YAKOBUS

YAKOBUS

¹ Han seon na’ko Nai Yakobus, ate Uisneno ma Usif Yesus Neno Anan neu uf bo’es am nua le nasitbon anbi pah-pah. ² Bae benu manekat! Leka him tam meu lasi su’at huma-huma, him simo mani on lasi malinat mese. ³ Hi mihin, mak lasi su’at neu hi palsait nane, anhatani hi nek sutais. ⁴ Mimautu hi nek sutais nane he mipeni fuaf amnatus, he nati’ hi minokbom ma mipeni matani ma kam nukan fa sa’. ⁵ Kalu es anbi ki anlabu nek hine, so in toti neu Uisneno, fun Uisneno of anfe nani neu in. Fun Uisneno anfe nani neu ale atoni nok sankolan ma nok nek amnaut. ⁶ Mes atoni le antoti so anpalsai, kais in nekan na’oni. Fun atoni le in nekan nao’ni onle tasi in oki le anin anfu neki neu ma nem. ⁷ Fun atoni onane, kais natenab nak in of ansimo sa’ na’ko Usif tunan. ⁸ Atoni le nek nuaon of kan tainine fa anbi in monin. ⁹ So leko bae knino le anbi bale le nabaunon anmalin fun Uisneno nalaitan nani. ¹⁰ Ma atoni amu’it so anmalin amsa leka Uisneno nabaun nani. Fun in of namneku onle hun in sufan. ¹¹ Leka manas ansae maput le’uf, hun nane anmaknene oke te in sufan ankua ma in masan te namneku. Onane amsa atoni amu’it; in of namle’u leka fe in nanaoba in mepu. ¹² Ua alekot neu atoni le anhatanion anbi lasi su’at. Fun leka in hatanion anbi lasi su’at nane, in of ansimo sobe honis le Uisneno anba’an nani neu atoni le sin nek In. ¹³ Leka anmu’i atoni le napeni lasi su’at onane kais in nak, "Lasi su’at nane na’ko Uisneno!" Fun ka nabe’i fa hen su’ Uisneno neki alis amle’ut ma In amsa kan su’ fa es. ¹⁴ Mes atoni le antam neu lasi su’at, nane natuin in sinmakat, talan te lasi amle’ut anfuil neki ma anhel neki. ¹⁵ Leka in natuin lasi amle’ut nane, in of nahonis sanat; leka sanat nane nanae, in nahonis maten. ¹⁶ Bae benu manekat, so kais him seken lalan. ¹⁷ Ale tulu alekot ma atnatas amneot nem na’ko neno tunan ma ansanu na’ko Ama Uisneno Apinat. In ka nabaina fa ma ka nate’un fa In mafon. ¹⁸ Natuin In lomin, In najalib kit natuin a’an amneot, he nati’ hit atfani an anaet anbi ale sa’ le In anmo’e nani. ¹⁹ Mimnau nai lasi i bae benu manekat! Ale atoni so anmanap he natnin, mes kais anmanap neu uab ma kais nato’ labah. ²⁰ Atoni le nato’ in ka nabe’i fa hen mo’e alekot anbi Uisneno In matan. ²¹ Es nane te ampolin nai ale lasi amle’ut ma amsimo nai a’an knino le ansenon anbi hi nekam nok nek baun, le neki honis neu hi monim. ²² Mes so him fani atoni le anmo’e natuin a’an Uisneno ma ka al fa atoni le in nen, fun kalu onane te hi milosib hi aom. ²³ Atoni le in nen a’an Uisneno ma kan mo’e natuin, in maleta on atoni le in kiso in human anbi nino. ²⁴ Leka in kiso nalali in human, oke te in nao ma in nikan nani in human nane onme. ²⁵ Mes atoni le anpanat plenat Uisneno nok amneot in napeni ao sona anbi plenat nane. Oke te in panat nani ma ka nikan nani fa, so anmo’e nani nok alekot, in of napeni alekot natuin in mo’et nane. ²⁶ Leka anmu’i atoni le natenab nak in atoni amtaus Uisneno, mes in kan panat fa in man, in nalosib kun in aon; in lasi luli besa neu Uisneno luman kun. ²⁷ Luli besa amneot amnonot anbi Uisneno In matan nane esle’ hen kiso anmanat sin ma bife banu sin anbi sin susal, ma anpanat aon he nati’ pah pinan kais nale’un nani.

¹ Bae benu alki! On atoni le anpalsai neu Yesus Neno Anan, hit Usif Apinat, kais minaob mani lasi palsait nane anbi beti humaf. ² Fun leka anmu’i atoni amu’it mese le anpake kleni mnatu ma anpake amasat nem neu hi tolas buat, oke te atoni amamu’it mese le anpake kloef nem neu ki, ³ ma him tola atoni amu’it nane ma mak neune, "Amtok nai tua, meu bael alekot i," ma hi mak neu amamu’it nane, "Amhake ambi nane," ai, "Amtoko meu nain, le au haek telin." ⁴ Mo’et nane anfani lasi beti humaf, le ho mo’e mani natuin tenab amle’ut. ⁵ Mitnin nai, bae benu manekat! Atoni le pah pinan ankiso on atoni mamu’it anbi lasi palsait, Uisneno anbeti nani on atoni amu’it anbi palsait. Atoni nane sin of napeni plenat neno tunan le Uisneno anba’an nani neu sin le sin nek Uisneno. ⁶ Mes hi kam lae fa atoni amamu’it sin. Atoni amu’it sin es anhamu’i ki ma anhel neki ki neu alef lasi sin matan. ⁷ Sin es na’akan kanaf apinat le him simo na’ko Uisneno. ⁸ Mes leka hi minaoba plenat abainesit le antui nani anbi Sulat Knino, "Him nek hi bia benu onle hi aom," nane hi mo’e lasi alekot. ⁹ Mes leka him beti humaf, nane hi mo’e sanat, ma plenat nane natonon, nak ho mo’e tanhais. ¹⁰ Atoni le antanhai plenat mese na’ko ale plenat Uisneno sin, nane in tanhai plenat ok-oke. ¹¹ Fun In es nakua a’an nak, "Kais hi mapaisa", In amsa es nakua a’an, "Kais hi mamaten", Es nane leka hi ka mapaisa fa mes hi mamaten, him fani atanhai plenat amsa. ¹² Mi’uab nai ma mo’e nai onle atoni le of anlefi in lasi natuin plenat Uisneno, le neki ao sona neu mansian. ¹³ Fun Uisneno of ka nalile fa lasi manekat neu atoni le kan mu’if lasi manekat. Mes lasi manekat of anbe’u lef lasi. ¹⁴ Bae benu manekat! Alekot sa’ ka neu atoni le in nak, "Au mu’i palsait," mes in ka nalile fa mo’et alekot? Lasi palsait onane neki honis ka? ¹⁵ Leka bae mone ai bae feto le kan mu’if tainusat ai kan mu’if mnahat neno-neno, ¹⁶ ma atoni mese anbi ki nak, "Hom nao nai mok tetus, hom tainus nai meki tainusat manafu ma muah nai he mumsen hem pet." Alekot sa’ ka neu atoni le in nak onane, mes in kan fe fa sa’ neu in ka? ¹⁷ Onane amsa lasi palsait, kalu lasi palsait nane ka nok fa mo’et alekot, palsait nane ka ma’upa fa. ¹⁸ Oni anmu’i atoni le in nak, "Ho mu’i palsait ma au mu’i mo’et alekot", of au utae neu in ak, "Mulile kau ho palsait le ka nok fa mo’et alekot, ma of au ulile ko au palsait le nok mo’et alekot." ¹⁹ Hom palsai mak, Uisneno mese ah ai? Nane leko! Nitu-nitu amsa anpalsai lasi nane ma sin natai. ²⁰ Hom palsai ka ambi tomas i, hoi mansian amonot, nak palsait le ka nok fa mo’et alekot, palsait nane luman kun? ²¹ Kiso mit, hit am uf Nai Abraham. Uisneno ansimo in mo’et alekot, leka in natulu in anah Nai Ishak anbi baki fuat. ²² Lasi i ansaksi nak, palsait mes nalilon nok mo’et alekot he nati’ nanokbon kun. ²³ Natuin lasi i Sulat Knino natision nak, "Oke te Nai Abraham anpalsai neu Uisneno ma Uisneno ansimo in on atoin alekot." Es nane te antek Nai Abraham nak, "Uisneno In soba." ²⁴ Namneo, nak Uisneno ansimo atoni le anmo’e alekot, ka al fa natuin lasi palsait. ²⁵ Onane amsa bi Rahab, bife amoe lasi kake nane. Uisneno ansimo in natuin in mo’et alekot, fun in natolo atonin le anlelu sin anbi in ume. Oke te in nafetin sin natuin lalan bian. ²⁶ Fun on aof ta’uf le ka nok fa smanaf, in anmate. Onane amsa palsait le ka nok fa mo’et alekot, nane palsait amates.

¹ Bae benu alki! Kais anmu’i atoni namfau anbi ki hen fani anoni. Fun hit tahin, nak hit le atfani anoni of anlef lasi mafena neu kit nesin atoni bian. ² Hit mo’e sanat anbi lasi namfau. Atoni le ka nasanab fa in anbi in uab, in atoni nek muti, le anpanat in aon. ³ Hit tao fleu ai kalat neu bikase fefan he nati’ in natuin hit lomik. Onane amsa hit mes atpanat hit aok noba temen. ⁴ Kiso mit ale bnao, maski naek ma anin matani nanaoba nani, mes nabei ana’i nani neki fenut an-ana’ natuin ana’ fenut in lomin. ⁵ Onane amsa hit mak, maski in an-ana’, mes in nanaebon kun anbi ale lasi naek. Kiso mit ai nane in an-ana’ kun, mes in notu nis ale nasi naek. ⁶ Maf nane amsa onle ai. In nahumbon onle pah amle’ut le napeni bale anbi hit aok ta’un. Maf nane nalahi hit aok ma anpin anbi hit monik, mes notu nisan neki ai maputu. ⁷ Ale mu’it fui, kolo-kolo, ale mu’it le anlaba ma ale mu’it le anbi tasi nabe’i anmanat ai namau sin ma atoni pah pinan namau nalali sin. ⁸ Mes katit fa atoni mese le nabe’i he namau nan maf nane. Maf nane neki amle’ut le ka taplenat tanef ma nahenu nok laso le neki kit neu lasi maten. ⁹ Hit pake hit mak he tanaeb Usi, hit Ama. Ma hit pake hit mak het sukat mansian le anmo’e nani natuin Uisneno In human. ¹⁰ Tetus ma sukat anpoi na’ko fefaf mese. Lasi i, kais anbol onane bae benu alki. ¹¹ Ai anmu’i oe mata le anbobok napoitan oe leko ma oe menu’ na’ko mata mese ka? ¹² Bae benu alki! Ai anmu’i bubuk le nafua bub fua mina ka ma anmu’i tanu’an sena le nafua bubuk ka? Onane amsa oe masi ka napoitan fa oe leko. ¹³ Sekau anbi ki le ahinet ma amoe alekot ka? So leko in nalile monit alekot ma mo’et alekot nok lasi hine ma nek aklati. ¹⁴ Mes kalu hi mibela nek to’as ma mitenab neu hi aom anmes, kais hi miliabom ma kais hi mi’moe lasi amneot le na’ko Uisneno. ¹⁵ Lasi hine humaf nane ka nem fa na’ko neno tunan, mes na’ko pah pinan, nem na’ko nek tenab mansian ma na’ko sanat in tuaf. ¹⁶ Anbi bale le anmu’i nek to’as ma lasi tenab neu aof mes-mese, bi nane amsa anmu’i lasi matoes ma lasi amle’ut huma-huma. ¹⁷ Mes lasi hine le nem na’ko neno tunan nane abainesit kun oke te neki hal nekaf, nek bua ma nek atuina. In nahenu nok nek mamum ma nalile mo’et alekot, kan betif humaf ma kan asafanuf. ¹⁸ Ma lasi alekot nane in fuan ansenan nani anbi halan nekaf neu sin le anmo’e halan nekaf.

¹ Lasi matoes ma mabanat anbi ki nem na’ko me ka? Nane nem na’ko hi nek lomif pah pinan le nataunon anbi hi aom. ² Him sinmakan ale sa’, mes ka mipeni fa, oke te mamaten. Hi mibela nekaf, mes hi ka mipeni fa sa’ le him sali, oke te hi matoe ma hi maban ai mabiso. Hi ka mipeni fa sa’ fun hi kam onen fa. ³ Ai him onen toti amsa, mes hi kam simof sa’, fun hi onen totis nane ansan. Fun sa’ le him toti nane, hi he mikloe mani he miminab hi lomim pah pinan. ⁴ Hi atoni ka nek aki’at ki! Hi ka mihin fa ka, nak kalu hi mimesbom mok pah pinan nane hi mimusu mok Uisneno ka? Es nane atoni le namesbon nok pah pinan i, in namusu nok Uisneno. ⁵ Kais hi mitenab mak Sulat Knino nane antui lum-luman nak, "Uisneno nabalab In Smanan anbi hit nekak, In anlomi nok nek atinos." ⁶ Mes halinat knino, le In anfe nani neu kit, naek nesin na’ko lasi nane. Es nane In nakua a’an nak, "Uisneno antumatan atoni le namok’on, mes In nek atoni le nabaun nekan." ⁷ Es nane te hi miusi nai neu Uisneno ma antumatan Santuaf, oke te santuaf of naen nasaitan ki! ⁸ Him haumak Uisneno ma Uisneno of anhaumak ki. Mifanu hi niman nai, hoi atoni asanat ma miknino hi nekam nai hoi atoni nek nua. ⁹ Mifetin hi mo’et amle’ut, amkul ma amkae nai. Amseka hi mani meki kulut kaet, ma amseka hi malinat meki lasi nu’ut. ¹⁰ Mibaun hi aom ambi Uisneno In human, ma In of nalatan ki. ¹¹ Bae benu alki! Kais hi mi’uab hem tek mile’un es nok es in kanan. Atoni le antek nale’un in bae ma anlefi in lasi, nane on alef lasi neu plenat Uisneno. Ma kalu ho musanab plenat Uisneno, nane ho ka mutuin fa plenat mes hom fani alef Lasi neu In. ¹² Amoe plenat ma alef lasi mese ah, esle’ Uisneno le anmu’i kuasat he namonib ma he nale’un. Mes ho sekau ko, le hom fani alef lasi neu ho bia benu sin ka? ¹³ Neu nai bae, le hi mi’uab mak, "Neno i ai noka hit nao teu kuan nane ma hit tamaika atbin ton mese, he tasosa ma tasau, oke te tapeni noni." ¹⁴ Mes hi ka mihin fa sa’ le hen bol neu ki anbi neno noka. Hi monim nane sa’ ka? Hi monim nane onle masu’ le mamnita leku tuk es oke te namneku. ¹⁵ So hi mi’uab mak, "Kalu Uisneno anlomi, of hit moni ma atmepu i ma atmepu nane." ¹⁶ Mes muni i hi miliabom anbi lasi moko’ ma lasi nane ka namneof. ¹⁷ Es nane atoni le nahin, nak in mes hen mo’e alekot, mes in kan mo’e nani fa, nane in nasanab.

¹ Bae benu atoni amu’it! So him kae ma amkul nai neu lasi nu’ut le he nem neu ki! ² Hi mu’im nane anmau ma hi tainusat nane ap-apu neku nisan. ³ Hi mnatu ma noin muti nutus neki nani ma in nutus nane of anfani saksi neu ki ma of neku hi aom onle ai. Hi mibua milali maus bi neno-neno le he namsopu. ⁴ Hi kam baen fa atoni le anmepu ambi hi lele. Mitnin mit sin an anbai! Atoni le natam abut na’ko hi lele, sin an anbai, ma sin hanan ante Uisneno ameput ale sa’ In luken. ⁵ Hi moni ambi athoes ma him tamis pah pinan in minan. Hi mipokab hi aom neu neno lolot. ⁶ Hi misanab ma mimate atoni le ka nasanab fa, mes in kan laban ki. ⁷ Es nane te him seusab nai, bae benu alki, talan te Usif ankoenon nem. Kiso, atoni ameup lele anpao pah in afan ma’upa ma anseusab talan te ul unu ma ul muni ansanu. ⁸ So hi amsa amseusab nai ma amhatani hi nekam, fun Usif in neno ankoenon nem anhaumaken. ⁹ Kais hi mimunu ma misanab es neu es, bae benu alki, he nati’ kais Uisneno anlef lasi neu ki. Kiso, Alef lasi anhaumaken, naloitan he nem. ¹⁰ Bae benu alki, mimnau nai mafefa knino le sin anetun Usif In kanan. Sin anseusaban ma ansutain mafena, mituin sin nai on heta neu ki. ¹¹ Hit tek sin on atoni ua leko, fun sin nalan ma ansutai. Him nen antom Nai Ayub in seusabat ma hi mihin nak namuni te Uisneno naloitan sa’ neu in. Fun Uisneno nek mamun ma nahenu nok manekat. ¹² Lasi abainesit bae benu alki; kais him sup meki neno tunan, ai pah pinan ai sa’ anten. Kalu namneo, hi mak namneo, kalu kahaf hi mak kahaf he nati’ Uisneno kais anlef lasi neu ki. ¹³ Leka anmu’i atoni anbi ki le ansutai mane’at so in onen toti. Leka anmu’i atoni le anmalin, so in ansi hen pules Uisneno. ¹⁴ Kalu anmu’i atoni anbi ki le namen, him boin ama penatua hen onen neu in. Oke te amtusi meki mina ambi Uisneno In kanan. ¹⁵ Ma onen totis le anpoi natuin palsait of naleko atoni amenat nane ma Uisneno of nafena in; ma ansako in sanat le in mo’e nalali. ¹⁶ Es nane te, so hi mihoeb hi sanat es nok es ma amonen toti es neu es he nati’ hi mileko. Onen totis atoni le natuin Uisneno lomin, anmu’i kuasat matani. ¹⁷ Nai Elia nane in amsa mansian onle hit. In onen toti namneo-namneo he nati’ kais na’ul, oke te ulan kan sanuf neu pah pinan ton tenu ma funan ne. ¹⁸ Oke te in onen toti anteni ma neno tunan nasanut ulan neu pah pinan ma napoitan in afan. ¹⁹ Bae benu alki! Bait atoni mese anbi ki le ka natuin fa noina na’ko Uisneno, anmu’i atoni le anhel nafani neu Uisneno, ²⁰ mihin nai, atoni le anhel nafani asanat nako lalan asanat, in of namonib atoni nane in smanan na’ko maten ma ankub in sanat namfau.