1 TESALONIKA

¹ Neu bae benu tolas knino anbi Tesalonika le anfani to Uisneno hit Ama ma hit Usif Yesus Neno Anan. Hai tenu kai, Nai Paulus, Nai Silwanus ma Nai Timotius mifnekan he nati’ Uisneno anfe tetus ma aomina neu ki. ² Hai mitulu hai nekam piut neu Uisneno natuin hi alki, ma hai mimnau ki anbi hai onen totis. ³ Leka haim onen neu Uisneno ma hit Ama, hai mimnau ki piut fun mepu le hi minaoba natuin palsait neu Neno Anan, hi manekam neu atoni bian talan te him tuthae sin, ma hi lasi afnekat le matani neu hit Usif Yesus Neno Anan. ⁴ Hai mihin nak Uisneno nek ki ma anbeti ki hem fani In ini. ⁵ Fun hai mitiaba Beno Knino neu ki ka al fa uab ma a’at mes nok kuasat ma nok Smanan Knino. Ma hai miteb lasi amneot na’ko Beno Knino nane. Hi mihin, hai moni onme neu hi alekot leka hai fe ambi hi atnanam. ⁶ Hi mituin milali hai heta ma heta Usif tunan. Maski him bi hamu’it, him simo nok malinat beno le haim etun neu ki. Lasi malinat nane Smanan Knino es anfe. ⁷ Oke te him fani heta neu ale atoni Slani anbi Makedonia ma Akhaya. ⁸ Fun nauba na’ko ko, beno antom Usif tunan nasitbon nalali ante Makedonia ma Akhaya. Ma ka al fa nane, mes beno antom hi palsait neu Uisneno antia me-me, talan te hai ka mi’uab amtenif sa’ antom lasi nane. ⁹ Ale atoni na’uab antom le him simo kai bi neno hai met meu ki. Sin na’uab antom lasi hi misaitan faut le’u ma hau le’u ma aim meu Uisneno le anmoni ma amneot he miluli ma mibes meu In. ¹⁰ Sin na’uaben amsa antom lasi le hi mifnekan Uisneno Anmone nanoebon nem na’ko neno tunan onme, esle’ Yesus, le Uisneno namonib nafani na’ko amates. Yesus nane amsa es namonib kit na’ko to’as Uisneno le of nem.

¹ Bae benu alki! Hi mihin kim le hai aim meu ki ambi i ka luman fa. ² Hi mihin nak afi hai fe ka aim meu ki fa anbi Tesalonika sin hamu’i ma nakle’at kai anbi Filipi. Mes maski antoni namfau anlaban kai, hit Uisneno anfe kai maspeti hem etun ki Beno Knino le na’ko Uisneno. ³ Fun hai fainekat nane ka natuin fulit ai ka natuin fa tenab amle’ut ma ka nok fa lasi losib amsa. ⁴ Mes Uisneno ankius kai on atam ota ma In nana’at Beno Knino nane neu kai. Es nane hai mimolok, ka natuin fa he miminab atoni pah pinan sin nekan; mes he miminab Uisneno In nekan. Fun Uisneno In es ansu’ hai nekam. ⁵ Hi mihin kim nak hai ka mimolok fa mek fefmina ai uab losib he mitolo’ salit-salit apalu’ ai akomat. Uisneno ansaksi lasi nane! ⁶ Hai amsa ka maim fa pules na’ko atoni pah pinan -- he na’ko hi ai na’ko atoni bian. On Neno Anan haef hai mibe’i hem toit sa’ na’ko ki. ⁷ Mes hai mo’e anbi hi atnanam onle ainaf mese le anfaf ma ampaloli in anah. ⁸ Onane amsa natuin haim nek ki’ haim lomi hem fe ki ka al fa Beno Knino na’ko Uisneno mes hai monim amsa, fun haim nek ki. ⁹ Fun hi fe mimnau mit, bae benu alki, hai haet ma hai puse neu ki. Hai meup fai manas, he nati’ kaisa anfani baut mafena neu sekau amsa le anbi ki, leka haim etun Uisneno In Beno Knino neu ki. ¹⁰ Him fain saksi neu kai, onane amsa Uisneno. Fun hai monim knino ma amneot ma ka nok fa akbunef sa’ neu ki alki, le him palsai neu Neno Anan. ¹¹ Hi mihin, nak hai mo’e neu ki mes-mese on amaf mese le anmo’e neu in anhenu. ¹² Haim fainek ki, haim toti nok matani neu ki he nati’ hi moni onane talan te anhalin Uisneno nekan. Fun Uisneno anboin nalali ki he mipeni pa’ ambi Pah Pinan Fe’u Uisneno ma ambi In apinat. ¹³ Anmu’i anteni lasi mese bian le anmo’e kai he mitulu nekam neu Uisneno. Esle’, bi leku hai mitiaba beno na’ko Uisneno neu ki, him simo beno nane ka on fa beno na’ko mansian, mes on beno na’ko Uisneno. Ma tebes nane beno na’ko Uisneno! Uisneno anmepu anbi ki le anpalsai neu Neno Anan. ¹⁴ Bae benu alki, lasi le him naben milali, tolas knino Uisneno abit Yudea le anfani Neno Anan Yesus ini sin amsa’a naben nani. Him naben hamu’it na’ko hi uf, onle tolas knino Uisneno abit Yudea sin naben nani na’ko atoni Yahudi sin. ¹⁵ Atoni Yahudi sin namate nalali Usif Yesus ma ale mafefa knino sin ma anhamu’i kai. Sin laban Uisneno piut ma anfani musu neu ale atoni ok-oke! ¹⁶ Sin nakain kai he nati’ kais haim etun beno knino neu ale uf kan tamaf nonot Yahudi, le he neik amonit neu sin. Onane te atoni Yahudi ansato sin sanat piut tal nehenu anfin. Ma tomas i to’as Uisneno anbol neu sin ka natfek. ¹⁷ Mes bae benu alki, hai mibaitsom mok ki leku tuk es bi -- hai matam, mes hai nekam kahaf -- haim lomi he mi’eku amteni mok ki. ¹⁸ Haim lomi he met meu ki -- ma au, Nai Paulus, he et eu ki neis na’ko hae mese --, mes Nitu nakain kai. ¹⁹ Namneo hai afnekat ma amlilat es hi. Bi leku Yesus, hit Usif, nanoebon nem ma hit athake atbi In matan, of him fain amlilat neu kai. ²⁰ Namneo, hai apinat ma hai amlilat esle’ hi.

¹ Hai kam un man fa hai lasi malinat. Es nane hai mifek he mimaika’a mes-mes anbi Atena. ² Oke te haim sonu Nai Timotius, hit bae le anmeup nok kai neu Uisneno bi etus Neno Anan In Beno Knino. Haim sonu in he nati’ anhatani ki ma anfainek ki he hi palsait ansato anteni neu Neno Anan. ³ Ma kaisa anmu’i es anbi ki le in nek ateb knino nabeko, natuin hamu’it i. Fun hi mihin, nak ale hamu’it i natam nalali neu lekat Uisneno neu kit. ⁴ Fun afi hai fe mok ki, haim eut main ki, mak of hit tapeni hamu’it. Ma lasi nane onle hi mihin, anbol nalalien. ⁵ Natuin lasi nane, au sonu Nai Timotius neit neu ki, he au uhin neu hi nek ateb knino. Fun au umtau kal-kalu santuaf ansu’ ki, oke te hai haet nane luman. ⁶ Mes tomas i, Nai Timotius anfani nemen na’ko ki ma neki beno le anhalin kai neu on me hi nek palsait neu Neno Anan ma hi lasi manekat. In eut kai nak hi mimnau kai piut ambi hi nekam. Ma him lomi he mi’eku mok kai, onle hai amsa amlomi he mi’eku mok ki. ⁷ Es nane, bae benu alki, anbi ale hai sutais ma hai susal. Hi palsait neu Neno Anan namepan hai nekam hai malin natuin hi nek ateb knino. ⁸ Tomas i, hai nekam anmoni anfan, lamu him hake mi’ki mimesbom mok Usif. ⁹ Es nane hai mitulu hai nekam neu Uisneno natuin lasi malinat le hai mipeni anbi Uisneno In human natuin hi. ¹⁰ Fai manas haim onen toti piut, he nati’ hit ta’eku humaf nok humaf; ma amsato ki lasi sa’ le him labu mani anbi hi nek ateb knino. ¹¹ So Uisneno hit Ama ma Yesus hit Usif, nasoitan lanan neu kai he mi’`eku mok ki. ¹² Ma so hit Usif ansato ki ma namu’ib ki he nati’ hi manek es nok es ma amnek ale atoni, onle hai amsa amnek ki. ¹³ So In hatani hi nekam, he nati’ knino ki ma ka kobe ki fa anbi Uisneno hit Ama In matan, leka Yesus hit Usif, nanoebon nem nok ale atoni le anfani In ini.

¹ Oke te, bae benu alki, so hi mituin hai heta antom lasi hi he moni onme hem halin Uisneno nekan. Namneo tomas i hi moni milali onle nane. Mes tomas i nok kuasat Usif Yesus, haim toit matani neu ki he nati’ him hataniom amteni anbi lasi nane. ² Fun hi mihin milali ale lekat le haim fe ki natuin kuasat Usif Yesus. ³ Uisneno In lomin on i, nati’ hi mikniono’om, him panat hi aom na’ko lasi kake. ⁴ Atoni mes-mese napeni bife mese hen fani in fe ma anmoni nokan anbi knino ma amneot. ⁵ Ka natuin fa nek sinmakat pah pinan, onle atoni le ka nahinef Uisneno. ⁶ Anbi lasi i, kais atoni anmo’e sanat neu in baef neki mo’et amle’ut. Fun Uisneno of anseunbanin ale lasi nane, onle afi haim eut milali neu ki. ⁷ Uisneno anboin kit, ka neu fa het mo’e lasi amolemut mes het mo’e lasi aknino. ⁸ Es nane te, atoni le antite fainekat i in kan tite fa atoni pah pinan mes in tite Uisneno le In anfe Ini Smanan Knino neu ki. ⁹ Au ka tui ki fa antom lasi manekat es nok es, fun hi minoni milali lasi manekat es nok es na’ko Uisneno. ¹⁰ Lasi nane hi mo’e milali neu hi bae benu alsin, anbi Makedonia ok-oke. Mes haim fainek ki, bae benu alki, he nati’ hi mo’e nesi anteni na’ko le nane. ¹¹ Moni nok nek tainine neki kan tola neu ki, him pantom bi ale lasi. Ma hi meup meki hi niman, onle afi haim ba’an milali ki. ¹² Kalu hi moni onane hi kam futnom neu sekau amsa, ma ale atoni le kan palsai fa neu Neno Anan, of antola ki. ¹³ Bae benu alki, haim lomi he nati’ hi mihin namneo antom ale atoni le anmaet nalali, he nati’ kais him kul on atoni le kan mu’if afnekat. ¹⁴ Kalu hit nekak nateb, nak Yesus anmate ma anfen anfani, hit nekak nateb amsa, nak ale atoni le anmate anbi Yesus, Uisneno of nabuab sin nok In. ¹⁵ Haim eut ki lasi i meki hit Usif In a’an; leka hit Usif nanoebon anfani nem, hit le fe atmoni, of ka tahunun fa ale atoni le anmaet nahunun kit. ¹⁶ Fun hit Usif of ansanu na’ko neno tunan neki taka. Ahake neno tunan sini nakaf of anhunun ma Uisneno In to’is nahan. Oke te ale atoni le anmate anbi Neno Anan of sin fen nahunun. ¹⁷ Nalali te, hit le fe atmoni of nait kit nok sin anbi nope het senu hit Usif anbi aileti ai neno tnanan. Onane te hit tamaika tok Usi talan te nabal-bal. ¹⁸ Es nane te so hi mafainekan es nok es meki ale a’at i.

¹ Bae benu alki! Neu leku ma tabu leka ale lasi nane hen bol hai kam tui ki fa. ² Fun hi mes mihin, nak neno le Usif he nanoebon nem of on abakat nem nok fai. ³ Leka atoni sin na’uab nak, Halan pah ma katit fa amale’ut" -- naskek onane te lasi amle’ut anbol neu sin. Lasi nane of naskekeb sin onle men mahonit anbol neu bife a’aput -- of sin ka naen nanan fa. ⁴ Mes hi, bae benu alki, hi ka monif anbi mesokan, talan te neno nane naskekeb ki on abakat. ⁵ Fun hi alki atoni le anmoni ambi meusine; him tam anbi manas le meusine. Hit kat monif anbi mesokan ai le atam anbi fai le mesokan. ⁶ Es nane kais him tup on atoni bian, mes hit be’ ma nekak nahin. ⁷ Fun atoni atupas nane, antup nok fai ma atoni amafu tua nane, anmafu nok fai. ⁸ Mes hit le i atoni manas le atam anbi manas le meusine so hit nekak nahin. Hit mes atpake palsait ma manekat on sobalu besi het maken. Ma hit sobe besi nane afnekat honis neu kit. ⁹ Uisneno anbeti kit ka neu fa he tapeni In to’as mes he nati’ hit tapeni honis natuin hit Usif Yesus Neno Anan. ¹⁰ Yesus anmate neu kit he nati’ bi neno In nanoebon anfani nem -- oni hit fe atmoni, oni hit maet talali -- hit moni tabua tok In. ¹¹ Es nane, so hi mafainek es neu es ma mahatanin es neu es onle hi mo’e mani. ¹² Bae benu alki! Haim toit ki, he nati’ him tola ale atoni le anmepu matani anbi ki; esle’ atoni le Uisneno anbeti sin hen topu ma anfainek ki. ¹³ Him simo ma mitaim sin nok lasi manekat natuin sin mepu. Hi moni ambi halan nekaf es nok es. ¹⁴ Haim toti ki amsa, bae benu alki, he nati’ hi mikain ale atoni le kan monif nok amneot. Amhalin ale atoni le nekan na’oni. Amtuntaku alima’et sin ma amseusab neu ale atoni. ¹⁵ Him panat, he nati’ kais es anseunbanin lasi amle’ut neik lasi amle’ut. Mes hi mo’e lasi alekot piut es neu es ma neu ale atoni ok-oke. ¹⁶ Mimlil nai ambi ale leku. ¹⁷ Onen totis kais natfek. ¹⁸ Mitulu nekam neu Uisneno anbi ale lasi, fun Uisneno anlomi lasi nane anbi ki onle ale atoni le anmoni namesbon nok Neno Anan Yesus. ¹⁹ Kais him sifo mimate Smanan Knino. ²⁰ Kais hi minebet ale lasi beno le Smanan Knino anfe nani. ²¹ Him tai ale lasi ma ampanat lasi alekot. ²² Hi mi’lo mi’ko ale lasi amle’ut. ²³ So Uisneno le anfe ki halan nekaf, anmo’e ki on atoni le namneo-namneo anmoni al neu Uisneno. So Uisneno anpao hi aom ok-oke, smanan, monim ma hi aom, he nati’ kais kobe anbi neno hit Usif Yesus Neno Anan nanoebon anfain nem. ²⁴ Uisneno, le anboin nalali ki, of anmo’e lasi nane fun In aki’at kun. ²⁵ Bae benu alki, him onen toti neu kai. ²⁶ Mitiaba hai tabe neu ale bae knino ok-oke le palsait mese nok kit. ²⁷ Nok kuasat Usif tunan, au toit ki he nati’ him soi sulat i neu bae knino sin ok-oke le palsait mese nok kit. ²⁸ So Yesus Neno Anan, hit Usif, anfe tetus ma aomina neu ki.