1 PETRUS

¹ - ² Bae benu to mabeti Uisneno le nasitbon anbi paha lo anbi pah-pah Pontus, Galatia, Kapadokia, Asia ma Bitinia! Au Nai Petrus, haef knino Yesus Neno Anan, ufnekan he nati’ Uisneno anfe ki tetus ma halan nekaf nok athoes. Uisneno anbeti ki hem fani In to namnes nok lekat Uisneno hit Ama. Ma Smanan Knino anmo’e nalali ki to knino, neu Uisneno, he nati’ hi mituin neu Yesus Neno Anan ma naknino ki natuin In na’. ³ So hit tanaeb Uisneno, hit Usif Yesus Neno Anan In Amaf, In nek nis kit, es nane te In fe kit monit fe’u natuin nafena nafani Yesus Neno Anan na’ko amates. In anfe kit afnekan amonit. ⁴ Hit tafnekan he tapeni tetus le Uisneno naloitan nani neu In to, esle’ tetus le nabela nani anbi neno tunan, le ka namle’uf ai anpun ai anmoes. ⁵ Ale lasi nane naloitan nani neu ki, fun him palsai neu Uisneno. Ma anpao ki neki Uisneno In kuasat, he nati’ hi mipeni honis le of natonon anbi neno hatas amsoput. ⁶ Es nane te, so hi nekam anmalin, maski tomas i neu leku tuk es hi mes minu’om natuin him naben lasi su’at huma-huma. ⁷ Ale lasi nane sin he naton nani hi nek palsait ini mneon. Noni mnatu le namle’u amsa ansu’ nani neki ai. Hi nek palsait le ma’upa nesin noni mnatu, of ansu’ nani amsa he nati’ namep. Ma nok lasi nane of anpules ki ma antola ki ma nalatan ki bi neno Yesus Neno Anan ankoenon anfani nem. ⁸ Hi fe ka mit fa In, mes him nek In, Hi fe ka mit fa In, mes tomas i him palsai neu In. Hi malin fun malinat nane naek ma kat soi tabe’ifa. ⁹ Fun hi mipeni hi nek palsait in salin, esle’ lasi honis neu hi smanan. ¹⁰ Lasi honis nane afi mafefa knino sin anpe’o ma naknutu, le sin nabeno nalali antom tetus aknino le Uisneno anfe nani neu ki. ¹¹ Sin anpe’o le onme ma leka lasi nane of anbol, le ansali natuin Neno Anan Smanan le natua anbi sin nekan. Bi leku nane Ini Smanan ansaksi neu sin antom ale lasi mane’at le Neno Anan mes ansutai nani ma antom In apinat le of nem namuni. ¹² Uisneno naton neu mafefa knino sin, nak sa’ le sin anmo’e ka neu fa sin, mes neu ki; esle’ lasi le him nen milali na’ko ale amnek Lasi Knino antom Yesus Neno Anan. Sin natiaba ale lasi nane neu ki neki kuasat Smanan Uisneno le In ansonu na’ko neno tunan. Ma ahake neno tunan sin amsa anlomi he nahin Beno Knino le sin ane’ut nani. ¹³ Es nane, te so hi miloitan nai. Ampanat nai ma mifnekan tetus le of anfe nani neu ki, bi neno Yesus Neno Anan ankoenon nem. ¹⁴ Mituin nai neu Uisneno, ma kais hi moni mituin hi sinmakat ahunut, bi neno hi fe mono ma ka mihinef Uisneno. ¹⁵ So hi knino ki anbi ale sa’ le hi mo’e, papmese onle Uisneno le anboin ki nane aknino. ¹⁶ Anbi Sulat Knino antui nani nak on i, "So hi knino ki, fun Au knino Kau." ¹⁷ Him tek Uisneno mak Ama bi leku him onen toti neu In. Uisneno nane es anlefi lasi neu mansian natai nok sin mo’et ma kan betif humaf ma masaf. Es nane leka hi fe moni ambi pah pinan i, so hi minaeb Uisneno ambi hi monim. ¹⁸ Fun hi mihin sa’ le anbaen nalali he nafetin ki na’ko hi monim son-sona, le hi mipeni na’ko hi babfini. In baen nane ka neki fa noin muti ma noni mnatu, ¹⁹ mes neki sa’ le ma’upa; esle’ Neno Anan In aon, le anfani bibi kase le anlolo neu Uisneno ka nok fa sanat ma ka nok fa kobe. ²⁰ Uisneno anbeti Neno Anan na’ko neno pah pinan fe ka nabelon. Ma anbi neno-neno pah pinan he namsopu, In koenon nem neu pah pinan he nati’ namonib ki. ²¹ Him palsai neu Uisneno natuin In, le nafena nafani In na’ko amates ma nalatan In. Es nane, Uisneno le him palsai ma neu Uisneno nane amsa hi mibela hi afnekat. ²² Hi miknino milali hi monim natuin him panat lasi noina na’ko Uisneno talan te him nek hi bae knino sin nok amneot. Es nane te hi manek es nok es meki nekam oke. ²³ Fun natuin a’an Uisneno le anmoni ma nabal-bal, anmo’e ki hem fani mansian fe’u le ka nahonis ki fa na’ko mansian, mes na’ko Ama abal-balat. ²⁴ Fun antui nani anbi Sulat Knino nak, "Ale amonit nane onle hun ma ma’u, ma ale masan apinat onle hun in sufan. Hun nane anmeto ma in sufan ankua, ²⁵ mes Uisneno In a’an nabala talan te nabal-bal."

¹ Es nane, him polin nai ale mo’et amle’ut na’ko hi aom; kais mipoibom, ma kais ama’safanu. Kais mi’unu nekam, ma kais mikle’at atoni bian. ² So him fani on li’ana le fe nahonis le anmeno susu mneo ma knino, he nati’ hi minae ma mipeni honis. ³ Anbi Sulat Knino antui nak on i, "Him tamis milali Uisneno In alekot." ⁴ Es nane te, aim nai meu Usif. In on fatu amonit, es fatu le mansian anpolin fun sin nak ka ma’upa fa; mes Uisneno anbeti nani on fatu ma’upa. ⁵ Hi amsa onle fatu-fatu amonit. Es nane so him lomi hen pake ki neu he nafena ume Uisneno le knino. Nok lasi nane him fani ana’ lasi fuat le anmoni neu Uisneno, ma natuin Yesus Neno Anan natulu nani neu Uisneno, fua tulu knino le malomi anbi Uisneno nekan. ⁶ Fun anbi Sulat Knino antui nani nak on i, "Au beti ulali fatu ma’upa mese, le ubela ani anbi Sion fatu naif; ma atoni le anpalsai neu In, of ka namaeb nani fa." ⁷ Fatu nane ma’upa neu hi le ampalsai. Mes neu atoni le kan palsai: a’an knino nak: "Fatu le amoe ume sin anpolin nani, anfani fatu naif, ma nane fatu le anmo’e atoni he nastun, fatu le anmo’e sin hen mofun." ⁸ Sin nastun neu fatu nane, fun sin kan palsaifa neu a’an Uisneno. Uisneno naloitan nani onane neu sin. ⁹ Mes hi le nane to mabeti, ana’ fuat knino le antuthae usif, uf le knino neu Uisneno. Uisneno anbeti ki ma anboin ki hem poi mi’ko mesokan ma amtam meu In meusine sanmakat, nok salit he nati’ him etun beno antom In mo’et amkakat sin. ¹⁰ Afi hi ka to Uisneno ki fa, mes muni i him fani In to. Afi In ka nek ki fa, mes muni i hi mipeni In manekan. ¹¹ Bae benu manekat! Au fainek ki on anao amnemat ma matateme ambi pah pinan i. Au toti ma ufnekan he nati’ kais hi mituin pah pinan in lomin le anmaken hen be’u hi smanam. ¹² Hi mo’et alekot mes natonon anbi ale uf le kan tamaf nonot Yahudi sin atnanan, he nati’ leka sin antek nale’un hi kanam on atoni amle’ut, sin kius nit hi mo’et alekot, oke te sin nanaeb Uisneno bi neno le In ankoenon nem. ¹³ Ambi Uisneno, so hi miluli neu ale mansian ana’ kuasat, leko he nen Kesel le anfani ana’ kuasat abainesit, ¹⁴ ma neu amaKumlol le Kesel anlek nani hen hukum atoni le anmo’e amle’ut ma hen tola atoni le anmo’e alekot. ¹⁵ Fun Uisneno anlomi, he nati’ hi mo’et alekot nane anpoh ale atoni amonot sin fefan. ¹⁶ Hi moni on atoni ao sona, kais on atoni le anpake ansan lasi ao sona, hen amu sin mo’et amle’ut mes hi moni on ate Uisneno. ¹⁷ Hi milile lasi tola neu ale atoni, him nek hi bae sin, mimtausan Uisneno ma amtola kesel. ¹⁸ Neu ale ate, mibaunom mok amtaus neu hi tuanenu, ka al fa neu alekot ma amahoet mes neu abulalut amsa. ¹⁹ Uisneno of anfe tetus neu ki, kalu hi mihin Uisneno lomin, amsutai ale taos mo’et ka amnonot nok seusabat. ²⁰ Fun hi mipeni alekot sa’ ka leka him sutai mane’at natuin hi mo’e sanat? Mes kalu him sutai mane’at natuin hi mo’e alekot, Uisneno of anfe ki tetus. ²¹ Natuin lasi nane Uisneno anboin ki. Fun Neno Anan ansutai nalali mane’at neu ki ma nok lasi nane In anfe ki leta mese he nati’ him nao mituin In nobin. ²² In kan mo’ef sanat ma katit fa moel anbi In fefan. ²³ Leka sin na’akan In, In kan tobef neki akan. Leka In sutai mane’at, In ka na’unu fa; al In nana’at In lasi neu Uisneno, Alef lasi amneot. ²⁴ Neno Anan anloi hit sanat anbi hau nehe, he nati’ hit ao sona kit ta’ko kuasat sanat ma atmoni tatuin Uisneno lomin. Neno Anan In papa fokel sin es naleko ki. ²⁵ Afi hi onle bibi kase le ansek, mes muni i In neik nafani ki he mituin Atukus ma Aneot hi smanam.

¹ Onane amsa hi bife amamonet, hi mibaunom neu hi mone sin, he nati’ kalu anmu’i anbi sin le kan palsai neu beno na’ko Uisneno, hi mo’et alekot nane anmo’e sin hen fani apalsait. Ma kais hi ma’uab sa’-sa’ neu sin, ² fun sin kius nit hi mo’et le muti ma naleko. ³ Kais hi mimasab hi humam al anbi kotin, onle ama’ne hi nakfunu, ampake bale mnatu ma ampake tainusat amasat. ⁴ So hi masam nane -- anpoi na’ko hi nekam, taos mo’et le neki fef mina ma han mina ma nok tainine; nane hi masam abal-balat le ma’upa natuin Uisneno lomin. ⁵ Nok mo’et i anbi batan ahunut ale bife knino le nafnek neu Uisneno namasab sin aon ma nabaunok neu sin mone. ⁶ Bi Sara amsa onane, in natnin neu Nai Abraham ma antek in nak tuan. Hi le nane Bi Sara in anhin, kalu hi mo’e alekot ma ka mimtauf neu ale sa’. ⁷ Onane amsa hi, atoni amafet, so hi moni nok nek ahinet neu hi fe, ma hi mihin mak sin le nane suf alima’et. Milile fef tola han tola neu sin, fun sin nabua nok ki, of him simo halinat amonit na’ko Uisneno. Hi mo’e onane he nati’ kais anmu’i le he nasenib hi onen totis. ⁸ Ma lasi amsoput esle’: So hi ala ki fefa mese ma hanaf mese. So hi manek es nok es onle atoni le anmaoil tatan. Ma so hi mu’i nek amnaut ma nek baun es nok es. ⁹ Ma kais him seunbanin lasi amle’ut meki lasi amle’ut, ai lasi akan nok lasi akan. So him tek alekot neu sin, fun Uisneno anboin ki he him simo tetus na’ko In. ¹⁰ Fun antui nani anbi Sulat Knino nak, "Atoni le anlomi hen tamis amonit ma anlomi he nit neno-neno alekot, so anpanat in fefan he nati’ kais namolok ale lasi amle’ut, ka na’uab fa ale lasi moel. ¹¹ In mes na’lob lasi amle’ut ma anmo’e lasi alekot; so in nautnon namneo-namneo he napeni halan nekaf. ¹² Fun Usif tunan ankiso piut ale atoni le natuin In lomin, ma Usif tunan natnin piut sin onen totis; mes Usif tunan antumatan ale atoni le anmo’e amle’ut." ¹³ Sekau hen mo’e amle’ut neu ki ka, kalu him lomi he mo’e alekot ka? ¹⁴ Mes maski hi mes amsutai fun hi mo’e ale lasi alekot, hi ma’ua ki! Kais hi mimtau neu sekau amsa, ma kais hi mi’unu. ¹⁵ Mes anbi hi nekam nanan, so him fe lasi tola neu Neno Anan le natai nok In mepu on Usif tunan. Ma so hi miloitan piut he mitae neu ale atoni le natan ki antom lasi afnekat le hi mu’i. ¹⁶ Mes so hi mo’e mani nok fef mina ma han tola. Ma so hi nekam nane muti, he nati’ kalu antek nale’un ki, natuin hi moni nok alekot on atuina Neno Anan, atoni le antek nale’un ki nane of sin anmae. ¹⁷ Leko nesi amsutai mane’at natuin mo’et alekot -- kalu lasi nane Uisneno anlomi -- na’ko him sutai mane’at natuin mo’et amle’ut. ¹⁸ Fun Neno Anan anmate no mese tal nabal-bal natuin sanat mansian -- atoni mese le ka nasanab, anmate neu atoni le nasanab. Neno Anan anmo’e he nati’ In nok ki neu Uisneno. Sin namate In on ta’uf pah pinan, mes namonib nafani on ta’uf smanaf. ¹⁹ Mes anbi smanaf nane In nao ma anetun beno na’ko Uisneno neu ale smanaf anbi o’of, ²⁰ esle’ smanaf le afi sin ka natuin fa Uisneno bi batan Nai Nuh. Bi tabu nane Uisneno anpao nok seusabat, leka Nai Nuh anmo’e ini bnao. Al atoni-atoni le anbi bnao nane -- sin ok-oke atoni fanu -- le anmoni natuin oe sako nane. ²¹ Lasi nane on lasi leta na’ko su oe le muni i neki honis neu ki. Lasi su oe i ka lekat mese le he naknino hit aok na’ko ale lahi ai leke, mes on hit lasi manba’an neu Uisneno na’ko hit nekak alekot. Lasi su oe nane neki honis neu ki fun Neno Anan anfen anfani na’ko amates, ²² ma ansae anfani neu neno tunan. Muni i In na’ kuasat, antunon anbi Uisneno aon bian ne’u ma naplenat ale ahake neno tunan sin, ale amui kuasat, ale matani abit neno tunan.

¹ Natuin Neno Anan ansutai nalali mane’at on ta’uf pah pinan, hi amsa amhatani hi aom meki tenab onane. Fun atoni le ansutai mane’at on aof ta’uf, in kan mo’en tenif sanat. ² Es nane hi monim in tukan, kais hi mo’e mituin pah pinan in lomin mes hi mo’e mituin Uisneno In lomin. ³ Bi batan afinit hi mo’e milali sa’ le atoni ka nahin Uisneno anlomi hen mo’e nani. Hi monim ka nalekof. Hi moni mituin lasi sinmakat, lasi kake, mafu tua, amlilat pah pinan, tolas amninut ma mibes meu le’u mahuma le neki hainisit. ⁴ Muni i ale atoni le ka nahin Usif tunan, namkakan nak hi ka mituin fa monit onle sin, hem tamis sanat anbi nonof hamu’it. Natuin lasi nane sin na’akan ki. ⁵ Mes of sin natae neu Uisneno, le naloitan nalali hen lefi amonit ma amates sin lasi. ⁶ Es nane te anetun Beno Knino neu atoni amates sin amsa, he nati’ sin, le anlefi sin lasi natuin aof, onle anlefi atoni bian sin lasi natuin aof, onle anlefi atoni bian sin lasi. Mes natuin smanaf sin monin natuin Uisneno In lomin. ⁷ Ale lasi anhaumak in amsoput. Es nane te him panat hi aom ma amtainine hi nekam he nati’ him onen toti. ⁸ Nesi na’ko ale lasi nane, so hi manek es nok es, fun lasi manekat ankub sanat namfau. ⁹ So hi masimo es nok es anbi hi ume mes-mese ka nok fa sakoit. ¹⁰ Hi mese-mese amsimo milali halinat knino le nasuli na’ko Uisneno. Es nane te on anaoba alekot na’ko ale halinat Uisneno, so hi mese-mese ampake ale halinat nane neu hi ok-oke. ¹¹ Atoni le natiaba beno, in mes natiaba beno na’ko Uisneno; atoni le antuthae atoni bian, in mes antuthae neki matani le na’ko Uisneno, he nati’ anbi ale lasi, hit tanaeb Uisneno natuin Yesus Neno Anan. In kun es anmu’i kuasat ma hit mes tanaeb In talan te nabal-bal. Amin. ¹² Bae benu manekat! Muni i him sutai matani fun fe ansu’ki. Mes kais hi mimkak, onle anmu’i sa’ esle’ matain le’uf neu ki. ¹³ So hi mimlil nai natuin him sutai oke mok Neno Anan. Leka Neno Anan In apinat nalilon, of hi malin. ¹⁴ Hi ma’ua ki, kalu anhamu’i ki natuin hi mituina Neno Anan. Nane nak Smanan apinat esle’ Smanan Uisneno, nokan ki. ¹⁵ Kais atoni mese anbi ki ansutai mane’at, natuin in na’oten ai nabak ai anbulalu ai nabutab lasi. ¹⁶ Mes leka in sutai mane’at on atoni Slani, kais in mae natuin lasi nane. So antoti terima kasih neu Uisneno, fun in neki Neno Anan kanan. ¹⁷ Leku le’at antelen he nati’ Uisneno anlefi lasi neu pah pinan. Uisneno anlefi nahunun In to sin lasi. Ma leka In na’uba lefi lasi anbi kit, of onme ka neu atoni le kan palsai fa neu Beno Knino na’ko Uisneno nane? ¹⁸ Anbi Sulat Knino antui nak on i, "Kalu ale atoni alekot amsa susal he napenin honis, of onme ka neu ale atoni asanat le ka nahin Uisneno?" ¹⁹ Es nane, kalu anmu’i atoni le ansutai natuin Uisneno anlomi onane, so ale atoni nane anmoni nok amneot ma nana’at sin aon neu sin Apakaet. Of In natiaba piut In han manta’en.

¹ Au toti matani neu ale penatua le anbi hi tolas knino, on bae penatua ma asaksit Neno Anan In lasi mane’at, le of napeni apinat amsa, leka Neno Anan In apinat nane nalilon neu mansian. Au toti nok matani, ² he nati’ hi mituku ale bibi kase le Uisneno nana’at sin neu ki. Mituku sin nok nek malinat onle Uisneno anlomi, ma kais nok nek mafena. Ma kais hi mepu he mipeni osaf mes natuin namneo-namneo him lomi hem tuthae. ³ Kais hi mo’e on ana’ aplenat neu sin le nana’at sin neu ki, mes him fani heta neu sin. ⁴ Leka Atukus Amnanut ankoenon nem, of hi mipeni sobe apinat le ka namle’u nitaf. ⁵ Onane amsa hi nonot munif, hi mibaunom meu nonot amnasit. Ma hi alki, mibaunom es neu es, fun antui nani nak, "Uisneno antumatan atoni le nanaebon, mes In nek atoni le nabaun in nekan." ⁶ Es nane te hi mibaun hi aom ambi Uisneno In niman matani, he nati’ In na’aiti ki leka in leku ante. ⁷ Mina’at ale hi nek na’unu neu Uisneno, fun in es anpanat ki. ⁸ Him pao nai ma ambe’ nai! Fun Nitu nane hi musu. In onle aus neno le naoinson neu ma nem ma nakunut nami ini mnahat. ⁹ Amtumatan in meki hi nek palsait, fun hi mihin, mak ale hi bae knino bian anbi pah pinan amsa ansutai mane’at onle hi. ¹⁰ Mes leka him sutai milali mane’at leku tuk es, Uisneno of nanokab ki. In of natetu ki ma anhatani ki ma namepan ki. Fun In lo Uisneno le nekan leok le’uf, le anboin nalali ki hem tamis In apinat nabal-bal natuin Neno Anan. ¹¹ In kun es anmu’i kuasat talan te nabal-bal! Amin. ¹² Au sulat tuk-tuka i au tui neu ki eki Nai Silwanus in niman, le au ak in on bae knino aki’at. Au lomi he eut ki, ma afainek ki ak i lo halinat Uisneno namneo so him na’ mimepan neu halinat nane. ¹³ Hi bae knino tolas knino mese anbi Babilon le mabeti amsa natuin Uisneno. ansonu tabe neu ki; onane amsa au anah Nai Markus le au nek ani. ¹⁴ Hi matabe es nok es nok manekat on bae knino. So Usif tunan anfe halan nekaf neu ki alki le amfani Neno Anan ini. Amin.