KOLOSE

KOLOSE

¹ Neu bae benu to knino anbi Kolose le nekan na’ki ma namesbok nok Neno Anan. Na’ko Neno Anan Yesus In haef Nai Paulus, le anlek nani natuin Uisneno In lomin ma hit bae Nai Timotius. ² So tetus ma aomina na’ko Uisneno, hit Ama, neu ki ala ki. ³ Hai mitulu nekam neu Uisneno, hit Usif Yesus Neno Anan, In Amaf, anbi onen totis piut-piut neu ki. ⁴ Fun haim nen milali antom hi nek palsait anbi Neno Anan Yesus ma hi lasi manekat neu ale to knino. ⁵ Hi mo’e ale lasi nane, natuin lasi afnekat le Uisneno naloitan nani neu ki anbi neno tunan. Him nen milali lasi afnekat nane, leka Beno Alekot na’ko Uisneno natiaba nalali neu ki. ⁶ Beno knino nasitbon neu pah pinan funam natef, ma atoni anmoni natuin beno nane, onle hi moni nok tetus na’ko neno him nen Uisneno nek mamun ma minaoba mani nok amneot. ⁷ Hi mihin lasi nane na’ko Nai Epafras, hai bae manekat anbi mepu. In on Neno Anan athutaes aki’at le anmepu neu ki. ⁸ In es an’ eut kai amsa neu lasi manekat le Uisneno anfe neu ki. ⁹ Es nane te, na’ko neno le haim nen lasi nane, haim onen toti piut neu ki. Haim toti neu Uisneno he nati’ Smanan Knino anfe ki lasi hine, he nati’ hi mihin lek-leko Uisneno In lomin. ¹⁰ Oke te him tam ota ambi Uisneno In human ma mituin In lomin anbi ale lasi. Ma hi milile in fuan anbi ale meup alekot ma of ansato ki amsa hi lasi hine neu Uisneno. ¹¹ Kuasat na’ko Uisneno apinat anhatani ki anbi ale lasi he nati’ him sutai ale sa’ nok seusabat ma nek malinat, ¹² ma tulu nekaf neu hit Ama. Fun Amaf nane es anmo’e ki hem fani to tafa plenat meusine he mibua mok to tafa Uisneno bian. ¹³ In nafetin kit na’ko kuasat mesokan ma natam kit anbi In Anmone bi’an Ini plenat. ¹⁴ Anbi In hit tapeni fetis ma sako sanat. ¹⁵ Neno Anan on humaf ma masaf mamnita na’ko Uisneno le ka mamnita; Neno Anan on Anmone naek, nesin ale sa’ le Uisneno anmo’e nalali. ¹⁶ Fun natuin In, Uisneno anmo’e ale sa’ abit neno tunan ma abit pah pinan, ale sa’ le mamnita ma ka mamnita. Onane amsa ale smanaf le anmui kuasat ma le naplenat. Fun anmo’e ale sa’ natuin Neno Anan ma neu Neno Anan. ¹⁷ Nahunu na’ko ale sa’ anhake, Neno Anan anhake nalali. Ma natuin In amsa ale sa’ anhake, anbi sin balan mes-mese. ¹⁸ In anfani nakaf neu aof esle tolas knino. In es An mone naek, le anfen nahun na’ko amates, talan te In ahunut kun anbi ale sa’. ¹⁹ Uisneno anlomi he nati’ ale sa’ le mapeni anbi Uisneno, mapeni amsa anbi In Anmone. ²⁰ Ma natuin In Anmone Uisneno anmo’e ale sa’ hen mafutu anfani nok In, ale sa’ abit pah pinan, ma abit neno tunan. Uisneno anmo’e lasi nane natuin In Anmone anmate anbi hau nehe. ²¹ Hi amsa afi mi’lo Uisneno ma mimusu mok In ambi hi nekam ma hi tenab on nalilon anbi hi mo’et asanat. ²² Muni i Uisneno anhalan nafani ki anbi Neno Anan In ta’un pah pinan natuin lalan maten. Nok lasi nane In nahakeb ki knino anbi Uisneno In human ka nok fa kobe ma ka nok fa lahi. ²³ Es nane te, hi mes amsutai ambi nek ateb knino, him hake mi’ki ma kais mibeko. Kais hi maen mi’ko lasi afnekat Beno Alekot, le him nen milali ma le anetun nalali anbi pah pinan. Ma natuin lasi nane, au Nai Paulus, au fani atuthaes neu Beno Alekot nane. ²⁴ Muni i au malin fun au sutai mane’at natuin hi. Au sutai lasi mane’at eki au aok, he nati’ utisi lasi mane’at le Neno Anan mes hen sutai nani neu In aon, esle tolas knino. ²⁵ Au fani tolas knino in athutaes natuin mepu le Uisneno nana’at nani neu kau; he utiaba In a’an ok-oke neu ki. ²⁶ Beno knino Uisneno le natolo’on na’ko eke neu eke ma na’ko batan neu batan, mes muni i nalilon neu In to knino. ²⁷ Uisneno anlomi hen etun In lasi tolo’ nane, In mu’in ma In kan apinat neu ale uf-uf bian. Lasi tolo’ nane nak: Neno Anan anbi ki, nane nak of hi mipeni pa’ ma nama anbi Uisneno apinat. ²⁸ Haim etun Neno Anan neu ale atoni. Haim fainek ma minoni sin meki ale lasi hine ma amtopu sin neu Uisneno on atoni naek anbi mo’et knino le namesbon nalali nok Neno Anan. ²⁹ Es nane te au uhaebok ma au autnok nok ale be’it natuin In matanin, le anmepu nok matani anbi kau.

¹ Au lomi he nati’ hi mihin, lasi le au autnok in mafena onme natuin hi ma natuin sin le abit Laodikia ma neu sin alsin le sin fe ka nahin kau fa. ² So sin napeni lasi malinat ma sin anfani mese anbi lasi manekat. Onane te sin napeni ale mu’in ma lasi hine ma nahin Uisneno In lasi tolo’ nane lo Neno Anan kun. ³ Fun Uisneno In lasi hine ma keon natolo’on anbi Neno Anan. ⁴ Au eut ki lasi i, he nati’ kais anmu’i atoni le namonob ki neki a’at ma uab aminat. ⁵ Maski au ka haumak ki, mes au smanak nok ki piut; ma au it nok malinat hi monim ma hi nek ateb aki’at anbi Neno Anan. ⁶ Him simo milali Neno Anan Yesus, hit Usif. Es nane te hi moni mibala ambi In. ⁷ So hi mi’ba anbi In ma nafena ki anbi In. So him hataniom anbi nek ateb knino, le nanoni nalali neu ki ma so hi nekam nathoe nok utulu nekaf. ⁸ Him pantom nai, he nati’ kais anmu’i atoni le nalosib ki neki nek hine pah pinan le in lasi luman ma neki lasi moel. Ale lasi hine nane ka natuin fa Neno Anan, mes natuin lasi noina nakakoba ma natuin ale smanaf pah pinan. ⁹ Fun Uisneno natua anbi Neno Anan, anbi In ta’un mansian. ¹⁰ Ma natuin anmoni namesbon nok Neno Anan, anfe ki amsa monit le nahenu. Fun Neno Anan nakaf neu ale smanaf le anmui kuasat ma le naplenat. ¹¹ Fun namesbon nok Neno Anan, anheli nalali ki, ka neki fa helit le anmo’e natuin mansian, mes neki helit le anmo’e natuin Neno Anan, le nafetin ki na’ko kuasat sanat. ¹² Fun ansub ki nok In anbi su oe ma nafena ki amsa ambi In. Fun hi nekam nateb knino neu Uisneno In kuasat, le nafena Neno Anan na’ko amates. ¹³ Afi hi mate natuin hi mo’et tanhais ma natuin kan heli ki fa. Mes Uisneno namonib ki nok Neno Anan, leka Uisneno ansako nalali hi mo’et tanhais. ¹⁴ Ma nose naneku hit sul tusa, le anmo’e nani neki plenat mafena. Natuin ankus hit sul tusa, anbi hau nehe, Uisneno nait naneku ale hit mo’et tanhais. ¹⁵ Neno Anan nafetin kit na’ko ale smanaf le naplenat ma anmu’i kuasat. Oke te nahakeb sin on atoni le napene ma ankiso In lasi mnisat neu sin. ¹⁶ Es nane te kais atoni nasanab ki antom lasi mnahat, ai lasi mninut, ai antom neno naek, ai funan le fe anbol ma kuke, ai antom Neno Snasat. ¹⁷ Fun ale lasi nane anfani lasi klile neu ale lasi le he natonon anbi neon amnemat, es Neno Anan kun. ¹⁸ Kais atoni nasanab ki anbi hi lasi mabe’ut, le in asafanu ma nabaun in aon ma naluli ma nabes neu ahake neno tunan. Atoni nane sin nanaebok natuin lasi mnitas. ¹⁹ Ma sin ka na’ namepan fa Neno Anan le anfani nakaf neu aof; aof nane matuntakun ma anmafutun fani mese natuin kini ma keot ma kanuf-kanuf le anmoni natuin Uisneno In lomin. ²⁰ Hi maet milali mok Neno Anan ma nafetin ki na’ko ale smanaf pah pinan. Nansa’es hi mina’at hi aom neu ale lekat huma-huma onle hi fe moni ambi pah pinan nak: ²¹ kais ampoe i, kais amtamis nane, kais amo’no i. ²² Ale lasi nane antom neu sa’ le of namle’u le anmo’e nani neki lekat ma noina pah pinan. ²³ Namneo, ale lekat nane nahenu nok nek hine, anlomi he naluli ma nabes neu ahake neno tunan, nabaun sin aon ma anhamu’i sin aon. Mes nane ka ma’upa fa, neu he naneku sin nek sinmakat pah pinan.

¹ Es nane te, kalu nafena nalali ki nok Neno Anan, so hi maim lasi le anbi neno tunan, le Neno Anan esan, antunon anbi Uisneno aonbian ne’u. ² Mitenab nai neu lasi le anbi neno tunan, kais mitenab neu lasi le anbi pah pinan. ³ Fun hi maet milalien ma hi monim na’tolo’ nok Neno Anan anbi Uisneno. ⁴ Hi monim nane es Neno Anan, leka In nalilon, of hi amsa mililom mok In anbi apinat. ⁵ Mimate nai anbi hi aom taos ma mo’et pah pinan, esle lasi kake, lasi amolemut, nek maputu, nek lomif neu amle’ut, ma lasi sinmakat le papmese nok luli besa neu le’u. ⁶ Ale lasi nane nafena to’as Uisneno (neu ale atoin amo’e amle’ut sin). ⁷ Afi hi amsa mo’e mituin ale lasi nane leka hi fe moni ambin. ⁸ Mes muni i hi mes ampolin ale lasi i, esle to’as, maunu, nek amle’ut, si’ut ma akan. Ma ale uab amle’ut le anpoi na’ko hi fefam. ⁹ Kais hi mipoibom es neu es fun hi mibela milali atoni mna nok in taos in mo’et. ¹⁰ Ma him fani atoni fe’u le nafe’un ki piut-piut he mipeni lasi hine amneot natuin Apakaet ma Amo’et In human. ¹¹ Anbi lasi i kan mu’in tenif atoni Yunani ai atoni Yahudi, atoni maheli ai atoni ka maheli, atoni Barbar ai atoni Skit, ate ai atoni ao sona. Fun Neno Anan In kun ale sa’-sa’, Neno Anan namesbon nok sin ok-oke! ¹² Hi on Uisneno In to mabeti. In nek ki ma naknino ki. Es nane te hi milile lasi manekat, lasi mahoen, nek baun, nek aklati ma seusabat. ¹³ Hi maseusaban es neu es, masakon sanat es neu es leka anmu’i atoni le nabela nek to’as neu es. Fun onle Usif ansako hi sanat, hi amsa mes mo’e onane. ¹⁴ Ma anbi lasi nane ok-oke lasi manekat anfani on tain futus le anfut nameseb ki ma nanokab ki anbi ale sa’. ¹⁵ So Neno Anan In halan nekaf naplenat hi nekam, fun natuin lasi nane Uisneno anboin ki hem fani aof mese. Es nane te hi mitulu hi nekam nai. ¹⁶ So Neno Anan In a’an nabala anbi hi nekam ma anfe ki tetus nok athoes. So hi moni ma mafainek es nok es meki lasi hine. Ma amsi nai meki sit knino unu ma sit pules ma sit knino, he mitulu hi nekam neu Uisneno. ¹⁷ Ma ale sa’ le hi mo’e meki uab ai mo’et, hi mo’e nai anbi Usif Yesus kanan; ma mitulu nekam neu Uisneno, hit Ama natuin Yesus. ¹⁸ Hi fenai-fenai, so hi miusi neu hi mone onle hi mo’e mani anbi hit Usif. ¹⁹ Hi atoni amafet, so him nek hi fenai sin ma kais mimaunun sin. ²⁰ Hi anah-anah, so mituin hi ama ma hi aina sini plenat anbi ale sa’, fun nane lasi amasat anbi hit Usif. ²¹ Hi amaf-amaf, kaisa mimenab hi anhin sin nekan, he nati’ kais sin nekan na’oni. ²² Hi ate-ate, so mituin hi tuan le anbi pah pinan i anbi ale lasi. Kais al anbi sin matan, neu he miminab sin nekan, mes nok nek muti fun hi mimtaus Usif tunan. ²³ Ale sa’ le hi mo’e, hi mo’e mani meik nekam oke, onle hi mo’e neu Usif tunan ma ka neu fa mansian. ²⁴ Hi mihin, nak of him simo pa’ ma nama’ na’ko Usif tunan le naloitan nani on baen neu ki. Neno Anan nane tuan ma him fani ate neu In. ²⁵ Sekau le anmo’e sanat, in of ansutai kun in sanat nane, fun Usif tunan kan betif humaf.

¹ Hi tuan-tuan, so hi mo’e amneot neu hi ate sin. Mimnau, hi amsa a’ mu’i tuan anbi neno tunan. ² Hi malan ambi onen totis neu lasi nane, ambe’ nai nok utulu nekaf neu Uisneno. ³ Him onen toti neu kai amsa, he nati’ Uisneno nasoitan eno neu ki; he nati’ hi mimolok antom Neno Anan In lasi tolo’ knino. Natuin lasi nane natam kau anbi o’of. ⁴ Onane te au eut ani, onle anlek nani neu kau. ⁵ Hi moni nok nek hine neu ale atoni ka apalsait ma him panat ale leku nok alekot. ⁶ So ale hi uab nahenu nok manekat ma miminab ale nekaf. Ma hi mihin he mitae ale atoni onme. ⁷ Hit bae manekat, ate aki’at ma bae ameput anbi hit Usif, Nai Tikhikus, of aneut ki ale lasi le antom neu kau. ⁸ Au sonu in net neu ki, he nati’ hi mihin ale lasi le antom neu kai ma he nati’ in halin hi nekam. ⁹ Au sonu in nok hit bae aki’at ma manekat le hi es Nai Onesimus. Sin of aneut ki ale lasi le anbol neu kai anbi i. ¹⁰ Nai Aristarkhus le antam nok kau anbi o’of ma Nai Markus, le Nai Barnabas in, baef sin sonu tabe neu ki, -- him simo milali hanaf neu Nai Markus, le he net neu ki, nati’ him simo in nok alekot -- ¹¹ ma Nai Yesus le nakhata In kanan Nai Yustus, in amsa ansonu tabe neu ki. Na’ko ale atoni Yahudi le anpalsai neu Usif Yesus, al sin teun sin es anmeup nok kau neu Plenat Uisneno. Sin es anfani ahalinat neu kau. ¹² Nai Eprafas ansonu tabe neu ki. In amsa na’ko hi. In anfani ate neu Neno Anan Yesus. In anonen toti neu ki, he nati’ him haek mi’ki on atoni neka teme le anpalsai ale sa’ le Uisneno anlomi. ¹³ Au saksi antom in, fun in nahaebon ma napusebon neu ki ma neu ale atoni anbi Laodikia ma Hierapolis. ¹⁴ Hit bae manekat Dokter Nai Lukas ma Nai Demas ansonu tabe neu ki. ¹⁵ Mitiaba hai tabe neu bae knino anbi Laodikia; ma neu bi Nimfa amsa nok tolas knino le anbi in ume. ¹⁶ Leka ansoi nalali sulat i neu ki, hi maim lanan he nati’ ansoi nani amsa neu tolas knino anbi Laodikia. Ma sulat le ansonu neu Laodikia ansoi nani neu ki amsa. ¹⁷ Ma him etun Nai Arkhipus mak, "Mumnau, he nati’ mepu le hom simo anbi Usif, he munaoba mani nok alekot." ¹⁸ Au Nai Paulus, au sonu tabe neu ki. Fef seon i au tui kuk eik au nimak. Mimnau kau, au fe bi o’of. So Usif anfe tetus knino neu ki alki.