2 TIMOTIUS

¹ - ² Au anah Nai Timotius le au nek ani! Au Nai Paulus, au tui sulat i neu ko, ma ufnekan he nati’ Uisneno hit Ama ma hit Usif Neno Anan Yesus anfe tetus, amnaut ma halan nekaf neu ko. Natuin lomin Uisneno, naiti kau he fani haef knino Neno Anan Yesus ma ansonu kau he etun lasi amonit le Uisneno anba’an nani. Lasi amonit nane hit simo fun tamesbok tok Neno Anan Yesus. ³ Au utulu nekak neu Uisneno, le au tuthae nok nek amnono knino onle afi au babfini anmo’e. Au utulu nekak piut neu Uisneno ma umnau ko anbi onen toti fais manas. ⁴ Au umnau ho nek susal. Es nane au lomi he ue’ku ko he nati’ namneo-namneo au nekak anmalin. ⁵ Au umnau ho nek palsait amneot neu Neno Anan, papmese onle ho bei bi Lois ma ho aina bi Eunike sin palsait. Ma au uteb ho amsa ampalsai onle nane. ⁶ Es nane au umnauba ko, he nati’ ho mumonib sankolan knino le Uisneno anfe nalali neu ko anbi neno au aiti nimak neu ko. ⁷ Fun Smanaf le Uisneno anfe neu kit, ka Smanaf le anmo’e kit het fani amtaus. Mes Smanan Knino nane anmo’e kit het fani abe’it, nehenu nok manekat ma nabe’i atpanat aok. ⁸ Es nane te kais mumaebom neu lasi saksit antom hit Usif ma kais hom nek mae amsa neu kau, le au tam o’of natuin In. So ho mok matani na’ko Uisneno, amsutai mok kau neu Beno Knino nane. ⁹ Uisneno namonib kit ma anboin kit het fani In to. In anmo’e lasi nane ka natuin fa sa’ le hit mepu, mes natuin In bekot ma In amnaut. In anfe nalali kit In amnaut natuin Neno Anan Yesus nahunun neno fe ka najalib fa pah pinan. ¹⁰ Ma muni i, Uisneno nalile In nek mamun neu kit natuin hit Kesel Afetin Neno Anan Yesus ankoenon nem. Natuin Beno Knino, Yesus anbe’u kuasat maten ma neki honis le ka namle’u nitaf. ¹¹ Natuin etus Beno Knino nane Uisneno naiti kau he fani haef knino ma anoni ai kulu. ¹² Es nane te au sutai ale lasi i, mes au ka nek mae, fun au uhin namneo sekau esle’ au palsai. Ma au uhin, nak sa’ le In anfe nalali neu kau, of In anpanat nani amsa talan te Neno Amsoput. ¹³ Mutuin namneo-namneo noina amneot le au fe ulali neu ko. Mes so hom na’ mumepan neu palsait ma manekat le anfani hit ini fun tamesbok tok Yesus Neno Anan. ¹⁴ Natuin tuntakus Smanan Knino le anmoni anbi kit, so hom panat lek-leko lasi ma’upa le anfe nalali neu ko. ¹⁵ Ho muhin nak ale atoni anbi pah Asia, sin naen nasaitan kau, anbi sin amsa Nai Figelus ma Nai Hermogenes. ¹⁶ Mes Nai Onesiforus in ume nanan hae fauk-fauk anhalin au nekak. So Usif tunan nalile manekan neu sin. Maski au bi o’of Nai Onesiforus in kan mae fa neu au lasi nane. ¹⁷ Leka in nem ante pah Roma in naim kau tal na’eku nok kau. ¹⁸ Anbi Efesus in anbab kau anbi lasi namfaun. Ho muhin mulali ale lasi nane. So Uisneno nalile In nek mamun neune, bi neno Uisneno tunan nafek to pah pinan sin lasi.

¹ Es nane te, koi au anah Nai Timotius! Hom hataniom natuin nek manuan le anfe nani neu kit, natuin hit tamesbok tok Neno Anan Yesus. ² Lasi le hom nen mulali na’ko kau ambi saksi namfaun sin natan, ho muna’at mani neu ale atoni le hom palsai ma le sin mabe’i he nanoina atoni bian. ³ Ho mes amsutai on solalus Neno Anan Yesus le na’ki. ⁴ Solalus le fe nanaoba in mepu, in ka natenab fa lasi huma-huma neu in monin, fun in lomi hen halin in solalus nakaf. ⁵ Atoni le antam anbi lasi bae ai lasi foti, in ka nabe’i fa he napeni sobe makana on amnisat kalu in ka natuin fa lasi bae nane in lekat, ⁶ Atoni ameup lene le anmeup matani in mes antamis nahun in lene afan. ⁷ Hom panat nai lasi le au eut ulali i, fun Uisneno of anfe ko lasi hine he muhin ale lasi nane. ⁸ Ho mumnau lek-leko lasi i: Beno Knino le au etun nane, beno antom Yesus Neno Anan, Nai Daud in sufan; In kun Neno Anan le anfen anfan na’ko amates. ⁹ Natuin au etun Beno Knino nane, au sutai mane’at; ma sin anfutu kau on atoin abulalut. Mes Uisneno In a’an nane ka mafutu fa. ¹⁰ Es nane au sutai ale lasi nane natuin ale atoni le Uisneno anbeti nalali sin, he nati’ sin amsa napeni honis natuin Neno Anan Yesus nok apinat nabal-bal. ¹¹ Tebes namneo a’at i, "Kalu hit atmate tok In, hit of atmoni amsa tok In. ¹² Kalu hit hataniok tabala, hit of taplenat amsa tok In, kalu hit tite In, In amsa of antite kit. ¹³ Kalu hit ka taki’af, In na’ki nabala, fun In ka nabe’i he natotan In aon." ¹⁴ So ho mumnauba ale atoni antom ale lasi i. Anbi Uisneno human, amfainek sin he nati’ kais anmatoen antom uab huma-huma. Fun lasi nane kan tamaf ota mes al neki poetelo neu ale atoni le sin amnen ma natnin nani. ¹⁵ Hom hataniom he nati’ Uisneno anlomi ko on atoni le antam ota hen mepu neu Uisneno. Ma kais hom nek mae, antom ho mepu, mes ho munoina mat-mat ale lasi noina na’ko Uisneno. ¹⁶ Mu’lob ale uab molok le kan tamaf ota ma ka knino fa. Uab molok onle nane neki atoni neu amle’ut. ¹⁷ Lasi noina ale atoni nane natlakbon on men le’u. Anbi sin nane Nai Himeneus ma Nai Filetus. ¹⁸ Sin anbeo na’ko sin noina amneot ma ampoetelo ai ankunkalan atoni bian sin nek palsait. Sin na’uab nak, lasi hit atfen atfan na’ko amates anbol nalalien. ¹⁹ Mes sukit matani le Uisneno anmo’e nani ka nabeko fa. Anbi in fafon matui nak, "Usif tunan nahin In ini sin," ma "Atoni le na’uab nak in Usif tunan Ini so in nasnasab in mo’et amle’ut." ²⁰ Anbi ume naek mese hit tapeni bale huma-huma. Bale’ bian anmo’e na’ko mnatu ai noin muti, mes bale bian anmo’e na’ko hau ai najan. Bale’ bian anpake neu salit amasat, ma bale’ bian anpake neu salit ka alekot. ²¹ Atoni le naknino in aon na’ko lasi amle’ut, atoni nane of mapake neu salit amasat. In anfani bale alekot le antam ota neu in tuan. Oke te naloitan nani neu mepu alekot. ²² Es nane te ho mu’lo mu’ko atoin munif sin lasi malinat. So ho moni mutuin Uisneno lomin, hem palsai neu In ma he mu’i manekat ma halan nekaf ambi nekam. Ho moni onane mok sin le ansakoi neu Uisneno nok nek muti. ²³ Kais mok ambi matoes atoni amonot le ka nahinef sa’-sa’. Fun ho muhin, nak ale lasi nane neki matoes. ²⁴ Atoni le anmepu neu Usif tunan in ka nebe’i hen matoe. So in fef leko neu ale atoni, ma nanoina atoni nok alekot ma seusabat. ²⁵ In mes antopu ma anhel ale atoni nakfatu nok nek aklati. So Uisneno anfe mainuan neu ale atoni nane ha nati’ nateunok na’ko sin sanat ma nahin lasi noina amneot. ²⁶ Nok lasi nane te, sin nekan nahin anfan, ma nafetinok na’ko Nitu ini le’o le anfutu nalali sin ma naseke sin he natuin in lomin.

¹ Mihin nai: Bi neno-neno amsoput of anmu’i susal namfau. ² Atoni pah pinan of sin nek kun sin aon, anlomi hen fani atoni amu’it, nanaebok ma nalosibok. Sin na’uab nale’un atoni in kanan, naspitiok neu amaf ainaf, kan seunbanin nahinef alekot, kan lomif lasi Uisneno. ³ Sin kan lomif lasi manekat, kan lomif halan nekaf, anlomi hen tek nale’un atoni in kanan, kan panat nahin in aon, na’seke atoni bian, kan lomif lasi alekot. ⁴ Sin lomi hen aneb, ka natenab fa mnanu ma nanaebok, sin lomi he natuin sinmakat pah pinan ma ka natenab fa Uisneno. ⁵ Sin ana’safanu nanaoba luli besa knino mes sin tite luli besa nane in matanin. Hi mi’lo mi’ko atoni nane sin. ⁶ Bian anbi sin antam neu ume-ume, ma anfuli ale bife nek aklati le nahenu nok sanat, ma lasi sinmakat huma-huma naplenat sin aon. ⁷ Bife nane sin antoti he nanoina sin mes sin ka nahin nitaf noina amneot na’ko Uisneno. ⁸ Onle afi Nai Yanes ma Nai Yambres le anlaban Nai Musa, onane amsa sin anlaban lasi noina na’ko Usineno. Sin lolen namle’u nalalien ma sin palsait namnoe nalalien. ⁹ Mes sin of ka napeni fa sa’ amsa, fun sin lasi mono nane mahine neu atoni ok-oke, onle Nai Yanes ma Nai Yambres amsa. ¹⁰ Mes ho mutuin mulali au noina, au taos au mo’et, ma au monit in salit. Ho mit mulali au palsait, au seusabat, ma au manekat ma au sutais. ¹¹ Ho mit mulali le anhamu’i kau ma au sutai ulali. Ho muhin ale sa’ le anbol neu kau anbi Antiokhia, ma anbi Ikonium, ma anbi Listra. Au sutai ale hamu’it nane mes Uisneno nafetin kau. ¹² Namneo ale atoni le hen moni anbi luli besa knino ma anmoni namesbon nok Neno Anan Yesus of ansutai mane’at. ¹³ Atoni abulalut ma aputal of anmo’e amle’ut piut. Sin putal atoni bian mes atoni bian of anputal sin amsa. ¹⁴ Mes neu ho Timotius, so hom na’ mumepan lasi noina amneot le hom sium mulali ma ho mumnau atoni le nanoina nalali neu ko. ¹⁵ Ho mumnau nak afi ho fe li ana ko ho muhin mulali Sulat Knino. Sulat Knino anfe ko nek hine he mupeni honis natuin palsait neu Neno Anan Yesus. ¹⁶ Ale tuis ambi Sulat Knino le Uisneno anetun nani, neki alekot neu he tanoina lasi amneot, he takain ma taleko le asanat, ma he tanoina mansian he nati’ anmoni natuin Uisneno lomin. ¹⁷ Nok Sulat Knino nane atoni le antuthae Uisneno nabe’i taloitan sin neu ale mepu alekot huma-huma.

¹ Neno Anan Yesus of ankoenon nem anteni neu pah pinan i he nafek ale atoni amonit ma amates sin lasi. Ma of In nanoebon nem on Kesel he naplenat. Es nane au toti neu ko anbi Uisneno ma Neno Anan Yesus In matan ak: ² So hom etun beno knino na’ko Uisneno nane, so hom panat nai ambi leku leko ai leku le’uf. So ho munoina sin mulile sin sanat ma amfe fainekat neu sin. ³ Fun leka In leku ante of ale atoni kan lomif hen simo noina amneot. Mes sin nabuaba anoni ai kulu namfau natuin sin lomin he nanoina ale lasi le naminab sin luken neki lasi le sin natnin nani. ⁴ Of sin sun sin luken neu lasi amneot ma antahan sin luken neu lasi nu’un kahahine. ⁵ Maski onane ho mes ampanat ho aom ambi lasi onme amsa. Malan ambi sutais, munaoba ho mepu on amneki Beno Knino ma munaoba ho mepu nok alekot on atuthes Uisneno. ⁶ Neu au aok, leku antelen au mate on fua tulu neu Uisneno. Ala kle’o anten of au usaitan pah pinan i. ⁷ Au utuin foti nok alekot, ma au tia foti in amsopun neu au nek ateb knino. ⁸ Ma tomas i sobe amnisat anpao kau. Bi Neno Amsoput, Usif tunan, alef lasi amneot of anfe baen nane neu kau fun au moni uleko ok Uisneno. Mes ka al fa neu kau, mes neu ale atoni le anpao Usif tunan he nanoebon nem nok nek amlilat. ⁹ Ho mami lanan he aum meu kau laba, ¹⁰ fun Nai Demas nao nasaitan kau natuin in nek pah pinan. In nao kun neu Tesalonika. Nai Krekes in nao neu Galatia ma Nai Titus in nao neu Dalmatia. ¹¹ Al Nai Lukas es nabala nok kau. Ho muman Nai Markus ma mokan nem neu i, he nati’ in bab kau anbi au mepu. ¹² Au lelu ulali Nai Tikhikus neu Efesus. ¹³ Kalu ho aum, meik kau au sobalu mnanu le nabala anbi Troas anbi Nai Karpus in ume. Meik kau au sultenu amsa nes-nesi sulat le anmo’e na’ko pasu. ¹⁴ Nai Aleksander, atoni ateis nit molo nane anmo’e lasi amle’ut namfau neu kau. Usif tunan of anseunbanin in mo’et nane. ¹⁵ Ho amsa ampanat ho aom na’ko in, fun in kan simof hit lasi noina. ¹⁶ Bi neno au utae lasi ahunut nane, katit fa atoni mese le hen bab kau; sin alsin naen nasaitan kau. Nati’ Uisneno kais nasanab sin anbi lasi nane! ¹⁷ Mes Usif tunan anhaek nok kau. In anfe kau matani talan te au etun beno knino nane, he nati’ ale atoni le kan tamaf nonot Yahudi sin natnin nani. Natuin lasi nane te nafetin kau na’ko aus neno in fefan. ¹⁸ Ma Usif tunan of nafetin kau na’ko ale salit amle’ut. In of neki kau nok aomina neu Ini plenat anbi neno tunan. Apinat neu In talan te nabal-bal! Amin. ¹⁹ Au sonu tabe neu bi Priska ma Nai Akwila ma neu Nai Onesiforus nok in ume nanan sin. ²⁰ Nai Erastus nabala anbi Korintus ma Nai Trofinus au usaitan anbi menas anbi Miletus. ²¹ Ho manap he aum meu kau nahunu na’ko neno oefat manikin. Nai Ebulus, Nai Pudes, Nai Linus, Nai Klaudia ansonu tabe neu ko; onane amsa bae benu bian. ²² So Usif tunan anhaek nok ko. So Usif tunan anfe ki tetus.