2 PETRUS

¹ Bae knino le napeni nalali nek ateb knino le namas nok hai nek ateb knino. Yesus Neno Anan, le Uisneno ma hit Kesel Afetin le anfe nala i nek ateb knino nane neu kit fun In nanaoba sa’ le namneo. Sulat i na’ko Nai Simon Petrus, ate ma haef knino Yesus Neno Anan. ² So Uisneno anfe tetus ma aomina neu ki nok athoes, fun hi mihin Uisneno ma Yesus hit Usif. ³ Uisneno anpaek nalali In kuasat neno hen fe kit ale sa’ le hit lomi he nati’ hit moni nok luli besa. In nanaoba lasi i natuin hit tahin In le anboin nalali kit het naben In apinat ma In alekot. ⁴ Nok lasi nane Uisneno anfe kit ale tetus le matain le’uf ma ma’upa le In anba’an nalali. Nok ale tetus nane hi mifetnom mi’ko lasi sinmakat le nale’un pah pinan, ma hi mipeni pa’ anbi taos neno. ⁵ Es nane te, him hataniom namneo-namneo he nati’ hi nek ateb knino matuntaku natuin monit alekot. Bi monit alekot aon bian, hi mes amui lasi hine, ⁶ ma ambi lasi hine aonbian, hi amsa mes ampanat hi aom. Ma lasi ampanat hi aom in bian so hi amsa amhatani hi aom he malan mibei ambi ale sa’. Malan mibei ambi ale lasi in aonbian, hi amsa mes amoni mituin Uisneno lomin. ⁷ Ma moni mituin Uisneno lomin amsa mes naloitan nok manekat neu bae knino sin. Neis na’ko nane so him nek ale atoni ok-oke. ⁸ Ale lasi nane esle’ taos mo’et le anbi ki. Kalu ale taos mo’et nane anbi ki nok athoes, of hi maspeti ma mipeni afan, ma of hi mihin Yesus Neno Anan hit Usif nok alekot. ⁹ Mes atoni le kan mu’if taos mo’et onane, in matan anfolo; in kan kius nitaf ma in nikan nak in sanat-sanat ahunut ansakso nalali sin. ¹⁰ Es nane bae benu alki, amhataniom he nati’ han boin Uisneno ma In betis neu ki namep anfin. Leka hi mo’e onane of hi ka mitselam tenif. ¹¹ Natuin lasi nane of anfe mainuan neu ki he nati’ him tam meu plenat nabal-bal na’ko Usif tunan ma hit Kesel Afetin Yesus Neno Anan. ¹² Es nane te au umnauba ki piut neu ale lasi nane, maski hi mihin milali ma ampalsai neu beno na’ko Uisneno le him simo milali. ¹³ Leka au fe moni, au utnine so umnauba ki neu ale lasi nane. ¹⁴ Fun au uhin nak ka lob antenif of au usaitan pah pinan i, fun hit Usif Yesus Neno Anan anetun nalali neu kau. ¹⁵ Mes of au ami lalan, he leka au usaitan pah pinan i, hi mimnau ale lasi nane piut. ¹⁶ Leka haim etun ki hit Usif, Yesus Neno Anan, In Apinat ma In neno le hen koenon nem on Usif, hai ka mituin fa uab tutab mansian. Neno Anan In Apinat nane hai mit milali meki hai matam. ¹⁷ Haim bi nane leka In ansimo kan tola ma Apinat na’ko Uisneno hit Ama. Bi leku nane hanaf manena na’ko Apinat anesit, le nak neu In, "I Au Anmone le Au nek ani In halin Au nekak!" ¹⁸ Haim nen hanaf nane nem na’ko neno tunan, leka hai mok In ambi nu’af knino tunan. ¹⁹ Es nane te haim palsai nesi anteni neu beno Uisneno le mafefa knino sin anetun nani. Leko nasi kalu him panat beno nane, fun beno nane on paku le anpin anbi bale mesokan talan te neno anpe ma faif nome ansae anbi hi nekam. ²⁰ Mes nes-nesi so hi mimnau lasi i: Beno na’ko Uisneno antom ale lasi of of anbol, ka nabe’i hit taketi natuin hit hinek. ²¹ Fun kan mu’if atoni le natuin in lomin, nabe’i natiaba beno Uisneno antom ale lasi Le of anbol. Ale atoni nane Smanan Knino naplenat sin bi leku natiaba beno na’ko Uisneno.

¹ Bi neno afinit mafefa-mafefa apoiba anbol anbi to Uisneno atnanan, onane amsa kulu-kulu apoiba of anbol anbi ki. Sin of natam ale lasi noina ka amneot, le nale’un to. Ma of sin natotan amui kuasat le natulu In aon hen soi sin. Nok lasi nane of sin neki amle’ut neu sin aon, le of anbol neu sin laba. ² Maski onane atoni namfau of natuina kulu-kulu apoiba nane sin monin le mo’et nono-nono naplenat sin. Ma kulu-kulu nane sin mo’et of anmo’e atoni namfau hen tek nale’un Lanan Amneot le Uisneno anfe nani. ³ Fun sin koman ai anpalu, ale kulu apoiba nane of anpeo ki lasi nu’un le sin anmo’e kun he napeni osaf na’ko ki. Mes lefit le he natiaba kasat neu sin naloitan nalali, ma lasi amle’ut le anlek nalali neu sin anhat ma anpao sin. ⁴ Ale ahake neno tunan le anmo’e sanat amsa, Uisneno ka namautu sin he nafetinnok na’ko kasat, mes anpolin natam sin neu ai maputu in nanan. Ma natam sin neu bola mesokan he natau sin anbi nane talan te Neno Lef Lasi. ⁵ Onane amsa nok pah pinan batan ahunut, Uisneno ka nefetin nani fa na’ko kasat. Uisneno nasanut noe sako neu ale atoni le ka nahin Uisneno bi batan nane. Al namonib Nai Nuh nok atoni hitu bian, fun Nai Nuh ane’tun beno antom lasi honis le Uisneno anlomi nani. ⁶ Onane amsa Uisneno nale’un kot Sodom nok Gomora neki ai, he nati’ anfani leta neu ale atoni le ka nahin Uisneno bi batan amunit. ⁷ Mes Nai Lot napeni honis, fun in natuin Uisneno lomin; in sutai mane’at natuin ale mo’et ka alekot na’ko ale atoni le ka namtaus fa plenat. ⁸ Nai Lot atoni alekot nane, neno-neno in namaika anbi sin atnanan, ma in loi mafena anbi in nekan, natuin in nit sin mo’et amle’ut. ⁹ Es nane te, Uisneno nahin, hen fe honis neu ale atoni le natuin In lomin leka sin napenin lasi su’at. Ma Uisneno nahin he natau ale atoin amle’ut hen hamu’i sin bi Neno Lef Lasi. ¹⁰ Nes-nesi neu ale atoni le anmo’e natuin sin nek sinmakat amle’ut ma antek nale’un kuasat Uisneno. Ale kulu apoiba nane sin namoko’ok ma anhaunaebok talan te sin kan ti’as fa na’akan ale amonit anbi neno tunan amsa. ¹¹ Ale ahake neno tunan le anmatani nesi ma anmu’i kuasat na’ko ale kulu apoiba nane, sin ka na’uab fa amle’ut neu ale amonit apinat neki a’at kle’at anbi Uisneno human. ¹² Mes ale kulu apoiba nane, sin onle mu’it ka maneka, le nahoni sin neu hen heke sin ma anlolo sin. Sin ka natenab fa al, sin mo’e natuin sin nek tenab, talan te sin na’akan lasi le sin ka nahinef neki ale uab akle’at. Es nane natuin sin mo’et, of sin namle’u on mu’it alalu. ¹³ On seunbanit neu sutais le sin anmo’e’ nalali, of sin sutai mane’at. Neu sin, lasi le anhalin sin nekan esle’ anmo’e sa’ anbi manas neu he naminab sin aon. Leka sin antoko ma anbukae nok ki, sin le nane alahit ma amolemut fun sin mafun nok nek sinmakat. ¹⁴ Fun sin kan lenan fa mo’et asanat, ma sin nek malinat esle’ hen kiso bife akaket. Ma atoni le in palsait anlimae sin anfuli. Sin nekan antak anbi lasi akomat. Sin le nane atoni masukat ma male’at. ¹⁵ Sin ka nao natuin fa lalan mneo, es nane sin anseken. Sin nao natuin Nai Bileam, Nai Beor anmone in lalan, le anlomi he napeni noni na’ko in mo’et amle’ut. ¹⁶ Mes Nai Bileam napeni fainekat matani, natuin in mo’et amle’ut nane, leka in bikase luke mnanu amonot na’uab neki han atoni. Ma na’seke mafefa knino nane he nasnasab in mo’et amaunu nane. ¹⁷ Ale kulu apoiba nane, sin onle oe mata le anmeti, onle nipu le anin anfu neki. Uisneno naloitan nalali bale mesokan neu sin. ¹⁸ Sin anmo’e lasi amasat le luman kun. Sin anpake lasi kake he namofu ale atoni le fe nafetnok na’ko monit aseket. ¹⁹ Ale kulu apoiba nane sin anba’an lasi ao sona neu ale atoni nane, mes sin ana’etnok neu taos mo’et le nale’un mansian fun atoni le kan be’uf sa’es, in anfani ate neu le anbe’u in. ²⁰ Leka atoni nafetnon na’ko ale kuasat pah pinan le nahutab mansian fun in nahin Usif tunan ma hit Uis kesel Afetin Yesus Neno Anan namuni te naleo nan anteni tal ale kuasat nane anbe’u in, atoni nane in monin namle’u nesin na’ko in monit ahunut. ²¹ Leko nesi ale atoni humaf nane le ka nahin lalan amneot na’ko Uisneno, na’ko sin nahine, mes namuni te sin ka natuin fa ale plenat le Uisneno anfe nalali neu sin. ²² Sa’ le sin anmo’e nane, namneob nani uab leta i le nak. "Asu of nah nafani sa’ le in lo’an nalali," ma "Fafi le naniu nalali, of anfani ma ankuk anbi klofo."

¹ Bae benu manekat! I sulat hae nua le au tui ani neu ki. Anbi au sulat nuasin, au ube’ab nek tenab muti le anbi ki. ² Au toti he nati’ hi mimnau ale a’at le afi mefafa Uisneno sin na’uab nani ma plenat na’ko Usif tunan, Kesel Afetin, le natiaba nani neu ki natuin haef knino sin. ³ Nahun-hunu hi mes mihin, nak anbi neno-neno hatas amsoput, of atoni le nek sinmakat naplenat sin monin anbol neman. Sin of nakle’at ki ⁴ ma na’uab nak on i, "Nak on Usif tunan hen koenon nem! Tomas i In es me ka? Hiti mnais enu anmatenen, mes ale sa’ fe nabala onle neno anfatan pah pinan." ⁵ Sin asafanu ka nahinen fa, nak neno tunan ma pah pinan nabelon neki oe, ⁶ ma nak neki oe amsa --, esle’ oe na’ko oe sako --, pah pinan un-unu nane nale’un nani. ⁷ Mes neno tunan ma pah pinan le muni i, mapanat natuin a’an Uisneno nane amsa he naneku nani neki ai. Tomas i neno tunan ma pah pinan fe mapanat talan te anbi neno ale atoni le ka nahin Uisneno mahukum ma malenat. ⁸ Mes bae benu manekat, lasi nono mese i, kais him nikan nak anbi Usif tunan matan, neno mese on ton nifun mese, ma ton nifun mese on neno mese. ⁹ Usif tunan ka nane’aon fa nok In fef ba’an, maski anmu’i atoni le natenab nak In nanea’on. Mes In seusaban ki, fun In kan lomif he atoni mese namle’u. In anlomi he nati’ ale atoni nateunon na’ko sin sanat-sanat. ¹⁰ Mes Usif tunan In neno hatas of nem on abakat. Bi neno nane neno tunan of namneku nok alotos ini punun, ma ale sa’ le anbi neno tunan of anput anbi ai ma pah pinan nok in nesan of namneku. ¹¹ Fun ale sa’ nane of naskuku nani onane, so hi monim nane naknino neu Uisneno, ¹² leka him pao ma minapa Usif tunan In neno hatas amnemat. Bi neno nane neno tunan of anput nain oke, ma natuin in malalan, ale sa’ abit neno tunan of namnoe. ¹³ Mes hit atpao sa’ le Uisneno anba’an nani, esle’ neno tunan fe’u ma pah pinan fe’u, le lasi amneot mapeni anbin. ¹⁴ Es nane, bae benu manekat, leka hi fe ampao neno nane, him hataniom he nati’ hi monim naknino ma ka kobe fa ambi Uisneno human. Ma ampanat lasi mafutus alekot nok Uisneno. ¹⁵ Him kiso Usif tunan In seusabat neu ki, on leku manuan le anfe nani neu ki he nati’ hi mipeni honis. Nai Paulus, hit bae menakat, antui nalali onane amsa neu ki. In antui nane neki hine le Uisneno anfe nalali neu in. ¹⁶ Anbi in sulat sin, Nai Paulus antui ale lasi nane. Namneo anbi in sulat-sulat nane anmu’i lasi nono fauk le susal he nahin nani. Ma atoni le sin ka nahin nani fa ma sin nek palsait nane ka namepaf, sin naklelo ma napenub sa’ le Nai Paulus antui nani. Onane amsa sin anmo’e antom lasi bian na’ko Sulat Knino. Sa’ le sin an moe nane neki naskuku sin monim. ¹⁷ Mes neu hi, bae benu manekat, hi mihin milali lasi i. Es nane him panat nai, he nati’ kais anhel neki ki neu ale atoni le ka nahin plenat knino sin lalan asanat, tal hi mineku hi lasi aki’at. ¹⁸ So hi moni ambi nek mamun Usif tunan, hit Kesel Afetin Yesus Neno Anan, ma so hi amsa mihin In lek-leko. So atpules In, na’ko tomas i talan te nabal-bal! Amin.