KALATA’N MƆ BƐ
HƐLƐLƖ NWANLƖN
EBELE’N-MƆ’N
M’ɔ wɔ nun’n
Sʋanlan’n m’ɔ hɛlɛlɩ kalata ɛhɩ’n, ɔ’a ngɛlɛ man yɩ́ dunman ɔ’a ngua man nun. Nan kʋsʋ, ɔ tɩ sʋanlan m’ɔ kan *Gɛlɛkɩ anɩɛ’n kpa, ɔ sɩ Nyanmɩan Ɛhɛlɛ Ɛjɔlɛ’n kpa, ɛsɛ ɔ sɩ Zufʋ’n-mɔ amanmuo’n kʋsʋ kpa. Kɛ bɛ lɛ kpɩn bɛ kele’n, kalata sɔ’n wɔ Pɔlʋ dɩɛ’n-mɔ anun. Ɛ ’su yɩ́ akpʋlʋwa a, Apolɔsʋ m’ɔ nʋn Pɔlʋ bɛ lili yɛ́ Mɩn junman’n y’ɔ hɛlɛlɩ kalata sɔ nɩn ɔ (Junman 18.24-28, 1 Kolɩntɩ 3.5-9, 4.1-2).
Ɔ hɛlɛlɩ kalata sɔ’n ɔ bʋtʋlɩ Ebele menian-mɔ mɔ b’a fa bɛ́ nwʋn b’a man Zozi mɔ bɛ lɛ kele bɛ́ ahʋlʋwa’n kɛ bɛ tíla bɛ́ dedi nɩn anun. Ɔ lɛ kele bɛ́ kɛ nvasʋɛ nnʋn man sʋ mman man bɛ́ kɛ bɛ yáci bɛ́ dedi’n bɛ tʋ́ bɛ sá bɛ lí Zufʋ’n-mɔ mala nɩn asʋ. Ɔ sanlɩn kɛ bɛ́ ti ele nɩn anwʋn ɛjɔlɛ mɔ Zozi Kilisi walɩ hanlɩn nɩn ala y’ɔ tɩ ananhɔlɛ ɔ.
B’a hye kalata nɩn anun nnyuan. Alimʋa dɩɛ’n (yɩ́ ti 1.4-10.18) man yɛ nwun yɩ́ kɛ Zozi ti kpili kpa tala nyanmɩansʋ mmɔfʋɛ’n-mɔ. Ɔ tɩ kpili kpa tala *Moyizɩ nʋn nyɩhyɛ daba’n tɛɛyɩfʋɛ mgbain’n-mɔ. Zozi tɩ yɛ́ tɛɛyɩfʋɛ kpain wɔ Nyanmɩan anyunnun. Ɔ tɩ kɛ Mɛlɛkɩsedɛkɩ mɔ anɩn ɔ tɩ belemgbin ɛsɛ ɔ tɩ tɛɛyɩfʋɛ Abalahamʋn mɛlɛ sʋ’n. Zozi muonun falɩ yɩ́ nwʋn yɩlɩ tɛɛ ɔ falɩ yɛ́ ɛtɛ’n-mɔ sʋalɩ. Yɛ́ ɛtɛ sɔ’n-mɔ, nyɩhyɛ daba nɩn anun tɛɛ’n mɔ bɛ yɩ’n ngʋala man bɛ́ cici.
M’ɔ tian yɩ́ nnyuan’n (10.19-13.17), ɔ lɛ wowula Ebele’n-mɔ anwʋnsɛlɛ kɛ bɛ bɔ́ mɔndɩnlɩn bɛ́ dedi nɩn anun kɛ daba mma’n mɔ bɛ lili kunnunmun’n yɔlɩ yɩ́’n. Nyila nʋn ahɩn ebisa y’ɔ fa gua yɩ́ kalata nɩn abʋ ɔ.
1Zozi Kilisi, m’ɔ tɩ Nyanmɩan Awa’n,
ɛ ’nwun kɛ ɔ kpɩn tɩ yɩ’n
1Daba nɩn anun, Nyanmɩan nanndɩlɩ yɩ́ mgbɔmanfʋɛ’n-mɔ asʋ ɔ hanlɩn ɛjɔlɛ ɔ helelɩ yɛ́ nan-mɔ. Ɛjɔlɛ sɔ’n, ɔ yɔ dede a, anɩn Nyanmɩan a sɩn atɩn ngacile dɔʋn asʋ ɔ’a han. 2Nan tɛmʋn’n mɔ yɛ wɔ nun m’ɔ tɩ mɛlɛ kasian’n, Nyanmɩan nanndɩ yɩ́ Wa nɩn asʋ yɛ̂ ɔ’a han ɛjɔlɛ ɔ’a hele yɛ́ ɔ. Baa sɔ’n, Nyanmɩan nanndɩ yɩ́ sʋ y’ɔ sesielɩ mân nɩn ɔ. Yɩ́ dein yɛ̂ ɔ’a yɩ yɩ́ ɔ’a fa ninnge kʋalaa ɔ’a wula yɩ́ sa nun ɔ. 3Yɩ́ y’ɔ man yɛ nwun Nyanmɩan Kpili anunminnyanmʋn nɩn ɛta m’ɔ ta nɩn ɔ. Kɛ Nyanmɩan Kpili’n kpɩn tɩ yɩ́ nɩn ala kpɛ y’ɔ le yɩ́. Yɩ́ Nʋan Ɛjɔlɛ’n m’ɔ tɩ tunmin’n le ninnge’n kʋalaa anun. M’ɔ yuelɩ menian’n-mɔ ɛtɛ ecicie nɩn anwʋn junman’n di’n, ɔ fʋlɩ hɔlɩ nyanmɩansʋ. Ɔ hɔlɩ tanlanlɩn anunminnyanmʋn belemgbin bia nɩn asʋ Tunminfʋɛ Nyanmɩan Kpili asa fama sʋ.
Zozi Kilisi tɩ kpili tala nyanmɩansʋ mmɔfʋɛ’n-mɔ
4Nyanmɩan Awa’n tɩ kpili tala nyanmɩansʋ mmɔfʋɛ’n-mɔ. Ɔ man dunman’n mɔ Nyanmɩan tʋnlɩn yɩ́’n tɩ kpili tala nyanmɩansʋ mmɔfʋɛ’n-mɔ dɩɛ’n. 5Nyanmɩansʋ bɔfʋɛ benin yɛ̂ cɩan kʋn Nyanmɩan a han a hele yɩ́ kɛ:
Ɛ tɩ mɩ́n Wa,
ɛnɛ m’ɔ kɔ’n, wɔ́ Sɩ y’ɔ le mɩ́n’n?
Cɩan bie lé, ɔ selɩ man yɩ́ mmɔfʋɛ’n-mɔ anun bie kɛ:
Mɩn ’ba kaci wɔ́ Sɩ,
nán wɔ́ kʋsʋ ɛ ’kaci mɩ́n Wa.
6Nan cɩan mɔ Nyanmɩan ’man yɩ́ Bamuan Baa’n ba mân nɩn anun’n, ɔ hanlɩn kɛ:
Nyanmɩansʋ mmɔfʋɛ’n-mɔ kʋalaa, bɛ kʋ́tʋ yɩ́.
7Ɛ ’nwun nyanmɩansʋ mmɔfʋɛ’n-mɔ anwʋn ɛjɔlɛ’n mɔ b’a hɛlɛ wɔ Ɛhɛlɛ Ɛjɔlɛ nɩn anun’n:
Nyanmɩan man yɩ́ mmɔfʋɛ’n-mɔ
kaci kɛ anwʋnman,
ɛsɛ ɔ man yɩ́ ngʋa’n-mɔ kaci kɛ sɩ̂n tofeleman.
8Nan m’ɔ tʋ de Baa’n, b’a hɛlɛ wɔ Ɛhɛlɛ Ɛjɔlɛ nɩn anun kɛ:
Nyanmɩan Kpili, wɔ́ dɩɛ ɛ tɩ belemgbin cɩan daa.
Ɛ bu mân’n sɛsɛ sʋ.
9Ɛ kulo ananhɔlɛ’n,
nan ɛtɛ’n dɩɛ, ɛ kpɔ yɩ́ sʋnman.
Nyanmɩan, wɔ́ Nyanmɩan nɩn a yɩ wɔ́,
ɔ’a man ɛ di fɛ,
ɔ’a fa anatɩlɩ ɔ’a gua wɔ́ ti sʋ
m’ɔ kele kɛ ɛ tala wɔ́ manngʋn’n-mɔ kʋalaa ɔ.
10B’a hɛlɛ yɩ́ biekun kɛ:
Mɩ́n Mɩn, wɔ́ dein yɛ̂ abʋbɔ nɩn anun
ɛ bɔlɩ mân nɩn ɔ.
Ɛsɛ anwunno’n tɩ wɔ́ sa ati like.
11Ninnge sɔ’n-mɔ tɛmʋn ’ba sɩn
nan wɔ́ dɩɛ, wɔ́ tɛmʋn’n nzɩn man lé.
Anwunno nʋn asɩ ’ba yɔ kɛ ɛtanlan daba.
12Ɛ ’bubu bɛ́ kɛ taladɩɛ.
Ɛsɛ ɛ ’kaci bɛ́ kɛ bɛ kaci taladɩɛ’n.
Nan wɔ́ dɩɛ, kɛ ɛ tɩ yɩ́’n yɛ̂ ɛ tɩ ɔ.
Wɔ́ mɛlɛ’n le man ayuelɩɛ.
13Cɩan bie lé, Nyanmɩan hanlɩn helelɩ man yɩ́ mmɔfʋɛ’n-mɔ anun kʋn kɛ:
Tanlan mɩ́n sa fama sʋ
nán mɩn ’ba fa wɔ́ mgbɔfʋɛ’n-mɔ
mɩn gua wɔ́ ja abʋ
kɛ bia’n mɔ belemgbin sesie yɩ́ ja sʋ’n.
14Nan nyanmɩansʋ mmɔfʋɛ’n-mɔ, bɛ tɩ bɛ́ dɩɛ sɛ? Bɛ́ kʋalaa, bɛ tɩ wawɛ. Bɛ sʋ Nyanmɩan. Ɔ sʋan bɛ́ maan bɛ bʋka bɛ́ mɔ b’a nyan bɛ́ ti mɔ Nyanmɩan ’fa yɩ́ ngʋan’n man bɛ́’n.
2Bɛ mán yɛ́ ti tánlan
nyanmɩansʋ ngʋan nɩn anwʋn ɛjɔlɛ nɩn asʋ kpa
1Ɛhɩka ati, ananhɔlɛ ɛjɔlɛ’n mɔ y’a tɩ’n, bɛ mán yɛ́ ti tánlan sʋ kpa yɛ nánndɩ sʋ nán y’a mminlin man. 2Ɔ sanlɩn kɛ Nyanmɩan nanndɩlɩ nyanmɩansʋ mmɔfʋɛ’n-mɔ asʋ yɛ̂ ɔ falɩ mala’n manlɩn *Moyizɩ ɔ. Bɛ́ mɔ bɛ yɔlɩ anzʋsɛlɛ ɛjɔlɛ sɔ nɩn anwʋn’n, bɛ nyanlɩn yɩ́ nwʋn ahatua m’ɔ sɛ fata’n. 3Ɛhɩ a, anɩn yɛ ’yɔ sɛ nán y’a nyan yɛ́ ti, mɔ y’a mmu man nyanmɩansʋ ngʋan’n like’n? Afɩ yɛ́ Mɩn Zozi muonun a li mʋa a han ɛjɔlɛ sɔ’n yɛ̂ bɛ́ mɔ bɛ tɩlɩ’n kʋsʋ a hele kɛ ɔ tɩ ananhɔlɛ sakpa. 4Kɛmɔ ɛjɔlɛ sɔ’n tɩ ananhɔlɛ sakpa’n, bɛ́ mɔ bɛ lili yɛ́ Mɩn Zozi anwʋn adanzɩɛ’n, Nyanmɩan nanndɩlɩ bɛ́ sʋ ɔ yɔlɩ nzɔlɛ nʋn asinbɛnwʋn ninnge ngacile dɔʋn. Ɛsɛ ɔ nanndɩ yɩ́ Wawɛ Nwannzan-nwannzan nɩn asʋ, ɔ manlɩn bɛ́ tunmin maan bɛ lili junman ngacile ngacile m’ɔ kulo’n.
Zozi a kaci kulo sʋanlan
maan menian’n-mɔ nyan nyanmɩansʋ ngʋan’n
5Ɛhɩ, mân fʋfɔlɛ’n mɔ yɛ lɛ kan yɩ́ nwʋn ɛjɔlɛ’n, nán nyanmɩansʋ mmɔfʋɛ’n-mɔ yɛ̂ Nyanmɩan a yɩ bɛ́ kɛ bɛ lí sʋ kpain ɔ. 6Kʋsʋ Ɛhɛlɛ Ɛjɔlɛ nɩn anun lɩka kʋn, b’a hɛlɛ yɩ́ kɛ:
Nyanmɩan Kpili, kulo sʋanlan tɩ yɩ́ dɩɛ sɛ
mɔ wɔ́ ti ’kacɩ yɩ́ ɔ?
Kulo sʋanlan dasannin tɩ nzu
mɔ ɛ ’nɩan yɩ́ ɔ?
7A han yɩ́ asɩ mɛlɛ kaan sʋa
a man nyanmɩansʋ mmɔfʋɛ’n-mɔ a tala yɩ́.
A man ɔ’a nyan anunminnyanmʋn
ɔ nʋn asasʋɛ kɛ belemgbin.
8A man yɩ́ tunmin like biala asʋ.
Sɛ bɛ kan kɛ Nyanmɩan a man yɩ́ tunmin like biala asʋ a, anɩn ɔ kele kɛ like fɩ́ɩ́ nnʋn ɛbɛlɛ mɔ sʋanlan le man sʋ tunmin ɔ. Nan kʋsʋ kɩkaala dɩɛ, yɛ nnwun man kɛ sʋanlan le tunmin like biala asʋ. 9Nan yɛ nwun yɩ́ kɛ Zozi mɔ Nyanmɩan a han yɩ́ asɩ mɛlɛ kaan sʋa a man nyanmɩansʋ mmɔfʋɛ’n-mɔ a tala yɩ́’n, Nyanmɩan adawʋlʋman, ɔ’a wu ɔ’a man menian’n-mɔ kʋalaatin. Ewue’n m’ɔ wuli nɩn ati, yɛ nwun yɩ́ sian dɩɛ kɛ ɔ’a nyan anunminnyanmʋn ɔ nʋn asasʋɛ kɛ belemgbin.
10Afɩ Nyanmɩan y’ɔ bɔlɩ like biala ɔ. Ɛsɛ yɩ́ y’ɔ man like biala jin yɩ́ ja nun ɔ. Ɔ hulolɩ kɛ Zozi fɛ́ dede ɔ gúa yɩ́ bʋ bɔkɔɔ maan menian dɔʋn nyán bɛ́ ti bɛ wʋ́lʋ yɩ́ anunminnyanmʋn nɩn anun. Ɔ sanlɩn kɛ Zozi y’ɔ man menian’n-mɔ nyan ngʋan ɔ. 11Zozi m’ɔ tɩ menian’n-mɔ anwʋn fi bɛ́ ɛtɛ nɩn anun’n, ɔ nʋn bɛ́ mɔ ɔ’a man bɛ́ nwʋn a tɩ’n, bɛ́ kʋalaa bɛ́ Sɩ’n tɩ kʋn. Ɛhɩka ati, sɛ Zozi fɛlɛ bɛ́ yɩ́ nianman-mɔ a, nyian ngun man yɩ́. 12Afɩ ɔ’a han yɩ́ kɛ:
Nyanmɩan, mɩn ’kan wɔ́ nwʋn ɛjɔlɛ’n
mɩn kele mɩ́n nianman’n-mɔ.
Mɩn ’tʋ ejue mɩn yɩ wɔ́ ayɛ bagua nɩn anun.
13Ɛsɛ ɔ’a han yɩ́ biekun kɛ:
Mɩn ’fa mɩ́n lʋa’n mɩn wula Nyanmɩan Kpili anun.
Ɛsɛ yɩ́ nwan:
Mma’n-mɔ mɔ Nyanmɩan falɩ bɛ́ manlɩn mɩ́n’n,
ɛ ’nwun bɛ́ nʋn mɩ́n.
14Kɛmɔ mma sɔ’n-mɔ tɩ kulo menian mɔ moja wɔ bɛ́ nwʋnnaan nɩn anun’n, Zozi kʋsʋ kacili yɩ́ nwʋn kulo sʋanlan kɛ bɛ́. Ɔ yɔlɩ yɩ́ sɔ nán ɔ’a nyan atɩn, ɔ fi ewue’n m’ɔ wuli’n, ɔ’a sɛcɩ Abɔnsanmʋn tunmin’n m’ɔ le yɩ́ ewue nɩn asʋ’n. 15Abɔnsanmʋn tunmin sɔ’n, Zozi a sɛcɩ yɩ́ maan bɛ́ mɔ bɛ́ asɩtanlan nɩn anun bɛ sulo ewue’n, mɔ b’a kaci kɛ nganga’n, bɛ nyan bɛ́ ti.
16Afɩ ɔ tɩ ananhɔlɛ, nán nyanmɩansʋ mmɔfʋɛ’n-mɔ y’ɔ bʋka bɛ́ ɔ. Nan Abalahamʋn asasʋ’n-mɔ y’ɔ bʋka bɛ́ ɔ. 17Ɛhɩka ati, like kʋalaa anun, ɔ’a kaci yɩ́ nwʋn kɛ yɩ́ nianman’n-mɔ. Ɔ’a yɔ yɩ́ sɔ ɔ’a kaci bɛ́ tɛɛyɩfʋɛ kpain. Ɔ kan ananhɔlɛ ɛsɛ ɔ fa ati anun kpa ɔ di yɩ́ junman’n Nyanmɩan anyunnun maan menian’n-mɔ kʋalaa nyan ɛtɛ face. 18Kɛmɔ Zozi muonun nwunlin yalɛ mɛlɛ mɔ Abɔnsanmʋn sɔlɩ yɩ́ nɩanlɩn’n, sian dɩɛ, bɛ́ kʋalaa mɔ bɛ wɔ asɩtanlan sɔ nɩn anun’n, ɔ kʋala tɩ bɛ́ nyanman nun.
3Zozi tɩ kpili tala Moyizɩ
1Ɛhɩka ati, anianman anwʋntɩɛ mma, ɛmɔ mɔ Nyanmɩan a fɛlɛ ɛmɔ ɔ’a man ɛmɔ a kaci yɩ́ menian’n, ɛmɔ fá bɛ́ nyɩn bɛ tʋ́ Zozi. Ɔ sanlɩn kɛ dedi’n mɔ yɛ lɛ kan yɩ́ ɛjɔlɛ yɛ kele eyuadɩ’n, Zozi yɛ̂ Nyanmɩan a yɩ yɩ́ kɛ ɔ káci sʋ tɛɛyɩfʋɛ kpain ɔ. 2Tɛɛyɩfʋɛ junman sɔ’n mɔ Nyanmɩan helelɩ Zozi kɛ ɔ lí’n, Zozi lili yɩ́ ananhɔlɛ nun kɛ *Moyizɩ kʋsʋ lili yɩ́ wɔ Nyanmɩan menian’n-mɔ kʋalaa afian’n. 3Kɛ sʋanlan m’ɔ kɔ si sua nyan anunminnyanmʋn tala sua’n muonun’n, Zozi kʋsʋ a nyan anunminnyanmʋn a tala Moyizɩ. 4Sua biala, sʋanlan y’ɔ si ɔ. Nan kʋsʋ sʋanlan’n m’ɔ bɔlɩ like biala’n y’ɔ le Nyanmɩan.
5Moyizɩ a, junman’n mɔ Nyanmɩan helelɩ yɩ́ kɛ ɔ lí’n, ɔ lili yɩ́ ananhɔlɛ nun wɔ Nyanmɩan menian’n-mɔ kʋalaa afian. Ɛjɔlɛ mɔ Nyanmɩan kulo kɛ ɔ kan’n, ɔ fa wula Moyizɩ anʋan maan ɔ kan. 6Nan Kilisi a, anɩn ɔ tɩ kɛ baa mɔ b’a sie yɩ́ awulo kpain ɔ. Nan sɛ yɛ tila yɛ́ dedi nɩn anun kpa ɔ nʋn anyɩndasʋɛ’n m’ɔ man yɛ di ndutue’n dede ɔ kɔ ju yɩ́ ayuelɩɛ a, anɩn yɩ́ awulo y’ɔ le yɛ́.
7Afɩ Nyanmɩan Wawɛ Nwannzan-nwannzan nɩn a han kɛ:
Sɛ ɛnɛ ɛmɔ tɩ Nyanmɩan anɩn nɩn an,
8nán bɛ totua bɛ́ nzʋ’n kɛ daba ɛmɔ anan-mɔ yɔlɩ
mɛlɛ mɔ bɛ jasʋlɩ yɩ́ kɔmɩn anun’n.
Nán bɛ yɔ kɛ cɩan mɔ ɛmɔ anan-mɔ sɔlɩ yɩ́
bɛ nɩanlɩn wɔ ɛwâ nɩn anun ɛlɔ’n.
9Nyanmɩan nwan: Ɛlɔ, ɛmɔ anan-mɔ jɩjɩlɩ mɩ́n
bɛ sɔlɩ mɩ́n bɛ nɩanlɩn
sunnzun mɔ bɛ nwunlin yɩ́ kʋalaa
mɔ n yɔlɩ manlɩn bɛ́ afʋɛ abulanan nɩn anun’n.
10Ɔ man m’an fa bɛ́ nwʋn sikpɛ
m’an wula mɩ́n kunnun
nán m’an han kɛ:
Bɛ tɩ menian mɔ bɛ́ ahʋnlɩn bɔ nvo,
bɛ nnanndɩ man mɩ́n atɩn nɩn asʋ.
11Bɛ́ nwʋn ɛya’n m’ɔ kun mɩ́n nɩn ati,
m’an han ndâ kɛ:
Ɛnwʋnmɩan ele mân’n
mɔ m’an sesie m’an man bɛ́’n,
cɩan bie lé, bɛ ngɔ hɔ man nun ɛlɔ.
12Ɛhɩka ati, anianman-mɔ, ɛmɔ síe bɛ́ nwʋn ye. Sɛ ɛmɔ sie bɛ́ nwʋn ye a, ɛmɔ anun bie fɩ́ɩ́ ngɔ nyan man ahʋnlɩn ɛtɛ. Bie fɩ́ɩ́ ngɔ yaci man yɩ́ dedi’n ngɔ tʋ man nán ɔ’a kaci yɩ́ nzin ɔ’a si Tɩasɩfʋɛ Nyanmɩan. 13Nan m’ɔ wɔ nun’n, ɛmɔ wówula bɛ́ nwʋn anwʋnsɛlɛ alɩhɩan biala. Afɩ, yɛ́ ti yɛ̂ b’a hɛlɛ wɔ Ɛhɛlɛ Ɛjɔlɛ nɩn anun kɛ: Ɛnɛ nɩn ɔ. B’a hɛlɛ yɩ́ sɔ nán ɛmɔ anun bie ati a ngaci man ɔ’a ndɔ man ɛtɛ nɩn anun. 14Afɩ yɛ nʋn Kilisi a yɔ kʋn. Nan kʋsʋ ɔ di kɛ yɛ tila dedi’n mɔ yɛ nyanlɩn yɩ́ ngɛlɛmɔ nun nɩn anun kpa kpolo dede ɔ kɔ ju yɩ́ ayuelɩɛ. 15Ɛ ’nwun ɛjɔlɛ mɔ b’a hɛlɛ wɔ Ɛhɛlɛ Ɛjɔlɛ nɩn anun’n:
Sɛ ɛnɛ ɛmɔ tɩ Nyanmɩan anɩn nɩn an,
nán bɛ totua bɛ́ nzʋ’n kɛ daba ɛmɔ anan-mɔ yɔlɩ
mɛlɛ mɔ bɛ jasʋlɩ yɩ́ kɔmɩn anun’n.
16Nwan menian dɩɛ-mɔ yɛ̂ bɛ tɩlɩ Nyanmɩan anɩn’n kʋsʋ bɛ jasʋlɩ yɩ́ kɔmɩn anun’n? Menian sɔ’n-mɔ y’ɔ le bɛ́ kʋalaa mɔ Moyizɩ nʋn bɛ́ fi Ezipiti mân nɩn anun fitelɩ’n. 17Nwan-mɔ yɛ̂ Nyanmɩan sikpɛ’n hyɩlɩ bɛ́ afʋɛ abulanan’n mɔ bɛ lili wɔ ɛwâ nɩn anun ɛlɔ’n? Nyanmɩan sikpɛ’n hyɩlɩ bɛ́ mɔ bɛ hulolɩ ɛtɛ nɩn ɛyɔlɛ’n. Bɛ́ yɛ̂ bɛ wuli ɛwâ nɩn anun ɛlɔ nɩn ɔ. 18Yɛ̂ nwan-mɔ anwʋn yɛ̂ Nyanmɩan hanlɩn ndâ kɛ bɛ ngɔ man yɩ́ ɛnwʋnmɩan ele mân nɩn anun ɛlɔ bie’n? Nyanmɩan hanlɩn ndâ’n gualɩ bɛ́ mɔ bɛ jasʋlɩ yɩ́ kɔmɩn anun nɩn anwʋn. 19Yɛ nwun yɩ́ yuein kɛ b’a ngʋala man ɛnwʋnmɩan ele mân nɩn anun kɔ. Ɔ sanlɩn kɛ b’a nne man Nyanmɩan b’a nni man.
4Nyanmɩan ɛnwʋnmɩan ele mân’n.
1Nan yɛ́ dɩɛ, Nyanmɩan a bɔ yɛ́ anɔhʋba kɛ yɛ kʋala kɛ yɛ kɔ yɩ́ ɛnwʋnmɩan ele mân nɩn anun bie. Ɛhɩka ati, yɛ síe yɛ́ nwʋn ye nán sʋanlan fɩ́ɩ́ a nga man asɩ ɛmɔ afian ɛlɔ. 2Ɔ sanlɩn kɛ y’a tɩ Ɛjɔlɛkpa’n kɛ bɛ́ kʋsʋ bɛ tɩlɩ yɩ́ daba ɛwâ nɩn anun ɛlɔ’n. Nan kʋsʋ b’a mmu man Ɛjɔlɛkpa sɔ’n like. Afɩ, mɛlɛ mɔ bɛ tɩlɩ’n, b’a nne b’a nni man. 3Nan yɛ́ mɔ yɛ de yɛ di’n, ɛnwʋnmɩan ele mân sɔ’n mɔ Nyanmɩan lɛ kan yɩ́ ɛjɔlɛ’n, yɛ ’kɔ nun bie. Afɩ Nyanmɩan lɛ kele kɛ:
Bɛ́ nwʋn ɛya’n m’ɔ kun mɩ́n nɩn ati,
m’an han ndâ kɛ:
Ɛnwʋnmɩan ele mân’n
mɔ m’an sesie m’an man bɛ́’n,
cɩan bie lé bɛ ngɔ hɔ man nun ɛlɔ.
Mɔ Nyanmɩan ’kan ɛjɔlɛ sɔ’n, anɩn ɔ’a li mʋa ɔ’a bɔ mân’n dada ɔ’a yue yɩ́ junman’n di. 4Ɛhɛlɛ Ɛjɔlɛ nɩn anun lɩka kʋn, b’a hɛlɛ ɛlɛsʋ nɩn anwʋn ɛjɔlɛ kɛ: Nyanmɩan falɩ cɩan nsian ɔ lili yɩ́ junman’n kʋalaatin nan yɩ́ ɛlɛsʋ nɩn asʋ, ɔ lelɩ yɩ́ ɛnwʋnmɩan.
5Ɛjɔlɛ sɔ’n mɔ bɛ hanlɩn yɩ́ daba’n, bɛ lɛ kan yɩ́ ɛwa biekun kɛ: Ɛnwʋnmɩan ele mân’n mɔ m’an sesie m’an man bɛ́’n, cɩan bie lé bɛ ngɔ hɔ man nun ɛlɔ.6Alimʋa mma’n-mɔ mɔ bɛ tɩlɩ Ɛjɔlɛkpa’n mɔ b’a nne b’a nni man’n, b’a ngɔ man Nyanmɩan ɛnwʋnmɩan ele mân nɩn anun bie. Nan kʋsʋ atɩn wɔ nun man mmie-mɔ kɛ bɛ wʋ́lʋ Nyanmɩan ɛnwʋnmɩan ele mân nɩn anun. 7Ɛhɩka ati, Nyanmɩan a sie cɩan fʋfɔlɛ kʋn biekun mɔ bɛ fɛlɛ yɩ́ “ɛnɛ”. Ɛnɛ sɔ’n mɔ b’a hɛlɛ yɩ́ ɛbɛlɛ’n, afʋɛ dɔʋn kpa sɩnlɩn, Nyanmɩan nanndɩlɩ belemgbin *Davidi asʋ ɔ hanlɩn kɛ:
Sɛ ɛnɛ ɛmɔ tɩ Nyanmɩan anɩn nɩn an,
nán bɛ totua bɛ́ nzʋ’n.
8Sɛ ɔ tɩ kɛ Zozie m’ɔ lili Moyizɩ aja nun’n hʋalɩ bagua’n nʋn ɛnwʋnmɩan ele mân nɩn anun kɔ a, ahan Nyanmɩan a ngan man cɩan fʋfɔlɛ kʋ́n anwʋn ɛjɔlɛ ɛhɩ anzin. 9Ɛhɩ, yɛ nwun yɩ́ kɛ ɛnwʋnmɩan ele cɩan kʋn tɛ wɔ ɛbɛlɛ man Nyanmɩan menian’n-mɔ. 10Afɩ sʋanlan m’ɔ wɔ Nyanmɩan ɛnwʋnmɩan ele mân nɩn anun’n, anɩn ɔ lɛ de yɩ́ ɛnwʋnmɩan yɩ́ junman elie nɩn anun kɛ Nyanmɩan lelɩ yɩ́ ɛnwʋnmɩan’n.
11Ɛhɩka ati, yɛ bɔ́ mɔndɩnlɩn yɛ wʋ́lʋ ɛnwʋnmɩn ele mân sɔ nɩn anun. Nán bɛ man yɛ́ nunhan bie yɔ anzʋsɛlɛ ɔ ka yɩ́ ɛtɛ nɩn anun kɛ yɛ́ nan-mɔ yɔlɩ yɩ́ ɛwâ nɩn anun ɛlɔ’n. 12Ɔ sanlɩn kɛ Nyanmɩan Anʋan Ɛjɔlɛ’n wɔ ɛbɛlɛ dahuu, ɛjɔlɛ m’ɔ kɔ han’n, ɔ kpɩn sʋ. Ɔ yɔ nâ tala dadɩɛ ngacile biala mɔ b’a si yɩ́ nyunnun nʋn yɩ́ nzin ɔ. Kɛ dadɩɛ’n wɔ sʋanlan an, ɔ bɔ fite’n, Nyanmɩan Anʋan Ɛjɔlɛ’n kʋsʋ nwun ɛjɔlɛ m’ɔ wɔ sʋanlan ati anun ɔ nʋn m’ɔ kɔ jʋnlɩn’n ɔ bua yɩ́ ndɛɛ. 13Ninnge’n mɔ Nyanmɩan bɔlɩ’n, fɩ́ɩ́ nnʋn man ɛbɛlɛ m’ɔ fʋn yɩ́ nyɩn ɔ. Yɩ́ nyunnun, yɩ́ kʋalaa wɔ jawe nun. Yɩ́ ja asʋ yɛ̂ yɛ ’bu yɛ́ junman’n mgbʋnndan ɔ.
14Ɛhɩka ati, dedi’n mɔ yɛ le yɩ́ mɔ yɛ lɛ bɔ yɛ kele mân’n, yɛ tíla nun kpolo. Afɩ yɛ le tɛɛyɩfʋɛ kpain kʋn mɔ ɔ’a hɔ dede ɔ’a ju Nyanmɩan muonun anyunnun. Tɛɛyɩfʋɛ kpain sɔ’n y’ɔ le Zozi m’ɔ tɩ Nyanmɩan Awa’n. 15Yɛ́ tɛɛyɩfʋɛ kpain’n kʋala yɛ́ nyanman nun tɩ wɔ emian ngacile kʋalaa anun. Nan kɛmɔ Abɔnsanmʋn sɔlɩ Zozi nɩanlɩn yɩ́ kʋalaa anun mɔ yɩ́ sa a ngan man yɩ́’n, ɔ man sɔnɩan nɩn anun, Zozi kʋala tɩ yɛ́ nyanman nun.
16Ɛhɩka ati, nán man yɛ sulo, nan yɛ hyʋ́ɩn yɛ kpúnnge Anwunnvoe Enwunfʋɛ Nyanmɩan’n m’ɔ tɩ belemgbin bia nɩn asʋ’n. Ɔ nwun yɛ́ nwʋn anwunnvoe ɔ fa yɛ́ ɛtɛ’n-mɔ ce yɛ́. Ɛsɛ mɛlɛ mɔ emian’n kɔ tʋ yɛ́’n, ɔ ’tɩ yɛ́ nyanman nun.
5Zozi y’ɔ tɩ tɛɛyɩfʋɛ kpain nɩn ɔ.
1Nyanmɩan tɛɛyɩfʋɛ kpain biala mɔ bɛ kɔ nɩan menian’n-mɔ anun bɛ kɔ yɩ yɩ́’n, ɔ di asafian. Ɛtɛ nɩn anwʋn tɛɛ ɛyɩɛ’n nʋn acɛdɩɛ’n, yɩ́ yɛ̂ ɔ fa man Nyanmɩan ɔ. 2Kɛmɔ tɛɛyɩfʋɛ sɔ’n muonun tɩ kulo sʋanlan’n, ɔ kʋala kɛ ɔ nwun bɛ́ mɔ bɛ nzɩ man Nyanmɩan mala’n nʋn bɛ́ mɔ b’a fʋn’n-mɔ anwʋn anwunnvoe. Ɔ sanlɩn kɛ, yɩ́ muonun ɔ kʋala kɛ ɔ fʋn. 3Ɛhɩka ati, ɔ di kɛ ɔ yɩ yɩ́ muonun yɩ́ ti tɛɛ kɛ ɔ yɩ bagua nɩn ati tɛɛ’n.
4Sɛ Nyanmɩan muonun a nvɛlɛ man sʋanlan kʋn kɛ ɔ fɛlɛlɩ Moyizɩ anianman Aalʋn ɔ sielɩ yɩ́ tɛɛyɩfʋɛ kpain nɩn an, sʋanlan fɩ́ɩ́ ngʋala njasʋ man ɔ nzie man yɩ́ nwʋn tɛɛyɩfʋɛ kpain. 5Kilisi muonun a njasʋ man ɔ’a nzie man yɩ́ nwʋn tɛɛyɩfʋɛ kpain. Nan Nyanmɩan muonun a han a hele yɩ́ kɛ:
Ɛnɛ m’ɔ kɔ’n, ɛ tɩ mɩ́n Wa,
mɩ́n kʋsʋ n dɩ wɔ́ Sɩ.
6Ɛsɛ ɔ’a han yɩ́ lɩka fʋfɔlɛ biekun kɛ:
Ɛ tɩ tɛɛyɩfʋɛ titi
kɛ Mɛlɛkɩsedɛkɩ tɩ yɩ́’n.
7Mɔ anɩn Zozi wɔ asɩɛ nɩn asʋ ɛwa’n, ɔ yɔlɩ asɔnɩn ɔ tɩanlɩn sɛlɛ kpa ɔ sunlin fɛlɛlɩ Nyanmɩan m’ɔ kʋala yɩ́ de fi ewue nun’n. Kɛmɔ Zozi manlɩn Nyanmɩan anyɩnnzɔ nɩn ati, Nyanmɩan kʋsʋ tielɩ yɩ́. 8Zozi tɩ Nyanmɩan Awa, kʋsʋ yɩ́ amannɩnhunlun nɩn anun, ɔ manlɩn Nyanmɩan anyɩnnzɔ. 9Mɔ Nyanmɩan man Zozi fʋlɩ hɔlɩ nyanmɩansʋ yuelɩ’n, Zozi a kaci bɛ́ kʋalaa mɔ bɛ man yɩ́ anyɩnnzɔ’n, bɛ́ nyanmɩansʋ ngʋan baka. 10Ɛhɩka ati, Nyanmɩan a sie yɩ́ tɛɛyɩfʋɛ kpain kɛ ɔ sielɩ Mɛlɛkɩsedɛkɩ’n.
Ɛkannzʋɛ
11Yɛ le ɛjɔlɛ dɔʋn yɛ kan yɛ kele ɛmɔ ɛhɩ anwʋn, nan kʋsʋ, yɩ́ bʋ etue yɔ sɩ. Ɔ sanlɩn kɛ ɛmɔ ndɩ man ɛjɔlɛ bʋ ndɛ. 12Ɛmɔ mɔ ahan ɛmɔ lɩlɩ y’ɔ di kɛ ɛmɔ kekele menian’n-mɔ Nyanmɩan anwʋn ɛjɔlɛ’n, ɛmɔ kulo kɛ bɛ kekele ɛmɔ Nyanmɩan anwʋn ɛjɔlɛ fɔtɩlɩ’n-mɔ biekun. Alɩɛ mɔ ɛmɔ ’kpʋnndɛ bɛ di’n, ɛhɩ nɔfanlan yɛ̂ ɛmɔ tɛ nʋn ɔ. 13Sʋanlan biala m’ɔ tɛ nʋn nɔfanlan’n, anɩn ɔ tɩ batʋnman. Ɔ nzɩ man amanmuo sɛsɛ’n mɔ Nyanmɩan lɛ kpʋnndɛ’n. 14Nan bɛ́ mɔ b’a tin’n, bɛ́ yɛ̂ bɛ di alɩɛ ketee nɩn ɔ, afɩ bɛ́ dɩɛ bɛ́ ti a tin. Bɛ sɩ like m’ɔ tɩ kpa nɩn angʋnmɩn. Bɛ sɩ m’ɔ tɩ man kpa’n kʋsʋ angʋnmɩn.
61Ɛhɩka ati, yɛ yáci ɛjɔlɛ asɩ asɩ’n m’ɔ tʋ de Kilisi’n nán yɛ wʋ́lʋ mgbili mgbili’n-mɔ anun. Yɛ yáci ɛjɔlɛ’n m’ɔ tʋ de nyɔlɩɛ ɛtɛ nɩn ɛyacie’n, Nyanmɩan anwʋn dedi’n, 2ɛsɔnɩan ngacile nɩn anwʋn ɛjɔlɛ’n, bɛ́ sa’n mɔ bɛ fa bɛ fua menian’n-mɔ asʋ m’ɔ kele kɛ Nyanmɩan a fa yɩ́ nyila nɩn a man’n, ewuetinnge’n nʋn menian’n-mɔ fʋɔ ebue’n mɔ Nyanmɩan ’ba bu bɛ́’n. Ninnge sɔ’n-mɔ, yɛ ngan man bɛ́ nwʋn ɛjɔlɛ kʋ́n. 3Nan yɛ hɔ́ yɛ́ nyunnun. Sɛ Nyanmɩan man atɩn an, mɔ yɛ ’ba yɔ nɩn anɩn.
4Ɛhɩ, bɛ́ mɔ bɛ nanndɩ Nyanmɩan jawe nɩn anun’n, Nyanmɩan a yeyila bɛ́ ɔ’a man b’a nyan yɩ́ Wawɛ Nwannzan-nwannzan’n. 5B’a nwun yɩ́ kɛ yɩ́ Nʋan Ɛjɔlɛ’n tɩ like kpa. B’a nwun mân fʋfɔlɛ’n m’ɔ lɛ sesie nɩn anun tunmin’n. 6Nan sɛ bɛ kaci bɛ́ nzin bɛ si Nyanmɩan, nán yɩ́ Nʋan Ɛjɔlɛ’n nvalɩ man bɛ́ nwʋn fɩ́ɩ́ kʋ́n an, bɛ ngʋala man like fɩ́ɩ́ kʋ́n yɔ maan bɛ sa bɛ́ nzin yɩ́ nwʋn ɛlɔ. Ɔ sanlɩn kɛ menian sɔ’n-mɔ bʋbɔ Kilisi kʋlʋwa nɩn asʋ biekun ɛsɛ bɛ gua yɩ́ nyunnun asɩ menian nun.
7Tɛmʋn mɔ esue tɔ asɩɛ kʋn asʋ titi mɔ alɩɛ fite sʋ man bɛ́ mɔ b’a lua’n, asɩɛ sɔ’n, anɩn Nyanmɩan a yeyila yɩ́. 8Nan sɛ eminlan mmowe nʋn ndile ɛtɛ fifi sʋ a, anɩn ɔ’a yɔ mgban ɔ’a ju yɩ́ sasan ɛbɔ. Yɩ́ agualɩɛ nun, bɛ tʋ nun sɩ̂n.
9Anianman-mɔ, sɛ bɔbɔ yɛ lɛ kan sɔ a, yɛ de ɛmɔ yɛ di kpa. Yɛ sɩ kɛ ɛmɔ nanndɩ atɩn kpa’n m’ɔ fite nyanmɩansʋ ngʋan nɩn asʋ. 10Afɩ Nyanmɩan dɩɛ, ɔ mmu man kpɔfʋndɛɛ. Junman’n mɔ ɛmɔ lɛ di’n, ye’n mɔ ɛmɔ a yɔ m’ɔ kele kɛ ɛmɔ kulo Nyanmɩan, mɔ ɛsɛ ɛmɔ tɛ yɔ tɛ man Zozi menian’n-mɔ mɔ bɛ tɩ ɛmɔ anianman’n, Nyanmɩan alʋa nvi man. 11Nan yɛ kulo kɛ ɛmɔ nunhan kʋn biala bɔ́ mɔndɩnlɩn, ɔ héle kɛ ɔ kulo Nyanmɩan dede ɔ kɔ ju yɩ́ ayuelɩɛ, nán ɛmɔ asa a han mɔ ɛmɔ lɛ kpʋnndɛ yɩ́ Nyanmɩan asa nun’n kpa bɔkɔɔ. 12Yɩ́ ti, nán man ɛmɔ kaci ɛfʋanfʋɛ. Nan ɛmɔ sɩ́n dedi mma’n-mɔ atɩn dɩɛ nɩn asʋ. Ɔ sanlɩn kɛ bɛ si abʋtalɛ dede bɛ́ sa kan like’n mɔ Nyanmɩan kɔ fa kɔ bɔ bɛ́ anɔhʋba’n.
13Mɔ Nyanmɩan ’bɔ Abalahamʋn anɔhʋba’n, ɔ hanlɩn ndâ tʋlɩ sʋ. Kɛmɔ sʋanlan fɩ́ɩ́ nnʋn man ɛbɛlɛ m’ɔ tɩ kpili tala yɩ́’n, yɩ́ muonun ɔ hanlɩn yɩ́ ti. 14Yɩ́ nwan: Mɩn kan mɩ́n ti kɛ mɩn ’yeyila wɔ́ sʋ maan ɛ di ata kpili kpa.15Mɔ Abalahamʋn tɩlɩ ɛjɔlɛ sɔ’n, ɔ sili abʋtalɛ dede yɩ́ sa hanlɩn like’n mɔ Nyanmɩan falɩ bɔlɩ yɩ́ anɔhʋba’n.
16Nan sɛ menian’n-mɔ ’kan ndâ a, bɛ kan sʋanlan m’ɔ tala bɛ́ nɩn ati. Ndâ sɔ’n tɩ ajinlanmun. Yɩ́ y’ɔ man ɛjɔlɛ’n kpɛ ɔ. 17Nan Nyanmɩan kʋsʋ ajʋnlɩn nun an, anɩn ɔ kulo kɛ bɛ́ m’ɔ di kɛ bɛ nyan anɔhʋba nɩn anun ninnge’n, bɛ nwun yɩ́ yuein kɛ ɛjɔlɛ’n m’ɔ fi yɩ́ nʋan fitelɩ’n, ɔ ngaci man yɩ́ lé. Ɛhɩka ati y’ɔ hanlɩn ndâ tʋlɩ anɔhʋba nɩn asʋ ɔ. 18Anɔhʋba’n nʋn ndâ’n tɩ ninnge nnyuan mɔ bɛ ngʋala man yɩ́ kaci, ɛsɛ Nyanmɩan ngʋala man nun ato di. Ninnge sɔ nnyuan’n wula yɛ́ mɔ y’a nyan ɛfɩabɛlɛ Nyanmɩan anwʋn nɩn anwʋnsɛlɛ. Ɛfɩabɛlɛ sɔ nɩn anun, ɔ di kɛ yɛ tila anyɩndasʋɛ like’n m’ɔ wɔ yɛ́ nyunnun nɩn anun kpolo. 19Kɛ sɛhɛ’n mɔ bɛ yɩ bɛ tʋ asue nɩn anun man meli’n jinlan bi’n, anyɩndasʋɛ like’n kʋsʋ man yɛ́ ɛkala’n jin bi. Anyɩndasʋɛ like sɔ’n man yɛ bɔ tala nyanmɩansʋ asɔnɩn sua nɩn anun mgbɛnun ɛtanlan’n. Yɛ kɔ dede yɛ ju lɩka nwannzan-nwannzan’n kɛ tɛɛyɩfʋɛ kpain’n. 20Ɛbɛlɛ yɛ̂ yɛ́ dunman nun, Zozi lili mʋa yɛ́ nyunnun ɔ wʋlʋlɩ ɔ. Yɩ́ yɛ̂ ɔ’a kaci tɛɛyɩfʋɛ kpain’n cɩan daa kɛ anɩn Mɛlɛkɩsedɛkɩ tɩ yɩ́ nɩn ɔ.
7Mɛlɛkɩsedɛkɩ tɩ belemgbin, ɛsɛ ɔ tɩ tɛɛyɩfʋɛ
1Mɛlɛkɩsedɛkɩ sɔ’n, anɩn ɔ tɩ kulo’n mɔ bɛ fɛlɛ yɩ́ Salɛmʋn nɩn asʋ belemgbin. Ɛsɛ anɩn ɔ tɩ Nyanmɩan Kpili m’ɔ wɔ anwunno anwunno ɛlɔ’n kʋsʋ tɛɛyɩfʋɛ Abalahamʋn mɛlɛ sʋ. Mɛlɛ mɔ Abalahamʋn fi ɛlɔɛ ɔ ’sa ba’n, Mɛlɛkɩsedɛkɩ kɔ hɔ kɔ kpa yɩ́ atɩn ɔ kɔ yeyila yɩ́ sʋ. 2Yɩ́ kʋalaa mɔ Abalahamʋn nyanlɩn yɩ́ ɛlɔɛ nɩn anun’n, ɔ kɔ bu nun bulu. Ɔ kɔ tu kʋn kɔ man Mɛlɛkɩsedɛkɩ.
Alimʋa nɩn anun, dunman Mɛlɛkɩsedɛkɩ’n kele kɛ: “belemgbin m’ɔ kulo sɛsɛ.” M’ɔ la sʋ’n, y’ɔ le kɛ ɔ tɩ Salɛmʋn belemgbin. Yɩ́ bʋ kele kɛ: “belemgbin m’ɔ kulo anzʋnunjɔ.” 3B’a ngan man yɩ́ sɩ nʋn yɩ́ nin nʋn yɩ́ nan-mɔ anwʋn ɛjɔlɛ fɩ́ɩ́. B’a ngan man yɩ́ awɔlɛ cɩan nʋn yɩ́ ewue cɩan nɩn anwʋn ɛjɔlɛ kalata nɩn anun lɩka fɩ́ɩ́. Nan ɔ tɩ kɛ Nyanmɩan Awa’n. Mɛlɛkɩsedɛkɩ sɔ’n tɩ tɛɛyɩfʋɛ cɩan daa.
4Ɛmɔ nwún yɩ́ kɛ Mɛlɛkɩsedɛkɩ tɩ kpili. Yɛ́ nan Abalahamʋn ninnge’n kʋalaa m’ɔ nyanlɩn yɩ́ ɛlɔɛ nɩn anun’n, ɔ buli nun bulu ɔ tuli kʋn manlɩn Mɛlɛkɩsedɛkɩ. 5Levi asasʋ’n-mɔ tɩ Nyanmɩan tɛɛyɩfʋɛ. Moyizɩ mala’n man bɛ́ atɩn kɛ Izalayɛ amma’n-mɔ bu bɛ́ ninnge’n-mɔ anun bulu a, bɛ tú kʋn. Kʋsʋ bɛ́ tɩ anianman, bɛ́ nan y’ɔ le Abalahamʋn. 6Mɛlɛkɩsedɛkɩ tɩ man Levi afilie nɩn anun sʋanlan. Kʋsʋ Abalahamʋn buli ninnge’n m’ɔ nyanlɩn yɩ́ ɛlɔɛ nɩn anun’n bulu ɔ tuli kʋn manlɩn yɩ́. Ɔ kɔ yeyila Abalahamʋn mɔ Nyanmɩan bɔlɩ yɩ́ anɔhʋba nɩn asʋ. 7Ɔ tɩ ananhɔlɛ kɛ kpain yɛ̂ ɔ yeyila batʋnman sʋ ɔ. 8Levi asasʋ’n-mɔ mɔ bɛ bubu ninnge’n-mɔ anun bulu, bɛ tu kʋn bɛ man bɛ́’n, kulo menian y’ɔ le bɛ́. Bɛ wu. Nan Mɛlɛkɩsedɛkɩ dɩɛ, ɔ tɩ sʋanlan m’ɔ tɩ asɩ kɛ Nyanmɩan Anʋan Ɛjɔlɛ’n kele’n. 9Kɛmɔ Abalahamʋn buli yɩ́ ninnge’n-mɔ anun bulu ɔ tuli kʋn manlɩn Mɛlɛkɩsedɛkɩ’n, Levi muonun mɔ ɛnɛ bɛ bu ninnge’n-mɔ anun bulu bɛ tu kʋn bɛ man yɩ́ bʋsʋ menian’n-mɔ’n, yɩ́ kʋsʋ ɔ yɔlɩ sɔ bie. 10Ɔ sanlɩn kɛ mɛlɛ mɔ Mɛlɛkɩsedɛkɩ ’kɔ a kpa Abalahamʋn atɩn’n, anɩn Levi tɛ wɔ Abalahamʋn akunnun.
Zozi tɩ kɛ Mɛlɛkɩsedɛkɩ
11Tɛɛ’n mɔ Levi asasʋ’n-mɔ yɩ’n, mala’n mɔ Nyanmɩan falɩ manlɩn Izalayɛ amma’n-mɔ’n, sʋ yɛ̂ anɩn ɔ jin ɔ. Nan sɛ ɔ tɩ kɛ Levi asasʋ’n-mɔ mɔ bɛ tɩ tɛɛyɩfʋɛ kɛ Aalʋn’n, efian fɩ́ɩ́ nnʋn man bɛ́ junman nɩn anwʋn an, ahan tɛɛyɩfʋɛ ngacile kʋn kɛ Mɛlɛkɩsedɛkɩ a nvite man. 12Ɔ sanlɩn kɛ sɛ Nyanmɩan tɛɛyɩfʋɛ’n-mɔ a kaci a, ɔ sɛ kɛ mala’n kʋsʋ káci. 13Yɛ́ Mɩn’n mɔ yɛ lɛ kan yɩ́ nwʋn ɛjɔlɛ ɛwa’n, ɔ fi afilie fʋfɔlɛ anun. Afilie sɔ nɩn anun sʋanlan kacili man Nyanmɩan tɛɛyɩfʋɛ lé. 14Bɛ́ kʋalaa bɛ sɩ kɛ yɛ́ Mɩn fi Zuda afilie nɩn anun. Mɔ Moyizɩ ’kan Nyanmɩan tɛɛyɩfʋɛ’n-mɔ anwʋn ɛjɔlɛ’n, ɔ’a ngan kɛ Zuda afilie nɩn anun sʋanlan kʋn tɩ tɛɛyɩfʋɛ.
15Like kʋn man yɛ nwun yɩ́ yuein biekun. Like sɔ’n y’ɔ le kɛ tɛɛyɩfʋɛ kʋn biekun kɛ Mɛlɛkɩsedɛkɩ a fite. 16Nán menian’n-mɔ mala nɩn asʋ yɛ̂ bɛ nɩanlɩn bɛ sielɩ yɩ́ tɛɛyɩfʋɛ ɔ. Nan tunmin’n m’ɔ man nyanmɩansʋ ngʋan m’ɔ le man ayuelɩɛ’n, y’ɔ man ɔ’a kaci Nyanmɩan tɛɛyɩfʋɛ ɔ. 17Afɩ ɔ wɔ Ɛhɛlɛ Ɛjɔlɛ nɩn anun kɛ:
Ɛ ’kaci tɛɛyɩfʋɛ cɩan daa kɛ Mɛlɛkɩsedɛkɩ.
18Ɛhɩ Nyanmɩan a yaci daba mala nɩn a tʋ. Ɔ sanlɩn kɛ tunmin nnʋn man nun, ɛsɛ ɔ’a yɔ mgban. 19Afɩ Moyizɩ mala nɩn a man sʋanlan fɩ́ɩ́ anwʋn a ndɩ man. Nan Nyanmɩan a sie anyɩndasʋɛ like kʋn ɛbɛlɛ. Anyɩndasʋɛ like sɔ’n man yɛ cʋɩn yɛ kpunnge Nyanmɩan.
20Afɩ m’ɔ la sʋ biekun’n y’ɔ le ndâ’n mɔ Nyanmɩan hanlɩn’n. Mɔ ɛhɩnlɩn-mɔ ’kaci tɛɛyɩfʋɛ’n, Nyanmɩan a ngan man yɩ́ nwʋn ndâ. 21Nan Zozi dɩɛ, Nyanmɩan hanlɩn yɩ́ nwʋn ndâ. Ɛ ’nwun ɛjɔlɛ m’ɔ hanlɩn helelɩ yɩ́’n:
Yɛ́ Mɩn a han ndâ,
Yɩ́ Nʋan Ɛjɔlɛ’n, ɔ ngaci man yɩ́.
Yɩ́ nwan: Ɛ tɩ tɛɛyɩfʋɛ cɩan daa.
22Ɛhɩka ati, Zozi di ajinlanmun maan yɛ nwun yɩ́ kɛ nyɩhyɛ’n mɔ Nyanmɩan nʋn yɛ́ a hyɩhyɛ’n tɩ ananhɔlɛ sakpa.
23Ɛsɛ like biekun wɔ ɛbɛlɛ m’ɔ tɩ bɛ́ afian ɔ. Y’ɔ le kɛ anɩn tɛɛyɩfʋɛ’n-mɔ sʋnlɩn. Afɩ ewue’n man kʋn nni man junman’n dede ɔ nga man ɛbɛlɛ. 24Kʋsʋ Zozi dɩɛ, ɔ tɩ asɩ dahuu. Tɛɛyɩfʋɛ junman’n m’ɔ di’n, junman sɔ’n nzɩn man sʋanlan fʋfɔlɛ asa nun. 25Ɛhɩka ati, bɛ́ kʋalaa mɔ bɛ nanndɩ yɩ́ sʋ bɛ kpunnge Nyanmɩan anwʋn’n, ɔ kʋala de bɛ́ kpa bɔkɔɔ. Ɔ sanlɩn kɛ ɔ tɩ asɩ dahuu ɔ sɛlɛ Nyanmɩan man bɛ́. 26Tɛɛyɩfʋɛ kpain’n mɔ y’a mian yɩ́ nwʋn’n y’ɔ le Zozi. Ɔ tɩ nwannzan-nwannzan, efian fɩ́ɩ́ nnʋn man yɩ́ nwʋn. Ɛtɛ fɩ́ɩ́ nnʋn man yɩ́ nun. Ɔ nʋn ɛtɛfʋɛ’n-mɔ afian tɩ. Ɔ tɩ like biala asʋ kpain. 27Zozi tɩ man kɛ tɛɛyɩfʋɛ mgbain ɛhɩnlɩn-mɔ. Tɛɛyɩfʋɛ sɔ’n-mɔ, ɔ di kɛ bɛ yɩ bɛ́ muonun bɛ́ ti tɛɛ nán b’a yɩ bagua’n kʋsʋ dɩɛ. Nan yɩ́ dɩɛ, ɔ falɩ yɩ́ nwʋn yɩlɩ yɛ́ kʋalaa yɛ́ ti tɛɛ baa kʋnmgba cein. 28Menian mɔ bɛ́ nwʋn ndɩ man, ɔ fi ɛtɛ’n dunman nun’n yɛ̂ *Moyizɩ mala’n fa bɛ́ sie tɛɛyɩfʋɛ mgbain ɔ. Mala nɩn anzin, Nyanmɩan hanlɩn ndâ tʋlɩ yɩ́ ɛjɔlɛ nɩn asʋ. Ɛjɔlɛ sɔ’n sie Baa’n mɔ yɩ́ nwʋn a tɩ kpa bɔkɔɔ’n tɛɛyɩfʋɛ kpain cɩan daa.
8Zozi tɩ yɛ́ tɛɛyɩfʋɛ kpain.
1Ɛjɔlɛ ɛhɩ kʋalaa mɔ yɛ lɛ kan’n, yɩ́ ti’n y’ɔ le kɛ yɛ le tɛɛyɩfʋɛ kpain kʋn. Ɔ’a fʋ anwunno ɛlɔ ɔ’a tanlan tunminfʋɛ Nyanmɩan kpili belemgbin bia’n fama sʋ. 2Asɔnɩn sua nwannzan-nwannzan’n m’ɔ tɩ *tantɩ kpa’n, nán sʋanlan yɛ̂ ɔ’a bɔ ɔ. Nan yɛ́ Mɩn muonun yɛ̂ ɔ’a bɔ tantɩ sɔ nɩn ɔ. Ɛbɛlɛ yɛ̂ yɛ́ tɛɛyɩfʋɛ kpain’n di yɩ́ tɛɛ ɛyɩɛ junman nɩn ɔ. 3Acɛdɩɛ nʋn tɛɛ ɛyɩɛ mɔ bɛ fa bɛ man Nyanmɩan’n, yɩ́ ti y’ɔ man bɛ sie tɛɛyɩfʋɛ biala ɔ. Ɔ sɛ kɛ yɛ́ tɛɛyɩfʋɛ kpain sɔ’n kʋsʋ nyan like mɔ ɔ ’fa fite Nyanmɩan anyunnun ɔ. 4Sɛ ɔ tɩ kɛ yɛ́ tɛɛyɩfʋɛ kpain’n wɔ asɩɛ nɩn asʋ ɛwa a, ahan ɔ tɩ man tɛɛyɩfʋɛ bɔbɔ. Ɔ sanlɩn kɛ tɛɛyɩfʋɛ’n-mɔ mɔ bɛ di junman sɔ’n wɔ ɛbɛlɛ kɛ Zufʋ’n-mɔ mala kpɩn kele’n. 5Junman’n mɔ tɛɛyɩfʋɛ sɔ’n-mɔ di’n, anwunno ɛlɔ dɩɛ’n nvoninnin’n mɔ Nyanmɩan yɩlɩ helelɩ Moyizɩ’n, sʋ yɛ̂ bɛ nɩan ɔ. Afɩ mɛlɛ mɔ Moyizɩ ’bɔ tantɩ’n man Nyanmɩan’n, Nyanmɩan hanlɩn helelɩ yɩ́ kɛ: Tantɩ’n mɔ m’an yɩ m’an hele wɔ́ bʋka nɩn asʋ’n, nɩan yɩ́ nwʋn sʋ yɔ.
6Nan sian dɩɛ, tɛɛ ɛyɩɛ junman’n mɔ Zozi di’n, ɔ tala tɛɛyɩfʋɛ ɛhɩnlɩn-mɔ kʋalaa dɩɛ’n. Ɔ sanlɩn kɛ ɔ di nyɩhyɛ kpa nɩn anun asafian. Nyɩhyɛ sɔ’n jin anɔhʋba mgbakpa’n-mɔ asʋ. 7Afɩ sɛ ɔ tɩ kɛ alimʋa nyɩhyɛ’n yɔlɩ kpa a, ahan ɔ’a ngaci man yɩ́. 8Nan Nyanmɩan lɛ tu yɩ́ menian’n-mɔ anyunnun. Yɩ́ ti, y’ɔ man ɔ lɛ kan kele bɛ́ kɛ:
Tɛmʋn’n lɛ ba ju,
mɩn nʋn Izalayɛ mân’n nʋn Zuda mân’n,
yɛ ’ba cɩcɩ nyɩhyɛ fʋfɔlɛ.
9Nyɩhyɛ sɔ’n tɩ man kɛ daba dɩɛ’n
mɔ mɩn nʋn bɛ́ nan-mɔ hyɩhyɛlɩ’n.
Daba dɩɛ’n, y’ɔ le cɩan mɔ n zɔlɩ bɛ́ sa
n yɩlɩ bɛ́ fi Ezipiti mân nɩn anun n vitelɩ’n.
B’a nanndɩ man nyɩhyɛ sɔ nɩn asʋ.
Ɛhɩka ati, bɛ́ kʋsʋ bɛ́ nwʋn ɛjɔlɛ a njian man mɩ́n.
10Yɛ́ Mɩn nwan:
Sɛ tɛmʋn sɔ’n ju a, ɛ ’nwun nyɩhyɛ’n
mɔ mɩn nʋn Izalayɛ mân’n ’ba hyɩhyɛ’n.
Mɩn ’fa mɩ́n mala’n mɩn wula bɛ́ ajʋnlɩn nɩn anun.
Mɩn ’kɛlɛ yɩ́ bɛ́ ahʋnlɩn nɩn anun.
Mɩn ’kaci bɛ́ Nyanmɩan,
bɛ́ kʋsʋ bɛ́ ’kaci mɩ́n menian.
11Sʋanlan fɩ́ɩ́ ngɔ hehele man yɩ́ manngʋn like,
anaan ɔ ngɔ han ɔ ngɔ hele yɩ́ nianman kɛ:
Kpʋnndɛ yɛ́ Mɩn.
Afɩ batʋnman o, kpain o, bɛ́ kʋalaa bɛ sɩ mɩ́n.
12Mɩn ’fa bɛ́ ɛtɛ’n-mɔ mɩn ce bɛ́.
Mɩn mmɔ man sʋ fɩ́ɩ́ kʋ́n.
13Sɛ Nyanmɩan lɛ kan nyɩhyɛ fʋfɔlɛ ɛjɔlɛ a, anɩn ɔ lɛ kele kɛ alimʋa dɩɛ nɩn a yɔ daba. Yɛ̂ like m’ɔ kɔ hyɛ, ɛsɛ ɔ kɔ yɔ daba’n, anɩn ɔ ka kaan yɩ́ bʋsʋ nunnun.
9Asɩɛ nɩn asʋ ɛwa nʋn anwunno ɛlɔ Nyanmɩan tantɩ’n
1Nyɩhyɛ daba nɩn anun, anɩn asɔnɩn ɛyɔlɛ’n le yɩ́ sua asɩɛ nɩn asʋ ɛwa ɔ nʋn yɩ́ nwʋn mala. 2Asɔnɩn sua sɔ’n, ɔ tɩ tantɩ. Nyanmɩan tantɩ sɔ’n, mgbɛ nun ɛtanlan kʋn ce nun nnyuan, Lɩka m’ɔ wɔ mgbɛ nun ɛtanlan nɩn anyunnun’n, lɩka sɔ’n yɛ̂ bɛ fɛlɛ yɩ́ lɩka nwannzan-nwannzan nɩn ɔ. Ɛbɛlɛ yɛ̂ kanlannɩɛ’n, ɔ nʋn tɔbɩlɩ’n mɔ bɛ gua Nyanmɩan kpaʋn’n sʋ’n wɔ ɔ. 3Nan mgbɛ nun ɛtanlan nɩn anzin lɩka dɩɛ’n, bɛ fɛlɛ yɩ́ lɩka nwannzan-nwannzan kpa. 4Ɛbɛlɛ yɛ̂ tɔbɩlɩ’n mɔ bɛ yala *ansan sʋ’n nʋn nyɩhyɛ alaka’n wɔ ɔ. Tɔbɩlɩ’n nʋn alaka sɔ’n, b’a holo esika ɛmanlan b’a gua bɛ nwʋn. Alaka nɩn akunnun, ninnge nsan wa nun. Esika ɛmanlan ɛsɛ̂ kʋn jin nun. Ɛsɛ̂ sɔ nɩn anun yɛ̂ *mannan’n wɔ ɔ. Aalʋn kpɔman’n m’ɔ bɔlɩ ndetele’n wɔ alaka nɩn anun. Yɛ̂ ɛsɛ nyɔbʋɛ nnyuan’n mɔ b’a se bɛ́ ndɛtɛlɛ kɛ tabʋa b’a hɛlɛ nyɩhyɛ nɩn anwʋn ɛjɔlɛ’n b’a gua sʋ’n, bɛ wɔ alaka nɩn anun bie. 5Bɛ kɔ se nyanmɩansʋ mmɔfʋɛ nnyuan bɛ kɔ sesie nyɩhyɛ alaka nɩn asʋ. Nyanmɩansʋ mmɔfʋɛ sɔ’n-mɔ, bɛ fɛlɛ bɛ́ selubɩn. Anunminnyanmʋn menian sɔ’n-mɔ kele kɛ Nyanmɩan wɔ ɛbɛlɛ. Bɛ ndɛba’n-mɔ sinnze alaka nɩn ati sʋ anwunno. Alaka nɩn ati sɔ nɩn asʋ yɛ̂ bɛ gua tɛɛ ɛyɩɛ moja nɩn ɔ. Nan mɩn ngulo man kɛ mɩn yɩyɩ ɛjɔlɛ nɩn anun dɔʋn kɩkaala.
6Kɛ bɛ kpɩnlɩn bɛ sesielɩ lɩka sɔ’n, alɩhɩan biala, tɛɛyɩfʋɛ’n-mɔ wʋlʋ Nyanmɩan tantɩ’n lɩka m’ɔ wɔ mgbɛ nun ɛtanlan nɩn anyunnun’n, bɛ di bɛ́ junman nɩn ɛbɛlɛ. 7Nan mgbɛ nun ɛtanlan nɩn anzin ɛlɔ lɩka dɩɛ’n, tɛɛyɩfʋɛ kpain nɩn ala y’ɔ wʋlʋ ɛlɔ ɔ. Ɔ wʋlʋ ɛlɔ afʋɛ nʋan. Ɔ ’wʋlʋ ɛlɔ a, yɩ́ muonun ɔ nʋn bagua’n ɛtɛ mɔ bɛ nzɩ man mɔ b’a yɔ’n dunman nun, ɔ fa naan moja ɔ fite Nyanmɩan anyunnun. 8Wawɛ Nwannzan-nwannzan’n kele nun kɛ mɛlɛ mɔ Nyanmɩan tantɩ daba’n nʋn nun junman elie’n tɛ wɔ ɛbɛlɛ’n, anɩn atɩn’n m’ɔ man menian’n-mɔ kpunnge Nyanmɩan’n la man nun. 9Ɛhɩ tɩ nvandʋhʋn ɛnɛ mɛlɛ’n mɔ yɛ wɔ nun nɩn anun. Yɩ́ bʋ kele kɛ nán acɛdɩɛ nʋn tɛɛ ɛyɩɛ y’ɔ man sʋanlan anwʋn tɩ wɔ Nyanmɩan anyunnun ɔ. 10Afɩ, alɩɛ nʋn nzan nʋn bɛ́ nwʋn efian etue ebialɛ ngacile mala y’ɔ le ɛhɩ-mɔ. Ɔ tɩ mala m’ɔ tʋ de eyuadɩ nɩn anun ninnge’n-mɔ. Mala sɔ’n-mɔ abʋsʋ ’ba nunnun wɔ mɛlɛ Nyanmɩan ’kaci ninnge’n-mɔ kʋalaatin’n.
11Nan ninnge mgbakpa’n m’ɔ wɔ yɛ́ nyunnun nɩn ati yɛ̂ Zozi a a kɛ tɛɛyɩfʋɛ kpain ɔ. Nyanmɩan tantɩ’n mɔ ɔ’a tanlan yɩ́ bʋ ɔ’a li yɩ́ junman nɩn anwʋn cian kpa, ɛsɛ ɛ tɩ kanlanman tala daba dɩɛ’n. Tantɩ sɔ’n, nán menian’n-mɔ asa ati like ɔ. Yɩ́ bʋ y’ɔ le kɛ nán mân ɛhɩ anun like ɔ. 12Zozi a wʋlʋ lɩka nwannzan-nwannzan kpa’n kpɛ̂ kʋnmgba cein bɔkɔɔ. Ɔ’a nva man esile nʋn nnalɛ mma moja ɔ’a nvite man Nyanmɩan anyunnun. Nan ɔ le yɩ́ muonun yɩ́ moja’n m’ɔ man bɛ nyan ngʋan m’ɔ le man ayuelɩɛ’n. 13Nyanmɩan anyunnun, bɛ́ mɔ efian kɔ gua bɛ́ nwʋn’n, sɛ bɛ fa esile nʋn nnalɛ nyin moja’n nʋn ɛnalɛ bɩlɩɛ mɔ bɛ kɔ yala yɩ́’n nzʋan’n bɛ kpʋnndɩn bɛ́ nwʋn an, anɩn bɛ́ nwʋn a tɩ. 14Sɛ naan ɛhɩ-mɔ moja’n kʋala kɛ ɔ man sʋanlan anwʋn tɩ a, Kilisi moja’n kʋala kɛ ɔ man sʋanlan ahʋnlɩn nɩn anun tɩ tala sʋ! Ɔ nanndɩ Ɛdannganman Wawɛ nɩn asʋ, Kilisi muonun a fa yɩ́ nwʋn ɔ’a bɔ afɔlɩɛ mɔ efian fɩ́ɩ́ nnʋn man yɩ́ nwʋn ɔ’a man Nyanmɩan. Yɩ́ moja’n ’tɩ yɛ́ ahʋnlɩn nɩn anun fi nyɔlɩɛ nvuin nvuin’n-mɔ anwʋn maan yɛ sʋ Tɩasɩfʋɛ Nyanmɩan’n.
15Ɛhɩka ati yɛ̂ Kilisi di nyɩhyɛ fʋfɔlɛ nɩn anun asafian ɔ. Ɔ di asafian maan bɛ́ mɔ Nyanmɩan a fɛlɛ bɛ́’n nyan nyanmɩansʋ ajapadɩɛ’n mɔ ɔ’a fa ɔ’a bɔ bɛ́ anɔhʋba’n. Bɛ kʋala kɛ bɛ́ sa kan yɩ́. Ɔ sanlɩn kɛ Kilisi a wu. Yɩ́ ewue sɔ’n de menian’n-mɔ ati fi bɛ́ ɛtɛ nɩn anun nyɩhyɛ daba nɩn abʋ.
16Afɩ sʋanlan kɛlɛ yɩ́ kunnun ɛjɔlɛ kalata sʋ sie a, ɔ di kɛ bɛ nwun yɩ́ kɛ sʋanlan nɩn a wu sakpa nán kalata sɔ’n mɔ ɔ’a hɛlɛ ɔ’a sie nɩn a nyan tunmin. 17Ɔ sanlɩn kɛ mɛlɛ mɔ sʋanlan’n mɔ ɔ’a hɛlɛ yɩ́ kʋnnun ɛjɔlɛ kalata sʋ ɔ’a sie’n tɛ tɩ asɩ’n, kalata sɔ’n le man tunmin. 18Ɛhɩka ati, dede mɔ bɛ ’di daba nyɩhyɛ nɩn asʋ’n, bɛ le naan moja. 19Alimʋa nɩn anun, Moyizɩ kɔ kɩnnga mala’n kʋalaa m’ɔ wɔ kalata nɩn anun’n ɔ kɔ hele bagua’n. M’ɔ kɩnngalɩ yuelɩ’n, ɔ kɔ fa nnalɛ mma nʋn esile moja’n nʋn nzue ɔ kɔ kpʋnndɩn kɔ gua mala kalata’n nʋn bagua’n kʋalaa anwʋn. Mɔ ɔ ’kpʋnndɩn’n, ɔ le *izɔpʋ asa baa nʋn naan enyuan kɔkɔlɛ y’ɔ kpʋnndɩnlɩn ɔ. 20Moyizɩ nwan: Nyɩhyɛ’n mɔ Nyanmɩan a fa a man yɛ́ kɛ yɛ lí sʋ’n, yɩ́ nwʋn moja nɩn ahɩ.21Moyizɩ kpʋnndɩnlɩn Nyanmɩan tantɩ’n nʋn asɔnɩn nɩn anwʋn ninnge’n kʋalaatin anwʋn moja. 22Kɛ mala’n kpɩn kele’n, moja’n man ninnge dɔʋn anwʋn tɩ. Afɩ sɛ moja a ngua man an, ɛtɛ face nnʋn man ɛbɛlɛ.
Zozi tɛɛ ɛyɩɛ’n tu ɛtɛ’n-mɔ
23Ɛhɩka ati, anwunno ɛlɔ ninnge’n-mɔ, bɛ́ nvoninnin y’ɔ le asɩ ɛwa dɩɛ’n-mɔ. Bɛ ’tɩ bɛ́ nwʋn an, bɛ le moja. Nan anwunno ɛlɔ dɩɛ’n-mɔ, sɛ bɛ ’tɩ bɛ́ nwʋn an, ɔ di kɛ bɛ nyan tɛɛ ɛyɩɛ ninnge m’ɔ tɩ kpa tala asɩɛ nɩn asʋ ɛwa dɩɛ’n-mɔ. 24Ɔ sanlɩn kɛ tantɩ’n mɔ Moyizɩ nɩanlɩn sʋ ɔ bɔlɩ asɩ ɛwa dɩɛ’n, nán ɛbɛlɛ yɛ̂ Kilisi wʋlʋlɩ ɔ. Nan ɔ’a fʋ ɔ’a hɔ anwunno. Yɛ́ dunman nun, ɔ jin Nyanmɩan anyunnun ɛbɛlɛ sian dɩɛ. 25Tɛɛyɩfʋɛ kpain’n, afʋɛ nʋan y’ɔ wʋlʋ lɩka nwannzan-nwannzan kpa nɩn ɔ. Ɔ ’wʋlʋ a, ɔ le naan moja. Nan Kilisi dɩɛ, ɔ’a nwʋlʋ man ɛlɔ ɔ’a nva man yɩ́ nwʋn ɔ’a nyɩ man tɛɛ afʋɛ daa. Nan ɔ’a wʋlʋ ɛlɔ kpɛ̂ kʋnmgba cein bɔkɔɔ. 26Sɛ nán yɩ́ sɔ a, ahan kɛ bɛ bɔlɩ mân’n, ɔ di kɛ Kilisi nwun yɩ́ nyunnun kpɛ̂ nyɛ nyɛ. Nan sian dɩɛ m’ɔ tɩ mɛlɛ kasian’n, Kilisi a yɩ yɩ́ nwʋn kpɛ̂ kʋnmgba bɔkɔɔ. Ɔ’a fa yɩ́ nwʋn ɔ’a yɩ tɛɛ ɔ’a tu ɛtɛ’n. 27Ɔ la ɛbɛlɛ man sʋanlan kʋn biala kɛ ɔ wú kpɛ̂ baa kʋnmgba cein. Ɔ wu yue a, bɛlɛ mɔ anɩn Nyanmɩan lɛ ba bua yɩ́ ndɛɛ ɔ. 28Yɩ́ sɔ kʋsʋ ala, Kilisi a fa yɩ́ nwʋn ɔ’a yɩ́ tɛɛ kpɛ̂ kʋnmgba cein bɔkɔɔ maan menian dɔʋn fi bɛ́ ɛtɛ nɩn anun b’a jasʋ. Ɔ ’ba sa ba biekun, kʋsʋ nán kɛ ɛtɛ nɩn ecicie ti ɔ. Nan ɔ ’ba ɔ de bɛ́ mɔ bɛ lɛ nwʋnndɛ yɩ́’n ngʋan.
10Asɩ ɛwa ninnge’n-mɔ tɩ anwunno dɩɛ’n-mɔ nvoninnin
1Ɛhɩ, mala’n mɔ Nyanmɩan falɩ manlɩn Moyizɩ’n, ɔ tɩ ninnge mgbakpa’n m’ɔ lɛ ba nɩn nvoninnin, nan nán yɩ́ kpa’n muonun ɔ. Bɛ́ mɔ afʋɛ daa bɛ nanndɩ tɛɛ ɛyɩɛ kʋnmgba nɩn asʋ bɛ kpunnge Nyanmɩan’n, mala sɔ’n le man anwʋnsɛlɛ fɩ́ɩ́ m’ɔ man bɛ́ nwʋn tɩ ɔ. 2Sɛ ɔ tɩ kɛ bɛ́ mɔ bɛ nanndɩ tɛɛ ɛyɩɛ nɩn asʋ bɛ kpunnge Nyanmɩan nɩn anwʋn tɩlɩ kpɛ̂ kʋnmgba bɔkɔɔ a, ahan bɛ́ ɛtɛ nɩn anwʋn ɛjɔlɛ a mma man bɛ́ ajʋnlɩn nun kʋ́n, ɛsɛ ahan bɛ yacili tɛɛ ɛyɩɛ’n. 3Tɛɛ’n mɔ bɛ yɩ yɩ́ afʋɛ daa’n kacɩ menian’n-mɔ ɛtɛ’n mɔ bɛ yɔ’n. 4Ɔ sanlɩn kɛ nnalɛ nʋn esile’n-mɔ moja’n ngʋala man ɛtɛ’n cici bɔbɔ fɩ́ɩ́.
5Ɛhɩka ati, mɛlɛ mɔ Kilisi ’ba mân nɩn anun’n, ɔ hanlɩn helelɩ Nyanmɩan kɛ:
Nán tɛɛ ɛyɩɛ nʋn acɛdɩɛ yɛ̂ ɛ lɛ kpʋnndɛ ɔ.
Nan a sesie anwʋnnaan a man mɩ́n.
6Tɛɛ ɛyɩɛ naan’n nʋn ɛtɛ face dɩɛ’n,
bɛ nyɔ man wɔ́ ɛnyɩnmɩn.
7Yɩ́ ti yɛ̂ mɩ́n nwan: Nyanmɩan, ɛ ’nwun mɩ́n.
Mɩɩn ba mɩn yɔ wɔ́ kʋnnun like kɛ
b’a kpɩn b’a hɛlɛ mɩ́n nwʋn ɛjɔlɛ’n
mala kalata nɩn anun’n.
8Alimʋa nɩn anun, yɩ́ nwan: Nán tɛɛ ɛyɩɛ nʋn acɛdɩɛ yɛ̂ ɛ lɛ kpʋnndɛ ɔ. Tɛɛ ɛyɩɛ naan’n nʋn ɛtɛ face dɩɛ’n nyɔ man wɔ́ ɛnyɩnmɩn. Kʋsʋ afɩ tɛɛ ɛyɩɛ sɔ’n-mɔ, kɛ mala’n kele’n, yɩ́ nwʋn yɛ̂ bɛ nɩan bɛ yɩ ɔ. 9Ɛhɩ anzin, yɩ́ nwan: Nyanmɩan, ɛ ’nwun mɩ́n. Mɩɩn ba mɩn yɔ wɔ́ kunnun like. Ɛbɛlɛ anun, Nyanmɩan a kpɛ daba like dɩɛ nɩn anun ɔ’a fa fʋfɔlɛ ɔ’a sie yɩ́ bʋsʋ. 10Ɔ sanlɩn kɛ Zozi Kilisi a yɔ Nyanmɩan akunnun like. Ɔ’a fa yɩ́ nwʋn ɔ’a bɔ afɔlɩɛ a man Nyanmɩan kpɛ̂ kʋnmgba cein bɔkɔɔ. Afɔlɩɛ sɔ nɩn a man yɛ́ nwʋn a tɩ fi yɛ́ ɛtɛ’n-mɔ anun.
11Cɩan daa tɛɛyɩfʋɛ’n jin Nyanmɩan *tantɩ nɩn abʋ ɔ di yɩ́ junman’n. Tɛɛ ɛyɩɛ kʋnmgba’n m’ɔ ngʋala man ɛtɛ’n tu fɩ́ɩ́’n y’ɔ yɩ ɔ. 12Nan Kilisi dɩɛ, ɔ’a yɩ ɛtɛ nɩn anwʋn tɛɛ baa kʋnmgba cein. Ɛhɩ anzin, ɔ’a fʋ anwunno ɔ’a hɔ a tanlan Nyanmɩan asa fama sʋ. Ɔ ’tanlan ɛbɛlɛ mɛlɛ daa. 13Sian dɩɛ, ɛbɛlɛ y’ɔ lɛ nwʋnndɛ maan Nyanmɩan fa yɩ́ mgbɔfʋɛ’n-mɔ gua yɩ́ ja abʋ kɛ bia mɔ belemgbin sesie yɩ́ ja sʋ ɔ. 14Afɩ Kilisi tɛɛ ɛyɩɛ kʋnmgba cein ɛhɩ ati, ɔ’a man bɛ́ mɔ ɔ’a tɩ bɛ́ nwʋn nɩn anwʋn a tɩ kpa bɔkɔɔ wɔ mɛlɛ daa.
15Ɛjɔlɛ sɔ’n kʋsʋ yɛ̂ Wawɛ Nwannzan-nwannzan kan kele yɛ́ ɔ. Afɩ alimʋa nɩn anun an, yɩ́ nwan:
16Yɛ́ Mɩn nwan: Ɛ ’nwun kɛ cɩan bie dede
nyɩhyɛ’n mɔ mɩn nʋn bɛ́ yɛ ’ba hyɩhyɛ’n ’yɔ yɩ́’n.
Mɩn ’fa mɩ́n mala’n mɩn wula bɛ́ ahʋnlɩn nɩn anun,
mɩn ’kɛlɛ mɩn sie bɛ́ ajʋnlɩn nɩn anun.
17Ɛsɛ yɩ́ nwan:
Mɩn ngɔ bɔ man bɛ́ ɛtɛ’n
nʋn bɛ́ mala ɛtʋan nɩn asʋ fɩ́ɩ́ kʋ́n.
18Lɩka kʋsʋ mɔ ɛtɛ face wɔ’n, anɩn ɛtɛ nɩn anwʋn tɛɛ ɛyɩɛ fɩ́ɩ́ kʋ́n nnʋn man ɛbɛlɛ.
Yɛ hyʋ́ɩn yɛ kpúnnge Nyanmɩan.
19Ɛhɩka ati, anianman-mɔ, Zozi moja’n dunman nun, yɛ le atɩn yɛ wʋlʋ lɩka nwannzan-nwannzan kpa’n. 20Ɔ’a sɩn mgbɛ nun ɛtanlan nɩn anun. Mgbɛ nun ɛtanlan sɔ’n y’ɔ le yɩ́ muonun yɩ́ nwʋnnaan’n. Ɔ’a fa ɔ’a kpɛ atɩn fʋfɔlɛ m’ɔ tɩ ngʋan atɩn ɔ’a man yɛ́. 21Yɛ le tɛɛyɩfʋɛ kpain kʋn m’ɔ nɩan Nyanmɩan awulo nɩn anun menian’n-mɔ asʋ ɔ. 22Ɛhɩka ati, yɛ fá ahʋnlɩn mɔ nun a tɩ, yɛ nyán dedi nɩn anun anyɩndasʋɛ kpa yɛ hyʋ́ɩn yɛ kpúnnge Nyanmɩan. Ɔ sanlɩn kɛ Zozi moja nɩn a nwunnzin yɛ́ ahʋnlɩn’n-mɔ anun. Ɛsɛ ɔ’a fa efian etue nzue ɔ’a bia yɛ́. 23Anyɩndasʋɛ like’n mɔ yɛ lɛ bɔ yɛ kele mân’n, yɛ tíla nun sɛlɛ kpa. Ɔ sanlɩn kɛ sʋanlan’n mɔ ɔ’a bɔ yɛ́ anɔhʋba’n kan ananhɔlɛ. 24Yɛ nɛ́nɩan yɛ́ nwʋn sʋ nán yɛ wówula yɛ́ nwʋn anwʋnsɛlɛ yɛ húlo yɛ́ nwʋn kpa, yɛ bɔ́ bala m’ɔ tɩ kpa. 25Lɩka mɔ yɛ yia daa yɛ tie Nyanmɩan Anʋan Ɛjɔlɛ’n, nán man yɛ yaci ɛbɛlɛ ɛhɔlɛ kɛ mmie-mɔ yɔ yɩ́’n. Nan yɛ wówula yɛ́ nwʋn anwʋnsɛlɛ maan ɔ tála sʋ, ɔ sanlɩn kɛ ɛmɔ nwun yɩ́ kɛ yɛ́ Mɩn cɩan nɩn a kpunnge.
26Afɩ kɛmɔ y’a nwun ananhɔlɛ’n, sɛ yɛ́ nyunnunfuu yɛ tanlan yɛ yɔ ɛtɛ’n biekun an, tɛɛ ɛyɩɛ fɩ́ɩ́ kʋ́n nnʋn ɛbɛlɛ m’ɔ kʋala ɛtɛ sɔ’n cici ɔ. 27Nan like mɔ ɔ ’nwʋnndɛ yɛ́’n y’ɔ le Nyanmɩan ndɛɛ ebua esulo’n nʋn sɩ̂n kpili’n mɔ ɔ ’yala Nyanmɩan mgbɔfʋɛ’n-mɔ’n. 28Sɛ sʋanlan kʋn tʋn Moyizɩ mala’n nán menian nyuan anan nsan di adanzɩɛ kɛ ɔ’a tʋn mala’n sakpa a, anwunnvoe ɛsa nnʋn man nun, bɛ kun sʋanlan sɔ’n. 29Sɛ ɛjɔlɛ’n tɩ sʋa a, bɛ́ mɔ bɛ́ nyɩn ci Nyanmɩan Awa’n, mɔ bɛ mmu man nyɩhyɛ’n moja’n mɔ ɔ’a tɩ bɛ́ nwʋn’n like fɩ́ɩ́’n, mɔ bɛ kpɛ anwunnvoe ɛsɩɛ Wawɛ’n nzʋba’n, asʋ bɛ ’yaci bɛ́ nwʋn sa bɛ ce bɛ́ ɔ? Ɛmɔ anyɩn ta nun kɛ ahatua mɔ bɛ ’tua bɛ́’n, ɔ tɩ man nzɛmɩndɛ. 30Afɩ yɛ sɩ sʋanlan’n m’ɔ hanlɩn kɛ: Mɩ́n dein yɛ̂ mɩn ’de alɔman nɩn ɔ. Mɩ́n yɛ̂ mɩn ’tua bɛ́ yɩ́ nwʋn kalɛ ɔ. Ɛsɛ sʋanlan sɔ’n hanlɩn kɛ: Nyanmɩan ’bua yɩ́ menian’n-mɔ ndɛɛ.31Sʋanlan m’ɔ kɔ tɔ Tɩasɩfʋɛ Nyanmɩan nɩn asa nun’n, anɩn sʋanlan sɔ nɩn a mian kpa.
32Ɛmɔ ati kácɩ kɛ mɛlɛ mɔ Nyanmɩan manlɩn ɛmɔ fitelɩ jawe nɩn anun’n, ɛmɔ nwunlin bɛ́ nyunnun kpa ɛlɔɛ kpili’n mɔ ɛmɔ hʋnlɩn nɩn anun. Ɛlɔɛ sɔ nɩn anun, ɛmɔ jinlanlɩn bɛ́ ja nun. 33Mɛlɛ sɔ’n, cɩan bie ju a, amgba yɛ̂ bɛ bɔ ɛmɔ, ɛsɛ bɛ kele ɛmɔ ahʋlʋwa bagua nɩn anun. Cɩan bie kʋsʋ a, bɛ́ mɔ bɛ lɛ nwun yalɛ kɛ ɛmɔ’n, ɛmɔ fa bɛ́ nwʋn bɛ bɔ bɛ́. 34Bɛ́ mɔ b’a gua bɛ́ fiadɩ mɔ bɛ kele bɛ́ ahʋlʋwa’n, ɛmɔ bʋkalɩ bɛ́. Tɛmʋn mɔ menian’n-mɔ tʋalɩ ɛmɔ lelɩ bɛ́ nwʋn ninnge’n, ɛmɔ a nni man yɩ́ nwʋn yalɛ, nan fɛ yɛ ɛmɔ lili ɔ. Afɩ ɛmɔ sɩ sie kɛ ɛmɔ le anwʋndɩɛ mgbakpa-mɔ. Ɛsɛ anwʋndɩɛ sɔ’n-mɔ nzɛcɩ man lé.
35Anyɩndasʋɛ like’n mɔ ɛmɔ le yɩ́’n, nán bɛ yaci bɛ tʋ. Ɔ sanlɩn kɛ nvasʋɛ kpili kpa wɔ sʋ. 36Ɔ di kɛ ɛmɔ bɔ mɔndɩnlɩn bɛ yɔ like mɔ Nyanmɩan kulo’n. Sɛ ɛmɔ yɔ yɩ́ sɔ a, yɩ́ anɔhʋba nɩn anun like’n, ɛmɔ asa ’kan yɩ́. 37Afɩ Ɛhɛlɛ Ɛjɔlɛ’n kele kɛ:
Mɛlɛ kaan sʋa, kaan sʋa bɔbɔ,
sʋanlan’n m’ɔ di kɛ ɔ ba’n,
ɔ ngɔ hyɛ man, ɔ ’ba a.
38Sʋanlan m’ɔ nanndɩ sɛsɛ wɔ mɩ́n nyunnun’n,
yɩ́ dedi nɩn ati, ɔ ’nyan ngʋan.
Nan sɛ ɔ yɩ yɩ́ nwʋn fi mɩ́n sa nun an,
mɩn mmu man yɩ́ sʋanlan kʋ́n.
39Bɛ́ mɔ bɛ yɩ bɛ́ nwʋn bɛ minlin’n, nán bɛ́ mmie-mɔ y’ɔ le yɛ́. Nan yɛ́ dɩɛ, yɛ le dedi, ɛsɛ yɛ nanndɩ ngʋan atɩn nɩn asʋ.
11Dedi nɩn anwʋn ɛjɔlɛ’n.
1Dedi nɩn abʋ y’ɔ le kɛ like mɔ bɛ́ lʋa wɔ sʋ’n, bɛ sɩ yɩ́ fɔ́ʋ́n kɛ bɛ́ sa ’kan yɩ́. Ɛsɛ like’n mɔ bɛ nnwun man yɩ́ bɛ́ nyɩnsʋ’n, bɛ yɔ maan bɛ nwun yɩ́ kɛ like sɔ’n wɔ ɛbɛlɛ sakpa. 2Daba menian’n-mɔ dedi’n mɔ anɩn bɛ le yɩ́ nɩn ati, Nyanmɩan lelɩ bɛ́ tʋlɩ nun.
3Dedi’n man yɛ nwun yɩ́ kɛ Nyanmɩan le yɩ́ Nʋan Ɛjɔlɛ’n y’ɔ bɔlɩ mân nɩn ɔ. Ɔ man like mɔ bɛ nwun yɩ́’n, Nyanmɩan nanndɩlɩ mɔ bɛ nnwun man yɩ́ nɩn asʋ y’ɔ bɔlɩ ɔ.
4Abɛlɩ lelɩ Nyanmɩan lili. Afɔlɩɛ’n m’ɔ bɔlɩ manlɩn Nyanmɩan’n sɔlɩ yɩ́ nyɩn talalɩ yɩ́ nianman kpain Kayɩn dɩɛ’n. Dedi’n mɔ Abɛlɩ le yɩ́ nɩn ati, Nyanmɩan buli yɩ́ sɛsɛfʋɛ. Ɔ sanlɩn kɛ Nyanmɩan muonun sɔlɩ Abɛlɩ afɔlɩɛ’n-mɔ anun. Abɛlɩ a wu. Nan kʋsʋ dedi’n m’ɔ le yɩ́ nɩn ati, ɔ tɩ kɛ yɩ́ nyɩn tɛ wɔ sʋ.
5Dedi nɩn ati, ewue a ngu man Enɔkɩ. Nyanmɩan kpili falɩ yɩ́ hɔlɩ yɩ́ nwʋn ɛlɔ. B’a nnwun man yɩ́ fɩ́ɩ́ kʋ́n. Abɛlɛ mɔ anɩn Enɔkɩ tɛ wɔ eyuadɩ nɩn anun ɛwa’n, Nyanmɩan lili yɩ́ nwʋn adanzɩɛ kɛ Enɔkɩ ɛnanndɩɛ’n sɔ yɩ́ nyɩn. 6M’ɔ wɔ nun’n y’ɔ le kɛ sʋanlan m’ɔ nne man Nyanmɩan nni man’n, yɩ́ ɛnanndɩɛ’n nzɔ man Nyanmɩan anyɩn. Ɛhɩka ati, sʋanlan mɔ ɔ ’kpunnge Nyanmɩan’n, ɔ lé lí kɛ Nyanmɩan wɔ ɛbɛlɛ yɛ̂ ɔ ce bɛ́ mɔ bɛ kpʋnndɛ yɩ́’n like.
7Munnzue’n m’ɔ lɛ ba tɔ mân nɩn anun mɔ anɩn bɛ nwunlin man yɩ́’n, Nyanmɩan kɔ yɩ kɔ hele Nowe. Dedi nɩn ati, Nowe kɔ fa ɛjɔlɛ sɔ’n ananhɔlɛ. Ɔ kɔ man Nyanmɩan anyɩnnzɔ ɔ kɔ bʋbɔ meli’n. Ɔ nʋn yɩ́ yɩ nʋn bɛ́ mma’n-mɔ bɛ kɔ fʋ nun bɛ kɔ nyan bɛ́ ti. Ɛhɩka ati, Nowe helelɩ kɛ mân’n bɔ bala ɛtɛ. Yɩ́ dedi nɩn ati, Nyanmɩan buli yɩ́ sɛsɛfʋɛ.
8Dedi nɩn ati, mɛlɛ mɔ Nyanmɩan fɛlɛlɩ Abalahamʋn’n, Abalahamʋn a nne a nzie man. Ɔ kɔ hɔ mân fʋfɔlɛ kʋn anun. Mân sɔ’n yɛ̂ anɩn Nyanmɩan lɛ ba fa man yɩ́ ɔ. Ɔ fi yɩ́ muonun yɩ́ mân dɩɛ nɩn anun ɔ kɔ tu kʋsʋ anɩn ɔ nzɩ lɩka’n m’ɔ lɛ kɔ’n. 9Dedi nɩn ati, ɔ tanlanlɩn mân’n mɔ Nyanmɩan falɩ bɔlɩ yɩ́ anɔhʋba nɩn anun kɛ ɛyɛfʋɛ. Abalahamʋn bɔlɩ tantɩ ɛbɛlɛ ɔ tanlanlɩn yɩ́ bʋ. Izakɩ nʋn Zʋakɔbʋ mɔ bɛ tɩ yɩ́ bʋsʋ menian’n, bɛ́ kʋsʋ bɛ tanlanlɩn tantɩ nɩn abʋ. Anɔhʋba’n mɔ Nyanmɩan bɔlɩ Abalahamʋn’n, yɩ́ kpʋnmgba nɩn ala y’ɔ bɔlɩ bɛ́ kʋsʋ bɛ́ ɔ. 10Afɩ anɩn Abalahamʋn lɛ nwʋnndɛ kulo’n mɔ yɩ́ awulabɛbʋ’n tɩ kunngun’n. Kulo sɔ’n, sʋanlan m’ɔ nyanlɩn yɩ́ nwʋn ajʋnlɩn ɔ hyɩhyɛ’n y’ɔ le Nyanmɩan muonun.
11Dedi nɩn ati, Abalahamʋn nʋn Sala hʋalalɩ baa wʋ kʋsʋ anɩn bɛ tɩ mɩlɩwa kpa bɔkɔɔ. Ɔ sanlɩn kɛ ɔ lelɩ lili kɛ sʋanlan’n m’ɔ bɔlɩ anɔhʋba’n kʋala yɔ maan ɔ nyan nun like. 12Ɛhɩka ati, ɔ nanndɩ sʋanlan baa kʋnmgba sɔ nɩn asʋ, yɩ́ mɔ anɩn ɔ tɩ kɛ ɔ’a wu a yue’n, menian nwala nwala kɛ nzalama, nwala nwala kɛ jenvie nʋan anyʋan fi yɩ́ kunnun fitelɩ.
13Menian sɔ’n-mɔ kʋalaa nyanlɩn dedi dede bɛ falɩ bɛ wuli. Bɛ́ sa a ngan man ninnge’n-mɔ mɔ Nyanmɩan falɩ bɔlɩ bɛ́ anɔhʋba’n. Nan kʋsʋ bɛ nwunlin ninnge sɔ’n-mɔ mʋa bɛ lili yɩ́ nwʋn fɛ. Bɛ hanlɩn yɩ́ yuein kɛ bɛ tɩ nyɔfʋɛ, ɛsɛ bɛ walɩ mgbanza asɩɛ nɩn asʋ ɛwa. 14Bɛ́ mɔ bɛ kan sɔ’n, bɛ kele nun kɛ bɛ lɛ kpʋnndɛ mân kʋn bɛ tanlan nun. 15Nan sɛ ɔ tɩ kɛ bɛ lili mân’n mɔ bɛ fi nun bɛ tuli nɩn anwʋn yalɛ a, ahan bɛ kpɛlɩ atɩn bɛ salɩ hɔlɩ tanlanlɩn ɛlɔ. 16Nan b’a nyɔ man yɩ́ sɔ. Ɔ sanlɩn kɛ nyanmɩansʋ mân dɩɛ’n yɛ̂ anɩn bɛ lɛ kpʋnndɛ ɔ. Ɛhɩka ati, sɛ bɛ fɛlɛ Nyanmɩan Kpili bɛ́ Nyanmɩan an, nyian ngun man yɩ́. Afɩ ɔ’a cɩcɩ kulo kʋn ɔ’a sie bɛ́.
17Dedi nɩn ati, Abalahamʋn tielɩ manlɩn Nyanmɩan sɔlɩ yɩ́ nɩanlɩn. Afɩ Nyanmɩan hanlɩn helelɩ yɩ́ kɛ ɔ fá yɩ́ bangɔlɔ Izakɩ ɔ yɩ́ tɛɛ ɔ mán yɩ́. Abalahamʋn a nne a nzie man. Kʋsʋ yɩ́ lɩlɩ yɩ́ Abalahamʋn yɛ̂ Nyanmɩan bɔlɩ yɩ́ anɔhʋba kɛ ɔ ’man ɔ wʋ baa sɔ nɩn ɔ. 18Afɩ, Nyanmɩan hanlɩn helelɩ yɩ́ kɛ: Mɩn ’sɩn Izakɩ asʋ mɩn man ɛ di ata kɛ m mɔlɩ wɔ́ anɔhʋba kɛ mɩn ’man ɛ di ata’n.19Abalahamʋn lelɩ lili kɛ sɛ bɔbɔ Izakɩ wu a, Nyanmɩan le tunmin ɔ kʋala ɔ man yɩ́ ngʋan. Sakpa kʋsʋ, Nyanmɩan manlɩn Izakɩ nyanlɩn ngʋan kɛ sʋanlan m’ɔ fi ewue nun a tinnge ɔ.
20Dedi nɩn ati, Izakɩ yeyilalɩ Zʋakɔbʋ nʋn Ezau asʋ bɛ́ cɩan bie asɩtanlan’n dunman nun.
21Dedi nɩn ati, Zʋakɔbʋ yeyilalɩ yɩ́ wa Zozɛfʋ amma’n-mɔ nunhan kʋn biala asʋ asannan nán ɔ’a wu. Ɔ butuli yɩ́ kpɔman nɩn asʋ ɔ yɩlɩ Nyanmɩan ayɛ.
22Dedi nɩn ati, mɛlɛ mɔ Zozɛfʋ ’ba wu’n, ɔ hanlɩn tɛmʋn’n mɔ Izalayɛ amma’n-mɔ fi Ezipiti mân nɩn anun ’fite nɩn anwʋn ɛjɔlɛ. Ɛsɛ sɛ ɔ wu a, kɛ bɛ kpɩ́n bɛ yɔ́ yɩ́’n, ɔ hanlɩn yɩ́ nwʋn ɛjɔlɛ kʋsʋ.
23Dedi nɩn ati, mɛlɛ mɔ bɛ wʋlɩ Moyizɩ’n, yɩ́ sɩ nʋn yɩ́ nin falɩ yɩ́ fɩalɩ dede sala nsan. Ɔ sanlɩn kɛ Moyizɩ tɩ baa kanlanman. Yɩ́ ti, yɩ́ sɩ nʋn yɩ́ nin a nzulo man b’a nni man belemgbin’n mala nɩn asʋ.
24Dedi nɩn ati, mɔ Moyizɩ ati tinlin’n, yɩ́ nwan nán Falaʋn awa balasua nɩn awa y’ɔ le yɩ́. 25Ahʋlʋwa’n mɔ anɩn bɛ lɛ kele Nyanmɩan menian’n-mɔ’n, yɩ́ nwan bɛ héle yɩ́ bie. Afɩ ɔ nɩan an, ɔ tɩ kpa tala kɛ ɔ tánlan ɛtɛ nɩn anun ɔ lí mân. Ɔ sanlɩn kɛ mân elie sɔ’n yɩ́ bʋsʋ njɛ man. 26Ɔ nwunlin yɩ́ kɛ sɛ bɛ kele yɩ́ ahʋlʋwa kɛ bɛ helelɩ Kilisi nɩn an, ɔ tɩ anyanbɛnwʋn kpili kpa man yɩ́. Anyanbɛnwʋn sɔ’n tala Ezipiti mân nɩn anun dɩɛ’n. Afɩ Kilisi anyanbɛnwʋn dɩɛ’n yɛ̂ yɩ́ nyɩn tua yɩ́ ɔ.
27Dedi nɩn ati, Moyizɩ a nzulo man belemgbin ɛya nɩn anzin. Ɔ fi Ezipiti mân nɩn anun jasʋlɩ. Ɔ tilalɩ yɩ́ ahʋnlɩn. Ɔ tɩ kɛ sʋanlan m’ɔ nwun Nyanmɩan’n mɔ bɛ nnwun man yɩ́ bɛ́ nyɩnsʋ nɩn anwʋn.
28Dedi nɩn ati, Moyizɩ lili fɛtɩ’n mɔ bɛ fɛlɛ yɩ́ *Pakɩ’n. Ɛsɛ ɔ manlɩn atɩn kɛ bɛ kpʋ́nndɩn naan’n moja’n bɛ́ sua nɩn anʋan’n-mɔ anwʋn. Sɛ bɛ yɔ yɩ́ sɔ a, anɩn nyanmɩansʋ bɔfʋɛ’n mɔ ɔ ’kun Ezipiti mân nɩn anun bamuan mma’n-mɔ’n ngun man Izalayɛ dɩɛ’n-mɔ.
29Dedi nɩn ati, bɛ kpɛlɩ asue’n mɔ bɛ fɛlɛ yɩ́ jenvie kɔkɔlɛ’n kɛ like mɔ nzue nnʋn man nun ɔ. Nan mɔ Ezipiti amma’n-mɔ kʋsʋ nwan bɛ ’kpɛ jenvie kɔkɔlɛ’n kɛ Izalayɛ amma’n-mɔ yɔlɩ yɩ́’n, jenvie’n kɔ hala bɛ́ sʋ.
30Dedi nɩn ati, mɔ Izalayɛ amma’n-mɔ bɔlɩ Zoliko kulo’n mgbɔlɔka cɩan nsʋ’n, nyɔbʋɛ mgbili mgbili’n mɔ b’a fa b’a hyɩ yɩ́ nwʋn’n bubuli gualɩ.
31Dedi nɩn ati, balasua’n mɔ bɛ fɛlɛ yɩ́ Lahabʋ m’ɔ si tutu’n, ɔ nʋn yɩ́ sasʋ’n-mɔ, b’a nwu man kɛ bɛ́ mɔ bɛ́ nyɩn a nzɔ man Nyanmɩan’n. Ɔ sanlɩn kɛ ɔ sɔlɩ bɛ́ mɔ Zozie yɩlɩ bɛ́ kɛ bɛ hɔ́ kpála Zoliko kulo nɩn anun kpa.
32Nzukɛ ɛjɔlɛ dɩɛ biekun yɛ̂ mɩn ’kan ɔ? Sɛ mɩ́n nwan mɩn ’kan Zedeʋn nʋn Balakɩ, Sanmɩnsʋn nʋn Zɛfʋte, Davidi nʋn Samiɛ nʋn Nyanmɩan mgbɔmanfʋɛ’n-mɔ anwʋn ɛjɔlɛ a, tɛmʋn’n nza man mɩ́n. 33Dedi nɩn ati, menian sɔ’n-mɔ lili mân nvʋfɔlɛ-mɔ asʋ kunnunmun bɛ falɩ bɛ́ bɛ sielɩ. Bɛ bɔlɩ bala m’ɔ sɔ Nyanmɩan anyɩn. Ɔ man anɔhʋba’n mɔ Nyanmɩan bɔlɩ bɛ́’n, bɛ́ sa hanlɩn nun ninnge’n. Bɛ momuanlɩn tɛtɩanfʋɛ’n-mɔ anʋan’n-mɔ asʋ. 34Bɛ nonuanlɩn sɩ̂n m’ɔ bɔ mân. Ahan bɛ ’fa dadɩɛ bɛ kun bɛ́. Ɛhɩ kʋalaa tʋlɩ fʋnlɩn bɛ́. Anɩn bɛ le man anwʋnsɛlɛ. Bɛ nyanlɩn anwʋnsɛlɛ. Bɛ́ nwʋn yɔlɩ esulo. Bɛ hʋnlɩn ɛlɔɛ dede bɛ lili bɛ́ mgbɔfʋɛ’n-mɔ asʋ kunnunmun. 35Mmalasua mmie-mɔ menian wuli. Bɛ́ nyɩnsʋ, bɛ́ menian sɔ’n-mɔ mɔ bɛ wuli’n fi ewue nun tinngelɩ. Bɛ helelɩ menian mmie-mɔ ahʋlʋwa bɛ hunlin bɛ́. Ewuetinnge kpa’n mɔ bɛ lɛ kpʋnndɛ nɩn ati, b’a ndie man kɛ sʋanlan lé bɛ́ ti. 36Bɛ gʋlʋlɩ mmie-mɔ kʋsʋ anwʋn ɛsɛ bɛ finlin bɛ́ mgbele. Bɛ gualɩ mmie-mɔ asa ngɔnzɔngɔnzɔ bɛ gualɩ bɛ́ fiadɩ 37Bɛ tʋtʋlɩ mmie-mɔ nyɔbʋɛ bɛ hunlin bɛ́. Bɛ le saha bɛ kukolɩ mmie-mɔ anun nnyuan nnyuan. Bɛ falɩ dadɩɛ bɛ hunlin mmie-mɔ. Anɩn like fɩ́ɩ́ nnʋn bɛ́ sa nun. Bʋa nʋn esile kpolo yɛ̂ b’a bu yɩ́ taladɩɛ b’a wula bɛ nanndɩ nun ɔ. Menian’n-mɔ kele bɛ́ ahʋlʋwa bɛ yɔ bɛ́ asa. 38Meninkpa sɔ’n-mɔ m’ɔ nvata man kɛ ahan bɛ wu bɛ gua mân ɛhɩ anun’n, bɛ nanndɩ nanndɩ ɛwâ’n-mɔ anun ɔ nʋn mmʋka’n-mɔ asʋ. Bɛ dɩda bɔɛ’n-mɔ anun ɔ nʋn asɩɛ’n lɩka m’ɔ kɔ kpɛ kunman’n-mɔ anun.
39Dedi nɩn ati, Nyanmɩan lelɩ menian sɔ’n-mɔ kʋalaa tʋlɩ nun. Nan kʋsʋ, like’n m’ɔ falɩ bɔlɩ bɛ́ anɔhʋba’n, bɛ́ sa a ngan man yɩ́. 40Afɩ Nyanmɩan a ngulo man kɛ bɛ́ nwʋn tɩ bɛ yaci yɛ́. Ɔ sanlɩn kɛ yɛ́ dunman nun, ɔ’a sesie like m’ɔ tɩ kpa tala sʋ ɔ’a sie yɛ́.
12Adanzɩɛ mma dɔʋn kpa ta si yia yɛ́.
1Nan yɛ́ dɩɛ, adanzɩɛ mma dɔʋn kpa ta si yia yɛ́. Ɛhɩka ati, like kʋalaa m’ɔ tʋnndʋn yɛ́ ja nun’n, yɛ yáci yɛ tʋ́. Ɛsɛ ɛtɛ’n kʋsʋ mɔ kʋn nʋn nnyuan an anɩn ɔ’a fa yɩ́ sa ɔ a tʋ yɛ́ kɔmɩn’n, yɛ yáci yɛ tʋ́. Nan yɛ nwánndi kpa dede yɛ jú lɩka’n mɔ b’a hele yɛ́’n. 2Sɛ yɛ ’nwanndi a, yɛ nɩ́an Zozi. Afɩ yɛ́ dedi nɩn abʋbɔ’n nʋn yɩ́ agualɩɛ’n y’ɔ le yɩ́. Ɔ tielɩ kɛ bɛ bʋ́bɔ yɩ́ kʋlʋwa nɩn asʋ, ɔ’a nnɩan man kɛ kʋlʋwa nɩn asʋ ewue sɔ’n tɩ anyunnunguasɩɛ like. Ɔ sanlɩn kɛ mɔ anɩn ɔ nwun yɩ́ nun’n y’ɔ le fɛ elie’n m’ɔ lɛ nwʋnndɛ yɩ́’n. Sian dɩɛ, ɔ tɩ anunminnyanmʋn belemgbin bia nɩn asʋ, Tunminfʋɛ Nyanmɩan Kpili asa fama sʋ. 3Ɛmɔ ati kácɩ Zozi m’ɔ nwunlin amannɩɛ ɛtɛfʋɛ’n-mɔ asa nun’n, nán ɛmɔ anwʋn a mmubu man bɛ́, ɛsɛ bɛ́ lʋa a mmɔ man bɛ́ nwʋn.
4Afɩ ngondin’n mɔ ɛmɔ nʋn ɛtɛ’n bɛ lɛ kʋn’n, ɛmɔ hʋnlɩn man dede bɛ wuli man. 5Nán bɛ man bɛ́ lʋa fi afʋtu’n m’ɔ wowula anwʋnsɛlɛ mɔ Nyanmɩan tuli ɛmɔ kɛ yɩ́ mma-mɔ’n. Yɩ́ nwan:
Mɩ́n wa, sɛ ɛ yɔ like ɛtɛ
nán yɛ́ Mɩn pinnin wɔ́ a, fa sie.
Mɛlɛ m’ɔ lɛ tu wɔ́ nyunnun’n,
n’ɛ man wɔ́ nwʋn bubu wɔ́.
6Ɔ sanlɩn kɛ sʋanlan mɔ yɛ́ Mɩn kulo yɩ́ ɛjɔlɛ’n,
sʋanlan sɔ’n, sɛ ɔ yɔ ɛtɛ a, Nyanmɩan pinnin yɩ́.
Sʋanlan biala mɔ yɛ́ Mɩn bu yɩ́ kɛ yɩ́ wa’n,
sʋanlan sɔ’n, sɛ ɔ yɔ like ɛtɛ a, Nyanmɩan bʋ yɩ́.
7Ɛmɔ tíla bɛ́ ahʋnlɩn wɔ yalɛ’n mɔ ɛmɔ lɛ nwun yɩ́ nɩn anun. Ɛmɔ ɛtɛ nɩn anwʋn epinnian yɛ̂ Sɩɛ’n lɛ pinnin ɛmɔ ɔ. Afɩ yalɛ’n mɔ ɛmɔ lɛ nwun yɩ́’n, ɔ kele kɛ Sɩɛ’n bu ɛmɔ kɛ yɩ́ mma-mɔ. Batʋnman benin yɛ̂ sɛ ɔ yɔ ɛtɛ a, yɩ́ sɩ mbinnin man yɩ́ ɔ? 8Sɛ ɔ’a mbinnin man ɛmɔ kɛ ɔ pinnin yɩ́ mma’n-mɔ kʋalaa mɔ bɛ kɔ yɔ like ɛtɛ nɩn an, anɩn ɛmɔ tɩ man yɩ́ kunnun mma, nan ɛmɔ tɩ gua sʋ mma. 9Yɛ fá yɛ́ nyɩn yɛ tʋ́ yɛ́ sɩ-mɔ mɔ b’a wʋ yɛ́ b’a gua asɩɛ nɩn asʋ ɛwa’n. Sɛ yɛ yɔ like ɛtɛ a, bɛ pinnin yɛ́ yɩ́ nwʋn, ɛsɛ yɛ́ nyɩn sɔ bɛ́. Yɩ́ ti, ɔ di kɛ yɛ bɛbɛlɛ yɛ́ nwʋn asɩ yɛ man yɛ́ Sɩ’n m’ɔ wɔ anwunno’n nán y’a nyan ngʋan. 10Sɛ yɛ yɔ ɛtɛ a, yɛ́ sɩ-mɔ pinnin yɛ́ cɩan kʋn anaan cɩan nnyuan kɛ bɛ́ kunnun kulo ɔ. Nan Nyanmɩan dɩɛ, yɛ́ kpa ɛyɔlɛ ati yɛ̂ yɛ yɔ ɛtɛ a, ɔ pinnin yɛ́ nɩn ɔ. Afɩ ɔ kulo kɛ yɛ yɔ menian nwannzan-nwannzan kɛ yɩ́ muonun. 11Ɔ tɩ ananhɔlɛ kɛ alimʋa nɩn anun, sɛ bɛ pinnin sʋanlan kʋn yɩ́ ɛtɛ’n dunman nun an, yalɛ y’ɔ di ɔ, ɔ nni man yɩ́ nwʋn fɛ. Nan bɛ́ mɔ bɛ kɔ pinnin bɛ́ sɔ’n, ɔ wɔ ɛbɛlɛ dede bɛ kpasi a, ɛkpasie sɔ’n man bɛ nyan anzʋnunjɔ, ɛsɛ bɛ bɔ abalabɔ kpa.
Afʋtu.
12Ɛhɩka ati, ɛmɔ kpúnndin kpúnndin bɛ́ sa’n-mɔ mɔ ɔ’a kpɔ nɩn anun. Ɛmɔ kpúnndin kpúnndin bɛ́ ja’n-mɔ m’ɔ lɛ bu nɩn anun. 13Ɛmɔ nánndɩ atɩn fɔ́ʋ́n nɩn asʋ nán sʋanlan m’ɔ tia tɔ sʋ nɩn anwʋn a sa yɩ́ ja nɩn a nga man ɛbɛlɛ.
14Ɛmɔ bɔ́ mɔndɩnlɩn bɛ nʋn menian’n-mɔ kʋalaa tánlan anzʋnunjɔ nun. Ɛsɛ ɛmɔ kpʋ́nndɛ nwannzan-nwannzan ɛyɔlɛ nɩn ɛmɔ asɩtanlan nɩn anun. Ɔ sanlɩn kɛ sʋanlan mɔ yɩ́ asɩtanlan’n tɩ man nwannzan-nwannzan’n, yɩ́ nyɩn ngɔ bɔ man yɛ́ Mɩn. 15Ɛmɔ síe bɛ́ nwʋn ye nán sʋanlan fɩ́ɩ́ a ngaci man yɩ́ nzin ɔ’a nzi man Nyanmɩan mɔ ɔ’a nwun yɩ́ nwʋn anwunnvoe’n. Ɛmɔ síe bɛ́ nwʋn ye nán sʋanlan fɩ́ɩ́ a ngaci man kɛ baka m’ɔ fifi ɔ su diyɔlɛ mɔ menian’n-mɔ ngʋala man yɩ́ mma’n di’n.
16Ɛmɔ síe bɛ́ nwʋn ye nán sʋanlan fɩ́ɩ́ a ngaci man satɩlɩfʋɛ. Ɛmɔ mán bɛ́ nyɩn sɔ́ Nyanmɩan ninnge’n-mɔ, nan nán bɛ yɔ kɛ Ezayu. Afɩ alɩɛ dunman nun, yɩ́ m’ɔ tɩ bamuan baa’n, ɔ tɔnɩnlɩn yɩ́ ajâ elie’n manlɩn yɩ́ nianman kasian’n. 17Ɛmɔ sɩ kɛ tɛmʋn mɔ yɩ́ nwan yɩ́ sɩ yéyila yɩ́’n, ɔ sunlin sɛlɛ kpa, nan kʋsʋ yɩ́ sɩ a ndɛ man yɩ́ sʋ. Afɩ Ezayu nnwun man atɩn ngacili fɩ́ɩ́ mɔ ɔ ’sɩn sʋ nán yɩ́ sɩ a yeyila yɩ́ sʋ ɔ.
18Ɛmɔ dɩɛ, ɛmɔ a njʋɩn a mgbunnge man bʋka kɛ Izalayɛ amma’n-mɔ hyɩnlɩn kpunngelɩ Sinayi bʋka’n. Bʋka sɔ’n mɔ bɛ kpunngelɩ’n, anɩn sɩ̂n’n lɛ jue sʋ, sʋ’n tɩ awosin, awosin kabii nʋn anwʋnman. 19Bɛ tɩlɩ kɔnɔti nɩn angan ɔ nʋn anɩɛ kʋn. Bɛ́ mɔ bɛ tɩlɩ anɩɛ sɔ’n nwan nán man bɛ kan ɛjɔlɛ fɩ́ɩ́ kʋ́n bɛ tʋ sʋ. 20Ɔ sanlɩn kɛ ɛjɔlɛ’n mɔ bɛ tɩlɩ’n, sʋanlan fɩ́ɩ́ ngʋala man sʋ di. Afɩ anɩɛ’n lɛ kele kɛ: Sʋanlan biala, anaan ayɛmʋa bɔbɔ kan bʋka nɩn an, bɛ ’tʋtʋ yɩ́ ɛbʋɛ bɛ kun yɩ́.21Mɔ bɛ nwunlin yɩ́’n yɔlɩ esulo dede Moyizɩ nwan: Mɩn sulo dede mɩ́n nwʋn lɛ wʋsʋ mɩ́n.
22Nan ɛmɔ dɩɛ, ɛmɔ a hyʋɩn a kpunnge Siʋn bʋka’n, Tɩasɩfʋɛ Nyanmɩan kulo’n mɔ bɛ fɛlɛ yɩ́ anwunno Zoluzalɛmʋn’n. Ɛmɔ a hyʋɩn a kpunnge nyanmɩansʋ mmɔfʋɛ akpɩɩ akpɩɩ’n-mɔ mɔ b’a yia Nyanmɩan anwʋn bɛ lɛ di ɛnyɩnmɩan’n. 23Ɛmɔ a hyʋɩn a kpunnge Nyanmɩan amma’n-mɔ mɔ ɔ’a hɛlɛ bɛ́ dunman yɩ́ kalata nɩn anun’n. Yɩ́ mma sɔ’n-mɔ tɩ kɛ yɩ́ bamuan mma. Ɔ’a sie bɛ́ ajâ. Ɛmɔ a hyʋɩn a kpunnge Nyanmɩan m’ɔ bua menian’n-mɔ kʋalaa ndɛɛ’n. Ɛmɔ a hyʋɩn a kpunnge sɛsɛfʋɛ’n-mɔ mɔ b’a wu mɔ Nyanmɩan a man bɛ́ nwʋn a tɩ’n. 24Ɛmɔ a hyʋɩn a kpunnge Zozi. Ɔ’a sesie yɛ́ nʋn Nyanmɩan yɛ́ afian maan y’a wʋlʋ yɩ́ nyɩhyɛ fʋfɔlɛ nɩn anun. Ɛmɔ a hyʋɩn a kpunnge yɩ́ moja’n m’ɔ butuli’n. Moja sɔ’n, ɔ yɔ nâ tala Abɛlɩ dɩɛ’n.
25Ɛhɩ ati, ɛmɔ nɩ́an bɛ́ nwʋn kpa! Nán bɛ totua bɛ́ nzʋ wɔ ɛjɔlɛ’n mɔ sʋanlan’n lɛ kan kele ɛmɔ nɩn anwʋn. Ɔ sanlɩn kɛ bɛ́ mɔ b’a ndie Nyanmɩan afʋtu’n, ɔ tualɩ bɛ́ yɩ́ nwʋn kalɛ. Yɛ́ kʋsʋ, sɛ yɛ totua yɛ́ nzʋ nán y’a ndie man sʋanlan’n m’ɔ wɔ anwunno ɛlɔ ɔ lɛ kan ɛjɔlɛ’n kele yɛ́ nɩn an, ɔ ’tua yɛ́ yɩ́ nwʋn kalɛ. 26Sʋanlan sɔ’n m’ɔ jʋjɔlɩ mɔ asɩɛ nɩn anwʋn wʋsʋlɩ yɩ́’n, sian dɩɛ, ɔ’a bɔ yɛ́ anɔhʋba ɛhɩ kɛ: Mɩn ’ba man asɩɛ nɩn anwʋn wʋsʋ yɩ́ kʋn biekun. Nán asɩɛ nɩn angʋnmɩn yɛ̂ yɩ́ nwʋn ’ba wʋsʋ yɩ́ ɔ, nán anwunno’n kʋsʋ anwʋn ’ba wʋsʋ yɩ́ bie.27Ɛjɔlɛ kpɔlɛ sɔ’n-mɔ: “kʋn biekun,” yɩ́ bʋ kele kɛ ninnge’n-mɔ kʋalaa mɔ Nyanmɩan bɔlɩ mɔ bɛ́ nwʋn ’ba wʋsʋ bɛ́’n, ninnge sɔ’n-mɔ ’ba kpɛ nun. Nan nunhan mɔ bɛ́ nwʋn ngɔ nwʋsʋ man bɛ́’n, bɛ́ yɛ̂ bɛ ’ka ɛbɛlɛ ɔ.
28Ɛhɩka ati, bɛ mán yɛ lá Nyanmɩan asɩ kɛ ɔ’a man yɛ́ ɛhɩnlɩn mân kʋn mɔ yɩ́ nwʋn nwʋsʋ man yɩ́ ɔ. Yɛ lá yɩ́ asɩ yɛ mán yɩ́ anyɩnnzɔ nʋn nindi, yɛ sʋ́ yɩ́ maan yɩ́ kunnun jɔ yɩ́ nwʋn. 29Ɔ sanlɩn kɛ yɛ́ Nyanmɩan’n kʋsʋ tɩ sɩ̂n m’ɔ jue kun sʋanlan ɔ.
13Ɛnanndɩɛ’n m’ɔ sɔ Nyanmɩan anyɩn’n.
1Ɛhɩka ati ɛmɔ húlo bɛ́ amanngun’n-mɔ kɛ bɛ́ mɔ bɛ de Kilisi bɛ di’n kulo bɛ́ nwʋn’n. 2Bɛ́ kʋalaa mɔ bɛ kɔ tʋ ɛmɔ’n, ɛmɔ síke bɛ́ kanlanman. Afɩ menian mmie-mɔ yɔlɩ sɔ bɛ sikelɩ nyanmɩansʋ mmɔfʋɛ kʋsʋ b’a nnwun man nun.
3Ɛmɔ ati kácɩ bɛ́ mɔ b’a gua bɛ́ fiadɩ’n kɛ ɛmɔ nʋn bɛ́ yɛ̂ bɛ la ɛlɔ ɔ. Ɛmɔ ati kácɩ bɛ mɔ bɛ lɛ kele bɛ́ ahʋlʋwa’n kɛ ɛmɔ nʋn bɛ́ bɛ tɩ anwʋnnaan kʋn.
4Ɛmɔ anun kʋn biala anyɩn sɔ́ ajaa’n. Belenzua’n mán yɩ́ yɩ nwún yɩ́ ti anun. Balasua’n kʋsʋ mán yɩ́ hun nwún yɩ́ ti anun. Afɩ, bɛ́ mɔ bɛ nanndɩ basa-basa’n, ɔ nʋn bɛ́ mɔ bɛ tʋn ajaa’n, Nyanmɩan ’bua bɛ́ ndɛɛ.
5Ɛmɔ ɛnanndɩɛ nɩn anun, nán bɛ man esika ehulo’n wʋlʋ bɛ́ ajʋnlɩn nun. Nan nunhan mɔ ɛmɔ le yɩ́’n, ɛmɔ fá yɩ́ sɔ. Afɩ Nyanmɩan a han kɛ: Mɩn nyaci man wɔ́ lé, ɛsɛ mɩn nju man wɔ́ mɩn ndʋ man lé.6Yɩ́ ti, yɛ nzulo man yɩ́ nzin. Yɛ kʋala yɩ́ kan kɛ:
Yɛ́ Mɩn tɩ mɩ́n bʋkafʋɛ, mɩn nzulo man like fɩ́ɩ́.
Nzu like dɩɛ yɛ̂ kulo sʋanlan kʋala mɩ́n yɔ ɔ?
7Ɛmɔ ati kácɩ bɛ́ mɔ bɛ lili ɛmɔ anyunnun daba mɔ bɛ bɔlɩ Nyanmɩan Ɛjɔlɛkpa’n bɛ helelɩ ɛmɔ’n. Kɛ bɛ kpɩnlɩn bɛ buli bɛ́ mân’n dede bɛ wuli’n, ɛmɔ ati tánlan sʋ bɛ nánndɩ dedi nɩn asʋ kɛ bɛ́.
8Zozi Kilisi ngaci man. Kɛ ɔ tɩ yɩ́ anʋnman’n y’ɔ tɩ yɩ́ ɛnɛ nʋn dahuu nɩn ɔ. 9Nán man ɛmɔ yaci bɛ́ nwʋn maan menian kekele ɛmɔ ninnge ngacile bɛ laka ɛmɔ. Ɔ sɛ kɛ anwunnvoe’n mɔ Nyanmɩan a nwun yɛ́’n wúla yɛ́ anwʋnsɛlɛ. Nan nán bɛ man alɩɛ anwʋn mala wula ɛmɔ anwʋnsɛlɛ. Afɩ bɛ́ mɔ bɛ di alɩɛ mala’n-mɔ asʋ’n, bɛ nyanlɩn man sʋ nvasʋɛ lé. 10Tɛɛyɩfʋɛ’n-mɔ mɔ bɛ di junman Zufʋ’n-mɔ asɔnɩn sua nɩn anun’n, bɛ le man atɩn bɛ nni man yɛ́ tɛɛ ɛyɩɛ mʋcɩa nɩn asʋ. 11Afɩ naan’n-mɔ moja’n m’ɔ tu ɛtɛ’n mɔ tɛɛyɩfʋɛ kpain’n fa wʋlʋ lɩka nwannzan-nwannzan kpa’n, kulo’n tiba yɛ̂ bɛ yala naan sɔ’n-mɔ ɔ. 12Ɛhɩka ati, kɛ ɔ kɔ yɔ nán yɩ́ moja nɩn a man mân nɩn anwʋn a tɩ’n, Zozi kʋsʋ falɩ yɩ́ nwʋn yɩlɩ tɛɛ kulo tiba. 13Kɛmɔ Zozi yɔlɩ yɩ́ sɔ’n, yɛ́ kʋsʋ yɛ kpʋ́ yɩ́ kulo tiba ɛlɔ yɛ nwún anyunnunguasɩɛ’n bie kɛ ɔ nwunlin yɩ́’n. 14Afɩ, asɩ ɛwa, yɛ le man kulo mɔ yɩ́ bʋsʋ cɛ dahuu ɔ. Nan kulo’n m’ɔ lɛ ba’n yɛ̂ yɛ lɛ kpʋnndɛ ɔ.
15Ɛhɩka ati, ɔ nanndɩ Zozi asʋ, yɛ yɩ́ Nyanmɩan ayɛ cɩan daa kɛ bɛ yɩ tɛɛ’n. Yɩ́ bʋ y’ɔ le kɛ yɛ fá yɛ́ nʋan’n yɛ kánnvʋ yɩ́ dunman’n. 16Nán man ɛmɔ alʋa fi ye nɩn ɛyɔlɛ, ɛsɛ ɛmɔ bʋ́ka bɛ́ nwʋn. Ɔ sanlɩn kɛ tɛɛ ɛyɩɛ sʋa-mɔ yɛ̂ Nyanmɩan kulo ɔ.
17Ɛmɔ mán bɛ nyɩn sɔ́ bɛ́ mgbain’n-mɔ bɛ bɛ́bɛlɛ bɛ́ nwʋn asɩ bɛ mán bɛ́. Afɩ bɛ́ yɛ̂ bɛ nɩan ɛmɔ ɛkala nɩn asʋ ɔ. Ɛsɛ bɛ́ yɛ̂ bɛ ’bu junman’n mɔ bɛ kɔ li nɩn anwʋn mgbʋnndan bɛ kele Nyanmɩan ɔ. Sɛ ɛmɔ man bɛ́ anyɩnnzɔ a, bɛ le fɛ elie bɛ ’di bɛ́ junman’n. Sɛ ɔ’a nyɔ man sɔ nán bɛ fa bíle bɛ di a, ɔ nyɔ man kpa mman man ɛmɔ.
18Ɛmɔ sɛ́lɛ bɛ mán yɛ́ dahuu. Afɩ ɔ wɔ yɛ́ ahʋnlɩn nun kɛ like biala anun, yɛ kulo kɛ yɛ bɔ bala kpa. 19Mɩɩn kan mɩn fua sʋ kɛ ɛmɔ sɛ́lɛ Nyanmɩan kɛ ɔ mán mɩ́n atɩn maan m mála ɛmɔ anwʋn ɛlɔ ndɛ-ndɛ.
20Nyanmɩan m’ɔ tɩ alʋacɩcɩɛ baka nɩn a man yɛ́ Mɩn Zozi m’ɔ tɩ bʋa ɛnɩanfʋɛ kpa’n fi ewue nun a tinnge. Yɩ́ moja’n di ajinlanmun kɛ nyɩhyɛ’n mɔ Nyanmɩan nʋn yɛ́ hyɩhyɛlɩ’n wɔ ɛbɛlɛ dahuu. 21Nyanmɩan mán ɛmɔ anwʋnsɛlɛ maan ɛmɔ hʋ́ala bɛ yɔ́ like biala m’ɔ tɩ kpa m’ɔ sɔ yɩ́ nyɩn’n. Zozi dunman nun, ɔ yɔ́ maan yɛ́ asɩtanlan’n sɔ́ yɩ́ nyɩn. Anunminnyanmʋn hán Zozi Kilisi cɩan daa! Amɩn!
22Anianman-mɔ, mɩn ’bʋtʋ ɛmɔ kɛ bɛ sí abʋtalɛ bɛ tíe afʋtu ɛjɔlɛ ɛhɩ-mɔ. Ɔ sanlɩn kɛ kalata’n mɔ m’an hɛlɛ ɛmɔ nɩn a nwa man. 23Mɩn kulo kɛ ɛmɔ tɩ kɛ yɛ́ nianman Timote mɔ bɛ tʋlɩ yɩ́ fiadɩ’n, b’a yɩ yɩ́. Sɛ ɔ ba tʋ mɩ́n ndɛ a, mɩ́n nʋn yɩ́ yɛ ’ba a a nɩan ɛmɔ abʋsʋ.
24Ɛmɔ yɔ́ bɛ́ mgbain’n-mɔ nʋn anwʋntɩɛ mma’n-mɔ kʋalaa like bɛ mán mɩ́n. Itali amma’n-mɔ mɔ bɛ tɩ yɛ́ nianman’n, bɛ́ nwan bɛ ’yɔ ɛmɔ like.
25Nyanmɩan nwún ɛmɔ kʋalaa anwʋn anwunnvoe.