob fa onane te atoni es nit in ma nak, "Ho amsa sin ini ko!" Mes Nai Petrus natae nak, "Kahaf, ka au fa!" ⁵⁹ Ma oni leku mese anfin onane te atoni es anten na’uab nok hana’ kataf nak, "Namneo, atoni i amsa nok Yesus, fun in amsa atoni pah Galilea." ⁶⁰ Mes Nai Petrus nak, "Kahaf, au ka uhin fa sa’ le ho mu’uab nane." Leka in fe na’uab onane te manu ankokle’o. ⁶¹ Ma Usif Yesus anikotin ma ankiso Nai Petrus. Oke te Nai Petrus namnau nit nak Usif Yesus na’uab nalali neu in ma nak, "Of manu fe kan kokle’o fa bi neno i te, ho mutotan Kau hae tenu." ⁶² Ma oke te Nai Petrus anpoi neu mone ma ankae sese’ul. ⁶³ Ma ale atoni le anpao Yesus, sin nasi’u ma anbiso In. ⁶⁴ Ma sin amu Yesus matan ma natan nak, "Ati hom tek mit, sekau es anbiso Ko ka?" ⁶⁵ Ma anmu’i uab si’ut bian le sin antek nani neu In. ⁶⁶ Leka manas anpe ale amnasit to Yahudi ma ale nakaf Ana’ fuat knino ma ale Ahin Sulat, sin nabua ma sin neki Yesus neu sin Alef Lasi ma nak, ⁶⁷ "Bait Ho Kesel Afetin Ko, muton kau nai." Ma Yesus nak, "Au he uton ki, mes of hi ka miteb mani fa; ⁶⁸ ma Au he utan ki lasi sa’es mes of hi ka mitae mani fa. ⁶⁹ Mes na’ko tomas i Anmone Pah To antoko bi Uisneno Akuasat Afin-finit niman ne’u." ⁷⁰ Onane te sin alsin nak, "Kalu onane, Ho le i, Uisneno Anmone Ko ka?" Ma Yesus nak neu sin, "Namneo, him tek milali, Au le i Uisneno Anah." ⁷¹ Onane te sin nak, "Hit het paek saksi neu sa’ anteni ka? Hit nen talali na’ko In fefan kun."

¹ Oke te tolas sin anfen ma neki Yesus neu Nai Pilatus. ² Ma sin natam Yesus lasi nak, "Hai mipeni atoni i, nasekeb hai to, ma antal to he kais anbaen noni poni neu Kesel, ma antek In aon Nenu Anan, Usif kun." ³ Ma Nai Pilatus natan Yesus nak, "Ho Usif Yahudi Ko ka?" Ma Yesus nak, "Namneo onle ho mak." ⁴ Ma Nai Pilatus nak neu ale nakaf Ana’ fuat knino ma neu to ok-oke, nak, "Au ka upeni fa sanat bi atoni i." ⁵ Mes sin naseke piut nak, "In fuli to neki In noina bi pah Yudea ok-oke, na’ko pah Galilea ma nem ante bale i." ⁶ Leka Nai Pilatus nen lasi nane in natan, ait atoni nane atoni Galilea? ⁷ Ma leka in nahin nak Yesus na’ko Nai Herodes in plenat, in ansonu Yesus nao neu Nai Herodes, le bi neno nane amsa bi kot Yerusalem. ⁸ Leka Nai Herodes nit Yesus, in nekan anmalin. Fun suk alo in lomi he nit Yesus, fun in fe fe’at amnen antom Yesus, oke te nafnekan he nit Yesus anmoe taka mese onme. ⁹ Es nane in natan lasi namfau neu Yesus, mes Yesus ka natae fa fefa mese. ¹⁰ Onane te ale nakaf Ana’ fuat knino ma ale ahinet sulat, sin nasanab Yesus piut. ¹¹ Ma Nai Herodes nok in to meo nakaf sin na’ akan ma nakle’at Yesus, oke te napakab nani neki pake kesel ma ansonu nafani In neu Nai Pilatus. ¹² Ma na’ko neno nane Nai Herodes ma Nai Pilatus fef leko anfani; fun nahunu te sin namusu es nok es. ¹³ Ma Nai Pilatus nabuab ale Ana’ fuat knino nakaf ma ale atopu to Yahudi ma to, ¹⁴ nalali te in nak, "Hi mok atoni i nem neu kau on atoni le nasekeb to. Ma him kiso au tae ulali In lasi, mes au ka upeni fa sanat sa’ le misanab mani neu In. ¹⁵ Ma Nai Herodes amsa kahaf, es nane In ansonu nafani nem neu kai. Ma atoni i ka nasanab fa sa’ le he namate In. ¹⁶ Es nane au he biso In, nalali te ufetin ufani." ( ¹⁷ Fun bi neno tolas, Nai Pilatus mes nafetin atoni mese neu to.) ¹⁸ Onane te sin ok-oke anhunun ma nak, "Muneku In, mufetin kai Nai Barabas!" ¹⁹ Nai Barabas antam o’of fun anmoe lasi bulalu bi kot ma namate atoni. ²⁰ Fun Nai Pilatus anlomi he nafetin Yesus es nane in na’uab anteni neu to mfaun nane. ²¹ Mes sin anhunun nak, "Muboni In bi hau nehe! Muboni In bi hau nehe!" ²² Ma Nai Pilatus nak anteni sin hae tenu nak, "Atoni i anmoe nalali lasi amle’ut sa’ ka? Au ka upeni fa sanat sa’ bi In le he namate nani. Es nane au he biso In oke te ufetin ani." ²³ Mes sin anhunun piut ma naseke he nati’ naboni Yesus bi hau nehe; onane te sin hunun nane manesa. ²⁴ Ma Nai Pilatus naiti fekat he namate Yesus natuin to in lomin. ²⁵ Ma in nafetin atoni le sin antoti le natam bi o’of natuin bulalu ma namate atoni. Ma nana’at Yesus neu sin he sin moe natuin sin lomin kun. ²⁶ Leka sin neki Yesus nao, sin nae’ku atoni mese kanan Nai Simon na’ko kuan Kirene le fe anfani nem neu kot. Ma sin naseke in hen loi hau nehe ma natuin Yesus. ²⁷ Ma pah namfau natuin Yesus; fun bife-bife amsa nokan ma ankae ma ankul neu Yesus. ²⁸ Mes Yesus naklelon neu sin ma nak: "Hi feotnai Yerusalem, kais him kae neu Kau, so him kae neu hi aom ma hi anah sin! ²⁹ Fun leka in eti ante of ale atoni nak: Alekot neu bife akiu le ka nahoni nit, ma in susun le ka nasusu nit fa anah. ³⁰ Bi leku nane of sin na’uab neu nu’af nak: Mithon nai meu kai! Ma neu ale tubu nak: Kub man kai nai! ³¹ Fun kalu sin moe nani neu hau honis onane, sa’ anteni neu hau meto ka?" ³² Ma sin antopu neki amsa atoni abulalut nua he namate sin nok Yesus. ³³ Leka sin nem ante bale le antek nani nak Nu’af Nui nakaf, sin ankus naboni Yesus bi hau nehe ma atoni abulalut nua amsa, es bi ne’u ma es bi li. ³⁴ Ma Yesus anonen nak, "Ama, sako sin sanat, fun sin ka nahin fa sa’ le sin anmo’e." Ma sin anhel sulat hen bati Ini bael pake. ³⁵ Ale atoni le anhake bi nane sin nit ale lasi ok-oke. Ma atopu Yahudi sin na’uab naslaet, nak, "In nahoni atoni bian, so In nahoni kun In aon, kalu In Neno Anan le Uisneno anbeti nani." ³⁶ Ma ale to meo amsa nasi’u In, ma nanona tua mahai neu in, ³⁷ ma nak, "Kalu Ho Usif to Yahudi Ko, muhoni Ho aom." ³⁸ Ma anmu’i tuis mese bi Yesus In hau nehe fafon le nahan nak, "I atoni Yahudi sin Usif." ³⁹ Ma abulalut mese le naboinon na’uab nale’un Yesus nak, "Ait Ho ka Neno Anan Ko fa? Muhoni Ho aom ma muhoni kai nok." ⁴⁰ Mes abulalut es nakain in, ma nak, "Ho ka mumtausan fa Uisneno ka? Fun he namate ko on In? ⁴¹ Neu hit nua kit simo hit mo’et in upan, mes atoni i kan mo’ef amle’ut sa’." ⁴² Oke te in nak neu Yesus, "Usif, mumnau kau leka Hom koenom aum on Kesel." ⁴³ Ma Yesus nak neu in, "Namneo, Au ak ko, neno i of ho mok Kau bi Firdaus." ⁴⁴ Ma oni leku bo’es am nua manas namtetu, pah nane mesokan oke talan te leku tenu, ⁴⁵ fun manas kan sinek fa. Ma beti eka bi Ume Knino natpisu bati nua. ⁴⁶ Ma Yesus anbai nok hanan naek nak, "Koi Ama, Au una’at Au smanak bi Ho niman nanan." Leka In na’uab nalali te, Ini snasan natfek. ⁴⁷ Leka to meo nakaf nit ale lasi nane te in naliatas Uisneno nak, "Tebes atoni i alekot kun!" ⁴⁸ Ma ale to le nem, hen tao mata neu ale lasi nane, sin anfani ma antofnok. ⁴⁹ Ma Yesus In ini sin ma ale bife sin, le natuin Yesus na’ko Galilea, sin hake bi lo ma napene ale lasi nane. ⁵⁰ - ⁵¹ Ma anmu’i atoni mese kanan Nai Yusuf na’ko kot Arimatea pah Yudea. In atoni alekot ma makana, ma anpao plenat Uisneno he nem. In aof na’ko Ale alef Lasi ma in kan simo fekat le antom Yesus. ⁵² Nai Yusuf nao neu Nai Pilatus ma antoti Yesus In aon nitu. ⁵³ Leka in nasanu nalali na’ko hau nehe te, in ana’mu neki muti kase, oke te natupab nani bi nuat naukel le anhani bi fatu naek. Nuat naukel nane fe’u fe ka nabela fa es anbin. ⁵⁴ Neno nane neno nima, fun neno ne, Neno Snasat anhaumak. ⁵⁵ Ma bife-bife le nok Yesus na’ko Galilea sin natuin Nai Yusuf ma nit nuat naukel nane ma natupab Yesus In aon nitu nane. ⁵⁶ Nalali te sin anfani ma naloitan fobona ma mina fomeni. Ma bi Neno Snasat sin nasnas natuin Plenat Knino.

¹ Mes bi neno klei nok-noka, bife-bife sin nao neu nuat naukel neki fobona le sin naloitan nalali. ² Ma sin ante naukel sin napeni fatu ekat nane antihoel na’ko nuat fefan. ³ Ma leka sin antam neu naukel nane sin ka napeni fa Yesus In aon nitu. ⁴ Leka sin fe anhake ma nekan namneku bi nane, sin nit atoni nua hake haumak sin nok pake nalim-nalim. ⁵ Sin namtaun ma nabes, mes atoni nua nane nak neu sin, "Nansa’ hi mami In le anmoni bi amates balan? ⁶ In kan bi fa i, In fen anfani. Mimnau nai afi In nakua a’an onme neu ki bi pah Galilea, ⁷ nak of nana’at Anmone Pah To neu atoni asanat sin niman ma naboni bi hau nehe, ma neno tenu namuni te anfen anfani." ⁸ Ma bife-bife nane namnau nafani Yesus In a’an nane. ⁹ Leka sin anfani nem na’ko nate naukel nane sin anetun lasi nane neu asimo lasi bo’es am mese ma neu bae benu bian. ¹⁰ Ma bife-bife nane esle’: Bi Maria na’ko Magdala, bi Yohana ma bi Maria Nai Yakobus in ainaf, ma bife bian le nao nok sin. ¹¹ Ma asimo lasi sin nak oni ale bife nane sin uab namo’e es nane te sin kan palsai fa sin uab nane. ¹² Mes Nai Petrus anfen, naen laba neu nate naukel nane. In nabes ma natnu’ neu naukel, al in nit pilu muti nabala bi nane. Oket in anfani ma nateb bi in nekan antom ale lasi le anbol. ¹³ Ma bi neno nane amsa atoni nua na’ko Yesus In asimo lasi sin he nao neu kuan mese kanan Emaus, oni kilo bo’es am mese na’lo na’ko kot Yerusalem. ¹⁴ Ma sin nua sin namolok antom ale lasi le anbol. ¹⁵ Leka sin fe namolok ma matukal uab es nok es, Yesus nem ma nao nok sin. ¹⁶ Mes anmu’i sa’le nanini sin matan, talan te sin ka nahin fa Yesus. ¹⁷ Oket Yesus nak neu sin, "Him nao nokat mimolok sa’ bi lalan atnanan?" Ma sin anhake ma sin human anmofu. ¹⁸ Oke te sin esle’ kanan Nai Kleopas natae nak, "Ait Ho mes kum atoni anao mnemat bi kot Yerusalem le ka muhinef ale lasi le anbol bi neno fauk i?" ¹⁹ Ma Yesus nak neu sin, "Lasi sa’ ka?" Ma sin nak, "Lasi le antom neu Yesus atoni Nazaret. In Mafefa knino kun, le anmu’i kuasat bi uab ma mepu nok, bi Uisneno In human ma bi ale to sin matan. ²⁰ Mes ale Ana’ fuat knino nakaf ma hai nakaf sin, nana’at In ma he namate ma naboni bi hau nehe. ²¹ Ma hai mifnekan mak In nem he nafetin to Israel. Ma neno i anfini neno tenu na’ko ale lasi nane anbol. ²² Mes bife bian na’ko kai naskekeb kai, fun fe noknoka sin nao neu naukel, ²³ mes sin ka napeni fa In aon nitu. Onane te sin anfani nem ma naton, nak sin nit ahake neno tunan le naton, nak Yesus anmoni. ²⁴ Ma hai bae bian sin nao neu naukel ma napeni amsa onle bife-bife naton nani mes sin ka nitaf Yesus." ²⁵ Oket Yesus nak neu sin, "Hi atoni amonot, le hi nekam manu’, talan te hi kam palsai fa ale sa’, le afi Mafefa knino naton nani. ²⁶ Nak Neno Anan mes ansutai mafena fe, nalali te antam neu In apinat!" ²⁷ Oket Yesus na’uab neu sin ale lasi le antui bi Sulat Knino antom In, na’ko Nai Musa in sulat ma Mafefa knino sin sulat. ²⁸ Leka sin haumak kuan le sin he nao neune, Yesus namo’e on In he nao anfin kun. ²⁹ Mes sin natau Yesus ma nak, "Mubala mok kai, fun neno hen faien ma manas hen tesen." Ma Yesus antam he nabala nok sin. ³⁰ Leka In toko hen bukae nok sin, In naiti utunu’ ma natulu neu Uisneno oke te anebi ma anfe neu sin. ³¹ Bi leku nane sin matan natfei ma nahin Yesus, mes In namneku na’ko sin matan. ³² Ma sin na’uab es nok es ma nak, "Ait hit nekak kan maput fa ka, leka In na’uab nok kit bi lalan atnanan ma anfainek kit neki Sulat Knino ka?" ³³ Bi leku nane amsa sin fen ma anfanin neu Yerusalem. Bi nane sin napeni asimo lasi bo’es am mese, le nabua nok sin ini bian. ³⁴ Ma sin nak, "Namneo, Uisneno anfen anfani ma nalile In aon neu Nai Simon." ³⁵ Ma sin nua sin anetun ale alsi le sin nit bi lanan atnanan ma sin nahin In onme bi leku In ane’bi utunu’ nane. ³⁶ Ma leka sin fe na’uab ale lasi nane te, Yesus nem ma anhake, bi sin atnanan ma nak neu sin, "Tetus ma aomina neu ki." ³⁷ Ma sin naskek ma namtau fun sin natenab nak oni nit smanaf. ³⁸ Mes Yesus nak neu sin, "Nansa’ hi mimtau, ma hi nekam na’unu? ³⁹ Kiso Au nimak ma Au haek: Mihin nai, Au es Kau i, poe Kau nai ma kiso fun smanaf kan mu’if nesan ma nuif onle hi mit anbi Kau." ⁴⁰ Ma In fe na’uab onane te In nalile In niman ma In haen neu sin. ⁴¹ Ma leka sin nekan fe ka nateb nani fa, natuin amlinat ma sanmakat te Yesus nak neu sin, "Hi mu’i mnahat sa’ ka?" ⁴² Oke te sin anfe neu In ika tunu koe mese ⁴³ In ansimo ma anbukae nani bi sin matan. ⁴⁴ Oke te Yesus nak neu sin, "I Au a’ak le Au ukua ani neu ki, leka Au fe ok ki, sa’le antui nani antom Kau bi Nai Musa in sulat ma bi Mafefa knino sin sulat ma bi sulat Sit Pules, of natiab nani." ⁴⁵ Oke te Yesus anfei sin lolen he nahin Sulat Knino. ⁴⁶ Ma Yesus nak neu sin, "Le antui nani nak: Neno Anan hen sutai mafena, ma neno tenu namuni te anfen anfani na’ko amates. ⁴⁷ Ma anbi Neno Anan In kanan of anetun lasi te’un nekaf ma lasi sako sanat neu ale uf-uf na’ko kot Yerusalem. ⁴⁸ Hi asaksit ki neu ale lasi i. ⁴⁹ Ma of Au sonu ki sa’ le Au Ama anba’an nalali. Mes hi mibala bi kot i talan te nahenu ki neki kuasat Uisneno na’ko neno tunan." ⁵⁰ Oke te Yesus nok sin anpoi na’ko kot ma sin nao anhaumak kuan Betania. Bi nane In na’aiti Ini niman ma antek uab alekot neu sin. ⁵¹ Leka In fe antek alekot neu sin, onane te In na’aition ansae neu neno tunan ma nabation nok sin. ⁵² Ma sin nabes neu In, oke te sin anfani neu kot Yerusalem nok amlilat naek. ⁵³ Ma sin nabala bi Ume Uisneno ma natulu nekan neu Uisneno.