2 TESALONIKA

¹ Bae benu tolas knino abit Tesalonika, le anfani to Uisneno hit Ama ma Usif Yesus Neno Anan! Hai teun kai, Nai Paulus, Nai Silwanus, ma Nai Timotius, ² mifnekan he nati’ Uisneno, hit Ama ma Usif Yesus Neno Anan anfe tetus ma aomina neu ki. ³ Bae benu alki, hai mes mitulu nekam piut neu Uisneno natuin hi. Ma namneo hai mes amoe onane, fun hi nek ateb knino neu Neno Anan ansato piut ma hi lasi manekat es neu es namepan fin. ⁴ Es nane nansa haim pules ki ambi tolas knino Uisneno sin atnanan. Nok malinat hai mi’uab neu hi nek atahas ma aki’at anbi palsait neu Neno Anan anbi hamu’it ma sutais atnanan le him naben. ⁵ Anbi i Uisneno In lasi lefit amneot nalilon. Him sutai milali Pah Pinan Fe’u Uisneno, ma of him tam otahem tam meun. ⁶ Uisneno of anmo’e sa’ le amneot. In of anseunbanin hamu’it neu atoni le anhamu’i ki. ⁷ Ma neu ki le tomas i him sutai -- onane amsa neu kai -- Uisneno of anfe neu kai alekot bi neno Usif Yesus nalilon, ansanu na’ko neno tunan nok In ahake neno tunan sin le anmu’i kuasat, ⁸ ma nok ai le anpin In sanu nem hen hukum ale atoni le kan lomif he nahin Uisneno ma leka natuin fa beno knino antom Yesus hit Usif. ⁹ Ale atoni nane sin of ansimo plenat amle’ut nabal-bal ma anli’u napoitan na’ko Usif In matan ma na’ko apinat ma kuasat Usif tunan. ¹⁰ Leka In nanaoebon nem bi neno nane of ale to knino naliatas In ma ale atoni nek ateb knino namtausan In. Hi amsa of ambi to Uisneno nane sin atnanan, fun him palsai milali beno le hai mitiaba neu ki. ¹¹ Es nane haim onen toti piut neu ki, he nati’ Uisneno ankius ki on atam ota he mituin In han boin. So Uisneno nok In kuasat nahenu hi lomim neu mo’et alekot ma natis ale mepu le hi mo’e mani fun anpalsai neu Neno Anan. ¹² Onane te hit Usif Yesus maliatas natuin hi, ma hi amsa maliatas natuin Yesus fun hit Uisneno nekan alekot ma Usif Yesus Neno Anan.

¹ Neu hit Usif Yesus Neno Anan he nanoebon nem, ma neu lasi he nabuab kit he tamaika tok Usif, lasi i au toti matani neu ki. ² Kais hi nekam ana’kman ma kais hi nekam na’unu neu beno le aneut ki nak Usif Yesus In neno he nanoebon anfani nem antelen. Beno nane he na’ko lasi mnitas ka, ai lasi noina ka ai natuin sin nak haim tui onane ambi sulat le haim sonu neu ki. ³ Maski onane amsa kais es anfuli ki. Fun nahunun Neno nane he nem: Of anmu’i atoni le anhel koti na’ko sin palsait neu Neno Anan. Mansian Amle’ut, le anlek nani hen tam neu ai maputu of nalile in aon. ⁴ Nok lasi moko of in laban ma namaeb in aon neu ale sa’ le mansian nabes neun ai neu ale sa’ le mansian nok Uisneno teta. In antoko anbi Ume Uisneno ma ane’tun nak in Uisneno. ⁵ Ai him nikan ale alsi afe au eut ulali ki bi neno au fe ok ki ka? ⁶ Ma tomas i fe anmu’i le natau in; ma hi mihin lasi sa’ nane. Of bi leku le Uisneno anlek nani, Mansian Amle’ut nane of anbol. ⁷ Lasi abe’it le anmo’e amle’ut nane anmepu nalali nok a’tolo; mes fe natau nani. Of leka le natau nani nane naskotun, ⁸ Mansian Amle’ut nani nalilon. Leka Usif Yesus nanoebon nem, of In namate mansian amle’ut nane neki snasan le anpoi na’ko In fefan ma nale’un nane neki In apinat. ⁹ Amoe Mansian Amle’ut nane of in nem natuin nitu in mepu. Mansian Amle’ut nane anbol nok kuasat mese la naek. Of in mo’e lasi amkakat huma-huma, taka ma sanmakat le nahenu nok lasi penu. ¹⁰ Of in mo’e ale ela lisan amle’ut he nasekeb ale atoni le of namle’u. Of sin namle’un fun sin kan simof ma kan lomif beno amneot na’ko Uisneno le he neki honis neu sin. ¹¹ Onane te Uisneno anfe neu sin kuasat mese le nasekab sin, talan te of sin palsai neu sa’ le ka amneot. ¹² Oke te ale atoni le anlomi sanat ma kan palsai fe neu amneot nane of anhukum sin. ¹³ Bae benu manekat anbi hit Usif! Hai mitulu nekam piut neu Uisneno natuin hi, fun afi Uisneno anbeti nalali ki he namonib ki. Lasi nane anjali natuin sa’ le Smanan Knino anmepu anbi ki hem fani to Uisneno le knino ma natuin him palsai neu beno amneot na’ko Uisneno. ¹⁴ Natuin lasi nane Uisneno anboin ki natuin Beno Knino le haim etun neu ki he nati’ hi mipeni pa’ ma nama anbi Usif Yesus Neno Anan, In apinat. ¹⁵ Es nane him hake mi’ki nai, ma ampanat ale lasi noina le him simo na’ko kai, anbi a’at ma uab ai anbi sulat le haim tui neu ki. ¹⁶ - ¹⁷ So hit Usif Yesus Neno Anan, ma Uisneno hit Ama, anhalin ki ma anhatani hi nekam he nati’ hi mepu ma ametun lasi alekot. Fun Uisneno nek kit, ma natuin In nekan alekot anfe kit amaspetis ma afnekat alekot.

¹ Oke te, bae benu alki, him onen toti neu kai, he nati’ beno na’ko Uisneno nasitbon laba ma masimo nok alekot, onle afi anbol nalali neu ki. ² Him onen toti amsa he nati’ Uisneno namonib kai na’ko atoni amaufinut ma atoni amoe lasi amle’ut. Fun ale atoni ok-oke kan palsai fa neu beno na’ko Uisneno nane. ³ Mes Uisneno aki’at kun. In of anhatani hi nekam ma anpao ki na’ko amle’ut in tuaf. ⁴ Ma haim palsai neu hit Usi, fun hi mo’e sa’ le haim ba’an milali ki ma of hi mo’e piut. ⁵ So Usif tunan antopu hi nekam talan te hi mihin manekan Uisneno ma nek sutais le Neno Anan anfe ki. ⁶ Bae benu alki, nok kuasat Usif Yesus Neno Anan, hai miplenat ki he nati’ hi mi’lo mi’ko ale atoni apehet, ma le ka natuin fa lasi noina le haim fe milali neu ki. ⁷ Fun hi mihin hi mes mituin hai heta onme, natuin hi beno hai mok ki hai kam pehef. ⁸ Ma hai ka miahaf es ini mnahat lum-luman. Hai meup fai manas nok haet ma puse he nati’ kais amhafen es anbi ki. ⁹ Ka natuin fa hai ka mu’if hak hem toti he nati’ him tuntaku kai; mes natuin haim lomi hem fani heta neu ki. ¹⁰ Fun afi fe hai mok ki, hai mimnauba ki lasi i mak, "Atoni le kan mepuf, kais amfene he nah." ¹¹ Hai mimolok lasi i, fun haim nen nak anmu’i atoni anbi ki le anmoni nok pehe. Sin nahutbok nok atoni bian sin lasi, ma kan mu’if mepu mese le sin anmo’e. ¹² Nok kuasat Usif Yesus Neno Anan, hai miplenat ale atoni nane ma mimnauba ki, he nati’ sin mepu nok alekot ma nami mnahat neu sin aon. ¹³ Mes neu hi, bae benu alki, kais hi misnasan mo’et alekot. ¹⁴ Oni anmu’i atoni le kan lomif he natuin sa’ le hai mi’uab mani anbi sulat i, hi mitaka in human, ma kais mimnono mokan, he nati’ in anmae. ¹⁵ Kais him kiso in on musu, mes amfainek mani on hi bae. ¹⁶ Usif tunan nane uf neu hit lasi honis. So In anfe halan nekaf piut neu ki anbi ale lasi. So Usif tunan nok ki alki. ¹⁷ Han seon na’ko kau, Nai Paulus. Han seon i au tui kuk eik au nimak. I taka anbi ale au sulat sin. ¹⁸ So hit Usif Yesus Neno Anan anfe tetus neu ki alki.