EFESUS

EFESUS

¹ Neu tolas knino anbi Efesus le nekan na’ki neu Neno Anan Yesus! ² Au, Nai Paulus haef Neno Anan Yesus natuin Uisneno In lomin, au ufnekan he nati’ Uisneno, hit Ama ma Usif Yesus Neno Anan anfe tetus ma aomina neu ki. ³ Minaeb Uisneno, Yesus Neno Anan hit Usi In Amaf! In anfe kit ale tetus alekot anbi neno tunan. ⁴ Uisneno anbeti kit anbi Neno Anan, nahunun le nabela pah pinan he nati’ hit atfani atoni knino ma ka malahi fa anbi In human. ⁵ Natuin Uisneno In manekan, In anlek nain kit na’ko afi natuin Yesus Neno Anan, he nati’ hit atfain anah neu In. Ma lasi Šnane namnes nok In lomin kun. ⁶ Minaeb Uisneno In halinat knino apinat, le In anfe nani neu kit anbi In Anmone le In nek nani. ⁷ Fun anbi Neno Anan ma natuin Ini maten, In ansoi kit na’ko hit sanat. Natuin Uisneno In manekan athoes, ⁸ In nahoeb kit nek ahinet ma lasi ahinet. ⁹ Uisneno an eut kit In bekot le natolon kun natuin In nek alekot; le In antao nani na’ko afi anbi Neno Anan. ¹⁰ In bekot he nati’ ale sa’ abit neno tunan ma abit pah pinan anfani mese nok Neno Anan on nakaf neu ale sa’. Ma lasi nane Uisneno of natiaba nani leka in leku ante. ¹¹ Uisneno anmeup ale sa’ natuin In lomin ma natuin In lasi fekat -- In anbeit kit na’ko afi unun -- he nati’ hit tapeni pa’ le In anba’an natuin Neno Anan. ¹² Ma hai, le nahunu mifnekan Neno Anan, so miliatas Uisneno natuin In apinat. ¹³ Hi amsa amfani to Uisneno, leka him nen In a’an amneot, esle Lasi Knino le neki honis neu ki. Leka hi nekam nateb knino, Uisneno anfe ki taka neki Smanan Knino le In anba’an nalali neu ki. ¹⁴ Smanan Knino nane anfani bael bela nak of hit simo sa’ le Uisneno anba’an nani neu In to. Lasi i naton kit nak Uisneno of nafetin In to. So taliatas Uisneno natuin In apinat! ¹⁵ Es nane, leka au nen neu hi nek ateb knino anbi Usif Yesus ma hi lasi manekat neu to knino, ¹⁶ au utulu nekak piut neu Uisneno antom ki. Ma au umnau ki piut anbi onen totis. ¹⁷ Au toti neu Yesus Neno Anan hit Usi In Uisneno, Amaf apinat, hen fe ki Smanan ahinet he nati’ him fain ahinet, ma of nalile Uisneno neu ki he mihin In lek-leko. ¹⁸ Ma Uisneno antana hi nekam he nati’ hi mihin lasi afnekat sa’ le naloitan anbi Uisneno In han amno’en nane. Lasi athoes apinat le naloitan nani neu to knino, ¹⁹ ma Uisneno anmepu nok kuasat matani neu kit le hit nekak nateb knino. ²⁰ Uisneno anmepu anbi Neno Anan ma nafena In na’ko amates ma natokob In anbi Uisneno aon bian ne’u anbi neno tunan. ²¹ Neno Anan In atoko nane namnanu nesin ale ana’ aplenat, amui kuasat, kuasat ma plenat. Ma ale kanaf le In antek nani, ka al fa anbi pah pinan i mes anbi neno amnemat amsa. ²² Ma Uisneno nabela ale sa’ anbi Neno Anan In haen nupun ma nana’at Neno Anan neu tolas knino hen fani nakaf neu ale sa’ anbi tolas knino. ²³ Tolas knino nane Neno Anan In aon kun, le In natisi nani, ma natis kun ale sa’ ok-oke.

¹ Afi hi maet milali natuin hi sanat ma amtanhai Uisneno Ini plenat sin. ² Hi moni ambine, fun mituin pah pinan in mo’et. Hi mituin plenat neno tnanan in kuasat le anmepu anbi ale atoni le ka natuin Uisneno sin nekan. ³ Afi unun hit amsa atmoni tok sin, leka hit moni atbi mo’et amolemut ma hit mo’e tatuin hit tenab asanat. Le namneo hai mes mipeni to’as Uisneno onle atoni bian. ⁴ Mes Uisneno In nek mamun lo naek kun. In nek nis kit, ⁵ talan te bi neno hit atmate natuin hit tanhais, In namonib nafani kit nok Neno Anan. Es nane, al natuin Uisneno nek mamun In namonib ki. ⁶ Natuin hit tamesbok tok Neno Anan Yesus, Uisneno namonib nafani kit, he nati’ hit na’ aplenat tok In anbi neno tunan. ⁷ Uisneno anmo’e onane he nati’ anbi neno amnemat, In nalile In mo’et alekot le nathoe neu kit anbi Neno Anan Yesus. ⁸ Uisneno In halinat knino namonib ki natuin nek ateb knino. Lasi nane ka natuin fa hi be’im, mes natuin Uisneno In amnaut. ⁹ Lasi nane ka natuin fa hi mepu, es nane kais anmu’i atoni le nanaebon antom lasi nane. ¹⁰ Fun hit le i Uisneno es anmo’e kit natuin Neno Anan Yesus neu mepu alekot, le afi Uisneno naloitan nani. Uisneno anlomi, he nati’ hit atmoni atbi lasi nane. ¹¹ Natuin lasi nane bae, mimnau nai, nak afi unun hi -- onle atoni le kan tamaf nonot Yahudi natuin nekaf pah pinan, le antek ki nak atoni ka maheli, natuin hi ka mituin fa lasi mahelit le anmo’e nani neki nimaf pah pinan -- ¹² Bi leku nane hi ka mimesbom fa mok Neno Anan, hi kam tamaf to mabeti Uisneno. Hi ka mipeni fa pa’ ma nama anbi fef ba’an le Uisneno anmo’e nani nok In to. Hi moni ambi pah pinan i ka nok fa afnekat ma ka nok fa Uisneno. ¹³ Mes muni i, anbi Neno Anan Yesus hi le afi "mi’lo", him fani "ahaumakat" natuin Neno Anan Ini maten. ¹⁴ Fun In ahal nekaf neu kit, In es nameseb atoni Yahudi ma atoni le kan tamaf nonot Yahudi hen fani uf mese. Baik lape le anbati sin, esle lasi musu, anpukai nalali natuin Neno Anan Ini maten. ¹⁵ Usif Yesus anmate ma anpukai nalali Plenat Knino unu nok ini plenat sin ma in lekat sin he nati’ uf nua in nane anfani atoni fe’u le namesbok nok In. Natuin lasi nane Neno Anan naloitan halan nekaf. ¹⁶ Natuin Ini maten anbi hau nehe, Neno Anan nameseb nafani uf nua in nane, ma anhalan sin nok Uisneno, oke te Lasi Knino musu nane namneku. ¹⁷ Es nane Neno Anan nanoebon nem ma anetun lasi halan nekaf neu ki le afi hi "mi’lo" Uisneno ma halan nekaf neu sin le "anhaumak" Uisneno. ¹⁸ Natuin Neno Anan Yesus hit alkit, -- nonot Yahudi ma le kan tamaf nonot Yahudi -- natuin Smanan Knino mese, tapeni lalan he tam teu Ama. ¹⁹ Onane te ka matateme anteni ki fa ma ka anaomnemat ki fa. Mes him fani mese mok to knino sin ma amfani Uisneno In ini ki. ²⁰ Ma nahakeb ki anbi sukit le haef knino sin ma mafefa knino sin nabela nani, mok Neno Anan Yesus on in fatu naif. ²¹ In es anlek mepu fena nane anfani Ume Uisneno le knino, ma naloitan neu hit Usi. ²² Natuin hi moni mimesbom mok Neno Anan, hi amsa nahakeb ki mok atoni bian amfain ume mese neu Uisneno; anbi nane Uisneno namaika nok In Smanan Knino.

¹ Natuin lasi nane, au Nai Paulus, atoni atam o’of natuin Neno Anan Yesus, neu hi atoni le kam tamaf nonot Yahudi. ² Namneo, him nen milali nak natuin Uisneno In nek mamun, anfe kau mepu i natuin hi. ³ Uisneno anfei In lasi tolo’ ma ane’ut kau neki mnitas -- onle au tui ulali ki tuk-tuka. ⁴ Leka him so’i te of hi mihin Neno Anan In lasi tolo’ onle au uhin ulali -- ⁵ afi unun lasi tolo’ nane kan etun nani fa neu atoni pah pinan, mes muni i ane’ut nani natuin Smanan Knino neu In haef knino sin ma In mafefa knino sin. ⁶ Lasi tolo’ nane nak, natuin Beno Alekot, atoni le kan tamaf nonot Yahudi sin napeni pa’ ma nama nok atoni Yahudi sin anbi tetus ma aomina le Uisneno naloitan nani. Sin anfani lokif ma taluf na’ko aof mese ma ansimo sa’ le Uisneno anba’an nani natuin Neno Anan Yesus. ⁷ Uisneno anfe kau In sankolan neno he nati’ au etun Lasi Knino nane. Au simo sankolan nane natuin In kuasat le anmepu anbi kau. ⁸ Anbi ale to Uisneno, au le i atoni amolemut. Mes Uisneno anfe kau halinat i, he nati’ au etun Lasi Knino neu ale atoni le kan tamaf nonot Yahudi antom Neno Anan In athoes le kan tu’ nitaf. ⁹ Ma he nati’ natuin au amsa ale atoni sin nahin nak Uisneno, Apakaet ale sa’, nanaoba In lomin le nakakoba anfani lasi tolo’ neu pah pinan. ¹⁰ Uisneno In lomin he nati’ muni i, natuin tolas knino ane’tun Uisneno In lasi hine neu ale ana’ aplenat ma amui kuasat abit neno tnanan. ¹¹ Uisneno amo’e lasi nane namnes nok In bekot nabal-bal, le In anmo’e nani natuin Neno Anan Yesus hit Usi. ¹² Natuin nek ateb knino neu Neno Anan, ma tamesbok tok In hit tapeni manuan het haumak Uisneno nok nek palsait. ¹³ Es nane te au toti ki he nati’ kais hi mimtau neu lasi le au sutai ani natuin hi, fun ale lasi nane neki alekot neu ki. ¹⁴ Es nane te au li’tu anbi Ama In human. ¹⁵ Fun na’ko In ale uf abit neno tunan ma abit pah pinan sin ansimo sin kanan. ¹⁶ Au onen toti he nati’ in le anmu’i apinat athoes, anhatani hi nekam neki In Smanan Knino. ¹⁷ Ma natuin hi nek ateb knino, Neno Anan namaika anbi hi nekam ma hi miba’ ma mi’ki ambi lasi manekat. ¹⁸ Au onen toti he nati’ hi mok ale to knino hi mibe’i mihin Neno Anan In lasi manekat In manuan ma Ini mnanun nekin sae ma ini mnanun nekin sanu. ¹⁹ Ma hi mihin lasi manekat nane le namnanu nesin hi lasi ahinet. Au onen toti he nati’ nahenu hi nekam neki Uisneno In lasi ahenut. ²⁰ Natuin Uisneno In kuasat le anmepu anbi kit, In anmo’e nesin na’ko le hit onen toti ma na’ko le hit tatenab. ²¹ Uisneno In kun apinat anbi tolas knino ma anbi Neno Anan Yesus eke ma batan talan te nabal-bal. Amin.

¹ Es nane te au, atoni le natam kau neu o’of natuin hit Usi, au fainek ki he nati’ hi monim onle atoni le Uisneno anboin nalali ki namnes nok In hanan amno’en nane. ² Hi mibaun hi nekam, nek malule ma amseusab ambi ale lasi. Hi milile lasi manekat anbi lasi matuntakun es nok es. ³ Ma him panat lasi nek mese anbi Smanan Knino natuin lasi mafutus anbi halan nekaf. ⁴ Aof mese ma Smanaf mese. Onane amsa anboin ki neu lasi afnekat mese. ⁵ Usif mese, nek palsait mese, su’ oe mese. ⁶ Uisneno mese, le anfani Amaf neu ale atoni. In Uisneno kun neu ale sa’-sa’, le anmepu natuin ale sa’ ma anmu’i kuasat anbi ale sa’. ⁷ Ma anfe neu kit mese-mese halinat knino natuin sa’ le Neno Anan anfe neu kit. ⁸ Natuin lasi nane, antui anbi Sulat Knino nak, "Leka In ansae neu bale amnanut, In anhel neki ale atoni le napeni hukum; In anfe bael alekot neu mansian." ⁹ Kalu ansaksi nak, "In ansae" nane nak afi In ansanu nem neu pah pinan ini pinan? ¹⁰ In le ansanu nalali, In amsa es ansae anfani namnanu nesin ale neno tunan, neu he nahenu ale sa’. ¹¹ Ma In es anlek he nati’ bian anfani haef knino, bian anfani mafefa knino, bian anfani amnek lasi knino, bian anfani atukus ma anoni. ¹² In mo’e onane he naikab to knino neu mepu tuthaes, he nahakeb Neno Anan In aon. ¹³ Nok lasi nane te, hit alkit atfani mese natuin nek palsait, ma atfani mese anbi lasi hine antom Uisneno In Anmone. Ma hit nekak natbo ma nanae onle Neno Anan. ¹⁴ Ma hit ka on fa li’ana anten, le anpes neki kit ma anfu neki kit neki atoin apoiba sin lasi noina huma-huma. Sin nasekeb atoni neki sin lasi ak’elo. ¹⁵ So hit atna’ tamepan lasi amneot anbi lasi manekat; talan te hit atmaspeti anbi ale lasi neu Neno Anan, le anfani nakaf neu kit. ¹⁶ Fun na’ko In ale aof, -- anmatalu lek-leko ma anmalut anfani mese natuin kanuf-kanuf, matuntakun nok matani -- le kanuf mes-mese napeni kun. Onane te aof nane of anmoni ma nahaekbon anbi lasi manekat. ¹⁷ Es nane te, anbi Usi In kanan, au u’uab ma au fainek ki ak, kais hi moni amteni onle atoni le ka nahinef Uisneno ma sin natenab lasi bute-bute. ¹⁸ Sin nek tenab nane anmesok. Sin ka nahin fa monit le Uisneno anfe, ma sin ka nahin fa sa’-sa’ antom Uisneno. Fun sin namanub sin nekan. ¹⁹ Sin kan mu’in fa nek mae, talan te sin nana’at sin aon neu sinmakat pah pinan ma anmo’e lasi amle’ut huma-huma. ²⁰ Mes hi ka on fa nane, fun hi mihin Neno Anan. ²¹ Fun him nen milali antom In. Ma him simo noina anbi In natuin lasi amneot le natonon anbi Yesus. ²² Onane te hi mibela hi mo’et unu ma misaitan atoni mna’ le namle’u natuin lasi sinmakat akiku. ²³ So hi nekam ma hi tenab nafe’unon ok-oke. ²⁴ Ma hi monim on atoni fe’u, le anmo’e natuin Uisneno In lomin, anbi lasi amneot ma amnonot knino. ²⁵ Onane te kais hi mipoibom, mes mi’uab amneot es neu es. Fun hit le i taluf mese na’ko Neno Anan In aon. ²⁶ Leka hi mito’ kais hi mo’e sanat. Kais hi mito’ talan te manas antes. ²⁷ He kaisa nitu napeni sona’. ²⁸ Atoni le nabak, kais in nabak anteni. Leko in anmepu matani ma anmo’e mepu alekot neki in niman. Onke te in napeni mnahat ma anbati neu amamu’it sin. ²⁹ Kais hi mipoitan uab amle’ut na’ko hi fefam. Mes hi mi’uab meki a’at alekot, he nati’ atoni le natnin, sin napeni lasi alekot. ³⁰ Kais hi minukab Uisneno Ini Smanan Knino. Fun anmalak nalali ki neki Smanan Knino hem fani Uisneno Ini. Smanan Knino nane amsa anfain lasi bela nak neno fetis of nem neu ki. ³¹ So hi mibela lasi nek unu, nek matoes, nek to’as, lasi mabanat, lasi ma’akan ma ale lasi amle’ut bian. ³² Mes hi mahoe es nok es ambi lasi manekat, ma masako sanat es nok es, onle Uisneno ansako hi sanat natuin Neno Anan.

¹ Hi le i anah-anah Uisneno le In nek ki, es nane hi mo’e mituin Uisneno Ini heta. ² Hi moni nai ambi lasi manekat, onle Neno Anan Yesus amsa In nek kit, In na’tulu In aon on atnatas ma fuat le anfomeni ma anhalin Uisneno. ³ Hi to knino ki, es nane, kais anmu’i anbi ki lasi kake, lasi amolemut huma-huma ma lasi sinmakat, mateka amsa kaisa. ⁴ Onane amsa ale a’at ai uab poetelo, le luman ma ka ma’upa -- fun ale lasi i ka nalekof -- leko nesi uab tulu nekaf neu Uisneno. ⁵ Mumnau lek-leko lasi i, atoni anmo’e lasi kake ai mapaisa, atoni le anmo’e lasi amle’ut ai atoni sinmakat ma apalu’ -- fun ale mo’et onane papmese amsa on luli besa neu le’u --, atoni nane ka napenif pa’ ma nama anbi Neno Anan ma Uisneno Ini plenat. ⁶ Kais atoni anfuil ki neki a’at ma uab luman. Fun ale lasi nane neki to’as Uisneno neu atoni le ka natuin fa In. ⁷ Es nane te kais hi mimnono mok atonin masaf nane. ⁸ Namneo afi hi mesokan ki mes muni i hi meusine ki ambi hit Usi. Es nane hi moni nai on anah-anah meusine. ⁹ Fun meusine nane napoitan lasi alekot, lasi amneot ma amnonot neu Uisneno. ¹⁰ So hi mami mihin sa’ le Usi anlomi. ¹¹ Kais hi mituin atonin le anmo’en lasi mesokan le ka ma’upa fa. Mes him etun mo’et nane mat-mat. ¹² Fun ale lasi le sin anmo’e nani anbi bale tolo’, kalu he na’uab nani of namaebok. ¹³ Mes ale lasi le natonon mat-mat of mamnita, fun ale lasi nane natonon anbi meusine. ¹⁴ Es nane anetun nani nak, "Atupas him be’ nai ma amfen nai mi’ko amates ma Neno Anan of antana ki." ¹⁵ Es nane him panat nai he hi moni onme. Kais hi moni on atoni amonot, mes hi moni on atoni ahinet. ¹⁶ Him panat nai ale leku manuan, fun batan i batan amle’ut. ¹⁷ Es nane kais hi mono, mes hi mami nai he mihin Uisneno In lomin. ¹⁸ Ma kais hi mauf tua, fun tua nane neki lasi amle’ut neu ki. So nahenu ki neki Smanan Knino. ¹⁹ Ma hi mi’uab es nok es meki sit knino unu ma sit pules ma sit knino. Him si ma mi’ba neu Uisneno meki hi nekam oke. ²⁰ Mitulu hi nekam piut anbi ale lasi neu Uisneno, hit Ama, anbi Neno Anan hit Usi In kanan. ²¹ Hi mibaunom es neu es nok amtaus neu Neno Anan. ²² Hoi fenai, mubaunom neu ho mone onle mubaunom neu Uisneno. ²³ Fun nai mone nane nakaf neu in fe on Neno Anan nakaf neu tolas knino. In kun es namonib aof. ²⁴ Es nane onle tolas knino nabaunon neu Neno Anan, onane amsa fenai nabaunon neu in mone anbi ale lasi. ²⁵ Hoi nai mone, hom nek ho fe onle Neno Anan In nek tolas knino ma natulu In aon neu tolas knino nane. ²⁶ Neno Anan anmo’e onane he naknino tolas knino neki In noina, ma natuin su oe, he nati’ namuni In nana’at sin neu Uisneno. ²⁷ Onane te In nahakeb tolas knino anbi In matan nok apinat, ma ka nok fa kobe ai lasi amle’ut sa’. ²⁸ Onane amsa nai mone mes in nek in fe onle in aon. Atoni le in nek in fe in nek in aon amsa. ²⁹ Kan mu’if atoni le nato’an in aon. Mes in panat ma anpaloli onle Neno Anan anpaloli tolas knino. ³⁰ Fun hit atfani lokif taluf na’ko Neno Anan In aon. ³¹ Fun antui nani anbi Sulat Knino nak, "Es nane te, atoni mes nasaitan in amaf ma in ainaf ma namesbon nok in fe ma sin nua sin anfani aof mese." ³² Lasi tolo’ i naek kun, mes au u’uab nane antom neu lasi mafutus Neno Anan nok tolas knino. ³³ Mes lasi i antom neu ki amsa, so ale nai mone a’nek in fe onle in aon ma so ale fenai antola in mone.

¹ Hoi anah-anah, hi mitnin neu hi ama ma hi aina anbi Neno Anan, natuin lasi mes onane. ² Hi miusi hi ama ma hi aina - nane plenat matani na’ko Uisneno, onle anba’an nani nak, ³ he nati’ hi mipeni ua alekot ma ua mnanu anbi pah pinan. ⁴ Ma neu hi amaf-amaf, kaisa hi mi’koke hi anhenu neu lasi to’as, mes minoina sin mek Uisneno In lasi noina ma In fainekat. ⁵ Hoi ale ate, hi mitnin hi tuan nok amtaus ma lilitais ma nek muti onle hi mitnin Neno Anan. ⁶ Kais al anbi sin matan neu he miminab sin nekan. Mes on Neno Anan In ate ki, hi mitnin Uisneno In lomin meki hi nekam oke. ⁷ Hi minaoba hi tuthaes onle atoni le antuthae Usif tunan ma kan tuthae fa atoni pah pinan. ⁸ Hi mihin, nak ale atoni, he ate ka, ai he ao sona ka, kalu in anmo’e lasi alekot, in of ansimo seunbanit na’ko Usif tunan. ⁹ Mes neu hi tuan-tuan, hi mo’e onane amsa neu hi ate sin. Kais him sali sin meki salit amle’ut. Mimnau nak hi ma hi ate sin, anmu’i Usif mese, esle Usif tunan abit neno tunan. In kan betif humaf. ¹⁰ So him fani atoni abe’it meki matani le hi mipeni na’ko Usif tunan In kuasat. ¹¹ Him pake bale manuat le Uisneno anfe ki he nati’ him be’u Nitu in lisan apenut. ¹² Hit kat mabe’u fa tok atoni pah pinan, mes hit mabe’u tok santuaf ini plenat ma in kuasat ma ana’ plenat mesokan. Ma hit mabe’u tok ale smanan nitu abit neno tnanan ai abit aileti. ¹³ Es nane te hi maiti bael manuat Uisneno, he nati’ hi mabe’u ambi neno amle’ut nane. Oke te him hake mibala, leka hi misopu lasi mabe’ut nane. ¹⁴ Onane te him haek nai! Hi mi’futu hi tnanam meki lasi amneot, him tainus sobalu besi lasi amneot. ¹⁵ Hi mipenhae meki nek lomif hem etun Beno Alekot ma halan nekaf. ¹⁶ Ambi ale lasi i hi maiti ben besi tika nek ateb knino. Fun hi meki nek ateb knino nane hem fu mimate ale santuaf sin asanef aklahat. ¹⁷ Ma amsimo lasi honis on soeb besi ma a’an Uisneno on suni Smanan Knino. ¹⁸ Hi mo’e ale lasi nane anbi onen totis ma amtoti tuntakus na’ko Uisneno. Him onen toti bi ale leku ambi Smanan Knino ma ambe’ nai ambi hi onen totis nane. Him onen toti piut ma mitnat ale to Uisneno. ¹⁹ Him onen toti neu kau amsa he nati’ bi leku le au umolok, Uisneno anfe kau a’at amneot. Ma he nati’ au etun Beno Alekot in lasi tolo’ ka nok fa amtaus. ²⁰ Natuin Beno Alekot nane, au fani haef le tomas i anbi o’of. Him onen toti he nati’ au umolok antom Beno Alekot nane ka nok fa amtaus, onle au mes he umolok. ²¹ Nai Tikhikus, hit bae manekat ma atuthaes aki’at anbi Usif tunan In mepu, of ane’ut ki ale lasi antom neu kau ma au mepu. ²² Es nane au sonu in net neu ki, he nati’ hi mihin ale lasi le antom neu kai ma he nati’ in halin hi nekam. ²³ Halan nekaf ma manekat nok nek ateb knino na’ko Uisneno, Amaf ma na’ko Usif Yesus Neno Anan neu ki alki. ²⁴ So Uisneno anfe tetus neu ki alki le him nek hit Usif Yesus Neno Anan meki lasi manekat le ka namle’u nitaf.