1 TIMOTIUS

¹ - ² Neu au anah Nai Timotius! Ho au anah natuin palsait neu Neno Anan, Sulat i au tui on haef knino Neno Anan Yesus. Au fani haef knino natuin plenat Uisneno, hit Afetin ma natuin plenat Neno Anan Yesus hit afnekan. So Uisneno, hit Ama ma Neno Anan Yesus hit Usif anfe tetus, nek mamun ma halan nekaf neu ko. ³ Au lomi he nati’ ho mumaika mubala ambi Efesus. Lasi nane au u’uab ulali bi neno au nao eu Makedonia. Au leul ko he mubala ambi Efesus, fun anbi nane amu’i atoni fauk le ane’tun noina ka amneot. Ma ho mes, musnasab sin. ⁴ Amfainek sin he nati’ kais sin tao nekan neu lasi nu’un pah pinan ma lasi pe’ot likin pe’en le ka nafnek nitaf. Ale lasi nane al neki matoes ma ka nanaoba fa bekot Uisneno le al mahine natuin palsait. ⁵ Fainekat nane in lomin esle’ nafena lasi manekat le anpoi na’ko nek muti, nek aknino ma palsait namneo. ⁶ Anmu’i atoni le kan monif onane anteni fun sin kiku anbi molok huma-huma le in lasi luman kun. ⁷ Sin anlomi hen fani anoni Plenat Knino unu, mes sin ka natenab nahin fa ale a’at le sin he na’uab ai ale lasi le sin he natiaba nani nok alekot. ⁸ Hit tahin, nak Plenat Knino unu nane leko ma namas, kalu tanoba nok alekot. ⁹ Hit mes tamnau nak Plenat Knino unu nane kan mo’e nani fa neu atoni amneot, mes neu atoni atanhai plenat sin, neu atoni abulalut, neu atoni le ka nahin Uisneno, neu atoni asanat, neu atoni pah pah pinan le kan mu’if Uisneno, neu atoni le namate in amaf ma in ainaf ma neu atoni ao’tes bian. ¹⁰ Neu atoni amoe lasi mapaisa, atoni le anbuion, abak atoni, apoiba, neu atoni le ansaksi poi ma neu atoni le in mo’et nasuli nok noina amneot. ¹¹ Noina nane mapeni anbi Beno Knino na’ko Uisneno le apinat ma mapules, le nana’at nalali neu kau. ¹² Au utulu nekak neu Neno Anan Yesus, hit Usif, le anfe kau matani he nati’ au tuthae In, ma ankius kau on atoni atam ota neu mepu nane. ¹³ Afi au u’akan ulali, ma hamu’i ma ukle’at In. Mes Uisneno nek kau, fun bi leku nane au fe ka palsaif, es nane au ka uhin fa sa’ le au mo’e. ¹⁴ Mes Usif tunan nek mamun nahoebon neu kau. In fe kau palsait ma manekat le anfani au ini leka au umesbok ok Neno Anan Yesus. ¹⁵ Tebes namneo a’at i -- es nane hit mes atsimo ma atpalsai nok alekot, "Neno Anan Yesus ankoenon nem neu pah pinan he namonib atoni asanat." Ma au le’i atoni asanat le anbulalu nesi. ¹⁶ Mes natuin lasi nane, Uisneno nek kau, he nati’ Yesus Neno Anan nalile In seusabat neu kau on atona asanat anesit. Ma lasi i anfani leta mese neu ale atoni le of anpalsai neu In ma napeni honis nabal-bal. ¹⁷ Uisneno, Kesel ale batan, so matola ma mapules piut, fun In kun le nabal-bal, le ka mamnita, lo mese kun! Amin. ¹⁸ Au anah Nai Timotius! Au fe ko mepu i fun umnau plenat Uisneno le mafefa knino sin natiaba nani anbi tolas knino antom neu ko. So plenat nane anfain bukael neu ko anbi ho mepu alekot. ¹⁹ Ho mautnom nok palsit neu Neno Anan ma nok nek muti. Anmu’i atoni le kan lae nan fa sin nek tenab, telan te sin palsait namneku. ²⁰ Fun anbi sin Nai Himeneus ma Nai Aleksander. Au una’at ulali sin nua sin neu Nitu, he nati’ sin nanoina ma nas-nas na’ko nasi’u Uisneno.

¹ Nahun-hunu, au fainek ko he nati’ ho mutiaba onen totis ma tulu nekaf neu Uisneno antom ale atoni; ² neu kesel ma neu ale anaet sin. Amtoti he nati’ hit moni nok nek atais ma nek tainine neu Uisneno nok taos ma mo’et alekot. ³ Nane lasi alekot ma malomi neu Uisneno, hit Afetin. ⁴ In anlomi he nati’ ale atoni napeni honis ma nahin lasi amneot. ⁵ Fun Uisneno nane mese, ma atoni tnana neu Uisneno ma mansian mese amsa, mansian nane Neno Anan Yesus. ⁶ In nana’at nalali In aon hen soi ale mansian na’ko sin sanat. Onane te Uisneno anlek nani anbi leku le’at, nak In lomi he nati’ atoni ok-oke napeni honis. ⁷ Natuin lasi nane Usi anlelu kau neu atoni le kan tamaf nonot Yahudi he etun sin beno antom lasi palsait amneot -- Au u’uab lasi amneot, au ka upoibok -- ⁸ Bi me-me amsa so atoni anonen toti nok nekan muti, ka nok fa to’as ma matoes. ⁹ Au lomi amsa he nati’ bife namasab in aon neki pake nek a’aka ma nek akesit. Kais in ane nakan funun, kais sin pake bale mnatu, ai baunkae usaf ai bale le upan matani. ¹⁰ Mes so neki mo’et alekot le antam ota neu bife le hen mo’e luli besa knino neu Uisneno. ¹¹ Leko nesi bife in ta’ah ma ansimo lasi noina nok nek atahas. ¹² Au ka pef mainuan neu bife he nanoina ai he naplenat atoni; so mes in anta’ kun. ¹³ Fun afi anmo’e nahunun Nai Adam namuni te bi Hawa. ¹⁴ Ma santuaf kan fuli fa Nai Adam mes anfuli bife nane tal antanhai plenat Uisneno. ¹⁵ Maski onane bife of anmoni natuin nahoni anah, lamu in nok nek baun nabala anbi palsait neu Neno Anan ma a’nek atoni bian ma anmoni nabala neu Uisneno.

¹ Tebes namneo a’at i, "Atoni le anlomi hen fani atopus tolas knino, in sinmakan mepu mese le ma’upa." ² Es nane atopus tolas knino mes atoni le kan mo’ef amle’ut, mafe bife mese, anpanat in aon, nek manuan, fef leko; lomi hen simo anao amnenat anbi in ume ma nabe’i nenoina atoni bian; ³ kais atoni amauf tua ai amatoes. In mes amahoet, anlomi halan nekaf. In ka nabe’i sinmakan noni. ⁴ In mes anpainola nahin in ume nok alekot, nanoina in anhenu he natnin ma antola in. ⁵ Fun atoni le in kan painola nahin in ume nanan, leka me in hen painola Tolas Uisneno ka? ⁶ Kais atoni le fe naslani, he nati’ kais in namoko’on oke te napeni kasat onle afi Nitu. ⁷ So in atoni makana anbi to; fun kalu ka onane, of atoni nakle’at in, talan te anmofu neu Nitu ini le’o. ⁸ Onane amsa neu diaken ai syamas, so atoni alekot le na’uab muti; kais atoni amniun tua ai atoni apalu noni. ⁹ Sin mes anpanat namepan lasi noina ma palsait atoni Slani le Uisneno nalile nani. Sin anmo’e nani nok nek muti. ¹⁰ Mes ansu’ sin amsa, leka sin kan mo’en fa lasi amle’ut, nabe’i anlek sin hen mepu anbi tolas knino. ¹¹ Onane amsa sin fenainu, so bife alekot kais na’uab nale’un es in kanan, anpanat sin aon ma na’uab muti anbi ale lasi. ¹² Diaken ai syamas so atoni le anmafe bife mese ma anpainola in anhenu ma in ume nanan nok alekot. ¹³ Fun atoni le antuthae nok alekot anbi tolas knino of antola sin ma anmaspetin he namolok antom sin lasi palsait neu Neno Anan Yesus. ¹⁴ Au ufnekan he eti kius ko, maski onane au tui ko ale lasi i. ¹⁵ Kalu au ka eti tia lab, ho muhin mulali, nak atoni le hen moni on Uisneno In ini esle’ tolas knino na’ko Uisneno amonit. Tolas knino nane anfani ni tula ma sukit lasi amneot na’ko Uisneno. ¹⁶ Tebes, lasi tolo neu hit luli besa knino lo naek kun: "In natonon anbi humaf mansian, namneob nani anbi Smanan Knino; nalile In aon neu ahake neno tunan sin. Anetun In beno neu uf-uf le ka nahin Uisneno, ma sin anpalsai In anbi pah pinan ma na’aiti neu neno tunan."

¹ Smanan Knino anetun mat-mat, nak bi neno amnemat anmu’i atoni le naen koti sin palsait ma natotan Neno Anan. Of sin natnin neu smanaf ma akiku ma natuin noina sman amle’ut, ² le natiaba nani natuin atoni asafanut le napoibon. Atoni nane sin nekan names’ok. ³ Sin nanoina atoni he kais anmafe ma anmamone ma kais nahan na’ko mnahat le Uisneno anmo’e nani. Mes Uisneno anmo’e mnahat nane he nati’ ale atoni le anpalsai neu Neno Anan ma atoni le nahin lasi amneot na’ko Uisneno sin nah nani nok tulu nekaf neu Uisneno. ⁴ Fun ale sa’ le Uisneno anmo’e nane leko, ma katit fa nuni ai kae kalu atsimo nok tulu nekaf neu Uisneno. ⁵ Fun tetus na’ko Uisneno ma onen totis anmo’e mnahat nane anfani alekot. ⁶ Kalu ho munoina ale lasi nane neu ho bae sin le anpalsai, of hom fani atuthaes neu Neno Anan Yesus, le anmepu nok alekot. Hom panat ho nekam nok a’an Uisneno le hit palsai ma lasi noina amneot le ho mutuin mulali. ⁷ Mes ho mu’lo mu’ko ale lasi nu’un kahahine le ka ma’ota fa. Mutakab ho aom neu monit luli besa knino. ⁸ Mutakab ho aom neu pah pinan in osan an-ana neu monim batan i ma monim batan amnemat. ⁹ Lasi i mes masimo ma mapalsai nok alekot. ¹⁰ Es nane hit tahaebok ma tapusebok ma atmepu matani, fun hit tafnekan neu Uisneno amonit; In Uis kesel Afetin neu ale mansian, nes-nesi ale atoni apalsait. ¹¹ Munoina ale lasi nane ma amleu sin he natuin nani. ¹² Kais es kan lae nan ko fa fun ho fe munif ko. Mes so hom fani heta mese neu ale atoni apalsait, anbi uab, anbi taos, mo’et, anbi lasi manekat, anbi lasi aki’at ma anbi ho monim aknino. ¹³ Anbi leku nane, tal au et ho mes namneo-namneo amsoi Sulat Knino neu ale atoni he mufena sin ma munoina sin. ¹⁴ Kais hom paleob halinat na’ko Smanan Knino le anfe nalali neu ko, bi leku penatua sin na’aiti niman neu ko, ma mafefa knino sin natiaba nalali han ba’an Uisneno antom ho aom. ¹⁵ Mepu nai ale lasi nane namneo-namneo he nati’ lasi hom nao mat mamnita neu atoni ok-oke. ¹⁶ Hom panat ho aom ma ampanat amsa ho lasi noina. Malan ambi ale lasi nane, fun nok mo’et onane, of he mumonib ho aom ma ale atoni le sin natnin ko.

¹ Kais mumaunun atoni le namnasi nesin ko mes mukain mani on amaf. Mukain atoin munif sin on olif, ² bife mnasi sin on ainaf, ma bife munif sin on fetof nok nek muti. ³ So hom tola bife banu sin, le namneo-namneo sin bife banu. ⁴ Mes kalu bife banu mese anmu’i anah ai upuf, nahunu mes sin nanoina he naleko sin ume nanan ma anseunbanin amaf ainaf ma babfin sin mo’et alekot. Fun lasi nane anhalin Uisneno nekan. ⁵ Bife banu le namneo-namneo in mes-mes kun, ma kan mu’if atoni le anpafa nani, al nafnekan neu Uisneno. Fai manas in onen toti piut neu Uisneno hen toti In tuntakus. ⁶ Mes bife banu le anmoni nok malinat, anmate nalali maski in fe anmoni. ⁷ Hom etun ale lasi i amsa neu bife banu sin he nati’ sin monin ka nok fa amle’ut. ⁸ Kalu anmu’i atoni le kan paloli fa in bia benu sin, nesnesi in ume nanan, atoni nane natotan in lasi palsait; in namle’u nesin na’ko atoni le ka apalsait. ⁹ Le maso’ik on bife banu, al bife banu le in uan kan labu fa na’ko ton bo’ne, le anmamone hae mese, ¹⁰ mahine on bife le anmo’e nalali ale lasi alekot, esle’ anpaloli in anhenu nok alekot, ansimo anao amnemat anbi in ume, antuthae ale atoni apalsait, ma antulun atoni le anmoni anbi manukat - atlefiha nak, sin le anmo’e nalali ale mepu alekot. ¹¹ Kais hom soi ale bife banu le fe munif. Fun leka nek sinmakat anbati sin na’ko Neno Anan, sin lomi hen mamone anteni. ¹² Ma of sin nasanab fun natotan lasi manba’ab le anfe nalali neu Neno Anan. ¹³ Onane amsa of sin polin leku fun anpoi antam atoni sin ume. Ma lasi amle’ut le nesi anteni, esle’ sin nanoni he na’uab nale’un atoni bian sin kanan ma anselo nok atoni bian sin lasi ma namolok ale lasi le ka nabe’i he namolok nani. ¹⁴ Es nane te, au lomi he nati’ ale bife banu munif sinmamone anteni, ma napenin anah oke te naleko sin ume nanan, he nati’ hit musu sin kais napeni manuan he nale’un hit kanak. ¹⁵ Fun anmu’i bife banu le ankiku oke te natuin Nitu. ¹⁶ Mes kalu atoni ai bife apalsait le anmu’i in ini le anbanu, in mes antuntaku sin he nati’ kais anhafen tolas knino. Onane te tolas knino nabe’i antuntaku sin le namneo-namneo anbanu. ¹⁷ Ale penatua le anmepu nok alekot sin napeni kan tola kuni nua’ nes-nesi sin le anmakoen neu lasi keti knino ma nanoina. ¹⁸ Fun antui anbi Sulat Knino nak, "Bia ai bijae le fe anteli ane hen beti nok ta’un, kais ampano in fefan", onane amsa, "Atoni le anmepu, in mu’i hak he napeni in baen". ¹⁹ Kais hom simo lasi aktuta neu penatua, so anmu’i saksi atoni nua ai atoni tenu. ²⁰ Atoni le anmo’e sanat, ho mukain anbi tolas knino sin matan, he nati’ atoni bian sin namtau. ²¹ Anbi Uisneno, ma Neno Anan Yesus, ma ahake neno tunan le mabeti sin matan, au toti matani he nati’ ho mutuin ale lekat i ka nok fa tenab neu sekau amsa ma ka nabe’i hom hake mok es. ²² Kais ho manap he mu’uiti nimam neu atoni mese le hem hatani in on atuthaes Usif tunan. Kais amselo ambi atoni bian sin sanat. Ampanat ho aom na’ko ale lasi amle’ut. ²³ Kais al minu oe anmes, so minu amsa tua mina amtasa kle’o hem tulun ho teim amenat fun fe’-fe’at ho mumen. ²⁴ Atoni bian sin sanat, fe ka malefi, mamnita nalali nok alekot. Mes atoni bian sin sanat mahine namuni. ²⁵ Onane amsa ale mo’et alekot mamnita laba. Ma mo’et le ka mamnita fa laba amsa, ka nabe’i natolo nabala.

¹ Ale atoni Slani le anfani ate, sin mes nahin, nak sin tuan nane so napeni kan tola, he nati’ atoni ka nabe’i antek nale’un Uisneno kanan ma hit lasi noina. ² Kalu sin tuan le nane atoni apalsait, kais sin nanebet nani, fun sin mabae benu anbi Neno Anan. Sin mes antuthae sin tuan nane naleko nesi anteni, fun tuan le napeni tuthaes nok alekot nane in amsa atoni apalsait le he napeni manekat. ³ Anmu’i atoni le nanoina lasi noina bian na’ko nane ma ka natuin fa noina amneot na’ko hit Usif, Yesus Neno Anan. Sin ka natuin fa noina le namnes nok hit luli besa knino. ⁴ Ale atoni nane sin atoni le namoko’ok mes sin ka nahin fa sa’-sa’. In menas esle’ anlomi uab suli ma matoes antom a’at huma-huma talan te napoitan lasi manek nanan, mabanat, ma’akan ma natenab lae lasi le ka alekot, ⁵ ma lasi matoes le ka oke nitaf. Ale atoni nane sin nek tenab antu’en ma ka namneof. Sin natenab nak of napenin osaf na’ko luli besa knino. ⁶ Namneo luli besa knino anfe kit osaf a’naek, kalu atoni natenab nak noba, neki sa’ le in anmu’i. ⁷ Fun kan mu’if sa’es amsa le hit teki neu pah pinan i. Ma kan mu’if sa’es amsa le nabe’i hit teki anpoi na’ko pah pinan i. ⁸ Es nane, kalu anmu’i mnahat ma tainusat, nane lo noba. ⁹ Mes atoni le anlomi hen fani amu’it, antam neu lasi su’at, antam neu le’o natuin lasi sinmakat huma-huma le amonot ma nale’un. Ale lasi sinmakat nane anmo’e atoni anfain amnekut ma amle’ut. ¹⁰ Fun na’ko lasi atsinmakan noni, lasi amle’ut huma-huma anbol. Anmui atoni bian le sin nami noni masin ka natuin anteni fa noina atoni Slani, talan te sin sutai hamu’it namfau le naskuku sin nekan. ¹¹ Mes ho atoni Uisneno, es nane ho mes mu’lo mu’ko ale lasi nane. Amhataniom hem fani atoni amneot anbi Uisneno human, le ama’etnom neu Uisneno ma ampalsai neu Neno Anan, ma le anmu’i manekat, seusabat ma nek aklati. ¹² Mabe’u nai namneo-namneo neu sa’ le hom palsai ma so hom musik honis nabal-bal. Fun neu lasi nane Uisneno anboin ko bi leku hom aun anbi atoni mfaun sin matan nak hom palsai neu Neno Anan. ¹³ Anbi Uisneno le namonib ale sa’ In human, ma anbi Neno Anan Yesus In human, le anfe saksit amneot neu Nai Pontius Pilatus, au uplenat lasi i neu ko: ¹⁴ Ho mutuin plenat i nok nek muti ma ka kobe fa talan te neno hit Uisneno, Yesus Neno Anan ankoenon anfani nem. ¹⁵ Leka le hen koenon nem, Uisneno es anlek nani, In kun es anmu’i kuasat anbi ale sa’; In apinat, Usif neu ale Usif ma Tuan neu ale tuan. ¹⁶ In kun le kuasat maten ka neplenat; In anmoni anbi meusine le es ka nabe’i hen haumak. Katit fa mansian mese le nit In namneo mansian ka nabe’i he nit In. Tola ma kuasat neu In telan te nabal-bal! Amin. ¹⁷ Hon etun neu ale atoni amu’it ambi pah pinan i, he nati’ kais sin nanaebok ma kais nafnekan neu nu’in le of namneku. Mes so sin nafnekan neu Uisneno le anfe kit ale sa’ nok athoes he nati’ hit malin. ¹⁸ Ametun sin he nati’ sin mo’en alekot, anfani amu’it anbi mo’et alekot, amahoet ma anlomi hen bati neu sin biakin. ¹⁹ Natuin lasi nane sin nabua maus le anfani sukit alekot neu neno amnemat. Ma nok lasi nane, of sin napeni honis nabal-bal, es le honis namneo. ²⁰ Koi Timotius, ampanat nai lek-leko sa’ le anfe nalali neu ko. Ho mu’lo mu’ko ale uab ma molok le ka manesa fa ma uab suli le antek nani nak, "Lasi hine." ²¹ Fun anmu’i atoni le nanoina nani, talan te sin anbeo na’ko noina atoni Slani, le afi sin palsai nani. So Usif tunan anfe tetus neu ki.