IBRANI

IBRANI

¹ Bi batan ahunut hae-hae Uisneno nakua a’an neu hit am uf sin natuin mafefa knino sin nok lanan huma-huma. ² Mes anbi batan amsoput i Uisneno nakua a’an neu kit natuin In Anmone. Uisneno anmo’e neno tunan ma pah pinan natuin In. Uisneno anlek nani he nati’ In sium ale sa’-sa’. ³ In es ansinek Uisneno In apinat aklahat ma In huma ma In masan on Uisneno. In amsa es anpanat ale sa’ neki In a’an ma In kuasat. Leka In naknino nalali atoni pah pinan sin sanat, oke te In antunon anbi Uisneno Amnanut aon bian ne’u anbi bale latan. ⁴ Ma In namnanu nesin ahake neno tunan sin. Ma In napeni kanaf le namas a’nesin ahake neno tunan sin kanan. ⁵ Fun Uisneno fe ka nakua nitaf a’an neu ahake neno tunan mese nak on i, "Au Anmone Ko! Au uhonis Ko anbi neno i." "Of Au fain Amaf neu In, ma In anfani Au anmone." ⁶ Ma leka In ausonu In Anmone naek antam neu pah pinan In nakua a’an nak, "Ale ahake Uisneno mes naluli ma nabes neu Anmone nane ." ⁷ Ma antom ahake neno tunan sin Uisneno nakua a’an nak, "Uisneno anmo’e In ahake neno tunan sin anfain on nautus ma In atuthaes sin anfain on ai pinan." ⁸ Mes neu Anmone nane Uisneno nakua a’an nak, "Ho toko plenat, koi Uisneno, of nabala talan te nabal-bal, ma Ho plenat in tias lo tias amneot kun. ⁹ Hom loim lasi amneot ma Ho kam lomif lasi ape nut: Es nane te Uisneno. Ho Uisneno antek alekot neu Ko, ma anpoin Ko neik mina, anfani taka lasi malinat le nesin Ho bae sin." ¹⁰ Ma Uisneno nakua a’an, "Na’ko un-unu, koi Usif, Ho es mubela pah pinan in sukin, ma Ho mo’e neno tunan meik Ho nimam. ¹¹ Ale sa’ nane of namle’u, mes Ho mubala, ma ale sa’ nane of anfani mna’ onle tainusat; ¹² of Hom nunu sin onle sobalu mnanu, ma Hom seka meki bian. Mes Ho mubala, ma Ho monim ka namsopu nitaf." ¹³ Uisneno ka nakua nitaf In a’an neu ahake neno tunan mese na’ko sin nak, "Hom tunom nai ambi Au aok bian ne’u, talan te Au ubela Ho musu sin anbi Ho haem nupun." ¹⁴ Kalu onane, ale ahake neno tunan nane sin sa’an ka? Ahake neno tunan sin onle smanaf-smanaf le antuthae Uisneno, ma Uisneno ansonu sin hen tuthae ale atoni le he napeni honis.

¹ Natuin lasi nane hit mes atpanat leko-leko sa’ le hit nen he nati’ kais anfu neki kit. ² Fun kalu a’at le na’uab nani natuin ahake neno tunan nanaobon nabala, ale atoni atanhais ma ale atoni le kan mo’e natuin nani of napeni seunbanit namnes nok in mo’et. ³ Leka me hit he taikotiok ta’ko kasat nane, kalu hit kat sian fa lasi honis a’naek nane. Fun afi hit Uisneno es anetun nani ma ale atoni le sin nen nani sin nalile sin amneot neu kit. ⁴ Ma Uisneno anhatani sin saksit nane neki lasi taka ma lasi amkakat ma kuasat huma-huma natuin mepu Smanan Knino, le Uisneno anbait nani neu sin natuin In lomin kun. ⁵ Fun Uisneno ka nana’at fa pah pinan fe’u le hit tamolok i neu ahake neno tunan sin. ⁶ Anmu’i atoni le ansaksi nani anbi Sulat Knino nak, "Mansian nane sa’an ka, talan te Ho mumnau mani, ai mansian in anah nane sa’an ka, talan te Hom kius mani? ⁷ Mes Ho mo’e mani neu in leku tuk es he nabaunon akle’o na’ko ale ahake neno tunan sin, ma Hom fe mulali neu in sobe apinat ma makana, ⁸ ma Ho mubaun ale sa’ anbi In haen nupun." Fun anbi lasi nabaun ale sa’ neu In, katit fa sa’ esle’ In naikoti; le ka nabaunon fa neu In. Mes tomas i hit fe katit fa, nak ale sa’ nabaunon neu In. ⁹ Mes In, le nabaun nani leku tuk es na’ko ahake neno tunan sin, esle’ Yesus; le hit tit, natuin In sutai lasi maten. Mes anfe neu In sobe apinat ma makana, he nati’ natuin Uisneno In halinat knino, Yesus ansutai lasi maten neu ale mansian. ¹⁰ Fun natai nok Uisneno In lomin -- In mo’e ale sa’ neu In ma natuin In --, Uisneno naknino Yesus natuin mane’at. Onane te Yesus neki atoni namfau neu apinat ma antopu sin neu honis. ¹¹ Yesus naknino sin ma sin le In naknino nani, sin alsin Amaf mese. Es nane In kan mae fa hen tek sin nak bae. ¹² Yesus nak neu Uisneno, "Of Au etun Ho kanam neu Au bae sin, ma uliatas Ho kanam anbi tolas knino sin atnanan." ¹³ Ma In nau’ab anteni nak, "Au of ufneka neu Uisneno." Ma In nau’ab anteni nak, "Kiso, Au es Kau i, ok anah-anah le Uisneno anfe Kau sin." ¹⁴ Fun anah-anah nane, sin on mansian le of anmate, mes Yesus namnes nok sin ma napeni pa’ ma nama anbi sin. In mo’e onane he nati’ natuin Ini maten, In naneku Nitu le anmui kuasat neu lasi maten. ¹⁵ Ma nok lanan nane te In nafetin sin na’ko lasi ate le naplenat sin monin talan te anmaten natuin sin namtausan lasi maten nane. ¹⁶ Fun namneo, In ka namnau fa ahake neno tunan sin mes In namnau Nai Abraham In sufan sin. ¹⁷ Es nane te, In namnes nok In bae sin anbi ale lasi. Ma In anfain Ana’ Lasi Fuat Anaet le anmui lasi manekat ma na’ki neu Uisneno hen sako to pah pinan sin sanat. ¹⁸ Onane te In hen bab ale atoni le napeni lasi su’at, fun afi In sutai hamu’it natuin lasi su’at amsa.

¹ Es nane te, bae knino alki, le hi mipeni pa’ ma nama anbi han ahaman neno tunan. So him kius neu Haef Knino ma Ana’ Lasi Fuat Anaet le hit tateb tani esle’ Usif Yesus. ² Usif Yesus na’ki nabala neu Uisneno le anlek In neu mepu nane, onle Nai Musa amsa afi na’ki anbi in mepu neu Uisneno In ume. ³ Es nane te Yesus napeni kan apinat nesin Nai Musa. Fun atoni le nahakeb ume nane mes napeni kan tola nesin ume le in nahakeb nani. ⁴ Fun ameup ume es nahakeb ale ume, mes ameput anbi ale sa’ lo Uisneno kun. ⁵ Nai Musa on atuthaes aki’at anbi Uisneno In ume, hen saksi lasi le Uisneno of nalile nani anbi neon amnemat. ⁶ Mes Neno Anan na’ki piut on Anmone le anfani nakaf neu Uisneno In ume. Ma Uisneno In ume nane esle’ hit, leka hit panat lek-leko nek ateb knino ma lasi afnekat le hit tafnekan tal namsop. ⁷ Es nane te onle Smanan Knino nak, "Bi neno i, kalu him nen Uisneno In hanan, ⁸ kais hi mimanub hi nekam, onle hi am ufenu bi neno ansu’ sin anbi mnela paha snaen, ⁹ hi am ufenu ansu’ Kau anbin he nataka Kau, maski sin nit nalali Au mepu, ton bo’ ha ini lon. ¹⁰ Natuin lasi nane Au uto’an batan nane, ma Au ak; Sin nekan anbeo piut, ma sin ka natuin fa Au lanan.’ ¹¹ Es nane te Au uto’ ma Au sukat sin ak: Of sin kan taman fa neu Au bale snasat." ¹² So him panat nai bae, he nati’ kais napeni atoni mese anbi ki le nekan nateb lasi amle’ut, ma nekan ka nateb knino, oke te in na’lo na’ko Uisneno honis. ¹³ Mes so neno-neno hi mafainek es nok es, leka hit fe atmoni atbi batan le antek nak, "neno i," he nati’ kais anmu’i anbi ki atoni le namanub nekan natuin sanat in fulit. ¹⁴ Fun hit tapeni talali pa’ ma nama anbi Neno Anan, lamu hit na’ tamepan hit nek ateb knino le hit tapen talali na’ko afi. ¹⁵ Fun antui nalali anbi Sulat Knino nak, "Bi neno i, leka him nen Uisneno In hanan, kais hi mimanub hi nekam, onle hi am ufenu." ¹⁶ Atoni sekau ka, le sin nato’ab Uisneno, maski sin nen nalail In hanan ka? Ai ka sin alsin fa, le Nai Musa antopu napoitan sin na’ko pah Mesir ka? ¹⁷ Ma sekau ka le Uisneno nato’an sin ton bo’ha ka? Ai ka sin fa ka le anmo’en sanat oke te anmaten anbi mnela paha snaen ka? ¹⁸ Ma In sukat sekau ka ma nak, of sin kan taman fa neu Au bale snasat. Ai ka sin fa ka le ka natuin fa Uisneno In lomin? ¹⁹ Onane te hit tit, nak sin ka nabe’i fa hen taman, natuin sin nekan ka nateb knino fa neu Uisneno.

¹ Es nane te, leko hit panat, he nati’ kais anmu’i atoni mese anbi ki le ka nok antam, maski in fefbe’la neu he tam teu In bale snasat nane fe nanaobon. ² Fun beno knino nane aneut nalali neu kit, on aneut nalali sin amsa. Mes etus beno knino nane ka ma’ota fa neu sin. Fun leka sin nen nalali beno knino nane sin nekan ka nateb knino fa. ³ Mes hit le nekak nateb nani of hit tam teu bale snasat onle Uisneno nakua a’an nak, "Au uto’ ma Au ait supat ak: ’Of sin kan taman fa neu Au bale snasat.’ " ⁴ Fun antui nani anbi Sulat Knino antom neno hitu nak on i, "Ma anbi neno hitu, Uisneno nasnas na’ko ale In mepu." ⁵ Ma hit soi anbi Sulat Knino i nak, "Sin of kan taman fa neu Au bale snasat." ⁶ Es nane hit tahin talali, nak of anmu’i atoni namfau le of antam neu bale snasat nane. Mes sin le ansium nahunun beno amlilat nane, of sin kan taman fa natuin sin kan palsin fa. ⁷ Onane te Uisneno anlek anteni neno bian, le nak, "neno i," leka In nakua a’an lo le’uf natuin Nai Daud in hanan le hit soi talali nak, "Kalu neno i him nen In hanan, kais hi mimanub hi nekam!" ⁸ Fun kalu afi Nai Yosua nok sin antam nalali neu bale snasat, Uisneno of ka nakua a’an anteni antom neno bian nane. ⁹ Es nane te fe naloitan neno snasat mese neu to Uisneno, esle’ neno hitu. ¹⁰ Fun atoni le antam nalali neu In bale snasat, in nasnas na’ko in mepu, onle Uisneno nasnas na’ko ale In mepu. ¹¹ Onane te so leko hit tam teu bale snasat nane, he nati’ kais anmu’i atoni mese le natsel natuin nekan ka nateb knino fa neu Uisneno. ¹² Uisneno In a’an nane anmoni ma anmatani; na’aikan nesin suni le na’aik koti mat. A’an nane napau antam talan te anbati aof ma smanaf ma antam ante nuif ma lonef. A’an nane nabe’i hen beti ale fekat ma tenab anbi hit nekak. ¹³ Ma katit fa amonit sa’ le he natolo anbi Uisneno In human. Fun ale sa’ natfei ma mamnita anbi In matan, le hit mes tatae neu In kun. ¹⁴ Fun muni i hit mu’i Ana’ Lasi Fuat Nakaf Anaet le anfini ale neno tunan, lo Yesus, Uisneno Anmone. So leko hit na’ tamepan hit nek ateb knino. ¹⁵ Hit Ana’ Lasi Fuat Nakaf Anaet nane ka on fa ana’ lasi fuat nakaf le ka naben nahin fa hit lasi lima’et. In amsa napeni su’at anbi ale lasi onle hit, al In kan mo’ef sanat. ¹⁶ Es nane aim nai, nok nek besi hit haumak toko halinat knino. Uisneno of namnau kit ma anfe kit tetus, oke te anbab kit bi leku hatas.

¹ Fun ale ana’ lasi fuat anaet, anbeti na’ko mansian. Oke te anlek neu mansian hen hake anbi Uisneno In human he nati’ In neki fua tulu ma fua tnatas natuin to pah pinan sin sanat. ² In mes nahin ale atoin amoe amle’ut ma neu atoin aseket sin fun in amsa atoin alima’et. ³ In neik fua tnatas, ka al fa neu to, mes neu in aon amsa. ⁴ Ma kan mu’if atoni le nait in aon hen fain ana’ lasi fuat anaet. So Uisneno anbeti neu mepu nane, onle anmo’e nani neu Nai Harun. ⁵ Onane amsa Neno Anan ka nanaeba fa In aon natuin In fain Ana’ Lasi Fuat Anaet. Uisneno es nanaeb In. Uisneno es nakua a’an neu In ma nak, "Au Anmone es Ho, Au uhonis ulail Ko anbi neno i." ⁶ Uisneno nakua a’an anbi Sulat bian nak, "Ho of amfain Ana’ Lasi Fuat Anaet talan te nabal-bal, natuin Nai Melkisedek in lekat." ⁷ Bi neno Yesus fe anmoni on mansian, In natulu onen totis ma antoti nok kulut ma han sakoit neu Uisneno, le anmu’i kuasat he namonib In na’ko amates. Ma natuin In namtaus Uisneno, oke te Uisneno nen In onen totis nane. ⁸ Ma maski Yesus on Uisneno Anmone, In nanoni he natuin anbi ale lasi le In ansutai nani. ⁹ Ma leka In natis nani ale sa’, In anfain on lasi honis nabal-bal in un neu ale atoni le natuin In. ¹⁰ Ma Uisneno anboin In hen fain Ana’ Lasi Fuat Anaet natuin Nai Melkisedek in lekat. ¹¹ Neu lasi nane, fe anmu’i uab namfau le hai he mimolok neu ki. Mes lasi nane mafena, natuin hi nekam manu neu he mitnin mani. ¹² Kalu hit tatenab neu leku manuan, nabe’i him fain anoni, mes hi mes minoni lasi namfau antom Uisneno In lasi noina. Fun hi fe ka mibe’i fa hem simo mnahat amanut so hi miun susu fe. ¹³ Atoni le fe ansusu, in ka nahin fa noina antom lasi amneot, fun in fe li’ana kun. ¹⁴ Mes mnahat amanut nane neu atoni naek, le nekan natenab nahin hen beti lasi alekot na’ko lasi amle’ut.

¹ Onane te so leko hit tafetin lasi noina ahunut antom Neno Anan ma hit nao mat atbi lasi noina matani. Kais hit tanoni a’teni lasi he nateunok na’ko sin mo’et huma-huma ma lasi hen palsai neu Uisneno. ² Lasi noina neu su’ oe, na’aiti niman hen tek alekot neu atoni, nafena amates ma kasat abal-balat. ³ Ma of hit mo’e lasi nane kalu Uisneno anlomi. ⁴ Fun atoni le afi Uisneno antana nalali sin, le antamis nalali sankolan neno tunan ma le napeni pa’ ma nama anbi Smanan Knino. ⁵ Ma atoni le antamis nalail Uisneno In a’an alekot ma sankolan pah pinan neon amnemat, ⁶ mes oket sin kan palsain tenin fa ma ankoit Uisneno leka me he nafe’un anteni sin onane he nati’ sin nateu nok na’ko sin sanat. Fun sin naponi anteni Uisneno Anmone neu sin aon ma sin na’akan In anbi mat-mat. ⁷ Nain ai najan le anmuis oe ulan le ansaun neune, oke te namonib luel alekot neu sin le anmeup nain nane, ansium Uisneno In athoes. ⁸ Mes kalu nain nane namonib kisan ai hu musu, nain nane ka nalekof, Uisneno of ankas nani oke te nale’un nani neki ai. ⁹ Mes bae benu manekat, maski hai mi’uab onane neu ki, hai mihin, nak hi mu’i lasi le naleko nesi ma matua honis. ¹⁰ Fun Uisneno nane ka Uisneno le ka amneot fa, le In nikan hi mepu ma hi lasi manekat, le hi milile neu In kanan natuin him tuthae to knino le hi mo’e mani tal neno i. ¹¹ Haim lomi he nati’ hi mes-mese amhataniom tal namsop, oke te hi mipeni sa’ le hi mifnekan. ¹² Hai kam lomif he nati’ him fain atoni apehet. Mes so hi moni onle atoni le nekan nateb knino ma anseusab tal napeni lasi le Uisneno anba’an nani. ¹³ Leka Uisneno anfe In fefbela neu Nai Abraham, In naiti supat neki In aon, fun kan mu’if atoni le namnanu nesin In. ¹⁴ Uisneno naiti supat ma nak, "Tebes namneo, of Au fe Ko tetus nok athoes, ma of Au mo’e Ho sufan namfaun." ¹⁵ Nai Abraham anpao nok nek aseusabat ma onane te in napeni sa’ le Uisneno anba’an nalali neu in. ¹⁶ Fun mansian, ansup neki atoni le namnanu nesin, ma supat nane anfain sukit neu in he nafek ale lasi matoes. ¹⁷ Uisneno he nalile neu ale atoni le hen simo In fefbela nane, nak of In ka nabaina fa In fekat nane. Es nane Uisneno anhatani nani neki supat. ¹⁸ Lasi nono nua nane of ka nabaina fa; neki fefbela ma supat, Uisneno ka napoibon fa. Onane te hit le tamaoftok atbi Uisneno, anhatani kit he nati’ hit tapeni lasi afnekat le naloitan nani neu kit anbi neon amnemat. ¹⁹ Lasi afnekat nane on lolu matani ma tetus neu hit smanak, le ansenon antam neu ke’an knino anbi Uisneno In sonaf bi neno tunan. ²⁰ Usif Yesus anfain ahel lanan neu kit ma In tam nalali neu bale nane on Ana’ Lasi Fuat Anaet tal nabal-bal natuin Nai Melkisedek in lekat.

¹ Nai Melkisedek i, kesel na’ko Salem ma Uisneno Anesit Afinit In ana’ lasi fuat. In es anao ma anseun Nai Abraham, leka Nai Abraham anfain nem na’ko anbe’u kesel-kesel ma anfe tetus neno neu in. ² Nai Abraham anfe neune batis bo’es na’ko sa’ le in napeni anbi manekat. Nai Melkisedek in kanan in oten ahunut "Usif Lasi amneot," ma natuin in na’ko Salem, in kanan amsa "Usif Halan Nekaf." ³ In kan mu’if amaf, kan mu’if ainaf, ma kan mu’if uf; in kan mu’if neon mahonit ma kan mu’if neno maten. Ma natuin nanesa nani nok Uisneno Anmone, in fain ana’ lasi fuat talan te nabal-bal. ⁴ Kiso mit Nai Melkisedek in atoni naek kun, tal Nai Abraham anfe neune batis bo’es na’ko sa’ le in napeni anbi makenat. ⁵ Ma Nai Lewi in sufan sin le ansimo mepu ana’ lasi fuat, sin napeni lekat he nati’ sin ansimo batis bo’es na’ko to Israel, le sin bia ma sin benu, maski sin amsa Nai Abraham in sufan sin. ⁶ Mes Nai Melkisedek, le sin ka sufan fa, in ansium batis bo’es na’ko Nai Abraham, ma in anfe tetus neno neune, maski Nai Abraham ansium fefbela na’ko Uisneno. ⁷ Namneo hit ka tatotan fa lasi, nak atoni abaut ansium tetus neno na’ko atoin anaet. ⁸ Ma anbi pah pinan, mansian amnekut es ansimo batis bo’es mes anbi neno tunan In, le ansaksi nani, nak in amonit kun. ⁹ Es nane hit tak, ansimo batis bo’es na’ko Nai Lewi natuin Nai Abraham, le in nabe’i hen simo batis bo’es. ¹⁰ Fun afi fe ka nahonis fa Nai Lewi na’ko in am uf, bi neno Nai Melkisedek na’eku ma natef nok in am uf Nai Abraham. ¹¹ Natuin lasi nane, kalu ana’ lasi fuat na’ko Nai Lewi namtis ma namnou -- fun natuin ana’ lasi fuat to Israel ansimo Plenat Knino --. Nansa ka es anlek anteni atoni bian hen fain ana’ lasi fuat anaet natuin Nai Melkisedek in lekat ma ka natuin fa Nai Harun in lekat ka? ¹² Fun kalu ana’ lasi fuat nabainon, Plenat Knino amsa of nabainon. ¹³ Fun le antek nani anbi i antom hit Usif, le antam neu uf bian. Kan mu’if atoni mese na’ko uf i le antuthae anbi baki fuat. ¹⁴ Fun ale atoni nahin, nak hit Usif na’ko uf Nai Yehuda ma Nai Musa ka na’uab fa sa’ antom uf nane neu mepu ana’ lasi fuat. ¹⁵ Ma lasi nane nalilon nesin teni, leka anlek ana’ lasi fuat bian anteni natuin Nai Melkisedek in lekat. ¹⁶ Fun le anfain ana’ lasi fuat nane ka natuin fa lekat mansian mes natuin lasi honis le ka namle’u nitaf. ¹⁷ Fun antui nani anbi Sulat Knino antom In nak, "Hom fain Ana’ lasi fuat talan te nabal-bal, natuin Ana’ Lasi Fuat Nai Melkisedek in lekat." ¹⁸ Namneo, plenat ahunut nane naikoti nani, kalu kan mu’if in matanin ma ka ma’ota fa. ¹⁹ -- Fun Plenat Knino unu nane ka namtis ma ka namnou -- mes muni i anlek anteni lasi afnekat le naleko nesi ma anhaumakab kit neu Uisneno. ²⁰ Ma lasi i anmo’e nani nok supat na’ko Uisneno -- afi anlek sin hen fain ana’ lasi fuat ka nok fa supat. ²¹ Mes Yesus napeni kanaf Ana lasi fuat nok supat, fun Uisneno nakua a’an neu In nak, "Usif tunan nait nalali supat ma In ka natofon fa, Hom fain ana’ lasi fuat talan te nabal-bal." ²² Onane amsa Usif Yesus anfain lasi mantaen neu fefbela le naleko nesi. ²³ Ma sin namfaun es anfani ana’ lasi fuat, mes natuin lasi maten ane’ka sin, talan te sin ka nabala fa piut anbi mepu ana’ lasi fuat. ²⁴ Mes natuin Yesus anmoni nabala, In mepu ana’ lasi fuat nane ka na’oni fa neu atoni bian. ²⁵ Es nane In nabe’i namonib ale atoni nok alekot le sin neman neu Uisneno natuin In. Fun In moni nabal-bal ma anfain atoni tnana neu sin. ²⁶ Fun hit lomi Ana’ Lasi Fuat Anaet onane. In atoni knino, In kan mu’if sanat, In kan mu’if lahi, anbeti naikan na’ko atoni asanat sin. Oke te nasaeb nani neu bale latan le namnanu nesin ale neno tunan kuni peni. ²⁷ In ka on fa ana’ lasi fuat anaet bian, le neno-neno neki fua tnatas nahun neu in sanat, oke te neu to in sanat. Mes Yesus anmo’e nani hae mese tal nabal-bal, leka In nana’at In aon on fua tnatas. ²⁸ Plenat Knino unu anlek atoni alima’et hen fain Ana’ Lasi Fuat Anaet. Mes namuni na’ko plenat knino unu nane, Uisneno naiti supat, hen lek In Anmone anfain Ana’ Lasi Fuat Anaet le namtis kun anbi ale sa’ tal nabal-bal.

¹ Ale lasi le hit tamolok nane in nesan nak on i: Hit mu’i Ana’ Lasi Fuat Anaet le antok anbi Uisneno Anaet anesit Ini toko aon bian ne’u. ² In antuthae mepu luli besa anbi bale knino, anbi um-ume amneot, le Usif tunan es nahakeb nani ma ka mansian fa. ³ Ale Ana’ Lasi Fuat anaet anlek nani he nati’ neki fua tulu ma fua tnatas. Ma onane amsa Yesus mes anmu’i sa’ he nati’ In neki nani on fua tulu ai fua tnatas. ⁴ Kalu In bi pah pinan i, of In kan hake fa on Ana’ Lasi Fuat, fun anmu’i ana’ lasi fuat anbi pah pinan le neki fua tulu natuin Plenat Knino unu. ⁵ Sin mepu tuthaes nane anfain lasi leta neu sa’ le anbi neno tunan. Lasi nane anetun nalali neu Nai Musa, bi neno in nahakeb um-ume. Uisneno nakua a’an neu Nai Musa nak, "Mumnau lek-leko" nak "ho mo’e ale sa’ nane onle afi nalile nalali neu ko anbi nu’af tunan." ⁶ Mes muni i, Yesus napeni tuthaes naleko nesi, fun In fain Atoni Tnana na’ko fefbela le namas a’nesi, natuin lasi ba’an le namnanu nesi. ⁷ Kalu fefbela ahunut nane kan labu fa sa’, of ka nami anteni fa bale neu fefbela amunit. ⁸ Mes Uisneno nakain sin ma In nakua a’an nak, "Mimnau, of anbi neno amnemat, Uisneno nakua a’an on i, of Au mo’e fefbela fe’u ok to Israel, ma to Yehuda. ⁹ Ka on fa fefbela le Au mo’e ulali ok sin am ufenu, bi neno Au na’ sin nimkenu ma he topu upoitan sin na’ko pah Mesir. Mes sin kan panat fa Au fefbela nane, onane te Au tite sin. ¹⁰ Mes muni i, Au he mo’e fefbela ok to Israel bi neno-neno amnemat, Uisneno nakua a’an on i, Au he ubela Au plenat anbi sin lolen ma Au he tui ani anbi sin nekan. Of Au fain Uisneno neu sin, ma sin fain to neu Kau. ¹¹ Ma sin of ka nanoni anteni fa sin ini sin ai anetun anteni neu sin bae sin nak: ’Mihin Usif tunan nai!’ Fun sin alsin anaet ma abaut, of nahin Kau. ¹² Of Au ubela lasi manekat neu sin sanat, ma Au ka umnau tenif ale sin sanat." ¹³ Fun In na’uab antom fefbela fe’u, onane te In anetun, nak plenat ahunut nane namsab ma anhaumak he namneku ma namsab.

¹ Fefbela ahunut nane anmu’i lekat neu luli besa ma neu bale knino le anmo’e neki niman mansian. ² Ma nahakeb um-ume mese anbi matan, le antek nak, bale knino. Anbi bale nane anmu’i tet paku ma mei nok utunu’ atnatas le he natulu neu Uisneno. ³ Anbi beti eka amunit anmu’i um-ume mese anteni le antek nak, Ke’an Knino Le’uf. ⁴ Anbi ke’an nane anmu’i baki fuat le anmo’e na’ko mnatu neu he notu atu fomeni. Ma peti fefbela le anmo’e na’ko mnatu. Ma anbi peti fefbela nane anmu’i botil mnatu nok manna, mak muti Nai Harun in tias le nasnuk ma faut bena nua le antui Uisneno Ini plenat bo’es. ⁵ Anbi peti nane in fafon, ahake neno tunan sin nua le human anpin ma nahafo peti in toben, bale sako sanat. Mes ale lasi i hai ka mibe’i fa he miknutu mani tomas i. ⁶ Fun nahakeb bale knino nane onane. Neno-neno Ana’ lasi fuat sin antam neu um-ume le anhake anbi matan he nanaoba sin mepu luli besa. ⁷ Mes neu um-ume amunit nane al Ana’ Lasi Fuat Anaet es antam neune ton mese hae mese. In nanaoba mepu nane neki na’, le in anfua neu Uisneno natuin in aon ma natuin lasi tanhais, le to anmo’e nani natuin sin ka nahinen fa. ⁸ Nok lekat i, Smanan Knino nalile nani, nak lanan neu bale knino nane fe ka masoitan fa, leka um-ume ahunut nane fe anhake. ⁹ Nane on lasi leta neu batan i. Namnes nok lasi nane, ale fua tulu ma fua tnatas le sin natulu neu Uisneno, ka nabe’i fa he natisi ma nano’u amneik fua tulu nane sin nekan. ¹⁰ Fun ale lasi nane al anmatom nok mnahat ma mninut ma fua tulu huma-huma he naknino’ok. Sin anmo’e ale lasi nane neu monit aof, talan te leku ai tabu nafeunon. ¹¹ Mes Neno Anan nanoebon nem on Ana’ Lasi Fuat Anaet neu ale lasi alekot neon amnemat. In anfin um-ume le naek a’nesin ma naleko nesin, le ka nahakeb fa neki niman mansian -- nane nak In ka na’ko fa pah pinan i --. ¹² Ma in antam neu bale knino nane hae mese talan te nabal-bal. In ka nekif bibi keso ai bia tipu in na’, mes In neki In na’ kun. Ma nok lasi nane te In nafetin kit tal nabal-bal. ¹³ Kalu bibi keso ma bia keso in na’ ma bia tipu mnotu in afu le anlisin he naknino sin lahi na’ko sin aon. ¹⁴ Nes-nesi Neno Anan In na’, le natuin Smanan Knino abal-balat, Neno Anan anfua In aon neu Uisneno on fuat amneot; he naknino hit nekak na’ko ale mo’et huma-huma he nati’ hit tuthae Uisneno honis. ¹⁵ Natuin lasi nane Yesus anfain Atoni Tnana na’ko fefbela fe’u, he nati’ sin le anboin nalali sin napeni lasi honis le anba’an nalali sin. Fun In anmate hen soi sin tanhais le sin anmo’e nalali anbi fefbela ahunut nane. ¹⁶ Kalu anmu’i fefbela anbi me, mes nalile amsa anbi nane, nak atoni amoe fefbela nane anmate. ¹⁷ Fun fefbela nane fe ka nanaobon fa leka amo’et nane fe anmoni. ¹⁸ Es nane fefbela ahunut nahakeb nani neki na’. ¹⁹ Leka Nai Musa anetun nalali Plenat Knino unu neu to ok-oke, in nait bia tipu in na’ ma bibi keso in na’ ma ansole nok oe. Oke te in nait bibi in funun amtasa ma kmeo ma anlisin neu sulat nane ma anlisin neu to nok. ²⁰ Oke te na’uab nak, "I na’ fefbela le Uisneno anlek nani neu ki." ²¹ Nalali te Nai Musa anlisin na’ neu um-ume ma ale bale knino neu luli besa. ²² Ma ala kle’o naknino ale bale ok-oke neki na’, fun kan mu’if sako sanat, kalu kan opan fa na’. ²³ Es nane ale sa’ le naleta sa’ le anbi neno tunan mes naknino nani onane. Mes ale bale le anbi neno tunan mes naknino nani neki fuat le naleko nesi. ²⁴ Fun Neno Anan kan tamaf neu bale knino le anmo’e neki nimaf mansian le al naleta bale knino amneot. Mes In tam neu neno tunan hen hake anbi Uisneno In human matuin hit lasi. ²⁵ Ma In kan tamaf neu bale knino nane teni-teni ne natulu In aon, onle Ana’ Lasi Fuat Anaet ton-ton in tam neu bale knino neki mu’it in na’. ²⁶ Fun kalu onane In mes ansutai hamu’it teni-teni na’ko neno fe nahakeb pah pinan i. Mes muni i In nalile In aon hae mese neu batan amsoput, hen sako hit sanat neki In aon. ²⁷ Onle Uisneno anlek nalali he nati’ mansian anmaet hae mese oke te Uisneno anlef sin lasi. ²⁸ Onane amsa Neno Anan nana’at In aon hae mese hen sutai atoni amfaut sin sanat. Namuni te of In nalile In aon hae mese anteni mes kan sutai fa sanat. So mak In anfe honis neu ale atoni le anpao In.

¹ Plenat Knino unu al nalile lasi honis in mafon ai in olon neon amnemat, ma lasi honis amneot ka es fa nane. Es nane nok fua tulu papmese le ton-ton sin natulu nani Plenat Knino unu ka neik fa tetus neu ale atoni le ansimo fuat nane. ² Fun kalu onane, of sin ka neki anteni fa fua tulu, fun sin le anmo’e luli besa ka nahinen tenif sanat; leka naknino sin sanat hae mese talan te nabal-bal. ³ Mes natuin ale fua tulu le sin anmo’e nani ton-ton namnauba sin neu sin sanat. ⁴ Fun bia keso ma bibi keso sin na’ nane ka nabe’i fa hen sako sanat. ⁵ Es nane leka Neno Anan antam neu pah pinan In na’uab neu Uisneno nak, "Ho kam lomif fua tnatas ma fua tulu mes Ho muloitan aof neu kau. ⁶ Ho kam lomif fua tulu na’ko mu’it le mamnotu on fua tnatas ai fua tulu neu hen sako sanat. ⁷ Oke te Au u’uab ak: Kiso, Au es i, antui nalali anbi Sulat Knino antom Kau. Au unaoba Ho lomim, koi Au Uisneno.’ " ⁸ Neno Anan na’uab nalali nak, "Ho kam lomif fua tnatas ma fua tulu. Ma Ho kam lomif fua mnotu ma fua sako sanat le natulu nani neu Ko." -- Maski natulu nani natuin plenat knino unu ⁹ Nalali te Neno Anan na’uab anteni nak, "Kiso, Au aum he unaoba Ho lomim." Uisneno nait naneku ahunut nane, he nahakeb amunit nane. ¹⁰ Ma natuin Uisneno In lomin, In naknino hit sanat hae mese tal nabal-bal, natuin Yesus Neno Anan natulu In aon. ¹¹ Ale ana’ lasi fuat nanaoba sin tuthaes neno-neno ma natulu fua tnatas teni-teni, mes ka nabe’i fa hen sako sanat. ¹² Mes Neno Anan le natulu fua tnatas hae mese neu sako sanat, In antunon anbi Uisneno aon bian ne’u talan te nabal-bal. ¹³ Ma tomas i al In hat ma anpao leku le’at, le Uisneno he nabela In musu sin anbi In haen nupun. ¹⁴ Fun natuin fua tnatas hae mese In natis ma nano’u sin le naknino sin talan nabal-bal. ¹⁵ Smanan Knino amsa ansaksi lasi nane neu kit ¹⁶ Leka In nakua a’an nak, "I fefbela le of Au mo’e ani ok sin anbi neon amnemat," In nakua anteni a’an nak: "Au ubela Au plenat anbi sin nekan ma of Au tui ani anbi sin lolen ai sin hinen." ¹⁷ Ma of Au ka umnau tenif sin sanat ma sin penu. ¹⁸ Es nane te leka anmu’i sako sanat neu ale lasi, of ka neki anteni fua tnatas neu sako sanat. ¹⁹ Onane te bae benu alki, natuin Usif Yesus Ini maten muni i hit tapeni manuan he tam teu bale knino. ²⁰ Fun In nasoitan lanan fe’u ma honis neu kit natuin beti eka, esle’ In aon kun. ²¹ Ma hit mu’i Ana’ Lasi Fuat Anaet mese le anfani nakaf neu Ume Uisneno. ²² Natuin lasi nane, aim nai hit haumak Uisneno nok nek amneot ma nek ateb knino. Fun naknino hit nekak na’ko lasi amle’ut ma anboe hit aok neki oe meuknino. ²³ Aim nai hit na’ tamepan hit nek ateb knino neu hit lasi afnekat, fun In le anba’an lasi nane aki’at kun. ²⁴ So leko aim nai hit mapanat es nok es he nati’ hit matuntakun atbi lasi manekat ma atbi meup alekot. ²⁵ Kais hit talob hit aok na’ko tolas knino onle atoni bian anmo’e. So leko hit mafainekan es nok es ma tanaoba luli besa makoet, fun hit Usif In neno hatas anhaumaken. ²⁶ Fun leka natiaba nalali beno na’ko Uisneno neu kit, mes hit asafanu het mo’e sanat, kan mu’in tenif fua tnatas hen sako sanat nane. ²⁷ Mes al anmu’i lasi maten matani neu lef lasi ma ai maputu malala le he notu ale atoni abulalut sin. ²⁸ Leka anmu’i atoni le nale’un plenat Nai Musa, in napeni fekat maten ka nok fa nek mamun, kalu anmu’i saksi atoni nua ai atoni tenu neu lasi nane. ²⁹ Kasat mafen le’uf of natiaba neu atoni le nale’un Uisneno Anmone. Ma neu atoni le nanebet na’ fefbela Uisneno, esle’ lasi maten Neno Anan le naknino in na’ko sanat. Ma neu atoni le nakle’at ai na’akan Smanan Knino le anfe lasi halinat. ³⁰ Fun hit tahin In le nakua a’an nak, "Aseunbanit nane es Au! Ma of Au es aseunbanin!" Man nakua anteni a’an nak, "Usif tunan of anlef lasi neu In to." ³¹ Mafen le’uf, kalu anmof neu Uisneno Amonit Ini niman! ³² So hi mimnau lek-leko neno ahunut, Afi him sium milali meusine, him sutai hamu’it naek, natuin hi malan ambi lasi mabe’ut mafena. ³³ Bi leku naa’kan ki ma anhamu’i ki anbi mat-mat. Ma anbi leku le him sutai hamu’it mok atoni le anhamu’i sin onane. ³⁴ Ma him sutai hamu’it mok ale atoni le antam o’of. Leka sin nasik hi maus, him sium lasi nane nok nek malinat, fun hi mihin, mak hi mu’i maus le naleko nesi ma nabal-bal kun. ³⁵ Es nane te kais hi mifetin hi nek ateb knino, fun anmu’i baen a’naek neu lasi nane. ³⁶ So him hataniom ambi lasi nane, he nati’ leka hi mo’e milali Uisneno In lomin, hi mipeni lasi le anba’an nani neu ki. ³⁷ Fun antui nani anbi Sulat Knino nak, "Ala kle’o, leku al tuk an esah, In le he nanoebon nem, anhaek esan, ma In ka naniaon fa. ³⁸ Mes Au to amneot, of anmoni natuin nek ateb knino, ma leka sin na’lo na’ko Kau, of Au ka lomif sin." ³⁹ Mes hit ka atoni le naskotun in aon ma namle’u, mes hit atoni nek ateb knino neu Uisneno ma napeni honis.

¹ Nek ateb knino nane anfain sukit neu ale lasi le hit tafnekan; ma anfani taka neu lasi le hit katit teki hit matak. ² Fun natuin nek ateb knino, Uisneno anlomi atoni batan ahinet sin. ³ Natuin nek ateb knino hit tahin, nak anmo’e neno tunan ma pah pinan natuin a’an Uisneno; talan te lasi mamnita anbol na’ko lasi le ka mamnita. ⁴ Natuin nek ateb knino Nai Habel natulu neu Uisneno fua tnatas le naleko nesi na’ko Nai Kain in fua tnatas. Natuin in nek ateb knino, Uisneno ansimo Nai Habel on atoni alekot, fun Uisneno anloim in fua tnatas nane. Ma natuin nek ateb knino in fe na’uab, leka in maet nalali. ⁵ Natuin nek ateb knino, Uisneno naiti Nai Henokh, he nati’ kais in sutai lasi maten. Ma kan mu’if atoni le nit in, fun Uisneno es naiti in. Fun Sulat Knino ansaksi nak, leka in fe ka na’aition fa in napeni saksi, nak in malomi neu Uisneno. ⁶ Kan mu’if atoni le malomi neu Uisneno, kalu kan mu’if nek ateb knino. Fun atoni le nem neu Uisneno, in mes nateb nak Uisneno esan, ma nak Uisneno mes anbaen neu atoni le sin nami In. ⁷ Natuin nek ateb knino, Nai Nuh -- Uisneno nalile sa’ le fe ka mamnita fa -- in naloitan bnao neu he namonib in ume nanan sin. Ma natuin nek ateb knino in nafek lasi neu pah pinan, ma anlek Nai Nuh on atoin alekot, natai ma namnes nok in nek ateb knino. ⁸ Natuin nek ateb knino, Nai Abraham in nen Uisneno, leka anboin in he nao neu bale le Uisneno anlek nani. Oke te Nai Abraham in nao neu bale le in ka nahinef. ⁹ Natuin nek ateb knino, in namaika anbi bale le Uisneno anba’an nani neu in on atoin anao amnemat. In namaika anbi nane anbi um-ume nok Nai Ishak ma Nai Yakub. Fun sin anfain on apal bael bela mnasi na’ko Uisneno. ¹⁰ Fun Nai Abraham anpao kot le anmu’i sukit, le Uisneno anlek ma nafena nani. ¹¹ Natuin nek ateb knino, Nai Abraham ma bi Sara napenin matani he nasuf ma naka’un; maski in namnasi, fun in nahin nak Uisneno le anba’an nane lo aki’at kun anbi In fefbela. ¹² Es nane, nak na’ko atoni mese, le in aon anmate, mes nahonis sufan namfaun le kat soi tabe’i fa, onle afkun anbi neno tunan ma onle snaen anbi tasi ninen. ¹³ Anbi nek ateb knino sin alsin anmate onle atoni le ka napenif fefbela na’ko Uisneno. Mes alsin nit nani na’ko lo ma sin nafnekan ma sin nateb nak sin on atoni anao amnemat anbi pah pinan i. ¹⁴ Fun atoni le na’uab onane, sin anetun nak sin lomi he nami bale le anfani sin pah ma sin nifu. ¹⁵ Anbi lasi i sin ka natenab fa pah le sin anpoi nasaitan. Fun kalu onane of sin napeni manuan hen fani neu pah nane. ¹⁶ Mes tomas i sin lomi bale le naleko nesi, esle’ neno tunan. Natuin lasi nane, Uisneno kan mae fa, hen tek nak sin Uisneno, fun In naloitan bale mese neu sin. ¹⁷ Natuin nek ateb knino, Nai Abraham natulu Nai Ishak on fua tulu, leka Uisneno ansu’ nani. Nai Abraham le ansimo fefbela nane anlomi he natulu in anmone mes tilo. ¹⁸ Maski afi Uisneno nakua a’an neu in nak, "Ho sufan ho ka’um of anpoi na’ko Nai Ishak." ¹⁹ Fun Nai Abraham natenab, nak Uisneno anmui kuasat he nafena Nai Ishak na’ko amates. Anbi lasi nane, on in sium nafani Nai Ishak na’ko amates. ²⁰ Natuin nek ateb knino, Nai Ishak anfe tetus aomina neu Nai Yakub ma Nai Esau sin neon amnemat. ²¹ Natuin nek ateb knino, Nai Yakub leka anhaumak hen mate, in fe tetus aomina neu Nai Yusuf in anmone nua sin. Oke te in sonlaitan neu in tias ma nabes neu Uisneno. ²² Natuin nek ateb knino, Nai Yusuf leka anhaumak hen mate, in na’uab neu to Israel hen poi na’ko pah Mesir ma in anba’an neu in nuifenu. ²³ Natuin nek ateb knino, leka nahonis nalali Nai Musa, in amaf ma in ainaf natolo nani funan tenu. Fun sin kius li’ana nane te human nama ma sin ka namtausan fa kesel in plenat. ²⁴ Natuin nek ateb knino, leka Nai Musa nanae, in kan lomif hen tek in, nak Nai Firaun in feotnai anmone es in. ²⁵ Fun in lomi nesi hen sutai hamu’it nok to Uisneno, na’ko in tamis alekot neon tuka anbi sanat. ²⁶ In kius lasi hamu’it natuin Neno Anan on maus le naek nesin ale maus anbi pah Mesir, fun in nafnekan baen anbi neon amnemat. ²⁷ Natuin nek ateb knino, Nai Musa nasaitan pah Mesir, ka nok fa lasi amtaus neu usif in to’as. In hatanion onle in nit Uisneno le ka mamnita. ²⁸ Natuin nek ateb knino, Nai Musa anmo’e Paskah ai tolas afinit, ma anlelu hen lisin na’ neu atoni Israel sin ume enon; he nati’, Ahake Ale’un le he nale’un sin anmone naekenu kais antoman sin. ²⁹ Natuin nek ateb knino, to Israel anlak Tasi Me onle nao natuin meto. Mes to Mesir anlem anmate anbi tasi nane, leka sin hen su’ nit. ³⁰ Natuin nek ateb knino, kot Yerikho in baik lape nathon, leka atoni Israel sin fun natef kot nane neno hitu. ³¹ Natuin nek ateb knino, Bi Rahab bife kake nane kan matef nok atoni abulalut sin, fun in simo atoni Israel sin atnu’us sin nok alekot. ³² Neu, au he tek a’teni sa’ ka? Fun au leku manuan kan mu’if leka au he u’uab antom Nai Gideon, Nai Barak, Nai Simson, Nai Yefta, Nai Daud, Nai Samuel ma ale mafefa knino sin. ³³ Natuin nek ateb knino, sin be’u ale plenat ma sin anmo’e lasi amneot ma napeni sa’ le Uisneno anba’an nani. Sin an ek ale asu fui sin fefan. ³⁴ Sin ansifo ai apinat ma nafetnok na’ko suni in aikan. Sin napeni matani anbi lima’et, ma sin napeni matani anbi makenat, oke te anliu na’aenab ale solalus anao amnemat sin. ³⁵ Ale ainaf-ainaf ansium nafani sin atonin le anmate, fun anfen anfan. Mes atoni bian sin namautu sin aon hen hamu’i sin, fun sin kan lomi hen simo lasi fetis, mes sin lomi nafena nafani sin nok alekot. ³⁶ Bian sin ansimo si’ut ma akan ma bisot ma kolen besi ma natam sin neu o’of nok. ³⁷ Anpoil sin nok fatu, anheo sin neki heo ma namate sin neik suni. Sin antoebaken nok tainusat pasu bibi kase ma pasu bibi. Ma ansutai mamu’it, hamu’it ma bisot. ³⁸ Pah pinan i ka ma’ota fe neu sin. Sin antoebaken anbi mnela hufui, anbi neten, anbi nuat ma anbi nonof. ³⁹ Ma sin alsin ka napeni fa sa’ le Uisneno anba’an neu sin; maski sin nek ateb knino nane anfe neu sin saksit alekot. ⁴⁰ Fun Uisneno naloitan nalali lasi le naleko nesi neu kit. So al natuin hit, sin nabe’i he napeni lasi amno’ut nane.

¹ Fun hit mui saksi namfau, onle nope anfun ma natef kit. So hit tabela ale baut ma sanat le an eka kit. Ma so hit taen matani anbi foti le anlek nani neu kit. ² Aim nai het mo’e lasi nane ma ta’aiti hit matak neu Yesus, le antopu kit anbi nek ateb knino ma neki kit neu lasi alekot. In naikoti lasi akle’at ma anloi hau nehe nok nek amlilat le naloitan neu In. Oke te antunon anbi Uisneno Ini toko aon bian ne’u. ³ So hi mimnau In piut, le ansutai lasi matoes nae le’uf na’ko atoin asanat sin. Es nane te kais him limae ma kais hi nekam na’unu. ⁴ Anbi lasi mabe’ut, hi fe ka mabe’u fa mok sanat talan te hi na’ anlomi. ⁵ Kais him nikan lasi fainekat le Uisneno nakua nani neu ki onle neu In anhenu nak, "Hoi Au anhenu, kais him nikan Usif tunan In lasi noina, ma kais hi mi’unu nekam, leka Uisneno nasesu ki. ⁶ Fun Usif tunan nanoni atoni le In nek nani, ma In nasesu atoni le In ansimo on anah." ⁷ Kalu him sutai sesut, Uisneno anmo’e ki on anah. Fun anah me, le in amaf ka nasesu nani fa ka? ⁸ Mes kalu hi kam simof sesu, onle anah le mes ansutai nani, hi ka anhoni ki fa mes hi anmanas ki. ⁹ Leka hit amhoni nasesu kit, hit tamtausan. Onane te mes hit tamtausan nesi Ama abit neno tunan, he nati’ hit tapeni honis. ¹⁰ Hit ama ma hit aina nanoina kit leku tuk es natai nok sa’ le sin nak leko. Mes Uisneno nanoina kit neu hit alekot, he nati’ hit tapeni pa’ ma nama anbi In le’u knino. ¹¹ Namneo, bi leku le nanoina kit, hit nekak kan malinaf mes hit nekak ansusal. Mes namuni te napoitan lasi amneot le neki halan nekaf neu sin le ansimo noina nane. ¹² Natuin lasi nane, amhatani nai hi nimam alima’et ma hi tum na’tai. ¹³ Him nao nai mituin lanan alekot, he nati’ hi haem a’tai nane kais natloki mes naleko kun. ¹⁴ So him halan nekaf mok ale atoni ma hi moni nok aknino neu Usif tunan, fun kan mu’if atoni le he nit Usif tunan kalu in monin ka on fa nane. ¹⁵ So him panat he nati’ kais anmu’i atoni mese amsa na’lo na’ko Uisneno In manekan. Oke te in anfain onle hau ba’at le menu’ ma neki amle’ut ma nale’un atoni amfaut sin. ¹⁶ Kais anmu’i atoni le ansinmak huma-huma ma natenab tuk-tuka on Nai Esau; le in nasosa in kanan tataf natuin mnahat pika mese. ¹⁷ Fun hi mihin, nak namuni te in lomi hen simo tetus na’ko in amaf mes antite nani. Fun in ka napeni fa manuan he naleko in mo’et asanat, maski in nami nok matnu. ¹⁸ Hi kam nao fa meu nu’af le nabe’i him nefo ma ampoe meki niman ma ai le anpin ma naklah, meu bale le nanipu ma mesokan ma anin slutuf. ¹⁹ Ma hi kam nao fa meu to’is in hanan ma hanaf le matain le’uf; talan te atoni Israel le sin nen hanaf nane sin antoti, he nati’ kais na’uab antenu neu sin. ²⁰ Fun sin ka nabe’i fa he natuin plenat nane le nak, "Leka mu’it ano’no ai ansetul nu’af nane of anpoil nisan neki fatu." ²¹ Ma sa’ le sin nit nane matain le’uf kun, tal Nai Musa nak, "Au umtau ma utai nok." ²² Mes hi aim meu Nu’af Sion, meu kot Uisneno amonit, esle’ Yerusalem neno tunan nok ahake neno tunan nifun hotun ma tolas pukan amlilat. ²³ Ma tolas knino anmone naek, le sin kankenu matui anbi neno tunan. Ma him hake ambi Uisneno In human, Alef lasi neu ale mansian, ma him haek ambi ale atoni amneot sin asmanan le namtis ma namnou. ²⁴ Ma him haek ambi Usif Yesus, Atoni fuf hala fefbela fe’u; ma him haek ambi lisin na’le nau’ab namep nesin Nai Habel in na’. ²⁵ So him panat he nati’ kais him tite In le nakua a’an. Fun kalu atoni le antite In le anetun Uisneno In a’an anbi pah pinan, sin ka naen koti fa; sa’ anteni hit taen koti na’ko In le nakua a’an na’ko neno tunan. ²⁶ Bi batan nane In hanan nabeko pah pinan, mes muni i In anba’an nak, "Of Au heko ateni hae mese, ka al fa pah pinan mes neno tunan amsa." ²⁷ A’at le nak, "Hae mese anteni" antom neu sa’ le anmo’e nalali of anheko nani, he nati’ sa’ le nabala ka nabe’i fa hen heko nani. ²⁸ Natuin hit simo plenat na’ko Uisneno le ka nabe’i fa hen heko nani; es nane te so hit alkit tatulu nekak ma taluli tabes teu Uisneno nok nek tola ma amtaus, natuin lekat le In anlomi. ²⁹ Fun hit Uisneno nane onle ai le he notu kit.

¹ So him panat lasi manekat es nok es bae manekat anbi Usif Yesus. ² Kais him nikan hem fe bale neu atoni anao amnemat, fun nok mo’et onane, atoni bian sin ka nahinef nak sin anfe bale neu ahake neno tunan. ³ Mimnau ale atoni abit o’of, fun hi amsa on atoni o’of ki. Ma mimnau nai ale atoni le anmo’e neu sin huma-huma, fun hi amsa fe amoni bi pah pinan i. ⁴ So ale atoni anpanat lasi mafe ma mamone he nati’ kais hi milahi hi hala tupa. Fun Uisneno of nasesu atoni amoe kake ma atoni bife amapaisa. ⁵ Kais him fain ate neu noni, mes hi minoka hi aom nok sa’ le hi mu’i Fun Uisneno nakua a’an nak: "Au of ka umautu ki fa, ma Au of ka usaitan ki fa." ⁶ Es nane te nabe’i hit ta’uab tak, "Usif tunan ababat neu kau. Au of ka umtau. Atoni pah pinan hen mo’e sa’ neu kau ka?" ⁷ Minau hi atopus sin, le natiaba a’an Uisneno neu ki. Him kiso sin monin amsoput ma mituin sin nek ateb knino nai. ⁸ Yesus Neno Anan ka nabaina fa, afi neno, neno i ma talan te nabal-bal. ⁹ Kais atoni nasekeb ki neik lasi noina bute-bute. Fun lasi alekot, nak anhatain hi nekam neki Uisneno In sankolan knino. Kais natuin lasi mnahat le ka neik fa alekot neu sin le sin natuin lekat onane. ¹⁰ Hi atmu’i baki fuat mese, ale atoni le anmepu anbi um-ume nane ka nabe’i fa he nah sa’ anbin. ¹¹ Fun Ana’ Lasi Fuat Anaet neki mu’it In na’ antom neu Bale Knino on fuat sako sanat. Mes ale mu’it nane sin tunu ai notu anbi mone. ¹² Onane amsa Neno Anan ansutai mane’at anbi kot in kotin he naknino In to na’ko sin sanat neki In na’. ¹³ Es nane te hit nao nai teu In anbi kot in kotin het sutai kle’at tok In. ¹⁴ Fun anbi pah pinan kan mu’if bale abal-balat neu kit; es nane hit tami bale amnemat. ¹⁵ Es nane te so natuin Neno Anan, hit teik fua tulu neu Uisneno, teik hit fefak he taliatas In kanan. ¹⁶ Ma kais him nikan mo’et alekot, ma amfe tuntakus neu hi bae benu sin, fun Uisneno anlomi ale fuat onane. ¹⁷ Hi mituin hi atopu sin hi mibaunom meu sin nai. Fun sin anpanat hi smanam, on atoni le mes he natae neune. Nok lasi nane te of sin nanaoba nani nok nek amlilat ma ka nok fa nek a’unu. Fun lasi nane of ka neik fa alekot neu ki. ¹⁸ Him onen toti piut neu kai; fun hai mihin, mak hai nekam nanan leko, fun anbi ale lasi haim lomi he mipeni monit alekot. ¹⁹ Ma nes-nesi au toti ki, he him onen toti neu kau. Okete Uisneno nok kau he fain et laba eu ki. ²⁰ Uisneno nafena nafani Yesus hit Usif na’ko amates. Natuin Ini maten muni i In fani Atukus Anaet neu Ini bibi sin. Ini maten nane amsa anhatani Fef Bela abal-balat na’ko Uisneno. ²¹ So Uisneno naloitan ki alekot, he nati’ hi mo’e mituin In lomin. Ma Uisneno anmepu anbi kit sa’ le In anlomi natuin Yesus Neno Anan. So atpules Neno Anan talan te nabal-bal! Amin. ²² Ma au fainek ki, bae benu, he nati’ him sium au fainekat i nok nek amlilat, maski au sulat i tuk-tuka neu ki. ²³ Hi mihin nai, nak hit bae Nai Timotius, nafetin nalali na’ko o’of. Leka in neman te kau laba, of au okan he met amkius ki. ²⁴ Hi mitiaba tabe neu hi atopus sin ma neu ale to knino. Ma him simo tabe na’ko bae knino sin anbi Italia. ²⁵ So Usif tunan anfe tetus neu ki alki.