2 KORINTUS

2 KORINTUS

¹ Neu Uisneno In tolas knino abit Korintus ma to knino ok-oke abit Akhaya. Au Nai Paulus, haef knino Neno Anan Yesus, le anlek natuin Uisneno In lomin, ma hit bae Nai Timotius. ² Haim toti he nati’ tetus knino ma aomina na’ko Uisneno, hit Ama, ma na’ko Usif Yesus nok ki alki. ³ Au uliatas Uisneno, hit Usif Yesus In Amaf. Amaf le nek mamun ma Uisneno le anmu’i ale lasi halinat. ⁴ In kun es anhalin kai anbi ale hamu’it; talan te hai mibe’i hem halin sin le anbi hamu’it huma-huma meki halinat le haim simo na’ko Uisneno. ⁵ Fun papmese onle hai mipeni Neno Anan In hamu’it nok athoes, onane amsa haim simo Neno Anan In halinat nok athoes. ⁶ Leka hai mipeni hamu’it, lasi nane anfain halinat neu ki ma he namonib ki; kalu anhalin kai, lasi nane on halinat neu ki, he nati’ him sutai mibe’i ale hamu’it onle haim sutai mani amsa. ⁷ Hai ka mitenab fa neu lasi le hai mifnekan na’ko ki, fun hai mihin nak him sutai hamu’it mok kai. Onane te of hi mipeni lasi malinat mok kai amsa. ⁸ Bae benu alki! Fun haim lomi he nati’ hi mihin lasi hamu’it le afi haim sutai mani ambi pah Asia. Hamu’it le nasub nani neu kai naek ma mafena, talan te hai ka mitenab fa nekam neu he moni. ⁹ Ma hai mitnin onle anlef lasi maten neu kai. Mes lasi nane anbol, he nati’ kais hai mifnekan neu hai aom, mes al hai mifnekan neu Uisneno le nafena amates. ¹⁰ In es namonib kai na’ko lasi maten malenat nane. Hai mifnekan neu In, fun In of es namonib kai anbi neno amnemat. ¹¹ Fun hi amsa amtuntaku kai meki onen totis, he nati’ atoni namfaun natulu nekan neu Uisneno natuin lasi halinat le hai mipeni na’ko Uisneno natuin sin onen totis neu kai. ¹² Hai miliabom neu lasi i, fun hai nekam ansaksi neu kai nak hai monim anbi pah pinan i -- nes-nesi anbi hai lasi mafutus mok ki -- hai mo’e mani anbi knino ma nek muti na’ko Uisneno. Hai mo’e ale lasi nane ka natuin fa nek ahinet pah pinan, mes natuin Uisneno In halinat knino. ¹³ Fun al haim tui neu ki lasi le him soi mihine ma him tae mihine. Ma au ufnekan, he nati’ hi mihin ale lasi nane ok-oke. ¹⁴ Onle hi mihin milali lasi bian na’ko kai. Onane te bi neno Usif Yesus nanoebon anfain nem, of hi miliabom neu kai onle hai amsa miliabom neu ki. ¹⁵ Natuin lasi afnekat i afi au ufek he eit eu ki, he nati’ hi mipeni halinat kuni nua. ¹⁶ Oke te au he nao fin eu Makedonia, nalali te u’ko Makedonia au fain aum eu ki, he nati’ him tuntaku kau ambi au lanan neu Pah Yudea. ¹⁷ Ait au utenab a san neu lasi fekat i ka? Ai au mo’e san lasi fekat i natuin au lomik ka? Talan te mapeni anbi kau nak, "Tebes" ma "Kahaf." ¹⁸ Nok Uisneno aki’at, hai lasi manba’an neu ki ka nak, "Tebes" ma "Kahaf". ¹⁹ Natuin Yesus Neno Anan, Uisneno In Anmone, le au ok Nai Silwanus ma Nai Timotius ameut milali neu ki, In es ka nak, "Tebes" ma "Kahaf". Mes anbi In al lo "Tebes". ²⁰ Fun Neno Anan lo "Tebes" neu ale Uisneno In fefba’an. Es nane te natuin In hit tak, "Namneo" he taliatas Uisneno. ²¹ Fun Uisneno le anhatani kai nok ki anbi Neno Anan, lo Uisneno le anbeti kai. ²² In antao In malak neu kit ma anfe Ini Smanan Knino anbi hit nekak on lasi bela na’ko ale sa’ le In naloitan nani neu kit. ²³ Mes Uisneno ansaksi kau -- fun In nahin au nekak --, au ka etif eu Korintus natuin au nek ki. ²⁴ Hai ka miplenat ki fa neu he miteb knino, fun him hake mi’ki ambi hi nek ateb knino. Al hai meup mibua mok ki he nati’ hi malin.

¹ Es nane au ufek ulali anbi au nekak nak au ka eti tenif eu ki nok nek susal. ² Fun kalu au ususab ki, sekau hen halin au nekak so ale atoni le afi au ususab sin nekan? ³ Es nane te au tui ki sulat i, he nati’ leka au eit kais au susal, natuin sin le hen halin kau. Fun au uhin ki alki, nak leka au malin, of hi amsa malin. ⁴ Au tui ki sulat i nok nek tu’as ma nek mafena ma nok matnu. Au tui onane he nati’ kais hi nekam antu’ mes hi mihin nak au nek ki alki. ⁵ Mes kalu anmu’i atoni le anmo’e lasi he nanukab, in ka nanukab fa au nekak, mes sin nanukab hi nekam -- ai he nati’ kais au hafen -- na’nuka atoni faukan anbi ki sin nekan. ⁶ Neu atoni onane, noba nai, fun hi amfaut nakain nalali in. ⁷ So mes him saok in sanat ma amhalin in he nati’ kais in namle’u natuin in nanukab nekan nae le’uf. ⁸ Es nane te au fainek ki he nati’ him nek in. ⁹ Natuin lasi nane au tui ki sulat i, he su’it ki, nak hi mituin ale lasi le au fe neu ki ai kahaf. ¹⁰ Fun kalu him sako atoni nane in sanat, au amsa sako in sanat. Fun kalu au sako, -- so anmu’i sa’ le au he saok ani --, au mo’e lasi nane anbi Neno Anan In human natuin hi alekot. ¹¹ Ma au mo’e lasi nane he nati’ santuaf kais in nis kit, fun hit tahin in ela ma in lisan sin. ¹² Leka au te Troas he etun Neno Anan In beno knino, Uisneno nasoitan lanan neu kau he au mepu bi bale nane. ¹³ Mes au nekak fe na’unu fun au fe ka u’euk fa ok au bae Nai Titus. Onane te au manseon ok sin ma au nao neu Makedonia. ¹⁴ Mes au utulu nekak neu Uisneno, le antopu kai neu Neno Anan In lasi amnisat. Uisneno anpaek kai he nati’ haim etun Neno Anan In beno knino on fomeni anbi me-me. ¹⁵ - ¹⁶ Fun haim fain on fomeni na’ko Neno Anan neu Uisneno. Ma neu ale atoni le namle’u hai fo’ maten kai neu he mimate; mes neu atoni le namonib sin hai fomeni kai neu he mimonib. Onane te sekau antam ota he nanaoba mepu nane ka? ¹⁷ Mes hai ka on fa atoni bian, le he neki beno knino na’ko Uisneno on bale sosa. Hai mi’uab a’an nane nok nek muti, fun Uisneno es anlelu kai. Ma Uisneno nit kun nak hai minaoba beno nane on Neno Anan In ate kai.

¹ Ati hai hem pules amteni hai aom ka? Ai on atoni bian he nalile sulat pules neu ki ai napeni sulat pules na’ko ki ka? ² Hai sulat pules es hi, le haim tui mani anbi hai nekam, fun ale atoni nahin nani ma ansoi nani. ³ Fun sin nit nalali, nak hi on sulat le Neno Anan antui nani natuin hai mepu. Sulat nane kan tui nani fa neki oe metan, mes antui nani neki Uisneno In Smanan Knino amonit. Ma kan tui nani fa anbi faut bena, mes antui nani anbi mansian in nekan. ⁴ Hai mifnek onane neu Uisneno natuin Neno Anan. ⁵ Kan mu’if lasi sa’ anbi hai aom, he nati’ haim tam ota neu mepu i, mes Uisneno es anfe be’it neu ki. ⁶ In es anfe kai be’it he nati’ haim fain ameput neu fefbela fe’u; fefbela le na’ponion neu Smanan Uisneno, ka neu fa plenat le matui nane. Fun plenat le matui nane namate, mes Smanan Uisneno nane namonib. ⁷ Bi leku fef bela le namate nane anmo’e ma anmalak neu fatu, apinat Uisneno antana nok matane. In pinan matane talan te uf Israel ka nabe’i fa hen kiso Nai Musa human, maski pina le anbi Nai Musa human namsab anbi leku nane. Nah, amo’e fef bela le namate nane nalil’on nok pinan a’naek, ⁸ lof amo’e fef bela le Smanan Uisneno anfe nani, nalil’on nok pinan le nesi anteni. ⁹ Kalu amo’e fef bela le nasanab mansian nane anpin onane, lof amo’e fef bela le naleko nafani mansian nok Uisneno in pinan nesi anteni. ¹⁰ Sa’ le afi hit tak anpin, kan pinan tenif fun apinat muni i. ¹¹ Kalu sa’ esle nalan al leku tuk es, anpin onane, lof sa’ esle nabal-bal lof anpin nesi anten. ¹² Natuin hai mui lasi afnekat onane, hai mi’uab nok nek amaspeti, ¹³ ka on fa Nai Musa le ankub in human he nati’ to Israel kais ankius nit Uisneno. In apinat le he namneku anbi in human. ¹⁴ Mes sin nekan nane an ek nabubu. Ma tal neno i sin nekan fe an ek nabubu neki kubat nane leka sin ansoi Sulat Knino unu. Al Neno Anan es nabe’i hen fei kubat nane. ¹⁵ Ma tal neno i amsa, kalu sin ansoi Nai Musa in sulat, kubat nane fe ankub sin nekan. ¹⁶ Mes leka es nali’on anfain nem neu hit Usif, of nait kubat nane na’ko in human. ¹⁷ Fun hit Usi, lo Smanan Knino; ma leka Uisneno Ini Smanan Knino anbi me te lasi ao sona anbi nane amsa. ¹⁸ Ma muni i hit kat kubaf hit humak, mes hit onle nino le tamasab Usif Yesus In apinat. Ma onane te In nabaina hit humak on In human; ma hit fain apinat natuin lasi apinat le na’ko Smanan Knino, hit Usi.

¹ Haim sium mepu i natuin Uisneno In nek mamun. Es nane te hai ka mi’unu fa hai nekam. ² Haim tite ale mo’et mesokan le namaeb kai. Hai ka mo’ef ela mesokan ma hai ka miklelo fa Uisneno In a’an. Haim etun Uisneno In lomin muti monas. Onane te hai mina’at hai aom neu ale atoni he nati’ sin tai hai lasi anbi Uisneno In human. ³ Leka Beno Alekot le haim etun fe ka mahine fa, nane al neu atoni le he namle’u es fe ka nahinef. ⁴ Uisneno teta batan i, nafolob atoin ka apalsait sin nekan. In nafolob sin tal sin ka nitaf beno knino neu Neno Anan In apinat le namasab Uisneno In human. ⁵ Fun hai kam etun fa hai aom, mes haim etun Yesus Neno Anan hit Usif. Ma haim fain ate neu ki natuin Yesus In lomin. ⁶ Fun Uisneno es nakua a’an nak, "Meusine of anbol na’ko mesokan!" In amsa es antana hit nekak neik In meusine; he nati’ hit tapeni nek ahinet neu Uisneno In apinat le nalilon anbi Neno Anan In human. ⁷ Mes maus i hai mibela ambi bale le anmo’e neki tepas ai klofo, he nati’ nalilon, nak matani anesit nane na’ko Uisneno ma ka na’ko fa hai aom. ⁸ Anhamu’i kai anbi ale lasi, mes kan hapnesa kai fa. Hai nekam mamneku, mes hai ka mi’unu fa. ⁹ Anli’u kai, mes ka nasaitan kai fa, anbison kai ai antepon kai, mes hai ka mimle’u fa. ¹⁰ Hai meik Yesus Ini maten ambi hai aom, he nati’ Yesus Ini honis nane nalilon anbi hai aom. ¹¹ Fun nana’at hai monim piut-piut neu maten natuin Yesus, he nati’ Yesus Ini honis nalilon anbi hai aom amle’ut i. ¹² Onane te lasi maten naplenat anbi hai aom, mes lasi honis naplenat anbi hi aom. ¹³ Fun hai mipeni smanaf nek ateb knino papmese, onle antui nani anbi Sulat Knino nak, "Au nekak nateb knino, es nane au u’uab," onane te hai nekam nateb knino amsa, es nane te hai mi’uab amsa. ¹⁴ Fun hai mihin nak Uisneno le nafena Usif Yesus, of nafena kai amsa nok Yesus. Ma In of nok kai ma nok ki neu In human. ¹⁵ Fun ale lasi nane anbol neu hi. Fun leka atoni namfau napeni manekan Uisneno, onane amsa onen totis namfau le natiaba neu Uisneno; nok lasi nane te nanaeba Uisneno. ¹⁶ Es nane te hai ka mi’unu fa hai nekam. Maski hai ta’um pah pinan namle’u mes hai nekam nafe’un nani neno-neno. ¹⁷ Fun lasi hamu’it an-ana batan i naloitan kai lasi apinat nabal-bal le nesin ale sa’. Ma lasi apinat nane naleko nesin hamu’it le haim sutai mani. ¹⁸ Hai ka mitenab fa lasi le mamnita, mes lasi le ka mamnita. Fun lasi le mamnita nane al neon tuk es, mes lasi ka mamnita nane talan te nabal-bal.

¹ Fun hai mihin mak kalu ume -- es le aof -- le hit tamaika atbin bi pah pinan i anpukai nani, Uisneno of naloitan neu kit ume mese bi neno tunan, le Uisneno es anmo’e nani ma le anhake talan nabal-bal. ² Anbi ume le muni i, hit tanoi fun hit lomi he tamaika atbi hit ume le anbi neno tunan nane. ³ Fun anbi ume nane, hit tamaoftok. ⁴ Leka hit fe tamaika atbi ume pah pinan i, hit tanoi fun hit sutais nane mafena. Ka natuin fa hit tauf tani tainusat aof pah pinan i, mes hit lomi het tainus teki aof neno tunan, he nati’ aof honis nane naneku nani aof maten. ⁵ Fun Uisneno es naloitan lasi nane neu kit ma anfe kit Ini Smanan Knino on lasi bela neu ale sa’ le naloitan nalali neu kit. ⁶ Onane te hai nekam namep, maski hai mihin mak leka hai fe mimaika ambi aof i, hai fe mi’lo mi’ko Uisneno. ⁷ -- Hai moni natuin nek ateb knino, ka natuin lasi le hai mit meki hai matam -- ⁸ es nane te hai nekam ka na’unu fa. Haim lomi he misaitan aof i he mimaika mok hit Usi. ⁹ Es nane te hai mami he nati’ amhalin In nekan, leka hai fe mimaika ambi aof i ai mimaika ambi neno tunan. ¹⁰ Fun hit alkit mes athake atbi Neno Anan Ini toko alef lasi, he nati’ atoni mes-mese napeni seunbanit namnes nok lasi le in anmo’e nani anbi in monin -- he lasi leko ai lasi le’uf. ¹¹ Hai mihin lasi amtaus neu Uisneno nane onme; es nane te hai mami he mok atoni sin neu ateb knino. Uisneno nahin hai nekam ma au ufnekan he hi amsa mihin kai ambi hi nekam. ¹² Hai ka mami fa he nati’ him pules kai, mes haim toti he nati’ hi miliabom neu kai. Oke te him etun neu ale atoni le naliabok neu lasi aof ma ka neu fa lasi smanaf. ¹³ Fun kalu hai ka miplenat fa hai aom, lasi nane anbi Uisneno In mepu. Ma kalu hai miplenat hai aom lasi nane neu hi alekot. ¹⁴ Fun Neno Anan In manekan naplenat kai, natuin hai mihin nak atoni mese anmate neu atoni ok-oke, onane te sin anmaet oke. ¹⁵ Ma Neno Anan anmate neu atoni ok-oke, he nati’ sin le anmoni, kais sin moni neu sin aon; mes neu In, le anmate ma nafena nafani neu sin. ¹⁶ Es nane te hai ka mitenab amteni fa atoni natuin tenab mansian. Ma kalu afi hai mitenab Neno Anan natuin tenab mansian, muni i ka mitenab amteni fa onane neu In. ¹⁷ Atoni le namesbon nok Neno Anan, in anfain atoni fe’u, fun lasi mna le anbi atoni nane anfin kun -- kiso lasi fe’u nem anbolen. ¹⁸ Ma ale lasi nane na’ko Uisneno kun. In anmo’e talan te natuin Neno Anan hit taleko tok In, oke te anlelu kit he tatiaba beno alekot he nati’ atoni bian naleko amsa nok Uisneno. ¹⁹ Hai beno esle nak natuin Neno Anan, mansian naleko nok Uisneno. Uisneno ka namnau fa sanat-sanat le mansian anmo’e neu In. Ma Uisneno anlelu kai hem etun beno nane. ²⁰ Es nane te hai le i Neno Anan In haef kai. Ma haim fainek ki on Uisneno es anfainek ki. Anbi Neno Anan In kanan haim toit ki, so mina’at hi aom he naleko ki nok Uisneno. ²¹ Neno Anan kan mo’ef sanat, mes Uisneno anmo’e In hen sutai hit sanat, he nati’ hit taleko atfani tok Uisneno fun tamesbok tok Neno Anan.

¹ On bae benu le hit mepu tabua tok Uisneno, haim fainek ki, he nati’ kais hi mo’e Uisneno nek mamun le him simo milali nane son-sona. ² Fun Uisneno nakua a’an nak, "Bi leku le Au lomi, of Au nen ko, ma bi neno Au umonib ko, of Au bab ko." Mim nane. ³ Kais hai mo’e lasi astunas anbi ale sa’, he nati’ kais sin na’akan hai mepu. ⁴ Mes hai milile anbi ale lasi, nak hai le i Uisneno In atuthaes kai. Haim sutai ale hamu’it nok nek seusabat. ⁵ Anbi bisot, anbi o’of, anbi matoes, anbi haet ma puse, anbi be’et ma anbi lasi milelnom. ⁶ Anbi nek muti, nek ahinet, ma nek aklati. Anbi Smanan Knino ma lasi manekat le ka nok fa asafanut, ⁷ ma ametun beno alekot ma kuasat Uisneno on Uisneno In atuthaes. Haim na’ mimepan Uisneno In lomin on bale manuat he nati’ ambe’u musu ma mitau hai aom. ⁸ Antola kai, mes antek nale’un kai amsa; na’akan kai ma anpules kai. Maski hai mi’uab nok amneot sin nak hai mipoibom. ⁹ On atoni ka mahine, mes sin nahin kai. On atoni le hen mate, mes hai fe moni. Anhamu’i kai mes hai ka matef. ¹⁰ Sin nasusab hai nekam, mes hai malin piut. Hai atoin manukat kai, mes hai mimu’ib atoni namfaun. Hai ka mu’if sa’-sa’, mes hai mipeni ale sa’. ¹¹ Bae benu manekat abit Korintus! Hai mi’uab muti neu ki ma hai nekam natfei neu ki. ¹² Ma neu ki anmu’i bale manuan anbi hai nekam, mes neu kai al naloitan bale le malenat anbi hi nekam. ¹³ So mak tomas i he nati’ namnes -- au u’uab neu ki on au anhenu -- So leko him fei hi nekam lek-leko! ¹⁴ Kais hi mimesbom mok atoni ka apalsait neu Neno Anan, fun nane ka nalekof. Leka me atoni le anmo’e Uisneno lomin he namesbon nok atoni le anlaban Uisneno! Ai leka me meusine he namesbon nok mesokan ka? ¹⁵ Leka me Neno Anan he namesbon nok Belial ka? Ai atoni apalsait namnes nok atoni ka apalsait ka? ¹⁶ Ai Ume Uisneno anmatalu nok uim le’u ka? Hit le i Uisneno amonit In ume kit, natuin Uisneno In a’an nak on i, "Of Au umaika ubua ok sin ma Au moni bi sin atnanan, ma of Au fain Uisneno neu sin, ma sin fain to neu Kau. ¹⁷ Es nane te, so him poi mi’ko sin atnanan ma him batiom mi’ko sin, natuin Uisneno In a’an, ma kais him poe sa’ le neki hainisit, fun of Au simo ki. ¹⁸ Ma of Au fain Amaf neu ki, ma of him fain anmone ma anfeto neu Kau Usif tunan, Usif amui kuasat nakua a’an onane."

¹ Bae benu manekat alki! Natuin hit tapeni talali ale lasi bela nane, es nane leko hi taknino hit aok ma hit smanak na’ko ale lasi amolemut. Ma onane te of naknino kit anbi lasi amtaus neu Uisneno. ² Misona kai bale ambi hi nekam fe! Hai ka mo’ef sanat neu atoni mese ma hai ka milukib fa atoni mese ma hai ka mami fa osaf na’ko atoni mese. ³ Au umolok onane ka natuin fa he usanab ki. Fun afi au umolok ulali neu ki ak, hi mipeni bale ambi hai nekam talan te haim lomi he moin mok ki ma he maet mok ki. ⁴ Au nekak muti neu ki, mes au uliabok neu ki amsa. Anbi ale hai lasi hamu’it, au nekak anmalin ma au lasi malinat nane nathoe. ⁵ Leka hai mimte ambi Makedonia, hai aom ka napeni fa snasat. Hai mipeni hamu’it anbi me-me; lasi matoes na’ko atoni bian ma lasi amtaus anbi kai. ⁶ Mes Uisneno le anhalin atoni nek baun, In halin hai nekam natuin Nai Titus anbol nemen. ⁷ Ka al fa natuin in nem ante, mes natuin lasi halinat le in napeni anbi ki. Fun in aneut kai nak him lomi he mi’euk mok kau; hi mitofa hi nekam ma him lomi he meis kau. Ale lasi nane neik malinat naek neu au nekak. ⁸ Es nane maski au ususab hi nekam eki au sulat nane, mes au ka utofa fa au nekak. Namneo afi au tofok, fun au it, nak sulat nane nasusab hi nekam -- maski al neon tuk es -- ⁹ Mes muni i au malin, ka natuin fa hi nekam ansusal, mes natuin hi susal nane nate’un hi nekam. Fun hi susal nane natuin Uisneno In lomin, talan te hai ka milukib ki fa. ¹⁰ Fun nek susal natuin Uisneno In lomin, nate’un hi nekam ma neki honis neu ki. Ma kan mu’if atoni le natofon natuin lasi nane. Mes susal le na’ko pah pinan i neki ki neu maten. ¹¹ Fun him kiso mit susal le natuin Uisneno In lomin nane, neik alekot neu ki. Fun him panat hi aom, nek to’as, lasi amtaus, lasi makoet, ma fekat amneot. Anbi ale lasi nane, hi mililom nak hi ka misanab fa. ¹² Es nane kalu au tui sulat neu ki, ka natuin fa atoni le nasanab. Ma ka natuin fa atoni le ansutai hamu’it natuin anmo’e sanat. Mes he nati’ hi nek lomit nane nalilon neu kai anbi Uisneno In human. ¹³ Natuin lasi nane hai nekam anmalin. Ma ka al fa hai malin, mes hai malin nes-nesi neu Nai Titus in nek malinat; fun hi alki amhalin in nekan. ¹⁴ Au uliaba ki neu in, ma hi ka mimaeb kau fa. Ale lasi le haim eut neu ki nane namneo. Onane amsa lasi le hai miliabom neu ki antom Nai Titus lo namneo. ¹⁵ Ma in manekan naek neu ki fun in namnau nak hi alki amlomi he nituin in lekat ma him simo in nok amtaus ma lilitai onme. ¹⁶ Au malin, fun au ufnekan ki anbi ale lasi.

¹ Bae benu alki! Hai hem eut ki neu Uisneno In nek mamun le anfe nani neu tolas knino abit Makedonia. ² Fun ansu’ sin neik hamu’it mafena huma-huma, mes sin malinat nane nathoe. Maski sin mamui le’uf, mes sin fain amu’it anbi lasi amnaut. ³ Au saksi neu ki, nak sin anfe natuin sin be’in, ma neis na’ko sin be’in amsa. ⁴ Natuin nek lomif, sin antoti ma naseke kai he nati’ sin amsa napeni halinat he nanaoba mepu tuthaes neu ale atoni knino. ⁵ Sin anfe nesin na’ko le hai mifnekan. Sin nana’at nahunun sin aon neu Uisneno; nalali te neu kai amsa, natuin Uisneno In lomin onane. ⁶ Es nane hai miseke Nai Titus le afi in es na’uba mepu tuthaes nane in net neu ki he nasopu mepu nane anbi ki. ⁷ Muni i hi mipen alekot anbi ale sa’, -- anbi nek ateb knino, anbi a’at ma uab, anbi lasi hine, anbi makoet hem bab kai ma anbi hi lasi manekat neu kai --. Onane te so him nao mat ambi mepu tuthaes i. ⁸ Au u’uab lasi i ka on fa plenat neu ki. Mes au he ulile atoni bian sin makoet hen tuntaku atoni. Au lomi he su’it hi lasi manekat ini mneon. ⁹ Fun hi mihin nak Yesus Neno Anan hit Usi, lo In nek kit. In amu’it kun mes natuin hi, In anfain amamu’it, he nati’ natuin In mamu’it nane, haim fain amu’it. ¹⁰ Au nek tenab neu lasi nane, neik alekot neu ki. Namneo na’ko afi ton afinit, hi es minaoba lasi nane; ma hi mifek he nati’ hi misopu mani amsa. ¹¹ Onane te so leko hi misop mepu nane es tomas i. So leko hi minaoba mani natuin hi lomim ma hi mo’e mani natuin hi be’im. ¹² Fun kalu him lomi hem fe, of ansimo sa’ le him fe mani, fun him fe natuin sa’ le hi mu’i ma ka natuin fa sa’ le hi ka mu’i. ¹³ Fun kan hafen ki fa he nati’ atoni bian napeni makafa, mes he nati’ natai ai namnes. ¹⁴ So leko, tomas i hi athoes nane nano’u sin nukat nane. Oke te sin athoes nane of nano’u hi nukat, he nati’ natai. ¹⁵ Fun antui nani anbi Sulat Knino nak, "Atoni le napeni naek, kan mu’if nesif, ma atoni le napeni kle’o kan labu fa." ¹⁶ Hai mitulu nekam neu Uisneno,le anfe nek amakoet neu Nai Titus onle hai amsa neu hen bab ki. ¹⁷ Namneo in simo hai fainekat, mes anbi in makoen in loim kun he neit neu ki. ¹⁸ Haim sonu in nok hit bae, le mabeti anbi tolas knino ok-oke natuin in mepu anbi etus Beno Alekot. ¹⁹ Ma ka al fa lasi nane! Mes Tolas Knino anlek nani he nati’ nok kai anbi hai lalan. Fun hai hem nao ma mitiaba manekat nane, neu Usif tunan In apinat, oke te hi mihin mak haim loim kim neu mepu nane. ²⁰ Haim panat matani he nati’ kais anmu’i atoni le nasanab kai neu lasi le hai mitiaba manekat a’naek i. ²¹ Fun hai mitenab lasi alekot, ka al fa anbi Uisneno In human, mes anbi mansian sin matan amsa. ²² Haim sonu hai bae es anteni nok sin, le haim su’ milali hae fauk ma namneo in lomi hen bab ki. Ma tomas i in lomi nes-nesi hen bab ki, fun in mu’i afnekat naek neu ki. ²³ Nai Titus nane au bae, le anmeup nok kau hen bab ki. Ma neu hit bae knino bian nane, tolas knino es ansonu sin on lasi aliatas mese neu Neno Anan. ²⁴ Es nane so leko hi milile hi lasi manekat neu sin anbi tolas knino sin matan; he nati’ sin nahin nak, lasi le hai miliabom neu ki nane lo namneo.

¹ Nok amneot au ka tui tenif neu ki antom tuntakus le him sonu neu to Uisneno anbi Yudea. ² Au uhin ulali ki, nak him loim hem tuntaku, ma au uliaba ulail ki neu ale atoni abit Makedonia. Au u’uab neu sin ak, "Bae knino sin abit Akhaya, sin naloitan nalali na’ko ton afinit." Ma hi makoet nane anfain lasi heta neu atoni namfaun. ³ Au sonu bae knino sin he nati’ lasi le hai miliabom neu ki kais luman ai son-sona kun. Mes so namneo-namneo hi miloitan milali onle au umolok ulali neu ki. ⁴ Au umtau kal-kalu anmu’i atoni Makedonia le anlomi he nok kau leka au et eu ki. Ma kalu sin napeni ki, hi fe ka miloitan fa, of hai mae, fun hai mi’uab milali neu sin mak, hai mifnekan naek neu ki. Ma hi al-alki of am mae samsa. ⁵ Es nane au lomi he nati’ bae knino sin net nahunun kau he naloitan sa’ le him ba’an milali. Onane te of nalilon nak hi tulu nane him fe mani nok nek amlilat ma amnaut ma ka natuin fa seke. ⁶ Mimnau lek-leko lasi i: Atoni le ankifu an-ana of nonu te an-ana amsa ma atoni le ankifu naek of nonu te naek amsa. ⁷ So es-es anfe natuin in nek lomin. Kais nok nek a’unu ai natuin seke, fun Uisneno In nek atoni le anfe nok nek amlilat. ⁸ Ma Uisneno anmui kuasat hen fe ki tetus nok athoes, he nati’ hi mimno’u anbi ale sa’. Oke te hi mo’e lasi alekot nesin teni. ⁹ Fun antui nani anbi Sulat Knino nak, "In ankifu nalali, In anfe neu atoin amamu’it, In alekot nabala talan te nabal-bal." ¹⁰ Uisneno es naloitan fini neu asenat, ma mnahat neu kit. In amsa of naloitan fini neu ki ma of ansato sa’ le him sen ma namonib lasi amneot anbi hi nekam. ¹¹ Onane te of namu’ib ki anbi mo’et manekat huma-huma oke te hi mitulu nekam neu Uisneno natuin hai. ¹² Fun tuthaes manekat le hi mo’e nane, ka al fa he mino’u to knino sin nukat, mes of anmo’e atoni amfaut he natulu nekan neu Uisneno. ¹³ Ma natuin hi tuthaes manekat nane nalilon, sin naliatas Uisneno natuin sin nit hi lasi aki’at neu Neno Anan In beno knino. Ma natuin hi nek amnaut him bait ale sa’ neu sin ma neu atoni bian amsa. ¹⁴ Of sin onen toti neu ki natuin sin nek ki, fun Uisneno In nek mamun nathoe neu ki. ¹⁵ So hit tatulu nekak neu Uisneno fun In manekan nae le’uf kun!

¹ Au, Nai Paulus kau, au fainek ki natuin Neno Anan In nek leko ma fef mina. Fun leka au haumak ki au u’uab nok nek baun mes leka au u’lo ki au u’uab nok nek maputu. ² Es nane au toti ki: he nati’ kais au ulile nek maputu neu ale atoni le sin nak hai moni natuin mo’et pah pinan. ³ Namneo hai fe moni es pah pinan, mes hai ka mabe’u fa meki bale manuat pah pinan. ⁴ Fun hai bale manuat nane ka pah pinan ini fa. Mes hai bale manuat nane Uisneno es naloitan nani neki In kuasat he nati’ hai mitselab ale kot-kot. ⁵ Haim iup mani ale atoni pah pinan sin lasi matoes ma mitselab main ale atoni pah pinan sin kot amoko le anmo’e nani he natik ma nasap lasi hine neu Uisneno. Haim ek ale sin nek tenab nane ma mina’at mani neu Neno Anan. ⁶ Leka hi nek atninas nane nanokbon, hai miloitan milali hem kas ale atoni le anmo’e lasi amle’ut. ⁷ Him kius mit lasi le nalilon anbi hi matam. Leka anmu’i atoni mese le nateb anbi in nekan nak, in lo Neno Anan Ini, so in natenab anbi in nekan nak, hai amsa Neno Anan Ini kai onle in. ⁸ Au ka mae fa, kalu au uliabok nes-nesi neu kuasat le hit Usi anfe neu kit. Fun anfe kuasat nane neu kai he nati’ hai mifena ki ma ka mimofu ki fa. ⁹ Ma au ka lomif he nati’ hi mitenab mak, au hakatau ki eki au sulat sin. ¹⁰ Fun anmu’i atoni le na’uab nak, "In sulat hanan mafena ma matani. Mes kalu in haumak kit in kan maspetif ma in uab nane ka ma’ota fa." ¹¹ Mes so atoni le na’uab onane, in mes nahin nak leka hai met, of hai mo’et nane papmese onle sa’ le haim tui anbi hai sulat sin. ¹² Hai ka mitam fa hai aom ai minesa hai aom mok ale atoni le nanaeb sin aon. Sin anluku sin aon neki sin luku ma sin nanesa sin aon neki sin aon. Mo’et onane mo’et amonot kun! ¹³ Hai ka miliabom fa nesi batas, mes hai mepu ambi batas le Uisneno anlek nani neu kai, le neti antia ki amsa. ¹⁴ Leka hai met meu ki ma ametun Neno Anan In Beno Alekot hai kam poif mi’ko batas le hai mepu ambin; fun hi amsa ambi batas nane. ¹⁵ Hai ka miliabom fa neu mepu le atoni bian anmepu anbi bale le kan lek nani fa neu kai. Mes hai mifnekan, leka hi nek ateb knino nane ansato, of hai mipeni kan tola nesin teni anbi ki kalu hai minesa nok bale le anlek nani neu kai. ¹⁶ Natuin lasi nane te haim lomi hem etun beno knino neu pah-pah le na’lo na’ko hi pah. Ma hai ka miliabom fa neu atoni bian sin mepu anbi pah le anlek nani neu sin. ¹⁷ Fun antui nani anbi Sulat Knino nak, "Atoni le naliabon, so naliabon anbi hit Uisneno." ¹⁸ Fun atoni le anpules in aon in ka nalan nabe’if, so atoni le hit Usi anpules nani.

¹ So leko him lomi, au mono kle’o! Him loim onane ka? ² Au loim ki onle Uisneno anloim ki. Fun au mafutub ulali ki neu atoni mese he ok ki on bife ao temef le knino neu Neno Anan. ³ Mes au umtau, kalu hi nekam na’oni oke te hi ka mi’ki amtenif meu Neno Anan. Papmese on afi kauna anfui. Bi Hawa neik in manoen. ⁴ Fun him ta’ah kim kalu anmu’i atoni le anetun ki Yesus teta na’ko le haim eut ki. Ai anfe ki smanaf teta na’ko le him sium milali ai Beno Alekot teta na’ko le him sium milali. ⁵ Mes natuin au nek tenab, au ka labu fa kle’o u’ko haef makana bian sin. ⁶ Oni au atoin amonot kau bi uab, mes anbi lasi hine neu Uisneno, au ka atoin amonot kau fa. Fun hai milile milali neu ki anbi ale leku ma anbi ale lasi. ⁷ Ai au usanab neu ki ka? Fun au ubaun au aok he nati’ nalatan ki, ma au etun Uisneno In beno knino neu ki ka nok fa baen mes lum-luman kun. ⁸ Leka au tuthae ki, tolas knino bian sin es anbaen kau. Au ulukib sin he nati’ sin bab ki. ⁹ Leka au nukan sa’anbi ki, au ka ususab fa atoni mese. Fun sa’ le au nukan nane, bae knino sin abit Makedonia sin natis nani neu kau. Au panat au aok anbi ale lasi, he nati’ kais anfain sutais neu ki. Ma of au mo’e onane piut. ¹⁰ Nok Neno Anan In amneot anbi kau, au ak ki, katit fa atoni mese anbi pah Akhaya hen ek au nek liaba nane. ¹¹ Nansa au u’uab onane ka? Ai natuin au ka nek ki fa ka? Uisneno es nahin lasi nane. ¹² Lasi le au mo’e, of au mo’e piut he nati’ haef knino bian sin ka napeni manuan he naliabok ma sin nak, sin mepu papmese onle hai mepu. ¹³ Fun atoni onane sin haef knino apoiba. Sin ameput le nalosib atoni ma anmo’e sok on Neno Anan In haef knino. ¹⁴ Kais hi mimkak neu lasi nane, fun Nitu amsa namasbon on ahake meusine! ¹⁵ Es nane te ka lasi amkakat fa, leka in ameuptenu anmo’e sok on ameput le anmo’e Uisneno lomin. Of namuni te sin napeni sin mo’et nane in seunbanit. ¹⁶ Au u’uab a’teni ak, so es kais ankius kau on amonot. Ma kalu hi mitenab onane, so him sium kau on atoin amonot, he nati’ au uliabok kle’o. ¹⁷ Sa’ le he au u’uab, au ka u’uab ani fa on atoni le na’uab natuin Uisneno In a’an. Mes au u’uab ani on atoni amonot le nateb, nak in mes naliabon. ¹⁸ Fun anmui atoni namfau le naliabok natuin nekaf pah pinan, es nane au lomi he uliabok amsa. ¹⁹ Him lomi hem sium atoni amonot fun hi atoin ahinet ki. ²⁰ Fun him lomi, leka atoni na’aet ki, leka atoni nah maet hi sa’, leka atoni naplenat ki, leka atoni namokon neu ki, leka atoni anpas ki. ²¹ Au nek mae kuk, fun haim limae neu he mo’e lasi onane. Mes kalu atoni bian nabe’i naliabok -- au amsa ube’i uliabok -- au u’uab on atoin amonot! ²² Sin atoni Ibrani ka? Au amsa atoin Ibrani kau! Sin atoni Israel ka? Au amsa atoin Israel kau! Nai Abraham in sufan esle sin ka? Au amsa Nai Abraham in sufan kau! ²³ Neno Anan In atuthaes sin ka? -- au u’uab on atoin amaunu -- au amsa tuthae nesin sin! Au hae nesin sin, natam kau anbi o’of nesin sin, anbiso kau nesin sin ma ala kle’o te au he mate. ²⁴ Atoni Yahudi sin anhamu’i kau hae nim, ma anbius kau papa bo’tenum sio. ²⁵ Anbius kau hae tenu, anpoil kau neik fatu hae mese. Au lem ok bnao hae tenu, au utboe bi oe tasi neno teme mese ma fai teme mese. ²⁶ Anbi au lanan le he unaoba mepu, au sutai susal namfaun, noe sako, atoin asikat, koke na’ko atoni Yahudi, koke na’ko atoni le kan tamaf nonot Yahudi. Au upeni susal anbi kot, susal anbi mnela paha snaen, susal anbi tasi atnanan, susal na’ko au bae sin le napoibok nak sin atoni Slani. ²⁷ Au uhaebok naek ma mepu mafena; fe fe’at au ka tupaf, au ka uah ma ka inuf, fe fe’at au unahok, manikin ma kan mu’if tainusat. ²⁸ Au ka teka tenif lasi bian; fun neno-neno au he ubiku ma tuthae Tolas Knino. ²⁹ Leka anmu’i atoni le anlima’e, au amsa lima’e ok sin? Leka sin anmu’i atoni le anmofu anbi sanat au nekak naklati? ³⁰ Leka au uliabok, of au uliabok anbi au lima’et. ³¹ Au ka upoibok fa. Uisneno, le hit Usif Yesus In Amaf anfain saksi neu kau. So atpules In kanan talan te nabal-bal. ³² Leka au bi Damsyik Kesel Aretas in kumlol naplenat atoni sin hen pao kot Damsyik hen heke kau. ³³ Mes sin natam kau neu kola ma nasanut kau natuin baik lape in fafon. Onane te au ufetnok u’ko sin.

¹ Au he uliabok, maski lasi nane ka ma’upa fa, mes au he eut ki mnitas le au simo na’ko hit Uisneno. ² Au uhin neu atoni Slani mese, afi ton bo’es am ha afinit -- he aon ta’un ai he smanan ka, au ka uhinef, Uisneno es nahine -- na’aiti atoni nane neu neno tunan in kuni ai peni tenu. ³ Au amsa uhin atoni nane, -- he aon ta’un ka ai he smanan ka, au ka uhinef, Uisneno es nahine -- ⁴ nait atoni nane neu Firdaus ma in nen uab le ka mateka fa, le mansian ka nabe’i hen tek nani. ⁵ Au he uliabok neu atoni nane, mes au ka uliabok fa neu au aok, so al neu lasi lima’et sin. ⁶ Fun kalu au he uliabok amsa, au ka atoin amonot kau fa, fun au u’uab lasi amneot. Mes au utau au aok, he nati’ kais anmu’i atoni le natenab neu kau nesin le sin nit anbi kau ai le sin nen na’ko kau. ⁷ Mes he nati’ kais au umok’ok natuin ale mnitas matani nane, antao kau kasunat mese ai menas mese anbi au aok. Menas nane na’ko santuaf hen tufu kau he nati’ kais au umok’ok. ⁸ Au onen toti hae tenu neu Uisneno antom santuaf nane, he nati’ naskot ai na’lo na’ko kau. ⁹ Mes Uisneno natae neu kau nak, "Au halinat neu ko, noba nai, fun au matanik natision anbi ho lima’et." Es nane te au lomi he uliabok natuin au lima’et, he nati’ Neno Anan In matanin namafo ai nahafo kau. ¹⁰ Natuin lasi nane au malin ma au lomi he bi lima’et. Au lomi he na’akan kau, anhamu’i kau, anli’u kau ma nasusab kau natuin Neno Anan. Fun leka au lima’e te au upeni matani. ¹¹ Namneo au fain amonot, mes hi miseke kau. So hi mes ampules kau. Fun maski au olof kau, mes anbi ale lasi au ka ubaunok fa u’ko ale haef knino makana nane sin. ¹² Ale lasi taka ma lasi amkakat ma ale kuasat ma matnai au mo’e ulali anbi ki nok seusabat he nati’ hi mihin, mak au haef knino kau. ¹³ Au ka kius ki fa anbi lasi sa’ ka, kalu tanesa nok tolas knino bian ka? So al anbi lasi i: Nak au ka ususab ki fa he nati’ him baen kau. Au toit ma’af neu nek tenab ka amneot nane! ¹⁴ Kiso au uloitan ulali hae tenu he et eu ki. Mes au ka lomif he ususab ki, fun au ka amif hi mu’im mes au aim ki. Fun li’ana ana ka naim fa maus neu amaf ainaf, so amaf ainaf es nami maus neu sin anhenu. ¹⁵ Es nane te au lomi he una’at au maus, ma neis na’ko nane au lomi he una’at au aok natuin hi monim. Kalu au nek ki, nansa hi kam nek kau fa ka? ¹⁶ Neu, au ka lomif he ususab ki, mes -- hi mak -- au amkesit kau es au hel ki eki fulit. ¹⁷ Ai au upeni osaf sa’ natuin atoni le au sonu neu ki ka? ¹⁸ Au toit Nai Titus he net neu ki ma au sonu bae knino bian he nok Nai Titus. Ai Nai Titus ansimo osaf sa’ na’ko ki ka? Fun hai nua kai mepu nekaf mese ma hai mo’e natuin lekat mese. ¹⁹ Hi mitenab lalo, ma hai mimneobom ambi hi matam. Hai mi’uab ambi Uisneno In human ma nok Neno Anan In kanan, mak, hai mo’e ale lasi nane bae benu manekat, hem hatani hi nek ateb knino. ²⁰ Au umtau leka au et, au upeni ki kan tomaf au lomik ma hi mipeni kau kan tomaf hi lomim. Au umtau kais-kais anmu’i matoes, manek nanan, lasi to’as, es-es naim kun alekot neu in aon, lasi ma’akan, lasi botu ai uab tutab, lasi mo’ko ma lasi taisibu. ²¹ Au umtau, leka au eti teni, au Uisneno of nabaun kau anbi hi matam. Ma of au nekak ansusal neu atoni namfau le afi anmo’en sanat ma sin ka nateunok fa na’ko sin mo’et amle’ut, sin mo’et amolemut ma sin mo’et amneot.

¹ I hae tenu le au et eu ki. Sulat Knino anetun nak, "Leko atoni nua ai tenu anfain saksi, lasi nane namneo. ² Neu ale atoni le afi anmo’e sanat ma atoni bian, au eut ulail ki ma haef i au etu ten ki. Tomas i leka au fe u’lo ki, papmese onle neno au et hae nua, of ka neka tenif sin kalu au eti teni. ³ Fun him loim he mita taka, nak Neno Anan nakua a’an anbi kau. Ma In of kan limae fa neu ki mes of nalile In matanin anbi ki. ⁴ Fun maski napeti In natuin lima’et, mes In anmoni natuin Uisneno In kausat. Namneo haim lima’e ambi In, mes of hai moni mok In natuin hi ma natuin Uisneno In kuasat. ⁵ So him au’hi aom, ai hi mibala ambi nek ateb knino ka? So him tae hi aom! Ai hi ka miteb fa anbi hi aom, nak Neno Anan Yesus nabala anbi ki ka? Fun kalu ka on fa nane, hi ka malan mibe’if. ⁶ Mes au ufnekan, ak hi mihin mak, ka hai es ka malan mibe’if su’at. ⁷ Haim onen toti neu Uisneno he nati’ kais hi mo’e lasi amle’ut. Fun ka natuin fa hai malan mibe’i su’at mes he nati’ hi mo’e lasi alekot. Maski ankius kai on atoni le ka nalan nabe’i fa su’at. ⁸ Fun hai ka mibe’i fa he mo’e sa’ le nasuli nok Uisneno lomin; so mak hai mo’e mituim Uisneno lomin. ⁹ Fun hai malin, leka haim limae mes hi mibe’i kim. Haim onen toti neu lasi i he nati’ hi knino ki. ¹⁰ Es nane te au tui ki sulat i leka au fe bi lo; he nati’ leka au ok ki kais au umaunun ki eki kuasat le hit Usif anfe neu kau. Fun anfe kau kuasat nane he fiti ki ma ka utselab ki. ¹¹ Lasi amsoput bae benu alki! Mimlil nai ma amhataniom he nati’ hi aom nakninon. So him simo ale au fainekat sin. So hi nekaf mese ma ansaof mese ma hi moni nok halan nekaf. Ma Uisneno, lasi manekat ma halan nekaf in un of anhaek nok ki. ¹² So hi masimo es nok es meik manekat knino. Ale to knino ansonu tabe neu ki. ¹³ Usif Yesus Neno Anan In tetus knino, ma Uisneno In manekan ma nekaf mese natuin Smanan Knino anhaek nok ki alki.