GALATIA

GALATIA

¹ - ³ Neu tolas knino anbi Galatia! Au Nai Paulus, ma bae knino sin anbi i, haim toti he nati’ hit Ama Uisneno ma Yesus Neno Anan hit Usi, anfe tetus ma aomina neu ki. Au fani haef knino ka natuin fa mansian ma ka na’ko fa mansian, mes natuin Yesus Neno Anan ma hit Ama Uisneno le nafena In na’ko amates. ⁴ In natnin neu Uisneno ma nana’at In aon hen fain fua tulu natuin hit sanat, he nati’ namonib kit na’ko batan amle’ut i. ⁵ So atpules Uisneno talan te nabal-bal! Amin. ⁶ Au umkak, fun fe ka sa’-sa’ fa him nao amkoti Uisneno, le anboin ki neu Neno Anan In halinat knino ma hi mituin "Lasi Knino teta," ⁷ le ka Uisneno In Lasi Knino fa. Anmu’i atoni le nakalab hi nekam ma naklelo Neno Anan In Lasi Knino. ⁸ Atoni le anetun Lasi Knino teta na’ko Lasi Knino le haim etun ki, maut he Uisneno sukat, maski atoni nane esle’ hai ka ai ahake neno le nem na’ko neno tunan. ⁹ Onle afi haim eut milali ki, tomas i au etun ateni ki. Kalu anmu’i atoni le anetun ki Lasi Knino teta le nasuli na’ko Lasi Knino le him simo milali na’ko kai, so Uisneno ansukat in. ¹⁰ Neu tomas i onme ka? Au he halin atoni pah pinan ka, ai he halin Uisneno ka? Ai au aum he atoni pah pinan anlomi kau ka? Kalu au fe mo’e onane, au ka Neno Anan In ate kau. ¹¹ Bae benu alki, au eut ki, ak Lasi Knino le au eut ki ka na’ko fa mansian. ¹² Au ka simof lasi nane na’ko mansian, ma katit fa atoni mese le nanoina kau. Mes natuin Yesus Neno Anan nalilon kun neu kau. ¹³ Him nen milalien antom au monik le afi au utuin atoni Yahudi sin lasi. Hi mihin, nak au li’u tolas Uisneno ma au aim lanan matani he ule’un ani. ¹⁴ Ma anbi lasi minaoba atoni Yahudi sin lasi noina, au finin au bae sin le nabat nok kau anbi nonot Yahudi. Ma au makoe nesi anbi lasi he panat au mnais enu sin lasi halat. ¹⁵ Mes natuin Uisneno nekan alekot In anbeti kau na’ko au aina in apun, In anboin kau he tuthae In. ¹⁶ Uisneno nalile In Anmone neu kau, he nati’ au etun In Lasi Knino neu ale uf le kan tamaf nonot Yahudi. Bi leku nane au ka nao fa he toti fainekat na’ko atoni bian antom lasi i. ¹⁷ Au ka nao fa amsa neu sin le anfani haef knino nahunun kau anbi Yerusalem. Mes au nao eu pah Arab, oke te au fain eu kot Damsyik. ¹⁸ Ton tenu namuni te au nao eu Yerusalem he kiso Nai Kefas. Au umaika okan neno bo’es am nim. ¹⁹ Au ka itaf haef knino bian, al Usif Yesus In olif Nai Yakobus. ²⁰ Lasi le au tui ki nane namneo. Uisneno nahin, nak au ka upoibok fa. ²¹ Namuni te au nao eu pah Siria ma Kilikia. ²² Mes tolas knino Neno Anan anbi pah Yudea sin ka nahin fa au humak. ²³ Al sin nen nak, atoni le afi anli’u kai, muni i anetun lasi ateb knino, le afi in he nale’un nani. ²⁴ Oke te sin nanaeb Uisneno natuin au.

¹ Ton bo’es am ha namuni te, au nao eu Yerusalem ok Nai Barnabas ma ok Nai Titus amsa. ² Au nao eu Yerusalem, natuin Uisneno es nalile nani -- Au u’uab ok atoni makana sin anmes -- ma au uhoeb Lasi Knino le au etun ulali neu ale uf le kan tamaf nonot Yahudi. Fun au ka lomif he nati’ au mepu nane son-sona ai luman. ³ Kiso, Nai Titus le in nok kau, in atoni Yunani mes ka naseke fa in he natuin lasi helit ai lasi hapit, ⁴ maski anmu’i atoni le naseke lasi nane. Sin le nane atoni le an’ap nok kit on bae knino. Sin neman nok lasi tolo’ he natnu hit lasi fetin ai ao sona le hit tapeni anbi Neno Anan Yesus. Sin mo’e onane he nati’ sin nabe’i na’ate kit. ⁵ Mes hai ka maen kotif ma ka mituin fa sin, he nati’ Lasi Knino in amneot nabala anbi ki. ⁶ Mes neu sin le on atoni makana -- le afi sin napeni nani onme, au ka uhinef, fun Uisneno kan betif humaf -- maski onane amsa sin le makana nane ka naseke fa lasi sa’ neu kau. ⁷ Mes leka sin nit nalali, nak Uisneno nana’at nalali kau lasi he etun Lasi Knino neu atoni le kan tamaf nonot Yahudi onle Nai Petrus anetun Lasi Knino nani neu atoni Yahudi sin. ⁸ Fun Uisneno es anfe matani neu Nai Petrus hen fani haef knino neu atoni maheli sin. In amsa es anfe kau matani he fani haef knino neu atoni ka maheli sin. ⁹ Ma leka sin nit nalali nak Uisneno anfe kau mepu i, Nai Yakobus, Nai Kefas ma Nai Yohanes le anfani on ni neu tolas knino sin ansimo kai. Sin mana’ nim nok kau ma nok Nai Barnabas on taka nek mese. Oke te hai malomis he nati’ hai mepu ambi atoni le kan tamaf nonot Yahudi ma sin anmepu anbi nonot Yahudi. ¹⁰ Sin antoti he nati’ hai mimnau atoni amamu’it sin. Ma au lomi nesi he unaoba lasi nane. ¹¹ Leka Nai Kefas nem neu Antiokhia au usuil okan mat-mat fun in mo’et nane ansan. ¹² Nahunu te in antoko ma anbukae nok in bae sin le kan tamaf nonot Yahudi. Mes leka Nai Yakobus in atoni sin neman in naskot na’ko sin fun in namtausan in bae le maheli sin. ¹³ Ma atoni Yahudi bian amsa an’asafanu nok in, talan te Nai Barnabas natuin sin mo’et asafanut nane. ¹⁴ Mes leka au it sin mo’et le ka natai fa nok Lasi Knino in lomin, au u’uab neu Nai Kefas anbi sin matan ok-oke, "Kalu ho atoni Yahudi, ho moni on atoni le kan tamaf nonot Yahudi, leka me ho museke atoni ka maheli hen moni on atoni Yahudi ka?" ¹⁵ Natuin likin ma pe’en hai atoni Yahudi kai ma ka atoni amo’e sanat na’ko uf bian. ¹⁶ Hai mihin, nak katit fa atoni mese le naleko anfani nok Uisneno natuin in nanaoba Plenat Knino, mes al natuin nek ateb knino neu Neno Anan Yesus. Es nane te haim palsai neu Neno Anan Yesus, he nati’ hai mileko mok Uisneno natuin palsait neu Neno Anan ka natuin fa mo’et Plenat Knino. Fun, "katit fa atoni mese le naleko anfani nok Uisneno" natuin nanaoba Plenat Knino unu. ¹⁷ Ma kalu haim lomi he mileko amfani mok Uisneno anbi Neno Anan natuin hai atoni asanat, lasi nane, nak Neno Anan es anmo’e kai hem tam meu sanat ka? Kahaf. ¹⁸ Fun kalu au uhakeb ufani sa’ le au pukai ulali, au on atoin atanhai Plenat Knino. ¹⁹ Mes au mate natuin Plenat Knino, ma neu Plenat Knino he nati’ au moni neu Uisneno. Ma napeti nalali kau nok Neno Anan, ²⁰ mes au moni. Nane ka au fa, mes Neno Anan anmoni anbi kau. Ma monit le au moni muni i, nane monit natuin nek palsait neu Uisneno In Anmone. In nek kau ma nana’at In aon anseka kau. ²¹ Au ka tite fa Uisneno In nek mamun. Fun kalu lasi mafutus nok Uisneno naleko anfani natuin Plenat Knino, Neno Anan In lasi maten nane ka ma’upa fa.

¹ Koi atoni Galatia amonot, sekau es naleko ki ka? Yesus Neno Anan In lasi maten anbi hau nehe afi au eut ulali neu ki. ² Au lomi he uhin lasi i na’ko ki. Him simo milali Smanan Knino natuin hi minaoba plenat knino unu, ai natuin hi nekam anpalsai neu Neno Anan natuin etus Lasi Knino ka? ³ Hi mono onane neu sa’ ka? Hi mi’uba anbi Smanan Knino ma hi misopu meki hi matanim ka? ⁴ Him sutai lasi namfau onane son-sona ka? Leka me he luman. ⁵ Neu tomas i onme, Uisneno anfe In Smanan Knino neu ki nok athoes ma anmo’e lasi taka namfau anbi hi atnanam. Uisneno anmo’e lasi nane natuin hi minaoba Plenat Knino unu ai natuin hi nekam anpalsai neu Neno Anan natuin etus Lasi Knino ka? ⁶ Onane amsa Nai Abraham nekan nateb knino neu Uisneno, oke te Uisneno ansimo in on atoni le anhalin Uisneno nekan. ⁷ Es nane hi mihin nai, mak ale atoni apalsait nane namneo-namneo Nai Abraham in sufan sin. ⁸ Sulat Knino nahin nahunun lasi nane, nak Uisneno anfe manuan neu atoni le kan tamaf nonot Yahudi he naleko anfani nok Uisneno kalu sin palsai neu In. Fun anetun nahunun Lasi Knino neu Nai Abraham nak, "Of anbi ko Uisneno anfe tetus neu ale pah-pah." ⁹ Nai Abraham anpalsai, es nane in napeni tetus. Onane amsa ale atoni le anpalsai, of napeni tetus nok Nai Abraham. ¹⁰ Fun ale atoni le anmoni natuin Plenat Knino unu sin napeni sukat. Fun antui nani nak, "Atoni le ka nanaoba fa ale sa’ le antui nalali anbi Sulat Plenat Knino unu, Uisneno of ansukat nani." ¹¹ Ma katit fa atoni mese le naleko nok Uisneno natuin in nanaoba Plenat Knino unu. Fun antui nani nak, "Al atoni le anpalsai neu Uisneno tal in lasi mafutus naleko anfani nok Uisneno, of anmoni!" ¹² Mes Plenat Knino unu nane in sukin ka es fa nek ateb knino. Mes atoni le nanaoba Plenat Knino of anmoni natuin plenat nane. ¹³ Neno Anan ansoi napoitan kit na’ko Plenat Knino unu in sukat. In nanaoba lasi nane natuin lanan nana’at In aon hen sutai sukat anseka kit. Fun antui nani nak, "Sukat neu atoni le anmate anbi hau nehe." ¹⁴ Yesus Neno Anan anmo’e lasi i he nati’ tetus le Uisneno anba’an nani neu Nai Abraham anfe nani amsa neu uf bian le kan tamaf nonot Yahudi. Onane te of hit le atpalsai neu Uisneno, atsimo Smanan Knino le In anba’an nani. ¹⁵ Bae benu alki! Leko nesi au u’uab leta mese na’ko monit neno-neno. Fefbela le antao nalali, katit fa atoni mese le hen pukai nani ai hen sato anteni. ¹⁶ Uisneno nabela In fefbela nane neu Nai Abraham ma neu in sufan. Uisneno ka nak fa, "neu in sufan ka’un sin" le antom neu atoni mfaun, mes Uisneno nak, "neu ho sufam" nane antom neu atoni mese, esle’ Neno Anan. ¹⁷ Au lomik on i, Uisneno nabela nalali In fefbela na’ko afi. Es nane Plenat Knino unu le anfe namuni anbi ton natun ha ma bo’tenu ka nabe’i fa he naneku Uisneno In fefbela nane. ¹⁸ Fun kalu sa’ le Uisneno anlek nani na’uba na’ko plenat knino unu, in ka na’ko fa fef ba’an nane. Mes natuin fef ba’an, Uisneno anfe In halinat neu Nai Abraham. ¹⁹ Kalu onane, Plenat Knino unu in lomin he sa’ ka? Antao plenat knino unu nane he nalile mansian in lasi tanhais. Plenat nane nanaobon talan te Nai Abraham sufan le Uisneno anba’an nani ankoenon nem. Plenat nane natiaba nani natuin ahake neno tunan sin neu atoni tnana mese. ²⁰ Atoni tnana nane so anhake neu tuaf nua. Mes Uisneno ka nukan fa atoni tnana, fun In mes kun es anlek. ²¹ Kalu onane, Plenat Knino unu nasuli nok Uisneno In fefbela ba’an ka? Kahaf. Fun kalu anfe Plenat Knino unu on lasi le he namonib mansian, onane te mansian nabe’i naleko nok Uisneno natuin Plenat Knino unu. ²² Mes Sulat Knino anetun nak ale mansian ok-oke anbi sanat in kuasat. Es nane te, natuin nek ateb knino anbi Yesus Neno Anan, fefbela nane anfe nani neu atoni le nekan nateb knino. ²³ Nahunun nek ateb knino nane anbol, Plenat Knino unu anpao kit matani; ma anek kit talan te nek ateb knino nane nalilon. ²⁴ Onane te Plenat Knino anfani atopus neu kit talan te Neno Anan ankoenon nem, naleko nafani kit nok Uisneno natuin hit nek ateb knino neu Neno Anan. ²⁵ Muni i, leku antelen he nati’ mansian anpalsai neu Neno Anan es nane te atopus nane kan paon teni kit. ²⁶ Hi alki Uisneno In anhin natuin nek ateb knino neu Yesus Neno Anan. ²⁷ Fun hi alki le amsu oe ambi Neno Anan, him simo milali Neno Anan ma mimesbom mok In. ²⁸ Anbi lasi i katit fa atoni Yahudi ai atoni Yunani, katit fa ate ai atoni ao sona, katit fa atoni ai bife fun hi alki mese ambi Neno Anan Yesus. ²⁹ Ma kalu hi Neno Anan Ini ki, onane te Nai Abraham sufan ki. Ma him tam ota hem simo Uisneno In fefbela ba’an.

¹ - ² Mes au he eut ki ak, leka apal bael bela mnasi nane in fe li’ana, anmu’i atoni le anpanat in ma anlekan ale sa’-sa’, talan te neno le in amaf anlek nani. Fun in papmese on ate, maski in apal bael bela mnasi kun. ³ Onane amsa hit, leka hit fe li’ana kit, hit aetnok teu ale smanaf pah pinan. ⁴ Mes leka in neno ante, Uisneno ansonu In Anmone nem neu pah pinan. Anah nane nahonis nani na’ko bife ma anmoni natuin Plenat Knino unu. ⁵ Ansonu In he nati’ ansoi napoitan sin le anmoni natuin Plenat Knino unu, he nati’ ansimo kit het fain anah-anah Uisneno. ⁶ Natuin hi anah-anah Uisneno, Uisneno ansonu In Anmone In Smanan Knino antam neu hit nekak le In anbai nak, "koi Abba, koi Ama!" ⁷ Es nane hi ka ate anteni, mes him fani anah. Kalu hi on anah, hi amsa apal bael bela mnasi natuin Uisneno. ⁸ Afi unun hi fe ka mihin fa Uisneno, es nane te him aetnom neu Uisneno teta le namneo ka Uisneno fa. ⁹ Mes muni i hi mihin Uisneno, nes-nesi Uisneno nahin ki. Leka me hi hem fani amteni meu smanaf pah pinan le anole ma anmamu’i ka? Nansa hi hem aetnom amteni neu ale smanaf nane ka? ¹⁰ Him panat ale neno naek, ale funan, ale leku ma ale ton. ¹¹ Au umtau kal-kalu au haet ma au puse neu ki ka m’aupa fa. ¹² Au toti ki bae benu alki, he nati’ him fani onle au, fun au amsa anfani onle hi. Au fe ka upeni fa lasi amle’ut sa’ na’ko ki. ¹³ Hi mihin, nak afi hae unu au etun Lasi Knino neu ki natuin menas anbi au aok. ¹⁴ Au menas nane anfani su’at neu ki, mes hi ka mitenab fa on lasi amolemut le neki hainisit, mes him simo kau onle ahake Uisneno ma onle Neno Anan Yesus. ¹⁵ Hi ua alekot ki anbi leku nane. Mes muni i, hi ua alekot nane esme ka? Au saksi neu ki, ak anbi leku nane kalu nabe’i him loi’ mipoitan hi matam ma amfe mani neu kau. ¹⁶ Au fani hi musu ka, natuin au eut ki lasi amneot? ¹⁷ Sin naim lanan hen fuil ki mes sin nek tenab nane ka nalekof. Fun sin lomi he nale’un hi lasi mafutus mok kai oke te mituin sin. ¹⁸ Nane alekot kalu sin loim hen fuil atoni bian natuin lasi alekot, lamu anbi ale leku ka al fa bi leku au ok ki. ¹⁹ Anah sin! Au sutai ma’ne’at on fenai mese’ an sutai menas anbi tobu he nahonis li’ana. Au mes a’sutai ma’ne’at piut leko Yesus Neno Anan In lomin nane fe’ kan senonfa anbi hi monim. ²⁰ Au lomi he haek ok ki anbi leku i, ma u’uab eki hanaf bian, fun au ka uhine tenif he u’uab sa’ neu ki. ²¹ Him eut kau nai neu le hi moni ambi Plenat Knino unu; ai hi kam nenaf Plenat Knino unu ka? ²² Fun antui nani, nak Nai Abraham anmu’i anmone nua. Anhes nahonis na’ko bife le anfani ate ma anhes nahonis na’ko bife ao sona. ²³ Anah le nahonis na’ko bife le anfani ate nane natuin nekaf pah pinan ma anah le nahonis na’ko bife ao sona nane natuin Uisneno In fefbela ba’an. ²⁴ Lasi i anfani leta mese. Bife nuain nane antom Uisneno In fefbela ba’an nua. Es na’ko Nu’af Sinai ma nahonis in anhenu neu lasi ate, esle’ bi Hagar -- ²⁵ Bi Hagar nane, esle’ Nu’af Sinai anbi pah Arab -- In maleta on kot Yerusalem muni i, le anmoni nok in anhenu anbi lasi ate. ²⁶ Mes Yerusalem abit neno tunan nane bife ao sona, ma nane hit aina. ²⁷ Fun antui nalali nak, "Malin nai, hoi bife akiut le ho ka muhoni mitaf! Mu’ba ma amkasul nai, le ho ka muhin fa men mahonit! Fun bife le in mone naen nasaitan of anmu’i anah namfau nes na’ko bife le anmamone." ²⁸ Ma hi, bae benu, hi anah-anah Uisneno le nahonis ki natuin fefbela ba’an Uisneno on Nai Ishak. ²⁹ Mes on afi, anah le nahonis natuin lomif mansian, anhamu’i anah le nahonis natuin Smanan Knino, onane amsa muni i. ³⁰ Mes antui anbi Sulat Knino nak sa’ ka? "Amli’u ate bife nane nok in anmone, fun ate bife nane in anmone of kan fanif apal bael bela mnasi nok bife ao sona nane in anmone." ³¹ Es nane bae, hit ka ate bife in anhin kit, mes bife ao sona nane in anhin kit.

¹ Namneo Neno Anan nafetin kit neu ao sona. Es nane te him hake mi’ki ma kais him lomi hem aetnom amteni. ² Tebes, au Nai Paulus, au ak ki, kalu him lomi hen heli ki ai hen hapi ki, Neno Anan ka ma’upa fa neu ki. ³ Au u’uab teni neu ale atoni le anlomi he natuin lasi helit so in natiaba ale Plenat Knino unu. ⁴ Kalu him lomi he mileko mok Uisneno natuin Plenat Knino unu, nane hi mitsefi mi’ko Neno Anan. Onane te hi ka monif ambi Uisneno In nek mamun. ⁵ Fun natuin Smanan Knino ma natuin nek ateb knino neu Neno Anan, Uisneno naleko nafani kit nok In. ⁶ Kalu hit tamesbok tok Neno Anan Yesus, lasi maheli ai ka maheli nane in kan tamaf molok. Al lasi ateb knino neu Neno Anan le natonon anbi lasi manekat neu atoni bian. ⁷ Afi hi mautnom mok alekot. Muni i hi ka mituin amteni fa Uisneno lomin neu sa’ ka? Sekau es anfuli ki ka? ⁸ Lasi fulit nane ka na’ko fa Uisneno le anboin ki. ⁹ Laul haef le an-ana anmahaib u’kabu ok-oke. ¹⁰ Maski onane au fe apalsai nak of hi ka mituin fa lasi bian, fun hit tamesbok talali tok Neno anan. Mes atoni le nakalab ki, he sekau am sekau of ansutai sukat na’ko Uisneno. ¹¹ Neu au, bae benu alki, kalu au fe etun lasi mahelit, nansa sin anli’u kau? Fun kalu onane Neno Anan In hau nehe ka neki fa lasi astunas. ¹² Leko nesi atoni le nakalab ki anpoi na’ko Tolas Knino. ¹³ Bae benu alki, anboin nalali ki neu lasi ao sona. Mes kais him pake lasi ao sona nane on leku manuan he nati’ hi moni mibala ambi sanat. So hi matuthaen es nok es natuin lasi manekat. ¹⁴ Fun plenat knino unu nane namesbon anbi plenat mese i le nak, "Hom nek ho aom bian onle hom nek ho aom." ¹⁵ Mes kalu hi mapisu es nok es ma ma’olo es nok es, ampanat, he nati’ kais hi mimle’u oke. ¹⁶ Au lomik on i: So hi moni mituin Smanan Knino ma kais hi mituin nekaf mansian. ¹⁷ Fun nekaf mansian in sinmakat nane nasuli nok Smanan Knino, ma Smanan Knino in sinmakat nasuli nok nekaf mansian -- fun nua sin nasulin -- talan te hi ka mibe’i fa he mo’e sa’ le him lomi. ¹⁸ Ma kalu Smanan Knino antopu ki, of hi ka mituin fa Plenat Knino unu. ¹⁹ Nekaf mansian in mo’et nane natonon anbi lasi mapaisa, lasi lahi, laif folu; ²⁰ luli besa neu le’u, ote naus, matoes, manek nanan, to’as, natenab al in aon, lasi suli, es-es in hake kun; ²¹ na’un to’an, lasi mafu tua, tolas malinat huma-huma ma lasi bian anteni. Au umnauba ki ale lasi i ok-oke, -- onle afi au eut ulali ki -- nak ale atoni le anmo’e lasi nane, in of ka napeni fa pa ma nama’ anbi Plenat Uisneno. ²² Mes kalu Smanan Knino antopu hit monik in fuan nane, lasi manekat, lasi amlilat, halan nekaf, lasi seusabat, mo’e alekot, nek leko, lasi aki’at; ²³ nek aklati, naplenat aon. Katit fa plenat le nasuli nok ale lasi nane. ²⁴ Atoni le anfani Neno Anan Yesus In ini, in namate nalali nekaf mansian, lasi folu ma in lasi sinmakat. ²⁵ Kalu hit moni natuin Smanan Knino, so Smanan Knino antopu hit monik amsa. ²⁶ Kais hit tamoko’ok, kais hit manto’an es nok es ma atmanek nanan es nok es.

¹ Bae benu alki! Kalu hi mipeni atoni mese anmo’e sanat, so hi le a’moni ambi Smanan Knino, amtopu atoni nane anfani nem neu lanan amneot. Him topu meki nek aklati ma him panat hi aom he nati’ kais hi amsa amtam meu lasi su’at. ² Hi matulun es nok es hem sutai hi baut, onane te hi mitis Neno Anan In aplenat. ³ Fun kalu es in natenab nak in ahinet mes in ka nahinef, in atoni apoiba. ⁴ So atoni mes-mese ansu’ kun in mepu he leko ai kahaf. Kalu in mepu nane leko, in malin neu lasi nane. Kais in nanesa in mepu nok atoni bian in mepu. ⁵ Fun atoni mes-mese of anloi kun in baut. ⁶ Atoni le ansimo Neno Anan In lasi noina, so anbati nok in anoni ale lasi alekot le in anmu’i. ⁷ Kais him sek ai ambeo. Kais hi mi’bae Uisneno In kanan. Fun atoni ansen sa’ of in seu lasi nane amsa. ⁸ Kalu atoni ansen natuin nekaf mansian, in of anseu lasi amle’ut na’ko nekaf mansian nane. Mes atoni le ansen natuin Smanan Knino, in of anseu lasi honis nabal-bal na’ko Smanan Knino. ⁹ Kais hit athae neu mo’et alekot, fun leka in leku ante of hit atseu in fuan. ¹⁰ Es nane te, leka hit fe atmu’i leku manuan, hit atmo’e alekot neu ale atoni, nes-nesi neu hit bae benu nek ateb knino sin. ¹¹ Him kiso mit, tuis a’naek le au tui ki eki au nimak. ¹² Atoni le he natonon neki lasi mamnita, sin es anlomi he naseke ki he mituin lasi mahelit. Sin anmo’e onane he nati’ atoni Yahudi kais anli’u sin natuin Neno Anan In hau peti. ¹³ Fun sin le natuin lasi mahelit, sin amsa kan panat fa Plenat Knino unu. Mes sin anlomi he nati’ hi mituin lasi mahelit he nati’ sin naliabok natuin hi mo’et le mamnita. ¹⁴ Mes au ka lomif he uliabok, so al anbi Neno Anan Yesus hit Usi le anmate anbi hau nehe. Fun natuin In anmaet nalali anbi hau nehe, pah pinan ka ma’ota anteni fa neu kau. Ma neu pah pinan i, au amsa on au maet ulalien. ¹⁵ Lasi mahelit ai ka mahelit nane kan tamaf ota. Lasi le antam ota es atfani atoni fe’u. ¹⁶ Mes atoni le anmoni natuin lasi i, halan nekaf ma amnaut ansanu neu sin ma neu Uisneno In to Israel. ¹⁷ Neis na’ko nane kais anmu’i atoni le he nasusab kau, fun anmu’i taka anbi au aok, nak Yesus In Ini kau. ¹⁸ So hit Usif Yesus Neno Anan anfe tetus piut neu ki oke. Amin.